Npuagtub 16th October 2009, 1:11 pm
TSWV NTUJ PUB ZOG RAU XASXOOS
Thaum lub caij uas haiv neeg Filitees kav cov neeg Hisxaislais. Muaj ib tug txiv neej npe hu ua XasXoos, Nws muaj zog heev.
Nws tawm tsam thiab tua cov neeg Filitees. XasXoos nws muaj zog heev kawg yeej tsis muaj leej twg ntes tau nws coj mus tua li.
Txawm cov vaj Filitees los lawv yeej ntes tsis tau Xas Xoos li thiab. Muaj ib hnub Xasxoos mus pom ib tug hluas nkauj, npe hu ua Delilas yog neeg Filitees. Nws nkauj heev thiab Xasxoos nyiam tus hluas nkauj ntawd heev kawg li. Ces Xasxoos pheej mus tham tus hluas nkauj Delilas, ces cov vaj Filitees paub tias Xasxoos nyiam tus hluas nkauj Delilas heev. Lawv thiaj li tuaj hais Delilas uas yog Xasxoos tus hluas nkauj tias: Yog koj pab peb nug tau Xasxoos saib uas cas nws yuav muaj zog ua luaj li, yog koj nug tau rau peb no ces peb 5 tug Vaj no tuaj yeem ib leeg muab 1,100 lub txiaj kis rau koj.
Ces muaj ib hnub Xasxoos thiab Delilas nkawv sib tham hauv Delilas tsev ces Delilas txawm hais rau Xasxoos tias: Xasxoos, koj twb tsis hlub thiab nyiam kuv tiag koj thiaj li pheej dag kuv tas zog, koj lub siab yeej tsis npuab kuv li. Yog koj nyiam thiab hlub kuv tiag tiag no ces kuv thov koj qhia rau kuv saib yog vim li cas koj thiaj yuav muaj zog ua luaj li. Thiab yuav ua li cas koj thiaj yuav tsis muaj zog? Ces Xasxoos txawm qhia rau Delilas tias: Kuv ib txwm yug los kuv cov plaub hau yeej tsis tau txiav ib zaug li. Yog koj muab kuv 7 qais plaub hau txiav lawm ces kuv yuav tsis muaj zog heev, kuv tsuas muaj zog ib yam li tej neeg sawv daws xwb.
Thaum delilas paub li ntawd lawm, nws thiaj xa xov mus rau cov Vaj kom lawv nqa nyiaj tuaj rau nws, thiab npaj tuaj muab Xasxoos ntes. Thaum cov vaj lawv cov tub peeb zeej tuaj txog ntawm Delilas tsev lawm ces delilas thiaj ntxias kom Xasxoos tsaug zog ntawm nws xub ntiag. thaum Xasxoos tsaug zog lawm ces Delilas thiaj kom lwm tus neeg los txiav Xasxoos cov plaub hau, ces Delilas thiaj li qw kom cov tub peeb zeej Filitees nkag los khi tau Xasxoos, thiab lawv muab nws ob lub qhov muag nkaum kom txhob pom kev.
Ces lawv thiaj li coj Xasxoos mus kaw. muaj ib hnub ces cov vaj Filitees thiaj kom nws cov tub puv coj Xasxoos tawm los sab nraum tshav rau sawv daws cov pej xeem Filitees pom saib Xasxoos zoo li cas. Ces thaum Xasxoos tab tom tawm los txog tawm ob tug ncej loj loj txheem lub tsev cov Vaj lawv sawv daws nyob ntawd ces Xasxoos thiaj muab nws ob sab tes mus thawb ob tug ncej loj loj ntawd dam ua rau lub tsev lawv nyob ntawd vau tas ces cov neeg nyob ntawm lub tsev ntawd tuag tas huv si nrog rau Xasxoos.
Cov phooj ywg, txawm Tswv Ntuj yuav pub peb muaj zog los muaj peev xwm ntau npaum li cas los peb yuav tau ceev fab thiab rov pab peb tus kheej. vim muaj tej lub caij Tswv Ntuj yuav cia koj kuv peb nyias yuav tau siv nyias tus kheej lub zog lus lub pheev xwm. peb yuav tsis txhob tso tas ib puas tsav yam rau Tswv Ntuj ua tus ua rau peb xwb. peb yuav tau ua peb tus kheej thiab. Vim thaum Tswv Ntuj nyob deb ntawm koj lawm ces dab phem yuav ntxias tau koj.
Poj niam yeej ib txwm ntxias tau txiv neej yooj yim. Yog tias tus poj niam ntawd es tus txiv neej nyiam thiab xav hlub heev mas txiv neej yeej tsis nco qab txog ib yam dab tsis hlo li lawm. Txawm nws txoj sia los nws twb tsis khuv xim tsuav nws tau hlub tus neeg uas nws txaus siab heev ntawd xwb.
Nej sim muas saib thaum chiv keeb dab phem twb ntxias tau Nkauj Iab kom los dag tau Nraug Oo, nkawd mus noj tsob txiv Tswv Ntuj txwv tsis pub noj.
Vim Nraug Oo hlub thiab nyiam Nkauj Iab heev dhau ces nws thiaj li mloog li Nkauj Iab hais.
Nej mus saib txhua tus txiv neej muaj koob nto npe, mas yog muaj neeg ntxub xav ua phem rau mas lawv yuav xub mus ntxias nws tus poj niam kom tau mas lawv thiaj li yuav ua tau phem rau tus txiv neej ntawd. Vim tus poj niam yog tus paub nws tus txiv zoo. Koj tus poj pab tau koj muaj zog, tiam sis nws yog tus yuav txo tau koj lub zog.
Ib tug txiv tsev yuav muaj koob nto npe, yuav tsum yog nws tus niam tsev txhawb nws. hos ib tug niam tsev yuav tau koob nrov npe los kuj yog los ntawd nws tus txiv lub meej mom thiab lub npe. Yuav ua tau ib yim neeg zoo, los yuav tsum yog ob niam txiv txawj ib pab sib txhawb, sib nyiam sib hlub, thiaj li yuav ua tau tsheej ib yim neeg zoo.
Txawm koj yuav txawj ntse npaum li cas los yog koj tus poj niam tsis txhawb tsis pab koj lub zog mas koj lub neej zoo thiab tiam sis yeej tseem tshuav thiab.
Ib tug txiv neej yuav ua tau luag ib tug thawj coj zoo, yuav yog nws tus poj niam muaj lub siab zoo, siab dav, nyiam pab thiab hlub kwv tij neej tsa ob cag sawv daws. Ces sawv daws thiaj li yuav hwm thiab saib nws tus txiv muaj nuj nqis.
Home
Yog koj tso siab rau Yesxus lub siab ntshiab, nws yuav ua koj siab kaj lug 
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.
