Thov Ntuj Pab kev twj lij nyob hauv kev ntseeg

Nyob zoo txhua leej txhua tus,

Kuv yuav tuaj piav me ntsis txog tej yam tshwm sim nyob rau USA no kom nej sawv daws ho to taub txog tias yog vim li cas.

Txij Hnub Tsib (Thursday) tim 21 lub 6 hli mus txog tim 4 lub 7 hli, ib tsoom Tswv Qhia nyob US xav kom peb cov ntseeg ua kev thov ntuj 15 hnub los pab peb txoj kev twj lij nyob hauv kev ntseeg. Lawv tis npe hu ua “the Fortnight For Freedom” no.

Yog vim li cas cov Tswv Qhia nyob Mes kas teb thiaj ua li ntawd? Vim lawv xav thov ntuj ua kom tseem hwv Mes Lis Kas (Obama thiab nws cov nom) pub kev twj lij rau ib tsoom neeg ntseeg, tsis hais hom kev ntseeg twg.

Thaum Obama los ua nom, nws tau los tsa ib co cai tswj txoj kev kho mob nyob US. Qhov kev kho cov cai kho mob mas lub Koom txoos yeej pom zoo. Tiam sis thaum lub 2 hli 2012, lawv tau ntxiv ib txog cai tshiab hu ua “Contraceptive Mandate” no rau. Txoj cai no yuam kom cov tsev muag insurance kho mob yuav tsum muag insurance them rau cov tshuaj noj thiab cov twj siv kom txhob muaj me nyuam, them rau cov tshuaj noj ntaus me nyuam kom poob thiab them rau kev rho me nyuam (abortion). Kev siv tshuaj siv twj kom txhob muaj me nyuam thiab kev rho me nyuam ntaus me nyuam yog tej yam txhaum rau lub Koom txoos txoj cai thiab HT Yes Xus txoj cai. Yog li ntawd mas lub Koom txoos yuav muag tsis tau cov insurance li ntawd, tiam sis yog tsis muag ces yuav txhaum tseem hwv txoj cai, ces tseem hwv yuav nplua loj.

Vim lub koom Txoos tsis yog muaj neeg ua hauj lwm nyob hauv tsev teev ntuj nkaus xwb, lub Koom Txoos ua tswv ntiav neeg ua hauj lwm nyob tej tsev kho mob, tej tsev kawm ntawv txheej qis, tej tsev kawm ntawv txheej siab, tej tsev tu neeg laus, thiab ntau hom hauj lwm ntxiv. Yog li ntawd mas lub Koom Txoos pom hais tias, Obama txoj cai ntawd yog ib txog cai yuam neeg lawm, tsis muab kev twj lij rau neeg ua raws nyias txoj kev ntseeg. Cov Tswv Qhia thiaj tau tawm suab los cam hais tias txoj cai no yuav tsis taus, vim nws txhaum txoj cai hauv Constitution lawm. Constitution twb pub kev twj lim rau txhua yam kev ntseeg kom lawv teev hawm thiab coj lawv lub neej ywj siab raws li lawv txoj kev ntseeg. Ua cas zaum no Obama ho yuav ua tej txoj cai los yuam sawv daws li no?

Vim li ntawd cov Tswv Qhia thiaj nqua hu tas ib tsoom neeg ntseeg kom sawv daws koom siab thov ntuj 15 hnub no los pab txoj kev twj lij hauv kev ntseeg.

Nej cov uas paub nyeem lus Aas Kiv nej mus nyeem cov information nyob hauv USCCB no ces nej yuav to taub zoo dua:

http://www.usccb.org/issues-and-action/religious-liberty/conscience-protection/upload/Twelve-Things-Everyone-Should-Know-About-the-Contraceptive-Mandate.pdf

http://www.usccb.org/news/2012/12-101.cfm

Nyob zoo Mim,

Ua tsaug koj tuaj qhia tej xwm txheej nov rau peb paub txog.

Ua li kev teev Ntuj 15 hnub ntawd puas muaj tias teev zaj twg rau zaj twg, teev Saw Mab Liab los teev Ntuj tshwj xeeb licas? Yog ntxov paub mas yuav nrog lawv pib thaum hauv paus los, tab sis paub lig ces txais lis mus es mam ntxiv rau tom qab.

Tu siab kawg, tos Leej Ntshiab Thérèse hais tias nws pom neeg cov ntsuj plig poob rau dab phem teb cuag li cov dhaus poob no uas neeg nrhiav kev ua txhaum tsis tseg....

Nyob zoo tais Tooj,

Tsis ua cas os, txawm nej tsis tau nrog pib thawj hnub los nej mam pab thov ntuj hnub no mus los yeej tau tib si mog. Nej xav hais txoj Saw Mab Liab pab los tau, hais zaj Kev Khuv Leej los tau, los hais ib zag "Peb Txiv nyob saum ntuj..." xwb los yeej tau li os. Los yog leej twg khoom no ho mus koom tej thaj txi ntuj thov ntuj pab qhov ntawd los tau. Raws li kuv xyuas mas zoo li lawv tsis kom sawv daws yuav tsum hais zaj teev ntuj twg li, lawv tsuas hais kom tsoom ntseeg mus koom thaj txi ntuj los puas thov ntuj pab xwb.