Leej ntshiab Dominic Savio

Nws yug los xyoo 1842 nyob Is Tas Lis teb. Nws niam nws txiv hu ua Carlo thiab Brigida Savio. Nkawd ob niam txiv yog neeg ntseeg ntuj zoo, nkawd qhuab qhia nkawd cov me tub me nyuam kom ua neeg tsim txiaj thiab hwm ntuj. Thaum nws muaj 4 xyoos xwb, nws twb txawj teev ntuj nws ib leeg lawm, yog lwm tus tsis nco qab teev ntuj mas nws hais rau kom nco ntsoov teev ntuj. Ntau zaus nws niam nws txiv pom nkawd tus me tub txawj mus nyob in qho chaw ntsiag to teev ntuj ib leeg. Thaum nws muaj 5 xyoos, nws nquag caum nws niam mus koom thaj txi ntuj nruab lis piam. Tus txiv plig hauv zos sau ntawv tseg tias muaj ntau zaus nws pom tus me nyuam tub ntawd tuaj txhos caug nraum lub qhov rooj tsev teev ntuj thaum sawv ntxov ntxov, vim tsis tau muaj neeg tuaj qhib qhov rooj, tab txawm los nag los daus los nws yeej tuaj txhos caug teev ntuj tos. Nws ua li ntawd vim nws nyiam tuaj pab txiv plig ua thaj txi ntuj (altar boy/enfant de choeur). Nws xyaum ntxov ntxov coj ib tug cwj pwm zoo. Nws tsis nyiam xyaum lwm tus me nyuam, nws paub hais tias muaj tej yam lawv ua mas tsis tsis zoo. Yog muaj neeg nug nws tias ua cas nws tsis caum lawv, nws txawj piav tias yog vim li cas nws thiaj tsis kam caum lawv.

Lub caij ntawd mas cov me nyuam yuav tsum tos kom muaj li kaum ob xyoos mas lawv mam kawm txais lub Cim Yug thawj zaug. Tiam sis vim Dominic paub tab sai thiab paub kev ntseeg zoo ces txiv plig tso lus cia nws daws txhaum thiab txais Yes Xus lub cev thaum nws muaj 7 xyoo. Thaum ntawd nws twb paub sau rau ntawv tseg tias nws txiav txim siab yuav co jib lub neej dawb huv zoo li no:
1. Kuv yuav nquag mus daws txhaum thiab nquag mus txais Yes Xus lub Cev, raws li kuv tus txiv plig pom zoo kom kuv ua;
2. Kuv yuav caiv hnub Chiv thiab tej hnub ua hmoov tshwj xeeb;
3. Kuv ob tug phooj ywg yog Yes Xus thiab Mab Liab;
4. Kuv yeem tuag tsis yeem ua kev txhaum.

Thaum Dominic muaj 10 xyoo, nws yuav tsum niaj hnub taug kev deb li 5 km mus kawm ntawv. Nws tsis nyiam nrog nws cov phooj ywg ib loj ntawd mus hle liab qab da de ua si, nws hais tias vim lub caij ntawd mas yog ib lub caij uas “yus ua txhaum Tswv Ntuj yooj yim.” Thiab vim nws twb pom dua nws cov phooj ywg ua tej yam tsis zoo lawm ces nws thiaj tsis kam nrog lawv. Thaum lub caij nws kawm ntawv ntawd, muaj ib zaug yog thaum lub caij no no, muaj ob tub tub puab ib co qe daus los pov rau hauv lawv lub qhov cub taws sov tsev. Thaum txiv plig los pom, nkawd muab liam rau Dominic. Dominic tsis teb tsis hais li, nws cia txiv plig muab nws cem thiab muab nws rau txim. Tag kis, muaj neeg mus qhia rau txiv plig hais tias twb tsis yog Dominic ua. Ces thaum ntawd txiv plig thiaj mus hais rau Dominic tias, “Ua cas koj tsis hais dab tsi li, koj hais rau kuv tias tsis yog koj ua xwb ces kuv yeej ntseeg koj lawd.” Dominic teb txiv plig tias, vim nws xav tias tsam txiv plig paub ces txiv plig yuav muab ob tug ntawd ntiab tawm, mas nws xav tias nkawd los nkawd yeej toob kam kawm ntawv thiab. Thiab nws hais ntxiv tias thaum Yes Xus raug luag liam rau nws, nws twb ua twj ywm thiab. Yog li ntawd mas peb pom tau tias Dominic yeej xeeb los muaj ib lub siab dawb siab huv, thiab nws niam nws txiv yeej cob tau nws coj ib lub neej dawb huv.

Vim Dominic kawm ntawv zoo thiab coj tau zoo, ces nws cov xib hwb uas yog cov txiv plig uas qhia ntawv rau nws thiaj piav txog nws rau leej ntshiab Don Bosco uas nws tab tom qhia ib pab tub nyob hauv nws lub tsev Oratory nyob Turin. Thaum lub 10 hli 1854, Dominic thiaj tuaj mus nrog Donn Bosco nyob kawm ntawv, thiab nws npaj hais tias nws xav mus kawm ua leej choj.

Tab tom thaum lub caij ntawd nyob Los Mas, txiv Vaj Qhia Pis Us IX npaj yuav tshaj tawm txog Niam Mab Liab txoj kev xeeb los tsis lo neeg lub keeb txhaum. Ces leej ntshiab Don Bosco coj nws pab tub lawv kuj npaj yuav ua ib lub hmoov loj txog Niam Mab Liab nyob hauv lawv lub tsev oratory thiab. Hnub tim 8 lub 12 hlis 1854 yog hnub uas Vaj Qhia Pis Us IX tshaj tawm tias Niam Mab Liab xeeb los tsis los neeg lub keeb txhaum. Hnub mtawd LN Don Bosco qhia kom Dominic mus sawv ntawm Niam Mab Liab xub ntiag rov qab cog lus raws li nws cov lus uas nws tau sau thaum nws txais Yes Xus lub cev thawj zaug. Txij hnub ntawd mus, Dominic hloov kiag nws tus cwj pwm haj yam ua neeg tsim txiaj tshaj qub tuaj. Ces LN Don Bosco thiaj pib sau tej yam txawv txav uas tshwm sim tuaj rau Dominic.

Thaum Dominic tuaj nyob tau 6 lub hlis lawm, muaj ib hnub lawv muaj kawm txog txoj kev ua leej ntshiab. Nyob hauv txoj kev kawm ntawd, muaj 3 yam uas Dominic khaws tau thiab xav coj los xyaum ua nws lub neej. 3 yam ntawd yog li no:
1. Tswv Ntuj xav kom txhua tus neeg coj lub neej ua neeg ntshiab (ua leej ntshiab).
2. Leej twg xav ua neeg ntshiab tiag mas tsis nyuaj li.
3. Cov neeg xyaum coj lub neej ua neeg ntshiab yuav tau txais koob haum loj nyob saum ntuj.

Thaum ntawd Dominic tsis paub tias yuav ua li cas thiaj ua tau neeg ntshiab, ces tau ob peb hnub mas nws nyob twj ywm mluas zog thiab zoo li nws txhawj txhawj. Don Bosco mem tau li ntawd ces nws thiaj nrog Dominic tham. Nws qhia Dominic tias kom yuav tsum ua lub neej luag ntxhi li qub, kav tsij rau siab ntso kawm ntawv thiab teev ntuj, thiab nws yuav tsum nrhiav kev mus nrog nws cov phooj ywg ua si lom zem. Txoj kev ua ib tug neeg ntshiab tsis yog yuav nyob mluas nluas thiab tsis yog yuav ua tej yam txawv txawv li cas, yog ua yus lub neej raws li kev cai tiam sis yog ua kom zoo xwb.

Tiam sis Dominic xav tau tias tej zaum nws yuav tsum ua tej yam nyuaj los them txim txhaum. Ces nws txawm xyaum muab pob zeb los puas tej daim ntoo los tso rau saum txaj kom nws pw lub lub ib ce. Nws tsis vov pam tuab kom tau tiv no them txim txhaum. Nws hnav ib lub tsho ntxhib ntxhib puab nqaij, nws yoo mov, tsuas haus dej ntxuag me ntsis mov ci tej xwb. Tiam sis thaum Don Bosco paub txog tej no, nws txwv tsis pub kom Dominic ua li ntawd lawm, vim nws yuav tsum txuag thiab tu nws lub cev thiaj tsis muaj mob thiab thiaj muaj zog. Don Bosco qhia Dominic hais tias txoj kev them txim txhaum zoo tshaj yog ua neeg me tsis muab hlob thiab ua neeg mloog lus thiab ua yus tej hauj lwm kom zoo xwb. Ces Dominic thiaj hloov los coj li Don Bosco qhia, thiab nws thiaj hais lus tseg tias: “Kuv ua tsis tau tej yam loj loj, tiam sis txhua yam kuv ua mas yog ua kom Tswv ntuj tau koob meej xwb.” Txij thaum ntawd mus, Dominic tsis nrhiav ua tej yam nyuaj nyuaj los them txim txhaum lawm, tiam sis nws ua siab ntev ntev nyiaj tas puas tsav yam nyuaj uas los raug yus. Xws li, txawm lub tsev no me ntsis los nws tsis yws, txawm zaub mov tsis txaus sawv daws noj tsau, tej zaum nws tsis tau noj li los nws tsis hais li. Thiab nws xyaum ua qauv zoo rau nws cov phooj ywg.

Muaj ib zaug nws muaj ob tug phooj ywg hais tsis sib haum, nkawd txawm txiav txim yuav sib txawb pob zeb. Nws mus nrog nkawd sib tham kom hais sib haaum txhob sib txawb pob zeb. Tiam sis nkawd tsis mloog nws hais li. Txog hnub uas nkawd teem tias nkawd yuav tuaj sib txawb pob zeb, Dominic thiaj mus nyob hauv nruab nrab, nws tuav tus ntoo cuam tsa rau nkawd ntsia, nws hais tias kom nkawd yuav cuam ces nkawd xub cuam thawj lub pob zeb rau nws tso. Nkawd ua tsis tau li cas, nkawd thiaj tso tseg tsis sib cuam pob zeb ntxiv lawm. Thiab Dominic kuj hais tau tias vim nkawd tau ua txhaum lawm, kom nkawd mus daws txhaum. Ces nkawd kuj mloog raws li Dominic hais.

Dominic nquag nrog nws cov phooj ywg ua ke, nws nrog lawv tham, coj lawv teev ntuj, qhia kom lawv txhob xyaum hais lus phem, txhob xyaum twv ntuj. Nws txhob kom lawv nquag mus daws txhaum mus txais Yes Xus lub cev. Nws kuj ua ib tug qhia kev cai rau cov me nyuam yaus hnub Chiv thiab.

Nws xyaum caiv nws lub ncauj kom txhob hais lus phem lus qias, nws caiv nws ob lub qhov muag kom txhob ntsia tej yam tsis zoo tsis huv. Muaj ib zaug, muaj ib tug tub hluas tuaj xyuas lawv, nws nqa tau ib phau ntawv pom duab liab qab tuaj. Ib pab tub txawm los ntsauv thiab los xyuas zom zaws. Thaum Dominic pom tias yog dab tsi, nws chua ntia phau ntawv muab dua tsuag tsuag, nws hais rau lawv tias:
“Nej yeej paub lawm tias nej ntsia ib plia xwb twb ua rau nej tus ntsuj plig dub lawm, ua cas nej tseem yuav qhib qhov muag saib tsis txawj tso tseg li. Kuv to taub tias yog tej yam nej xav xav saib, tiam sis muaj ib hnub nej tus ntsuj plig yuav taum pom tej yam haj yam zoo saib tshaj no.”


(Mam tuaj tso ntxiv kom tas...)

LN Don Bosco sau tseg hais tias ntau zaus thaum Dominic teev ntuj mas nws muaj “distractions,” txhais tias nws tsis nco qab lawm. Vim nws yees pom tej yam zoo dhau ces nws mloog lub sij hawm tsis ntev tiam sis twb yog tsheej tsib rau teev lawm. Muaj ib zaug, txog caij noj tshais, noj sus los nws tsis los noj li. Lawv nrhiav tau nws nyob haus tsev teev ntuj, ntsia ntsoov lub Tsev Tsam Phooj (Tabernacle) uas HT Yes Xus nyob. Nws tsis nco pom tias thaj txi ntuj twb tiav ntev lawm. Tseem muaj ib zaug Don Bosco pom nws hais hais lus nyob hauv tsev teev ntuj, nws hais tas nws ho mloog, yog nws nrog Tswv ntuj tham.

Muaj ib zaug, Dominic nkag los hauv Don Bosco chav tsev, nws hais rau Don Bosco tias kom nrog nws mus saib ib tug neeg. Nws coj Don Bosco taug ob peb tsem kev mus txog ib lub tsev. Nws mus nyem tswb ntawm lub qhov rooj, ces nws khiav mus lawm. Thaum qhov rooj qhib, Don Bosco nkag mus saib no pom muaj ib tug txiv neej mob hnyav hnyav tab tom yuav tuag, nws thov tas zog kom hu txiv plig tuaj daws txhaum rau nws zaum kawg. Dhau qhov ntawd lawm Don Bosco nug Dominic tias yog ua cas nws ho paub txog tus txiv neej ntawd, Dominic tsis tshua xav piav, ces Don Bosco tsis nug ntxiv lawm.

Muaj ib tag kis Dominic txais yes Xus lub cev tag, nws los teev ntuj ua ntuj tsaug, nws yees pom muaj ib pab neeg coob coob nyob hauv ib lub tiaj loj loj pos huab nti. Cov neeg tsis pom kev yuav mus rau qhov twg li. Ces txawm muaj ib tug neeg qhia hais tias yog Aas Kiv teb. Ces Dominic txawm pom vaj qhia Pis Us IX hnav ib ce muaj hwj chim ntxiag tuav ib tes tsau cig cig ntawm tes maj mam taug kev mus rau ntawm pab neeg coob coob. Cov nplaim taws ntawm tes tsau cia li ua kom qhov pos pos huab yaj tag, ua rau pab neeg ntawd sawv ntsug nyob hauv qhov pom kev nrig thaum tav su. Tus neeg txawm hais rau Dominic tias, “Tes tsau ntawd yog txoj kev ntseeg Kas Tos Liv, uas yuav ua kom Aas Kiv teb pom kev.” Xyoo 1858, LN Don Bosco thiaj mam piav zaj yees pom no rau Vaj Qhia, Vaj Qhia zoo siab hais tias yog ib zaj txhawb nws heev, vim nws yeej tau npaj yuav ua tej yam los pab Aas kiv teb thiab.

Xyoo 1856 lub 9 hlis tim 12, Dominic thov Don Bosco tias nws xav mus tsev mus xyuas nws niam mob mob, yog Niam Mab Liab xav kom nws mus. Thaum ntawd yog nws niam mob mob plab yuav yug me nyuam, tiam sis yug nyuaj nyuaj, thiab mob plab heev heev. Dominic los txog ntua, nws mus puag nkaus nws niam nwj nws niam tas ces nws rov loo rov qab lawm. Tam sid ntawd, nws niam hnov nws zaj mob plab ntaug kiag thiab nws cia li yug tau nws tus me ntxais hu ua Catherine. Cov poj niam tuaj pab nws niam yug me nyuam mam pom tias Dominic muab tau ib txoj “green scapular” yog ib txoj scapular ntsuab, dai rau ntawm nws niam caj dab, thiaj pab kom nws niam yug tau me nyuam sai thiab tsis mob plab heev lawm. Tom qab no, nws tus muam Catherine ntawd tseem tau coj txoj scapular ntawd thaum nws mob plab yuav yug me nyuam thiab. Tus muam hais tias nws tau muab qiv rau coob leej poj niam, ces cia li ploj lawm.

Txij thaum Vaj Qhia tau tshaj tawm tias Niam mab Liab xeeb los tsis lo neeg lub keeb txhaum tas los, ua rau Dominic muaj ib lub siab xav xav kom ua tau ib yam los hwm Niam mab Liab thiab nco txog qhov ntawd. Ces nws thiaj sau nws ib pab phooj ywg zoo, nws nrog lawv sib tham haum ces lawv tsim lawv lub koom haum hu ua “Sodality of Mary immaculate.” (Koom Haum Niam Mab Liab tsis los lub keeb txhaum) Lub ntsiab yog xav muab lawv fij rau Niam Mab Liab kom Niam mab Liab pov hwm lawv thaum lawv ua neej nyob thiab thaum lub caij lawv yuav dua nras. Muaj ob yam loj uas Dominic xav kom ua: 1) Yog lawv yuav hwm niam Mab Liab thiab yuav coj coob leej los hwm Niam Mab Liab; 2) lawv yuav nquag mus txais Yes Xus lub Cev. Lawv sib koom sau tau ib co cai rau lawv siv, muaj txog 21 nqes. Thaum lub 6 hli tim 8, Dominic thiab nws cov phooj ywg los sawv ntawm Niam Mab Liab xub ntiag, lawv nyeem cov cai ntawd, thiab lawv thov kom Niam Mab Liab pab lawv coj kom tau. Lawv muab lawv cov cai ntawd rau Don Bosco saib, nws nrog lawv kho tej yam rau ces nws nrog pom zoo rau lawv yuav raws li ntawd.

LN Don Bosco coj nws pab tub kom lawv niaj lub hlis muaj ib hnub ua kev thov ntuj rau nyias lub caij tas sim neej hu ua Exercise of a Happy Death. Nyob hauv lawv txoj kev teev ntuj ntawd mas muaj yuav tsum mus daws txhaum thiab txais Yes Xus lub cev rau hnub ntawd. Dominic niaj lub hlis mob siab rau ua txoj kev teev ntuj ntawd. Muaj ib hnub thaum lawv ua txoj kev teev ntuj, Dominic txawm hais rau sawv daws tias nws yuav yog tus xub tuag dua lawv cov.

Tsis ntev tom qab Dominic cia li pib muaj mob. Tiam sis nws kuj tseem ua tiag siv nws lub sij hawm los nrog nws cov phooj ywg ua si, nrog lawm tham, pab tswv yim rau lawv. Thiab nws kuj tseem nrhiav tau sij hawm mus pab tu cov neeg muaj mob pw nyob hauv lawv lub tsev tu cov neeg mob infirmerie.

Vim Dominic tus mob pheej tsis zoo, ces kws tshuaj hais tias kom nws yuav tsum mus so nyob pem tsev ib ntus tso mam rov tuaj. Nws mus tau ob peb nyuag hnub xwb, nws twb rov tuaj lawm, vim nws lub siab xav tuaj nyob hauv Oratory, xav tuag nyob hauv. Tiam sis Don Bosco txiav txim siab tias nws hnoos heev dhau lawm, ntshai yuav tsum mloog raws li kws tshuaj hais thiaj yuav zoo taus. Ces nws rov muab Dominic xa mus tsev. Dominic yeej paub ntsoov tias nws mus nws yuav tsis rov tuaj ib zaug ntxiv li lawm, tiam sis nws kuj ua ib siab nyiaj qhov kev nyuaj ua tsis tau raws li nws lub siab xav no pub rau Tswv Ntuj. Hmo ua ntej yuav sawv kev, nws nrog Don Bosco nyob ntev loo tham ntau tsav yam txog kev ntseeg txog sab ntsuj plig. Hnub nws yuav sawv kev mus tsev, thaum sawv ntxov, nws mus ua kev teev ntuj pab rau nws lub caij tuag. Nws hais rau sawv daws tias yuav yog nws zaum kawg ua kev thov ntuj li no lawm. Thaum sawv kev, nws mus xob (hais sib ncaim rau) nws cov phooj ywg txhua tus thiab rau Don Bosco li uas nws yuav tsis ntsib lawv ntxiv, tiam sis lawv xav hais tias nws tus mob ntawd twb tsis yog mob loj loj, ces lawv tso siab lug tias nws tseem yuav tuaj dua.

Nws mus txog tsev tau 4 hnub xwb, nws niam nws txiv pom tias nws cia li haj yam tsis qab los noj mov li lawm thiab nws haj yam hnoos heev ntxiv tshaj qub xwb, tsis yog tias yuav zoo tuaj. Ces nkawd xa nws mus cuag kws tshuaj. Kws tshuaj hais tias kom nws yuav tsum pw so kom txaus txaus. Lub caij ntawd cov kws tshuaj siv txoj kev tso ntshav tawm li peb Hmoob siv kam thiab. Ces kws tshuaj tuaj hlais nws tej leeg tes tso ntshav tawm. Kws tshuaj hais rau nws niam nws txiv tias ua li ntawd tas lawm ces tsis ntshai lawm, nws yuav tsum pw so kom txaus txaus xwb ces yuav zoo zuj zus.

Tiam sis Dominic tsis hais li ntawd, nws paub tseeb tias tsis ntev xwb ces nws yuav tuag. Nws thov kom hu txiv plig tuaj ua kev daws txhaum rau nws thiab nqa Yes Xus lub Cev tuaj rau nws, ntshai yuav yog zaum kawg lawm. Nws niam nws txiv tseem muaj kev cia siab li kws tshuaj hais, nkawd xav tias tsis tau txog yuav daws txhaum los txais Yes Xus lub Cev zaum kawg. Tiam sis vim Dominic thov lawm ces nkawd thiaj lam hu txiv plig kom nqa lub Cim Yug thiab tuaj ua kev daws txhaum rau Dominic. Plaub hnub tom qab ntxiv, Dominic yuav tseev kom hu txiv plig tuaj ua lub Cim Pleev Roj rau nws xwb, npaj nws yuav tuag. Kws tshuaj thiab nws niam nws txiv tsis ntseeg li, tiam sis vim nws hais lawm ces nkawd thiaj lam hu txiv plig tuaj. Yog tim 9 lub 3 hlis ntuj xyoo 1857, thaum yav tsaus ntuj. Txiv plig thiaj tuaj thov ntuj thiab muab Vaj Qhia qhov kev foom hmoov zoo (papal blessing) rau nws, nws hais zaj “Kuv lees txhaum…” Thaum txiv plig mus lawm, nws hais kom nws txiv nyeem cov zaj teev ntuj pab thov ntuj rau yus txoj kev tuag uas nyob hauv nws phau ntawv rau nws. Ces nws txawm tsaug zog lawm. Nws tsaug kiag ib nyuag pliag zog xwb, nws tsim dheev los, nws hais meej meej rau nws txiv tias:

“Kuv yuav ncaim koj os kuv txiv, kuv yuav ncaim koj os…xyov puas ta txiv plig kom kuv ua dab tsi no ne… kuv tsis nco qab lawm… Aub! Kuv pom tej yam zoo nkauj kawg nkaus li…”

Ces nws txoj sia tu nrho nrog cov lus no lawm. Thaum tam sis ntawd kiag, nws txiv tseem ua xyem xyav tias ntshai yog nws tsaug zog dua xwb. Ces nws thiaj mam to taub tseeb tias yog tuag lawm tiag tiag. Dominic txiv thiaj sau ib tsab ntawv mus qhia rau LN Don Bosco tias Dominic tsis nyob hnub tim 9 lub 3 hlis lawm.

Ib lub hlis tom qab Dominic tuag tas, muaj ib hmos nws yees tawm tuaj rau nws txiv pom. Nws txiv piav li no:
“Thaum ntawd kuv muaj kev ntxhov siab kawg nkaus li vim kuv tus tub ncaim mus lawm, thiab kuv muaj ib lub siab xav xav paub txog tias ua li es nws mus nyob tau zoo los mus nyob zoo li cas sab nraud lawm. Ces Tswv ntuj txawm muaj lub siab zoo ua kom kuv muaj kev cia siab. Ib lub hlis tom qab nws tuag tas, muaj ib hmos kuv tsaug tsis taus zog li, ces kuv cia li pom zoo li lub qab nthab hauv kuv chav pw qhib plho, pom Dominic tshwm los nyob hauv ib qho pom pom kev dawb paug. Ces kuv cia li qw tias, ‘Dominic, kuv me tub aw, puas yog koj twb mus nyob saum ntuj lawm nas?’ Nws teb tias, ‘- Yog los mas. Kuv twb nyob saum ntuj lawm. – Yog li ces koj yuav tsum thov ntuj pab rau koj cov kwv cov tij cov muam, thiab rau koj niam koj txiv thiab, kom peb los caum tau koj ib hnub twg nyob saum ntuj Ceeb Tsheej nawb. – Aws, kuv mam li thov ntuj os.’ Hais li ntawd tas ces nws cia li ploj ntais lawm, thiab kuv chav pw rov zoo li qub lawm.”

Kaum cuaj xyoos tom qab dominic tuag tas, muaj ib zaug Don Bosco kuj yees pom Dominic thiab. Yog thaum lub 12 hlis tim 6, 1876. Dominic yees tawm tuaj, nws ci ntsa iab hos hnav tsoos tsho ci lam lug xwb. Nws nrog ib pab tub hluas coob coob taug kev tuaj ntsib Don Bosco. Nws tuaj txhawb zog thiab qhia qee yam rau Don Bosco paub txog nws tes hauj lwm qhuab qhia cov tub hluas. Don Bosco nug Dominic tias: “Thaum lub caij koj txoj sia tu ntawd, yog dab tsi thiaj pab koj tshaj plaws?” Dominic qhia tias: “Thaum lub caij ntawd, qhov pab kuv tshaj plaws yog Tswv Ntuj leej Niam (Niam Mab Liab) txoj kev pab cuam.”

Tsis ntev tom qab Dominic tuag tas xwb , LN Don Bosco twb pib muab nws lub neej sau cia lawm, vim nws pom tau tias Dominic yog ib tug neeg tshwj xeeb heev, thiab ua tau qauv zoo rau cov tub hluas ntxhais hluas thiab rau peb sawv daws txog ntawm txoj kev coj ib lub neej ua neeg dawb huv, tsim txiaj, thiab ua neeg ntshiab.

Xyoo 1954, Vaj Qhia Pis Us XII tsa Dominic Savio ua leej ntshiab. Nws yog ib tug leej ntshiab hluas hluas. Nws muaj 15 xyoos xwb thaum nws tuag.
Lub Koom Txoos muab nws tsa ua tus leej ntshiab pov hwm cov hluas, thiab pov hwm cov neeg uas raug luag lam iab liam tej yam tsis zoo rau lawv.
Peb yuav muab nws txoj kev xyaum ua neej dawb huv los ua qauv rau peb txhua tus taug. Thiab peb yuav xyaum yoog nws txoj kev nyiam nquag mus daws txhaum, nquag mus txais Yes Xus lub Cev , thiab yoog nws txoj kev vam khom Niam Mab Liab, nws thiaj yuav pab peb thaum txog peb lub caij dua nras.

Dominic Savio lub ntxa nyob hauv lub tsev teev ntuj Basilica Our Lady Help of Christians (txhais tias: Niam Mab Liab tus pab cuam cov neeg ntseeg) nyob Turin, Is Tas Lis teb.