THOV NTUJ RAU YUS TUS KHEEJ THAUM MUAJ MOB

**Npuagtub** 21st September 2009, 6:04 am

Npuagtub: Tswv Cuab Hmong Catholique; Messages : 1000
Date d'inscription : 2009-08-16
Age : 58
Localisation : Fresno, California, USA.

Post n°1

THOV NTUJ RAU YUS TUS KHEEJ THAUM MUAJ MOB

Post Npuagtub 21st September 2009, 6:04 am

Piav: Lub sij hawm thaum koj tus kheej muaj mob uas koj yuav thov Ntuj pab rau koj tus kheej, koj yuav tau thov raws li 2 nqi hauv qab no:

1. Kuv tus Huab Tais, kuv tus Tswv Ntuj, ua cas koj tso kuv tseg ? Kuv thov koj tig ntsej los mloog kuv lub suab hu txog koj. Thov koj tig muag ci ntsa iab los ntsia txog kuv. Ua cas kuv yuav raug ib tug yeeb ncuab phem npaum no tsim txom kuv?

Ua cas kuv yuav tau ib tug mob phem ua luaj no nyob hauv kuv lub cev qaij daim tawv? Kuv tus Tswv Ntuj, kuv tus Huab Tais, kuv thov koj pab muab tej mob nkeeg uas nyob hauv kuv lub cev, nyob hauv kuv tej roj ntsha rhuav tshem mus kom yaj kom ploj mus kom tag. Thov koj pab kuv, vim koj yog tus tsim kuv lub cev thiab txoj sia.

Kuv tus Tswv Ntuj, kuv thov cog lus tias: thaum kuv tau txais kev noj qab nyob zoo lawm, kuv yuav muab siab rau tsim kev thaj yeeb, kev sib nyiam sib hlub, kom tas siab tas ntsws li koj lub siab nyiam thiab kuv yuav tshaj koj lub Moo Zoo kom mus thoob ntiaj teb, thiab kuv yuav nco ntsoov ua koj tsaug mus li tsis tas tsis kawg. Ua li.

2. Kuv tus Huab Tais Tswv Ntuj muaj hwj huam, koj yog kuv txoj sia tus tswv. Kuv thov muab kuv txoj sia tso rau hauv koj txhais tes. Yog koj hlub kuv no thov koj cawm kuv kom kuv dim ntawm kuv tus mob. Txawm kuv tus mob tsis tso kuv tseg los, thov koj khuv leej kuv, thov koj txhob tso kuv pov tseg rau hauv dab phem txhais tes. Thov koj zam txhaum rau kuv. Thov koj coj kuv tus ntsuj plig thiab txoj sia mus nyob hauv koj lub Ceeb Tsheej uas ci ntsa iab nyob kaj lug mus tsis txawj kawg mus li. Ua li.