Nyob zoo ib tsoom niam txiv kwv tij neeej tsa phooj sawv daws,
Lub hlis no yog lub 12 hlis lawm, mas ua rau kuv rov xav txog tias thaum lub 6 hli tim 17-18, 2017, kuv tau mus koom lub koob tsheej ua Ntuj tsaug rau 17 leej Tim Khawv muaj hmoov zoo nyob Nplog teb, uas tsoom neeg Nplog Hmoob Khmu nyob USA tau sib koom ua rau ntawm lub National Shrine of Our Lady of the Snows nyob Belleville, IL.
Txij thaum ntawd los cas zoo li kuv cia li nyob ntsiag to lawm xwb. Kuv thiaj li tau rov mus tshawb saib puas muaj ib hnub uas lub Koom Txoos teem rau peb kom niaj xyoo peb tau kev rov ua thaj Txi Ntuj nco txog lawv. Kuv thiaj mus pom tias yeej muaj ib hnub tiag, yog hnub tim 16 lub 12 hlis. Yog li mas tsim nyog peb yuav niaj xyoo nco txog lawv hnub ntawd. Twb ze ze lawm ces kuv yuav tuaj tso ib zaj lus piav txog peb ob tug neeg tuag ua Tim Khawv vim txoj kev ntseeg.
Nyob hauv pab 17 leej Tim Khawv ntawd, muaj ob tug neeg uas ze kuv kawg li, yog TP Txhiaj Tshaj (Fr. Mario Borzaga) thiab XH Thoj Xyooj nkawd. TP Txhiaj Tshaj yog ib tug tub tshaj Ntuj Lus, neeg Is Tas Lis, tuaj nyob hauv kuv lub zos Roob Nyuj Qus; XH Thoj Xyooj yog ib tug tub hluas Hmoob hauv kuv lub zos kiag. Nkawd ob leeg tau ua ke mus ntawm kuv lub zos Roob Nyuj Qus mus rau lwm lub zos mus tshaj Tswv Ntuj lub Moo Zoo, ces nkawd cia li tsis rov qab los lawm.
Nram no yog kuv tus phauj zaj lus piav txog lub sij hawm nkawd sawv kev tsees mus lawm:
Thov hais rau peb ib tsoom ntseeg, tshwj xeeb yog rau tsoom nyob lub teb chaws Los Tsuas, los puas tsoom uas twb ho tawm mus nyob rau lwm lub teb chaws lawm. Txawm li cas los, tsuav hais tias, poj yawm tseem yog neeg nyob Los Tsuas teb xwb. Cov twb paub lawm los kom nco ntsoov, hos cov tsis tau paub los kom ho paub thiab. Ib xyoos puag ncig rov los txog rau lub kaum ob hlis, hnub xiab kaum rau ( december 16th/ 12- 16 th) yog hnub lub Koom Txoos, thiab Vaj Qhia tau pom zoo muab lawv 17 leej no los zeem paub ua Yes Xus cov Tim Khawv muaj txoj hmoov zoo , uas tau raug lwm tus txo txoj sia nyob rau lub teb chaws Los Tsuas , khaws cia rau hauv tej ntaub ntawv kom nyob mus tas ib txhis nyob rau hauv lub Koom Txoos, rau tsoom ntseeg tau nco txog lawv thiab vam txog lawv.
Hnub no kuv thov hais kiag rau peb tsoom hmoob tias, nyob hauv lawv pab 17 leej ntawd , muaj ob tug yog nyob nrog peb tsoom Hmoob kiag xwb. Tus ib , yog T.P. Txhiaj Tshaj ( Fr. Mario Borzaga ). Tus ob yog , Xyooj xeem Thoj , nws yog ib tug tub hluas hmoob kiag. Nws tab tom kawm ua XH tshaj ntuj lub Moo Zoo. T.P. Txhiaj Tshaj thiab Xyooj Thoj nkawd tau ua khub tawm rooj mus tshaj Ntuj lub Moo Zoo rau lwm lub zos hmoob, nkawd thiaj tau raug neeg tsis muaj kev ncaj ncees , tsis muaj kev hlub, tsis muaj kev ntseeg, thiaj tau muab nkawd yuam txo txoj sia rau yas kev yas ncua , npog nroj ntsuab; yam nkawd cia li tsis muaj hnub rov los lawm.
Ua li mas peb tsoom ntseeg,tshwj xeeb yog peb tsoom ntseeg Hmoob, peb sawv daws yuav kub siab sib koom siab thov Tswv Ntuj thiab Huab Tais Yes Xus rau T.P. Txhiaj Tshaj thiab Xyooj nkawd tiag tiag, kom Leej Txiv thiab leej Tub nkawd tso nkawd lub hwj huaj los pub rau T.P. thiab Xyooj nkawd ua tau tej yam tshwm sim , los pab rau peb thaum lub sij hawm peb thov thiab vam txog nkawd kev pab, vim peb ntshaw muab nkawd tso rau lub sam xeeb siab muaj hwj chim ib yam li tsoom leej ntshiab, thiab nrog tsoom leej ntshiab muaj lub npe teev tseg rau hauv cov ntawv ceev npe leej ntshiab kom nyob mus ib txhis.
Kuv yog ib tug poj niam hmoob nyob lub zos Roob Nyuj Qus; yog lub zos hmoob uas T.P.Txhiaj Tshaj tuaj nyob qhia Ntuj lub Moo Zoo. Lub sij hawm T.P. Txhiaj Tshaj thiab Xyooj nkawd mus ploj ntawd, mas kuv tseem yog me nyuam yaus tseem me me xwb.Tej laus tias kuv muaj li kaum xyoo xwb. T.P. Txhiaj Tshaj thiab Xyooj nkawd txoj kev mus tshaj Ntuj Lus thiab ploj lawm ntawd, kuj ua tau ib zag dab neeg nyob rau hauv kuv lub hlwb me nyuam yaus, nco ntsoov los txog niaj hnub tam sis no, tsis muaj hnub ploj li. Vim yog ib qho kev nyuaj siab ntxhov plawv txawv uas tshwm sim thawj thawj zaug nyob rau hauv kuv lub neej me nyuam yaus.
Xyoo 1960, tsis paub xyov yog lub hlis twg thiab hnub xiab dab tsi li. Hnub ntawd nco meej meej tias yog hnub chiv. Hnub chiv ntawd , T.P. Txhiaj Tshaj kuj tau ua thaj mis xas rau peb tsoom ntseeg sawv daws. T.P. kuj tau ua lub cim ntxuav rau ob tug me ntxhais tseem mos mos ab thiab. Raws li ib tug leej niam hais mas nws tus me ntxhais mos ab ntawd nyuam qhuav muaj li kaum hnub xwb.Tej laus sawv daws twb tham ua ntshoo nrooj los tau ntau hnub tias, tom qab ua thaj mis xas hnub chiv ntawd tas, ces T.P. Txhiaj Tshaj thiab Xyooj nkawd yuav tawm rooj nrog ob tug tub hluas, uas nyob rau lub zos Phuaj Xuab mus tim nkawd lub zos. Ob tug tub hluas ntawd, yeej tuaj kawm ntawv thiab kawm kev ntseeg nyob hauv zos Roob Nyuj Qus no tau ob peb xyoos lawm. Nkawd xav coj T.P. Txhiaj Tshaj nrog nkawd mus tim nkawd lub zos Phuaj Xuab, mus ntiab dab rau ib tug , nws tsev neeg , rau nws txiv kiag.
Tom qab ua thaj mis xas tas,ua ntej sawv kev, T.P. yuav tsum tau mus noj me ntsis tshais tso, vim yog yuav mus kev deb. Yuav mus li ib hnub tseem tseem , vim yog mus ko taws xwb , tsis muaj kev tsheb mus li. Yog mus lig li lawv mus ntawd ces tseem yuav tau pw ib hmos ntawm kev thiab. Kuv nco tias thaum T.P. Txhiaj Tshaj mus noj tshais lawm, kuv txiv thiab kuv niam peb tsis mus tsev, vim kuv txiv thiab kuv niam nkawd yuav nyob tos ntsia thiab xaT.P. sawv kev tso. Kuv kuj nrog kuv txiv thiab kuv niam nkawd nyob tos thiab. Kuj tseem muaj ntau leej nrog peb nyob tos xa lawv sawv kev thiab.
Thaum T.P. Txhiaj Tshaj ris tau nws lub nra tawm tuaj , yuav sawv kev, ob tug tub hluas nrog rau nkawd tus yawm yij lawv kuj tuaj txog ntawd lawm thiab. Ua ntej lawv yuav sawv kev kiag, nkawd tus yawm yij hais rau T.P. Txhiaj Tshaj tias: " T. P. ,koj mus tsuag tsuag los, hnub no kuv poj niam yug tau ib tug me ab tub lawm, kuv yuav tos koj los ua lub cim ntxuav rau nws." Ces thiaj li muab lub cim ntxuav teem tsuag tsuag cia tos txog hnub chiv tom ntej no , uas T.P. rov los txog. Vim T.P. Txhiaj Tshaj yeej tau hais rau sawv daws tias T.P. yeej yuav los kom ncav ua thaj mis xas hnub chiv tuaj no, tsis pub kom sawv daws tau ncual li.
Lawv peb leeg sawv kev kiag. Peb cov uas nyob tos ntawd, peb kuj tau nrog lawv mus ua ke, mus li ib ncuas kev kiag , txog kiag tom ntug zos, ntawm lub ncauj ke , txoj me nyuam kev lav uas yuav mus tshuam rau txoj kev loj uas nyob sab me nyuam roob nraud . Nyob ntawm ncauj ke ntawd , yog Xyooj lub tsev. Xyooj yog tus tub hluas hauv zos Roob Nyuj Qus. Xyooj Thoj yog tus tub hluas ua T.P. Txhiaj Tshaj khub mus thiab rov qab los. Xyooj kuj yog tus T.P. Txhiaj Tshaj coj mus pab T.P. Txhiaj Tshaj hais lus rau hmoob thiab. Peb mus txog ntawd ces Xyooj kuj ris nra tawm tuaj, nrog rau nws tsev neeg tuaj xa nws thiab xa lawv plaub leeg ntawd. Xyooj ua zam sees, coj ib phiaj xauv thiab ntoo ib lub mom hmoob.
Thaum lawv plaub leeg yuav sawv kev tiag tiag, ces cov txiv neej los tuav lawv tes tag nrho, tus yuav hais dab tsi los hais. Me nyuam yaus li kuv no twb mloog tsis tawm lawv cov lus li. Ntawm cov poj niam ces lawv kuj tsis mus tuav plaub leeg ntawd ib tug twg tes li , lawv tsuas sawv ntsug hais lawv cov lus xa xwb. Thaum lawv plaub leeg nce kev kiag , taug txoj me nyuam kev lav mus uas yuav coj lawv mus txais txoj kev loj nyob sab nraud , ces peb tsis mus lawm. Peb sawv ntsia lawv plaub leeg, lawv mus lawv lawm xwb. Txoj kev tsis fab thiab mas peb yeej ntsia pom lawv plaub leeg mus mus li ib ncua muag , mam li tsis pom lawm, vim txoj kev lav tig nqes hav dua nraud lawm. Thaum tseem pom lawv mus mus ntawm txoj me nyuam kev , mas ib txhia, nim tsa suab see yees hais lus lawv lawv qab rau lawv, txog kiag thaum lawv ploj ntais mus lawm, thiaj mam tsum xwb. Xyov lawv hais lawv lus dab tsi li, me nyuam yaus li kuv no twb tsis to taub , tsuas paub thiab cim tau lo nyuag hais tias : _" mus tsuag tsuag nej mam los " no xwb. Thaum lawv ploj ntais lawm , ces peb sawv daws nyias mam tig mus nyias tsev. Kuv txiv thiab kuv niam thiab kuv, peb kuj los tsev lawm thiab.
TOS TOS TSIS HNOV XOV, TSIS POM ROV LOS.
Tos tos, lub caij nyoog ze zuj zus, me nyuam yaus li kuv no, kuj txawj zoo siab tias yuav rov pom T.P. laud. Tiam sis.......Tos tos....... dhau lub caij nyoog teem tseg, cas tsis pom los li....... Tos hnub dhau hnub,.... los cas yeej tsis pom los li thiab...... Hnov tej laus tham tias ntshai yog muaj teeb meem dab tsi lawm , cia li taug qab nrhiav xwb . Kuj hnov tej laus tham tias , xa neeg mus taug qab los kuj tsis pom nkawd li thiab.cov neeg lawv mus ntsib mus nrog tham los lawv kuj hais tias lawv tsis paub tias yog los ploj rau txoj xub ke twg lawm, lawv kuj muab xa nce kev los tsev lawm thiab. Tsis paub , xyov tej laus nrhiav li cas ntxiv, tiam sis me nyuam yaus li kuv no ces yeej tos tas zog ..., tiam sis yeej kuj tsis pom T.P. Txhiaj Tshaj thiab Xyooj Thoj nkawd los txog tsev li. Ntsia mas cov laus nyuab siab tas siab nrho. Zej zog , tsoom ntseeg sawv daws , mas nyob mluas mlob lawm xwb. Leej niam ,uas yog Xyooj niam, kuv txiv tus phauj txheeb txheeb, mas quaj quaj tshuav tu siav lawm xwb. Kuj tseem hnov cov laus tham tias , txoj kev nrhiav nkawd, lawv yuav tsis tso tseg li, txawm yuav ntev npaum li cas los lawv yeej yuav nrhiav mus kom kawg, txog thaum tau ib qho tseeb lawm, mam li tso tseg xwb. Ntuj kuj pab, txog thaum kawg ,kuj soj tau nkawd qab, taug tau nkawd lw lawm thiab. Tu siab heev, vim nkawd tsis muaj hnub yuav rov los ib zaug ntxiv lawm.
Lub sij hawm ntawd, me nyuam yaus li kuv no , tseem me dhau thiab tseem ruam dhau, lub hlwb tsis tau tawg hlo li , hais txog ntawm txoj kev ploj kev tuag thiab kev tu siab. Pom tej laus quaj quaj , yus kuj quaj quaj nrog lawv thiab, tiam sis, kuj tsis paub tias cas yus ho quaj thiab . Ib qho ua rau kuv khuv xim tshaj plaws rauT,P, Txhiaj Tshaj txoj kev ploj , mas yog muaj li no thiab. Lub sij hawm thaum T.P. Txhiaj Tshaj tuaj nrog peb nyob , nws kawm paub lus hmoob ntau , tham tau nrog hmoob yooj yim me ntsis lawm ; mas nws tau txhais tau ib zaj nkauj cav txog Niam Mab Liab. Yog zaj nkauj : " Poj Tswv Ntuj ". T.P. thiab XH Tshu Hwj Thoj nkawd tau muab sib pab kho thiab rau suab rau. T.P. Txhiaj Tshaj nyuam qhuav muab los qhia rau peb pab nyuag me nyuam yaus kawm ntawv nruab hnub, xyaum hu xwb. Peb twb tseem hu tsis tau tau zoo kiag li. T.P. tau cog lus rau peb tias T.P. yuav mob siab thiab rau siab qhia peb xyaum hu ua ke , kom peb hu tau keej keej thiab zoo zoo , mam tsum; thiab txhua zaus peb teev ntuj, peb yuav hu zaj ntawd los cav txog Niam Mab Liab. Thaum ze T.P. Txhiaj Tshaj yuav sawv kev kiag , nws tau hais tias kom peb ua siab ntev nyob tos, T.P. cog lus , T. P. rov los txog mam rau siab ntso coj peb xyaum dua. Lwm cov , kuv tsis paub tiam sis tus kuv no mas yeej nyob tos ntsoov. Thaum txog ze ntawm T.P. lub tsev mas yeej xam rawv saib T. P. puas tau los xwb. Thaum hnov tej laus nroo zom zaws, tu siab tas tias ntshai tsam tsis muaj hnub los lawm, mas ua rau kuv tu siab tas; vim kuv xav twj ywm tias ntshai zaum no yuav tsis tau kawm zaj nkauj ntawd ntxiv lawm laud.... Khuv xim tshaj plaws, yus me nyuam yaus twb tsis paub qhia yus txoj kev khuv xim rau yus niam lawv li thiab.Khaws twj ywm cia rau nruab siab xwb. Cas txawm cia li yog li ntawd lawm tiag tiag li ; T.P. Txhiaj Tshaj cia li tsis tau rov los qhia nws zaj nkauj rau peb hu mus ntxiv lawm tiag tiag li. Twb ib nyuag ntu tom qab no lawm, XH Tshu Hwj mam rov muab zaj nkauj ntawd los qhia rau peb sawv daws xyaum dua mus txog thaum peb hu tau zoo zoo, raws li T.P. Txhiaj Tshaj txoj kev npaj thiab vam. Ua ntu zus los txog rau lub sij hawm tam sis no, yog thaum twg hnov zaj nkauj ntawd los puas lub suab ntawm zaj nkauj ntawd, yeej ua rau kuv rov nco txog T.P. Txhiaj Tshaj thiab lub neej me nyuam yaus nrog T.P. xyaum hu zaj nkauj ntawd.
Xaus no, tsoom ntseeg, thov txhob hnov qab peb tsoom 17 leej tim khawv muaj hmoo ntawd mog. Nco ntsoov tias lawv yog ib co zoo qauv rau peb tsoom ntseeg. Lawv kuj yog cov tho txoj kev rau peb taug thiab coj peb mus kom txog rau Huab Tais Yes Xus tus Ntoo Cuam thiaj yog lub Qhov Rooj uas yuav coj peb mus txog Leej Txiv.
Los ntawm Maiv xeem Yaj, Yug thiab hmoob Roob Nyuj Qus[