Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» COV ZAJ NYEEM HNUB CHIV XYOO A 2016-2017
by NrhiavTswvNtuj Yesterday at 10:38 am

» Xib Hwb Thoj Xyooj lub neej
by NrhiavTswvNtuj Yesterday at 10:33 am

» TP.Txhiaj Foom lub TSEV Ntawv
by Maiv Tooj Yesterday at 10:15 am

» XH. Yaj Zoov Ntxheb lub Tsev THOOB TSIB
by Maiv Tooj Yesterday at 10:10 am

» XH.Zoov Ntxheb Yaj Nthuav Ntawv Ntshiab.
by Maiv Tooj Yesterday at 10:03 am

» Tshuaj NTSUAB
by Maiv Tooj Yesterday at 7:35 am

» COV ZAJ NYEEM NRUAB LIS PIAM XYOO I 2016-2017
by Mim Yesterday at 5:25 am

» Tswv Ntuj txoj kev HLUB. Cob Tsib teb.
by NrhiavTswvNtuj 17th January 2017, 11:45 pm

» HMOOB CATHOLIC NYOB COB TSIB TEB (Hmong Catholic Vietnam)
by Maiv Tooj 17th January 2017, 11:19 pm

» Nos Hes lub nkoj = L'Arche de Noé = Noah's Ark
by NrhiavTswvNtuj 13th January 2017, 9:53 am

» ZAJ PIAV TXOG IB TUG NTXHAIS SUAV
by Mim 12th January 2017, 1:50 pm

» NYOB ZOO XYOO TSHIAB 2017
by Tub Kawm 1st January 2017, 11:24 pm

Suav neeg tuaj saib, txij hnub 17/09/2010 los mus.


    Tim khawv zos Naj Poom, XH.Thoj Tsav Yaj

    Share

    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5174
    Date d'inscription : 2009-08-18

    Tim khawv zos Naj Poom, XH.Thoj Tsav Yaj

    Post  Maiv Tooj on 8th July 2011, 7:32 pm




    Peb cov Hmoob phab Qaum teb, ua ntej xyoo 1959. Sawv daws yeej ib txwm coj txoj qub kev cai. Yam li coj dab, muaj mob muaj nkeeg los tsuas nrhiav neeb nrhiav yaig kho xwb. Peb cov Hmoob Qaum teb yeej tsis paub txog "YES XUS" lub moo zoo li. Txij xyoo 1959, peb vaim (txiv lus Hmoob Dub)Thoj Zoov Ntsuab thiaj rtau nqes mus pem Moos Loob Naj Thuab (Luang Nam Tha), tau mus ntsib ib tug Txiv Plig.

    Lub sij hawm ntawd, lawv tsis hu tias Txiv Plig, lawv hu tias: "YES XUS".
    Txiv Plig nug peb vaim tias:
    -Pho Thaub, nyob pem nej lub zos puas muaj Hmoob coob thiab?
    Peb vaim teb tias:
    -Peb cov Hmoob muaj coob thiab hos!

    Thaum peb vaim rov qab los txog tsis ntev hnub xwb ces cov "As Cas" txawm tuaj txog hauv peb lub zos "Npam Naj Xees". Lawv tuaj qhia Kev Cai Ntseeg tau ntau hnub thiab ntau hmo. Tab sis tsis muaj ib yim Hmoob yuav los txais, kam txiav dab qhuas li.Ntuj txoj cai muaj coob tus pom zoo, tab sis cov  "As Cas" txoj cai coj nruj thiab txwv ntau tsav, ntau yam. Ces thiaj ua rau peb cov Hmoob ua xyem xyav. Thaum cov As Cas rov qab lawm -Txiv Plig uas lawv hu tias "YES XUS" tuaj nrog ib tug Hmoob hu ua Thoj Xyooj. Nkawd coj "YES XUS" luv moo zoo tuaj qhia rau cov niam txiv, kwv tij neej tsa Hmoob. Zoo li lub sij hawm twb tsis ntev, cheeb tsam ntawm peb muaj 3 lub zos nyob ua xab kub tsab. Dhau ntawd mus muaj lub zos Pas Zaj, muaj zos Pas Xis Lees.

    Peb cum kwv tij muaj 5 leeg txiv yam li:
    Tus 1, Thoj Vam Nyiaj, tus 2 Thoj Suav Lwm, tus 3 Thoj Ntxoov Neeb, tus 4 Thoj Zoov Ntsuab, tus 5 Thoj Zam Ntxawg. Lawv 5 leeg kwv tij no, muaj ib tug tau tsiv teb chaws mus rau Naj Vuaj, yog Ntxoov Neeb. Tshuav lawv 4 kwv tij nrog rau cov kwv tij neej tsa Hmoob. Sawv daws lam nyob zov teb chaws quav poj rau thaj chaw no uas peb cov Hmoob nyob tau ntev heev los lawm. Muab teb chaws ua noj ua haus ciaj quav poj tag. Lub sij hawm ntawd, tsis paub tias peb cov Hmoob yuav tau los txais kev ntseeg, tsis paub xyov nyias yuav xav nyias li cas?

    Ntawm peb vaim "Thoj Zoov Ntsuab", nws yog ib tug txawj neeb muag dawb, txawj khawv koob, tab sis nws lub neej txawm txawj npaum li cas los nws twb pab tssi tau nws ob tug me nyuam. Nws tus tub hlob muaj 4 los 5 xyoos xwb tau tas sim neej lawm, nkawd tus ntxhais yau los tau tuag lawm thiab. Twb yog mos ais tsis muaj tshuaj pab thiaj tuag los tseem hais tias raug dab, yuav tau muab tsiaj, muab txhuv, nrhiav txiv neeb, txiv yaig, hlawv xyab, hlawv ntawv mus kho ais thiaj zoo. Txawm ua neeb, ua yaig, ua khawv koob, khov kuam mus daws los yeej pab tsis tau, ua rau peb niam thiab peb vaim lub kua muag poob, quaj nyiav rau txhua txoj xub ke los nkawd leej tub hlub, leej ntxhais nyiam yeej tsis tshwm, tsis sawv rov los. Peb vaim thiaj tau xav tias: Yog ntuj tsim, neeg mob yuav tsum tau tshuaj kho.

    Lub sij hawm ntawd thiaj muaj ntau yim los txais kev ntseeg. Yam li ntau xeem Hmoob los txais YES XUS lub Moo Zoo.
    Peb cov Hmoob! Ua ntej 1959, peb cov Hmoob yej tssi paub ib tug ntawv Hmoob li. Tsuas muaj ob peb tug tub Hmoob paub ntawv Nplog xwb. Thaum sawv daws hloov lub neej los nrog YES XUS li no lawm, Hau Zos thiaj li ib suab nquag hu kom sawv daws pab txiav xyoob ntoo, hlais nqeeb los cuam ua nplooj los vov tsev. Sawv daws thiaj sib pab ua tau ib lub tsev rau Txiv Plig thiab Xib Hwb nyob. Thiab tseem ua ib lub tsev Kawm Ntawv; kom sawv daws thiaj tau kawm ntawv Hmoob thiab ntawv Nplog thiab thaum tsaus ntuj thiaj tau kawm kev Ntseeg txog YES XUS thiab xyaum kawm hu tej zaj nkauj cav txog peb tus Huab tais YES XUS, tej zaj cav txog NIAM MAB LIAB.
    Thoj Xyooj thiaj tau qhia ntawv Hmoob rau cov me nyuam tub ntxhais Hmoob. Kuv ib tug thiab uas tau txais kev ntseeg, kev paub ntaub paub ntawv txij thaum ntawd los. Lub sij hawm ntawd, tseem muaj cov cov Hmoob loj loj uas tej tug twb muaj cuab muaj yig tag lawm los tseem tuaj kawm pib kawm ntawv, vim sawv daws ntshaw ntshaw txoj kev paub ntawv Hmoob. Tsis ntev tom qab no, ces Xib Hwb yaj Zoov Ntxheb ho tuaj, Xib Hwb Thoj Xyooj thiab Xib Hwb Zoov Ntxheb nkawd ua hauj lwm ua ke tau ib nyuag ntu ua ke xwb ces XH. Thoj Xyooj cia li rov rau Roob Nyuj Qus lawm. Tsuas tshuav XH.Zoov Ntxheb nyob lawm xwb.

    Teb chaw Npam Naj Xees, yog ib lub teb chaws uas peb cov kwv tij Hmoob nyob coob heev nrog rau Mab Daum, Kwv Txhoob, Lub Hej, Khuaj thiab Co. Muab teb chaw noj ciaj quav poj tag. Thaum sawv daws pom zoo li ntawd lawm; ces sawv daws thiaj tau sib tham nrog Txiv Plig Vaj Pov ...Saib peb cov Hmoob lub neej tom ntej yuav mus nrhiav teb ua noj haus nyob rau qhov twg?
    Txiv Plig thiaj tau teb sawv daws tias: Nram txoj niam kev tsheb loj, uas lawv hu tias "Qhov Hmoov Sib" twb muaj teb chaws ua noj ntau. Tseem yog teb tiaj thiab tus zoo. Nej cov Hmoob tsis nyiam mus nyob lov?
    Peb Hmoob ib txwm nyob Toj Siab, tsis kam mus nyob chaw qes, vim ntshai tsam mob npaws thiab lub teb chaws no ib txwm lawv cav muaj tsov tom neeg. Vim mus nram Pus Khuas (Vieng Phou Kha) rau Moos Loob Naj thuab, yuav tsum mus 2 me nyuam hnub. Txog ntawm ntu kev uas tsov tom neeg ces yeej tsaus ntuj.Cov neeg dhau txoj kev no, ais pw li hais no yeej kawg raug teeb meem tsov tom; tab sis tsis tshua hnov luag hais xwb. Tsis tas li tsov tsuas tom Mab Daum thiab tej mab sua xwb, "ntawm peb Hmoob tsis hnov luag tham txog tias tsov tom".

    Ntawm peb tsev neeg thiaj tau nqes ua qab mus raws Txiv Plig thiab peb cov Hmoob ntseeg Ntuj, xyoo 1960, lawv cov mus ua ntej, lawv lam ua vaj ua tsev rau nruab liaj nruab teb. Thaum peb nqes mus txog, sawv daws thiaj tau sab laj ua ke tias yuav tsum mus nrhiav ib thaj chaw chaw ais sawv daws mus ua vaj ua tsev ua ke, tsim kom tau ib zej ib zog. Nyob ua pab ua pawg, muaj chaw txib chaw hu. Sawv dawss thiaj mus nrhiav tau ib lub nrag tiaj, nyob ze ntawm tus dej loj, Naj poov, thiab tus dej me, Naj Las sib tshuam. Sawv daws thiaj mus txiav xyoob, hlais nqeeb coj los ua tsev rau Txiv Plig nyob thiab ua ib lub tsev kawm Ntawv. Tau coj los Kawm ntawv thiab kawm kev Ntseeg Ntuj. Peb cov Hmoob Ntseeg ntuj uas sawv daws los rhawv lub zos tshiab no; sawv daws los ntsiv lub neej lom zem, nyob kaj siab lug, muaj teb ua noj, muaj tsiaj nruab nrag coob. Sawv daws tau mus plob, tsham zoov, tsham tsuag lom zem ntws. Lub sij hawm ntawd, Txiv Plig yog Txiv Plig Vaj Pov..., tus Xib Hwb qhia ntawv yog Xib hwb Xyooj Ntsum Hauj. Muaj ib hnub peb tab tom kawm ntawv, lub caij ntawd yog lub caij yav hnub qaij. Peb hnov npua quaj, ib txhia tias yog tsov tom npua, ib txhia tias yog hma tom npua. Thaum sawv daws dhia mus txog qhov chaw npua quaj. Tsis pom tsov, tssi pom hma, pom ib tug nab loj heev, muab tus npua zawm rawv, yav ko tw nab mus rig rau ntawm ib tug ntoo. Nab lub tau hau kauv rawv tus npua lub taub hau. Tus npua twb quaj tsis taus nrov lawm. Yog peb tsawm mus qeeb zog thiab ces ntshe tus nab twb muab tus npua nqos lawm. Thaum muab tus nab tua tuag, mos txwv tshab rau tus npua tuag lawm thiab.

    Sawv daws txiav hmab muab tus nab khi caj dab, cab los hauv zos, sawv daws muab tus nab laws tawv, hnub ntawd mas tshav ntuj tshaj plaws li tiag. Thaum kawg peb coj daim tawv nab coj mus nrhab thiab khi hlua tso rau nram tus dej loj Naj Poov. Peb sawv daws ciav qhuas tias: dej ntsawj daim tawv nab pom txaij dawb, txaij dub. Tib pliag xwb, ntuj tsaus ntais, nag xob nag cua nplawm ntws, xob nthe tsheej zaj, los nag hlob tis ua hlob, tus dej me uas ntws ntawm peb ntug zos, tej yav cav muaj tsheej puag los, dej muab tshoob ua hav to tog lawm tag. Daim tawv nab los dej tshoob ua nws du lug. Kob nag tsuas los ntev li 30 tawm fiab xwb ces tu lawm. Cov Mab daum tias: "Nej muaj hmoo heev, vim nej lub zos coj YES XUS, tsis li ces zaj twb muab nej lub zos nphau lawm. Vim nej coj daim tawv nab coj mus cab rau hauv tus dej loj Naj poov ais Zaj tsis nyiam". Qhov nov, kuv ntseeg tau tias: "Peb yog Tswv Ntuj cov me nyuam, Tswv Ntuj ib leeg thiaj yog tus Tswv sim ceeb."
    Kuv tseem pom ib yam ntxiv, xyoo 1960, peb civ Hmoob khiav los rau nram lub zos tshiab, Qhov Hmoov Sib, muaj ib lub qhov dej txhawv, nyob ntawm lub qhov dej txhawv ib sab, muaj ib tsob xyoob ntxhws, ib txwm Mab Daum yeej tsis kav txiav ib tug coj mus siv li. Yog txiav ces yeej tsis zoo: Muaj nab los hauv zos, los muaj mob, muaj nkeeg, muaj tuag. Tab sis peb cov Hmoob coj YES XUS los nyob, ib ncig peb muab luaj ua teb tag; tsis tas li, tsob xyoob peb muab txiav mus ua raj rau dej tag, tsis pom ib yam dab tsi tshwm sim tuaj li. Pom tau tias Tswv Ntuj thiaj yog tus Tswv tseem ceeb rau peb cov Ntseeg txog YES XUS lub npe.

    Txij xyoo 1962, Moos Loob Naj Thuab tawg, poob rau Nplog Liab tes, Txiv Plig coj peb tsiv los nyob rau Pham Dees, Thaib teb, ciaj ciam teb Nplog thiab Thaib. Xyoo 1964, peb cov Hmoob Ntseeg ib pab rov qab mus nyob rau Naj Ywj thiab Naj Vuaj, ib pab raws Txiv Plig los nyob rau Naj Gos, ze ntawm Houei Sai. Kuv vaim peb los nyob Naj Gos, kuv vaim ua Hau Zos, kuv kawm ntawv tiav ces kuv mus ua Xib Hwb qhia ntawv rau Txiv Plig lawv lub Tsev kawm Ntawv Ntiav Darasamouth Houei Sai.
    Xyoo 1975, sawv daws ho khiav rog los nyob rau Thaib teb, lub yeej Ban Tong. Txog rau xyoo 1977 mus rau 1978, peb cov Hmoob lub yeej Ban tong, ib txhia mus rau teb chaws As Mes Liv Cas. Peb ib txhia thiaj li tuaj rau Fab Kis teb. Sawv daws sib pus coj tej niam tej txiv, tej tub, tej ki tuaj nyob xyaw mab sua. Ua tau lub neej 20 txog 30 tawm xyoo, tej niam tej txiv coj lub cev ntaj ntsug los tso rau rooj teb no, ib pas nqus tsis tuaj lawm tiag. Lav nuj nqis puv lis kas, tsis muaj hnub sawv rov los, yeej yuav ua nuj ua nqi rau tej xeeb leej xeeb ntxwv them ib tiam dhau ib tiam...







    Thoj Zoov Ntsuab tsev neeg, Naj Nkos, 1965


    Sab lauj rau xis:


    See, Zuag, Neeb, Lig, Paj, Zoov Ntsuab, Yaj Xeeb, Vaj Yig, Xis, Mab Muas thiab Kos.

    Lub zos Naj Nkos,  yog lub zos uas cov Txiv Plig tsim rau cov Hmoob Ntseeg Npam Naj Xees los nyob. Thaum Luang Nam Tha tawg 1962, lawv tawg rog mus rau Pham Dees, Thaib teb tau ob xyoos ces thiaj coj lawv los rhawv lub zos Naj Nkos. Yog ib lub zos Hmoob Ntseeg nkaus xwb. Txiv Plig tsim muaj tsev Kawm Ntawv, Tsev Tshuaj tib si.



    Tus sau: XH.Thoj Tsav Yaj
    Cluny, Fab kis teb lub 4 hlis 2011

    Thoj Tsav Yaj tog Thoj Zoo Ntsuab, tus sau zaj saum toj nov tus tub hlob. muaj teb qhov nws kuj rov hais txog tej yam uas nws txiv twb tau hais ua ntej lawm.





    Lub Tsev teev Ntuj thiab Tsev Kawm Ntawv ua XH.Thoj Xyooj ua nyob zos Npam Naj Xees 1959




    Nov yog lawv xyaum hu nkauj thaum tsaus ntuj, nyob Bam Naj Vas.


    Sab laug rau sab xis:

    Tus 1: Ntxawm Xyooj
    Tus 2: Ntxhi Thoj
    Tus 3: Kab yeeb Thoj
    Tus 4: Paj Xyooj
    Tus 5: Yias Xyooj
    Tus 6: Tswb Xyooj
    Tus 7: Maiv Xyooj

    3 tug sawv qis dua, sab laug rau sab xis:

    Tus 1: Paj Thoj
    Tus 2: Rhia Vwj
    Tus 3: Mab Thoj

    Xyooj tuaj mus qhia Ntuj Kev Cai rau cov Hmoob Bam Naj Vas, 1959.



    TP. Vaj Pov, Bam Naj Vas ( Luang Nam Tha)





      Current date/time is 20th January 2017, 2:53 am