COV ZAJ NYEEM NRUAB LIS PIAM XYOO B 2020-2021

Tim 15 lub 9 Hlis 2021

Hnub Plaub Lis Piam Nees Nkaum Plaub Nruab Xyoo B Nruab Lis Piam Xyoo I
Lectionary: 445

Yuav Hwm Leej Niam Muaj kev Tu Siab (Our Lady of Sorrows/Notre Dame des Douleurs)

Zaj Nyeem Ib: 1 TM 3: 14-16

Tus Zoo Nyiad,
14 Kuv sau cov lus no tuaj rau koj nyem no, tiam sis kuv vam tias tshuav tsis ntev kuv yuav tau tuaj ntsib koj.
15 Yog tias ho muaj dab tsis khuam kuv tsis tau tuaj sai, mas koj yuav tsum paub tias koj yuav coj tus yam ntxwv zoo li cas nyob hauv Tswv Ntuj tsev neeg, uas yog tus Tswv Ntuj muaj txoj sia lub Koom Txoos, uas yog tus ncej txheem thiab lub hauv paus ntawm txoj kev tseeb.
16 Sawv daws yeej lees tias peb txoj kev teev hawmj Tswv Ntuj yog ib zag txuj tob kawg nkaus to taub nyuaj: Nws tawm los rau neeg pom nyob hauv lub cev nqaij,
Leej Ntuj Plig lees tias nws yog tug ntshiab,
tsoom Tshiab tau pom nws,
muaj cov tshaj txog nws rau tsoom neeg teev pej kum dab paub,
ntiaj teb neeg ntseeg txog nws,
nws nce mus saum ntuj mus muaj hwj chim lawm.

NPN 111: 1-2, 3-4, 5-6

Txais: (2) HUAB TAIS cov hauj lwm loj tas nrho!

Kuv yuav ua HUAB TAIS tsaug tas kuv lub siab lub ntsws,
nyob hauv tsoom neeg siab ncaj kev tuaj sib sau ua lub txoos.
HUAB TAIS cov hauj lwm loj tas nrho,
Thiab zoo nkauj zoo saib kawg nkaus.

Txais: (2) HUAB TAIS cov hauj lwm loj tas nrho!

HUAB TAIS cov hauj lwm muaj hwj xyeej thiab muaj hwj chim,
nws txoj kev ncaj yuav nyob mus li ib txhiab ib txhis.
Nws nto koob meej lug vim nws cov hauj lwm txaus qhuas.
HUAB TAIS lub siab zoo thiab khuv leej neeg.

Txais: (2) HUAB TAIS cov hauj lwm loj tas nrho!

Nws muab txhiam xws rau cov hwm nws tau noj,
nws yuav nco ntsoov mus li txog tias nws tau cog lus.
Nws ua kom nws haiv neeg paub txog nws tej hauj lwm muaj hwj huam,
Nws muab cov pej kum haiv neeg lub cuab tam pub rau lawv.

Txais: (2) HUAB TAIS cov hauj lwm loj tas nrho!

As Les Lus Yas: ZAM 6: 63c, 68c

Mus xaiv ob zaj nram qab.

Txais: As les lus yas, as les lus yas.

Koj cov lus, Huab Tais, yog ntsuj plig thiab yog txoj sia;
koj muaj cov lus pub txoj sia nyob mus li.

Txais: As les lus yas, as les lus yas.

Ntawv Moo Zoo: LK 7: 31-35

Yes Xus hais rau cov neeg coob tias:
31 "Kuv yuav muab tiam neeg no piv rau dab tsi ? Lawv zoo li leej twg ?
32 Lawv zoo li ib pab me nyuam yaus zaum tom tshav puam, lawv qw sib hu tias : 'Peb twb tshuab raj rau nej, nej tsis seev cev tsis dhia li! Peb twb cuab suab hu nkauj tuag, nej tsis quaj tsis nyiav li!'
33 Thaum Zam Ntxuav Plig tuaj, nws tsis noj mov tsis haus cawv, nej hais tias : 'Nws raug dab !'
34 Neeg Leej Tub tuaj, nws noj mov thiab haus cawv, nej hais tias : 'Saib, tus neeg hu dab thiab quav cawv ntawd, nws nrog cov sau se thiab cov neeg txhaum ua phooj ywg !'
35 Tiam sis kev Thoob Tsib twb tau txais kev ncaj ncees nyob hauv nws cov me nyuam tas huv tib si lawm."

Vim hnub no yog hnub peb yuav hwm Leej Niam Muaj Kev Tu Siab mas tsis siv zaj As Les Lus Yas thia zaj Ntawv Moo Zo saum toj no, yuav siv cov zaj nrom no:

sAs Les Lus Ya

Txais: As les lus yas, as les lus yas.

Nkauj tsim txiaj Mab Liab, koj tau txoj hmoov zoo;
koj tsis raug luag tua tiam sis koj tau txais lub mom teev kub ua tim khawv,
thaum koj sawv ze ntawm Huab Tais tus Ntoo Cuam.

Txais: As les lus yas, as les lus yas.

Ntawv Moo Zoo: ZAM 19: 25-27

25 Yes Xus niam thiab nws niam tus viv ncaus, hu ua Mab Liab uas yog DLos Pas poj niam,
thiab Mab Liab Mas Ntas Las, lawv sawv ze ntawm Yes Xus tus ntoo cuam.
26 Yes Xus pom nws niam thiab pom tus thwj tim uas nws nyiam sawv ze nws niam,
ces nws hais rau nws niam tias: "Niad, tus ntawd yog koj tus tub."
27 Thiab Yes Xus hais rau tus thwj tim tias: "Tus ntawd yog koj niam."
Ces txij lub sij hawm ntawd los, tus thwj tim coj Mab Liab mus nyob hauv nws tsev.

Los: Lk 2: 33-35

33 Yes Xus niam thiab txiv nkawd qhuas cov lus nkawd hnov hais txog tus me nyuam.
34 Xis Mes Oos foom hmoov zoo rau lawv, nws hais rau Mab Liab, tus me nyuam niam tias: "Koj ntsia, tus me nyuam no yuav ua chaw rau ntau leej neeg His Xas Lais ntog thiab ntau leej rov sawv. Nws yog ib lub cim ua kom sawv daws muaj lus sib cav.
35 Hos ntawm koj, mas ib rab ntaj yuav hno ntsees koj tus plig, kom xwv tej tswv yim uas coob leej xav tuaj nruab siab tawm los rau sawv daws paub.”

Tim 16 lub 9 Hlis 2021

Hnub Tsib Lis Piam Nees Nkaum Plaub Nruab Xyoo B Nruab Lis Piam Xyoo I
Lectionary: 446

Yuav Hwm LN Cornelius, Vaj Qhia ua Tim Khawv, thiab LN Cyprian, Tswv Qhia ua Tim Khawv

Zaj Nyeem Ib: 1 TMT 4: 12-16

Tus zoo nyiad:
12 Koj tsis txhob pub kom leej twg thuam koj vim koj lub hnub nyoog hluas. Ua li mas koj yuav coj ib tug piv txwv zoo rau tsoom ntseeg sawv daws yoog, nyob hauv koj cov lus, koj tus cwj pwm, koj txoj kev nyiam, koj txoj kev ntseeg, thiab koj txoj kev ua neeg dawb huv.
13 Lub caij uas kuv tsis tau tuaj, mas koj yeej meem mus twm ntawv Ntshiab, mus ntuas thiab qhuab qhia rau tsoom sid.
14 Koj tau txais ib lub txiaj ntsim nyob hauv koj lawm mas koj txhob muab tso pov tseg; yog tsoom txwj laus lo lus ua yaj saub tau muab pub rau koj, hnub lawv tiag tes rau saum koj.
15 Koj kav tsij mob siab xyaum ua cov hauj lwm ntawd; koj siv zog kub siab ua ces sawv daws yuav pom tias koj muaj peev xwm zuj zus.
16 Koj yuav mob siab rau koj tus kheej thiab koj txoj kev qhuab qhia; koj ntxeem tiag ua ob yam no kom xwm yeem mus. Yog koj ua li ntawd, mas koj yuav cawm tau koj thiab yuav cawm tau cov neeg uas mloog koj hais.

NPN 111: 7-8, 9, 10

Txais: (2) HUAB TAIS cov hauj lwm loj tas npaum li!

Cov hauj lwm tawm ntawm nws txhais tes los yeej tseeb thiab ncaj nces.
Nws cov lus qhia yog lus tsim nyog tso siab rau tas tib si,
Yog cov lus nyob ruaj nreb mus li ib txhiab ib txhis,
xab xeeb rau hauv kev tseeb thiab kev ncaj.

Txais: (2) HUAB TAIS cov hauj lwm loj tas npaum li!

Nws xa kev cawm tuaj rau nws haiv neeg,
nws ceeb toom kom lo lus nws tau cog nyob mus li.
Nws lub npe ntshiab thiab muaj hwj xyeej tas nrho.

Txais: (2) HUAB TAIS cov hauj lwm loj tas npaum j li!

Kev hwm HUAB TAIS yog kev pib txawj ua neeg thoob tsib;
cov ua lub neej hwm HUAB TAIS yog neeg xyuam xim.
Lo lus cav txog HUAB TAIS nyob mus li txheej dhau txheej.

Txais: (2) HUAB TAIS cov hauj lwm loj tas npaum li!

As Les Lus Yas: MT 11: 28

Txais: As les lus yas, as les lus yas.

Huab Tais hais tias:
“Tas nej sawv daws uas nej khwv thiab ris nra hnyav,
nej tuaj cuag kuv mas kuv yuav cia nej so los siav.”

Txais: As les lus yas, as les lus yas.

Ntawv Moo Zoo: LK 7: 36-50

36 Muaj ib tug Fas Lis Xais caw Yes Xus mus nrog nws noj mov. Yes Xus chaws mus hauv tus Fas Lis Xais tsev, nws mus zaum ntawm rooj mov.
37 Muaj ib tug poj niam yog neeg txhaum nyob hauv lub nroog ntawd; nws hnov tias Yes Xus mus noj mov hauv tus Fas Lis Xais ntawd tsev, ces nws nqa ib hwj tshuaj tsw qab tuaj.
38 Nws tuaj nyob ntawm Yes Xus nraub qaum, nram Yes Xus ko taw, nws quaj ua kua muag poob los ywg Yes Xus ko taw, ces nws muab nws cov plaub hau los so, nws nwj Yes Xus ko taw tsis tseg, thiab muab tshuaj tsw qab los pleev.
39 Tus Fas Lis Xais uas caw Yes Xus pom li ntawd, nws xav hauv siab tias: "Yog tias tus neeg no yog ib tug yaj saub, mas phim nws yuav paub tias tus poj niam uas kov nws yog leej twg, vim nws yog ib tug neeg txhaum!"
40 Ces Yes Xus tsa ncauj teb rau tus Fas Lis Xais tias: "Xis Moos, kuv muaj ib lo lus xav hais rau koj." Tus Fas Lis Xais teb tias: "Xib Hwb, koj hais mas!"
41 “Muaj ib tug neeg qiv nyiaj rau ob tug neeg. Thawj tug tshuav nuj nqis txog tsib puas lub txiaj nyiag ; lwm tus tshuav nqi txog tsib caug lub txiaj nyiag.
42 Nkawd ob leeg tsis muaj dab tsi them rov qab, ces tus tswv nyiaj cia li zam rau nkawd ob leeg. Ob tug neeg ntawd, tus twg yuav nyiam tus tswv nyiaj dua?"
43 Xis Moos teb tia : "Kuv xav mas yog tus uas tus tswv nyiaj zam nuj nqis ntau dua rau." Yes Xus hais rau Xis Moos tias: "Koj txiav raug lawm."
44 Yes Xus tig mus ntsia tus poj niam, nws hais rau Xis Moos tias: "Koj puas pom tus poj niam no? Kuv los hauv koj tsev, koj tsis tau hliv dej rau kuv ko taw, hos tus poj niam no, nws muab kua muag los ywg kuv ko taw, thiab nws muab nws cov plaub hau los so.
45 Koj tsis tau nwj kuv, hos tus poj niam no, txij thaum nws chaws los hauv no, mas nws nwj kuv ko taw tsis tseg.
46 Koj tsis tau hliv roj pleev kuv taub hau, hos tus poj niam no hliv tshuaj tsw qab ywg kuv ko taw.
47 Yog vim qhov ntawd, mas kuv hais rau koj tias, tus poj niam no cov txhaum ntau kawg, tab sis daws tas lawm, vim nws tau nyiam ntau; hos tus uas luag zam rau nws tsawg, mas nws kuj nyiam tsawg."
48 Ces Yes Xus hais rau tus poj niam tias: "Koj cov txhaum daws tas lawm."
49 Cov neeg tuaj koom rooj mov nyias xav nyias hauv nruab siab tias: "Tus ntawd yog leej twg, ua cas nws yuav daws txhaum tau?"
50 Yes Xus rov hais rau tus poj niam tias: "Koj lub siab ntseeg cawm koj lawm. Koj rov mus kaj siab lug mog."

Tim 17 lub 9 Hlis 2021

Hnub Rau Lis Piam Nees Nkaum Plaub Nruab Xyoo B Nruab Lis Piam Xyoo I
Lectionary: 447

XHLT: LN Hildegard nyob Bingen

Zaj Nyeem Ib: 1 TM 6: 2c-12

Tus zoo nyiad,
2c Koj yuav tsum qhia thiab txhib sawv daws kom ua raws li hais ntawd.
3 Yog muaj ib tug twg qhia lwm yam, tsis hais raws nraim li peb tus Huab Tais Yes Xus Pleev cov lus meej pem, thiab tsis raws li txoj kev cai teev hawm qhia,
4 mas nws yog ib tug neeg dig muag vim khav theeb muab hlob, tsis paub dab tsi; nws raug tus mob uas nyiam txoj kev siv lus los sib cav thiab sib ceg; tej lus ntawd ua kom muaj kev khib siab, muaj lus sib ceg, lus sib thuam, lus iab liam siab phem,
5 thiab muaj lus tsis sib haum ntawm cov neeg uas muaj lub tswv yim phem, tsis muaj qhov tseeb nyob hauv lawv, vim lawv saib kev hwm Ntuj yog ib txog kev nrhiav kom yus nplua nuj xwb.
6 Kev hwm Ntuj uas yog yus txaus siab rau qhov ntawd yeej coj ib yam kev nplua tuaj tiag.
7 Vim peb tsis tau nqa dab tsi los nyob ntiaj teb no li, peb kuj yuav nqaj tsis tau dab tsi thaum peb rov mus li.
8 Li ntawd, tsuav yog peb muaj txaus noj txaus hnav, mas peb yuav tsum txaus siab yuav li ntawd.
9 Hos cov neeg uas xav nplua nuj muaj nyiaj txiag ntau, mas lawv poob rau kev ntxias, lawv mag ib rooj ntxiab, thiab lawv poob rau ntau txoj kev ntshaw tsis muaj qab hau thiab tsis zoo , ces yuav coj kev xyob txhiaj thiab kev puas ntsoog tuaj raug lawv.
10 Vim lub hauv paus cag uas hlav txhua hom kev phem yog txoj kev nyiam nyiaj txiag. Qee leej qaug rau nyiaj txiag, ces lawv yuam kev mus deb ntawm txoj kev ntseeg, mas lawv rov muab ntau yam kev mob los chob lawv tus kheej.
11 Ntawm koj, uas yog Tswv Ntuj tus neeg, mas koj yuav tsum txav mus kom deb ntawm tej ntawd tas tib si. Koj xyaum taug txoj kev ua neeg ncaj ncees, kev hwm Ntuj, kev ntseeg zoo, kev nyiam luag, kev ua siab ntev, thiab kev ua siab mos siab zoo.
12 Koj ntaus ntsug rog zoo los pab kev ntseeg; koj yuav tsum txeeb kom tau txoj sia nyob mus li uas Ntuj hu koj los txais, thaum koj tau los lees coj txoj kev ntseeg rau coob leej ua tim khawv pom.

NPN 49: 6-7, 8-10, 17-18, 19-20

Txais: Cov tau txoj hmoov zoo yog cov pluag hauv nruab siab,
vim lub Ceeb Tsheej saum ntuj yog lawv li.

Viim li cas kuv thiaj yuav ntshai cov hnub nyoog phem
thaum cov neeg nkhaus tuaj vij ncig kuv?
Lawv yog cov tso siab rau lawv peev nyiaj txiag
lawv kev nplua nuj yog lawv qhov chaw khav.

Txais: Cov tau txoj hmoov zoo yog cov pluag hauv nruab siab,
vim lub Ceeb Tsheej saum ntuj yog lawv li.

Ib tug neeg yuav rov txhiv nws tus kheej tsis tau,
nws yuav them tus nqi txhiv nws rau Tswv Ntuj tsis tau.
Vim tus nqi them yus txoj sia hnyav dhau, yus yeej tsis muaj txaus ib zaug li
Kom yus thiaj muaj txoj sia nyob mus li thiab tsis pom txoj kev puas kev lwj.

Txais: Cov tau txoj hmoov zoo yog cov pluag hauv nruab siab,
vim lub Ceeb Tsheej saum ntuj yog lawv li.

Koj txhob ntshai thaum ib tug neeg txawj nplua nuj tuaj
thiab nws tsev neeg lub cuab tam huam vam tuaj.
Vim tias hnub nws tuag, nws yuav nqa tsis tau dab tsi li,
Tej nws muaj yuav tsis caum nws qab mus li.

Txais: Cov tau txoj hmoov zoo yog cov pluag hauv nruab siab,
vim lub Ceeb Tsheej saum ntuj yog lawv li.

Thaum ua neej nyob, nws qhuas tias nws hmoov zoo kawg:
"Luag tej yuav cav txog koj vim koj ua tau txhua yam zoo rau koj ! "
Nws kawg yuav rov mus cuag nws cov yawg koob,
Uas yuav tsis rov pom qhov pom kev ib zaug ntxiv.

Txais: Cov tau txoj hmoov zoo yog cov pluag hauv nruab siab,
vim lub Ceeb Tsheej saum ntuj yog lawv li.

As Les Lus Yas: MT 11: 25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: LK 8: 1-3

1 Yes Xus taug kev mus ntawm ib lub nroog los ib lub zos mus rau lwm lub. Nws qhia thiab tshaj lub Moo Zoo txog Tswv Ntuj lub Ceeb Tsheej. Pab Kaum Ob leeg nrog Yes Xus mus,
2 thiab kuj muaj ib co poj niam uas Yes Xus tau kho lawv dim ntawm dab phem thiab dim ntawm lawv tus mob lawm: muaj Mab Liab uas luag hu ua Mas Ntas Las, yog tus uas Yes Xus ntiab xya tus dab phem tawm hauv nws mus;
3 muaj Yos As Nas, uas yog Tshus Xas, Hes Los tus tim xyoob tus poj niam, muaj Xus Xas Nas thiab coob leej ntxiv. Lawv muab lawv lub cuab tam los tsob hwb Yes Xus thiab nws cov thwj tim.

Tim 18 lub 9 Hlis 2021

Hnub Xya Lis Piam Nees Nkaum Plaub Nruab Xyoo B Nruab Lis Piam Xyoo I
Lectionary: 448

Zaj Nyeem Ib: 1 TM 6: 13-16

Tus zoo nyiad,
13 Nyob ntawm Tswv Ntuj tus pub txoj sia rau txhua tsav txhua yam thiab nyob ntawm Leej Pleev Yes Xus xub ntiag, uas yog tus tau hais lo lus zeem tseeb ua pov thawj zoo nyob ntawm Poos Xyus Pis Las Tos xub ntiag, kuv tso txoj hauj lwm no rau koj ua:
14 yog kom koj khaws lo lus qhia kom zoo, txhob muaj qhov phem thiab txhob muaj chaw xyeej, mus txog hnub peb tus Huab Tais Yes Xus Pleev rov los,
15 tus uas thaum txog caij txog nyoog, Tswv Ntuj tus nto koob meej, thiab tus tseem tswj sawv daws yuav ua kom tawm los, uas yog tus Vaj kav tas tsoom vaj, tus Huab Tais kav tas tsoom huab tais.
16 Tsuas yog nws ib leeg xwb thiaj muaj txoj sia tsis txawj kawg ua nws tug, nws nyob txawm saum qhov pom kev uas neeg mus tsis txog, neeg tsis tau pom dua nws, thiab neeg pom tsis tau nws.
Kev nto koob meej thiab kev muaj hwj huam yog nws tug mus tas ib txhiab ib txhis! Ua li.

NPN 100:1b-2, 3, 4, 5

Txais: (2) Nej tuaj muaj kev zoo siab nyob ntawm Huab Tais xub ntiag.

Txhua lub teb chaws, nej cia li zoo siab hu nkauj rau HUAB TAIS.
Nej xyiv fab hlo luag ntxhi tsob hwb HUAB TAIS;
nej hu nkauj zoo siab chaws los ntawm nws xub ntiag.

Txais: (2) Nej tuaj muaj kev zoo siab nyob ntawm Huab Tais xub ntiag.

Nej yuav tsum paub tias HUAB TAIS yog Tswv Ntuj.
Nws tsim peb los, peb yog nws tug,
peb yog nws haiv neeg, yog pab yaj nws saib.

Txais: (2) Nej tuaj muaj kev zoo siab nyob ntawm Huab Tais xub ntiag.

Nej hla ntawm nws cov rooj vag mus, nej ua nws tsaug,
Nej mus hauv nws cov tshav loog, nej cav txog nws ;
nej ua nws tsaug, nej foom lus zoo rau nws lub npe.

Txais: (2) Nej tuaj muaj kev zoo siab nyob ntawm Huab Tais xub ntiag.

Vim nws muaj lub siab zoo:
HUAB TAIS txoj kev ua zoo yuav nyob mus li,
nws yuav ua ncaj rau txheej dhau txheej.

Txais: (2) Nej tuaj muaj kev zoo siab nyob ntawm Huab Tais xub ntiag.

As Les Lus Yas: LK 8: 15

Txais: As Les Lus Yas, as les lus yas.

Lawv muaj hmoov zoo cov uas muaj ib lub siab dav coj raws lo lus
thiab lawv txi txiv ncw vim lawv mob siab rau tsis tso tseg.

Txais: As Les Lus Yas, as les lus yas..

Ntawv Moo Zoo: LK 8: 4-15

4 Thaum ntawd muaj tej pab neeg coob coob tuaj sis sau ua ke, thiab muaj neeg tuaj hauv cov nroog tuaj cuag Yes Xus. Ces Yes Xus ua paj lug hais li no:
5 "Tus tseb nplej tawm mus tseb nws cov noob qoob noob loo. Thaum nws tseb, muaj ib co noob poob rau ntawm ntug kev, luag tsuj cov noob ntawd, thiab noog ya saum ntuj los noj tas lawm.
6 Muaj ib co noob poob rau saum pob zeb; cov yub nplej hlav tuaj, tab sis cia li qhuav tas, vim tsis muaj av noo.
7 Muaj ib co noob poob rau hauv cov pos, cov yub nplej nrog pos hlob ua ke, tab sis pos laum cov nplej tuag tas.
8 Muaj ib co noob poob rau hauv thaj av zoo, cov yub nplej hlob, thiab txi txiv txog pua lub." Yes Xus hais cov lus no tas, nws hais nrov nrov tias: "Leej twg muaj pob ntseg mloog, cia nws yeej meem mloog!"
9 Yes Xus cov thwj tim nug nws tias zaj paj lug no lub ntsiab yog dab tsi.
10 Yes Xus hais tias: "Ntuj pub kom nej paub txog tej txuj tob tob hauv Tswv Ntuj lub Ceeb Tsheej, tab sis rau luag tej, mas tsuas yog lus paj lug xwb, kom xwv lawv ntsia los lawv tsis pom, lawv hnov los lawv tsis to taub.
11 Zaj paj lug ntawd txhais li no: Cov noob, yog Tswv Ntuj Lo Lus.
12 Cov noob uas poob ntawm ntug kev, yog cov uas tau hnov, tab sis dab phem tuaj rho Lo Lus tawm hauv lawv lub siab mus, kom lawv txhob ntseeg, thiab txhob tau txais kev cawm.
13 Cov uas poob rau saum pob zeb, yog cov neeg uas thaum lawv hnov Lo Lus, lawv zoo siab hlo txais. Tab sis lawv tsis muaj cag, lawv tsuas ntseeg ib ntus xwb, lub caij lawv muaj kev sim siab, lawv cia li tso tseg.
14 Cov noob uas poob rau hauv hav pos yog cov neeg uas tau hnov Lo Lus, tab sis lawv lub neej tej kev txhawj xeeb, tej kev nrhiav nyiaj txiag, thiab tej kev ntshaw ua kom zoo yus siab laum Lo Lus, ces Lo Lus hlob tsis taus txi tsis taus txiv.
15 Hos cov noob poob hauv thaj av zoo, yog cov uas tau hnov Lo Lus, lawv khaws nkaus Lo Lus rau hauv lawv lub siab zoo siab dav, ces lawv txi txiv vim lawv lub siab ruaj nreb xyaum tas zog tsis tso tseg.

Tim 20 lub 9 Hlis 2021

Hnub Ob Lis Piam Nees Nkaum Tsib Nruab Xyoo B Nruab Lis Piam Xyoo I
Lectionary: 449

Yuav Hwm LN Andrew Kim Tae-gon thiab LN Paul Chong Ha-sang, thc… tuag ua Tim Khawv

Zaj Nyeem Ib: ES NRAS 1: 1-6

1 Thawj xyoo uas Kws Los pib ua vaj nyob Pes Xis teb, HUAB TAIS xav ua raws li nws lo lus uas Yes Les Mias tau hais, nws tuaj tshoj Kws Los tus vaj Pes Xis lub tswv yim, ces Kws Los thiaj tshaj ib co lus ceeb toom hais rau nws lub teb chaws tas tib si, thiab kuj muaj sau ua ntawv tias:
2 "Tus vaj Kws Los uas kav Pes Xis teb hais li no: ‘HUAB TAIS, tus Tswv lub ntuj, tau muab tas cov teb chaws nyob ntiaj teb rau kuv kav thiab nws xav kom kuv txhim ib lub Tuam Tsev teev nws nyob Yes Lus Xas Les, uas nyob Yus Das teb.
3 Li ntawd yog nej leej twg yog Tswv Ntuj haiv neeg, mas kom nej tus Tswv Ntuj nrog nej nyob, thiab kom nej mus lawm pem Yes Lus Xas Les uas nyob Yus Das teb, mus txhim lub Tuam Tsev teev HUAB TAIS uas yog His Xas Lais tus Tswv Ntuj, yog tus Tswv Ntuj nyob Yes Lus Xas Les.
4 Kom txhua tus neeg raug txim tuaj nyob qhov txhia chaw yuav tsum tau txais kev pab los ntawm cov neeg uas nrog nws myob, xws li pab nyiaj pab kub, pab toob xib pab tsiaj txhu, thiab tseem yuav pab tej yam ua paj tshab siab dawb coj mus fij rau Tswv Ntuj lub Tuam Tsev nyob Yes Lus Xas Les thiab."
5 Ces cov txiv tsev Yus Das thiab Npes Yas Mis, cov Leej Choj, cov Les Vis thiab tas cov neeg uas Tswv Ntuj tshoj lawv lub siab, sawv daws npaj mus pem Yes Lus Xas Les kom tau txhim HUAB TAIS lub Tuam Tsev.
6 Tas cov neeg nyob ncig lawv kuj pab lawv; luag muab tej twj taig nyiaj rau lawv thiab muab kub, muab toob xib, muab tsiaj rau lawv thiab pub ntau yam muaj nqes thiab ntau hom paj tshab pab rau lawv dawb dawb.

NPN 126: 1b-2ab, 2cd-3, 4-5, 6

Txais: (3) HUAB TAIS ua tej yam loj tas nrho rau peb.

Thaum HUAB TAIS coj Xis Yoos cov neeg nyob txim rov los,
peb zoo li ib co neeg ua npau suav.
Peb lub ncauj muaj suab luag nqhua,
peb tus nplaig qw zoo siab.

Txais: (3) HUAB TAIS ua tej yam loj tas nrho rau peb.

Tej pej kum cuab hais nroo ntws tias :
"HUAB TAIS ua tej yam loj tas nrho rau lawv !"
HUAB TAIS tau ua tej yam loj rau peb tiag,
peb zoo siab tas nrho.

m
HUAB TAIS, thov koj sau peb tej cuab yeej cuab tam rov qab los
zoo puav tam dej sab siv huam nyob teb chaws suab puam sab naj.
Cov neeg tseb nplej ntxuag kua muag,
lawv yuav sau nplej ntxuag kev zoo siab.

Txais: (3) HUAB TAIS ua tej yam loj tas nrho rau peb.

Thaum mus, lawv quaj kua muag poob,
vim lawv ris cov seev noob mus,
thaum rov los, lawv qw suab zoo siab,
vim lawv ris cov res nplej tshiab rov los.

Txais: (3) HUAB TAIS ua tej yam loj tas nrho rau peb.

As Les Lus Yas: MT 5: 16

Txais: As les lus yas, as les lus yas.

Cia nej qhov pom kev ci nyob ntawm zeej tsoom xub ntiag,
kom lawv pom nej cov dej num zoo, ces lawv yuav cav txog nej Txiv nyob saum ntuj.

Txais: As les lus yas, as les lus yas.

Ntawv Moo Zoo: LK 8: 16-18

Yes Xus hais rau cov pab neeg coob coob tias:
16 "Tsis muaj leej twg taws tau ib lub teeb, yuav muab ib lub thoob los khwb, los yuav muab txawb rau hauv qab txag. Luag tsuas muab txawb saum tus ncej teeb, kom xwv cov neeg nkag los hauv tsev pom kev.
17 Vim tias tsis muaj ib yam zais ntshis uas yuav tsis tshwm los, tsis muaj ib yam npog cia uas yuav tsis qhib los rau sawv daws paub thiab pom.
18 Ua li mas nej yuav ceev faj tias thaum nej hnov hais yog hnov li cas. Vim tias tus uas twb muaj lawm, tseem yuav tau txais ntxiv, hos tus tsis muaj, tab yog qhov nws xav tias nws muaj, tseem yuav raug muab rho tawm ntawm nws mus."

Tim 21 lub 9 hlis 2021

Hnub Peb Lis Piam Nees Nkaum Tsib Nruab Xyoo B Nruab Lis Piam Xyoo I

Hwm LN Mas Tais, tus Hauv Paus Xa Lus
Lectionary: 643

Zaj Nyeem Ib: ES FES XOS 4: 1-7, 11-13

Cov kwv tij nkauj muad:
1 Kuv, ib tug neeg raug txim pub rau Huab Tais, kuv thov txhawb nej, kom nej coj ib lub neej phim txoj kev uas Ntuj hu nej los taug.
2 Nej yuav ua neeg tsis muab hlob ua neeg siab mos siab zoo, nej yuav ua siab ntev ib leeg txhawb ib leeg nyob hauv txoj kev nyiam.
3 Nej yuav siv zog txuag kom nej muaj kev koom siab koom ib tug Leej Tswv Yim xwb nyob hauv txoj kev thaj yeeb,
4 kom tsuas muaj tib lub Cev thiab tib tug Leej Tswv Yim xwb, ib yam li nej raug hu los taug tib txog kev tso siab raws li Ntuj tau hu nej;
5 kom tsuas muaj tib tug Huab Tais, tib txoj kev ntseeg, tib lub cim ntxuav,
6 tib tug Tswv Ntuj ua sawv daws Txiv, tus nyob siab dua sawv daws, nws hla ntawm sawv daws tuaj, thiab nws nyob hauv sawv daws.
7 Peb nyias tau txais txiaj ntsim npaum li Leej Pleev luj pub rau nyias.
11 Nws pub kom ib txhia ua Hauv Paus Xa Lus, ib txhia ua Yaj Saub, ib txhia ua tub tshaj lub Moo Zoo, ib txhia ua tswv zov pab yaj thiab ua xib hwb,
12 kom muaj ntau txoj kev nyob hauv cov ntshiab los leg Tswv Ntuj tes dej num, kom tau txhawb txhim Leej Pleev lub Cev,
13 mus txog thaum peb sawv daws los koom tau ua ib leeg xwb nyob hauv txoj kev ntseeg thiab txoj kev paub Tswv Ntuj Leej Tub, ces peb yuav yog tus tib neeg hlob tiav txiv tiav txuj tiav ci, zoo raws nraim li Leej Pleev lub Cev uas loj hlob tiav log, siab txaus thiab puv ntoob lawm.

NPN 19: 2-3, 4-5

Txais: (5) Lawv lo lus xa moo nrov mus thoob ntiaj teb.

Cov txheej ntuj saud tshaj txog Tswv Ntuj lub koob meej,
lub qab ntuj khwb tshaj cov hauj lwm nws txhais tes tsim.
Nruab hnub hais lo lus rau nruab hnub mloog,
Hmo ntuj qhia rau hmo ntuj paub txog.

Txais: (5) Lawv lo lus xa moo nrov mus thoob ntiaj teb.

Tsis muaj ib lo lus los ib zaj lus piav
Uas leej tib neeg yuav tsis hnov txog.
Lawv lub suab yeej ncha puv tas ntiaj teb,
lawv lo lus xa moo nrov txog tim npoo ntiaj teb kawg.

Txais: (5) Lawv lo lus xa moo nrov mus thoob ntiaj teb.

As Les Lus Yas - Te Deum

Txais: As les lus yas, as les lus yas.

Tswv Ntuj, peb cav txog koj,
peb qw tshaj tias koj yog Huab Tais;
Npoj Hauv Paus Xa Lus uas
muaj koob meej lawv cav txog koj.

Txais: As les lus yas, as les lus yas.

Ntawv Moo Zoo: MT 9: 9-13

9 Yes Xus tawm mus, thaum nws tab tom taug kev hla ntawd, nws pom ib tug neeg hu ua Mas Tais, zaum ntawm lub rooj sau se. Yes Xus hais rau nws tias: "Koj raws kuv mus!" Ces tus neeg ntawd sawv tsees raws Yes Xus mus.
10 Thaum Yes Xus zaum noj mov hauv Mas Tais tsev, muaj coob leej neeg sau se thiab neeg txhaum tuaj nrog Yes Xus thiab cov thwj tim noj mov.
11 Cov Fas Lis Xais pom li ntawd, ces lawv hais rau cov thwj tim tias: "Vim li cas nej tus Xib Hwb nrog cov sau se thiab cov neeg txhaum noj mov?"
12 Tab sis Yes Xus twb hnov qhov lawv hais lawm, nws thiaj teb tias: "Tsis yog cov neeg noj qab nyob zoo thiaj yuav vam txog kws kho mob, tsuas yog cov neeg mob thiaj vam txog xwb.
13 Nej yuav tsum mus kawm lo lus no lub ntsiab: 'Qhov kuv xav tau yog txoj kev khuv leej, tsis yog thaj txi ntuj.' Vim kuv tsis yog tuaj hu cov neeg ncaj, hos kuv tuaj hu cov neeg txhaum.”

Tim 22 lub 9 Hlis 2021

Hnub Plaub Lis Piam Nees Nkaum Tsib Nruab Xyoo B Nruab Lis Piam Xyoo I
Lectionary: 451

Zaj Nyeem Ib: ES NRAS 9: 5-9

5 Thaum lub caij ua thaj txi Ntuj yav tsaus ntuj, kuv Es Nras sawv hauv kuv txoj kev tu siab loj los, kuv hnav kuv cev ris tsho thiab kuv lub tsho loj uas kuv twb dua rhe tas lawm, ces kuv txhos caug ntua, tsa tes rau Huab Tais, kuv tus Tswv Ntuj.
6 Kuv hais tias: “Kuv tus Tswv Ntuj aw, kuv poo ntsej muag thiab txaj muag dhau kuv tsis tsim nyog yuav tsa kuv lub ntsej muag tuaj rau koj li os, kuv tus Tswv Ntuj, vim peb cov txhaum ntau dhau siab tshaj peb taub hau lawm, thiab peb lub txim loj dhau siab mus txog saum ntuj lawm.
7 Txij puag thaum peb phaj txiv phaj yawg los txog hnub no, peb tau ua txhaum loj kawg nkaus. Vim peb tej kev txhaum, peb thiaj swb loj, peb thiab peb cov vaj thiab cov leej choj thiaj poob rau hauv cov pej kum vaj nyob hauv lub teb chaws tes, thiaj raug luag rab ntaj txo peb, raug luag coj mus nyob txim, raug luag lwg, thiab raug poob ntsej muag loj tas nrho xws li niaj hnub no.
8 Tiam sis lub sij hawm no, peb muaj ib lub caij luv luv tau txais kev khuv leej tuaj ntawm Huab Tais peb tus Tswv Ntuj tuaj; nws tau pub kom peb muaj ib pab seem dim los, thiab kom peb tau kev los nyob ruaj rau hauv nws thaj chaw ntshiab; ua li mas peb tus Tswv Ntuj tau ua kom peb ntsej muag rov kaj tuaj thiab kom peb tau kev dim me ntsis nyob hauv peb txoj kev ua luag qhev.
9 Peb ua luag qhev tiag, tiam sis peb tus Tswv Ntuj tsis tso peb pov tseg nyob hauv peb txoj kev ua qhev. Nws tau tig cov vaj Pes Xis lub siab kom los hlub peb, nws ua kom peb rov ciaj sia dua tuaj, peb thiaj tau rov los tsa peb tus Tswv Ntuj lub tsev thiab rov kho nws tej vaj tse uas vau tas; thiab nws tau pub kom peb muaj ib lub ntsa tiv thaiv peb nyob Yus das teb thiab nyob Yes Lus Xas Les.”

NPN: TOS NPIS 13: 2, 3-4a, 6def, 7, 8

Txais: (1b) Kom Tswv Ntuj nto koob meej, nws yog tus nyob mus li.

Nws nplua neeg thiab nws kuj khuv leej neeg;
nws thawb kom neeg poob lawm puag dab ntiag teb,
thiab nws kuj npo neeg puag hauv lub qhov ntuj tob tawm los.
Tsis muaj leej twg yuav khiav dim tau ntawm nws txhais tes.

Txais: (1b) Kom Tswv Ntuj nto koob meej, nws yog tus nyob mus li.

His Xas Lais tsoom tub ki, nej cav txog nws
nyob ntawm cov teev pej kum dab xub ntiag,
vim nws tau coj nej mus nyob xyaw lawv,
tiam sis nws tau ua tej yam loj los pab nej rau lawv pom.

Txais: (1b) Kom Tswv Ntuj nto koob meej, nws yog tus nyob mus li.

Nej yuav nco ntsoov tej yam nws tau ua los pab nej,
ces nej yuav siv tas nrho nej lub suab los cav txog nws.
Nej yuav cav txog tus Huab Tais muaj kev ncaj ncees,
nej yuav qhuas txog tus vaj uas nyob ib txhiab ib txhis.

Txais: (1b) Kom Tswv Ntuj nto koob meej, nws yog tus nyob mus li.

Thaum kuv raug mus nyob txim rau pej kum teb,
kuv cav txog Huab Tais;
kuv qhia txog nws lub hwj huam thiab hwj chim
rau ib haiv neeg txhaum paub.

Txais: (1b) Kom Tswv Ntuj nto koob meej, nws yog tus nyob mus li.

Tas nej cov uas Huab Tais tau xaiv, nej cav txog nws lub koob meej
tas nej sawv daws cia li cav txog nws lub hwj chim.
Nej qee tej lub hnub nyoog los ua kev zoo siab thiab cav txog nws.

Txais: (1b) Kom Tswv Ntuj nto koob meej, nws yog tus nyob mus li.

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej los txog ze lawm :
nej hloov siab, nej cia li ntseeg txog lub Moo Zoo.

Txais: As les lus yas, as les lus yas.

Ntawv Moo Zoo: LK 9: 1-6

1 Yes Xus hu Pab Kaum Ob los, nws muab hwj huam thiab peev xwm rau lawv kom lawv yuam tau txhua tus dab thiab kho tau mob kom zoo.
2 Ces nws xa lawv mus tshaj Tswv Ntuj lub Ceeb Tsheej thiab kho cov mob kom zoo.
3 Nws hais rau lawv tias: "Nej txhob nqa dab tsi taug kev, txhob nqa pas nrig, txhob ris hnab, txhob ntim mov, txhob nqa nyiaj, txhob nqa ib lub tsho faj seeb li.
4 Nej chaws mus hauv lub tsev twg, nej nyob hauv lub tsev ntawd mus txog hnub nej rov qab.
5 Hos cov neeg uas tsis txais nej, thaum nej tawm hauv lub nroog ntawd mus, mas nej nchos tej plua av lo nej ko taw huv si tseg cia ua pov thawj txog lawv."
6 Ces cov thwj tim sawv kev mus, lawv mus ib lub zos dhau ib lub zos, lawv tshaj lub Moo Zoo thiab kho cov mob nyob txhua qhov chaw zoo tas.

Tim      23      lub      9      Hlis      2021

Hnub Tsib Lis Piam Nees Nkaum Tsib Nruab Xyoo B Nruab Lis Piam Xyoo I
Lectionary: 452

Yuav Hwm LN Pis Yus nyob Pietrelcina (Padre Pio), ua Leej Choj

Zaj Nyeem Ib:       AS NKAIS  1:   1-8

1 Xyoo ob uas Das Lis Yus ua vaj, thaum lub rau hli xiab ib, HUAB TAIS lo lus tawm ntawm tus Yaj Saub As Nkais los hais rau Ntxos Los Npas Npes, uas yog tus nom kav lub xeev Yus Das thiab yog Sij Thias tub, thiab rau Yos Xuas, tus thawj Leej choj uas yog Yes Hos Xas Das tus tub tias:  
2 “Tus HUAB TAIS kav tsoom tshiab hais li no: ‘Haiv neeg no hais tias tsis tau txog caij rov tsa HUAB TAIS lub tsev.’”
3 Ces Huab Tais lo lus tawm hauv tus yaj saub As Nkais tuaj hais li no:  
4 “Puas yog lub caij rau nej tau zoo nyob hauv nej tej vaj tse xov txiag zoo zoo, hos lub tsev no nyob puas tsus cia?
5  Tus HUAB TAIS kav tsoom tshiab hais li no tias: Nej yuav xav txog nej tus cwj pwm mog!
6 Nej tau tseb noob ntau, tab sis nej sau tau tsawg los cia; nej noj mov lawm, tab sis nej tsis hnov tsau plab; nej haus dej haus cawv, tab sis ua tsis tau kom nej qaug li; nej muaj hnav, tab sis tsis sov nej. Hos tus txais nyiaj hli, nws tsuas yog khwv ntim rau hauv ib lub hnab to qab xwb!  
7 Tus HUAB TAIS kav tsoom tshiab hais li no: Nej yuav xav txog nej tus cwj pwm mog!
8 Nej kav tsij nce mus lawm pem toj siab, mus txiav ntoo los; nej yuav coj los tsa lub tsev, kom kuv muaj kev zoo siab nyob hauv lub tsev ntawd, thiab tau txais koob meej; Huab Tais hais li ntawd."

NPN       149:   1b-2, 3-4, 5-6a+9b

Txais: (4a) Huab Tais zoo siab nyob hauv nws haiv neeg.

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
His Xas Lais yuav zoo siab nyob hauv tus uas tsim lawv los,
Xis Yoos cov me nyuam yuav luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.

Lawv yuav ua kev lom zem yoj cev cav txog nws lub npe,
lawv yuav hu nkauj cav txog nws nrog suab nruas thiab suab nkauj nog ncas.
Vim HUAB TAIS hlub nws haiv neeg,
nws muab txoj kev yeej rau cov neeg me hnav ua zam.

Txais: (4a) Huab Tais zoo siab nyob hauv nws haiv neeg.

Cov muaj lub siab ntseeg yuav hom khaj nyob hauv txoj kev nto koob meej;
lawv yuav zaum ntawm lawv cov rooj ib hu nkauj zoo siab;
lawv lub ncauj yuav qw suab cav txog Tswv Ntuj.
Qhov no yog cov uas ntseeg nws lub koob meej. As les lus yas.

Txais: (4a) Huab Tais zoo siab nyob hauv nws haiv neeg.

As Les Lus Yas:       ZAM  14:   6

Txais: As les lus yas, as les lus yas.

Huab Tais hais tias: “Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis hla ntawm kuv mus.”

Txais: As les lus yas, as les lus yas.

Ntawv Moo Zoo:       LK  9:   7-9

7 Vaj txheeb Hes Los hnov txog txhua yam tshwm sim, nws tsis pom qab yuav xav li cas, vim muaj ib txhia neeg hais tias: "Yog Zam sawv hauv cov tuag rov los lawm."
8 Muaj qee leej hais tias: "Yog Es Lias tshwm sim los." Lwm cov tseem hais tias: "Yog ib tug yaj saub thaum ub sawv rov los lawm."
9 Tab sis Hes Los hais tias: "Zam, mas kuv kom luag txiav nws caj dab lawm. Ua li tus uas kuv hnov hais txog tias nws ua tej yam ntawd ho yog leej twg?" Ces Hes Los nrhiav kom tau kev pom Yes Xus.

Tim 24 lub 9 Hlis 2021

Hnub Rau Lis Piam Nees Nkaum Tsib Nruab Xyoo B Nruab Lis Piam Xyoo I
Lectionary: 453

Zaj Nyeem Ib: As Nkais 2: 1-9

1 Xyoo ob uas Das Lis Yus ua vaj, thaum lub xya hli xiab nees nkaum ib, HUAB TAIS lo lus tawm ntawm tus yaj saub As Nkais los hais li no:
2 “Koj hais rau tus nom kav lub xeev Yus Das, Ntxos Los Npas Npes, uas yog Sij Thias tub, thiab rau tus thawj leej choj Yos Xuas, uas yog Ye Hos Xas Das tub, thiab rau cov pej xeem seem tias :
3 ‘Nej cov uas tseem nyob, puas muaj tus tau pom lub Tuam Tsev no thaum nws tseem muaj koob meej yav thaum ub? Nyem no ne, nej pom lub Tuam Tsev no zoo li cas? Nej puas pom tias zoo li nws tsis zoo dab tsi li?
4 Tab sis nyem no, HUAB TAIS ceeb toom li no: Ntxos Los Npas Npes, koj ua siab loj mog! Yos Xuas, tus thawj leej choj uas yog Yes Hos Xas Das tub, koj ua siab loj mog! Tas tsoom pej xeem hauv lub teb chaws, nej ua siab loj mog! Nej rau siab ntso ua hauj lwm, vim kuv nrog nraim nej; tus HUAB TAIS kav tsoom tshiab li ntawd.
5 Raws nraim li thaum nej tawm ntawm Hais Nkws Tos teb los, kuv tau nrog nej cog lus lawm, kuv lub tswv yim yeej nyob nruab nrab hauv nej, mas nej tsis txhob ntshai.
6 Vim tus HUAB TAIS kav tsoom tshiab hais li no: Tshuav tsis ntev lawm, tshuav ib lub sij hawm luv luv xwb, kuv yuav diaj lub ntuj thiab lub ntiaj teb, cov hiav txwv thiab cov av qhuav kom ua zog koog.
7 Kuv yuav nchos cov kuj cuab tas huv tib si kom lawv tej nyiaj tej kub tuaj rau ntawm no, ces kuv yuav ua kom lub Tuam Tsev no muaj hwj chim puv npo; tus HUAB TAIS kav tsoom tshia hais li ntawd
8 Nyiaj yog kuv li, kub yog kuv tug; tus HUAB TAIS kav tsoom tshiab hais li ntawd.
9 Yav tom ntej lub Tuam Tsev no yuav nto koob meej tshaj yas tas los; tus HUAB TAIS kav tsoom tshiab hais li ntawd. Kuv yuav tso kev thaj yeeb tuaj rau nej nyob hauv thaj chaw no; tus HUAB TAIS kav tsoom tshiab hais li ntawd!’”

NPN 43: 1, 2, 3, 4

Txais: (5) Cia li tso siab rau Tswv Ntuj mog;
kuv yuav cav txog nws, kuv tus Tswv Ntuj kuv tus cawm seej.

Tswv Ntuj, thov koj txiav txim ncaj rau kuv,
thov koj tsa kuv cai nyob ntawm cov neeg tsis ntseeg xub ntiag.
Thov koj cawm kuv dim ntawm tus neeg dag thiab tus neeg phem.

Txais: (5) Cia li tso siab rau Tswv Ntuj mog;
kuv yuav cav txog nws, kuv tus Tswv Ntuj kuv tus cawm seej.

Tswv Ntuj, koj yog kuv lub zog,
vim li cas koj thiaj cia kuv nyob deb koj ua luaj?
Vim li cas kuv thiaj yuav tau quaj ntsuag
vim tus yeeb ncuab tsim txom kuv?

Txais: (5) Cia li tso siab rau Tswv Ntuj mog;
kuv yuav cav txog nws, kuv tus Tswv Ntuj kuv tus cawm seej.

Thov koj xa koj qhov pom kev thiab koj qhov tseeb tuaj
coj kuv kev kom mus txog saum lub roob koj txoj kev ntshiab,
thiab txog saum qhov chaw koj nyob txawm.

Txais: (5) Cia li tso siab rau Tswv Ntuj mog;
kuv yuav cav txog nws, kuv tus Tswv Ntuj kuv tus cawm seej.

Ces kuv yuav mus kom txog ntawm Tswv Ntuj lub thaj,
tus Tswv Ntuj uas yog kuv txoj kev zoo siab kev kaj siab.
Ces kuv yuav ntaus nkauj nog ncas cav txog koj ua koj tsaug,
Tswv Ntuj, kuv tus Tswv Ntuj.

Txais: (5) Cia li tso siab rau Tswv Ntuj mog;
kuv yuav cav txog nws, kuv tus Tswv Ntuj kuv tus cawm seej.

As Les Lus Yas: MK 10: 45

Txais: As les lus yas, as les lus yas.

Neeg Leej Tub tuaj kom tau tsob hwb sawv daws
thiab muab nws txoj sia los ua nqi txhiv coob leej.

Txais: As les lus yas, as les lus yas.

Ntawv Moo Zoo: LK 9: 18-22

18 Muaj ib zaug, Yes Xus mus nyob ib leeg teev ntuj, cov thwj tim txawm sib sau los nyob ncig nws. Yes Xus nug lawv tias: "Tsoom sid hais tias kuv yog leej twg?"
19 Cov thwj tim teb tias: "’Zam Ntxuav Plig,’ ib txhia hais tias ‘Es Lias,’ tseem muaj lwm cov hais tias ‘ib tug yaj saub thaum ub sawv rov lo lawm.’"
20 Yes Xus hais rau lawv tias: "Nej ne, nej hais tias kuv yog leej twg?" Pob Zeb teb tias: "Koj yog Tswv Ntuj Leej Pleev."
21 Ces Yes Xus cheem thiab txwv lawv kom txhob hais qhov ntawd rau leej twg paub.
22 Yes Xus tseem hais tias: "Neeg Leej Tub yuav tsum raug txom nyem loj. Cov txwj laus, cov Thawj Leej Choj, thiab cov Kws Ntawv Ntshiab yuav muab nws tshem tawm; nws yuav raug luag tua, ces hnub peb nws yuav sawv rov los."

Tim 25 lub 9 Hlis 2021

Hnub Xya Lis Piam Nees Nkaum Tsib Nruab Xyoo B Nruab Lis Piam Xyoo I
Lectionary: 454

Zaj Nyeem Ib: NTXAS KAS LIAS 2: 5-9, 14-15a

5 Kuv, Ntxas Kas Lias, tsa muag ntsia, kuv pom muaj ib tug txiv neej tuav ib txog hlua ntsuas ntawm tes.
6 Kuv nug nws tias: "Koj yuav mus qhov twg?" Nws teb kuv tias: "Mus ntsuas Yes Lus Xas Les saib nws dav li cas thiab nws ntev li cas."
7 Ces tus Tshiab uas nrog kuv hais lus txawm txav zoj mus pem hauv ntej, hos muaj dua lwm tus tshiab tawm tuaj ntsib nws, hais rau nws tias:
8 "Koj khiav mus hais rau tus tub hluas ntawd tias: Neeg yuav nyob Yes Lus Xas Les qhib lug xws li pem tej zej zos, vim yuav muaj neeg coob thiab tsiaj coob nyob hauv Yes Lus Xas Les."
9 Tiam sid kuv yuav yog ib lub ntsa loog hluav taws nyob ncig Yes Lus Xas Les tas tib si, HUAB TAIS hais li ntawd, thiab kuv yuav yog lub hwj chim nyob hauv nws.
14 Leej Ntxhais Xis Yoos, koj cia li hu nkauj thiab zoo siab mog! Koj ntsia saib kuv tuaj lawm, kuv yuav tuaj nyob hauv koj;” HUAB TAIS hais li ntawd
15a Hnub ntawd, ntau haiv neeg yuav los koom nrog HUAB TAIS, lawv yuav ua nws haiv neeg; ces nws yuav nyob nruab nrab hauv nej nrog nej nyob.

NPN : YLM 31: 10, 11-12ab, 13

Txais: (10d) Huab Tais yuav saib peb nraim xws li tus tswv zov yaj saib nws pab yaj.

Txhua haiv neeg, nej mloog Huab Tais lo lus,
nej coj mus tshaj rau cov pov txwv nyob deb, nej hais tias:
“Nws tau cia His Xas Lais tawg mus rau ntau qhov,
nyem no nws rov sau lawv los ua ke,
nws saib lawv xws li tus tswv zov yaj saib nws pab yaj.”

Txais: (10d) Huab Tais yuav saib peb nraim xws li tus tswv zov yaj saib nws pab yaj.

Huab Tais yuav txhiv Yas Kos,
nws yuav txhiv lawv ntawm tus neeg tuaj kav lawv txhais tes los.
Lawv yuav qw ntsuag qees nce mus saum cov ncov roob Xis Yoos,
lawv yuav tuaj laub lug tuaj mus txais Huab Tais lo lus foom hmoov zoo.

Txais: (10d) Huab Tais yuav saib peb nraim xws li tus tswv zov yaj saib nws pab yaj.

Ces cov ntxhais nkauj xwb yuav yoj cev yees dhia lom zem,
cov tub hluas thiab cov laus neeg kuj yuav ua ib yam.
Kuv yuav muab lawv tej kev tu siab ntxeev ua kev zoo siab,
kuv yuav chawj lawv nplij lawv thaum lawv dhau kev txom nyem lawm.

Txais: (10d) Huab Tais yuav saib peb nraim xws li tus tswv zov yaj saib nws pab yaj.

As Les Lus Yas: 2 TM 1: 10

Txais: As les lus yas, as les lus yas.

Peb tus Cawm Seej Yes Xus Pleev tau rhuav txoj kev tuag,
thiab ua kom txoj sia tawm los nyob hauv lub Moo Zoo.

Txais: As les lus yas, as les lus yas.

Ntawv Moo Zoo: LK 9: 43b-45

43b Sawv daws qhuas kawg txog txhua yam Yes Xus tau ua, ces nws hais rau nws cov thwj tim tias:
44 "Nej ua tib zoo cuab pob ntseg khaws kuv cov lus no cia: Neeg Leej Tub yuav raug luag muab nws rau hauv tsoom neeg txhais tes."
45 Tab sis cov thwj tim tsis to taub lo lus ntawd, muaj dab tsi ntis kom lawv txhob to taub lub ntsiab, tiam sis lawv ntshai nug Yes Xus txog lo lus ntawd.

Tim 27 lub 9 Hlis 2021

Hnub Ob Lis Piam Nees Nkaum Rau Nruab Xyoo B Nruab Lis Piam Xyoo I
Lectionary: 455

Yuav Hwm LN Vincent de Paul. ua Leej Choj

Zaj Nyeem Ib: NKL 8: 1-8

1 Tus HUAB TAIS kav tsoom tshiab lo lus nrov tuaj.
2 Tus Huab Tais kav tsoom tshiab hais li no: "Kuv khib Xis Yoos kawg nkaus, kuv lub siab muaj txoj kev khib npau taws heev vim nws.”
3 HUAB TAIS hais li no: "Kuv yuav rov los cuag Xis Yoos, kuv yuav los nyob hauv Yes Lus Xas Les. Ces Yes Lus Xas Les yuav hu ua lub tsheej muaj kev ntseeg, tus HUAB TAIS kav tsoom tshiab lub roob , lub Roob Ntshiab."
4 Tus HUAB TAIS kav tsoom tshiab hais li no: "Cov yawg laus thiab cov pog laus ib leeg yuav nrig ib rab pas ntawm tes, vim lawv hnub nyoog nchav, lawv tseem yuav rov tau tuaj zaum nyob ntawm Yes Lus Xas Les tej tshav puam,.
5 Tej tshav nyob hauv lub tsheej yuav muaj me nyuam tub me nyuam ntxhais tuaj nyob ua si zom zaws puv ntia hauv cov tshav ntawd."
6 Tus HUAB TAIS kav tsoom tshiab hais li no: "Yog cov seem ntawm haiv neeg no saib qhov ntawd yog ib yam hwj huam loj thaum lub caij ntawd, mas kuv puas yuav saib tias yog ib yam muaj hwj huam loj thiab?"
7 Tus HUAB TAIS kav tsoom tshiab hais li no: "Ntsia saib, kuv yuav cawm kuv haiv neeg dim ntawm cov teb chaws nyob sab hnub tuaj thiab ntawm cov teb chaws nyob sab hnub poob.
8 Kuv yuav coj lawv rov los nyob txawm rau hauv Yes Lus Xas Les. Lawv yuav yog kuv haiv neeg, kuv yuav yog lawv tus Tswv Ntuj nyob hauv txoj kev pheej xeeb thiab txoj kev ncaj."

NPN 102: 16-18, 19-21, 29+22-23

Txais: (17) Huab Tais yuav rov txhim tsa Xis Yoos dua,
thiab nws yuav tawm tuaj nyob hauv tas nws lub hwj chim.

HUAB TAIS, cov haiv neeg yuav hwm koj lub npe,
thiab tas cov vaj nyob ntiaj teb yuav ntshai koj lub hwj chim,
thaum HUAB TAIS rov txhim Xis Yoos,
thiab nws tawm tuaj nyob hauv tas nws lub hwj chim;
thaum nws tig los mloog cov neeg txom nyem tej lus thov,
thiab tsis thuam lawv zaj teev ntuj.

Txais: (17) Huab Tais yuav rov txhim tsa Xis Yoos dua,
thiab nws yuav tawm tuaj nyob hauv tas nws lub hwj chim.

Nej sau tej no cia rau tiam neeg yuav los yav tom ntej,
cov neeg HUAB TAIS yuav tsim los yav tom ntej thiaj yuav cav txog nws tias:
“HUAB TAIS nyob saum nws thaj chaw ntshiab nyob siab dauv muag los saib;
HUAB TAIS nyob saum txheej ntuj siab saud ntsia los rau ntiaj teb,
ces nws mloog cov neeg nyob txim lub suab ntsaj,
nws tso cov yuav raug tua kom dim kev tuag.”

Txais: (17) Huab Tais yuav rov txhim tsa Xis Yoos dua,
thiab nws yuav tawm tuaj nyob hauv tas nws lub hwj chim.

Koj cov tub txib tej me nyuam yuav nyob ruaj nreb,
lawv cov xeeb ntxwv yuav nyob ntawm koj xub ntiag mus li.
Kom sawv daws tshaj HUAB TAIS lub npe nyob saum Xis Yoos,
thiab cav lus zoo txog nws nyob Yes Lus Xas Les;
thaum ntawd cov haiv neeg yuav sib sau los nyob ua ke,
cov ceeb tsheej yuav sib txoos los tsob hwb HUAB TAIS.

Txais: (17) Huab Tais yuav rov txhim tsa Xis Yoos dua,
thiab nws yuav tawm tuaj nyo hauv tas nws lub hwj chim.

As Les Lus Yas: MK 10: 45

Txais: As les lus yas, as les lus yas.

Neeg Leej Tub tuaj kom tau tsob hwb sawv daws,
thiab muab nws txoj sia los ua nqi txhiv coob leej.

Txais: As les lus yas, as les lus yas.

Ntawv Moo Zoo: LK 9: 46-50

46 Thaum ntawd cov thwj tim muaj lus sib cav tias nyob hauv lawv, leej twg yog tus loj dua cov.
47 Yes Xus paub qhov lawv xav hauv nruab siab, nws thiaj rub ib tug me nyuam los nyob ze nws,
48 Ces nws hais rau lawv tias: "Leej twg txais tus me nyuam no vim kuv lub npe, mas yog nws txais kuv. Hos leej twg txais kuv mas yog nws txais Tus xa kuv tuaj. Vim tias tus me tshaj nyob hauv nej sawv daws, tus ntawd thiaj yog tus loj dua cov."
49 Zam txawm teb tias: "Xib Hwb, peb pom ib tug neeg hu txog koj lub npe los ntiab dab phem. Peb tau txwv nws, vim nws tsis raws nrog peb ua ke."
50 Yes Xus hais rau Zam tias: "Nej tsis txhob txwv nws, vim tus twg tsis tiv nej, nws yog nej tog."

Tim     28     lub     9     Hlis     2021

Hnub Peb Lis Piam Nees Nkaum Rau Nruab Xyoo B Nruab Lis Piam Xyoo I
Lectionary: 456

XHLT:  LN Lawrence Ruiz thc… los LN Wenceslaus, tuag ua Tim Khawv

Zaj Nymeem Ib:      NKL  8:   20-23.

20 Tus HUAB TAIS kav tsoom tshiab hais li no: "Tseem yuav muaj neeg tuaj ntxiv, cov neeg nyob hauv ntau lub nroog yuav tuaj.
21 Cov nyob hauv ib lub nroog yuav mus lawm lwm lub nroog, lawv yuav sib hu tias: ‘Tuaj peb mus thov Huab Tais lub siab zoo, peb mus cuag tus HUAB TAIS kav tsoom tshiab! Kuv kuj yuav mus thiab.’”
22 Ntau haiv neeg ntau lub kuj cuab muaj hwj xyeej yuav tuaj nrhiav tus HUAB TAIS kav tsoom tshiab nyob Yes Lus Xas Les, thiab tuaj thov nws lub siab zoo.
23 Tus HUAB TAIS kav tsoom tshiab hais li no: "Lub caij ntawd, yuav muaj kaum tus neeg nyob hauv txhua xeem lus hauv cov haiv neeg yuav tuav nkaus ib tug neeg Yus Das tw tsho ruaj ruaj, ces lawv yuav hais rau nws tias: ‘Peb yuav nrog koj mus thiab, vim peb hnov hais tias Tswv Ntuj nrog nej nyob.’"

NPN       87:   1b-3, 4-5, 6-7

Txais:  (NKL 8: 23) Tswv Ntuj nrog peb nyob.

Xis Yoos raug txhim rau saum cov roob ntshiab;
Huab Tais nyiam nws cov rooj vag
tshaj tas nrho Yas Kos tej vaj tse.
Neeg hais ntau yam zoo qhuas txog koj tiag,
Tswv Ntuj lub tsheej!

Txais:  (NKL 8: 23) Tswv Ntuj nrog peb nyob.

Kuv yuav hais txog Las Has thiab
Npas Npis Los rau cov uas paub HUAB TAIS,
yuav hais txog Fis Lis Tis, Tws Los, thiab
Es Thias Pias tias: “Tus no yug nyob ntawd".
Tiam sis luag yuav hais txog Xis Yoos tias:
“Txhua leej txhua tus yug los nyob ntawd,
Hos tus tau tsa nws kom nyog ruaj khov
yog tus Huab Tais nyob siab.”

Txais:  (NKL 8: 23) Tswv Ntuj nrog peb nyob.

Luag yuav sau rau hauv phau ntawv txheeb npe tias :
"Tus neeg no yug los nyob ntawd."
Tas txhua tus neeg yuav seev cev dhia hu nkauj tias:
“Kuv lub tsev yog nyob hauv koj.”

Txais:  (NKL 8: 23) Tswv Ntuj nrog peb nyob.

As Les Lus Yas:       MK  10:   45

Txais:   As les lus yas, as les lus yas.

Neeg Leej Tub tuaj yog tuaj kom tau tsob hwb sawv daws
thiab muab nws txoj sia los ua nqi txhiv coob leej.

Txais:   As les lus yas, as les lus yas.

Ntawv Moo Zoo:        LK  9:   51-56

51 Thaum lub sij hawm uas Yes Xus yuav ncaim mus los txog lawm, nws ua siab tawv qhawv mus pem Yes Lus Xas Les.
52 Yes Xus xa ib co tub fi xov ua nws ntej mus. Thaum lawv mus txog ib tog kev, lawv nkag hauv ib lub zos Xas Mas Lias kom tau npaj txhua yam rau lawv yuav tos txais Yes Xus.
53 Tab sis cov Xas Mas Lias tsis kam txais nws, vim nws npaj yuav mus pem Yes Lus Xas Les.
54 Lawv pom li ntawd ces ob tug thwj tim Yas Kos thiab Zam nkawd hais tias: "Huab Tais, koj puas xav kom peb hu ib co hluav taws nqes saum ntuj los hlawv lawv?"
55 Tab sis Yes Xus tig los cem nkawd.
56 Ces lawv mus ntxiv rau lwm lub zos.

Tim 29 lub 9 Hlis 2021

Hnub Peb Lis Piam Nees Nkaum Rau Nruab Xyoo B Nruab Lis Piam Xyoo I

Koo Tsheej Hwm cov Tuam Tshiab LN Miv Kas (Michael), Nkas Nplias (Gabriel), thiab Las Fais (Raphael)
Lectionary: 647

Zaj Nyeem Ib: DN 7: 9-10, 13-14

9 Kuv ntsia ntsoov:
Pom lawv muab ib co theej kiab los txawb rau ntawd,
ces tus Laus hnub nyoog nchav los zaum saum nws lub theej kiab;
nws cov ris tsho dawb cuag daus,
nws cov plaub hau saum taub hau dawb paug cuag plaub yaj;
nws lub theej kiab yog ib co nplaim taws,
muaj ib co log hluav taws cig lam lug.
10 Muaj ib tug dej hluav taws txhawv
ntawm nws xub ntiag ntawm qhov chaw nws zaum los.
Txhiab txhiab leej tsob hwb nws,
vam vam leej sawv ntsug nyob ntawm nws xub ntiag.
Lub rooj txiav txim zaum txhij vog, tej ntaub ntawv twb nthuav tas lawm.
13 Thaum hmo ntuj, kuv tseem yees pom zoo li no:
Tuaj saum cov huab tuaj zoo li yog ib tug Neeg leej Tub.
Nws tuaj mus rau ntawm tus Laus,
ces lawv coj nws mus qhia rau tus Laus.
14 Ces tus Neeg Leej Tub txais lub hwj chim tswj kav, lub koob meej thiab kev ua vaj.
Tas txhia haiv neeg, txhia lub kuj cuab, txhia xeem lus yuav tsum tsob hwb nws.
Nws txoj kev tswj kav yog ib txog kev tswj kav nyob mus li yuav tsis txawj kawg.
Nws txoj kev ua vaj yuav tsis muaj leej twg rhuav tau.

Los QYTN 12: 7-12ab

7 Muaj ib nthwv rog nyob saum ntuj: yog Miv Kas thiab nws cov Tshiab ua rog ntaus tus Zaj; tus Zaj thiab nws cov dab kuj ua rog tiv lawv thiab.
8 Tab sis tus Zaj tsis yeej, ces tus Zaj thiab nws cov dab tsis tau kev nyob saum ntuj ntxiv.
9 Niag Zaj loj, niag nab txheej thaud uas tseem hu ua Dab Phem thiab hu ua Xas Tas, uas yog tus ntxias tas ntiaj teb neeg , nws raug muab cuam pov rau hauv ntiaj teb thiab nws cov dab kuj raug pov nrog nws huv tib si.
10 Ces kuv hnov ib lub suab nrov nroo ntws nyob saum ntuj tias: “Zaum no, peb tus Tswv Ntuj txoj kev cawm, lub hwj huam, thiab txoj kev ua vaj los txog lawm, thiab nws leej Pleev txoj kev tswj kav los txog lawm. Vim tus niag uas liam rau peb cov kwv tij raug muab ntiab tawm lawm, nws yog tus liam rau lawv nyob ntawm peb tus Tswv Ntuj xub ntiag nruab hnub hmo ntuj.
11 Lawv tau ntaus yeej nws nyob hauv Leej Yaj cov ntshav, thiab vim lawv lo lus ua tim khawv; lawv tsis khuv xim lawv txoj sia lawv tuaj yeem txais kev tuag.
12 Vim li ntawd mas cov txheej ntuj saud thiab tas cov uas nyob saum ntuj, nej cia li zoo siab!”

NPN 138: 1-2AB, 2CDE-3, 4-5

Txais: (1) HUAB TAIS, kuv yuav cav txog koj nyob ntawm tsoom tshiab xub ntiag.

Kuv yuav ua koj tsaug tas kuv lub siab ntsws, HUAB TAIS,
vim koj tau hnov kuv lub ncauj cov lus thov;
kuv yuav hu nkauj cav txog koj nyob ntawm tsoom tshiab xub ntiag;
kuv yuav tuaj pe hawm koj nyob hauv koj lub tuam tsev ntshiab
thiab yuav ua tsaug rau koj lub npe.

Txais: (1) HUAB TAIS, kuv yuav cav txog koj nyob ntawm cov tshiab xub ntiag.

Vim koj txoj kev ua zoo thiab koj txoj kev tseeb,
koj tau muab koj lub npe thiab koj txoj kev cog lus
ua qhov loj tshaj tas txhua yam.
Thaum kuv hu, koj tau teb kuv,
koj ntxiv zog rau kuv kom kuv muaj zog tuaj.

Txais: (1) HUAB TAIS, kuv yuav cav txog koj nyob ntawm cov tshiab xub ntiag.

HUAB TAIS, tas ib tsoom vaj nyob ntiaj teb yuav ua koj tsaug,
thaum lawv hnov koj cov lus koj lub ncauj tau hais.
Lawv yuav cav lus zoo txog HUAB TAIS tej kab tej kev tias:
"HUAB TAIS lub hwj chim loj tas nrho!”

Txais: (1) HUAB TAIS, kuv yuav cav txog koj nyob ntawm cov tshiab xub ntiag.

As Les Lus Yas: NPN 103: 21

Txais: As les lus yas, as les lus yas.

Tas ib tsoom tshiab, nej cav lus zoo txog Huab Tais,
Nej yog nws cov tub khiav dej num ua ywj nws lub siab.

Txais: As les lus yas, as les lus yas.

Ntawv Moo Zoo: ZAM 1: 47-51

47 Yes Xus pom Nas Tas Nais tuaj, nws hais txog Nas Tas Nais, nws hais tias: "Nej saib, tus ntawd yog ib tug tseem His Xas Lais uas tsis zais siab li."
48 Nas Tas Nais hais rau Yes Xus tias: "Ua cas koj paub kuv?" Yes Xus teb rau Nas Tas Nais tias: "Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias lawm."
49 Nas Tas Nais teb rau Yes Xus tias: "Las Npis, koj yog Tswv Ntuj Leej Tub tiag! Koj yog His Xas Lais tus Vaj."
50 Yes Xus hais rau nws tias : "Yog vim kuv hais rau koj tias, kuv pom koj nyob hauv tsob qab ntoo txiv ncuav pias, mas koj thiaj ntseeg, puas yog? Koj yuav pom tej yam loj dua no ntxiv."
51 Ces Yes Xus hais rau Nas Tas Nais tias: "Kuv hais qhov muaj tseeb tiag rau nej: Nej yuav pom lub ntuj qhib los, thiab pom Tswv Ntuj cov Tshiab nce mus thiab nqes los nyob saum Neeg Leej Tub.”

Tim 30 lub 9 Hlis 2021

Hnub Tsib Lis Piam Nees Nkaum Rau Nruab Xyoo B Nruab Lis Piam Xyoo I
Lectionary: 458

Yuav Hwm LN Jerome, Leej Choj thiab Kws cov Txuj Ntshiab

Zaj Nyeem Ib: NHM 8: 1-4a, 5-6, 7b-12

1 Tas tsoom pej xeem sawv daws tuaj sib txoos ua ke xws li yog ib leeg xwb nyob ntawm lub tshav ntawm lub Rooj Vag Dej. Lawv kom tus thoob xwm ntawv Es Nras nqa phau ntawv Mais Xes txoj cai uas HUAB TAIS tau muab rau cov His Xas Lais tuaj.
2 Ces tus Leej Choj Es Nras nqa txoj cai tuaj tso ntawm lub txoos xub ntiag, muaj cov txiv neej, cov poj niam thiab tas cov uas yuav to taub zoo thaum lawv hnov cov lus; hnub ntawd yog hnub xiab ib lub xya hli.
3 Es Nras nyeem ntawv tig ntsia ntsoov lub tshav nyob ncaj ntawm lub rooj vag Dej, txij thaum nyuam qhuav kaj ntug mus txog tav su; nws nyeem rau cov txiv neej cov poj niam thiab cov uas yuav to taub zoo. Sawv daws cug pob ntseg zoo zoo los mloog txoj cai.
4a Tus thoob xwm ntawv Es Nras sawv nyob saum ib lub sam thiaj ntoo uas lawv txhob txwm npaj rau lub sij hawm ntawd.
5 Es Nras qhib phau ntawv rau sawv daws pom, vim nws nyob qhov chaw siab dua sawv daws. Thaum nws qhib phau ntawv mas tsoom sid sawv daws sawv.
6 Es Nras pib cav txog HUAB TAIS, tus Tswv Ntuj uas loj tas nrho; tas sawv daws tsa tes rau saum ntuj thiab teb tias : "Ua li! Ua li!" Ces tas tsoom pej xeem nyo taub hau txhos caug pe HUAB TAIS, lawv ntsej muag khoov ti av.
7b Ces tsoom pej xeem nyob twj ywm ntawm lawv qhov chaw.
8 Es Nras nyeem Tswv Ntuj txoj cai nyob hauv ntawv kom meej meej thiab txhais lub ntsiab kom sawv daws to taub zoo.
9 Ces Nes Hes Mis tus nom tswj xeev thiab tus leej choj thoob xwm Es Nras thiab cov Les Vis uas yog cov qhuab qhia cov neeg, lawv hais rau tas tsoom pej xeem tias: "Hnub no, yog ib hnub ntshiab rau HUAB TAIS nej tus Tswv Ntuj! Nej tsis txhob nyob tej tug mluas mlob, tsis txhob quaj!" Lawv hais li no vim thaum sawv daws hnov cov lus nthuav txoj cai mas sawv daws quaj.
10 Nws tseem hais ntxiv tias: "Nyem no, nej mus noj cov txhiam xws qab , haus cov cawv qab zib, nej nqa ib feem mus faib rau cov npaj tsis tau dab tsi; vim hnub no yog ib hnub ntshiab rau peb tus HUAB TAIS. Nej tsis txhob tu siab, vim kev zoo siab nyob hauv Huab Tais yuav tsum yog nej lub zog!"
11 Cov Les Vis kom tsoom sid nyob twj ywm, lawv hais tias: "Nej tswm seeb vim hnub no yog ib hnub ntshiab, nej txhob tu siab."
12 Ces tas tsoom pej xeem mus noj mus haus; lawv xa txhiam xws noj rau cov tsis muaj, sawv daws ua kev zoo siab loj, vim lawv to taub cov lus uas tau muab nthuav tawm rau lawv mloog.

NPN 19: 8, 9, 10, 11

Txais: (9ab) Huab Tais cov lus qhia ua tau kom neeg zoo siab.

HUAB TAIS txoj cai zoo tas nrho,
nws ntxiv siav rau tus ntsuj plig;
HUAB TAIS tus txhooj tsim nyog yuav,
nws ua kom tus neeg ruam thoob tsib tuaj.

Txais: (9ab) Huab Tais cov lus qhia ua tau kom neeg zoo siab.

HUAB TAIS cov lus qhuab qhia yog lus ncaj
ua kom neeg muaj kev zoo siab.
HUAB TAIS lo lus meej kawg nkaus,
ua kom qhov muag pom kev.

Txais: (9ab) Huab Tais cov lus qhia ua tau kom neeg zoo siab.

Kev hwm HUAB TAIS yog txoj kev dawb huv,
kev hwm Huab Tais yuav nyob mus li.
HUAB TAIS cov lus txiav txim yog lus tseeb,
Txhua lo lus nws txiav yog qhov ncaj.

Txais: (9ab) Huab Tais cov lus qhia ua tau kom neeg zoo siab.

Nws cov lus txiav txim tsim nyog ntshaw dua kub,
Tsim nyog ntshaw dua ib txhab tseem kub,
qab zib dua cov kua zib,
los cov zib mu ntawm daim nas muv.

Txais: (9ab) Huab Tais cov lus qhia ua tau kom neeg zoo siab.

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej los txog ze lawm :
nej cia li hloov siab thiab ntseeg txog lub Moo Zoo.

Txais: As les lus yas, as les lus yas.

Ntawv Moo Zoo: LK 10: 1-12

1 Yes Xus tseem xaiv xya caum ob leeg thwj tim, nws xa lawv mus tej pab ob leeg, ua nws ntej mus rau hauv cov nroog thiab tej qhov chaw uas nws yuav mus.
2 Nws hais rau lawv tias: "Qoob loo zoo sau muaj ntau kawg, tab sis cov tub zog muaj tsawg. Nej thov tus Tswv qoob kom nws xa ib co tub zog tuaj sau nws cov qoob.
3 Nej mus, kuv xa nej zoo li ib co yaj mus nyob nruab nrab ib cov hma.
4 Nej tsis txhob nqa nas nyiaj, txhob ris hnab, txhob nqa khau, txhob hais lus hu leej twg ntawm kev li.
5 Nej chaws mus hauv lub tsev twg, nej xub hais tias: ‘Kom lub tsev no nyob kaj lug!’
6 Yog muaj ib tug neeg nyiam txoj kev kaj lug nyob ntawd, mas nej txoj kev kaj lug yuav nyob saum nws. Yog tsis muaj, mas nej txoj kev kaj lug yuav rov los rau nej.
7 Nej nyob hauv lub tsev ntawd, nej noj nej haus tej yam uas lawv muaj, vim tus tub zog tsim nyog txais nqi zog. Nej txhob tawm hauv ib lub tsev mus nyob dua lwm lub.
8 Nej mus hauv lub nroog twg, yog luag txais nej, nej noj tej yam uas luag muab rau nej.
9 Nej kho cov neeg mob hauv lub nroog ntawd kom zoo, thiab nej hais rau lawv tias: ‘Tswv Ntuj lub Ceeb Tsheej tuaj txog nej lawm.’
10 Tab sis yog nej mus hauv lub nroog twg, luag tsis txais nej, nej tawm mus nraum tej kev nej hais tias:
11 ‘Tab yog tej plua av uas lo peb ko taw, peb muab nchos tseg tib si cia ua tim khawv txog nej. Tab sis, nej yuav tsum paub tias Tswv Ntuj lub Ceeb Tsheej tuaj txog ze lawm.’
12 Kuv hais rau nej tias, thaum hnub ntawd, lub nroog Xos Dos Mas yuav raug txim sib dua lub nroog ntawd.”

Tim 1 lub 10 Hli 2021

Thawj Hnub Rau Lis Piam Nees Nkaum Rau Nruab Xyoo C Nruab Lis Piam Xyoo I
Lectionary: 459

Yuav Hwm LN Thérèse of the Child Jesus, Virgin and Doctor of the Church

Zaj Nyeem Ib: NPAS LWS 1: 15-22

Cov His Xas Lais nyob txim nyob Npas Npis Los sau ntawv qhia rau cov nyob Yes Lus Xas Les tias lawv yuav tsum thov ntuj li cas:
15 “Nej yuav hais li no: ‘Txoj kev ncaj yog Huab Tais peb tus Tswv Ntuj li, tiam sis txoj kev txaj muag xws li niaj hnub no yog peb tug, yog peb cov neeg nyob Yus Das teb thiab cov nyob Yes Lus Xas Les tug,
16 yog peb cov vaj, peb cov nom tswv, peb cov Leej Choj, peb cov Yaj Saub thiab peb cov yawg koob sawv daws tug,
17 vim peb tau ua txhaum rau peb tus Huab Tais,
18 peb tau tawv ncauj tsis mloog nws lus, thiab peb tsis mob siab coj raws li Huab Tais peb tus Tswv Ntuj lo lus tias kom peb ua raws li Huab Tais cov lus qhia uas nws muab rau peb.
19 Txij hnub Huab Tais coj peb cov yawg koob tawm ntawm Hais Nkws Tos teb los txog hnub no, peb tau tawv ncauj tsis mloog Huab Tais peb tus Tswv Ntuj lus, peb tau tsis ua raws li nws qhia, tsis kam mloog nws lub suab hais.
20 Vim li ntawd, los txog hnub no, peb thiaj raug cov xwv txheej thiab cov lus tsawm uas Huab Tais hais rau nws tus tub txib Mais Xes, lub caij nws coj peb cov yawg koob tawm hauv Hais Nkws Tos teb los, kom tau muab ib lub teb chaws uas mis nyuj thiab zib mu ntws lug rau peb .
21 Peb tsis tau mloog Huab Tais peb tus Tswv Ntuj cov lus uas cov Yaj Saub nws tau xa tuaj hais rau peb.
22 Peb nyias tau coj raws li nyias lub siab nkhaus nyiam, peb tau mus teev hawm lwm cov dab qhuas, thiab peb tau ua tej yam uas Huab Tais peb tus Tswv Ntuj saib yog phem.’"

NPN 79: 1b-2, 3-5, 8, 9

Txais: (9) Huab Tais, thov koj cawm peb kom koj lub npe nto koob meej.

Tswv Ntuj, cov kuj cuab tau tuaj tsuj koj lub cuab tam lawm,
lawv tau ua tsis zoo rau koj lub tuam tsev ntshiab,
lawv tau rhuav tsoo Yes Lus Xas Les pob tag.
Lawv tau muab koj cov tub txib lub cev
pub rau cov noog ya saum ntuj noj,
muab koj cov ntseeg lub cev pub
rau ntiaj teb cov tsiaj qus dua.

Txais: (9) Huab Tais, thov koj cawm peb kom koj lub npe nto koob meej.

Lawv tau nchuav koj cov ntseeg tej roj ntshav zoo li dej
Uas ntws sis laub sis lug ncig Yes Lus Xas Les,
tsis muaj leej twg yuav faus lawv lub cev li.
Cov neeg nyob ze peb ua tub qaug peb,
cov nyob ncig peb thuam peb luag peb.
HUAB TAIS, koj yuav npau taws hov ntev rau peb?
Koj puas yuav npau tas mus li?
Koj txoj kev khib siab puas yuav kub cuag hluav taws?

Txais: (9) Huab Tais, thov koj cawm peb kom koj lub npe nto koob meej.

Thov koj txhob nco txog peb tej txhaum peb ua yav dhau los,
muab koj lub siab khuv leej neeg tuaj pab peb sai sai,
vim peb poob rau qhov qis kawg nkaus lawm.

Txais: (9) Huab Tais, thov koj cawm peb kom koj lub npe nto koob meej..

Tswv Ntuj peb tus cawm seej, thov koj pab peb mas,
vim koj lub npe muaj koob meej nto moo lug;
Thov cawm peb thiab zam peb cov txhaum rau peb
kom koj lub npe nto moo zoo mus li.

Txais: (9) Huab Tais, thov koj cawm peb kom koj lub npe nto koob meej.

As Les Lus yas: NPN 95: 8

Txais: As les lus yas, as les lus yas.

Hnub no, yog nej hnov nws lub suab,
Tsis txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo: LK 10: 13-16

Yes Xus hais rau lawv tias:
13 “Kos Las Xis, koj txoj hmoov phem! Npes Xais Das, koj txoj hmoov phem! Vim cov hwj huam yees ntxwv tshwm sim nyob hauv neb kheev lam yog tshwm sim nyob Tws Los thiab Xis Doos, mas ntshai lawv twb hnav ntaub tsaj thiab zaum hauv plua tshauv ntev los lawm, thiab twb hloov siab hloov ntsws lawm.
14 Li ntawd mas Tws Los thiab Xis Doos yuav tau raug txim sib dua neb thaum txog lub caij txiav txim.
15 Hos Koj, Kas Fas Naus, luag puas yuav tsa koj siab txij ntuj? Koj ces twb yuav poob rau hauv dab ntiag teb.
16 Yog leej twg mloog nej, mas yog nws mloog kuv; leej twg tsis txais nej, mas kuj yog nws tsis txais kuv. Leej twg tsis txais kuv, mas yog nws tsis txais tus xa kuv tuaj."

Tim 2 lub 10 Hli 2021

Thawj Hnub Xya Lis Piam Nees Nkaum Rau Nruab Xyoo B Nruab Lis Piam Xyoo I
Lectionary: 460

Yuav Hwm cov Tshiab Pov Hwm (Mus saib cov zaj nyeem nram qab)

Zaj Nyeem Ib: NPAS LWS 4: 5-12, 27-29

5 "Kuv haiv neeg, nej ua siab loj! Nej yog pab neeg ua kom luag nco tias tseem tshuav haiv His Xas Lais.
6 Nej raug muag rau cov kuj cuab, tsis yog yuav ua kom nej ploj mus tas, tiam sis nej poob rau hauv cov yeeb ncuab txhais tes yog vim nej tau ua Huab Tais npau taws.
7 Nej tau ua kom tus tsim nej los npau taws, vim nej ua tej thaj txi dab phem, nej tsis txi Tswv Ntuj.
8 Nej tsis nco qab tus Tswv Ntuj nyob mus li, uas yog tus tau muab zau mua mlov rau nej noj; nej tau ua kom Yes Lus Xas Les tu siab, nws twb yog tus tau tu nej hlob.
9 Yes Lus Xas Les yog tus tau pom tias Tswv Ntuj txoj kev npau taws yuav tuaj raug nej, nws hais tias : ‘Nej cov uas nyob ze Xis Yoos nej mloog mas, Tswv Ntuj tau tso kev tu siab loj tuaj raug kuv!
10 Vim kuv tau pom tus muaj txoj sia nyob mus li tso txoj kev mus nyob txim tuaj raug kuv cov tub thiab cov ntxhais.
11 Kuv zoo siab tu lawv kom loj hlob, tiam sis kuv quaj thiab tu siab thaum kuv tso lawv mus.
12 Kom tsis txhob muaj leej twg hnyos kuv vim kuv yog ib tug poj ntsuam uas muaj coob leej ncaim mus lawm. Kuv nyob ib tug twm zeej muaj kev tu siab, yog vim kuv cov me nyuam tejn txhaum, vim lawv tau ncaim ntawm Tswv Ntuj Txoj Cai lawm.
27 Kuv cov me nyuad, nej ua siab loj,nej hu txog Tswv Ntuj mog! Tus tau tso tej no tuaj raug nej nws yeej yuav rov nco txog nej xwb.
28 Vim nej lub siab tau feeb mus rau txoj kev ncaim deb ntawm Tswv Ntuj lawm, nyem no nej yuav tsum tig rov los kub siab lug nrhiav nws zoo dua yav thaud kaum npaug ntxiv.
29 Ces tus uas tau tso tej xwv txheej no tuaj raug nej, nws yuav cawm nej thiab pub txoj kev zoo siab uas yuav kav ntev rau nej.”

NPN 69: 33-35, 36-37

Txais: (34) HUAB TAIS mloog cov pluag lo lus thov.

Nej cov neeg me, nej saib, ces nej yuav zoo siab;
Nej cov uas nrhiav Tswv Ntuj, nej txhob ntaus siab me;
Vim HUAB TAIS mloog cov pluag zaj lus thov;
nws tsis ntxub nws cov neeg uas raug luag kaw.
Kom lub ntuj lub teb cav lus zoo txog nws,
Kom cov hiav txwv thiab txhua yam mus mus
los los nyob hauv cov hiav txwv qhuas txog nws!

Txais: (34) HUAB TAIS mloog cov pluag lo lus thov.

Tswv Ntuj yuav cawm Xis Yoos,
nws yuav rov txhim cov tsheej hauv Yus Das teb.
Lawv yuav nyob hauv lub teb chaws,
lawv yuav nyob thiab yuav tau lub teb chaws ua lawv tug.
Tswv Ntuj cov tub txib tej xeeb leej xeeb ntxwv yuav tau
lub teb chaws los ua lawv lub cuab tam;
cov uas nyiam Tswv Ntuj lub npe yuav tau nyob hauv lub teb chaws.

Txais: (34) HUAB TAIS mloog cov pluag lo lus thov.

As Les Lus Yas: MT 11: 25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: LK 10: 17-24

17 Pab xya caum ob leeg rov qab los txog, lawv zoo siab kawg, lawv hais rau Yes Xus tias: "Huab Tais, tab yog cov dab phem, tsis kav lawv mloog peb lus vim koj lub npe."
18 Yes Xus hais rau lawv tias: "Kuv twb pom Xas Tas poob saum ntuj los xws li ib kab xob laim lawm!
19 Ntsia saib, kuv twb pub hwj huam rau nej lawm, mas nej tsuj tau nab, tsuj tau kab lij tshooj, thiab tsuj tau Yeeb Ncuab lub hwj huam tib si, yuav tsis muaj dab tsi ua xwv txheej tau rau nej li.
20 Txawm li ntawd los nej tsis txhob zoo siab vim cov dab mloog nej lus, nej yuav zoo siab vim nej lub npe raug muab sau cia rau saum ntuj lawm."
21 Tib lub sij hawm ntawd, Yes Xus zoo siab tas nrho nyob hauv Leej Tswv Yim Ntshiab, nws hais tias: "Kuv cav lus zoo txog koj, Leej Txiv, Huab Tais kav lub ntuj lub teb, vim koj tau zais tej ntawd ntawm cov neeg thoob tsib thiab cov neeg ntse, koj muab qhib rau cov neeg me paub. Txiv, vim koj yeej nyiam ua li ntawd.
22 Kuv Txiv tau muab tas ib puas tsav yam rau kuv lawm. Tsis muaj leej twg paub tias Leej Tub yog tus twg, kawg yog Leej Txiv thiaj paub. Tsis muaj leej twg paub tias Leej Txiv yog tus twg, kawg yog Leej Tub thiaj paub, thiab yog tus uas Leej Tub xav qhia rau kom paub xwb."
23 Yes Xus tig los hais rau nws cov thwj tim nkaus xwb tias: "Cov qhov muag uas pom tej yam nej pom no tau txoj hmoov zoo !
24 Kuv hais rau nej tias coob tus yaj saub thiab coob tus vaj xav pom qhov uas nej pom, tab sis lawv tsis tau pom, xav hnov tej uas nej hnov, tab sis lawv tsis tau hnov."

*****************

YUAV HWM IB TSOOM TSHIAB POV HWM
Lectionary: 650

Yog xav xaiv zaj nyeem ib thiab zaj nkauj paj nruag tshwj xeeb rau hnub hwm ib tsoom Tshiab Pov Hwm raws li nram no los tau:

Zaj Nyeem Ib: KT 23: 20-23

HUAB TAIS hais li no:
20 "Ntsias saib, kuv xa kuv tus tshiab mus ua nej ntej, kom nws pov hwm nej ntawm txoj kev thiab coj nej mus kom txog qhov chaw uas kuv tau npaj lawm.
21 Nej yuav mob siab rau cuab pob ntseg mloog nws thiab ua raws li nws hais. Nej tsis txhob sawv tiv nws, vim nws yuav tsis zam nej qhov txhaum rau nej; vim kuv lub npe nyob hauv nws.
22 Yog tias nej kub siab mloog nws lus thiab ua trxhua yam uas kuv hais rau nej, mas kuv yuav ua yeeb ncuab rau nej cov yeeb ncuab, kuv yuav sawv tiv cov uas sawv tiv nej.
23 Kuv tus tshiab yuav mus ua nej ntej, thiab coj nej mus txog cov neeg As Mos Lis, cov neeg His Tis, cov neeg Pes Lis Xis, cov neeg Kas Nas Has, cov neeg His Vis, thiab cov neeg Yes Npus Xis, ces kuv yuav muab lawv tua kom tu noob tas.”

NPN 91: 1-2, 3-4ab, 4c-6, 10-11

Txais: (11) HUAB TAIS yuav txib nws cov tshiab
kom zov koj txuag koj hauv txhua txoj kev koj taug.

Koj, tus tsa tsev rau hauv tus Nyob Siab lub chaw nkaum,
Tus uas pw hauv tus Muaj Hwj Huam qhov ntxoov,
Koj hais txog HUAB TAIS tias
"Kuv qhov chaw nkaum, kuv lub yeej ntsa zeb,
kuv tus Tswv Ntuj, tus kuv tso siab rau."

Txais: (11) HUAB TAIS yuav txib nws cov tshiab
kom zov koj txuag koj hauv txhua txoj kev koj taug.

Nws yuav cawm koj dim ntawm tus cuab noog lub vas,
thiab npo koj ntawm tus mob aws tsis zam siav.
Nws yuav muab nws ob phab tis los vov koj,
Koj yuav tau chaw nkaum nyob hauv nws ob phab tis.

Txais: (11) HUAB TAIS yuav txib nws cov tshiab
kom zov koj txuag koj hauv txhua txoj kev koj taug.

Nws txoj kev pheej xee yog daim leem phiaj, yog lub tsho hlau;
Koj yuav tsis ntshai ntuj teb tag hmo tej vij sub vij sw,
tsis ntshai xib xub uas ya nruab hnub nrig tuaj.
Koj yuav tsis ntshai tus mob aws uas yuj hauv qhov tsaus,
tsis ntshai tej xwm txheej raug kab mob thaum tav su nrig.

Txais: (11) HUAB TAIS yuav txib nws cov tshiab
kom zov koj txuag koj hauv txhua txoj kev koj taug.

Qhov phem yuav tsis tuaj nphav txog koj,
Kev txom nyem yuav tsis txav los ze koj lub tsev tsam phooj,
Vim HUAB TAIS tau txib nws cov tshiab
Kom lawv zov koj hauv txhua txoj kev koj taug.

Txais: (11) HUAB TAIS yuav txib nws cov tshiab
kom zov koj txuag koj hauv txhua txoj kev koj taug.

As Les Lus Yas: NPN 103: 21

Txais: As les lus yas, as les lus yas.

Nej cav lus zoo txog HUAB TAIS, nej uas yog nws tsoom tshiab,
nej uas yog nws cov tub txib ua ywj nws lub siab.

Txais: As les lus yas, as les lus yas.

Ntawv Moo Zoo: MT 18: 1-5, 10

1 Lub caij ntawd cov thwj tim txav los ze Yes Xus, lawv hais rau nws tias: “Leej twg yog tus loj dua nyob hauv lub Ceeb Tsheej saum ntuj?”
2 Yes Xus hu ib tug me nyuam los, nws coj tus me nyuam los nyob hauv nruab nrab lawv,
3 nws hais tias: “Kuv hais tseeb rau nej, yog nej tsis hloov los coj xws li ib co me nyuam, mas nej yuav mus tsis tau hauv lub Ceeb Tsheej saum ntuj.
4 Leej twg rov saib nws me xws li tus me nyuam no, tus ntawd yog tus loj dua cov nyob hauv lub Ceeb Tsheej saum ntuj.
5 Leej twg txais ib tug me nyuam zoo li tus no vim kuv lub npe, mas yog nws txais kuv.
10 Nej ceev faj, tsis txhob thuam ib tug me nyuam yaus li tus no, kuv hais rau nej tias, vim nyob saum ntuj, lawv cov Tshiab yeej ntsia ntsoov kuv Txiv nyob saum ntuj lub ntsej muag mus li.”

Tim 4 lub 10 Hli 2021

Hnub Ob Lis Piam Nees Nkaum Xya Nruab Xyoo B Nruab Lis Piam Xyoo I
Lectionary: 461

Yuav Hwm LN Francis nyob Assisi

Zaj Nyeem Ib: YOS NAS 1: 1–2:1-2, 11

1 HUAB TAIS lo lus nrov tuaj rau Yos Nas, As Mis Tais tus tub tias :
2 "Koj sawv, koj mus lawm tom lub tuam tsheej loj Nis Nis Vas; koj mus hais lus cem lub tsheej, vim lawv txoj kev phem nce tuaj txog kuv lawm."
3 Yos Nas sawv los, tiam sis nws khiav mus rau Tas Xis kom deb ntawm HUAB TAIS. Nws mus nram Yos Pes, nws nrhiav tau ib lub nkoj yuav mus Tas Xis. Nws them nqe kev rau lawv ces nws nce hauv lub nkoj nrog lawv mus Tas Xis, kom deb ntawm HUAB TAIS.
4 Tab sis HUAB TAIS tso cua hlob tuaj nplawm lub hiav txwv, ces cua daj cua dub sawv loj loj tuaj ntsawj lub hiav txwv ua kom lub nkoj yuav luag tawg tas.
5 Cov tub nquam nkoj ntshai, lawv nyias thov nyias tus tswv ntuj kom tuaj pab. Lawv muab cov toob xib pov tseg rau hauv dej kom lub nkoj sib tuaj. Hos Yos Nas ces nws nqes mus hauv sab hauv qab lub nkoj nws mus pw tsaug zog hauv lawm.
6 Lawv tus tsav nkoj thiaj los hais rau Yos Nas tias: "Koj tseem pw tsaug zog xwb lod ? Koj sawv los thov koj tus Tswv Ntuj mas! Tej zaum Tswv Ntuj yuav nco txog peb, ces peb yuav tsis tuag."
7 Ces lawv sib tham tias: "Peb ntaus kuam saib saib yog leej twg coj xwv txheej tuaj rau peb." Lawv txawm ntaus kuam, ces raug rau Yos Nas.
8 Lawv hais rau Yos Nas tias: "Koj sim qhia peb saib koj ua txoj hauj lwm dab tsi? Koj nyob qhov twg tuaj? Koj lub teb chaws yog lub twg? Koj yog haiv neeg dab tsi?"
9 Yos Nas teb lawv tias: "Kuv yog ib tug Hes Nplaws, kuv teev HUAB TAIS, tus Tswv lub ntuj uas tsim lub hiav txwv thiab tsim thaj av qhuav."
10 Cov nquam nkoj ntshai kawg, lawv hais rau Yos Nas tias: "Ua cas koj ua li ntawd ?” Vim lawv twb paub tias yog nws khiav mus deb ntawm HUAB TAIS, nws twb xub hais qhia rau lawv li ntawd lawm .
11 Lawv nug Yos Nas tias: "Peb yuav ua li cas rau koj kom lub hiav txwv rov tus yees tuaj?” Vim lub hiav txwv haj yam nphau loj zuj zus xwb.
12 Nws teb rau lawv tias: "Nej nqa kuv muab kuv pov rau hauv lub hiav txwv, ces dej yuav tus rau nej. Kuv paub tias yog tim kuv mas cua thiaj hlob li no rau nej."
13 Lawv xub sim siv zog nquam lub nkoj rov los rau tim ntug nqhuab, tab sis tsis tau li vim dej nphau heev dhau.
14 Ces lawv quaj thov HUAB TAIS tias: "HUAB TAIS, peb thov koj tsis txhob cia peb tuag vim peb txo tus neeg no txoj sia. Koj tsis txhob suav txim rau peb tias peb tau ua kom ib co ntshav tsis muaj txhaum ntws, vim koj yog tus ua rau nws raws li koj nyiam."
15 Ces lawv nthos nkaus Yos Nas thiab muab nws pov rau hauv hiav txwv; tam sis ntawd lub hiav txwv tus yees tuaj.
16 Lawv ntshai HUAB TAIS kawg nkaus, ces lawv txi ib co txim rau HUAB TAIS, thiab lawv fiv ib co yeem rau nws.
2: 1 Tiam sis HUAB TAIS ua kom ib tug ntses loj loj tawm tuaj nqos Yos Nas; Yos Nas nyob hauv tus ntses lub plab tau peb hnub peb hmos.
2 Yos Nas nyob hauv tus ntsev lub plab thov Huab Tais nws tus Tswv Ntuj.
11 Ces Huab Tais thiaj hais kom tus ntses muab Yos Nas ntuav tawm los tso rau saum ntug nqhuab.

NPN: YOS NAS 2: 3, 4, 5, 8

Txais: (7) Huab Tais, koj yuav npo kuv tawm hauv lub qhov ntuj los.

Thaum kuv muaj kev nyuaj siab mtxhov hnyo,
kuv quaj hu HUAB TAIS, nws teb kuv.
Nyob hauv ntuj txias teb tsaus lub qab plab,
kuv tau thov koj pab, koj hnov kuv lub suab.

Txais: (7) Huab Tais, koj yuav npo kuv tawm hauv lub qhov ntuj los.

Koj muab kuv pov rau puag hauv qab tiv txwv,
Puag hauv plawv nruab dej ntuj,
Dej loj nphau nphwv los nyab kuv;
Koj ua kom dej sawv tej niag twv nphau npog luas los vov kuv.

Txais: (7) Huab Tais, koj yuav npo kuv tawm hauv lub qhov ntuj los.

Kuv thiaj hais tias: “Yog kuv nyob deb ntawm
koj lub ntsej muag lawm!
Li ntawd los kuv tseem yuav rov tig
mus saib koj lub Tuam Tsev Ntshiab.”

Txais: (7) Huab Tais, koj yuav npo kuv tawm hauv lub qhov ntuj los.

Thaum kuv tus plig hauv kuv looj hlias lawm,
kuv nco dheev txog kuv tus HUAB TAIS;
ces kuv zaj thov ntuj nce tuaj txog koj
nyob hauv koj lub Tuam Tsev Ntshiab.

Txais: (7) Huab Tais, koj yuav npo kuv tawm hauv lub qhov ntuj los.

As Les Lus Yas: ZAM 13: 34

Txais: As les lus yas, as les lus yas.

Kuv muab ib lo lus qhia tshiab rau nej tias:
nej yuav tsum sib nyiam sib hlub ib yam li kuv tau nyiam tau hlub nej.

Txais: As les lus yas, as les lus yas.

Ntawv Moo Zoo: LK 10: 25-37

25 Muaj ib tug Kws Lij Choj sawv, nws xav sim Yes Xus, ces nws nug tias: "Xib Hwb, kuv yuav ua dab tsi thiaj tau txais txoj sia nyob mus li los ua kuv lub cuab tam?"
26 Yes Xus hais rau nws tias: "Nyob hauv Txoj Cai muaj dab tsi sau tseg? Koj nyeem hais li cas?”
27 Tus Kws Lij Choj teb tias: "Koj yuav nyiam Huab Tais koj tus Tswv Ntuj, tas koj siab ntsws, tas koj ntsuj plig, tas koj lub zog, tas koj lub tswv yim, thiab koj yuav nyiam tus nyob ze koj ib yam li koj nyiam koj.”
28 Yes Xus hais rau nws tias: "Koj teb raug lawm. Koj ua li ntawd, ces koj yuav muaj txoj sia."
29 Tab sis tus Kws Lij Choj xav cav kom nws yog tus hais yog, ces nws hais rau Yes Xus tias: "Leej twg yog tus nyob ze kuv?”
30 Yes Xus thiaj hais ntxiv tias: "Muaj ib tug neeg nqes ntawm Yes Lus Xas Les mus rau nram Yes Lis Kos, nws ntsib ib pab tub sab, lawv muab nws tej ris tsho hle, muab nws ntaus sab sab, ces lawv mus lawv lawm, tso nws tseg tshuav txoj sia xwb.
31 Muaj ib tug Leej Choj taug txoj kev ntawd nqes tuaj tom thawj, nws pom tus raug mob, nws lug kev hla mus lawm.
32 Muaj ib tug Les Vis ho tuaj txog ntawd, nws pom tus raug mob, nws kuj lug kev hla mus lawm thiab.
33 Tab sis ib tug Xas Mas Lias mus tawm rooj tuaj txog ze ntawm tus raug mob, nws pom nws hlub tus raug mob.
34 Nws txav los ntawm tus raug mob, nws hliv roj thiab hliv cawv rau nws cov qhov txhab, nws muab qhwv rau. Nws tsaws tus raug mob caij nws tus luj, ces nws coj tus raug mob mus txog ib lub tsev txais qhua, nws tu tus raug mob nyob ntawd.
35 Hnub tom qab, nws rho tau ob lub txiaj nyiag rau tus saib lub tsev txais qhua, nws hais tias: ‘Koj tu tus neeg mob no, yog koj siv tshaj qhov kuv muab no lawm, kuv yuav them rov rau koj thaum kuv rov qab los.’
36 Raws li koj xav, lawv peb leeg no, leej twg ua tus nyob ze tus neeg uas poob rau hauv tub sab tes?"
37 Tus Kws Lij Choj hais tias: "Yog tus uas tau khuv leej tus raug mob." Ces Yes Xus hais rau nws tias: "Koj mus, koj ua ib yam li ntawd thiab."

Tim     5     lub     10     Hli     2021

Hnub Peb Lis Piam Nees Nkaum Xya Nruab Xyoo B Nruab Lis Piam Xyoo I
Lectionary: 462

XHLT:  LN Faustina Kowalska, nkauj tsim txiaj;
tus Tau Hmoov Zoo Francis Xavier Seelos

Zaj Nyeem Ib:   YOS NAS 3: 1–10

1 HUAB TAIS lo lus nrov tuaj rau Yos Nas zaum ob tias:  
2 "Koj sawv, koj yuav mus kom txog lub tuam tsheej Nis Nis Vas thiab koj yuav tshaj tej lus uas kuv yuav hais rau koj rau lawv."
3 Ces Yos Nas sawv los npaj, thiab nws sawv kev mus rau Nis Nis Vas raws li Huab Tais hais. Lub tsheej Nis Nis Vas yog ib lub tsheej loj dav kawg nkaus, yuav mus li peb hnub ke thiaj hla tshab lub tsheej.
4 Yos Nas pib nkag mus hla hauv lub nroog, nws mus li ib hnub ke, ke mus ke qw hais rau lawv tias: "Tshuav plaub caug hnub ntxiv xwb mas lub tsheej Nis Nis Vas yuav tawg tas."
5 Ces cov neeg nyob Nis Nis Vas ntseeg Tswv Ntuj, lawv ceeb toom rau tsoom sid tias kom sawv daws ua kev yoo mov, thiab kom tas sawv daws npua ntaub tsaj, tsis hais tus hlob los tus yau li."
6 Thaum tus vaj kav Nis Nis Vas tau hnov cov lus ntawd, nws sawv ntawm nws lub theej kiab mus, nws hle nws tej ris tsho tseg, nws muab ntaub tsaj los npua, nws mus zaum hauv cov plua tshauv.
7 Ces nws kom lawv tshaj ib lo lus ceeb toom nyob txhua qhov hauv lub tsheej Nis Nis Vas, los ntawm tus vaj thiab nws cov tub nom tub tswv los tias: "Tej neeg, tej tsiaj txhu, tsis hais nyuj yaj los qaib npua, sawv daws yuav tsis txhob noj dab tsi li, tsis noj txhiam xws tsis haus dej li.
8 Tsis hais tus neeg los tus tsiaj, yuav tsum npua ntaub tsaj thiab yuav siv zog hu txog Tswv Ntuj tas zog. Nyias yuav tso nyias txoj kev phem pov tseg thiab tso txoj kev ua txhaum ntawm nyias txhais tes tseg.
9 Ces nyaj tej zaud Tswv Ntuj siab yuav nqig, nws yuav tso nws txoj kev npau taws tseg, ces peb sawv daws yuav tsis tuag."
10 Thaum Tswv Ntuj pom qhov cov neeg nyob Nis Nis Vas ua, lawv tau tso lawqv txoj kev ua txhaum tseg, ces Tswv Ntuj thim nws txoj kev xav ua phem rau lawv, nws tsis ua raws li nws tau npaj.

NPN   130: 1b-2, 3-4ab, 7-8

Txais: (3) Huab Tais, yog koj cim ntsoov peb cov txhaum, leej twg thiaj yuav nyob taus?

Kuv nyob hauv qab tiv txwv hu txog koj, HUAB TAIS,
HUAB TAIS, thov koj mloog kuv lub suab!
Thov koj cuab pob ntseg mloog kuv lo lus thov koj.

Txais: (3) Huab Tais, yog koj cim ntsoov peb cov txhaum, leej twg thiaj yuav nyob taus?

HUAB TAIS, yog koj cim ntsoov peb cov txhaum,
leej twg thiaj yuav nyob taus, HUAB TAIS?
Tab sis nyob ntawm koj muaj kev zam txhaum,
kom sawv daws thiaj hwm koj.

Txais: (3) Huab Tais, yog koj cim ntsoov peb cov txhaum, leej twg thiaj yuav nyob taus?

His Xas Lais, koj yuav tos ntsoov HUAB TAIS,
Vim nyob ntawm HUAB TAIS muaj txoj kev ua siab zoo,
thiab nyob ntawm nws muaj txoj kev cawm ntau ntws lug;
nws yuav cawm His Xas Lais ntawm tas lawv tej kev txhaum.

Txais: (3) Huab Tais, yog koj cim ntsoov peb cov txhaum, leej twg thiaj yuav nyob taus?

As Les Lus Yas:    LK 11: 28

Txais: As les lus yas, as les lus yas.

Cov muaj hmoov zoo yog cov uas mloog
Tswv Ntuj Lo Lus thiab ua raws li ntawd,

Txais: As les lus yas, as les lus yas.

Ntawv Moo Zoo:    LK 10: 38-42

38 Thaum lawv taug kev, Yes Xus nkag mus hauv ib lub zos. Muaj ib tug poj niam hu ua Mas Tas txais Yes Xus los hauv nws tsev.
39 Tus poj niam ntawd muaj ib tug niam hluas hu ua Mab Liab uas los zaum ntawm Huab Tais ko taw, mloog ntsoov Huab Tais hais lus.
40 Hos Mas Tas ua siab fab txog ntau yam qav num yuav tos txais qhua, ces nws los hais rau Yes Xus tias: "Huab Tais, koj tsis quav ntsej tias kuv tus niam hluas cia kuv tib leeg lis qav lis num tos txais qhua xwb lod ? Koj hais kom nws pab kuv thiab mas!"
41 Tab sis Huab Tais teb rau Mas Tas tias: "Mas Tas, Mas Tas, koj txhawj thiab ua siab fab rau ntau yam,
42 tab sis tsuas muaj ib yam xwb uas yuav tsum ua. Mab Liab xaiv tau yam zoo tshaj lawm, yuav tsis txhob muab tshem ntawm nws mus."

Tim 6 lub 10 Hli 2021

Hnub Plaub Lis Piam Nees Nkaum Xya Nruab Xyoo B Nruab Lis Piam Xyoo I
Lectionary: 463

XHLT: LN Bruno; ua Leej Choj; los tus Tau Hmoov Zoo Marie-Rose Durocher, nkauj tsim txiaj

Zaj Nyeem Ib: YOS NAS 4: 1-11

1 Yos Nas chim kawg thiab nws npau taws tias Tswv Ntuj tsis ua li nws hais rau lub nroog Nis Nis Vas.
2 Nws thov HUAB TAIS zoo li no: "HUAB TAIS, puas yog li kuv hais thaum kuv tseem nyob hauv kuv lub teb chaws? Tos kuv tau xub khiav mus rau Tas Xis los yog vim kuv yeej paub tias koj yog ib tug Tswv Ntuj khuv leej neeg, koj lub siab mos thiab muag, koj npau taws qeeb, koj lub siab zoo loj tas nrho, koj rov thim koj txoj kev xav ua phem.
3 HUAB TAIS, nyem no thov koj thau kuv txoj sia mus, vim yog kuv tuag mas zoo dua kuv muaj txoj sia nyob."
4 HUAB TAIS teb tias: “Puas tsim nyog koj yuav npau taws?”
5 Yos Nas tawm hauv lub nroog mus zaum nyob ntawm ib qho chaw nyob rov sab toob fab ntawm lub nroog. Nws ua ib lub tsev pheeb suab rau nws nkaum ntxoov ntxoo, nws zaum ntsia tos saib puas yuav muaj dab tsi tshwm sim tuaj raug lub nroog.
6 Ces HUAB TAIS Tswv Ntuj ua kom muaj ib tsob hmab taub hwb hlob tuaj roos Yos Nas, kom tshav txhob kub nws taub hau thiab kom nws txoj kev chim siab ploj. Yos Nas pom tsob hmab taub hwb, nws zoo siab kawg nkaus.
7 Tab sis tag kis sawv ntxov, Tswv Ntuj ua kom muaj kab tuaj txo txoj hmab taub, ces txoj hmab ntsws tas.
8 Thaum lub hnub tuaj siab lawm, Tswv Ntuj ua kom muaj ib nthwv cua kub lug tshuab sab hnub tuaj tuaj, lub hnub ziab rau Yos Nas taub hau ua kom nws twb yuav tsis nco qab. Ces Yos Nas thov tuag xwb, nws hais tias : "Kuv tuag zoo dua kuv muaj txoj sia nyob."
9 HUAB TAIS hais rau Yos Nas tias: "Puas tsim nyog koj npau taws rau txoj hmab taub ntawd?" Yos Nas teb tias: "Yeej tsim nyog kuv npau taws, kuv mas npau taws kawg nkaus xav tuag lawm xwb."
10 Ces HUAB TAIS hais tias: "Koj mob siab rau txoj hmab taub ntawd, uas koj twb tsis tau siv zog cog, koj tsis tau ua kom hlob, nws tuaj nws nyob hauv ib hmos, ces nws rov tuag nws mus nyob hauv ib hmos thiab.
11 Kuv ne, vim li cas kuv thiaj yuav tsis mob siab rau lub tsheej loj Nis Nis Vas? Muaj tshaj ib puas nees nkaum txhiab leej neeg nyob hauv, lawv twb tsis paub tias lawv sab xis yog sab twg sab laug yog sab twg, thiab kuj tseem muaj cov tsiaj txhu ntau uas tsis tau hais txog."

NPN 86: 3-4, 5-6, 9-10

Txais: (15) Huab Tais, koj siab zoo thiab khuv leej neeg.

Thov koj khuv leej kuv, Huab Tais,
vim kuv hu koj tas hnub.
Thov koj ua kom koj tus tub txib tus ntsuj plig zoo siab,
vim kuv tsa kuv tus ntsuj plig yuj plaws tuaj rau koj, Huab Tais.

Txais: (15) Huab Tais, koj siab zoo thiab khuv leej neeg.

Huab Tais, koj muaj lub siab zoo thiab txawj zam txhaum,
koj ua siab zoo tas nrho rau cov uas hu txog koj.
HUAB TAIS, thov koj mloog kuv zaj thov ntuj
thiab cuab pob ntseg rau kuv lub suab thov.

Txais: (15) Huab Tais, koj siab zoo thiab khuv leej neeg.

Huab Tais, tas ib tsoom kuj cuab
uas koj tau tsim los yuav tuaj pe hawm koj;
Lawv yuav cav txog koj lub npe muaj koob meej.
Koj loj tas nrho, koj ua hwj huam txaus qhuas,
Koj tib leeg yog Tswv Ntuj.

Txais: (15) Huab Tais, koj siab zoo thiab khuv leej neeg.

As Les Lus Yas: LM 8: 15bc

Txais: As les lus yas, as les lus yas.

Nej tau txais ib lub tswv yim ua tub sau,
lub tswv yim ntawd qhia kom peb hu tias : ‘As Npas! Txiv!’

Txais: As les lus yas, as les lus yas.

Ntawv Moo Zoo: LK 11: 1-4

1 Muaj ib zaug, Yes Xus teev ntuj nyob ib qho chaw. Thaum nws teev ntuj tas lawm, nws ib tug thwj tim hais rau nws tias: "Huab Tais, koj qhia peb teev Ntuj xws li Zam qhia nws cov thwj tim saib."
2 Yes Xus hais rau lawv tias: "Thaum nej teev Ntuj, nej hais li no: Txiv, ua kom koj lub Npe ntshiab,
3 kom koj txoj kev tswj kav los txog! Thov koj niaj hnub pub mov txaus rau peb noj hnub ntawd.
Koj zam txhaum rau peb zoo li peb zam rau cov tau ua txhaum rau peb. Koj txhob cia peb poob rau hauv txoj kev ntxias.”

Tim 7 lub 10 Hli 2021

Hnub Tsib Lis Piam Nees Nkaum Xya Nruab B Nruab Lis Piam Xyoo I
Lectionary: 464

Yuav hwm Leej Niam muab Txoj Saw Mab Liab

Zaj Nyeem Ib: MAS LAS KIS 3: 13-20b

13 HUAB TAIS hais li no: "Nej hais lus nchav lus phem txog kuv, tsis kav nej tseem nug hais tias: ‘Peb tau hais lus tsis zoo li cas txog koj?’
14 Nej hais tias: ‘Kev tsob hwb Tswv Ntuj tsis zoo dab tsi. Peb tau coj nws cov lus qhia, peb tau ua kev tu siab them txim txhaum nyob ntawm tus HUAB TAIS kav tsoom tshiab xub ntiag, peb tau tus dab tsi zoo?
15 Yuav zoo dua yog peb hais tias, cov neeg tau hmoov zoo yog cov neeg muab hlob, vim cov ua phem yog cov vam meej. Lawv sim Tswv Ntuj tab sis lawv tsis muaj kev khaum li.’”
16 Ces cov uas hwm HUAB TAIS sib tham, HUAB TAIS cua pob ntseg ua zoo mloog lawv. Ces lawv muab sau tseg rau hauv ib phau ntawv nyob ntawm HUAB TAIS xub ntiag, tias cov twg yog cov hwm Huab Tais thiab tso siab rau nws lub npe.
17 Tus HUAB TAIS kav tsoom tshiab thiaj hais li no: "Thaum txog hnub kuv teem tseg mas cov ntawd yuav yog kuv tug, lawv yuav yog kuv cov neeg tshwj xeeb. Kuv yuav khuv leej lawv xws li ib leeg txiv khuv leej nws tus tub uas tsob hwb nws.
18 Ces thaum ntawd nej yuav rov qab pom tias tus neeg ncaj txawv tus neeg nkhaus li cas, tus tsob hwb Tswv Ntuj txawv tus tsis tsob hwb nws li cas .
19 Vim Huab Tais lub Hnub Nyoog yuav tawm tuaj ntaiv cuag li ib lub qhov txos, ces cov neeg muab hlob thiab tas cov neeg siab phem yuav zoo li ib co quav nyab; lub hnub nyoog uas yuav tuaj ntawd, yuav hlawv lawv tas huv tib si, kom tsis txhob tshuav ib tug cag los ib tug kav li,” tus Huab Tais kav tsoom tshiab hais li ntawd.
20b “Tab sis nej cov uas hwm kuv lub npe, mas lub Hnub pub txoj kev ncaj yuav sawv tuaj rau nej, nws cov sab yuav ci tuaj kho nej kom nej zoo hlo."

NPN 1: 1-2, 3, 4+6

Txais: (NPN 40:5a) Cov muaj hmoov zoo yog cov uas tso siab rau Huab Tais.

Muaj hmoov zoo yog tus uas tsis coj
raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (NPN 40:5a) Cov muaj hmoov zoo yog cov uas tso siab rau Huab Tais.

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj ntsws li.
Nws ua yam twg yeej tau yam ntawd. .

Txais: (NPN 40:5a) Cov muaj hmoov zoo yog cov uas tso siab rau Huab Tais.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis tas mus.

Txais: (NPN 40:5a) Cov muaj hmoov zoo yog cov uas tso siab rau Huab Tais.

As Les Lus yas: HL 16: 14b

Txais: As les lus yas, as les lus yas.

HUAB TAIS, thov koj qhib peb tej siab ntsws
kom peb mloog koj leej Tub cov lus.

Txais: As les lus yas, as les lus yas

Ntawv Moo Zoo: LK 11: 5-13

5 Yes Xus hais rau nws cov thwj tim tias: "Yog nej leej twg muaj ib tug phooj ywg tuaj cuag nej thaum ib tag hmo, thiab hais rau nej tias: 'Phooj ywg, koj txais peb lub ncuav mov rau kuv,
6 vim kuv ib tug npawg mus tawm rooj los txog hauv kuv tsev, kuv tsis muaj dab tsi rau nws noj li.'
7 Hos tus nyob hauv tsev teb tias: 'Txhob txob kuv, lub qhov rooj twb xauv lawm, kuv cov me nyuam peb twb pw tas, kuv sawv tsis taus los muab dab tsi rau koj lawm.'
8 Kuv hais rau nej tias, tab yog nws tsis sawv los muab vim tus ntawd yog nws phooj ywg, tsis kav nws yeej yuav sawv los muab rau tus ntawd raws li nws thov, vim nws taij tsis tseg."
9 "Li ntawd, kuv hais rau nej tias: Nej thov, ces nej yuav tau txais, nej nrhiav, ces nej yuav ntsib; nej khob ces qhov rooj yuav qhib rau nej.
10 Vim tias leej twg thov, nws yuav tau txais, leej twg nrhiav, nws yuav ntsib, hos leej twg khob qhov rooj, luag yuav qhib rau nws.
11 Nyob hauv nej, leej txiv twg yuav muab ib tug nab rau nws tus tub yog tus tub tai jib tug ntses?
12 Los yuav muab ib tug kab lij tshooj rau yog nws tus tub taij ib lub qe?
13 Txawm tias nej yog neeg phem, tsis kav nej twb txawj pub tej yam zoo rau nej cov me nyuam. Ua li mas Leej Txiv nyob saum ntuj nws puas tsis haj yam yuav txawj pub Leej Ntuj Plig Ntshiab rau cov uas thov nws?"

Tim 8 lub 10 Hli 2021

Hnub Rau Lis Piam Nees Nkaum Xya Nruab Xyoo B Nruab Lis Piam Xyoo I
Lectionary: 465

Zaj Nyeem Ib: YOS ES 1: 13-15; 2: 1-2

13 Cov Leej Choj, nej sia siv , nej cia li quaj cia li nyiav!
Cov ua tub txib nyob ntawm thaj txi Ntuj, nej cia li quaj qw nrov nrov!
Kuv tus Tswv Ntuj cov tub txib, nej cia li tuaj nyob hmo ntuj, nej hnav ntaub tsaj mog!
Vim luag tsis pub muaj cov txim thiab cov dej caw txi Ntuj
nyob hauv nej tus Tswv Ntuj lub tsev lawm.
14 Nej ceeb toom ib lub sij hawm ntshiab los yoo mov,
Nej teem ib lub hnub nyoog loj los sib sau,
nej hu tas cov txwj laus thiab tas tsoom neeg nyob hauv lub teb chaws
tuaj sib koom nyob hauv HUAB TAIS nej tus Tswv Ntuj lub tsev,
nej tsa suab nrov nrov quaj thov HUAB TAIS.”
15 Vim txog hnub phem lawm!
HUAB TAIS lub hnub nyoog tuaj txog ze lawm tiag!
Yog ib lub hnub nyoog coj kev puas mtsoog
` tuaj ntawm tus muaj hwj huam tas nrho tuaj.
2: 1 “Nej tshuab hom Nyob Xis Yoos mas!
Nyob saum lub roob kuv txoj kev ntshiab,
nej tshuab kub twg ceeb toom rau sawv daws!
Kom tas cov neeg nyob hauv lub teb chaws ntshai tshee na,
vim HUAB TAIS lub hnub nyoog tuaj txog ze lawm,
twb nyob ntawm no lawm!
2 Yog ib hnub muaj kev tsaus ntuj thiab muaj kev tu siab,
yog ib hnub pos huab nti thiab tsaus ntuj dub nciab.
Xws li lub hnub tawm tuaj ziab zuj zus saum cov roob,
muaj ib haiv neeg coob coob thiab muaj zog, cia li nchuav nthwv tuaj.
Tsis tau muaj dua ib haiv neeg zoo li ntawd txij thaum ntxov ub los;
yuav tsis rov muaj dua zoo li ntawd ntxiv
mus ntau txhiab ntau tiam tom ntej lawm.

NPN 9: 2-3, 6+16, 8-9

Txais: (9) Huab Tais yuav txiav txim ncaj ncees rau lub sim ceeb.

HUAB TAIS, kuv yuav muab tas kuv siab ntsws los ua koj tsaug,
kuv yuav tshaj txog koj cov hauj lwm tsim nyog qhuas.
Kuv yuav zoo siab, yuav hom khaj nyob hauv koj;
Tus Tswv Nyob Siab, kuv yuav hu nkauj cav txog koj lub npe.

Txais: (9) Huab Tais yuav txiav txim ncaj ncees rau lub sim ceeb.

Koj tsawm cov kuj cuab, koj rhuav tus tsis hwm Ntuj,
koj ua kom lawv lub npe ploj mus tas ib txhis.
Tsoom kuj cuab zom av rau hauv lub qhov ntuj lawv tau khawb,
lawv ko taw daig hauv rooj ntxiab uas lawv tau cuab.

Txais: (9) Huab Tais yuav txiav txim ncaj ncees rau lub sim ceeb.

HUAB TAIS zaum ua vaj mus ib txhiab ib txhis,
nws teeb nws lub theej kiab khov kho tos lub caij txiav txim.
Nws txiav txim rau lub sim ceeb raws txoj kev ncaj.
Nws tswj kav tsoom haiv neeg raws txoj kev haum pheej.

Txais: (9) Huab Tais yuav txiav txim ncaj ncees rau lub sim ceeb.

As Les Lus yas: ZAM 12: 31b-32

Txais: As les lus yas, as les lus yas.

Huab Tais hais tias: Zaum no tus Tswj lub ntiaj teb no
yuav raug ncaws pov rau nraum zoov.
Thaum luag tsa kuv siab rau saum ntiaj teb lawm,
mas kuv yuav rub tas txhua leej kom los cuag kuv."

Txais: As les lus yas, as les lus yas.

Ntawv Moo Zoo: LK 11: 15-26

Thaum Yes Xus caum ib tug dab ruam tsis txawj hais lus tawm hauv ib tug neeg mus,
15 Ces ib txhia hauv cov neeg nyob ntawd hais tias: "Yog nws hu txog Npes Ntxes Npus tus thawj dab phem nws thiaj ntiab tau dab."
16 Tseem muaj ib txhia xav sim Yes Xus, ces lawv thov kom Yes Xus ua ib lub cim tawm saum ntuj tuaj.
17 Tab sis Yes Xus paub qhov lawv xav, nws hais rau lawv tias: "Lub teb chaws twg rov tawm tsam nws tus kheej, mas nws kawg raug kev puas tsuaj; tej vaj tse ib lub yuav vau tsuam ib lub.
18 Yog tias Xas Tas rov tawm tsam Xas Tas tus kheej, mas nws lub ceeb tsheej yuav ua cas nyob tau ruaj? Vim nej hais tias kuv tuav txog Npes Ntxes Npus los ntiab dab no.
19 Yog tias kuv tuav txog Npes Ntxes Npus los ntiab dab no, nej cov neeg ne lawv tuav txog leej twg los ntiab dab? Ua li mas, nej cov neeg yog cov yuav txiav txim rau nej.
20 Hos yog tias kuv tuav txog Tswv Ntuj tus ntiv tes los ntiab dab, mas yog vim tias Tswv Ntuj lub Ceeb Tsheej los txog nej lawm.
21 Thaum ib tug neeg muaj zog tuav ntaj tuav hmuv zov nws lub vaj tse, mas nws lub cuab tam nyob nyab xeeb.
22 Tab sis, thaum twg lwm tus muaj zog dua nws tuaj ntaus yeej nws, ces lawv txeeb nws cev ris tsho hlau uas yog nws lub chaw tso siab mus, thiab muab nws tej cuab yeej cuab tam sib faib tas lawm.
23 Leej twg tsis nrog kuv, ces yog nws tiv kuv. Leej twg tsis nrog kuv sau los ua ke, ces yog nws muab w pov tseg tas xwb.
24 Thaum dab tsis huv tawm hauv ib tug neeg mus, nws mus ua loj leeb rau hauv tej teb chaws qhuav, nrhiav ib lub chaw so, tab sis nrhiav tsis tau, ces nws hais tias: 'Kuv yuav rov mus nyob hauv lub tsev uas kuv tawm los.'
25 Thaum dab tsis huv rov qab los txog, nws pom lub tsev cheb huv si thiab tu du lug cia.
26 Ces nws mus coj xya tus dab uas tseem tsiv tsaim dua nws nkag los nyob hauv lub tsev ntawd. Thaum kawg, tus neeg ntawd lub neej phem dua qhov qub lawm ntau."

Tim 9 lub 10 Hli 2021

Hnub Xya Lis Piam Nees Nkaum Xya Nruab Xyoo B Nruab Lis Piam Xyoo I
Lectionary: 466

XHLT: LN Denis,Tswv Qhia tuag ua Tim Khawv, thc…; los LN John Leonardi, ua Leej Choj

Zaj Nyeem Ib: YOS ES 4: 12-21

Huab Tais hais tias:
12 “Kom cov haiv neeg sawv tsees,
kom lawv tuaj mus lawm tom lub hav tiaj Yos Xas Fas.
Kuv yuav zaum nyob ntawd txiav txim rau tas txhia lub kuj cuab nyob ib ncig.
13 Kav tsij coj nej rab liag mus hlais, vim qoob twb siav lawm.
Mus tsuj cov txiv cawv, vim lub tsu cub cawv puv lawm.
Cov rhawv puv phwj yaws, vim lawv txoj kev phem loj tas nrho!
14 Neeg coob tis ua coob tuaj nyob hauv lub Hav Txiav Txim Siab,
vim HUAB TAIS lub hnub nyoog tuaj txog ze ze nyob hauv lub Hav Txiav Txim Siab lawm.
15 Lub hnub thiab lub hli tsaus nti, cov hnub qub tsis ntsa lawm.
16 HUAB TAIS nyooj laws saum Xis Yoos tuaj,
nws lub suab nrov nroo ntws hauv Yes Lus Xas Les tuaj.
Lub ntuj thiab lub ntiaj teb co qeeg nkaws,
tab sis HUAB TAIS yog nws haiv neeg chaw nkaum,
nws yog haiv His Xas Lais lub ntsa zeb thaiv lawv!
17 Ces nej yuav paub tias kuv yog HUAB TAIS nej tus Tswv Ntuj,
uas nyob saum Xis Yoos, lub roob kuv txoj kev ntshiab.
Yes Lus Xas Les yuav yog ib qho chaw ntshiab,
cov pej kum neeg yuav tsis hla hauv nws mus ntxiv lawm.
18 Hnub ntawd, ib co cawv tshiab yuav nrog saum cov roob los,
kua mis yuav ntws pem tej pov roob los;
dej yuav ntws lug hauv txhia tus dej nyob Yus Das teb.
Ib tug dej yuav txhawv ntawm HUAB TAIS lub tsev los ywg lub vov hav Sis Tis.
19 Hais Nkws Tos teb yuav puas tsuaj puas ntsoog tas,
Es Dos yuav yog ib thaj suab puam qhuav qhawv,
vim lawv tau hiam tsoom tub ki Yus Das,
lawv tau ua kom cov ntshav tsis muaj txhaum ntws nyob hauv lawv teb chaws.
20 Tab sis Yus Das teb yuav muaj neeg nyob tas mus li,
thiab Yes Lus Xas Les yuav nyob mus tiam dhau tiam.
21 Kuv yuav ua pauj rau lawv cov ntshav, kuv yuav tsis zam txim."
HUAB TAIS nyob rawv saum Xis Yoos.

NPN 97: 1-2, 5-6, 11-12

Txais: (12) Cov neeg ncaj, nej yuav zoo siab nyob hauv Huab Tais!

HUAB TAIS ua vaj; kom lub ntiaj teb cia li zoo siab;
kom ntau lub pov txwv luag ntxhi.
Cov huab thiab qhov tsaus ntuj nyob ncig nws,
kev ncaj ncess thiab kev txiav txim yog lub taw
ntsa txheem nws lub theej kiab.

Txais…

Cov roob yaj ntshis mus xws li ciab ntab
nyob ntawm Huab Tais xub ntiag,
ntawm tus HUAB TAIS kav tas lub ntiaj teb xub ntiag.
Lub ntuj tshaj txog nws txoj kev ncaj ncees,
thiab tas txhua haiv neeg pom nws lub hwj chim.

Txais…

Qhov pom kev ci tawm tuaj kaj tus neeg ncaj,
kev zoo siab ci tuaj rau tus neeg siab ncaj.
Cov neeg ncaj nej zoo siab nyob hauv HUAB TAIS mog,
nej ua tsaug rau nws lub npe ntshiab.

Txais…

As Les Lus Yas: LK 11: 28

Txais: As les lus yas, as les lus yas.

Cov muaj hmoov zoo yog cov uas mloog
Tswv Ntuj Lo Lus thiab ua raws li ntawd,

Txais: As les lus yas, as les lus yas.

Ntawv Moo Zoo: LK 11: 27-28

27 Thaum Yes Xus tseem hais lus, muaj ib tug poj niam nyob hauv nruab nrab tsoom sid tsa suab hais nrov nrov rau Yes Xus tias: "Lub plab uas tau nqa koj thiab lub xub ntiag uas pub mis rau koj tau txoj hmoov zoo!"
28 Tab sis Yes Xus teb tias: "Cov uas mloog Tswv Ntuj Lo Lus thiab ua raws li ntawd, mas lawv thiaj yog cov tau txoj hmoov zoo."

Tim 11 lub 10 Hli 2021

Hnub Ob Lis Piam Nees Nkaum Yim Nruab Xyoo B Nruab Lis Piam Xyoo I
Lectionary: 467

XHLT: LN Zam XXIII, Vaj Qhia

Zaj Nyeem Ib: LOS MAS 1: 1-7

1 Kuv, Paj Lug, uas yog Yes Xus Pleev ib tug tub qhev, raug hu los ua Hauv Paus Xa Lus, thiab qee los tshaj Tswv Ntuj lub Moo Zoo,
2 uas Tswv Ntuj tau xub cog lus txog ua ntej rau hauv nws cov yaj saub tej ntawv ntshiab tseg lawm,
3 yog lub Moo Zoo hais txog nws Leej Tub, uas yug hauv Das Vis caj ces los raws li neeg ntiaj teb,
4 tiam sis nws yog Tswv Ntuj Leej Tub muaj hwj huam raws li Leej Tswv Yim tus pub txoj kev dawb huv, vim nws txoj kev sawv hauv cov tub tuag rov los, peb tus Huab Tais Yes Xus Pleev.
5 Nyob hauv nws, peb tau txais lub txiaj ntsim ua hauv paus xa lus, kom peb tau coj txoj kev mloog lus nyob hauv txoj kev ntseeg rau tas cov neeg teev pej kum dab, ces nws lub npe yuav tau koob meej.
6 Nej kuj yog ib co nyob hauv cov neeg ntawd thiab; nej raug hu los ua Yes Xus Pleev tug.
7 Kuv xa lus tuaj rau tas cov neeg uas Tswv Ntuj nyiam nyob Los Mas; nws hu nej los ua neeg ntshiab. Thov kom nej txais txiaj ntsim thiab kev thaj yeeb tuaj ntawm peb Leej Txiv Tswv Ntuj, thiab ntawm Huab Tais Yes Xus Pleev tuaj.

NPN 98: 1, 2-3ab, 3cd-4

Txais: (2a) Huab Tais ua kom neeg paub txog nws txoj kev cawm.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua.

Txais: (2a) Huab Tais ua kom neeg paub txog nws txoj kev cawm.

HUAB TAIS tau ua kom neeg paub txog nws txoj kev cawm,
nws tau ua kom cov haiv neeg pom nws txoj kev ncaj.
Nws rov nco txog nws txoj kev ua zoo thiab kev pheej xeeb
rau tsev neeg His Xas Lais.

Txais: (2a) Huab Tais ua kom neeg paub txog nws txoj kev cawm.

Tas cov npoo ntiaj teb kawg tau pom
peb tus Tswv Ntuj txoj kev cawm neeg.
Tas txhua teb chaws, nej hu nkauj zoo siab rau HUAB TAIS,
nej qw suab nkauj, nej cav txog nws.

Txais: (2a) Huab Tais ua kom neeg paub txog nws txoj kev cawm.

As Les Lus Yas: NPN 95: 8

Txais: As les lus yas, as les lus yas.

Yog hnub no nej hnov nws lub suab,
Tsis txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo: LK 11: 29-32

29 Thaum tej pab neeg coob tuaj ntxiv, Yes Xus pib hais lus li no tias: "Tiam neeg no yog ib tiam neeg phem. Lawv taij ib lub cim, tab sis tsis muaj ib lub cim rau lawv pom, tsuas kawg muaj Yos Nas lub cim xwb.
30 Ib yam li Yos Nas yog ib lub cim rau cov neeg nyob Nis Nis Vas, Neeg Leej Tub kuj yuav yog ib lub cim rau tiam neeg no.
31 Thaum txog hnub txiav txim, tus poj vaj nyob Naj Fab yuav nrog tiam neeg no sawv rov los, nws yuav muab txim rau lawv, vim nws tuaj puag tim npoo ntiaj teb kawg tuaj mloog Xas Los Moos cov lus thoob tsib; hos nyob ntawm no, twb muaj tus loj dua Xas Los Moos.
32 Thaum txog hnub txiav txim, cov neeg nyob Nis Nis Vas yuav nrog tiam neeg no sawv rov los, lawv yuav muab txim rau tiam neeg no, vim tias thaum Yos Nas tuaj ceeb toom rau lawv, mas lawv tso kev txhaum tseg, hos nyob ntawm no twb muaj tus loj dua Yos Nas."

Tim     12     lub     10     Hli     2021

Hnub Peb Lis Piam Nees Yim Nruab Xyoo B Nruab Lis Piam Xyoo I
Lectionary: 468

Zaj Nyeem Ib:   LM 1: 16-25

Cov kwv tij nkauj muad:
16 Kuv tsis txaj muag txog lub Moo Zoo li; nws yog Tswv Ntuj lub hwj huam cawm tas txhua tus neeg uas ntseeg, xub cawm cov Yus Das ua ntej, ces cov Hes Las.
17 Vim nyob hauv lub Moo Zoo, Tswv Ntuj txoj kev ncaj tshwm tawm tuaj nyob hauv ib txog kev ntseeg mus rau lwm txoj, xws li ntawv sau tseg tias: “Tus neeg siab ncaj vim txoj kev ntseeg yuav muaj txoj sia.”
18 Tswv Ntuj txoj kev npau taws tawm saum ntuj los raug txhua txoj kev tsis hwm Ntuj thiab txhua txoj kev nkhaus nyob hauv cov neeg nkhaus uas thaiv txoj kev tseeb tsis pub kom tawm los.
19 Vim lawv yeej paub meej txog tej yam uas txawj qhia txog Tswv Ntuj rau neeg, vim Tswv Ntuj tau ua kom lawv paub txog lawm.
20 Txij puag thaum ntuj tsim teb raug los, txhua yam uas neeg pom tsis tau txog Tswv Ntuj, xws li nws lub hwj huam nyob mus li thiab nws lub hwj chim ua Tswv Ntuj, neeg lub tswv yim yeej tsom tau nyob hauv tej yam nws tau tsim los. Vim li ntawd, cov neeg tsis ncaj hais tsis tau tias lawv tsis muaj txhaum.
21 Vim lawv twb paub Tswv Ntuj, tab sis lawv tsis cav txog nws lub koob meej tias nws yog Tswv Ntuj, lawv tsis ua nws tsaug, hos lawv tuaj yeem xav tej zaj tswv yim tsis tseem ceeb dab tsi, ces lawv lub siab vwm thiaj nyob hauv qhov tsaus ntuj nti.
22 Lawv khav tias lawv thoob tsib, tab sis lawv yog neeg vwm.
23 Lawv muab tus Tswv Ntuj nyob mus li lub hwj chim hloov los ua tej tus duab xws li duab neeg uas txawj tuag, los duab noog, los duab tsiaj txhu muaj plaub txhais tes taw, los duab nab.
24 Vim li ntawd Tswv Ntuj thiaj tso lawv pov tseg rau hauv lawv txoj kev ua phem ua qias raws li lawv lub siab ntshaw, hauv txoj kev ua neeg tsis dawb huv, hauv txoj kev lawv rov sib siv lawv lub cev los ua kev tsis tsim txiaj ua rau lawv poo tsim.
25 Lawv hloov txoj kev tseeb txog Tswv Ntuj los ua kev dag; ces lawv teev hawm thiab tsob hwb tej yam uas yog tsim tawm los, tsis yog tus tsim tas txhua yam, uas nws nto koob meej mus ib txhiab ib txhis. Ua li.

NPN   19: 2-3, 4-5

Txais: (2a) Cov txheej ntuj saud tshaj txog Tswv Ntuj lub koob meej.

Cov txheej ntuj saud tshaj txog Tswv Ntuj lub koob meej,
lub qab ntuj khwb tshaj cov hauj lwm nws txhais tes tsim los.
Nruab hnub hais lo lus rau nruab hnub mloog,
Hmo ntuj qhia rau hmo ntuj paub txog.

Txais: (2a) Cov txheej ntuj saud tshaj txog Tswv Ntuj lub koob meej.

Tsis muaj ib lo lus los ib zaj lus piav
Uas leej tib neeg yuav tsis hnov txog.
Lawv lub suab yeej ncha puv tas ntiaj teb,
lawv lo lus xa moo yeej nrov txog tim npoo ntiaj teb kawg.

Txais: (2a) Cov txheej ntuj saud tshaj txog Tswv Ntuj lub koob meej.

As Les Lus Yas:   HES NPLAWS 4: 12

Txais: As les lus yas, as les lus yas.

Tswv Ntuj lo lus muaj sia thiab ua tau hauj lwm,
nws txawj tsom tau tej tswv yim thiab
tej kev xav nyob hauv neeg nruab siab.

Txais: As les lus yas, as les lus yas.


Ntawv Moo Zoo:   LK 11: 37-41

37 Thaum Yes Xus hais lus tas nrho, muaj ib tug Fas Lis Xais caw Yes Xus mus noj mov tim nws tsev. Yes Xus chaws mus hauv tsev, nws mus xyab ntawm rooj mov.
38 Tus Fas Lis Xas pom li ntawd, ces nws poob siab rau qhov Yes Xus tsis xub ntxuav tes tso mam noj mov.
39 Tab sis Huab Tais hais rau tus Fas Lis Xais ntawd tias: "Nej cov Fas Lis Xais mas nej ntxuav khob ntxuav phaj sab nraud kom huv, tab sis nej muaj kev tub sab thiab kev phem nyob puv nkaus nej sab hauv.
40 Neeg vwm! Tus tsim sab nraud nws tsis tsim sab hauv thiab lod?
41 Hais txog tej yam nyob sab hauv mas nej yuav tsum pub rau luag, ces txhua yam yuav dawb huv rau nej.”

Tim 13 lub 10 Hli 2021

Hnub Plaub Lis Piam Nees Nkaum Yim Nruab Xyoo B Nruab Lis Piam Xyoo I
Lectionary: 469

Zaj Nyeem Ib: LM 2: 1-11

1 Txhua tus tib neeg uas txiav txim rau luag tej, koj yuav hais tsis tau tias koj tsis txhaum Thaum koj txiav txim rau luag, mas yog koj rov txiav txim rau koj ntag, vim tias koj yog tus txiav txim, tab sis koj twb ua ib yam nkaus li ntawd thiab.
2 Peb paub hais tias Tswv Ntuj yeej txiav txim raws txoj kev ncaj rau cov neeg uas ua tej txhaum ntawd.
3 Koj puas xav tias txawm koj txiav txim rau cov neeg ua tej txhaum ntawd, thiab txawm koj twb ua ib yam nkaus los koj yeej yuav dim ntawm Tswv Ntuj txoj kev txiav txim?
4 Los koj puas muab Tswv Ntuj lub siab nplua nuj txoj kev ua zoo, txoj kev ua siab ntev ua tiag nyiaj koj tej kev phem, thiab txoj kev ua siab dav, saib tsis rau nqe, vim koj tsis paub tias Tswv Ntuj txoj kev ua zoo yuav tshoj koj kom koj tig los hloov dua siab tshiab?
5 Vim koj ua koj lub siab tawv qhawv txhav qhi tsis tuaj yeem thov txhaum, mas koj tsub Tswv Ntuj txoj kev thoj chim rau saum koj mus txog hnub Tswv Ntuj txoj kev npau taws thiab nws txoj kev txiav txim ncaj ncees yuav tawm plaws tuaj.
6 Ces nws yuav pauj rau nyias raws li nyias cov hauj lwm.
7 Nws yuav muab txoj sia nyob mus li los pauj rau cov uas nrhiav lub koob meej, lub hwj chim thiab kev ciaj nyob mus li nyob hauv txoj kev ua lub siab ntuj ntev peem tiag mus taug txoj kev ua zoo.
8 Hos nws yuav muab txoj kev npau taws kev ua siab kub los pauj rau cov uas lawv ua neeg twm xeeb tsuas yuav lawv siab, tsis xav mloog txoj kev tseeb, tiam sis mloog txoj kev phem.
9 Txhua tus neeg uas ua qhov phem mas nws yuav raug kev txom nyem thiab kev txhawj xeeb; tus neeg Yus Das yuav xub raug, ces tus neeg Hes Las kuj yuav raug thiab.
10 Hos txhua tus uas ua qhov zoo, mas nws yuav txais lub koob meej, lub hwj chim, thiab txoj kev thaj yeeb; tus neeg Yus Das yuav xub txais, ces tus Hes Las kuj yuav txais thiab.
11 Vim Tswv Ntuj tsis tsa leej twg cai.

NPN 62: 2-3, 6-7, 9

Txais: (13b) Huab Tais, koj them rau txhua tus raws li nyias cov hauj lwm.

Kuv tus plig tau nyob tiaj tus tsuas yog nyob hauv Tswv Ntuj;
Kuv txoj kev cawm seej tuaj ntawm nws tuaj.
Nws ib leeg yog kuv lub tsua, yog tus cawm kuv,
yog kuv lub yeej ntsa zeb, kuv yuav tsis ntshai li..

Txais: (13b) Huab Tais, koj them rau txhua tus raws li nyias cov hauj lwm.

Kuv tus plig, koj tau nyob tiaj tus yog nyob hauv Tswv Ntuj ib leeg xwb,
vim nws yog kuv lub chaw tso siab.
Nws ib leeg yog kuv lub tsua, yog tus cawm kuv,
yog kuv lub yeej ntsa zeb, kuv yuav tsis ntshai li.

Txais: (13b) Huab Tais, koj them rau txhua tus raws li nyias cov hauj lwm.

Tas ib tsoom neeg, nej tso siab rau nws txhua lub sij hawm mog!
Nej qhib lug nej lub siab rau nws,
vim Tswv Ntuj yog peb qhov chaw vam khom.

Txais: (13b) Huab Tais, koj them rau txhua tus raws li nyias cov hauj lwm.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias, kuv cov yaj mloog kuv lub suab;
kuv paub kuv cov yaj, lawv caum kuv qab nraim.

Txais: As les lus yas, as les lus yas.

Ntawv Moo Zoo: LK 11: 42-46

Huab Tais hais tias:
42 “Nej tsoom Fas Lis Xais, nej txoj hmoov phem! Vim nej them se ib feem kaum rau cov pum hub, zaub txhwb, thiab rau txhua yam txuj lom nyob hauv vaj, tab sis nej tsis ua raws txoj kev ncaj thiab txoj kev nyiam Tswv Ntuj li. Nej twb yuav tsum tau them tej se ntawd, thiab ho txhob tso qhov tod pov tseg.
43 Nej tsoom Fas Lis Xais, nej txoj hmoov phem! Vim nej nyiam zaum thawj lub rooj kim txwv hauv cov tsev txoos, thiab nyiam kom luag hawm nej tom tej tshav puam.
44 Nej txoj hmoov phem! Vim nej zoo li tej ntxa uas tsis muaj dab tsi qhia tias yog ntxa, ces sawv daws mus tsuj saud.”
45 Ces ib tug Kws Lij Choj hais rau Yes Xus tias: "Xib Hwb, koj hais tej lus ntawd mas kuj raug peb thiab."
46 Yes Xus thiaj hais tias: "Nej, cov Kws Lij Choj, nej kuj tau txoj hmoov phem thiab! Vim nej nog tej lub nra hnyav ceeb laj ris kawg rau tsoom neeg sawv daws, tab sis nej twb tsis tsa nej tus nyuag ntiv tes mus kov tej nra ntawd.”