COV ZAJ NYEEM NRUAB LIS PIAM XYOO B 2020-2021

Tim 14 lub 10 Hli 2021

Hnub Tsib Lis Piam Nees Nkaum Yim Nruab Xyoo B Nruab Lis Piam Xyoo I
Lectionary: 470

XHLT: LN Callistus I, Vaj Qhia tuag ua Tim Khawv

Zaj Nyeem Ib: LM 3: 21-30

Cov kwv tij nkauj muad:
21 Nyem no, Tswv Ntuj txoj kev ncaj tawm tuaj, tsis yog nyob hauv Txoj Cai, tiam sis Txoj Cai thiab cov Yaj Saub zeem tseeb txog.
22 Yog Tswv Ntuj txoj kev ncaj uas los ntawm txoj kev ntseeg txog Yes Xus Pleev los rau tas txhua leej uas ntseeg; vim tsis muaj ib co neeg txawv lwm cov li,
23 sawv daws puav leej tau ua txhaum tas huv tib si thiab tsis tau Tswv Ntuj lub hwj chim.
24 Yog nws lub txiaj ntsim uas nws pub dawb paug ua kom sawv daws ncaj tuaj tau nyob hauv txoj kev cawm uas nyob hauv Yes Xus Pleev,
25 tus uas Tswv Ntuj tso tuaj siv nws cov ntshav ua nqi them txim txhaum nyob hauv txoj kev ntseeg, kom tau ua pov thawj txog Tswv Ntuj txoj kev ncaj, vim nws zam rau sawv daws tej txhaum uas lawv tau ua yav tas los lawm,
26 Tswv Ntuj ua lub siab ntuj ntev, kom tau ua pov thawj txog nws txoj kev ncaj rau lub sij hawm niaj hnub no pom tias nws yog tus ncaj, thiab kom nws tau pub kev ncaj rau cov neeg ntseeg txog Yes Xus.
27 Puas muaj ib lub sij hawm twg rau peb khav? Tsis muaj li. Puas muaj ib txog cai twg? Txoj cai ntawm kev ua hauj lwm lod? Tsis tau li. Tsuas muaj txoj kev ntseeg nkaus xwb.
28 Peb paub tias neeg ncaj tuaj tau vim txoj kev ntseeg, tsis yog vim nws ua raws Txoj Cai.
29 Tswv Ntuj puas yog cov Yus Das tus Tswv Ntuj nkaus xwb? Nws tsis yog cov neeg teev pej kum dab tus Tswv Ntuj thiab lod? Nws yeej yog cov neeg teev pej kum dab tus Tswv ntuj thiab.
30 Vim tsuas muaj ib tug Tswv Ntuj xwb; nws ua kom cov neeg txais lub cim txiav ncaj tuaj vim lawv txoj kev ntseeg; hos nws ua kom cov neeg tsis tau txais lub cim txiav ncaj tuaj nyob hauv txoj kev ntseeg.

NPN 130: 1b-2, 3-4, 5-6ab

Txais: (7) Huab Tais muaj kev khuv leej thiab kev cawm neeg zoo txhij txhua.

HUAB TAIS, kuv nyob hauv qab tiv txwv hu txog koj,
HUAB TAIS, thov koj mloog kuv lub suab!
Thov koj cuab pob ntseg mloog kuv lub suab thov koj.

Txais: (7) Huab Tais muaj kev khuv leej thiab kev cawm neeg zoo txhij txhua.

HUAB TAIS, yog koj cim ntsoov peb cov txhaum
leej twg thiaj yuav nyob taus, Huab Tais?
Tab sis nyob ntawm koj muaj kev zam txhaum,
ces sawv daws yuav hwm koj.

Txais: (7) Huab Tais muaj kev khuv leej thiab kev cawm neeg zoo txhij txhua.

Kuv tso siab rau HUAB TAIS,
kuv tus ntsuj plig tso siab rau nws lo lus.
Kuv tus ntsuj plig tos ntsoov HUAB TAIS
tos heev tshaj cov zov keeb tos lub caij kaj ntug.

Txais: (7) Huab Tais muaj kev khuv leej thiab kev cawm neeg zoo txhij txhua.

As Les Lus Yas: ZAM 14: 6

Txais: As les lus yas, as les lus yas.

Huab Tais hais tias: Kuv yog Txoj Kev,
yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau,
yog nws tsis mus ntawm kuv mus.

Txais: As les lus yas, as les lus yas.

Ntawv Moo Zoo: LK 11: 47-54

Huab Tais hais tias:
47 ”Nej txoj hmoov phem, nej cov uas txhim cov yaj saub tej ntxa, uas yog nej phaj txiv tau muab lawv tua.
48 Vim li ntawd, nej ua tim khawv txog thiab pom zoo tias qhov nej phaj txiv ua yog ib qho zoo: lawv yog cov muab tua, hos nej yog cov txhim ntxa.
49 Yog vim li ntawd Tswv Ntuj txoj kev Thoob Tsib thiaj hais tias: ‘Kuv yuav xa ib co yaj saub thiab ib co hauv paus xa lus mus rau lawv, lawv yuav muab ib co tua thiab hiam ib co,’
50 kom tas cov yaj saub tej ntshav uas raug muab nchuav txij thaum ntuj tsim teb raug los, yuav tsum poob rau tiam neeg no ris,
51 txij As Npes cov ntshav los txog Ntxas Kas Lias cov ntshav, tus uas raug tua ntawm kis nruab nrab lub thaj txi Ntuj thiab thaj Chaw Ntshiab. Kuv hais rau nej tias, tiam neeg no yeej yuav tau ris lub txim ntawm lawv cov ntshav.
52 Nej tsoom Kws Lij Choj, nej txoj hmoov phem! Vim nej muab tus yuam sij qhib txoj kev txawj ntse rho tawm lawm; nej tus kheej tsis kam nkag mus hauv, hos cov xav nkag mus los nej thaiv tsis pub lawv mus."
53 Thaum Yes Xus tawm ntawd mus lawm, cov Kws Ntawv Ntshiab thiab cov Fas Lis Xais pib nrhiav kev ua phem rau nws, thiab lawv nug nws txog ntau tsav ntau yam,
54 vim lawv xav cuab ntxiab tos rawv yuav ntes nws yog nws hais ib lo lus txawv li cas.

Tim 15 lub 10 Hli 2021

Hnub Rau Lis Piam Nees Nkaum Yim Nruab Xyoo B Nruab Lis Piam Xyoo I
Lectionary: 471

Yuav Hwm LN Teresa of Jesus, nkauj tsim txiaj thiab Kws cov Txuj Ntshiab

Zaj Nyeem Ib: LM 4: 1-8

Cov kwv tij nkauj muad:
1 Peb yuav hais li cas txog qhov tias Has Nplas Has, peb tus yawg koob raws li neeg nqaij tawv, nrhiav tau ?
2 Yog Has Nplas Has muaj kev ncaj vim nws cov hauj lwm mas nws yeej muaj chaw khav. Tab sis Tswv Ntuj tsis pom li ntawd.
3 Ntawv hais dab tsi? “Has Nplas Has ntseeg txog Tswv Ntuj, ces Tswv Ntuj saib qhov ntawd yog Has Nplas Has txoj kev ncaj ncees.”
4 Thaum ib tug neeg ua ib txog hauj lwm, mas peb tsis saib nws tus nqe zog yog ib qho paj tshab pub dawb rau nws, tiam sis yog ib qho uas nws khwv tau los ua nws tug.
5 Tab sis thaum ib tug neeg tsis tau ua hauj lwm, tiam sis nws ntseeg txog tus ua tau kom tus neeg tsis hwm Ntuj ncaj tuaj, mas nws txoj kev ntseeg yuav raug muab suav ua nws txoj kev ncaj.
6 Das Vis kuj tau hais li ntawd tias tus muaj txoj hmoov zoo yog tus uas Tswv Ntuj tsis saib nws cov hauj lwm li, Tswv Ntuj cia li pub kev ncaj rau nws:
7 “Cov tau txoj hmoov zoo yog cov uas Ntuj zam txhaum rau lawv, thiab muab lawv cov txhaum npog rau.
8 Tus tau txoj hmoov zoo yog tus uas Huab Tais tsis sau nws cov txhaum cia.”

NPN 32: 1b-2, 5, 11

Txais: (7) Huab Tais, kuv vam txog koj thaum kuv ntsib kev nyuaj ntxhov,
koj pub kev cawm seej rau kuv kom kuv muaj kev zoo siab puv npo.

Tus tau txoj hmoov zoo yog tus uas Ntuj zam nws qhov txhaum rau nws,
yog tus uas Ntuj muab nws qhov txhaum npog rau.
Tus tau txoj hmoov zoo, yog tus uas HUAB TAIS tsis suav txim rau nws,
yog tus uas tsis muaj ib lub tswv yim dag.

Txais: (7) Huab Tais, kuv vam txog koj thaum kuv ntsib kev nyuaj ntxhov,
koj pub kev cawm seej rau kuv kom kuv muaj kev zoo siab puv npo.

Kuv lees kuv qhov txhaum rau koj,
Kuv tsis zais kuv qhov yuam kev.
Kuv hais tias: "Kuv lees kuv cov txhaum rau HUAB TAIS".
Ces koj tshem lub txim ntawm kuv qhov txhaum mus tas.

Txais: (7) Huab Tais, kuv vam txog koj thaum kuv ntsib kev nyuaj ntxhov,
koj pub kev cawm seej rau kuv kom kuv muaj kev zoo siab puv npo.

Cov neeg ncaj nej cia li zoo siab
nyob hauv HUAB TAIS, nej lcia li uag ntxhi;
tas ib tsoom muaj lub siab zoo siab ncaj,
nej cia li dhia zoo siab !

Txais: (7) Huab Tais, kuv vam txog koj thaum kuv ntsib kev nyuaj ntxhov,
koj pub kev cawm seej rau kuv kom kuv muaj kev zoo siab puv npo.

As Les Lus Yas: NPN 33: 22

Txais: As les lus yas, as les lus yas.

HUAB TAIS, thov kom koj lub siab zoo roos peb,
vim koj yog tus peb tso siab lug rau.

Txais: As les lus yas, as les lus yas.

Ntawv Moo Zoo: LK 12: 1-7

1 Thaum ntawd, muaj neeg coob coob tuaj sib txoos ua tsheej pawg, nyob sib tsuj pes daws, Yes Xus thiaj pib hais lus, nws xub hais rau nws cov thwj tim tias: "Nej ceev faj txog cov poov xab uas yog cov Fas Lis Xais txoj kev dag ua zoo sab nraud xwb.
2 Tsis muaj ib yam zais ntshis uas yuav tsis qhib tawm los, tsis muaj ib yam npog cia uas yuav tsis muaj neeg paub txog.
3 Yog vim li ntawd, txhua yam uas nej hais nyob hauv qhov tsaus ntuj nti, yuav nrov rau luag hnov thaum nruab hnub nrig; yam uas nej ntxhi rau hauv luag pob ntseg nyob hauv tej chav kaw nti, yuav raug muab tshaj tawm saum tej ru tsev.
4 Kuv cov phooj ywg, kuv hais rau nej: Nej tsis txhob ntshai cov uas tua neeg lub cev, thaum lawv tua tas, lawv ua tsis tau dab tsi ntxiv lawm.
5 Kuv qhia rau nej tias nej yuav tsum ntshai leej twg: Nej yuav tsum ntshai tus uas tua lub cev tas, tseem muaj peev xwm muab pov rau hauv dab phem teb thiab. Kuv hais rau nej tias, tus ntawd mas nej yuav tsum ntshai nws tiag.
6 Tsib tug noog tsig txhuv tsuas muag tau ob lub txiaj toog xwb puas yog? Tsis kav, tsis muaj ib tug tsig txhuv uas Tswv Ntuj yuav tsis nco txog.
7 Tab yog nej cov plaub hau saum taub hau los Tswv Ntuj yeej suav tas huv si lawm. Nej tsis txhob txhawj. Nej muaj nqis dua tej pab tsig txhuv coob coob.”

Tim 16 lub 10 Hli 2021

Hnub Xya Lis Piam Nees Nkaum Yim Nruab Xyoo B Nruab Lis Piam Xyoo I
Lectionary: 472

XHLT: LN Margaret Mary Alacoque, nkauj tsim txiaj; los LN Hedwig, ua leej phauj

Zaj Nyeem Ib: LM 4: 13, 16-18

Cov kwv tij nkauj muad,
13 Tswv Ntuj tsis yog cog lus nyob hauv txoj cai tias nws yuav pub lub sim ceeb no rau Has Nplas Has thiab nws tsoom xeeb leej xeeb ntxwv ua lawv tug, hos yog cog lus nyob hauv txoj kev ncaj uas txhawv ntawm kev ntseeg los.
16 Yog vim li ntawd, nws yog ib yam uas tau txais los ntawm kev ntseeg los, mas nws thiaj yog ib lub txiaj ntsim pub dawb; thiab lo lus uas Tswv Ntuj cog ntawd yog cog rau tas Has Nplas Has tsoom xeeb leej xeeb ntxwv huv tib si, tsis yog rau cov coj raws Txoj Cai xwb, tiam sis yog rau cov uas coj raws li Has Nplas Has txoj kev ntseeg huv tib si; nws yog tas nrho peb sawv daws txiv,
17 raws li muaj sau tseg tias: “Kuv muab koj ua txiv rau ntau tej haiv neeg.” Nws yog peb sawv daws txiv nyob ntawm Tswv Ntuj xub ntiag, tus Tswv Ntuj uas nws ntseeg txog, tus uas pub txoj sia rau cov neeg tuag, thiab tus hu tej yam tseem tsis tau xeeb kom xeeb tau los nyob.
18 Has Nplas Has ntseeg, txawm nws twb tsis pom muaj chaw tso siab li los nws tseem tso siab qees, nws ntseeg tias nws yuav tau ua ntau haiv neeg txiv, raws nraim li lo lus hais tias: “Koj tsoom xeeb ntxwv yuav muaj li ntawd.”

NPN 105: 6-7, 8-9, 42-43

Txais: (8a) Huab Tais nco ntsoov nws lo lus nws tau cog mus ib txhis.

Nej, Has Nplas Has tsoom xeeb ntxwv,
uas yog Huab Tais cov tub txib,
Nej, Yas Kos cov tub, uas yog cov Huab Tais tau xaiv,
HUAB TAIS yog peb tus Tswv Ntuj tiag,
Nws tej cai tswj tas qhov txhia chaw hauv lub ntiaj teb.

Txais: (8a) Huab Tais nco ntsoov nws lo lus nws tau cog mus ib txhis.

Nws nco ntsoov mus li cov lus nws cog cia,
yog ib co lus cog ruaj rau txhiab tiam tub ki.
Yog cov lus nws tau nrog Has Nplas Has cog,
thiab nws tau rov zeem tseeb rau His Xas Has.

Txais: (8a) Huab Tais nco ntsoov nws lo lus nws tau cog mus ib txhis.

Vim HUAB TAIS rov nco txog nws lo lus ntshiab
uas nws tau hais rau nws tus tub txib Has Nplas Has.
Nws coj nws haiv neeg tawm los luag ntxhi ,
nws coj cov neeg nws tau xaiv tawm los, lawv qw zoo siab.

Txais: (8a) Huab Tais nco ntsoov nws lo lus nws tau cog mus ib txhis.

As Les Lus Yas: ZAM 15: 26b, 27a

Txais: As les lus yas, as les lus yas.

Huab Tais hais tias: Leej Tswv Yim muaj qhov tseeb yuav ua tim
khawv txog kuv, thiab nej kuj yuav ua kuv tim khawv ib yam.

Txais: As les lus yas, as les lus yas.

Ntawv Moo Zoo: LK 12: 8-12

Yes Xus hais rau nws cov thwj tim tias:
8 “Kuv hais rau nej tias, txhua leej uas lees kuv nyob ntawm tsoom neeg xub ntiag, mas Neeg Leej Tub kuj yuav lees tus ntawd nyob ntawm Tswv Ntuj cov Tshiab xub ntiag thiab.
9 Leej twg tsis lees kuv nyob ntawm tsoom neeg xub ntiag, mas kuj yuav tsis muaj tus lees nws nyob ntawm Tswv Ntuj tsoom Tshiab xub ntiag thiab.
10 Yog leej twg hais ib lo lus phem txog Neeg Leej Tub, mas Ntuj yuav zam tau rau nws. Tab sis tus twg thuam Leej Ntuj Plig Ntshiab, mas Ntuj yuav tsis zam rau nws li.
11 Thaum luag coj nej mus sawv hauv cov tsev txoos, thiab ntawm cov thawj coj thiab cov nom tswv xub ntiag, mas nej tsis txhob txhawj tias nej yuav ua li cas, yuav coj li cas nej thiaj tau cai, thiab yuav hais dab tsi;
12 vim thaum txog sij hawm, Leej Ntuj Plig Ntshiab mam li yuav qhia kom nej hais dab tsi."

Tim 18 lub 10 Hli 2021

Hnub Ob Lis Piam Nees Nkaum Cuaj Nruab Xyoo B Nruab Lis Piam Xyoo I

Hmoov Hwm LN Lus Kas, tus sau Ntawv Moo Zoo
Lectionary: 661

Zaj Nyeem Ib: 2 TM 4: 10-17b

Tus hmov tshua,
10 Des Mas uas nyiam lub ntiaj teb dua ntais, nws tso kuv tseg thiab nws sawv kev mus rau Tes Xas Los Nis lawm; Khes Xees mus rau Nkas Las Tias, hos Tis Tos mus Das Mas Tias lawm.
11 Tshuav Lus Kas tib leeg nrog kuv nyob xwb. Koj mus coj Mas Kos nrog koj tuaj thiab, vim nws yog ib tug pab tau kuv zoo hauv txoj hauj lwm tshaj Ntuj lus.
12 Kuv tau xa Tis Sis Kos mus nyob Es Fes Xos lawm.
13 Thaum koj tuaj, thov koj pab nqa kuv lub tsho tshaj sab uas kuv tso nyob Thuas, hauv Kas Pos tsev tuaj, thiab nqa cov ntawv ncaug tuaj, tseem ceeb tshaj yog cov tawv sau ntawv.
14 Tus kws nchuav tooj As Les Xas Nraws tau ua phem kawg rau kuv; cia Huab Tais mam li ua pauj rau nws raws li nws tau ua.
15 Koj tus kheej yuav tau ceev faj zoo txog nws thiab, vim nws yog ib tug yeeb ncuab tawm tsam peb txoj kev tshaj lub Moo Zoo heev kawg.
16 Thawj zaug uas kuv tau mus hais ntawm cov nom txiav txim xub ntiag, mas tsis muaj leej twg tuaj nres kuv tog li, sawv daws tso kuv pov tseg tas tib si. Kuv thov kom Ntuj txhob suav txim rau lawv!
17 Tab sis Huab Tais tau sawv nrog nraim kuv, thiab tau muab lub zog los txhawb kuv, kom vim kuv tau tshaj lub Moo Zoo kom txhij txhua tiav log, ces tas cov neeg teev pej kum dab thiaj tau hnov txog.

NPN 145: 10-11, 12-13, 17-18

Txais: (12) Huab Tais, koj cov phooj ywg tshaj rau neeg paub txog
koj lub Ceeb Tsheej muaj hwj chim ci ntsa iab.

HUAB TAIS, cia tas koj cov hauj lwm ua koj tsaug,
thiab cia cov uas nyiam koj cav txog koj.
Cia lawv qhuas txog koj lub Ceeb Tsheej muaj hwj chim
thiab piav txog koj lub hwj huam loj.

Txais: (12) Huab Tais, koj cov phooj ywg tshaj rau neeg paub txog
koj lub Ceeb Tsheej muaj hwj chim ci ntsa iab.

Cia lawv qhia rau neeg paub txog koj lub hwj huam loj
thiab koj lub Ceeb Tsheej muaj hwj chim ci ntsa iab.
Koj lub Ceeb Tsheej yog ib lub Ceeb Tsheej rau txhua lub hnub nyoog,
thiab koj txoj kev tswj kav yuav nyob mus lj dhau txhua tiam.

Txais: (12) Huab Tais, koj cov phooj ywg tshaj tawm txog
koj lub Ceeb Tsheej muaj hwj chim ci ntsa iab.

Huab Tais ua ncaj nyob hauv tas nws tej kev
nws ua qhov ntshiab nyob hauv tas nws tej dej num.
Huab Tais nyob ze tas cov uas hu txog nws,
tas cov uas muaj lub siab hu txog nwsnyo hauv txoj kev tseeb.

Txais: (12) Huab Tais, koj cov phooj ywg tshaj rau neeg paub txog
koj lub Ceeb Tsheej muaj hwj chim ci ntsa iab.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias: Kuv tau xaiv nej hauv lub ntiaj teb los
Kom nej mus txi ib co txiv uas yuav nyob ruaj.

Txais: As les lus yas, as les lus yas.

Ntawv Moo Zoo: LK 10: 1-9

1 Dhau qhov ntawd lawm, Huab Tais tseem xaiv xya caum ob leeg thwj tim; nws xa lawv mus tej pab ob leeg, ua nws ntej mus rau hauv txhua lub nroog thiab txhua qhov chaw uas nws yuav mus.
2 Nws hais rau lawv tias: "Qoob loo zoo sau muaj ntau kawg, tab sis cov tub zog muaj tsawg. Nej thov tus Tswv qoob kom nws xa ib co tub zog tuaj sau nws cov qoob.
3 Nej kav tsij mus! Kuv xa nej zoo li ib co yaj mus nyob nruab nrab ib cov hma.
4 Nej tsis txhob nqa nas nyiaj, txhob ris hnab, txhob nqa khau, txhob hu leej twg ntawm kev.
5 Nej chaws mus hauv lub tsev twg, nej xub hais tias: "Kom lub tsev no nyob kaj lug lau!"
6 Yog muaj txoj kev kaj lug ib leeg tub nyob ntawd, mas nej txoj kev kaj lug yuav nyob saum nws. Yog tsis muaj, mas nej txoj kev kaj lug yuav rov los rau nej.
7 Nej nyob hauv lub tsev ntawd, nej noj nej haus tej yam uas lawv muaj hauv tsev, vim tus tub zog tsim nyog txais ib tug nqi zog. Nej txhob tawm hauv ib lub tsev mus nyob dua lwm lub.
8 Nej mus hauv lub nroog twg, yog luag txais nej, mas nej noj tej yam uas luag muab rau nej.
9 Nej kho cov neeg mob hauv lub nroog ntawd kom zoo, thiab nej hais rau lawv tias: "Tswv Ntuj lub Ceeb Tsheej tuaj txog ze nej lawm."

Tim 19 lub 10 Hli 2021

Hnub Peb Lis Piam Nees Nkaum Cuaj Nruab Xyoo B Nruab Lis Piam Xyoo I
Lectionary: 474

Yuav Hwm LN John de Brébeuf &Isaac Jogues, leej choj tuag ua Time Khawv

Zaj Nyeem Ib: LM 5: 12, 15b, 17-19, 20b-21

Cov kwv tij nkauj muad,
12 Vim ib tug neeg ces kev txhaum tau tshwm los nyob hauv lub ntiaj teb, thiab kev txhaum kuj coj kev tuag los, ces txoj kev tuag thiaj raug tas zeej tsoom, vim sawv daws ua txhaum.
15b Yog tias coob leej tuag vim ib tug neeg xwb ua txhaum, mas Tswv Ntuj lub txiaj ntsim thiab ib tug neeg xwb, Yes Xus Pleev lub txiaj ntsim paj tshab haj yam ntws lug los rau coob leej ntau tus.
17 Yog tias ib tug neeg tau ua txhaum, ces kev tuag tau ua vaj kav txhua tus vim ib tug ntawd, mas cov uas tau txais txiaj ntsim koob hmoov ntau thiab txais kev ncaj ua paj tshab, lawv haj yam yuav tau ua vaj nyob hauv txoj sia vim Yes Xus Pleev tib leeg .
18 Li ntawd, yog ib tug neeg qhov txhaum pus tas ib zeej tsoom mus rau kev raug txim, mas ib tug neeg txoj kev ua ncaj kuj pus tas ib zeej tsoom mus rau kev ncaj ncees muaj txoj sia.
19 Ib yam li ib tug neeg txoj kev tsis mloog lus ua kom coob leej poob mus ua neeg txhaum, ib yam li ntawd ib tug neeg txoj kev mloog lus kuj ua kom coob leej tau txais txoj kev ua neeg ncaj.
20b Qhov twg muaj kev txhaum ntau, mas haj yam muaj txiaj ntsim ntau ntws lug.
21 Ces ib yam li txoj kev txhaum ua vaj nyob hauv txoj kev tuag, ib yam li ntawd, lub txiaj ntsim kuj ua vaj nyob hauv txoj kev ncaj, kom tau pub txoj sia nyob mus li nyob hauv Yes Xus Pleev peb tus Huab Tais.

NPN 40: 7-8a, 8b-9, 10, 17

Txais: (8a+9a) Huab Tais, kuv nyob ntawm no; kuv tuaj ua raws koj nyiam.

Koj tsis ntshaw tej tsiaj los tej txhiam xws txi rau koj,
tiam sis koj muab pob ntseg rau kuv kom kuv txawj mloog lus.
Koj tsis xav tau tsiaj hlawv txi ntuj los tsiaj hlawv them txim txhaum,
kuv thiaj hais tias: “Kuv nyob ntawm no, cia kuv tuaj.”

Txais: (8a+9a) Huab Tais, kuv nyob ntawm no; kuv tuaj ua raws koj nyiam.

Nyob hauv kauj ntawv muaj lus sau tseg rau kuv tias:
“Ua ywj koj lub siab, kuv tus Tswv Ntuj,
yog yam ntxim kuv siab,
koj txoj cai nyob rawv hauv kuv nruab plaw!”

Txais: (8a+9a) Huab Tais, kuv nyob ntawm no; kuv tuaj ua raws koj nyiam.

Kuv tau tshaj txog koj txoj kev ncaj
rau tsoom neeg coob tuaj sib txoos ua ke,
kuv tsis tau kaw kuv lub qhov ncauj,
HUAB TAIS, koj yeej paub.

Txais: (8a+9a) Huab Tais, kuv nyob ntawm no; kuv tuaj ua raws koj nyiam.

Thov kom txhua leej uas nrhiav koj
zoo siab hom khaj nyob hauv koj,
thiab kom cov uas nyiam koj txoj kev cawm
cav tsis tseg tias: “HUAB TAIS nto koob meej.”

Txais: (8a+9a) Huab Tais, kuv nyob ntawm no; kuv tuaj ua raws koj nyiam.

As Les Lus yas: LK 21: 36

Txais: As les lus yas, as les lus yas.

Nej yuav ceev faj txhua lub sij hawm thiab yuav teev Ntuj,
nej thiaj yuav muaj zog sawv taus ntseg
ntawm Neeg Leej Tub xub ntiag."

Txais: As les lus yas, as les lus yas.

Ntawv Moo Zoo: LK 12: 35-38

Yes Xus hais rau nws cov thwj tim tias:
35 "Nej yuav sia siv rawv thiab taws teeb nraim,
36 nej ua zoo li ib co tub txib uas tos ntsoov lawv tus tswv mus noj tshoob yuav rov los. Thaum nws rov los txog, nws yuav khob qhov rooj, ces lawv yuav qhib plho rau nws tam sis ntawd.
37 Cov tub txib uas thaum tus tswv los txog, nws pom lawv zov hmo tos, mas lawv txoj hmoov zoo. Kuv hais tseeb rau nej tias, tus tswv yuav sia siv, yuav coj lawv mus zaum ntawm rooj thiab yuav nqa mov los tiam lawv.
38 Txawm tias tus tswv yuav los txog thaum lub caij zov hmo teev ob los teev peb los xij, yog nws pom lawv zov hmo zoo li ntawd, mas cov tub txib ntawd txoj hmoov zoo.”

Tim 20 lub 10 Hli 2021

Hnub Plaub Lis Piam Nees Nkaum Cuaj Nruab Xyoo B Nruab Lis Piam Xyoo I
Lectionary: 475

XHLT: LN Paul Ntoo Cuam(Paul of the Cross)

Zaj Nyeem Ib: LM 6: 12-18

Cov kwv tij nkauj muad:
12 Nej txhob cia kev txhaum kav nej lub cev uas txawj tuag, nej thiaj yuav tsis mloog nej lub cev tej kev ntshaw.
13 Nej txhob cia nej tes taw qhov muag poob rau kev txhaum kom yog ib co cuab yeej txhawb txoj kev phem, nej yuav muab nej tus kheej tso rau Tswv Ntuj, xws li ib co neeg ciaj sawv hauv qhov tuag rov los lawm, thiab muab nej tes taw qhov muag rau Tswv Ntuj ua ib co cuab yeej txhawb txoj kev ncaj.
14 Kev txhaum yuav kav tsis tau nej, vim nej tsis zwm rau txoj cai, tiam sis nej zwm rau lub txiaj ntsim.
15 Yog li yuav zoo li cas? Peb puas yuav ua txhaum vim peb tsis zwm rau txoj cai tiam sis peb zwm rau lub txiaj ntsim? Yeej yuav tsis muaj tau li ntawd li.
16 Nej puas paub tias thaum nej rov muab nej zwm rau ib tug tswv kom nej ua nws cov qhev mloog lus, mas nej yog tus tswv uas nej mloog ntawd cov qhev? Ces nej yuav yog kev txhaum uas coj mus rau kev tuag cov qhev, los yog kev mloog lus uas coj mus rau kev ua neeg ncaj cov tub txib,
17 Peb ua Tswv Ntuj tsaug, vim txawm tias yav thaud nej tau ua kev txhaum qhev, los nej tuaj yeem muab nej lub siab tas nrho los mloog raws li txoj kev cai uas nej tau kawm thiab tau cog lus tias nej yuav coj.
18 Ces nej tau dim ntawm kev txhaum lawm, ces nej los ua kev ncaj cov tub txib.

NPN 124: 1b-3, 4-6, 7-8

Txais: (8a) Peb tau kev pab yog nyob hauv Huab Tais lub npe.

Yog HUAB TAIS tsis txhob tuaj peb tog,
His Xais Lais yuav tsum hais tias:
yog HUAB TAIS tsis txhob tuaj peb tog,
thaum cov neeg tuaj tua peb,
mas lawv yeej yuav muab peb nqos ciaj tas,
vim lawv npau taws cuag hluav taws kub rau peb.

Txais: (8a) Peb tau kev pab yog nyob hauv Huab Tais lub npe.

Ntshai dej twb los nyab peb tas,
tus dej twb phwj tuaj tshoob peb mus tas;
Dej sab siv twb huam tuaj tshoob peb tas.
Peb cav lus zoo txog HUAB TAIS,
Vim nws tsis tau tso peb raug lawv cov hniav xo peb!

Txais: (8a) Peb tau kev pab yog nyob hauv Huab Tais lub npe.

Peb zoo puav tam li tus noog dim
ntawm tus cuab ntxiab lub vas ;
lub vas ntuag rhe, peb dim plaws lawm.
Peb tau kev pab yog nyob hauv HUAB TAIS lub npe,
nws uas yog tus tsim lub ntuj lub teb.

Txais: (8a) Peb tau kev pab yog nyob hauv Huab Tais lub npe.

As Les Lus Yas: MT 24: 42a, 44

Txais: As les lus yas, as les lus yas.

Nej yuav zov hmo nraim!
Vim nej tsis paub tias Neeg Leej Tub yuav los lub caij twg.

Txais: As les lus yas, as les lus yas

Ntawv Moo Zoo: LK 12: 39-48

Yes Xus hais rau nws cov thwj tim tias:
39 “Nej yeej paub tseeb tias, yog tus tswv tsev paub lub sij hawm twg tub sab yuav tuaj, mas nws yuav zov nraim tsis cia tub sab tho nws qhov tsev.
40 Nej kuj ib yam thiab, nej yuav npaj tos nraim, vim yog lub sij hawm uas nej tsis nco faj, mas Neeg Leej Tub thiaj yuav los ."
41 Ces Pob Zeb hais tias: "Huab Tais, koj hais zaj paj lug no, puas yog koj hais rau peb xwb, los yog hais rau sawv daws ?"
42 Huab Tais teb hais tias: "Leej twg yog tus tub txib pheej xeeb thiab xyuam xim, uas tus tswv tsev tsa nws saib tus tswv cov tub zog kom thaum txog caij nws faib txhiam laj txhiam xws rau lawv raws caij raws nyoog?
43 Tus tub txib uas thaum tus tswv rov los txog, nws pom tab tom lis nws tej dej num li ntawd, mas nws txoj hmoov zoo.
44 Kuv hais tseeb rau nej, tus tswv yuav tsa nws saib tus tswv lub cuab tam tas huv si.
45 Tab sis yog tus tub txib xav hauv siab tias 'kuv tus Tswv yuav los lig,' ces nws pib muab tus tswv tej tub txib ntxhais txib ntaus, nws noj nws haus thiab tseem haus kom qaug,
46 mas tus tub txib no tus tswv yuav los txog hnub uas nws tsis nco faj, thiab lub sij hawm uas nws tsis paub, tus tswv yuav ntiab tus tub txib no tawm kom mus nrog cov neeg hwm Ntuj nyob.
47 Tus tub txib twg uas nws yeej paub qhov uas tus tswv xav kom ua, tab sis nws tsis npaj dab tsi li, thiab tsis tau ua raws li qhov tus tswv xav kom ua, mas tus tub txib ntawd yuav raug tus tswv rab nplawm sab ntsuav.
48 Hos tus tub txib uas yeej tsis paub qhov tus tswv xav kom ua li, thiab nws kuj tau ua tej yam tsim nyog ntaus kom sab, mas nws yuav raug tus tswv nplawm sib dua; vim tias tus uas tau txais ntau, kuj yuav raug them ntau rov qab, thiab tus uas haj yam tau txais ntau ntxiv, mas nws haj yam yuav tau them ntau tshaj rov qab.”

Tim 21 lub 10 Hli 2021

Hnub Tsib Lis Piam Nees Nkaum Cuaj Nruab Xyoo B Nruab Lis Piam Xyoo I
Lectionary: 476

Zaj Nyeem Ib: LM 6: 19-23

Cov kwv tij nkauj muad:
19 Kuv piav raws li tib neeg xwb, vim nej muaj qhov tsis zoo txaus nyob hauv nej lub cev; yam li thaum ub, nej tau cia nej tes taw qhov muag mus ciaj txoj kev tsis huv thiab txoj kev ua txhaum qhev ntau heev zuj zus, zaum no, nej kuj yuav muab nej tes taw qhov muag los zwm rau txoj kev ncaj kom nej ua tau neeg ntshiab dawb huv.
20 Thaum nej tseem ua kev txhaum qhev, mas nej tsis zwm rau txoj kev ncaj li.
21 Tiam sis thaum ntawd, nej tau dab tsi zoo los ntawm tej yam nej tau ua uas nyem no nej rov txaj muag txog? Vim qhov kawg, tej ntawd yuav coj nej mus rau hauv txoj kev tuag xwb.
22 Tiam sis nyem no nej dim ntawm txoj kev ua kev txhaum qhev los ua Tswv Ntuj cov tub txib lawm, mas qhov zoo rau nej yog qhov tias nws yuav coj nej mus ua neeg ntshiab dawb huv, ces qhov kawg nej yuav tau txoj sia nyob mus li.
23 Vim tias tus nqi zog uas txoj kev txhaum them los yog txoj kev tuag, hos cov paj tshab uas Tswv Ntuj pub yog txoj sia nyob mus li nyob hauv Yes Xus Pleev peb tus Huab Tais.

NPN 1: 1-2, 3, 4+6

Txais: (NPN 40:5a) Cov muaj hmoov zoo yog cov uas tso siab rau Huab Tais.

Muaj hmoov zoo yog tus uas tsis coj
raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg uas saib tsis taus luag,
tiam sis nws zoo siab hlo coj HUAB TAIS txoj cai,
thiab xav ntsoov txog txoj cai ntawd nruab hnub hmo ntuj.

Txais: (NPN 40:5a) Cov muaj hmoov zoo yog cov uas tso siab rau Huab Tais.

Nws zoo li tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj ntsws li.
Nws ua yam twg tau yam ntawd. .

Txais: (NPN 40:5a) Cov muaj hmoov zoo yog cov uas tso siab rau Huab Tais.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (NPN 40:5a) Cov muaj hmoov zoo yog cov uas tso siab rau Huab Tais.

As Les Lus Yas: FLP 3: 8-9

Txais: As les lus yas, as les lus yas.

kuv saib tas puas tsav yam tsis muaj nuj nqes li, kom kuv
tau Leej Pleev ua kuv tug thiab kom kuv tau nyob hauv nws.

Txais: As les lus yas, as les lus yas.

Ntawv Moo Zoo: LK 12: 49-53

Yes Xus hais rau nws cov thwj tim tias:
49 "Kuv tuaj zes taws rau lub ntiaj teb, kuv xav kom kheev lam cov hluav taws ntawd twb cig lam lug lawm.
50 Muaj ib lub cim ntxuav uas kuv yuav tsum tau mus txais; ces kuv lub siab ntxhov hnyo mus txog thaum tej ntawd tiav tas.
51 Nej puas xav tias kuv tuaj ua kom muaj kev thaj yeeb nyob ntiaj teb no? Tsis yog li ntawd. Kuv hais rau nej tias, yog kuv tuaj ua kom muaj kev sib ncaim sib cais.
52 Txij no mus, ib tse neeg muaj tsib leeg yuav sib ncaim sib cais, peb leeg yuav tiv ob leeg, ob leeg yuav tiv peb leeg ;
53 txiv yuav tiv tub, tub yuav tiv txiv, niam yuav tiv ntxhais, ntxhais yuav tiv niam, poj yuav tiv nyab, nyab yuav tiv poj."

Tim 22 lub 10 Hli 2021

Hnub Rau Lis Piam Nees Nkaum Cuaj Nruab Xyoo B Nruab Lis Piam Xyoo I
Lectionary: 477

XHLT: LN Zam Paj Lug II, vaj qhia

Zaj Nyeem Ib: LM 7: 18-25a

cov kwv tij nkauj muad:
18 Kuv paub tias qhov zoo yeej tsis nyob txawm hauv kuv, los yog hauv kuv lub cev li. Lub siab xav ua yam zoo mas yeej nyob rawv ntawd, tab sis yuav ua kiag qhov zoo mas tsis nyob ntawd li.
19 Vim tias kuv tsis ua qhov zoo uas kuv xav ua, hos kuv ua qhov phem uas kuv tsis xav ua.
20 Yog kuv ua qhov kuv tsis xav ua, mas tsis yog kuv ua qhov ntawd, yog txoj kev txhaum uas nyob hauv kuv ua qhov ntawd.
21 Ces kuv thiaj pom tias muaj ib yam zoo li no: Thaum kuv xav ua qhov zoo, mas qhov phem tawm plaws tam sim ntawd los ua ntej.
22 Kuv yeej txaus siab tas nrho rau Tswv Ntuj Txoj Cai nyob puag hauv kuv nruab siab,
23 tab sis kuv pom tias muaj dua lwm txoj cai tswj kuv lub cev, uas pheej tawm tsam tiv txoj cai nyob hauv kuv lub tswv yim, nws muab kuv mus zwm rau txoj kev ua txhaum uas nyob hauv kuv lub cev.
24 Kuv yog ib tug neeg txom nyem tas nrho tiag! Leej twg yuav npo tau kuv dim ntawm lub cev uas coj mus rau txoj kev tuag?
25 Ua Tswv Ntuj tsaug, vim kawg yog Yes Xus Pleev peb tus Huab Tai xwb.

NPN 119: 66, 68, 76, 77, 93, 94

Txais: (68b) Huab Tais, thov koj qhia koj cov cai lij choj rau kuv.

Thov koj qhia kev thoob tsib thiab kev paub txuj rau kuv,
vim kuv tso siab rau koj cov lus qhia.

Txais: (68b) Huab Tais, thov koj qhia koj cov cai lij choj rau kuv.

Koj yog tus siab zoo siab dav tas nrho,
thov koj qhia koj cov cai lij choj rau kuv.

Txais: (68b) Huab Tais, thov koj qhia koj cov cai lij choj rau kuv.

Thov cia koj txoj kev ua siab zoo nplij kuv,
raws li koj tau cog lus rau koj cov tub txib.

Txais: (68b) Huab Tais, thov koj qhia koj cov cai lij choj rau kuv.

Thov kom koj muab koj txoj kev khuv leej rau kuv, ces kuv
yuav muaj txoj sia, vim koj Txoj Cai yog kuv kev zoo siab.

Txais: (68b) Huab Tais, thov koj qhia koj cov cai lij choj rau kuv.

Kuv yuav tsis hnov qab koj cov lus qhia ib zaug li,
Vim koj cov lus qhia ua kom kuv muaj txoj sia.

Txais: (68b) Huab Tais, thov koj qhia koj cov cai lij choj rau kuv.

Kuv yog koj tug, thov koj cawm kuv mas !
Vim kuv tau nrhiav koj cov lus qhia.

Txais: (68b) Huab Tais, thov koj qhia koj cov cai lij choj rau kuv.

As Les Lus Yas: MT 11: 25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: LK 12: 54-59

54 Yes Xus hais rau tsoom neeg sawv daws tias: "Thaum nej pom huab sawv laum sab hnub poob, tam sis ntawd, nej hais tias ntuj yuav los nag, ces kuj los nag tiag.
55 Thaum cua nplawm sab qab teb tuaj, nej hais tias ntuj yuav sov, ces muaj li ntawd tuaj tiag.
56 Neeg zoo nraum tawv, nej twb paub ntsuas lub ntuj lub teb tus yam ntxwv, ua cas nej tsis paub ntsuas lub zim txwv no li?
57 Vim li cas nej tsis txiav txim rau nej tus kheej tias qhov twg yog qhov ncaj?
58 Yog koj nrog koj tus yeeb ncuab taug kev mus cuag nom, mas nyob ntawm kev, koj yuav tsum nrog nws sib hais kom haum ua ntej, tsam nws coj koj mus kom rau tus nom txiav txim, ces nom txiav txim muab koj cob nkaus rau tub ceev xwm, tub ceev xwm muab koj pov rau hauv tsev loj faj.
59 Kuv hais rau koj tias: Koj yuav tsis tawm hauv tsev loj faj los mus txog thaum koj rho nyiaj qab nas txog xus kawg los them kom tas rau tso.”

Tim 23 lub 10 Hli 2021

Hnub Xya Lis Piam Nees Nkaum Cuaj Xyoo B Nruab Lis Piam Xyoo I
Lectionary: 478

XHLT: LN John nyob Capistrano, leej choj

Zaj Nyeem Ib: LM 8: 1-11

Cov kwv tij nkauj muad:
1 Nyem no tsis muaj kev nyob txim tuaj raug cov neeg uas nyob hauv Yes Xus Pleev lawm.
2 Vim tias Leej Ntuj Plig uas pub txoj sia nyob hauv Yes Xus Pleev nws Txoj Cai tau txhiv nej ntawm txoj kev txhaum thiab kev tuag txoj cai lawm.
3 Yam uas lub cev ua kom txoj cai tsis muaj zog ua tau, mas Tswv Ntuj ua tau: Nws xa nws Leej Tub tuaj yug muaj ib lub cev xws li lub cev muaj txhaum; nws xav rhuav kev txhaum, mas nws muab txim rau txoj kev txhaum uas nyob hauv neeg lub cev..
4 Ces txoj kev ncaj ncees raws li Txoj Cai tau txiav thiaj tshwm sim los nyob hauv peb, vim peb tsis coj tus yam ntxwv raws li lub cev, peb coj tus yam ntxwv raws li Leej Tswv Yim qhia.
5 Vim cov neeg ua neej mloog lub cev, mas lawv tsuas xav ntsoov txog yam uas lub cev nyiam; hos cov neeg ua neej mloog Leej Tswv Yim, mas lawv xav ntsoov txog yam uas Leej Tswv Yim nyiam.
6 Yam uas lub cev ntshaw tsuas coj mus rau kev tuag. Yam uas Leej Tswv Yim nyiam coj mus rau txoj sia thiab txoj kev kaj siab lug.
7 Yam uas lub cev ntshaw nws ua yeeb ncuab rau Tswv Ntuj, nws tsis zwm rau Tswv Ntuj Txoj Cai, vim nws yeej zwm tsis tau.
8 Cov neeg zwm rau lub cev, lawv ua xis Tswv Ntuj siab tsis tau.
9 Tiam sis nej mas nej tsis zwm rau lub cev, nej zwm rau Leej Tswv Yim, yog tias Tswv Ntuj Leej Tswv Yim nyob txawm hauv nej. Leej twg tsis muaj Leej Pleev lub Tswv Yim nyob hauv nws mas nws tsis yog Leej Pleev tug.
10 Yog Leej Pleev yeej nyob hauv nej, mas tab yog nej lub cev tuag vim kev txhaum, los nej lub tswv yim muaj txoj sia vim txoj kev ncaj.
11 Yog tias tus uas tau tsa Yes Xus sawv hauv cov tuag rov los nws Leej Tswv Yim nyob txawm hauv nej, mas tus uas tau tsa Yes Xus sawv hauv cov tuag rov los kuj yuav pub txoj sia rau nej lub cev txawj tuag thiab, vim nws Leej Tswv Yim uas nyob txawm hauv nej.

NPN 24: 1b-2, 3-4ab, 5-6

Txais: (6) HUAB TAIS, ntawm no yog haiv neeg uas ntshaw pom koj lub ntsej muag.

Lub ntiaj teb thiab puas tsav yam nyob hauv yog HUAB TAIS li,
lub sim ceeb thiab cov neeg nyob hauv yog nws tug.
Vim nws yog tus tau tsim lub ntiaj teb txawb rau saum cov hiav txwv
thiab muab tso rau saum cov dej ntws.

Txais: (6) HUAB TAIS, ntawm no yog haiv neeg uas ntshaw pom koj lub ntsej muag.

Leej twg thiaj yuav nce tau mus rau saum HUAB TAIS lub roob?
Leej twg thiaj yuav mus sawv taus nyob hauv nws thaj chaw ntshiab?
Yog tus uas txhais tes tsis muaj txhaum, lub siab dawb huv,
tus uas tsis ntshaw tej yam tsis muaj qab hau.

Txais: (6) HUAB TAIS, ntawm no yog haiv neeg uas ntshaw pom koj lub ntsej muag.

Nws yuav tau txais HUAB TAIS lo lus foom koob hmoov,
yog paj tshab tuaj ntawm Tswv Ntuj tus cawm nws tuaj.
Lawv yuav zoo li no, tsav neeg uas nrhiav Tswv Ntuj,
xeem neeg uas nrhiav Yas Kos tus Tswv Ntuj lub ntsej muag.

Txais: (6) HUAB TAIS, ntawm no yog haiv neeg uas ntshaw pom koj lub ntsej muag.

As Les Lus Yas: EXK 33: 11

Txais: As les lus yas, as les lus yas.

Huab Tais hais tias: Kuv tsis zoo siab kom tus neeg phem tuag,
tiam sis kuv zoo siab kom nws tig los ua zoo, nws thiaj yuav tau txoj sia.

Txais: As les lus yas, as les lus yas.

Ntawv Moo Zoo: LK 13: 1-9

1 Lub zim txwv ntawd, muaj ib co neeg tuaj qhia rau Yes Xus txog cov neeg Nkas Lis Lais uas Pis Las Tos muab lawv cov ntshav mus xyaw rau cov ntshav tsiaj uas lawv muab txi Ntuj.
2 Ces Yes Xus hais rau lawv tias: "Nej puas xav tias vim cov Nkas Lis Lais ntawd tau ua txhaum loj dua lwm cov neeg nyob Nkas Lis Lais, lawv thiaj raug txom nyem zoo li ntawd ?
3 Kuv hais rau nej tias lawv tsis tau ua txhaum loj dua. Tab sis yog nej sawv daws tsis hloov siab tig los ua zoo, mas nej kuj yuav tuag ib yam li ntawd thiab.
4 Los puas kaum yim leej neeg uas tus pej thuam Xis Los Es vau los tsuam tuag, mas nej puas xav tias lawv yog neeg txhaum loj dua ib tsoom neeg nyob Yes Lus Xas Les huv si ?
5 Kuv hais rau nej tias lawv tsis yog neeg txhaum loj dua. Tab sis yog nej tsis hloov siab tig los ua zoo, mas nej sawv daws kuj yuav tuag ib yam li ntawd thiab."
6 Ces Yes Xus hais zaj paj lug no tias: "Muaj ib tug neeg cog tau ib tsob txiv ncuav pias rau hauv nws lub vaj txiv ntoo. Nws tuaj de txiv ncuav pias, tab sis tsis pom muaj ib lub txiv li.
7 Ces nws hais rau tus tub txib zov vaj tias: "Koj saib! Tau peb xyoos no kuv tuaj de txiv ncuav pias, kuv yeej tsis pom ib lub txiv li. Koj muab tsob ntoo ncuav pias ntov. Yuav cia nws nyob nkim av ua dab tsi?"
8 Tus tub txib zov vaj teb rau tus tswv vaj tias: "Huab Tais, thov koj cia tsob ntoo nyob xyoo no ntxiv. Kuv yuav khawb av ncig lub hauv paus thiab npoog chiv rau.
9 Tej zaum lwm xyoo, tsob ntoo yuav txi txiv. Yog tsis txi, koj mam muab ntov."

Tim 25 lub 10 Hli 2021

Hnub Ob Lis Piam peb caug Nruab Xyoo B Nruab Lis Piam Xyoo I
Lectionary: 479

Zaj Nyeem Ib: LM 8: 12-17

Cov kwv tij nkauj muad:
12 Peb tsis tshuav lub cev nqe, peb tsis tas yuav tsum ua neej mloog lub cev.
13 Yog nej ua neej mloog lub cev mas nej kawg yuav tuag; tab sis yog nej cia Leej Tswv Yim pab nej cheem lub cev cov hauj lwm, mas nej yuav muaj txoj sia.
14 Txhua leej txhua tus uas Tswv Ntuj Leej Tswv Yim coj lawv, mas lawv yog Tswv Ntuj cov me nyuam.
15 Nej tsis tau txais ib lub tswv yim ua qhev, kom nej poob rau hauv txoj kev ntshai. Tiam sis nej tau txais ib lub tswv yim ua tub ki tshiab, ces nej hu Tswv Ntuj tias: ‘As Npas! Txiv!’
16 Leej Tswv Yim nrog peb lub tswv yim zeem tseeb tias peb yog Tswv Ntuj cov me nyuam tiag.
17 Vim cov me nyuam kuj yog cov yuav txais lub cuab tam, ces peb yuav tau txais Tswv Ntuj lub cuab tam, peb yuav nrog Leej Pleev koom txais lub cuab tam ntawd, tsuav yog tias peb nrog nws raug txom nyem, kom peb tau nrog nws muaj hwj chim thiab.

NPN 68: 2+4, 6-7ab, 20-21

Txais: (21a) Peb tus Tswv Ntuj yog tus Tswv Ntuj pub kev cawm seej.

Tswv Ntuj sawv tsees, nws cov yeeb ncuab tawg tas,
cov ntxub Tswv Ntuj khiav mus deb ntawm nws lub ntsej muag
Hos cov siab ncaj zoo siab thiab hom khaj nyob ntawm
Tswv Ntuj xub ntia; lawv zoo siab luag ntxhi :

Txais: (21a) Peb tus Tswv Ntuj yog tus Tswv Ntuj pub kev cawm seej.

Tus ua cov ntsuag nos txiv thiab tuaj cov poj ntsuam tog
yog Tswv Ntuj uas nyob hauv nws lub tsev ntshiab.
Tswv Ntuj pub ib tsev neeg rau tus tsis muaj leej twg,
nws coj cov neeg raug txim tawm los rau kev vam meej,

Txais: (21a) Peb tus Tswv Ntuj yog tus Tswv Ntuj pub kev cawm seej.

Thov kom HUAB TAIS nto koob meej txhia niaj txhia hnub.
Nws yog tus ris peb lub nra; Tswv Ntuj yog peb txoj kev cawm seej.
Tswv Ntuj yog tus Tswv Ntuj uas cawm peb;
HUAB TAIS, kuv tus Huab Tais yog tus tswj txoj kev tuag cov rooj vag.

Txais: (21a) Peb tus Tswv Ntuj yog tus Tswv Ntuj pub kev cawm seej.

As Les Lus Yas: ZAM 17: 17b, 17a

Txais: As les lus yas, as les lus yas.

Huab Tais, koj lo lus yog qhov tseeb;
thov koj qee peb mus nyob hauv qhov tseeb.

Txais: As les lus yas, as les lus yas.


Ntawv Moo Zoo: LK 13: 10-17

10 Muaj ib zaug Yes Xus qhuab qhia nyob hauv ib lub tsev txoos hnub xas npas tos.
11 Nyob ntawd muaj ib tug poj niam raug ib tug dab khoov duav tau kaum yim xyoo lawm. Nws nyob khoov nkoos, yeej sawv tsis taus ntseg li.
12 Yes Xus pom tus poj niam ntawd, Yes Xus hais rau nws tias: "Tus poj niamj, koj dim ntawm koj tus mob khoov duav lawm."
13 Ces Yes Xus tsa nws txhais tes rau saum tus poj niam; tam sis ntawd, tus poj niam sawv taus ntseg, ces nws cav txog Tswv Ntuj.
14 Tus tswj tsev txoos tsis txaus siab rau qhov Yes Xus kho neeg hnub Xas Npas Tos, nws thiaj qhib ncauj hais rau tsoom sid tias: "Muaj rau hnub uas yuav tsum ua hauj lwm, nej tuaj kho mob tej hnub ntawd, txhob tuaj hnub Xas Npas Tos!"
15 Huab Tais teb rau nws tias: "Neeg zoo nraum daim tawv! Hnub Xas Npas Tos, nej txhua leej txhua tus twb daws nej tus nyuj los tus luj ntawm lub dab zaub cab mus haus dej los tsis yog?
16 Has Nplas Has tus ntxhais no, Xas Tas twb muab khi tau kaum yim lub xyoo no lawm, tseem yuav tsis txhob ua kom nws dim ntawm cov hlua no hnub Xas Npas Tos thiab lod?"
17 Thaum Yes Xus hais li ntawd, cov neeg ntxub Yes Xus txaj muag kawg, hos tas tsoom sid zoo siab rau txhua yam hauj lwm nto koob meej uas Yes Xus ua.

Tim 26 lub 10 Hli 2021

Hnub Peb Lis Piam Peb Caug Nruab Xyoo B Nruab Lis Piam Xyoo I
Lectionary: 480

Zaj Nyeem Ib: LM 8: 18-25

Paj Lug sau ntawv tias:
18 Kuv saib tias tej kev txom nyem nyob hauv lub caij nyem no tsis loj npaum li cas yog muab los piv rau lub hwj chim uas yuav tawm tuaj rau peb pom xyeem.
19 Vim tas puas tsav yam Ntuj tsim los yeej tos ntshis ntshaw pom lub caij Tswv Ntuj cov me nyuam yuav tawm los rau sawv daws pom xyeem xwb.
20 Tas puas tsav yam raug tsim los puav leej zwm rau txoj kev tsis muaj nqes, tsis yog vim lawv tuaj yeem zwm rau, hos yog vim tus muab lawv mus zwm rau, nws cia siab tias:
21 Tas puas tsav yam tsim los ntawd yuav tau kev dim ntawm txoj kev ua kev puas tsuaj qhev, thiab yuav tau sib koom txais txoj kev twj lij muaj hwj chim ua Tswv Ntuj tsoom tub ki.
22 Peb paub tias, tas puas tsav yam tsim los yeej nyiaj zaj mob ntsaj qaws xws li ib tug poj niam yuav daws cev, los txog lub zwj ceeb no.
23 Tsis tas li ntawd xwb, tab peb kiag los txawm peb twb yog cov tau txais Leej Ntuj Plig thawj cov txiv, tsis kav peb tseem ntsaj qaws nyob hauv peb nruab siab, thaum peb tos rawv lub caij peb yuav tau ua cov tub sau, uas yog lub caij cawm peb lub cev.
24 Yog vim peb muaj kev cia siab, peb thiaj tau txais kev cawm. Thaum yus tau pom yam uas yus cia sia tos rawv lawm, mas tsis muaj kev cia siab tos lawm. Leej twg thiaj yuav cia siab tos rawv yam nws twb tau pom lawd?
25 Tab sis thaum peb cia siab tos rawv yam peb tsis tau pom, mas peb yuav ua siab ntev tos.

NPN 126: 1bc-2ab, 2cd-3, 4-5, 6

Txais: (3a) Huab Tais tau ua tej yam loj tas nrho rau peb.

Thaum HUAB TAIS coj Xis Yoos cov neeg mus nyob txim rov los,
peb zoo li ib co neeg ua npau suav.
Peb lub ncauj muaj suab luag nqhua,
peb tus nplaig qw nkauj zoo siab.

Txais: (3a) Huab Tais tau ua tej yam loj tas nrho rau peb.

Tej pej kum cuab hais nroo ntws tias:
"HUAB TAIS ua tej yam loj tas nrho rau lawv!"
HUAB TAIS yeej tau ua tej yam loj rau peb tiag,
peb zoo siab tas nrho.

Txais: (3a) Huab Tais tau ua tej yam loj tas nrho rau peb.

HUAB TAIS, thov koj rov muab kev vam meej ntws lug rau peb,
xws li dej sab siv huam nyob cov teb chaws suab puam.
Cov neeg tseb nplej ntxuag kua muag,
lawv yuav sau nplej ntxuag kev zoo siab.

Txais: (3a) Huab Tais tau ua tej yam loj tas nrho rau peb.

Thaum mus, lawv quaj,
vim lawv ris cov seev noob yuav coj mus tseb,
thaum lawv rov los, lawv hu nkauj,
vim lawv ris cov res nplej tshiab rov los.

Txais: (3a) Huab Tais tau ua tej yam loj tas nrho rau peb.

As Les Lus Yas: MT 11: 25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: LK 13: 18-21

18 Yes Xus hais tias: "Tswv Ntuj lub Ceeb Tsheej yog zoo li cas? Kuv yuav muab piv rau dab tsi?
19 Tswv Ntuj lub Ceeb Tsheej zoo li ib lub noob zaub roj uas ib tug neeg nqa mus tseb rau hauv nws lub vaj.Thaum lub noob loj hlob los tsheej ib tsob me nyuam ntoo loj, ces cov noog ya saum ntuj los nyob hauv nws cov ceg."
20 Yes Xus tseem hais tias: "Kuv yuav muab Tswv Ntuj lub Ceeb Tsheej piv rau dab tsi thiab?
21 Tswv Ntuj lub Ceeb Tsheej piv tau rau ib co poov xab uas ib tug poj niam muab do rau hauv peb kawg hmoov nplej kom cov hmoov su tuaj tas huv si."

Tim 27 lub 10 Hli 2021

Hnub Plaub Lis Piam Peb Caug Nruab Xyoo B Nruab Lis Piam Xyoo I
Lectionary: 481

Zaj Nyeem Ib: LM 8: 26-30

Cov kwv tij nkauj muad:
26 Leej Ntuj Plig tuaj pab peb cov neeg tsis muaj zog, vim peb tsis txawj thov ntuj kom zoo raws li peb yuav tsum txawj, tab sis Leej Ntuj Plig ua tus sawv peb chaw thov Ntuj nyob hauv tej lub suab nroo suab ntsaj uas piav tsis tau.
27 Tus uas tsom tau hauv neeg nruab siab, nws paub tias Leej Ntuj Plig xav ua dab tsi, vim Leej Ntuj Plig ua tus sawv cov ntshiab chaw thov Ntuj raws nraim li Tswv Ntuj lub siab xav.
28 Peb paub tias tas txhua tsav puas yam ua hauj lwm kom tau pab cov uas nyiam Tswv Ntuj mus rau qhov zoo, lawv yog cov uas raug xaiv raws li nws lub hom phiaj.
29 Cov neeg uas Tswv Ntuj xub paub lawv ua ntej lawm, nws kuj xub hu lawv pub txoj hmoo rau lawv kom lawv yoog tau raws li nws Leej Tub tus duab, ces Leej Tub thiaj yog tus xub yug los dua tas ib tsoom kwv coob coob.
30 Cov uas Tswv Ntuj xub xaiv lawv lawm, mas nws kuj hu lawv thiab; cov uas Tswv Ntuj hu lawv, mas nws kuj ua kom lawv yog neeg ncaj tuaj thiab; cov uas Tswv Ntuj ua kom lawv ncaj tuaj, mas nws kuj ua kom lawv nto koob meej thiab.

NPN 13: 4-5, 6

Txais: 6a) Huab Tais, kuv txoj kev tso siab yog nyob hauv koj txoj kev khuv leej.

HUAB TAIS, kuv tus Tswv Ntuj, thov koj teb kuv mas!
Thov koj ua kom kuv qhov muag pom kev,
kom kuv txhob tsaug zog hauv kev tuag tus dab ntub,
Kuv tus yeeb ncuab thiaj tsis tau kev khav tias: "Kuv yeej nws lawm."
Cov ntxub kuv thiaj tsis zoo siab pom kuv poob qis.

Txais: 6a) Huab Tais, kuv txoj kev tso siab yog nyob hauv koj txoj kev khuv leej.

Kuv tso siab plhuav rau koj txoj kev khuv leej,
Kuv lub siab yuav hom khaj nyob hauv koj txoj kev cawm.
Kuv yuav hu nkauj txog HUAB TAIS tias:
“Nws tau hlub kuv ua zoo rau kuv.”

Txais: 6a) Huab Tais, kuv txoj kev tso siab yog nyob hauv koj txoj kev khuv leej.

As Les Lus Yas: 2 TXLN 2: 14

Txais: As les lus yas, as les lus yas.

Tswv Ntuj hu peb los ntseeg lub Moo Zoo kom peb tau txais
peb tus Huab Tais Yes Xus Pleev lub hwj chim ua peb tug.

Txais: As les lus yas, as les lus yas.

Ntawv Moo Zoo: LK 13: 22-30

22 Yes Xus ke mus hla hauv cov nroog thiab cov zos, nws qhia sawv daws, thiab ke taug kev mus rau Yes Lus Xas Les.
23 Muaj ib tug nug Yes Xus tias: "Huab Tais, cov yuav txais kev cawm puas yog cov tsawg xwb?" Yes Xus hais rau lawv tias:
24 "Nej ua tiag tiv qhawv mus hauv lub qhov rooj nqaim mog. Kuv hais rau nej tias, coob leej yuav nrhiav kev mus lawm hauv, tab sis lawv yuav tsis muaj zog mus kom tau.
25 Thaum tus tswv tsev sawv mus xauv qhov rooj lawm, ces nej sawv nyob nraum zoov, nej yuav khob qhov rooj thiab yuav hais tias: 'Huab Tais, koj qhib qhov rooj rau peb mas,' ces nws yuav teb rau nej tias: 'Kuv tsis paub nej nyob qhov twg tuaj.'
26 Ces nej yuav hais rau nws tias: ‘Peb twb tau noj nyob ntawm koj xub ntiag, thiab tau haus, hos koj twb tau qhia sawv daws nyob hauv peb cov tshav puam.’
27 Ces tus tswv tsev yuav hais tias: 'Kuv hais rau nej tias kuv tsis paub nej nyob qhov twg tuaj. Nej txav mus deb ntawm kuv, tas nej cov uas ua tsis ncaj huv tib si.
28 Nej mus nyob qhov chaw uas nej yuav quaj ncia thiab tom hniav nkawv. Ces nej yuav pom Has Nplas Has, His Xas Has, Yas Kos, thiab ib tsoom yaj saub nyob hauv Tswv Ntuj lub Ceeb Tsheej, hos nej yuav raug ntiab mus nyob sab nraud.
29 Luag yuav tuaj Xib Fab thiab Toob Fab tuaj, tuaj Naj Fab thiab Pej Fab tuaj. Sawv daws yuav tuaj zaum ntawm rooj qav nyob hauv Tswv Ntuj lub Ceeb Tsheej.
30 Ces muaj ib co neeg ua luag qab, yuav tau ua ntej, hos ib co ua ntej yuav tau ua qab."

Tim 28 lub 10 Hli 2021

Hnub Tsib Lis Piam Peb Caug Nruab Xyoo B Nruab Lis Piam Xyoo I

Hwm LN Xis Moos thiab Yus Das(Jude), ob tug Hauv Paus Xa Lus
Lectionary: 666

Zaj Nyeem Ib: EFX 2: 19-22

Cov kwv tij nkauj muad:
9 Li ntawd, nej tsis yog ib co pej kum neeg, los ib co qhua ntxiv lawm, tiam sis nej koom ua ib cuab nrog cov neeg ntshiab thiab nej yog Tswv Ntuj tsev neeg,
20 uas yog txhim rau saum cov Hauv Paus Xa Lus thiab cov Yaj Saub ua cov taw ntsa, Yes Xus Pleev yog lub pob zeb txheem tas lub tsev.
21 Nyob hauv Leej Pleev, lub tuam tsev sib dhos sib tuav tau zoo thiab hlob ua ib lub tuam tsev teev ntuj ntshiab nyob hauv Huab Tais.
22 Nyob hauv Leej Pleev, nej kuj raug muab teeb ua ke tsim tsa ua Tswv Ntuj ib lub tsev nyob, nyob hauv Leej Ntuj Plig.

NPN 19: 2-3, 4-5

Txais: (5) Lawv lo lus xa moo nrov mus thoob ntiaj teb.

Cov txheej ntuj saud piav txog Tswv Ntuj lub koob meej,
lub qab ntuj khwb tshaj cov hauj lwm nws txhais tes tau ua.
Nruab hnub hais lo lus rau nruab hnub hnov,
Hmo ntuj qhia rau hmo ntuj paub txog.

Txais: (5) Lawv lo lus xa moo nrov mus thoob ntiaj teb.

Tsis muaj ib lo lus los ib zaj lus piav
Uas leej tib neeg yuav tsis hnov txog.
Lawv lub suab yeej ncha puv tas ntiaj teb,
lawv lo lus xa moo yeej nrov txog tim npoo ntiaj teb kawg.

Txais: (5) Lawv lo lus xa moo nrov mus thoob ntiaj teb.

As Les Lus Yas: Te Deum

Txais: As les lus yas, as les lus yas.

Tswv Ntuj, peb cav txog koj, peb tsa suab tias koj yog Huab Tais;
tsoom Hauv Paus Xa Lus uas muaj koob meej cav txog koj.

Txais: As les lus yas, as les lus yas.

Ntawv Moo Zoo: LK 6: 12-16

12 Yes Xus nce mus pem roob mus teev Ntuj, nws teev Tswv Ntuj ib hmos nkaus.
13 Thaum kaj ntug, nws hu nws cov thwj tim los ntawm nws, nws xaiv kaum ob leeg nyob hauv lawv, nws hu cov ntawd ua Hauv Paus Xa Lus.
14 Muaj Xis Moos, uas nws tis npe rau hu ua Pob Zeb, As Nres, Pob Zeb tus kwv, Yas Kos, Zam, Fis Lis Pos, Npas Tos Los Mas Yos,
15 Mas Tais, Tos Mas, Yas Kos uas yog As Fas Yos tub, Xis Moos Siab Kub,
16 Yus Das, Yas Kos tub, thiab Yus Das Kas Lis Yaus, uas yog tus ntxeev siab.

Tim 29 lub 10 Hli 2021

Hnub Rau Lis Piam Peb Caug Nruab Xyoo B Nruab Lis Piam Xyoo I
Lectionary: 483

Zaj Nyeem Ib: LM 9: 1-5

Cov kwv tij nkauj muad:
1 Kuv hais qhov tseeb nyob hauv Leej Pleev, kuv tsis dag; kuv lub siab nrog Leej Ntuj Plig Ntshiab ua tim khawv txog kuv tias:
2 Kuv muaj kev tu siab loj thiab kev nyuaj siab tas mus li hauv nruab siab.
3 Vim kuv xav tias yog ua tau mas kom kuv ua tus tau hmoov phem thiab muab cais ntawm Leej Pleev mus, tsuav yog kuv pab tau kuv tsoom kwv tij, kuv haiv neeg uas nrog kuv koom ib hom nqaij tawv xwb.
4 Lawv yog cov His Xas Lais; lawv tau txoj kev ua Tswv Ntuj cov tub sau, tau lub hwj chim, txoj kev cog lus, Txoj Cai, txoj kev teev hawm, thiab cov lus cog ruaj.
5 Lawv muaj cov yawg koob yawg suab, thiab Leej Pleev yog tawm ntawm lawv los raws li sab nqaij tawv; nws yog tus nyob siab dua txhua yam thiab yog tus Tswv Ntuj muaj koob meej mus li. Ua li.

NPN 147: 12-13, 14-15, 19-20

Txais: Yes Lus Xas Les, koj cia li cav txog Huab Tais.

Yes Lus Xas Les, koj cia li cav txog HUAB TAIS lub koob meej!
Xis Yoos, koj cia li cav lus zoo txog koj tus Tswv Ntuj!
Vim nws ua kom koj cov nqaj laug qhov rooj khov ;
nws foom hmoov zoo rau koj cov me nyuam nyob hauv koj.

Txais: Yes Lus Xas Les, koj cia li cav txog Huab Tais.

Nws ua kom muaj kev thaj yeeb nyob hauv koj ciaj ciam teb chaws,
nws pub cov mov nplej mog qab tshaj rau koj noj txaus siab.
Nws xa nws lo lus qhia tuaj rau ntiaj teb,
nws lo lus khiav yeev nrawm nroos tuaj.

Txais: Yes Lus Xas Les, koj cia li cav txog Huab Tais.

Nws tshaj nws lo lus rau Yas Kos paub,
Nws qhia nws cov lij choj thiab cov lus qhia rau His Xas Lais.
Nws tsis tau ua li ntawd rau lwm haiv neeg twg li,
Nws tsis tau qhia nws tej lij choj rau lawv paub li. As les lus yas.

Txais: Yes Lus Xas Les, koj cia li cav txog Huab Tais.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias, kuv cov yaj mloog kuv lub suab;
kuv paub kuv cov yaj, kuv cov yaj raws nraim kuv qab mus.

Txais: As les lus yas, as les lus yas.

Ntawv Moo Zoo: LK 14: 1-6

1 Muaj ib hnub Xas Npas Tos, Yes Xus tuaj noj mov nyob hauv ib tug thawj coj Fas Lis Xais tsev, ces cov neeg nyas ntshis saib Yes Xus.
2 Tab tom muaj ib tug neeg mob phob vog nyob ntawm nws xub ntiag.
3 Ces Yes Xus nug rau cov Kws Lij Choj thiab cov Fas Lis Xais tias: "Hnub Xas Npas Tos, puas muaj cai kho mob los tsis muaj?"
4 Lawv nyob ntsiag to. Ces Yes Xus tuav tus neeg mob, thiab kho nws zoo hlo, ces Yes Xus kom nws rov mus tsev.
5 Yes Xus thiaj hais rau lawv tias: "Yog nej tus tub los tus nyuj poob rau hauv ib lub qhov tim thaj hnub Xas Npas Tos, nej leej twg thiaj yuav tsis rub nws tawm tam sis ntawd? ”
6 Tiam sis lawv teb tsis tau dab tsi rau nws lo lus nug ntawd li.

Tim 30 lub 10 Hli 2021

Hnub Xya Lis Piam Peb Caug Nruab Xyoo B Nruab Lis Piam Xyoo I
Lectionary: 484

Zaj Nyeem Ib: LM 11: 1-2, 11-12, 25-29

Cov kwv tij nkauj muad:
1 Kuv nug tias: Tswv Ntuj puas tau muab nws haiv neeg tso pov tseg? Nws tsis tau muab li! Vim kuv twb yog ib tug tub His Xas Lais, yog Has Nplas Has ib tug xeeb ntxwv, nyob hauv lub xeem Npes Yas Mis.
2 Tswv Ntuj tsis tau tso nws haiv neeg uas nws ib txwm xub paub thaum ntxov los lawm pov tseg kiag li. Puas yog nej tsis paub txog tias ntawv sau li cas txog Es Lias, tias nws thov Tswv Ntuj kom tso His Xas Lais pov tseg?
11 Kuv thiaj nug tias: Cov His Xas Lais puas tau dawm ko taw loj kom lawv qaug mus li? Tsis muaj li ntawd. Tiam sis lawv mus ib ruam yuam kev, kom cov neeg teev pej kum dab tau txais kev cawm, ces yuav ua rau lawv muaj kev khib.
12 Yog tias cov His Xas Lais qhov yuam kev ua kom lub qab ntuj neeg txais kev vam meej, thiab thaum lawv cov neeg tsawg tuaj ua kom cov pej kum haiv neeg txais kev vam meej, mas yog tias cov His Xas Lais muaj coob txaus, mas cov pej kum haiv neeg haj yam yuav tau qhov zoo ntau ntxiv xwb.
25 Cov kwv tij, kuv tsis xav cia nej tsis paub dab tsi txog zaj lus tob zais ntshis no, tsam nej tsis txawj ua neeg thoob tsib nyob hauv nej txoj kev xav tswv yim: Ib feem ntawm cov neeg His Xas Lais yuav tsum ua siab tawv qhawv tsis ntseeg mus txog lub caij uas ib tsoom neeg teev pej kum dab los txais kev ntseeg kom txaus tso.
26 Thaum ntawd tas tsoom His Xas Lais mam li txais kev cawm, raws li cov lus sau tseg tias: “Tus cawm seej yuav sawv pem Xis Yoos tuaj; nws yuav rhuav Yas Kos txoj kev tsis hwm ntuj pov tseg.
27 Ces kuv yuav nrog lawv cog lus li no, thaum kuv tshem lawv cov txhaum pov tseg.”
28 Hais txog lub Moo Zoo mas cov His Xas Lais yog ib co yeeb ncuab vim muaj nej; tab sis raws li lawv yog haiv neeg raug xaiv, mas Tswv Ntuj hlub lawv, vim lawv cov yawg koob.
29 Vim tias Tswv Ntuj tej txiaj ntsim paj tshab thiab nws txoj kev hu lawv yog tej yam thim tsis tau.

NPN 94: 12-13a, 14-15, 17-18

Txais: (14a) Huab Tais yuav tsis tso nws haiv neeg pov tseg.

HUAB TAIS, tus uas koj qhuab qhia nws tau txoj hmoov zoo,
tus uas koj cob qhia nws txog koj txoj cai, tau txoj hmoov zoo;
nws tau kev dim ntawm cov hnub nyoog phem.

Txais: (14a) Huab Tais yuav tsis tso nws haiv neeg pov tseg.

Vim HUAB TAIS tsis nrauj nws haiv neeg,
nws tsis muab nws lub cuab tam laim pov tseg.
Txoj kev txiav txim yuav txiav raws kev ncaj,
tas tsoom neeg siab ncaj yuav taug txoj kev ncaj.

Txais: (14a) Huab Tais yuav tsis tso nws haiv neeg pov tseg.

Yog HUAB TAIS tsis pab kuv, mas tshuav tsis ntev
kuv tus ntsuj plig yuav mus nyob hauv qhov ntsiag to.
Thaum kuv hais tias: "Kuv yuav ntog!"
HUAB TAIS, koj txoj kev khuv leej txheem kuv.

Txais: (14a) Huab Tais yuav tsis tso nws haiv neeg pov tseg.

As Les Lus yas: MT 11: 29ab

Txais: As les lus yas, as les lus yas.

Nej txais kuv tus quab mus kwv, nej kawm ntawm kuv,
vim kuv muaj lub siab txo hwj chim ua neeg me.

Txais: As les lus yas, as les lus yas.

Ntawv Moo Zoo: LK 14: 1, 7-11

1 Muaj ib hnub Xas Npas Tos, Yes Xus tuaj noj mov nyob hauv ib tug thawj coj Fas Lis Xais tsev. Lawv soj ntshis Yes Xus.
7 Yes Xus hais ib zag paj lug rau cov neeg tuaj noj mov ntawd, vim nws pom lawv xaiv mus zaum thawj cov rooj zaum; nws hais tias:
8 "Thaum luag caw koj mus noj tshoob, koj tsis txhob mus zaum thawj cov rooj, tsam luag caw ib tug muaj meej mom dua koj tuaj thiab.
9 Ces tus tswv tsev uas tau caw neb tuaj yuav los hais rau koj tias: 'Koj cia qhov chaw kod rau tus no zaum.' Ces koj yuav sawv tus txaj muag ntsuav mus zaum lub rooj puag nram qab.
10 Thaum luag caw koj, mas koj yuav mus zaum lub rooj puag nram qab, kom thaum tus caw koj los txog, nws hais rau koj tias: 'Npawg, koj nce los zaum pem toj no.' Ces koj yuav tau ntsej muag nyob ntawm cov neeg tuaj nrog koj koom noj rooj qav xub ntiag.
11 Vim tias tus uas nws tsa nws siab, mas nws yuav raug muab txo kom qis, hos tus uas nws txo nws qis, mas nws yuav raug muab tsa kom siab."

Tim 1 lub 11 Hlis 2021

Thawj Hnub Rau Lis Piam Peb Caug Xyoo B Nruab Lis Piam Xyoo I

Tsuj Xeeb Hwm tas ib tsoom Leej Ntshiab
Lectionary: 667

Yog ib hnub uas tsoom ntseeg yuav tsum mus teev ntuj ib yam li Hnub Chiv (Holiday of Obligation/ Fête d’Obligation).

Zaj Nyeem Ib: QYTN 7: 2-4, 9-14

2 Kuv, Zam, rov pom dua ib tug Tshiab tawm sab Toob Fab tuaj; nws tuav rawv tus Tswv Ntuj muaj txoj sia lub thwj. Nws hu ib suab nrov nrov rau plaub tug Tshiab uas tau txais txoj hauj lwm tso xwv txheej rau lub ntiaj teb thia cov hiav txwv tias:
3 “Nej txhob rawm tso xwv txheej mus rau lub ntiaj teb, los lub hiav txwv, los tej ntoo. Tos peb ntaus cim rau saum Tswv Ntuj cov tub txib hauv pliaj tso.”
4 Ces kuv hnov tias lawv ntaus cim rau npaum no leej: ib puas plaub caug plaub txhiab leej raug ntaus cim rau nyob hauv tas nrho cov xeem His Xas Lais.
9 Dhau tej ntawd tas lawm, kuv ntsia pom ib pab neeg coob coob tsis muaj neeg suav txheeb li; muaj tas txhua lub kuj cuab, txhua xeem neeg, txhua haiv neeg, thiab txhua xeem lus tib si nyob hauv. Lawv sawv ntsug ze ntawm lub theej kiab, thiab ntawm Leej Yaj xub ntiag. Lawv hnav tsho tiab dawb ntev, thiab tuav tej rev nplooj ntoo txoob ntawm tes.
10 Lawv ua ib lub suab qw nrov nrov muaj ceem tias: “Kev cawm seej yog peb tus Tswv Ntuj uas nws zaum saum lub theej kiab tug, thiab yog Leej Yaj tug!”
11 Ces tas tsoom Tshiab uas sawv ncig lub theej kiab, ncig cov txwj laus thiab plaub Leeg Muaj Txoj Sia, lawv txhos caug, ntsej muag khoov ti av pe Tswv Ntuj.
12 Lawv hu nkauj tias: “Lo Lus cav, lub hwj chim, kev thoob tsib, kev ua tsaug, kev nto koob meej, kev muaj hwj huam thiab muaj zog yog peb tus Tswv Ntuj li, mus tas ib txhiab ib txhis! Ua li.”
13 Ib tug txwj laus txawm hais rau kuv tias: “Cov neeg uas hnav tsho tiab dawb ntev ntawd yog leej twg? Lawv tuaj qhov twg tuaj?”
14 Kuv teb nws tias: “Huab Tais, koj thiaj yog tus paub xwb.” Nws rov hais tias: “Lawv yog cov uas hla dhau txoj kev raug luag hiam hnyav los. Lawv tau ntxhua lawv cov tsho ntev thiab ua kom dawb nyob hauv Leej Yaj cov ntshav.”

NPN 24: 1bc-2, 3-4ab, 5-6

Txais: (6) Huab Tais, lawv yog haiv neeg uas ntshaw pom koj lub ntsej muag.

Lub ntiaj teb thiab puas tsav yam nyob hauv yog HUAB TAIS li,
lub sim ceeb thiab cov nyob hauv yog nws tug.
Vim nws yog tus tsim lub ntiaj teb los txawb rau saum cov hiav txwv
thiab muab tsa rau saum cov dej ntws.

Txais: (6) Huab Tais, lawv yog haiv neeg uas ntshaw pom koj lub ntsej muag.

Leej twg thiaj yuav nce tau mus saum HUAB TAIS lub roob?
Los leej twg thiaj yuav mus sawv taus nyob hauv nws thaj chaw ntshiab?
Yog tus uas txhais tes tsis muaj txhaum, lub siab dawb huv,
tus uas tsis ntshaw tej yam tsis muaj nqes.

Txais: (6) Huab Tais, lawv yog haiv neeg uas ntshaw pom koj lub ntsej muag.

Nws yuav txais koob hmoov ntawm HUAB TAIS los. ,
yog paj tshab tuaj ntawm Tswv Ntuj tus cawm nws tuaj.
Lawv yuav zoo li ntawd, tsav neeg uas nrhiav Tswv Ntuj,
cov uas nrhiav Yas Kos tus Tswv Ntuj lub ntsej muag.

Txais: (6) Huab Tais, lawv yog haiv neeg uas ntshaw pom koj lub ntsej muag.

Zaj Nyeem Ob: 1 ZAM 3: 1-3

Cov zoo nyiad,
1 Nej ntsia saib, Leej Txiv txoj kev hlub peb loj tas npaum no, peb thiaj tau lub npe hu ua Tswv Ntuj cov me nyuam; peb yeej yog Tswv Ntuj cov me nyuam tiag tiag! Tos lub ntiaj teb tsis paub peb los vim lawv twb tsis paub Tswv Ntuj.
2 Cov zoo nyiad, zaum no peb yog Tswv Ntuj cov me nyuam lawm. Qhov uas yav tom ntej peb yuav plhis mus zoo li cas, tseem tsis tau tawm los rau peb qhov muag pom xyeem. Peb paub tau tias, thaum qhov ntawd tawm los rau peb qhov muag pom, mas peb yuav zoo li Leej Pleev, vim nws zoo li cas mas peb yuav pom Nws zoo li ntawd.
3 Txhua tus neeg uas tso siab zoo li no nyob hauv Leej Pleev, mas nws kuj yuav dawb huv tuaj, vim Leej Pleev yog tus dawb huv.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: “Nej tuaj cuag kuv mas, tas nej sawv daws
uas nej khwv thiab ris nra hnyav! Kuv yuav cia nej so los siav.

Txais: As les lus yas, as les lus yas.

Ntawv Moo Zoo: MT 5: 1-12a

1 Yes Xus pom neeg coob coob tuaj, nws nce mus saum lub roob. Nws zaum, ces nws cov thwj tim txav los ze nws.
2 Yes Xus tsa ncauj pib qhia lawv hais tias :
3 "Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li.
4 Cov tau txoj hmoov zoo, yog cov quaj ntsuag, vim yuav muaj tus nplij lawv.
5 Cov tau txoj hmoov zoo, yog cov muaj lub siab mos siab muag, vim lawv yuav txais lub ntiaj teb los ua lawv tug.
6 Cov tau txoj hmoov zoo, yog cov tshaib thiab nqhis txog txoj kev ncaj, vim Ntuj yuav daws lawv qhov nqhis.
7 Cov tau txoj hmoov zoo, yog cov khuv leej luag, vim Ntuj yuav khuv leej lawv.
8 Cov tau txoj hmoov zoo, yog cov siab dawb siab huv, vim lawv yuav pom Tswv Ntuj.
9 Cov tau txoj hmoov zoo, yog cov tsim kev thaj yeeb, vim lawv yuav hu ua Tswv Ntuj cov tub ki.
10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug.
11 Nej tau txoj hmoov zoo thaum luag cem nej, hiam nej, thiab liam ntau yam phem tsis muaj tseeb rau nej vim kuv.
12a Nej yuav zoo siab thiab hom khaj, vim nej yuav tau txais koob haum loj nyob saum ntuj.”

Tim 2 lub 11 Hlis 2021

Hnub Peb Lis Piam Peb Caug Ib Nruab Xyoo ABC Nruab Lis Piam Xyoo I & II

Nco txog ib tsoom neeg tau tas sim neej lawm (All Souls/Fête des Morts)
Lectionary: 668

Zaj Nyeem Ib: THOOB TSIB 3: 1-9

1 Cov neeg ncaj tus ntsuj plig nyob hauv Tswv Ntuj txhais tes, tsis muaj ib yam kev txom nyem dab tsi yuav raug tau lawv.
2 Lawv zoo li yog tuag lawm rau cov neeg tsis muaj tswv yim, luag saib lawv txoj kev tas lub neej yog ib yam kev txom nyem loj,
3 thiab saib lawv txoj kev ncaim peb mus yog ib txog kev puas tsuaj loj tas nrho. Tab sis lawv twb nyob hauv kev thaj yeeb lawm.
4 Tib neeg xav tias lawv mus raug txim lawm; tab sis ntawm lawv mas lawv tso siab lug tias lawv yuav muaj txoj sia nyob mus li.
5 Lawv raug ib lub txim sib sib xwb, ces lawv yuav txais txiaj ntsim koob hmoov loj, vim Tswv Ntuj tau sim lawv, nws pom tias lawv tsim nyog ua nws tug.
6 Tswv Ntuj tau sim cov neeg siab ncaj zoo li sim kub nyob hauv lub yeej vub, nws tau pom zoo txais lawv zoo li ib co txim txi ntuj los ua nws li,.
7 Thaum txog lub caij Tswv Ntuj tuaj xyuas lawv, mas lawv yuav ci ntsa iab; lawv yuav khiav nrawm cuag li hluav taws ri mus kis tej nqeeb qhuav.
8 Lawv yuav txiav txim rau cov kuj cuab, thiab lawv yuav tswj cov haiv neeg, hos Huab Tais yuav yog lawv tus vaj mus li ib txhis.
9 Cov neeg tso siab rau Huab Tais yuav to taub txog txoj kev tseeb, cov neeg npuab Huab Tais yuav nyob ze nws hauv txoj kev nyiam: Vim nws lub txiaj ntsim thiab nws txoj kev khuv leej nyob rawv nrog nws cov ntshiab, thiab nws txoj kev hlub tshua nyob rawv nrog nws cov xaiv.

NPN 23: 1-3a, 3b-4, 5, 6

Txais: (1) Huab Tais yog tus tswv zov yaj saib kuv,
kuv yuav tsis tshaib txog dab tsi li.
Los: (4) Txawm kuv taug kev hauv ib lub hav tsaus nti,
los kuv tsis ntshai dab tsi phem, vim koj nrog nraim kuv.

HUAB TAIS yog tus tswv zov yaj saib kuv,
kuv yuav tsis tshaib txog dab tsi li.
Nws cia kuv so nyob hauv tej tshav zaub mos ntsuab xiab;
Nws coj kuv mus nyob ze cov dej tus yees;
nws ua kom kuv tus ntsuj plig rov muaj zog tuaj.

Txais…

Nws coj kuv mus taug tej kev ncaj, vim nws lub npe.
Txawm kuv taug kev hauv ib lub hav tsaus nti,
kuv tsis ntshai dab tsi phem, vim koj nyob rawv ntawm kuv ib sab,
koj rab nplawm thiab rab pas nrig ua kuv luag.

Txais…

Koj rau ib rooj qav rau ntawm kuv xub ntiag
rau kuv cov yeeb ncuab ntsia ntsoov;
koj muab roj pleev kuv taub hau;
kuv lub ntim puv phwj yaws.

Txais…

Txiaj ntsim thiab kev zoo raws kuv nraim
niaj hnub hauv kuv lub neej;
Kuv lub chaw nyob yog nyob hauv HUAB TAIS tsev
mus ntev niaj ntau xyoo lawm yav tom ntej.

Txais…

Zaj Nyeem Ob: LOS MAS 5: 5-11

Cov kwv tij nkauj muad:
5 Kev tso siab tsis ua kom peb muaj kev tu siab , vim Leej Ntuj Plig Ntshiab, uas peb tau txais, tau hliv Tswv Ntuj txoj kev nyiam rau hauv peb nruab siab lawm.
6 Lub caij peb tseem tsis tau muaj tus tuaj pab peb, thaum txog lub zoo caij nyoog, Leej Pleev tau tuag kom tau pab cov neeg tsis hwm Ntuj.
7 Yog yuav tsum tuag kom tau pab ib tug neeg ncaj, mas yus twb txiav txim siab nyuaj; yog yuav tuag kom tau pab ib tug neeg siab zoo mas nyaj tej zaum yus yuav muaj peev xwm zog.
8 Tiam sis qhov uas Tswv Ntuj qhia tias nws hlub peb yog qhov tias thaum peb tseem yog neeg txhaum, Leej Pleev twb tuag kom tau pab peb lawm.
9 Yog tias nyem no peb twb muaj kev ua neeg ncaj nyob hauv Leej Pleev cov roj ntsha lawm, mas nws haj yam yuav cawm peb ntawm Ntuj txoj kev npau taws xwb.
10 Yog tias thaum peb tseem ua yeeb ncuab rau Tswv Ntuj, nws Leej Tub txoj kev tuag twb ua kom peb nrog Tswv Ntuj rov sib haum xeeb, mas nyem no thaum peb nrog Tswv Ntuj rov sib haum xeeb lawm, mas Tswv Ntuj Leej Tub txoj sia haj yam yuav cawm tau peb.
11 Tsis tas li xwb, peb tseem khav tau tias peb nyob hauv Tswv Ntuj vim peb tus Huab Tais Yes Xus Pleev, tus uas tau ua kom zaum no peb muaj kev haum xeeb nrog Tswv Ntuj.

Los: LM 6: 3-9

Cov kwv tij nkauj muad:
3 Nej puas paub txog tias thaum peb tau txais lub Cim Ntxuav nyob hauv Yes Xus Pleev, mas kuj yog peb sawv daws tau txais lub Cim Ntxuav nyob hauv Yes Xus txoj kev tuag thiab?
4 Li ntawd, nyob hauv lub Cim Ntxuav peb kuj nrog nws tuag mus zwm ntxa thiab, kom ib yam li Leej Pleev tau sawv hauv cov tub tuag rov los vim Leej Txiv lub hwj huam tau tsa nws sawv, peb kuj yuav muaj dua ib lub neej tshiab thiab.
5 Vim tias yog peb nrog Leej Pleev koom ua ib tug nyob hauv txoj kev tuag zoo li nws txoj, mas peb kuj yuav nrog Leej Pleev koom ib txoj kev sawv rov los thiab.
6 Peb yuav tsum to taub tias peb tus qub neeg raug muab ntsia nrog Yes Xus dai saum ntoo cuam lawm, kom peb lub cev uas xib rau kev txhaum tsis txhob ciaj sia ntxiv, ces peb thiaj tsis ua kev txhaum cov qhev ntxiv.
7 Vim tias tus neeg tuag tau txais kev zam nws cov txhaum tas lawm;
8 ua li mas yog peb tau nrog Leej Pleev tuag, mas peb ntseeg tias peb kuj yuav tau nrog nws muaj txoj sia nyob thiab.
9 Peb paub tias Leej Pleev tau sawv hauv qhov tuag los lawm, nws yuav tsis tuag ntxiv; txoj kev tuag tsis muaj cuab kav tuaj raug nws ntxiv lawm.

As Les Lus Yas: MT 25: 34

Txais: As les lus yas, as les lus yas.

Nej los mog ! Nej cov uas kuv Txiv pub txoj hmoov zoo rau nej,
los txais lub Ceeb Tsheej uas yeej npaj tseg rau nej
txij puag thaum pib tsim lub sim ceeb los lawm ua nej tug.

Txais: As les lus yas, as les lus yas.

Ntawv Moo Zoo: ZAM 6: 37-40

Yes Xus hais rau pab neeg coob coob tias:
37 “Txhua yam uas kuv Txiv muab rau kuv yuav los cuag kuv. Hos tus tuaj cuag kuv, kuv yuav tsis ntiab nws rau nraum zoov.
38 Vim kuv nqes saum ntuj los, tsis yog los ua ywj kuv siab, yog los ua raws li Tus Xa kuv tuaj lub siab.
39 Tus Xa kuv tuaj lub siab xav yog zoo li no : Kom kuv tsis txhob ua ib yam uas nws muab rau kuv ploj li, thiab hnub kawg, kom kuv tsa yam ntawd sawv rov los.
40 Qhov uas kuv Txiv nyiam yog zoo li no : kom leej twg pom Leej Tub thiab ntseeg txog Leej Tub, mas nws yuav muaj txoj sia nyob mus li, thiab Hnub Kawg, kuv yuav tsa nws sawv rov los."

Tim 3 lub 11 Hlis 2021

Hnub Plaub Lis Piam Peb Caug Ib Nruab Xyoo B Nruab Lis Piam Xyoo I
Lectionary: 487

XHLT: LN Martin de Porres, ua leej tij

Zaj Nyeem Ib: LM 13: 8-10

PCov kwv tij nkauj muad:
8 Nej tsis txhob tshuav leej twg nuj nqis li, tiam sis yam nej tshuav yog yuav tsum ib leeg hlub ib leeg xwb. Vim tus nyiam luag tej, mas nws ua raws li Txoj Cai qhia tas huv tib si lawm.
9 Cov lus qhia hais tias : “Koj txhob zes luag txij luag nkawm, koj txhob tua neeg, koj txhob ua tub sab tub nyiag, koj lub siab yuav tsis txhob ntshaw,” cov lus qhia no thiab lwm cov lus qhia lub ntsiab yog nyob hauv lo lus nram no tas huv tib si: “Koj yuav nyiam tus nyob ze koj ib yam li koj nyiam koj.”
10 Leej twg nyiam luag, mas nws tsis ua ib qho phem rau luag li. Li ntawd, txoj cai lub hom phiaj kom tiav log yog txoj kev nyiam.

NPN 112: 1b-2, 4-5, 9

Txais: (5a) Tus neeg ua siab zoo thiab qiv rau cov neeg txom nyem yuav tau txoj hmoov zoo.

Tus muaj hmoov zoo yog tus uas hwm HUAB TAIS,
thiab nyiam coj Huab Tais cov lus qhia tas siab tas ntsws.
Nws caj ces yuav muaj hwj chim nyob ntiaj teb,
caj ces neeg siab ncaj yuav tau txais koob hmoov.

Txais: (5a) Tus neeg ua siab zoo thiab qiv rau cov neeg txom nyem yuav tau txoj hmoov zoo.

Tus neeg ncaj ci hauv qhov tsaus ntuj tuaj ua lub teeb kaj cov neeg ncaj,
nws ua siab zoo, khuv leej luag, thiab coj ncaj.
Tus neeg txawj hlub luag thiab qiv rau luag nws txoj hmoov zoo.
Nws tswj nws tej hauj lwm raws txoj kev ncaj.

Txais: (5a) Tus neeg ua siab zoo thiab qiv rau cov neeg txom nyem yuav tau txoj hmoov zoo.

Nws tsis qia dub nws pub ntau rau cov pluag :
nws txoj kev ua siab dav yuav nyob mus li,
nws yuav tau ntsej muag, nws yuav muaj koob meej.

Txais: (5a) Tus neeg ua siab zoo thiab qiv rau cov neeg txom nyem yuav tau txoj hmoov zoo.

As Les Lus yas: 1 PZ 4: 14

Txais: As les lus yas, as les lus yas.

Yog nej raug luag cem vim Leej Pleev lub npe, mas nej txoj hmoov zoo,
vim Tswv Ntuj Leej Tswv Yim tuaj so nyob saum nej.

Txais: As les lus yas, as les lus yas.

Ntawv Moo Zoo: LK 14: 25-33

25 Tej pab neeg coob coob nrog Yes Xus taug kev ua ke. Yes Xus tig los hais rau lawv tias:
26 "Leej twg los raws kuv, yog nws tsis ntxub nws niam nws txiv, nws poj niam me nyuam, nws cov kwv tij nkauj muam, thiab nws txoj sia, mas tus ntawd ua tsis tau kuv thwj tim.
27 Leej twg tsis kwv nws tus ntoo cuam thiab tsis lawv kuv qab, mas nws ua tsis tau kuv thwj tim.
28 Yog nej leej twg xav txhim ib tug pej thuam, nws puas tsis xub los zaum xam saib yuav siv nyiaj npaum li cas, thiab ntsuas saib nws puas muaj nyiaj txaus ua kom tiav log tso ?
29 Tsam nws pib txhim cov taw ntsa tas, ho ua tsis tau kom tiav, ces tas cov neeg pom yuav thuam nws hais tias :
30 ‘Saib! Tus neeg no pib txhim, nws ho tsis muaj cov peev los ua kom tiav!’
31 Los ib tug vaj yuav sawv kev mus ua rog ntaus lwm tus vaj, nws puas tsis xub zaum xav saib nws muaj kaum txhiab leej tub rog, nws puas yuav tiv tau tus vaj uas coj nees nkaum txhiab leej tuaj ?
32 Yog nws paub tias yuav tiv tsis tau, mas thaum lwm tus vaj tseem tuaj txog deb, nws yuav xa ib pab tiam lis mus thov kev sib hais haum kom cia lub teb chaws nyob thaj yeeb.
33 Nej kuj zoo ib yam li ntawd, yog nej leej twg tsis tso tas nws lub cuab tam tseg, mas nws ua tsis tau kuv thwj tim.”

Tim 4 lub 11 Hlis 2021

Hnub Tsib Lis Piam Peb Caug Ib Nruab Xyoo B Nruab Lis Piam Xyoo I
Lectionary: 488

Yuav hwm LN Charles Borromeo, ua Tswv Qhia

Nyeem Ib: LM 14: 7-1Zaj 2

Cov kwv tij nkauj muad:
7 Peb tsis muaj leej twg yuav ua neej vim yus tus kheej, thiab tsis muaj leej twg yuav tuag vim yus tus kheej.
8 Yog peb ua neej nyob, mas peb ua neej vim Huab Tais, thiab yog peb tuag, mas peb kuj tuag vim Huab Tais. Ua li mas txawm peb ua neej nyob los peb tuag, mas peb yog Huab Tais tug.
9 Yog vim li no Leej Pleev thiaj tuag thiab sawv rov los muaj txoj sia, kom tau ua tsoom neeg tuag thiab neeg ciaj tus Huab Tais.
10 Ua cas koj thiaj txiav txim rau koj tus kwv tij? Los ua cas koj thiaj ntxub koj tus kwv tij? Vim peb sawv daws puav leej yuav tau mus sawv ntawm Tswv Ntuj lub rooj txiav txim.
11 Muaj ntawv sau cia tias: “Huab Tais hais tias: Txhua leej txhua tus yuav txhos caug nyob ntawm kuv xub ntiag, thiab txhua xeem lus yuav cav lus zoo txog Tswv Ntuj.”
12 Li ntawd, peb nyias yuav tsum tau piav nyias lub neej rau Tswv Ntuj.

NPN 27: 1bcde, 4, 13-14

Txais: (13) Kuv ntseeg tias kuv yuav tau pom Huab Tais qhov zoo
nyob hauv cov neeg ciaj sia lub teb chaws.

Huab Tais yog kuv qhov pom kev thiab kuv txoj kev cawm;
Kuv yuav ntshai leej twg?
Huab Tais yog kuv qhov chaw nkaum hauv kuv lub neej,
Kuv yuav tshee vim leej twg?

Txais: (13) Kuv ntseeg tias kuv yuav tau pom Huab Tais qhov zoo
nyob hauv cov neeg ciaj sia lub teb chaws.

Kuv thov ib yam ntawm Huab Tais; qhov kuv nrhiav yog:
kom tau nyob hauv Huab Tais tsev niaj hnub hauv kuv lub neej,
Kom kuv tau ntsia ntsoov Huab Tais txoj kev zoo
thiab tau pom nws lub tuam tsev.

Txais: (13) Kuv ntseeg tias kuv yuav tau pom Huab Tais qhov zoo
nyob hauv cov neeg ciaj sia lub teb chaws.

Kuv ntseeg hais tias kuv yuav tau pom Huab Tais txoj kev nplua mias
nyob hauv cov neeg ciaj sia lub teb chaws.
Nej yuav ua siab loj tos ntsoov Huab Tias;
ua siab tawv qhawv thiab tos ntsoov Huab Tais.

Txais: (13) Kuv ntseeg tias kuv yuav tau pom Huab Tais qhov zoo
nyob hauv cov neeg ciaj sia lub teb chaws.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: “Tas nej sawv daws uas nej khwv thiab ris nra hnyav,
nej tuaj cuag kuv mas kuv yuav cia nej so los siav.”

Txais: As les lus yas, as les lus yas.

Ntawv Moo Zoo: LK 15: 1-10

1 Tas cov neeg sau se thiab cov neeg txhaum txav los ze Yes Xus, lawv xav mloog Yes Xus hais lus.
2 Ces cov Fas Lis Xais thiab cov Kws Ntawv Ntshiab nroo zom zaws tias: "Tus neeg no txais cov neeg txhaum, nws tseem nrog lawv noj mov thiab!"
3 Yes Xus thiaj hais zaj paj lug no rau lawv:
4 "Yog nej leej twg muaj ib puas tus yaj, tab sis ib tug ploj lawm, mas nws puas yuav tsis tso cuaj caum cuaj tus tseg rau tom hav suab puam, thiab mus nrhiav kom tau tus uas ploj lawd?
5 Thaum nws nrhiav tau tus yaj ploj lawm, nws muab kwv saum xwb pwg, nws zoo siab tas nrho.
6 Thaum nws rov los txog tsev, nws nqua hu nws cov phooj ywg thiab cov nyob ze ntawm nws tuaj, nws hais rau lawv tias: 'Nej nrog kuv zoo siab, vim kuv nrhiav tau kuv tus yaj ploj lawm.'
7 Kuv hais rau nej tias, ib yam li ntawd, thaum ib tug neeg txhaum hloov siab tig los ua zoo, mas nyob saum ntuj kuj yuav muaj kev zoo siab loj dua txoj kev zoo siab rau cuaj caum cuaj leeg siab ncaj uas tsis tas yuav hloov siab tig los ua zoo.
8 Los tus poj niam twg yog nws muaj kaum lub txiaj nyiag, muaj ib lub poob lawm, nws puas yuav tsis taws teeb cheb tsev, ua tib zoo tshawb nrhiav kom tau nws lub txiaj nyiag?
9 Thaum nws nrhiav tau lawm, nws nqua hu nws cov phooj ywg thiab cov nyob ze ntawm nws tuaj, nws hais rau lawv tias: ‘Nej nrog kuv zoo siab vim kuv nrhiav tau kuv lub txiaj nyiag uas poob lawd!’
10 Kuv hais rau nej tias, ib yam li ntawd, kuj muaj kev zoo siab loj nyob hauv Tswv Ntuj tsoom Tshiab, thaum ib tug neeg txhaum hloov siab tig los tu siab thiab lees txhaum.”

Tim 5 lub 11 Hlis 2021

Hnub Rau Lis Piam Peb Caug Ib Nruab Xyoo B Nruab Lis Piam Xyoo I
Lectionary: 489

Zaj Nyeem Ib: LM 15: 14-21

14 Kuv cov kwv tij nkauj muad, kuv yeej paub tseeb txog nej lawm tias nej muaj lub siab zoo tas nrho, nej muaj kev paub kev txawj txhua yam, thiab nej muaj kev txawj sib qhuab qhia sib ntuas.
15 Tsis kav kuv muaj cuab kav sau tej yam ntxhib me ntsis rau nej, yog xav txhawb nej kom nco ntsoov; kuv ua los ntawm lub txiaj ntsim uas Tswv Ntuj pub rau kuv,
16 kom kuv ua Yes Xus Pleev tus khiav dej num rau cov neeg teev pej kum dab, nyob hauv kuv txoj kev ua Leej Choj tsob hwb Tswv Ntuj lub Moo Zoo, thiaj yuav muab tau cov neeg teev pej kum dab los ua ib co txim cev rau Tswv Ntuj kom xis nws siab, vim lawv dawb huv tuaj nyob hauv Leej Tswv Yim Ntshiab lawm.
17 Li ntawd mas kuv muaj chaw khav nyob hauv Yes Xus Pleev, txog kuv tes hauj lwm ua rau Tswv Ntuj.
18 Kuv tsis muaj cuab kav yuav hais txog dab tsi, tsuas muaj cuab kav hais txog qhov uas Leej Pleev tau siv kuv ua xwb, kom coj tau cov haiv neeg teev pej kum dab los mloog lus, vim kuv lo lus thiab qhov kuv ua,
19 vim lub hwj huam ntawm cov cim thiab cov hwj huam yees ntxwv, vim Tswv Ntuj Leej Tswv Yim lub hwj huam; ces txij Yes Lus Xas Les mus txog Is Lis Lis Kus teb, kuv thiaj tau tshaj Leej Pleev lub Moo Zoo kom thoob.
20 Li no mas kuv muaj lub siab kub tshaj lub Moo Zoo, tiam sis tsis yog rau cov teb chaws uas neeg twb hu txog Leej Pleev lub npe lawm, kom kuv txhob txhim tsev rau saum luag lwm tus tej taw ntsa,
21 tiam sis kuv ua raws li lo lus sau tseg tias:
“Cov neeg uas tsis tau muaj tus qhia txog nws rau lawv dua, lawv yuav pom,
cov neeg uas tsis tau hnov hais txog nws dua, lawv yuav to taub.”

NPN 98: 1, 2-3ab, 3cd-4

Txais: (2b) Huab Tais qhia nws lub hwj huam cawm neeg rau cov kuj cuab paub.

Nej hu ib zag nkauj tshiab rau HUAB TAIS,
vim nws ua tej yam loj muaj tsim nto moo.
Nws sab tes xis ua kom nws yeej,
nws sab npab ntshiab ua.

Txais: (2b) Huab Tais qhia nws lub hwj huam cawm neeg rau cov kuj cuab paub.

HUAB TAIS ua kom sawv daws paub nws txoj kev cawm ;
nws muab nws txoj kev ncaj rau cov kuj cuab pom.
Nws rov nco txog nws txoj kev ua siab zoo
thiab siab ncaj rau His Xas Lais tsev neeg.

Txais: (2b) Huab Tais qhia nws lub hwj huam cawm neeg rau cov kuj cuab paub..

Tas npoo ntuj npoo ntiaj teb tau pom
peb tus Tswv Ntuj txoj kev cawm seej.
Tas txhua teb chaws, nej qw zoo siab cav txog HUAB TAIS !
Nej cuab suab hu nkauj, nej qhuas txog nws!

Txais: (2b) Huab Tais qhia nws nws lub hwj huam cawm neeg rau cov kuj cuab paub.

As Les Lus yas: 1 ZAM 2: 5

Txais: As les lus yas, as les lus yas.

Leej twg coj nraim Leej Pleev lo lus,
mas txoj kev nyiam Tswv Ntuj zoo tiav log nyob hauv nws lawm.

Txais: As les lus yas, as les lus yas.

Ntawv Moo Zoo: LK 16: 1-8

1 Yes Xus tseem hais rau cov thwj tim tias: "Muaj ib tug neeg nplua nuj, nws muaj ib tug tim xyoob xam txiaj. Luag qhia tus tswv tias tus tim xyoob muab nws tej nyiaj txiag siv lwj siv liam.
2 Tus tswv hu tus tim xyoob tuaj, nws hais rau tus tim xyoob tias: ‘Kuv hnov luag hais dab tsi txog koj li ntawd? Koj npaj ib daim ntawv qhia saib koj siv kuv tej nyiaj txiag li cas rau li cas. Txij no mus, koj yuav tsis tau ua kuv tus xam txiaj ntxiv.’
3 Tus tim xyoob xav zoj rau nruab siab tias: ‘Kuv yuav ua li cas, vim kuv tus tswv tshem txoj hauj lwm xam txiaj ntawm kuv mus lawm? Mus ncaws teb, kuv tsis muaj zog. Mus thov khawv, kuv kuj txaj muag.
4 Kuv paub kuv yuav ua dab tsi lawm, kom thaum luag tshem txoj hauj lwm xam txiaj ntawm kuv lawd, muaj neeg txais kuv mus nyob hauv lawv tsev.’
5 Ces tus tim xyoob hu cov neeg tshuav nqi ntawm nws tus tswv ib tug zuj zus tuaj. Nws hais rau thawj tug tias: ‘Koj tshuav nuj nqi ntawm kuv tus tswv npaum li cas ?’
6 Tus tshuav nqi teb tias: ‘Ib puas hub roj.’ Tus tim xyoob hais rau nws tias: 'Muab koj daim ntawv tshuav nqi los, koj zaum, koj sau sai sai rau ua tsib caug.'
7 Tus tim xyoob hais rau lwm tus tias: ‘Koj ne, koj tshuav nqi pes tsawg ?’ Nws hais tias: ‘Ib puas tawb nplej.’ Tus tim xyoob hais rau nws tias: 'Muab koj daim ntawv tshuav nqi los, koj sau ua yim caum.'
8 Tus tswv qhuas tus tim xyoob siab tsis ncaj tias nws txawj ua neeg xyuam xim kawg. Vim tias ntiaj teb no cov tub txawj ua neeg xyuam xim dua kev kaj cov tub nrog lawv phaum neeg.”

Tim 6 lub 11 Hlis 2021

Hnub Xya Lis Piam Peb Caug Ib Nruab Xyoo B Nruab Lis Piam Xyoo I
Lectionary: 490

Zaj Nyeem Ib: LM 16: 3-9, 16, 22-27

Cov kwv tij nkauj muad:
3 Thov nej hais kuv lo lus hmov tshua rau Phis Xis Las thiab As Kis Las nkawd, vim nkawd yog ob tug tau nrog kuv ua hauj lwm nyob hauv Yes Xus Pleev.
4 Nkawd tau muab nkawd caj dab los thaiv kuv txoj sia; tsis yog kuv ib leeg xwb yuav nco nkawd txiaj ntsim, tiam sis tas cov Koom Txoos nyob hauv cov neeg teev pej kum dab huv si kuj yuav nco nkawd txiaj ntsim thiab.
5 Thiab thov nej hais rau lub koom txoos uas sib sau nyob hauv nkawd tsev thiab. Thov nej hais rau Es Pes Nes Tus, tus kuv nyiam thiab; nws yog thawj lub txiv uas txi rau Leej Pleev nyob As Xias teb.
6 Nej hais rau Mab Liab thiab, nws tau khwv khwv pab nej kawg nkaus .
7 Nej hais rau As Nros Nis Kus thiab Yus Nias nkawd thiab; nkawd yog kuv ob tug kwv tij kwv luag nyob hauv tsev loj faj; nkawd yog ob tug Hauv Paus Xa Lus nto moo zoo, xub tau los nyob hauv Leej Pleev ua ntej kuv.
8 Nej hais kuv cov lus rau As Plias Tus, tus kuv nyiam nyob hauv Huab Tais thiab;
9 thiab hais rau Us Npas Nus, tus tau nrog kuv ua hauj lwm nyob hauv Leej Pleev, thiab rau Xaws Tas Kis, tus kuv nyiam thiab.
16 Nej sawv daws yuav rov sib hu thiab sib qawg raws txoj kev ntshiab. Leej Pleev cov Koom Txoos tib si xa lawv cov lus hmov tshua tuaj rau nej thiab.
22 Kuv, Tes Xis Yus, uas yog tus sau tsab ntawv no xa kuv cov lus hmov tshua tuaj rau nej nyob hauv Huab Tais thiab.
23 Nkas Yus, tus uas tos txais kuv thiab txais tas lub Koom Txoos, xa nws cov lus hmov tshua tuaj rau nej thiab; Es Las Tus, tus ceev nyiaj rau lub tsheej, thiab peb tus kwv tij Kuas Tus, nkawd kuj xa nkawd cov lus hmov tshua tuaj rau nej thiab. [24...]
25 Thov kom Tswv Ntuj nto koo meej, tus uas ua tau kom nej muaj zog raws lub Moo Zoo kuv xa tuaj thiab cov lus tshaj tawm txog Yes Xus Pleev, raws txoj kev qhia tawm txog tej yam qhia tsis tau nyob zais ntshis tau ntau tiam los lawm,
26 tiam sis, nyem no, muab qhib tawm rau sawv daws paub, thiab tus uas cov yaj saub tej ntaub ntawv sau txog thiab muab qhia rau tas tsoom neeg teev pej kum dab paub lawm, raws li tus Tswv Ntuj nyob mus li kom ua, thiaj rub tau kom sawv daws los ua neeg mloog lus nyob hauv txoj kev ntseeg.
27 Thov kom tus Tswv Ntuj uas nws ib leeg yog tus thoob tsib, kom nws muaj koob meej nyob hauv Yes Xus Pleev, mus txog txhiab niag tim puas xyoo. Ua li!

NPN 145: 2-3, 4-5, 10-11

Txais: (1) Kuv yuav cav txog koj lub npe mus li, Huab Tais.

Kuv yuav niaj hnub cav txog koj lub koob meej,
kuv yuav cav lus zoo txog koj lub npe mus li ib txhiab ib txhis.
HUAB TAIS loj tas nrho, tsim nyog cav txog nws ;
nws loj tas nrho, neeg ntsuas tsis tau.

Txais: (1) Kuv yuav cav txog koj lub npe mus li, Huab Tais.

Sawv daws yuav qhuas txog koj tej hauj lwm txheej dhau txheej,
Lawv yuav tshaj koj txoj kev muaj hwv huam rau neeg paub.
Lawv yuav hais txog koj lub hwj chim loj ci ntsa iab muaj koob meej.
Lawv yuav piav txog koj cov dej num tsim nyog qhuas.

Txais: (1) Kuv yuav cav txog koj lub npe mus li, Huab Tais.

HUAB TAIS, cia koj cov hauj lwm txhua yam ua koj tsaug,
thiab cia cov neeg nyiam koj cav txog koj.
Cia lawv qhuas txog koj lub Ceeb Tsheej muaj hwj chim
Thiab piav txog koj lub hwj huam loj.

Txais: (1) Kuv yuav cav txog koj lub npe mus li, Huab Tais.

As Les Lus Yas: 2 KLN 8: 9

Txais: As les lus yas, as les lus yas.

Yes Xus Pleev tau ua neeg pluag txawm tias nws yog tus nplua nuj,
kom xwv nws txoj kev pluag ua kom nej nplua nuj tuaj.

Txais: As les lus yas, as les lus yas.

Ntawv Moo Zoo: LK 16: 9-15

Yes Xus hais rau nws cov thwj tim tias:
9 “Kuv hais rau nej tias: Nej sim ua phooj ywg nrog txoj kev nplua nuj tsis ncaj ncees saib, ces thaum txoj kev nplua nuj ntawd dua tas lawm, luag thiaj yuav zoo siab txais nej mus nyob hauv cov tsev tsam phooj nyob mus li.
10 Leej twg yog tus luag ntseeg tau thaum nws saib tej yam me, luag kuj ntseeg tau nws thaum nws saib tej yam loj thiab. Leej twg ua tsis ncaj thaum nws saib tej yam me, nws kuj ua tsis ncaj thaum nws saib tej yam loj thiab.
11 Yog luag twb ntseeg tsis tau nej thaum nej saib tej yam uas tsis muaj kev ncaj, mas leej twg thiaj yuav ntseeg tau nej thiab tso tej yam tseem ceeb rau nej saib?
12 Thaum nej saib yam uas yog luag tug, yog nej ua tsis ncaj, mas leej twg yuav muab yam uas yog nej tug rau nej tuav?
13 Tsis muaj ib tug tub txib twg yuav tsob hwb ob tug tswv tau. Nws yeej yuav ntxub ib tug, nyiam ib tug, los nws yuav npuab ib tug, thuam ib tug. Nej yuav ua Tswv Ntuj tub txib thiab nyiaj txiag tub txib tsis tau."
14 Cov Fas Lis Xais uas yog neeg nyiam nyiaj txiag, lawv hnov cov lus ntawd, lawv thuam Yes Xus.
15 Ces Yes Xus hais rau lawv tias: "Nej yog cov uas rov qhuas rau ntawm luag tej xub ntiag tias nej muaj siab ncaj, tab sis Tswv Ntuj twb paub nej siab tas lawm. Vim tias yam uas neeg muab saib siab yog ib yam uas Tswv Ntuj saib phem kawg nkaus."

Tim 8 lub 11 Hlis 2021

Hnub Ob Lis Piam Peb Caug Ob Nruab Xyoo B Nruab Lis Piam Xyoo I
Lectionary: 491

Zaj Nyeem Ib: THOOB TSIB 1: 1-7

1 Nej cov uas txiav txim rau lub ntiaj teb, nej yuav nyiam txoj kev ncaj. Nej yuav xav txog Huab Tais raws qhov zoo, thiab nej yuav muaj ib lub siab nrhiav nws tiag tiag.
2 Vim tias yog cov neeg tsis sim Huab Tais thiaj yuav nrhiav tau nws, thiab nws ua kom cov neeg tsis ua xyem xyav txog nws pom tau nws.
3 Vim cov zaj tswv yim phem cais neeg kom nyob deb ntawm Tswv Ntuj, thiab Tswv Ntuj lub hwj huam uas raug neeg sim, yuav qhia txog tus neeg vwm rau sawv daws paub.
4 Vim kev thoob tsib tsis chaws mus hauv ib tug ntsuj plig uas nrhiav ua phem, thiab nws kuj tsis nyob hauv ib lub cev uas zwm rau kev txhaum.
5 Vim lub tswv yim ntshiab thiab txawj coj zoo yuav khiav mus deb ntawm txoj kev cuav, thiab yuav muab tej zaj tswv yim phem tso pov tseg. Thaum muaj txoj kev tsis ncaj ncees tuaj mas nws yuav txaj muag pom.
6 Kev thoob tsib yog ib lub tswv yim nyiam kev ntaus phooj ywg, tiam sis nws yuav tsis tso cov neeg hais lus thuam Ntuj dim ntawm lub txim ntawm lawv lo lus, vim Tswv Ntuj ua tim khawv pom lawv tej kev xav hauv qhov nraim nkoos hauv lawv nruab siab, nws tsom pom qhov tseeb hauv lawv nruab plaw, thiab nws yog tus hnov cov lus uas lawv tus nplaig hais tawm.
7 Vim Huab Tais Leej Tswv Yim nyob puv hauv lub sim ceeb, nws vij tas txhua yam, nws paub txhua yam uas neeg hais.

NPN 139: 1b-3, 4-6, 7-8, 9-10

Txais: (24b) Huab Tais, thov koj coj kuv kev mus taug txoj kev ciaj nyob mus li.

HUAB TAIS, koj tsom thoob hauv kuv, koj paub kuv :
koj paub thaum kuv sawv thiab thaum kuv zaum ;
koj nyob deb to taub tas tej kuv xav.
Koj soj nraim kuv thaum kuv mus kev los thaum kuv zaum,
koj paub txhua yam kuv ua txhua txoj kev kuv taug.

Txais: (24b) Huab Tais, thov koj coj kuv kev mus taug txoj kev ciaj nyob mus li.

Lo lus uas tsis tau nyob saum kuv tus nplaig,
HUAB TAIS, koj twb xub paub tas lawm.
Koj nyob tom kuv qab tom kuv hauv ntej,
koj nyob ib ncig kuv, koj tso koj txhais tes rau saum kuv.
Koj txoj kev paub txhua yam zoo dhau rau kuv,
siab tshaj qhov kuv ncav tau.

Txais: (24b) Huab Tais, thov koj coj kuv kev mus taug txoj kev ciaj nyob mus li.

Kuv yuav mus lawm qhov twg thiaj nraim tau ntawm koj Leej Tswv Yim?
Kuv yuav khiav lawm ces twg, thiaj nyob deb ntawm koj?
Yog kuv nce mus saum ntuj, koj twb nyob saud lawm.
Yog kuv nqes lawm puag ntuj txias teb tsaus, koj kuj nyob hauv thiab!

Txais: (24b) Huab Tais, thov koj coj kuv kev mus taug txoj kev ciaj nyob mus li.

Yog kuv ya raws lub caij kaj ntug ob phab tis mus,
yog kuv mus lawm puag sab dej ntuj kawg nkaus tim ub,
los tseem yog koj txhais tes coj kuv kev mus rau ntawd,
yog koj sab tes xis hwj kuv kom kuv nyob ruaj nreb.

Txais: (24b) Huab Tais, thov koj coj kuv kev mus taug txoj kev ciaj nyob mus li.

As Les Lus Yas: FLP 2: 15d, 16a

Txais: As les lus yas, as les lus yas.

Nej yuav tsum ci zoo li tej lub teeb ci pom kev rau lub ntiaj teb,
thaum nej tab tom khawm ruaj nreb rau Lo Lus pub txoj sia.

Txais: As les lus yas, as les lus yas.

Ntawv Moo Zoo: LK 17: 1-6

1 Yes Xus hais rau nws cov thwj tim tias: "Yeej yuav cheem tsis tau kom txhob muaj tej kev coj luag ua txhaum, tab sis tus coj kom luag ua txhaum mas nws txoj hmoov phem!
2 Txhiaj khoov cia muab ib lub zeb zom dai ntawm nws caj dab thiab muab nws pov rau hauv hiav txwv, zoo dua cia nws coj ib tug neeg me li no mus ua txhaum.
3 Nej yuav tsum ceev faj! Yog koj tus kwv ua txhaum, mas koj yuav qhuab ntuas nws. Yog nws thov txhaum, mas koj yuav zam rau nws.
4 Yog ib hnub nws ua txhaum rau koj xya zaus, nws rov los thov koj xya zaus hais tias 'Kuv thov txhaum,' mas koj yuav tsum zam rau nws."
5 Cov Hauv Paus Xa Lus hais rau Huab Tais tias : "Thov koj txhab kom peb txoj kev ntseeg loj tuaj!"
6 Ces Huab Tais teb tias: "Yog nej muaj kev ntseeg luaj li ib lub noob zaub roj, mas nej yuav hais tau rau tsob ntoo txiv zaub kab no tias: 'Rho koj cov cag tawm, koj tshais koj mus cog rau hauv dej ntuj,' mas tsob ntoo yuav mloog nej lus.”

Tim     9     lub     11     Hlis 2021

Tsuj Xeeb txog Hnub Foom Hmoov Zoo rau Tuam Tsev Teev Ntuj Lateran nyob Los Mas
Lectionary: 671

Zaj Nyeem Ib:    EXK 47: 1-2, 8-9, 12

1 Tus tshiab coj kuv rov los txog ntawm lub qhov rooj txuas nkag mus hauv lub Tuam Tsev Teev Ntuj, ua ciav kuv pom dej ntws hauv lub qab taw rooj los mus dua sab hnub tuaj lawm, vim lub Tuam Tsev tig sab qhov rooj txuas mus rau sab hnub tuaj. Dej txhawv ntawm lub qab tuam tsev sab xis uas yog nram sab naj lub thaj txi Ntuj los.
2 Nws coj kuv tawm ntawm lub qhov rooj nyob sab pej los rau sab nraud, thiab coj kuv ncig sab Tuam Tsev nraud los txog ntawm lub rooj vag uas tig mus rau sab hnub tuaj. Nyob ntawd, kuv thiaj pom dej ntws tawm ntawm sab xis los.
8 Nws hais rau kuv tias: "Cov dej no ntws mus rau thaj tsam sab toob fab, thiab nqes mus rau nram lub hav As Las Npas, yuav mus tshwm rau hauv lub hiav txwv, mus ua kom cov dej hiav txwv ntshiab huv tuaj.
9 Tus dej no ntws txog twg mas txhua tsav txhua yam muaj sia yuav ciaj nyob hauv cov dej ntawd; yuav muaj ntses coob heev, vim thaum tus dej no tuaj txog, nws yuav ua kom cov dej hiav txwv ntshiab huv tuaj; ces txhua yam yuav ciaj sia tau hauv tej qhov chaw tus dej no ntws mus txog.
12 Nyob ntawm ob sab ntug dej, yuav tuaj tas puas tsav yam ntoo txi txiv zoo noj; lawv cov nplooj yuav tsis zeeg li thiab lawv yuav txi txiv mus li. Niaj lub hli, lawv yuav txi ib phaum txiv tshiab, vim muaj cov dej uas ntws ntawm thaj chaw ntshiab los yug lawv. Lawv cov txiv yuav yog ib co txhiam xws, hos lawv cov nplooj yuav yog ib co tshuaj."

NPN    46: 2-3, 5-6, 8-9

Txais: (5) Cov dej hauv tus dej ntawd ua kom Tswv Ntuj lub tsheej zoo siab,
l ub tsheej uas yog tus Nyob Siab qhov chaw nyob.

Tswv Ntuj yog peb chaw nkaum yog peb lub zog,
yog tus pab peb mus li thaum peb ntsib kev nyuaj.
Vim li no, peb tsis ntshai, txawm ntiaj teb yuav ua zog koog
thiab toj roob hauv pes yuav nphau nphwv rau hauv qab thu dej.

Txais: (5) Cov dej hauv tus dej ntawd ua kom Tswv Ntuj lub tsheej zoo siab,
lub tsheej uas yog tus Nyob Siab qhov chaw nyob.

Muaj ib tug dej, nws ncau ceg mus ua kom Tswv Ntuj lub tsheej zoo siab,
lub tsheej uas yog tus Nyob Siab qhov chaw nyob.
Tswv Ntuj nyob hauv lub tsheej, nws yuav tsis ntsib kev nyuaj ntxhov,
Tswv Ntuj yuav tuaj pab nws thaum kaj ntug txoog.

Txais: (5) Cov dej hauv tus dej ntawd ua kom Tswv Ntuj lub tsheej zoo siab,
lub tsheej uas yog tus Nyob Siab qhov chaw nyob.

Tus Huab Tais kav tsoom tshiab nrog peb nyob;
peb lub yeej ntsa zeb yog Yas Kos tus Tswv Ntuj.
Nej tuaj xyuas HUAB TAIS cov hauj lwm saib,
xyuas tej yam loj tas nrho nws tau ua nyob ntiaj teb.

Txais: (5) Cov dej hauv tus dej ntawd ua kom Tswv Ntuj lub tsheej zoo siab,
lub tsheej uas yog tus Nyob Siab qhov chaw nyob.

Zaj Nyeem Ob:    1 KLN 3: 9c-11, 16-17

Cov kwv tij nkauj muad:
9c “Nej yog Tswv Ntuj lub Tuam Tsev.
10 Raws li lub txiaj ntsim uas Tswv Ntuj pub rau kuv, kuv zoo li ib tug neeg txhim tsev, kuv pib txhim tau cov taw ntsa, ces lwm tus tuaj txhim ntxiv rau saud. Tab sis nyias yuav muab siab rau saib xyuas nyias txoj kev txhim tsev saib yuav txhim li cas.
11 Vim tias tsis muaj leej twg yuav txhim tau ib tug taw ntsa txawv tus uas ib txwm nyob : tus taw ntsa ntawd yog Yes Xus Pleev.
16 Nej puas paub tias nej yog Tswv Ntuj lub Tuam Tsev, thiab Tswv Ntuj Leej Tswv Yim nyob txawm hauv nej?
17 Yog leej twg rhuav Tswv Ntuj lub Tuam Tsev, mas Tswv Ntuj yuav rhuav tus ntawd. Vim tias Tswv Ntuj lub Tuam Tsev, uas yog nej,  yog ib yam ntshiab.

As Les Lus Yas:    2 XWM 7: 16

Txais: As les lus yas, as les lus yas.

Huab Tais hais tias: “Kuv tau xaiv thiab tau tshwj lub tsev no
cia rau kuv lub npe kom nyob ntawd tas mus li.”

Txais: As les lus yas, as les lus yas.

Ntawv Moo Zoo: ZAM 2: 13-22

13 Yuav txog cov Yus Das lub Ntees Hla, ces Yes Xus mus pem Yes Lus Xas Les.
14 Nyob hauv lub Tuam Tsev Teev Ntuj, nws pom cov tub luam muag nyuj, muag tshis, thiab muag nquab, thiab pom cov neeg pauv nyiaj zaum nyob ntawd.
15 Nws muab ib co hlua los ua ib rab nplawm, nws ntiab sawv daws huv tib si tawm hauv lub Tuam Tsev Teev Ntuj, nrog cov yaj thiab cov nyuj mus; nws nchuav cov pauv nyiaj tej nyiaj me, thiab nws muab lawv tej rooj ntxeev.
16 Nws hais rau cov muag nquab tias: "Nej tshem tej ntawd tawm hauv no mus. Nej tsis txhob muab kuv Txiv lub Tsev los ua ib lub tsev lag tsev luam ntxiv."
17 Yes Xus cov thwj tim nco txog lo lus uas Ntawv sau tseg tias: “Kev mob siab rau koj lub Tsev ua kom kuv lub siab kub lug.”
18 Cov Yus Das thiaj hais rau nws tias: "Koj yuav ua ib lub cim dab tsi qhia rau peb txog qhov koj ua no?”
19 Yes Xus teb rau lawv tias: "Nej rhuav lub tuam tsev no, ces peb hnub tom qab, mas kuv yuav rov txhim tiav tas.”
20 Cov Yus Das thiaj hais tias: "Lawv ua hauj lwm plaub caug rau xyoo diam thiaj txhim tau lub tuam tsev no, hos koj li, koj ua peb hnub xwb, koj yuav rov txhim tau no lod?"
21 Tab sis Yes Xus hais txog lub tuam tsev uas yog nws lub cev.
22 Thaum Yes Xus sawv hauv cov tuag rov los lawm, nws cov thwj tim thiaj rov nco txog tias nws twb tau hais li ntawd lawm, ces lawv ntseeg txog Phau Ntawv thiab ntseeg txog lo lus uas Yes Xus tau hais.

Tim 10 lub 11 Hlis 2021

Hnub Plaub Lis Piam Peb Caug Ob Nruab Xyoo B Nruab Lis Piam Xyoo I
Lectionary: 493

Yuav Hwm LN Leo tus Loj, Vaj Qhia ua Kws cov Txuj Ntshiab

Zaj Nyeem Ib: THOOB TSIB 6: 1-11

1 Cov vaj aw, nej mloog mas, nej yuav tsum to taub! Cov nom txiav txim rau cov teb chaws tim npoo ntiaj teb, nej yuav kawm kom paub!
2 Nej cov uas tswj zeej tsoom neeg thiab khav tias nej kav ntau lub kuj cuab, nej cia li tig ntsej los mloog!
3 Vim yog Huab Tais muab hwj chim kav neeg rau nej, yog tus Nyob Siab pub kom nej muaj hwj huam ua vaj. Nws yuav tshuaj txog nej cov hauj lwm thiab nws yuav tshawb txog nej lub hom phiaj nej npaj.
4 Vim tias nej yog ib co tub txib leg hauj lwm rau nws lub ceeb tsheej, tiam sis nej tsis tswj luag raws kev ncaj, nej tsis coj raws Txoj Cai, thiab nej tsis ua raws li Tswv Ntuj lub siab nyiam,
5 mas nws yuav tuaj rau txim loj rau nej sai sai, vim cov ua hlob yuav raug txiav txim hnyav.
6 Tus neeg me, mas nws yuav txais kev zam txhaum nyob hauv kev khuv leej. Tab sis cov ua hlob yuav raug txiav txim nruj.
7 Vim tus Huab Tais kav tas txhua yam nws tsis saib ib leeg twg hlob, nws tsis ntshai cov muaj meej mom, vim nws yog tus tsim tus loj tus me huv tib si, nws pub pab sawv daws zoo ib yam.
8 Tab sis nws yuav ua nruj ua tsiv dua thaum nws tshuaj txog cov ua tus coj.
9 Li no, kuv thiaj hais cov lus no rau nej cov ua nom ua tswv kom nej kawm tau kev thoob tsib, thiab kom nej tsis txhob ua kev txhaum.
10 Cov uas coj nraim txoj cai ntshiab raws kev ntshiab, mas Ntuj yuav saib lawv yog neeg ntshiab; hos cov kawm kom paub txoj cai ntshiab zoo, mas lawv yuav muaj lus teb tsis tau kev tws.
11 Nej yuav tsum xav paub kuv cov lus, nej yuav tsum ntshaw paub, ces yuav muaj tus qhia rau nej.

NPN 82: 3-4, 6-7

Txais: (8a) Tswv Ntuj, koj sawv tsees los txiav txim rau ntiaj teb mas.

Nej cia li tuaj tus neeg me thiab tus ntsuag nos tog,
nej txiav txim ncaj rau tus txom nyem thiab tus tsis muaj dab tsi.
Nej pab cawm tus neeg me thiab tus pluag;
nej cawm lawv kom lawv dim ntawm tus neeg phem txhais tes.

Txais: (8a) Tswv Ntuj, koj sawv tsees los txiav txim rau ntiaj teb mas.

Kuv hais rau nej tias: “Nej yog ib co tswv ntuj,
tas nej cov uas yog tus Nyob Siab cov tub.
Tsis kav nej yuav txawj tuag li tej tib neeg,
nej yuav txawj poob tsim ib yam li tej ua nom ua tswv.”

Txais: (8a) Tswv Ntuj, koj sawv tsees los txiav txim rau ntiaj teb mas.

As Les Lus yas: 1 TXLN 5: 18

Txais: As les lus yas, as les lus yas.

Txawm yuav muaj dab tsi los nej yuav ua Tswv Ntuj tsaug ,
vim Tswv Ntuj lub siab xav kom nej ua li ntawd nyob hauv Yes Xus Pleev.

Txais: As les lus yas, as les lus yas.

Ntawv Moo Zoo: LK 17: 11-19

11 Thaum Yes Xus taug kev mus pem Yes Lus Xas Les, nws hla hauv Xas Mas Lias teb thiab Nkas Lis Lais teb mus.
12 Thaum nws tab tom yuav mus rau hauv ib lub zos, muaj kaum tus mob ruas tuaj cuag nws, lawv nres nrug deb ntawm nws.
13 Lawv tsa suab hais nrov nrov rau nws tias: "Xib Hwb Yes Xus, thov koj khuv leej peb!"
14 Thaum Yes Xus pom lawv, nws hais rau lawv tias: “Nej mus thws nej lub cev rau cov Leej Choj saib." Thaum lawv tab tom mus ces lawv lub cev huv tuaj.
15 Muaj ib tug hauv pab ntawd pom tias nws lub cev zoo lawm, ces nws tig hlo rov qab los, nws tsa suab nrov nrov cav txog Tswv Ntuj.
16 Nws khoov pe ntsej muag ti av rau ntawm Yes Xus ko taw, nws ua Yes Xus tsaug. Nws yog ib tug neeg Xas Mas Lias.
17 Yes Xus thiaj tsa ncauj hais tias: “Muaj kaum leej rov huv tuaj diam los tsis yog? Tshuav cuaj leeg ne, lawv dua qhov twg lawm?
18 Ua cas tsuas muaj tus qhua no xwb thiaj rov los ua tsaug cav txog Tswv Ntuj ?"
19 Ces Yes Xus hais rau nws tias: "Koj sawv mus, koj lub siab ntseeg cawm koj lawm."

Tim 11 lub 11 Hlis 2021

Hnub Tsib Lis Piam Peb Caug Ob Nruab Xyoo B Nruab Lis Piam Xyoo I
Lectionary: 494

Yuav Hwm LN Martin nyob Tours

Zaj Nyeem Ib: THOOB TSIB 7: 22b-8:1

22b Nyob hauv kev thoob tsib muaj ib lub tswv yim ntse, ntshiab huv, tsis muaj lwm lub zoo li ntawd, paub ntau fab, txawj to taub tej yam tob, khiav nrawm, pom tau tseeb, tsis muaj yam tsuas, paub meej, tsis ua phem, nyiam qhov zoo, ntse zuag plias,
23 rub tau neeg lub siab, ua zoo rau luag, ua neeg zoo, nyob ruaj nreb, tsis ua xyem xyav, nyob tus tus, muaj hwj huam ua txhua yam, pom tas txhua yam, nkag tau tshab hauv txhua lub tswv yim txawm yuav ntse npaum cas, dawb huv, thiab txawj txiav raug txhua yam.
24 Vim kev thoob tsib mus los nrawm dua txhua yam uas txawj ua zog, nws nkag tau thiab mus ntxaum thoob tas txhua yam, vim nws ntshiab dawb huv.
25 Kev thoob tsib yog ib yam tawm ntawm Tswv Ntuj lub hwj huam los, yog ib co pa ntshiab huv ncho tawm ntawm Tus Muaj Hwj Huam Tas Nrho lub hwj chim tuaj. Vim li ntawd, tsis muaj ib yam phem yuav txeem tau mus rau hauv nws.
26 Kev thoob tsib yog qhov ci ntsa iab tawm ntawm qhov pom kev nyob mus li tuaj, yog daim tsom iav huv si uas pom Tswv Ntuj lub hwj huam, thiab yog daim duab qhia txog nws lub siab zoo.
27 Kev thoob tsib yog ib leeg twm zee xwb, tsis kav nws ua tau tas puas tsav yam. Nws nyob li qub tas mus li, tsis kav nws ua tau kom txhua yam tshiab tuaj. Tiam dhau tiam, nws mus nyob hauv cov ntsuj plig ntshiab, nws tsa lawv ua Tswv Ntuj cov phooj ywg thiab cov Yaj Saub.
28 Vim Tswv Ntuj tsuas nyiam tus uas nyob txawm nrog kev thoob tsib xwb.
29 Kev thoob tsib zoo nkauj dua lub hnub, nws zoo tshaj tas txhua ntsauv hnub qub. Muab piv rau qhov pom kev, nws tseem zoo tshaj lawm.
30 Qhov pom kev txawj hloov chaw cia qhov tsaus ntuj los nyob, hos kev phem tsis txawj yeej tau kev thoob tsib li.
8: 1 Txoj kev thoob tsib muaj peev xwm koos lub ntiaj teb ntawm ib sab ntuj kawg mus rau lwm sab, nws tswj txhua yam kom mus tau zoo.

NPN 119: 89, 90, 91, 130, 135, 175

Txais: (89a) HUAB TAIS, koj lo lus yeej nyob mus li.

HUAB TAIS, koj lo lus nyob mus li,
nws nyob ruaj nreb xws cov txheej ntuj saud.

Txais: (89a) HUAB TAIS, koj lo lus yeej nyob mus li.

Koj txoj kev tseeb nyob tiam dhau tiam.
Koj teeb lub ntiaj teb kom nyob ruaj nreb.

Txais: (89a) HUAB TAIS, koj lo lus yeej nyob mus li.

Tas ib puas tsav yam nyob ruaj khov los txog tav no,
raws li koj tau teem cia, vim txhua tsav yam tsob hwb koj.

Txais: (89a) HUAB TAIS, koj lo lus yeej nyob mus li.

Txoj kev paub txog koj cov lus ua kom pom kev,
ua kom cov neeg me muaj kev to taub.

Txais: (89a) HUAB TAIS, koj lo lus yeej nyob mus li.

Thov kom koj lub ntsej muag ci tuaj rau koj tus tub txib,
Thiab thov koj qhia koj cov cai lij choj rau kuv.

Txais: (89a) HUAB TAIS, koj lo lus yeej nyob mus li.

Thov cia kuv tus ntsuj plig muaj txoj sia kom tau cav txog koj.
Thiab cia koj cov cai lij choj txhawb nqa kuv.

Txais: (89a) HUAB TAIS, koj lo lus yeej nyob mus li.

As Les Lus Yas: ZAM 15: 5

Txais: As les lus yas, as les lus yas.

Huab Tais hais tias: Kuv yog tsob txiv cawv, nej yog cov ceg;
tus uas nyob hauv kuv thiab kuv nyob hauv nws, mas nws yuav txi txiv ntau.

Txais: As les lus yas, as les lus yas.

Ntawv Moo Zoo: LK 17: 20-25

20 Cov Fas Lis Xais nug Yes Xus tias thaum twg Tswv Ntuj lub Ceeb Tsheej thiaj li yuav los txog. Yes Xus teb rau lawv tias: "Thaum Tswv Ntuj lub Ceeb Tsheej los mas neeg qhov muag pom tsis tau,
21 tsis muaj neeg tshaj tias: 'Tswv Ntuj lub Ceeb Tsheej nyob ntawm no,’ Los ‘Nyob tod', vim tias Tswv Ntuj lub Ceeb Tsheej twb tuaj nyob hauv nruab nrab nej lawm."
22 Ces Yes Xus hais rau nws cov thwj tim tias: "Yuav muaj tej hnub uas nej yuav ntshaw xav kom pom ib hnub uas thaum Neeg Leej Tub tseem nrog nej nyob, tab sis nej yuav tsis pom ntxiv.
23 Yuav muaj tej cov neeg hais rau nej tias: ‘Nws nyob tod', los 'Nws nyob ntawm no'. Mas nej tsis txhob mus xyuas, tsis txhob tso sas khiav mus caum.
24 Vim tias, ib yam li cov kab xob laim uas ci pom kev dawb vog kaj ib ceg kaum ntuj mus rau lwm ces, Neeg Leej Tub kuj yuav zoo ib yam li ntawd hnub nws los.
25 Tab sis nws yuav tsum xub raug luag tsim txom loj kawg nkaus thiab raug tiam neeg no tsis lees paub nws tso.”