Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» Xib Hwb Thoj Xyooj lub neej
by Maiv Tooj Today at 10:30 pm

» COV ZAJ NYEEM NRUAB LIS PIAM XYOO I 2016-2017
by Mim Yesterday at 8:12 am

» Thov Leej Ntshiab YOS XES
by Maiv Tooj 3rd December 2016, 10:36 am

» COV ZAJ NYEEM NRUAB LIS PIAM XYOO II, 2015-2016
by Mim 2nd December 2016, 1:29 pm

» COV ZAJ NYEEM HNUB CHIV XYOO A 2016-2017
by NrhiavTswvNtuj 1st December 2016, 12:54 pm

» XH.Zoov Ntxheb Yaj Nthuav Ntawv Ntshiab.
by Maiv Tooj 1st December 2016, 12:35 pm

» XH. Yaj Zoov Ntxheb lub Tsev THOOB TSIB
by Maiv Tooj 1st December 2016, 12:33 pm

» Qhia keeb kwm kev ntseeg. TP.Cwj Vuam CChiv.
by Maiv Tooj 28th November 2016, 9:58 pm

» Yes Xus lub ntsej muag tiag tiag.
by NrhiavTswvNtuj 26th November 2016, 1:52 pm

» HMOOB NPAM NAJ XEES
by NrhiavTswvNtuj 21st November 2016, 9:15 am

» MOO QAIJ QAUG
by Maiv Tooj 20th November 2016, 9:45 am

» TP.Txhiaj Foom lub TSEV Ntawv
by Maiv Tooj 19th November 2016, 12:04 pm

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM 2012

    Share

    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    COV ZAJ NYEEM NRUAB LIS PIAM 2012

    Post  Mim on 26th March 2012, 4:30 pm

    COV ZAJ NYEEM NIAJ HNUB HAUV NRUAB LIS PIAM.

    Lub koom Txoos Kas Tos Liv xav kom peb niaj hnub nyeem ntawv Ntshiab. Yog nej leej twg tsis khoom yuav mus nyeem ib tog zus tuaj no los nej tuaj nyeem cov zaj nyeem niaj hnub ces thaum tas 3 xyoos, nej nyeem yuav luag txhua phau Ntawv Ntshiab lawm, txij phau Cog Qub Lus mus txog phau Cog Lus Tshiab tib si.

    Lub 3 hlis tim 26 xyoo 2012

    Kev cai tiag mas niaj xyoo yog tim 25 lub 3 hlis peb ua lub hmoov  hwm tus Tshiab tuaj xa lus rau Mab Liab tias nws yuav xeeb ib tug tub. Tiam sis vim xyoo no hnub tim 25 yog Hnub Chiv 5 hauv Caij 40 lawm, ces thiaj muab tshem mus rau tim 26. Nws yog ib lub hmoov tseem ceeb, peb thiaj muaj 3 zaj nyeem uas yog hais txog HT Yes Xus txoj kev xeeb los ua neeg.


    His Xais  7 : 10 - 16.

    10  HUAB TAIS kom His Xais rov hais rau As Kas tias :  11 "Koj thov koj tus HUAB TAIS Tswv Ntuj kom nws ua ib lub cim qhia rau koj, txawm yuav nyob puag hauv qab ntuj txias teb tsaus, los puas nyob saum cov chaw siab puag saum ub los tau."  12  As Kas hais tias :  "Kuv yuav tsis thov.  Kuv yuav tsis sim HUAB TAIS."    13  His Xais hais tias : "Das Vis tsev neeg, nej mloog! Nej ua kom tej tib neeg sab tas nrho, los tsis txaus nej siab !  Nej tseem yuav ua kom Tswv Ntuj sab thiab?  14  Vim li ntawd, Huab Tais yuav pub ib lub cim rau nej. Nej ntsia saib !  Tus poj niam hluas xeeb tub lawm.  Nws yuav yug ib tug tub.  Nws yuav tis npe rau nws tus tub hu ua Es Mas Nus Es."

    Hes Nplaws  10: 4-10

    4  Muaj tseeb, ntshav nyuj ntshav tshis daws tsis tau txhaum .  5 Vim li ntawd, thaum Leej Pleev los nyob ntiaj teb no, nws thiaj hais tias :   “Tswv Ntuj, koj tsis xav yuav cov thaj txi Ntuj thiab cov paj tshab, koj thiaj puab ib lub cev rau kuv.  6  Cov thaj hlawv tsiaj thiab cov thaj txi Ntuj them txim txhaum, koj tsis zoo siab txais.   7 Ces kuv thiaj hais tias : “Cia kuv tuaj, vim yog lawv hais txog kuv nyob hauv cov riam ntawv, Tswv Ntuj, kuv tuaj ua raws li koj nyiam. ”   8  Leej Pleev xub txog hais tias : “Cov thaj txi Ntuj, cov paj tshab, cov thaj hlawv tsiaj, cov thaj txi Ntuj them txim txhaum, koj tsis zoo siab txais", tiam sis tej ntawd twb yog tej yam uas Txoj Cai qhia kom cev.   9  Leej Pleev hais ntxiv tias : “Cia kuv tuaj ua raws li koj nyiam.”    Li ntawd, Leej Pleev rhuav thawj txoj cai, nws tsa ib txog  tshiab los hloov.  10  Vim Yes Xus Pleev tau ua raws li Tswv Ntuj nyiam, nws muab nws lub Cev txi rau ntuj ib  zaug  xwb, ces peb ntshiab mus li.

    Lus Kas  1 : 26 – 38

    26  Thaum lub rau hli, Tswv Ntuj xa tus Tshiab Nkas Nplias mus hauv ib lub zos nyob Nkas Lis Lais, hu ua Nas Xas Les,  27  mus cuag ib tug ntxhais uas lawv muab qhaib rau ib tug txiv neej hu ua Yos Xes, xeem Das Vis.  Tus ntxhais lub npe hu ua Mab Liab.  28  Tus Tshiab chaws mus hauv Mab Liab tsev, nws hais rau Mab Liab tias :  "Koj nyob kaj lug, tus tau txiaj ntsim puv siab ! Huab Tais nrog koj nyob."  29  Mab Liab hnov lo lus ntawd, nws lub siab nphau npog, nws xav hauv nruab siab tias yog vim li cas thiaj hais ib lo lus hawm zoo li ntawd.  30  Tus Tshiab hais rau nws tias : "Mab Liab, koj tsis txhob ntshai.  Tswv  Ntuj saib koj ntxim Tswv Ntuj siab.   31  Koj yuav xeeb tub hauv koj cev, koj yuav yug ib tug tub, koj yuav tis nws npe hu ua Yes Xus.  32  Nws yuav yog ib tug loj, luag yuav hu nws ua tus Nyob Siab leej Tub.  Huab Tais Tswv Ntuj yuav muab nws txiv Das Vis lub theej kiab rau nws. 33  Nws yuav ua vaj kav Yas Kos tsev neeg tiam dhau tiam.  Nws txoj kev ua vaj yuav tsis muaj caij kawg."  34  Mab Liab hais rau tus Tshiab tias :  "Qhov ntawd yuav muaj tuaj zoo li cas, vim kuv tsis paub ib tug txiv neej?"   35  Tus Tshiab teb tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj.  Li ntawd, tus ntshiab yug los  yuav hu  ua Tswv Ntuj Leej Tub.  36  Koj saib! Es Lis Xas Npes, tus uas txheeb koj,  luag hu nws ua pog khoom,  nws hnub nyoog laus lawm, tab sis nws kuj xeeb tub lawm thiab, twb tau rau hli lawm.  37 "Vim tias, tsis muaj ib yam uas Tswv Ntuj  ua tsis tau."  38  Ces Mab Liab hais tias :  "Kuv yog Huab Tais tus ntxhais txib.  Kuv xav kom muaj raws li koj hais."  Tus Tshiab thiaj tso Mab Liab tseg.

    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 27th March 2012, 2:49 pm

    Cov Zaj Nyeem rau lub 3 hlis tim 27, 2012
    Hnub 3 hauv lis piam 5 lub Caij 40 Xyoo B


    Xam Phaj 21 : 4 - 9.


    4 Cov His Xas Lais tso lub Roob Hos tseg, lawv taug txoj kev mus rau lub hiav txwv Xus, vim lawv xav lug Es Dos teb. Thaum lawv mus txog ib tog kev, tsoom pej xeem npau taws. 5 Lawv cem Tswv Ntuj thiab cem Mais Xes tias : "Vim li cas neb thiaj coj peb tawm Hais Nkws Tos teb kom peb los tuag hauv lub teb chaws suab puam no ? Tsis muaj mov noj, tsis muaj dej haus li, peb dhuav noj cov niag mov tuag tshaib ntawd dhau hwv lawm !" 6 Tswv Ntuj thiaj tso ib cov nab muaj taug tuaj tom lawv. Cov nab ntawd tom cov His Xas Lais tuag coob leej. 7 Tsoom pej xeem mus hais rau Mais Xes tias : "Peb ua txhaum lawm vim peb tau cem HUAB TAIS thiab cem koj. Koj thov kom HUAB TAIS zam rau peb, kom nws ntiab cov niag nab ntawd khiav mus deb peb." Ces Mais Xes thiaj thov kom Ntuj zam rau lawv. 8 HUAB TAIS teb tias : "Koj nchuav ib tug nab muaj taug, koj muab khuam rau saum ib tug ncej. Leej twg raug nab tom, yog nws ntsia tus nab nchuav ntawd ces nws yuav tsis tuag." 9 Mais Xes thiaj muab tooj nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag ntsia tus nab tooj ntawd ces nws tsis tuag.

    Zam 8 : 21 - 30.

    21 Yes Xus tseem rov qab hais rau lawv tias : "Kuv yuav mus, nej yuav nrhiav kuv, tab sis nej yuav tuag nyob hauv nej qhov txhaum. Qhov chaw kuv mus, mas nej tuaj tsis tau." 22 Ces cov Yus Das hais tias : "Puas yog nws yuav rov tua nws, nws thiaj hais tias : Qhov chaw kuv mus, mas nej tuaj tsis tau ?" 23 Yes Xus hais rau lawv tias : "Nej tawm txheej hauv no los. Kuv tawm txheej saud los. Nej yog ntiaj teb tug, kuv tsis yog ntiaj teb tug. 24 Kuv tau hais rau nej tias nej yuav tuag nyob hauv nej cov txhaum. Yog nej tsis ntseeg tias kuv yog Tus Nyob, mas nej yuav tuag nyob hauv nej cov txhaum." 25 Lawv hais rau Yes Xus tias : "Koj yog leej twg ?" Yes Xus hais rau lawv tias : "Yog raws li kuv ib txwm hais rau nej lawm. 26 Kuv muaj ntau yam hais txog nej thiab muaj chaw txiav txim ntau qhov. Tus Xa kuv tuaj yog tus tseeb, qhov kuv hais rau lub qab ntuj neeg yog qhov kuv hnov ntawm nws los." 27 Lawv tsis to taub tias Yes Xus hais txog Leej Txiv rau lawv. 28 Yes Xus thiaj hais tias : "Thaum nej yuav muab Neeg Leej Tub tsa siab, mas nej yuav pom tias kuv yog Tus Nyob, thiab tsis muaj ib yam uas yog kuv ua kuv xwb. Yam uas kuv hais, yog Leej Txiv qhia kuv. 29 Tus Xa kuv tuaj nws nrog nraim kuv. Nws tsis cia kuv nyob ib leeg, vim kuv ua ntxim nws siab mus li.” 30 Thaum Yes Xus hais cov lus ntawd, muaj coob leej ntseeg txog nws.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 28th March 2012, 4:16 pm

    Hnub Plaub hauv lis piam 5 Caij 40 Xyoo B, 2012

    Das Nias 3: 1-20 + 91-92 + 95

    14 Tus vaj Nas Npws Kos Dos Nos Xos nug lawv tias : "Xas Ntas, Mes Sas thiab As Npes Nes Nkos, hnov tias nej tsis kam tsob hwb kuv cov dab, nej tsis kim caug pe tus mlom kub uas kuv tau tsa no, puas muaj li ntawd tiag ? 15 Thaum nej hnov raj kub tshis nrov, hnov luag tshuab qeej tshuab xyu, ntaus thaj cheej thiab hnov tas txhia lub suab nrov, mas nej puas yuav txhos caug pe tus mlom uas kuv tau ua ? Yog nej tseem tsis pe mas tam sim ntawd yuav muab nej pov rau hauv lub qhov hluav taws kub tshaj plaws. Saib tus dab twg yuav tuaj cawm nej ntawm kuv txhais tes tau ?" 16 Xas Ntas, Mes Sas, As Npes Nes Nkos lawv teb rau tus vaj tias : "Tsis tas peb yuav teb koj txog qhov koj nug no. 17 Yog peb tus Tswv Ntuj, tus uas peb tsob hwb, nws pab tau peb dim ntawm lub qhov hluav taws kub tshaj plaws thiab ntawm koj txhais tes, mas nws yeej yuav pab peb kom dim xwb. 18 Tab yog nws tsis pab, koj yuav tsum paub tias peb yeej tsis tsob hwb koj tus dab thiab peb tsis kam pe tus mlom koj tau tsa !" 19 Tus vaj Nas Npws Kos Dos Nos Xos npau taws heev heev ua ntsej muag dub nciab rau Xas Ntas, Mes Sas thiab As Npes Nes Nkos lawv. Nws txib neeg kom mus rauv taws hauv lub qhov hluav taws kom kub dua xya npaug tuaj. 20 Thiab nws txib cov neeg muaj zog tshaj nyob hauv nws pab tub rog kom lawv muab Xas Ntas, Mes Sas thiab As Npes Nes Nkos khi thiab pov rau hauv lub qhov hluav taws.
    91 Tus vaj Nas Npws Kos Dos Nos Xos poob siab, nws sawv tsees. Nws hais rau nws cov tub ncig tias : "Ua cas ? Peb twb muab peb tug hluas ntawd pav tas huv si peb mam muab lawv pov rau hauv hluav taws sad, puas yog ?" Lawv teb tias :
    “Huab Tais Vaj Ntxwv ! Yog kawg mas !" 92 Tus vaj hais tias : "Ua cas kuv pom plaub tug neeg tsis pav li, lawv mus mus los los hauv hluav taws, xws li hluav taws tsis kub lawv qhov twg li. Tus plaub muaj ntsis yuav zoo li yog tswv ntuj ib tug tub." 95 Nas Npws Kos Dos Nos Xos hais tias : "Xas Ntas, Mes Sas thiab As Npes Nes Nkos lawv tus Huab Tais nto koob meej lau, nws xa nws tus Tshiab tuaj cawm nws cov tub txib, uas tso siab rau nws, ces lawv hla tus vaj cov lus ceeb toom, lawv yeem cia lawv lub cev raug txom nyem dua mus tsob hwb thiab teev lwm tus Tswv Ntuj."

    Zam 8 : 31 - 42.

    31 Yes Xus hais rau cov Yus Das uas ntseeg nws tias : "Yog nej nyob hauv kuv cov lus, mas nej yog kuv cov thwj tim tiag. 32 Nej yuav paub qhov tseeb, ces qhov tseeb yuav ua kom nej twj lij." 33 Lawv hais rau Yes Xus tias : "Peb yog Has Nplas Has cov xeeb ntxwv, peb tsis tau ua dua leej twg qhev ib zaug, ua cas koj thiaj hais tias : Nej yuav twj lij ?" 34 Yes Xus teb rau lawv tias : "Kuv hais qhov muaj tseeb tiag rau nej tias : Leej twg ua txhaum, nws yog kev txhaum tus qhev. 35 Tus qhev tsis tau nyob hauv lub tsev tas nws sid, tus tub thiaj tau nyob tas nws sid. 36 Yog Leej Tub ua kom nej twj lij, mas nej thiaj ua tsheej neeg twj lij. 37 Kuv paub tias nej yog Has Nplas Has cov xeeb ntxwv, tsis kav nej nrhiav kev muab kuv tua, vim kuv lo lus txeem tsis tau rau hauv nej. 38 Kuv hais yam uas kuv pom ntawm kuv Txiv, hos nej ua yam nej hnov ntawm nej txiv." 39 Lawv teb rau Yes Xus tias : "Peb txiv yog Has Nplas Has." Yes Xus hais rau lawv tias : "Yog tias nej yog Has Nplas Has cov me nyuam, mas nej yuav ua Has Nplas Has cov hauj lwm. 40 Tab sis nej tsis ua. Kuv yog ib tug hais qhov tseeb uas kuv hnov ntawm Tswv Ntuj los, tsis kav nej nrhiav kev muab kuv tua. Has Nplas Has tsis tau ua li ntawd. 41 Nej ua nej txiv cov hauj lwm." Lawv hais rau Yes Xus tias : "Peb tsis yog me nyuam tsaub : Peb tsuas muaj ib leeg txiv : Yog Tswv Ntuj." 42 Yes Xus hais rau lawv tias : "Yog tias Tswv Ntuj yog nej Txiv, mas nej yuav nyiam kuv, vim kuv tawm ntawm Tswv Ntuj los, thiab kuv tuaj ntawm nws tuaj. Tsis yog kuv tuaj kuv, yog nws xa kuv tuaj.”





    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 29th March 2012, 5:44 am

    Hnub Tsib tim 29 lub 3 hlis xyoo 2012
    Lis Piam Tsib hauv Caij 40 Xyoo B


    Hauv Paus 17 : 3-9

    3 Ces Has Nplas txhos caug pe, nws khoov ntsej muag ti av. Tswv Ntuj hais li no rau Has Nplas : 4 "Ntawm kuv mas kuv nrog koj cog lus li no: Koj yuav ua txiv rau ntau haiv neeg. 5 Luag yuav tsis hu koj ua Has Nplas ntxiv. Koj yuav hu ua Has Nplas Has, vim kuv muab koj los ua txiv rau ntau haiv neeg. 6 Kuv yuav ua kom koj huam vam. Ntau haiv neeg yuav tawm hauv koj los, thiab ntau tus vaj yuav sawv hauv koj los. 7 Kuv yuav nrog koj cog lus thiab nrog haiv neeg uas tawm hauv koj los cog lus; kuv lo lus cog yuav nyob mus li txheej dhau txheej tiam dhau tiam. Kuv yuav ua koj tus Tswv Ntuj thiab ua haiv neeg uas tawm hauv koj los tus Tswv Ntuj. 8 Kuv yuav muab lub teb chaws uas koj nyob no rau koj thiab rau haiv neeg uas tawm hauv koj los. Kuv yuav muab tas nrho lub teb chaws Kas Nas Has rau nej ua nej tug mus li tsis muaj caij kawg, thiab kuv yuav ua nej tus Tswv Ntuj." 9 Tswv Ntuj tseem hais rau Has Nplas Has tias : "Ntawm koj mas koj yuav ua raws li kuv lo lus uas kuv nrog koj cog, koj thiab haiv neeg uas tawm hauv koj los, nej yuav ua raws li ntawd mus tiam dhau tiam.”

    Zam 8: 51-59

    51 Kuv hais qhov muaj tseeb tiag rau nej : Leej twg khaws kuv lo lus, nws yuav tsis pom txoj kev tuag ib zaug." 52 Cov Yus Das hais rau Yes Xus tias : "Nyem no peb paub lawm tias koj raug ib tug dab phem. Has Nplas Has tuag lawm, cov yaj saub kuj tuag lawm. Hos koj hais tias : 'Yog leej twg khaws kuv lo lus, nws yuav tsis saj txoj kev tuag ib zaug.' 53 Koj puas loj dua peb txiv Has Nplas Has uas nws tuag lawm ? Loj dua cov yaj saub uas kuj tuag lawm thiab ? Koj khav tias koj yog leej twg ?" 54 Yes Xus teb tias : "Yog kuv rov cav txog kuv lub koob meej, mas kuv lub koob meej tsis muaj nqi dab tsi. Tab sis, tus cav txog kuv lub koob meej, yog kuv Txiv, yog tus uas nej hais tias : 'Nws yog peb tus Tswv Ntuj.' 55 Tab sis nej tsis paub nws, hos kuv paub nws. Yog kuv hais tias kuv tsis paub nws, mas kuv yog ib tug neeg dag ib yam li nej. Tab sis kuv paub nws thiab kuv khaws nws lo lus. 56 Nej txiv Has Nplas Has twb muaj siab kawg vim nws xav tias nws yuav pom kuv lub hnub nyoog ; nws tau pom, ces nws zoo siab lawm." 57 Cov Yus Das hais rau Yes Xus tias : "Koj twb tsis tau muaj tsib caug xyoo, koj txawm siv pom Has Nplas Has lawm!" 58 Yes Xus hais rau lawv tias : "Kuv hais qhov muaj tseeb tiag rau nej tias : Thaum Has Nplas Has tsis tau yug, kuv Nyob lawm." 59 Lawv khaws pob zeb yuav txawb rau Yes Xus, tab sis Yes Xus tsiv nraim, thiab nws tawm hauv lub Tuam Tsev Teev Ntuj mus lawm.


    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 30th March 2012, 4:54 am

    Hnub Rau hauv lis piam 5 Caij 40 Xyoo B, 2012

    Yes Les Mias 20: 1-13

    10 Kuv hnov ntau leej hais tej yam ntais ntuj txog kuv tias : "Peb kav tsij tso hem thawj rau nws tsis tseg mas ! Peb mus kom nws rau cov nom !" Cov uas thaud lawv yog kuv cov phooj ywg, lawv nyas saib kuv puas yuav ntog. Lawv hais tias : "Nyaj tej zaus, nws yuav mloog cov neeg ntxias. Ces peb yuav yeej nws, peb yuav tau kev rob caub." 11 Tab sis HUAB TAIS tsa kuv cai, HUAB TAIS yog zoo li ib tug peeb zeej
    zog nchav. Kuv cov yeeb ncuab yuav ntog, lawv yuav tsis yeej. Lawv yuav nco ntsoov ib txhiab ib txhis txog hnub lawv poob ntsej muag. 12 HUAB TAIS, koj yog tus kav tsoom tub rog, koj tsom tau tus neeg siab ncaj, koj pom nyob hauv neeg nruab siab. Kuv vam tias kuv yuav pom koj rob caub rau lawv, vim kuv tso kuv rooj plaub rau hauv koj tes. 13 Nej hu nkauj rau HUAB TAIS, nej cav lus zoo txog HUAB TAIS, vim nws npo tus neeg pluag tus plig ntawm cov neeg phem txhais tes los.

    Zam 10: 31-42


    Nyob ntawm ntug dej Yos Las Das
    31 Cov Yus Das rov nqa dua ib co pob zeb los txawb rau Yes Xus. 32 Yes Xus teb rau lawv tias : "Kuv tau muab ntau txoj hauj lwm zoo tuaj ntawm Leej Txiv tuaj rau nej pom. Tim qhov twg, nej thiaj xav txawb pob zeb rau kuv ?" 33 Cov Yus Das teb rau Yes Xus tias : "Peb yuav txawb pob zeb rau koj, tsis yog tim ib txog hauj lwm zoo, yog tim koj thuam Ntuj. Vim tias koj tsuas yog ib tug neeg xwb, tsis kav, koj muab koj tsa ua Tswv Ntuj." 34 Yes Xus teb rau lawv tias : "Nyob hauv nej Txoj Cai, puas muaj lus sau cia tias : Kuv hais tias : nej yog ib co tswv ntuj ? 35 Peb rhuav tsis tau Ntawv yog tias Ntawv hu cov neeg txais Tswv Ntuj lo lus ua tswv ntuj. 36 Hos tus uas Leej Txiv muab nws qee, thiab xa nws tuaj hauv lub qab ntuj neeg, nej hais tias : 'Koj thuam Ntuj' - vim kuv hais tias : Kuv yog Tswv Ntuj Leej Tub. 37 Yog kuv tsis ua kuv Txiv cov hauj lwm, mas nej txhob ntseeg kuv. 38 Tab sis yog kuv ua kuv Txiv cov hauj lwm, mas txawm tias nej tsis ntseeg kuv, los nej yuav ntseeg cov hauj lwm, kom xwv nej paub thiab to taub tias Leej Txiv nyob hauv kuv, thiab kuv nyob hauv Leej Txiv." 39 Lawv rov qab xav ntes Yes Xus, tab sis nws dim ntawm lawv tes mus lawm. 40 Yes Xus rov hla mus rau sab dej Yos Las Das tim ub, ntawm thaj chaw uas yav dhau los Zam ua kab ke ntxuav. Ces Yes Xus nyob ntawd. 41 Muaj neeg coob tuaj cuag Yes Xus, lawv hais tias : "Zam tsis tau ua ib lub cim li, tab sis txhua yam uas Zam hais txog tus no, mas muaj tseeb tas huv tib si." 42 Ces muaj coob leej ntseeg txog Yes Xus nyob ntawd



    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 31st March 2012, 5:05 pm

    Hnub Xya hauv lis piam 5 Caij 40 Xyoo B,
    tim 31 lub 3 hlis, 2012


    Es Xes Kias 37: 21-28


    21 Koj hais rau tsoom His Xas Lais tias : "HUAB TAIS hais li no : Kuv yuav mus coj tsoom His Xas Lais uas lawv mus nyob hauv cov kuj cuab. Kuv yuav sau lawv nyob tas qhov txhia chaw rov los rau hauv lawv thaj av. 22 Kuv yuav cia lawv ua ib lub kuj cuab xwb nyob hauv lub teb chaws, nyob saum cov roob His Xas Lais. Ib tug vaj xwb yuav ua sawv daws tus vaj. Lawv yuav tsis sib faib ua ob haiv neeg nyob ob lub teb chaws lawm. 23 Lawv yuav tsis rov ua kom lawv phem tuaj ntxiv, lawv yuav tsis ua lawv tej kab ke teev mlom thiab lawv yuav tsis muab neeg tua ntxiv. Kuv yuav cawm lawv ntawm lawv txoj kev fav xeeb. Kuv yuav ntxuav lawv kom huv tuaj. Ces lawv yuav ua kuv haiv neeg, kuv yuav ua lawv tus Tswv Ntuj. 24 Kuv tus tub txib Das Vis yuav kav lawv. Yuav muaj ib tug tswv zov yaj saib sawv daws Xwb. Lawv yuav mloog kuv tej kev cai lij choj, lawv yuav coj kuv Txoj Cai. 25 Lawv yuav nyob txawm hauv lub teb chaws kuv muab rau kuv tus tub txib Yas Kos, yog lub teb chaws uas nej cov yawg koob tau nyob. Lawv cov tub ki xeeb zeej xeeb ntxwv yuav nyob ntawd mus li txheej dhau txheej. Kuv tus tub txib Das Vis yuav ua lawv tus vaj mus li. 26 Kuv yuav nrog lawv cog lus nyob hauv txoj kev thaj yeeb, zaj cog lus ntawd yuav nyob mus li. Kuv yuav cia lawv tsa cuab tsa yim, kuv yuav tsa lawv nyob khov kho, kom lawv huam vam mus. Kuv yuav tsa kuv lub tsev ntshiab nyob nruab nrab hauv lawv mus li. 27 Kuv yuav tsa kuv lub tsev roos lawv. Kuv yuav yog lawv tus Tswv Ntuj. Lawv yuav yog kuv haiv neeg. 28 Ces cov kuj cuab yuav paub tias kuv yog HUAB TAIS, yog tus ua kom His Xas Lais ntshiab tuaj, vim kuv lub tsev ntshiab nyob nruab nrab hauv lawv mus li."

    Zam 11: 45-56

    45 Coob tus Yus Das uas tuaj xyuas Mab Liab (Mas Ntas Las) tau pom qhov uas Yes Xus ua (Yes Xus tsa Las Ntxas Los sawv rov los) ces lawv ntseeg txog Yes Xus. 46 Tab sis muaj ib co Yus Das mus cuag cov Fas Lis Xais, lawv mus qhia cov Fas Lis Xais txog qhov Yes Xus tau ua. 47 Cov thawj leej choj thiab cov Fas Lis Xais thiaj ua ib lub rooj sab laj, lawv hais tias : "Peb yuav ua dab tsi ? Tus neeg ntawd pheej ua ib co cim ntau kawg ? 48 Yog peb cia nws ua li no ntxiv, mas sawv daws yuav ntseeg txog nws, ces cov Los Mas yuav tuaj rhuav peb lub Chaw Ntshiab thiab peb haiv neeg." 49 Nyob hauv lawv, muaj ib tug hu ua Kais Fas, xyoo ntawd yog nws ua tuam leej choj. Nws hais rau lawv tias : "Nej tsis to taub dab tsi li ! 50 Nej tsis xav tswv yim tias qhov zoo tshaj rau nej, yog cia ib tug neeg xwb this tsoom pej xeem tuag, kom xwv tas haiv neeg tsis txhob tuag." 51 Kais Fas hais li ntawd, tsis yog nws hais nws xwb. Tab sis vim nws ua tuam leej choj xyoo ntawd, ces nws thiaj ua yaj saub qhia tias Yes Xus yuav tsum this nws haiv neeg tuag. 52 Tsis yog Yes Xus yuav this nws haiv neeg tuag xwb, nws tseem yuav sau Tswv Ntuj cov me nyuam uas tau sib ncaim rov los ua ib pab. 53 Txij hnub ntawd los, lawv txiav tias yuav muab Yes Xus tua. 54 Ces Yes Xus thiaj tsis tab meeg mus los hauv tsoom Yus Das. Nws sawv kev ntawm qhov chaw ntawd mus rau ib thaj tsam tsis deb ntawm teb chaws suab puam, hauv ib lub nroog hu ua Es Fas Is. Nws nrog nws cov thwj tim nyob ntawd. Yuav txog lub ntees Hla. 55 Yuav txog cov Yus Das lub hnub nyoog Hla, cov neeg hauv tej zos nruab liaj nruab teb nce coob mus pem Yes Xus Xas Les. Lawv tuaj ua kab ke ntxuav kom huv ua ntej lub ntees Hla. 56 Thaum lawv nyob hauv lub Tuam Tsev Teev Ntuj, lawv nrhiav Yes Xus, lawv ib leeg nug ib leeg tias : "Nej xav li cas ? Nws puas yuav tuaj koom lub Ntees no?" ( 57 Tab sis cov thawj leej choj thiab cov Fas Lis Xais yeej tshaj tawv qhawv tias yog leej twg paub Yes Xus nyob qhov twg, mas tus ntawd yuav tsum qhia lawv paub, lawv yuav ntes kom tau Yes Xus.)

    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 2nd April 2012, 2:44 pm

    Hnub Ob Lis Piam Ntshiab Xyoo B

    His Xais 42: 1-7

    1 Ntawm no yog kuv tus tub txib uas kuv nres, tus kuv xaiv uas kuv nyiam tas siab. Kuv tau muab kuv lub tswv yim los roos nws. Nws yuav piav txoj cai rau cov kuj cuab. 2 Kuv tus tub txib yuav tsis nthe, tsis hais nrov, tsis ua suab ncha nyob ntawm tej kev hauv nroog. 3 Nws yuav tsis lov tus txhiav qaug, nws yuav tsis tshuab tus nplaim teeb uas cig qauj les, nws yuav piav txoj cai raws kev pheej xeeb. 4 Kuv tus tub txib yuav tsis ntaus siab me, yuav tsis muaj swb mus txog hnub nws tsa kev ncaj kav ntiaj teb. Cov pov txwv tos ntsoov nws txoj kev qhuab qhia. 5 HUAB TAIS Tswv Ntuj hais li ntawd. Tswv Ntuj yog tus tsim thiab nthuav cov txheej ntuj saud, nws yog tus ua kom lub ntiaj teb nyob ruaj nreb thiab txhua yam tawm hauv ntiaj teb los, nws yog tus tshuab pa rau tsoom neeg nyob ntiaj teb thiab nws muab lub tswv yim rau cov neeg uas mus ncig ntiaj teb. 6 Kuv, HUAB TAIS, tau hu koj los nyob hauv txoj kev ncaj, kuv tau tuav koj tes, kuv tau puab koj, kuv tau muab koj ua tsoom neeg txoj kev cog lus, thiab ua lub teeb pom kev kaj cov kuj cuab. 7 Kom tau qhib cov dig muag qhov muag, kom tau tso cov neeg kaw hauv tsev loj faj tawm los, thiab tau rho cov neeg nyob nkuaj kom tawm hauv kev tsaus ntuj nti los.

    Zam 12: 1-11

    1 Yes Xus tuaj txog Npes Tas Nias rau hnub ua lub Ntees Hla ntej, yog Las Ntxas Los lub zos. Las Ntxas Los yog tus uas Yes Xus tsa nws sawv hauv cov tuag rov los. 2 Nyob ntawd, lawv ua ib roog qav rau Yes Xus noj. Mas Tas rau mov, hos Las Ntxas Los yog ib tug nyob hauv cov uas nrog Yes Xus zaum ntawm rooj noj mov. 3 Mab Liab muab tau ib choj tshuaj tsw qab, yog cov tseem tshuaj muaj nqis kim kawg los pleev Yes Xus ko taw. Thiab nws muab nws cov plaub hau los so Yes Xus ko taw. Cov tshuaj tsw thoob plaws lub tsev. 4 Ces Yus Das Kas Lis Yaus, uas yog Yes Xus ib tug thwj tim, nws yog tus yuav muab Yes Xus muag, nws hais tias : 5 "Ua cas tsis muab cov tshuaj tsw qab ntawd muag peb puas lub txiaj nyiag, mas yuav tau nyiaj pub cov pluag ?" 6 Yus Das hais li ntawd, tsis yog vim nws nco txog cov pluag, tab sis vim nws yog ib tug tub sab, nws yog tus saib lub hnab rau nyiaj, ces nws nyiag cov nyiaj uas lawv tso rau hauv. 7 Yes Xus thiaj hais tias : "Nej cia nws ua nws. Nws ua qhov kab ke no, kom nws tau xub qhwv kuv lub cev cia zwm ntxa. 8 Nej muaj cov pluag nrog nej nyob mus li ; tab sis nej tsis muaj kuv nrog nej nyob mus li." 9 Cov Yus Das paub tias Yes Xus tuaj nyob ntawd, lawv tuaj tej pab coob, tsis yog vim lawv xav pom Yes Xus xwb, lawv kuj xav pom Las Ntxas Los uas Yes Xus tsa nws sawv hauv cov tuag rov los thiab. 10 Ces cov thawj leej choj txiav tias lawv yuav muab Las Ntxas Los tua thiab. 11 Yog tim Las Ntxas Los, cov Yus Das coob leej thiaj tso cov thawj leej choj tseg los ntseeg txog Yes Xus.


    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 3rd April 2012, 5:37 pm

    Hnub Peb hauv Lis Piam Ntshiab 2012 Xyoo B

    His Xais 49: 1-6

    1 Cov pov txwv, nej mloog kuv hais !
    Cov haiv neeg nyob deb, nej muab siab rau mloog !
    Txij thaum kuv tsis tau yug los, HUAB TAIS yeej hu kuv lawm.
    Txij thaum kuv nyob hauv kuv niam plab, HUAB TAIS tuav kuv npe lawm.

    2 Nws muab kuv lub ncauj los ua ib rab ntaj ntse zuag plias,
    nws muab kuv zais rau hauv nws txhais tes qhov ntxoov ntxoo.
    Nws muab kuv los ua ib xib xub vos ntse ntse,
    Thiab muab kuv zais ntim hauv nws lub raj xub.

    3 HUAB TAIS hais rau kuv tias : "His Xas Lais, koj yog kuv tus tub txib,
    kuv yuav nto koob meej nyob hauv koj."

    4 Kuv xav hauv nruab siab tias : "Kuv khwv sab kawg, tab sis khwv dawb xwb,
    kuv nkim kuv lub zog, tsis tau dab tsi, tsuas tau yam yaj ntshis mus xwb.
    Tsis kav HUAB TAIS yuav tsa kuv cai,
    Kuv tus nqi zog yog nyob ze kuv tus Tswv Ntuj.

    5 Nyem no, HUAB TAIS twb txiav tas lawm.
    Nws yog tus puab kuv nyob hauv kuv niam lub cev kom kuv tau ua nws tus tub txib,
    kom tau coj Yas Kos rov los cuag nws,
    thiab sau His Xas Lais rov qab los ntsaub nws.
    Vim kuv tauj koob meej nyob ntawm HUAB TAIS xub ntiag,
    thiab Tswv Ntuj yog kuv lub zog."

    6 Tswv Ntuj hais tias : "Koj ua kuv tus tub txib, koj rov tsa cov xeem Yas Kos kom sawv,
    thiab coj cov His Xas Lais seem rov qab los xwb yuav tsis tsim nyog.
    Kuv tseem muab koj ua lub teeb ci ntsa kaj cov kuj cuab thiab,
    kom kuv txoj kev cawm mus txog npoo ntiaj teb kawg.

    Zam 13: 21-33, 36-38

    21 Yes Xus hais li ntawd tas, ces nws lub tswv yim ntxhov hnyo, nws thiaj hais meej tias : "Kuv hais qhov muaj tseeb tiag rau nej tias nej ib tug yuav muab kuv muag." 22 Cov thwj tim sib ntsia zom zaws, lawv tsis paub tias Yes Xus hais txog leej twg. 23 Muaj ib tug thwj tim, yog tus uas Yes Xus nyiam, zaum qaij rau Yes Xus hauv siab. 24 Xis Moos Pob Zeb ncaws hau rau nws, thiab hais rau nws tias : "Koj nug saib nws hais txog leej twg ?" 25 Tus thwj tim ntawd tig los pheeb rau Yes Xus hauv siab, nws nug Yes Xus tias : "Huab Tais, yog leej twg ?" 26 Yes Xus teb tias : "Yog tus uas kuv yuav muab qhov ncuav mov no ntsw kua cev rau nws." Ces Yes Xus muab qhov ncuav mov ntsw kua, nws muab cev rau Yus Das, Xis Moos Kas Lis Yaus tus tub. 27 Thaum Yus Das txais qhov mov ntawd tas, ces Xas Tas nkag mus hauv Yus Das. Yes Xus hais rau Yus Das tias : "Qhov koj yuav ua, mas koj ua kom sai." 28 Cov zaum ntawm rooj mov, tsis muaj ib tug to taub tias yog vim li cas Yes Xus hais li ntawd rau Yus Das. 29 Vim tias Yus Das saib lub hnab nyiaj, ces ib txhia xav tias Yes Xus hais rau Yus Das tias : "Mus muas tej yam uas peb yuav siv rau rooj qav." los yog hais kom nws pub tej yam rau cov pluag. 30 Yus Das txais lo mov, nws tawm mus tam sis ntawd. Thaum ntawd tsaus ntuj lawm.

    31 Thaum Yus Das tawm mus lawm, Yes Xus hais tias : "Nyem no Neeg Leej Tub twb txais koob meej lawm, thiab Tswv Ntuj kuj muaj koob meej nyob hauv nws. 32 Yog Tswv Ntuj muaj koob meej nyob hauv Neeg Leej Tub, mas Tswv Ntuj kuj yuav ua kom Neeg Leej Tub muaj koob meej nyob hauv nws thiab. Tshuav tsis ntev, Tswv Ntuj yuav muab koob meej rau Neeg Leeg Tub. 33 Cov me nyuad, kuv yuav nrog nej nyob me ntsis ntxiv xwb. Nej yuav nrhiav kuv. Nyem no, kuv hais rau nej ib yam li kuv tau hais rau cov Yus Das tias qhov chaw kuv mus, mas nej tuaj tsis tau. 36 Xis Moos Pob Zeb hais rau Yes Xus tias : "Huab Tais, koj yuav mus qhov twg?" Yes Xus teb tias : "Qhov chaw kuv mus, nyem no koj lawv
    kuv qab tsis tau. Tab sis yav tom ntej, mas koj yuav lawv kuv qab mus." 37 Pob Zeb hais rau Yes Xus tias : "Huab Tais, vim li cas nyem no kuv thiaj lawv koj qab mus tsis tau ? Kuv tuaj yeem siv kuv txoj sia rau koj." 38 Yes Xus teb tias : "Koj yuav siv koj txoj sia rau kuv no lod? Kuv hais qhov tseeb tiag rau koj : Qaib tsis tau qua, koj twb tsis lees kuv peb zaug lawm."

    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 4th April 2012, 4:50 am

    Hnub Plaub hauv lub Lis Piam Ntshiab Xyoo B

    His Xais 50 : 4 - 10.

    4 HUAB TAIS Tswv Ntuj tau muab ib tug nplaig ua thwj tim rau kuv. Nws qhia kuv kom kuv txawj hais ib lo lus nplij tus qaug zog. Niaj tag kis nws tsa kuv pob ntseg kom kuv tsim dheev, kom kuv txawj mloog xws li cov thwj tim mloog.
    5 HUAB TAIS Tswv Ntuj qhib kuv pob ntseg, mas kuv tsis npau taws tsis yig, kuv tsis thaub qab.
    6 Lawv ntaus kuv, mas kuv tig kuv nraub qaum rau lawv ntaus. Lawv xav rho kuv cov hwj txwv, mas kuv tig kuv sab plhu rau lawv. Lawv xav ib tawg ncuav rau kuv thiab xav nto aub ncaug rau kuv ntsej muag, los kuv tsis fee plhu rau lawv.
    7 Tab sis HUAB TAIS Tswv Ntuj yog tus pab kuv, vim li ntawd mas kuv tsis poob ntsej muag. Ces kuv ua kuv ntsej
    muag tawv li zeb. Kuv paub tias kuv yuav tsis raug kev txaj muag.
    8 Tus pom tias kuv siab ncaj, nws nyob ze kuv. Leej twg xav liam tias kuv txhaum ? Kom peb ua ke tuaj ntawm lub rooj txiav txim mas ! Leej twg yog tus tau mus kom kuv rau cov nom txiav txim ? Kom nws kav tsij txav los cuag kuv saib !
    9 HUAB TAIS Tswv Ntuj yog tus pab kuv ! Leej twg yuav txiav txim rau kuv tau ? "

    Mas Tais 26 : 14 - 25.

    14 Muaj ib tug nyob hauv pab kaum ob, hu ua Yus Das Kas Lis Yaus. Nws mus cuag cov thawj leej choj,
    15 nws hais rau lawv tias : “Nej yuav muab dab tsi rau kuv yog kuv muab nws muag rau nej ?” Ces lawv them peb caug lub txiaj nyiag rau Yus Das.
    16 Txij hnub ntawd los, Yus Das nrhiav ib lub sij hawm zoo cob Yes Xus rau hauv lawv txhais tes.
    17 Thaum txog thawj hnub noj cov ncuav mov tsis muaj poov xab, cov thwj tim txav los nug Yes Xus tias : “Koj xav kom peb npaj Pluas Hla rau koj noj nyob qhov twg ?”
    18 Yes Xus hais tias : “Nej mus tom nroog, hauv ib tug neeg tsev, nej hais rau nws tias : ‘Xib Hwb hais tias : Kuv lub caij nyoog los txog ze lawm. Kuv yuav nrog kuv cov thwj tim noj Pluas Hla nyob hauv koj tsev.”
    19 Cov thwj tim ua raws li Yes Xus qhia. Ces lawv npaj Pluas Hla.
    20 Thaum tsaus ntuj YesXus nrog pab Kaum Ob nyob ntawm rooj mov.
    21 Thaum lawv noj mov, Yes Xus hais tias : “Kuv hais tseeb rau nej, nej ib tug yuav muab kuv muag.
    22 Lawv ntxhov siab tas nrho, lawv nyias nug nyias tias : “Huab Tais, puas yog kuv ?”
    23 Yes Xus teb tias : “Tus yuav muab kuv muag, yog tus tau nrog kuv cev tes ntsw hauv lub phaj !
    24 Neeg Leej Tub yuav mus raug raws li Ntawv xub sau txog nws. Tab sis tus muab Neeg Leej Tub muag, nws txoj hmoov phem ! Txhiaj khoov tus ntawd tsis txhob yug los !”
    25 Yus Das, tus muab Yes Xus muag, kuj nug tias : “Xib Hwb, puas yog kuv ?” Yes Xus hais rau Yus Das tias : “Yog li koj hais.”

    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 9th April 2012, 7:31 am

    Hnub Ob hauv thawj Lis Piam Hla Xyoo B

    Hauj Lwm 2: 14, 22-33.

    14 Pob Zeb nrog Pab Kaum Ib leeg sawv ntsug, nws hais cov lus no nrov nrov tias : "Cov Yus Das, thiab tas nej cov uas nyob hauv Yes Lus Xas Les, nej yuav tsum paub qhov no, nej tig ntsej los mloog kuv cov lus.
    22 "Cov His Xas Lais, nej mloog qhov kuv hais no: Yes Xus Nas Xas Les yog tus uas Tswv Ntuj pom zoo kom nws ua hwj huam yees ntxwv, ua cov dej num nto moo, thiab ua ib co cim nyob hauv nej. Yog Tswv Ntuj pub kom nws ua tau li ntawd.
    23 Tus neeg ntawd, luag muab nws muag rau nej, raws nraim li Tswv Ntuj tau teem tseg nyob hauv nws txoj kev paub yav tom ntej. Nej kom cov neeg tsis hwm txoj cai xuas lawv txhais tes mus tua nws, thiab muab nws ntsia saum ntoo cuam.
    24 Tswv Ntuj tsa nws sawv rov los, thiab npo nws ntawm txoj kev mob hauv qhov tuag. Vim tias kev tuag tsis muaj hwj huam tuav tau nws cia.
    25 Das Vis twb hais txog nws tias :
    Kuv pom Huab Tais nyob ntawm kuv xub ntiag tsis tseg. Huab Tais nyob ntawm kuv sab xis, kom kuv txhob qaij txhob qaug.
    26 Yog vim li ntawd kuv lub plawv thiaj xyiv fab hlo, kuv tus nplaig hom khaj. Kuv cev nqaij muaj sia nyob hauv txoj kev tso siab.
    27 Vim koj yuav tsis tso kuv tus plig pov tseg rau hauv ntuj txias teb tsaus, koj yuav tsis cia koj tus Ntshiab lub cev lwj.
    28 Koj ua kom kuv paub cov kev mus hauv txoj sia. Koj cia kuv pom koj lub ntsej muag kom kuv xyiv fab.
    29 Kwv tij sawv daws, kuv thov hais meej rau nej txog tus yawg koob Das Vis tias : nws tuag thiab nws mus zwm av lawm. Nws lub ntxa tseem nyob rau peb pom txog niaj hnub no.
    30 Tiam sis Das Vis yog ib tug yaj saub, mas nws paub tias Tswv Ntuj twb cog lus rau nws yuav cia nws ib tug xeeb ntxwv uas yog nws cov roj ntsha zaum nws lub theej kiab.
    31 Das Vis twb xub pom tias Leej Pleev yuav sawv rov los, ces nws thiaj qhia tias : Ntuj yuav tsis tso nws pov tseg rau hauv tub tuag teb, thiab nws lub cev nqaij yuav tsis lwj.
    32 Tus Yes Xus ntawd, Tswv Ntuj tsa nws sawv rov los lawm. Peb ua taus tim khawv.
    33 Nyem no Tswv Ntuj sab xis tsa Yes Xus nyob siab. Nws tau txais Leej Ntuj Plig Ntshiab ntawm Leej Txiv, vim Leej Txiv yeej tau cog lus li ntawd. Yes Xus thiaj tso Leej Ntuj Plig los rau sawv daws : yog qhov uas nej pom thiab nej hnov.

    Mas Tais 28: 8-15

    8 Ob tug poj niam tso plhuav lub ntxa tseg. Nkawd ntshai thiab zoo siab tas nrho. Nkawd khiav mus xa lub moo ntawd rau cov thwj tim.
    9 Yes Xus tuaj tos ob tug poj niam kev, nws hais tias : "Neb nyob kaj lug". Ces nkawd txav los ze Yes Xus, nkawd puag Yes Xus ko taw, nkawd pe nws.
    10 Yes Xus hais rau nkawd tias : "Neb txhob ntshai mog, neb mus qhia kuv cov kwv tij kom lawv mus lawm Nkas Lis Lais teb, lawv yuav pom kuv nyob ntawd."
    11 Lub sij hawm ob tug poj niam tab tom rov mus, cov zov keeb ob peb leeg kuj rov mus hauv nroog. Lawv mus qhia tej xwm uas lawv tau pom rau cov thawj leej choj.
    12 Cov thawj leej choj nrog cov txwj laus sib sau tuav xam. Lawv muab nyiaj ntau rau cov zov keeb,
    13 lawv hais tias : "Nej hais li no : 'Hmo ntuj, thaum peb tsaug zog lawm, Yes Xus cov thwj tim tuaj nyiag nws lub cev lawm.'
    14 Yog tias tej lus no nrov txog tus nom tswj teb chaws pob ntseg, peb yuav npliag kom nej tsis txhob raug dab tsi nyuaj."
    15 Cov zov keeb khaws cov nyiaj, lawv ua raws li cov hlob qhia lawv. Cov lus no thiaj ri mus hauv cov Yus Das txog niaj hnub no.


    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 11th April 2012, 7:39 am

    Hnub Peb hauv Lis Piam Hla Xyoo B

    Hauj Lwm 2: 36-41

    36 Pob Zeb hais rau lawv tias: "Tsoom His Xas Lais, nej yuav paub meej tias : Tswv Ntuj tsa tus Yes Xus uas nej tau dai saum ntoo cuam, ua Huab Tais thiab ua Leej Pleev."
    37 Cov lus ntawd raug sawv daws lub siab. Ces lawv hais rau Pob Zeb thiab rau cov Hauv Paus Xa Lus tias : "Cov kwv tij, peb yuav tsum ua dab tsi ?" 38 Pob Zeb teb rau lawv tias : “Nej yuav thov txhaum, thiab nej txhia leej txhia tus yuav txais lub cim ntxuav nyob hauv Yes Xus Pleev lub npe kom Ntuj zam txhaum rau nej. Ces nej yuav txais Leej Ntuj Plig Ntshiab cov paj tshab. 39 Vim thaum Ntuj cog lus, mas yog nws cog lus yuav muab rau nej, thiab rau nej cov me nyuam, rau cov neeg nyob deb, thiab rau tsoom neeg coob coob uas Huab Tais peb tus Tswv Ntuj yuav hu lawv los." 40 Pob Zeb tseem hais ntau lo lus qhuab qhia thiab ntuas lawv. Nws hais tias : "Nej khiav kom nej dim ntawm tiam neeg xib rau kev phem no." 41 Cov neeg ntawd mloog Pob Zeb cov lus, lawv txais lub cim ntxuav. Hnub ntawd, muaj ze ntawm peb txhiab leej los ntxiv cov thwj tim.

    Zam 20: 11-18
    11 Mab Liab Mas Ntas Las sawv ze lub ntxa sab nraud, nws quaj. Thaum nws quaj, nws khoov rau hauv lub ntxa.
    12 Ces nws pom ob tug Tshiab hnav dawb zaum hauv qhov chaw uas lawv tso Yes Xus lub cev, ib tug zaum pem yav taub hau, ib tug zaum nram yav ko taw. 13 Ob tug Tshiab hais rau Mab Liab tias: "Tus poj niam, ua cas koj quaj ?" Mab Liab hais rau nkawd tias : "Vim lawv nqa kuv tus Huab Tais lawm, kuv tsis paub lawv muab nws tso qhov twg."
    14 Hais li ntawd tas, Mab Liab tig ntsia tom qab. Nws pom Yes Xus sawv ntsug nyob ntawd. Tab sis nws tsis paub tias yog Yes Xus. 15 Yes Xus hais rau Mab Liab tias : "Tus poj niam, ua cas koj quaj ? Koj nrhiav leej twg ?" Mab Liab xav tias yog tus saib lub vaj, ces Mab Liab hais rau nws tias : "Txiv ntxawm, yog koj nqa nws lub cev lawm no, koj qhia kuv saib koj muab tso qhov twg lawm, kuv yuav mus nqa nws los." 16 Yes Xus hais rau Mab Liab tias : "Mab Liab !" Mab Liab tig hlo mus, nws ua lus Hes Nplaws hais tias : "Las Npus Nis!" Txhais tias : Xib Hwb. 17 Yes Xus hais rau Mab Liab tias : "Koj txhob tuav kuv, vim kuv tseem tsis tau nce mus cuag Leej Txiv. Koj mus cuag kuv cov kwv tij, koj hais rau lawv tias : Kuv yuav nce mus cuag kuv Txiv thiab nej Txiv, mus cuag kuv tus Tswv Ntuj thiab nej tus Tswv Ntuj."
    18 Mab Liab Mas Ntas Las thiaj los tshaj rau cov thwj tim hais tias : "Kuv pom Huab Tais lawm, nws hais cov lus no rau kuv."



    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 11th April 2012, 7:41 am

    Hnub Plaub hauv Lis Piam Hla Xyoo B

    Hauj Lwm 3: 1-10

    1 Pob Zeb thiab Zam nkawd nce mus pem lub Tuam Tsev Teev Ntuj, mus ua zaj teev ntuj thaum cuaj teev. 2 Thaum ntawd, luag coj ib tug neeg tuag ceg nruab thiab tuaj. Lawv niaj hnub muab nws tso rau ntawm lub qhov rooj mus hauv lub Tuam Tsev Teev Ntuj, uas hu ua Zoo Nkauj, kom tus tuag ceg tau kev thov khawv ntawm cov neeg uas chaws mus hauv. 3 Thaum nws pom Pob Zeb thiab Zam nkawd tab tom yuav chaws mus hauv, ces nws thov khawv ntawm nkawd.
    4 Pob Zeb ntsia ntsoov nws, Zam kuj ntsia ntsoov thiab. Pob Zeb hais tias : "Koj ntsia wb." 5 Tus tuag ceg ntsia ntsoov nkawd, tsis ntsais muag, nws xav tias nws yuav tau ib yam dab tsi. 6 Tab sis Pob Zeb hais tias : "Nyiaj thiab kub mas kuv tsis muaj. Tab sis qhov kuv muaj, mas kuv muab pub rau koj : Kuv tuav txog Yes Xus Pleev, tus neeg Nas Xas Les lub npe, koj mus kev !" 7 Ces Pob Zeb tuav nkaus tus tuag ceg sab tes xis, rub nws sawv. Tam sim ntawd, nws ob txhais taw thiab nws ob lub pob luj taws ruaj nrees tuaj. 8 Nws tib plhaw, sawv tsees, ces nws mus taus kev. Nws nrog nkawd chaws mus hauv lub Tuam Tsev. Nws rhais ruam mus kev, nws dhia tej paj paws thiab nws cav txog Tswv Ntuj. 9 Tas tsoom pej xeem pom nws rhais ruam mus kev thiab cav txog Tswv Ntuj. 10 Sawv daws zeem tau nws : yog tus zaum thov khawv ntawm lub Qhov Rooj Zoo Nkauj tiag. Sawv daws ntshai, ua siab poob nthav txog qhov uas nyuam qhuav tshwm sim tuaj rau tus tuag ceg.

    Lus Kas 24: 13-35

    13 Tib hnub ntawd, ob leeg hauv cov thwj tim taug kev mus rau ib lub zos hu ua Es Mas Ws, deb li rau caum ncuas kev ntawm Yes Lus Xas Les. 14 Nkawd sib tham txog txhua tsav yam xwm uas tau tshwm sim tuaj. 15 Thaum nkawd piav thiab sib tham txog tej ntawd, Yes Xus caum tau nkawd, nws nrog nkawd mus kev. 16 Tab sis nkawd qhov muag zeem tsis tau Yes Xus. 17 Ces Yes Xus hais rau nkawd tias : "Neb sib tham txog tej lus dab tsi taug kev ?" Ces nkawd nres, nkawd ntsej muag ntshaus tas.
    18 Tus hu ua Khes Os Fas qhib ncauj hlo hais tias : "Tas cov neeg tuaj pem Yes Lus Xas Les, ntshai koj tib leeg xwb thiaj tsis paub txog qhov uas tau tshwm sim ob peb hnub no !" 19 Yes Xus hais rau nkawd tias : "Muaj dab tsi ?" Nkawd hais rau Yes Xus tias : "Tej xwm uas hais txog Yes Xus Nas Xas Les. Nws yog ib tug yaj saub ua tau tej hauj lwm thiab hais tau tej lus muaj hwj huam, nyob ntawm Tswv Ntuj thiab tsoom pej xeem xub ntiag. 20 Tab sis peb cov Thawj Leej Choj thiab peb cov nom tswv ntes nws rau luag, kom luag txiav lub txim tuag rau nws thiab muab nws dai saum ntoo cuam.
    21 Peb mas peb vam tias nws yog tus yuav txhiv His Xas Lais. Tsis tag li ntawd, tej xwm no tshwm sim tau peb hnub,
    22 ces ob peb tug poj niam uas yog peb cov neeg, tseem ua rau peb poob siab tas. Tag kis no, lawv sawv ntxov mus tom ntxa, 23 lawv nrhiav tsis tau nws lub cev. Lawv rov los hais rau peb tias ib cov Tshiab tawm los rau lawv pom. Cov Tshiab hais tias Yes Xus muaj txoj sia nyob. 24 Cov nrog peb, ob peb leeg kuj tau mus txog tom lub ntxa, lawv pom txhua yam raws li cov poj niam hais, tab sis lawv kuj tsis pom nws lub cev thiab."
    25 Ces Yes Xus hais rau nkawd tias : "Ua cas nej lub siab yuav ruam ua luaj, thiab yuav ntseeg qeeb ua luaj txog tas txhua yam uas cov Yaj Saub tau tshaj los ! 26 Tej ntawd tsis yog txoj kev tsim txom uas Leej Pleev yuav tsum raug tso, nws mam li mus hauv nws lub koob meej lod?" 27 Yes Xus txhais cov Ntawv uas sau txog nws, txij Mais Xes los txog cov Yaj Saub tas huv tib si rau nkawd.
    28 Thaum lawv tuaj yuav txog lub zos uas ob tug thwj tim mus, Yes Xus ua txuj yuav mus ntxiv. 29 Tab sis nkawd cheemYes Xus tias : "Nrog wb nyob mas ! Yuav tsaus ntuj, lub hnub twb yuav poob qho." Yes Xus thiaj chaws mus hauv tsev, nws nrog nkawd nyob. 30 Thaum nws nrog nkawd zaum ntawm rooj mov, nws tuav lub ncuav mov, nws hais zaj foom hmoov zoo, nws muab lub ncuav mov ntais, nws cev rau nkawd. 31 Ces nkawd qhov muag qhib plho, nkawd zeem tau Yes Xus... Tab sis Yes Xus ploj ntais ntawm nkawd xub ntiag lawm. 32 Ces nkawd rov sib tham tias : "Thaum nws hais lus rau wb tom kev, thiab nws txhais Ntawv rau wb, mas wb lub siab kub lug hauv nrog cev, puas yog ?"
    33 Ces nkawd sawv tsees tam sis ntawd, rov mus Yes Lus Xas Les. Nkawd los pom Pab Kaum Ib nrog lawv cov npawg sib txoos ua ke. 34 Lawv hais tias : "Huab Tais sawv rov los lawm tiag, nws tawm los rau Xis Moos pom !" 35 Ces nkawd piav qhov uas tshwm tuaj nyob tom kev, thiab piav tias Huab Tais ua dab tsi, nkawd thiaj zeem tau nws thaum nws ntais lub ncuav mov.


    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 12th April 2012, 4:24 am

    Hnub Tsib hauv Lis Piam Hla Xyoo B

    Hauj Lwm 3: 11-26

    11 Tus tuag ceg tsis tso Pob Zeb thiab Zam nkawd tseg li. Tas tsoom pej xeem xav paub, lawv khiav tuaj vij nkawd nyob hauv lub qab ruv tsev uas hu ua Xas Los Moos Mom Kaum.12 Pob Zeb pom li ntawd, nws hais rau tsoom pej xeem hais tias: "Cov His Xas Lais, vim li cas nej poob siab rau qhov ntawd ? Vim li cas nej qhov muag ntsia ntsoov rau peb, xws li peb yog neeg muaj hwj huam thiab txawj thov Ntuj, ua kom tus neeg ntawd mus taus kev ? 13 Yog Has Nplas Has, His Xas Has, thiab Yas Kos tus Tswv Ntuj, thiab peb cov yawg koob tus Tswv Ntuj muab koob meej rau nws tus tub txib Yes Xus, uas nej muab nws ntes. Thaum Pis Las Tos xav tso nws mus, mas nej tsis kam lees nws. 14 Nej tsis lees tus siab Ntshiab thiab siab Ncaj. Nej thov kom luag zam rau ib tug tua neeg. 15 Hos nej muab tus Tswv pub txoj sia tua. Tiam sis Tswv Ntuj tsa nws sawv hauv cov tub tuag rov los lawm. Peb ua tim khawv pom. 16 Yog vim peb ntseeg txog nws lub npe, mas nws lub npe thiaj li ua kom tus neeg ntawd muaj zog, uas yog tus nej pom kam nws thiab paub nws. Yog txoj kev ntseeg txog Yes Xus tsa tus neeg ntawd kom nws lub cev zoo hlo rau ntawm nej xub ntiag.
    17 Kwv tij sawv daws, kuv paub hais tias thaum nej ua li ntawd, nej yeej tsis paub dab tsi. Nej cov nom los kuj tsis paub thiab. 18 Li ntawd, Tswv Ntuj ua raws li nws tau xuas cov Yaj Saub lub ncauj xub hais ntxov los tias nws Leej Pleev yuav raug luag tsim. 19 Ua li mas nyem no, nej yuav thov txhaum thiab nej yuav tig los hloov ib lub siab tshiab kom Ntuj so nej cov txhaum. 20 Ces Huab Tais yuav pub ib co sij hawm zam txhaum rau sawv daws, thiab nws yuav xa tus uas nws ib txwm npaj cia ua Leej Pleev tuaj rau nej : Yes Xus, 21tus uas lub ntuj yuav tau txais nws mus txog lub zim txwv tas txhia yam yuav rov plhis dua tshiab. Raws li Tswv Ntuj xuas nws cov yaj saub ntshiab lub ncauj xub qhia thaum ub. 22 Mais Xes xub hais tias : Huab Tais Tswv Ntuj yuav muab nej ib tug kwv tij tsa ua Yaj Saub xws li kuv. Nej yuav mloog tas puas tsav yam nws qhia rau nej. 23 Leej twg tsis mloog tus Yaj Saub ntawd, mas luag yuav muab nws thau ntawm peb haiv neeg mus. 24 Tas cov yaj saub tom qab no, txij Xas Muas los rau cov hloov nws, sawv daws kuj tau hais txog tej yam uas tshwm sim ob peb hnub no.
    25 Nej yog cov yaj saub ntawd cov tub. Nej yog cov neeg txais lo lus Tswv Ntuj cog rau peb cov yawg koob, raws li Tswv Ntuj hais rau Has Nplas Has tias :Tas ib tsoom haiv neeg nyob ntiaj teb no yuav tau txais ib txog hmoov zoo nyob hauv koj cov xeeb zeej xeeb ntxwv. 26 Yog vim nej, mas Tswv Ntuj thiaj tsa nws Leej Tub sawv rov los, thiab Tswv Ntuj tso nws tuaj foom hmoov zoo rau nej thiab pab nej ncaim ntawm nej txoj kev phem."

    Lus Kas 24: 35-48

    35 Ces nkawd piav qhov uas tshwm tuaj nyob tom kev, thiab piav tias Huab Tais ua dab tsi, nkawd thiaj zeem tau nws thaum nws ntais lub ncuav mov. 36 Thaum lawv tseem sib tham txog tej lus ntawd, Yes Xus sawv ntsug hauv nruab nrab lawv, nws hais rau lawv tias : "Nej nyob kaj lug." 37 Cov thwj tim ceeb nkaus, lawv ntshai kawg, lawv xav tias lawv pom ib tug dab. 38 Ces Yes Xus hais rau lawv tias : "Vim li cas nej poob siab ? Vim li cas tej zaj ua xyem xyav li ntawd sawv los nyob hauv nej lub siab ? 39 Nej ntsia kuv ob txhais tes thiab ob txhais taw : yog kuv tiag ! Nej xuas kuv saib ! Nej ntsia mas : dab tsis muaj nqaij tsis muaj pob txha, xws li nej pom kuv muaj." 40 Yes Xus hais li ntawd tas, nws muab nws ob txhais tes ob txhais taw rau lawv saib. 41 Lawv zoo siab dhau, lawv tseem tsis tau xav ntseeg. Lawv yoob tas. Yes Xus hais rau lawv tias: "Nyob ntawm no, nej muaj dab tsi noj ?" 42 Lawv muab ib ya ntses txhiab rau Yes Xus. 43 Yes Xus tuav, nws noj yav ntses ntawd nyob ntawm lawv xub ntiag.
    44 Yes Xus hais rau lawv tias : "Thaum kuv tseem nrog nej nyob, kuv hais cov lus no rau nej : Tas ib puas tsav yam uas Mais Xes Txoj Cai, cov Yaj Saub, thiab cov Nkauj Paj Nruag sau txog kuv, yuav tsum tshwm sim kom tiav." 45 Ces Yes Xus qhib lawv lub tswv yim kom lawv to taub Ntawv. 46 Nws hais rau lawv tias : "Ntawv sau hais tias Leej Pleev yuav raug luag tsim txom. Hnub peb, nws yuav sawv hauv cov tuag rov los. 47 Thiab Ntawv tseem hais tias yuav tsum tshaj txoj kev tig los hloov siab ntxub kev txhaum kom Ntuj zam txhaum rau ib tsoom haiv neeg nyob hauv Leej Pleev lub Npe. Yuav xub tshaj nyob Yes Lus Xas Les. 48 Nej yuav ua tim khawv txog tej ntawd.



    Last edited by Mim on 12th April 2012, 4:38 pm; edited 1 time in total

    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 12th April 2012, 4:37 pm

    Hnub Rau hauv Lis Piam Hla Xyoo B

    Hauj Lwm 4 : 1 - 12.

    1 Pob Zeb thiab Zam nkawd tseem tab tom hais lus rau tsoom pej xeem, ces cov leej choj, tus tswj lub Tsev Txoos,
    thiab cov Xas Dus Kais tuaj txog. 2 Lawv tsis zoo siab rau qhov tias nkawd qhia tsoom sid thiab nkawd tshaj tias neeg tuag yuav sawv rov los xws li Yes Xus. 3 Lawv ntes nkawd thiab coj nkawd mus kaw hauv tsev loj faj txog kaj ntug, vim thaum ntawd twb tsaus ntuj lawm. 4 Tiam sis muaj ntau leej uas tau hnov nkawd lo lus kuj txais kev ntseeg. Tsuas suav cov txiv neej xwb, cov ntseeg muaj nto tsib txhiab leej. 5 Hnub tom qab, cov nom tswv Yus Das, cov laus neeg, thiab cov kws ntawv, sawv daws tuaj sib sau nyob Yes Lus Xas Les. 6 Tus thawj leej choj As Nas kuj nyob ntawd, Kais Fas, Yos Nas Thas, As Les Xas Nrias thiab cov uas yog caj ces ua leej choj puav leej tuaj nyob ntawd tas huv tib si. 7 Lawv kom luag coj ob tug Hauv Paus Xa Lus los, ces lawv nug nkawd tias : "Leej twg muab cai rau neb, thiab neb tuav txog leej twg lub npe los ua tej ntawd" ? 8 Ces Pob Zeb muaj Leej Ntuj Plig nyob puv hauv nws, nws hais rau lawv tias : "Cov nom tswv coj tsoom pej xeem, thiab tsoom laus neeg sawv daws : 9 Hnub no, nej kom wb hais tseeb txog qhov tias ib tug tuag ceg zoo lawm, thiab tim li cas nws thiaj li zoo lawm. 10 Nej sawv daws, thiab tas tsoom His Xas Lais huv tib si, nej yuav paub tias tus neeg uas zoo hlo rau nej pom ntawd, mas yog vim Yes Xus Pleev lub npe. Yog tus Yes Xus Nas Xas Les uas nej muab dai saum ntoo cuam, tab sis Tswv Ntuj tsa nws sawv hauv cov tub tuag rov los. Yog vim Yes Xus lub npe xwb, tsis yog vim lwm tus. 11 Yes Xus yog lub pob zeb uas nej cov txhim tsev tsis xav yuav. Zaum no nws yog thawj lub pob zeb txheem lub tsev. 12 Vim nyob hauv lub qab ntuj khwb tsis muaj dua lwm lub npe yuav cawm tau peb."

    Zam 21: 1-14

    1 Dua li ntawd, Yes Xus rov tawm los rau cov thwj tim pom nyob ntawm ntug dej ntuj Tis Npes Lias. Thaum Yes Xus tawm los mas muaj zoo li no. 2 Cov nyob ua ke ntawd yog Xis Moos Pob Zeb, Tos Mas uas hu ua Dis Dws Mos, Nas Tas Nais uas nyob Kas Nas hauv xeev Nkas Lis Lais, Ntxes Npes Dais ob tug tub, thiab ob tug thwj tim ntxiv. 3 Xis Moos Pob Zeb hais rau lawv tias : Kuv yuav mus puav ntses." Lawv hais rau nws tias : Peb nrog koj mus thiab." Lawv tawm mus nce rau hauv lub nkoj. Hmo ntawd lawv puav tsis tau dab tsi li. 4 Thaum kaj ntug lawm, Yes Xus nyob tim ntug dej. Tab sis cov thwj tim tsis paub tias yog Yes Xus. 5 Yes Xus thiaj hais rau lawv tias : "Cov me nyuam, nej puas muaj dab tsi noj?" Lawv teb rau Yes Xus tias : "Tsis muaj." 6 Nws hais rau lawv tias : "Nej pov vas rau ntawm lub nkoj sab xis, nej yuav tau ntses." Lawv thiaj pov vas mus, ces lawv rub tsis tau lub vas rov los, vim mag tau ntses ntau kawg. 7 Tus thwj tim uas Yes Xus nyiam thiaj hais rau Pob Zeb tias : "Yog Huab Tais !" Xis Moos Pob Zeb hnov dheev tias yog Huab Tais, nws muab ib daim khaub ncaws khi ntawm duav, vim nws liab qab, ces nws dhia mus hauv dej. 8 Lwm cov thwj tim mam li caij nkoj thiab cab lub vas puav ntses los. Lawv nyob tsis deb ntawm ntug nqhuab lawm, kwv yees deb li ob puas tshim. 9 Thaum lawv nqes los txog saum av, lawv pom ib cub tawg thee nyob ntawd, hos muaj ib co ntses tso rausaud, thiab ib co ncuav mov. 10 Yes Xus hais rau lawv tias : "Nej nqa cov ntses me uas nej nyuam qhuav puav tau los." 11 Xis Moos Pob Zeb nce mus hauv nkoj, nws rub lub vas mag ntses loj puv nkaus los rau saum av : tau ib puas tsib caug peb tus ntses ! Txawm tias puav tau ntses ntau npaum ntawd, tsis kav lub vas tsis ntuag. 12 Yes Xus hais rau lawv tias : "Nej los noj tshais." Tsis muaj ib tug thwj tim muaj cuab kav nug Yes Xus tias : "Koj yog leej twg ?" Vim lawv yeej paub tseeb tias yog Huab Tais. 13 Yes Xus txav los muab cov ncuav mov cev rau lawv, nws kuj muab cov ntses cev rau lawv thiab. 14 Txij thaum Yes Xus sawv hauv cov tuag rov los, mas nws tawm los rau cov thwj tim pom, zaum no yog zaum peb.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 14th April 2012, 4:35 am

    Hnub Xya hauv Lis Piam Hla Xyoo B

    Hauv Lwm 4: 13-21

    13 Cov nom txiav txim pom tias Pob Zeb thiab Zam nkawd lub siab tawv tsis ntshai, thiab lawv kuj pom tias nkawd yog neeg tsis tau kawm txuj ci, tsis muaj kev txawj ntse, ces lawv ua siab poob nthav. Lawv kuj rov zeem tau tias nkawd yog cov uas tau nrog Yes Xus ua ke. 14 Ib txhij ntawd, lawv kuj pom tus neeg uas nkawd kho zoo, sawv ntsug nyob ze nkawd. Ces lawv tsis pom qab teb dab tsi. 15 Lawv kom coj nkawd tawm ntawm lub tsev txiav txim mus, ces lawv mam sab laj ua ke hais tias : 16 "Peb yuav ua dab tsi rau ob tug neeg ntawd ? Qhov tias nkawd tau ua ib yam hwj huam yees ntxwv loj kawg, mas tas cov neeg nyob Yes Lus Xas Les paub tas lawm, peb dag tsis tau tias nkawd tsis tau ua. 17 Tiam sis yuav kom cov pej xeem tsis txhob ntseeg zuj zus ntxiv, mas peb yuav tsum txwv nkawd, tsis pub nkawd hais txog lub Npe ntawd ntxiv rau leej twg lawm."
    18 Ces lawv hu Pob Zeb thiab Zam rov los, lawv txwv tsis kheev nkawd hais dab tsi. 19 Tiam sis Pob Zeb thiab Zam nkawd teb hais tias : "Nej thiaj yog cov paub txiav saib Tswv Ntuj pom zoo wb mloog nej, los wb mloog Tswv Ntuj. 20 Ntawm wb, mas yog wb tsis tshaj tej yam wb tau pom tau hnov mas wb nyob tsis taus." 21 Cov nom tswv tseem hem nkawd ntxiv tas, ces lawv tso nkawd mus : lawv tsis pom qab muab txim dab tsi rau nkawd, vim lawv ntshai cov pej xeem. Sawv daws cav txog Tswv Ntuj rau tej yam tshwm sim tuaj.

    Mas Kos 16: 9-15

    9 Thaum Yes Xus sawv rov los lawm, hnub chiv lub lis piam, thaum sawv ntxov, Yes Xus tawm los rau Mab Liab Mas Ntas Las pom. Mab Liab yog tus uas Yes Xus ntiab xya tus dab phem tawm. 10 Mab Liab mus qhia lub moo ntawd rau cov tau nrog Yes Xus nyob, vim lawv tu siab thiab lawv quaj. 11 Thaum lawv hnov hais tias Yes Xus tseem muaj txoj sia nyob, thiab Mab Liab Mas Ntas Las twb tau pom nws, mas lawv tsis ntseeg.
    12 Dhau qhov ntawd lawm, Yes Xus txia ua ib tug txawv, tawm tuaj rau ob leeg hauv lawv pom, thaum nkawd tab tom taug kev tom cov nras teb. 13 Ob tug ntawd rov los qhia rau cov, tab sis lawv kuj tsis ntseeg nkawd thiab. 14 Tom qab lawm, Yes Xus tawm los rau Pab Kaum Ib pom, thaum lawv tab tom noj mov. Yes Xus yws lawv lub siab tsis ntseeg thiab lub siab txhav, vim lawv tsis ntseeg cov uas tau pom Yes Xus sawv rov los. 15 Yes Xus hais rau lawv tias : "Nej mus thoob qab ntuj, nej tshaj lub Moo Zoo rau txhua leej txhua tus. 16 Tus twg ntseeg thiab txais lub cim ntxuav, mas Ntuj yuav cawm nws, hos tus tsis ntseeg yuav raug txim. (Nyob hauv tus txheej rtxheem tsis muaj nqe 16, tiam sis kuv muab tau rau qhov no lawm ces cia nws nyob nws)


    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 16th April 2012, 8:42 am

    Tim 16 lub 4 hlis Xyoo B

    Hauj Lwm 4 : 23 - 31.

    23 Thaum lawv tso Pob Zeb thiab Zam nkawd lawm, mas nkawd rov qab los nrog cov kwv tij nyob. Nkawd piav tej yam uas cov leej choj thiab cov txwj laus tau hais. 24 Sawv daws hnov li ntawd mas sawv daws tsa suab thov Tswv Ntuj tias : "Tswv Huab Tais, koj yog tus tsim lub ntuj lub teb, lub hiav txwv thiab tas ib puas tsav yam nyob hauv. 25 Yog koj nrog Leej Ntuj Plig Ntshiab qhia peb txiv Das Vis, koj tus tub txib, kom nws hais tias : "Vim li cas tsoom kuj cuab yuav ua ntxhov hnyo, tsoom haiv neeg yuav xav txog tej yam tsis muaj tsim ? 26 Cov vaj nyob ntiaj teb sawv ntxeev siab, cov thawj coj ua tej pab tuav xam nrhiav kev tawm tsam tiv Huab Tais thiab nws Leej Pleev." 27 Nyob hauv lub nroog no, Hes Los thiab Poos Xyus Pis Las Tos nrog cov pej kum haiv neeg thiab nrog cov haiv neeg His Xas Lais sib koom ua rog rau koj Leej Tub Txib Ntshiab Yes Xus uas koj tau Pleev nws. 28 Lawv tsuas kawg ua raws li koj lub hwj huam, koj txhais tes thiab koj lub tswv yim tau teem puag ntxov los. 29 Huab Tais, nyem no koj ntsia saib lawv hem peb. Yog koj xav pab koj cov tub txib kom lawv muaj lub siab ruaj nreb tshaj koj lo lus, 30 mas thov koj cev tes los ua hwj huam yees ntxwv kho cov neeg mob, thiab ua tej yam txawv nyob hauv koj Leej Tub Txib Ntshiab Yes Xus lub npe." 31 Thaum lawv tab tom teev ntuj, mas qhov chaw lawv nyob qeeg nkaws. Leej Ntuj Plig Ntshiab los nyob puv lawv siab ntsws. Lawv rov ua siab ruaj nreb tshajTswv Ntuj lo lus.

    Zam 3: 1-8

    1 Nyob hauv cov Fas Lis Xais,muaj ib tug hu ua Nis Kos Des Mos. Nws yog cov Yus Das ib tug thawj coj. 2 Nws tuaj cuag Yes Xus hmo ntuj, nws hais rau Yes Xus tias : "Las Npis, peb paub tias koj tuaj ntawm Tswv Ntuj tuaj ua Kws Xib Hwb. Yeej tsis muaj leej twg ua tau cov cim koj ua, yog Tswv Ntuj tsis nrog nws." 3 Yes Xus teb rau Nis Kos Des Mos tias : ‘Kuv hais qhov muaj tseeb tiag rau koj : Tus tsis yug saum txheej siab los, mas nws pom tsis tau Tswv Ntuj lub Ceeb Tsheej.’ 4 Nis Kos Des Mos hais rau Yes Xus tias : "Ib tug neeg laus lawm, nws yuav ua li cas rov yug los tau ? Nws puas rov mus tau rau hauv nws niam plab ib zaug ntxiv, mam rov yug los dua ?” 5 Yes Xus teb hais tias : “Kuv hais qhov muaj tseeb tiag rau koj: Tus tsis yug ntawm dej thiab ntawm Leej Ntuj Plig los, mas nws yuav mus tsis tau hauv Tswv Ntuj lub Ceeb Tsheej. 6 Tus uas yug ntawm lub cev nqaij los, mas nws yog nqaij. Tus uas yug ntawm Leej Ntuj Plig los, mas nws yog ntsuj plig. 7 Koj txhob poob siab vim kuv hais rau koj tias : Nej yuav tsum yug ntawm txheej siab los. 8 Cua xav tshuab lawm seem twg kuj tau. Koj hnov cua nrov, tab sis koj tsis paub cua tuaj qhov twg tuaj, thiab cua mus qhov twg. Tus uas yug ntawm Leej Ntuj Plig los kuj zoo ib yam li ntawd thiab.”



    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 17th April 2012, 9:35 am

    Tim 17 lub 4 hlis 2012 Xyoo B

    Hauj Lwm 4: 32-37

    32 Tas ib tsoom ntseeg coob coob sawv daws muaj ib lub siab, ib lub tswv yim xwb. Tej yam uas yog nws li, tsis kav tsis muaj leej twg yuav hais tias yog nws tug xwb. Nyias muab nyias tug los ua sawv daws tug. 33 Cov Hauv Paus Xa Lus muaj hwj huam loj, lawv ua tim khawv txog Huab Tais Yes Xus sawv rov los. Tsoom sid pom lawv zoo kawg. 34 Nyob hauv lawv, tsis muaj ib tug yuav tshaib nqhis dab tsi : vim tias cov uas muaj liaj muaj teb, muaj vaj tse, muab muag tas huv si, 35 lawv nqa tus nqi uas muag tau tuaj tso ntawm cov Hauv Paus Xa Lus ko taw. Lawv mam muab faib rau sawv daws kom nyias tau txaus nyias siv. 36 Muaj ib tug hu ua Yos Xes, cov Hauv Paus Xa Lus hu nws ua Npas Nas Npes - lub npe no txhais tias : tus txawj nplij neeg. Nws yog xeem Les Vis, nws yug los nyob Kws Plos. 37 Npas Nas Npes muaj ib daim teb, nws muab muag, nws coj cov nyiaj tuaj tso ntawm cov Hauv Paus Xa Lus ko taw.

    Zam 3: 7b-15

    7 Yes Xus hais rau Nis Kos des Mos tias : Nej yuav tsum yug ntawm txheej siab los. 8 Cua xav tshuab lawm seem twg kuj tau. Koj hnov cua nrov, tab sis koj tsis paub cua tuaj qhov twg tuaj, thiab cua mus qhov twg. Tus uas yug ntawm Leej Ntuj Plig los kuj zoo ib yam li ntawd thiab.” 9 Nis Kos Des Mos teb rau Yes Xus tias : "Qhov ntawd yog zoo li cas ? 10 Yes Xus hais rau Nis Kos Des Mos tias : "Koj yog cov His Xas Lais ib tug xib hwb, koj tseem tsis paub tej ntawd lod? 11 Kuv hais qhov muaj tseeb tiag rau koj, peb hais yam peb paub, peb ua tim khawv txog tej uas peb pom, tab sis nej tsis txais peb cov lus ua tim khawv. 12 Thaum kuv hais txog tej yam nyob ntiaj teb no rau nej, nej twb tsis ntseeg. Yog kuv hais txog tej yam nyob saum ntuj rau nej, mas nej yuav ua cas ntseeg tau ? 13 Tsis muaj leej twg tau nce mus saum ntuj, tsuas yog tus nqes saum ntuj los, uas yog Neeg Leej Tub nyob saum ntuj. 14 Neeg Leej Tub yuav tsum raug luag tsa nws siab xws li Mais Xes tsa tus nab nyob teb chaws suab puam, 15 kom xwv tus ntseeg txog nws, muaj txoj sia nyob mus li.

    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 17th April 2012, 9:37 am

    Tim 18 lub 4 hlis 2012 Xyoo B

    Hauj Lwm 5: 17-26

    17 Tus thawj leej choj thiab nws cov tub ncig uas yog tog Xas Dus Kais, sawv tuaj cuam tshuam. Lawv khib kawg, 18 ces lawv ntes cov Hauv Paus Xa Lus coj mus pov rau hauv tsev loj faj. 19 Tab sis hmo ntuj, Huab Tais tus Tshiab qhib cov qhov rooj hauv tsev loj faj, nws coj lawv tawm sab nraud, ces nws hais rau lawv tias : 20 "Nej ua siab tawv qhawv mus tshaj cov lus muaj Txoj Sia rau tsoom pej xeem nyob hauv lub Tuam Tsev Teev Ntuj." 21 Cov Hauv Paus Xa Lus ua raws li cov lus ntawd : thaum kaj ntug txoog, lawv chaws mus hauv lub Tuam Tsev Teev Ntuj, ces lawv pib qhia. Thaum ntawd, tus thawj leej choj nrog nws cov tub ncig tuaj txog. Lawv hu cov txwj laus Xas Nes Nrees thiab lub rooj sab laj laus neeg hauv cov tub His Xas Lais tas hu si tuaj. Ces luag tso neeg mus coj cov Hauv Paus Xa Lus tom tsev loj faj los. 22 Tab sis thaum cov zov keeb mus txog tom chaw, lawv tsis pom cov Hauv Paus Xa Lus nyob hauv tsev loj faj. Lawv thiaj rov los ceeb toom tias : 23 "Peb pom lub tsev loj faj kaw zoo, hos cov zov keeb nyob rawv ntawm cov rooj loog. Tab sis thaum peb qhib qhov rooj, peb tsis pom leej twg nyob sab hauv li." 24 Tus tswj zov lub Tuam Tsev Teev Ntuj thiab cov thawj leej choj hnov cov lus ntawd, lawv nyob hab nuv tsis to taub tias qhov ntawd yog vim li cas. 25 Ces txawm muaj ib tug neeg tuaj ceeb toom rau lawv tias : "Cov neeg uas nej muab kaw hauv tsev loj faj, mas nyem no lawv nyob hauv lub Tuam Tsev Teev Ntuj qhia tsoom pej xeem." 26 Tus tswj zov lub Tuam Tsev thiaj nrog nws cov neeg mus coj cov Hauv Paus Xa Lus rov los. Lawv tsis ua phem rau cov Hauv Paus Xa Lus, vim lawv ntshai tsam tsoom pej xeem muab pob zeb los tua lawv.

    Zam 3: 16-21

    16 Vim Tswv Ntuj nyiam lub qab ntuj neeg npaum no : nws thiaj muab nws Leej Tub twm zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li. 17 Tswv Ntuj tsis xa Leej Tub tuaj hauv lub qab ntuj kom nws muab txim rau lub qab ntuj neeg, nws xa Leej Tub tuaj cawm lub qab ntuj neeg. 18 Tus ntseeg txog Leej Tub, nws tsis raug txiav txim. Tus tsis ntseeg, nws twb raug txiav txim lawm, vim nws tsis ntseeg txog Tswv Ntuj Leej Tub twm zeej lub npe. 19 Kev txiav txim yog zoo li no : Qhov pom kev tuaj nyob hauv lub qab ntuj neeg, tab sis tsoom neeg nyiam qhov tsaus ntuj dua qhov pom kev, vim lawv cov hauj lwm phem. 20 Tus twg ua qhov phem, mas nws ntxub qhov pom kev, ces nws tsis los nyob hauv qhov pom kev, vim nws ntshai tsam cov hauj lwm phem yuav qhib los. 21 Hos tus ua qhov tseeb, mas nws los nyob hauv qhov pom kev, kom luag pom tias nws ua nws cov hauj lwm nyob hauv Tswv Ntuj."

    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 18th April 2012, 1:09 pm

    Tim 19 lub 4 hlis 2012 xyoo B

    Hauj Lwm 5: 27-33

    27 Lawv coj los txog, lawv kom cov Hauv Paus Xa Lus mus sawv ntawm cov txwj laus Xas Nes Nrees xub ntiag. Tus Thawj leej choj nug cov Hauv Paus Xa Lus tias : 28 "Peb twb txwv nej, tsis kheev nej siv lub npe ntawd los qhia. Tab sis nej tseem qhia nej zaj ntawd mus thoob Yes Lus Xas Les. Nej puas xav kom tus neeg ntawd cov ntshav rov qab poob los rau saum peb ?" 29 Ces Pob Zeb nrog cov Hauv Paus Xa Lus teb tias : "Yuav tsum mloog Tswv Ntuj lus zoo dua mloog neeg lus. 30 Tus Yes Xus uas nej muab nws dai saum ib tug ncej kom tuag, mas peb cov yawg koob tus Huab Tais tsa nws sawv rov los lawm. 31 Nws yog tus uas Tswv Ntuj txhais tes xis tsa nws siab kom nws ua tus Thawj thiab tus Cawm Seej. Yog vim nws, mas Tswv Ntuj thiaj pub txoj kev thov txhaum thiab kev zam txhaum rau His Xas Lais. 32 Peb yog cov tim khawv pom tej yam ntawd. Leej Ntuj Plig Ntshiab uas Tswv Ntuj pub rau cov neeg mloog nws lus kuj ua tim khawv txog tej yam ntawd thiab." 33 Lawv hnov li ntawd mas lawv npau taws kawg, lawv npaj yuav muab cov Hauv Paus Xa Lus tua.

    Zam 3: 31-36


    31 “Tus tuaj saum txheej saud tuaj, nws nyob siab dua sawv daws. Tus tuaj hauv ntiaj teb tuaj, nws yog ntiaj teb tug, nws hais txog tej yam nyob ntiaj teb. Tus tuaj saum ntuj tuaj, 32 nws ua tim khawv txog qhov nws pom thiab nws hnov, tab sis tsis muaj leej twg txais nws cov lus tim khawv. 33 Tus uas txais nws cov lus tim khawv, nws lees meej tias Tswv Ntuj yog tus tseeb. 34 Tus uas Tswv Ntuj xa tuaj, nws hais Tswv Ntuj cov lus, vim Tswv Ntuj pub Leej Ntuj Plig tsis xuas dab tsi luj. 35 Leej Txiv nyiam Leej Tub, nws tso tas ib puas tsav yam rau hauv Leej Tub txhais tes. 36 Tus ntseeg txog Leej Tub, mas nws muaj txoj sia nyob mus li. Hos tus tsis kam ntseeg txog Leej Tub, nws yuav tsis pom txoj sia, ces Tswv Ntuj lub siab npau taws yuav nyob saum nws.

    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 19th April 2012, 7:13 am

    Tim 20 lub 4 hlis 2012 Xyoo B

    Hauj Lwm 5 : 34 - 42.

    34 Ces ib tug Fas Lis Xais hu ua Nkas Mas Lias sawv hauv cov txwj laus Xas Nes Nrees. Nws yog ib tug kws Txoj Cai uas tas tsoom pej xeem hwm. Nws hais kom coj cov Hauv Paus Xa Lus tawm mus ib pliag. 35 Ces nws hais rau cov txwj laus Xas Nes Nrees tias : "Cov His Xas Lais, nej yuav xyuam xim rau tej yam nej ua rau cov neeg ntawd. 36 Tau tsis ntev muaj ib tug hu ua Thaws Das. Nws hais tias nws yog ib tug loj. Nws sau tau kwv yees plaub puas leej neeg. Tab sis nws raug luag tua tuag, ces nws cov neeg tawg tas, tsis tshuav ib tug li. 37 Tom qab no, lub zim txwv txheeb tsoom mej hwm, mas Yus Das tus uas nyob Nkas Lis Lais kuj sawv. Nws coj tau coob leej raws nws qab. Nws kuj tuag thiab, ces cov neeg uas raws nws tawg tas. 38 Ua li mas, nyem no, kuv hais rau nej tias nej tsis txhob quav ntsej rau cov neeg ntawd, nej tso plhuav lawv. Vim tias yog lawv cov lus thiab lawv txoj kab xwm tuaj ntawm neeg tuaj, mas txoj kab xwm ntawd nws yuav rov rhuav nws ploj mus. 39 Hos yog tias lawv txoj kab xwm tuaj ntawm Tswv Ntuj tuaj tiag, mas nej yeej rhuav tsis tau. Nej tsis txhob tuam yim, tsam nej lam ua rog tiv Tswv Ntuj." Sawv daws yuav Nkas Mas Lias zaj tswv yim. 40 Lawv hu cov Hauv Paus Xa Lus kom rov los hauv tsev. Lawv kom luag muab cov Hauv Paus Xa Lus nplawm tas, lawv txwv tsis pub tuav txog Yes Xus lub npe los qhia. Ces lawv tso cov Hauv Paus Xa Lus mus. 41 Cov Hauv Paus Xa Lus tawm ntawm lub rooj txwj laus Xas Nes Nrees, lawv zoo siab vim Ntuj saib lawv tsim nyog raug luag hiam vim Lub Npe. 42 Lawv niaj hnub nyob hauv lub Tuam Tsev Teev Ntuj thiab nyob hauv lawv tsev qhia thiab tshaj txog Yes Xus lub Moo Zoo tsis tseg.

    Zam 6 : 1 - 15.

    1 Dhau tej no lawm, Yes Xus mus rau sab dej ntuj Nkas Lis Lais tim ub, uas tseem hu ua Dej Ntuj Tis Npes Lias. 2 Ib pab neeg coob raws nws mus, vim lawv tau pom cov cim nws ua kho neeg mob. 3 Yes Xus nce saum lub roob, nws nrog nws cov thwj tim zaum nyob saud. 4 Yuav txog lub Ntees Hla uas yog cov Yus Das lub ntees nqaum paj nqaum nruas. 5 Yes Xus tsa muag ntsia pom ib pab neeg coob tuaj cuag nws, nws hais rau Fis Lis Pos tias : "Peb yuav ua li cas muas ncuav mov txaus cov neeg ntawd noj ?" 6 Yes Xus hais li ntawd sim Fis Lis Pos, tab sis Yes Xus yeej paub tias nws yuav ua dab tsi. 7 Fis Lis Pos teb rau Yes Xus tias : "Muab ob puas lub txiaj nyiag muas mov los tseem yuav tsis txaus kom ib leeg tau ib qho me me." 8 Yes Xus ib tug thwj tim hu ua As Nres, yog Xis Moos Pob Zeb tus kwv, hais rau Yes Xus tias : 9 "Ib tug me tub nyob ntawm no muaj tsib lub ncuav mov qib thiab ob tug ntses me me, tab sis qhov ntawd yuav ua cas txaus rau npaum no leej neeg noj ?" 10 Yes Xus hais tias : "Nej kom cov neeg zaum." Nyob ntawm qhov chaw ntawd muaj nroj ntau. Ces cov neeg zaum, kwv yees muaj tsib txhiab leej neeg. 11 Yes Xus tuav cov ncuav mov, nws ua ntuj tsaug tas, nws muab faib rau cov neeg uas zaum ntawd. Nws kuj ua ib yam li ntawd rau cov ntses me me kom txaus lawv noj thiab. 12 Thaum lawv noj tsau tas, Yes Xus hais rau nws cov thwj tim tias : "Nej khaws cov sab mov seem kom txhob sem ib qho li."13 Thaum lawv noj tsau tas, lawv thiaj khaws cov mov seem uas ntsu ntawm tsib lub ncuav mov qib los, lawv ntim puv kaum ob tawb. 14 Tsoom sid pom lub cim Yes Xus ua, ces lawv hais tias : "Tus no yog tus Yaj Saub uas yuav tuaj nyob hauv lub qab ntuj neeg tiag." 15 Yes Xus to taub hais tias lawv yuav tuaj ntes nws mus tsa ua vaj, ces nws mus
    nws tib leeg twj ywm rau pem roob.

    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 24th April 2012, 4:19 pm

    Tim 21 lub 4 hlis 2012 Xyoo B

    Hauj Lwm 6 : 1 - 7.

    1 Lub caij ntawd, cov thwj tim huam vam coob zuj zus. Ces cov Hes Las yws yws cov Hes Nplaws. Lawv hais tias niaj hnub thaum faib mov mas tsis muaj neeg nco txog cov poj ntsuam Hes Las. 2 Pab Kaum Ob hu cov thwj tim tuaj sab laj, lawv hais tias : "Tsis phim peb yuav tso Tswv Ntuj lo lus tseg, mus saib cov rooj noj mov. 3 Kwv tij, nej nrhiav nyob hauv nej, xya leej txiv neej nto moo zoo, uas yog neeg thoob tsib, thiab muaj Leej Ntuj Plig nyob puv hauv lawv. Peb yuav tsa lawv tuav txoj hauj lwm ntawd. 4 Hos peb, mas peb yuav muab siab hlo npuab txoj kev teev ntuj thiab tsob hwb Lo Lus.” 5 Cov lus no haum lub txoos siab, ces lawv xaiv Tes Fas Nos, uas nws yog ib tug neeg ntseeg ruaj, thiab muaj Leej Ntuj Plig Ntshiab nyob puv hauv nws. Fis Lis Pos, Plos Kos Los, Nis Kas Nos, Tis Moos, Pas Mes Nas, thiab Nis Kos Las uas yog ib tug neeg ntseeg nyob As Nthias Kias tuaj. 6 Lawv coj cov neeg no los rau cov Hauv Paus Xa Lus. Cov Hauv Paus Xa Lus thov ntuj tas, ces lawv tsa tes rau saum xya leej ntawd. 7 Huab Tais lo lus hlob zuj zus. Cov thwj tim huam vam coob kawg nyob Yes Lus Xas Les. Muaj ib co leej choj coob kawg kuj los mloog txoj kev ntseeg thiab.

    Zam 6 : 16 - 21.

    16 Thaum tsaus ntuj, Yes Xus cov thwj tim nqes mus nram dej ntuj, 17 lawv nce hauv ib lub nkoj, lawv hla dej mus rau Kas Fas Naus, nyob sab ntug dej tid. Thaum ntawd twb tsaus ntuj lawm, tab sis Yes Xus tseem tsis tau los txog ntawm lawv. 18 Muaj ib nthwv cua hlob ntsawj, ces dej ntuj nphau nphwv sawv tuaj. 19 Thaum cov thwj tim nquam nkoj deb li nees nkaum los peb caug ntsua muag lawm, ces lawv txawm pom Yes Xus mus kev saum dej ntuj, los ze zuj zus rau ntawm lub nkoj, ces lawv ntshai. 20 Tab sis Yes Xus hais rau lawv tias : "Yog kuv, nej txhob ntshai." 21 Lawv thiaj xav mus coj nws los rau hauv nkoj. Tiam sis tam sis ntawd lub nkoj twb txog qhov chaw lawv yuav mus lawm.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 24th April 2012, 4:20 pm

    Tim 23 lub 4 hlis 2012 Xyoo B

    Hauj Lwm 6 : 8 - 15.

    8 Tes Fas Nos yog ib tug neeg muaj txiaj ntsim thiab muaj hwj chim. Nws ua ib co hwj huam yees ntxwv thiab ib co cim loj kawg nyob hauv tsoom pej xeem. 9 Ces muaj ib co neeg tuaj ntawm lub Tsev Txoos uas hu ua cov Qhev Dim Txim lub txoos tuaj; lawv yog neeg Xis Les Nas, neeg As Les Xas Nrias, neeg Xis Lis Xias, thiab neeg As Xias. 10 Lawv nrog Tes Fas Nos sib cav. Tab sis lawv cav tsis yeej Tes Fas Nos, vim nws yog neeg thoob tsib, thiab yog Leej Ntuj Plig qhia nws hais. 11 Ces lawv xiab ib co neeg kom liam tias : "Peb hnov tus neeg ntawd hais ib co lus thuam Mais Xes thiab thuam Tswv Ntuj." 12 Lawv haub tsoom pej xeem, tsoom laus neeg, thiab tsoom kws ntawv kom sawv daws npau taws. Ces lawv nyas tuaj ntes Tes Fas Nos, lawv coj nws mus rau ntawm lub rooj txwj laus Xas Nes Nrees.
    13 Lawv coj ib co tim khawv cuav tuaj liam tias : "Tus neeg ntawd hais lus phem tsis tseg txog lub Tsev Ntshiab no thiab txog Txoj Cai. 14 Peb tau hnov nws hais tias Yes Xus, tus Nas Xas Les, yuav rhuav lub Chaw no, thiab nws yuav hloov tej kab ke uas Mais Xes muab rau peb." 15 Tas cov uas zaum hauv lub rooj txwj laus Xas Nes Nrees ua qhov muag nruj nreem tuaj ntsia Tes Fas Nos, lawv pom Tes Fas Nos lub ntsej muag zoo xws li ib tug Tshiab lub ntsej muag.

    Zam 6 : 22 - 29.

    22 Tag kis kaj ntug, tsoom neeg uas nyob sab dej ntuj tim ub pom tias nag hmo tsuas muaj ib lub nkoj nyob ntawd xwb. Lawv kuj pom tias Yes Xus tsis nrog nws cov thwj tim nce mus hauv nkoj, cov thwj tim lawv mus lawv xwb. 23 Tab sis, muaj ib co nkoj tuaj Tis Npes Lias tuaj, cov nkoj los ze ntawm qhov chaw lawv noj cov mov uas thaum Huab Tais ua Ntuj tsaug tas, nws muab rau lawv noj. 24 Tab sis tsoom neeg pom tias Yes Xus tsis nyob ntawd lawm, nws cov thwj tim kuj tsis nyob lawm thiab, ces lawv nce mus hauv cov nkoj ntawd, lawv mus nrhiav Yes Xus tim Kas Fas Naus. 25 Lawv tuaj nrhiav tau Yes Xus rau sab ntug dej tid, lawv hais rau nws tias : "Las Npis, thaum twg koj tuaj ntawm no lawm ?" 26 Yes Xus teb rau lawv tias : "Kuv hais qhov tseeb tiag rau nej : Nej nrhiav kuv, tsis yog vim nej tau pom ib co cim, yog vim nej tau noj cov ncuav mov tsau nej plab. 27 Nej txhob ua hauj lwm nrhiav cov txhiam xws txawj ploj. Nej ua hauj lwm nrhiav cov txhiam xws pub txoj sia nyob mus li. Cov txhiam xws ntawd yog cov uas Neeg Leej Tub yuav pub rau nej. Vim nws yog tus uas Leej Txiv Tswv Ntuj ntaus thwj rau." 28 Lawv hais rau Yes Xus tias : "Peb yuav ua dab tsi, peb thiaj ua tau Tswv Ntuj cov hauj lwm ?" 29 Yes Xus teb rau lawv hais tias : "Tswv Ntuj txoj hauj lwm yog zoo li no : Kom nej ntseeg txog tus nws xa tuaj."

    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 24th April 2012, 4:22 pm

    Tim 24 lub 4 hlis 2012 Xyoo B

    Hauj Lwm 7: 51-8: 1a

    51 Nej yog neeg xwb qwb txhav ! Uas lub siab thiab pob ntseg tsis txais lub cim txiav, nej thiaj tawv ncauj tsis mloog Leej Ntuj Plig Ntshiab. Nej cov yawg koob zoo li ntawd, nej kuj zoo li ntawd thiab. 52 Puas muaj ib tug yaj saub uas nej cov yawg koob tsis tau hiam ? Lawv tua cov yaj saub uas tau xub hais txog tus Siab Ncaj uas yuav tuaj. Tus Siab Ncaj yog tus uas nej nyuam qhuav ntxeev siab rau nws, thiab nyuam qhuav muab nws tua. 53 Nej tau txais Txoj Cai ntawm cov Tshiab los, tab sis nej tsis mloog Txoj Cai. 54 Thaum lawv hnov cov lus no, mas lawv npau taws ceev kawg. Lawv zim hniav zog rau Tes Fas Nos. 55 Leej Ntuj Plig Ntshiab nyob puv hauv Tes Fas Nos lub siab. Tes Fas Nos tsa muag ntsia ntsoov rau saum ntuj. Nws pom Tswv Ntuj lub hwj chim thiab pom Yes Xus sawv nyob ntawm Tswv Ntuj sab xis. 56 Ces nws hais tias : "Kuv pom lub ntuj qhib lug, thiab pom Neeg Leej Tub sawv ntsug ntawm Tswv Ntuj sab xis." 57 Thaum ntawd, cov Yus Das nthe nrov nrov. Lawv pos pob ntseg. Sawv daws ua ib tsaug khiav mus nthos nkaus Tes Fas Nos.
    58 Lawv thawb Tes Fas Nos mus rau sab nroog nraud, ces lawv txawb pob zeb tua nws. Cov tim khawv tso lawv tej khaub ncaws rau ntawm ib tug tub hluas ko taw. Tus hluas ntawd hu ua Xauv. 59 Thaum lawv tab tom txawb pob zeb tua Tes Fas Nos mas Tes Fas Nos hu txog Ntuj. Nws hais tias : "Huab Tais Yes Xus, thov koj txais kuv tus plig." 60 Ces nws txhos caug, nws hais ib lo nrov nrov tias : "Huab Tais, koj txhob muab qhov txhaum ntawd rau lawv ris." Tes Fas Nos hais li ntawd tas, ces nws txoj sia tu.
    8 1 Hos Xauv, mas nws pom zoo kom lawv muab Tes Fas Nos tua.

    Zam 6: 30-35

    30 Lawv hais rau Yes Xus tias : "Koj yuav ua lub cim dab tsi rau peb pom, kom peb ntseeg koj ? Koj ua hauj lwm dab tsi? 31 Peb cov yawg koob noj cov mov mas nas nyob teb chaws suab puam, raws li cov lus sau cia hais tias : "Nws pub cov mov tuaj saum ntuj tuaj rau lawv noj." 32 Yes Xus thiaj hais rau lawv tias : "Kuv hais qhov tseeb tiag rau nej : Tsis yog Mais Xes pub cov mov tuaj saum ntuj tuaj rau nej, yog kuv Txiv pub rau nej. Cov mov tuaj saum ntuj tuaj yog tseem mov. 33 Vim Tswv Ntuj cov mov yog cov mov nqes saum ntuj los, yog cov mov pub txoj sia rau lub qab ntuj neeg." 34 Lawv thiaj hais rau Yes Xus tias : "Huab Tais, thov koj pub cov mov ntawd rau peb noj mus li." Cov mov pub txoj sia yog Yes Xus. 35 Yes Xus hais rau lawv tias : "Kuv yog cov mov muaj txoj sia. Tus tuaj cuag kuv nws yuav tsis tshaib, tus ntseeg txog kuv nws yuav tsis nqhis ib zaug li.

    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 24th April 2012, 4:24 pm

    Tim 25 lub 4 hlis 2012 Xyoo B

    Pob Zeb Tsab Ntawv Ib 5: 5b-14

    5 Cov hluas, thaum nej sib fim, nej yuav nyiam ua neeg me, vim Tswv Ntuj tiv cov neeg muab hlob, hos nws pub nws cov txiaj ntsim rau cov neeg nyiam ua tus me. 6 Nej sawv daws yuav zoo siab ua neeg me nyob hauv Tswv Ntuj txhais tes muaj hwj huam, thaum txog zoo sij hawm, nws yuav tsa nej rau qhov chaw siab. 7 Nej tso nej tej kev ntxhov siab huv tib si rau Tswv Ntuj, vim nws yog tus txuag nej. 8 Nej yuav noj me haus tsawg, nej ua neeg feeb meej. Vim tus dab phem uas yog nej tus yeeb ncuab, nws zoo li ib tug tsov nyooj laws, nws koos ncig lees nrhiav saib yuav tom leej twg.
    9 Nej tiv nws mog ! Nej nyob ruaj nreb hauv txoj kev ntseeg. Nej nco ntsoov tias peb cov kwv tij ncaim nyob tas ntiaj teb, puav leej raug tib txog kev hiam. 10 Nej tsuas raug luag hiam ib ntus tsis ntev, tus Tswv Ntuj pub txiaj ntsim uas
    tau hu nej los txais lub koob meej nyob mus li hauv Leej Pleev, nws yuav rov tsa nej kom nej khov, nws yuav ntxiv zog rau nej, nws yuav ua kom nej ruaj nreb vau tsis taus. 11 Lub hwj huam yog Tswv Ntuj tug mus tiam dhau tiam. Ua li.
    12 Tus pab kuv sau cov lus no rau nej, yog Xis Vas Nus : kuv saib nws yog ib tug kwv pheej xeeb. Kuv sau cov lus no, vim kuv xav ntuas nej, thiab kuv xav hais meej rau nej tias Tswv Ntuj lub tseem txiaj ntsim yog zoo li ntawd : nej nyob ruaj hauv lub txiaj ntsim no mog. 13 Lub Koom Txoos nyob Npas Npis Los, uas Ntuj xaiv lawv ib yam li xaiv nej, lawv xa lawv cov lus hmov tshua tuaj rau nej. Kuv tus tub Mas Kos kuj xa nws cov lus hmov tshua tuaj rau nej. 14 Nej ib leeg yuav rov hais lus hmov tshua rau ib leeg. Nej sib nwj xws li ib co neeg sib nyiam. Nej nyob kaj lug hauv Leej Pleev !

    Mas Kos 16: 15-20

    15 Yes Xus hais rau lawv tias : "Nej mus thoob qab ntuj, nej tshaj lub Moo Zoo rau tas ntiaj teb. 16 Tus twg ntseeg thiab txais lub cim ntxuav, mas nws yuav txais kev cawm, hos tus tsis ntseeg yuav raug txim. 17 Cov cim no yuav nrog nraim cov uas ntseeg : lawv hu txog kuv lub npe, lawv yuav ntiab dab tau, lawv yuav hais ib co lus tshiab, 18 lawv yuav tuav nab tau, yog lawv haus tshuaj lom neeg, tshuaj yuav tsis ua xwv txheej rau lawv, thaum lawv tsa tes rau saum cov neeg mob, mas cov mob yuav zoo."
    19 Thaum Huab Tais Yes Xus hais cov lus no tas rau lawv, ces Ntuj nqa nws nce mus saum ntuj. Nws zaum ntawm Tswv Ntuj sab xis. 20 Cov thwj tim tawm mus tshaj lub Moo Zoo rau tas qhov txhia chaw, Huab Tais nrog lawv lis hauj lwm, nws ua ib co cim nres Lo Lus.

    Mim
    Tswv Cuab Hmong Catholique
    Tswv Cuab Hmong Catholique

    Messages : 1646
    Date d'inscription : 2009-10-16

    Re: COV ZAJ NYEEM NRUAB LIS PIAM 2012

    Post  Mim on 25th April 2012, 5:54 pm

    Tim 26 lub 4 hlis 2012 Xyoo B

    Hauj Lwm 8 : 26 - 40
    .

    26 Huab Tais tus Tshiab hais rau Fis Lis Pos tias : "Thaum tav su, koj sawv kev, koj mus rau tom txoj kev uas nqes ntawm Yes Lus Xas Les mus nram Nkas Xas. Tsis muaj neeg taug txoj kev ntawd." 27 Fis Lis Pos thiaj sawv kev mus txog tom txoj kev. Thaum ntawd, ib tug Es Thias Pias tab tom los txog ntawd. Nws yog ib tug neeg sam, yog tus poj vaj Es Thias Pias hu ua Kas Ntas ib tug nom loj. Nws yog tus saib cov txhab nyiaj. Nws tuaj mus teev ntuj pem Yes Lus Xas Les rov los. 28 Nws zaum hauv nws lub tsheb rov mus, ces nws nyeem tus yaj saub His Xais phau ntawv. 29 Leej Ntuj Plig hais rau Fis Lis Pos tias : "Koj khiav mus caum lub tsheb ntawd." 30 Fis Lis Pos thiaj khiav ntsuj caum. Nws hnov tus nom Es Thias Pias nyeem His Xais phau ntawv. Fis Lis Pos nug nws tias : "koj puas to taub qhov koj nyeem?" 31 Tus nom teb hais tias : "Yog tsis muaj neeg qhia kuv, mas kuv yuav ua li cas to taub ?" Ces nws caw kom Fis Lis Pos nce los zaum ntawm nws ib sab. 32 Zaj uas tus nom tab tom nyeem yog zaj no : Luag cab nws mus hauv tsev tua tsiaj zoo li ib tug yaj. Nws tsis qhib ncauj, nws zoo li ib tug me nyuam yaj tsis hais lus rau tus uas muab nws cov plaub chais. 33 Nws txo nws rau hauv txoj kev poob tsim, luag tsis ua ncaj rau nws. Leej twg yuav hais txog nws cov xeeb ntxwv ? Vim tias luag txo nws txoj sia kom ploj hauv ntiaj teb. 34 Tus nom sam hais rau Fis Lis Pos tias : "Koj sim qhia saib. Tus yaj saub hais txog leej twg zoo li ntawd ? Nws puas rov hais txog nws, los nws hais txog lwm tus ?" 35 Fis Lis Pos thiaj qhib ncauj hais lus. Nws siv cov lus sau tseg hauv Ntawv los qhia Yes Xus lub Moo Zoo rau tus nom sam. 36 Thaum nkawd mus kev, txog ib qho chaw muaj dej, ces tus nom sam hais tias : "Ntawm no muaj dej. Ua cas kuv yuav txais tsis tau lub cim ntxuav ?" [37...] 38 Ces nws kom lub tsheb nres. Fis Lis Pos thiab tus nom sam nkawd ob leeg nqes mus hauv dej. Fis Lis Pos thiaj ua lub cim ntxuav rau nws. 39 Thaum nkawd tawm hauv dej los, Huab Tais tus Ntsuj Plig nqa Fis Lis Pos lawm. Ces tus nom sam tsis pom Fis Lis Pos ntxiv. Tab sis tus nom sam xyiv fab hlo taug nws txoj kev mus ntxiv. 40 Hos Fis Lis Pos mas, nws tshwm hauv lub zos As Ntxos, nws taug kev mus ntxiv. Nws tshaj lub Moo Zoo rau cov nroog uas nws hla tas huv si. Nws ua li ntawd mus txog Xes Ntxas Les.

    Zam 6: 44-51
    44 Tsis muaj leej twg tuaj cuag kuv tau, yog Leej Txiv uas xa kuv tuaj tsis rub nws los. Hos kuv, mas Hnub Kawg, kuv yuav tsa nws sawv rov qab los. 45 Cov Yaj Saub Phau Ntawv sau hais tias: "Tswv Ntuj yuav qhia sawv daws huv tib si." Tus twg hnov Leej Txiv lub suab thiab txais nws lo lus qhia, mas tus ntawd tuaj cuag kuv. 46 Tsis muaj leej twg tau pom Leej Txiv. Tsuas yog tus tuaj ntawm Tswv Ntuj tuaj thiaj tau pom Leej Txiv. 47 Kuv hais qhov muaj tseeb tiag rau nej : Tus ntseeg, nws muaj txoj sia nyob mus li. 48 "Kuv yog cov mov muaj txoj sia. 49 Nej cov yawg koob tau noj cov mov mas nas hauv teb chaws suab puam, tab sis lawv tuag tas lawm. 50 Cov mov nqes saum ntuj los yog zoo li no : tus noj cov mov no, nws tsis tuag. 51 Kuv yog cov mov muaj txoj sia nqes saum ntuj los. Leej twg noj cov mov no, nws yuav ciaj nyob mus li. Cov mov uas kuv yuav muab pub rau lub qab ntuj neeg noj kom lawv muaj txoj sia, yog kuv lub cev nqaij."


    Sponsored content

    Re: COV ZAJ NYEEM NRUAB LIS PIAM 2012

    Post  Sponsored content Today at 11:28 pm


      Current date/time is 6th December 2016, 11:28 pm