COV ZAJ NYEEM NRUAB LIS PIAM XYOO B 2020-2021

Tim 16 lub 8 Hli 2021

Hnub Ob Lis Piam Nees Nkaum Nruab Xyoo B Nruab Lis Piam Xyoo I
Lectionary: 419

XHLT: LN Stephen nyob Hungary

Zaj Nyeem Ib: TXWJ LAUS TIV THAIV 2: 11-19

11 Cov His Xas Lais ua qhov HUAB TAIS saib yog qhov phem, lawv mus tsob hwb cov dab Npas As.
12 Lawv tso HUAB TAIS lawv cov yawg koob tus Tswv Ntuj pov tseg, tus uas tau coj lawv tawm hauv Hais Nkws Tos teb los. Lawv mus teev lwm cov dab, uas yog cov pej kum haiv neeg nyob ib ncig ntawm lawv tej dab. Lawv mus khoov pe hawm cov dab ntawd, ua rau HUAB TAIS npau taws.
13 Lawv tso HUAB TAIS tseg, lawv mus tsob hwb cov dab Npas As thiab As Tas Tes.
14 Ces HUAB TAIS thiaj npau taws rau cov His Xas Lais, nws tso lawv rau tub sab tes, tub sab thiaj tuaj lwg lawv; thiab nws tso lawv rau lawv cov yeeb ncuab uas nyob ib ncig ntawm lawv tes, ces lawv tiv tsis yeej cov yeeb ncuab ntawd lawm.
15 Thaum twg lawv sawv kev mus qhov twg, mas HUAB TAIS txhais tes ua kom lawv tau txoj hmoov phem, raws li HUAB TAIS tau hais rau lawv thiab tau cog lus rau lawv lawm, ces lawv raug kev txom nyem loj kawg nkaus.
16 Ces HUAB TAIS thiaj li tsa ib co Txwj Laus Tiv Thaiv sawv tuaj cawm cov His Xas Lais dim ntawm cov neeg tuaj lwg lawv tes.
17 Tab sis cov His Xas Lais tsis mloog cov Txwj Laus Tiv Thaiv lus li, lawv tseem ntxeev siab ua niam ntiav mus teev thiab pe hawm lwm cov dab thiab; ces tsis ntev xwb, lawv twb ncaim ntawm txoj kev lawv cov yawg koob taug lawm, uas yog mloog HUAB TAIS cov lus qhia; lawv tsis ua li ntawd li.
18 Lub caij HUAB TAIS tsa cov Txwj Laus Tiv Thaiv tuaj pab cov His Xas Lais, mas HUAB TAIS nrog nraim tus Txwj Laus uas nyob lub sij hawm ntawd. Tas lub caij tus Txwj Laus tseem ua neej nyob, mas Huab Tais txuag cov His Xas Lais ntawm lawv cov yeeb ncuab txhais tes, vim HUAB TAIS lub siab hlub lawv thaum lawv nroo lawv quaj vim tias luag yuam lawv hiam lawv.
19 Tab sis thaum twg tus Txwj Laus Tiv Thaiv tuag lawm, mas lawv rov qab tig mus ua phem li qub; lawv tseem ua phem dua lawv phaj txiv phaj yawg lawm thiab. Lawv mus teev lwm cov dab, mus tsob hwb thiab pe hawm lwm cov dab, lawv yeej ua siab tawv qhawv tsis kam tso lawv txoj kev ua phem thiab tus yam ntxwv tsis zoo ntawd pov tseg li.

NPN 106: 34-35, 36-37, 39-40, 43ab+44

Txais: (4a) Thov koj nco txog peb, Huab Tais, vim koj nyiam koj haiv neeg.

Lawv tsis rhuav lwm haiv neeg kom ploj tas
raws li HUAB TAIS tau kom lawv ua.
Lawv tseem mus nrog lwm lub kuj cuab sib fim,
thiab xyaum ua raws li cov neeg ntawd.

Txais: (4a) Thov koj nco txog peb, Huab Tais, vim koj nyiam koj haiv neeg.

Lawv tsob hwb lwm haiv neeg cov mlom,
ces cov mlom ntawd yog ib rooj ntxiab cuab tau lawv.
Lawv muab lawv cov tub thiab
lawv cov ntxhais tua txi rau dab phem.

Txais: (4a) Thov koj nco txog peb, Huab Tais, vim koj nyiam koj haiv neeg.

Tej yam lawv ua ua kom lawv tsis dawb huv,
lawv yim ua phem lawv yim ua ntau tsis kam tso tseg.
HUAB TAIS lub siab npau taws rau nws haiv neeg,
ces nws tsis xav ntsia nws lub cuab tam ntxiv.

Txais: (4a) Thov koj nco txog peb, Huab Tais, vim koj nyiam koj haiv neeg.

Ntau zaus, nws tau npo lawv dim,
tab sis lawv lub tswv yim phem ua rau nws tu siab .
Txawm li ntawd los nws tseem hlub lawv thaum lawv txom nyem,
thaum nws hnov lawv lub suab quaj .

Txais: (4a) Thov koj nco txog peb, Huab Tais, vim koj nyiam koj haiv neeg.

As Les Lus Yas: MT 5: 3

Txais: As les lus yas, as les lus yas.

Cov muaj hmoov zoo yog cov pluag hauv nruab siab,
vim lub Ceeb Tsheej saum ntuj yog lawv li.

Txais: As les lus yas, as les lus yas.

Ntawv Moo Zoo: MT 19: 16-22

16 Muaj ib tug tub hluas tuaj cuag Yes Xus, nws hais rau Yes Xus tias: “Xib Hwb siab zoo, kuv yuav ua tej yam zoo twg, kuv thiaj tau txoj sia nyob mus li?”
17 Yes Xus teb rau nws tias: “Vim li cas koj nug kuv txog qhov zoo? Tsuas muaj tib leeg xwb thiaj yog tus zoo. Yog koj xav muaj txoj sia, mas koj yuav ua raws li cov lus qhia.”
18 Tus ntawd hais tias: “Cov lus qhia twg?” Yes Xus hais rau nws tias: “Koj txhob tua neeg, koj txhob zes luag txij luag nkawm, koj txhob ua tub sab, koj txhob ua tim khawv cuav,
19 koj yuav hwm koj niam koj txiv, koj yuav nyiam tus nyob ze koj ib yam li koj nyiam koj.”
20 Tus tub hluas hais rau Yes Xus tias: “Kuv yeej ua raws li ntawd tas huv tib si lawm. Tseem tshuav dab tsi kuv tsis tau ua?”
21 Yes Xus hais rau nws tias: “Yog koj xav kom koj ua zoo tshaj, mas koj rov mus muab txhua yam uas yog koj tug muag, muab pub rau cov pluag, kom koj muaj ib lub cuab tam muaj nqis loj nyob saum ntuj, ces koj los raws kuv."
22 Thaum tus tub hluas hnov cov lus no tas, nws rov mus tsev ib tug mluas mlob, vim nws muaj cuab yeej cuab tam ntau.

Tim 17 lub 8 Hli 2021

Hnub Peb Lis Piam Nees Nkaum Nruab Xyoo B Nruab Lis Piam Xyoo I
Lectionary: 420

Zaj Nyeem Ib: TLTT 6: 11-24a

11 HUAB TAIS tus Tshiab nqes los zaum hauv tsob qab ntoo qhib nyob Os Fas uas yog Yos As, ib tug neeg As Npis Es Xes tsob. Nws tus tub Zes Des Oos tab tom ntaus nplej hauv lub zom cawv kom cov Mas Dias txhob nrhiav tau.
12 HUAB TAIS tus Tshiab yees tawm los rau Zes Des Oos pom, nws hais tias: "Tub rog siab tawv muaj peev xwm, HUAB TAIS nrog koj nyob!"
13 Zes Des Oos teb rau nws tias: "Tus yawg hlob, yog HUAB TAIS nrog peb tiag, tim li cas tas puas tsav yam thiaj tuaj raug peb zoo li no? Nws cov hwj huam loj uas peb phaj txiv piav rau peb tias: ‘HUAB TAIS yog tus coj peb tawm ntawm Hais Nkws Tos teb los,’ nyob qhov twg? Nyem no nws tso peb pov tseg, nws cia peb poob rau hauv cov Mas Dias txhais tes lawm."
14 Ces HUAB TAIS tig los hais rau Zes Des Oos tias: "Koj mus, koj siv lub zog uas koj muaj mus cawm cov His Xas Lais ntawm cov Mas Dias tes. Kuv yog tus xa koj mus."
15 Zes Des Oos teb tias: " HUAB TAIS, kuv yuav ua li cas cawm tau His Xas Lais? Kuv lub xeem yog xeem qis tshaj nyob hauv Mas Nas Xes, thiab kuv yog tus me tshaj cov nyob hauv kuv txiv tsev."
16 Tiam sis HUAB TAIS hais rau nws tias: "Kuv yuav nrog koj, ces koj yuav ntaus yeej cov Mas Dias, Ib yam li lawv yog ib leeg xwb."
17 Zes Des Oos hais tias: "Yog kuv ua neeg xis koj siab, mas thov koj ua ib lub cim qhia kuv kom kuv paub tias yog koj hais lus rau kuv tiag.
18 Thov koj tsis txhob txav mus deb ntawm no, koj tos kom kuv rov tuaj cuag koj tso; kuv yuav nqa paj tshab tuaj rau koj, kuv yuav coj tuaj tso rau ntawm koj xub ntiag." Ces HUAB TAIS teb tias: "Kuv yuav nyob tos koj rov tuaj txog tso."
19 Zes Des Oos thiaj mus tom nws tsev. Nws npaj ib tug tshis thiab nws yeem ib tawb hmoov nplej ua ib co mov tsis xyaw poov xab. Nws muab cov nqaij tso rau hauv ib lub pob tawb, hos cov kua nqaij rau hauv ib lub lauj kaub. Ces nws nqa tuaj rau HUAB TAIS nyob hauv tsob qab ntoo qhib thiab muab cev rau nws.
20 Tswv Ntuj tus Tshiab hais rau Zes Des Oos tias: "Koj muab cov nqaij thiab muab cov mov tsis xyaw poov xab tso rau saum lub pob zeb no, thiab koj hliv cov kua rau." Zes Des Oos ua li ntawd tas.
21 Ces HUAB TAIS tus Tshiab cev tus ntsis pas uas nws tuav ntawm nws tes mus chwv cov nqaij thiab cov ncuav mov. Hluav taws cia li cig plaws hauv lub pob zeb tuaj kub cov nqaij thiab cov ncuav mov tas tib si. Ces HUAB TAIS tus Tshiab ploj ntais ntawm nws qhov muag lawm.
22 Zes Des Oos paub tias yog HUAB TAIS tus Tshiab tiag. Nws txawm hais tias: "HUAB TAIS Tswv Ntuj aw, Kuv tau pom koj tus Tshiab tim ntsej tim muag kiag lawm tiag lau!"
23 HUAB TAIS hais rau nws tias: "Ua sia tus tus, tsis txhob ntshai. Koj yuav tsis tuag."
24 Zes Des Oos thiaj tsa ib lub thaj txi HUAB TAIS nyob ntawd, thiab nws hu qhov chaw ntawd ua "HUAB TAIS Kev Thaj Yeeb."

NPN 85: 9, 11-12, 13-14

Txais: (9b) Huab Tais tham txog kev thaj yeeb rau nws haiv neeg.

Kuv yuav hnov qhov Tswv Ntuj tshaj tawm;
Huab Tais, nws tshaj tawm txog kev thaj yeeb
rau nws haiv neeg thiab cov neeg ntseeg nws,
thiab rau cov uas tso siab rau nws.

Txais: (9b) Huab Tais tham txog kev thaj yeeb rau nws haiv neeg.

Kev ua sia zoo thiab kev tseeb yuav los sib ntsib,
Kev ncaj ncees thiab kev thaj yeeb yuav los sib qawg.
Kev tseeb yuav txhawv tawm hauv ntiaj teb los,
kev ncaj ncees yuav dauv muag ntsia saum ntuj tuaj.

Txais: (9b) Huab Tais tham txog kev thaj yeeb rau nws haiv neeg.

HUAB TAIS yuav pub nws txoj kev nplua nuj,
ces peb cov av yuav ntsu qoob ntsu loo ntau tuaj.
Kev ncaj ncees yuav taug kev ua nws ntej,
kev cawm yuav taug raws nws cov hneev taw.

Txais: (9b) Huab Tais tham txog kev thaj yeeb rau nws haiv neeg.

As Les Lus Yas: 2 KLN 8: 9

Txais: As les lus yas, as les lus yas.

Yes Xus Pleev tau ua neeg pluag txawm tias nws yog tus nplua nuj,
kom xwv nws txoj kev pluag ua kom nej nplua nuj tuaj.

Txais: As les lus yas, as les lus yas.

Ntawv Moo Zoo: MT 19: 23-30

23 Yes Xus hais rau nws cov thwj tim tias: “Kuv hais tseeb rau nej, ib tug neeg nplua nuj yuav ceeb laj nkag mus tau hauv lub Ceeb Tsheej saum ntuj.
24 Kuv rov hais dua rau nej, ib tug ntxhuav yuav nkag hauv ib lub qhov koob, mas tseem yooj yim dua ib tug neeg nplua nuj yuav nkag mus hauv Tswv Ntuj lub Ceeb Tsheej.”
25 Cov thwj tim hnov cov lus ntawd, lawv poob siab tas, lawv hais tias: “Yog li leej twg thiaj yuav tau txais kev cawm?”
26 Yes Xus ntsia ntsoov lawv, nws hais rau lawv tias: “Rau neeg mas yeej tsis tau li; tab sis, rau Tswv Ntuj, mas yuav ua tau tas ib puas tsav yam.”
27 Ces Pob Zeb hais rau Yes Xus tias: “Yog li, peb tau tso ib puas tsav yam tseg, peb los raws koj lawm, peb yuav tau dab tsi?”
28 Yes Xus hais rau lawv tias: “Kuv hais tseeb rau nej cov uas los raws kuv tias, nyob hauv lub caij tshiab, uas yog thaum Neeg Leej Tub yuav zaum saum nws lub theej kiab muaj hwj chim, mas nej kuj yuav zaum saum kaum ob lub theej kiab, txiav txim rau kaum ob lub xeem His Xas Lais thiab.
29 Txhua tus uas tau tso vaj tse, kwv tij nkauj muam, niam txiv, me tub me nyuam thiab tso liaj teb tseg, vim kuv lub npe, mas tus ntawd yuav tau txais ib puas npaug tshaj, thiab nws tseem yuav tau txoj sia nyob mus li los ua nws tug.
30 Tiam sis muaj coob leej cov ua ntej yuav tuaj tom qab, hos cov tuaj tom qab yuav tau ua ntej.”

Tim 18 lub 8 Hli 2021

Hnub Plaub Lis Piam Nees Nkaum Nruab Xyoo B Nruab Lis Piam Xyoo I
Lectionary: 421

Zaj Nyeem Ib: TLTT 9: 6-15

6 Tas cov neeg nyob Xis Kes thiab tas cov nyob Npev Mis Los tuaj sib sau ua ke thiab lawv mus tsa As Npis Mes Lev ua vaj nyob ze tsob ntoo qhib ntawm daim ncej zeb nyob Xis Kes.
7 Muaj neeg mus hais qhia rau Yos Tas paub, ces Yos Tas nce mus nyob saum lub ncov roob Nkas Lis Xis. Nws qw nrov nrov rau lawv tias: "Cov neeg nyob Xis Kes, nej mloog kuv hais, ces Tswv Ntuj thiaj yuav mloog nej!
8 Muaj ib hnub cov ntoo sawv kev mus, lawv mus pleev roj tsa ib tug vaj los kav lawv. Lawv hais rau tsob txiv ntoo roj tias: ‘Koj ua vaj kav peb mas!’
9 Tsob txiv ntoo roj teb lawv tias: ‘Vim li cas kuv thiaj yuav tso kuv cov roj pov tseg, uas yog siv los hwm tej dab thiab tib neeg, es mus nyob piav cev yuj yees saum cov ntoo xwb ?’
10 Ces cov ntoo mus hais rau tsob txiv ncuav pias tias: ‘Koj los ua vaj kav peb mas!’
11 Tsob txiv ncuav pias teb lawv tias: ‘Vim li cas kuv thiaj yuav tso kuv qhov qab zib thiab kuv cov txiv uas yog yam zoo pov tseg es mus nyob piav cev yuj yees saum cov ntoo xwb?’
12 Cov ntoo txawm mus hais rau tsob hmab txiv cawv tias: ‘Koj los ua vaj kav peb!’
13 Tsob hmab txiv cawv teb tias: ‘Vim li cas kuv thiaj yuav tso kuv cov cawv uas txawj ua kom dab thiab neej zoo siab pov tseg es mus nyob piav cev yuj yees nyob saum cov ntoo xwb?’
14 Ces cov ntoo mus hais rau tsob pos tias : ‘Koj los ua vaj kav peb!’ Tsob pos teb tias: ‘Yog nej ua siab ncaj tsa kuv los ua vaj kav nej tiag mas nej yuav tsum los nkaum hauv kuv qhov ntxoov ntxoo.
15 Tsis li ntawd ces hluav taws yuav tawm hauv tsob pos tuaj kub tas cov ntoo ciab nyob Lis Npaas.’”

NPN 21: 2-3, 4-5, 6-7

Txais: (2a) Huab Tais, tus vaj zoo siab nyob hauv koj lub zog.

HUAB TAIS, tus vaj zoo siab nyob hauv koj lub zog :
Nyob hauv koj txoj kev yeej nws zoo siab tas nrho.
Koj tau pub rau nws raws nraim nws lub siab ntshaw.
Koj tau mloog lo lus thov uas tawm ntawm nws di ncauj losj.

Txais: (2a) Huab Tais, tus vaj zoo siab nyob hauv koj lub zog.

Koj tau tos txais nws foom koob foom hmoov zoo kawg nkaus rau nws;
koj muab ib lub mom teev kub yog tseem kub rau nws ntoo.
Nws thov koj kom nws tau txoj sia, koj muab rau nws,
koj pub nws nyob ntev niaj ntau xyoo mus li tsis txawj kawg.

Txais: (2a) Huab Tais, tus vaj zoo siab nyob hauv koj lub zog.

Nws lub koob meej nto moo loj nyob hauv koj txoj kev yeej;
koj muab hwj chim thiab muab kev ci ntsa iab rau nws.
Koj muab nws ua ib txoj hmoov zoo mus li rau txhua leej;
Koj lub ntsej muag luag ntxhi ua kom nws zoo siab.

Txais: (2a) Huab Tais, tus vaj zoo siab nyob hauv koj lub zog.

As Les Lus yas: Hes Nplaws 4: 12

Txais: As les lus yas, as les lus yas.

Tswv Ntuj lo lus muaj sia thiab ua tau hauj lwm,
nws txawj tsom tau tej tswv yim thiab
tej kev xav nyob hauv neeg nruab siab.

Txais: As les lus yas, as les lus yas.

Ntawv Moo Zoo: MT 20: 1-16

Yes Xus hais zaj paj lug no rau nws cov thwj tim tias:
1 Lub Ceeb Tsheej saum ntuj muab piv tau rau ib tug tswv teb uas thaum kaj ntug, nws tawm mus nrhiav tub zog tuaj ua nws daim teb txiv cawv.
2 Nws nrog cov tub zog sib hais haum ib hnub ib lub txiaj nyiag ua nqe zog, ces nws xa lawv mus tom nws daim teb txiv cawv lawm.
3 Ze cuaj teev, nws tawm mus ncig, nws rov pom ib co neeg nyob dag tom tshav puam.
4 Nws hais rau lawv tias : “Nej mus ua num tom kuv daim teb txiv cawv mas, kuv yuav muab nqi kom haum rau nej.”
5 Ces lawv kuj mus lawm. Kwv yees tav su, nws rov tawm mus ncig dua, thiab thaum hnub qaij peb teev nws kuj rov mus ua li qub dua.
6 Thaum ze li tsib teev yav yuav tsaus ntuj, nws rov tawm mus ncig, nws tseem pom ib co neeg nyob dag, nws hais rau lawv tias: “Vim li cas nej nyob dag tas hnub ntawm no tsis ua dab tsi li ?”
7 Lawv hais rau nws tias : “Vim tsis muaj neeg ntiav peb.” Tus tswv hais rau lawv tias : “Nej kuj mus ua num tom kuv daim teb txiv cawv thiab.”
8 Thaum tsaus ntuj, tus tswv teb hais rau nws tus tub ceev nyiaj tias : “Koj hu cov tub zog los, koj muab nyias tus nqe zog rau nyias, pib hu cov tuaj tom qab zuj zus los xaus rau cov xub tuaj.”
9 Cov tub zog uas tuaj thaum tsib teev los txog, lawv ib leeg tau ib lub txiaj nyiag.
10 Ces cov xub xub tuaj los txog, lawv xav tias lawv yuav tau txais nqi zog ntau dua, tab sis lawv ib leeg kuj tau ib lub txiaj nyiag thiab xwb.
11 Thaum lawv los txais lawv tus nqi, lawv yws rau tus tswv teb tias :
12 “Cov tuaj tom qab ua num ib nyuag teev xwb, koj muab rau lawv ib yam li muab rau peb thiab, hos peb, mas peb kwv nra hnyav thiab tiv tshav ib hnub nkaus.”
13 Ces tus tswv teb rau cov xub tuaj ib tug tias : “Npawg, kuv tsis tau ua tsis ncaj rau koj : wb tsis tau hais haum tias ib hnub ib lub txiaj nyiag no lod ?
14 Txais koj tus nqi zog, koj cia li mus. Yog kuv xav muab rau tus tuaj tom qab no, ib yam li muab rau koj ne?
15 Kuv tsis muaj cai rho kuv tej nyiaj txiag raws li kuv siab nyiam lod ? Los yog koj khib vim koj pom tias kuv siab zoo ?"
16 Li ntawd, cov tuaj tom qab yuav tau ua ntej, hos cov ua ntej yuav tuaj tom qab zoo li no.

Tim 19 lub 8 Hli 2021

Hnub Tsib Lis Piam Nees Nkaum Nruab Xyoo B Nruab Lis Piam Xyoo I
Lectionary: 422

XHLT: LN John Eudes, ua Leej Choj

Zaj Nyeem Ib: TLTT 11: 29-39a

29 HUAB TAIS lub tswv yim tuaj nyob saum Zes Faws Tes; nws mus ncig Nkas Las As thiab Mas Nas Xes teb, nws hla ntawm Mis Xaws Pes nyob Nkas Las As teb ces nws mus ntawd mus txog cov As Mos Lis teb.
30 Zes Faws Tes fiv ib lub yeem rau HUAB TAIS tias: "Yog koj muab cov As Mos Lis rau hauv kuv xib tes,
31 mas thaum kuv rov qab los tsev, thawj tug neeg tawm hauv kuv tsev tuaj tos kuv mas tus ntawd yuav yog HUAB TAIS li. Kuv yuav muab nws txi rau HUAB TAIS."
32 Ces Zes Faws Tes hla mus hauv cov As Mos Lis mus ntaus lawv; HUAB TAIS muab lawv tso rau hauv nws txhais tes.
33 Nws ntaus yeej lawv txij ntawm lub nroog As Los Es mus rau ze ntawm lub nroog Mis Nis, tas nrho yog nees nkaum lub nroog, mus txog ntua rau As Npes Kes Las Mis, ua rau lawv loj kawg. Ces cov As Mos Lis thiaj poob rau cov His Xas Lais lub qab tswj fwm zoo li no.
34 Thaum Zes Faws Tes rov los tsev nyob Mis Xaws Pes, nws tus ntxhais ntaus nruas yoj cev yees tuaj tos nws. Yog nws tib tug tug ntxhais twm zeej, nws tsis muaj tub muaj ntxhais ntxiv lawm.
35 Zes Faws Tes pom dheev nws tus ntxhais, Zes Faws Tes dua rhe nws lub tsho, nws hais tias: "Kuv me ntxhais, cas koj yuav ua rau kuv poob qis ua luaj thiab koj yuav muab ib txog kev nyuaj siab loj ua luaj rau kuv! Vim kuv tau cog lus rau HUAB TAIS lawm, kuv thim tsis tau kuv cov lus!"
36 Tus ntxhais teb tias: "Kuv txiv, koj cog lus rau HUAB TAIS lawm, mas koj ua rau kuv xws li koj tau hais, vim HUAB TAIS twb pub koj ua pauj rau koj cov yeeb ncuab As Mos Lis lawm."
37 Tus ntxhais hais rau nws txiv tias: "Kuv thov koj kheev kuv ua li no: Koj pub ob lub hlis rau kuv, kuv yuav nqes mus lawm nram cov roob nrog kuv cov viv ncaus phooj ywg zoo, kuv yuav mus quaj txog kuv lub cev nkauj xwb."
38 Nws txiv hais tias: "Koj mus tau." Ces nws cia nws tus ntxhais mus tau ob lub hlis. Tus ntxhsais mus nyob saum cov roob nrog nws cov viv ncaus phooj ywg quaj txog nws lub cev nkauj xwb.
39a Thaum puv ob hlis lawm, tus ntxhais rov los cuag nws txiv, ces nws txiv thiaj ua rau tus ntxhais raws li lub yeem nws tau fiv.

NPN 40: 5, 7-8a, 8b-9, 10

Txais: (8a+9a) Kuv nyob ntawm no, HUAB TAIS, kuv tuaj ua ywj koj siab.

Muaj hmoov zoo yog tus neeg uas tso siab rau HUAB TAIS,
Tsis tig mus rau txoj kev tsis hwm Ntuj,
Los tsis mus caum cov neeg taug tej zaj cuav.

Txais: (8a+9a) Kuv nyob ntawm no, HUAB TAIS, kuv tuaj ua ywj koj siab.

Koj tsis ntshaw tsiaj los txhiam xws txi rau koj,
tiam sis koj muab pob ntseg rau kuv kom kuv cuab ntsej mloog lus.
Koj tsis xav tau tsiaj hlawv txi ntuj los tsiaj hlawv them txim txhaum,
kuv thiaj hais tias: “Kuv nyob ntawm no, cia kuv tuaj.”

Txais: (8a+9a) Kuv nyob ntawm no, HUAB TAIS, kuv tuaj ua ywj koj siab.

Nyob hauv kauj ntawv muaj lus sau tseg txog kuv tias:
“Ua ywj koj lub siab, kuv tus Tswv Ntuj, yog yam ntxim kuv siab,
koj txoj cai nyob rawv hauv kuv nruab plaw!”

Txais: (8a+9a) Kuv nyob ntawm no, HUAB TAIS, kuv tuaj ua ywj koj siab.

Kuv tau tshaj koj txoj kev ncaj nyob hauv lub txoos muaj neeg coob,
kuv tsis tau kaw kuv lub qhov ncauj, HUAB TAIS, koj yeej paub.

Txais: (8a+9a) Kuv nyob ntawm no, HUAB TAIS, kuv tuaj ua ywj koj siab

As Les Lus Yas: NPN 95: 8

Txais: As les lus yas, as les lus yas.

Yog hnub no nej hnov nws lub suab,
nej tsis txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo: MT 22: 1-14

1 Yes Xus tsa ncauj rov ua paj lug hais rau cov thawj leej choj thia cov txwj laus ntxiv tias :
2 “Lub Ceeb Tsheej saum ntuj mua oiv tau rau ib tug vaj uas nws ua tshoob rau nws tus tub.
3 Nws xa tub txib mus nqua hu cov neeg raug caw tuaj noj pluas tshoob, tab sis lawv tsis kam tuaj.
4 Nws rov xa dua ib pab tub txib mus zaum ob, nws hais li no: ‘Nej hais rau cov raug caw tias: Nej saib, kuv twb npaj kuv rooj nqaij rooj hno tiav tas, kuv tej heev nyuj thiab cov tsiaj rog puav leej tua tas lawm. Txhua yam npaj txhij tas lawm. Nej kav tsij tuaj noj tshoob!’
5 Tab sis cov neeg ntawd tsis quav ntsej li, lawv nyias mus nyias tas: ib tug mus tom teb, ib tug mus ua luam.
6 Hos lwm cov ntes cov tub txib, muab lawv hiam, thiab muab lawv tua.
7 Tus vaj npau taws, nws xa nws cov tub rog mus tua cov neeg txo luag siav ntawd thiab hlawv lawv lub nroog.
8 Ces nws hais rau nws cov tub txib tias: ‘Rooj tshoob npaj tiav tas lawm, tab sis cov neeg raug caw tsis tsim nyog tuaj noj.
9 Nej mus tom tej ncauj ke, nej pom tsawg leej, nej nqua hu kom tuaj noj rooj tshoob.’
10 Cov tub txib mus tom tej kev, lawv sau tas txhua leej txhua tus uas lawv ntsib, cov phem cov zoo tuaj huv tib si. Neeg tuaj puv nkaus lub tsev noj tshoob.
11 Thaum tus vaj chaws los xyuas cov neeg tuaj koom rooj tshoob, nws pom nyob ntawd ib tug neeg tsis hnav tsoos noj tshoob.
12 Tus vaj hais rau nws tias: ‘Npawg, koj tsis hnav tsoos noj tshoob, ua cas koj los rau hauv no?’ Tus neeg ntawd nyob ntsiag to.
13 Ces tus vaj hais rau cov tub txib tias: ‘Nej muab nws pav tes pav taw, muab nws pov rau nraum zoov, rau hauv qhov tsaus ntuj nti; nyob ntawd, yuav muaj quaj laug laws tom hniav nkawv.’
14 Vim tias muaj ntau leej raug caw, tab sis muaj tsawg leej raug xaiv.”

Tim 20 lub 8 Hli 2021

Hnub Rau Lis Piam Nees Nkaum Nruab Xyoo B Nruab Lis Piam Xyoo I
Lectionary: 423

Yuav Hwm LN Bernard, Thawj Coj Koom Haum thiab Kws cov Txuj Ntshiab

Zaj Nyeem Ib: LUV 1: 1, 3-6, 14b-16, 22

1 Muaj ib zaug thaum lub caij muaj cov Txwj Laus Tiv Thaiv, lub teb chaws tau tshaib plab. Thaum ntawd muaj ib tug txiv neej nyob Npes Les Hes, Yus Das teb, nws coj nws poj niam thiab nws ob tug tub lawv tsiv mus nyob ib ntus nram cov nras teb Mos As.
3 Es Lis Mes Lev, uas yog Nos Es Mis tus txiv, tuag nyob ntawd, tshuav Nos Es Mis nrog nws ob tug tub nyob xwb.
4 Ob tug tub ntawd yuav poj niam nyob hauv cov neeg Mos As Npis. Ob tug poj niam ntawd ib tug hu ua Os Pas, ib tug hu ua Luv. Lawv nyob ntawd tau kaum xyoo.
5 Ces ob tug tub Mas Loos thiab Kis Lis Yoos nkawd kuj tuag thiab. Tshuav Nos Es Mis ib leeg xwb, nws tsis muaj tub tsis muaj txiv lawm.
6 Nos Es Mis thiaj npaj yuav coj nws ob tug nyab rov ntawm lub tiaj Mos As los rau nws teb chaws, vim nyob ntawd, nws hnov tias Tswv Ntuj tuaj xyuas nws haiv neeg thiab pub mov rau lawv noj lawm.
14b Ces Os Pas nwj nws niam pog, nws ua siab rov mus nrog nws neej nws tsav nyob, tshuav Luv nrog Nos Es Mis nyob xwb.
15 Nos Es Mis hais rau Luv tias: "Koj saib koj tus viv ncaus twb rov mus hauv nws haiv neeg thiab mus coj lawv cov dab qhuas lawm. Koj ua li nws thiab koj rov mus mog!"
16 Luv teb tias: "Koj tsis txhob ntiab kuv kom kuv tso koj tseg los kom kuv ncaim koj mus! Koj mus qhov twg, kuv yuav nrog koj mus. Koj nyob qhov twg, kuv yuav nrog koj nyob. Koj haiv neeg yog kuv haiv neeg. Koj tus Tswv Ntuj yog kuv tus Tswv Ntuj.”
22 Ces Nos Es Mis coj nws tus nyab Mos As Npis hu ua Luv nrog nws rov los. Nkawd rov ntawm cov nras teb Mos As los, nkawd los txog Npes Les Hes tab tom yog lub caij pib sau qib lawm.

NPN 146: 5-6ab, 6c-7, 8-9a, 9bc-10

Txais: (1b) Kuv tus plig, koj cav lus zoo txog HUAB TAIS !

Muaj hmoov zoo yog tus tau Yas Kos tus Tswv Ntuj nres nws,
Yog tus tso siab rau HUAB TAIS nws tus Tswv Ntuj,
uas yog tus tswv tsim lub ntuj lub teb,
tsim dej ntuj thiab ib puas tsav yam nyob hauv dej.

Txais: (1b) Kuv tus plig, koj cav lus zoo txog HUAB TAIS!

Nws txuag txoj kev tseeb kom nyob mus ib txhiab ib txhis;
nws txiav rxim ncaj rau cov raug luag quab yuam,
nws pub mov rau cov neeg tshaib noj;
HUAB TAIS tso cov neeg raug txim kom dim.

Txais: (1b) Kuv tus plig, koj cav lus zoo txog HUAB TAIS!

HUAB TAIS qhib cov dig muag qhov muag,
HUAB TAIS tsa cov khoov nkoos kom sawv ntseg,
HUAB TAIS nyiam cov neeg ncaj,
HUAB TAIS pov hwm cov pej kum neeg.

Txais: (1b) Kuv tus plig, koj cav lus zoo txog HUAB TAIS!

Nws txhawb tus ntsuag nos thiab tus poj ntsuam,
nws ua kom tus siab phem tau kev tws.
HUAB TAIS yuav ua vaj mus li;
Xis Yoos, koj tus Tswv Ntuj ua vaj
mus txheej dhau txheej ! As les lus yas!

Txais: (1b) Kuv tus plig, koj cav lus zoo txog HUAB TAIS !

As Les Lus Yas: NPN 25: 4b, 5a

Txais: As les lus yas, as les lus yas.

Kuv tus Tswv Ntuj, thov qhia koj txoj kev rau kuv taug,
thiab coj kuv mus nyob hauv koj txoj kev tseeb.

Txais: As les lus yas, as les lus yas.

Ntawv Moo Zoo: MT 22: 34-40

34 Cov Fas Lis Xais hnov tias Yes Xus teb rau cov Xas Dus Kais tws lus, ces lawv sib sau sab laj.
35 Lawv ib tug tuaj sim Yes Xus, nws yog ib tug kws lij choj, nws nug tias:
36 “Xib Hwb, nyob hauv Txoj Cai, lo lus qhia twg loj dua cov?”
37 Yes Xus hais rau nws tias: “Koj yuav muab tas koj lub siab, tas koj tus ntsuj plig, tas koj lub tswv yim los nyiam Huab Tais koj tus Tswv Ntuj.
38 Lo lus no yog lo lus qhia loj tshaj cov thiab yog thawj lo lus qhia.
39 Lo lus qhia ob zoo li ntawd thiab: Koj yuav nyiam tus nyob ze koj ib yam li koj nyiam koj.
40 Tas Txoj Cai thiab cov Yaj Saub puav leej xaus tas nrho rau ob lo lus qhia no."

Tim 21 lub 8 Hli 2021

Hnub Xya Lis Piam Nees Nkaum Nruab Xyoo B Nruab Lis Piam Xyoo I
Lectionary: 424

Yuav hwm LN Pis Yus (Pius) X, ua Vaj Qhia

Zaj Nyeem Ib: LUV 2: 1-3, 8-11; 4:13-17

1 Nos Es Mis tshuav nws tus txiv ib tug kwv tij txheeb, yog ib tug neeg tsim txiaj muaj npe thiab yog Es Lis Mes Lev tsev neeg. Nws hu ua Npuag Oo.
2 Luv, tus neeg Mos As Npis, hais rau Nos Es Mis tias: "Thov koj kheev kuv mus tom lawv tej teb mus nkawg ntxaib nplej ntawm tus uas txaus siab kom kuv ua li ntawd lawv nws qab." Nos Es Mis teb tias: "Kuv me ntxhais, koj mus mas."
3 Luv thiaj mus nkawg nplej lawv cov neeg hlais nplej qab. Nws txoj hmoo mus ncaj rau hauv Npuag Oo uas yog Es Lis Mes Lev tsev neeg daim teb.
8 Npuag Oos hais rau Luv tias: "Me ntxhais, koj tsis txhob mus khaws nplej nyob hauv luag lwm daim teb mog! Koj tsis txhob txav ntawm no mus, koj raws nraim kuv cov ntxhais txib xwb.
9 Koj ntsia ntsoov lawv hlais nplej nyob qhov twg ces koj raws nraim lawv qab. Kuv txwv tsis kheev kuv cov tub hluas ua phem rau koj. Yog koj nqhis dej mas koj mus hliv hauv cov plhuaj taub uas cov hluas twb ce tau lawm los haus."
10 Ces Luv txhos caug ntua khoov ti av pe Npuag Oos tias: "Vim li cas koj thiaj ua zoo rau kuv thiab saib taus kuv? Kuv yog ib tug pej kum neeg xwb!"
11 Npuag Oos teb tias: "Vim kuv tau hnov lawv hais txog koj rau kuv, lawv piav tej koj tau ua rau koj niam pog thaum koj tus txiv tuag lawm. Koj tso koj niam koj txiv thiab koj lub teb chaws tseg thiab koj tuaj nyob ib lub teb chaws uas koj tsis tau xub paub dua li.
4: 13 Ces Npuag Oos yuav Luv los ua nws poj niam. Thaum nkawd tau los nyob ua ke lawm, HUAB TAIS pub kom Luv xeeb tub, ces Luv yug tau ib tug tub.
14 Cov poj niam hais rau Nos Es Mis tias: "Kom HUAB TAIS nto koob meej! Vim hnub no Huab Tais tseem pub ib tug xeeb ntxwv rau koj; thov kom nws lub npe nrov nyob hauv haiv His Xas Lais!
15 Nws yuav nplij koj thiab yuav tu koj thaum koj yav laus. Nws niam yog koj tus nyab uas hlub koj, nws zoo tshaj koj muaj xya leej tub."
16 Ces Nos Es Mis puag nkaus tus me nyuam rau hauv nws xub ntiag. Thiab nws yog tus tu tus me nyuam hlob.
17 Cov poj niam nyob ib ncig tis npe rau tus me nyuam, lawv hais tias: "Ib tug tub yug los rau Nos Es Mis lawm.” Ces lawv tis npe rau tus me nyuam hu ua Os Npev, uas yog Yes Xes txiv; Yes Xes yog Das Vis txiv.

NPN 128: 1b-2, 3, 4, 5

Txais: (4) Ntsia saib, Huab Tais foom hmoov zoo rau cov uas hwm nws.

Nej cov hwm HUAB TAIS nej txoj hmoov zoo,
nej yog cov taug raws nws txoj kev!
Vim nej yuav tau noj lub txiv ntawm nej tej hauj lwm,
nej yuav tau hmoov zoo thiab nws yuav nyiam nej.

Txais: (4) Ntsia saib Huab Tais foom hmoov zoo rau cov uas hwm nws.

Koj poj niam yuav zoo li ib txoj hmab txiv cawv txi txiv ncw
nyob rau hauv koj tej kaum vaj kaum tsev,
koj cov me nyuam zoo li ib co ntoo txiv roj
nyob ncig lees koj lub phaj tsum mov.

Txais: (4) Ntsia saib, Huab Tais foom hmoov zoo rau cov uas hwm nws.

Ntsia saib, tus neeg muaj txoj hmoov zoo
yog tus ntshai HUAB TAIS.

Txais: (4) Ntsia saib Huab Tais foom hmoov zoo rau cov uas hwm nws.

HUAB TAIS nyob saum roob Xis Yoos foom koob hmoov rau nej;
thov kom nej tau pom Yes Lus Xas Les vam meej niaj hnub hauv nej lub neej.

Txais: (4) Ntsia saib, Huab Tais foom hmoov zoo rau cov uas hwm nws.

As Les Lus yas: MT 23: 9b, 10b

Txais: As les lus yas, as les lus yas.

Nej tsuas muaj ib leeg txiv xwb, yog tus nyob saum ntuj;
nej tsuas muaj ib tug tswv xwb, yog Leej pleev.

Txais: As les lus yas, as les lus yas.

Ntawv Moo Zoo: MT 23: 1-12

1 Yes Xus qhia tsoom sid thiab nws cov thwj tim,
2 nws hais tias: “Cov Kws Ntawv Ntshiab thiab cov Fas Lis Xais lawv zaum saum Mais Xes lub rooj zaum,
3 yog vim li ntawd mas nej yuav khaws thiab nej yuav ua tas txhua yam lawv qhia rau nej, tab sis nej txhob ua raws li lawv ua, vim tias lawv tsuas hais xwb, lawv tsis ua raws li lawv hais.
4 Lawv pav tej lub nra hnyav hnyav ris tsis taus, lawv muab nog rau saum cov neeg xwb pwg, tab sis lawv twb tsis kam cev ib tug ntiv tes los thawb li.
5 Lawv ua txhua tsav txhua yam kom neeg pom xwb. Yog li ntawd, lawv thiaj coj tej txws ntim Txoj Cai loj loj, thiab dai tej tw ntxhoo ntev ntev.
6 Thaum lawv mus noj nqaij haus cawv, lawv nyiam zaum thawj lub rooj. Nyob hauv cov tsev txoos, lawv nyiam zaum cov rooj pem hauv ntej.
7 Lawv nyiam kom luag hawm lawv tom tej tshav puam, nyiam hnov sawv daws hu lawv ua ‘Xib Hwb’.
8 Hos nej, mas nej txhob cia luag hu nej ua ‘Xib Hwb’, vim nej tsuas muaj ib tug Xib Hwb xwb, thiab nej sawv daws yog ib co kwv tij.
9 Nej txhob hu leej twg nyob ntiaj teb no ua ‘Txiv’, vim nej tsuas muaj ib leeg Txiv xwb, yog tus nyob saum ntuj.
10 Nej txhob cia luag hu nej ua ‘Thawj Coj,’ vim nej tsuas muaj ib tug thawj coj xwb, yog Leej Pleev.
11 Tus loj dua cov nyob hauv nej, yuav ua nej tus tub txib.
12 Tus twg tsa nws siab, nws yuav raug muab txo kom qis; tus twg txo nws qis, yuav raug muab tsa kom siab.”

Tim 23 lub 8 Hli 2021

Hnub Ob Lis Piam Nees Nkaum Ib Nruab Xyoo B Nruab Lis Piam Xyoo I
Lectionary: 425

XHLT: LN Rose nyob Lima

Zaj Nyeem Ib: 1 TXLN 1: 1-5, 8b-10

1 Paj Lug thiab Xis Vas Nus thiab Tis Mos Tes, sau ntawv tuaj rau lub Koom Txoos nyob Tes Xas Los Nis, uas nyob hauv Leej Txiv Tswv Ntuj thiab nyob hauv Huab Tais Yes Xus Pleev. Thov kom nej tau txais txiaj ntsim thiab kev thaj yeeb.
2 Peb ua Tswv Ntuj tsaug tas mus li txog nej sawv daws, thiab peb nco ntsoov txog nej nyob hauv peb zaj teev ntuj tsis tseg.
3 Peb nco ntsoov tias nej rau siab ua hauj lwm vim txoj kev ntseeg,thiab nej mob siab ua cov hauj lwm nyob hauv txoj kev nyiam, thiab nej ua siab tawv nyob ruaj nreb hauv txoj kev tso siab rau peb tus Huab Tais Yes Xus Pleev nyob ntawm Tswv Ntuj peb Leej Txiv xub ntiag.
4 Cov kwv tij uas Tswv Ntuj nyiad, peb paub tias nej yog cov Tswv Ntuj xaiv.
5 Peb coj lub Moo Zoo tuaj txog nej, tsis yog ib co lus qhuav xwb, tiam sis nws yog ib lub hwj huam, nws muaj Leej Ntuj Plig Ntshiab, thiab yog ib qho peb ntseeg ruaj nreb, raws li nej yeej paub lawm tias peb tau coj tus yam ntxwv zoo li cas thaum peb nrog nej nyob kom tau pab nej.
8b Nej txoj kev ntseeg txog Tswv Ntuj tau ri mus txog tas qhov txhia chaw lawm, ces peb tsis tas yuav tsum hais dab tsi txog ntxiv.
9 Vim cov neeg ntawd yeej tham txog peb tias peb tau tuaj txog tim nej li cas, thiab nej tau tig los ntseeg txog Tswv Ntuj li cas, nej tau tso nej cov dab mlom pov tseg, nej los tsob hwb tus Tswv Ntuj muaj txoj sia thiab tus tseem,
10 nej nyob tos ntsoov nws Leej Tub yuav rov saum ntuj los, tus uas nws tau tsa hauv cov tub tuag sawv rov los lawm, tus Yes Xus uas cawm peb dim ntawm txoj kev npau taws yuav tuaj yav tom ntej.

NPN 149: 1B-2, 3-4, 5-6A+9B

Txais: (4a) Huab Tais zoo siab nyob hauv nws haiv neeg.
los: As les lus yas

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
His Xas Lais yuav tsum zoo siab nyob hauv tus uas tsim lawv,
Xis Yoos cov me nyuam yuav tsum luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.
los: As les lus yas

Lawv yuav ua kev lom zem yoj cev cav txog nws lub npe,
lawv yuav hu nkauj cav txog nws nrog suab nruas thiab suab nkauj nog ncas.
Vim HUAB TAIS hlub nws haiv neeg,
thiab nws muab txoj kev yeej rau cov neeg me hnav ua zam.

Txais: (4a) Huab Tais zoo siab nyob hauv nws haiv neeg.
los: As les lus yas

Cov muaj lub siab ntseeg yuav hom khaj nyob hauv txoj kev nto koob meej;
lawv yuav hu nkauj zoo siab hauv lawv tej chaw nyob;
lawv lub qa tsuas muaj qw suab cav txog Tswv Ntuj.
Qhov no yog cov uas ntseeg nws lawv lub koob meej. As les lus yas.

Txais: (4a) Huab Tais zoo siab nyob hauv nws haiv neeg.
los: As les lus yas

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias, kuv cov yaj mloog kuv lub suab;
kuv paub kuv cov yaj, lawv raws nraim kuv qab mus.

Txais: As les lus yas, as les lus yas.

Ntawv Moo Zoo: MT 23: 13-22

Yes Xus hais rau cov neeg thiab rau nws cov thwj tim tias:
13 “Cov Kws Ntawv Ntshiab thiab cov Fas Lis Xais zoo nraum daim tawv, nej txoj hmoov phem, vim nej muab lub Ceeb Tsheej saum ntuj xauv cia tsis pub neeg nkag! Nej tsis mus hauv, nej kuj tsis pub kom cov xav mus, tau kev nkag mus.
[14 Cov Kws Ntawv Ntshiab thiab cov Fas Lis Xais zoo nraum daim tawv, nej txoj hmoov phem, vim nej noj tej poj ntsuam tug, thiab nej lam ua txuj teev ntuj ntev ntev kom neeg qhuas; vim li no nej yuav raug ib lub txim hnyav dua lwm tus.]
15 Cov Kws Ntawv Ntshiab thiab cov Fas Lis Xais zoo nraum daim tawv, nej txoj hmoov phem, vim nej hla hiav txwv hla teb chaws mus nrhiav kom tau ib tug neeg los hwm Ntuj. Thaum nej tau ib tug lawm, nej ua kom nws tsim nyog mus hauv dab phem cov hluav taws tshaj nej ob npaug ntxiv.
16 Nej yog ib co coj ke dig muag, nej txoj hmoov phem, vim nej hais tias: ‘Yog tus twg tuav txog thaj chaw ntshiab los cog lus, mas tsis muaj nqes dab tsi. Tab sis tus twg tuav txog cov kub hauv thaj chaw ntshiab los cog lus, mas nws yuav tsum ua raws li nws lo lus.’
17 Neeg vwm thiab dig muag, dab tsi muaj nqes dua? Cov kub los yog thaj chaw ntshiab uas ua kom cov kub ntshiab tuaj?
18 Nej tseem hais tias: ‘Yog tus twg tuav txog lub thaj txi Ntuj los cog lus, mas tsis muaj nqes dab tsi. Tab sis yog tus twg tuav txog cov txim saum thaj txi Ntuj los cog lus, mas nws yuav tsum ua raws li nws lo lus.’
19 Neeg dig muag, qhov twg yog qhov loj dua? Yog cov txim los yog lub thaj txi Ntuj uas ua kom cov txim ntawd ntshiab tuaj?
20 Tus tuav txog lub thaj txi Ntuj los cog lus, kuj yog tuav txog lub thaj thiab tas txhia yam uas nyob saum lub thaj huv si.
21 Tus tuav txog thaj chaw ntshiab los cog lus, kuj yog tuav txog thaj chaw ntshiab thiab Tus nyob hauv thaj chaw ntawd.
22 Hos tus tuav txog lub ntuj los cog lus, kuj yog tuav txog Tswv Ntuj lub theej kiab thiab Tus zaum saum lub theej kiab ntawd tib si.”

Tim      24      lub      8      Hli      2021

Hnub Peb Lis Piam Nees Nkaum Ib Nruab Xyoo B Nruab Lis Piam Xyoo I

Koo Tsheej Hwm LN Bartholomew (Npas Tos Los Mas Yos), ib tug Hauv Paus Xa Lus.
Lectionary: 629

Zaj Nyeem Ib:        QYTN  21:   9b-14

Ib tug tshiab los hais rau kuv tias: “Koj los, kuv yuav coj koj mus saib tus Nkauj Nyab, uas yog Leej Yaj tus txij nkawm.”
10 Ces nws coj kuv hauv kuv lub tswv yim mus rau saum ib lub roob loj roob siab, nws muab lub tsheej ntshiab Yes Lus Xas Les rau kuv saib, uas nqes saum ntuj pem Tswv Ntuj los.
11 Lub tsheej muaj Tswv Ntuj lub hwj chim ci ntsa iab, nws ci xws li ib lub pob zeb pov haum muaj nqi loj, xws li ib lub pov haum liab ci lam lug xws tsom iab.
12 Muaj ib lub ntsa zeb loj thiab siab xov lub tsheej; nws muaj kaum ob lub rooj vag, muaj kaum ob tug tshiab zov cov rooj vag ntawd. Muaj ib co npe sau rau ntawm cov qhov rooj: yog cov npe ntawm kaum ob lub xeem His Xas Lais.
13 Nyob sab Toob Fab muaj peb lub rooj vag, sab pej Fab muaj peb lub rooj vag, Naj Fab muaj peb lub rooj vag, Xib Fab muaj peb lub rooj vag.
14 Lub ntsa zeb xov lub tsheej txawb rau saum kaum ob tug taw ntsa. Muaj kaum ob lub npe sau rau saum cov taw ntsa, yog Leej Yaj kaum ob leeg Hauv Paus Xa Lus cov npe.

NPN        145:   10-11, 12-13, 17-18

Txais: (12) Huab Tais, koj cov phooj ywg tshaj txog
              koj lub Ceeb Tsheej muaj hwj chim ci ntsa iab.

HUAB TAIS, cia tas koj cov hauj lwm ua koj tsaug,
thiab cia cov uas nyiam koj cav txog koj.
Cia lawv tshaj txog koj lub Ceeb Tsheej muaj hwj chim
thiab piav txog koj lub hwj huam loj.

Txais: (12) Huab Tais, koj cov phooj ywg tshaj txog
              koj lub Ceeb Tsheej muaj hwj chim ci ntsa iab.

Cia lawv qhia rau neeg paub txog koj lub hwj huam loj
thiab koj lub Ceeb Tsheej muaj hwj chim ci ntsa iab.
Koj lub Ceeb Tsheej yog ib lub Ceeb Tsheej yuav nyob tiam dhau tiam
thiab koj txoj kev tswj kav yuav nyob mus txheej dhau txheej.

Txais: (12) Huab Tais, koj cov phooj ywg tshaj txog
              koj lub Ceeb Tsheej muaj hwj chim ci ntsa iab.

Huab Tais ua ncaj nyob hauv tas nrho nws tej kev,
Nws yog tus ntshiab nyob hauv tas nws tej dej num.
Huab Tais nyob ze tas cov hu txog nws,
tas cov uas hu txog nws nyob hauv txoj kev tseeb.

Txais: (12) Huab Tais, koj cov phooj ywg tshaj txog
              koj lub Ceeb Tsheej muaj hwj chim ci ntsa iab.

As Les Lus Yas:        ZAM  1:   49b

Txais: As les lus yas, as les lus yas.

Las Npis, koj yog Tswv Ntuj Leej Tub,
koj yog cov His Xas Lais tus vaj.

Txais: As les lus yas, as les lus yas.

Ntawv Moo Zoo:        ZAM  1:   45-51

45 Fis Lis Pos ntsib Nas Tas Nais, nws hais rau Nas Tas Nais tias: "Tus uas Mais Xes tau sau txog nyob hauv Txoj Cai, thiab cov Yaj Saub tau hais txog, mas peb ntsib nws lawm, yog Yes Xus, Yos Xes nyob Nas Xas Les tus tub."
46 Ces Nas Tas Nais hais rau Fis Lis Pos tias: "Puas yuav muaj ib yam zoo tawm hauv Nas Xas Les tuaj tau?" Fis Lis Pos hais rau Nas Tas Nais tias : "Koj tuaj, ces koj yuav pom."
47 Yes Xus pom Nas Tas Nais tuaj, nws hais txog Nas Tas Nais, nws hais tias: "Nej saib, tus ntawd yog ib tug tseem His Xas Lais uas tsis muaj kev zais siab nyob hauv nws li."
48 Nas Tas Nais hais rau Yes Xus tias: "Ua cas koj paub kuv?" Yes Xus teb rau nws tias: "Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias lawm."
49 Nas Tas Nais teb rau Yes Xus tias: "Las Npis, koj yog Tswv Ntuj Leej Tub! Koj yog His Xas Lais tus Vaj."
50 Yes Xus teb rau nws tias: "Yog vim kuv hais rau koj tias kuv pom koj nyob hauv tsob qab ntoo txiv ncuav pias, mas koj thiaj ntseeg, puas yog? Koj yuav pom tej yam loj dua no thiab."
51 Ces Yes Xus hais rau Nas Tas Nais tias: "Kuv hais qhov muaj tseeb tiag rau nej: Nej yuav pom ntuj qhib los, thiab pom Tswv Ntuj cov Tshiab nce mus thiab nqes los nyob saum Neeg Leej Tub."

Tim 25 lub 8 Hli 2021

Hnub Plaub Lis Piam Nees Nkaum Ib Nruab Xyoo B Nruab Lis Piam Xyoo I
Lectionary: 427

XHLT: LN Louis, Fa Kis tus Vaj; los LN Joseph Calasanz, ua Leej Choj

Zaj Nyeem Ib: 1 TXLN 2: 9-13

9 Cov kwv tij, nej yuav nco ntsoov txog peb tej hauj lwm, thiab peb tej kev iab kev khwv. Peb tau ua hauj lwm nruab hnub thiab hmo ntuj, kom peb tsis txhob yog ib lub nra hnyav rau nej ib tug twg ris; tib txhij ntawd peb tseem tshaj Tswv Ntuj lub Moo Zoo rau nej thiab.
10 Nej yog cov tim khawv pom, thiab Tswv Ntuj kuj ua tim khawv pom tias, peb tau coj tus yam ntxwv hwm Ntuj thiab ncaj ncees, tus yam ntxwv tsis muaj chaw xyeej, nyob hauv nruab nrab nej cov ntseeg.
11 Nej twb paub lawm tias, peb tau ua rau nej txhua leej txhua tus xws li ib leeg txiv ua rau nws tej tub ki.
12 Peb tau ntuas nej sawv daws, tau txhawb nej lub siab kom loj, tau cob qhia nej tas zog, kom nej taug ib txog kev tsim nyog tus Tswv Ntuj uas hu nej los nyob hauv nws lub Ceeb Tsheej, thiab nyob hauv nws lub hwj chim.
13 Yog vim tej ntawd, mas peb ua Tswv Ntuj tsaug tsis tseg, vim thaum nej txais Tswv Ntuj Lo Lus uas nej tau hnov ntawm peb, mas nej tsis txais Lo Lus ntawd xws li yog neeg lo lus xwb, nej txais raws li nws yeej yog Tswv Ntuj Lo Lus tiag. Niaj hnub no Lo Lus ntawd ua hauj lwm nraim nyob hauv nej cov uas ntseeg.

NPN 139: 7-8, 9-10, 11-12ab

Txais: (1) HUAB TAIS, koj tsom pom hauv kuv, koj paub kuv.

Kuv yuav mus lawm qhov twg thiaj nraim tau ntawm koj lub tswv yim?
Kuv yuav khiav lawm ces twg, thiaj nyob deb ntawm koj lub ntsej muag?
Yog kuv nce mus saum ntuj, koj twb nyob saud lawm !
Yog kuv nqes lawm puag ntuj txias teb tsaus, koj kuj nyob hauv thiab!

Txais: (1) HUAB TAIS, koj tsom pom hauv kuv, koj paub kuv.

Yog kuv ya raws lub caij kaj ntug ob phab tis mus,
yog kuv mus nyob puag sab dej ntuj kawg nkaus tim ub,
los tseem yog koj txhais tes coj kuv mus,
yog koj sab tes xis hwj kuv kom kuv nyob ruaj nreb.

Txais: (1) HUAB TAIS, koj tsom pom hauv kuv, koj paub kuv.

Yog kuv hais tias: "Qhov tsaus ntuj yuav tsum zais tau kuv,
hmo ntuj yuav yog kuv qhov pom kev,"
los qhov tsaus ntuj tsis dub tsis tsaus rau koj,
hmo ntuj pom kev nrig xws nruab hnub rau koj.

Txais: (1) HUAB TAIS, koj tsom pom hauv kuv, koj paub kuv.

As Les Lus Yas: 1 ZAM 2: 5

Txais: As les lus yas, as les lus yas.

Yog tus twg coj nraim Leej Pleev lo lus, mas
txoj kev nyiam Tswv Ntuj zoo tiav log nyob hauv nws.

Txais: As les lus yas, as les lus yas.

Ntawv Moo Zoo: MT 23: 27-32

Yes Xus hais tias:
27 “Tsoom Kws Ntawv Ntshiab thiab tsoom Fas Lis Xais zoo nraum daim tawv, nej txoj hmoov phem, vim nej zoo li ib co ntxa pleev hmoov zeb sib, sab nraud zoo nkauj zoo saib, tab sis sab hauv muaj pob txha neeg tuag thiab tas puas tsav yam kev lwj kev qias nyab puv nkaus.
28 Nej kuj ib yam, tuaj sab nraud saib, nej zoo li yog neeg ncaj ncees, tab sis, nyob sab hauv, nej muaj kev dag thiab kev ua phem nyob puv nkaus.
29 Tsoom Kws Ntawv Ntshiab thiab tsoom Fas Lis Xais zoo nraum daim tawv, nej txoj hmoov phem. Nej txhim tsa cov yaj saub tej ntxa thiab nej tu cov neeg ncaj tej ntxa kom zoo nkauj.
30 Nej hais tias: ‘Yog peb ua neej nyob lub zim txwv peb cov yawg koob nyob, mas peb yuav tsis nrog lawv koom tes hliv cov yaj saub tej roj ntsha.’
31 Li ntawd, nej rov lees tias nej yeej yog cov neeg txo cov yaj saub txoj sia cov tub.
32 Ua li mas nej yeej meem ua phem kom phim nej cov yawg koob txoj kev phem.”

Tim 26 lub 8 Hli 2021

Hnub Tsib Lis Piam Nees Nkaum Ib Nruab Xyoo B Nruab Lis Piam Xyoo I
Lectionary: 428

Zaj Nyeem Ib: 1 TXLN 3: 7-13

7 Cov kwv tij nkauj muad, peb muaj kev tso siab lug txog nej nyob hauv tas peb tej kev txhawj xeeb thiab kev txom nyem vim nej txoj kev ntseeg.
8 Nyem no, peb muaj sia nyob los yog vim nej nyob ruaj nreb hauv Huab Tais.
9 Peb yuav ua cas thiaj ua Tswv Ntuj tsaug txaus txog nej, rau peb txoj kev zoo siab loj nyob ntawm Tswv Ntuj xub ntiag vim nej?
10 Nruab hnub hmo ntuj, peb thov Tswv Ntuj tsis tseg kom peb tau rov tuaj pom nej lub ntsej muag, thiab kom peb tau kev qhia ntxiv rau nej txog tej yam uas nej paub tsis tau txaus nyob hauv nej txoj kev ntseeg.
11 Nyem no, thov kom Tswv Ntuj uas yog peb Leej Txiv, thiab kom peb tus Huab Tais Yes Xus coj peb txoj hauv kev kom peb tuaj txog nej.
12 Thov kom Huab Tais ua kom nej ntseeg ruaj thiab kom nej vam meej nyob hauv txoj kev ib leeg hlub ib leeg, thiab txoj kev nyiam zeej tsoom, ib yam li peb nyiam thiab hlub nej,
13 ces thiaj yuav txhawb nej lub siab kom nej ua neeg ntshiab tsis muaj chaw xyeej, nyob ntawm Tswv Ntuj
peb Leej Txiv xub ntiag, thaum txog hnub uas peb tus Huab Tais Yes Xus yuav rov los nrog tas nws tsoom neeg ntshiab.

NPN 90: 3-5a, 12-13, 14+17

Txais: (14) Huab Tais, thov koj muab koj txoj kev hlub puv npo rau peb,
ces peb yuav hu nkauj vim peb muaj kev zoo siab.

Koj ua kom neeg hloov rov mus ua plua av,
koj hais tias: “Me nyuam neeg, nej rov mus.”
Vim tias ib txhiab xyoo, uas dhau mus lawm,
rau koj tsuas zoo li yog nag hmo xwb,
los tsuas zoo li ib lub caij zov keeb thaum hmo ntuj xwb.

Txais: (14) Huab Tais, thov koj muab koj txoj kev hlub puv npo rau peb,
ces peb yuav hu nkauj vim peb muaj kev zoo siab.

Thov koj qhia peb txawj suav peb cov hnub nyoog kom zoo,
kom peb txawj muaj kev thoob tsib hauv nruab siab.
HUAB TAIS, thov koj tsuag tsuag rov qab los! Peb yuav tos hov ntev?
Thov koj khuv leej koj cov tub txib mas!

Txais: (14) Huab Tais, thov koj muab koj txoj kev hlub puv npo rau peb,
ces peb yuav hu nkauj vim peb muaj kev zoo siab.

Thaum sawv ntxov, thov koj ua zoo rau pe kom puv npo,
ces peb yuav qw zoo siab hom khaj txhua hnub hauv peb lub neej.
Thov kom Huab Tais peb tus Tswv Ntuj txoj kev hlub yog peb tug,
Thov koj ua kom cov hauj lwm peb txhais tes ua vam meej tuaj,
kom cov hauj lwm peb txhais tes khwv vam meej!

Txais: (14) Huab Tais, thov koj muab koj txoj kev hlub puv npo rau peb,
ces peb yuav hu nkauj vim peb muaj kev zoo siab.

As Les Lus Yas: MT 24: 42A, 44

Txais: As les lus yas, as les lus yas.

Nej yuav zov hmo nraim,
Vim nej tsis paub tias Neeg Leej Tub yuav los lub caij twg.

Txais: As les lus yas, as les lus yas.

Ntawv Moo Zoo: MT 24: 42-51

Yes Xus hais rau nws cov thwj tim tias:
42a “Nej yuav zov hmo nraim, vim nej tsis paub hnub twg nej tus Huab Tais yuav los.
43 Nej yeej paub tias, yog tus tswv tsev paub tias hmo ntuj lub sij hawm twg tub sab yuav tuaj, mas nws yuav zov hmo, tsis cia tub sab tuaj tho qhov tsev.
44 Nej kuj ib yam, nej yuav npaj kom txhij, vim Neeg Leej Tub yuav los lub sij hawm uas nej tsis nco faj txog.
45 Leej twg thiaj yog tus tub txib pheej xeeb thiab xyuam xim, uas tus tswv tsev tsa nws ua tus saib cov neeg nyob hauv tus tswv lub tsev kom nws faib txhiam laj txhiam xws rau sawv daws noj raws caij raws nyoog?
46 Tus tub txib uas tus tswv tsev rov los pom tab tom lis tej num li ntawd, yuav tau txoj hmoov zoo.
47 Kuv hais tseeb rau nej, tus tswv yuav tsa nws ua tus saib tus tswv lub cuab tam tas huv si.
48 Tab sis yog tus tub txib ntawd siab phem nws xav tias: ‘Kuv tus tswv yuav los lig.’
49 Ces nws muab cov tub txib nrog nws nyob ntaus, nws mus nrog cov quav dej quav cawv noj haus,
50 mas nws tus tswv yuav rov los hnub uas nws tsis nco faj, thiab lub sij hawm uas nws tsis paub.
51 Ces tus tswv yuav rau txim hnyav rau nws, yuav ntiab nws mus nrog cov neeg zoo nraum daim tawv nyob; nyob ntawd, yuav sawv daws yuav quaj vwm leg thiab tom hniav nkawv.”

Tim 27 lub 8 Hli 2021

Hnub Rau Lis Piam Nees Nkaum Ib Nruab Xyoo B Nruab Lis Piam Xyoo I
Lectionary: 429

Yuav Hwm LN Monica

Zaj Nyeem Ib: 1 TXLN 4: 1-8

1 Cov kwv tij nkauj muad, ib qho uas peb thov nej thiab txhib nej nyob hauv Huab Tais Yes Xus, yog kom nej yuav tsum coj ib tug yam ntxwv raws li nej tau kawm ntawm peb, thiaj ntxim Tswv Ntuj siab. Yog nej twb coj ib tug yam ntxwv zoo li ntawd lawm, thov kom nej yeej meem coj kom zoo tshaj ntxiv xwb.
2 Nej twb paub cov lus qhuab qhia uas peb tuav txog Huab Tais Yes Xus hais rau nej tas lawm.
3 Qhov Tswv Ntuj xav kom ua yog kom nej ua neeg ntshiab: kom nej caiv txoj kev ua phem ua qias sib daj sib deev lwj liam,
4 kom nej nyias txawj tswj nyias lub cev nyob hauv txoj kev ntshiab thiab tsim txiaj,
5 tsis txhob ua raws nyias lub cev kev nqhis kev xav xws li cov neeg teev dab uas tsis paub Tswv Ntuj.
6 Hais txog qhov no mas, kom tsis txhob muaj leej twg ua phem rau los ua noj nws ib tug kwv tij twg taub hau, vim Huab Tais yog tus yuav ua pauj rau txhua yam phem ntawd, raws li peb twb tau hais rau nej ua ntej lawm thiab qhia tseeb rau nej lawm.
7 Vim Tswv Ntuj tsis tau hu peb kom mus taug txoj kev tsis huv, nws hu peb kom peb mus taug txoj kev ntshiab.
8 Li ntawd, yog leej twg tsis kam mloog qhov no, mas tsis yog nws tsis kam mloog ib tug neeg, yog nws tsis kam mloog Tswv Ntuj, uas yog tus pub nws Leej Tswv Yim Ntshiab rau nej.

NPN 97: 1+2b, 5-6, 10, 11-12

Txais: (12a) Cov neeg ncaj, nej cia li zoo siab nyob hauv HUAB TAIS.

HUAB TAIS ua vaj; kom lub ntiaj teb hom khaj,
kom tas cov pov txwv dhia zoo siab !
kev ncaj thiab kev txiav txim yog chaw txawb nws lub theej kiab.

Txais: (12a) Cov neeg ncaj, nej cia li zoo siab nyob hauv HUAB TAIS.

Cov toj roob yaj xws ciab ntab nyob ntawm HUAB TAIS xub ntiag,
ntawm tus HUAB TAIS kav tas ntiaj teb xub ntiag.
Yim txheej cuaj txheej ntuj tshaj nws txoj kev ncaj,
tas txhua haiv neeg pom nws lub hwj chim.

Txais: (12a) Cov neeg ncaj, nej cia li zoo siab nyob hauv HUAB TAIS.

Huab Tais nyiam cov uas ntxub txoj kev phem;
Nws txuag cov neeg ntseeg txog nws txoj sia,
nws npo lawv dim ntawm cov neeg phem txhais tes.

Txais: (12a) Cov neeg ncaj, nej cia li zoo siab nyob hauv HUAB TAIS.

Qhov pom kev sawv los kaj tus neeg ncaj ;
Kev kaj siab sawv los ziab cov siab dawb.
Cov neeg ncaj, nej cia zoo siab nyob hauv HUAB TAIS,
nej ua nws tsaug vim nws lub npe ntshiab.

Txais: (12a) Cov neeg ncaj, nej cia li zoo siab nyob hauv HUAB TAIS.

As Les Lus Yas: LK 21: 36

Txais: As les lus yas, as les lus yas.

Nej yuav ceev faj txhua lub sij hawm thiab nej yuav teev Ntuj tsis tseg,
nej thiaj yuav muaj zog sawv taus ntseg nyob ntawm Neeg Leej Tub xub ntiag."

Txais: As les lus yas, as les lus yas.

Ntawv Moo Zoo: MT 25: 1-13

Yes Xus piav zaj paj lug no rau nws cov thwj tim tias:
1 “Lub Ceeb Tsheej saum ntuj yuav zoo xws li kaum leej ntxhais nkauj xwb taws teeb tawm mus tos nraug vauv.
2 Nyob hauv lawv, muaj tsib leeg ruam, hos tsib leeg xyuam xim.
3 Cov ruam nqa teeb, tab sis tsis nqa roj nrog.
4 Hos cov xyuam xim nqa teeb thiab ntim roj rau hauv hwj nqa nrog.
5 Nraug vauv los lig, ces lawv qaug dab ntub, sawv daws tsaug zog.
6 Thaum ib tag hmo, ib lub suab nthe tias: ‘Nraug vauv los txog lawm! Nej tawm los txais nws!’
7 Ces tas cov ntxhais nkauj xwb sawv los npaj lawv cov teeb.
8 Cov ruam hais rau cov xyuam xim tias: ‘Nej pub ib qho roj rau peb mas, peb cov teeb tab tom yuav tuag.’
9 Tab sis cov xyuam xim teb rau cov ruam tias: ‘Ntshai roj yuav tsis txaus rau nej thiab rau peb. Nej mus muas roj tom cov tub luam rau nej.’
10 Thaum cov ntxhais ruam mus muas roj lawm, ces nraug vauv los txog. Cov uas tau npaj txhij tos, nrog nraug vauv chaws mus rau hauv chav tsev noj tshoob, ces luag xauv qhov rooj rau lawm.
11 Dhau ntawd lawm, lwm cov ntxhais nkauj xwb kuj los txog, lawv hais tias: ‘Huab Tais, Huab Tais, thov koj qhib qhov rooj rau peb.’
12 Tab sis nraug vauv teb tias: ‘Kuv hais tseeb rau nej, kuv tsis paub nej!’
13 Vim li no mas nej yuav tsum zov hmo nraim, vim nej tsis paub hnub twg thiab lub sij hawm twg li.”

Tim 28 lub 8 Hli 2021

Hnub Xya Lis Piam Nees Nkaum Ib Nruab Xyoo B Nruab Lis Piam Xyoo I
Lectionary: 430

Yuav hwm LN Augustine Vaj Qhia thia Kws cov Txuj Ntshiab

Zaj Nyeem Ib: 1 TXLN 4: 9-11

Cov kwv tij nkauj muad,
9 Hais txog txoj kev sib nyiam sib hlub xws li ib co kwv tij, mas tsis tas kom leej twg sau txog qhov ntawd rau nej, vim Tswv Ntuj twb tau qhia nej kom nej txawj ib leeg nyiam ib leeg lawm.
10 Nej yeej nyiam thiab hlub tas tsoom kwv tij nyob Mas Xes Dos Nias teb tib si lawm; tiam sis, cov kwv tij, peb tseem xav txhib nej kom nej haj yam txawj nyiam thiab hlub zoo tshaj ntawd ntxiv thiab.
11 Kom nej yuav mob siab rau ntshaw ua neej nyob thaj yeeb lug, nyias yuav saib nyias li dej num xwb txhob cuam tshuam txog luag li, nyias yuav xuas nyias txhais tes mus khwv noj, xws li peb tau qhia rau nej lawm.

NPN 98: 1, 7-8, 9

Txais: (9) Huab Tais tuaj kav lub ntiaj teb raws kev ncaj ncees.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej.,
nws sab npab ntshiab tau ua.

Txais: (9) Huab Tais tuaj kav lub ntiaj teb raws kev ncaj ncees.

Kom dej hiav txwv thiab tej yam nyob hauv dej ua nrov nroo ntws,
Kom lub ntiaj teb thiab tsoom neeg nyob hauv ua lom zem ntsuag qees;
Kom cov niam dej npuaj teg, kom cov roob qw zoo siab,

Txais: (9) Huab Tais tuaj kav lub ntiaj teb raws kev ncaj ncees.

Nyob ntawm HUAB TAIS xub ntiag, vim nws tab tom tuaj,
nws tuaj tswj kav lub ntiaj teb.
Nws yuav tswj kav qab ntuj neeg raws kev ncaj,
Nws yuav tswj kav cov haiv neeg raws kev haum pheej.

Txais: (9) Huab Tais tuaj kav lub ntiaj teb raws kev ncaj ncees.

As Les Lus Yas: ZAM 13: 34

Txais: As les lus yas, as les lus yas.

Kuv muab ib lo lus qhia tshiab rau nej tias:
nej yuav sib nyiam sib hlub ib yam li kuv tau nyiam tau hlub nej.

Txais: As les lus yas, as les lus yas.

Ntawv Moo Zoo: MT 25: 14-30

Yes Xus hais zaj paj lug no rau nws cov thwj tim tias:
14 “Yog zoo li ib tug neeg uas yuav mus tawm rooj deb, nws hu nws cov tub txib los, nws muab nws lub cuab tam rau lawv ceev.
15 Nws muab tsib nras nyiaj rau thawj tug, muab ob nras rau tus ob, hos muab ib nras rau tus peb, muab raws li lawv lub peev xwm, ces nws mus tawm rooj lawm.
16 Tam sis ntawd, tus tau txais tsib nras nyiaj nqa cov nyiaj ntawd coj mus ntxeev, ces nws tau paj tsib nras ntxiv.
17 Tus tau txais ob nras kuj ua li ntawd thiab, nws tau paj ob nras ntxiv.
18 Hos tus tau txais ib nras xwb mus khawb ib lub qhov rau hauv av, nws muab tus tswv nras nyiaj coj mus faus rau hauv.
19 Ib lub sij hawm ntev loo tom qab, cov tub txib tus tswv rov los txog. Nws nrog lawv txheeb nws cov nyiaj.
20 Tus uas tau txais tsib nras nyiaj tuaj txog. Nws cev tsib nras ntxiv, nws hais tias: ‘Huab Tais, tsib nras nyiaj no yog koj muab rau kuv, hos ntawm no yog tsib nras uas kuv coj mus ntxeev tau paj ntxiv.’
21 Tus tswv hais rau nws tias: ‘Zoo kawg, tub txib siab zoo siab ncaj, thaum koj saib tej yam me, koj ua ncaj. Kuv yuav tsa koj saib tej yam loj. Koj los nyob hauv koj tus huab tais txoj kev zoo siab mog.’
22 Ces tus tau txais ob nras tuaj txog, nws hais tias: ‘Huab Tais, ob nras nyiaj no yog koj muab rau kuv, hos ntawm no yog ob nras uas kuv coj mus ntxeev tau paj ntxiv.’
23 Nws tus tswv hais rau nws tias: ‘Zoo kawg, tub txib siab zoo siab ncaj. Thaum koj saib tej yam me li no, koj ua ncaj. Kuv yuav tsa koj saib tej yam loj. Koj los nyob hauv koj tus huab tais txoj kev zoo siab mog.’
24 Tus tub txib uas tau txais ib nras nyiaj xwb tuaj txog, nws hais tias: ‘Huab Tais, kuv paub tias koj yog ib tug neeg siab heev. Koj hlais nplej hauv tej teb koj tsis tau tseb, koj sau qoob hauv tej chaw koj tsis tau pov noob rau.
25 Kuv ntshai, kuv thiaj coj koj nras nyiaj mus faus rau hauv av. Saib ntawm no, koj rov tau yam uas yog koj tug.’
26 Ces tus tswv teb rau nws tias: ‘Tub txib siab phem thiab tub nkeeg, koj twb paub tias kuv hlais nplej hauv tej qhov uas kuv tsis tau tseb, thiab kuv sau qoob hauv tej chaw uas kuv tsis tau pov noob rau.
27 Phim koj twb yuav tsum tau nqa kuv cov nyiaj mus tso rau hauv cov tsev ceev nyiaj. Thaum kuv rov los, kuv thiaj yuav tau kuv cov nyiaj nrog cov paj.
28 Nej rho nras nyiaj ntawm nws mus, nej muab rau tus uas muaj kaum nras lawm.
29 Vim tias tus uas twb muaj lawm tseem yuav tau txais ntxiv, ces nws yuav nplua nuj tuaj. Hos tus uas tsis muaj, tseem yuav raug luag thau qhov me me uas nws muaj tawm thiab.
30 Nej muab tus tub txib tsis tsim txiaj ntawd pov rau nraum zoov hauv qhov tsaus ntuj; nyob ntawd yuav muaj quaj vwm leg ntsuav thiab tom hniav nkawv.’”

Tim 30 lub 8 Hlis 2021

Hnub Ob Lis Piam Nees Nkaum Ob Nruab Xyoo B Nruab Lis Piam Xyoo I
Lectionary: 431

Zaj Nyeem Ib: 1 TXLN 4: 13-18

13 Cov kwv tij nkauj muad, peb tsis xav kom nej tsis paub dab tsi txog cov neeg uas mus pw tsaug zog lawd, kom nej tsis txhob tu tu siab xws li lwm cov neeg uas tsis muaj kev tso siab li.
14 Yog peb twb ntseeg tias Yes Xus tuag thiab sawv rov los lawm, mas nyob hauv Yes Xus, Tswv Ntuj kuj yuav coj cov uas mus pw tsaug zog lawd nrog nws mus thiab.
15 Peb hais lo lus no rau nej uas yog hais raws li Huab Tais lo lus tias, peb cov tseem ciaj nyob, uas yog cov seem yuav nyob mus txog hnub Huab Tais rov los txog, mas peb yuav tsis xub mus ua ntej cov uas twb pw tsaug zog lawd.
16 Vim Huab Tais yuav nqes saum ntuj los nrog ib lub suab qw kom sawv, nrog tus tuam tshiab lub suab hu, thiab nrog Tswv Ntuj lub suab hom nrov. Ces cov neeg tuag nyob hauv Yes Xus Pleev yuav xub sawv rov los tso.
17 Ces peb cov uas tseem ciaj nyob, peb cov uas seem, mam li yuav tau nrog lawv ua ke nce saum cov huab mus cuag Huab Tais nyob saum cov cua. Ces peb yuav tau mus nrog Huab Tais nyob mus li ib txhis.
18 Li ntawd mas nej yuav tsum siv cov lus no los rov sib txhawb sib pab ua siab loj.

NPN 96: 1+3, 4-5, 11-12, 13

Txais: (13b) Huab Tais tuaj txiav txim rau lub ntiaj teb.

Nej hu ib zag nkauj tshiab rau HUAB TAIS,
tas cov teb chaws, nej hu nkauj rau HUAB TAIS;
Nej cav nws lub koob meej rau tsoom kuj cuab paub,
piav nws cov dej num txaus qhuas rau tsoom haiv neeg hnov.

Txais: (13b) Huab Tais tuaj txiav txim rau lub ntiaj teb.

Vim HUAB TAIS loj tas nrho, tsim nyog sawv daws cav txog nws,
nws zoo kawg nkaus, zoo tshaj ib tsoom dab tas huv si .
Tas tsoom dab uas lwm cov haiv neeg teev, tsis muaj nqi dab tsi.
Hos HUAB TAIS yog tus tsim yim txheej cuaj txheej ntuj.

Txais: (13b) Huab Tais tuaj txiav txim rau lub ntiaj teb.

Kom lub ntuj zoo siab thiab lub ntiaj teb hom khaj;
kom lub hiav txwv thiab txhua yam nyob hauv nrov nroo ntws;
kom cov tiaj nrag thiab txhua yam nyob hauv luag ntxhi!
Ces txhua tsob ntoo nyob hauv hav zoo yuav dhia zoo siab,

Txais: (13b) Huab Tais tuaj txiav txim rau lub ntiaj teb.

Nyob ntawm HUAB TAIS xub ntiag, vim nws tuaj lawm,
nws tuaj tswj kav lub ntiaj teb.
Nws yuav tswj ntiaj teb neeg raws kev ncaj
thiab txhua haiv neeg raws kev haum pheej. .

Txais: (13b) Huab Tais tuaj txiav txim rau lub ntiaj teb.

As Les Lus Yas: LK 4: 18

Txais: As les lus yas, as les lus yas.

Huab Tais lub Tswv Yim nyob saum kuv,
Nws xa kuv mus tshaj lub Moo Zoo rau cov pluag.

Txais: As les lus yas, as les lus yas.

Ntawv Moo Zoo: LK 4: 16-30

16 Yes Xus los txog Nas Xas Les, lub zos uas nws loj hlob. Txog hnub Xas Npas Tos, nws mus hauv lub tsev txoos xws li nws ua kam, ces nws sawv mus nyeem ntawv.
17 Lawv cev tus Yaj Saub His Xais kauj ntawv rau nws. Nws nthuav kauj ntawv, nws nrhiav tau nqe lus uas sau tias:
18 “Huab Tais lub Tswv Yim nyob saum kuv,
vim nws pleev roj rau kuv kom kuv mus tshaj lub Moo Zoo rau cov pluag;
nws xa kuv mus ceeb toom rau cov nyob txim tias lawv yuav dim,
rau cov dig muag tias lawv yuav rov pom kev;
Nws xa kuv mus tso cov raug luag hiam kom dim mus ua neeg twj lij,
19 thiab nws xa kuv mus tshaj tias yog xyoo zoo rau Huab Tais.”
20 Yes Xus rov kauv kauj ntawv, nws muab cev rau tus tub txib, ces nws zaum. Tas tsoom neeg uas nyob hauv lub tsev txoos ntsia ntsoov Yes Xus.
21 Ces Yes Xus pib hais rau lawv tias: “Hnub no, cov lus nyob hauv zaj ntawv no tsheej xeeb raws li nej tau hnov lawm."
22 Tas cov neeg ntawd zeem tseeb tias nws hais lus zoo, lawv qhuas cov lus muaj txiaj ntsim tawm hauv nws lub ncauj los. Lawv hais tias: "Tus ntawd, tsis yog Yos Xes tus tub lod?"
23 Ces Yes Xus hais rau lawv tias: "Paub ntsoov tias, nej yuav piv lus hais txog kuv li no: ‘Kws kho mob, koj rov kho koj mas! Tas txhua yam uas luag piav tias tshwm sim nyob Kas Fas Naus, mas koj kuj ua ib yam li ntawd nyob hauv lub zos koj nyob hlob no thiab mas!’"
24 Yes Xus tseem hais tias: "Kuv hais tiag rau nej, tsis muaj ib tug yaj saub uas luag yuav txais nws zoo hauv lub zos nws nyob hlob.
25 Kuv hais raws qhov tseeb rau nej tias: lub caij Es Lias nyob, muaj coob tus poj ntsuam nyob His Xas Lais teb. Thaum ntuj kaw nag tau peb xyoos thiab rau hli, tas teb chaws tshaib plab loj kawg.
26 Tab sis Es Lias tsis raug xa mus pab cov poj ntsuam ntawd ib tug li, nws tsuas raug xa mus pab ib tug poj ntsuam nyob lub zos Xas Les Tas, nyob Xis Doos teb xwb.
27 Lub caij tus yaj saub Es Lis Xais nyob, muaj coob tus mob ruas nyob His Xas Lais teb, tab sis tsis muaj ib tug mob ruas His Xas Lais rov huv li, tsuas yog tus mob ruas Xis Lias hu ua Nas Maas thiaj rov huv xwb."
28 Tas cov neeg hauv lub tsev txoos hnov cov lus ntawd, mas lawv npau taws kawg nkaus.
29 Lawv sawv tsees, lawv caum ntiab kom Yes Xus tawm sab nroog nraud. Lawv coj Yes Xus mus txog ntawm ib qho ua qab tsuas saum lub roob uas lawv txhim lawv lub nroog, lawv xav thawb Yes Xus kom poob lawm hauv lub qab tsuas.
30 Tab sis Yes Xus hla plaws hauv nruab nrab lawv, nws taug nws kev mus lawm.

Tim 31 lub 8 Hli 2021

Hnub Peb Lis Piam Nees Nkaum Ob Nruab Xyoo B Nruab Lis Piam Xyoo I
Lectionary: 432

Zaj Nyeem Ib: 1 TXLN 5: 1-6, 9-11

1 Cov kwv tij nkauj muad, hais txog lub sij hawm thiab lub caij nyoog mas nej tsis tas yuav tsum muaj ntawv sau hais txog tej ntawd rau nej.
2 Vim nej twb paub zoo lawm tias Huab Tais lub hnub nyoog yuav los txog xws li ib tug tub sab uas tuaj thaum hmo ntuj.
3 Thaum zeej tsoom hais zom zaws tias: ‘Peb tau nyob kaj lug thiab nyob nyab xeeb lawm’, ces ib sij huam, txoj kev puas tsuaj yuav tuaj raug lawv, xws li tus poj niam cev hnyav uas ib sij huam nws cia li mob plab yug me nyuam, ces lawv yuav tsis tau kev dim.
4 Tiam sis, cov kwv tij, ntawm nej mas nej tsis nyob hauv qhov tsaus ntuj, kom lub hnub nyoog ntawd yuav tuaj raug nej xws li ib tug tub sab.
5 Nej sawv daws puav leej yog qhov pom kev cov me nyuam, thiab yog nruab hnub cov me nyuam. Peb tsis yog cov neeg maub hmo ntuj, los nyob hauv qhov tsaus ntuj.
6 Vim li ntawd, mas peb tsis txhob tsaug zog xws li luag tej, peb yuav nyob zov hmo thiab peb yuav noj me haus tsawg.
9 Vim Tswv Ntuj tsis muab peb tshwj tseg rau nws txoj kev npau taws, tiam sis nws tshwj zias peb cia kom peb tau txais txoj kev cawm seej nyob hauv peb tus Huab Tais Yes Xus Pleev,
10 uas nws tau tuag pub rau peb, ces tab yog peb zov hmo, los peb tsaug zog, mas peb yuav tau nrog nws nyob muaj txoj sia.
11 Ua li mas, nej yuav rov sib pab ua siab loj, thiab sib txhawb sib nqa mus rau txoj kev zoo, xws li nej twb ua lawm.

NPN 27: 1, 4, 13-14

Txais: (13) Kuv ntseeg tias kuv yuav tau pom Huab Tais tej yam zoo
nyob hauv cov neeg ciaj sia lub teb chaws.

Huab Tais yog kuv qhov pom kev thiab kuv txoj kev cawm seej;
Kuv yuav ntshai leej twg?
Huab Tais yog kuv qhov chaw nkaum hauv kuv lub neej,
Kuv yuav tsis tau luag vim leej twg?

Txais: (13) Kuv ntseeg tias kuv yuav tau pom Huab Tais tej yam zoo
nyob hauv cov neeg ciaj sia lub teb chaws.

Kuv tsuas thov ib yam ntawm Huab Tais xwb; qhov kuv nrhiav yog:
kom tau nyob hauv Huab Tais tsev niaj hnub hauv kuv lub neej;
Kom kuv tau ntsia ntsoov Huab Tais txoj kev zoo
thiab tau pom nws lub tuam tsev.

Txais: (13) Kuv ntseeg tias kuv yuav tau pom Huab Tais tej yam zoo
nyob hauv cov neeg ciaj sia lub teb chaws.

Kuv ntseeg hais tias kuv yuav tau pom Huab Tais txoj kev nplua mias
nyob hauv cov neeg ciaj sia lub teb chaws.
Nej ua siab loj tos ntsoov Huab Tias;
ua siab tawv qhawv tos ntsoov Huab Tais.

Txais: (13) Kuv ntseeg tias kuv yuav tau pom Huab Tais tej yam zoo
nyob hauv cov neeg ciaj sia lub teb chaws.

As Les Lus Yas: LK 7: 16

Txais: As les lus yas, as les lus yas.

Ib tug yaj saub loj sawv los nyob hauv peb,
Tswv Ntuj tuaj xyuas nws haiv neeg lawm.

Txais: As les lus yas, as les lus yas.

Ntawv Moo Zoo: LK 4: 31-37

31 Yes Xus nqes mus nram Kas Fas Naus uas yog ib lub nroog nyob hauv xeev Nkas Lis Lais. Nws qhuab qhia lawv hnub Xas Npas Tos.
32 Sawv daws qhuas txog nws cov lus qhia, vim nws hais lus muaj hwj chim.
33 Nyob hauv lub tsev txoos ntawd, muaj ib tug neeg raug ib tug dab tsis huv. Nws qw nrov nrov tias:
34 "Yes Xus Nas Xas Les, koj xav ua dab tsis rau peb? Puas yog koj tuaj rhuav peb? Kuv paub koj yog leej twg : koj yog Tswv Ntuj tus Ntshiab."
35 Yes Xus cem nws tias: "Ua twj ywm! Koj tawm ntawm nws mus." Ces dab tsis huv muab tus neeg thawb ntiag rau hauv av nyob ntawm sawv daws xub ntiag, nws tawm hauv tus neeg mus, tsis ua dab tsi phem rau tus neeg ntawd.
36 Tas lawv sawv daws ntshai, lawv sib hais zom zaws tias: "Nws lo lus ntawd muaj dab tsi? Vim nws siv hwj chim thiab hwj huam yuam dab tsis huv, ces dab cia li tawm mus."
37 Muaj ib lub moo qhuas txog Yes Xus cia li pib nrov mus rau txhua qhov chaw nyob ncig thaj tsam ntawd.

Tim 1 lub 9 Hlis 2021

Hnub Plaub Lis Piam Nees Nkaum Ob Nruab Xyoo B Nruab Lis Piam Xyoo I
Lectionary: 433

Zaj Nyeem Ib: KLX 1: 1-8

1 Kuv, Paj Lug, tus uas Tswv Ntuj pom zoo tsa ua Yes Xus Pleev ib tug Hauv Paus Xa Lus, thiab tus kwv Tis Mos Tes wb sau ntawv tuaj rau cov ntshiab thiab cov kwv tij ntseeg nyob hauv Leej Pleev nyob Kos Los Xais.
2 Thov kom nej tau txais txiaj ntsim thiab kev thaj yeeb tuaj ntawm Tswv Ntuj peb Leej Txiv tuaj.
3 Peb ua Tswv Ntuj, uas nws yog peb tus Huab Tais Yes Xus Pleev Leej Txiv, tsaug tas mus li thaum peb thov Ntuj rau nej.
4 Vim peb tau hnov hais txog nej txoj kev ntseeg txog Yes Xus Pleev thiab nej txoj kev nyiam tas tsoom ntshiab,
5 yog vim nej muaj ib qho chaw cia siab tshwj zias tseg rau nej nyob saum ntuj lawm, uas nej twb xub tau hnov hais txog nyob hauv Lo Lus tseeb ntawm lub Moo Zoo lawm.
6 Lub Moo Zoo ntawd tau tuaj txog nej, ces ib yam li nws txi txiv thiab loj hlob zuj zus nyob hauv tas lub ntiaj teb, nws kuj ua ib yam li ntawd nyob hauv nej, txij hnub nej tau hnov txog thiab to taub txog Tswv Ntuj lub txiaj ntsim nyob hauv qhov tseeb,
7 raws li Es Pas Fas, uas yog peb tus tub txib zoo nyiam, tau qhia rau nej lawm; nws yog Leej Pleev ib tug tub tshaj lub Moo Zoo rau nej uas peb tso siab rau.
8 Nws kuj yog tus qhia rau peb paub txog tias nej muaj txoj kev nyiam kev hlub nyob hauv Leej Tswv Yim.

NPN 52: 10, 11

Txais: (10) Kuv tso siab mus li rau Tswv Ntuj txoj kev khuv leej.

Kuv zoo li ib tsob txiv ntoo roj ntsuab xiab
nyob hauv Tswv Ntuj lub tsev.
Nej tso siab mus li rau Tswv Ntuj txoj
kev khuv leej neeg tsis muaj caij kawg.

Txais: (10) Kuv tso siab mus li rau Tswv Ntuj txoj kev khuv leej.

Kuv yuav ua koj tsaug mus li rau qhov uas koj tau ua,
kuv yuav cav txog koj lub npe zoo tas nrho
nyob ntawm cov neeg ntseeg txog koj xub ntiag.

Txais: (10) Kuv tso siab mus li rau Tswv Ntuj txoj kev khuv leej.

As Les Lus Yas: LK 4: 18

Txais: As les lus yas, as les lus yas.

Huab Tais xa kuv mus tshaj lub Moo Zoo rau cov pluag
Thiab mus ceeb toom txog kev twj lij rau cov nyob txim.

Txais: As les lus yas, as les lus yas.

Ntawv Moo Zoo: LK 4: 38-44

38 Yes Xus sawv, nws tawm hauv lub tsev txoos los, nws mus hauv Xis Moos lub tsev. Thaum ntawd, Xis Moos niam tais tab tom mob kub cev heev. Lawv thov kom Yes Xus pab Xis Moos niam tais.
39 Yes Xus sawv ntsug ntsia rau niam tais, nws yuam tus mob kub cev, ces tus mob tso plhuav niam tais tseg. Niam tais sawv tsees tam sis ntawd, nws pib tsob hwb lawv.
40 Thaum lub hnub poob qho, cov uas muaj neeg raug ntau hom mob sawv daws coj lawv cov neeg mob tuaj rau Yes Xus. Ces Yes Xus tsa tes rau saum lawv ib leeg zuj zus, nws kho sawv daws zoo tas huv si.
41 Muaj ib co dab phem kuj tawm hauv coob leej mus, dab phem qw qw tias: "Koj yog Tswv Ntuj Leej Tub." Tab sis Yes Xus cem lawv, nws txwv tsis pub lawv hais cov lus, vim lawv paub tias nws yog Leej Pleev.
42 Thaum kaj ntug, Yes Xus tawm mus rau ib qho chaw tsis muaj neeg. Tsoom sid nrhiav nws, thaum lawv tuaj txog ntawm nws, lawv cheem Yes Xus kom txhob ncaim ntawm lawv mus.
43 Tab sis Yes Xus hais rau lawv tias: "Kuv yuav tsum mus tshaj lub Moo Zoo hais txog Tswv Ntuj lub Ceeb Tsheej rau lwm cov nroog thiab. Yog vim qhov ntawd, kuv thiaj raug xa tuaj."
44 Ces Yes Xus mus qhuab qhia rau hauv cov tsev txoos nyob Yus Das teb.

Tim 2 lub 9 Hlis 2021

Hnub Tsib Lis Piam Nees Nkaum Ob Nruab Xyoo B Nruab Lis Piam Xyoo I
Lectionary: 434

Zaj Nyeem Ib: KLX 1: 9-14

Cov kwv tij nkauj muad,
9 Txij hnub uas peb tau hnov hais txog nej los, mas peb thov Ntuj rau nej tsis tseg; peb thov kom nej muaj txoj kev paub txog tias Tswv Ntuj lub siab nyiam li cas puv npo nyob hauv nej, raws txoj kev thoob tsib thiab txoj kev to taub hauv sab ntsuj plig.
10 Kom nej taug ib txog kev kom phim Huab Tais, ces nej thiaj yuav ua neeg ntxim nyiam tas nrho, nej yuav ua tau ntau yam zoo uas yuav tawg paj txi txiv, thiab nej yuav hlob zuj zus nyob hauv txoj kev paub Tswv Ntuj.
11 Nej yuav tau nws lub hwj huam ntxiv zog rau nej nyob hauv txhua yam raws li nws lub peev xwm muaj hwj chim ci ntsa iab, kom nej muaj txoj kev nyob ruaj nreb tsis tso tseg, thiab muaj ib lub siab ntev zoo siab hlo nyiaj tas txhua yam.
12 Ces nej yuav ua Leej Txiv tsaug; nws yog tus tau ua kom nej tsim nyog nrog nws cov ntshiab koom txais ib lub cuab tam nyob hauv qhov pom kev.
13 Nws tau rho peb tawm ntawm kev tsaus ntuj lub hwj huam los, thiab coj peb los nyob hauv nws Leej Tub nws nyiam lub Ceeb Tsheej.
14 Nyob hauv nws Leej Tub, peb muaj txoj kev cawm, txoj kev zam txim txhaum.

NPN 98: 2-3AB, 3CD-4, 5-6

Txais: (2) HUAB TAIS ua kom sawv daws paub txog nws txoj kev cawm.

HUAB TAIS ua kom sawv daws paub txog nws txoj kev cawm,
nws muab nws txoj kev ncaj rau cov haiv neeg pom.
Nws rov nco txog nws txoj kev ua zoo thiab
kev pheej xeeb rau tsev neeg His Xas Lais.

Txais: (2) HUAB TAIS ua kom sawv daws paub txog nws txoj kev cawm.

Tas npoo ntuj npoo ntiaj teb kawg tau pom
peb tus Tswv Ntuj txoj kev cawm neeg.
Tas txhua teb chaws, nej zoo siab hu nkauj rau HUAB TAIS,
nej qw suab hu nkauj, nej cav txog nws.

Txais: (2) HUAB TAIS ua kom sawv daws paub txog nws txoj kev cawm.

Nej ntaus nkauj nog ncas cav txog Huab Tais,
nej ntaus nkauj nog ncas nrog tej zaj nkauj zoo mloog.
Nej tshuab hom ntxuag suab kub nyuj,
nej hu nkauj zoo siab ntawm tus Vaj Ntxwv HUAB TAIS xub ntiag.

Txais: (2) HUAB TAIS ua kom sawv daws paub txog nws txoj kev cawm.

As Les Lus Yas: MT 4: 19

Txais: As les lus yas, as les lus yas.

Huab Tais hais tias: Nej raws kuv mus,
Kuv yuav tsa nej ua cov tub puav neeg.

Txais: As les lus yas, as les lus yas.

Ntawv Moo Zoo: LK 5: 1-11

1 Muaj ib zaug, muaj ib pab neeg coob coob tuaj sib txiv nyob ncig Yes Xus mloog Tswv Ntuj Lo Lus; nws sawv ntsug nyob ze lub ntug pas dej Nkes Nes Xas Les.
2 Ces nws pom ob lub nkoj nres ntawm ntug dej, cov tub puav ntses nqes nkoj tas lawm, lawv tab tom ntxuav lawv cov vas.
3 Yes Xus nce mus rau hauv ib lub nkoj, yog Xis Moos lub, nws kom Xis Moos nquam nkoj mus deb ntawm ntug dej me ntsis. Yes Xus zaum hauv nkoj qhia tsoom sid.
4 Thaum Yes Xus hais lus tas lawm, nws hais rau Xis Moos tias: "Koj nquam nkoj mus lawm tom qhov dej tob, nej tso nej cov vas nqes mus puav ntses."
5 Xis Moos teb tias: "Xib Hwb, peb twb khwv ib hmos tsis tau dab tsi li. Tab sis yog vim koj hais, mas kuv yuav pov cov vas nqes mus."
6 Ces lawv pov vas, lawv puav tau ntses ntau kawg ua lawv cov vas txam kiag.
7 Lawv co tes rau lawv cov npawg nyob lwm lub nkoj kom tuaj pab. Cov npawg tuaj txog, sawv daws muab ntses ntim rau ob lub nkoj puv nkaus, ua nkoj yuav luag tog.
8 Xis Moos Pob Zeb pom li ntawd, nws txhos caug ntua pe Yes Xus, nws hais tias: "Huab Tais, koj txav mus deb ntawm kuv, vim kuv yog ib tug neeg txhaum."
9 Xis Moos ntshai kawg, cov nrog Xis Moos ua ke puav leej ntshai, vim lawv puav tau ntses ntau.
10 Yas Kos thiab Zam, uas yog Ntxes Npes Dais ob tug tub, thiab yog Xis Moos ob tug kwv luag, nkawd kuj ntshai kawg. Yes Xus hais rau Xis Moos tias: "Koj txhob ntshai, txij no mus, koj yuav puav neeg."
11 Ces lawv nquam nkoj los rau tim ntug. Lawv tso tas ib puas tsav yam tseg, lawv raws Yes Xus mus.

Tim 3 lub 9 Hlis 2021

Thawj Hnub Rau Lis Piam Nees Nkaum Ob Nruab Xyoo B Nruab Lis Piam Xyoo I
Lectionary: 435

Yuav hwm LN Gregory tus Loj, Vaj Qhia ua Kws cov Txuj Ntshiab

Zaj Nyeem Ib: KLX 1: 15-20

Cov kwv tij nkauj muad:
15 Yes Xus Pleev yog tus Tswv Ntuj uas qhov muag pom tsis tau tus duab. Nws yog tus xub yug dua cov nyob hauv txhua tsav txhua yam uas Ntuj tsim los.
16 Vim nyob hauv Yes Xus, tas txhua tsav txhua yam nyob saum ntuj thiab nyob ntiaj teb no raug tsim los, txhua yam pom tau thiab pom tsis tau, txhua tus Tshiab zaum saum theej kiab, thiab txhua tus Tshiab ua Huab Tais, ua Vaj Txheeb, thiab muaj hwj huam tib si. Tas puas tsav yam ntawd yog tsim los nyob hauv Leej Pleev thiab cia rau Leej Pleev.
17 Nws xub nyob dua txhua tsav txhua yam; tas puas tsav yam sib dhos sib tuav ua ke ruaj nyob hauv nws.
18 Nws yog lub Taub Hau nyob saum lub Cev uas yog lub Koom Txoos. Nws yog lub hauv paus chiv keeb, nws yog tus xub yug hauv cov tub tuag rov los, kom nws yog tus loj tshaj cov nyob hauv tas txhua tsav txhua yam.
19 Vim nyob hauv Yes Xus, Tswv Ntuj tas nrho txaus siab los nyob txawm,
20 ces Tswv Ntuj ua kom tas puas tsav yam nyob saum ntuj los nyob ntiaj teb rov nrog nws sib haum xeeb nyob hauv Yes Xus, thiab rov muaj kev thaj yeeb nyob hauv nws cov ntshav uas nrog saum ntoo cuam.

NPN 100: 1b-2, 3, 4, 5

Txais: (2b) Nej tuaj muaj kev zoo siab nyob ntawm HUAB TAIS xub ntiag.

Tas txhua lub teb chaws, nej hu nkauj zoo siab rau HUAB TAIS!
Nej xyiv fab hlo luag ntxhi tsob hwb HUAB TAIS ;
nej hu nkauj zoo siab chaws los ntawm nws xub ntiag!

Txais: (2b) Nej tuaj muaj kev zoo siab nyob ntawm HUAB TAIS xub ntiag.

Nej yuav tsum paub tias HUAB TAIS yog Tswv Ntuj.
Nws tsim peb los, peb yog nws tug,
peb yog nws haiv neeg, yog nws pab yaj nws saib.

Txais: (2b) Nej tuaj muaj kev zoo siab nyob ntawm HUAB TAIS xub ntiag.

Nej chaws mus hauv nws cov rooj loog, nej ua nws tsaug,
Nej mus hauv nws cov tshav loog, nej cav txog nws ;
nej ua nws tsaug, nej foom lus zoo rau nws lub npe.

Txais: (2b) Nej tuaj muaj kev zoo siab nyob ntawm HUAB TAIS xub ntiag.

HUAB TAIS muaj lub siab zoo :
HUAB TAIS, nws ua zoo rau peb mus li,
nws ua siab ncaj rau peb txheej dhau txheej.

Txais: (2b) Nej tuaj muaj kev zoo siab nyob ntawm HUAB TAIS xub ntiag.

As Les Lus Yas: Zam 8 12

Txais: As les lus yas, as les lus yas.

Huab Tais hais tias: “Kuv yog qhov pom kev kaj lub qab ntuj neeg.
Leej twg lawv kuv qab, nws yuav tau qhov pom kev uas pub txoj sia."

Txais: As les lus yas, as les lus yas.


Ntawv Moo Zoo: LK 5: 33-39

33 Cov thoob xwm ntawv thiab cov Fas Lis Xais hais rau Yes Xus tias: "Zam Ntxuav Plig cov thwj tim nquag yoo mov thiab hais cov zaj teev Ntuj, cov Fas Lis Xas cov thwj tim kuj ua ib yam li ntawd thiab. Hos koj cov thwj tim mas lawv noj thiab lawv haus!"
34 Yes Xus teb rau lawv tias: "Nej puas kom nraug vauv cov kwv luag yoo mov thaum nraug vauv tseem nrog lawv nyob?
35 Yuav muaj ib lub zim txwv uas luag coj nraug vauv mus lawm, thaum ntawd, lawv mam li yuav yoo mov."
36 Yes Xus tseem hais ib zag paj lug rau lawv tias: "Tsis muaj leej twg yuav dua ib daig ntaub ntawm lub tsho tshiab los ntxiv rau lub khaub tshos. Vim tias lub tshiab yuav ntuag, hos daim ntaub dua ntawm lub tsho tshiab los, kuj tsis phim lub khaub tshos.
37 Thiab kuj tsis muaj leej twg yuav ntim cawv tshiab rau hauv tej qub hnab tawv. Vim tias cov cawv tshiab yuav ua kom cov hnab tawv ntawd tawg, ces cawv yuav txeej tas, hos cov hnab tawv los kuj yuav piam sij tas.
38 Ua li mas, yuav tsum muab cawv tshiab ntim rau hauv cov hnab tawv tshiab.
39 Thiab tsis muaj ib tug neeg uas tau haus cov cawv laus tas, yuav xav haus cov cawv tshiab. Nws hais tias : “Cawv laus qab dua."

Tim 4 lub 9 Hlis 2021

Thawj Hnub Xya Lis Piam Nees Nkaum Ob Nruab Xyoo B Nruab Lis Piam Xyoo I
Lectionary: 436

Zaj Nyeem Ib: KLX 1: 21-23

Cov kwv tij nkauj muad,
21 Yav thaud, nej nyob deb Tswv Ntuj thiab nej yog nws ib co yeeb ncuab nyob hauv nej lub tswv yim vim nej ua tej yam phem.
22 Nyem no, Tswv Ntuj tau ua kom nej los nrog nws sib haum xeeb nyob hauv Leej Pleev lub cev nqaij txoj kev tuag lawm, kom Leej Pleev muab nej ua ib co neeg ntshiab, tsis muaj qhov phem, tsis muaj chaw xyeej nyob ntawm Tswv Ntuj xub ntiag.
23 Tiam sis yuav tsum yog nej ua siab tawv qhawv nyob hauv txoj kev ntseeg, nyob ruaj nreb khov kho, nyob tus tus, txhob ncaim ntawm lub Moo Zoo txoj kev tso siab uas nej tau hnov lawm; lub Moo Zoo ntawd tw b raug muab tshaj rau txhua leej txhua tus nyob hauv lub qab ntuj khwb no lawm. Kuv, Paj Lug, yog ib tug tub tsob hwb lub Moo Zoo ntawd.

NPN 54: 3-4, 6+8

Txais: (6) Tswv Ntuj nws yog tus pab kuv.

Tswv Ntuj, thov koj cawm kuv vim koj lub npe;
muab koj lub hwj huam los pab kom kuv yeej.
Tswv Ntuj, thov koj mloog kuv zaj thov,
Thov mloog cov lus tawm ntawm kuv lub ncauj los.

Txais: (6) Tswv Ntuj nws yog tus pab kuv.

Nej ntsia, Tswv Ntuj yog tus tuaj pab kuv,
HUAB TAIS yog tus hwj rawv kuv txoj sia.
Kuv zoo siab hlo yuav cev ib co txim los txi koj,
HUAB TAIS, kuv yuav cav txog koj lub npe
Uas muaj txoj kev hlub neeg tas nrho.

Txais: (6) Tswv Ntuj nws yog tus pab kuv.

As Les Lus Yas: ZAM 14: 6

Txais: As les lus yas, as les lus yas.

Huab Tais hais tias: Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis mus ntawm kuv mus.

Txais: As les lus yas, as les lus yas.

Ntawv Moo Zoo: LK 6: 1-5

1 Muaj ib hnub Xas Npas Tos, Yes Xus mus hla ib thaj teb npleg, nws cov thwj tim txawm de tej hnab nplej los mos ntawm tes noj.
2 Muaj ib co Fas Lis Xas hais tias: "Vim li cas nej ua tej yam uas txoj cai tsis pub ua hnub Xas Npas Tos?"
3 Yes Xus teb rau lawv tias: "Nej tsis tau nyeem zaj piav txog qhov Das Vis tau ua thaum nws thiab nws cov neeg tshaib plab lod?
4 Thaum ntawd Das Vis tau nkag mus rau hauv Tswv Ntuj lub tsev, mus muab cov ncuav mov txi Ntuj uas tsuas kawg yog cov Leej Choj thiaj muaj cai noj xwb los noj, thiab nws tseem muab rau nws cov kwv luag noj thiab."
5 Ces Yes Xus hais rau lawv tias: “Neeg Leej Tub yog tus tswv hnub Xas Npas Tos."

Tim 7 lub 9 Hlis 2021

Hnub Peb Lis Piam Nees Nkaum Peb Nruab Xyoo B Nruab Lis Piam Xyoo I
Lectionary: 438

Zaj Nyeem Ib: KLX 2: 6-15

Cov kwv tij nkauj muad,
6 Xws li nej twb tau txais tus Huab Tais Yes Xus Pleev lawm, mas nej kuj yuav tsum taug kev nyob hauv nws;
7 nej yeej meem nrhau cag ruaj rau hauv nws thiab muab nej txhim tsa rau saum nws; nej ua kom nej txoj kev ntseeg ruaj nreb khov kho raws li nej tau kawm los lawm; nej lub siab yuav ua Ntuj tsaug tsis tseg.
8 Nej ceev faj kom luag txhob ntxias tau nej qaug mus rau lawv tej zaj tswv yim thiab lawv tej lus dag lus cuav raws li tib neeg txoj kev ib txwm qhia los, thiab raws li ntiaj teb cov tswv yim dab qhuas xwb, tsis yog raws li Leej Pleev.
9 Vim nyob hauv Leej Pleev, lub hwj chim ua Tswv Ntuj yeej nyob tas nrho hauv nws lub cev ua tib neeg.
10 Nej los nyob hauv Leej Pleev, mas nej kuj koom nrog nws txais lub hwj chim ntawd huv tib si thiab. Nws yog lub Taub Hau kav tas txhua txoj kev ua vaj thiab txhua txoj kev muaj hwj huam.
11 Nyob hauv Leej PLeev, nej kuj tau txais ib lub cim txiav thiab, uas tsis yog ib lub cim txiav neeg txhais tes ua, yog Leej Pleev lub cim txiav, uas muab yus lub cev nqaij hle pov tseg tas huv tib si.
12 Hnub nej txais lub Cim Ntxuav, nej nrog Leej Pleev nqes mus rau hauv ntxa, thiab nej kuj nrog nws sawv rov qab los, vim nej ntseeg txog Tswv Ntuj lub huam tsa tau Leej Pleev sawv hauv cov tub tuag rov los.
13 Txawm nej twb tuag lawm vim nej cov txhaum thiab vim nej lub cev tsis ua lub cim txiav, los Tswv Ntuj tsa nej sawv rov los ua ke nrog Leej Pleev, vim tias nws twb zam txhaum rau peb tas huv si lawm.
14 Nws muab lub txim uas txoj cai tsis hlub peb txiav rau peb ris so pov tseg tas tib si, nws muab tshem tawm ntawm peb mus, thiab muab ntsia rau saum ntoo cuam.
15 Tswv Ntuj txo cov tshiab ua vaj txheeb thiab muaj hwj huam, nws khoo lawv taug kev raws Leej Pleev qab rau sawv daws saib tias nws yog tus yeej lawv nyob saum tus Ntoo Cuam.

NPN 145: 1b-2, 8-9, 10-11

Txais: (9) HUAB TAIS ua siab zoo hlub txhua tsav txhua yam nws tau tsim los.

Kuv tus Tswv Ntuj, kuv tus vaj, kuv cav lus zoo txog koj,
kuv yuav foom koob meej rau koj lub npe mus ib txhiab ib txhis.
Kuv yuav niaj hnub foom koob meej rau koj,
kuv yuav cav lus zoo txog koj lub npe mus ib txhiab ib txhis.

Txais: (9) HUAB TAIS ua siab zoo hlub txhua tsav txhua yam nws tau tsim los.

HUAB TAIS lub siab hlub thiab khuv leej neeg,
nws npau taws qeeb, nws lub siab hlub neeg tas nrho.
HUAB TAIS ua siab zoo rau txhua leej txhua tus,
nws lub siab khuv leej tas puas tsav yam nws tau tsim los.

Txais: (9) HUAB TAIS ua siab zoo hlub txhua tsav txhua yam nws tau tsim los.

HUAB TAIS, cia tas koj cov hauj lwm ua koj tsaug,
thiab cia cov uas nyiam koj cav txog koj.
Cia lawv qhuas txog koj lub Ceeb Tsheej muaj hwj chim
Thiab piav txog kuj lub hwj huam loj.

Txais: (9) HUAB TAIS ua siab zoo hlub txhua tsav txhua yam nws tau tsim los.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias: Kuv tau xaiv nej tawm ntawm ntiaj teb los
kom nej mus txi ib co txiv uas yuav tsis txawj lwj.

Txais: As les lus yas, as les lus yas.

Ntawv Moo Zoo: LK 6: 12-19

12 Thaum ntawd, Yes Xus nce mus teev Ntuj pem roob, nws nyob teev Ntuj ib hmos.
13 Thaum kaj ntug, nws hu nws cov thwj tim los, nws xaiv kaum ob leeg, nws hu lawv ua cov Hauv Paus Xa Lus.
14 Muaj Xis Moos, uas nws tis npe rau hu ua Pob Zeb, muaj As Nres, Pob Zeb tus kwv, muaj Yas Kos, Zam, Fis Lis Pos, Npas Tos Los Mas Yos,
15 Mas Tais, Tos Mas, Yas Kos uas yog As Fas Yos tub, Xis Moos tus Siab Kub,
16 Yus Das uas yog Yas Kos tub, thiab Yus Das Kas Lis Yaus, uas yog tus ntxeev siab.
17 Yes Xus nrog lawv cov no nqes los, nws sawv saum ib qho chaw tiaj. Muaj Yes Xus ib pab thwj tim coob kawg thiab ib pab neeg kuj coob kawg tuaj ntawm xeev Yus Das, thiab ntawm Yes Lus Xas Les tuaj, thiab ntawm thaj tsam ntug dej ntuj ntawm Tws Los thiab Xis Doos tuaj.
18 Lawv tuaj mloog Yes Xus thiab tuaj kom nws kho lawv cov mob. Tab cov uas raug tej tus dab tsis huv tsim lawv, kuj puav leej rov zoo tas.
19 Tas txhua leej nyob hauv pab neeg ntawd nrhiav kom tau kev kov Yes Xus, vim muaj ib lub hwj huam tawm hauv nws los kho sawv daws zoo tas huv si.

Tim 8 lub 9 Hlis 2021

Hnub Peb Lis Piam Nees Nkaum Peb Nruab Xyoo B nruab Lis Piam Xyoo I

Koob Tsheej Hwm Niam Mab Liab Yug Los
Lectionary: 636

Zaj Nyeem Ib: Mis Kes 5: 1-4a

Huab Tais hais tias:
1 Npes Les Hes Es Fas Tas, koj uas me dua cov nyob hauv cov xeem Yus Das, tus yuav kav tsoom His Xas Lais yuav tawm hauv koj los rau kuv. Nws lub keeb yeej nyob puag thaum ntxov ub los, yeej nyob puag txheej thaud los lawm.
2 Yog vim li ntawd mas Huab Tais yuav tso lawv pov tseg ib ntus, mus txog lub caij uas tus yuav yug me nyuam yug tau nws tus me nyuam lawm. Ces nws cov kwv tij seem yuav rov los koom nrog haiv neeg His Xas Lais.
3 Nws yuav sawv ruaj nreb thiab nws yuav pub zaub rau nws pab yaj nyob hauv HUAB TAIS lub hwj huam, nyob hauv Huab Tais nws tus Tswv Ntuj lub npe muaj hwj chim. Ces lawv yuav tau nyob nyab xeeb vim zaum no nws yuav nto moo loj mus txog tim npoo ntiaj teb kawg.
4a Nws yuav yog kev thaj yeeb.

Los: Los Mas 8: 28-30

Cov kwv tij nkauj muad:
28 Peb paub tias txhua yam pab kom cov uas nyiam Tswv Ntuj tau qhov zoo, yog cov uas Tswv Ntuj hu lawv raws li qhov nws npaj rau lawv.
29 Cov neeg uas nws ib txwm paub ua ntej lawm, nws kuj pub txoj hmoov rau lawv kom lawv yoog tau raws li nws Leej Tub tus duab, kom xwv nws Leej Tub thiaj ua tus xub yug los dua tas ib tsoom kwv coob coob.
30 Cov uas Tswv Ntuj ib txwm npaj hu, mas nws yeej hu lawv; cov uas nws hu, mas nws ua kom lawv dawb huv tuaj; cov uas nws ua kom dawb huv tuaj, mas nws kuj muab hwj chim rau lawv thiab.

NPN 13: 6ab, 6c

Txais: (HX 61: 10) Kuv txaus siab thiab zoo siab nyob hauv Huab Tais.

Txawm tias kuv tso siab lug rau koj txoj kev khuv leej los,
Thov cia kuv lub siab luag ntxhi nyob hauv koj txoj kev cawm.

Txais: (HX 61: 10) Kuv txaus siab thiab zoo siab nyob hauv Huab Tais.

Cia kuv hu nkauj cav txog HUAB TAIS tias:
“Nws tau ua siab zoo kawg rau kuv.”

Txais: (HX 61: 10) Kuv txaus siab thiab zoo siab nyob hauv Huab Tais.

As Les Lus yas

Txais: As les lus yas, as les lus yas.

Koj tau txoj hmoov zoo, Nkauj Xwb Tsim Txiaj Mab Liab,
tsim nyog sawv daws qhuas koj;
lub Hnub uas pub txoj kev Ncaj tawm hauv koj tuaj,
yog Leej Pleev peb tus Tswv Ntuj.

Txais: As les lus yas, as les lus yas.

Ntawv Moo Zoo: Mt 1: 1-16, 18-23

1 Phau ntawv qhia txog Yes Xus Pleev lub keeb, uas yog Das Vis leej tub thiab yog Has Nplas Has leej tub :
2 Has Nplas Has yug Is Xas Has, Is Xas Has yug Yas Kos, Yas Kos yug Yus Das thiab nws cov kwv tij.
3 Yus Das yug Phas Les thiab Zas Las, ntawm Thas Mas los; Phas Les yug Es Xas Los; Es Xas Los yug As Las;
4 As Las yug As Mis Nas Das; As Mis Nas Das yug Nas As Xoos; Nas As Xoos yug Xas Moos,
5 Xas Moos yug Npuag Oos, ntawm Las Has los; Npuag Oos yug Os Npes, ntawm Luv los; Os Npes yug Yes Xes;
6 Yes Xes yug tus vaj Das Vis. Das Vis yug Xas Los Moos, uas yog Us Lis tus poj niam yug;
7 Xas Los Moos yug Los Npuag; Los Npuag yug As Npias; As Npias yug As Xas;
8 As Xas yug Yos Xas Fas; Yos Xas Fas yug Yos Las; Yos Las yug Os Xias;
9 Os Xias yug Yos Thas; Yos Thas yug As Kas; As Kas yug Es Xes Kias;
10 Es Xes Kias yug Mas Nas Xes; Mas Nas Xes yug As Moos; As Moos yug Yos Xias;
11 Yos Xias yug Yes Kos Nias thiab nws cov kwv tij, thaum lub caij lawv mus raug txim nyob Npas Npis Los.
12 Dhau lub caij raug txim nyob Npas Npis Los lawm, Yes Kos Nias yug Xas Las Thias; Xas Las Thias yug Ntxos Los Npas Npes;
13 Ntxos Los Npas Npes yug As Npis Yus; As Npis Yus yug Es Lias Kis; Es Lias Kis yug As Ntxos,
14 As Ntxos yug Xas Dos; Xas Dos yug As Khis; As Khis yug Es Lis Us;
15 Es Lis Us yug Es Les As Ntxas; Es Les As Ntxas yug Mas Thas; Mas Thas yug Yas Kos;
16 Yas Kos yug Yos Xes uas yog Mab Liab tus txiv. Mab Liab yug Yes Xus, uas tseem hu ua Leej Pleev.
18 Yes Xus Pleev lub keeb chiv zoo li no: Mab Liab uas yog nws niam raug muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub hauv plab.
19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab yuav nrauj Mab Liab twj ywm.
20 Thaum nws xav tau li ntawd, Huab Tais tus Tshiab tawm los ua npau suav rau nws, thiab hais rau nws tias: "Yos Xes, Das Vis leej tub, koj txhob ntshai coj Mab Liab, koj poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub.
21 Nws yuav yug ib tug tub, koj yuav tis nws npe hu ua Yes Xus, vim nws yuav cawm nws haiv neeg ntawm lawv cov txhaum."
22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias:
23 “Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias: ‘Tswv Ntuj nrog peb nyob’.”

Los: MT 1: 18-23

18 Yes Xus Pleev lub keeb chiv zoo li no : Mab Liab uas yog nws niam raug muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub hauv plab.
19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab yuav nrauj Mab Liab twj ywm.
20 Thaum nws xav tau li ntawd, Huab Tais tus Tshiab tawm los ua npau suav rau nws, thiab hais rau nws tias: "Yos Xes, Das Vis leej tub, koj txhob ntshai coj Mab Liab, koj poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub.
21 Nws yuav yug ib tug tub, koj yuav tis nws npe hu ua Yes Xus, vim nws yuav cawm nws haiv neeg ntawm lawv cov txhaum."
22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias:
23 “Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias: ‘Tswv Ntuj nrog peb nyob’.”

Tim 9 lub 9 Hlis 2021

Hnub Tsib Lis Piam Nees Nkaum Peb Nruab Xyoo B Nruab Lis Piam Xyoo I
Lectionary: 440

Yuav Hwm LN Peter Claver, ua Leej Choj

Zaj Nheem Ib: KLX 3: 12-17

Cov kwv tij nkauj muad:
12 Li ntawd, nej yog cov Tswv Ntuj xaiv, nws cov ntshiab, cov uas nws nyiam, mas nej yuav tsum coj ib lub siab txawj khuv leej luag, ib lub siab nyiam ua zoo rau luag, ib lub siab nyiam ua neeg me, ib lub siab mos siab muag, thiab ib lub siab ntev.
13 Nej ib leeg yuav ua siab ntev rau ib leeg; yog nej ib tug muaj lus rau lwm tus, mas nej yuav sib zam, vim Huab Tais twb zam rau nej lawm ces nej kuj yuav ua raws li nws tau ua.
14 Qhov loj tshaj plaws yog kom nej yuav tsum coj txoj kev nyiam, uas yog yam yuav ua kom nej zoo tiav txhij tiav txhua.
15 Thov kom Leej Pleev txoj kev thaj yeeb tuaj kav nej lub siab; yog txoj kev thaj yeeb uas Ntuj hu nej los koom ua ib lub cev. Nej yuav ua Ntuj tsaug mog.
16 Thov kom Leej Pleev Lo Lus nyob nplua mias hauv nej, ces nej yuav txawj rov sib qhuab qhia, sib ntuas nyob hauv txoj kev thoob tsib, thiab nej yuav hu tej zaj nkauj paj nruag, tej zaj nkauj ntxuag qeej thiab tej zaj nkauj teev ntuj rau Tswv Ntuj ua nws tsaug, vim nej muaj lub siab nco nws tej txiaj ntsim.
17 Txawm nej hais yam twg, los ua yam twg, mas nej yuav tuav txog Huab Tais Yes Xus lub npe los ua tas txhua yam, thiab nej yuav ua Leej Txiv Tswv Ntuj tsaug nyob hauv Yes Xus.

NPN 150: 1b-2, 3-4, 5-6

Txais: (6)Kom txhua tsav txhua yam uas txawj ua pa cav txog HUAB TAIS!

Nej cav txog Tswv Ntuj nyob hauv nws Kem Ntshiab ;
Nej cav txog nws nyob saum lub ntuj muaj nws lub peev xwm.
Nej cav txog nws vim nws cov hauj lwm muaj hwj huam;
nej cav txog nws vim nws yog tus vaj loj tas nrho

Txais: (6)Kom txhua tsav txhua yam uas txawj ua pa cav txog HUAB TAIS!

Nej cav txog nws thaum lub suab hom nrov.
Nej ntaus thaj cheej ntaus nkauj nog ncas cav txog nws.
Nej yoj nruas dai tswb dhia seev cev cav txog nws ;
nej qoj hlua thiab tshuab qeej cav txog nws.

Txais: (6)Kom txhua tsav txhua yam uas txawj ua pa cav txog HUAB TAIS!

Nej ntaus nruas npuaj doog diaj cav txog nws ;
nej ntaus nruas npuaj nrov ncha ntws cav txog nws.
Kom txhua tsav txhua yam uas txawj ua pa
kav tsij cav txog HUAB TAIS! As les lus yas!

Txais: (6)Kom txhua tsav txhua yam uas txawj ua pa cav txog HUAB TAIS!

As Les Lus Yas: 1 Zam 4: 12

Txais: As les lus yas, as les lus yas.

Yog peb sib nyiam sib hlub, mas Tswv Ntuj nyob hauv peb,
thiab nws txoj kev nyiam kev hlub
yuav hlob tiav tiav log zoo txhij txhua nyob hauv peb.

Txais: As les lus yas, as les lus yas.

Ntawv Moo Zoo: LK 6: 27-38

Yes Xus hais rau nws cov thwj tim tias:
27 "Kuv hais rau nej cov uas mloog kuv tias: Nej yuav nyiam nej cov yeeb ncuab, nej yuav ua zoo rau cov neeg ntxub nej,
28 nej foom lus zoo rau cov foom phem rau nej, nej thov Ntuj rau cov neeg hais lus phem txog nej.
29 Leej twg ib ncuav pias rau koj sab plhu, mas koj tig sab tod rau nws ntaus thiab. Leej twg chua koj lub tsho tshaj sab, mas koj tso koj lub tsho hnav rau nws thiab.
30 Leej twg thov koj, mas koj pub rau nws. Leej twg txeeb tej yam yog koj tug, mas koj tsis txhob ntaim kom nws muab rov qab.
31 Nej xav kom luag ua li cas rau nej, mas nej yuav ua ib yam li ntawd rau luag thiab.
32 Yog nej nyiam cov neeg nyiam nej, mas nej yuav tau txiaj ntsim dab tsi? Vim tias cov neeg txhaum kuj nyiam cov uas nyiam lawv thiab.
33 Yog nej ua zoo rau cov neeg ua zoo rau nej, mas nej yuav tau txiaj ntsim dab tsi? Cov neeg txhaum kuj ua tau ib yam li ntawd thiab.
34 Yog nej txais nyiaj rau cov neeg uas nej paub tias nej yuav tau rov qab, mas nej yuav tau txiaj ntsim dab tsi? Vim cov neeg txhaum kuj txais nyiaj rau cov neeg txhaum kom lawv tau li qub rov qab thiab.
35 Hos nej, mas nej yuav nyiam nej cov yeeb ncuab, nej yuav ua qhov zoo thiab nej yuav txais nyiaj tsis tos kom luag rov rau nej li. Ces nej yuav tau txais koob haum loj, thiab nej yuav yog Tus Nyob Siab cov tub, vim nws ua siab zoo rau cov neeg tsis nco nws txiaj ntsim thiab rau cov neeg siab phem lim hiam.
36 Nej yuav khuv leej luag ib yam li nej Txiv tus uas txawj khuv leej neeg.
37 Nej tsis txhob txiav txim, Ntuj thiaj yuav tsis txiav txim rau nej. Nej tsis txhob muab txim, Ntuj thiaj yuav tsis muab txim rau nej. Nej zam txhaum rau luag, Ntuj thiaj yuav zam rau nej.
38 Nej pub rau luag, Ntuj thiaj yuav pub rau nej. Nws yuav xuas ib lub tawb loj los luj, yuav muab tswm muab co kom ceev thiab ntim nco lug ces nws yuav muab hliv rau hauv nej nqaws tsho. Vim Ntuj yuav xuas lub tawb uas nej luj rau luag rov los luj rau nej.”

Tim 10 lub 9 Hlis 2021

Hnub Rau Lis Piam Nees Nkaum Peb Nruab Xyoo B Nruab Lis Piam Xyoo I
Lectionary: 441

Zaj Nyeem Ib: 1 TMT 1: 1-2, 12-14

1 Kuv, Paj Lug, uas yog Yes Xus Pleev ib tug Hauv Paus Xa Lus vim Tswv Ntuj tus cawm peb, thiab Yes Xus Pleev peb qhov chaw tso siab, tau tsa kom kuv ua,
2 kuv sau ntawv rau Tis Mos Tes, kuv ib leeg tseem tub nyob hauv txoj kev ntseeg. Thov kom koj tau txais txiaj ntsim, kev khuv leej, thiab kev thaj yeeb tuaj ntawm Tswv Ntuj peb Leej Txiv, thiab ntawm Yes Xus Pleev peb tus Huab Tais tuaj.
12 Kuv ua tus uas txhawb zog rau kuv, Yes Xus Pleev peb tus Huab Tais tsaug, vim nws saib kuv yog ib tug neeg nws ntseeg tau, ces nws tau hu kuv los tsob hwb nws.
13 Thaud, kuv yog ib tug neeg thuam Ntuj, hiam luag, thiab nyiam ua nruj ua tsiv, tiam sis Tswv Ntuj tau zam rau kuv lawm, vim kuv tsis paub thiab tsis muaj kev ntseeg kuv thiaj tau ua li ntawd.
14 Tiam sis kuv tau txais peb tus Huab Tais lub txiaj ntsim puv hauv kuv, nrog rau txoj kev ntseeg thiab txoj kev nyiam uas nyob hauv Yes Xus Pleev.

NPN 16: 1b-2a+5, 7-8, 11

Txais: (5a) Huab Tais, koj yog kuv lub cuab tam kuv teej tug.

Tswv Ntuj, thov koj txuag kuv, vim kuv tuaj khaub zig koj.
Kuv hais rau HUAB TAIS tias: " Koj yog kuv tus Hua Tais!”
Huab Tais, koj yog kuv lub cuab tam, kuv lub ntim,
Koj yog tus tuav rawv kuv txoj hmoo.

Txais: (5a) Huab Tais, koj yog kuv lub cuab tam kuv teej tug.

Kuv cav lus zoo txog tus HUAB TAIS uas qhia kuv xav tswv yim,
Tab yog hmo ntuj kuv lub siab ntsws tseem txhib kuv.
Kuv cia HUAB TAIS nyob ntawm kuv xub ntiag tsis tseg;
Vim nws nyob ntawm kuv sab xis, kuv yuav tsis ntaus siab me.

Txais: (5a) Huab Tais, koj yog kuv lub cuab tam kuv teej tug .

Koj yuav qhia kuv taug txoj kev mus rau txoj sia,
mus tau txoj kev zoo siab puv npo nyob ntawm koj xub ntiag,
mus txog txoj kev nplig siab tsis txawj kawg nyob ntawm koj sab xis.

Txais: (5a) Huab Tais, koj yog kuv lub cuab tam kuv teej tug .

As Les Lus Yas: Zam 17: 17b, 17a

Txais: As les lus yas, as les lus yas.

Huab Tais, koj lo lus yog qhov tseeb;
thov koj qee peb mus nyob hauv qhov tseeb.

Txais: As les lus yas, as les lus yas.

Ntawv Moo Zoo: LK 6: 39-42

39 Yes Xus hais ib zag paj lug rau nws cov thwj tim tias: “Ib tug dig muag puas coj tau lwm tus dig muag kev? Nkawd ob leeg yuav tsis ua ke mus poob qhov xwb lod?
40 Tus thwj tim tsis loj dua nws tus xib hwb. Txhua tus thwj tim uas kawm tiav tas, nws tsuas kawg zoo li nws tus xib hwb xwb.
41 Vim li cas koj ntsia tus quav nplej uas nyob hauv koj tus kwv lub qhov muag, hos tus nqaj uas nyob hauv koj lub qhov muag, koj ho tsis pom?
42 Ua cas koj thiaj hais tau rau koj tus kwv tias: ‘Kwv ntxawg, koj cia kuv rho tus quav nplej hauv koj qhov muag pov tseg’, hos koj twb tsis pom tus nqaj hauv koj qhov muag li? Neeg zoo nraum daim tawv, koj rho tus nqaj hauv koj qhov muag pov tseg tso ; koj thiaj yuav pom kev dig tus quav nplej hauv koj tus kwv lub qhov muag.”

TIM 11 LUB 9 HLIS 2021

Hnub Xya Lis Piam Nees Nkaum Peb Nruab Xyoo B Nruab Lis Piam Xyoo I
Lectionary: 442

Zaj Nyeem Ib: 1 TM 1: 15-17

Tus zoo nyiad
15 Lo Lus no yog ib lo lus peb yuav tsum ntseeg, thiab tsim nyog peb yuav tsum Khaws tas nrho, yog lo tias: Yes Xus Pleev tuaj nyob ntiaj teb no yog tuaj cawm cov neeg txhaum. Kuv yog thawj tug hauv cov neeg txhaum ntawd ntag.
16 Tos Yes Xus Pleev tau zam rau kuv ua thawj tug, los yog vim nws xav muab kuv ua piv txwv qhia txog nws lub siab ntev rau cov neeg uas yuav ntseeg txog nws pom kom lawv tau txoj sia nyob mus li.
17 Kom tus Vaj kav tiam dhau tiam, tus tsis txawj tuag, tus neeg pom tsis tau, tus uas nws tib leeg yog Tswv Ntuj, kom nws muaj koob meej thiab muaj hwj chim mus li txheej dhau txheej tis dhau tis. Ua li.

NPN 113: 1b-2, 3-4, 5a+6-7

Txais: (2) Nej cav txog Huab Tais lub npe mus li.

HUAB TAIS cov tub txib, nej cav txog nws,
nej cav txog HUAB TAIS lub npe.
Kom HUAB TAIS lub npe nto moo lug,
nyem no mus txog txhiab niag tim puas xyuas!

Txais: (2) Nej cav txog Huab Tais lub npe mus li.

Txij thaum hnub tawm txog hnub poob qho,
kom HUAB TAIS lub npe nto koob meej.
HUAB TAIS nyob siab tshaj ib tsoom kuj cuab,
nws lub koob meej nyob siab dua txheej ntuj saud.

Txais: (2) Nej cav txog Huab Tais lub npe mus li.

Leej twg thiaj zoo li HUAB TAIS, peb tus Tswv Ntuj?
Nws dauv muag los ntsia lub ntuj thiab lub ntiaj teb nyob txheej hauv.
Nws tsa tus pluag sawv hauv plua tshauv los,
nws rub tus txom nyem hauv qhov qias los.

Txais: (2) Nej cav txog Huab Tais lub npe mus li.

As Les Lus Yas: ZAM 14: 23

Txais: As les lus yas, as les lus yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws.
Kuv Txiv wb yuav tuaj nyob hauv nws.

Txais: As les lus yas, as les lus yas.

Ntawv Moo Zoo: LK 6: 43-49

Yes Xus hais rau nws cov thwj tim tias:
43 "Tsis muaj ib tsob ntoo zoo nkauj yuav txi ib co txiv lwj, tsis muaj ib tsob ntoo lwj yuav txi ib co txiv zoo nkauj.
44 Xav paub tsob ntoo, ces ntsia nws lub txiv xwb. Neeg tsis de txiv ncuav pias saum tej tsob ntoo tuaj pos, los de txiv cawv saum ib co hmab tuaj pos.
45 Tus neeg zoo, rho tej yam zoo uas nyob puv hauv nws lub siab tawm los. Tus neeg phem rho tej yam phem uas nyob puv hauv nws lub siab tawm los. Vim tias lub siab puv nkaus yam twg mas lub ncauj hais yam ntawd tawm.
46 Vim li cas nej hu kuv tias 'Huab Tais, Huab Tais', tab sis nej tsis ua raws li kuv hais?
47 Tus uas tuaj cuag kuv, nws mloog kuv tej lus thiab ua raws li kuv hais, mas kuv yuav qhia nej tias nws yog ib tug neeg zoo li cas.
48 Nws zoo xws li ib tug neeg txhim tsev, uas khawb av kom tob tob, thiab puab lub taw ntsa rau saum pob tsuas. Thaum dej sab siv huam, dej dag nphau nphwv tuaj ntsawj lub tsev, tab sis ua tsis tau kom lub tsev ua zog, vim lub tsev ntawd txhim tau ruaj.
49 Hos tus mloog kuv cov lus, tab sis nws tsis ua raws, nws zoo xws li tus neeg txhim tsev rau saum npoo av, tsis cog taw ntsa tob. Thaum dej sab siv tuaj ntsawj lub tsev, lub tsev vau tam sis ntawd, thiab lub tsev puas tas nrho."

Tim 13 lub 9 Hlis 2021

Hnub Ob Lis Piam Nees Nkaum Plaub Nruab Xyoo B Nruab Lis Piam Xyoo I
Lectionary: 443

Yuav Hwm LN John Chrysostom, ua Tswv Qhia thiab Kws cov Txuj Ntshiab

Zaj Nyeem Ib: 1 TM 2: 1-8

Tus zoo nyiad,
1 Qhov ua ntej dua cov mas yog kuv xav thov kom nej muaj kev vam txog Ntuj, kev teev Ntuj, kev thov Ntuj, thiab hais tej zaj ua Ntuj tsaug rau tas ib zeej tsoom neeg,
2 rau cov vaj ntxwv, thiab cov muaj cai tswj luag tej, kom peb tau kev coj ib lub neej nyob nyab xeeb thiab tiaj tus nyob hauv txoj kev hwm Ntuj thiab txoj kev ib leeg saib tau sib leeg.
3 Qhov no yog qhov zoo thiab xis Tswv Ntuj tus cawm peb lub siab.
4 Nws xav kom txhua leej txhua tus txais kev cawm thiab paub txog qhov tseeb.
5 Vim tsuas muaj tib tug Tswv Ntuj xwb, thiab tsuas muaj tib tug cev lus ntawm Tswv Ntuj rau tib neeg thiab ntawm tib neeg rau Tswv Ntuj xwb, yog tus tib neeg Yes Xus Pleev,
6 uas nws tau muab nws los ua nqi txhiv sawv daws. Thaum txog lub caij teem, thiaj tau muaj kev ua tim khawv zeem tseeb txog qhov ntawd.
7 Vim li no kuv thiaj raug tsa ua ib tug tub tshaj xo thiab ib tug Hauv Paus Xa Lus. Kuv hais tseeb, kuv tsis dag, kuv yog tus xib hwb qhia cov neeg teev pej kum dab txog txoj kev ntseeg thiab txog qhov tseeb.
8 Li ntawd, kuv xav kom nyob tas qhov txhia chaw, ib tsoom neeg yuav tsum tsa lawv txhais tes dawb huv thov Ntuj, tsis txhob muaj kev npau taws los muaj lus sib cav sib ceg.

NPN 28: 2, 7, 8-9

Txais: (6) Kom HUAB TAIS nto koob meej, vim nws tau mloog kuv lo lus thov.

Thov koj mloog kuv lub suab thaum kuv hu txog koj,
thaum kuv tsa tes rau tim koj lub tsev ntshiab,.

Txais: (6) Kom HUAB TAIS nto koob meej, vim nws tau mloog kuv lo lus thov.

HUAB TAIS yog kuv lub zog, thiab kuv daim leej phiaj.
Kuv tso siab lug rau nws, kuv nrhiav tau kev pab nyob hauv nws;
ces kuv lub siab hom khaj, kuv zaj nkauj yog hu los ua nws tsaug.

Txais: (6) Kom HUAB TAIS nto koob meej, vim nws tau mloog kuv lo lus thov.

HUAB TAIS yog nws haiv neeg lub zog,
yog lub yeej khov txuag nws tus pleev.
Thov koj cawm koj haiv neeg thiab foom hmoov zoo rau koj lub cuab tam,
thov koj ua tswv zov yaj coj lawv thiab puag nqa lawv mus li.

Txais: (6) Kom HUAB TAIS nto koob meej, vim nws tau mloog kuv lo lus thov.

As Les Lus Yas: ZAM 3: 16

Txais: As les lus yas, as les lus yas.

Tswv Ntuj hlub lub qab ntuj neeg npaum no,
nws thiaj muab nws Leej Tub twm zeej rau,
kom xwv txhua tus ntseeg txog nws muaj txoj sia nyob mus li.

Txais: As les lus yas, as les lus yas.

Ntawv Moo Zoo: LK 7: 1-10

1 Thaum Yes Xus hais nws cov lus rau tsoom sid mloog tas, nws mus rau hauv Kas Fas Naus.
2 Muaj ib tug xab txheeb nws muaj ib tug tub txib uas nws nyiam tab tom mob hnyav, yuav tuag.
3 Thaum tus xab txheeb hnov hais txog Yes Xus, nws xa ib co laus neeg Yus Das tuaj thov Yes Xus kom mus kho nws tus tub txib.
4 Thaum cov laus neeg tuaj txog ntawm Yes Xus, lawv thov Yes Xus tas zog rau tus xab txheeb tias: "Tsim nyog koj yuav ua qhov ntawd rau nws,
5 nws nyiam peb haiv neeg, thiab nws yog tus tau txhim lub tsev txoos rau peb."
6 Yes Xus nrog lawv taug kev mus. Thaum lawv tuaj yuav txog lub tsev, tus xab txheeb xa ib co phooj ywg tuaj hais rau Yes Xus tias: "Huab Tais, txhob tab kaum koj, vim kuv tsis tsim nyog koj yuav chaws los hauv kuv lub qab ru tsev,
7 vim li ntawd kuv tus kheej twb tsis tsim nyog tuaj cuag koj; tab sis thov koj hais ib lo lus xwb ces kuv tus tub txib yuav zoo hlo.
8 Vim tias, kuv kuj yog ib tug neeg zwm rau ib tug loj, thiab kuv muaj ib co tub rog uas zwm rau kuv, yog kuv hais rau ib tug tias 'Mus !' ces nws cia li mus; hos kuv hais rau lwm tus tias 'Los !', mas nws cia li los. Kuv hais rau kuv tus tub qhe tias 'Ua qhov no !' ces nws cia li ua".
9 Yes Xus hnov cov lus no, nws qhuas tus xab txheeb kawg. Nws tig ntsia tom qab, nws hais rau pab neeg lawv nws qab tias: "Kuv hais rau nej, nyob hauv tsoom His Xas Lais, kuv tsis tau pom dua ib lub siab ntseeg loj npaum li no."
10 Thaum cov neeg uas raug xa tuaj cuag Yes Xus rov mus txog tsev, lawv pom tus tub qhe twb zoo neej lawm.

Tim     14     lub     9     Hlis     2021

Hnub Xya Lis Piam Nees Nkaum Peb Nruab Xyoo B Nruab Lis Piam Xyoo I

Koob Tsheej Cav Txog Yes Xus tus Ntoo Cuam
Lectionary: 638

Zaj Nyeem Ib:    XAM PHAJ 21: 4b-9

4b Cov His Xas Lais mus txog ib tog kev, lawv npau taws.
5 Lawv cem Tswv Ntuj thiab cem Mais Xes tias: "Vim li cas neb thiaj coj peb tawm Hais Nkws Tos teb los kom peb los tuag hauv lub teb chaws suab puam no? Tsis muaj mov noj, tsis muaj dej haus li, peb dhuav noj cov niag mov dhuav siab ntawd dhau lawm!"
6 Tswv Ntuj thiaj tso ib cov nab muaj taug hluav taws tuaj tom lawv; cov nab ntawd tom cov His Xas Lais tuag coob leej.
7 Tsoom pej xeem thiaj tuaj hais rau Mais Xes tias: "Peb ua txhaum lawm vim peb tau cem HUAB TAIS thiab cem koj. Koj thov HUAB TAIS kom nws coj cov nab ntawd mus deb ntawm peb." Ces Mais Xes thiaj thov Ntuj rau tsoom pej xeem.
8 HUAB TAIS hais rau Mais Xes tias: "Koj nchuav ib tug nab muaj taug hluav taws, koj muab khuam rau saum ib tug ncej. Leej twg raug nab tom, yog nws tsa muag saib tus nab nchuav ntawd ces nws yuav tsis tuag."
9 Mais Xes thiaj muab tooj dub los nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag saib tus nab tooj ntawd ces nws tsis tuag.

NPN    78: 1bc-2, 34-35, 36-37, 38

Txais: (7b) Nej yuav nco ntsoov Huab Tais cov hauj lwm loj.

Kuv haiv neeg, nej mloog kuv tej lus qhuab qhia;
Nej tig ntsej los mloog cov lus tawm ntawm kuv lub ncauj los.
Kuv yuav qhib ncauj hais ib zag paj lug,
Kuv yuav hais tej zaj lus tob uas yeej muaj txheej thaud los lawm.

Txais: (7b) Nej yuav nco ntsoov Huab Tais cov hauj lwm loj.

Thaum Tswv Ntuj rhuav lawv, ces lawv nrhiav nws ;
lawv tig rov los nug txog Tswv Nuj.
Lawv rov nco tias Tswv Ntuj yog lawv lub tsua,
yog tus Tswv Ntuj Nyob Siab tus txhiv lawv.

Txais: (7b) Nej yuav nco ntsoov Huab Tais cov hauj lwm loj.

Tiam sis lawv lam qhuas nws ntawm ncauj xwb,
lawv tus nplaig hais lus dag nws.
Lawv lub siab tsis npuab nws ruaj kiag li,
lawv tsis coj raws cov lus nws tau nrog lawv cog li.

Txais: (7b) Nej yuav nco ntsoov Huab Tais cov hauj lwm loj.

Tab sis, Tswv Ntuj lub siab hlub neeg zam rau lawv qhov txhaum,
nws tsis rhuav lawv pov tseg,
Nws cheem nws lub siab npau taws tsis tseg,
nws tsis pub kom nws lub siab ceev tsim dheev los.

Txais: (7b) Nej yuav nco ntsoov Huab Tais cov hauj lwm loj.

Zaj Nyeem Ob:    FIS LIS POS 2: 6-11

Cov kwv tij nkauj muad,
6 Yes Xus Pleev yog Tswv Ntuj, tiam sis nws tsis tau saib nws loj ib yam li Tswv Ntuj, yog ib qho uas peb lub tswv yim mem tau nyuaj.
7 Nws muab nws tus kheej tshem tawm, nws hloov ua zoo li ib tug qhev, yug los zoo li tib neeg.
8 Vim luag pom nws yog tib neeg, ces nws txo nws qis qis, nws tuaj yeem mloog lus mus txog qhov tuag, thiab tseem yog tuag nyob saum ntoo cuam.
9 Vim li no, mas Tswv Ntuj thiaj tsa Yes Xus ua tus loj nyob qhov chaw siab dua cov, thiab muab lub npe uas nyob siab dua txhua lub npe rau nws.
10 Kom thaum twg hnov tuav txog Yes Xus lub npe, mas txhua leej txhua tus yuav tsum kim caug hawm, tsis hais nyob saum cov txheej ntuj saud, los nyob ntiaj teb no, los nyob nruab yeeb tib si.
11 Thiab kom txhua xeem lus yuav tsum zeem tseeb tias Yes Xus Pleev yog Huab Tais, ces Leej Txiv Tswv Ntuj thiaj muaj koob meej nto moo lug.

As Les Lus Yas

Txais: As les lus yas, as les lus yas.

Leej Pleev, peb pe hawm koj, thiab peb cav txog txog,
vim koj tau cawm qab ntuj neeg nyob saum koj tus Ntoo Cuam.

Txais: As les lus yas, as les lus yas.

Ntawv Moo Zoo:    ZAM 3: 13-17

Yes Xus hais rau Nis Kos Des Mos tias:
13 “Tsis tau muaj leej twg nce mus saum ntuj dua li, tsuas muaj tus tau nqes saum ntuj los xwb, uas yog Neeg Leej Tub.
14 Ib yam li Mais Xes tsa tus nab nyob teb chaws suab puam, Neeg Leej Tub kuj yuav tsum raug luag tsa nws siab thiab,
15 kom xwv txhua leej txhua tus ntseeg txog nws muaj txoj sia nyob mus li.”
16 Vim Tswv Ntuj nyiam lub qab ntuj neeg npaum no, nws thiaj muab nws Leej Tub twm zeej rau lawv, kom xwv txhua leej txhua tus ntseeg txog nws txhob tuag, tab sis kom muaj txoj sia nyob mus li.
17 Vim Tswv Ntuj tsis tau xa nws Leej Tub tuaj hauv lub qab ntuj kom nws muab txim rau lub qab ntuj neeg, tiam sis kom qab ntuj neeg tau txais kev cawm nyob hauv nws.