COV ZAJ NYEEM NRUAB LIS PIAM XYOO II 2017-2018

TIM      26      LUB      5      HLIS      2018

Hnub Xya Lis Piam Xya Nruab Xyoo B Nruab Lis Piam II

Hwm LN Philip Neri. ua Leej choj

Zaj Nyeem Ib:     YAS KOS   5:   13-20

Cov kwv tij zoo nyiad,
13 Nyob hauv nej, puas muaj leej twg raug kev txom nyem?  Kom nws yuav tsum thov Ntuj.  Puas muaj leej twg nyob kaj siab lug? Kom nws yuav tsum hu nkauj cav txog Ntuj. 14 Puas muaj leej twg muaj mob muaj nkeeg nyob hauv nej?  Kom nws yuav tsum hu lub Koom Txoos cov txwj laus ua leej choj tuaj thov Ntuj rau nws, thiab kom lawv muab roj los pleev nws nyob hauv Huab Tais lub npe. 15 Zaj thov ntuj muaj kev ntseeg tiag yuav cawm tau tus neeg mob, Huab Tais yuav tsa nws sawv rov los. Yog nws tau ua txhaum, mas nws cov txhaum yuav daws tas. 16 Li ntawd, nej yuav rov lees txhaum ib leeg rau ib leeg, thiab nej yuav thov Ntuj ib leeg rau ib leeg, kom nej tus mob zoo hlo. Thaum tus neeg siab ncaj mob siab thov Ntuj, mas nws lo lus thov muaj zog kawg nkaus. 17 Es Lias yog ib tug neeg zoo li peb  xwb tiam sis nws thov Ntuj tas zog kom txhob los nag, ces nag tsis poob los yug lub ntiaj teb tau peb xyoos thiab rau hli. 18 Es Lias mam rov qab thov Ntuj  dua ces ntuj thiaj qhib lug tso nag los, lub ntiaj teb thiaj rov txi txiv.
19 Kuv cov kwv tij, thaum nej ib tug twg yuam kev mus deb ntawm qhov tseeb lawm, yog muaj ib tug coj tau nws rov los, 20 mas nej yuav tsum paub tias, tus uas coj ib tug neeg txhaum ntawm nws txoj kev poob zoo rov los, mas nws cawm tau tus ntawd tus plig ntawm txoj kev tuag, thiab nws so tau ntau yam txhaum pov tseg.

NPN       141:  1-2, 3+8

Txais:  (2a) Thov kom kuv zaj thov Ntuj nce tuaj rau ntawm koj xws li ib co pa xyab.

HUAB TAIS, kuv hu txog koj : tsuag tsuag tuaj pab kuv !
Thaum kuv hu txog koj, thov koj tig los mloog kuv.
Thov cia kuv zaj teev Ntuj nce tuaj rau ntawn koj xws li pa xyab,
Kom kuv ob txhais tes tsa tuaj zoo li cev txim thaum tsaus ntuj.

Txais:  (2a) Thov kom kuv zaj thov Ntuj nce tuaj rau ntawm koj xws li ib co pa xyab.

HUAB TAIS, thov koj zov kuv lub ncauj,
Thov koj zov lub qhov rooj ntawm kuv di ncauj.
Tswv Ntuj kuv tus Huab Tais, kuv tig qhov muag ntsia ntsoov koj,
kuv khiav tuaj nkaum hauv koj, koj txhob cia kuv plam txoj sia.

Txais:  (2a) Thov kom kuv zaj thov Ntuj nce tuaj rau ntawm koj xws li ib co pa xyab.

As Les Lus Yas:      MT 11:  25

Txais:   As les lus yas, as les lus yas.

Koj nto koob meej, Leej Txiv, tus Huab Tais kav lub ntuj lub teb,
vim koj qhib cov txuj txog lub Ceeb Tsheej rau cov neeg me paub.

Txais:   As les lus yas, as les lus yas.

Ntawv Moo Zoo:       MK  10:   13-16

13 Neeg coj ib co me nyuam tuaj rau Yes Xus kom Yes Xus kov lawv, tab sis cov thwj tim cem lawv. 14 Yes Xus pom li ntawd, nws npau taws, nws hais rau lawv tias : "Nej cia cov me nyuam tuaj cuag kuv, nej txhob txwv lawv. Vim yog cov uas zoo li cov me nyuam no thiaj yuav tau Tswv Ntuj lub Ceeb Tsheej los ua lawv tug. 15 Kuv hais tseeb rau nej : leej twg tsis txais Tswv Ntuj lub Ceeb Tsheej zoo li ib tug me nyuam, mas nws yuav mus tsis tau rau hauv.” 16 Ces Yes Xus puag cov me nyuam hauv nws xub ntiag, nws foom hmoov zoo tsa tes rau saum lawv.

TIM      28      LUB      5      HLIS      2018

Hnub Ob Lis Piam Yim Nruab Xyoo B Nruab Lis Piam II

Zaj Nyeem Ib:       1 POB ZEB  1:   3-9

3 Peb cav lus zoo txog peb tus Huab Tais Yes Xus Pleev tus Tswv Ntuj thiab Leej Txiv, vim nws muaj lub siab khuv leej neeg kawg nkaus, nws thiaj ua kom peb rov yug los tshiab muaj kev tso siab lug nyob hauv Yes Xus Pleev txoj kev sawv hauv cov tub tuag rov los, 4 nws thiaj pub ib lub cuab tam uas tsis txawj lwj, tsis txawj tsuas, thiab tsis txawj nphob rau peb, uas nws tshwj zias cia rau saum ntuj pub rau nej, 5 nej cov uas Tswv Ntuj lub hwj huam txuag nej nyob hauv txoj kev ntseeg, kom nej tau txais txoj kev cawm neeg, uas yuav tawm tuaj hnub kawg rau sawv daws pom.
6 Vim li no, nej thiaj muaj kev zoo siab luag ntxhi, txawm tias nej yuav raug ntau yam kev txom nyem kev sim siab ib ntus ntxiv, 7 kom nej txoj kev ntseeg uas muaj nqes dua tej kub txawj puas, raug sim zoo li sim nyob hauv hluav taws; ces nej thiaj yuav tsim nyog txais kev qhuas nej, txais koob meej, thiab txais hwj chim, thaum hnub Yes Xus Pleev yuav tshwm sim rov los. 8 Txawm nej tsis tau pom nws dua los nej nyiam nws; niaj hnub no nej tsis pom nws li, tab sis nej ntseeg, mas nej muaj ib txog kev zoo siab uas piav tsis tau thiab muaj hwj chim, 9 vim nej twb tau txais raws li lub hom phiaj ntawm nej txoj kev ntseeg lawm, uas yog txoj kev cawm nej tus ntsuj plig.

NPN       111:   1-2, 5-6, 9+10C

Txais: (5) Huab Tais yuav nco ntsoov tias nws tau cog lus mus tas ib txhis.
los: As les lus yas.

Kuv yuav ua HUAB TAIS tsaug tas kuv lub siab lub ntsws
thaum kuv nrog tsoom neeg siab ncaj koom ua ib pab koom ua lub txoos.
HUAB TAIS cov hauj lwm loj tas nrho,
zoo ntxim siab kawg nkaus.

Txais: (5) Huab Tais yuav nco ntsoov tias nws tau cog lus mus tas ib txhis.
los: As les lus yas.

Nws muab txiam xws rau cov hwm nws tau noj,
nws yuav nco ntsoov mus li txog tias nws tau cog lus.
Nws tau ua kom nws haiv neeg paub
txog nws tej hauj lwm muaj hwj huam,
Nws muab cov haiv neeg lub cuab tam pub rau lawv.

Txais: (5) Huab Tais yuav nco ntsoov tias nws tau cog lus mus tas ib txhis.
los: As les lus yas.

Nws tau xa kev cawm tuaj rau nws haiv neeg,
nws yuav tsis hloov nws lo lus tas mus li ib txhis;
nws lub npe ntshiab thiab tsim nyog peb hwm.
Nws lub koob meej yuav nyob mus li ib txhiab ib txhis. .

Txais: (5) Huab Tais yuav nco ntsoov tias nws tau cog lus mus tas ib txhis.
los: As les lus yas.

As Les Lus Yas:       2 KLN  8:   9

Txais: As les lus yas, as les lus yas.

Yes Xus Pleev tuaj yeem ua tus pluag txawm tias nws yog tus nplua nuj,
kom xwv nws txoj kev pluag ua nej nplua nuj tuaj.

Txais: As les lus yas, as les lus yas.

Ntawv Moo Zoo:       MK  10:   17-27

17 Thaum Yes Xus tab tom sawv kev mus, muaj ib tug neeg khiav los txhos caug ntua ntawm Yes Xus xub ntiag, nws nug tias : "Xib Hwb siab zoo, kuv yuav ua dab tsi thiaj yuav tau txais txoj sia nyob mus li los ua cuab tam ?" 18 Yes Xus hais rau nws tias : "Vim li cas koj hais tias kuv siab zoo ? Tsis muaj leej twg siab zoo, tsuas kawg Tswv Ntuj tib leeg xwb. 19 Koj twb paub cov lus qhia no lawm: ‘Koj txhob tua neeg, txhob zes luag txij luag nkawm, txhob ua tub sab, txhob ua tim khawv cuav, txhob ua luam noj luag, hwm koj niam koj txiv.’" 20 Tus neeg ntawd teb rau Yes Xus tias : "Xib Hwb, txij thaum kuv yav hluas los, kuv yeej coj raws nraim li ntawd." 21 Yes Xus ntsia nws, ces Yes Xus nyiam nws. Nws hais rau tus neeg ntawd tias : “Tsuas tshuav ib yam xwb koj tsis tau ua : koj mus, koj muab koj lub cuab tam muag, muab tus nqi pub rau cov pluag, koj yuav tau ib lub cuab tam muaj nqis nyob saum ntuj. Ces koj los raws kuv." 22 Tus neeg ntawd hnov lo lus no, nws lub ntsej muag ntshaus tas, ces nws rov mus tu siab nrho, vim nws muaj cuab yeej cuab tam ntau. 23 Ces Yes Xus ntsia ib ncig nws, nws hais rau cov thwj tim tias : "Cov neeg nplua nuj mus hauv Tswv Ntuj lub Ceeb Tsheej mas nyuaj npaum no!" 24 Cov thwj tim yoob tas rau nws cov lus no. Tab sis Yes Xus rov hais rau lawv tias : "Kuv cov me nyuad, kev mus hauv Tswv Ntuj lub Ceeb Tsheej mas yeej nyuaj npaum no ! 25 Ib tug ntxhuav yuav nkag hauv lub qhov koob yooj yim dua ib tug nplua nuj nkag mus hauv Tswv Ntuj lub Ceeb Tsheej." 26 Cov thwj tim yim huab yoob heev, lawv sib tham lawv tias : "Leej twg thiaj yuav txais kev cawm tau ?" 27 Yes Xus ntsia lawv, nws hais tias : "Yog neeg ua neeg xwb, mas yeej tsis tau li, tab sis Tswv Ntuj ua tau, vim Tswv Ntuj ua tau tas ib puas tsav yam."

TIM 29 LUB 5 HLIS 2018

Hnub Peb Lis Piam Yim Nruab Xyoo B Nruab Lis Piam II

Zaj Nyeem Ib: 1 POB ZEB 1: 10-16

10 Txoj kev cawm nej tus ntsuj plig ntawd, mas cov Yaj Saub twb tau tshawb nrhiav thiab tau tshuaj txog lawm, lawv yog cov tau ua saub tshaj lus txog lub txiaj ntsim uas nej yuav tau txais ua nej tug. 11 Lawv tau tshuaj txog lub caij thiab cov xwm uas yuav tshwm sim raws li Leej Pleev lub Tswv Yim nyob hauv lawv xub qhia ua ntej tias Leej Pleev yuav raug txom nyem li cas thiab yuav muaj koob meej li cas tom qab. 12 Lawv tau txais kev to taub tias qhov lawv ua tsis yog ua los pab lawv tus kheej tiam sis yog ua los pab nej hais txog tej yam uas zaum no nej tau hnov tshaj txog lawm, uas yog cov tub tshaj lub Moo Zoo tuaj qhia rau nej paub nyob hauv Leej Tswv Yim Ntshiab tus tuaj saum ntuj tuaj, yog tej yam uas cov Tshiab kiag lawv yeej ntshaw kom lawv tau pom.
13 Vim li no, nej lub tswv yim yuav sia siv khov kho nyob npaj rawv tos, nej tsis txhob haus dej haus cawv qaug, nej yuav tso siab lug rau lub txiaj ntsim uas nej yuav tau txais thaum Yes Xus Pleev tshwm los nkaus xwb. 14 Nej ua ib co me nyuam mloog lus, tsis txhob mloog ywj nej lub siab ntshaw xws li yav thaud uas nej tseem tsis tau paub qhov tseeb. 15 Raws li tus hu nej nws yog tus ntshiab, nej kuj yuav coj ib tug cwj pwm ntshiab , 16 vim muaj lus sau tseg tias : ‘Nej yuav ua neeg ntshiab vim kuv yog tus ntshiab.’

NPN 98: 1, 2-3AB, 3CD-4

Txais: (2a) HUAB TAIS ua kom sawv daws paub txog nws txoj kev cawm neeg.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua.

Txais…

HUAB TAIS ua kom sawv daws paub txog nws txoj kev cawm neeg,
nws muab nws txoj kev ncaj rau cov haiv neeg pom.
Nws rov nco txog nws txoj kev ua zoo rau
thiab kev hlub tsev neeg His Xas Lais.

Txais…

Tas npoo ntuj npoo ntiaj teb kawg tau pom
peb tus Tswv Ntuj txoj kev cawm neeg.
Tas txhua teb chaws, nej zoo siab hu nkauj rau HUAB TAIS,
nej nqua suab hu nkauj, nej cav txog nws.

Txais…

As Les Lus Yas: MT 11: 25

Txais: As les lus yas, as les lus yas.

Peb cav txog koj, Leej Txiv, tus Huab Tais kav lub ntuj lub teb,
vim koj qhib cov txuj txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: MK 10: 28-31

28 Pob Zeb hais rau Yes Xus tias : “Peb, mas peb tau tso ib puas tsav yam tseg, peb los raws koj.” 29 Yes Xus hais tias: “Kuv hais tseeb rau nej tias, tsis muaj ib tug neeg twg uas tau tso vaj tse, kwv tij nkauj muam, niam thiab txiv, me tub me nyuam, thiab liaj teb tseg vim kuv thiab vim lub Moo Zoo, 30 uas yuav tsis tau txais ib puas npaug tiam no ntawm vaj tse, kwv tij nkauj muam, niam thiab txiv, me tub me nyuam thiab liaj teb, ntxiv nrog rau kev raug luag hiam, thiab lwm tiam, nws yuav txais txoj sia nyob mus li. 31 Tiam sis coob leej uas tuaj ua ntej, yuav tuaj puag tom qab, hos coob leej tuaj tom qab, yuav ua ntej.”

TIM 30 LUB 5 HLIS 2018

Hnub Plaub Lis Piam Yim Nruab Xyoo B Nruab Lis Piam II

Zaj Nyeem Ib: 1 PZ 1: 18-25

Cov kwv tij zoo nyiad,
18 Nej yuav tsum paub tias, tus txhiv nej ntawm nej tus yam ntxwv tsis muaj nqes uas nej txais ntawm nej cov poj yawm txwv koob los, mas nws tsis muab nyiaj tsis muab kub los muab tej yam txawj puas los txhiv nej, 19 nws muab Leej Pleev, uas yog tus yaj tsis muaj chaw xyeej tsis tsuas ib tee dub cov ntshav muaj nqes loj los txhiv nej. 20 Tswv Ntuj yeej paub nws ua ntej ntuj tsim teb raug los lawm, tiam sis nws nyuam qhuav tshwm los rau lub caij kawg no xwb, nws tshwm los vim nej, 21 uas yog cov ntseeg txog Tswv Ntuj nyob hauv nws, vim Tswv Ntuj tsa nws sawv hauv cov tub tuag rov los thiab muab hwj chim rau nws, kom xwv nej ntseeg thiab tso siab tas nrho rau Tswv Ntuj.
22 Nej tau ua kom nej tus plig dawb huv tuaj nyob hauv txoj kev mloog lus ua raws txoj kev tseeb uas qhia kom sib nyiam sib hlub tseeb tiag xws li ib co kwv tij, ua li mas nej yuav tsum muaj ib lub siab dawb sib nyiam sib hlub tiag tiag kom tas nej siab nej ntsws. 23 Nej tau rov yug dua tshiab lawm, tiam sis tsis yog yug ntawm ib lub noob txawj lwj los, hos yog yug ntawm ib lub noob tsis txawj lwj los, uas yog Tswv Ntuj Lo Lus muaj txoj sia thiab nyob mus li. 24 Vim tias, “Tas txhua leej tib neeg zoo li tsob nroj tsuag, nws lub hwj chim zoo li lub paj tawg hauv nruab liaj nruab teb; tsob nroj ntsws, lub paj qhuav paj caws. 25 Tsuas tshuav Huab Tais Lo Lus thiaj nyob tas ib txhiab ib txhis xwb.” Lo Lus ntawd yog lub Moo Zoo uas tau tshaj rau nej lawm.

NPN 147: 12-13, 14-15, 19-20

Txais: (12a) Yes Lus Xas Les, koj cia li cav txog Huab Tais.
Los: As les lus yas.

Yes Lus Xas Les, koj cia li cav txog Huab Tais lub koob meej,
Xis Yoos, koj cia li cav txog koj tus Tswv Ntuj,
vim nws tau ua kom koj cov tab ntawm rooj vag khov tuaj lawm,
nws tau foom hmoov zoo rau koj cov me nyuam nyob hauv koj.

Txais: (12a) Yes Lus Xas Les, koj cia li cav txog Huab Tais.
Los: As les lus yas.

Nws pub kev thaj yeeb rau koj hauv koj ciam dej ciam av,
nws pub mov nplej mov mog rau koj noj txaus siab.
Nws txib nws lo lus tuaj rau ntiaj teb,
nws lo lus khiav yeev tam sis ntawd tuaj.

Txais: (12a) Yes Lus Xas Les, koj cia li cav txog Huab Tais.
Los: As les lus yas.

Nws tau tshaj nws lo lus rau Yas Kos,
nws cov kev cai thiab lij choj rau His Xas Lais.
Nws tsis tau ua zoo li ntawd rau lwm haiv neeg twg li,
nws tsis tau qhia nws cov lij choj rau lawv paub li. As les lus yas.

Txais: (12a) Yes Lus Xas Les, koj cia li cav txog Huab Tais.
Los: As les lus yas.

As Les Lus Yas: MK 10: 45

Txais: As les lus yas, as les lus yas.

Neeg Leej Tub tuaj kom tau tsob hwb sawv daws
thiab muab nws txoj sia los ua nqi txhiv coob leej.

Txais: As les lus yas, as les lus yas.

Ntawv Moo Zoo: MK 10: 32-45

32 Yes Xus thiab nws cov thwj tim taug kev nce mus pem Yes Lus Xas Les. Yes Xus mus ua lawv ntej. Lawv poob siab tas, hos cov neeg raws lawv qab kuj ntshai tas. Yes Xus rov hu Pab Kaum Ob los rau ib cag, ces nws pib hais txog tej yam uas yuav tuaj raug nws li no : 33 "Zaum no peb nce mus pem Yes Lus Xas Les, mas Neeg Leej Tub yuav raug muab rau cov thawj leej choj thiab cov kws Ntawv Ntshiab ntes. Lawv yuav txiav lub txim tuag rau nws, yuav muab nws rau cov neeg teev pej kum dab. 34 Lawv yuav thuam nws, nto aub ncaug rau nws, muab nws nplawm thiab muab nws tua. Peb hnub tom qab, nws yuav sawv rov los."
35 Yas Kos thiab Zam uas yog Ntxes Npes Dais ob tug tub txav los ze nws, nkawd hais rau nws tias : "Xib Hwb, wb xav thov kom koj ua raws li wb thov rau wb." 36 Yes Xus hais rau nkawd tias : "Neb xav kom kuv ua dab tsi rau neb?" 37 Nkawd hais rau nws tias : "Thov koj pub wb ib tug zaum ntawm koj sab xis, ib tug zaum ntawm koj sab laug nyob hauv koj lub hwj chim." 38 Yes Xus hais rau nkawd tias : "Neb tsis paub neb thov dab tsi. Neb puas haus taus lub ntim uas kuv yuav tsum haus ? Thiab txais taus lub cim ntxuav uas kuv yuav tsum txais ?” 39 Nkawd teb tias : “Wb ua tau.” Yes Xus hais rau nkawd tias : “Lub ntim uas kuv yuav tsum haus, neb kuj yuav haus, thiab lub cim ntxuav uas kuv yuav tsum txais, neb kuj yuav txais. 40 Tiam sis qhov yuav zaum ntawm kuv sab xis los sab laug, mas tsis yog kuv yuav ua tus muab. Ntuj npaj qhov ntawd rau leej twg, mas leej twg tau.” 41 Kaum leej thwj tim hnov li ntawd, lawv tsis txaus siab rau Yas Kos thiab Zam nkawd.
42 Yes Xus thiaj hu cov thwj tim los ntawm nws, nws hais rau lawv tias : "Nej paub tias nyob hauv cov neeg coj pej kum dab, mas cov ua thawj coj kav sawv daws xws li ib co tswv, thiab cov ua hlob yuam sawv daws nruj. 43 Tiam sis nyob hauv nej, mas yuav tsis txhob pub muaj zoo li ntawd : leej twg xav ua tus loj nyob hauv nej, nws yuav ua nej tus tub txib, 44 hos leej twg xav ua tus thawj hauv nej, mas nws yuav ua sawv daws tus qhev. 45 Vim tias Neeg Leej Tub tsis tuaj kom luag tsob hwb nws, tiam sis nws tuaj tsob hwb sawv daws thiab muab nws txoj sia los ua nqi txhiv coob leej."

TIM 31 LUB 5 HLIS 2018

Hnub Tsib Lis Piam Yim Nruab Xyoo B Nruab Lis Piam Xyoo II

Hwm Niam Mab Liab mus saib Es Lis Xas Npes

Zaj Nyeem Ib: XFN 3: 14-18A

14 Leej me ntxhais Xis Yoos, koj cia li nqua suab qw zoo siab ! Tsoom His Xas Lais, nej cia li hu nkauj luag ntxhi ! Me ntxhais Yes Lus Xas Les, koj lub siab cia li zoo siab tas nrho dhia hom khaj ! 15 HUAB TAIS tau thim nws cov lus txiav txim rau koj lawm. Nws tau caum koj cov yeeb ncuab khiav mus tas. HUAB TAIS , His Xas Lais tus vaj nws nyob nruab nrab hauv koj, koj yuav tsis ntshai kev phem dab tsi ntxiv. 16 Hnub ntawd, Yes Lus Xas Les yuav hnov cov lus no tias: “Xis Yoos, koj txhob ntshai, txhob ntaus siab me ! 17 HUAB TAIS koj tus Tswv Ntuj nyob nruab nrab hauv koj, yog tus cawm seej muaj hwj huam. Nws zoo siab tas nrho vim muaj koj. Nws kev hlub ua kom koj rov tshiab tuaj. Nws hu nkauj dhia zoo siab yog vim koj, 18 xws li thaum neeg hu nkauj ua koob tsheej lom zem.”

Los: LOS MAS 12: 9-16

Cov kwv tij:
9 Nej tsis txhob ua txuj lam nyiam luag xwb. Nej yuav ntxub qhov phem nyiam qhov zoo tuag nthi. 10 Nej yuav muaj lub siab muag sib hlub xws li ib co txheeb kwv tij; nej yuav xyaum kom ib leeg txawj xub saib ib leeg muaj nqes. 11 Nej yuav tsis txhob cia kom nej lub siab kub tsuag tuaj, nej siv zog muab tas nej lub tswv yim los tsob hwb Huab Tais. 12 Nej yuav z00 siab nyob hauv txoj kev tso siab rau Ntuj, nej yuav ua siab ntev ris kev txom nyem, nej yuav kub siab teev Ntuj tsis tso tseg. 13 Nej yuav muab kev pab rau cov ntshiab raws li lawv tej kev siv. Nej yuav xyiv fab txais cov qhua tuaj hauv nej. 14 Nej yuav foom lus zoo rau cov neeg hiam nej, foom lus zoo xwb txhob foom lus phem. 15 Nej yuav zoo siab nrog cov neeg muaj kev zoo siab, nej yuav quaj nrog cov neeg tau kev quaj ntsuag. 16 Nej yuav ua siab zoo rau sawv daws ib yam nkaus; nej tsis txhob ua neeg muab hlob, tiam sis yuav saib taus cov neeg me, nrog lawv ua phooj ywg; txhob rov saib nej zoo dua luag tej.

NPN: HIS XAIS 12: 2-3, 4BCD, 5-6

Txais: (6) His Xas Lais tus loj thiab tus Ntshiab tuaj nyob hauv nej lawm.

Tswv Ntuj yog kuv tus cawm seej,
Kuv tso siab rau nws, kuv tsis txhawj.
Kuv lub zog thiab kuv lub peev xwm yog HUAB TAIS,
Nws yog tus tau cawm kuv.
Nej yuav zoo siab luag ntxhi mus ce dej
Hauv lub qhov dej muaj kev cawm neeg.

Txais: (6) His Xas Lais tus loj thiab tus Ntshiab tuaj nyob hauv nej lawm.

Nej ua HUAB TAIS tsaug, nej cav txog nws lub npe;
Nej tshaj nws tej hauj lwm loj rau cov haiv neeg paub,
Nej qhia rau lawv tias nws lub npe zoo tas nrho.

Txais: (6) His Xas Lais tus loj thiab tus Ntshiab tuaj nyob hauv nej lawm.

Nej hu nkauj qhuas HUAB TAIS txog nws tej hauj lwm muaj hwj chim,
Coj mus qhia rau tas ntiaj teb paub kom thoob .
Nroog Xis Yoos, koj tsa suab qw zoo siab,
vim His Xas Lais tus loj thiab tus Ntshiab tuaj nyob hauv koj lawm!

Txais: (6) His Xas Lais tus loj thiab tus Ntshiab tuaj nyob hauv nej lawm.

As Les Lus Yas: LK 1: 45

Txais: As les lus yas, as l;es lus yas.

Koj tau hmoov zoo, nkauj xwb tsim txiaj Mab Liab, vim koj ntseeg
tias yuav muaj tuaj raws li Huab Tais hais rau koj.

Txais: As les lus yas, as les lus yas.

Ntawv Moo Zoo: LK 1: 39-56

39 Mab Liab sawv kev mus, nws rau siab ntso maj nroos mus pem toj siab, mus rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Koj tus tau ntseeg tias cov lus Huab Tais hais rau koj yuav tsheej xeeb tuaj, mas koj txoj hmoov zoo !" 46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv, 48 vim nws tau dauv muag ntsia nws tus ntxhais txib tsis muaj tsim. Vim li ntawd, txij no mus, txhua tiam neeg yuav hais tias kuv txoj hmoov zoo, 49 vim tus Muaj Hwj Huam ua tej yam loj rau kuv, nws lub npe Ntshiab. 50 Nws lub siab hlub cov neeg hwm nws tiam dhau tiam. 51 Nws tau xyab nws txhais npab muaj zog , ua kom cov neeg uas lub siab muab hlob tawg tas. 52 Huab Tais nchuav cov muaj hwj chim poob ntawm lawv lub rooj zaum, hos nws tsa cov neeg hauv txheej qis kom siab. 53 Nws pub tej yam zoo rau cov neeg tshaib tau noj seem noj so, hos nws ntiab cov neeg muaj rov qab mus tes qhuav qhawv. 54 Huab Tais tuaj pab nws tus tub txib His Xas Lais, nws nco ntsoov tias nws khuv leej neeg, 55 raws li lo lus nws tau cog rau peb cov yawg koob tias nws yuav ua zoo rau Has Nplas Has thiab Has Nplas Has tsoom xeeb leej xeeb ntxwv mus ib txhiab ib txhis."
56 Mab Liab nrog Es Lis Xas Npes nyob li peb lub hlis tej, ces nws rov mus tsev.

TIM 1 LUB 6 HLI 2018

Hnub Rau Lis Piam Yim Nruab Xoo B Nruab Lis Piam Xyoo II

Hnub hwm LN Justin, tuag ua Tim Khawv

Zaj Nyeem Ib: 1 PZ 4: 7-13

Cov zoo nyiad:
7 Lub caij uas tas txhua yam yuav kawg los txog ze lawm. Li ntawd, nej yuav tsum ua neeg xav tswv yim tob thiab tsis txhob qaug dej qaug cawv, kom nej thiaj xav teev Ntuj. 8 Qhov loj tshaj yog nej yuav tsum kub siab sib nyiam sib hlub zoo, vim txoj kev hlub kho tau ntau yam kev txhaum. 9 Nej ib leeg yuav xyiv fab txais ib leeg zoo tsis txhob nroo. 10 Nej ib leeg tau txais ib lub txiaj ntsim, yog li nej yuav siv lub txiaj ntsim ntawd los ib leeg tsob hwb ib leeg zoo li ib co tub txib zoo uas txawj siv Tswv Ntuj cov txiaj ntsim sib txawv. 11 Tus txawj hais lus qhuab qhia, nws yuav tsum hais kom yog Tswv Ntuj cov lus; tus nyiam pab luag, nws yuav tsum siv lub zog Tswv Ntuj muab rau nws los pab luag, kom xwv txhua yam hauj lwm yuav ua kom Tswv Ntuj nto koob meej nyob hauv Yes Xus Pleev, tus muaj lub koob meej thiab lub hwj huam mus tiam dhau tiam. Ua li.
12 Cov zoo nyiad, nej txhob poob siab tias nej raug ib txog kev sim siab nyob hauv hluav taws, xws li yog ib yam txawv txav uas nej tsis to taub tuaj raug nej. 13 Nyob hauv txoj kev uas nej tau nrog Leej Pleev raug txom nyem txawm loj txawm sib los nej yuav tsum zoo siab xwb, kom thaum nws lub hwj chim yuav tawm los rau nej pom xyeem, mas nej haj yam yuav muaj kev zoo siab loj ntxiv.

NPN 96: 10, 11-12, 13

Txais: (13b) Huab Tais tuaj txiav txim rau lub ntiaj teb.

Nej hais rau txhua haiv neeg tias: HUAB TAIS yog vaj ntxwv;
Nws tau tsim lub ntiaj teb kom nyob ruaj nreb, kom muab tshem tsis tau.
Nws tswj tsoom pej xeem raws kev ncaj ncees.

Txais: (13b) Huab Tais tuaj txiav txim rau lub ntiaj teb.

Kom lub ntuj zoo siab, lub ntiaj teb hom khaj;
kom dej hiav txwv thiab txhua yam nyob hauv qw ncha ntws;
kom cov tiaj nras thiab txhua yam nyob hauv luag ntxhi!
Thiab kom txhua tus ntoo hauv hav zoov co zoo siab.

Txais: (13b) Huab Tais tuaj txiav txim rau lub ntiaj teb.

Kom lawv zoo siab ntawm HUAB TAIS xub ntiag,
vim nws tuaj txog lawm, nws tuaj kav lub ntiaj teb.
Nws yuav tswj lub ntiaj teb raws kev ncaj ncees,
thiab cov haiv neeg raws kev pheej xeeb.

Txais: (13b) Huab Tais tuaj txiav txim rau lub ntiaj teb.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias: kuv xaiv nej hauv ntiaj teb neeg los,
kom nej mus txi ib co txiv uas yuav nyob ruaj.

Txais: As les lus yas, as les lus yas..

Ntawv Moo Zoo: MK 11: 11-26

11 Yes Xus mus hauv Yes Lus Xas Les, nws chaws mus hauv lub Tuam Tsev Teev Ntuj, nws ntsia txhua yam nyob ib ncig nws. Thaum ntawd twb lig lawm ces nws tawm nrog Pab Kaum Ob leeg mus rau Npes Tas Nias. 12 Hnub tom qab, thaum lawv tawm hauv Npes Tas Nias mus, Yes Xus tshaib plab. 13 Nws tuaj deb pom ib tsob txiv ncuav pias muaj nplooj, nws mus xyuas saib puas muaj dab tsi. Tab sis thaum nws mus txog ze, nws nrhiav tsis muaj dab tsi tsuas muaj nplooj xwb, vim tsis yog lub caij txi txiv. 14 Yes Xus hais rau tsob txiv ncuav pias tias : "Txij no mus tas ib txhis, kom txhob muaj neeg tau noj koj tej txiv ib zaug ntxiv li !" Cov thwj tim hnov Yes Xus hais li ntawd.
15 Thaum lawv tuaj txog Yes Lus Xas Les, Yes Xus chaws mus hauv lub Tuam Tsev Teev Ntuj, nws pib ntiab cov neeg tuaj muag thiab cov tuaj yuav toob xib nyob hauv kom tawm mus. Nws ntxeev cov tub pauv nyiaj tej rooj, thiab cov muag nquab tej tog zaum. 16 Nws tsis kheev leej twg nqa toob xib hla hauv lub Tuam Tsev li. 17 Yes Xus qhia lawv, nws hais rau lawv tias : "Puas yog ntawv tau sau tseg tias : ‘Kuv lub tsev yuav hu ua tsev cia rau ib tsoom haiv neeg teev ntuj?’ Tab sis, nej muab ua tub sab lub qhov nkaum !" 18 Cov thawj leej choj thiab cov kws Ntawv Ntshiab hnov, ces lawv nrhiav saib yuav ua cas muab Yes Xus tua. Tab sis lawv kuj ntshai nws thiab, vim tas tsoom pej xeem zoo siab rau Yes Xus cov lus qhia. 19 Thaum tsaus ntuj, Yes Xus tawm hauv nroog mus sab nraud .
20 Tag kis sawv ntxov, lawv hla mus, lawv pom tsob txiv ncuav pias qhuav ti nkaus cag. 21 Pob Zeb nco dheev txog, nws hais rau Yes Xus tias : "Xib Hwb, koj saib : tsob txiv ncuav pias uas koj tsawm qhuav tas lawm." 22 Yes Xus teb rau lawv tias : "Nej ntseeg Tswv Ntuj mog. 23 Kuv hais tseeb rau nej, yog leej twg hais rau lub roob no tias : ‘Koj rho tawm, thiab dhia lawm hauv dej ntuj,’ yog tias tus ntawd tsis ua xyem xyav hauv siab li, thiab nws ntseeg tias qhov nws hais yuav tshwm sim tiag, mas qhov ntawd yuav tsheej xeeb rau nws tau. 24 Vim li ntawd, kuv thiaj hais rau nej tias : tas puas tsav yam uas thaum nej teev Ntuj nej thov, nej cia li ntseeg tias nej twb tau txais lawm, ces nej yuav tau yam ntawd. 25 Thiab thaum nej tab tom sawv ntsug teev Ntuj, yog nej muaj ib lo lus tsis txaus siab rau ib tug, mas nej zam rau nws, kom xwv nej Txiv nyob saum ntuj zam nej cov txhaum rau nej thiab.”

TIM 2 LUB 6 HLI 2018

Thawj Hnub Xya Lis Piam Yim Nruab Xyoo C Nruab Lis Piam II

Hwm Niam Mab Liab; hwm LN Marcellinus thiab LN Peter

Zaj Nyeem Ib: YUS DAS 17, 20B-25

17 Nej kuv cov phooj ywg zoo nyiad, nej yuav tsum nco ntsoov txog txhua yam peb tus Huab Tais Yes Xus Pleev cov Hauv Paus Xa Lus tau xub hais qhia rau nej lawm.
20 Nej yeej meem siv nej txoj kev ntseeg ntshiab los txhim kho nej tus kheej kom tsuas zoo tuaj, nej thov Leej Ntuj Plig Ntshiab pab. 21 Nej nyob ruaj nreb hauv Tswv Ntuj txoj kev nyiam thiab nej tos ntsoov peb tus Huab Tais Yes Xus Pleev txoj kev khuv leej neeg uas yuav pub txoj sia nyob mus li rau nej. 22 Cov neeg uas ua xyem xyav, nej yuav khuv leej lawv; 23 lwm cov, nej chua lawv tawm hauv cov hluav taws kub los kom cawm tau lawv; tseem muaj lwm cov ntxiv, nej yuav hlub lawv nyob hauv txoj kev ntshai rwg; txawm lawv cev ris tsho los nej yuav ntxub txog huv si vim lawv lub cev tau ua qias rau lawm.
24 Thov kom tus uas muaj lub hwj huam txuag tau nej kom nej txhob ntog thiab coj nej yog ib co neeg dawb huv nyob luag ntxhi los sawv rau ntawm nws lub xub ntiag muaj hwj chim, 25 thov kom tus Tswv Ntuj, tsuas muaj tib tug Tswv Ntuj, Tus cawm peb nyob hauv peb tus Huab Tais Yes Xus Pleev, thov kom nws muaj lub koob meej , muaj lub hwj xyeej, muaj txoj kev tswj fwm thiab txoj kev muaj hwj huam ua nws tug mus li, txij puag hnub txheej thaum ub los txog zwj ceeb no mus txog txhiab niag tim puas xyoo. Ua li.

NPN 63: 2, 3-4, 5-6

Txais: (2b) Huab Tais kuv tus Tswv Ntuj, kuv tus ntsuj plig nqhis txog koj.

Tswv Ntuj, koj yog kuv tus Tswv Ntuj, tus kuv nrhiav;
kuv lub cev seev txog koj, kuv tus plig nqhis txog koj,
zoo puav tam li av qhuav qhawv, nkig nkuav, tsis tau dej.

Txais: (2b) Huab Tais kuv tus Tswv Ntuj, kuv tus ntsuj plig nqhis txog koj.

Kuv tig mus ntsia koj nyob hauv koj lub tuam tsev,
kuv pom koj lub zog thiab koj lub hwj chim.
Koj txoj kev hlub muaj nqis dua txoj sia,
kuv di ncauj yuav cav lus zoo txog koj.

Txais: (2b) Huab Tais kuv tus Tswv Ntuj, kuv tus ntsuj plig nqhis txog koj.

Kuv yuav cav txog koj tas kuv sim neej,
kuv yuav tsa tes thov ntuj, yuav hu txog koj lub npe.
Kuv tus ntsuj plig yuav txaus siab hlo li tus tau noj nqaig noj hno,
kuv di ncauj yuav zoo siab, kuv lub ncauj yuav qhuas txog koj.

Txais: (2b) Huab Tais kuv tus Tswv Ntuj, kuv tus ntsuj plig nqhis txog koj.

As Les Lus Yas: KLX 3: 16A, 17C

Txais: As les lus yas, as les lus yas.

Thov kom Leej Pleev Lo Lus nyob txawm hauv nej nplua mias.
Nej ua Leej Txiv Tswv Ntuj tsaug nyob hauv Leej Pleev.

Txais: As les lus yas, as les lus yas.

Ntawv Moo Zoo: MK 11: 27-33

27 Yes Xus thiab nws cov thwj tim rov qab los hauv Yes Lus Xas Les dua. Thaum Yes Xus mus mus los los hauv lub Tuam Tsev Teev Ntuj, cov thawj leej choj, cov kws Ntawv Ntshiab thiab cov txwj laus tuaj cuag nws. 28 Lawv hais rau nws tias : "Koj tau cai qhov twg los ua tej ntawd ? Los leej twg muab cai rau koj ua tej ntawd?" 29 Yes Xus teb rau lawv tias : "Kuv kuj yuav nug nej ib lo thiab. Nej teb kuv, kuv mam li qhia nej tias kuv tau cai ntawm leej twg los ua tej ntawd. 30 Zam lub cim ntxuav puas tuaj ntawm Ntuj tuaj los ntawm neeg tuaj ? Nej teb kuv saib." 31 Ces lawv sib tham tias : "Yog peb hais tias : 'Tuaj ntawm Ntuj tuaj,' nws yuav hais tias : 'Ua cas nej tsis ntseeg txog nws ?' 32 Peb yuav hais tias : ‘Tuaj ntawm neeg tuaj ?’” Lawv kuj ntshai tsoom sid, vim tas sawv daws saib Zam yog ib tug yaj saub tiag. 33 Ces lawv teb li no rau Yes Xus : "Peb tsis paub." Yes Xus hais rau lawv tias : "Kuv kuj yuav tsis qhia nej tias kuv tau cai ntawm leej twg los ua tej ntawd thiab."

TIM 4 LUB 6 HLI 2018

Hnub Ob Lis Piam Cuaj Nruab Xyoo B Nruab Lis Piam II

Zaj Nyeem Ib: 2 PZ 1: 2-7

Cov zoo nyiad:
2 Thov kom nej tau txais txiaj ntsim thiab kev thaj yeeb ntau nyob hauv txoj kev paub Tswv Ntuj thiab paub peb tus Huab Tais Yes Xus. 3 Tswv Ntuj lub hwj huam tau pub tas ib puas tsav yam qhia txog txoj sia thiab qhia txog kev hwm Ntuj rau peb nyob hauv peb txoj kev paub txog tus tau siv nws lub hwj chim thiab nws lub siab zoo los hu peb. 4 Vim nws lub hwj chim thiab lub siab zoo ntawd mas nws tau pub ib co kev cog lus muaj nqes thiab tseem ceeb heev rau peb kom nej koom tau nrog Tswv Nuj lub meej mom thaum uas nej dim ntawm txoj kev lwj kev phem uas muaj nyob hauv ntiaj teb no vim txoj kev ntshaw siab phem lawm. 5 Vim qhov no mas nej yuav tsum siv zog kub siab tiag xyaum coj zoo vim nej muaj kev ntseeg, xyaum ua neeg paub tab vim nej coj zoo, 6 xyaum tswj tau nej tus kheej vim nej paub tab, xyaum nyiaj kom dhau kev nyuaj vim nej tswj tau nej tus kheej, xyaum ua neeg hwm Ntuj vim nej txawj nyiaj dhau kev nyuaj, 7 xyaum sib hwm vim nej muaj kev hwm Ntuj, thiab xyaum sib nyiam sib hlub vim nej muaj kev sib hwm.

NPN 91: 1-2, 14-15B, 15C-16

Txais: (2b) Kuv tus Tswv Ntuj, kuv tso siab rau koj.

Tus tsa tsev rau hauv tus Nyob Siab lub chaw nkaum,
Tus nyob hauv tus Muaj Hwj Huam qhov ntxoov.
Koj hais rau HUAB TAIS tias:
“Kuv qhov chaw nkaum, kuv lub yeej ntsa zeb,
kuv tus Tswv Ntuj, kuv tso siab rau koj."

Txais: (2b) Koj yog kuv tus Tswv Ntuj, kuv tso siab rau koj.

Vim nws npuab kuv, kuv yuav cawm nws dim.
Kuv yuav tso nws rau qhov siab, vim nws paub kuv lub npe.
Yog nws hu txog kuv, kuv yuav teb nws,
thaum nws txom nyem, kuv yuav nrog nws nyob.

Txais: (2b) Koj yog kuv tus Tswv Ntuj, kuv tso siab rau koj.

Kuv yuav cawm nws dim, kuv yuav ua kom nws nto koob meej.
Kuv yuav pub nws ua neej nyob ntev xyoo kom txaus nws siab,
kuv yuav cia nws pom kuv txoj kev cawm seej.

Txais: (2b) Koj yog kuv tus Tswv Ntuj, kuv tso siab rau koj.

As Les Lus Yas: QYTN 1: 5ab

Txais: As les lus yas, as les lus yas.

Yes Xus Pleev, koj yog tus Tim Khawv pheej xeeb,
tus xub yug hauv cov tub tuag los;
Koj tau hlub peb, muab koj cov ntshav
los cawm peb dim ntawm peb cov txhaum.

Txais: As les lus yas, as les lus yas.

Ntawv Moo Zoo: MK 12: 1-12

1 Yes Xus pib hais tej zaj paj lug rau cov thawj leej choj, cov thoob xwm ntawv thiab cov txwj laus tias: "Muaj ib tug neeg cog tau ib daim teb txiv cawv. Nws xov laj kab ncig, nws khawb ib lub qhov tsuam cawv, thiab nws tsa ib lub lawj siab siab rau. Nws ntiav ib co tub zog saib, ces nws tawm rooj mus deb lawm. 2 Thaum txog caij, nws xa ib tug tub txib mus cuag cov tub zog, kom lawv muab ib feem ntawm cov txiv cawv rau nws. 3 Tab sis lawv nthos nkaus tus tub zog, muab nws ntaus tas, kom nws rov qab mus tes dawb tes npliag. 4 Tus tswv teb xa dua ib tug tub txib mus : cov tub zog ntaus nws taub hau thiab ua tsis saib taus nws li. 5 Tus tswv teb tseem rov xa dua ib tug mus , cov tub zog muab tus tub txib ntawd tua. Lawv kuj ua ib yam li ntawd rau ntau tus tub txib ntxiv, lawv muab ib co ntaus, muab ib co tua. 6 Tus tswv teb tseem tshuav ib tug neeg ntxiv, yog nws tus tub uas nws nyiam. Nws xa nws tus tub mus tom qab kawg, nws xav tias : 'Lawv yuav hwm kuv tus tub.' 7 Tab sis, cov tub zog sib tham tias : 'Tus ntawd yog tus yuav txais lub cuab tam. Tsuag tsuag ! Peb muab nws tua, lub cuab tam thiaj yuav yog peb tug.' 8 Ces lawv nthos nkaus nws, muab nws tua thiab coj nws mus pov tseg rau sab ntug teb nraud. 9 Tus tswv teb ntawd yuav ua dab tsi ned? Nws yuav tuaj muab cov zov teb tua, thiab yuav muab daim teb txiv cawv pub rau lwm cov neeg. 10 Nej tsis tau nyeem cov lus no nyob hauv Ntawv lod? ‘Lub pob zeb uas cov tub txhim tsev muab pov tseg, hloov ua lub pob zeb txheem tsev. 11 Qhov ntawd yog tuaj ntawm Huab Tais tuaj, yog ib yam peb saib tias zoo kawg nkaus.’" 12 Lawv nrhiav kev ntes Yes Xus, tab sis lawv kuj ntshai tsoom sid thiab, vim lawv to taub tias Yes Xus zaj paj lug no yog hais rau lawv. Ces lawv tso Yes Xus tseg, lawv rov mus.

TIM 5 LUB 6 HLI 2018

Hnub Peb Lis Piam Cuaj Nruab Xyoo B Nruab Lis Piam Xyoo II

Hwm LN Boniface, Tswv Qhia tuag ua Tim KHawv

Zaj Nyeem Ib: 2 PZ 3: 12-15A, 17-18

Cov zoo nyiad:
12 Nej tos ntsoov Tswv Ntuj lub Hnub Nyoog, thiab nej ua kom nws los txog sai. Hnub ntawd cov txheej ntuj saud yuav kub hnyiab thiab yuav yaj ntshis mus, txhua tsav txhua yam yuav kub hnyiab thiab yuav yaj tas huv tib si. 13 Peb tos txog ib lub ntuj tshiab thiab ib lub ntiaj teb tshiab uas txoj kev ncaj yuav nyob txawm rau hauv, raws li Tswv Ntuj tau cog lus.
14 Cov zoo nyiad, lub caij nej tseem tos no, nej yuav rau siab ua kom nej tsis tsuas ib tee qias thiab tsis muaj ib qho xyeej, nyob ntawm Tswv Ntuj xub ntiag, kom nej nyob hauv txoj kev thaj yeeb nrog nws. 15 Nej yuav saib tias peb tus Huab Tais lub siab ntev yog txoj kev cawm nej,
17 Cov zoo nyiad, kuv xub qhia rau nej lawm, nej yuav ceev faj, txhob cia cov tsis hwm Ntuj pus kom nej ncaim ntawm txoj kev nyob ruaj nreb. 18 Nej yuav hlob nyob hauv lub txiaj ntsim thiab txoj kev paub peb tus Huab Tais Cawm Seej Yes Xus Pleev. Lub koob meej yog nws tug lub zim txwv no mus txog txhiab niag tim puas xyoo. Ua li.

NPN 90: 2, 3-4, 10, 14+16

Txais: (1) HUAB TAIS, koj yog peb qhov chaw vam khom tiam dhau tiam.

Txij puag thaum cov hauv roob siab tsis tau xeeb los,
Thaum lub ntiaj teb thiab lub sim ceeb tsis tau tshwm tawm los,
koj yeej yog Tswv Ntuj tsis muaj caij tag tsis muaj caij kawg los lawm.

Txais: (1) HUAB TAIS, koj yog peb qhov chaw vam khom tiam dhau tiam.

Koj tso neeg rov mus ua av, koj hais tias :
"As Das cov tub, nej rov mus ua plua av !"
Koj saib ib txhiab xyoo zoo li yog nag hmo ib hnub,
zoo li yog ib hnub uas dhau mus lawm,
zoo li yog ib lub caij zov keeb thaum hmo ntuj xwb.

Txais: (1) HUAB TAIS, koj yog peb qhov chaw vam khom tiam dhau tiam..

Peb lub caij ua neej ntev txog xya caum xyoo,
yog lub cev muaj zog, nyob txog yim caum xyoo,
lub caij ua neej tsuas yog kev khwv tsis tau dab tsi zoo;
ib pliag ntshis niaj xyoos dhau mus, ces peb kuj mus thiab.

Txais: (1) HUAB TAIS, koj yog peb qhov chaw vam khom tiam dhau tiam.

Sawv ntxov tsees, thov koj pub koj lub siab hlub rau peb saj kom tsau, ces peb yuav qw zoo siab tas ib sim neej.
Thov koj qhib koj tes dej num rau koj cov tub txib pom xyeem, qhib koj lub hwj chim ci iab rau lawv cov tub ntsia.
Fill us at daybreak with your kindness,
that we may shout for joy and gladness all our days.
Let your work be seen by your servants
and your glory by their children.

Txais: (1) HUAB TAIS, koj yog peb qhov chaw vam khom tiam dhau tiam.

As Les Lus Yas: EFX 1: 17-18

Txais: As les lus yas, as les lus yas.

Kuv thov kom peb tus Huab Tais Yes Xus Pleev Leej Txiv
tso qhov pom kev ci tuaj rau hauv peb lub siab,
kom peb pom tias txoj kev tso siab
uas Ntuj hu peb los nyob hauv zoo npaum li cas.

Txais: As les lus yas, as les lus yas.

Ntawv Moo Zoo: MK 12: 13-17

13 Cov Yus Das xa ob peb tug Fas Lis Xais thiab ob peb tug Hes Los Dias tuaj sim Yes Xus, lawv yuav lem kom nws hais lus yuam kev. 14 Lawv tuaj txog, lawv hais rau Yes Xus tias : "Xib Hwb, peb paub tias koj yog ib tug neeg hais qhov tseeb, thiab koj tsis quav ntsej txog qhov tias luag tej yuav xav li cas, koj tsis saib tib neeg lub ntsej muag, koj tsuas qhia Tswv Ntuj txoj kev raws qhov tseeb xwb. Ua li puas muaj cai kom them se rau Xes Ntxas los tsis muaj? Peb puas yuav tsum them se los tsis them ?" 15 Tab sis Yes Xus paub tias lawv siab nkhaus, ces nws hais rau lawv tias : "Ua cas nej xav sim kuv ? Muab ib lub txiaj nyiag los rau kuv saib." 16 Lawv muab ib lub txiaj nyiag los, Yes Xus thiaj hais rau lawv tias : "Tus duab no thiab cov npe ntawv hauv no yog leej twg li ?" Lawv hais rau Yes Xus tias : "Yog Xes Ntxas li." 17 Ces Yes Xus hais rau lawv tias : "Yam twg yog Xes Ntxas tug, ces nej muab rov rau Xes Ntxas, yam twg yog Tswv Ntuj tug, mas nej muab rov rau Tswv Ntuj." Ces lawv ceeb tas rau nws.

TIM 6 LUB 6 HLI 2018

Hnub Plaub Lis Piam Cuaj Nruab Xyoo B Nruab Lis Piam Xyoo II

Hwm LN Norbert

Zaj Nyeem Ib: 2 TM 1: 1-3, 6-12

1 Kuv, Paj Lug, uas yog Yes Xus Pleev ib tug Hauv Paus Xa Lus, vim Tswv Ntuj pom zoo li ntawd, kom tau tshaj txog nws txoj kev cog lus yuav pub txoj sia nyob hauv Yes Xus Pleev rau peb, 2 kuv thov kom Tis Mos Tes, kuv tus tub zoo nyiam tau txais txiaj ntsim, kev khuv leej, thiab kev thaj yeeb tuaj ntawm Leej Txiv Tswv Ntuj, thiab peb tus Huab Tais Yes Xus Pleev tuaj. 3 Kuv ua tsaug rau Tswv Ntuj uas kuv muab ib lub siab dawb paug los teev hawm raws li kuv cov yawg koob tau ua los, vim kuv nco txog koj tas mus li hauv kuv zaj teev ntuj nruab hnub hmo ntuj huc si.
6 Yog vim li ntawd, kuv rov txhib koj dua kom koj nco ntsoov thob lub txiaj ntsim uas Tswv Ntuj tso rau hauv koj hnub kuv tiag tes rau saum koj kom nws cig nplaim tuaj. 7 Vim Tswv Ntuj tsis pub ib lub tswv yim ua neeg ntshai ntshai rau peb, tiam sis nws pub ib lub tswv yim muaj peev xwm, muaj kev nyiam, thiab txawj tswj tus kheej rau peb. 8 Koj tsis txhob txaj muag ua tim khawv txog peb tus Huab Tais, txhob txaj muag zeem kuv uas yog ib tug neeg raug kaw vim nws. Koj yuav zoo siab siv lub zog tuaj ntawm Tswv Ntuj tuaj pab koj ris koj li kev txom nyem vim lub Moo Zoo.
9 Nws cawm peb thiab hu peb kom coj ib lub neej ntshiab dawb huv, tsis yog vim peb cov dej num tiam sis yog vim nws pom zoo li ntawd thiab vim lub txiaj ntsim nws pub rau peb nyob hauv Yes Xus Pleev txij puag thaum lub caij nyoog twb tsis tau pib lawm. 10 Ces nyiam no, lub txiaj ntsim ntawd tshwm tuaj thaum peb tus cawm seej Yes Xus tawm tuaj thiab. Nws yog tus rhuav txoj kev tuag thiab tus ua kom txoj sia thiab txoj kev yuav nyob mus li ci ntsa tawm tuaj nyob hauv lub Moo Zoo, 11 uas kuv raug tsa los ua tus kws qhuab qhia txog thiab ua Hauv Paus Xa Lus thiab ua xib hwb tshaj txog. 12 Yog vim qhov ntawd, kuv thiaj tau nyiaj kev raug txom nyem. Tab sis kuv tsis txaj muag, vim kuv paub tus uas kuv ntseeg thiab kuv tso siab tias nws muaj peev xwm yuav txuag tau qhov nws muab rau kuv ceev tseg mus txog lub hnub nyoog ntawd.

NPN 123: 1B-2AB, 2CDEF

Txais: (1b) Huab Tais, kuv tsa muag ntsia ntsoov koj.

Kuv tsa muag tig ntsia ntsoov koj
tus zaum saum lub theej kiab saum ntuj,
zoo puav tam li cov tub txib tsa muag
ntsia lawv tus tswv txhais tes.

Txais: (1b) Huab Tais, kuv tsa muag ntsia ntsoov koj.

Zoo puav tam li ib tug ntxhais txib
tsa muag ntsia ntsoov nws tus niam tsev txhais tes,
peb qhov muag kuj ntsia ntsoov HUAB TAIS
peb tus tswv Ntuj mus txog thaum nws khuv leej peb.

Txais: (1b) Huab Tais, kuv tsa muag ntsia ntsoov koj.

As Les Lus Yas: Zam 11: 25A, 26

Txais: As les lus yas, as les lus yas.

Huab Tais hais tias: “Kuv yog txoj kev sawv rov los thiab txoj sia,
leej twg ntseeg txog kuv yuav tsis txawj tuag li.

Txais: As les lus yas, as les lus yas.

Ntawv Moo Zoo: MK 12: 18-27

18 Ib co xas dus kais uas hais tias neeg tuag yuav tsis sawv rov los, lawv tuaj cuag Yes Xus, lawv nug nws tias : 19 "Xib Hwb, Mais Xes sau cia rau peb tias : ‘Yog leej twg ib tug kwv tij tuag tseg poj niam cia, tsis tau muaj me nyuam, mas tus kwv yuav tsum qaws tus niam tij kom tsa tau tus kwv tij ntawd lub keeb sawv.’ 20 Txawm muaj xya leej kwv tij. Thawj tug yuav poj niam, nws tuag, tsis tau muaj tub ki li. 21 Tus ob qaws tus niam tij ntawd, nws kuj tuag tsis tau muaj tub ki li; tus peb kuj ua ib yam li ntawd thiab. 22 Tas xya leej ntawd yeej tsis muaj tub ki cia li. Thaum kawg, tus poj niam kuj tuag lawm thiab. 23 Lub caij neeg lub cev sawv rov los, thaum lawv sawv rov los ne, tus poj niam ntawd yuav yog leej twg tus ? Vim lawv xya tus kwv tij puav leej tau yuav nws ua lawv poj niam." 24 Yes Xus hais rau lawv tias : "Puas yog nej yuam kev vim nej tsis paub Ntawv Ntshiab thiab tsis paub Tswv Ntuj lub hwj huam ? 25 Vim tias, thaum lawv sawv hauv cov tub tuag rov los, mas lawv yuav tsis yuav poj niam, tsis yuav txiv li, lawv yuav zoo li cov Tshiab nyob saum ntuj lawm xwb. 26 Hais txog cov tuag kev sawv rov los mas, nej puas tau nyeem hauv Mais Xes phau ntawv, zaj hais txog tsob me nyuam ntoo uas Tswv Ntuj hais rau Mais Xes tias : ‘Kuv yog Has Nplas Has tus Tswv Ntuj, His Xas Has tus Tswv Ntuj, thiab Yas Kos tus Tswv Ntuj’ ? 27 Tswv Ntuj tsis yog cov neeg tuag tus Tswv Ntuj, nws yog cov neeg ciaj tus Tswv Ntuj. Nej yuam kev lawm ntau."

TIM 7 LUB 6 HLI 2018

Hnub Tsib Lis Piam Cuaj Nruab Xyoo B Nruab Lis Piam II

Zaj Nyeem Ib: 2 TMT 2: 8-15

8 Koj nco ntsoov txog Yes Xus Pleev, uas nws sawv hauv cov tub tuag rov los, nws yog Das Vis ib tug xeeb ntxwv, qhov no yog lub Moo Zoo kuv qhia. 9 Vim lub Moo Zoo ntawd, kuv thiaj raug txom nyem thiab raug saw hlau xauv kuv xws li ib tug neeg phem. Tab sis Tswv Ntuj lo lus tsis raug saw hlau xauv. 10 Kuv thiaj ua siab ntev nyiaj txhua yam pab cov neeg Ntuj tau xaiv, kom lawv tau txais kev cawm, txoj kev cawm uas nyob hauv Yes Xus Pleev, thiab txais lub hwj chim nyob mus li.
11 Lo lus no, yog ib lo lus tseeb : “Yog peb nrog nws tuag, mas peb kuj yuav nrog nws muaj txoj sia. 12 Yog peb ntseeg ruaj nreb tsis thim, mas peb kuj yuav nrog nws ua vaj. Yog peb tsis lees nws, mas nws kuj yuav tsis lees peb. 13 Yog peb tsis npuab nws, los nws tseem npuab peb, vim nws yuav rov tsis lees nws tsis tau.”
14 Koj yuav rov hais txhua yam no huv tib si rau sawv daws. Koj hais meej nyob ntawm Tswv Ntuj xub ntiag rau lawv kom lawv yuav tsum tseg tsis txhob muab tej lus los ua chaw sib cav, vim kev sib cav tsis zoo dab tsi, tsuas ua kom cov neeg tuaj mloog ntawd mus yuam kev xwb. 15 Koj muab siab rau ua kom Tswv Ntuj saib koj yog ib tug neeg tsis muaj chaw xyeej, ib tug tub zog tsis ua kom muaj kev txaj muag nyob hauv nws tes dej num, thiab ib tug neeg uas qhia tau qhov tseeb tsis muaj yuam kev.

NPN 25: 4-5AB, 8-9, 10+14

Txais: (4) Huab Tais, thov qhia koj tej kev rau kuv paub.

HUAB TAIS, ua kom kuv paub koj tej kev,
qhia koj tej kev rau kuv kawm.
Coj kuv mus taug koj txoj kev tseeb, qhia rau kuv paub,
vim koj yog Tswv Ntuj tus cawm kuv.

Txais…

HUAB TAIS yog txoj kev siab zoo thiab siab ncaj,
nws qhia cov neeg txhaum rov los taug txoj kev zoo.
nws coj cov neeg me mus rau txoj kev ncaj,
nws qhia nws txoj kev rau cov neeg me kawm.

Txais…

Tas HUAB TAIS tej kev yog kev hlub thiab kev ua ncaj
rau cov neeg coj raws nraim li nws tau cog lus thiab nws txoj cai.
Cov neeg hwm HUAB TAIS xwb thiaj paub nws lub siab hlub,
thiab lawv thiaj to taub txog nws txoj kev cog lus.

Txais…

As Les Lus Yas: 2 TM 1: 10

Txais: As les lus yas, as les lus yas.

Peb tus cawm seej Yes Xus Pleev tau rhuav txoj kev tuag,
thiab nws lub Moo Zoo tau qhia kom peb paub txog txoj sia.

Txais: As les lus yas, as les lus yas.

Ntawv Moo Zoo: MK 12: 28-34

28 Ib tug kws Ntawv Ntshiab hnov lawv sib cav, nws pom tias Yes Xus teb raug kawg rau cov xas dus kais, ces nws txav los nug Yes Xus tias : "Nyob hauv cov lus qhia tas huv tib si, lo twg yog thawj lo lus qhia ?" 29 Yes Xus teb rau nws tias : "Thawj lo lus qhia yog lo lus no : ‘His Xas Lais, koj mloog! Huab Tais peb tus Tswv Ntuj tib leeg xwb yog Huab Tais. 30 Koj yuav nyiam Huab Tais koj tus Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog.’ 31 Lo lus qhia ob yog lo lus no : ‘Koj yuav nyiam tus nyob ze koj ib yam li koj nyiam koj.’ Tsis muaj lwm lo lus qhia loj dua ob lo lus no lawm." 32 Tus kws Ntawv Ntshiab hais rau Yes Xus tias : "Koj hais raug kawg, Xib Hwb, koj hais qhov tseeb qhov tias: ‘Tsuas muaj ib tug Tswv Ntuj xwb, tsis muaj dua lwm tus dhau ntawm nws lawm, 33 thiab kom nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog, thiab kom nyiam tus nyob ze yus ib yam li yus nyiam yus,’ qhov ntawd zoo tshaj txhua yam kev hlawv tsiaj thiab cev lwm yam txi Ntuj huv tib si." 34 Yes Xus pom tus kws Ntawv Ntshiab txhab ib lo lus thoob tsib, ces nws hais rau tus kws Ntawv Ntshiab tias : "Koj nyob tsis deb ntawm Tswv Ntuj lub Ceeb Tsheej lawm." Ces tsis muaj leej twg muaj cuab kav nug Yes Xus ntxiv.

TIM      8      LUB      6      HLI      2018

Hnub Rau Lis Piam Cuaj Nruab Xyoo B Ntuab Lis Piam Xyoo II

Peb Hawm HT Yes Xus lub Plawv/Siab Ntshiab (Sacred Heart)




Zaj Nyeem Ib:       OX  11:   1, 3-4, 8C-9

Huab Tais hais tias:
1 Thaum haiv His Xas Lais tseem yog me nyuam me kuv twb nyiam nws lawm, kuv hu kuv tus tub kom tawm hauv Hais Nkws Tos teb los.
3 Kuv yog tus qhia kom Es Fais Yis txawj mus kev, kuv tuav rawv lawv txhais npab, tiam sis lawv tsis to taub tias kuv saib xyuas lawv. 4 Kuv tau siv ib co hlua tib neeg coj lawv mus kev, yog ib co hlua muaj kev hlub. Kuv tu lawv zoo cuag li ib tug neeg nqa tus me nyuam mos los npuab nws sab plhu; tsis kav txawm kuv twb khoov mus pub mov rau lawv noj los lawv tsis paub tias kuv yog tus kho lawv zoo li.
8c Kuv lub siab lub plawv ntxeev tas hauv kuv, kuv tej siab ntsws tshee hnyo qaub tas. 9 Kuv yuav tsis tso kuv lub siab npau taws. Kuv yuav tsis rhuav Es Fais Yis dua ntxiv, vim kuv yog Tswv Ntuj, kuv tsis yog neeg; nyob nruab nrab hauv nej, kuv yog tus Ntshiab, kuv yuav tsis cia nplaim taws tuaj hlawv nej pov tseg.

NPN       HX  12:   2-3, 4, 5-6.

Txais:   (3) Nej yuav ce dej luag ntxhwb ntxhi
hauv tus dej txhawv los khuv leej neeg.  

Tswv Ntuj yog tus cawm kuv,
Kuv tso siab rau nws, kuv tsis txhawj.
Kuv lub zog thiab kuv lub peev xwm yog HUAB TAIS,
Nws yog tus cawm kuv.
Nej yuav zoo siab luag ntxhi mus ce dej
Hauv lub qhov dej muaj kev cawm neeg.

Txais:   (3) Nej yuav ce dej luag ntxhwb ntxhi
hauv tus dej txhawv los khuv leej neeg.

Nej ua HUAB TAIS tsaug, nej cav txog nws lub npe;
Nej tshaj nws tej hauj lwm loj rau cov haiv neeg paub,
Nej qhia rau lawv tias nws lub npe zoo tas nrho.

Txais:   (3) Nej yuav ce dej luag ntxhwb ntxhi
hauv tus dej txhawv los khuv leej neeg.

Nej hu nkauj qhuas HUAB TAIS txog nws tej hauj lwm muaj hwj chim,
Coj mus qhia rau tas ntiaj teb paub kom thoob .
Nroog Xis Yoos, koj tsa suab qw zoo siab,
vim His Xas Lais tus loj thiab tus Ntshiab tuaj nyob hauv nej lawm!

Txais:   (3) Nej yuav ce dej luag ntxhwb ntxhi
hauv tus dej txhawv los khuv leej neeg.

Zaj Nyeem Ob:       EFX  3:   8-12, 14-19

Cov kwv tij nkauj muad:
8 Ntuj pub lub txiaj ntsim no rau kuv, tus me dua cov nyob hauv tsoom ntshiab, kom kuv tshaj Leej Pleev txoj kev nplua nuj uas neeg ntsuas tsis tau rau cov neeg teev pej kum dab, 9 kom kuv qhia sawv daws paub tseeb tias lub tswv yim zais tob tob yog dab tsi, lub tswv yim uas nyob zais ntshis tau txhiab tiam hauv Tswv Ntuj tus tsim tas ib puas tsav yam los lawm,  10 kom nyem no, vim muaj lub Koom Txoos mas cov Tshiab ua vaj txheeb thiab cov Tshiab muaj hwj huam nyob saum cov txheej ntuj siab thiaj paub txog Tswv Ntuj txoj kev thoob tsib uas muaj ntau fab, 11 vim Tswv Ntuj ib txwm npaj tej no tau ntau tiam los lawm thiab nws tau ua kom tshwm sim tuaj nyob hauv peb tus Huab Tais Yes Xus Pleev lawm. 12 Nyob hauv Leej Pleev, peb muaj cuab kav hais lus tsis ntshai leej twg thiab peb tso siab lug txav los ze txoj kev ntseeg txog Leej Pleev.
14 Vim li no, mas kuv txhos caug nyob ntawm Leej Txiv xub ntiag, 15 nws yog tus uas tas txhua yim neeg nyob saum ntuj, thiab nyob ntiaj teb no txais lub npe txiv ntawm nws los. 16 Thov kom Leej Txiv pub rau nej raws li nws txoj kev nplua nuj muaj koob meej, kom nej tau txais Leej Ntuj Plig txoj kev txhawb zog nyob hauv nej nruab siab. 17 Thov kom Leej Pleev los nyob txawm hauv nej lub siab, vim nej ntseeg, ces nej yuav nrhau cag ruaj thiab nej yuav cog nej lub siab rau hauv txoj kev nyiam, 18 kom nej txais ib lub zog pab nej kom nej nrog tsoom ntshiab to taub tias Leej Pleev txoj kev nyiam dav npaum li cas, ntev li cas, siab li cas, tob li cas. 19 Ces nej yuav paub Leej Pleev txoj kev nyiam kev hlub uas tob tshaj txhua txoj kev paub txuj, ces nej yuav tau txais Tswv Ntuj txoj kev muaj puv npo los nyob puv hauv nej.

As Les Lus Yas:       MT  11:   29AB

Txais:     As les lus yas, as les lus yas.

Huab Tais hais tias: Nej txais kuv tus quab mus nej kwv,
Nej kawm ntawm kuv vim kuv muaj lub siab mos siab muag txo hwj chim.

Txais:     As les lus yas, as les lus yas.

los:       1 ZAM  4:   10B

Txais: As les lus yas, as les lus yas.

Tswv Ntuj xub nyiam peb, nws thiaj xa nws Leej Tub
tuaj ua nqi txhiv peb ntawm peb cov txhaum.

Txais: As les lus yas, as les lus yas.

Ntawv Moo Zoo:       ZAM  19:   31-37

31 Hnub ntawd yog Hnub Npaj, mas cov Yus Das tsis xav cia cov tuag lub cev dai saum ntoo cuam hnub Xas Npas Tos, vim tias hnub Xas Npas Tos ntawd yog ib lub hnub nyoog loj, ces lawv thov Pis Las Tos kom muab cov neeg dai saum ntoo cuam ob sab ceg lov thiab muab lawv lub cev txo nqes los. 32 Cov tub rog thiaj tuaj muab thawj tug uas nrog nws dai saum ntoo cuam ob sab ceg lov, thiab muab lwm tus ob sab ceg lov. 33 Thaum lawv los txog ntawm Yes Xus, lawv pom nws twb tuag lawm, ces lawv tsis muab nws ob sab ceg lov, 34 tab sis ib tug tub rog xuas nws rab hmuv hno Yes Xus phab tav, tam sis ntawd ib co ntshav thiab ib co dej tawm los. 35 Tus uas tau pom qhov ntawd ua pov thawj hais, nws ua pov thawj hais qhov tseeb, nws paub tias qhov nws hais muaj tiag. Nws hais tej ntawd kom nej ntseeg. 36 Tej xwm no tshwm sim kom muaj raws li Ntawv sau cia tias : ‘Nws cov pob txha tsis lov ib tug li.’ 37 Thiab tseem muaj lwm lo lus hauv Ntawv hais tias : ‘Lawv yuav ntsia ntsoov tus uas lawv muab nkaug.’

TIM      9      LUB      6      HLI      2018

Hnub Xya Lis Piam Cuaj Nruab Xyoo B Nruab Lis Piam Xyoo II

Hwm Niam Mab Liab lub Plawv tsis lo txhaum

Zaj Nyeem Ib:       2 TMT  4:   1-8

Tus zoo nyiad:
1 Kuv nyob ntawm Tswv Ntuj thiab Yes Xus Pleev xub ntiag, tus uas yuav txiav txim rau cov neeg ciaj thiab cov neeg tuag, thiab kuv tuav txog nws txoj kev tshwm sim tuaj thiab nws txoj kev ua vaj, kuv tso txoj hauj lwm no rau koj: 2 Koj kav tsij tshaj Lo Lus; koj yuav tshaj tsis tseg, tsis muaj caij tsis muaj thaum li. Koj yuav hais lus txaus cem los cem, txaus qhuab ntuas los qhuab ntuas, txaus txhawb los txhawb, nyob hauv txoj kev ua siab ntev ntev thiab txoj kev xav qhuab qhia sawv daws. 3 Yuav muaj ib lub caij tom ntej uas tib neeg yuav tsis kam mloog txoj kev cai ntshiab lawm, lawv yuav ua ywj li lawv lub siab xib rau, ces lawv yuav nrhiav ntau tus xib hwb uas hais tej yam lawv xav mloog, 4 lawv yuav tig pob ntseg mus deb ntawm txoj kev tseeb, lawv yuav tig mus mloog tej zaj cuav. 5 Ntawm koj mas koj yuav xyuam xim rau txhua yam. Koj ua siab ntev ris txoj kev nyuaj; koj ua txoj hauj lwm ua tub tshaj lub Moo Zoo, koj leg koj txoj dej num kom zoo mus nto luag.
6 Ntawm kuv, mas kuv twb zoo li cov cawv raug nchuav mus txi rau Ntuj lawm, twb txog lub caij kuv yuav mus lawm. 7 Kuv tau nrog luag ua kev sib tw sib ntsuas zog txaus, kuv twb khiav mus txog chaw lawm. Kuv tau ceev txoj kev ntseeg zoo. 8 Nyem no, luag twb npaj tau lub kaus mom yeej phim cov neeg ncaj rau kuv lawm; txog Hnub Ntawd, Huab Tais, tus tswv txiav txim ncaj yuav muab rau kuv ntoo. Tsis yog yuav muab rau kuv ib leeg xwb, nws yuav muab rau tas tsoom neeg tos ntsoov txog lub Hnub Nyoog nws yuav tawm los huv tib si.

NPN       71:   8-9, 14-15AB, 16-17, 22

Txais: (15ab) Kuv yuav hu nkauj qhuas txog koj txoj kev cawm.

Lo lus cav txog koj nyob nraim hauv kuv lub ncauj,
Thiab cav txog koj lub koob meej hnub dhau hnub.
Zaum no kuv laus lawm, koj txhob ntiab kuv ;
Kuv lub zog ntaug zuj zus, koj txhob tso kuv pov tseg.

Txais: (15ab) Kuv yuav hu nkauj qhuas txog koj txoj kev cawm.

Kuv yuav tso siab tas mus li
thiab yuav cav txog koj tsis tseg tsis txawj kawg.
Kuv lub ncauj yuav niaj hnub piav txog
koj txoj kev ncaj thiab kev cawm neeg.

Txais: (15ab) Kuv yuav hu nkauj qhuas txog koj txoj kev cawm.

Kuv yuav cav txog HUAB TAIS cov hauj lwm loj ;
Kuv yuav cav txog txoj kev ncaj uas tuaj ntawm koj tib leeg tuaj.
TswvNtuj, koj tau qhuab qhia kuv puag thaum yau los,
Los txog tav no kuv tau tshaj koj tej dej num txaus qhuas.

Txais: (15ab) Kuv yuav hu nkauj qhuas txog koj txoj kev cawm.

Kuv yuav siv nkauj nog ncas los ua koj tsaug,
Vim koj txoj kev pheej xeeb, kuv tus Tswv Ntuj;
Kuv yuav ntaus thaj cheej cav lus zoo txog koj,
His Xas Lais tus Ntshiab !

Txais: (15ab) Kuv yuav hu nkauj qhuas txog koj txoj kev cawm.

As Les Lus Yas:       LK  2:   19

Txais: As les lus yas, as les lus yas.

Tus nkauj xwb tsim txiaj Mab Liab tau hmoov zoo vim nws khaws
Tswv Ntuj lo lus cia rau nruab siab thiab muab coj los xav.

Txais: As les lus yas, as les lus yas.

Ntawv Moo Zoo:       LK  2:   41-51

41 Yes Xus niam thiab txiv nkawd niaj xyoo mus ua lub Ntees Hla pem Yes LusXas Les. 42 Thaum Yes Xus muaj kaum ob xyoos, lawv kuj mus ua lub Ntees Hla ped raws li kev cai thiab. 43 Thaum cov hnub ua ntees ntawd tas lawm, Yos Xes thiab Mab Liab nkawd sawv kev rov los, hos tus me tub Yes Xus tseem nyob Yes Lus Xas Les, nws niam thiab nws txiv tsis paub. 44 Nkawd xav tias nws nyob hauv pab neeg coob nrog sawv daws rov qab los lawm. Ces nkawd mus ib hnub ke, nkawd mam li pib nrhiav nws hauv cov txheeb ze thiab cov swm neeg. 45 Tiam sis nkawd nrhiav tsis tau, ces nkawd thiaj tig rov mus pem Yes Lus Xas Les, nkawd nrhiav nws tsis tseg. 46 Nkawd nrhiav tau peb hnub, thiaj nrhiav tau Yes Xus nyob hauv lub Tuam Tsev Teev Ntuj, nws zaum hauv nruab nrab cov kws Txoj Cai, nws mloog lawv thiab nug lawv. 47 Cov neeg uas tau hnov nws hais lus puav leej yoob tas rau nws lub tswv yim ntse thiab nws cov lus teb. 48 Thaum nkawd pom Yes Xus, nkawd xav tsis thoob, ces nws niam hais rau nws tias : "Me tub, vim li cas koj ua li ntawd rau wb ? Saib koj txiv wb nrhiav koj, wb ntxhov siab tas nrho." 49 Yes Xus hais rau nkawd tias : "Vim li cas neb nrhiav kuv ? Neb tsis paub tias kuv yuav leg kuv Txiv cov hauj lwm no lod ?” 50 Tiam sis nkawd tsis to taub nws lo lus tias yog nws xav hais tsi. 51 Yes Xus nrog nkawd rov mus nyob Nas Xas Les, nws mloog nkawd lus. Nws niam ua zoo khaws tej lus ntawd huv tib si cia rau hauv nruab siab.

TIM 11 LUB 6 HLI 2018

Hnub Ob Lis Piam Kaum Nruab Xyoo B Nruab Lis Piam Xyoo II

Hwm LN Npas Nas Npas, Hauv Paus Xa Lus

Zaj Nyeem Ib: HAUJ LWM 11: 21B-26; 13:1-3

11 21b Lub caij ntawd cov neeg txais kev ntseeg thiab tig los cuag Huab Tais coob kawg. 22 Lub Koom Txoos nyob Yes Lus Xas Les hnov lub moo ntawd, lawv thiaj xa Npas Nas Npes mus nyob As Caus Kus. 23 Thaum Npas Nas Npes tuaj txog, nws pomTswv Ntuj lub txiaj ntsim, mas nws zoo siab heev, nws pab txhawb kom lawv ua siab loj siab tawv nyob ruaj nreb hauv txoj kev ntseeg txog Huab Tais. 24 Vim Npas Nas Npes yog ib tug neeg zoo, Leej Ntuj Plig Ntshiab nyob puv hauv nws, thiab nws muaj kev ntseeg ruaj, mas ib pab neeg coob kawg los ntseeg txog HuabTais ntxiv. 25 Ces Npas Nas Npes mus nrhiav Xauv nyob Tas Xis. 26 Thaum nws nrhiav tau Xauv lawm, nws coj Xauv los nyob As Caus Kus. Tau ib xyoos nkaus, nkawd nrog lub Koom Txoos sib sau sib ntsib, thiab nkawd qhuab qhia ib pab neeg coob kawg. Yog nyob As Caus Kus mas luag thiaj xub pib hu cov thwj tim ua cov Pleev.
13 1 Lub Koom Txoos nyob As Caus Kus muaj ib co yaj saub thiab ib co kws qhuab qhia : yog Npas Nas Npes, Xis Mes Oos uas luag hu nws ua Nis Zes, Lus Xyus tus nyob Xis Les Nas teb tuaj, Mas Nas Ees uas thaum yau nws nrog tus vaj Hes Los ua phooj ywg, thiab Xauv. 2 Muaj ib hnub, lawv tab tom ua lub txoos teev ntuj thiab ua cov kab ke yoo mov, mas Leej Ntuj Plig Ntshiab hais rau lawv tias : "Nej xaiv qee Npas Nas Npes thiab Xauv nkawd, vim kuv hu nkawd mus ua dua ib txog hauj lwm." 3 Ces thaum lawv yoo mov tas thiab teev Ntuj tas, lawv tsa tes rau saum nkawd, thiab lawv xa nkawd mus.


NPN 98: 1, 2-3AB, 3CD-4, 5-6

Txais: (2b) Huab Tais muab nws lub hwj huam
cawm neeg rau cov haiv neeg pom.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
thiab nws sab npab ntshiab.

Txais: (2b) Huab Tais muab nws lub hwj huam
cawm neeg rau cov haiv neeg pom.

HUAB TAIS ua kom sawv daws paub txog nws txoj kev cawm neeg,
nws muab nws txoj kev ncaj rau cov haiv neeg pom.
Nws rov nco txog nws txoj kev ua zoo thiab kev pheej xeeb rau
tsev neeg His Xas Lais.

Txais: (2b) Huab Tais muab nws lub hwj huam
cawm neeg rau cov haiv neeg pom.

Tas npoo ntuj npoo ntiaj teb kawg tau pom
peb tus Tswv Ntuj txoj kev cawm neeg.
Tas txhuam teb chaws, nej zoo siab hu nkauj rau HUAB TAIS,
nej qw suab hu nkauj, nej cav txog nws.

Txais: (2b) Huab Tais muab nws lub hwj huam
cawm neeg rau cov haiv neeg pom.

Nej ntaus nkauj nog ncas cav txog Huab Tais,
nej ntaus nkauj nog ncas nrog tej zaj nkauj zoo mloog.
Nej tshuab hom ntxuag suab kub nyuj,
nej dhia zoo siab nyob ntawm Vaj Ntxwv HUAB TAIS xub ntiag.

Txais: (2b) Huab Tais muab nws lub hwj huam
cawm neeg rau cov haiv neeg pom.

As Les Lus Yas: MT 5: 12A

Txais: As l;es lus yas, as les lus yas.

Txais: Nej yuav zoo siab thiab hom khaj,
vim nej yuav tau txais koob haum loj nyob saum ntuj

Txais: As l;es lus yas, as les lus yas.

Ntawv Moo Zoo: MT 5: 1-12

1 Yes Xus pom neeg coob coob tuaj, nws nce mus saum lub roob. Nws zaum, ces cov thwj tim txav los ze nws. 2 Ces Yes Xus tsa ncauj qhia lawv hais tias : 3 "Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li. 4 Cov tau txoj hmoov zoo, yog cov quaj ntsuag, vim Ntuj yuav nplij lawv. 5 Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug. 6 Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis. 7 Cov tau txoj hmoov zoo, yog cov hlub luag tej, vim Ntuj yuav hlub lawv. 8 Cov tau txoj hmoov zoo, yog cov siab huv, vim lawv yuav pom Tswv Ntuj. 9 Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam. 10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug. 11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo. 12 Nej yuav zoo siab thiab hom khaj, vim nej yuav tau txais koob haum loj nyob saum ntuj. Cov yaj saub ua nej ntej, kuj raug luag hiam zoo li ntawd thiab.

TIM 12 LUB 6 HLI 2018

Hnub Peb Lis Piam Kaum Nruab Xyoo B Nruab Lis Piam Xyoo II

Zaj Nyeem Ib: 1 VAJ 17: 7-16

7 Tau ib ntus xwb ces tus dej ntawm qhov chaw Es Lias mus nyob tsiv nraim qhuav tas, vim ntuj tsis los nag nyob hauv lub teb chaws li. 8 Ces Es Lias hnov HUAB TAIS lo lus hais rau nws tias : 9 "Koj sawv kev mus tom lub nroog Xas Les Tas nyob Xis Doos, koj yuav mus nyob ntawd. Kuv twb tau tshoj kom ib tug poj ntsuam nyob tod yuav pub mov rau koj noj lawm." 10 Es Lias thiaj li sawv kev mus Xas Les Tas. Thaum nws tuaj txog ntawm ntug yuav nkag mus hauv nroog, muaj ib tug poj ntsuam tab tom khaws taws rauv. Nws hais rau tus poj ntsuam tias : "Thov koj nqa ib qho dej hauv lub tshob tuaj rau kuv haus saib !" 11 Tus poj ntsuam txawm sawv kev yuav mus nqa dej. Es Lias qw caum tus poj ntsuam tias : "Thov koj nqa ib qho ncuav movhauv koj txhais tes tuaj rau kuv noj thiab !" 12 Tus poj ntsuam teb tias : "Tseeb ib yam li HUAB TAIS koj tus Tswv Ntuj muaj sia nyob, kuv tsis muaj ib qhov mov siav li. Kuv kawg tshuav me ntsis hmoov nplej nyob hauv lub qab hub xwb, thiab tshuav me me roj nyob hauv lub qab hwj xwb. Zaum no, yog kuv tab tom tuaj sau ib tsuag taws mus rauv, tso kuv yuav ua ib lub ncuav mov rau kuv tus tub thiab kuv wb noj. Noj tas ces wb kawg tos tuag lawm xwb." 13 Es Lias hais rau tus poj ntsuam tias : "Koj txhob txhawj, koj kav tsij mus ua raws li koj npaj lawm. Tiam sis koj yuav xub ua ib lub ncuav mov nqa tuaj rau kuv noj tso, koj mam li mus ua rau koj thiab koj tus tub neb noj. 14 Vim Huab Tais, His Xas Lais tus Tswv Ntuj cog lus tias: ‘lub hub hmoov nplej yuav tsis txawj tas, lub hwj ntim roj yuav tsis txawj nqhuab mus txog hnub uas Tswv Ntuj tso nag los ywg lub ntiaj teb daim npoo av." 15 Tus poj ntsuam mus ua raws li Es Lias qhia. Ces nws thiab Es Lias thiab nws tus tub lawv tau mov noj tsis tu pluas tau ntau hnub. 16 Lub hub rau hmoov nplej tsis txawj tas li hos lub hwj rau roj tsis txawj nqhuab li, raws nraim li Tswv Ntuj tau hais nyob hauv Es Lias lawm.

NPN 4: 2-3, 4-5, 7b-8

Txais: (7a) Huab Tais, ua kom koj lub ntsej muag ci tuaj rau peb.

Kuv tus Tswv Ntuj siab ncaj , thaum kuv hu txog koj, koj teb kuv.
Thaum kuv raug kev txhawj xeeb, koj daws kuv kev txhawj.
Thov koj khuv leej kuv thiab mloog kuv lo lus thov koj.
Leej tib neeg, nej yuav ua nej lub siab twm xeeb mus txog thaum twg?
Vim li cas nej nyiam qhov tsis muaj nqes thiab nrhiav txoj kev cuav taug?

Txais: (7a) Huab Tais, ua kom koj lub ntsej muag ci tuaj rau peb.

Nej yuav paub tias HUAB TAIS ua hwj huam loj pab tus ntseeg nws,
HUAB TAIS yuav mloog kuv thaum kuv hu txog nws.
Nej yuav ntshai tshee na, nej txhob ua txhaum ntxiv;
Nej hais lus hauv nruab siab xav tswv tim nyob ntsiag to saum nej lub txaj.

Txais: (7a) Huab Tais, ua kom koj lub ntsej muag ci tuaj rau peb.

HUAB TAIS, koj ua kom koj lub ntsej muag ci tuaj rau peb.
Koj ua kom kuv lub siab muaj kev zoo siab loj,
Tseem loj dua thaum sau tau nplej thiab cub tau cawv ntau.

Txais: (7a) Huab Tais, ua kom koj lub ntsej muag ci tuaj rau peb.

As Les Lus Yas: MT 5: 16

Txais: As les lus yas, as les lus yas.

Nej yuav cia nej lub teeb ci nyob ntawm zeej tsoom xub ntiag,
kom lawv pom nej cov dej num zoo, ces lawv yuav cav txog nej Txiv nyob saum ntuj.

Txais: As les lus yas, as les lus yas.

Ntawv Moo Zoo: MT 5: 13-16

Yes Xus hais rau nws cov thwj tim tias:
13 "Nej yog cov ntsev las lub ntiaj teb. Tab sis yog ntsev tsuag lawm, yuav muab dab tsi ua kom ntsev rov qab tuaj ? Ntsev tsuag tsis zoo ua dab tsi ntxiv, tsuas kawg muab pov tseg nraum zoov rau neeg tsuj xwb. 14 Nej yog lub teeb ci rau lub ntiaj teb. Ib lub nroog txhim rau saum ib lub ncov roob, yuav muab zais tsis tau. 15 Luag kuj tsis taws teeb coj mus khwb rau hauv qab pob tawb, hos luag muab txawb saum tus ncej teeb, kom lub teeb ci rau tas cov neeg nyob hauv tsev pom kev. 16 Li ntawd, nej lub teeb kuj yuav tsum ci nyob ntawm zeej tsoom xub ntiag, kom lawv pom nej cov dej num zoo, ces lawv yuav cav txog nej Txiv nyob saum ntuj.”

TIM 13 LUB 6 HLI 2018

Hnub Plaub Lis Piam Kaum Nruab Xyoo B Nruab Lis Piam II

Hwm LN Anthony nyob Padua

Zaj Nyeem Ib: 1 VAJ 18: 20-39

20 Tus vaj As Kas hu tas tsoom His Xas Lais thiab sau cov yaj saub tuaj nyob saum lub roob Kas Mes. 21 Es Lias nqua hu rau tas tsoom sid, nws hais tias : "Nej yuav nrhab ceg tsuj ob tog mus txog thaum twg ? Yog tias HUAB TAIS yog Tswv Ntuj ces nej raws nws kiag! Yog tias Npas Has yog Tswv Ntuj ces nej raws nws kiag !" Tsoom sid tsis teb dab tsi rau Es Lias li. 22 Es Lias hais ntxiv tias : "Tshuav kuv ib leeg ua HUAB TAIS tus Yaj Saub xwb, hos Npas Has cov yaj saub muaj plaub puas tsib caug leej diam. 23 Nej coj ob tug thav nyuj tuaj rau peb. Cia lawv xaiv ib tug, lawv muab txiav ua tej daim thiab muab tso rau saum cov taws, tab sis tsis txhob rauv taws rau li. Kuv kuj yuav npaj ib tug, muab tso rau saum cov taws thiab, thiab kuv kuj yuav tsis rauv taws rau li. 24 Nej yuav hu txog nej cov tswv ntuj lub npe, hos kuv yuav hu txog HUAB TAIS lub npe. Tus Tswv Ntuj uas teb thiab tso hluav taws los hlawv cov tsiaj mas tus ntawd thiaj yog Tswv Ntuj." Tsoom sid teb tias : "Peb pom zoo ua li ntawd!"
25 Ces Es Lias hais rau cov yaj saub Npas Has tias : "Nej xaiv ib tug thav nyuj, cia nej npaj ua ntej vim nej yog cov coob. Nej hu txog nej cov tswv ntuj, tiam sis nej tsis txhob rauv taws li." 26 Lawv coj tus nyuj uas luag muab rau lawv mus, lawv muab tua muab npaj kom tiav tas, ces lawv hu txog Npas Has lub npe txij sawv ntxov mus txog tav su, lawv hais tias : "Npas Has, thov koj teb peb mas !" Tab sis tsis hnov ib lub suab tsis hnov leej twg teb li. Lawv dhia ncig ntawm lub thaj txi ntuj uas lawv tau txhim tib si. 27 Thaum txog tav su, Es Lias thuam lawv tias : "Nej qw nrov dua mas ! Nws yog ib tug tswv ntuj diam, ntshai nws muaj chaw ntxhov siab los muaj hauj lwm ntau lawm, los ntshai nws muaj chaw tawm rooj lawm; los tej zaud nws tsaug zog lawm, nej yuav tsum tsa nws ces nws yuav tsim dheev los xwb !" 28 Lawv haj yam qw nrov dua tuaj thiab lawv xuas ntaj xuas hmuv los hlais lawv kom ntshav tawm los raws li lawv kev cai ua kam. 29 Thaum tav su dua lawm, lawv ua saub nthe los nthe ntuas los ntuas mus txog lub caij yuav cev cov txim txi ntuj. Tab sis tsis hnov ib lub suab los ib lo lus teb li, zoo li tsis muaj neeg hnov li.
30 Es Lias thiaj hais rau tsoom sid tias : "Nej sawv daws txav los ze kuv." Thaum Sawv daws txav los lawm, Es Lias thiaj rov tsa HUAB TAIS lub thaj txi ntuj uas puas tas lawm. 31 Nws muab kaum ob lub pob zeb kom muaj txwm kaum ob lub xeem raws li Yas Kos kaum ob leeg tub; Yas Kos yog tus uas HUAB TAIS tau hais rau nws tias : “Koj lub npe yuav hu ua His Xas Lais.” 32 Es Lias muab cov pob zeb ntawd los txhim ua ib lub thaj rau HUAB TAIS lub npe. Nws khawb ib tug kwj ntim taus ob kawg noob ncig lub thaj. 33 Nws teeb cov taws tas rau , nws muab tus thav nyuj phua ua tej daim thiab muab tso rau saum cov taws. 34 Ces nws hais tias : "Nej ntim plaub hub dej puv puv thiab nej nqa los nchuav ywg tus nyuj thiab cov taws." Lawv ua li ntawd tas. Es Lias hais tias : "Nej ua zaum ob thiab !" Ces lawv ywg dej zaum ob thiab. Es Lias tseem rov hais tias : "Nej ua zaum peb ntxiv thiab !" Lawv thiaj ua zaum peb ntxiv. 35 Dej nyab ncig lub thaj txi Ntuj tas, tus kwj kuj puv dej tas.
36 Thaum txog lub caij txi Ntuj, tus Yaj Saub Es Lias txav los ze, nws hais tias : "HUAB TAIS, uas koj yog Has Nplas Has, His Xas Has thiab His Xas Lais tus Tswv Ntuj, thov koj ua kom hnub no neeg paub tias koj yog tus Tswv Ntuj nyob hauv His Xas Lais, thiab kuv yog koj tus tub txib, thiab tas txhua yam kuv ua no yog koj kom ua. 37 HUAB TAIS, thov koj teb kuv ! Koj teb kuv, ces tsoom pej xeem nyob ntawm no thiaj yuav paub tias koj yog Tswv Ntuj, koj yog tus ua kom lawv lub siab rov xeev tig los cuag koj." 38 Ces HUAB TAIS cov hluav taws nqes los kub tus tsiaj hlawv txi ntuj thiab cov taws, cov pob zeb, cov plua tshauv, thiab los nqus cov dej nyob hauv tus kwj tas huv si. 39 Tsoom pej xeem pom tej no, tas sawv daws ntog khwb rwg pe hauv av, lawv hais tias : "HUAB TAIS yog Tswv Ntuj! HUAB TAIS yog Tswv Ntuj!"

NPN 16: 1B-2AB, 4, 5AB+8, 11

Txais: (1) Tswv Ntuj, thov koj txuag kuv; koj yog kuv chaw tso siab.

Tswv Ntuj, thov koj txuag kuv, vim kuv tuaj khaub zig koj.
Kuv hais rau HUAB TAIS tias: " Koj yog kuv tus HUAB TAIS !

Txais: (1) Tswv Ntuj, thov koj txuag kuv; koj yog kuv chaw tso siab.

Lawv nrhiav kev txom nyem ntau rau lawv,
cov uas teev lwm cov dab.
Kuv yuav tsis hliv ntshav los txi lawv.
Kuv di ncauj yuav tsis tuav txog lawv lub npe.

Txais: (1) Tswv Ntuj, thov koj txuag kuv; koj yog kuv chaw tso siab.

Huab Tais, kuv lub cuab tam kuv lub ntim,
Koj yog tus tuav rawv kuv txoj hmoo.
Kuv cia HUAB TAIS nyob ntawm kuv xub ntiag tsis tseg,
cia nws nyob ntawm kuv sab xis, kuv yuav tsis qaij tsis qaug.

Txais: (1) Tswv Ntuj, thov koj txuag kuv; koj yog kuv chaw tso siab.

Koj yuav qhia kuv taug txoj kev mus txog txoj sia,
mus txog kev zoo siab puv npo nyob ntawm koj xub ntiag,
mus txog kev luag ntxhi nyob ntawm koj sab xis mus li.

Txais: (1) Tswv Ntuj, thov koj txuag kuv; koj yog kuv chaw tso siab.

As Les Lus Yas: NPN 25: 4B, 5A

Txais: As les lus yas, as les lus yas.

Kuv tus Tswv Ntuj, qhia koj tej xub ke rau kuv paub.
coj kuv mus taug koj txoj kev tseeb

Txais: As les lus yas, as les lus yas.

Ntawv Moo Zoo: MT 5: 17-19

Yes Xus hais rau nws cov thwj tim tias:
17 Nej txhob xav tias kuv tuaj rhuav Txoj Cai thiab cov Yaj Saub : Kuv tsis yog tuaj rhuav, kuv tsuas yog tuaj ua kom tiav raws li ntawd xwb. 18 Kuv hais qhov muaj tseeb rau nej tias: Ua ntej lub ntuj lub teb yuav dua, yuav tsis muaj ib tug txwm ntawv, los ib lub cim ntawv me me nyob hauv Txoj Cai yuav dua mus, tas ib puas tsav yam yuav tsum tshwm sim tuaj tso. 19 Vim li no, yog leej twg hla ib txog cai me tshaj nyob hauv txoj cai, thiab nws qhia kom luag ua xws li nws, mas Ntuj yuav saib tus ntawd qis tshaj cov nyob hauv Ntuj lub Ceeb Tsheej. Hos tus ua raws Txoj Cai tas huv si, thiab nws qhia kom luag ua xws li nws, Ntuj yuav saib nws yog tus loj tshaj cov nyob hauv Ntuj lub Ceeb Tsheej.

TIM      14      LUB      6      HLI      2018

Hnub Tsib Lis Piam Kaum Nruab Xyoo B Nruab Lis Piam Xyoo II

Zaj Nyeem Ib:       1 VAJ  18:   41-46

41 Es Lias hais rau tus vaj As Kas tias: “Koj nce mus noj mov mus haus dej, vim twb hnov los nag nrov loj loj lawm.” 42 Ces As Kas nce mus noj mov mus haus dej lawm, hos Es Lias nce mus saum lub ncov roob Kas Mes; nws mus nyo hau khoov ti hauv av muab nws taub hau ntsaws rau kis nruab nrab ntawm nws ob lub hauv caug. 43 Nws hais rau nws tus tub txib tias: “Koj mus lawm saud mus ntsia lawm sab tim dej hiav txwv saib.” Tus tub txib nce mus saib, nws hais tias: “Twb tsis muaj dab tsi li.” Es Lias hais xya zaus rau nws tias: “Koj yuav tsum rov mus xyuas dua.” 44 Zaum xya, tus tub hluas hais tias: “Zaum no muaj ib tauv huab me me luaj li ib txhais tes nce hauv dej hiav txwv tuaj lawm.” Es Lias hais rau nws tias: “Koj mus hais rau As Kas tias: ‘Koj yuav tsum nog nra thiab kav tsij nqes saum roob mus ua ntej ntuj los nag, tsam koj rov mus tsis tau.’” 45 Ces tam sis ntawd ntuj cia li dub nciab tsaus nti tuaj, muaj cua daj cua dub, thiab los nag loj nchuav lug saum ntuj los. As Kas thiaj nce hlo saum tsheb thiab rov qab mus rau Yiv Xes Les lawm. 46 Huab Tais txhais tes lub hwj huam los roos Es Lias, nws khi tsho khov kho ntawm duav ces nws khiav rag ntws ua As Kas ntej mus txog ntua rau tom lub rooj vag nkag mus hauv nroog Yiv Xes Les.

NPN       65:   10, 11, 12-13

Txais: (2a) Tswv Ntuj, tsim nyog peb cav txog koj nyob saum Xis Yoos.

Koj tuaj xyuas lub ntiaj teb daim av, koj ywg dej rau;
koj ua kom daim av nplua nuj muaj txhij txhua.
Tswv Ntuj tus dej muaj dej ntws puv nkaus kwj.
Koj npaj kom muaj noob qoob noob loo rau lawv.

Txais: (2a) Tswv Ntuj, tsim nyog peb cav txog koj nyob saum Xis Yoos.

Koj npaj txhua yam rau daim av zoo li no:
Koj ua kom muaj dej puv tej kwj liag,
kom qhov ua pob a tawg mos tas;
koj tso nag los ywg kom av phom,
koj foom kom cov qoob ntsu.

Txais: (2a) Tswv Ntuj, tsim nyog peb cav txog koj nyob saum Xis Yoos.

Koj pub txhua yam zoo thaum lub xyoo tas,
koj tej lw ntsu qoob loo ntws lug.
Tej tshav zaub hauv teb chaws suab puam muaj dej ntws lug,
Tej pov roob hnav zam muaj kev zoo siab puv npo.

Txais: (2a) Tswv Ntuj, tsim nyog peb cav txog koj nyob saum Xis Yoos.

As Les Lus Yas:       ZAM  13:   34

Txais: As les lus yas, as les lus yas.

"Kuv muab ib lo lus qhia tshiab rau nej :
Nej yuav ib leeg hlub ib leeg ib yam li kuv hlub nej.

Txais: As les lus yas, as les lus yas.

Ntawv Moo Zoo:       MT  5:   20-26

Yes Xus hais rau nws cov thwj tim tias:
20 "Kuv hais rau nej tias yog nej tsis coj ncaj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv Ntuj lub Ceeb Tsheej. 21 Nej tau hnov cov lus qhia rau tej laus thaud tias : ‘Koj tsis txhob tua neeg, tus twg tua neeg, nws yuav mus raug txim nyob tom tsev hais plaub.’ 22 Hos kuv hais rau nej tias leej twg npau taws rau nws tus kwv tij, mas nws yuav mus raug txim nyob tom tsev hais plaub. Yog leej twg hais rau nws tus kwv tij tias ‘Niag ruam !’ mas nws yuav mus raug txim nyob ntawm lub rooj txwj laus Xas Nes Nrees. Yog nws hais rau nws tus kwv tij tias : "Niag neeg vwm", mas nws yuav mus raug txim nyob hauv dab phem cov hluav taws. 23 Vim li no, thaum koj tuaj cev ib co txim rau saum lub thaj txi Ntuj, yog koj nco dheev tias koj tus kwv tij tau muaj lus tsis zoo rau koj lawm, 24 mas koj cia li tso koj cov txim rau ntawm lub thaj txi Ntuj, koj mus nrog koj tus kwv tij hais kom haum tso, koj mam rov tuaj cev koj cov txim. 25 Koj yuav kav tsij hais kom haum nrog koj tus yeeb ncuab sai sai thaum koj tseem nrog nws taug kev, tsam nws coj koj mus kom rau tus nom txiav txim, ces nom txiav txim muab koj cob rau tub ceev xwm, ces koj yuav raug kaw hauv tsev loj faj. 26 Kuv hais tseeb rau koj tias, koj yuav tawm tsis tau hauv tsev loj faj los, mus txog thaum koj rho nyiaj qab nas mus them kom txog npib kawg tso.”

TIM 15 LUB 6 HLI 2018

Hnub Rau Lis Piam Kaum Nruab Xyoo B Nruab Lis Piam Xyoo II

Zaj Nyeem Ib: 1 VAJ 19: 9A, 11-16

Thaum Es Lias mus txog ntawm Tswv Ntuj lub roob Hos Les,
9 nws chaws mus hauv ib lub qhov tsua, nws mus pw nyob ntawd.
11 Huab Tais hais rau nws tias : "Koj tawm mus, koj mus ntsib HUAB TAIS saum lub roob.” Ces HUAB TAIS txawm tuaj. Muaj ib nthwv cua hlob tas nrho tuaj ua cov roob thiab cov pob tsuas tawg tas ua Huab Tais ntej, tab sis HUAB TAIS tsis nyob hauv nthwv cua ntawd. Dhau nthwv cua lawm, txawm muaj av qeeg, tab sis HUAB TAIS tsis nyob hauv qhov av qeeg ntawd thiab. 12 Thaum av qeeg tas lawm, muaj ib co hluav taws tawm tuaj, tab sis HUAB TAIS kuj tsis nyob hauv cov hluav taws ntawd thiab. Thaum cov hluav taws dhau tas lawm, hnov ib lub suab nrov mos mos yau yau tuaj. 13 Es Lias hnov lub suab ntawd mas tam sis ntawd nws muab nws lub tsho tshaj sab los thaiv ntsej muag, ces nws tawm los nyob ntawm lub rooj qhov tsua, nws hnov ib lub suab hu nws tias : "Es Lias, koj tuaj ua dab tsi ntawm no ?" 14 Es Lias teb tias : "Kuv kub siab lug rau HUAB TAIS Xas Npas Os, vim His Xas Lais cov tub tau tso koj txoj kev cog lus pov tseg, lawv rhuav koj cov thaj txi Ntuj thiab lawv rho ntaj tua koj cov Yaj Saub tuag tas, tshuav kuv ib leeg xwb, lawv tseem nrhiav txo kuv txoj sia thiab." 15 HUAB TAIS hais rau nws tias : "Koj rov mus, koj taug koj txoj qub ke rov qab mus tom lub hav suab puam Das Mas. Koj yuav mus tsa Has Xas Es ua vaj kav As Las, 16 koj yuav tsa Yes Hus uas yog Nis Sis tub ua vaj kav His Xas Lais, thiab koj pleev Es Lis Xais, uas yog Xas Fas tub nyob As Npes Mes Hos Las ua Yaj Saub hloov koj."

NPN 27: 7-8A, 8B-9ABC, 13-14

Txais: (8b) Huab Tais, kuv xav pom koj lub ntsej muag tas siab nrho.

HUAB TAIS, thov koj mloog kuv lub suab hu koj,
Thov koj hlub kuv, thiab teb kuv mas!
Kuv lub siab tham txog koj tuj taws,
Kuv nrhiav koj lub ntsej muag.

Txais: (8b) Huab Tais, kuv xav pom koj lub ntsej muag tas siab nrho.

HUAB TAIS, kuv nrhiav kom tau pom koj.
Thov txhob muab koj lub ntsej muag zais ntawm kuv,
Txhob npau taws txhob xyeej koj tus tub txib;
Koj yog tus pab kuv, txhob ntiab kuv khiav ntawm koj mus.

Txais: (8b) Huab Tais, kuv xav pom koj lub ntsej muag tas siab nrho.

Kuv ntseeg tias kuv yuav tau pom HUAB TAIS lub siab zoo
nyob hauv tsoom neeg ciaj lub teb chaws.
Koj tos ntsoov HUAB TAIS, ua siab loj loj ;
ua siab tawv qhawv, tos ntsoov HUAB TAIS !

Txais: (8b) Huab Tais, kuv xav pom koj lub ntsej muag tas siab nrho.

As Les Lus Yas: FLP 2: 15D, 16A

Txais: As les lus yas, as les lus yas.

Nej yuav tsum ci li ib co teeb ci rau lub ntiaj teb,
Vim nej tuav rawv Lo Lus pub txoj sia.

Txais: As les lus yas, as les lus yas.

Ntawv Moo Zoo: MT 5: 27-32

Yes Xus hais rau nws cov thwj tim tias:
27 “Nej hnov tej lus qhia tias : ‘Koj yuav tsis txhob deev luag txij luag nkawm.’ 28 Hos kuv hais rau nej tias: Leej twg ntsia ib tug poj niam vim ntshaw zes nws, tus ntawd twb deev tus poj niam ntawd hauv nruab siab lawm. 29 Yog koj sab qhov muag xis coj koj mus ua txhaum, mas kav tsij muab sab qhov muag ntawd kaus pov tseg deb koj : txhiaj khoov cia ib sab qhov muag puas zoo dua tas koj lub cev poob hauv dab phem teb. 30 Yog koj sab tes xis coj koj mus ua txhaum, kav tsij muab txiav pov tseg deb koj : txhiaj khoov cia tu ib sab tes zoo dua tas koj lub cev poob hauv dab phem teb. 31 Kuj tseem muaj tej lus qhia tias : ‘Leej twg nrauj nws poj niam, yuav tsum muab ib daim ntawv nrauj rau tus poj niam.’ 32 Tab sis, kuv hais rau nej : Tus txiv neej twg nrauj nws poj niam, tus ntawd tso nws poj niam rau luag deev. Qhov no tsis yog hais txog tus poj niam uas mus nrog lwm tus txiv neej ua dev ua npua. Hos leej twg yuav ib tug poj nrauj, mas tus ntawd yog ib tug deev luag txij luag nkawm.”

TIM 16 LUB 6 HLI 2018

Hnub Xya Lis Piam Kaum Nruab Xyoo B Nruab Lis Piam Xyoo II

Zaj Nyeem Ib: 1 VAJ 19: 19-21

19 Ces Es Lias sawv kev mus tso qhov chaw ntawd tseg, nws mus nrhiav tau Es Lis Xais uas yog Xas Fas tus tub; Es Lis Xais tseem laij teb nrog kaum ob nkawm nyuj; nws tab tom laij nrog nkawm kaum ob. Es Lias hla mus ze ntawm Es Lis Xais, nws pov rhees nws lub tsho tshaj sab rau saum Es Lis Xais xub pwg. 20 Ces Es Lis Xais tso plhuav nws cov nyuj tseg, nws khiav khiav mus caum Es Lias. Nws hais tias : "Koj cia kuv mus hais ob peb lo lus nplij kuv niam thiab kuv txiv tso, ces kuv yuav caum koj mus." Es Lias teb tias : "Koj kav tsij rov mus. Kuv tau ua dab tsi rau koj ?" 21 Es Lis Xais thiaj rov mus, nws muab nws nkawm nyuj tua. Nws muab rab voom los rauv hau nqaij kom siav, ces nws muab faib rau nws cov neeg noj, ces nws sawv mus caum Es Lias, ua Es Lias tus tub txib.

NPN 16: 1B-2A+5, 7-8, 9-10

Txais: (5a) HUAB Tais, koj yog lub cuab tam kuv yuav tau txais.

Tswv Ntuj, thov koj txuag kuv, vim kuv tuaj khaub zig koj.
Kuv hais rau HUAB TAIS tias: " Koj yog kuv tus HUAB TAIS !
HUAB TAIS kuv lub cuab tam kuv lub ntim cawv,
koj yog tus tuav rawv kuv txoj hmoov.

Txais: (5a) HUAB Tais, koj yog lub cuab tam kuv yuav tau txais.

Kuv cav lus zoo txog HUAB TAIS tus qhia kuv xav tswv yim,
Tab yog hmo ntuj kuv siab ntsws tseem qhuab qhia kuv.
Kuv cia HUAB TAIS nyob rawv ntawm kuv xub ntiag;
Vim nws nyob ntawm kuv sab xis, kuv yuav tsis qaij qaug.

Txais: (5a) HUAB Tais, koj yog lub cuab tam kuv yuav tau txais.

Vim li ntawd, kuv lub siab luag ntxhi, kuv tus plig hom khaj,
Kuv lub cev kuj nyob nyab xeeb hauv txoj kev tso siab.
Vim koj tsis tso kuv tus plig pov tseg rau ntuj txias teb tsaus,
Koj tsis kheev kom koj tus neeg ntshiab paub kev lwj kev puas.

Txais: (5a) HUAB Tais, koj yog lub cuab tam kuv yuav tau txais.

As Les Lus Yas: NPN 119: 36A, 29B

Txais: As les lus yas, as les lus yas.

Tswv Ntuj, thov koj rub kuv lub siab kom xib rau cov lij choj,
koj pub lub txiaj ntsim ntawm koj Txoj Cai rau kuv.

Txais: As les lus yas, as les lus yas.

Ntawv Moo Zoo: MT 5: 33-37

Yes Xus hais rau nws cov thwj tim tias:
33 “Nej tseem hnov cov lus qhia rau tej laus thaud tias : ‘Koj tsis txhob twv ntuj raws kev tsis ncaj, koj yuav ua raws li cov lus koj tau fiv rau Huab Tais.’ 34 Tab sis kuv hais rau nej, nej tsis txhob twv ntuj ib zaug li; txhob muab lub ntuj los ua tim khawv, vim lub ntuj yog Tswv Ntuj lub theej kiab ; 35 txhob muab lub ntiaj teb los ua tim khawv, vim lub ntiaj teb yog Tswv Ntuj lub rooj tiag taw ; txhob muab Yes Lus Xas Les los ua tim khawv, vim yog tus Tuam Vaj lub Nroog. 36 Txhob muab koj lub taub hau los ua tim khawv, vim koj ua tsis tau kom ib txog plaub hau dawb tuaj los dub tuaj. 37 Nej yuav hais lus tias ‘Muaj,’ thaum muaj tiag, ‘Tsis muaj,’ thaum tsis muaj. Cov lus hais tshaj, yog tuaj ntawm tus Phem tuaj.”

TIM      18      LUB      6      HLI      2018

Hnub Ob Lis Piam Kaum Ib Nruab Xyoo B Nruab Lis Piam Xyoo II

Zaj Nyeem Ib:       1 VAJ  21:   1-16

1 Thaum tej no dhau tas lawm muaj zoo li no tuaj:  Nas Npos uas nyob Yiv Xaws Les muaj ib lub vaj txiv cawv nyob puab tus vaj Xas Mas Lias hu ua As Kas lub tsev nyob Yiv Xaws Les. 2 As Kas hais zoo li no rau Nas Npos tias : "Koj muab koj lub vaj txiv cawv rau kuv ua kuv lub vaj cog zaub, vim koj lub vaj twb nyob ze ze kuv tsev. Kuv mam li muab dua ib lub vaj txiv cawv zoo dua rau koj yog koj pom zoo. Los puas yog koj xav yuav nyiaj mas kuv yuav muab nyiaj kom txaus nws tus nqe rau koj." 3 Tab sis Nas Npos hais rau As Kas tias : "Thov kom HUAB TAIS tsis txhob cia kuv tso kuv cov yawg koob tej qub txeeg qub teg rau koj !" 4 As Kas rov los tsev, nws ua ntsej muag dub nciab, nws tsis zoo siab rau lo lus uas Nas Npos tus neeg Yiv Xaws Les hais rau nws tias : 'Kuv yuav tsis tso kuv cov yawg koob tej qub txeeg qub teg rau koj.' Nws mus pw saum txaj, nws fee plhu, nws tsis xav noj mov.
5 Nws tus poj niam Zes Xas Npes los hais rau nws tias : "Vim li cas koj thiaj chim siab ua luaj, koj thiaj tsis noj mov ?" 6 As Kas teb tias : "Vim kuv hais rau Nas Npos tus neeg Yiv Xaws Les tias : 'Muab koj lub vaj txiv cawv rau kuv, kuv mam muab nyiaj rau koj. Los yog koj nyiam, kuv mam muab dua lwm lub vaj txiv cawv los pauv.' Tab sis nws hais tias : 'Kuv tsis muab kuv lub vaj txiv cawv rau koj li." 7 Ces Zes Xas Npes hais rau As Kas tias : "Koj kam yog ib tug vaj His Xas Lais diam,  kav tsij sawv tsees los noj mov! Koj kav tsij zoo siab ! Kuv yuav muab kom tau Nas Npos tus neeg Yiv Xaws Les lub vaj rau koj."
8 Zes Xas Npes siv As Kas lub npe los sau ib tsab ntawv. Nws ntaus tus vaj lub thwj rau saum tsab ntawv. Nws xa mus rau cov txwj laus thiab cov nom nrog Nas Npos nyob hauv nws lub nroog. 9 Nyob hauv tsab ntawv ntawd, Zes Xas Npes sau tias: "Nej tshaj ib lub caij yoo mov. Nej cia Nas Npos mus zaum ntawm tsoom sid hauv ntej. 10 Nej coj ob tug tim khawv uas yog neeg tsis tseem ceeb dab tsi los zaum ntawm Nas Npos xub ntiag. Ob tug tim khawv ntawd yuav liam li no tias : 'Koj tau thuam Tswv Ntuj thiab thuam tus vaj !' Ces nej coj Nas Npos tawm mus nraum sab nroog nraud thiab nej xuas pob zeb txawb kom nws tuag."
11 Cov nom tswv thiab cov txwj laus nyob hauv Nas Npos lub nroog sawv daws ua raws li Zes Xas Npes hais kom ua nyob hauv nws tsab ntawv nws sau tuaj rau lawv. 12 Lawv ua kab ke yoo mov thiab lawv kom Nas Npos mus zaum ntawm tsoom pej xeem hauv ntej. 13 Ces ob tug tim khawv uas yog neeg tsis tseem ceeb dab tsi tuaj sawv ntawm Nas Npos xub ntiag thiab liam tias Nas Npos tau thuam Tswv Ntuj thiab thuam tus vaj. Ces lawv coj Nas Npos tawm ntawm lub nroog mus thiab lawv txawb pob zeb ntaus nws kom  nws tuag. 14 Lawv ua li ntawd tas ces lawv tso neeg mus hais rau Zes Xas Npes tias : "Peb tau xuas pob zeb txawb tua Nas Npos tuag lawm." 15 Thaum Zes Xas Npes hnov tias lawv xuas pob zeb txawb Nas Npos tuag lawm, nws hais rau As Kas tias : "Koj sawv mus muab Nas Npos lub vaj txiv cawv los ua koj tug. Nws tsis xav muab rau koj kom nws tau nyiaj. Zaum no nws tsis nyob, nws tuag lawm." 16 Thaum As Kas hnov tias Nas Npos tuag lawm, ces nws sawv tsees, nws nqes mus nram Nas Npos tus neeg Yiv Xaws Les lub vaj, nws muab lub vaj los ua nws tug.

NPN       5:   2-3AB, 4B-6A, 6B-7

Txais: (2b) Huab Tais, thov koj mloog kuv thaum kuv nroo.

HUAB TAIS, thov koj tig ntsej los mloog kuv tej lus,
Thov koj quav ntsej txog kuv thaum kuv xyu tej zaj.
Koj ua tib zoo mloog kuv thaum kuv hu kom koj tuaj pab,
Koj kuv tus vaj, kuv tus Tswv Ntuj!

Txais: (2b) Huab Tais, thov koj mloog kuv thaum kuv nroo.

Sawv ntxov tsees, kuv tuaj thov koj, kuv tos ntsoov koj kev pab.
Tswv Ntuj, koj tsis zoo siab pom txoj kev phem.
Tus neeg phem yuav nyob tsis taus nrog koj.
Tus neeg saib tsis taus luag yuav sawv tsis taus rau koj pom.

Txais: (2b) Huab Tais, thov koj mloog kuv thaum kuv nroo.

Koj ntxub tas tsoom neeg nrhiav kev ua phem.
Koj txo kom cov neeg hais lus cuav ploj mus tag.
Cov neeg txo luag roj ntsha thiab cov neeg dag,
HUAB TAIS ntxub lawv tas siab nrho.

Txais: (2b) Huab Tais, thov koj mloog kuv lub suab nroo.

As Les Lus Yas:       NPN 119:   105

Txais: As les lus yas, as les lus yas.

Koj lo lus yog lub teeb tsom kuv ko taw taug kev,
yog qhov pom kev kaj kuv txoj xub ke.

Txais: As les lus yas, as les lus yas.

Ntawv Moo Zoo:       MT  5:   38-42

Yes Xus hais rau nws cov thwj tim tias:
38 Nej tau hnov tej lus qhia tias : ‘Qhov muag pauj qhov muag, kaus hniav pauj kaus hniav.’ 39 Hos kuv hais rau nej tias : nej tsis txhob nrog tus neeg phem sib cav. Yog leej twg ib ncuav pias rau koj sab plhu xis, mas koj yuav tig koj sab plhu laug rau nws thiab. 40 Yog leej twg xav ua plaub rau koj kom tau koj lub tsho hnav, mas koj muab koj lub tsho tshaj sab ntxiv rau nws thiab. 41 Yog leej twg thov koj xa nws mus ib ncuas kev , mas koj nrog nws mus ob ncuas kev. 42 Yog leej twg thov koj ib yam, mas koj muab pub rau nws. Yog leej twg xav qiv koj ib yam, mas koj txhob tig nraub qaum rau nws.

TIM 19 LUB 6 HLI 2018

Hnub Peb Lis Piam Kaum Ib Nruab Xyoo B Nruab Lis Piam Xyoo II

Hwm LN Romuald

Zaj Nyeem Ib: 1 VAJ 21: 17-29

Thaum Nas Npos tuag lawm,
17 HUAB TAIS hais rau Es Lias uas nyob Tis Npis tias : 18 "Koj cia li sawv kev nqes mus cuag As Kas tus vaj His Xas Lais nyob Xas Mas Lias teb. Koj yuav pom nws nyob hauv Nas Npos lub vaj txiv cawv, nws mus rau nrad mus muab lub vaj los ua nws tug. 19 Koj yuav mus hais li no rau nws : ‘HUAB TAIS hais li no: 'Koj tua tus neeg tuag thiab koj tseem txeeb nws tug yuav thiab lod? Vim li ntawd, Huab Tais hais tias: nyob ntawm qhov chaw uas cov dev yaim Nas Npos cov ntshav, mas dev kuj yuav yaim koj cov ntshav thiab.’” 20 As Kas hais rau Es Lias tias : "Kuv tus yeeb ncuab aw, koj ntes tau kuv lawm lod?" Es Lias teb tias : "Kuv ntes tau koj lawm tiag, vim koj tig koj lub siab mus ua qhov phem nyob ntawm HUAB TAIS qhov muag. 21 Kuv yuav tso kev phem tuaj raug koj; kuv yuav rhuav koj caj ces yuav txo txhua tus tub nyob hauv As Kas tsev neeg, tsis hais tus tub qhev los tus twj lij, kuv yuav tsis pub seem ib tug noob cia nyob hauv His Xas Lais li. 22 Kuv yuav ua rau koj tsev neeg ib yam li kuv tau ua rau Yes Los Npuag uas yog Nes Npas tub thiab Npas Sas uas yog As His Yas tub nkawd ob tsev neeg, vim koj tau ua kom kuv npau taws thiab koj coj His Xas Lais mus ua txhaum." (23 HUAB TAIS kuj foom ib lo lus phem rau Zes Xas Npes tias: “Dev yuav sib huas dua Zes Xas Npes nyob hauv thaj teb nyob Yiv Xaws Les.”) 24 “Nyob hauv As Kas caj ces, tus twg tuag hauv nroog mas dev yuav noj nws, tus twg tuag tom tej nras teb mas cov dav yuav noj nws.”25 Vim tsis tau muaj dua ib tug neeg ua phem npaum li As Kas ua li. Nws ua tej yam tsis haum HUAB TAIS siab vim yog nws tus poj niam txhob kom nws ua. 26 Nws coj ib txog kev phem kawg nkaus vim nws mus teev dab zoo nkaus li cov As Mos Lis thaud coj, uas HUAB TAIS ntaus lawv tawg tas kom lawv swb rau cov His Xas Lais.
27 Thaum As Kas hnov cov lus ntawd, As Kas dua rhe nws cev khaub ncaws, nws mus hnav ntaub tsaj ntxhib ntxhib npuab nws cev nqaij; nws yoo mov thiab nws pw hauv cov ntaub tsaj ntxhib ntxhib; nws maj mam mus kev ua tau hau qaij de. 28 Ces HUAB TAIS hais rau Es Lias tus neeg nyob Tis Npis tias : 29 "Koj puas pom tias As Kas yeem ua tus neeg me nyob ntawm kuv xub ntiag lawd? Vim nws yeem ua tus me li ntawd rau kuv mas kuv yuav tsis tso xwv txheej los raug nws thaum nws tseem ua neej nyob; tiam sis thaum lub caij nws tus tub sawv los ua vaj mas kuv yuav tso xwv txheej los raug nws tsev neeg."

NPN 51: 3-4, 5-6AB, 11+16

Txais: (3a) Huab Tais, thov koj khuv leej peb vim peb tau ua txhaum lawm.

Tswv Ntuj, thov koj khuv leej kuv, vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.
Thov koj ntxuav kuv lub txim pov tseg kom tas
thiab koj muab kuv qhov txhaum tshem mus kom kuv dawb huv tuaj.

Txais: (3a) Huab Tais, thov koj khuv leej peb vim peb tau ua txhaum lawm.

Kuv lees paub kuv qhov txhaum,
kuv qhov txhaum nyob rawv ntawm kuv xub ntiag.
“Kuv tau ua txhaum rau koj ib leeg xwb,
kuv tau ua qhov uas koj saib yog tsis zoo.”

Txais: (3a) Huab Tais, thov koj khuv leej peb vim peb tau ua txhaum lawm.

Thov koj fee ntsej muag mus deb ntawm kuv cov txhaum,
koj so kuv cov txhaum pov tseg huv tib si.
Tswv Ntuj, kuv tus Tswv Ntuj cawm neeg,
thov koj npo kuv ntawm lub txim tua neeg ;
kuv ncauj nplaig yuav cav txog koj txoj kev ncaj !

Txais: (3a) Huab Tais, thov koj khuv leej peb vim peb tau ua txhaum lawm.

As Les Lus Yas: ZAM 13: 34

R. Alleluia, alleluia.

"Kuv muab ib lo lus qhia tshiab rau nej :
nej yuav sib nyiam sib hlub ib yam li kuv tau hlub nej

R. Alleluia, alleluia.

Ntawv Moo Zoo: MT 5: 43-48

Yes Xus hais rau nws cov thwj tim tias:
43 "Nej tau hnov tej lus hais tias : ‘Koj yuav nyiam tus nyob ze koj, koj yuav ntxub koj tus yeeb ncuab.’ 44 Tab sis, kuv hais rau nej tias : nej yuav nyiam nej cov yeeb ncuab, nej yuav thov Ntuj rau cov tsim txom nej ; 45 nej thiaj yuav yog nej Txiv nyob saum ntuj cov tub ; vim nws ua kom nws lub hnub tawm tuaj ziab cov neeg phem thiab cov neeg zoo, thiab nws ua kom nag los rau cov siab ncaj thiab cov siab nkhaus tib si. 46 Vim yog nej nyiam cov neeg nyiam nej xwb, mas nej yuav tau koob haum dab tsi ? Tab yog cov sau se, lawv kuj txawj nyiam li ntawd thiab puas yog? 47 Yog nej tshwj zias nej cov lus zoo rau nej cov kwv tij xwb, mas nej tau ua dab tsi zoo tshaj luag ? Tab yog cov neeg teev pej kum dab, los lawv kuj txawj ua li ntawd thiab. 48 Ntawm nej, mas nej yuav ua neeg zoo txhij zoo txhua, ib yam li nej Txiv nyob saum ntuj nws zoo txhij zoo txhua.”

TIM 20 LUB 6 HLI 2018

Hnub Plaub Lis Piam kaum ib Nruab Xyoo B Nruab Lis Piam Xyoo II

Zaj Nyeem Ib: 2 VAJ 2: 1, 6-14

1 Thaum HUAB TAIS xa ib lub khaub zeeg cua tuaj nqa Es Lias mus saum ntuj mas thaum ntawd Es Lias thiab Es Lis Xais nkawd sawv kev tawm hauv Zis Nkas mus.
6 Es Lias hais rau Es Lis Xais tias : "Koj nyob ntawm no, HUAB TAIS tsuas hais kom kuv xwb mus txog tom tus dej Yos Las Das." Tab sis Es Lis Xais teb tias : "Kuv cog lus tias ib yam li Huab Tais muaj txoj sia thiab koj muaj txoj sia, kuv yuav tsis tso koj tseg li." Ces nkawd ob leeg mus ntxiv. 7 Muaj tsib caug leej hauv lub koom haum yaj saub caum nkawd qab tuaj, lawv tuaj nres nyob nrug deb me ntsis ntawm nkawd thaum nkawd tab tom mus sawv ze ntawm tus ntug dej Yos Las Das. 8 Es Lias hle nws lub tsho tshaj sab, nws muab kauv zoj ua ib tug ces nws muab nplawm cov dej. Tus dej cia li faib ua ob sab, ces nkawd hla dej ko taw tsuj av qhuav qhawv. 9 Thaum nkawd hla dhau lawm, Es Lias hais rau Es Lis Xais tias : "Koj thov saib kuv ua puas tau dab tsi pab koj, cheem luag tseem tsis tau tshem kuv ntawm koj mus ?" Es Lis Xais teb tias : "Kuv thov kom kuv tau txais ob npaug ntawm koj lub tswv yim los ua kuv tug." 10 Es Lias hais tias : "Koj thov ib yam nyuaj ! Yog koj pom kuv nce mus saum ntuj mas koj yuav tau txais li koj thov. Yog koj tsis pom mas koj yuav tsis tau txais."
11 Ces nkawd mus ntxiv, nkawd ke tham ke taug kev. Cia li muaj ib lub tsheb hluav taws thiab ib co nees hluav taws tawm plaws tuaj nyob ntawm nkawd kis nruab nrab. Ces Es Lias nce hlo nrog lub khaub zeeg cua ya mus dua saum ntuj lawm. 12 Es Lis Xais pom Es Lias mus, nws qw tias : "Kuv Txiv ! Kuv Txiv ! His Xas Lais lub tsheb thiab nws cov nees xob nees cua!" Ces Es Lis Xais tsis pom ntxiv lawm. Es Lis Xais nthos nkaus nws lub tsho muab dua rhe ua ob daig. 13 Nws khaws nkaus Es Lias lub tsho tshaj sab uas poob ntawm Es Lias los rau hauv av, ces nws rov qab los sawv ntawm ntug dej Yos Las Das. 14 Nws muab Es Lias lub tsho uas poob los los nplawm cov dej nws qw nrov nrov tias : " HUAB TAIS Es Lias tus Tswv Ntuj nyob qhov twg ?" Nws nplawm cov dej, dej cia li faib kiag ua ob sab, ces Es Lis Xais hla dej los lawm.

NPN 31: 20, 21, 24

Txais: (25) Tas ib tsoom neeg uas tso siab rau HUAB TAIS, nej cia li ua siab loj !

HUAB TAIS, koj muaj lub siab zoo tas nrho ,
Koj tshwj zias ua
zoo rau cov neeg hwm koj,
Koj pab cov uas tuaj khaub zig koj,
Koj tab meeg pab lawv rau tib neeg pom.

Txais: (25) Tas ib tsoom neeg uas tso siab rau HUAB TAIS, nej cia li ua siab loj !

Koj coj lawv mus nkaum nyob ntawm koj xub ntiag
kom deb ntawm neeg tej kev ua siab phem.
Koj coj lawv mus nraim deb ntawm
tus nplaig nkhaus tsawm neeg.

Txais: (25) Tas ib tsoom neeg uas tso siab rau HUAB TAIS, nej cia li ua siab loj !

Tas nej cov neeg hwm HUAB TAIS, nej nyiam nws mog !
HUAB TAIS txuag cov ntseeg nws mus li,
hos nws nplua tus muab hlob kom ti txha nkaus.

Txais: (25) Tas ib tsoom neeg uas tso siab rau HUAB TAIS, nej cia li ua siab loj !.

As Les Lus Yas: ZAM 14: 23

Txais: As les lus yas, as les lus yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws,
kuv Txiv wb yuav los nyob hauv nws.

Txais: As les lus yas, as les lus yas.

Ntawv Moo Zoo: MT 6: 1-6, 16-18

Yes Xus hais rau nws cov thwj tim tias:
1 “Nej ceev faj, nej txhob ua ncaj nyob ntawm neeg xub ntiag xwb, kom luag pom nej. Yog nej ua li ntawd, mas nej yuav tsis txais koob haum ntawm nej Txiv nyob saum ntuj. 2 Thaum koj pub rau luag, koj txhob tshuab hom ua koj ntej. Cov neeg zoo sab nraud ua li ntawd nyob hauv cov tsev txoos thiab nyob ntawm tej kev, kom sawv daws cav lus zoo txog lawv. Kuv hais tseeb rau nej, lawv twb txais lawv cov koob haum tas lawm. 3 Hos koj, mas thaum koj pub rau luag, koj txhob cia koj sab tes laug paub qhov uas koj sab tes xis ua. 4 Li ntawd, tsis muaj neeg paub tias koj tau pub. Ces koj Txiv uas nws pom hauv qhov chaw nraim yuav pauj rau koj.
5 Thaum nej teev Ntuj, nej txhob ua li cov neeg zoo sab nraud : lawv nyiam sawv ntsug hauv cov tsev txoos, thiab ntawm tej kev tshuam, kom sawv daws pom lawv. Kuv hais tseeb rau nej, lawv twb txais lawv cov koob haum lawm. 6 Hos koj, mas thaum koj teev Ntuj, koj mus nyob twj ywm hauv koj kem txaj, kaw koj qhov rooj rau ces koj teev koj Txiv uas nws nyob hauv qhov chaw nraim. Koj Txiv uas nws pom hauv qhov chaw nraim, yuav pauj rau koj.
16 Thaum nej yoo mov, nej txhob ua ntsej muag ntshaus xws li cov neeg zoo sab nraud : lawv ua ntsej muag mluas mluas, kom luag pom meej tias lawv yoo mov. Kuv hais tseeb rau nej tias cov neeg ntawd twb txais lawv cov koob haum tas lawm. 17 Hos koj, mas thaum koj yoo mov, koj yuav pleev tshuaj tsw qab rau saum taub hau, koj ntxuav muag, 18 kom txhob muaj neeg paub tias koj yoo mov, tsuas kawg koj Txiv uas nws nyob hauv qhov chaw nraim tib leeg paub xwb. Koj Txiv pom hauv qhov chaw nraim yuav pauj rau koj.”

TIM 21 LUB 6 HLI 2018

Hnub Tsib Lis Piam Kaum Ib Nruab Xoo B Nruab Lis Piam Xyoo II

Hwm LN Aloysius Gonzaga

Zaj Nyeem Ib: NPES XIS LAS 48: 1-14

1 Tus yaj saub Es Lias sawv tsees xws li ib lub cub tawg, nws lo lus cig npaum li ib teg tsau. 2 Nws ua kom kev tshaib plab tuaj raug lawv, nws lub siab kub lug ua kom lawv tuag tas ntau. 3 Nws hais Huab Tais lo lus los muab cov dej nag saum ntuj kaw ntom nti. Nws kuj ua hluav taws nqes saum ntuj los peb zaug thiab. 4 Es Lias, koj ua ib co hwj huam yees ntxwv loj ua luaj! Leej twg yuav khav tau tias nws ua tau tej yam loj ib yam li koj ? 5 Koj yog tus tau hais tus Nyob Siab lo lus los tsa ib tug tuag kom sawv hauv ntuj txiag teb tsaus los. 6 Koj tau txo ib co vaj kom poob rau hauv kev puas ntsoog, koj ua kom lawv lub hwj chim tawg tas, thiab koj txo cov neeg muaj npe kom poob hwj chim nyob saum lawv lub txaj mob. 7 Nyob saum roob Xis Nais koj tau hnov ib co lus ntuas lus hem; nyob saum roob Hos Les, koj tau hnov ib co lus ceeb toom txog kev yuav nplua txim. 8 Koj tau pleev roj tsa tej tus vaj kom lawv nrhiav kev ua pauj. Koj tau pleev roj rau ib tug yaj saub kom los hloov koj. 9 Ib lub khaub zeeg hluav taws nqa koj mus, koj caij ib lub tsheb uas yog nees hluav taws luab. 10 Muaj ntawv sau tseg tias Ntuj xaiv koj kom koj rov los thaum lub caij teem tom ntej, koj yuav los ua kom nws lub siab nqig thaum lub caij nws npau taws. Koj yuav coj phaj txiv lub siab tig rov los hlub phaj tub. Koj yuav rov tuaj tsa cov xeem Yas Kos kom sawv. 11 Lawv tau txoj hmoov zoo cov neeg uas yuav pom koj thiab cov uas tuag nyob hauv txoj kev nyiam; vim tias peb kuj yuav tau txais txoj sia thiab.
12 Thaum Es Lias mus nyob hauv lub khaub zeeg hluav taws lawm, mas Es Lis Xais tau nws lub tswv yim los nyob puv hauv nws. Tas Es Lis Xais sim neej tsis muaj ib tug nom yuav ua tau kom nws ntshai, tsis muaj leej twg yuav yeej tau nws. 13 Tsis muaj ib yam yuav nyuaj dhau rau nws. Nws twb tuag lawm los nws lub cev tseem ua yaj saub tau. 14 Thaum nws ua neej nyob nws ua hwj huam yees ntxwv txaus qhuas, thaum nws tuag lawm, nws tseem tau ua tej yam loj kawg nkaus.

NPN 97: 1-2, 3-4, 5-6, 7

Txais: (12a) Nej cov neeg ncaj, nej yuav zoo siab nyob hauv HUab Tais!

HUAB TAIS ua vaj, kom lub ntiaj teb zoo siab,
kom cov pov txwv uas muaj ntau lub dhia daj dhia luag !
Cov huab thiab qhov tsaus ntuj dub nciab nyob ncig nws ;
kev ncaj thiab kev txiav txim yog chaw txawb nws lub theej kiab.

Txais: (12a) Nej cov neeg ncaj, nej yuav zoo siab nyob hauv HUab Tais!

Hluav taws mus ua nws ntej,
cig mus kub cov neeg ntxub nws uas nyob ncig nws.
Nws cov kab xob laim ci tuaj kaj lub qab ntuj ;
ntiaj teb pom, ntiaj teb tshee na ;

Txais: (12a) Nej cov neeg ncaj, nej yuav zoo siab nyob hauv HUab Tais!

Cov toj roob yaj xws ciab ntab nyob ntawm HUAB TAIS xub ntiag,
ntawm tus HUAB TAIS kav tas ntiaj teb xub ntiag.
Yim txheej cuaj txheej ntuj tau tshaj nws txoj kev ncaj,
tas ib tsoom haiv neeg tau pom nws lub hwj chim :

Txais: (12a) Nej cov neeg ncaj, nej yuav zoo siab nyob hauv HUab Tais!

Kom tas tsoom neeg teev mlom tau txaj muag,
vim lawv tau ntsej muag nyob hauv tej yam tsis muaj nqes.
Tas ib tsoom dab tuaj txhos caug pe ntawm HUAB TAIS xub ntiag .

Txais: (12a) Nej cov neeg ncaj, nej yuav zoo siab nyob hauv HUab Tais!

As Les Lus Yas: LOS MAS 8: 15BC

Txais: As les lus yas, as les lus yas.

Nej tau txais ib lub tswv yim ua tub ki tshiab,
Nws qhia kom peb hu tias : ‘As Npas ! Txiv !’

Txais: As les lus yas, as les lus yas.

Ntawv Moo Zoo: MT 6: 7-15

Yes Xuas hais rau nws cov thwj tim tias:
7 “Thaum nej teev Ntuj, nej txhob ntuas mus ntuas los zoo li cov neeg teev dab, lawv xav tias dab yuav mloog lawv yog lawv hais lus ntau ntau. 8 Nej txhob ua zoo li lawv. Vim nej Txiv twb xub paub lawm tias qhov twg yog qhov nej yuav tsum muaj, tab yog nej tseem tsis tau tho. 9 Nej yuav teev Ntuj zoo li no :
‘Peb Txiv nyob saum ntuj, ua kom koj lub Npe ntshiab nto moo lug. 10 Koj lub Ceeb Tsheej kom los txog. Kom muaj raws li koj nyiam nyob ntiaj teb no li nyob saum ntuj. 11 Thov koj pub mov txaus peb noj hnub no. 12 Koj zam peb cov txhaum rau peb zoo li peb zam rau cov tau ua txhaum peb. 13 Koj txhob tso peb raug kev ntxias. Koj npo peb dim ntawm kev phem.’
14 Yog nej zam rau cov neeg ua txhaum rau nej, mas nej Txiv nyob saum ntuj kuj yuav zam txhaum rau nej thiab. 15 Hos yog nej tsis zam txhaum rau luag, mas nej Txiv kuj yuav tsis zam rau nej thiab.”

TIM 22 LUB 6 HLI 2018

Hnub Rau Lis Piam Kaum Ib Nruab Xyoo B Nruab Lis Piam Xyoo II

Hwm LN Paulinus nyob Nola; LN John Fisher thiab LN Thomas More, ob tug Tim Khawv

Zaj Nyeem Ib: 2 VAJ 11: 1-4, 9-18, 20

1 Thaum As Thas Lias uas yog Os Kos Xias niam, hnov hais tias nws tus tub tuag lawm, mas As Thas Lias pib muab caj ces ua vaj tua kom tu noob. 2 Tab sis Yes Hos Ses Npas uas yog tus vaj Yes Hos Las tus ntxhais thiab yog Os Kos Xias tus muam nyiag nqa Os Kos Xias tus tub Yos As khiav ntawm tus vaj cov tub uas lawv yuav musb tua mus. Nws muab Yos As thiab Yos As ib tug niam yug mov coj mus nkaum nyob hauv chav tsev uas muaj cov txaj pw; lawv muab nws zais li ntawd ces As Thas Lias thiaj tua tsis tau nws. 3 Yes Hos Ses Npas muab Yos As zais li ntawd tau rau xyoo nyob hauv HUAB TAIS lub Tuam Tsev. Rau xyoo ntawd yog As Thas Lias kav lub teb chaws. 4 Thaum xyoo xya tuaj, tus Leej Choj Yes Hos Yas Das tso neeg mus hu cov thawj tub rog saib cov Kas Lias thiab saib cov tub zov keeb tuaj cuag nws nyob hauv HUAB TAIS lub Tuam Tsev. Nws nrog lawv cog lus ruaj khov thiab kom lawv tsa tes tib si, ces nws muab tus vaj tus tub rau lawv pom.
9 Cov thawj tub rog ua tas puas tsav yam raws li tus Leej Choj Yes Hos Yas Das kom ua. Lawv nyias coj nyias cov neeg tuaj cuag tus Leej Choj Yes Hos Yas Das, cov uas tsis raug ua hauj lwm hnub xas npas tos ntawd thiab cov raug ua hauj lwm zov keeb rau hnub ntawd tuaj tib si. 10 Tus Leej Choj muab vaj Das Vis cov hmuv thiab cov leem phiaj uas nyob hauv Huab Tais lub tuam tsev los faib rau lawv. 11 Cov tub zov keeb sawv ua tej leej ntawm lub tuam tsev sab nrad mus rau sab ped, lawv tuav hmuv ntawm tes, lawv sawv ncig lub thaj txi Ntuj thiab ncig lub Tuam Tsev tib si. 12 Ces Yes Hos Yas Das coj tus vaj tus tub Yos As tawm los, nws muab lub mom teev kub rau tus me nyuam vaj ntoo, muab cov ntawv cog lus rau nws tuav, thiab tsa nws ua va muab nws pleev roj. Ces sawv daws npuaj teg thiab qw tias : "Thov kom tus vaj muaj sia ntev nyob!"
13 As Thas Lias hnov cov tub zov keeb thiab tsoom pej xeem suab qw ntsuag qees, nws txawm tuaj rau ntawm lub Tuam Tsev uas tsoom pej xeem nyob. 14 Thaum As Thas Lias pom tus vaj sawv ntsug ntawm tus ncej ntawm qhov rooj tuam tsev raws li txoj cai, thiab pom cov thawj tub rog thiab cov neeg tshuab hom nyob ze tus vaj, tas tsoom pej xeem zoo siab ke qw ke tshuab hom, As Thas Lias dua rhe nws cev khaub ncaws, nws qw tias : "Lawv ntxeev siab lawm! Lawv ntxeev siab lawm!" 15 Ces tus Leej Choj Yes Hos Yas Das ceeb toom rau cov thawj tub rog saib pua leej tub rog tias : "Nej coj As Thas Lias tawm ntawm lub Tuam Tsev mus. Yog leej twg raws nws nej xuas ntaj tua pov tseg !" Tus Leej Choj hais li no vim nws xav tias yuav tsis txhob cia As Thas Lias tuag nyob hauv Huab Tais lub Tuam Tsev Teev Ntuj. 16 Lawv ntes As Thas Lias, coj nws los txog nws lub tsev vaj loog ntawm lub Qhov Rooj Nees, lawv thiaj muab nws tua nyob ntawd.
17 Yes Hos Yas Das nrog tus vaj thiab tsoom pej xeem cog lus rau HUAB TAIS tias lawv yuav ua HUAB TAIS haiv neeg. Tus vaj thiab tsoom pej xeem kuj muaj sib cog lus thiab. 18 Tas ces tsoom pej xeem sawv daws mus tom lub tsev teev Npas Has, lawv muab lub tsev rhuav, muab cov thaj cov mlom tsoo pov tseg tas, thiab lawv muab tus Leej Choj Npas Has hu ua Mas Taas tua nyob ntawm cov thaj txi Npas Has. Yes Hos Yas Das tso ib cov tub zov keeb mus zov lub tuam tsev teev ntuj.
20 Tas tsoom sid sawv daws zoo siab, thiab lub nroog nyob ntsiag to, vim zaum no Lawv tau muab ntaj tua As Thas Lias tuag nyob hauv tus vaj lub tuam tsev lawm.

NPN 132: 11, 12, 13-14, 17-18

Txais: (13) Huab Tais tau xaiv Xis Yoos ua nws qhov chaw nyob.

HUAB TAIS tau cog lus rau Das Vis,
yog ib lo lus ruaj, nws yuav tsis thim nws lo lus tias:
“Ib tug tawm hauv koj roj ntsha los
Yog tus kuv yuav tsa los zaum saum koj lub theej kiab.”

Txais: (13) Huab Tais tau xaiv Xis Yoos ua nws qhov chaw nyob.

“Yog koj cov tub khaws cov lus kuv nrog lawv cog,
thiab ua raws li cov lus kuv qhia kom lawv ua,
mas lawv phaj tub phaj ki kuj yuav tau
zaum saum koj lub theej kiab mus li."

Txais: (13) Huab Tais tau xaiv Xis Yoos ua nws qhov chaw nyob.

Vim HUAB TAIS tau xaiv Xis Yoos,
nws nyiam Xis Yoos dua lwm qhov los ua nws chaw nyob:
"Xis Yoos yog kuv qhov chaw so mus li,
kuv yuav nyob saum Xis Yoos, vim kuv nyiam nws dua.”

Txais: (13) Huab Tais tau xaiv Xis Yoos ua nws qhov chaw nyob.

Nyob saum Xis Yoos, kuv yuav ua kom Das Vis hlav ib tug kub,
Kuv yuav taws ib lub teeb rau tus kuv pleev roj rau.
Kuv yuav muab kev txaj muag rau nws cov yeeb ncuab hnav,
hos kuv lub teev kub nyob saum nws taub hau yuav ci hob."

Txais: (13) Huab Tais tau xaiv Xis Yoos ua nws qhov chaw nyob.

As Les Lus Yas: MT 5: 3

Txais: As les lus yas, as les lus yas.

Cov pluag hauv nruab siab tau txoj hmoov zoo,
vim Ntuj lub Ceeb Tsheej yog lawv li.

Txais: As les lus yas, as les lus yas.

Ntawv Moo Zoo: MT 6: 19-23

Yes Xus hais rau nws cov thwj tim tias:
19 "Nej txhob sau tej txhab cuab tam cia nyob ntiaj teb no, vim muaj kab rws kab lia txo, thiab muaj tub sab tho qhov tsev tuaj nyiag. 20 Nej yuav sau tej txhab cuab tam cia nyob saum ntuj : nyob saud, tsis muaj kab rws kab lia txo, tsis muaj tub sab tho qhov tsev tuaj nyiag. 21 Vim tias, koj txhab cuab tam nyob qhov twg, koj lub siab kuj yuav nyob qhov ntawd.
22 "Lub teeb pom kev rau lub cev yog lub qhov muag. Yog koj lub qhov muag zoo, mas tas koj lub cev yuav pom kev nrig. 23 Tab sis yog koj lub qhov muag muaj mob, mas tas koj lub cev yuav nyob tsaus ntuj nti. Yog qhov pom kev uas nyob hauv koj twb tsaus nti lawm, mas qhov tsaus ntuj haj yam yuav ua cas tsaus loj heev.”

TIM 23 LUB 6 HLI 2018

Hnub Xya Lis Piam Kaum Ib Nruab Xyoo B Nruab Lis Piam Xyoo II

Zaj Nyeem Ib: 2 XWM 24: 17-25

17 Thaum leej choj Yes Hos Yas Das tuag tas lawm, cov ntaus thawj Yus Das tuaj pe tus vaj Yuas. Tus vaj mloog lawv cov tswv yim. 18 Ces cov Yus Das tso HUAB TAIS lub Tuam Tsev pov tseg, tso lawv cov yawg koob tus Tswv Ntuj pov tseg, lawv mus teev cov dab ncej dab mlom. Vim lawv ua txhaum li ntawd mas txoj kev phem thiaj los raug Yus Das thiab Yes Lus Xas Les. 19 Muaj ib co Yaj Saub raug xa tuaj hais rau lawv kom lawv rov qab los cuag HUAB TAIS. Tab sis thaum cov Yaj Saub hais lus ceeb toom rau lawv, lawv tsis quav ntsej mloog li. 20 Tswv Ntuj lub tswv yim thiaj los nyob hauv Ntxas Kas Lias uas yog tus Leej Choj Yes Hos Yas Das tus tub. Ntxas Kas Lias sawv ntsug saum ib qho chaw siab hais rau tsoom sid tias : "Tswv Ntuj hais li no : Vim li cas nej hla HUAB TAIS cov lus qhia kom nej txom nyem? Vim nej tso HUAB TAIS pov tseg mas HUAB TAIS yuav tso nej pov tseg thiab." 21 Ces cov Yus Das sib koom siab hiam Ntxas Kas Lias. Lawv ua raws li tus vaj lus ceeb toom kom lawv xuas pob zeb los txawb nws tuag nyob ntawm lub tshav ntawm HUAB TAIS lub Tuam Tsev. 22 Tus vaj Yos As tsis nco qab Ntxas Kas Lias txiv Yes Hos Yas Das lub txiaj ntsim lawm, nws muab Yes Hos Yas Das tus tub tua. Thaum Ntxas Kas Lias yuav tuag nws qw tias : "Muaj HUAB TAIS pom, yuav khaum nej!"
23 Thaum xyoo laus tas xyoo tshiab pib, cov tub rog As Las Mais sawv tuaj ntaus Yos As. Lawv tuaj ntaus yeej Yus Das teb thiab yeej Yes Lus Xas Les. Lawv muab tas cov thawj tub rog Yus Das tua thiab lawv xa tas puas tsav yam lawv lwg tau mus rau lawv tus vaj nyob Das Mas. 24 Cov tub rog As Las Mais tuaj tsis coob, tab sis HUAB TAIS cia lawv yeej ib pab tub rog Yus Das coob kawg, vim lawv tso HUAB TAIS lawv cov yawg koob tus Tswv Ntuj pov tseg. Ces thiaj khaum tus vaj Yos As . 25 Thaum cov As Las Mais rov qab, lawv tso Yos As raug mob loj heev tseg. Nws cov tub txib koom siab ntxeev siab rau nws vim nws tau muab tus leej choj Yes Hos Yas Das tus tub tua tuag lawm. Lawv muab Yos As tua nyob hauv nws lub txaj. Nws tuag tas, lawv muab nws faus nyob hauv Das Vis lub tsheej, tab sis tsis faus rau ntawm cov vaj cov ntxa.

NPN 89: 4-5, 29-30, 31-32, 33-34

Txais: (29a) Kuv yuav hlub kuv tus tub txib mus li.

Kuv tau cog ib lo lus nrog tus kuv xaiv,
kuv tau cog lus khov rau kuv tus tub txib Das Vis tias :
Kuv yuav tsa koj caj ces kom nyob ruaj mus li,
kuv yuav txhim ib lub theej kiab rau koj zaum tiam dhau tiam.

Txais: (29a) Kuv yuav hlub kuv tus tub txib mus li.

Kuv yuav hlub nws mus li,
Kuv lo lus kuv nrog nws cog yuav nyob ruaj khov.
Kuv tsa kom nws caj ces nyob ib txhis,
tsa nws lub theej kiab nyob ntev li lub ntuj.

Txais: (29a) Kuv yuav hlub kuv tus tub txib mus li.

Yog nws cov tub tso kuv txoj cai lij choj pov tseg,
tsis mus taug kuv tej txhooj,
yog lawv hla kuv txoj cai kuv tau txiav tseg
thiab tsis khaws kuv cov lus qhia.

Txais: (29a) Kuv yuav hlub kuv tus tub txib mus li.

Kuv yuav xuas qws rau txim rau lawv txoj kev ua phem,
xuas hlua nplawm lawv qhov kev txhaum.
Tab sis, kuv yuav tsis txiav kuv txoj kev hlub lawv,
kuv yuav tsis thim cov lus kuv cog rau nws.

Txais: (29a) Kuv yuav hlub kuv tus tub txib mus li.

As Les Lus Yas: 2 KLN 8: 9

Txais: As les lus yas, as les lus yas.

Yes Xus Pleev yog tus nplua nuj, tab sis nws ua kom nws pluag,
kom xwv nws txoj kev pluag ua nej nplua nuj tuaj.

Txais: As les lus yas, as les lus yas.

Ntawv Moo Zoo: MT 6: 24-34

Yes Xus hais rau nws cov thwj tim tias:
24 "Tsis muaj leej twg tsob hwb ob tug tswv tau : nws yuav ntxub ib tug, nyiam lwm tus, nws yuav npuab ib tug, thuam lwm tus. Nej ib txhij tsob hwb Tswv Ntuj thiab nyiaj txiag tsis tau. 25 Yog vim li ntawd, kuv thiaj hais rau nej tias : Nej txhob txhawj txog nej txoj sia tias yuav muab dab tsi los noj los yuav muab dab tsi los haus, txhob txhawj txog nej lub cev tias yuav muab dab tsi los hnav. Nej txoj sia tsis muaj nqis dua txhiam xws thiab nej lub cev tsis muaj nqi dua tej tsoos tsho lod ? 26 Nej ntsia cov noog saum ntuj saib : lawv tsis tseb nplej, tsis hlais nplej, tsis sau qoob rau hauv txhab li, tsis kav nej Txiv nyob saum ntuj pub rau lawv noj. Nej tsis muaj nqi dua cov noog ntawd lod? 27 Yog nej leej twg txhawj txhawj, nws puas rub tau nws txoj sia kom ntev ib nyuag pliag ntxiv ? 28 Hais txog tej tsoos tsho, nej yuav txhawj dab tsi ? Nej ntsia cov paj hmab paj ntoos nyob tom tej nras saib lawv hlob zoo li cas: Lawv tsis khwv, tsis ua maj ua ntuag li. 29 Kuv hais rau nej, tab yog Xas Los Moos, txawm nws muaj koob meej nto moo lug, tsis kav nws tsis tau hnav zoo npaum li ib lub paj ntoos li. 30 Yog tias Tswv Ntuj twb muab zam zoo npaum ntawd rau tej nroj nruab nrag , uas hnub no ciaj, tag kis luag twb yuav muab pov hlawv hauv qhov txos, mas nws haj yuav tsis ua zoo tshaj rau nej lod, cov neeg uas ntseeg tsis ti txha ? 31 Li no nej txhob ua siab fab tias : 'Peb yuav noj dab tsi ?’ los ‘Peb yuav haus dab tsi?’ los ‘Peb yuav hnav dab tsi?' 32 Tej ntawd, yog tas puas tsav yam uas cov neeg teev pej kum dab nrhiav. Nej Txiv nyob saum ntuj yeej paub tias nej yuav tsum muaj tej ntawd huv tib si. 33 Ntawm nej, nej yuav xub nrhiav Tswv Ntuj lub Ceeb Tsheej thiab nws txoj kev ntshiab tso, ces Ntuj yuav pub tas puav tsav yam ntawd tib si ntxiv rau nej thiab. 34 Nej txhob ua siab fab txog tag kis : tag kis mam li txhawj rau tag kis. Vim niaj hnub twb muaj kev nyuaj txaus rau hnub ntawd lawm.”