Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

ZOS ROOB NYUJ QUS 1956 NTAWV HMOOB THOOB TEB LUB HAUV PAUS.

Gallery


Latest topics

» COV ZAJ NYEEM NRUAB LIS PIAM XYOO II 2017-2018
by Mim Yesterday at 9:23 am

» TP.Txhiaj Foom lub TSEV Ntawv
by Maiv Tooj 16th September 2018, 1:48 pm

» COV ZAJ NYEEM HNUB CHIV Xyoo B 2017-2018
by NrhiavTswvNtuj 13th September 2018, 10:14 am

» XH. Yaj Zoov Ntxheb lub Tsev THOOB TSIB
by Maiv Tooj 13th September 2018, 10:03 am

» XH.Zoov Ntxheb Yaj Nthuav Ntawv Ntshiab.
by Maiv Tooj 13th September 2018, 10:00 am

» 3 Tug Tij Hmoob Nyab Laj teb.
by Mim 4th September 2018, 2:26 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 31st August 2018, 6:10 am

» Notre Dame du Laus
by Maiv Tooj 9th August 2018, 8:28 am

» Txiv Tswv QhiaTxwj Choo Thoj nyob los tsuas
by Maiv Tooj 27th July 2018, 8:04 am

» Hmoob Roob Nyuj Qus 1956-57 ( Saib duab nias ntawm no)
by Maiv Tooj 20th July 2018, 10:47 pm

» Nyob pab saib tsev
by Maiv Tooj 18th July 2018, 2:01 pm

» ZAJ PEB TXIV UA YES XUS HOM LUS AS LAS MAIS(ARAMAIC)
by Mim 10th July 2018, 2:20 am

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO II 2017-2018

    Share
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 26th April 2018, 10:58 am

    TIM 27 LUB 4 HLIS 2018

    Hnub Rau Lis Piam Plaub Caij Hla Xyoo B Nruab Lis Piam Xyoo II

    Zaj Nyeem Ib: HAUJ LWM 13: 26-33


    Paj Lug hais nyob hauv lub tsev txoos nyob As Caus Kus tias:
    26 Cov kwv tij uas nej yog Has Nplas Has cov tub, thiab nej cov uas hwm Tswv Ntuj nyob ntawm no, cov lus ceeb toom txog txoj kev cawm neeg no yog xa tuaj rau peb ntag. 27 Cov neeg nyob Yes Lus Xas Les thiab lawv cov nom tswv tsis lees paub Yes Xus thiab lawv tsis to taub cov Yaj Saub cov lus uas peb nyeem niaj hnub xav npas tos, ces thaum lawv tau txiav txim muab nws tua, yog lawv ua raws li cov yaj saub cov lus. 28 Lawv nrhiav tsis tau ib yam dab tsi nyob hauv Yes Xus kom txaus muab nws tua, tab sis lawv thov kom Pis Las Tos muab nws tua. 29 Thaum lawv ua tas puas tsav yam raws li Ntawv sau tseg lawm, mas lawv daws nws saum tus ntoo los thiab lawv muab nws mus zwm ntxa. 30 Tab sis Tswv Ntuj tsa nws sawv hauv cov tuag rov los lawm. 31 Tau ntau hnub Yes Xus tawm los xyuas cov neeg nrog nws tuaj ntawm Nkas Lis Lais tuaj mus rau Yes Lus Xas Les. Nyem no cov neeg ntawd ua tim khawv txog nws rau tsoom pej xeem sawv daws hnov. 32 Ntawm peb los peb kuj tshaj lub Moo Zoo rau nej raws li lo lus uas Tswv Ntuj tau cog rau peb cov yawg koob. 33 Nws tau ua rau peb raws nraim li lo lus cog ntawd vim peb yog lawv cov me nyuam; thiab nws tau tsa Yes Xus sawv rov los raws li nyob hauv cov nkauj paj nruag zaj ob, muaj lo lus sau tseg tias : 'Koj yog kuv Leej Tub, hnub no kuv xeeb koj los.'

    NPN 2: 6-7, 8-9, 10-11

    Txais: (7bc) Koj yog kuv Leej Tub, hnub no kuv tau xeeb koj los.
    los: As les lus yas.

    “Kuv tau pleev roj rau kuv tus vaj
    nyob saum Xis Yoos, kuv lub roob ntshiab."
    Kuv yuav tshaj HUAB TAIS txoj cai tawm.
    HUAB TAIS hais rau kuv tias :
    'Koj yog kuv leej tub, hnub no kuv xeeb koj los.

    Txais: (7bc) Koj yog kuv Leej Tub, hnub no kuv tau xeeb koj los.
    los: As les lus yas.

    Koj thov kuv, mas kuv yuav muab
    tsoom kuj cuab los ua koj lub cuab tam,
    kuv yuav muab lub ntiaj teb
    mus txog tim npoo ntuj los ua koj tug.
    Koj yuav tuav ib tug cwj hlau los tswj lawv,
    Koj yuav tsoo lawv ntsoog tas xws li lub lauj kaub av."

    Txais: (7bc) Koj yog kuv Leej Tub, hnub no kuv tau xeeb koj los.
    los: As les lus yas.

    Ib tsoom vaj, nej yuav mob siab rau mloog,
    cov tswj lub ntiaj teb, nej yuav tsum nrhiav kom paub.
    Nej yuav tsob hwb HUAB TAIS thiab ntshai nws.
    Nej yuav zoo siab nyob ntawm nws ko taw thiab hwm nws.


    Txais: (7bc) Koj yog kuv Leej Tub, hnub no kuv tau xeeb koj los.
    los: As les lus yas.

    As Les Lus Yas: ZAM 14: 6

    Txais: As les lus yas, as les lus yas.

    Huab Tais hais tias: Kuv yog Txoj Kev, yog Qhov Tseeb, thiab yog Txoj Sia.
    Tsis muaj leej twg mus cuag Leej Txiv tau, yog nws tsis mus ntawm kuv mus.

    Txais: As les lus yas, as les lus yas.

    Ntawv Moo Zoo: ZAM 14: 1-6

    Yes Xus hais rau nws cov thwj tim tias:
    1 Nej tsis txhob ntxhov siab mog. Nej twb ntseeg txog Tswv Ntuj, nej ntseeg txog kuv thiab. 2 Nyob hauv kuv Txiv tsev, muaj ntau chav. Yog tsis muaj, mas kuv puas yuav hais rau nej tias kuv mus npaj ib qho chaw rau nej? 3 Thaum kuv mus lawm thiab npaj tau ib qho chaw rau nej lawm, kuv yuav rov los coj nej mus nyob ze kuv, kom xwv kuv nyob qhov twg, nej nrog kuv nyob qhov ntawd. 4 Nej yeej paub txoj kev mus txog qhov chaw kuv yuav mus lawm. 5 Tos Mas hais rau Yes Xus tias : "Huab Tais, peb tsis paub koj yuav mus qhov twg, peb yuav ua cas paub txoj kev ?" 6 Yes Xus hais rau Tos Mas tias : "Kuv yog Txoj Kev, yog Qhov Tseeb, thiab yog Txoj Sia. Tsis muaj leej twg mus cuag Leej Txiv tau, yog nws tsis mus ntawm kuv mus."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 27th April 2018, 4:46 am

    TIM 28 LUB 4 HLIS 2018

    Hnub Xya Lis Piam Plaub Caij Hla Xyoo B Nruab Lis Piam Xyoo II

    Hwm LN Peter/Pierre Chanel, leej Choj tuag ua Tim Khawv; LN Louis Grignion de Monfort

    Zaj Nyeem Ib: HAUJ LWM 13: 44-52


    44 Txog lwm hnub Xas Npas Tos, yuav luag tas lub tsheej tuaj sib sau mloog Tswv Ntuj Lo Lus. 45 Cov Yus Das pom neeg tuaj coob coob, mas lawv khib, ces lawv hais lus thuam Paj Lug cov lus thiab thuam Ntuj. 46 Paj Lug thiab Npas Nas Npes nkawd ob leeg ua siab loj hais lus tawv qhawv tias : "Peb yeej yuav tsum xub tshaj Tswv Ntuj lo lus rau nej ua ntej tso thiaj yog, tab sis yog vim nej tsis kam txais lo lus thiab nej rov txiav txim rau nej tias nej tsis tsim nyog txais txoj sia nyob mus li, ces nyem no mus peb yuav tig mus qhia cov neeg teev pej kum dab. 47 Huab Tais twb hais rau peb tias : ‘Kuv tsa koj ua qhov pom kev kaj txhua haiv neeg, kom koj coj kuv txoj kev cawm neeg mus txog tim npoo ntiaj teb kawg.’" 48 Cov neeg teev pej kum dab hnov cov lus no mas sawv daws zoo siab kawg, lawv cav txog Huab Tais lo lus. Cov uas lawv txoj hmoo yog tau txais txoj sia nyob mus li mas lawv tig los ntseeg. 49 Ces Huab Tais lo lus ri mus puv tas ib cheeb tsam ntawd. 50 Tab sis cov Yus Das mus cob cov poj niam nom uas hwm Tswv Ntuj, thiab cov ua thawj nyob hauv lub tsheej, ces lawv pib hiam Paj Lug thiab Npas Nas Npes nkawd. Lawv ntiab nkawd kom tawm hauv lawv teb chaws mus. 51 Nkawd thiaj nchos cov plua av lo nkawd ko taw rau lawv, ces nkawd mus rau Is Kos Nias. 52 Hos cov thwj tim, mas lawv muaj kev zoo siab thiab muaj Leej Ntuj Plig Ntshiab nyob puv hauv lawv.

    NPN 98: 1, 2-3AB, 3CD-4

    Txais: (3cd) Tas npoo ntuj npoo ntiaj teb tau pom peb tus Tswv Ntuj txoj kev cawm neeg.

    Nej hu ib zaj nkauj tshiab rau HUAB TAIS
    vim nws tau ua tej yam txaus qhuas;
    nws txhais tes xis tau ua kom nws yeej,
    yog nws sab npab ntshiab ua.

    Txais…

    HUAB TAIS ua kom sawv daws paub txog nws txoj kev cawm,
    nws muab nws txoj kev ncaj rau cov haiv neeg pom.
    Nws rov nco txog nws txoj kev ua zoo rau thiab hlub
    tsev neeg His Xas Lais.

    Txais…

    Tas npoo ntuj npoo ntiaj teb tau pom
    peb tus Tswv Ntuj txoj kev cawm neeg.
    Tas txhua teb chaws, nej zoo siab hu nkauj rau HUAB TAIS,
    nej qw suab hu nkauj, nej cav txog nws.

    Txais…

    As Les Lus Yas: ZAM 8: 31B-32

    Txais: As les lus yas, as les lus yas.

    Huab Tais hais tias: Yog nej nyob ruaj hauv kuv lo lus,
    mas nej yog kuv cov tseem thwj tim thiab nej yuav paub qhov tseeb.

    Txais: As les lus yas, as les lus yas.

    Ntawv Moo Zoo: ZAM 14: 7-14

    Yes Xus hais rau nws cov thwj tim tias:
    7 “Yog nej paub kuv, mas nej kuj paub kuv Txiv thiab. Txij nyem no mus, nej twb paub nws thiab twb pom nws lawm." 8 Fis Lis Pos hais rau Yes Xus tias : "Huab Tais, koj pub peb pom Leej Txiv, mas peb yuav txaus siab." 9 Yes Xus hais rau Fis Lis Pos tias : "Fis Lis Pos, kuv nrog nej nyob ntev npaum no, koj tseem tsis tau paub kuv thiab lod ? Tus twg pom kuv, mas nws pom Leej Txiv lawd. Ua cas koj thiaj hais tau tias : 'Koj pub peb pom Leej Txiv' ? 10 Koj tsis ntseeg tias kuv nyob hauv Leej Txiv, thiab Leej Txiv nyob hauv kuv lod ? Cov lus uas kuv hais rau nej, tsis yog kuv hais kuv , yog Leej Txiv uas nyob txawm hauv kuv nws ua nws cov hauj lwm. 11 Nej ntseeg kuv : tias kuv nyob hauv Leej Txiv, thiab Leej Txiv nyob hauv kuv. Txawm nej tsis ntseeg kuv los nej yuav tsum ntseeg cov hauj lwm. 12 Kuv hais qhov muaj tseeb tiag rau nej : Tus ntseeg kuv, nws kuj yuav ua cov hauj lwm uas kuv ua, thiab nws tseem yuav ua tej yam loj dua cov kuv ua no thiab, vim tias kuv yuav mus cuag Leej Txiv. 13 Yog nej thov dab tsi nyob hauv kuv lub npe, mas kuv yuav ua rau nej, kom xwv Leej Txiv muaj koob meej nyob hauv Leej Tub. 14 Yog nej tuav txog kuv lub npe thov ib yam dab tsi, mas kuv yuav ua yam ntawd."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 29th April 2018, 10:19 am

    TIM 30 LUB 4 HLIS 2018

    Hnub Ob Lis Piam Tsib Caij Hla Xyoo B Nruab Lis Piam Xyoo II

    Hwm LN Vaj Qhia Pis Yus V

    Zaj Nyeem Ib: HL 14: 5-18


    5 Thaum ntawd cov neeg teev pej kum dab thiab cov Yus Das nrog lawv cov thawj coj xav ua phem rau ob tug Hauv Paus Xa Lus thiab xav txawb pob zeb tua nkawd. 6 Nkawd paub txog li ntawd, ces nkawd khiav mus rau hauv cov nroog Lis Ros thiab Des Npes nyob Lis Kos Nias teb thiab thaj tsam ib ncig ntawd. 7 Nkawd tshaj lub Moo Zoo nyob ntawd.
    8 Nyob Lis Ros, muaj ib tug txiv neej zaum nyob ntawd uas nws taw tsis muaj zog, nws tuag taw txij hnub nws yug los lawm, nws tsis tau mus kev ib zaug li. 9 Nws mloog rawv Paj Lug qhuab qhia, Paj Lug kuj ntsia ntsoov nws, ces Paj Lug pom tias nws muaj kev ntseeg txaus kho kom nws zoo. 10 Paj Lug thiaj hais ib suab nrov nrov tias : "Koj cia li sawv tsees ntseg ntseg saum koj ob txhais taw saib!" Tus tuag taw tib plhaw sawv tsees thiab nws mus kev. 11 Cov neeg pom Paj Lug ua li ntawd, lawv ua lus Lis Kos Nias qw zom zaws tias : "Dab txia ua neeg nqes los rau hauv peb lawm lau!" 12 Lawv hu Npas Nas Npes ua ‘Zeus,’ hos hu Paj Lug ua ‘Hermes,’ vim Paj Lug yog tus hais lus dua. 13 Tus leej choj teev Zeus uas nyob ze ze sab nroog nraud coj ib co heev nyuj thiab tej ntshua paj tuaj txog ntawm lub rooj loog, vim tus leej choj nrog tsoom pej xeem npaj yuav txi nyuj rau nkawd. 14 Ob tug hauv paus xa lus Npas Nas Npes thiab Paj Lug hnov txog li ntawd, nkawd dua rhe nkawd cov ris tsho, thiab nkawd khiav loo tawm mus qw rau tsoom neeg tias : 15 "Cov kwv tij, nej ua dab tsi li no ? Wb kuj zoo li nej thiab xwb, wb yog tib neeg ib yam nkaus li nej xwb; wb tuaj qhia lub moo zoo rau nej kom nej tso tej dab tej mlom no pov tseg, tig los hwm tus Tswv Ntuj muaj txoj sia uas yog tus tsim lub ntuj lub teb, lub hiav txwv thiab tas txhua yam uas nyob hauv. 16 Nyob hauv cov tiam neeg dhau los, Tswv Ntuj cia cov haiv neeg nyias mus raws nyias txoj kev. 17 Tsis kav yeej muaj pov thawj txog tej yam zoo Tswv Ntuj ua rau sawv daws: nws twb tso nag poob saum ntuj los rau nej, nws ua kom muaj caij nyoog zoo ua qoob ua loo kom nej muaj noj txaus siab, thiab kom nej siab ntsws zoo puv npo." 18 Nkawd cov lus no twb txwv yuav luag tsis tau kom tsoom sid tsis txhob tua nyuj txi rau nkawd.

    NPN 115: 1-2, 3-4, 15-16

    xais: (1ab HUAB TAIS, koj txhob muab koob meej rau peb, tab sis muab rau koj lub npe.
    los: As les lus yas.

    HUAB TAIS, txhob muab koob meej rau peb,
    txhob muab rau peb, tab sis muab rau koj lub npe
    vim koj hlub neeg thiab koj yog kev tseeb.
    Vim li cas cov teev pej kum dab thiaj yuav tau kev hais tias :
    "Lawv tus Tswv Ntuj nyob qhov twg ?"

    Txais: (1ab HUAB TAIS, koj txhob muab koob meej rau peb, tab sis muab rau koj lub npe.
    los: As les lus yas.

    Peb tus Tswv Ntuj nyob txheej ntuj saud ;
    ib puas tsav yam nws xav ua, nws ua tau tas.
    Lawv cov mlom dab yog nyiaj yog kub,
    yog neeg ob txhais tes ua tawm los xwb.

    Txais: (1ab HUAB TAIS, koj txhob muab koob meej rau peb, tab sis muab rau koj lub npe.
    los: As les lus yas.

    Thov kom HUAB TAIS foom koob foom hmoov rau nej,
    nws yog tus xeeb ntuj xeeb teb.
    Lub ntuj yog HUAB TAIS lub ntuj,
    hos lub ntiaj teb, nws muab pub rau neeg.

    Txais: (1ab HUAB TAIS, koj txhob muab koob meej rau peb, tab sis muab rau koj lub npe.
    los: As les lus yas.

    As Les Lus Yas: JN 14: 26


    Txais: As les lus yas, as les lus yas.

    Leej Ntuj Plig Ntshiab yuav qhia tas ib puas tsav yam rau nej
    thiab yuav pab kom nej rov nco txog txhua yam kuv tau hais rau nej.

    Txais: As les lus yas, as les lus yas.

    Ntawv Moo Zoo: JN 14: 21-26


    Yes Xus hais rau nws cov thwj tim tias:
    21 Tus twg muaj kuv cov lus qhia, thiab coj raws li ntawd, nws thiaj yog tus nyiam kuv. Tus nyiam kuv mas kuv Txiv yuav nyiam nws, kuv kuj yuav nyiam nws thiab kuv yuav muab kuv rau nws pom." 22 Yus Das - tsis yog tus Kas Lis Yaus - hais rau nws tias : "Huab Tais, ua cas koj thiaj yuav muab koj rau peb pom xwb, tsis cia lub qab ntuj neeg pom?" 23 Yes Xus teb rau Yus Das tias : "Yog leej twg nyiam kuv, nws yuav coj rawv kuv lo lus, ces kuv Txiv yuav nyiam nws, kuv Txiv wb yuav los nyob hauv nws, wb yuav tsa tsev nyob hauv nws. 24 Tus tsis nyiam kuv, nws tsis coj raws kuv cov lus. Lo lus uas nej hnov, tsis yog kuv lo lus, yog Leej Txiv uas xa kuv tuaj lo lus. 25 Kuv hais tej no rau nej thaum kuv tseem nrog nej nyob. 26 Tus Pab nej, Leej Ntuj Plig Ntshiab, uas Leej Txiv yuav xa nws tuaj vim kuv lub npe, nws yog tus yuav qhia tas ib puas tsav yam rau nej, thiab nws yuav pab kom nej rov nco txog tas txhua yam uas kuv tau hais rau nej.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 30th April 2018, 4:35 am

    TIM      1      LUB      5      HLIS      2018

    Hnub Peb Lis Piam Tsib Caij Hla Xyoo B Nruab Lis PIam Xyoo II

    Hwm LN Yos Xes, tus Neeg Ua Hauj Lwm/St Joseph the Worker

    Zaj Nyeem Ib:       HAUJ LWM  14:   19-28


    19 Muaj ib co Yus Das tuaj As Caus Kus thiab Is Kos Nias tuaj, lawv haub ntxias tsoom pej xeem. Ces lawv xuas pob zeb txawb rau Paj Lug thiab muab nws cab mus pov rau sab tsheej nraud, lawv xav tias nws tuag lawm. 20 Tab sis cov thwj tim tuaj sawv ncig Paj Lug, ces nws rov sawv los thiab nws rov mus hauv lub tsheej. Hnub tom qab, nws nrog Npas Nas Npes sawv kev mus rau Des Npes.
    21 Thaum nkawd tshaj Ntuj lus tas nyob hauv lub tsheej Des Npes, thiab nkawd qhia tau ib pab thwj tim coob lawm, nkawd rov mus rau Lis Ros, thiab rau Is Kos Nias thiab rau As Caus Kus. 22 Nkawd pab cov thwj tim kom muaj ib lub siab ruaj nreb thiab txhawb kom lawv nyob tawv qhawv hauv txoj kev ntseeg. Nkawd qhia tias : "Peb yuav tsum raug ntau yam kev txom nyem, peb thiaj yuav tau mus hauv Tswv Ntuj lub Ceeb Tsheej." 23 Nkawd xaiv ib co txwj laus coj lawv nyob hauv txhua lub koom txoos. Lawv ua cov kab ke teev ntuj thiab yoo mov tas, ces nkawd muab cov txwj laus fij rau tus Huab Tais uas lawv tau los ntseeg txog.
    24 Ces nkawd hla Pis Xis Dias teb mus txog Pas Fis Lias teb. 25 Thaum nkawd tshaj lo lus nyob Pes Nkas tas lawm, nkawd thiaj li mus rau nram As Tas Lias. 26 Ces nkawd caij nkoj ntawm As Tas Lias mus rau As Caus Kus, uas yog lub tsheej Tswv Ntuj lub txiaj ntsim tau xaiv nkawd los mus ua txoj hauj lwm uas nkawd tau ua tiav log no. 27 Thaum nkawd los txog, nkawd hu lub Koom Txoos tas huv si tuaj, ces nkawd piav txog tas txhua yam uas Tswv Ntuj tau pab nkawd ua, rau sawv daws mloog, thiab nkawd piav tias Tswv Ntuj tau qhib qhov rooj rau cov neeg teev dab los ua neeg ntseeg lawm. 28 Ces nkawd nrog cov thwj tim nyob ib ntus ntev hauj sim.

    NPN       145:   10-11, 12-13AB, 21


    Txais: (12) Huab Tais, koj cov phooj ywg tshaj tawm txog
         koj lub ceeb tsheej muaj hwj chim ci ntsa iab.
    los: As les lus yas.

    HUAB TAIS, cia koj txhua yam hauj lwm ua koj tsaug,
    thiab cia cov uas nyiam koj cav txog koj.
    Cia lawv qhuas txog koj lub Ceeb Tsheej muaj hwj chim
    thiab piav txog koj lub hwj huam loj.

    Txais: (12) Huab Tais, koj cov phooj ywg tshaj tawm txog
         koj lub ceeb tsheej muaj hwj chim ci ntsa iab.
    los: As les lus yas.

    Cia lawv qhia rau neeg paub txog koj lub hwj huam loj
    thiab koj lub Ceeb Tsheej muaj hwj chim ci ntsa iab.
    Koj lub Ceeb Tsheej yog ib lub Ceeb Tsheej rau tas txhua tiam,
    thiab koj txoj kev tswj kav yuav nyob mus txheej dhau txheej.

    Txais: (12) Huab Tais, koj cov phooj ywg tshaj tawm txog
         koj lub ceeb tsheej muaj hwj chim ci ntsa iab.
    los: As les lus yas.

    Kom kuv lub ncauj cia li cav txog HUAB TAIS,
    kom txhua lub cev nqaij cia li foom lus zoo
    rau nws lub npe ntshiab mus ib txhiab ib txhis !

    Txais: (12) Huab Tais, koj cov phooj ywg tshaj tawm txog
         koj lub ceeb tsheej muaj hwj chim ci ntsa iab.
    los: As les lus yas.

    As Les Lus Yas:       LK  24:   46, 26

    Txais: As les lus yas, as les lus yas.

    Leej Pleev yuav tsum raug txom nyem
    thiab sawv hauv cov tub tuag rov los,
    ces nws thiaj tau mus rau hauv nws lub hwj chim.

    Txais: As les lus yas, as les lus yas.

    Ntawv Moo Zoo:       ZAM  14:   27-31A

    Yes Xus hais rau nws cov thwj tim tias:
    27 “Kuv tso txoj kev thaj yeeb rau nej, kuv muab kuv txoj kev thaj yeeb rau nej. Kuv tsis muab rau nej xws li lub qab ntuj neeg muab. Nej tsis txhob ntxhov siab, tsis txhob ntshai. 28 Nej tau hnov kuv hais rau nej tias : Kuv yuav mus, ces kuv yuav rov los cuag nej. Yog nej nyiam kuv, nej yuav zoo siab tias kuv mus cuag Leej Txiv, vim Leej Txiv loj dua kuv. 29 Kuv xub hais rau nej nyem no, cheem tseem tsis tau tshwm sim tuaj, kom thaum tej ntawd tshwm sim tuaj, nej ntseeg. 30 Kuv yuav tsis tau nrog nej tham ntau ntxiv, vim tus tswj lub qab ntuj neeg tuaj lawm. Nws tsis muaj hwj huam ua tau dab tsi rau kuv.  31 Tab sis lub qab ntuj neeg yuav tsum paub hais tias kuv nyiam Leej Txiv thiab kuv ua raws li Leej Txiv txib kom kuv ua.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 1st May 2018, 5:14 am

    TIM 2 LUB 5 HLIS 2018

    Hnub Plaub Lis Piam Tsib Caij Hla Xyoo B Nruab Lis Piam Xyoo II

    Hwm LN Athanasius

    Zaj Nyeem Ib: HAUJ LWM 15: 1-6


    1 Thaum ntawd, muaj ib co neeg tuaj Yus Das teb tuaj, lawv qhia cov kwv tij tias : "Yog nej tsis ua lub cim txiav raws li Mais Xes txoj cai, mas nej yuav txais kev cawm tsis tau." 2 Paj Lug thiab Npas Nas Npes nkawd nrog lawv sib hais sib cav muaj ceem hauj sim txog qhov ntawd, ces lawv thiaj txiav tias cia tso Paj Lug thiab Npas Nas Npes thiab lawv ob peb leeg mus pem Yes Lus Xas Les, mus cuag cov Hauv Paus Xa Lus thiab cov laus neeg, nrog lawv sab laj txog cov lus ntawd. 3 Lub Koom Txoos thiaj xa nkawd mus ces nkawd hla Fes Nis Xias thiab Xas Mas Lias teb, nkawd piav txog cov ua dab tig los txais kev ntseeg rau cov kwv tij mloog, mas sawv daws zoo siab kawg. 4 Thaum lawv tuaj txog Yes Lus Xas Les, lub Koom Txoos nrog cov Hauv Paus Xa Lus thiab cov laus neeg txais tos lawv zoo. Paj Lug thiab Npas Nas Npes nkawd piav rau sawv daws txog tej yam Tswv Ntuj tau pab nkawd ua. 5 Tab sis, muaj ib co neeg uas yog tog Fas Lis Xais los txais kev ntseeg, lawv sawv los tawm suab hais tias yuav tsum kom cov neeg teev pej kum dab txais lub cim txiav tawv thiab coj Mais Xes txoj cai thiab. 6 Cov Hauv Paus Xa Lus thiab cov laus neeg thiaj sib sau sab laj txog cov lus no.

    NPN 122: 1-2, 3-4AB, 4CD-5

    Txais: (1) Nej tuaj peb zoo siab hlo mus pem Huab Tais tsev.
    los: As les lus yas.

    Kuv zoo siab vim lawv hais rau kuv tias:.
    "Peb yuav nce mus lawm pem Huab Tais tsev.”
    Yes Lus Xas Les, nim no,
    peb txhais taw tau tsuj koj cov rooj loog lawm.

    Txais…

    Yes Lus Xas Les, luag txhim zoo li
    ib lub nroog uas zoo tau xwm yeem.
    Cov xeem neeg nce mus pem nws,
    Yog Huab Tais cov xeem neeg.

    Txais…

    Lawv mus raws li txoj cai qhia rau His Xas Lais,
    Kom tau cav txog Huab Tais lub Npe.
    Nyob ntawd muaj ib co rooj txiav txim teeb tau tseg,
    Yog cov rooj cia rau Das Vis tsev neeg.

    Txais…

    As Les Lus Yas: ZAM 15: 4A, 5B

    Txais: As les lus yas, as les lus yas.

    Huab Tais hais tias:
    Nej yuav nyob ruaj hauv kuv ib yam li kuv nyob hauv nej;
    leej twg nyob ruaj hauv kuv nws yuav txi txiv ntau.

    Txais: As les lus yas, as les lus yas.

    Ntawv Moo Zoo: ZAM 15: 1-8

    Yes Xus hais rau nws cov thwj tim tias:
    1 "Kuv yog tsob tseem hmab txiv cawv, kuv Txiv yog tus tswv cog txiv cawv. 2 Nyob hauv kuv, txoj hmab twg tsis txi txiv, kuv Txiv muab txiav pov tseg, txoj hmab twg txi txiv, kuv Txiv tav nws ntsis kom nws txi txiv ncw dua tuaj. 3 Nej lub ntsis twb raug tav lawm, vim lo lus kuv tau hais rau nej. 4 Nej yuav nyob ruaj hauv kuv, ib yam li kuv nyob hauv nej. Tus ceg twg tsis txuas rau txoj hmab, mas nws txi tsis taus txiv nws tus kheej; nej kuj ib yam, yog nej tsis nyob ruaj hauv kuv, mas nej txi tsis taus txiv. 5 Kuv yog tsob hmab txiv cawv, nej yog cov ceg. Tus uas nyob ruaj hauv kuv thiab kuv nyob hauv nws, mas nws txi txiv ncw; vim tias yog tsis muaj kuv mas nej ua tsis tau dab tsi li. 6 Yog leej twg tsis nyob hauv kuv, luag yuav muab nws pov tseg rau sab nraud xws li tus ceg khaub, nws yuav qhuav. Luag yuav sau cov ceg qhuav mus pov rau hauv hluav taws kom kub hnyiab tas. 7 Yog nej nyob ruaj hauv kuv, thiab kuv cov lus nyob ruaj hauv nej, mas nej xav tau dab tsi, nej thov ces nej yuav tau raws li nej thov. 8 Qhov yuav ua kom kuv Txiv tau koob meej, mas yog kom nej txi txiv ntau thiab nej lua kuv thwj tim.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 2nd May 2018, 4:21 am

    TIM 3 LUB 5 HLIS 2018

    Hnub Tsib Lis Piam Tsib Caij Hla Xyoo B Nruab Lis PIam Xyoo II

    Hwm LN Fis Lis Pos thiab LN Yas Kos, ob tug Hauv Pais Xa Lus

    Zaj Nyeem Ib: 1 KLN 15: 1-8


    1 Cov kwv tij, kuv tshaj lub Moo Zoo rau nej uas kuv twb tau tshaj dua rau nej lawm; nej tau txais, thiab nej yeej nyob ruaj nreb hauv lub Moo Zoo ntawd. 2 Nej yuav txais kev cawm vim lub moo zoo ntawd, yog tias nej ntseeg raws nraim li kuv tau qhia rau nej, thiab nej tsis yog lam ntseeg dag xwb. 3 Qhov tseem ceeb kuv tau xub qhia rau nej ua ntej tas nrho, kuj yog qhov kuv tus kheej tau txais thiab: Yog qhov tias Leej Pleev tuag vim peb cov txhaum, raws li Ntawv Ntshiab tau hais tseg; 4 yog qhov tias lawv muab nws mus zwm ntxa, thiab hnub peb, nws sawv rov qab los, raws li Ntawv xub hais tseg; 5 yog qhov tias nws yees tawm los rau Pob Zeb pom, thiab rau pab kaum ob pom. 6 Tom qab ntawd, nws tseem yees tawm los rau cov kwv tij muaj tsib puas leej ib txhij pom; lawv cov coob tseem ua neej nyob tiam sis muaj qee leej twb ncaim mus lawm. 7 Nws kuj tseem tawm los rau Yas Kos pom, thiab rau tas cov Hauv Paus Xa Lus huv tib si pom. 8 Puag tom qab no, nws kuj yees tawm tuaj rau kuv pom thiab, txawm tias kuv zoo li ib tug me nyuam yug los tsis yog caij yog nyoog.

    NPN 19: 2-3, 4-5


    Txais: (5) Lawv lo lus xa moo nrov mus thoob ntiaj teb.
    los: As les lus yas.

    Cov txheej ntuj saud piav txog Tswv Ntuj lub koob meej,
    lub qab ntuj khwb tshaj cov hauj lwm nws txhais tes tsim los.
    Nruab hnub hais lo lus rau nruab hnub mloog,
    Hmo ntuj qhia rau hmo ntuj paub txog.

    Txais: (5) Lawv lo lus xa moo nrov mus thoob ntiaj teb.
    los: As les lus yas.

    Tsis muaj ib lo lus los ib zaj lus piav
    Uas leej tib neeg yuav tsis hnov txog.
    Lawv lub suab ncha puv tas ntiaj teb,
    lawv lo lus xa moo nrov txog
    tim npoo ntiaj teb kawg.

    Txais: (5) Lawv lo lus xa moo nrov mus thoob ntiaj teb.
    los: As les lus yas.

    As Les Lus Yas: ZAM 14: 6B, 9C

    Txais: As les lus yas, as les lus yas.

    Huab Tais hais tias:
    “Kuv yog Txoj Kev, yog Qhov Tseeb, thiab yog Txoj Sia;
    Fis Lis Pos, leej twg tau pom kuv ces yog pom Leej Txiv lawm.”

    Txais: As les lus yas, as les lus yas.

    Ntawv Moo Zoo: ZAM 14: 6-14

    6 Yes Xus hais rau Tos Mas tias : "Kuv yog Txoj Kev, yog Qhov Tseeb, thiab yog Txoj Sia. Tsis muaj leej twg mus cuag Leej Txiv tau, yog nws tsis mus ntawm kuv mus. 7 Yog nej paub kuv, mas nej kuj paub kuv Txiv thiab. Nyem no, nej twb paub nws thiab twb pom nws lawm." 8 Fis Lis Pos hais rau Yes Xus tias : "Huab Tais, koj pub peb pom Leej Txiv, ces peb yuav txaus siab." 9 Yes Xus hais rau Fis Lis Pos tias : "Fis Lis Pos, kuv nrog nej nyob ntev npaum no, koj tseem tsis paub kuv thiab lod ? Tus twg pom kuv, mas yog nws pom Leej Txiv. Ua cas koj thiaj hais tau tias : 'Koj pub peb pom Leej Txiv' ? 10 Koj tsis ntseeg tias kuv nyob hauv Leej Txiv, thiab Leej Txiv nyob hauv kuv lod ? Cov lus uas kuv hais rau nej, tsis yog kuv hais kuv; yog Leej Txiv uas nyob txawm hauv kuv nws ua nws cov hauj lwm. 11 Nej ntseeg kuv mog tias kuv nyob hauv Leej Txiv, thiab Leej Txiv nyob hauv kuv; txawm nej tsis ntseeg los nej yuav tsum ntseeg vim cov hauj lwm.
    12 "Kuv hais qhov muaj tseeb tiag rau nej : Tus ntseeg txog kuv, nws kuj yuav ua cov hauj lwm kuv ua, thiab nws tseem yuav ua tej yam loj dua, vim kuv mus cuag Leej Txiv. 13 Yam twg nej tuav txog kuv lub npe thov, mas kuv yuav yam ntawd, kom xwv Leej Txiv muaj koob meej nyob hauv Leej Tub. 14 Yog nej tuav txog kuv lub npe thov ib yam dab tsi, mas kuv yuav ua yam ntawd."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 3rd May 2018, 5:19 pm

    TIM      4      LUB      5       HLIS      2018

    Thawj Hnub Rau Lis Piam Tsib Caij Hla Xyoo B Nruab Lis Piam Xyoo II

    Zaj Nyeem Ib:       HAUJ LWM  15:   22-31


    22 Ces cov Hauv Paus Xa Lus thiab cov txwj laus nrog lub Koom Txoos tas nrho pom zoo cia lawv xaiv ib co sawv cev ntawm lawv xa nrog Paj Lug thiab Npas Nas Npes nkawd mus As Caus Kus. Lawv xaiv Yus Das uas tseem hu ua Npas Xas Npas thiab Xis Las, nkawd yog ob tug ua thawj coj nyob hauv cov kwv tij. 23 Lawv sau ib tsab ntawv li no: "Cov Hauv Paus Xa Lus thiab cov txwj laus, nej cov kwv tij, xa lus tuaj rau cov kwv tij nyob As Caus Kus, nyob Xis Lias teb, thiab nyob Xis Lis Xias teb, uas nej yog cov teev pej kum dab tig los ntseeg. Noj qab nyob zoo rau nej sawv daws. 24 Peb tau hnov tias muaj ib co neeg nyob hauv peb tau tuaj , tiam sis tsis yog peb xa lawv tuaj. Lawv tuaj hais ib co lus ua kom nej ntxhov siab thiab ua kom nej lub tswv yim tws kev. 25 Peb thiaj ua ke pom zoo txiav tias cia peb xaiv ib co sawv peb chaw tuaj cuag nej nrog ob tug kwv tij Npas Nas Npes thiab Paj Lug nkawd, 26 uas yog ob tug neeg zoo siab siv nkawd txoj sia los tsob hwb peb tus Huab Tais Yes Xus Pleev lub Npe. 27 Peb tso Yus Das thiab Xis Las nkawd tuaj, kom nkawd tuaj hais kiag peb cov lus rau nej. 28 Leej Ntuj Plig Ntshiab thiab peb tau txiav tias yuav tsis yuam ib lub nra ntxiv rau nej ris, tsuas kom nej coj tej yam tseem ceeb raws li no xwb : 29 caiv cov nqaij txi dab, caiv ntshav, caiv cov nqaij tsiaj nyem caj dab tuag, caiv kev sib yuav tsis raws txoj cai. Yog nej caiv tsis ua tej no ces nej ua tau qhov zoo lawm. Nej nyob kaj lug." 30 Nkawd ob leeg thiaj tau sawv kev mus; thaum mus txog As Caus Kus, nkawd hu sawv daws tuaj, ces nkawd muab tsab ntawv rau lawv. 31 Lawv muab tsab ntawv nyeem rau cov neeg  ces lawv zoo siab tias cov lus nyob hauv txhawb lawv ntau.

    NPN       57:   8-9, 10-12

    Txais: (10a) Kuv yuav nrog tsoom haiv neeg cav txog koj, Huab Tais.
    los: As les lus yas.

    Kuv lub siab nyob ruaj nreb, Tswv Ntuj, kuv lub siab nyob ruaj nreb.
    Kuv yuav hu nkauj, kuv yuav hu ib zaj cav txog koj.
    Kuv tus ntsuj plig, koj tsim dheev los;
    nkauj nog ncas thiab thaj cheej, nej cia li tsim dheev!
    Kuv yuav tsa kom lub hnub sawv tawm tuaj.

    Txais: (10a) Kuv yuav nrog tsoom haiv neeg cav txog koj, Huab Tais.
    los: As les lus yas.

    Kuv yuav nrog tsoom haiv neeg cav txog koj, Huab Tais,
    kuv yuav nrog tsoom kuj cuab hu nkauj qhuas txog koj.
    Vim koj txoj kev hlub loj siab npaum lub ntuj,
    thiab koj txoj kev ua ncaj loj siab npaum cov huab.
    Tswv Ntuj, koj ua kom koj nto koob meej nyob txheej ntuj saud,
    thiab ua kom koj lub hwj chim ci tuaj rau saum tas lub ntiaj teb!

    Txais: (10a) Kuv yuav nrog tsoom haiv neeg cav txog koj, Huab Tais.
    los: As les lus yas.

    As Les Lus Yas:       ZAM  15:   15

    Txais: As les lus yas, as les lus yas.

    Huab Tais hais tias:  Kuv hu nej ua kuv cov phooj ywg,
    vim kuv tau qhia rau nej paub tas puas tsav yam
    uas leej Txiv hais rau kuv lawm.

    Txais: As les lus yas, as les lus yas.

    Ntawv Moo Zoo:       ZAM  15:   12-17

    Yes Xus hais rau nws cov thwj tim tias:
    12 Kuv lo lus qhia yog lo lus no : nej yuav sis nyiam sis hlub zoo li kuv tau nyiam tau hlub nej. 13 Tsis muaj leej twg yuav muaj txoj kev hlub loj dua tus uas siv nws txoj sia rau nws cov phooj ywg. 14 Yog nej ua qhov kuv qhia nej, mas nej yog kuv cov phooj ywg. 15 Kuv tsis hu nej ua kuv cov tub txib, vim tus tub txib tsis paub qhov uas tus tswv ua. Tab sis kuv hu nej ua phooj ywg, vim tas ib puas tsav yam kuv hnov ntawm kuv Txiv, mas kuv qhia nej paub tas huv si. 16 Tsis yog nej xaiv kuv, yog kuv xaiv nej. Thiab yog kuv xa nej mus kom nej txi txiv, kom nej cov txiv nyob ruaj, kom xwv nej tuav txog kuv lub npe thov yam twg ntawm Leej Txiv, mas nws muab rau nej. 17 Lo lus qhia uas kuv muab rau nej yog: Nej yuav sis nyiam sis hlub."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 4th May 2018, 4:03 am

    TIM 5 LUB 5 HLIS 2018

    Thawj Hnub Xya Lis Piam Tsib Caij Hla Xyoo B Nruab Lis Piam Xyoo II

    Zaj Nyeem Ib: HAUJ LWM 16: 1-10


    1 Paj Lug thiaj mus txog Des Npes, thiab Lis Ros. Nyob ntawd muaj ib tug thwj tim hu ua Tis Mos Tes. Nws niam yog ib tug poj niam Yus Das los txais kev ntseeg, tiam sis nws txiv yog ib tug Hes Las. 2 Cov kwv tij nyob Lis Ros thiab nyob Is Kos Nias hais lus pov thawj zoo txog nws. 3 Paj Lug xav coj Tis Mos Tes nrog nws mus tshaj Ntuj lus, ces nws muab Tis Mos Tes ua lub cim txiav, vim muaj ib co Yus Das coob nyob thaj tsam ntawd, thiab sawv daws paub tias nws txiv yog neeg Hes Las. 4 Paj Lug lawv mus hla lub nroog twg, mas lawv tshaj txoj cai uas cov Hauv Paus Xa Lus thiab cov txwj laus nyob Yes Lus Xas Les tau txiav, rau cov Ntseeg kom lawv coj txoj cai ntawd. 5 Ua li mas cov Koom Txoos khov zuj zus nyob hauv txoj kev ntseeg, thiab niaj hnub huam vam coob ntxiv tuaj.
    6 Paj Lug lawv hla lub teb chaws Fis Zias thiab xeev ntuj Nkas Las Tias mus, vim Leej Ntuj Plig tsis kheev lawv tshaj ntuj Lo Lus nyob As Xias teb. 7 Thaum lawv tuaj txog ntawm Mis Xias teb, lawv xav mus rau Npis Tis Nias teb, tab sis Yes Xus Leej Tswv Yim tsis kheev. 8 Ces lawv hla Mis Xias teb nqes mus rau nram lub tsheej Thuas. 9 Thaum hmo ntuj, Paj Lug yees pom ib tug neeg Mas Xes Dos Nias sawv ntsug ntawm nws xub ntiag thov nws tias : "Koj hla tuaj rau Mas Xes Dos Nias teb, tuaj pab peb !" 10 Paj Lug pom li ntawd tas, ces peb nrhiav kev mus Mas Xes Dos Nias teb tam sim ntawd, vim peb pom tias yog Tswv Ntuj hu peb mus tshaj Ntuj lus rau cov neeg ntawd.

    NPN 100: 1B-2, 3, 5

    Txais: Kom tas lub ntiaj teb qw zoo siab rau Tswv Ntuj.
    los: As les lus yas.

    Tas txhua daim av, nej hu nkauj rau HUAB TAIS !
    Nej xyiv fab hlo luag ntxhi tsob hwb HUAB TAIS ;
    nej hu nkauj zoo siab chaws los ntawm nws xub ntiag !


    Txais: Kom tas lub ntiaj teb qw zoo siab rau Tswv Ntuj.
    los: As les lus yas.

    Nej cia li lees tias HUAB TAIS yog Tswv Ntuj.
    Nws tsim peb los, peb yog nws tug,
    peb yog nws haiv neeg, yog pab yaj nws saib.

    Txais: Kom tas lub ntiaj teb qw zoo siab rau Tswv Ntuj.
    los: As les lus yas.

    HUAB TAIS muaj lub siab zoo :
    nws hlub peb mus li,
    nws ua ncaj rau peb txheej dhau txheej.

    Txais: Kom tas lub ntiaj teb qw zoo siab rau Tswv Ntuj.
    los: As les lus yas.

    As Les Lus Yas: KLX 3: 1

    Txais: As les lus yas, as les lus yas.

    Yog nej twb tau nrog Leej Pleev sawv rov los lawm,
    mas nej cia li nrhiav tej yam nyob txheej saud,
    uas yog qhov chaw Leej Pleev
    zaum rawv ntawm Tswv Ntuj phab xis.

    Txais: As les lus yas, as les lus yas.

    Ntawv moo Zoo: Zam 15: 18-21

    Yes Xus hais rau nws cov thwj tim tias:
    18 "Yog lub qab ntuj neeg ntxub nej, mas nej yuav nco tias lawv twb xub ntxub kuv ua ntej lawm. 19 Yog nej yog lub qab ntuj neeg tug, mas qab ntuj neeg yuav nyiam yam uas yog nws tug. Tab sis vim nej tsis yog qab ntuj neeg tug, rau qhov kuv tau xaiv nej thau nej hauv lub qab ntuj neeg los mas lub qab ntuj neeg ntxub nej. 20 Nej nco ntsoov lo lus uas kuv tau hais rau nej tias : ‘Tus tub txib tsis loj dua nws tus tswv.’ Yog lawv twb hiam kuv, mas lawv kuj yuav hiam nej thiab. Yog lawv khaws kuv lo lus, mas lawv kuj yuav khaws nej lo lus thiab. 21 Tiam sis lawv yuav ua tas puas tsav yam ntawd rau nej vim kuv lub npe, rau qhov lawv tsis paub Tus xa kuv tuaj.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 6th May 2018, 5:46 pm

    TIM 7 LUB 5 HLIS 2018

    Hnub Ob Lis Piam Rau Caij Hla Xyoo B Nruab Lis Piam Xyoo II

    Zaj Nyeem Ib: HAUJ LWM 16: 11-15


    11 Peb caij nkoj nyob Thuas ncaj qha mus rau Xas Mos Thas. Hnub tom qab peb mus rau Nias Pos Lis. 12 Txog ntawd, peb mus ntxiv rau Fis Lis Pos uas yog thawj lub tsheej nyob hauv lub cheeb Mas Xes Dos Nias, uas yog ib lub xeev cov Los Mas kav. Peb nyob ob peb hnub hauv lub nroog ntawd. 13 Txog hnub xav npas tos, peb tawm mus rau sab rooj vag nraud, nyob ntawm ib tug ntug dej, uas peb xav tias yuav muaj ib qho chaw rau neeg tuaj teev ntuj. Peb zaum, thiab peb hais lus rau cov poj niam tuaj sib sau nyob ntawd. 14 Hauv pab poj niam ntawd muaj ib tug hu ua Lis Dias, nws yog ib tug neeg muag hom tshuaj zas ntaub liab tsam xem nyob Thias Tis Las tuaj, nws thiaj mloog peb. Nws yog neeg teev Tswv Ntuj ces Huab Tais qhib nws lub siab kom nyiam txais tej yam uas Paj Lug hais. 15 Thaum Lis Dias thiab nws tsev neeg txais lub cim ntxuav tas, nws thov peb li no: "Yog nej saib kuv yog ib tug neeg ntseeg txog Huab Tais zoo, mas thov nej chaws los so nyob hauv kuv tsev." Ces peb thiaj yuav tsum tau ua raws li nws hais.

    NPN 149: 1-2, 3-4, 5-6A+9B

    Txais: (4a) Huab Tais zoo siab nyob hauv nws haiv neeg.
    los: As les lus yas

    Nej hu ib zaj nkauj tshiab rau HUAB TAIS,
    nej cav txog nws nyob hauv tsoom ntseeg lub txoos.
    His Xas Lais yuav zoo siab nyob hauv tus uas tsim lawv,
    Xis Yoos cov me nyuam yuav luag ntxhi nyob hauv lawv tus vaj.

    Txais: (4a) Huab Tais zoo siab nyob hauv nws haiv neeg.
    los: As les lus yas

    Lawv yuav ua kev lom zem yoj cev cav txog nws lub npe,
    lawv yauv hu nkauj cav txog nws nrog suab nruas thiab suab nkauj nog ncas.
    Vim HUAB TAIS hlub nws haiv neeg,
    thiab nws muab txoj kev yeej ua zam npua cov neeg me.

    Txais: (4a) Huab Tais zoo siab nyob hauv nws haiv neeg.
    los: As les lus yas

    Cov muaj lub siab ntseeg hom khaj nyob hauv txoj kev nto koob meej;
    lawv yuav hu nkauj zoo siab hauv lawv tej chaw nyob;
    lawv lub qa tsuas muaj qw suab cav txog Tswv Ntuj.
    Txhua tus uas ntseeg nws muaj lub koob meej zoo li no. As les lus yas.

    Txais: (4a) Huab Tais zoo siab nyob hauv nws haiv neeg.
    los: As les lus yas

    As Les Lus Yas: ZAM 15: 26B, 27A

    Txais: As les lus yas, as les lus yas.

    Huab Tais hais tias:
    Leej Tswv Yim muaj qhov tseeb yuav ua tim khawv txog kuv,
    thiab nej kuj yuav ua tim khawv txog kuv ib yam.

    Txais: As les lus yas, as les lus yas.

    Ntawv Moo Zoo: ZAM 15: 26—16:4A

    Yes Xus hais rau nws cov thwj tim tias:
    26 Thaum tus Pab Nej yuav tuaj, uas yog tus kuv yuav xa ntawm Leej Txiv tuaj rau nej, nws yog Leej Ntuj Plig qhia qhov tseeb uas tawm hauv Leej Txiv los, nws yuav ua tim khawv txog kuv. 27 Nej kuj yuav ua tim khawv thiab, vim nej nrog kuv txij thaum lub hauv paus los.
    16 1 "Kuv xub hais tej no rau nej kom nej txhob ntog. 2 Luag yuav ntiab nej tawm hauv cov tsev txoos mus. Yuav muaj ib lub caij uas txhua tus muab nej tua yuav xav tias nws ua ib qho los hawm Tswv Ntuj. 3 Lawv ua li ntawd vim lawv tsis paub Leej Txiv thiab tsis paub kuv. 4 Kuv hais tej no rau nej, kom thaum txog lub sij hawm ntawd, nej nco txog tias kuv twb xub hais qhia rau nej lawm.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 7th May 2018, 3:12 am

    TIM 8 LUB 5 HLIS 2018

    Hnub Peb Lis Piam Rau Caij Hla Xyoo B Nruab Lis Piam Xyoo II

    Zaj Nyeem Ib: HL 16: 22-34


    22 Tas tsoom sid nyob Fis Lis Pos koom ua phem rau Paj Lug thiab Xis Las nkawd. Cov nom tswv kom lawv muab nkawd tej khaub ncaws hle, thiab muab pas nplawm nkawd. 23 Lawv muab nkawd nplawm ntau nplawg sab kawg, ces lawv muab nkawd pov rau hauv tsev loj faj. Lawv ceeb toom rau tus zov tsev loj faj kom yuav tsum zov nkawd zoo zoo. 24 Tus zov tsev loj faj hnov lawv hais li ntawd, mas nws coj nkawd mus kaw hauv lub qhov taub uas nyob hauv nruab nrog tsev loj faj, thiab tseem xuas saw khi nkawd ko taw tib si rau ntawm cov ncej.
    25 Thaum ib tag hmo, Paj Lug thiab Xis Las nkawd teev ntuj hu nkauj cav txog Tswv Ntuj, cov neeg nyob txim mloog nkawd. 26 Ib sij huam txawm muaj ib qho av qeeg loj, ua rau lub tsev loj faj tej phab ntsa ua zog koog, tas cov qhov rooj cia li qhib plho tam sim ntawd, hos cov saw khi cov neeg raug txim plam tas huv tib si. 27 Tus zov tsev loj faj tsim dheev los, nws pom cov qhov rooj qhib lug, ces nws rho hlo nws rab ntaj, nws yuav rov tua nws, vim nws xav tias cov neeg raug txim twb khiav dim tas lawm. 28 Tab sis Paj Lug qw ib suab nrov nrov tias : "Koj txhob ua dab tsi rau koj tus kheej, peb sawv daws tseem nyob ntawm no tas huv tib si." 29 Tus zov tsev loj faj thiaj kom taws teeb, ces nws maj nroos nkag los, nws los txhos caug tshee na ntawm Paj Lug thiab Xis Las nkawd ko taw, 30 nws coj nkawd tawm sab nraud, nws hais rau nkawd tias : "Ob tug hlob, kuv yuav ua dab tsi kuv thiaj yuav txais kev cawm?" 31 Nkawd teb tias : "Koj ntseeg txog Huab Tais Yes Xus, ces koj thiab koj tsev neeg yuav txais kev cawm." 32 Ces nkawd qhia Huab Tais Lo Lus rau nws, thiab rau cov neeg hauv nws tsev tas huv tib si. 33 Thaum ib tag hmo ntawd, tus zov tsev loj faj coj nkawd los ntxuav nkawd cov qhov txhab, ces nws thiab tas nws tsev neeg huv si txais lub cim ntxuav tam sim ntawd. 34 Nws coj nkawd nce mus saum nws tsev, nws rau mov rau sawv daws noj. Nws thiab tas nws tsev neeg huv si zoo siab, vim lawv tau ntseeg txog Tswv Ntuj lawm.

    NPN 138: 1-2AB, 2CDE-3, 7C-8

    Txais: (7c) Huab Tais, koj sab tes xis cawm kuv.
    Los: As les lus yas.

    Kuv yuav ua koj tsaug, HUAB TAIS, tas kuv lub siab ntsws,
    vim koj tau hnov kuv lub ncauj cov lus thov;
    kuv yuav hu nkauj cav txog koj nyob ntawm cov tshiab xub ntiag;
    kuv yuav tuaj pe hawm koj nyob hauv koj lub tuam tsev ntshiab
    thiab yuav ua tsaug rau koj lub npe.

    Txais: (7c) Huab Tais, koj sab tes xis cawm kuv.
    Los: As les lus yas.

    Vim koj lub siab zoo thiab koj txoj kev tseeb,
    koj tau muab koj lub npe thiab koj txoj kev cog lus
    ua qhov loj tshaj tas txhua yam.
    Thaum kuv hu, koj tau teb kuv,
    koj ntxiv zog rau kuv kom kuv lub zog loj tuaj.

    Txais: (7c) Huab Tais, koj sab tes xis cawm kuv.
    Los: As les lus yas.

    Koj txhais tes xis cawm kuv.
    HUAB TAIS yuav ua kom tiav tej yam nws npaj ua rau kuv. ;
    HUAB TAIS, koj lub siab zoo nyob mus li;
    thov txhob muab yam koj txhais tes tau tsim los tso tseg.

    Txais: (7c) Huab Tais, koj sab tes xis cawm kuv.
    Los: As les lus yas.

    As Les Lus yas: ZAM 16: 7, 13

    Txais: As les lus yas, as les lus yas.

    Huab Tais hais tias:
    Kuv yuav xa Leej Tswv yim qhia qhov tseeb tuaj rau nej,
    nws yuav coj nej mus txog txhua yam tseeb.

    Txais: As les lus yas, as les lus yas.

    Ntawv Moo Zoo: ZAM 16: 5-11

    Yes Xus hais rau nws cov thwj tim tias:
    5 “Nyem no kuv yuav mus cuag Tus Xa kuv tuaj. Nej tsis muaj leej twg nug kuv tias: ‘Koj yuav mus qhov twg?’ 6 Vim kuv hais tej no rau nej, ces nej tu siab tas. 7 Tab sis kuv hais qhov tseeb rau nej tias: Cia kuv mus mas yuav zoo dua rau nej. Yog kuv tsis mus, mas Leej Nplij Neeg yuav tsis tuaj nyob hauv nej. Hos yog kuv mus, mas kuv yuav xa Leej Nplij Neeg tuaj rau nej. 8 Thaum Leej Nplij Neeg tuaj txog, nws yuav txiav txim rau qab ntuj neeg txog kev txhaum, txog kev ncaj, thiab txog kev raug txim. 9 Kev txhaum, vim lawv tsis ntseeg txog kuv, 10 kev ncaj, vim kuv mus cuag Leej Txiv, ces nej yuav tsis pom kuv ntxiv, 11 kev raug txim, vim tus tswj lub qab ntuj neeg twb raug txim lawm.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 8th May 2018, 1:22 pm

    TIM 9 LUB 5 HLIS 2018

    Hnub Plaub Lis Piam Rau Caij Hla Xyoo B Nruab Lis Piam Xyoo II

    Zaj Nyeem Ib: HAUJ LWM 17: 15, 22—18:1


    15 Cov neeg uas xa Paj Lug, xa nws mus txog ntua As Thes Nas, ces lawv rov qab. Lawv coj Paj Lug cov lus rov los rau Xis Las thiab Tis Mos Tes kom nkawd mus caum Paj Lug sai sai.
    22 Ces Paj Lug mus sawv ntsug ntawm cov txwj laus As Les Os Pas Nkus, nws hais tias : "Cov neeg As Thes Nas, raws li kuv pom mas nej yog ib co neeg muaj kev teev hawm zoo kawg nkaus. 23 Kuv tau mus yos ncig thiab mus xyuas nej cov tsev teev hawm, mas kuv pom muaj ib lub thaj uas sau ib co npe ntawv tias : ‘Rau tus Tswv Ntuj peb tsis paub.’ Tus uas nej hawm, tab sis nej tsis paub ntawd mas kuv tuaj tshaj txog nws rau nej paub. 24 Tus Tswv Ntuj tsim lub sim ceeb thiab tsim tas ib puas tsav yam nyob hauv lub sim ceeb yog tus Huab Tais kav lub ntuj lub teb, nws tsis nyob hauv cov tsev teev hawm uas yog neeg ob txhais tes txhim. 25 Nws kuj tsis tas yuav yuav neeg ob txhais tes los tsob hwb nws, xws li ib tug uas xav tau yam ub yam no, vim nws twb yog tus uas pub txoj sia txoj pa thiab txhua yam rau sawv daws lawm. 26 Nws tsim tas tsoom tib neeg tawm ntawm ib tug xwb los nyob puv ntiaj teb, thiab nws teem cov caij nyoog thia cais cov ciam teb ciam av rau tib neeg nyob , 27 kom lawv nrhiav Tswv Ntuj, tej zaud lawv yuav tsum tau maj mam maub xuas nrhiav thiaj ntsib nws, txawm tias nws yeej nyob tsis deb ntawm peb ib tug twg li. 28 Vim peb ‘muaj txoj sia, peb txawj ua zog, thiab ciaj taus ib tug tib neeg yog nyob hauv nws.’ Nej twb muaj ib co neeg txawj sau lus paj huam tseg tias : ‘Peb kuj yog nws caj ces thiab.’ 29 Li ntawd, peb yog Tswv Ntuj caj ces, mas peb yuav tsis txhob xav tias Tswv Ntuj yog zoo li ib tug mlom kub, mlom nyiaj, los mlom pob zeb uas neeg lub tswv yim thiab txhais tes txua tau. 30 Tswv Ntuj tau ua siab ntev nyiaj lub caij uas tib neeg tsis paub nws yav tas los lawd, tiam sis nyem no, nws xav kom ib zeej tsoom nyob tas qhov txhia chaw sawv daws yuav tsum los thov txhaum. 31 Vim Tswv Ntuj twb tau teem ib hnub cia txiav txim rau lub qab ntuj neeg raws li txoj kev ncaj lawm, thiab nws twb xaiv tau tus yuav txiav txim ntawd lawm; nws tau tsa tus ntawd sawv hauv cov tub tuag rov los, kom sawv daws paub tias yuav muaj tseeb li ntawd tiag." 32 Thaum Paj Lug hais txog kev sawv hauv cov tub tuag rov los, mas ib txhia pib thuam Paj Lug, hos ib txhia hais rau Paj Lug tias : "Lwm zaus tso, peb mam rov mloog koj hais txog qhov ntawd dua."
    33 Ces Paj Lug tso lawv tseg li ntawd. 34 Tsis kav, kuj muaj tus puav los raws Paj Lug thiab txais kev ntseeg. Cov txais kev ntseeg muaj ib tug yog Dis Yos Nis Xus, uas nws yog ib tug kev txwj laus As Les Os Pas Nkus; kuj muaj ib tug poj niam hu ua Das Mas Lis thiab ob peb leeg ntxiv .
    18 1 Ua li ntawd tas, Paj Lug tawm hauv As Thes Nas mus, ces nws mus txog rau Kos Lis Nthos.

    NPN 148: 1-2, 11-12, 13, 14

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    Nej nyob saum ntuj cav txog Huab Tais,
    nej nyob saum tej chaw siab cav txog nws.
    Nws cov tshiab, nej cav txog nws,
    nws cov peeb zeej, nej cav txog nws.

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    Kom tas cov vaj nyob ntiaj teb thiab tas txhua haiv neeg,
    tas cov tub nom tub tsw thiab cov nom txiav txim nyob ntiaj teb,
    cov tub nraug hluas thiab ntxhais nkauj xwb,
    cov neeg laus thiab cov me nyuam yaus,

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    Kom lawv cia li cav txog Huab Tais lub npe ,
    vim nws tib lub npe thiaj loj siab dua cov;
    nws lub hwj xyeej nyob siab tshaj lub ntiaj teb thiab lub ntuj.

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    Nws tsa nws haiv neeg lub ntsej muag kom siab :
    Vim li no kom sawv daws yuav tsum cav txog nws,
    Tsis hais cov ntseeg txog nws los cov tub ki His Xas Lais
    uas yog haiv neeg nyob ze nws,.

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    As Les Lus Yas: ZAM 14: 16

    Txais: As les lus yas, as les lus yas.

    Kuv yuav thov Leej Txiv,
    ces nws yuav xa dua ib tug Nplij Neeg
    los nrog nej nyob mus li.

    Txais: As les lus yas, as les lus yas.

    Ntawv Moo Zoo: ZAM 16: 12-15


    Yes Xus hais rau nws cov thwj tim tias:
    “12 Kuv tseem tshuav ntau yam yuav hais rau nej, tab sis nyem no nej ris tsis taus. 13 Thaum Leej Tswv Yim qhia qhov tseeb tuaj txog, nws yuav coj nej mus rau qhov tseeb tas huv si. Vim nws yuav tsis hais nws cov lus, nws yuav hais qhov nws hnov, thiab nws yuav xub qhia nej txog tej xwm uas yuav tshwm sim tuaj. 14 Nws yuav ua kom kuv muaj koob meej, vim nws yuav coj yam uas yog kuv tug tuaj qhia rau nej. 15 Tas ib puas tsav yam uas yog Leej Txiv tug, mas kuj yog kuv tug huv tib si. Vim li ntawd kuv thiaj hais rau nej tias : Leej Tswv Yim yuav coj yam uas yog kuv tug tuaj qhia rau nej.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 9th May 2018, 4:45 pm

    TIM      10      LUB      5     HLIS      2018

    HNUB TSIB LIS PIAM RAU CAIJ HLA XYOO B Nruab Lis Piam Xyoo II


    Hnub Tsib no kev cai yog ua hmoov nco txog Yes Xus nce mus saum ntuj, tiam sis nyob ntau qhov chaw lub Koom Txoos muab Hnub Yes Xus nce mus saum ntuj pauv mus rau Hnub Chiv tom ntej lawm. Vim li ntawd thiaj muab ob co zaj nyeem tib si los tso rau ntawm no.
    Yog nej lub teb chaws los nej lub tsev teev ntuj ua hmoov nco txog Yes Xus mus saum ntuj rau hnub no, ces nej mus xaiv cov zaj nyeem hais txog Yes Xus mus saum ntuj, yog nej teb chaws los lub tsev teev ntuj tsis ua hmoov Yes Xus mus saum ntuj hnub no, ces nej mus xaiv cov zaj nyeem rau Hnub Tsib Lis Piam Rau Caij Hla hauv qab no.


    NCO TXOG YES XUS NCE MUS SAUM NTUJ

    Zaj Nyeem Ib:       HAUJ LWM  1:   1-11


    1 Tes Os Fis Los aw, nyob hauv kuv thawj phau ntawv, kuv twb sau txog tas ib puas tsav yam uas Yes Xus tau ua thiab tau qhia txij thaum lub hauv paus los
    2 mus txog hnub uas Leej Ntuj Plig Ntshiab tau kom nws hais nws cov lus kawg rau cov Hauv Paus Xa Lus uas nws tau xaiv, ces nws raug nqa mus saum ntuj lawm.
    3 Lawv yog cov uas, muaj ntau yam zeem tseeb tias thaum nws tau nyiaj kev txom nyem tas lawd, nws yees tawm los muaj txoj sia rau lawv pom; nws tawm los rau lawv pom tau plaub caug hnub, nws tham txog Tswv Ntuj lub Ceeb Tsheej rau lawv.
    4 Muaj ib zaug thaum lawv noj mov, nws hais rau lawv kom tsis txhob tawm hauv Yes Lus Xas Les mus, “Nej nyob tos qhov uas Leej Txiv tau cog lus yuav xa tuaj tso, uas yog lo lus nej tau hnov ntawm kuv lub ncauj tias:
    5 Zam ua kab ke ntxuav nyob hauv dej, hos nej, mas tshuav hnub puav ntxiv xwb, nej yuav txais kab ke ntxuav nyob hauv Leej Ntuj Plig Ntshiab.”
    6 Thaum cov Hauv Paus Xa Lus nyob ua ke, lawv nug Yes Xus tias : "Huab Tais, nyem no puas yog lub sij hawm koj yuav rov tsa tus vaj His Xas Lais ?"
    7 Yes Xus hais rau lawv tias : "Tsis yog nej hauj lwm yuav paub txog cov caij nyoog los lub sij hawm uas Leej Txiv tau teem cia raws nws tus kheej tau txiav lawm.
    8 Tab sis nej, mas nej yuav txais ib lub peev xwm los ntawm Leej Tswv Yim Ntshiab los rau saum nej, ces nej yuav ua kuv cov tim khawv nyob Yes Lus Xas Les, nyob thoob lub xeev Yus Das thiab Xas Mas Lias, mus txog puag tim npoo ntiaj teb kawg."
    9 Nws hais cov lus no tas, ces nws nce siab zuj zus ntawm lawv qhov muag ntsia ntsoov mus lawm; muaj ib tw huab los thaiv ces lawv tsis pom nws ntxiv.
    10 Thaum Yes Xus nce mus lawd, lawv tseem nyob hab nuv ntawd ntsia ntsoov saum ntuj, ces cia li muaj ob tug neeg hnav dawb los sawv ntawm lawv.
    11 Nkawd hais tias : "Cov neeg Nkas Lis Lais, vim li cas nej sawv ntsug ntsia ntsoov saum ntuj zoo li no ? Tus Yes Xus uas raug nqa ntawm nej mus rau saum ntuj lawd, nws yuav rov los zoo nkaus li nej pom nws nce mus saum ntuj thiab."

    NPN       47:   2-3, 6-7, 8-9

    Txais: (6) Tswv Ntuj nce saum nws lub theej kiab,
    muaj suab qw zoo siab, muaj suab hom nrov rau Huab Tais.
    Los: As les lus yas.

    Txhua haiv neeg, nej npuaj teg,
    nej qw suab zoo siab rau Tswv Ntuj,
    vim HUAB TAIS tus nyob siab, tus zoo tshaj,
    yos tus vaj loj kav tas nrho lub ntiaj teb.

    Txais: (6) Tswv Ntuj nce saum nws lub theej kiab,
    muaj suab qw zoo siab, muaj suab hom nrov rau Huab Tais.
    Los: As les lus yas.

    Tswv Ntuj nce saum nws lub theej kiab, muaj suab zoo sia
    HUAB TAIS nce, muaj suab hom nrov.
    nej hu nkauj cav txog Tswv Ntuj, nej cav txog nws,
    nej hu nkauj cav txog peb tus vaj, nej cav txog nws.

    Txais: (6) Tswv Ntuj nce saum nws lub theej kiab,
    muaj suab qw zoo siab, muaj suab hom nrov rau Huab Tais.
    Los: As les lus yas.

    Tus vaj kav tas lub ntiaj teb yog Tswv Ntuj,
    nej hu nkauj cav txog nws.
    Tswv Ntuj tswj cov haiv neeg,
    Tswv Ntuj zaum saum nws lub theej kiab ntshiab.

    Txais: (6) Tswv Ntuj nce saum nws lub theej kiab,
    muaj suab qw zoo siab, muaj suab hom nrov rau Huab Tais.
    Los: As les lus yas.

    Zaj Nyeem Ob:       ES FES XOS  1:   17-23

    Cov kwv tij nkauj muam,
    17 Kuv thov kom peb tus Huab Tais Yes Xus Pleev tus Tswv Ntuj, uas yog Leej Txiv tus muaj koob meej, pub ib lub tswv yim thoob tsib thiab txawj mem tau tej yam zais ntshis rau nej, nej thiaj yuav paub nws tseeb tiag.
    18 Thov kom muaj qhov pom kev kaj nej cov qhov muag hauv nej nruab siab ces nej yuav paub tias nej muaj kev vam kev cia siab npaum li cas nyob hauv txoj kev uas Tswv Ntuj hu nej, nej yuav paub tias nej nplua nuj npaum li cas nyob hauv lub koob meej uas nej koom nrog cov leej ntshiab txais nws lub cuab tam,
    19 thiab nej yuav paub tias nws lub hwj huam loj tshaj npaum li cas pub rau peb cov ntseeg, raws li lub peev xwm ntawm lub zog ntawm nws lub hwj huam,
    20 uas nws tau siv nyob hauv Leej Pleev thaum nws tsa Leej Pleev sawv hauv cov tub tuag rov los thiab tsa Leej Pleev zaum ntawm nws phab xis nyob saum cov txheej ntuj saud,
    21 nyob siab dua cov tshiab ua vaj, siab dua cov tshiab muaj hwj chim, siab dua cov tshiab muaj hwj huam, siab dua cov tshiab ua huab tais, thiab siab dua txhua lub npe uas hu tau, hauv lub zim txwv tiam no mus rau tiam yuav tuaj huv tib si.
    22 Tswv Ntuj tso tas ib puas tsav yam rau hauv Leej Pleev qab xib taws thiab tsa nws ua lub taub hau kav tas txhua yam nyob hauv lub Koom Txoos,
    23 uas yog Yes Xus lub Cev, yog yam puv npo tus uas nyob puv txhua yam txhua tsav.

    Los:       ES FES XOS  4:   1-13

    Cov kwv tij nkauj muam,
    1 Kuv yog tus raug txim vim Huab Tais, kuv thov nej kom nej coj ib lub neej phim txoj kev uas Ntuj tau hu nej los taug.
    2 Nej yuav ua neeg tsis muab hlob , ua neeg siab muag siab zoo, ua siab ntev ib leeg txhawb ib leeg nyob hauv txoj kev nyiam.
    3 Nej yuav siv zog txuag kom nej nyob sib haum koom ib lub tswv yim hauv txoj kev thaj yeeb.
    4 Tsuas muaj ib lub cev thiab ib lub tswv yim xwb, ib yam li tsuas muaj ib txoj kev tso siab uas Ntuj hu nej los taug xwb.
    5 Tsuas muaj ib tug Huab Tais, ib txoj kev ntseeg, ib lub cim ntxuav,
    6 ib tug Tswv Ntuj xwb, nws ua sawv daws Txiv, nws nyob siab dua sawv daws, nws nyob tas qhov txhia chaw thiab nyob hauv sawv daws.
    7 Tsis kav peb nyias tau txais Ntuj lub txiaj ntsim raws li Yes Xus Pleev pub rau nyias.
    8 Li ntawd thiaj muaj lo lus hais tias : ‘Nws nce mus saum qhov siab, nws quab yuam txoj kev quab yuam neeg, nws pub paj tshab rau cov tib neeg.’
    9 Lo lus tias : ‘nws nce mus’, txhais tias nws kuj tau xub nqes mus puag hauv yeeb ceeb lawm thiab.
    10 Tus tau nqes mus puag hauv kuj yog tus uas tau nce mus nyob siab dua cov txheej ntuj saud thiab, ces nws thiaj nyob puv hauv lub sim ceeb.
    11 Thiab nws kuj yog tus pub kom ib txhia ua Hauv Paus Xa Lus, ib txhia ua Yaj Saub, ib txhia tshaj lub Moo Zoo, ib txhia ua leej choj, thiab ib txhia ua xib hwb,
    12 kom thiaj muaj txhij txhua pab tau cov neeg ntshiab ua lawv txoj hauj lwm tshaj Ntuj lus, kom lawv txhim tau Leej Pleev lub Cev,
    13 kom thaum kawg, peb sawv daws koom ua ib leeg xwb nyob hauv txoj kev ntseeg thiab txoj kev paub Tswv Ntuj Leej Tub, peb yuav yog ib tug neeg hlob tiav txiv, phim qhov Leej Pleev yuav tsum loj hlob txhij txhua tiav log .

    Los:       ES FES XOS  4:   1-7, 11-13

    Cov kwv tij nkauj muam,
    1 Kuv yog tus raug txim vim Huab Tais, kuv thov nej kom nej coj ib lub neej phim txoj kev uas Ntuj tau hu nej los taug.
    2 Nej yuav ua neeg tsis muab hlob , ua neeg siab muag siab zoo, ua siab ntev ib leeg txhawb ib leeg nyob hauv txoj kev nyiam.
    3 Nej yuav siv zog txuag kom nej nyob sib haum koom ib lub tswv yim hauv txoj kev thaj yeeb.
    4 Tsuas muaj ib lub cev thiab ib lub tswv yim xwb, ib yam li tsuas muaj ib txoj kev tso siab uas Ntuj hu nej los taug xwb.
    5 Tsuas muaj ib tug Huab Tais, ib txoj kev ntseeg, ib lub cim ntxuav,
    6 ib tug Tswv Ntuj xwb, nws ua sawv daws Txiv, nws nyob siab dua sawv daws, nws nyob tas qhov txhia chaw thiab nyob hauv sawv daws.
    7 Tsis kav peb nyias tau txais Ntuj lub txiaj ntsim raws li Yes Xus Pleev pub rau nyias.
    11 Thiab nws kuj yog tus pub kom ib txhia ua Hauv Paus Xa Lus, ib txhia ua Yaj Saub, ib txhia tshaj lub Moo Zoo, ib txhia ua leej choj, thiab ib txhia ua xib hwb,
    12 kom thiaj muaj txhij txhua pab tau cov neeg ntshiab ua lawv txoj hauj lwm tshaj Ntuj lus, kom lawv txhim tau Leej Pleev lub Cev,
    13 kom thaum kawg, peb sawv daws koom ua ib leeg xwb nyob hauv txoj kev ntseeg thiab txoj kev paub Tswv Ntuj Leej Tub, peb yuav yog ib tug neeg hlob tiav txiv, phim qhov Leej Pleev yuav tsum loj hlob txhij txhua tiav log .

    As Les Lus Yas:       MT  28:   19A, 20B

    Txais: As les lus yas, as les lus yas.

    Huab Tais hais tias: Nej mus qhuab qhia rau tas txhua haiv neeg,
    kuv yuav nrog nej nyob nraim mus txog thaum ntiaj teb kawg.

    Txais: As les lus yas, as les lus yas.

    Ntawv Moo Zoo:       MK  16:   15-20

    15 Yes Xus hais rau nws cov thwj tim tias : "Nej mus thoob qab ntuj, nej tshaj lub Moo Zoo rau txhua leej txhua tus. 16 Tus twg ntseeg thiab txais lub cim ntxuav, mas nws yuav txais kev cawm dim, hos tus tsis ntseeg yuav raug txim. 17 Cov cim no yuav nrog nraim cov uas ntseeg : lawv yuav hu txog kuv lub npe los ntiab dab tau; lawv yuav hais ib co lus tshiab; 18 lawv yuav tuav tau nab ntawm lawv tes; yog lawv haus tshuaj lom neeg, tshuaj yuav tsis ua xwv txheej rau lawv; thaum lawv tsa tes rau saum cov neeg mob, mas cov mob yuav zoo hlo." 19 Thaum Huab Tais Yes Xus hais cov lus no tas rau lawv, nws raug nqa nce mus saum ntuj thiab nws mus zaum ntawm Tswv Ntuj sab xis lawm. 20 Ces cov thwj tim tawm mus qhuab qhia rau tas qhov txhia chaw, Huab Tais nrog lawv lis hauj lwm thiab nws ua ib co cim los ua tim khawv txhawb Lo Lus.

    +++++++++++++++++++++++++++++++++++++++++++++++++++

    COV ZAJ NYEEM RAU HNUB TSIB LIS PIAM RAU CAIJ HLA

    Zaj Nyeem Ib:       HAUJ LWM  18:   1-8


    1 Dhau ntawd lawm, Paj Lug tawm hauv As Thes Nas mus, nws mus txog Kos Lis Nthos. 2 Nyob Kos Lis Nthos, Paj Lug ntsib ib tug neeg Yus Das hu ua As Kis Las, uas yug los nyob Poos Tus teb. Nws thiab nws poj niam hu ua Phis Xis Las nkawd nyuam qhuav tsiv tim Is Tas Lis teb los txog vim tus Vaj Klaus Dis Yus ceeb toom kom tas cov Yus Das sawv daws yuav tsum tawm hauv Los Mas mus. Paj Lug mus cuag nkawd; 3 vim tias Paj Lug kuj ua txoj hauj lwm uas nkawd ua thiab, nws thiaj mus nrog nkawd nyob, thiab nrog nkawd ua hauj lwm. Lawv txoj hauj lwm yog xaws ntaub ua tsev tsam phooj. 4 Niaj hnub xas npas tos, Paj Lug mus qhia sawv daws nyob hauv lub tsev txoos. Nws siv zog qhia cov Yus Das thiab cov Hes Las kom lawv ntseeg. 5 Thaum Xis Las thiab Tis Mos Tes nkawd tuaj ntawm Mas Xes Dos Nias teb tuaj txog lawm, mas Paj Lug siv nws lub sij hawm cia tshaj Lo Lus lawm xwb. Nws zeem tseeb rau cov Yus Das tias Yes Xus yog Leej Pleev. 6 Tab sis lawv tsis ntseeg, lawv hais tej lo lus thuam Ntuj. Ces Paj Lug nchos nws cov ris tsho rau lawv thiab nws hais tias : "Cia nej cov ntshav rov poob los rau saum nej taub hau. Kuv hauj lwm nrog nej tiav lawm, txij no mus kuv yuav mus tsham cov neeg teev pej kum dab lawm xwb." 7 Paj Lug hais li ntawd tas, ces nws sawv kev mus. Nws mus hauv ib tug hu ua Tis Tos Yus Tus lub tsev. Yus Tus yog ib tug neeg hwm Tswv Ntuj ; nws lub tsev nyob puab lub tsev Txoos. 8 Khis Pus uas yog tus saib lub tsev Txoos nrog nws tsev neeg sawv daws ntseeg txog Huab Tais. Muaj ntau leej Kos Lis Nthos hnov Paj Lug, lawv ntseeg thiab txais lub cim ntxuav.

    NPN       98:   1, 2-3ab,3cd-4

    Txais: (2b) Huab Tais muab nws txoj kev cawm neeg muaj hwj huam rau cov kuj cuab pom.
    los: As les lus yas.

    Nej hu ib zag nkauj tshiab rau HUAB TAIS,
    vim nws ua dej num loj muaj tsim nto moo.
    Nws sab xis ua kom nws yeej,
    nws sab npab ntshiab ua.

    Txais: (2b) Huab Tais muab nws txoj kev cawm neeg muaj hwj huam rau cov kuj cuab pom.
    los: As les lus yas.

    HUAB TAIS ua kom sawv daws paub nws txoj kev cawm ;
    nws muab nws txoj kev ncaj rau cov kuj cuab pom.
    Nws rov nco txog nws txoj kev hlub
    thiab kev pheej xeeb rau His Xas Lais tsev neeg.

    Txais: (2b) Huab Tais muab nws txoj kev cawm neeg muaj hwj huam rau cov kuj cuab pom.
    los: As les lus yas.

    Tas npoo ntuj npoo ntiaj teb tau pom
    peb tus Tswv Ntuj txoj kev cawm seej.
    Tas txhua teb chaws, nej qw zoo siab cav txog HUAB TAIS !
    Nej qhib suab hu nkauj, nej cav txog nws!

    Txais: (2b) Huab Tais muab nws txoj kev cawm neeg muaj hwj huam rau cov kuj cuab pom.
    los: As les lus yas.

    As Les Lus Yas:       ZAM  14:   18

    Txais: As les lus yas, as les lus yas.

    Huab Tais hais tias: Kuv yuav tsis cia nej ua ntsuag,
    kuv yuav rov los cuag nej ces nej yuav zoo siab hlo.

    Txais: As les lus yas, as les lus yas.

    Ntawv Moo Zoo:       ZAM  16:   16-20


    Yes Xus hais rau nws cov thwj tim tias:
    16 "Tshuav me ntsis ntxiv lawm xwb, ces nej yuav tsis pom kuv. Tab sis ib me ntsis ntxiv, nej yuav rov pom kuv." 17 Muaj ob peb tug thwj tim sib tham tias : "Nws hais dab tsi li ntawd rau peb tias : ‘Tshuav me ntsis ntxiv lawm xwb, ces nej yuav tsis pom kuv, tab sis ib me ntsis ntxiv , nej yuav rov pom kuv,’ thiab lo lus tias : ‘Kuv mus cuag Leej Txiv,’ yog txhais li cas? " 18 Lawv hais tias : "Qhov ‘ib me ntsis’ uas nws hais ntawd yog li cas ? Peb tsis paub nws xav hais dab tsi li." 19 Yes Xus paub tias lawv xav nug nws, ces nws hais rau lawv tias : "Nej rov sib nug txog lo lus kuv hais tias : Tshuav me ntsis lawm xwb, nej yuav tsis pom kuv, tab sis ib me ntsis ntxiv, nej yuav rov pom kuv. 20 Kuv hais qhov muaj tseeb tiag rau nej tias nej yuav quaj thiab nej yuav nyiav, hos lub qab ntuj neeg yuav zoo siab. Nej yuav tu siab loj, tab sis nej txoj kev tu siab yuav hloov ua kev zoo siab.”


    Last edited by Mim on 16th May 2018, 8:25 am; edited 5 times in total
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 10th May 2018, 10:19 am

    TIM 11 LUB 5 HLIS 2018

    Hnub Rau Lis Piam Rau Caij Hla Xyoo B Nruab Lis Piam Xyoo II

    Zaj Nyeem Ib: HAUJ LWM 18: 9-18


    9 Muaj ib hmos, nyob Kos Lis Nthos, Paj Lug ua yog toog pom Huab Tais hais rau nws tias : "Koj tsis txhob ntshai, koj kav tsij hais lus, tsis txhob nyob twj ywm. 10 Vim kuv nrog nraim koj, tsis muaj leej twg yuav tsa tes ua phem rau koj tau. Vim tias kuv muaj ib haiv neeg coob nyob hauv lub tsheej no." 11 Ces Paj Lug thiaj nyob hauv lub tsheej ntawd ib xyoos thiab rau hli. Nws qhia Tswv Ntuj lo lus rau lawv.
    12 Thaum ntawd, Nkas Loos ua pwm tsav kav lub xeev As Kais. Cov Yus Das koom siab sawv ntxeev Paj Lug, lawv coj Paj Lug tuaj rau lub tsev txiav txim. 13 Lawv hais tias : "Tus neeg no ua tsis haum txoj cai, nws haub zeej tsoom kom sawv daws teev Tswv Ntuj." 14 Paj Lug tseem yuav qhib ncauj hais lus, tab sis Nkas Loos twb teb ntua rau cov Yus Das tias : "Cov Yus Das, yog nej hais txog kev tsis ncaj ncees los kev ua phem li cas, mas kuv yuav pab nej raws txoj cai. 15 Tab sis yog nej sib cav txog ib txog kev ntxeeg, los tej lub npe, los ib txoj cai uas yog nej li, mas cia nej txiav nej, kuv tsis kam txiav txim rau tej yam ntawd." 16 Ces Nkas Loos ntiab sawv daws tawm hauv tsev txiav txim mus. 17 Sawv daws thiaj ntes tus saib lub tsev txoos hu ua Xos Thes Nes. Lawv muab nws ntaus nyob ze lub tsev txiav txim. Tiam sis Nkas Loos tsis quav ntsej rau tej ntawd li.
    18 Paj Lug tseem nyob Kos Lis Nthos ib ntus ntev loo ntxiv, nws mam li hais rau cov kwv tij tias nws yuav ncaim mus, ces nws nce nkoj mus rau Xis Lias teb. Phis Xis Las thiab As Kis Las nkawd kuj nrog nws mus thiab. Nyob Xees Qhes, Paj Lug chais plaub hau, vim nws tau fiv ib lub yeem li ntawd.

    NPN 47: 2-3, 4-5, 6-7

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Txhua haiv neeg, nej npuaj teg,
    nej qw suab zoo siab rau Tswv Ntuj,
    vim HUAB TAIS tus nyob siab, tus zoo tshaj,
    yos tus vaj loj kav tas nrho lub ntiaj teb.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Nws coj cov haiv neeg los zwm rau peb,
    nws tso cov kuj cuab rau hauv peb qab xib taws.
    Nws xaiv peb lub cuab tam rau peb,
    Yog Yas Kos lub koob meej, tus uas nws nyiam.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Tswv Ntuj nce saum nws lub theej kiab, muaj suab zoo siab
    HUAB TAIS nce mus, muaj suab hom nrov.
    nej hu nkauj cav txog Tswv Ntuj, nej cav txog nws,
    nej hu nkauj cav txog peb tus vaj, nej cav txog nws.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    As Les Lus yas: LK 24: 46, 26

    Txais: As les lus yas, as les lus yas.

    Leej Pleev yuav tsum raug txom nyem
    thiab sawv hauv cov tub tuag rov los,
    ces nws mam mus rau hauv nws lub hwj chim.

    Txais: As les lus yas, as les lus yas.

    Ntawv moo Zoo: ZAM 16: 20-23


    Yes Xus hais rau nws cov thwj tim tias:
    20 “Kuv hais qhov muaj tseeb tiag rau nej: Nej yuav quaj thiab nej yuav nyiav, hos lub qab ntuj neeg yuav zoo siab. Nej yuav tu siab loj, tab sis nej txoj kev tu siab yuav hloov ua kev zoo siab. 21 Thaum ib tug poj niam daws cev, mas nws nyuaj siab, vim txog nws caij lawm. Tab sis thaum nws yug tau tus me nyuam lawm, nws tsis nco nyuaj siab ntxiv, vim nws zoo siab tias ib tug me nyuam yug los nyob hauv ntiaj teb no lawm. 22 Nej kuj ib yam : Nyem no nej nyuaj siab, tab sis kuv yuav rov pom nej dua, ces nej lub siab yuav kaj. Yuav tsis muaj leej twg tshem tau nej txoj kev zoo siab ntawm nej mus. 23 Hnub ntawd, nej yuav tsis nug kuv txog dab tsi ntxiv lawm. Kuv hais qhov muaj tseeb tiag rau nej : Nej tuav txog kuv lub npe thov dab tsi ntawm Leej Txiv, mas nws yuav pub rau nej.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 11th May 2018, 2:50 am

    TIM 12 LUB 5 HLIS 2018

    Hnub Xya Lis Piam Rau Caij Hla Xyoo B Nruab Lis Piam Xyoo II

    Hwm LN Nereus thiab LN Achilleus; LN Pancras

    Zaj Nyeem Ib: HAUJ LWM 18: 23-28


    23 Paj Lug nyob As Caus Kus ib ntus, ces nws sawv kev, nws mus ncig cov teb chaws Nkas Las Tias thiab Fis Zias ib qho dhau ib qho zuj zus, mus pab txhawb zog rau cov thwj tim. 24 Muaj ib tug neeg Yus Das hu ua As Pos Los, uas yug nyob As Les Xas Nrias, nws yog neeg txawj hais lus, nws tuaj txog Es Fes Xos; nws paub Ntawv Ntshiab zoo. 25 Nws tau kawm txog Huab Tais Txoj Kev. Nws muaj Leej Ntuj Plig ua nws kub siab lug; nws hais lus thiab nws qhia raug kawg txog Yes Xus, txawm tias nws tsuas paub Zam lub cim ntxuav xwb. 26 Nws hais lus tsis ua xyem xyav li nyob hauv lub tsev Txoos. Phis Xis Las thiab As Kis Las nkawd hnov nws cov lus, ces nkawd coj nws nrog nkawd mus, thiab nkawd qhia Tswv Ntuj Txoj Kev rau nws kom meej dua. 27 As Pos Los xav mus As Kais teb, cov kwj tij txhawb nws kom ua siab loj mus. Lawv sau ib tsab ntawv mus rau cov thwj tim kom lawv txais nws. Thaum nws tuaj txog As Kais lawm, nws tau pab cov uas tau txais lub txiaj ntsim los ntseeg ntau kawg. 28 Nws tsis ntshai tab meeg hais lus tiv cov Yus Das, nws siv Ntawv Ntshiab los qhia tias Yes Xus yeej yog Leej Pleev tiag.

    NPN 47: 2-3, 8-9, 10

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Txhua haiv neeg, nej npuaj teg,
    nej qw suab zoo siab rau Tswv Ntuj,
    vim HUAB TAIS tus nyob siab, tus zoo tshaj,
    yog tus vaj loj kav tas nrho lub ntiaj teb.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Tus vaj kav tas lub ntiaj teb yog Tswv Ntuj,
    nej hu nkauj cav txog nws.
    Tswv Ntuj tswj cov haiv neeg,
    Tswv Ntuj zaum saum nws lub theej kiab ntshiab.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Cov vaj txheeb hauv txhua haiv neeg tuaj sib sau ua ke
    nrog Has Nplas Has tus Tswv Ntuj haiv neeg.
    Vim cov leem phiaj thaiv ntiaj teb yog Tswv Ntuj tug,
    Nws loj tshaj tas txhua tsav txhua yam.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    As Les Lus Yas: ZAM 16: 28


    Txais: As les lus yas, as les lus yas.

    Kuv tuaj ntawm Leej Txiv tuaj rau hauv ntiaj teb,
    zaum no kuv yuav tso ntiaj teb tseg thiab rov mus cuag Leej Txiv.

    Txais: As les lus yas, as les lus yas.

    Ntawv Moo Zoo: ZAM 16: 23B-28

    Yes Xus hais rau nws cov thwj tim tias:
    23b “"Kuv hais qhov muaj tseeb tiag rau nej : Nej tuav txog kuv lub npe thov dab tsi ntawm Leej Txiv, mas nws yuav pub rau nej. 24 Los txog tav no, nej tsis tau tuav txog kuv lub npe thov ib yam dab tsi li. Nej thov ces nej yuav tau txais, nej thiaj yuav muaj kev zoo siab puv npo. 25 Kuv tau siv tej zaj paj lug los hais tej no rau nej. Txog lub caij uas kuv yuav tsis siv tej zaj paj lug los hais rau nej ntxiv. Kuv yuav ncaj qha qhia meej txog Leej Txiv rau nej. 26 Txog hnub ntawd, nej yuav tuav txog kuv lub npe los thov. Kuv tsis hais rau nej tias kuv yuav thov Leej Txiv rau nej. 27 Leej Txiv twb nyiam nej lawm, vim nej nyiam kuv, thiab nej ntseeg tias kuv tuaj ntawm Tswv Ntuj tuaj. 28 Kuv tawm ntawm Leej Txiv tuaj nyob hauv lub ntiaj teb no. Zaum no kuv tso lub ntiaj teb tseg, kuv yuav rov mus cuag Leej Txiv."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 14th May 2018, 10:24 am

    TIM      14      LUB      5      hLIS      2018

    Hnub Ob Lis Piam Xya Caij Hla Xyoo B Nruab Lis Piam Xyoo II

    HWM HAUV PAUS XA LUS LEEJ NTSHIAB MAS THIAS

    Zaj Nyeem Ib:       HAUJ LWM  1:   15-17, 20-26


    15 Lub caij ntawd, Pob Zeb sawv ntsug hauv nruab nrab cov kwv tij, - muaj ze ntawm ib puas nees nkaum leej tuaj sib txoos ua ke nyob ib qho, - nws hais tias : 16 "Kwv tij sawv daws, cov lus uas sau rau hauv Ntawv Ntshiab yuav tsum tshwm sim tuaj, raws li Leej Ntuj Plig tau siv Das Vis lub ncauj los hais txog Yus Das, uas yog tus coj luag kev tuaj ntes Yes Xus. 17 Nws yog ib tug nyob hauv peb thiab nws kuj tau txais ib txog hauj lwm xws li peb txoj thiab.
    20 Ntawv Nkauj Paj Nruag sau tseg tias : ‘Cia kom nws lub tsev nyob nphob xuav, tsis txhob muaj neeg nyob hauv li,’ thiab tseem hais tias : ‘Cia lwm tus ua nws txoj dej num.’ 21 Vim li ntawd, cov neeg uas tau nrog peb ua ke tas lub caij Huab Tais Yes Xus nrog peb mus mus los los, 22 txij hnub Zam ua kab ke ntxuav los txog hnub uas nws raug nqa hauv peb mus lawd, mas yuav tsum muaj ib tug los nrog peb ua tim khawv txog nws txoj kev sawv rov los." 23 Ces lawv coj tau ob leeg los, yog Yos Xes tseem hu ua Npas Xas Npas, uas sawv daws kuj tseem hu nws ua Zus Tws, thiab Mas Thias. 24 Lawv thov Ntuj li no : "Huab Tais, koj paub tas sawv daws neeg lub siab, thov koj qhia saib ob tug no tus twg yog tus koj xaiv 25 kom los leg txoj dej num ua hauv paus xa lus uas Yus Das muab tso pov tseg thiab khiav mus nyob nws qhov chaw lawm." 26 Ces lawv kom nkawd rho ntawv, txoj hmoo los raug rau Mas Thias. Lawv thiaj suav nws los ntxiv rau pab Kaum Ib leeg Hauv Paus Xas Lus.

    NPN       113:   1-2, 3-4, 5-6, 7-8

    Txais: Huab Tais yuav coj nws mus zaum nrog cov thawj coj hauv nws haiv neeg.
    los: As les lus yas.

    HUAB TAIS cov tub txib, nej cav txog nws,
    nej cav txog HUAB TAIS lub npe.
    Kom HUAB TAIS lub npe nto moo lug,
    txij no mus txheej dhau txheej !

    Txais: Huab Tais yuav coj nws mus zaum nrog cov thawj coj hauv nws haiv neeg.
    los: As les lus yas.

    Txij thaum hnub tawm txog hnub poob qho,
    kom HUAB TAIS lub npe nto koob meej.
    HUAB TAIS loj siab tshaj ib tsoom kuj cuab,
    nws lub koob meej nyob siab dua txheej ntuj saud.

    Txais: Huab Tais yuav coj nws mus zaum nrog cov thawj coj hauv nws haiv neeg.
    los: As les lus yas.

    Leej twg thiaj zoo li HUAB TAIS, peb tus Tswv Ntuj,
    Uas nws nce mus zaum nws lub theej kiab nyob siab saud
    Thiab nws dauv muag khoov los ntsia lub ntuj
    thiab lub ntiaj teb nyob txheej qis hauv?

    Txais: Huab Tais yuav coj nws mus zaum nrog cov thawj coj hauv nws haiv neeg.
    los: As les lus yas.

    Nws tsa tus pluag hauv plua tshauv los,
    nws rub tus txom nyem hauv qhov qias los
    kom los zaum nrog cov tub huab tais,
    cov tub huab tais hauv nws haiv neeg.

    Txais: Huab Tais yuav coj nws mus zaum nrog cov thawj coj hauv nws haiv neeg.
    los: As les lus yas.

    As Les Lus Yas:       ZAM  15:   16

    Txais: As les lus yas, as les lus yas.

    Huab Tais hais tias: kuv tau xaiv nej hauv lub ntiaj teb los,
    kom nej mus thiab nej txi ib co txiv uas nyob ruaj.

    Txais: As les lus yas, as les lus yas.

    Ntawv Moo Zoo:       ZAM  15:   9-17

    Yes Xus hais rau nws cov thwj tim tias:
    9 “Kuv nyiam nej ib yam li Leej Txiv nyiam kuv. Nej nyob ruaj hauv kuv txoj kev nyiam mog. 10 Yog nej coj kuv cov lus qhia, mas nej yuav nyob ruaj hauv kuv txoj kev nyiam, ib yam li kuv coj kuv Txiv cov lus qhia thiab kuv nyob ruaj hauv nws txoj kev nyiam. 11 Kuv hais tej no rau nej kom kuv txoj kev kaj siab nyob hauv nej thiab nej thiaj muaj kev kaj siab puv npo.” 12 Kuv lo lus qhia yog lo lus no : nej sis nyiam sis hlub zoo li kuv tau nyiam tau hlub nej. 13 Tsis muaj leej twg muaj txoj kev nyiam loj dua tus uas siv nws txoj sia rau nws cov phooj ywg. 14 Yog nej ua qhov kuv kom ua, mas nej yog kuv cov phooj ywg. 15 Kuv tsis hu nej ua kuv cov tub txib, vim tus tub txib tsis paub qhov uas tus tswv ua. Tab sis kuv hu nej ua phooj ywg, vim tas ib puas tsav yam kuv hnov ntawm kuv Txiv, mas kuv qhia nej paub tas huv si. 16 Tsis yog nej xaiv kuv, yog kuv xaiv nej. Thiab yog kuv xa nej mus kom nej txi txiv, kom nej cov txiv nyob ruaj, kom xwv nej tuav txog kuv lub npe thov yam twg ntawm Leej Txiv, mas nws muab rau nej. 17 Lo lus qhia uas kuv muab rau nej yog: kom nej sis nyiam sis hlub."
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 15th May 2018, 7:18 am

    TIM 15 LUB 5 HLIS 2018

    Hnub Peb Lis Piam Xya Caij Hla Xyoo B Nruab Lis Piam Xyoo II

    HWM LN ISIDORE

    Zaj Nyeem Ib: HAUJ LWM 20: 17-27


    17 Nyob Mis Les Tos, Paj Lug xa neeg mus hu cov txwj laus saib lub Koom Txoos nyob Es Fes Xos tuaj. 18 Thaum lawv tuaj txog, nws hais rau lawv tias : “Nej paub zoo tias txij hnub kuv ko taw tau tsuj As Xias teb los txog tav no, kuv ib txwm coj li cas thaum kuv nrog nej nyob. 19 Kuv tau ua neeg me tsob hwb Huab Tais, txawm tias kuv ntsib txoj kev los kua muag, txoj kev txom nyem ntau zaus, vim cov Yus Das tuav tswv yim ua phem rau kuv. 20 Kuv tsis tau thaub qab ib zaug es tsis ua tej yam zoo los pab nej thaum kuv qhuab ntuas thiab quab qhia nej nyob ntawm sawv daws xub ntiag los nyob hauv nej vaj nej tsev li. 21 Kuv tau ua tim khawv tas zog rau cov Yus Das thiab cov Hes Las kom sawv daws tig los lees txhaum ntawm Tswv Ntuj thiab los ntseeg txog peb tus Huab Tais Yes Xus Pleev. 22 Nyem no, Leej Ntuj Plig muab kuv khi cia ces kuv yuav tsum mus Yes Lus Xas Les, kuv yeej tsis paub tias yuav muaj dab tsi tuaj raug kuv nyob ped li. 23 Kuv tsuas paub tias thaum kuv hla ib lub nroog mus rau lwm lub, mas Leej Ntuj Plig Ntshiab xub qhia kuv tias saw hlau thiab kev txom nyem tos nrhw kuv. 24 Txawm li cas los kuv tsis saib kuv tus kheej txoj sia muaj nqes tshaj, kuv tsuas xav kom kuv tau taug kuv txoj kev kom zoo tshaj thiab leg cov dej num uas Huab Tais Yes Xus muab rau kuv leg kom tiav log xwb: yog mus tshaj lub Moo Zoo pub Tswv Ntuj lub txiaj ntsim. 25 Kuv paub tias txij no mus, tas nej cov uas kuv tau nrog nej nyob thiab qhia txog lub Ceeb Tsheej rau nej, mas nej yuav tsis pom kuv lub ntsej muag ntxiv lawm. 26 Vim li no mas hnub no, kuv thiaj hais tseeb rau nej tias yog nej leej twg ua txhaum, lub txim ntawd yuav tsis poob rau kuv ua tus ris, 27 vim kuv tsis ntshai tshaj tas nrho qhov Tswv Ntuj tau npaj kom nej ua rau nej lawm.”

    NPN 68: 10-11, 20-21

    Txais: (33a) Cov ceeb tsheej nyob ntiaj teb, nej cia li hu nkauj rau Tswv Ntuj.
    los: As les lus yas.

    Tswv Ntuj, koj tso nag muaj txiaj ntsim ntau los ywg koj lub cuab tam,
    koj rov ua kom thaj av zoo tuaj thaum nws tsuag lawm.
    Koj cov yaj los nyob hauv thaj av ntawd.
    Tswv Ntuj, koj lub siab zoo pub thaj av ntawd rau tus pluag.

    Txais: (33a) Cov ceeb tsheej nyob ntiaj teb, nej cia li hu nkauj rau Tswv Ntuj.
    los: As les lus yas.

    Kom HUAB TAIS nto koob meej hnub dhau hnub !
    Nws yog tus ris peb lub nra, yog Tswv Ntuj tus cawm peb.
    Tswv Ntuj yog tus Tswv Ntuj pub kev cawm rau peb,
    HUAB TAIS, kuv tus Huab Tais yog
    tus saib txoj kev tuag lub rooj vag.

    Txais: (33a) Cov ceeb tsheej nyob ntiaj teb, nej cia li hu nkauj rau Tswv Ntuj.
    los: As les lus yas.

    As Les Lus Yas: ZAM 14: 16

    Txais: As les lus yas, as les lus yas.

    Kuv yuav thov Leej Txiv,
    ces nws yuav xa dua ib Tug Pab nej
    los nrog nej nyob mus li.

    Txais: As les lus yas, as les lus yas.

    Ntawv Moo Zoo: ZAM 17: 1-11A

    1 Yes Xus hais li ntawd tas, nws tsa muag ntsia saum ntuj, nws hais tias: “Txiv, txog sij hawm lawm ! Koj ua kom koj Leej Tub muaj koob meej mas, ces koj Leej Tub yuav ua kom koj muaj koob meej, 2 vim koj muab hwj huam rau nws kav tib neeg tas nrho, kom nws pub txoj sia nyob mus li rau txhua leej uas koj muab rau nws. 3 Txoj sia nyob mus li yog zoo li no : kom lawv paub koj, uas yog tus tseem Tswv Ntuj, thiab paub Yes Xus Pleev uas yog tus koj xa tuaj. 4 Kuv tau ua kom koj muaj koob meej nyob ntiaj teb no, vim tias cov hauj lwm uas koj muab rau kuv ua, mas kuv ua tiav lawm. 5 Txiv, nyem no koj ua kom kuv muaj koob meej nyob ntawm koj xub ntiag, yog lub koob meej uas kuv ib txwm muaj rau ntawm koj xub ntiag thaum lub sim ceeb tsis tau xeeb los nyob.
    6 Kuv tau qhia koj lub Npe rau cov neeg koj rho hauv lub qab ntuj los pub rau kuv kom lawv paub koj. Cov neeg no yog koj tug, koj muab lawv pub rau kuv lawm, lawv coj rawv koj lo lus. 7 Nyem no lawv paub tias tas txhua yam uas koj muab rau kuv yog tuaj ntawm koj tuaj. 8 Vim tias cov lus uas koj muab rau kuv, mas kuv muab rau lawv lawm. Lawv txais koj cov lus, ces lawv paub tseeb tias kuv tuaj ntawm koj tuaj, thiab lawv ntseeg tias yog koj xa kuv tuaj. 9 Kuv thov koj rau lawv, kuv tsis thov rau lub qab ntuj neeg, tiam sis kuv thov koj rau cov uas koj muab pub rau kuv, vim lawv yog koj tug. 10 Txhua yam uas yog kuv tug, kuj yog koj tug ; txhua yam uas yog koj tug, kuj yog kuv tug thiab. Kuv muaj koob meej nyob hauv lawv lawm. 11 Kuv tsis nyob hauv lub qab ntuj no ntxiv lawm, tab sis lawv tseem nyob hauv lub qab ntuj no, hos kuv rov los cuag koj.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 15th May 2018, 11:35 am

    TIM 16 LUB 5 HLIS 2018

    Hnub Plaub Lis Piam Xya Caij Hla Xyoo B Nruab Lis Piam Xyoo II

    Zaj Nyeem Ib: HAUJ LWM 20: 28-38


    Paj Lug hais rau cov txwj laus tuaj Es Fes Xos tuaj tias:
    28 “Nej yuav muab siab rau saib nej tus kheej, thiab saib pab yaj uas Leej Ntuj Plig Ntshiab tsa nej ua cov tswv zov kom nej coj Tswv Ntuj lub Koom Txoos mus noj zaub, yog lub Koom Txoos uas Tswv Ntuj tau muab nws cov tseem roj ntsha los txhiv. 29 Kuv paub ntsoov tias thaum kuv mus lawm, mas yuav muaj ib co hma tsiv tsaim txeem los nrog nej ua ib pab; lawv yuav tsis txuag pab yaj siav. 30 Tab yog nyob hauv nej pab neeg kiag, kuj tseem yuav muaj ib co sawv los hais tej zaj thuam qhov tseeb kom rub tau cov thwj tim mus raws lawv. 31 Ua li mas nej yuav ceev faj tiag. Nej nco ntsoov tias kuv tau quaj ntuas nej nruab hnub hmo ntuj tau peb lub xyoos. 32 Nyem no, kuv muab nej tso rau Tswv Ntuj saib xyuas thiab muab nej tso rau hauv nws Lo Lus pub txiaj ntsim uas yuav txhim kho tau nej, thiab yuav pub ib lub cuab tam rau nej nrog cov neeg Tswv Ntuj tau qee lawv.
    33 Kuv tsis tau ntshaw leej twg nyiaj txiag los kub los tsoos tsho li. 34 Nej yeej paub lawm tias yog kuv ob txhais tes no tau ua rau kuv tus kheej thiab kuv cov phooj ywg nrog kuv peb noj peb siv xwb. 35 Kuv ua txhij ua txhua li ntawd kom tau qhia rau nej tias peb yuav tsum tau siv zog khwv thiaj yuav pab tau cov tsis muaj zog, thiab peb yuav nco ntsoov Huab Tais Yes Xus lo lus, vim nws tus kheej tau hais tias: ‘Thaum koj pub, koj muaj kev zoo siab ntau dua thaum koj tau txais los.’”
    36 Paj Lug hais cov lus no tas, nws txhos caug nrog lawv teev Ntuj. 37 Sawv daws quaj, sawv daws mus puag Paj Lug caj dab, thiab nwj Paj Lug. 38 Lawv sawv daws tu siab tshaj rau lo lus uas Paj Lug hais tias lawv yuav tsis rov pom nws ntxiv lawm. Ces sawv daws xa Paj Lug mus txog ntua ntawm lub nkoj.

    NPN 68: 29-30, 33-35A, 35BC-36AB

    Txais: (33a) Cov ceeb tsheej nyob ntiaj teb, nej cia li hu nkauj cav txog Tswv Ntuj.
    los: As les lus yas.

    Tswv Ntuj, thov koj ua kom koj lub hwj huam tawm los,
    Tswv Ntuj, koj lub hwj huam uas koj tau siv pab peb;
    Saum koj lub tuam tsev nyob Yes Lus Xas Les,
    Cov vaj ntxwv yuav nqa paj tshab tuaj cev rau koj.

    Txais: (33a) Cov ceeb tsheej nyob ntiaj teb, nej cia li hu nkauj cav txog Tswv Ntuj.
    los: As les lus yas.

    Ntiaj teb cov teb chaws muaj vaj kav, nej hu nkauj rau Tswv Ntuj,
    nej hu nkauj cav txog Huab Tais, tus uas caij nees hla saum
    cov chaw siab saum cov txheej ntuj thaum ub.
    Nej mloog, nws lub suab nrov nroo ntws, lub suab muaj hwj huam.
    Nej cia li lees Tswv Ntuj lub hwj huam.

    Txais: (33a) Cov ceeb tsheej nyob ntiaj teb, nej cia li hu nkauj cav txog Tswv Ntuj.
    los: As les lus yas.
    .
    Nws lub hwj xyeej nyob saum His Xas Lais,
    nws lub hwj huam nyob saum cov txheej ntuj saud.
    Tswv Ntuj, His Xas Lais tus Tswv Ntuj
    muaj hwj chim kawg nkaus nyob hauv nws lub tuam tsev.
    Nws muab lub hwj huam thiab lub zog rau nws haiv neeg.

    Txais: (33a) Cov ceeb tsheej nyob ntiaj teb, nej cia li hu nkauj cav txog Tswv Ntuj.
    los: As les lus yas.

    As Les Lus Yas: ZAM 17: 17B, 17A

    Txais: As les lus yas, as les lus yas.

    Huab Tais, koj lo lus yog qhov tseeb,
    Thov koj qee peb mus nyob hauv qhov tseeb.

    Txais: As les lus yas, as les lus yas.

    Ntawv Moo Zoo: ZAM 17: 11B-19

    Yes Xus tsa muag rau saum ntuj, nws thov ntuj li no:
    11b Leej Txiv Ntshiab, thov koj txuag cov uas koj muab rau kuv nyob hauv koj lub Npe, kom xwv lawv ua ib leeg xwb xws li wb ua ib leeg xwb. 12 Thaum kuv nrog lawv nyob, kuv txuag cov uas koj muab rau kuv nyob hauv koj lub Npe. Kuv saib lawv, ces tsis muaj ib tug ploj li, tsuas muaj kev ploj tuag tus tub xwb thiaj ploj, kom tshwm sim raws li Ntawv sau cia. 13 Zaum no kuv rov los cuag koj, kuv hais tej no rau hauv lub ntiaj teb, kom xwv lawv muaj kuv txoj kev zoo siab puv npo hauv lawv. 14 Kuv tau muab koj lo lus rau lawv, ces lub ntiaj teb thiaj li ntxub lawv, vim lawv tsis yog ntiaj teb tug, ib yam li kuv tsis yog ntiaj teb tug. 15 Kuv tsis thov kom koj rho lawv hauv ntiaj teb mus, kuv thov kom koj txuag lawv ntawm tus Phem xwb. 16 Lawv tsis yog lub ntiaj teb tug ib yam li kuv tsis yog ntiaj teb tug. 17 Thov koj qee lawv mus nyob hauv txoj kev tseeb. Koj lo lus yog qhov tseeb. 18 Ib yam li koj xa kuv los nyob hauv lub ntiaj teb neeg, kuv xa lawv mus nyob hauv lub ntiaj teb neeg thiab. 19 Kuv rov qee kuv los pab lawv, kom xwv lawv raug qee mus nyob hauv qhov tseeb.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 16th May 2018, 6:42 am

    TIM 17 LUB 5 HLIS 2018

    Hnub Tsib Lis Piam Xya Caij Hla Xyoo B Nruab Lis Piam Xyoo II

    Zaj Nyeem Ib: HAUJ LWM 22: 30; 23: 6-11


    30 Hnub tom qab, tus xab txheeb xav paub tseeb tias cov Yus Das liam dab tsi rau Paj Lug, ces nws daws Paj Lug thiab nws kom cov thawj leej choj thiab tas tsoom txwj laus Xas Nes Nrees tuaj sib sau. Nws coj Paj Lug mus rau lawv.
    23 6 Paj Lug paub tias cov neeg nyob ntawd muaj ib tog yog tog Xas Dus Kais, hos ib tog yog tog Fas Lis Xais. Ces nws tsa suab hais nrov nrov rau tsoom Xas Nes Nrees tias : "Cov kwv tij, kuv yog ib tug Fas Lis Xais, kuv yog Fas Lis Xais tub. Kuv raug txiav txim li no yog vim peb muaj txoj kev cia siab tias cov neeg tuag yuav ciaj rov qab los ." 7 Paj Lug hais li no ces cov Fas Lis Xais thiab cov Xas Dus Kais pib sib ceg, ces sawv daws faib kiag ua ob tog. 8 Vim cov Xas Dus Kais hais tias tsis muaj kev sawv rov los, tsis muaj cov Tshiab thiab tsis muaj dab li, hos cov Fas Lis Xais ntseeg txog peb yam ntawd tib si. 9 Sawv daws thiaj sib cav ntsuag qees. Muaj ob peb tug kws ntawv, uas yog tog Fas Lis Xais sawv, lawv hais tias : "Peb tsis pom tus neeg ntawd ua ib qho txhaum dab tsi. Tej zaum tsam yog ib tug dab los yog ib tug Tshiab hais lus rau nws xwb?" 10 Lawv haj yam sib cav heev zuj zus tuaj, ces tus xab txheeb ntshai tsam lawv muab Paj Lug hlais ua daim, nws thiaj kom nws pab tub rog nqes mus chua Paj Lug ntawm lawv los thiab coj nws rov los nyob hauv lub yeej. 11 Hmo tom qab, Huab Tais tuaj xyuas Paj Lug, thiab hais rau nws tias : "Ua siab loj loj! Koj tau ua tim khawv txog kuv nyob Yes Lus Xas Les lawm, ib yam nkaus li ntawd koj tseem yuav ua tim khawv txog kuv nyob Los Mas thiab."

    NPN 16: 1-2A+5, 7-8, 9-10, 11

    Txais: (1) Tswv Ntuj, thov koj txuag kuv, koj yog kuv chaw tso siab.
    Los : As les lus yas.

    Tswv Ntuj, thov koj txuag kuv, vim kuv tuaj khaub zig koj.
    Kuv hais rau HUAB TAIS tias: "Koj yog kuv tus HUAB TAIS!”
    Huab Tais, kuv lub cuab tam, kuv lub ntim,
    Koj yog tus tuav rawv kuv txoj hmoo.

    Txais: (1) Tswv Ntuj, thov koj txuag kuv, koj yog kuv chaw tso siab.
    Los : As les lus yas.

    Kuv cav lus zoo txog HUAB TAIS uas qhia kuv xav tswv yim,
    Tab yog hmo ntuj kuv siab ntsws tseem qhia kuv.
    Kuv cia HUAB TAIS nyob ntawm kuv xub ntiag tsis tseg,
    muaj nws nyob ntawm kuv sab xis, kuv yuav tsis ntshai.

    Txais: (1) Tswv Ntuj, thov koj txuag kuv, koj yog kuv chaw tso siab.
    Los : As les lus yas.

    Kuv lub siab luag ntxhi, kuv tus plig hom khaj,
    kuv lub cev kuj tau nyob nyab xeeb,
    Vim koj yuav tsis tso kuv tus ntsuj plig
    pov tseg rau ntuj txias teb tsaus.
    Koj tsis kheev kom tus ntseeg koj paub kev puas kev lwj.

    Txais: (1) Tswv Ntuj, thov koj txuag kuv, koj yog kuv chaw tso siab.
    Los : As les lus yas.

    Koj yuav qhia rau kuv txog txoj kev muaj txoj sia,
    txog txoj kev zoo siab puv npo nyob ntawm koj xub ntiag,
    txog txoj kev nplig siab nyob ntawm koj sab xis tas mus li.

    Txais: (1) Tswv Ntuj, thov koj txuag kuv, koj yog kuv chaw tso siab.
    Los : As les lus yas.

    As Les Lus Yas: ZAM 17: 21

    Txais: As les lus yas, as les lus yas.

    Huab Tais hais tias:
    “Leej Txiv, thov kom lawv sawv daws koom ua ib leeg,
    ib yam li koj nyob hauv kuv thiab kuv nyob hauv koj,
    kom ntiaj teb neeg thiaj ntseeg tias yog koj xa kuv tuaj.”

    Txais: As les lus yas, as les lus yas.

    Ntawv Moo Zoo: ZAM 17: 20-26

    Yes Xus tsa muag ntsia saum ntuj, nws thov ntuj li no:
    20 "Kuv tsis thov koj rau cov no xwb, kuv tseem thov koj rau cov uas yuav ntseeg txog kuv vim lawv lo lus thiab, 21 kom lawv sawv daws koom ua ib leeg, ib yam li koj, Leej Txiv, nyob hauv kuv thiab kuv nyob hauv koj, kom lawv nyob hauv wb, ces ntiaj teb neeg thiaj ntseeg tias yog koj xa kuv tuaj. 22 Lub koob meej uas koj muab rau kuv, mas kuv muab rau lawv lawm, kom xwv lawv ua ib leeg xws li wb ua ib leeg. 23 Kuv nyob hauv lawv, koj nyob hauv kuv, lawv thiaj li ua tsheej ib leeg tiag, ces lub qab ntuj neeg thiaj paub tias yog koj xa kuv tuaj, thiab paub tias koj nyiam lawv ib yam li koj nyiam kuv. 24 Txiv, cov uas koj muab rau kuv, kuv nyob qhov twg, mas kuv xav kom lawv tau nrog kuv nyob qhov ntawd thiab, kom lawv pom kuv lub koob meej uas koj muab rau kuv, vim koj tau nyiam kuv, txij thaum tsis tau tsim lub sim ceeb los lawm. 25 Txiv siab ncaj, lub qab ntuj neeg tsis paub koj, tab sis kuv paub koj, thiab cov no kuj paub tias yog koj xa kuv tuaj. 26 Kuv twb ua kom lawv paub koj lub npe lawm. Kuv tseem yuav ua kom lawv paub ntxiv, kom txoj kev nyiam uas koj muab los nyiam kuv, nyob hauv lawv, thiab kom kuv nyob hauv lawv."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 18th May 2018, 7:48 am

    TIM 18 LUB 5 2018

    Hnub Rau Lis Piam Xya Caij Hla Xyoo B Nruab Lis Piam Xyoo II

    Hwm LN Vaj Qhia Zam I

    Zaj Nyeem Ib: HAUJ LWM 25: 13-21


    13 Ob peb hnub tom qab, tus vaj As Nqis Pas thiab Npes Les Nis nkawd tuaj txog Xes Ntxas Les, nkawd mus xyuas Fes Tus. 14 Vim tias nkawd yuav nyob ntau hnub, ces Fes Tus thiaj piav txog Paj Lug rau tus vaj hais tias : "Nyob ntawm no, muaj ib tug neeg uas Fes Liv muab nws kaw rau hauv tsev loj faj cia. 15 Thaum kuv mus Yes Lus Xas Les, cov leej choj thiab cov txwj laus Yus Das tuaj liam nws rau kuv, lawv kom kuv muab txim rau nws. 16 Kuv teb lawv tias cov Los Mas tsis muaj cai yuav cia li muab ib tus neeg tso rau hauv cov neeg liam nws txhais tes, yuav tsum xub cia nws nrog lawv sib hais tim ntsej tim muag hais tso, thiab yuav cia nws tau kev hais lus daws lub txim uas luag liam rau nws tso. 17 Ces thaum cov Yus Das tuaj sib sau nyob ntawm no, kuv tsis ncua sij hawm li, tag kis tom qab kiag, kuv mus zaum hauv lub tsev txiav txim, kuv kom lawv coj tus neeg los. 18 Cov neeg tuaj sawv ncig nws liam rau nws; lawv liam tsis tau ib qho phem raws li kuv xav li. 19 Lawv tsuas nrog nws muaj lus tsis sib haum hais txog lawv txoj kev cai teev ntuj, thiab hais txog ib tug Yes Xus uas tuag lawm, tab sis Paj Lug hais tias nws tseem muaj txoj sia nyob xwb. 20 Kuv tsis pom qab ua dab tsi rau ib zag sib cav li ntawd, kuv thiaj nug Paj Lug saib nws puas yeem mus pem Yes Lus Xas Les, ces mam txiav txim txog tej ntawd rau nws nyob ped. 21 Tiam sis Paj Lug tau thov kom kuv muab nws kaw tos txog thaum nws mus rau tus Tuam Vaj txiav txim rau nws. Kuv thiaj li ceeb toom cia Paj Lug nyob ntawm no mus txog hnub kuv xa nws mus rau Xes Ntxas.”

    NPN 103: 1-2, 11-12, 19-20AB


    Txais: (19a) Huab Tais tsa nws lus theej kiab nyob txheej ntuj saud.
    los: As les lus yas.

    Kuv tus ntsuj plig, koj cav txog HUAB TAIS;
    tas nrho kuv tus kheej, koj cav txog nws lub npe ntshiab.
    Kuv tus ntsuj plig, koj cav txog HUAB TAIS,
    koj tsis txhob hnov qab nws tej kev zoo ib qho li.

    Txais: (19a) Huab Tais tsa nws lus theej kiab nyob txheej ntuj saud.
    los: As les lus yas.

    Siab tshaj npaum li lub ntuj nyob rau saum ntiaj teb,
    nws kuj hlub cov neeg uas hwm nws tshaj npaum li ntawd.
    Deb npaum li sab hnub tuaj nyob deb sab hnub poob,
    nws kuj tau muab peb tej txhaum pov tseg
    deb ntawm peb npaum li ntawd .

    Txais: (19a) Huab Tais tsa nws lus theej kiab nyob txheej ntuj saud.
    los: As les lus yas.

    HUAB TAIS tsa nws lub theej kiab nyob txheej ntuj saud,
    nws lub hwj chim ua vaj kav tas txhua tsav txhua yam.
    Nej uas yog nws cov Tshiab, nej cav lus zoo txog HUAB TAIS,
    nej uas yog cov muaj zog loj thiab nej ua raws li nws lo lus.

    Txais: (19a) Huab Tais tsa nws lus theej kiab nyob txheej ntuj saud.
    los: As les lus yas.

    As Les Lus Yas: ZAM 14: 26

    Txais: As les lus yas, as les lus yas.

    Leej Ntuj Plig Ntshiab yuav qhia tas ib puas tsav yam rau nej,
    thiab yuav pab nej rov nco txog tas txhua yam uas kuv tau hais rau nej.

    Txais: As les lus yas, as les lus yas.

    Ntawv Moo Zoo: ZAM 21: 15-19

    15 Thaum lawv noj tshais tas, Yes Xus hais rau Xis Moos Pob Zeb tias : "Xis Moos, Zam tub, koj puas nyiam kuv dua lawv cov ntawd ?" Pob Zeb hais rau Yes Xus tias : "Huab Tais, koj yeej paub tias kuv nyiam koj." Yes Xus hais rau Pob Zeb tias : "Koj coj kuv cov yaj mus nog zaub." 16 Yes Xus rov hais zaum ob tias : "Xis Moos, Zam tub, koj puas nyiam kuv ?" Pob Zeb hais rau Yes Xus tias : "Huab Tais, koj yeej paub tias kuv nyiam koj." Yes Xus hais rau nws tias : "Koj ua tus saib kuv cov yaj mog." 17 Yes Xus tseem rov hais dua zaum peb rau Pob Zeb tias : "Xis Moos, Zam tub, koj puas nyiam kuv tiag ?” Pob Zeb tu siab rau qhov Yes Xus hais rau nws zaum peb tias : "Koj puas nyiam kuv tiag ?" Pob Zeb hais rau Yes Xus tias : "Huab Tais, koj paub tas ib puas tsav yam, koj yeej paub tias kuv nyiam koj tiag." Yes Xus hais rau Pob Zeb tias : "Koj coj kuv cov yaj mus nog zaub mog. 18 Kuv hais qhov muaj tseeb tiag rau koj; thaum koj tseem hluas, koj muab koj siv koj sia koj, koj xav mus qhov twg los koj mus koj. Tiam sis thaum koj laus lawm, koj yuav tsa tes cia lwm tus kho siv rau koj sia thiab coj koj mus qhov uas koj tsis xav mus." 19 Yes Xus hais qhov ntawd qhia tias Pob Zeb yuav tuag zoo li cas kom Tswv Ntuj nto koob meej. Yes Xus hais li tas, nws hais rau Pob Zeb tias : "Koj raws kuv mus."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 18th May 2018, 8:31 am

    TIM 19 LUB 5 HLIS 2018

    Hnub Xya Lis Piam Xya Caij Hla Xyoo B Nruab Lis Piam Xyoo II

    Zaj Nyeem Ib: HAUJ LWM 28: 16-20, 30-31


    16 Thaum peb tuaj txog hauv Los Mas lawm, mas lawv cia Paj Lug nws nyob nws ib leeg nrog tus tub rog uas zov nws xwb. 17 Peb hnub tom qab, Paj Lug nqua hu cov thawj coj Yus Das hauv lub nroog tuaj sib txoos ua ke. Thaum lawv tuaj txog tas, Paj Lug hais rau lawv tias : "Cov kwv tij, kuv tsis tau ua dab tsi txhaum peb haiv neeg, los txhaum peb cov yawg koob tej kev cai, tsis kav lawv ntes kuv nyob Yes Lus Xas Les, thiab lawv muab kuv rau cov Los Mas. 18 Thaum cov Los Mas tshuaj lus tas, lawv xav tso kuv mus, vim kuv tsis tau ua dab tsi txaus ris lub txim tuag. 19 Tab sis cov Yus Das tsis kam tso, mas kuv thiaj tau hu txog Xes Ntxas ua tus txiav txim rau kuv, tsis yog vim kuv muaj dab tsi xav liam rau kuv haiv neeg. 20 Vim li no, mas kuv thiaj xav ntsib nej thiab hais rau nej paub tias, yog vim His Xas Lais txoj kev tso siab, mas kuv thiaj li coj cov saw khi kuv li no."
    30 Paj Lug nyob tau ob xyoos nkaus hauv nws lub tsev no. Nws tos txais cov neeg uas tuaj xyuas nws tas huv tib si. 31 Nws tshaj txog Tswv Ntuj lub Ceeb Tsheej, thiab qhia txog Huab Tais Yes Xus Pleev, nws tso siab lug qhia, tsis muaj leej twg txwv nws li.

    NPN 11: 4, 5+7

    Txais: (7b) Huab Tais, cov neeg siab ncaj yuav ntsia ntsoov koj lub ntsej muag.
    los: As les lus yas.

    HUAB TAIS nyob hauv nws lub tuam tsev ntshiab;
    HUAB TAIS lub theej kiab nyob saum ntuj.
    Nws qhov muag saib ntsoov,
    nws ntsia tsom ntsoov rau ntiaj teb neeg.

    Txais: (7b) Huab Tais, cov neeg siab ncaj yuav ntsia ntsoov koj lub ntsej muag.
    los: As les lus yas.

    HUAB TAIS nrhiav tus neeg ncaj thiab tus neeg phem,
    nws ntxub tus nyiam kev sib ntaus sib tua.
    Vim HUAB TAIS siab ncaj, nws nyiam cov hauj lwm ncaj ncees,
    cov neeg siab ncaj yuav ntsia ntsoov HUAB TAIS ntsej muag

    Txais: (7b) Huab Tais, cov neeg siab ncaj yuav ntsia ntsoov koj lub ntsej muag.
    los: As les lus yas.

    As Les Lus Yas: ZAM 16: 7, 13


    Txais: As les lus yas, as les lus yas.

    Huab Tais hais tias:
    Kuv yuav xa Leej Tswv Yim qhia qhov tseeb tuaj rau nej;
    Nws yuav coj nej mus txog txhua yam tseeb.

    Txais: As les lus yas, as les lus yas.

    Ntawv Moo Zoo: ZAM 21: 20-25

    20 Pob Zeb tig ntsia tom qab, nws pom tus thwj tim uas Yes Xus nyiam lawv nkawd qab. Yog tus uas thaum lawv noj hmo, nws tig mus pheeb rau ntawm Yes Xus hauv siab, thiab nug tias : 'Huab Tais, tus yuav muab koj rau luag yog leej twg?'. 21 Pob Zeb pom tus thwj tim ntawd, Pob Zeb hais rau Yes Xus tias : "Huab Tais, tus ntawd ned ?" 22 Yes Xus hais rau Pob Zeb tias : "Yog kuv xav kom nws nyob mus txog hnub kuv rov los kuj xij, koj quav ntsej dab tsi txog? Hos koj, mas koj raws kuv mus." 23 Lo lus no ncha rau hauv cov kwv tij tias : 'Tus thwj tim ntawd yuav tsis tuag.' Tab sis Yes Xus tsis tau hais rau Pob Zeb tias : 'Nws yuav tsis tuag', Yes Xus tsuas tau hais tias : 'Yog kuv xav kom nws nyob txog hnub kuv rov los, kuj xij, koj quav ntsej dab tsi txog?' 24 Yog tus thwj tim ntawd ua tim khawv txog tej no thiab yog nws muab sau cia. Peb paub tias nws cov lus ua pov thawj muaj tseeb. 25 Tseem tshuav ntau yam kawg uas Yes Xus tau ua, yog yuav sau ib yam zuj zus tas huv tib si, mas kuv xav tias lub ntiaj teb yuav ntim tsis tas cov phau ntawv sau ntawd li.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 21st May 2018, 1:11 am

    TIM      21      LUB      5      HLIS      2018

    Hnub Ob Lis Piam Xya Nruab Xyoo B Nruab Lis Piam Xyoo II

    Hwm tus Nkauj Nkauj Xwb Tsim Txiaj Mab Liab ua lub Koom Txoos Leej Niam
    (yog ib lub hmoov tshiab Vaj Qhia Francis kom pib muaj xyoo no xwb).  

    Zaj Nyeem Ib:       HP  3:   9-15, 20

    Thaum As Das thiab Es Vas nkawd noj lub txiv tas,
    9 HUAB TAIS Tswv Ntuj hu tus txiv neej hais tias : "Koj nyob qhov twg ?" 10 Tus txiv neej teb tias : "Kuv hnov koj nyob hauv lub vaj, tiam sis kuv ntshai vim kuv liab qab, ces kuv thiaj khiav tsiv nraim lawm." 11 Tswv Ntuj hais ntxiv tias : "Leej twg qhia koj tias koj liab qab ? Yog koj noj lub txiv uas kuv txwv tsis pub koj noj lawm puas yog ?" 12 Tus txiv neej teb tias: "Yog tus poj niam uas koj tso nrog kuv nyob, nws muab lub txiv ntawm tsob ntoo rau kuv, ces kuv thiaj noj !" 13 HUAB TAIS Tswv Ntuj hais rau tus poj niam tias : "Koj ua dab tsi li ntawd ?" Tus poj niam teb tias : "Yog niag nab ntxias kuv, kuv thiaj noj." 14 Ces HUAB TAIS Tswv Ntuj hais rau tus nab hais tias : "Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej. 15 Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws."
    20 Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam.

    Los:      HL  1:  12-14

    Thaum Yes Xus nce mus saum ntuj lawm,
    12 cov thwj tim nqes pem lub roob uas hu ua "Roob Txiv Ntoo Roj" rov mus rau Yes Lus Xas Les. Lub roob ntawd nyob ze ntawm Yes Lus Xas Les li ib ncua kev uas neeg taug kam hnub Xas Npas Tos. 13 Thaum lawv rov los txog, lawv nce mus saum chav tsev siab uas yog qhov chaw lawv nyob : muaj Pob Zeb thiab Zam, Yas Kos thiab As Nres, Fis Lis Pos thiab Tos Mas, Npas Tos Los Mas Yos thiab Mas Tais, Yas Kos uas yog As Fas Yos tub, Xis Moos Siab Kub, thiab Yus Das uas yog Yas Kos tub. 14 Tas lawv cov no sawv daws koom ib lub siab kub siab teev ntuj; muaj ob peb tug poj niam nrog lawv, thiab kuj muaj Mab Liab uas yog Yes Xus niam, thiab muaj Yes Xus cov kwv tij thiab.

    NPN        87:   1-2, 3+5, 6-7

    Txais:   (3) Tswv Ntuj lub tsheej, lawv hais tej yam nto koob meej qhuas txog koj!

    Nws lub taw ntsa txhos nyob saum cov roob ntshiab,  
    Huab Tais nyiam Xis Yoos cov rooj vag            
    heev dua Yas Kos lwm cov tsev tas huv si.        

    Txais:   (3) Tswv Ntuj lub tsheej, lawv hais tej yam nto koob meej qhuas txog koj!

    Tswv Ntuj lub tsheej, lawv hais tej yam zoo kawg qhuas txog koj!    
    Lawv yuav hais txog Xis Yoos tias:    
    “Tus no thiab txhua tus neeg yug nyob hauv nws.”    
    Tus uas txhim tsa Xis Yoos yog tus Huab Tais nyob siab.    

    Txais:   (3) Tswv Ntuj lub tsheej, lawv hais tej yam nto koob meej qhuas txog koj!

    HUAB TAIS yuav sau rau hauv phau ntawv txheeb npe txog
    cov haiv neeg tias: "Tus neeg no yug los nyob ntawd."
    Nws sau cov vaj txheeb thiab cov me nyuam lub npe :
    "Sawv daws puav leej nyob txawm hauv koj."

    Txais:   (3) Tswv Ntuj lub tsheej, lawv hais tej yam nto koob meej qhuas txog koj!

    As Les Lus Yas  

    Txais:   As les lus yas, as les lus yas.    

    Nkauj Tsim Txiaj, koj yuav zoo siab, koj yug peb tus Huab Tai;
    lub Koom Txoos Leej Niam tus tau txoj hmoov zoo,
    koj ua kom peb sov siab nyob hauv
    koj leej Tub Yes Xus Pleev lub Tswv Yim.
     
    O happy Virgin, you gave birth to the Lord;
    O blessed mother of the Church,
    you warm our hearts with the Spirit of your Son Jesus Christ.

    Txais:   As les lus yas, as les lus yas.

    Ntawv Moo Zoo:       ZAM  19:   25-34

    25 Cov sawv nyob ze ntawm Yes Xus tus ntoo cuam yog nws niam thiab nws niam tus niam hluas Mab Liab uas yog Khos Pas poj niam, thiab Mab Liab Mas Ntas Las. 26 Yes Xus pom nws niam, thiab pom tus thwj tim uas nws nyiam sawv nyob ze, ces nws hais rau nws niam tias : "Niad, tus ntawd yog koj tus tub." 27 Thiab Yes Xus hais rau tus thwj tim tias : "Tus ntawd yog koj niam." Txij lub sij hawm ntawd los, tus thwj tim coj Mab Liab mus nyob hauv nws tsev.
    28 Ua li ntawd tas, Yes Xus paub tias zaum no ib puas tsav yam tiav tas lawm; kom xwv muaj raws li ntawv sau tseg, nws hais tias : "Kuv nqhis dej." 29 Muaj ib hub kua qaub puv nkaus nyob ntawd. Lawv muab ib thooj rwb tub kua qaub chob rau ib tug ntsis pas nroj his xaus cev mus rau Yes Xus qhov ncauj. 30 Thaum Yes Xus haus qhov kua qaub tas, nws hais tias : "Ib puas tsav yam tiav tas lawm." Ces Yes Xus nyo taub hau, nws tso nws tus ntsuj plig tawm mus.
    31 Hnub ntawd yog Hnub Npaj, mas cov Yus Das tsis xav cia cov tuag lub cev dai saum ntoo cuam hnub Xas Npas Tos, vim tias hnub Xas Npas Tos ntawd yog ib lub hnub nyoog loj. Cov Yus Das thov Pis Las Tos kom muab cov neeg dai saum ntoo cuam ob sab ceg lov thiab muab lawv lub cev txo nqes los. 32 Cov tub rog thiaj tuaj muab thawj tug ob sab ceg lov, thiab muab lwm tus uas nrog nws dai saum ntoo cuam ob sab ceg lov. 33 Thaum lawv los txog ntawm Yes Xus, lawv pom nws twb tuag lawm, lawv tsis muab nws ob sab ceg lov, 34 tab sis ib tug tub rog xuas nws rab hmuv hno Yes Xus phab tav; tam sis ntawd ib co ntshav thiab ib co dej tawm los.


    Last edited by Mim on 22nd May 2018, 10:10 am; edited 1 time in total
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 21st May 2018, 8:45 am

    TIM 22 LUB 5 HLIS 2018

    Hnub Peb Lis Piam Xya Nruab Xyoo B Nruab Lis Piam Xyoo II

    Hwm LN Rita nyob Cascia

    Zaj Nyeem Ib: YAS KOS 4: 1-10


    Cov kwv tij zoo nyiad,
    1 Tej kev sib ntaus sib tua thiab tej lus sib cav sib ceg hnyav nyob hauv nej yog txhawv qhov twg los ? Puas yog txhawv ntawm tej kev ntshaw uas sib tawm tsam tsis tseg nyob hauv nej lub siab los los tsis yog? 2 Nej ntshaw tej yam, tab sis nej tsis muaj; nej tua neeg, nej lub siab ntshaw rwg, tiam sis nej muab tsis tau los; ces nej sib ntaus sib tawm tsam ua tsov ua rog. Tos nej tsis muaj yam nej ntshaw los yog vim nej tsis teev ntuj thov yam ntawd. 3 Yog nej teev ntuj thov tab sis nej tsis tau txais, yog vim nej tsis thov kom yog, nej tsuas thov kom nej tau siv los ua rau nej lub cev txaus yees xwb. 4 Neeg ntxeev siab nyiam tham hluas! nej puas paub tias kev nyiam lub ntiaj teb yog kev ntxub Tswv Ntuj ? Tus twg xav ua ntiaj teb neeg tus phooj ywg, mas nws rov tsa nws ua Tswv Ntuj tus yeeb ncuab. 5 Nej puas xav tias Ntawv Ntshiab lam hais lo lus no xwb: ‘Nws khib txog lub tswv yim uas nws tso tuaj nyob hauv peb’ ? 6 Tiam sis Tswv Ntuj tseem pub ib lub txiaj ntsim loj tshaj rau peb; Ntawv thiaj hais tias : ‘Tswv Ntuj tiv cov neeg muab hlob, nws pub nws lub txiaj ntsim rau cov ua neeg me.’ 7 Li ntawd, nej kav tsij zwm rau Tswv Ntuj, nej tiv dab phem, ces nws yuav khiav mus deb ntawm nej. 8 Nej txav los ze Tswv Ntuj ces Tswv Ntuj yuav txav los ze nej. Nej cov neeg txhaum, kav tsij ntxuav nej txhais tes ; nej cov neeg muaj ob lub siab, kav tsij ua kom nej lub siab huv tuaj. 9 Nej cia li lees nej qhov phem, nej yuav tu siab, nej yuav quaj. Nej cia nej tej suab luag hloov ua suab quaj tu siab, cia nej tej kev lom zem hloov ua kev ntshaus kev mluas. 10 Nej txo nej kom qis nyob ntawm Huab Tais xub ntiag, ces nws yuav tsa nej siab.

    NPN 55: 7-8, 9-10A, 10B-11A, 23

    Txais: (23a) Muab koj lub nra pov rau HUAB TAIS, ces nws yuav pab koj.

    Kuv thiaj hais tias : “Kheev lam kuv muaj tis li nquab,
    Kuv yuav ya plho khiav mus, kuv yuav tau nyob kaj siab.
    Kuv yuav khiav mus kom deb deb,
    yuav mus ua tsev nyob hauv teb chaws suab puam.”

    Txais: (23a) Muab koj lub nra pov rau HUAB TAIS, ces nws yuav pab koj.

    Kuv yuav nrhiav tau chaw nkaum sai,
    kom txhob raug nag xob nag cua nplawm.
    HUAB TAIS, koj rhuav lawv kom lawv
    hais lus txhob sib to taub txhob sib haum.

    Txais: (23a) Muab koj lub nra pov rau HUAB TAIS, ces nws yuav pab koj.

    Kuv pom muaj kev ua nruj ua tsiv
    thiab kev tsis sib haum nyob hauv lub tsheej.
    Nruab hnub hmo ntuj, lawv sib tos
    sib nyas ncig tej ntsa tsheej:

    Txais: (23a) Muab koj lub nra pov rau HUAB TAIS, ces nws yuav pab koj.

    Muab koj lub nra pov rau HUAB TAIS,
    Ces nws yuav txheem koj pab koj;
    nws yuav tsis cia tus neeg ncaj ntog ib zaug li.

    Txais: (23a) Muab koj lub nra pov rau HUAB TAIS, ces nws yuav txheem koj.

    As Les Lus Yas: NLT 6: 14

    Txais: As les lus yas, as les lus yas.

    Kom kuv tsis txhob khav ib zaug li, yog kuv yuav khav
    tsuas yog khav nyob hauv Huab Tais Yes Xus Pleev tus ntoo cuam,
    vim nws muab lub ntiaj teb dai saum ntoo cuam rau saum kuv,
    thiab muab kuv dai saum ntoo cuam rau saum lub ntiaj teb.

    Txais: As les lus yas, as les lus yas.

    Ntawv Moo Zoo: MK 9: 30-37

    30 Yes Xus thiab nws cov thwj tim tawm qhov chaw ntawd mus, lawv mus hla lub xeev Nkas Lis Lais, tiam sis Yes Xus tsis xav kom muaj neeg paub. 31 Vim nws xav qhuab qhia nws cov thwj tim, thiab nws hais rau lawvtias : "Neeg Leej Tub yuav raug muab muag rau hauv tsoom neeg txhais tes, lawv yuav muab nws tua. Thaum nws tuag tas tau peb hnub lawm, nws yuav sawv rov los." 32 Cov thwj tim tsis to taub lo lus ntawd li, tab sis lawv ntshai nug Yes Xus.
    33 Ces lawv mus rau Kas Fas Naus. Thaum lawv mus txog tsev, Yes Xus nug lawv tias : "Nej sib cav txog dab tsi nyob tom kev ?" 34 Lawv nyob ntsiag to, vim nyob tom kev, lawv sib cav tias leej twg yog tus loj dua cov. 35 Yes Xus zaum, ces nws hu Pab Kaum Ob los, nws hais rau lawv tias : "Leej twg xav ua tus thawj, mas nws yuav ua tus tuaj tom sawv daws qab, thiab yuav ua sawv daws tus tub txib." 36 Ces nws coj ib tug me nyuam los sawv hauv nruab nrab lawv, nws puag tus me nyuam, ces nws hais rau lawv tias : 37 "Leej twg txais ib tug me nyuam yaus zoo li tus no, vim kuv lub npe, yog nws txais kuv. Thiab leej twg txais kuv, mas tsis yog nws txais kuv, yog txais Tus xa kuv tuaj."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 22nd May 2018, 10:03 am

    TIM 23 LUB 5 HLIS 2018

    Hnub Plaub Lis Piam Xya Nruab Xyoo B Nruab Lis Piam Xyoo II

    Zaj Nyeem Ib: YAS KOS 4: 13-17


    Cov kwv tij zoo nyiad,
    13 nej cov uas nej hais tias : ‘Hnub no los tag kis, peb yuav mus tom lub tsheej no, peb yuav mus nyob ntawd ib xyoos ua lag ua luam, ces peb yuav tau nyiaj ntau,’ 14 nej twb tsis paub tias tag kis nej lub neej yuav zoo li cas; nej tsuas zoo li ib co pa dej uas tshwm los nyob ib pliag xwb yuav yaj tas mus. 15 Phim nej yuav tsum hais tias : ‘Yog Huab Tais pom zoo, mas peb tseem yuav muaj txoj sia nyob, ces peb yuav ua qhov no los qhov tod.’ 16 Tiam sis nej yeem ua neeg khav theeb nyob hauv nej txoj kev muab hlob. Txoj kev khav theeb no yog ib yam phem. 17 Li ntawd, leej twg paub tias qhov twg yog qhov zoo, tab sis nws tsis ua, mas nws ua txhaum.

    NPN 49: 2-3, 6-7, 8-10, 11

    Txais: (MT 5: 3) Cov pluag hauv nruab siab tau txoj hmoov zoo,
    ntuj ceeb tsheej yog lawv tug.

    Cov haiv neeg, nej sawv daws mloog qhov no,
    tas tsoom neeg nyob qab ntuj khwb, nej tig pob ntseg mloog,
    tsis hais laj mej pej xeem los neeg muaj koob nto npe,
    tsis hais cov muaj los cov pluag.

    Txais: (MT 5: 3) Cov pluag hauv nruab siab tau txoj hmoov zoo,
    ntuj ceeb tsheej yog lawv tug.

    Thaum tsiv hnub tsiv nyoog tuaj, vim li cas kuv thiaj ntshai
    cov neeg nkhaus txoj kev phem nyob puag ncig kuv?
    Lawv tso siab rau lawv peev nyiaj txiag,
    lawv muaj plhus ntxiag vim lawv nplua nuj loj kawg nkaus.

    Txais: (MT 5: 3) Cov pluag hauv nruab siab tau txoj hmoov zoo,
    ntuj ceeb tsheej yog lawv tug.

    Tsiv kav ib tug neeg yuav rov txhiv nws tus kheej tsis tau,
    nws yuav rov them tsis tau nws tus nqi rau Tswv Ntuj li.
    Tus nqi txhiv ib tug neeg txoj sia hnyav dhau,
    nws yuav muaj tsis txaus them ib zaug li
    Kom nws thiaj muaj sia mus li tsis txhob pom lub qhov tuag.

    Txais: (MT 5: 3) Cov pluag hauv nruab siab tau txoj hmoov zoo,
    ntuj ceeb tsheej yog lawv tug.

    Nws yuav pom tias cov neeg thoob tsib txawj tuag,
    ib yam li cov neeg vwm thiab cov neeg ruam los txawj tuag,
    lawv tso lawv tej nyiaj txiag rau lwm cov neeg yuav.

    Txais: (MT 5: 3) Cov pluag hauv nruab siab tau txoj hmoov zoo,
    ntuj ceeb tsheej yog lawv tug.

    As Les Lus Yas: ZAM 14: 6


    Txais: As les lus yas, as les lus yas.

    Huab Tais hais tias : "Kuv yog Txoj Kev, yog Qhov Tseeb, thiab yog Txoj Sia.
    Tsis muaj leej twg mus cuag Leej Txiv tau, yog nws tsis taug ntawm kuv mus.

    Txais: As les lus yas, as les lus yas.

    Ntawv Moo Zoo: MK 9: 38-40

    38 Zam hais rau Yes Xus tias : “Xib Hwb, peb pom ib tug neeg hu txog koj lub npe los ntiab dab, ces peb hais kom nws tsum, vim nws tsis caum peb.” 39 Tab sis Yes Xus hais tias : “Nej txhob txwv nws, vim tsis muaj ib tug neeg hu txog kuv lub npe los ua hwj huam thiab ho ib txhij hais lus phem txog kuv. 40 Leej twg tsis tiv peb, mas yog nws tuaj peb tog.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 23rd May 2018, 11:57 am

    TIM 24 LUB 5 HLIS 2018

    Hnub Tsib Lis Piam Xya Nruab Xyoo B Nruab Lis Piam Xyoo II

    Zaj Nyeem Ib: YAS KOS 5: 1-6


    1 Nyem no, nej cov nplua nuj, nej kav tsij quaj kav tsij nyiav txog tej kev txom nyem uas yuav tuaj raug nej. 2 Nej tej kev nplua nuj lwj tas, nej tej tsoos tsho raug kab muab txiav tu tas. 3 Nej tej kub thiab tej nyiaj xeb tas, cov xeb ntawd yuav ua tim khawv txiav txim rau nej, thiab yuav tom nej tej nqaij zoo li yog hluav taws hlawv. Nej khaws nyiaj cia rau hnub kawg. 4 Nej mloog saib, cov nqe zog uas nej tsis them rau cov tub zog sau nej tej qoob hauv nej tej teb, lawv quaj, thiab cov tub zog lub suab quaj qw nce mus txog tus Huab Tais kav tsoom hnub qub lub pob ntseg lawm. 5 Nyob ntiaj teb no, nej ua neej noj tsis txhawj haus tsis txuag thiab muaj kev lom zem xauv npo, nej tau txav nej lub siab kom rog rau lub caij luag yuav cab nej mus tua. 6 Nej tau muab txim rau nws, nej tau muab tus neeg tsis txhaum tua, nws tsis cav nej ib los li.

    NPN 49: 14-15AB, 15CD-16, 17-18, 19-20

    Txais: (MT 5: 3) Cov pluag hauv nruab siab tau txoj hmoov zoo,
    ntuj lub ceeb tsheej yog lawv tug!

    Cov uas tso siab rau lawv tus kheej yuav mus zoo li ntawd,
    lawv yuav xaus li ntawd vim lawv zoo siab rau lawv txoj hmoo.
    Lawv zoo li ib pab yaj raug coj mus kaw hauv ntuj txias teb tsaus;
    Kev tuag yuav ua tswv coj lawv mus noj zaub,
    cov neeg ncaj yuav ua tswv kav lawv.

    Txais: (MT 5: 3) Cov pluag hauv nruab siab tau hmoov zoo,
    ntuj ceeb tsheej yog lawv tug!

    Thaum kaj ntug lawv lub ntsej muag yuav ploj mus,
    Ntuj txias teb tsaus yog lawv chaw nyob.
    Tab sis, Tswv Ntuj yuav txhiv kuv txoj sia ntawm
    ntuj txias teb tsaus lub hwj huam, nws yuav txais kuv.

    Txais: (MT 5: 3) Cov pluag hauv nruab siab tau hmoov zoo,
    ntuj ceeb tsheej yog lawv tug!

    Koj txhob txhawj thaum ib tug neeg nplua nuj tuaj
    thiab nws tsev neeg nto koob meej tuaj;
    Vim hnub nws tuag, nws nqa tsis tau dab tsi li,
    nws lub koob meej kuj yuav caum tsis tau nws mus.

    Txais: (MT 5: 3) Cov pluag hauv nruab siab tau hmoov zoo,
    ntuj ceeb tsheej yog lawv tug!

    Thaum ua neej nyob, nws rov zoo siab rau nws tau hmoov zoo tias:
    "Luag yuav qhuas koj, vim koj ua tau txhua yam zoo rau koj! "
    Nws twb yuav mus cuag nws cov niam cov txiv hauv kev tuag,
    lawv yuav tsis pom lub hnub ci ib zaug ntxiv.

    Txais: (MT 5: 3) Cov pluag hauv nruab siab tau hmoov zoo,
    ntuj ceeb tsheej yog lawv tug!

    As Les Lus Yas: 1 TXLN 2: 13

    Txais: As les lus yas, as les lus yas.

    Nej txais Tswv Ntuj Lo Lus, tsis txhob txais zoo li yog neeg lo lus xwb,
    nej yuav txais raws li qhov tseeb uas yeej yog Tswv Ntuj Lo Lus tiag.

    Txais: As les lus yas, as les lus yas.

    Ntawv Moo Zoo: MK 9: 41-50

    Yes Xus hais rau nws cov thwj tim tias:
    41 "Yog leej twg muab ib khob dej rau nej haus, vim nej yog Leej Pleev tug, mas kuv hais tseeb rau nej, tus ntawd yuav txais nws qhov koob haum.” 42 Yog leej twg coj ib tug neeg me li no uas ntseeg txog kuv mus ua txhaum, mas txhiaj khoov cia luag muab ib lub zeb luj mus dai ntawm nws caj dab, thiab muab nws pov rau hauv dej ntuj. 43 Yog koj txhais tes coj koj mus ua txhaum, muab txiav pov tseg : txhiaj khoov koj tu ib sab tes mus hauv Txoj Sia, zoo dua koj muaj ob sab tes mus hauv dab phem teb, mus hauv cov hluav taws tsis txawj tuag. [44]. 45 Yog koj txhais taw coj koj mus ua txhaum, muab txiav pov tseg : txhiaj khoov koj tu taw mus hauv Txoj Sia, zoo dua muaj ob txhais taw, tab sis koj poob hauv dab phem teb [46]. 47 Yog koj lub qhov muag coj koj mus ua txhaum, muab kaus pov tseg : txhiaj khoov koj dig ib sab qhov muag mus hauv Tswv Ntuj lub Ceeb Tsheej, zoo dua koj muaj ob sab qhov muag, tab sis koj poob hauv dab phem teb, 48 hauv lub teb chaws uas lawv cov kas tsis txawj tuag, thiab hluav taws tsis txawj kug. 49 Hluav taws yuav ua kom txhua leej txhua tus qab ntsev. 50 Ntsev yog ib yam qab, tab sis, yog ntsev tsuag lawm, yuav muab dab tsi las kom ntsev daw li qub? Nej yuav ua kom muaj ntsev nyob hauv nej, thiab nej ib leeg yuav nrog ib leeg nyob thaj yeeb.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2291
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 24th May 2018, 10:40 am

    TIM 25 LUB 5 HLIS 2018

    Hnub Rau Lis Piam Xya Nruab Xyoo B Nruab Lis Piam Xyoo II

    Hwm LN Bede the Venerable, LN Gregory VII, LN Mary Magdalene de Pazzi

    Zaj Nyeem Ib: Yas Kos 5: 9-12


    9 Cov kwv tij, nej tsis txhob ib tug yws txog ib tug, nej thiaj yuav tsis raug txiav txim. Tus txiav txim twb sawv nyob ze ntawm lub rooj vag lawm. 10 Cov kwv tij, nej yuav muab cov Yaj Saub uas tau hais lus nyob hauv Huab Tais lub npe los ua ib tug piv txwv txog kev nyiaj kev txom nyem thiab kev ua siab ntev rau nej xyaum. 11 Muaj tseeb tias peb hu cov neeg uas muaj lub siab nyob ruaj nreb khov kho ua cov tau txoj hmoov zoo. Nej twb tau hnov hais txog tias Yob muaj ib lub siab nyob ruaj nreb khov kho, thiab nej tau pom qhov uas Huab Tais npaj rau nws, vim Huab Tais yog tus muaj lub siab hlub thiab khuv leej neeg. 12 Kuv cov kwv tij e, qhov uas nej yuav xub mob siab rau tshaj cov mas yog nej yuav tsis txhob cog lus twv ntuj los twv teb, los yog muab lwm yam los cog lus kiag li. Thaum nej hais tias ‘yog’, mas yuav tsum ‘yog’ xwb, thaum nej hais tias ‘tsis yog,’ mas yuav tsum ‘tsis yog’ xwb, nej thiaj yuav tsis nrhiav txim rau nej ris.

    NPN 103: 1-2, 3-4, 8-9, 11-12

    Txais: (8a) Huab Tais siab zoo thiab khuv leej neeg.

    Kuv tus plig, koj cia li cav txog HUAB TAIS;
    tas nrho kuv tus kheej, koj cia li cav txog nws lub npe ntshiab.
    Kuv tus plig, koj cia li cav txog HUAB TAISs,
    thiab tsis txhob hnov qab nws tej txiaj ntsim koob hmoov.

    Txais: (8a) Huab Tais siab zoo thiab khuv leej neeg.

    Nws zam tas nrho koj cov txhaum rau koj,
    nws kho tas koj tej mob nkeeg kom zoo.
    Nws txhiv koj txoj sia ntawm kev puas tsuaj puas ntsoog,
    nws muab nws lub siab zoo thiab nws kev hlub rau koj ntoo.

    Txais: (8a) Huab Tais siab zoo thiab khuv leej neeg.

    HUAB TAIS khuv leej thiab hlub neeg,
    nws npau taws qeeb, nws muaj kev hlub puv npo
    Nws tsis cem tsis yws tas mus li,
    nws kuj tsis npau taws tas mus ib txhis.

    Txais: (8a) Huab Tais siab zoo thiab khuv leej neeg.

    Siab npaum li lub ntuj nyob siab tshaj saum ntiaj teb,
    nws kuj hlub cov neeg uas hwm nws tshaj npaum li ntawd.
    Deb npaum li sab hnub tuaj nyob deb sab hnub poob,
    nws kuj muab peb tej txhaum pov tseg deb ntawm peb npaum li ntawd

    Txais: (8a) Huab Tais siab zoo thiab khuv leej neeg.

    As Les Lus Yas: ZAM 17: 17B, 17A

    Txais: As les lus yas, as les lus yas.

    Koj lo lus yog qhov tseeb , Huab Tais,
    thov koj qee peb mus nyob hauv txoj kev tseeb .

    Txais: As les lus yas, as les lus yas.

    Ntawv Moo Zoo: MK 10: 1-12

    1 Yes Xus tso qhov chaw ntawd tseg, nws mus rau xeev Yus Das, thiab mus rau sab dej Yos Las Das tim ub. Rov muaj dua tej pab neeg tuaj mus cuag nws. Nws rov qhia lawv xws li nws ua kam. 2 Cov Fas Lis Xais txav los ze, lawv nug nws tias : "Ib tug txiv neej puas muaj cai yuav nrauj nws poj niam?" Lawv hais li ntawd los sim nws. 3 Yes Xus teb rau lawv tias : "Mais Xes qhia dab tsi rau nej ?" 4 Lawv teb tias : "Mais Xes tso cai kom ua ntawv nrauj tso ces mam li nrauj." 5 Yes Xus teb rau lawv tias : "Yog vim nej lub siab tawv dhau, Mais Xes thiaj sau txoj cai ntawd. 6 Tab sis, txij thaum chiv lub keeb tsim neeg los, Tswv Ntuj tsim nkawd yog txiv neej thiab poj niam. 7 Vim li ntawd, tus txiv neej yuav tso nws niam nws txiv tseg, nws yuav mus nrog nws poj niam, 8 nkawd ob leeg yuav ua ib lub cev nqaij xwb. Ua li mas nkawd tsis yog ob leeg lawm, nkawd yog ib lub cev nqaij lawm xwb. 9 Yog vim li no, mas yam uas Tswv Ntuj muab sau los ua ke, neeg yuav tsis txhob muab cais.” 10 Thaum lawv rov los txog tsev, cov thwj tim rov nug Yes Xus txog qhov ntawd. 11 Ces Yes Xus hais rau lawv tias : "Tus txiv neej twg nrauj nws poj niam ho rov yuav dua lwm tus, mas nws yog ib tug muaj poj niam mus deev hluas, nws ua txhaum rau nws poj niam. 12 Hos tus poj niam twg nrauj nws tus txiv, rov yuav dua lwm tus, mas nws yog ib tug neeg muaj txiv mus deev hluas.”


    Sponsored content

    Re: COV ZAJ NYEEM NRUAB LIS PIAM XYOO II 2017-2018

    Post  Sponsored content


      Current date/time is 19th September 2018, 3:28 am