Lub Koom Txoos caw tag ntiaj teb tuaj mus tsa TVQ Zam Paj Lug 2 ua leej ntshiab

Xyov hmoov dab tsi pub tau ib lub Moo Zoo nrov tuaj txhawb txhim lub Koom Txoos Kav Tos Liv thiab rau peb txhua leej yog nws tub ki nyob txhua lub teb chaws thoob ntiaj teb. Peb paub txoj kev ua Yes Xus cov tub ntxhais txib. Muaj tej tus poj niam thiab tej tus txiv neej ua tau Yes Xus cov tub ntxhais txib tiag. Txiv Vaj Qhia Zam Paj Lug 2, ua Yes Xus ib tug tub txib mloog lus thiab nquag tshaj Yes Xus lub Moo Zoo mus txog plaub ceg kaum ntuj, thoob ntiaj teb. Vim nws tau ib tug mob phem « Parkinson, ua rau nws tshee thiab mob ncus heev » nws thiaj tso ntiaj teb no tseg hnub xiab 2 lub 4 hlis 2005.
Hnub xiab 14 lub 1 hlis ntuj 2011 no, txiv Vaj Qhia Npes Nes Des Tos 16, tso lus npaj tsa TVQ Zam Paj Lug 2 ua leej ntshiab. Yog ib lub txiaj ntsim tuaj ntawm Tswv Ntuj tuaj, loj thiab zoo nkauj kawg li. Txoj cai tsa ib tug leej ntshiab, yuav tsum tau txais Huab Tais Tswv Ntuj lub txiaj ntsim pab. Ua li, Tswv Ntuj tau txhawb TVQ Zam Paj Lug 2 ua hwj huam kho ib tug niam nkauj xwb Fab Kis Marie-Simon-Pierre zoo hlo nws tus mob « Parkinson » hnub xiab 2 lub 6 hli 2005. Cov kws tshuaj saib xyuas tag, tsis muaj leej twg piav tau yog tim li cas. Niam nkauj xwb thiaj paub. Nws tau thov TVQ Zam Paj Lug 2 thov Tswv Ntuj pab rau nws. Vim li ntawd, lub Koom Txoos ib txwm ntseeg cov leej ntshiab tej txiaj ntsim, tej lus koob lus hmoov. Hnub xiab 1 lub 5 hlis 2011 tom ntej no, lub Koom Txoos caw tag ntiaj teb tuaj mus tsa TVQ Zam Paj Lug 2 ua leej ntshiab ( Béatification, thawj qib ).
Peb tsoom Hmoob, leej twg npaj tau txawm peem tuaj mus koom lub Thaj Txi Ntuj tsa TVQ Zam Paj Lug ua leej ntshiab nyob Los Mas, yog ib lub koob hmoov loj kawg nkaus rau tag lub Koom Txoos thiab ntiaj teb neeg tib si.

Le Seigneur Dieu a fait une merveille pour l’Eglise catholique en la personne du Pape Jean-Paul II en le rendant irréprochable de sainteté. Le Vatican a reconnu cette grâce et invite tous les chrétiens du monde entier à la célébration de béatification de Jean-Paul II pour le 1 mai 2011 à la place saint Pierre de Rome. Grâce et louange à notre Dieu.

T.P Cwj Vuam Chiv

Jean Paul II « Santo Subito »



Hnub tim 2 lub 4hlis xam hnub dhau hnub tau 4xyoo nkaus uas Txiv Vaj Qhia Zam paj Lug tau tag sim neej.Tau 6 hnub tom qab, thaum nws lub ntees, tsoom sid thov kom muab nws tsa ua Leej Ntshiab tam sim ntawd. Thaum lub sij hwm ntawd, Txiv Vaj Qhia Npaws Nuas 16 nyuam qhua sawv los tuav lub Koom Txoos ces nws thiaj cog lus rau tsoom sid kom ncua 5 xyoos mam saib xyuas. 18 hnub tom qab, Lub rooj Ncauj Lus tau tso cai qheb ntawv tshawb nrhiav, yog hnub tim 18 lub 6hlis, thaum ib thaj Mis Xas nyob ntawm Tuam tsev teev Ntuj Leej Ntshiab Pob Zeb, nyob Tuaù Ceeb Los Mas. Cov ntawv uas lawv nrhiav tau tag nrho piav txog txoj hauj lwm uas Txiv Vaj Qhia tau ua los muaj 2500 phab. Yuav muab cov ntawv los los tshuaj thiab tshawb xyuas kom meej ua ntej yuav txiav txim siab txais Txiv Vaj Qhia los ua Leej Ntshiab.....Ces hnub no yog Hnub uas lawv nyeem cov 2500 phab ntawv ntawd tag thiab pom tias Txiv Vaj Qhia yog ib tug uas Tswv Ntuj nrog nraim nws, nws thiaj muaj lub peev xwm los thaiv xob thaiv cua, los kem dej kem av...