St. Vincent de Paul ( Hmong Catholic Roman MN)

Qhia txog peb txoj kev ntseeg




Tau muaj li 100 tawm xyoo los lub Tsev Teev Ntuj St. Vincent de Paul
tau tsim los ntawm pab neeg tsiv teb tsaws chaw, uas yog cov Irish Kav
Taus Liv. Tau 10 xyoo los no, lub tsev teev ntuj no kuj tau txais ib
pab neeg tsiv teb tsaws chaw tshiab, yog cov Hmoob.
Niaj hnub no lub tsev teev ntuj no thiaj li yog ib qhov chaw rau cov
Hmoob Kav Taus Liv hauv ob lub nroog no tuaj sib txoos teev ntuj ua ke.
Cov As Mes Lis Kas nrog rau cov Hmoob tuaj koom ua ke teev hawm Tswv
Ntuj hauv lub tsev teev ntuj no kom lawv tau txais Tswv Ntuj txoj kev
hlub rau lawv tus kheej, thiab kom lawv thiaj muab tau txoj kev sib
hlub ntawd rau lwm leej lwm tus mus rau txhua haiv neeg, txhua lub teb
chaw.



Vim li cas neeg thiaj tuaj hauv peb lub koom txoos?


Txhua txhia tus neeg nrhiav txoj kev kaj siab, kev zoo siab. Peb
ntseeg tias muaj Huab Tais Tswv Ntuj tus siab zoo, yog tus tsim peb los
ua neeg. Nws saib xyuas peb thiab pub kev kaj siab rau peb. Txoj kev
kaj siab, kev nyab xeeb yog txhawv ntawm Tswv Ntuj los.
Nyiaj txiag thiab hwj chim yuav muab tsis tau txoj kev nyab xeeb,
kev kaj siab tseeb uas peb ntshaw tas nrho los rau peb. Ntiaj teb tej
khoom ntawd tsuas ua kom peb zoo siab ib ntus xwb yuav ploj mus tas.
Tsuas yog txoj kev peb los nyob ze Tswv Ntuj, tso siab rau Nws xwb,
thiaj yuav ua kom peb to taub txog qhov tseeb ntawm neeg lub neej,
thiab yog muab txoj kev kaj siab rau peb hnub no thiab thiaj yuav kav
mus tas ib txhiab ib txis.



Tus Tswv Ntuj peb teev yog leej twg?


Tswv Ntuj yog tus tsim lub ntuj lub ntiaj teb. Nws tswm sim ua ntej
lub ntuj, lub ntiaj teb, thiab yuav nyob mus li tom qab uas tsis muaj
lub hnub, lub hli thiab cov hnub qub lawm tag. Peb qhov muag tsis pom
Tswv Ntuj, tab sis peb lub tswv yim muaj peev xwm nrhiav tau Tswv Ntuj
nyob hauv lub sim ceeb no thiab nyob hauv peb siab.

Tswv Ntuj xav los nyob hauv peb kom peb thiaj yuav paub nws thiab
tau txais Nws txoj kev hlub. Thaum ub Tswv Ntuj tau tso siv ib cov yaj
saub los tshaj nws tej lus rau cov yawg koob His Xas Lais. Nws tau cog
lus rau peb tias nws yuav cawm peb ntawm peb txoj kev nyuab siab ntxov
plawv hauv lub sim ceeb no, kom peb tau mus nrog nws nyob muaj koob
meej nto moo lug saum Ntuj Ceeb Tsheej. Tswv Ntuj cov lus qhia rau lub
qab ntuj neeg tau muab sau tseg rau hauv phau Ntawv Ntshiab (Bible).



Ntawv Ntshiab (Bible) qhia txog dab tsi rau peb?


Ntawv Ntshiab (Bible) qhia peb tias tsuas muaj ib tug Tswv Ntuj xwb.
Nws yog tus tsim lub ntuj, lub ntiaj teb, tsim nroj tsuag xyoob ntoo
thiab tsiaj txhu. Tsis tas li ntawd nws tseem tsim kom muaj cov dab
ntuj thiab tib neeg. Tswv Ntuj tsim cov dab ntuj thiab neeg kom los hwm
Nws, tab si ib co dab ntuj thiab tib neeg tsis mloog Nws lus. Txoj kev
tsis mloog Tswv Ntuj lus yog ib txog kev txhaum.

Tus thawj dab ntuj uas tsis mloog Tswv Ntuj lus, yog tus muaj lub
npe tias Lucifer, Xas Tas, los yog dab phem. Dab phem nrhiav kev ntxias
neeg kom txhob mloog Tswv Ntuj lus, thiab kom neeg nrhiav ntiaj teb
txoj kev lom zem.
Dab phem tsis muaj lub hwj chim muab kev txhaum rau neeg. Vim tias
nws yog ib tug uas Tswv Ntuj tsim los xwb. Dab phem tsuas muab qhov
cuav los ntxia dag kom neeg ua txhaum kom ncaim mus deb ntawm Tswv
Ntuj. Yog vim li no, luag thiaj hu dab phem ua lub hauv paus ntawm txoj
kev ntxia dag.
Txoj kev ua txhaum yuav coj txiab mob txiab nkeeg, kev tuag, kev
tsov rog thiab kev tsis sib to taub tuaj rau lub ntiaj teb neeg. Tsuas
muaj tib txoj kev uas peb yuav yeej tau qhov phem, yog txoj kev uas peb
ntseeg thiab tso siab rau Tswv Ntuj, thiab nrhiav kom tau txoj kev rov
los ua raws li lub chiv keeb Tswv Ntuj tau npaj tseg rau ntiaj teb
neeg.



Yuav ua li cas peb thiaj rov tau nyob nrog Tswv Ntuj li thaum lub hauv paus?


Nyob hauv Tswv Ntuj, muaj Leej Txiv, Leej Tub thiab Leej Ntuj Plig.
Huab Tais Tswv Ntuj uas yog Leej Txiv xa nws Leej Tub tuaj. Leej Ntuj
Plig ua kom nws xeeb los ua neeg, kom tau tho txoj xub ke rau peb rov
mus pem ntuj ceeb tsheej.

Leej Tub tau yug los ntawm tus Nkauj Tsim Txiaj Mab Liab los tau
muaj 2000 xyoo lawm, thiab Nws muaj lub npe hu ua “Yes Xus”, yog txhais
hais tias “Tswv Ntuj cawm”. Txhua xyoo thaum lub 12 hli ntuj, mas sawv
daws rov ua hmoov nco txog Yes Xus yug los, yog ua lub cim nco tias
Tswv Ntuj yuav tuaj cawm peb ntawm txoj kev txhaum raws li nws cog lus
tseg.

Tswv Ntuj Leej Tub tus zoo tas nrho uas tsis lo lub keeb txhaum
raug tuag kom tau them peb txoj kev tsis mloog Tswv Ntuj lus. Nws tuaj
yeem tuag nyob saum ntoo cuam kom qhia tau rau peb tias Tswv Ntuj txoj
kev hlub peb loj npaum twg. Yes Xus sawv hauv cov tub tuag rov qab los
kom thaum peb tso lub ntiaj teb no tseg lawm, peb tau nrog nws muaj
txoj sia tshiab nyob hauv Tswv Ntuj lub ceeb tsheej. Lub txiaj ntsim
hauv lub Cim Ntxuav coj peb los ua Tswv Ntuj cov me nyuam, yog peb
ntseeg thiab tso siab rau Nws, mas peb yuav tau txoj sia nyob mus li.




Yuav ua cas peb thiaj coj tau zoo li Yes Xus thiab thiaj ua tau raws li qhov Tswv Ntuj xav kom peb ua?


Yes Xus lub neej yog ib tug qauv qhia rau peb kom peb yuav tsum coj
lub neej mloog Tswv Ntuj lus, thiab ua raws li Tswv Ntuj nyiam. Tswv
Ntuj Kaum Lo Lus qhia yog Nws cov cai coj haiv neeg nws xaiv. Yes Xus
tau hais rau kom nws cov thwj tim tias yog lawv nyiam nws tiag lawv
yuav tsum coj raws li Kaum Lo Lus qhia ntawd. Thaum peb ua raws li peb
siab nyiam xwb, peb tsis mloog Tswv Ntuj cov lus qhia, mas yog peb
ncaim mus deb ntawm Tswv Ntuj lawm.
Peb yog noob neej, peb tsis muaj zog, peb ua tsis tau li Tswv Ntuj
siab nyiam thiab peb coj tsis tau li Yes Xus. Li ntawm txhua hnub, peb
yuav tau thov Tswv Ntuj pab peb, kom nws pub cov txiaj ntsim uas nws
xav muab rau peb kom peb thiaj yeej tej kev ntshaw ua qhov txhaum.
Tsoom ntseeg sawv daws yuav tau thov ntuj los sib pab, sib txhawb zog.
Kev sib pab, sib txhawb ntawm ib pab neeg yog ua tus yam ntxwv zoo hauv
txoj kev ntseeg.
Vim Tswv Ntuj txoj kev hlub Nws thiaj xav sau txhua leej txhua tus
los ua Nws cov me tub me nyuam los sib txoos ua ke. Txoj kev sib txoos
ua ke nyob ntawm Tswv Ntuj no thiaj muaj lub npe tias lub Koom Txoos
(the Church).



Lub Koom Txoos Los Mas Kav Taus Liv yog dab tsi?

Yes Xus tau tsim lub Koom Txoos kom tau qhia lub sim ceeb txog Tswv
Ntuj txoj kev hlub. Lo lus “Kav Taus Liv” (Catholic) muaj lub ntsiab
hais tias mus thoob ntiaj teb, thiab yog qhov txhais hais tias lub Koom
Txoos, mas loj dua li qhov ib pab neeg sib txoos ua ke hauv ib lub zos
xwb. Yes Xus tau xaiv kaum ob tug thwj tim uas yog cov Hauv Paus Xa Lus
los ua cov coj ntawm lub Koom Txoos. Lawv tau qhia thiab coj thawj pab
neeg uas xub los ntseeg Yes Xus teev ntuj.
Niaj hnub nyem no, cov uas los sawv cov Hauv Paus Xa Lus chaw hauv
lub Koom Txoos yog cov Tswv Qhia. Ib tiam dhau ib tiam lawv yog cov
saib xyuas txoj kev ntseeg kom txoj kev qhia txoj kev ntseeg tsis txhob
muaj yam pauv mus raws li ib tug neeg twg kev xav.
Tus thawj coj ntawm cov Hauv Paus Xa Lus yog Pob Zeb (Saint Peter). Tus
hloov Pob Zeb chaw yog Vaj Qhia. Vaj Qhia yog tus Tswv Qhia nyob rau
Los Mas (Rome), vim tias Los Mas yog qhov chaw uas Pob Zeb tau tas sim
neej. Yog vim hais tias Vaj Qhia yog tus thawj coj cov Tswv Qhia, mas
lub Koom Txoos thiaj muaj lub npe hu ua Los Mas los thiab Kav Taus Liv.

Tam sim nov lub Koom Txoos muaj li ntawm ib txhiab vam tus ntseeg
(over 1 billion members) thiab yeej tseem taug tau qab keeb kwm hauv
lub Koom Txoos rov mus txog rau kaum ob tug Hauv Paus Xa Lus uas Huab
Tais Yes Xus tau tsa lawv ua cov thawj coj.



Archdiocese Saint Paul thiab Minneapolis yog dab tsi?

Lub Koom Txoos Archdiocese nyob Saint Paul thiab Minneapolis yog
muaj ntau pawg ntseeg nyob hauv ob lub Nroog Ntxhaib no los koom ua ke
kom muaj lub hauv paus, muaj ib tug thawj coj, kom lawv txoj kev ntseeg
zoo raws li thawj pab ntseeg thaum ub, thiab lawv zwm rau Vaj Qhia. Tus
thawj coj hauv no yog Txiv Tswv Qhia Harry Flynn (Archbishop Harry
Flynn), hos lub Tuam Tsev Teev Ntuj yog Cathedral of Sain Paul.



Leej NtshiabVincent de Paul yog leej twg?

Tus leej ntshiab yog ib tug neeg uas tau tso siab lug thiab muab tag
nrho nws lub neej thiab txoj sia los raws Yes Xus qab. Yog li ntawd lub
Koom Txoos thiaj hwm nws thiab muab nws ua ib tug qauv rau tsoom
ntseeg. Cov leej ntshiab mus nyob saum Ntuj lub Ceeb Tsheej nrog nyob
ib xab ntawm Tswv Ntuj lub theej kiab.
Peb vam txog lawv nrog thov kom Tswv Ntuj pub txiaj ntsim rau peb
kom peb tau nrog lawv teev hawm Tswv Ntuj nyob mus li hauv ntuj ceeb
tsheej. Thaum ub Leej ntshiab Vincent de Paul yog ib tug Txiv Plig Fab
Kis zoo heev. Nws yog tus leej ntshiab pov hwm tsoom ntseeg Hmoob Kav
Taus Liv nyob hauv Minnesota.

Nrhiavtswvntuj, koj mas thiaj yog ua tau zoo heev li lau....kuv ces nag hmo nyeem tsuag tsuag xwb twb tsis nco qab tias nrhiav duab kom zoo zoo los rau tej ntawv kom zoo nkauj li tiag, ua tsaug ntau nawb mog.