Home
Yog koj tso siab rau Yesxus lub siab ntshiab, nws yuav ua koj siab kaj lug 
Peb Lub Xyoo Teev Ntuj (Annee Liturgique/Liturgical year) |
Nyob hauv Koom Txoos Kas Tos Liv, peb muab HT Yes Xus lub neej los ua peb txoj kev pe hawm TswvNtuj ib xyoos puag ncig lees. Tag kis tim 22 lub 11 hlis 2009 yog hnub Chiv kawg hauv peb lub xyoo teev ntuj. Hnub kawg ntawd peb ua kev hawm HT Yes Xus yog peb tus Vaj (Christ Roi/Christ the King). HT Yes Xus hais rau Pis Las Tos hais tias, "Kuv txoj kev ua vaj tsis yog nyob ntiaj teb no." Tiam sis peb paub hais tias nws ua vaj kav saum ntuj thiab kav ntiaj teb tas huv tib si. Nws txoj kev ua vaj yuav tsis raws li neeg ntiaj teb txoj kev ua vaj uas ntau zaus yuam qhi thiab tsuj ntiag tej neeg me. Nws txoj kev ua vaj yog kav neeg nruab siab raws txoj kev ncaj ncees. Yog peb tsis kam nws kav peb, nws yuav tsis yuam qhi los kav peb, yog peb txaus siab thiab caw nws, nws yuav zoo siab hlo kav peb thiab kho kom peb pauv tau ua neeg dawb huv yoog tau raws li nws zuj zus....
Niaj xyoo hnub Chiv kawg yuav pauv hnub nyoog me ntsis, yuav tsis yog tim 22 lub 11 hlis tas mus li. Tiam sis nyob hauv lub xyoo teev ntuj, yuav muaj tej lub hnub nyoog uas pauv tsis tau, xws li hnub Yes Xus yug los (Noel/Christmas) yuav niaj xyoo raug rau tim 25 lub 12 hlis ntuj. Niaj xyoo lub caij Yes Xus tuag thiab sawv rov los kuj yuav pauv hnub nyoog me ntsis thiab. Kuv yuav tsis txawj piav meej meej hais tias yog vim li cas, tiam sis qhov kuv paub mas yog vim lub Koom Txoos saib lub hnub thiab lub hli los teem lub caij Yes Xus tuag thiab sawv rov los, kom haum rau lub caij cov Yus Das (Jews) lub hnub nyoog Hla (Passover).
Yog li ntawd, tag kis yog Hnub Chiv kawg thiab lub lis piam tuaj no yog lub lis piam kawg, ces pib Hnub Chiv tim 29 lub 11 hlis 2009 yog thawj hnub hauv peb lub xyoo teev ntuj tshiab. Hnub ntawd kuj yog thawj Hnub Chiv hauv lub Caij Tos Huab Tais (Advent/Avent), uas muaj plaub Hnub Chiv ua ntej HT Yes Xus yug los. Lub caij no peb npaj peb lub siab, hloov peb lub tswv yim lub neej kom peb tsim nyog txais nws yug los. Tiam sis nws twb yug los tau 2 txhiab tawm xyoo no lawm, qhov uas niaj hnub no peb xav tau yog xav kom nws yug los hauv peb nruab siab nruab ntsws, los coj peb ua peb lub neej niaj hnub kom haum li nws nyiam.
Peb lub Xyoo Teev Ntuj muaj caij nyoog thiab pauv cov xim (colors/couleurs) ris tsho raws cov caij nyoog raws li nram no:
- Caij Tos Huab Tais: 4 Hnub Chiv los 4 lis piam, tsho xiav tsam xem (blue purple);
- Caij Yes Xus Yug los: txij hnub Yes Xus yug los mus txog hnub nws txais lub Cim Ntxuav ntawm Zam Ntxuav Plig, hnav tsho dawb;
- Pib Caij Nruab Xyoos: txij hnub Yes Xus txais Cim Ntxuav mus txog Hnub Plaub Txais Tshauv (Ash Wednesday/Mercredi des Cendres), hnav tsho ntsuab;
- Caij Plaub Caug los Caij Yoo (Lent/Careme): pib txij Hnub Plaub Txais Tshauv mus txog Hnub Xya Ntshiab uas Yes Xus nyob zwm ntxa, yog ib lub caij xyaum tswj yus lub cev thiab lub siab uas coj yus ua kev txaug kev txhaum; hnav tsho tsam xem (purple), rooj pua ntaub tsam xem; tiam sis Hnub Tsib Ntshiab, siv ris tsho thiab ntaub pua rooj dawb; Hnub Rau Ntshiab, tsis muaj dab tsi pua rooj li, txiv plig hnav tsho liab thaum teev ntuj hawm Ntoo Cuam.
Lub caij ntawd, peb yoo nqaij (abstain from meat) yoo mov (fasting) rau Hnub Plaub Txais Tshauv(Ash Wednesday/Mercredi des Cendres) thiab Hnub Rau Ntshiab(Good Friday/ Vendredi Saint), uas yog hnub Yes Xus tuag, noj tau li ib pluag mov zaub tsuag kom txhob tshaib dhau xwb, thiab peb caiv nqaij rau niaj lub lis piam Hnub Rau (Every Friday of Lent); Cov neeg muaj 14 xyoos rov yav saud yuav tsum caiv nqaij; cov muaj 18 xyoo mus txog 59 xyoos yuav tsum yoo mov; txoj cai tsis yuam kom cov muaj mob thiab cov poj niam muaj me nyuam hauv plab los pub me nyuam mis yuav tsum yoo mov.
- Caij Hla: pib txij Hnub Xya Ntshiab tsaus ntuj(Holy Saturday evening, Easter Vigil) mus txog Hnub Leej Ntuj Plig nqes los (Pentecost/Pentecote), hnav tsho dawb, ntaub pua rooj dawb; tiam sis hnub Pentecost hnav tsho liab, ntaub pua rooj liab.
- Rov yog Caij Nruab Xyoo dua: txij Leej Ntuj Plig Nqes Los mus txog rau HT Yes Xus ua Vaj, hnav tsho ntsuab.
Yog li peb pom hais tias peb txoj kev pe hawm Tswv Ntuj yog nyob ncig tej lub caij tseem ceeb hauv HT Yes Xus lub neej, xws li thaum nws yug los, thaum nws tuag thiab sawv rov los, thaum nws xa nws Leej Tswv Yim Ntshiab los.
Peb cov zaj nyeem Ntawv Ntshiab los yeej teeb kom haum cov caij nyoog, tsis yog tias XH los TP xav nyeem zaj twg ces nws cia li nthuav rau zaj ntawd xwb.
Hais txog cov zaj nyeem, vim lub Koom Txoos xav kom peb cov ntseeg tau nyeem txhua los yog yuav luag txhua cov ntawv tseem ceeb txog Yes Xus lub neej thiab nws cov lus qhuab qhia, ces lub Koom Txoos teeb cov zaj nyeem sib txawv rau 3 lub xyoo, muaj cov zaj nyeem rau xyoo A (los Xyoo 1), muaj cov zaj nyeem rau xyoo B (los Xyoo 2), muaj cov zaj nyeem rau xyoo C (los Xyoo 3) .... ces rov pib xyoo A dua.... Tag kis peb yuav xaus Xyoo B, hnub Chiv tom ntej, peb yuav pib Xyoo C.
Nyob hauv nruab lis piam (weekday) los yeej muaj ib cov zaj nyeem huv tib si thiab. Yog peb leej twg khoom thiab nquag es mus koom thaj txi Ntuj niaj hnub ces nws yeej tau hnov txog Huab Tais Yes Xus cov lus tseem ceeb qhia peb ua neej raws Tswv Ntuj lub siab nyiam.
Cov zaj nyeem nruab lis piam mas lub Koom Txoos muab faib ua ob xyoos nyeem xwb, yog Xyoo I thiab Xyoo II.
Last edited by Mim on 14th August 2020, 7:02 pm; edited 5 times in total
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.
