KAB KE NTEES HMOOB CATHOLIC

**Maiv Tooj** 5th November 2009, 5:14 am

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°1

KAB KE NTEES HMOOB CATHOLIC

Post Maiv Tooj 5th November 2009, 5:14 am

ZAJ Xa Plig ntu 1 (Yog zaj tshiab tom qab xyoo 1997)

Vaj Qhia Zam Paj Lug 23 (Pope John Paul 23rd) thiab tsoom Tswv Qhia nyob thoob ntiaj teb tau pub cai (Vatican II) rau txhua txhia haiv neeg nyob thoob ntiaj teb nyias siv nyias yam txuj zoo uas haum kev ntseeg Ntuj los teev hawm Tswv Ntuj. Txij thaum ntawd los lub Koom Txoos Hmoob Kav Tos Liv thiaj tau pib siv yam puav txuj Hmoob uas haum kev ntseeg rau Hmoob tej lub ntees tshoob kos thiab tej lub ntees pam tuag. Hmoob kuj pib siv lus Hmoob los hais tej zaj teev ntuj thiab ua lub thaj txi ntuj.

Lub 9 hlis, 1972 T.P. Nyiaj Pov (Yves Bertrais O.M.I) thiab cov Txiv Plig uas lawv qhia kev ntseeg rau haiv Hmoob, cov Xib Hwb Hmoob, cov Phauj (Sisters) Hmoob, thiaj tau caw ntau tus laus neeg Hmoob cov ntseeg ntuj thiab cov tsis tau ntseeg tuaj sib txoos rau Thaj Nkoj, Vees Cas, Los Tsuas teb (Thagone, Vientiane, Laos). Yog thawj zaug lub Koom Txoos Hmoob Kav Tos Liv tau soj ntsuam xauj xyuas Hmoob tej txuj, saib yam twg yog ua rau dab, yam twg ho ua rau kev neej kev tsav kev sib hlub sib hwm. Sawv daws thiaj pom tias: Hmoob muaj ntau yam txuj zoo thiab haum kev ntseeg, zoo siv rau Hmoob Kav Tos Liv lub ntees tshoob kos thiab lub ntees pam tuag. Tseem muaj ntau yam zoo siv rau cov txoos teev ntuj thiab lub thaj txi ntuj.

Txij xyoo 1962 - 1997 tsis tau muaj dua ib tug hmoob twg yuav los muab Hmoob tej txuj “Txiv Xaiv Foom Kom” kho kom haum kev ntseeg ntuj li. Txog caij siv ces cia li hais kom tej tus hmoob laus txawj ua cov kab ke “Txiv Xaiv Foom Kom” tuaj hais txiv xaiv raws li Hmoob kev cai dab qhuas ib txwm coj los. Peb tsoom ntseeg sawv daws thiaj pom hais tias: yog ua li no mas tsis haum rau txoj kev ntseeg ntuj lawm.

Tim 22 – 29, 1997 cov Txiv Plig, cov Xib Hwb, thiab cov Txwj Laus Hmoob Kav Tos Liv lub rooj sab laj sau siab (training) nyob rau Cheeb Koom Txoos Milwaukee (Arch Diocese cousin Center Milwaukee, Wisconsin, U. S. A). Sawv daws thiaj tsa tes pom zoo kom Xib Hwb Vam Thaiv Lauj (Deacon Va Thai Lor) wb los sib pab kho Hmoob cov txuj “Txiv Xaiv Fooom Kom” no, kom haum kev ntseeg ntuj. Txij thaum ntawd los peb thiaj tau pib nqes tes kho. Ke kho ke kawm. Yog muaj Hmoob Kav Tos Liv tej lub ntees tuag, peb cia li pib hais zuj zus los txog tam sim no uas ua phau ntawv tiav.

Peb tau siv 9 xyoos nkaus los kho Hmoob Kav Tos Liv phau ntawv “Txiv Xaiv Foom Kom” no. Txhua xyoo peb ua lub rooj sab laj sau siab, yeej muab phau ntawv no coj los rau cov Txiv plig, cov Xib Hwb, cov Txwj Laus sawv daws nrog soj ntsuam xauj xyuas. Txiv Tswv Raymond L. Burke tau pom zoo kom xa phau ntawv no mus rau Txiv Plig Nyiaj Pov (Rev. Yves Bertrais) nyob Lomsak Thaib teb soj ntsuam xauj xyuas. T.P. Nyiaj Pov, X.H. Nom Thoob, Lis Maib, thiab Ham Kub, lawv tau siv sij hawm 6 lub hli los tshawb xyuas ib tog zuj zus tuaj, thaum lawv soj ntsuam kho tiav tas lawd, lawv thiaj rov muab xa tuaj. Txiv Plig Nyiaj Pov kuj sau ib tsab ntawv nrog phau ntawv xa rov qab tuaj rau Txiv Tswv Qhia Raymond L. Burke peb.

Thaum phau ntawv tuaj txog hauv peb lub Cheeb Koom Txoos (Diocese La Crosse) lawm, muaj Dr. Bob Lechelor thiab Mrs. Virginia nrog kuv, peb tau soj ntsuam xyuas saib puas tseem tshuav tej lo lus tsis haum kev ntseeg. Dhau ntawd los muaj Miss. Ann Lankford thiab Dr. Arthur Hippler nrog kuv, peb rov soj ntsuam kho zaum kawg nkaus no. Ann Lankford yog ib tug uas tau siv zog pab khiav hauj lwm txhawb nqa rau phau ntawv no peb thiaj ua tiav. Thov ua Ann Lankford tsaug ntau ntau.

Kuv thov hais ob peb lo lus rau peb tsoom neeg ntseeg Hmoob tias: peb ua ib haiv neeg nyob, yog peb tsis muaj peb ib yam txuj los sib hwm kiag li, kuj txhais tau tias: peb yog haiv neeg tsis muaj nuj nqis dab tsi. Tab yog peb ua neeg ntseeg lawm los peb yeej muaj cai siv peb tej yam txuj zoo uas haum Tswv Ntuj lo lus qhia los sib hwm. Leej twg txawm yuav hais li cas los peb yog Hmoob peb yeej plhis tsis tau hloov tsis tau peb cev nqaij daim tawv, peb cov lo lus, thiab peb lub npe Hmoob ib zaug.

Tab sis, peb tsis tau saib Hmoob cov txuj Hmoob loj dua Huab Tais Ntuj lo lus qhia. Txhob muab cov lus nyob hauv phau ntawv “Txiv Xaiv Foom Kom” no los hloov phau ntawv ntshiab. Tswv Ntuj cov lo lus qhia yog thawj yam yuav los coj peb lub neej txoj sia. Peb yuav tau tso siab rau Huab Tais Ntuj ib leeg nkaus xwb thiab yuav tsum mloog nraim Tswv Ntuj lo lus hu peb. Txhua hnub chiv yeej tsim nyog peb txhua tus neeg ntseeg yuav tsum mus koom lub thaj txi ntuj, mus ua Tswv Ntuj tsaug thiab thov Tswv Ntuj kom pub nws Leej Tswv Yim Ntshiab pab peb kom nyob ruaj nreb ua Tswv Ntuj ib tug me nyuam tas nrho yus sim neej. Tsis txhob pw tos looj mem tig los txog, qhov ntawd yog ib qho npau suav xwb.

Nyob hauv hmoob cov txuj kab ke tshoob kos thiab kab ke pam tuag, muaj ntau yam tsis haum txoj kev ntseeg. Nyob hauv peb phau ntawv “Txiv Xaiv Foom Kom” no tau txiav tawm tej yam tsis haum txoj kev ntseeg pov tas lawm. Thaum nej yuav ua ib lub ntees pam tuag, nej yuav tau mus saib kom meej pem txoj cai tswj kab ke pam tuag rau peb cov neeg ntseeg nyob hauv phau ntawv “Txiv Xaiv Foom Kom” no ntawm phab 53 – 72.

Txiv Plig Nyiaj Pov hais tias: tas nws sim neej nws tau nrog Hmoob nyob, thaum tsis muaj nws txoj sia lawm, nws thov tsoom Hmoob ntseeg ntuj thiab cov tsis tau ntseeg ua lub ntees pam tuag raws Hmoob Kav Tos Liv cov kab ke rau nws.

Qhov kawg no, kuv sawv cev ntawm tsoom Hmoob nyob thoob ntiaj teb, thov ua tsaug ntau rau Txiv Plig Nyiaj Pov, Txiv Tswv Qhia Raymond L. Burke, Txiv Tswv Qhia Jerome E. Listecki, Dr. Bob Lechelor, Mrs. Virginia, Dr. Arthur Hippler, Miss, Mrs Des Sikowski Nelson uas yog tus pab kho phau ntawv, thiab tas nrho tsoom Txiv Plig uas qhia kev ntseeg rau haiv Hmoob. Nej yog cov tuav lub Koom Txoos, nej sawv daws tau sib zog pab tawm tswv yim, thiaj ua rau peb “Hmoob Kav Tos Liv phau ntawv Txiv Xaiv Foom Kom” raws kev ntseeg ntuj ua tiav. Kuv tseem thov ua tsaug rau lub Tuam Cheeb Koom Txoos Milwaukee (Arch Diocese Milwaukee), uas nej tau pom zoo luam phau ntawv no, thiab nej tau pab ib pob nyiaj rau peb luam phau ntawv no. Tas nrho tsoom Hmoob Kav Tos Liv thiab tsoom Hmoob tsis tau ntseeg ntuj zoo siab tshaj plaws thiab ua tsaug ntau. Txawm peb tsis muaj dab tsi ua nej tsaug los Huab Tais Tswv Ntuj yeej yuav pauj txhua yam uas nej tau hlub tau pab haiv Hmoob rov qab rau nej raws li nej sawv daws txhua tus lub siab xav tau.

Thov kom Huab Tais Tswv Ntuj nrog nraim nej sawv daws txhua nyob, ua nej siab kaj lug mus tas nrho ib txhiab ib txhis. Ua tsaug.

X.H. Npuag Neeb Yaj

Last edited by Maiv Tooj on 21st March 2019, 11:53 pm; edited 2 times in total

**Maiv Tooj** 9th November 2010, 2:52 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°2

Re: KAB KE NTEES HMOOB CATHOLIC

Post Maiv Tooj 9th November 2010, 2:52 am

KAB KE NTEES HMOOB CATHOLIC 6581289312378temp

Rooj Ncauj Lus Vatican II (Concile Vatacan II)

Xyoo 1962-65, muaj 2.300 tus Txiv Tswv Qhia tau sib sau 4 zaug nyob rau nroog Los Mas ( Rome)Italy teb. Lawv tau tshaj ib cov lus txhawb nqa kev ntseeg rau ntau lub teb chaws. Yam loj tshaj uas lawv tau tshaj tawm: "Nyob hauv txhua haiv neeg, nyias muaj cai siv nyias xeem lus los teev hawm Tswv Ntuj" Tsis siv lus Latina nkaus xwb li yav thaud lawm.

30 xyoo tom qab Rooj Ncauj Lus Vatican II, Vaj Qhia Zam paj Lug Ob tau sau yuas(signer) pom zoo nyob hauv phau ntawv "Catechism of the Catholic Church" (phab 310 #1204-1209).

#1204: "Txhua haiv neeg, nyias muaj cai khaws nyias tej txuj ci los teev hawm Tswv Ntuj."
#1205: Civ haiv neeg, uas nyuam qhuav txais lub Moo Zoo, mas yeej yuav tsum muaj ib cov kab ke teev Ntuj kom haum cov haiv neeg ntawd tej txuj ci."
#1206: "Lub Koom txoos yuav muaj ntau cov kab ke hauv nyias haiv neeg sib txawv los hawm Tswv Ntuj kom txoj kev hawm tswv Ntuj nplua nug thiab huaj vam dua qhov qub. Tab sis yuav ceev faj kom txhob tawg ua ntau pab ntau pawg. Thaum tsim tej yam tshiab, yuav tau xyuas seb puas haum txoj kev ntseeg Catholic."

Tom qab lub caij Rooj Ncauj Lus VaticanII, 1965 nyob Tuam Ceeb Vees Cas, Los Tsuas teb, Txiv Plig Nyiaj Pov tau hu cov txwj laus, cov Xib Hwb tuaj sab laj hauv lub Tsev Hauv Paus 4-5 hnub sib law. Muaj Yaj Zam Nob, Txhiaj tswb Lis, Thoj Suav Lwm, XH. Txoov Yeeb, XH. Yaj Zoov Ntxheb/ Lawv tau sib cog lus kho zaj qhuab ke qub kom haum rau txoj kev ntseeg Catholic.

Xyoo 1992-93, Rooj sab laj HANCA tau sab laj txog qhov ntawd. Feeb coob kuj pom zoo siv li lub suab qub. Tab sis tej pawg ntseeg tsis xav siv los nyob ntawm lawv siab nyiam.
-Cov pawg Ntseeg nyob Thaib teb, lawv tsis siv cov kab ke Taw Kev lub suab qub lawm.
-Tej pawg ntseeg uas lawv xav khaws lawv tej txuj tseg mas thaum muaj ib tug dua nra mas lawv hais lawv los tau.

Txawm tias ib cov tsis yuav zaj taw kev, ib cov ho yuav zaj Tawv Kev, los peb ib pawg txhob thuam ib pawg. Peb puav leej yog neeg ntseeg Catholic. Peb puav leej yog Tswv Ntuj cov me nyuam. Qhov twg tsis zoo, peb mam sib cog kho thiab siv mus lawm yav tom ntej.

Thov ua tsaug.

**Maiv Tooj** 23rd December 2010, 3:04 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°3

Re: KAB KE NTEES HMOOB CATHOLIC

Post Maiv Tooj 23rd December 2010, 3:04 am

LUS THAM HAUV ROOJ SAB LAJ
Hnub tim 2 lub 5 hlis 2009 – nyob Orléans

Hnub tim 2 lub 5 hlis 2009, tsoom ntseeg Hmoob Kas Tos Liv, cov tiam lis
nyob ntau lub xeev nrog cov coj lub Aumônerie Catholique Hmoob Fab Kis
teb : Xaiv Tsom Yaj, TP Yvon, TP Neej Vaj thiab TP Cwj Vuam Chiv, peb tau
sib sau sab laj nyob Orléans raws li caij nyoog teem caw hu sawv daws.
Peb Hmoob nyob thoob Fab Kis teb, peb cov Kas Tos Liv kuj nyob ua sab ua
sua ua ntau lub cheeb tsam nyob. Cov tuaj sab laj yuav luag txhua : tuaj
cov Nîmes, Troyes, Metz, Gien, Bourges, Amboise, Saint Nazaire, Caen, Paris
thiab Versailles nrog cov nyob Orléans (tag nrho peb muaj 28 leej neeg).
Tshuav cov muaj chaw tab kaum tuaj koom tsis tau rooj sab laj. Lawv kuj
tau xa xov cev lawv tej lus raws li lawv tau sib tham ntawm lawv lub xeev
ntuj txog tej teeb meem hauv txoj kab ke pam tuag, zoo li cov nyob : Castres,
Carpentras, Lyon.
Khuv xim tsis hnov cov lawv tsis teb dab tsi, tsis hais dab tsi tuaj ces peb
kuj tsis paub xyov lawv xav tau li cas, lawv siab nyiam li cas…
Cov ntsiab lus sib tham sab laj hnub no hais txog peb yam loj :
1- Lub Aumônerie txoj hauj lwm.
2- Hais txog peb Kas Tos Liv lub ntees ploj ntees tuag.
3- Hais txog lwm yam : kev txhawb txhim Aumônerie, kev sau siab…
Peb cov Hmoob Kas Tos Liv tuaj poob rau Fab Kis teb, tsis tau nyob ua pawg
koom zej koom zos. Nyias mus raws nyias hauj lwm rau ib qho. Tsis muaj
peb Hmoob xwb ua neeg pej kum tuaj poob rau Fab Kis teb. Muab ntau
xeem neeg hais ntau xeem lus sawv daws nyob sib xyaws, puv tej nroog loj.
Luag kuj muaj luag tej teeb meem. Ua li ntawd, lub « Aumônerie Catholique
Hmong » txoj hauj lwm, nws ua dab tsi niaj hnub no pab peb tsoom
Hmoob ?

1- LUB AUMÔNERIE TXOJ HAUJ LWM :

Nyob thoob qab ntuj, tas cov teb chaws puav leej siv tib txoj cai tuaj tim Los
Mas, ntawm txiv Vaj Qhia tuaj. Nyob Fab Kis teb, muaj ib tug Tswv Qhia
nrog lub « Service National de la Pastorale des Migrants » khiav hauj lwm saib
xyuas cov neeg pej kum Kav Tos Liv (selon l’instruction Erga Migrantes
Caritas Christi).
Vim li ntawd, Txiv Tswv Qhia Claude Schockert thiaj sau ua ib daim ntawv
tso cai rau peb 4 leeg saum no khiav hauj lwm nrog lub « Centre Pastoral
des Migrants » pab peb cov Hmoob Kav Tos Liv pib txij lub 11 hlis 2008 mus
txog lub 10 hli 2011, ua 3 xyoos hauj lwm.
Luag kuj hu peb mus koom lub « Centre Pastoral des Migrants » nrog lawv
sib tham, nyias cev nyias tej teeb meem, nrhiav kev pab txhawb cov neeg pej
kum li peb kom muaj tsev teev ntuj qhib rau nyias xeem neeg teev ntuj ua
kab ke raws nyias xeem lus, pab nyias tej me tub me nyuam kom loj hlob
tsim txiaj txuag thiab paub nyias tej txuj ci, kom sawv daws mus fim tau cov
ntseeg Fab Kis, nrog cov TP Fab Kis tham kom lawv paub yus, pab qhia kev
ntseeg, pab ntxuav plig rau yus Hmoob…

Vim li no, peb thiaj yuav vam khom cov Xib Hwb thiab cov coj ntawm txhua
lub xeev nrog peb leg qav leg num los pab tsoom ntseeg Hmoob sawv daws.
Txawm hais tias peb cov Hmoob Kav Tos Liv kuj muaj tej teeb meem thooj li
luag : Los Tsuas, Khab Meem, Cob Tsib. Tiam sis peb kuj muaj peb teeb
meem vim peb muaj peb kab ke Hmoob txawv luag thiab.

2- HAIS TXOG PEB KAV TOS LIV LUB NTEES PLOJ NTEES TUAG :

Cov lus hu sawv daws tuaj sab laj hnub no yog tham txog peb Kav Tos Liv
lub ntees ploj ntees tuag. Peb kuj tau caw XH Caiv Kaub Koo tuaj piav
Hmoob kev cai rau peb mloog. Vim nws yog ib tug Xib Hwb thiab ib tug laus
muaj txuj ci Hmoob. Xyoo 1970, nws tau nrog Yaj Zam Nob thiab Yaj Txooj
Tsawb mus Vees Cas. Mus nrog cov Xib Hwb thiab TP Nyiaj Pov lawm tham
txog Hmoob kab ke pam tuag raws li Hmoob ib txwm ua kam. Thaum muaj
ib tug siav tu pw nrom cas ntawd, Hmoob ua li cas nta dab nta qhua rau tus
tuag lub ntees kom ntseg log puav tam ncej txawb.
Hmoob hais zaj taw kev, xa tus ntsuj plig mus lawm qub teb qub
chaw, mus lawm ntuj txiag teb tsaus, xa mus nce ntaiv ntuj, mus pem
nyuj vab teem mus nqa daim ntawv nyiaj keeb puaj txwm mus cuag
poj cuag yawm. Taw kev tas, Hmoob thiaj tshuab zaj qeej tu siav, thiaj
mam tshuab zaj qeej tsa nees…Thaum twg txiv kav xwm los cob hauj
lwm ces tus txiv qeej mam li khaws nws zaj qeej tshov.
Qeej tsis yog siv rau tuag xwb. Hmoob kuj muaj qeej lom zem, qeej
nqaum toj noj tsiab peb caug, qeej txais qhua, tshuab qeej ntaus
nruas hu neeg txwj neeg laus tu plaub tu ntug…Hmoob suav tseem
tshuab qeej tos qhua niaj hnub no yog nej mus tsham mus saib lawv.
Hais txog kev tua tsiaj rau tej laus yog pauj tej laus kev iab kev khwv
tsa cuab tsa yim rau tej tub ki. Luag phij cuam plaub npua hlob plaub
nyuj. Yog tua tsiaj ces yuav tau hu muam phauj txiv dab laug tuaj
txheeb nws laus kev iab kev khwv ntawm lub rooj txwj laug. Yog nkauj
muam nraug nus pluas mov tu moo. Thiaj li muab ntsov nyuj cob rau
muam phauj txiv dab laug.
Hais txog kab ke foom kom, raws Yaj Txooj Tsawb piav. Yog ib tug
hluas ces tsis muaj foom kom. Yog muaj hnub nyoog 30 xyoo rov saud
ces muaj hais txiv xaiv foom kom. Vim thaum lub hauv paus, Hmoob
yawm vaj laug ua neej nyob, Hmoob yawm vaj laug hais tias nws
txhais tes khawb tsis cuag nws nrob qaum. Thaum nws tuag kom cov
tub mus hu Hmoob yawm txwj laug tuaj tsaws nws tej koob hmoov
rau cov tub ki. Tej foom kom yog nws laus lus koob lus hmoov hais
tsis taus lawm cia Hmoob yawm txwj laug ntuas thiab nrom rau tej
tub ki.
Zim txwv no, peb Hmoob Kav Tos Liv zaj qhuab ke yog ua raws li Hmoob tej
txuj, Txooj Tsawb thiab Laj Laub lawv cov laus no tau qhia. Yog vim li cas
thiaj tsis yuav qeej yuav nruas li Hmoob kev cai Hmoob ua kam ? Ua cas cov
TP Plig thiaj li tau tshem qeej thiab nruas tsis yuav los pam tuag ?
Peb kuj tau mloog TP Neej Vaj piav txog lub sij hawm thaum TP Nyiaj Pov
thiab TP Neej Vaj lawv tuaj txog pem Hmoob.
TP Neej Vaj tau hais rau sawv daws hnov tias lub sij hawm 1949-50, lub
Koom Txoos Kav Tos Liv tseem tsis tau xeev los. Rau lub Koom Txoos Kav
Tos Liv, lwm yam kev teev hawm puav leej tsis muaj nuj nqes, tsis muaj
qhov zoo tsim nyog yuav khaws tej yam dab tsi tseg. Tsuas yog txoj kev Teev
Yes Xus thiaj muaj nuj nqes. Cov hluas npaj kawm ua txiv plig puav leej xav
tswv yim mus fab ntawd, thiaj tsis muaj kws txuj, tsis muaj xib hwb qhia
txog kev cai dab qhuas rau lawv hnov kom paub (c’est un manquement dans
le parcours de la formation des futurs prêtres à cette époque). Cov txiv plig
tsis nco faj tias Hmoob kev teev dab qhuas muaj tej yam zoo. Ces lawv kuj
xav tias dab qhuas yog phem tag nrho. Ces yuav tsum lawb dab pov tseg, los
ntseeg Yes Xus. Tso tag nrho qub kev cai pov tseg. Qeej nruas yog ua dab
ces muab tso pov tseg kuj yuam kev me ntsis rau qhov no.
TP Neej Vaj tau piav rau peb tias thaum chiv hauv paus lub sij hawm 1950
ntawd, cov txiv plig kuj xav tsis tau txaus. Lo lus hais tias lawb dab mas tsis
raug. Yuav tsum hais tias hloov dab qhuas los txais kev ntseeg Yes Xus.
Hmoob kev ua dab qhuas piv tau rau His Xais Lais yav laus thaum ub.
Ntawv Cog Qub Lus hais txog His Xais Lais muab yaj muab tshis los hlawv
txi Ntuj. Hmoob muab qaib npua los tua txi dab, ua neeb kho, hu plig, kuj
zoo li ntawd.
Hmoob kev teev dab qhuas tsis yog ib qho phem. Thaum tua tsiaj ua ib
pluag noj. Thaum tua npua tsiab noj. Hmoob laig dab, hu poj yawm txwv
koob los noj los pov tsis yog phem. Yog nco poj yawm txwv koob tej koob
hmoov. Kuj zoo li peb thov cov leej ntshiab cov txiaj ntsim los pab los roos
peb. Hmoob tsis paub Yes Xus, tiam sis Hmoob zwm rau Ntuj. Hmoob
ntseeg Ntuj. Thaum Hmoob tau kev tws, Hmoob fiv yeem Ntuj los pab
Hmoob. Yog Hmoob tsis ntseeg Ntuj mas Hmoob yuav tsis hu txog Ntuj kom
tuaj pov hwm Hmoob. Tsis muaj neeg qhia ces Hmoob kuj tsis paub tuav
Tswv Ntuj lub npe ; Hmoob kuj hu Ntuj tsis muaj npe.
Hnub no peb sab laj tham txog peb cov Kav Tos Liv txoj kab ke pam tuag.
Hais txog zaj qhuab ke ntu 1 raws li phau ntawv liab. Peb thiaj tau caw cov
coj ntawm nyias pawg ntseeg nyob thoob Fab Kis teb nrog nyias pawg ntseeg
sab laj ua ntej.
Cov ntseeg hais dab tsi ? Peb txoj kab ke pam tuag raws li sawv daws ua
kam niaj hnub no puas zoo txaus ?
Sawv daws pom tias kuj zoo tsis tau txaus. Vim li ntawd, nyob Fab Kis thiab
nyob USA sawv daws kuj ua txawv me ntsis li hauv phau ntawv. Tab yog
nyob hauv Fab Kis teb, ib cheeb tsam twg kuj ua txawv me ntsis ib cheeb
tsam thiab. Twb muaj neeg hais tias tsis ua zaj qhuab ke ntu 1. Kuj muaj
neeg hais tias xav kom tshuab qeej tu siav. Peb thiaj tau mloog cov tuaj sab
laj, ib cheeb tsam zuj zus saib cov ntseeg nyiam li cas. Ib txhia kuj hais tias
lam yuav li qub tab nws txawm zoo tsis tag. Cov coob kuj pom zoo kho dua
tshiab. Vim zaj qhuab ke ntu 1 no ntev zog lawm. Yuav siv sij hawm 3 teev
thiaj li ua tas ntu 1. Tej txhia kuj kho ua ib zaj luv luv ua 20 fiab hais xwb.
Txawm li cas los yuav tau kho kom peb cov ntseeg Kav Tos Liv Fab Kis teb
muaj ib tug qauv ntxim sawv daws siab nyiam zoo nkauj dua tus niaj hnub
no sawv daws ua kam nyob rau ntawd. Peb yuav tau nrhiav ib pab neeg los
sib pab kho ua ke kom tau sai rau sawv daws siv.

3- HAIS TXOG LWM YAM :

Muaj coob leej kuj xav kom lub Aumônerie npaj kom muaj kev kawm
qhia cov yuav los coj tsoom ntseeg. Lawv yuav tsum paub kev ntseeg
kom zoo, txawj coj sawv daws teev ntuj, txawj qhiab kev ntseeg rau cov
yuav los txais lub cim ntxuav, kom paub ua tej kab ke hmoob thaum
muaj ib siab ob qig. Txiv PLig yuav tsum tuaj ua ib thaj txi ntuj cob
hauj lwm rau sawv daws cov yuav los leg hauj lwm pab sawv daws.
Tsis tas li ntawd xwb, xav kom muaj coob leej sib pab ua tej hauj lwm
no. Tsis yog txiv neej xwb thiaj ua tau. Yog muaj cov poj niam los
kawm los pab cov txiv neej thiab mas yim huab zoo rau pawg ntseeg
sawv daws.
Lub Aumônerie xav npaj kom muaj chaw kawm los txhawb txhim cov
laus, cov nrab neej thiab cov hluas txoj kev ntseeg. Xav npaj kom
muaj kev sau siab teev ntuj, coj sawv daws mus pèlerinage…Tiam sis
yuav npaj rau tej cheeb tsam zuj zus. Vim peb tsis muaj tsev, tsis
muaj chaw hu tag sawv daws tuaj sib sau ua ke, nyob noj kawv ua ke
tsheej hnub.
Hais txog kev txhawb txhim : lub Aumônerie kuj tsis muaj nyiaj yuav
los ua tej yam hauj lwm loj pab peb tsoom Hmoob. Lub Aumônerie kuj
tos ntsoov cov coj ntawm tas txhia pawg ntseeg puas pab txhawb lub
Aumôneire kom muaj zog. Nws kev siv nyiaj yog zoo li cas ?
Piv txwv li, lub rooj sab laj tim 2 lub 5 hlis 2009 nyob Orléans. Yog lub
Aumônerie ua tus nres. Nws siv tag 1280 €. Nyob hauv ib xyoos, cov
ntseeg twb pab nyiaj tsis txog txhiab tuaj. Lub Aumônerie yuav ua cas
hu sawv daws saj laj tshaj 2 zaug, puas coj sawv daws mus sau siab
tau, yauv ua cas hu tau sawv daws tuaj mus qhia kev ntseeg…Tshuav
ib yam ntxiv, yus ua ib tug neeg ntseeg Kav Tos Liv, yus yuav tsum
qee niaj lub xyoo, muab 1 hnub ntaus nqi ua nyiaj txiag los txhawb
lub Koom Txoos Kav Tos Liv (« le denier de l’église »).
Peb tig los ua neeg ntseeg Yes Xus, mas peb yuav xyaum coj lub siab
dav ib yam Yes Xus. Txhais hais tias « notre générosité ne doit jamais
cesser et si possible elle est appelée à grandir et non à diminuer ».
Tshuav peb cov kwv tij Hmoob txom nyem : Cob Tsib, Suav, Thaib.
Lawv tsa muag ntsia saum ntuj los yog huab, dauv muag ntsia pem
teb los yog av, tshaib los tsis muaj leej twg muab, ntshaw los tsis muaj
twg pub hnav. Peb txoj kev ntseeg Tswv Ntuj yog los taj Tswv Ntuj
txhais tes plws kom sawv daws muaj noj thiab tau hnav.

Cov coj lub Aumônerie

**Maiv Tooj** 17th September 2012, 9:37 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°4

Re: KAB KE NTEES HMOOB CATHOLIC

Post Maiv Tooj 17th September 2012, 9:37 am

LUB TXOOS XA PLIG

Kho tshiab 2010

Hu txog Leej Txiv, thiab Leej Tub, thiab Leej Ntuj Plig lub npe. Ua li

Hu ib zag nkauj qhib txoos : Zaj twg los tau raws li cov zaj hauv qab no( I los II los III )

I-Koj lub siab zoo, Huab Tais koj zam rau kuv,
koj lub siab hlub neeg, Huab Tais koj so kuv cov txhaum.

1 - Kuv ua txhaum rau koj ib leeg xwb,
muaj tej yam koj ntsia yog tsis zoo, kuv twb ua lawm.
2 - Kuv paub kuv cov txhaum, kuv tsis zais, kuv cia li lees; kuv cov txhaum nyob ntawm kuv xub ntiag tsis tseg.

II-Huab Tais txhob ncua ntev, koj tuaj kaj cov neeg maub kev tsaus ntuj

2 - Yes Lus Xas Les Ntshiab, koj tsa muag nriaj cov hlua khi koj; tas zeej tsoom hwm Ntuj, nej sawv tsees npaj siab tos Huab Tais. Nej zam lub siab me, nej ntaus lub siab loj, nej ua thawj hlo, nej luag ntxhi mus ce Huab Tais cov dej tshuaj.

3 - Huab Tais koj tuaj ntxuav His Xas Lais tej txhaum, koj cev tes npo cov neeg khaub zig koj, koj tsa cov neeg tsis muaj txoj sia, koj sau tsoom pej xeem huab hwm nyob thoob qab ntuj los vij koj tus chij.

III 1 - Kuv tsa muag ntsia hauv toj hauv pes saib yog leej twg yuav tuaj pab kuv. Tus yuav tuaj pab kuv yog tus Huab Tais tsim lub ntuj tsim lub ntiaj teb.

2 - Tus saib koj nws tsis cia koj txhais taw dawm pob zeb; tus zov His Xas Lais nws tsis qaug dab ntub nws tsis tsaug zog.

3 - Huab Tais nyob ntawm koj sab xis nws ntxoov koj; Huab Tais nyob ntawm koj sab laug nws txuag koj.

4. Nruab hnub lub hnub ziab rau koj, nws yuav tsis ntaiv koj; Hmo ntuj lub hli qaim rau koj, nws yuav tsis dag koj.

5 - Huab Tais zov koj mas koj yuav maim dhau xwv txheej, Huab Tais zov koj tus plig nws zov koj txoj sia.
6 - Koj sawv kev, koj rov los, Huab Tais saib koj; Huab Tais saib koj ziag no mus txog ib txhiab ib txhis.
7-Kuv tsa muag ntsia hauv toj hauv pes saib yog leej twg yuav tuaj pab kuv Tus yuav tuaj pab kuv yog tus Huab Tais tsim lub ntuj tsim lub ntiaj teb.

Cev ob peb lo lus nplij xyom cuab, caw tas tsoom kev neej kev tsav, nrog peb ua lub ntees xa plig rau tus tas sim neej…Nws yog neeg ntseeg… tau txais lub cim ntxuav ua Huab Tais Yes Xus ib tug thwj tim hauv lub sim ceeb. Thaum nws tseem ua neej nyob, nws muaj cuab muaj yig, muaj poj niam tub se…Nws txoj kev ntseeg Ntuj…Nws muaj kev cia siab rau Tswv Ntuj…Zim txwv no, nws tso nws cuab nws yim tseg, tso lub sim ceeb tas ib sim neej rau tom qab. Peb xa nws tus ntsuj tus plig mus cuag poj cuag yawm, mus lawm pem Ntuj. Peb thov Huab Tais Tswv Ntuj siab ntshiab siab ncaj, pom tib neeg nruab siab nruab ntsws, paub tib neeg kev ncaj ncees, zam nws tej txhaum nws tau yuam kev nyob ntiaj teb no ua tsis haum Tswv Ntuj siab nyiam. Peb thov Tswv Ntuj zam txoj kev dav rau nws taug, tos txais nws tus ntsuj tus plig, saib xyuas thiab hlub nws nrog ib tsoom poj yawm txwv koob siab dawb siab huv nyob puag ncig ntawm Leej Txiv Tswv Ntuj xub ntiag mus ib txhiab niaj ib txhis.

Huab Tais Yes Xus, koj yog tus Leej Txiv xa tuaj cawm leej tib neeg, khuv leej peb yuas.
Teb : khuv leej peb yuas.

Leej Pleev, koj nqes los hauv lub sim ceeb sau tas tib neeg muaj txhaum, khuv leej peb yuas.
Teb : khuv leej peb yuas.

Huab Tais, koj muaj Leej Txiv lub hwj chim, mloog peb lub suab hu, khuv leej peb yuas.
Teb : khuv leej peb yuas.

Peb yuav ua kev cai Hmoob : hais zaj qhuab ke. Tiam sis peb yog neeg ntseeg Yes Xus hauv lub Koom Txoos Kav Tos Liv. Peb teev hawm Huab Tais Tswv Ntuj, tus tsim lub ntuj lub teb, tsim leej tij neeg cev nqaij thiab ntsuj plig. Peb hais zaj qhuab ke xa peb ( niam nkauj lag, txiv nraug laj) tus ntsuj plig mus pem ntuj raws li peb txoj kev cia siab thiab ntseeg Huab Tais Tswv Ntuj, raws lub Koom Txoos kev qhuab qhia thiab tso cai rau peb ua.

Last edited by Maiv Tooj on 17th September 2012, 10:09 am; edited 1 time in total

**Maiv Tooj** 17th September 2012, 9:54 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°5

Re: KAB KE NTEES HMOOB CATHOLIC

Post Maiv Tooj 17th September 2012, 9:54 am

QHUAB KE NTU 1

TOOM 1 : NUG SAIB PUAS YOG NWS TUAG TSEEB LOS TUAG CUAV ?

Hloov raws tus neeg (Neeg laus : Yawm liag lis laus, Puj liag lis laus ; Nrab neej : Niam nkauj quag, Niam nkauj lag, Txiv nraug laj, Txaij nraum txiv ; Hluas thiab me nyuam : Nkauj qas mim, Nkauj lag, Tub quag, Tub nraug laj…)

1-Tav nov, yog tau hnub txheej tshoj thaum ub, Ntuj ntsig teb hav caj sis voos, thiaj li xeeb tau koj, (Tub Nraug laj, Niam Nkauj lag), lub cev los txoos.

-Zoo li yog tau hnub txheej tshoj thaum ntxov i, Ntuj ntsig teb hav caj sis vos, thiaj li xeeb tau koj, (Tub Nraug laj, Niam Nkauj lag), lub cev los nyob.

2-Zoo li nyiam no, yuav (tsaus ntuj lis zus txog hmo no, kaj ntug lis zus txog hnub no) koj yuav ntim tau lub txiaj zam li zim los pw lis ko, txias lis to, tuaj rau tej npoo hleb. Ua ciav, koj tuag daj los tuag tiag ? Tuag tseeb los tuag cuav ? Yog koj tuag daj no ces, sawv lis tsees los ncig qav ncig num. Tuag tiag no ces, tig ntsej los mloog, tig muag los ntsia peb yuav qhia kev rau koj mus cuag Tswv Ntuj tus tsim koj lub cev no nas.

-Ua ciav, (Tsaus ntuj lis zus txog hmo no, kaj ntug lis zus xab tag kis kaj) ais, leej ua lub zam lis zim los txog tim toj. Leej hlob leej yau ntsia los yog koj. Yog koj los tsis yog ? Yog koj no ces tig muag los ntsia, tig ntsej los mloog peb yuav qhia kab rau koj mus cuag Tswv Ntuj tus pub txoj sia rau koj no nas.

PHWB TXOG NOOB NEEJ NOOB TSAV

3-Tav nov, yog tau hnub txheej tshoj thaum ub, ntuj hnub tuaj puag thaum i, lub ntuj raug tsis muaj lub teb raug tsis tau. Lub ntuj ces yoj lis yees xws taum paj, teb yees lis yi xws taum tsuab. Yog tau Tswv Ntuj tso sis plhuav cua moj lwg kaws nplawm ntuj ntws hauv ntuj tuaj tshuab. Tso sis plhuav nkauj hnub tuaj ziab ntiaj teb nrag cais qhuav lis qhawv xws toj zeb ntsuab.

-Yog tau hnub txheej tshoj thaum i, ntuj hnub tuaj puag thaum ub, lub ntuj raug tsis muaj lub teb raug tsis tau. Lub ntuj ces yoj lis yees xws taum tsuab, teb yees lis yi xws taum paj. Yog tau Tswv Ntuj tso sis plhuav cua moj lwg kaws nplawm ntuj ntws hauv ntuj tuaj tshuab. Tso sis plhuav nkauj hnub tuaj ziab ntiaj teb nrag cais qhuav lis qhawv xws toj zeb lag, hais li no rau koj mloog yuas.

TSWV NTUJ TSIM XYOOB NTOO, QOOB LOO THIAB TSIAJ TXHU

4-Zoo li, zaum no Tswv Ntuj tsim tau lub ntuj loj tis ua loj tuaj zoo saib. Tsim tau ntiaj teb dav tis ua dav tuaj zoo ntsia. Tswv Ntuj li qhub zoj tias: « zaum no, lub ntuj los tsim txhij cia, ntiaj teb los tsim txhua tseg. Kuv yuav tso noob qoob noob loo, xyoob ntoo nqes lawm ntiaj teb.»

-Nyem no ces Tswv Ntuj tsim tau lub ntuj loj tis ua loj tuaj zoo saib. Tsim ntiaj teb dav tis ua dav mus zoo ntsia, Tswv Ntuj li qhub zoj tias : « zaum no lub ntuj los tsim txhij cia, ntiaj teb tsim txhua tag. Tsim muaj tsiaj txhu mus puv lawm ntiaj nrag.»

5-Zoo li nyem no ces Tswv Ntuj li tsim muaj xyoob ntoo, tsiaj txhu, kab noog los txoos ntiaj teb ua lawm niaj ib pab. Ua ciav, tsis muaj leej twg los ua tswv kav.

-Tswv Ntuj tsim muaj xyoob ntoo, tsiaj txhu, kab noog los txoos lawm ntiaj teb ua lawm niaj ib puab. Ua ciav, tsis muaj leej twg los ua tswv cuab, hais li no rau koj mloog no yuas.

TSWV NTUJ TSIM NOOB NEEJ LOS TXOOS NTIAJ TEB

6-Ua ciav, yog tau hnub txheej tshoj thaum ntxov i, ntuj hnub puag thaum ub, Tswv Ntuj muab zoj twv av luaj doog los puab nraug Oo yog nraug sawm koob. Tswv Ntuj tshuab zoj niam ib pas, ua ciav nraug Oo muaj sia nyob mus thawm xyoo.

-Zoo li, hnub txheej tshoj thaum ub, ntuj hnub puag thaum ntxov i, Tswv Ntuj muab zoj twv av luaj dag los puab nraug Oo tus sawm txhiaj. Tshuab zoj niam ib pas, ua ciav nraug Oo muaj sia nyob mus thawm niaj.

7-Zoo li, Nraug Oo sawv lis tsees los ciaj ntug, tsa muag li zoj ntsia ua ciav ib puas tsav tsiaj txhu kab noog nyob muaj txig muaj nkawm. Yuav kho zoj tag Nraug Oo plawv, Nraug Oo yuav seev li yees lawm tej sib li nqhawv.

-Nraug Oo sawv lis tsees los ciaj neeg, tsa muag los saib ua ciav ib puas tsav tsiaj txhu kab noog nyob muaj txig muaj nkawm cia. Yuav Kho li zoj tag Nraug Oo siab; Nraug Oo thiaj seev li yees lawm tej sis nqiab.

8-Nyem no ces Tswv Ntuj li qhub tias : « Yuav tsim leej nkauj phim leej nraug ua txij mus ua nkawm. Muaj ib hnub zoo caij, ib hmos zoo nyoog, Nraug Oo pw lis ko twv av luaj txhais. Tswv Ntuj thau zoj Nraug Oo tug txha tav puab tsheej ib leeg ntxhais. »

-Ua ciav, Tswv Ntuj li hais zoj tias. « Yuav tsim leej nkauj phim leej nraug ua txij mus ua nkawm. Muaj ib hmos zoo caij, ib hnub zoo nyoog, Nraug Oo pw lis ko twv av mus luaj liab. Tswv Ntuj thau zog nraug Oo tug txha tav puab ciaj niam Nkauj Iab »

9-Zoo li zaum no ces, Tswv Ntuj coj nkauj Iab los phim Nraug Oo. Nraug Oo hais luag ntxhis tej sis niab: « Koj nqaij zoo xws kuv nqaij, cia kuv qaws koj ua sev sov kuv me nplooj siab. »

-Zaum no ces, Nkauj Iab tsuas pom Nraug Oo thiaj ntxim ntshaw. Nkauj Iab hais luag nyav tias : « Kuv txha zoo xws koj txha, cia kuv qaws koj ua kuv leej tub leej roog sov kuv me nplooj plawv. »

10-Zoo li, Nkauj Iab thiab Nraug Oo sawv lis tsees los ciaj neeg zov Tswv Ntuj lub vaj loog xyoob. Cuaj hnub yim hmo nkawd ncig lis yeev sab peg txog nram taug los lub txiaj oob kua muag tsis txawj poob.

-Zaum no ces, Nkauj Iab thiab Nraug Oo sawv lis tsees los ciaj neeg hauv Tswv Ntuj lub vaj loog dos. Nkauj Iab Nraug Oo ncig yeev cuaj hnub yim hmo sab peg mus nram taug los lub txiaj oob kua muag tsis paub nrog.

11-Zoo li, zaum no ces, Tswv Ntuj tsa ncauj los qhub lis zoj tias : « Hauv kuv vaj loog zeb, txiv dab txiv qas tsi los neb muab tau mus noj txhij. Tshwj lis zoj neb tsis noj tsob txiv toj txiv taug txi zoj tuaj lub liab. Yog neb noj tsau mus haus txhua, ces neb yuav paub txoj kev nyob mus lwj siab. »

-Tswv Ntuj tsa ncauj los qhub lis zoj tias : « Hauv kuv vaj loog tsua, txiv dab txiv qas tsi los neb muab tau mus noj txhua. Tsuas tshwj lis zoj tsis txhob noj tsob txiv toj txiv taug txi zoj tuaj lub doog li nkawv. Yog neb noj tsau mus haus txhua, ces neb yuav paub txoj kev nyob mus lwj plawv. » Hais li no rau koj no nas.

NTXWJ NYOOG NTXIAS TAU NOOB NEEJ MUS UA TXHAUM

12-Ua ciav, hnub txheej tshoj thaum ub, ntuj hnub puag thaum i, Tswv Ntuj tsim Nkauj iab thiab Nraug Oo txoos lawm ntiaj teb, nyob tsis muaj mob, pw los tau luag. Yog vim Ntxwj Sib Lis Nyoog siab tsis zoo, Ntxwj Nyoog paub li ntsoov tias: « Cia noob neej tau zoo hauv Tswv Ntuj lub vaj loog mus xov tsua, noob neej yuav tsis muaj ploj tsis muaj tuag. »

-Hnub txheej tshoj thaum ntxov i, ntuj hnub puag thaum ub, Tswv Ntuj tsim Nkauj Iab thiab Nraug Oo los txoos lawm ntiaj teb, nyob los tau zoo, pw tsis muaj mob. Yog vim Ntxwj Nyoog siab tsis zoo. Ntxwj Nyoog paub li ntsoov tias: « Cia noob neej nyob hauv Tswv Ntuj lub vaj loog mus xov pos, noob neej yuav tsis muaj mob tsis muaj ploj. »

13-Ntxwj Sib Lis Nyoog paub ntsoov tias: « Nkauj Iab thiab Nraug Oo ua neej luag tej siv nyav hauv Tswv Ntuj lub vaj loog mus xov cav, txawm tso cuaj hauv mob yim hauv tuag txeem mus tsis raug yuav tsis nphav. »

-Ntxwj Sib Lis Nyoog paub tias: « Cia Nkauj Iab Nraug Oo ua neej nyob luag tej sis ntxhi hauv Tswv Ntuj lub vaj loog mus xov hlau, txawm tso cuaj hauv mob yim hauv tuag yuav tsis nphav txeem mus tsis raug. »

14-Zoo li, Ntxwj Nyoog yuav txia lis ntshis ua niag nab txaij nab nraug, laum zog tuaj tus ceg cav. Ntxwj Nyoog ua zaj ua ntxeev haub Nkauj Iab Nraug Oo tias : « Tsob txiv toj txiv taug, yog neb noj tag mus haus tsau, yuav ua neb txawj puav tam li Tswv Ntuj kav. »

-Ntxwj Nyoog yuav txia lis ntshis ua niag nab txaij nab nraug, laum zog tuaj tus ceg cav mus ceg nkoj, ua zaj ua ntxeev ntxias Nkauj Iab Nraug Oo tias : « Tswv Ntuj ntshai neb noj tag lub txiv toj txiv taug, neb yuav txawj puav tam li Tswv Ntuj kav Tswv Ntuj coj no nas. »

15-Zaum no ces, Nkauj Iab xav li zoj tias : « Noj zoj lub txiv toj txiv taug thiaj yuav pom puas tsav yam li Tswv Ntuj kav.» ; Nkauj Iab tes lauj de lis zoj tuaj lub daj, lauj nas ntsaws lis ntso tuaj ntawm ncauj, poob sis nthav rau nruab plab. Ua ciav, Nraug Oo hnov lis dheev Nkauj Iab lub suab mob mus suab ntsaj.

-Nraug Oo xav zoj tias: « Saj zoj lub txiv toj txiv taug thiaj yuav paub puas tsav yam li Tswv Ntuj qhia. » ; Nraug Oo tes lauj xaiv li ko lub doog lis nciav, lauj nas rub lis zog tuaj ntawm lo, poob sis nthav puag nruab siab. Ua ciav, Nkauj Iab hnov dheev Nraug Oo lub suab quaj mus suab nyiav, no nas.

TIM NOOB NEEJ UA TXHAUM THIAJ MUAJ MOB MUAJ TUAG

16-Tav nov, zoo li zaum no ces, koj (Tub Nraug laj, niam Nkauj lag) ua neej txoos lawm ntiaj teb, tsis mus khwv los tsis tau noj. Koj li mus ua daim teb liaj teb tus rov nram tiaj. Ntxwj Sib Lis Nyoog yuav ntsaws li ntso lub mob lub tuag ua ntshua li niab rau koj tej mus ntshua siab.

-Zoo li zaum no ces, koj (Tub Nraug laj, niam Nkauj lag) ua neej txoos lawm ntiaj teb, tsis khwv los tsis tau hnav. Koj li mus ua daim liaj teb tuaj nram dawm. Ntxwj Sib Lis Nyoog yuav ntsaws li ntso vij mob vij ntsag ua ntshua li zawv koj tej mus ntshua plawv.

17-Zoo li, nyiam no ces, koj li ua mob qas ntxiag tuaj nruab siab, ua noo qas zias tuaj nruab cev, pw qaug hau lias tuaj saum txaj. Ua ciav, zaj mob txawj mob los tsis txawj kaj.

-Nyiam no ces, koj li ua mob qas ntxiag tuaj nruab cev, ua noo qas zias tuaj nruab siab, pw qaug hau lias tuaj saum ncoo. Ua ciav, zaj mob txawj mob los tsis txawj zoo no nas.

MUS RAWS TXIV TSHUAJ TUAJ KHO LOS TSIS ZOO

18-Zoo li, koj kwv koj tig, koj tub koj kiv, txaum yim tuaj tom txuas, sab laj tuaj tom taj. Cav tau leej twg txawj ntsuas mob, nkawm twg txawj kho ntsaj ?

-Ua ciav, koj kwv koj tig, koj tub koj kiv, sab laj tuaj tom taj, txaum yim tuaj tom txuas. Cav tau leej twg txawj kho mob, nkawm twg txawj kho nquag ?

19-Zoo li, nyiam no ces, leej tub tij ntoj ntaws txog nram mab. Raws tau txiv tshuaj nqes tuaj poob. Yuav nkaus hlo cuaj hauv kuab los haus, yim hauv tshuaj los txhaj. Ua ciav, kuab tshuaj mus lawm ncaj, zaj mob txhooj nyob tsis kaj.

-Nyiam no ces, leej tub kwv seev yees txog nram suav. Raws txiv tshuaj nqes tuaj txog. Yuav nkaus hlo cuaj hauv tshuaj los txhaj, yim hauv kuab los ntsuas. Ua ciav, kuab tshuaj raws tsis cuag, zaj mob txhooj nyob tsis nquag.

20-Ua ciav, koj vuag yees nthab los plam ntawm npab, vuag yees tsev los plam ntawm tes, koj ntog ib teeg sawv tsis ciaj neeg, koj ntog ib vuag sawv tsis ciaj luag. Koj txoj pa thiaj tu lis nrho, ncauj nplaig qhuav lis qho.

-Zoo li, koj vuag yees nthab los plam ntawm npab, vuag yees tsev los plam ntawm tes, koj ntog ib teeg sawv tsis ciaj neeg. Koj ntog ib vuag sawv tsis cuag luag. Koj txoj pa thiaj tu lis nrhawv, ncauj nplaig qhuav lis qhawv.

21-Nyiam no ces, koj kwv koj tig thiaj muab tsoos tsuj tsoos npuag rau koj hnav, muab koj xyab li zoj tuaj tom taj, kev kwv kev tij, kev neej kev tsav, kev zej kev zos yuav tuaj tu lawm koj qhua taw lawm koj kab.

-Zaum no ces, koj kwv koj tig thiaj muab tsoos maj tsoos ntuag rau koj npua, muab koj xyab li nciav ntawm plaj tsev, kev kwv kev tij, kev neej kev tsav, kev zej kev zos yuav tuaj qhub lawm koj kab taw lawm koj kev no nas.

Txog toom no mas tas sawv daws ho ua ib nqe thov ntuj rau tus tuag.
Saib zaj 1 Thov cov leej ntshiab, phab 11 thiab zaj 2 Vam txog Tswv Ntuj cov txiaj ntsim , phab 12

Last edited by Maiv Tooj on 17th September 2012, 10:02 am; edited 1 time in total

**Maiv Tooj** 17th September 2012, 10:00 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°6

Re: KAB KE NTEES HMOOB CATHOLIC

Post Maiv Tooj 17th September 2012, 10:00 am

QHUAB KE TOOM 2 : TSIM LUB HLEB

22-Zoo li, zaum no, koj (Tub Nraug laj, niam Nkauj lag), qaij qaug lis yeev los mus, koj kwv koj tig nqes tuaj txog, kev zej kev zos nqes tuaj poob. Ua ciav txiaj xab los tsis muaj txiaj ntoo los tsis txawm. Yuav muab qas tsi ua lawm koj lub txiaj xab ? Yuav muab ntoo maj ntoo tov los ua koj lub txiaj xab. Ntoo maj nyob lawm ntoo maj tej mus qab nrag.

-Yuav muaj qas tsi ua lawm koj lub txiaj ntoo ? Yuav muab too nkoj ntoo lug los ua koj lub txiaj ntoo. Ntoo nkoj ntoo lug nyob txawm tej mus qab roob.

23-Zoo li, zaum no, Txawj Nkiag nqes tuaj poob, Tub Txawj nqes tuaj txog kwv tau rab taus peb plhu ncauj, rab kawb leej peb plhu hniav, ncig lis yeev qaum ntoo tuaj, lug zoj qab ntoo los, ntxus tawv to ntoo maj ntoo tov qaug tav toj. Tes lauj los nrog txiav, lauj nas los nrog phua, yuav phua lis plho ua plaub nreej, kawb li zoj tau koj (Tub Nraug laj, niam Nkauj lag), lub tsev mus xwm leej no nas.

-Ua ciav, Tub Txawg nqes tuaj poob, Txawj Nkiag nqes tuaj txog kwv tau rab taus peb plhu ncauj, kawb leej peb hniav zuag, ncig lis yeev qaum ntoo tuaj, lug zoj qab ntoo los, ntxus tawv to ntoo nkoj ntoo lum qaug lis ncees mus tav zag. Tes lauj los nrog txiav, lauj nas los nrog phua, phua li plhawv ua plaub sab, kawb lis zus tau lawm koj (Tub Nraug laj, niam Nkauj lag), lub tsev mus xwm fab.
Yog vim li no, thiaj tau lub txiaj xab txiaj ntoo zwm koj lub cev txiaj zam mus tiv luaj tiv av no nas.

UA LUB SIM CEEB IB LOS TSAUG

24-Tav nov, (Tub Nraug laj, niam nkauj lag) koj yuav cim lis ntsoov tuaj nruab siab, nco lis nraim tuaj nruab plawv tias : Thaum koj ua neej txoos lawm ntiaj teb, koj tau noj tsuag ntiaj teb ib tsav txuj, siv tas ib ntsug zoov, koj haus tas ntiaj teb ib ntsug dej, rauv tag ib ntsug taws. Koj yuav nco ntsoov ua lub sim ceeb ib los tsaug sawb sim ncauj xub ke mus cuag tus tswv tsim koj lub cev nyob muaj chaw no nas.

-Tav nov, (Tub Nraug laj, niam nkauj lag) koj yuav cim lis ntsoov tuaj nruab plawv, nco lis nraim tuaj nruab siab tias : Thaum koj ua neej txoos lawm ntiaj nrag, koj tau siv ntiaj nrag ib tsav ci; rauv tas ib ntsug taws, haus tas ntiaj teb ib ntsug dej. Koj yuav nco ntsoov ua lub sim ceeb ib los tsaug sawv kev lis tsee los mus cuag tus tswv tsim koj txoj sia nyob muaj tsev no nas.

XA MUS CUAG TSWV NTUJ

25-Tav nov, koj ntim tau lub txiaj zam lis zim los mus nce li hlo Tswv Ntuj txoj hauv kab. Zaum no, koj yuav tseg koj niam koj txiv, koj kwv koj tig (koj tub koj ki, koj txij koj nkawm) ua neej quaj ntsuag seev lis yees tuaj rov tom qab.

-Zaum no, koj ntim tau lub txiaj zam lis zim los mus nce li hlo Tswv Ntuj txoj hauv kev. Koj yuav tseg koj niam koj txiv, koj kwv koj tig (koj tub koj ki, koj txij koj nkawm) ua neej quaj ntsuag seev lis yees tuaj rov tom tsev.

26-Ua ciav, koj mus txog pem ntuj ub, koj yuav mus pom nkawm tub zov rooj ntug ua daj li zus thaiv koj kab ua dos li zuav thaiv koj kev. Koj yuav tsa ncauj tias : « Vim thaum koj ua neej txoos lawm ntiaj teb, koj tsis khwv los tsis tau noj. Koj mus ua daim teb zuj zias tuaj tim toj, thiaj mus khaws tau Ntxwj Sib Lis Nyoog lub mob ces koj li tau ploj.»

-« Vim thaum koj ua neej txoos lawm ntiaj teb, koj tsis khwv los tsis tau hnav. Koj mus ua daim teb zuj zias tuaj tim tsuag, koj thiaj khaws tau Ntxwj Sib Lis Nyoog lub mob ces koj li tau tuag. » nkawm tub zov rooj ntug li tso koj kab qhib koj kev mus no nas!

27-Zaum no ces, koj ntog ib teeg sawv tsis ciaj neeg. Koj ntog ib vuag sawv tsis ciaj luag. Koj vuag yees nthab los plam ntawm npab, vuag yees tsev los plam ntawm tes. Zaum no koj ntim tau lub txiaj zam lis yeev yuav los mus cuag tus tswv tsim koj lub cev, luag thiaj li yuav tso koj kev.

-Au ciav, koj ntog ib teeg sawv tsis ciaj neeg. Koj ntog ib vuag sawv tsis ciaj luag. Koj vuag yees tsev los plam ntawm tes. Vuag yees nthab los plam ntawm npab. Zaum no koj ntim tau lub txiaj zam lis yeev yuav los mus cuag tus tswv tsim koj txoj pa, luag thiaj li yuav tso koj kab no nas!

MUAB COV DEJ NTSHIAB LOS NTXUAV NEEG LUB KEEB TXHAUM

28-Zoo li, hnub txheej tshoj thaum ub, dej ntxheb txawm tau los tsis ntshiab, coj los ntxuav tsis nyog leej tib neeg ntsuj duab ntsuj plhu kom tshiab.

-Hnub txheej tshoj thaum ub, dej cag txawm tau los tsis huv, coj los ntxuav tsis nyog leej tib neeg tus ntsuj duab ntsuj plhu kom du.

29-Zoo li nyem no ces, leej twg li ua kom dej ntxheb ntshiab ? Yog Tswv Ntuj Leej Tub Yes Xus thiaj ua tau dej ntxheb ntshiab los ntxuav leej tib neeg lub siab, ntxuav keeb txim keeb txhaum lawm tej sis niab, noob neej li yuav tau nyob kaj lug lawm niaj ib txhiab.

-Yog tau, leej twg li ua kom dej cag huv ? Yog Tswv Ntuj Leej Tub Yes Xus thiaj ua tau dej cag huv los ntxuav leej tib neeg tus ntsuj plhu, ntxuav keeb txim keeb txhaum mus kom du, noob neej li yuav tau nyob kaj nrig mus kaj lug.

30-Nyem no ces, peb leej tib neeg thiaj vam li ntsoov Huab Tais Yes Xus lub hwj huam muab dej cag tov lawm dej ntxheb, plhis lis plho ua dej huv, (Tsaus ntuj txog hmo no, kaj ntug txog hnub no) muab los ntxuav lawm koj (Tub Nraug laj, niam Nkauj lag) lub keeb txig mus keeb txhaum kom koj lub pliaj plhu nrog ntsuj duab ntsuj plig yuj lis lees los mus cuag Huab Tais Tswv Ntuj.

-Peb leej tib neeg thiaj vam li ntsoov Huab Tais Yes Xus lub hwj huam muab dej ntxheb los tov dej cag, yuav plhis lis plho ua dej ntshiab (Tsaus ntuj txog hmo no, kaj ntug txog hnub no) muab los ntxuav lawm koj (Tub Nraug laj, niam Nkauj lag) lub keeb txhoj mus keeb txhaum kom koj lub cev cwj yag sawv lis tsees tshiab nrog ntsuj duab ntsuj plig yuj lis lees los mus vij lawm Tswv Ntuj lub theej kiab, no nas.

(Muab dej ntshiab pov ib lwm rau saum tus tuag : Koj tau ntxuav plig hauv Leej Txiv thiab Leej Tub thiab Leej Ntuj Plig Ntshiab npe)

HUAB TAIS YES XUS TUS NTOO CUAM COJ KAB QHIA KEV

Leej tub tuag koj nco ntsoov tuaj nruab siab (nruab plaw) cim li nraim rau nruab plaw, (nruab siab)
Huab Tais Pleev qaim li qho leej tib neeg txoj ke tuag (ploj) ntsaws li ntso tej nqaw awv, (tiab) tes pes lauj (lauj xib nas) nqus koj npab (tuav koj tes) nce li ko puag qaum ntuj nyob muaj chaw, (nyob ib txhiab)

Huab Tais Pleev yog tus txhiv tus cawm seej leej tib neeg tus ntsuj duab rov cia sia nto koob meej.
Huab Tais Pleev yog leej neeg lub chaw ntoj chaw khaub zig tsa ntsuj plig sawv ciaj sia nyob mus li.

Leej tub tuag koj yuav soj koj yuav taug Leej Huab Tais txoj xub kab, koj li cuag Huab Tais qab poob sis nthav Huab Tais nrag.
Koj yuav soj koj yuav taug Leej Huab Tais txoj xub kev, koj li raws Huab Tais hneev tshwm li plaws Huab Tais tsev, nyob Huab Tais tes.

31-Tav nov, Leej Tub Yes Xus tuaj tshwm sim rau lawm ntiaj teb. Khee kawv tus plaub xo ncej ntug rau nws tib leeg ua tus pab. Ua ciav, ntiaj teb tib neeg yog tub roj tub ruag tsis paub tab, tau muab Yes Xus tua lis nthi, dai lis ncuv ntawm Ntoo Cuam ua lawm daj npab.
-Zoo li, Leej Tub Yes Xus tuaj tshwm sim rau lawm ntiaj teb. Khee kawv tus plaub xo ncej ntug rau nws tib leeg ua tus nres. Ua ciav, ntiaj teb tib neeg yog tub roj tub ruag tsis paub cai, yuav muab zoj Yes Xus tua lis nthi, dai lis ncuv saum Ntoo Cuam ua daj tes.

32-Nyem no ces Yes Xus tuag lis nthi ua daj tes lis ncuv rau ntiaj teb leej tib neeg kev nto mus chaw thuam. Peb leej tib neeg tsis paub, twb yog nws tuag los txhaws noob neej qhov ploj mus qhov tuag.
-Ua ciav, Yes Xus tuag lis nthi ua daj tes lis ncuv rau ntiaj teb leej tib neeg kev hiam mus raug tsim. Peb leej tib neeg tsis paub, twb yog nws tuag los theej peb leej tib neeg lub txhoj lub txim.

33-Nyem no ces Yes Xus tuag lis nthi puv niaj peb hnub. Ua ciav nws sawv lis tsees, nce lis hlo pem ntuj ub zaum li ntua Leej Txiv sab xis. Kom noob neej nqaij ciaj zib txha plaub mag txawj tuag los txawj sawv li tsees taug Leej Tub Yes Xus qab muaj txoj sia tshiab nyob lawm niaj ib txhis.

-Nyem no ces Yes Xus tuag lis nthi puv niaj peb hnub. Ua ciav nws sawv lis tsees, nce lis hlo pem ntuj ub nrog Leej Txiv zaum li ntua lub theej kiab. Kom noob neej nqaij ciaj zib txha plaub mag txawj tuag los txawj sawv lis tsees lawv Yes Xus qab muaj txoj sia tshiab nyob lawm niaj ib txhiab.

34-Tav nov, (Tub Nraug laj,- niam Nkauj lag) koj yuav nco lis ntsoov tuaj nruab siab, cim lis nraim tuaj nruab plawv tias : « Thaum koj ua neej txoos nyob lawm ntiaj teb, koj mloog Yes Xus lus qhub, yuav Yes Xus lus qhia. Koj tau nrog nws thooj siab los koom cev. Zaum no koj ntim tau lub txiaj zam lis zim los mus, koj yuav raws Ntoo Cuam coj koj kab taw lawm koj kev. »

-Tav nov, (Tub Nraug laj,- niam Nkauj lag) koj yuav nco lis ntsoov tuaj nruab siab, cim lis nraim tuaj nruab plawv tias : « Thaum koj ua neej txoos nyob lawm ntiaj teb, koj mloog Yes Xus lus qhub, yuav Yes Xus lus qhia. Koj tau nrog nws thooj plaw los koom plab. Zaum no koj ntim tau lub txiaj zam lis zim los mus, koj yuav raws Ntoo Cuam coj koj kev taw lawm koj kab. » no nas.

(Muab Ntoo Cuam cob rau tus tas sim neej )

MUS TXOG TSWV NTUJ LUB TSHEEJ NTSHIAB

35-Zoo li, zaum no ces, Ntoo Cuam coj koj mus txog Tswv Ntuj lub Theej Kiab. Koj yuav pom tas tsoom Leej Ntshiab thiab koj tsoom poj yawm txwv koob nrog Huab Tais Yes Xus tuaj tos koj ua ntshua lis niab.

-Zaum no ces, Ntoo Cuam coj koj mus txog Tswv Ntuj lub teb chaws. Koj yuav pom tas tsoom Leej Ntshiab thiab koj tsoom poj yawm txwv koob nrog Huab Tais Yes Xus tuaj tos koj ua ntshua lis zawv.

36-Zoo li, zaum no ces, koj mus txog Tswv Ntuj lub Tsheej Ntshiab, koj yuav pom nws Leej Tub Yes Xus tuaj tos koj luag li ntxhi. Koj yuav tau nrog nws nyob mus ib sid.

-Zaum no ces, koj mus txog Tswv Ntuj lub Tsheej Ntshiab, koj yuav pom nws Leej Tub Yes Xus tuaj tos koj luag li nyav. Koj yuav tau nrog nws nyob niaj mus ib txhis tsis txawj tag, hais li no qhia koj paub no nas.

NROM TXIAJ NTSIG RAU TUB KI:
(Txwm no hais rau cov muaj cuab yig thiab tub ki nkaus xwb)

37-Zaum no ces, koj tau mus zaum li ntua Tswv Ntuj lub mus zoo rooj nyob thawm xyoo. Koj nco lis ntsoov thov Tswv Ntuj tug txiaj ntsha, txiaj ntsig rau koj tub koj ki koj txheeb koj ze ua neej nyob tom qab kom nyob mus sawm koob.

-Zaum no ces, koj tau mus zaum li ntua Tswv Ntuj lub zoo rooj nyob thawm niaj. Koj nco lis ntsoov thov Tswv Ntuj txiaj ntsha, nrom txiaj ntsig rau koj tub koj ki koj txheeb koj ze ua neej nyob tom qab kom nyob mus sawm txhiaj no yuas (Txiv Nraug Laj, Niam Nkauj Lag…) es om.

Zaj qhuab ke ntu 1 xaus li no.

**Maiv Tooj** 17th September 2012, 10:15 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°7

Re: KAB KE NTEES HMOOB CATHOLIC

Post Maiv Tooj 17th September 2012, 10:15 am

KAB KE XA PLIG

Tus coj lub txoos hais tias:
Peb twb hais zaj qhuab ke raws li peb Hmoob kab lis kev cai. Hmoob hais tias : ua neej nyob, lub cev laus qaij qaug los mus. Tiam sis tshuav tus ntsuj duab ntsuj plig. Hmoob thiaj los qhia kev xa tus ntsuj plig mus cuag poj cuag yawm. Vim Hmoob ntseeg li ntawd.

Zim txwv no peb tig los txais kev ntseeg Tswv Ntuj. Peb ntseeg tias, poj yawm dua nras tas. Lawv mus nyob muaj Tswv saib, muaj Tswv kav, nyob ua npoj ntws, mus ua ntxaij daws. Tswv Ntuj yog tus nyob lub chaw siab, tus zaum lub ntsis ntuj, yog tus Huab Tais tsim lub ntuj lub teb, tus tsim lub sim ceeb qhov muag pom thiab lub sim ceeb qhov muag pom tsis tau. Tus tsim tib neeg thiab txoj sia, ntsuj plig yog Huab Tais Leej Txiv Tswv Ntuj. Tus muaj hwj chim, tsim nyog peb yuav teev thiab yuav qhuas, yog Tswv Ntuj tib leeg. Leej Txiv tuaj yeem xas nws Leej Tub Yes Xus yug los muaj nqaij muaj txha, kom qhuab qhia tau, coj tau peb tib neeg nrog nws mus nyob ua ke ntawm Leej Txiv Tswv Ntuj xub ntiag, saum lub ncov lub ntsis ntuj.

Peb ntseeg li ntawd. Vim li no, zaj xa plig ntu 2, yog peb zaj teev ntuj. Peb thov cov neeg siab ncaj, siab dawb, nyob ntawm Tswv Ntuj xub ntiag pab peb thov Tswv Ntuj txais peb (tus tij, tus muam…) mus nyob ua npoj koom ua ntxaig ntawm Tswv Ntuj xub ntiag. Peb yuav tsa ncauj thov peb Leej Niam nkauj Xwb Mab Liab cev peb tej lus, vam cov Thwj Tim, cov leej Ntshiab thiab peb tej poj yawm txwv txoob Hmoob sawv daws tej koob hmoov thiab peb vam txog Huab Tais Yes Xus yog tus yuav pab tau peb.

Tus coj cuab suab hais :

ZAJ 1. THOV COV LEEJ NTSHIAB

T.C.= Leej Ntshiab Miab Liab aib
S.D. -Koj thov Ntuj rau nws.
T.C.= Tas ib Tsoom Tshiab nyob saum ntuj sawv daws aib !
S.D. -Nej thov…
T.C.= Leej Ntshiab Has Nplas aib !
S.D. - Koj thov…
T.C.= Tas ib Tsoom Poj Yawm Txwv Koob His Xas Lais Ntshiab aib !
S.D. - Nej thov...
T.C.= Tas ib Tsoom Hmoob cov Poj Yawm Txwv Koob Ntshiab aib !
S.D. - Nej thov...
T.C.= Cov Yaj Saub Ntshiab aib !
S.D. - Nej thov...
T.C.= Leej Ntshiab Zam ntxuav plig aib !
S. D. - Koj thov...
T.C.= Leej Ntshiab Yos Xes aib
S.D. - Koj thov...
T.C.= Leej Ntshiab Pob Zeb aib !
S.D. Koj thov...
T.C.= Leej Ntshiab Paj Lug aib
S.D. - Koj thov...
T.C.= Leej Ntshiab As Nres aib !
S.D. - Koj thov...
T.C.= Leej Ntshiab Zam aib !
S.D. - Koj thov...
T.C.= Cov Hauv Paus Xa Lus siab ntshiab aib !
S.D. - Nej thov...
T.C.= Tas ib Tsoom Tim Khawv ntshiab aib !
S.D. - Nej thov...
T.C.= Tas ib Tsoom Leej Txiv ntshiab aib !
S.D. - Nej thov...
T.C.= Tas ib Tsoom Leej Niam ntshiab aib !
S.D. - Nej thov Ntuj rau nws

ZAJ 2. VAM TXOG TSWV NTUJ COV TXIAJ NTSIM
Hloov dua nqe txais :

T.C.= Huab Tais Yes Xus koj tuaj pov hwm nws.
S.D. - Huab Tais Yes Xus koj tuaj pov hwm nws.
T.C.= Kom nws tsis txhob raug nplua.
S.D. - Huab Tais…
T.C.= Kom nws tsis txhob mus daig lub lav tuag mus li.
S.D. - Huab Tais…
T.C.= Peb vam txog cov txiaj ntsim koj yug los ciaj neeg hauv lub sim ceeb.
S.D. - Huab Tais…
T.C.= Peb vam txog cov txiaj ntsim koj mus tshaj lub Moo Zoo qhiaTswv Ntuj lub Ceeb Tsheej.
S.D. - Huab Tais…
T.C.= Peb vam txog cov txiaj ntsim koj raug luag hiam los cawm lub qab ntuj neeg.
S.D. - Huab Tais…
T.C.= Peb vam txog cov txiaj ntsim koj tuag theej ntiaj teb tib neeg lub txig lub txhaum.
S.D. - Huab Tais…
T.C.= Peb vam txog cov txiaj ntsim koj sawv rov muaj sia nyob mus li.
S.D. - Huab Tais…
T.C = Peb vam txog cov txiaj ntsim koj rov mus lawm pem ntuj.
S.D. - Huab Tais…
T C.= Peb vam txog cov txiaj ntsim koj xa Leej Ntuj Plig nqes los tiv thaiv ntiaj teb no.
S.D. - Huab Tais…
T.C = Zaum no txog nws lub caij txiav txim lawm.
S.D. - Huab Tais…
T.C.= Koj ua siab zam rau nws.
S.D. - Huab Tais Yes Xus koj…

ZAJ 3. NTSUJ PLIG TSO LUB NTIAJ TEB NO TSEG.

T.C.= Plig ua Ntuj me nyuam koj tso lub ntiaj teb no tseg mog.
S.D. - Plig ua Ntuj me nyuam koj tso lub ntiaj teb no tseg mog.
T.C.= Tus muaj hwj huam tas nrho, nws yog koj txiv, nws yog tus tsim koj, koj tuav txog nws lub npe, koj cia li mus os.
S.D. - Plig ua Ntuj me nyuam…
T.C.= Huab Tais Yes Xus Pleev, nws tuaj yeem raug hiam los pab koj, koj tuav txog nws lub npe, koj cia li mus os.
S.D. - Plig ua Ntuj me nyuam…
T.C. = Huab Tais Leej Ntuj Plig, nws tuaj tsa tsev nyob hauv koj, koj tuav txog nws lub npe koj cia li mus os.
S.D. - Plig ua Ntuj me nyuam…
T.C.= Tus Nkauj Tsim Txiaj Nkauj Xwb Mab Liab, nws yog peb tus Huab Tais Yes Xus niam, koj tuav txog nws lub npe, koj cia li mus os.
S.D. - Plig ua Ntuj me nyuam…
T.C.= Koj hu txog tas ib Tsoom Leej Txiv Ntshiab thiab Leej Niam Ntshiab, koj tuav txog lawv lub npe koj cia li mus os.
S.D. - Plig ua Ntuj me nyuam…
T.C =Hnub no, koj lub teb chaws yog lub teb chaws koj yuav tau nyob tiaj tus mus li koj tso siab koj cia li mus os.
S.D. - Plig ua Ntuj me nyuam…
T.C.= Hnub no, koj yuav tau mus pem lub nroog ntshiab Xis Yoos, koj tso siab, koj cia li mus os.
S.D. - Plig ua Ntuj me nyuam…

Nyeem ib zaj Ntawv Ntshiab
(Txhais zaj ntawv ntshiab ob peb los rau sawv daws)

ZAJ 4. XA MUS CUAG TSWV NTUJ
Txwm no hais raws phaj neeg (Tij, Muam. Tub, Ntxhais, Niam, Txiv)

T.C.= Tav nov (Tij) zoo nyiam koj mus pem lub teb chaws, koj yuav so mus li yuas.
S.D. - Tav nov (Tij) zoo nyiam koj mus pem lub teb chaws, Koj yuav so mus li yuas.
T.C.= Peb xa koj mus rau tus muaj hwj huam tas nrho, koj sawv lis tsees los mus os.
S.D. - Tav nov…
T.C.= Peb tso koj nyob hauv tus tsim koj, nws xub ntiag, koj sawv lis tsees los mus os.
S.D. - Tav nov…
T.C.= Kuv xa koj mus cuag tus muab av luaj los puab koj, koj sawv lis tsees los mus os.
S.D. - Tav nov…
T.C.= Huab Tais Yes Xus Pleev, nws yuav txais koj los nyob hauv tsoom hawm nws, koj yuav pom nws lub ntsej muag hlub koj, koj sawv lis tsees los mus os.
S.D. - Tav nov…
T.C.= Koj yuav dim plhuav tas puas tsav yam hauv lub teb chaws tsaus ntuj, koj sawv lis tsees los mus os.
S.D. - Tav nov…
T.C. = Tus dab phem Xas Tas thiab nws cov dab yuav khiav mus deb ntawm koj txoj xub ke, koj sawv lis tsees los mus os.
S.D. - Tav nov…

Hloov tshiab nqe txais :

T.C.= Tav nov (Tij) zoo nyiam koj mus pem lub teb chaws koj yuav pom kev tas ib txhiab ib txhis.
S.D. - Tav nov (Tij) zoo nyiam koj mus pem lub teb chaws koj yuav pom kev tas ib txhiab ib txhis.
T.C.= Nkauj Tsim Txiaj Mab Liab, nws yog peb tus Huab Tais Niam, nws dauv muag luag nyav tos txais koj, koj sawv lis tsees los mus os.
S.D. - Tav nov…
T.C.= Ntuj cov Tshiab ua ib pab zoo saib, lawv khiav nplawg ntia tuaj tos
koj tus plig, koj sawv lis tsees los mus os.
S.D. - Tav no…
T.C.=Cov Hauv Paus Xa Lus ua ib pab txwj laus txiav txim, lawv tuaj puag koj, koj sawv lis tsees los mus os.
S.D. - Tav nov…
T.C.= Cov Tim Khawv ua ib npoj yaig kwv luag, lawv tuaj ntsib koj, koj sawv lis tsees los mus os.
S.D. - Tav nov…
T.C.= Cov Leej txiv ntseeg ua ib pab, lawv tuav tej rev paj ntoos, lawv tuaj tos koj, koj sawv lis tsees los mus os.
S.D. - Tav nov…
T.C.= Cov Niam Nkauj Xwb ua ib pab, lawv luag ntxhwb ntxhi, lawv tuaj txais koj, koj sawv lis tsees los mus os.
S.D. - Tav nov…
T.C.= His Xais Lais cov poj yawm txwv koob, ua ib pab txwj laus nyob cus plaws, lawv cev tes plhws koj, koj sawv lis tsees los mus os.
S.D. Tav nov…

Hloov tshiab nqe txais :

T.C.= Tav nov (Tij) zoo nyiam, koj mus pem lub teb chaws, koj yuav nyob kaj lug, nyob kaj nrig.
S.D. - Tav nov (Tij) zoo nyiam, koj mus pem lub teb chaws, koj yuav nyob kaj lug, nyob kaj nrig.
T.C.= Tsoom neeg siab dawb yuav mus noj ib roog qav, nyob ntawm Huab Tais xub ntiag, koj sawv lis tsees los mus os.
S.D. - Tav nov…
T.C.= Cov neeg siab huv, hom khaj mus li nyob ntawm Huab Tais xub ntiag, koj sawv lis tsees los mus os
S.D. - Tav nov…
T.C.= Leej Pleev zoo siab tuaj yeem tuag kom tau pab koj, cawm koj ntawm lub lav tuag mus li, koj sawv lis tsees los mus os.
S.D. - Tav nov…
T.C.=Tus Huab Tais muaj txoj sia Yes Xus Pleev, nws yuav tsa koj nyob hauv nws lub loog, koj sawv lis tsees los mus os.
S.D. - Tav nov…
T.C.= Tus Zoo Tswv zov yaj, nws yuav txais koj nyob hauv nws pab yaj, koj sawv lis tsees los mus os.
S.D. - Tav nov…
T.C.= Leej Pleev yuav daws koj cov txhaum, nws yuav cia koj nrog nws Tsoom Pleev zaum nyob ntawm nws phab xis, koj sawv lis tsees los mus os.
S.D. - Tav nov…
T.C.= Koj muaj txoj hmoov zoo, koj yuav pom tus yog Tseem Huab Tais, koj sawv lis tsees los mus os.
S.D. - Tav nov…
T.C.= Koj yuav nyob ntsia Tswv Ntuj mus tas txhiab niag tim puas xyoo, koj sawv lis tsees los mus os
S.D. - Tav nov…

Lub txoos xa plig xaus li no. Teem caij teem nyoog rau lwm hmo…

T.C.= Kuv tso kuv txoj sia rau hauv koj txhais tes,
Kuv tus Huab Tais,Tswv Ntuj qhia qhov tseem ceeb
Koj yog tus cawm peb.
Peb tus Vaj koj txuag peb xws li txuag hauv lub ntsiab muag.
Ntuj Txiv koj nthuav tis, Peb los nkaum hauv koj qhov ntxoov
Huab Tais Leej Txiv, Huab Tais Leej Tub, Huab Tais Leej Ntuj Plig,
Muaj koob meej nto moo lug
Lub zim txwv no mus txog fab lwm txheej,
Xws li txheej laus thaud los. Ua li.

Hu txog Leej Txiv thiab Leej Tub thiab Leej Ntuj Plig lub npe. Ua Li

**Maiv Tooj** 17th September 2012, 10:32 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°8

Re: KAB KE NTEES HMOOB CATHOLIC

Post Maiv Tooj 17th September 2012, 10:32 am

Teev Ntuj Zov Hmo

Hu Txog Leej Txiv thiab Leej Tub thiab Leej Ntuj Plig lub npe. Ua Li

Huab Tais, thaum kev tsaus ntuj ua peb ntog ib teeg tu ib saw, nchuav ib nkog, koj tib leeg thiaj yuav ua tau kom peb siab ntsws rov loj tuaj. Pab txhawb peb txoj kev ntseeg koj Leej Tub Yes Xus kom ruaj nreb, nws sawv hauv tsoom tub tuag rov los. Peb vam tias, muaj ib hnub peb leej tij … yuav nrog peb tus Huab Tais txais txoj sia nyob mus li. Peb vam txog Yes Xus Pleev peb tus Huab Tais. Ua Li

Huab Tais, txhob ncua ntev, koj tuaj kaj cov neeg maub kev tsaus ntuj

1 - Nej ntsia tus Huab Tais cawm peb tuaj yuav txog. Nyem no txog lub zwj ceeb kawg, Tswv Ntuj tso nws Leej Tub tuaj. Nws tsa nws tus chij coj tas txhia haiv neeg. Nws muaj peev xwm hlob mus li, nws txoj kev thaj yeeb yuas tsis kawg.

2 - Yes Lus Xas Les Ntshiab, koj tsa muag nriaj cov hlua khi koj; tas zeej tsoom hwm Ntuj, nej sawv tsees npaj siab tos Huab Tais. Nej zam lub siab me, nej ntaus lub siab loj, nej ua thawj hlo, nej luag ntxhi mus ce Huab Tais cov dej tshuaj.

3 - Huab Tais koj tuaj ntxuav His Xas Lais tej txhaum, koj cev tes npo cov neeg khaub zig koj, koj tsa cov neeg tsis muaj txoj sia, koj sau tsoom pej xeem huab hwm nyob thoob qab ntuj los vij koj tus chij.

Npaj ib lub caij : Ib tug txheeb ze los piav nws laus lub neej pub sawv daws mloog.

Teev Saw Mab Liab quas zaj nyeem
(Lc2,22-35; Jn19,25-30; Ac1,9-14)

Ntawv Thoob Tsib (1,13-15 ; 2,23-24)

13 Tswv Ntuj tsis tau tsim kev ploj tuag. Nws tsis txaus siab pom cov ciaj sia ploj mus.
14 Nws tsim puas tsav yam kom los nyob txawm. Tas txhia yam tsim muaj nyob ntiaj teb puav leej muaj nqes. Hauv tas txhia yam tsis muaj tshuaj lom tuag. Kev ploj tuag kav tsis tau daim av.
15 Vim kev ncaj ncees yog txoj sia nyob mus li.
23 Tswv Ntuj tsim leej tib neeg kom nyob tsis pluam. Nws ua leej tib neeg txawm nkaus li yog nws tus kheej.
24 Vim dab phem kev khib kev ploj tuag nkag tau los hauv lub ntiaj teb. Cov neeg xaiv tuaj nws tog puav leej khaws tau los tuav.

Nkauj Paj Nruag 125 (124) Huab Tais pov hwm nws haiv neeg.

Ib zag nkauj nce roob.
1 Leej neeg twg tso siab rau Huab Tais nws zoo puav tam li roob Xis Yoos :
nws nyob ruaj nreb tsis ua zog, khov kho mus tas ib sid.
2 Huab Tais sawv koos nws haiv neeg puav tam cov roob sawv koos Yes Lus Xas Les, txij no mus tas ib txhiab niaj ib txhis.
3 Vaj nkhaus tus quab tsis sawv nam cov ncaj ciam av,
cov neeg ncaj tes tsis lo txhaum.
4 Huab Tais, koj zoo rau cov neeg zoo cov neeg ncaj.
5 Thov kom Huab Tais lawv cov neeg xib fab nkhaus khiav, ntiab lawv mus poo cov phem. Pub kom kev thaj yeeb roos His Xas Lais.

Peb mloog leej Ntshiab Jean Chrysostome nthuav zaj nkauj paj nruag 124. Nws sau tseg xyoo 370 :

Sim qhia kuv paub, dab tsi ua rau nej txhawj xeeb dua cov ? Puas yog nej txoj kev nkees thiab kev tais caus ? Kev ploj tuag puas yog yam phem loj dua tas tib si qhov phem ? Thiab kev ploj tuag yog nuj nqes ntawm lub sim ceeb yuav tau them rov rau nws.Vim li ntawd, yuav tau ua kom qhov nuj nqes ntawd saib puas yuav tsam rau yus ? Ntxov lig, sawv daws taug tib txog kab, tim li cas thiaj tsis ua kom kev ploj tuag tsam rau yus ?
Sim neej no muaj kev txom nyem ntau, lwm sim tej koob hmoov nyob mus li yuav ua nej kaj siab loj tshaj tas nej kev ntsaj kev nroo tib si. Ua neej nyob, nej pom zoo li muaj kev chim siab hnyav tsuam rawv nej, piv li tej tib neeg siab ntsws tsis tau kev cob cuab nyob tsaus nti tsi muaj chaw vam nyob qhov twg, thiab lawv nyiaj qhi lawv lub mob ncus nco tsis txawj ntaug…ua rau lawv tos ntshi hnub tuag xwb. Yus twb pom muaj tej txhia neeg muab ntaj muab hlua txov lawv txoj sia.
Ntawm nej yuav tau coj kom txawv luag, tej txiaj ntsim zoo tshaj muaj nyob saum ntuj muab rau nej ua nej tug, nej txawm yuav tsis paub txhawj nej kev nkees, kev tais caus li los, nej twb muaj tus tiv thaiv nej nws muaj hwj huam loj tas npaud ? Nej tsis nco tus yaj saub tej lus los cas : « Leej neeg twg tso siab rau Huab Tais nws zoo puav tam li lub roob Xis Yoos : nws nyob ruaj nreb tsis ua zog, khov kho mus tas ib sid. »
Kev tso siab txawm tau ruaj cag tsis qaij qaug yam toj roob hauv pes. Nej txawm ua zaj diaj toj roob tsis qeeg, ua ntxeev nchos hauv pes tsis ua zog. Kuj zoo tib yam nkaus, leej twg thab tus neeg tso nws pluaj siab nyob hauv Tswv Ntuj, tus ntawd qaug zog dawb, vim pluaj siab cog hauv Tswv Ntuj tseem khov ruaj tshaj toj roob hauv pes nyob ruaj cag. « Leej twg nyob koos Yes Lus Xas Les yuav tsis thim ncauj thim lus » Tseem muaj lwm tus txhais li no : « Leej twg nyob koos Yes Lus Xas Les nws ruaj khov mus tas ib sid. »
Puas yog, Daniel thiab peb tug me nyuam, lawv plam thiab thim ncauj thim lus ? Tsis yog li ntawd : lawv raug ntes xa mus txawv teb chaws, ciaj ua luag qhev, tiam sis lawv nyob ruaj nreb kho kho tiv ntau yam xwv txheej, thiab lawv zoo li nyob nruab nrab nplaim dej nphau npog lawv tas los lawv nyob khov kho yam caj zeb caj tsua, yam lub nkoj ntab sis yeev nruab nrab nag xob nag cua, tsis raug xwv txheej.
Tej yam ua neeg thim ncauj thim lus tsis yog yam nej xav tau hauv siab, kev raug xwv txheej, hos yog yam ua kom ntsuj plig ploj, poob qho thiab poob tsim. Tej xwv txheej no raug tsis tau cov neeg thoob tsib thiab xyuam xim. Tej kev txhawj xeeb yim ua kom lawv kev thoob tsib loj hlob thiab pom kev deb. Yog nej xav paub lub ntsiab lus no tiag : “Leej twg nyob koos Yes Lus Xas Les yuav tsis thim ncauj thim lus.” Nej yuav xav txog lub neej nyob dawb huv hauv lub tsheej nyob txheej ntuj saud. Lawv cov ua ntej mus nyob maim dhau tag puas tsav yam xwv txheej, tsis muaj dab tsi yuav ua tau lawv kom thim ncauj lus : kev plees kev yis, kev mob ntsaj, xwv thxeej, tsis muaj tag tej no lawm : « Huab Tais sawv koos nws haiv neeg puav tam cov roob sawv koos Yes Lus Xas Les, txij no mus tas ib txhiab niaj ib txhis. ». Yes Lus Xas Les yog lub tsheej tau lub zoo chaw, tiam sis Yaj Saub qhia kom lub tsheej tsis txhob vam khom nws lub zoo chaw, lub zog loj yuav cawm tau nws yog nws kev tso siab rau Tswv Ntuj.

Sawv Daws Sib Pab Cev Lus Thov Ntuj :

-Rau tus tas sim neej, qaij qaug los mus.

-Rau nws cuab yig, tsev xyom cuab.

-Rau tsoom laj lig tim fab kwv tij phooj ywg tuaj saib tuaj pom…

Peb Txiv, tus nyob txheej ntuj saud, koj lub npe ntshiab huv.
Koj tuaj kav peb, kom muaj nyob ntiaj teb li koj siab nyiam saum ntuj.
Koj pub peb mov hnub no thiab lwm hnub rau peb.
Koj thim peb nuj nqes rau peb tam li peb thim rau cov luab peb
Txhob cia peb hauv kev haub ntxias, tso peb dim ntawm tus phem.
Ua Li

Huab tais, thov koj mloog peb kev vam khom khaub zig koj. Peb thov koj rau …..nws tau ncaim peb mus. Thov koj txais nws tuaj nrog koj nyob hauv koj lub Loog nrog tas ib tsoom neeg tau tso lub ntiaj teb no tseg. Peb vam txog peb tus Huab Tais Yes Xus Pleev.

Ua Li

Hu txog Leej Txiv thiab Leej Tub thiab Leej Ntuj Plig lub npe

Ua Li

**Maiv Tooj** 18th September 2012, 7:06 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°9

Re: KAB KE NTEES HMOOB CATHOLIC

Post Maiv Tooj 18th September 2012, 7:06 am

HNUB SAM SAB
(TXOOS TEEV NTUJ TSIS MUAJ LEEJ CHOJ)

Hu txog Leej Txiv thiab Leej Tub thiab Leej Ntuj Plig lub npe. Ua li.

XH: Nej muaj lub txiaj ntsim thiab txoj kev kaj lug tuaj ntawm peb Txiv Tswv Ntuj thiab ntawm Huab Tais Yes Xus Pleev tuaj.
SD : Peb cav lus zoo txog Tswv Ntuj, peb tus Huab Tais Yes Xus Pleev leej Txiv.

XH : Kuv lees txhaum …
ntawm Tswv Ntuj muaj hwj huam, ntawm tsoom kwv tij sawv daws;
kuv lub siab xav txhaum, kuv lub ncauj hais txhaum, kuv lub cev ua txhaum, li ntawd, kuv vam txog Nkauj Ntshiab Mab Liab, cov dab ntuj, cov Leej Ntshiab, thiab tsoom kwv tij sawv daws pab thov Huab Tais Tswv Ntuj rau kuv.

XH : Thov kom Tswv Ntuj hlub peb, daws peb cov txhaum thiab coj peb mus txog txôj sia nyob mus li.
SD : Ua li.

Huab Tais, koj khuv leej yuad ! ( 2 zaug )
Leej Pleev, koj khuv leej yuad ! ( 2 zaug )
Huab Tais, koj khuv leej yuad !( 2 zaug )

Zaj Nyeem ib

Kos Lis Nthos tsab Ib12,12-27

Yeej muaj li hais, lub cev yog tib lub tiam sis muaj ntau ces ; nyias muaj nyias ces tiam sis tsuas koom tib lub cev. Nyob hauv Leej Pleev kuj zoo tib yam li ntawd.
Txawm yog neeg Yus Das, yog neeg Hes Las, yog noob qhev, yog noob twj lij, tas sawv daws puav leej txais lub cim ntxuav koom ua tib lub cev, peb sawv daws puav leej koom tib leeg Leej Ntuj Plig. Tab ko taw hais tau tias : kuv tsis yog tes, ces kuv tsis nyob nrog lub cev, los nws ua tsis tau li hais yeej txaus rawv lub cev.Tab pob ntseg hais tau tias : kuv tsis yog qhov muag, ces kuv tsis nyob nrog lub cev, los nws ua tsis tau, nws yeej tseem txuas rawv lub cev. Yog tas lub cev muaj qhov muag xwb, yuav ua cas hnov lus ? Yog lub cev muaj pob ntseg xwb yuav ua cas hnov ntxhiab ?Qhov muag hais tsis tau rau txhais tes tias : kuv tsis ntshaw koj ; ib yam nkaus, taub hau hais tsis tau rau ko taw tias : kuv tsis ntshaw koj.
Tswv Ntuj txawj faib kom lub cev sib thuam tsis tau, saib yam twg me dua cov yuav tau qhuas nws tshaj, li ntawd, lub cev tsis muaj khib tas sawv daws sib ntshaw sib vam.Yog lub cev ces twg muaj mob, tas lub cev cov ces kuj nrog nws mob ib yam. Yog ib ces twg muaj koob meej, tas lub cev cov ces puav leej nrog nws tau koob meej.
Ntawm nej, tas sawv daws yog Leej Pleev lub cev, tiam sis nyias muaj nyias ces.
XH : Yog Tswv Ntuj lo lus.
SD : Nws lub txiaj ntsim.

KUV NYOB HAUV QAB TIV TXWV. - ZNQ 129

1 - Kuv nyob hauv qab tiv txwv, Huab Tais awb, kuv hu-txog koj, Huab Tais, koj mloog kuv lub suab yuad
2 - Koj yuav tig ntsej los mas !Koj yuav mloog kuv lo lus thov koj.
3 - Koj tsis txhob nco peb cov txhaum, yog koj nco mas tsis muaj leej twg yuav nyob taus.
4 - Kuv paub koj yog tus zam txhaum, kuv tuaj pe koj, kuv tso siab rau koj.
5 - Kuv tus plig tos txog koj,zoo li tus peeb zov hmo tos txog lub caij kaj ntug.
6 - Txoj kev zam txoj kev cawm neeg yog nyob hauv koj; tus yuav cawm His Xas Lais ntawm lub txim txhaum kawg yog koj.
Huab Tais Leej Txiv, Huab Tais Leej Tub, Huab Tais Leej Ntuj Plig muaj koob meej nto moo lug. Lub zim txwv no mus txog fab lwm txheej, xws li txheej laus thaud los. Ua li.
Kuv nyob hauv qab tiv txwv Huab Tais awb kuv hu-txog koj, Huab Tais koj mloog kuv lub suab yuad

As Les Lus Yas, Leej Ntuj Plig Koj Los mas….

XH : Huab Tais Ntuj nrog nej nyob.
SD : Huab Tais Ntuj nrog koj nyob.

Peb mloog ib zag nyob hauv Mas Tais Ntawv Moo Zoo 6,25-34
SD : Huab Tais, peb cav txog koj lub koob meej.

25 Yog vim li ntawd, kuv thiaj hais rau nej tias : Nej txhob txhawj txog nej txoj sia,txhob txhawj txog nej lub cev. Txhob txhawj yuav muab dab tsi los noj thiab yuav muab dab tsi los hnav. Nej txoj sia muaj nuj nqes dua txhiam xws, nej lub cev muaj nqes dua tej tsoos hnav.26 Nej sim ntsia tej me noog saib : lawv tsis tseb nplej, tsis hlais nplej, tsis sau qoob rau hauv txhab, nej Txiv nyob saum ntuj pub rau lawv noj. Nej muaj nuj nqes tshaj cov me noog.27 Nej leej twg kev txhawj puas rub tau nws txoj sia kom ntev ib tshim ntxiv?28 Ua cas nej thiaj pheej txhawj txog tej tsoos tsho ? Nej sim ntsia tej paj hmab tom tshav puam, muaj ntau tsav ntsais tsias. Lawv tsis xaws maj xaws ntuag. 29 Tiam sis kuv hais rau nej li no: tab yog Xas Los Moos, muaj nyiaj muaj kub npaum li nws, twb tsis muaj ib daim khaub tsoos yuav tsab cuag ib lub nyuag paj ntawd.
30 Tej nroj tsuag hnub no laum teb, tag kis tuaj muab pov hlawv tag. Tsis kav Tswv Ntuj twb ua tsoos tsab tas npaud rau lawv npua. Nej tib neeg ntseeg tsis ti txha, txawm tsawg npaum twg Tswv Ntuj yeej yuav ua npaum li rau nej tib yam.31 Nej txhob txhov siab tias : 'Peb yuav muab dab tsi los noj ? Yuav muab dab tsi los haus ? Yuav muab dab tsi los hnav ?' 32 Tej neeg tsis paub Tswv Ntuj thiaj li nrhiav tshuav tej yam zoo li ntawd. Nej Txiv nyob saum ntuj yeej pom ntsoov nej ntshaw rwg tej ntawd thiab. 33 Nej yuav xub nrhiav Tswv Ntuj lub Ceeb Tsheej thiab yam ntxim Tswv Ntuj siab tas dua tej. Lwm yam nws yuav pub tas nrho tshaj rau nej. 34 Thiaj li tsis txhob txhawj tag kis. Tag kis tus kheej mam txhawj rau nws. Hnub no nyiaj sab thev txaus rau hnub no tus kheej lawm.

XH : Huab Tais Pleev, SD : Lub qab ntuj neeg cav txog koj.
(Ntuav ob peb los txog cov Ntawv Ntshiab)Hais Zaj Ntseeg

XH : Kuv ntseeg txog Tswv Ntuj,
SD : Yog Leej Txiv muaj hwj huam tas nrho, yog tus tsim ntuj tsim teb. Kuv ntseeg txog Yes Xus Pleev, yog Tswv Ntuj Leej Tub ib leeg kheej, yog peb tus Huab Tais Leej Tswv Yim ntshiab ua kom nws xeeb los ua neeg. Nws yug ntawm Nkauj Xwb Mab Liab los. Lub caij Pis Las Tos ua nom, Yes Xus raug luag hiam thiab ntsia saum ntoo cuam. Nws tuag mus zwm av, mus txog ntuj txias teb tsaus. Hnub peb, nws sawv hauv cov tub tuag rov los. Nws nce mus saum ntuj, zaum ntawm Leej Txiv muaj hwj huam tas nrho phab xis.Nws yuav rov los txiav txim rau cov neeg ciaj neeg tuag.
Kuv ntseeg txog Leej Tswv Yim Ntshiab,
Ntseeg txog lub Koom Txoos Ntshiab cia rau lub qab ntuj neeg.
Ntseeg txog tsoom Leej Ntshiab sib koom Ntuj lub txiaj ntsim.
Ntseg txog kev daws txhaum;
Ntseeg txog leej neeg lub cev kev sawv rov los;
Ntseg txog muaj txoj sia nyob mus li. Ua Li

Cev ob peb lo lus thov Tswv Ntuj pab tus tas sim neej, pab tsev xyom cuab thiab pab cov kwv tij neej tsa tso qav tso num tseg tuaj nrog xyom cuab nta dab nta qhua…

Pib ua lub Txoos Txi Ntuj ntxiv mus:

XH : Kwv tij sawv daws, nej thov kom peb Txiv Tswv Ntuj pom zoo txais peb thaj txi Ntuj.
SD : Yog thaj tshaj Tswv Ntuj lub koob meej thiab cawm lub ntiaj teb neeg.

XH : Huab Tais Ntuj nrog nej
SD Huab Tais Ntuj nrog koj

XH : Peb tsa peb lub siab nyob ze Huab Tais.
SD : Peb lub siab yuj plaws rau Huab Tais.

XH : Peb cav txog peb tus Huab Tais Tswv Ntuj
SD : Tsim nyog peb yuav ua nws tsaug.
Faj tim Huab Tais Ntshiab, Tswv Ntuj kav tsoom hnub qub, koj nto koob meej puv lub ntuj lub teb, koj muaj txoj sia mus li nyob txheej ntuj saud. Tus tuaj ntawm Huab Tais xub ntiag tuaj nto moo lug, nws muaj txoj sia mus li nyob txheej ntuj saud.

XH : Leej Txiv Tswv Ntuj muaj hwj huam,
SD : Yog vim Leej Pleev, yog nrog Leej Pleev, yog nyob hauv Leej Pleev, koj thiaj nrog Leej Tswv Yim Ntshiab muaj koob meej nto moo lug mus txog txhiab niag tim puas xyoo. Ua li.

XH : Peb Txiv, tus nyob txheej ntuj saud, koj lub npe ntshiab huv.
Koj tuaj kav peb, kom muaj nyob ntiaj teb li koj siab nyiam saum ntuj.
Koj pub peb mov hnub no thiab lwm hnub rau peb.
Koj thim peb nuj nqes rau peb tam li peb thim rau cov luab peb
Txhob cia peb hauv kev haub ntxias, tso peb dim ntawm tus phem.
Ua Li

XH : Vim peb tso siab tos txog hnub tus cawm peb, Yes Xus pleev, rov tuaj.
SD : Kev ua vaj, kev muaj hwj huam, kev nto koob meej yog koj tug mus tas ib txhiab ib txhis.

XH : Tswv Ntuj ua nei siab kaj lug.
SD : Tswv Ntuj ua koj siab kaj lug.

Yaj Txi Tswv Ntuj, Yaj ris qab ntuj neeg txhaum, koj hiub peb cov neeg txhaum.
Yaj Txi Tswv Ntuj, Yaj tuag kom qab ntuj neeg ciaj, koj tuaj yug peb txoj sia.
Yaj Txi Tswv Ntuj, Yaj uas koj lub cev yog zoo tshuaj, koj tuaj ua peb lub siab kaj lug.

XH : Nej ntsia tus Yaj Txi Tswv Ntuj, nej ntsia tus ris qab ntuj neeg cov txhaum. Cov Tswv Ntuj caw lawv tuaj noj Leej Yaj rooj qav, lawv txoj hmoov zoo
SD : Huab Tais, kuv tsis tsim nyog txais koj tuaj nyob hauv kuv vaj tsev, thov koj hais ib lo lus mas kuv lub siab yuav zoo hlo.

Yog muaj lub Cim Yug, faib lub cim Yug rau cov Ntseeg…

Hu ib zaj nkauj:

TUS UA TSEV NYOB HA UV HUAB TAIS. - ZNQ 90

Huab Tais hais tias: tus tuaj khaub zig kuv mas kuv cawm nws, tus tuav kuv lub npe, kuv tsa nws siab.

1 - Tus ua tsev nyob hauv Huab Tais nyob siab, nws hais rau Huab Tais hais tias: Koj yog lub yeej txuag kuv, koj yog kuv qhov chaw vam khom.
2 - Tus zaum nyob hauv tus muaj hwj huam qhov ntxoov, nws hais rau Tswv Ntuj hais tias: Koj yog kuv tus Tswv, kuv tso siab rau koj mus li.

3 - Nws muab nws ob txhais tis los vov koj, koj nyob hauv nws qab tis, koj yuav tso siab.
4 - Hmo ntuj koj tsis ntshai vij sub vij sw, nruab hnub koj tsis ntshai cov xub ya ntxiag tuaj.

5 - Ib txhiab leej ntog nyob ntawm koj sab xis, ib vam leej ntog nyob ntawm koj sab laug, tsis muaj dab tsi tuaj raug koj.
6 - Niaj hnub koj hais tias koj khaub zig Huab Tais, koj qhov chaw vam khom yog tus Huab Tais nyob siab.
Npaj dej ntshiab thiab xyab nrog ib tais txhuv :

Ua ntej yuav pov dej Xib Hwb hais ob peb lo lus li no,
Peb vam thiab ntseeg tias ua leej tib neeg nyob, tab peb cev nqaij txawm ciab zib tag, txha ua txha plaub mag lawm, peb cev nqaij thiab txha mus ua twv av luaj dag tas lawm los, txog hnub Huab Tais Yes Xus rov tuaj txiav txim, peb yuav rov sawv los txais txoj sia nyob mus li ntawm nws xub ntiag.
Txij hnub peb txais lub cim ntxuav, peb twb lees hais tias Huab Tais Yes Xus yog thawj tug xub sawv hauv tsoom tub tuag rov los muaj txoj sia nyob mus li.
Cov dej ntshiab dej huv no nco txog lub cim ntxuav peb (niam nkauj lag, txiv nraug laj lub txhaum) nws tau txais lub cim ntxuam thiab ntseeg Yes Xus.

Sawv daws los pov dej rau saum tus tuag lub hleb ib leeg zuj zus.
Lub caij ntawd, hlawv tes xyab faib rau xyom cuab los sawv koos lub hleb.

Thaum pov dej tas:

Xaiv ib zaj nkauj sawv kev los seev. Nws xaiv ib zaj twg los tau tsuav haum rau tus tso sawv daws tseg.

**Maiv Tooj** 18th September 2012, 7:11 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°10

Re: KAB KE NTEES HMOOB CATHOLIC

Post Maiv Tooj 18th September 2012, 7:11 am

Nkauj Sawv Kev

Zaj 1 ( Me nyuam thiab neeg laus )

-Huab Tais, koj thiaj yog tus yuav pab tau peb (leej tij…), yog tus yuav tshem tau nws kev tsaus ntuj pov tseg mus kom deb, pub kom nws muaj kev tso siab rau koj nyob ruab nreb xws lawm caj zeb yuas.

-Huab Tais, koj thiaj yog tus yuav pab tau peb (leej tij…), yog tus tiv thaiv kev tsaus ntuj ua nws luag, pub kom nws muaj kev tso siab rau koj khov kho xws lawm caj tsua yuas.

-Huab Tais, koj yog tus cawm koj Leej Tub Yes Xus cev ntaj xib ntsug tuag li nthi hnub peb, dim ntawm lub lav ploj lav tuag pluaj saw khi, nws sawv lis tsees los ua Vaj Huab Tais kav puag qaum ntuj thiab ntiaj teb tib neeg ciaj thiab tuag nyob mus ib sid.

-Huab Tais, koj yog tus cawm koj Leej Tub Yes Xus cev ntaj xib ntsug tuag lis nthi hnub peb, dim ntawm lub lav ploj lav tuag pluaj hlua soo, nws sawv li tsees los ua Vaj Huab Tais kav puag qaum ntuj thiab ntiaj teb tib neeg ciaj thiab tuag mus txhiab niaj tim puas xyoo.

-Koj yog tus yuav tsa peb (leej tij …) nqaij thiab txha ib hnub twg sawv li tsees rov muaj pa rov los ncig, rub nws tes tuav nws npab nce li ko tus ntaiv ntuj nrog tsoom poj yawm txwv koob ntsiab zaum ntawv koj xub ntiag ciaj ua koj tub ki nyob niaj txhiab mus ib txhis yuas

-Koj yog tus yuav tsa peb (leej tij … ) cev cwj yag nyob laus tag ib hnub twg sawv li tsees rov muaj sia, rub nws npab tuav nws tes nce li ko tus ntaiv ntuj nrog tsoom poj yawm txwv koob ntsiab zaum ntawv koj xub ntiag mus lawm niaj ib txhiab yuas.

Fontenay Sous Bois
Le 4juin2009

Zaj 2 (Neeg laus muaj cuab yig thiab xeeb ntxwv)

-Nplooj lus txiv li saub, saub txiv li lus, raug tau ntuj nkig caj sis vos, li raug tus neej dab teb sawv los nyob.
- Raug tau ntuj nkig caj sis voos, li raug tau tus neej dab teb sawv los txoos.

-Yog Ntxwj sib li Nyoog siab tuaj os tsi zoo os, tso lub mob lub tuag poob sis nroo rau lawm neej teb ces, thiaj li yuav kho nws laus siab tsis txawj tag, lub mob lub tuag ces li txeem zoj rau nws laus tej mus ntsua siab, nws laus li tau qaij qaug li yeev los mus os.
-Nplooj lus txiv li saub, saub txiv li lus, yog Ntxwj sib li Nyoog siab tuaj mus tsi zoo os, nws tso li plhuav lub mob lub tuag poob sis nroo rau lawm neej chaw ces thiaj li yuav kho nws laus siab tsis txawj tag lub mob lub tuag ces li txeem zoj rau nws laus tej mus ntsua plawv, nws laus li tau qaij qaug li yeev los mus os.

-Nplooj lus txiv li saub, saub txiv li lus, zoo li ob xyoo nram ntej ces tsis kho nws laus siab os, nws laus yuav nrog nws poj tub se koom ib plaj los mus qoob muab os, uas cas xyoo no ces yuav kho nws laus siab tsis txawj tas, nws laus li yuav nrog nws poj tub se tuaj mus sis faib cuab no yuas.
-Nplooj lus txiv li saub, saub txiv li lus, ob xyoo nram ntej ces tsis kho nws laus siab os, nws laus yuav nrog nws poj tub li se koom ib plaj los mus qoob ncig, zaum no es yuav kho nws laus siab tsis txawj tag, ces nws laus yuav nrog nws poj tub se tuaj sis faib yig no yuas.

-Nplooj lus txiv li saub, saub txiv li lus, txhia niaj txhia xyoo, nws nrog nws tub nws kiv poj lag tub se os sau plaj qoob los puv txhab, xyoo no nws qaij qaug li yeev los mus ces nws tsoom tub tsoom ki poj tub se muaj tau tsav tsim nuj dab qas tsi rau nws laus hnav coj los mus ua lawm Faj Tim Huab Tais ib leeg mus zoo nyab os
- Txhia niaj txhia xyoo, nws yuav nrog nws tub nws kiv poj lag tub se os sau plaj qoob plaj loo los puv tsev, xyoo no nws qaij qaug li yeev los mus ces nws tsoom tub tsoom ki poj lag tub se muaj tau tsav tsim nuj dab qas tsi rau nws laus hnav coj los mus ua lawm Faj Tim Huab Tais ib leeg tuaj mus zoo sev no yuas.

-Nplooj lus txiv li saub, saub txiv li lus, ( Tuav nws li npe…) zoo li koj ces thaum koj ua neej nyob es koj tsuas ua hnub coj ua hmo muab zaj peb txiv los qhub, hnub no ces yog lawm koj hnub os, peb xa koj nto plaws ntuj ceeb tsheej ces, koj yuav mus xeeb zuj li zia ua Tswv Ntuj ib leeg tuaj mus zoo tub no yuas.
- Nplooj lus txiv li saub, saub txiv li lus, ( Tuav nws li npe…) zoo li koj es thaum koj tseem ua neej nyob ces koj tsuas ua hnub coj ua hmo muab zaj kaj lug Mab Liab los hais, hnub no ces yog lawm koj hnub os, peb xa koj nto plaws ntuj ceeb tsheej ces, koj yuav mus xeeb zuj li zia ua Tswv Ntuj Faj Tim Huab Tais ib leeg tuaj mus zoo ntxhais no yuas.

Fontenay Sous Bois mars 2009

Zaj 3 ( hais rau me nyuam, cov tab seeb los nrab neej…)

-Nplooj lus txiv li saub, saub txiv li lus, raug tau lub ntuj ntsig cas sis vos, li raug tus neej dab teb sawv los nyob.
-Nplooj lus txiv li saub, saub txiv li lus, raug tau lub ntuj ntsig cas sis voos, li raug tus neej dab teb sawv los txoos.

-Yog ntxwj sib lis nyoog siab tuaj mus tsis zoo os, tso lub mob lub tuag poob sis nroo rau lawm neej teb ces, thiaj li yuav kho tub nraug laj siab tsis txawj tag, lub mob lub tuag ces li txeem zoj rau nws tej mus ntshua siab, nws li tau qaij qaug li yeev los mus os.
-Yog ntxwj sib lis nyoog siab tuaj mus tsis zoo os, tso lub mob lub tuag poob sis nroo rau lawm neej chaw, thiaj li yuav kho tub nraug laj siab tsis txawj tag, lub mob lub tuag ces li txeem zoj rau nws tej mus ntshua plawv, nws li tau qaij qaug li yeev los mus os.

-Nplooj lus txiv li saub, saub txiv li lus, zoo li ob xyoos nram ntej ces tsis kho tub nraug laj siab os, tub nraug laj yuav nrog nws niam nws txi, kws tij neej tsa koom ib txoj mus lus hais, uas cas xyoo no yuav kho tub nraug laj siab tsis txawj tag, nws yuav nrog nws niam nws txi kwv tij neej tsa tuaj mus sib ncaim no yuav.
-Nplooj lus txiv li saub, saub txiv li lus, zoo li ob xyoos nram ntej ces tsis kho tub nraug laj siab os, tub nraug laj yuav nrog nws niam nws txi, kws tij neej tsa koom ib vag mus ib tse, uas cas xyoo no yuav kho tub nraug laj siab tsis txawj tag, nws yuav nrog nws niam nws txi kwv tij neej tsa sib ncaim mus tso tseg no yuas.

-Nplooj lus txiv li saub, saub txiv li lus, txhia niaj txhia xyoo, nws nrog nws niam nws txi, kwv tij neej tsa sau plaj qoob los puv txhab, xyoo no nws qaij qaug li yeev los mus ces nws niam nws txi muab tau tsav tsim nuj dab qas tsis rau nws coj los mus ua lawm Faj Tim Huab Tais ib leeg mus zoo nyab no yuas.
-Txhia niaj txhia xyoo, nws nrog nws niam nws txi, kwv tij neej tsa sau plaj qoob los puv tsev, xyoo no nws qaij qaug li yeev los mus ces nws niam nws txi muab tau tsav tsim nuj dab qas tsis rau nws coj los mus ua lawm Faj Tim Huab Tais ib leeg mus zoo sev no yuas.

-Nplooj lus txiv li saub, saub txiv li lus, me tub …, zoo li koj ces, thaum koj tseem ua neej nyob os koj tsuas ua hnub coj ua hmo muab zaj teev ntuj los qhub, hnub no ces yog lawm koj hnub os, peb xa koj nto plaws ntuj ces, koj yuav mus xeeb zus li zia ua Tswv Ntuj ib leeg tuaj mus zoo tub no yuas.
-Nplooj lus txiv li saub, saub txiv li lus, me tub …, zoo li koj ces, thaum koj tseem ua neej nyob os koj tsuas ua hnub coj ua hmo muab zaj teev ntuj los seev hais, hnub no ces yog lawm koj hnub os, peb xa koj nto plaws ntuj ces, koj yuav mus xeeb zus li zia ua Tswv Ntuj ib leeg tuaj mus zoo ntxhais no yuas.

Thaum seev zaj nkauj sawv kev tas, sawv daws los coj tus qauv tawm kwv mus txog tom toj ntxas.

Tso lub hleb ntawm npoo av lub qhov ntxa, Xib Hwb los hais li no :

Huab Tais, thov koj pub (Nkauj quag, Tub quag, niam nkauj lag…txiv nraug laj…) so dawb so huv ntawm twv av no mus txog hnub koj Leej Tub Yes Xus nqes los tsa lub zos txias sawv ua npoj mus ua ntxaig nrog ib tsoom poj yawm txwv koob plig dawb plig huv tuaj txais txoj sia nyob mus li, hu txog Leej Txiv thiab Leej Tub thiab Leej Ntuj Plig Ntshiab lub npe.

Ua Li

Nqa lub hleb rau hauv qhov ntxa tas, sawv daws muab tes tsuab av leeg teg ua piv txwv faus tuag.

Lub ntees xaus li no.

**Npuagtub** 23rd September 2012, 5:11 pm

Npuagtub

Npuagtub: Hmong Catholique; Messages : 999
Date d'inscription : 2009-08-16
Age : 59
Localisation : Fresno, California, USA.

Post n°11

Re: KAB KE NTEES HMOOB CATHOLIC

Post Npuagtub 23rd September 2012, 5:11 pm

Nyob zoo Mt,

Kuv lam tuaj sau me me ntxiv rau koj cov zaj ua lub txoos rau tus tas sim neej, tej zaum ib sab teb ib ras txuj, lub txoos ntees hauv tsev teev ntuj mas peb tsis hais zaj "KUV LEES TXHAUM thiab ZAJ NYOB PEM NTUJ" tiam sis peb cov hmoob mas kuj muaj qee zaus tseem hais thiab, yog nej leej twg ho paub zoo dua no thov tuaj piav kom ntxaws rau peb tau kawm..

**Tub ntsuag** 26th September 2012, 2:51 am

Tub ntsuag

Tub ntsuag: Phooj Ywg; Messages : 111
Date d'inscription : 2011-10-06

Post n°12

Re: KAB KE NTEES HMOOB CATHOLIC

Post Tub ntsuag 26th September 2012, 2:51 am

nyob zoo sawv daws kuv xav kom nej muab zsj lug thov ntuj nyob rau phoo ntawm tsi tsi tau hloov qhov thov ntuj ntawd coj los tso xyaw rau thaum hais zaj kuv ntseeg tas ntawd thov ntuj pab rau tsev xyom cuab tas nrho ntawd los ua ke hauv no mas yuav zoo dua or nawb.. .tau ib ntu no ca sab los kuj tsi zoo .tau ntev los tsi tau tuaj sau zaj li tiam sis peb los tseem saib nraim os nawb.nyob zoo nej sawv daws.

**NrhiavTswvNtuj** 10th December 2012, 10:17 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°13

Re: KAB KE NTEES HMOOB CATHOLIC

Post NrhiavTswvNtuj 10th December 2012, 10:17 am

Lub neej tshiab nyob saum Ntuj

Nkauj Xa Plig Catholic
Yaj Txhiaj Vwj

1/
Leej Niam ( Txiv, Kwv, Muam, ntxhais)
Tus dua nra, koj yuav sawv kev mus,
Mus saum lub Ceeb Tsheej tshav ntuj nrig.
Koj yuav txais txoj sia tshiab nyob mus li.
Tswv Ntuj yeej npaj tseg rau koj.
Koj tso siab hlo mus cuag koj Leej Txiv,
Nws yuav hlub koj,
Cia koj so mus li nyob saum Ntuj Ceeb Tsheej,
Tswv Ntuj yeej muaj tsev cia rau koj nyob,
Koj yuav mus pom.

2/
Zaum no ces tag koj txoj kev txom nyem,
Koj lub cev nqaij yuav plhis dua tshiab,
Koj tso tag koj tej kev ntxhov siab tseg,
Mus nyob kaj lug tsis muaj kev txhawj,
Koj tso siab lug mus cuag Niam Mab Liab,
Nws yuav nplij koj nyob hauv nws xub ntiag,
Koj yuav zoo siab hom khaj mus ib txhid.
Koj yuav tau nyob ze Niam mab Liab.

3/
Saum Ntuj Ceeb tsheej,
Koj nrog tsoom Leej Ntshiab nyob luag ntxhi
koom noj ib rooj qav.
Txiaj ntsim phaj tshab yuav ntws lug tuaj,
Tswv Ntuj pub ta txhua yam rau koj,
Koj tso siab hlo mus cuag Yes Xus Pleev,
Koj tus ntsuj plig yuav raug cawm,
Thaum txog hnub kawg,
Huab Tais Yes Xus yuav tsa koj lub cev sawv rov qab los.

KAB KE NTEES HMOOB CATHOLIC 48639587parousie-over-blog-fr-poisson-croix-coeur-gif

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.