Hlawv xyab hlawv ntawv rau cov Tuag puas tau ?

Hlawv xyab hlawv ntawv rau cov Tuag puas tau ?

July 2, 2019 by Zoo Tswv Zov Yaj
Zoo Tswv Zov Yaj


“Yam twg yog kev teev Dab thiab ua rau Dab, mas peb cov neeg ntseeg Ntuj tso pov tseg. Yam twg yog Hmoob tej txuj ci, mas peb txuag cia“


Raws li tej laus ib txwm ua kam, thaum muaj ib tug neeg mob nkeeg mas Hmoob ua neeb ua yaig; hlawv xyab hlawv ntawv rau.
Xyab yog ib hom tshuaj tsw qab zoo cev rau Dab thiab rau Ntuj. peb pom tias nyob hauv cov Thaj Txi Ntuj loj mas Leej Choj yeej hlawv ib co tshuaj tsw qab xws li cov pa xyab. Li ntawd, thaum peb xav hawm Ntuj peb hlawv xyab hawm Ntuj kuj tau. Hos thaum peb niam peb txiv qaij qaug los txog, peb xav hlawv xyab hawm peb niam peb txiv tus ntsuj plig kuj tsis txhaum.
Hais txog cov ntawv uas Hmoob hlawv rau tus tuag, mas Hmoob ntseeg tias qhov ntawd yog muab nyiaj txiag rau tus tuag coj muss iv lawm Yeeb Ceeb. Hmoob ib txwm ntseeg li ntawd tiag. Hmoob ntseeg tias nyob Yeeb Ceeb yuav siv nyiaj txiag xws li nyob Yaj Ceeb no. hmoob kuj ntseeg tias tus neeg tuag yuav mus thawj thiab, yuav rov yug los tshiab.
Qhov hais los yog Hmoob txoj kev ntseeg, tab sis nyem no peb tig los yuav lub siab tshiab; los ntseeg Tswv Ntuj; ntseeg Huab Tais Yes Xus, mas peb kuj ua raws li Huab Tais Yes Xus qhia thiab ntseeg li Yes Xus Pleev hais. Yam twg yog kev teev Dab thiab ua rau Dab, mas peb cov neeg ntseeg Ntuj tso pov tseg. Yam twg yog Hmoob tej txuj ci, mas peb txuag cia; peb khaws tseg; peb tseem siv txuas ntxiv mus. Yus yuav tsum feeb meej tias yam twg yog kev cai dab qhuas, yam twg yog Hmoob kab lis kev cai thiab yog Hmoob txuj ci.
Piv txwv 1 : kev pe, yog Hmoob kab lis kev cai. Yus pe niam pet xiv, pe kwv tij neej tsa kuj tau, pe Ntuj kuj tau.
Piv txwv 2 : rab qej, yog Hmoob li txuj ci. Cov coj dab yuav tshuab qeej rau tus tuag kuj tau, yuav tshuab qeej ua kev lom zem kuj tau. Hos peb cov neeg ntseeg Ntuj yuav tshuab qeej cav lus zoo txog Tswv Ntuj kuj tau, tshuab ua kev lom zem kuj tau. Tab sis tsis phim ib tug neeg ntseeg Ntuj yuav ua Txiv Qeej tshuab qeej xa tus tuag mus rau Dab teb. Vim peb tsuas txawj xa mus cuag Tswv Ntuj xwb.
Kwv tij, thaum ib tug neeg qaij qaug los txog mas Hmoob txaug ntawv, hlawv ntawv rau kom nws coj muss iv lawm Yeej Ceeb. Hmoob ntseeg li ntawd tiag. Tab sis peb cov neeg ntseeg Ntuj mas Huab Tais Yes Xus qhia tias ‘Tswv Ntuj yuav txiav txim rau sawv daws raws li nyias tau ua zoo, los ua phem. Cov neeg zoo yuav mus nrog TSwv Ntuj nyob mus ib txhiab ib txhis pem Tswv Ntuj lub Ceeb Tsheej. Cov neeg phem yuav txais kev txom nyem loj’. (MT 25 : 34-36)
Huab Tais Yes Xus kuj qhia meej pem tias nyob pem Tswv Ntuj lub Ceeb Tsheej tsis thooj li nyob Yaj Ceeb no. Yaj Ceeb muaj kev ua txij ua nkawm, muaj kev tshaib kev nqhis, muaj kev khwv, muaj kev ntshaw. Tab sis nyob pem Tswv Ntuj lub Ceeb Tsheej muaj kev puv siab mus li ib txhiab ib txhis. Sawv daws yuav nyob kaj lug kaj nrig mus li. Yuav zoo li Tswv Ntuj tsoom Tshiab nyob pem Ntuj. (MT 29 : 30)
Huab Tais Yes Xus tseem hais ib zaj paj lug qhia kom peb tsis txhob muab lub hnab qub los ntim cov cawv tshiab, tsam lub hnab qub ntuag ces cov cawv yuav txeej tas. Huab Tais Yes Xus ua paj lug hais xwb, lub ntsiab yog qhia kom peb txhob muab Yes Xus txoj kev cai tshiab los xyaw rau txoj qub kev cai. Yog peb muab ob txoj kev cai los sib xyaws, mas tsam peb txoj kev ntseeg yuav puas mus.
Peb paub li no lawm, mas yus thiaj yuav paub tias cov neeg ntseeg Ntuj puas tsim nyog hlawv ntawv rau cov neeg tuag?
Qhov uas cov neeg ntseeg Ntuj xub muab siab rau ua, yog xub muab siab rau nrhiav Tswv Ntuj lub Ceeb Tsheej los ua lawv tug. Kwv tij, tsuas yog peb nyiam Tswv Ntuj thiab sib nyiam sib hlub, peb pab luag tej li Huab Tais Yes Xus qhia, mas peb tso siab tias lwm tiam peb yuav txais Tswv Ntuj lub Ceeb Tsheej ua peb tug. Peb yuav muaj kev puv siab mus li. Nyob pem Tswv Ntuj lub Ceeb Tsheej peb tsis siv cov nyiaj ntawv uas Hmoob hlawv rau cov tuag.