MUAJ TEJ YAM TXAWV TXAWV TSHWM SIM HMO YES XUS YUG

Nyob zoo sawv daws,

Kuv muab lawv ib zaj kwv huam txog lub caij Yes Xus yug no txhaisrau peb sawv daws tau nyeem os.

“Muaj Tej Yam Txawv Txawv Tshwm Sim HmoYes Xus Yug Los”

Zaj no yog ib tug TP hu ua TP Charles M Mangan piav. Nws hais li no:

TP Segundo Llorente (1906-1989) yog ib tug txiv plig  Jesuit, neeg Spanish,  raug  xa mus qhia kev ntseeg nyob Alaska. Nws siv zog khwv tshaj lub Moo Zoo tau 20 xyoo.

Nws tau sau ib zaj hu ua “Muaj Tej Yam Txawv Txawv Tshwm Sim Hmo Yes Xus Yug Los,”  uas yog piav txog tias yog ib qho tseem ceeb kom peb yuav tsum hwm lub Cim Yug…

(TP Llorente piav li no:)
Muaj ib tug txiv plig tau piav ib yam tshwm sim rau nws thaum nws tseem nyob hauv nws thawj pab ntseeg. Muaj ib zaug thaum lub Caij Yes Xus Yug, thaum ua thaj txi ntuj ib tag hmo tas, nws tau xauv cov qhov rooj tsev teev ntuj tib si rau. Nws muab cov yawm sij ntsaws rau hnab ris, nws nce mus saum nws chav, thiab mus pw tsaug zog ib hmos.  Tag kis sawv ntxov, 7 teev 30, nws sawv los, nws rov mus tom tsev teev ntuj, nws xav tias nws yuav tau zoo mus teev ntuj ib leeg li ib teev tej.  Nws qhib lub qhov rooj ntawm ib sab thiab nkag mus hauv chav tsev hloov ris tsho (sacristy), nws taws teeb rau thiab nws kuj nta cov teeb hauv tsev teev ntuj rau. Thaum nws qhib plho qhov rooj nkag mus hauv tsev teev ntuj, nws cia li ceeb tag sawv nres nroos cia. Cas muaj ib co neeg hnav ris tsho khaub khaub hlab nyob yuav luag txhua cov rooj zaum, lawv sawv daws nyob ntsiag twb to xwb. Tsis muaj ib tug yuav tig cev los ua zog, tsis muaj ib tug yuav tig ntsia txiv plig li. Muaj ib pab ob peb tug neeg sawv ntsiag to ntawm lub nkuaj tsiaj (Nativity scene) uas Yes Xus yug los saib ntsoov lub dab nyuj.

Tus txiv plig txawm rov feeb meej kiag tuaj, nws qw nrov nrov nug cov neeg ntawd tias lawv nkag los hauv tsev teev ntuj li cas tau.  Tsis muaj ib tug teb li. Nws mus ze ntawm lawv thiab rov nug tias, “Leej twg qhib qhov rooj rau nej?” Ib tug poj niam txawm teb tsis qab tsis tsuag tias,”Muaj tej yam txawv txawv tshwm sim Hmo Yes Xus yug los.” Ces rov ntsiag to lawm xwb. Tus txiv plig txawm mus saib lub qhov rooj loj no ua cas nws tseem xauv nws. Txiv plig txawm xav tau tias yuav tsum nug kom tau qhov tseeb xwb, ces nws tig hlo rov los saib cov rooj zaum no uas cas rooj qhuav qhawv lawm xwb. Cov neeg ploj tag lawm.

Tus txiv plig muab cov xwm no khaws twj yim cia rau nws ib leeg paub tau ib ntus, nws npo tsis taus lawm ces nws thiaj piav qhia rau kuv ib yam li kuv nyuam qhuav piav rau nej no.  Kuv puas muaj ib yam dab tsi yuav qhia tau tias yog li cas tiag? Ua ntej, kuv xav xub hais rau nej paub tias tus txiv plig no nws yog ib tug neeg tswv yim feeb meej thiab nws kuj kawm txuj siab ib yam li cov txiv plig uas kuv paub thiab.

Kuv zaj txhais cov xwm ntawd thaum ntawd thiab nyem no los tseem zoo ib yam thiab yog li no:  Cov neeg ntawd yog cov  tuag lawd  tus ntsuj plig, lawv los ua kev them txim txhaum nyob hauv tsev teev ntuj.  Peb hais tau tias tej zaum peb yuav tsum tau rov los them txim txhaum nyob ntawm tej chaw uas peb tau ua txhaum.  Cov neeg ntawd nyob ntsiag to xwb.  Yog vim li cas? Peb yuav tsum xav txog lub caij peb nyob ze ntawm lub Cim Yug hauv tsev teev ntuj: tus yuav hais lus, yuav luag, yuav tig ntsia tom tej li cas los muaj.  Thaum ua thaj txi ntuj tas lawm, tseem muaj tej tus neeg muab cov rooj zaum siv ua lag ua luam tib si, tsis saib Yes Xus nyob hauv lub Cim Yug li. Yog vim li cas lawv thiaj ploj tag lawm? Lawv tsis ploj, tiam sis yog peb tsis pom lawv lawm xwb.  Lawv yeej nyob rawv ntawm cov rooj, hais tsis tau ib lo lus li, vim lawv yuav tsum them lawv cov txim txhaum lawv tau hais lus hauv tsev teev ntuj thaum lawv tseem ua neej nyob.
Lub Cim Yug tsis yog ib yam tsis muaj nqes. Tas puas tsav yam peb ua los peb hais (thaum nyob ntawm lub Cim Yug)  yuav raug ib tug nqe rau peb ris. Tswv Ntuj yog tus yuav txiav txim thaum kawg.  Cov neeg ntawd (lub txim) yog  yuav tsum tau pe hawm Yes Xus hauv lub Cim Yug kom tsim nyog. Lawv yuav tsum ua li ntawd hov ntev? Qhov ntawd Tswv Ntuj thiaj paub xwb. Vim li cas tus txiv plig ntawd ho pom lawv? Kom nws thov ntuj pab lawv thiab pab lwm cov ntsuj plig uas los nyob them txim txhaum rau lwm lub tsev teev ntuj thiab.  Vim li cas lwm cov txiv plig ho tsis pom cov neeg ntawd? Tej zaum vim lwm cov txiv plig twb paub lawm tias muaj ib co ntsuj plig los nyob hauv tej tsev teev ntuj, los lwm qhov chaw, ces lawv tsis tas yuav pom ntawm qhov muag.

Vim li cas lawv thiaj hnav khaub khaub hlab?  Yog hnav them txim rau lawv txoj kev ntshaw hnav zoo thaum tseem ua neej nyob. Ntau zaus tib neeg siv ris tsho los tsa lawv lub hwj chim rau ntawm luag. Tiam sis Tswv ntuj tsis saib ib tug tib neeg muaj hwj chim vim nws hnav ib lub tsho tshwb liag. Muaj ib txhia neeg nkag mus hauv tsev teev ntuj liab qab tas ib ya. Lub caij sov, qhov ntau yog cov poj niam, muaj coob leej mus txais lub Cim Yug tsis hnav ris tsho kom phim li. Tej zaum cov txiv plig yuav kav liam, tiam sis Tswv Ntuj yuav tsis tso lawv dim thaum hnub kawg li.  Tej zaum vim li ntawd lawv thiaj yuav tsum hnav khaub khaub hlab pauj lawv cev ris tsho tsis phim.

Lub Koom Txoos txoj cai tsis yuam kom peb yuav tsum ntseeg raws li TP Llorente zaj piav. Tiam sis yog ib zaj zoo  qhia peb kom peb yuav tsum  mob siab rau hwm lub Cim Yug zoo kawg nkaus.

Peb paub hais tias peb yeej tsis txawj yuav hwm Yes Xus hauv lub Cim Yug kom phim kom zoo txaus li, tiam sis peb yuav tsum xyaum tas zog. Nws yuav them txiaj ntsim koob hmoov ntau rau peb lub zog peb kev xyaum.
…

Muab hauv lub site no los:
http://www.catholic.org/featured/headline.php?ID=574

Nyob zoo mim ua tsaug koj zaj lug txhais ntawm tug tp mas yog ib qho tseem ceeb kawg og .

Nyob zoo Mim thiab Tub Ntsuag,

Mim, ua tsaug ntau rau koj zaj kwv huam; yog ib qho tseem ceeb heev rau cov uas xav kawm thiab xav paub txog lub neej ua neeg ntseeg yuav coj li cas. Raws li kuv nyeem Maria Simma phau ntawv mas yeej hais li koj hais, teb chaw sthem txim mas muaj ntau npaum li neeg tej txhaum. Nyias them qhov uas nyiam ua tsis zoo, ces muaj neeg coob npaum li cas yeej muaj npaum li ntawd yam.

Lawv los ua rau Txiv Plig TP Charles M Mangan pom hnub Yes Xus Yug los, vim cov ntsuj plig nyob teb chaws them txim mas txeev tau dim mus saum Ntuj thaum lub hmoov nco txog tsoom Leej Ntshiab thiab Hmoov Yes Xus Yug los. Li ntawd, lawv thiaj thov txog nws hnub ntawd.

Cov ntsuj plig ntawd nyiam nyob ncig ntawm lub thaj Txiv Ntuj, tos cov tseem ciaj thov Ntuj rau lawv.

Nyob sawv daws, mim ua tsaug koj tso TP zaj lus no rau sawv daws xyaum coj lub neej thaum tuaj teev ntuj og, yog ib zaj zoo kawg.

Thov hais rau peb txhua tus neeg tuaj teev ntuj hauv tsev teev ntuj, kom peb sawv daws yuav xyaum tswj peb tus kheej kom txhob hais lus ntau, thiab xyaum coj peb lub neej kom phim lub txoos teev ntuj.
Thov kom sawv daws muab siab xyuam.

Nyob zoo tais Tooj, Tub Kawm, thiab Tub Ntsuag,

Ua nej tsaug uas nej kuj tuaj nrog kuv nyeem zaj lus no thiab os. Tej zaum nej yuav tsis to taub zoo, tiam sis nyob hauv zaj no muaj 3 tug txiv plig diam. Tus txiv plig uas tau pom cov ntsuj plig nws muaj nws ib tug uas peb tsis paub npe. Tus xub xub tau sau zaj no yog tus TP hu ua TP Segundo Llorente uas twb tuag xyoo 1989 lawm. Ces tam sis no TP Charles M Mangan mam li muab coj los tso rau peb nyeem xwb.

Muaj ob peb lub ntsiab uas zaj no qhia rau peb. Ib lub ntsiab yog qhia kom peb mob siab rau hawm HT Yes Xus hauv tsev teev ntuj. Thaum peb mus hauv tsev teev ntuj, yog peb hla ntawm lub tsev tsam phooj kaw lub Cim Yug mas peb twb yuav tsum ib nyuag kim caug los puas nyo hau hawm Yes Xus hauv lub Cim Yug. Tiam sis txheej nyem no zoo li peb cov ntseeg tsis ntseeg hais tias yog Yes Xus nyob hauv lub mov tiag tiag, kuv pom coob leej hla yeej mus zoo li tsis muaj dab tsi li, yeej tsis pom tsis nco tias Yes Xus nyob ntawd li, cia li hla plaws xwb. Thaum peb mus koom Thaj Txi Ntuj los muaj ib txhia lam tuaj nyob ntawd kom tas sij hawm, twb tsis qhib qhov ncauj teb cov zaj teev ntuj, los hu nkauj li. Tej zaum muaj tej tus tseem nrog lawv tus phooj ywg sib tham lus ntxhi muaj zaj kawg xwb, twb tsis paub tias TP ua thaj txi ntuj txog qhov twg lawm. Ua li no ces lawv yeej tsis koom Thaj txi Ntuj li.

Thiab nyob hauv no kuj muaj hais txog hnav ris tsho kom phim mus teev ntuj. Kuv xav tias yog peb yuav mus ntsib ib tug nom ib tug tswv mas peb yeej tsis lam cia li hnav yus cev uas yus niaj hnub hnav mus, los puas tsis lam hnav li yuav mus tom ntug dej hiav txwv li, yeej yuav hnav cev kom zoo saib. Tiam sis thaum peb mus teev ntuj mas, kuj tsis yog tas sawv daws, tiam sis muaj coob leej thiab qhov ntau yog cov poj niam thiab cov ntxhais hluas, cia li hnav tej tsho uas thws tas nws lub hauv siab rau luag ntsia, los puas hnav cov ris luv luv (shorts) uas npog kiag pob tw xwb. Tej cov ris tsho zoo li no tsis phim hnav mus hauv tsev teev ntuj, vim yog ib co ris tsho tsis hwm neeg thiab tsis hwm ntuj. Cov ris tsho no ua rau neeg xav tau tswv yim phem ntau yam, vim li no thiaj tsis zoo.

Yog thaum peb ua neej nyob peb coj tus yeeb yam tsis hwm HT Yes Xus thiab tsis hwm neeg li no, ntshai thaum peb tuag lawm, peb tus ntsuj plig yuav raug hnav tej cev khaub khaub hlab los nyob ntsiag to li ntawd hauv tej tsev teev ntuj kom tau them txim txhaum rau tej txhaum uas peb ua hauv tsev teev ntuj.

Thiab zaj no kuj qhia rau peb paub txog hais tias peb ua neej nyob peb tsis pom, tiam sis yeej muaj ib co ntsuj plig uas raug los nyob rau ntau qhov chaw uas peb mus mus los los, xws li tej tsev teev ntuj los lwm qhov chaw. Tswv Ntuj tso cai rau lawv los ua qho zoo pauj qhov phem uas lawv tau ua thaum ua neej nyob.