Adam&Eve - Part 1 (Hindi-Movie).avi

Nyob zoo maiv Paj Lug,
Zaj Adam&Eve koj tso saum no mas zoo kawg, tiam sis peb tsis to taub lawv cov lus li. Yog li ntawd kuv ho tso zaj no rau peb xyuas. Lawv sau ntawv txhais ua lus Aas Kiv ces zoo li peb to taub lub ntsiab tias vim As Das thiab Es Vas ua txhaum, ces kev phem, kev npau taws, kev tua neeg, kev tuag los caum tau nkawd zuj zus. Thiab peb kuj pom qhov tias As Das thiab Es Vas nkawd nco ntsoov Tswv Ntuj thiab khuv xim nkawd lub vaj tau zoo kawg nkaus, tiam sis nkawd thim tsis tau nkawd qhov txhaum lawm. Nkawd tsuas muaj ib txoj kev tso siab lawm xwb, yog Tswv Ntuj lo lus hais tias nkawd ib tug tub yuav sawv los tsuj niag nab taub hau thiab yuav qhib lub qhob rooj loog rau nkawd dua.

Kuv saib zaj no tag mas ua rau kuv to taub nkawd lub neej zoo dua tuaj. Kuv muab lawv cov lus txhais ua lus hmoob. Nej nyeem saib nej ho puas nrog nkawd tu siab thiab khuv xim nkawd lub neej zoo tas los.

Thawj daim video no pib kiag thaum Tswv Ntuj foom rau Es Vas tias:
- “Kuv yuav ua kom koj zaj mob plab yug me nyuam haj yam yuav mob heev ntxiv tuaj xwb. Ces koj yuav yug tub yug kiv nyob hauv txoj kev nyiaj mob. Txawm li ntawd los koj tseem yuav ntshaw nrog koj tus txiv qees, nws yuav tswj koj.”

Ces As Das tawm kiag sab rooj vag nraud, nws tuav Es Vas tes tawm los thiab. Ces Tswv Ntuj hais rau As Das tias:
- “Vim koj mloog koj poj niam hais, koj tau noj tsob txiv kuv kom koj txhob noj, ces vim koj mas kuv foom lus phem rau av. Yuav tuaj nroj muaj pos muaj koob chob, thiab koj yuav khwv tawm hws lug koj thiaj tau mov noj, mus txog hnub koj rov mus zwm av uas koj tawm hauv los. Vim koj yog av, koj yuav rov mus ua av.”

Ces thaum ntawd lub rooj vag kaw nkaus rau lawm. As Das nkawd mus khob mus qhib los tsis qhib lawm. Nkawd pw ib hmos ntawm rooj vag. Pom As Das ua npau suav txog los yog xav txog nkawd noj lub txiv.

Ces cia li pom nkawd sib tuav tes mus lawm. Ces ho pom nkawd lub neej pib nyuaj zuj zus. Es Vas coj tau ib co txiv los rau As das noj. Tiam sis As Das nthe thiab cuam cov txiv rau Es Vas tias cov niag txiv lwj lwj lawm, kom Es Vas noj. Ces Es vas pos taub hau pib quaj. As Das thiaj los ntxias hais tias:
- “Thov txim… Ua cas wb yuav zoo li no? Wb tsis tau ib leeg yuav ua kom mob ib leeg ib zaug li. Cas zaum no yuav zoo li no?”

Ces txawm pom Es Vas muaj ib plab me nyuam loj loj. Nkawd tab tom txiav tauj los ua tsev pheeb suab nyob. Es Vas txawm pib mob plab yuav yug me nyuam. Nkawd sib tham: Es Vas xub hais:
- Kuv muaj ib co noob. Thaum twg koj mam coj mus cog?
- Tag kis tso, thaum kuv ua lub tsev no tiav tso.
- Kuv sab sab li. Kuv taw los mob, nrob qaum los mob… Uaj, rov mob dua lawm thiab os.
- Ua cas no?
- Hnov tuam tuam tiag.
- Txawv ua luaj. Zoo nkaus tej tsiaj li… Kuv tshaib tshaib plab lawm na.
- As Das, hnub no kuv mus tsis taus mus de txiv lawm... Kuv mus tsis taus li. Kuv sab sab heev li.
- Kuv mam mus. Koj nyob koj ntawm no.

Ces As Das thiaj mus lawm. Es Vas thov ntuj:
- Tswv Ntuj aw, thov koj qhib lub rooj vag rau As Das, kuv tus txiv os. Thov tiag tiag li os, Tswv Ntuj...

As Das mus ntev loo, thaum As Das rov los, Es Vas mob plab heev heev, ces nws yug tau ib tug me nyuam quaj uj ab…

Ces pom thaum tus me nyuam twb loj me ntsis lawm nrog nws txiv ua si, thiab pom leej niam puag ib tug mos mos liab ntxiv lawm thiab. As Das hais lus:
- Ntsia saib, wb cov me nyuam tej tus muaj zog kawg li. Wb yuav dim tiag laiv. Kuv pib to taub lawm lau zaum no.
- Koj xav li cas no?
- Koj puas nco qab Tswv Ntuj hais li cas rau niag nab, thaum wb tawm hauv lub vaj los? Nws hais tias wb tus me nyuam yuav tsuj niag nab taub hau no. Ces wb yuav dim tiag. Koj sim saib nkawd saib maj, nkawd zoo nraug ntxiag, muaj zog kawg li. Tej zaum wb ob tug tub yuav coj wb rov mus nkag hauv lub vaj.
- As Das e, es koj xav tias yuav ua tau li ntawd no lod?
- Kuv xav li tiag. Tswv ntuj yuav tsum tuaj xwb. Nws yuav tsum tsis hnov qab li. Nkawd ob tug no dawb huv, nkawd tsis tau ua dab tsi txhaum li.
- Kuv zoo siab kawg li os As das.
- Tswv Ntuj yuav tsum tsis hnov qab wb xwb. Nws yuav tsum tuaj xwb xwb.

Ces ho pom thaum ob tug me nyuam twb muaj li xya yim xyoo kaum tawm xyoo lawm. Tus hlob qw qw tias:
- Kuv txiv… kuv txiv… As Npes pheej kov kov cov txiv ntoo.
- As Npes, khiav deb deb ntawm tsob txiv ko.

Leej txiv mus cab tus tub tes kom khiav.

Daim ob:
Nyob hauv saim ob no, mloog raws li cov lus lawv hais, mas pog Es Vas yog tus xub to taub hais tias nkawd cov me nyuam khaws tau nkawd lub noob tsis mloog Tswv Ntuj lus lawm. Nws pom tias Kas Ees pib txawj dag, pib tsis mloog lus, pib txawj ua siab phem. Lawv cov lus sib tham:

- As Npes, cov txiv tsis tau siav, nws tseem ntsuab ntsuab. Cia kom nws siav tso peb mam de, ces thaum ntawd noj thiaj qab. Kas Ees, saib koj tus kwv. Tsis txhob pub nws de cov txiv.
- Aws, kuv txiv.

Leej txiv hais rau leej niam:
- Tsis muaj dab tsi. Yog cov txiv tsis tau siav xwb, muab de ces yuav tsis zoo dab tsi rau leej twg…
…
- Kuv txiv! Kuv txiv! As Npes pheej kov kov cov txiv ntoo ua si.
- Kas Ees, kuv twb kom koj saib nws no ne.
Leej txiv khiav los:
- Kuv kom koj txhob pub nws de cov txi no ne…
- Kuv twb saib lawm los mas.
- As Npes, koj muab cov txiv ua piam tas lawm ne… Me tub, twb tsis tau siav li. Koj yuav noj los tsis tau li. Cas koj ua li ntawd?
As Npes nyo haut sis teb li…

Ces txawm pom ob niam txiv taug kev sib tham. Leej niam xub hais:
- Koj puas pom ob tug me nyuad ua dab tsi nab?
- Nkawd ua dab tsi no?
- Cov txiv naj.
- Tsis muaj dab tsi. Tsuas yog me nyuam yaus tsis paub tab, ua si xwb.
- Tsis yog li koj hais. Nkawd twb tsis mloog lus, nkawd ua nkaus li wb tau ua thiab ntag.
- Nkawd tseem me dhau, nkawd yeej tsis paub txog tias tsis mloog lus yog dab tsi li os. Nkawd yeej tsis to taub tias nkawd tau ua dab tsi li.
- Kas Ees paub kawg. Koj twb hais rau nws kom nws saib nws tus kwv txhob pub de cov txiv. Kuv paub hais tias yog nws xav cheem nws tus kwv yeej tau kawg, tiam sis nws tsis ua xwb na.
- Koj yeej tsis paub tias yog nws txhob txwm ua li ntawd os.
- Kuv ntsia nws ntsej muag xwb ces yeej paub lawm. Nws yeej to taub kawg li. Koj twb npau taws heev los nws tseem luag twj ywm xwb na.
- Koj xav hais rau kuv tias yog nws dag kuv no?
- Yog los mas, As Das… As Das aw, nkawd hlob zuj zus ces nkawd yuav yoog raws nkaus li wb tau ua zuj zus li os, thiab nkawd yuav ua yuam kev li wb tau ua thiab. Ces nkawd yuav tsuj tsis tau niag nab taub hau li, thiab yuav rhuav tsis tau wb txoj kev yuam kev li.
- Koj pheej hais dab tsi li ntawd mas? Nkawd tseem yog me nyuam yaus xwb na.
- Kuv yuav hais qhov tseeb rau koj, As Das. Yog koj kav liam cia kuv de lub txiv nyob hauv lub vaj, ib yam nkaus li Kas Ees kav liam cia As Npes de cov txiv ntawd ntag.
- Kuv yuav cheem koj li cas tau.
- Tsis yog li koj hais. Koj twb hais rau Tswv ntuj tias: ‘Tus poj niam koj muab rau kuv, yog nws de lub txiv’ no . Koj puas nco qab, koj hais tias yog kuv de no na.
- Tsum. Hais tsis muaj qab hau dab tsi lawm.
- Koj xav liam rau niag nab tias niag dab dag wb no lo tau, tiam sis koj ho liam rau kuv.
- Tsam no ces hais tas lawm las as..
- As Das e, niag nab tseem niaj hnub laum wb qees li thiab los mas. Kuv mas txaj muag kawg nkaus li, tias cas wb mas yuav qaug sai ua luaj.
- Txhob hais txog qhov ntawd ntxiv lawm. Wb ob tug me nyuam yog neeg muaj zog. Peb sawv daws yuav tsum siv zog, yuav tsum kawm ntawm wb qhov ua yuam kev…

As Das tseem tsis tau pom qhov tias nws cov me nyuam poob rau kev phem zuj zus. Nws tseem vam vam tias nws ob tug tub yuav yog ob tug tsuj niag nab taub hau, thiab nkawd yuav mus ua tau kom lub rooj vag rov qhiv rau lawv.

Txawm pom nkawd ob niam txiv nyob ntawm lub cub tawg. Leej txiv hais tias:
- Tag kis kuv yuav coj ob tug me nyuad mus lawm tim lub rooj vag.
- Koj yuav coj nkawd mus?
- Kuv yuav coj nkawd mus. Txog caij lawm. Nkawd twb loj tiav txiv lawm. Txog caij nkawd mus saib lub rooj vag lawm…

Thaum As Das coj nws ob tug tub mus saib lub rooj vaj, ua cas tsis muaj rooj vag lawm, tsuas pom roob pob zeb liab ploog xwb. Ua rau nws tu siab qaug zog kawg nkaus li. Nws ob tug tub tseem sib ceg sib zawm caj pas thiab mas nws haj yam tu siab heev. Nkawd maj mam hwj nws los txog tsev. Leej niam hais:

- Ua cas rau neb txiv?
As Npes:
- Xyov nws cia ntog tsis muaj zog lawm.
Kas Ees:
- Twb yog vim nws mus nrhiav tsis pom lub rooj vag lawm xwb los mas.
Leej niam:
- Coj nws los tsev.

Kas Ees coj nws txiv los pw. Leej niam hais:
-
As das, muaj dab tsi os? Koj mob qhov twg? Nyaj tsis muaj dab tsi. Yeej yuav tsum txawj zoo xwb.
- Tsis muaj dab tsi yuav zoo li lawm. Kuv mus nrhiav tsis pom ib qho dab tsi me me uas yuav zoo li lub rooj vag wb tawm los li lawm.
- Es koj vam tiam lub rooj vag yuav qhib no los?
- Kuv xav li tiag…
- As Das, kuv ntshai ua luaj li os.
- Kuv los ib yam thiab.
- Wb yuav ua li cas no?
- Kuv tsis paub li. Kuv tsis paub li os.
- Luag muab wb kaw nkaus rau sab nraud must as ib sim li lawm os….
- Thaum peb taug kev rov los, kuv xav tau li ntawd thiab… Wb yuav tsum tau qhia wb ob tug tub txog tej yam wb tau kawm ntawm wb qhov kev yuam kev.
- Koj hais yog lawm…


Xav txog As Das nkawd mas txaus tu siab kawg nkaus li. Nkawd mas ntshai khuv xim nkawd lub neej tas los, mus txog hnub tuag li, tiam sis thim tsis tau, rhuav tsis tau li lawm, nkawd xav pom Tswv ntuj npaum li cas los pom tsis tau li yav tas li lawm…ntsia As Das mas nws ris ib lub nra hnyav kawg li, vim nws tau ua txhaum…


(Mam tuaj tso ntxiv...)

Mim, ua tsaug koj tuaj tso daim video Adam thiab Eva nkawv tag koj tseem ntxhais lus rau thiab, yog ib lub zoo tswv yim heev, koj muab txhais kom tas, kuv mam lis mus nqus daim video koj los tso koj cov lus rau hauv nawb.

Kuv txawj mus Download kom tau daim video los es txawj sau ntawv rau hauv daim video, yog koj txhais tau tag kuv mam lis mus ua kom tawm lus Hmoob rau peb saib " longdesc="58" />

Daim 3:
As Das sawv ntawm ntug cub mus thov ntuj ntawm hauv paus ntoo:
- Kuv tus Tswv ntuj, ua cas koj thiaj fee koj lub ntsej muag rau kuv?... Kuv tsis muaj koj mas kuv mloog kuv yog neeg twm zeej kawg li… Ua cas koj thiaj tsis rub kuv rov mus lawm hauv lub vaj li?... Ua cas koj muab kuv tso pov tseg li no?... Kuv twb vam ntsoov tias koj yuav tuaj xwb no – tiam sis tsis pom koj li. Chim kuv siab dhau li… Chim kuv kawg li…

As Das tu siab dhau, cia li pw ntawm qab ntoos lawm. Es Vas pw pw tsim los thiaj mus xauj As Das thiab kho pam rau vov.

Thaum sawv ntxov, As Npes thiab nws niam los zaum sib tham. As Npes xub hais lus:
- Kuv niad, kuv txiav txim siab yuav ua ib yam lawm. Kuv yuav siv kuv lub sij hawm mus yug yaj yug tshis. Kas Ees txawj ua teb. Nws nyiam faus teb. Kuv li kuv nyiam tej roob tej nras muaj nroj, kuv nyiam nyob qhib lug raws tej ntawd.
- Kuv yeej paub li ntawd mas. Cov tsiaj coob tuaj lawm, yuav tsum tau ib tug neeg los tu los saib. Neb ob leeg nyias coj nyias cwj pwm sib txawv.
- Niad?
- Dab tsi os?
- Koj puas kam piav lub Vaj qhia rau kuv?
- Kuv kam kawg, cia kuv mam piav rau koj os.
- Nwb lub neej nyob hauv lub Vaj ntawd zoo li cas xwb?
- Wb muaj txhij muaj txhua li. Wb tsis tau yuav mus khwv nrhiav zaub nrhiav mov noj los nrhiav dej haus li. Tej tsiaj tsis ntshai wb, wb los wb tsis ntshai lawv li.
- Wb tsis tau tiv qhov sov sov los qhov no no li. Wb tsis hnav khaub ncaws li, vim wb tsis nco qab yuav txaj muag li.
- Tej ko kuv twb paub lawm, tiam sis kuv xav paub tas txhua yam txog Tswv ntuj na.
- Tswv Ntuj… Tswv Ntuj ua zoo zooxwb tsis ua nchav rau wb li. Nws hais lus rau wb. Nws piav tej yam uas phim wb yuav to taub txog rau wb. Nws zoo zoo siab tuaj nrog As Das nyob thaum ua ntej nws muab As das tus tav los puab kuv. Nws hlub wb tshaj plaws li.
- Muaj li ntawd xwb los niad?
- Muaj ntau yam ntxiv uas wb tsis tau qhia rau neb thiab hos.
- Kuv xav paub kom tas txhua txhua yam tib si na…

Ho pom Kas Ees thiab nws txiv nkawd taug taug kev. Leej txiv hais:
- Kas Ees… Kas Ees
Kas Ees mus taug cav ntawm ntug pas dej. Leej txiv muab pas thawb Kas Ees kom poob hauv pas dej. Leej txiv luag luag thiab nug tias:
- Puas laj khiam thiab?
- Khwv ib hnub sab sab mas laj khiam kawg tiag.
Kas Ees ntov dej rau nws txiv. Leej txiv hais:
- Tsum na! Kuv muaj dab tsi yuav qhia koj.
Leej txiv dhia mus hauv pas dej thiab. Ces ob txiv tub los zaum ntawm ntug pas dej. Leej txiv hais:
- Koj niam wb xav hais tias txog caij lawm uas neb yuav tsum tau kawm kom paub txog Tswv Ntuj thiab Tswv Ntuj txoj kev.
- Tswv Ntuj? Nws twb yog tus uas muab neb laij tawm hauv lub vaj lawd? Tawm ntawm ib qho chaw zoo zoo nkauj los tau ib lub neej txom nyem npaum li As Npes wb tau no na. Hos niaj hnub no koj cog tau pos ntau xwb na.
- Cia kuv mam qhia txog Tswv Ntuj rau koj os tus me ntsuag pos…
Nws txiv muab nws qhau rau hauv dej, mam muab nws tsa tawm huas pa laws los:
- Kas Ees, yog koj xav paub Tswv Ntuj mas koj yuav tsum nrhiav nws npaum nkaus li koj nrhiav nqus cua. Koj yuav tsum siv tas koj lub peev xwm,, tas koj tus kheej, tas nrho koj lub zog. Txawm koj yuav nrhiav nrhiav tuag kiag los koj yuav tsum nrhiav nws tiag.
- Es yog li Tswv ntuj zoo li cas no?
- Zoo li ib co dej. Nws nyob ncig koj tas nrho zoo nkaus cov dej ntag. Nws nyob ncig koj tas nrho, nws nyob ntawm koj txhua sab li. Zoo ib yam nkaus li koj nyuam qhuav nyob hauv dej.
- Haha… ces kuv kuj yuav nqus dej xwb.
- Tej lus no tsis yog lus tso ya li hos. Koj xav tias koj ntse diam no…
Leej txiv rov muab nws tsaus rau hauv dej dua kom nws huas pa laws. Leej txiv mam rov phlws nws tias:
- Txaus lawm, txaus lawm…

Rov pom As Npes thiab leej niam tham nyob ntawm cub tawg:
- Tswv ntuj hais rau kuv txiv tias nws noj tau txhua yam hauv lub vaj, tshwj tsis txhob noj lub txiv ntawm tsob ntoo xwb lod?
- Noj tau tas txhua txhua yam li, tseg kiag tsob txiv uas qhia kom paub qhov phem thiab qhov zoo xwb tiag… Niag nab txawj txawj dag. Muaj ib hnub wb tab tom taug kev ze ntawm tsob ntoo, niag nab txawm hais lus rau kuv. Nws hais tias saib kuv puas xav zoo li Tswv ntuj, paub qhov phem thiab qhov zoo. Kuv ntsia lub txiv mas ntxim qab kawg nkaus li.
- Tswv ntuj twb hais rau neb lawm tias yog neb noj lub txiv ces neb yuav tuag xwb no ne?
- Tswv ntuj hais rau As das, nws tsis hais rau kuv.
- Ua cas koj ho noj mas?
- Kuv xav kom kuv paub npaum li As Das thiab xav kom thoob tsib npaum Tswv Ntuj thiab no na. Lub txiv mas ntxim qab kawg li. Kuv de kiag rau hauv tes, kuv muab hnia zoj, tsw qab zib ntxiag. Kuv muab chais tsuag tsuag, ces kuv txawm ntxo me me saj, ces kuv txawm ntxo kiag ib los loj loj, noj qab kawg nkaus li.
- Ces muaj dab tsi tshwm sim?

Ntawm no rov pom Kas Ees thiab nws txiv. Leej txiv hais:
- Tsis muaj dab tsi tshwm sim li. Koj niam muab cev rau kuv, ces kuv cia li muab ntxo noj.
- Muaj li ntawd xwb?
- Thauj ntej ces tsuas muaj li ntawd xwb. Tiam sis ntev me ntsis mus ces wb txawm mloog zoo li wb muaj ib qho dab tsi ploj lawm. Zoo li wb cia li tsis muaj dab tsi tag nrho li lawm. Ces wb cia li txawj txaj muag txog qhov wb tau ua. Wb cia li pom dheev tias cas wb liab qab. Wb thiaj de nplooj cev los xaws ua tiab npua cev.
- Es neb nim liab qab os?
- Nyob hauv lub vaj, thaum xub thawj wb yeej tsis paub tias yuav hnav ris tsho li. Wb ua neej tsis paub txob tsis paub txhawj, ua siab qhib lug xwb… Tiam sis thaum wb tau tsis mloog Tswv Ntuj lus lawm, Tswv ntuj yeej paub tam sisd tias wb txawv lawm, wb tus cwj pwm hloov lawm.
- Tiam sis mas yog vim niag nab txw neb ua xwb. Nws dag neb.
- Qhov no ces txawm yog qhov teeb meem ntag. Wb ntseeg niag nab tshaj wb ntseeg Tswv ntuj lawm.

Ces ho rov yog leej niam piav rau As Npes:
- Tswv ntuj tuaj nrhiav wb thaum lub caij laj khiam ntxiag. Wb khiav mus tsiv nraim. Wb paub tias wb tau tsis mloog tswv Ntuj lus lawm. Wb tau ua qhov ntawd ntawm wb tus kheej… Ces nws thiaj muab wb ntiab tawm hauv lub vaj zoo nkauj ntawd tawm los nyob rau hauv ntiaj teb no lawm. Wb tsis muaj Tswv Ntuj lawm mas wb mloog zoo li wb twb tuag ib nrab lawm. Tiam sis txawm wb tau ua nws tu siab heev los kuv paub tias nws tseem hlub wb kawg li. Tsis li ntawd no ua cas nws thiaj muab ris tsho los npog wb kev txaj muag?
- Thaum neb ua li ntawd tas, Tswv Ntuj puas nrog neb tham thiab?
- Muaj qee zaus, wb xav tias wb hnov Tswv Ntuj lub suab no, tiam sis yog suab cua nrov xwb… Wb yeej tseem pom tau tias nws nyob ncig wb txhua sab tas nrho. Wb pom nws tes hauj lwm, tiam sis wb tsis hnov nws lub suab lawm.


Daim 4:

As Npes:
- Kuv yuav tsum xav txog qhov no. Kuv xav paub txog tus Tswv ntuj ntawd. Nws puas yog kuv tus Tswv ntuj thiab?
- Nws yog mas. Nws yog tus tswv tsim tas txhua tsav txhua yam li os.
- Yog li mas kuv yuav tsum ua kom paub nws xwb.

Pom Kas Ees nyob hauv pas dej, nws txiv nyob ntawm ntug . Kas Ess hais lus:
- Koj hais tas mus li tias Tswv ntuj yuav tuaj no es.. .
- Kuv hais li los mas. (Leej txiv cev tes rub leej tub tes) Tiam sis txoj kev cia siab ces ploj zuj zus mus lawm ib yam li txoj kev nco lub vaj thiab.

Ob txiv tub los mus tsev...

Kas Ees pom As Npes cov tsiaj muab nws tej khoom noj tsuj lwj ntsuav tuag tas. Nws qw qw:
- Cov niag tsov tom yaj no, khiav mus! As Npes, koj nyob qhov twg? Cov niag yaj, khiav mus! As Npes! Los ntawm no! As Npes!
As Npes sawv nram nws niam nws txiv los.
Ntsia saib! Cov niag tsov tom ntawd ua li no rau kuv thaj teb lawm na!
As Npes khiav los. Kas Ees ntos tau pas:
Ntsias saib kuv thaj teb lwj tas! Kuv yuav muab nws tua kiag kom tuag!
As Npes mus cheem Kas Ees:
- Cia muab lawv tso mus. Kuv mam li coj lawv khiav tawm mus.
- Kuv yuav muab nws tua kiag xwb ntag!
Leej txiv los cheem thiab chua pas ntawm Kas Ees:
- Tsum kiag tam sis no!
- Koj saib mas, nws cov yaj ua kuv thaj teb lwj tas li no lawm na!
- As Npes, yog ua cas thiaj zoo li no?
- Ntshai yog lub ntsa laj kab tsis khov. Thiab cov teb no los muaj ntau yam ntxim noj kawg li.
- Coj cov tsiaj khiav tawm ntawm no mus.
- Kuv txiv, zam txim rau kuv thiab.
- Zam txim pab tau kuv dab tsi?! Zam txim ces txawm ua tau kom kuv cov qoob ciaj los lod?!
- Hais los saib koj yuav kom kuv ua dab tsi no?
Leej txiv hais:
- Tsum kiag. Kuv mam li them koj. (Hais rau As Npes) Coj cov ntawd khiav tawm ntawm no mus saib…. (Hais rau Kas Ees) Ua siab txias txias mog….
Leej niam los hais lus rau As Npes:
- As Npes, kav liam cov yaj. Kuv mam muab cawm lawm hauv nkuaj. Kav tsij mus da dej lawm tom hav dej.
- Niad, tsis ua cas os. Kas Ees yeej muaj cai yuav tsum npau taws.
- Peb mam li pab nws xwb. Muaj dab no?
Leej niam pom As Npes nrob qaum liab tag:
Zaum ntawm no las…
Leej niam khoov saib. As Npes nstia pom nws txiv nrog Kas Ees tseem sib chua tsis txawj tso tseg li, nws hais rau nws niam:
- Nws mas ib nyuag ua cas xwb mas npau cuag li.
- Nws tsis kam muab txoj kev npau taws tso tseg yooj yim li na…
- Ntshai kuv yuav tsum tau lawv pab tsiaj mus lawm pem roob li ob peb lub lis piam ho…
- Kuv los xav tias ntshai yuav zoo dua thiab os.
- Kuv yuav tsum sawv kev tam sis no, ntshai yuav zoo tshaj!
- Mus los mas, mog…

Txawm pom ob niam txiv nte taws, nkawd sib tham. Leej txiv xub hais:
- Kuv xav tias kheev lam txhob muaj tej yam zoo li no tuaj cais ob kwv tij xwb os.
- As Npes yog ib tug tub yug tsiaj zoo.
- Kas Ees los yeej yog ib tug neeg txawj ua teb zoo heev.
- As Npes ua dab tsi los yeej ua tau kawg li. Koj puas tau pom nws thooj ntaub?
- Pom lawm thiab mas, tuab tuab thiab ntxim sov sov. Peb yuav tau siv rau thaum lub caij ntuj no no.
- Wb tsis tau ntsib dua tej lub caij zoo li ntawd nyob hauv lub Vaj li.
- Xyov ua cas txawv ua luaj li tiag, tej nplooj txawj tuag thaum caij nplooj zeeg, txawj ciaj rov los mos mos ntsuab xiab li yuav tsis txawj tuag li.
- Koj puas nco lawm nab, hauv lub vaj sais yog lub caij nroj tsuag tuaj mos nyoos ntsuab xiab (Spring) tas mus li xwb laiv?
As Das ncaws ncaws hau thiab hais tias:
- Koj puas nco qab tus me nyuam noog kuv pom hnub i? Tib tug txias txias li. Kuv sim muab tes qhwv kom sov tuaj saib nws puas rov ciaj tuaj… Tiam sis ua npaum twg los yeej tsis rov ciaj li lawm… Koj puas paub, kuv khiav tsis tau ceev npaum yav thaum i li lawm. Zoo li lub caij ntuj so hauv yus lub neej ntxeev zuj zus mus ua caij ntuj zeeg lawm, ces ntshai yus yuav tsum pib txias zuj zus lawm thiab….(Ob niam txiv tham txog thawj zaug nkawd ntsib kev tuag los ntawm tus noog, ua rau As das xav txog nws tus kheej, nws lub zog ntaug zuj zuj)
- Muaj qee zaus kuv xav txog wb lub neej mas ua rau kuv tu siab tshaj plaws li.
- Kuv xav kom kheev lam wb txawj tig tau rov qab es mus tshem qhov wb tau ua…
- Kuv los xav kom wb rov qab tau kawg li thiab. Tiam sis qhov wb yuav tsum qhia rau wb ob tug tub yog qhov tias yuav rov tsis tau li lawm. Yuav thim tsis tau yam yug tau ua li lawm.

Kas Ees los tshwm:
- Kuv daim teb puas tas li lawm. As Npes dua twg lawm?
Leej txiv hais:
- Kas Ees, peb muaj khoom ntau. Puas tas lawm los tsis ua cas.
- Kuv siv zog khwv tas npaud cog, es txawm cia li tso rau As Npes cov yaj muab rhuav ua liam tas xwb?! Kuv xav paub saib As npes ua dab tsi tiag. Nws tsuas yog taug kev ncig nrog cov yaj ntawd ib hnub ib hnub xwb.
Leej niam los plhws Kas Es:
- Kas Ees e… koj twb haus mis yaj noj nqaij yaj ne, thiab As Npes tseem muab nws cov plaub yaj los faib rau koj siv tib si…
- Kuv mam muab cov plaub yaj rov qab rau nws. Kuv tsis haus mis yaj sis noj nqaij yaj ntxiv lawm os. Kuv tsuas xav tau kuv daim teb rov qab kom zoo nkaus li qub xwb.
Leej txiv hais:
- Yuav ua tsis tau kom zoo nkaus li qub li lawm os. Zaum ntawm no pab wb.
- Kuv hais rau neb paub nawv. Nws yuav tsum tau them xwb thiaj tas!
Kas Ees khiav mus lawm. Ob niam txiv tsis pom qab ua cas…

Pom As Npes pw thaum ib tag hmo. Dev los tom me nyuam yaj. Nws mus txeeb tau rov los tso rau hauv nkuaj. Nws los thov ntuj:
- Kuv txiv As Das tus Tswv Ntuj e, kuv ua koj tsaug, vim koj txhais tes tau pab kuv yeej ib tug yeeb ncuab lawm. Kuv yuav muab dab tsi rau koj? Koj xav yuav dab tsi pauj?
Tswv ntuj ua cua hlob tuaj hais lus rau As Npes.

Thaum nruab hnub Kas Ees tuaj ntsib As Npes.
- Koj ua dab tsi?
- Kuv teem ib lub thaj txi ntuj.
- Koj ua li cas thiaj paub tias Tswv Ntuj xav kom peb ua li ntawd?
- Nws qhia rau kuv.
- Tswv Ntuj nim qhia rau koj ntag?
- Nws qhia tiag.
- Nws hais kom koj ua?
- Nws hais tiag.
- Kuv txiv, koj pom zoo ua li nws hais lod?
- Kuv xav tias Tswv ntuj yeej tau nrog nws tham lawm.
Kas Ees tsis ntseeg tiam sis nws mus hais rau As Npes:
- Hahaha…Tswv Ntuj nrog nws tham kom nws ua li ntawd tiag lod?
- Tswv ntuj hais tias kom muab yam zoo tshaj plaws tuaj mus txi rau nws no. Yuav yog tus me nyuam yaj uas kuv tau mus cawm los. Nws thiaj dawb huv tsis muaj chaw xyeej li.
- Hahaha… Kuv xav mas nws yuav xav pom saib leej twg thiaj nqa tau yam zoo tshaj tuaj xwb… Kuv mam li nqa yam zoo tshaj txi hauv av los tuaj. Yog ib qhov kev wb sib xeem.
Leej txiv hais:
- Kuv xav tias peb yuav tsum tau ua ua ke xws ib tse neeg xwb... Tos rawm, Kas Ees.
- Uas cas no? Ua kom As Npes ua kuv txaj muag no lod? Tsis tau. Kuv paub qhov nej xav lawm. Yuav tsum yog kev sib xeem, kev sib xeem…Hahaha…
Kas Ees khiav mus lawm, As Npes hais rau nws txiv:
- Tsis yog li ntawd kiag li.
Leej txiv ncaws ncaws hau. Hnov Kas Ees lub suab qw nrov nrov puag tim ub tuaj
- Sib xeem!

Maiv Paj Lug wrote:Mim, ua tsaug koj tuaj tso daim video Adam thiab Eva nkawv tag koj tseem ntxhais lus rau thiab, yog ib lub zoo tswv yim heev, koj muab txhais kom tas, kuv mam lis mus nqus daim video koj los tso koj cov lus rau hauv nawb.

Kuv txawj mus Download kom tau daim video los es txawj sau ntawv rau hauv daim video, yog koj txhais tau tag kuv mam lis mus ua kom tawm lus Hmoob rau peb saib " longdesc="58" />

Maiv Paj Lug,

Yog koj muab ua tau li ntawd los zoo kawg os. Tsuas yog ntshai tsam kuv txhais tsis tau zoo xwb.

Daim 5:

Pom Kas Ees muab pob zeb los txhim tau ib lub thaj siab hauj sim. Nws hais khav tsawv rau As Npes tias:
- Ntsia saib kuv lub thaj loj kawg!
- Kas Ees, tsis yog ib qho kev sib tw li na.
- Tiam sis yog kawg. Sib tw saib Tswv ntuj yuav pom leej twg zoo ntag. (As Npes co co hau xwb) Es koj hnov nws lub suab tiag tiag lod? Qhia kuv saib nws nrov li cas? ... Nws nrov li cas na has?...
- Tsis yog nrov hauv kuv pob ntseg… kuj tsis yog nrov hauv cua tuaj thiab. Zoo li yog nrov hauv kuv tuaj, hauv kuv lub cev thoob plaws tuaj…
- Hahaha…Kuv hais tau tias yog cua hais lus zoo li nroo nroo tuaj xwb os….
- Kuv tsis yog ua kom kuv zoo tshaj koj. Tsis yogi b qho kev sib tw.
- Cia peb mam saib saib.
- Yog li ces cia peb mam saib saib.

Kas Ees saib saib nws lub thaj, muab txhua ytam zaub, nws hais hauv nws siab tias:
- Kuv pawg no mas yuav tsum Tswv Ntuj txoj koob hmoov xwb xwb li.
Pom nws noj noj dib, ces pom nws txawm siv tsaug zog dua ncauj u ib ntawm nws lub thaj pob zeb lawm. As Npes los xauj xauj, nws hais rau As Npes tias:
- Kuv cov txim ntau kawg nkaus, kuv twb npaj tiav tas lawm laiv.
- Koj ua dab tsi li no? Koj nqa tag nrho cov khoom koj sau tau tuaj tib si.
Kas Ees sawv los khav tias:
- Peb yuav pom tias leej twg cov txim yog cov koj tus Tswv Ntuj xaiv.
- Nws yog koj tus Tswv ntuj thiab hos. Thiab nws yog wb txiv tus Tswv ntuj. Thiab nws yog txhua tsav txhua yam tus Tswv ntuj.

Hnov nkawd niam hu:
- Kas Ees, As Npes, los noj mov au! Ntshai neb tshaib tshaib plab lawm os!

Kas Ees khiav loo los txog, nthos nkaus chaws las nqaij hauv qhov cub los noj kheej rau leej niam ntsia ntsia. As Npes los txog, leej niam cev tau ib daig nqaij rau nws tab tom yuav noj, tiam sis nws nco dheev txog nws txiv:
- Kuv txiv e, los peb noj mov tso os.

Leej txiv kwv tau ib tug yaj los hais tias:
- Tus no thiaj yog tus uas peb yuav siv.
- Yog los mas, twb yog tus uas kuv mus cawm tau ntawm cov dev los.
- Yog ib tug me tsiaj zoo nkauj kawg li.
As Npes txais coj mus tso rau saum nws lub thaj. Nws niam nws txiv nkawd tuaj thiab. Tswv ntuj ua xob tuaj hlawv tus yaj, hnov cua hlob nrov nroo ntws tuaj. Lawv peb leeg txhos caug khoov pe hawm Tswv ntuj. Kas Ees tsis kam pe hawm. Kas Ees pom tias Tswv ntuj tsis txais nws cov txim, ces Kas Ees chis siab thiab npau taws heev, nws muab nws cov khoom zuaj pov tseg, nws yws rau Tswv ntuj tias:
- Kuv cov khoom tsis zoo txaus rau koj… Kuv cov dag zog khwv ua tau tsis muaj nqes dab tsi rau koj li?...
Nws mus pw hauv av muab ib lub pob zeb los rau ncoo xav:
- koj yeej ib txwm hlub kuv tus kwv tshaj kuv…
Pom Kas Ees khiav nce roob. Lawv sau tias : Ces Tswv Ntuj hais lus rau Kas Ees tias:
- Ua cas koj npau taws? Ua cas koj thiaj npau taws heev ua luaj? Pom tshwm tas nrho saum koj lub ntsej muag. Yog koj ua qhov ncaj, ces ntuj yeej yuav txais koj xwb. Yog koj ua qhov phem ces kev txhaum nyob rawv ntawm koj qhov rooj. Kev txhaum maj maj yuav los kav koj, yuav los ua kom koj tau kev txaj muag. Tiam sis koj yuav tsum yog tus kav nws.
Tiam sis Kas Ees lub siab npau taws dhau, nws twb tsis mloog Tswv ntuj lub suab, nws pom As Npes, nws nyas khaws pob zeb coj los tsoo As Npes vau hlo ntawd lawm, tsis nti li lawm. Nws mam ho khoov mus diaj thiab hu:
- As Npes, As Npes.

Nws pom ntshav los, ua rau nws ntshai.

Daim 6:
Nws cev tes mus kov, nws rov nco txog thaum As Npes tseem me me, thaum nws quaj quaj. Kas Ees ntshai thiab tsis paub yuav ua li cas lawm, kawg khiav mus kom deb deb xwb. Tiam sis Tswv ntuj hu nws tias:
- Koj tus kwv As Npes nyob qhov twg lawd?
- Kuv tsis paub. Kuv puas yog tus zov kuv tus kwv?
- Koj tau ua dab tsi lawd? Koj tus kwv cov ntshav lub suab quaj hauv av tuaj txog kuv.
- Txaus lawm! Ttxaus lawm!... Txaus lawm, txaus lawm na!!...
- Txij no mus koj hmoov phem, vim av tau rua ncauj cug koj tus kwv cov ntshav ntawm koj txhais tes. Thaum koj cog qoob, av yuav tsis txi txiv zoo rau koj ntxiv. Koj yuav yog ib tug neeg loj leeb ncig thoob ntiaj teb.
- Kuv lub txim hnyav dhau ris tsis nyog li. Koj muab kuv cuam pov tseg deb saum daim av ntiaj teb dhau. Kuv yuav tsum ploj mus deb ntawm koj lub ntsej muag.
- Leej twg tua Kas Ees, kuv mam li yuav ua pauj xya zaus.

Hnov nws niam nws txiv nrhiav hu nrhiav hu tias:
- As Npes aw!
- Kas Ees aw!
- Kas Ees aw!
- As Npes aw!...
Leej niam pom lawm, thiaj qhia rau leej txiv. Ob tug txhawj qhov muag hlaws hlo…. Nkawd mus qw hu qw hu
- As Npes! As Npes!!
Hu npaum twg los tsis ciaj sia lawm. Pom taub hau los ntshav liab vog. Leej txiv hais tias:
[/i]- Nws lub cev txias to lawm. Txoj sia twb ncaim mus lawm.[/i]
Leej niam los puag nkaus taub hau quaj. Yog thawj zaug uas as Das thiab Es Vas nkawd ntsib kev txom nyem quaj ntsuag.

Thiaj pom lub hnub poob qho tim qab ntug. Lawv sau cov lus tias:
- Es Vas yug dua ib tug tub rau As das hu ua Xes Thes. Yog nyob hauv Xes Thes tsob noob, muaj ib hnub tas ntiaj teb tib neeg thiaj yuav tau txais koob hmoov zoo.


Zaj Adam and Eve los xaus li no xwb.