QHIA TEEV TXOJ SAW MAB LIAB

NROG NIAM MAB LIAB mus rau YES XUS


1- Hnub Yes Xus txais lub cim ntxuav.
(Ib lub suab nrov doog diaj hais tias :
"Tus no yog kuv Leej Tub zoo nyiam, Nej yuav mloog nws!"
Lus thov Ntuj:
Tswv Ntuj thov koj lub txiaj ntsim pab kom peb ua raws li
peb tau cog lus ntawm peb lub Cim Ntxuav.

2- Rooj tshoob nyob Kas Nas, Yes Xus hloov dej ua cawv:
“Mab Liab hais rau cov tub txib tias: Nej ua li NWS hais tag nrho”

Lus Thov Ntuj:
Nrog Mab Liab, peb xyaum ua neeg tso siab rau Yes Xus
li cov uas tso siab rau NWS ua hwj huam yees ntxwv thawj zaug.

3- Yes Xus tshaj Tswv Ntuj lub Tsheej rau ntiaj teb :
“ Tswv Ntuj lub Tsheej nyob ze ze lawm,
nej thim xav thiab los ntseeg lub Moo Zoo”

Lus Thov Ntuj:
Lub Moo Zoo rau peb thiab lub ntiaj teb neeg,
Yog Leej Pleev los hloov peb lub siab ntsws.
Thov kom yav tom ntej peb lub siab hloov thiab kom
muaj txoj kev sib zam sib hlub rau hauv lub ntiaj teb no.

4- Yes Xus qhib nws lub hwj chim rau cov thwj tim pom :
“Yes Xus ci ntsa iab ntawm lawv xub ntiag :
Nws ntsej muag ci lam lug tam lub hnub”


Lus Thov Ntuj:
Huab tais, koj muab koj lub hwj chim rau cov Thwj Tim pom,
Thov koj ua kom peb cov zaj teev Ntuj ci ntsa iab thiab dawb huv.
Thov koj pab kom peb ua raws li koj cov lus.

5- Tsim Lub Cim Yug :
Thaum noj mov tas, Yes Xus muab lub mov mog
ntais thiab cev rau cov Thwj Tim hais tias;
“Txais mus nej noj, ntawm no yog kuv lub cev”

Lus Thov Ntuj:
Huab Tais vim muaj koj lub txiaj ntsim Ntshiab txi Ntuj,
thov kom peb txawj thov Ntuj pab luag tej.
Thov kom peb muaj peev xwm tshaj
koj lub koob meej nrog rau lub Cim Yug.

NROG NIAM MAB LIAB mus rau YES XUS

1- Yes Xus yuav Tuag:
“Nej zov hmo thiab teev ntuj kom maim dhau kev haub ntxias,
ntsuj plig heev tiam sis cev qaij muag luav” Mas Kos 14,38

Lus thov Ntuj:
Peb nrog Huab Tais zov hmo thiab cev peb lub neej txi rau Huab Tais.

2- Luag muab Yes Xus ntaus :
“Cov neeg pom nws, muab nws plawm thiab hnyos nws”

Lus thov Ntuj:
Huab Tais, thov koj zam peb tej txhaum rau peb
thiab kom peb txawj sib zam ib yam li koj.

3- Muab lub mom pos rau Yes Xus :
“Kuv loj thiab ntshiab, tiam sis kuv nrog tus raug
hiam tus qhib nws lub siab lees nws lub txim” His Xais 57,15

Lus Thov Ntuj:
Huab Tais, thov koj npo peb ntawm kev muab hlob kev hiam neeg.

4- Yes Xus Kwv Ntoo Cuam :
“Nws tus kheej raug lawv lub txim,
nws ris tas zeej tsoom txim txhaum” His Xais 53,11

Lus thov:
Huab Tais Yes Xus, thov koj pub peb muaj koj lub siab hlub neeg li koj.

5- Yes Xus raug ntsia saum Ntoo Cuam thiab tuag:
“Koj muab roj ntsha los txhiv tas tib
neeg txhua xeem lus, txhua haiv neeg thiab teb chaws” QhiYa Tom Ntej 5,9.

Lus Thov Ntuj:
Huab Tais, qhib peb lub siab kom pom koj hlub peb loj npaum luaj li no.

NROG NIAM MAB LIAB mus rau YES XUS


1- Yes Xus Sawv rov los :
“Txhob poob siab, kuv yog tus muaj sia, kuv siav tu,
saib ziag no kuv ciaj sia nyob txhiab niag tim puas xyoo” QhiY Tom Ntej 1,18

Lus thov Ntuj:
Huab Tais, pub kom peb muab zog ntseeg khov kho thiab muaj Yes Xus lub Koob Meej.

2- Yes Xus mus saum Ntuj :
“Kuv nce mus cuag kuv Txiv thiab nej Txiv,
cuag kuv tus Tswv Ntuj thiab nej tus Tswv Ntuj” Zam 20,17

Lus thov Ntuj:
Huab Tais, thov pub peb muaj kev vam thiab tso siab rau Yes Xus cov lus.

3- Leej Ntuj Plig nqes los :
“Leej Nplij neeg, yog Leej Ntsuj Plig Ntshiab,
Leej Txiv yuav ua kuv npe xa tuaj,
yog nws tus yuav qhuab qhia rau nej” Zam 14,26

Lus thov Ntuj:
Peb yuav nrog Mab Liab niaj hnub thov
Leej Ntuj Plig hlub neeg rau lub sim ceeb.

4- Mab Liab cev ntaj ntsug mus txog saum ntuj lawm :
“Txawm Mab Liab cev ntaj ntsug mus txog saum ntuj lawm,
nws hauj lwm tseem muaj ua” Vatican II

Lus thob Ntuj:
Mab Liab, koj yog tus choj hlub neeg dauv qaum ntuj thiab rau peb.
Leej niam, koj dauv muag saib peb lub neej,
coj peb mus taug txoj kev ntshiab.

5-Mab Liab ua poj Huab Tais :
“Ntsuj plig thiab lub cev muaj ntuj Koob Meej…
Mab Liab yog lub sim ceeb tus poj vaj” Vatcan II

Lus thov Ntuj:
Peb hwm Mab Liab yog Leej Niam thiab yog Poj Vaj,
nws yog lub cim peb pom tau Tswv Ntuj lo lus
tsheej xeeb saum ntuj thiab nyob ntiaj teb no.

Cov zaj nyob hauv kev teev Saw Mab Liab muaj tag nrho yog zaj xws li:

1- Ua Ntoo Cuam Lub Cim.
2- Zaj Kuv ntseeg.
3- Niam Mab Liab Fas Tis Mas
4- Kuv tus HT.Yes Xus...
5- Peb txiv
6- Koj nyob kaj lug Mab Liab
7- Huab tais Leej txiv, Huab tais Leej tub...
8- Poj Huab tais.

Ua Ntoo Cuam Lub Cim:

Hu txog leej Txiv thiab leej Tub thiab leej Ntuj Plig lub npe. Ua li.

Kuv Ntseeg

Kuv ntseeg txog Tswv Ntuj,
Yog leej txiv muaj hwj huam tas nrho,
yog tus tsim ntuj tsim teb.
Kuv ntseeg txog Yes Xus Pleev,
yog Tswv Ntuj leej Tub twm zeej, yog peb tus huab tais.
Leej Tswv Yim Ntshiab ua kom nws xeeb los ua neeg.
Nws yug ntawm Nkauj Ntshiab mab Liab los.
Lub caij Pis Las Tos ua nom,
Yes Xus raug luag hiam thiab ntsia saum ntoo cuam.
Nws tuag mus zwm av, mus txog ntuj txias teb tsaus.
Hnub peb, Yes Xus sawv hauv cov tub tuag rov los.
Nws nce mus lawm saum ntuj,
zaum ntawm Leej Txiv muaj hwj huam tas nrho phab xis.
Nws yuav rov los txiav txim rau cov neeg ciaj neeg tuag.
Kuv ntseeg txog Leej tswv Yim Ntshiab.
Ntseeg txog Tsoom Leej Ntshiab sib koom Ntuj Lub Txiaj Ntsim.
Ntseeg txog kev daws txhaum.
Ntseeg txog neeg lub cov sawv rov los.
Ntseeg muaj txoj sia nyob mus li. Ua li.

Miab Mab Liab fas Tis Mas:

"Peb thov kom peb muaj txoj kev ntseeg Ntuj zoo,
txoj kev nyiam Ntuj
thiab kev tso siab lug rau Ntuj nyob hauv peb.”


Kuv tus HT.Yes Xus.

"Kuv tus HT Yes Xus,
thov koj zam txhaum rau peb,
thov koj cawm peb dim ntawm dab phem cov hluav taws,
koj coj kom tas txhua tus ntsuj plig mus txog saum ntuj ceeb tsheej,
tshwj xeeb yog cov uas koj yuav tsum khuv leej lawv ntau tshaj cov. Ua li"


Zaj Peb Txiv.

Peb txiv nyob saum ntuj,
Peb txiv nyob saum ntuj,
Koj lub npe ntshiab nto moo lug,
Koj lub ceeb tsheej los txog,
Kom muaj raws li koj nyiam nyob ntiaj teb no
zoo li nyob saum ntuj.
Thov koj muab mov txaus peb noj hnub no.
Koj zam txhaum rau peb zoo li peb zam rau luag.
Koj txhob tso peb raug kev ntxias.
Koj npo peb dim ntawm kev phem. Ua li.

Zaj Koj nyob kaj lug Mab Liab:

Koj nyob kaj lug Mab liab,
Tus tau txiaj ntsim puv siab.
Huab Tais Ntuj nrog koj nyob.
Koj tau koob tau hmoov tshaj ib zej tsoom poj niam tib si,
thiab koj lub txiv uas koj lub cev txi tau koob tau hmoov.
Leej Ntshiab mab Liab, Tswv ntuj leej Niad,
Koj thov Ntuj rau peb cov neeg txhaum,
Nyem no mus txog thaum peb lub caij dua. Ua li.

Huab Tais Leej Txiv.

"Huab Tais leej Txiv,
HT leej Tub,
HT leej Ntuj Plig muaj koob meej nto moo lug,
lub zim txwv no mus txog fab lwm txheej,
xws li txheej laus thaud los. Ua Li,"

Poj Huab Tais.

Zaj qub: Poj Huab Tais, koj ua niam hlub peb, koj nres peb txoj sia, koj ua peb lub neej tsim txiaj, koj ua peb lub siab tus, peb tuaj xyuas koj. Es Vas tej me nyuam khuam ntiaj teb no; Es Vas tej me nyuam poob nram hav puv kua muag no; Es Vas tej me nyuam kho siab tas nrho tuaj seev ntawm koj. Aib! Niam pab peb puag saum ntuj, koj dauv ntsej muag los ntsia peb. Thaum txog peb lub caij khuam ntiaj teb no tas lawm, koj muab koj plab lub txiv tsim txiaj Yes Xus rau peb xyuas. Aib! Niam txawj zam txhaum, Niam txawj hlub neeg, Mab Liab, nkauj tsim txiaj zoo nyiam.


Txhais dua tshiab:

Koj nyob kaj lug, Poj Huab Tais tus ntshiab huv, leej Niam muaj txoj kev khuv leej neeg! Koj yog peb txoj sia, koj yog peb qhov chaw zoo siab, koj yog peb qhov chaw tso siab! Peb yog Es Vas cov me nyuam poob tsag, peb quaj hu txog koj. Peb poob rau lub hav los kua muag, peb nroo peb quaj tuaj rau koj. Koj yog tus pab tus tuaj peb tog, thov koj tig koj lub ntsej muag khuv leej neeg los ntsia peb. Thaum txog peb lub caij khuam ntiaj teb no tas, thov koj pub lub txiv txi hauv koj cev, Yes Xus, rau peb pom. Aib! Niam txawj zam txhaum, Niam txawj hlub neeg, Mab Liab, nkauj tsim txiaj zoo nyiam. Tswv Ntuj leej Niam Ntshiab e, koj thov Ntuj rau peb, kom peb tsim nyog tau txais raws li Yes Xus cog lus tseg.

Niam Mab Liab tau cog lus pub txiaj ntsim rau tus hais txoj saw Mab Liab:

Cov neeg uas tau xub hais txoj Saw Mab Liab:


Leej Ntshiab Daus Mis Niv yog ib tug Txiv Plig. Nws yug xyoo
1170 nyob Fab Kis teb. Nws tau tshaj lub Moo Zoo ntau rau
tsoom neeg. Nws qhuab qhia kom ua neeg mus raws txoj kev
ntshiab, thiab coj lub Moo Zoo raws li Yes Xus qhia. Tab sis tsis
muaj leej twg mloog nws hais. Leej Ntshiab Daus Mis Niv thiaj
muab siab rau teev Ntuj, thiab hais txoj saw Mab Liab. Nws kuj
qhia kom sawv daws hais txoj saw Mab Liab ces sawv daws
mloog nws qhia. Lawv thiaj lees txhaum thiab thov txhaum ntawm Tswv Ntuj.
Txij thaum muaj neeg kub siab teev Ntuj raws li txoj saw Mab
Liab lawm, ces muaj neeg tig rov los ua zoo, thiab xyaum ua neeg ntshiab.
Peb kuj yuav mob siab hais txoj saw Mab Liab, rau siab
thov peb niam Mab Liab, uas nws yog tus tau txais koob
hmoov ntau tshaj ib tsoom neeg huv tib si.
Peb yuav vam txog nws pab thov Tswv Ntuj zam txhaum
rau peb, vim peb yog cov uas niaj hnub poob nyob hauv
kev txhaum thiab yog vim peb tsis nco hwm Tswv Ntuj uas
yog peb Leej Txiv Tswv Ntuj siab zoo.




Leej Ntshiab Npes Nas Des yog ib tug me ntxhais pluag
pluag, thiab ho muaj mob kawg nyob hauv nws lub neej.
Nws yog ib tug me nyuam ntxhais uas tsis tau kawm txuj ci
li luag tej. Nws yog neeg fab Kis.
Tab sis nws nyiam Tswv Ntuj heev, thiab nyiam niam Mab
Liab heev. Muaj ib hnub, nws tau pom niam Mab Liab. Nws
tsis paub hais tias yog niam Mab Liab.
Nws thiaj nug tus uas nws pom ntawd hais tias: “Koj yog
leej twg?” Niam Mab Liab teb nws hais tias: “ Kuv yog tus
yug los tsis lo neeg lub keeb txhaum”. Ces Npes Nas Des
mam li paub hais tias yog leej twg. Npes Nas Des tseem rov
pom niam Mab Liab li ntawd ntau ntau zaus kawg. Txhua
lub caij uas Npes Nas Des pom niam Mab Liab mas nws
yeej tuav rawv txoj saw Mab Liab ntawm nws txhais tes.
Niam Mab Liab thiaj qhia Npes Nas Des kom mus qhia rau
zeej tsoom sawv daws kom muab siab rau hais txoj saw Mab
Liab los thov Ntuj pab lub ntiaj teb neeg.
Peb sawv daws thiaj yuav tau muab siab rau hais txoj saw
Mab Liab thov Ntuj pab peb tiag tiag.



Tau tsis ntev pes tsawg los lawm, muaj peb tug me nyuam mus
yug yaj noj zaub. Lawv kuj tau pom niam Mab Liab tawm tuaj
xyuas lawv thiab. Lawv cov npe hu ua:

Lus Xias (Lucia) yog ib tug ntxhais
Fas Ntshis Kaus (Francisco) yog ib tug tub
Zas Xees Tas (Jacinta) yog ib tug ntxhais.

Lawv nyob ntawm ib lub me nyuam nroog hu ua Fas Tis Mas,
nyob hauv teb chaws Pos Tus Nkas (Portugal). Xyoo 1917, muaj
ib hnub, lawv mus zov lawv cov yaj noj zaub. Ib sij huam, lawv
tau pom niam Mab Liab sawv luag nyav nyob ze ntawm lawv.
Lawv pom niam Mab Liab sawv li tus duab hauv qab no. Niam
Mab Liab tuav rawv txoj saw Mab Liab nyob hauv nws tes. Cov
me nyuam pom Niam Mab Liab mas lawv tsis tshua zoo siab
pes tsawg. Niam Mab Liab thiaj hais tias:

“ Muaj neeg coob kawg tsis tau mus saum ntuj vim tsis muaj neeg thov Ntuj rau lawv”.

Ces niam Mab Liab hais rau peb tug me nyuam ntawd tias:

“Kuv cov me nyuad, nej kav tsij niaj hnub hais txoj saw
Mab Liab thov Ntuj pab txhua leej txhua tus mog. Kuv ua
nej niam, kuv yuav thov kom Leej Tub Yes Xus hlub nej
thiab zam txhaum rau nej. Ces yuav muaj neeg coob tau
mus saum ntuj yog vim nej thov Tswv Ntuj pab”.

Nyem no cov ntseeg thiaj tau tsa ib lub tsev teev Ntuj rau qhov
chaw ntawd kom cov ntseeg nyob tas ntiaj teb tau kev tuaj mus
teev Ntuj nyob ntawd.



Hais txoj saw Mab Liab nyob hauv peb tsev:

Peb hais txoj saw Mab Liab nyob hauv tsev teev Ntuj. Thiab hais
txoj saw Mab Liab ua ke nyob hauv peb tsev, los puas nyob ze
ntawm Mab Liab tus duab, los qhov chaw twg kuj tau tas tib si.