Yuav Hwm LN Timothy thiab Titus, ob tug Tswv Qhia
Lectionary: 520/319
Zaj Nyeem Ib: 2 TMT 1: 1-8
1 Kuv, Paj Lug, uas yog Yes Xus Pleev ib tug Hauv Paus Xa Lus vim Tswv Ntuj tau pom zoo li ntawd, kom los pab txoj kev cog lus tias yuav muaj txoj sia nyob hauv Yes Xus Pleev,
2 kuv sau ntawv rau Tis Mos Tes, kuv tus tub zoo nyiam. Thov kom koj tau txais txiaj ntsim, kev khuv leej, thiab kev thaj yeeb tuaj ntawm Leej Txiv Tswv Ntuj thiab ntawm Yes Xus Pleev peb tus Huab Tais tuaj.
3 Kuv ua Tswv Ntuj, tus uas kuv muaj ib lub siab dawb paug tsob hwb raws li kuv cov poj yawm ib txwm ua los tsaug, vim kuv nco txog koj tsis tseg thaum kuv teev ntuj, nruab hnub los hmo ntuj.
4 Kuv nco txog koj tej kua muag poob, kuv lub siab xav pom koj kawg nkaus kom kuv rov zoo siab.
5 Kuv xav txog txoj kev ntseeg ncaj ncees uas koj tau txais, yog txoj kev ntseeg uas tau xub nyob hauv koj pog Laus Is, thiab nyob hauv koj niam Aws Nis lawm, mas kuv tso siab lug tias nws yeej nyob hauv koj thiab.
6 Yog vim li ntawd, mas kuv thiaj rov hais rau koj kom koj nco ntsoov ntsaub lub txiaj ntsim uas Tswv Ntuj tso rau hauv koj hnub kuv tau tiag tes rau koj, kom rov cig nplaim loj tuaj .
7 Vim Tswv Ntuj tsis tau pub ib lub tswv yim ntshai ntshai rau peb, tiam sis ib lub tswv yim muaj peej xwm, muaj kev nyiam, thiab tswj tau yus tus kheej.
8 Li ntawd mas koj yuav tsis txhob txaj muag ua tim khawv txog peb tus Huab Tais, los txaj muag vim kuv uas yog tus neeg raug luag khi vim nws. Tiam sis koj yuav vam ntsoov txog Tswv Ntuj lub hwj huam los nyiaj kev txom nyem pab lub Moo Zoo,.
Los: TIS TOS 1: 1-5
1 Kuv, Paj Lug, yog Tswv Ntuj tus tub qhe thiab Yes Xus Pleev tus Hauv Paus Xa Lus, kom tau txhawb cov neeg Tswv Ntuj xaiv lawv txoj kev ntseeg thiab txhawb txoj kev lees paub qhov tseeb hauv txoj kev hwm Ntuj,
2 nyob hauv txoj kev tso siab tias yuav tau txoj sia nyob mus li, raws li Tswv Ntuj tus tsis txawj dag tau cog lus puag thaum ntxov ub, ua ntej muaj lub caij nyoog los lawm.
3 Thaum txog lub caij teem, nws tau qhia nws lo lus tawm, nyob hauv txoj kev tshaj tawm uas nws tau tso rau kuv ua tus lis raws li peb tus cawm seej Tswv Ntuj nws lo lus txib.
4 Kuv sau ntawv tuaj rau Tis Tos, kuv ib tug tseem tub nyob hauv peb sawv daws txoj kev ntseeg. Thov kom koj tau txais txiaj ntsim thiab kev thaj yeeb tuaj ntawm Leej Txiv Tswv Ntuj, thiab Yes Xus Pleev, tus cawm peb tuaj.
5 Lub ntsiab ntawm qhov kuv tau tso koj tseg nyob Khes Tas yog li no: vim xav kom koj npaj tej yam tsis tau muaj kom muaj txhij, thiab xav kom koj tsa ib co txwj laus nyob hauv txhua lub nroog, raws li kuv tau hais kom koj ua.
NPN 96: 1-2a, 2b-3, 7-8a, 10
Txais: (3) Nej cia li tshaj tswv Ntuj cov hauj lwm loj rau tas txhua haiv neeg paub.
Nej hu ib zaj nkauj tshiab rau HUAB TAIS,
tas txhua teb chaws, nej hu nkauj rau HUAB TAIS.
Nej hu nkauj rau HUAB TAIS, nej cav txog nws lub npe.
Txais: (3) Nej cia li tshaj tswv Ntuj cov hauj lwm loj rau tas txhua haiv neeg paub.
Nej tshaj txog nws txoj kev cawm neeg, hnub dhau hnub.
Nej cav txog nws lub koob meej rau cov haiv neeg paub,
nej cav txog nws cov hauj lwm loj rau txhua xeem neeg hnov.
Txais: (3) Nej cia li tshaj tswv Ntuj cov hauj lwm loj rau tas txhua haiv neeg paub.
Cov haiv neeg uas los sib koom ua ib cuab, nej muab rau HUAB TAIS,
nej muab lub koob meej thiab lo lus qhuas lus cav rau HUAB TAIS
nej muab rau HUAB TAIS, lub koob meej uas phim nws lub npe!
Txais: (3) Nej cia li tshaj tswv Ntuj cov hauj lwm loj rau tas txhua haiv neeg paub.
Nej hais nyob hauv cov naiv neeg tias: HUAB TAIS yog tus vaj.
Nws tau tsim lub ntiaj teb kom nyob ruaj, muab tshem tsis tau,
nws tswj cov haiv neeg raws txoj kev ncaj.
Txais: (3) Nej cia li tshaj tswv Ntuj cov hauj lwm loj rau tas txhua haiv neeg paub.
As Les Lus Yas
Txais: As les lus yas, as les lus yas.
Lub noob nplej yog Tswv Ntuj lo lus, leej Pleev yog tus tseb cov noob;
txhua tus uas tuaj cuag nws yuav ciaj nyob mus li.
Txais: As les lus yas, as les lus yas.
Ntawv Moo Zoo: MK 4: 1-20
1 Muaj ib zaug, Yes Xus rov pib qhuab qhia dua nyob ntawm ntug dej ntuj. Ib pab neeg coob kawg sis sau nyob ze nws, nws thiaj nce mus zaum hauv ib lub nkoj nyob saum nplaim dej ntuj, hos tas ib tsoom neeg nyob saum av, tim ntug nqhuab.
2 Yes Xus ua paj lug qhia ntau yam rau lawv. Thaum nws qhia lawv, nws hais tias:
3 "Nej mloog ov! Tus neeg tseb nplej tawm mus tseb nplej.
4 Thaum nws tseb, muaj ib co noob poob rau ntawm ntug kev, ces noog ya tuaj noj lawm.
5 Muaj ib co noob poob rau hauv thaj av pob zeb. Nyob ntawd tsis muaj av ntau, ces noob tuaj kaus sai, vim av tsis tob.
6 Thaum hnub tuaj ziab, cov yub ntsws tas; vim cov yub tsis muaj cag, ces cov yub cia li qhuav.
7 Tseem muaj ib co noob poob rau hauv cov pos. Pos hlob tuaj laum cov yub, ces cov yub ntawd txhawv tsis taus.
8 Hos muaj ib co noob poob rau hauv thaj av zoo. Cov yub nplej ntawd hlob thiab huam, txhawv ua hnab. Tej lub noob txi peb caug lub nplej, tej lub txi rau caum lub, tej lub txi ib puas lub."
9 Ces Yes Xus hais tias: "Leej twg muaj pob ntseg mloog, yuav tsum mloog."
10 Thaum Yes Xus nyob ntawm ib qho xu kev lawm, cov neeg nrog nws ua ke thiab Pab Kaum Ob nug nws txog cov paj lug ntawd.
11 Yes Xus teb rau lawv tias: "Ntuj pub cov lus tob qhia txog Tswv Ntuj lub Ceeb Tsheej rau nej paub. Hos cov neeg uas nyob sab nraud, mas ib puas tsav yam yog paj lug rau lawv xwb.
12 Kom xwv ‘lawv ntsia ntsoov, los lawv tsis pom,
lawv mloog ntsoov, los lawv tsis to taub li,
vim ntshai tsam lawv yuav tsum hloov siab, ces Ntuj ho yuav zam rau lawv.’”
13 Yes Xus hais rau lawv tias: "Nej tsis to taub zaj paj lug no lod? Yog li, nej yuav ua cas to taub tas txhua zaj paj lug?
14 Tus tseb nplej nws tseb Lo Lus.
15 Cov noob poob ntawm ntug kev, qhov chaw lawv tseb Lo Lus, yog cov neeg uas tau hnov Lo Lus, tab sis, tam sis ntawd Xas Tas twb tuaj rho Lo Lus uas nyuam qhuav tseb rau hauv lawv tawm mus lawm.
16 Cov uas poob rau hauv thaj av pob zeb, yog cov neeg uas thaum lawv hnov Lo Lus, lawv zoo siab hlo txais tam sis ntawd.
17 Tab sis lawv tsis muaj cag ruaj nyob hauv lawv, ces kav tsis ntev: thaum muaj kev txom nyem los kev raug luag hiam vim Lo Lus, mas lawv ntog tam sis ntawd.
18 Cov uas tseb rau hauv cov pos, yog cov neeg uas tau hnov Lo Lus,
19 tab sis tej kev txhawj xeeb hauv ntiaj teb no, tej kev haub kev ntxias kom yus nplua nuj, thiab lub siab ntshaw ntau yam, txeem mus laum Lo Lus, ces Lo Lus txi tsis taus txiv.
20 Hos cov uas tseb rau hauv thaj av zoo yog cov neeg uas hnov Lo Lus, lawv khaws Lo Lus thiab lawv tawg paj txi txiv, lawv txi peb caug lub, los rau caum lub, los ib puas lub."