COV ZAJ NYEEM NIAJ HNUB HAUV NRUAB LIS PIAM 2014-15

TIM 17 LUB 1 HLIS 2015

Hnub Xya Thawj Lis Piam Nruab Xyoo B

Hmoov hwm leej ntshiab Anthony (251-356), thawj  tug Txiv Twj Cuab nyob Hais Nkws Tos teb.

Zaj Nyeem Ib  HES NPLAWS 4:12-16

12 Tswv Ntuj lo lus muaj txoj sia. Tswv Ntuj lo lus ua tau hauj lwm. Tswv Ntuj lo lus ntse dua ib rab ntaj ob sab hniav. Nws txeem mus tau hauv tus plig thiab hauv nruab nrab lub tswv yim. Nws mus tau rau hauv cov pob qij txha thiab cov paj hlwb. Tswv Ntuj lo lus txawj txiav txim rau lub siab ntshaw, thiab rau tej zaj tswv yim nyob hauv nruab siab. 13 Tas puas tsav yam Ntuj tsim los, mas yeej tsis muaj ib yam uas Tswv Ntuj lo lus pom tsis tau. Txhua yam nqha nrig thiab du lug nyob ntawm Tswv Ntuj xub ntiag. Peb yuav tsum cev peb tej hauj lwm huv tib si rau nws pom. 14 Vim peb muaj Tswv Ntuj Leej Tub Yes Xus ua Tuam Leej Choj thiab ua Vaj, nws hla dhau yim txheej cuaj txheej ntuj, mas peb yuav nyob ruaj nreb hauv txoj kev lees ntseeg. 15 Peb tus Tuam Leej Choj tsis yog ib tug Leej Choj tsis txawj hlub peb cov neeg zog me, rau qhov nws tau raug txoj kev sim siab txhij txhua ib yam li peb. Tsuas tshuav txoj kev txhaum xwb, nws thiaj tsis raug. 16 Peb kav tsij rhais ruam mus lawm tom ntej. Peb tso siab lug mus kom txog lub theej kiab muaj txiaj ntsim, kom peb tau  txais kev khuv leej, kev zam, thiab kev pab ntawm lub theej kiab.

NPN  19:  8, 9, 10, 15

Txais:   (Zam 6:63c) Huab Tais, koj cov lus muaj ntsuj plig thiab muaj sia.  

HUAB TAIS txoj cai zoo tas nrho,      
ua tau kom tus  ntsuj plig ciaj tuaj;    
HUAB TAIS cov cai lij choj tsim nyog mloog,  
ua tau kom tus neeg tsis ntse thoob tsib tuaj.    

Txais:   (Zam 6:63c) Huab Tais, koj cov lus muaj ntsuj plig thiab muaj sia.

HUAB TAIS cov cai lij choj ncaj ncees,
ua kom lub siab zoo hlo ;  
HUAB TAIS lo lus qhia meej kawg,    
ua tau kom qhov muag pom kev.    

Txais:   (Zam 6:63c) Huab Tais, koj cov lus muaj ntsuj plig thiab muaj sia.

Txoj kev hwm HUAB TAIS yog kev ntshiab,
yog txoj yuav nyob mus li;
HUAB TAIS cov txhooj yog qhov tseeb,
tas nrho nws cov txhooj ncaj ncees.    

Txais:   (Zam 6:63c) Huab Tais, koj cov lus muaj ntsuj plig thiab muaj sia.

Thov kom cov lus kuv lub ncauj hais thiab tej yam kuv lub siab xav tau
zoo raws li koj nyiam,
HUAB TAIS, kuv lub tsua thiab tus cawm kuv.    

Txais:   (Zam 6:63c) Huab Tais, koj cov lus muaj ntsuj plig thiab muaj sia.

As Les Lus Yas   LK 4:18

Txais:   As les lus yas, as les lus yas.  

Huab Tais xa kuv tuaj kom coj lub moo zoo tuaj rau cov pluag
thiab tshaj kev twj lij rau cov nyob hauv tsev loj faj.        

Txais:   As les lus yas, as les lus yas.

Ntawv Moo Zoo     MK 2:13-17

13 Yes Xus rov qab tawm mus taug ntug dej ntuj, tas tsoom sid tuaj ntsauv nws, ces nws qhia lawv. 14 Yes Xus mus ntxiv. Nws pom Les Vis, uas yog As Fas Yos tus tub. Les Vis zaum ntawm rooj sau se, ces Yes Xus hais rau Les Vis tias : "Koj los raws kuv." Les Vis sawv, nws raws Yes Xus mus. 15 Thaum Yes Xus noj mov hauv Les Vis tsev, mas muaj ib co sau se thiab ib co neeg txhaum coob nrog Yes Xus thiab cov thwj tim noj mov : vim cov sau se thiab cov neeg txhaum coob coob raws Yes Xus. 16 Cov kws Ntawv Ntshiab uas yog togFas Lis Xais pom Yes Xus nrog cov neeg txhaum thiab cov sau se noj mov, lawv hais rau cov thwj tim tias : "Vim li cas nws nrog cov sau se thiab cov neeg txhaum noj mov ?" 17 Yes Xus hnov, nws hais rau lawv tias : "Tsis yog cov neeg noj qab nyob zoo yuav vam txog kws kho mob, yog cov neeg mob. Kuv tsis tuaj hu cov neeg ncaj, kuv tuaj hu cov neeg txhaum."

TIM 19 LUB 1 HLIS 2015

Hnub Ob hauv Lis Piam Ob Nruab Xyoo B

Zaj Nyeem Ib HESNPLAWS 5:1-10

1 Tsis hais tus Tuam Leej Choj twg, nws tsuas yog ib tug tawm hauv zeej tsoom los, mas nws ua Leej Choj pab neeg nyob hauv txoj kev fim Tswv Ntuj, pab cev paj tshab txi Ntuj them txim txhaum. 2 Tus Leej Choj hlub taus cov neeg tsis paub dab tsi thiab cov neeg yuam kev, vim tias nws kuj txawj ua txhaum xws li lawv. 3 Vim nws txawj ua txhaum, mas nws yuav tsum ua thaj txi Ntuj them nws cov txhaum, ib yam li nws txi Ntuj them tsoom sid cov txhaum. 4 Tsis muaj leej twg yuav rov muab nws tsa ua leej choj tau. Yog Tswv Ntuj hu nws mas nws thiaj ua leej choj tau, ib yam nkaus li Tswv Ntuj tau hu As Loos. 5 Leej Pleev, kuj tsis tau rov tsa nws ua Tuam Leej Choj muaj hwj chim, nws txais lub hwj chim ntawd ntawm tus hais rau nws tias : “Koj yog kuv Leej Tub. Hnub no, kuv xeeb koj.” 6 Tswv Ntuj tseem hais tias : “Koj ua leej choj mus ib txhiab ib txhis, raws li Mes Kis Xes Des txoj kev.” 7 Leej Pleev, thaum nws ua neej nyob hauv nws lub cev nqaij, nws tau tsa suab quaj thov tus muaj peev xwm cawm tau nws ntawm txoj kev tuag. Leej Txiv mloog Leej Pleev lus thov, vim Leej Pleev yog tus hwm Leej Txiv zoo. 8 Txawm tias Leej Pleev twb yog tus Tub cag, tsis kav nws tuaj yeem raug txom nyem. Nws tau kawm tias kev mloog lus yog dab tsi. 9 Nyem no, Leej Pleev yog tus zoo txhij zoo txhua. Leej Pleev los ua lub hauv paus uas cawm cov neeg mloog nws lus mus li. 10 Vim Tswv Ntuj tsa Leej Pleev ua Tuam Leej Choj raws li Mes Kis Xes Des txoj kev.

NPN 110:1, 2, 3, 4

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS hais rau kuv tus Huab Tais tias: “Koj zaum ntawm kuv sab xis
mus txog thaum kuv muab koj cov yeeb ncuab ua rooj rau koj tiag taw.”

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS yuav ua kom koj tus cwj ua vaj muaj hwj chim nthuav mus deb txij ntawm Xis Yoos mus:
Koj yuav ua vaj nyob nruab nrab hauv koj cov yeeb ncuab.

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

Koj yeej tau lub hwj chim ua vaj los ua koj tug txij hnub koj yug los lawm, lub hwj chim ntshiab
thaum koj tseem nyob hauv leej niam plab, thaum koj txoj kev hluas tseem zoo li lub hnub pib tawm tuaj.

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS tau cog lus lawm, nws yuav tsis thim nws lo lus tias:
“Koj ua leej choj mus ib txhis raws li Mes Kis Xes Des txoj cai.”

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

As Les Lus Yas HES NPLAWS 4:12

Txais: As les lus yas, as les lus yas.

Tswv Ntuj lo lus muaj sia thiab ua tau hauj lwm,
nws txawj tsom tau tej yam tswv yim thiab tej yam kev xav uas nyob hauv neeg nruab siab.

Txais: As les lus yas, as les lus yas.

Ntawv Moo Zoo MK 2:18-22

18 Thaum Zam cov thwj tim thiab cov Fas Lis Xais tab tom yoo mov, muaj neeg tuaj hais rau Yes Xus tias : "Vim li cas Zam cov thwj tim thiab cov Fas Lis Xais cov thwj tim yoo mov, hos koj cov thwj tim tsis yoo ?" 19 Yes Xus hais rau lawv tias : "Thaum nraug vauv tseem nrog nws cov kwv luag nyob, lawv puas yoo mov tau ? Tas lub caij uas nraug vauv nrog lawv nyob, lawv yoo mov tsis tau. 20 Tab sis, muaj ib hnub luag yuav coj nraug vauv mus deb lawv, ces hnub ntawd lawv yuavyoo mov. 21 Tsis muaj leej twg ntxiv ib daim ntaub tshiab rau lub khaub tsho tshaj sab, vim daim ntaub ntxiv yuav rub lub tsho, daim tshiab rub daim qub, ces haj yam ntuag loj. 22 Kuj tsis muaj leej twg ntim cawv tshiab rau hauv ib co hnab tawv qub ; vim cov cawv yuav ua cov hnab tawv qub tawg, ces cawv yuav txeej tas, hos cov hnab tawv los kuj yuav puas tas. Vim li ntawd luag thiaj muab cawv tshiab ntim rau hauv cov hnab tawv tshiab.

TIM 20 LUB 1 HLIS  2015

Hnub Peb hauv Lis Piam Ob Nruab Xyoo B

Zaj Nyeem Ib   HES NPLAWS 6:10-20

10 Tswv Ntuj tsis yog ib tug siab nkhaus. Nws nco ntsoov tej yam nej ua, nco ntsoov nej txoj kev nyiam nws lub npe thiab pab cov ntshiab. 11 Peb tsuas xav kom nej txhua leej muaj lub siab kub mus li kom txoj kev tso siab nyob ruaj mus txog hnub kawg xwb. 12 Peb tsis xav kom nej ua ib co neeg qaug zog. Peb xav kom nej yoog cov uas lawv ntseeg thiab lawv lub siab ruaj xwm yeem, vim lawv tau txais Tswv Ntuj lo lus cog. 13 Thaum Tswv Ntuj cog lus rau Has Nplas Has, nws tuav tsis tau ib tug loj dua nws lub npe, ces nws thiaj rov tuav nws lub npe los cog lus li no : 14 “Kuv yuav foom hmoov zoo ntau rau koj, thiab kuv yuav ua kom koj huam vam coob tas nrho.” 15 Vim Has Nplas Has tau ua lub siab ruaj xwm yeem, mas nws thiaj tau pom raws li Tswv Ntuj hais. 16 Tej tib neeg, thaum lawv cog lus, mas lawv tuav txog ib tug loj lub npe los cog lus thiab los ua pov thawj kom txhob muaj chaw sib cav ntxiv. 17 Vim Tswv Ntuj xav kom cov yuav txais lub cuab tam paub tias nws lo lus yuav tsis hloov li, mas nws tau ua ib zag twv ntuj twv teb. 18 Li ntawd, nyob hauv ob lo lus ruaj no, yam li ob lo lus uas Tswv Ntuj dag tsis tau, mas peb muaj kev tso siab lug, vim peb nrhiav tau ib qho chaw nkaum, ces peb tuav ruaj ruaj txoj kev cia siab uas Ntuj cev los rau peb. 19 Kev tso siab yog zoo li tus nqe lauj nkoj tuav peb tus plig khov thiab ruaj. Kev tso siab txeem mus dhau daim ntaub thaiv kem ntshiab. 20 Yes Xus ua peb ntej mus nyob hauv kem ntshiab, vim nws ua Tuam Leej Choj mus li, raws nraim Mes Kis Xes Des txoj kev.

NPN  111:1-2, 4-5, 9 + 10C

Txais:  (5) Huab Tais yuav nco ntsoov tias nws tau cog lus mus tas ib txhis.
    los:  As les lus yas.

Kuv yuav ua HUAB TAIS tsaug tas kuv lub siab lub ntsws
thaum kuv nrog tsoom neeg siab ncaj koom ua ib pab, nrog lawv ua lub txoos.  
HUAB TAIS cov hauj lwm loj tas nrho,        
zoo ntxim siab kawg nkaus.      

Txais:  (5) Huab Tais yuav nco ntsoov tias nws tau cog lus mus tas ib txhis.
    los:  As les lus yas.
.
Nws cov hauj lwm txaus qhuas ua kom nws nto moo lug;
HUAB TAIS muaj lub siab zoo thiab khuv leej neeg.      
Nws muab txiam xws rau cov hwm nws tau noj,
nws yuav mco ntsoov mus li txog tias nws tau cog lus.      

Txais:  (5) Huab Tais yuav nco ntsoov tias nws tau cog lus mus tas ib txhis.
    los:  As les lus yas.
.
Nws tau xa kev cawm dim tuaj rau nws haiv neeg,    
nws yuav tsis hloov nws lo lust as mus li ib txhis;
nws lub npe ntshiab thiab tsim nyog peb yuav hwm.      
Nws lub koob meej yuav nyob mus li ib txhis.     .

Txais:  (5) Huab Tais yuav nco ntsoov tias nws tau cog lus mus tas ib txhis.
    los:  As les lus yas.


As Les Lus Yas   ES FES XOS 1:17-18

Txais:   As les lus yas, as les lus yas.

Thov kom peb tus Huab Tais Yes Xus Pleev leej Txiv          
qhib peb lub qhov muag hauv peb lub siab kom pom kev,    
kom peb thiaj paub txog tias peb txoj kev tso siab yog dab tsi        
thaum Tswv Ntuj hu peb.  
     
Txais:   As les lus yas, as les lus yas.

Ntawv Moo Zoo  MK 2:23-28

23 Muaj ib zaug, yog hnub Xas Npas Tos, Yes Xus hla ib thaj nplej, cov thwj tim taug kev, lawv pib de tej hnab nplej. 24 Cov Fas Lis Xais hais rau Yes Xus tias : "Saib ! Vim li cas lawv ua tej yam txwv tsis pub ua hnub Xas Npas Tos ?" 25 Yes Xus hais rau lawv tias : "Nej tsis tau nyeem ib zaug txog qhov Das Vis ua thaum nws tsis muaj dab tsi noj, ces nws thiab nws cov kwv luag tshaib plab lod ? 26 Nws mus hauv Tswv Ntuj lub tsev li cas, thiab noj cov ncuav mov txi Ntuj uas kawg yog cov leej choj thiaj noj tau xwb, nws tseem muab rau nws cov kwv luag noj thiab. Thaum ntawd yog lub caij As Npias Thas ua tuam leej choj".  27 Ces Yes Xus hais rau lawv tias : "Ntuj tsim hnub Xas Npas Tos rau neeg, tsis yog tsim neeg rau hnub Xas Npas Tos, 28 Neeg Leej Tub kuj yog tus tswv kav hnub Xas Npas Tos thiab."

TIM 21 LUB 1 HLIS  2015

Hmoov hwm leej ntshiab Agnes, Nkauj ua Tim Khawv

Zaj Nyeem Ib   HES NPLAWS 7:1-3, 15-17

1 Mes Kis Xes Des, tus vaj kav Xas Les thiab Tswv Ntuj nyob siab tus leej choj, tuaj ntsib Has Nplas Has thaum nws mus ntaus yeej cov vaj lawm, thiab nws rov los tsev; ces nws foom hmoov zoo rau Has Nplas Has. 2 Has Nplas Has qee ib feem kaum hauv nws tej toob xib tib si pub rau Mes Kis Xes Des. Mes Kis Xes Des lub npe txhais tias ‘Vaj kav txoj kev ncaj.’ Tab sis nws ua vaj kav Xas Les, qhov ntawd txhais tias tus Vaj kav kev thaj yeeb! 3 Nws tsis muaj niam tsis muaj txiv, tsis muaj keeb kwm. Nws lub neej tsis muaj hnub pib tsis muaj hnub xaus. Mes Kis Xes Des zoo li Tswv Ntuj Leej Tub, nws ua leej choj mus ib txhiab ib txhis.
15 Tseem muaj ib qho tseeb kawg, yog qhov no : tus uas sawv ua leej choj tshiab raws Mes Kis Xes Des txoj kev, 16 mas nws txoj kev ua leej choj tsis los ntawm nws lub keeb los, nws txoj kev ua leej choj los ntawm lub hwj huam muaj txoj sia uas rhuav tsis tau. 17 Vim muaj ib lo lus zeem tseeb txog tus ntawd hais tias : “Koj ua leej choj mus li raws nraim Mes Kis Xes Des txoj kev.”  

NPN   110:1, 2, 3, 4

Txais (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS hais rau kuv tus Huab Tais tias:  “Koj zaum ntawm kuv sab xis
mus txog thaum kuv muab koj cov yeeb ncuab ua rooj rau koj tiag taw.”

Txais (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS yuav ua kom koj tus cwj ua vaj muaj hwj chim nthuav mus deb txij ntawm Xis Yoos mus:
Koj yuav ua vaj nyob nruab nrab hauv koj cov yeeb ncuab.

Txais (4b) Koj yuav ua leej choj mus ib txhis raws txoj kev Mes Kis Xes Des tau rhawv.

Koj yeej tau lub hwj chim ua vaj los ua koj tug txij hnub koj yug los lawm, lub hwj chim ntshiab
thaum koj tseem nyob hauv leej niam plab, thaum koj txoj kev hluas tseem zoo li lub hnub pib tawm tuaj.    

Txais (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS tau cog lus lawm, nws yuav tsis thim nws lo lus tias:
“Koj ua leej choj mus ib txhis raws li Mes Kis Xes Des txoj cai.”

Txais (4b) Koj yuav ua leej choj mus ib txhis raws txoj kev Mes Kis Xes Des tau rhawv.

As Les Lus Yas    MT 4:23

Txais:  As les lus yas, as les lus yas.

Yes Xus tshaj lub moo zoo txog Ntuj Ceeb Tsheej    
thiab kho txhua yam mob rau cov neeg.    

Txais:  As les lus yas, as les lus yas.

Ntawv Moo Zoo  MK 3:1-6

1 Yes Xus rov mus hauv ib lub tsev txoos dua. Nyob ntawd, muaj ib tug neeg uas ib sab tes qhuav. 2 Ces lawv nyas ntshis ntsia saib Yes Xus puas yuav kho tus neeg qhuav tes ntawd hnub Xas Npas Tos, kom lawv tau kev liam rau Yes Xus. 3 Yes Xus hais rau tus neeg qhuav tes tias : "Koj los sawv hauv nruab nrab." 4 Thiab Yes Xus hais rau lawv tias : "Hnub Xas Npas Tos, puas kheev kom ua qhov zoo los cia ua qhov phem, cawm ib txog sia los txo ib txog sia ?" Sawv daws nyob ntsiag to. 5 Yes Xus ntsia lawv ib muag npau taws vog, nws tu siab vim lawv lub siab txhav, ces nws hais rau tus neeg qhuav tes tias : "Koj xyab tes." Ces nws xyab, nws txhais tes rov zoo hlo. 6 Thaum cov Fas Lis Xais tawm mus, lawv nrog cov hes los dias sab laj saib yuav ua li cas thiaj tau kev muab Yes Xus tua.

TIM 22 LUB 1 HLIS  2015

Hnub thov ntuj pab kom cov tseem hwv txiav ib txog cai txwv tsis pub tua me nyuam hauv plab

Zaj Nyeem Ib  HES NPLAWS 7:25—8:6

25 Vim li ntawd Leej Pleev muaj peev xwm cawm tau cov neeg vam txog nws kom mus cuag Tswv Ntuj. Vim nws muaj txoj sia mus li, ces nws thov Ntuj pab lawv. 26 Tsim nyog peb yuav tsum muaj ib tug tuam Leej Choj zoo li ntawd, ib tug tuam Leej Choj ntshiab, tsis muaj chaw xyeej, tsis muaj ib yam tsuas nws, tsis nyob xyaw cov neeg txhaum, nws nyob siab dua cuaj txheej ntuj. 27 Tsis tas nws yuav niaj hnub tua tsiaj txi Ntuj mus them nws cov txim txhaum thiab them tsoom pej xeem cov txim txhaum, xws li cov thawj leej choj uas lawv yuav tsum ua. Nws txi Ntuj ib zaug xwb, yog thaum nws rov muab nws txi rau Ntuj. 28 Txoj Cai tsa ib co neeg zog me ua leej choj. Tiam sis Txoj Cai twb dua lawm. Tswv Ntuj lo lus cog tsa Leej Tub uas yog tus zoo txhij zoo txhua kom ua leej choj mus ib txhiab ib txhis.
8   1 Lub ntsiab tseem ceeb uas peb xav hais txog, yog qhov tias peb muaj ib tug Tuam Leej Choj loj npaum li no : nws zaum ntawm tus muaj hwj chim lub theej kiab phab xis, nyob saum cov txheej ntuj. 2 Nws tuav txoj kab xwm saib Kem Ntshiab, thiab saib lub tsev tsam phooj uas Tswv Ntuj tsa, tsis yog ib tug neeg tsa. 3 Txhua tus thawj leej choj, mas yog luag tsa los ua leej choj cev paj tshab thiab txi Ntuj. Ua li mas nws yuav tsum muaj tej yam paj tshab mus txi Ntuj. 4 Yog tias Yes Xus tseem nyob ntiaj teb no, mas nws tsis tau ua leej choj, vim twb muaj cov leej choj txi Ntuj raws Txoj Cai lawm. 5 Cov leej choj no lis txoj kab xwm teev hawm uas yog ib tug piv txwv, thiab ib tug qauv duab teev hawm xws li nyob saum ntuj. Vim thaum Mais Xes yuav tsa lub tsev tsam phooj, Tswv Ntuj tau qhia nws tias : “Koj ntsia, koj yuav ua txhua yam raws li tus piv txwv kuv muab rau koj saib saum lub roob.” 6 Nyem no, Leej Pleev tau txais ib txog kab xwm siab dua. Nws cev ib txog kev cog lus zoo dua. Txoj kev cog lus no txawb rau saum ib co lus khov dua.

NPN   40:7-8A, 8B-9, 10, 17

Txais: (8a + 9a) Kuv nyob ntawm no, HUAB TAIS, kuv tuaj ua ywj koj lub siab.

Koj tsis ntshaw tsiaj los txhiam xws txi rau koj,
tiam sis koj muab pob ntseg rau kuv kom kuv cuab ntsej mloog.
Koj tsis xav tau tsiaj hlawv txi ntuj los tsiaj hlawv them txim txhaum,  
kuv thiaj hais tias:  “Kuv nyob ntawm no, cia kuv tuaj.”      

Txais: (8a + 9a) Kuv nyob ntawm no, HUAB TAIS, kuv tuaj ua ywj koj lub siab.

Nyob hauv kauj ntawv muaj lus hais tseg txog kuv tias:
Ua ywj koj lub siab, kuv tus Tswv Ntuj, yog yam ntxim kuv siab,    
koj txoj cai nyob rawv hauv kuv nruab plaw!”  

Txais: (8a + 9a) Kuv nyob ntawm no, HUAB TAIS, kuv tuaj ua ywj koj lub siab.

Kuv tau tshaj tawm kom txoj kev ncaj rau tsoom neeg coob tuaj sib txoos,
kuv tsis tau kaw kuv lub qhov ncauj, HUAB TAIS, koj yeej paub.      

Txais: (8a + 9a) Kuv nyob ntawm no, HUAB TAIS, kuv tuaj ua ywj koj lub siab.

Thov kom txhua leej uas nrhiav koj
zoo siab hom khaj nyob hauv koj,
thiab kom cov uas nyiam koj txoj kev cawm
cav tsis tseg tias: “HUAB TAIS nto koob meej.”

Txais: (8a + 9a) Kuv nyob ntawm no, HUAB TAIS, kuv tuaj ua ywj koj lub siab.

As Les Lus Yas    2 TM 1:10

Txais:  As les lus yas, as les lus yas.

Peb tus Cawm Seej Yes Xus Pleev twb rhuav txoj kev tuag lawm,      
thiab nws ua kom txoj sia ci tawm tuaj nyob hauv lub Moo Zoo.                                                              

Txais:  As les lus yas, as les lus yas.


Ntawv Moo Zoo   MK 3:7-12

7 Yes Xus nrog nws cov thwj tim mus nram ntug dej ntuj. Muaj ib pab neeg coob kawg nyob xeev Nkas Lis Lais raws nws. Thiab tej pab neeg coob coob nyob Yus Das teb, 8 nyob Yes Lus Xas Les, nyob Is Dus Mias, nyob sab dej Yos Las Das tim ub, nyob ib ncig Tws Los thiab Xis Doos tuaj cuag Yes Xus, vim lawv tau hnov txog tas ib puas tsav yam nws
ua. 9 Yes Xus hais kom cov thwj tim muab ib lub nkoj dab rau nws, kom lawv txhob tsuj nws, vim neeg coob. 10 Yog vim nws kho ntau leej zoo, ces tas cov neeg uas muaj txiab muaj nkeeg sawv daws phoom kom tau kov Yes Xus. 11 Niaj zaus, cov dab tsis huv pom Yes Xus, lawv khoov ti av nyob ntawm nws xub ntiag, lawv qw tias : "Koj yog Tswv Ntuj Leej Tub !" 12 Yes Xus txwv lawv nruj tsis pub lawv ua kom muaj neeg paub nws.

TIM 23 LUB 1 HLIS  2015

Hnub Rau hauv Lis Piam Ob Nruab Xyoo B

Zaj Nyeem Ib  HES NPLAWS 8:6-13

6 Nyem no, Leej Pleev tau txais ib txog kab xwm siab dua. Nws cev ib txog kev cog lus zoo dua. Txoj kev cog lus no txawb rau saum ib co lus khov dua. Tswv Ntuj yeej xub hais tias nws yuav rov cog lus dua. 8 : 7 - 13. 7 Yog tias txoj kev cog lus thawj zaug zoo nto ntsis lawm, mas tsis tas yuav rov cog lus dua. 8 Tswv Ntuj tau cem qhuab qhia lawv hais tias : “Yav tom ntej, yuav muaj ib hnub, kuv yuav nrog His Xas Lais tsev neeg thiab Yus Das tsev neeg cog dua ib lo lus tshiab. 9 Kuv yuav tsis cog lus xws li kuv nrog lawv cov yawg koob cog lus thawj zaug, hnub uas kuv tuav lawv tes, coj lawv tawm hauv Hais Nkws Tos teb los. Vim lawv nyob tsis ruaj hauv kuv lo lus cog. Kuv thiaj tsis liam fab pab lawv. 10 Kuv yuav nrog His Xas Lais tsev neeg rov cog lus li no : dhau lub sij hawm ntawd, mas kuv yuav muab kuv cov kev cai lij choj cog rau hauv lawv lub tswv yim, kuv yuav muab txaug rau hauv lawv lub siab. Kuv yuav ua lawv tus Tswv Ntuj, lawv yuav ua kuv haiv neeg. 11 Tsis tas yuav muaj leej twg qhia lwm tus, tsis tas ib leeg yuav hais rau ib leeg tias :‘Koj paub Huab Tais mas.’ Vim tias tus hlob tus yau, sawv daws yuav paub kuv txhua. 12 Kuv yuav zam rau lawv, kuv yuav tsis nco txog lawv cov txhaum ntxiv.” 13 Thaum Tswv Ntuj hais tias ‘Kev cog lus tshiab,’ mas lo lus ntawd ua kom thawj txoj kev cog lus thaum ub, qub tuaj. Tej yam uas pib qub thiab pib khaub seeb, mas tshuav tsis ntev yuav ploj mus.

NPN     85:  8 + 10, 11-12, 13-14

Txais:  (11a) Kev siab zoo thiab kev tseeb yuav tuaj sib ntsib.    

HUAB TAIS, thov muab koj txoj kev khuv leej rau peb pom,
Thiab muab koj txoj kev cawm neeg pub rau peb.      
Cov neeg hwm HUAB TAIS tau nws txoj kev cawm nyob ze ze lawv,    
nws lub hwj chim yuav nyob txawm hauv peb lub teb chaws.  

Txais:  (11a) Kev siab zoo thiab kev tseeb yuav tuaj sib ntsib.    

Kev siab zoo thiab thiab kev tseeb yuav tuaj sib ntsib,
kev ncaj thiab kev thaj yeeb yuav los sib puag.
Kev tseeb yuav tawm hauv av los,
thiab kev ncaj yuav dauv muag ntsia saum ntuj los.      

Txais:  (11a) Kev siab zoo thiab kev tseeb yuav tuaj sib ntsib.    

HUAB TAIS yuav pub txoj kev nplua nuj,
hos peb lub teb chaws yuav ntsu qoob.  
Kev ncaj yuav taug kev ua nws ntej,  
kev cawm yuav taug raws nws txoj lw.

Txais:  (11a) Kev siab zoo thiab kev tseeb yuav tuaj sib ntsib.    .

As Les Lus Yas

Txais:   As les lus yas, as les lus yas.

Tswv Ntuj nrog lub ntiaj teb rov sib haum nyob hauv leej Pleev,
nws muab tsab xov nrhiav kev siv haum tso rau peb.    

R. Alleluia, alleluia.

Ntawv Moo Zoo    MK 3:13-19

13 Yes Xus nce mus saum lub roob, nws hu cov uas nws xav hu kom los ntawm nws. Ces lawv los nyob ze nws. 14 Nws tsa kaum ob leeg los ua nws cov kwv luag, kom nws tau xa lawv mus tshaj Lo Lus, 15 thiab kom lawv tau hwj huam ntiab dab phem. 16 Nws thiaj tsa Pab Kaum Ob : yog Xis Moos uas Yes Xus tis nws npe hu ua Pob Zeb, 17 Yas Kos, Ntxes Npes Dais tus tub, Zam, Yas Kos tus kwv, Yes Xus tis nkawd npe hu ua Npuas Nes Nkes, txhais tias Yawm Xob cov tub, 18 As Nres, Fis Lis Pos, Npas Tos Los Mas Yos, Mas Tais, Tos Mas, Yas Kos uas yog As Fas Yos tub, Thas Das Yos, Xis Moos tus Ntxes Lo`s Tes, 19 thiab Yus Das Kas Lis Yaus, tus muab Yes Xus muag.

TIM 24 LUN 1 HLIS 2015

Hmoov hwm LN Francis de Sales, Tswv Qhia thiab Kws Kev Ntseeg (Doctor of the Church)

Zaj Nyeem Ib HES NPLAWS 9:2-3, 11-14

2 Lawv tsa ib lub tsev tsam phooj kem ua ob chav: thawj chav uas muaj tus ncej txawb tswm ciab, lub rooj, thiab cov ncuav mov, hu ua lub Tsev Ntshiab. 3 Ces nyob dhau tom daim ntaub thaiv ob yog chav ob hu ua Kem Ntshiab rau cov Ntshiab.
11 Tab sis Leej Pleev tuaj lawm, nws yog tus Tuam Leej Choj kav lub cuab tam tom ntej. Nws hla ib lub tsev tsam phooj loj dua, thiab zoo dua, uas tsis yog neeg txhais tes ua, tsis yog tawm ntawm ntiaj teb los. 12 Leej Pleev mus hauv lub tsev Ntshiab, nws tsis nqa ntshav tshis los ntshav nyuj, nws hliv kiag nws cov ntshav, ces nws txhiv tau peb mus li. 13 Yog ntshav tshis, thiab ntshav heev nyuj, los ib co hmoov tshauv maum nyuj uas luag muab tsuag rau saum cov neeg tsis huv, ua tau kom cov tsis huv ntshiab tuaj, thiab lub cev nqaij rov huv tuaj tiag, 14 mas Leej Pleev cov ntshav haj yam ua tau kom peb lub siab huv tuaj thiab kom peb dim tau ntawm peb cov hauj lwm txhaum los teev tus Tswv Ntuj muaj txoj sia, vim Leej Pleev uas nrog Leej Ntuj Plig nyob mus li, Leej Pleev uas tsis muaj ib qho xyeej, nws rov muab nws txi rau Tswv Ntuj

NPN 47:2-3, 6-7, 8-9

Txais: (6) Tswv Ntuj nce saum nws lub theej kiab, muaj suab qw zoo siab, muaj suab hom nrov rau Huab Tais.

Txhua haiv neeg, nej npuaj teg,
nej qw suab zoo siab rau Tswv Ntuj,
vim HUAB TAIS tus nyob siab, tus zoo tshaj,
yos tus vaj loj kav tas nrho lub ntiaj teb.

Txais: (6) Tswv Ntuj nce saum nws lub theej kiab, muaj suab qw zoo siab, muaj suab hom nrov rau Huab Tais.

Tswv Ntuj nce saum nws lub theej kiab, muaj suab zoo sia
HUAB TAIS nce, muaj suab hom nrov.
nej hu nkauj cav txog Tswv Ntuj, nej cav txog nws,
nej hu nkauj cav txog peb tus vaj, nej cav txog nws.

Txais: (6) Tswv Ntuj nce saum nws lub theej kiab, muaj suab qw zoo siab, muaj suab hom nrov rau Huab Tais.

Tus vaj kav tas lub ntiaj teb yog Tswv Ntuj,
nej hu nkauj cav txog nws.
Tswv Ntuj tswj cov haiv neeg,
Tswv Ntuj zaum saum nws lub rooj ntshiab.

Txais: (6) Tswv Ntuj nce saum nws lub theej kiab, muaj suab qw zoo siab, muaj suab hom nrov rau Huab Tais.

As Les Lus Yas HAUJ LWM 16:14B

Txais: As les lus yas, as les lus yas.

Huab Tais, thov koj qhib peb lub siab
kom peb mloog koj leej Tub cov lus.

Txais: As les lus yas, as les lus yas.

Ntawv Moo Zoo MK 3:20-21

20 Yes Xus los tsev, ces rov muaj neeg coob coob tuaj sib sau,
Yes Xus lawv tsis xyeej noj mov li.
21 Yes Xus cov neeg hnov li ntawd, lawv tawm tuaj ntes nws,
vim lawv hais tias : "Nws tsis meej pem lawm."

TIM 26  LUB 1 HLIS  2015

Hwm leej ntshiab Tis Mos Tes thiab Tis Tos, ob tug Tswv Qhia

Zaj Nyeem Ib   2 TMT 1:1-8

1 Kuv, Paj Lug, uas yog Yes Xus Pleev tus Hauv Paus Xa Lus, vim Tswv Ntuj xav kom muaj li ntawd, kom kuv tau tshaj tias Tswv Ntuj cog lus yuav pub txoj sia uas nyob hauv Yes Xus Pleev, 2 kuv sau ntawv tuaj rau Tis Mos Tes, kuv tus tub zoo nyiam. Thov kom Leej Txiv Tswv Ntuj, thiab peb tus Huab Tais Yes Xus Pleev khuv leej koj, pub txiaj ntsim thiab kev thaj yeeb rau koj. 3 Kuv ua tus Tswv Ntuj uas kuv tsob hwb tsaug raws li kuv cov poj yawm ib txwm ua los, kuv muaj lub siab dawb paug nruab hnub hmo ntuj nco txog koj tsis tseg thaum lub caij kuv teev ntuj. 4 Thaum kuv nco txog koj cov kua muag, mas kuv lub siab kub lug xav pom koj, kom kuv rov zoo siab. 5 Kuv nco txog txoj kev ntseeg ncaj ncees, uas nyob hauv koj. Yog txoj kev ntseeg uas tau xub nyob hauv koj pog Laus Is, thiab nyob hauv koj niam Aws Nis Kes. Kuv tso siab lug tias txoj kev ntseeg ntawd nyob hauv koj thiab. 6 Yog vim li ntawd, kuv thov ntuas koj, kom koj rov tsa lub txiaj ntsim uas Tswv Ntuj tso rau hauv koj hnub kuv tiag tes rau koj kom sawv. 7 Lub tswv yim uas Tswv Ntuj pub rau peb tsis yog ib lub tswv yim muaj kev ntshai, yog ib lub tswv yim muaj zog,  muaj kev nyiam, muaj kev pab yus tswj yus tus kheej. 8  Li ntawd koj yuav tsis txhob txaj muag ua tim khawv pub rau peb tus Huab Tais los txaj muag vim kuv ua Yes Xus tus neeg raug txim. Tiam sis koj yuav zoo siab nrog kuv raug txom nyem vim lub Moo Zoo, thiab tso siab lug rau Tswv  Ntuj lub hwj huam.

Los:      TIS TOS 1:1-5

1 Kuv, Paj Lug, Tswv Ntuj tus tub txib, thiab Yes Xus Pleev tus Hauv Paus Xa Lus, uas coj cov neeg Tswv Ntuj xaiv los txais kev ntseeg thiab txais txoj kev paub qhov tseeb uas qhia kev hwm Ntuj, 2 thiab pab kom lawv muaj txoj kev tso siab tias yuav tau txoj sia nyob mus li raws li Tswv Ntuj tsus txawj dag tau cog lus puag thaum ntxov ub lawm.  3 Thaum txog lub caij teem, nws tau tshaj tawm nws lo lus raws li peb tus Tswv Ntuj cawm neeg tau txib kom kuv ua. 4 Kuv sau ntawv tuaj rau Tis Tos, kuv ib tug tseem tub nyob hauv peb txoj kev ntseeg. Thov kom Leej Txiv Tswv Ntuj, thiab Yes Xus Pleev, tus cawm peb, pub txiaj ntsim thiab kev thaj yeeb rau koj. 5 Tos kuv tau tso koj tseg nyob Khes Tas, yog vim xav cia koj npaj tas ib puas tsav yam hauv tus txheej txheem kom tiav ces koj thiaj tau tsa ib co Txwj Laus nyob hauv txhua lub nroog, raws li kuv tau qhia koj.

NPN   96:1-2A, 2B-3, 7-8A, 10

Txais:   (3)  Nej tshaj tswv Ntuj cov hauj lwm loj rau txhua haiv neeg paub.    

Nej hu ib zaj nkauj tshiab rau HUAB TAIS,
tas ntiaj teb neeg nej hu nkauj rau HUAB TAIS.
Nej hu nkauj rau HUAB TAIS, nej cav txog nws lub npe.    

Txais:   (3)  Nej tshaj tswv Ntuj cov hauj lwm loj rau txhua haiv neeg paub.

Hnub dhau hnub nej tshaj txog nws txoj kev cawm neeg.  
Nej cav txog nws lub koob meej rau cov neeg tsis paub Ntuj,
cav txog nws cov hauj lwm loj rau txhua haiv neeg.

Txais:   (3)  Nej tshaj tswv Ntuj cov hauj lwm loj rau txhua haiv neeg paub.

Cov yim neeg nyob hauv cov haiv neeg, nej muab rau HUAB TAIS,
nej muab lub koob meej thiab lo lus qhuas lus cav rau HUAB TAIS    
nej muab rau HUAB TAIS lub koob meej uas phim nws lub npe!      

Txais:   (3)  Nej tshaj tswv Ntuj cov hauj lwm loj rau txhua haiv neeg paub.

Nej hais rau cov naiv neeg tias:  HUAB TAIS  ua vaj.    
Nws tau tsim lub ntiaj teb kom nyob ruaj, muab tshem tsis tau,  
nws tswj cov haiv neeg raws txoj kev ncaj.

Txais:   (3)  Nej tshaj tswv Ntuj cov hauj lwm loj rau txhua haiv neeg paub.

As Les Lus Yas   2 TMT 1:10

Txais:   As les lus yas, as les lus yas.

Peb tus Cawm Seej Yes Xus Pleev tau rhuav txoj kev tuag
thiab tau tso txoj sia tawm los nyob hauv lub Moo Zoo.

Txais:   As les lus yas, as les lus yas.

Ntawv Moo Zoo    MK 3:22-30

22 Cov thoob xwm tuaj pem Yes Lus Xas Les tuaj hais tias : "Nws raug dab Npes Ntxes Npus." Lawv tseem hais tias : "Nws hu txog tus tuam thawj dab los ntiab dab tawm." 23 Yes Xus hu lawv los ntawm nws, ces nws ua paj lug hais rau lawv tias : "Xas Tas yuav ua cas ntiab tau Xas Tas ? 24 Yog ib lub teb chaws rov ua kom nws sib tawg, mas lub teb chaws ntawd nyob tsis ruaj. 25 Yog ib tse neeg rov ua kom nws sib tawg, mas lub tsev ntawd yuav nyob tsis tau. 26 Ua li yog Xas Tas rov sawv tiv Xas Tas, mas nws tawg, ces nws yuav nyob tsis tau, nws kawg yuav piam sij tas. 27 Tsis muaj leej twg nkag tau mus hauv tus neeg muaj zog tsev, mus lwg nws lub cuab tam, yog tsis xub muab tus muaj zog khi tso, mas nws yuav lwg tsis tau tus muaj zog lub tsev. 28 Kuv hais tseeb rau nej, Ntuj yuav zam ib puas tsav yam txhaum rau neeg tej tub ki, tsis hais tej txhaum los tej lus thuam Ntuj lawv tau tsawm. 29 Tab sis tus twg thuam Leej Ntuj Plig Ntshiab, mas Ntuj yuav tsis zam rau nws ib zaug li : nws ua ib qho txhaum nyob mus li." 30 Vim lawv hais tias : "Yes Xus raug ib tug dab tsis huv."

TIM  27 LUB 1 HLIS  2015

Hnub Peb hauv Lis Piam Peb Nruab Xyoo  B

Zaj Nyeem Ib  HES NPLAWS 10:1-10

1 Vim Txoj Cai tsuas yog tus duab zeem txog tej yam zoo uas yuav muaj tuaj yav pem suab xwb, tsis yog kiag tej yam ntawd, mas Txoj Cai thiaj ua tsis tau kom cov neeg uas tuaj cuag Tswv Ntuj dawb huv tas nrho, txawm tias lawv niaj xyoo txi Ntuj raws nraim li lawv ib txwm ua los xyoo dhau dhau. 2 Yog tias Txoj Cai ua tau kom neeg dawb huv tas nrho, mas lawv yuav tsis txi Ntuj ntxiv, vim tias lawv txi ib zaug tas xwb ces lawv tsis pom tias lawv muaj txhaum ntxiv lawm. 3 Tiam sis, niaj xyoo thaum lawv txi Ntuj yuav ua kom lawv rov nco txog lawv cov txhaum.  4 Vim ntshav nyuj ntshav tshis tsis muaj hwj huam daws txhaum tau. 5 Vim li ntawd, thaum Leej Pleev los nyob ntiaj teb no, nws thiaj hais tias : “Cov thaj txi Ntuj thiab cov paj tshab, koj tsis xav yuav, koj thiaj puab ib lub cev rau kuv.  6 Cov thaj hlawv tsiaj thiab cov thaj txi Ntuj them txim txhaum, koj tsis zoo siab txais. 7 Kuv thiaj hais tias : “Tswv Ntuj, cia kuv tuaj ua raws li koj nyiam, raws li riam Ntawv sau hais txog kuv”. 8 Leej Pleev xub hais txog tias : Cov thaj txi Ntuj, cov paj tshab, cov thaj hlawv tsiaj, cov thaj txi Ntuj them txim txhaum, koj tsis xav yuav tsis zoo siab txais,  txawm hais tias tej ntawd yog tej yam uas Txoj Cai qhia kom ua.  9 Ces Leej Pleev hais ntxiv tias : “Cia kuv tuaj ua raws li koj nyiam.” Li ntawd, nws rhuav thawj txoj cai thiab tsa ib txog tshiab los hloov. 10 Nws tau txaus siab ua li no kom peb ntshiab tuaj; nws muab nws lub cev txi rau ntuj ib zaug xwb, ces daws tau kev txhaum tas nrho lawm.

NPN    40:2+4AB, 7-8A, 10, 11

Txais:   (8a and 9a) Kuv nyob ntawm no HUAB TAIS, kuv tuaj ua raws li koj nyiam.

Kuv tau tso siab thiab tos ntsoov HUAB TAIS,  
nws tau khoob los  qis qis los saib kuv thiab mloog kuv.
Nws tau muab ib zaj nkauj tshiab rau kuv qhov ncauj,
ib zaj nkauj hu rau Tswv Ntuj.

Txais:   (8a and 9a) Kuv nyob ntawm no HUAB TAIS, kuv tuaj ua raws li koj nyiam.

Thaj txi ntuj thiab paj tshab koj tsis ntshaw,
tiam sis koj muab ib lub pob ntseg mloog lus rau kuv.
Cov tsiaj hlawv thiab cov thaj txi ntuj them txim txhaum, koj tsis xav tau,
kuv thiaj hais tias:  “Ntawm no, kuv tuaj lawm.”

Txais:   (8a and 9a) Kuv nyob ntawm no HUAB TAIS, kuv tuaj ua raws li koj nyiam.

Kuv tau tshaj txog koj txoj kev ncaj rau cov neeg coob tuaj sib txoos;
kuv tsis tau kaw qhov ncauj; HUAB TAIS, koj yeej paub.

Txais:   (8a and 9a) Kuv nyob ntawm no HUAB TAIS, kuv tuaj ua raws li koj nyiam.

Koj txoj kev ncaj kuv tsis tau muab zais cia rau nruab siab;
kuv tau hais txog koj txoj kev pheej xeeb thiab koj txoj kev cawm,
kuv tsis tau zais koj lub siab zoo thiab koj txoj kev tseeb
kuv tau qhia rau pab neeg coob.

Txais:   (8a and 9a) Kuv nyob ntawm no HUAB TAIS, kuv tuaj ua raws li koj nyiam.

As Les Lus Yas    MT 11:25

Txais:   As les lus yas, as les lus yas. lleluia, alleluia.

Leej Txiv, HUAB TAIS kav lub ntuj lub teb, peb cav txog koj,
koj tau qhia tej yam neeg tsis paub txog Ntuj Ceeb Tsheej rau cov neeg me.

Txais:   As les lus yas, as les lus yas.

Ntawv Moo Zoo   MK 3:31-35

31 Yes Xus niam thiab nws cov kwv tij tuaj txog, lawv nyob nraum zoov, lawv kom luag mus hu Yes Xus. 32 Muaj ib pab neeg zaum ncig Yes Xus, lawv hais rau nws tias : "Koj niam nrog koj cov kwv thiab cov muam tuaj nyob nraud, lawv nrhiav koj." 33 Yes Xus teb rau lawv tias : "Leej twg yog kuv niam ? Leej twg yog kuv kwv tij ?" 34 Yes Xus ntsia cov neeg zaum ncig nws, nws hais tias : "Kuv niam thiab kuv cov kwv tij nyob ntawm no. 35 Leej twg ua raws li Tswv Ntuj lub siab, tus ntawd yog kuv ib leeg kwv, ib leeg muam thiab ib leeg niam."

TIM 28 LUB 1 HLIS   2015

Hnub Plaub Lis Piam Nruab Xyoo B

Hwm leej ntshiab Tos Mas As Kis Nas, ua Txiv Plig thiab Doctor kev ntseeg

Zaj Nyeem Ib  HN 10:11-18

11 Cov leej choj niaj hnub sawv ntsug leg lawv txoj kab xwm, lawv nquag cev cov thaj txi Ntuj uas zoo ib yam tas mus li, thiab tsis muaj hwj huam daws txhaum tau. 12 Hos Leej Pleev, mas nws tsuas cev thaj txi Ntuj daws txhaum ib zaug xwb, ces nws mus zaum ntawm Tswv Ntuj phab xis mus li. 13 Nws tos kom Ntuj muab nws cov yeeb ncuab los ua rooj rau nws tiag taw lawm xwb. 14 Leej Pleev tsuas cev paj tshab ib zaug xwb, ces nws ua tau kom cov uas nws tau ntxuav lawv huv lawd zoo tiav nto ntsis. 15 Leej Ntuj Plig Ntshiab zeem tseeb li ntawd thiab, vim nws hais tias : 16 “Lub caij ntawd, kuv yuav nrog lawv cog lus zoo li no : Huab Tais hais tias : kuv yuav tso kuv txoj cai lij choj rau hauv lawv lub siab, kuv yuav txaug kuv txoj cai lij choj rau hauv lawv lub tswv yim. 17 Kuv yuav tsis nco txog lawv cov txhaum thiab lawv tej kev hla txoj cai.” 18 Thaum Ntuj zam txhaum tas, mas tsis tas yuav rov ua thaj txi Ntuj them txhaum ntxiv.

NPN  110:1, 2, 3, 4

Txais (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS hais rau kuv tus Huab Tais tias: “Koj zaum ntawm kuv sab xis
mus txog thaum kuv muab koj cov yeeb ncuab ua rooj rau koj tiag taw.”

Txais (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS yuav ua kom koj tus cwj ua vaj muaj hwj chim nthuav mus deb txij ntawm Xis Yoos mus:
Koj yuav ua vaj nyob nruab nrab hauv koj cov yeeb ncuab.

Txais (4b) Koj yuav ua leej choj mus ib txhis raws txoj kev Mes Kis Xes Des tau rhawv.

Koj yeej tau lub hwj chim ua vaj los ua koj tug txij hnub koj yug los lawm, lub hwj chim ntshiab
thaum koj tseem nyob hauv leej niam plab, thaum koj txoj kev hluas tseem zoo li lub hnub pib tawm tuaj.

Txais (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS tau cog lus lawm, nws yuav tsis thim nws lo lus tias:
“Koj ua leej choj mus ib txhis raws li Mes Kis Xes Des txoj cai.”

Txais (4b) Koj yuav ua leej choj mus ib txhis raws txoj kev Mes Kis Xes Des tau rhawv.

As Les Lus Yas

Txais:   As les lus yas, as les lus yas.

Lub noob nplej yog Tswv Ntuj lo lus, leej Pleev yog tus tseb cov noob nplej;
txhua tus uas tuaj cuag nws yuav ciaj nyob mus li.

Txais:   As les lus yas, as les lus yas.

Ntawv Moo Zoo   MK 4:1-20

1 Yes Xus rov qhia dua nyob ntawm ntug dej ntuj. Ib pab neeg coob kawg sis sau nyob ze nws, nws thiaj nce mus hauv ib lub nkoj nyob saum dej ntuj, nws zaum hauv, hos tas ib tsoom neeg nyob saum av, tim ntug nqhuab. 2 Yes Xus ua paj lug qhia ntau yam rau lawv. Thaum nws qhia lawv, nws hais tias : 3 "Nej mloog saib ! Tus neeg tseb nplej tawm mus tseb. 4 Thaum nws tseb, muaj ib co noob poob rau ntawm ntug 4574 kev, ces noog ya tuaj noj lawm. 5 Muaj ib co noob poob rau hauv thaj av pob zeb. Nyob ntawd tsis muaj av ntau, ces noob tuaj kaus sai, vim av tsis tob. 6 Thaum hnub tuaj ziab, cov yub ntsws tas, vim cov yub tsis muaj cag, ces cov yub cia li qhuav. 7 Tseem muaj ib co noob poob rau hauv cov pos. Pos hlob tuaj laum cov yub, ces cov yub ntawd txhawv tsis taus. 8 Hos muaj ib co noob poob rau hauv thaj av zoo. Cov yub nplej ntawd hlob thiab huam, txhawv ua hnab. Tej lub noob txi peb caug lub nplej, tej lub txi rau caum lub, tej lub txi ib puas lub." 9 Ces Yes Xus hais tias : "Leej twg muaj pob ntseg mloog, mas cia nws mloog." Vim li cas Yes Xus ua paj lug hais. 4 : 10 - 12. 10 Thaum Yes Xus nyob ntawm ib qho xu kev lawm, cov neeg nrog nws ua ke thiab Pab Kaum Ob nug nws txog cov paj lug ntawd. 11 Yes Xus hais rau lawv tias : "Ntuj pub cov lus tob qhia txog Tswv Ntuj lub Ceeb Tsheej rau nej. Hos cov neeg no, lawv nyob sab nraud, ces ib puas tsav yam yog paj lug rau lawv. 12 Kom xwv lawv sib zog ntsia, los lawv tsis pom, lawv mloog ntsoov, los lawv tsis to taub, tsam lawv yuav tsum hloov siab, ces Ntuj ho yuav zam rau lawv." Txhais zaj paj lug tseb nplej. 4 : 13 - 20. 13 Yes Xus hais rau lawv tias : "Nej tsis to taub zaj paj lug no lod ? Yog li, nej yuav ua cas to taub cov paj lug tas huv si ? 14 Tus tseb noob, nws tseb Lo Lus. 15 Cov uas nyob ntawm ntug kev txais Lo Lus, yog cov neeg uas tau hnov Lo Lus. Tab sis, Xas Tas tuaj rho Lo Lus uas nyuam qhuav tseb rau hauv lawv tam sim ntawd lawm. 16 Cov uas txais cov noob tseb rau hauv thaj av pob zeb, yog cov neeg uas thaum lawv hnov Lo Lus, lawv zoo siab txais. 17 Tab sis lawv tsis muaj cag nyob nruab siab, thiab lawv yog neeg tsis ruaj : thaum muaj kev txom nyem los kev raug luag hiam vim Lo Lus, mas lawv ntog tam sim ntawd. 18 Tseem muaj ib co txais cov noob tseb rau hauv cov pos : yog cov neeg uas tau hnov Lo Lus. 19 Tab sis ntiaj teb kev txob xeeb, nyiaj txiag kev ntxias, thiab lub siab ntshaw ntau yam txeem mus laum Lo Lus, ces Lo Lus txi tsis taus txiv. 20 Hos cov uas txais cov noob tseb rau hauv thaj av zoo yog cov neeg uas hnov Lo Lus, lawv txais, thiab lawv txi txiv. Ib tug txi peb caug lub, ib tug txi rau caum lub, lwm tus txi ib puas lub."

TIM 29 LUB 1 HLIS 2015

Hnub Tsib Lis Piam Peb Nruab Xyoo B

Zaj Nyeem Ib HN 10:19-25

19 Kwv tij, peb tso siab lug tias peb muaj ib txog kev mus tau txog hauv chav tsev Ntshiab, vim Yes Xus cov ntshav. 20 Yes Xus rhawv ib txoj kev tshiab, ib lub qhov rooj muaj sia nyob ntawm daim ntaub thaiv uas yog nws lub cev rau peb. 21 Li ntawd peb muaj ib tug Leej Choj loj tas nrho saib Tswv Ntuj chav tsev ntshiab. 22 Ua li mas thaum peb nkag mus hauv, peb yuav tsum coj ib lub siab ncaj thiab ntseeg ruaj, ib lub siab huv tsis tsuas kev phem, thiab ib lub cev ntxuav huv si hauv dej ntshiab mus. 23 Peb kav tsij nyob ruaj nreb hauv txoj kev tso siab uas peb tshaj tawm, vim tus tau cog lus rau peb, nws tsis dag. 24 Peb yuav muab siab rau sib pab, yuav sib txhib kom sib nyiam thiab ua tej yam zoo. 25 Nej tsis txhob ncua tsis mus koom nej lub txoos teev ntuj, xws li tej tus pheej ua, tiam sis nej yuav tsum sib txhawb sib pab kom nquag mus, vim yog nej yim pom tias Tswv Ntuj lub Hnub Nyoog los txog ze lawm mas nej yim yuav sib pab sib txhawb.

NPN 24:1-2, 3-4AB, 5-6

Txais: (6) HUAB TAIS, ntawm no yog haiv neeg uas nsthaw pom koj lub ntsej muag.

Lub ntiaj teb thiab puas tsav yam nyob hauv yog HUAB TAIS li,
nws tug, lub sim ceeb thiab cov nyob hauv.
Vim nws yog tus tau tsim lub ntiaj teb los txawb rau saum cov hiav txwv
thiab muab tso rau saum cov dej ntws.

Txais: (6) HUAB TAIS, ntawm no yog haiv neeg uas nsthaw pom koj lub ntsej muag.

Leej twg thiaj yuav nce tau saum HUAB TAIS lub roob?
Los leej twg thiaj yuav mus sawv taus nyob hauv nws thaj chaw ntshiab?
Yog tus uas txhais tes tsis muaj txhaum, lub siab dawb huv,
tus uas tsis ntshaw tej yam tsis muaj qab hau.

Txais: (6) HUAB TAIS, ntawm no yog haiv neeg uas nsthaw pom koj lub ntsej muag.

HUAB TAIS yuav foom koob hmoov rau nws. ,
yog paj tshab tuaj ntawm Tswv Ntuj tus cawm nws tuaj.
Lawv yuav zoo li no, tsav neeg uas nrhiav Tswv Ntuj,
cov uas nrhiav Yas Kos tus Tswv Ntuj lub ntsej muag.

Txais: (6) HUAB TAIS, ntawm no yog haiv neeg uas nsthaw pom koj lub ntsej muag.

As Les Lus Yas NPN 119:105

Txais: As les lus yas, as les lus yas.

Koj lo lus yog lub teeb rau kuv ko taw,
yog qhov pom kev kaj kuv txoj hau kev.

Txais: As les lus yas, as les lus yas.

Ntawv Moo Zoo MK 4:21-25

21 Yes Xus hais rau lawv tias : "Thaum yus taws ib lub teeb nqa los, yus puas muab txawb hauv qab pob tawb los hauv qab txag, es tsis muab txawb saum tus ncej teeb li? 22 Vim tsis muaj ib yam zais ntshis cia, uas yuav tsis tshwm rau luag pom, tsis muaj ib yam npog rawv uas yuav tsis tawm los rau luag paub. 23 Leej twg muaj pob ntseg mloog, mas cia nws mloog !" 24 Ces Yes Xus hais rau lawv tias : “Nej ceev faj txog tej yam uas nej hnov ! Ntuj yuav xuas lub tawb uas nej luj rov los luj rau nej, thiab Ntuj tseem yuav ntxiv rau nej. 25 Vim tias tus uas twb muaj lawm, Ntuj yuav pub ntxiv rau nws, hos tus tsis muaj, mas Ntuj tseem yuav rho qhov nws muaj mus.”

[TIM 30LUB 1 HLIS   2015

Hnub Rau Lis Piam Peb Nruab Xyoo B

Zaj Nyeem Ib   HEB 10:32-39

32 Nej nco ntsoov txog yav dhau los thaum nej nyuam qhuav txais txoj kev pom kev, thaum ntawd, nej tau ua siab ntev ris txoj kev sim siab nyob hauv ntau hom kev txom nyem. 33 Nej kiag tau raug luag tsawm thiab luag hiam, los nej tau nrog lwm cov neeg raug tej ntawd ua ke. 34 Nej tsis yog tau nrog cov nyob hauv tsev loj faj raug txom nyem xwb, nej tseem zoo siab raug luag tuaj lwg nej tej cuab yeej cuab tam, vim nej paub tias nej muaj ib lub cuab tam zoo tshaj thiab yuav nyob mus li. 35 Ua li mas nej yuav tsis txhob ntaus siab me kiag li, vim nej yuav tau txais paj tshab loj. 36 Nej yuav tsum ua siab ntev nyiaj ntxiv, mas nej thiaj ua tau raws li Tswv Ntuj lub siab nyiam, ces nej yuav tau txais raws li Tswv Ntuj tau cog lus. 37 “Vim tias tshuav tsis ntev lawm, yeej tshuav tsis ntev li lawm, ces tus yuav tuaj, nws yuav tuaj txog, nws yuav tsis ncua ntev. 38 Kuv tus neeg siab ncaj yuav ua neej muaj kev ntseeg. Tab sis yog nws ntxeev siab mas kuv lub siab yuav tsis nyiam nws.” 39 Ntawm peb mas peb tsis yog cov neeg thim xav thiab mus taug kev ploj; peb yog cov neeg uas ntseeg ruaj mus taug txoj kev cawm peb tus ntsuj plig.

NPN   37:3-4, 5-6, 23-24, 39-40

Txais:   (39a) Txoj kev cawm tus neeg ncaj tuaj ntawm HUAB TAIS tuaj.  

Nej tso siab rau HUAB TAIS thiab ua qhov zoo,
ces nej yuav tau nyob hauv lub teb chaws thiab muaj noj nrog kev tso siab.
Nej zoo siab nyob hauv HUAB TAIS,
ces nws yuav peb rau nej raws nej lub siab ntshaw.

Txais:   (39a) Txoj kev cawm tus neeg ncaj tuaj ntawm HUAB TAIS tuaj.

Muab nej txoj kev taug tso rau HUAB TAIS ua tus saib;
nej tso siab rau nws ces nws yuav pab. .
Nws yuav ua kom txoj kev ncaj ncees sawv tuaj ziab nej li qhov pom kev;
ces nej txoj kev yeej yuav ci npaum thaum tav su nrig.

Txais:   (39a) Txoj kev cawm tus neeg ncaj tuaj ntawm HUAB TAIS tuaj.

HUAB TAIS ua kom ib tug neeg tshais ruam muaj zog,
thiab HUAB TAIS pom zoo txoj kev nws taug.
Txawm nws ntog, nws yuav tsis pw nthi,
vim HUAB TAIS txhais tes txheem nws.

Txais:   (39a) Txoj kev cawm tus neeg ncaj tuaj ntawm HUAB TAIS tuaj.

Txoj kev cawm tus neeg ncaj tuaj ntawm HUAB TAIS tuaj,
nws yog lawv lub chaw nkaum thaum lawv ntsib kev nyuaj.
HUAB TAIS pab lawv thiab tso lawv dim,
nws tso lawv dim ntawm tus phem thiab cawm lawv,
vim lawv tuaj nkaum hauv nws.    

Txais:   (39a) Txoj kev cawm tus neeg ncaj tuaj ntawm HUAB TAIS tuaj.

As Les Lus Yas    MT 11:25

Txais:  As les lus yas, as les lus yas.

Peb cav txog koj, Leej Txiv, tus Huab Tais kav lub ntuj lub teb,      
koj tau qhia tej yam tob txog Ntuj Ceeb Tsheej rau cov neeg me paub.

Txais:  As les lus yas, as les lus yas.

Ntawv Moo Zoo     MK 4:26-34

26 Yes Xus hais tias : Tswv Ntuj lub Ceeb Tsheej zoo xws li ib tug neeg pov ib co noob rau nruab a : 27 Nws txawm pw los nws sawv, hmo ntuj los nruab hnub, lub noob tuaj kaus thiab hlob, nws tsis paub tias lub noob hlob zoo li cas. 28 Av xwb tim txawj xeeb kom hloov : xub ua yub tas, ua plab nab, ces nplej txhawv puv hnab. 29 Thaum nplej siav, tus neeg ntawd xuas liag hlais tam sis ntawd, vim qoob siav lawm.  30 Yes Xus tseem hais tias : "Peb yuav muab Tswv Ntuj lub Ceeb Tsheej piv rau dab tsi ? Thiab peb yuav ua paj lug qhia txog Tswv Ntuj lub Ceeb Tsheej zoo li cas ?  31 Tswv Ntuj lub Ceeb Tsheej yog zoo li ib lub noob zaub roj, uas thaum luag muab tseb rau hauv av, mas lub noob ntawd me tshaj lwm cov noob nyob ntiaj teb no. 32 Tab sis thaum tseb tas lawd, lub noob hlob, nws siab dua lwm cov zaub huv si ; nws ncau ceg deb, ces tej noog ya saum ntuj tau kev los nkaum hauv nws qhov ntxoov."  33 Yes Xus siv ntau hom paj lug zoo li no los qhia Lo Lus rau lawv, raws li lawv mloog tau. 34 Tsis muaj ib yam uas nws tsis ua paj lug hais. Thaum tshuav cov thwj tim nrog nws nyob xwb, nws txhais txhua yam huv tib si rau lawv.

TIM 31 LUB 1 HLIS  2015

Hnub Xya Lis Piam Peb Nruab Xyoo B

Hwm LN Zam Bosco, ua Leej Choj



Zaj Nyeem Ib  HN 11:1-2, 8-19

1 Txoj kev ntseeg yog txoj kev zeem tau meej tias peb yuav txais yam uas peb cia siab tos. Kev ntseeg ua puav pheej tias yam uas peb tsis pom, yeej muaj tseeb tiag. 2 Yog txoj kev ntseeg ua kom cov poj yawm txwv koob nto moo zoo.
8 Yog vim Has Nplas Has ntseeg, mas nws thiaj mloog Ntuj hu nws kom sawv kev mus ib lub teb chaws uas nws yuav txais los ua nws lub cuab tam. Ces nws sawv kev, nws tsis paub tias nws yuav mus txog qhov twg. 9 Yog vim Has Nplas Has ntseeg, mas nws thiaj tsiv mus nyob hauv thaj av uas yog pej kum neeg av, yog thaj av uas Ntuj cog lus tias yuav pub rau nws. Has Nplas Has ua neej nyob hauv tsev tsam phooj xws li Is Xas Has thiab Yas Kos. Nkawd nrog Has Nplas Has txais Tswv Ntuj lo lus cog. 10 Has Nplas Has tos txog lub tsheej muaj taw ntsa uas Tswv Ntuj yuav txhim thiab yuav tsa. 11 Yog vim Xas Las ntseeg, mas tab nws txawm laus heev lawm, nws muaj peev xwm xeeb tub. Xas Las ntseeg tias tus tau cog lus rau nws, yuav tsis fav xeeb. 12 Vim li ntawd, tus neeg uas twb yuav txog nws lub caij tuag tseem yug tau ib co xeeb ntxwv coob npaum li cov hnub qub nyob saum ntuj thiab cov suab zeb nyob ntawm ntug hiav txwv uas suav tsis txheeb. 13 Cov neeg ntawd, thaum lawv tuag, lawv tseem tsis tau txais txhua yam uas Tswv Ntuj cog lus tias nws yuav pub. Tab sis yog vim lawv ntseeg, mas lawv nyob deb pom thiab tshua txog txhua yam ntawd, thiab lawv zeem tseeb tias lawv tsuas yog ib co pej kum neeg tuaj hla lub ntiaj teb no xwb. 14 Lawv qhia li no kom pom tias lawv nrhiav ib lub teb chaws nyob. 15 Yog lawv nco txog lub teb chaws uas lawv yug los, mas lawv tseem muaj caij rov mus nyob lawv qub teb qub chaw. 16 Tab sis lawv tos txog ib lub teb chaws zoo dua, yog lub nyob saum ntuj. Vim li ntawd Tswv Ntuj tsis txaj muag cia lawv hu nws ua lawv tus Tswv Ntuj, ces nws npaj ib lub tsheej rau lawv tiag. 17 Yog vim Has Nplas Has ntseeg, mas thaum Tswv Ntuj sim nws, nws cia li muab Is Xas Has txi rau Ntuj, txawm tias Is Xas Has yog nws tib leeg tub twm zeej. 18 Is Xa Has twb yog tus yuav txais tej yam uas Tswv Ntuj cog lus tias yuav pub. Tswv Ntuj twb hais txog Is Xas Has tias : ‘koj yuav muaj ib co xeeb ntxwv tawm ntawm Is Xas Has.’ 19 Has Nplas Has xav tias Tswv Ntuj tsa tau cov neeg tuag kom ciaj rov los. Ces Has Nplas Has rov qab tau nws tus tub. Zaj hais txog Is Xas Has no yog ib zag paj lug.

NPN   LK 1: 69-70, 71-72, 73-75

Txais:  (68) Peb cav txog Huab Tais, His Xas Lais tus Tswv Ntuj; nws tuaj txog nws haiv neeg lawm.    

Nws tau tsa ib tug cawm seej muaj hwj huam rau peb,
yug  ntawm nws tus tub txib Das Vis tsev neeg los.

Txais:  (68) Peb cav txog Huab Tais, His Xas Lais tus Tswv Ntuj; nws tuaj txog nws haiv neeg lawm..

Txheej thaum ub, nws siv cov yaj saub nrog peb cog lus
tias nws yuav cawm peb ntawm peb cov txhaum,
ntawm cov uas ntxub peb txhais tes.
Nws tau cog lus tias yuav khuv leej peb cov yawg koob
thiab nws yuav nco ntsoov nws lo lus.

Txais:  (68) Peb cav txog Huab Tais, His Xas Lais tus Tswv Ntuj; nws tuaj txog nws haiv neeg lawm..

Raws li Tswv Ntuj tau nrog peb yawg koob Has Nplas Has cog lus:  
Nws yuav tso peb dim ntawm yeeb ncuab cov hlua khi peb,        
yuav muab kev twj lij rau peb tau kev teev hawm nws tsis muaj kev ntshai,
tau kev ua neeg ntshiab neeg ncaj ncees raws li nws nyiam
Niaj hnub hauv  peb lub neej.  

Txais:  (68) Peb cav txog Huab Tais, His Xas Lais tus Tswv Ntuj; nws tuaj txog nws haiv neeg lawm.

As Les Lus Yas   JN 3:16

Txais:  As les lus yas, as les lus yas.

Tswv Ntuj hlub lub ntiaj teb npaum li ntawd, nws thiaj tso nws tib leeg Tub los
kom leej twg ntseeg nws, tus ntawd yuav tau txoj siab nyob mus li.

Txais:  As les lus yas, as les lus yas.

Ntawv Moo Zoo   MK 4:35-41

35 Hnub ntawd, thaum tsaus ntuj zuag, Yes Xus hais rau lawv tias : "Peb hla mus sab ntug dej tid." 36 Ces lawv tso tsoom sid tseg. Lawv coj Yes Xus mus, nws cia li mus zoo li ntawd rau hauv nkoj. Muaj ib co nkoj nrog nws mus thiab. 37 Muaj ib nthwv khaub zeeg cua loj kawg sawv tuaj. Dej nphau nphwv los rau hauv nkoj, ces lub nkoj twb puv dej tas lawm. 38 Yes Xus nyob tom tw nkoj, nws tsaug zog saum lub hauv ncoo. Lawv tsa Yes Xus, lawv hais rau nws tias : "Xib Hwb, peb yuav tuag, koj tsis quav ntsej lod ?" 39 Yes Xus tsim dheev, nws txwv cua, nws hais rau dej ntuj tias : "Tswm seeb ! Koj nyob twj ywm !" Ces cua tu nrho, dej ntuj rov tus yees. 40 Yes Xus hais rau lawv tias : "Ua cas nej ntshai ua luaj ? Nej tseem tsis tau ntseeg lod ?" 41 Lawv ntshai kawg, lawv sib tham hais tias : "Tus ntawd yog leej twg ? Txawm tias yog cua thiab dej ntuj los yeej mloog nws lus ?"

TIM  2  LUB  2  HLIS   2015

Nco txog Niam Mab Liab thiab Yos Xes coj Yes Xus mus fij rau Ntuj


Zaj Nyeem Ib:    MAS LAS KIS  3:1-4

1 Kuv yuav xa kuv tus tub tshaj xov mus tho kev ua kuv ntej. Ib sij huam, tus Huab Tais uas nej nrhiav nws yuav chaws los hauv nws kem tsev ntshiab. Tus tub tshaj xo tuav lo lus tau cog, tus uas nej nrhiav nws tuaj txog ntawd lawm ! Tsoom peeb zeej tus HUAB TAIS hais li ntawd : 2 Hnub nws tuaj txog, leej twg yuav nyob taus ? Thaum nws yuav tawm tuaj leej twg yuav sawv taus ntsug tos nws ? Vim nws yuav zoo li tus nchuav hlau cov hluav taws, zoo li tshuaj ntxhua khaub ncaws dawb. 3 Nws yuav tuaj zaum nchuav nyiaj kom huv, nws yuav ua kom Les Vis cov tub huv tuaj; nws yuav nchuav lawv ib yam li nchuav kub thiab nchuav nyiaj, kom lawv yog cov cev thaj txi Ntuj raws kev ncaj. 4 Ces HUAB TAIS yuav zoo siab txais Yus Das thiab Yes Lus Xas Les thaj txi Ntuj,  ib yam li yav thaum ub lub caij uas dhau tas los lawm .

NPN    24:7, 8, 9, 10

Txais:   ( Leej twg yog tus vaj muaj koob meej?  HUAB TAIS yog tus muaj koob meej!

Cov rooj vag, nej tsa nej daim txiag puab saum qhov rooj kom siab,
cov qhov rooj laus, nej tshoom kom siab ntxiv,  
kom tus vaj muaj koob meej tau kev nkag los!  

Txais:   ( Leej twg yog tus vaj muaj koob meej?  HUAB TAIS yog tus muaj koob meej!

Leej twg yog tus vaj muaj koob meej?
Yog tus HUAB TAIS muaj zog, muaj peev xwm,
tus HUAB TAIS muaj peev xwm yeej tsam rog.

Txais:   ( Leej twg yog tus vaj muaj koob meej?  HUAB TAIS yog tus muaj koob meej!

Cov rooj vag, nej tsa nej daim txiag puab saum qhov rooj kom siab,
cov qhov rooj laus, nej tshoom kom siab ntxiv,  
kom tus vaj muaj koob meej tau kev nkag los!

Txais:   ( Leej twg yog tus vaj muaj koob meej?  HUAB TAIS yog tus muaj koob meej!

Tus vaj muaj koob meej ntawd yog leej twg?
Tuas HUAB TAIS kav tsoom peeb zeej, nws yog tus vaj muaj koob meej.

Txais:   ( Leej twg yog tus vaj muaj koob meej?  HUAB TAIS yog tus muaj koob meej!

Zaj Nyeem Ob    HEB 2:14-18

14 Vim cov me nyuam koom ib co ntshav, ib ce nqaij, mas Yes Xus kuj nrog lawv koom, kom nws txoj kev tuag yeej tus tuav txoj kev tuag lub hwj huam, tus ntawd yog tus dab phem Xas Tas. 15 Yes Xus npo cov uas mag kev tuag muab lawv ua qhev nyob hauv txoj kev ntshai tuag tas ib sim neej. 16 Yes Xus tsis tuaj cawm cov Tshiab. Nws tuaj cawm Has Nplas Has tsoom xeeb ntxwv. 17 Vim li no, nws thiaj yuav tsum yug los zoo ib yam li nws cov kwv, nws thiaj ua tau ib tug Leej Choj uas ib txhij khuv leej neeg thiab npuab Tswv Ntuj. Nws so tsoom pej xeem cov txhaum pov tseg. 18 Vim nws tau raug kev sim siab, mas nws thiaj txawj pab cov raug kev sim siab.

As Les Lus Yas   LK 2:32

Txais:  As les lus yas, as les lus yas. lleluia, alleluia.

Ib qho pom klev tawm tuaj kaj cov pej kum haiv neeg
thiab lub koob meej rau koj haiv His Xas Lais.

Txais:  As les lus yas, as les lus yas.

Ntawv Moo Zoo   LK 2:22-40

22 Thaum txog lub caij yuav ua kab ke ntxuav ob niam tub raws li Mais Xes Txoj Cai, Mab Liab thiab Yos Xes nkawd coj Yes Xus mus pem Yes Lus Xas Les, kom tau cev tus me nyuam rau Huab Tais. 23 Vim Huab Tais Txoj Cai sau tias : "Txhua tus me nyuam tub xub yug, yuav muab qee rau Huab Tais." 24 Nkawd tseem yuav cev ib co txim rau Ntuj raws li Huab Tais Txoj Cai uas sau cia tias : muab ib nkawg nquab lwb rwg, los ob tug thav nquab dawb. 25 Thaum ntawd nyob Yes Lus Xas Les, muaj ib tug txiv neej hu ua Xis Mes Oos. Tus neeg ntawd yog neeg ncaj thiab nyiam teev Ntuj. Nws tos tus yuav tuaj nplij His Xas Lais. Leej Ntuj Plig Ntshiab nyob roos nws. 26 Leej Ntuj Plig Ntshiab tshoj nws ces nws paub tias yog nws tsis tau pom Huab Tais tus Pleev, mas nws yuav tsis tuag. 27 Leej Ntuj Plig coj nws tuaj nyob hauv lub Tuam Tsev Teev Ntuj. Thaum Mab Liab thiab Yos Xes nkawd coj tus me nyuam mos Yes Xus tuaj ua cov kab ke raws Txoj Cai, 28 Xis Mes Oos txais tus me nyuam los rau hauv nws ob txhais npab, nws cav lus zoo txog Tswv Ntuj tias : 29 Tus Tswv, nyem no koj tso koj tus tub txib mus kaj lug, raws li koj lo lus, 30 vim kuv qhov muag tau pom koj txoj kev cawm neeg, 31 uas koj npaj nyob ntawm ib tsoom haiv neeg xub ntiag, 32 yog qhov pom kev tawm tuaj kaj cov pej kum haiv neeg, yog koj tsoom pej xeem His Xas Lais lub koob meej. 33 Yes Xus niam thiab txiv qhuas cov lus nkawd hnov hais txog tus me nyuam. 34 Xis Mes Oos foom hmoov zoo rau lawv, nws hais rau Mab Liab, Yes Xus niam tias : "Koj yuav pom , Tus me nyuam no yuav ua chaw rau ntau leej His Xas Lais ntog thiab ntau leej rov sawv. Nws yog ib lub cim ua kom sawv daws sib cav. 35 Hos ntawm koj, mas ib rab ntaj yuav hno koj tus plig, kom xwv tej lus uas coob leej xav tuaj nruab siab tawm los rau sawv daws paub.
36 Tseem muaj ib tug yaj saub poj niam, hu ua As Nas, yog Fas Nus Ees tus ntxhais, xeem As Ntxes. Nws lub hnub nyoog laus kawg. Dhau lub caij nws nyob ua nkauj xwb lawm, mas nws nrog nws tus txiv nyob xya xyoo, 37 ces nws ua poj ntsuam laus li ntawd txog yim caum plaub xyoos. Nws tsis nrug ntawm lub Tuam Tsev Teev Ntuj li. Nws yoo mov thiab hais cov zaj teev Ntuj los hawm Tswv Ntuj thawm hnub thawm hmo. 38 Tib lub sij hawm ntawd, Lus Kas, Zaj 2 609 As Nas kuj tuaj nyob ntawd thiab, nws cav lus zoo txog Tswv Ntuj, nws hais txog tus me nyuam rau txhia leej txhia tus uas tos txog txoj kev txhiv Yes Lus Xas Les. 39 Thaum lawv ua txhua yam raws li Huab Tais Txoj Cai tas lawm, lawv rov mus Nkas Lis Lais, hauv lawv lub nroog Nas Xas Les. 40 Hos ntawm tus me nyuam, nws hlob, nws muaj zog zuj zus, kev thoob tsib puv nws siab ntsws. Tswv Ntuj lub txiaj ntsim nyob saum nws.

TIM  3 LUB 2 HLIS  2015

Hnub Peb Lis Piam Plaub Nruab Xyoo B

Zaj Nyeem Ib:  HES NPLAWS 12:1-4

1 Li ntawd vim muaj ib co tim khawv coob nyob zoo li ib tauv huab ncig peb, mas peb kuj yuav muab txhua lub nra uas nias peb thiab tej kev txhaum uas lo rawv peb xyeeb hlo pov tseg, peb kav tsij peem khiav tas zog mus raws txoj kev uas nyob ntawm peb hauv ntej. 2 Peb yuav ntsia ntsoov Yes Xus uas yog tus ntaus thawj coj peb hauv txoj kev ntseeg thiab  pab peb ntseeg kom tom thawj. Vim nws paub tias yuav muaj kev zoo siab nyob tom ntej, mas Yes Xus tuaj yeem nyiaj txoj kev txom nyem saum ntoo cuam, tsis quav ntsej txog txoj kev raug txaj muag, ces nws tau mus zaum saum Tswv Ntuj lub theej kiab ntawm nws sab xis lawm.   3 Nej nco ntsoov tias Yes Xus tau nyiaj dhau cov neeg txhaum txoj kev tiv nws, nej thiaj yuav tsis ntaus siab me tsis qaug zog.  4 Nyob hauv nej txoj kev tawm tsam kev txhaum, nej tseem tsis tau siv zog tiag tiv kom txog thaum nej nqaij ntuag ntshav nrog.

NPN    22 : 26B-27, 28 + 30, 31-32

Txais:   (27b) Huab Tais, cov uas nrhiav koj lawv yuav cav txog koj.      

Kuv yuav pauj lub yeem nyob ntawm cov neeg hwm Huab Tais xub ntiag.
Tus neeg me yuav tau noj seem noj so; The lowly shall eat their fill;
cov uas nrhiav HUAB TAIS yuav cav txog nws: they who seek the LORD shall praise him:
“Thov kom nej lub siab muaj kev lom zem xauv npo!”

Txais:   (27b) Huab Tais, cov uas nrhiav koj lawv yuav cav txog koj.

Tas cov npoo ntiaj teb yuav rov nco txog HUAB TAIS thiab tig lawv lub siab mus rau nws.
Tas cov tsev neeg hauv cov haiv neeg yuav khoov pe hawm nws.
Tas cov neeg uas mus pw tsaug nyob hauv av lawm yuav khoov pe hawm nws ib leeg.  
Tas cov neeg uas mus nyob hauv cov plua tshauv yuav khoov pe hawm nws

Txais:   (27b) Huab Tais, cov uas nrhiav koj lawv yuav cav txog koj.

Kuv tus plig yuav ciaj sia nyob hauv HUAB TAIS;
kuv cov xeeb leej xeeb ntxwv yuav tsob hwb nws.
Peb yuav tsum qhia rau tiam neeg yuav tuaj txog HUAB TAIS  
ces lawv thiaj yuav tshaj tawm rau ib haiv neeg uas tseem tsis tau yug los
paub txog nws txoj kev cawm neeg ncaj ncees.

Txais:   (27b) Huab Tais, cov uas nrhiav koj lawv yuav cav txog koj.

As Les Lus Yas    MT 8:17

Txais:  As les lus yas, as les lus yas.

Leej Pleev tshem peb tej kev ceg tawv mus
thiab nws cug nrob qaum ris peb tej kev mob kev ntsaj.

Txais:  As les lus yas, as les lus yas.

Ntawv Moo Zoo   MK 5:21-43

21 Thaum Yes Xus caij nkoj rov los txog sab ntug dej tim no, ib pab neeg coob tuaj sib sau ntsauv nws. Thaum ntawd, Yes Xus tseem nyob ntawm ntug dej ntuj. 22 Muaj ib tug hauv cov tswj tsev txoos hu ua Yais Los tuaj txog. Thaum nws pom dheev Yes Xus, nws txhos caug ntua ntawm Yes Xus ko taw. 23 Nws thov Yes Xus tias :  "Kuv tus me ntxhais txoj sia yuav tu, thov koj tuaj tsa tes cawm nws kom nws ciaj." 24 Yes Xus nrog Yais Los mus. Ib pab neeg coob raws Yes Xus mus thiab, lawv sawv daws txiv Yes Xus. 25 Muaj ib tug poj niam tsob ntshav tau kaum ob xyoos los lawm. 26 Ntau tus kws tshuaj tau ua kom nws txom nyem kawg. Nws siv tas nws lub cuab tam los kho tsis tau nws zoo. Nws mob heev zuj zus ntxiv. 27 Nws hnov luag hais txog Yes Xus, ces nws nrog tsoom sid sib txiv tom Yes Xus nraub qaum. Nws kov Yes Xus lub tsho. 28 Vim nws xav hauv siab tias : "Tsuav yog kuv tau kov nws lub tsho xwb, mas kuv yeej yuav dim." 29 Ces tam sis ntawd, nws qhov tsob ntshav tu nrho, nws hnov nws lub cev zoo hlo ntawm tus mob. 30 Tam sim ntawd, Yes Xus kuj hnov ib lub zog tawm hauv nws mus ; ces Yes Xus tig los nug pab neeg ntawd tias : "Leej twg kov kuv lub tsho ?" 31 Cov thwj tim hais rau nws tias : "Koj ntsia saib, tas tsoom sid txiv koj txhua sab tuaj, koj tseem hais tias : "Leej twg kov kuv ?" 32 Yes Xus ntsia ib ncig kom pom tus neeg uas tau kov nws. 33 Ces tus poj niam ntshai, nws tshee tshee, vim nws paub qhov uas nyuam qhuav tshwm sim hauv nws. Nws los txhos caug ntawm Yes Xus taw thiab qhia qhov tseeb rau Yes Xus. 34 Yes Xus hais rau tus poj niam tias : “Phauj, koj lub siab ntseeg cawm koj lawm. Koj rov mus kaj siab lug, koj tus mob zoo lawm." 35 Thaum Yes Xus tseem tab tom hais lus, ib co neeg tuaj ntawm tus tswj tsev txoos lub tsev tuaj hais tias : “Koj tus ntxhais twb tuag lawm, koj tseem yuav txob Xib Hwb ua dab tsi ?” 36 Tab sis Yes Xus twb hnov lo lus lawv nyuam qhuav hais, nws hais rau tus tswj tsev txoos tias : "Koj txhob ntshai, tsuav koj ntseeg xwb." 37 Yes Xus tsis kheev leej twg nrog nws mus li. Nws tsuas cia Pob Zeb, Yas Kos thiab Yas Kos tus kwv Zam nrog nws mus xwb. 38 Lawv tuaj txog tus tswj tsev txoos lub tsev, Yes Xus pom sawv daws ua ntxhov hnyo : ib txhia quaj, ib txhia qw nrov nrov. 39 Yes Xus los hauv tsev, nws hais tias : "Ua cas sawv daws ua ntxhov hnyo thiab quaj zom zaws ? Tus me ntxhais tsis tuag, nws tsaug zog xwb." 40 Ces lawv luag Yes Xus. Tab sis Yes Xus ntiab sawv daws tawm mus nraum zoov, nws tsuas kheev tus me nyuam niam thiab txiv, thiab cov nrog nws tuaj, nyob xwb. Nws chaws mus hauv kem uas tus me nyuam nyob. 41 Yes Xus tuav tus me nyuam txhais tes, nws hais rau tus me nyuad tias : "Tas lis tas kus," txhais tias : "Me ntxhais, kuv hais koj, koj sawv !" 42 Tus me ntxhais sawv tsees tam sis ntawd, nws mus kev, vim nws twb muaj kaum ob xyoos lawm. Tam sim ntawd, sawv daws ntshai kawg. 43 Yes Xus txwv lawv heev kom txhob qhia leej twg paub. Ces nws kom lawv muab mov rau tus me ntxhais noj.

TIM  4 LUB 2 HLIS   2015

Hnub Plaub Lis Piam Plaub Nruab Xyoo I
(Yav tas los mas kuv tau tso “Nruab Xyoo B”, tiam sis txij zaum no mus kuv yuav tso kom yog. Nyob hauv Nruab Lis Piam, mas tsuas muaj Xyoo I thiab Xyoo II xwb, xyoo no yog Xyoo I. Nyob hauv Hnub Chiv mas thiaj li muaj Xyoo A, Xyoo B, los Xyoo C. Xyoo no hauv Hnub Chiv nas yog Xyoo B).

Zaj Nyeem Ib   HES NPLAWS 12:4-7, 11-15

Cov kwv tij, cov nkauj muam:
4  Nyob hauv txoj kev tawm tsam kev txhaum, nej tseem tsis tau siv zog tiag tiv kom txog thaum nej nqaij ntuag ntshav nrog. 5 Nej puas nco qab cov lus uas yog hais rau nej xws li hais rau ib co tub tias : “Me tub, koj txhob thuam Huab Tais lo lus cem lus qhuab; koj txhob npau taws, thaum nws cob qhia koj. 6 Vim tias tus uas Huab Tais nyiam mas Huab Tais cob qhia nws, thiab Huab Tais rau txim rau tus uas Huab Tais txais los ua nws tus tub.” 7 Kev raug txom nyem yog ib txog kev cob qhia nej. Tswv Ntuj cob nej xws li nws cov tub. Puas muaj ib tug tub twg uas nws txiv tsis cob qhia nws ?
11 Txoj kev cob qhia yeej tsis ua kom leej twg zoo siab thaum tam sis ntawd, tsuas muaj ua kom chim siab xwb. Tiam sis yav tom ntej, mas txoj kev cob qhia mam li yuav txi txiv muaj kev thaj yeeb thiab kev ncaj ncees rau hauv cov neeg uas tau raug kev cob qhia. 12 Ua li mas nej kav tsij rov tsa nej ob txhais tes uas tsaug leeg, rov sawv ntseg saum nej lub hauv caug uas tshee hnyo,  13 thiab nej ua kom tej kev nkhaus ncaj tuaj rau nej ob txhais taw, kom tus ceg tawv txhob lem ko taw, nws thiaj yuav zoo taus. 14 Nej yeej meem nrhiav kom tau nrog sawv daws nyob thaj yeeb, thiab nrhiav txoj kev ntshiab uas yog tus twg tsis muaj mas nws yuav pom tsis tau Tswv Ntuj. 15 Nej ceev faj kom txhob muaj ib tug twg tsis tau Tswv Ntuj lub txiaj ntsim nyob hauv nws thiab kom tsis txhob muaj ib tug cag iab hlav taus kaus tuaj tsim kev ntxhov thiab ua kom coob leej poob rau kev phem.

NPN   103:1-2, 13-14, 17-18A

Txais:   (17) THuab Tais yuav ua siab zoo tas mus li rau cov uas hwm nws.

Kuv tus ntsuj plig, koj cav txog HUAB TAIS;
Kuv tus kheej tas nrho, koj cav txog nws lub npe ntshiab.    
Kuv tus ntsuj plig, koj cav txog HUAB TAIS,
koj tsis txhob hnov qab nws tej paj tshab ib qho li.

Txais:   (17) THuab Tais yuav ua siab zoo tas mus li rau cov uas hwm nws.

Xws li leej txiv hlub nws cov mw nyuam,
ib yam li ntawd, HUAB TAIS hlub cov uas hwm nws.
Vim nws paub tias nws puab peb  los zoo li cas,
nws paub tias peb yog plua av.      

Txais:   (17) THuab Tais yuav ua siab zoo tas mus li rau cov uas hwm nws.

Tiam sis HUAB TAIS yuav ua siab zoo ib txhiab  
dhau ib txhis  rau cov uas hwm nws,
thiab nws yuav ua ncaj rau tiam me nyuam no cov me nyuam tib si
yog tias lawv coj nraim nws cov lus qhia.

Txais:   (17) THuab Tais yuav ua siab zoo tas mus li rau cov uas hwm nws.

As Les Lus Yas    Zam  10:27

Txais:   As les lus yas, as les lus yas.

Huab Tais hais tias, kuv cov yaj mloog kuv lub suab,      
kuv paub law,  thiab lawv caum kuv qab.    

Txais:   As les lus yas, as les lus yas.

Ntawv Moo Zoo   MK 6:1-6

1 Yes Xus tawm hauv qhov chaw ntawd mus, nws rov mus lub zos nws nyob hlob, cov thwj tim kuj nrog nws mus thiab. 2 Hnub Xas Npas Tos, Yes Xus qhia hauv tsev txoos. Muaj neeg  coob tuaj mloog, lawv hnov nws cov lus, lawv ceeb tas, lawv hais tias : "Nws tau tej ntawd qhov twg los ? Lub siab thoob tsib thiab cov hwj huam yees ntxwv loj uas nws ob txhais tes ua, yog leej twg pub rau nws? 3 Tus ntawd tsis yog tus kws ntoo, Mab Liab tus tub lod ? Nws tsis yog Yas Kos, Yos Xes, Yus Das thiab Xis Moos lawv kwv tij lod ? Hos nws cov muam, tsis yog cov nrog peb nyob ua ke lod ? Yes Xus ua lawv poob siab. 4 Ces Yes Xus hais rau lawv tias : "Ib tug Yaj Saub yeej raug luag hwm nws, tsuas yog nyob hauv lub zos nws hlob, hauv nws cov txheeb ze thiab nws tsev neeg, thiaj tsis muaj neeg xav hwm nws xwb." 5 Vim li ntawd, Yes Xus ua tsis tau ib yam hwj huam yees ntxwv nyob ntawd li, nws tsuas tsa tes rau tus puav tuag ceg los tuag tes kom zoo. 6 Nws xav tsis thoob txog qhov lawv tsis ntseeg nws.

TIM  5 LUB 2 HLIS  2015

Hnub Tsib Lis Piam Plaub Nruab Xyoo B

Hwm leej ntshiab As Nkas Tas, nkauj tsim txiaj tuag ua tim khawv.

Zaj Nyeem Ib  HES NPLAWS 12:18-19, 21-24

18 Nej tsis tau txav mus ze ib yam uas nej kov tau, xws li cov hluav taws kub kub, twv huab dub, qhov tsaus ntuj nti, thiab cua daj cua dub, 19 lub suab hom los tej suab hais lus nrov doog diaj. Cov thaum ub tau hnov, lawv thov kom txhob hais lus ntxiv rau lawv.
21 Tej yam lawv pom ntawd txaus ntshai tas nrho. Mais Xes kuj hais tias : “Kuv ntshai tshee na.” 22 Tab sis nej, mas nej tau txav los ze lub roob Xis Yoos, ze tus Tswv Ntuj muaj txoj sia lub tsheej Yes Lus Xas Les saum ntuj, ze txhiab vam tus Tshiab uas sib txoos ua ntees lom zem, 23 ze ib tsoom tub hlob uas muaj npe sau nyob saum ntuj, ze tus Tswv Ntuj txiav txim rau tas lub qab ntuj neeg, ze cov neeg ncaj cov plig uas Ntuj twb ua kom lawv zoo txhij zoo txhua tas. 24 Nej tau txav los ze Yes Xus uas yog tus sawv peb chaw cog lus tshiab, yog tus tsuag nws cov ntshav uas txawj hais lus zoo dua As Npes cov ntshav.

NPN   48:2-3AB, 3CD-4, 9, 10-11

Txais:  (10) Tswv Ntuj, peb nrhiav kom to taub koj txoj kev khuv leej nyob hau koj lub tuam tsev.

HUAB TAIS loj tas nrho, yeej tsim nyog peb cav txog nws
hauv Tswv Ntuj lub tsheej.
Nws lub roob ntshiab, uas zoo tshaj txhua lub roob,
yog txoj kev zoo siab rau tas ntiaj teb neeg.

Txais:  (10) Tswv Ntuj, peb nrhiav kom to taub koj txoj kev khuv leej nyob hau koj lub tuam tsev.

Roob Xis Yoos, thaj chaw loj nyob sab qaum teb,
tus tuam vaj lub tsheej,  
Tswv Ntuj nyob hauv lawv tej vaj tse,
nws qhia rau lawv paub tias nws yog lawv lub ntsa loog zeb.

Txais:  (10) Tswv Ntuj, peb nrhiav kom to taub koj txoj kev khuv leej nyob hau koj lub tuam tsev.

Ib yam li peb tau hnov, peb kuj tau pom li ntawd      
nyob hauv tus HUAB TAIS kav tsoom peeb zeej lub nroog,
nyob hauv peb tus Tswv Ntuj lub nroog;  
Tswv Ntuj ua kom nws nyob ruaj nreb mus li.  

Txais:  (10) Tswv Ntuj, peb nrhiav kom to taub koj txoj kev khuv leej nyob hau koj lub tuam tsev.

Tswv Ntuj, peb xav txog koj txoj kev hlub
nyob hauv koj lub tuam tsev.
Ib yam li koj lub npe, Tswv Ntuj, koj lub koob meej
ncha mus txog npoo ntiaj teb kawg.      
Txoj kev ncaj ncees nyob puv nkaus koj txhais tes xis.  

Txais:  (10) Tswv Ntuj, peb nrhiav kom to taub koj txoj kev khuv leej nyob hau koj lub tuam tsev.

As Les Lus Yas     MK 1:15

Txais:  As les lus yas, as les lus yas.

Tswv Ntuj lub Ceeb Tsheej nyob ze lawm;
nej cia li los lees txhaum thiab ntseeg txog lub Moo Zoo.

Txais:  As les lus yas, as les lus yas.

Ntawv Moo Zoo    MK 6:7-13

7 Yes Xus hu Pab Kaum Ob los cuag nws, ces nws xa lawv ua tej pab ob leeg mus. Nws pub hwj huam ntiab dab tsis huv rau lawv. 8 Yes Xus qhia lawv kom txhob nqa dab tsi taug kev li, tsuas nqa tib rab pas nrig xwb. Txhob ntim mov, txhob nqa hnab ruas, txhob ntim xim nyiaj rau hauv duav siv. 9 Nws hais tias : "Nej rau khau khiab xwb, txhob hnav ob lub tsho." 10 Yes Xus tseem hais rau lawv tias : "Nej chaws mus hauv lub tsev twg, nej yuav nyob hauv lub tsev ntawd mus txog hnub nej rov qab. 11 Yog qhov chaw twg tsis txais nej, thiab luag tsis mloog nej, nej tso qhov chaw ntawd tseg, nej nchos cov plua av lo nej qab xib taws pov tseg, cia ua tim khawv txiav txim rau lawv." 12 Cov thwj tim tawm mus, lawv tshaj kom tsoom sid tig los hloov siab tshiab. 13 Lawv ntiab ntau tus dab phem, thiab lawv muab roj pleev ntau leej tuag tes tuag taw, thiab kho ntau tus neeg mob zoo.

TIM 6 LUB 2 HLIS   2015

Thawj Hnub Rau Lis Piam Plaub Nruab Xyoo B

Nco txog leej ntshiab Paj Lug(Paul) Miki thiab lwm cov, tuag ua Tim Khawv.
Caw nej rov mus nyeem zaj piav lawv txoj kev tuag ua tim khawv:
https://hmongcatholique.forumdediscussions.com/t1049-nees-nkaum-rau-tus-leej-ntshiab-tim-khawv-zij-pees


Zaj Nyeem Ib   HES NPLAWS 13:1-8

1 Nej yuav nyob ruaj mus li hauv txoj kev sib hlub xws li ib pab kwv tij. 2 Nej nco ntsoov txog txoj kev txais qhua. Vim txoj kev txais qhua, mas cov neeg thaum ub thiaj tau txais tej tus Tshiab tuaj so hauv lawv tsev, lawv twb tsis paub tias yog Ntuj ib tug Tshiab. 3 Nej nco ntsoov txog cov neeg nyob hauv tsev loj faj, ib yam li yog nej nrog lawv kaw rau hauv tsev loj faj. Nej nco ntsoov txog cov raug luag hiam, vim nej yog tib lub cev. 4 Nej sawv daws yuav hwm lub neej ua txij ua nkawm, nej yuav txuag lub txaj ua txij ua nkawm tsis pub tsuas ib qho txhaum. Vim Tswv Ntuj yuav txiav txim rau cov ua dev ua npua, thiab cov zes luag txij luag nkawm. 5 Nej yuav coj tus yeeb yam tsis ntshaw nyiaj txiag, kom nej txhob qaug rau kev phem. Nej muaj li cas mas nej yuav txaus siab yuav li ntawd. Vim Tswv Ntuj hais tias : “Kuv yuav tsis ntiab koj, yuav tsis tso koj pov tseg.” 6 Ces peb thiaj muaj cuab kav hais tias : “Huab Tais yog kuv qhov chaw vam khom. Kuv tsis ntshai. Leej twg yuav ua tau dab tsi rau kuv ?” 7 Nej nco ntsoov txog nej cov thawj coj. Lawv tau tshaj Tswv Ntuj lo lus rau nej. Nej ntsia saib lawv lub neej mus tshwm rau qhov twg, ces nej yoog lawv txoj kev ntseeg mog ! 8 Yes Xus Pleev yog tus zoo li qub mus li : nws yog tus thaud, yog tus tam sim no, thiab yog tus yuav nyob mus li.

NPN   27:1, 3, 5, 8B-9ABC

Txais:   (1a) HUAB TAIS yog kuv qhov pom kev thiab yog kuv txoj kev cawm.  

HUAB TAIS yog kuv qhov pom kev thiab yog kuv txoj kev cawm,      
Kuv yuav ntshai leej twg?
HUAB TAIS yog kuv qhov chaw vam hauv kuv lub neej,
kuv yuav ntshai leej twg?

Txais:   (1a) HUAB TAIS yog kuv qhov pom kev thiab yog kuv txoj kev cawm.

Txawm muaj ib pab tub rog nyob ntawm kuv hauv ntej,
kuv lub siab yuav tsis ntshai,  
txawm muaj ib nthwv rog tuaj ntaus kuv
los kuv yuav tso siab lug.

Txais:   (1a) HUAB TAIS yog kuv qhov pom kev thiab yog kuv txoj kev cawm.

Vim txog hnub muaj kev kub ntxhov
nws yuav muab kuv nkaum rau hauv nws lub tsev,
Nws yuav muab kuv zais rau hauv nws lub tsev tsam phooj,
nws yuav muab kuv tso nyob siab rau saum ib lub tsua.    

Txais:   (1a) HUAB TAIS yog kuv qhov pom kev thiab yog kuv txoj kev cawm.

HUAB TAIS, kuv nrhiav kom tau nrog koj nyob.
Thov txhob muab koj lub ntsej muag zais ntawm kuv,
txhob npau taws txhob ntiab koj tus tub txib.
Koj yog tus pab kuv:  txhob cia kuv ncaim ntawm koj mus.    

Txais:   (1a) HUAB TAIS yog kuv qhov pom kev thiab yog kuv txoj kev cawm.

As Les Lus Yas   LK 8:15

Txais:  As Les Lus Yas, as les lus yas.

Lawv muaj hmoov zoo cov uas muaj ib lub siab dav coj raws lo lus
thiab lawv txi txiv ntsu vim lawv mob siab rau.    

Txais:  As Les Lus Yas, as les lus yas..

Ntawv Moo Zoo   MK 6:14-29

14 Tus vaj Hes Los hnov hais txog Yes Xus, vim Yes Xus lub npe nto moo loj, ces luag tej hais tias : "Zam Ntxuav Plig sawv hauv cov tuag rov qab los, vim li ntawd, cov hwj huam yees ntxwv thiaj tawm hauv nws tuaj." 15 Hos ib txhia hais tias : ‘Yog Es Lias.’ Lwm cov hais tias : ‘Yog ib tug yaj saub xws li tej yaj saub.’ 16 Tab sis Hes Los hnov hais txog Yes Xus, nws hais tias : "Yog tus Zam uas kuv tau txiav nws caj dab, nws sawv rov los lawm." 17 Yog tim Hes Los Dias Hes, mas Hes Los thiaj xa neeg mus ntes Zam thiab muab saw hlau khi Zam rau hauv tsev loj faj. Hes Los Dias yog Hes Los tij laug Fis Lis Pos tus poj niam, tab sis Hes Los yuav los ua nws poj niam. 18 Zam hais rau Hes Los tias : "Koj tsis muaj cai yuav koj tij laug tus poj niam." 19 Ces Hes Los Dias ntxub Zam tas siab tas ntsws. Nws xav muab Zam tua, tab sis nws tua tsis tau, 20 vim Hes Los ntshai Zam, thiab nws paub tias Zam yog ib tug neeg siab ncaj siab ntshiab, ces Hes Los txuag Zam. Thaum Hes Los hnov Zam hais lus, mas nws ntxhov siab kawg. Hes Los kuj nyiam mloog Zam thiab. 21 Muaj ib lub zoo sij hawm los txog, yog hnub tsuj xeeb Hes Los yug. Hes Los ua ib roog qav caw cov nom tswv hauv nws lub tuam tsev, cov thawj tub rog, thiab cov nom loj hauv xeev Nkas Lis Lais tuaj koom. 22 Thaum ntawd, Hes Los Dias tus ntxhais chaws los dhia seev cev. Nws dhia tau ntxim Hes Los thiab cov qhua koom rooj qav ntawd siab kawg. Ces tus vaj hais rau tus ntxhais tias : "Koj thov saib koj xav yuav dab tsi, kuv yuav muab rau koj." 23 Ces tus vaj cog lus rau tus ntxhais tias : "Koj thov yam twg, mas kuv yuav muab rau koj, tab yog ib nrab ntawm lub teb chaws kuv kav !" 24 Tus ntxhais tawm plaws mus nug nws niam tias : "Kuv yuav thov dab tsi ?" Leej niam hais tias : "Zam Ntxuav Plig lub taub hau." 25 Tam sim ntawd, tus ntxhais rov ntsuj los ntawm tus vaj, nws hais tias : "Kuv xav kom koj muab Zam Ntxuav Plig lub taub hau tso hauv ib lub phaj, cev rau kuv tam sim no." 26 Tus vaj tu siab kawg, tab sis vim nws tau cog lus thiab vim muaj cov qhua, nws thiaj tsis xav thim nws lo lus. 27 Ces tus vaj txib ib tug zov keeb tam sim ntawd, kom mus nqa Zam lub taub hau los. 28 Tus zov keeb mus txiav Zam caj dab hauv tsev loj faj, nws nqa Zam lub taub hau txawb hauv ib lub phaj los cev rau tus ntxhais. Tus ntxhais muab rau nws niam. 29 Zam cov thwj tim hnov li ntawd, lawv tuaj kwv Zam lub cev mus tso rau hauv ib lub ntxa.

******************************
Los puas xaiv cov zaj nram no uas yog Thaj Txi Ntuj hwm cov LN Tuag Ua Tim Khawv:

Zaj Nyeem Ib: NLT 2: 19-20

Cov kwv tij:
19 Vim Txoj Cai, mas kuv thiaj ploj ntawm Txoj Cai mus lawm, kom kuv ciaj nyob hauv Tswv Ntuj. Kuv tau nrog Leej Pleev dai ncuv saum ntoo cuam, 20 tsis kav kuv tseem ciaj sia nyob, vim tsis yog kuv hos yog Leej Pleev ciaj nyob hauv kuv lawm xwb. Tam sis no kuv tseem muaj txoj sia nyob hauv kuv lub cev nqaij, mas kuv ua lub neej nyob hauv txoj kev ntseeg txog Tswv Ntuj Leej Tub, uas nws nyiam kuv, thiab rov muab nws rau luag kom tau pab kuv.

NPN 126: 1BC-2AB, 2CD-3, 4-5, 6

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Thaum HUAB TAIS coj Xis Yoos cov neeg nyob txim rov los,
peb zoo li yog ib co neeg ua npau suav.
Peb lub ncauj muaj suab luag nqhua,
peb tus nplaig qw nkauj zoo siab.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Tej pej kum haiv neeg hais nroo ntws tias :
"HUAB TAIS ua tej yam loj tas nrho rau lawv !"
HUAB TAIS tau ua tej yam loj rau peb tiag,
peb zoo siab kawg nkaus.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

HUAB TAIS, thov koj sau peb cov neeg nyob txim rov qab los
zoo puav tam li dej sab siv huam nyob teb chaws suab puam.
Cov neeg tseb nplej ntxuag kua muag,
lawv yuav sau nplej ntxuag kev zoo siab.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Thaum mus, lawv quaj kua muag poob,
lawv ris cov seev noob mus,
thaum rov los, lawv qw suab zoo siab,
lawv ris cov res nplej tshiab los.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

As Les Lus yas: MT 28: 19a, 20b
.
Huab Tais hais tias: Nej mus, nej ua kom tas txhua haiv neeg los ua kuv thwj tim;
ntawm kuv mas kuv niaj hnub nrog nej nyob mus txog lub zim txwv kawg.

Ntawv Moo Zoo: MT 28: 16-20

16 Pab Kaum Ib leeg mus txog Nkas Lis Lais teb. Lawv mus saum lub roob uas Yes Xus teem rau lawv.
17 Lawv pom Yes Xus, lawv pe hawm; ib txhia tseem ua xyem xyav.
18 Yes Xus txav los ze lawv, nws hais cov lus no rau lawv : "Ntuj pub ib puas tsav yam hwj huam rau kuv nyob saum ntuj thiab nyob ntiaj teb no.
19 Nej mus, nej ua kom tas txhua haiv neeg los ua kuv thwj tim. Nej ua lub Cim Ntuav nej hu txog Leej Txiv thiab Leej Tub thiab Leej Ntuj Plig Ntshiab lub npe los ntxuav lawv.
20 Nej qhia kom lawv coj tas puas tsav yam uas kuv qhia rau nej. Ntawm kuv mas kuv niaj hnub nrog nej nyob mus txog thaum lub zim txwv kawg.”

TIM 7 LUB 2 HLIS 2015

Thawj Hnub Xya hauv lub hlis los Hnub Xya Lis Piam Plaub Nruab Xyoo I

Zaj Nyeem Ib HES NPLAWS 13:15-17, 20-21

15 Peb nrog Yes Xus cev ib thaj cav txiaj ntsim rau Tswv Ntuj txhua lub sij hawm : lub txiv uas txi ntawm peb lub ncauj yog tshaj Tswv Ntuj lub npe. 16 Hais txog kev ua dej num pab luag tej thiab kev koom cuab yeej cuab tam, mas nej yuav tsis txhob hnov qab ua, vim Tswv Ntuj nyiam tej txoj kev txi Ntuj zoo li ntawd. 17 Nej yuav mloog cov coj nej. Nej mloog lawv hais mog. Lawv saib nej tus plig, lawv yuav mus lees ntawm Ntuj tias lawv tau saib zoo li cas. Nej mloog lus kom lawv zoo siab coj nej, lawv thiaj tsis muaj chaw ntsaj chaw nroo : yog lawv nroo mas tsis muaj txiaj ntsim zoo los rau nej.
20 Thov kom tus Tswv Ntuj pub kev thaj yeeb, tus tau coj peb tus Huab Tais Yes Xus Pleev hauv cov tub tuag rov los, ua kom nej txawj leg txhua yam raws nraim nws lub siab xav. 21 Thov kom Tswv Ntuj tso Yes Xus uas yog tus Thawj Tswv Zov Yaj, thiab yog tus tau muab nws cov ntshav ua lub cim cog lus nyob ib txhiab ib txhis, tuaj ua cov hauj lwm ntxim Tswv Ntuj siab nyob hauv nej. Lub koob meej nyob txhiab tiam mus dhau fab lwm txheej yog Yes Xus Pleev tug. Ua li.

NPN 23:1-3A, 3B-4, 5, 6

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

HUAB TAIS yog tus tswv zov yaj saib kuv, kuv yuav tsis ntshaw dab tsi.
Nws coj kuv mus so nyob hauv tej tshav zaub mos ntsuab xiab.
Nws coj kuv mus tso nyob ze tej tus dej tus yees;
nws ua kom kuv tus ntsuj plig los siav.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

Nws coj kuv mus taug txoj kev ncaj vim nws lub npe.
Txawm kuv taug kev nyob hauv lub hav tsaus nti,
kuv tsis ntshai dab tsi phem, vim koj nyob rawv ntawm kuv ib sab
nrog koj rab pas nplawm thiab rab pas nrig, ua rau kuv muaj siab loj.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

Koj rau ib rooj mov rau ntawm kuv xub ntiag
rau kuv cov yeeb ncuab ntsia ntsoov.
Koj muab roj pleev kuv taub hau;
kuv lub khob puv phwj yaws.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

Tsuas muaj txoj kev ua siab zoo ua siab dawb caum cuag kuv
txhua txhia hnub hauv kuv lub neej xwb.
Kuv yuav tau nyob hauv HUAB TAIS tsev
ntev niaj ntau xyoo lawm tom ntej.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

As Les Lus Yas ZAM 10:27

Txais: As les lus yas, as les lus yas.

Huab Tais hais tias, kuv cov yaj mloog kuv lub suab;
kuv paub lawv, lawv lawv kuv qab.

Txais: As les lus yas, as les lus yas.

Ntawv Moo Zoo MK 6:30-34

30 Cov Hauv Paus Xa Lus los sib sau ncig Yes Xus, lawv piav tas puas tsav yam uas lawv tau ua thiab tau qhia. 31 Ces Yes Xus hais rau lawv tias : "Nej los rau ib qho chaw xu kev tsis muaj neeg, nej so me ntsis." Vim cov neeg tuaj thiab cov rov mus coob, ces cov Hauv Paus Xa Lus tsis xyeej noj mov. 32 Lawv thiaj caij nkoj mus rau ib qho chaw xu ke, tsis muaj neeg. 33 Tsoom sid pom cov Hauv Paus Xa Lus caij nkoj mus, coob leej twb mem tau lawm. Ces sawv daws khiav ko taw hauv cov nroog tuaj mus. Lawv xub mus txog chaw. 34 Thaum Yes Xus nqes nkoj, nws pom ib pab neeg coob coob, nws hlub lawv, vim lawv zoo li cov yaj uas tsis muaj tswv zov. Ces Yes Xus pib qhuab qhia lawv ntev loo txog ntau yam.

TIM 9 LUB 2 HLIS 2015

Hnub Ob Lis Piam Tsib Nruab Xyoo I

Zaj Nyeem Ib HP 1:1-19

1 Thaum chiv lub keeb, Tswv Ntuj tsim lub ntuj thiab lub ntiaj teb, 2 mas lub ntiaj teb tseem tsis tau tsheej ntiaj teb thiab tsis muaj dab tsi nyob hauv li. Qhov tsaus ntuj nti npog lub qhov ntuj dub nciab. Tswv Ntuj nthwv cua kiv nplawm ntws saum nplaim dej. 3 Tswv Ntuj hais tias : "Kom muaj qhov pom kev." Ces txawm muaj qhov pom kev tuaj. 4 Tswv Ntuj pom tias qhov pom kev ntawd zoo. Tswv Ntuj cais qhov pom kev ntawm qhov tsaus ntuj. 5 Tswv Ntuj hu qhov pom kev ua "nruab hnub" thiab hu qhov tsaus ntuj ua "hmo ntuj." Txawm muaj tsaus ntuj thiab muaj kaj ntug : yog thawj hnub.
6 Tswv Ntuj hais tias : "Kom muaj ib lub ntuj ntsuab nyob hauv nruab nrab cov dej thiab kom nws quas cov dej ntawm cov dej". Ces txawm muaj li ntawd tuaj. 7 Tswv Ntuj ua lub ntuj ntsuab los quas cov dej nyob hauv qab ntuj ntsuab ntawm cov dej nyob saum qaum ntuj ntsuab. 8 Tswv Ntuj hu lub ntuj ntsuab ua "ntuj." Txawm muaj tsaus ntuj thiab muaj kaj ntug : yog hnub ob.
9 Tswv Ntuj hais tias : "Kom cov dej uas nyob hauv qab lub ntuj ntsuab sib sau los ua ib pawg xwb, thiab kom av qhuav tshwm los." Ces txawm muaj li ntawd tuaj. 10 Tswv Ntuj hu cov av qhuav ua "ntiaj teb" thiab hu cov dej ua "hiav txwv." Tswv Ntuj pom tias qhov ntawd zoo. 11 Tswv Ntuj hais tias : "Kom lub ntiaj teb tuaj nroj tsuag ntsuab xiab : kom muaj nroj tsuag txawj muaj noob, thiab kom muaj ntoo txi txiv nyias txi nyias hom txiv, nyias muaj nyias hom noob." Ces txawm muaj li ntawd tuaj. 12 Ntiaj teb tuaj nroj tsuag ntsuab xiab : tej nroj tsuag nyias txawj txi nyias hom noob thiab tej ntoo nyias txawj txi nyias hom txiv, nyias muaj nyias hom noob. Tswv Ntuj pom hais tias qhov ntawd zoo. 13 Txawm muaj tsaus ntuj thiab muaj kaj ntug : yog hnub peb.
14 Tswv Ntuj hais tias : "Kom muaj tej lub ci ci nyob saum lub ntuj ntsuab saud, cais nruab hnub thiab hmo ntuj, thiab cia ua tej lub cim xam hnub xam nyoog thiab suav hnub suav xyoo, 15 kom tej lub ci ci nyob saum lub ntuj ntsuab ua kom ntiaj teb pom kev." Ces txawm muaj li ntawd tuaj. 16 Tswv Ntuj ua ob lub ci ci loj dua cov, lub ci ci loj yog lub kav nruab hnub, lub ci ci me yog lub kav hmo ntuj, thiab cov hnub qub. 17 Tswv Ntuj muab lawv txawb rau saum lub ntuj ntsuab saud kom ntiaj teb pom kev, 18 cia kav nruab hnub thiab hmo ntuj, thiab cia cais qhov pom kev ntawm qhov tsaus ntuj. Tswv Ntuj pom tias qhov ntawd zoo. 19 Txawm muaj tsaus ntuj thiab muaj kaj ntug : yog hnub plaub.

NPN 104:1-2A, 5-6, 10 + 12, 24 + 35C

Txais: (31b) Thov kom Huab Tais zoo siab rau nws cov hauj lwm.

Kuv tus ntsuj plig, koj cav txog HUAB TAIS!
HUAB TAIS kuv tus Tswv Ntuj, koj yeej loj tas nrho!
Koj cev ris tsho yog hwj chim thiab koob meej,
koj lub tsho tshaj sab yog qhov pom kev.

Txais: (31b) Thov kom Huab Tais zoo siab rau nws cov hauj lwm

Koj txhim lub ntiaj teb kom ruaj rau ntawm nws qhov chaw,
kom nws txav tsis tau mus ib sid li.
Koj muab lub hiav txwv ua zoo li ib daim tsoos tsho npog nws;
muaj dej tob siab tshaj tej ncov roob.

Txais: (31b) Thov kom Huab Tais zoo siab rau nws cov hauj lwm

Koj ua kom muaj dej txhawv ntws raws tej kwj ha
uas chev ncig tej toj roob.
Cov noog ya saum ntuj ua zes nyob rau ntawd,
lawv tsaws saum tej ceg ntoo quaj zoo mloog.

Txais: (31b) Thov kom Huab Tais zoo siab rau nws cov hauj lwm
HUAB TAIS, koj tej hauj lwm muaj ntau tsav ntau yam kawg li!
Koj txoj kev thoob tsib tsim txhua yam tas nrho;
lub ntiaj teb puv nkaus txhua yam koj tsim.
Kuv tus ntsuj plig, koj cav txog HUAB TAIS! As les lus yas.

Txais: (31b) Thov kom Huab Tais zoo siab rau nws cov hauj lwm.

As Les Lus Yas MT 4:23

Txais: As les lus yas, as les lus yas.

Yes Xus tshaj lub Moo Zoo txog lub Ceeb Tsheej
thiab nws kho txhua yam mob nyob hauv cov neeg.

Txais: As les lus yas, as les lus yas.

Ntawv Moo Zoo MK 6:53-56

53 Cov thwj tim hla dhau dej ntuj, lawv tuaj txog Nkes Nes Xas Les, lawv nqes nkoj. 54 Thaum lawv nqes plhuav nkoj, muaj neeg cim tau Yes Xus tam sis ntawd. 55 Cov neeg uas cim tau Yes Xus khiav thoob ib cheeb tsam ntawd, lawv mus kwv cov neeg muaj txiab nkeeg saum tej lub txaj lev tuaj rau Yes Xus. Lawv hnov luag hais tias Yes Xus nyob qhov twg, mas lawv kwv cov neeg mob tuaj rau ntawd. 56 Yes Xus mus txhua txhia qhov chaw, hauv cov zos, cov nroog, thiab cov tsev twj cuab, lawv coj neeg mob tuaj tso rau ntawm tej tshav puam, lawv thov Yes Xus kom nws cia lawv kov nws, tab yog kov nws tw tsho xwb kuj tau. Cov neeg uas tau kov Yes Xus puav leej dim ntawm lawv tus mob.

TIM 10 LUB 2 HLIS   2015

Hwm leej ntshiab Scholastica, Nkauj Tsim Txiaj (Virgin)

Zaj Nyeem Ib   HP 1:20—2:4A

20 Tswv Ntuj hais tias : "Kom muaj tej tsiaj muaj sia npau xi nyob hauv cov dej, thiab kom muaj noog ya saum npoo ntiaj teb, saum ib nta ntuj ntsuab." Ces txawm muaj li ntawd tuaj. 21 Tswv Ntuj tsim cov nab hiav txwv loj loj thiab tas puas tsav yam tsiaj muaj sia uas txawj ntab hauv dej, coob coob npau xi nyias muaj raws nyias hom, thiab tsim cov noog muaj tis, nyias muaj raws nyias hom. Tswv Ntuj pom tias qhov ntawd zoo. 22 Tswv Ntuj foom lus zoo rau lawv tias : "Nej yeej meem tsim noob, yeej meem huam vam mus nyob puv cov dej hauv hiav txwv, kom cov noog yeej meem huam vam mus puv ntiaj teb." 23 Txawm muaj tsaus ntuj thiab muaj kaj ntug : yog hnub tsib.
24 Tswv Ntuj hais tias : "Kom lub ntiaj teb txawj muaj tej yam tsiaj muaj sia, nyias muaj raws nyias hom : tsiaj nyeg, kab ntsaum, tsiaj qus, nyias muaj raws nyias hom." Ces txawm muaj li ntawd tuaj. 25 Tswv Ntuj ua tej tsiaj qus kom nyias muaj nyias hom, tej tsiaj nyeg kom nyias muaj nyias hom, thiab tas txhua yam kab ntsaum kom nyias muaj nyias hom. Tswv Ntuj pom tias qhov ntawd zoo. 26 Tswv Ntuj hais tias : "Peb yuav ua tib neeg raws li peb tus duab, kom zoo li peb me ntsis. Kom lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av. 27 Ces Tswv Ntuj tsim tib neeg raws li nws tus duab. Yog raws li Tswv Ntuj tus duab, mas nws thiaj tau tsim tib neeg. Nws tsim nkawd ua txiv neej thiab ua poj niam. 28 Tswv Ntuj foom lus zoo rau nkawd thiab hais rau nkawd tias : "Neb yeej meem tsim noob, yeej meem huam vam mus puv ntiaj teb thiab tswj ntiaj teb. Neb kav cov ntses nyob hauv hiav txwv, cov noog ya saum ntuj thiab tas puas tsav yam tsiaj uas nkag hauv av." 29 Tswv Ntuj hais tias : "Kuv muab tas puas tsav yam nroj tsuag muaj noob uas tuaj nyob saum npoo av, kuv muab tas puas tsav yam ntoo txi txiv thiab muaj noob rau neb : tej ntawd yuav yog neb tej txhiam laj txhiam xws. 30 Kuv muab tas txhua yam nroj ntsuab rau cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab rau lawv ua txhiam xws noj." Ces txawm muaj li ntawd tuaj. 31 Tswv Ntuj ntsia tas txhua yam nws tau ua : txhua yam ntawd zoo kawg. Txawm muaj tsaus ntuj thiab muaj kaj ntug : yog hnub rau.
2    1 Lub ntuj thiab lub ntiaj teb yog tsim los zoo li no, thiab tas txhua yam nyob rau hauv. 2 Tswv Ntuj ua nws txoj num tiav tas rau hnub xya. Ces hnub xya nws thiaj so, vim nws ua nws txoj num tiav tas. 3 Tswv Ntuj foom lus zoo rau hnub xya thiab muab hnub xya ua hnub ntshiab, vim nws ua nws txoj num tsim ntuj tsim teb tiav tas ces hnub ntawd nws so. 4a Zaj kwv huam piav txog lub ntuj thiab lub ntiaj teb, thaum ntuj tsim teb raug, mas yog zoo li saum no.

NPN   8:4-5, 6-7, 8-9

Txais:   (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

Thaum kuv ntsia  saum ntuj pom cov hauj lwm koj ob txhais tes tau tsim,
lub hli thiab cov hnub qub uas koj tau muab txawb rau lawv qhov chaw,
neeg yog dab tsi , koj thiaj quav ntsej txog nws?
Neeg tus tub yog dab tsi koj thiaj hlub txog nws?

Txais:   (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

Koj tau tsim nws nyob qis me ntsis coiv tshiab,
koj tau muab meej mom muab hwj chim rau nws ntoo.
Koj tau tsa nws ua tus kav txhua yam hauj lwm koj tshais tes tau tsim,  
muab txhua yam tso rau hauv nws qab xib taws:      

Txais:   (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

Tas nrho the yaj tej nyuj,
tej tsiaj nyob hauv nruab liaj nruab teb,
cov noog ya saum huab saum cua, cov ntses nyob hauv hiav txwv,  
thiab txhua yam ua luam dej taug raws cov hiav txwv.
Txais:   (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

As Les Lus yas  NPN 119:36, 29B

Txais:   As les lus yas, as les lus yas.

HUAB TAIS, thov koj rub kuv lub siab kom feeb mus rau koj tej lus qhia,
thiab pub lub txiaj ntsim rau kuv tau txais koj txoj cai.    

Txais:   As les lus yas, as les lus yas.

Ntawv Moo Zoo  MK 7:1-13

1 Cov Fas Lis Xais thiab tus puav Kws Ntawv Ntshiab tuaj Yes Lus Xas Les tuaj, lawv sib sau ntsauv Yes Xus. 2 Lawv pom tus puav thwj tim xuas tes tsis huv noj mov, yam li lawv tsis xub ntxuav tes, 3 vim tias cov Fas Lis Xais, thiab tas cov Yus Das huv tib si, mas lawv tsis noj mov yog lawv tsis xub ntxuav tes zoo zoo tso. 4 Thaum lawv mus kav kiab kav khw rov los, yog lawv tsis tau xub pov dej rau lawv tso, mas lawv tsis noj mov. Tseem muaj ntau yam uas cov Yus Das ua raws li tej laus qhia kom ua : xws li ntxuav khob, ntxuav hub, thiab ntxuav tej tais tooj dag. 5 Vim li ntawd, cov Fas Lis Xais thiab cov kws Ntawv Ntshiab thiaj nug Yes Xus tias : "Ua cas koj cov thwj tim tsis ua raws li tej laus kev cai ib txwm qhia kom ua, lawv cia li xuas tes tsis huv noj mov ?" 6 Yes Xus hais rau lawv tias : "Neeg zoo sab nraud, His Xais hais raug nej kawg, Ntawv thiaj sau tseg tias : Haiv neeg no tsuas hwm kuv saum di ncauj, lawv lub siab nyob deb kuv. 7 Lawv lam teev kuv dag, lawv muab neeg tej kab ke los nthuav xws li yog Ntuj lus qhia ! 8 "Nej tso Tswv Ntuj lo lus qhia tseg, nej muab nej khi  rau neeg tej kev cai." 9 Thiab Yes Xus hais rau lawv tias : "Nej rhuav Tswv Ntuj lo lus qhia pov tseg, nej coj tej laus cov kab ke. 10 Mais Xes yeej tau qhia tias : "Koj yuav hwm koj niam koj txiv : tus tsawm niam tsawm txiv, yuav raug lub txim tuag ! 11 Tab sis nej, mas nej hais tias : Yog ib tug hais rau nws niam nws txiv tias : cov nyiaj txiag uas yuav muab los pab koj, mas yog -kos npas- txhais tias muab qee rau Ntuj lawm, 12 ces nej tsis hais kom nws ua dab tsi ntxiv rau nws niam nws txiv. 13 Nej muab tej kab ke nej txais ntawm tej laus los rhuav Tswv Ntuj lo lus. Nej tseem ua ntau yam ntxiv zoo li ntawd !"

TIM 11 LUB 2 HLIS   2015

Hnub Plaub Lis Piam Tsib  Nruab Xyoo I

Hwm Niam Mab Liab Tim Lourdes (Niam Mab Liab pib tshwm sim thawj thawj zaug rau LN Bernadette pom yog tim 11 lub 2 hlis 1858)

Zaj Nyeem Ib    HP 2:4B-9, 15-17

4b Thaum lub caij HUAB TAIS Tswv Ntuj tsim lub ntiaj teb thiab lub ntuj, 5 tseem tsis tau muaj ib tug me yub ntoo, ib tug nroj tsuag tuaj li, vim HUAB TAIS Tswv Ntuj tseem tsis tau ua kom los nag rau ntiaj teb, thiab tseem tsis tau muaj tib neeg los cog tej av. 6 Tab sis muaj dej txhawv hauv av los ywg tas nrho daim npoo av. 7 HUAB TAIS Tswv Ntuj muab ib thooj av nplaum los puab ua tib neeg. HUAB TAIS Tswv Ntuj tshuab pa rau hauv tib neeg qhov ntswg, ces tib neeg ciaj ua ib tug muaj sia. 8 HUAB TAIS Tswv Ntuj cog tau ib lub vaj nyob Es Dees, nyob sab hnub tuaj.  Nws muab tus txiv neej uas nws tau puab tso rau hauv lub vaj. 9 HUAB TAIS Tswv Ntuj ua kom txhua yam ntoo uas zoo saib thiab zoo noj tuaj hauv lub vaj thaj av. Tus ntoo muaj txoj sia tuaj nyob hauv nruab nrab lub vaj, thiab tus ntoo uas paub qhov zoo qhov phem.
15 HUAB TAIS Tswv Ntuj coj tus txiv neej mus nyob hauv lub vaj Es Dees kom nws cog lub vaj thiab saib lub vaj. 16 HUAB TAIS Tswv Ntuj qhia tus txiv neej li no : "Koj noj tau cov txiv txi ntawm tas txhua tsob ntoo hauv lub vaj no tib si. 17 Tiam sis cov txiv txi ntawm tus ntoo paub qhov zoo thiab qhov phem, mas koj txhob noj. Yog koj noj hnub twg, mas hnub ntawd koj yuav tuag."


NPN   104:1-2A, 27-28, 29BC-30

Txais:   (1a) Kuv tus ntsuj plig, koj cav txog HUAB TAIS!

Kuv tus ntsuj plig, koj cav txog HUAB TAIS!
HUAB TAIS kuv tus Tswv Ntuj, koj yeej loj tas nrho!
Koj cev ris tsho yog hwj chim thiab koob meej,
koj lub tsho tshaj sab yog qhov pom kev.

Txais:   (1a) Kuv tus ntsuj plig, koj cav txog HUAB TAIS!

Txhua yam koj tau tsim los ntsia ntsoov koj
tias koj yuav pub zaub mov rau lawv noj thaum txog caij txog nyog.
Thaum koj pub rau lawv, lawv mus sau los,
thaum koj qhib koj txhais tais, lawv tau txais tej yam zoo puv npo.    

Txais:   (1a) Kuv tus ntsuj plig, koj cav txog HUAB TAIS!

Yog koj rho lawv txoj pa, lawv kawg puas mus
thiab yuav rov mus ua plua tshauv.
Thaum koj xa koj lub tswv yim tawm mus, nws yuav tsim lawv dua tshiab,
thiab koj yuav ua kom lub ntiaj teb rov tshiab tuaj.    

Txais:   (1a) Kuv tus ntsuj plig, koj cav txog HUAB TAIS!

As Les Lus Yas     JN 17:17B, 17A

Txais:  As les lus yas, as les lus yas.

Huab Tais, koj lo lus yog qhov tseeb:
thov koj qee zias peb los nyob hauv txoj kev tseeb. .

Txais:  As les lus yas, as les lus yas.

Ntawv Moo Zoo    MK 7:14-23

14 Yes Xus rov hu tsoom sid los ntawm nws, ces nws hais rau lawv tias : "Tas nej sawv daws, nej mloog kuv kom nej to taub mog ! 15 Tsis muaj dab tsi nyob sab nraum neeg lub cev, uas nkag rau hauv neeg, yuav ua kom neeg tsis huv. Yam ua kom neeg tsis huv yog yam tawm hauv neeg los. 16  Leej twg muaj pob ntseg hnov, yeej meem mloog.  17 Thaum Yes Xus rov los tsev thiab nyob nrug deb ntawm tsoom sid, cov thwj tim nug Yes Xus txog zaj paj lug ntawd. 18 Ces Yes Xus hais rau lawv tias : "Nej tsis muaj tswv yim li thiab lod ? Nej tsis to taub tias tej yam nyob sab nraum no, nkag rau hauv neeg ua tsis tau kom neeg tsis huv. 19 Vim tias tej yam ntawd tsis nkag mus hauv neeg lub siab, tsuas nkag rau hauv plab, tas ces tawm mus rau nraum chaw plob.” (Ua li mas Yes Xus qhia tias txhua hom txhiam xws noj puav leej huv). 20 Yes Xus hais ntxiv tias : "Yam uas tawm hauv neeg los yog yam ua kom neeg tsis huv. 21 Vim tej yam phem uas txhawv hauv neeg nruab siab los yog : kev ua dev ua npua, ua tub sab, tua neeg, 22 deev luag txij nkawm, cuaj khaum, lim hiam, ua cuav, ntxias luag ua plees ua yi, khib, xyav luag moo, muab hlob, ywj fab ywj fwj. 23 Txhua hom kev phem no tawm sab hauv los, mas thiaj ua kom neeg tsis huv."

TIM 12 LUB 2 HLIS   2015

Hnub Tsib Lis Piam Tsib Nruab Xyoo I

Zaj Nyeem Ib  HP 2:18-25

18 HUAB TAIS Tswv Ntuj hais tias : "Cia txiv neej nyob ib leeg mas tsis zoo. Kuv yuav ua ib tug pab nws kom phim nws." 19 HUAB TAIS Tswv Ntuj thiaj muab av los puab tas puas tsav yam tsiaj qus thiab tas puas tsav yam noog ya saum ntuj. Nws coj los rau tus txiv neej xyuas saib nws yuav tis npe li cas rau. Txhua yam tsiaj yuav muaj lub npe raws li tus txiv neej tis rau. 20 Tus txiv neej tis npe rau tas txhua hom tsiaj nyeg, rau cov noog ya saum ntuj, thiab rau tas txhua hom tsiaj qus, tiam sis nws nrhiav tsis tau ib tug pab nws thiab phim nws. 21 HUAB TAIS Tswv Ntuj tso ib tug dab ntub hlob laum tus txiv neej, ces nws tsaug zog lawm. Tswv Ntuj rho nws ib tug tav tawm los, nws rov kaw lub qhov zoo li qub. 22 HUAB TAIS Tswv Ntuj muab tus tav uas nws rho ntawm tus txiv neej los puab ua ib tug poj niam. Tswv Ntuj coj los rau tus txiv neej saib. 23 Tus txiv neej nqua suab hlo tias : "Zaum no, tus no yog tseem txha ntawm kuv txha thiab tseem nqaij ntawm kuv nqaij tiag ! Tus no yuav hu ua 'poj niam,' vim tus no tawm ntawm txiv neej los !" 24 Vim li no txiv neej thiaj tso niam tso txiv tseg, mus npuab nws tus poj niam, ces nkawd ua ib lub cev nqaij xwb. 25 Thaum ntawd, tus txiv neej thiab tus poj niam nkawd ob leeg nyob liab qab, tiam sis nkawd ib leeg tsis txaj muag rau ib leeg.

NPN   128:1-2, 3, 4-5

Txais:   (1a) Cov uas hwm Huab Tais tau txoj hmoov zoo.

Nej cov hwm HUAB TAIS, nej txoj hmoov zoo,
thiab nej cov taug raws nws txoj kev!
Vim nej yuav tau noj lub txiv ntawm nej tej hauj lwm,
nej yuav tau hmoov zoo thiab nws yuav nyiam nej.

Txais:   (1a) Cov uas hwm Huab Tais tau txoj hmoov zoo.

Kuj tus poj niam yuav zoo li ib txoj hmab txiv cawv txi txiv ncw
nyob rau hauv koj tej kaum vaj kaum tsev,
koj cov me nyuam zoo li ib co ntoo txiv roj
nyob ncig lees koj lub phaj tsum.

Txais:   (1a) Cov uas hwm Huab Tais tau txoj hmoov zoo.

Nej saib, tus neeg muaj txoj hmoov zoo
yog tus ntshai HUAB TAIS.
HUAB TAIS nyob saum roob Xis Yoos foom koob hmoov rau nej,
kom nej tau pom Yes Lus Xas Les vam meej niaj hnub hauv nej lub neej.

Txais:   (1a) Cov uas hwm Huab Tais tau txoj hmoov zoo.

As Les Lus Yas  Yas Kos 1:21BC

Txais:   As les lus yas, as les lus yas.

Nej yuav ua neeg me txais lo lus uas twb muab cog rau hauv nej lawm,
nws thiaj yuav cawm tau nej tus ntsuj plig.    

Txais:   As les lus yas, as les lus yas.

Ntawv Moo Zoo   MK 7:24-30

24 Yes Xus sawv kev ntawd mus rau Tws Los xeev ntuj. Nws mus hauv ib lub tsev, nws tsis xav kom muaj neeg paub, tab sis nws tsiv nraim tsis tau. 25 Tam sim ntawd, muaj ib tug poj niam uas nws tus ntxhais raug ib tug dab tsis huv, nws tau hnov luag hais txog Yes Xus, nws tuaj txhos caug ntawm Yes Xus taw. 26 Tus poj niam ntawd yog ib tug Hes Las, yug los nyob Xis Lias Fes Nis Xias xeev ntuj, nws thov kom Yes Xus ntiab tus dab tawm hauv nws tus ntxhais. 27 Yes Xus hais rau nws tias : "Yuav xub cia cov me nyuam noj kom tsau tso, vim yuav muab cov me nyuam cov mov los pub me nyuam dev noj mas tsis yog." 28 Tab sis tus poj niam teb rau Yes Xus tias : “Huab Tais, yog li koj hais ! Tab sis, cov me nyuam dev nyob hauv qab rooj kuj noj tej tsig mov poob ntawm cov me nyuam los.” 29 Ces Yes Xus hais rau tus poj niam tias : "Vim koj hais lo lus no, koj rov mus mog, tus dab twb tawm hauv koj tus ntxhais lawm." 30 Tus poj niam rov mus txog tsev, nws pom tus me nyuam pw saum txaj, tus dab tawm mus lawm.

TIM 13 LUB 2 HLIS   2015

Hnub Rau Lis Piam Tsib Nruab Xyoos, Xyoo I

Zaj Nyeem Ib    HAUV PAUS 3:1-8

1 Tus nab yog tus ntse tshaj tas txhua hom tsiaj HUAB TAIS Tswv Ntuj tau tsim los nyob nruab nrag. Nab hais rau tus poj niam tias : "Li ntawd, Tswv Ntuj hais tias : Neb yuav tsis txhob noj txhua yam txiv ntoo hauv lub vaj no puas yog ?" 2 Tus poj niam teb rau tus nab tias : "Wb noj tau cov txiv txi saum cov ntoo hauv lub vaj no tib si. 3 Tsuas tshwj cov txiv txi saum tsob ntoo nyob hauv nruab nrab lub vaj, mas Tswv Ntuj hais tias : “Neb tsis txhob noj, tsis txhob kov, yog neb noj neb kov, mas neb yuav tuag." 4 Tus nab teb ntua tus poj niam tias : "Tsis muaj li ntawd ib zaug ! Neb yuav  tsis tuag. 5 Vim Tswv Ntuj paub tias, hnub twg neb noj ces neb qhov muag yuav qhib, neb yuav zoo li tej tus tswv ntuj uas paub qhov zoo thiab qhov phem." 6 Tus poj niam pom hais tias tus ntoo ntawd yeej zoo noj thiab zoo saib kawg, thiab yog tus ntoo uas yus ntshaw noj kom yus paub qhov zoo thiab qhov phem. Nws de zoj lub txiv ntawm tus ntoo los noj. Nws kuj cev rau nws tus txiv uas nrog nws nyob, ces tus txiv kuj noj thiab. 7 Ces nkawd ob leeg qhov muag qhib plho, nkawd paub hais tias nkawd liab qab. Nkawd thiaj muab nplooj ncuav pias los ua tiab npua. 8 Thaum cua tuaj ntxiag, nkawd hnov HUAB TAIS Tswv Ntuj rhais ruam ncig lub vaj. Tus txiv neej thiab nws tus poj niam khiav tsiv nraim HUAB TAIS Tswv Ntuj hauv cov ntoo nyob hauv lub vaj.

NPN   32:1-2, 5, 6, 7

Txais:   (1a) Cov uas luag zam txhaum rau lawv, lawv txoj hmoov zoo.

Hmoov zoo rau tus uas luag thim nws qhov txhaum lawm,
tus uas lawv npog nws qhov txhaum rau.  
Hmoov zoo rau tus neeg uas HUAB TAIS tsis suav txim rau nws,
tus uas lub tswv yim tsis muaj ib qho kev siab phem.

Txais:   (1a) Cov uas luag zam txhaum rau lawv, lawv txoj hmoov zoo.

Kuv lees kuv qhov txhaum rau koj,
kuv tsis muab kuv qhov txhaum npog cia.    
Kuv hais tias:  “Kuv lees kuv qhov txhaum rau HUAB TAIS,”
ces koj muab kuv lub txim ntawm kuv qhov txhaum tshem tas.

Txais:   (1a) Cov uas luag zam txhaum rau lawv, lawv txoj hmoov zoo.

Vim li no txhua tus neeg muaj kev ntseeg ntuj
yuav tsum teev ntuj hu txog koj haum lub caij muaj kev nyuaj siab.
Txawm tias dej tob phwj yaws
los dej yuav tsis nce mus txog nws.

Txais:   (1a) Cov uas luag zam txhaum rau lawv, lawv txoj hmoov zoo.

Koj yog kuv lub chaw nkaum, koj yuav thaiv kuv ntawm txoj kev nyuaj;
nyob ncig kuv, koj yuav cia ib co suab qw zoo siab txog kev twj lij.

Txais:   (1a) Cov uas luag zam txhaum rau lawv, lawv txoj hmoov zoo.

As Les Lus Yas     HAUJ LWMS 16:14B

Txais:  As les lus yas, as les lus yas.

HUAB TAIS, thov koj qhib peb tej siab ntsws
kom peb mloog koj leej Tub cov lus.

Txais:  As les lus yas, as les lus yas.

Ntawv Moo Zool  MK 7:31-37

31 Yes Xus tso Tws Los teb tseg, nws taug txoj kev hla Xis Doos mus rau dej ntuj Nkas Lis Lais, uas nyob hauv xeev Des Kas Pos Lis. 32 Luag coj ib tug neeg lag ntseg, hais lus txhav qhi, tuaj rau Yes Xus. Lawv thov kom Yes Xus tsa tes rau saum nws. 33 Yes Xus coj nws tawm ntawm tsoom sid mus rau ib cag, Yes Xus muab nws ntiv tes ntxig rau tus lag ntseg ob lub qhov ntsej, nws muab aub ncaug pleev tus neeg ntawd tus nplaig. 34 Yes Xus tsa muag ntsia saum ntuj, nws xyu ib suab, nws hais rau tus lag ntseg tias : "Es fas tas," txhais tias : "Koj qhib los." 35 Tus lag ntseg ob lub qhov ntsej qhib hlo, hos cov hlua khi nws tus nplaig kuj plam plaws tam sim ntawd, ces nws hais lus meej. 36 Yes Xus txwv tsis pub lawv hais qhov ntawd rau leej twg li. Tab sis Yes Xus yim txwv, lawv yim tsha tawm. 37 Qhov ntawd raug lawv siab tshaj txhua yam, ces lawv hais tias : "Nws ua tau ib puas tsav yam zoo : nws ua kom cov lag ntseg hnov lus, thiab ua kom cov nplaig txhav hais lus tau."

TIM 14 LUB 2 HLIS 2015

Hwm ob tug leej ntshiab:
LN Cyril, txiv twj cuab, thiab LN Methodius, Tswv Qhia

Zaj Nyeem Ib HP 3:9-24

9 HUAB TAIS Tswv Ntuj hu tus txiv neej hais tias : "Koj nyob qhov twg ?" 10 Tus txiv neej teb tias : "Kuv hnov koj rhais ruam hauv lub vaj. Kuv ntshai vim kuv liab qab, kuv thiaj khiav tsiv nraim." 11 Tswv Ntuj rov hais ntxiv tias : "Leej twg qhia koj tias koj liab qab ? Yog koj noj lub txiv uas kuv txwv tsis pub noj lawm puas yog ?" 12 Tus txiv neej teb tias : "Yog tus poj niam uas koj tso nyob ze kuv, muab lub txiv rau kuv, ces kuv thiaj noj !" 13 HUAB TAIS Tswv Ntuj hais rau tus poj niam tias : "Koj ua dab tsi li ntawd ?" Tus poj niam teb tias : "Yog niag nab ntxias kuv, kuv thiaj noj." 14 Ces HUAB TAIS Tswv Ntuj hais rau tus nab hais tias : "Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej. 15 Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws." 16 Tswv Ntuj hais rau tus poj niam hais tias : "Kuv yuav ua kom koj muaj mob ntau thaum koj xeeb tub xeeb ki. Koj yuav tau mob tau ntsaj, koj thiaj yug tau me tub me nyuam. Tsis kav, koj tseem yuav ntshaw koj tus txiv, tiam sis nws yuav tswj koj." 17 Tswv Ntuj hais rau tus txiv neej hais tias : "Vim koj tau mloog koj tus poj niam lus, koj thiaj noj lub txiv kuv txwv tsis kheev noj, av thiaj raug foom phem vim koj ! Koj yuav siv zog khwv tas koj lub neej koj thiaj tau noj. 18 Av yuav tuaj pos tuaj nrhab rau koj, thiab koj yuav noj tej nroj tsuag uas tuaj hauv nruab teb. 19 Koj ntsej muag yuav tawm hws lug koj thiaj tau noj, mus txog hnub koj rov mus ua av, vim koj yog av puab. Koj yog av luaj ces koj yuav rov mus ua av luaj." 20 Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam. 21 HUAB TAIS Tswv Ntuj muab tawv los ua tsoos rau tus txiv neej thiab nws poj niam hnav. 22 Thiab HUAB TAIS Tswv Ntuj hais tias : "Zaum no tib neeg zoo li peb lawm, nws paub qhov phem thiab qhov zoo. Yuav tsis pub kom nws cev tes mus de tau tsob txiv muaj txoj sia los noj ntxiv, tsam nws muaj txoj sia nyob mus li." 23 HUAB TAIS Tswv Ntuj thiaj tshem neeg tawm hauv lub vaj Es Dees, kom neeg mus cog cov av uas muab los puab nws. 24 Tswv Ntuj ntiab tib neeg tawm, nws tso ib co Tshiab Kes Lus Npis zov lub vaj Es Dees. Tswv Ntuj tsa ib rab ntaj nplaim taws thaiv txoj kev mus txog tus ntoo muaj txoj sia.

NPN 90:2, 3-4ABC, 5-6, 12-13

Txais: (1) Nyob txhua tiam, Huab Tais, koj yog peb qhov chaw nkaum.

Ua ntej cov roob raug tsim tawm los,
ua ntej lub ntiaj teb thiab tas txhua yam hauv ntiaj teb tshwm muaj los,
ib txhis dhau ib txhis koj yeej yog Tswv Ntuj lawm.

Txais: (1) Nyob txhua tiam, Huab Tais, koj yog peb qhov chaw nkaum.

Koj cia neeg hloov rov mus ua plua av,
koj hais tias: “Me nyuam neeg, nej rov mus.”
Vim tias ib txhiab xyoo rau koj zoo li yog nag hmo xwb,
vim nws dhau tas lawm, los tsuas zoo li
ib lub caij zov keeb thaum hmo ntuj xwb.

Txais: (1) Nyob txhua tiam, Huab Tais, koj yog peb qhov chaw nkaum.

Koj ua kom lawv tas thaum nyob nruab dab ntub,
tag kis sawv ntxov lawv zoo li cov nroj tsuag pib hloov:
thaum hnub tuaj nroj tsuag sawv ntsuab xiab,
tiam sis yav tsaus ntuj nws twb ntsws tas ploj tas.

Txais: (1) Nyob txhua tiam, Huab Tais, koj yog peb qhov chaw nkaum.

Thov koj qhia peb txawj suav peb cov hnub cov hmo kom zoo,
kom peb txawj muaj kev thoob tsib hauv nruab siab.
HUAB TAIS, thov koj rov qab los! Yuav tos hov ntev?
Thov koj khuv leej koj cov tub txib!

Txais: (1) Nyob txhua tiam, Huab Tais, koj yog peb qhov chaw nkaum.

As Les Lus Yas MT 4:4B

Txais: As les lus yas, as les lus yas.

Ib tug neeg tsis ciaj sia vim tej zaub mov nkaus xwb,
tiam sis vim txhua lo lus tawm ntawm Tswv Ntuj lub ncauj los.

Txais: As les lus yas, as les lus yas.

Ntawv Moo Zoo MK 8:1-10

1 Lub sij hawm ntawd, rov qab muaj dua ib pab neeg coob, lawv tsis muaj dab tsi noj. Yes Xus hu cov thwj tim los, nws hais rau lawv tias : 2 "Kuv hlub cov neeg no, vim lawv nrog kuv nyob tau peb hnub lawm, lawv tsis muaj dab tsi noj. 3 Yog kuv cia lawv yoo tshaib rov mus tsev, mas lawv yuav tsaus muag tom tog kev, vim lawv ib txhia tuaj deb tuaj." 4 Cov thwj tim teb rau Yes Xus tias : "Qhov chaw no, tsis muaj neeg nyob, yuav muab mov qhov twg rau cov neeg ntawd noj kom tsau ? 5 Ces Yes Xus nug lawv tias : "Nej muaj pes tsawg lub ncuav mov?" Lawv hais tias : "Xya lub." 6 Yes Xus kom tsoom sid zaum pem teb. Nws tuav xya lub ncuav mov, nws ua Ntuj tsaug, nws muab cov ncuav mov ntais, nws cev rau cov thwj tim kom nqa mus rau sawv daws. Ces cov thwj tim muab rau pab neeg ntawd noj. 7 Lawv muaj ob peb tug me nyuam ntses thiab. Yes Xus foom hmoov zoo rau cov ntses tas, nws kom lawv nqa mus rau sawv daws noj thiab. 8 Lawv noj tsau tas, sawv daws khaws tej sab mov seem : tau xya tawb ! 9 Cov neeg ntawd kwv yees muaj plaub txhiab leej. Ces Yes Xus kom lawv rov mus tsev. 10 Yes Xus nrog cov thwj tim nce mus hauv nkoj tam sis ntawd. Nws mus rau thaj tsam Das Mas Nus Thas.