Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» COV ZAJ NYEEM NRUAB LIS PIAM XYOO I 2016-2017
by Mim Today at 6:17 am

» COV ZAJ NYEEM HNUB CHIV XYOO A 2016-2017
by NrhiavTswvNtuj 8th December 2016, 12:32 pm

» XH.Zoov Ntxheb Yaj Nthuav Ntawv Ntshiab.
by Maiv Tooj 8th December 2016, 12:26 pm

» XH. Yaj Zoov Ntxheb lub Tsev THOOB TSIB
by Maiv Tooj 8th December 2016, 12:18 pm

» Xib Hwb Thoj Xyooj lub neej
by Maiv Tooj 6th December 2016, 10:30 pm

» Thov Leej Ntshiab YOS XES
by Maiv Tooj 3rd December 2016, 10:36 am

» COV ZAJ NYEEM NRUAB LIS PIAM XYOO II, 2015-2016
by Mim 2nd December 2016, 1:29 pm

» Qhia keeb kwm kev ntseeg. TP.Cwj Vuam CChiv.
by Maiv Tooj 28th November 2016, 9:58 pm

» Yes Xus lub ntsej muag tiag tiag.
by NrhiavTswvNtuj 26th November 2016, 1:52 pm

» HMOOB NPAM NAJ XEES
by NrhiavTswvNtuj 21st November 2016, 9:15 am

» MOO QAIJ QAUG
by Maiv Tooj 20th November 2016, 9:45 am

» TP.Txhiaj Foom lub TSEV Ntawv
by Maiv Tooj 19th November 2016, 12:04 pm

Suav neeg tuaj saib, txij hnub 17/09/2010 los mus.


    COV ZAJ NYEEM NIAJ HNUB HAUV NRUAB LIS PIAM 2014-15

    Share

    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 21st May 2015, 4:59 am

    TIM 22 LUB 5 HLIS 2015

    Hnub Rau Lis Piam Xya Caij Hla Xyoo B

    Zaj Nyeem Ib: HAUJ LWM 25: 13-21


    13 Ob peb hnub tom qab, tus vaj As Nqis Pas thiab Npes Les Nis nkawd tuaj txog Xes Ntxas Les, nkawd mus xyuas Fes Tus. 14 Vim tias nkawd yuav nyob ntev hnub, ces Fes Tus thiaj piav txog Paj Lug rau tus vaj. Nws hais tias : "Nyob ntawm no, muaj ib tug neeg nyob txim uas Fes Lis cia nws kaw rau hauv tsev loj faj. 15 Thaum kuv mus Yes Lus Xas Les, cov leej choj thiab cov txwj laus Yus Das tuaj liam nws rau kuv, lawv kom kuv muab txim rau nws. 16 Kuv teb lawv tias cov Los Mas tsis muaj kev cai yuav cia li muab tus neeg raug luag liam tso rau lawv tes, yuav tsum xub hu cov neeg kom tuaj nrog tus raug liam ntawd tim ntsej tim muag hais tso, thiab yuav cia tus raug liam tau kev hais lus daws lub txim uas luag liam rau nws tso. 17 Ua li mas cov Yus Das thiaj nrog kuv tuaj ntawm no; peb tsis ncua sij hawm li, tag kis tom qab kiag, kuv mus zaum hauv lub tsev txiav txim, kuv kom lawv coj tus neeg los. 18 Cov neeg tuaj liam txav los liam; lawv liam tsis tau ib qho phem raws qhov kuv xav li. 19 Lawv tsuas nrog nws muaj lus sib cav, xyov, hais txog lawv txoj kev cai teev ntuj, thiab hais txog ib tug Yes Xus uas tuag lawm, tab sis Paj Lug hais tias nws tseem muaj txoj sia nyob xwb. 20 Kuv tsis pom qab ua dab tsi rau ib zag sib cav li ntawd, kuv thiaj nug Paj Lug saib nws puas yeem mus pem Yes Lus Xas Les, cia mam txiav txim txog tej ntawd rau nws nyob ped. 21 Tiam sis Paj Lug tau thov kom cia tso nws mus rau tus Tuam Vaj txiav txim rau nws xwb. Kuv thiaj li ceeb toom cia Paj Lug nyob ntawm no mus txog hnub kuv xa nws mus rau Xes Ntxas.”

    NPN 103: 1-2, 11-12, 19-20AB

    Txais: (19a) Huab Tais tsa nws lus theej kiab rau txheej ntuj saud.
    los: As les lus yas.

    Kuv tus ntsuj plig, koj cav txog HUAB TAIS;
    kuv tej siab ntsws, nej cav txog nws lub npe ntshiab.
    Kuv tus ntsuj plig, koj cav txog HUAB TAIS,
    koj tsis txhob hnov qab nws tej kev zoo ib qho li.

    Txais: (19a) Huab Tais tsa nws lus theej kiab rau txheej ntuj saud.
    los: As les lus yas.

    Siab npaum li lub ntuj nyob rau saum ntiaj teb,
    nws kuj hlub cov neeg uas hwm nws loj npaum li ntawd.
    Deb npaum li sab hnub tuaj nyob deb sab hnub poob,
    nws tau muab peb tej txhaum pov tseg deb ntawm peb npaum li ntawd .

    Txais: (19a) Huab Tais tsa nws lus theej kiab rau txheej ntuj saud.
    los: As les lus yas.

    HUAB TAIS tsa nws lub theej kiab rau txheej ntuj saud,
    nws lub hwj chim ua vaj kav tas txhia tsav txhua yam.
    Nej uas yog nws cov Tshiab, nej cav lus zoo txog HUAB TAIS,
    nej uas yog cov muaj peev xwm zog loj thiab nej mloog nws lus.

    Txais: (19a) Huab Tais tsa nws lus theej kiab rau txheej ntuj saud.
    los: As les lus yas.

    As Les Lus Yas: ZAM 14: 26

    Txais: As les lus yas, as les lus yas.

    Leej Ntuj Plig Ntshiab yuav qhia tas ib puas tsav yam rau nej,
    thiab yuav pab nej rov nco txog tas txhua yam uas kuv tau hais rau nej.

    Txais: As les lus yas, as les lus yas.

    Ntawv Moo Zoo: ZAM 21: 15-19


    15 Thaum lawv noj tshais tas, Yes Xus hais rau Xis Moos Pob Zeb tias : "Xis Moos, Zam tub, koj puas nyiam kuv dua lawv cov ntawd ?" Pob Zeb hais rau Yes Xus tias : "Huab Tais, koj yeej paub tias kuv nyiam koj." Yes Xus hais rau Pob Zeb tias : "Koj muab zaub rau kuv cov yaj noj." 16 Yes Xus rov hais zaum ob tias : "Xis Moos, Zam tub, koj puas nyiam kuv ?" Pob Zeb hais rau Yes Xus tias : "Huab Tais, koj yeej paub tias kuv nyiam koj." Yes Xus hais rau nws tias : "Koj zov kuv cov yaj mog." 17 Yes Xus tseem rov hais dua zaum peb rau Pob Zeb tias : "Xis Moos, Zam tub, koj puas nyiam kuv tiag ?” Pob Zeb tu siab rau qhov Yes Xus hais rau nws zaum peb tias : "Koj puas nyiam kuv tiag ?" Pob Zeb hais rau Yes Xus tias : "Huab Tais, koj paub tas ib puas tsav yam, koj yeej paub tias kuv nyiam koj tiag." Yes Xus hais rau Pob Zeb tias : "Koj muab zaub rau kuv cov yaj noj mog. 18 Kuv hais qhov muaj tseeb tiag rau koj : Thaum koj tseem hluas, koj muab koj siv koj sia koj, koj xav mus qhov twg los koj mus koj. Tiam sis thaum koj laus lawm, koj yuav tsa tes cia lwm tus kho siv rau koj sia thiab coj koj mus qhov uas koj tsis xav mus." 19 Yes Xus hais qhov ntawd qhia tias Pob Zeb yuav tuag zoo li cas kom Tswv Ntuj nto koob meej. Yes Xus hais li tas, nws hais rau Pob Zeb tias : "Koj raws kuv mus."





    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 23rd May 2015, 4:34 am

    TIM 23 LUB 5 HLIS 2015

    Hnub Xya Lis Piam Xya Caij Hla Xyoo B

    Zaj Nyeem Ib: HAUJ LWM 28: 16-20, 30-31


    16 Thaum peb tuaj txog hauv Los Mas lawm, mas lawv cia Paj Lug nws nyob nws hauv ib lub tsev, tsuas muaj tus tub rog uas zov nws nrog nws nyob xwb. 17 Peb hnub tom qab, Paj Lug nqua hu cov thawj coj Yus Das hauv lub nroog tuaj sib txoos ua ke. Thaum lawv tuaj txog tas, Paj Lug hais rau lawv tias : "Kwv tij, kuv tsis tau ua dab tsi txhaum peb haiv neeg, los txhaum peb cov yawg koob tej kev cai, tsis kav lawv ntes kuv nyob Yes Lus Xas Les, thiab lawv muab kuv rau cov Los Mas. 18 Thaum cov Los Mas tshuaj lus tas, lawv xav tso kuv mus, vim kuv tsis tau ua dab tsi txaus ris lub txim tuag. 19 Tab sis cov Yus Das tsis kam tso, mas kuv thiaj tau hu txog Xes Ntxas ua tus txiav txim, tsis yog vim kuv xav liam dab tsi rau kuv haiv neeg. 20 Vim li no, mas kuv thiaj xav ntsib nej thiab hais rau nej paub tias, yog vim His Xas Lais txoj kev tso siab, mas kuv thiaj li coj txoj saw khi no."
    30 Paj Lug nyob tau ob xyoos nkaus hauv lub tsev uas nws ntiav. Nws txais cov neeg uas tuaj xyuas nws tas huv tib si. 31 Nws tshaj txog Tswv Ntuj lub Ceeb Tsheej, thiab qhia txog Huab Tais Yes Xus Pleev, nws tso siab lug qhia, tsis muaj leej twg txwv nws li.

    NPN 11: 4, 5 + 7

    Txais: (7b) Huab Tais, cov neeg siab ncaj yuav ntsia ntsoov koj lub ntsej muag.
    los: As les lus yas.

    HUAB TAIS nyob hauv nws lub tuam tsev ntshiab;
    HUAB TAIS lub theej kiab nyob saum ntuj.
    Nws qhov muag saib ntsoov ntiaj teb,
    nws ntsia tsom ntsoov rau ntiaj teb neeg.

    Txais: (7b) Huab Tais, cov neeg siab ncaj yuav ntsia ntsoov koj lub ntsej muag.
    los: As les lus yas.

    HUAB TAIS sim tus neeg ncaj thiab tus neeg phem,
    nws ntxub tus lim hiam nyiam kev sib ntaus sib tua.
    Vim HUAB TAIS siab ncaj, nws nyiam cov hauj lwm ncaj ncees,
    cov neeg siab ncaj yuav ntsia ntsoov HUAB TAIS ntsej muag

    Txais: (7b) Huab Tais, cov neeg siab ncaj yuav ntsia ntsoov koj lub ntsej muag.
    los: As les lus yas.

    As Les Lus Yas: ZAM 16: 7, 13

    Txais: As les lus yas, as les lus yas.

    Huab Tais hais tias: Kuv yuav xa Leej Tswv Yim qhia qhov tseeb tuaj rau nej;
    Nws yuav coj nej mus txog txhua yam tseeb.

    Txais: As les lus yas, as les lus yas.

    Ntawv Moo Zoo: ZAM 21: 20-25

    20 Pob Zeb tig ntsia tom qab, nws pom tus thwj tim uas Yes Xus nyiam lawv nkawd qab. Yog tus uas thaum lawv noj hmo, nws tig mus pheeb rau ntawm Yes Xus hauv siab, thiab nug tias : 'Huab Tais, tus muab koj rau luag yog leej twg'. 21 Pob Zeb pom tus thwj tim ntawd, Pob Zeb hais rau Yes Xus tias : "Huab Tais, tus ntawd ned ?" 22 Yes Xus hais rau Pob Zeb tias : "Yog kuv xav kom nws nyob mus txog hnub kuv rov los kuj xij, tsis yog koj hauj lwm. Hos koj, mas koj raws kuv mus." 23 Lo lus no ncha mus hauv cov kwv tij tias : 'Tus thwj tim ntawd yuav tsis tuag.' Tab sis Yes Xus tsis tau hais rau Pob Zeb tias : 'Nws yuav tsis tuag', Yes Xus tsuas tau hais tias : 'Yog kuv xav kom nws nyob txog hnub kuv rov los, kuj xij, tsis yog koj hauj lwm.' 24 Yog tus thwj tim ntawd ua tim khawv txog tej xwm no thiab yog nws muab sau cia. Peb paub tias nws cov lus ua pov thawj muaj tseeb. 25 Tseem tshuav ntau yam kawg uas Yes Xus tau ua, yog yuav sau ib yam zuj zus tas huv tib si, mas kuv xav tias lub ntiaj teb yuav ntim tsis tas cov ntawv uas sau txog nws tej hauj lwm.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 24th May 2015, 5:33 pm

    TIM   25  LUB  5  HLIS   2015

    Hnub Ob Lis Piam Yim Nruab Xyoo I

    Zaj Nyeem Ib: Npes Xis Las 17: 24-29


    24 HUAB TAIS pub kom cov neeg thov txhaum tau kev rov los cuag nws, nws txhawb zog rau cov neeg tas kev cia siab. 25 Koj cia li rov los cuag HUAB TAIS, tso kev txhaum pov tseg ! Koj thov nws thiab tseg tsis txhob ua txhaum ntxiv ! 26 Koj cia li rov los cuag tus Tswv NyobTxheej Siab, koj tig nraub qaum rau txoj kev tsis ncaj, kav tsij ntxub txoj kev phem tas siab tas ntsws. 27 Leej twg thiaj yuav cav lus zoo tau txog Huab Tais nyob hauv tub tuag teb, yog tias cov tseem muaj sia nyob tsis cav txog nws ? 28 Tus neeg tuag lawm zoo xws li tus tsis tau xeeb los dua, nws cav lus zoo tsis tau; yog tus neeg muaj txoj sia thiab noj qab nyob zoo yuav cav txog Huab Tais lub koob meej. 29 HUAB TAIS txoj kev khuv leej loj ua luaj ! Nws kev zam txhaum rau cov neeg tig rov los cuag nws loj tas npaud !

    NPN   32: 1-2, 5, 6, 7


    Txais: (11a) Kom tus siab ncaj cia li dhia zoo siab nyob hauv Huab Tais.

    Hmoov zoo rau tus uas luag thim nws qhov txhaum lawm,
    tus uas lawv npog nws qhov txhaum rau.  
    Hmoov zoo rau tus neeg uas HUAB TAIS tsis suav txim rau nws,
    tus uas lub tswv yim tsis muaj ib qho kev siab phem.  

    Txais: (11a) Kom tus siab ncaj cia li dhia zoo siab nyob hauv Huab Tais.

    Kuv lees kuv qhov txhaum rau koj,
    kuv tsis muab kuv qhov txhaum npog cia.    
    Kuv hais tias:  “Kuv lees kuv qhov txhaum rau HUAB TAIS,”
    ces koj muab kuv lub txim ntawm kuv qhov txhaum tshem tas.

    Txais: (11a) Kom tus siab ncaj cia li dhia zoo siab nyob hauv Huab Tais.

    Vim li no txhua tus neeg muaj kev ntseeg ntuj
    yuav tsum teev ntuj hu txog koj thaum lub caij muaj kev nyuaj siab.
    Txawm tias dej tob phwj yaws
    los dej yuav tsis nce mus txog nws.

    Txais: (11a) Kom tus siab ncaj cia li dhia zoo siab nyob hauv Huab Tais.

    Koj yog kuv lub chaw nkaum, koj yuav thaiv kuv ntawm txoj kev nyuaj;
    nyob ncig kuv, koj yuav cia ib co suab qw zoo siab txog kev twj lij.

    Txais: (11a) Kom tus siab ncaj cia li dhia zoo siab nyob hauv Huab Tais.

    As Les Lus yas: 2 KLN  8: 9

    Txais: As les lus yas, as les lus yas.

    Yes Xus Pleev tuaj yeem ua tus neeg pluag txawm tias nws nplua nuj,
    kom xwv nws txoj kev pluag ua kom nej nplua nuj tuaj.

    Txais: As les lus yas, as les lus yas.

    Ntawv Moo Zoo: MK 10: 17-27


    17 Thaum Yes Xus yuav sawv kev mus, muaj ib tug neeg khiav los txhos caug ntawm Yes Xus xub ntiag, nws nug tias : "Xib Hwb siab zoo, kuv yuav ua dab tsi thiaj yuav tau txais txoj sia nyob mus li los ua cuab tam ?" 18 Yes Xus hais rau nws tias : "Vim li cas koj hais tias kuv siab zoo ? Tsis muaj leej twg siab zoo, tsuas kawg Tswv Ntuj tib leeg xwb. 19 Koj paub cov lus qhia tias : koj txhob tua neeg, txhob zes luag txij luag nkawm, txhob ua tub sab, txhob ua tim khawv cuav, txhob ua luam cuav, hwm koj niam koj txiv." 20 Tus neeg ntawd teb rau Yes Xus tias : "Xib Hwb, txij thaum kuv yav hluas los, kuv yeej coj raws nraim li ntawd." 21 Yes Xus ntsia nws, ces Yes Xus nyiam nws. Nws hais rau tus neeg ntawd tias : "Tsuas tshuav ib yam xwb koj tsis tau ua : koj mus, koj muab koj lub cuab tam muag, muab tus nqi pub rau cov pluag, koj yuav tau ib lub cuab tam muaj nqis nyob saum ntuj. Ces koj los raws kuv." 22 Tus neeg ntawd hnov lo lus no, nws lub ntsej muag ntshaus tas, ces nws rov mus tu siab nrho, vim nws muaj cuab yeej cuab tam ntau. 23 Ces Yes Xus ntsia ib ncig nws, nws hais rau cov thwj tim tias : "Cov neeg nplua nuj mus hauv Tswv Ntuj lub Ceeb Tsheej mas nyuaj npaum no!" 24 Cov thwj tim yoob tas rau cov lus no. Tab sis Yes Xus rov hais rau lawv tias : "Kuv cov me nyuam, kev mus hauv Tswv Ntuj lub Ceeb Tsheej mas yeej nyuaj npaum no ! 25 Ib tug ntxhuav yuav nkag hauv lub qhov koob yooj yim dua ib tug nplua nuj nkag mus hauv Tswv Ntuj lub Ceeb Tsheej." 26 Cov thwj tim yim huab yoob heev. Lawv sib tham tias : "Leej twg thiaj yuav txais kev cawm ?" 27 Yes Xus ntsia lawv, nws hais tias : "Yog neeg ua neeg xwb, mas yeej tsis tau li, tab sis Tswv Ntuj ua tau. Vim Tswv Ntuj ua tau tas ib puas tsav yam."

    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 25th May 2015, 10:13 am

    TIM 26 LUB 5 2015

    Hnub Peb Lis Piam Yim Nruab Xyoo I

    Hmoov Hwm Leej Ntshiab Philip Neri, ua Leej Choj


    Zaj Nyeem Ib: NPES XIS LAS 35:1-12


    1 Tus ua raws Txoj Cai nws muaj ntau yam los fij rau Ntuj, tus muab siab rau coj cov lus qhia nws fij cov thaj txi Ntuj cog kev koom siab. 2 Tus hlub luag nws muab ib co hmoov nplej los txi Ntuj; pub nyiaj rau tus pluag yog ua ib thaj cav txog Ntuj. 3 Qhov ntxim Tswv Ntuj siab yog txav mus deb ntawm txoj kev phem; thaum yus txav mus deb ntawm txoj kev tsis ncaj yog yus cev ib thaj txi Ntuj them txim txhaum. 4 Koj tsis txhob mus tes dawb tes do ntawm Huab Tais xub ntiag, vim twb muaj Txoj Cai qhia kom ua txhua yam. 5 Qhov uas tus neeg ncaj cev rau Ntuj ua kom lub thaj txi Ntuj muaj nqes thiab nws ncho ib co pa tsw qab ntxiag nyob ntawm Tus Tswv Nyob Txheej Siab xub ntiag. 6 Tus neeg ncaj thaj txi ntuj ntxim Huab Tais siab kawg nkaus thiab nws yuav nco ntsoov mus li. 7 Koj yuav muaj lub siab dav pe hawm Huab Tais, tsis txhob qia dub nqa koj thawj cov qoob loo tuaj txi rau nws. 8 Txhua zaus koj pub rau luag, koj ntsej muag yuav tsum luag ntxhi, thiab koj yuav tsum zoo siab hlo tso kaum feem pua nyiaj rau tuam tsev teev ntuj. 9 Koj yuav pub rau Tus Tswv Nyob Txheej Siab ib yam li nws tau pub rau koj, yuav ua lub siab dav pub rau nws raws li koj pub tau. 10 Vim Huab Tais yuav rov pauj rau koj, nws yuav rov pauj xya npaug rau koj. 11 Koj tsis txhob xyaum muab nyiaj txiag mus ua nqe xiab, Huab Tais tsis kam txais; koj tsis txhob vam txog tej txoj kev txi ntuj tsis ncaj ncees. 12 Vim Huab Tais yog ib tug txiav txim tsis kws leej twg cai.

    NPN 50: 5-6, 7-8, 14 + 23

    Txais: (23b) Kuv yuav pub kom tus neeg ncaj paub Tswv Ntuj txoj kev cawm neeg.

    "Nej hu cov ntseeg kuv tuaj sib sau nyob ntawm kuv,
    cov uas tau tua tsiaj txi ntuj nrog kuv cog lus.”
    Lub ntuj tshaj nws txoj kev ncaj tias:
    “ Tswv Ntuj yog tus txiav txim.”

    Txais: (23b) Kuv yuav pub kom tus neeg ncaj paub Tswv Ntuj txoj kev cawm neeg.

    “ Kuv haiv neeg, koj mloog, kuv yuav hais lus;
    His Xas Lais, kuv yuav hais tej yam phem txog koj,
    Kuv,Tswv Ntuj, koj tus Tswv Ntuj.
    Kuv yuav hais tej yam phem tsis yog vim koj cov tsiaj txi Ntuj ;
    koj cov tsiaj hlawv txi Ntuj nyob ntawm kuv xub ntiag mus li.

    Txais: (23b) Kuv yuav pub kom tus neeg ncaj paub Tswv Ntuj txoj kev cawm neeg.

    Koj yuav tsum muab lo lus qhuas lus cav los txi rau Ntuj,
    koj yuav tsum pauj yeem rau tus Tswv Nyob Txheej Siab.
    Leej twg muab lo lus qhuas lus cav los txi Ntuj, tus ntawd ua kuv nto koob meej.
    kuv yuav pub kom tus neeg ncaj paub Tswv Ntuj txoj kev cawm neeg.

    Txais: (23b) Kuv yuav pub kom tus neeg ncaj paub Tswv Ntuj txoj kev cawm neeg.

    As Les Lus Yas: MT 11: 25

    Txais: As les lus yas, as les lus yas.

    Leej Txiv, kuv cav lus zoo txog koj, Huab Tais kav lub ntuj lub teb,
    Koj tau qhia rau cov neeg me tej yam tob txog lub Ceeb Tsheej.

    Txais: As les lus yas, as les lus yas.

    Ntawv Moo Zoo: MK 10: 28-31

    28 Pob Zeb txawm hais rau Yes Xus tias : “Peb tau tso ib puas tsav yam tseg, peb los raws koj.” 29 Yes Xus hais tias : "Kuv hais tseeb rau nej, tsis muaj ib tug neeg uas tau tso vaj tse, kwv tij, nkauj muam, niam thiab txiv, me tub me nyuam, los liaj teb tseg vim kuv thiab vim lub Moo Zoo, 30 uas yuav tsis tau txais txij hnub no, lub sij hawm no mus, ib puas npaug ntawm vaj tse, kwv tij, nkauj muam, niam, me tub me nyuam, thiab liaj teb, ntxiv rau kev raug luag hiam huv si, thiab lwm tiam, nws yuav txais txoj sia nyob mus li. 31 Coob leej ua luag ntej, yuav tuaj puag tom qab, hos coob leej ua luag qab, yuav ua ntej.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 26th May 2015, 5:47 am

    TIM   27  LUB   5   2015

    Hnub Plaub Lis Piam Yim Nruab Xyoo I

    Zaj Nyeem Ib: NPES XIS LAS  36: 1, 4-5A, 10-17


    1 Tus Tswv, Huab Tais kav lub sim ceeb, thov koj khuv leej peb, thov koj saib peb, koj ua kom tas txhia haiv neeg ntshai koj. 4 Kom lawv zeem tseeb txog koj, ib yam li peb zeem tias dua koj lawm, Huab Tais, tsis muaj dua lwm tus Tswv Ntuj li. 5 Thov koj rov xa ib co cim loj tuaj, koj rov ua ib cov hauj lwm muaj hwj huam. 10 Koj sau tas cov xeem Yas Kos, koj rov muab thaj av ua cuab tam rau lawv xws li thaum lub hauv paus. 11 HUAB TAIS, thov koj khuv leej haiv neeg uas ris koj lub npe,  thov koj khuv leej His Xas Lais uas yog koj tus tub hlob. 12 Thov koj hlub koj lub tsheej ntshiab Yes Lus Xas Les, uas yog koj lub chaw so. 13 Koj ua kom Xis Yoos puv nkaus koj lub hwj chim thiab ua kom koj lub tsev ntshiab puv nkaus koj lub koob meej. 14  Koj ua tim khawv pab txuag cov neeg koj tau tsim los; koj ua raws li cov lus uas cov yaj saub tau ceeb toom tseg nyob hauv koj lub npe lawm. 15 Koj pub kom cov neeg tso siab rau koj tau txais raws li qhov lawv tos; koj ua kom koj cov Yaj Saub tau hais qhov tseeb tiag. 16 Huab Tais, koj mloog zaj uas koj cov tub txib taij ntawm koj,  koj ua raws li As Loos cov lus foom hmoov zoo rau koj haiv neeg. 17 Ces tas tsoom neeg nyob ntiaj teb thiaj paub tseeb tias koj yog Huab Tais, yog tus Tswv Ntuj uas nyob mus li.

    NPN 79: 8, 9, 11 + 13

    Txais: Huab Tais, thov koj muab koj lub siab zoo qhov pom kev rau peb.

    Thov koj txhob nco txog peb txheej thaud tej txhaum ntxiv;
    coj koj txoj kev khuv leej tuaj rau peb sai sai,
    vim peb poob rau qhov qis kawg nkaus lawm

    Txais: Huab Tais, thov koj muab koj lub siab zoo qhov pom kev rau peb.

    Thov koj pab peb, Tswv Ntuj peb tus cawm seej,
    vim koj lub npe muaj koob meej loj;
    Thov cawm peb thiab zam peb cov txhaum rau peb
    vim koj lub npe zoo..

    Txais: Huab Tais, thov koj muab koj lub siab zoo qhov pom kev rau peb.

    Thov koj cia cov neeg nyob txim lub suab ntsaj tuaj txog koj;
    koj siv koj lub hwj huam loj los cawm cov neeg poob rau kev tuag.
    Ces peb, uas yog koj haiv neeg thiab pab yaj nyob hauv koj lub nras zaub
    yuav ua koj tsaug mus li tsis muaj caij kawg;
    tiam dhau tiam peb yuav cav txog koj lub koob meej.  

    Txais: Huab Tais, thov koj muab koj lub siab zoo qhov pom kev rau peb.

    As Les Lus Yas: MK 10: 45

    Txais: As les lus yas, as les lus yas.

    Neeg Leej Tub tuaj kom tau tsob hwb neeg,
    thiab muab nws txoj sia los ua nqe txhiv coob leej.

    Txais: As les lus yas, as les lus yas.

    Ntawv Moo Zoo: MK 10: 32-45

    32 Yes Xus thiab cov thwj tim taug kev nce mus pem Yes Lus Xas Les. Yes Xus mus ua lawv ntej. Lawv ua siab nyias ntsais, hos cov neeg raws lawv mus kuj ntshai. Yes Xus rov hu Pab Kaum Ob los ze nws, ces nws pib hais txog tej yam uas yuav tuaj raug nws li no : 33 "Zaum no, peb nce mus pem Yes Lus Xas Les, mas luag yuav muab Neeg Leej Tub rau cov thawj leej choj thiab cov kws Ntawv Ntshiab. Lawv yuav txiav lub txim tuag rau nws, yuav muab nws rau cov neeg teev pej kum dab. 34 Lawv yuav thuam nws, nto aub ncaug rau nws, muab nws nplawm thiab muab nws tua. Peb hnub tom qab, nws yuav sawv rov los." 35 Ntxes Npes Dais ob tug tub hu ua Yas Kos thiab Zam txav los ze Yes Xus, nkawd hais rau Yes Xus tias : "Xib Hwb, qhov wb yuav thov ntawm koj, mas wb xav kom koj ua rau wb." 36 Yes Xus hais rau nkawd tias : "Neb xav kom kuv ua dab tsi rau neb ?" 37 Nkawd hais tias : "Thov koj pub wb ib tug zaum ntawm koj sab xis, ib tug zaum ntawm koj sab laug nyob hauv koj lub hwj chim." 38 Yes Xus hais rau nkawd tias : "Neb tsis paub neb thov dab tsi. Neb puas haus taus lub ntim uas kuv yuav haus ? Thiab txais taus lub cim ntxuav uas kuv yuav txais ?” 39 Nkawd teb tias : “Wb ua tau.” Yes Xus hais rau nkawd tias : “Lub ntim uas kuv yuav haus, neb kuj yuav haus, thiab lub cim ntxuav uas kuv yuav txais, neb kuj yuav txais. 40 Hos qhov yuav zaum ntawm kuv sab xis los sab laug, tsis yog kuv yuav muab rau neb. Ntuj npaj qhov ntawd rau leej twg, mas yog leej twg tug.” 41 Kaum leej thwj tim hnov li ntawd, lawv tsis txaus siab rau Yas Kos thiab Zam nkawd. 42 Yes Xus hu cov thwj tim los ntawm nws. Nws hais rau lawv tias : "Nej paub tias cov uas luag saib lawv yog thawj coj hauv cov kuj cuab, mas lawv kav sawv daws xws li ib co tswv. Thiab cov loj yuam sawv daws nruj. 43 Nyob hauv nej, mas yuav tsis zoo li ntawd : leej twg xav ua tus loj nyob hauv nej, nws yuav ua nej tus tub txib. 44 Hos leej twg xav ua tus ntaus thawj hauv nej, nws yuav ua sawv daws tus qhev. 45 Vim tias, Neeg Leej Tub tsis tuaj kom luag tsob hwb nws, nws tuaj tsob hwb sawv daws thiab muab nws txoj sia los ua nqi txhiv coob leej."

    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 28th May 2015, 7:48 am

    TIM 28 LUB 5 HLIS 2015

    Hnub Tsib Lis Piam Yim Nruab Xyoo B Xyoo I

    Zaj Nyeem Ib: NPES XIS LAS 42: 15-25


    15 Zaum no kuv yuav rov nco txog Huab Tais cov hauj lwm, tej yam kuv tau pom, kuv yuav piav txog. Huab Tais ua nws cov hauj lwm yog nws hais lus ua, ces tej nws tsim los mloog nws lus. 16 Lub hnub ci ntsa iab ntsia ntsoov rau tas puas tsav yam, ces Huab Tais lub hwj chim nyob puv hauv nws tej hauj lwm. 17 Huab Tais tsis tau tso cai rau cov neeg ntshiab kom lawv muaj peev xwm piav tau txog Huab Tais tej hauj lwm zoo nkauj zoo saib tas huv tib si, tej hauj lwm uas Tus Huab Tais muaj hwj huam tas nrho thiab tus kav tas txhua yam tsa kom ruaj nreb, kom tas lub sim ceeb nyob khov kho hauv nws lub hwj chim. 18 Huab Tais tsom pom hauv tej qab tiv txwv tob thiab pom hauv neeg nruab siab, nws nkag tau rau hauv cov nru lus zais tob tob. Vim tus Tswv Nyob Txheej Siab paub txhua yam txuj thiab nws saib ntsoov cov xwm tshwm sim txhua caij nyoog. 19 Nws ceeb toom yav dhau los lawm thiab yav tom ntej, nws qhib tej yam zais ntshis tawm rau sawv daws paub. 20 Tsis muaj ib zag tswv yim uas nws yuav paub tsis tau, tsis muaj ib lo lus uas nws yuav hnov tsis tau. 21 Nws tu tau zoo tas txhua yam txaus qhuas uas nws lub tswv yim thoob tsib tau tsim los. Nws ib txwm nyob zoo ib yam tsis muaj hnub pib nws yuav nyob zoo ib yam mus tsis muaj hnub kawg; tsis muaj ib yam dab tsi uas yuav ntxiv tau rau nws los yuav thau tau ntawm nws mus; nws tsis tas yuav vam txog lwm tus pab nws xav tswv yim. 22 Tas nws cov hauj lwm huv tib si zoo nkauj ntxim nyiam ua luaj! Ci lam lug rau yus qhov muag pom txawm tias yog ib pliag xwb! 23 Tas puas tsav yam ntawd muaj txoj sia, lawv nyob mus li, txawm yuav muaj dab tsi tuaj, txhua yam mloog lus. 24 Txhua yam nws tsim muaj nkawm, ib tug txawv ib tug, nws tsis tau tsim ib yam uas zoo tsis txaus. 25 Ib yam txawj ua kom lwm yam qhov zoo tawm tuaj; leej twg thiaj pom dhuav lawv qhov zoo nkauj zoo saib?

    NPN 33: 2-3, 4-5, 6-7, 8-9

    Txais: (6a) Huab Tais hais nws lo lus ces lub ntuj tsim tawm los.

    Nej ntaus nkauj nog ncas ua HUAB TAIS tsaug,
    nej ntaus thaj cheej kaum txoj hlua cav txog nws.
    Nej hu ib zaj nkauj tshiab rau nws;
    Nej qoj cov hlua kom zoo mloog nrog nej cov suab qw zoo siab.

    Txais: (6a) Huab Tais hais nws lo lus ces lub ntuj tsim tawm los.

    HUAB TAIS lo lus yog lus ncaj,
    nws tej num yog num tseeb.
    Nws nyiam kev ncaj thiab kev haum pheej;
    HUAB TAIS txoj kev hlub nyob puv lub ntiaj teb.

    For upright is the word of the LORD
    and all his works are trustworthy.
    He loves justice and right;
    of the kindness of the LORD the earth is full.

    Txais: (6a) Huab Tais hais nws lo lus ces lub ntuj tsim tawm los.

    Huab Tais hais nws lo lus ces lub ntuj tshwm tawm los;
    nws tshuab pa ces cov hnub qub tshwm tawm tuaj.
    Nws sau cov dej hiav txwv los ua zoo li ib co pas dej tauv;
    nws muab cov dej ntuj ntim rau tej lub txhab tob tob.

    Txais: (6a) Huab Tais hais nws lo lus ces lub ntuj tsim tawm los.

    Thov kom tas lub ntiaj teb hwm HUAB TAIS,
    kom tas txhua leej nyob hauv lub qab ntuj ntshai nws.
    Vim nws hais ib los xwb, ces txhua yam tsheej xeeb tuaj;
    nws txib, ces txhua tsav puas yam tshwm tawm tau los.

    Txais: (6a) Huab Tais hais nws lo lus ces lub ntuj tsim tawm los.

    As Les Lus Yas: ZAM 8: 12


    Txais: As les lus yas, as les lus yas.

    Huab Tais Hais tias, kuv yog ntiaj teb neeg qhov pom kev;
    leej twg lawv kuv qab yuav muaj kev kaj lub neej.

    Txais: As les lus yas, as les lus yas.

    Ntawv Moo Zoo: MK 10: 46-52


    46 Thaum Yes Xus nrog cov thwj tim thiab ib pab neeg coob tawm hauv Yes Lis Kos mus, muaj ib tug neeg dig muag thov khawv zaum ntawm ntug kev. Nws hu ua Npas Tis Mes, yog Tis Mes tus tub. 47 Thaum nws hnov tias yog Yes Xus Nas Xas Les, nws pib hu tias : "Yes Xus, Das Vis Leej Tub, thov koj khuv leej kuv !" 48 Muaj ntau leej cem nws kom ua twj ywm, tab sis tus dig muag haj yam hu nrov tias : "Das Vis Leej Tub, thov koj khuv leej kuv." 49 Yes Xus nres, nws hais tias : "Nej hu nws los." Lawv hu tus dig muag tias : "Koj tso siab mog ! Koj sawv mus. Yes Xus hu koj." 50 Ces tus dig muag pov rhees nws lub tsho ntev cia, dhia mus cuag Yes Xus. 51 Yes Xus hais rau nws tias : "Koj xav kom kuv ua dab tsi rau koj ?" Tus dig muag teb rau Yes Xus tias : "Kuv tus Xib Hwb, kuv thov kom kuv qhov muag rov pom kev !" 52 Yes Xus hais rau nws tias : "Koj mus mog ! Koj lub siab ntseeg cawm koj lawm." Tam sis ntawd, tus dig muag rov pom kev, ces nws taug kev lawv Yes Xus qab.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 28th May 2015, 9:07 am

    TIM 29 LUB 5 HLIS 2015

    Hnub Rau Lis Piam Yim Nruab Xyoo B Xyoo I

    Zaj Nyeem Ib: NPES XIS LAS 44: 1, 9-13


    1 Peb yuav cav txog cov neeg nto moo loj, uas yog peb cov yawg koob, raws lub caij lawv ua neej nyob. 9 Muaj ib txhia neeg tsis muaj leej twg nco txog lawv li, lawv ploj mus lawm ntsiag to xws li tsis tau xeeb los ua neeg ib zaug li. Lawv zoo lit sis tau tshwm sim los ua neeg kiag li, lawv tej me nyuam los kuj ib yam. 10 Tab sis muaj ib co neeg zoo uas sawv daws nco ntsoov lawv tej hauj lwm pab neeg. 11 Lawv muaj ib lub cuab tam nplua nuj nyob hauv lawv tej xeeb leej xeeb ntxwv uas yog lawv caj laws ces. 12 Lawv tsoom xeeb ntxwv coj nraim cov lus qhia, thiab lawv cov xeeb ntxwv tej tub ntxhais los coj nraim, vim lawv. 13 Lawv tsoom xeeb ntxwv yuav nyob mus li ib txhis, lawv lub koob meej yuav tsis ploj.

    NPN 149: 1B-2, 3-4, 5-6A +D 9B

    Txais: (4a) Huab Tais zoo siab nyob hauv nws haiv neeg.
    los: As les lus yas

    Nej hu ib zaj nkauj tshiab rau HUAB TAIS,
    nej cav txog nws nyob hauv tsoom ntseeg lub txoos.
    His Xas Lais yuav zoo siab nyob hauv tus uas tsim lawv,
    Xis Yoos cov me nyuam yuav luag ntxhi nyob hauv lawv tus vaj.

    Txais: (4a) Huab Tais zoo siab nyob hauv nws haiv neeg.
    los: As les lus yas

    Lawv yuav ua kev lom zem yoj cev cav txog nws lub npe,
    lawv yauv hu nkauj cav txog nws nrog suab nruas thiab suab nkauj nog ncas.
    Vim HUAB TAIS hlub nws haiv neeg,
    thiab nws muab txoj kev yeej ua zam npua cov neeg me.

    Txais: (4a) Huab Tais zoo siab nyob hauv nws haiv neeg.
    los: As les lus yas

    Cov muaj lub siab ntseeg hom khaj nyob hauv txoj kev nto koob meej;
    lawv yuav hu nkauj zoo siab hauv lawv tej chaw nyob;
    lawv lub qa tsuas muaj qw suab cav txog Tswv Ntuj.
    Cov uas ntseeg nws lawv lub koob meej yog li no. As les lus yas.

    Txais: (4a) Huab Tais zoo siab nyob hauv nws haiv neeg.
    los: As les lus yas

    As Les Lus Yas: ZAM 15: 16

    Txais: As les lus yas, as les lus yas.

    Huab Tais hais tias, kuv tau xaiv nej tawm hauv ntiaj teb los,
    kom nej mus thiab nej txi ib co txiv uas yuav nyob ntev.

    Txais: As les lus yas, as les lus yas.

    Ntawv Moo Zoo: MK 11: 11-26

    11 Yes Xus mus hauv Yes Lus Xas Les, nws chaws mus hauv lub Tuam Tsev Teev Ntuj, nws ntsia txhua yam nyob ncig nws. Thaum ntawd twb lig lawm, nws tawm mus. Nws nrog Pab Kaum Ob leeg mus Npes Tas Nias. 12 Hnub tom qab, thaum lawv tawm hauv Npes Tas Nias mus, Yes Xus tshaib plab. 13 Nws tuaj deb pom ib tsob txiv ncuav pias muaj nplooj, nws mus xyuas saib puas muaj dab tsi noj. Tab sis thaum nws mus txog ze, tsob ncuav pias tsuas muaj nplooj xwb : vim tsis yog lub caij txi txiv. 14 Yes Xus hais rau tsob txiv ncuav pias tias : "Txij no mus, kom txhob muaj neeg noj koj tej txiv ib zaug ntxiv li !" Cov thwj tim hnov Yes Xus hais li ntawd. 15 Lawv tuaj txog Yes Lus Xas Les. Yes Xus chaws mus hauv lub Tuam Tsev Teev Ntuj, nws ntiab cov tub luam tuaj muag thiab cov tuaj yuav toob xib hauv lub Tuam Tsev Teev Ntuj. Nws ntxeev cov tub pauv nyiaj tej rooj, thiab cov muag nquab tej tog zaum. 16 Nws tsis kheev leej twg nqa toob xib hla hauv lub Tuam Tsev. 17 Yes Xus qhia lawv, nws hais rau lawv tias : "Ntawv tau sau tseg tias : Kuv lub tsev yuav hu ua tsev teev Ntuj, cia rau ib tsoom haiv neeg ? Tab sis, nej muab kuv lub tsev ua tub sab lub qhov nkaum !" 18 Cov thawj leej choj thiab cov kws Ntawv Ntshiab hnov, ces lawv nrhiav saib yuav ua cas muab Yes Xus tua. Tab sis lawv kuj ntshai Yes Xus thiab, vim tas tsoom pej xeem zoo siab rau Yes Xus cov lus qhia. 19 Thaum tsaus ntuj, Yes Xus tawm hauv nroog mus sab nraud. 20 Tag kis sawv ntxov, Yes Xus lawv hla mus, lawv pom tsob txiv ncuav pias qhuav ti nkaus cag. 21 Pob Zeb nco dheev txog, nws hais rau Yes Xus tias : "Xib Hwb, koj saib : tsob txiv ncuav pias uas koj tsawm qhuav tas lawm." 22 Yes Xus teb rau lawv tias : "Nej ntseeg Tswv Ntuj mog. 23 Kuv hais tseeb rau nej, yog leej twg hais rau lub roob no tias : "Koj txav, koj dhia lawm hauv dej ntuj," yog tias tus ntawd tsis ua xyem xyav hauv siab li, thiab nws ntseeg tias qhov nws hais yuav tshwm sim tiag, mas qhov ntawd yuav tsheej xeeb rau nws tau. 24 Vim li ntawd, kuv thiaj hais rau nej tias : tas puas tsav yam uas thaum nej teev Ntuj, nej thov, nej cia li ntseeg tias nej twb tau txais lawm, ces Ntuj yuav pub yam ntawd rau nej. 25 Hos thaum nej tab tom sawv ntsug teev Ntuj, yog nej muaj ib lo lus tsis txaus siab rau ib tug, mas nej zam rau nws, kom xwv nej Txiv nyob saum ntuj zam txhaum rau nej thiab.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 29th May 2015, 2:29 pm

    TIM 30 LUB 5 HLIS 2015

    Hnub Xya Lis Piam Yim Nruab Xyoo B Xyoo I

    Zaj Nyeem Ib: NPES XIS LAS 51: 12-20a


    12 Kuv ua Huab tsaug thiab kuv qhuas txog nws, kuv yuav foom lus zoo rau Huab Tais lub npe. 13 Thaum kuv hluas, thaum kuv tseem tsis tau mus pla ua loj leeb, kuv yeej tab meeg nrhiav kev thoob tsib nyob hauv txoj kev teev Ntuj. 14 Nyob ntawm lub tsev ntshiab hauv ntej kuv tau thov kom kuv muaj kev thoob tsib. Kuv yuav nrhiav kev thoob tsib mus txog kuv hnub kawg. 15 Kev thoob tsib tawg paj zoo li ib re txiv cawv tab tom siav, kuv muaj kev zoo siab nyob hauv nws. Kuv txhais taw muab tau txoj kev yog taug vim txij kuv yav hluas los kuv yeej nrhiav kev thoob tsib . 16 Kuv ib nyuag tig ntsej mloog kom zoo, ces kuv tau txais kev thoob tsib, thiab kuv nrhiav tau ib txoj kev qhuab qhia tob. 17 Vim kev thoob tsib mas kuv thiaj txawj ua zoo tuaj, kuv yuav cav txog tus muab kev thoob tsib rau kuv lub hwj chim. 18 Kuv txiav siab tias kuv yuav siv kev thoob tsib ua kuv lub neej. Kuv tau mob siab nrhiav qhov zoo, kuv yuav tsis tau kev txaj muag. 19 Kuv tus plig tau ntaus tsam kom tau kev thoob tsib. Kuv tau muab siab coj raws Txoj Cai, kuv tau tsa tes rau saum ntuj thov, thiab tau quaj tu siab vim tshuav ntau yam kuv tsis paub. 20 kuv tig kuv tus plig rau kev thoob tsib ces kuv nrhiav tau nws nyob hauv txoj kev dawb huv.

    NPN 19: 8, 9, 10, 11

    Txais: (9ab) HUAB TAIS cov cai lij choj yog kev ncaj ua kom neeg lub siab kaj.

    HUAB TAIS txoj cai zoo tas nrho,
    nws ntxiv siav rau ntsuj plig;
    HUAB TAIS tus txhooj yog qhov tseeb,
    nws ua kom tus neeg ruam thoob tsib tuaj.

    Txais: (9ab) HUAB TAIS cov cai lij choj yog kev ncaj ua kom neeg lub siab kaj.

    HUAB TAIS cov cai lij choj yog kev ncaj
    ua kom neeg lub siab kaj.
    HUAB TAIS lo lus qhia ntshiab si,
    ua kom neeg pom kev.

    Txais: (9ab) HUAB TAIS cov cai lij choj yog kev ncaj ua kom neeg lub siab kaj.

    Kev hwm HUAB TAIS yog txoj kev dawb huv,
    kev hwm Huab Tais yuav nyob mus li.
    HUAB TAIS cov lus txiav txim yog raws qhov tseeb,
    Yog raws kev ncaj ncees tas mus lij.

    Txais: (9ab) HUAB TAIS cov cai lij choj yog kev ncaj ua kom neeg lub siab kaj.

    Tsim nyog ntshaw dua kub,
    los ib pawg tseem kub.
    qab dua paj zib,
    los zib ntab zib mu.

    Txais: (9ab) HUAB TAIS cov cai lij choj yog kev ncaj ua kom neeg lub siab kaj.

    As Les Lus yas: KLX 3: 16A, 17C

    Txais: As les lus yas, as les lus yas.

    Thov kom Leej Pleev lo lus muaj nqes nyob puv npo hauv nej,
    kom nej ua Tswv Ntuj peb Leej Txiv tsaug nyaub hauv nws.

    Txais: As les lus yas, as les lus yas.

    Ntawv Moo Zoo: MK 11: 27-33

    27 Yes Xus lawv rov qab los hauv Yes Lus Xas Les. Thaum Yes Xus mus mus los los hauv lub Tuam Tsev Teev Ntuj, ces cov thawj leej choj, cov kws Ntawv Ntshiab thiab cov txwj laus tuaj cuag nws. 28 Lawv hais rau nws tias : "Koj tau cai qhov twg los, koj thiaj ua tej ntawd ? Leej twg muab cai rau koj kom ua li ntawd ?" 29 Yes Xus teb rau lawv tias : "Kuv kuj yuav nug nej ib lo thiab. Nej teb kuv, kuv mam li qhia nej tias kuv tau cai ntawm leej twg los ua tej ntawd. 30 Zam lub cim ntxuav puas tuaj ntawm Ntuj los ntawm neeg tuaj ? Nej teb kuv saib." 31 Ces lawv sib tham tias : "Yog peb hais tias : 'Tuaj ntawm Ntuj tuaj,' nws yuav hais tias : 'Ua cas nej tsis ntseeg nws ?' 32 Yog li peb puas hais tias: ‘Tuaj ntawm neeg tuaj ? ‘” Tiam sis lawv kuj ntshai tsoom sid, vim tas sawv daws saib Zam yog ib tug yaj saub. 33 Ces lawv teb li no rau Yes Xus : "Peb tsis paub." Yes Xus hais rau lawv tias : "Kuv kuj yuav tsis qhia nej tias kuv tau cai ntawm leej twg los ua tej ntawd thiab."




    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 31st May 2015, 4:02 pm

    TIM 1 LUB 6 HLI 2015

    HNUB OB LIS PIAM CUAJ NRUAB XYOO B XYOO I

    Hwm Leej Ntshiab Justin, tuag ua tim khawv

    Zaj Nyeem Ib: TOS NPIS 1: 3; 2: 1B-8


    1 3 Kuv, Tos Npis, tau ua neej raws txoj kev tseeb thiab kev ncaj ncees tas kuv sid. Kuv tau ua ntau yam pub pab rau kuv cov kwv tij thiab rau kuv haiv neeg uas nrog kuv nyob txim nyob Nis Nis Vas, nyob As Xis Lias teb.
    2 1b Thaum txog peb lub Hmoov Tsib Caug, uas kuj yog lub Hmoov cov Lis Piam, lawv npaj tau ib roog qav qab rau kuv noj, kuv tab tom qhau cev ntawm rooj yuav noj mov. 2 Lawv rau tau rooj thiab nqa tau ntau yam zaub mov los txawb rau ntawm kuv xub ntiag, ces kuv hais rau kuv tus tub Tos Npias tias: “ Me tub, koj mus nrhiav nyob hauv peb cov kwv tij nyob txim nyob Nis Nis Vas saib puas muaj ib tug pluag uas nws tseem muaj lub siab nco ntsoov txog Tswv Ntuj; koj coj nws los nrog kuv noj kuv pluas mov. Me tub, kuv yuav nyob ntawm no tos koj rov los." 3 Tos Npias thiaj mus nrhiav ib tug neeg pluag nyob hauv peb cov kwv tij lawm. Tab sis ib me ntsis nws rov los, nws hais tias : "Txiv !" Kuv teb tias : "Dab tsi, me tub ?" Nws hais tias : "Txiv, lawv nyuam qhuav muab peb ib tug neeg tua tuag, lawv muab nws zawm caj dab tuag, lawv muab nws coj tuaj pov rau ntawm tshav kiab, nws lub cev tseem nyob ntawd." 4 Ces kuv sawv tsees tam sid, tso plhuav kuv pluas mov tseg tsis kov li. Kuv mus nkaus hlo tus neeg tuag kwv tom kiab los, kuv muab zais rau hauv kuv ib kem tsev tos kom lub hnub poob qho tso, kuv mam coj mus faus. 5 Kuv thiaj rov los, kuv mus ntxuav cev tas, kuv mam los noj kuv pluas mov ntxuag kua muag. 6 Kuv nco txog tus Yaj Saub As Mos cov lus saub hais txog Npes Thes tias : "Nej tej hnub nyoog nqaum paj nqaum nruas yuav hloov ua hnub nyoog ntoo xyom, nej tej suab hu nkauj yuav hloov ua suab nyiav." 7 Ces kuv quaj. Thaum hnub poob qho lawm, kuv mus khawb tau ib lub qhov ntxa, kuv muab tus tuag faus rau hauv. 8 Cov neeg nyob ze kuv luag luag kuv tias : "Saib ! Nws rov qab tsis ntshai lawm. Zaum tas los luag twb tau nrhiav nws tua vim tib zaj no xwb, ces nws twb khiav yuav luag tsis dim. Nyem no, nws tseem rov qab nyiag faus cov neeg tuag dua !"

    NPN 112: 1B-2, 3B-4, 5-6

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Nws muaj hmoov zoo tus uas hwm HUAB TAIS,
    thiab nyiam coj Huab Tais cov lus qhia tas siab tas ntsws.
    Nws caj ces yuav muaj peev xwm nyob ntiaj teb,
    ntuj yuav foom koob hmoov rau caj ces neeg siab ncaj.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Nws txoj kev ncaj yuav nyob ruaj nreb mus li.
    Nws ci sawv hauv qhov tsaus ntuj,
    ua lub teeb kaj cov neeg siab ncaj,
    nws muaj lub siab zoo, khuv leej luag, thiab ua ncaj.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Tus neeg txawj hlub luag thiab qiv rau luag nws txoj hmoov zoo.
    Nws tswj nws tej nyiaj txiag raws kev ncaj.
    Tus neeg ncaj yuav nyob ruaj nreb,
    sawv daws yuav nco ntsoov txog nws mus li

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    As Les Lus Yas: QYTN 1: 5AB

    Txais: As les lus yas, as les lus yas.

    yes Xus Pleev, koj yog tus tim khawv tseeb,
    koj yog tus tub hlob yug ntawm txoj kev tuag los.
    Koj tau hlub peb thiab thiab muab koj roj ntsha
    los txhiv pev dim ntawm peb cov txhaum.

    R. Alleluia, alleluia.

    Ntawv Moo Zoo: MK 12: 1-12

    1 Yes Xus pib hais tej zaj paj lug li no : "Muaj ib tug neeg cog tau ib daim teb txiv cawv. Nws xov laj kab ncig, nws txaug ib lub zeb tsuam cawv, thiab nws txhim ib lub lawj siab siab. Nws ntiav ib co tub zog saib, ces nws tawm rooj mus ua qhua deb. 2 Thaum txog caij, nws xa ib tug tub txib mus cuag cov zov teb, kom lawv muab ib feem ntawm cov txiv cawv rau nws. 3 Tab sis lawv nthos nkaus nws, muab nws ntaus tas, kom nws rov qab mus tes dawb tes npliag. 4 Tus tswv teb xa dua ib tug tub txib mus : cov tub zog kuj ntaus nws taub hau thiab ua tub qaug nws. 5 Tus tswv teb rov xa dua ib tug mus : cov tub zog muab tus tub txib ntawd tua. Lawv kuj ua ib yam li ntawd rau ntau tus tub txib, lawv muab ib co ntaus, muab ib co tua. 6 Tus tswv teb tseem tshuav ib tug neeg ntxiv, yog nws tus tub uas nws nyiam. Nws xa tus tub mus tom qab, nws xav tias : ‘Lawv yuav hwm kuv tus tub.’ 7 Tab sis, cov tub zog sib tham tias : ‘Tus ntawd yog tus yuav txais lub cuab tam. Tsuag tsuag ! Peb muab nws tua, lub cuab tam thiaj yuav yog peb tug.’ 8 Ces lawv nthos nkaus nws, muab nws tua thiab coj nws mus pov tseg rau tom ntug teb. 9 Tus tswv teb yuav ua dab tsi ? Nws yuav tuaj muab cov zov teb tua, thiab yuav muab daim teb txiv cawv pub rau lwm cov neeg. 10 Nej tsis tau nyeem cov lus no hauv Ntawv lod : ‘Lub pob zeb uas cov tub txhim tsev muab pov tseg, hloov ua lub pob zeb txheem ru tsev. 11 Qhov ntawd, yog Huab Tais ua thiaj tau li ntawd, yog ib yam zoo kawg rau peb qhov muag ntsia?’ “ 12 Lawv to taub tias Yes Xus zaj paj lug no tsom lawv hais. Lawv nrhiav kev ntes Yes Xus, tab sis lawv ntshai tsoom sid. Ces lawv tso Yes Xus tseg, lawv rov mus.




    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 1st June 2015, 6:13 am

    TIM  2  LUB  6  HLI   2015

    Hnub Peb Lis Piam Cuaj Nruab Xyoo B Xyoo I

    Zaj Nyeem Ib:   TOS NPIS  2: 9-14



    9 Hmo ntawd, kuv da dej tas, kuv mus nraum peb lub tshav, kuv mus pw ntawm taw ntsa loog; sov sov ces kuv pw tsis npog ntsej muag. 10 Kuv tsis paub tias nyob ncaj saum qhov chaw kuv pw, muaj ib co noog ua zes rau saum phab ntsa. Txawm muaj ib tawb quav noog poob nthav sov so los rau hauv kuv ob lub qhov muag. Kuv ob lub qhov muag thiaj hlav tej daim dawb dawb. Kuv coj mus rau cov kws tshuaj kho ib tug dhau ib tug; tab sis lawv yim muab lawv cov tshuaj rau mas yim haj yam mob loj tuaj xwb,  ces thaum kawg kuv cia li ua neeg dig muag. Kuv tsis pom kev li ntawd tau plaub xyoos, kuv cov kwv tij nrog kuv tu siab kawg. As His Kas yug kuv tau ob xyoos ces nws mus dua Es Lis Mais teb lawm. 11 Thaum ntawd kuv poj niam thiaj As Nas mus ua hauj lwm, nws muab plaub yaj los tooj ua xov thiab nws ntos ntaub rau cov neeg tuaj kom nws ntos. 12 Thaum ntos tau lawm nws xa mua rau lawv ces lawv them nqi rau nws. Hnub tim 7 lub peb hlis, kuv poj niam ua tiav ib tug ntaub thiab xa rau cov tswv. Lawv them nqe rau nws tas tib si thiab lawv tseem pub ib tug tshis rau nws coj los tua noj. 13 Thaum nws nkag los tsev, tus tshis txawm quaj. Kuv hu kuv poj niam tias: "Tus tshis ntawd los qhov twg los ? Tej zaum ntshai yog nyiag los xwb mas coj rov mus rau nws tus tswv. Peb tsis muaj cai noj tej yam nyiag los." 14 Kuv poj niam hais tias : "Yog lawv pub rau kuv, ntxiv kuv tus nqi zog xwb !" Kuv tsis ntseeg, kuv kom kuv poj niam cab rov mus rau cov tswv, vim tias kuv pab kuv poj niam txaj muag heev. Ces kuv poj niam teb tias : "Koj tej kev niaj hnub pub rau luag dua twg lawd? Koj tej kev niaj hnub ua zoo zoo xwb dua twg tas lawd?  Sawv daws paub ntsoov tias koj tau dab tsi vim tej ntawd ntag los mas."

    NPN 112:1-2, 7-8, 9

    Txais:    (7bc) Tus neeg ncaj lub siab ruaj nreb tso siab lug rau Huab Tais.
    los:   As les lus yas.

    Nws muaj hmoov zoo tus uas hwm HUAB TAIS,
    thiab nyiam coj Huab Tais cov lus qhia tas siab tas ntsws.
    Nws caj ces yuav muaj peev xwm nyob ntiaj teb,
    ntuj yuav foom koob hmoov rau caj ces neeg siab ncaj.

    Txais:    (7bc) Tus neeg ncaj lub siab ruaj nreb tso siab lug rau Huab Tais.
    los:   As les lus yas.

    Nws tsis ntshai hnov ib tsab xov phem;
    nws lub siab ruaj nreb, nws tso siab rau HUAB TAIS.
    Nws lub siab khob kho, nws tsis txhawj,
    nws yuav tsa taub hau siab saib nws cov yeeb ncuab.

    Txais:    (7bc) Tus neeg ncaj lub siab ruaj nreb tso siab lug rau Huab Tais.
    los:   As les lus yas.

    Nws siab dav, nws pub ntau rau cov pluag :
    nws txoj kev siab dav siab ncaj yuav nyob mus li,
    nws yuav muaj ntsej muag, nws lub koob meej yuav nrov.

    Txais:    (7bc) Tus neeg ncaj lub siab ruaj nreb tso siab lug rau Huab Tais.
    los:   As les lus yas.

    As Les Lus Yas: ES FES XOS  1: 17-18

    Txais:    As les lus yas, as les lus yas.

    Thov kom peb tus Huab Tais Yes Xus Pleev leej Txiv
    tso qhov pom kev ci tuaj kaj peb cov qhov muag hauv peblub siab,
    kom peb pom tias txoj kev tso siab uas
    Tswv Ntuj hu nej los nyob hauv, zoo npaum li cas,

    Txais:    As les lus yas, as les lus yas.

    Ntawv Moo Zoo: MK 12: 13-17

    13 Ob peb tug Fas Lis Xais thiab Hes Los Dias raug luag xa tuaj lem  Yes Xus kom nws hais lus yuam kev. 14 Lawv tuaj txog, lawv hais rau Yes Xus tias : "Xib Hwb, peb paub tias koj yog ib tug neeg hais qhov tseeb, thiab koj tsis tsa leej twg cai, vim koj tsis saib tib neeg sab nraud. Koj tsuas qhia Tswv Ntuj txoj kev raws qhov tseeb xwb. Puas kheev them se rau Xes Ntxas los tsis kheev ? Peb puas yuav tsum them se los tsis them ?" 15 Tab sis Yes Xus paub tias lawv siab nkhaus, ces nws hais rau lawv tias : "Ua cas nej xav sim kuv ? Muab ib lub txiaj nyiag los rau kuv saib." 16 Lawv muab ib lub txiaj nyiag los, Yes Xus thiaj hais rau lawv tias : "Tus duab no yog leej twg tus ? Thiab cov npe ntawv hauv no yog leej twg li ?" Lawv hais rau Yes Xus tias : "Yog Xes Ntxas li." 17 Ces Yes Xus hais rau lawv tias : "Yam twg yog Xes Ntxas tug, ces nej muab rau Xes Ntxas, yam twg yog Tswv Ntuj tug, mas nej muab rau Tswv Ntuj." Ces lawv nyob hab nuv cia, tsis paub xav dab tsi txog nws.

    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 2nd June 2015, 9:09 am

    TIM  3  LUB  6  HLI   2015

    Hnub Plaub Lis Piam Cuaj Nruab Xyoo B Xyoo I
    Hwm Leej Ntshiab Charles Lwanga thiab cov, tuag ua Tim Khawv

    Zaj Nyeem Ib:  TOS NPIS 3: 1-11A, 16-17A



    1 Ces tu kuv siab tas nrho, kuv xyu tej suab thiab kuv kua muag poob. Kuv thiaj hais zaj teev Ntuj no tias : 2 "HUAB TAIS, koj siab ncaj, koj ua qhov twg yog qhov ncaj.  Koj tej kev tsuas yog txiaj ntsim thiab qhov tseeb xwb. Koj yog tus txiav txim rau lub ntiaj teb.  3 Vim li no, thov koj nco txog kuv, Huab Tais, thov koj tig saib kuv. Koj tsis txhob rau txim rau kuv vim kuv tej kev txhaum los tej kev yuam kev los vim kuv cov yawg koob tej kev txhaum.  Vim peb tau ua txhaum rau koj, 4 peb tau hla koj tej lus qhia, ces koj tau tso peb raug luag tuaj lwg peb, raug luag tuaj cab peb mus kaw, thiab raug luag tua, raug luag hais, raug luag thuam thiab cem nyob hauv cov haiv neeg uas koj muab peb cais mus nyob.  5  Koj tej kev txiav txim rau kuv yeej tseeb thaum koj muab txim rau kuv vim kuv tej kev txhaum thiab kuv cov yawg koob tej kev txhaum.  6 Nyem no, thov koj ua rau kuv raws li koj nyiam. Thov koj thau kuv txoj sia mus. Kuv xav dim ntawm lub ntiaj teb no mus, kuv xav rov qab mus ua av. Yog kuv tuag mas zoo dua kuv ciaj. Rau qhov kuv raug lawv lam tau lam cem kuv, tu kuv siab loj tas nrho ! HUAB TAIS, kuv tos koj tuaj cawm kuv ntawm txoj kev txom nyem no. Thov koj cia kuv mus nyob lub teb chaws kuv yuav so mus li. HUAB TAIS, thov koj tsis txhob fee koj lub ntsej muag rau kuv. Vim kuv tuag zoo dua cia kuv ua neej raug txom nyem loj npaum no thiab cia kuv hnov luag cem kuv.”  
    7 Tib hnub ntawd, Xas Las uas yog Las Nkus Es tus ntxhais nyob Es Npas Tas Nas nyob Mes Dias teb kuj raug nws txiv ib tug ntxhais txib thuam nws thiab. 8 Vim tias lawv twb muab nws pub tshoob rau xya tus txiv lawm, tab sis tus dab phem As Mos Des uas nws phem tshaj plaws hauv cov dab phem, muab nws cov txiv tua tuag tas tib si, tsis pub lawv tau nrog Xas Las pw ua niam txiv raws tus kev cai li. Ces tus ntxhais txib tseem hais tias : "Twb yog koj muab koj cov txiv tua xwb los mas ! Koj yuav txiv xya zaus lawm, koj txoj hmoov tsis zoo ib zaug li ! 9 Tsis yog vim koj cov txiv tuag tas ces koj txawm muaj cai rau txim rau peb ! Koj cia li mus raws koj cov txiv qab mas ! Kom xwv peb tsis txhob tau pom koj ib tug tub los ib tug ntxhais li !" 10 Hnub ntawd, Xas Las tu siab loj, nws quaj. Nws nce mus saum nws txiv lub paim, nws npaj tias nws yuav mus dai tuag nyob saud. Tab sis nws ho xav tau tias : "Tsam luag tej yuav cem kuv txiv ne? Lawv yuav hais tias : 'Koj muaj ib tug nyuag ntxhais rau koj hlub xwb, koj tseem tsis muaj hmoo, nws tseem dai tuag lawm thiab !' Kuv tsis xav ua kom kuv txiv tu siab li ntawd thaum nws yav laus no mus txog hnub nws tuag. Ntshai zoo dua kom kuv txhob dai tuag, tiam sis kuv  yuav thov HUAB TAIS ua kom kuv tuag, kom kuv thiaj tsis hnov luag tej thuam kuv ntxiv." 11 Tam sim ntawd, Xas Las tsa tes tig mus ntawm qhov rais, nws thov Ntuj tias : "HUAB TAIS ,thov kom koj nto koob meej, Tswv Ntuj khuv leej neeg, kom koj lub npe ntshiab nto koob meej. Thov kom koj nto koob meej nyob hauv koj tej dej num mus ib txhiab ib txhis!”
    16 Hnub ntawd, Tos Npis thiab Xas Las nkawd ob zag thov ntuj nce mus txog pem Tswv Ntuj lub hwj chim. 17 Tswv Ntuj thiaj xa Las Fais tuaj kho nkawd ob leeg.  Las Fais yuav tuaj laws tej yam dawb dawb nyob hauv Tos Npis qhov muag kom nws rov pom kev tuaj; thiab nws yuav tuaj muab Las Nkus Es tus ntxhais Xas Las txis rau Tos Npis tus tub Tos Npias ua poj niam; thiab nws tuaj cawm Xas Las ntawm tus dab phem As Mos Des uas phem tshaj plaws lwm cov dab.

    NPN 25: 2-3, 4-5AB, 6 + 7BC, 8-9

    Txais:   (1) Huab Tais, kuv tsa kuv tus ntsuj plig rau koj.

    Kuv tso siab rau koj, thov koj tsis txhob cia kuv poob ntsej muag,
    txhob pub kom  kuv cov yeeb ncuab tau kev thuam kuv.
    Cov neeg tso siab rau koj, tsis muaj ib tug yuav poob ntsej muag,
    hos cov neeg ntxeev siab rau kev ntseeg yuav poob ntsej muag.

    Txais:   (1) Huab Tais, kuv tsa kuv tus ntsuj plig tuaj rau koj.

    Huab Tais, thov rub kuv mus rau hauv koj tej kev,
    thov qhia koj tej kev rau kuv taug,
    txhawb kom kuv mus raws koj txoj kev tseeb thiab qhia rau kuv kawm,
    vim koj yog Tswv Ntuj, tus cawm kuv.

    Txais:   (1) Huab Tais, kuv tsa kuv tus ntsuj plig tuaj rau koj.

    Huab Tais, koj yeej ib txwm muaj lub siab zoo,
    thiab muaj kev hlub txij puag thaum ub los, thov koj nco ntsoov.
    Huab Tais, vim koj lub siab hlub neeg,
    thov koj nco txog kuv.

    Txais:   (1) Huab Tais, kuv tsa kuv tus ntsuj plig tuaj rau koj.

    Huab Tais yog tus ncaj tus zoo,
    nws thiaj coj tus neeg txhaum rov los rau txoj kev zoo.
    Nws coj tus neeg me mus raws txoj kev ncaj,
    nws qhia nws txoj kev rau tus neeg txom nyem taug.

    Txais:   (1) Huab Tais, kuv tsa kuv tus ntsuj plig tuaj rau koj.

    As Les Lus Yas ZAM  11: 25A, 26

    Txais:    As les lus yas, as les lus yas.

    Huab Tais hais tias: Kuv yog txoj kev sawv rov los thiab txoj sia,
    leej twg ntseeg txog kuv yuav tsis tuag li.

    Txais:    As les lus yas, as les lus yas.

    Ntawv Moo Zoo: MK 12: 18-27

    18 Ib co xas dus kais tuaj cuag Yes Xus. Lawv yog cov uas hais tias neeg tuag yuav tsis sawv rov los. Lawv nug Yes Xus tias : 19 "Xib Hwb, Mais Xes sau cia rau peb tias : "Yog leej twg ib tug kwv tij tuag tseg poj niam cia, tsis tau muaj me nyuam, mas tus kwv yuav tsum qaws tus niam tij kom tsa tau tus kwv tij ntawd lub keeb sawv." 20 Muaj xya leej kwv tij. Thawj tug yuav poj niam, nws tuag, tsis tau muaj tub ki. 21 Tus ob qaws tus niam tij ntawd, nws kuj tuag tsis tau muaj tub ki ; tus peb kuj tuag ib yam li ntawd. 22 Xya leej kwv tij ntawd yeej tsis muaj tub ki li. Thaum lawv tuag tas lawm, tus poj niam kuj tuag thiab. 23 Txog caij neeg lub cev sawv rov los, lawv kuj yuav sawv rov los, mas tus poj niam ntawd yuav yog leej twg tus ? Vim lawv xya tus kwv tij puav leej tau yuav nws ua lawv poj niam." 24 Yes Xus hais rau lawv tias : "Puas yog vim nej tsis paub Ntawv Ntshiab thiab tsis paub Tswv Ntuj lub hwj huam, nej thiaj yuam kev ? 25 Vim tias, thaum neeg lub cev yuav sawv hauv cov tuag los, sawv daws yuav tsis yuav poj niam, tsis yuav txiv, sawv daws yuav zoo li cov Tshiab nyob saum ntuj. 26 Hais txog cov tuag kev sawv rov los, nej puas tau nyeem Mais Xes phau Ntawv, zaj hais txog Tsob Pos, uas Tswv Ntuj hais rau Mais Xes tias : Kuv yog Has Nplas Has tus Tswv Ntuj, His Xas Has tus Tswv Ntuj, Yas Kos tus Tswv Ntuj. 27 Tswv Ntuj tsis yog cov tuag tus Tswv Ntuj. Yog cov neeg ciaj tus Tswv Ntuj. Nej yuam kev lawm deb."

    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 3rd June 2015, 7:30 am

    TIM 4 LUB 6 HLI 2015

    Hnub Tsib Lis Piam Cuaj Nruab Xyoo B Xyoo I

    Zaj Nyeem Ib: TOS NPIS 6: 10-11; 7: 1BCDE, 9-17; 8: 4-9A


    6 10 Thaum tus tshiab Las Fais thiab Tos Npias mus txog Mes Dias teb lawm thiab mus yuav txog Es Npas Tas Nas,
    11 tus tshiab hais rau Tos Npias tias: “Tus kwv Tos Npias!” Nws teb tias: “Dab tsi?” Tus tshiab hais tias: “Hmo no wb yuav mus pw hauv Las Nkes tsev; nws yog koj ib tug txheeb ze. Nws muaj ib tug ntxhais hu ua Xas Las.”
    7 1b… Ces nws coj tus hluas mus tom Las Nkes tsev; nkawd pom Las Nkes zaum ntawm lub rooj vag ntawm nws lub ntsa vaj. Nkawd xub hu nws. Nws teb nkawd tias: “Neb tuaj los ob tug kwv tij! Nyob zoo rau neb thiab os, los tsev mas!” Ces nws coj nkawd los hauv nws tsev.
    9 Las Nkes ntes ib tug yaj los tua, nws ua ib pluag mov txais nkawd zoo. Thaum nkawd da dej ntxuav cev tas, nkawd los noj mov, Tos Npias hais rau Las Fais tias : "Tij laug As Ntxas Lias, thov koj pab kuv mus thov Las Nkes kom nws muab kuv tus muam Xas Las rau kuv yuav yuad?' 10 Las Nkes hnov nws cov lus no, Las Nkes hais rau nws tias : "Hmo no koj noj mov haus dej kom txaus txaus tso ! Koj tsis txhob txhawj, cav tsis muaj leej twg muaj cai yuav yuav kuv tus ntxhais Xas Las, tsuas yog koj tib leeg xwb os, tus kwv. Txawm li cas los kuv yeej muab tsis tau rau lwm tus, vim koj twb yog tus ze nws tshaj lawm. Tiam sis, me tub ! Kuv yuav hais tseeb tseeb rau koj. 11 Kuv twb nrhiav nyob hauv peb cov kwv tij xya tus txiv rau nws lawm. Tab sis cov txiv ntawd puav leej tuag tas tib si thawj hmo thaum lawv nyuam qhuav nkag kiag rau nws chav pw. Ua li mas nyem no koj rau siab noj thiab haus tso mog ! HUAB TAIS yuav pub nws lub txiaj ntsim rau koj thiab nws txoj kev kaj lug rau koj xwb." Tos Npias txawm teb tias : "Kuv tsis xav noj tsis xav haus li, yog koj tsis xub hais tias koj yuav muab rau kuv thiab tsis muab tso." Las Nkes thiaj teb tias: “Cia ua li koj nyiam, vim raws Mais Xes txoj Cai ces nws yeej poob rau koj, yog lub ntuj txiav kom muab rau koj. Ces kuv muab koj tus muam cob rau koj. Txij no mus koj yog nws tus nus thiab nws yog koj tus muam. Nws yog koj tug txij hnub no mus li lawm. Tus Tswv saum lub Ntuj yeej yuav saib xyuas koj hmo no os me tub, thiab yuav muab nws txoj koob hmoov thiab nws txoj kev kaj siab lug rau koj.” 12 Las Nkes hu nws tus ntxhais Xas Las los, nws muab tus ntxhais txhais tes cob rau Tos Npias, nws hais tias : "Kuv muab kuv tus ntxhais cob rau koj. Mais Xes Txoj Cai thiab tus txhooj yeej qhaib nws los ua koj poj niam lawm. Koj yuav nws, koj coj nws mus nrog koj nyob hauv koj txiv tsev, koj ua siab loj loj. Thov kom Tswv Ntuj pub neb rov mus txog tsev, mus dawb mus huv mog !" 13 Las Nkes hais rau nws poj niam kom mus muab ib kauj ntawv los rau nws sau. Ces Las Nkes sau ntawv cog lus cia tias nws muab nws tus ntxhais rau Tos Npias yuav ua poj niam raws li Mais Xes kev cai. 14 Ua li ntawd tas sawv daws thiaj noj mov haus dej. 15 Las Nkes hu nws poj niam Es Nas los thiab hais tias : "Leej muam, koj npaj kem tsev ob, koj coj wb tus ntxhais mus pw hauv." 16 Es Nas mus kho tau chaw raws li nws tus txiv hais kom kho, nws los coj nws tus ntxhais mus pw. Nws quaj quaj rau tus ntxhais tas, nws so kua muag thiab nws hais tias : "Kuv me ntxhais, koj tso siab mog ! Tswv Ntuj yuav hloov koj txoj kev tu siab los ua kev zoo siab mog ! Ua siab loj loj!" Ces leej niam tawm los.
    8 4 Thaum tus ntxhais niam thiab txiv tawm hauv chav los thiab kaw qhov rooj rau lawm, Tos Npias sawv tsees saum txaj los, nws hais rau Xas Las tias: "Leej muad, wb sawv ! Wb ob leeg yuav tsum teev Ntuj tso, wb yuav thov kom HUAB TAIS pub nws lub txiaj ntsim pab wb thiab kom nws pov hwm wb." 5 Ces Xas Las sawv thiab nkawd ob leeg teev Ntuj thov kom Tswv Ntuj pov hwm nkawd. Tos Npias thiaj pib hais tias : "Peb cov yawg koob tus Tswv Ntuj, thov kom koj nto koob meej, thiab kom koj lub npe ntoo koob meej mus txheej dhau txheej ! Kom cov txheej ntuj saud thiab tas txhua tsav yam koj tau tsim los cav txog koj lub koob meej mus txheej dhau txheej. 6 Koj yog tus tsim As Das, koj yog tus tsim Es Vas nws poj niam kom ua tus pab nws tus txhawb nws, ces caj ces tib neeg thiaj yug ntawm nkawd ob leeg los. Koj yog tus hais tias : 'Yuav tsis txhob cia txiv neej nws nyob nws ib leeg, peb yuav tsim ib tug los pab nws kom zoo li nws.' 7 Nyem no kuv yuav kuv tus muam no, tsis yog kuv yuav los ua si. Kuv yuav vim kuv musj lub siab dawb paug hlub nws tiag. Thov koj hlub nws thiab hlub kuv. Thiab thov koj pub wb ua wb lub neej laus nkoos ua ke!" 8 Nkawd ob leeg ua ke teb tias : "Ua li ! Ua li!" 9 Ces nkawd mus pw ib hmos.

    NPN 128: 1-2, 3, 4-5

    Txais: (1a) Cov uas hwm Huab Tais tau txoj hmoov zoo.

    Nej cov hwm HUAB TAIS, nej txoj hmoov zoo,
    thiab nej cov taug raws nws txoj kev!
    Vim nej yuav tau noj lub txiv ntawm nej tej hauj lwm,
    nej yuav tau hmoov zoo thiab nws yuav nyiam nej.

    Txais: (1a) Cov uas hwm Huab Tais tau txoj hmoov zoo.

    Kuj tus poj niam yuav zoo li ib txoj hmab txiv cawv txi txiv ncw
    nyob rau hauv koj tej kaum vaj kaum tsev,
    koj cov me nyuam zoo li ib co ntoo txiv roj
    nyob ncig lees koj lub phaj tsum.

    Txais: (1a) Cov uas hwm Huab Tais tau txoj hmoov zoo.

    Nej saib, tus neeg muaj txoj hmoov zoo
    yog tus ntshai HUAB TAIS.
    HUAB TAIS nyob saum roob Xis Yoos foom koob hmoov rau nej,
    kom nej tau pom Yes Lus Xas Les vam meej niaj hnub hauv nej lub neej.

    Txais: (1a) Cov uas hwm Huab Tais tau txoj hmoov zoo.

    As Les Lus Yas: 2 TMT 1: 10

    Txais: As les lus yas, as les lus yas.

    Yes Xus Pleev tus Cawm Peb tau rhuav txoj kev tuag pov tseg
    thiab ua kom txoj sia nyob mus li tawm tuaj nyob hauv lub Moo Zoo.

    Txais: As les lus yas, as les lus yas.

    Ntawv Moo Zoo: MK 12: 28-34

    28 Ib tug kws Ntawv Ntshiab hnov lawv sib cav, nws pom tias Yes Xus teb raug kawg rau cov xas dus kais, nws txav los nug Yes Xus tias : "Nyob hauv cov lus qhia tas huv tib si, lo lus qhia twg yog thawj lo lus qhia ?" 29 Yes Xus teb rau nws tias : "Thawj lo lus qhia yog lo lus no : "His Xas Lais, koj mloog mog ! Peb tus Huab Tais Tswv Ntuj tib leeg xwb yog Huab Tais. 30 Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog. 31 Lo lus qhia ob yog lo lus no : Koj yuav nyiam tus nyob ze koj ib yam li koj nyiam koj. Tsis muaj lwm lo lus qhia loj dua ob lo lus no." 32 Tus kws Ntawv Ntshiab hais rau Yes Xus tias : "Koj hais raug kawg, Xib Hwb, koj hais qhov tseeb : muaj ib tug Huab Tais Tswv Ntuj xwb, tsis muaj dua lwm tus Tswv Ntuj dhau ntawm nws. 33 Kev nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog, thiab nyiam tus nyob ze yus ib yam li yus nyiam yus, yog zoo tshaj tej tsiaj hlawv thiab tej thaj txi Ntuj huv tib si." 34 Yes Xus pom tus kws Ntawv Ntshiab txhab ib lo lus thoob tsib, ces nws hais rau tus kws Ntawv Ntshiab tias : "Koj nyob tsis deb ntawm Tswv Ntuj lub Ceeb Tsheej lawm." Ces tsis muaj leej twg muaj cuab kav nug Yes Xus ntxiv.





    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 4th June 2015, 4:49 am

    TIM 5 LUB 6 2015

    Hnub Rau Lis Piam Cuaj Xyoo B Xyoo I
    Hwm Leej Ntshiab Boniface, Tswv Qhia tuag ua Tim Khawv

    Zaj Nyeem Ib: TOS NPIS 11: 5-17


    5 As Nas zaum ntsia ntsoov txoj xub ke uas nws tus tub yuav rov los. 6 Nws ntsia pom deb zoo li yog nws tus tub, nws hais rau leej txi tias : "Koj tus tub nrog tus ua nws luag los txog lawm !" 7 Thaum nkawd los tsis tau txog ntawm nws txiv tsev, Las Fais hais rau Tos Npias tias : "Kuv hais rau koj tias koj txiv yuav rov pom kev tuaj. 8 Koj yuav muab lub tsib ntses los pleev nws qhov muag. Cov tshuaj yuav tom me ntsis ces yuav muaj tej daim tawv dawb dawb me me nti ntawm nws lub qhov muag los. Ces koj txiv yuav tsis dig muag ntxiv, nws yuav rov qab pom kev tuaj." 9 Tos Npias niam khiav khiav tuaj puag lias nws tus tub caj dab, nws hais tias: "Nyem no, kuv tuag kuj tau, kuv rov tau pom koj lawm !" Ces nws niam quaj ! 10 Tos Npis sawv tuaj, nws maub dawm ub dawm no, tab sis nws kuj xuas hla tuaj dhau lub qhov rooj loog thiab. Tos Npias taug kev los ntsib nws, 11 Tos Npias nqa lub tsib ntses ntawm tes. Nws tshuab pa rau nws txiv qhov muag thiab nws tuav nws txiv ruaj ruaj, nws hais tias : "Txiv, koj txhob ntshai !" Ces nws muab lub tsib ntses pleev nws txiv qhov muag, nws tos ib me ntsis, 12 ces nws xuas nws ob txhais tes mus nti daim tawv me me ntawm nws txiv lub kaum muag los. 13 Nws txiv puag lias nws tus tub caj dab 14 thiab nws txiv quaj. Nws txiv hais tias : "Me tub, tus uas yog kuv qhov pom kev, kuv pom koj lawm ! " Tos Npis tseem hais ntxiv tias : "Tswv Ntuj nto meej nto moo ! Nws lub npe loj tas nrho nto meej nto moo! Nws cov tshiab nto meej nto moo! Nws lub npe loj tas nrho nto meej nto moo mus tiam dhau tiam! 15 Vim nws tau muab kev txom nyem rau kuv, thiab nws kuj tau hlub kuv. Nyiam no, kuv tau pom kuv tus tub Tos Npias lawm tiag !" Tos Npias chaws mus hauv tsev, nws tsa suab hlo nrov nrov cav txog Tswv Ntuj vim nws zoo siab. Thiab nws tham qhia nws txiv tias nws tau mus kev zoo thiab nws nqa tau cov nyiaj los lawm. Nws twb yuav tau poj niam lawm thiab, nws yuav Las Nkes tus ntxhais hu ua Xas Las. Xas Las lawv nws qab los txog tsis deb cov rooj loog Nis Nis Vas lawm. 16 Ces Tos Npis sawv tsees mus tos nws tus nyab nyob ntawm cov rooj loog Nis Nis Vas. Nws mus, nws cav txog Tswv Ntuj vim nws zoo siab. Thaum cov neeg nyob Nis Nis Vas pom tsis muaj neeg tuav nws tes mus kev thiab pom nws rov muaj zog zoo li thaum ub, mas lawv poob siab. 17 Tos Npis hais rau lawv tias yog Tswv Ntuj tau hlub nws thiab rov qhib nws qhov muag lawm. Ces Tos Npis mus txog ntawm Xas Las, uas yog Tos Npias poj niam, nws foom lus zoo rau Xas Las tias : "Me ntxhais, kuv zoo siab tos txais koj! Koj tus Tswv Ntuj nto koob meej, vim nws tau tso koj los nrog peb nyob ! Thov kom koj txiv tau txoj hmoov zoo thiab kom kuv tus tub Tos Npias thiab koj, neb tau txoj hmoov zoo mog! Me ntxhais, koj los nyob hauv koj tsev, thov kom koj tau txoj hmoov zoo thiab kev zoo siab ! Los tsev, me ntxhais!" Hnub ntawd, tas cov neeg Yus Das nyob Nis Nis Vas zoo siab.

    NPN 146: 1B-2, 6C-7, 8-9A, 9BC-10

    Txais: (1b) Kuv tus plig, koj cav lus zoo txog HUAB TAIS !
    los: As les lus yas.

    Kuv tus plig, koj cav lus zoo txog HUAB TAIS !
    Kuv yuav cav txog HUAB TAIS tas kuv sim neej,
    kuv yuav ntaus paj nruag rau kuv tus Tswv Ntuj
    thaum kuv tseem muaj sia nyob.

    Txais: (1b) Kuv tus plig, koj cav lus zoo txog HUAB TAIS !
    los: As les lus yas.

    nws pheej xeeb mus ib txhiab ib txhis :
    cov raug luag quab yuam, nws tsa lawv cai.
    nws pub mov rau cov neeg tshaib noj.
    HUAB TAIS tso cov neeg raug txim

    Txais: (1b) Kuv tus plig, koj cav lus zoo txog HUAB TAIS !
    los: As les lus yas.

    HUAB TAIS qhib cov dig muag qhov muag,
    HUAB TAIS tsa cov khoov nkoos kom sawv ntseg,
    HUAB TAIS nyiam cov neeg ncaj.
    HUAB TAIS pov hwm cov pej kum neeg .

    Txais: (1b) Kuv tus plig, koj cav lus zoo txog HUAB TAIS !
    los: As les lus yas.

    Nws txhawb tus ntsuag nos thiab tus poj ntsuam,
    nws mooj tus siab phem ob txhais taw kom yuam kev.
    HUAB TAIS yuav ua vaj mus li; Xis Yoos,
    koj tus Tswv Ntuj ua vaj mus txheej dhau txheej ! As les lus yas!

    Txais: (1b) Kuv tus plig, koj cav lus zoo txog HUAB TAIS !
    los: As les lus yas.

    As Les Lus Yas: ZAM 14: 23

    Txais: As les lus yas, as les lus yas.

    Yog leej twg nyiam kuv, nws yuav coj rawv kuv lo lus,
    ces kuv Txiv yuav nyiam nws.
    Kuv Txiv wb yuav ua tsev nyob hauv nws.

    Txais: As les lus yas, as les lus yas.

    Ntawv Moo Zoo: MK 12: 35-37

    35 Thaum Yes Xus qhia hauv lub Tuam Tsev Teev Ntuj, nws hais tias : "Vim li cas cov kws Ntawv Ntshiab thiaj hais tias Leej Pleev yog Das Vis tub ? 36 Tab sis Leej Ntuj Plig tshoj Das Vis kom nws hais cov lus no : Huab Tais hais rau kuv tus Huab Tais tias : Koj zaum ntawm kuv sab xis, mus txog hnub kuv muab koj cov yeeb ncuab rau hauv koj qab xib taws. 37 Das Vis hu Leej Pleev ua Huab Tais ; ua cas Leej Pleev ho yog Das Vis tub thiab ?" Ces tsoom neeg coob zoo siab mloog Yes Xus.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 5th June 2015, 1:10 pm

    TIM   6   LUB   6   HLI    2015

    Hnub Xya Lis Piam Cuaj Nruab Xyoo B  Xyoo I

    Zaj Nyeem Ib: TOS NPIS  12: 1, 5-15, 20


    1 Thaum lawv los ua tshoob hauv tsev tas lawm, Tos Npis hu nws tus tub Tos Npias los, hais rau nws tias : "Me tub, koj yuav nco ntsoov them nqi rau tus ua koj luag. Koj yuav muab tshaj tus nqi uas peb tau hais tseg."
    5 Tos Npias hu tus ua nws luag los, Tos Npias hais rau nws tias : "Koj yuav ib nrab tej yam uas koj tau thauj los, koj ua siab kaj lug rov mus mog !" 6 Ces Las Fais coj nkawd ob leeg mus ntawm ib qho chaw xu me ntsis, nws hais rau nkawd tias : "Nej ua Tswv Ntuj tsaug, nej cav txog nws rau tsoom neeg ciaj mloog tias nws tau ua zoo rau nej npaum li cas. Nej qhuas txog nws thiab hu nkauj cav txog nws lub npe. Nej qhia rau txhua leej neeg paub txog Tswv Ntuj tej dej num raws li tsim nyog lawv yuav tsum paub txog. Nej tsis txhob nkees ua nws tsaug.  7 Yeej phim yuav tsum nrog tus vaj zais nws tej lus npog cia, tiam sis Tswv Ntuj tej hauj lwm mas yuav tsum muab tshaj tawm kom sawv daws paub txog.  Nej ua nws tsaug kom tsim nyog.  Nej ua qhov zoo ces yuav tsis muaj qhov phem tuaj raug nej.  8 Txoj kev teev ntuj nrog kev yoo mov thiab txoj kev pub rau luag nrog kev ncaj ncees muaj nqes dua txoj kev nplua nuj nrog kev ua txhaum.  Xyaum pub rau luag muaj nqes dua khaws ib niag pob kub cia.  9 Txoj kev pub rau luag cawm yus ntawm txoj kev tuag thiab ntxuav yus tej txhaum tas huv si. Cov neeg pub rau luag yuav ua neej nyob ntev niaj ntau hnub.  10 Cov neeg ua txhaum thiab ua phem lob kev puas tsuaj rau lawv.   11 Kuv yuav qhia qhov tseeb rau neb, yuav tsis zais ib yam dab tsi. Kuv twb hais rau neb lawm hais tias tsim nyog yuav nrog tus vaj khaws nws tej lus npog cia, tiam sis kuj tsim nyog yuav tsum tshaj Tswv Ntuj cov hauj lwm tawm thiab. 12 Nyem no, neb yuav paub tias, thaum koj thiab Xas Las neb tab tom teev Ntuj, mas yog kuv cev thiab kuv nyeem neb zaj thov nyob ntawm Huab Tais lub hwj chim. Thaum koj mus faus cov neeg tuag los kuj yog kuv cev koj cov yeeb koob rau Ntuj. 13 Thaum koj tsis ua xyem xyav, koj cia li tso diav plhuav sawv tsees mus faus ib tug neeg tuag, los kuj yog Ntuj xa kuv tuaj sim koj lub siab ntseeg. 14 Thiab yog Tswv Ntuj xa kuv tuaj kho koj kom zoo hlo thiab kho koj tus nyab Xas Las. 15 Kuv yog Las Fais, yog ib tug ntawm xya leej Tshiab uas chaws mus nyob ntawm Tswv Ntuj lub hwj chim tsob hwb nws.
    20  Yog li, nej cav txog Huab Tais nyob ntiaj teb no thiab ua Tswv Ntuj tsaug. Kuv yuav nce rov mus cuag tus uas tau xa kuv tuaj. Nej yuav tsum muab tas puas tsav yam tshwm sim rau nej sau cia.”

    NPN   TN 13: 2, 6EFGH, 7, 8

    Txais:  (1b) Peb cav txog Tswv Ntuj tus uas nyob mus li.

    Nws nplua neeg thiab nws kuj khuv leej neeg;
    nws muab neeg thawb kom poob lawm puag dab nriag teb,
    thiab nws kuj npo neeg puag hauv lub qhov ntuj tob tawm los.
    Tsis muaj leej twg yuav khiav dim tau ntawm nws txhais tes.    

    Txais:  (1b) Peb cav txog Tswv Ntuj tus uas nyob mus li.

    Nej yuav saib tas puas tsav yam nws tau ua rau nej,
    ces nej tsa suab nrov nrov cav txog nws.
    Nej cav lus zoo txog tus Huab Tais muaj kev ncaj ncees,
    thiab nej qhuas txog tus Vaj kav cov caij nyoog.

    Txais:  (1b) Peb cav txog Tswv Ntuj tus uas nyob mus li.

    Txawm kuv raug mus nyob txim rau pej kum teb,
    kuv yuav ua Huab Tais tsaug;
    kuv yuav tshaj tawm txog nws lub hwj huam thiab hwj chim
    Rau ib haiv neeg txhaum paub.

    Txais:  (1b) Peb cav txog Tswv Ntuj tus uas nyob mus li.

    Tas nej cov uas nws tau xaiv, nej cav txog Huab tais,
    tas nej sawv daws cav txog nws lub hwj chim.
    Nej qee tej lub hnub nyoog los ua kev zoo siab, cav txog nws.

    Txais:  (1b) Peb cav txog Tswv Ntuj tus uas nyob mus li.

    As Les Lus yas:   MT 5: 3

    Txais:   As les lus yas, as les lus yas.

    Cov pluag hauv nruab siab lawv txoj hmoov zoo,
    vim Ntuj lub Ceeb Tsheej yog lawv li.

    Txais:   As les lus yas, as les lus yas.

    Ntawv moo Zoo: MK 12: 38-44


    38 Thaum Yes Xus qhia sawv daws, nws tseem hais tias : "Nej ceev faj rau cov kws Ntawv Ntshiab. Lawv nyiam hnav tej lub tsho ntev ua zam piav yeev. Lawv nyiam kom luag hawm lawv tom tej tshav puam. 39 Lawv nyiam zaum cov rooj kim txwv pem hauv ntej hauv tsev txoos, thiab thawj cov rooj zaum thaum lawv noj nqaij haus cawv. 40 Lawv dhuas cov poj ntsuam lub cuab tam nqos tas. Tsis kav lawv ua txuj hais tej zaj teev ntuj ntev. Lawv yuav raug txiav txim hnyav dua."  41 Yes Xus zaum ncaj rau lub txhab ceev nyiaj. Nws ntsia zeej tsoom tso lawv cov txiaj toog rau hauv lub txhab ceev nyiaj. Cov nplua nuj coob leej tso nyiaj ntau rau hauv. 42 Muaj ib tug poj ntsuam pluag tuaj tso ob lub txiaj toog me me, tsis muaj nqi dab tsi. 43 Ces Yes Xus hu cov thwj tim los ze nws, nws hais rau lawv tias : "Kuv hais tseeb rau nej, tus poj ntsuam no pluag, tab sis nws tso nyiaj ntau dua cov uas tau tso nyiaj rau hauv lub txhab ceev nyiaj huv tib si. 44 Vim tas cov neeg tso nyiaj ntawd, rho lawv tej nyiaj seem mus tso, hos tus poj ntsuam ntawd rho nyiaj hauv nws txoj kev pluag los : nws rho tas nrho nws lub cuab tam, uas nres nws txoj sia los tso rau hauv."



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 8th June 2015, 9:56 am

    TIM 8 LUB 6 HLI 2015

    Hnub Ob Lis Piam Kaum Nruab Xoo B Xyoo I

    Zaj Nyeem Ib: 2 KOS LIS NTHOS 1: 1-7


    1 Kuv, Paj Lug, tus uas Tswv Ntuj pom zoo tsa ua Yes Xus Pleev ib tug Hauv Paus Xa Lus nrog tus kwv Tis Mos Tes, sau ntawv rau Tswv Ntuj lub Koom Txoos nyob Kos Lis Nthos, thiab rau cov ntshiab nyob As Kas Yas teb tib si. 2 Thov kom peb Txiv Tswv Ntuj thiab Huab Tais Yes Xus Pleev pub txiaj ntsim thiab kev thaj yeeb tuaj rau nej. 3 Peb cav lus zoo txog Tswv Ntuj, uas yog peb tus Huab Tais Yes Xus Pleev Leej Txiv, yog Leej Txiv khuv leej neeg, yog tus Tswv Ntuj nplij sawv daws. 4 Nws nplij peb nyob hauv peb txoj kev txom nyem, kom peb nplij luag tej nyob hauv lawv txoj kev txom nyem thiab, vim peb xub tau txais Tswv Ntuj cov lus nplij. 5 Leej Pleev txoj kev txom nyem tuaj raug peb ntau ; tab sis, vim Leej Pleev, mas peb kuj tau txais kev nplij ntau kawg thiab. 6 Tab yog peb raug txom nyem, los tsuas yog raug kom nej tau txais kev nplij thiab kev cawm. Thaum peb txais kev nplij, los cov lus nplij peb kuj ua kom nej txais kev nplij thiab : kev nplij yuav ua kom nej ua siab ntev ris txoj kev txom nyem, ib yam li peb ua siab ntev ris. 7 Thaum peb xav txog nej, mas peb tso siab ruaj nreb rau nej. Peb paub tias nej nrog peb ris kev txom nyem, mas nej kuj yuav nrog peb txais kev nplij.

    NPN 34: 2-3, 4-5, 6-7, 8-9

    Txais: (9a) Nej saj ces nej yuav pom Huab Tais lub siab zoo.

    Kuv yuav cav txog HUAB TAIS txhua lub sij hawm;
    nws lub koob meej yuav nyob rawv ntawm kuv lub ncauj.
    Kuv tus plig tau koob meej nyob hauv HUAB TAIS;
    kom tus neeg me hnov thiab zoo siab.

    Txais: (9a) Nej saj ces nej yuav pom Huab Tais lub siab zoo.

    Nej nrog kuv cav txog HUAB TAIS lub koob meej,
    peb sawv daws ua ke qhuas nws lub npe.
    Kuv nrhiav HUAB TAIS, nws tau teb kuv,
    thiab tau cawm kuv ntawm kuv tej kev ntshai.

    Txais: (9a) Nej saj ces nej yuav pom Huab Tais lub siab zoo.

    Nej vam txog nws ces nej yuav zoo siab luag ntxhi,
    nej ntsej muag yuav tsis liab vim nej tau txaj muag.
    Thaum tug neeg pluag hu, HUAB TAIS hnov,
    thiab yuav cawm nws ntawm tas nws tej kev nyuaj.

    Txais: (9a) Nej saj ces nej yuav pom Huab Tais lub siab zoo.

    HUAB TAIS tus tshiab tsa tsev tsam phooj ncig
    cov neeg hwm HUAB TAIS, nws cawm lawv.
    Nej saj ces nej yuav pom HUAB TAIS lub siab zoo npaum li cas.
    Hmoov zoo rau tus muab HUAB TAIS ua nws lub chaw nkaum !

    Txais: (9a) Nej saj ces nej yuav pom Huab Tais lub siab zoo.

    As Les Lus Yas: MT 5: 12A

    Txais: As les lus yas, as les lus yas.

    Nej yuav zoo siab thiab hom khaj,
    vim nej yuav tau txais koob haum loj nyob saum ntuj.

    Txais: As les lus yas, as les lus yas.

    Ntawv Moo Zoo: MT 5: 1-12


    1 Yes Xus pom neeg coob coob tuaj, nws nce mus saum lub roob. Nws zaum. Cov thwj tim txav los ze Yes Xus. 2 Ces Yes Xus tsa ncauj qhia lawv hais tias : 3 "Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li. 4 Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug. 5 Cov tau txoj hmoov zoo, yog cov quaj ntsuag, vim Ntuj yuav nplij lawv. 6 Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis. 7 Cov tau txoj hmoov zoo, yog cov hlub luag tej, vim Ntuj yuav hlub lawv. 8 Cov tau txoj hmoov zoo, yog cov siab huv, vim lawv yuav pom Tswv Ntuj. 9 Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam. 10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug. 11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo. 12 Nej zoo siab thiab nej hom khaj mog, vim nej yuav tau txais koob haum loj nyob saum ntuj. Cov yaj saub ua nej ntej, kuj raug luag hiam zoo li ntawd thiab.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 8th June 2015, 11:56 am

    TIM   9  LUB   6   HLI   2015

    Hnub Peb Lis Piam Kaum Nruab Xyoo B  Xyoo I

    Zaj NYeem Ib: 2 Kos Lis Nthos 1: 18-22


    Paj Lug sau tias:
    18  Ib yam li Tswv Ntuj yog tus tsis dag, peb cov lus rau nej kuj tsis ib txhij yog: ‘tau’ thiab ‘tsis tau.’ 19 Vim Tswv Ntuj Leej Tub Yes Xus Pleev, uas Xis Vas Nus thiab Tis Mos Tes peb tshaj rau nej paub, mas nws tsis ib txhij yog qhov ‘tau’ thiab ‘tsis tau.’ Nyob hauv Yes Xus tsuas muaj qhov ‘tau’ xwb.  20 Vim nws yog lo lus tias ‘tau’ rau tas cov lus uas Tswv Ntuj tau cog tseg huv tib, thiab kuj yog nrog Yes Xus, peb thiaj hais tau lo lus tias ‘Ua li’ rau Tswv Ntuj cav txog nws lub koob meej. 21 Tus ua kom peb nrog nej nyob ruaj nreb hauv Leej Pleev, thiab tus tau pleev roj rau peb, yog Tswv Ntuj. 22 Nws tau muab nws lub thwj los ntaus cim rau peb, thiab nws tau tso Leej Ntuj Plig los nyob hauv peb ua puav pheej txog txhua yam zoo nws npaj rau peb .

    NPN    119: 129, 130, 131, 132, 133, 135

    Txais: (135a)  Huab Tais, cia koj lub ntsej muag ci tuaj rau kuv.

    Koj tej lus qhuab qhia zoo tas nrho,
    vim li ntawd kuv thiaj mloog.

    Txais: (135a)  Huab Tais, cia koj lub ntsej muag ci tuaj rau kuv.

    Koj cov lus nthuav tawm tuaj ci kom pom kev,
    ua kom cov neeg me txawj to taub.

    Txais: (135a)  Huab Tais, cia koj lub ntsej muag ci tuaj rau kuv.

    Kuv rua ncauj hlo huas pa,
    Vim kuv tshaib koj cov lus qhia.

    Txais: (135a)  Huab Tais, cia koj lub ntsej muag ci tuaj rau kuv.

    Thov koj tig los saib kuv thiab khuv leej kuv :
    Thiaj yog kev ncaj ncees rau cov neeg nyiam koj lub npe.

    Txais: (135a)  Huab Tais, cia koj lub ntsej muag ci tuaj rau kuv.

    Thov koj hwj kuv txhais taw kom khov, kom haum lo lus koj cog,
    txhob kheev kom kev phem tuaj kav tau kuv.

    Txais: (135a)  Huab Tais, cia koj lub ntsej muag ci tuaj rau kuv.

    Thov cia koj lub ntsej muag ci tuaj rau koj tus tub txib
    thiab qhia koj cov kev cai lij choj rau kuv.

    Txais: (135a)  Huab Tais, cia koj lub ntsej muag ci tuaj rau kuv.

    As Les Lus Yas: MT 5: 16

    Txais:   As les lus yas, as les lus yas.

    Cia nej lub teeb ci nyob ntawm zeej tsoom xub ntiag,
    kom lawv pom nej cov dej num zoo, ces lawv yuav cav txog nej Txiv nyob saum ntuj.

    Txais:   As les lus yas, as les lus yas.

    Ntawv Moo Zoo:   MT 5: 13-16


    Yes Xus hais tias:
    13 "Nej yog cov ntsev las lub ntiaj teb. Tab sis yog ntsev tsuag lawm, yuav muab dab tsi ua kom ntsev rov qab daw tuaj ? Ntsev tsuag tsis zoo ua dab tsi, tsuas kawg muab pov tseg nraum zoov rau neeg tsuj xwb. 14 "Nej yog lub teeb ci rau lub ntiaj teb. Ib lub nroog txhim rau saum ib lub ncov roob, yuav muab zais tsis tau. 15 Hos, luag kuj tsis taws teeb coj mus zais rau hauv qab txee, luag muab txawb saum tus ncej teeb, lub teeb ci rau tas cov neeg nyob hauv tsev pom kev. 16 Li ntawd, nej lub teeb yuav tsum ci nyob ntawm zeej tsoom xub ntiag, kom lawv pom nej cov dej num zoo, ces lawv yuav cav txog nej Txiv nyob saum ntuj.




    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 10th June 2015, 7:03 am

    TIM 10 LUB 6 HLI 2015

    HnubPlaub Lis PiamKaumNruabXyoo B Xyoo I

    ZajNyeemIb: 2 KLN 3:4-11


    4 Peb ntseeg khov ntseeg ruaj li ntawd nyob ntawm Tswv Ntujxub ntiag, vim Leej Pleev. 5 Tsis yog vim tias ntawm peb tus kheej peb muaj peev xwm ua tau tej yam uas peb yuav khav tau tias yog peb ua tawm hauv peb los; tiam sis peb muaj peev xwm ua tau tej yam yog tuaj ntawm Tswv Ntuj tuaj. 6 Nws pub kom peb muaj peev xwm lis txoj kab xwm saib kev cog lus tshiab,uas tsis yog ib txog kev cog lus nyob hauv ntawv,yog ib txog kev cog lus nyob hauv Leej Ntuj Plig: Vim ntawv txawj tua neeg, hos Leej Ntuj Plig pub txoj sia rau neeg. 7 Yog tias txoj kab xwm coj kevtuag, uas lawv txaug rau saum daim txiag zeb, twb muaj hwj chim loj npaum no, ua kom cov tub ki His Xas Lais ntsia tsis taus Mais Xes lub ntsej muag vim nws lub ntsej muag muaj hwj chim, txawm tias yog ib lub hwj chim kav ib pliag xwb, 8 mas txoj kab xwm coj Leej Ntuj Plig haj yam yuav tsum muaj hwj chim loj tshaj ntawd ! 9 Yog tias txoj kab xwm muab txim rau neeg twb muaj hwj chim, mas txoj kab xwm muab kev ncaj ncees haj yam muaj hwj chim loj tshaj. 10 Yog peb muab lub hwj chim hauv txoj kab xwm qub los piv rau lub hwj chim hauv txoj kab xwm tshiab, mas txoj kab xwb qub tsis muaj hwj chim dab tsi li : 11 vim tias yog yam uas yuav dua sai twb tawm tuaj muaj hwj chim, mas yam uas yuav nyob mus li, haj yam yuav tsum muaj hwj chim!

    NPN 99: 5, 6, 7, 8, 9

    Txais: (9c) Huab Tais, peb tus Tswv Ntuj yog tus ntshiab.

    Nej qhuas, nej khav txog HUAB TAIS, peb tus Tswv Ntuj,
    nej pe nws ntawm nws lub rooj tiag taw !
    Nws ntshiab tiag!

    Txais: (9c) Huab Tais, peb tus Tswv Ntuj yog tus ntshiab.

    Mais Xes thiab As Loos nkawd yog ob tug hauv nws tsoom leej choj,
    Xas Muas yog ib tug hauv cov uas vam txog nws lub npe;
    thaum lawv hu txog HUAB TAIS, nws teb lawv.

    Txais: (9c) Huab Tais, peb tus Tswv Ntuj yog tus ntshiab.

    HUAB TAIS nyob hauv tus ncej huab nrog lawv tham;
    Lawv coj nws tej lij choj thiab txoj cai nws muab rau lawv.

    Txais: (9c) Huab Tais, peb tus Tswv Ntuj yog tus ntshiab.

    HUAB TAIS, peb tus Tswv Ntuj, koj teb rau lawv,
    koj yog ib tug Tswv Ntuj siab ntev rau lawv,
    tab sis koj rau txim rau lawv vim lawv cov txhaum.

    Txais: (9c) Huab Tais, peb tus Tswv Ntuj yog tus ntshiab.

    Nej qhuas txog HUAB TAIS, peb tus Tswv Ntuj ;
    nej pe nws nyob saum nws lub roob ntsiab,
    vim HUAB TAIS peb tus Tswv Ntuj ntshiab tiag !

    Txais: (9c) Huab Tais, peb tus Tswv Ntuj yog tus ntshiab.

    As Les Lus Yas: NPN 25: 4B, 5A


    Txais: As les lus yas, as les lus yas.

    Kuv tus Tswv Ntuj, qhia koj txoj kev rau kuv taug,
    thiab coj kuv mus nyob hauv koj txoj kev tseeb.

    Txais: As les lus yas, as les lus yas.

    Ntawv Moo Zoo: MT 5:17-19

    Yes Xus hais rau nws cov thwj tim tias:
    17 Nej txhob xav tias kuv tuaj rhuav Txoj Cai thiab cov Yaj Saub :kuv tsis tuaj rhuav, kuv tuaj qhia ntxiv kom thoob. 18 Vim tias qhov kuv hais rau nej muaj tseeb : lub ntuj lub teb yuav dua, tab sis tsis muaj ib tug txwm ntawv, los ib lub cim ntawv me me hauv Txoj Cai yuav ploj. Tas ib puas tsav yam nyob hauv Txoj Cai yuav tsum tshwm sim tuaj tso. 19 Tus twg hla ib txog cai me, thiab nws qhia kom luag ua xws li nws, mas Ntuj yuav saib tus ntawd qis tshaj cov nyob hauv Ntuj lub Ceeb Tsheej. Hos tus ua rawsTxojCai tas huv si, thiab nws qhia kom luag ua xws li nws, Ntuj yuav saib nws yog tus loj nyob hauv Ntuj lub Ceeb Tsheej.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 10th June 2015, 8:13 am

    TIM 11 LUB 6 HLI 2015

    HnubTsib Lis Piam Kaum Nruab Xyoo B Xyoo I

    Hwm Leej Ntshiab Npas Nas Npas, Hauv Paus Xa Lus

    Zaj Nyeem Ib: HAUJ LWM 11: 21B-26; 13:1-3


    11 21b Lub caij ntawd cov neeg txais kev ntseeg thiab tig los cuag Huab Tais coob kawg. 22 Lub Koom Txoos nyob Yes Lus Xas Les hnov lub moo ntawd, lawv thiaj xa Npas Nas Npes mus nyob As Nthias Kias. 23 Thaum Npas Nas Npes tuaj txog, nws pomTswv Ntuj lub txiaj ntsim, mas nws zoo siab hlo. Nws pab lawv ua siab loj siab tawv kom lawv nyob ruaj nreb hauv txoj kev ntseeg txog Huab Tais. 24 Npas Nas Npes yog ib tug neeg zoo. Leej Ntuj Plig Ntshiab nyob puv hauv nws, thiab nws yog ib tug neeg ntseeg ruaj. Ib pab neeg coob kawg los ntseeg txog HuabTais ntxiv. 25 Ces Npas Nas Npes mus nrhiav Xauv nyob Tas Xis. 26 Thaum nws nrhiav tau Xauv lawm, mas nws coj Xauv los nyob As Nthias Kias. Nkawd nyob li ntawd ib xyoos hauv lub Koom Txoos, nkawd qhia ib pab neeg coob kawg. Yog nyob As Nthias Kias mas luag thiaj pib hu cov thwj tim ua cov Pleev.
    13 1 Lub Koom Txoos nyob As Nthias Kias muaj ib co yaj saub thiab ib co kws txoj cai : yog Npas Nas Npes, Xis Mes Oos uas luag hu nws ua Nis Zes, Lus Xyus tus nyob Xis Les Nas teb tuaj, Mas Nas Ees uas thaum yau nws nrog tus vaj Hes Los ua phooj ywg, thiab Xauv. 2 Muaj ib hnub, lawv tab tom ua lub txoos teev ntuj, thiab coj cov kab ke yoo, mas Leej Ntuj Plig Ntshiab hais rau lawv tias : "Nej qee Npas Nas Npes thiab Xauv nkawd, vim kuv hu nkawd mus ua dua ib txog hauj lwm." 3 Ces thaum lawv yoo mov tas thiab teev Ntuj tas, lawv tsa tes rau saum nkawd, lawv xa nkawd mus.


    NPN 98: 1, 2-3AB, 3CD-4, 5-6

    Txais: (2b) Huab Tais muab nws txoj kev ncaj rau cov haiv neeg pom.

    Nej hu ib zaj nkauj tshiab rau HUAB TAIS
    vim nws tau ua tej yam txaus qhuas;
    nws txhais tes xis tau ua kom nws yeej,
    Thiab nws sab npab ntshiab.

    Txais: (2b) Huab Tais muab nws txoj kev ncaj rau cov haiv neeg pom.

    HUAB TAIS ua kom sawv daws paub txog nws txoj kev cawm neeg,
    nws muab nws txoj kev ncaj rau cov haiv neeg pom.
    Nws rov nco txog nws txoj kev ua zoo rau thiab hlub
    tsev neeg His Xas Lais.

    Txais: (2b) Huab Tais muab nws txoj kev ncaj rau cov haiv neeg pom.

    Tas npoo ntuj npoo ntiaj teb tau pom
    peb tus Tswv Ntuj txoj kev cawm neeg.
    Tas txhuam teb chaws, nej zoo siab hu nkauj rau HUAB TAIS,
    nej qw suab hu nkauj, nej cav txog nws.

    Txais: (2b) Huab Tais muab nws txoj kev ncaj rau cov haiv neeg pom.

    Nej ntaus nkauj nog ncas cav txog Huab Tais,
    nej ntaus nkauj nog ncas nrog tej zaj nkauj zoo mloog.
    Nej tshuab hom ntxuag suab kub nyuj,
    nej dhia zoo siab nyob ntawm tus vaj ntxwv HUAB TAIS xub ntiag.

    Txais: (2b) Huab Tais muab nws txoj kev ncaj rau cov haiv neeg pom.

    As Les LusYas ZAM 13: 34

    Txais: As les lus yas, as les lus yas.

    Kuv muab ib lo lus qhia tshiab rau nej:
    Yog nej yuav tsum ib leeg hlub ib leeg xws li kuv tau hlub nej.

    Txais: As les lus yas, as les lus yas.

    Ntawv Moo Zoo: MT 5: 20-26

    Yes Xus hais rau nws cov thwj tim tias:
    20 "Kuv hais rau nej : yog nej tsis ua siabn caj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv Ntuj lub Ceeb Tsheej. 21 "Nej hnov cov lus qhia rau tej laus thaud tias : "Koj tsis txhob tua neeg. Tus twg tua neeg, nws yuav raug luag txiav txim rau nws. 22 Hos kuv, mas kuv hais rau nej :Leej twg npau taws rau nws tus kwv, nws yuav raug txim ntawm tsev hais plaub. Yog nws hais rau nws tus kwv tias "Niag ruam !" mas nws yuav raug txim ntawm lub rooj txwj laus Xas Nes Nrees. Yog nws hais rau nws tus kwv tias : "Niag vwm", mas nws yuav raug txim nyob hauv dab phem cov hluav taws. 23 Thaum koj cev ib co txim rau saum lub thaj txi Ntuj, yog koj nco dheev tias koj tus kwv tau muaj lus rau koj lawm. 24 Mas koj cia li tso koj cov txim rau ntawm lub thaj txi Ntuj, koj mus nrog koj tus kwv hais kom haum tso, koj mam rov los cev koj cov txim. 25 Thaum koj nrog tus neeg ntxub koj tseem ua ke mus kev, koj kav tsij nrog nws hais kom haum, tsam nws coj koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj. 26 Kuv hais tseeb rau koj, kojyuav tawm tsis tau hauv tsev loj faj, mus txog thaum koj rho nyiaj qab nas txog npib kawg nkaus los them.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 11th June 2015, 6:14 am

    TIM  12  LUB  6  HLI   2015

    Hnub Rau Lis Piam Kaum Nruab Xyoo B  Xyoo I

    Hmoov  Hawm Yes Xus lub Plawv Ntshiab




    Zaj Nyeem Ib: OS XES  11: 1, 3-4, 8C-9


    Huab Tais hais tias:
    1 Thaum His Xas Lais tseem yau, kuv nyiam nws, kuv hu kuv tus tub nyob Hais Nkws Tos teb kom los.
    3 Kuv yog tus qhia Es Fais xyaum mus kev, kuv tuav rawv lawv txhais npab, tiam sis lawv tsis to taub tias kuv yog tus saib xyuas lawv;  4  tias kuv xuas ib co hlua tib neeg rub lawv, uas yog hlua kev sib hlub; tias kuv tu lawv xws li ib tug neeg tsaws tus me nyuam mos los npuab nws sab plhu; thiab kuv khoov qis qis los pub mov rau lawv noj.
    8c Kuv lub siab lub plawv ntxeev tas, kuv tej plab hnyuv tshee hnyo. 9 Kuv yuav tsis tso plhuav kev cia kuv lub siab npau taws, kuv yuav tsis rhuav Es Fais dua ntxiv, vim kuv yog Tswv Ntuj, kuv tsis yog tib neeg, kuv yog tus Ntshiab nyob hauv nej, kuv yuav tsis cia kuv txoj kev npau taws hlawv nej.

    NPN: HX 12: 2-3, 4, 5-6

    R. (3) Nej yuav zoo siab hlo mus ce dej hauv cov dej muaj cawm neeg.

    Tswv Ntuj yog tus cawm kuv,
    kuv tso siab lug, kuv tsis txhawj tsis ntshai.
    Kuv lub zog thiab kuv zaj nkauj yog HUAB TAIS,  
    Nws yog tus cawm kuv.
    Nej yuav zoo siab hlo mus ce dej
    hauv cov dej txhawv cawm neeg

    R. (3) Nej yuav zoo siab hlo mus ce dej hauv cov dej muaj cawm neeg.

    Nej cav txog  HUAB TAIS, nej hu txog nws lub npe .
    Nej tshaj nws tej hauj lwm loj nyob hauv cov haiv neeg,
    nej nco ntsoov tias nws lub npe zoo tas nrho.
    R. (3) Nej yuav zoo siab hlo mus ce dej hauv cov dej muaj cawm neeg.

    Nej hu nklauj qhuas HUAB TAIS,  vim nws tau ua tej yam loj,
    Kom  txhua leej cav txog nws nyob ntiaj teb.
    Tsoom neeg nyob Xis Yoos, nej qw suab zoo siab,
    vim tus loj tas nrho nyob hauv koj
    yog His Xas Lais tus Ntshiab.

    R. (3) Nej yuav zoo siab hlo mus ce dej hauv cov dej muaj cawm neeg.

    Zaj Nyeem Ob: ES FES XOS  3: 8-12, 14-19

    8 Ntuj pub lub txiaj ntsim no rau kuv, tus me dua cov hauv tsoom ntshiab, kom kuv tshaj Leej Pleev cov paj tshab uas neeg ntsuas tsis tau rau cov teev pej kum dab, 9 kom kuv qhia sawv daws paub tseeb tias cov txuj ci zais tob tob yog dab tsi : cov txuj no nyob zais ntshis tau txhiab tiam hauv Tswv Ntuj, hauv tus tsim tas ib puas tsav yam. 10 Nyem no, cov Tshiab ua vaj txheeb, thiab cov Tshiab muaj hwj huam saum cov txheej ntuj pom Tswv Ntuj lub Koom Txoos, lawv thiaj paub Tswv Ntuj txoj kev thoob tsib uas tsis txawj kawg. 11 Vim Tswv Ntuj ib txwm npaj tej no nyob hauv peb tus Huab Tais Yes Xus Pleev. 12 Yog vim li no, peb muaj cuab kav tso siab lug txav los ze txoj kev ntseeg txog Leej Pleev.
    14 Vim tej uas tau hais no, mas kuv txhos caug nyob ntawm Leej Txiv xub ntiag, 15 yog Leej Txiv uas tas ib tsoom ua txiv nyob saum ntuj, thiab nyob ntiaj teb no, txais lub npe txiv ntawm nws los. 16 Kuv thov kom Leej Txiv pub nws lub zog loj zog nchav los pab nej txoj sia sab hauv, nyob hauv Leej Ntuj Plig, thov nws pub raws nraim li nws lub hwj chim nplua nuj. 17 Kuv thov kom Leej Pleev los nyob txawm hauv nej lub siab, vim nej ntseeg, ces nej yuav nrhau cag rau hauv txoj kev nyiam, thiab nej cog lub siab rau hauv txoj kev nyiam. 18 Nej yuav txais ib lub zog pab nej, kom nej nrog tsoom ntshiab to taub Leej Pleev txoj kev nyiam dav npaum li cas, ntev li cas, siab li cas, tob li cas. 19 Nej yuav paub Leej Pleev txoj kev nyiam, uas tob tshaj txhua txoj kev paub txuj. Ces txhua hom txiaj ntsim hauv Tswv Ntuj yuav los nyob puv hauv nej.

    As Les Lus Yas: MT 11: 29AB

    Txais:   As les lus yas, as les lus yas.

    Huab Tais hais tias,  nej ris kuv lub nra, thiab nej kawm ntawm kuv,
    vim kuv muaj lub siab ua neeg me tsis muab hlob.

    Txais:   As les lus yas, as les lus yas.

    Los   1 ZAM 4: 10B

    Txais:   As les lus yas, as les lus yas.

    Tswv Ntuj xub nyiam peb hlub peb
    thiab nws xa nws leej Tub tuaj ua nqe them peb cov txim txhaum.

    Txais:   As les lus yas, as les lus yas.

    Ntawv Moo Zoo: ZAM 19: 31-37

    31 Hnub ntawd yog Hnub Npaj, mas cov Yus Das tsis xav cia cov tuag lub cev dai saum ntoo cuam hnub Xas Npas Tos, vim tias hnub Xas Npas Tos ntawd yog ib lub hnub nyoog loj. Cov Yus Das thov Pis Las Tos kom muab cov neeg dai saum ntoo cuam ob sab ceg lov thiab muab lawv lub cev txo nqes los. 32 Cov tub rog thiaj tuaj muab thawj tug ob sab ceg lov, thiab muab lwm tus uas nrog nws dai saum ntoo cuam ob sab ceg lov. 33 Thaum lawv los txog ntawm Yes Xus, lawv pom nws twb tuag lawm, lawv tsis muab nws ob sab ceg lov, 34 tab sis ib tug tub rog xuas nws rab hmuv hno Yes Xus phab tav, tam sis ntawd ib co ntshav thiab ib co dej tawm los. 35 Tus uas tau pom qhov ntawd ua pov thawj hais. Nws ua tim khawv hais qhov tseeb, nws paub tias qhov nws hais muaj tiag. Nws hais tej ntawd kom nej ntseeg. 36 Tej xwm no tshwm sim kom muaj raws li Ntawv sau cia tias : Nws cov pob txha tsis lov ib tug li. 37 Tseem muaj lwm lo lus hauv Ntawv hais tias : Lawv yuav saib tus uas lawv nkaug.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 12th June 2015, 5:53 pm

    TIM   13   LUB   6   HLI    2015

    Hnub Xya Lis Piam Kaum Nruab Xyoo B  Xyoo I

    Kuj Yog Hnub Hawm Niam Mab Liab lub Plawv Tsis Lo Txhaum thiab.





    Zaj Nyeem Ib:    2 KLN 5: 14-21


    14 Leej Pleev txoj kev nyiam txhib peb tas zog, yog thaum twg peb ntseeg tseeb lawm tias ib leeg tuag rau sawv daws , ces kuj yog tias sawv daws tuag tas nrho lawm. 15 Nws yeej tuag pub rau sawv daws tib si, kom cov neeg ciaj txhob ua neej rau lawv tus kheej xwb, tiam sis kom lawv ua neej rau tus uas tau tuag thiab sawv rov los pub rau lawv lawm. 16 Li ntawd, txij nyem no  mus, peb yuav tsis txhob saib neeg raws li lub cev nqaij xwb. Tab yog peb tau pom Leej Pleev raws li lub cev nqaij yav tas los lawd, nyem no, peb tsis pom nws zoo li ntawd lawm. 17 Nyem no, yog leej twg nyob hauv Leej Pleev, mas nws yog ib tug uas Ntuj xeem tsim dua tshiab:  yam qub dua mus lawm, ib tug neeg tshiab sawv los nyob rau ntawd. 18 Tas txhua yam puav leej tuaj ntawm Tswv Ntuj tuaj, nws ua kom peb rov nrog nws sib haum xeeb nyob hauv Leej Pleev, thiab nws muab txoj kab xwm sau sawv daws los sib haum xeeb rau peb leg. 19  Vim Tswv Ntuj yog tus ua kom lub ntiaj teb neeg nrog nws rov sib haum xeeb nyob hauv Leej Pleev, nws tsis saib neeg cov txhaum ntxiv, nws muab cov lus muaj kev sib haum xeeb cog rau hauv peb. 20 Ces peb yog Leej Pleev cov tiam lis, yog zoo li Tswv Ntuj siv peb mus qhuab qhia mus txhob neeg. Peb tuav txog Leej Pleev lub npe thov nej tas zog, kom nej cia li nrog Tswv Ntuj rov sib haum xeeb. 21 Tswv Ntuj ua kom tus uas tsis paub txoj kev txhaum, txia ua kev txhaum los pab peb, ces peb hloov tau mus ua Tswv Ntuj txoj kev ncaj nyob hauv nws.

    NPN 103: 1-2, 3-4, 9-10, 11-12

    Txais:    (8a) Huab Tais siab zoo thiab khuv leej neeg.

    Kuv tus ntsuj plig, koj cav txog HUAB TAIS;
    kuv tej siab ntsws, nej cav txog nws lub npe ntshiab.
    Kuv tus ntsuj plig, koj cav txog HUAB TAIS,
    koj tsis txhob hnov qab nws tej kev zoo ib qho li.

    Txais:    (8a) Huab Tais siab zoo thiab khuv leej neeg.

    Nws tau zam tas koj tej txhaum rau koj,
    nws tau kho tas koj tej kev mob nkeeg zoo.  
    Nws tau cawm koj txoj sia ntawm kev puas nstoog,
    nws tau muab nws txoj kev ua siab zoo thiab kev khuv leej rau koj ntoo.

    Txais:    (8a) Huab Tais siab zoo thiab khuv leej neeg.

    Nws tsis npau taws tas  mus li,
    nws kuj tsis chim tas mus ib txhis.
    Nws tsis nplua peb raws li peb tau ua txhaum,
    nws tsis pauj rau peb raws li peb tau ua phem.

    Txais:    (8a) Huab Tais siab zoo thiab khuv leej neeg.

    Siab npaum li lub ntuj nyob  saum ntiaj teb,
    nws kuj hlub cov neeg uas hwm nws loj npaum li ntawd.  
    Deb npaum li sab hnub tuaj nyob deb sab hnub poob,
    nws tau muab peb tej txhaum pov tseg deb ntawm peb npaum li ntawd .
     
    Txais:    (8a) Huab Tais siab zoo thiab khuv leej neeg.

    As Les Lus Yas: NPN 119: 36A, 29B

    Txais:  As les lus yas,  as les lus yas.

    Tswv Ntuj,  koj dib kuv lub siab kom xib mus rau koj cov lij choj,  
    thiab koj muab koj Txoj Cai pub ua txiaj ntsim rau kuv.

    Txais:  As les lus yas,  as les lus yas.

    Ntawv Moo Zoo: MT 5: 33-37

    Yes Xus hais tias:
    33 Nej tseem hnov cov lus qhia rau tej laus thaud tias : Koj tsis txhob twv ntuj, koj yuav pauj yeem raws li cov lus koj tau cog rau Huab Tais. 34 Tab sis kuv hais rau nej, nej tsis txhob twv ntuj ib zaug li; txhob muab lub ntuj los ua tim khawv, vim lub ntuj yog Tswv Ntuj lub theej kiab ; 35 txhob muab lub ntiaj teb los ua tim khawv, vim lub ntiaj teb yog Tswv Ntuj lub rooj tiag taw ; txhob muab Yes Lus Xas Les los ua tim khawv, vim yog tus Tuam Vaj lub Nroog. 36 Txhob muab koj lub taub hau los ua tim khawv, vim koj ua tsis tau kom ib txog plaub hau dawb tuaj los dub tuaj. 37 Nej yuav hais li no : Muaj, ces hais tias muaj ; tsis muaj, ces hais tias tsis muaj. Cov lus hais tshaj, yog tuaj ntawm tus Phem tuaj.

    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Mim on 15th October 2015, 11:41 am

    Nyob zoo ib tsoom niam txiv kwv tij phooj ywg sawv daws,

    Tej zaum nej muaj ib txhia kuj tos tos tias cas kuv tsis rov tuaj tso cov zaj nyeem niaj hnub lawm. Kuv thov txim ntawm nej sawv daws tias vim kuv tau ncua ntev heev lawm ces kuv yuav cia lwm zaus rov txog Nruab Lis Piam Xyoo I tso kuv mam rov tuaj tso rau kom tas. Tshuav li ib hlis tawm tej xwb twb yuav pib Nruab Xyoo II, ces cia kuv mam rov pib tuaj tso cov zaj nyeem nruab lis piam Xyoo II mus.

    Kuv thov txim ntawm nej sawv daws thiaj thov kom nej nrog kuv ua siab ntev tos me me ntxiv.

    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5049
    Date d'inscription : 2009-08-18

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Maiv Tooj on 20th October 2015, 7:58 am



    Nyob zoo Mim,

    Zoo siab pom koj tuaj hnub no.
    Ua li os, yeej tos ntshi koj yuav rov tuaj sau zaj.
    Qoob loo muaj ntau yuav sau, ua li nws npaj tau thaum twg no rov tuaj mog.





    Sponsored content

    Re: COV ZAJ NYEEM NIAJ HNUB HAUV NRUAB LIS PIAM 2014-15

    Post  Sponsored content Today at 8:57 pm


      Current date/time is 10th December 2016, 8:57 pm