Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Suav neeg tuaj saib, txij hnub 17/09/2010 los mus.


    COV CHIV TEEV NTUJ XYOO A, B, C

    Share
    avatar
    Bao X Mary
    Phooj Ywg
    Phooj Ywg

    Messages : 183
    Date d'inscription : 2011-07-09

    COV CHIV TEEV NTUJ XYOO A, B, C

    Post  Bao X Mary on 27th July 2013, 1:45 am

    Mee thiab Maiv Tooj,

    Neb sism piav me ntsis txog cov xyoo teev Ntuj A,B, C tias yog vim li cas thiaj muab ua li ntawd. Raws li kuv to taub mas yog muaj ntau tus tub sau ntawd.Neb ho pab piav kom meej rau kuv os. Kuv xav tias cov ntau yog cov tsis paub xwb.

    Ua tsaug.
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1972
    Date d'inscription : 2009-10-16

    Re: COV CHIV TEEV NTUJ XYOO A, B, C

    Post  Mim on 27th July 2013, 7:31 pm

    Nyob zoo Bao X Mary,

    Koj xav kom piav txog Xyoo A, B, C no, yog li kuv tau sau zaj nram no. Yog nej leej twg tsis to taub qhov twg los ho nug thiab.



    Hais txog Koom Txoos Kas Tos Liv lub xyoo A, B, C


    Lub xyoo teev ntuj muaj cov Hnub Chiv thiab kuj muaj niaj hnub hauv nruab lis piam tib si.  Niaj zaus peb mus teev ntuj ua ke nyob hauv tsev teev ntuj mas peb tsis yog mus hu nkauj, teev ntuj, nyeem Ntawv Ntshiab thiab mloog lus qhuab qhia nkaus li cov koom txoos plos tes taas ua xwb, tiam sis txhua zaus peb ua thaj Txi Ntuj ( the Mass/la Messe).  Thaj Txi Ntuj mas tsuav yog muaj txiv plig ces yeej niaj hnub ua. Yog thaum tsis muaj txiv plig tsuas muaj tus xib hwb los deacon xwb, ces tsis muaj thaj Txi Ntuj, tsuas yog ua kev teev ntuj nyeem thiab nthuav Ntawv Ntshiab thiab txais lub Cim Yug xwb (Communion Service).  Kuv hnov peb cov Hmoob pheej siv lo lus “Mass” rau  thaum XH ua kab ke teev ntuj thiab faib lub Cim Yug. Zoo li lawv tsis to taub tias tus xib hwb tsis muaj cai ua thaj Txi Ntuj, nws tsuas ua kev thov ntuj, nyeem thiab nthuav Ntawb Ntshiab thiab faib Yes Xus lub Cev thiab cov Ntshav rau sawv daws xwb,m tsis yog Mass.


    Niaj Hnub Chiv thaum sawv daws mus koom Thaj Txi Ntuj mas peb mloog peb zaj nyeem. Thawj zaj yog muab hauv Ntawv Cog Qub Lus los. Zaj ob yog muab hauv cov Tsab Ntawv los. Zaj peb, yog Ntawv Moo Zoo.  Niaj hnub hauv nruab lis piam los peb yeej mloog ob zaj nyeem, zaj ib yog muab hauv Ntawv Cog Qub Lus los puas muab hauv cov Tsab Ntawv los, zaj ob yog Ntawv Moo Zoo.

    Yuav ua li cas thiaj paub tias yuav mus nyeem zaj twg? Puas yog tias txiv plig los XH xav nyeem zaj twg ces lawv cia li nyeem, los puas yog tias lawv nthuav tau phab twg ces cia li nyeem phab ntawd xwb?  Nyob hauv Koom Txoos Kas Tos Liv, peb tsis ua li ntawd. Koom Txoos Kas Tos Liv yeej xub muab cov zaj uas yuav nyeem rau cov Hnub Chiv teeb zoo zoo tas kom haum raws lub caij nyoog hauv xyoo teev ntuj lawm. Xws li txog caij Tos Huab Tais, yuav nyeem cov zaj kom phim lub caij ntawd;  txog caij Yes Xus Yug los, kuj yuav nyeem cov zaj uas hais txog Yes Xus yug los li cas. Caij 40, caij Hla los ib yam, nruab xyoo los kuj ib yam. Niaj hnub hauv nruab lis piam los lub Koom Txoos yeej muab cov zaj nyeem los teeb zoo zoo tib si rau txhua txhua hnub thiab.

    Vim nyob hauv phau Bible muaj ntau ntau phau ntawv, lub Koom Txoos xav kom sawv daws tau nyeem yuav luag thoob txhua txhua phau ntawv, ces lub Koom Txoos thiaj muab cov zaj nyeem ntawd teeb ua peb xyoos nyeem, ces thiaj li muab hu ua Xyoo A, Xyoo B, thiab Xyoo C.  Cov Xyoo A, Xyoo B, thiab Xyoo C yog hais txog Hnub Chiv xwb. Nyob hauv Xyoo A, mas zaj Ntawv Moo Zoo yog muab hauv Mas Tais los ntau; hauv Xyoo B, peb nyeem Mas Kos ntawv Moo Zoo thiab chapter 6 hauv Zam Ntawv Moo Zoo; Xyoo C, peb nyeem Lus Kas Ntawv Moo Zoo ntau dua.  Zam Ntawv Moo Zoo mas yeej nyeem txhua txhia xyoo thaum lub Caij Hla, txawm yuav yog Xyoo A, Xyoo B, Xyoo C, los yeej nyeem.

    Cov zaj nyeem hauv nruab lis piam, lub Koom Txoos muab teeb ua ob xyoos nyeem, muaj Xyoo I thiab Xyoo II. Xyoo I yog cov xyoo uas muaj tus zauv 1, 3, 5, 7 los 9; Xyoo II yog cov xyoo uas muaj tus zauv 2,4,6,8 los 0. Vim li no, xyoo  2013 no yog Xyoo I, lwm xyoo 2014, yog Xyoo II.  Zaj Ntawv Moo Zoo niaj hnub hauv nruab lis piam Xyoo I  thiab Xyoo II  zoo ib yam tsis txawv.  Xws li hnub no yog Hnub 7 tim 27 lub 7 hli Xyoo I, yog peb mus koom thaj Txi Ntuj mas peb yuav hnov zaj Ntawv Moo Zoo Mas Tais 13: 24-30, uas yog Yes Xus  piav txog ntuj lub Ceeb Tsheej zoo li ib tug tswv liaj tswv teb uas nws ttseb ib co noob nplej rau nws thaj teb, tiam sis hmo ntuj muaj neeg phem tuaj nyiag tseb ib co noob nroj noob pos rau lawm, ces lwm hnub nroj los tuaj nplej los tuaj ua ke.  Tsaib no Hnub 7 yog tim 28 lub 7 hli, zaj Ntawv Moo Zoo yog tib zag li xyoo no tsis txawv li, tiam sis zaj nyeem 1 thiab zaj nkauj paj nruag txawv tsis zoo ib yam.

    Peb kuj tseem yuav tsum nco ntsoov hais tias lub Xyoo Teev Ntuj tshiab tsis yog pib thaum lub 1 hlis tim 1 li xyoo tshiab, tiam sis yog pib Hnub Chiv 1 hauv lub Caij Tos Huab Tais (Advent).  Cov zaj nyeem kuj pib tshiab rau hnub ntawd thiab.

    Tsis tas li ntawd xwb, tej hnub tshwj xeeb muaj ua hmoov nco txog Niam Mab Liab los cov leej Ntshiab, nws kuj tseem muaj nws ib co zaj nyeem txawv rau hnub tshwj xeeb ntawd thiab.

    Cov zaj nyeem uas txiv plig siv rau Hnub Chiv los puas nruab lis piam mas tsis yog nyeem ncaj qha hauv phau Bible, tiam sis yog nyeem nyob hauv ib phau ntawv hu ua “Lectionary” no.  Nws muaj nws ib phau lectionary rau cov zaj nyeem nruab lis piam, thiab nws muaj nws ib phau rau cov zaj nyeem Hnub Chiv.



    avatar
    Bao X Mary
    Phooj Ywg
    Phooj Ywg

    Messages : 183
    Date d'inscription : 2011-07-09

    Re: COV CHIV TEEV NTUJ XYOO A, B, C

    Post  Bao X Mary on 28th July 2013, 7:34 am

    Ua tsaug ntau os Mim,

    ua tsaug uas koj tseem muaj lub siab zoo uas tau sau txog cov chiv teev Ntuj thiab txua yam tseem ceeb txog kev teev Ntuj pub rau kuv. Qhov tseeb tiag mas yeej muaj ntau yam uas peb cov ntseeg yuav tau paub thiab kawm peb yuav vam txog Maiv Tooj nej ob peb tug cov uas tau txais kev kawm ua paub los pab peb.

    Kuv zoo siab tias Maiv Tooj thiab Maiv Paj nej ob peb leeg tau tsim lub hmongcatholique no, nws muaj nqes heev li rau peb sawv daws. Nws txhawb kuv ntau thiab yam kuv tsis paub , kuv tuaj noog nej mas nej teb rau kuv tam sid. Kuv zoo siab kawg, nws yog ib yam txhawb kuv txoj kev ntseeg heev li. Txij thaum kuv tuaj nrhiav tau nej lub no mas kuv kaj siab lawm ntau kawg.

    Kuv pom tias peb cov ntseeg Kas Tos Liv tos peb pheej ua xyem xyav los vim peb tsis paub txaus, zoo li tsis muaj dej los ywg txaus tej nrog tsuag los tsis tau, hlob tsis xwm yeem.

    Ua koj tsaug ntxiv uas koj tau teb rau kuv sai nawb mog.

    Kuv tseem yuav muaj ntau yam uas yuav nug koj thiab Maiv Tooj nej ntxiv thiab.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1972
    Date d'inscription : 2009-10-16

    Re: COV CHIV TEEV NTUJ XYOO A, B, C

    Post  Mim on 28th July 2013, 8:09 am

    Bao X Mary,

    Tsis ua cas os. Zoo siab hais tias yam peb sau ho pab tau koj os. Muaj dab tsis xav nug ces kav tsij tuaj nug mog, yog tsis muaj neeg nug txog ces tej zaum peb twb xav tsis txog tias yuav tsim tuaj tham txog thiab no os.
    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5351
    Date d'inscription : 2009-08-18

    Re: COV CHIV TEEV NTUJ XYOO A, B, C

    Post  Maiv Tooj on 28th July 2013, 8:24 am


    Nyob zoo Bao X Mary thiab Mim,

    Bao X Mary,

    Ua tsaug rau koj cov lus nug txog cov xyoo nyeem Ntawv Ntshiab yog ib qho zoo kawg. Zoo rau koj thiab rau coob leej uas paub tsis meej txog kev cai nyeem Ntawv Ntshiab Hnub Chiv thiab txhua Hnub ntawm lub Koom Txoos Catholic.

    Yeej yog li Mim hais, cov zaj nyeem yog lub Koom txoos xav kom nyeem tag nrog cov Ntawv Ntshiab tej qhov tseem ceeb ces thiaj li muab faib ua 3 xyoos nyeem; tsis tag li ntawd, yog koj tib zoo nyeem cov zaj nyeem Hnub Chiv mas koj pom tias lawv muab cov zaj sib raws los nyeem ua ke. Yam li Ntawv Cog Qub Lus yog cov Yaj Saub tau hais tseg tias yuav tshwm sim li cas rau yav tom ntej yog zaj Nyeem Ib, zaj nyeem Ob qhov ntau yog cov Hauv Paus Xa Lus cov hauj lwm thiab lawv cov lus ntuas lus tim khawv txog HT.Yes Xus tes dej num thiab qheb peb qhov muag txog txoj kev ntseeg lub ntsiab uas raws li zaj Ntawv Moo Zoo los yog Zaj Nyeem Ib. Zaj Ntawv Moo Zoo, qhov ntau nws hais qhov uas tau tshwm sim tseeb tiag raws li cov Yaj saub cov lus uas tau hais tseg ua ntej ntau pua ntau txhiab xyoo los lawm.

    Thaum koj mloog tau tias peb zaj nyeem no sib raws mas ua rau koj to taub thiab tsis laj mloog cov zaj nyeem thiab thaum Txiv Plig nthuav Ntawv Ntshiab, ntuas mas koj tsis tsaug zog lawm. Koj pom zoo li koj nrog lub caij ntawm cov zaj nyob ua ke.

    Bao, kuv lov kuj tsis paub dab tsi ntau, yog yus nrhiav ces yus ntsib, yog yus khob ces yus tau thiab xwb mog. Li cas los peb mam sib coj kawm, sib coj nrhiav seb Peb Hmoob yuav mus txog li cas. Kuv nyeem txog LN.Txiv Plig Ars lub neej thiab tes dej num nrog rau phau ntawv "cov dab neeg nyiaj kub (hais txog teg nrho cov Leej Ntshiab lub neej thiab tej xwm tshwm sim)" mas kuv xav txhais kom tag nrho, tab sis tsis muaj caij li. Kuv tseem npaj yuav txhais zaj lus hais txog ntau yam tshwm sim thaum lub caij Huab Tais Yes Xus yug los uas peb tsis paub txog; vim nws tsis nyob hauv Ntawv Ntshiab. Thiab thaum Huab Tais Yes Xus ua lub Cim Txiav. Kuj tshua ntau zaj heev uas kuv twb tsis tau nyeem tag thiab.

    Mim,

    Ua tsaug ntau uas koj tseem lauj zias koj lub caij muaj nqes tuaj piav lub ntsiab ntawm cov zaj nyeem rau peb paub txog.
    Kuv yeej paub tias koj khwv khwv thiab tab sis twb yog tsis muaj neeg pab kuv es kuv ua tsis tau ib yam tseem ceeb li kuv thiaj nroo me ntsis xwb. Yog koj tsis khoom los tuaj sau li koj sau tau xwb mog. Txhob ntxhov siab mog.



    avatar
    Bao X Mary
    Phooj Ywg
    Phooj Ywg

    Messages : 183
    Date d'inscription : 2011-07-09

    Re: COV CHIV TEEV NTUJ XYOO A, B, C

    Post  Bao X Mary on 28th July 2013, 12:45 pm

    Maiv Tooj ua koj tsaug uas koj tseem tuaj qhia ntxiv rau cov zaj nyeem hnub chiv ntawv thiab. Ua Mim neb ob leeg tsaug. Neb ua rau kuv pom kev lawm hov ntau. Tseem muaj ntau yam uas kuv yuav tuaj noog neb ntxiv thiab. Txij thaum kuv tuaj nrhiav tau nej lub forum nov ua rau kuv pom kev txog txog kev ntseeg lawm ntau. Kuv zoo siab ua nej txhua tus tsaug rau Maiv Tooj, Mim os Maiv Paj lug nej sawv daws txhua tus. Kuv paub tias zaum no kuv tsis paub yam twg kuv tuaj noog nej mas nej yuav pab tau kuv.

    Thov kom Tswv Ntuj nrog nej sawv daws nyob ua nej siab kaj lug.
    avatar
    Bao X Mary
    Phooj Ywg
    Phooj Ywg

    Messages : 183
    Date d'inscription : 2011-07-09

    Re: COV CHIV TEEV NTUJ XYOO A, B, C

    Post  Bao X Mary on 30th July 2013, 10:06 am

    Mim thiab Maiv Tooj,

    hais txog phau ntawv Ntshiab ne muaj pes tsawg phau nyob rau hauv uas lawv muab los ua ke ua ib phau ntawv Ntshiab?

    Thov txim yuav noog neb ntau me ntsis , ua tsaug neb lub sij hawm uas tau tuaj pab kuv.

    Kuv muab qhov nov los tab sis tsis paub meej tias puas yog li ntawd.




    " Roman Catholic Bible: 73 books. Roman Catholic Old Testaments follow an ancient Christian Old Testament called the Septuagint, which includes all the same books as the Jewish Bible, plus seven more. Thus, Roman Catholic Old Testaments have 46 books, including Tobit; Judith, Wisdom; Ecclesiasticus, The Wisdom of Joshua the Son of Sirach; Baruch; First Maccabees; Second Maccabees; and additions to the books or Daniel and Esther."
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1972
    Date d'inscription : 2009-10-16

    Re: COV CHIV TEEV NTUJ XYOO A, B, C

    Post  Mim on 30th July 2013, 12:18 pm

    Nyob Bao X Mary,

    Kuv teb tau tuaj piav txog phau Ntawv Bible tas lawm, thiab kuv tau hais txog qhov tias peb phau Bible Kas Tos Liv muaj ntau phau dua cov Protestants phau yog vim li cas tib si lawm.

    Koj mus taum nyeem hauv no. Yog muaj dab tsis tsis meej los ho nug dua.

    http://hmongcatholique.forumdediscussions.com/t386-phau-ntawv-ntshiab-bible
    avatar
    Bao X Mary
    Phooj Ywg
    Phooj Ywg

    Messages : 183
    Date d'inscription : 2011-07-09

    Re: COV CHIV TEEV NTUJ XYOO A, B, C

    Post  Bao X Mary on 30th July 2013, 12:42 pm

    Ob ! Mee,

    kuv tsis saib meej tiag koj twb sau rau hauv tas lawm. Thov txim os.

    Mee, koj tuaj lub Hanca sab laj Milwaukee thiab tab sis mas kuv tsis paub koj, yog kuv paub mas kuv yuav los nrog koj tham thiab. Koj hais tias koj tuaj no kuv mas paub xwb.
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1972
    Date d'inscription : 2009-10-16

    Re: COV CHIV TEEV NTUJ XYOO A, B, C

    Post  Mim on 31st July 2013, 12:42 pm

    Nyob zoo Bao X Mary,

    Kuv tuaj thiab los mas. Kuv los tsis paub koj li thiab, ces ntshai wb twb los sib phoom qhov twg lawm los tsis sib paub li os. Tsis ua cas, cia lwm niaj lwm zaus tso mam nrhiav kev los sib tham os.

    Sponsored content

    Re: COV CHIV TEEV NTUJ XYOO A, B, C

    Post  Sponsored content


      Current date/time is 23rd October 2017, 8:31 pm