COV ZAJ NYEEM NRUAB LIS PIAM XYOO A 2019-2020

Tim 19 lub 8 Hli 2020

Hnub Plaub Lis Piam Nees Nkaum Nruab Xyoo A Nruab Lis Piam Xyoo II

Hwm LN Jean Eudes, ua Leej Choj

Zaj Nyeem Ib: ES XES KIAS 34: 1-11

1 HUAB TAIS lo lus nrov tuaj rau kuv li no : 2 Neeg leej tub, koj ua yaj saub cem cov tswv zov yaj saib His Xas Lais, koj ua yaj saub tshaj rau lawv tias: "Cov tswv zov yaj, HUAB TAIS hais li no : cov tswv zov yaj saib His Xas Lais txoj hmoov phem, vim lawv tsuas rov nrhiav zaub rau lawv noj xwb. Cov tswv zov yaj puas yog lawv yuav tsum coj pab yaj mus nog zaub lost sis yog ?" 3 Nej noj yaj cov roj, hnav yaj cov plaub, muab cov yaj rog tua, tab sis nej tsis coj pab yaj mus nog zaub. 4 Nej tsis tau txhawb zog rau cov tsis muaj zog, tsis tau kho cov muaj mob kom zoo, tsis tau qhwv cov raug mob lub qhov txhab. Nej tsis tau mus coj tus mus yuam kev kom rov los, tsis tau mus nrhiav kom tau tus poob zoo. Nej tsuas tswj lawv nrog kevg tsuj ntiag lawv thiab ua nruj ua tsiv rau lawv xwb. 5 Ces lawv tau tawg mus rau ub rau no vim tsis muaj tus tswv zov yaj saib lawv, lawv thiaj mus poob rau tsiaj qus ncauj tsiaj qus lo, ces lawv tau tawg mus rau ub rau no tas. 6 Kuv pab yaj tau ncaim mus, lawv tawg mus nyob puv tej toj roob thiab tej ncov roob siab tas; kuv pab yaj tawg ua lwj ua liam mus nyob puv lub ntiaj teb lawm, tsis muaj leej twg yuav saib xyuas lawv, tsis muaj leej twg yuav mus nrhiav lawv li.
7 Cov tswv zov yaj, nej tig ntsej los mloog HUAB TAIS lo lus kom zoo. 8 HUAB TAIS Tswv Ntuj hais li no: Kuv tuav txog kuv txoj sia tias, vim kuv pab yaj tau raug luag tuaj lwg, tau poob rau tsiaj qus lub ncauj lo, rau qhov tsis muaj tus tswv zov yaj saib lawv; vim kuv cov tswv zov yaj tsis txhawj txog kuv pab yaj li, lawv mus nog lawv zaub, lawv tsis coj kuv pab yaj mus nog zaub. 9 Vim li ntawd, cov tswv zov yaj, nej tig ntsej los mloog HUAB TAIS lo lus kom zoo. 10 HUAB TAIS Tswv Ntuj hais li no : Ntsia saib, kuv yuav sawv tiv cov tswv zov yaj, kuv yuav mus coj kuv pab yaj ntawm lawv tes los, kuv yuav ua kom lawv tsis tau coj kuv pab yaj mus nog zaub ntxiv; lawv yuav tsis tau mus nog zaub rau lawv tus kheej ntxiv. Kuv yuav thau kuv cov yaj ntawm lawv qhov ncauj los, kom kuv cov yaj tsis txhob yog ib co nqail rau lawv tau noj. 11 HUAB TAIS Tswv Ntuj hais li no : Ntsia saib, kuv yog tus yuav txhawj txog kuv pab yaj, kuv yuav mus nrhiav kom tau lawv.

NPN 23: 1-3A, 3B-4, 5, 6

Txais: (1) Huab Tais yog tus tswv zov yaj saib kuv, kuv yuav tsis tshaib txog dab tsi li.

HUAB TAIS yog kuv tus tswv zov yaj, kuv yuav tsis tshaib txog dab tsi.
Nws cia kuv so nyob hauv tej tshav zaub mos ntsuab xiab;
Nws coj kuv mus nyob ze cov dej tus yees;
nws ua kom kuv tus ntsuj plig muaj zog.

Txais…

Nws coj kuv mus taug txoj kev ncaj, vim nws lub npe.
Txawm kuv taug kev hauv ib lub hav tsaus ntuj nti,
kuv tsis ntshai dab tsi phem; vim koj nyob rawv ntawm kuv ib sab,
koj rab nplawm thiab rab pas nrig ua kuv luag.

Txais…

Koj rau ib rooj mov rau ntawm kuv xub ntiag
rau kuv cov yeeb ncuab ntsia ntsoov;
koj muab roj pleev kuv taub hau;
kuv lub ntim puv phwj yaws.

Txais…

Txiaj ntsim thiab kev ua zoo yuav raws kuv nraim
niaj hnub hauv kuv lub neej;
Kuv lub chaw nyob yog nyob hauv HUAB TAIS tsev
mus kom tas ntev niaj ntau xyoo.

Txais…

As Les Lus Yas: HES NPLAWS 4: 12

Txais: As les lus yas, as les lus yas.

Tswv Ntuj lo lus muaj sia thiab ua tau hauj lwm,
Nws paub tau tej tswv yim thiab tej kev xav nyob hauv neeg nruab siab.

Txais: As les lus yas, as les lus yas.

Ntawv Moo Zoo: MT 20: 1-16

Yes Xus hais rau nws cov thwj tim tias:
1 “Ntuj lub Ceeb Tsheej piv tau rau ib tug tswv teb uas thaum kaj ntug, nws tawm mus nrhiav tub zog tuaj ua nws daim teb txiv cawv. 2 Nws nrog cov tub zog hais haum ib hnub ib lub txiaj nyiag, ces nws xa lawv mus tom daim teb txiv cawv. 3 Ze cuaj teev, nws tawm mus ncig, nws pom ib co neeg nyob dag tom tshav puam. 4 Nws hais rau lawv tias : ‘Nej mus ua num tom kuv daim teb txiv cawv mas, kuv yuav muab nqi kom haum nej.’ 5 Ces lawv mus. Kwv yees txog tav su, nws rov tawm mus ncig dua, thaum hnub qaij peb teev nws rov mus ua li qub dua. 6 Thaum hnub qaij ze li tsib teev, nws rov tawm mus ncig dua, nws tseem pom ib co nyob dag, nws hais rau lawv tias : ‘Vim li cas nej nyob dag tas hnub ntawm no, tsis ua num dab tsi li ?’ 7 Lawv hais rau nws tias : ‘Vim tsis muaj neeg ntiav peb.’ Tus tswv teb hais tias : ‘Nej mus ua num tom kuv daim teb txiv cawv thiab mas.’ 8 Thaum tsaus ntuj, tus tswv teb hais rau tus tswj nyiaj txiag tias : ‘Koj hu cov tub zog los, koj muab nyias tus nqe zog rau nyias. Koj xub hu cov tuaj tom qab zuj zus los xaus rau cov xub tuaj.’ 9 Cov tub zog uas tuaj thaum tsib teev hnub qaij los txog, lawv ib leeg tau ib lub txiaj nyiag. 10 Cov xub tuaj los txog, lawv xav tias lawv yuav tau txais nqi zog ntau dua, tab sis lawv ib leej kuj tau ib lub txiaj nyiag thiab. 11 Thaum lawv txais lawv tus nqi zog, lawv yws rau tus tswv teb tias : 12 ‘Cov tuaj tom qab ua num ib teev xwb, koj muab rau lawv ib yam li muab rau peb, hos peb, mas peb tau khwv thiab tiv tshav ib hnub.’ 13 Ces tus tswv teb hais rau cov xub tuaj ib tug tias : ‘Npawg, kuv tsis tau ua tsis ncaj rau koj : wb tsis tau hais haum tias ib hnub ib lub txiaj nyiag no lod ? 14 Txais koj tus nqi zog, koj cia li mus. Yog kuv xav muab rau tus tuaj tom qab ib yam li muab rau koj no, 15 kuv tsis muaj cai rho kuv tej nyiaj txiag raws kuv siab lod ? Los yog koj khib vim kuv siab zoo?’ 16 Cov tuaj tom qab yuav tau ua ntej, hos cov ua ntej yuav tuaj tom qab zoo li no.”

Tim     20     lub     8     Hli     2020

Hnub Tsib Lis Piam Nees Nkaum Nruab Xyoo A Nruab Lis Piam Xyoo II

Hwm LN Bernard, Thawj Txiv Tab Seeb ua Kws cov Txuj Ntshiab

Zaj Nyeem Ib:   ES XES KIAS 36:  23-28

23 Huab Tais hais tias: “Kuv yuav ua kom kuv lub npe loj ntshiab tuaj, vim cov kuj cuab tau thuam kuv lub npe, vim nej tau ua kom kuv lub npe puas nyob hauv cov kuj cuab thaum nej tuaj nyob hauv lawv. Ces cov kuj cuab yuav paub tias kuv yog HUAB TAIS, thaum kuv ua kom kuv txoj kev ntshiab tawm tuaj rau lawv qhov muag pom nyob hauv nej. 24 Thaum ntawd kuv yuav thau nej hauv cov kuj cuab los, kuv yuav sau nej ntawm tas cov pej kum teb los nyob ua ke, kuv yuav coj nej rov los nyob hauv nej thaj av. 25 Kuv yuav nchos dej ntshiab rau saum nej, kom ntxuav tas tej yam tsis dawb huv nyob hauv nej mus kom tas, thiab kuv yuav sau nej tej mlom dab qia neeg pov tseg kom nej dawb huv tuaj. 26 Kuv yuav pub ib lub siab tshiab thiab ib lub tswv yim tshiab rau nej, kuv yuab muab cog rau hauv nej; kuv yuav dawj nej lub siab tawv li zeb pov tseg, thiab yuav cog ib lub siab muag li nqaij nyob hauv nej lub cev. 27 Kuv yuav muab kuv lub tswv yim rau hauv nej. Kuv yuav ua kom nej coj raws kuv tej cai lij choj, thiab kom nej ua raws kuv tej kev cai kuv tau txiav. 28 Ces nej yuav tau nyob hauv lub teb chaws uas kuv muab rau nej phaj txiv thiab phaj yawg. Nej yuav yog kuv haiv neeg, kuv yuav yog nej tus Tswv Ntuj."

NPN   51:  12-13, 14-15, 18-19

Txais: (EXK 36:25) Kuv yuav ywg dej ntshiab rau nej thiab ntxuav nej cov txhaum tas tib si.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim Ntshiab tawm ntawm kuv mus.

Txais: (EXK 36:25) Kuv yuav ywg dej ntshiab rau nej thiab ntxuav nej cov txhaum tas tib si.

Koj ua kom kuv rov zoo siab nyob hauv koj txoj kev cawm;
koj muab ib lub tswv yim txawj nyiam koj rau kuv.
Kuv yuav qhia koj txoj kev rau cov neeg yuam kev paub,
ces cov neeg txhaum yuav tig rov los cuag koj.

Txais: (EXK 36:25) Kuv yuav ywg dej ntshiab rau nej thiab ntxuav nej cov txhaum tas tib si.

Vim koj tsis zoo siab txais cov kev txi ntuj,
yog kuv hlawv tsiaj txi ntuj, koj yuav tsis txais.
Kuv txoj kev txi ntuj, Tswv Ntuj, yog muaj ib lub siab xav lees txhaum;
muaj ib lub siab xav lees txhaum thiab ua neeg me, Tswv ntuj, koj yuav tsis thuam.

Txais: (EXK 36:25) Kuv yuav ywg dej ntshiab rau nej thiab ntxuav nej cov txhaum tas tib si.

As Les Lus Yas:   NPN 95:  8

Txais: As les lus yas, as les lus yas.
.
Hnub no yog nej hnov nws lus suab,
nej yuav tsis txhob ua lub siab tawv ncauj.

Txais: As les lus yas, as les lus yas.

Ntawv Moo Zoo:   MT 22:  1-14

1 Yes Xus tsa ncauj rov ua paj lug hais rau lawv ntxiv tias : 2 “Ntuj lub Ceeb Tsheej zoo li ib tug vaj uas nws ua tshoob rau nws tus tub. 3 Nws xa tub txib mus nqua hu cov neeg nws tau caw tuaj noj tshoob, tab sis lawv tsis xav tuaj. 4 Nws rov xa dua ib pab tub txib mus, nws hais li no : ‘Nej hais rau cov raug caw tias : Nej saib, kuv twb npaj kuv rooj qav tiav tas, kuv tej heev nyuj thiab cov tsiaj rog puav leej tua tas lawm. Txhua yam npaj txhij tas, nej kav tsij tuaj nrog kuv noj tshoob !’ 5 Tab sis cov neeg ntawd tsis quav ntsej, lawv nyias mus nyias : ib tug mus tom teb, ib tug mus ua luam. 6 Hos lwm cov tseem nthos nkaus cov tub txib ntes, hiam lawv, muab lawv tua pov tseg. 7 Tus vaj npau taws, nws xa nws cov tub rog mus tua cov neeg txo luag siav ntawd thiab hlawv lawv lub nroog. 8 Ces nws hais rau nws cov tub txib tias : ‘Rooj tshoob npaj tau txhij, tab sis cov neeg kuv caw tsis tsim nyog noj. 9 Nej mus tom tej ncauj ke, nej pom tsawg leej, nej nqua hu kom tuaj noj rooj tshoob.’ 10 Cov tub txib mus txhua txoj kev, lawv sau tas txhua leej txhua tus uas lawv ntsib, cov phem cov zoo tuaj huv tib si. Neeg tuaj puv nkaus lub tsev noj tshoob. 11 Tus vaj chaws los xyuas cov neeg tuaj koom lub ntees tshoob. Nyob ntawd, nws pom ib tug tsis hnav tsoos noj tshoob. 12 Tus vaj hais rau nws tias : ‘Npawg, koj tsis hnav tsoos noj tshoob, ua cas koj los hauv no ?’ Tus neeg ntawd nyob ntsiag to. 13 Ces tus vaj hais rau cov tub txib tias : ‘Nej muab nws pav tes pav taw, muab nws pov rau nraum zoov, hauv qhov tsaus ntuj; nyob ntawd, yuav muaj quaj tom hniav nkawv.’ 14 Vim tias muaj ntau leej raug hu, tab sis tsawg leej raug xaiv.”

Tim 21 lub 8 Hli 2020

Hnub Rau Lis Piam Nes Nkaum Nruab Xyoo A Nruab Lis Piam Xyoo II

Hwm LN Pius X (Pis Yus X), ua Vaj Qhia

Zaj Nyeem Ib: ES XES KIAS 37: 1-14

1 HUAB TAIS txhais tes nyob saum kuv thiab nws coj kuv nyob hauv Huab Tais lub tswv yim mus tso rau hauv ib lub vos hav uas muaj pob txha puv nkaus. 2 HUAB TAIS coj kuv mus ncig mus ncig los xyuas cov pob txha ntawd. Muaj pob txha ntau kawg puv ntia saum tej npoo av hauv lub vos hav. Yog ib co pob txha qhuav qhuav xwb. 3 HUAB TAIS hais rau kuv tias : "Neeg leej tub, cov pob txha ntawd puas yuav rov muaj txoj sia tau ?" Kuv teb tias : "HUAB TAIS Tswv Ntuj, koj thiaj paub xwb." 4 Nws hais rau kuv tias : "Koj ua yaj saub tshaj lus rau cov pob txha no, koj hais rau lawv tias : Pob txha qhuav, nej mloog HUAB TAIS lo lus mog! 5 HUAB TAIS Tswv Ntuj hais rau cov pob txha li no : Kuv yuav muab ib lub tswv yim los tso rau hauv nej ces nej yuav ciaj sia tuaj. 6 Kuv yuav muab leeg los lo rau nej, kuv yuav ua kom muaj nqaij hlav tuaj, kuv yuav muab tawv los qhwv nej, kuv yuav muab tswv yim rau nej, ces nej yuav muaj sia, nej thiaj yuav paub tias kuv yog HUAB TAIS."
7 Ces kuv ua yaj saub tshaj raws li Tswv Ntuj qhia, ces thaum kuv tab tom ua yaj saub tshaj lus, mas kuv txawm hnov ib qho nrov qeeg zom zaws; yog cov pob txha txav los mus sib dhos ua ke, nyias txav los dhos rau nyias tus. 8 Kuv ntsia pom lawv cov leeg hlav tuaj thiab lawv cov nqaij xeeb tuaj, thiab muaj tawv hlav tuaj qhwv lawv. Tab sis tsis muaj txoj sia nyob hauv lawv. 9 Ces Tswv Ntuj hais rau kuv tias : "Neeg leej tub, koj ua yaj saub tshaj lus rau txoj sia mas ! Koj ua yaj saub, koj hais li no rau txoj sia tias : 'HUAB TAIS Tswv Ntuj hais li no : Txoj sia, koj ya tuaj ntawm plaub ceg kaum ntuj tuaj ! Koj tuaj tshuab pa rau cov tuag no kom lawv muaj txoj sia tuaj."
10 Kuv ua yaj saub tshaj raws li Tswv Ntuj qhia. Ces txoj sia los nyob hauv lawv, lawv muaj sia tuaj thiab lawv sawv los nyob ntseg ntsees, zoo li ib npoj tub rog coob tas nrho. 11 Tswv Ntuj hais rau kuv tias : "Neeg leej tub, cov pob txha no yog tas nrho tsev neeg His Xas Lais. Lawv niaj hnub hais tias : 'Peb cov pob txha qhuav tas ! Peb txoj kev tso siab yaj tas ! Peb ces tas li no lawm!' 12 Vim li ntawd, koj yuav ua yaj saub tshaj rau lawv, koj hais rau lawv tias : ‘HUAB TAIS Tswv Ntuj hais li no : Kuv haiv neeg, kuv yuav qhib nej cov ntxa, kuv yuav cia nej nce hauv nej cov ntxa tawm los, kuv yuav coj nej rov mus nyob rau His Xas Lais thaj av. 13 Kuv haiv neeg, thaum kuv qhib nej cov ntxa thiab kuv cia nej nce tawm hauv nej cov ntxa los, mas nej yuav paub tias kuv yog HUAB TAIS. 14 Kuv yuav tso kuv lub tswv yim rau hauv nej ces nej yuav rov muaj txoj sia. Kuv yuav coj nej mus nyob txawm hauv nej thaj av. Nej thiaj yuav paub tias kuv yog HUAB TAIS. Kuv tau hais li cas mas kuv ua li ntawd.’” Yog HUAB TAIS lo lus.

NPN 107: 2-3, 4-5, 6-7, 8-9

Txais: (1) Nej ua Huab Tais tsaug vim nws txoj kev hlub nyob mus li.

Kom cov uas HUAB TAIS tau npo lawv dim hais li ntawd,
cov uas nws npo lawv dim ntawm cov neeg quab yuam txhais tes,
cov uas nws tau sau lawv ntawm pej kum teb rov los,
txij sab hnub tuaj mus txog sab hnub poob, txij qaum teb mus txog qab teb.

Txais: (1) Nej ua Huab Tais tsaug vim nws txoj kev hlub nyob mus li.

Lawv tau mus poob zoo rau teb chaws suab puam,
lawv nrhiav tsis tau kev mus rau ib lub zos muaj neeg nyob.
Lawv tshaib tshaib plab nqhis nqhis dej,
Ua rau lawv txoj sia twb yuav yaj ntawm lawv mus.

Txais: (1) Nej ua Huab Tais tsaug vim nws txoj kev hlub nyob mus li.

Ces lawv quaj hu HUAB TAIS thaum lawv txom nyem,
nws cawm lawv ntawm lawv kev nyuaj siab.
Nws coj lawv mus taug txoj kev uas ncaj qha
Mus kom txog ib lub tsheej muaj neeg nyob.

Txais: (1) Nej ua Huab Tais tsaug vim nws txoj kev hlub nyob mus li.

Kom lawv cav lus zoo ua HUAB TAIS tsaug, vim nws hlub
thiab nws ua hwj huam yees ntxwv loj tas nrho pab tib neeg,
Vim tias nws pub rau tus nqhis qhuav siab qhawv tau haus zoo siab hlo,
thiab rau tus tshaib plab qaug zog zis tau noj tsau npo.

Txais: (1) Nej ua Huab Tais tsaug vim nws txoj kev hlub nyob mus li.

As Les Lus Yas: NPN 25: 4B, 5A

Txais: As les lus yas, as les lus yas.

Kuv tus Tswv Ntuj, thov koj qhia koj txoj kev rau kuv taug,
thov koj coj kuv mus taug koj txoj kev tseeb.

Txais: As les lus yas, as les lus yas.

Ntawv Moo Zoo: MT 22: 34-40

34 Cov Fas Lis Xais hnov tias Yes Xus teb rau cov Xas Dus Kais tws lus, ces lawv sib sau sab laj.
35 Lawv ib tug tuaj sim Yes Xus, nws yog ib tug kws lij choj, nws nug tias :
36 “Xib Hwb, nyob hauv Txoj Cai, lo lus qhia twg loj dua cov ?
37 Yes Xus hais rau nws tias : “Koj yuav muab tas koj lub siab, tas koj tus ntsuj plig, tas koj lub tswv yim los nyiam koj tus Huab Tais Tswv Ntuj .
38 Lo lus qhia no yog lo lus qhia loj tshaj cov, yog thawj lo lus qhia.
39 Lo lus qhia ob kuj zoo ib yam thiab : Koj yuav nyiam tus nyob ze koj ib yam nkaus li koj nyiam koj.
40 Tas Txoj Cai thiab cov Yaj Saub puav leej dai ncuv rau ob lo lus qhia no."

Tim 22 lub 8 Hli 2020

Hnub Xya Lis Piam Nees Nkaum Nruab Xyoo A Nruab Lis Piam Xyoo II

Hwm Niam Mab Liab ua Poj Vaj

Zaj Nyeem Ib: ES XES KIAS 43: 1-7AB

1 Tus txiv neej coj kuv mus rau ntawm lub qhov rooj vag uas tig rau sab hnub tuaj. 2 Nyob ntawd kuv pom cov His Xas Lais tus Tswv Ntuj lub hwj chim tawm tim phab hnub tuaj tuaj; nws lub suab nrov nroo ntws xws li suab ntau tus dej loj loj nrov thiab nws lub hwj chim ua rau lub ntiaj teb ci ntsa iab. 3 Qhov kuv pom no zoo ib yam li qhov uas kuv tau pom thaum nws tuaj rhuav lub tsheej thiab kuj zoo li qhov kuv tau pom nyob ntawm tus niam dej Kes Npas, ces kuv tau khoov ntsej muag ti av. 4 HUAB TAIS lub hwj chim hla ntawm lub qhov rooj vag uas tig rau sab hnub tuaj tuaj mus rau hauv lub Tuam Tsev Teev Ntuj. 5 Ces Leej Tswv Yim nqa kuv coj kuv mus txog hauv lub plawv tshav loog. Kuv pom HUAB TAIS lub hwj chim ci puv lub Tuam Tsev. 6 Ces kuv hnov ib lub suab hais lus rau kuv tuaj hauv lub Tuam Tsev tuaj, hos tus txiv neej sawv ntawm kuv ib sab. 7 Lub suab hais rau kuv tias : "Neeg leej tub, qhov chaw no yog qhov kuv yuav txawb kuv lub theej kiab rau, thaj chaw no yog thaj kuv yuav tiag kuv xib taws rau; kuv yuav nyob ntawm no nrog tsoom tub ki His Xas Lais mus li ib txhiab ib txhis.”

NPN 85: 9AB+10, 11-12, 13-14

Txais: 10b) HUAB TAIS lub hwj chim yuav nyob txawm hauv peb teb chaws.

Kuv yuav mloog saib Tswv Ntuj hais dab tsi:
Huab Tais nws tshaj kev thaj yeeb.
Nws txoj kev cawm los txog ze cov hwm nws lawm,
Nws lub hwj chim yuav tsa tsev nyob hauv peb teb chaws.

Txais: 10b) HUAB TAIS lub hwj chim yuav nyob txawm hauv peb teb chaws.

Kev ua zoo thiab kev tseeb yuav los sib ntsib,
Kev ncaj thiab kev thaj yeeb yuav los sib qawg.
Kev tseeb yuav txhawv tawm hauv ntiaj teb los,
kev ncaj yuav dauv muag ntsia saum ntuj tuaj.

Txais: 10b) HUAB TAIS lub hwj chim yuav nyob txawm hauv peb teb chaws.

HUAB TAIS yuav pub nws tej txiaj ntsim,
peb cov av yuav ntsu qoob ntsu loo,
Kev ncaj yuav mus ua Huab Tais ntej,
txoj kev cawm yuav taug tej nws hneev taw.

Txais: 10b) HUAB TAIS lub hwj chim yuav nyob txawm hauv peb teb chaws.

As Les Lus Yas: MT 23: 9B, 10B

Txais: As les lus yas, as les lus yas.

Nej tsuas muaj tib leeg Txiv xwb, yog tus nyob saum ntuj
nej tsuas muaj tib tug Coj xwb, yog Leej Pleev. .

Txais: As les lus yas, as les lus yas.

Ntawv Moo Zoo: MT 23: 1-12

1 Yes Xus qhia tsoom sid thiab nws cov thwj tim, nws hais tias : 2 “Cov Kws Ntawv Ntshiab thiab cov Fas Lis Xais zaum Mais Xes lub rooj zaum lawm. 3 Vim li ntawd mas nej yuav ua thiab yuav coj tas txhua yam lawv qhia rau nej, tab sis nej txhob xyaum raws li lawv ua. Vim lawv qhia, tab sis lawv tsis ua raws qhov lawv qhia. 4 Lawv nog tej lub nra hnyav yuam rau tsoom sid xwb pwg, tab sis lawv tsis kam cev ib tug ntiv tes los kov. 5 Lawv ua txhua tsav txhua yam kom neeg pom xwb. Yog li ntawd, lawv thiaj coj tej txws ntim Txoj Cai dav dav, thiab dai tej tw ntxhoo ntev ntev. 6 Thaum lawv mus noj nqaij haus cawv, lawv nyiam zaum thawj lub rooj zaum thiab nyob hauv cov tsev txoos, lawv nyiam zaum cov rooj pem hauv ntej. 7 Lawv nyiam kom luag hawm lawv tom tej tshav puam, nyiam hnov sawv daws hu lawv ua “Xib Hwb”. 8 Hos nej, mas nej txhob cia luag hu nej ua “Xib Hwb”, vim nej tsuas muaj tib tug Xib Hwb xwb, thiab nej sawv daws yog ib co kwv tij. 9 Nej txhob hu leej twg nyob ntiaj teb no ua “Txiv”, vim nej tsuas muaj tib leeg Txiv xwb, yog tus nyob saum ntuj. 10 Nej txhob cia luag hu nej ua “Tus Coj”, vim nej tsuas muaj tib tug Coj xwb, yog Leej Pleev. 11 Tus loj dua cov nyob hauv nej, yuav ua nej tus tub txib. 12 Tus twg tsa nws tus kheej siab, Ntuj yuav txo nws qis. Tus twg txo nws qis, Ntuj yuav tsa nws siab.

TIM     24     LUB     8     HLI     2020

Hnub Ob Lis Piam Nees Nkaum Ib Nruab Xyoo A Nruab Lis Piam Xyoo II

Hwm LN Bartholomew (Npas Tos Los Mas Yos), ib tug Hauv Paus Xa Lus.
Muaj coob leej hais tias Bartholomew thiab Nathanael (Nas Tas Nais) yog tib tug xwb.
Lectionary: 629

Zaj Nyeem Ib:        QYTN  21:   9B-14

Ib tug tshiab los hais rau kuv tias : “Koj los, kuv yuav coj koj mus saib tus Nkauj Nyab, uas yog Leej Yaj tus txij nkawm.” 10 Ces nws coj kuv hauv kuv lub tswv yim mus rau saum ib lub roob loj roob siab, nws muab lub tsheej ntshiab Yes Lus Xas Les rau kuv saib, uas nqes saum ntuj pem Tswv Ntuj los. 11 Lub tsheej muaj Tswv Ntuj lub hwj chim, nws ci ntsa iab xws li ib lub pob zeb pov haum muaj nqi kawg, xws li ib lub pob zeb jasper ci lam lug xws tsom iav. 12 Muaj ib lub ntsa zeb loj thiab siab xov lub tsheej. Lub ntsa zeb muaj kaum ob lub qhov rooj vag, muaj kaum ob tug Tshiab zov cov qhov rooj ntawd. Muaj ib co npe sau rau ntawm cov qhov rooj : yog cov npe ntawm kaum ob lub xeem tub ki His Xas Lais. 13 Sab Toob Fab muaj peb lub qhov rooj, Pej Fab muaj peb lub qhov rooj, Naj Fab muaj peb lub qhov rooj, Xib Fab muaj peb lub qhov rooj. 14 Lub ntsa zeb xov lub tsheej txawb rau saum kaum ob txheej pob zeb ua tus taw ntsa. Muaj kaum ob lub npe sau rau saum tus taw ntsa, yog Leej Yaj kaum ob leeg Hauv Paus Xa Lus cov npe.

NPN        145:   10-11, 12-13, 17-18

Txais: (12) Huab Tais, koj cov phooj ywg tshaj txog
              koj lub Ceeb Tsheej muaj hwj chim ci ntsa iab.

HUAB TAIS, cia tas koj cov hauj lwm ua koj tsaug,
thiab cia cov uas nyiam koj cav txog koj.
Cia lawv tshaj txog koj lub Ceeb Tsheej muaj hwj chim
thiab piav txog koj lub hwj huam loj.

Txais: (12) Huab Tais, koj cov phooj ywg tshaj txog
              koj lub Ceeb Tsheej muaj hwj chim ci ntsa iab.

Cia lawv qhia rau neeg paub txog koj lub hwj huam loj
thiab koj lub Ceeb Tsheej muaj hwj chim ci ntsa iab.
Koj lub Ceeb Tsheej yog ib lub Ceeb Tsheej
txais tas cov hlob nrog cov yau,
thiab koj txoj kev tswj kav yuav nyob mus txhua tiam neeg

Txais: (12) Huab Tais, koj cov phooj ywg tshaj txog
              koj lub Ceeb Tsheej muaj hwj chim ci ntsa iab.

Huab Tais ua ncaj nyob hauv tas nrho nws tej kev,
Nws yog tus ntshiab nyob hauv tas nws tej dej num.
Huab Tais nyob ze cov hu txog nws,
cov uas hu txog nws rawv qhov tseeb.

Txais: (12) Huab Tais, koj cov phooj ywg tshaj txog
              koj lub Ceeb Tsheej muaj hwj chim ci ntsa iab.

As Les Lus Yas:        ZAM  1:   49B

Txais: As les lus yas, as les lus yas.

Las Npis, koj yog Tswv Ntuj Leej Tub,
koj yog cov His Xas Lais tus vaj.

Txais: As les lus yas, as les lus yas.

Ntawv Moo Zoo:        ZAM  1:   45-51

45 Fis Lis Pos ntsib Nas Tas Nais, nws hais rau Nas Tas Nais tias : "Tus uas Mais Xes tau sau txog nyob hauv Txoj Cai, thiab cov Yaj Saub tau hais txog, mas peb ntsib nws lawm, yog Yes Xus, Yos Xes nyob Nas Xas Les tus tub." 46 Ces Nas Tas Nais hais rau Fis Lis Pos tias : "Puas yuav muaj ib yam zoo tawm hauv Nas Xas Les tuaj tau ?" Fis Lis Pos hais rau Nas Tas Nais tias : "Koj tuaj, koj yuav pom." 47 Yes Xus pom Nas Tas Nais tuaj, nws hais txog Nas Tas Nais, nws hais tias : "Nej saib, tus ntawd yog ib tug tseem His Xas Lais uas tsis muaj kev zais siab nyob hauv nws li." 48 Nas Tas Nais hais rau Yes Xus tias: "Ua cas koj paub kuv ?" Yes Xus teb rau nws tias : "Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias lawm." 49 Nas Tas Nais teb rau Yes Xus tias : "Las Npis, koj yog Tswv Ntuj Leej Tub ! Koj yog His Xas Lais tus Vaj." 50 Yes Xus teb rau nws tias : "Yog vim kuv hais rau koj tias : Kuv pom koj nyob hauv tsob qab ntoo txiv ncuav pias, mas koj thiaj ntseeg, puas yog? Koj yuav pom tej yam loj dua no thiab." 51 Ces Yes Xus hais rau Nas Tas Nais tias : "Kuv hais qhov muaj tseeb tiag rau nej: Nej yuav pom lub ntuj qhib los, thiab pom Tswv Ntuj cov Tshiab nce mus thiab nqes los nyob saum Neeg Leej Tub."

TIM 25 LUB 8 HLI 2020

Hnub Peb Lis Piam Nees Nkaum Ib Nruab Xyoo A Nruab Lis Piam Xyoo II

Hwm LN Louis nyob Fab Kis teb, ua Vaj; LN Joseph Calasanz, ua Leej Choj

Zaj Nyeem Ib: 2 TES XAS LOS NIS 2: 1-3A, 14-17

1 Cov kwv tij, peb thov hais rau nej tias, hais txog lub caij thaum peb tus Huab Tais Yes Xus Pleev yuav los, thiab peb yuav sib sau nyob ze nws, 2 mas thov kom nej tsis txhob vwm sai sai txog, thiab nej yuav tsis txhob txhawj txhob ntshai, yog tias muaj tej lub tswv yim los tej cov lus los tej tsab ntawv uas luag hais tias yog tuaj ntawm peb tuaj, hais txog tias twb txog Huab Tais lub hnub nyoog tuaj lawm, 3 mas nej yuav ceev faj zoo txhob cia leej twg ua kom nej yuam kev li.
14 Tswv Ntuj hu nej kom nej tau txais kev cawm thiab kev ntseeg raws qhov tseeb nyob hauv peb lub Moo Zoo, kom nej tau txais peb tus Huab Tais Yes Xus Pleev lub hwj chim los ua nej tug. 15 Vim li ntawd mas, cov kwv tij, nej yuav tsum nyob ruaj nreb, nej coj raws nraim li tej kev cai nej tau ib txwm coj uas yog peb tau qhia rau nej ntawm peb lub ncauj kiag, los ntawm peb cov tsab ntawv sau rau nej.
16 Thov kom peb tus Huab Tais Yes Xus Pleev thiab Tswv Ntuj peb leej Txiv uas yog tus hlub peb, pub lub txiaj ntsim rau peb kom peb muaj kev nplig siab mus li, thiab muaj kev tso siab lug, 17 thov kom nws nplij nej lub siab thiab txhawb nej lub zog thaum nej ua tej hauj lwm zoo thiab thaum nej hais lus.

NPN 96: 10, 11-12, 13

Txais: (13b) Huab Tais tuaj txiav txim rau lub ntiaj teb.

Nej hais nyob hauv cov kuj cuab tias: HUAB TAIS ua vaj;
Nws tsim lub ntiaj teb kom nyob ruaj, yuav txav tsis tau;
Nws yuav tswj cov haiv neeg raws kev ncaj ncees.

Txais: (13b) Huab Tais tuaj txiav txim rau lub ntiaj teb.

Kom cov txheej ntuj zoo siab, thiab kom lub ntiaj teb hom khaj;
kom dej hiav txwv thiab txhua yam nyob hauv tsa suab qw nroo ntws;
kom cov tiaj nras thiab txhua yam nyob hauv luag ntxhi!
Cea txhua tus ntoo nyob hauv hav zoov yuav qw zoo siab.

Txais: (13b) Huab Tais tuaj txiav txim rau lub ntiaj teb.

Nyob ntawm HUAB TAIS xub ntiag, vim nws tuaj lawm,
nws tuaj tswj kav lub ntiaj teb.
Nws yuav tswj kav lub sim ceeb raws kev ncaj ncees,
thiab cov haiv neeg raws nws txoj kev tseeb.

Txais: (13b) Huab Tais tuaj txiav txim rau lub ntiaj teb.

As Les Lus Yas: HES NPLAWS 4: 12

Txais: As les lus yas, as les lus yas.

Tswv Ntuj lo lus muaj txoj sia thiab ua tau hauj lwm,
Nws paub tau tej tswv yim thiab tej kev xav nyob hauv neeg nruab siab.

Txais: As les lus yas, as les lus yas.

Ntawv Moo Zoo: MT 23: 23-26

Yes Xus hais tias:
23 “Nej tsoom Kws Ntawv Ntshiab thiab tsoom Fas Lis Xais, neeg zoo nraum daim tawv, nej txoj hmoov phem, vim nej them se ib feem kaum rau cov pum hub, zaub txhwb nyug thiab txheej txhaim, tab sis nej tso tej yam loj nyob hauv Txoj Cai pov tseg : yam li kev ncaj, kev hlub luag, thiab kev coj zoo. Yuav tsum xub muab siab rau coj tej no ua ntej, thiab kuj tsis tso tej tod tseg. 24 Neeg dig muag coj kev, nej lim tus yoov tshaj cum tawm, nej ho cia li nqos tus ntxhuav.
25 Nej tsoom Kws Ntawv Ntshiab thiab tsoom Fas Lis Xais, neeg zoo nraum daim tawv, nej txoj hmoov phem. Nej ntxuav khob ntxuav phaj sab nraud, tab sis kev tub sab thiab kev hu dab nyob puv nkaus sab hauv. 26 Fas Lis Xais dig muag, koj ntxuav lub khob sab hauv tso, ces sab nraud thiaj yuav huv thiab.

TIM 26 LUB 8 HLI 2020

Hnub Plaub Lis Piam Nees Nkaum Ib Nruab Xyoo A Nruab Lis Piam Xyoo II

Zaj Nyeem Ib: 2 TXLN 3: 6-10, 16-18

6 Cov kwv tij, peb tuav txog Huab Tais Yes Xus Pleev lub npe qhia nej kom nej txav mus deb ntawm tej tus kwv tij uas coj lub neej dog dig, thiab lawv tsis mloog txoj kev cai ib txwm coj uas lawv tau txais ntawm peb los. 7 Nej yeej paub zoo lawm tias, nej yuav tsum yoog peb zoo li cas. Vim tias thaum peb tseem nrog nej nyob, mas peb tsis tau coj ib lub neej dog dig. 8 Peb twb tsis tau kom leej twg pub mov rau peb noj dawb dawb, peb tau ua hauj lwm nruab hnub hmo ntuj, peb tau khwv iab khwv daw, vim peb tsis xav ua ib lub nra hnyav rau nej leej twg ris. 9 Tsis yog vim peb tsis muaj cai noj, tab sis yog vim peb tus kheej xav ua ib tug piv txwv rau nej tau yoog raws li peb coj. 10 Thaum peb tseem nrog nej nyob, peb tau tsa ib txog cai li no rau nej tias, yog ib tug neeg twg tsis kam ua hauj lwm, mas nws yuav tsis txhob noj mov thiab.
16 Thov kom tus Huab Tais muaj kev thaj yeeb pub txoj kev thaj yeeb rau nej txhua lub sij hawm thiab nyob hauv txhua txoj kev. Kom Huab Tais nrog nej sawv daws nyob nraim.
17 Kuv Paj Lug, tau xuas kuv txhais tes sau cov lus no rau nej. Yog ib lub cim qhia txog txhua tsab ntawv uas kuv sau; kuv yeej sau ntawd li ntawd. 18 Thov kom peb tus Huab Tais Yes Xus Pleev lub txiaj ntsim nrog nej sawv daws nyob nraim.

NPN 128: 1-2, 4-5

Txais: (1) Cov hwm Huab Tais lawv tau txoj hmoov zoo.

Cov hwm HUAB TAIS, nej txoj hmoov zoo,
vim nej taug raws nws tej kev!
Nej yuav tau noj lub txiv ntawm nej tej hauj lwm,
nej yuav tau hmoov zoo thiab yuav tau nws kev hlub.

Txais: (1) Cov hwm Huab Tais lawv tau txoj hmoov zoo.

Ntsia saib, tus neeg muaj txoj hmoov zoo
yog tus ntshai HUAB TAIS.
HUAB TAIS nyob saum Xis Yoos foom koob hmoov rau koj,
kom koj tau pom Yes Lus Xas Les vam meej
niaj hnub hauv koj lub neej.

Txais: (1) Cov hwm Huab Tais lawv tau txoj hmoov zoo.

As Les Lus Yas: 1 JOHN 2: 5

Txais: As les lus ays, as les lus yas.

Leej twg khaws nraim Leej Pleev lo lus,
mas Tswv Ntuj txoj kev nyiam hlob tiav log nyob hauv nws tiag

Txais: As les lus ays, as les lus yas.

Ntawv Moo Zoo: MT 23:27-32

Yes Xus hais tias:
27 “Tsoom Kws Ntawv Ntshiab thiab tsoom Fas Lis Xais zoo nraum daim tawv, nej txoj hmoov phem. Nej zoo li ib co ntxa pleev hmoov zeb sib; sab nraud zoo nkauj zoo saib, tab sis sab hauv muaj pob txha neeg tuag thiab puas tsav yam kev phem kev qias puv nkaus. 28 Nej kuj zoo ib yam li ntawd, ntsia sab nraud mas nej zoo li neeg ncaj, tab sis nyob sab hauv mas kev dag thiab kev txhaum nyob puv nkaus.
29 Tsoom Kws Ntawv Ntshiab thiab tsoom Fas Lis Xais zoo nraum daim tawv, nej txoj hmoov phem, vim tias nej txhim cov yaj saub tej ntxa thiab tu cov neeg ncaj tej ntxa kom zoo nkauj, 30 nej hais tias : “Yog peb ua neej nyob lub zim txwv peb cov yawg koob nyob, mas peb yuav tsis nrog lawv koom tes hliv cov yaj saub tej roj ntsha.” 31 Ua li mas yog nej rov ua tim khawv rhuav nej, vim nej yog cov neeg txo cov yaj saub txoj sia cov tub. 32 Nej tau ua phim nkaus nej cov yawg koob thiab.

TIM     27     LUB     8     HLI     2020

Hnub Tsib Lis Piam Nees Nkaum Ib Nruab Xyoo A Nruab Lis Piam Xyoo II  

Hw LN Monica

Zaj Nyeem Ib:      1 KLN  1:   1-9

1 Kuv, Paj Lug, tus raug hu los ua Yes Xus Pleev ib tug Hauv Paus Xa Lus vim Tswv Ntuj pom zoo, nrog tus kwv Xos Thes Nos,  
2  sau ntawv tuaj rau Tswv Ntuj lub Koom Txoos nyob Kos Lis Nthos, rau nej cov uas tau hloov ua neeg dawb huv nyob hauv Yes Xus Pleev lawm, uas Ntuj hu nej los ua neeg ntshiab, nrog tas txhua leej nyob qhov txhia chaw uas tuav txog peb tus Huab Tais Yes Xus Pleev lub npe, uas nws yog lawv tus Huab Tais thiab yog peb tus Huab Tais.
3 Thov kom nej tau txais txiaj ntsim thiab kev thaj yeeb tuaj ntawm
Tswv Ntuj peb Leej Txiv thiab ntawm Huab Tais Yes Xus Pleev tuaj.
4 Kuv ua kuv tus Tswv Ntuj tsaug tsis tseg vim nej,
rau lub txiaj ntsim uas Tswv Ntuj tau pub rau nej nyob hauv Yes Xus Pleev,
5 ces nej tau ua neeg nplua nuj muaj tas txhua tsav txhua yam nyob nws.
Nej muaj txoj kev txawj hais lus txog txhua yam,
thiab txoj kev paub txog txhua yam txuj ci,
6 raws li txoj kev ua tim khawv zeem tseeb txog Leej Pleev
tau loj tuaj muaj zog tuaj nyob hauv nej lawm.
7 Ces ua kom nej tsis pluag ib lub txiaj ntsim dab tsi ntawm sab ntsuj plig li,
thaum lub caij nej tseem nyob tos peb tus Huab Tais
Yes Xus Pleev yuav tawm los rau neeg pom xyeem.
8 Nws yuav pab kom nej nyob ruaj nreb mus txog qhov kawg,
kom thaum txog peb tus Huab Tais Yes Xus Pleev hnub,
mas tsis muaj ib qho xyeej nyob hauv nej li.
9 Tswv Ntuj yog tus tsis dag, nws tau hu nej
kom nej los muaj kev sib raug zoo nrog nws Leej Tub
peb tus Huab Tais Yes Xus Pleev.

NPN      145:   2-3, 4-5, 6-7

Txais:    (1)  Huab Tais, kuv yuav cav txog koj lub npe mus li.

Kuv yuav niaj hnub cav txog koj lub koob meej,
kuv yuav cav lus zoo txog koj lub npe mus li ib txhiab ib txhis.
HUAB TAIS loj tas nrho, tsim nyog cav txog nws kawg nkaus;
nws loj tas nrho, neeg ntsuas tsis tau.

Txais:    (1)  Huab Tais, kuv yuav cav txog koj lub npe mus li.

Txheej dhau txheej sawv daws yuav qhuas txog koj tej hauj lwm,
Lawv yuav tshaj koj txoj kev muaj hwj huam rau neeg paub.
Lawv yuav qhia txog koj lub hwj huam hwj chim loj ci ntsa iab,
thab yuav hais tsis tseg txog koj cov dej num tsim nyog qhuas.

Txais:    (1)  Huab Tais, kuv yuav cav txog koj lub npe mus li.

Lawv yuav piav txog koj tej hauj lwm muaj hwj huam txaus ntshai,
thiab yuav tshaj koj lub hwj chim loj kawg nkaus.
Lawv yuav cav txog koj lub siab zoo siab dav tas nrho,
thiab yuav hu nkauj zoo siab cav txog koj txoj kev ncaj.

Txais:    (1)  Huab Tais, kuv yuav cav txog koj lub npe mus li.

As Les Lus Yas:       MT  24:   42A, 44

Txais:   As les lus yas, as les lus yas.

Nej zov hmo mas!
Vim nej tsis paub thaum twg Neeg Leej Tub yuav los.

Txais:   As les lus yas, as les lus yas.

Ntawv Moo Zoo:     MT  24:   42-51

Yes Xus hais rau nws cov thwj tim tias:
42 “Nej zov hmo! Vim nej tsis paub hnub twg nej tus Huab Tais yuav los.
43 Nej yeej paub tseeb tias : yog tus tswv tsev paub tias hmo ntuj, lub sij hawm twg tub sab yuav tuaj, mas nws yuav zov hmo, yuav tsis cia tub sab tho qhov tsev.
44 Nej kuj ib yam, nej yuav npaj kom txhij tos, vim Neeg Leej Tub yuav los ib lub sij hawm uas nej tsis nco faj.
45 Leej twg thiaj yuav yog tus tub txib pheej xeeb thiab xyuam xim, uas tus tswv tsev tsa nws ua tus saib nws tsev neeg, kom thaum txog caij, nws faib txhiam xws rau sawv daws noj ?
46 Tus tub txib uas tus tswv tsev rov los pom tab tom lis dej num li ntawd, mas nws yuav tau txoj hmoov zoo.
47 Kuv hais tseeb rau nej, tus tswv yuav tsa nws ua tus saib tus tswv lub cuab tam tas huv si.
48 Tab sis yog tus tub txib ntawd siab phem nws xav tias : ‘Kuv tus tswv yuav los lig.’
49 Ces nws muab lwm cov tub txib ntaus, nws mus nrog cov quav dej quav cawv noj thiab haus,  
50 mas nws tus tswv yuav rov los ib hnub uas nws tsis nco faj, thiab ib lub sij hawm uas nws tsis paub.
51 Tus tswv yuav rau txim loj rau nws, yuav ntiab nws mus nyob ib qho chaw nrog cov neeg uas zoo nraum daim tawv xwb. Nyob ntawd, yuav muaj kev quaj vwm leg thiab tom hniav nkawv.”

TIM 28 LUB 8 HLI 2020

Hnub Rau Lis Piam Nees Nkaum Ib Nruab Xyoo A Nruab Lis Piam Xyoo II

Hwm LN Augustine, Tswv Qhia ua Kws cov Txuj Ntshiab

Zaj Nyeem Ib: 1 KLN 1: 17-25

Cov kwv tij nkauj muad:
17 Leej Pleev tsis tau xa kuv mus ua lub Cim Ntxuav, tiam sis nws xa kuv mus tshaj lub Moo Zoo, tsis yog siv kev txawj hais lus thoob tsib tshaj, ces thiaj tsis ua kom Leej Pleev tus ntoo cuam yog ib qho tsis muaj nuj nqis.
18 Tus ntoo cuam lub ntsiab yog kev vwm rau cov neeg taug txoj kev ploj, tab sis rau peb cov neeg uas txais kev cawm, mas ntoo cuam yog Tswv Ntuj lub hwj huam. 19 Vim muaj lus sau tseg tias : “Kuv yuav rhuav cov neeg thoob tsib txoj kev thoob tsib, kuv yuav tshem cov neeg ntse txoj kev txawj ntse tawm.”
20 Tus neeg thoob tsib nyob qhov twg ? Tus neeg txawj sau ntawv dua qhov twg lawm ? Tus neeg txawj nrog luag sib cav hais tswv yim tiam no nyob qhov twg? Tswv Ntuj tsis tau ua kom ntiaj teb txoj kev thoob tsib yog kev vwm lod? 21 Vim nyob hauv Tswv Ntuj txoj kev thoob tsib mas nws tsis ua kom ntiaj teb zeem tau Tswv Ntuj vim kev thoob tsib, hos Tswv Ntuj pom zoo cia siv txoj kev vwm hauv kev tshaj lub Moo Zoo los cawm cov neeg uas muaj kev ntseeg. 22 Vim tias cov Yus Das taij kom ua hwj huam yees ntxwv, hos cov Hes Las mas lawv ntsia saib puas muaj kev thoob tsib, 23 ntawm peb mas peb tshaj Leej Pleev dai saum ntoo cuam, uas yog ib qho phem kawg nkaus rau cov Yus Das, thiab yog ib qho kev vwm rau cov neeg teev pej kum dab. 24 Tab sis cov uas Ntuj hu lawv, tsis hais Yus Das los Hes Las, mas lawv saib Leej Pleev yog Tswv Ntuj lub hwj huam, thiab yog Tswv Ntuj txoj kev Thoob Tsib. 25 Vim tias Tswv Ntuj txoj kev vwm mas tseem thoob tsib dua neeg kev thoob tsib, thiab Tswv Ntuj txoj kev qaug zog, mas tseem muaj zog dua neeg lub zog.

NPN 33: 1-2, 4-5, 10-11

Txais: (5) Lub ntiaj teb puv nkaus Huab Tais txoj kev ua zoo.

Cov neeg siab ncaj, nej cia li zoo siab nyob hauv HUAB TAIS;
tus neeg siab ncaj txoj kev qhuas Huab Tais yog ib qho zoo.
Nej ntaus nkauj nog ncas ua HUAB TAIS tsaug,
nej ntaus thaj cheej kaum txoj hlua cav txog nws.

Txais: (5) Lub ntiaj teb puv nkaus Huab Tais txoj kev hlub.

HUAB TAIS lo lus yog lus ncaj,
nws tej num yog num tsim nyog tso siab rau.
Nws nyiam kev ncaj thiab kev haum pheej;
HUAB TAIS txoj kev ua zoo nyob puv lub ntiaj teb.

Txais: (5) Lub ntiaj teb puv nkaus Huab Tais txoj kev hlub

HUAB TAIS ua kom tej yam tsoom kuj cuab npaj mus tsis taus,
Nws rhuav cov haiv neeg zaj tswv yim kom tsheej xeeb tsis tau.
Cov hauj lwm HUAB TAIS npaj yuav nyob mus li,
Zaj tswv yim nws lub siab xav tau yuav nyob txheej dhau txheej.

Txais: (5) Lub ntiaj teb puv nkaus Huab Tais txoj kev hlub.

As Les Lus Yas: LK 21: 36

Txais: As les lus yas, as les lus yas.

Nej ua ib co neeg xyuam xim tas mus li, nej teev Ntuj tsis tseg,
nej thiaj yuav muaj zog sawv taus ntseg ntawm Neeg Leej Tub xub ntiag.

Txais: As les lus yas, as les lus yas.

Ntawv Moo Zoo: MT 25: 1-13

Yes Xus hais zaj paj lug no rau nws cov thwj tim:
1 “Ntuj lub Ceeb Tsheej yuav zoo xws li kaum leej ntxhais hluas taws teeb tawm mus tos nraug vauv. 2 Nyob hauv lawv, muaj tsib leeg ruam, hos tsib leeg xyuam xim. 3 Cov ruam nqa teeb, tab sis tsis nqa roj nrog. 4 Hos cov xyuam xim nqa teeb thiab ntim roj rau hauv hwj nrog. 5 Nraug vauv tsis txawj los, ces lawv qaug dab ntub, sawv daws tsaug zog tas. 6 Thaum ib tag hmo, ib lub suab nthe tias : ‘Nraug vauv los txog lawm ! Nej tawm los txais nws !’ 7 Ces tas cov ntxhais hluas sawv los npaj teeb. 8 Cov ruam hais rau cov xyuam xim tias : ‘Nej pub ib qho roj rau peb mas, peb cov teeb tuag lawm.’ 9 Tab sis cov xyuam xim teb rau cov ruam tias : ‘Ntshai roj yuav tsis txaus rau nej thiab rau peb. Nej mus muas roj tom cov tub luam rau nej.’ 10 Thaum cov ntxhais ruam mus muas roj lawm, ces nraug vauv los txog. Cov uas tau npaj txhij tos, nrog nraug vauv chaws mus hauv chav tsev ua tshoob, ces luag kaw qhov rooj rau. 11 Tom qab ntawd, lwm cov ntxhais los txog thiab, lawv hais tias : ‘Huab Tais, Huab Tais, thov koj qhib qhov rooj rau peb.’ 12 Tab sis nraug vauv teb tias : ‘Kuv hais tseeb rau nej, kuv tsis paub nej yog leej twg !’ 13 Ua li mas nej zov hmo mog, vim nej tsis paub yuav yog hnub twg los lub sij hawm twg.”

TIM     29     LUB     8     HLI     2020

Hnub Xya Lis Piam Nees Nkaum Ib Nruab Xyoo A Nruab Lis Piam Xyoo II

Hwm LN Zam Ntxuav Plig txoj kev Txom Nyem

Lect 430/634

Zaj Nyeem Ib: 1 KLN 1: 26-31

26 Cov kwv tij, nej yuav saib tias Ntuj xaiv nej zoo li cas : nej yeej tsis muaj ntau leej uas neeg saib muaj kev thoob tsib, tsis muaj ntau leej muaj hwj chim, tsis muaj ntau leej yug los ua tub nom tub tswv li.  27 Tiam sis, Tswv Ntuj xaiv cov neeg uas lub ntiaj teb saib lawv ruam, kom cov neeg thoob tsib poob ntsej muag; thiab Tswv Ntuj xaiv cov neeg uas lub ntiaj teb saib lawv tsis muaj peev xwm, kom cov muaj peev xwm poob ntsej muag; 28 thiab Tswv Ntuj xaiv cov neeg uas lub ntiaj teb saib lawv qis qis thiab ntxub lawv, thiab saib lawv tsis tsim txiaj dab tsi, kom cov tsim tsim txiaj poob mus ua ib co neeg tsis tsim tuaj. 29 Ua li mas tsis muaj ib tug neeg twg yuav khav tau txog nws tus kheej nyob ntawm Tswv Ntuj xub ntiag li. 30 Tswv Ntuj yog tus ua kom nej los nyob hauv Yes Xus Pleev uas yog peb txoj kev thoob tsib tuaj ntawm Tswv Ntuj tuaj, yog peb txoj kev ncaj, peb txoj kev ntshiab, thiab peb txoj kev cawm seej, 31 kom thiaj muaj raws nraim li Ntawv sau tseg tias : ‘Tus twg xav khav mas nws yuav tsum khav nyob hauv Huab Tais xwb.’

NPN 33: 12-13, 18-19, 20-21

Txais: (12) Haiv neeg Huab Tais tau xaiv ua nws tug lawv txoj hmoov zoo.

Haiv neeg uas lawv tus Tswv Ntuj yog HUAB TAIS, lawv txoj hmoov zoo!
Haiv neeg uas nws xaiv ua nws lub cuab tam, lawv txoj hmoov zoo!
Nyob txheej ntuj saud, HUAB TAIS dauv muag los ntsia,
nws pom tas nrho ib tsoom neeg.

Txais: (12) Haiv neeg Huab Tais tau xaiv ua nws tug lawv txoj hmoov zoo.

Ntsia saib, HUAB TAIS lub qhov muag ntsia ntsoov cov neeg hwm nws,
saib ntsoov cov tso siab rau nws txoj kev hlub;
nws yuav npo lawv dim ntawm kev tuag,
thiab yuav txuag lawv txoj sia thaum muaj kev tshaib plab.

Txais: (12) Haiv neeg Huab Tais tau xaiv ua nws tug lawv txoj hmoov zoo.

Peb tus ntsuj plig tos ntsoov HUAB TAIS:
nws yog tus pab peb, nws yog peb daim leem phiaj !
Vim nyob hauv Huab Tais peb muaj kev zoo siab,
nws lub npe ntshiab yog peb chaw tso siab.

Txais: (12) Haiv neeg Huab Tais tau xaiv ua nws tug lawv txoj hmoov zoo.

Hnub no peb hla ob zaj ntawm no mus rau zaj As Les Lus Yas thiab zaj Ntawv Moo Zoo nyob nram qab

As Les Lus Yas: ZAM 13: 34

Txais: As les lus yas, as les lus yas.

Kuv muab ib lo lus qhia tshiab rau nej :
Nej yuav ib tug hlub ib tug ib yam li kuv tau hlub nej.

Txais: As les lus yas, as les lus yas.

Ntawv Moo Zoo: MT 25: 14-30

Yes Xus hais zaj paj lug no rau nws cov thwj tim tias:
14 “Lub Ceeb Tsheej saum ntuj yog zoo li ib tug neeg uas yuav mus tawm rooj, nws hu nws cov tub txib tuaj, nws muab nws lub cuab tam rau lawv ceev. 15 Nws muab tsib nras nyiaj rau thawj tug, muab ob nras rau tus ob, hos muab ib nras rau tus peb; nws muab rau lawv raws li lawv lub peev xwm, ces nws tawm rooj mus lawm. Tam sis ntawd, 16 tus uas tau txais tsib nras nyiaj, nqa cov nyiaj ntawd mus ntxeev, nws tau paj tsib nras ntxiv. 17 Tus tau txais ob nras kuj ua li ntawd thiab, nws tau paj ob nras ntxiv. 18 Hos tus tau txais ib nras xwb mus khawb ib lub qhov rau hauv av, nws muab tus tswv nras nyiaj coj mus faus rau hauv. 19 Ib lub sij hawm ntev loo tom qab, cov tub txib tus tswv rov los txog. Nws nrog lawv txheeb nws cov nyiaj. 20 Tus uas tau txais tsib nras nyiaj tuaj txog, nws cev tsib nras ntxiv, nws hais tias : “Huab Tais, koj tau muab tsib nras nyiaj rau kuv, hos ntawm no yog tsib nras uas kuv coj mus ntxeev tau los ntxiv.” 21 Tus tswv hais rau nws tias : “Zoo kawg, tub txib siab zoo siab ncaj, thaum koj saib tej yam me, koj ua ncaj, mas kuv yuav tsa koj los saib tej yam loj. Koj los nyob hauv koj tus huab tais txoj kev zoo siab mog.” 22 Ces tus tau txais ob nras tuaj txog, nws hais tias : “Huab Tais, koj tau muab ob nras nyiaj rau kuv, hos ntawm no yog ob nras uas kuv coj mus ntxeev tau los ntxiv.” 23 Nws tus tswv hais rau nws tias : “Zoo kawg, tub txib siab zoo siab ncaj, thaum koj saib tej yam me, koj ua ncaj, mas kuv yuav tsa koj los saib tej yam loj. Koj los nyob hauv koj tus huab tais txoj kev zoo siab mog.” 24 Tus tub txib uas tau txais ib nras nyiaj tuaj txog, nws hais tias : “Huab Tais, kuv paub tias koj yog ib tug neeg siab heev. Koj hlais nplej hauv tej teb koj tsis tau tseb, koj sau qoob hauv tej chaw koj tsis tau pov noob rau. 25 Kuv ntshai, kuv thiaj coj koj nras nyiaj mus faus rau hauv av. Saib ntawm no, koj rov tau yam uas yog koj tug.” 26 Ces tus tswv teb rau nws tias : “Tub txib siab phem thiab tub nkeeg, koj twb paub tias kuv hlais nplej hauv tej teb uas kuv tsis tau tseb, thiab kuv sau qoob hauv tej chaw uas kuv tsis tau pov noob rau, 27 tsim nyog koj yuav nqa kuv cov nyiaj mus rau cov tub ceev nyiaj, thaum kuv rov los, kuv yuav tau kuv cov nyiaj nrog cov paj. 28 Nej rho nras nyiaj ntawm nws mus, nej muab rau tus uas muaj kaum nras lawm. 29 Vim tias Ntuj yuav pub rau tus uas twb muaj lawm, ces nws yuav muaj ntau nplua mias. Hos tus uas tsis muaj, Ntuj tseem yuav thau qhov me me uas nws muaj mus thiab. 30 Nej muab tus tub txib tsis tsim txiaj ntawd pov rau nraum zoov rau hauv qhov tsaus ntuj nti: nyob ntawd yuav muaj kev quaj vwm leg thiab tom hniav nkawv.”

Hnub no peb hwm LN Zam Ntxuav Plig raug kev txom nyem, mas peb hla los siv zaj As Les Lus Yas thiab zaj Ntawv Moo Zoo nyob nram no:

As Les Lus Yas:   MT 5: 10

Txais: As les lus yas, as les lus yas.

Cov tau txoj hmoov zoo yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais: As les lus yas, as les lus yas.

Ntawv Moo Zoo:   MK 6: 17-29

17 Hes Los yog tus tau xa neeg mus ntes Zam thiab muab saw hlau khi Zam rau hauv tsev loj faj, vim Hes Los Dias uas yog Hes Los tij laug Fis Lis Pos tus poj niam, tab sis Hes Los yuav los ua nws poj niam lawm. 18 Zam tau hais rau Hes Los tias : "Koj tsis muaj cai yuav koj tij laug tus poj niam." 19 Ces Hes Los Dias ntxub Zam tas siab nrho, nws xav muab Zam tua, tab sis nws tua tsis tau, 20 vim Hes Los ntshai Zam, thiab nws paub tias Zam yog ib tug neeg siab ncaj siab ntshiab, ces Hes Los txuag Zam. Thaum Hes Los hnov Zam hais lus, mas nws ntxhov siab kawg, tiam sis Hes Los kuj nyiam mloog Zam thiab.
21 Muaj ib lub zoo sij hawm los txog, yog hnub tsuj xeeb Hes Los hnub yug. Hes Los ua ib roog qav caw cov neeg tseem ceeb hauv nws lub tuam tsev, cov thawj tub rog, thiab cov nom loj hauv lub xeev Nkas Lis Lais tuaj koom. 22 Thaum ntawd, Hes Los Dias tus ntxhais chaws los dhia seev cev. Nws dhia tau ntxim Hes Los thiab cov qhua tuaj nrog nws koom rooj qav ntawd siab kawg. Ces tus vaj hais rau tus ntxhais tias : "Koj thov saib koj xav tau dab tsi, ces kuv yuav muab rau koj." 23 Thiab tus vaj tseem cog lus rau tus ntxhais tias : "Koj thov yam twg, mas kuv yuav muab rau koj, tab yog ib nrab ntawm lub teb chaws kuv kav !" 24 Tus ntxhais tawm plaws mus nug nws niam tias : "Kuv yuav thov dab tsi ?" Leej niam hais tias : "Zam Ntxuav Plig lub taub hau." 25 Tam sim ntawd, tus ntxhais rov loo los ntawm tus vaj, nws hais tias : "Kuv xav kom tam sis no koj muab Zam Ntxuav Plig lub taub hau tso rau saum ib lub phaj los cev rau kuv." 26 Tus vaj ua ntsej muag ntshaus tag, tab sis vim nws tau cog lus lawm thiab vim muaj cov qhua, nws thiaj tsis xav thim nws lo lus. 27 Ces tus vaj txib ib tug zov keeb tam sis ntawd kom mus nqa Zam lub taub hau los. Tus zov keeb thiaj mus txiav Zam caj dab hauv tsev loj faj, 28 nws nqa Zam lub taub hau txawb saum ib lub phaj los cev rau tus ntxhais. Tus ntxhais muab rau nws niam. 29 Zam cov thwj tim hnov li ntawd, lawv thiaj tuaj muab Zam lub cev thiab coj mus tso rau hauv ib lub ntxa lawm.

TIM 31 LUB 8 HLI 2020

Hnub Ob Lis Piam Nees Nkaum Peb Nruab Xyoo A Nruab Lis Piam Xyoo II

Zaj Nyeem Ib: 1 KLN 2: 1-5

1 Cov kwv tij, ntawm kuv mas thaum kuv tuaj tim nej, kuv tsis tau nrhiav koob meej nyob hauv txoj kev siv ib co lus muaj hwj chim thiab thoob tsib los tshaj lub ntsiab tob txog Tswv Ntuj rau nej. 2 Thaum kuv nrog nej nyob, kuv tau txiav txim siab ua tus neeg tsis paub dab tsi li, tsuas paub txog Yes Xus Pleev xwb, tus uas tuag dai saum ntoo cuam. 3 Kuv ua tus neeg tsis muaj peev xwm, tus neeg ntshai ntshai thiab txhawj tshee na rau nej pom xwb. 4 Kuv tej lus kuv tuaj hais thiab tuaj tshaj rau nej tsis yog hais los ntawm kev thoob tsib ntse ntsuav kom ntxias tau neeg, tiam sis yog hais los ntawm txoj kev ua kom nej pom Leej Tswv Yim thiab kev muaj hwj huam los, 5 kom nej txoj kev ntseeg tsis txhob txawb rau saum neeg kev thoob tsib tiam sis txawb rau saum Tswv Ntuj lub hwj huam.

NPN 119: 97, 98, 99, 100, 101, 102

Txais: (97) Huab Tais, kuv nyiam koj cov lus qhia.

Huab Tais, kuv nyiam koj Txoj Cai tas nrho,
kuv muab coj los xav tuaj nruab siab tas hnub.

Txais: (97) Huab Tais, kuv nyiam koj cov lus qhia.

Koj lo lus qhia ua kom kuv thoob tsib dua kuv cov yeeb ncuab,
vim kuv muab khaws los coj nraim mus li.

Txais: (97) Huab Tais, kuv nyiam koj cov lus qhia.

Kuv to taub ntau dua kuv cov xib hwb tas huv si,
vim kuv muab koj cov lus qhia coj los xav los kawm.

Txais: (97) Huab Tais, kuv nyiam koj cov lus qhia.

Kuv txawj xav tom ntej tom qab dua cov txwj laus,
vim kuv coj koj cov lus qhia nraim.

Txais: (97) Huab Tais, kuv nyiam koj cov lus qhia.

Kuv maim txhua txoj kev phem,
kom kuv coj tau raws koj cov lus.

Txais: (97) Huab Tais, kuv nyiam koj cov lus qhia.

Kuv tsis ncaim ntawm txoj cai koj tau txiav,
vim koj yog tus cob qhia kuv.

Txais: (97) Huab Tais, kuv nyiam koj cov lus qhia.

As Les Lus yas: LK 4: 18

Txaiz: As les lus yas, as les lus yas.

Huab Tais Leej Tswv Yim nyob saum kuv,
Nws xa kuv tuaj tshaj lub moo zoo rau cov pluag.

Txaiz: As les lus yas, as les lus yas.

Ntawv Moo Zoo: LK 4: 16-30

16 Yes Xus los txog Nas Xas Les, lub zos uas nws nyob hlob. Hnub Xas Npas Tos, nws mus hauv lub tsev txoos xws li nws ua kam. Ces nws sawv mus nyeem ntawv. 17 Lawv cev tus Yaj Saub His Xais phau ntawv rau nws. Nws nthuav phau ntawv, nws nrhiav tau nqe lus uas sau tias :
18 “Huab Tais lub Tswv Yim nyob saum kuv,
vim nws pleev roj los qee kuv.
Nws xa kuv mus tshaj lub Moo Zoo rau cov pluag.
Nws xa kuv mus ceeb toom rau cov nyob txim tias lawv yuav dim,
rau cov dig muag tias lawv yuav rov pom kev;
nws xa kuv mus tso cov raug luag yuam kom tau kev dim,
19 thiab kom kuv tshaj tias yog ib xyoos Huab Tais pom zoo.”
20 Yes Xus rov kauv phau ntawv rau, nws muab cev rau tus tub txib, ces nws zaum. Tas tsoom neeg uas nyob hauv lub tsev txoos ntsia ntsoov Yes Xus. 21 Ces Yes Xus hais rau lawv tias : “Hnub no, cov lus nyob hauv zaj Ntawv no tsheej xeeb raws li nej tau hnov lawm." 22 Tas cov neeg ntawd zeem tseeb tias nws hais lus zoo kawg, lawv qhuas cov lus muaj txiaj ntsim tawm hauv nws lub ncauj los. Lawv hais tias : "Tus ntawd, tsis yog Yos Xes tus tub lod ?"
23 Ces Yes Xus hais rau lawv tias : "Paub ntsoov tias nej yuav xav hais lo lus piv txoj lus no rau kuv mloog: ‘Kws kho mob, koj rov kho koj mas !’ Tas txhua yam peb hnov luag piav tias tshwm sim nyob Kas Fas Naus, koj kuj ua nyob hauv koj lub zos koj ib txwm nyob thiab !" 24 Yes Xus hais ntxiv tias : "Kuv hais tseeb rau nej tias, tsis muaj ib tug yaj saub uas luag yuav txais nws zoo nyob hauv lub zos nws hlob. 25 Kuv hais qhov muaj tseeb tias, lub caij Es Lias nyob, muaj coob tus poj ntsuam nyob His Xas Lais teb, thaum ntuj kaw nag tau peb xyoos thiab rau hli, tas teb chaws tshaib plab loj kawg. 26 Tab sis Ntuj tsis xa Es Lias mus pab lawv ib tug li, Ntuj xa Es Lias mus pab ib tug poj ntsuam nyob lub zos Xas Les Tas, nyob Xis Doos teb xwb. 27 Lub caij tus yaj saub Es Lis Xais nyob, muaj coob tus mob ruas nyob His Xas Lais teb, tab sis lawv tsis muaj ib tug rov huv li, tsuas yog tus neeg Xis Lias hu ua Nas Maas thiaj rov huv tuaj xwb."
28 Tas cov neeg hauv lub tsev txoos hnov cov lus ntawd, mas lawv npau taws kawg. 29 Lawv sawv tsees, lawv ntiab Yes Xus tawm sab nroog nraud. Lawv coj Yes Xus mus txog ntawm ib phab toj ntxhab saum lub roob uas lawv txhim lawv lub nroog, lawv yuav thawb Yes Xus kom nws ntog toj. 30 Tab sis Yes Xus hla plaws hauv nruab nrab lawv, nws taug nws kev mus lawm.

TIM 1 LUB 9 HLIS 2020

Hnub Peb Lis Piam Nees Nkaum Ob Nruab Xyoo A Nruab Lis Piam Xyoo II

Zaj Nyeem Ib: 1 KLN 2: 10b-16

Cov kwv tij nkauj muad:
10 Leej Ntuj Plig tsom tau tas puas tsav yam, nws tsom tau tej yam tob nyob hauv Tswv Ntuj tib si. 11 Nyob hauv ib tsoom neeg, leej twg thiaj paub tau yam uas nyob hauv ib tug neeg? Tsuas yog tus neeg ntawd lub tswv yim uas nyob hauv nws xwb thiaj paub. Nyob hauv Tswv Ntuj kuj ib yam, tsis muaj leej twg paub tej yam nyob hauv Tswv Ntuj, tsuas yog Tswv Ntuj Leej Tswv Yim xwb thiaj paub.
12 Ntawm peb, mas peb tsis tau txais ntiaj teb lub tswv yim ; tiam sis peb txais Leej Tswv Yim uas tuaj ntawm Tswv Ntuj tuaj, kom peb to taub tej yam uas Tswv Ntuj tau pub rau peb. 13 Thaum peb qhia txog tej yam ntawd, mas peb tsis siv neeg kev thoob tsib los hais lus qhia, peb siv Leej Tswv Yim cov lus los qhia, peb siv cov lus sab ntsuj plig los qhia txog tej yam nyob sab ntsuj plig.
14 Tib neeg nqaij tawv yeej tsis xav txais tej yam tuaj ntawm Tswv Ntuj Leej Tswv Yim tuaj, nws xav tias yog ib zag vwm xwb; nws tsis to taub tej ntawd li, vim yuav tsum siv tswv yim los txiav txim txog tej ntawd. 15 Tus neeg siv tswv yim los xav, mas nws txiav txim tau rau tas txhua yam, tiam sis tsis muaj leej twg txiav txim rau nws tau. 16 Vim tias “leej twg thiaj yuav paub tau Huab Tais zaj tswv yim, kom nws pab tau tswv yim rau Huab Tais ?” Ntawm peb mas peb muaj Leej Pleev zaj tswv yim.

NPN 145: 8-9, 10-11, 12-13AB, 13CD-14

Txais: (17) Huab Tais tej kev yog kev ncaj tas tib si.

Huab Tais muaj lub siab hlub thiab khuv leej neeg,
nws npau taws qeeb, nws muaj lub siab zoo tas nrho.
Huab Tais ua zoo rau txhua leej txhua tus,
nws khuv leej txhua yam nws tau tsim los.

Txais: (17) Huab Tais tej kev yog kev ncaj tas tib si.

HUAB TAIS, cia koj cov hauj lwm txhua yam ua koj tsaug,
thiab cia cov uas nyiam koj cav txog koj.
Cia lawv tshaj txog koj lub Ceeb Tsheej muaj hwj chim
thiab piav txog koj lub hwj huam loj.

Txais: (17) Huab Tais tej kev yog kev ncaj tas tib si.

Cia lawv qhia rau neeg paub txog koj lub hwj huam loj
thiab txog koj lub Ceeb Tsheej muaj hwj chim ci ntsa iab.
Koj lub Ceeb Tsheej yog ib lub Ceeb Tsheej rau tas txhua tiam neeg,
thiab koj txoj kev tswj kav yuav nyob mus txheej dhau txheej.

Txais: (17) Huab Tais tej kev yog kev ncaj tas tib si.

Huab Tais hais nws tej lus nyob hauv txoj kev ua siab ncaj,
nws ua nws tej hauj lwm nyob hauv txoj kev ntshiab.
Huab Tais rub cov ntog kom sawv taus los,
nws tsa cov khoov nkoos kom sawv taus ntseg.

Txais: (17) Huab Tais tej kev yog kev ncaj tas tib si.

As Les Lus Yas: LK 7: 16

Txais: As les lus yas, as les lus yas.

Ib tug yaj saub loj tau sawv los nyob hauv peb lawm,
Tswv Ntuj tau tuaj xyuas nws haiv neeg lawm.

Txais: As les lus yas, as les lus yas.

Ntawv Moo Zoo: LK 4: 31-37

31 Yes Xus nqes mus nram Kas Fas Naus uas yog ib lub nroog nyob hauv xeev Nkas Lis Lais. Hnub Xas Npas Tos, nws qhuab qhia lawv. 32 Sawv daws qhuas txog nws cov lus qhia, vim nws hais lus muaj peev xwm. 33 Nyob hauv lub tsev txoos ntawd, muaj ib tug neeg raug ib tug dab tsis huv, nws qw nrov nrov tias : 34 "Yes Xus Nas Xas Les, koj xav ua dab tsis rau peb ? Puas yog koj tuaj rhuav peb? Kuv paub koj yog leej twg : koj yog Tswv Ntuj tus Ntshiab." 35 Yes Xus cem nws tias : "Ua twj ywm ! Koj tawm ntawm nws mus!" Ces dab tsis huv muab tus neeg thawb ntiag rau hauv av rau sawv daws saib, nws tawm hauv tus neeg mus, tsis ua xwv txheej dab tsi rau tus neeg ntawd. 36 Tas lawv sawv daws yoob tag, lawv sib hais zom zaws tias : "Nws lo lus muaj dab tsi ? Nws siv hwj hwj chim thiab hwj hwj huam yuam dab tsis huv, ces dab cia li tawm mus lawm." 37 Ib lub moo qhuas txog Yes Xus thiaj li nrov mus rau tas txhua lub zos nyob ib ncig thaj tsam ntawd.

TIM 2 LUB 9 HLIS 2020

Hnub Plaub Lis Piam Nees Nkaum Ob Nruab Xyoo A Nruab Lis Piam Xyoo II

Zaj Nyeem Ib: 1 KLN 3: 1-9

1 Cov kwv tij, thaum pib mas kuv hais tsis tau ib co lus rau nej xws li yog hais rau ib co neeg uas yog tswv yim, kuv tsuas hais tau li yog hais rau ib co neeg muaj lub cev nqaij xwb, thiab xws li hais rau ib co me nyuam mos nyob hauv Leej Pleev xwb. 2 Kuv tau xub muab kua mis pub rau nej haus, tsis tau muab txhiam xws khov rau nej noj, vim nej tseem noj tsis tau taus. Tab nyem no los nej twb tseem noj tsis tau taus, 3 vim nej tseem zwm rau lub cev nqaij. Thaum nej muaj kev sib khib thiab kev sib tw kom yeej nyob hauv nej, mas kuj yog vim nej yog neeg nqaij tawv thiab nej coj tus yam ntxwv raws li neeg coj xwb puas yog ? 4 Thaum nej muaj ib tug hais tias : ‘Kuv yog Paj Lug tog,’ los tseem muaj lwm tus hais tias : ‘Kuv yog As Pos Los tog,’ mas tej lus ntawd yog tib neeg nqaij tawv tej lus xwb los tsis sub ? 5 As Pos Los yog leej twg ? Paj Lug ho yog leej twg ? Nkawd yog ob tug tub tshaj Ntuj lus rau nej kom nej tau los ua neeg ntseeg; nkawd nyias tshaj raws li Huab Tais pub rau nyias. 6 Kuv yog tus cog, As Pos Los ywg dej rau, tiam sis Tswv Ntuj yog tus ua kom hlob. 7 Li ntawd, tus cog tsis tseem ceeb dab tsi, tus ywg dej los kuj tsis tseem ceeb dab tsi ; Tswv Ntuj tus ua kom hlob, thiaj yog tus tseem ceeb xwb. 8 Tus cog thiab tus ywg dej, nkawd ob leeg yog ib tug xwb; tab sis nyias yuav txais nyias nqe zog raws li nyias kev khwv. 9 Vim tias peb yog cov nrog Tswv Ntuj ua hauj lwm ; nej yog Tswv Ntuj daim teb, nej yog Tswv Ntuj lub tsev.

NPN 33: 12-13, 14-15, 20-21

Txais: (12) Haiv neeg uas Huab Tais xaiv ua nws tug lawv txoj hmoov zoo.

Haiv neeg uas lawv tus Tswv Ntuj yog HUAB TAIS, lawv txoj hmoov zoo!
lawv yog haiv neeg uas nws xaiv ua nws lub cuab tam!
Nyob txheej ntuj saud, HUAB TAIS dauv muag los ntsia,
nws pom tas nrho ntiaj teb neeg.

Txais: (12) Haiv neeg uas Huab Tais xaiv ua nws tug lawv txoj hmoov zoo.

Nws zaum saum nws lub theej kiab txawj ruaj tsis ua zog,
nws ntsia pom tas ib tsoom neeg nyob ntiaj teb.
Nws yog tus puab txhua leej txhua tus lub siab,
nws paub txhua txoj hauj lwm lawv ua.

Txais: (12) Haiv neeg uas Huab Tais xaiv ua nws tug lawv txoj hmoov zoo.

Peb tus ntsuj plig tos ntsoov HUAB TAIS:
nws yog tus pab peb, nws yog daim leem phiaj thaiv peb !
Vim nyob hauv Huab Tais peb muaj kev zoo siab,
peb tso siab rau nws lub npe ntshiab.

Txais: (12) Haiv neeg uas Huab Tais xaiv ua nws tug lawv txoj hmoov zoo.

As Les Lus Yas: LK 4: 18

Txais: As les lus yas, as les lus yas.

Huab Tais xa kuv mus tshaj lub Moo Zoo rau cov pluag
Thiab mus tshaj txog kev twj lij rau cov nyob txim.

Txais: As les lus yas, as les lus yas.

Ntawv Moo Zoo: LK 4: 38-44

38 Yes Xus tawm hauv lub tsev txoos mus, nws nkag mus hauv Xis Moos lub tsev. Xis Moos niam tais muaj mob kub cev heev, ces lawv thov kom Yes Xus mus saib Xis Moos niam tais. 39 Yes Xus mus khoov saib niam tais, nws tsawm tus mob kub cev, ces tus mob tso plhuav niam tais tseg. Niam tais sawv tsees tam sis ntawd, nws pib txais tos lawv.
40 Thaum lub hnub yuav poob qho, cov uas muaj neeg raug ntau hom mob, sawv daws coj lawv cov neeg mob tuaj rau Yes Xus. Ces Yes Xus tsa tes rau saum lawv ib leeg zuj zus, nws kho sawv daws zoo tas huv si. 41 Ib co dab phem kuj tawm hauv coob leej mus, dab phem qw qw tias : "Koj yog Tswv Ntuj Leej Tub." Tab sis Yes Xus cem lawv, nws txwv tsis pub lawv hais lus, vim lawv paub tias nws yog Leej Pleev.
42 Thaum kaj ntug, Yes Xus tawm mus rau ib qho chaw tsis muaj neeg. Tsoom sid nrhiav nws, lawv tuaj txog ntawm nws, lawv xav cheem Yes Xus kom txhob mus deb ntawm lawv. 43 Tab sis Yes Xus hais rau lawv tias : "Kuv yuav tsum tshaj lub Moo Zoo hais txog Tswv Ntuj lub Ceeb Tsheej rau lwm cov nroog thiab. Yog vim qhov ntawd, Ntuj thiaj xa kuv tuaj." 44 Ces Yes Xus mus qhuab qhia nyob hauv cov tsev txoos nyob Yus Das teb.

TIM 3 LUB 9 HLIS 2020

Hnub Tsib Lis Piam Nees Nkaum Ob Nruab Xyoo A Nruab Lis Piam Xyoo II

Hwm LN Gregory tus Loj, Vaj Qhia thiab Kws cov Txuj Ntshiab

Zaj Nyeem Ib: 1 KLN 3: 18-23

Cov kwv tij,
18 Nej tsis txhob rov dag nej tus kheej. Yog nyob hauv nej, leej twg xav tias tiam no nws yog neeg thoob tsib, mas nws yuav tsum ua neeg vwm kom nws thoob tsib tuaj. 19 Vim ntiaj teb neeg txoj kev thoob tsib yog ib txog kev vwm rau Tswv Ntuj.
Muaj ib lo lus sau tseg tias :
“Tswv Ntuj siv cov neeg thoob tsib txoj kev cuab ntse rov ntes tau lawv.”
20 Tseem muaj dua ib los sau tias :
“Huab Tais paub cov neeg thoob tsib zaj tswv yim, tias yog tswv yim tsis muaj qab hau dab tsi.”
21 Li ntawd, nej tsis txhob muaj leej twg khav txog tib neeg, vim tas txhua yam yog nej tug,
22 tsis hais Paj Lug, los As Pos Los, los Kes Fas, los lub ntiaj teb, los txoj sia, los txoj kev tuag, los lub zim txwv no, los yav tom ntej, tas txhua yam ntawd yog nej tug, 23 hos nej yog Leej Pleev tug, Leej Pleev yog Tswv Ntuj tug.

NPN 24: 1BC-2, 3-4AB, 5-6

Txais: (1) Lub ntiaj teb thiab puas tsav yam nyob hauv yog HUAB TAIS li.

Lub ntiaj teb thiab puas tsav yam nyob hauv yog HUAB TAIS li,
lub sim ceeb thiab txhua yam nyob hauv yog nws tug.
Vim nws yog tus tsim lub ntiaj teb los txawb rau saum cov hiav txwv
thiab muab tsa rau saum cov dej ntws.

Txais: (1) Lub ntiaj teb thiab puas tsav yam nyob hauv yog HUAB TAIS li.

Leej twg thiaj yuav nce tau mus saum HUAB TAIS lub roob?
Los leej twg thiaj yuav mus sawv taus nyob hauv nws thaj chaw ntshiab?
Yog tus uas txhais tes tsis muaj txhaum, lub siab dawb huv,
tus uas tsis ntshaw tej yam tsis muaj qab hau.

Txais: (1) Lub ntiaj teb thiab puas tsav yam nyob hauv yog HUAB TAIS li.

Nws yuav tau txais ib lo lus foom hmoov zoo ntawm Huab Tais,
ib qho paj tshab tuaj ntawm Tswv Ntuj tus cawm nws tuaj.
Cov neeg uas nrhiav Tswv Ntuj yuav zoo li ntawd,
cov uas nrhiav Yas Kos tus Tswv Ntuj lub ntsej muag.

Txais: (1) Lub ntiaj teb thiab puas tsav yam nyob hauv yog HUAB TAIS li.

As Les Lus Yas: MT 4: 19

Txais: As les lus yas, as les lus yas.

Huab Tais hais tias: “Nej raws kuv mus,
kuv yuav tsa nej ua cov tub puav neeg.”

Txais: As les lus yas, as les lus yas.

Ntawv Moo Zoo: LK 5: 1-11

1 Muaj ib zaug, muaj ib pab neeg coob tuaj txiv Yes Xus kom tau mloog Tswv Ntuj Lo Lus, thaum ntawd Yes Xus sawv nyob ntawm ntug pas dej Nkes Nes Xas Les. 2 Yes Xus pom ob lub nkoj nres ntawm ntug dej. Cov tub puav ntses nqes nkoj lawm, lawv tseem tab tom ntxhua lawv cov vas. 3 Yes Xus nce mus hauv ib lub nkoj, yog Xis Moos lub, nws kom Xis Moos nquam nkoj mus deb ntawm ntug dej me ntsis, ces nws zaum hauv nkoj qhia tsoom sid. 4 Thaum Yes Xus hais lus tas, nws hais rau Xis Moos tias : "Koj nquam nkoj mus lawm tom qhov dej tob, nej tso nej cov vas nqes mus puav ntses." 5 Xis Moos teb tias : "Xib Hwb, peb twb khwv ib hmos tsis tau dab tsi li. Tab sis yog vim koj hais, mas kuv yuav pov cov vas nqes mus." 6 Ces thaum lawv ua li ntawd, lawv puav tau ntses ntau kawg ua lawv cov vas txam kiag. 7 Lawv co tes rau lawv cov npawg nyob lwm lub nkoj kom tuaj pab. Cov npawg tuaj txog, sawv daws muab ntses ntim rau ob lub nkoj puv nkaus, ua nkoj yuav luag tog. 8 Xis Moos Pob Zeb pom li ntawd, nws txhos caug ntua pe Yes Xus, nws hais tias "Huab Tais, koj txav mus deb kuv, vim kuv yog ib tug neeg txhaum." 9 Xis Moos ntshai kawg, cov nrog Xis Moos ua ke puav leej ntshai, vim lawv puav tau ntses ntau, 10 Yas Kos thiab Zam, uas yog Ntxes Npes Dais ob tug tub, thiab yog Xis Moos ob tug npawg, nkawd kuj ntshai ib yam thiab. Yes Xus hais rau Xis Moos tias : "Koj txhob ntshai, txij no mus, koj yuav puav tib neeg." 11 Ces lawv nquam nkoj los rau tim ntug. Lawv tso tas ib puas tsav yam tseg, lawv raws Yes Xus mus.

TIM 4 LUB 9 HLIS 2020

Thawj Hnub Rau Lis Piam Nees Nkaum Ob Nruab Xyoo B Nruab Lis Piam Xyoo II

Zaj Nyeem Ib: 1 KLN 4: 1-5

Cov kwv tij:
1 Xav kom sawv daws saib peb zoo li no: tias peb yog Yes Xus Pleev cov tub txib, thiab yog cov tuav txoj dej num cob qhia txog tej yam tob zais nyob hauv Tswv Ntuj. 2 Qhov uas sawv daws tos ntawm cov neeg tuav txoj dej num ntawd yog kom lawv ua ib co neeg sawv daws tso siab rau tau. 3 Ntawm kuv mas kuv tsis quav ntsej txog tias tsam nej yuav txiav txim rau kuv, los tsam ib pab txwj laus yuav txiav txim rau kuv; kuv los kuj tsis rov txiav txim rau kuv tus kheej li. 4 Kuv tsis pom tias kuv tau ua ib yam tsis zoo, tiam sis kuv hais tsis tau tias kuv tsis muaj txim li. Tus yuav txiav txim rau kuv kawg yog Huab Tais xwb. 5 Li ntawd mas nej tsis txhob maj txiav txim rau luag ua ntej lub caij teem tseg, mus yog lub caij Huab Tais yuav rov los. Ces nws yuav qhib tej yam zais nyob hauv qhov tsaus ntuj kom tawm los, nws yuav ua kom sawv daws pom yam npog cia nyob hauv peb tej nruab siab. Ces thaum ntawd nyias yuav txais Tswv Ntuj lo lus qhuas txog nyias.

NPN 37: 3-4, 5-6, 27-28, 39-40

Txais: (39a) Txoj kev cawm tus neeg ncaj tuaj ntawm HUAB TAIS tuaj.

Nej tso siab rau HUAB TAIS thiab ua qhov zoo,
ces nej yuav tau nyob hauv lub teb chaws thiab muaj noj nrog kev nyab xeeb.
Nej zoo siab nyob hauv HUAB TAIS mog,
ces nws yuav pub rau nej raws nej lub siab ntshaw.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

Muab nej txoj kev nej taug tso rau HUAB TAIS ua tus saib;
nej tso siab rau nws ces nws yuav pab. .
Nws yuav ua kom txoj kev ncaj sawv tuaj ziab nej li thaum kaj ntug;
ces nej txoj kev yeej yuav ci npaum thaum tav su nrig.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

Koj tso txoj kev phem tseg mus ua qhov zoo,
koj yuav nyob ruaj nreb hauv qhov zoo mus li.
Vim HUAB TAIS nyiam txoj kev ncaj,
nws tsis tso cov neeg ntseeg nws pov tseg.
Cov neeg siab phem yuav raug muab txo kom ploj mus,
cov tsis hwm Ntuj tsoom tub ki yuav raug luag muab rho tawm.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

Txoj kev cawm tus neeg ncaj tuaj ntawm HUAB TAIS tuaj,
nws yog lawv lub chaw vam thaum lawv ntsib kev nyuaj.
HUAB TAIS pab lawv thiab cawm lawv dim,
nws tso lawv dim ntawm tus phem thiab cawm lawv,
vim lawv tuaj vam khom nws.

Txais: (39a) Txoj kev cawm tus neeg ncaj tuaj ntawm HUAB TAIS tuaj.

As Les Lus Yas: ZAM 8: 12

Txais: As les lus yas, as les lus yas.

Huab Tais hais tias: "Kuv yog qhov pom kev kaj lub qab ntuj neeg.
Leej twg lawv kuv qab, nws yuav tau qhov pom kev uas pub txoj sia."

Txais: As les lus yas, as les lus yas.

Ntawv Moo Zoo: LK 5: 33-39

33 Cov thoob xwm ntawv thiab cov Fas Lis Xais hais rau Yes Xus tias : "Zam cov thwj tim nquag yoo mov thiab hais cov zaj teev Ntuj, cov Fas Lis Xas cov thwj tim kuj ua ib yam li ntawd thiab, hos koj cov thwj tim mas lawv noj thiab lawv haus tas li." 34 Yes Xus hais rau lawv tias : "Nej puas hais kom nraug vauv cov phooj ywg yoo mov thaum nraug vauv tseem nrog lawv nyob ? 35 Yuav muaj ib lub zim txwv uas luag coj nraug vauv mus lawm, thaum ntawd, lawv mam li yuav yoo mov."
36 Yes Xus tseem hais ib zag paj lug rau lawv tias : "Tsis muaj leej twg yuav dua ib daig ntaub ntawm lub tsho tshiab los ntxiv rau lub khaub tshos. Vim ua li ntawd ces lub tshiab yuav ntuag, hos daim ntaub dua los kuj tsis phim lub khaub tshos thiab.
37 Thiab kuj tsis muaj leej twg yuav ntim cov cawv tshiab rau hauv tej qub hnab tawv. Vim tias cov cawv tshiab yuav ua kom cov hnab tawv tawg, ces cawv yuav txeej tas, hos cov hnab tawv los kuj yuav piam sij tas. 38 Ua li mas, yuav tsum muab cawv tshiab ntim rau hauv cov hnab tawv tshiab. 39 Kuj tsis muaj ib tug neeg uas tau haus cawv laus tas, yuav xav haus cawv tshiab, vim nws hais tias : ‘cawv laus thiaj qab.’"

TIM 5 LUB 9 HLI 2020

Thawj Hnub Xya Lis Piam Nees Nkaum Ob Nruab Xyoo A Nruab Lis Piam Xyoo II

Zaj Nyeem Ib: 1 KLN 4: 6B-15

6 Cov kwv tij, nej yuav tsum kawm ntawm kuv thiab As Pos Los wb kom nej xyaum tsis “txhob hais tshaj cov lus nyob hauv Ntawv.” Ces nej thiaj yuav tsis muaj leej twg xav ua neeg khav theeb tuaj ib tug tog thiab thuam lwm tus.
7 Leej twg yog tus muab koj tsa rau qhov siab ? Puas muaj ib yam koj muaj uas koj tsis tau txais ntawm luag tej los ? Yog koj tau txais los, ua cas koj thiaj khav xws li tsis yog koj tau txais los ? 8 Nej yeej muaj noj muaj haus tsau npo, nej yeej muaj txiag nplua nuj kawg lawm; txawm tsis muaj peb los nej yeej tau huab tais ua lawm ! Qhov tseeb tiag, yeej xav tias kheev lam nej tau ua huab tais, kom peb tau nrog nej ua huab tais thiab !
9 Vim raws li kuv pom mas Tswv Ntuj muab peb cov uas yog Hauv Paus Xa Lus tso tuaj puag tom tw, xws li ib co neeg raug lub txim tuag; peb raug coj mus sawv ua phiaj rau lub ntiaj teb saib, rau tsoom Tshiab thiab rau tib neeg ntsia. 10 Peb ua ib co neeg vwm vim Leej Pleev, hos nej ua neeg xyuam xim nyob hauv Leej Pleev. Peb tsis muaj zog ; hos nej muaj zog. Luag saib taus nej, hos peb raug luag thuam. 11 Los txog lub caij nyem no, peb tshaib plab, peb nqhis dej, peb khaub hlab, peb raug luag tsim txom, peb mus rau ub rau no tsis muaj chaw nyob; 12 peb khwv, peb ob txhais tes ua hauj lwm sab. Lawv foom lus phem rau peb, peb foom lus zoo rau lawv. Lawv hiam peb, peb ua siab ntev nyiaj. Lawv hais lus phem txog peb, peb hais lus zoo nplij lawv. 13 Los txog niaj hnub no, ntiaj teb neeg saib peb yog tej yam tsis zoo siv tsuas zoo muab pov tseg, thiab yog ib cov npuas tsis huv uas neeg muab yim pov tseg.
14 Kuv sau tej no tuaj rau nej, tsis yog kuv xav ua kom nej txaj muag, tiam sis yog kuv xav ntuas nej zoo li ib co me nyuam uas kuv hlub xwb. 15 Txawm tias nej muaj txhiab tus xib hwb tuaj qhia nej coj nej mus nyob hauv Leej Pleev los nej tsis muaj ntau leej ua nej txiv : kuv yog nej txiv nyob hauv Yes Xus Pleev, vim kuv xa lub Moo Zoo tuaj rau nej.

NPN 145: 17-18, 19-20, 21

Txais: (18) Huab Tais nyob ze txhua leej uas hu txog nws.

Huab Tais tej kev yog kev ncaj tas txhua txoj
nws tej dej num yog num ntshiab tas nrho.
Huab Tais nyob ze cov hu txog nws,
cov uas muaj lub siab hu txog nws tseeb tiag.

Txais: (18) Huab Tais nyob ze txhua leej uas hu txog nws.

Nws ua rau cov neeg hwm nws raws li lawv ntshaw,
nws hnov lawv lub suab quaj, nws cawm lawv.
HUAB TAIS txuag cov neeg nyiam nws,
nws rhuav tshem cov neeg phem tas huv tib si.

Txais: (18) Huab Tais nyob ze txhua leej uas hu txog nws.

Kom kuv lub ncauj yeej meem cav txog HUAB TAIS,
kom txhua yam muaj lub cev nqaij foom lus zoo
rau nws lub npe ntshiab mus li ib txhiab ib txhis !

Txais: (18) Huab Tais nyob ze txhua leej uas hu txog nws.

As Les Lus Yas: ZAM 14: 6

Txais: As les lus yas, as les lus yas.

Huab Tais hais tias: "Kuv yog Txoj Kev, Qhov Tseeb, thiab Txoj Sia.
Tsis muaj leej twg mus cuag Leej Txiv tau, yog nws tsis mus ntawm kuv mus.

Txais: As les lus yas, as les lus yas.

Ntawv Moo Zoo: LK 6: 1-5

1 Muaj ib hnub Xas Npas Tos, Yes Xus hla ib thaj teb npleg, Yes Xus cov thwj tim zaws tej hnab nplej los mos ntawm tes noj.
2 Muaj ib co Fas Lis Xas hais tias : "Vim li cas nej ua tej yam uas hnub Xas Npas Tos tsis muaj cai ua ?"
3 Yes Xus teb rau lawv tias : "Nej tsis tau nyeem zaj piav txog qhov Das Vis ua thaum nws thiab cov nrog nws lawv tshaib plab lod ?
4 Tias nws nkag mus rau hauv Tswv Ntuj lub tsev, mus muab cov ncuav mov txi Ntuj noj, cov mov uas cov leej choj xwb thiaj muaj cai noj, nws muab los noj thiab nws tseem muab rau nws cov kwv luag noj thiab no lod ?."
5 Ces Yes Xus hais rau lawv tias : “Neeg Leej Tub yog tus tswv Hnub Xas Npas Tos."

TIM 7 LUB 9 HLI 2020

Hnub Ob Lis Piam Nees Nkaum Peb Nruab Xyoo A Nruab Lis Piam Xyoo II

Zaj Nyeem Ib: 1 KLN 5: 1-8

Cov kwv tij nkauj muad:
1 Peb tau hnov hais nroo ntws tias, nyob hauv nej, muaj kev ua dev ua npua qias kawg, tab yog cov neeg teev pej kum dab twb tsis ua qias npaum li ntawd: Yog qhov tias muaj ib tug txiv neej nrog nws txiv tus poj niam ua neej no! 2 Tsis kav nej tseem khav theeb thiab qhuas kawg nkaus! Twb phim nej yuav tu siab loj kawg los tsis sub? Nej yuav tsum muab tus ua phem li no rho tawm hauv nej mus.
3 Ntawm kuv, mas kuv lub cev tsis nrog nej nyob, tab sis kuv lub tswv yim nrog nraim nej nyob; kuv twb txiav txim nyob hauv Huab Tais Yes Xus lub npe rau tus ua qhov txhaum ntawd lawm, zoo li kuv nrog nej nyob ntag. 4 Thaum nej tuaj sib txoos ua ke thiab kuv lub tswv yim koom nrog nej nyob hauv Huab Tais Yes Xus lub hwj huam, 5 peb yuav muab tus neeg ntawd tso rau Xas Tas kom nws lub cev nqaij raug puas tsuaj mus, tiam sis kom thaum txog Huab Tais Hnub, nws tus ntsuj plig thiaj yuav tau kev dim.
6 Nej cov lus khav theeb tsis yog ib qho zoo kiag li! Nej puas paub tias, ib qho poov xab me me ua kom tas tais hmoov nplej su tuaj ? 7 Nej ntxuav cov qub poov xab pov tseg, kom nej txia ua ib co hmoov nplej do tshiab tshiab, nej thiaj li yog ib co tsis xyaw poov xab. Vim Leej Pleev, peb tus Yaj Hla twb raug muab txi Ntuj lawm. 8 Li ntawd peb yuav ua lub Ntees Hla, peb tsis txhob siv cov qub poov xab, uas ua kom kev lim hiam thiab kev phem sawv tuaj, tiam sis peb yuav siv cov mov tsis xyaw poov xab, uas muaj kev ncaj thiab kev tseeb.

NPN 5: 5-6, 7, 12

Txais: (9) Huab Tais, thov koj coj kuv muas raws koj txoj kev ncaj.

Tswv Ntuj, koj tsis zoo siab pom txoj kev phem.
Tus neeg phem yuav nyob tsis taus nrog koj.
Tus neeg saib tsis taus luag yuav sawv tsis taus rau koj pom.
Koj ntxub tas tsoom neeg nrhiav kev ua phem.

Txais: (9) Huab Tais, thov koj coj kuv mus raws koj txoj kev ncaj.

Koj txo kom cov neeg hais lus cuav ploj mus tag.
Cov neeg txo luag roj ntsha thiab cov neeg dag,
HUAB TAIS ntxub lawv tas siab nrho.

Txais: (9) Huab Tais, thov koj coj kuv mus raws koj txoj kev ncaj.

Kom cov tuaj nkaum hauv koj
zoo siab thiab hom khaj mus li;
thov koj txuag lawv, kom cov neeg nyiam
koj lub npe muaj koj ua lawv kev zoo siab.

Txais: (9) Huab Tais, thov koj coj kuv mus raws koj txoj kev ncaj.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias: “Kuv cov yaj mloog kuv lub suab;
kuv paub kuv cov yaj, kuv cov yaj raws nraim kuv qab mus.

Txais: As les lus yas, as les lus yas.

Ntawv Moo Zoo: LK 6: 6-11

6 Tseem muaj ib hnub Xas Npas Tos dua, Yes Xus mus hauv lub tsev txoos, nws qhia sawv daws. Nyob ntawd, muaj ib tug neeg uas sab tes xis qhuav. 7 Cov Kws Ntawv Ntshiab thiab cov Fas Lis Xais nyas ntsia twj ywm saib Yes Xus puas kho neeg mob rau hnub Xas Npas Tos, xwv lawv thiaj tau kev nrhiav lus rau Yes Xus. 8 Tiam sis Yes Xus twb paub qhov lawv xav lawm, ces nws hais rau tus neeg qhuav tes tias : "Koj los sawv ntsug nyob hauv nruab nrab." Ces tus qhuav tes sawv ntsug rau ntawd. 9 Yes Xus hais rau lawv tias : « Kuv nug nej: Hnub Xas Npas Tos, txoj cai puas kheev kom ua zoo los kom ua phem? Puas kheev kom cawm ib txog sia los kom cia ib txog sia ploj? » 10 Ces Yes Xus ntsia ib ncig lawv sawv daws tas, nws hais rau tus qhuav tes tias : "Koj xyab tes." Tus neeg ntawd xyab tes, nws txhais tes cia li zoo hlo. 11 Tab sis lawv npau taws heev kawg, ces lawv sib tham saib lawv yuav ua li cas tau rau Yes Xus.

TIM 8 LUB 9 HLIS 2020

Hnub Peb Lis Piam Nees Nkaum Peb Nruab Xyoo A nruab Lis Piam Xyoo II

Hwm Niam Mab Liab Hnub Yug Los

Zaj Nyeem Ib: Mis Kes 5: 1-4a

Huab Tais hais tias:
1 Npes Les Hes Es Fas Tas, koj uas me dua cov nyob hauv cov xeem Yus Das, tus yuav kav tsoom His Xas Lais yuav tawm hauv koj los rau kuv. Nws lub keeb yeej nyob thaum ntxov ub los, yeej nyob puag txheej thaud los lawm. 2 Yog vim li ntawd mas Huab Tais yuav tso lawv pov tseg ib ntus, mus txog lub caij uas tus yuav yug me nyuam yug tau nws tus me nyuam lawm. Ces nws cov kwv tij seem yuav rov los koom nrog haiv neeg His Xas Lais. 3 Nws yuav sawv ruaj nreb thiab nws yuav pub zaub rau nws pab yaj nyob hauv HUAB TAIS lub hwj huam, nyob hauv Huab Tais nws tus Tswv Ntuj lub npe muaj hwj chim. Ces lawv yuav tau nyob nyab xeeb vim zaum no nws yuav nto moo loj mus txog tim npoo ntiaj teb kawg, 4 thiab nws yuav pub kev thaj yeeb.

Los: Los Mas 8: 28-30

Cov kwv tij nkauj muad:
28 Peb paub tias txhua yam pab kom cov uas nyiam Tswv Ntuj tau qhov zoo, cov uas Tswv Ntuj hu lawv raws li qhov nws npaj rau lawv. 29 Cov neeg uas nws ib txwm paub ua ntej lawm, nws kuj pub txoj hmoov rau lawv kom lawv yoog tau raws li nws Leej Tub tus duab, ces nws Leej Tub thiaj ua tus xub yug los dua tas ib tsoom kwv coob coob. 30 Cov uas Tswv Ntuj ib txwm npaj hu, mas nws hu lawv; cov uas nws hu, mas nws ua kom lawv ncaj tuaj; cov uas nws ua kom ncaj tuaj, mas nws kuj muab hwj chim rau lawv thiab.

NPN 13: 6ab, 6c

Txais: (HX 61: 10) Kuv txaus siab thiab zoo siab nyob hauv Huab Tais.

Txawm tias kuv tso siab lug rau koj txoj kev khuv leej ,
Thov cia kuv lub siab luag ntxhi nyob hauv koj txoj kev cawm.

Txais: (HX 61: 10) Kuv txaus siab thiab zoo siab nyob hauv Huab Tais.

Cia kuv hu nkauj cav txog HUAB TAIS tias:
“Nws tau ua siab zoo kawg rau kuv.”

Txais: (HX 61: 10) Kuv txaus siab thiab zoo siab nyob hauv Huab Tais.

As Les Lus yas

Txais: As les lus yas, as les lus yas.

Koj tau txoj hmoov zoo, Nkauj Xwb Tsim Txiaj Mab Liab,
tsim nyog sawv daws qhuas koj;
lub Hnub uas pub txoj kev Ncaj tawm hauv koj tuaj,
yog Leej Pleev peb tus Tswv Ntuj.

Txais: As les lus yas, as les lus yas.

Ntawv Moo Zoo: Mt 1: 1-16, 18-23

1 Phau ntawv qhia txog Yes Xus Pleev lub keeb, uas yog Das Vis leej tub thiab yog Has Nplas Has leej tub : 2 Has Nplas Has yug Is Xas Has, Is Xas Has yug Yas Kos, Yas Kos yug Yus Das thiab nws cov kwv tij. 3 Yus Das yug Fas Les thiab Ntxas Las, nkawd niam yog Thas Mas; Fas Les yug Es Xas Los; Es Xas Los yug As Las; 4 As Las yug As Mis Nas Das; As Mis Nas Das yug Nas As Xoos; Nas As Xoos yug Xas Moos, 5 Xas Moos yug Npuag Oos, nws niam yog Las Has; Npuag Oos yug Os Npes, nws niam yog Luv; Os Npes yug Yes Xes; 6 Yes Xes yug tus vaj Das Vis.
Das Vis yug Xas Los Moos, uas yog Us Lis tus poj niam yug; 7 Xas Los Moos yug Los Npuag; Los Npuag yug As Npias; As Npias yug As Xas; 8 As Xas yug Yos Xas Fas; Yos Xas Fas yug Yos Las; Yos Las yug Os Xias; 9 Os Xias yug Yos Thas; Yos Thas yug As Kas; As Kas yug Es Xes Kias; 10 Es Xes Kias yug Mas Nas Xes; Mas Nas Xes yug As Moos; As Moos yug Yos Xias; 11 Yos Xias yug Yes Kos Nias thiab nws cov kwv tij, thaum lub caij lawv mus raug txim nyob Npas Npis Los.
12 Dhau lub caij raug txim nyob Npas Npis Los lawm, Yes Kos Nias yug Xas Las Thias; Xas Las Thias yug Ntxos Los Npas Npes; 13 Ntxos Los Npas Npes yug As Npis Yus; As Npis Yus yug Es Lias Kis; Es Lias Kis yug As Ntxos, 14 As Ntxos yug Xas Dos; Xas Dos yug As Khis; As Khis yug Es Lis Us; 15 Es Lis Us yug Es Les As Ntxas; Es Les As Ntxas yug Mas Thas; Mas Thas yug Yas Kos; 16 Yas Kos yug Yos Xes uas yog Mab Liab tus txiv. Mab Liab yug Yes Xus, uas tseem hu ua Leej Pleev.
18 Yes Xus Pleev lub keeb chiv zoo li no : Mab Liab uas yog nws niam raug muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub hauv plab. 19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab yuav nrauj Mab Liab twj ywm. 20 Thaum nws xav tau li ntawd, Huab Tais tus Tshiab tawm los ua npau suav rau nws, thiab hais rau nws tias : "Yos Xes, Das Vis leej tub, koj txhob ntshai coj Mab Liab, koj poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum." 22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias : 23 “Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias : "Tswv Ntuj nrog peb nyob".

Los: MT 1: 18-23

18 Yes Xus Pleev lub keeb chiv zoo li no : Mab Liab uas yog nws niam raug muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub hauv plab. 19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab yuav nrauj Mab Liab twj ywm. 20 Thaum nws xav tau li ntawd, Huab Tais tus Tshiab tawm los ua npau suav rau nws, thiab hais rau nws tias : "Yos Xes, Das Vis leej tub, koj txhob ntshai coj Mab Liab, koj poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum." 22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias : 23 Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias : "Tswv Ntuj nrog peb nyob".’

TIM 9 LUB 9 HLIS 2020

Hnub Plaub Lis Piam Nees Nkaum Peb Xyoo A Nruab Lis Piam Xyoo II

Hwm LN Peter Clever, ua Leej Choj

Zaj Nyeem Ib: 1 KLN 7: 25-31

Cov kwv tij nkauj muad:
25 Hais txog cov neeg xav nyob ua neeg tab seeb mas kuv tsis muaj Huab Tais ib lo lus qhia txog, tab sis kuv yuav hais ib lo lus raws li kuv xav vim kuv yog ib tug Huab Tais tau khuv leej uas nej ntseeg tau. 26 Kuv xav tias, vim lub zim txwv no muaj kev nyuaj kev ntxhov, mas qhov zoo yog nyias yuav tsum coj raws li nyias tau xaiv lawm. 27 Yog koj muaj poj niam lawm, mas koj txhob nrhiav kev ncaim ntawm koj tus poj niam. Hos yog koj tsis tau muaj poj niam, mas koj txhob nrhiav yuav poj niam. 28 Tab sis yog koj ho yuav poj niam los koj tsis ua txhaum, thiab yog ib tug ntxhais hluas nkauj yuav txiv, los nws kuj tsis ua txhaum; tab sis vim cov yuav poj niam yuav txiv li ntawd yuav paub kev txom nyem nyob hauv lawv lub neej nqaij tawv, mas kuv xav pab lawv kom txhob raug txoj kev ntawd xwb.
29 Cov kwv tij, kuv hais rau nej tias, tsis tshuav zim txwv ntev lawm. Li ntawd mas cov muaj poj niam yuav coj lub neej xws li lawv tsis muaj poj niam, 30 Cov neeg quaj ntsuag yuav coj xws li lawv tsis muaj chaw quaj, cov muaj kev lom zem, yuav ua xws li lawv tsis lom zem, cov muas cuab yeej cuab tam yuav ua zoo li lawv tsis muaj dab tsi li, 31 cov uas siv lub ntiaj teb yuav ua zoo li lawv tsis siv. Vim lub ntiaj teb uas zoo xws li qhov peb paub no yuav dua mus sai sai.

NPN 45: 11-12, 14-15, 16-17

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.

Me ntxhais, koj mloog mog ! Koj ntsia, koj tig ntsej los mloog :
Koj txhob nco koj haiv neeg, koj niam koj txiv lub tsev ntxiv.
Tus vaj yuav qaug siab hlo nyiam koj txoj kev zoo nkauj,
vim nws yog koj tus Huab Tais, koj yuav txhos caug pe hawm nws.

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.

Vaj ntxwv tus ntxhais nkag los nws muaj hwj chim kawg nkaus,
Nws hnav ib ce zam yog paj ntaub ntos xov kub.
Nws hnav zam paj ntaub thaum lawv coj nws mus cob rau tus vaj;
ib pab nkauj xwb ua cov nkauj ntsuab lawv nws qab kuj raug coj mus rau koj thiab.

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.

Lawv ua ib pab muaj kev zoo siab sib law sib liag,
lawv chaws mus hauv tus vaj lub tuam tsev.
Koj cov tub yuav los sawv lawv phaj txiv chaw,
koj yuav tsa lawv ua vaj txheeb kav ntiaj teb

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.

As Les Lus Yas: LK 6: 23AB

Txais: As les lus yas, as les lus yas.

Nej yuav zoo siab, nej yuav dhia hom khaj,
vim nej yuav tau txais koob haum loj nyob saum ntuj.

Txais: As les lus yas, as les lus yas.

Ntawv Moo Zoo: LK 6: 20-26

20 Yes Xus tsa muag ntsia nws cov thwj tim, nws hais tias : "Nej cov uas yog neeg pluag, nej txoj hmoov zoo, vim Tswv Ntuj lub Ceeb Tsheej yog nej tug. 21 Nej cov uas nyem no nej tshaib, nej txoj hmoov zoo, vim nej yuav tau noj txaus siab. Nej cov uas nyem no nej quaj, nej txoj hmoov zoo, vim nej yuav luag. 22 Thaum muaj neeg ntxub nej, thaum luag ntiab nej tawm, los luag cem nej, los xyav lus phem txog nej lub npe vim Neeg Leej Tub, mas nej txoj hmoov zoo.
23 Hnub ntawd, nej yuav zoo siab, nej yuav dhia hom khaj, vim nej yuav tau txais koob haum loj nyob saum ntuj. Txheej thaud, lawv cov yawg koob kuj tau ua li ntawd rau cov Yaj Saub thiab.
24 Hos nej cov uas yog neeg nplua nuj, mas nej txoj hmoov phem, vim nej twb txais kev nplij nej lawm. 25 Nej cov uas nyem no tau noj tsau, nej txoj hmoov phem, vim nej yuav tshaib. Nej cov uas nyem no nej luag, nej txoj hmoov phem, vim nej yuav quaj thiab yuav nyiav. 26 Thaum zeej tsoom cav lus zoo txog nej, mas nej txoj hmoov phem. Vim txheej thaud, lawv cov yawg koob kuj ua li ntawd rau cov yaj saub cuav thiab.”

TIM 10 LUB 9 HLIS 2020

Hnub Tsib Lis Piam Nees Nkaum Peb Nruab Xyoo A Nruab Lis Piam Xyoo II

Zaj Nyeem Ib: 1 KLN 8: 1B-7, 11-13

Cov kwv tij nkauj muad:
1 Hais txog cov nqaij txi rau cov mlom dab mas peb paub tias peb sawv daws yeej paub zoo txog. Txoj kev paub ua kom yus muab hlob, hos txoj kev nyiam thiaj tsim tsa tau yus. 2 Yog ib tug twg xav tias nws muaj kev paub txog ib yam dab tsi mas yog nws tseem tsis tau paub raws li nws yuav tsum paub. 3 Yog ib tug twg nyiam Tswv Ntuj, mas Tswv Ntuj paub nws zoo.
4 Li ntawd, mas hais txog qhov yuav noj cov nqaij txi mlom, mas peb paub tias tsis muaj ib tug mlom dab nyob ntiaj teb no li, thiab tsis muaj dua lwm tus tsuas muaj tib tug thiaj yog Tswv Ntuj xwb. 5 Txawm tias muaj ntau tus tswv ntuj cuav nyob saum ntuj, thiab nyob hauv ntiaj teb no, vim tias yeej muaj ntau tus tswv ntuj ntau tus huab tais tiag, 6 tab sis rau peb mas tsuas muaj ib tug Tswv Ntuj xwb, yog Leej Txiv, tus uas tas puas tsav yam tawm ntawm nws los, thiab tus uas vim nws thiaj muaj peb; thiab tsuas muaj ib tug Huab Tais Yes Xus Pleev xwb, tus ua kom txhua tsav txhua yam muaj tuaj tau thiab tus ua kom muaj peb.
7 Tab sis, tsis yog tas sawv daws paub txog qhov no. Muaj ib txhia, vim lawv ib txwm teev dab mlom los txog nyem no, ces yog lawv noj tej nqaij txi mlom, mas lawv lub tswv yim tseem xav li qub ces lawv lub siab muag ua rau lawv xav tias lawv tsis huv lawm.
11 Li ntawd ces nej txoj kev paub txog qhov no yuav ua kom tus neeg siab muag ntsib kev ploj , tsis kav nws twb yog ib tug kwv tij uas Leej Pleev tau tuag cawm nws thiab. 12 Yog nej ua txhaum rau nej cov kwv tij zoo li ntawd, nej ua xwv txheej rau lawv lub siab muag, mas kuj yog nej ua txhaum rau Leej Pleev thiab. 13 Vim li ntawd, yog txhiam xws yuav ua kom kuv tus kwv tij ntog, mas kuv yuav yoo tsis noj nqaij mus li, kom kuv tsis txhob ua rau kuv tus kwv tij ntog.

NPN 139: 1B-3, 13-14AB, 23-24

Txais: (24b) Huab Tais, thov koj coj kuv mus taug txoj kev yuav nyob mus li.

HUAB TAIS, koj tsom kuv, koj paub kuv :
koj paub thaum kuv sawv thiab thaum kuv zaum ;
koj nyob deb to taub tas tej kuv xav.
Koj saib nraim kuv thaum kuv mus kev los thaum kuv zaum,
koj paub txhua txoj kev kuv taug.

Txais: (24b) Huab Tais, thov koj coj kuv mus taug txoj kev yuav nyob mus li.

Koj yog tus tsim kuv lub tswv yim kuv tej plab plaw ;
koj ntos kuv ntxiv kuv hauv kuv niam plab.
Kuv ua koj tsaug, vim koj tsim kuv txaus ntshai txaus qhuas ua luaj;
koj tej dej num yeej txaus qhuas tas nrho.

Txais: (24b) Huab Tais, thov koj coj kuv mus taug txoj kev yuav nyob mus li.

Tswv Ntuj, cia koj tsom kuv, thiab paub kuv lub siab,
cia koj sim kuv, thiab paub kuv tej kev xav tswv yim.
Koj saib saib kuv puas mus taug txoj kev phem,
thov koj coj kuv mus taug txheej laus thaud txoj kev.

Txais: (24b) Huab Tais, thov koj coj kuv mus taug txoj kev yuav nyob mus li.

As Les Lus Yas: 1 Zam 4: 12

Txais: As les lus yas, as les lus yas.

Yog peb sib nyiam sib hlub, mas Tswv Ntuj nyob hauv peb,
thiab nws txoj kev nyiam yuav zoo tiav log nyob hauv peb.

Txais: As les lus yas, as les lus yas.

Ntawv Moo Zoo: LK 6: 27-38

Yes Xus hais rau nws cov thwj tim tias:
27 "Kuv hais rau nej cov uas mloog kuv tias : Nej yuav nyiam nej cov yeeb ncuab, nej yuav ua zoo rau cov neeg ntxub nej.
28 Nej foom lus zoo rau cov foom phem rau nej, nej thov Ntuj rau cov neeg xyav nej lub moo.
29 Leej twg ib ncuav pias rau koj sab plhu, koj tig sab tod rau nws thiab. Leej twg chua koj lub tsho tshaj sab, mas koj tso koj lub tsho hnav rau nws thiab.
30 Leej twg thov koj, mas koj pub rau nws. Leej twg nqa tej yam uas yog koj li lawm, mas koj tsis txhob kom nws xa rov qab.
31 Nej xav kom luag tej ua li cas rau nej, mas nej kuj yuav ua ib yam li ntawd rau luag thiab.
32 Yog nej nyiam cov neeg uas nyiam nej, mas nej tau txiaj ntsim dab tsi ? Tab yog cov neeg txhaum kuj txawj nyiam cov uas nyiam lawv thiab.
33 Yog nej ua zoo rau cov neeg ua zoo rau nej, mas nej tau txiaj ntsim dab tsi ? Tab yog cov neeg txhaum kuj txawj ua ib yam li ntawd thiab.
34 Yog nej txais nyiaj rau cov neeg uas nej paub tias nej yuav tau rov qab, mas nej tau txiaj ntsim dab tsi ? Cov neeg txhaum kuj txawj txais nyiaj rau cov neeg txhaum kom lawv rov tau li qub los.
35 Hos nej, mas nej yuav nyiam nej cov yeeb ncuab, nej yuav ua qhov zoo thiab nej yuav txais nyiaj tsis tos luag them dab tsi rov rau nej li, ces nej qhov koob haum yuav loj kawg, thiab nej yuav yog Tus Nyob Siab cov tub, vim nws ua siab zoo rau cov neeg mom nws txiaj ntsim thiab rau cov neeg lim hiam.
36 Nej yuav muaj lub siab khuv leej neeg ib yam li nej Txiv khuv leej neeg.
37 Nej tsis txhob txiav txim rau luag, nej thiaj yuav tsis raug txiav txim. Nej tsis txhob muab leej twg mus nyob txim, nej thiaj yuav tsis raug mus nyob txim. Nej zam txhaum rau luag ces Ntuj thiaj yuav zam rau nej.
38 Nej pub rau luag, ces nej thiaj yuav txais. Luag yuav xuas ib lub tawb loj los luj, yuav muab tswm muab co kom ceev thiab ntim nco lug, yuav muab nchuav rau hauv nej lub xub ntiag. Vim tias nej luj li cas rau luag, mas Ntuj kuj yuav luj li ntawd rov rau nej.”

TIM     11     LUB     9     HLIS     2020

Hnub Rau Lis Piam Nees Nkaum Peb Nruab Xyoo A Nruab Lis Piam Xyoo II

Zaj Nyeem Ib:   1 KLN 9:  16-19, 22B-27

16 Tsis yog vim kuv tshaj lub Moo Zoo ces kuv txawm tau kev khav, vim tshaj lub Moo Zoo yog kuv tes dej num uas muaj tus muab rau kuv yuav tsum tau ua, yog kuv tsis tshaj, mas kuv yuav tau hmoov phem. 17 Yog kuv txaus siab hlo tshaj lub Moo Zoo ntawm kuv tus kheej, mas kuv yuav muaj cai tau txais ib tug nqe zog ; yog kuv tsis tau txiav siab ua los ntawm kuv tus kheej, mas nws yog txoj hauj lwm uas Ntuj muab cob rau kuv ua. 18 Li ntawd mas kuv yuav txais nqe zog dab tsi ? Yog kom kuv pub lub Moo Zoo dawb rau luag, tsis txhob noj tus nqe zog uas kuv muaj cai noj vim lub Moo Zoo.
19 Kuv yog ib tug neeg twj lij tsis zwm rau leej twg, tab sis kuv txhob txwm xaiv txoj kev ua sawv daws qhev, vim kuv xav yaum kom tau neeg coob li coob tau nrog kuv.
22b Kuv muab kuv ua txhua yam rau txhua leej txhua tus, vim txawm li cas los kuv xav cawm kom tau ib co . 23 Kuv ua txhua yam rau lub Moo Zoo, kom kuv tau txais ib feem nyob hauv lub Moo Zoo thiab.
24 Nej twb paub lawm tias cov neeg sib tw khiav nyob hauv ib lub tshav, sawv daws khiav, tiam sis tsuas muaj tib leeg yeej thiab tau paj tshab xwb, puas yog? Nej kav tsij khiav tiag kom nej yeej mog ! 25 Cov neeg sib tw txhob txwm yoo ntau yam; lawv ua li ntawd kom lawv yeej thiab tau ib co paj tshab txawj ploj; hos ntawm peb, (peb kuj yuav yoo,) kom peb tau ib co paj tshab tsis txawj ploj. 26 Li ntawd thaum kuv khiav, kuv tsis yog lam khiav dag; thaum kuv ntsuas zog tsis yog xws li ib tug neeg lam ntaus cua xwb. 27 Kuv quab yuam thiab xyaum kuv lub cev nruj tiag, vim nyob tsam thaum kuv qhuab qhia luag tej tas, kuv ho tsis tsim nyog txais paj tshab lawm.

NPN   84:  3, 4, 5-6, 12

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Kuv tus plig ntshaw seev yees yuj plaws
rau HUAB TAIS cov tshav loog.
Kuv lub siab lub cev quaj hu
txog tus Tswv Ntuj muaj txoj sia.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Tab cov me noog ntxias nrhiav tau chaw nyob,
noog luv nrhiav tau zes puag nws cov me nyuam
ntawm koj cov thaj txi ntuj, HUAB TAIS kav tsoom tshiab,
kuv tus vaj, kuv tus Tswv Ntuj!

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Cov neeg nyob hauv koj tsev lawv txoj hmoov zoo :
lawv tau kev cav txog koj mus li tsis tseg.
Cov uas muab koj ua lawv lub zog, lawv txoj hmoov zoo.
Lawv yim mus kev lawv lub zog yim loj tuaj.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Vim HUAB TAIS Tswv Ntuj yog lub hnub, yog daim leem phiaj thaiv ;
nws pub txiaj ntsim thiab koob meej.
Huab Tais tsis tshem txoj koob hmoov zoo
ntawm cov neeg muaj ib lub siab dawb paug ua lawv lub neej.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

As Les Lus Yas:   ZAM 17:  17B, 17A

Txais: As les lus yas, as les lus yas.

Huab Tais, koj lo lus yog qhov tseeb,
thov koj muab peb cog rau hauv txoj kev tseeb.

Txais: As les lus yas, as les lus yas.

Ntawv Moo Zoo:   LK 6:  39-42

39 Yes Xus hais dua ib zag paj lug rau lawv li no : "Ib tug dig muag puas coj tau lwm tus dig muag kev ? Nkawd ob leeg yuav tsis ua ke mus poob kwj deg xwb lod?
40 Tus thwj tim tsis loj dua nws tus xib hwb. Tus thwj tim uas kawm tiav tas, nws yuav zoo li nws tus xib hwb xwb. 41 Vim li cas koj pom tus quav nplej uas nyob hauv koj tus kwv lub qhov muag, hos tus nqaj uas nyob hauv koj lub qhov muag, koj ho tsis pom?
42 Ua cas koj thiaj muaj cuab kav hais rau koj tus kwv tias : ‘Kwv ntxawg, koj cia kuv rho tus quav nplej hauv koj qhov muag pov tseg’, hos koj twb tsis pom tus nqaj hauv koj qhov muag? Neeg zoo nraum daim tawv, koj rho tus nqaj hauv koj qhov muag pov tseg tso ; koj thiaj yuav pom kev dig tus quav nplej hauv koj tus kwv lub qhov muag.”

TIM 12 LUB 9 HLIS 2020

Hnub Xya Lis Piam Nees Nkaum Peb Xyoo A Nruab Lis Piam Xyoo II

Hwm Niam Mab Liab lub Npe Ntshiab (the Most Holy Name of Mary)

Zaj Nyeem Ib: 1 KLN 10: 14-22

14 Kuv cov zoo nyiad, nej txav deb ntawm txoj kev teev dab teev mlom mog. 15 Kuv hais lus rau nej yog hais rau ib co neeg paub tab. Nej yuav tsum txiav txim rau kuv cov lus saib puas yog los tsis yog. 16 Lub ntim foom hmoov zoo uas peb foom hmoov rau, puas ua kom peb koom siab nyob hauv Leej Pleev cov ntshav los tsis ua ? Cov mov uas peb muab ntais, puas ua kom peb koom siab nyob hauv Leej Pleev lub cev los tsis ua ? 17 Ib yam li tsuas muaj tib lub ncuav mov xwb, peb sawv daws, txawm peb muaj coob leej, kuj koom ua ib lub cev thiab xwb, vim peb sawv daws koom noj tib lub ncuav mov.
18 Nej ntsia tsoom His Xas Lais raws li nyob sab nqaij tawv saib : cov uas noj cov txim, lawv puas koom nrog lub thaj txi Ntuj los tsis koom ? 19 Qhov kuv hais no yog xav hais dab tsi ? Puas yog xav hais tias cov nqaij txi dab yog ib yam uas muaj nqes ? Los puas yog xav hais tias cov dab ntawd muaj nqes? 20 Tsis yog li ntawd, qhov kuv xav hais yog qhov tias tej yam uas lawv muab los txi, mas yog txi rau ib co dab phem, tsis yog txi rau Tswv Ntuj. Ces kuv tsis xav kom nej nrog cov dab phem sib koom siab. 21 Nej ib txhij haus Huab Tais lub ntim thiab dab phem lub ntim tsis tau. Nej ib txhij noj Huab Tais rooj qav thiab dab phem rooj qav tsis tau. 22 Los puas yog peb xav txhob txwm ua kom Huab Tais khib thiab npau taws? Peb puas muaj zog dua Huab Tais ?

NPN 116: 12-13, 17-18

Txais: (17) Huab Tais, kuv yuav cev ib co txim los cav txog koj.

Kuv yuav muab dab tsi los pauj
ib puas tsav yam zoo uas HUAB TAIS ua rau kuv ?
Kuv yuav cev lub ntim cawm neeg,
kuv yuav hu txog HUAB TAIS, yuav tuav txog nws lub npe.

Txais: (17a) Huab Tais, kuv yuav cev ib co txim los cav txog koj.

Kuv yuav cev ib co txim los ua koj tsaug,
kuv yuav tuav txog HUAB TAIS lub npe.
Kuv yuav pauj kuv lub yeem rau HUAB TAIS
nyob ntawm tas nws haiv neeg xub ntiag,

Txais: (17) Huab Tais, kuv yuav cev ib co txim los cav txog koj.

Hnub no vim yog hnub hwm Niam Mab Liab lub Npe Ntshiab, tej zaum yuav hla zaj As les lus yas thiab zaj Ntawv Moo Zoo ntawm no, ces nej mus saib ob zaj nyob nram qab kawg.

As Les Lus Yas: ZAM 14: 23

Txais: As les lus yas, as les lus yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws;
kuv Txiv wb yuav los nyob hauv nws.

Txais: As les lus yas, as les lus yas.

Ntawv Moo Zoo: LK 6: 43-49

Yes Xus hais rau nws cov thwj tim tias:
43 "Tsis muaj ib tsob ntoo zoo nkauj yuav txi ib co txiv lwj, los ib tsob ntoo lwj yuav txi ib co txiv zoo nkauj. 44 Xav paub tsob ntoo, mas yuav ntsia nws lub txiv : luag tsis de txiv ncuav pias saum tej pos kaus ntsaj, los de txiv cawv saum ib tsob txiv pos tshauv. 45 Tus neeg zoo rho tej yam zoo tawm hauv nws lub siab uas puv tej yam zoo los, tus neeg phem rho tej yam phem tawm hauv nws lub siab uas puv tej yam phem los. Vim tias yam uas lub ncauj hais tawm, yog puv phwj hauv lub siab tuaj.
46 Vim li cas nej hu kuv ua 'Huab Tais, Huab Tais', tab sis nej tsis ua raws li kuv hais ? 47 Txhua tus uas tuaj cuag kuv, nws mloog kuv cov lus thiab ua raws li kuv cov lus, mas kuv yuav qhia nej tias nws yog ib tug neeg zoo li cas. 48 Nws zoo xws li ib tug neeg txhim tsev, uas khawb qhov kom tob, thiab puab lub taw ntsa rau saum pob tsuas. Thaum dej sab siv huam, dej dag nphau nphwv tuaj ntsawj lub tsev, tab sis ua tsis tau kom lub tsev ua zog, vim lub tsev ntawd txhim tau ruaj. 49 Hos tus mloog kuv cov lus, tab sis nws tsis ua raws, mas nws zoo xws li ib tug neeg txhim tsev rau saum npoo av, tsis cog taw ntsa li. Thaum dej sab siv tuaj ntsawj lub tsev, lub tsev vau tam sis ntawd, ces lub tsev raug xwv txheej loj."


***********************
Hnub no yog hnub hwm Niam Mab Liab lub Npe Ntshiab, yuav siv zaj As Les Lus Yas thiab zaj Ntawv Moo Zoo nram no los tau:

As Les Lus Yas: LK 1: 45

Txais: As les lus yas, as l;es lus yas.

Koj tau hmoov zoo, nkauj xwb tsim txiaj Mab Liab, vim koj ntseeg
tias yuav muaj tuaj raws li Huab Tais hais rau koj.

Txais: As les lus yas, as les lus yas.

Ntawv Moo Zoo: LK 1: 39-47

39 Tau ob peb hnub tom qab, Mab Liab sawv kev mus, nws rau siab ntso mus pem toj siab, mus rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws tsa suab hu Es Lis Xas Npes. 41 Thaum Es Lis Xas Npes hnov dheev Mab Liab lub suab hu nws, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv nws. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab hu nrov txog kuv pob ntseg, tus me nyuam hauv kuv plab dhia zoo siab. 45 Li ntawd, tus tau ntseeg tias cov lus Huab Tais hais rau nws yuav tsheej xeeb tau, mas nws txoj hmoov zoo !"
46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv.”

TIM 14 LUB 9 2020

Hnub Ob Lis Piam Nees Nkaum Plaub Nruab Xyoo A Nruab Lis Piam Xyoo II

Cag Txog Yes Xus tus Ntoo Cuam

Zaj Nyeem Ib: XAM PHAJ 21: 4B-9

4 Cov His Xas Lais mus txog ib tog kev, lawv npau taws. 5 Lawv cem Tswv Ntuj thiab cem Mais Xes tias : "Vim li cas neb thiaj coj peb tawm Hais Nkws Tos teb los kom peb los tuag hauv lub teb chaws suab puam no ? Tsis muaj mov noj, tsis muaj dej haus li; peb dhuav noj cov mov tuag tshaib ntawd dhau lawm!" 6 Tswv Ntuj thiaj tso ib cov nab muaj taug hluav taws tuaj tom lawv.; cov nab ntawd tom tsoom pej xeem His Xas Lais tuag coob leej. 7 Tsoom pej xeem thiaj mus hais rau Mais Xes tias: "Peb tau ua txhaum lawm vim peb tau cem HUAB TAIS thiab cem koj. Koj thov kom HUAB TAIS zam rau peb, kom nws ntiab cov nab ntawd khiav mus deb peb." Ces Mais Xes thiaj thov kom Tswv Ntuj zam rau lawv.
8 HUAB TAIS hais rau Mais Xes tias : "Koj nchuav ib tug nab muaj taug hluav taws, koj muab khuam rau saum ib tug ncej. Leej twg raug nab tom, yog nws ntsia tus nab nchuav ntawd mas nws yuav ciaj sia nyob." 9 Mais Xes thiaj muab tooj nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag ntsia tus nab tooj ntawd ces nws ciaj sia nyob.

NPN 78: 1BC-2, 34-35, 36-37, 38

Txais: (7b) Nej yuav nco ntsoov Huab Tais cov hauj lwm loj.

Kuv haiv neeg, nej mloog kuv tej lus qhuab qhia;
Nej tig ntsej los mloog cov lus tawm ntawm kuv lub ncauj los.
Kuv yuav qhib ncauj hais ib zag paj lug,
Kuv yuav hais tej zaj lus tob uas yeej muaj txheej thaud los lawm.

Txais: (7b) Nej yuav nco ntsoov Huab Tais cov hauj lwm loj.

Thaum Tswv Ntuj rhuav lawv, ces lawv nrhiav nws ;
lawv hloov siab thiab tig rov los nrhiav nws.
Lawv rov nco tias Tswv Ntuj yog lawv lub tsua,
yog tus Tswv Ntuj Nyob Siab tus txhiv lawv.

Txais: (7b) Nej yuav nco ntsoov Huab Tais cov hauj lwm loj.

Tab sis lawv lam hais lus ntxias nws ntawm ncauj,
lawv tus nplaig lam hais lus dag rau nws xwb,
lawv lub siab tsis npuab nws kom ruaj,
lawv tsis coj raws cov lus nws tau nrog lawv cog.

Txais: (7b) Nej yuav nco ntsoov Huab Tais cov hauj lwm loj.

Tab sis, Tswv Ntuj lub siab hlub neeg zam lawv qhov txhaum rau lawv,
nws tsis rhuav lawv pov tseg,
Nws cheem nws lub siab npau taws tsis tseg,
nws tsis pub kom nws lub siab ceev tsim dheev los.

Txais: (7b) Nej yuav nco ntsoov Huab Tais cov hauj lwm loj.

Zaj Nyeem Ob: FIS LIS POS 2: 6-11

Cov kwv tij nkauj muam,
6 Yes Xus Pleev yog Tswv Ntuj, tiam sis nws tsis tau txeeb tseev kom nws loj ib yam li Tswv Ntuj. 7 Nws muab nws lub hwj chim hle, nws yeem ua ib tug qhev, nws yug los xws li tib neeg, luag pom nws tus yam ntxwv yog yam ntxwv tib neeg. 8 Nws txo nws qis, nws tuaj yeem mloog lus mus txog qhov tuag, thiab tseem yog kev tuag saum ntoo cuam. 9 Vim li ntawd, mas Tswv Ntuj thiaj tsa Yes Xus ua tus loj nyob qhov chaw siab dua cov, thiab muab lub npe uas nyob siab dua txhua lub npe rau nws. 10 Kom thaum twg hnov tuav txog lub npe Yes Xus, mas txhua leej txhua tus yuav tsum kim caug hawm, tsis hais nyob saum cov txheej ntuj saud, los nyob ntiaj teb no, los nyob nruab yeeb tib si. 11 Thiab kom txhua xeem lus yuav tsum zeem tseeb tias Yes Xus Pleev yog Huab Tais, ces Leej Txiv Tswv Ntuj thiaj muaj koob meej nto moo lug.

As Les Lus Yas

Txais: As les lus yas, as les lus yas.

Leej Pleev, peb pe hawm koj, thiab peb cav txog txog,
vim koj tau cawm lub qab ntuj neeg nyob saum koj tus Ntoo Cuam.

Txais: As les lus yas, as les lus yas.

Ntawv Moo Zoo: ZAM 3: 13-17

Yes Xus hais rau Nis Kos Des Mos tias:
13 “Tsis muaj leej twg tau nce mus saum ntuj dua li, tsuas muaj tus tau nqes saum ntuj los xwb, uas yog Neeg Leej Tub. 14 Ib yam li Mais Xes tau tsa tus nab nyob teb chaws suab puam, Neeg Leej Tub kuj yuav tsum raug luag muab tsa kom siab, 15 kom xwv tus twg ntseeg txog nws, yuav tsum muaj txoj sia nyob mus li.”
16 Vim Tswv Ntuj nyiam lub qab ntuj neeg npaum no, nws thiaj muab nws Leej Tub twm zeej rau lawv, kom xwv tus ntseeg txog nws txhob tuag, tab sis kom nws muaj txoj sia nyob mus li. 17 Vim Tswv Ntuj tsis tau xa nws Leej Tub tuaj hauv lub qab ntuj kom nws muab txim rau lub qab ntuj neeg, tiam sis kom qab ntuj neeg tau txais kev cawm nyob hauv nws.

TIM     15     LUB     9     HLIS     2020

Hnub Peb Lis Piam Nees Nkaum Plaub Nruab Xyoo A Nruab Lis Piam Xyoo II

Hwm Leej Niam Muaj kev Tu Siab (Our Lady of Sorrows/Notre Dame des Douleurs)

Zaj Nyeem Ib:       1 KLN  12:   12-14, 27-31A

Cov kwv tij nkauj muad:
12 Ib yam li neeg muaj ib lub cev xwb, tab sis lub cev ntawd muaj ntau ces; txhua ces ntawd, txawm tias muaj ntau, tsuas yog ib lub cev xwb.  Nyob hauv Leej Pleev kuj zoo ib yam  li ntawd. 13 Vim tias peb sawv daws tau txais lub Cim Ntxuav nyob hauv ib tug Leej Ntuj Plig xwb, ces peb kuj koom ua lub Cev thiab xwb. Tsis hais cov Yus Das los cov Hes Las, cov ua qhev los cov twj lij, peb sawv daws puav leej tau haus ib tug Leej Ntuj Plig xwb. 14 Lub cev tsis yog ib yam xwb, lub cev muaj ntau yam.
27 Ntawm nej, mas nej yog Leej Pleev lub cev, nej nyias muaj nyias ib yam nyob rau hauv lub cev ntawd. 28 Muaj tej tus neeg mas Tswv Ntuj tsa lawv ua ib Hauv Paus Xa Lus nyob hauv lub Koom Txoos, ob ua Yaj Saub, peb ua Xib Hwb;  kuj tseem muaj cov ua tau hwj huam yees ntxwv, cov tau lub txiaj ntsim kho neeg mob, cov txawj pab luag, cov txawj tuav kev tswj fwm, thiab cov paub ntau xeem lus. 29 Sawv daws puas yog Hauv Paus Xa Lus ? Sawv daws puas yog Yaj Saub? Sawv daws puas yog Xib Hwb ? Sawv daws puas ua tau hwj huam yees ntxwv ? 30 Sawv daws puas tau lub txiaj ntsim txawj kho mob? Sawv daws puas txawj hais ntau hom lus ? Sawv daws puas txawj ua tus txhais lus ?
31 Xav kom nej yuav tsum mob siab rau nrhiav cov txiaj ntsim nyob sab ntsuj plig uas muaj nqis loj dua cov.

NPN       100:   1B-2, 3, 4, 5

Txais: (3) Peb yog nws haiv neeg, peb yog nws pab yaj.

Tas lub ntiaj teb, nej zoo siab hu nkauj rau HUAB TAIS !
Nej xyiv fab hlo luag ntxhi tsob hwb HUAB TAIS ;
nej hu nkauj zoo siab chaws los ntawm nws xub ntiag

Txais: (3) Peb yog nws haiv neeg, peb yog nws pab yaj.

Nej yuav tsum paub tias HUAB TAIS yog Tswv Ntuj.
Nws tau tsim peb los, peb yog nws tug,
peb yog nws haiv neeg, yog pab yaj nws saib.

Txais: (3) Peb yog nws haiv neeg, peb yog nws pab yaj.

Nej chaws mus hauv nws cov rooj loog, nej ua nws tsaug,
Nej mus hauv nws cov tshav loog, nej cav txog nws ;
nej ua nws tsaug, nej foom lus zoo rau nws lub npe.

Txais: (3) Peb yog nws haiv neeg, peb yog nws pab yaj.

Vim HUAB TAIS muaj lub siab zoo,
nws txoj kev ua zoo yuav nyob mus li,
nws ua siab ncaj rau peb txheej dhau txheej.

Txais: (3) Peb yog nws haiv neeg, peb yog nws pab yaj.

Hla zaj As Les Lus Yas thiab zaj Ntrawv Moo Zoo ntawmn no mus saib nram qab.

As Les Lus Yas:       LK  7:   16

Txais: As les lus yas, as les lus yas.

Ib tug yaj saub loj sawv los nyob hauv peb,
Tswv Ntuj tuaj xyuas nws haiv neeg lawm.

Txais: As les lus yas, as les lus yas.

Ntawv Moo Zoo:       LK  7:   11-17

11 Yes Xus mus hauv ib lub nroog hu ua Nas Ees. Yes Xus cov thwj tim thiab ib pab neeg coob nrog Yes Xus ua ke mus. 12 Thaum nws tuaj yuav txog lub qhov rooj loog nkag mus hauv lub nroog, luag tab tom kwv ib tug tuag tawm tuaj txog ntawd. Yog ib leeg tub twm zeej, hos leej niam yog ib tug poj ntsuam. Ib pab neeg coob hauv nroog nrog leej niam tawm tuaj. 13 Huab Tais pom tus poj ntsuam, Huab Tais khuv leej nws, Huab Tais hais rau nws tias : "Koj txhob quaj." 14 Yes Xus txav los ze, nws los tuav lub hleb, ces cov kwv hleb nres. Ces Yes Xus hais tias : "Tus hluas, kuv hais koj : Koj cia li sawv !" 15 Ces tus tuag sawv los zaum, thiab nws pib hais lus. Yes Xus muab tus tub hluas ntawd cob rau nws niam. 16 Tas sawv daws ntshai kawg. Lawv cav txog Tswv Ntuj tias : "Ib tug yaj saub loj sawv los nyob hauv peb lawm,” thiab lawv tseem hais tias: “ Tswv Ntuj tuaj xyuas nws haiv neeg lawm." 17 Cov lus no ncha mus thoob tas xeev Yus Das thiab ib ncig sab teb chaws ntawd.


Hnub no vim peb nco txog Leej Niam Muaj kev Tu Siab, Yog li ntawd peb yuav siv zaj As Les Lus Yas thuab xaiv ib zaj Ntawv Moo Zoo nram qab no:


As Les Lus Yas

Txais:   As les lus yas, as les lus yas.  

Nkauj tsim txiaj Mab Liab, koj tau txoj hmoov zoo;      
koj tsis raug luag tua tiam sis koj tau txais lub mom teev kub ua tim khawv,      
thaum koj sawv ze ntawm Huab Tais tus Ntoo Cuam.

Txais:   As les lus yas, as les lus yas.

Ntawv Moo Zoo:   ZAM 19: 25-27

25 Yes Xus niam thiab nws niam tus viv ncaus, hu ua Mab Liab uas yog Khos Pas poj niam,
thiab Mab Liab Mas Ntas Las, lawv sawv ze ntawm tus ntoo cuam.
26 Yes Xus pom nws niam, thiab pom tus thwj tim uas nws nyiam sawv ze nws niam,
ces nws hais rau nws niam tias : "Niad, tus ntawd yog koj tus tub."
27 Thiab Yes Xus hais rau tus thwj tim tias : "Tus ntawd yog koj niam."
Ces txij lub sij hawm ntawd los, tus thwj tim coj Mab Liab mus nyob hauv nws tsev.

Los:     Lk 2:  33-35

33 Yes Xus niam thiab txiv qhuas cov lus nkawd hnov hais txog tus me nyuam.
34 Xis Mes Oos foom hmoov zoo rau lawv, nws hais rau Mab Liab, tus me nyuam niam tias : "Koj ntsia ! Tus me nyuam no yuav ua chaw rau ntau leej neeg His Xas Lais ntog thiab ntau leej rov sawv. Nws yog ib lub cim ua kom sawv daws muaj lus sib cav.
35 Hos ntawm koj, mas ib rab ntaj yuav hno koj tus plig, kom xwv tej tswv yim uas coob leej xav tuaj nruab siab tawm los rau sawv daws paub.”

TIM 16 LUB 9 HLIS 2020

Hnub Plaub Lis Piam Nees Nkaum Plaub Nruab Xyoo A Nruab Lis Piam Xyoo II

Hwm LN Vaj Qhia Cornelius, thiab LN Tswv Qhia Cyprian, tuag ua Tim Khawv

Zaj Nyeem Ib: 1 KLN 12: 31-13: 13

Cov kwv tij nkauj muad:
31 Nej yuav muaj lub siab ntshaw cov txiaj ntsim muaj nqis dua cov. Thiab kuv tseem yuav qhia dua ib txog kev zoo tshaj rau nej ntxiv thiab.
13 1 Txawm kuv txawj hais cov haiv neeg tej xeem lus, thiab Ntuj cov tshiab tej xeem lus huv tib si los, yog kuv tsis muaj txoj kev nyiam, mas kuv tsuas yog ib lub nruas tooj nrov nrov, los ib lub nruas npuaj ncha ncha xwb. 2 Txawm kuv muaj lub peev xwm ua yaj saub, thiab paub tas ib puas tsav yam lus tob, ib puas tsav yam txuj ci, thiab kuv muaj kev ntseeg loj tas hro, tshem tau tej lub roob rau lwm qhov chaw los, yog kuv tsis muaj txoj kev nyiam, mas kuv tsis muaj qab hau dab tsi li. 3 Txawm kuv muab kuv lub cuab tam tas huv tib si los faib rau cov neeg pluag, thiab kuv muab kuv lub cev mus rau luag hlawv los, yog kuv tsis muaj txoj kev nyiam, mas kuv yuav tsis tau txais ib qho dab tsi zoo li.
4 Lub siab nyiam txawj ua siab ntev, ua siab zoo pab luag; lub siab nyiam tsis txawj khib, tsis khav theeb, tsis muab hlob. 5 Lub siab nyiam tsis ua tub qaug luag, tsis nrhiav qhov zoo rau nws tus kheej, tsis npau taws, tsis nco ntsoov luag qhov phem. 6 Lub siab nyiam tsis zoo siab pom txoj kev ua tsis ncaj, nws zoo siab pom txoj kev tseeb xwb. 7 Lub siab nyiam zam rau sawv daws, nws ntseeg sawv daws, nws tso siab rau sawv daws, nws ua siab ntev ris tas puas tsav yam nyuaj.
8 Txoj kev nyiam tsis txawj kawg ib zaug li. Txoj kev ua Yaj Saub yuav txawj raug muab tso tseg. Txoj kev txawj hais ntau xeem lus yuav txawj tsis muaj ntxiv. Txoj kev txawj kev ntse kuj yuav txawj raug muab tso tseg. 9 Vim tias, peb tsuas txawj ntse txog tej yam, thiab peb tsuas txawj ua saub txog tej yam thiab xwb . 10 Thaum txoj kev zoo tiav log los txog, mas tej yam uas neeg ua tau yuav ploj tas huv tib si. 11 Thaum kuv tseem yau, kuv hais lus li me nyuam yaus, kuv xav li me nyuam yaus, kuv muaj tswv yim li me nyuam yaus. Thaum kuv hlob tiav neeg lawm, mas kuv tso tej kev ua me nyuam yaus pov tseg. 12 Zaum no, peb tsuas pom zoo li nyob hauv ib daim tsom iav xwb, pom tsis tseeb; thaum ntawd, peb yuav pom xyeem ntawm qhov muag kiag. Nyem no, kuv tsuas paub ib feem me me xwb; thaum ntawd, kuv yuav paub txhij paub txhua tshab plaws, ib yam li Ntuj paub kuv tshab plaws. 13 Li ntawd, peb yam no yuav nyob: txoj kev ntseeg, txoj kev tso siab, txoj kev nyiam; tiam sis, qhov loj tshaj cov mas yog txoj kev nyiam.

NPN 33: 2-3, 4-5, 12+22

Txais: (12) Haiv neeg uas Huab Tais xaiv lawv ua nws tug, lawv txoj hmoov zoo.

Nej ntaus nkauj nog ncas ua HUAB TAIS tsaug,
nej ntaus thaj cheej kaum txoj hlua cav txog nws.
Nej hu ib zaj nkauj tshiab rau nws;
Nej qoj cov hlua kom zoo mloog nrog nej cov suab qw zoo siab.

Txais: (12) Haiv neeg uas Huab Tais xaiv lawv ua nws tug, lawv txoj hmoov zoo.

HUAB TAIS lo lus yog lus ncaj,
tas nws tej dej num yog qhov tseeb.
Nws nyiam kev ncaj thiab kev haum pheej;
HUAB TAIS txoj kev ua zoo nyob puv lub ntiaj teb.

Txais: (12) Haiv neeg uas Huab Tais xaiv lawv ua nws tug, lawv txoj hmoov zoo.

Haiv neeg uas tau HUAB TAIS los uaTswv Ntuj, lawv txoj hmoov zoo,
yog haiv neeg Huab Tais xaiv los ua nws lub cuab tam
HUAB TAIS, thov kom koj txoj kev hlub roos peb,
vim koj yog peb qhov chaw tso siab.

Txais: (12) Haiv neeg uas Huab Tais xaiv lawv ua nws tug, lawv txoj hmoov zoo.

As Les Lus Yas: ZAM 6: 63C, 68C

Txais: As les lus yas, as les lus yas.

Huab Tais, koj cov lus yog ntsuj plig thiab yog txoj sia;
koj muaj cov lus pub txoj sia nyob mus li.

Txais: As les lus yas, as les lus yas.

Ntawv Moo Zoo: LK 7: 31-35

Yes Xus hais rau tsoom sid tias:
31 “Kuv yuav muab tiam neeg no piv rau dab tsi? Lawv zoo li leej twg?
32 Lawv zoo li ib pab me nyuam yaus zaum tom tshav puam, lawv sib hu tias : 'Peb twb tshuab raj rau nej, nej tsis seev cev tsis dhia li! Peb twb cuab suab nyiav, nej tsis quaj li!'
33 Zam Ntxuav Plig tuaj, nws tsis noj mov, tsis haus cawv, nej hais tias : 'Nws raug dab !'
34 Neeg Leej Tub tuaj, nws noj mov thiab haus cawv, nej hais tias : 'Saib, tus neeg ntawd hu dab thiab quav cawv, nws nrog cov sau se thiab cov neeg txhaum ua phooj ywg !'
35 Tiam sis kev Thoob Tsib cov me nyuam huv tib si puav leej ua rau nws tau ntsej muag lawm.”