UA KOOB TSHEEJ YES XUS YUG LOS XYOO 2018

Tim      10      lub      9      Hlis      2019

Hnub Peb Lis Piam Nees Nkaum Peb Nruab Xyoo C Nruab Lis Piam Xyoo I

Zaj Nyeem Ib:      KLX  2:   6-15

Cov kwv tij,
6 Nej twb tau txais tus Huab Tais Yes Xus Pleev lawm, mas nej kuj yuav tsum coj kom phim qhov tias nej nyob hauv nws; 7 nej yeej meem nrhau cag thiab tsa tsev ruaj rau hauv nws. Nej ua kom nej txoj kev ntseeg ruaj nreb khov kho, raws li nej tau kawm los lawm. Nej lub siab yuav tsum ua Ntuj tsaug tsis tseg.
8 Nej ceev faj kom luag txhob ntxias tau nej qaug mus rau lawv tej zaj tswv yim thiab lawv tej lus dag lus cuav raws li tib neeg txoj kev ib txwm qhia los, thiab raws li ntiaj teb cov tswv yim xav xwb, tsis yog raws li Leej Pleev xav. 9 Vim nyob hauv Leej Pleev lub hwj chim ua Tswv Ntuj yeej nyob tas nrho hauv nws lub cev ua tib neeg. 10 Nej los nyob hauv Leej Pleev, mas nej kuj tau txais lub hwj chim ntawd huv tib si thiab. Nws yog lub Taub Hau kav tas txhua txoj kev ua vaj thiab txhua txoj kev muaj hwj huam. 11 Nej kuj tau txais ib lub cim txiav nyob hauv Leej PLeev thiab, uas tsis yog ib lub cim txiav neeg txhais tes ua: yog Leej Pleev lub cim txiav, uas muab yus lub cev nqaij hle pov tseg tas huv tib si. 12 Hnub nej txais lub Cim Ntxuav, nej nrog Leej Pleev nqes mus rau hauv ntxa, thiab nej kuj nrog nws sawv rov qab los, vim nej ntseeg txog Tswv Ntuj lub huam tsa tau Leej Pleev sawv hauv cov tub tuag rov los. 13 Txawm nej twb tuag lawm vim nej cov txhaum thiab vim nej lub cev tsis ua lub cim txiav, los Leej Pleev tsa nej sawv rov los ua ke nrog nws, vim tias nws twb zam txhaum rau peb tas huv si lawm, 14 thiab nws muab peb lub txim uas txoj cai txiav rau peb ris so pov tseg tib si, nws muab tshem tawm ntawm peb mus, thiab muab ntsia rau saum ntoo cuam. 15 Leej Pleev ntaus yeej cov tshiab ua vaj txheeb thiab muaj hwj huam ; nws khoo lawv raws nws qab rau sawv daws saib tias nws yog tus yeej lawv.

NPN        145:   1B-2, 8-9, 10-11

Txais: (9) HUAB TAIS ua siab zoo hlub txhua tsav txhua yam nws tau tsim los.

Kuv tus Tswv Ntuj, kuv tus vaj, kuv cav lus zoo txog koj,
kuv yuav foom koob meej rau koj lub npe mus ib txhiab ib txhis.
Kuv yuav niaj hnub foom koob meej rau koj,
kuv yuav cav lus zoo txog koj lub npe mus ib txhiab ib txhis.

Txais: (9) HUAB TAIS ua siab zoo hlub txhua tsav txhua yam nws tau tsim los.

HUAB TAIS lub siab hlub thiab khuv leej neeg,
nws npau taws qeeb, nws lub siab hlub neeg tas nrho.
HUAB TAIS ua siab zoo rau txhua leej txhua tus,
nws lub siab khuv leej tas puas tsav yam nws tau tsim los.

Txais: (9) HUAB TAIS ua siab zoo hlub txhua tsav txhua yam nws tau tsim los.

HUAB TAIS, cia tas koj cov hauj lwm ua koj tsaug,
thiab cia cov uas nyiam koj cav txog koj.
Cia lawv qhuas txog koj lub Ceeb Tsheej muaj hwj chim
Thiab piav txog kuj lub hwj huam loj.

Txais: (9) HUAB TAIS ua siab zoo hlub txhua tsav txhua yam nws tau tsim los.

As Les Lus Yas:        ZAM  15:   16

Txais: As les lus yas, as les lus yas.

Huab Tais hais tias: kuv xaiv nej tawm ntawm ntiaj teb los
kom nej mus txi ib co txiv uas yuav tsis txawj lwj.

Txais: As les lus yas, as les lus yas.

Ntawv Moo Zoo:        LK  6:   12-19

12 Thaum ntawd, Yes Xus mus teev Ntuj pem roob, nws nyob teev Ntuj ib hmos. 13 Thaum kaj ntug, nws hu nws cov thwj tim los, nws xaiv kaum ob leeg, nws hu lawv ua cov Hauv Paus Xa Lus. 14 Muaj Xis Moos, uas nws tis npe rau hu ua Pob Zeb, muaj As Nres, Pob Zeb tus kwv, muaj Yas Kos, Zam, Fis Lis Pos, Npas Tos Los Mas Yos, 15 Mas Tais, Tos Mas, Yas Kos uas yog As Fas Yos tub, Xis Moos tus Siab Kub, 16 Yus Das, Yas Kos tub, thiab Yus Das Kas Lis Yaus, uas yog tus ntxeev siab.
17 Yes Xus nrog lawv cov no nqes los, nws sawv saum ib qho chaw tiaj. Muaj Yes Xus ib pab thwj tim coob kawg thiab ib pab neeg kuj coob kawg tuaj ntawm xeev Yus Das, thiab ntawm Yes Lus Xas Les tuaj, thiab ntawm thaj tsam ntug dej ntuj ntawm Tws Los thiab Xis Doos tuaj. 18 Lawv tuaj mloog Yes Xus thiab tuaj kom nws kho lawv cov mob. Tab cov uas raug tej tus dab tsis huv tsim lawv, kuj puav leej rov zoo tas. 19 Tas txhua leej nyob hauv pab neeg ntawd nrhiav kom tau kev kov Yes Xus, vim muaj ib lub hwj huam tawm hauv nws los kho sawv daws zoo tas huv si.

Tim 11 lub 9 Hlis 2019

Hnub Plaub Lis Piam Nees Nkaum Peb Nruab Xyoo C Nruab Lis Piam Xyoo I

Zaj Nyeem Ib: KLX 3: 1-11

Cov kwv tij,
1 Yog tias nej tau nrog Leej Pleev sawv rov los lawm tiag, mas nej yuav tsum nrhiav tej yam nyob txheej saud, uas yog qhov chaw Leej Pleev nyob, nws zaum ntawm Tswv Ntuj phab xis. 2 Nej lub siab yuav dai dhuam rau tej yam nyob txheej saud, txhob dai rau tej yam nyob ntiaj teb no. 3 Vim tias, nej twb tuag lawm, nej txoj sia nrog Leej Pleev tsiv nraim nyob hauv Tswv Ntuj. 4 Thaum Leej Pleev uas yog nej txoj sia rov tshwm tawm los, mas nej kuj yuav nrog nws tshwm tawm los muaj hwj chim thiab.
5 Nej yuav muab tej yam uas yog kev coj raws lub ntiaj teb nyob hauv nej tua kom tuag mus: Xws li kev ua plees ua yi, kev tsis dawb huv, kev tswj tsis tau yus tus kheej, kev xav ua phem, thiab kev ntshaw nyiaj txiag, uas kuj zoo cuag li yog ib txog kev teev hawm thiab. 6 Tej yam no yog tej yam ua kom Tswv Ntuj npau taws rau cov neeg tsis mloog lus. 7 Yav thaud, nej kuj tau coj ib tug yam ntxwv zoo li ntawd thiab, vim nej tseem coj lub neej ntawd. 8 Hos nyem no, nej yuav tsum tso tej ntawd pov tseg tas huv tib si, tso txoj kev npau taws, txoj kev ua siab ceev, txoj kev nkhaus, kev xyav luag moo, kev hais lus phem lus qias pov tseg deb ntawm nej di ncauj . 9 Nej txhob ib leeg dag ib leeg, vim nej twb hle tus qub neeg thiab tej yam nws ua kam pov tseg lawm; 10 nej hnav tus neeg tshiab lawm, uas yog tus hloov dua tshiab nyob hauv txoj kev paub tias nws zoo raws li Tus Tsim nws los tus duab. 11 Nyob hauv txoj kev ntawd, mas tsis muaj neeg Hes Las los Yus Das, tsis muaj tus txais lub cim txiav, los tus tsis txais, tsis muaj tus neeg qus, tus Xis Thias, tus qhev, los tus twj lij lawm, tsuas muaj Leej Pleev xwb, vim Leej Pleev yog txhua leej txhua tus, thiab nws nyob hauv txhua leej txhua tus.

NPN 145: 2-3, 10-11, 12-13AB

Txais: (9) HUAB TAIS ua siab zoo rau txhua yam nws tau tsim los.

Kuv yuav niaj hnub cav txog koj lub koob meej,
kuv yuav cav lus zoo txog koj lub npe mus li ib txhiab ib txhis.
HUAB TAIS loj tas nrho, tsim nyog cav txog nws ;
nws loj tas nrho, neeg ntsuas tsis tau.

Txais: (9) HUAB TAIS ua siab zoo rau txhua yam nws tau tsim los.

HUAB TAIS, cia koj cov hauj lwm txhua yam ua koj tsaug,
thiab cia cov uas nyiam koj cav txog koj.
Cia lawv qhuas txog koj lub Ceeb Tsheej muaj hwj chim
Thiab piav txog koj lub hwj huam loj.

Txais: (9) HUAB TAIS ua siab zoo rau txhua yam nws tau tsim los.

Cia lawv qhia rau neeg paub txog koj lub hwj huam loj
thiab koj lub Ceeb Tsheej muaj hwj chim ci ntsa iab.
Koj lub Ceeb Tsheej yog ib lub Ceeb Tsheej txais tas cov hlob nrog cov yau,
thiab koj txoj kev tswj kav yuav nyob mus txheej dhau txheej.

Txais: (9) HUAB TAIS ua siab zoo rau txhua yam nws tau tsim los.

As Les Lus Yas: LK 6: 23AB

Txais: As les lus yas, as les lus yas.

Nej yuav zoo siab, nej yuav dhia hom khaj,
vim nej yuav tau txais koob haum loj nyob saum ntuj.

Txais: As les lus yas, as les lus yas.

Ntawv Moo Zoo: LK 6: 20-26

20 Yes Xus tsa muag ntsia nws cov thwj tim, nws hais tias : "Nej cov pluag, nej txoj hmoov zoo, vim Tswv Ntuj lub Ceeb Tsheej yog nej tug. 21 Nej cov uas nyem no nej tshaib, nej txoj hmoov zoo, vim nej yuav tau noj txaus siab. Nej cov uas nyem no nej quaj, nej txoj hmoov zoo, vim nej yuav luag. 22 Thaum muaj neeg ntxub nej, thaum lawv ntiab nej, los cem nej, los xyav lus phem txog nej lub npe vim Neeg Leej Tub, mas nej txoj hmoov zoo.
23 Txog hnub ntawd, nej yuav zoo siab, nej yuav dhia hom khaj, vim nej yuav tau txais koob haum loj nyob saum ntuj. Txheej thaud, lawv cov yawg koob kuj tau ua ib yam li ntawd rau cov Yaj Saub thiab.
24 Hos nej cov uas nplua nuj, nej txoj hmoov phem, vim nej twb tau txais kev nplig siab lawm. 25 Nej cov uas nyem no tau noj tsau, nej txoj hmoov phem, vim nej yuav tshaib plab. Nej cov uas nyem no nej luag, nej txoj hmoov phem, vim nej yuav mluas thiab yuav quaj. 26 Thaum zeej tsoom cav lus zoo txog nej, mas nej txoj hmoov phem, vim txheej thaud, lawv cov yawg koob kuj tau ua li ntawd rau cov yaj saub cuav thiab."

Tim 12 lub 9 Hlis 2019

Hnub Tsib Lis Piam Nees Nkaum Peb Nruab Xyoo C Nruab Lis Piam Xyoo I

Hwm Niam Mab Liab lub Npe Ntshiab

Zaj Nheem Ib: KLX 3: 12-17

Cov kwv tij nkauj muad:
12 Li ntawd, nej yog cov uas Tswv Ntuj xaiv, nej yog nws cov ntshiab, yog cov uas nws nyiam, mas nej yuav tsum hnav ib lub siab txawj khuv leej luag, ib lub siab nyiam ua zoo rau luag, ib lub siab nyiam ua neeg me, ib lub siab mos siab muag, thiab ib lub siab ntev. 13 Nej ib leeg yuav txhawb ib leeg; yog nej ib tug muaj lus rau lwm tus, mas nej yuav sib zam, vim Huab Tais twb zam rau nej lawm ces nej kuj yuav ua raws li nws tau ua. 14 Qhov loj tshaj plaws yog kom nej yuav tsum hnav txoj kev nyiam, vim txoj kev nyiam yuav ua kom nej zoo tiav txhij tiav txhua. 15 Thov kom Leej Pleev txoj kev thaj yeeb tuaj kav nej lub siab; Ntuj yeej hu nej los sib sau koom ua ib lub cev nyob hauv txoj kev thaj yeeb ntawd. Nej yuav ua Ntuj tsaug mog !
16 Thov kom Leej Pleev Lo Lus nyob nplua mias hauv nej, ces nej yuav txawj rov sib qhuab qhia, sib ntuas nyob hauv txoj kev thoob tsib, thiab nej yuav hu tej zaj nkauj paj nruag, tej zaj nkauj ntxuag qeej thiab tej zaj nkauj tawm hauv nej nruab siab los rau Tswv Ntuj ua nws tsaug. 17 Txawm nej hais yam twg, los ua yam twg, mas nej yuav tuav txog Huab Tais Yes Xus lub npe los ua tas txhua yam, thiab nej yuav ua Leej Txiv Tswv Ntuj tsaug nyob hauv Yes Xus.

NPN 150: 1B-2, 3-4, 5-6

Txais: (6)Kom txhua tsav txhua yam uas txawj ua pa cav txog HUAB TAIS!

Nej cav txog Tswv Ntuj nyob hauv nws Kem Ntshiab ;
Nej cav txog nws saum lub ntuj muaj nws lub hwj huam.
Nej cav txog nws vim nws cov hauj lwm muaj hwj xyeej ;
nej cav txog nws vim nws yog tus vaj loj tas nrho

Txais: (6)Kom txhua tsav txhua yam uas txawj ua pa cav txog HUAB TAIS!

Nej cav txog nws thaum lub suab hom nrov.
Nej ntausthaj cheej ntaus nkauj nog ncas cav txog nws.
Nej ntaus nruas zoj nruas tawv, dhia seev cev cav txog nws ;
nej qoj hlua thiab tshuab qeej cav txog nws.

Txais: (6)Kom txhua tsav txhua yam uas txawj ua pa cav txog HUAB TAIS!

Nej ntaus nruas npuaj doog diaj cav txog nws ;
nej ntaus nruas npuaj nrov ncha ntws cav txog nws.
Kom txhua tsav txhua yam uas txawj ua pa
kav tsij cav txog HUAB TAIS ! As les lus yas !

Txais: (6)Kom txhua tsav txhua yam uas txawj ua pa cav txog HUAB TAIS!

As Les Lus Yas: 1 Zam 4: 12

Txais: As les lus yas, as les lus yas.

Yog peb sib nyiam sib hlub, mas Tswv Ntuj nyob hauv peb,
thiab nws txoj kev nyiam kev hlub
yuav hlob tiav tiav log zoo txhij txhua nyob hauv peb.

If we love one another,
God remains in us,
and his love is brought to perfection in us.

Txais: As les lus yas, as les lus yas.

Ntawv Moo Zoo: LK 6: 27-38

Yes Xus hais rau nws cov thwj tim tias:
27 "Kuv hais rau nej cov uas mloog kuv tias : Nej yuav nyiam nej cov yeeb ncuab, nej yuav ua zoo rau cov neeg ntxub nej, 28 nej foom lus zoo rau cov foom phem rau nej, nej thov Ntuj rau cov neeg xyav moo phem txog. 29 Leej twg ib ncuav pias rau koj sab plhu, mas koj tig sab tod rau nws ntaus thiab. Leej twg chua koj lub tsho tshaj sab, mas koj txhob nrog nws txeeb koj lub tsho hnav rov qab. 30 Leej twg thov koj, mas koj pub rau. Leej twg txeeb tau tej yam nyob hauv koj lub cuab tam, mas koj tsis txhob ntaim kom nwsmuab rov qab. 31 Nej xav kom luag tej ua li cas rau nej, mas nej yuav ua ib yam li ntawd rau luag thiab.
32 Yog nej nyiam cov neeg nyiam nej, mas nej yuav tau txiaj ntsim dab tsi ? Vim tias cov neeg txhaum kuj nyiam cov uas nyiam lawv thiab. 33 Yog nej ua zoo rau cov neeg ua zoo rau nej, mas nej yuav tau txiaj ntsim dab tsi ? Cov neeg txhaum kuj ua tau ib yam li ntawd thiab. 34 Yog nej txais nyiaj rau cov neeg uas nej paub tias nej yuav tau rov qab, mas nej yuav tau txiaj ntsim dab tsi ? Vim cov neeg txhaum kuj txais nyiaj rau cov neeg txhaum kom lawv tau li qub rov qab thiab. 35 Hos nej, mas nej yuav nyiam nej cov yeeb ncuab, nej yuav ua qhov zoo thiab nej yuav txais nyiaj tsis tos kom luag rov rau nej li. Ces nej yuav tau txais koob haum loj, thiab nej yuav yog Tus Nyob Siab cov tub, vim nws ua siab zoo rau cov neeg tsis nco nws txiaj ntsim thiab rau cov neeg siab phem lim hiam. 36 Nej yuav hlub luag ib yam li nej Txiv tus uas txawj hlub neeg.
37 Nej tsis txhob txiav txim, Ntuj thiaj yuav tsis txiav txim rau nej. Nej tsis txhob rau txim, Ntuj thiaj yuav tsis rau txim rau nej. Nej zam txhaum rau luag, Ntuj thiaj yuav zam rau nej. 38 Nej pub rau luag, Ntuj thiaj yuav pub rau nej. Nws yuav xuas ib lub tawb loj los luj, yuav muab tswm muab co kom ceev thiab ntim nco lug ces nws yuav muab hliv rau hauv nej nqaws tsho. Vim Ntuj yuav xuas lub tawb uas nej luj rau luag rov los luj rau nej.”


***************************************************

Tim 12 lub 9 Hlis

Hwm Niam Mab Liab lub Npe Ntshiab

Yog xav xaiv cov zaj nyeem tshwj xeeb rau hnub hwm Niam Mab Liab lub Npe Ntshiab raws li nram no los tau:

Zaj Nyeem Ib: NLT 4: 4-7

Cov kwv tij nkauj muad:
4 Thaum txog lub caij teem tseg lawm, Tswv Ntuj tau tso nws Leej Tub tuaj yug ntawm ib tug poj niam los; nws yug nyob hauv Txoj Cai, 5 kom tau txhiv cov uas zwm rau Txoj Cai, ces peb thiaj tau kev los ua Tswv Ntuj cov tub sau. 6 Vim nej yog Tswv Ntuj cov tub, mas nwsj thiaj xa nws Leej Tub lub tswv yim tuaj nyob hauv peb nruab siab, nws qw hauv peb tuaj tias: ‘As Npas, Txiv !’ 7 Ua li mas koj tsis yog ib tug qhev ntxiv, koj yog ib tug tub lawm; yog tias koj yog ib tug tub ces koj kuj yog ib tug yuav txais lub cuab tam nyob hauv Tswv Ntuj thiab.

NPN: LK 1: 46-47, 48-49, 50-51, 52-53, 54-55

Txais: (49) Tus Muaj Hwj Huam tau ua tej yam loj rau kuv, nws lub npe Ntshiab.
Los: Nkauj tsim txiaj Mab Liab tus hmoov zoo,
koj tau nqa Leej Txiv nyob mus li Leej Tub.

"Kuv tus plig cav txog Huab Tais lub hwj chim loj,
kuv lub tswv yim hom khaj nyob hauv Tswv Ntuj, tus Cawm kuv.”

Txais: (49) Tus Muaj Hwj Huam tau ua tej yam loj rau kuv, nws lub npe ntshiab.
Los: Nkauj tsim txiaj Mab Liab tus hmoov zoo,
koj tau nqa Leej Txiv nyob mus li Leej Tub.

“Vim nws tau dauv muag los ntsia nws tus ntxhais txib tsis muaj tsim;
Txij no mus, txhua tiam neeg yuav hais tias kuv txoj hmoov zoo;
Tus Muaj Hwj Huam tau ua tej yam loj rau kuv, nws lub npe ntshiab.

Txais: (49) Tus Muaj Hwj Huam tau ua tej yam loj rau kuv, nws lub npe Ntshiab.
Los: Nkauj tsim txiaj Mab Liab tus hmoov zoo,
koj tau nqa Leej Txiv nyob mus li Leej Tub.

“Nws lub siab hlub roos cov neeg hwm nws tiam dhau tiam.
Nws sab npab nthuav nws lub zog rau sawv daws pom.
Cov neeg uas lub siab muab hlob, nws ua kom lawv sib tawg tas.”

Txais: (49) Tus Muaj Hwj Huam ua tej yam loj rau kuv, nws lub npe Ntshiab.
Los: Nkauj tsim txiaj Mab Liab tus hmoov zoo,
koj tau nqa Leej Txiv nyob mus li Leej Tub.

“Huab Tais txo cov muaj hwj chim kom poob ntawm lawv lub theej kiab.
Nws tsa cov neeg hauv txheej qis kom siab.
Nws pub tej yam zoo rau cov neeg tshaib noj seem noj so,
nws ntiab cov neeg muaj rov qab mus tes qhuav nquas.”

Txais: (49) Tus Muaj Hwj Huam ua tej yam loj rau kuv, nws lub npe Ntshiab.
Los: Nkauj tsim txiaj Mab Liab tus hmoov zoo,
koj tau nqa Leej Txiv nyob mus li Leej Tub.

Huab Tais tuaj pab nws tus tub txib His Xas Lais,
vim nws nco ntsoov tias nws tau cog yuav hlub lawv,
nws tau cog lus li ntawd rau peb cov yawg koob,
rau Has Nplas Has thiab Has Nplas Has
cov xeeb leej xeeb ntxwv mus li ib txhiab ib txhis."

Txais: (49) Tus Muaj Hwj Huam ua tej yam loj rau kuv, nws lub npe Ntshiab.
Los: Nkauj tsim txiaj Mab Liab tus hmoov zoo,
koj tau nqa Leej Txiv nyob mus li Leej Tub..

As Les Lus Yas: LK 1: 45

Txais: As les lus yas, as les lus yas.

Nksuj tsim txiahj Mab Liab, koj txoj hmoov zoo, vim koj ntseeg
tias cov lus Huab Tais hais rau koj yuav tsheej xeeb tau.

Txais: As les lus yas, as les lus yas.

Ntawv Moo Zoo: LK 1: 39-47

39 Tau ob peb hnub, ces Mab Liab sawv kev mus, nws maj zoj zeeg mus lawm pem toj siab, rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab lo lus foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas yog hmoov dab tsi, kuv tus Huab Tais leej niam thiaj tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Nws txoj hmoov zoo, tus uas tau ntseeg tias cov lus Huab Tais hais rau nws yuav tsheej xeeb tau !"
46 Ces Mab Liab hais tias : "Kuv tus plig cav txog Huab Tais lub hwj chim loj, 47 kuv lub tswv yim hom khaj nyob hauv Tswv Ntuj, tus Cawm kuv.”

Tim      13      lub      9      Hlis      2019

Hnub Rau Lis Piam Nees Nkaum Peb Nruab Xyoo C Nruab Lis Piam Xyoo I

Hwm LN John Chrysostom, Tswv Qhia thiab Kws cov Txuj Ntshiab

Zaj Nyeem Ib:       1 TMT  1:   1-2, 12-14

1 Kuv, Paj Lug, uas yog Yes Xus Pleev tus Hauv Paus Xa Lus raws li Tswv Ntuj tus cawm peb, thiab Yes Xus Pleev uas yog peb qhov chaw tso siab, nkawd tau tsa kuv ua, 2 kuv sau ntawv rau Tis Mos Tes, kuv ib leeg tseem tub nyob hauv txoj kev ntseeg. Thov kom koj tau txais txiaj ntsim, kev hlub, thiab kev thaj yeeb tuaj ntawm Tswv Ntuj peb Leej Txiv, thiab ntawm Yes Xus Pleev peb tus Huab Tais tuaj.
12 Kuv ua tus uas txhawb zog rau kuv, Yes Xus Pleev peb tus Huab Tais tsaug, vim nws saib kuv yog ib tug neeg tsis fav xeeb, ces nws tau hu kuv los tsob hwb nws. 13 Thaud, kuv yog ib tug neeg thuam Ntuj, hiam luag, thiab nyiam ua nruj ua tsiv, tiam sis Tswv Ntuj tau zam rau kuv lawm, vim kuv tsis paub thiab tsis muaj kev ntseeg kuv thiaj tau ua li ntawd. 14 Tiam sis kuv tau txais peb tus Huab Tais lub txiaj ntsim tuaj nyob puv rau hauv kuv, nrog rau txoj kev ntseeg thiab txoj kev nyiam uas nyob hauv Yes Xus Pleev.

NPN      16:   1B-2A+5, 7-8, 11

Txais: (5a) Huab Tais, koj yog kuv lub cuab tam kuv teej tug.

Tswv Ntuj, thov koj txuag kuv, vim kuv tuaj nkaum hauv koj.
Kuv hais rau HUAB TAIS tias: " Koj yog kuv tus HUAB TAIS !”
Huab Tais, kuv lub cuab tam, kuv lub ntim,
Koj yog tus tuav rawv kuv txoj hmoo.

Txais: (5a) Huab Tais, koj yog kuv lub cuab tam kuv teej tug.

Kuv cav lus zoo txog tus HUAB TAIS uas qhia kuv xav tswv yim,
Tab yog hmo ntuj kuv lub siab ntsws tseem txhib kuv.
Kuv cia HUAB TAIS nyob ntawm kuv xub ntiag tsis tseg,
Vim nws nyob ntawm kuv sab xis, kuv yuav tsis qaij tsis qaug

Txais: (5a) Huab Tais, koj yog kuv lub cuab tam kuv teej tug .

Koj yuav qhia kuv taug txoj kev mus rau txoj sia,
mus tau txoj kev zoo siab puv npo nyob ntawm koj xub ntiag,
mus txog txoj kev nplig siab tsis txawj kawg nyob ntawm koj sab xis.

Txais: (5a) Huab Tais, koj yog kuv lub cuab tam kuv teej tug .

As Les Lus Yas:         Zam  17:   17B, 17A

Txais:   As les lus yas, as les lus yas.    

Huab Tais, koj lo lus yog qhov tseeb;
thov koj qee peb mus nyob hauv qhov tseeb.

Txais:   As les lus yas, as les lus yas.

Ntawv Moo Zoo:        LK  6:   39-42

39 Yes Xus hais dua ib zag paj lug li no tias: “Ib tug dig muag puas coj tau lwm tus dig muag kev ? Nkawd ob leeg yuav tsis ua ke mus poob qho xwb lod ? 40 Tus thwj tim tsis loj dua nws tus xib hwb. Txhua tus thwj tim uas kawm tiav tas, nws tsuas kawg zoo li nws tus xib hwb.
41 Vim li cas koj ntsia tus quav nplej uas nyob hauv koj tus kwv lub qhov muag, hos tus nqaj uas nyob hauv koj lub qhov muag, koj ho tsis pom? 42 Ua cas koj thiaj hais tau rau koj tus kwv tias : ‘Kwv ntxawg, koj cia kuv rho tus quav nplej hauv koj qhov muag pov tseg’, hos koj twb tsis pom tus nqaj hauv koj qhov muag li? Neeg zoo nraum daim tawv, koj rho tus nqaj hauv koj qhov muag pov tseg tso ; koj thiaj yuav pom kev dig tus quav nplej hauv koj tus kwv lub qhov muag.”


*************************************

Tim      13      lub      9      Hlis  

Hwm LN John Chrysostom, Tswv Qhia thiab Kws cov Txuj Ntshiab

Yog xav xaiv cov zaj nyeem tshwj xeeb rau hnub hwm LN John Chrysostom raws li nram no los tau:

Zaj Nyeem Ib:       EFX  4:   1-7, 11-13

1 Kuv, ib tug neeg raug txim vim Huab Tais, kuv thov nej, kom nej coj ib lub neej phim txoj kev uas Ntuj hu nej los taug. 2 Nej yuav ua neeg tsis muab hlob ua neeg siab mos siab zoo, nej yuav ua siab ntev ib leeg txhawb ib leeg nyob hauv txoj kev nyiam. 3 Nej yuav siv zog txuag kom nej muaj kev koom siab koom ib tug Leej Tswv Yim nyob hauv txoj kev thaj yeeb, 4 kom tsuas muaj tib lub cev thiab tib tug Leej Tswv Yim xwb, ib yam li nej raug hu los taug tib txoj kev tso siab raws li Ntuj tau hu nej. 5 Tsuas muaj tib tug Huab Tais, tib txoj kev ntseeg, tib lub cim ntxuav,  6 tib tug Tswv Ntuj ua sawv daws Txiv, tus nyob siab dua sawv daws, nws hla ntawm sawv daws tuaj, nws nyob hauv sawv daws. 7 Peb nyias tau txais Ntuj lub txiaj ntsim raws li Yes Xus Pleev yeem pub rau nyias.
11 Nws pub kom ib txhia ua Hauv Paus Xa Lus, ib txhia ua Yaj Saub, ib txhia ua tub tshaj lub Moo Zoo, ib txhia ua tswv saib pab yaj thiab ua xib hwb, 12 kom muaj ntau txoj kev nyob hauv cov ntshiab los leg Tswv Ntuj tes dej num, kom tau txhawb txhim Leej Pleev lub Cev, 13 mus txog thaum peb sawv daws los koom ua tau ib leeg xwb nyob hauv txoj kev ntseeg thiab txoj kev paub Tswv Ntuj Leej Tub, ces peb yuav yog tus tib neeg hlob tiav txiv tiav txuj tiav ci zoo raws nraim li Leej Pleev lub Cev uas hlob tiav log loj siab puv ntoob txaus tag lawm.

NPN        40:   2+4, 7-8A, 8B-9, 10, 11

Txais: (8a+9a) Kuv nyob ntawm no HUAB TAIS, kuv tuaj ua ywj koj lub siab.

Kuv tau ua siab ntes tos ntsoov HUAB TAIS,
nws tau khoov qis qis los rau kuv mloog kuv lub suab quaj.
Nws tau muab ib zaj nkauj tshiab rau kuv qhov ncauj,
yog ib zag nkauj qhuas txog peb tus Tswv Ntuj.

Txais: (8a+9a) Kuv nyob ntawm no HUAB TAIS, kuv tuaj ua ywj koj lub siab.

Koj tsis ntshaw tsiaj los txhiam xws txi rau koj,
tiam sis koj muab pob ntseg rau kuv kom kuv cuab ntsej mloog lus.
Koj tsis xav tau tsiaj hlawv txi ntuj los tsiaj hlawv them txim txhaum,
kuv thiaj hais tias: “Kuv nyob ntawm no, cia kuv tuaj.”

Txais: (8a+9a) Kuv nyob ntawm no HUAB TAIS, kuv tuaj ua ywj koj lub siab.

Nyob hauv kauj ntawv, muaj lus sau tseg rau kuv tias:
“Ua ywj koj siab, kuv tus Tswv Ntuj, yog yam ntxim kuv siab,
koj txoj cai nyob rawv hauv kuv nruab plaw!”

Txais: (8a+9a) Kuv nyob ntawm no HUAB TAIS, kuv tuaj ua ywj koj siab.

Kuv tau tshaj koj txoj kev ncaj nyob hauv lub txoos loj muaj neeg coob,
kuv tsis tau kaw kuv qhov ncauj, HUAB TAIS, koj yeej paub.

Txais: (8a+9a) Kuv nyob ntawm no HUAB TAIS, kuv tuaj ua ywj koj lub siab.

Kuv tsis tau muab koj txoj kev ncaj zais cia rau nruab siab;
kuv tau piav txog koj txoj kev pheej xeeb thiab koj txoj kev cawm neeg;
kuv tsis tau zais tsis qhia koj txoj kev hlub
thiab kev tseeb rau lub txoos loj muaj neeg coob.

Txais: (8a+9a) Kuv nyob ntawm no, Huab tais, kuv tuaj ua ywj koj lub siab.

As Les Lus Yas

Txais:   As les lus yas, as les lus yas.

Cov noob yog Tswv Ntuj lo lus, Leej Pleev yog tus tseb noob.  
Txhua leej uas tuaj cuag nws yuav ciaj nyob mus li.    

Txais:   As les lus yas, as les lus yas.

Ntawv Moo Zoo:        MK  4:  1-10, 13-20

1 Yes Xus rov pib qhuab qhia dua nyob ntawm ntug dej ntuj. Ib pab neeg coob kawg sib sau nyob ze ntawm nws, nws thiaj nce mus hauv ib lub nkoj nyob saum dej ntuj, nws zaum hauv, hos tas ib tsoom neeg nyob saum av, tim ntug nqhuab. 2 Yes Xus ua paj lug qhia ntau yam rau lawv. Thaum nws qhia lawv, nws hais tias : 3 "Nej mloog saib ! Tus neeg tseb tawm mus tseb nplej. 4 Thaum nws tseb, muaj ib co noob poob rau ntawm ntug kev, ces noog ya tuaj noj lawm. 5 Muaj ib co noob poob rau hauv thaj av pob zeb. Nyob ntawd tsis muaj av ntau, ces noob tuaj kaus sai, vim av tsis tob. 6 Thaum hnub tuaj ziab, cov yub ntsws tas, vim cov yub tsis muaj cag, ces cov yub cia li qhuav. 7 Tseem muaj ib co noob poob rau hauv cov pos. Pos hlob tuaj laum cov yub, ces cov yub ntawd txhawv tsis taus. 8 Hos muaj ib co noob poob rau hauv thaj av zoo. Cov yub nplej ntawd hlob thiab huam, txhawv ua hnab. Tej lub noob txi peb caug lub nplej, tej lub txi rau caum lub, tej lub txi ib puas lub." 9 Ces Yes Xus hais tias : "Leej twg muaj pob ntseg mloog, mas cia nws mloog."
10 Thaum Yes Xus nyob ntawm ib qho xu kev lawm, cov neeg nrog nws ua ke thiab Pab Kaum Ob, nug nws txog cov paj lug ntawd.
13 Ces Yes Xus hais rau lawv tias : "Nej tsis to taub zaj paj lug no lod ? Yog li, nej yuav ua cas to taub cov paj lug tas huv si ? 14 Tus tseb noob, mas nws tseb Lo Lus. 15 Cov uas nyob ntawm ntug kev ntawm qhov uas muaj Lo Lus tseb rau, yog cov neeg uas tau hnov Lo Lus, tab sis tam sis ntawd Xas Tas tuaj rho kiag Lo Lus uas nyuam qhuav tseb rau hauv lawv lawm. 16 Cov uas tseb rau hauv thaj av pob zeb, yog cov neeg uas thaum lawv hnov Lo Lus, lawv zoo siab hlo txais tam sis ntawd. 17 Tab sis lawv tsis muaj cag ruaj nyob hauv lawv, lawv tsuas kav ib ntus luv luv xwb : thaum muaj kev txom nyem los kev raug luag hiam vim Lo Lus, mas lawv ntog tam sis ntawd. 18 Tseem muaj ib co noob uas tseb rau hauv cov pos,  yog cov neeg uas tau hnov Lo Lus, 19 tab sis ntiaj teb tej kev txhawj xeeb, nyiaj txiag txoj kev kev ntxias, thiab lub siab kev ntshaw ntau yam txeem mus laum Lo Lus, ces Lo Lus txi tsis taus txiv. 20 Hos cov uas tseb rau hauv thaj av zoo yog cov neeg uas hnov Lo Lus, lawv txais lo lus zoo, ces lawv txi taus txiv, ib tug txi peb caug lub, ib tug txi rau caum lub, lwm tus txi ib puas lub."

Los: MK  4:   1-9

1 Yes Xus rov pib qhuab qhia dua nyob ntawm ntug dej ntuj. Ib pab neeg coob kawg sib sau nyob ze ntawm nws, nws thiaj nce mus hauv ib lub nkoj nyob saum dej ntuj, nws zaum hauv, hos tas ib tsoom neeg nyob saum av, tim ntug nqhuab. 2 Yes Xus ua paj lug qhia ntau yam rau lawv. Thaum nws qhia lawv, nws hais tias : 3 "Nej mloog saib ! Tus neeg tseb tawm mus tseb nplej. 4 Thaum nws tseb, muaj ib co noob poob rau ntawm ntug kev, ces noog ya tuaj noj lawm. 5 Muaj ib co noob poob rau hauv thaj av pob zeb. Nyob ntawd tsis muaj av ntau, ces noob tuaj kaus sai, vim av tsis tob. 6 Thaum hnub tuaj ziab, cov yub ntsws tas, vim cov yub tsis muaj cag, ces cov yub cia li qhuav. 7 Tseem muaj ib co noob poob rau hauv cov pos. Pos hlob tuaj laum cov yub, ces cov yub ntawd txhawv tsis taus. 8 Hos muaj ib co noob poob rau hauv thaj av zoo. Cov yub nplej ntawd hlob thiab huam, txhawv ua hnab. Tej lub noob txi peb caug lub nplej, tej lub txi rau caum lub, tej lub txi ib puas lub." 9 Ces Yes Xus hais tias : "Leej twg muaj pob ntseg mloog, mas cia nws mloog."

Tim 14 lub 9 Hlis 2019

Hnub Xya Lis Piam Nees Nkaum Peb Nruab Xyoo C Nruab Lis Piam Xyoo I

Hawm Yes Xus tus Ntoo Cuam

Zaj Nyeem Ib: XAM PHAJ 21: 4B-9

4 Cov His Xas Lais mus txog ib tog kev, lawv npau taws. 5 Lawv cem Tswv Ntuj thiab cem Mais Xes tias : "Vim li cas neb thiaj coj peb tawm Hais Nkws Tos teb los kom peb los tuag hauv lub teb chaws suab puam no ? Tsis muaj mov noj, tsis muaj dej haus li, peb dhuav noj cov niag mov dhuav siab ntawd dhau lawm !" 6 Tswv Ntuj thiaj tso ib cov nab muaj taug hluav taws tuaj tom lawv. Cov nab ntawd tom cov His Xas Lais tuag coob leej. 7 Tsoom pej xeem thiaj tuaj hais rau Mais Xes tias : "Peb ua txhaum lawm vim peb tau cem HUAB TAIS thiab cem koj. Koj thov kom HUAB TAIS ces nws thiaj yuav ntiab cov nab ntawd khiav mus deb peb." Ces Mais Xes thiaj thov Ntuj rau tsoom pej xeem. 8 HUAB TAIS hais rau Mais Xes tias : "Koj nchuav ib tug nab muaj taug hluav taws, koj muab khuam rau saum ib tug ncej. Leej twg raug nab tom, yog nws ntsia tus nab nchuav ntawd ces nws yuav tsis tuag." 9 Mais Xes thiaj muab tooj dub los nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag ntsia tus nab tooj ntawd ces nws tsis tuag.

NPN 78: 1BC-2, 34-35, 36-37, 38

Txais: (7b) Nej yuav nco ntsoov Huab Tais cov hauj lwm loj.

Kuv haiv neeg, nej mloog kuv tej lus qhuab qhia;
Nej tig ntsej los mloog cov lus tawm ntawm kuv lub ncauj los.
Kuv yuav qhib ncauj hais ib zag paj lug,
Kuv yuav hais tej zaj lus tob uas yeej muaj txheej thaud los lawm.

Txais: (7b) Nej yuav nco ntsoov Huab Tais cov hauj lwm loj.

Thaum Tswv Ntuj rhuav lawv, ces lawv nrhiav nws ;
lawv tig rov los nug txog Tswv Nuj.
Lawv rov nco tias Tswv Ntuj yog lawv lub tsua,
yog tus Tswv Ntuj Nyob Siab tus txhiv lawv.

Txais: (7b) Nej yuav nco ntsoov Huab Tais cov hauj lwm loj.

Lawv lam qhuas nws ntawm ncauj xwb,
lawv tus nplaig hais lus dag nws.
Lawv lub siab tsis npuab nws ruaj,
lawv tsis coj raws cov lus nws tau nrog lawv cog.

Txais: (7b) Nej yuav nco ntsoov Huab Tais cov hauj lwm loj.

Tab sis, Tswv Ntuj lub siab hlub neeg zam rau lawv qhov txhaum,
nws tsis rhuav lawv pov tseg,
Nws cheem nws lub siab npau taws tsis tseg,
nws tsis pub kom nws lub siab ceev tsim dheev los.

Txais: (7b) Nej yuav nco ntsoov Huab Tais cov hauj lwm loj.

Zaj Nyeem Ob: FIS LIS POS 2: 6-11

Cov kwv tij nkauj muad,
6 Yes Xus Pleev yog Tswv Ntuj, tiam sis nws tsis tau saib nws loj ib yam li Tswv Ntuj, yog ib qho uas peb lub tswv yim mem tsis tau. 7 Nws muab nws lub hwj chim hle, nws yeem ua ib tug qhev, nws yug los zoo nkaus li tib neeg. 8 Vim luag pom nws yog tib neeg, ces nws txo nws qis qis, nws tuaj yeem mloog lus mus txog qhov tuag, thiab tseem yog kev tuag nyob saum ntoo cuam. 9 Vim li ntawd, mas Tswv Ntuj thiaj tsa Yes Xus ua tus loj nyob qhov chaw siab dua cov, thiab muab lub npe uas nyob siab dua txhua lub npe rau nws. 10 Kom thaum twg hnov tuav txog Yes Xus lub npe, mas txhua leej txhua tus yuav tsum kim caug hawm, tsis hais nyob saum cov txheej ntuj saud, los nyob ntiaj teb no, los nyob nruab yeeb tib si. 11 Thiab kom txhua xeem lus yuav tsum zeem tseeb tias Yes Xus Pleev yog Huab Tais, ces Leej Txiv Tswv Ntuj thiaj muaj koob meej nto moo lug.

As Les Lus Yas

Txais: As les lus yas, as les lus yas.

Leej Pleev, peb pe hawm koj, thiab peb cav txog txog,
vim koj tau cawm qab ntuj neeg nyob saum koj tus Ntoo Cuam.

Txais: As les lus yas, as les lus yas.

Ntawv Moo Zoo: ZAM 3: 13-17

Yes Xus hais rau Nis Kos Des Mos tias:
13 “Tsis tau muaj leej twg nce mus saum ntuj dua li, tsuas muaj tus tau nqes saum ntuj los xwb, uas yog Neeg Leej Tub. 14 Ib yam li Mais Xes tsa tus nab nyob teb chaws suab puam, Neeg Leej Tub kuj yuav tsum raug luag tsa nws siab thiab, 15 kom xwv tus ntseeg txog nws, muaj txoj sia nyob mus li.”
16 Vim Tswv Ntuj nyiam lub qab ntuj neeg npaum no, nws thiaj muab nws Leej Tub twm zeej rau lawv, kom xwv tus ntseeg txog nws txhob tuag, tab sis kom nws muaj txoj sia nyob mus li. 17 Tswv Ntuj tsis tau xa nws Leej Tub tuaj hauv lub qab ntuj kom nws muab txim rau lub qab ntuj neeg, tiam sis kom qab ntuj neeg tau txais kev cawm nyob hauv nws.

Tim 16 lub 9 Hlis 2019

Hnub Ob Lis Piam Nees Nkaum Plaub Nruab Xyoo C Nruab Lis Piam Xyoo I

Hwm LN Vaj Qhia Cornelius thiab LN Tswv Qhia Cyprian, tuag ua Tim Khawv

Zaj Nyeem Ib: 1 TM 2: 1-8

Tus zoo nyiad,
1 Qhov ua ntej dua cov mas yog kuv xav thov kom nej muaj kev vam txog Ntuj, kev teev Ntuj, kev thov Ntuj, thiab hais tej zaj ua Ntuj tsaug rau tas ib zeej tsoom neeg. 2 Nej yuav thov Ntuj rau cov vaj ntxwv, thiab cov muaj cai tswj luag tej, kom peb tau kev coj ib lub neej nyob nyab xeeb thiab tiaj tus nyob hauv txoj kev hwm Ntuj thiab txoj kev ib leeg saib tau sib leeg. 3 Qhov no yog qhov zoo thiab xis Tswv Ntuj tus cawm peb lub siab. 4 Nws xav kom tas zeej tsoom txais kev cawm thiab paub txog qhov tseeb. 5 Vim tsuas muaj tib tug Tswv Ntuj xwb, thiab tsuas muaj tib tug cev lus ntawm Tswv Ntuj rau thiab ntawm gib neeg rau Tswv Ntuj xwb, yog tus tib neeg Yes Xus Pleev. 6 Nws tau muab nws los ua nqi txhiv sawv daws. Thaum txog lub caij teem, thiaj tau muaj ua tim khawv zeem tseeb txog tej yam ntawd. 7 Vim li no kuv thiaj raug tsa ua ib tug tub tshaj xo thiab ib tug Hauv Paus Xa Lus. Kuv hais tseeb, kuv tsis dag, kuv yog tus xib hwb qhia cov neeg teev pej kum dab txog txoj kev ntseeg thiab txog qhov tseeb.
8 Li ntawd, kuv xav kom nyob tas qhov txhia chaw, tsoom neeg sawv daws yuav tsum tsa lawv txhais tes dawb huv thov Ntuj, tsis txhob muaj kev npau taws los muaj lus sib cav sib ceg.

NPN 28: 2, 7, 8-9

Txais: (6) Kom HUAB TAIS nto koob meej, vim nws tau mloog kuv lo lus thov.

Thov koj mloog kuv lub suab thaum kuv hu txog koj,
thaum kuv tsa tes rau tim koj lub tsev ntshiab,.

Txais: (6) Kom HUAB TAIS nto koob meej, vim nws tau mloog kuv lo lus thov.

HUAB TAIS yog kuv lub zog, thiab kuv daim leej phiaj.
Kuv tso siab lug rau nws, kuv nrhiav tau kev pab nyob hauv nws;
ces kuv lub siab hom khaj, kuv zaj nkauj yog hu los ua nws tsaug.

Txais: (6) Kom HUAB TAIS nto koob meej, vim nws tau mloog kuv lo lus thov.

HUAB TAIS yog nws haiv neeg lub zog,
yog lub yeej khov cawm nws tus pleev.
Thov koj cawm koj haiv neeg thiab foom
hmoov zoo rau koj lub cuab tam,
koj pub rau lawv noj thiab nqa lawv mus li.

Txais: (6) Kom HUAB TAIS nto koob meej, vim nws tau mloog kuv lo lus thov.

As Les Lus Yas: ZAM 3: 16

Txais: As les lus yas, as les lus yas.

Tswv Ntuj hlub lub qab ntuj neeg npaum no,
nws thiaj muab nws Leej Tub twm zeej rau,
kom xwv txhua tus ntseeg txog nws muaj txoj sia nyob mus li.

Txais: As les lus yas, as les lus yas.

Ntawv Moo Zoo: LK 7: 1-10

1 Thaum Yes Xus hais nws cov lus rau tsoom sid mloog tas, nws mus rau hauv Kas Fas Naus. 2 Muaj ib tug xab txheeb nws muaj ib tug tub txib uas nws nyiam tab tom mob hnyav, yuav tuag. 3 Thaum tus xab txheeb hnov hais txog Yes Xus, nws xa ib co laus neeg Yus Das tuaj thov Yes Xus kom mus kho nws tus tub txib. 4 Thaum cov laus neeg tuaj txog ntawm Yes Xus, lawv thov Yes Xus tas zog rau tus xab txheeb tias : "Tsim nyog koj yuav ua qhov ntawd rau nws, 5 nws nyiam peb haiv neeg, thiab nws yog tus tau txhim lub tsev txoos rau peb." 6 Yes Xus nrog lawv taug kev mus. Thaum lawv tuaj yuav txog lub tsev, tus xab txheeb xa ib co phooj ywg tuaj hais rau Yes Xus tias : "Huab Tais, txhob tab kaum koj, vim kuv tsis tsim nyog koj yuav chaws los hauv kuv lub qab ru tsev, 7 vim li ntawd kuv tus kheej twb tsis tsim nyog tuaj cuag koj; tab sis thov koj hais ib lo lus xwb ces kuv tus tub txib yuav zoo hlo. 8 Vim tias, kuv kuj yog ib tug neeg zwm rau ib tug loj, thiab kuv muaj ib co tub rog uas zwm rau kuv, yog kuv hais rau ib tug tias 'Mus !' ces nws cia li mus ; hos kuv hais rau lwm tus tias : 'Los !', mas nws cia li los. Kuv hais rau kuv tus tub qhev tias 'Ua qhov no !' ces nws cia li ua". 9 Yes Xus hnov cov lus no, nws qhuas tus xab txheeb kawg. Nws tig ntsia tom qab, nws hais rau pab neeg lawv nws qab tias : "Kuv hais rau nej, nyob hauv tsoom His Xas Lais, kuv tsis tau pom dua ib lub siab ntseeg loj npaum li no." 10 Thaum cov neeg uas raug xa tuaj cuag Yes Xus rov mus txog tsev, lawv pom tus tub qhev twb zoo neej lawm.

Tim 17 lub 9 Hlis 2019

Hnub Peb Lis Piam Nees Nkaum Plaub Nruab Xyoo C Nruab Lis Piam Xyoo I

Hwm LN Robert Bellarmine

Zaj Nyeem Ib: 1 TM 3: 1-13

Cov zoo nyiad:
1 Lo lus no yog ib lo lus tseeb: “Yog leej twg ntshaw ua ib tug tswv qhia, mas nws xav tau ib txog dej num tseem ceeb.” 2 Vim li ntawd, tus tswv qhia yuav tsum yog ib tug neeg tsis muaj chaw xyeej, yuav ib tug poj niam xwb, tsis haus dej haus cawv, ua siab tus tus, coj ib tug zoo cwj pwm, nyiam txais qhua, txawj qhia neeg. 3 Nws tsis quav dej quav cawv, tsis nrog luag sib ntaus, tiam sis coj zoo, ntxub kev sib ceg, tsis muaj lub siab dai rau nyiaj txiag. 4 Nws txawj tswj nws tsev neeg zoo, txawj coj nws cov me nyuam kom ua neeg mloog lus nrog txoj kev hwm neeg nyob hauv txhua yam. 5 Vim tias, ib tug neeg tsis txawj tswj nws tsev neeg, mas nws yuav ua cas saib tau Tswv Ntuj ib lub Koom Txoos cov ntseeg? 6 Nws yuav tsis txhob yog ib tug nyuam qhuav txais kev ntseeg tau tsis ntev, tsam nws poob rau kev muab hlob khav nws tus kheej, ces nws yuav raug mus nyob tximib yam li tus dab phem. 7 Nws kuj yuav tsum yog ib tug uas cov neeg sab nraud saib tias nws yog neeg zoo, ces nws thiaj yuav tsis raug luag thuam thiab tsis poob rau hauv tus dab phem rooj ntxiab.
8 Cov tub tsob hwb los ib yam, lawv yuav tsum yog ib co neeg kub siab, yuav tsis txhob hais lus dag, tsis txhob quav dej quav cawv, txhob ntshaw tau nyiaj raws txoj kev tsis ncaj. 9 Lawv yuav tsum muaj ib lub siab dawb paug tuav rawv txoj kev ntseeg, uas yog ib yam txuj tob. 10 Chiv thawj, yuav xub sim lawv siab tso, ces yog lawv tsis muaj qhov xyeej, mas mam li txais lawv los ua txoj hauj lwm ua tub tsob hwb. 11 Cov poj niam los ib yam, lawv yuav tsum yog ib co neeg kub siab, tsis hais lus xaiv, tsis haus cawv ntau, tij lim nyob hauv tas puas tsav yam lawv ua. 12 Cov tub tsob hwb yuav tsum yuav ib tug poj niam xwb, lawv yuav tsum txawj coj lawv cov me nyuam thiab lawv tsev neeg kom zoo. 13 Vim yog lawv ua lawv txoj dej num tub tsob hwb zoo, mas lawv kuj yuav tau txais ib lub koob meej zoo, thiab lawv yuav ua tau kom neeg muaj kev tso siab rau txoj kev ntseeg txog Yes Xus Pleev.

NPN 101: 1B-2AB, 2CD-3AB, 5, 6

Txais: (2) kuv yuav taug kev coj rawv lub siab kom ncaj.

Kuv yuav hu nkauj txog kev khuv leej thiab kev ncaj,
Huab Tais, kuv yuav hu nkauj cav txog koj.
Kuv yuav peem tiag taug txoj kev ncaj kev zoo :
thaum twg koj li mam tuaj xyuas kuv ?

Txais: (2) kuv yuav taug kev coj rawv lub siab kom ncaj.

Kuv taug kev coj rawv kuv lub siab kom ncaj,
Nyob hauv kuv lub vaj lub tsev,
Kuv yuav tsis cia kuv qhov muag
ntsia ib yam phem li.

Txais: (2) kuv yuav taug kev coj rawv lub siab kom ncaj.

“Tus twg nyiag hais lus phem txog tus nyob ze nws,
mas kuv yuav rhuav nws pov tseg.
Tus neeg saib luag qis thiab muaj lub siab muab hlob,
Mas kuv yuav tsis ua siab ntev rau nws li.”

Txais: (2) kuv yuav taug kev coj rawv lub siab kom ncaj.

“Kuv qhov muag saib ntsoov cov siab ncaj nyob hauv lub teb chaws,
kom lawv thiaj tau nrog kuv nyob.
Leej twg coj tus yam ntxwv zoo ncaj ncees,
yuav tau los ua kuv tus tub txib.

Txais: (2) kuv yuav taug kev coj rawv lub siab kom ncaj.

As Les Lus Yas: LK 7: 16

Txais: As les lus yas, as les lus yas.

Ib tug yaj saub loj sawv los nyob hauv peb,
Tswv Ntuj tuaj xyuas nws haiv neeg lawm.

Txais: As les lus yas, as les lus yas.

Ntawv Moo Zoo: LK 7: 11-17

11 Dhau ntawd lawm, Yes Xus mus hauv ib lub nroog hu ua Nas Ees. Yes Xus cov thwj tim thiab ib pab neeg coob coob nrog nws ua ke mus. 12 Thaum Yes Xus tuaj yuav txog lub qhov rooj loog nkag mus hauv lub nroog, lawv tab tom kwv ib tug tuag tawm tuaj txog ntawd; yog ib leeg tub twm zeej, hos nws niam yog ib tug poj ntsuam. Ib pab neeg coob coob hauv nroog nrog leej niam tawm tuaj. 13 Huab Tais pom tus poj ntsuam, Huab Tais khuv leej nws. Huab Tais hais rau nws tias : "Koj txhob quaj." 14 Yes Xus txav los tuav lub hleb, ces cov kwv hleb nres. Yes Xus hais tias : "Tus hluas, kuv hais rau koj : Koj sawv !" 15 Ces tus tuag sawv los zaum, thiab nws pib hais lus. Yes Xus muab tus tub hluas ntawd cob rau nws niam. 16 Tas sawv daws ntshai kawg. Lawv cav txog Tswv Ntuj tias : "Ib tug yaj saub loj sawv los nyob hauv peb lawm,” thiab hais tias: “Tswv Ntuj tuaj xyuas nws haiv neeg lawm." 17 Cov lus hais txog tus hluas ntawd ncha mus thoob tas xeev Yus Das thiab tas ib ncig lub teb chaws ntawd.

Tim 18 lub 9 Hlis 2019

Hnub Plaub Lis Piam Nees Nkaum Plaub Nruab Xyoo C Nruab Lis Piam Xyoo I

Zaj Nyeem Ib: 1 TM 3: 14-16

Tus Zoo Nyiad,
14 Kuv sau cov lus no tuaj rau koj nyem no, tiam sis kuv vam tias tshuav tsis ntev kuv yuav tau tuaj ntsib koj. 15 Yog tias ho muaj dab tsis khuam kuv tsis tau tuaj sai, mas koj yuav tsum paub tias koj yuav coj tus yam ntxwv zoo li cas nyob hauv Tswv Ntuj tsev neeg, uas yog tus Tswv Ntuj muaj txoj sia lub Koom Txoos, yog tus ncej txheem thiab lub hauv paus ntawm txoj kev tseeb. 16 Sawv daws yeej lees tias txoj kev teev hawm Tswv Ntuj yog ib zag txuj tob kawg nkaus to taub nyuaj: muaj tus tawm los rau neeg pom nyob hauv lub cev nqaij, Leej Ntuj Plig qhia tias nws yog tug ntshiab, tsoom Tshiab tau pom nws, muaj cov tshaj txog nws rau tsoom neeg teev pej kum dab paub, ntiaj teb neeg ntseeg txog nws, nws nce mus saum ntuj mus nyob muaj hwj chim lawm.

NPN 111: 1-2, 3-4, 5-6

Txais: (2) HUAB TAIS cov hauj lwm loj tas nrho!

Kuv yuav ua HUAB TAIS tsaug tas kuv lub siab lub ntsws,
thaum tsoom neeg siab ncaj tuaj sib sau thiab nyob hauv lub txoos.
HUAB TAIS cov hauj lwm loj tas nrho,
Thiab zoo nkauj zoo saib kawg nkaus.

Txais: (2) HUAB TAIS cov hauj lwm loj tas nrho!

HUAB TAIS cov hauj lwm muaj hwj xyeej thiab muaj hwj chim,
nws txoj kev ncaj yuav nyob ib txhiab ib txhis.
Nws nto koov meej lug vim nws cov hauj lwm txaus qhuas ;
HUAB TAIS lub siab zoo thiab khuv leej neeg.

Txais: (2) HUAB TAIS cov hauj lwm loj tas nrho!

Nws muab txhiam xws rau cov hwm nws tau noj,
nws yuav nco ntsoov mus li txog tias nws tau cog lus.
Nws ua kom nws haiv neeg paub txog nws tej hauj lwm muaj hwj huam,
Nws muab cov pej kum haiv neeg lub cuab tam pub rau lawv.

Txais: (2) HUAB TAIS cov hauj lwm loj tas nrho!

As Les Lus Yas: ZAM 6: 63C, 68C

Txais: As les lus yas, as les lus yas.

Koj cov lus, Huab Tais, yog ntsuj plig thiab yog txoj sia;
koj muaj cov lus pub txoj sia nyob mus li.

Txais: As les lus yas, as les lus yas.

Ntawv Moo Zoo: LK 7: 31-35

Yes Xus hais rau cov neeg coob tias:
31 "Kuv yuav muab tiam neeg no piv rau dab tsi ? Lawv zoo li leej twg ? 32 Lawv zoo li ib pab me nyuam yaus zaum tom tshav puam, lawv qw sib hu tias : 'Peb twb tshuab raj rau nej, nej tsis seev cev tsis dhia li! Peb twb cuab suab hu nkauj tuag, nej tsis quaj tsis nyiav li!' 33 Thaum Zam Ntxuav Plig tuaj, nws tsis noj mov tsis haus cawv, nej hais tias : 'Nws raug dab !' 34 Neeg Leej Tub tuaj, nws noj mov thiab haus cawv, nej hais tias : 'Saib, tus neeg hu dab thiab quav cawv ntawd, nws nrog cov sau se thiab cov neeg txhaum ua phooj ywg !' 35 Tiam sis kev Thoob Tsib twb tau txais kev ncaj ncees nyob hauv nws cov me nyuam tas huv tib si lawm."

Tim 19 lub 9 Hlis 2019

Hnub Tsib Lis Piam Nees Nkaum Plaub Nruab Xyoo C Nruab Lis Piam Xyoo I

Hwm LN Januarius

Zaj Nyeem Ib: 1 TMT 4: 12-16

Tus zoo nyiad:
12 Koj tsis txhob pub kom leej twg thuam koj vim koj lub hnub nyoog hluas. Ua li mas koj yuav coj ib tug piv txwv zoo rau tsoom ntseeg sawv daws yoog, nyob hauv koj cov lus, koj tus cwj pwm, koj txoj kev nyiam, koj txoj kev ntseeg, koj txoj kev ua neeg dawb huv. 13 Lub caij uas kuv tsis tau tuaj, mas koj yeej meem mus twm ntawv Ntshiab, mus ntuas thiab qhuab qhia rau tsoom sid. 14 Koj tau txais ib lub txiaj ntsim nyob hauv koj lawm mas koj txhob muab tso pov tseg; yog tsoom txwj laus lo lus ua yaj saub tau muab pub rau koj, hnub lawv tiag tes rau saum koj. 15 Koj kav tsij mob siab xyaum ua cov hauj lwm ntawd; koj siv zog kub siab ua ces sawv daws yuav pom tias koj muaj peev xwm zuj zus. 16 Koj yuav mob siab rau koj tus kheej thiab koj txoj kev qhuab qhia; koj ntxeem tiag ua ob yam no kom xwm yeem mus. Yog koj ua li ntawd, mas koj yuav cawm tau koj thiab yuav cawm tau cov neeg uas mloog koj hais.

NPN 111: 7-8, 9, 10

Txais: (2) HUAB TAIS cov hauj lwm loj tas nrho!

Cov hauj lwm tawm ntawm nws txhais tes los
yog hauj lwm tseeb thiab ncaj nces.
Nws cov lus qhuab qhia yog cov lus tsim nyog tso siab rau,
Yog cov lus nyob ruaj nreb mus ib txhiab ib txhis,
xab xeeb rau hauv kev tseeb thiab kev ncaj.

Txais: (2) HUAB TAIS cov hauj lwm loj tas nrho!

Nws xa kev cawm tuaj rau nws haiv neeg,
nws ceeb toom kom lo lus nws tau cog nyob mus li.
Nws lub npe ntshiab thiab muaj hwj xyeej tas nrho.

Txais: (2) HUAB TAIS cov hauj lwm loj tas nrho!

Kev hwm HUAB TAIS yog kev pib txawj ua neeg thoob tsib;
cov ua lub neej hwm HUAB TAIS, lawv xyuam xim.
Lo lus cav txog HUAB TAIS nyob mus li txheej dhau txheej.

Txais: (2) HUAB TAIS cov hauj lwm loj tas nrho!

As Les Lus Yas: MT 11: 28

Txais: As les lus yas, as les lus yas.

Huab Tais hais tias: “Tas nej sawv daws uas nej khwv thiab ris nra hnyav,
nej tuaj cuag kuv mas kuv yuav cia nej so los siav.”

Txais: As les lus yas, as les lus yas.

Ntawv Moo Zoo: LK 7: 36-50

36 Muaj ib tug Fas Lis Xais caw Yes Xus mus nrog nws noj mov. Yes Xus chaws mus hauv tus Fas Lis Xais tsev, nws mus zaum ntawm rooj mov. 37 Muaj ib tug poj niam yog neeg txhaum nyob hauv lub nroog ntawd; nws hnov tias Yes Xus noj mov hauv tus Fas Lis Xais ntawd tsev, ces nws nqa ib hwj tshuaj tsw qab tuaj. 38 Nws tuaj nyob ntawm Yes Xus nraub qaum, nram Yes Xus ko taw, nws quaj ua kua muag poob los ywg Yes Xus ko taw, ces nws muab nws cov plaub hau los so, nws nwj Yes Xus ko taw tsis tseg, thiab muab tshuaj tsw qab los pleev. 39 Tus Fas Lis Xais uas caw Yes Xus pom li ntawd, nws xav hauv siab tias : "Yog tias tus neeg no yog ib tug yaj saub, mas phim nws yuav paub tias tus poj niam uas kov nws yog leej twg, vim nws yog ib tug neeg txhaum !" 40 Ces Yes Xus tsa ncauj teb rau tus Fas Lis Xais tias : "Xis Moos, kuv muaj ib lo lus xav hais rau koj." Tus Fas Lis Xais teb tias : "Xib Hwb, koj hais mas !" 41 “Muaj ib tug neeg qiv nyiaj rau ob tug neeg. Thawj tug tshuav nuj nqis txog tsib puas lub txiaj nyiag ; lwm tus tshuav nqi txog tsib caug lub txiaj nyiag. 42 Nkawd ob leeg tsis muaj dab tsi them rov qab, ces tus tswv nyiaj cia li zam rau nkawd ob leeg. Ob tug neeg ntawd, tus twg yuav nyiam tus tswv nyiaj dua ?" 43 Xis Moos teb tias : "Kuv xav mas yog tus uas tus tswv nyiaj zam nuj nqis ntau dua rau." Yes Xus hais rau Xis Moos tias : "Koj txiav raug lawm." 44 Yes Xus tig mus ntsia tus poj niam, nws hais rau Xis Moos tias : "Koj puas pom tus poj niam no ? Kuv los hauv koj tsev, koj tsis tau hliv dej rau kuv ko taw, hos tus poj niam no, nws muab kua muag los ywg kuv ko taw ntub tas, thiab nws muab nws cov plaub hau los so. 45 Koj tsis tau nwj kuv, hos tus poj niam no, txij thaum nws chaws los hauv no, mas nws nwj kuv ko taw tsis tseg. 46 Koj tsis tau hliv roj pleev kuv taub hau, hos tus poj niam no hliv tshuaj tsw qab ywg kuv ko taw. 47 Yog vim qhov ntawd, mas kuv hais rau koj tias, tus poj niam no cov txhaum ntau kawg, tab sis daws tas lawm, vim nws tau nyiam ntau; hos tus uas luag zam rau nws tsawg, mas nws kuj nyiam tsawg." 48 Ces Yes Xus hais rau tus poj niam tias : "Koj cov txhaum daws tas lawm." 49 Cov neeg tuaj koom rooj mov nyias xav nyias hauv nruab siab tias : "Tus ntawd yog leej twg, ua cas nws yuav daws txhaum tau ?" 50 Yes Xus rov hais rau tus poj niam tias : "Koj lub siab ntseeg cawm koj lawm. Koj rov mus kaj siab lug mog."

Tim      20      lub      9      Hlis      2019

Hnub Rau Lis Piam Nees Nkaum Plaub Nruab Xyoo C Nruab Lis Piam Xyoo I

Hwm LN Andrew Kim Tae-gon, ua Leej Choj, LN Paul Chong, thiab cov..., tuag ua Tim Khawv

Zaj Nyeem Ib:        1 TM  6:   2C-12

Tus zoo nyiad,
2c Koj yuav tsum qhia thiab txhib sawv daws kom ua raws li hais ntawd. 3 Yog muaj ib tug twg qhia lwm yam, tsis hais raws nraim  li peb tus Huab Tais Yes Xus Pleev cov lus tseeb, thiab tsis raws li txoj kev teev hawm Ntuj qhia, 4 mas nws yog ib tug neeg dig muag vim kev khav theeb muab hlob, tsis paub dab tsi; nws raug tus mob uas nyiam txoj kev siv lus los sib cav thiab sib ceg; tej lus ntawd ua kom muaj kev khib siab, muaj lus sib cav kom yeej, lus sib thuam, lus iab liam siab phem, 5 muaj lus tsis sib haum ntawm cov neeg uas muaj lub tswv yim phem, tsis muaj qhov tseeb nyob hauv lawv, vim lawv saib kev hwm Ntuj yog ib txog kev nrhiav kom yus nplua nuj xwb. 6 Kev hwm Ntuj uas yog yus txaus siab rau qhov ntawd yeej coj ib yam kev nplua tuaj tiag. 7 Vim peb tsis tau nqa dab tsi los nyob ntiaj teb no li, peb kuj yuav nqaj tsis tau dab tsi thaum peb rov mus li. 8 Li ntawd, tsuav yog peb muaj txaus noj txaus hnav, mas peb yuav tsum txaus siab yuav li ntawd. 9 Hos cov neeg uas xav nplua nuj muaj nyiaj txiag ntau, mas lawv poob rau kev ntxias, lawv mag ib rooj ntxiab, thiab lawv poob rau ntau txoj kev ntshaw tsis muaj qab hau thiab tsis zoo , ces yuav coj kev xyob txhiaj thiab kev puas ntsoog tuaj raug lawv. 10 Vim lub hauv paus cag uas hlav txhua hom kev phem yog txoj kev nyiam nyiaj txiag. Qee leej qaug rau nyiaj txiag, ces lawv yuam kev mus deb ntawm txoj kev ntseeg, mas ntau yam kev mob siab nyuaj siab thiaj chob lawv txhua qhov txhia chaw tuaj.
11 Ntawm koj, uas yog Tswv Ntuj tus neeg, mas koj yuav tsum txav mus kom deb ntawm tej ntawd tas tib si. Koj xyaum taug txoj kev ua neeg ncaj ncees, kev hwm Ntuj, kev ntseeg zoo, kev nyiam luag, kev ua siab ntev, thiab kev ua siab mos siab zoo. 12 Koj ntaus ntsug rog zoo los pab kev ntseeg; koj yuav tsum txeeb kom tau txoj sia nyob mus li uas Ntuj hu koj los txais, thaum koj tau los lees coj txoj kev ntseeg rau coob leej ua tim khawv pom.

NPN        49:   6-7, 8-10, 17-18, 19-20

Txais: Cov pluag hauv nruab siab tau txoj hmoov zoo,
Ntuj lub Ceeb Tsheej yog lawv li.

Thaum tsiv hnub tsiv nyoog, vim li cas kuv thiaj ntshai
cov neeg nkhaus uas tuaj vij ncig kuv?
Lawv yog cov tso siab rau lawv peev nyiaj txiag
lawv kev nplua nuj yog lawv qhov chaw khav.

Txais: Cov pluag hauv nruab siab tau txoj hmoov zoo,
Ntuj lub Ceeb Tsheej yog lawv li.

Tiam sis ib tug neeg yuav rov muas nws txoj kev dim tsis tau,
nws yuav them tus nqi txhiv nws rau Tswv Ntuj kuj tsis tau.
Vim tus nqi them yus txoj sia hnyav dhau, yus yeej tsis muaj txaus ib zaug li
Kom yus thiaj muaj txoj sia nyob mus li thiab tsis pom txoj kev puas kev lwj.

Txais: Cov pluag hauv nruab siab tau txoj hmoov zoo,
Ntuj lub Ceeb Tsheej yog lawv li.

Koj txhob ntshai thaum ib tug neeg nplua nuj tuaj
thiab nws tsev neeg lub cuab tam huam vam tuaj.
Vim tias hnub nws tuag, nws yuav nqa tsis tau dab tsi li,
Tej nws muaj yuav tsis caum nws qab mus li.

Txais: Cov pluag hauv nruab siab tau txoj hmoov zoo,
Ntuj lub Ceeb Tsheej yog lawv li.

Thaum ua neej nyob, nws qhuas li no tias nws hmoov zoo kawg:
"Luag tej yuav cav txog koj vim koj ua tau txhua yam zoo rau koj ! "
Nws kawg yuav rov mus cuag nws cov yawg koob,
Uas yuav tsis rov pom qhov pom kev ib zaug ntxiv.

Txais: Cov pluag hauv nruab siab tau txoj hmoov zoo,
Ntuj lub Ceeb Tsheej yog lawv li.

As Les Lus Yas:        MT  11:   25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo:        LK  8:   1-3

1 Yes Xus taug kev mus ntawm ib lub nroog los ib lub zos mus rau lwm lub. Nws qhia thiab tshaj lub Moo Zoo txog Tswv Ntuj lub Ceeb Tsheej. Pab Kaum Ob leeg nrog Yes Xus mus, 2 thiab kuj muaj ib co poj niam uas Yes Xus tau kho lawv dim ntawm dab phem thiab dim ntawm lawv tus mob: muaj Mab Liab uas luag hu ua Mas Ntas Las, yog tus uas Yes Xus ntiab xya tus dab phem tawm hauv nws mus; 3 muaj Yos As Nas, uas yog Tshus Xas, Hes Los tus tim xyoob tus poj niam, muaj Xus Xas Nas thiab coob leej ntxiv. Lawv muab lawv lub cuab tam los tsob hwb Yes Xus thiab nws cov thwj tim.

**************************************

Tim      20      lub      9      Hlis

Hwm LN Andrew Kim Taegon, ua Leej Choj, LN Paul Chong Hasang, Xib Hwb, thiab cov..., tuag ua Tim Khawv

Yog xav xaiv cov zaj nyeem tshwj xeeb rau hnub hwm LN Andrew Kim thiab cov… raws li nram no los tau:

Zaj Nyeem Ib:        ThT  3:   1-9

1 Cov neeg ncaj tus plig nyob hauv Tswv Ntuj txhais tes, yuav tsis muaj ib yam kev tsim txom dab tsi raug tau lawv.
2 Cov neeg tsis muaj tswv yim xav tias lawv tuag lawm, ces lawv txoj kev ncaim mus yog ib txoj kev raug txom nyem loj,
3 thiab lawv txoj kev ncaim peb mus yog ib txog kev puas tsuaj loj. Tab sis cov neeg ncaj ntawd nyob hauv txoj kev thaj yeeb lawm.
4 Tib neeg xav tias cov siab ncaj tuag mas yog lawv raug txim, tab sis lawv tso siab lug tias lawv muaj txoj sia nyob mus li.
5 Lawv raug ib txog kev txom nyem sib, tab sis lawv yuav txais txiaj ntsim koob hmoov loj, vim Tswv Ntuj  tau sim lawv, nws pom tias lawv tsim nyog ua nws tug.
6 Tswv Ntuj sim lawv zoo li sim kub nyob hauv lub yeej vub. Nws txais lawv zoo li yog thaj txi Ntuj hlawv txi nws..
7 Thaum Tswv Ntuj tuaj xyuas lawv, mas lawvyuav  ci ntsa iab. Lawv yuav khiav nrawm cuag li cov txim taws ri mus kis tej hauv paus nplej qhuav.
8 Lawv yuav txiav txim rau cov kuj cuab, thiab  yuav tswj cov haiv neeg. Huab Tais yuav ua lawv tus vaj mus li ib txhisab ib txhis.
9 Cov neeg tso siab rau Huab Tais yuav paub txoj kev tseeb. Cov neeg npuab Huab Tais yuav nyob ze nws hauv txoj kev nyiam. Vim Huab Tais tshwj zias nws lub txiaj ntsim thiab nws txoj kev zam rau nws cov ntshiab, nw saib xyuas cov nws xaiv.

Los:       Los Mas  8:   31B-39

Cov kwv tij:
31 Yog Tswv Ntuj tuaj peb tog, mas leej twg yuav tiv peb ? 32 Nws yog tus tsis txuag nws Leej Tub,  nws cia nws Leej Tub raug txom nyem kom pab tau peb txhua leej, ua cas nws thiaj yuav tsis pub txhua yam rau peb nrog nws Leej Tub? 33 Leej twg yuav muaj cuab kav liam txhaum rau cov neeg uas Tswv Ntuj xaiv ? Tswv Ntuj yog tus ua kom lawv ncaj tuaj. 34 Leej twg yog tus yuav muab txim tau?  Yes Xus Pleev uas nws tuag, thiab qhov tseem ceeb, nws sawv rov los dua, nws nyob ntawm Tswv Ntuj sab xis thiab nws yog tus thov Tswv Ntuj rau peb.  35 Leej twg yuav cais tau kom peb ncaim ntawm Leej Pleev txoj kev hlub? Puas yog kev raug txom nyem, los kev txhawj xeeb, los kev raug luag hiam, los kev tshaib kev nqhis, los kev pluag liab qab, los kev raug xwv txheej, los kev raug ntaj raug riam tua ? 36 Raws li lo lus sau nyob hauv Ntawv tias: “Huab Tais, vim peb nyiam koj, mas niaj hnub lawv muab peb tua. Sawv daws saib peb yog ib co yaj uas yuav raug muab tua.” 37 Txawm tias peb raug tej yam zoo li ntawd, los peb yog cov yeej loj kawg nkaus nyob hauv Yes Xus uas nws nyiam peb. 38 Kuv paub meej tias tsis muaj dab tsi, txawm yuav yog txoj kev tuag los txoj sia, tsoom Tshiab los tsoom ua vaj txheeb, tej yam uas nyem no muaj nyob los tej yam yav tom ntej, tsoom muaj hwj huam, 39 los tej yam nyob saum ntuj los nyob nruab yeeb, tsis muaj ib yam nyob hauv txhua yam uas Ntuj tsim los yuav cais tau peb ntawm Tswv Ntuj txoj kev nyiam peb nyob hauv peb tub Huab Tais Yes Xus Pleev li.    

NPN        126:   1BC-2AB, 2CD-3, 4-5, 6

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Thaum HUAB TAIS coj Xis Yoos cov neeg nyob txim rov los,
peb zoo li yog ib co neeg ua npau suav.
Peb lub ncauj muaj suab luag ntxhi
peb tus nplaig qw nkauj zoo siab.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Tej pej kum haiv neeg hais nroo ntws tias :
"HUAB TAIS ua tej yam loj tas nrho rau lawv !"
HUAB TAIS tau ua tej yam loj rau peb tiag,
peb zoo siab kawg nkaus.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

HUAB TAIS, thov koj sau peb tej cuab yeej cuab tam rov qab los
zoo puav tam li dej sab siv huam nyob teb chaws suab puam.
Cov neeg tseb nplej ntxuag kua muag,
lawv yuav sau nplej ntxuag kev zoo siab.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Thaum mus, lawv quaj kua muag poob,
lawv ris cov seev noob mus,
thaum rov los, lawv qw suab zoo siab,
lawv ris cov res nplej tshiab los.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

As Les Lus Yas:   1 PZ  4:   14

Txais: As les lus yas, as les lus yas.

Yog nej raug luag tsawm vim Leej Pleev lub npe,
mas nej txoj hmoov zoo,
vim Tswv Ntuj Leej Tswv Yim tuaj roos nej

Txais: As les lus yas, as les lus yas.

Ntawv Moo Zoo:        LK  9:   23-26

23 Yes Xus hais rau sawv daws tias : "Leej twg xav los raws kuv, nws yuav tsis txhob nco txog nws, nws yuav niaj hnub kwv nws tus ntoo cuam, thiab yuav lawv kuv qab. 24 Vim tias tus xav cawm nws txoj sia, mas nws yuav ua nws txoj sia ploj. Hos tus twg ua nws txoj sia ploj vim kuv, mas nws yuav cawm nws txoj sia. 25 Yog ib tug neeg txeeb tau lub ntiaj teb tas huv si los ua nws tug, tab sis nws ua nws ploj, los ua nws tus kheej puas tsuaj, mas nws tau dab tsi zoo ? 26 Tus twg txaj muag lees kuv thiab kuv cov lus, mas Neeg Leej Tub kuj yuav txaj muag lees nws thaum Neeg Leeg Tub rov los muaj koob meej, thiab muaj Leej Txiv thiab tsoom Tshiab ntshiab lub koob meej.”

Tim      21      lub      9      Hlis      2019

Hnub Xya Lis Piam Nees Nkaum Plaub Nruab Xyoo C Nruab Lis Piam Xyoo I

Hwm LN Mas Tais, tus Hauv Paus Xa Lus

Zaj Nyeem Ib:        ES FES XOS  4:   1-7, 11-13

Cov kwv tij,
1 Kuv, ib tug neeg raug txim vim Huab Tais, kuv thov nej, kom nej coj ib lub neej phim txoj kev uas Ntuj hu nej los taug. 2 Nej yuav ua neeg tsis muab hlob ua neeg siab mos siab zoo, nej yuav ua siab ntev ib leeg txhawb ib leeg nyob hauv txoj kev nyiam. 3 Nej yuav siv zog txuag kom nej muaj kev koom siab koom ib tug Leej Tswv Yim nyob hauv txoj kev thaj yeeb, 4 kom tsuas muaj tib lub Cev thiab tib tug Leej Tswv Yim xwb, ib yam li nej raug hu los taug tib txog kev tso siab raws li Ntuj tau hu nej. 5 Tsuas muaj tib tug Huab Tais, tib txoj kev ntseeg, tib lub cim ntxuav, 6 tib tug Tswv Ntuj ua sawv daws Txiv, tus nyob siab dua sawv daws, nws hla ntawm sawv daws tuaj, nws nyob hauv sawv daws. 7 Peb nyias tau txais Ntuj lub txiaj ntsim raws li Leej Pleev yeem pub rau nyias.
11 Nws pub kom ib txhia ua Hauv Paus Xa Lus, ib txhia ua Yaj Saub, ib txhia ua tub tshaj lub Moo Zoo, ib txhia ua tswv saib pab yaj thiab ua xib hwb, 12 kom muaj ntau txoj kev nyob hauv cov ntshiab los leg Tswv Ntuj tes dej num, kom tau txhawb txhim Leej Pleev lub Cev, 13 mus txog thaum peb sawv daws los koom ua tau ib leeg xwb nyob hauv txoj kev ntseeg thiab txoj kev paub Tswv Ntuj Leej Tub, ces peb yuav yog tus tib neeg hlob tiav txiv tiav txuj tiav ci, zoo raws nraim li Leej Pleev lub Cev uas hlob tiav log loj siab puv ntoob txaus tag lawm.

NPN        19:   2-3, 4-5

Txais: (5) Lawv lo lus xa moo nrov mus thoob ntiaj teb.

Cov txheej ntuj saud piav txog Tswv Ntuj lub koob meej,
lub qab ntuj khwb tshaj cov hauj lwm nws txhais tes tsim los.
Nruab hnub hais lo lus rau nruab hnub mloog,
Hmo ntuj qhia rau hmo ntuj paub txog.

Txais: (5) Lawv lo lus xa moo nrov mus thoob ntiaj teb.

Tsis muaj ib lo lus los ib zaj lus piav
Uas leej tib neeg yuav tsis hnov txog.
Lawv lub suab yeej ncha puv tas ntiaj teb,
lawv lo lus xa moo yeej nrov txog tim npoo ntiaj teb kawg.

Txais: (5) Lawv lo lus xa moo nrov mus thoob ntiaj teb.

As Les Lus Yas - Te Deum

Txais: As les lus yas, as les lus yas.

Tswv Ntuj, peb cav txog koj,
peb tshaj tias koj yog Huab Tais;
tsoom Hauv Paus Xa Lus uas
muaj koob meej lawv cav txog koj.

Txais: As les lus yas, as les lus yas.

Ntawv Moo Zoo:        MT  9:   9-13

9 Yes Xus tawm mus, thaum nws tab tom mus kev, nws pom ib tug neeg hu ua Mas Tais, zaum ntawm lub rooj sau se. Yes Xus hais rau nws tias : "Koj raws kuv mus !" Ces tus neeg ntawd sawv tsees raws Yes Xus mus.
10 Thaum Yes Xus zaum noj mov hauv Mas Tais tsev, muaj coob leej neeg sau se thiab neeg txhaum tuaj nrog Yes Xus thiab cov thwj tim noj mov. 11 Cov Fas Lis Xais pom li ntawd, ces lawv hais rau cov thwj tim tias : "Vim li cas nej tus Xib Hwb nrog cov sau se thiab cov neeg txhaum noj mov ?" 12 Tab sis Yes Xus twb hnov qhov lawv hais lawm, nws thiaj teb tias : "Tsis yog cov neeg noj qab nyob zoo thiaj yuav vam txog kws kho mob, tsuas yog cov neeg mob thiaj vam txog xwb. 13 Nej yuav mus kawm lo lus no lub ntsiab : 'Qhov kuv xav tau yog txoj kev khuv leej, tsis yog thaj txi ntuj.' Vim kuv tsis tuaj hu cov neeg ncaj, kuv tuaj hu cov neeg txhaum.”

Tim 23 lub 9 Hlis 2019

Hnub Ob Lis Piam Nees Nkaum Tsib Nruab Xyoo C Nruab Lis Piam Xyoo I

Hwm LN Padre Pio nyob Pietrelcina, ua Leej Chooj

Zaj Nyeem Ib: ES NRAS 1: 1-6

1 Thawj xyoo uas Kus Los pib ua vaj nyob Pes Xis teb, HUAB TAIS xav ua raws li nws lo lus uas Yes Les Mias tau hais, nws tuaj tshoj Kus Los, tus vaj Pes Xis lub tswv yim ces Kus Los thiaj tshaj ib co lus ceeb toom rau nws lub teb chaws tas tib si, muaj ua lus hais thiab muaj ua ntawv sau tias : 2 "Tus vaj Kus Los uas kav Pes Xis teb hais li no : HUAB TAIS, tus Tswv lub ntuj, tau muab tas cov teb chaws nyob ntiaj teb rau kuv kav thiab nws xav kom kuv ua txoj haum lwm txhim ib lub Tuam Tsev teev nws nyob Yes Lus Xas Les nyob Yus Das teb. 3 Li ntawd yog nej leej twg yog Tswv Ntuj haiv neeg mas kom nej tus Tswv Ntuj nrog nej nyob, thiab kom nej mus lawm pem Yes Lus Xas Les uas nyob Yus Das teb, kom nej mus txhim lub Tuam Tsev teev HUAB TAIS uas yog His Xas Lais tus Tswv Ntuj, yog tus Tswv Ntuj nyob Yes Lus Xas Les. 4 Kom txhua tus neeg raug txim nyob qhov txhia chaw yuav tsum tau txais kev pab los ntawm cov neeg uas nrog nws myob, xws li pab nyiaj pab kub, pab toob xib pab tsiaj txhu, thiab tseem yuav pab tej yam ua paj tshab siab dawb coj mus fij rau Tswv Ntuj lub Tuam Tsev nyob Yes Lus Xas Les thiab."
5 Ces cov txiv tsev Yus Das thiab Npes Yas Mis, cov Leej Choj, cov Les Vis thiab tas cov neeg uas Tswv Ntuj txhib lawv lub tswv yim, sawv daws sawv mus pem Yes Lus Xas Les kom tau txhim HUAB TAIS lub Tuam Tsev. 6 Tas cov neeg nyob ncig lawv kuj pab lawv; luag muab tej twj taig nyiaj thiab kub, muab toob xib, muab tsiaj rau lawv thiab pub ntau yam muaj nqes thiab ntau hom paj tshab pab rau lawv dawb dawb.

NPN 126: 1B-2AB, 2CD-3, 4-5, 6

Txais: (3) HUAB TAIS ua tej yam loj tas nrho rau peb.

Thaum HUAB TAIS coj Xis Yoos cov neeg nyob txim rov los,
peb zoo li ib co neeg ua npau suav.
Peb lub ncauj muaj suab luag nqhua,
peb tus nplaig qw nkauj zoo siab.

Txais: (3) HUAB TAIS ua tej yam loj tas nrho rau peb.

Tej pej kum cuab hais nroo ntws tias :
"HUAB TAIS ua tej yam loj tas nrho rau lawv !"
HUAB TAIS tau ua tej yam loj rau peb tiag,
peb zoo siab tas nrho.

Txais: (3) HUAB TAIS ua tej yam loj tas nrho rau peb.

HUAB TAIS, thov koj sau peb tej cuab yeej cuab tam rov qab los
Zoo puav tam li dej sab siv huam nyob teb chaws suab puam.
Cov neeg tseb nplej ntxuag kua muag,
lawv yuav sau nplej ntxuag kev zoo siab.

Txais: (3) HUAB TAIS ua tej yam loj tas nrho rau peb.

Thaum mus, lawv quaj kua muag poob,
vim lawv ris cov seev noob mus,
thaum rov los, lawv qw suab zoo siab,
vim lawv ris cov res nplej tshiab los.

Txais: (3) HUAB TAIS ua tej yam loj tas nrho rau peb.

As Les Lus Yas: MT 5: 16

Txais: As les lus yas, as les lus yas.

Cia nej qhov pom kev ci nyob ntawm zeej tsoom xub ntiag,
kom lawv pom nej cov dej num zoo, ces lawv yuav cav txog nej Txiv nyob saum ntuj.

Txais: As les lus yas, as les lus yas.

Ntawv Moo Zoo: LK 8: 16-18

Yes Xus hais rau cov pab neeg coob coob tias:
16 "Tsis muaj leej twg taws tau ib lub teeb, yuav muab ib lub thoob los khwb, los yuav muab txawb rau hauv qab txag. Luag tsuas muab txawb saum tus ncej teeb, kom xwv cov neeg nkag los hauv tsev pom kev.
17 Vim tias tsis muaj ib yam zais ntshis uas yuav tsis tshwm los, tsis muaj ib yam npog cia uas yuav tsis qhib los rau sawv daws paub thiab pom.
18 Ua li mas nej yuav ceev faj tias thaum nej mloog nej coj li cas. Vim tias tus uas twb muaj lawm, tseem yuav tau txais ntxiv, hos tus tsis muaj, tab yog qhov nws xav tias nws muaj, tseem yuav raug muab rho tawm ntawm nws mus."


**************************************

Tim 23 lub 9 Hlis

Hwm LN Padre Pio nyob Pietrelcina, ua Leej Choj

Yog xav xaiv cov zaj nyeem tshwj xeeb rau hnub hwm LN Padre Pio raws li nram no los tau:

Zaj Nyeem Ib: NLT 2: 19-20

Cov kwv tij nkauj muad:
19 Vim Txoj Cai, mas kuv thiaj tuag rau Txoj Cai, kom kuv ciaj nyob hauv Tswv Ntuj.
20 Kuv nrog Leej Pleev dai saum ntoo cuam, tsis kav kuv tseem muaj txoj sia, tsis yog kuv muaj txoj sia tiam sis yog Leej Pleev ciaj sia nyob hauv kuv; nyem no kuv muaj txoj sia nyob hauv kuv lub cev, tab sis kuv ua neej yog ua nyob hauv txoj kev ntseeg txog Tswv Ntuj Leej Tub, uas nws tau hlub kuv, thiab tau rov muab nws rau luag, kom tau pab kuv.

NPN 128: 1-2, 3, 4-5

Txais: (1a) Cov uas hwm Huab Tais tau txoj hmoov zoo.

Nej cov hwm HUAB TAIS, nej txoj hmoov zoo,
vim nej taug raws nws txoj kev!
Nej yuav tau noj lub txiv uas nej ob txhais tes khwv tau los ,
nej yuav zoo siab thiab nej yuav tau qhov zoo.

Txais: (1a) Cov uas hwm Huab Tais tau txoj hmoov zoo.

Koj poj niam yuav zoo li txoj hmab txiv cawv txi ncw ncw
nyob rau hauv tej chaw nraim hauv koj lub vaj lub tsev,
koj cov me nyuam yuav zoo li ib co ntsuag ntoo txiv roj
nyob ncig lees koj lub phaj tsum mov.

Txais: (1a) Cov uas hwm Huab Tais tau txoj hmoov zoo.

Nej saib, tus neeg muaj txoj hmoov zoo
yog tus ntshai HUAB TAIS li ntawd.
Thov kom HUAB TAIS nyob saum Xis Yoos
foom koob hmoov rau koj, kom koj tau pom Yes Lus Xas Les
txoj kev vam meej niaj hnub hauv koj lub neej.

Txais: (1a) Cov uas hwm Huab Tais tau txoj hmoov zoo.

As Les Lus Yas: LK 21: 36

Txais: As les lus yas, as les lus yas.

Nej yuav ceev faj txhua lub sij hawm thiab nej yuav teev Ntuj,
Kom nej muaj zog sawv taus ntseg ntawm Neeg Leej Tub xub ntiag."

Txais: As les lus yas, as les lus yas.

Ntawv Moo Zoo: MT 16: 24-27

24 Yes Xus hais rau nws cov thwj tim tias : “Yog leej twg xav los raws kuv, nws yuav tsum txhob xav txog nws tus kheej, nws yuav kwv nws tus ntoo cuam, thiab yuav lawv kuv qab.
25 Vim leej twg xav cawm nws txoj sia, mas nws yuav plam nws txoj sia. Hos leej twg plam nws txoj sia vim kuv, mas nws yuav rov tau nws txoj sia.
26 Yog ib tug neeg txeeb tau tas lub ntiaj teb huv tib si los ua nws tug, tab sis g nws ua nws txoj sia ploj, mas nws tau dab tsi ? Neeg yuav muab dab tsi los pauv tau nws txoj sia ?
27 Vim tias Neeg Leej Tub yuav nrog nws cov Tshiab los, muaj nws Leej Txiv lub hwj chim, ces nws yuav pauj rau nyias raws li nyias tus cwj pwm.”

Tim 24 lub 9 Hlis 2019

Hnub Peb Lis Piam Nees Nkaum Tsib Nruab Xyoo C Nruab Lis Piam Xyoo I

Zaj Nyeem Ib: ES NRAS 6: 7-8, 12B, 14-20

Vaj ntxwv Das Lis Yus tshaj ib co lus ceeb toom rau cov nom tswv nyob sab dej Aws Fas Tes sab tim ub tias:
7. “Nej tsis txhob txwv cov hauj lwm tsa Tswv Ntuj lub tsev, nwj cia tus nom saib xeev Yus Das thiab cov txwj laus Yus das tsa Tswv Ntuj lub tsev nyob rau ntawm nws thaj qub chaw. 8 Kuv tseem muaj lus ceeb toom ntxiv rau nej tias nej yuav tsum pab cov txwj laus Yus Das rov tsa Tswv Ntuj lub tsev li cas: nej yuav rho cov nyiaj se hauv tus vaj lub txhab nyiaj uas yog tuaj tim lub xeev tim sab dej Aws Fas Tes sab tid tuaj, los them sai sai rau lawv cov nuj nqes kom tas huv si.
12b. Kuv, Das Lis Yus, tau ceeb toom li ntawd. Nej kav tsij mob siab ua raws li ntawd.
14 Cov txwj laus Yus Das txhim lub tuam tsev mus tau zoo kawg, tus yaj saub As Nkais thiab tus yaj saub Ntxas Kas Lias, uas yog Is Dos tub, nkawd hais lus txhib sawv daws. Lawv txhim lub tuam tsev tiav raws li tsoom His Xas Lais tus Tswv Ntuj kom ua thiab raws li cov vaj Kus Los thiab Das Lis Yus thiab As Tas Xes Xes uas yog cov vaj Pes Xis, lawv cov lus ceeb toom. 15 Lawv ua lub tsev tiav rau hnub tim peb hauv lub hli As Das uas yog xyoo rau Das Lis Yus ua vaj. 16 Tsoom neeg His Xas Lais – muaj cov leej choj, cov Les Vis thiab cov seem ntawm cov raug mus nyob txim rov los – lawv ua ib lub ntees lom zem ua cov kab ke fij lub tuam tsev ntawd rau Tswv Ntuj nrog kev zoo siab. 17 Thaum ua cov kab ke fij lub tuam tsev ntawd rau Tswv Ntuj, lawv muab ib puas tus heev nyuj, ob puas tus laug yaj, plaub puas tus thav yaj los txi Ntuj, thiab lawv muab kaum ob tug laug tshis los tua txi ntuj them txim rau tas tsoom His Xas Lais raws li kaum ob xeem His Xas Lais. 18 Ces lawv tsa kom muaj cov Leej Choj raws li lawv tes dej num thiab tsa cov Les Vis kom muaj pab los tuav cov kab xwm tsob hwb Tswv Ntuj nyob Yes Lus Xas Les, raws li cov lus sau tseg nyob hauv Mais Xes phau ntawv.
19 Thaum txog lub ib hlis xiab kaum plaub tsoom neeg mus nyob txim rov los ua lub hnub nyoog Hla. 20 Cov leej choj thiab cov Les Vis mus ntxuav kom lawv dawb huv ua ke, ces lawv txhua tus yog neeg ntshiab dawb huv tib si lawm. Ces lawv muab tus yaj hla tua txi ntuj pub rau tas cov mus nyob txim rov los, pub rau lawv cov kwv tij ua leej choj, thiab rau lawv tus kheej.

NPN 122: 1-2, 3-4AB, 4CD-5

Txais: (1) Tuaj peb zoo siab hlo mus pem Huab Tais tsev.
los: As les lus yas.

Kuv zoo siab vim lawv hais rau kuv tias:.
"Peb yuav nce mus lawm pem Huab Tais tsev.”
Yes Lus Xas Les, nim no, peb txhais taw
tau tsuj hauv koj cov rooj loog lawm.

Txais…

Yes Lus Xas Les raug txhim ua ib lub nroog;
luag txhim tau kom zoo xwm yeem.
Cov xeem neeg nce mus pem Yes Lus Xas Les,
Yog Huab Tais cov xeem neeg nce mus.

Txais…

Lawv nce mus raws li txoj cai qhia rau His Xas Lais,
Kom tau cav txog Huab Tais lub Npe.
Nyob ntawd muaj ib co rooj zaum txiav txim teeb tau tseg,
Yog cov rooj cia rau Das Vis tsev neeg zaum.

Txais…

As Les Lus Yas: LK 11: 28

Txais: As les lus yas, as les lus yas.

Cov muaj hmoov zoo yog cov uas mloog
Tswv Ntuj Lo Lus thiab ua raws li ntawd,

Txais: As les lus yas, as les lus yas.

Ntawv Moo Zoo: LK 8: 19-21

19 Yes Xus niam thiab nws cov kwv tij tuaj, tab sis lawv tuaj cuag nws tsis tau vim neeg coob coob.
20 Muaj neeg mus qhia Yes Xus tias : "Koj niam thiab koj cov kwv tij tuaj sawv nraum zoo, lawv xav pom koj."
21 Yes Xus teb rau lawv tias : "Kuv niam thiab kuv cov kwv tij yog cov uas mloog Tswv Ntuj Lo Lus thiab lawv ua raws li Tswv Ntuj Lo Lus.”

Tim 25 lub 9 Hlis 2019

Hnub Plaub Lis Piam Nees Nkaum Tsib Nruab Xyoo C Nruab Lis Piam Xyoo I

Zaj Nyeem Ib: ES NRAS 9: 5-9

Thaum lub caij ua thaj txi Ntuj yav tsaus ntuj, kuv sawv hauv kuv txoj kev poob ntsej muag los, kuv dua rhe kuv cev ris tsho thiab kuv lub tsho loj, ces kuv txhos caug ntua, tsa tes rau Huab Tais, kuv tus Tswv Ntuj.
6 Kuv hais tias: “Kuv tus Tswv Ntuj, kuv txaj muag dhau kuv tsis tsim nyog yuav tsa kuv lub ntsej muag tuaj rau koj li, vim peb cov txhaum ntau dhau siab tshaj peb taub hau lawm, thiab peb lub txim loj dhau siab mus txog saum ntuj lawm. 7 Txij puag thaum peb phaj txiv los txog hnub no, peb tau ua yuam kev loj. Vim peb tej kev txhaum, peb thiaj swb, peb thiab peb cov vaj thiab cov leej choj thiaj poob rau hauv cov vaj nyob hauv lub teb chaws tes, thiaj raug luag rab ntaj txo peb, raug luag coj mus nyob txim, raug luag lwg, thiab raug poob ntsej muag loj tas nrho xws li niaj hnub no. 8 Tiam sis lub sij hawm no, peb muaj ib lub caij luv luv tau txais kev khuv leej ntawm Huab Tais peb tus Tswv Ntuj, kom peb muaj ib pab seem dim los, thiab kom peb tau kev los nyob ruaj rau hauv nws thaj chaw ntshiab; ua li mas thov kom peb tus Tswv Ntuj ua kom peb qhov muag pom kev tuaj thiab kom nws ua kom peb txoj sia loj me ntsis tuaj nyob hauv txoj kev ua luag qhev. 9 Peb ua luag qhev tiag, tiam sis peb tus Tswv Ntuj tsis tso peb pov tseg nyob hauv peb txoj kev ua qhev. Nws tau tig cov vaj Pes Xis lub siab kom los hlub peb, nws ua kom peb rov ciaj sia tuaj, peb thiaj tau rov los tsa peb tus Tswv Ntuj lub tsev thiab rov kho tej vaj tse uas vau tas; thiab nws tau pub kom peb muaj ib lub ntsa zeb tiv thaiv peb nyob Yus das teb thiab nyob Yes Lus Xas Les.”

NPN: TOS NPIS 13: 2, 3-4a, 6def, 7, 8

Txais: (1b) Kom Tswv Ntuj nto koob meej, nws yog tus nyob mus li.

Nws nplua neeg thiab nws kuj khuv leej neeg;
nws thawb kom neeg poob lawm puag dab ntiag teb,
thiab nws kuj npo neeg puag hauv lub qhov ntuj tob tawm los.
Tsis muaj leej twg yuav khiav dim tau ntawm nws txhais tes.

Txais: (1b) Kom Tswv Ntuj nto koob meej, nws yog tus nyob mus li.

His Xas Lais cov tub, nej cav txog nws nyob
ntawm cov teev pej kum dab xub ntiag,
Vim nws tau tseb nej mus nyob xyaw lawv,
Tiam sis nws tau ua tej yam hwj huam loj los pab nej.

Txais: (1b) Kom Tswv Ntuj nto koob meej, nws yog tus nyob mus li.

Nej yuav nco ntsoov tej yam nws tau ua los pab nej
Ces nej yuav siv tas nrho nej lub suab los cav txog nws.
Nej yuav cav txog tus Huab Tais muaj kev ncaj ncees,
Nej yuav qhuas txog tus vaj uas nyob ib txhiab ib txhis.

Txais: (1b) Kom Tswv Ntuj nto koob meej, nws yog tus nyob mus li.

Thaum kuv raug mus nyob txim rau pej kum teb,
kuv cav txog Huab Tais;
kuv qhia txog nws lub hwj huam thiab hwj chim
Rau ib haiv neeg txhaum paub.

Txais: (1b) Kom Tswv Ntuj nto koob meej, nws yog tus nyob mus li.

Tas nej cov uas Huab Tais tau xaiv, nej cav txog nws,
tas nej sawv daws cia li cav txog nws lub hwj chim.
Nej qee tej lub hnub nyoog los ua kev zoo siab thiab cav txog nws.

Txais: (1b) Kom Tswv Ntuj nto koob meej, nws yog tus nyob mus li.

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej los txog ze lawm :
nej hloov siab, nej cia li ntseeg txog lub Moo Zoo.

Txais: As les lus yas, as les lus yas.

Ntawv Moo Zoo: LK 9: 1-6

1 Yes Xus hu Pab Kaum Ob los, nws muab hwj huam thiab peev xwm rau lawv kom lawv yuam tau txhua tus dab thiab kho tau mob kom zoo. 2 Ces nws xa lawv mus tshaj Tswv Ntuj lub Ceeb Tsheej thiab kho cov mob kom zoo. 3 Nws hais rau lawv tias : "Nej txhob nqa dab tsi taug kev, txhob nqa pas nrig, txhob ris hnab, txhob ntim mov, txhob nqa nyiaj, txhob nqa ib lub tsho faj seeb li. 4 Nej chaws mus hauv lub tsev twg, nej nyob hauv lub tsev ntawd mus txog hnub nej rov qab. 5 Hos cov neeg uas tsis txais nej, thaum nej tawm hauv lub nroog ntawd mus, mas nej nchos tej plua av lo nej ko taw huv si tseg cia ua pov thawj txog lawv." 6 Ces cov thwj tim sawv kev mus, lawv mus ib lub zos dhau ib lub zos, lawv tshaj lub Moo Zoo thiab kho cov mob nyob txhua qhov chaw zoo tas.

Tim      26      lub      9      Hlis      2019

Hnub Tsib Lis Piam Nees Nkaum Tsib Nruab Xyoo C Nruab Lis Piam Xyoo I

Hwm LN Cosmas thiab LN Damian, tuag ua Tim Khawv

Zaj Nyeem Ib:       AS NKAIS  1:   1-8

1 Xyoo ob uas Das Lis Yus ua vaj, thaum lub rau hli xiab ib, HUAB TAIS cov lus tawm ntawm tus Yaj Saub As Nkais los hais rau Ntxos Los Npas Npes, uas yog Sij Thias tub thiab yog tus  nom kav Yus Das teb, thiab rau Yos Xuas, tus thawj Leej choj uas yog Yes Hos Xes Das tus tub tias:  
2 “Tus Huab Tais kav tsoom tshiab hais li no : ‘Haiv neeg no hais tias tsis tau txog caij rov tsa HUAB TAIS lub tsev.’” 3 Ces Huab Tais lo lus tawm hauv tus yaj saub As Nkais tuaj hais li no:  4 “Puas yog lub caij rau nej tau zoo nyob hauv nej tej tsev xov txiag zoo zoo, hos lub tsev no nyob puas tsus cia? 5  Tus HUAB TAIS kav tsoom tshiab hais li no tias: Nyem no nej yuav xav tswv yim txog qhov nej ua. 6 Nej tau tseb noob ntau, tab sis nej sau tau tsawg los cia; nej noj mov lawm, tab sis nej tsis hnov tsau plab; nej haus dej haus cawv, tab sis tsis txaus daws nej qhov nqhis li; nej muaj hnav, tab sis tsis sov nej. Hos tus txais nyiaj hli, nws tsuas yog khwv ntim rau hauv ib lub hnab to qab xwb !  
7 Tus HUAB TAIS kav tsoom tshiab hais li no: Nej yuav xav tswv yim txog tej yam nej ua! Nej kav tsij nce mus lawm pem toj siab, mus txiav ntoo los; nej yuav coj los tsa lub tsev. Ces kuv yuav zoo siab nyob hauv lub tsev ntawd, thiab kuv yuav tau txais koob meej." Yog  Huab Tais lo lus.

NPN       149:   1B-2, 3-4, 5-6A+9B

xais: (4a) Huab Tais zoo siab nyob hauv nws haiv neeg.
los: As les lus yas

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
His Xas Lais yuav zoo siab nyob hauv tus uas tsim lawv,
Xis Yoos cov me nyuam yuav luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.
los: As les lus yas

Lawv yuav ua kev lom zem yoj cev cav txog nws lub npe,
lawv yuav hu nkauj cav txog nws nrog suab nruas thiab suab nkauj nog ncas.
Vim HUAB TAIS hlub nws haiv neeg,
nws muab txoj kev yeej rau cov neeg me hnav ua zam.

Txais: (4a) Huab Tais zoo siab nyob hauv nws haiv neeg.
los: As les lus yas

Cov muaj lub siab ntseeg yuav hom khaj nyob hauv txoj kev nto koob meej;
lawv yuav zaum ntawm lawv cov rooj ib hu nkauj zoo siab;
lawv lub ncauj yuav qw suab cav txog Tswv Ntuj.
Qhov no yog cov uas ntseeg nws lub koob meej. As les lus yas.

Txais: (4a) Huab Tais zoo siab nyob hauv nws haiv neeg.
los: As les lus yas

As Les Lus Yas:       ZAM  14:   6

Txais: As les lus yas, as les lus yas.

Huab Tais hais tias: Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis mus ntawm kuv mus.

Txais: As les lus yas, as les lus yas.

Ntawv Moo Zoo:       LK  9:   7-9

7 Vaj txheeb Hes Los hnov txog txhua yam tshwm sim, nws tsis pom qab yuav xav li cas, vim muaj ib txhia neeg hais tias : "Yog Zam sawv hauv cov tuag rov los lawm."
8 Muaj qee leej hais tias : "Yog Es Lias tshwm sim los." Lwm cov tseem hais tias : "Yog ib tug yaj saub thaum ub sawv rov los lawm."
9 Tab sis Hes Los hais tias : "Zam, mas kuv kom luag txiav nws caj dab lawm. Ua li tus uas kuv hnov hais txog tias nws ua tej yam ntawd ho yog leej twg ?" Ces Hes Los nrhiav kom tau kev pom Yes Xus.

***************************************

Tim      26      lub      9      Hlis

Hwm LN Cosmas thiab LN Damian, tuag ua Tim Khawv

Yog xav xaiv cov zaj nyeem tshwj xeeb rau hnub hwm LN Cosmas thiab LN Damian raws li nram no los tau:

Zaj Nyeem Ib:        ThT  3:   1-9

1 Cov neeg ncaj tus plig nyob hauv Tswv Ntuj txhais tes, yuav tsis muaj ib yam kev tsim txom dab tsi raug tau lawv. 2 Rau cov neeg tsis muaj tswv yim, lawv zoo li tuag lawm, lawv txoj kev tso ntiaj teb tseg yog ib txoj kev raug txom nyem loj, 3 thiab lawv txoj kev ncaim peb mus yog ib txog kev puas tsuaj loj kawg nkaus. Tab sis cov neeg ncaj twb tau txoj kev nyob thaj yeeb lawm.4 Tib neeg xav tias lawv tuag mas yog lawv raug txim, tab sis lawv tso siab lug tias lawv yuav tau txoj sia nyob mus li. 5 Lawv raug ib txog kev txom nyem sib, tab sis lawv yuav txais txiaj ntsim koob hmoov loj, vim Tswv Ntuj  tau sim lawv, nws pom tias lawv tsim nyog ua nws me nyuam. 6 Tswv Ntuj sim lawv zoo li sim kub nyob hauv lub yeej vub. Nws txais lawv zoo li yog thaj txi Ntuj hlawv txi nws. 7 Thaum Tswv Ntuj tuaj xyuas lawv, mas lawv yuav ci ntsa iab thiab lawv yuav khiav nrawm cuag li cov txim taws kis mus hlawv tej hauv paus nplej qhuav. 8 Lawv yuav txiav txim rau cov kuj cuab, thiab  yuav tswj cov haiv neeg. Huab Tais yuav ua vaj kav lawv mus li ib txhiab ib txhis. 9 Cov neeg tso siab rau Huab Tais yuav to taub txoj kev tseeb. Cov neeg npuab Huab Tais yuav nyob ze nws hauv txoj kev nyiam. Vim Huab Tais tshwj zias nws lub txiaj ntsim thiab nws txoj kev zam rau nws cov ntshiab, nw saib xyuas cov nws xaiv.

NPN        126:   1BC-2AB, 2CD-3, 4-5, 6

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Thaum HUAB TAIS coj Xis Yoos cov neeg nyob txim rov los,
peb zoo li yog ib co neeg ua npau suav.
Peb lub ncauj muaj suab luag ntxhi
peb tus nplaig qw nkauj zoo siab.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Tej pej kum haiv neeg hais nroo ntws tias :
"HUAB TAIS ua tej yam loj tas nrho rau lawv !"
HUAB TAIS tau ua tej yam loj rau peb tiag,
peb zoo siab kawg nkaus.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

HUAB TAIS, thov koj sau peb tej cuab yeej cuab tam rov qab los
zoo puav tam li dej sab siv huam nyob teb chaws suab puam.
Cov neeg tseb nplej ntxuag kua muag,
lawv yuav sau nplej ntxuag kev zoo siab.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Thaum mus, lawv quaj kua muag poob,
lawv ris cov seev noob mus,
thaum rov los, lawv qw suab zoo siab,
lawv ris cov res nplej tshiab los.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

As Les Lus Yas:        Yas Kos  1:   12

Txais: As les lus yas, as les lus yas.

Tus tau txoj hmoov zoo yog tus uas ua tiag nyiaj dhau txoj kev ntxias,
Vim thaum Ntuj sim nws siab tas, mas nws yuav tau txais lub mom teev kub pub txoj sia.

Txais: As les lus yas, as les lus yas.

Ntawv Moo Zoo:        MT  10:   28-33

Yes Xus hais rau nws cov thwj tim tias:
28 "Nej tsis txhob ntshai cov neeg tua tau lub cev, tab sis lawv tua tsis tau tus ntsuj plig. Nej yuav tsum ntshai tus muaj peev xwm rhuav tau tus ntsuj plig thiab lub cev huv si nyob hauv lub pas  hluav taws. 29 Ob tug noog tsig txhuv, luag tsuas muag tau ib npib xwb puas yog? Tsis kav, tsis muaj ib tug poob rau hauv av tau, yog nej Txiv tsis tso lus. 30 Nej kuj ib yam li ntawd, tab yog nej cov plaub hau, nej Txiv yeej suav tas huv si lawm. 31 Ua li mas nej tsis txhob ntshai, vim nej muaj nqis dua  tej pab tsig txhuv coob coob. 32 "Leej twg lees rau sawv daws tias nws paub kuv, mas kuv kuj yuav lees tias kuv paub nws rau kuv Txiv nyob saum ntuj. 33 Hos tus tsis lees rau sawv daws tias nws paub kuv, mas kuv kuj yuav tsis lees tias kuv paub nws rau kuv Txiv nyob saum ntuj.

Tim      27      lub      9      Hlis      2019

Hnub Rau Lis Piam Nees Nkaum Tsib Nruab Xyoo C Nruab Lis Piam Xyoo I

Hwm LN  Vincent de Paul, ua Leej Choj

Zaj Nyeem Ib:        As Nkais  2:   1-9

1 Xyoo ob uas Das Lis Yus ua vaj, thaum lub xya hli xiab nees nkaum ib, tus yaj saub As Nkais hnov HUAB TAIS cov lus  hais li no:  2 “Koj hais rau Ntxos Los Npas Npes, uas yog Sij Thias tub thiab yog tus nom kav Yus Das teb, thiab rau Yos Xuas, tus thawj leej choj,  thiab rau  cov pej xeem uas seem tias : 3 ‘Nej cov uas tseem nyob, puas muaj tus tau pom lub Tuam Tsev no thaum nws tseem muaj koob meej yav tas los lawd ? Nyem no ne, nej pom lub Tuam Tsev zoo li cas ? Nej puas pom tias nws tsis zoo dab tsi li lawd?’ 4 Tab sis nyem no, HUAB TAIS ceeb toom li no : ‘Ntxos Los Npas Npes, koj ua siab loj mog! Yos Xuas, tus thawj leej choj uas yog Yes Hos Xas Das tub, koj ua siab loj mog ! Tas tsoom pej xeem hauv lub teb chaws, nej ua siab loj mog ! Nej rau siab ntso ua hauj lwm, vim kuv nrog  nraim nej, 5 ib yam  li thaum nej tawm ntawm Hais Nkws Tos teb los kuv tau nrog nej cog lus lawm. Kuv lub tswv yim nyob hauv nruab nrab nej, mas nej tsis txhob ntshai.’ 6 Tus HUAB TAIS kav tsoom tshiab  hais li no : ‘Tshuav tsis ntev lawm, kuv yuav diaj lub ntuj thiab lub ntiaj teb, cov hiav txwv thiab cov av qhuav kom ua zog koog. 7 Kuv yuav nchos cov kuj cuab tas huv tib si kom lawv tej nyiaj tej kub tuaj rau ntawm no,  ces kuv yuav ua kom lub Tuam Tsev no muaj hwj chim puv nkaus.’ 8 Tus HUAB TAIS kav tsoom tshiabhais tias : ‘Nyiaj yog kuv li, kub yog kuv tug ! 9 Lub Tuam Tsev no yuav nto koob meej tshaj lub thaum ub. Kuv yuav tso kev thaj yeeb tuaj nyob hauv thaj chaw no.’" Yog tus Huab Tais kav tsoom tshiab lo lus.

NPN        43:   1, 2, 3, 4

Txais: (5) Cia li tso siab rau Tswv Ntuj mog;
kuv yuav cav txog nws yog kuv tus Tswv Ntuj tus cawm kuv.

Tswv Ntuj, thov koj txiav txim ncaj rau kuv,
thov koj tsa kuv cai nyob ntawm cov neeg tsis ntseeg.
Thov koj cawm kuv dim ntawm tus neeg dag thiab tus neeg phem.

Txais: (5) Cia li tso siab rau Tswv Ntuj mog;
kuv yuav cav txog nws yog kuv tus Tswv Ntuj tus cawm kuv.

Tswv Ntuj, koj yog kuv qhov chaw
vim li cas koj thiaj  ntiab kuv mus deb koj ua luaj?
Vim li cas kuv thiaj yuav tau quaj ntsuag
vim tus yeeb ncuab tsim txom  kuv ?

Txais: (5) Cia li tso siab rau Tswv Ntuj mog;
kuv yuav cav txog nws yog kuv tus Tswv Ntuj tus cawm kuv.

Koj xa koj qhov pom kev thiab koj qhov tseeb tuaj
coj kuv kev kom mus txog saum koj lub roob ntshiab,
Thiab txog saum qhov chaw koj nyob txawm.

Txais: (5) Cia li tso siab rau Tswv Ntuj mog;
kuv yuav cav txog nws yog kuv tus Tswv Ntuj tus cawm kuv.

Ces kuv yuav mus  kom  txog ntawm Tswv Ntuj lub thaj,
kom txog tus Tswv Ntuj uas ua kom kuv dhia zoo siab.
Ces kuv yuav ntaus nkauj nog ncas cav txog koj ua koj tsaug,
Tswv Ntuj, kuv tus Tswv Ntuj.

Txais: (5) Cia li tso siab rau Tswv Ntuj mog;
kuv yuav cav txog nws yog kuv tus Tswv Ntuj tus cawm kuv.

As Les Lus Yas:        MK  10:   45

Txais: As les lus yas, as les lus yas.

Neeg Leej Tub tuaj kom tau tsob hwb sawv daws
thiab muab nws txoj sia los ua nqi txhiv coob leej.

Txais: As les lus yas, as les lus yas.

Ntawv Moo Zoo:        LK  9:   18-22

18 Muaj ib zaug, Yes Xus mus nyob ib leeg teev ntuj, cov thwj tim txawm sib sau los nyob ncig nws. Yes Xus nug lawv tias : "Tsoom sid hais tias kuv yog leej twg ?" 19 Cov thwj tim teb tias : "Lawv hais tias koj yog Zam Ntxuav Plig, ib txhia hais tias koj yog Es Lias, tseem muaj lwm cov hais tias koj yog ib tug yaj saub thaum ub sawv rov lo lawms." 20 Yes Xus hais rau lawv tias : "Nej ne,  nej hais tias kuv yog leej twg ?" Pob Zeb teb tias : "Koj yog Tswv Ntuj Leej Pleev." 21 Ces Yes Xus cheem thiab txwv lawv kom txhob hais qhov ntawd rau leej twg paub.
22 Yes Xus tseem hais tias : "Neeg Leej Tub yuav tsum raug txom nyem loj. Cov txwj laus, cov Thawj Leej Choj, thiab cov Kws Ntawv Ntshiab yuav muab nws tshem tawm. Nws yuav raug luag tua, tab sis hnub peb nws yuav sawv rov los."

*********************************

Tim 27 lub 9 Hli

Hwm LN Vincent de Paul, ua Leej Choj

Yog xav xaiv cov zaj nyeem tshwj xeeb rau hnub lwm LN Vincent de Paul raws li nram no los tau:

Zaj Nyeem Ib: 1 KLN 1: 26-31


26 Cov kwv tij, nej yuav xav saib Ntuj tau xaiv nej zoo li cas. Nej tsis muaj ntau leej thoob tsib raws li tib neeg lub tswv yim, tsis muaj ntau leej muaj hwj chim, tsis muaj ntau leej yug los ua tub huab tais. 27 Tab sis Tswv Ntuj xaiv cov neeg uas lub ntiaj teb saib lawv ruam los ua kom cov neeg thoob tsib poob ntsej muag, Tswv Ntuj xaiv cov neeg uas lub ntiaj teb saib lawv tsis muaj zog los ua kom cov muaj zog poob ntsej muag. 28 Tswv Ntuj xaiv cov uas lub ntiaj teb saib lawv qis qis thiab thuam lawv tias lawv tsis tsim txiaj dab tsi, los ua kom cov uas saib lawv tus kheej muaj nqes poob mus ua neeg tsis muaj nqes. 29 Ua li mas tsis muaj ib tug neeg yuav khav tau txog nws nyob ntawm Tswv Ntuj xub ntiag. 30 Tswv Ntuj yog tus ua kom nej nyob hauv Yes Xus Pleev uas yog peb txoj kev thoob tsib, peb txoj kev ncaj, peb txoj kev ntshiab, thiab peb txoj kev cawm seej. 31 Tej no muaj raws nraim li Ntawv sau hais tias : “Leej twg xav khav mas nws yuav tsum khav nyob hauv Huab Tais.”

NPN 112: 1BC-2, 3-4, 5-7, 7-8, 9

Txais: (1b) Tus neeg hwm Huab Tais nws txoj hmoov zoo.
los: As les lus yas.

Muaj hmoov zoo yog tus uas hwm HUAB TAIS,
thiab nyiam coj Huab Tais cov lus qhia tas siab tas ntsws.
Nws caj ces yuav muaj hwj chim nyob ntiaj teb,
Ntuj yuav foom koob hmoov rau caj ces neeg siab ncaj.

Txais: (1b) Tus neeg hwm Huab Tais nws txoj hmoov zoo.
los: As les lus yas.

Kev nplua nuj muaj nyiaj muaj txiaj yuav nyob hauv nws tsev
Nws txoj kev ua siab dav yuav nyob ruaj nreb mus li.
Qhov pom kev ci hauv qhov tsaus ntuj tuaj kaj tus neeg siab ncaj,
nws muaj lub siab zoo, khuv leej luag, thiab ncaj ncees.

Txais: (1b) Tus neeg hwm Huab Tais nws txoj hmoov zoo.
los: As les lus yas.

Tus neeg txawj hlub luag thiab qiv rau luag nws hmoov zoo.
Nws txawj tswj nws tej hauj lwm raws kev ncaj.
Luag yuav muab nws tshem tsis tau ib zaug li,
Neeg yuav nco ntsoov txog tus neeg ncaj tas mus li ib txhis.

Txais: (1b) Tus neeg hwm Huab Tais nws txoj hmoov zoo.
los: As les lus yas.

Nws tsis ntshai hnov ib tsab xov phem twg;
nws lub siab nyob ruaj nreb, tso siab rau HUAB TAIS.
Nws lub siab khob kho, nws tsis txhawj dab tsi
Mus txog thaum nws saib nws cov yeeb ncuab nyob rau qhov qis.

Txais: (1b) Tus neeg hwm Huab Tais nws txoj hmoov zoo.
los: As les lus yas.
.
Nws ua siab dav fo pub ntau rau cov pluag :
nws txoj kev ua siab dav yuav nyob mus li,
nws yuav muaj ntsej muag thiab nto koob meej loj.

Txais: (1b) Tus neeg hwm Huab Tais nws txoj hmoov zoo.
los: As les lus yas.

As Les Lus Yas: Zam 10: 14

Txais: As les lus yas, as les lus yas.

Huab Tais hais tias: Kuv yog tus zoo tswv zov yaj;
kuv paub kuv cov yaj, kuv cov yaj paub kuv.

Txais: As les lus yas, as les lus yas.

Ntawv Moo Zoo: MT 9: 35-38

35 Yes Xus mus ncig txhua cov nroog thiab txhua cov zos huv si, nws qhuab qhia sawv daws nyob hauv lawv cov tsev txoos, nws tshaj lub Moo Zoo txog Ntuj lub Ceeb Tsheej, thiab nws kho sawv daws tej txiab xeeb thiab tej mob nkeeg tas huv si.
36 Yes Xus pom tej pab neeg coob coob, nws hlub lawv, vim lawv qaug zog thiab tas kev cia siab, zoo li ib co yaj tsis muaj tswv zov. 37 Yes Xus thiaj hais rau nws cov thwj tim tias : "Qoob loo ntau kawg, tab sis cov tub zog tsawg.
38 Nej thov tus tswv qoob kom nws xa ib co tub zog tuaj sau nws cov qoob."

Tim      28      lub      9      Hlis      2019

Hnub Xya Lis Piam Nees Nkaum Tsib Nruab Xyoo C Nruab Lis Piam Xyoo I

Hwm LN Wenceslaus thiab LN Lawrence Ruiz thiab cov...

Zaj Nyeem Ib:       NTXAS KAS LIAS  2:   5-9, 14-15A

5 Kuv, Ntxas Kas Lias, tsa muag ntsia, kuv pom muaj ib tug txiv neej tuav ib txog hlua ntsuas ntawm tes. 6 Kuv hais rau nws tias: "Koj yuav mus qhov twg ?" Nws teb kuv tias : "Mus ntsuas Yes Lus Xas Les saib nws dav li cas thiab nws ntev li cas." 7 Ces tus Tshiab uas nrog kuv hais lus txawm txav zoj mus pem hauv ntej, hos muaj dua lwm tus tshiab tawm tuaj ntsib nws, hais rau nws tias : 8 "Koj khiav mus hais rau tus tub hluas ntawd tias : Neeg yuav nyob Yes Lus Xas Les qhib lug xws li pem tej zej zos, vim cov neeg thiab cov tsiaj yuav nyob coob hauv Yes Lus Xas Les." 9 HUAB TAIS hais tias: “Kuv yuav yog ib lub ntsa loog hluav taws nyob ncig Yes Lus Xas Les tas tib si, thiab  kuv yuav yog lub hwj chim nyob hauv Yes Lus Xas Les.”
14 Leej Ntxhais Xis Yoos, koj cia li hu nkauj thiab zoo siab! Huab Tais hais tias: “Koj ntsia saib kuv tuaj lawm, kuv yuav tuaj nyob hauv koj. 15 Hnub ntawd, ntau haiv neeg yuav los koom nrog HUAB TAIS, lawv yuav ua nws haiv neeg; ces kuv yuav nyob nruab nrab hauv nej nrog nej nyob."

NPN :       YLM  31:   10, 11-12AB, 13

Txais: (10d) Huab Tais yuav saib peb nraim xws li tus tswv zov yaj saib nws pab yaj.

Txhua haiv neeg, nej mloog Huab Tais lo lus,
nej coj mus tshaj tawm rau cov pov txwv nyob deb hais tias:
‘Nws tau cia His Xas Lais tawg mus rau ntau qhov,
nyem no nws rov sau lawv los ua ke,
nws saib lawv xws li tus tswv saib nws pab yaj.’

Txais: (10d) Huab Tais yuav saib peb nraim xws li tus tswv zov yaj saib nws pab yaj.

Huab Tais yuav txhiv Yas Kos,
nws yuav txhiv lawv ntawm tus neeg tswj lawv txhais tes los.
Lawv yuav qw ntsuag qees nce mus saum cov ncov roob Xis Yoos,
lawv yuav tuaj laub lug tuaj mus txais Huab Tais lo lus foom koob hmoov.

Txais: (10d) Huab Tais yuav saib peb nraim xws li tus tswv zov yaj saib nws pab yaj.

Ces cov ntxhais hluas yuav dhia lom zem thiab yoj cev,
cov tub hluas thiab cov laus neeg kuj ua ib yam.
Kuv yuav muab lawv tej kev tu siab ntxeev ua kev zoo siab,
kuv yuav chawj lawv nplij lawv thaum lawv  dhau kev txom nyem lawm.

Txais: (10d) Huab Tais yuav saib peb nraim xws li tus tswv zov yaj saib nws pab yaj.

As Les Lus Yas:       2 TM  1:   10

Txais: As les lus yas, as les lus yas.

Peb tus Cawm Seej Yes Xus Pleev tau rhuav txoj kev tuag,
thiab ua kom txoj sia tawm los nyob hauv lub Moo Zoo.

Txais: As les lus yas, as les lus yas.

Ntawv Moo Zoo:       LK  9:   43B-45

43B Sawv daws qhuas kawg txog txhua yam Yes Xus tau ua, ces nws hais rau nws cov thwj tim tias :
44 "Nej ua tib zoo cuab pob ntseg khaws kuv cov lus no cia : Neeg Leej Tub yuav raug luag muab nws rau hauv tsoom neeg txhais tes."
45 Tab sis cov thwj tim tsis to taub lo lus ntawd, muaj dab tsi ntis kom lawv txhob to taub lub ntsiab, tiam sis lawv ntshai nug Yes Xus txog lo lus ntawd.

*****************************************

Tim      28      lub      9      Hlis

Hwm LN Wenceslaus, tuag ua Tim KHawv

Yog xav xaiv cov zaj nyeem tshwj xeeb rau hnub hwm LN Wenceslaus raws li nram no los tau:  

Zaj Nyeem Ib:        1 PT   3:   14-17

Cov zoo nyiad:
14 Yog nej raug luag hiam vim txoj kev ncaj, mas nej txoj hmoov zoo. Nej tsis txhob ntshai lawv, nej txhob ntxhov siab txog. 15 Nej yuav hwm Leej Pleev ua nej tus Huab Tais nyob hauv nej nruab siab. Nej yuav tsum npaj kom nej muaj lus teb tas mus li rau ib tug neeg twg uas nug nej tias yog vim li cas nej thiaj muaj kev tso siab lug nyob hauv nej. 16 Nej yuav hais lus mos lus zoo teb rau luag thiab yuav hwm luag, nej hais raws li nej muaj lub siab dawb paug xwb,  kom thaum nej raug luag thuam, cov neeg hais lus xaiv txog  nej tus cwj pwm zoo nyob hauv Leej Pleev lawv yuav raug kev poob ntsej muag. 17 Yog tias Tswv Ntuj pom zoo cia yus raug txom nyem vim yus ua zoo, mas qhov ntawd zoo dua yus raug txom nyem vim yus ua phem.

NPN        126:   1BC-2AB, 2CD-3, 4-5, 6

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Thaum HUAB TAIS coj Xis Yoos cov neeg mus nyob txim rov los,
peb zoo li yog ib co neeg ua npau suav.
Peb lub ncauj muaj suab luag ntxhi
peb tus nplaig qw nkauj zoo siab.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Tej pej kum haiv neeg hais nroo ntws tias :
"HUAB TAIS ua tej yam loj tas nrho rau lawv !"
HUAB TAIS yeej tau ua tej yam loj rau peb tiag,
peb zoo siab kawg nkaus.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

HUAB TAIS, thov koj sau peb tej cuab yeej cuab tam rov qab los
zoo puav tam li dej sab siv huam nyob teb chaws suab puam.
Cov neeg tseb nplej ntxuag kua muag,
lawv yuav sau nplej ntxuag kev zoo siab.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Thaum mus, lawv quaj kua muag poob,
vim lawv ris cov seev noob mus,
thaum rov los, lawv qw suab zoo siab,
vim lawv ris cov rev nplej tshiab los.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

As Les Lus Yas:        MT 5:   10

Txais: As les lus yas, as les lus yas.

Cov tau txoj hmoov zoo yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais: As les lus yas, as les lus yas.

Ntawv Moo Zoo:        MT  10:   34-39

Yes Xus hais rau nws cov thwj tim tias:
34 "Nej txhob xav tias kuv tuaj yog coj kev thaj yeeb tuaj rau lub ntiaj teb. Kuv tsis coj kev thaj yeeb tuaj, kuv coj hniav ntaj hniav riam tuaj. 35 Kuv tuaj ua kom tub sawv los tiv txiv, ntxhais sawv los tiv niam, nyab sawv los tiv poj. 36 Ua li mas yus cov yeeb ncuab yog cov neeg nyob hauv yus tsev.
37 Tus nyiam nws niam nws txiv dua kuv, mas nws tsis tsim nyog nrog kuv; tus nyiam nws tej tub tej ntxhais dua kuv, mas nws tsis tsim nyog nrog kuv.
38 Tus tsis kwv nws tus ntoo cuam thiab tsis taug raws kuv qab, mas nws tsis tsim nyog nrog kuv.
39 Tus nrhiav tau nws txoj sia, nws yuav ua nws txoj sia ploj, hos tus ua nws txoj sia ploj vim kuv, mas nws yuav nrhiav tau nws txoj sia lawm

***********************************************

Tim      28      lub      9      Hlis

Hwm LN Lawrence Ruiz thiab cov..., tuag ua Tim Khawv

Yog xav xaiv cov zaj nyeem tshwj xeeb rau hnub hwm LN Lawrence Ruiz thiab cov... raws li nram no los tau:

Zaj Nyeem Ib:        2 MC  7:   1-2, 9-14

1 Muaj  xya leej kwv tij nrog lawv niam raug tus vaj ntes thiab raug tsim txom thiab raug xuas pas thiab xuas leeg nyuj nplawm lawv yuam lawv kom noj nqaij npuas uas lawv Txoj Cai txwv tsis pub noj.  2 Ib tug tub txawm sawv xya leej kwv tij thiab lawv niam chaw hais rau tus vaj tias : "Koj xav nug peb txog dab tsi thiab xav paub dab tsi ntawm peb? Vim peb yeem tuag zoo dua qhov hla peb cov yawg koob Txoj Cai."
9 Thaum tus kwv tij ob yuav tuag, nws hais tias : "Tus neeg siab phem thiab tau hmoov phemj,  koj txo peb txoj sia tsis pub peb nyob hauv  lub neej tam sis, tab sis tus Vaj kav lub sim ceeb yuav tsa peb sawv rov los kom peb tau ib lub neej tshiab tsis txawj kawg, rau qhov peb tuag vim nws Txoj Cai."
10 Tus ob no tuag tas,  tus peb kuj raug lawv txoj kev tsim txom thiab. Lawv kom nws hlev nplaig, ces nws hlev nplaig tam sim ntawd thiab nws xyab nws ob txhais caj npab tam sim rau lawv. 11 Nws ua siab loj tas nrho hais tias : "Kuv txais kuv ob txhais tes no ntawm Ntuj los, vim nws tej kev cai mas kuv ntxub kuv ob txhais tes. Kuv tso siab tias nws yuav rov muab kuv ob txhais tes rau kuv." 12 Tus vaj thiab nws cov neeg sawv daws qhuas kawg tias vim li cas tus tub hluas ntawd yuav muaj lub siab loj kawg nkaus li, nws saib nws qhov kev txom nyem zoo li tsis yog dab tsi li.
13 Thaum nws txoj sia tu lawm, lawv kuj coj tus plaub los ua phem ib yam li ntawd rau thiab. 14 Thaum tus plaub yuav tuag, nws hais tias : "Kuv yeem tuag nyob hauv tib neeg txhais tes,thiab yeem mloog txoj kev tso siab lug uas Tswv Ntuj muab rau peb tias nwsv yuav tsa peb ciaj sawv rov los dua. Tiam sis ntawm nej, mas nej yuav tsis tau ciaj sawv rov los muaj txoj sia li.
"
NPN        34:   2-3, 4-5, 6-7, 8-9

Txais:  Huab Tais cawm kuv dim ntawm tas kuv tej kev ntshai.

Kuv yuav cav txog HUAB TAIS txhua lub sij hawm;
nws lub koob meej yuav nyob rawv ntawm kuv lub ncauj.
Kuv tus plig txoj kevnto koob meej yog nyob hauv HUAB TAIS;
tus neeg me yuav hnov kuv thiab yuav zoo siab.

Txais: Huab Tais cawm kuv dim ntawm tas kuv tej kev ntshai.

Nej nrog kuv cav txog HUAB TAIS,
peb sawv daws ua ke qhuas nws lub npe.
Kuv nrhiav HUAB TAIS; nws teb kuv,
Nws cawm kuv dim ntawm tas kuv tej kev ntshai.

Txais:  Huab Tais cawm kuv dim ntawm tas kuv tej kev ntshai.

Nej vam txog HUAB TAIS, ces kev zoo siab yuav ua nej ci ntsa iab,
koj ntsej muag yuav tsis liab ploog vim kev txaj muag.
Thaum tus pluag txom nyem hu, HUAB TAIS mloog
thiab yuav cawm nws ntawm tas nws tej kev nyuaj ntxhov.

Txais:  Huab Tais cawm kuv dim ntawm tas kuv tej kev ntshai.

HUAB TAIS tus tshiab tsa tsev tsam phooj
ncig cov neeg hwm HUAB TAIS, nws cawm lawv dim.
Nej saj ces nej yuav pom tias HUAB TAIS siab zoo npaum li cas.
Tus muab HUAB TAIS ua nws lub chaw nkaum tau txoj hmoov zoo.

Txais:  Huab Tais cawm kuv dim ntawm tas kuv tej kev ntshai.

As Les Lus Yas:        MT  5:   10

Txais: As les lus yas, as les lus yas.

Cov tau txoj hmoov zoo yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais: As les lus yas, as les lus yas

Ntawv Moo Zoo:        JN  15:   18-21

Yes Xus hais rau nws cov thwj tim tias:
18 "Yog lub qab ntuj neeg ntxub nej, mas nej yuav tsum paub tias lawv twb ntxub kuv ua ntej lawm. 19 Yog tias nej yog lub qab ntuj neeg tug, mas lub qab ntuj neeg yuav nyiam yam uas yog nws tug. Tab sis vim nej tsis yog lub qab ntuj neeg tug, rau qhov kuv tau xaiv nej tawm hauv lub qab ntuj neeg los lawm, mas lub qab ntuj neeg thiaj ntxub nej. 20 Nej nco ntsoov lo lus uas kuv tau hais rau nej tias : ‘Tus tub txib tsis loj dua nws tus tswv.’ Yog lawv twb hiam kuv, mas lawv kuj yuav hiam nej thiab. Yog lawv khaws kuv lo lus, mas lawv kuj yuav khaws nej lo lus thiab. 21 Tiam sis lawv yuav ua tas puas tsav yam no rau nej vim kuv lub npe, vim lawv tsis paub tus xa kuv tuaj.”

TIM      30      LUB      9      HLIS      2019

Hnub Ob Lis Piam Nees Nkaum Rau Nruab Xyoo C Nruab Lis Piam Xyoo I

Hwm LN Jerome, ua Leej Choj thiab Kws cov Txuj Ntshiab

Zaj Nyeem Ib:       NKL  8:   1-8

1 Tus HUAB TAIS kav tsoom tshiab lo lus nrov tuaj txog kuv.  2 Tus Huab Tais kav tsoom tshiab hais li no: "Kuv khib Xis Yoos kawg nkaus, kuv lub siab muaj txoj kev khib npau taws heev rau nws.”
3 HUAB TAIS hais li no : "Kuv yuav rov los cuag Xis Yoos, kuv yuav los nyob hauv Yes Lus Xas Les. Ces Yes Lus Xas Les yuav hu ua lub tsheej muaj kev ntseeg, tus HUAB TAIS kav tsoom tshiab lub roob , lub Roob Ntshiab."
4 Tus HUAB TAIS kav tsoom tshiab hais li no : "Cov yawg laus thiab cov pog laus tseem yuav rov tau zaum nyob ntawm Yes Lus Xas Les tej tshav puam, ib leeg yuav nrig ib rab pas ntawm tes, vim lawv hnub nyoog nchav. 5 Tej tshav nyob hauv lub tsheej yuav muaj me nyuam tub me nyuam ntxhais tuaj nyob ua si zom zaws puv ntia hauv cov tshav ntawd."
6 Tus HUAB TAIS kav tsoom tshiab hais li no : "Yog cov seem ntawm haiv neeg no saib qhov ntawd yog ib yam hwj huam loj thaum lub caij ntawd, mas kuv puas yuav saib tias yogi b yam muaj hwj huam loj thiab ?"
7 Tus HUAB TAIS kav tsoom tshiab hais li no : "Nej saib mus, kuv cawm kuv haiv neeg dim ntawm cov teb chaws nyob sab hnub tuaj thiab ntawm cov teb chaws nyob sab hnub poob. 8 Kuv yuav coj lawv los nyob txawm rau hauv Yes Lus Xas Les. Ces lawv yuav yog kuv haiv neeg, kuv yuav yog lawv tus Tswv Ntuj nyob hauv txoj kev pheej xeeb thiab txoj kev ncaj."

NPN       102:   16-18, 19-21, 29+22-23

Txais:   (17) Huab Tais yuav rov txhim tsa Xis Yoos dua,
nws yuav tawm tuaj nyob hauv nws lub hwj chim.

HUAB TAIS, cov haiv neeg yuav hwm koj lub npe,
thiab tas cov vaj nyob ntiaj teb yuav ntshai koj lub hwj chim,
thaum HUAB TAIS rov txhim Xis Yoos,
thiab nws tawm tuaj nyob hauv nws lub hwj chim;
thaum nws tig los mloog cov neeg txom nyem tej lus thov,
thiab tsis thuam lawv zaj teev ntuj.

Txais:   (17) Huab Tais yuav rov txhim tsa Xis Yoos dua,
nws yuav tawm tuaj nyob hauv nws lub hwj chim.

Nej sau tej no cia rau phaj tub ki yuav los yav tom ntej,
cov tiam neeg HUAB TAIS yuav tsim los thiaj yuav cav txog nws tias:
“HUAB TAIS nyob saum nws lub chaw ntshiab nyob siab dauv muag los saib;
HUAB TAIS nyob saum txheej ntuj siab ntsia rau ntiaj teb,
ces nws mloog cov neeg nyob txim lub suab ntsaj,
nws tso cov yuav raug tua kom dim kev tuag.”

Txais:   (17) Huab Tais yuav rov txhim tsa Xis Yoos dua,
nws yuav tawm tuaj nyob hauv nws lub hwj chim.

Koj cov tub txib tej me nyuam yuav nyob ruaj nreb,
lawv cov xeeb ntxwv yuav nyob ntawm koj xub ntiag mus li.
Kom sawv daws tshaj HUAB TAIS lub npe nyob saum Xis Yoos,
thiab cav lus zoo txog nws nyob Yes Lus Xas Les;
thaum ntawd cov haiv neeg yuav sib sau los nyob ua ke,
cov ceeb tsheej yuav sib txoos los tsob hwb HUAB TAIS.

Txais:   (17) Huab Tais yuav rov txhim tsa Xis Yoos dua,
nws yuav tawm tuaj nyob hauv nws lub hwj chim.

As Les Lus Yas:       MK 10:   45

Txais: As les lus yas, as les lus yas.

Neeg Leej Tub tuaj kom tau tsob hwb sawv daws,
thiab muab nws txoj sia los ua nqi txhiv coob leej.

Txais: As les lus yas, as les lus yas.

Ntawv Moo Zoo:       LK  9:   46-50

46 Thaum ntawd cov thwj tim muaj lus sib cav tias nyob hauv lawv, leej twg yog tus loj dua cov ?
47 Yes Xus paub qhov lawv xav hauv nruab siab, nws thiaj rub ib tug me nyuam los nyob ze nws,
48 Ces nws hais rau lawv tias : "Leej twg txais tus me nyuam no vim kuv lub npe, mas yog nws txais kuv. Hos leej twg txais kuv mas yog nws txais Tus xa kuv tuaj. Vim tias tus me tshaj nyob hauv nej sawv daws, tus ntawd thiaj yog tus loj."
49 Zam txawm teb, nws hais tias : "Xib Hwb, peb pom ib tug neeg hu txog koj lub npe los ntiab dab. Peb tau txwv nws, vim nws tsis nrog peb raws koj."
50 Yes Xus hais rau Zam tias : "Nej tsis txhob txwv nws, vim tus twg tsis tiv nej, nws yog nej tog."


**********************************

TIM      30      LUB      9      HLIS  

HWM LN JEROME, UA LEEJ CHOJ THIAB KWS COV TXUJ NTSHIAB

Yog xav xaiv cov zaj nyeem tshwj xeeb rau hnub hwm LN Jerome raws li nram no los tau:

Zaj Nyeem Ib:        2 TM 3:14-17

Tus zoo nyiad:
14 Ntawm koj, mas koj nyob twj ywm hauv txoj kev uas koj tau kawm thiab koj tau ntseeg ruaj ntseeg khov, vim koj yeej paub tias koj tau kawm ntawm leej twg los. 15 Thiab koj yeej paub txog cov Ntawv Ntshiab txij thaum yau los lawm tias cov Ntawv Ntshiab no muaj peev xwm ua tau kom koj thoob tsib mus rau txoj kev cawm neeg nyob hauv txoj kev ntseeg txog Yes Xus Pleev. 16 Tas cov Ntawv Ntshiab huv tib si yog Tswv Ntuj tshoj neeg kom muab sau tseg, ces nws zoo pab yus thaum yus qhuab qhia, thaum yus xav hais lus kho tej yam dag los cuav, los kho tej zaj yuam kev, thiab zoo pab qhia neeg kom taug txoj kev ncaj. 17 Ces tus uas yog Tswv Ntuj tus neeg thiaj yuav paub txhij txhua los pab nws ua txhua txoj hauj lwm zoo.

NPN        119:   9, 10, 11, 12, 13, 14

Txais: (12b) Huab Tais, thov koj qhia koj txoj cai lij choj rau kuv.

Yuav ua cas ib tug tub hluas thiaj coj tau tus yeeb yam dawb huv ?
Yog yuav ua raws li koj cov lo lus.

Txais: (12b) Huab Tais, thov koj qhia koj txoj cai lij choj rau kuv.

Kuv nrhiav koj tas siab tas ntsws,
thov koj txhob cia kuv ncaim mus deb koj cov lus qhia.

Txais: (12b) Huab Tais, thov koj qhia koj txoj cai lij choj rau kuv.

Kuv khaws koj cov lus koj tau cog rau nruab siab
kom kuv tsis txhob ua txhaum rau koj.

Txais: (12b) Huab Tais, thov koj qhia koj txoj cai lij choj rau kuv.

HUAB TAIS, ua kom koj nto koob meej !
Thov koj qhia koj txoj cai lij choj rau kuv.

Txais: (12b) Huab Tais, thov koj qhia koj txoj cai lij choj rau kuv.

Kuv di ncauj tshaj tas nrho cov lus
qhuab qhia tawm ntawm koj lub ncauj los.

Txais: (12b) Huab Tais, thov koj qhia koj txoj cai lij choj rau kuv.

Kuv zoo siab hlo taug txoj kev ua raws li koj lo lus qhia,
Zoo siab npaum li kuv nplua nuj muaj txhij txhua.

Txais: (12b) Huab Tais, thov koj qhia koj txoj cai lij choj rau kuv.

As Les Lus Yas:        HL  16:   14B

Txais: As les lus yas, as les lus yas.

HUAB TAIS, thov koj qhib peb tej siab ntsws
kom peb mloog koj leej Tub cov lus.

Txais: As les lus yas, as les lus yas.

Ntawv Moo Zoo:        MT  13:   47-52

Yes Xus hais rau nws cov thwj tim tias:
47 "Ntuj lub Ceeb Tsheej zoo li ib lub vas uas luag pov rau hauv dej ntuj. Lub vas puav tau txhua tsav txhua hom ntses. 48 Thaum lub vas puv lawd, cov tub puav ntses rub lub vas los tim ntug nqhuab, lawv zaum, lawv mam li xaiv cov zoo rau hauv tawb, hos muab cov tsis zoo pov tseg. 49 Thaum lub zim txwv kawg, kuj yuav zoo ib yam li ntawd thiab : cov tshiab yuav tawm tuaj, lawv yuav cais cov neeg phem ntawm cov neeg ncaj. 50 Lawv yuav muab cov neeg phem pov tseg rau hauv lub qhov hluav taws : nyob hauv, lawv yuav quaj laug laws thiab tom hniav nkawv.
51 "Nej puas to taub tas puas tsav yam ntawd ?" Lawv teb rau Yes Xus tias : "Peb to taub." 52 Yes Xus hais rau lawv tias : “Vim li no, thaum ib tug Kws Ntawv Ntshiab los ua thwj tim hauv Ntuj lub Ceeb Tsheej, mas nws zoo li ib tug tswv tsev uas rho tau tej yam tshiab thiab tej yam qub hauv nws lub cuab tam los.”

TIM      1      LUB      10      HLI      2019

Hnub Peb Lis Piam Nees Nkaum Rau Nruab Xyoo C Nruab Lis Piam Xyoo I

Hwm LN Thérèse de l’Enfant Jesus, Nkauj Ntshiab thiab Kws cov Txuj Ntshiab

Zaj Nyeem Ib:      NKL  8:   20-23

20 Tus HUAB TAIS kav tsoom tshiab hais li no : "Tseem yuav muaj neeg tuaj ntxiv, thiab yuav muaj cov neeg nyob hauv ntau lub nroog tuaj. 21 Cov nyob hauv ib lub nroog yuav mus lawm lwm lub nroog, lawv yuav sib hu tias : ‘Tuaj peb mus thov Huab Tais lub siab zoo, peb mus nrhiav tus HUAB TAIS kav tsoom tshiab ! Kuv yeej yuav mus xwb.’ 22 Ntau haiv neeg ntau lub kuj cuab muaj hwj xyeej yuav tuaj nrhiav tus HUAB TAIS kav tsoom tshiab nyob Yes Lus Xas Les, thiab tuaj thov nws lub siab zoo.”
23 Tus HUAB TAIS kav tsoom tshiab hais li no : "Lub caij ntawd, yuav muaj kaum tus neeg nyob hauv txhua xeem lus hauv cov haiv neeg yuav tuav nkaus ib tug neeg Yus Das tw tsho ruaj ruaj, ces lawv yuav hais rau nws tias : "Peb yuav nrog koj mus thiab, vim peb hnov hais tias Tswv Ntuj nrog nej nyob."

NPN       87:   1B-3, 4-5, 6-7

Txais:  (NKL 8: 23) Tswv Ntuj nrog peb nyob.

Nws raug txhim rau saum cov roob ntshiab;
Huab Tais nyiam Xis Yoos cov rooj vag
tshaj tas nrho Yas Kos tej vaj tse.
Neeg hais ntau yam zoo qhuas txog koj tiag,
Tswv Ntuj lub tsheej!

Txais:  (NKL 8: 23) Tswv Ntuj nrog peb nyob.

Kuv yuav hais txog Las Has thiab
Npas Npis Los nyob hauv cov uas paub kuv;
nej saib Fis Lis Tis, Tws Los, thiab
Es Thias Pias: “Tus no yug nyob ntawd".
Tiam sis luag yuav hais txog Xis Yoos tias :
“Txhua tus neeg yug nyob ntawd,
Hos tus tau tsa nws kom nyog ruaj khov
yog tus Huab Tais nyob siab.”

Txais:  (NKL 8: 23) Tswv Ntuj nrog peb nyob.

Huab Tais yuav sau rau hauv phau ntawv txheeb npe tias :
"Tus neeg no yug los nyob ntawd !"
Tas txhua tus neeg sawv daws yuav dhia hu nkauj tias:
“Kuv lub tsev yog nyob hauv koj.”

Txais:  (NKL 8: 23) Tswv Ntuj nrog peb nyob.

As Les Lus Yas:       MK  10:   45

Txais:   As les lus yas, as les lus yas.

Neeg Leej Tub tuaj yog tuaj kom tau tsob hwb sawv daws
thiab muab nws txoj sia los ua nqi txhiv coob leej.

Txais:   As les lus yas, as les lus yas.

Ntawv Moo Zoo:        LK  9:   51-56

51 Thaum lub sij hawm uas Yes Xus yuav ncaim mus los txog lawm, nws ua siab tawv qhawv mus pem Yes Lus Xas Les.
52 Yes Xus xa ib co tub fi xov ua nws ntej mus. Thaum lawv mus txog ib tog kev, lawv nkag hauv ib lub zos Xas Mas Lias kom tau npaj txhua yam rau Yes Xus.
53 Tab sis cov Xas Mas Lias tsis txais nws, vim nws npaj yuav mus pem Yes Lus Xas Les.
54 Lawv pom li ntawd ces ob tug thwj tim Yas Kos thiab Zam nkawd hais tias : "Huab Tais, koj puas xav kom peb hu ib co hluav taws nqes saum ntuj los hlawv lawv ?"
55 Tab sis Yes Xus tig los cem nkawd.
56 Ces lawv mus ntxiv rau lwm lub zos.

*******************************************

TIM      1      LUB      10      HLI  

Hwm LN Thérèse de l’Enfant Jesus, Nkauj Xwb Ntshiab thiab Kws cov Txuj Ntshiab

Yog xav xaiv cov zaj nyeem tshwj xeeb rau hnub hwm LN Jerome raws li nram no los tau:

Zaj Nyeem Ib:        HX  66:   10-14C

10 Nej kav tsij nrog Yes Lus Xas Les zoo siab, kav tsij dhia hom khaj vim Yes Lus Xas Les, nej cov uas nyiam nws.
Nej kav tsij nrog Yes Lus Xas Les zoo siab luag ntxhi, nej cov uas tau quaj ntsuag vim nws!
11 Thov kom nej tau ntxais nws lub mis los nplig nej thiab tau haus tsau npo; kom  nej tau nqus nws cov kua mis txaus  siab hlo ntawm nws lub mis muaj kua thiab muaj hwj chim.
12 Vim HUAB TAIS hais li no: "Ntsia saib, kuv yuav coj kev vam meej tuaj rau Yes Lus Xas Les zoo li ib tug niam dej ntws lug, kuv yuav coj tsoom kuj cuab kev nplua nuj tuaj rau Yes Lus Xas Les zoo li ib tug dej phwj yaws tuaj. Yes Lus Xas Les yuav puag nej zoo li ib co me nyuam mos ntawm nws xub ntiag, yuav plhws nej saum nws hauv caug.
13 Kuv yuav nplij nej xws li ib leeg niam nplij nws tus me nyuam; yuav muaj tus nplij nej nyob Yes Lus Xas Les.
14 Thaum nej pom muaj li ntawd, nej yuav zoo siab; nej cov pob txha yuav hlav tuaj xws li tej nroj tsuag. Luag yuav paub tias HUAB TAIS txhais tes nrog nraim nws cov tub txib..

NPN        131:   1BCDE, 2, 3

Txais: Huab Tais, kuv nrhiav tau kev thaj yeeb nyob hauv koj.

Huab Tais, kuv tsis muaj lub siab xav khav,
Kuv qhov muag tsis ntsia muab hlob ntxiag rau luag.
Kuv tsis ua tej yam loj loj rau kuv,
Los tej yam kuv lub tswv yim ncav tsis txog.

Txais: Huab Tais, kuv nrhiav tau kev thaj yeeb nyob hauv koj.

Kuv tau ua kom kuv tus ntsuj plig nyob twj ywm tus tus
Zoo xws li ib tug me nyuam cais tau mis lawm,
Xws li tus me nyuam cais mis lawm
los nyob ntawm leej niam xub ntiag,
Kuv tus ntsuj plig nyob twj ywm hauv kuv
Zoo puav tam li ntawd .

Txais: Huab Tais, kuv nrhiav tau kev thaj yeeb nyob hauv koj.

His Xas Lais, koj tso siab lug rau Huab Tais,
txij nyem no mus tag ib txhiab ib txhis.

Txais: Huab Tais, kuv nrhiav tau kev thaj yeeb nyob hauv koj.

As Les Lus Yas:         MT  11:   25

Txais: As les lus yas, as les lus yas.

Peb cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo:        MT  18:   1-4

1 Lub caij ntawd cov thwj tim txav los ze Yes Xus, lawv hais rau nws tias : “Leej twg yog tus loj dua nyob hauv Ntuj lub Ceeb Tsheej ?” 2 Yes Xus hu ib tug me nyuam los , nws coj tus me nyuam los nyob hauv nruab nrab lawv, 3 nws hais tias : “Kuv hais tseeb rau nej, yog nej tsis hloov los coj xws li ib co me nyuam, mas nej yuav mus tsis tau hauv Ntuj lub Ceeb Tsheej. 4 Leej twg rov saib nws me xws li tus me nyuam no, tus ntawd yog tus loj dua cov nyob hauv Ntuj lub Ceeb Tsheej.”

TIM 2 LUB 10 HLI 2019

Hnub Plaub Lis Piam Nees Nkaum Rau Nruab Xyoo C Nruab Lis Piam Xyoo I

Hwm cov Tshiab Pov Hwm

Zaj Nyeem Ib: NES HES MIS 2:1-8

1 Thaum lub hlis Nis Xaas, xyoo nees nkaum uas As Tas Xes Xes ua vaj, yog thaum muaj dej muaj cawv, mas kuv yog tus nqa cawv mus thiab ce cawv rau tus vaj. Los txog tav no kuv tsis tau ua ntsej muag mluas ib zaug li. 2 Ces hnub ntawd tus vaj txawm hais rau kuv tias : "Vim li cas koj ua ntsej muag mluas mlob li kod ? Koj twb tsis mob, ntshai yog muaj ib yam dab tsi ua rau koj nyuaj siab xwb !" Kuv ntshai kawg, ces kuv hais rau tus vaj tias : 3 "Thov kom tus vaj tsuas muaj nyob mus li xwb ! Ua cas kuv thiaj yuav tsis ua ntsej muag mluas li no ? Vim lub tsheej uas kuv phaj txiv lawv tej ntxa nyob twb puas tas lawm, tej qhov rooj loog los kub hnyiab tas lawm." 4 Tus vaj nug kuv tias : "Koj xav tau dab tsi ?" 5 Kuv thov tus Tswv Ntuj nyob saum ntuj ces kuv teb tus vaj tias : "Yog tus vaj pom zoo thiab yog koj saib koj tus tub txib tsim nyog pab, mas kuv xav thov koj xa kuv mus Yus Das teb, mus hauv lub tsheej uas kuv cov yawg koob lawv tej ntxa nyob, kom kuv mus rov txhim kho rau.” 6 Tus vaj thiab tus poj vaj uas zaum ntawm nws ib sab, nug kuv tias : "Koj yuav mus ho ntev ? Thaum twg koj mam rov los ?" Tus vaj zoo siab xa kuv mus , ces kuv teem ib lub sij hawm rau tus vaj. 7 Kuv tseem thov tus vaj tias : "Yog tus vaj zoo siab mas thov koj muab ntawv rau kuv nqa mus rau cov nom saib cov teb chaws nyob ntawm tus niam dej sab tim ub, kom lawv kheev kuv hla lawv teb chaws mus rau Yus Das teb. 8 Thiab xav tau ib daig ntawv mus rau As Xas uas yog tus saib tus vaj lub hav zoov, kom nws muab ntoo rau kuv tau coj mus ua cov qhov rooj vag ntawm lub ntsa loog uas xov ncig lub Tuam Tsev Teev Ntuj, thiab coj mus ua cov ntsa yeej xov ncig luv nroog thiab ua lub tsev kuv yuav nyob." Tus vaj tso lus rau kuv ua tej ntawd, vim kuv tus Tswv Ntuj txhais tes nyob saum kuv pab kuv.

NPN 137: 1-2, 3, 4-5, 6

Txais: (6ab) Kom kuv tus nplaig ruam yog kuv tsis nco qab koj!

Nyob ntawm cov ntug dej nyob Npas Npis Los,
peb zaum peb quaj vim peb nco txog Xis Yoos.
Peb muab peb tej nkauj nog ncas dai
rau saum tej ceg ntoo uas nyob ib ncig ntawd.

Txais: (6ab) Kom kuv tus nplaig ruam yog kuv tsis nco qab koj!

Nyob ntawd, cov neeg uas ntes peb taij kom
peb qhia cov lus hauv peb cov nkauj rau lawv,
cov neeg uas tuaj lwg peb, taij kom peb ua lom zem ,
lawv hais tias: "Nej seev cov nkauj Xis Yoos rau peb mloog!"

Txais: (6ab) Kom kuv tus nplaig ruam yog kuv tsis nco qab koj!

Peb yuav ua cas seev tau HUAB TAIS
ib zaj nkauj nyob pej kum teb ?
Yes Lus Xas Les, yog kuv hnov qab koj,
thov kom kuv txhob nco qab kuv sab tes xis!

Txais: (6ab) Kom kuv tus nplaig ruam yog kuv tsis nco qab koj!

Thov kom kuv tus nplaig lo rau saum qab yiag,
yog tias kuv tsis nco txog koj ntxiv,
yog kuv tsis muab Yes Lus Xas Les tso ua ntej dua cov
nyob hauv kuv txoj kev zoo siab.

Txais: (6ab) Kom kuv tus nplaig ruam yog kuv tsis nco qab koj!

As Les Lus Yas: NPN 103: 21

Txais: As les lus yas, as les lus yas.

Nej cav lus zoo txog HUAB TAIS, nej uas yog nws tsoom tshiab,
nej uas yog nws cov tub txib ua ywj nws lub siab.

Txais: As les lus yas, as les lus yas.

Ntawv Moo Zoo: MT 18: 1-5, 10

1 Lub caij ntawd cov thwj tim ltxav os ze Yes Xus, lawv hais rau nws tias : “Leej twg yog tus loj dua nyob hauv Ntuj lub Ceeb Tsheej ?” 2 Yes Xus hu ib tug me nyuam los, nws coj tus me nyuam los nyob hauv nruab nrab lawv, 3 nws hais tias : “Kuv hais tseeb rau nej, yog nej tsis hloov los coj xws li ib co me nyuam, mas nej yuav mus tsis tau hauv Ntuj lub Ceeb Tsheej. 4 Leej twg rov saib nws me xws li tus me nyuam no, tus ntawd yog tus loj dua cov nyob hauv Ntuj lub Ceeb Tsheej. 5 Leej twg txais ib tug me nyuam zoo li tus no vim kuv lub npe, mas yog nws txais kuv.”
10 Nej ceev faj, tsis txhob thuam ib tug me nyuam yaus li tus no, kuv hais rau nej tias, lawv cov Tshiab saib lawv nyob saum ntuj ntsia ntsoov kuv Txiv nyob saum ntuj lub ntsej muag mus li.”

***********************************

TIM 2 LUB 10 HLI

HWM IB TSOOM TSHIAB POV HWM

Yog xav xaiv zaj nyeem ib thiab zaj nkauj paj nruag tshwj xeeb rau hnub hwm ib tsoom Tshiab Pov Hwm raws li nram no los tau:

Zaj Nyeem Ib: KT 23: 20-23

HUAB TAIS hais li no:
20 "Ntsias saib, kuv xav kuv tus tshiab mus ua nej ntej; nws yuav pov hwm nej ntawm txoj kev thiab yuav coj nej mus kom txog qhov chaw uas kuv tau npaj lawm.
21 Nej yuav mob siab rau ua raws li nws hais thiab mloog nws lus. Nej tsis txhob sawv tiv nws, vim nws yuav tsis zam nej qhov txhaum rau nej; vim kuv lub npe nyob hauv nws.
22 Yog tias nej kub siab mloog nws lus thiab ua trxhua yam uas kuv hais rau nej, mas kuv yuav ua yeeb ncuab rau nej cov yeeb ncuab, kuv yuav sawv tiv cov uas sawv tiv nej.
23 Kuv tus tshiab yuav mus ua nej ntej, thiab coj nej mus txog cov neeg As Mos Lis, cov neeg His Tis, cov neeg Pes Lis Xis, cov neeg Kas Nas Has, cov neeg His Vis, thiab cov neeg Yes Npus Xis, ces kuv yuav muab lawv rhuav kom ploj mus tas.”

NPN 91: 1-2, 3-4AB, 4C-6, 10-11

Txais: (11) HUAB TAIS yuav txib nws cov tshiab
kom zov koj saib hauv txhua txoj kev koj taug.

Koj, tus tsa tsev rau hauv tus Nyob Siab lub chaw nkaum,
Tus uas pw hauv tus Muaj Hwj Huam qhov ntxoov,
Koj hu HUAB TAIS tias :
"Kuv qhov chaw nkaum, kuv lub yeej ntsa zeb,
kuv tus Tswv Ntuj, tus kuv tso siab rau."

Txais: (11) HUAB TAIS yuav txib nws cov tshiab
kom zov koj saib hauv txhua txoj kev koj taug.

Nws yuav cawm koj dim ntawm tus cuab noog lub vas,
thiab npo koj ntawm tus mob aws tsis zam siav.
Nws yuav muab nws ob phab tis los vov koj,
Koj yuav tau chaw nkaum nyob hauv nws ob phab tis.

Txais: (11) HUAB TAIS yuav txib nws cov tshiab
kom zov koj saib hauv txhua txoj kev koj taug.

Nws txoj kev hlub yog daim leem phiaj, yog lub tsho hlau;
Koj yuav tsis ntshai ntuj teb tag hmo tej vij sub vij sw,
tsis ntshai xib xub uas ya nruab hnub nrig tuaj.
Koj yuav tsis ntshai tus mob aws uas yuj hauv qhov tsaus,
tsis ntshai tej xwm txheej raug kab mob thaum tav su nrig.

Txais: (11) HUAB TAIS yuav txib nws cov tshiab
kom zov koj saib hauv txhua txoj kev koj taug.

Qhov phem yuav tsis tuaj nphav txog koj,
Kev txom nyem yuav tsis txav los ze koj lub tsev tsam phooj,
Vim HUAB TAIS tau txib nws cov tshiab
Kom lawv zov koj hauv txhua txoj kev koj taug.

Txais: (11) HUAB TAIS yuav txib nws cov tshiab
kom zov koj saib hauv txhua txoj kev koj taug.

As Les Lus Yas: NPN 103: 21

Txais: As les lus yas, as les lus yas.

Nej cav lus zoo txog HUAB TAIS, nej uas yog nws tsoom tshiab,
nej uas yog nws cov tub txib ua ywj nws lub siab.

Txais: As les lus yas, as les lus yas.

Ntawv Moo Zoo: MT 18: 1-5, 10

1 Lub caij ntawd cov thwj tim ltxav os ze Yes Xus, lawv hais rau nws tias : “Leej twg yog tus loj dua nyob hauv Ntuj lub Ceeb Tsheej ?” 2 Yes Xus hu ib tug me nyuam los, nws coj tus me nyuam los nyob hauv nruab nrab lawv, 3 nws hais tias : “Kuv hais tseeb rau nej, yog nej tsis hloov los coj xws li ib co me nyuam, mas nej yuav mus tsis tau hauv Ntuj lub Ceeb Tsheej. 4 Leej twg rov saib nws me xws li tus me nyuam no, tus ntawd yog tus loj dua cov nyob hauv Ntuj lub Ceeb Tsheej. 5 Leej twg txais ib tug me nyuam zoo li tus no vim kuv lub npe, mas yog nws txais kuv.”
10 Nej ceev faj, tsis txhob thuam ib tug me nyuam yaus li tus no, kuv hais rau nej tias, lawv cov Tshiab saib lawv nyob saum ntuj ntsia ntsoov kuv Txiv nyob saum ntuj lub ntsej muag mus li.”

TIM 3 LUB 10 HLI 2019

Hnub Tsib Lis Piam Nees Nkaum Rau Nruab Xyoo C Nruab Lis Piam Xyoo I

Zaj Nyeem Ib: NHM 8: 1-4A, 5-6, 7B-12

1 Tas tsoom pej xeem sawv daws tuaj sib txoos ua ke xws li yog ib leeg xwb nyob ntawm lub tshav ntawm lub rooj vag Dej. Lawv kom tus thoob xwm ntawv Es Nras nqa phau ntawv Mais Xes txoj cai uas HUAB TAIS tau muab rau cov His Xas Lais tuaj. 2 Ces tus Leej Choj Es Nras nqa txoj cai tuaj tso ntawm lub txoos xub ntiag, muaj cov txiv neej, cov poj niam thiab tas cov uas yuav to taub zoo thaum lawv hnov cov lus. Hnub ntawd yog hnub xiab ib lub xya hli. 3 Es Nras nyeem ntawv tig ntsia ntsoov lub tshav nyob ncaj ntawm lub rooj vag Dej, txij thaum nyuam qhuav kaj ntug mus txog tav su; nws nyeem rau cov txiv neej cov poj niam thiab cov uas yuav to taub zoo. Sawv daws cug pob ntseg zoo zoo los mloog txoj cai. 4a Tus thoob xwm ntawv Es Nras sawv nyob saum ib lub sam thiaj uas lawv txhob txwm npaj rau lub sij hawm ntawd. 5 Es Nras qhib phau ntawv rau sawv daws pom, vim nws nyob qhov chaw siab dua sawv daws. Thaum nws qhib phau ntawv mas tsoom sid sawv daws sawv. 6 Es Nras pib cav txog HUAB TAIS tus Tswv Ntuj uas loj tas nrho; tas sawv daws tsa tes rau saum ntuj thiab teb tias : "Ua li ! Ua li !" Ces tas tsoom pej xeem nyo taub hau txhos caug pe HUAB TAIS, lawv ntsej muag khoov ti av. 7b Ces tsoom pej xeem nyob twj ywm ntawm lawv qhov chaw. 8 Es Nras thiab cov Les Vis nyeem Tswv Ntuj txoj cai nyob hauv ntawv kom meej meej thiab lawv txhais lub ntsiab kom sawv daws to taub zoo.
9 Ces Nes Hes Mis tus nom tswj xeev thiab tus leej choj thoob xwm Es Nras thiab cov Les Vis uas yog cov qhuab qhia cov neeg, lawv hais rau tas tsoom pej xeem tias : "Hnub no, yog ib hnub ntshiab rau HUAB TAIS nej tus Tswv Ntuj ! Nej tsis txhob nyob tej tug mluas mlob, nej tsis txhob quaj !" Lawv hais li no vim thaum sawv daws hnov cov lus nthuav txoj cai mas sawv daws quaj. 10 Nws tseem hais ntxiv tias : "Nyem no, nej mus noj cov nqaij qab qab , haus cov cawv uas qab zib, nej nqa ib feem mus faib rau cov npaj tsis tau dab tsi. Hnub no yog ib hnub ntshiab huv rau peb tus HUAB TAIS ! Nej tsis txhob tu siab ! Vim HUAB TAIS kev zoo siab yog nej lub zog !" 11 Cov Les Vis kom tsoom sid nyob twj ywm, lawv hais tias : "Nej tswm seeb vim hnub no yog ib hnub ntshiab, nej txhob tu siab." 12 Ces tas tsoom pej xeem mus noj mus haus; lawv xa txhiam xws noj rau cov tsis muaj, sawv daws ua kev lom zem loj, vim lawv to taub cov lus uas tau muab nthuav tawm rau lawv mloog.

NPN 19: 8, 9, 10, 11

Txais: (9ab) Huab Tais cov lus qhia ua tau kom neeg zoo siab.

HUAB TAIS txoj cai zoo tas nrho,
nws ntxiv siav rau tus ntsuj plig;
HUAB TAIS tus txhooj tsim nyog yuav,
nws ua kom tus neeg ruam thoob tsib tuaj.

Txais: (9ab) Huab Tais cov lus qhia ua tau kom neeg zoo siab.

HUAB TAIS cov lus qhuab qhia yog lus ncaj
ua kom neeg muaj kev zoo siab.
HUAB TAIS lo lus meej kawg nkaus,
ua kom qhov muag pom kev.

Txais: (9ab) Huab Tais cov lus qhia ua tau kom neeg zoo siab.

Kev hwm HUAB TAIS yog txoj kev dawb huv,
kev hwm Huab Tais yuav nyob mus li.
HUAB TAIS cov lus txiav txim yog lus tseeb,
Txhua lo lus nws txiav yog qhov ncaj.

Txais: (9ab) Huab Tais cov lus qhia ua tau kom neeg zoo siab.

Nws cov lus txiav txim tsim nyog ntshaw dua kub,
Tsim nyog ntshaw dua ib txhab tseem kub,
qab zib dua cov kua zib,
los cov zib mu ntawm daim nas muv.

Txais: (9ab) Huab Tais cov lus qhia ua tau kom neeg zoo siab.

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej los txog ze lawm :
nej cia li hloov siab thiab ntseeg txog lub Moo Zoo.

Txais: As les lus yas, as les lus yas.

Ntawv Moo Zoo: LK 10: 1-12

1 Yes Xus tseem xaiv xya caum ob leeg thwj tim, nws xa lawv mus tej pab ob leeg, ua nws ntej mus rau hauv cov nroog thiab tej qhov chaw uas nws yuav mus. 2 Nws hais rau lawv tias : "Qoob loo zoo sau muaj ntau kawg, tab sis cov tub zog muaj tsawg. Nej thov tus Tswv qoob kom nws xa ib co tub zog tuaj sau nws cov qoob. 3 Nej mus, kuv xa nej zoo li ib co yaj mus nyob nruab nrab ib cov hma. 4 Nej tsis txhob nqa nas nyiaj, txhob ris hnab, txhob nqa khau, txhob hais lus hu leej twg ntawm kev li. 5 Nej chaws mus hauv lub tsev twg, nej xub hais tias : ‘Kom lub tsev no nyob kaj lug !’ 6 Yog muaj ib tug neeg nyiam txoj kev kaj lug nyob ntawd, mas nej txoj kev kaj lug yuav nyob saum nws. Yog tsis muaj, mas nej txoj kev kaj lug yuav rov los rau nej. 7 Nej nyob hauv lub tsev ntawd, nej noj nej haus tej yam uas lawv muaj, vim tus tub zog tsim nyog txais nqi zog. Nej txhob tawm hauv ib lub tsev mus nyob dua lwm lub. 8 Nej mus hauv lub nroog twg, yog luag txais nej, nej noj tej yam uas luag muab rau nej. 9 Nej kho cov neeg mob hauv lub nroog ntawd kom zoo, thiab nej hais rau lawv tias : ‘Tswv Ntuj lub Ceeb Tsheej tuaj txog ze nej lawm.’ 10 Tab sis yog nej mus hauv lub nroog twg, luag tsis txais nej, nej tawm mus nraum tej kev nej hais tias : 11 ‘Tab yog tej plua av uas lo peb ko taw, peb muab nchos tseg tib si cia ua tim khawv txog nej. Tab sis, nej yuav tsum paub tias Tswv Ntuj lub Ceeb Tsheej tuaj txog ze lawm.’ 12 Kuv hais rau nej tias, txog hnub ntawd, lub nroog Xos Dos Mas yuav raug txim sib dua lub nroog ntawd.”

TIM      4      LUB      10      HLI      2019

Thawj Hnub Rau Lis Piam Nees Nkaum Rau Nruab Xyoo C Nruab Lis Piam Xyoo I

Hwm LN Francis of Assisi, ua Txiv Twj Cuab

Zaj Nyeem Ib:       NPAS LWS  1:   15-22

Cov His Xas Lais nyob txim nyob Npas Npis Los sau ntawv qhia rau cov nyob Yes Lus Xas Les kom teev ntuj li cas:
15 “Nej yuav hais li no : Txoj kev ncaj yog Huab Tais peb tus Tswv Ntuj li tug. Ntawm peb mas hnub no peb tau txoj kev txaj muag, tas peb cov neeg nyob Yus Das teb thiab cov nyob Yes Lus Xas Les, 16 peb cov vaj, peb cov nom tswv, cov Leej Choj, cov Yaj Saub thiab peb cov yawg koob sawv daws tib si, 17 vim peb tau ua txhaum rau peb tus Huab Tais, 18 peb tau tawv ncauj tsis mloog nws lus, thiab peb tsis mob siab coj raws li Huab Tais peb tus Tswv Ntuj lo lus tias kom peb ua raws li Huab Tais cov lus qhia uas nws muab rau peb. 19 Txij hnub Huab Tais coj peb cov yawg koob tawm ntawm Hais Nkws Tos teb los txog hnub no, peb tau tawv ncauj tsis mloog Huab Tais peb tus Tswv Ntuj lus, peb tau tsis ua raws li nws qhia,  tsis kam mloog nws lub suab hais. 20 Vim li ntawd, los txog hnub no, peb thiaj raug cov xwv txheej thiab cov lus tsawm uas Huab Tais hais rau nws tus tub txib Mais Xes, lub caij nws coj peb cov yawg koob tawm hauv Hais Nkws Tos teb los, kom tau muab ib lub teb chaws uas mis nyuj thiab zib mu ntws lug rau peb . 21 Peb tsis tau mloog Huab Tais peb tus Tswv Ntuj cov lus uas cov Yaj Saub nws tau xa tuaj hais rau peb. 22 Peb nyias tau coj raws li nyias lub siab nkhaus nyiam, peb tau mus teev hawm lwm cov dab qhuas, thiab peb tau ua tej yam uas Huab Tais peb tus Tswv Ntuj saib yog phem."

NPN      79:   1B-2, 3-5, 8, 9

Txais:   (9) Huab Tais, thov koj cawm peb kom koj lub npe nto koob meej.  

Tswv Ntuj, cov kuj cuab tau uaj tsuj koj lub cuab tam lawm,
lawv tau ua tsis zoo rau koj lub tuam tsev ntshiab,
lawv tau rhuav tsoo Yes Lus Xas Les pob tag.
Lawv tau muab koj cov tub txib lub cev
pub rau cov noog ya saum ntuj noj,
muab koj cov ntseeg lub cev pub
rau ntiaj teb cov tsiaj qus dua.

Txais:   (9) Huab Tais, thov koj cawm peb kom koj lub npe nto koob meej.

Lawv tau nchuav koj cov ntseeg tej roj ntshav zoo li dej
Uas ntws sis laub sis lug ncig Yes Lus Xas Les,
tsis muaj leej twg yuav faus lawv lub cev li.
Cov neeg nyob ze peb ua tub qaug peb,
cov nyob ncig peb thuam peb luag peb.
HUAB TAIS, koj yuav npau taws hov ntev rau peb?
Koj puas yuav npau tas mus li?
Koj txoj kev khib peb puas yuav kub cuag hluav taws?

Txais:   (9) Huab Tais, thov koj cawm peb kom koj lub npe nto koob meej.

Thov koj txhob nco txog txhob cia peb ris peb tej txhaum dhau los,
muab koj lub siab khuv leej neeg tuaj pab peb sai sai,
vim peb poob rau qhov qis kawg nkaus lawm.

Txais:   (9) Huab Tais, thov koj cawm peb kom koj lub npe nto koob meej..

Tswv Ntuj peb tus cawm seej, thov koj pab peb,
vim koj lub npe nto koob meej lug;
Thov cawm peb thiab zam peb cov txhaum rau peb
vim koj lub npe zoo.

Txais:   (9) Huab Tais, thov koj cawm peb kom koj lub npe nto koob meej.

As Les Lus yas:       NPN  95:   8

Txais: As les lus yas, as les lus yas.

Hnub no, yog nej hnov nws lub suab,
Tsis txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo:       LK  10:   13-16

Yes Xus hais tias:
13 “Kos Las Xis, koj txoj hmoov phem ! Npes Xais Das, koj txoj hmoov phem ! Vim cov hwj huam yees ntxwv tshwm sim nyob hauv neb kheev lam yog tshwm sim nyob Tws Los thiab Xis Doos, mas ntshai lawv twb hnav ntaub tsaj thiab zaum hauv qhov tshauv ntev los lawm, ntshai lawv twb hloov siab hloov ntsws tas lawm.
14 Tws Los thiab Xis Doos thiaj li yuav raug txim sib dua neb thaum txog lub caij txiav txim.
15 Hos Koj, Kas Fas Naus, luag puas yuav tsa koj siab txij ntuj? Koj ces twb yuav poob rau hauv dab phem teb.
16 Leej twg mloog nej, mas yog nws mloog kuv; leej twg xyeej nej, mas kuj yog xyeej kuv. Leej twg xyeej kuv, mas yog nws xyeej tus xa kuv tuaj."

******************************

Tim      4      lub      10      Hli  

Hwm LN Francis of Assisi, ua Txiv Twj Cuab

Yog xav xaiv zaj nyeem ib thiab zaj nkauj paj nruag tshwj xeeb rau hnub hwm LN Francis of Assisi raws li nram no los tau:

Zaj Nyeem Ib:        NLT  6:   14-18

Brothers and sisters:
May I never boast except in the cross of our Lord Jesus Christ,
through which the world has been crucified to me,
and I to the world.
For neither does circumcision mean anything, nor does uncircumcision,
but only a new creation.
Peace and mercy be to all who follow this rule and to the Israel of God.

From now on, let no one make troubles for me;
for I bear the marks of Jesus on my body.

The grace of our Lord Jesus Christ be with your spirit,
brothers and sisters.  Amen.

NPN        16:   1B-2A AND 5, 7-8, 11

Txais: (5a) Huab Tais, koj yog kuv lub cuab tam kuv teej tug.

Tswv Ntuj, thov koj txuag kuv, vim kuv tuaj nkaum hauv koj.
Kuv hais rau HUAB TAIS tias: " Koj yog kuv tus HUAB TAIS !”
Huab Tais, kuv lub cuab tam, kuv lub ntim,
Koj yog tus tuav rawv kuv txoj hmoo.

Txais: (5a) Huab Tais, koj yog kuv lub cuab tam kuv teej tug.

Kuv cav lus zoo txog tus HUAB TAIS uas pab kuv xav tswv yim,
Tab yog hmo ntuj kuv lub siab ntsws tseem txhib kuv.
Kuv cia HUAB TAIS nyob ntawm kuv xub ntiag tsis tseg,
Vim nws nyob ntawm kuv sab xis, kuv yuav tsis qaij tsis qaug

Txais: (5a) Huab Tais, koj yog kuv lub cuab tam kuv teej tug .

Koj yuav qhia kuv taug txoj kev mus rau txoj sia,
mus tau txoj kev zoo siab puv npo nyob ntawm koj xub ntiag,
mus txog txoj kev nplig siab tsis txawj kawg nyob ntawm koj sab xis.

Txais: (5a) Huab Tais, koj yog kuv lub cuab tam kuv teej tu

As Les Lus Yas:         MT  11:   25

Txais: As les lus yas, as les lus yas.

Peb cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo:        MT  11:   25-30

25 Lub caij ntawd, Yes Xus hais tias : "Txiv, kuv cav lus zoo txog koj, Huab Tais kav lub ntuj lub teb, vim koj zais tej yam ntawd rau cov neeg thoob tsib thiab cov neeg ntse, koj ho muab qhib rau cov ua neeg me paub. 26 Muaj tseeb, Txiv, koj lub siab yeej nyiam li ntawd. 27 Kuv Txiv tau muab tas ib puas tsav yam rau kuv lawm. Tsis muaj leej twg paub Leej Tub, tsuas kawg Leej Txiv thiaj paub. Kuj tsis muaj leej twg paub Leej Txiv, tsuas kawg Leej Tub thiaj paub, thiab tus uas Leej Tub pom zoo qhia rau kom paub xwb.
28 Tas nej sawv daws uas nej khwv, thiab ris nra hnyav, nej tuaj cuag kuv mog ! Kuv yuav cia nej so los siav. 29 Nej txais kuv tus quab los kwv thiab nej kawm ntawm kuv, vim kuv siab zoo thiab tsis muab hlob; nej tus plig yuav nrhiav tau chaw so los siav, 30 vim kuv tus quab kwv yooj yim, thiab kuv lub nra sib.”

TIM 5 LUB 10 HLI 2019

Thawj Hnub Xya Lis Piam Nees Nkaum Rau Nruab Xyoo C Nruab Lis Piam Xyoo I

Hwm tus Tau Txoj Hmoov Zoo Francis Xavier Seelos

Zaj Nyeem Ib: NPAS LWS 4: 5-12, 27-29

5 "Kuv haiv neeg, nej ua siab loj ! Nej yog pab neeg ua kom luag nco tias tseem tshuav haiv His Xas Lais. 6 Nej raug muag rau cov kuj cuab, tsis yog ua kom nej ploj mus tas, tiam sis nej poob rau hauv cov yeeb ncuab txhais tes yog vim nej tau ua Huab Tais npau taws. 7 Nej tau ua kom tus tsim nej los npau taws, vim nej ua tej thaj txi dab phem, nej tsis txi Tswv Ntuj. 8 Nej tsis nco qab tus Tswv Ntuj nyob mus li, uas yog tus tau pub zaub pub mov rau nej noj; nej tau ua kom Yes Lus Xas Les tu siab, nws yog tus tau tu nej hlob. 9 Yes Lus Xas Les yog tus tau pom tias Tswv Ntuj txoj kev npau taws yuav tuaj raug nej, nws hais tias : ‘Nej cov uas nyob ze Xis Yoos nej mloog mas, Tswv Ntuj tau tso kev tu siab loj tuaj raug kuv ! 10 Kuv tau pom tus muaj txoj sia nyob mus li tso txoj kev mus nyob txim tuaj raug kuv cov tub thiab cov ntxhais. 11 Kuv zoo siab tu lawv kom loj hlob, tiam sis kuv quaj thiab tu siab thaum kuv tso lawv mus. 12 Kom tsis txhob muaj leej twg hnyos kuv vim kuv yog ib tug poj ntsuam uas muaj coob leej muab tso tseg. Kuv nyob ib tug twm zeej muaj kev tu siab, yog vim kuv cov me nyuam tau ncaim ntawm Tswv Ntuj Txoj Cai lawm.
27 Kuv cov me nyuad, nej ua siab loj ! Nej hu txog Tswv Ntuj mog! Ces tus tau tso tej no los raug nej nws yuav rov nco txog nej. 28 Vim nej lub siab tau feeb mus rau txoj kev ncaim deb ntawm Tswv Ntuj lawm, nyem no nej yuav tsum tig rov los kub siab lug nrhiav nws zoo dua yav thaud kaum npaug ntxiv. 29 Ces tus uas tau tso tej xwv txheej no tuaj raug nej, nws yuav pub txoj kev zoo siab mus li rau nej nrog rau txoj kev cawm seej.’”

NPN 69: 33-35, 36-37

Txais: (34) HUAB TAIS mloog cov pluag lo lus thov.

Nej cov neeg me, nej saib, ces nej yuav zoo siab;
Nej cov uas nrhiav Tswv Ntuj, nej txhob ntaus siab me;
Vim HUAB TAIS mloog cov pluag zaj lus thov;
nws tsis ntxub cov neeg uas raug luag muab kaw.
Kom lub ntuj lub teb cav lus zoo txog nws,
Kom cov hiav txwv thiab txhua yam mus mus
los los nyob rau hauv qhuas txog nws!

Txais: (34) HUAB TAIS mloog cov pluag lo lus thov.

Tswv Ntuj yuav cawm Xis Yoos,
nws yuav rov txhim cov tsheej hauv Yus Das teb.
Lawv yuav nyob hauv lub teb chaws,
lawv yuav tau lub teb chaws ua lawv tug.
Tswv Ntuj cov tub txib tej xeeb ntxwv yuav tau
lub teb chaws los ua lawv lub cuab tam;
cov uas nyiam Tswv Ntuj lub npe yuav tau nyob rau hauv.

Txais: (34) HUAB TAIS mloog cov pluag lo lus thov.

As Les Lus Yas: MT 11: 25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: LK 10: 17-24

17 Pab xya caum ob leeg rov qab los txog, lawv zoo siab kawg, lawv hais tias : "Huab Tais, tab yog cov dab phem, tsis kav lawv mloog peb lus vim koj lub npe." 18 Yes Xus hais rau lawv tias : "Kuv twb pom Xas Tas poob saum ntuj los xws li ib kab xob laim lawm! 19 Nej yuav pom, kuv pub hwj huam rau nej lawm kom nej ko taw tsuj tau nab, tsuj tau kab lij tshooj, tsuj tau Yeeb Ncuab lub hwj huam tib si, yuav tsis muaj dab tsi ua xwv txheej tau rau nej li. 20 Txawm li ntawd los nej tsis txhob zoo siab vim cov dab mloog nej lus, nej yuav zoo siab vim nej lub npe muab sau cia rau saum ntuj lawm."
21 Tib lub sij hawm ntawd, Yes Xus zoo siab tas nrho nyob hauv Leej Tswv Yim Ntshiab, nws hais tias : "Kuv cav lus zoo txog koj, Leej Txiv, Huab Tais kav lub ntuj lub teb, vim koj tau zais tej ntawd rau cov neeg thoob tsib thiab cov neeg ntse, koj muab qhib rau cov neeg me paub. Txiv, vim koj yeej nyiam ua li ntawd. 22 Kuv Txiv tau muab tas ib puas tsav yam rau kuv lawm. Tsis muaj leej twg paub tias Leej Tub yog tus twg, kawg yog Leej Txiv thiaj paub. Tsis muaj leej twg paub tias Leej Txiv yog tus twg, kawg yog Leej Tub thiaj paub, thiab yog tus uas Leej Tub xav qhia rau kom paub xwb."
23 Yes Xus tig los hais rau nws cov thwj tim nkaus xwb tias : "Cov qhov muag uas pom tej yam nej pom no tau txoj hmoov zoo ! 24 Kuv hais rau nej tias coob tus yaj saub thiab coob tus vaj xav pom qhov uas nej pom, tab sis lawv tsis tau pom, xav hnov tej uas nej hnov, tab sis lawv tsis tau hnov."

TIM      7      LUB      10      HLI      2019

Hnub Ob Lis Piam Nees Nkaum Xya Nruab Xyoo C Nruab Lis Piam Xyoo I

Hwm Leej Niam ntawm txoj Saw Mab Liab

Zaj Nyeem Ib:        YOS NAS  1:   1–2:1-2, 11

1 HUAB TAIS hais rau Yos Nas uas yog As Mis Tais tus tub tias : 2 "Koj sawv los, koj mus tom lub tuam tsheej Nis Nis Vas. Koj mus hais rau lawv tias lawv txoj kev phem nrov nce tuaj txog kuv lawm." 3 Yos Nas sawv los, nws npaj khiav mus rau Tas Xis kom deb ntawm HUAB TAIS. Nws mus nram Yos Pes, nws nrhiav tau ib lub nkoj yuav mus Tas Xis. Nws them nqe kev rau lawv ces nws nce hauv lub nkoj nrog lawv mus Tas Xis, kom deb ntawm HUAB TAIS. 4 Tab sis HUAB TAIS tso cua hlob tuaj nplawm lub hiav txwv, ces cua daj cua dub sawv loj loj tuaj ntsawj lub hiav txwv ua kom lub nkoj yuav luag tawg tas. 5 Cov tub nquam nkoj ntshai, lawv nyias thov nyias tus tswv ntuj kom tuaj pab. Lawv muab cov toob xib pov tseg rau hauv dej kom lub nkoj sib tuaj. Hos Yos Nas ces nws nqes mus hauv sab hauv qab lub nkoj nws mus pw tsaug zog hauv lawm. 6 Lawv tus tsav nkoj thiaj los hais rau Yos Nas tias : "Koj tseem tau zoo tsaug zog thiab lod ? Koj sawv los thov koj tus Tswv Ntuj mas ! Tej zaum Tswv Ntuj yuav nco txog peb, ces peb yuav tsis tuag." 7 Ces lawv sib tham tias : "Peb ntaus kuam saib saib yog leej twg coj xwv txheej tuaj rau peb." Lawv txawm ntaus kuam, ces raug rau Yos Nas. 8 Lawv hais rau Yos Nas tias: "Koj sim qhia peb saib yog vim li cas peb thiaj raug xwv txheej li no? Koj ua txoj hauj lwm dab tsi ? Koj nyob qhov twg, lub teb chaws twg tuaj ? Koj yog haiv neeg dab tsi ?" 9 Yos Nas teb lawv tias : "Kuv yog ib tug Hes Nplaws, kuv teev HUAB TAIS, tus Tswv lub ntuj uas tsim lub hiav txwv thiab tsim thaj av qhuav." 10 Cov nquam nkoj ntshai kawg, lawv hais rau Yos Nas tias : "Ua cas koj ua li ntawd ?” Vim lawv twb paub tias yog nws khiav mus deb ntawm HUAB TAIS, nws twb xub hais qhia rau lawv li ntawd lawm . 11 Lawv nug Yos Nas tias : "Peb yuav ua li cas rau koj kom lub hiav txwv rov tus yees tuaj? Vim lub hiav txwv haj yam nphau loj zuj zus xwb.” 12 Nws teb rau lawv tias : "Nej muab kuv pov rau hauv lub hiav txwv, ces dej yuav tus rau nej. Kuv paub tias yog tim kuv mas cua thiaj hlob li no rau nej." 13 Lawv xub sim nquam lub nkoj rov los rau tim ntug nqhuab, tab sis tsis tau li vim dej nphau heev dhau. 14 Ces lawv thov HUAB TAIS tias: "HUAB TAIS, thov koj tsis txhob cia peb tuag vim tus neeg no txoj sia. Koj tsis txhob suav txim rau peb tias peb tau tua ib tug neeg tsis muaj txhaum, vim koj yog tus ua rau nws raws li koj nyiam." 15 Ces lawv nthos nkaus Yos Nas thiab muab nws pov rau hauv lub hiav txwv. Tam sim ntawd lub hiav txwv tus yees tuaj. 16 Lawv ntshai HUAB TAIS kawg nkaus, ces lawv txi ib co txim rau HUAB TAIS, thiab lawv fiv ib co yeem rau nws.
2 1 HUAB TAIS ua kom ib tug ntses loj loj tawm tuaj nqos Yos Nas. Yos Nas nyob hauv tus ntses lub plab tau peb hnub peb hmos. 2 Yos Nas nyob hauv tus ntsev lub plab thov Huab Tais nws tus Tswv Ntuj.
11 Ces Huab Tais thiaj hais kom tus ntses muab Yos Nas ntuav tawm los tso rau saum nruab nqhuab.

NPN:        YOS NAS  2:   3, 4, 5, 8

Txais: (7) Huab Tais, koj npo kuv tawm ntawm lub qhov ntuj los.

Nyob hauv kuv txoj kev txom nyem,
kuv quaj hu HUAB TAIS, nws teb kuv.
Nyob hauv ntuj txias teb tsaus lub plab,
kuv thov kom pab, koj hnov kuv lub suab.

Txais: (7) Huab Tais, koj npo kuv tawm ntawm lub qhov ntuj los.

Koj muab kuv pov rau puag hauv qab tiv txwv,
Puag hauv plawv nruab hiav txwv
Dej nphau nphwv tej niag twv los vov kuv tas.

Txais: (7) Huab Tais, koj npo kuv tawm ntawm lub qhov ntuj los.

Kuv thiaj hais tias kuv nyob deb ntawm
koj lub ntsej muag lawm !
Li ntawd los kuv tseem yuav rov tig
mus saib koj lub Tuam Tsev Ntshiab

Txais: (7) Huab Tais, koj npo kuv tawm ntawm lub qhov ntuj los.

Thaum kuv tus plig twb tsis nco qab hauv kuv lawm,
kuv nco dheev txog kuv tus HUAB TAIS,
ces kuv zaj thov Ntuj nce tuaj txog koj
nyob hauv koj lub Tuam Tsev Ntshiab.

Txais: (7) Huab Tais, koj npo kuv tawm ntawm lub qhov ntuj los.

As Les Lus Yas:        ZAM  13:   34

Txais: As les lus yas, as les lus yas.

Kuv muab ib lo lus qhia tshiab rau nej tias:
nej yuav tsum sib nyiam sib hlub ib yam li kuv tau nyiam tau hlub nej.

Txais: As les lus yas, as les lus yas.

Ntawv Moo Zoo:        LK  10:   25-37

25 Lub sij hawm ntawd, ib tug Kws Lij Choj sawv, nws xav sim Yes Xus ces nws nug tias : "Xib Hwb, kuv yuav ua dab tsi thiaj tau txais txoj sia nyob mus li los ua kuv lub cuab tam ?" 26 Yes Xus hais rau nws tias : "Nyob hauv Txoj Cai muaj dab tsi sau tseg ? Koj nyeem hais dab tsi ?” 27 Tus Kws Lij Choj teb tias : "Koj yuav nyiam Huab Tais koj tus Tswv Ntuj, tas koj siab ntsws, tas koj ntsuj plig, tas koj lub zog, tas koj lub tswv yim, thiab koj yuav nyiam tus nyob ze koj ib yam li koj nyiam koj.” 28 Yes Xus hais rau nws tias : "Koj teb raug lawm. Koj ua li ntawd, koj yuav muaj txoj sia." 29 Tab sis tus Kws Lij Choj xav cav kom nws yog tus hais yog, ces nws hais rau Yes Xus tias : "Leej twg yog tus nyob ze kuv ?” 30 Yes Xus thiaj hais ntxiv tias : "Muaj ib tug neeg nqes ntawm Yes Lus Xas Les mus rau nram Yes Lis Kos, nws ntsib ib pab tub sab, lawv muab nws tej ris tsho hle, muab nws ntaus sab sab, ces lawv mus lawv lawm, tso nws tseg tshuav txoj sia xwb. 31 Muaj ib tug Leej Choj taug txoj kev ntawd nqes tuaj tom thawj, nws pom tus raug mob, nws lug kev hla mus lawm. 32 Muaj ib tug Les Vis ho tuaj txog ntawd, nws pom tus raug mob, nws kuj lug kev hla mus lawm. 33 Tab sis ib tug Xas Mas Lias mus tawm rooj tuaj txog ze ntawm tus raug mob, nws pom nws hlub tus raug mob. 34 Nws txav los ntawm tus raug mob, nws hliv roj thiab hliv cawv rau cov qhov txhab, nws muab qhwv rau. Nws tsaws tus raug mob caij nws tus luj, ces nws coj tus raug mob mus txog ib lub tsev txais qhua, nws tu tus raug mob ntawd. 35 Hnub tom qab, nws rho tau ob lub txiaj nyiag rau tus saib lub tsev txais qhua, nws hais tias : ‘Koj tu tus neeg mob no, yog koj siv tshaj lawd, thaum kuv rov qab los, kuv yuav them rov rau koj.’ 36 Raws li koj xav, lawv peb leeg no, leej twg ua tus nyob ze tus neeg uas poob rau hauv tub sab txhais tes ?" 37 Tus Kws Lij Choj hais tias : "Yog tus uas tau khuv leej tus raug mob." Ces Yes Xus hais rau nws tias : "Koj mus, koj yuav ua zoo li ntawd thiab."


*****************************************

TIM 7 LUB 10 HLI

HWM LEEJ NIAM NTAWM TXOJ SAW MAB LIAB

Yog xav xaiv cov zaj nyeem tshwj xeeb rau hnub hwm Leej Niam ntawm txoj Saw Mab Liab raws li nram no los tau:

Zaj Nyeem Ib: ACTS 1: 12-14

Thaum Yes Xus raug nqa mus saum ntuj lawm,
12 cov thwj tim nqes pem lub roob uas hu ua "Txiv Ntoo Roj" rov mus rau Yes Lus Xas Les; lub roob ntawd nyob ze ntawm Yes Lus Xas Les li ncua kev uas lawv taug hnub Xas Npas Tos. 13 Thaum lawv rov los txog hauv nroog lawm, lawv nce mus saum chav tsev siab uas lawv tuaj nyob : muaj Pob Zeb thiab Zam, Yas Kos thiab As Nres, Fis Lis Pos thiab Tos Mas, Npas Tos Los Mas Yos thiab Mas Tais, Yas Kos uas yog As Fas Yos tub, thiab Xis Moos Siab Kub, thiab Yus Das uas yog Yas Kos tub. 14 Tas lawv cov no sawv daws koom ib lub siab kub siab teev ntuj, nrog rau ob peb tug poj niam thiab nrog Mab Liab uas yog Yes Xus niam, thiab nrog Yes Xus cov kwv tij.

NPN: LK 1: 46-47, 48-49, 50-51, 52-53, 54-55

Txais: (49) Tus Muaj Hwj Huam tau ua tej yam loj rau kuv, nws lub npe Ntshiab.
Los: Nkauj tsim txiaj Mab Liab tus hmoov zoo, koj tau nqa Leej Txiv nyob mus li Leej Tub.

"Kuv tus plig cav txog Huab Tais lub hwj chim loj,
kuv lub tswv yim hom khaj nyob hauv Tswv Ntuj, tus Cawm kuv.”

Txais: (49) Tus Muaj Hwj Huam tau ua tej yam loj rau kuv, nws lub npe ntshiab.
Los: Nkauj tsim txiaj Mab Liab tus hmoov zoo, koj tau nqa Leej Txiv nyob mus li Leej Tub.

“Vim nws tau dauv muag los ntsia nws tus ntxhais txib tsis muaj tsim;
Txij no mus, txhua tiam neeg yuav hais tias kuv txoj hmoov zoo;
Tus Muaj Hwj Huam tau ua tej yam loj rau kuv, nws lub npe ntshiab.

Txais: (49) Tus Muaj Hwj Huam tau ua tej yam loj rau kuv, nws lub npe Ntshiab.
Los: Nkauj tsim txiaj Mab Liab tus hmoov zoo, koj tau nqa Leej Txiv nyob mus li Leej Tub.

“Nws lub siab hlub roos cov neeg hwm nws tiam dhau tiam.
Nws sab npab nthuav nws lub zog rau sawv daws pom.
Cov neeg uas lub siab muab hlob, nws ua kom lawv sib tawg tas.”

Txais: (49) Tus Muaj Hwj Huam ua tej yam loj rau kuv, nws lub npe Ntshiab.
Los: Nkauj tsim txiaj Mab Liab tus hmoov zoo, koj tau nqa Leej Txiv nyob mus li Leej Tub.

“Huab Tais txo cov muaj hwj chim kom poob ntawm lawv lub theej kiab.
Nws tsa cov neeg hauv txheej qis kom siab.
Nws pub tej yam zoo rau cov neeg tshaib noj seem noj so,
nws ntiab cov neeg muaj rov qab mus tes qhuav nquas.”

Txais: (49) Tus Muaj Hwj Huam ua tej yam loj rau kuv, nws lub npe Ntshiab.
Los: Nkauj tsim txiaj Mab Liab tus hmoov zoo, koj tau nqa Leej Txiv nyob mus li Leej Tub.

Huab Tais tuaj pab nws tus tub txib His Xas Lais,
vim nws nco ntsoov tias nws tau cog yuav hlub lawv,
nws tau cog lus li ntawd rau peb cov yawg koob,
rau Has Nplas Has thiab Has Nplas Has
cov xeeb leej xeeb ntxwv mus li ib txhiab ib txhis."

Txais: (49) Tus Muaj Hwj Huam ua tej yam loj rau kuv, nws lub npe Ntshiab.
Los: Nkauj tsim txiaj Mab Liab tus hmoov zoo, koj tau nqa Leej Txiv nyob mus li Leej Tub..

As Les Lus Yas: LK 1: 28

Txais: As les lus yas, As les lus yas.

Koj nyob zoo, Mab Liab, koj tau txiaj ntsim puv siab,
Huab Tais Ntuj nrog koj nyob;
koj tau koob tau hmoov tshaj ib tsoom poj niam tib si.

Txais: As les lus yas, As les lus yas.

Ntawv Moo Zoo: LK 1: 26-38

26 Thaum Es Lis Xas Npes xeeb tub tau rau hli lawm, Tswv Ntuj xa tus Tshiab Nkas Nplias mus cuag ib tug ntxhais hauv ib lub zos nyob Nkas Lis Lais teb, hu ua zos Nas Xas Les. 27 Tus ntxhais ntawd, lawv muab qhaib rau ib tug txiv neej hu ua Yos Xes, xeem Das Vis lawm. Hos tus ntxhais lub npe hu ua Mab Liab. 28 Tus Tshiab chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! Huab Tais nrog koj nyob." 29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. 30 Tus Tshiab hais rau Mab Liab tias : "Mab Liab, koj tsis txhob ntshai. Tswv Ntuj saib koj ntxim Tswv Ntuj siab. 31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. 32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws zaum. 33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg." 34 Mab Liab hais rau tus Tshiab tias : "Qhov ntawd yuav muaj tau zoo li cas, vim kuv tsis paub ib tug txiv neej?" 35 Tus Tshiab teb rau Mab Liab tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. 36 Saib ! Es Lis Xas Npes, tus uas txheeb koj, luag hu nws ua pog khab seeb, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau." 38 Ces Mab Liab hais tias : "Kuv yog Huab Tais tus ntxhais txib. Kuv xav kom muaj rau kuv raws li koj hais." Tus Tshiab thiaj ncaim mus tso Mab Liab tseg.

TIM 8 LUB 10 HLI 2019

Hnub Peb Lis Piam Nees Nkaum Xya Nruab Xyoo C Nruab Lis Piam Xyoo I

Zaj Nyeem Ib: YOS NAS 3: 1–10

1 HUAB TAIS lo lus nrov tuaj rau Yos Nas zaum ob tias : 2 "Koj sawv, koj yuav mus kom txog lub tuam tsheej Nis Nis Vas thiab koj yuav qhia tej lus uas kuv yuav hais rau koj rau lawv." 3 Ces Yos Nas sawv los npaj, thiab nws sawv kev mus rau Nis Nis Vas raws li Huab Tais hais. Lub tsheej Nis Nis Vas yog ib lub tsheej loj dav kawg nkaus, yuav mus li peb hnub ke thiaj hla dhau lub tsheej. 4 Yos Nas pib nkag mus hla hauv lub nroog, nws mus li ib hnub ke, ke mys ke qw hais rau lawv tias : "Tshuav plaub caug hnub ntxiv xwb mas lub tsheej Nis Nis Vas yuav tawg tas." 5 Ces cov neeg nyob Nis Nis Vas ntseeg Tswv Ntuj, lawv ceeb toom rau tsoom sid tias kom sawv daws ua kev yoo mov, thiab kom tas sawv daws npua ntaub tsaj, tsis hais tus hlob los tus yau li."
6 Thaum tus vaj kav Nis Nis Vas tau hnov cov lus ntawd, nws sawv ntawm nws lub theej kiab mus, nws hle nws tej ris tsho tseg, nws muab ntaub tsaj los npua, nws mus zaum hauv qhov tshauv. 7 Ces nws kom lawv tshaj ib lo lus ceeb toom los ntawm tus vaj thiab nws cov tub nom tub tswv los, nyob txhua qhov hauv lub tsheej Nis Nis Vas tias : "Tej neeg, tej tsiaj txhu, tsis hais nyuj yaj los qaib npua, sawv daws yuav tsis txhob noj dab tsi li, tsis noj txhiam xws tsis haus dej li. 8 Tsis hais tus neeg los tus tsiaj, yuav tsum npua ntaub tsaj thiab yuav siv zog hu txog Tswv Ntuj tas zog. Nyias yuav tso nyias txoj kev phem pov tseg thiab tso txoj kev ua txhaum ntawm nyias txhais tes tseg. 9 Ces nyaj tej zaud Tswv Ntuj siab yuav nqig, nws yuav tso nws txoj kev npau taws tseg, ces peb sawv daws yuav tsis tuag."
10 Thaum Tswv Ntuj pom qhov cov neeg nyob Nis Nis Vas tau ua, lawv muab siab rau tso txoj kev txhaum tseg, ces Tswv Ntuj thim nws txoj kev xav ua phem rau lawv, nws tsis ua raws li nws tau npaj.

NPN 130: 1B-2, 3-4AB, 7-8

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Kuv nyob hauv qab tiv txwv hu txog koj, HUAB TAIS,
HUAB TAIS, thov koj mloog kuv lub suab!
Thov koj cuab pob ntseg mloog kuv lo lus thov koj.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

HUAB TAIS, yog koj cim ntsoov peb cov txhaum
leej twg thiaj yuav nyob taus?
Tab sis nyob ntawm koj muaj kev zam txhaum,
kom sawv daws hwm koj.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

His Xas Lais, koj yuav tos ntsoov HUAB TAIS,
Vim nyob ntawm HUAB TAIS muaj txoj kev ua siab zoo,
thiab nyob ntawm nws muaj txoj kev cawm nplua mias;
nws yuav cawm His Xas Lais ntawm tas lawv tej kev txhaum.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

As Les Lus Yas: LK 11: 28

Txais: As les lus yas, as les lus yas.

Cov muaj hmoov zoo yog cov uas mloog
Tswv Ntuj Lo Lus thiab ua raws li ntawd,

Txais: As les lus yas, as les lus yas.

Ntawv Moo Zoo: LK 10: 38-42

38 Thaum lawv taug kev, Yes Xus nkag mus hauv ib lub zos. Muaj ib tug poj niam hu ua Mas Tas txais Yes Xus los hauv nws tsev.
39 Tus poj niam ntawd muaj ib tug niam hluas hu ua Mab Liab uas los zaum ntawm Huab Tais ko taw, mloog ntsoov Huab Tais hais lus.
40 Hos Mas Tas rau siab ntso lis ntau yam qav num tos txais qhua. Ces Mas Tas los hais rau Yes Xus tias : "Huab Tais, koj tsis quav ntsej tias kuv tus niam hluas cia kuv tib leeg lis qav lis num tos txais qhua xwb lod ? Koj hais kom nws pab kuv thiab mas !"
41 Tab sis Huab Tais teb rau Mas Tas tias : "Mas Tas, Mas Tas, koj txhawj thiab ua siab fab rau ntau yam,
42 tab sis tsuas muaj ib yam xwb uas yuav tsum ua. Mab Liab xaiv tau yam zoo tshaj lawm, yuav tsis txhob muab tshem ntawm nws mus."