Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

ZOS ROOB NYUJ QUS 1956 NTAWV HMOOB THOOB TEB LUB HAUV PAUS.

Gallery


UA KOOB TSHEEJ YES XUS YUG LOS XYOO 2018 - Page 2 Empty

Latest topics

» UA KOOB TSHEEJ YES XUS YUG LOS XYOO 2018
by Mim Yesterday at 11:47 am

» XH. Yaj Zoov Ntxheb lub Tsev THOOB TSIB
by Maiv Tooj Yesterday at 6:33 am

» XH.Zoov Ntxheb Yaj Nthuav Ntawv Ntshiab.
by NrhiavTswvNtuj Yesterday at 6:26 am

» COV ZAJ NYEEM HNUB CHIV 2018-2019 xyoo C
by NrhiavTswvNtuj Yesterday at 5:30 am

» Qhia Ntuj Kev Cai.
by Maiv Tooj 5th August 2019, 12:16 am

» Xov Tooj Cua Zoo Tswv Zov Yaj
by Maiv Tooj 22nd July 2019, 7:39 pm

» Txhob poob siab
by Mim 12th July 2019, 5:24 am

» Hlawv xyab hlawv ntawv rau cov Tuag puas tau ?
by Maiv Tooj 1st July 2019, 5:08 pm

» IB TUG TXIV PLIG NCAIM NTIAJ TEB SAUM HUAB CUA...
by Mim 1st July 2019, 3:20 am

» TP.Txhiaj Foom
by Maiv Tooj 14th June 2019, 6:17 am

» Leej Ntshiab Anthony of Padua
by Maiv Tooj 13th June 2019, 12:59 am

» KEV THOOB TSIB & ZAJ NKAUJ SEEV
by Maiv Tooj 16th May 2019, 10:10 pm

Suav neeg tuaj saib, txij hnub 17/09/2010 los mus.


    UA KOOB TSHEEJ YES XUS YUG LOS XYOO 2018

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 18th January 2019, 4:00 am

    TIM 19 LUB 1 HLIS 2019

    Hnub Xya Lis Piam Ib Nruab Xyoo C Nruab Lis Piam Xyoo I

    Zaj Nyeem Ib: HES NPLAWS 4: 12-16


    12 Tswv Ntuj lo lus muaj sia, nws ua tau hauj lwm, nws ntse dua ib rab ntaj ob sab ntse, nws txeem mus tau hauv kis uas cais tus ntsuj plig ntawm lub tswv yim, thiab kis uas cais cov pob qij txha ntawm cov hlwb txha; thiab nws txawj nyeem tau tej zaj tswv yim thiab tej txoj kev xav nyob hauv neeg nruab siab. 13 Tsis muaj ib yam Ntuj tsim los uas Tswv Ntuj lo lus pom tsis tau, txhua yam liab qab thiab qhib lug nyob ntawm nws xub ntiag. Nws yog tus uas peb yuav tsum teb rau nws txog txhua yam.
    14 Vim peb muaj ib tug Tuam Leej Choj ua vaj ntxwv, nws tau hla dhau yim txheej cuaj txheej ntuj tuaj, yog Tswv Ntuj leej Tub Yes Xus, mas peb yuav tsum tuav rawv peb txoj kev ntseeg kom ruaj nreb khov kho. 15 Peb tsis muaj ib tug Tuam Leej Choj uas tsis txawj hlub peb cov neeg zog me, rau qhov nws tau raug txoj kev sim siab txhij txhua ib yam nkaus li peb, tsuas tshuav kiag txoj kev txhaum xwb. 16 Li ntawd peb kav tsij tso siab lug mus kom txog lub theej kiab muaj txiaj ntsim, kom peb tau txais kev khuv leej, thiab lub txiaj ntsim zoo los pab peb.

    NPN 19: 8, 9, 10, 15

    Txais: (Zam 6:63c) Huab Tais, koj cov lus yog ntsuj plig thiab yog txoj sia.

    HUAB TAIS txoj cai zoo tas nrho,
    ua tau kom tus ntsuj plig ciaj tuaj;
    HUAB TAIS cov cai lij choj tsim nyog mloog,
    ua tau kom tus neeg tsis ntse thoob tsib tuaj.

    Txais: (Zam 6:63c) Huab Tais, koj cov lus yog ntsuj plig thiab yog txoj sia.

    HUAB TAIS cov cai lij choj ncaj ncees,
    ua tau kom lub siab zoo hlo ;
    HUAB TAIS lo lus qhia meej kawg,
    ua tau kom qhov muag pom kev.

    Txais: (Zam 6:63c) Huab Tais, koj cov lus yog ntsuj plig thiab yog txoj sia.

    Txoj kev hwm HUAB TAIS yog kev ntshiab,
    yog txoj yuav nyob mus li;
    HUAB TAIS cov txhooj yog qhov tseeb,
    tas nrho nws cov txhooj yeej ncaj ncees.

    Txais: (Zam 6:63c) Huab Tais, koj cov lus yog ntsuj plig thiab yog txoj sia.

    Thov kom cov lus kuv lub ncauj hais thiab tej yam
    kuv lub siab xav tau zoo raws li koj nyiam,
    HUAB TAIS, kuv lub tsua thiab tus cawm kuv.

    Txais: (Zam 6:63c) Huab Tais, koj cov lus yog ntsuj plig thiab yog txoj sia.

    As Les Lus Yas: LK 4: 18

    Txais: As les lus yas, as les lus yas.

    Huab Tais xa kuv tuaj kom coj lub moo zoo tuaj rau cov pluag
    thiab tshaj kev twj lij rau cov kaw nyob hauv tsev loj faj.

    Txais: As les lus yas, as les lus yas.

    Ntawv Moo Zoo: MK 2: 13-17

    13 Yes Xus rov qab tawm mus taug ntug dej ntuj, tas tsoom sid tuaj ntsauv nws, ces nws qhuab qhia lawv. 14 Thaum Yes Xus taug kev, nws pom Les Vis, uas yog As Fas Yos tub, zaum ntawm rooj sau se, ces Yes Xus hais rau Les Vis tias : "Koj los raws kuv." Les Vis sawv tsees, nws raws Yes Xus mus. 15 Thaum Yes Xus pw zaum noj mov hauv Les Vis tsev, mas muaj ib co sau se thiab ib co neeg txhaum coob nrog Yes Xus thiab cov thwj tim pw zaum noj mov : vim muaj cov sau se thiab cov neeg txhaum coob raws Yes Xus. 16 Cov kws Ntawv Ntshiab uas yog ib co Fas Lis Xais pom Yes Xus nrog cov neeg txhaum thiab cov sau se noj mov, lawv hais rau cov thwj tim tias : "Vim li cas nws nrog cov sau se thiab cov neeg txhaum noj mov ?" 17 Yes Xus hnov, nws hais rau lawv tias : "Tsis yog cov neeg noj qab nyob zoo thiaj yuav vam txog kws kho mob, tiam sis yog cov neeg muaj mob. Kuv tsis yog tuaj hu ib co neeg ncaj, kuv tuaj hu ib co neeg txhaum."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 20th January 2019, 8:31 am

    TIM      21      LUB      1      HLIS      2019

    Hnub Ob Lis Piam Ob Nruab Xyoo C Nruab Lis Piam Xyoo I

    Hwm LN Agnes, Nkauj Xwb tuag ua Tim Khawv

    Zaj Nyeem Ib:       HES NPLAWS  5:   1-10


    Cov kwv tij:
    1 Txhua tus Tuam Leej Choj yog muab hauv zeej tsoom los tsa ua tus sawv tib neeg chaw nyob ntawm lawv txoj kev fim Tswv Ntuj, kom nws ua tus cev paj tshab thiab txi Ntuj them txim txhaum. 2 Nws yog tus txawj to taub cov neeg tsis paub dab tsi thiab cov neeg yuam kev, vim tias nws kuj txawj ua txhaum ib yam nkaus li lawv thiab. 3 Vim nws txawj ua txhaum, mas nws yuav tsum ua thaj txi Ntuj them nws cov txhaum, ib yam li nws txi Ntuj them tsoom sid cov txhaum. 4 Tsis muaj leej twg yuav rov muab nws tsa ua leej choj tau, yog Tswv Ntuj hu nws mas nws thiaj ua leej choj tau, ib yam li Tswv Ntuj tau hu As Loos. 5 Leej Pleev los kuj ib yam, nws tsis tau rov muab hwj chim rau nws tus kheej kom nws raug tsa ua Tuam Leej Choj, nws txais lub hwj chim ntawd ntawm tus hais rau nws tias : “Koj yog kuv Leej Tub: Hnub no, kuv tau yug koj los.” 6 Tswv Ntuj tseem hais nyob lwm qhov tias : “Koj ua leej choj mus ib txhiab ib txhis, raws li Mes Kis Xes Des txoj cai.” 7 Thaum Leej Pleev tseem nyob hauv nws lub cev nqaij, nws tau teev ntuj thov tus muaj peev xwm cawm tau nws ntawm txoj kev tuag, nws tau tsa suab quaj qw los kua muag cev nws tus kheej kom tau ua raws li txoj kev mloog lus, ces Tswv Ntuj mloog nws tej lus thov. 8 Ces txawm tias nws yog tus tub cag, tsis kav nws yuav tsum kawm txoj kev mloog lus nyob hauv txoj kev raug txom nyem. 9 Thaum Leej Pleev ua tas txhua yam zoo txhij zoo txhua lawm, nws yog lub hauv paus uas pub txoj kev cawm nyob mus li rau cov neeg mloog nws lus. 10 Vim tias Tswv Ntuj tsa nws ua Tuam Leej Choj raws li Mes Kis Xes Des txoj cai.

    NPN       110:   1, 2, 3, 4

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

    HUAB TAIS hais rau kuv tus Huab Tais tias: “Koj zaum ntawm kuv sab xis
    mus txog thaum kuv muab koj cov yeeb ncuab ua rooj rau koj tiag taw.”

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke. .

    HUAB TAIS yuav ua kom koj tus cwj ua vaj muaj hwj chim
    nthuav mus deb txij ntawm Xis Yoos mus:
    Koj yuav ua vaj nyob nruab nrab hauv koj cov yeeb ncuab.

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

    Koj tau lub hwj chim ua vaj ua koj tug txij hnub koj yug los,
    yog lub hwj chim ntshiab ci ntsa iab,
    Ua ntej lub hnub qub sawv ntxov,
    zoo li cov lwg, kuv tau yug koj los.

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

    HUAB TAIS tau cog lus lawm, nws yuav tsis thim nws lo lus tias:
    “Koj ua leej choj mus ib txhis raws li Mes Kis Xes Des txoj cai.”

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

    As Les Lus Yas:       HES NPLAWS  4:   12

    Txais: As les lus yas, as les lus yas.

    Tswv Ntuj lo lus muaj sia thiab ua tau hauj lwm,
    nws txawj tsom tau tej zaj tswv yim thiab
    tej zaj kev xav nyob hauv neeg nruab siab.

    Txais: As les lus yas, as les lus yas.

    Ntawv Moo Zoo:       MK  2:   18-22

    18 Zam cov thwj tim thiab cov Fas Lis Xais ua kam cov kab ke yoo mov, ces muaj neeg tuaj hais rau Yes Xus tias : "Vim li cas Zam cov thwj tim thiab cov Fas Lis Xais yoo mov, hos koj cov thwj tim tsis yoo ?"
    19 Yes Xus hais rau lawv tias : “Thaum nraug vauv tseem nrog nws cov kwv luag nyob, lawv puas yoo mov tau ? Thaum lub caij lawv tseem muaj nraug vauv nrog lawv, mas lawv yoo tsis tau.
    20 Tab sis, muaj ib hnub luag yuav coj nraug vauv ntawm lawv mus, ces hnub ntawd lawv yuav yoo mov.
    21 Tsis muaj leej twg yuav ntxiv ib daig ntaub tshiab uas tsis tau nqws rau lub khaub tsho, vim daim ntaub tshiab yuav rub daim qub, ces haj yam yuav ntuag loj.
    22 Kuj tsis muaj leej twg ntim cawv tshiab rau hauv ib co hnab tawv qub ; vim cov cawv yuav ua cov hnab tawv qub tawg, ces cawv yuav txeej tas, hos cov hnab tawv los kuj yuav puas tas. Vim li ntawd cawv tshiab mas yuav ntim rau cov hnab tawv tshiab.”



    Last edited by Mim on 22nd January 2019, 6:01 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 21st January 2019, 4:40 am

    TIM      22      LUB      1      HLIS       2019

    Hnub Peb Lis Piam Ob Nruab Xyoo A Nruab Lis Piam Xyoo I

    Hnub thov ntuj pab kom muaj txoj cai txwv tsis pub rho me nyuam hauv plab

    Zaj Nyeem Ib:      HES NPLAWS  6:   10-20


    Cov kwv tij:
    10 Tswv Ntuj tsis yog ib tug siab tsis ncaj ncees, uas yuav cia li tsis nco qab nej tej hauj lwm thiab nej txoj kev nyiam luag vim nws lub npe, thaum nej tau pab thiab nej tseem niaj hnub pab cov ntshiab.
    11 Peb xav kom nej txhua leej muaj lub siab kub lug ua kom txoj kev tso siab tsuas muaj tawg paj txi txiv mus txog hnub kawg xwb,
    12 kom nej tsis txhob ua ib co neeg nkees qaug zog, tiam sis kom nej yoog raws cov uas lawv ntseeg thiab ua lub siab ntev tsis tso tseg, ces lawv tau txais lub cuab tam raws li txoj kev cog lus.
    13 Thaum Tswv Ntuj cog lus rau Has Nplas Has, nws tuav tsis tau ib tug loj dua nws lub npe, ces nws rov tuav nws lub npe los cog lus,
    14 nws hais tias: “Kuv yuav foom hmoov zoo rau koj, thiab kuv yuav ua kom koj huam vam coob tas nrho.”
    15 Vim Has Nplas Has tau ua lub siab ntev tsis tso tseg, mas nws thiaj tau txais raws li Tswv Ntuj cog lus.
    16 Tej tib neeg cog lus, mas lawv tuav txog ib tug loj dua lawv lub npe los cog lus, thiab lawv muaj pov thawj cia, kom txhob muaj chaw sib cav sib hais.
    17 Yog li ntawd, Tswv Ntuj xav kom cov yuav txais lub cuab tam paub tias nws lo lus yeej tsis hloov li, mas nws thiaj tau siv txoj kev twv ntuj los cog lus.
    18 Kom nyob hauv ob qho ruaj uas hloov tsis tau no, uas Tswv Ntuj dag tsis tau, peb cov uas tau tso puas tsav yam tseg muaj kev tso siab lug, kom peb tuav ruaj ruaj txoj kev tso siab uas Ntuj cev los rau peb.
    19 Txoj kev tso siab ntawd yog zoo li ib tug nqe lauj nkoj ruaj thiab khov peb muaj los tuav peb tus plig kom nyob tus, nws txeem tau mus dhau daim ntaub thaiv kem ntshiab mus rau sab hauv.  
    20 Yes Xus yog thawj tug ua peb ntej nkag mus nyob rau hauv lawm, vim nws ua Tuam Leej Choj mus li, raws nraim Mes Kis Xes Des txoj cai.

    NPN      111:   1-2, 4-5, 9+10C

    Txais:  (5) Huab Tais yuav nco ntsoov nws lo lus nws tau cog mus tas ib txhis.
      los:  As les lus yas.

    Kuv yuav ua HUAB TAIS tsaug tas kuv lub siab lub ntsws
    thaum kuv nrog tsoom neeg siab ncaj ua ib pab thiab ua lub txoos.  
    HUAB TAIS cov hauj lwm loj tas nrho,        
    zoo ntxim siab kawg nkaus.      

    Txais:  (5) Huab Tais yuav nco ntsoov nws lo lus nws tau cog mus tas ib txhis.
      los:  As les lus yas.

    Nws cov hauj lwm txaus qhuas ua kom nws nto moo lug;
    HUAB TAIS muaj lub siab zoo thiab khuv leej neeg.      
    Nws muab txhiam xws rau cov hwm nws tau noj,
    nws yuav nco ntsoov mus li txog tias nws tau cog lus.      

    Txais:  (5) Huab Tais yuav nco ntsoov nws lo lus nws tau cog mus tas ib txhis.
      los:  As les lus yas.

    Nws tau xa kev cawm tuaj rau nws haiv neeg,    
    nws yuav tsis hloov nws lo lus tas mus li ib txhis;
    nws lub npe ntshiab thiab loj tas nrho.      
    Nws lub koob meej yuav nyob mus li ib txhis.     .

    Txais:  (5) Huab Tais yuav nco ntsoov nws lo lus nws tau cog mus tas ib txhis.
      los:  As les lus yas.

    As Les Lus Yas:       ES FES XOS  1:   17-18

    Txais:   As les lus yas, as les lus yas.

    Thov kom peb tus Huab Tais Yes Xus Pleev leej Txiv          
    qhib peb lub qhov muag hauv peb nruab siab kom pom kev,    
    kom peb thiaj paub txog tias thaum peb muaj kev tso siab
    yuav tau dab tsi yog peb mloog Tswv Ntuj hu peb.  
       
    Txais:   As les lus yas, as les lus yas.

    Ntawv Moo Zoo:       MK  2:   23-28

    23 Muaj ib zaug, yog hnub Xas Npas Tos, Yes Xus hla ib thaj teb, nws cov thwj tim txawm fawb ib txoj kev taug, thiab lawv pib de tej hnab nplej.
    24 Cov Fas Lis Xais hais rau Yes Xus tias : "Saib ! Vim li cas lawv ua tej yam txwv tsis pub ua hnub Xas Npas Tod ?" 25 Yes Xus hais rau lawv tias : "Nej tsis tau nyeem ib zaug txog qhov Das Vis tau ua thaum nws tsis muaj dab tsi noj, es nws thiab nws cov kwv luag tshaib plab lod ?
    26 Tias nws nkag mus hauv Tswv Ntuj lub tsev li cas, yog thaum lub caij As Npias Thas ua tuam leej choj, thiab nws noj cov ncuav mov txi Ntuj uas kawg yog cov leej choj thiaj noj tau xwb, thiab nws tseem muab rau nws cov kwv luag noj thiab lod?"  
    27 Ces Yes Xus hais rau lawv tias : "Ntuj tsim hnub Xas Npas Tos rau tib neeg, tsis yog tsim tib neeg rau hnub Xas Npas Tos.  28 Li ntawd neeg Leej Tub kuj yog tswv kav hnub Xas Npas Tos thiab."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 22nd January 2019, 6:20 am

    TIM      23      LUB      1      HLIS      2019

    Hnub  Plaub Lis Piam Ob Nruab Xyoo C Nruab Lis Piam Xyoo I

    Hwm LN Vincent, tuag ua Tim Khawv;  LN Marianne Cope

    Zaj Nyeem Ib:      HES NPLAWS  7:   1-3, 15-17


    1 Mes Kis Xes Des, tus vaj kav Xas Les uas yog Tswv Ntuj nyob siab tus leej choj, nws tuaj ntsib Has Nplas Has thaum Has Nplas Has mus tua yeej cov vaj lawm thiab nws rov los tsev; ces nws foom hmoov zoo rau Has Nplas Has. 2 Has Nplas Has qee ib feem kaum ntawm puas tsav yam nws muaj pub rau Mes Kis Xes Des. Lub npe Mes Kis Xes Des txhais tias ‘Vaj muaj txoj kev ncaj,’ thiab nws kuj ua vaj kav Xas Les, txhais tias tus Vaj muaj kev thaj yeeb!
    3 Nws tsis muaj niam tsis muaj txiv, tsis muaj keeb kwm, nws lub neej tsis muaj hnub pib tsis muaj hnub xaus li, yog  zoo li Tswv Ntuj Leej Tub; nws ua leej choj mus ib txhiab ib txhis.
    15 Tseem muaj ib qho qhia tseeb kawg, li no tias : Yog muaj lwm tus sawv ua leej choj tshiab raws li Mes Kis Xes Des,
    16 mas nws tau ua leej choj tsis yog vim muaj lus qhia tseg tias nyob saum nqaij tawv nws caj ces keeb kwm yeej ua leej choj, tiam sis yog los ntawm lub hwj huam muaj txoj sia uas rhuav tsis tau.
    17 Vim muaj ib lo lus zeem tseeb txog tus ntawd hais tias : “Koj ua leej choj mus li raws nraim Mes Kis Xes Des txoj cai.”  

    NPN     110:   1, 2, 3, 4

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.
    HUAB TAIS hais rau kuv tus Huab Tais tias:
    “Koj zaum ntawm kuv sab xis
    mus txog thaum kuv muab koj cov
    yeeb ncuab ua rooj rau koj tiag taw.”

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

    HUAB TAIS yuav ua kom koj tus cwj ua vaj muaj hwj chim
    nthuav mus deb txij ntawm Xis Yoos mus:
    Koj yuav ua vaj nyob nruab nrab hauv koj cov yeeb ncuab.

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

    Koj tau lub hwj chim ua vaj ua koj tug txij hnub koj yug los,
    yog lub hwj chim ntshiab ci ntsa iab,
    Ua ntej lub hnub qub sawv ntxov,
    zoo li cov lwg, kuv tau yug koj los.
    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

    HUAB TAIS tau cog lus lawm, nws yuav tsis thim nws lo lus tias:
    “Koj ua leej choj mus ib txhis raws li Mes Kis Xes Des txoj cai.”

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

    As Les Lus Yas:       MT  4:   23

    Txais:  As les lus yas, as les lus yas.

    Yes Xus tshaj lub Moo Zoo txog Ntuj lub Ceeb Tsheej  
    thiab nws kho txhua yam mob nyob hauv cov neeg zoo hlo.      

    Txais:  As les lus yas, as les lus yas.

    Ntawv Moo Zoo:      MK  3:   1-6


    1 Yes Xus rov mus hauv ib lub tsev txoos dua. Nyob ntawd, muaj ib tug neeg uas ib sab tes qhuav.
    2 Ces lawv nyas ntshis ntsia saib Yes Xus puas yuav kho tus neeg qhuav tes ntawd hnub Xas Npas Tos, kom lawv tau kev liam rau Yes Xus.
    3 Yes Xus hais rau tus neeg qhuav tes tias : "Koj los sawv hauv nruab nrab."
    4 Thiab Yes Xus hais rau lawv tias : "Hnub Xas Npas Tos, txoj cai puas kheev kom ua qhov zoo los kom ua qhov phem, puas kom cawm ib txog sia los txo ib txog sia ?" Sawv daws nyob ntsiag to.
    5 Yes Xus ntsia ib ncig npau taws vog, nws tu siab vim lawv lub siab txhav qhi, ces nws hais rau tus neeg qhuav tes tias : "Koj xyab tes." Ces nws xyab kiag tes, nws txhais tes rov zoo hlo.
    6 Thaum cov Fas Lis Xais tawm mus, lawv mus nrog cov Hes Los Dias sab laj tam sis ntawd saib yuav ua li cas lawv thiaj ua tau kom Yes Xus ploj mus.



    Last edited by Mim on 25th January 2019, 8:46 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 23rd January 2019, 7:50 am

    TIM      24      LUB      1      HLIS      2019

    Hnub Tsib Lis Piam Ob Nruab Xyoo C Nruab Lis Piam Xyoo I

    Hwm LN Francis de Sales

    Zaj Nyeem Ib:       HES NPLAWS  7:   25—8:6


    7   25 Leej Pleev ua Leej Choj mus li ces nws muaj peev xwm cawm tau tas mus li cov neeg uas vam txog nws kom mus cuag tau Tswv Ntuj, vim nws muaj txoj sia mus li kom nws tau thov Ntuj pab lawv tsis tseg. 26 Yeej tsim nyog kom peb yuav tsum muaj ib tug Thawj Leej Choj zoo li ntawd, ib tug ntshiab huv, tsis muaj chaw xyeej, tsis muaj ib yam tsuas nws, tsis nyob xyaw cov neeg txhaum, nws nyob siab dua cov txheej ntuj saud. 27 Nws tsis tas yuav niaj hnub tua tsiaj txi Ntuj li lwm cov leej choj, kom tau them nws cov txim txhaum, thiab them tsoom pej xeem cov txim txhaum. Nws tsuas txi Ntuj ib zaug xwb, yog thaum nws rov muab nws txi rau Ntuj. 28 Txoj Cai tsa ib co neeg muaj txaug muaj txhaum ua tuam leej choj, tiam sis lo lus twv ntuj los cog, uas los tom qab Txoj Cai, tsa Leej Tub ua tus thawj leej choj mus ib txhiab ib txhis, vim nws tau ua tas txhua yam zoo txhij zoo txhua.
    8   1 Lub ntsiab tseem ceeb uas peb tau hais txog yog qhov tias peb muaj ib tug Thawj Leej Choj zoo tas nro uas mus zaum ntawm tus muaj hwj huam lub theej kiab phab xis nyob saum cov txheej ntuj saud lawm. 2 Nws tuav txoj kab xwm saib Kem Tsev Ntshiab, thiab saib lub tsev tsam phooj, lub tseem, uas yog Tswv Ntuj tsa, tsis yog tib neeg tsa.  3 Txhua tus thawj leej choj mas yog luag tsa los ua tus cev paj tshab thiab txi Ntuj; ua li mas nws yuav tsum muaj tej yam mus txi Ntuj. 4 Yog tias Yes Xus tseem nyob ntiaj teb no, mas nws tsis tau ua leej choj, vim twb muaj cov leej choj txi Ntuj raws Txoj Cai lawm. 5 Cov leej choj no lis txoj kab xwm teev hawm uas yog ib tug piv txwv thiab ib tug qauv duab teev hawm xws li nyob saum ntuj xwb, vim thaum Mais Xes yuav tsa lub tsev tsam phooj, Tswv Ntuj tau qhia nws paub thiab hais rau nws tias : “Koj ntsia, koj yuav ua txhua yam raws li tus piv txwv kuv muab rau koj saib saum lub roob.” 6 Nyem no, Leej Pleev tau txais ib txog kab xwm siab dua, vim nws ua tus cev lus rau ib txog kev cog lus zoo dua, uas txawb rau saum ib co lus khov dua.

    NPN       40:   7-8A, 8B-9, 10, 17

    Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

    Koj tsis ntshaw tsiaj los txhiam xws txi rau koj,
    tiam sis koj muab pob ntseg rau kuv kom kuv txawj mloog lus.
    Koj tsis xav tau tsiaj hlawv txi ntuj los tsiaj hlawv them txim txhaum,  
    kuv thiaj hais tias: “Kuv nyob ntawm no, cia kuv tuaj.”      

    Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

    Nyob hauv kauj ntawv muaj lus hais tseg rau kuv tias:
    “Ua ywj koj siab, kuv tus Tswv Ntuj, yog yam ntxim kuv siab,    
    koj txoj cai nyob rawv hauv kuv nruab plaw!”  

    Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

    Kuv tau tshaj koj txoj kev ncaj rau tsoom neeg coob tuaj sib txoos paub,
    kuv tsis tau kaw kuv lub qhov ncauj, HUAB TAIS, koj yeej paub.      

    Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

    Thov kom txhua leej uas nrhiav koj
    zoo siab hom khaj nyob hauv koj,
    thiab kom cov uas nyiam koj txoj kev cawm
    cav tsis tseg tias: “HUAB TAIS nto koob meej.”

    Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

    As Les Lus Yas:        2 TMT  1:   10

    Txais:  As les lus yas, as les lus yas.

    Peb tus Cawm Seej Yes Xus Pleev twb rhuav txoj kev tuag lawm,      
    thiab nws ua kom txoj sia ci tawm tuaj nyob hauv lub Moo Zoo.                                                              

    Txais:  As les lus yas, as les lus yas.

    Ntawv Moo Zoo:        MK  3:   7-12

    7 Yes Xus nrog nws cov thwj tim mus so nram ntug dej ntuj. Muaj ib pab neeg coob kawg nyob Nkas Lis Lais thiab  nyob Yus Das teb raws nws qab tuaj, 8 Cov nyob Yes Lus Xas Les, nyob Is Dus Mias, nyob sab dej Yos Las Das tim ub, thiab nyob ib ncig Tws Los thiab Xis Doos los tuaj coob kawg tuaj cuag Yes Xus, vim lawv hnov txog tas ib puas tsav yam uas nws ua. 9 Yes Xus hais kom cov thwj tim muab ib lub nkoj me rau nws nyob vim muaj neeg coob dhau, kom lawv txhob tuaj txiv nws. 10 Yes Xus kho ntau leej zoo, ces tas cov neeg uas muaj mob muaj nkeeg sawv daws phoom tas zog kom tau chwv nws. 11 Thaum cov dab tsis huv pom Yes Xus, mas lawv khoov hauv av nyob ntawm nws xub ntiag, lawv qw tias : "Koj yog Tswv Ntuj Leej Tub !" 12 Yes Xus txwv lawv nruj tsis pub lawv hais kom muaj neeg paub txog nws.



    Last edited by Mim on 1st March 2019, 10:21 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 24th January 2019, 1:27 pm

    Tim 25 lub 1 Hlis 2019

    Hnub Rau Lis Piam Ob Nruab Xyoo C Nruab Lis Piam Xyoo I

    Nco txog Hnub LN Paj Lug Tig Los Ntseeg

    Zaj Nyeem Ib: HAUJ LWM 22: 3-16


    3 Paj Lug hais rau cov neeg li no:
    "Kuv yog ib tug Yus Das, kuv yug los nyob Tas Xis, Xis Lis Xias teb. Tab sis kuv tuaj hlob nyob hauv lub tsheej no. Nkas Mas Lias yog kuv tus xib hwb, nws qhia kuv kom ua raws nraim peb cov yawg koob Txoj Cai. Mas kuv yeej kub siab lug rau Tswv Ntuj ib yam li nej nyem no. 4 Kuv tau hiam Txoj Kev no kom txog qhov tuag, kuv tau muab saw hlau los khi poj niam txiv neej huv tib si, thiab coj lawv mus pov rau hauv tsev loj faj. 5 Tus thawj leej choj thiab pab txwj laus tib si puav leej ua tim khawv pom kuv tau ua li ntawd tiag. Kuv tau txais lawv ib co ntawv hais lus cem txog cov kwv tij nyob Das Mas, ces kuv thiaj sawv kev mus lawm tid, kuv npaj siab mus khi cov nyob Das Mas coj los rau txim nyob Yes Lus Xas Les.
    6 Kuv tseem tab tom mus kev, tshuav tsis deb yuav txog Das Mas, thaum ntawd kwv yees tav su lawm, cia li muaj ib qho pom kev ci dawb paug loj loj tuaj saum ntuj tuaj vij kuv. 7 Kuv poob nthav pem teb, kuv hnov ib lub suab hais rau kuv tias : 'Xauv, Xauv, vim li cas koj hiam kuv ?' 8 Kuv teb tias : 'Huab Tais, koj yog leej twg ?' Ces nws teb kuv tias : 'Kuv yog tus Yes Xus Nas Xas Les uas koj hiam.' 9 Cov neeg nrog kuv kuj pom qhov pom kev ci dawb loj loj thiab, tab sis lawv tsis hnov lub suab hais lus rau kuv. 10 Kuv hais tias : 'Huab Tais, kuv yuav tsum ua dab tsi ?' Huab Tais thiaj hais rau kuv tias : 'Koj sawv, koj mus Das Mas. Mus txog tod, mas lawv mam qhia rau koj txog tas puas tsav yam Ntuj yeej npaj rau koj lawm kom koj yuav tsum ua.' 11 Thaum ntawd kuv tsis pom kev kiag li, vim qhov pom kev ci loj ntawd fam kuv qhov muag lawm. Kuv cov neeg thiaj tuav kuv tes, coj kuv mus txog Das Mas.
    12 Muaj ib tug txiv neej hu ua As Nas Nias, nws yog ib tug neeg hwm Ntuj zoo raws li Txoj Cai; cov Yus Das nyob hauv lub tsheej sawv daws hais lus zoo txog nws. 13 Nws tuaj ntsib kuv, nws qhia txog nws rau kuv, ces nws hais tias : 'Xauv, kuv tus kwv, koj rov pom kev mog.' Kuv cia li pom nws tam sim ntawd. 14 Nws hais ntxiv tias : 'Peb cov yawg koob tus Tswv Ntuj yeej ib txwm xaiv koj lawm, kom koj paub nws lub siab nyiam li cas, kom koj pom tus Siab Ncaj, thiab kom koj hnov lub suab tawm hauv nws lub ncauj los. 15 Vim tias koj yuav tsum ua nws tim khawv nyob ntawm tas zeej tsoom xub ntiag txog tej yam koj tau pom thiab tau hnov. 16 Ua li mas koj tseem yuav tos dab tsi ntxiv ? Koj cia li sawv, koj mus txais lub cim ntxuav kom ntxuav koj cov txhaum pov tseg nyob hauv nws lub npe.' ”

    Los: HAUJ LWM 9: 1-22

    1 Ntawm Xauv, mas nws tsuas xav ntsoov txog qhov hiam thiab tua Huab Tais cov thwj tim nkaus xwb, ces nws mus cuag tus thawj leej choj. 2 Nws thov kom tus thawj leej choj muab ntawv rau nws mus Das Mas mus xyuas hauv cov tsev txoos saib puas muaj cov neeg npuab Txoj Kev. Yog muaj, mas nws yuav muab lawv khi cab mus pem Yes Lus Xas Les, tsis hais poj niam los txiv neej li. 3 Thaum nws tab tom taug kev, yuav txog Das Mas, ces ib sij huam, muaj ib qho pom kev ci dawb vog tuaj saum ntuj tuaj ncig nws. 4 Nws ntog rau pem teb, nws hnov ib lub suab hais rau nws tias : "Xauv, Xauv, tim li cas koj hiam kuv?" 5 Xauv teb hais tias : "Huab Tais, koj yog leej twg ?" Lub suab hais tias : "Kuv yog Yes Xus, tus uas koj hiam. 6 Koj sawv, koj mus hauv lub nroog. Yuav muaj neeg qhia koj tias koj yuav tsum ua dab tsi." 7 Cov neeg nrog Xauv taug kev, sawv daws nres tas, lawv ntshai kawg hais tsis taus lus li, lawv kuj hnov lub suab thiab, tab sis tsis pom leej twg li. 8 Xauv sawv hauv av los, nws qhov muag rua pliav, tab sis nws tsis pom kev li. Lawv tuav nws tes coj nws mus hauv lub nroog Das Mas. 9 Nws nyob peb hnub, tsis pom kev, tsis noj tsis haus dab tsi li.
    10 Nyob Das Mas, muaj ib tug thwj tim hu ua As Nas Nias. Huab Tais yees tawm los hais rau nws tias : "As Nas Nias." As Nas Nias teb tias : "Huab Tais, kuv nyob ntawm no." 11 Huab Tais hais rau nws tias : "Koj sawv mus, koj mus tom txoj kev uas hu ua Kev Ncaj, koj mus hauv Yus Das tsev, koj nrhiav ib tug neeg hu ua Xauv nyob Tas Xis tuaj. Tam sim no nws tab tom teev Ntuj. 12 Nws pom ib tug txiv neej hu ua As Nas Nias chaws los tsa tes rau saum nws kom nws rov pom kev tuaj." 13 As Nas Nias teb tias : "Huab Tais, kuv tau hnov ntau leej hais tias tus neeg ntawd ua phem kawg rau koj cov Ntshiab nyob Yes Lus Xas Les. 14 Nws tuaj ntawm no, vim nws tau cai ntawm cov thawj leej choj tuaj khi cov neeg uas hu txog koj lub npe tas huv tib si." 15 Tab sis Huab Tais hais rau As Nas Nias hais tias : "Koj mus, vim tus neeg ntawd yog ib lub twj uas kuv xaiv los coj kuv lub Npe mus rau cov neeg teev pej kum dab, rau cov vaj, thiab rau cov tub ki His Xas Lais. 16 Kuv yuav qhia nws tias nws yuav tsum raug tsim txom npaum li cas vim kuv lub Npe."
    17 As Nas Nias thiaj mus. Nws chaws mus hauv lub tsev ntawd. Nws tsa tes rau saum Xauv, nws hais tias : "Xauv, kuv tus kwv, yog Huab Tais xa kuv tuaj, yog tus Yes Xus uas tau tawm los rau koj pom tom txoj kev uas koj tuaj. Nws xa kuv tuaj kom koj rov qab pom kev, thiab kom koj tau txais Leej Ntuj Plig Ntshiab puv hauv koj.” 18 Tam sim ntawd muaj tej daim zoo li nplai ntses poob ntawm Xauv qhov muag los, ces nws rov qab pom kev. Lawv ua lub cim ntxuav rau nws tam sis ntawd. 19 Nws noj mov, ces nws rov qab muaj zog tuaj. Nws nrog cov thwj tim nyob ob peb hnub hauv Das Mas. 20 Ces tam sis ntawd nws cia li mus nyob hauv cov tsev Txoos, thiab pib qhuab qhia txog Jesus, nws tshaj tawm tias Yes Xus yog Tswv Ntuj Leej Tub. 21 Tas tsoom neeg uas hnov nws, mas lawv poob siab, lawv hais zom zaws tias : "Tus no tsis yog tus uas nyob Yes Lus Xas Les, nws tau hiam cov neeg hu txog lub npe ntawd lod? Tsis yog nws twb txhob txwm tuaj ntawm no kom tau ntes lawv, muab lawv khi, thiab cab lawv mus rau cov thawj leej choj xwb lod?" 22 Hos Xauv, mas nws muaj zog zuj zus tuaj. Nws ua rau cov Yus Das nyob Das Mas xav tsis thoob li, vim nws qhia tseeb hais tias Yes Xus yog Leej Pleev tiag.

    NPN 117: 1BC, 2

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.
    los: As les lus yas.

    Tas ib tsoom kuj cuab, nej cav lus zoo txog HUAB TAIS.
    Tas ib tsoom haiv neeg, nej cav txog nws lub hwj chim.

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.
    los: As les lus yas.

    Vim nws lub siab hlub peb nyob ruaj nreb,
    HUAB TAIS lub siab pheej xeeb mus ib txhiab ib txhis.

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.
    los: As les lus yas.

    As Les Lus Yas: ZAM 15: 16

    Txais: As les lus yas, as les lus yas.

    Huab Tais hais tias: Kuv yog tus xaiv nej hauv lub ntiaj teb los
    thiab xa nej mus kom nej txi ib co txiv uas yuav nyob mus li.

    Txais: As les lus yas, as les lus yas.

    Ntawv Moo Zoo: MK 16: 15-18

    15 Yes Xus hais rau nws cov thwj tim tias : "Nej mus thoob qab ntuj, nej tshaj lub Moo Zoo rau txhua leej txhua tus. 16 Tus twg ntseeg thiab txais lub cim ntxuav, mas nws yuav txais kev cawm, hos tus tsis ntseeg yuav raug txim. 17 Cov cim no yuav nrog nraim cov uas ntseeg : lawv hu txog kuv lub npe ntiab ces dab yuav tawm khiav; lawv yuav hais tej hom lus tshiab; 18 lawv yuav tuav nab tau hauv lawv txhais tes thiab yog lawv haus tshuaj lom neeg, tshuaj yuav tsis ua xwv txheej rau lawv; thaum lawv tsa tes rau saum cov neeg mob, mas cov mob yuav zoo."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 25th January 2019, 8:43 am

    Tim 26 lub 1 Hlis 2019

    Hnub Xya Lis Piam Ob Nruab Xyoo C Nruab Lis Piam Xyoo I

    Hwm LN Tis Mos Tes thiab LN Tis Tos, ua Tswv Qhia

    Zaj Nyeem Ib: 2 TMT 1: 1-8


    1 Kuv, Paj Lug, uas yog Yes Xus Pleev tus Hauv Paus Xa Lus vim Tswv Ntuj pom zoo, raws li txoj kev cog lus yuav pub txoj sia uas nyob hauv Yes Xus Pleev, 2 kuv sau ntawv rau Tis Mos Tes, kuv tus tub zoo nyiam. Thov kom koj tau txais txiaj ntsim, kev khuv leej, thiab kev thaj yeeb tuaj ntawm Leej Txiv Tswv Ntuj thiab ntawm peb tus Huab Tais Yes Xus Pleev tuaj.
    3 Kuv ua Tswv Ntuj tsaug, tus Tswv Ntuj uas kuv muaj ib lub siab dawb paug tsob hwb raws li kuv cov poj yawm ib txwm ua los. Kuv nco txog koj tsis tseg thaum lub caij kuv teev ntuj, nruab hnub los hmo ntuj. 4 Thaum kuv nco txog koj lub kua muag, mas kuv lub siab xav pom koj kawg nkaus kom kuv rov zoo siab. 5 Kuv nco txog txoj kev ntseeg ncaj ncees uas koj tau txais nyob hauv koj, yog txoj kev ntseeg uas tau xub nyob hauv koj pog Laus Is, thiab nyob hauv koj niam Aws Nis lawm, mas kuv tso siab lug tias nws nyob hauv koj thiab. 6 Yog vim li ntawd, kuv thiaj xav hais rau koj tias kom koj nco ntsoov rov ntsaub lub txiaj ntsim uas Tswv Ntuj tso rau hauv koj hnub kuv tau tiag tes rau koj kom rov cig nplaim tuaj . 7 Lub tswv yim uas Tswv Ntuj pub rau peb tsis yog ib lub tswv yim muaj kev ntshai, yog ib lub tswv yim muaj zog, muaj kev nyiam, thiab muaj kev pab yus tswj yus tus kheej. 8 Li ntawd koj yuav tsis txhob txaj muag ua tim khawv txog peb tus Huab Tais, los txaj muag vim kuv uas yog nws tus neeg raug txim. Tiam sis koj yuav zoo siab nrog kuv nyiaj kev txom nyem vim lub Moo Zoo, nyob hauv txoj kev tso siab lug rau Tswv Ntuj lub hwj huam.

    Los: TIS TOS 1: 1-5

    1 Kuv, Paj Lug, Tswv Ntuj tus tub qhe thiab Yes Xus Pleev tus Hauv Paus Xa Lus, kom tau tshaj txoj kev ntseeg rau cov neeg Tswv Ntuj xaiv thiab tshaj kev paub qhov tseeb uas yog kev hwm Ntuj, 2 nyob hauv txoj kev tso siab tias yuav tau txoj sia nyob mus li raws li Tswv Ntuj tus tsis txawj dag tau cog lus puag thaum ntxov ub lawm. 3 Thaum txog lub caij teem, nws tau qhia nws lo lus nyob hauv txoj kev tshaj tawm uas nws tau tso rau kuv ua raws li peb tus Tswv Ntuj cawm seej lo lus txib. 4 Kuv sau ntawv tuaj rau Tis Tos, kuv ib tug tseem tub nyob hauv peb txoj kev ntseeg. Thov kom koj tau txais txiaj ntsim thiab kev thaj yeeb tuaj ntawm Leej Txiv Tswv Ntuj, thiab Yes Xus Pleev, tus cawm peb tuaj.
    5 Tos kuv tau tso koj tseg nyob Khes Tas, yog vim xav kom koj npaj tej yam tsis muaj kom muaj txhij, thiab xav kom koj tsa ib co txwj laus nyob hauv txhua lub nroog, raws li kuv tau qhia koj.

    NPN 96: 1-2A, 2B-3, 7-8A, 10


    Txais: (3) Nej cia li tshaj tswv Ntuj cov hauj lwm loj rau txhua haiv neeg paub.

    Nej hu ib zaj nkauj tshiab rau HUAB TAIS,
    tas ntiaj teb neeg nej hu nkauj rau HUAB TAIS.
    Nej hu nkauj rau HUAB TAIS, nej cav txog nws lub npe.

    Txais: (3) Nej cia li tshaj tswv Ntuj cov hauj lwm loj rau txhua haiv neeg paub.

    Hnub dhau hnub nej tshaj txog nws txoj kev cawm neeg.
    Nej cav txog nws lub koob meej rau cov haiv neeg paub,
    nej cav txog nws cov hauj lwm loj rau txhua xeem neeg hnov.

    Txais: (3) Nej cia li tshaj tswv Ntuj cov hauj lwm loj rau txhua haiv neeg paub.

    Cov yim neeg nyob hauv cov haiv neeg, nej muab rau HUAB TAIS,
    nej muab lub koob meej thiab lo lus qhuas lus cav rau HUAB TAIS
    nej muab rau HUAB TAIS lub koob meej uas phim nws lub npe!

    Txais: (3) Nej cia li tshaj tswv Ntuj cov hauj lwm loj rau txhua haiv neeg paub.

    Nej hais rau cov naiv neeg tias: HUAB TAIS ua vaj.
    Nws tau tsim lub ntiaj teb kom nyob ruaj, muab tshem tsis tau,
    nws tswj cov haiv neeg raws txoj kev ncaj.

    Txais: (3) Nej cia li tshaj tswv Ntuj cov hauj lwm loj rau txhua haiv neeg paub.

    As Les Lus Yas: LK 4: 18

    Txais: As les lus yas, as les lus yas.

    Huab Tais xa kuv tuaj coj lub moo zoo mus rau cov pluag
    Thiab tshaj txoj kev twj lij rau cov neeg nyob txim.

    Txais: As les lus yas, as les lus yas.

    Ntawv Moo Zoo: LK 10: 1-9

    1 Dhau ntawd lawm, Huab Tais tseem xaiv dua xya caum ob leeg, nws xa lawv mus tej pab ob leeg, ua nws ntej mus rau hauv cov nroog thiab tej qhov chaw uas nws yuav mus. 2 Nws hais rau lawv tias : “Qoob loo zoo sau muaj ntau kawg, tab sis cov tub zog muaj tsawg. Nej thov tus tswv qoob kom nws xa ib co tub zog tuaj sau nws cov qoob. 3 Nej mus, kuv xa nej mus zoo li ib co yaj mus nyob nruab nrab hauv ib cov hma. 4 Nej tsis txhob nqa nas nyiaj, txhob ris hnab, txhob rau khau, txhob hais lus hu leej twg ntawm kev. 5 Nej chaws mus hauv lub tsev twg, nej xub hais tias : ‘Kom lub tsev no nyob kaj lug !’ 6 Yog muaj txoj kev kaj lug ib leeg tub nyob ntawd, mas nej txoj kev kaj lug yuav mus nyob saum nws. Yog tsis muaj, mas nej txoj kev kaj lug yuav rov los rau saum nej. 7 Nej nyob hauv lub tsev ntawd, nej noj nej haus tej yam uas lawv muaj hauv tsev, vim tus tub zog tsim nyog txais nqi zog. Nej txhob tawm hauv ib lub tsev mus nyob dua lwm lub. 8 Nej mus hauv lub nroog twg, yog luag txais nej, mas nej noj tej yam uas luag muab rau nej. 9 Nej kho cov neeg mob hauv lub nroog ntawd kom zoo, thiab nej hais rau lawv tias : ‘Tswv Ntuj lub Ceeb Tsheej tuaj txog ze nej lawm.’”

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 27th January 2019, 7:50 am

    TIM 28 LUB 1 HLIS 2019

    Hnub Ob Lis Piam Peb Nruab Xyoo C Nruab Lis Piam Xyoo I

    Hwm LN Thomas Aquinas

    Zaj Nyeem Ib: HES NPLAWS 9: 15, 24-28


    15 Li ntawd Leej Pleev yog tus sawv neeg chaw nyob hauv ib txog kev cog lus tshiab, kom nws txoj kev tuag ua nqi them rau cov txim txhaum neeg tau ua thaum lawv tseem zwm rau txoj kev cog lus qub, ces cov neeg uas Ntuj hu, thiaj yuav tau txais lub cuab tam nyob mus li raws li tau cog lus lawm.
    24 Leej Pleev tsis tau chaws mus hauv ib lub tsev Ntshiab uas yog neeg txhais tes txhim, thiab yog ib lub ua piv txwv txog lub tseem xwb, nws yeej tau mus kiag rau saum ntuj lawm tiag tiag, ces zaum no nws thiaj sawv peb chaw nyob ntawm Tswv Ntuj xub ntiag.
    25 Nws tsis tas yuav rov cev nws rau Ntuj ob peb zaug xws li tus tuam leej choj, uas niaj xyoo yuav tsum chaws mus hauv kem tsev ntshiab, rov mus cev ib co ntshav uas tsis yog nws cov.
    26 Yog tias Leej Pleev ua li ntawd xwb, mas nws yuav tsum tau raug txom nyem ntau ntau zaus txij puag thaum ntuj tsim teb raug los lawm. Tab sis zaum no txog lub zwj ceeb kawg lawm, nws tau tawm los muab nws txi rau Ntuj ib zaug xwb, kom tau rhuav kev txhaum pov tseg.
    27 Ib yam li leej tib neeg tsuas tuag ib zaug xwb, dhau qhov tuag lawm, yog lub caij txiav txim.
    28 Leej Pleev kuj ib yam li ntawd, nws rov muab nws txi rau Ntuj ib zaug xwb, kom nws tau them ib zeej tsoom cov txhaum. Ces nws tseem yuav tawm rov los zaum ob, tsis yog los them txhaum lawm, yog tawm los kom tau muab kev cawm rau cov neeg uas tos ntsoov nws.

    NPN 98: 1, 2-3AB, 3CD-4, 5-6

    Txais: (1a) Nej hu ib zaj nkauj tshiab rau Huab Tais,
    vim nws tau ua tej yam txaus qhuas.

    Nej hu ib zaj nkauj tshiab rau HUAB TAIS
    vim nws tau ua tej yam txaus qhuas;
    nws txhais tes xis tau ua kom nws yeej,
    nws sab npab ntshiab tau ua qhov ntawd.

    Txais: (1a) Nej hu ib zaj nkauj tshiab rau Huab Tais,
    vim nws tau ua tej yam txaus qhuas.

    HUAB TAIS ua kom sawv daws paub txog nws txoj kev cawm,
    nws muab nws txoj kev ncaj rau cov haiv neeg pom.
    Nws rov nco txog nws txoj kev ua zoo rau
    thiab hlub tsev neeg His Xas Lais.

    Txais: (1a) Nej hu ib zaj nkauj tshiab rau Huab Tais,
    vim nws tau ua tej yam txaus qhuas.

    Tas npoo ntuj npoo ntiaj teb tau pom
    peb tus Tswv Ntuj txoj kev cawm neeg.
    Tas txhua teb chaws, nej zoo siab hu nkauj rau HUAB TAIS,
    nej qw suab hu nkauj, nej cav txog nws.

    Txais: (1a) Nej hu ib zaj nkauj tshiab rau Huab Tais,
    vim nws tau ua tej yam txaus qhuas.

    Nej ntaus nkauj nog ncas cav txog Huab Tais,
    nej ntaus nkauj nog ncas nrog tej zaj nkauj zoo mloog.
    Nej tshuab hom ntxuag suab kub nyuj,
    nej hu nkauj zoo siab ntawm peb tus vaj
    Ntawm peb tus HUAB TAIS xub ntiag.

    Txais: (1a) Nej hu ib zaj nkauj tshiab rau Huab Tais,
    vim nws tau ua tej yam txaus qhuas.

    As Les Lus yas: 2 TM 1: 10

    Txais: As les lus yas, as les lus yas.

    Peb tus Cawm Seej Yes Xus Pleev tau rhuav txoj kev tuag pov tseg,
    thiab tau ua kom txoj sia ci tawm tuaj nyob hauv lub Moo Zoo.

    Txais: As les lus yas, as les lus yas.

    Ntawv Moo Zoo: MK 3: 22-30

    22 Cov thoob xwm ntawv nqes pem Yes Lus Xas Les tuaj, hais tias : "Nws raug dab Npes Ntxes Npus lawm,” thiab tseem hais tias: "Nws hu txog tus tuam thawj dab los ntiab dab tawm."
    23 Yes Xus hu lawv los ntawm nws, ces nws ua paj lug hais rau lawv tias : "Xas Tas ua cas thiaj ntiab tau Xas Tas tawd ?
    24 Yog ib lub teb chaws rov ua kom nws sib tawg, mas lub teb chaws ntawd yuav nyob tsis ruaj.
    25 Yog ib tse neeg rov ua kom nws sib tawg, mas tsev neeg ntawd yuav nyob tsis taus li.
    26 Yog Xas Tas rov sawv tiv Xas Tas, mas nws yuav tawg tas yuav nyob tsis taus ntxiv, nws yuav muaj hnub tag xwb.
    27 Tsis muaj leej twg nkag tau mus hauv tus neeg muaj zog lub tsev mus lwg nws lub cuab tam, yog tsis xub muab tus neeg muaj zog khi tso, ces nws mam mus lwg tus muaj zog lub tsev.
    28 Kuv hais tseeb rau nej, Ntuj yuav zam ib puas tsav yam txhaum rau neeg tej tub ki, tsis hais lawv tej txhaum los tej lus thuam Ntuj lawv tau tsawm.
    29 Tab sis tus twg thuam Leej Ntuj Plig Ntshiab, mas Ntuj yuav tsis zam rau nws tas mus ib txhis li, vim nws tau ua ib qho txhaum nyob mus li."
    30 Vim lawv hais tias : "Nws raug ib tug dab tsis huv."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 28th January 2019, 9:38 am

    TIM 29 LUB 1 HLIS 2019

    Hnub Peb Lis Piam Peb Nruab Xyoo C Nruab Lis Piam Xyoo I

    Zaj Nyeem Ib: HES NPLAWS 10: 1-10


    Cov kwv tij,
    1 Vim Txoj Cai tsuas yog tus duab zeem txog tej yam zoo uas yuav muaj tuaj yav pem suab xwb, tsis yog kiag tej yam zoo ntawd, mas Txoj Cai thiaj ua tsis tau kom cov neeg uas tuaj txi Ntuj tas mus li dawb huv tas nrho, txawm tias lawv niaj xyoo txi Ntuj raws nraim li qub li lawv ib txwm ua xyoo dhau xyoo los lawm. 2 Yog tias Txoj Cai ua tau kom neeg dawb huv, mas lawv yuav tsis tas txi Ntuj ntxiv lawm puas yog? Vim tias lawv txi ib zaug Ntuj ua kom lawv dawb huv lawm ces lawv lub siab yuav tsis pom ntxiv tias lawv muaj txhaum lawm. 3 Tiam sis niaj xyoo thaum lawv txi Ntuj mas tsuas yog ua kom lawv rov nco txog lawv cov txhaum xwb. 4 Vim ntshav nyuj ntshav tshis tsis muaj hwj huam daws txhaum tau. 5 Vim li ntawd, thaum Leej Pleev los nyob ntiaj teb no, nws thiaj hais tias : “Cov thaj txi Ntuj thiab cov paj tshab, koj tsis xav yuav, koj thiaj puab ib lub cev rau kuv. 6 Cov thaj hlawv tsiaj thiab cov thaj txi Ntuj them txim txhaum, koj tsis zoo siab txais. 7 Kuv thiaj hais tias : ‘Tswv Ntuj, cia kuv tuaj, vim tias qhov uas ntawv tau sau tseg yog sau hais txog kuv, cia kuv tuaj ua raws li koj nyiam.’ ” 8 Nws tau xub hais txog tias “Cov thaj txi Ntuj, cov paj tshab, cov thaj hlawv tsiaj, cov thaj txi Ntuj them txim txhaum, koj tsis xav yuav tsis zoo siab txais.” Tej ntawd yog tej yam lawv ua raws Txoj Cai qhia kom ua xwb. 9 Ces nws thiaj hais ntxiv tias : “Cia kuv tuaj ua raws li koj nyiam.” Li ntawd, nws rhuav thawj txoj cai thiab tsa ib txog cai tshiab los hloov. 10 Vim raws li Tswv Ntuj nyiam mas yog kom peb ntshiab tuaj thaum Yes Xus Pleev muab nws lub cev txi rau Ntuj, tsuas txi ib zaug xwb tau lawm.

    NPN 40: 2+4AB, 7-8A, 10, 11

    Txais: (8a+9a) Kuv nyob ntawm no HUAB TAIS, kuv tuaj ua raws li koj nyiam.

    Kuv tau tos thiab tos ntsoov HUAB TAIS,
    nws tau khoov qis qis tig los mloog kuv.
    Nws tau muab ib zaj nkauj tshiab rau kuv qhov ncauj,
    kom kuv hu nkauj cav txog peb tus Tswv Ntuj.

    Txais: (8a+9a) Kuv nyob ntawm no HUAB TAIS, kuv tuaj ua raws li koj nyiam.

    Thaj txi ntuj thiab paj tshab koj tsis ntshaw,
    tiam sis koj qhib kuv ob lub pob ntseg kom mloog lus.
    Cov thaj hlawv tsiaj thiab cov thaj them txim txhaum, koj tsis xav tau,
    kuv thiaj hais tias: “Cia kuv tuaj.”

    Txais: (8a+9a) Kuv nyob ntawm no HUAB TAIS, kuv tuaj ua raws li koj nyiam.

    Kuv tau tshaj txog koj txoj kev ncaj rau tsoom neeg coob tuaj sib txoos;
    kuv tsis tau kaw qhov ncauj; HUAB TAIS, koj yeej paub.

    Txais: (8a+9a) Kuv nyob ntawm no HUAB TAIS, kuv tuaj ua raws li koj nyiam.

    Koj txoj kev ncaj kuv tsis tau muab zais cia rau nruab siab;
    kuv tau hais txog koj txoj kev pheej xeeb thiab koj txoj kev cawm,
    kuv tsis tau zais koj lub siab zoo thiab koj txoj kev tseeb,
    kuv tau muab qhia rau pab neeg coob coob paub.

    Txais: (8a+9a) Kuv nyob ntawm no HUAB TAIS, kuv tuaj ua raws li koj nyiam.

    As Les Lus Yas: MT 11: 25

    Txais: As les lus yas, as les lus yas. lleluia, alleluia.

    Peb cav txog koj, Leej Txiv, HUAB TAIS kav lub ntuj lub teb,
    koj tau qhia tej yam tob txog Ntuj Ceeb Tsheej rau cov neeg me paub.

    Txais: As les lus yas, as les lus yas.

    Ntawv Moo Zoo: MK 3: 31-35

    31 Yes Xus niam thiab nws cov kwv tij tuaj txog ntawm lub tsev, lawv nyob nraum zoov, lawv xa neeg mus hu Yes Xus.
    32 Muaj ib pab neeg zaum ncig Yes Xus, lawv hais rau nws tias : "Koj niam nrog koj cov kwv tij thiab cov muam tuaj nyob nraud, lawv nrhiav koj."
    33 Yes Xus teb rau lawv tias : "Leej twg yog kuv niam thiab yog kuv kwv tij ?"
    34 Yes Xus ntsia ncig lees rau cov neeg zaum ncig nws, nws hais tias : "Kuv niam thiab kuv cov kwv tij yog cov no.
    35 Vim tias leej twg ua raws li Tswv Ntuj lub siab, tus ntawd yog kuv kwv tij, kuv nkauj muam thiab kuv niam."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 30th January 2019, 9:02 am

    TIM      30      LUB      1      HLIS      2019

    Hnub Plaub Lis Piam Peb Nrhuab Xyoo C Nruab Lis Piam Xyoo I

    Zaj Nyeem Ib:       HN  10:   11-18


    11 Txhua tus leej choj niaj hnub mus sawv ntsug leg nws txoj kab xwm rov cev cov thaj txi Ntuj ntau ntau zaus, tab sis cov thaj txi Ntuj ntawd tsis muaj hwj huam daws txhaum tau li. 12 Hos Leej Pleev, mas nws tsuas cev thaj txi Ntuj daws txhaum ib zaug xwb, ces nws mus zaum ntawm Tswv Ntuj phab xis mus li lawm. 13 Nws nyob tos kom Ntuj muab nws cov yeeb ncuab los ua rooj rau nws tiag taw lawm xwb. 14 Leej Pleev tsuas cev paj tshab ib zaug xwb, ces nws ua tau kom cov uas nws tau ntxuav lawv huv lawd zoo tiav log mus li ib txhis lawm. 15 Leej Ntuj Plig Ntshiab kuj zeem tseeb li ntawd rau peb paub thiab, vim nws tau hais li no: 16 “Huab Tais hais tias: ‘Dhau lub caij ntawd lawm, kuv yuav nrog lawv cog lus li no:  Kuv yuav muab kuv txoj cai lij choj tso rau hauv lawv nruab siab, kuv yuav muab txaug rau hauv lawv lub tswv yim. 17 Kuv yuav tsis nco txog lawv cov txhaum thiab lawv tej kev hla txoj cai ntxiv.” 18 Yog tias Ntuj twb zam txhaum rau lawv tas lawm, mas tsis tas yuav rov ua thaj txi Ntuj them txim txhaum ntxiv.

    NPN        110:   1, 2, 3, 4

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

    HUAB TAIS hais rau kuv tus Huab Tais tias:
    “Koj zaum ntawm kuv sab xis
    mus txog thaum kuv muab koj cov
    yeeb ncuab ua rooj rau koj tiag taw.”

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

    HUAB TAIS yuav ua kom koj tus cwj ua vaj muaj hwj chim
    nthuav mus deb txij ntawm Xis Yoos mus:
    Koj yuav ua vaj nyob nruab nrab hauv koj cov yeeb ncuab.

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

    Koj tau lub hwj chim ua vaj ua koj tug txij hnub koj yug los,
    yog lub hwj chim ntshiab ci ntsa iab,
    Ua ntej lub hnub qub sawv ntxov,
    zoo li cov lwg, kuv tau yug koj los.

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

    HUAB TAIS tau cog lus lawm, nws yuav tsis thim nws lo lus tias:
    “Koj ua leej choj mus ib txhis raws li Mes Kis Xes Des txoj cai.”

    Txais: (4b) Koj yuav ua leej choj mus ib txhis raws li Mes Kis Xes Des txoj kab ke.

    As Les Lus Yas  

    Txais:   As les lus yas, as les lus yas.  

    Cov noob yog Tswv Ntuj lo lus, Leej Pleev yog tus tswv tseb noob.    
    txhua leej txhua tus uas los cuag nws yuav muaj txoj sia nyob mus li.  

    Txais:   As les lus yas, as les lus yas

    Ntawv Moo Zoo:       MK  4:   1-20

    1 Muaj ib zaug Yes Xus rov pib qhuab qhia nyob ntawm ntug dej ntuj dua. Ces ib pab neeg coob kawg tuaj sib sau ntsauv nws, nws thiaj nce mus rau hauv ib lub nkoj nyob saum dej ntuj;  nws zaum hauv lub nkoj, hos tas ib tsoom neeg nyob saum av, tim ntug nqhuab. 2 Yes Xus ua paj lug qhia ntau yam rau lawv. Thaum nws qhia lawv, nws hais tias : 3 "Nej mloog saib ! Tus neeg tseb nplej tawm mus tseb noob nlpej. 4 Thaum nws tseb, muaj ib co noob poob rau ntawm txoj kev, ces noog ya tuaj noj lawm. 5 Muaj ib co noob poob rau hauv thaj av pob zeb. Nyob ntawd tsis muaj av ntau, ces noob tuaj kaus sai, vim av tsis tob. 6 Thaum hnub tuaj ziab, cov yub ntsws tas, vim cov yub tsis muaj cag, ces cov yub cia li qhuav tas. 7 Tseem muaj ib co noob poob rau hauv cov pos. Pos hlob tuaj laum cov yub, ces cov yub ntawd txhawv tsis taus. 8 Hos muaj ib co noob poob rau hauv thaj av zoo. Cov yub nplej ntawd hlob thiab huam tuaj, txhawv ua hnab. Tej lub noob txi peb caug lub nplej, tej lub txi rau caum lub, tej lub txi ib puas lub."
    9 Ces Yes Xus hais tias : "Leej twg muaj pob ntseg mloog, mas kom nws yeej meem mloog."
    10 Thaum Yes Xus nyob ntawm ib qho xu kev lawm, cov neeg nrog nws ua ke thiab Pab Kaum Ob nug nws txog cov paj lug ntawd. 11 Yes Xus hais rau lawv tias : "Ntuj pub cov lus tob qhia txog Tswv Ntuj lub Ceeb Tsheej rau nej paub. Hos cov neeg no, lawv nyob sab nraud, ces ib puas tsav yam yog paj lug rau lawv. 12 Kom xwv lawv sib zog ntsia, los lawv tsis pom, lawv mloog ntsoov, los lawv tsis to taub, tsam lawv yuav tsum hloov siab, ces Ntuj ho yuav zam rau lawv."
    13 Yes Xus hais rau lawv tias : "Nej tsis to taub zaj paj lug no lod ? Yog li, nej yuav ua cas to taub cov paj lug tas huv si ? 14 Tus tseb noob nplej, nws tseb Lo Lus. 15 Cov uas nyob ntawm kev txais Lo Lus, yog cov neeg uas tau hnov Lo Lus, tab sis, Xas Tas tuaj rho Lo Lus uas nyuam qhuav tseb rau hauv lawv tam sim ntawd lawm. 16 Cov uas txais cov noob tseb rau hauv thaj av pob zeb, yog cov neeg uas thaum lawv hnov Lo Lus, lawv zoo siab txais. 17 Tab sis lawv tsis muaj cag nyob hauv nruab siab, ces kav tsis ntev : thaum muaj kev txom nyem los kev raug luag hiam vim Lo Lus, mas lawv ntog tam sim ntawd. 18 Tseem muaj ib co txais cov noob tseb rau hauv cov pos : yog cov neeg uas tau hnov Lo Lus, 19 tab sis ntiaj teb kev txob xeeb, nyiaj txiag kev ntxias, thiab lub siab ntshaw ntau yam txeem mus laum Lo Lus, ces Lo Lus txi tsis taus txiv li.
    20 Hos cov uas txais cov noob tseb rau hauv thaj av zoo yog cov neeg uas hnov Lo Lus, lawv khaws lo lus, thiab lawv txi txiv. Ib tug txi peb caug lub, ib tug txi rau caum lub, lwm tus txi ib puas lub.”



    Last edited by Mim on 1st February 2019, 11:04 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 30th January 2019, 10:52 am

    TIM 31 LUB 1 HLIS 2019

    Hnub Tsib Lis Piam Peb Nruab Xyoo C Nruab Lis Piam Xyoo I
    Hwm LN John Bosco, ua Leej Choj

    Zaj Nyeem Ib: HN 10: 19-25


    19 Cov kwv tij, nyob hauv Yes Xus cov ntshav peb tso siab lug tias peb muaj ib txog kev mus tau rau hauv kem tsev Ntshiab, 20 yog ib txog kev tshiab, ib lub qhov rooj muaj sia uas nws rhawv rau peb nyob ntawm daim ntaub thaiv uas yog nws lub cev. 21 Li ntawd peb muaj ib tug Leej Choj loj tas nrho saib Tswv Ntuj lub tsev. 22 Ua li mas peb kav tsij ua siab dawb paug tso siab lug nkag mus rau hauv, nrog ib lub siab dawb huv tsis tsuas kev phem, thiab ib lub cev ntxuav huv si hauv cov dej ntshiab lawm. 23 Peb yuav tsum tuav ruaj nreb tsis txhob ua xyem xyav txog peb txoj kev ntseeg uas ua kom peb tso siab lug, vim tus tau cog lus rau peb nws tsis dag. 24 Peb yuav muab siab rau sib nres sib txhib kom sib nyiam sib hlub thiab ua tej yam zoo. 25 Peb yuav tsis txhob ncua tsis mus koom peb lub txoos teev ntuj xws li tej tus pheej ua, tiam sis peb yuav tsum sib txhawb kom nquag mus, vim yog nej yim pom tias Tswv Ntuj lub hnub nyoog los txog ze lawm mas nej yim yuav sib pab sib txhawb.

    NPN 24: 1-2, 3-4AB, 5-6

    Txais: (6) HUAB TAIS, ntawm no yog haiv neeg uas nsthaw pom koj lub ntsej muag.

    Lub ntiaj teb thiab puas tsav yam nyob hauv yog HUAB TAIS li,
    nws tug yog lub sim ceeb thiab cov neeg nyob hauv.
    Vim nws yog tus tau tsim lub ntiaj teb txawb rau saum cov hiav txwv
    thiab muab tso rau saum cov dej ntws.

    Txais: (6) HUAB TAIS, ntawm no yog haiv neeg uas nsthaw pom koj lub ntsej muag.

    Leej twg thiaj yuav nce tau mus rau saum HUAB TAIS lub roob?
    Leej twg thiaj yuav mus sawv taus nyob hauv nws thaj chaw ntshiab?
    Yog tus uas txhais tes tsis muaj txhaum, lub siab dawb huv,
    tus uas tsis ntshaw tej yam tsis muaj qab hau.

    Txais: (6) HUAB TAIS, ntawm no yog haiv neeg uas nsthaw pom koj lub ntsej muag.

    HUAB TAIS yuav foom koob hmoov rau nws,
    yog paj tshab tuaj ntawm Tswv Ntuj tus cawm nws tuaj.
    Lawv yuav zoo li no, tsav neeg uas nrhiav Tswv Ntuj,
    cov uas nrhiav Yas Kos tus Tswv Ntuj lub ntsej muag.

    Txais: (6) HUAB TAIS, ntawm no yog haiv neeg uas nsthaw pom koj lub ntsej muag.

    As Les Lus Yas: NPN 119: 105

    Txais: As les lus yas, as les lus yas.

    Koj lo lus yog lub teeb tsom rau kuv ko taw,
    yog qhov pom kev kaj kuv txoj hau kev.

    Txais: As les lus yas, as les lus yas.

    Ntawv Moo Zoo: MK 4: 21-25

    21 Yes Xus hais rau nws cov thwj tim tias : "Thaum yus taws ib lub teeb nqa los, yus puas muab txawb hauv qab pob tawb los hauv qab txag, tsis muab txawb saum tus ncej teeb li?
    22 Vim tsis muaj ib yam zais cia, uas yuav tsis tshwm tawm rau luag pom, tsis muaj ib yam npog cia uas yuav tsis tawm los rau luag paub.
    23 Leej twg muaj pob ntseg mloog, mas kom nws yeej meem mloog !"
    24 Yes Xus hais rau lawv ntxiv tias : “Nej ceev faj txog tej yam uas nej hnov ! Ntuj yuav xuas lub tawb uas nej luj rau luag rov los luj rau nej, thiab tseem yuav ntxiv tshaj rau nej.
    25 Vim tias tus uas twb muaj lawm, Ntuj yuav pub ntxiv rau nws, hos tus tsis muaj, mas Ntuj tseem yuav rho qhov nws muaj tawm mus thiab.”

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 31st January 2019, 12:28 pm

    TIM 1 LUB 2 HLIS 2019

    Thawj Hnub Rau Lis Piam Peb Nruab Xyoo C Nruab Lis Piam Xyoo I

    Zaj Nyeem Ib: HEB 10: 32-39


    32 Nej nco ntsoov txog yav dhau los thaum nej nyuam qhuav txais txoj kev pom kev, thaum ntawd, nej tau nyiaj kev sim siab loj nyob hauv txoj kev txom nyem. 33 Qee zaus nej tau raug luag tsawm thiab luag hiam, qee zaus nej tau koom nrog lwm cov neeg raug tej ntawd ua ke. 34 Nej kuj tau koom siab nrog cov nyob hauv tsev loj faj raug txom nyem, thiab nej tseem zoo siab ua cov raug luag tuaj lwg nej tej cuab yeej cuab tam tas, vim nej paub tias nej muaj ib lub cuab tam zoo tshaj thiab yuav nyob mus li. 35 Ua li mas nej yuav tsis txhob tso nej txoj kev tso siab pov tseg kiag li, vim nws yuav ua kom nej tau txais koob haum loj. 36 Nej yuav tsum ua siab ntev nyiaj ntxiv tsis txhob tso tseg, mas nej thiaj ua tau raws li Tswv Ntuj lub siab nyiam, ces nej yuav tau txais raws li nws tau cog lus.
    37 “Vim tias tshuav tsis ntev kiag li lawm, ces tus yuav tuaj, nws yuav tuaj txog, nws yuav tsis ncua ntev. 38 Kuv tus neeg siab ncaj yuav ua neej raws kev ntseeg. Tab sis yog nws ntxeev siab mas kuv lub siab yuav tsis nyiam nws.”
    39 Ntawm peb mas peb tsis yog cov neeg ntxeev siab thiab mus taug kev ploj; peb yog cov neeg uas ntseeg ruaj kom tau txoj kev cawm peb tus ntsuj plig.

    NPN 37: 3-4, 5-6, 23-24, 39-40

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Nej tso siab rau HUAB TAIS thiab ua qhov zoo,
    ces nej yuav tau nyob hauv lub teb chaws
    thiab muaj noj nrog kev tso siab.
    Nej zoo siab nyob hauv HUAB TAIS,
    ces nws yuav pub rau nej raws nej lub siab ntshaw.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Muab txoj kev nej taug tso rau HUAB TAIS ua tus saib;
    nej tso siab rau nws ces nws yuav pab nej .
    Nws yuav ua kom txoj kev ncaj sawv tuaj ziab nej xws li qhov pom kev;
    ces nej txoj kev ncaj ncees yuav ci npaum thaum tav su nrig.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    HUAB TAIS ua kom ib tug neeg tshais ruam muaj zog,
    thiab HUAB TAIS pom zoo txoj kev nws taug.
    Txawm nws ntog, nws yuav tsis pw nthi tsis sawv,
    vim HUAB TAIS txhais tes txheem nws.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Txoj kev cawm cov neeg ncaj tuaj ntawm HUAB TAIS tuaj,
    nws yog lawv lub chaw nkaum thaum lawv ntsib kev nyuaj.
    HUAB TAIS pab lawv thiab tso lawv dim,
    nws tso lawv dim ntawm tus phem thiab cawm lawv,
    vim lawv tuaj nkaum hauv nws.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    As Les Lus Yas: MT 11: 25

    Txais: As les lus yas, as les lus yas.

    Peb cav txog koj, Leej Txiv, tus Huab Tais kav lub ntuj lub teb,
    koj tau qhia tej yam tob txog Ntuj Ceeb Tsheej rau cov neeg me paub.

    Txais: As les lus yas, as les lus yas.

    Ntawv Moo Zoo: MK 4: 26-34

    26 Yes Xus hais rau tsoom neeg tias : “Tswv Ntuj lub Ceeb Tsheej zoo xws li ib tug neeg pov ib co noob rau nruab a ; 27 Nws txawm pw los nws sawv, hmo ntuj los nruab hnub, lub noob tuaj kaus thiab hlob, nws tsis paub tias lub noob tuaj kaus thiab hlob zoo li cas. 28 Av xwb tim cia li txawj xeeb kom txi txiv : xub ua yub tas, ua plab nab, ces nplej txhawv puv hnab. 29 Thaum nplej siav, tus neeg ntawd xuas liag hlais tam sis ntawd, vim txog caij sau qoob lawm.”
    30 Yes Xus tseem hais tias : "Peb yuav muab Tswv Ntuj lub Ceeb Tsheej piv rau dab tsi ? Thiab peb yuav ua paj lug qhia txog Tswv Ntuj lub Ceeb Tsheej zoo li cas? 31 Nws yog zoo li ib lub noob zaub roj, uas thaum luag muab tseb rau hauv av, mas lub noob ntawd me tshaj lwm cov noob nyob ntiaj teb no. 32 Tab sis thaum tseb tas lawd, lub noob hlob, nws siab dua lwm cov zaub huv si ; nws ncau ceg deb, ces tej noog ya saum ntuj tau kev los nkaum hauv nws qhov ntxoov."
    33 Yes Xus siv ntau hom paj lug zoo li no los qhia Lo Lus rau lawv, raws li lawv mloog tau. 34 Tsis muaj ib yam uas nws tsis ua paj lug hais. Thaum tshuav cov thwj tim nrog nws nyob xwb, nws txhais txhua yam huv tib si rau lawv.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 1st February 2019, 11:03 am

    TIM 2 LUB 2 HLIS 2019

    Thawj Hnub Xya Lis Piam Peb Nruab Xyoo C Nruab Lis Piam Xyoo I

    Nco txog Niam Mab Liab thiab Yos Xes coj Yes Xus mus fij rau Ntuj

    Zaj Nyeem Ib: MAS LAS KIS 3: 1-4


    Huab Tais hais tias:
    1 “Kuv yuav xa kuv tus tub tshaj xo mus npaj kev ua kuv ntej. Ces ib sij huam, tus Huab Tais uas nej nrhiav yuav tshwm plaws los nyob hauv nws lub tuam tsev, thiab tus tub tshaj xo tuav lo lus tau cog uas nej zoo siab xav tau, nws tuaj lawm !” Tsoom tshiab tus HUAB TAIS hais li ntawd : 2 Tiam sis hnub nws tuaj txog, leej twg thiaj yuav tiv taus ? Leej twg thiaj yuav sawv taus ntsug thaum nws tshwm tawm los ? Vim nws yuav zoo li cov hluav taws nchuav nyiaj, thiab zoo li cov tshuaj ntxhua khaub ncaws kom dawb. 3 Nws yuav tuaj zaum tsaws nchuav nyiaj kom huv, nws yuav ua kom Les Vis cov tub dawb huv tuaj; nws yuav nchuav lawv ib yam li nchuav kub nchuav nyiaj, kom lawv ua tau cov cev thaj txi Ntuj raws kev ncaj ncees. 4 Ces HUAB TAIS yuav zoo siab txais Yus Das thiab Yes Lus Xas Les thaj txi Ntuj, ib yam li yav ntuj thaum ub lub caij yav thaum i .

    NPN 24: 7, 8, 9, 10

    Txais: ( Leej twg yog tus vaj muaj koob meej? Yog HUAB TAIS!

    Cov rooj vag, nej tsa nej daim txiag puab saum qhov rooj kom siab,
    cov qhov rooj laus, nej tshoom kom siab ntxiv,
    kom tus vaj muaj koob meej tau kev nkag los!

    Txais: ( Leej twg yog tus vaj muaj koob meej? Yog HUAB TAIS!

    Leej twg yog tus vaj muaj koob meej?
    Yog tus HUAB TAIS muaj zog, muaj peev xwm,
    tus HUAB TAIS muaj peev xwm yeej tsam rog.

    Txais: ( Leej twg yog tus vaj muaj koob meej? Yog HUAB TAIS!

    Cov rooj vag, nej tsa nej daim txiag puab saum qhov rooj kom siab,
    cov qhov rooj laus, nej tshoom kom siab ntxiv,
    kom tus vaj muaj koob meej tau kev nkag los!

    Txais: ( Leej twg yog tus vaj muaj koob meej? Yog HUAB TAIS!

    Leej twg yog tus vaj muaj koob meej ?
    Tus HUAB TAIS kav tsoom tshiab; nws yog tus vaj muaj koob meej.

    Txais: ( Leej twg yog tus vaj muaj koob meej? Yog HUAB TAIS!

    Zaj Nyeem Ob: HEB 2: 14-18

    14 Vim ib co me nyuam koom ib co roj ntsha ib ce nqaij, mas Yes Xus kuj nrog lawv koom thiab, kom nws txoj kev tuag yeej tus tuav txoj kev tuag lub hwj huam, uas yog tus dab phem. 15 Yes Xus tso cov uas raug kev tuag muab lawv ua qhev nyob hauv txoj kev ntshai tuag tas lawv sim neej kom lawv dim. 16 Nws tsis yog tuaj cawm ib co tshiab, nws tuaj cawm Has Nplas Has tsoom xeeb ntxwv. 17 Vim li no, nws thiaj yuav tsum yug los zoo ib yam li nws cov kwv, kom nws ua tau ib tug Thawj Leej Choj khuv leej neeg thiab npuab Tswv Ntu zoo, nws thiaj theej tau tsoom pej xeem lub txhoj. 18 Vim nws tus kheej tau raug txom nyem nyob hauv txoj kev sim siab, mas nws thiaj muaj peev xwm pab tau cov uas raug kev sim siab.

    As Les Lus Yas: LK 2: 32

    Txais: As les lus yas, as les lus yas. lleluia, alleluia.

    Yog ib qho pom kev tawm tuaj kaj cov pej kum haiv neeg
    thiab lub koob meej rau koj haiv His Xas Lais.

    Txais: As les lus yas, as les lus yas.

    Ntawv Moo Zoo: LK 2: 22-40

    22 Thaum lub caij ua ntej yuav ua cov kab ke ntxuav kom huv rau ob niam tub raws li Mais Xes Txoj Cai tas lawm, Mab Liab thiab Yos Xes coj Yes Xus mus pem Yes Lus Xas Les, kom tau fij tus me nyuam rau Huab Tais, 23 vim Huab Tais Txoj Cai sau tias: "Txhua tus tub xub qhib leej niam plab yug los, yuav tsum muab qee rau Huab Tais,”
    24 thiab kom tau cev ib co txim rau Ntuj raws li Huab Tais Txoj Cai hais cia tias : “Cev ib nkawg nquab lwb rwg, los ob tug nquab mos.”
    25 Thaum ntawd nyob Yes Lus Xas Les, muaj ib tug txiv neej hu ua Xis Mes Oos. Tus txiv neej ntawd yog neeg ncaj thiab nyiam teev ntuj, nws tos ntsoov tus yuav tuaj nplij His Xas Lais; Leej Ntuj Plig Ntshiab nyob saum nws. 26 Leej Ntuj Plig Ntshiab qhia rau nws paub tias nws yuav tsis xub tuag ua ntej nws tau pom Huab Tais tus Pleev. 27 Leej Ntuj Plig coj nws tuaj nyob hauv lub Tuam Tsev Teev Ntuj, thaum leej niam thiab leej txiv nkawd coj tus me nyuam Yes Xus tuaj ua cov kab ke raws li Txoj Cai. 28 Ces Xis Mes Oos txais tus me nyuam los rau hauv nws xub ntiag, nws cav lus zoo txog Tswv Ntuj, nws hais tias : 29 “Huab Tais, nyem no koj tso tau koj tus tub txib mus kaj lug raws li koj tau hais lawm, 30 vim kuv qhov muag twb tau pom koj txoj kev cawm neeg lawm, 31 uas koj tau npaj nyob ntawm tas ib tsoom haiv neeg xub ntiag. 32 Nws yog qhov pom kev tawm tuaj qhia koj rau cov pej kum neeg paub, thiab yog qhov ua kom koj haiv His Xas Lais tau koob meej.”
    33 Tus me nyuam niam thiab txiv poob siab tas rau cov lus nkawd hnov hais txog nws. 34 Ces Xis Mes Oos foom hmoov zoo rau nkawd, thiab nws hais rau Mab Liab tus me nyuam leej niam tias : "Koj saib mus, tus me nyuam no yuav ua chaw rau ntau leej nyob His Xas Lais ntog thiab ua rau ntau leej sawv los. Nws yog ib lub cim yuav ua kom neeg hais lus thuam txog nws. 35 Hos ntawm koj, mas ib rab ntaj yuav chob ntsia ntsees koj tus plig, kom xwv tej lus uas coob leej xav tuaj nruab siab tawm los rau sawv daws paub.”
    36 Tseem muaj ib tug yaj saub poj niam, hu ua As Nas, yog Fas Nus Es tus ntxhais, xeem As Sej. Nws hnub nyoog laus lawm. Tom qab lub caij nws ua nkauj xwb nyob mas nws mus nrog nws tus txiv nyob tau xya xyoo, 37 ces nws ua poj ntsuam laus li ntawd txog yim caum plaub xyoos. Nws tsis nrug ntawm lub Tuam Tsev Teev Ntuj li, nws yoo mov thiab hais cov zaj teev Ntuj los teev hawm Tswv Ntuj nruab hnub hmo ntuj tib si. 38 Tib lub sij hawm ntawd, As Nas kuj tuaj nyob ntawd thiab, nws cav lus zoo txog Tswv Ntuj, thiab nws hais txog tus me nyuam rau txhia leej txhia tus uas tos txog txoj kev yuav txhiv Yes Lus Xas Les. 39 Thaum nkawd ua txhua yam raws li Huab Tais Txoj Cai tas lawm, nkawd rov mus Nkas Lis Lais teb, hauv nkawd lub nroog Nas Xas Les. 40 Hos ntawm tus me nyuam, nws hlob tuaj muaj zog zuj zus, kev thoob tsib puv nws siab ntsws, Tswv Ntuj lub txiaj ntsim nyob saum nws.

    Los: LK 2: 22-32

    22 Thaum lub caij ua ntej yuav ua cov kab ke ntxuav kom huv rau ob niam tub raws li Mais Xes Txoj Cai tas lawm, Mab Liab thiab Yos Xes coj Yes Xus mus pem Yes Lus Xas Les, kom tau fij tus me nyuam rau Huab Tais, 23 vim Huab Tais Txoj Cai sau tias: "Txhua tus tub xub qhib leej niam plab yug los, yuav tsum muab qee rau Huab Tais,”
    24 thiab kom tau cev ib co txim rau Ntuj raws li Huab Tais Txoj Cai hais cia tias : “Cev ib nkawg nquab lwb rwg, los ob tug nquab mos.”
    25 Thaum ntawd nyob Yes Lus Xas Les, muaj ib tug txiv neej hu ua Xis Mes Oos. Tus txiv neej ntawd yog neeg ncaj thiab nyiam teev ntuj, nws tos ntsoov tus yuav tuaj nplij His Xas Lais; Leej Ntuj Plig Ntshiab nyob saum nws. 26 Leej Ntuj Plig Ntshiab qhia rau nws paub tias nws yuav tsis xub tuag ua ntej nws tau pom Huab Tais tus Pleev. 27 Leej Ntuj Plig coj nws tuaj nyob hauv lub Tuam Tsev Teev Ntuj, thaum leej niam thiab leej txiv nkawd coj tus me nyuam Yes Xus tuaj ua cov kab ke raws li Txoj Cai. 28 Ces Xis Mes Oos txais tus me nyuam los rau hauv nws xub ntiag, nws cav lus zoo txog Tswv Ntuj, nws hais tias : 29 “Huab Tais, nyem no koj tso tau koj tus tub txib mus kaj lug raws li koj tau hais lawm, 30 vim kuv qhov muag twb tau pom koj txoj kev cawm neeg lawm, 31 uas koj tau npaj nyob ntawm tas ib tsoom haiv neeg xub ntiag. 32 Nws yog qhov pom kev tawm tuaj qhia koj rau cov pej kum neeg paub, thiab yog qhov ua kom koj haiv His Xas Lais tau koob meej.”

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 3rd February 2019, 2:13 pm

    TIM 4 LUB 2 HLIS 2019

    Hnub Ob Lis Piam Plaub Nruab Xyoo C Nruab Lis Piam Xyoo I

    Zaj Nyeem Ib: HN 11: 32-40


    Cov kwv tij:
    32 Kuv yuav hais txog dab tsi ntxiv ? Kuv yuav tsis muaj sij hawm txaus los piav txog Zes Des Oos, Npas Las, Xas Xoos, Zes Tes, Das Vis, thiab Xas Muas thiab cov yaj saub. 33 Vim lawv muaj kev ntseeg, ces lawv thiaj ntaus rog yeej ib co teb chaws muaj vaj kav, lawv ua raws qhov ncaj, lawv tau txais raws li txoj kev cog lus hais tseg, lawv kaw tau tsov lub qhov ncauj, 34 lawv tua tau cov hluav taw kub hnyiab tuag tas, lawv dim ntawm rab hniav ntaj lub qhov ncauj, lawv rov muaj zog tuaj txawm tias lawv muaj mob muaj nkeeg, lawv muaj siab tawv qhawv ntaus tsam rog, lawv caum cov pej kum tub rog kom rov qab tas. 35 Ib txhia poj niam tau pom lawv cov neeg tuag lawm ciaj sawv rov los. Hos ib txhia neeg yeem cia luag muab lawv dua, tsis yeem cia luag tso lawv dim, vim lawv xav tau ib txog kev sawv rov los zoo dua qub. 36 Hos lwm cov txaus siab nyiaj kev raug luag thuam thiab luag nplawm, los cia luag khi lawv thiab coj mus kaw hauv tsev loj faj. 37 Lawv raug luag muab pob zeb txawb lawv tuag, lawv mag luag rab hniav kaw txiav lawv tu ob ya, raug ntaj tua lawv tuag; lawv hnav tawv yaj hnav tawv tshis khiav rau ub rau no, lawv yoo tshaib yoo nqhis, thiab raug luag tsim txom, raug luag hiam. 38 Ntiaj teb neeg tsis tsim nyog txais lawv, ces lawv khiav mus nkaum hauv tej hav suab puam, pem tej toj roob, hauv tej qhov tsua, thiab tej qhov taub qhov av. 39 Tas cov neeg hais no puav leej nto moo zoo vim lawv ntseeg. Tsis kav lawv tsis tau txais yam uas Tswv Ntuj cog lus tias yuav pub. 40 Yog vim tias Tswv Ntuj npaj ib yam zoo tshaj rau peb sawv daws, ces lawv yuav tsum tos kom muaj peb tso, lawv thiaj yuav tau tau txais qhov uas zoo kawg nkaus, zoo txhij zoo txhua.

    NPN 31: 20, 21, 22, 23, 24

    Txais: (25) Tas ib tsoom neeg tso siab rau HUAB TAIS, nej cia li ua siab loj.

    Huab Tais, koj muaj lub siab zoo tas nrho,
    Koj tshwj zias koj qhov zoo pub rau cov neeg hwm koj,
    Koj pub rau txhua leej uas tuaj khaub zig koj,
    Koj tab meeg pub kom tej tib neeg pom.

    Txais: (25) Tas ib tsoom neeg tso siab rau HUAB TAIS, nej cia li ua siab loj.

    Koj muab lawv zais rau hauv koj lub xub ntiag,
    Kom lawv nyob deb ntawm tej tib neeg zaj tswv yim phem,
    Koj coj lawv mus nkaum hauv koj lub chaw nyob,
    Kom nyob deb ntawm tus nplaig nkhaus tsawm neeg.

    Txais: (25) Tas ib tsoom neeg tso siab rau HUAB TAIS, nej cia li ua siab loj.

    Kom txhua leej txhua tus cav txog HUAB TAIS,
    vim nws tau ua hwj huam loj khuv leej kuv
    nyob hauv ib lub nroog xov ntsa zeb.

    Txais: (25) Tas ib tsoom neeg tso siab rau HUAB TAIS, nej cia li ua siab loj.

    Kuv tau kev tws kev ntxhov, kuv thiaj hais tias :
    "Kuv nyob deb ntawm qhov koj qhov muag pom."
    Tsis kav, koj hnov kuv lub suab thov,
    thaum kuv quaj hu txog koj,

    Txais: (25) Tas ib tsoom neeg tso siab rau HUAB TAIS, nej cia li ua siab loj.

    Tas tsoom neeg hwm HUAB TAIS, nej nyiam nws mog !
    HUAB TAIS txuag cov ntseeg ruaj txog nws,
    hos nws nplua tus muab hlob ti txha nkaus.

    Txais: (25) Tas ib tsoom neeg tso siab rau HUAB TAIS, nej cia li ua siab loj.

    As Les Lus Yas: LK 7: 16

    Txais: As les lus yas, as les lus yas.

    "Ib tug yaj saub loj sawv los nyob hauv peb,
    Tswv Ntuj tuaj xyuas nws haiv neeg lawm.

    Txais: As les lus yas, as les lus yas.

    Ntawv Moo Zoo: MK 5: 1-20

    1 Yes Xus thiab nws cov thwj tim tuaj txog sab ntug dej ntuj tim ub, yog ntawm cov neeg Nkes Las Xes lub teb chaws. 2 Thaum Yes Xus nqes plhuav saum nkoj los, tam sis ntawd, muaj ib tug neeg raug ib tug dab tsis huv tawm hauv cov toj ntxas tuaj cuag Yes Xus : 3 Nws yeej nyob txawm hauv cov toj ntxas ntawd; tab yog xuas saw hlau khi los tsis muaj leej twg pav tau nws li, 4 vim ntau zaus lawm, lawv twb muab saw hlau pav nws, rau cuab rau nws, tsis kav nws ua saw hlau tu tas, ua cuab lov tas, yeej tsis muaj leej twg muaj peev xwm kov yeej nws li. 5 Niaj hnub niaj hmo, nws nyob hauv cov toj ntxas thiab nyob pem tej roob, nws qw tsis tseg, thiab nws muab pob zeb los tsoo nws. 6 Thaum nws pom Yes Xus tseem nyob deb, nws khiav tuaj tos, nws txhos caug ntua ntawm Yes Xus xub ntiag, 7 ces nws qw nrov nrov tias : “Yes Xus, Tswv Ntuj Nyob Siab Leej Tub, koj xav ua dab tsi rau kuv ? Kuv hu txog Tswv Ntuj los thov, koj txhob tsim txom kuv.” 8 Vim Yes Xus tau hais rau nws lawm tias : "Dab tsis huv, koj tawm ntawm tus neeg no mus !" 9 Yes Xus nug nws tias : "Koj lub npe hu ua li cas ?" Nws teb tias : "Kuv lub npe hu ua Npoj, vim muaj peb coob kawg." 10 Nws thov Yes Xus tas zog kom txhob ntiab nws tawm hauv lub teb chaws ntawd mus.
    11 Thaum ntawd, muaj ib pab npua coob coob tab tom noj zaub saum lub roob. 12 Cov dab tsis huv thov Yes Xus tias: "Koj xa peb mus rau hauv cov npua ntawd, cia peb nkag mus rau hauv lawv." 13 Yes Xus tso lus rau lawv mus. Ces cov dab tsis huv tawm mus, lawv nkag rau hauv cov npua. Ces tas pab npua dhia nplawg ntia puag saum tsag rau hauv dej ntuj. Pab npua ntawd kwv yees muaj ob txhiab tus, tuag tas rau hauv dej ntuj.
    14 Cov zov npua tso tes khiav, lawv mus qhia lub moo ntawd rau hauv nroog thiab hauv cov nras liaj nras teb nyob ntawd. Ces neeg tuaj mus xyuas saib muaj tus xwm zeej dab tsi. 15 Thaum lawv tuaj txog ze ntawm Yes Xus, lawv pom tus neeg raug dab Npoj hnav ris tsho zaum ntawd, thiab nws meej pem lawm, mas lawv ntshai kawg. 16 Cov uas tau pom, piav rau lawv txog qhov uas tau tshwm sim rau tus neeg raug dab, thiab rau pab npua. 17 Ces lawv thov Yes Xus kom txav mus deb ntawm lawv thaj chaw. 18 Thaum Yes Xus nce mus hauv nkoj, tus neeg raug dab thov kom Yes Xus cia nws nrog Yes Xus mus. 19 Tab sis Yes Xus tsis kheev, nws hais rau tus raug dab tias : "Koj rov mus tsev, rov mus nrog koj tsev neeg nyob, koj qhia lawv txog tas txhua yam uas Huab Tais tau ua rau koj thiab nws tau khuv leej koj li cas."
    20 Tus raug dab thiaj rov mus, nws pib tshaj txhua yam uas Yes Xus tau ua rau nws nyob lub xeev Des Kas Pos Lis. Sawv daws qhuas kawg.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 4th February 2019, 9:51 am

    TIM 5 LUB 2 HLIS 2019

    Hnub Peb Lis Piam Plaub Nruab Xyoo C Nruab Lis Piam Xyoo I

    Hwm LN Agatha, Nkauj Xwb tuag ua Tim Khawv

    Zaj Nyeem Ib: HES NPLAWS 12: 1-4


    1 Vim tias peb muaj ib co tim khawv coob kawg nyob ua ib tauv huab ncig peb, mas peb kuj yuav muab txhua lub nra uas tsuam peb thiab tej kev txhaum uas lo rawv peb xyeeb hlo pov tseg, peb kav tsij peem khiav tas zog mus raws txoj kev sib tw khiav uas nyob ntawm peb hauv ntej.
    2 Peb yuav ntsia ntsoov Yes Xus uas yog tus ntaus thawj coj peb nyob hauv txoj kev ntseeg thiab pab peb ntseeg kom tom thawj mus txog qhov zoo tiav log. Nws pom txoj kev zoo siab yav tom ntej, nws thiaj tuaj yeem nyiaj txoj kev txom nyem saum ntoo cuam, tsis quav ntsej txog txoj kev raug txaj muag, ces nws tau mus zaum saum Tswv Ntuj lub theej kiab ntawm nws sab xis lawm.
    3 Nej nco ntsoov tias Yes Xus tau ua tiag nyiaj dhau cov neeg txhaum txoj kev tiv nws loj kawg nkaus, nej thiaj yuav tsis ntaus siab me thiab tsis tag kev cia siab.
    4 Nej twb tsis tau tau siv zog tiag ntaus tsam tiv txoj kev txhaum kom txog thaum nej nqaij ntuag ntshav nrog.

    NPN 22 : 26B-27, 28+30, 31-32


    Txais: (27b) Huab Tais, cov uas nrhiav koj lawv yuav cav txog koj.

    Kuv yuav pauj yeem nyob ntawm cov neeg hwm Huab Tais xub ntiag.
    Tus neeg pluag yuav tau noj seem noj so;
    cov uas nrhiav HUAB TAIS yuav cav txog nws;
    Thov kom nej lub siab muaj sia nyob mus li!

    Txais: (27b) Huab Tais, cov uas nrhiav koj lawv yuav cav txog koj.

    Tas cov npoo ntiaj teb kawg yuav rov nco txog HUAB TAIS
    thiab tig lawv lub siab mus rau nws.
    Tas cov xeem neeg hauv cov haiv neeg yuav khoov pe hawm nws.
    Tas cov neeg muaj hwj chim nyob ntiaj yuav khoov pe nws.
    Tas cov neeg uas mus nyob hauv av lawm yuav khoov pe nws.

    Txais: (27b) Huab Tais, cov uas nrhiav koj lawv yuav cav txog koj.

    Kuv tus plig yuav ciaj sia nyob hauv HUAB TAIS;
    kuv cov xeeb leej xeeb ntxwv yuav tsob hwb nws.
    Yuav tsum qhia rau tiam neeg tom ntej txog HUAB TAIS
    ces lawv thiaj yuav tshaj tawm rau cov tseem yuav yug los
    kom lawv paub txog nws txoj kev ua ncaj rau sawv daws.

    Txais: (27b) Huab Tais, cov uas nrhiav koj lawv yuav cav txog koj.

    As Les Lus Yas: MT 8: 17


    Txais: As les lus yas, as les lus yas.

    Leej Pleev tau tshem peb tej kev ceg tawv mus
    thiab nws cug nrob qaum ris peb tej kev mob kev ntsaj.

    Txais: As les lus yas, as les lus yas.

    Ntawv Moo Zoo: MK 5: 21-43

    21 Thaum Yes Xus caij nkoj rov hla dej mus txog sab ntug tim ub, ib pab neeg coob tuaj sib sau ntsauv nws, ces nws sawv nyob ntawm ntug dej ntuj. 22 Muaj ib tug hauv cov tswj tsev txoos hu ua Yais Los tuaj txog, thaum nws pom dheev Yes Xus, nws txhos caug ntua ntawm Yes Xus ko taw. 23 Nws thov Yes Xus tias : "Kuv tus me ntxhais tshuav txoj sia tsis tau tu xwb, thov koj tuaj tsa tes cawm nws kom nws ciaj." 24 Yes Xus nrog Yais Los mus. Muaj ib pab neeg coob raws nws mus; lawv sawv daws txiv tuaj ti nkaus Yes Xus.
    25 Muaj ib tug poj niam tsob ntshav tau kaum ob xyoos lawm. 26 Ntau tus kws tshuaj tau ua kom nws txom nyem kawg. Nws tau siv tas nws lub cuab tam los kho tsis tau nws zoo li, nws mob heev zuj zus ntxiv xwb. 27 Nws hnov luag hais txog Yes Xus, ces nws nrog tsoom sid sib txiv tom Yes Xus nraub qaum tuaj. Nws kov Yes Xus lub tsho. 28 Vim nws xav hauv siab tias : "Tsuav yog kuv tau kov nws lub tsho xwb, mas kuv yeej yuav dim." 29 Ces tam sis ntawd, nws qhov tsob ntshav tu nrho, nws hnov nws lub cev zoo hlo, dim ntawm tus mob lawm. 30 Tam sis ntawd, Yes Xus kuj hnov ib lub zog tawm plaws hauv nws mus ; ces Yes Xus tig rov los nug pab neeg ntawd tias : "Leej twg kov kuv lub tsho ?" 31 Cov thwj tim hais rau nws tias : "Koj ntsia saib, tas tsoom sid txiv koj txhua sab tuaj, koj tseem hais tias : ‘Leej twg kov kuv ?’ " 32 Yes Xus ntsia ib ncig kom pom tus neeg uas tau kov nws. 33 Ces tus poj niam ntshai thiab tshee na, vim nws paub qhov uas nyuam qhuav tshwm sim nyob hauv nws; nws los txhos caug ntawm Yes Xus ko taw thiab qhia qhov tseeb rau Yes Xus. 34 Yes Xus hais rau nws tias : “Me ntxhais, koj lub siab ntseeg cawm koj lawm. Koj rov mus kaj siab lug, kom koj tus mob zoo hlo mus."
    35 Thaum Yes Xus tseem tab tom hais lus, ib co neeg tuaj ntawm tus tswj tsev txoos lub tsev tuaj hais tias : “Koj tus ntxhais twb tuag lawm, koj tseem yuav txob Xib Hwb ua dab tsi ?” 36 Tab sis thaum Yes Xus hnov lo lus lawv hais, nws hais rau tus tswj tsev txoos tias : "Koj txhob ntshai, tsuav koj ntseeg xwb."
    37 Yes Xus tsis kheev leej twg nrog nws mus li. Nws tsuas cia Pob Zeb, Yas Kos thiab Yas Kos tus kwv Zam nrog nws mus xwb. 38 Lawv tuaj txog tus tswj tsev txoos lub tsev, Yes Xus pom sawv daws ua ntxhov hnyo : ib txhia quaj nyiav, ib txhia quaj qw nrov nrov. 39 Yes Xus los hauv tsev, nws hais rau lawv tias : "Ua cas sawv daws ua ntxhov hnyo thiab quaj zom zaws li no? Tus me nyuam tsis tuag, nws tsaug zog xwb." 40 Ces lawv luag Yes Xus zom zaws. Tab sis Yes Xus ntiab sawv daws tawm mus nraum zoov, nws tsuas kheev tus me nyuam niam thiab txiv, thiab cov nrog nws tuaj nyob xwb. Nws chaws mus hauv kem uas tus me nyuam pw. 41 Yes Xus tuav tus me nyuam txhais tes, nws hais rau tus me nyuam tias : "Tas lis tas kus," txhais tias : "Me ntxhais, kuv hais rau koj, koj sawv !" 42 Tus me ntxhais sawv tsees tam sis ntawd, nws mus kev, vim nws twb muaj kaum ob xyoos lawm. Thaum ntawd, sawv daws ntshai kawg. 43 Yes Xus txwv lawv heev kom txhob qhia leej twg paub. Ces nws kom lawv muab mov rau tus me ntxhais noj.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 5th February 2019, 7:37 am

    TIM      6      LUB      2      HLIS      2019

    Hnub Plaub Lis Piam Plaub Nruab Xyoo C Nruab Lis Piam Xyoo I

    Hwm LN Paul Miki thiab nws cov kwv luag tuag ua Tim Khawv

    Zaj Nyeem Ib:       HES NPLAWS  12:   4-7, 11-15


    Cov kwv tij:
    4 Nej twb tsis tau tau siv zog tiag ntaus tsam tiv txoj kev txhaum kom txog thaum nej nqaij ntuag ntshav nrog.
    5 Thiab nej kuj tsis nco qab cov lus uas yog hais rau nej xws li hais rau ib co tub ki tias :
    “Kuv me tub, koj txhob tsis liam fab Huab Tais lo lus cem lus qhuab; koj txhob ntaus siab me, thaum nws cob qhia koj. 6 Vim tias tus uas Huab Tais nyiam mas Huab Tais cob qhia nws, thiab Huab Tais rau txim rau txhua tus uas nws lees paub tias yog nws tus tub.”
    7 Kev raug txom nyem yog ib txog kev cob qhia nej. Tswv Ntuj cob nej xws li nws cov tub. Puas muaj ib tug tub twg uas nws txiv tsis cob qhia nws ? 11 Txhua yam kev cob qhia yeej tsis ua kom leej twg zoo siab thaum tam sis ntawd, tsuas ua kom chim siab xwb. Tiam sis yav tom qab, mas txoj kev cob qhia mam li yuav txi txiv muaj kev thaj yeeb thiab kev ncaj ncees rau cov neeg uas tau raug kev cob qhia. 12 Ua li mas nej kav tsij rov tsa ob txhais tes uas tsaug leeg, thiab ob lub hauv caug uas ntshaus hnyo,  13 thiab nej ua kom tej kev nkhaus ncaj tuaj rau nej ob txhais taw, kom tus ceg tawv txhob ntshaus ceg ntxiv, nws thiaj yuav zoo taus.
    14 Nej yeej meem nrhiav kom tau nrog sawv daws nyob thaj yeeb, thiab nrhiav txoj kev ntshiab, vim yog tus twg tsis muaj kev ntshiab mas nws yuav pom tsis tau Tswv Ntuj. 15 Nej ceev faj kom nej txhob muaj ib tug twg ua Tswv Ntuj lub txiaj ntsim nyob hauv nws poob, thiab kom tsis txhob muaj ib tug twg muaj kev ntsawv siab tshwm tuaj tsim kev kub ntxhov nyob hauv nej, ces nws yuav kis mus ua kom coob leej poob rau kev phem.

    NPN      103:   1-2, 13-14, 17-18A

    Txais:   (17) Huab Tais yuav ua siab zoo tas mus li rau cov uas hwm nws.

    Kuv tus ntsuj plig, koj cav txog HUAB TAIS;
    Kuv tus kheej tas nrho, koj cav txog nws lub npe ntshiab.    
    Kuv tus ntsuj plig, koj cav txog HUAB TAIS,
    koj tsis txhob hnov qab nws tej paj tshab ib qho li.

    Txais:   (17) THuab Tais yuav ua siab zoo tas mus li rau cov uas hwm nws.

    ib yam li leej txiv hlub nws cov mw nyuam,
    HUAB TAIS kuj hlub cov uas hwm nw thiab.
    Vim nws paub tias nws puab peb los zoo li cas,
    nws nco ntsoov tias peb yog plua av.      

    Txais:   (17) THuab Tais yuav ua siab zoo tas mus li rau cov uas hwm nws.

    Tiam sis HUAB TAIS yuav ua siab zoo ib txhiab  
    dhau ib txhis rau cov uas hwm nws,
    thiab nws yuav ua ncaj rau cov me nyuam no cov me nyuam tib si
    yog tias lawv coj nraim nws cov lus qhia.

    Txais:   (17) THuab Tais yuav ua siab zoo tas mus li rau cov uas hwm nws.

    As Les Lus Yas:      Zam  10:   27

    Txais:   As les lus yas, as les lus yas.

    Huab Tais hais tias, kuv cov yaj mloog kuv lub suab,      
    kuv paub kuv cov yaj, lawv raws li nraim kuv qab.    

    Txais:   As les lus yas, as les lus yas.

    Ntawv Moo Zoo:     MK  6:   1-6

    1 Yes Xus tawm hauv qhov chaw ntawd los, nws rov los lub zos nws nyob hlob, cov thwj tim kuj nrog nws los thiab.
    2 Hnub Xas Npas Tos, Yes Xus mus pib qhia hauv tsev txoos. Muaj coob leej hnov nws cov lus, lawv ceeb tas, lawv hais tias : "Nws tau tej ntawd qhov twg los ? Leej twg muab lub siab thoob tsib ntawd rau nws, thiab muab cov hwj huam yees ntxwv loj uas nws ob txhais tes ua rau nws?
    3 Tus ntawd tsis yog tus kws ntoo, uas yog Mab Liab tus tub thiab yog Yas Kos, Yos Xes, Yus Das thiab Xis Moos lawv tus kwv tij lod ? Hos nws cov muam, puav leej nrog peb nyob ua ke ntawm no los tsis sub ?” Lawv poob siab loj vim Yes Xus.
    4 Ces Yes Xus hais rau lawv tias : "Ib tug Yaj Saub yeej raug luag hwm, tsuas yog nyob hauv lub zos nws nyob hlob, thiab hauv nws cov txheeb ze thiab nws tsev neeg xwb thiaj tsis muaj neeg hwm nws."
    5 Vim li ntawd, Yes Xus ua tsis tau ib yam hwj huam yees ntxwv nyob ntawd li, nws tsuas tsa tes rau tus puav tuag ceg los tuag tes kom zoo xwb. 6 Nws xav tsis thoob txog qhov tias lawv tsis muaj kev ntseeg li.


    ****************
    Los puas xaiv cov zaj nram no uas yog Thaj Txi Ntuj hwm cov LN Tuag Ua Tim Khawv:

    Zaj Nyeem Ib:          NLT  2:   19-20

    Cov kwv tij:
    19 Vim Txoj Cai, mas kuv thiaj ploj ntawm Txoj Cai mus lawm, kom kuv ciaj nyob hauv Tswv Ntuj. Kuv tau nrog Leej Pleev dai ncuv saum ntoo cuam,  20 tsis kav kuv tseem ciaj sia nyob, vim tsis yog kuv hos yog Leej Pleev ciaj nyob hauv kuv lawm xwb. Tam sis no kuv tseem muaj txoj sia nyob hauv kuv lub cev nqaij, mas kuv ua lub neej nyob hauv txoj kev ntseeg txog Tswv Ntuj Leej Tub, uas nws nyiam kuv, thiab rov muab nws rau luag kom tau pab kuv.

    NPN       126:   1BC-2AB, 2CD-3, 4-5, 6

    Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

    Thaum HUAB TAIS coj Xis Yoos cov neeg nyob txim rov los,
    peb zoo li yog ib co neeg ua npau suav.
    Peb lub ncauj muaj suab luag nqhua,
    peb tus nplaig qw nkauj zoo siab.

    Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

    Tej pej kum haiv neeg hais nroo ntws tias :
    "HUAB TAIS ua tej yam loj tas nrho rau lawv !"
    HUAB TAIS tau ua tej yam loj rau peb tiag,
    peb zoo siab kawg nkaus.

    Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

    HUAB TAIS, thov koj sau peb cov neeg nyob txim rov qab los
    zoo puav tam li dej sab siv huam nyob teb chaws suab puam.
    Cov neeg tseb nplej ntxuag kua muag,
    lawv yuav sau nplej ntxuag kev zoo siab.

    Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

    Thaum mus, lawv quaj kua muag poob,
    lawv ris cov seev noob mus,
    thaum rov los, lawv qw suab zoo siab,
    lawv ris cov res nplej tshiab los.

    Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

    As Les Lus yas:       MT  28:   19a, 20b
    .
    Huab Tais hais tias:  Nej mus, nej ua kom tas txhua haiv neeg los ua kuv thwj tim;
    ntawm kuv mas kuv niaj hnub nrog nej nyob mus txog lub zim txwv kawg.

    Ntawv Moo Zoo:          MT  28:   16-20

    16 Pab Kaum Ib leeg mus txog Nkas Lis Lais teb. Lawv mus saum lub roob uas Yes Xus teem rau lawv.
    17 Lawv pom Yes Xus, lawv pe hawm; ib txhia tseem ua xyem xyav.
    18 Yes Xus txav los ze lawv, nws hais cov lus no rau lawv : "Ntuj pub ib puas tsav yam hwj huam rau kuv nyob saum ntuj thiab nyob ntiaj teb no.
    19 Nej mus, nej ua kom tas txhua haiv neeg los ua kuv thwj tim. Nej ua lub Cim Ntuav nej hu txog Leej Txiv thiab Leej Tub thiab Leej Ntuj Plig Ntshiab lub npe los ntxuav lawv.
    20 Nej qhia kom lawv coj tas puas tsav yam uas kuv qhia rau nej. Ntawm kuv mas kuv niaj hnub nrog nej nyob mus txog thaum lub zim txwv kawg.”

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 6th February 2019, 1:14 pm

    TIM      7      LUB      2      HLIS      2019

    Hnub Tsib Lis Piam Plaub Nruab Xyoo C Nruab Lis Piam Xyoo I

    Zaj Nyeem Ib:      HES NPLAWS  12:   18-19, 21-24


    Cov kwv tij,
    18 Nej tsis yog txav mus ze ib yam uas kov tau, ib yam txawj cig hluas taws, los ze qhov tsaus ntuj nti, thiab ua kom yus nyuaj siab ntsuav, los ze cua daj cua dub, 19 los ze lub suab hom nrov, los tej suab hais lus nrov ua rau cov neeg ntshai, ces cov tau hnov thiaj thov kom txhob hais lus ntxiv rau lawv.  21 Tej yam lawv pom ntawd txaus ntshai tiag, Mais Xes thiaj hais tias : “Kuv ntshai tshee na.”
    22 Tab sis nej li mas nej tau txav los ze lub roob Xis Yoos, ze tus Tswv Ntuj muaj txoj sia lub tsheej Yes Lus Xas Les uas nyob saum ntuj, thiab ze txhiab leej vam leej cov Tshiab uas sib txoos ua ntees lom zem, 23 thiab ze ib tsoom tub hlob uas muaj npe sau nyob saum ntuj, thiab ze tus Tswv Ntuj txiav txim rau tas lub qab ntuj neeg, thiab ze cov neeg ncaj cov ntsuj plig uas Ntuj twb ua kom lawv zoo txhij zoo txhua tas lawm. 24 Thiab nej tau txav los ze Yes Xus uas yog tus sawv peb chaw cog lus tshiab, thiab ze ntawm cov ntshav uas raug hliv pub rau peb thiab qhia tau ib lub ntsiab lus tob tshaj As Npes cov ntshav.

    NPN       48:   2-3AB, 3CD-4, 9, 10-11

    Txais:   (10) Tswv Ntuj, peb nrhiav kom to taub koj txoj kev khuv leej
    nyob hauv koj lub tuam tsev.

    HUAB TAIS loj tas nrho, yeej tsim nyog peb cav txog nws
    nyob hauv Tswv Ntuj lub tsheej.
    Nws lub roob ntshiab, uas zoo tshaj txhua lub roob,
    yog txoj kev zoo siab rau tas ntiaj teb neeg.

    Txais:   (10) Tswv Ntuj, peb nrhiav kom to taub koj txoj kev khuv leej
    nyob hauv koj lub tuam tsev.

    Roob Xis Yoos, thaj chaw loj nyob sab qaum teb,
    tus tuam vaj lub tsheej,  
    Tswv Ntuj nyob hauv lawv tej vaj tej tsev,
    nws qhia rau lawv paub tias nws yog lawv lub ntsa loog zeb.

    Txais:   (10) Tswv Ntuj, peb nrhiav kom to taub koj txoj kev khuv leej
    nyob hauv koj lub tuam tsev.

    Ib yam li peb tau hnov, peb kuj tau pom li ntawd      
    nyob hauv tus HUAB TAIS kav tsoom tshiab lub nroog,
    nyob hauv peb tus Tswv Ntuj lub nroog;  
    Tswv Ntuj ua kom nws nyob ruaj nreb mus li.  

    Txais:   (10) Tswv Ntuj, peb nrhiav kom to taub koj txoj kev khuv
    leej nyob hauv koj lub tuam tsev.

    Tswv Ntuj, peb xav txog koj txoj kev khuv leej
    nyob hauv koj lub tuam tsev.
    Ib yam li koj lub npe, Tswv Ntuj, koj lub koob meej
    ncha mus txog npoo ntiaj teb kawg.      
    Txoj kev ncaj ncees nyob puv nkaus koj txhais tes xis.  

    Txais:   (10) Tswv Ntuj, peb nrhiav kom to taub koj txoj kev khuv leej
    nyob hauv koj lub tuam tsev.

    As Les Lus Yas:       MK  1:   15

    Txais:  As les lus yas, as les lus yas.

    Tswv Ntuj lub Ceeb Tsheej nyob ze lawm;
    nej cia li los lees txhaum thiab ntseeg txog lub Moo Zoo.

    Txais:  As les lus yas, as les lus yas.

    Ntawv Moo Zoo        MK  6:   7-13

    7 Yes Xus hu Pab Kaum Ob los cuag nws, ces nws xa lawv ua tej pab ob leeg mus. Nws pub lub hwj huam ntiab tau cov dab tsis huv rau lawv.
    8 Yes Xus qhia lawv kom txhob nqa dab tsi taug kev li, tsuas nqa tib rab pas nrig xwb; txhob ntim mov, txhob nqa hnab, txhob ntim xim nyiaj rau hauv duav siv li.
    9 Lawv yuav tsum rau khau khiab, tiam sis tsis txhob hnav ob lub tsho sib tshooj.
    10 Yes Xus tseem hais rau lawv tias : "Nej chaws mus hauv lub tsev twg, nej yuav nyob hauv lub tsev ntawd mus txog hnub nej rov qab.
    11 Yog qhov chaw twg tsis txais nej, thiab luag tsis mloog nej, mas nej tso qhov chaw ntawd tseg, nej nchos cov plua av lo nej qab xib taws tib si cia ua tim khawv txiav txim rau lawv."
    12 Cov thwj tim tawm mus, lawv tshaj kom tsoom sid tig los hloov siab yuav dua siab tshiab.
    13 Lawv ntiab ntau tus dab phem tawm, thiab lawv muab roj pleev ntau tus neeg mob zoo hlo.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 7th February 2019, 5:18 am

    TIM 8 LUB 2 HLIS 2019

    Hnub Rau Lis Piam Plaub Nruab Xyoo C Nruab Lis Piam Xyoo I

    Hwm LN Jerome Emiliani; hwm LN Josephine Bakhita

    Zaj Nyeem Ib: HES NPLAWS 13: 1-8


    1 Nej yuav cia txoj kev sib nyiam sib hlub xws li ib pab kwv tij nyob ruaj hauv nej. 2 Nej nco ntsoov txoj kev ua zoo txais tej qhua. Vim txoj kev txais qhua, mas tej tus neeg thiaj tau txais ib co Tshiab tuaj so hauv lawv tsev, lawv twb tsis paub tias yog ib co Tshiab. 3 Nej nco ntsoov txog cov neeg nyob hauv tsev loj faj, ib yam li yog nej nrog lawv kaw ua ke rau hauv ntag. Nej nco ntsoov txog cov raug luag tsim txom xws li yog nej raug thiab, vim nej muaj ib lub cev nqaij thiab. 4 Nej sawv daws yuav hwm txoj kev ua txij nkawm, nej yuav txuag lub txaj ua txij ua nkawm tsis pub tsuas ib qho txhaum. Vim Tswv Ntuj yuav txiav txim rau cov ua plees ua yi, thiab cov zes luag txij luag nkawm. 5 Nej yuav tsis txhob cia tus yeeb yam ntshaw nyiaj txiag coj nej, nej muaj li cas mas nej yuav txaus siab yuav li ntawd. Vim Tswv Ntuj tau hais tias: “Kuv yuav tsis tsis khuv xim koj, yuav tsis tso koj pov tseg ib zaug li.” 6 Ces peb thiaj muaj cuab kav hais tias: “Huab Tais yog tus tuaj pab kuv, kuv tsis ntshai li. Leej twg yuav ua tau dab tsi rau kuv?”
    7 Nej nco ntsoov txog nej cov thawj coj uas tau tshaj Tswv Ntuj lo lus rau nej. Nej ntsia saib lawv coj lawv lub neej mus xaus zoo li cas, ces nej yoog lawv txoj kev ntseeg mog !
    8 Yes Xus Pleev zoo li qub nag hmo thiab hnub no, thiab yuav zoo li qub mus li ib txhis.

    NPN 27: 1, 3, 5, 8B-9ABC


    Txais: (1a) HUAB TAIS yog kuv qhov pom kev thiab yog tus cawm kuv.

    HUAB TAIS yog kuv qhov pom kev thiab yog kuv tus cawm kuv,
    Kuv yuav ntshai leej twg?
    HUAB TAIS yog kuv qhov chaw vam hauv kuv lub neej,
    kuv yuav ntshai leej twg?

    Txais: (1a) HUAB TAIS yog kuv qhov pom kev thiab yog tus cawm kuv.

    Txawm muaj ib pab tub rog nyob ntawm kuv hauv ntej,
    los kuv lub siab yuav tsis ntshai.
    Txawm luag ua ib nthwv rog tawm tsam kuv
    los kuv yeej yuav tso siab lug.

    Txais: (1a) HUAB TAIS yog kuv qhov pom kev thiab yog tus cawm kuv.

    Vim nws yuav muab kuv nkaum rau hauv nws lub tsev,
    Thaum txog hnub muaj kev kub ntxhov;
    Nws yuav muab kuv zais rau hauv nws lub tsev tsam phooj,
    nws yuav muab kuv tso nyob siab rau saum ib lub tsua.

    Txais: (1a) HUAB TAIS yog kuv qhov pom kev thiab yog tus cawm kuv.

    HUAB TAIS, kuv nrhiav kom tau nrog koj nyob.
    Thov txhob muab koj lub ntsej muag zais ntawm kuv,
    txhob npau taws txhob ntiab koj tus tub txib.
    Koj yog tus pab kuv: txhob ntiab kuv khiav ntawm koj mus.

    Txais: (1a) HUAB TAIS yog kuv qhov pom kev thiab yog tus cawm kuv.

    As Les Lus Yas: LK 8: 15

    Txais: As Les Lus Yas, as les lus yas.

    Muaj hmoov zoo yog cov uas muaj ib lub siab dav coj raws lo lus
    thiab lawv txi txiv ncw vim lawv mob siab rau tsis tso tseg.

    Txais: As Les Lus Yas, as les lus yas..

    Ntawv Moo Zoo: MK 6: 14-29

    14 Tus vaj Hes Los hnov hais txog Yes Xus, vim Yes Xus lub npe nto moo loj, thiab luag tej hais tias : "Zam Ntxuav Plig sawv hauv cov tuag rov qab los lawm, vim li ntawd, nws thiaj ua tau hwj huam yees ntxwv ." 15 Hos ib txhia hais tias : “Nws yog Es Lias.” Lwm cov hais tias : “Yog ib tug yaj saub xws li lwm tus yaj saub.” 16 Tab sis Hes Los hnov hais txog Yes Xus, nws hais tias : “Yog tus Zam uas kuv tau txiav nws caj dab, nws sawv rov los lawm.” 17 Vim Hes Los yog tus xa neeg mus ntes Zam thiab muab saw hlau khi Zam rau hauv tsev loj faj, tim Hes Los Dias, uas yog Hes Los tij laug Fis Lis Pos tus poj niam, tab sis Hes Los yuav los ua nws poj niam. 18 Ces Zam hais rau Hes Los tias: "Koj tsis muaj cai yuav koj tij laug tus poj niam." 19 Ces Hes Los Dias ntxub Zam tas siab nrho, nws xav muab Zam tua, tab sis nws tua tsis tau, 20 vim Hes Los ntshai Zam, thiab nws paub tias Zam yog ib tug neeg siab ncaj siab ntshiab, ces nws txuag Zam. Thaum Hes Los hnov Zam hais lus, mas ua rau nws ntxhov siab hnyo. Nws kuj nyiam mloog Zam thiab.
    21 Muaj ib lub zoo sij hawm los txog, yog hnub tsuj xeeb Hes Los hnub yug. Nws ua ib roog qav caw cov nom tswv, cov thawj tub rog, thiab cov neeg tseem ceeb hauv xeev Nkas Lis Lais tuaj koom. 22 Thaum ntawd, Hes Los Dias tus ntxhais chaws los dhia seev cev, nws dhia tau ntxim Hes Los thiab cov qhua tuaj koom rooj qav ntawd siab kawg. Ces tus vaj hais rau tus ntxhais tias : "Koj thov saib koj xav yuav dab tsi, kuv yuav muab rau koj." 23 Ces tus vaj cog lus rau tus ntxhais tias : "Koj thov yam twg, mas kuv yuav muab rau koj, tab txawm yuav yog ib nrab ntawm lub teb chaws kuv kav !" 24 Tus ntxhais tawm plaws mus nug nws niam tias : "Kuv yuav thov dab tsi ?" Leej niam hais tias : "Zam Ntxuav Plig lub taub hau." 25 Tam sis ntawd, tus ntxhais rov ntsuj los ntawm tus vaj, nws hais tias : "Kuv xav kom tam sis no koj muab Zam Ntxuav Plig lub taub hau tso rau saum ib lub phaj los cev rau kuv." 26 Tus vaj tu siab tas nrho, tab sis vim nws tau cog lus lawm thiab vim muaj cov qhua, nws thiaj tsis xav thim nws lo lus. 27 Ces tus vaj txib ib tug zov keeb tam sis ntawd, kom mus nqa Zam lub taub hau los. Tus zov keeb mus txiav Zam caj dab hauv tsev loj faj. 28 Ces nws nqa Zam lub taub hau txawb hauv ib lub phaj los cev rau tus ntxhais; tus ntxhais muab cev rau nws niam. 29 Zam cov thwj tim hnov li ntawd, ces lawv tuaj coj Zam lub cev mus tso rau hauv ib lub ntxa.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 8th February 2019, 8:21 am

    TIM 9 LUB 2 HLIS 2019

    Hnub Xya Lis Piam Plaub Nruab Xyoo C Nruab Lis Piam Xytoo I

    Zaj Nyeem Ib: HES NPLAWS 13: 15-17, 20-21


    Cov kwv tij:
    15 Peb cia li cev ib thaj cav txiaj ntsim nyob hauv Yes Xus rau Tswv Ntuj txhua lub sij hawm; nws yog cov lus txhawv zoo li ib co txiv txi ntawm cov di ncauj uas lees paub Tswv Ntuj lub npe. 16 Nej yuav nco ntsoov tsis txhob hnov qab txoj kev ua zoo rau luag thiab muab yam yus muaj faib rau luag, vim Tswv Ntuj nyiam tej txoj kev txi Ntuj zoo li ntawd.
    17 Nej yuav mloog nej cov thawj coj lus, thiab nej yuav tsis txhob cav lawv, vim lawv yog tus saib xyuas nej tus plig, lawv yuav tau mus lees ntawm Ntuj txog lawv txoj hauj lwm. Yog nej ua kom lawv zoo siab coj nej, mas lawv yuav tsis muaj chaw yws txog nej, yog lawv muaj chaw yws mas yuav tsis muaj txiaj ntsim zoo rau nej li.
    20 Thov kom tus Tswv Ntuj pub kev thaj yeeb, uas yog tus tau tsa tus thawj tswv zov yaj, peb tus Huab Tais Yes Xus, hauv cov tub tuag rov los, nyob hauv cov roj ntsha hliv ua kev cog lus nyob mus li, 21 thov kom tus Tswv Ntuj ntawd muab txoj kev txawj ua zoo txhua yam pub rau nej kom nej ua raws nraim nws lub siab xav, ces nej thiaj yuav ua tau yam xis nws siab nyob hauv Yes Xus Pleev, uas yog tus tsim nyog tau txais lub koob meej mus li ib txhiab ib txhis. Ua li.

    NPN 23: 1-3A, 3B-4, 5, 6

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    HUAB TAIS yog tus tswv zov yaj saib kuv, kuv yuav tsis ntshaw dab tsi.
    Nws cia kuv so nyob hauv tej tshav zaub mos ntsuab xiab.
    Nws coj kuv mus tso nyob ze tej tus dej tus yees;
    nws ua kom kuv tus ntsuj plig los siav.

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    Nws coj kuv mus taug txoj kev ncaj vim nws lub npe.
    Txawm kuv taug kev nyob hauv lub hav tsaus nti,
    kuv tsis ntshai dab tsi phem, vim koj nyob rawv ntawm kuv ib sab
    nrog koj rab pas nplawm thiab rab pas nrig, ua rau kuv lub siab loj.

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    Koj rau ib rooj mov rau ntawm kuv xub ntiag
    rau kuv cov yeeb ncuab ntsia ntsoov.
    Koj muab roj pleev kuv taub hau;
    kuv lub khob puv phwj yaws.

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    Kuv tsuas tau ntsib txoj kev ua siab zoo thiab kev hlub
    txhua txhia hnub hauv kuv lub neej xwb.
    Ces kuv yuav tau nyob hauv HUAB TAIS tsev
    ntev niaj ntau xyoo lawm yav tom ntej.

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    As Les Lus Yas: ZAM 10: 27

    Txais: As les lus yas, as les lus yas.

    Huab Tais hais tias, kuv cov yaj mloog kuv lub suab;
    kuv paub lawv, ces lawv caum kuv qab.

    Txais: As les lus yas, as les lus yas.

    Ntawv Moo Zoo: MK 6: 30-34

    30 Cov Hauv Paus Xa Lus los sib sau ncig Yes Xus, lawv piav tas puas tsav yam uas lawv tau ua thiab tau qhia.
    31 Ces Yes Xus hais rau lawv tias : "Nej los mus rau ib qho chaw xu kev tsis muaj neeg, nej so me ntsis." Vim cov neeg tuaj thiab cov rov qab coob coob, ces cov Hauv Paus Xa Lus tsis xyeej ib lub sij hawm me me noj mov li.
    32 Lawv thiaj caij nkoj mus rau ib qho chaw xu kev tsis muaj neeg.
    33 Tsoom sid pom cov Hauv Paus Xa Lus caij nkoj mus, coob leej twb paub lawm. Ces sawv daws khiav ko taw hauv txhua lub nroog tuaj mus rau qhov chaw ntawd. Lawv xub mus txog dua cov thwj tim.
    34 Thaum Yes Xus nqes nkoj, nws pom ib pab neeg coob coob, nws lub siab qaug lais hlub lawv, vim lawv zoo li cov yaj uas tsis muaj tswv zov. Ces Yes Xus pib qhuab qhia lawv txog ntau yam.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 11th February 2019, 3:09 am

    TIM 11 LUB 2 HLIS 2019

    Hnub Ob Lis Piam Tsib Nruab Xyoo C Nruab Lis Piam Xyoo I

    Hwm Niam Mab Liab Tshwm Sim nyob Lourdes Fab Kis teb

    Zaj Nyeem Ib: HP 1: 1-19


    1 Thaum chiv lub keeb, Tswv Ntuj tsim lub ntuj thiab lub ntiaj teb, 2 mas lub ntiaj teb tseem tsis tau tsheej thiab tsis muaj dab tsi nyob hauv li. Qhov tsaus ntuj nti npog lub qhov ntuj dub nciab. Tswv Ntuj nthwv cua kiv nplawm ntws saum nplaim dej.
    3 Tswv Ntuj hais tias : "Kom muaj qhov pom kev." Ces txawm muaj qhov pom kev tuaj. 4 Tswv Ntuj pom tias qhov pom kev ntawd zoo kawg. Tswv Ntuj cais qhov pom kev ntawm qhov tsaus ntuj. 5 Tswv Ntuj hu qhov pom kev ua "nruab hnub" thiab hu qhov tsaus ntuj ua "hmo ntuj." Txawm muaj tsaus ntuj thiab muaj kaj ntug : yog thawj hnub.
    6 Tswv Ntuj hais tias : "Kom muaj ib lub ruv ntsuab nyob hauv nruab nrab cov dej thiab kom nws quas cov dej ntawm cov dej". Ces txawm muaj li ntawd tuaj. 7 Tswv Ntuj ua ib lub ruv ntsuab los quas cov dej nyob hauv qab lub ruv ntawm cov dej nyob saum qaum lub ruv. 8 Tswv Ntuj hu lub ruv ntsuab ua "lub ntuj." Txawm muaj tsaus ntuj thiab muaj kaj ntug : yog hnub ob.
    9 Tswv Ntuj hais tias : "Kom cov dej uas nyob hauv qab lub ntuj sib sau los nyob ib qho chaw xwb, thiab kom av qhuav tshwm tawm los." Ces txawm muaj li ntawd tuaj. 10 Tswv Ntuj hu cov av qhuav ua "ntiaj teb" thiab hu cov dej sib sau ua ke ua "hiav txwv." Tswv Ntuj pom tias qhov ntawd zoo kawg. 11 Tswv Ntuj hais tias : "Kom lub ntiaj teb tuaj nroj tsuag ntsuab xiab : kom muaj nroj tsuag txawj muaj noob, thiab kom muaj ntoo txi txiv nyias txi nyias hom txiv uas muaj nyias hom noob nyob ntiaj teb." Ces txawm muaj li ntawd tuaj. 12 Ntiaj teb tuaj nroj tsuag ntsuab xiab : tej nroj tsuag nyias txawj txi nyias hom noob thiab tej ntoo nyias txawj txi nyias hom txiv uas muaj nyias hom noob. Tswv Ntuj pom hais tias qhov ntawd zoo kawg. 13 Txawm muaj tsaus ntuj thiab muaj kaj ntug : yog hnub peb.
    14 Tswv Ntuj hais tias : "Kom muaj tej lub pom kev ci ci nyob saum lub qab ntuj ntsuab saud, cia cais nruab hnub thiab hmo ntuj, cia ua tej lub cim, thiab cia xam hnub xam nyoog, thiab suav hnub suav xyoo, 15 kom cov pom kev ntawd ci nyob saum lub qab ntuj ntsuab ua kom ntiaj teb pom kev." Ces txawm muaj li ntawd tuaj. 16 Tswv Ntuj ua ob lub pom kev ci loj dua cov, lub pom kev ci loj dua yog lub kav nruab hnub, lub pom kev ci me dua yog lub kav hmo ntuj; thiab nws ua cov hnub qub. 17 Tswv Ntuj muab lawv txawb rau saum lub qab ntuj ntsuab saud kom ci rau ntiaj teb pom kev, 18 cia kav nruab hnub thiab hmo ntuj, thiab cia cais qhov pom kev ntawm qhov tsaus ntuj. Tswv Ntuj pom tias qhov ntawd zoo kawg. 19 Txawm muaj tsaus ntuj thiab muaj kaj ntug : yog hnub plaub.

    NPN 104: 1-2A, 5-6, 10+12, 24+35C

    Txais: (31b) Kom Huab Tais zoo siab rau nws cov hauj lwm.

    Kuv tus ntsuj plig, koj cia li cav txog HUAB TAIS!
    HUAB TAIS kuv tus Tswv Ntuj, koj yeej loj tas nrho!
    Koj hnav hwj chim thiab koob meej ua ris tsho,
    koj hnav qhov pom kev ua tsho tshaj sab.

    Txais: (31b) Kom Huab Tais zoo siab rau nws cov hauj lwm.

    Koj txhim lub ntiaj teb kom ruaj rau ntawm nws qhov chaw txawb,
    nws yuav txav tsis tau mus ib txhiab ib txhis.
    Koj muab lub hiav txwv ua zoo li ib daim tsoos tsho npog nws;
    muaj dej tob siab tshaj tej ncov roob.

    Txais: (31b) Kom Huab Tais zoo siab rau nws cov hauj lwm.

    Koj ua kom muaj dej txhawv ntws raws tej kwj ha
    thiab chev ncig raws tej hauv paus roob.
    Cov noog ya saum ntuj ua zes nyob ze cov dej,
    lawv tsaws saum tej ceg ntoos quaj.

    Txais: (31b) Kom Huab Tais zoo siab rau nws cov hauj lwm.
    HUAB TAIS, koj tej hauj lwm muaj ntau tsav yam kawg li!
    Koj txoj kev thoob tsib tsim txhua yam zoo tas nrho;
    lub ntiaj teb puv nkaus koj tej kev nplua nuj.
    Kuv tus ntsuj plig, koj cia li cav txog HUAB TAIS! As les lus yas.

    Txais: (31b) Kom Huab Tais zoo siab rau nws cov hauj lwm.

    As Les Lus Yas: MT 4: 23

    Txais: As les lus yas, as les lus yas.

    Yes Xus tshaj lub Moo Zoo txog Ntuj lub Ceeb Tsheej
    thiab nws kho txhua yam mob nyob hauv cov neeg zoo hlo.

    Txais: As les lus yas, as les lus yas.

    Ntawv Moo Zoo: MK 6: 53-56


    53 Cov thwj tim hla dhau dej, lawv tuaj nres ntawm thaj av Nkes Nes Xas Les, ces lawv nqes nkoj.
    54 Thaum lawv nqes plhuav nkoj, muaj neeg cim tau Yes Xus tam sis ntawd.
    55 Ces lawv khiav mus ncig thoob ib cheeb tsam ntawd, lawv mus kwv cov neeg muaj txiab nkeeg saum tej lub txaj tuaj rau ntawm qhov chaw uas lawv hnov tias Yes Xus nyob.
    56 Txhua txhia qhov chaw uas Yes Xus mus, hauv cov zos, cov nroog, los tom tej teb, lawv coj neeg mob tuaj tso rau ntawm tej tshav puam, lawv thov Yes Xus kom nws cia lawv kov nws, tab yog kov nws lub tw tsho xwb los xij. Ces cov neeg uas tau kov Yes Xus puav leej dim ntawm lawv tus mob.



    Last edited by Mim on 12th February 2019, 7:05 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 11th February 2019, 6:25 am

    TIM 12 LUB 2 HLIS 2019

    Hnub Peb Lis Piam Tsib Nruab Xyoo C Nruab Lis Piam Xyoo I

    Zaj Nyeem Ib: HP 1: 20—2:4A


    20 Tswv Ntuj hais tias : "Kom cov dej muaj tau tej tsiaj muaj sia npau xi nyob rau hauv, thiab kom muaj noog ya nyob saum ntiaj teb, saum ib nta lub qab ntuj ntsuab." Ces txawm muaj li ntawd tuaj. 21 Tswv Ntuj tsim cov zaj hiav txwv loj loj thiab tas puas tsav yam tsiaj muaj sia uas txawj ntab hauv dej, coob coob npau xi nyob hauv dej, nyias muaj raws nyias hom; thiab tsim tas cov noog muaj tis, nyias muaj raws nyias hom. Tswv Ntuj pom tias qhov ntawd zoo kawg. 22 Tswv Ntuj foom lus zoo rau lawv tias : "Nej yeej meem tsim noob, yeej meem huam vam, yeej meem mus nyob puv cov dej hauv hiav txwv, thiab kom cov noog yeej meem huam vam mus puv ntiaj teb." 23 Txawm muaj tsaus ntuj thiab muaj kaj ntug : yog hnub tsib.
    24 Tswv Ntuj hais tias : "Kom lub ntiaj teb txawj muaj txhua yam tsiaj muaj sia, nyias muaj raws nyias hom : tsiaj nyeg, kab ntsaum, tsiaj qus, nyias muaj raws nyias hom." Ces txawm muaj li ntawd tuaj. 25 Tswv Ntuj ua tej tsiaj qus kom nyias muaj nyias hom, tej tsiaj nyeg kom nyias muaj nyias hom, thiab tas txhua yam kab ntsaum kom nyias muaj nyias hom. Tswv Ntuj pom tias qhov ntawd zoo kawg. 26 Tswv Ntuj hais tias : "Cia peb ua tib neeg kom zoo raws li peb tus duab kom zoo xws li peb. Yuav cia lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av. 27 Ces Tswv Ntuj tsim tib neeg zoo raws li nws tus duab; raws li Tswv Ntuj tus duab, nws tau tsim tib neeg. Nws tsim nkawd ua txiv neej thiab ua poj niam. 28 Tswv Ntuj foom lus zoo rau nkawd thiab hais rau nkawd tias : "Neb yeej meem tsim noob, yeej meem huam vam thiab mus nyob puv ntiaj teb, thiab kav ntiaj teb; neb tswj cov ntses nyob hauv hiav txwv, cov noog ya saum ntuj thiab tas puas tsav yam tsiaj uas nkag saum av." 29 Tswv Ntuj hais tias : "Kuv muab tas puas tsav yam nroj tsuag muaj noob uas tuaj nyob saum npoo av, thiab kuv muab tas puas tsav yam ntoo txi txiv thiab muaj noob rau neb : tej ntawd yuav yog neb tej txhiam laj txhiam xws. 30 Rau tas cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab tas txhua yam nroj ntsuab rau lawv ua txhiam xws noj." Ces txawm muaj li ntawd tuaj. 31 Tswv Ntuj ntsia tas txhua yam nws tau ua : txhua yam ntawd zoo kawg nkaus. Txawm muaj tsaus ntuj thiab muaj kaj ntug : yog hnub rau.
    2 1 Lub ntuj thiab lub ntiaj teb yog tsim los zoo li no, thiab tas txhua yam nyob rau hauv. 2 Tswv Ntuj ua nws txoj num tiav tas rau hnub xya. Ces hnub xya nws thiaj so, vim nws ua txhua yam tiav tas lawm. 3 Tswv Ntuj foom lus zoo rau hnub xya thiab muab hnub xya ua hnub ntshiab, vim nws ua nws txoj num tsim ntuj tsim teb tiav tas ces hnub ntawd nws so. 4a Zaj kwv huam piav txog lub ntuj thiab lub ntiaj teb, thaum ntuj tsim teb raug thaum, mas yog zoo li saum no.

    NPN 8: 4-5, 6-7, 8-9

    Txais: (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

    Thaum kuv ntsia saum ntuj pom cov hauj lwm koj ob txhais tes tau tsim,
    lub hli thiab cov hnub qub uas koj tau muab txawb rau lawv qhov chaw,
    neeg yog dab tsi , koj thiaj quav ntsej txog nws?
    Neeg tus tub yog dab tsi koj thiaj hlub txog nws?

    Txais: (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

    Koj tau tsim nws nyob qis me ntsis cov tshiab,
    koj tau muab meej mom muab hwj chim rau nws ntoo.
    Koj tau tsa nws ua tus kav txhua yam koj txhais tes tau tsim,
    koj muab txhua yam tso rau hauv nws qab xib taws:

    Txais: (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

    Tas nrho tej yaj tej nyuj,
    tej tsiaj nyob hauv nruab liaj nruab teb,
    cov noog ya saum huab saum cua, cov ntses nyob hauv hiav txwv,
    thiab txhua yam ua luam dej taug raws cov hiav txwv.

    Txais: (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

    As Les Lus yas: NPN 119: 36, 29B

    Txais: As les lus yas, as les lus yas.

    HUAB TAIS, thov koj rub kuv lub siab kom nyiam koj tej lus qhia,
    thiab pub lub txiaj ntsim rau kuv kom kuv coj koj txoj cai.

    Txais: As les lus yas, as les lus yas.

    Ntawv Moo Zoo: MK 7: 1-13

    1 Cov Fas Lis Xais thiab tus puav Kws Ntawv Ntshiab tuaj Yes Lus Xas Les tuaj, lawv sib sau ntsauv Yes Xus. 2 Lawv pom tus puav thwj tim xuas tes tsis huv noj mov, txhais tias lawv tsis xub ntxuav tes tso, 3 vim tias cov Fas Lis Xais, thiab tas cov Yus Das huv tib si, mas lawv tsis noj mov yog lawv tsis xub ntxuav tes txog puag pem luj tshib tib si tso, raws nraim li tej laus ib txwm ua los. 4 Thaum lawv mus kav kiab kav khw rov los, yog lawv tsis tau xub pov dej ntxuav lawv tso, mas lawv tsis noj mov. Tseem muaj ntau yam uas cov Yus Das ua raws li txoj kev ib txwm ua kam los : xws li ntxuav khob, ntxuav hub, thiab ntxuav tej phaj tej tais. 5 Vim li ntawd, cov Fas Lis Xais thiab cov kws Ntawv Ntshiab thiaj nug Yes Xus tias : "Ua cas koj cov thwj tim tsis ua raws li tej laus kev cai ib txwm qhia kom ua, lawv cia li xuas tes tsis huv noj mov?" 6 Yes Xus hais rau lawv tias : "Cov me neeg zoo sab nraud, His Xais hais raug kawg txog nej, ntawv thiaj sau tseg tias : ‘Haiv neeg no tsuas hwm kuv ntawm di ncauj xwb, lawv lub siab nyob deb kuv. 7 Lawv lam teev kuv dag, tej kev cai lawv qhuab qhia tsuas yog neeg kab ke xwb !’ 8 Nej tso Tswv Ntuj lo lus qhia tseg, nej coj rawv neeg txoj cai ib txwm qhia los." 9 Thiab Yes Xus hais ntxiv rau lawv tias : "Nej tshem Tswv Ntuj lo lus qhia pov tseg kom tas, nej thiaj tau coj nej cov kev cai ib txwm qhia los. 10 Mais Xes yeej tau qhia tias : ‘Koj yuav hwm koj niam koj txiv,’ thiab tseem qhia tias: ‘Tus tsawm niam tsawm txiv yuav tsum xausb rau kev tuag.’ 11 Nej mas nej hais tias, yog ib tug neeg hais rau nws niam los nws txiv tias: ‘Qhov kuv yuav muab pub rau koj, qhov koj yuav tau txais ntawm kuv, mas yog kos npas, txhais tias muab qee rau Ntuj lawm, 12 ces nej pub kom nws tsis ua dab tsi ntxiv rau nws niam los nws txiv li. 13 Nej rhuav Tswv Ntuj lo lus li no vim nej muab nej tej kab ke ib txwm ua los qhia rau luag xwb. Nej tseem ua ntau yam ntxiv zoo li ntawd thiab."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 12th February 2019, 3:31 pm

    TIM 13 LUB 2 HLIS 2019

    Hnub Plaub Lis Piam Tsib Nruab Xyoo C Nruab Lis Piam Xyoo I

    Zaj Nyeem Ib: HP 2: 4B-9, 15-17


    4b Thaum lub caij HUAB TAIS Tswv Ntuj tsim lub ntiaj teb thiab lub ntuj, 5 tseem tsis tau muaj ib tug yub ntoo tuaj nyob ntiaj teb, tsis tau muaj ib tug nroj tsuag tuaj li, vim HUAB TAIS Tswv Ntuj tsis tau ua kom los nag rau ntiaj teb, thiab tsis tau muaj tib neeg los ncaws tej av li. 6 Tab sis muaj dej txia hauv av los ywg tas nrho daim npoo av kom noo. 7 Ces HUAB TAIS Tswv Ntuj muab ib thooj av nplaum los puab ua ib tug txiv neej, nes tshuab pa rau hauv tus txiv neej qhov ntswg, ces tus txiv neej ciaj los ua ib tug muaj sia.
    8 HUAB TAIS Tswv Ntuj cog tau ib lub vaj nyob Es Dees, nyob sab hnub tuaj. Nws muab tus txiv neej uas nws tau puab tso rau hauv lub vaj ntawd. 9 HUAB TAIS Tswv Ntuj ua kom txhua yam ntoo uas zoo saib thiab zoo noj tuaj nyob hauv lub vaj thaj av. Tus ntoo muaj txoj sia tuaj nyob hauv nruab nrab lub vaj, thiab tus ntoo uas paub qhov zoo qhov phem.
    15 HUAB TAIS Tswv Ntuj coj tus txiv neej mus nyob hauv lub vaj Es Dees kom nws cog lub vaj thiab tu lub vaj. 16 HUAB TAIS Tswv Ntuj hais tau ib lo lus qhia rau tus txiv neej li no : "Koj noj tau cov txiv txi ntawm tas txhua tsob ntoo hauv lub vaj no tib si. 17 Tiam sis cov txiv txi ntawm tus ntoo paub qhov zoo thiab qhov phem, mas koj txhob noj. Yog koj noj thaum twg, mas txij thaum ntawd mus koj yuav txawj tuag."

    NPN 104: 1-2A, 27-28, 29BC-30

    Txais: (1a) Kuv tus ntsuj plig, koj cia li cav txog HUAB TAIS!

    Kuv tus ntsuj plig, koj cia li cav txog HUAB TAIS!
    HUAB TAIS kuv tus Tswv Ntuj, koj yeej loj tas nrho!
    Koj hnav hwj chim thiab koob meej ua ris tsho,
    koj hnav qhov pom kev ua tsho tshaj sab.

    Txais: (1a) Kuv tus ntsuj plig, koj cia li cav txog HUAB TAIS!

    Tas txhua yam koj tau tsim ntsia ntsoov koj
    tias koj yuav pub rau lawv noj thaum txog caij txog nyoog.
    Thaum koj muab pub rau lawv, lawv mus sau los,
    thaum koj qhib koj ob txhais tais, muaj tej yam zoo puv npo.

    Txais: (1a) Kuv tus ntsuj plig, koj cia li cav txog HUAB TAIS!

    Yog koj rho lawv txoj pa, lawv kawg puas mus
    thiab yuav rov mus thawj lawv cov plua tshauv.
    Thaum koj xa koj lub tswv yim mus, nws yuav tsim lawv dua,
    thiab koj yuav ua kom lub ntiaj teb rov tshiab tuaj.

    Txais: (1a) Kuv tus ntsuj plig, koj cia li cav txog HUAB TAIS!

    As Les Lus Yas: Zam 17: 17B, 17A

    Txais: As les lus yas, as les lus yas.

    Huab Tais, koj lo lus yog qhov tseeb:
    thov koj qee zias peb los nyob hauv qhov tseeb.

    Txais: As les lus yas, as les lus yas.

    Ntawv Moo Zoo: MK 7: 14-23

    14 Yes Xus rov hu tsoom sid los ntawm nws, ces nws hais rau lawv tias : "Tas nej sawv daws, nej mloog kuv kom nej to taub!
    15 Tsis muaj dab tsi nyob sab nraud, uas nkag rau hauv neeg lub cev, yuav ua tau kom neeg tsis huv. Tab sis yog tej yam tawm hauv neeg los ua kom neeg tsis huv.
    16 Leej twg muaj pob ntseg mloog, yeej meem mloog.
    17 Thaum Yes Xus los hauv tsev thiab nyob nrug deb ntawm tsoom sid lawm, cov thwj tim nug nws txog zaj paj lug ntawd.
    18 Ces Yes Xus hais rau lawv tias : "Nej tsis muaj tswv yim to taub li thiab lod ? Nej tsis to taub tias tej yam nyob sab nraum no, nkag rau hauv tib neeg ua tsis tau kom tib neeg tsis huv.
    19 Vim tias tej yam ntawd tsis nkag mus hauv tib neeg lub siab, tsuas nkag rau hauv plab, tas ces tawm mus rau nraum chaw plob lawm xwb.” (Ua li mas Yes Xus qhia tias txhua hom txhiam xws puav leej huv).
    20 Yes Xus hais ntxiv tias : "Yam uas tawm hauv tus tib neeg los yog yam ua kom nws tsis huv.
    21 Vim tias tej yam uas txhawv hauv tib neeg nruab siab los yog tej yam tswv yim phem, yog kev xav ua plees ua yi, kev ua tub sab tub nyiag, kev tua neeg,
    22 kev deev luag txij nkawm, kev cuaj khaum, kev lim hiam, kev ua cuav, kev ntxias luag ua plees ua yi, kev khib, kev thuam Ntuj, kev muab hlob thuam luag, kev vwm tsis meej pem.
    23 Txhua hom kev phem no yog tawm sab hauv los, mas thiaj ua kom neeg tsis huv."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 13th February 2019, 4:46 pm

    TIM 14 LUB 2 HLIS 2019

    Hnub Tsib Lis PIam Tsib Nruab Xyoo C Nruab Lis Piam Xyoo I

    Hwm LN Cyril thiab LN Methodius

    Zaj Nyeem Ib: HP 2: 18-25


    18 HUAB TAIS Tswv Ntuj hais tias : "Tsis zoo cia tus txiv neej nyob ib leeg xwb, kuv yuav ua ib tug pab nws kom phim nws." 19 HUAB TAIS Tswv Ntuj thiaj muab av los puab tas puas tsav yam tsiaj qus thiab tas puas tsav yam noog ya saum ntuj. Nws coj los rau tus txiv neej xyuas saib nws yuav tis npe li cas rau. Txhua yam tsiaj yuav muaj lub npe raws li tus txiv neej tis rau nws. 20 Tus txiv neej tis npe rau tas txhua hom tsiaj nyeg, rau cov noog ya saum ntuj, thiab rau tas txhua hom tsiaj qus, tiam sis nws nrhiav tsis tau ib tug pab nws kom phim nws li.
    21 HUAB TAIS Tswv Ntuj tso ib tug dab ntub hlob hlob laum tus txiv neej; ces thaum nws tsaug zog lawm, Tswv Ntuj rho nws ib tug tav tawm los, nws muaj nqaij los kaw lub qhov rov rau. 22 HUAB TAIS Tswv Ntuj muab tus tav uas nws rho ntawm tus txiv neej los puab ua ib tug poj niam, Tswv Ntuj coj los rau tus txiv neej saib. 23 Tus txiv neej nqua suab hlo tias : "Zaum no, tus no yog tseem txha ntawm kuv txha thiab tseem nqaij ntawm kuv nqaij tiag ! Tus no yuav hu ua 'poj niam,' vim nws tawm ntawm txiv neej los !" 24 Vim li no txiv neej thiaj tso niam tso txiv tseg, mus npuab nws tus poj niam, ces nkawd ua ib lub cev nqaij xwb.
    25 Thaum ntawd, tus txiv neej thiab tus poj niam nkawd ob leeg nyob liab qab, tiam sis nkawd tsis txaj muag li.

    NPN 128: 1-2, 3, 4-5

    Txais: (1a) Cov uas hwm Huab Tais tau txoj hmoov zoo.

    Nej cov hwm HUAB TAIS, nej txoj hmoov zoo,
    vim nej taug raws nws txoj kev!
    Nej yuav tau noj lub txiv uas nej ob txhais tes khwv tawm los ,
    nej yuav tau hmoov zoo thiab nej yuav zoo siab.

    Txais: (1a) Cov uas hwm Huab Tais tau txoj hmoov zoo.

    Koj tus poj niam yuav zoo li txoj hmab txiv cawv txi ncw ncw
    nyob rau hauv koj lub vaj lub tsev,
    koj cov me nyuam yuav zoo li ib co ntsuag ntoo txiv roj
    nyob ncig lees koj lub phaj tsum mov.

    Txais: (1a) Cov uas hwm Huab Tais tau txoj hmoov zoo.

    Yog li, tus neeg muaj txoj hmoov zoo
    yog tus ntshai HUAB TAIS.
    Thov kom HUAB TAIS nyob saum Xis Yoos
    foom koob hmoov rau koj, kom koj tau pom Yes Lus
    Xas Les tej kev vam meej niaj hnub hauv koj lub neej.

    Txais: (1a) Cov uas hwm Huab Tais tau txoj hmoov zoo.

    As Les Lus Yas: Yas Kos 1: 21BC

    Txais: As les lus yas, as les lus yas.

    Nej yuav ua neeg me txais lo lus
    uas twb muab cog rau hauv nej lawm,
    lo lus ntawd thiaj yuav cawm tau nej tus ntsuj plig.

    Txais: As les lus yas, as les lus yas.

    Ntawv Moo Zoo: MK 7: 24-30

    24 Yes Xus sawv kev ntawd mus rau lub xeev Tws Los. Nws mus rau hauv ib lub tsev, nws tsis xav kom muaj neeg paub li, tab sis nws zais tsis tau.
    25 Muaj ib tug poj niam uas nws tus ntxhais raug ib tug dab tsis huv, hnov hais txog Yes Xus tam sis ntawd, ces nws tuaj txhos caug ntawm Yes Xus ko taw.
    26 Tus poj niam ntawd yog ib tug neeg Hes Las, yug los nyob Xis Lias Fes Nis Xias xeev ntuj, nws thov kom Yes Xus ntiab tus dab tawm hauv nws tus ntxhais mus.
    27 Yes Xus hais rau nws tias : "Yuav tsum xub cia cov me nyuam noj kom tsau tso, vim tsis phim yuav muab me nyuam cov mov los pov rau cov me nyuam dev noj."
    28 Tab sis tus poj niam teb rau Yes Xus tias : “Huab Tais, txawm li ntawd los cov me nyuam dev nyob hauv qab rooj kuj noj tej tsig mov uas poob ntawm cov me nyuam los.”
    29 Ces Yes Xus hais rau tus poj niam tias : "Vim koj tau hais lo lus ntawd, koj rov mus mog, tus dab twb tawm hauv koj tus ntxhais mus lawm."
    30 Thaum tus poj niam rov mus txog tsev, nws pom tus me nyuam pw saum txaj, hos tus dab phem twb tawm mus lawm.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 14th February 2019, 10:58 am

    TIM 15 LUB 2 HLIS 2019

    Hnub Rau Lis Piam Tsib Nruab Xyoo A Nruab Lis Piam Xyoo I

    Zaj Nyeem Ib: HAUV PAUS 3: 1-8


    1 Tus nab yog tus ntse tshaj tas txhua hom tsiaj HUAB TAIS Tswv Ntuj tau tsim los nyob nruab nrag. Nab hais rau tus poj niam tias : "Li ntawd, Tswv Ntuj hais tias kom neb tsis txhob noj ib yam txiv ntoo txi hauv lub vaj no li no lod ?" 2 Tus poj niam teb rau tus nab tias : "Wb noj tau tas cov txiv txi saum cov ntoo hauv lub vaj no tib si. 3 Tsuas tshwj kiag cov txiv txi saum tsob ntoo nyob hauv nruab nrab lub vaj xwb, Tswv Ntuj hais tias : ‘Neb tsis txhob noj, tsis txhob kov, yog neb noj neb kov, mas neb yuav tuag’ no.” 4 Tus nab teb ntua tus poj niam tias : "Neb yeej yuav tsis tuag li. 5 Tiam sis vim Tswv Ntuj paub tias, hnub twg neb noj ces neb qhov muag yuav qhib, neb yuav zoo li tej tus tswv ntuj uas paub qhov zoo thiab qhov phem xwb." 6 Ces tus poj niam txawm pom dheev hais tias tus ntoo ntawd yeej zoo noj thiab zoo saib kawg, thiab yog tus ntoo yus ntshaw noj kom yus muaj kev paub kev txawj xav. Ces nws de zoj lub txiv ntawm tus ntoo los, nws muab noj. Nws kuj muab cev rau nws tus txiv uas nrog nws nyob ntawd, tus txiv kuj noj thiab. 7 Ces nkawd ob leeg qhov muag qhib plho, nkawd paub hais tias nkawd liab qab. Nkawd thiaj muab nplooj ncuav pias los xaws ua tiab npua. 8 Thaum lub caij cua tuaj ntxiag, nkawd hnov HUAB TAIS Tswv Ntuj tshais ruam ncig hauv lub vaj; tus txiv neej thiab nws tus poj niam khiav mus tsiv nraim hauv cov ntoo nyob hauv lub vaj kom HUAB TAIS Tswv Ntuj txhob pom nkawd.

    NPN 32: 1-2, 5, 6, 7


    Txais: (1a) Cov uas Ntuj zam txhaum rau lawv, lawv txoj hmoov zoo.

    Tau hmoov zoo yog tus uas Ntuj tshem nws qhov txhaum pov tseg,
    tus uas Ntuj muab nws qhov txhaum npog rau.
    Tau hmoov zoo yog tus neeg uas HUAB TAIS tsis suav txim rau nws,
    tus uas lub tswv yim tsis muaj ib qho kev siab phem.

    Txais: (1a) Cov uas Ntuj zam txhaum rau lawv, lawv txoj hmoov zoo.

    Kuv lees kuv qhov txhaum rau koj,
    kuv tsis muab kuv qhov txhaum npog cia.
    Kuv hais tias: “Kuv lees kuv qhov txhaum rau HUAB TAIS,”
    ces koj muab kuv lub txim ntawm kuv qhov txhaum tshem tas.

    Txais: (1a) Cov uas Ntuj zam txhaum rau lawv, lawv txoj hmoov zoo.

    Vim li no txhua tus neeg ntseeg yuav tsum teev ntuj
    hu txog koj thaum lub caij muaj kev nyuaj siab.
    Ces txawm tias dej tob nphau nphwv phwj yaws
    los dej yuav tsis nce mus nyab txog nws.

    Txais: (1a) Cov uas Ntuj zam txhaum rau lawv, lawv txoj hmoov zoo.

    Koj yog kuv lub chaw nkaum, koj yuav thaiv kuv ntawm txoj kev nyuaj;
    koj yuav cia tej lub suab qw txog txoj kev cawm seej nyob ncig kuv.

    Txais: (1a) Cov uas Ntuj zam txhaum rau lawv, lawv txoj hmoov zoo.

    As Les Lus Yas: HAUJ LWM 16: 14B

    Txais: As les lus yas, as les lus yas.

    HUAB TAIS, thov koj qhib peb tej siab ntsws
    kom peb mloog koj leej Tub cov lus.

    Txais: As les lus yas, as les lus yas.

    Ntawv Moo Zoo: MK 7: 31-37

    31 Yes Xus tso Tws Los teb tseg, nws taug txoj kev hla Xis Doos mus rau dej ntuj Nkas Lis Lais, mus rau hauv xeev Des Kas Pos Lis.
    32 Luag coj ib tug neeg lag ntseg, hais lus txhav txhav, tuaj rau Yes Xus, lawv thov kom Yes Xus tsa tes rau saum nws.
    33 Yes Xus coj nws tawm ntawm tsoom sid mus rau ib cag tsis muaj neeg, Yes Xus muab nws ntiv tes ntxig rau tus lag ntseg ob lub qhov ntsej, nws nti aub ncaug ces nws muab chwv rau tus neeg ntawd tus nplaig.
    34 Yes Xus tsa muag ntsia saum ntuj, nws xyu ib suab, nws hais rau tus lag ntseg tias : "Es fas tas," txhais tias : "Koj qhib los."
    35 Tus lag ntseg ob lub qhov ntsej qhib plo tam sis ntawd, hos cov hlua khi nws tus nplaig kuj plam plaws, ces nws hais lus meej log.
    36 Yes Xus txwv tsis pub lawv hais qhov ntawd rau leej twg li. Tab sis Yes Xus yim txwv, lawv yim tshaj tawm.
    37 Lawv qhuas kawg nkaus, lawv hais tias : "Nws ua tau ib puas tsav yam zoo kawg, nws ua kom tus lag ntseg hnov lus, thiab ua kom tus nplaig txhav hais tau lus."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Mim on 15th February 2019, 3:47 pm

    TIM 16 LUB 2 HLIS 2019

    Hnub Xya Lis Piam Tsib Nruab Xyoo C Nruab Lis Piam Xyoo I

    Zaj Nyeem Ib: HP 3: 9-24


    9 HUAB TAIS Tswv Ntuj thiaj hu tus txiv neej hais tias : "Koj nyob qhov twg ?" 10 Tus txiv neej teb tias : "Kuv hnov koj mus kev hauv lub vaj, kuv ntshai vim kuv liab qab, kuv thiaj khiav tsiv nraim lawm." 11 Tswv Ntuj hais ntxiv tias : "Leej twg qhia koj tias koj liab qab ? Yog li koj noj lub txiv ntawm tsob ntoo uas kuv txwv tsis pub koj noj lawm puas yog ?" 12 Tus txiv neej teb tias : "Yog tus poj niam uas koj tso nyob ze kuv, nws muab lub txiv ntawm tsob ntoo rau kuv, ces kuv thiaj noj !" 13 HUAB TAIS Tswv Ntuj hais rau tus poj niam tias : "Koj ua dab tsi li ntawd ?" Tus poj niam teb tias : "Yog niag nab ntxias kuv, kuv thiaj noj."
    14 Ces HUAB TAIS Tswv Ntuj hais rau tus nab hais tias : "Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej. 15 Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws." 16 Tswv Ntuj hais rau tus poj niam hais tias : "Kuv yuav ua kom koj muaj mob ntau thaum lub caij koj cev xeeb tub xeeb ki. Koj yuav tau mob tau ntsaj, koj thiaj yug tau me tub me nyuam. Tsis kav, koj tseem yuav ntshaw koj tus txiv, thiab nws yuav tswj koj." 17 Tswv Ntuj hais rau tus txiv neej hais tias : "Vim koj tau mloog koj tus poj niam lus, koj thiaj noj lub txiv kuv txwv tsis kheev noj, mas av yuav raug foom phem vim koj ! Koj yuav siv zog khwv tas koj lub neej koj thiaj tau noj. 18 Av yuav tuaj pos tuaj nrhab rau koj, thiab koj yuav noj tej nroj tsuag uas tuaj hauv nruab liaj nruab teb. 19 Koj ntsej muag yuav tawm hws lug koj thiaj tau noj, mus txog hnub koj rov mus ua av, vim koj yog muab av puab. Koj yog plua av ces koj yuav rov mus ua plua av."
    20 Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam. 21 HUAB TAIS Tswv Ntuj muab tawv tsiaj los ua tsoos rau tus txiv neej thiab nws poj niam, thiab muab rau nkawd hnav. 22 Ces HUAB TAIS Tswv Ntuj hais tias : "Zaum no tib neeg zoo li peb lawm, nws paub qhov phem thiab qhov zoo lawm. Yuav tsis pub kom nws cev tes mus de tau tsob txiv muaj txoj sia coj los no kom nws muaj txoj sia nyob mus li."
    23 HUAB TAIS Tswv Ntuj thiaj tshem tib neeg tawm hauv lub vaj Es Dees mus, kom nws mus cog cov av uas muab los puab nws. 24 Tswv Ntuj ntiab tib neeg tawm, nws tso ib co Tshiab Kes Lus Npis zov lub vaj Es Dees ntawm sab hnub tuaj thiab nws tsa ib rab ntaj nplaim taws uas kiv ncig lees, thaiv txoj kev mus txog tus ntoo muaj txoj sia.

    NPN 90: 2, 3-4ABC, 5-6, 12-13

    Txais: (1) Nyob txhua tiam, Huab Tais, koj yog peb qhov chaw vam.

    Ua ntej cov roob raug tsim tawm los,
    ua ntej lub ntiaj teb thiab tas lub qab ntuj khwb tshwm muaj tuaj,
    ib txhis dhau ib txhis koj yeej yog Tswv Ntuj lawm.

    Txais: (1) Nyob txhua tiam, Huab Tais, koj yog peb qhov chaw vam.

    Koj cia neeg hloov rov mus ua plua av,
    thaum koj hais tias: “Me nyuam neeg, nej rov mus ua av.”
    Vim tias ib txhiab xyoo rau koj zoo li yog nag hmo xwb,
    uas twb dhau tas lawm, los tsuas zoo li
    ib lub caij zov hmo thaum hmo ntuj xwb.

    Txais: (1) Nyob txhua tiam, Huab Tais, koj yog peb qhov chaw vam.

    Koj ua kom lawv tas thaum nyob nruab dab ntub,
    tag kis sawv ntxov lawv zoo li cov nroj tsuag hloov sai sai:
    thaum hnub tuaj nroj tsuag sawv ntsuab xiab,
    tiam sis yav tsaus ntuj nws twb ntsws tas tuag tas.

    Txais: (1) Nyob txhua tiam, Huab Tais, koj yog peb qhov chaw vam.

    Thov koj qhia peb txawj suav peb cov hnub cov hmo mus rau qhov zoo,
    kom peb txawj muaj kev thoob tsib hauv nruab siab.
    HUAB TAIS, thov koj rov qab los! Yuav tos hov ntev?
    Thov koj khuv leej koj cov tub txib mas!

    Txais: (1) Nyob txhua tiam, Huab Tais, koj yog peb qhov chaw vam.

    As Les Lus Yas: MT 4: 4B

    Txais: As les lus yas, as les lus yas.

    Ib tug neeg tsis ciaj sia vim tej zaub mov nkaus xwb,
    tiam sis vim txhua lo lus tawm ntawm Tswv Ntuj lub ncauj los.

    Txais: As les lus yas, as les lus yas.

    Ntawv Moo Zoo: MK 8: 1-10

    1 Thaum lub caij ntawd, rov qab muaj dua ib pab neeg coob coob tuaj, lawv tsis muaj dab tsi noj. Yes Xus hu nws cov thwj tim los, nws hais rau lawv tias :
    2 "Kuv hlub cov neeg no, vim lawv nrog kuv nyob tau peb hnub lawm, lawv tsis muaj dab tsi noj.
    3 Yog kuv cia lawv yoo tshaib rov mus tsev, mas lawv yuav tsaus muag tom tog kev, vim lawv ib txhia tuaj deb tuaj." 4 Cov thwj tim teb rau Yes Xus tias : "Qhov chaw no yog chaw twj cuab xwb, yuav muab mov qhov twg los rau cov neeg ntawd noj kom tsau ?”
    5 Ces Yes Xus nug lawv tias : "Nej muaj pes tsawg lub ncuav mov?" Lawv hais tias : "Xya lub."
    6 Yes Xus kom tsoom sid zaum pem teb. Nws tuav xya lub ncuav mov, nws ua Ntuj tsaug, nws muab cov ncuav mov ntais, muab cev rau cov thwj tim kom nqa mus faib; ces cov thwj tim nqa mus faib rau pab neeg coob coob noj.
    7 Lawv muaj ob peb tug me nyuam ntses thiab. Yes Xus foom hmoov zoo rau cov ntses tas, nws kom lawv nqa mus rau sawv daws noj thiab.
    8 Lawv sawv daws tau noj tsau plab npo, lawv khaws cov seem tau xya tawb !
    9 Cov neeg ntawd kwv yees muaj plaub txhiab leej. Ces Yes Xus kom lawv rov mus tsev.
    10 Tam sisd ntawd nws nrog nws cov thwj tim nce mus rau hauv nkoj, nws npaj mus rau thaj tsam Das Mas Nus Thas.



    Sponsored content

    UA KOOB TSHEEJ YES XUS YUG LOS XYOO 2018 - Page 2 Empty Re: UA KOOB TSHEEJ YES XUS YUG LOS XYOO 2018

    Post  Sponsored content


      Current date/time is 17th August 2019, 9:40 pm