HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


UA KOOB TSHEEJ YES XUS YUG LOS XYOO 2018 - Page 9 Empty

Latest topics

» Ua tsaug ntees.
by Maiv Tooj 21st February 2024, 11:33 pm

» DUAB MAB LIAB TSHIAB.
by Maiv Tooj 16th February 2024, 8:39 am

» COV ZAJ NYEEM NRUAB LIS PIAM XYOO I 2022-2023
by Mim 10th August 2023, 7:04 am

» Cov zaj nyeem Hnub Chiv Xyoo A. 2022-2023
by Maiv Tooj 20th July 2023, 11:21 pm

» SAJ YES XUS KEV TXOM NYEM
by Maiv Tooj 7th March 2023, 6:34 am

» Tswv Ntuj ua tau tag puas tsav yam, F. Ts. Cob Tsib teb
by Mim 3rd February 2023, 11:33 am

» DAIM NTAUB QHWV TUAG NYOB TURIN
by Mim 29th January 2023, 9:24 am

» Txiv plig Tshaj Sawm (Harry Thiel ) Lub neej
by Maiv Tooj 28th December 2022, 8:25 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 28th December 2022, 7:55 am

» COV ZAJ NYEEM NRUAB LIS PIAM XYOO II 2021-2022
by Mim 24th November 2022, 9:06 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 18th November 2022, 8:28 am

» Cov Txiv Plig ua tau muaj txiaj ntsim rau Peb Hmoob nyob Los Tsuas, Thaib teb ua ntej & tom qab 1975
by Maiv Tooj 14th November 2022, 10:03 am

Suav neeg tuaj saib, txij hnub 17/09/2010 los mus.


2 posters

    UA KOOB TSHEEJ YES XUS YUG LOS XYOO 2018

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 11th August 2019, 1:59 pm

    Tim 12 lub 8 Hli 2019

    Hnub Ob Lis Piam Kaum Cuaj Nraub Xyoo C Nruab Lis Piam Xyoo I

    Hwm LN Jeanne de Chantal

    Zaj Nyeem Ib: TCO 10: 12-22


    Mais Xes hais rau tsoom pej xeem tias:
    12 His Xas Lais, HUAB TAIS nej tus Tswv Ntuj xav kom nej ua dab tsi ? Nws tsuas xav kom nej hwm HUAB TAIS nej tus Tswv Ntuj, kom nej taug raws nws tej kev tas huv si, kom nej nyiam nws, kom nej muab tas nej lub siab nej tus ntsuj plig los tsob hwb HUAB TAIS nej tus Tswv Ntuj, 13 kom nej khaws HUAB TAIS tej lus qhia thiab nws cov kev cai lij choj uas hnub no kuv qhia rau nej, ces nej yuav tau qhov zoo. 14 Nej xav saib, lub ntuj, thiab cov txheej ntuj saud, lub ntiaj teb thiab tas puas tsav yam nyob hauv ntiaj teb, puav leej yog HUAB TAIS nej tus Tswv Ntuj tug. 15 Tsis kav Huab Tais tsuas tso nws lub siab mus nyiam nej cov yawg koob xwb, thiab nws tau xaiv lawv caj ces los tom qab lawv uas yog nej, nyob hauv tas txhua haiv neeg, xws li niaj hnub no. 16 Nej ua lub cim txiav tawv rau nej lub siab thiab nej lub xwb qwb, kom nej tsis txhob txhav ntxiv lawm. 17 Vim HUAB TAIS nej tus Tswv Ntuj yog tus Tswv Ntuj kav tsoom tswv ntuj, tus Huab Tais kav tsoom huab tais. Nws yog tus Tswv Ntuj loj, tus muaj hwj huam, thiab tus txaus ntshai tas nrho. Nws tsis tsa leej twg cai, nws tsis txais leej twg cov nyiaj xiab. 18 Nws txiav txim ncaj rau tus me nyuam ntsuag thiab tus poj ntsuam. Nws hlub tus pej kum neeg, nws pub mov thiab pub ris tsho rau tus pej kum neeg. 19 Nej kuj yuav tsum hlub cov pej kum neeg thiab, vim thaud nyob Hais Nkws Tos teb nej twb yog ib co pej kum neeg. 20 Nej yuav hwm thiab yuav tsob hwb HUAB TAIS nej tus Tswv Ntuj, nej yuav npuab nws, nej yuav tuav txog nws lub npe los cog lus. 21 Nws yog nej lub koob meej, nws yog nej tus Tswv Ntuj, nws tau ua tej yam loj tas nrho thiab muaj hwj xyeej txaus ntshai kawg rau nej qhov muag pom. 22 Thaum nej cov yawg koob tsiv mus nyob Hais Nkws Tos teb, lawv tsuas muaj xya caum leej xwb. Nyem no, HUAB TAIS nej tus Tswv Ntuj ua kom nej coob npaum li cov hnub qub nyob saum ntuj.”

    NPN 147: 12-13, 14-15, 19-20

    Txais: (12a) Yes Lus Xas Les, koj cia li cav txog Huab Tais.

    Yes Lus Xas Les, cia li cav txog Huab Tais lub koob meej,
    Xis Yoos, cia li cav txog koj tus Tswv Ntuj.
    Vim nws tau ua kom cov tab ntawm koj cov rooj vag khov tuaj lawm,
    nws tau foom hmoov zoo rau koj cov me nyuam nyob hauv koj.

    Txais: (12a) Yes Lus Xas Les, koj cia li cav txog Huab Tais.

    Nws ua kom muaj kev thaj yeeb nyob hauv koj cov ciam av;
    Nws ua kom koj tau noj cov hmoov nplej qab tsau npo.
    Nws xa nws lo lus qhuab qhia tuaj rau ntiaj teb;
    nws lo lus khiav nrawm nroos.

    Txais: (12a) Yes Lus Xas Les, koj cia li cav txog Huab Tais.

    Nws tau tshaj nws lo lus rau Yas Kos,
    nws cov kev cai thiab lij choj rau His Xas Lais.
    Nws tsis tau ua zoo li ntawd rau lwm haiv neeg twg,
    nws tsis tau qhia nws cov lij choj rau lawv paub.

    Txais: (12a) Yes Lus Xas Les, koj cia li cav txog Huab Tais.

    As Les Lus yas: 2 TXLN 2: 14


    Txais: As les lus yas, as les lus yas.

    Tswv Ntuj siv lub Moo Zoo hu nej los kom nej tau txais
    peb tus Huab Tais Yes Xus Pleev lub koob meej ua nej tug.

    Txais: As les lus yas, as les lus yas.

    Ntawv Moo Zoo: MT 17: 22-27

    22 Thaum Yes Xus thiab nws cov thwj tim mus sib sau nyob Nkas Lis Lais teb, nws hais rau lawv tias : "Neeg Leej Tub yuav raug luag muag rau hauv tsoom neeg txhais tes. 23 Lawv yuav muab nws tua, hnub peb nws yuav sawv rov los." Ces cov thwj tim ntxhov siab kawg nkaus.
    24 Thaum lawv los txog Kas Fas Naus, cov sau se rau lub Tuam Tsev Teev Ntuj tuaj cuag Pob Zeb, lawv hais rau nws tias : "Nej tus xib hwb puas them ob lub txiaj nras mas pab lub Tuam Tsev Teev Ntuj ?" 25 Pob Zeb teb tias : "Nws them." Thaum Pob Zeb los txog hauv tsev, Yes Xus xub nug nws tias : "Xis Moos, koj xav li cas ? Cov vaj kav ntiaj teb sau se ntawm leej twg ? Ntawm lawv cov tub los ntawm luag tej qhua ?" 26 Pob Zeb teb tias : "Ntawm luag tej qhua." Yes Xus hais rau Pob Zeb tias : "Yog li mas cov tub tsis tas them se li. 27 Tab sis, wb yuav tsis txhob ua kom luag tsis zoo siab. Koj mus lawm nram dej ntuj, koj pov nuv rau hauv dej; thawj tug ntses tawm tuaj, koj muab rub los, koj rua nws lub qhov ncauj, koj yuav pom ib lub txiaj nyiag, koj muab lub txiaj nyiag ntawd rau lawv kom tau them se rau kuv thiab rau koj."


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 12th August 2019, 5:20 pm

    Tim 13 lub 8 Hli 2019

    Hnub Peb Lis Piam Kaum Cuaj Nruab Xyoo C Nruab Lis Piam Xyoo I

    Hwm LN Pontian thiab LN Hippolytus, tuag ua Tim Khawv

    Zaj Nyeem Ib: TCO 31: 1-8


    l Mais Xes tseem hais cov lus no ntxiv rau tas tsoom His Xas Lais tias: 2 "Hnub no kuv muaj ib puas nees nkaum xyoo lawm. Kuv ncig mus ncig los tsis tau lawm. HUAB TAIS tau hais rau kuv tias : 'Koj yuav tsis tau hla tus dej Yos Las Das.' 3 Ua li mas yog HUAB TAIS, nej tus Tswv Ntuj yuav ua nej ntej coj nej mus hla, nws yuav rhuav cov haiv neeg nyob ntawm nej hauv ntej, ces nej yuav tau mus nyob lawv qhov chaw. Yos Xuas yog tus yuav mus ua nej ntej coj nej hla mus raws li HUAB TAIS tau hais lawm. 4 HUAB TAIS yuav ua rau cov haiv neeg ntawd ib yam li nws tau ua rau ob tug vaj As Mos Lis, Xis Hoos thiab Os nkawd, nws tau rhuav nkawd thiab nkawd ob lub teb chaws tib si. 5 Ua li mas thaum HUAB TAIS muab lawv rau hauv nej tes, nej yuav ua rau lawv raws li kuv tau qhia rau nej. 6 Nej ua siab loj siab tawv, tsis txhob ntshai lawv, txhob txhawj. Vim HUAB TAIS nej tus Tswv Ntuj nrog nraim nej, nws yuav tsis cia nej swb los tso nej pov tseg."
    7 Ces Mais Xes hu Yos Xuas los. Nws hais rau Yos Xuas nyob ntawm tas tsoom His Xas Lais xub ntiag tias : " Koj ua siab loj mog ! Koj ua siab tawv qhawv. Koj yuav nrog haiv neeg no mus txog lub teb chaws uas HUAB TAIS tau cog lus rau lawv cov yawg koob tias nws yuav muab rau lawv. Koj yuav coj lawv mus txeeb lub teb chaws ntawd los ua lawv tug. 8 HUAB TAIS yuav ua koj ntej, nws yuav nrog koj nraim, nws yuav tsis cia koj swb los tso koj pov tseg. Koj txhob ntshai txhob txhawj mog !"

    NPN: TCO 32: 3-4AB, 7, 8, 9+12

    Txais: (9a) Huab Tais haiv neeg yog nws li ntiag tug.

    Kuv yuav hu nkauj cav txog HUAB TAIS lub koob lub npe.
    Nej cia li qhuas tias peb tus Tswv Ntuj yog tus loj!
    Nws yog lub Tsua, nws tej hauj lwm tsis muaj ib qho xyeej li,
    Tas nws tej kev yog kev ncaj tas nrho!

    Txais: (9a) Huab Tais haiv neeg yog nws li ntiag tug.

    Nej tig rov mus saib txheej thaum ub,
    Nej xav tswv yim txog cov xyoo tas los lawm txheej dhau txheej.
    Nej nug nej txiv ces nws yuav qhia rau nej paub,
    Nej nug nej phaj yawg ces lawv yuav piav rau nej.

    Txais: (9a) Huab Tais haiv neeg yog nws li ntiag tug.

    Thaum Tus Nyob Siab faib cuab tam rau cov kuj cuab,
    Thaum nws muab As Das cov xeeb ntxwv cais ua pawg,
    Nws tsa kom muaj ciam dej ciam av cais cov haiv neeg
    Raws li His Xas Lais cov tub muaj pes tsawg leej.

    Txais: (9a) Huab Tais haiv neeg yog nws li ntiag tug.

    Huab Tais li teej tug yog Yas Kos,
    Nws lub cuab tam yog His Xas Lais.
    Huab Tais ib leeg yog tus coj lawv,
    Tsis muaj lwm tus tswv ntuj txawv nrog nws.

    Txais: (9a) Huab Tais haiv neeg yog nws li ntiag tug.

    As Les Lus Yas: MT 11: 29AB

    Txais: As les lus yas, as les lus yas.

    Huab Tais hais tias: Nej txais kuv tus quab mus nej kwv,
    Nej kawm ntawm kuv vim kuv muaj
    lub siab mos siab muag thiab txo hwj chim.

    Txais: As les lus yas, as les lus yas.

    Ntawv Moo Zoo: MT 18: 1-5, 10, 12-14

    1 Lub caij ntawd cov thwj tim txav los cuag Yes Xus, lawv hais rau nws tias : “Leej twg yog tus loj dua nyob hauv Ntuj lub Ceeb Tsheej ?” 2 Yes Xus hu ib tug me nyuam los ntawm nws, nws coj tus me nyuam los nyob hauv nruab nrab lawv, 3 nws hais tias : “Kuv hais tseeb rau nej, yog nej tsis hloov siab tsis coj xws li ib co me nyuam , mas nej yuav mus tsis tau hauv Ntuj lub Ceeb Tsheej. 4 Leej twg txo hwj chim rov saib nws me xws li tus me nyuam no, tus ntawd yog tus loj dua nyob hauv Ntuj lub Ceeb Tsheej. 5 Leej twg txais ib tug me nyuam zoo li tus no, vim kuv lub npe, mas yog nws txais kuv.”
    10 Nej ceev faj, tsis txhob ntxub ib tug me nyuam li tus no; kuv hais rau nej tias, nyob saum ntuj, cov Tshiab saib lawv ntsia nyob ntsoov kuv Txiv nyob saum ntuj lub ntsej muag mus li.”
    12 “Raws li nej xav ne, yog ib tug neeg muaj ib puas tus yaj, ces ib tug mus poob zoo lawm, nws puas yuav tsis tso cuaj caum cuaj tus ntawd cia saum roob, nws mus nrhiav tus uas poob zoo lawd ? 13 Kuv hais tseeb rau nej, thaum nws nrhiav tau tus yaj poob zoo lawm, mas nws zoo siab rau tus ntawd tshaj rau cuaj caum cuaj tug uas tsis tau poob zoo. 14 Ib yam li ntawd, nej Txiv nyob saum ntuj kuj tsis xav kom ib tug me nyuam zoo li no ploj li.”


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 13th August 2019, 2:56 am

    Tim 14 lub 8 2019

    Hnub Plaub Lis Piam Kaum Cuaj Nruab Xyoo C Nruab Lis Piam Xyoo I

    Hwm LN Maximilian Kolbe, Leej Choj tuag ua Tim Khawv

    Zaj Nyeem Ib: TCO 34: 1-12


    1 Mais Xes sawv kev ntawm cov tiaj Mos As, nws nce mus saum lub roob Nes Npos, mus txog lub ncov roob Pis Nkas uas nyob ncaj Yes Lis Kos sab tid. HUAB TAIS muab lub teb chaws huv tib si rau Mais Xes pom : txij Nkas Las As teb mus txog ntua rau Daas teb, 2 Nes Tas Lis teb, uas yog Es Fais thiab Mas Nas Xes nkawd lub teb chaws, tas Yus Das teb mus txog lub hiav txwv xib fab, 3 lub teb chaws Nes Zes, lub nras tiaj uas yog lub hav Yes Lis Kos lub tsheej muaj txoob ntau, mus txog ntua rau thaj tsam ntawm Xos As. 4 HUAB TAIS hais rau Mais Xes tias : "Koj ntsia lub teb chaws no yog lub uas kuv tau cog lus rau Has Nplas Has, His Xas Has thiab Yas Kos tias : 'Kuv yuav muab rau koj tsoom xeeb ntxwv nyob.' Kuv muab rau koj qhov muag pom, tiam sis koj yuav hla tsis tau mus txog cov teb chaws ntawd." 5 Mais Xes HUAB TAIS tus tub txib tuag nyob ntawd, nyob hauv thaj av Mos As, raws li HUAB TAIS tau txiav. 6 Lawv muab nws faus rau hauv lub vos hav nyob Mos As teb ncaj ntawm Npes Pes Os sab tid. Los txog niaj hnub no, yeej tsis muaj leej twg paub tseeb tias Mais Xes lub ntxa yog nyob qhov twg kiag li. 7 Thaum Mais Xes tuag, nws muaj ib puas nees nkaum xyoo, nws qhov muag tseem tsis tau puas, thiab nws lub zog tseem tsis tau ntaug li. 8 Tsoom tub ki His Xas Lais quaj Mais Xes tau peb caug hnub nyob hauv lub vos hav Mos As, ces lawv thiaj ua lub ntees tiav.
    9 Yos Xuas uas yog Nus tus tub muaj lub tswv yim thoob tsib, vim Mais Xes tau tsa tes rau saum nws lawm. Cov His Xas Lais mloog Yos Xuas lus, lawv ua raws li HUAB TAIS tau ceeb toom rau Mais Xes.
    10 Txij thaum ntawd los txog tav no, tsis tau muaj dua ib tug Yaj Saub zoo li Mais Xes sawv hauv cov His Xas Lais los ntxiv lawm; Mais Xes yog tus HUAB TAIS paub tim ntsej tim muag. 11 Tsis muaj leej twg ntxiv yuav ua tau cov cim thiab cov hwj huam yees ntxwv loj cuag li Mais Xes ua lawm, uas yog HUAB TAIS tau txib kom nws mus ua nyob Hais Nkws Tos teb, tiv tus vaj Fas Las Oos thiab Fas Las Oos cov tub ncig, thiab tas nws tsoom pej xeem huv tib si, 12 thiab tsis muaj dua lwm tus yuav muab tau nws lub hwj huam loj thiab nws lub hwj xyeej txaus ntshai rau tas tsoom His Xas Lais pom li Mais Xes ntxiv lawm.

    NPN 66: 1-3A, 5+8, 16-17

    Txais: (20a+10b) Tswv Ntuj nto koob meej, vim nws ua kom
    kuv tug ntsuj plig kub npaum cov hluav taws.

    Tas ntiaj teb, nej qw zoo siab cav txog Tswv Ntuj ;
    Nej hu nkauj cav txog nws lub npe nto koob meej,
    nej tshaj tej zaj lus cav txog nws.
    Nej hais rau Tswv Ntuj tias :
    "Koj tej hauj lwm muaj hwj xyeej ua luaj!”

    Txais: (20a+10b) Tswv Ntuj nto koob meej, vim nws ua kom
    kuv tug ntsuj plig kub npaum cov hluav taws.

    Nej tuaj, nej yuav pom Tswv Ntuj cov hauj lwm,
    nws cov hwj huam loj nws ua rau As Das cov tub pom:
    Tsoom haiv neeg, nej cav lus zoo txog peb tus Tswv Ntuj,
    Nej qw kom lub suab cav txog nws ncha ntws mus deb.

    Txais: (20a+10b) Tswv Ntuj nto koob meej, vim nws ua kom
    kuv tug ntsuj plig kub npaum cov hluav taws.

    Tas nej cov uas hwm Tswv Ntuj, nej tuaj mloog kuv piav
    txog qhov uas nws tau ua rau kuv tus ntsuj plig.
    Thaum kuv qhib ncauj hais lus thov nws,
    Lo lus qhuas twb nyob ntawm kuv ntsis nplaig lawm.

    Txais: (20a+10b) Tswv Ntuj nto koob meej, vim nws ua kom
    kuv tug ntsuj plig kub npaum cov hluav taws.

    As Les Lus Yas: 2 KLN 5: 19

    Txais: As les lus yas, as les lus yas.

    Tswv Ntuj ua kom lub ntiaj teb nrog nws rov sib raug zoo nyob hauv Leej Pleev,
    nws tso cov lus pab kom neeg nrog nws rov sib raug zoo rau peb muab tshaj tawm.

    Txais: As les lus yas, as les lus yas.

    Ntawv Moo Zoo: MT 18: 15-20

    Yes Xus hais rau nws cov thwj tim tias:
    15 “Yog koj ib tug kwv tij ua txhaum rau koj, koj yuav mus cuag nws mus nrog nws tham ib leeg txog nws qhov txhaum . Yog nws mloog koj, mas koj rov tau kwv tau tij dua lawm. 16 Yog nws tsis mloog koj, koj yuav coj ib leeg los ob leeg nrog koj mus dua, kom ob tug los peb tug tim khawv nrog hnov tej lus ntawd. 17 Yog nws tsis mloog cov nrog koj mus thiab, koj yuav qhia rau lub Koom Txoos paub. Yog nws tseem tsis mloog lub Koom Txoos hais thiab, ces koj yuav saib nws zoo li ib tug neeg teev pej kum dab los ib tug tub sau se xwb.
    18 Kuv hais tseeb rau nej tias, yog nej khi yam twg nyob ntiaj teb no, mas yam ntawd kuj yuav raug khi nyob saum ntuj; yog nej daws yam twg nyob ntiaj teb no, mas yam ntawd kuj yuav raug daws nyob saum ntuj. 19 Kuv rov hais tseeb rau nej dua tias : yog muaj ob leeg hauv nej hais sib haum koom suab thov dab tsi nyob ntiaj teb no, mas kuv Txiv nyob saum ntuj yuav pub yam ntawd rau nkawd. 20 Vim thaum ob leeg los peb leeg sib sau ua ke nyob hauv kuv lub npe, mas kuv nyob nruab nrab hauv lawv.”


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 14th August 2019, 1:16 am

    Tim      15      lub      8      Hli      2019

    Hnub Tsib lis Piam Kaum Cuaj Nruab Xyoo C Nruab Lis Piam Xyoo I

    Hwm Niam Mab Liab Nce Mus Saum Ntuj Nrog Nws lub Cev dawb huv– Thaj Txi Ntuj Hmo Ua Ntej

    Zaj Nyeem Ib:       1 XWM  15:   3-4, 15-16; 16:1-2


    3 Das Vis hu tas tsoom His Xas Lais tuaj sib sau nyob Yes Lus Xas Les; lawv yuav kwv HUAB TAIS lub Xab Cog Lus mus rau hauv qhov chaw uas nws tau npaj tseg. 4 Das Vis kuj hu As Loos cov tub thiab hu cov Les Vis tuaj.
    15 Cov Les Vis muab ib co nqaj kwv Tswv Ntuj lub Xab Cog Lus nyob saum lawv xub pwg, xws li Mais Xes tau ceeb toom tseg raws li HUAB TAIS lo lus. 16 Ces Das Vis hais rau cov ua thawj nyob hauv cov Les Vis kom xaiv ib co tub hu nkauj nyob hauv lawv cov kwv tij, thiab kom lawv ntaus lawv cov twj ua paj nruag, nkauj nog ncas thiab nruas npuaj, kom nrov nrov ua ib lub ntees zoo siab lom zem loj.
    16   1 Lawv coj Tswv Ntuj lub Xab Cog Lus los rau sawv daws pom thiab coj mus tso rau hauv nruab nrab lub Tsev Tsam Phooj uas Das Vis txhob txwm tsa cia txais lub Xab. Lawv hlawv tsiaj txi rauTswv Ntuj thiab lawv ua tej thaj txi Ntuj noj cov txim.  2 Thaum Das Vis hlawv tsiaj txi Ntuj thiab ua cov thaj txi Ntuj noj cov txim tas nws tuav txog HUAB TAIS lub npe, thiab nws foom hmoov zoo rau tsoom sid.

    NPN      132:   6-7, 9-10, 13-14

    Txais:   HUAB TAIS, koj sawv mus nyob pem koj lub chaw so,
          koj thiab lub Phij Xab uas muaj koj txoj kev ntshiab.

    Peb hnov txog qhov ntawd nyob Es Fas Tas,
    peb nrhiav tau nws tom cov nras teb Yas As.
    Peb kav tsij nkag mus hauv nws lub tsev,
    peb txhos caug pe ntawm nws lub rooj tiag taw.

    Txais:   HUAB TAIS, koj sawv mus nyob pem koj lub chaw so,
          koj thiab lub Xab uas muaj koj txoj kev ntshiab.

    Thov kom koj cov leej choj hnav txoj kev ncaj,
    kom cov hwm koj qw zoo siab lom zem.
    Vim koj tus tub txib Das Vis,
    Thov koj mloog tus koj tau pleev cov lus thov.

    Txais:   HUAB TAIS, koj sawv mus nyob pem koj lub chaw so,
          koj thiab lub Xab uas muaj koj txoj kev ntshiab.

    HUAB TAIS tau xaiv Xis Yoos,
    nws yeem yuav Xis Yoos los ua nws chaw nyob.
    Xis Yoos yog kuv qhov chaw so mus ib txhiab ib txhis,
    kuv yuav nyob txawm saum Xis Yoos, vim kuv xaiv nws.

    Txais:   HUAB TAIS, koj sawv mus nyob pem koj lub chaw so,
          koj thiab lub Xab uas muaj koj txoj kev ntshiab.

    Zaj Nyeem Ob:    1 KLN  15:   54B-57

    Cov kwv tij nkauj muam:
    54b Thaum yam uas txawj tuag hnav tau txoj kev tsis txawj tuag lawm, mas yuav muaj raws li lo lus nyob hauv Ntawv hais tias : “Txoj kev tuag ploj tas rau hauv txoj kev yeej lawm. 55 Kev tuag, koj txoj kev yeej nyob qhov twg ? Kev tuag, koj tus ple muaj taug nyob qhov twg ?”
    56 Kev tuag tus ple muaj taug yog kev txhaum. Kev txhaum lub zog yog txoj cai. 57 Tiam sis peb ua Tswv Ntuj tsaug, vim nws pub kev yeej rau peb nyob hauv peb tus Huab Tais Yes Xus Pleev.

    As Les Lus Yas:      LK  11: 28

    Txais:   As les lus yas, as les lus yas.

    Cov muaj hmoov zoo yog cov uas mloog Tswv Ntuj lo lus
    thiab coj raws nraim li ntawd.      

    Txais:   As les lus yas, as les lus yas.

    Ntawv Moo Zoo:      LK  11:   27-28

    27 Thaum Yes Xus tseem hais tej lus ntawd, muaj ib tug poj niam nyob hauv nruab nrab tsoom sid tsa suab hais nrov nrov rau Yes Xus tias : "Lub plab uas tau nqa koj thiab lub xub ntiag uas tau pub mis rau koj muaj txoj hmoov zoo !"
    28 Yes Xus teb tias : "Cov uas mloog Tswv Ntuj Lo Lus thiab ua raws li Tswv Ntuj Lo Lus, mas lawv thiaj yog cov tau txoj hmoov zoo."

    *********************************
    Kuv xub muab cov zaj nyeem rau hmo ua ntej tso rau pem toj no lawm, tiam sis qhov ntau peb tsuas siv cov zaj nyeem rau Thaj txi Ntuj nruab hnub xwb.
    Hnu b tim 15 lub 8 hli no yog ib hnub uas peb yuav tsum tau mus teev ntuj, yog ib hnub uas lub Koom Txoos hu tias "a day of obligation." Txhais tias peb yuav tsum tau mus teev ntuj ib yam li yog Hnub Chiv thiab.


    TIM     15    LUB    8    HLI     2019

    Hwm Niam Mab Liab Nce Mus Saum Ntuj Nrog Nws lub Cev – Thaj Txi Ntuj Thaum Nruab Hnub

    Zaj Nyeem Ib:     QYTN  11:   19A; 12:1-6A, 10AB


    19 Ces Tswv Ntuj lub Tuam Tsev nyob saum ntuj qhib los, yus pom tau nws Lub Xab Cog Lus nyob hauv lub tuam tsev.
    12   1 Muaj ib lub cim loj tas nrho tshwm nyob saum ntuj : ib tug Poj Niam hnav lub hnub, lub hli nyob hauv nws qab xib taws, kaum ob lub hnub qub ua ib lub mom teev kub nyob saum nws taub hau. 2 Tus Poj Niam ntawd cev xeeb tub lawm, nws ntsaj mob, vim nws tab tom daws cev. 3 Tseem muaj dua ib lub cim tshwm tuaj nyob saum ntuj : ib tug zaj liab ploog loj kawg; nws muaj xya lub taub hau thiab kaum tus kub. Xya lub taub hau ntawd ntoo xya lub kaus mom teev kub. 4 Nws tus ko tw cheb cov hnub qub saum ntuj poob tas lawm ib feem peb, nws muab cuam pov los rau hauv ntiaj teb. Ces tus Zaj mus sawv ntawm tus poj niam uas tab tom daws cev xub ntiag, npaj nqos tus me nyuam uas tus poj niam yuav yug. 5 Tus Poj Niam yug tau tus me nyuam, yog ib tug me tub : yog tus yuav tuav ib rab cwj hlau coj tas txhua haiv neeg. Luag nqa hlo tus me nyuam mus rau ntawm Tswv Ntuj thiab ntawm nws lub theej kiab lawm. 6 Hos tus Poj Niam khiav mus nyob hauv teb chaws suab puam : nws mus nyob hauv qhov chaw uas Tswv Ntuj npaj rau nws nyob.
    10 Ces kuv hnov ib lub suab nrov loj loj saum ntuj tuaj tias : “Zaum no, kev yeej thiab kev muaj hwj huam los txog lawm, thiab peb tus Tswv Ntuj txoj kev ua Vaj thiab nws Leej Pleev lub hwj chim los txog lawm.”

    NPN     45:   10, 11, 12, 16

    Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.  

    Tus poj vaj hnav kub Os Fis los zaum nyob ntawm koj sab xis.

    Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

    Me ntxhais, koj mloog mog ! Koj ntsia, koj tig ntsej los mloog :
    Koj txhob nco koj haiv neeg, koj niam koj txiv lub tsev ntxiv.

    Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

    Tus vaj yuav qaug siab hlo rau koj txoj kev zoo nkauj,
    Vim nws yog koj tus huab tais.

    Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

    Luag coj lawv ua ib pab muaj kev zoo siab luag ntxhwb ntxhi
    chaws mus hauv tus vaj lub tuam tsev.

    Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

    Zaj Nyeem Ob:      1  KLN  15:   20-27

    Cov kwv tij nkauj muad:
    20 Leej Pleev sawv hauv cov tuag rov los lawm; nws yog thawj tug sawv rov los nyob hauv ib tsoom neeg uas mus pw tsaug zog lawm.  21 Tim ib tug neeg, ces txoj kev tuag thiaj muaj tau, kuj yog tim ib tug neeg ces txoj kev sawv hauv cov tuag rov los thiaj muaj tau thiab. 22 Ib yam li sawv daws tuag nyob hauv As Das, sawv daws kuj yuav ciaj rov los nyob hauv Leej Pleev thiab. 23 Tiam sis nyias muaj nyias lub sij hawm: Ua ntej dua cov yog Leej Pleev, tus xub sawv rov los, ces thaum txog lub hnub nyoog Leej Pleev rov tawm tuaj, mas Leej Pleev cov neeg yuav sawv rov los. 24 Ces mam yog lub caij kawg: Thaum ntawd Leej Pleev yuav muab nws txoj kev ua vaj cob rau nws Leej Txiv Tswv Ntuj, yog tom qab uas nws rhuav txhua txoj kev ua vaj, txhua txoj kev ua tus tswj, thiab txhua tus muaj hwj huam tas lawm. 25 Vim Leej Pleev yuav tsum ua vaj mus txog lub caij Leej Txiv tso tsoom yeeb ncuab tas tib si rau hauv nws qab xib taws lawm. 26 Tus yeeb ncuab kawg, uas nws yuav rhuav, yog txoj kev tuag. 27 Vim ‘nws tau muab tas puas tsav yam rau hauv nws qab xib taws lawm.’

    As Les Lus Yas:  

    Txais:   As les lus yas, as les lus yas.

    Mab Liab nce mus saum ntuj,
    Muaj ib pab tshiab hu nkauj zoo siab.

    Txais:   As les lus yas, as les lus yas.

    Ntawv Moo Zoo:       LK  1:   39-56


    39 Tau ob peb hnub, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Tus tau ntseeg tias cov lus Huab Tais hais rau nws yuav tsheej xeeb tau, mas nws txoj hmoov zoo !"
    46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv, 48 vim nws dauv muag ntsia nws tus ntxhais txib hauv txheej qis. Vim li ntawd, txij no mus, txhua tiam neeg yuav hais tias kuv txoj hmoov zoo, 49 vim tus Muaj Hwj Huam ua tej yam loj rau kuv, nws lub npe Ntshiab. 50 Nws lub siab hlub roos cov neeg hwm nws tiam dhau tiam. 51 Nws sab npab nthuav nws lub zog rau sawv daws pom. Cov neeg uas lub siab muab hlob, Huab Tais ua kom lawv tawg tas. 52 Huab Tais nchuav cov muaj hwj huam poob ntawm lawv lub theej kiab. Nws tsa cov neeg hauv txheej qis kom siab. 53 Nws pub tej yam zoo rau cov neeg tshaib tau noj seem noj so, hos nws ntiab cov neeg muaj rov qab mus tes qhuav. 54 Huab Tais pab nws tus tub txib His Xas Lais, vim nws nco ntsoov tias nws lub siab hlub neeg, 55 nws ua raws li nws tau tshaj rau peb cov yawg koob, nws ua zoo tas nrho rau Has Nplas Has thiab Has Nplas Has cov xeeb ntxwv mus ib txhiab ib txhis."
    56 Mab Liab nrog Es Lis Xas Npes nyob peb lub hlis tej, ces nws mam rov mus tsev.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 15th August 2019, 4:51 pm

    TIM      16      LUBN      8      HLI      2019

    Hnub Rau Lis Piam Kaum Cuaj Nruab Xyoo  Nruab Lis Piam Xyoo I

    Hwm LN Stephen nyob Hungary

    Zaj Nyeem Ib:        YOS XUAS  24:   1-13


    1 Yos Xuas hu tas nrho cov xeem His Xas Lais tuaj sib sau nyob Xis Kes. Ces nws hu cov txwj laus His Xas Lais, cov thawj coj, cov txiav txim thiab cov tub tuav hauj lwm tuaj sawv nyob ntawm Tswv Ntuj xub ntiag. 2 Ces Yos Xuas hais rau tsoom sid sawv daws tias : "HUAB TAIS tsoom His Xas Lais tus Tswv Ntuj hais li no : ‘Thaum ub, nej cov yawg koob nyob sab dej tid, uas yog Tes Las, Has Nplas Has thiab Nas Hos nkawd txiv. Lawv teev hawm lwm cov dab qhuas. 3 Kuv tau hu nej txiv Has Nplas Has tawm sab ntug dej tid los thiab tau coj nws mus hla tas nrho lub teb chaws Kas Nas Has. Kuv xav ua kom nws tsob noob huam vam coob tuaj ces kuv pub His Xas Has rau nws. 4 Kuv pub Yas Kos thiab Es Xas Ws rau His Xas Has. Kuv muab lub roob Xes Is rau Es Xas Ws nyob ua nws tug. Tiam sis Yas Kos thiab nws cov tub tsiv mus nyob Hais Nkws Tos teb lawm.
    5 Ces kuv thiaj tau xa Mais Xes thiab As Loos nkawd mus thiab tau tso xwv txheej loj los raug Hais Nkws Tos teb raws li cov hwj huam kuv tau ua nyob hauv lawv; tom qab ntawd kuv thiaj tau coj nej tawm los. 6 Thaum kuv coj nej phaj txiv tawm Hais Nkws Tos teb los thiab nej los txog ntawm lub hiav txwv, mas cov Hais Nkws Tos caij tsheb caij nees tuaj caum nej txog ntawm lub Hiav Txwv Liab. 7 Ces nej phaj txiv quaj hu txog HUAB TAIS, nws thiaj tso kev tsaus ntuj tuaj kem nej ntawm cov Hais Nkws Tos, thiab nws tso dej hiav txwv nphau los nyab lawv tuag tas . Nej qhov muag tau pom tej yam kuv ua rau cov Hais Nkws Tos tas, nej tseem tau los nyob ntev xyoo nyob hauv teb chaws suab puam. 8 Ces kuv tau coj nej los txog hauv cov As Mos Lis lub teb chaws uas nyob sab dej Yos Las Das tim ub. Lawv sawv ua rog ntaus nej, tab sis kuv muab lawv rau hauv nej tes, kom nej tau lawv lub teb chaws los ua nej tug, thiab kuv tau ua kom lawv tawg tas nyob ntawm nej hauv ntej.
    9 Ces Npas Lav uas yog tus vaj Mos As thiab yog Xis Pos tub, kuj tau npaj ua rog rau His Xas Lais. Nws tso neeg mus hu Npas Laas uas yog Pes Os tub, tuaj foom lus phem rau nej. 10 Tab sis kuv tsis kam mloog Npas Laas, ces Npas Laas yuav tsum tau foom lus zoo rau nej xwb thiab kuv tau cawm nej dim ntawm nws txhais tes. 11 Thaum nej hla dhau tus dej Yos Las Das thiab los txog Yes Lis Kos lawm, cov neeg kav Yes Lis Kos ua rog rau nej. Lawv yog cov As Mos, cov Pes Lis Xis, cov Kas Nas Has, cov His Tis, cov Zis Nkas Sis, cov His Vis thiab cov Yes Npws Xis, tab sis kuv tau muab lawv tso rau nej xib teg tib si. 12 Kuv tau tso ib co nkawj ua nej ntej mus caum kom lawv khiav, ces nej tsis tau siv ntaj los siv hneev li.
    13 Kuv tau muab ib lub teb chaws uas nej tsis tau khwv tsim rau nej; cov tsheej los tsis yog nej txhim; cov vaj txiv cawv thiab vaj txiv ntoo roj uas niaj hnub nej noj los tsis yog tau khwv cog."

    NPN        136:   1-3, 16-18, 21-22+24

    Txais: Huab Tais txoj kev khuv leej nyob mus li.

    Nej ua HUAB TAIS tsaug, vim nws siab zoo,
    vim nws txoj kev hlub nyob tas ib txhiab ib txhis.
    Nej ua tus Tswv Ntuj kav tas tsoom tswv ntuj tsaug,
    vim nws txoj kev hlub nyob tas ib txhiab ib txhis.
    Nej ua tus HUAB TAIS kav tas tsoom huab tais tsaug,
    vim nws txoj kev hlub nyob tas ib txhiab ib txhis.

    Txais: Huab Tais txoj kev khuv leej nyob mus li.

    Nws coj nws haiv neeg hla dhau teb chaws suab puam,
    vim nws txoj kev hlub nyob tas ib txhiab ib txhis.
    Nws ntaus cov vaj loj kom lawv qaug,
    vim nws txoj kev hlub nyob tas ib txhiab ib txhis.
    Nws tua tej vaj muaj hwj xyeej kom lawv tuag,
    vim nws txoj kev hlub nyob tas ib txhiab ib txhis,

    Txais: Huab Tais txoj kev khuv leej nyob mus li.

    Nws muab lawv lub teb chaws los pub ua cuab tam,
    vim nws txoj kev hlub nyob tas ib txhiab ib txhis,
    yog ua cuab tam rau nws tus tub txib His Xas Lais,
    vim nws txoj kev hlub nyob tas ib txhiab ib txhis.
    nws cawm peb dim ntawm peb cov yeeb ncuab,
    vim nws txoj kev hlub nyob tas ib txhiab ib txhis.

    Txais: Huab Tais txoj kev khuv leej nyob mus li.

    As Les Lus Yas:        1 TXLN  2:   13

    Txais: As les lus yas, as les lus yas.

    Nej txais Tswv Ntuj lo lus txhob txais li yog neeg lo lus xwb ;
    nej yuav txais kom raws li yeej yog Tswv Ntuj Lo Lus tiag tiag.

    Txais: As les lus yas, as les lus yas.

    Ntawv Moo Zoo:        MT  19:   3-12

    3 Ib co Fas Lis Xais los cuag Yes Xus, lawv xav sim nws, lawv hais rau nws tias : “Ib tug txiv neej puas muaj cai nrauj nws poj niam txawm yuav tim li cas los tau ? ” 4 Yes Xus teb tias : “Nej tsis tau nyeem tias, thaum chiv lub keeb, tus Tsim neeg, nws tsim kom muaj txiv neej thiab poj niam, 5 thiab kuj muaj hais tias : ‘Vim qhov ntawd, mas txiv neej yuav tso nws niam nws txiv tseg mus npuab nws poj niam, ces ob tug ntawd yuav ua ib lub cev nqaij xwb’ no lod? 6 Vim li ntawd, nkawd tsis yog ob leeg lawm, nkawd yog leeg lawm xwb. Qhov uas Tswv Ntuj sau los ua ke, mas neeg yuav tsis txhob muab cais.” 7 Lawv teb rau Yes Xus tias : “Vim li cas Mais Xes ho qhia kom ua ib daig ntawv nrauj rau yus poj niam ces yus muab nws nrauj tau?" 8 Yes Xus hais rau lawv tias : “Yog vim nej lub siab twm xeeb dhau, ces Mais Xes thiaj tso lus kom nej nrauj tau poj niam. Tab sis txij thaum chiv lub keeb los, mas tsis yog li ntawd. 9 Kuv hais rau nej tias: leej twg nrauj nws poj niam, yog tsis yog vim kev sib yuav txhaum cai, thiab nws ho rov mus yuav dua lwm tus, mas nws yog ib tug muaj txij nkawm mus deev hluas. Hos tus uas mus yuav tus luag muab nrauj lawm kuj yog ib tug mus deev luag txij nkawm.”
    10 Cov thwj tim hais rau Yes Xus tias: “Yog muaj li koj hais txog ntawm tus txiv neej thiab nws poj niam tiag, mas txhob yuav poj niam zoo dua." 11 Yes Xus hais rau lawv tias : “Tsis yog sawv daws yuav to taub cov lus no, tsuas yog cov uas Ntuj pub rau mas lawv thiaj to taub: 12 Muaj ib co neeg yuav tsis tau txij nkawm, vim lawv yeej yug los zoo li ntawd. Muaj ib co, vim neeg muab lawv sam lawm. Hos muaj ib co, yog lawv txhob txwm tsis yuav txij nkawm vim Ntuj lub Ceeb Tsheej. Leej twg txawj to taub, mas yeej meem cia nws to taub.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 16th August 2019, 11:47 am

    Tim 17 lub 8 Hli 2019

    Hnub Xya Lias Piam Kaum Cuaj Nruab Xyoo C Nruab Lis Piam Xyoo I

    Zaj Nyeem Ib: YOG XUAS 24: 14-29


    Nyob Xis Kes, Yos Xuas hu cov His Xas Lais los sib sau ua ke, nws hais rau lawv tias :
    14 "Tsoom His Xas Lais, nyem no, nej yuav hwm HUAB TAIS thiab tsob hwb nws tiag tiag thiab tas nej lub siab lub ntsws. Nej muab cov dab uas nej phaj txiv teev nyob sab dej tid thiab nyob Hais Nkws Tos teb tso pov tseg, nej los tsob hwb HUAB TAIS. 15 Tab sis yog nej tsis zoo siab tsob hwb HUAB TAIS, mas nej cia li xaiv ib co dab uas nej xav tsob hwb hnub no. Saib nej yuav xaiv nej phaj txiv lawv cov dab uas lawv teev nyob sab dej tid, los nej yuav xaiv cov As Mos Lis cov dab, uas nyem no nej nyob hauv lawv teb chaws. Ntawm kuv thiab kuv tsev neeg mas peb yuav tsob hwb HUAB TAIS."
    16 Ces tsoom sid teb tias : "Peb yuav tsis tso HUAB TAIS pov tseg mus teev lwm cov dab li ! 17 Vim HUAB TAIS peb tus Tswv Ntuj yog tus tau coj peb thiab peb phaj txiv tawm hauv Hais Nkws Tos teb los , tawm ntawm lub tsev muab peb yuam ua lawv qhev los. Nws tau ua hwj huam loj rau peb qhov muag pom xyeem. Nws tau pov hwm peb ntawm txhua txoj kev peb tau taug thiab txuag peb ntawm txhua haiv neeg uas peb tau hla hauv lawv los. 18 HUAB TAIS tseem tau caum tas cov haiv neeg thiab cov As Mos Lis uas nyob hauv lub teb chaws no kom lawv khiav tawm ntawm peb hauv ntej mus. Peb kuj yuav tsob hwb HUAB TAIS thiab vim nws yog peb tus Tswv Ntuj."
    19 Ces Yos Xuas hais rau tsoom sid tias : "Ntshai tsam nej yuav tsob hwb HUAB TAIS tsis tau, vim nws yog ib tug Tswv Ntuj ntshiab, nws yog ib tug Tswv Ntuj muaj khib, nws yuav tsis zam nej tej kev ua tsis zoo thiab nej tej txhaum rau nej, 20 yog tias nej tso HUAB TAIS pov tseg mus tsob hwb cov pej kum dab; thaum ntawd HUAB TAIS yuav tso nej tseg thiab yuav xa xwv txheej tuaj rau nej, nws yuav ua kom nej ploj tas txawm tias nws xub tau ua zoo rau nej lawm." 21 Tsoom sid teb rau Yos Xuas tias : "Yuav tsis muaj li koj hais, peb yuav tsob hwb HUAB TAIS xwb." 22 Ces Yos Xuas hais rau tsoom sid tias : "Nej rov ua tim khawv txog nej tus kheej tias nej tau xaiv txoj kev tsob hwb HUAB TAIS." Lawv teb tias : "Peb ua tim khawv!" 23 Yos Xuas hais tias : "Ua li mas nej muab pej kum neeg cov dab uas nyob hauv nej tshem tawm mus, thiab nej tig nej lub siab los rau HUAB TAIS His Xas Lais tus Tswv Ntuj." 24 Tsoom sid teb rau Yos Xuas tias : "HUAB TAIS peb tus Tswv Ntuj yog tus peb yuav tsob hwb; peb yuav mloog nws hais !"
    25 Hnub ntawd Yos Xuas nrog tsoom sid cog lus. Nws tsa ib co txhooj thiab ib txog cai rau lawv coj nyob Xis Kes. 26 Yos Xuas sau cov lus ntawd tseg rau hauv phau ntawv hais txog Tswv Ntuj Txoj Cai; thiab nws muab ib lub pob zeb loj loj los teeb rau hauv tsob qab ntoo uas yog HUAB TAIS lub tsev ntshiab. 27 Yos Xuas hais rau tas tsoom sid tias : "Nej ntsia, lub pob zeb no ua tim khawv txiav txim rau peb vim nws tau hnov cov lus uas HUAB TAIS hais rau peb tas tib si thiab nws yuav ua tim khawv txiav txim rau nej, yog tias nej ua tsis ncaj rau nej tus Tswv Ntuj." 28 Ces Yos Xuas tso sawv daws nyias rov mus nyias vaj nyias tsev.
    29 Thaum tej xwm no tshwm sim tuaj tas lawm, mas Yos Xuas uas yog Nuv tus tub thiab yog Huab Tais tus tub txib thiaj tuag, nws muaj ib puas kaum xyoo.

    NPN 16: 1-2A+5, 7-8, 11


    Txais: (5a) Huab Tais, koj yog kuv lub cuab tam.

    Tswv Ntuj, thov koj txuag kuv, vim kuv tuaj nkaum hauv koj.
    Kuv hais rau HUAB TAIS tias: " Koj yog kuv tus HUAB TAIS !”
    Huab Tais, kuv lub cuab tam, kuv lub ntim,
    Koj yog tus tuav rawv kuv txoj hmoo.

    Txais: (5a) Huab Tais, koj yog kuv lub cuab tam.

    Kuv cav lus zoo txog tus HUAB TAIS uas qhia kuv xav tswv yim,
    Tab yog hmo ntuj kuv lub siab ntsws tseem txhib kuv.
    Kuv cia HUAB TAIS nyob ntawm kuv xub ntiag tsis tseg;
    Vim nws nyob ntawm kuv sab xis, kuv yuav tsis qaij tsis qaug

    Txais: (5a) Huab Tais, koj yog kuv lub cuab tam.

    Koj yuav qhia kuv taug txoj kev mus rau txoj sia,
    koj yuav qhia kuv paub txog txoj kev zoo siab
    puv npo nyob ntawm koj xub ntiag,
    txog txoj kev nplij siab tsis txawj kawg nyob ntawm koj sab xis.

    Txais: (5a) Huab Tais, koj yog kuv lub cuab tam.

    As Les Lus Yas: MT 11: 25

    Txais: As les lus yas, as les lus yas.

    Kuv cav txog koj, Leej Txiv, Huab Tais kav lub ntuj lub teb,
    koj tau qhia tej yam tob txog Ntuj Ceeb Tsheej rau cov neeg me paub.

    Txais: As les lus yas, as les lus yas.

    Ntawv Moo Zoo: MT 19: 13-15

    13 Thaum ntawd, muaj neeg coj ib co me nyuam yaus tuaj rau Yes Xus kom Yes Xus tsa tes rau saum lawv thiab thov Ntuj rau lawv, tab sis cov thwj tim cem cov neeg ntawd.
    14 Yes Xus thiaj hais tias : “Nej cia cov me nyuam yaus ntawd tuaj cuag kuv, nej txhob txwv lawv ; vim Ntuj lub Ceeb Tsheej yog cov neeg zoo li cov me nyuam no tug.”
    15 Ces Yes Xus tsa tes rau saum cov me nyuam ntawd tas, nws mam mus ntxiv.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 18th August 2019, 5:58 am

    Tim 19 lub 8 Hli 2019

    Hnub Ob Lis Piam Nees Nkaum Nruab Xyoo C Nruab Lis Piam Xyoo I

    Hwm LN John Eudes

    Zaj Nyeem Ib: TXWJ LAUS TIV THAIV 2: 11-19


    11 Cov His Xas Lais ua tsis ntxim HUAB TAIS siab, lawv mus tsob hwb cov dab Npas As. 12 Lawv tso HUAB TAIS lawv cov yawg koob tus Tswv Ntuj pov tseg; HUAB TAIS twb yog tus coj lawv tawm hauv Hais Nkws Tos teb los. Lawv mus teev lwm cov dab, mus nrog cov pej kum haiv neeg nyob ib ncig ntawm lawv teev lawv cov dab. Lawv mus khoov pe hawm cov dab ntawd, lawv ua HUAB TAIS npau taws. 13 Lawv tso HUAB TAIS tseg, lawv mus tsob hwb Npas As thiab As Tas Tes. 14 Ces HUAB TAIS thiaj npau taws rau cov His Xas Lais, nws tso lawv rau tub sab tes, tub sab thiaj tuaj lwg lawv; thiab nws tso lawv rau lawv cov yeeb ncuab uas nyob ib ncig ntawm lawv tes, ces lawv tiv tsis yeej cov yeeb ncuab ntawd li. 15 Thaum twg lawv sawv kev mus qhov twg mas HUAB TAIS txhais tes tsis pab lawv, nws ua kom lawv tau txoj hmoov phem raws li HUAB TAIS tau hais rau lawv thiab tau cog lus rau lawv lawm, ces lawv raug kev txom nyem loj kawg nkaus.
    16 Ces HUAB TAIS thiaj li tso ib co Txwj Laus Tiv Thaiv sawv tuaj cawm cov His Xas Lais dim ntawm cov neeg tuaj lwg lawv tes. 17 Tab sis cov His Xas Lais kuj tsis mloog cov Txwj Laus Tiv Thaiv lus li thiab. Lawv tseem ntxeev siab mus teev thiab pe lwm cov dab; tsis ntev xwb, lawv twb ncaim ntawm lawv cov yawg koob txoj kev lawm, uas yog mloog HUAB TAIS cov lus qhia; lawv tsis ua li ntawd.
    18 Thaum HUAB TAIS tsa cov Txwj Laus Tiv Thaiv tuaj pab lawv, mas HUAB TAIS nrog nraim tus Txwj Laus uas nyob lub sij hawm ntawd. Tas lub caij tus Txwj Laus tseem ua neej nyob, mas Huab Tais txuag cov His Xas Lais ntawm lawv cov yeeb ncuab, vim HUAB TAIS lub siab hlub lawv thiab tsis xav kom lawv nroo lawv quaj tias luag hiam lawv. 19 Tab sis thaum twg tus Txwj Laus Tiv Thaiv tuag lawm mas lawv rov qab tig mus ua phem li qub; lawv tseem ua phem dua lawv phaj txiv phaj yawg lawm thiab. Lawv mus teev lwm cov dab, mus tsob hwb thiab pe hawm lwm cov dab, lawv yeej ua siab tawv qhawv tsis kam tso lawv txoj kev ua phem thiab tus yam ntxwv tsis zoo ntawd pov tseg li.

    NPN 106: 34-35, 36-37, 39-40, 43AB+44


    Txais: (4a) Thov koj nco txog peb, Huab Tais, vim koj nyiam koj haiv neeg.

    Lawv tsis rhuav lwm cov neeg kom ploj tas
    raws li HUAB TAIS tau kom lawv ua.
    Lawv tseem mus nrog lwm cov haiv neeg sib fim,
    Thiab lawv xyaum ua raws li cov neeg ntawd.

    Txais: (4a) Thov koj nco txog peb, Huab Tais, vim koj nyiam koj haiv neeg.

    Lawv tsob hwb lwm haiv neeg cov mlom,
    ces cov mlom ntawd yog ib rooj ntxiab cuab tau lawv.
    Lawv muab lawv cov tub thiab
    lawv cov ntxhais tua txi rau dab phem.

    Txais: (4a) Thov koj nco txog peb, Huab Tais, vim koj nyiam koj haiv neeg.

    Tej yam lawv ua ua kom lawv tsis dawb huv,
    lawv tej hauj lwm ua kom lawv zoo li niam ntiav txiv ntiav.
    HUAB TAIS lub siab npau taws rau nws haiv neeg,
    ces nws tsis xav ntsia nws lub cuab tam.

    Txais: (4a) Thov koj nco txog peb, Huab Tais, vim koj nyiam koj haiv neeg.

    Ntau zaus, nws tau npo lawv dim,
    tab sis lawv muaj ib lub tswv yim ua neeg ntxeev siab.
    Txawm li ntawd los nws tseem hlub lawv thaum lawv txom nyem,
    thaum nws hnov lawv lub suab quaj .

    Txais: (4a) Thov koj nco txog peb, Huab Tais, vim koj nyiam koj haiv neeg.

    As Les Lus Yas: MT 5: 3

    Txais: As les lus yas, as les lus yas.

    Cov muaj hmoov zoo yog cov pluag hauv nruab siab,
    vim Ntuj lub Ceeb Tsheej yog lawv li.

    Txais: As les lus yas, as les lus yas.

    Ntawv Moo Zoo: MT 19: 16-22

    16 Muaj ib tug tub hluas tuaj cuag Yes Xus, nws hais rau Yes Xus tias : “Xib Hwb siab zoo, kuv yuav ua tej yam zoo twg, kuv thiaj tau txoj sia nyob mus li ?” 17 Yes Xus teb rau nws tias : “Vim li cas koj nug kuv txog qhov zoo ? Tsuas muaj tib leeg xwb thiaj yog tus zoo, yog Tswv Ntuj. Yog koj xav muaj txoj sia, mas koj yuav ua raws li cov lus qhia.” 18 Tus ntawd hais tias : “Cov lus qhia twg ?” Yes Xus hais rau nws tias : “Koj txhob tua neeg, koj txhob zes luag txij luag nkawm, koj txhob ua tub sab, koj txhob ua tim khawv cuav, 19 koj hwm koj niam koj txiv, koj yuav nyiam tus nyob ze koj ib yam li koj nyiam koj.” 20 Tus tub hluas hais rau Yes Xus tias : “Kuv yeej ua raws li ntawd tas huv tib si txij thaum kuv yau los lawm. Tseem tshuav dab tsi kuv tsis tau ua?” 21 Yes Xus hais rau nws tias : “Yog koj xav kom koj ua zoo tshaj, mas koj rov mus muab txhua txhia yam uas yog koj tug muag, muab pub rau cov pluag, kom koj muaj ib lub cuab tam muaj nqis loj nyob saum ntuj, ces koj los raws kuv." 22 Tus tub hluas hnov cov lus no tas, nws rov mus tsev ib tug mluas mlob, vim nws muaj cuab yeej cuab tam ntau.

    ******************

    Tim 19 lub 8 Hli

    Cov Zaj Nyeem Hwm LN John Eudes, Ua Leej Choj

    Zaj Byeem Ib: EFX 3: 14-19


    Cov kwv tij nkauj muad:
    14 Vim li no, mas kuv txhos caug nyob ntawm Leej Txiv xub ntiag, 15 yog Leej Txiv uas tas ib tsoom ua txiv nyob saum ntuj, thiab nyob ntiaj teb no, txais lub npe txiv ntawm nws los. 16 Kuv thov kom Leej Txiv pub rau nej raws li nws lub hwj chim nplua nuj, nws lub zog loj zog nchav uas nyob hauv Leej Ntuj Plig los txhawb nej lub siab lub ntsws kom nyob ruaj nreb tawv qhawv. 17 Kuv thov kom Leej Pleev los nyob txawm hauv nej nruab siab, vim nej ntseeg, ces nej yuav nrhau cag ruaj thiab cog nej lub siab rau hauv txoj kev nyiam. 18 Ces nej yuav txais ib lub zog pab nej, kom nej nrog tas tsoom neeg ntshiab to taub txog tias nws dav npaum li cas, ntev npaum li cas, siab npaum li cas, tob npaum li cas. 19 Nej yuav paub Leej Pleev txoj kev nyiam, uas loj tshaj neeg txoj kev to taub, ces nej yuav muaj Tswv Ntuj tas nrho los nyob puv hauv nej.

    NPN 131: 1BCDE, 2, 3

    Txais: Huab Tais, kuv txoj kev thaj yeeb yog nyob hauv koj.

    Huab Tais, kuv tsis muaj lub siab xav khav,
    Kuv qhov muag tsis ntsia muab hlob ntxiag rau luag.
    Kuv tsis ua tej yam loj dhau rau kuv,
    Los tej yam kuv lub tswv yim ncav tsis txog.

    Txais: Huab Tais, kuv txoj kev thaj yeeb yog nyob hauv koj.

    Kuv tau ua kom kuv tus ntsuj plig nyob twj ywm tus tus
    Zoo xws li ib tug me nyuam cais tau mis lawm,
    Xws li tus me nyuam cais mis lawm
    los nyob ntawm leej niam xub ntiag,
    Kuv tus ntsuj plig nyob twj ywm hauv kuv
    Zoo puav tam li ntawd .

    Txais: Huab Tais, kuv txoj kev thaj yeeb yog nyob hauv koj.

    His Xas Lais, koj tso siab lug rau Huab Tais,
    txij nyem no mus tag ib txhiab ib txhis.

    Txais: Huab Tais, kuv txoj kev thaj yeeb yog nyob hauv koj.

    As Les Lus Yas: MT 11: 25

    Txais: As les lus yas, as les lus yas.

    Txiv, kuv cav lus zoo txog koj, Huab Tais kav lub ntuj lub teb,
    vim koj tau qhia tej yam tob txog lub Ceeb Tsheej rau cov neeg me.

    Txais: As les lus yas, as les lus yas.

    Ntawv Moo Zoo: MT 11: 25-30

    25 Lub caij ntawd, Yes Xus hais tias : "Txiv, kuv cav lus zoo txog koj, Huab Tais kav lub ntuj lub teb, vim koj zais tej yam ntawd rau cov neeg thoob tsib thiab cov neeg ntse, koj ho qhib rau cov ua neeg me paub. 26 Muaj tseeb, Txiv, koj lub siab yeej nyiam li ntawd. 27 Kuv Txiv tau muab tas ib puas tsav yam rau kuv lawm. Tsis muaj leej twg paub Leej Tub, tsuas kawg Leej Txiv thiaj paub. Kuj tsis muaj leej twg paub Leej Txiv, tsuas kawg Leej Tub thiaj paub, thiab tus uas Leej Tub pom zoo qhia rau kom paub xwb.
    28 Tas nej sawv daws uas nej khwv, thiab ris nra hnyav, nej tuaj cuag kuv mog ! Kuv yuav cia nej so los siav. 29 Nej txais kuv tus quab los kwv thiab nej kawm ntawm kuv, vim kuv siab zoo thiab tsis muab hlob, nej tus plig yuav nrhiav tau chaw so los siav. 30 Vim kuv tus quab kwv yooj yim, thiab kuv lub nra sib.”



    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 19th August 2019, 4:58 am

    Tim      20      lub      8      Hli      2019

    Hnub Peb Lis Piam Nees Nkaum Nruab Xyoo C Nruab Lis Piam Xyoo I

    Hwm LN Bernard, Thawj Tswj Koom Haum thiab Kws cov Txuj Ntshiab

    Zaj Nyeem Ib:        TLTT  6:   11-24A


    11 HUAB TAIS tus Tshiab nqes los zaum hauv tsob qab ntoo qhib nyob Os Fas uas yog Yos As tus neeg As Npis Xes tsob. Nws tus tub Zes Des Oos tab tom ntaus nplej hauv lub zom cawv vim nws xav muab zais kom cov Mas Dias txhob pom. 12 HUAB TAIS tus Tshiab yees tawm los rau Zes Des Oos pom, nws hais tias : "Tub rog siab tawv muaj peev xwm! HUAB TAIS nrog koj nyob !" 13 Zes Des Oos teb rau nws tias : "HUAB TAIS, yog HUAB TAIS nrog peb tiag, tim li cas peb thiaj raug tas ib puas tsav yam zoo li no ? Nws cov hwj huam loj uas peb phaj txiv piav rau peb thaum lawv hais tias: ‘HUAB TAIS yog tus coj peb tawm ntawm Hais Nkws Tos teb los,’ nyob qhov twg? Nyem no nws tso peb pov tseg, nws cia peb poob rau hauv cov Mas Dias txhais tes lawm." 14 Ces HUAB TAIS tig los rau Zes Des Oos, nws hais tias : "Koj mus, koj siv koj lub zog mus cawm cov His Xas Lais ntawm cov Mas Dias tes. Kuv yog tus xa koj mus." 15 Zes Des Oos teb tias : " HUAB TAIS, kuv yuav ua li cas cawm tau His Xas Lais ? Kuv lub xeem yog xeem qis tshaj nyob Mas Nas Xes teb, thiab kuv yog tus tsis muaj hwj chim tshaj cov nyob hauv kuv txiv tsev." 16 HUAB TAIS hais rau nws tias : "Kuv yuav nrog koj, ces koj yuav ntaus yeej cov Mas Dias, yam li lawv yog ib leeg xwb." 17 Zes Des Oos hais tias : "Yog kuv tau ua neeg xis koj siab, mas thov koj ua ib lub cim qhia kuv kom kuv paub tias yog koj hais lus rau kuv tiag. 18 Thov koj tsis txhob txav mus deb ntawm no, koj tos kom kuv rov tuaj cuag koj tso; kuv yuav nqa paj tshab tuaj txi rau koj, kuv yuav coj tuaj tso rau ntawm koj xub ntiag." Ces HUAB TAIS teb tias : "Kuv yuav nyob tos koj rov tuaj txog tso."
    19 Zes Des Oos thiaj mus tom tsev. Nws tua ib tug tshis thiab nws yeem ib tawb hmoov nplej ua ib co mov tsis xyaw poov xab. Nws muab co nqaij tso rau hauv ib lub pob tawb, hos cov kua rau hauv ib lub lauj kaub. Ces nws nqa tuaj rau HUAB TAIS nyob hauv tsob qab ntoo qhib thiab muab fij rau nws. 20 Tswv Ntuj tus Tshiab hais rau Zes Des Oos tias : "Koj muab nqaij thiab muab cov mov tsis xyaw poov xab tso rau saum lub pob zeb no, thiab koj hliv cov kua rau." Zes Des Oos ua li ntawd tas. 21 Ces HUAB TAIS tus Tshiab cev tus ntsis pas uas nws tuav ntawm nws tes mus chwv cov nqaij thiab cov ncuav mov. Hluav taws cia li cig hauv lub pob zeb tuaj kub cov nqaij thiab cov ncuav mov tas tib si. Ces HUAB TAIS tus Tshiab ploj ntais ntawm nws qhov muag lawm. 22 Zes Des Oos paub tias yog HUAB TAIS tus Tshiab tiag. Nws txawm hais tias : "Kuv tus HUAB TAIS Tswv Ntuj, aw ! Kuv txawm tau pom koj tus Tshiab tim ntsej tim muag kiag lod?" 23 HUAB TAIS hais rau nws tias : "Koj nyob kaj siab lug ! Tsis txhob ntshai ! Koj yuav tsis tuag." 24 Zes Des Oos thiaj tsa ib lub thaj txi HUAB TAIS nyob ntawd, thiab nws hu qhov chaw ntawd ua "HUAB TAIS Kev Thaj Yeeb."

    NPN        85:   9, 11-12, 13-14

    Txais: (9b) Huab Tais tham txog kev thaj yeeb rau nws haiv neeg.

    Kuv yuav hnov Tswv Ntuj tshaj tawm txog dab tsi;
    Huab Tais, nws tshaj tawm txog kev thaj yeeb
    rau nws haiv neeg thiab cov neeg ntseeg nws,
    thiab rau cov tso siab tas nrho rau nws.

    Txais: (9b) Huab Tais tham txog kev thaj yeeb rau nws haiv neeg.

    Kev ua sia zoo thiab kev tseeb yuav los sib ntsib,
    Kev ncaj ncees thiab kev thaj yeeb yuav los sib qawg.
    Kev tseeb yuav txhawv tawm hauv ntiaj teb los,
    kev ncaj ncees yuav dauv muag ntsia saum ntuj tuaj.

    Txais: (9b) Huab Tais tham txog kev thaj yeeb rau nws haiv neeg.

    HUAB TAIS yuav pub nws txoj kev nplua nuj,
    ces peb cov av yuav ntsu qoob ntsu loo dua qub.
    Kev ncaj ncees yuav taug kev ua nws ntej,
    kev cawm yuav taug kev raws nws cov hneev taw.

    Txais: (9b) Huab Tais tham txog kev thaj yeeb rau nws haiv neeg.

    As Les Lus Yas:        2 KLN  8:   9

    Txais: As les lus yas, as les lus yas.

    Yes Xus Pleev tau ua neeg pluag txawm tias nws yog tus nplua nuj,
    kom xwv nws txoj kev pluag ua kom nej nplua nuj tuaj.

    Txais: As les lus yas, as les lus yas.

    Ntawv Moo Zoo:        MT  19:   23-30


    23 Yes Xus thiaj hais rau nws cov thwj tim tias : “Kuv hais tseeb rau nej : ib tug neeg nplua nuj yuav ceeb laj nkag mus tau hauv Ntuj lub Ceeb Tsheej. 24 Kuv rov hais dua rau nej : ib tug ntxhuav yuav nkag hauv ib lub qhov koob, mas tseem yooj yim dua ib tug neeg nplua nuj yuav nkag mus hauv Ntuj lub Ceeb Tsheej.” 25 Cov thwj tim hnov cov lus ntawd, lawv poob siab tas, lawv hais tias : “Yog li leej twg thiaj yuav tau txais kev cawm ?” 26 Yes Xus ntsia lawv, nws hais rau lawv tias : “Yog neeg xwb mas yeej tsis tau li. Tab sis, ntawm Tswv Ntuj, mas yuav ua tau tas ib puas tsav yam.”
    27 Ces Pob Zeb teb rau Yes Xus tias : “Yog li, peb tau tso ib puas tsav yam tseg, peb los raws koj lawm, peb yuav tau dab tsi ?” 28 Yes Xus hais rau lawv tias : “Kuv hais tseeb rau nej cov uas los raws kuv tias: nyob hauv lub caij uas txhua yam yuav phlis dua tshiab, uas yog thaum Neeg Leej Tub yuav zaum saum nws lub theej kiab muaj hwj chim, mas nej kuj yuav zaum saum kaum ob lub theej kiab, txiav txim rau kaum ob xeem lub His Xas Lais thiab. 29 Txhua tus uas tau tso vaj tse, kwv tij nkauj muam, niam txiv, me tub me nyuam thiab tso liaj teb tseg, vim kuv lub npe, mas tus ntawd yuav tau txais ib puas npaug tshaj, thiab nws tseem yuav tau txoj sia nyob mus li los ua nws tug. 30 Muaj coob leej cov ua ntej yuav tuaj tom qab, hos cov tuaj tom qab yuav tau ua ntej.”

    *******************

    Nram no yog cov Zaj Nyeem tshwj xeeb rau kev hwm LN Bernard:



    Tim      20      lub      8 Hli

    Hwm LN Bernard, Thawj Coj Koom Haum thiab Kws cov Txuj Ntshiab

    Zaj Nyeem Ib:        Npes Xis Las  15:   1-6


    1 Tus hwm Huab Tais yuav ua zoo li no,  tus tuav rawv Txoj Cai nws yuav txais txoj kev thoob tsib. 2 Txoj kev thoob tsib yuav tuaj cuag nws xws li ib leeg niam, thiab yuav txais nws xws li ib tug nkauj nyab tsim txiaj. 3 Txoj kev thoob tsib yuav muab cov mov muaj kev to taub rau nws noj thiab yuav muab cov dej muaj kev txawj ntse rau nws haus. 4 Tus neeg hwm Huab Tais ib rau txoj kev thoob tsib, ces nws yuav tsis ntog. Nws vam txog txoj kev thoob tsib, ces nws tsis poob ntsej muag. 5 Txoj kev thoob tsib yuav tsa nws kom nyob siab dua nws cov phooj ywg, thiab yuav pab nws qhib ncauj hais lus nyob hauv cov rooj ncauj lus. 6 Tus neeg hwm Huab Tais nrhiav tau kev sov siab thiab kev zoo siab ua lub mom teev kub rau nws ntoo, nws yuav txais ib lub koob lub npe uas yuav nyob mus li

    NPN        119:   9, 10, 11, 12, 13, 14

    Txais: (12b) Huab Tais, thov koj qhia koj txoj cai lij choj rau kuv.

    Yuav ua cas ib tug tub hluas txoj kev thiaj yuav ntshiab huv ?
    Yog yuav ua raws li koj cov lo lus.

    Txais: (12b) Huab Tais, thov koj qhia koj txoj cai lij choj rau kuv.

    Kuv nrhiav koj tas siab tas ntsws,
    thov koj txhob cia kuv ncaim mus deb koj cov lus qhia.

    Txais: (12b) Huab Tais, thov koj qhia koj txoj cai lij choj rau kuv.

    Kuv khaws koj cov lus koj tau cog rau nruab siab
    kom kuv tsis txhob ua txhaum rau koj.

    Txais: (12b) Huab Tais, thov koj qhia koj txoj cai lij choj rau kuv.

    HUAB TAIS, ua kom koj nto koob meej !
    Thov koj qhia koj txoj cai lij choj rau kuv.

    Txais: (12b) Huab Tais, thov koj qhia koj txoj cai lij choj rau kuv.

    Kuv di ncauj tshaj tas nrho cov lus
    cob qhia tawm ntawm koj lub ncauj los.

    Txais: (12b) Huab Tais, thov koj qhia koj txoj cai lij choj rau kuv.

    Kuv zoo siab hlo taug txoj kev ua raws li koj lo lus qhia,
    Zoo siab npaum li kuv nplua nuj muaj txhij txhua.

    Txais: (12b) Huab Tais, thov koj qhia koj txoj cai lij choj rau kuv.

    As Les Lus Yas:        Zam  15:   9B, 5B

    Txais:.   As les lus yas, as les lus yas.    

    Huab Tais hais tias: “Nej nyob truaj hauv kuv txoj kev nyiam mog.
    Tus uas nyob hauv kuv thiab kuv nyob hauv nws, mas nws yuav txi txiv ntau.

    Txais:.   As les lus yas, as les lus yas.

    Ntawv Moo Zoo:        Zam  17:   20-26

    Yes Xus tsa muag rau saum ntuj, nws hais tias:
    20 "Leej Txiv, kuv tsis thov koj rau cov no xwb, kuv tseem thov koj rau cov uas yuav ntseeg txog kuv vim lawv lo lus thiab, 21 kom lawv sawv daws koom ua ib leeg xwb. Ib yam li koj, Leej Txiv, nyob hauv kuv, thiab kuv nyob hauv koj, kom lawv nyob hauv wb, lub qab ntuj neeg thiaj ntseeg tias yog koj xa kuv tuaj. 22 Lub koob meej uas koj muab rau kuv, mas kuv muab rau lawv lawm, kom xwv lawv ua tau ib leeg xws li wb ua ib leeg xwb. 23 Kuv nyob hauv lawv, koj nyob hauv kuv, kom lawv thiaj li ua tsheej ib leeg tiag, ces lub qab ntuj neeg thiaj paub tias yog koj xa kuv tuaj, thiab paub tias koj nyiam lawv ib yam li koj nyiam kuv.
    24 Leej Txiv, cov uas koj muab rau kuv, kuv nyob qhov twg, mas kuv xav kom lawv tau nrog kuv nyob qhov ntawd thiab, kom lawv pom kuv lub koob meej uas koj muab rau kuv, vim koj tau nyiam kuv, txij thaum tsis tau tsim lub sim ceeb los lawm. 25  Leej Txiv siab ncaj, lub qab ntuj neeg tsis paub koj, tab sis kuv paub koj, thiab cov no kuj paub tias yog koj xa kuv tuaj. 26 Kuv twb ua kom lawv paub koj lub npe lawm. Kuv tseem yuav ua kom lawv paub ntxiv, kom txoj kev nyiam uas koj muab los nyiam kuv, nyob hauv lawv, thiab kom kuv nyob hauv lawv."



    Last edited by Mim on 22nd August 2019, 11:07 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 21st August 2019, 5:51 pm

    Tim      21      lub      8      Hli      2019

    Hnub Plaub Lis Piam Nees Nkaum Nruab Xyoo C Nruab Lis Piam Xyoo I

    Hwm LN Pius X, ua Vaj Qhia

    Zaj Nyeem Ib:        TLTT  9:   6-15


    6 Tas cov neeg tseem ceeb nyob Xis Kes thiab tas cov neeg nyob Npes Mis Los tuaj sib sau ua ke thiab lawv mus tsa As Npis Mes Les ua vaj nyob ze tsob ntoo qhib ntawm daim txiag zeb nyob Xis Kes. 7 Muaj neeg mus hais qhia rau Yos Tas paub, ces Yos Tas nce mus nyob saum lub ncov roob Nkas Lis Xis. Nws qw nrov nrov rau lawv tias : "Cov neeg tseem ceeb nyob Xis Kes, nej mloog kuv hais! Tswv Ntuj thiaj yuav mloog nej. 8 Muaj ib hnub cov ntoo sawv kev mus, lawv xav mus pleev roj tsa ib tug vaj los kav lawv. Lawv hais rau tsob txiv ntoo roj tias : ‘Koj ua vaj kav peb !’ 9 Tsob txiv ntoo roj teb lawv tias : ‘Vim li cas kuv thiaj yuav tso kuv cov roj pov tseg uas yog siv los hwm tej dab thiab neej, es mus nyob piav cev yuj yeev saum cov ntoo xwb ?’ 10 Ces cov ntoo mus hais rau tsob txiv ncuav pias tias : ‘Koj los ua vaj kav peb mas !’ 11 Tsob txiv ncuav pias teb lawv tias : ‘Vim li cas kuv thiaj yuav tso kuv qhov qab zib thiab kuv cov txiv uas yog yam zoo pov tseg es mus nyob piav cev yuj yeev saum cov ntoo xwb?’ 12 Cov ntoo txawm mus hais rau tsob hmab txiv cawv tias : ‘Koj los ua vaj kav peb!’ 13 Tsob hmab txiv cawv teb tias : Vim li cas kuv thiaj yuav tso kuv cov cawv uas txawj ua kom dab thiab neej zoo siab pov tseg es mus nyob piav cev yuj yeev nyob saum cov ntoo xwb?’ 14 Ces cov ntoo mus hais rau tsob pos tias : ‘Koj los ua vaj kav peb!’ Tsob pos teb tias : ‘Yog nej ua siab ncaj tsa kuv los ua vaj kav nej tiag mas nej yuav tsum los nkaum hauv kuv qhov ntxoov ntxoo. 15 Tsis li ntawd ces hluav taws yuav tawm hauv tsob pos tuaj kub tas cov ntoo ciab nyob Lis Npaas.’”

    NPN        21:   2-3, 4-5, 6-7

    Txais: (2a) Huab Tais, tus vaj zoo siab nyob hauv koj lub zog.

    HUAB TAIS, tus vaj zoo siab nyob hauv koj lub zog :
    Nyob hauv koj txoj kev yeej nws zoo siab tas nrho.
    Koj tau pub rau nws raws nraim nws lub siab ntshaw.
    Koj tau mloog lo lus thov uas tawm ntawm nws di ncauj los.

    Txais: (2a) Huab Tais, tus vaj zoo siab nyob hauv koj lub zog.

    Koj tau tos txais nws foom koob hmoov zoo kawg nkaus rau nws;
    koj muab ib lub mom teev kub yog tseem kub rau nws ntoo.
    Nws thov koj kom nws tau txoj sia, koj muab rau nws,
    koj pub nws nyob ntev niaj ntau xyoo tsis txawj kawg.

    Txais: (2a) Huab Tais, tus vaj zoo siab nyob hauv koj lub zog.

    Nws lub koob meej nto moo loj nyob hauv koj txoj kev yeej;
    koj muab hwj chim thiab muab kev ci ntsa iab rau nws.
    Koj muab nws ua ib txoj koob hmoov zoo rau txheej dhau txheej;
    Koj lub ntsej muag luag ntxhi ua kom nws zoo siab.

    Txais: (2a) Huab Tais, tus vaj zoo siab nyob hauv koj lub zog.

    As Les Lus yas:        Hes Nplaws  4:   12

    Txais: As les lus yas, as les lus yas.

    Tswv Ntuj lo lus muaj sia thiab ua tau hauj lwm,
    nws txawj tsom tau tej tswv yim thiab
    tej kev xav nyob hauv neeg nruab siab.

    Txais: As les lus yas, as les lus yas.

    Ntawv Moo Zoo: MT 20: 1-16

    Yes Xus hais zaj paj lug no rau nws cov thwj tim tias:
    1 Ntuj lub Ceeb Tsheej piv tau rau ib tug tswv teb uas thaum kaj ntug, nws tawm mus nrhiav tub zog tuaj ua nws daim teb txiv cawv. 2 Nws nrog cov tub zog hais haum ib hnub ib lub txiaj nyiag ua nqe zog, ces nws xa lawv mus tom nws daim teb txiv cawv lawm. 3 Ze cuaj teev, nws tawm mus ncig, nws rov pom ib co neeg nyob dag tom tshav puam. 4 Nws hais rau lawv tias : “Nej mus ua num tom kuv daim teb txiv cawv mas, kuv yuav muab nqi kom haum rau nej.” 5 Ces lawv kuj mus lawm. Kwv yees tav su, nws rov tawm mus ncig dua, thiab thaum hnub qaij peb teev nws kuj rov mus ua li qub dua. 6 Thaum ze li tsib teev yav yuav tsaus ntuj, nws rov tawm mus ncig, nws tseem pom ib co neeg nyob dag, nws hais rau lawv tias : “Vim li cas nej nyob dag tas hnub ntawm no tsis ua dab tsi li ?” 7 Lawv hais rau nws tias : “Vim tsis muaj neeg ntiav peb.” Tus tswv hais rau lawv tias : “Nej kuj mus ua num tom kuv daim teb txiv cawv thiab.” 8 Thaum tsaus ntuj, tus tswv teb hais rau nws tus tub ceev nyiaj tias : “Koj hu cov tub zog los, koj muab nyias tus nqe zog rau nyias, pib hu cov tuaj tom qab zuj zus los xaus rau cov xub tuaj.” 9 Cov tub zog uas tuaj thaum tsib teev los txog, lawv ib leeg tau ib lub txiaj nyiag. 10 Ces cov xub xub tuaj los txog, lawv xav tias lawv yuav tau txais nqi zog ntau dua, tab sis lawv ib leej kuj tau ib lub txiaj nyiag thiab xwb. 11 Thaum lawv los txais lawv tus nqi, lawv yws rau tus tswv teb tias : 12 “Cov tuaj tom qab ua num ib nyuag teev xwb, koj muab rau lawv ib yam li muab rau peb thiab, hos peb, mas peb kwv nra hnyav thiab tiv tshav ib hnub nkaus.” 13 Ces tus tswv teb rau cov xub tuaj ib tug tias : “Npawg, kuv tsis tau ua tsis ncaj rau koj : wb tsis tau hais haum tias ib hnub ib lub txiaj nyiag no lod ? 14 Txais koj tus nqi zog, koj cia li mus. Yog kuv xav muab rau tus tuaj tom qab no, ib yam li muab rau koj ne? 15 Kuv tsis muaj cai rho kuv tej nyiaj txiag raws li kuv siab nyiam lod ? Los yog koj khib vim koj pom tias kuv siab zoo ?" 16 Li ntawd, cov tuaj tom qab yuav tau ua ntej, hos cov ua ntej yuav tuaj tom qab zoo li no.

    ************************

    Tim      21      lub     8      Hli

    Hwm LN Pius X, ua Vaj Qhia

    Zaj Nyeem Ib:        1 TXLN  2:   2B-8


    Cov kwv tij nkauj muad:
    2b Peb muaj kev txhawb zog nyob hauv peb tus Tswv Ntuj los tshaj Tswv Ntuj lub Moo Zoo rau nej, txawm peb ntsib kev tawm tsam ntau. 3 Peb txoj kev qhuab qhia nej tsis yog txhawv ntawm kev yuam kev thiab kev tsis huv los , thiab peb tsis yog xav dag ntxias nej. 4 Vim Tswv Ntuj yeej xub pom zoo yuav peb los tuav txoj hauj lwm tshaj lub Moo Zoo lawm, li ntawd thaum peb hais lus, mas peb tsis nrhiav ua xis neeg lub siab, peb tsuas nrhiav ua xis Tswv Ntuj siab xwb, vim nws yog tus sim peb lub siab. 5 Nej yeej paub lawm tias, peb tsis tau siv tej lo lus mos lus muag los qhuas nej ib zaug, los hais tej yam dag kom peb tau yam peb ntshaw ntshaw; Tswv Ntuj ua tim khawv pom. 6 Peb kuj tsis tau nrhiav ua kom neeg qhuas peb, xws li ua kom nej qhuas los lwm cov neeg qhuas peb. Vim peb yog Leej Pleev cov Hauv Paus Xa Lus, mas yog peb xav yuam nej kuj tau. 7 Tiam sis thaum peb nrog nej nyob mas peb tau ua siab zoo hlub nej xws li ib leeg niam pub mis rau nws cov me nyuam thiab tu lawv.  8 Vim peb hlub nej kawg nkaus, mas peb xav kom nej nrog peb paub Tswv Ntuj lub Moo Zoo, thiab peb tseem xav muab kiag peb txoj sia rau nej, vim peb saib nej yog ib co neeg uas peb lub siab hlub tiag tiag.

    NPN        89:   2-3, 4-5, 21-22, 25+27

    Txais: (2) Kuv yuav hu nkauj mus li cav txog HUAB TAIS lub siab zoo.

    Kuv yuav hu nkauj mus li cav txog HUAB TAIS tej kev ua zoo,
    kuv lub ncauj yuav tshaj txog koj txoj kev pheej xeeb mus tiam dhau tiam.
    Vim koj tau hais tias: “Kuv lub siab zoo yuav nyob ruaj mus li;”
    nyob saum ntuj koj tau cog koj txoj kev pheej xeeb kom ruaj nreb.

    Txais: (2) Kuv yuav hu nkauj mus li cav txog HUAB TAIS lub siab zoo.

    Kuv tau cog ib lo lus nrog tus kuv xaiv,
    kuv tau cog lus khov rau kuv tus tub txib Das Vis tias :
    Kuv yuav tsa koj caj ces kom nyob ruaj mus li,
    kuv yuav txhim ib lub theej kiab rau koj zaum tiam dhau tiam.

    Txais: (2) Kuv yuav hu nkauj mus li cav txog HUAB TAIS lub siab zoo.

    Kuv nrhiav tau kuv tus tub txib Das Vis,
    kuv tau muab kuv cov roj ntshiab los pleev nws.
    Kuv txhais tes yuav nrog nraim nws mus li,
    Thiab kuv txhais npab yuav ua kom nws muaj zog.

    Txais: (2) Kuv yuav hu nkauj mus li cav txog HUAB TAIS lub siab zoo.

    Kuv txoj kev ncaj thiab kev khuv leej yuav nrog nraim nws,
    kuv lub npe yuav tsa nws hauv pliaj kom siab.
    Nws yuav hu kuv tias : "Kuv txiv,
    Kuv tus Tswv Ntuj, kuv lub Tsua, kuv tus Cawm Seej!"

    Txais: (2) Kuv yuav hu nkauj mus li cav txog HUAB TAIS lub siab zoo.

    As Les Lus Yas:        ZAM  10:   14

    Txais: As les lus yas, as les lus yas.

    Huab Tais hais tias: “Kuv yog tus zoo tswv zov yaj;    
    Kuv paub kuv cov yaj, kuv cov yaj paub kuv.”    

    Txais: As les lus yas, as les lus yas.

    Ntawv Moo Zoo:        Zam  21:   15-17

    15 Thaum lawv noj tshais tas, Yes Xus hais rau Xis Moos Pob Zeb tias : "Xis Moos, Zam tus tub, koj puas nyiam kuv dua lawv cov ntawd ?" Pob Zeb hais rau Yes Xus tias : "Huab Tais, koj yeej paub tias kuv nyiam koj." Yes Xus hais rau Pob Zeb tias : "Koj coj kuv cov me nyuam yaj mus noj zaub mog." 16 Yes Xus rov hais zaum ob tias : "Xis Moos, Zam tus tub, koj puas nyiam kuv ?" Pob Zeb hais rau Yes Xus tias : "Huab Tais, koj yeej paub tias kuv nyiam koj." Yes Xus hais rau nws tias : "Koj zov kuv cov yaj mog." 17 Yes Xus tseem rov hais dua zaum peb rau Pob Zeb tias : "Xis Moos, Zam tus tub, koj puas nyiam kuv tiag ?” Pob Zeb tu siab rau qhov Yes Xus hais rau nws zaum peb tias : "Koj puas nyiam kuv tiag ?" Pob Zeb hais rau Yes Xus tias : "Huab Tais, koj paub tas ib puas tsav yam, koj yeej paub tias kuv nyiam koj tiag." Yes Xus hais rau Pob Zeb tias : "Koj coj kuv cov yaj mus noj zaub mog.”


    Last edited by Mim on 26th August 2019, 1:33 pm; edited 2 times in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 22nd August 2019, 7:40 am

    Tim 22 lub 8 Hli 2019

    Hnub Tsib Lis Piam Nees Nkaum Nruab Xyoo C Nruab Lis Piam Xyoo I

    Hwm Niam Mab Liab Ua Poj Vaj

    Zaj Nyeem Ib: TLTT 11: 29-39A


    29 HUAB TAIS lub tswv yim tuaj nyob saum Zes Faws Tes, ces nws mus ncig Nkas Las As thiab Mas Nas Xes teb, nws hla ntawm Mis Pes nyob Nkas Las As teb ces nws mus ntawd mus txog cov As Mos teb. 30 Zes Faws Tes fiv ib lub yeem rau HUAB TAIS tias : "Yog koj muab cov As Mos rau hauv kuv xib tes, 31 mas thaum kuv rov qab los tsev, thawj tug neeg tawm hauv kuv tsev tuaj tos kuv mas tus ntawd yuav yog HUAB TAIS li. Kuv yuav muab nws txi rau HUAB TAIS." 32 Ces Zes Faws Tes hla mus ntaus cov As Mos; HUAB TAIS muab lawv rau hauv nws txhais tes. 33 Nws ntaus yeej lawv txij ntawm lub nroog As Los Es mus rau Mis Nis, tas nrho yog nees nkaum lub nroog, mus txog ntua rau As Npes Kes Las Mis; lawv tuag coob kawg. Ces cov As Mos thiaj swb rau cov His Xas Lais zoo li no.
    34 Thaum Zes Faws Tes rov los tsev nyob Mis Pes, nws tus ntxhais ntaus nruas khiav yeev tuaj tos nws. Yog nws tus ntxhais twm zeej, nws tsis muaj tub muaj ntxhais ntxiv lawm. 35 Zes Faws Tes pom dheev nws tus ntxhais, Zes Faws Tes dua rhe nws lub tsho, nws hais tias : "Kuv me ntxhais, cas koj yuav txo kuv qis ua luaj thiab koj yuav coj ib txog hmoov phem los rau kuv? Vim kuv tau cog lus rau HUAB TAIS lawm, kuv thim tsis tau kuv cov lus!" 36 Tus ntxhais teb tias : "Txiv, koj cog lus rau HUAB TAIS lawm, mas koj ua rau kuv xws li koj tau hais, vim HUAB TAIS twb pub koj ua pauj rau koj cov yeeb ncuab As Mos lawm." 37 Tus ntxhais hais rau nws txiv tias : "Kuv thov koj kheev kuv ua li no : Koj pub ob lub hlis rau kuv. Kuv yuav nrog kuv cov viv ncaus phooj ywg zoo nqes mus lawm nram cov roob, kuv yuav mus quaj txog kuv lub cev nkauj xwb." 38 Nws txiv hais tias : "Koj mus tau." Ces nws cia tus ntxhais mus tau ob lub hlis. Nws mus nyob saum cov roob nrog nws cov viv ncaus phooj ywg quaj txog nws lub cev nkauj xwb. 39 Thaum puv ob hlis lawm, tus ntxhais rov los cuag nws txiv, ces nws txiv thiaj ua rau tus ntxhais raws li lub yeem nws tau fiv.

    NPN 40: 5, 7-8A, 8B-9, 10

    Txais: (8a+9a) Kuv nyob ntawm no HUAB TAIS, kuv tuaj ua ywj koj siab.

    Muaj hmoov zoo yog tus neeg uas tso siab rau HUAB TAIS,
    Tsis tig mus tuaj cov tsis hwm Ntuj tog,
    Los tsis mus caum cov neeg ntseeg tej zaj cuav qab.

    Txais: (8a+9a) Kuv nyob ntawm no HUAB TAIS, kuv tuaj ua ywj koj siab.

    Koj tsis ntshaw tsiaj los txhiam xws txi rau koj,
    tiam sis koj muab pob ntseg rau kuv kom kuv cuab ntsej mloog lus.
    Koj tsis xav tau tsiaj hlawv txi ntuj los tsiaj hlawv them txim txhaum,
    kuv thiaj hais tias: “Kuv nyob ntawm no, cia kuv tuaj.”

    Txais: (8a+9a) Kuv nyob ntawm no HUAB TAIS, kuv tuaj ua ywj koj siab.

    Nyob hauv kauj ntawv muaj lus sau tseg txog kuv tias:
    “Ua ywj koj lub siab, kuv tus Tswv Ntuj, yog yam ntxim kuv siab,
    koj txoj cai nyob rawv hauv kuv nruab plaw!”

    Txais: (8a+9a) Kuv nyob ntawm no HUAB TAIS, kuv tuaj ua ywj koj siab.

    Kuv tau tshaj koj txoj kev ncaj nyob hauv lub txoos muaj neeg coob,
    kuv tsis tau kaw kuv lub qhov ncauj, HUAB TAIS, koj yeej paub.

    Txais: (8a+9a) Kuv nyob ntawm no HUAB TAIS, kuv tuaj ua ywj koj siab

    As Les Lus Yas: NPN 95: 8

    Txais: As les lus yas, as les lus yas.

    Yog hnub no nej hnov nws lub suab,
    nej tsis txhob ua nej lub siab tawv ncauj.

    Txais: As les lus yas, as les lus yas.

    Ntawv Moo Zoo: MT 22: 1-14

    1 Yes Xus tsa ncauj rov ua paj lug hais rau lawv ntxiv tias : 2 “Ntuj lub Ceeb Tsheej zoo li ib tug vaj uas nws ua tshoob rau nws tus tub. 3 Nws xa tub txib mus nqua hu cov neeg raug caw tuaj noj tshoob, tab sis lawv tsis kam tuaj. 4 Nws rov xa dua ib pab tub txib mus zaum ob, nws hais li no : ‘Nej hais rau cov raug caw tias : Nej saib, kuv twb npaj kuv rooj qav tiav tas, kuv tej heev nyuj thiab cov tsiaj rog puav leej tua tas lawm. Txhua yam npaj txhij tas lawm. Nej kav tsij tuaj noj tshoob !’ 5 Tab sis cov neeg ntawd tsis quav ntsej, lawv nyias mus nyias : ib tug mus tom teb, ib tug mus ua luam. 6 Hos lwm cov tseem nthos nkaus cov tub txib ntes, hiam lawv, muab lawv tua pov tseg. 7 Tus vaj npau taws, nws xa nws cov tub rog mus tua cov neeg txo luag siav ntawd thiab hlawv lawv lub nroog. 8 Ces nws hais rau nws cov tub txib tias : ‘Rooj tshoob npaj tau txhij lawm, tab sis cov neeg kuv caw tsis tsim nyog noj. 9 Nej mus tom tej ncauj ke, nej pom tsawg leej, nej nqua hu kom tuaj noj rooj tshoob.’ 10 Cov tub txib mus txhua txoj kev, lawv sau tas txhua leej txhua tus uas lawv ntsib, cov phem cov zoo tuaj huv tib si. Neeg tuaj puv nkaus lub tsev noj tshoob.
    11 Thaum tus vaj chaws los xyuas cov neeg tuaj koom lub ntees tshoob, nws pom nyob ntawd ib tug neeg tsis hnav tsoos noj tshoob. 12 Tus vaj hais rau nws tias : ‘Npawg, koj tsis hnav tsoos noj tshoob, ua cas koj los tau hauv no ?’ Tus neeg ntawd nyob ntsiag to. 13 Ces tus vaj hais rau cov tub txib tias : ‘Nej muab nws pav tes pav taw, muab nws pov rau nraum zoov, hauv qhov tsaus ntuj : nyob ntawd, yuav muaj quaj laug laws tom hniav nkawv.’ 14 Vim tias muaj ntau leej raug caw, tab sis muaj tsawg leej raug xaiv.”

    **************************

    Tim 22 lub 8 Hli

    Hwm Niam Mab Liab Ua Poj Vaj


    Nram no yog cov zaj nyeem tshwj xeeb rau hnub ntawd.
    .
    Zaj Nyeem Ib: His Xais 9: 1-6

    1 Tsoom pej xeem uas maub hauv qhov tsaus ntuj tau pom ib qho pom kev loj, cov uas nyob hauv lub teb chaws tsaus ntuj nti muaj ib qho pom kev ci hob tuaj rau saum lawv. 2 Koj tau ua kom kev hom haiv neeg coob tuaj, koj tau ua kom lawv muaj kev zoo siab ntau tuaj. Sawv daws zoo siab nyob ntawm koj xub ntiag, ib yam li cov sau qoob loo zoo siab, ib yam li co tub rog sib faib cov toob xib lawv txeeb tau lawv dhia lom zem. 3 Vim tus quab uas tsuam lawv, tus ntas uas nyob saum lawv xub pwg, tus zov cov neeg nyob txim rab qws, koj tau muab tsuj dam tag xws li thaum lub caij ua rog Mas Dias. 4 Txhua nkawm khau tub rog uas tau tsuj nrov hauv tsam rog, thiab txhua lub tsho uas tau ntxaum ntshav yuav raug muab pov hlawv ua taws rauv.
    5 Vim ib tug me nyuam yug los rau peb lawm, Ntuj pub ib tug tub rau peb lawm. Txoj kev tswj kav nyob saum nws xub pwg. Luag tis nws npe hu ua : tus Txawj Pab Tswv Yim Zoo Tas Nrho, tus Tswv Ntuj Zog Loj, Leej Txiv Nyob Mus Li, tus Vaj Txheeb Pub Kev Thaj Yeeb. 6 Nws txoj kev tswj kav thiab kev thaj yeeb yuav hlob mus tsis muaj caij kawg nyob saum Das Vis lub theej kiab thiab hauv nws lub tuam te, uas nws yuav txhim tsa kom nyob ruaj nreb thiab yuav nres nroos raws txoj cai thiab txoj kev ncaj txij no mus txog ib txhiab ib txhis tsis txawj kawg. Tus HUAB TAIS kav tsoom tshiab txoj kev kub siab yuav ua qhov ntawd.

    NPN 113: 1-2, 3-4, 5-6, 7-8

    Txais: Kom Huab Tais lub npe nto mooj mus li.
    los: As les lus yas.

    HUAB TAIS cov tub txib, nej cav txog nws,
    nej cav txog HUAB TAIS lub npe.
    Kom HUAB TAIS lub npe nto moo lug,
    txij no mus txheej dhau txheej mus li!

    Txais: Kom Huab Tais lub npe nto mooj mus li.
    los: As les lus yas.

    Txij thaum hnub tawm txog hnub poob qho,
    kom HUAB TAIS lub npe nto moo lug.
    HUAB TAIS loj siab tshaj ib tsoom kuj cuab,
    nws lub koob meej nyob siab dua txheej ntuj saud.

    Txais: Kom Huab Tais lub npe nto mooj mus li.
    los: As les lus yas.

    Leej twg thiaj zoo li HUAB TAIS, peb tus Tswv Ntuj,
    Uas nws zaum saum nws lub theej kiab nyob siab saud
    Thiab nws dauv muag khoov los ntsia lub ntuj
    thiab lub ntiaj teb nyob txheej qis hauv?

    Txais: Kom Huab Tais lub npe nto mooj mus li.
    los: As les lus yas.

    Nws tsa tus pluag hauv plua tshauv los,
    nws rub tus txom nyem hauv qhov phem los
    kom los zaum nrog cov tub huab tais,
    cov tub huab tais hauv nws haiv neeg.

    Txais: Kom Huab Tais lub npe nto mooj mus li.
    los: As les lus yas.

    As Les Lus Yas: LK 1: 28

    Txais: As les lus yas, As les lus yas.

    Koj nyob zoo, Mab Liab, koj tau txiaj ntsim puv siab,
    Huab Tais Ntuj nrog koj nyob;
    koj tau koob tau hmoov tshaj ib tsoom poj niam tib si.

    Txais: As les lus yas, As les lus yas

    Ntawv Moo Zoo: LK 1: 26-38

    26 Thaum Es Luis Xas Npes xeeb tub tau rau hli lawm, Tswv Ntuj xa tus Tshiab Nkas Nplias mus cuag ib tug ntxhais hauv ib lub zos nyob Nkas Lis Lais teb, hu ua zos Nas Xas Les. 27 Tus ntxhais ntawd, lawv muab qhaib rau ib tug txiv neej hu ua Yos Xes, xeem Das Vis lawm. Hos tus ntxhais lub npe hu ua Mab Liab. 28 Tus Tshiab chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! Huab Tais nrog koj nyob." 29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. 30 Tus Tshiab hais rau Mab Liab tias : "Mab Liab, koj tsis txhob ntshai. Tswv Ntuj saib koj ntxim Tswv Ntuj siab. 31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. 32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws zaum. 33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg." 34 Mab Liab hais rau tus Tshiab tias : "Qhov ntawd yuav muaj tau zoo li cas, vim kuv tsis paub ib tug txiv neej?" 35 Tus Tshiab teb rau Mab Liab tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. 36 Saib ! Es Lis Xas Npes, tus uas txheeb koj, luag hu nws ua pog khab seeb, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau." 38 Ces Mab Liab hais tias : "Kuv yog Huab Tais tus ntxhais txib. Kuv xav kom muaj rau kuv raws li koj hais." Tus Tshiab thiaj ncaim mus tso Mab Liab tseg.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 22nd August 2019, 11:12 am

    Tim 23 lub 8 Hli 2019

    Hnub Rau Lis Piam Nees Nkaum Nruab Xyoo C Nruab Lis Piam Xyoo I

    Hwm LN Rose nyob Lima

    Zaj Nyeem Ib: LUV 1: 1, 3-6, 14B-16, 22


    1 Lub caij uas cov Txwj Laus Tiv Thaiv kav teb chaws, lub teb chaws tau tshaib plab ib ntus. Thaum ntawd muaj ib tug txiv neej nyob Npes Les Hes, Yus Das teb, nws coj nws poj niam thiab nws ob tug tub lawv tsiv mus nyob ib ntus nram cov nras tiaj Mos As.
    3 Tus txiv neej Es Lis Mes Lev uas yog Nos Es Mis tus txiv, tuag nyob ntawd, tshuav Nos Es Mis nrog nws ob tug tub nyob xwb. 4 Ob tug tub ntawd yuav poj niam nyob hauv cov neeg Mos As. Ob tug poj niam ntawd ib tug hu ua Os Pas, ib tug hu ua Luv. Lawv nyob ntawd tau kaum xyoo. 5 Ces ob tug tub Mas Loos thiab Kis Lis Yoos nkawd kuj tuag thiab. Tshuav Nos Es Mis ib leeg xwb nws tsis muaj tub tsis muaj txiv lawm. 6 Nos Es Mis thiaj npaj yuav coj nws ob tug nyab rov ntawm lub tiaj Mos As los rau nws teb chaws, vim nyob ntawd nws hnov tias Tswv Ntuj tuaj xyuas nws haiv neeg thiab pub mov rau lawv noj lawm.
    14 Ces Os Pas nwj nws niam pog, nws ua ib siab rov mus nrog nws neej nws tsav nyob, tshuav Luv nrog Nos Es Mis nyob xwb. 15 Nos Es Mis hais rau Luv tias : "Koj saib koj tus viv ncaus twb rov mus hauv nws haiv neeg thiab mus coj lawv cov dab qhuas lawm. Koj ua li nws thiab koj rov mus mog !" 16 Luv teb tias : "Koj tsis txhob ntiab kuv kom kuv tso koj tseg los kom kuv ncaim koj mus ! Koj mus qhov twg, kuv yuav nrog koj mus. Koj nyob qhov twg, kuv yuav nrog koj nyob. Koj haiv neeg yuav yog kuv haiv neeg. Koj tus Tswv Ntuj yuav yog kuv tus Tswv Ntuj.”
    22 Ces Nos Es Mis coj nws tus nyab Mos As hu ua Luv nrog nws rov los. Nkawd rov ntawm lub tiaj Mos As los, nkawd los txog Npes Les Hes tab tom yog lub caij pib sau qib lawm.

    NPN 146: 5-6AB, 6C-7, 8-9A, 9BC-10

    Txais: (1b) Kuv tus plig, koj cav lus zoo txog HUAB TAIS !

    Muaj hmoov zoo yog tus tau Yas Kos tus Tswv Ntuj nres nws,
    Yog tus tso siab rau HUAB TAIS nws tus Tswv Ntuj,
    uas yog tus tswv tsim lub ntuj lub teb,
    tsim dej ntuj thiab ib puas tsav yam nyob hauv dej.

    Txais: (1b) Kuv tus plig, koj cav lus zoo txog HUAB TAIS!

    Nws txoj kev tseeb nyob mus ib txhiab ib txhis;
    cov raug luag quab yuam, nws tsa lawv cai,
    nws pub mov rau cov neeg tshaib noj;
    HUAB TAIS tso cov neeg raug txim kom dim.

    Txais: (1b) Kuv tus plig, koj cav lus zoo txog HUAB TAIS!

    HUAB TAIS qhib cov dig muag qhov muag,
    HUAB TAIS tsa cov khoov nkoos kom sawv ntseg,
    HUAB TAIS nyiam cov neeg ncaj,
    HUAB TAIS pov hwm cov pej kum neeg.

    Txais: (1b) Kuv tus plig, koj cav lus zoo txog HUAB TAIS!

    Nws txhawb tus ntsuag nos thiab tus poj ntsuam,
    nws ua kom tus siab phem tau kev tws.
    HUAB TAIS yuav ua vaj mus li;
    Xis Yoos, koj tus Tswv Ntuj ua vaj
    mus txheej dhau txheej ! As les lus yas!

    Txais: (1b) Kuv tus plig, koj cav lus zoo txog HUAB TAIS !

    As Les Lus Yas: NPN 25: 4B, 5A

    Txais: As les lus yas, as les lus yas.

    Kuv tus Tswv Ntuj, qhia koj txoj kev rau kuv taug,
    thiab coj kuv mus nyob hauv koj txoj kev tseeb.

    Txais: As les lus yas, as les lus yas.

    Ntawv Moo Zoo: MT 22: 34-40

    34 Cov Fas Lis Xais hnov tias Yes Xus teb rau cov Xas Dus Kais tws lus, ces lawv sib sau sab laj. 35 Lawv ib tug tuaj sim Yes Xus, nws yog ib tug kws lij choj, nws nug tias : 6 “Xib Hwb, nyob hauv Txoj Cai, lo lus qhia twg loj dua cov ?” 37 Yes Xus hais rau nws tias : “Koj yuav muab tas koj lub siab, tas koj tus ntsuj plig, tas koj lub tswv yim los nyiam Huab Tais koj tus Tswv Ntuj . 38 Lo lus no yog lo lus qhia loj tshaj cov thiab yog thawj lo lus qhia. 39 Lo lus qhia ob kuj zoo ib yam thiab : Koj yuav nyiam tus nyob ze koj ib yam nkaus li koj nyiam koj. 40 Tas Txoj Cai thiab cov Yaj Saub puav leej xaus tas nrho rau ob lo lus qhia no."

    ********************************

    Tim 23 lub 8 Hli

    Hwm LN Rose nyob Lima

    Zaj Nyeem Ib: 2 KLN 10: 17-11:2


    Cov kwv tij nkauj muad:
    17 ‘Tus twg xav khav, mas nws yuav tsum khav nyob hauv Huab Tais xwb.’ 18 Tus neeg uas rov saib nws yog tus yuav ua tau hauj lwm tsis yog tus luag xaiv, tiam sis tus luag xaiv yog tus uas Huab Tais hais tias nws ua tau hauj lwm.
    11 1 Xav kom nej ua siab ntev mloog kuv hais tej lo lus vwm me ntsis. Thov kom nej ua siab ntev mloog mog ! 2 Kuv lub siab khib nej raws li Tswv Ntuj khib, vim kuv yog tus tau qhaib nej rau ib tug txij nkawm xwb, kuv tau muab nej rau Leej Pleev xws li muab ib tug nkauj xwb dawb huv.

    NPN 148: 1BC-2, 11-13A, 13C-14

    Txais: Nej cov tub cov ntxhais hluas, nej cav txog Huab Tais lub npe.
    los: As les lus yas.

    Nej nyob saum ntuj cav txog Huab Tais,
    nej nyob saum tej chaw siab cav txog nws.
    Nws cov tshiab, nej cav txog nws,
    nws cov peeb zeej, nej cav txog nws.

    Txais: Nej cov tub cov ntxhais hluas, nej cav txog Huab Tais lub npe.
    los: As les lus yas.

    Kom tas cov vaj ntxwv nyob ntiaj teb thiab tas txhua haiv neeg,
    tas cov tub nom tub tsw thiab cov nom txiav txim nyob ntiaj teb,
    cov tub nraug hluas thiab ntxhais nkauj xwb,
    cov laus thiab cov me nyuam yaus,
    Kom lawv cia li cav txog Huab Tais lub npe ,
    vim nws tib lub npe thiaj loj siab dua cov;

    Txais: Nej cov tub cov ntxhais hluas, nej cav txog Huab Tais lub npe.
    los: As les lus yas.

    nws lub hwj xyeej nyob siab tshaj lub ntiaj teb thiab lub ntuj.
    Nws tsa nws haiv neeg lub peev xwm kom siab :
    Vim li no kom cov ntseeg nws, kom cov tub ki His Xas Lais
    uas yog haiv neeg nyob ze nws, sawv daws yuav tsum cav txog nws.
    As les lus yas.

    Txais: Nej cov tub cov ntxhais hluas, nej cav txog Huab Tais lub npe.
    los: As les lus yas.

    As Les Lus Yas: Zam 15: 9B, 5B

    Txais:. As les lus yas, as les lus yas.

    Huab Tais hais tias: “Nej nyob truaj hauv kuv txoj kev nyiam mog.
    Tus uas nyob hauv kuv thiab kuv nyob hauv nws,
    mas nws yuav txi txiv ntau.

    Txais:. As les lus yas, as les lus yas.

    Ntawv Moo Zoo: MT 13: 44-46

    Yes Xus hais rau nws cov thwj tim:
    44 Ntuj lub Ceeb Tsheej zoo li ib hub nyiaj faus rau hauv ib daim teb. Muaj ib tug neeg mus nrhiav tau. Nws rov muab zais dua, nws zoo siab kawg nkaus, nws mus muag nws lub cuab tam, ces nws mus muas daim teb ntawd.
    45 "Ntuj lub Ceeb Tsheej tseem zoo li ib tug tub luam nrhiav cov hlaws npliag deg zoo nkauj. 46 Thaum nws nrhiav tau ib lub hlaws nphiag deg muaj nqi loj, nws mus muag nws lub cuab tam tas huv si, ces nws mus muas lub hlaws npliag deg ntawd.



    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 23rd August 2019, 1:56 am

    Tim      24      lub      8      Hli      2019


    Hnub Xya Lis Piam Nees Nkaum Nruab Xyoo C Nruab Lis Piam Xyoo I

    Hwm LN Bartholomew (Npas Tos Los Mas Yos), ib tug Hauv Paus Xa Lus.

    Muaj coob leej hais tias Bartholomew thiab Nathanael (Nas Tas Nais) yog tib tug xwb.

    Zaj Nyeem Ib:        QYTN  21:   9B-14

    Ib tug tshiab los hais rau kuv tias : “Koj los, kuv yuav coj koj mus saib tus Nkauj Nyab, uas yog Leej Yaj tus txij nkawm.” 10 Ces nws coj kuv hauv kuv lub tswv yim mus rau saum ib lub roob loj roob siab, nws muab lub tsheej ntshiab Yes Lus Xas Les rau kuv saib, uas nqes saum ntuj pem Tswv Ntuj los. 11 Lub tsheej muaj Tswv Ntuj lub hwj chim, nws ci ntsa iab xws li ib lub pob zeb pov haum muaj nqi kawg, xws li ib lub pob zeb jasper ci lam lug xws tsom iab. 12 Muaj ib lub ntsa zeb loj thiab siab xov lub tsheej. Lub ntsa zeb muaj kaum ob lub qhov rooj vag, muaj kaum ob tug Tshiab zov cov qhov rooj ntawd. Muaj ib co npe sau rau ntawm cov qhov rooj : yog cov npe ntawm kaum ob lub xeem tub ki His Xas Lais. 13 Sab Toob Fab muaj peb lub qhov rooj, Pej Fab muaj peb lub qhov rooj, Naj Fab muaj peb lub qhov rooj, Xib Fab muaj peb lub qhov rooj. 14 Lub ntsa zeb xov lub tsheej txawb rau saum kaum ob zaj taw ntsa. Muaj kaum ob lub npe sau rau saum cov taw ntsa, yog Leej Yaj kaum ob leeg Hauv Paus Xa Lus cov npe.

    NPN        145:   10-11, 12-13, 17-18

    Txais: (12) Huab Tais, koj cov phooj ywg tshaj txog
                   koj lub Ceeb Tsheej muaj hwj chim ci ntsa iab.

    HUAB TAIS, cia tas koj cov hauj lwm ua koj tsaug,
    thiab cia cov uas nyiam koj cav txog koj.
    Cia lawv tshaj txog koj lub Ceeb Tsheej muaj hwj chim
    thiab piav txog koj lub hwj huam loj.

    Txais: (12) Huab Tais, koj cov phooj ywg tshaj txog
                   koj lub Ceeb Tsheej muaj hwj chim ci ntsa iab.

    Cia lawv qhia rau neeg paub txog koj lub hwj huam loj
    thiab koj lub Ceeb Tsheej muaj hwj chim ci ntsa iab.
    Koj lub Ceeb Tsheej yog ib lub Ceeb Tsheej
    txais tas cov hlob nrog cov yau,
    thiab koj txoj kev tswj kav yuav nyob mus txheej dhau txheej.

    Txais: (12) Huab Tais, koj cov phooj ywg tshaj txog
                   koj lub Ceeb Tsheej muaj hwj chim ci ntsa iab.

    Huab Tais ua ncaj nyob hauv tas nrho nws tej kev,
    Nws yog tus ntshiab nyob hauv tas nws tej dej num.
    Huab Tais nyob ze cov hu txog nws,
    cov uas muaj lub siab hu txog nws rawv qhov tseeb.

    Txais: (12) Huab Tais, koj cov phooj ywg tshaj txog
                   koj lub Ceeb Tsheej muaj hwj chim ci ntsa iab.

    As Les Lus Yas:        ZAM  1:   49B

    Txais: As les lus yas, as les lus yas.

    Las Npis, koj yog Tswv Ntuj Leej Tub,
    koj yog cov His Xas Lais tus vaj.

    Txais: As les lus yas, as les lus yas.

    Ntawv Moo Zoo:        ZAM  1:   45-51

    45 Fis Lis Pos ntsib Nas Tas Nais, nws hais rau Nas Tas Nais tias : "Tus uas Mais Xes tau sau txog nyob hauv Txoj Cai, thiab cov Yaj Saub tau hais txog, mas peb ntsib nws lawm, yog Yes Xus, Yos Xes nyob Nas Xas Les tus tub." 46 Ces Nas Tas Nais hais rau Fis Lis Pos tias : "Puas yuav muaj ib yam zoo tawm hauv Nas Xas Les tuaj tau ?" Fis Lis Pos hais rau Nas Tas Nais tias : "Koj tuaj, koj yuav pom." 47 Yes Xus pom Nas Tas Nais tuaj, nws hais txog Nas Tas Nais, nws hais tias : "Nej saib, tus ntawd yog ib tug tseem His Xas Lais uas tsis muaj kev zais siab nyob hauv nws li." 48 Nas Tas Nais hais rau Yes Xus tias: "Ua cas koj paub kuv ?" Yes Xus teb rau nws tias : "Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias lawm." 49 Nas Tas Nais teb rau Yes Xus tias : "Las Npis, koj yog Tswv Ntuj Leej Tub ! Koj yog His Xas Lais tus Vaj." 50 Yes Xus teb rau nws tias : "Yog vim kuv hais rau koj tias : Kuv pom koj nyob hauv tsob qab ntoo txiv ncuav pias, mas koj thiaj ntseeg, puas yog? Koj yuav pom tej yam loj dua no thiab." 51 Ces Yes Xus hais rau Nas Tas Nais tias : "Kuv hais qhov muaj tseeb tiag rau nej: Nej yuav pom ntuj qhib los, thiab pom Tswv Ntuj cov Tshiab nce mus thiab nqes los saum Neeg Leej Tub."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 25th August 2019, 12:59 pm

    Tim 26 lub 8 Hli 2019

    Hnub Ob Lis Piam Nees Nkaum Ib Nruab Xyoo C Nruab Lis Piam Xyoo I

    Zaj Nyeem Ib: 1 TXLN 1: 1-5, 8B-10


    1 Paj Lug thiab Xis Vas Nus thiab Tis Mos Tes, sau ntawv tuaj rau lub Koom Txoos nyob Tes Xas Los Nis, uas nyob hauv Leej Txiv Tswv Ntuj thiab nyob hauv Huab Tais Yes Xus Pleev. Thov kom lub txiaj ntsim thiab txoj kev thaj yeeb nyob hauv nej.
    2 Peb ua Tswv Ntuj tsaug tas mus li txog nej sawv daws, thiab peb nco ntsoov txog nej nyob hauv peb zaj teev ntuj tsis tseg. 3 Peb nco ntsoov tias nej kub siab lug nyob hauv txoj kev ntseeg, nej rau siab ntso ua cov hauj lwm nyob hauv txoj kev nyiam, thiab nej ua siab tawv nyob ruaj nreb hauv txoj kev tso siab rau peb tus Huab Tais Yes Xus Pleev nyob ntawm Tswv Ntuj peb Leej Txiv xub ntiag. 4 Cov kwv tij uas Tswv Ntuj nyiad, peb paub tias nej yog cov Tswv Ntuj xaiv. 5 Peb coj lub Moo Zoo tuaj txog nej, tsis yog ib co lus qhuav xwb, tiam sis nws yog ib lub zog, nws muaj Leej Ntuj Plig Ntshiab, thiab yog ib qho ruaj khov tiag; raws li nej yeej paub lawm tias peb tau coj tus yeeb yam zoo li cas thaum peb nrog nej nyob kom tau pab nej.
    8b Nej txoj kev ntseeg txog Tswv Ntuj tau ri mus txog tas qhov txhia chaw lawm, ces peb tsis tau yuav tsum hais txog ntxiv. 9 Vim cov neeg ntawd yeej tham txog tias peb tau tuaj txog tim nej li cas, thiab nej ua li cas tig los ntseeg txog Tswv Ntuj, nej tso nej cov mlom pov tseg, nej los tsob hwb tus Tswv Ntuj muaj txoj sia thiab tus tseem, 10 nej tos ntsoov nws Leej Tub yuav rov saum ntuj los, yog tus uas nws tau tsa hauv cov neeg tuag sawv rov los, yog Yes Xus tus cawm peb dim ntawm txoj kev npau taws uas yuav tuaj yav tom ntej.

    NPN 149: 1B-2, 3-4, 5-6A+9B

    Txais: (4a) Huab Tais zoo siab nyob hauv nws haiv neeg.
    los: As les lus yas

    Nej hu ib zaj nkauj tshiab rau HUAB TAIS,
    nej cav txog nws nyob hauv tsoom ntseeg lub txoos.
    His Xas Lais yuav zoo siab nyob hauv tus uas tsim lawv,
    Xis Yoos cov me nyuam yuav luag ntxhi nyob hauv lawv tus vaj.

    Txais: (4a) Huab Tais zoo siab nyob hauv nws haiv neeg.
    los: As les lus yas

    Lawv yuav ua kev lom zem yoj cev cav txog nws lub npe,
    lawv yuav hu nkauj cav txog nws nrog suab nruas thiab suab nkauj nog ncas.
    Vim HUAB TAIS hlub nws haiv neeg,
    thiab nws muab txoj kev yeej rau cov neeg me hnav ua zam.

    Txais: (4a) Huab Tais zoo siab nyob hauv nws haiv neeg.
    los: As les lus yas

    Cov muaj lub siab ntseeg yuav hom khaj nyob hauv txoj kev nto koob meej;
    lawv yuav hu nkauj zoo siab hauv lawv tej chaw nyob;
    lawv lub qa tsuas muaj qw suab cav txog Tswv Ntuj.
    Qhov no yog cov uas ntseeg nws lub koob meej. As les lus yas.

    Txais: (4a) Huab Tais zoo siab nyob hauv nws haiv neeg.
    los: As les lus yas

    As Les Lus Yas: ZAM 10: 27

    Txais: As les lus yas, as les lus yas.

    Huab Tais hais tias, kuv cov yaj mloog kuv lub suab;
    kuv paub kuv cov yaj, lawv raws nraim kuv qab mus.

    Txais: As les lus yas, as les lus yas.

    Ntawv Moo Zoo: MT 23: 13-22

    Yes Xus hais rau cov neeg thiab rau nws cov thwj tim tias:
    13 “Cov Kws Ntawv Ntshiab thiab cov Fas Lis Xais zoo nraum daim tawv, nej txoj hmoov phem, vim nej muab Ntuj lub Ceeb Tsheej xauv tsis pub neeg nkag ! Nej tsis mus hauv, nej kuj tsis pub kom cov xav mus, tau kev nkag mus hauv.
    [14 Cov Kws Ntawv Ntshiab thiab cov Fas Lis Xais zoo nraum daim tawv, nej txoj hmoov phem, vim nej noj tej poj ntsuam tug, thiab nej lam ua txuj teev ntuj ntev ntev kom neeg qhuas; vim li no nej yuav raug ib lub txim hnyav dua lwm tus.]
    15 Cov Kws Ntawv Ntshiab thiab cov Fas Lis Xais zoo nraum daim tawv, nej txoj hmoov phem, vim nej hla hiav txwv hla teb chaws mus nrhiav kom tau ib tug neeg los hwm ntuj. Thaum nej tau ib tug lawm, nej ua kom nws tsim nyog mus hauv dab phem cov hluav taws tshaj nej ob npaug ntxiv. 16 Nej yog ib co coj ke dig muag, nej txoj hmoov phem, vim nej hais tias : ‘Yog tus twg tuav txog thaj chaw ntshiab los cog lus, mas nws tsis tas ua raws li nws lo lus los tau. Tab sis tus twg tuav txog cov kub hauv thaj chaw ntshiab los cog lus, mas nws yuav tsum ua raws li lo lus nws tau cog.’ 17 Neeg vwm thiab dig muag, dab tsi muaj nqes dua ? Cov kub los yog thaj chaw ntshiab uas ua kom cov kub ntshiab tuaj ? 18 Nej tseem hais tias : ‘Yog tus twg tuav txog lub thaj txi Ntuj los cog lus, mas nws tsis tas ua raws nws lo lus kuj tau. Tab sis yog tus twg muab cov txim saum thaj txi Ntuj los cog lus, mas nws yuav tsum ua raws li lo lus nws tau cog.’ 19 Neeg dig muag, qhov twg yog qhov loj dua ? Yog cov txim los yog lub thaj txi Ntuj uas ua kom cov txim ntawd ntshiab ? 20 Tus tuav txog lub thaj txi Ntuj los cog lus, kuj yog tuav txog lub thaj thiab tas txhia yam uas nyob saum lub thaj huv si. 21 Tus tuav txog thaj chaw ntshiab los cog lus, kuj yog tuav txog thaj chaw ntshiab thiab Tus nyob hauv thaj chaw ntawd. 22 Hos tus tuav txog lub ntuj los cog lus, kuj yog tuav txog Tswv Ntuj lub theej kiab thiab Tus zaum saum lub theej kiab ntawd tib si.”


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 26th August 2019, 2:19 pm

    Tim      27      lub      8      Hli      2019

    Hnub Peb Lis Piam Nees Nkaum Ib Nruab Xyoo C Nruab Lis Piam Xyoo I

    Nco txog LN Monica

    Zaj Nyeem Ib:         1 TXLN  2:   1-8


    1 Cov kwv tij, nej yeej paub lawm tias peb tuaj tim nej, peb tsis tau nkim zog tuaj. 2 Nej kuj paub txog tias, peb xub tau raug txom nyem thiab raug luag hiam nyob Fis Lis Pos ua ntej lawm. Tab sis, peb muaj kev txhawb zog nyob hauv peb tus Tswv Ntuj los tshaj Tswv Ntuj lub Moo Zoo rau nej, txawm tias peb ntsib kev tawm tsam ntau. 3 Peb txoj kev qhuab qhia nej tsis yog txhawv ntawm kev yuam kev thiab kev tsis huv los , thiab peb tsis yog xav dag ntxias nej. 4 Vim Tswv Ntuj yeej xub pom zoo yuav peb los tuav txoj hauj lwm tshaj lub Moo Zoo lawm, li ntawd thaum peb hais lus, mas peb tsis nrhiav ua xis neeg lub siab, peb tsuas nrhiav ua xis Tswv Ntuj siab xwb, vim nws yog tus sim peb lub siab. 5 Nej yeej paub lawm tias, peb tsis tau siv tej lo lus mos lus muag los qhuas nej ib zaug, los hais tej yam dag kom peb tau yam peb ntshaw ntshaw; Tswv Ntuj ua tim khawv pom. 6 Peb kuj tsis tau nrhiav ua kom neeg qhuas peb, xws li ua kom nej qhuas los lwm cov neeg qhuas peb. Vim peb yog Leej Pleev cov Hauv Paus Xa Lus, mas yog peb xav yuam nej kuj tau. 7 Tiam sis thaum peb nrog nej nyob mas peb tau ua siab zoo hlub nej xws li ib leeg niam pub mis rau nws cov me nyuam thiab tu lawv. 8 Vim peb hlub nej kawg nkaus, mas peb xav kom nej nrog peb paub Tswv Ntuj lub Moo Zoo, thiab peb tseem xav muab kiag peb txoj sia rau nej, vim peb saib nej yog ib co neeg uas peb lub siab hlub tiag tiag.

    NPN        139:   1-3, 4-6

    Txais: (1) Huab Tais, koj tsom thoob kuv, koj paub kuv zoo.

    HUAB TAIS, koj tsom thoob kuv, koj paub kuv :
    koj paub thaum kuv sawv thiab thaum kuv zaum ;
    koj nyob deb tsom paub tas tej kuv xav.
    Koj saib nraim kuv thaum kuv mus kev los thaum kuv zaum,
    koj paub txhua yam kuv ua.

    Txais: (1) Huab Tais, koj tsom thoob kuv, koj paub kuv zoo.

    Lo lus uas tseem tsis tau nyob saum kuv tus nplaig,
    HUAB TAIS, koj twb xub paub lawm.
    Koj nyob tom kuv qab tom kuv hauv ntej, koj nyob ib ncig kuv,
    koj tso koj txhais tes rau saum kuv.
    Txoj kev paub txog tej no zoo dhau rau kuv,
    siab dhau qhov kuv ncav tau lawm!

    Txais: (1) Huab Tais, koj tsom thoob kuv, koj paub kuv zoo.

    As Les Lus Yas:        Hes Nplaws 4:   12

    Txais: As les lus yas, as les lus yas.

    Tswv Ntuj lo lus muaj sia thiab ua tau hauj lwm,
    nws txawj tsom tau tej zaj tswv yim thiab
    tej zaj kev xav nyob hauv neeg nruab siab.

    Txais: As les lus yas, as les lus yas.

    Ntawv Moo Zoo:        MT  23:   23-26

    Yes Xus hais tias:
    23 “Tsoom Kws Ntawv Ntshiab thiab tsoom Fas Lis Xais zoo nraum daim tawv, nej txoj hmoov phem, vim nej them se ib feem kaum ntawm cov pum hub, txheej txhaim, thiab zaub txhwb nyug, tab sis nej tso tej yam loj nyob hauv Txoj Cai pov tseg : yam li kev ncaj, kev hlub luag, thiab kev ntseeg. Yuav tsum coj raws tej lus no, thiab tsis tso tej se tod tseg thiaj yog.
    24 Neeg dig muag coj kev, nej lim tus yoov tshaj cum tawm, nej ho cia li nqos tus ntxhuav.
    25 Tsoom Kws Ntawv Ntshiab thiab tsoom Fas Lis Xais zoo nraum daim tawv, nej txoj hmoov phem.  Nej ntxuav khob ntxuav phaj sab nraud, tab sis kev tub sab thiab kev hu dab nyob puv nkaus sab hauv.
    26 Fas Lis Xais dig muag, koj xub ntxuav lub khob sab hauv tso, ces sab nraud kuj yuav huv tuaj thiab.”

    ************************************

    TIM      27      LUB      8      hLI

    Hwm LN Monica


    Hnub no yog xav xaiv cov zaj nyeem Tshwj xeeb rau hnub hwm LN Monica raws li nram no los tau:

    Zaj Nyeem Ib:        NXL  26:   1-4, 13-16

    1 Muaj hmoov zoo yog tus txiv uas tau ib tug poj niam zoo,    
    nws lub neej yuav nyob ntev li ob npaug.      
    2 Ib tug poj niam tsim txiaj yuav ua kom nws tus txiv zoo siab;      
    Tus txiv yuav tau ib lub neej kaj lug thiab puv npo.                
    3 Ib tug poj niam zoo yog ib qho khoom plig uas
    HUAB TAIS ua siab dav fo pub rau tus uas hwm nws.    
    4 Txawm nws yuav muaj los yuav pluag, nws muaj kev txaus siab hlo,
    thiab nws muaj lub ntsej muag luag ntxhi txhua lub sij hawm.  

    13 Ib tug poj niam zoo nkauj ua kom nws tus txiv zoo siab;    
    Nws txawj tu kom tus txiv tej pob txha puv ntoob tuaj.  
    14 Ib tug poj niam txawj hais lus yog ib qho khoom plig tuaj ntawm Huab Tais tuaj,  
    Nws tus cwj pwm tsim txiaj muaj nqes dua ntais tas txhua yam.  
    15 Ib tug poj niam tsis muab hlob yog ib txog hmoov zoo tshaj plaws;  
    Tsis muaj dab tsi yuav piv tau rau nws tus plig txoj kev tsim txiaj.  
    16 Xws li lub hnub ci tawm tuaj nyob saum HUAB TAIS lub ntuj ntsuab,
    Tus poj niam tsim txiaj qhov zoo nkauj yog qhov ua kom nws lub vaj tse ci ntsa.  
         .
    NPN        131:   1BCDE, 2, 3

    Txais: Nyob hauv koj, Huab Tais, kuv nrhiav tau txoj kev kaj lug.

    HUAB TAIS, kuv lub siab tsis khav theeb,
    kuv tsis tsa hau siab los ntsia luag.
    Kuv tsis nrhiav tej yam loj nto koob meej,
    los tej yam tob uas kuv lub tswv yim tsis duav.

    Txais: Nyob hauv koj, Huab Tais, kuv nrhiav tau txoj kev kaj lug.

    Kuv cia kuv tus plig nyob thaj yeeb ntsiag to
    zoo li tus me nyuam uas cais tau mis lawm.
    Zoo li tus me nyuam cais mis lawm nyob hauv nws niam
    xub ntiag, kuv tus plig kuj zoo li ntawd nyob hauv kuv.

    Txais: Nyob hauv koj, Huab Tais, kuv nrhiav tau txoj kev kaj lug.

    His Xas Lais, koj yuav tso siab rau HUAB TAIS,
    txij nyem no mus tas ib txhiab ib txhis.

    Txais: Nyob hauv koj, Huab Tais, kuv nrhiav tau txoj kev kaj lug.

    As Les Lus Yas:        Zam  8:   12

    Txais: As les lus yas, as les lus yas.

    Huab Tais hais tias: “Kuv yog qhov pom kev kaj lub qab ntuj neeg.
    Leej twg lawv kuv qab, yuav tau qhov pom kev uas coj mus rau txoj sia."

    Txais: As les lus yas, as les lus yas

    Ntawv Moo Zoo:        LK  7:   11-17

    11 Yes Xus mus hauv ib lub nroog hu ua Nas Ees. Nws cov thwj tim thiab ib pab neeg coob nrog nws ua ke mus. 12 Thaum Yes Xus tuaj yuav txog lub qhov rooj loog nkag mus hauv lub nroog, luag tab tom kwv ib tug tuag tawm tuaj txog ntawd. Yog ib leeg tub twm zeej, hos leej niam yog ib tug poj ntsuam. Ib pab neeg coob hauv nroog nrog leej niam tawm tuaj. 13 Thaum Huab Tais pom tus poj ntsuam, Huab Tais khuv leej nws, Huab Tais hais rau nws tias : "Koj txhob quaj." 14 Yes Xus txav lawm pem hauv ntej mus tuav lub hleb; cov kwv hleb nres, ces Yes Xus hais tias : "Tus hluas, kuv hais koj : Koj sawv !" 15 Ces tus tuag sawv zaum, thiab nws pib hais lus. Yes Xus muab tus tub hluas ntawd cob rau nws niam. 16 Tas sawv daws ntshai tas nrho. Lawv cav txog Tswv Ntuj tias : "Ib tug yaj saub loj sawv los nyob hauv peb, Tswv Ntuj tuaj xyuas nws haiv neeg lawm." 17 Cov lus hais txog tus hluas ntawd ncha mus thoob tas xeev Yus Das thiab ib ncig lub teb chaws ntawd.



    Last edited by Mim on 20th September 2019, 2:01 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 27th August 2019, 4:18 am

    Tim 28 lub 8 Hli 2019

    Hnub Plaub Lis Piam Nees Nkaum Ib Nruab Xyoo C Nruab Lis Piam Xyoo I

    Hwm LN Augustine/Augustin

    Zaj Nyeem Ib: 1 TXLN 2: 9-13


    9 Cov kwv tij, nej yuav nco ntsoov txog peb tej hauj lwm, thiab peb tej kev iab kev khwv. Peb tau ua hauj lwm nruab hnub thiab hmo ntuj, kom peb tsis txhob yog ib lub nra hnyav rau nej ib tug twg ris; tib txhij ntawd peb tseem tshaj Tswv Ntuj lub Moo Zoo rau nej thiab. 10 Nej yog cov tim khawv pom, thiab Tswv Ntuj kuj ua tim khawv pom tias peb tau coj tus yam ntxwv ntshiab thiab ncaj ncees, tus yam ntxwv tsis muaj chaw xyeej nyob hauv nruab nrab nej cov ntseeg. 11 Nej twb paub lawm tias, peb tau ua rau nej txhua leej xws li ib leeg txiv ua rau nws tej tub ki. 12 Peb tau ntuas nej sawv daws, tau txhawb nej lub siab kom loj, tau cob qhia nej tas zog, kom nej taug ib txog kev ua neej tsim nyog tus Tswv Ntuj uas hu nej los nyob hauv nws lub Ceeb Tsheej, thiab nyob hauv nws lub hwj chim.
    13 Yog vim tej ntawd, mas peb ua Tswv Ntuj tsaug tsis tseg, vim thaum nej txais Tswv Ntuj Lo Lus uas peb tau qhia rau nej, mas nej tsis txais Lo Lus ntawd xws li yog neeg lo lus xwb, nej txais raws li nws yeej yog Tswv Ntuj Lo Lus tiag tiag. Niaj hnub no Lo Lus ntawd ua hauj lwm nraim nyob hauv nej cov uas ntseeg.

    NPN 139: 7-8, 9-10, 11-12AB

    Txais: (1) HUAB TAIS, koj tsom pom hauv kuv, koj paub kuv.

    Kuv yuav mus lawm qhov twg thiaj nraim ntawm koj lub tswv yim?
    Kuv yuav khiav lawm ces twg, thiaj nyob deb ntawm koj lub ntsej muag?
    Yog kuv nce mus saum ntuj, koj twb nyob saud lawm !
    Yog kuv nqes lawm puag ntuj txias teb tsaus, koj kuj nyob hauv thiab!

    Txais: (1) HUAB TAIS, koj tsom pom hauv kuv, koj paub kuv.

    Yog kuv ya raws lub caij kaj ntug ob phab tis mus,
    yog kuv mus nyob puag sab dej ntuj kawg nkaus tim ub,
    los tseem yog koj txhais tes coj kuv mus,
    yog koj sab tes xis hwj kuv kom kuv nyob ruaj nreb.

    Txais: (1) HUAB TAIS, koj tsom pom hauv kuv, koj paub kuv.

    Yog kuv hais tias : "Cia qhov tsaus ntuj muab kuv zais,
    los hmo ntuj tseem yuav ua kom pom kev nyob ncig kuv ."
    vim qhov tsaus ntuj tsis dub tsis tsaus rau koj,
    hmo ntuj pom kev nrig xws nruab hnub rau koj.

    Txais: (1) HUAB TAIS, koj tsom pom hauv kuv, koj paub kuv.

    As Les Lus Yas: 1 ZAM 2: 5

    Txais: As les lus yas, as les lus yas.

    Yog tus twg coj nraim Leej Pleev lo lus, mas
    txoj kev nyiam Tswv Ntuj zoo tiav log nyob hauv nws.

    Txais: As les lus yas, as les lus yas.

    Ntawv Moo Zoo: MT 23: 27-32

    Yes Xus hais tias:
    27 “Tsoom Kws Ntawv Ntshiab thiab tsoom Fas Lis Xais zoo nraum daim tawv, nej txoj hmoov phem, vim nej zoo li ib co ntxa pleev hmoov zeb sib : sab nraud zoo nkauj zoo saib, tab sis sab hauv muab pob txha neeg tuag thiab tas puas tsav yam kev lwj kev qias nyab puv nkaus. 28 Nej kuj ib yam, tuaj sab nraud saib, nej zoo li yog neeg ncaj ncees, tab sis, nyob sab hauv, nej muaj kev dag thiab kev phem nyob puv nkaus.
    29 Tsoom Kws Ntawv Ntshiab thiab tsoom Fas Lis Xais zoo nraum daim tawv, nej txoj hmoov phem, vim nej txhim tsa cov yaj saub tej ntxa thiab nej tu cov neeg ncaj tej ntxa kom zoo nkauj, 30 nej hais tias : ‘Yog peb ua neej nyob lub zim txwv peb cov yawg koob nyob, mas peb yuav tsis nrog lawv koom tes hliv cov yaj saub tej roj ntsha.’ 31 Li ntawd, nej rov lees tias nej yeej yog cov neeg txo cov yaj saub txoj sia cov tub. 32 Ua li mas nej yeej meem ua phem kom phim nej cov yawg koob txoj kev phem.”

    ***************************************

    Tim 28 lub 8 Hlis

    Hwm LN Augustine


    Yog xav xaiv cov zaj nyeem tshwj xeeb rau hnub hwm LN Augustine raws li nram no los tau:


    Zaj Nyeem Ib: 1 Zam 4: 7-16

    7 Cov zoo nyiad, peb yuav tsum sib nyiam sib hlub mog ! Vim txoj kev nyiam kev hlub tuaj ntawm Tswv Ntuj tuaj, ua li mas tus twg nyiam thiab hlub, mas tus ntawd yug ntawm Tswv Ntuj los, thiab nws paub Tswv Ntuj. 8 Tus tsis txawj nyiam tsis txawj hlub, mas nws tsis paub Tswv Ntuj, vim Tswv Ntuj yog txoj kev nyiam kev hlub. 9 Tswv Ntuj txoj kev nyiam thiab hlub peb tawm los rau qhov muag pom xyeem zoo li no : Tswv Ntuj tau xa nws Leej Tub Twm Zeej tuaj nyob ntiaj teb no kom peb muaj txoj sia nyob hauv nws. 10 Txoj kev nyiam kev hlub yog zoo li no : peb tsis tau nyiam thiab hlub Tswv Ntuj, tiam sis yog Tswv Ntuj nyiam thiab hlub peb, ces nws tau xa nws Leej Tub tuaj ua nqi txhiv peb ntawm peb cov txhaum. 11 Cov zoo nyiad, yog Tswv Ntuj twb nyiam thiab hlub peb npaum li ntawd, mas peb kuj yuav tsum sib nyiam sib hlub thiab. 12 Tsis muaj leej twg tau pom dua Tswv Ntuj ib zaug li. Yog peb sib nyiam sib hlub, mas Tswv Ntuj yuav nyob hauv peb, thiab nws txoj kev nyiam kev hlub yuav hlob tiav log zoo txhij zoo txhua nyob hauv peb.
    13 Qhov yuav ua kom peb paub tias peb nyob hauv Tswv Ntuj, thiab nws nyob hauv peb yog li no : yog qhov tias nws tau pub nws Leej Tswv Yim rau peb. 14 Ntawm peb, mas peb tau ntsia ntsoov, ces peb ua tim khawv zeem tias Leej Txiv tau xa nws Leej Tub tuaj cawm lub qab ntuj neeg. 15 Tus lees tias Yes Xus yog Tswv Ntuj Leej Tub, mas Tswv Ntuj nyob txawm hauv nws, thiab nws nyob hauv Tswv Ntuj. 16 Peb mas peb paub txog Tswv Ntuj txoj kev nyiam kev hlub peb lawm, thiab peb ntseeg tias Tswv Ntuj yeej nyiam thiab hlub peb tiag.
    Tswv Ntuj yog txoj kev nyiam, leej twg nyob hauv txoj kev nyiam,
    mas nws kuj nyob hauv Tswv Ntuj, thiab Tswv Ntuj nyob hauv nws.

    NPN 119: 9, 10, 11, 12, 13, 14

    Txais: (12b) Huab Tais, thov koj qhia koj txoj cai lij choj rau kuv.

    Yuav ua cas ib tug tub hluas thiaj coj tau tus yeeb yam dawb huv ?
    Yog yuav ua raws li koj cov lo lus.

    Txais: (12b) Huab Tais, thov koj qhia koj txoj cai lij choj rau kuv.

    Kuv nrhiav koj tas siab tas ntsws,
    thov koj txhob cia kuv ncaim mus deb koj cov lus qhia.

    Txais: (12b) Huab Tais, thov koj qhia koj txoj cai lij choj rau kuv.

    Kuv khaws koj cov lus koj tau cog rau nruab siab
    kom kuv tsis txhob ua txhaum rau koj.

    Txais: (12b) Huab Tais, thov koj qhia koj txoj cai lij choj rau kuv.

    HUAB TAIS, ua kom koj nto koob meej !
    Thov koj qhia koj txoj cai lij choj rau kuv.

    Txais: (12b) Huab Tais, thov koj qhia koj txoj cai lij choj rau kuv.

    Kuv di ncauj tshaj tas nrho cov lus
    qhuab qhia tawm ntawm koj lub ncauj los.

    Txais: (12b) Huab Tais, thov koj qhia koj txoj cai lij choj rau kuv.

    Kuv zoo siab hlo taug txoj kev ua raws li koj lo lus qhia,
    Zoo siab npaum li kuv nplua nuj muaj txhij txhua.

    Txais: (12b) Huab Tais, thov koj qhia koj txoj cai lij choj rau kuv.

    As Les Lus Yas: MT 23: 9B, 10B

    Txais: As les lus yas, as les lus yas.

    Nej tsuas muaj tib leeg Txiv xwb, yog tus nyob saum ntuj;
    nej tsuas muaj tib tug Tswv xwb, yog Leej Pleev.

    Txais: As les lus yas, as les lus yas.

    Ntawv Moo Zoo: MT 23: 8-12

    Yes Xus hais rau nws cov thwj tim tias:
    8 “Ntawm nej mas nej txhob cia luag hu nej ua ‘Xib Hwb’, vim nej tsuas muaj tib tug Xib Hwb xwb, thiab nej sawv daws yog ib co kwv tij.
    9 Nej txhob hu leej twg nyob ntiaj teb no ua nej txiv, vim nej tsuas muaj tib leeg Txiv xwb, yog tus nyob saum ntuj.
    10 Nej txhob cia luag hu nej ua “Thawj Tswj”, vim nej tsuas muaj tib tug Tswj xwb, yog Leej Pleev.
    11 Tus loj dua cov nyob hauv nej, yuav ua nej tus tub txib.
    12 Tus twg tsa nws siab, Ntuj yuav txo nws qis. Tus twg txo nws qis, Ntuj yuav tsa nws siab.”


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 29th August 2019, 9:34 am

    Tim      29      lub      8      Hli      2019

    Hnub Tsib Lis Piam Nees Nkaum Ib Nruab Xyoo C Nruab Lis Piam Xyoo I

    Hwm LN Zam Ntxuav Plig txoj kev raug txom nyem

    Zaj Nyeem Ib:        1 TXLN  3:   7-13


    7 Cov kwv tij, nej ua kom peb muaj kev nplig siab nyob hauv tas peb tej kev txhawj xeeb thiab kev txom nyem vim nej muaj txoj kev ntseeg. 8 Nyem no, peb muaj sia nyob vim nej nyob ruaj nreb hauv Huab Tais. 9 Peb yuav ua li cas thiaj ua Tswv Ntuj tsaug txaus txog nej, vim tias peb muaj chaw zoo siab ntau vim muaj nej nyob ntawm Tswv Ntuj xub ntiag ? 10 Nruab hnub hmo ntuj, peb thov Tswv Ntuj tsis tseg kom peb tau rov tuaj pom nej lub ntsej muag, thiab kom peb tau kev qhia ntxiv rau nej txog tej yam uas nej paub tsis tau txaus nyob hauv nej txoj kev ntseeg.
    11 Thov kom Tswv Ntuj uas yog peb Leej Txiv, thiab kom peb tus Huab Tais Yes Xus coj peb txoj hauv kev kom peb tuaj txog nej. 12 Thov kom Huab Tais ua kom nej hlob zuj zus tuaj thiab vam meej ntau nyob hauv txoj kev sib nyiam sib hlub, thiab txoj kev nyiam zeej tsoom, ib yam li peb nyiam thiab hlub nej, 13 kom nws txhawb nej lub siab kom nyob ruaj nreb hauv txoj kev ntshiab tsis muaj chaw xyeej, nyob ntawm Tswv Ntuj peb Leej Txiv xub ntiag, mus txog hnub peb tus Huab Tais Yes Xus yuav rov los nrog tas nws tsoom leej ntshiab.

    NPN        90:   3-5A, 12-13, 14+17

    Txais: (14) Huab Tais, thov koj muab koj txoj kev hlub puv npo rau peb,
    Ces peb yuav hu nkauj muaj kev zoo siab.

    Koj cia neeg hloov rov mus ua plua av,
    koj hais tias: “Me nyuam neeg, nej rov mus.”
    Vim tias ib txhiab xyoo rau koj zoo li yog nag hmo xwb,
    vim nws dhau tas lawm, los tsuas zoo li
    ib lub caij zov keeb thaum hmo ntuj xwb.

    Txais: (14) Huab Tais, thov koj muab koj txoj kev hlub puv npo rau peb,
    Ces peb yuav hu nkauj vim peb muaj kev zoo siab.

    Thov koj qhia peb txawj suav peb cov hnub nyoog kom zoo,
    kom peb txawj muaj kev thoob tsib hauv nruab siab.
    HUAB TAIS, thov koj tsuag tsuag rov qab los! Peb yuav tos hov ntev?
    Thov koj khuv leej koj cov tub txib mas!

    Txais: (14) Huab Tais, thov koj muab koj txoj kev hlub puv npo rau peb,
    Ces peb yuav hu nkauj vim peb muaj kev zoo siab.

    Sawv ntxov tsees, thov koj muab koj txoj kev nyiam puv npo rau peb,
    ces peb yuav qw zoo siab hom khaj txhua hnub hauv peb lub neej.
    Thov kom Huab Tais peb tus Tswv Ntuj txoj kev hlub yog peb tug,
    Thov koj ua kom cov hauj lwm peb txhais tes ua vam meej tuaj,
    kom cov hauj lwm peb txhais tes khwv ua vam meej!

    Txais: (14) Huab Tais, thov koj muab koj txoj kev hlub puv npo rau peb,
    Ces peb yuav hu nkauj vim peb muaj kev zoo siab.

    As Les Lus yas:        MT  5:   10

    Txais: As les lus yas, as les lus yas.
    Cov tau txoj hmoov zoo yog cov raug luag hiam vim txoj kev ncaj,
    Ntuj lub Ceeb Tsheej yog lawv li.
    Txais: As les lus yas, as les lus yas.

    Ntawv Moo Zoo:        MK  6:   17-29

    17 Hes Los yog tus xa neeg mus ntes Zam thiab muab saw hlau khi Zam rau hauv tsev loj faj, vim Hes Los Dias uas yog Hes Los tij laug Fis Lis Pos tus poj niam, uas+9 Hes Los yuav los ua nws poj niam lawm. 18 Zam tau hais rau Hes Los tias : "Koj tsis muaj cai yuav koj tij laug tus poj niam." 19 Ces Hes Los Dias ntxub Zam tas siab nrho, nws xav muab Zam tua kawg, tab sis nws tua tsis tau. 20 Vim Hes Los ntshai Zam, thiab nws paub tias Zam yog ib tug neeg siab ncaj siab ntshiab, ces Hes Los txuag Zam. Thaum Hes Los hnov Zam hais lus, mas ua rau nws tsis paub xav tswv yim li, tiam sis nws kuj ho nyiam mloog Zam thiab. 21 Muaj ib lub zoo sij hawm los txog, yog hnub tsuj xeeb Hes Los hnub yug. Hes Los ua ib roog qav caw cov nom tswv hauv nws lub tuam tsev, cov thawj tub rog, thiab cov nom loj hauv xeev Nkas Lis Lais tuaj koom. 22 Thaum ntawd, Hes Los Dias tus ntxhais chaws los dhia seev cev. Nws dhia tau ntxim Hes Los thiab cov qhua tuaj koom rooj qav ntawd siab kawg. Ces tus vaj hais rau tus ntxhais tias : "Koj thov saib koj xav yuav dab tsi, kuv yuav muab rau koj." 23 Ces tus vaj cog lus rau tus ntxhais tias : "Koj thov yam twg, mas kuv yuav muab rau koj, tab txawm yog ib nrab ntawm lub teb chaws kuv kav !" 24 Tus ntxhais tawm plaws mus nug nws niam tias : "Kuv yuav thov dab tsi ?" Leej niam hais tias : "Zam Ntxuav Plig lub taub hau." 25 Tam sim ntawd, tus ntxhais rov ntsuj los ntawm tus vaj, nws hais tias : "Kuv xav kom koj muab Zam Ntxuav Plig lub taub hau tso rau hauv ib lub phaj, los cev rau kuv tam sis no." 26 Tus vaj mluas kiag tu siab kawg, tab sis vim nws tau cog lus thiab vim muaj cov qhua, nws thiaj tsis xav thim nws lo lus. 27 Ces tus vaj txib ib tug zov keeb tam sim ntawd, kom mus nqa Zam lub taub hau los. 28 Tus zov keeb mus txiav Zam caj dab hauv tsev loj faj, nws nqa Zam lub taub hau txawb hauv ib lub phaj los cev rau tus ntxhais; ces tus ntxhais muab rau nws niam. 29 Zam cov thwj tim hnov li ntawd, ces lawv tuaj coj Zam lub cev mus tso rau hauv ib lub ntxa.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 29th August 2019, 3:34 pm

    Tim 30 lub 8 Hli 2019

    Hnub Rau Lis Piam Nees Nkaum Ib Nruab Xyoo C Nruab Lis Piam Xyoo I

    Zaj Nyeem Ib: 1 TXLN 4: 1-8


    1 Cov kwv tij, ib qho ntxiv uas peb thov nej thiab txhib nej nyob hauv Huab Tais Yes Xus yog kom nej yuav tsum coj ib lub neej raws li nej tau kawm ntawm peb thiaj ntxim Tswv Ntuj siab. Nej twb coj ib lub neej zoo li ntawd lawm, tiam sis xav kom nej yeej meem coj kom zoo tshaj ntxiv mus xwb. 2 Nej twb paub cov lus qhuab qhia uas peb sawv Huab Tais Yes Xus chaw hais rau nej tas lawm.
    3 Qhov Tswv Ntuj xav kom nej ua yog kom nej ua neeg ntshiab: kom nej caiv txoj kev ua plees ua yi, 4 kom nej nyias txawj siv nyias lub cev raws txoj kev ntshiab thiab tsim txiaj, 5 tsis txhob mloog nyias lub cev kev nqhis kev ntshaw xws li cov neeg teev dab uas tsis paub Tswv Ntuj. 6 Hais txog qhov no mas kom tsis txhob muaj leej twg ua phem rau los ua noj nws ib tug kwv tij twg taub hau, vim Huab Tais yog tus yuav ua pauj rau txhua yam phem ntawd, raws li peb twb tau hais rau nej thiab qhia tseeb rau nej ua ntej lawm.
    7 Vim Tswv Ntuj tsis tau hu peb kom mus taug txoj kev tsis huv, nws hu peb kom peb mus taug txoj kev ntshiab. 8 Li ntawd, yog leej twg tsis kam mloog qhov no, mas tsis yog nws tsis kam mloog ib tug neeg, yog nws tsis kam mloog Tswv Ntuj, uas yog tus pub nws Leej Tswv Yim Ntshiab rau nej.

    NPN 97: 1+2B, 5-6, 10, 11-12

    Txais: (12a) Cov neeg ncaj, nej cia li zoo siab nyob hauv HUAB TAIS.

    HUAB TAIS ua vaj; kom lub ntiaj teb hom khaj,
    kom tas cov pov txwv dhia zoo siab !
    kev ncaj thiab kev txiav txim yog chaw txawb nws lub theej kiab.

    Txais: (12a) Cov neeg ncaj, nej cia li zoo siab nyob hauv HUAB TAIS.

    Cov toj roob yaj xws ciab ntab nyob ntawm HUAB TAIS xub ntiag,
    ntawm tus HUAB TAIS kav tas ntiaj teb xub ntiag.
    Yim txheej cuaj txheej ntuj tshaj nws txoj kev ncaj,
    tas txhua haiv neeg pom nws lub hwj chim.

    Txais: (12a) Cov neeg ncaj, nej cia li zoo siab nyob hauv HUAB TAIS.

    Huab Tais nyiam cov uas ntxub txoj kev phem;
    Nws txuag cov neeg ntseeg txog nws txoj sia,
    nws npo lawv dim ntawm cov neeg phem txhais tes.

    Txais: (12a) Cov neeg ncaj, nej cia li zoo siab nyob hauv HUAB TAIS.

    Qhov pom kev sawv los kaj tus neeg ncaj ;
    Kev kaj siab sawv los ziab cov siab dawb.
    Cov neeg ncaj, nej cia zoo siab nyob hauv HUAB TAIS,
    nej ua nws tsaug vim nws lub npe ntshiab.

    Txais: (12a) Cov neeg ncaj, nej cia li zoo siab nyob hauv HUAB TAIS.

    As Les Lus Yas: LK 21: 36

    Txais: As les lus yas, as les lus yas.

    Nej yuav ceev faj txhua lub sij hawm thiab nej yuav teev Ntuj tsis tseg,
    nej thiaj yuav muaj zog sawv taus ntseg nyob ntawm Neeg Leej Tub xub ntiag."

    Txais: As les lus yas, as les lus yas.

    Ntawv Moo Zoo: MT 25: 1-13

    Yes Xus piav zaj paj lug no rau nws cov thwj tim tias:
    1 “Ntuj lub Ceeb Tsheej yuav zoo xws li kaum leej ntxhais nkauj xwb taws teeb tawm mus tos nraug vauv. 2 Nyob hauv lawv, muaj tsib leeg ruam, hos tsib leeg xyuam xim. 3 Cov ruam nqa teeb, tab sis tsis nqa roj nrog. 4 Hos cov xyuam xim nqa teeb thiab ntim roj rau hauv hwj nqa nrog. 5 Nraug vauv los lig, ces lawv qaug dab ntub, sawv daws tsaug zog. 6 Thaum ib tag hmo, ib lub suab nthe tias : ‘Nraug vauv los txog lawm ! Nej tawm los txais nws !’ 7 Ces tas cov ntxhais nkauj xwb sawv los npaj teeb. 8 Cov ruam hais rau cov xyuam xim tias : ‘Nej pub ib qho roj rau peb mas, peb cov teeb tuag lawm.’ 9 Tab sis cov xyuam xim teb rau cov ruam tias : ‘Ntshai roj yuav tsis txaus rau nej thiab rau peb. Nej mus muas roj tom cov tub luam rau nej.’ 10 Thaum cov ntxhais ruam mus muas roj lawm, ces nraug vauv los txog. Cov uas tau npaj txhij tos, nrog nraug vauv chaws mus rau hauv chav tsev noj tshoob, ces luag xauv qhov rooj rau lawm. 11 Thaum kawg, lwm cov ntxhais nkauj xwb los txog thiab, lawv hais tias : ‘Huab Tais, Huab Tais, thov koj qhib qhov rooj rau peb.’ 12 Tab sis nraug vauv teb tias : ‘Kuv hais tseeb rau nej, kuv tsis paub nej!’
    13 Ua li mas nej yuav tsum zov hmo nraim, vim nej tsis paub hnub twg thiab lub sij hawm twg.”


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 30th August 2019, 4:53 am


    Tim 31 lub 8 Hli 2019

    Hnub Xya Lis Piam Nees Nkaum Ib Nruab Xyoo C Nruab Lis Piam Xyoo I

    Zaj Nyeem Ib: 1 TXLN 4: 9-11


    Cov kwv tij,
    9 Hais txog txoj kev sib nyiam sib hlub xws li ib co kwv tij, mas tsis tas kom leej twg sau txog qhov ntawd rau nej, vim Tswv Ntuj twb tau qhia nej kom nej txawj ib leeg nyiam ib leeg lawm.
    10 Nej yeej nyiam thiab hlub tas tsoom kwv tij nyob Mas Xes Dos Nias teb tib si lawm; tiam sis, cov kwv tij, peb tseem xav txhib nej kom nej haj yam txawj nyiam thiab hlub zoo tshaj ntawd ntxiv thiab.
    11 Kom nej yuav mob siab rau ntshaw ua neej nyob thaj yeeb lug, nyias yuav saib nyias li dej num xwb txhob cuam tshuam txog luag li, nyias yuav xuas nyias txhais tes mus khwv noj, xws li peb tau qhia rau nej lawm.

    NPN 98: 1, 7-8, 9

    Txais: (9) Huab Tais tuaj kav lub ntiaj teb raws kev ncaj ncees.

    Nej hu ib zaj nkauj tshiab rau HUAB TAIS
    vim nws tau ua tej yam txaus qhuas;
    nws txhais tes xis tau ua kom nws yeej.,
    nws sab npab ntshiab tau ua.

    Txais: (9) Huab Tais tuaj kav lub ntiaj teb raws kev ncaj ncees.

    Kom dej hiav txwv thiab tej yam nyob hauv dej ua nrov nroo ntws,
    Kom lub ntiaj teb thiab tsoom neeg ua lom zem ntsuag qees;
    Kom cov niam dej npuaj teg, kom cov roob qw zoo siab,

    Txais: (9) Huab Tais tuaj kav lub ntiaj teb raws kev ncaj ncees.

    nyob ntawm HUAB TAIS xub ntiag, vim nws tab tom tuaj,
    nws tuaj tswj kav lub ntiaj teb.
    Nws yuav tswj kav qab ntuj neeg raws kev ncaj,
    Nws yuav tswj kav cov haiv neeg raws kev haum pheej.

    Txais: (9) Huab Tais tuaj kav lub ntiaj teb raws kev ncaj ncees.

    As Les Lus Yas: ZAM 13: 34

    Txais: As les lus yas, as les lus yas.

    Kuv muab ib lo lus qhia tshiab rau nej tias:
    nej yuav sib nyiam sib hlub ib yam li kuv tau nyiam tau hlub nej.

    Txais: As les lus yas, as les lus yas.

    Ntawv Moo Zoo: MT 25: 14-30

    Yes Xus hais rau nws cov thwj tim tias:
    14 “Yog zoo li ib tug neeg uas yuav mus tawm rooj deb, nws hu nws cov tub txib los, nws muab nws lub cuab tam rau lawv ceev. 15 Nws muab tsib nras nyiaj rau thawj tug, muab ob nras rau tus ob, hos muab ib nras rau tus peb, muab raws li lawv lub peev xwm, ces nws mus tawm rooj lawm. 16 Tus uas tau txais tsib nras nyiaj, nws nqa cov nyiaj ntawd coj mus ntxeev, ces nws tau paj tsib nras ntxiv. 17 Tus tau txais ob nras kuj ua li ntawd thiab, nws tau paj ob nras ntxiv. 18 Hos tus tau txais ib nras xwb mus khawb ib lub qhov rau hauv av, nws muab tus tswv nras nyiaj coj mus faus rau hauv. 19 Ib lub sij hawm ntev loo tom qab, cov tub txib tus tswv rov los txog. Nws nrog lawv txheeb nws cov nyiaj. 20 Tus uas tau txais tsib nras nyiaj tuaj txog. Nws cev tsib nras ntxiv, nws hais tias : ‘Huab Tais, tsib nras nyiaj no yog koj muab rau kuv, hos ntawm no yog tsib nras uas kuv coj mus ntxeev tau paj ntxiv.’ 21 Tus tswv hais rau nws tias : ‘Zoo kawg, tub txib siab zoo siab ncaj, thaum koj saib tej yam tsawg, koj ua ncaj. Kuv yuav tsa koj saib ntau yam. Koj los nyob hauv koj tus huab tais txoj kev zoo siab mog.’ 22 Ces tus tau txais ob nras tuaj txog, nws hais tias : ‘Huab Tais, ob nras nyiaj no yog koj muab rau kuv, hos ntawm no yog ob nras uas kuv coj mus ntxeev tau paj ntxiv.’ 23 Nws tus tswv hais rau nws tias : ‘Zoo kawg, tub txib siab zoo siab ncaj. Thaum koj saib tej yam tsawg li no, koj ua ncaj. Kuv yuav tsa koj saib ntau yam. Koj los nyob hauv koj tus huab tais txoj kev zoo siab mog.’ 24 Tus tub txib uas tau txais ib nras nyiaj xwb tuaj txog, nws hais tias : ‘Huab Tais, kuv paub tias koj yog ib tug neeg siab heev. Koj hlais nplej hauv tej teb koj tsis tau tseb, koj sau qoob hauv tej chaw koj tsis tau pov noob rau. 25 Kuv ntshai, kuv thiaj coj koj nras nyiaj mus faus rau hauv av. Saib ntawm no, koj rov tau yam uas yog koj tug.’ 26 Ces tus tswv teb rau nws tias : ‘Tub txib siab phem thiab tub nkeeg, koj twb paub tias kuv hlais nplej hauv tej qhov uas kuv tsis tau tseb, thiab kuv sau qoob hauv tej chaw uas kuv tsis tau pov noob rau. 27 Twb phim koj yuav nqa kuv cov nyiaj mus tso rau hauv cov tsev ceev nyiaj. Thaum kuv rov los, kuv thiaj yuav tau kuv cov nyiaj nrog cov paj. 28 Nej rho nras nyiaj ntawm nws mus, nej muab rau tus uas muaj kaum nras lawm. 29 Vim tias tus uas twb muaj lawm tseem yuav tau txais ntxiv, ces nws yuav tau ntau ntxiv. Hos tus uas tsis muaj, tseem yuav raug luag thau qhov me me uas nws muaj tawm thiab. 30 Nej muab tus tub txib tsis tsim txiaj ntawd pov rau nraum zoov hauv qhov tsaus ntuj; nyob ntawd yuav muaj quaj vwm leg ntsuav thiab tom hniav nkawv.’”


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 1st September 2019, 7:12 am

    Tim 2 lub 9 Hlis 2019

    Hnub Ob Lis Piam Nees Nkaum Ob Nruab Xyoo C Nruab Lis Piam Xyoo I


    Koob Tsheej Txog Neeg txoj Kev Ua Dej Num (Labor Day)
    Nyob USA txoj cai txiav kom niaj xyoo thawj Hnub Ob hauv lub cuaj hlis tas teb chaws yuav caiv hauj lwm rau lub koob tsheej no.

    Zaj Nyeem Ib: 1 TXLN 4: 13-18

    13 Cov kwv tij, peb tsis xav kom nej tsis paub dab tsi txog cov neeg uas mus pw tsaug zog lawd. Nej yuav tsis txhob tu tu siab xws li lwm cov neeg uas tsis muaj kev tso siab dab tsi li. 14 Yog peb ntseeg tias Yes Xus tuag thiab sawv rov los lawm, mas peb kuj ntseeg tias cov neeg uas mus pw tsaug zog lawd, Tswv Ntuj kuj yuav coj lawv nyob hauv Yes Xus mus nrog nws nyob thiab. 15 Peb hais lo lus no rau nej uas yog hais raws li Huab Tais lo lus tias, peb cov uas tseem ciaj nyob, uas yog cov seem ciaj nyob mus txog hnub Huab Tais yuav rov los txog, mas peb yuav tsis xub mus ua ntej cov uas pw tsaug zog ntxov lawd. 16 Vim Huab Tais kiag yuav nqes saum ntuj los nrog ib lub suab qw kom yuav tsum ua, nrog tus tuam tshiab lub suab hu, thiab nrog Tswv Ntuj lub suab puab nrov. Ces cov neeg tuag nyob hauv Yes Xus Pleev yuav xub sawv rov los tso. 17 Ces peb cov uas tseem ciaj nyob, peb cov uas seem, mam li yuav tau nrog lawv ua ke nce saum cov huab mus cuag Huab Tais nyob saum cua. Ces peb yuav tau mus nrog Huab Tais nyob mus li ib txhis. 18 Vim li ntawd nej yuav tsum siv cov lus no los rov sib txhawb sib pab ua siab loj.

    NPN 96: 1+3, 4-5, 11-12, 13

    Txais: (13b) Huab Tais tuaj txiav txim rau lub ntiaj teb.

    Nej hu ib zag nkauj tshiab rau HUAB TAIS,
    tas cov teb chaws, nej hu nkauj rau HUAB TAIS;
    Nej cav nws lub koob meej rau tsoom kuj cuab paub,
    piav nws cov dej num txaus qhuas rau tsoom haiv neeg hnov.

    Txais: (13b) Huab Tais tuaj txiav txim rau lub ntiaj teb.

    Vim HUAB TAIS loj tas nrho, tsim nyog sawv daws cav txog nws,
    nws zoo kawg nkaus, zoo tshaj ib tsoom dab tas huv si .
    Tas tsoom dab uas lwm cov haiv neeg teev, tsis muaj nqi dab tsi.
    Hos HUAB TAIS yog tus tsim yim txheej cuaj txheej ntuj.

    Txais: (13b) Huab Tais tuaj txiav txim rau lub ntiaj teb.

    Kom lub ntuj zoo siab thiab lub ntiaj teb hom khaj;
    kom lub hiav txwv thiab txhua yam nyob hauv nrov nroo ntws;
    kom cov tiaj nrag thiab txhua yam nyob hauv luag ntxhi!
    Ces txhua tsob ntoo nyob hauv hav zoo yuav co zoo siab,

    Txais: (13b) Huab Tais tuaj txiav txim rau lub ntiaj teb.

    Nyob ntawm HUAB TAIS xub ntiag, vim nws tuaj lawm,
    nws tuaj tswj kav lub ntiaj teb.
    Nws yuav tswj ntiaj teb neeg raws kev ncaj
    thiab txhua haiv neeg raws kev haum pheej. .

    Txais: (13b) Huab Tais tuaj txiav txim rau lub ntiaj teb.

    As Les Lus Yas: LK 4: 18

    Txais: As les lus yas, as les lus yas.

    Huab Tais lub Tswv Yim nyob saum kuv,
    Nws xa kuv mus tshaj lub Moo Zoo rau cov pluag.

    Txais: As les lus yas, as les lus yas.

    Ntawv Moo Zoo: LK 4: 16-30

    16 Yes Xus los txog Nas Xas Les, lub zos uas nws nyob hlob. Txog hnub Xas Npas Tos, nws mus hauv lub tsev txoos xws li nws ua kam, ces nws sawv mus nyeem ntawv. 17 Lawv cev tus Yaj Saub His Xais kauj ntawv rau nws. Nws nthuav kauj ntawv, nws nrhiav tau nqe lus uas sau tias :

    18 “Huab Tais lub Tswv Yim nyob saum kuv,
    vim nws pleev roj rau kuv kom kuv mus tshaj lub Moo Zoo rau cov pluag;
    nws xa kuv mus ceeb toom rau cov nyob txim tias lawv yuav dim,
    rau cov dig muag tias lawv yuav rov pom kev;
    Nws xa kom kuv mus tso cov raug luag hiam dim mus ua neeg twj lij,
    19 nws xa kuv mus tshaj tias yog xyoo zoo rau Huab Tais.”

    20 Yes Xus rov kauv phau ntawv, nws muab cev rau tus tub txib, ces nws zaum. Tas tsoom neeg uas nyob hauv lub tsev txoos ntsia ntsoov Yes Xus. 21 Ces Yes Xus pib hais rau lawv tias : “Hnub no, cov lus nyob hauv zaj ntawv no tsheej xeeb raws li nej tau hnov lawm." 22 Tas cov neeg ntawd zeem tseeb tias nws hais lus zoo, lawv qhuas cov lus muaj txiaj ntsim tawm hauv nws lub ncauj los. Lawv hais tias : "Tus ntawd, tsis yog Yos Xes tus tub lod ?" 23 Ces Yes Xus hais rau lawv tias : "Paub ntsoov tias, nej yuav piv lus hais txog kuv li no : ‘Kws kho mob, koj rov kho koj mas ! Tas txhua yam uas luag piav tias tshwm sim nyob Kas Fas Naus, mas koj kuj ua ib yam li ntawd nyob hauv lub zos koj hlob no thiab mas !’" 24 Yes Xus tseem hais ntxiv tias : "Kuv hais tiag rau nej, tsis muaj ib tug yaj saub uas luag yuav txais nws zoo hauv lub zos nws hlob. 25 Kuv hais raws qhov tseeb rau nej tias: lub caij Es Lias nyob, muaj coob tus poj ntsuam nyob His Xas Lais teb. Thaum ntuj kaw nag tau peb xyoos thiab rau hli, tas teb chaws tshaib plab loj kawg. 26 Tab sis Es Lias tsis raug xa mus pab cov poj ntsuam ntawd ib tug li, nws tsuas raug xa mus pab ib tug poj ntsuam nyob lub zos Xas Les Tas, nyob Xis Doos teb xwb. 27 Lub caij tus yaj saub Es Lis Xais nyob, muaj coob tus mob ruas nyob His Xas Lais teb, tab sis tsis muaj ib tug mob ruas His Xas Lais rov huv li, tsuas yog tus mob ruas Xis Lias hu ua Nas Maas thiaj rov huv xwb." 28 Tas cov neeg hauv lub tsev txoos hnov cov lus ntawd, mas lawv npau taws kawg. 29 Lawv sawv tsees, lawv ntiab kom Yes Xus tawm sab nroog nraud. Lawv coj Yes Xus mus txog ntawm ib qho ua qab tsuas saum lub roob uas lawv txhim lawv lub nroog, lawv xav thawb Yes Xus kom poob lawm hauv lub qab tsuas. 30 Tab sis Yes Xus hla plaws hauv nruab nrab lawv, nws taug nws kev mus lawm.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 2nd September 2019, 1:31 am

    Tim      3      lub      9      Hlis      2019

    Hnub Peb Lis Piam Nees Nkaum Ob Nruab Xyoo C Nruab Lis Piam Xyoo I

    Hwm LN Gregory tus Loj, Vaj Qhia thiab Kws cov Txuj Ntshiab

    Zaj Nyeem Ib:       1 TXLN  5:   1-6, 9-11


    1 Cov kwv tij, hais txog lub sij hawm thiab lub caij nyoog mas nej tsis tas yuav tsum muaj ntawv sau hais txog tej ntawd rau nej, 2 vim nej twb paub zoo lawm tias Huab Tais lub hnub nyoog yuav los txog xws li ib tug tub sab uas tuaj thaum hmo ntuj. 3 Thaum zeej tsoom hais zom zaws tias : ‘Peb tau nyob kaj lug thiab nyob nyab xeeb lawm’, ces ib sij huam, txoj kev puas tsuaj yuav tuaj raug lawv, xws li tus poj niam cev hnyav uas ib sij huam nws cia li mob plab yug me nyuam, ces lawv yuav tsis tau kev dim. 4 Tiam sis, cov kwv tij, ntawm nej mas nej tsis nyob hauv qhov tsaus ntuj, komlub hnub nyoog ntawd yuav tuaj rau nej xws li ib tug tub sab. 5 Nej sawv daws puav leej yog qhov pom kev cov me nyuam, thiab yog nruab hnub cov me nyuam. Peb tsis yog cov neeg maub hmo ntuj, los nyob hauv qhov tsaus ntuj. 6 Vim li ntawd, mas peb tsis txhob tsaug zog xws li luag tej, peb nyob yuav zov hmo thiab peb yuav noj me haus tsawg.
    9 Vim Tswv Ntuj tsis muab peb tshwj tseg rau nws txoj kev npau taws, tiam sis nws tshwj zias peb cia kom peb tau txais txoj kev cawm seej nyob hauv peb tus Huab Tais Yes Xus Pleev, 10 uas nws tuag pub rau peb, ces tab yog peb zov hmo, los peb tsaug zog, mas peb yuav tau nrog nws nyob muaj txoj sia. 11 Ua li mas, nej yuav rov sib pab ua siab loj, thiab sib txhawb sib nqa mus rau txoj kev zoo, xws li nej twb ua lawm.

    NPN       27:   1, 4, 13-14

    Txais:  (13) Kuv ntseeg tias kuv yuav tau pom Huab Tais qhov zoo
    nyob hauv cov neeg ciaj sia lub teb chaws.

    Huab Tais yog kuv qhov pom kev thiab kuv txoj kev cawm;
    Kuv yuav ntshai leej twg?
    Huab Tais yog kuv lub neej qhov chaw nkaum,
    Kuv yuav tsis tau luag vim leej twg?

    Txais: (13) Kuv ntseeg tias kuv yuav tau pom Huab Tais qhov zoo
    nyob hauv cov neeg ciaj sia lub teb chaws.

    Kuv tsuas thov ib yam ntawm Huab Tais; qhov kuv nrhiav yog:
    kom tau nyob hauv Huab Tais tsev niaj hnub hauv kuv lub neej;
    Kom kuv tau ntsia ntsoov Huab Tais txoj kev zoo
    thiab tau pom nws lub tuam tsev.

    Txais:  (13) Kuv ntseeg tias kuv yuav tau pom Huab Tais qhov zoo
    nyob hauv cov neeg ciaj sia lub teb chaws.

    Kuv ntseeg hais tias kuv yuav tau pom Huab Tais txoj kev nplua mias
    nyob hauv cov neeg ciaj sia lub teb chaws.
    Nej ua siab loj tos ntsoov Huab Tias;
    ua siab tawv qhawv tos ntsoov Huab Tais.

    Txais:  (13) Kuv ntseeg tias kuv yuav tau pom Huab Tais qhov zoo
    nyob hauv cov neeg ciaj sia lub teb chaws.

    As Les Lus Yas:       LK  7:   16

    Txais: As les lus yas, as les lus yas.

    Ib tug yaj saub loj sawv nyob hauv peb,
    Tswv Ntuj tuaj xyuas nws haiv neeg lawm.

    Txais: As les lus yas, as les lus yas.

    Ntawv Moo Zoo:       LK  4:   31-37

    31 Yes Xus nqes mus nram Kas Fas Naus uas yog ib lub nroog nyob hauv xeev Nkas Lis Lais. Nws qhuab qhia lawv hnub Xas Npas Tos. 32 Sawv daws qhuas txog nws cov lus qhia, vim nws hais lus muaj hwj chim. 33 Nyob hauv lub tsev txoos ntawd, muaj ib tug neeg raug ib tug dab tsis huv. Nws qw nrov nrov tias : 34 "Yes Xus Nas Xas Les, koj xav ua dab tsis rau peb ? Puas yog koj tuaj rhuav peb ? Kuv paub koj yog leej twg : koj yog Tswv Ntuj tus Ntshiab." 35 Yes Xus cem nws tias : "Ua twj ywm ! Koj tawm ntawm nws mus." Ces dab tsis huv muab tus neeg thawb ntiag rau hauv av nyob ntawm sawv daws xub ntiag, nws tawm hauv tus neeg mus, tsis ua dab tsi phem rau tus neeg ntawd. 36 Tas lawv sawv daws ntshai,  lawv sib hais zom zaws tias : "Nws lo lus ntawd muaj dab tsi ? Vim nws siv hwj chim thiab hwj huam yuam dab tsis huv, ces dab cia li tawm mus." 37 Muaj ib lub moo qhuas txog Yes Xus cia li pib nrov mus rau txhua qhov chaw nyob ncig thaj tsam ntawd.


    ***************************

    Tim      3      lub     9      Hlis


    Hwm LN Gregory tus Loj, Vaj Qhia thiab Kws cov Txuj Ntshiab


    Yog tias xav xaiv cov zaj nyeem tshwj xeeb rau hnub hwm LN Gregory raws li nram no los tau:

    Zaj Nyeem Ib:        2 KLN  4:   1-2, 5-7

    Cov kwv tij nkauj muad:
    1 Peb tau txais txoj dej num no yog vim Tswv Ntuj muaj lub siab khuv leej neeg muab cob rau peb ua, mas peb tsis ntaus siab me. 2 Tiam sis peb tau muab tej yam ua rau yus txaj muag uas yus muab zais tsis pub leej twg paub tso pov tseg tas. Peb tsis nrhiav kev ua neeg ntse kom tau ua phem, los tsis muab Tswv Ntuj lo lus ntxeev ua lus cuav, tiam sis peb muab lo lus tseeb nthuav qhib rau sawv daws paub, ces peb muab peb tus kheej tso rau txhua tus neeg lub siab xav, ua tus txiav txim  nyob ntawm Tswv Ntuj xub ntiag.
    5 Vim tias peb tsis rov qhia txog peb, tiam sis peb tshaj txog tias Yes Xus Pleev yog Huab Tais. Peb tsuas yog nej cov tub txib nyob hauv Yes Xus xwb. 6 Vim tias tus Tswv Ntuj uas tau hais tias : ‘Kom qhov pom kev ci tawm hauv qhov tsaus ntuj tuaj,’ yog tus tau ci rau hauv peb nruab siab, kom txoj kev pom kev ntawm txoj kev paub txog Tswv Ntuj lub hwj chim uas nyob saum Leej Pleev lub ntsej muag, ci tawm tuaj.
    7 Peb khaws yam muaj nuj nqes loj no rau hauv tej lub tais  av, kom sawv daws pom tseeb tias lub hwj huam loj ntawd yog tuaj ntawm Tswv Ntuj tuaj tsis yog tawm ntawm peb los.

    NPN        96:   1-2A, 2B-3, 7-8, 10

    Txais: (3) Nej cia li tshaj tswv Ntuj cov hauj lwm loj rau txhua haiv neeg paub.

    Nej hu ib zaj nkauj tshiab rau HUAB TAIS,
    nej hu nkauj rau HUAB TAIS. tas txhua lub teb chaws ,
    Nej hu nkauj rau HUAB TAIS, nej cav txog nws lub npe.

    Txais: (3) Nej cia li tshaj tswv Ntuj cov hauj lwm loj rau txhua haiv neeg paub.

    Nej tshaj txog nws txoj kev cawm neeg hnub dhau hnub .
    Nej piav txog nws lub koob meej rau cov haiv neeg paub,
    nej cav txog nws cov hauj lwm loj rau txhua xeem neeg hnov.

    Txais: (3) Nej cia li tshaj tswv Ntuj cov hauj lwm loj rau txhua haiv neeg paub.

    Cov yim neeg nyob hauv cov haiv neeg, nej muab rau HUAB TAIS,
    nej muab lub koob meej thiab lo lus qhuas lus cav rau HUAB TAIS,
    nej muab rau HUAB TAIS lub koob meej uas phim nws lub npe!

    Txais: (3) Nej cia li tshaj tswv Ntuj cov hauj lwm loj rau txhua haiv neeg paub.

    Nej hais rau cov naiv neeg tias: HUAB TAIS ua vaj.
    Nws tau tsim lub ntiaj teb kom nyob ruaj, muab tshem tsis tau,
    nws tswj cov haiv neeg raws txoj kev ncaj.

    As Les Lus Yas:        Zam  15:   15B

    Txais: As les lus yas, as les lus yas.

    Huab Tais hais tias:  Kuv hu nej ua kuv cov phooj ywg,
    vim kuv tau qhia rau nej paub tas puas tsav yam uas leej Txiv hais rau kuv lawm.

    Txais: As les lus yas, as les lus yas.

    Ntawv Moo Zoo:        LK  22:   24-30

    24 Cov thwj tim muaj lus sib cav txog tias saib nyob hauv lawv leej twg yog tus loj dua cov. 25 Yes Xus hais rau lawv tias : "Tsoom kuj cuab cov vaj ntxwv tswj lawv tuag nthi, cov muaj lub hwj chim kav lawv tau lub npe hu ua cov pab txhawb nqa. 26 Tiam sis nej, mas tsis yog li ntawd. Tus loj dua cov nyob hauv nej yuav ua tus hluas dua cov. Tus tswj yuav ua tus tsob hwb. 27 Leej twg yog tus loj dua, puas yog tus zaum ntawm rooj mov los yog tus nqa zaub nqa mov ? Yog tus zaum ntawm rooj mov los tsis yog ? Hos kuv, mas kuv nyob hauv nruab nrab nej xws li yog tus tsob hwb xwb! 28 Nej yog cov uas tau nrog nraim kuv thaum kuv raug kev sim siab. 29 Kuv muaj ib lub Ceeb Tsheej uas kuv muab pub rau nej, ib yam li kuv Txiv tau pub rau kuv, 30 kom nej tau noj thiab tau haus saum kuv lub rooj nyob hauv kuv lub Ceeb Tsheej , thiab kom nej zaum saum ib co theej kiab txiav txim rau kaum ob lub xeem His Xas Lais.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 3rd September 2019, 1:17 pm

    Tim 4 lub 9 Hlis 2019

    Hnub Plaub Lis Piam Nees Nkaum Ob Nruab Xyoo C Nruab Lis Piam Xyoo I

    Zaj Nyeem Ib: KLX 1: 1-8


    1 Kuv, Paj Lug, tus uas Tswv Ntuj pom zoo tsa ua Yes Xus Pleev ib tug Hauv Paus Xa Lus, thiab tus kwv Tis Mos Tes wb sau ntawv tuaj rau cov ntshiab thiab cov kwv tij ntseeg nyob hauv Leej Pleev nyob Kos Los Xais. 2 Thov kom nej tau txais txiaj ntsim thiab kev thaj yeeb tuaj ntawm Tswv Ntuj peb Leej Txiv tuaj.
    3 Peb ua Tswv Ntuj, uas nws yog peb tus Huab Tais Yes Xus Pleev Leej Txiv, tsaug tsis tseg thaum peb thov Ntuj rau nej. 4 Vim peb tau hnov hais txog nej txoj kev ntseeg txog Yes Xus Pleev thiab nej txoj kev nyiam tas tsoom ntshiab, 5 yog vim nej muaj ib qho chaw cia siab tshwj zias tseg rau nej nyob saum ntuj lawm, uas nej twb xub tau hnov hais txog nyob hauv Lo Lus tseeb hauv lub Moo Zoo lawm. 6 Lub Moo Zoo ntawd tuaj txog hauv nej thiab kuj tuaj nyob puv hauv lub ntiaj teb, ces nws txi txiv thiab loj hlob ib yam li nyob hauv nej txij hnub uas nej tau hnov thiab to taub txog Tswv Ntuj lub txiaj ntsim nyob hauv qhov tseeb, 7 raws li Es Pas Fas tau qhia rau nej lawm; nws yog peb tus kwv luag nrog peb ua dej num tsob hwb luag, nws yog Leej Pleev ib tug tub Txib pheej xeeb pub rau nej. 8 Nws kuj yog tus qhia rau peb pom tias nej muaj txoj kev nyiam kev hlub nyob hauv Leej Tswv Yim.

    NPN 52: 10, 11

    Txais: (10) Kuv tso siab mus li rau Tswv Ntuj txoj kev khuv leej.

    Kuv zoo li ib tsob txiv ntoo roj ntsuab
    ntsuab nyob hauv Tswv Ntuj lub tsev.
    Nej tso siab mus li rau Tswv Ntuj txoj
    kev khuv leej neeg tsis muaj caij kawg.

    Txais: (10) Kuv tso siab mus li rau Tswv Ntuj txoj kev khuv leej.

    Kuv yuav ua koj tsaug mus li rau qhov uas koj tau ua,
    kuv yuav cav txog koj lub npe zoo tas nrho
    nyob ntawm cov neeg ntseeg txog koj xub ntiag.

    Txais: (10) Kuv tso siab mus li rau Tswv Ntuj txoj kev khuv leej.

    As Les Lus Yas: LK 4: 18


    Txais: As les lus yas, as les lus yas.

    Huab Tais xa kuv mus tshaj lub Moo Zoo rau cov pluag
    Thiab mus ceeb toom txog kev twj lij rau cov nyob txim.

    Txais: As les lus yas, as les lus yas.

    Ntawv Moo Zoo: LK 4: 38-44

    38 Yes Xus sawv, nws tawm hauv lub tsev txoos los, nws mus hauv Xis Moos lub tsev. Thaum ntawd, Xis Moos niam tais tab tom mob kub cev heev. Lawv thov kom Yes Xus pab Xis Moos niam tais. 39 Yes Xus khoov mus rau saum niam tais, nws yuam tus mob kub cev, ces tus mob tso plhuav niam tais tseg. Niam tais sawv tsees tam sis ntawd, nws pib tsob hwb lawv.
    40 Thaum lub hnub poob qho, cov uas muaj neeg raug ntau hom mob sawv daws coj lawv cov neeg mob tuaj rau Yes Xus. Ces Yes Xus tsa tes rau saum lawv ib leeg zuj zus, nws kho sawv daws zoo tas huv si. 41 Muaj ib co dab phem kuj tawm hauv coob leej mus, dab phem qw qw tias : "Koj yog Tswv Ntuj Leej Tub." Tab sis Yes Xus cem lawv, nws txwv tsis pub lawv hais cov lus ntawd, vim lawv paub tias nws yog Leej Pleev.
    42 Thaum kaj ntug, Yes Xus tawm mus rau ib qho chaw tsis muaj neeg. Tsoom sid nrhiav nws, thaum lawv tuaj txog ntawm nws, lawv cheem Yes Xus kom txhob ncaim ntawm lawv mus. 43 Tab sis Yes Xus hais rau lawv tias : "Kuv yuav tsum mus tshaj lub Moo Zoo hais txog Tswv Ntuj lub Ceeb Tsheej rau lwm cov nroog thiab. Yog vim qhov ntawd, kuv thiaj raug xa tuaj." 44 Ces Yes Xus mus qhuab qhia rau hauv cov tsev txoos nyob Yus Das teb.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 4th September 2019, 4:03 am

    Tim 5 lub 9 Hlis 2019

    Hnub Tsib Lis Piam Nees Nkaum Ob Nruab Xyoo C Nruab Lis Piam Xyoo I

    Zaj Nyeem Ib: KLX 1: 9-14


    Cov kwv tij,
    9 Txij hnub uas peb tau hnov hais txog nej los, mas peb thov Ntuj rau nej tsis tseg; peb thov kom nej muaj txoj kev paub txog tias Tswv Ntuj lub siab nyiam li cas puv npo nyob hauv nej, raws txoj kev thoob tsib thiab txoj kev to taub hauv sab ntsuj plig. 10 Kom nej taug ib txog kev ua neej kom phim Huab Tais, ces nej thiaj yuav ua tau xis Tswv Ntuj lub siab tas nrho, nej yuav ua tau ntau yam zoo uas yuav tawg paj txi txiv, thiab nej yuav hlob zuj zus nyob hauv txoj kev paub Tswv Ntuj. 11 Thov kom Tswv Ntuj lub hwj huam ntxiv zog rau nej raws li nws lub hwj chim ci ntsa iab, kom nej muaj txoj kev nyob ruaj nreb tsis tso tseg, thiab muaj ib lub siab ntev zoo siab ris txhua yam. 12 Nej yuav ua Leej Txiv tsaug, vim nws tau ua kom nej tsim nyog nrog nws cov ntshiab koom txais ib lub cuab tam nyob hauv qhov pom kev. 13 Nws tau rho peb tawm ntawm kev tsaus ntuj lub hwj huam los, thiab coj peb los nyob hauv nws Leej Tub nws nyiam lub Ceeb Tsheej. 14 Nyob hauv nws Leej Tub, peb muaj txoj kev cawm,uas yog txoj kev zam txhaum.

    NPN 98: 2-3AB, 3CD-4, 5-6

    Txais: (2) HUAB TAIS ua kom sawv daws paub txog nws txoj kev cawm.

    HUAB TAIS ua kom sawv daws paub txog nws txoj kev cawm,
    nws muab nws txoj kev ncaj rau cov haiv neeg pom.
    Nws rov nco txog nws txoj kev ua zoo thiab
    kev ua pheej xeeb rau tsev neeg His Xas Lais.

    Txais: (2) HUAB TAIS ua kom sawv daws paub txog nws txoj kev cawm.

    Tas npoo ntuj npoo ntiaj teb tau pom
    peb tus Tswv Ntuj txoj kev cawm neeg.
    Tas txhua teb chaws, nej zoo siab hu nkauj rau HUAB TAIS,
    nej qw suab hu nkauj, nej cav txog nws.

    Txais: (2) HUAB TAIS ua kom sawv daws paub txog nws txoj kev cawm.

    Nej ntaus nkauj nog ncas cav txog Huab Tais,
    nej ntaus nkauj nog ncas nrog tej zaj nkauj zoo mloog.
    Nej tshuab hom ntxuag suab kub nyuj,
    nej hu nkauj zoo siab ntawm tus Vaj Ntxwv HUAB TAIS xub ntiag.

    Txais: (2) HUAB TAIS ua kom sawv daws paub txog nws txoj kev cawm.

    As Les Lus Yas: MT 4: 19

    Txais: As les lus yas, as les lus yas.

    Huab Tais hais tias: Nej raws kuv mus,
    Kuv yuav tsa nej ua cov tub puav neeg.

    Txais: As les lus yas, as les lus yas.

    Ntawv Moo Zoo: LK 5: 1-11

    1 Muaj ib zaug, muaj ib pab neeg coob coob tuaj sib txiv nyob ncig Yes Xus mloog Tswv Ntuj Lo Lus; nws sawv ntsug nyob ze lub ntug pas dej Nkes Nes Xas Les. 2 Ces nws pom ob lub nkoj nres ntawm ntug dej, cov tub puav ntses nqes nkoj tas lawm, lawv tab tom ntxuav lawv cov vas. 3 Yes Xus nce mus rau hauv ib lub nkoj, yog Xis Moos lub, nws kom Xis Moos nquam nkoj mus deb ntawm ntug dej me ntsis. Yes Xus zaum hauv nkoj qhia tsoom sid. 4 Thaum Yes Xus hais lus tas lawm, nws hais rau Xis Moos tias : "Koj nquam nkoj mus lawm tom qhov dej tob, nej tso nej cov vas nqes mus puav ntses." 5 Xis Moos teb tias : "Xib Hwb, peb twb khwv ib hmos tsis tau dab tsi li. Tab sis yog vim koj hais, mas kuv yuav pov cov vas nqes mus." 6 Ces lawv pov vas, lawv puav tau ntses ntau kawg ua lawv cov vas txam kiag. 7 Lawv co tes rau lawv cov npawg nyob lwm lub nkoj kom tuaj pab. Cov npawg tuaj txog, sawv daws muab ntses ntim rau ob lub nkoj puv nkaus, ua nkoj yuav luag tog. 8 Xis Moos Pob Zeb pom li ntawd, nws txhos caug ntua pe Yes Xus, nws hais tias: "Huab Tais, koj txav mus deb ntawm kuv, vim kuv yog ib tug neeg txhaum." 9 Xis Moos ntshai kawg, cov nrog Xis Moos ua ke puav leej ntshai, vim lawv puav tau ntses ntau. 10 Yas Kos thiab Zam, uas yog Ntxes Npes Dais ob tug tub, thiab yog Xis Moos ob tug kwv luag, nkawd kuj ntshai kawg. Yes Xus hais rau Xis Moos tias : "Koj txhob ntshai, txij no mus, koj yuav puav neeg." 11 Ces lawv nquam nkoj los rau tim ntug. Lawv tso tas ib puas tsav yam tseg, lawv raws Yes Xus mus.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 5th September 2019, 10:24 am

    Tim      6      lub      9      Hlis      2019

    Thawj Hnub Rau Lis Piam Nees Nkaum Ob Nruab Xyoo C Nruab Lis Piam Xyoo I

    Zaj Nyeem Ib:        KLX  1:   15-20


    Cov kwv tij:
    15 Yes Xus Pleev yog tus Tswv Ntuj uas qhov muag pom tsis tau tus duab. Nws yog tus xub yug dua cov nyob hauv txhua tsav txhua yam uas Ntuj tsim los. 16 Nyob hauv nws, Ntuj tsim txhua yam nyob saum ntuj thiab nyob ntiaj teb no, tsim txhua yam pom tau thiab pom tsis tau, tsim txhua tus Tshiab zaum saum theej kiab, thiab txhua tus Tshiab ua Huab Tais, ua Vaj Txheeb, thiab muaj hwj huam. Ntuj tsim tas puas tsav yam nyob hauv Leej Pleev thiab yog tsim los rau Leej Pleev. 17 Nws xub nyob dua txhua tsav txhua yam; tas puas tsav yam sib dhos sib tuav ruaj nreb nyob hauv nwsv. 18 Nws yog lub Taub Hau nyob saum lub Cev uas yog lub Koom Txoos. Nws yog lub Hauv Paus, nws yog tus xub yug hauv cov tub tuag rov los, kom nws yog tus loj tshaj cov nyob hauv tas txhua tsav txhua yam. 19 Vim nyob hauv nws Tswv Ntuj txoj kev puv npo txaus siab los nyob txawm, 20 ces Tswv Ntuj ua kom tas puas tsav yam nyob saum ntuj los nyob ntiaj teb rov nrog nws sib haum xeeb nyob hauv Yes Xus Pleev, thiab rov muaj kev thaj yeeb nyob hauv nws cov ntshav uas nrog saum ntoo cuam.

    NPN        100:   1B-2, 3, 4, 5

    Txais: (2b) Nej tuaj nyob ntawm HUAB TAIS xub ntiag nrog kev zoo siab.

    Tas txhua lub teb chaws, nej hu nkauj zoo siab rau HUAB TAIS !
    Nej xyiv fab hlo luag ntxhi tsob hwb HUAB TAIS ;
    nej hu nkauj zoo siab chaws los ntawm nws xub ntiag !

    Txais: (2b) Nej tuaj nyob ntawm HUAB TAIS xub ntiag nrog kev zoo siab.

    Nej yuav tsum paub tias HUAB TAIS yog Tswv Ntuj.
    Nws tsim peb los, peb yog nws tug,
    peb yog nws haiv neeg, yog nws pab yaj nws saib.

    Txais: (2b) Nej tuaj nyob ntawm HUAB TAIS xub ntiag nrog kev zoo siab.

    Nej chaws mus hauv nws cov rooj loog, nej ua nws tsaug,
    Nej mus hauv nws cov tshav loog, nej cav txog nws ;
    nej ua nws tsaug, nej foom lus zoo rau nws lub npe.

    Txais: (2b) Nej tuaj nyob ntawm HUAB TAIS xub ntiag nrog kev zoo siab.

    HUAB TAIS muaj lub siab zoo :
    HUAB TAIS, nws ua zoo rau peb mus li,
    nws ua ncaj rau peb txheej dhau txheej.

    Txais: (2b) Nej tuaj nyob ntawm HUAB TAIS xub ntiag nrog kev zoo siab.

    As Les Lus Yas:        Zam   8   12

    Txais: As les lus yas, as les lus yas.

    Huab Tais hais tias: “Kuv yog qhov pom kev kaj lub qab ntuj neeg.
    Leej twg lawv kuv qab, nws yuav tau qhov pom kev uas pub txoj sia."

    Txais: As les lus yas, as les lus yas.


    Ntawv Moo Zoo:        LK  5:   33-39

    33 Cov thoob xwm ntawv thiab cov Fas Lis Xais hais rau Yes Xus tias : "Zam Ntxuav Plig cov thwj tim nquag yoo mov thiab hais cov zaj teev Ntuj, cov Fas Lis Xas cov thwj tim kuj ua ib yam li ntawd thiab. Hos koj cov thwj tim mas lawv noj thiab lawv haus !" 34 Yes Xus teb rau lawv tias : "Nej puas kom nraug vauv cov kwv luag yoo mov thaum nraug vauv tseem nrog lawv nyob ? 35 Yuav muaj ib lub zim txwv uas luag coj nraug vauv lawm, thaum ntawd, lawv mam li yoo mov." 36 Yes Xus tseem hais ib zag paj lug rau lawv tias : "Tsis muaj leej twg yuav dua ib daig ntaub ntawm lub tsho tshiab los ntxiv rau lub khaub tshos. Vim tias lub tshiab yuav ntuag, hos daim ntaub dua ntawm lub tsho tshiab los, kuj tsis phim lub khaub tshos. 37 Thiab kuj tsis muaj leej twg yuav ntim cawv tshiab rau hauv tej qub hnab tawv. Vim tias cov cawv tshiab yuav ua cov hnab tawv ntawd tawg, ces cawv yuav txeej tas, hos cov hnab tawv los kuj yuav piam sij tas. 38 Ua li mas, yuav tsum muab cawv tshiab ntim rau hauv cov hnab tawv tshiab. 39 Thiab tsis muaj ib tug neeg uas tau haus cov cawv laus tas, yuav xav haus cov cawv tshiab. Nws hais tias : “Cawv laus qab dua."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 6th September 2019, 1:41 pm

    Tim 7 lub 9 Hlis 2019

    Thawj Hnub Xya Lis Piam Nees Nkaum Ob Nruab Xyoo C Nruab Lis Piam Xyoo I

    Zaj Nyeem Ib: KLX 1: 21-23


    Cov kwv tij,
    21 Yav thaud, nej yog ib co pej kum neeg thiab yog nws ib co yeeb ncuab nyob hauv nej lub tswv yim vim nej ua tej yam phem.
    22 Nyem no, Yes Xus Pleev twb tau ua kom nej los nrog nws sib haum xeeb nyob hauv nws lub cev nqaij vim nws txoj kev tuag lawm, kom nws muab nej ua tau ib co neeg ntshiab, tsis muaj qhov phem, tsis muaj chaw xyeej nyob ntawm nws xub ntiag.
    23 Tiam sis yuav tsum yog nej ua siab tawv qhawv nyob hauv txoj kev ntseeg, nyob ruaj nreb khov kho, txhob ncaim ntawm txoj kev tso siab uas nej tau hnov lub Moo Zoo qhia rau nej; lub Moo Zoo ntawd twb raug muab tshaj rau txhua leej txhua tus nyob hauv lub qab ntuj khwb no lawm. Kuv, Paj Lug, yog ib tug tsob hwb lub Moo Zoo ntawd.

    NPN 54: 3-4, 6+8

    Txais: (6) Tswv Ntuj nws yog tus pab kuv.

    Tswv Ntuj, thov koj cawm kuv vim koj lub npe;
    muab koj lub hwj huam los pab kuv kom kuv yeej.
    Tswv Ntuj, thov koj mloog kuv zaj thov,
    Thov mloog cov lus tawm ntawm kuv lub ncauj los.

    Txais: (6) Tswv Ntuj nws yog tus pab kuv.

    Nej ntsia, Tswv Ntuj yog tus tuaj pab kuv,
    HUAB TAIS yog tus hwj rawv kuv txoj sia.
    Kuv zoo siab hlo cev ib co txim los txi koj,
    HUAB TAIS, kuv cav txog koj lub npe
    Uas muaj txoj kev hlub neeg tas nrho.

    Txais: (6) Tswv Ntuj nws yog tus pab kuv.

    As Les Lus Yas: ZAM 14: 6

    Txais: As les lus yas, as les lus yas.

    Huab Tais hais tias: Kuv yog Txoj Kev, yog Qhov Tseeb, thiab yog Txoj Sia.
    Tsis muaj leej twg mus cuag Leej Txiv tau, yog nws tsis mus ntawm kuv mus.

    Txais: As les lus yas, as les lus yas.

    Ntawv Moo Zoo: LK 6: 1-5

    1 Muaj ib hnub Xas Npas Tos, Yes Xus mus hla ib thaj teb npleg, nws cov thwj tim txawm de tej hnab nplej los mos ntawm tes noj.
    2 Muaj ib co Fas Lis Xas hais tias : "Vim li cas nej ua tej yam uas txoj cai tsis pub ua hnub Xas Npas Tos?"
    3 Yes Xus teb rau lawv tias : "Nej tsis tau nyeem zaj piav txog qhov Das Vis tau ua thaum nws thiab nws cov neeg tshaib plab lod?
    4 Thaum ntawd Das Vis tau nkag mus rau hauv Tswv Ntuj lub tsev, mus muab cov ncuav mov txi Ntuj uas tsuas kawg yog cov Leej Choj thiaj muaj cai noj xwb los noj, thiab nws tseem muab rau nws cov kwv luag noj thiab."
    5 Ces Yes Xus hais rau lawv tias : “Neeg Leej Tub yog tus tswv hnub Xas Npas Tos."


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Mim 8th September 2019, 11:57 am

    Tim 9 lub 9 Hlis 2019

    Hnub Ob Lis Piam Nees Nkaum Peb Nruab Xyoo C Nruab Lis Piam Xyoo I

    Hwm LN Peter Claver, ua Leej Choj

    Zaj Nyeem Ib: KLX 1: 24–2:3


    Cov kwv tij nkauj muad,
    24 Nyem no, kuv zoo siab ris kev txom nyem kom tau pab nej, vim hais tias yog qhov twg tsis txaus nyob hauv Leej Pleev txoj kev txom nyem mas kuv yuav tau ntxiv rau nyob hauv kuv cev nqaij kom tau pab Leej Pleev lub Cev uas yog lub Koom Txoos. 25 Kuv tau los ua ib tug tub tsob hwb lub Koom Txoos, raws li Tswv Ntuj yeej npaj txoj hauj lwm ntawd rau kuv ua lawm, uas yog ua kom Tswv Ntuj lo lus txoj dej num tiav log pub rau nej, 26 yog ib yam tob tob zais cia tau ntau vam xyoo ntau tiam los lawm, tiam sis nyem no kuj tau muab qhib tawm rau nws cov ntshiab paub. 27 Tswv Ntuj xav ua kom cov ntshiab paub tias yam zais cia ntawd lub hwj chim muaj nuj nqes loj npaum li cas nyob hauv cov neeg teev pej kum dab; qhov zais ntawd yog Leej Pleev nyob hauv nej, nws yog txoj kev tso siab tias yuav tau txais hwj chim. 28 Leej Pleev yog tus peb tshaj rau nej paub. Peb ceeb toom rau txhua leej txhua tus paub thiab peb qhuab qhia txhua leej txhua tus raws li txoj kev thoob tsib, kom peb coj tau txhua leej txhua tus txawj ua neeg zoo txhij zoo txhua nyob hauv Leej Pleev. 29 Yog vim li no, kuv thiaj siv zog ua hauj lwm thiab tiv tej kev tawm tsam raws li Leej Pleev lub hwj huam ua hauj lwm nyob hauv kuv.
    2 1 Kuv xav kom nej paub txog tias, kuv yuav tsum siv zog tiv kev tawm tsam npaum li cas los pab nej thiab pab cov nyob Laus Dis Xias, thiab pab ntau leej ntxiv, uas lawv qhov muag tseem tsis tau pom kuv dua ib zaug, 2 kom txhawb tau lawv lub siab, ces lawv yuav los sib koom nyob hauv txoj kev nyiam, hauv txoj kev muaj kev tso siab puv npo los ntawm kev to taub txog Tswv Ntuj cov txuj zais tob, uas yog Leej Pleev. 3 Leej Pleev yog tus uas muaj txhua tsav txhua yam kev thoob tsib kev paub kev txawj nplua mias zais rau hauv nws.

    NPN 62: 6-7, 9

    Txais: Tswv Ntuj yog kuv txoj kev tso siab thiab kuv lub koob meej.

    Kuv tus plig, koj yuav nyob tiaj tus hauv Tswv Ntuj ib leeg,
    Vim kuv txoj kev tso siab tuaj ntawm nws tuaj.
    Nws ib leeg yog kuv lub tsua, yog tus cawm kuv,
    yog kuv lub yeej ntsa zeb, kuv yuav tsis raug xwv txheej.

    Txais: Tswv Ntuj yog kuv txoj kev tso siab thiab kuv lub koob meej.

    Kuv haiv neeg, nej yuav tso siab rau nws txhua lub sij hawm!
    Nej yuav qhib nej lub siab rau nws;
    Tswv Ntuj yog peb qhov chaw vam khom.

    Txais: Tswv Ntuj yog kuv txoj kev tso siab thiab kuv lub koob meej.

    As Les Lus Yas: ZAM 10: 27

    Txais: As les lus yas, as les lus yas.

    Huab Tais hais tias, kuv cov yaj mloog kuv lub suab;
    kuv paub kuv cov yaj, lawv raws nraim kuv qab mus.

    Txais: As les lus yas, as les lus yas.

    Ntawv Moo Zoo: LK 6: 6-11

    6 Tseem muaj ib hnub Xas Npas Tos, Yes Xus mus hauv lub tsev txoos, nws qhia sawv daws. Nyob ntawd, muaj ib tug neeg uas sab tes xis qhuav. 7 Cov Kws Ntawv Ntshiab thiab cov Fas Lis Xais nyas ntsia twj ywm saib Yes Xus puas yuav kho neeg mob kom zoo hnub Xas Npas Tos, kom xwv lawv thiaj tau kev nrhiav lus rau Yes Xus. 8 Yes Xus twb paub qhov lawv xav lawm, ces nws txawm hais rau tus neeg qhuav tes tias : "Koj sawv, koj los sawv ntsug hauv nruab nrab." Ces tus qhuav tes sawv los. 9 Yes Xus hais rau lawv tias : « Kuv nug nej ib yam: hnub Xas Npas Tos, txoj cai puas kheev kom ua zoo los ua phem, kom cawm ib txog sia los txo ib txog sia? » 10 Ces Yes Xus ntsia ncig lees rau lawv sawv daws, nws hais rau tus qhuav tes tias : "Koj xyab tes." Tus neeg ntawd xyab tes, nws txhais tes cia li zoo hlo lawm. 11 Tab sis lawv npau taws kawg nkaus, ces lawv sib tham saib lawv yuav ua li cas rau Yes Xus.


    ****************************************

    Tim 9 lub 9 Hlis

    Hwm LN Peter Claver, ua Leej Choj Memorial of Saint Peter Claver, priest


    Yog xav xaiv cov zaj nyeem tshwj xeeb rau hnub hwm LN Peter Claver raws li nram no los tau:

    Zaj Nyeem Ib: His Xais 58: 6-11

    HUAB TAIS ceeb toom hais tias :
    6 "Txoj kev yoo raws li kuv nyiam yog ua li no:
    Daws cov saw khi neeg vim txoj kev phem ,
    hle cov hlua khi ntawm tus quab,
    tso cov neeg raug luag hiam kom tau nyob twj lij,
    muab txhua tus quab lov kom tas,
    7 muab koj cov mov los faib rau tus neeg tshaib noj,
    coj cov txom nyem tsis muaj chaw nkaum kom los nyob hauv koj tsev,
    muab ris tsho rau tus koj pom liab qab hnav,
    tsis txhob tig nraub qaum rau tus tawm ntawm koj roj ntsha los.
    8 Yog koj ua li ntawd , mas koj qhov pom kev yuav tshwm tawm tuaj xws li hnub,
    koj lub qhov txhab yuav nqawm sai,
    koj txoj kev ncaj yuav mus ua koj ntej,
    HUAB TAIS lub hwj chim yuav lawv koj qab txuag koj.
    9 Yog koj hu mas HUAB TAIS yuav teb,
    yog koj qw tias : "Tsuag tsuag tuaj pab kuv." Nws yuav hais tias : "Kuv nyob ntawm no."
    Yog koj tshem rab quab yuam neeg ntawm koj mus,
    yog koj tsis taw tes rau luag, koj tsis hais cov lus phem,
    10 Yog koj qhib siab lug pub rau tus neeg tshaib,
    yog koj ua kom tus neeg txom nyem zoo siab,
    mas koj qhov pom kev yuav sawv nyob hauv qhov tsaus ntuj tuaj rau koj,
    Ces koj qhov tsaus ntuj yuav pom kev nrig li thaum tav su.
    11 HUAB TAIS yuav coj koj kev tas mus li,
    nws yuav pub rau koj ntau yam zoo raws li koj lub siab ntshaw,
    nws yuav ua kom koj cov pob txha rov muaj zog tuaj,
    Ces koj yuav zoo li ib lub vaj muaj dej ywg,
    koj yuav zoo li lub qhov dej txhawv uas dej ntws tsis txawj tu.

    NPN 1: 1-2, 3, 4+6

    Txais: (40:5a) Cov uas tso siab rau Huab Tais, lawv txoj hmoov zoo.
    Los: (2a) Cov uas zoo siab coj Huab Tais txoj cai, lawv txoj hmoov zoo.
    Los: (92:13-14) Tus neeg ncaj yuav hlob mos nyoos xws li tsob txoob nyob hauv Huab Tais lub vaj.

    Tus muaj hmoov zoo yog tus uas tsis
    coj raws tus neeg phem zaj tswv yim,
    los taug cov neeg txhaum txoj kev,
    los zaum nrog cov neeg saib tsis taus luag tej,
    tiam sis nws zoo siab hlo coj HUAB TAIS txoj cai,
    thiab nws xav ntsoov HUAB TAIS
    txoj cai nruab hnub hmo ntuj.

    Txais…

    Nws zoo li ib tsob ntoo cog nyob ze cov dej ntws,
    nws txi txiv raws caij raws nyoog,
    thiab nws tej nplooj tsis txawj ntsws li.
    Nws ua yam twg tau yam ntawd. .

    Whatever he does, prospers.

    Txais…

    Cov neeg phem tsis zoo li ntawd,
    lawv zoo li cov npluag nplej uas cua muab nplawm tawm mus.
    Vim HUAB TAIS saib ntsoov tus neeg ncaj txoj kev,
    hos tus neeg phem txoj kev yaj ntshis mus.

    Txais...

    As Les Lus Yas: Zam 13: 34

    Txais: As les lus yas, as les lus yas.

    Kuv muab ib lo lus qhia tshiab rau nej tias:
    nej yuav tsum sib nyiam sib hlub ib yam li kuv tau nyiam tau hlub nej.

    Txais: As les lus yas, as les lus yas.

    Ntawv Moo Zoo: MT 25: 31-40

    Yes Xus hais rau nws cov thwj tim tias:
    31 “Thaum Neeg Leej Tub yuav rov los, muaj koob meej thiab tas ib tsoom Tshiab yuav nrog nws los, mas nws yuav zaum saum nws lub theej kiab muaj hwj chim. 32 Ces tas ib tsoom haiv neeg yuav los sib sau nyob ntawm nws xub ntiag. Nws yuav cais cov neeg xws li tus zov yaj cais cov yaj ntawm cov tshis. 33 Nws yuav tso cov yaj rau ntawm nws sab xis, tso cov tshis rau ntawm nws sab laug. 34 Ces tus Vaj yuav hais rau cov nyob sab xis tias : “Nej los mog ! Nej yog cov uas kuv Txiv pub txoj hmoov zoo rau nej. Nej los txais lub Ceeb Tsheej uas Ntuj npaj tseg rau nej txij puag thaum pib tsim lub sim ceeb los lawm los ua nej tug. 35 Vim tias kuv tshaib plab, nej pub rau kuv noj ; kuv nqhis dej, nej pub rau kuv haus, kuv yog ib tug pej kum neeg, nej txais kuv ; 36 kuv liab qab, nej muab rau kuv hnav ; kuv mob, nej tuaj xyuas kuv ; kuv nyob hauv tsev loj faj, nej tuaj tsham kuv.” 37 Ces cov neeg ncaj yuav teb tias : “Huab Tais, thaum twg peb tau pom koj tshaib plab ces peb tau pub rau koj noj, pom koj nqhis dej, ces peb tau muab rau koj haus? 38 Thaum twg peb tau pom koj yog ib tug pej kum neeg, ces peb tau txais koj, pom koj liab qab ces tau muab rau koj hnav ? 39 Thaum twg peb tau pom koj mob los nyob hauv tsev loj faj, ces peb tau tuaj xyuas koj ?” 40 Ces tus Vaj yuav teb rau lawv tias : “Kuv hais tseeb rau nej: Yog nej tau ua dab tsi rau ib tug me tshaj hauv kuv tsoom kwv, mas yog nej tau ua rau kuv lawm.”



    Sponsored content


    UA KOOB TSHEEJ YES XUS YUG LOS XYOO 2018 - Page 9 Empty Re: UA KOOB TSHEEJ YES XUS YUG LOS XYOO 2018

    Post  Sponsored content


      Current date/time is 18th March 2024, 4:01 pm