Leej Ntshiab Kateri Tekakwitha

Kateri yug los xyoo 1656 nyob hauv ib lub zos Is Ntias hu ua Ossernenon nyob thaj tsam tam sis no yog qaum xeev New York, USA, nyob ze lub nroog Auriesville. Nws niam yog ib tug neeg Is Ntias Algonquin, uas tau tig los ntseeg Yes Xus nyob lub zos Trois-Rivieres, Kas Nas Das teb lawm.  Xyoo 1651, cov Is Ntias Mohauk tuaj ntaus cov Algonquin nyob Kas Nas Das, ces lawv txawm ntes tau coob leej Algonquin los ua qhev, nws niam nyob hauv pab ntawd. Tsis ntev tom qab nws niam thiaj yuav nws txiv uas yog ib tug thawj coj (chief) nyob hauv cov neeg Mohauk.  Nkawd muaj ob tug me nyuam, tus ntxhais yog Kateri, thiab ib tug tub.  Thaum Kateri muaj 4 xyoos, nws  tsev neeg raug ib phaum qoob hnyav heev, ces nws niam nws txiv thiab nws tus nus tuag tag tib si lawm, tshuav nws ib leeg dim xwb. Cov qoob ua rau nws tej plhu txaij thiab ua caws pliav tas, thiab ua rau nws qhov muag tsis pom kev zoo thiab tiv tsis taus tshav ntuj ci lawm. Ces nws pheej maj mam xuas kev mus ub mus no xwb, vim li ntawd lawv thiaj tis lub npe “Tekakwitha” rau nws, txhais tias “tus neeg xuas xuas kev.”  

Thaum nws niam nws txiv tuag tas lawm, nws tus txiv ntxawm uas kuj yog  ib tug chief, thiab nws ob tug phauj sau nws los ua lawv tus ntxhais.  Thaum cov qoob ntawd twb dhau lawm, lawv lub zos khiav mus nyob rau ib lub zos tshiab hu ua Caughnawaga nyob ntawm tus ntug dej Mohauk River. Niaj hnub no hu ua Fonda, xeev New York.

Thaum Tekakwitha loj lawm, nws coj ib tug cwj pwm txawv cov me ntxhais nrog nws ib phaum ntawd.  Nws yog neeg txaj muag, nyiam pab nws ob tug phauj ua hauj lwm tu vaj tu tsev, thiab mus cog pob kws, cog taum thiab cog taub.  Nws nquag mus yos hav zoov mus khawb cag ntoo cag nroj tej los ua tshuaj ua nkaj raws Is Ntias kev cai. Nws kuj mus txiav taws, kwv dej los siv hauv vaj hauv tsev. Txawm nws twb tsis pom kev zoo los nws kuj xyaum ua tau paj ntaub chob hlaws tib si. Nws nyiam  nyob ntsiag to ib leeg, tsis kam tawm mus poo nrog nws cov ib phaum viv ncaus ntawd pes tsawg li.  Thaum twg nws tawm yog vim nws muaj hauj lwm xwb.

Thaum nws loj tiav nkauj lawm, nws cov phauj nrhiav txiv rau nws yuav, tiam sis nws tsis kam yuav li, ces ua rau nws tsev neeg ntxub nws, thuam nws thiab cem nws tas mus li.

Thaum Tekakwitha muaj 18 xyoo, ib tug tub tshaj ntuj lus uas yog ib tug Jesuit hu ua TP de Lamberville tuaj nyob hauv nws lub zos Caughnawaga. TP tsa tau ib lub tsev teev ntuj me me.  Tekakwitha tus txiv ntxawm tsis nyiam  tus “Blackrobe” (tus hnav tiab dub) ntawd li, tiam sis nws kuj lam cia TP nyob hauv zos thiab. Muaj neeg qhia rau Tekakwitha tias nws niam yog ib tug neeg ntseeg Yes Xus. Nws nco tau me me li ua npau suav txog nws niam tej lus teev ntuj. Nws ho tau hnov tus txiv plig piav txog Yes Xus, ces nws haj yam xav paub ntxiv, thiab nws xav tig los ua ib tug neeg ntseeg raws li nws niam thiab.

Txiv plig de Lamberville thiaj nrog nws tus txiv ntxawm tham, ces nws thiaj tau kawm kev ntseeg. Thaum txog lub caij Hla, Tekakwitha  txais lub Cim Ntxuav. Nws yuav lub npe ntxuav plig hu ua Catherine, lus Mohauk hu ua Kateri.  Thaum ntawd nws muaj 20 xyoo lawm. Kateri zoo siab luag ntxhi tias nws tau los ua Tswv Ntuj me nyuam lawm.

Tiam sis nws tsev neeg tsis pom zoo qhov uas nws tig los ua neeg ntseeg li. Tag nws lub zos hais lus thuam nws saib tsis taus nws li. Hnub Chiv vim nws xav caiv Tswv Ntuj hnub, nws tsis kam ua hauj lwm, ces nws tsev neeg cais tsis pub mov rau nws noj hnub ntawd. Tej me nyuam yaus txawb pob zeb rau nws, luag nws.  Nws cov neeg hem nws tias yog nws tsis kam thim kev ntseeg mas nws yuav raug khi thiab raug tua.

Vim tej kev nyuaj li no thiab vim Kateri xav siv nws lub neej los ua hauj lwm rau Tswv Ntuj ib leeg xwb, ces thaum lub 7 hli 1677, nws khiav ncaim nws lub zos mus. Nws taug kev li 200 miles (322 km)  hla hav zoov hla dej hla hav iav, nws thiaj mus tshwm lub zos ntseeg ntuj hu ua St. Francis Xavier (St. Framcois Xavier) nyob ntawm Sault St. Louis, ze ntawm Montreal, Kas Nas Das teb. Xyoo ntawd, thaum lub hmoov HT Yes Xus yug los, lub 12 hlis 1677, Kateri thiaj txais  lub Cim Yug thawj zaug.

Kateri tsis tau kawm ntaub kawm ntawv dab tsi li, tiam sis nws lub siab kub rau txoj kev ntseeg qhia kom nws nyiam txoj kev teev ntuj ntau thiab txoj kev ua tej yam nyuaj los them txim txhaum.  Nws qhia kev ntseeg rau cov me nyuam yaus, nws hais lus zoo thiab luag ntxhi rau txhua tus uas nws ntsib.  Nws nyiam mus teev ntuj nyob hauv hav zoov, nws txiav tog pas ntoo los khi ua ntoo cuam txhos puv hauv hav zoo. Thaum twg nws mus ncig txog ib tug ntoo cuam, ces yog nws qhov chaw nres teev ntuj ib pliag, nws mam mus ntxiv.

Kateri lo lus uas nws nquag hais yog lo no: “Leej twg puas qhia tau yam uas Tswv Ntuj nyiam tshaj rau kuv, kom kuv ua qhov ntawd?” Nws nquag mus txhos caug teev ntuj ntev loo tsheej ob peb teev ntawm lub tsev tsam phooj rau lub Cim Yug. Txog caij ntuj no, nws nrog cov neeg zej zog mus yos hav zoov tua nqaij. Nws thais ib tug ntoo cuam rau ntawm tej tus ntoo, ces nws txhos caug hauv cov daus txias txias teev ntuj. Nws kuj nquag hais txoj Saw Mab Liab, nws coj nraim txoj Saw Mab Liab ntawm caj dab.

Kateri cim tau zoo zoo tej zaj piav txog HT Yes Xus los yog nws cov thwj tim. Neeg nquag tuaj taij kom nws piav kwv huam rau lawv mloog. Lawv mloog tsis dhuav li thiab lawv nyiam nrog nws nyob. Muaj ib zaug ib tug txiv plig nug cov neeg tias yog vim li cas lawv thiaj pheej tuaj ntsauv Kateri, lawv teb rau nws tias vim lawv mloog zoo li Tswv Ntuj nyob ze ze thaum Kateri teev ntuj. Lawv pom nws lub ntsej muag txawj hloov ua ib lub ntsej muag zoo zoo nkauj thiab kaj lug thaum nws teev ntuj, zoo li nws ntsia ntsoov Tswv ntuj lub ntsej muag lawm.

Xyoo 1679 thaum lub 3 hlis, Kateri cog lus tias nws yuav tsis yuav txiv li, nws yuav qee nws lub neej rau HT Yes Xus ib leeg xwb. Nws vam twj ywm tias nws xav pib ib lub tsev koom haum ua phauj rau nws haiv neeg nyob hauv lub zos Sault St Louis. Tiam sis tus txiv plig uas saib nws hu ua TP Pierre Cholonec tsis pom zoo.  TP hais rau nws tias vim lawv nyuam qhuav los ntseeg tshiab dhau tsis tau ntev li. Thiab kuj vim nws yog ib tug neeg uas muaj mob ntsuj ntsuav. Tsis tas li xwb, vim nws ua tej yam kev them txim txhaum hnyav dhau (xws li nplawm nws tus kheej kom sab sab) ces kuj tsis pab nws lub cev li.  TP hais tias kom nws yuav tsum txuag nws kom zoo, tiam sis nws kuj ua nws txoj kev them txim tsis tso tseg.

Xyoo 1680 thaum lub 4 hlis tim 17, Kateri mob heev heev ces nws ncaim ntiaj teb  mus , nws muaj 24 xyoos xwb. Nws lo lus kawg yog hais tias “Yes Xus, kuv nyiam koj.”  Nws tau ua neej luv luv tiam sis yog ib lub neej zoo neej dawb huv.  Nws txoj sia tu tas ntev li  kaum tawm fiab, nws lub ntsej muag cia li hloov, tej caws pliav ploj tag, tshuav ib lub ntsej muag du lug dawb paug zoo nkauj rhib xwb.  Muaj ob tug txiv plig tuaj nyob ntawd pom nrog rau cov neeg uas tuaj nyob hauv nws chav pw pom qhov hwj huam no tib si.

Kateri tseem muaj ib lub npe hu ua “Lily of the Mohauks” (txhais tias “lub Paj Dawb hauv cov Mohauk”).  Xyoo 1943, Koom Txoos Kas Tos Liv tsa nws ua “Venerable” (tus tsim nyog hwm). Xyoo 1980, vaj qhia Zam Paj Lug II tsa nws ua “Blessed” (tus muaj hmoov zoo). Xyoo 2002, VQ Zam Paj Lug II muab nws tsa ua tus pov hwm tsoom tub ntxhais hluas thoob Ntiaj Teb  Hnub Sib Sau (World Youth Day).  Tsaib no thaum lub 12 tim 19, 2011, VQ Npes Nes Dis XVI tau sau npe rau daim ntawv pom zoo tsa Kateri Tekakwitha ua leej Ntshiab.  Hnub Chiv tom ntej no, tim 21 lub 10 hli 2012, VQ yuav tsa Kateri Tekakwitha ua leej ntshiab nyob Los Mas.

Nyob As Mes Kas teb, peb niaj xyoo ua hmoov nco txog Kateri yog tim 14 lub 7 hli.

Leej nsthiab Kateri Tekakwitha lub ntxa yog nyob ntawm lub nroog St Francis Xavier, hauv lub zos Mohauk Kahnawake, ze ntawm  Montreal, Quebec, Kas Nas Das.