Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» COV ZAJ NYEEM NRUAB LIS PIAM XYOO I 2016-2017
by Mim Today at 6:17 am

» COV ZAJ NYEEM HNUB CHIV XYOO A 2016-2017
by NrhiavTswvNtuj 8th December 2016, 12:32 pm

» XH.Zoov Ntxheb Yaj Nthuav Ntawv Ntshiab.
by Maiv Tooj 8th December 2016, 12:26 pm

» XH. Yaj Zoov Ntxheb lub Tsev THOOB TSIB
by Maiv Tooj 8th December 2016, 12:18 pm

» Xib Hwb Thoj Xyooj lub neej
by Maiv Tooj 6th December 2016, 10:30 pm

» Thov Leej Ntshiab YOS XES
by Maiv Tooj 3rd December 2016, 10:36 am

» COV ZAJ NYEEM NRUAB LIS PIAM XYOO II, 2015-2016
by Mim 2nd December 2016, 1:29 pm

» Qhia keeb kwm kev ntseeg. TP.Cwj Vuam CChiv.
by Maiv Tooj 28th November 2016, 9:58 pm

» Yes Xus lub ntsej muag tiag tiag.
by NrhiavTswvNtuj 26th November 2016, 1:52 pm

» HMOOB NPAM NAJ XEES
by NrhiavTswvNtuj 21st November 2016, 9:15 am

» MOO QAIJ QAUG
by Maiv Tooj 20th November 2016, 9:45 am

» TP.Txhiaj Foom lub TSEV Ntawv
by Maiv Tooj 19th November 2016, 12:04 pm

Suav neeg tuaj saib, txij hnub 17/09/2010 los mus.


    LEEJ NTSHIAB MOS NIS KAS

    Share

    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    LEEJ NTSHIAB MOS NIS KAS

    Post  Mim on 12th January 2015, 2:10 pm

    LEEJ NTSHIAB MOS NIS KAS (MONICA, MONIQUE)

    Txoj kev thov ntuj, Tswv Ntuj yeej pub, yog peb thov tiag tiag, xws li txheej thaud, leej ntshiab  Mos Nis Kas (Monica), uas yog leej ntshiab Augustine niam, nws tau thov ntuj tau ntau xyoo rau nws tus txiv, nws niam pog, thiab tshwj xeeb yog rau nws tus tub Augustine.  

    LN Mos Nis Kas yog ib tug ntxhais ntseeg ntuj, yug nyob Africa Qaum Teb, lub zos Tagaste, kwv yees xyoo 331-33 ntawd. Peb tsis paub nws xyoo yug tseeb, muaj ib txhia sau tias yog xyoo 331, ib txhia hais tias xyoo 332, thiab tseem muaj cov hais tias xyoo 333 thiab, yog li kuv thiaj muab kwv yees xyoo 331-33. Nws niam nws txiv yog cov neeg Berbers, yog ib haiv neeg  ib txwm nyob Africa Qaum Teb. Lawv yog neeg ntseeg,  tiam sis lawv kuj tseem coj li txheej qub, lawv muab  lawv tus ntxhais yuam  mus yuav ib tug txiv tsis ntseeg ntuj hu ua Patritius. Thaum lub caij ntawd cov Los Mas kav Africa qaum teb.  Vim li ntawd nws tus txiv thiaj muaj ib lub npe Los Mas, los tej zaum nws yog ib tug neeg Los Mas los peb tsis paub meej. Nws tus txiv yog hom neeg siab luv luv thiab coj ib lub neej luab sab heev, tsis tsim txiaj tham hluas nkauj, ua dog ua dig xwb, ua rau LN Mos Nis Kas ntsib kev nyuaj siab kev ntsim siab ntau. Tiam sis LN Mos Nis Kas ua lub siab ntev ntev nyiaj tas puas tsav yam.

    LN Mos Nis Kas yug tau ob tug tub, ib tug ntxhais. Tiam sis nws tus txiv tsis kam nws ua lub Cim Ntxuav rau lawv li, ua rau LN Mos Nis Kas nyuaj siab heev rau lawv. Muaj ib zaug nws tus tub hlob, Augustine,  txawm mob heev heev, LN Mos Nis Kas thiaj li thov nws tus txiv tas zog kom tso cai rau nws ua lub Cim Ntxuav rau. Tus txiv kam thaum ntawd, tiam sis thaum tus me nyuam khees lawm, tus txiv rov qab thim lus dua.

    Nws niam pog kuj nrog nkawd nyob. Niam pog yog ib tug neeg tsiv tsaim heev thiab ua nyuaj rau nws kawg li.  Tiam sis LN Mos Nis Kas ua siab ntev ntev nyiaj tas puas tsav yam, thiab tsuas ua qhov zoo xwb, thiab thov ntuj tsis tseg. Vim nws coj zoo thiab ua zoo rau nws tus txiv thiab niam pog, ces nws tus txiv kuj hwm nws, thiab tsis pom qab yuav cem nws los hais lus phem txog nws li. Thaum Augustine muaj kwv yees 16 xyoo tej, nws tus txiv thiab niam pog kuj cia li hloov siab tig los ua neeg ntseeg. Nws tus txiv ua neeg ntseeg tau ib xyoos xwb ces tus txiv tuag lawm.  Thaum ntawd Augustine muaj li 17 xyoo tej. Yog li LN Mos Nis Kas kuj ntsib kev nyuaj vim nws tau ua poj ntsuam. Tiam sis nws kuj muaj qhov zoo siab tias nws tus txiv tau tuag nyob hauv txoj kev ntseeg lawm.

    LN Mos Nis Kas ob tug me nyuam yau kuj hlob los ua lub neej tsim txiaj, nkawd ob leeg mus ua lub neej qee rau Ntuj, ua leej tij ua leej phauj. Tiam sis ntawm Augustine, mas nws coj tus cwj pwm raws nkaus li leej txiv, nyiam luab sab, nyiam ua si lom zem heev.  Vim nws yog ib tug me nyuam ntse uas lub hlwb khiav zoo, ces nws txiv kuj tau xa nws mus kawm ntawv siab, kawm ua ib tug kws txawj hais lus txawj hais cai.  Thaum nws txiv tuag tas, nws mus kawm nws txoj kev txawj hais lus txawj hais cai ntxiv nyob rau lub nroog Carthage, Africa Qaum Teb.  Thaum nws muaj 19 xyoos, Augustine tham ib tug hluas nkauj. Nkawd nyob ua ke tau 12-13 xyoos,  muaj ib tug me nyuam tsaub li Hmoob hais thiab.Nws tis tus me nyuam npe hu ua Adeodatus. Thaum nws kawm tiav lawm, nws mus ua hauj lwm ua xib hwb qhia hais lus hais cai nyob Carthage, nws ho mus poog ib hom kev ntseeg yuam kev, hu ua txoj kev ntseeg Manichaeism los qee zaus lawv sau tias Manichaeanism thiab.  Kuv yuav muab txhais lus Hmoob hu ua txoj kev ntseeg raws li Mas Nis no, vim tus neeg rhawv txoj kev ntseeg no nws hu ua Mas Nis (Mani).

    Kuv kuj tsis to taub txoj kev ntseeg ntawd zoo, tiam sis kuv yuav piav me me lub ntsiab raws li kuv to taub. Yog kuv ho hais yuam kev li cas los thov nej zam rau kuv thiab.  Txoj kev ntseeg Mas Nis qhia hais tias lub neej nyob ntiaj teb no yog ib lub neej txom nyem tsaus ntuj neej phem, vim peb tus ntsuj plig uas yog sab pom kev thiab zoo raug kaw los khi rau hauv lub cev nqaij uas yog sab phem sab tsaus thiab qias lawm. Yog li ntawd ib tug neeg nws yuav tsum kawm kom nws paub thiab to taub txog hais tias txawm nws tus ntsuj plig los nyob xyaw yam phem yam tsis zoo hauv lub cev los nws tus ntsuj plig tseem muaj ib qho pom kev nyob hauv Tswv Ntuj.  Yog li txoj kev paub txoj kev to taub ntawd yuav cawm tau tus ntsuj plig dim ntawm txoj kev tsaus thiab kev phem.  Yog tus neeg muaj kev paub kev to taub thiab tswj tau nws lub cev, uas yog qhov phem, mas thaum nws tuag nws tus ntsuj plig yuav tau mus nyob saum ntuj. Tus neeg uas tswj tsis tau nws lub cev, tseem  ua phem ua qias, xws li kev sib dee, kev haus dej haus cawv, kev hu dab noj loj, kev noj nqaij tej, mas thaum nws tuag, nws tus ntsuj plig yuav tsum tau yug rov los them txim txhaum ntau ntau tiam ntxiv.  Kuv tsuas hais lub ntsiab me me li no xwb.

    Augustine mus mloog thiab ntseeg raws txoj kev ntseeg Mas Nis no. Thaum nws rov los tsev, nws piav nws txoj kev ntseeg tshiab rau nws niam mloog, ces nws niam muab nws caum tawm hauv tsev mus tsis pub nyob.  Tiam sis  Mos Nis Kas txhawj xeeb heev txog nws tus tub Augustine. Qhov nws txhawj mas yog qhov tias, ntshai nws tus tub yuav tsis tau txais Tswv Ntuj txoj kev cawm li thiab yuav tsis tau mus nrog Tswv Ntuj nyob li lau! Ces nws niaj hnub thov ntuj tas zog rau nws tus tub. Muaj ib zaug nws tab tom teev ntuj thiab quaj txog nws tus tub coj tus yeeb yam phem, nws txawm pom ib yam txawv txawv. Nws pom zoo li ib tug neeg tshwm los nug nws tias yog nws tu siab dab tsi. Nws thiaj qhia nws txoj kev tu siab rau. Tus neeg ntawd hais rau nws tias kom cia li so kua muag, “vim koj tus tub yeej nrog koj rawv.”  LN Mos Nis Kas pom li no tas, nws thiaj rov cia Augustine los hauv nws tsev dua.  Nws kuj piav qhov nws pom no rau Augustine thiab. Augustine hais rau nws niam tias yog nws niam thim nws txoj kev ntseeg ces nkawd yeej yuav ua ke nraim tiag, vim yog txoj kev ntseeg ua kom nkawd sib cais xwb. Nws niam txawm teb ntua tias, “Nws tsis tau hais tias yog kuv nrog koj no, tiam sis nws hais tias yog koj nrog kuv no.” Ces Augustine nco ntsoov nws niam lo lus ntawd cia.

    Tiam sis Augustine yeej coj nws lub neej li qub tsis hloov li. Nws niam niaj hnub thov ntuj, ua kev yoo pab, thiab mus quaj mus thov tej txiv plig tej tswv qhia kom thov ntuj pab cawm nws tus tub. Muaj ib zaug nws mus thov nws tus tswv qhia hauv cheeb koom txoos kom thov ntuj pab nws tus tub Augustine.  Tus tswv qhia hais rau nws tias kom ua siab ntev, “Tsis tau txog Tswv Ntuj lub caij.” Tiam sis Mos Nis Kas pheej mus quaj tas zog rau nws ntxiv, ces nws txawm hais tias: “Koj cias li mus tsev os mog, … ib tug tub uas muaj kua muag ntau npaum no poob los ywg diam yuav ua cas poob tau rau hauv txoj kev puam tsuaj mas.” Ces lo lus no thiaj yog ib lo lus neeg nquag muab los hais txog LN Mos Nis Kas.


    Thaum Augustine muaj 29 xyoos,  xyoo 383 tej, nws npaj xav mus ua txoj hauj lwm qhia kev txawj hais lus hais cai nyob Los Mas, tiam sis nws niam tsis pom zoo. Txawm li ntawd los, nws npaj yuav mus. Thiab nws paub tias nws mus txog twg nws niam yuav caum nws qab, ces thaum txog caij sawv kev, nws dag nws niam, nws tsis qhia lub caij tseeb uas nws yuav caij nkoj sawv kev rau nws niam. Nws thiaj coj nws tus hluas nkauj thiab nws tus tub tsaub nyiag caij nkoj sawv kev mus rau Los Mas lawm.  Thaum lawv sawv kev ntawd nws niam tseem tab tom mus teev ntuj hauv tsev teev ntuj lawm.  LN Mos Nis Kas pom tias Augustine nyiag kev mus lawm, nws kuj raws qab mus thiab. Lub nkoj uas LN Mos Nis Kas caij ntawd mus raug cua daj cua dub nplawm nyob hauv hiav txwv. Cov neeg nyob hauv nkoj sawv daws ntshai kawg, tiam sis LN Mos Nis Kas thov ntuj thiab ua siab tus tus, tso siab rau Tswv Ntuj. Thaum kawg lub nkoj kuj coj lawv mus txog Los Mas.

    Thaum LN Mos Nis Kas mus txog Los Mas, Augustine twb ho mus dua Milan lawm thiab, los nws kuj raws qab mus ntxiv. Thaum Augustine tuaj txog Milan, ces nws tuaj ntsib tus tswv qhia LN Ambrose. LN Ambrose kuj yog ib tug neeg txawj txawj hais lus hais cai ib yam li nws thiab. Nws nyiam mus mloog LH Ambrose tham thiab hais lus. Nws mus mloog LN Ambrose tej lus, ces cia li ua rau nws pib thim xav.  Thaum nws niam tuaj nrhiav tau nws, nws twb thim nws txoj kev ntseeg Mas Nis lawm, tiam sis nws tseem tsis tau los ua neeg ntseeg Ntuj kiag thiab. LN Mos Nis Kas thiaj tau tuaj ntsib LN Ambrose nyob Milan thiab. LN Mos Nis Kas thiab LN Ambrose kuj muaj kev sib fim thiab kev sib haum xeeb kev phooj ywg zoo.  Nyob Milan, LN Mos Nis Kas kuj ua nws lub neej coj raws nws txoj kev ntseeg pab lub Koom Txoos. Nws yog ib tug nquag pab cov txom nyem cov pluag. Nws kuj yog ib tug nquag mus teev hawm Tswv Ntuj xws li nws ib txwm ua kam.  Muaj qee yam uas nws ua kam nyob nws teb chaws Africa Qaum Teb, mas nws yuav tsum muab tso tseg. Xws li nyob nws teb chaws, mas lawv cov ntseeg nqa kam zaub mov mus tso rau tom cov neeg tuag ua tim khawv txog kev ntseeg tej ntxa.  Tiam sis nyob Milan, tus tswv qhia Ambrose hais rau nws tias lawv tsis ua lawm, ces nws kuj muab qhov ntawd tso tseg.

    Vim Augustine thau ntsib LN Ambrose, ces nws thim xav thiab tig los ntseeg Yes Xus xyoo 386.  Thaum txog Caij Hla xyoo 387, LN tswv qhia Ambrose thiaj ua lub cim ntxuav rau Augustine thiab nws tus tub Adeodatus.  Yog li ntawd peb pom hais tias LN Mos Nis Kas tau thov ntuj tas zog thiab tau caum nws tus tub  tau 16-17 xyoo nkaus, nws thiaj mam los ntseeg thiab ua neeg zoo.  LN Mos Nis Kas, kuj nrhiav kev tas zog ua kom Augustine tso nws tus hluas nkauj tseg. LN Mos Nis Kas thiaj mus qhaib tau ib tug ntxhais nom, uas hnub nyoog tseem me rau Augustine.  Ces Augustine tus hluas nkauj kuj khiav rov qab mus Africa lawm.  Tiam sis Augustine hais rau nws niam tias, nws yuav tsis yuav poj niam, nws yuav coj ib lub neej tab seeb, qee cia ua Tswv Ntuj tes dej num.  Ces LN Mos Nis Kas txoj kev zoo siab thiaj loj kawg nkaus, vim nws tub tub uas nws txhawj xeeb heev txog, zaum no tig los ua neeg ntseeg lawm, thiab tsis tas li xwb, nws tseem npaj siab tsis yuav poj niam, thiab yuav ua Tswv Ntuj dej num.

    Plaub tsib lub hlis tom qab xwb, Augustine thiab nws tus tub thiab nws tus kwv thiab nws niam lawv npaj xav sawv kev rov qab mus lawv lub zos Tagaste, Africa Qaum Teb. Tiam sis thaum lawv mus txog Ostia, uas yog lub nroog lawv yuav caij nkoj sawv kev, LN Mos Kis Kas txawm cia li mob lawm.  LN Mos Nis kas sab heev zuj zus, ces nws thiaj hais rau Augustine tias:  “Kuv tsis paub tias kuv tseem tshuav dab tsi yuav ua ntxiv, thiab yog vim li cas kuv thiaj tseem nyob ntawm no, vim kuv twb tau tas puas tsav yam kuv ntshaw lawm. Qhov kuv ntshaw ces yog xav pom koj los ua ib tug neeg ntseeg Kas Tos Liv thiab ua Tswv Ntuj ib tug me nyuam xwb. Tswv Ntuj tseem pub ntau tshaj qhov kuv xav tau rau kuv lawm, vim nws tau ua kom koj tsis ntshaw lub neej ntiaj teb ntxiv, thiab kom koj qee koj lub siab ua Tswv Ntuj tes dej num.”  Tsis ntev xwb ces LN Mos Kis Kas tuag, ua rau nws cov me nyuam ntsib kev quaj ntsuag tu siab loj.  Nyob hauv nws phau ntawv nws sau, hu ua “Confessions,” Augustine kuj tau thov cov neeg uas nyeem nws phau ntawv kom thov ntuj pab rau nws niam nws txiv thiab.  Li ntawd LN Mos Nis Kas lub cev yog muab faus rau ntawm Ostia.  Tiam sis tom qab no, lawv tau muab nqa coj los tso rau hauv lub tsev teev ntuj  San Agostino nyob Los Mas lawm.


    Koom Txoos Kas Tos Liv tau tsa nkawd ob niam tub ua leej ntshiab tib si, LN Mos Nis kas, thiab LN Augustine (LN As Nkus Tis Nos?).  Niaj xyoo Koom Txoos Kas Tos Liv ua hnub hwm LN Mos Nis Kas, muaj ib txhia siv hnub tim 4 lub 5 hlis ntuj, hos muaj ib txhia ho siv hnub tim 27 lub 8 hli ntuj.

    Li no kuv muab nkawd lub neej los piav kom peb cov ntseeg ho tau muab coj los kawm ua peb lub neej teev ntuj thiab neej ntseeg thiab.

    Mim Yaj

      Current date/time is 10th December 2016, 3:15 pm