COV ZAJ NYEEM RAU CAIJ YES XUS YUG LOS

TIM      24     LUB    12    HLIS  (tsaus ntuj)

HMOOV TSUJ XEEB HT YUG LOS
Mis Xas Yav Tsaus Nuj Hmo Tim 24 (Vigil Mass)
Lectionary: 13



Zaj Nyeem Ib:     HIS XAIS  62: 1-5

1 Vim Xis Yoos, kuv yuav tsis nyob ntsiag to,
vim Yes Lus Xas Les, kuv yuav tsis nyob twj ywm,
mus txog lub caij nws txoj kev tsis txhaum tawm plaws los xws li qhov kaj ntug,
nws txoj kev yeej cai tawm plaws los xws li ib teg tsau cig lam lug.
2 Cov kuj cuab yuav pom koj txoj kev tsis txhaum,
tas cov vaj huv si yuav pom koj lub hwj chim.
Koj yuav muaj ib lub npe tshiab, uas HUAB TAIS lub ncauj yuav tis rau koj.
3 Koj yuav zoo li ib lub mom teev kub muaj hwj chim nyob hauv HUAB TAIS tes,
zoo li ib lub kaus mom ua vaj uas koj tus Tswv Ntuj tuav rawv.
4 Luag yuav tsis hais ntxiv txog koj tias: "Tus luag tso pov tseg;"
los txog koj lub teb chaws ntxiv tias: “tsis muaj neeg nyob,”
koj yuav hu ua: "Kuv lub chaw zoo siab,"  
koj thaj av yuav hu ua: "Nkauj nyab tshiab."
Vim koj yog HUAB TAIS chaw zoo siab,
nws yuav koj thaj av ua nws tus nkauj nyab tshiab.
5 Xws li ib tug nraug xwb mus yuav ib tug nkauj xwb,
tus tsim koj los yuav qaws koj ua nws txij nkawm;
xws li tus nkauj nyab yog nraug vauv lub chaw sov siab zoo siab,
koj kuj yuav yog koj tus Tswv Ntuj chaw zoo siab.


NPN:     89:  4-5, 16-17, 27+29

Txais:  (2a) Kuv yuav hu nkauj mus li cav txog HUAB TAIS lub siab zoo.    

Kuv tau cog ib lo lus nrog tus kuv xaiv,
kuv tau cog lus khov rau kuv tus tub txib Das Vis tias :
Kuv yuav tsa koj caj ces kom nyob ruaj nreb mus li,
kuv yuav txhim ib lub theej kiab rau koj zaum tiam dhau tiam.

Txais:   (2a) Kuv yuav hu nkauj mus li cav txog HUAB TAIS lub siab zoo.

Hmoov zoo rau cov neeg uas paub lub suab qw zoo siab;
Koj lub ntsej muag yuav ci kaj lawv txoj kev lawv taug.
Lawv hnov koj lub npe, lawv yuav dhia zoo siab tas hnub.
Koj txoj kev ncaj yuav  tsa lawv nyob rau qhov siab.

Txais:  (2a) Kuv yuav hu nkauj mus li cav txog HUAB TAIS lub siab zoo.

Nws yuav hu kuv tias : "Koj yog kuv txiv,
Kuv tus Tswv Ntuj, kuv Phab Tsua, tus  cawm kuv."
Kuv yuav hlub nws ua zoo rau nws  mus li,  
Kuv lo lus kuv nrog nws cog yuav nyob ruaj khov.

Txais:   (2a) Kuv yuav hu nkauj mus li cav txog HUAB TAIS lub siab zoo.

Zaj Nyeem Ob:      HAUJ LWM  13:16-17, 22-25

Thaum Paj Lug mus txog Aas Caus Kus
nyob Pis Xis Dias teb, nws mus hauv lub tsev txoos,
16 nws sawv, nws tsa tes, thiab nws hais tias: "Cov kwv tij His Xas Lais,
thiab nej cov uas hwm Tswv Ntuj sawv daws, nej mloog kuv hais.
17 Haiv neeg His Xas Lais no tus Tswv Ntuj tau xaiv peb cov yawg koob,
thiab tau ua kom lawv haiv neeg vam meej lub caij lawv khuam nyob Hais Nkws Tos teb,
Ces nws tau tsa nws txhais npab muaj zog tuaj coj lawv tawm hauv lub teb chaws ntawd los.
22 Tswv Ntuj tau muab Xas Ws xyeeb pov tseg, nws thiaj tsa Das Vis ua lawv tus vaj.
Tswv Ntuj ua pov thawj txog Das Vis tias: "Kuv nrhiav tau Das Vis, Yes Xes tus tub.
Nws yog tus neeg ntxim kuv siab, nws yuav ua raws li kuv lub siab xav tas huv si."
23 Nyob hauv Das Vis caj ces, Tswv Ntuj tau tso ib tug cawm seej tuaj
rau His Xas Lais, raws li nws tau cog lus lawm, yog Yes Xus.
24 Zam xub tuaj npaj kev rau Yes Xus yuav tuaj; nws tshaj rau tas tsoom  His Xas Lais
kom sawv daws los txais cov kab ke ntxuav ua kev lees txhaum.
25 Thaum Zam ua nws txoj hauj lwm yuav tiav, nws hais tias:
"Nej xav hais tias kuv yog leej twg? Kuv tsis yog tus uas nej xav.
Tiam sis tus lawv kuv qab, nyem no nws twb tuaj lawm.
Tus ntawd mas kuv tsis tsim nyog daws nws txoj hlua khau."

As Les Lus Yas  

Txais: As les lus yas, as les lus yas.

Tag kis lub ntiaj teb txoj kev phem yuav raug rhuav pov tseg tas:  
tus tuaj cawm lub sim ceeb yuav ua vaj tswj peb.

Txais: As les lus yas, as les lus yas.

Ntawv Moo Zoo:    
Zaj ntev:  MT  1:   1-25

1 Phau ntawv qhia txog Yes Xus Pleev lub keeb,
nws yog Das Vis leej tub uas yog Has Nplas Has leej tub :
2 Has Nplas Has yug Is Xas Has, Is Xas Has yug Yas Kos, Yas Kos yug Yus Das thiab nws cov kwv tij.
3 Yus Das yug Fas Les thiab Ntxas Las, nkawd niam yog Thas Mas. Fas Les yug Es Xas Los, Es Xas Los yug As Las,
4 As Las yug As Mis Nas Das, As Mis Nas Das yug Nas Soos,  Nas Soos yug Xas Moos,
5 Xas Moos yug Npuag Oo, uas nws niam yog Las Has;
Npuag Oo yug Os Npes, uas nws niam yog Luv; Os Npes yug Yes Xes,
6 Yes Xes yug tus vaj Das Vis, Das Vis yug Xas Los Moos, uas nws niam yog Us Lis tus poj.
7 Xas Los Moos yug Los Npuag, Los Npuag yug As Npias, As Npias yug As Xas,
8 As Xas yug Yos Xas Fas, Yos Xas Fas yug Yos Las, Yos Las yug Os Xias,
9 Os Xias yug Yos Thas, Yos Thas yug As Kas, As Kas yug Es Xes Kias,
10 Es Xes Kias yug Mas Nas Xes, Mas Nas Xes yug As Moos, As Moos yug Yos Xias,
11 Yos Xias yug Yes Kos Nias thiab Yes Kos Nias cov kwv tij, thaum lub caij raug txim nyob Npas Npis Los.
12 Dhau lub caij raug txim nyob Npas Npis Los lawm,
Yes Kos Nias yug Xas Las Thias, Xas Las Thias yug Ntxos Los Npas Npes,
13 Ntxos Los Npas Npes yug As Npis Yus, As Npis Yus yug Es Lias Kis, Es Lias Kis yug As Ntxos,
14 As Ntxos yug Xas Dos, Xas Dos yug As Khis, As Khis yug Es Lis Us,
15 Es Lis Us yug Es Les As Ntxas, Es Les As Ntxas yug Mas Thas, Mas Thas yug Yas Kos,
16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev.
17 Tas cov tiam neeg huv tib si, txij Has Nplas Has los txog Das Vis, muaj kaum plaub tiam;
txij Das Vis los txog lub caij raug txim nyob Npas Npis Los, muaj kaum plaub tiam;
txij lub caij raug txim nyob Npas Npis Los txog lub caij Leej Pleev tuaj, muaj kaum plaub tiam.
18 Yes Xus Pleev lub keeb chiv zoo li no: Mab Liab uas yog Yes Xus niam, lawv muab qhaib rau Yos Xes lawm.
Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub.
19 Yos Xes uas yog Mab Liab tus txiv, yog ib tug neeg ncaj,
nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm.
20 Thaum nws txiav tau siab tias yuav li ntawd, Huab Tais tus Tshiab tawm los ua npau suav rau nws,
thiab hais rau nws tias : "Yos Xes, Das Vis leej tub, koj txhob ntshai coj Mab Liab, koj tus poj niam,
los nyob hauv koj tsev. Yog Leej Ntuj Plig Ntshiab ua kom nws xeeb tub.
21 Nws yuav yug ib tug tub, koj yuav tis nws npe hu ua Yes Xus,
vim nws yuav cawm nws haiv neeg ntawm lawv cov txhaum."
22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias:
23 “Tus ntxhais nkauj xwb yuav xeeb tub, nws yuav yug ib tug tub.
Luag yuav tis nws npe hu ua Es Mas Nus Es,” txhais tias: "Tswv Ntuj nrog peb nyob".
24 Thaum Yos Xes tsim los, nws ua raws li Huab Tais tus Tshiab qhia rau nws,
nws coj nws poj niam los nyob hauv nws tsev.
25 Nws tsis paub nws poj niam mus txog hnub Mab Liab yug Mab Liab tus tub.
Nws tis tus tub npe hu ua Yes Xus.

Los Zaj luv:   MT  1: 18-25

18 Yes Xus Pleev lub keeb chiv zoo li no: Mab Liab uas yog Yes Xus niam, lawv muab qhaib rau Yos Xes lawm.
Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub.
19 Yos Xes uas yog Mab Liab tus txiv, yog ib tug neeg ncaj,
nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm.
20 Thaum nws txiav tau siab tias yuav li ntawd, Huab Tais tus Tshiab tawm los ua npau suav rau nws,
thiab hais rau nws tias : "Yos Xes, Das Vis leej tub, koj txhob ntshai coj Mab Liab, koj tus poj niam,
los nyob hauv koj tsev. Yog Leej Ntuj Plig Ntshiab ua kom nws xeeb tub.
21 Nws yuav yug ib tug tub, koj yuav tis nws npe hu ua Yes Xus,
vim nws yuav cawm nws haiv neeg ntawm lawv cov txhaum."
22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias:
23 “Tus ntxhais nkauj xwb yuav xeeb tub, nws yuav yug ib tug tub.
Luag yuav tis nws npe hu ua Es Mas Nus Es,” txhais tias: "Tswv Ntuj nrog peb nyob".
24 Thaum Yos Xes tsim los, nws ua raws li Huab Tais tus Tshiab qhia rau nws,
nws coj nws poj niam los nyob hauv nws tsev.
25 Nws tsis paub nws poj niam mus txog hnub Mab Liab yug Mab Liab tus tub.
Nws tis tus tub npe hu ua Yes Xus.

TIM     24-25     LUB     12     HLIS    (IB TAG HMO)

HMOOV TSUJ XEEB HT YUG LOS
MIS XAS THAUM IB TAG HMO (MIDNIGHT MASS)
Lectionary: 14



Zaj Nyeem Ib:     HIS XAIS  9:1-6

1 Tsoom neeg uas maub hauv qhov tsaus ntuj lawv tau pom ib qho pom kev loj;
muaj ib qho pom kev ci tuaj rau saum cov nyob hauv lub teb chaws tsaus ntuj nti lawm.
2 Koj tau coj kev zoo siab ntau rau lawv, kom lawv muaj kev zoo siab puv npo.
Lawv zoo siab nyob ntawm koj xub ntiag, xws li cov sau qoob loo zoo siab,
xws li lawv sib faib cov toob xib lawv mus lwg los lawv dhia lom zem.
3 Vim tus quab uas tsuam lawv, tus ntas uas nyob saum lawv xub pwg,
tus zov cov neeg nyob txim rab qws, koj muab dam pov tseg tas,
xws li thaum lub caij cov Mas Dias nyob.
4 Tas cov khau uas tub rog rau, tas cov tsho lo ntshav,
yuav raug muab siv ua taws rauv kom kub hnyiab tas.
5 Vim muaj ib tug me nyuam yug los rau peb lawm, Ntuj pub ib tug tub rau peb lawm;
txoj kev tswj kev kav poob rau saum nws xub pwg. Luag tis nws npe hu ua:
tus Pab Tswv Yim Zoo Tas Nrho, tus Tswv Ntuj Zog Loj,
Leej Txiv Mus Li, tus Vaj Txheeb Pub Kev Thaj Yeeb.
6 Nws txoj kev tswj kev kav ri mus deb thiab nyob thaj yeeb lug tsis muaj caij kawg;  
nws zaum saum Davis lub theej kiab tswj kav, nws kav nws ntswj teb ntswj av,
uas nws tsa kom nyob ruaj nreb hauv txoj kev txiav txim ncaj
thiab txoj kev ncaj ncees, txij no mus tag ib txhiab ib txhis.
Tus HUAB TAIS kav tsoom tshiab nws lub siab kub yuav ua tej no.

NPN:      96: 1-2,2-3, 11-12, 13

Txais:   (Lk 2:11) Hnub no tus Cawm peb yug los lawm, yog Leej Pleev, peb tus Huab Tais.

Nej hu ib zag nkauj tshiab rau HUAB TAIS,
tas lub ntiaj teb, nej hu nkauj rau HUAB TAIS;
nej hu nkauj rau HUAB TAIS,
nej foom lus zoo rau nws lub npe!

Txais:   (Lk 2:11) Hnub no tus Cawm peb yug los lawm, yog Leej Pleev, peb tus Huab Tais.

Hnub dhau hnub, nej tshaj nws txoj kev cawm.
Nej ceeb toom txog nws lub koob meej rau tsoom kuj cuab paub,
piav nws cov dej num nto moo rau tsoom haiv neeg !

Txais:   (Lk 2:11) Hnub no tus Cawm peb yug los lawm, yog Leej Pleev, peb tus Huab Tais.

Kom lub ntuj zoo siab, lub ntiaj teb dhia lom zem,
kom cov dej ntuj thiab cov tsiaj uas nyob hauv qw suab ntas ntua!
Kom cov tiaj nras thiab txhua yam nyob hauv zoo siab,
ces txhua hom xyoob ntoo tom hav zoov yuav nqua suab lom zem

Txais:   (Lk 2:11) Hnub no tus Cawm peb yug los lawm,  yog Leej Pleev, peb tus Huab Tais.

Lawv yuav zoo siab ntawm HUAB TAIS xub ntiag, vim nws tuaj lawm,
nws tuaj tswj kav lub ntiaj teb,
nws yuav tswj kav lub sim ceeb raws kev haum pheej,
nws yuav tswj cov haiv neeg nyob hauv txoj kev ncaj.

Txais:   (Lk 2:11) Hnub no tus Cawm peb yug los lawm,  yog Leej Pleev, peb tus Huab Tais.

Zaj  Nyeem Ob:   TIS TOS  2:11-14

Cov hmov tshua:
11 Tswv Ntuj lub txiaj ntsim tawm tuaj lawm, nws tuaj cawm txhua leej txhua tus.  
12 Nws qhia peb sawv daws kom tso tus yam ntxwv tsis hwm Ntuj
pov tseg thiab tso txoj kev ntshaw tej yam hauv ntiaj teb no pov tseg;
kom ua ib lub neej coj tus, cheem tau peb lub siab, coj ncaj, thiab hwm Ntuj rau tiam neej no,
13 uas peb tos ntsoov tias yuav tau txais raws txoj kev tso siab muaj txiaj ntsim,
uas yog peb tus Tswv Ntuj loj, thiab tus cawm seej Yes Xus Pleev
txoj kev tshwm los muaj hwj chim rau peb pom xyeem.
14 Nws tau muab nws rau luag ntes, kom tau txhiv peb ntawm txhua txoj kev phem
thiab kom tau ntxuav ib haiv neeg kom dawb huv los ua nws tug,
yog haiv neeg muaj kev kub siab ua qhov zoo xwb.

As Les LusYas:    LK 2:10-11

Txais:  As les lus yas, as les lus yas.

Kuv tuaj tshaj ib lub moo zoo rau nej uas yuav ua kom neeg zoo siab heev:
Hnub no, tus Cawm peb yug los lawm, nws yog Leej Pleev, peb tus Huab Tais.

Txais:  As les lus yas, as les lus yas.

Ntawv Moo Zoo:    LK 2:1-14

1 Lub zwj ceeb ntawd, vaj ntxwv Xes Ntxas Aus Nkus Tus tshaj
lus ceeb toom kom tas ntiaj teb txheeb tsoom mej hwm.
2 Thaum txheeb tsoom mej hwm thawj zaug no, yog lub caij Kis Lis Nyus ua nom tswj Xis Lias teb.
3 Ces txhua leej txhua tus sawv kev mus, nyias mus sau nyias npe hauv nyias lub nroog.
4 Yos Xes kuj sawv kev hauv lub nroog Nas Xas Les, xeev Nkas Lis Lais
mus pem Das Vis lub nroog hu ua Npes Les Hes, nyob hauv xeev Yus Das thiab,
vim Yos Xes yog Das Vis tsev neeg thiab Das Vis caj ces.
5 Yos Xes coj Mab Liab mus au npe nrog nws lub npe thiab,
vim Mab Liab yog tus nws qhaib thiab Mab Liab cev hnyav lawm.
6 Thaum nkawd nyob Npes Les Hes, txog lub caij Mab Liab yuav daws cev.
7 Nws yug nws tus tub hlob, nws muab ntaub qhwv, thiab muab tso pw hauv ib lub dab nyuj,
vim lub tsev txais qhua tsis muaj chaw rau nkawd so.
8 Nyob thaj tsam ntawd, muaj ib co neeg zov yaj, nyob nruab teb.
Hmo ntuj, lawv nyob zov lawv pab yaj.
9 Huab Tais tus Tshiab tawm los rau lawv pom,
Huab Tais lub hwj chim ci dawb paug ncig lawv, lawv ntshai kawg.
10 Tus Tshiab hais rau lawv tias: "Nej txhob ntshai, vim kuv tuaj xa
ib tsab xov zoo uas yuav ua kom nej zoo siab thiab ib tsoom neeg zoo siab.
11 Vim hnub no, nyob hauv Das Vis lub nroog,
tus Cawm nej yug los lawm, nws yog Leej Pleev thiab yog Huab Tais.
12 Lub cim yuav ua kom nej paub yog li no: nej yuav pom ib tug
me nyuam mos qhwv ntaub pw hauv ib lub dab nyuj."
13 Ib sij huam, txawm muaj ib pab Tshiab coob coob
tuaj nrog tus Tshiab xa xov cav lus zoo txog Tswv Ntuj tias:
14 "Nyob saum cov txheej ntuj siab, Tswv Ntuj nto meej nto moo,
nyob ntiaj teb, tsoom neeg Tswv Ntuj nyiam, nyob thaj yeeb.”

TIM 25 LUB 12 HLIS (YUAV KAJ NTUG)

HMOOV TSUJ XEEB HT YUG LOS
MIS XAS THAUM YUAV KAJ NTUG (MASS AT DAWN)
Lectionary: 15



Zaj Nyeem Ib: HIS XAIS 62: 11-12

11 HUAB TAIS tshaj lus kom nrov mus txog npoo ntiaj teb tias:
Nej hais rau tus me ntxhais Xis Yoos li no: “Tus cawm koj tuaj lawm!
Nws nqa khoom plig nrog nws tuaj, nws cov paj tshab nyob ntawm nws xub ntiag.
12 Luag yuav hu lawv ua: "Haiv Neeg Ntshiab,
cov neeg uas HUAB TAIS txhiv." Luag yuav hu koj tias:
"Muaj neeg coob tuaj nrhiav, lub tsheej uas tsis raug tso pov tseg.”

NPN: 97: 1+6, 11-12

Txais: Ib qho pom kev ci tuaj rau peb hnub no: Huab Tais yug los vim peb.

HUAB TAIS ua vaj, kom lub ntiaj teb hom khaj,
kom cov pov txwv dhia zoo siab.
Yim txheej cuaj txheej ntuj tshaj nws txoj kev ncaj,
Thiab tas txhua haiv neeg pom nws lub hwj chim.

Txais: Ib qho pom kev ci tuaj rau peb hnub no: Huab Tais yug los vim peb.

Qhov pom kev sawv los ci rau tus neeg ncaj ;
kev kaj siab sawv los ci rau cov siab dawb.
Cov neeg ncaj, nej zoo siab nyob hauv HUAB TAIS,
nej ua tsaug rau nws lub npe ntshiab mog.

Txais: Ib qho pom kev ci tuaj rau peb hnub no: Huab Tais yug los vim peb.

Zaj Nyeem Ob: TIS TOS 3: 4-7

Tus hmov tshua:
4 Hnub uas tus Tswv Ntuj cawm peb
qhib nws lub siab zoo thiab nws txoj kev nyiam
txhua leej tawm los rau peb qhov muag pom xyeem,
5 mas tsis yog vim peb tau ua ib cov dej num ncaj ncees.
tiam sis tsuas yog vim nws lub siab khuv leej neeg xwb.
Nws cawm peb nyob hauv cov dej ntxuav neeg kom rov yug los tshiab,
thiab kom rov hloov dua tshiab nyob hauv Leej Ntuj Plig Ntshiab.
6 tus uas nws tau tso los nyob puv ntoob hauv peb,
nyob hauv Yes Xus Pleev, tus cawm peb,
7 kom peb ntshiab tuaj nyob hauv nws lub txiaj ntsim,
ces peb thiaj tso siab tau tias peb yuav txais txoj sia
nyob mus li los ua peb lub cuab tam.

As Les Lus Yas: LK 2: 14

Txais: As les lus yas, as les lus yas.

Tswv Ntuj nto meej nto moo nyob saum cov txheej ntuj siab,
nyob ntiaj teb, tsoom neeg Tswv Ntuj nyiam, nyob thaj yeeb.

Txais: As les lus yas, as les lus yas.

Ntawv Moo Zoo: LK 2: 15-20

15 Thaum cov Tshiab tso cov zov yaj tseg rov mus saum ntuj lawm,
cov zov yaj sib yaum tias: "Peb mus Npes Les Hes,
mus xyuas yam xwm uas tshwm sim tuaj,
uas Huab Tais tuaj qhia rau peb paub ntawd saib."
16 Ces lawv maj zeeg tuaj mus, lawv pom Mab Liab thiab Yos Xes,
thiab pom tus me nyuam mos pw hauv lub dab nyuj.
17 Thaum lawv pom li ntawd, lawv piav lo lus uas tus Tshiab
tau qhia rau lawv txog tus me nyuam.
18 Txhua tus uas hnov kuj qhuas kawg txog tej lus uas cov zov yaj hais rau lawv.
19 Hos Mab Liab, nws ua tib zoo khaws tej lus no huv si cia
thiab muab coj los xav rau hauv nruab siab.
20 Cov zov yaj rov mus tsev, lawv foom koob meej
thiab cav lus zoo txog Tswv Ntuj vim tas txhua yam lawv tau pom
thiab tau hnov muaj raws li Ntuj qhia rau lawv lawm.

TIM 25 LUB 12 HLIS (SAWV NTXOV NRUAB HNUB)

HMOOV TSUJ XEEB HT YUG LOS
MIS XAS THAUM SAWV NTXOV NRUAB HNUB (MASS DURING THE DAY)
Lectionary: 16




Zaj Nyeem Ib: HIS XAIS 52: 7-10

7 Tus xa lub Moo Zoo tuaj, nws ob txhais taw
tsuj tej hauv roob tau zoo saib ua luaj,
nws tshaj tias kev thaj yeeb tuaj lawm, nws coj ib tsab xov zoo tuaj,
nws tshaj txog txoj kev cawm neeg; nws hais rau Xis Yoos tias:
"Koj tus Tswv Ntuj ua vaj!"
8 Koj mloog! Koj cov neeg zov keeb tsa suab qw nrov nrov,
lawv ua ke qw zoo siab vim lawv pom xyeem ntawm qhov muag
tias HUAB TAIS rov tsa Xis Yoos lawm.
9 Yes Lus Xas Les cov tsev uas tau pob tas,
nej sawv daws hu nkauj ua suab ntas ntua mas,
vim HUAB TAIS muab kev nplig siab rau nws haiv neeg,
nws txhiv Yes Lus Xas Les.
10 HUAB TAIS loj npab ntshuas nyob ntawm
txhua haiv neeg xub ntiag rau lawv pom.
Npoo ntuj npoo ntiaj teb yuav pom
peb tus Tswv Ntuj txoj kev cawm neeg.

NPN 98: 1, 2-3, 3-4, 5-6

Txais: (3c) Tas cov npoo ntiaj teb kawg tau pom
Tswv Ntuj lub hwj huam cawm neeg lawm.

Nej hu ib zag nkauj tshiab rau HUAB TAIS,
vim nws tau ua dej num muaj tsim nto moo.
Nws sab tes xis ua kom nws yeej,
Yo nws sab npab ntshiab ua .

Txais: (3c) Tas cov npoo ntiaj teb kawg tau pom
Tswv Ntuj lub hwj huam cawm neeg lawm.

HUAB TAIS ua kom sawv daws paub nws txoj kev cawm;
nws muab nws txoj kev ncaj rau cov kuj cuab pom.
Nws rov nco txog nws txoj kev hlub thiab kev pheej xeeb
uas nws muab rau His Xas Lais lub cuab lub yig.

Txais: (3c) Tas cov npoo ntiaj teb kawg tau pom
Tswv Ntuj lub hwj huam cawm neeg lawm.

Tas npoo ntuj npoo ntiaj teb tau pom
peb tus Tswv Ntuj txoj kev cawm lawm.
Tas ntiaj teb tej av, nej zoo siab cav txog HUAB TAIS,
nej qhib suab hu nkauj, nej hu nkauj qhuas nws mog.

Txais: (3c) Tas cov npoo ntiaj teb kawg tau pom
Tswv Ntuj lub hwj huam cawm neeg lawm.

Nej ntaus nkauj nog ncas cav txog HUAB TAIS,
Nej ntaus nkauj nog ncas ntxuag suab seev zoo mloog.
Nej tshuab xyu tshuab hom ntxuag suab kub nyuj,
nej hu nkauj dhia zoo siab cav txog tus Vaj, peb tus HUAB TAIS.

Txais: (3c) Tas cov npoo ntiaj teb kawg tau pom
Tswv Ntuj lub hwj huam cawm neeg lawm.

Zaj Nyeem Ob: HES NPLAWS 1: 1-6

Cov kwv tij nkauj muad:
1 Txheej thaum ub, muaj ntau zaus kawg uas Tswv Ntuj tau siv ntau txoj kev
los hais lus rau peb cov yawg koob nyob hauv cov yaj saub.
2 Lub zim txwv kawg no, Tswv Ntuj tau hais nws cov lus rau peb nyob hauv nws Leej Tub;
yog tus uas nws tau tsa los ua tus txais lub cuab tam tas huv tib si,
thiab yog tus nrog nws tsim lub sim ceeb.
3 Leej Tub yog Tswv Ntuj lub hwj chim ci ntsa iab, yog Tswv Ntuj tus ntsuj duab.
Nws siv nws lo lus muaj hwj huam los nres tas tas ib puas tsav yam huv tib si.
Thaum nws ntxuav kev txaug kev txhaum pov tseg tas lawm,
nws mus zaum ntawm tus Muaj Hwj Huam sab xis, nyob txheej ntuj saud.
4 Nws loj dua ib tsoom Tshiab, vim nws tau txais ib lub npe zoo
tshaj tas tsoom Tshiab tej npe huv tib si.
5 Vim tias puas muaj ib tug Tshiab twg uas Tswv Ntuj tau hais rau nws tias:
“Koj yog kuv Leej Tub, hnub no kuv tau xeeb koj los”?
Los tseem hais tias: “Kuv yog nws Txiv, nws yog kuv Leej Tub”?
6 Thaum Tswv Ntuj xa nws tus tub hlob los yug nyob hauv lub sim ceeb no,
nws tseem rov qab hais dua tias:
“Xav kom tas Tswv Ntuj tsoom Tshiab pe hawm nws.”

As Les Lus Yas

Txais: As les lus yas, as les lus yas.

Ib hnub ntshiab tawm tuaj ci rau peb lawm.
Txhua haiv neeg, nej cia li tuaj pe hawm Huab Tais,
Vim hnub no muaj ib qho pom kev loj ci tuaj rau ntiaj teb lawm.

Txais: As les lus yas, as les lus yas.

Ntawv Moo Zoo: ZAM 1: 1-18

1 Thaum lub hauv paus chiv keeb,
Leej Lo Lus yeej nyob txawm lawm.
Leej Lo Lus nrog Tswv Ntuj nyob, Leej Lo Lus yog Tswv Ntuj.
2 Thaum lub hauv paus, Leej Lo Lus nrog Tswv Ntuj nyob.
3 Tas ib puas tsav yam tshwm tawm los yog vim nws.
Yog tsis muaj nws, mas tsis muaj ib yam dab tsi tshwm tau los nyob.
4 Yam xeeb txawm tau los nyob vim nws, yog txoj sia.
Txoj sia ntawd yog tib neeg qhov pom kev.
5 Qhov pom kev ci nyob hauv qhov tsaus ntuj,
qhov tsaus ntuj thaiv tsis tau qhov pom kev.
6 Muaj ib tug neeg hu ua Zam tuaj, yog Tswv Ntuj xa nws tuaj.
7 Nws tuaj yog tuaj ua tim khawv, kom tau ua pov thawj txog qhov pom kev,
kom txhua leej txhua tus ntseeg vim nws.
8 Nws tsis yog qhov pom kev, tab sis nws tuaj ua tim khawv txog qhov pom kev.
9 Qhov pom kev uas yog qhov tseeb, ci tuaj kaj txhua leej tib neeg,
nws tuaj nyob hauv lub sim ceeb.
10 Nws yeej nyob txawm hauv lub sim ceeb no,
nws yog tus ua kom muaj lub sim ceeb tshwm tawm los,
tsis kav lub sim ceeb tsis paub nws li.
11 Nws los nyob hauv nws tsev neeg, tab sis nws cov neeg tsis txais nws.
12 Hos cov neeg uas txais nws, mas nws pub lub hwj huam rau lawv
kom los ua tau Tswv Ntuj cov me nyuam,
nws kuj pub rau cov uas ntseeg txog nws lub npe ib yam thiab.
13 Cov ntawd yog cov uas tsis yug ntawm roj ntsha los,
tsis yog tib neeg ua kom lawv yug los,
thiab kuj tsis yog tib neeg txiav siab xav kom lawv yug los;
lawv yog cov yug ntawm Tswv Ntuj los.
14 Ces Leej Lo Lus xeeb los muaj ib lub cev nqaij,
nws los nrog peb nyob, peb tau ntsia ntsoov nws lub hwj chim.
Yog lub hwj chim uas phim Leej Txiv ib leeg Tub twm zeej,
muaj txiaj ntsim thiab qhov tseeb nyob puv hauv nws.
15 Zam ua tim khawv txog Leej Lo Lus, nws qw tshaj tawm tias:
"Tus no yog tus kuv tau hais txog tias, tus uas lawv kuv qab tuaj,
nws loj dua kuv, vim nws xub nyob dua kuv."
16 Peb sawv daws puav leej tau txais ntawm nws qhov kev muaj puv npo
nyob hauv nws los, peb txais txiaj ntsim tas txiaj ntsim tuaj.
17 Txoj Cai yog Mais Xes muab, hos lub txiaj ntsim thiab
txoj kev tseeb yog Yes Xus Pleev coj tuaj.
18 Tsis muaj leej twg tau pom dua Tswv Ntuj ib zaug li,
tab sis Leej Tub Twm Zeej uas yog Tswv Ntuj,
nws nyob nraim hauv Leej Txiv lub xub ntiag,
nws qhia kom peb paub Tswv Ntuj.

Los: ZAM 1:1-5, 9-14

1 Thaum lub hauv paus chiv keeb,
Leej Lo Lus yeej nyob txawm lawm.
Leej Lo Lus nrog Tswv Ntuj nyob, Leej Lo Lus yog Tswv Ntuj.
2 Thaum lub hauv paus, Leej Lo Lus nrog Tswv Ntuj nyob.
3 Tas ib puas tsav yam tshwm tawm los yog vim nws.
Yog tsis muaj nws, mas tsis muaj ib yam dab tsi tshwm tau los nyob.
4 Yam xeeb txawm tau los nyob vim nws, yog txoj sia.
Txoj sia ntawd yog tib neeg qhov pom kev.
5 Qhov pom kev ci nyob hauv qhov tsaus ntuj,
qhov tsaus ntuj thaiv tsis tau qhov pom kev.
9 Qhov pom kev uas yog qhov tseeb, ci tuaj kaj txhua leej tib neeg,
nws tuaj nyob hauv lub sim ceeb.
10 Nws yeej nyob txawm hauv lub sim ceeb no,
nws yog tus ua kom muaj lub sim ceeb tshwm tawm los,
tsis kav lub sim ceeb tsis paub nws li.
11 Nws los nyob hauv nws tsev neeg, tab sis nws cov neeg tsis txais nws.
12 Hos cov neeg uas txais nws, mas nws pub lub hwj huam rau lawv
kom los ua tau Tswv Ntuj cov me nyuam,
nws kuj pub rau cov uas ntseeg txog nws lub npe ib yam thiab.
13 Cov ntawd yog cov uas tsis yug ntawm roj ntsha los,
tsis yog tib neeg ua kom lawv yug los,
thiab kuj tsis yog tib neeg txiav siab xav kom lawv yug los;
lawv yog cov yug ntawm Tswv Ntuj los.
14 Ces Leej Lo Lus xeeb los muaj ib lub cev nqaij,
nws los nrog peb nyob, peb tau ntsia ntsoov nws lub hwj chim.
Yog lub hwj chim uas phim Leej Txiv ib leeg Tub twm zeej,
muaj txiaj ntsim thiab qhov tseeb nyob puv hauv nws.