COV ZAJ NYEEM RAU CAIJ TOS HUAB TAIS

Hnub Ob Lis Piam Ib Caij Tos Huab Tais
Xyoo A B C Nruab Lis Piam Xyoo I & II
Lectionary: 175

Zaj Nyeem Ib: HX 4: 2-6 (Xyoo A)

2 Hnub ntawd, HUAB TAIS tus ntsuag ntoo yuav muaj hwj chim thiab yuav nto koob meej, lub teb chaws tej txiv yuav ua kom cov His Xas Lais dim rov los tau ntsej muag thiab nto moo.
3 Tus uas tseem nyob saum Xis Yoos thiab tus neeg seem nyob hauv Yes Lus Xas Les yuav tau lub npe hu ua neeg ntshiab: yog tas txhua leej txhua tus uas muaj npe sau tseg tias nws yog neeg nyob hauv Yes Lus Xas Les tas nws sim neej,.
4 Thaum Huab Tais ntxuav cov ntxhais Xis Yoos tej kev phem kev qias pov tseg tas lawm, thiab yaug Yes Lus Xas Les cov ntshav nyob hauv nws kom tawm tas mus, nyob hauv lub tswv yim txiav txim ncaj thiab lub tswv yim muab hlawv kom yaj tas mus lawm,
5 mas HUAB TAIS yuav tsim rau saum txhua qhov chaw huv si saum lub roob Xis Yoos thiab rau saum qhov chaw uas sawv daws tuaj sib txoos ua ke, ib twv huab thaum yav nruab hnub, thiab ib co pa taws nrog ib lub cub tawg cig nplaim pom kev lug thaum hmo ntuj, kom Huab Tais lub hwj chim ua lub kaus roos thiab txuag tas txhua leej:
6 nws yuav ua ntxoov ntxoo roos kom tshav ntuj txhob kub thaum nruab hnub, thiab yuav ua chaw nkaum thiab thaiv kom txhob raug nag xob nag cua.

Zaj Nyeem Ib: HIS XAIS 2: 1-5 (Xyoo B & C)

1 Lo lus uas His Xais, uas yog As Mos tub, tau hnov hais txog Yus Das teb thiab Yes Lus Xas Les:
2 Thaum txog lub caij kawg, lub roob uas HUAB TAIS tsa tsev nyob rau saud yuav yog lub roob loj dua cov, nws yuav sawv siab dua cov pov roob. Tas ib tsoom kuj cuab yuav khiav ua npoj ntws tuaj mus lawm saud.
3 Muaj neeg coob yuav tuaj, lawv yuav hais tias: "Nej tuaj ! Peb nce mus lawm pem Huab Tais lub roob, pem Yas Kos tus Tswv Ntuj lub tsev, kom nws qhia nws tej kev rau peb, ces peb thiaj yuav taug nws tej kev." Vim tias yuav muaj kev qhuab qhia tawm ntawm Xis Yoos tuaj, thiab Huab Tais lo lus yuav tawm ntawm Yes Lus Xas Les tuaj.
4 Huab tais yuav txiav txim nyob hauv nruab nrab cov kuj cuab, nws yuav hais lus nchav rau coob leej neeg. Lawv yuav muab lawv rab ntaj los ntaus ua voom laij teb, muab lawv rab hmuv ntaus ua liag. Ib lub kuj cuab yuav tsis tsa ntaj mus ntaus lwm lub kuj cuab ntxiv; lawv yuav tsis kawm kev ntaus rog ntxiv lawm.
5 Yas Kos tsev neeg, nej tuaj, peb cia li taug kev nyob hauv Huab Tais qhov pom kev!

NPN 122: 1-2, 3-4B, 4CD-5, 6-7, 8-9

Txais: Nej tuaj peb zoo siab hlo mus pem Huab Tais tsev

Kuv zoo siab vim lawv hais rau kuv tias:.
"Peb yuav nce mus lawm pem Huab Tais tsev.”
Yes Lus Xas Les, nim no, peb txhais taw
tau tsuj sab hauv koj cov rooj loog lawm.

Txais: Nej tuaj peb zoo siab hlo mus pem Huab Tais tsev

Yes Lus Xas Les raug luag txhim los zoo li
ib lub Nroog uas zoo tau xwm yeem.
Cov xeem neeg nce mus pem nws,
Yog Huab Tais cov xeem neeg

Txais: Nej tuaj peb zoo siab hlo mus pem Huab Tais tsev

Lawv nce mus raws li txoj cai qhia rau His Xas Lais,
Kom tau ua tsaug cav txog Huab Tais lub Npe.
Nyob ntawd muaj ib co rooj txiav txim teeb tau tseg,
Yog cov rooj cia rau Das Vis tsev neeg.

Txais: Nej tuaj peb zoo siab hlo mus pem Huab Tais tsev

Nej thov ntuj kom muaj kev thaj yeeb nyob Yes Lus Xas Les!
Kom cov neeg uas nyiam koj tsuas muaj kev vam meej!
Kom kev thaj yeeb nyob sab hauv koj cov ntsa loog,
Kom kev vam meej nyob hauv koj cov vaj tsev.

Txais: Nej tuaj peb zoo siab hlo mus pem Huab Tais tsev

Vim kuv cov txheeb ze thiab kuv cov phooj ywg,
kuv yuav foom rau koj tias: “Kom kev thaj yeeb nyob hauv koj!”
Vim muaj Huab Tais peb tus Tswv Ntuj lub tsev,
Kuv yuav thov ntuj kom koj tsuas tau kev zoo.

Txais: Nej tuaj peb zoo siab hlo mus pem Huab Tais tsev

As Les Lus yas: NPN 80: 4

Txais: As les lus yas, as les lus yas.

Thov koj tuaj cawm peb, Huab Tais, peb tus Tswv Ntuj;
Cia koj lub ntsej muag ci tuaj rau saum peb, ces peb yuav tau txais kev cawm.

Txais: As les lus yas, as les lus yas.

Ntawv Moo Zoo: MT 8: 5-11

5 Thaum Yes Xus mus hauv Kas Fas Naus, ib tug xab txheeb txav los ze Yes Xus, nws thov tias : 6 "Huab Tais, kuv tus tub txib pw tom tsev, nws tes taw tuag tas, nws mob txom nyem kawg." 7 Yes Xus hais rau nws tias : "Kuv yuav mus kho nws kom zoo." 8 Tus xab txheeb teb tias : "Huab Tais, kuv tsis tsim nyog koj chaws los hauv kuv lub qab ru tsev, tsuav yog koj hais ib lo lus xwb ces kuv tus tub txib yuav zoo hlo. 9 Vim tias kuv kuj yog ib tug neeg zwm rau tus loj dua kuv, kuv kuj muaj ib co tub rog zwm rau kuv thiab. Yog kuv hais rau ib tug tias : 'Koj mus !' nws cia li mus, kuv ho hais rau lwm tus tias : 'Koj los,' nws kuj cia li los. Kuv hais rau kuv tus tub txib tias : 'Koj ua qhov no !' nws cia li ua." 10 Yes Xus hnov nws hais li ntawd, Yes Xus qhuas kawg. Nws hais rau cov neeg raws nws qab tias : "Kuv hais tseeb rau nej, kuv tsis tau pom ib tug neeg ntseeg npaum li ntawd nyob hauv cov His Xas Lais li. 11 Kuv hais rau nej tias, yuav muaj neeg coob tuaj Toob Fab thiab Xib Fab tuaj nrog Has Nplas Has, His Xas Has thiab Yas Kos lawv noj rooj qav hauv Ntuj lub Ceeb Tsheej.“

Hnub Peb Lis Piam Ib Caij Tos Huab Tais Xyoo A B C Nruab Lis Piam Xyoo I & II
Lectionary: 176

Zaj Nyeem Ib: HIS XAIS 11: 1-10

Hnub ntawd,
1 Ib tug ceg yuav hlav tuaj ntawm Yes Xes lub hauv paus tuaj, ib tug ntsuag yuav ncau tawm ntawm Yes Xes cov cag tuaj.
2 HUAB TAIS lub tswv yim yuav nyob rawv saum nws. Yog ib lub tswv yim thoob tsib thiab muaj kev to taub, ib lub tswv yim pab xav tom ntej tom qab thiab muaj peev xwm, ib lub tswv yim paub txuj thiab hwm HUAB TAIS.
3 Txoj kev hwm HUAB TAIS yog nws kev zoo siab. Nws yuav tsis txiav txim raws li nws qhov muag pom sab nraud, nws yuav tsis xaiv raws li hnov lus moo cua hais xwb.
4 Nws yuav txiav txim ncaj rau cov pluag txom nyem, thiab yuav muab ib lub txim haum pheej rau cov neeg tsis muaj hwj chim hauv lub teb chaws. Nws yuav siv rab pas ntawm nws lub ncauj los nplawm lub ntiaj teb, thiab siv cov pa ntawm nws di ncauj los tua cov neeg lim hiam.
5 Kev ncaj yuav yog nws txoj siv sia duav, kev pheej xeeb yuav yog nws txoj siv sia ntawm ntsag.
6 Tus hma yuav nrog tus me nyuam yaj nyob ua ke, tus tsov pom txwv yuav nrog tus me nyuam tshis pw ua ke. Tus xyuas nyuj, tus thav tsov ntxhuav, thiab tus tsiaj rog yuav mus ua ke, ib tug me nyuam tub coj lawv kev.
7 Tus nyuj thiab tus dais yuav nog zaub, nkawd cov me nyuam yuav pw ua ke; tus tsov ntxhuav yuav noj quav nyab xws li tus heev nyuj.
8 Tus me nyuam mos yuav ua si ze ntawm nab raj qhov chaw pw, tus me nyuam me yuav cev tes rau hauv nab muaj taug lub qhov.
9 Yuav tsis muaj ua phem tsis muaj sib ntaus sib tua nyob saum tas lub roob kuv txoj kev ntshiab, vim kev paub HUAB TAIS yuav nyob puv ntiaj teb, ib yam li dej nyob puv lub hiav txwv.
10 Thaum txog hnub ntawd, Yes Xes tus cag yuav sawv zoo li ib tug chij rau cov haiv neeg; nws yog tus cov pej kum cuab yuav tuaj nrhiav; nws lub vaj tse yuav nto moo lug.

NPN 72: 1-2, 7-8, 12-13, 17

Txais: (7) Kev ncaj yuav tawg paj lub caij nws ua vaj,
thiab yuav muaj kev thaj yeeb lug tsis txawj kawg.

Tswv Ntuj, pub koj txoj kev txawj txiav txim rau tus vaj,
Thiab pub koj txoj kev ncaj rau vaj ntxwv tus tub;
Nws yuav tswj koj haiv neeg raws kev ncaj
thiab koj cov neeg txom nyem raws kev txawj txiav txim.

Txais: Kev ncaj yuav tawg paj lub caij nws ua vaj,
thiab yuav muaj kev thaj yeeb lug tsis txawj kawg.

Kev ncaj yuav tawg paj lub caij nws ua vaj,
thiab yuav muaj kev thaj yeeb lug mus txog thaum tsis muaj lub hli ntxiv.
Thov kom nws tswj ib lub hiav txwv mus rau lwm lub hiav txwv,
Thiaj txij ntawm tus niam dej mus txog tim npoo ntiaj teb kawg.

Txais: Kev ncaj yuav tawg paj lub caij nws ua vaj,
thiab yuav muaj kev thaj yeeb lug tsis txawj kawg.

Nws yuav cawm tus pluag uas hu txog nws,
thiab yuav npo tus txom nyem uas tsis muaj chaw khaub zig.
Nws yuav hlub tus neeg me thiab tus neeg pluag;
Nws yuav cawm cov pluag txoj sia.

Txais: Kev ncaj yuav tawg paj lub caij nws ua vaj,
thiab yuav muaj kev thaj yeeb lug tsis txawj kawg.

Thov kom neeg cav txog nws lub npe mus li;
nws lub npe yuav nyob ntev npaum lub hnub.
Nyob hauv nws, txhua xeem neeg nyob ntiaj teb yuav tau hmoov zoo;
txhua haiv neeg yuav tshaj txog nws txoj kev zoo siab.

Txais: Kev ncaj yuav tawg paj lub caij nws ua vaj,
thiab yuav muaj kev thaj yeeb lug tsis txawj kawg..

As Les Lus Yas

Txais: As les lus yas, as les lus yas.

Peb tus Huab Tais yuav tuaj nrog nws lub hwj huam;
Nws yuav ua kom nws cov tub txib qhov muag pom kev.

Txais: As les lus yas, As les lus yas

Ntawv Moo Zoo: LK 10: 21-24

21 Yes Xus zoo siab nyob hauv Leej Ntuj Plig Ntshiab, nws hais tias : "Leej Txiv, kuv cav lus zoo txog koj, Huab Tais kav lub ntuj lub teb, vim koj tau zais tej ntawd ntawm cov neeg thoob tsib thiab cov neeg ntse, tiam sis koj ho qhib rau cov neeg me paub. Leej Txiv, vim koj yeej nyiam ua li ntawd.
22 Kuv Txiv tau muab tas ib puas tsav yam rau kuv. Tsis muaj leej twg paub tias Leej Tub yog tus twg, kawg yog Leej Txiv xwb thiaj paub, thiab tsis muaj leej twg paub tias Leej Txiv yog tus twg, kawg yog Leej Tub xwb thiaj paub, thiab tus uas Leej Tub xav qhia rau kom paub."
23 Yes Xus tig los rau nws cov thwj tim, nws hais twj ywm rau lawv tias: "Ob lub qhov muag uas pom tej yam nej pom no tau txoj hmoov zoo !
24 Kuv hais rau nej tias coob tus yaj saub thiab coob tus vaj xav pom qhov uas nej pom, tab sis lawv tsis tau pom, xav hnov tej uas nej hnov, tab sis lawv tsis tau hnov."

Hnub Plaub Lis Piam Ib Caij Tos Huab Tais Xyoo A B C Nruab Lis Piam Xyoo I & II
Lectionary: 177

Zaj Nyeem Ib: HX 25: 6-10A

6 Nyob saum lub roob no, tus HUAB TAIS kav tsoom tshiab yuav ua ib rooj nqaij rooj hno rau tas cov haiv neeg huv tib si, yog ib rooj qav muaj nqaij muaj dej caw qab, yog hom nqaij muaj roj muaj hlwb pob txha ntxuag, thiab yog hom cawv uas qab tshaj plaws.
7 Nyob saum lub roob no, HUAB TAIS yuav rhuav daim ntaub npog tas ib tsoom neeg pov tseg, thiab lub vas uas kauv tas ib tsoom kuj cuab.
8 Nws yuav rhuav txoj kev tuag kom ploj mus tas ib txhiab ib txhis. HUAB TAIS Tswv Ntuj yuav so cov kua muag ntws saum sawv daws lub ntsej muag; nws yuav tshem nws haiv neeg nyob thoob ntiaj teb txoj kev poob ntsej muag tawm; vim HUAB TAIS tau hais li ntawd.
9 Hnub ntawd yuav muaj tus hais tias : "Nej ntsia peb tus Tswv Ntuj, tus uas peb tos ntsoov, nws yuav cawm peb; nws yog peb tus HUAB TAIS uas peb tos ntsoov txog. Peb kav tsij dhia lom zem kav tsij zoo siab nyob hauv nws txoj kev cawm seej mog”!
10a Vim HUAB TAIS txhais tes yuav so nyob saum lub roob no.

NPN 23: 1-3A, 3B-4, 5, 6

Txais: (6cd) Kuv yuav nyob hauv Huab lub Tais tsev niaj hnub tas kuv lub neej.

HUAB TAIS yog tus tswv zov yaj saib kuv, kuv yuav tsis tshaib tsis nqhis li.
Nws cia kuv so nyob hauv tej tshav zaub mos ntsuab xiab;
Nws coj kuv mus nyob ze cov dej tus yees;
nws ua kom kuv tus ntsuj plig rov muaj zog tuaj.

Txais: (6cd) Kuv yuav nyob hauv Huab Tais lub tsev niaj hnub tas kuv lub neej.

Nws coj kuv mus taug txoj kev ncaj, kom tau txuag nws lub npe.
Txawm kuv taug kev hauv ib lub hav tsaus nti,
kuv tsis ntshai ib yam phem, vim koj nyob rawv ntawm kuv ib sab,
koj rab nplawm thiab rab pas nrig ua kuv luag.

Txais: (6cd) Kuv yuav nyob hauv Huab Tais lub tsev niaj hnub tas kuv lub neej.

Koj rau ib rooj mov rau ntawm kuv xub ntiag
rau kuv cov yeeb ncuab ntsia ntsoov;
koj muab roj pleev kuv taub hau;
kuv lub ntim puv phwj yaws.

Txais: (6cd) Kuv yuav nyob hauv Huab Tais lub tsev niaj hnub tas kuv lub neej.

Kev ua siab zoo thiab kev khuv leej raws kuv nraim
niaj hnub hauv kuv lub neej;
Kuv yuav nyob hauv HUAB TAIS tsev
mus txog txhiab niag tim puas xyoo.

Txais: (6cd) Kuv yuav nyob hauv Huab Tais lub tsev niaj hnub tas kuv lub neej.

As Les Lus Yas

Txais: As les lus yas, as les lus yas.

Nej ntsia, Huab Tais tuaj cawm nws haiv neeg;
Cov uas npaj tiav log tos txais nws lawv txoj hmoov zoo.

Txais: As les lus yas, as les lus yas.

Ntawv Moo Zoo: MT 15: 29-37

Thaum ntawd,
29 Yes Xus tawm ntawm qhov chaw ntawd mus, nws mus txog ntawm tus ntug dej ntuj Nkas Lis Lais, nws nce mus saum roob, ces nws mus zaum nyob ntawd.
30 Tej pab neeg coob kawg tuaj cuag nws; lawv coj tej tus ceg tawv, tej tus dig muag, tej tus tuag tes tuag taw, tej tus ruam tsis txawj hais lus, thiab lwm cov muaj mob coob kawg tuaj tso rau ntawm Yes Xus ko taw; Yes Xus kho sawv daws huv tib si kom zoo hlo.
31 Ib zeej tsoom sawv daws qhuas kawg, thaum lawv pom cov ruam txawj hais tau lus tuaj, cov tuag tes tuag taw rov muaj zog tuaj, cov ceg tawv rov mus taus kev zoo, hos cov dig muag rov pom kev tuaj; ces lawv cav txog cov His Xas Lais tus Tswv Ntuj lub koob meej.
32 Ces Yes Xus hu nws cov thwj tim los, nws hais rau lawv tias: “Kuv lub siab hlub pab neeg no, vim lawv twb nrog kuv nyob tau peb hnub lawm, lawv tsis muaj dab tsi noj li. Kuv tsis xav cia lawv tshaib plab rov mus tsev, tsam lawv tsaus muag ntawm kev."
33 Cov thwj tim hais rau nws tias: "Peb yuav nrhiav mov qhov twg hauv lub teb chaws suab puam no kom txaus ib pab neeg coob npaum no noj?"
34 Yes Xus hais rau lawv tias: “Nej muaj pes tsawg lub ncuav mov?” Lawv teb tias: “Muaj xya lub thiab ob peb tug me nyuam ntses.”
35 Yes Xus hais kom tsoom sid zaum hauv pem teb.
36 Ces nws tuav xya lub ncuav mov thiab cov ntses, nws ua Ntuj tsaug; nws muab cov ncuav mov ntais, nws cev rau cov thwj tim, ces cov thwj tim coj mus faib rau tsoom sid noj.
37 Tas sawv daws tau noj tsau npo.Tthaum lawv noj tas lawm, lawv khaws tej sab mov seem tau puv xya pob tawb.

Hnub Tsib Lis Piam Ib Caij Tos Huab Tais Xyoo A B C Nruab Lis Piam Xyoo I & II
Lectionary: 178

Hwm LN Francis Xavier, ua Leej Choj

Zaj Nyeem Ib: HX 26: 1-6

1 Hnub ntawd, nyob Yus Das teb lawv yuav hu zaj nkauj no:
"Peb muaj ib lub tsheej ruaj khov; nws muab txoj kev cawm peb los ua cov phab ntsa thiab lub ntsa zeb.
2 Nej cia li qhib cov rooj loog mas! Kom haiv neeg siab ncaj nkag los, yog haiv neeg uas ntseeg tiag.
3 Tus uas muaj ib lub hom phiaj ruaj khov koj txuag kom nws nyob thaj yeeb; nws nyob thaj yeeb vim nws tso siab rau koj.
4 Nej tso siab rau HUAB TAIS mus li, vim HUAB TAIS yog lub tsua uas yuav nyob ib txhiab ib txhis.
5 Nws yog tus ua kom cov nyob saum tej chaw siab poob rau qhov chaw qis; lub tsheej uas nyob saum qhov siab, nws ua kom poob rau qhov qis, kom vau hlo rau hauv av, thiab mus xyaw av.
6 Nws yuav raug cov neeg txom nyem muab ko taw tsuj rau hauv av thiab raug cov neeg pluag tshais ruam tsuj mus mus los los."

NPN 118: 1+8-9, 19-21, 25-27A

Txais: (26a) Kom tus tuaj ntawm Huab Tais lub npe tuaj nto koob meej.

Nej ua HUAB TAIS tsaug, vim nws siab zoo,
nws txoj kev khuv leej yuav nyob mus li.
Khiav los nkaum hauv HUAB TAIS zoo dua tso siab rau tib neeg,
Khiav los nkaum hauv HUAB TAIS zoo dua tso siab rau tej nom tswv.

Txais: (26a) Kom tus tuaj ntawm Huab Tais lub npe tuaj nto koob meej.

Nej qhib cov rooj vag mus hauv txoj kev ncaj rau kuv,
kuv yuav chaws mus, kuv yuav mus ua HUAB TAIS tsaug.
Ntawm no yog HUAB TAIS lub rooj vag;
tus neeg siab ncaj yuav tau nkag mus.
Kuv yuav ua koj tsaug, vim koj tau teb kuv, koj yog tus cawm kuv.

Txais: (26a) Kom tus tuaj ntawm Huab Tais lub npe tuaj nto koob meej.

HUAB TAIS, thov koj pub kev cawm rau peb!
HUAB TAIS, thov koj pub kev vam meej rau peb!
Kom tus tuaj ntawm HUAB TAIS lub npe tuaj nto koob meej.
Peb nyob hauv HUAB TAIS tsev foom hmoov zoo rau nej.
HUAB TAIS yog Tswv Ntuj, nws pub qhov pom kev rau peb..

Txais: (26a) Kom tus tuaj ntawm Huab Tais lub npe tuaj nto koob meej.

As Les Lus Yas: His Xais 55: 6

Txais: As les lus yas, As les lus yas

Nej nrhiav HUAB TAIS thaum nej tseem nrhiav tau nws;
nej hu nws thaum nws tseem nyob ze.

Txais: As les lus yas, As les lus yas

Zaj Ntawv Moo Zoo: Mas Tais 7: 21, 24-27

Yes Xus hais rau nws cov thwj tim tias:
21 “Tsis yog txhua tus uas hu kuv tias ‘Huab Tais, Huab Tais,’ thiaj yuav tau mus hauv Ntuj lub Ceeb Tsheej. Tiam sis yog tus uas ua raws li kuv Txiv nyob saum ntuj lub siab nyiam.
24 Txhua tus uas mloog kuv cov lus no, thiab ua raws li ntawd, mas nws piv tau rau ib tug neeg xyuam xim uas txhim nws lub tsev rau saum tsua.
25 Thaum los nag hlob, dej sab siv huam, cua tshuab ntsawj lub tsev ntawd, tab sis tsev tsis vau, vim lub tsev cog ruaj rau saum tsua.
26 Hos txhua tus uas hnov kuv cov lus no, tab sis nws tsis ua raws li ntawd, mas nws piv tau rau ib tug neeg ruam uas txhim tsev rau saum av xuab zeb.
27 Thaum los nag hlob, dej sab siv huam, cua tshuab ntsawj lub tsev, ces lub tsev vau tas thiab puas tas huv tib si.”

Thawj Hnub Rau Lis Piam ib Caij Tos Huab Tais Xyoo A B C Nruab Lis Piam Xyoo I & II
Lectionary: 179

Zaj Nyeem Ib: HX 29: 17-24

Huab Tais Tswv Ntuj hais li no:
17 Tshuav caij luv luv lawm xwb, Les Npas Nos yuav hloov los ua ib lub vaj txiv ntoo, ces sawv daws yuav saib tias lub vaj txiv ntoo yog ib lub hav zoo.
18 Hnub ntawd, cov neeg lag ntseg yuav hnov cov lus nyob hauv phau ntawv, hos cov dig muag cov qhov muag yuav dim ntawm qhov tsaus ntuj dub nciab, lawv yuav pom kev tuaj.
19 Cov neeg me yuav zoo siab hlo nyob hauv HUAB TAIS, cov pluag txom nyem yuav dhia hom khaj nyob hauv His Xas Lais tus Ntshiab.
20 Vim tias yuav tsis muaj tus ua nruj ua tsiv rau luag ntxiv, thiab tus khav tias nws loj dua lwm tus yuav ploj mus lawm; tas cov neeg uas nyas ntshis nrhiav ua qhov phem yuav raug muab tshem tawm tas,
21 xws li cov neeg uas hais ib lo lus xwb ua tau kom ib tug neeg yog tus txhaum, lawv yog cov cuab ntxiab ntawm lub rooj loog tos tus tuaj pab nws, ces tus neeg siab ncaj ua tus swb hais tsis tau dab tsi.
22 Vim li ntawd, HUAB TAIS, Yas Kos tsev neeg tus Tswv Ntuj, tus uas tau txhiv Has Nplas Has, nws hais li no: “Nyem no, Yas Kos yuav tsis txaj muag ntxiv; nyem no nws lub ntsej muag yuav tsis daj ntxiv.
23 Thaum Yas Kos cov me nyuam pom kuv cov hauj lwm kuv ob txhais tes ua nyob hauv nws, lawv yuav cav txog kuv lub npe ntshiab, lawv yuav cav txog Yas Kos tus Ntshiab, thiab lawv yuav ntshai His Xas Lais tus Tswv Ntuj.
24 Cov uas lub tswv yim xav yuam kev yuav kawm kom muaj kev to taub; cov uas pheej pom qhov tsis zoo xwb yuav raug mloog cov lus qhuab ntuas.

NPN 27: 1, 4, 13-14

Txais: (1a) Huab Tais yog kuv qhov pom kev thiab yog kuv txoj kev cawm.

Huab Tais yog kuv qhov pom kev thiab kuv txoj kev cawm;
Kuv yuav ntshai leej twg?
Huab Tais yog kuv lub chaw nkaum nyob hauv tas kuv lub neej,
Kuv yuav tshee vim leej twg?

Txais: (1a) Huab Tais yog kuv qhov pom kev thiab yog kuv txoj kev cawm.

Kuv tsuas thov ib yam ntawm Huab Tais xwb; qhov kuv nrhiav yog:
kom tau nyob hauv Huab Tais tsev niaj hnub hauv kuv lub neej,
Kom kuv tau ntsia ntsoov Huab Tais txoj kev zoo
thiab tau saib ntsoov nws lub tuam tsev.

Txais: (1a) Huab Tais yog kuv qhov pom kev thiab yog kuv txoj kev cawm.

Kuv ntseeg hais tias kuv yuav tau pom Huab Tais txoj kev nplua nuj
nyob hauv cov neeg ciaj sia lub teb chaws.
Nej ua siab loj tos ntsoov Huab Tias;
nej ua siab tawv qhawv, nej yuav tos ntsoov Huab Tais.

Txais: (1a) Huab Tais yog kuv qhov pom kev thiab yog kuv txoj kev cawm.

As Les Lus Yas

Txais: As les lus yas, As les lus yas.

Nej ntsia, peb tus Huab Tais yuav tuaj muaj hwj huam loj;
Nws yuav ua kom nws cov tub txib qhov muag pom kev.

Txais: As les lus yas, As les lus yas.

Gospel: MT 9: 27-31

27 Thaum Yes Xus mus hla thaj tsam ntawd, muaj ob tug neeg dig muag raws nws qab; nkawd qw qw hais tias : "Das Vis Leej Tub, thov koj khuv leej wb mas!"
28 Thaum Yes Xus nkag los rau hauv lub tsev lawm, ob tug dig muag los cuag Yes Xus, ces Yes Xus hais rau nkawd tias : "Neb puas ntseeg tias kuv ua tau qhov ntawd?" Nkawd teb tias : “Huab Tais, wb ntseeg.”
29 Ces Yes Xus kov nkawd qhov muag, nws hais tias: "Kom muaj tuaj rau neb raws li neb kev ntseeg."
30 Ces nkawd qhov muag qhib hlo. Yes Xus txwv nkawd nruj nruj tias: "Neb tsis txhob ua kom muaj neeg paub txog qhov no li!"
31 Tab sis thaum nkawd tawm mus lawm, nkawd tshaj txog Yes Xus rau tas ib cheeb tsam ntawd paub tas huv tib si.

Thawj Hnub Xya Lis Piam Ib Caij Tos Huab Tais Xyoo A B C Nruab Lis Piam Xyoo I & II
Lectionary: 180

Zaj Nyeem Ib: His Xais 30: 19-21, 23-26

Huab Tais, His Xas Lais tus Ntshiab hais li no:
19 Xis Yoos tsoom neeg uas nyob Yes Lus Xas Les, nej yuav tsis tau quaj ntxiv lawm. Huab Tais yuav ua zoo rau nej, vim nws hnov nej lub suab; nws hnov dheev nej lub suab xwb, ces nws yuav teb rau nej.
20 Txawm Huab Tais yuav muab cov mov txhawj xeeb rau nej noj thiab cov dej txom nyem siab rau nej haus los nej tus Xib Hwb yuav tsis tsiv nraim ntawm nej ntxiv, nej qhov muag yuav tau pom nej tus Xib Hwb.
21 Nej pob ntseg yuav hnov ib lub suab nrov ntawm nej nraub qaum tuaj tias: “Ntawm no yog txoj kev uas nej yuav tsum taug, txawm nej yuav mus rau sab xis los rau sab laug.
23 Nws yuav ua kom nag los ywg cov noob qoob noob loo uas nej tseb rau hauv av. Ces cov nplej uas tawm hauv av los yuav qab thiab yuav ntsu kawg nkaus. Hnub ntawd, nej cov nyuj yuav noj zaub nyob hauv tej lub tiaj nrag dav dav.
24 Cov heev nyuj thiab cov luj uas laij teb yuav noj cov quav nyab uas yog xuas duav hlau thiab duav nkaug hais rau noj.
25 Saum txhua lub roob siab thiab txhua lub pov roob siab, yuav muaj tej tug dej txhawv muaj dej ntws lug; thaum ntawd yog lub caij muaj sib tua loj ua kom tej pej thuam vau tas.
26 Ces lub hli yuav ci pom kev npaum lub hnub, hos lub hnub yuav ci pom kev tshaj xya npaug ntxiv, npaum li yog xya hnub ua ib hnub ci. Hnub ntawd HUAB TAIS yuav qhwv nws haiv neeg cov qhov txhab thiab yuav kho lawv cov nqaij raug nws nplawm ntuag kom zoo.

NPN 147: 1-2, 3-4, 5-6

Txais: (HX 30:18d) Txhua tus uas tos Huab Tais lawv txoj hmoov zoo.

Nej cav txog Huab Tais, vim nws siab zoo
nej hu nkauj cav txog peb tus Tswv Ntuj, vim nws hlub neeg;
tsim nyog peb cav txog nws.
HUAB TAIS rov tsa Yes Lus Xas Les kom sawv;
nws sau His Xas Lais cov neeg tawg tas rov los ua ke.

Txais…

Nws kho cov neeg lwj siab mob ntsws kom zoo,
thiab nws qhwv lawv tej qhov txhab rau.
Nws suav cov hnub qub saib muaj pes tsawg lub;
nws hu lawv cov npe ib lub zuj zus.

Txais…

Peb tus HUAB TAIS loj thiab muaj hwj huam tas nrho;
nws txoj kev thoob tsib tsis muaj qhov txawj kawg.
HUAB TAIS tsa cov neeg me cai;
nws thawb kom cov siab phem ntog rau hauv av.

Txais…

As Les Lus Yas: His Xais 33: 22

Txais: As les lus yas, As les lus yas

HUAB TAIS yog tus txiav txim rau peb, tus muab txoj cai rau peb;
nws yog peb tus vaj, yog tus yuav cawm peb dim.
.
Txais: As les lus yas, As les lus yas

Zaj Ntawv Moo Zoo: Mas Tais 9: 35-10:1, 5A, 6-8

35 Yes Xus mus ncig txhua cov nroog thiab cov zos huv si, nws qhuab qhia sawv daws nyob hauv lawv cov tsev txoos, nws tshaj lub Moo Zoo txog lub Ceeb Tsheej, thiab nws kho sawv daws tej txiab xeeb thiab tej mob nkeeg tas huv si.
36 Yes Xus pom tsoom pej xeem, nws muaj lub siab hlub lawv, vim lawv sawv daws sab thiab qaug zog zoo li ib co yaj tsis muaj tsw saib
37 Yes Xus thiaj hais rau nws cov thwj tim tias : "Qoob loo ntau kawg, tab sis cov tub zog tsawg.
38 Nej thov tus tswv qoob kom nws xa ib co tub zog tuaj sau nws cov qoob."
10 1 Yes Xus hu nws kaum ob leeg thwj tim kom los ntawm nws. Nws muab hwj huam rau lawv kom lawv ntiab tau dab tawm, thiab kho tau txhua yam txiab xeeb thiab txhua yam mob nkeeg kom zoo.
5a Yes Xus xa kaum ob leeg no mus tshaj lub Moo Zoo, nws qhia lawv tias :
6 “Nej mus nrhiav cov yaj ploj hauv tsev neeg His Xas Lais.
7 Thaum nej taug kev, nej tshaj tias: ‘Ntuj lub Ceeb Tsheej tuaj txog ze lawm.’
8 Nej kho cov mob kom zoo, nej tsa cov tuag kom sawv rov los, nej kho cov mob ruas kom huv tuaj, nej ntiab dab kom khiav mus. Nej tau txais dawb, nej kuj yuav pub dawb rau luag thiab.”

Hnub Ob Lis Piam Ob Caij Tos Huab Tais Xyoo A B C Nruab Lis Piam Xyoo I & II
Lectionary: 181

Zaj Nyeem Ib: HIS XAIS 35: 1-10

1 Lub teb chaws tsis zoo ua noj thiab thaj av qhuav yuav dhia hom khaj; lub teb chaws hav suab puam yuav zoo siab thiab yuav tawg paj.
2 Nws yuav tawg paj ncw nra paug thiab yuav zoo siab, yuav hu tej zaj nkauj lom zem; luag yuav muab Les Npas Nos lub koob meej rau nws; lawv yuav tau pom Roob Kas Mes thiab Sas Loos lub hwj chim, yog HUAB TAIS lub koob meej, yog peb tus Tswv Ntuj lub hwj chim.
3 Nej ua kom cov tuag tes rov muaj zog, kom cov hauv caug ntshaus rov khov tuaj.
4 Nej hais rau cov siab me tias: "Nej ua siab loj! Nej txhob ntshai! Ntsia saib, nej tus Tswv Ntuj tuaj lawm! Nws tuaj ua kom nej tau ntsej muag; nws nqa paj tshab saum ntuj tuaj, nws tuaj cawm nej.
5 Ces cov dig muag ob lub qhov muag yuav rua hlo, cov lag ntseg ob lub pob ntseg yuav qhib plho.
6 Tus neeg ceg tawv yuav dhia nrawm xws tus muas lwj, tus nplaig txhav yuav hu tau nkauj. Dej yuav txhawv tawm hauv cov teb chaws suab puam los, tej tus dej loj yuav ntws tawm hauv cov teb chaws av qhuav los.
7 Thaj av suab puam kub lug yuav hloov ua pas dej, lub teb chaws tshaib dej yuav txhawv dej ntws lug tawm los; thaj chaw uas hma nyob yuav hloov ua hav iav muaj tauj deg thiab muaj ncaug ua ntawv.
8 Nyob ntawd, yuav muaj ib txog kev loj, tis npe hu ua "txoj Kev Ntshiab." Tus neeg tsis huv yuav mus tsis tau saum txoj kev ntawd; yog cia rau cov uas yuav taug txoj kev ntawd xwb; Txawm lawv yog ib co neeg vwm los yuav tsis mus yuam kev thaum lawv taug txoj kev ntawd.
9 Yuav tsis muaj tsov nyob ntawm txoj kev, tsis muaj tej tsiaj qus tsiaj tsiv nyob ntawd, yuav nrhiav tsis pom li, tsuas yog cov uas raus txhiv lawm xwb thiaj taug txoj kev ntawd.
10 Ces cov neeg uas HUAB TAIS txhiv yuav rov qab los, lawv yuav nce mus pem Xis Yoos nrog suab hu nkauj; txoj kev zoo siab mus ib txhiab ib txhis yuav nyob saum lawv taub hau. Lawv yuav txais kev zoo siab thiab kev luag ntxhi, kev tu siab thiab quaj ntsuag yuav ploj ntais mus.

Nkauj Paj Nruag 85: 9AB+10, 11-12, 13-14

Txais: (H X 35:4f) Peb tus Tswv Ntuj yuav tuaj cawm peb!

Kuv yuav hnov tias Tswv Ntuj hais dab tsi.
Huab Tais nws tshaj txog kev thaj yeeb rau nws haiv neeg,
Nws txoj kev cawm los txog ze ze cov hwm nws lawm,
nws lub hwj chim nyob txawm hauv peb lub teb chaws.

Txais: (H X 35:4f) Peb tus Tswv Ntuj yuav tuaj cawm peb!

Kev ua zoo thiab kev tseeb yuav sib ntsib,
kev ncaj thiaj kev thaj Yeeb yuav los sib puag.
Kev Tseeb yuav nthaw kaus tawm hauv ntiaj teb los,
kev ncaj yuav dauv muag ntsia saum ntuj tuaj.

Txais: (H X 35:4f) Peb tus Tswv Ntuj yuav tuaj cawm peb!

HUAB TAIS yuav pub nws cov txiaj ntsim puv npo,
peb cov av yuav ntsu qoob loo ntau tshaj qub.
Kev ncaj yuav mus ua nws ntej,
Kev cawm yuav taug raws txoj kev nws hneev taw rhawv.

Txais: (H X 35:4f) Peb tus Tswv Ntuj yuav tuaj cawm peb!

As Les Lus Yas

Txais: As les lus yas, as les lus yas.

Nej ntsia tus vaj yuav tuaj, yog tus Huab Tais kav ntiaj teb,
nws yuav daws lub nra uas tsuam peb kom peb nti tsis taus.

Txais: As les lus yas, as les lus yas.

Ntawv Moo Zoo: LK 5: 17-26

17 Muaj ib hnub, thaum Yes Xus tab tom qhia sawv daws, muaj ib cov Fas Lis Xais thiab ib co Kws Txoj Cai tuaj ntawm txhua lub zos hauv xeev Nkas Lis Lais, xeev Yus Das, thiab tuaj Yes Lus Xas Les tuaj, lawv sawv daws zaum nyob ntawd. Huab Tais lub hwj huam ua kom Yes Xus kho tau cov neeg mob zoo kuj nyob hauv nws thiab.
18 Muaj ib pab neeg kwv ib tug tuag ceg saum ib lub txaj tuaj. Lawv nrhiav kev yuav nqa tus tuag ceg mus rau hauv tsev, coj nws mus tso rau ntawm Yes Xus xub ntiag.
19 Tab sis lawv tsis tau kev nqa tus tuag ceg mus rau sab hauv, vim neeg coob dhau. Ces lawv nce mus saum ru tsev, lawv dauv tus tuag ceg pw saum nws lub txaj, nqes ntawm cov kis thwj cib mus rau hauv nruab nrab ntawm Yes Xus xub ntiag.
20 Yes Xus pom tias lawv muaj kev ntseeg, nws hais tias: "Ntawm koj, mas koj cov txhaum daws tas lawm."
21 Ces cov Kws Ntawv Ntshiab thiab cov Fas Lis Xais xav twj ywm hais tias: "Tus neeg ntawd yog leej twg, cas nws thiaj hais ib co lus thuam Ntuj? Leej twg yuav daws txhaum tau? Kawg yog Tswv Ntuj tib leeg xwb."
22 Yes Xus twb paub qhov lawv xav hauv nruab siab lawm, nws hais rau lawv tias: "Vim li cas nej thiaj xav tej zaj tswv yim li ntawd hauv nej siab ?
23 Lo lus twg yog lo hais yooj yim dua, lo lus tias : 'Koj cov txhaum daws tas lawm,' los yog lo lus tias : 'Koj sawv, koj mus kev ?'
24 Ua li mas, kom nej paub tias Neeg Leej Tub muaj hwj huam daws txhaum tau nyob ntiaj teb no,” ces Yes Xus hais rau tus tuag ceg tias: “Kuv hais rau koj: koj sawv, koj nqa koj lub txaj, koj rov mus tsev."
25 Tam sis ntawd, tus tuag ceg sawv tsees los nyob ntawm sawv daws xub ntiag, nws nqa lub txaj uas thaum tuaj nws pw, nws rov mus tsev, nws cav txog Tswv Ntuj.
26 Sawv daws yoob tas, lawv cav txog Tswv Ntuj. Lawv ntshai kawg, lawv hais tias: "Hnub no, peb tau pom tej yam tsis txaus ntseeg li!"