HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


    PHAU NTAWV NTHUAV    LUB THAJ CAV TXIAJ NTSIM Empty

Latest topics

» Ua tsaug ntees.
by Maiv Tooj 21st February 2024, 11:33 pm

» DUAB MAB LIAB TSHIAB.
by Maiv Tooj 16th February 2024, 8:39 am

» COV ZAJ NYEEM NRUAB LIS PIAM XYOO I 2022-2023
by Mim 10th August 2023, 7:04 am

» Cov zaj nyeem Hnub Chiv Xyoo A. 2022-2023
by Maiv Tooj 20th July 2023, 11:21 pm

» SAJ YES XUS KEV TXOM NYEM
by Maiv Tooj 7th March 2023, 6:34 am

» Tswv Ntuj ua tau tag puas tsav yam, F. Ts. Cob Tsib teb
by Mim 3rd February 2023, 11:33 am

» DAIM NTAUB QHWV TUAG NYOB TURIN
by Mim 29th January 2023, 9:24 am

» Txiv plig Tshaj Sawm (Harry Thiel ) Lub neej
by Maiv Tooj 28th December 2022, 8:25 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 28th December 2022, 7:55 am

» COV ZAJ NYEEM NRUAB LIS PIAM XYOO II 2021-2022
by Mim 24th November 2022, 9:06 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 18th November 2022, 8:28 am

» Cov Txiv Plig ua tau muaj txiaj ntsim rau Peb Hmoob nyob Los Tsuas, Thaib teb ua ntej & tom qab 1975
by Maiv Tooj 14th November 2022, 10:03 am

Suav neeg tuaj saib, txij hnub 17/09/2010 los mus.


    PHAU NTAWV NTHUAV LUB THAJ CAV TXIAJ NTSIM

    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5526
    Date d'inscription : 2009-08-18

        PHAU NTAWV NTHUAV    LUB THAJ CAV TXIAJ NTSIM Empty PHAU NTAWV NTHUAV LUB THAJ CAV TXIAJ NTSIM

    Post  Maiv Tooj 26th May 2017, 9:31 am





    PHAU NTAWV NTHUAV

    LUB THAJ CAV TXIAJ NTSIM

    THIAB NTHUAV LUB KOOM TXOOS
    7 LUB CIM NQA TXIAJ NTSIM TUAJ
    RAU COV NEEG NTSEEG.

    Yaj Zoov Ntxheb Xib Hwb.



    Lub thaj cav txiaj ntsim yog lub thaj txi Ntuj. Nyob hauv lub thaj cav txiaj ntsim no, muaj ntau yam zoo kawg. Muaj lub ntshiab nyob hauv kev ntseeg, txij lub hauv paus los mus kawg rau lub ntsis.
    Ib tug neeg ntseeg muab siab rau, raws tus Leej Choj los tus Xib Hwb, ua thaj cav txiaj ntsim. Mas nws tau txais txhua yam zoo los nres nws lub siab nyob ruaj hauv kev ntseeg.
    Nyem no, yuav nthuav tias, muaj dab tsi zoo nyob hauv lub thaj cav txiaj ntsim no:
    1. Lej Choj los Xib Hwb coj, sawv daws ua ntoo cuam lub cim. Yog thawj los lus hu txog peb Leeg Huab Tais, xws li muab tus yawm sij qhib qhov rooj tias:
    Peb xav nrog Tswv Ntuj ua ib cuab ib yim, xws li Leej txiv Leej Tub thiab Leej Ntuj plig. Thov tso lus rau peb.
    2. Peb ua ke hais zaj kuv lees txhaum, yog lo lus peb hais rau Tswv Ntuj tias, peb xav nrog Tswv Ntuj thiab tsoom kwv tij los tej txij nkawm sawv daws sib haum xeeb ua ke.
    Kom tsim nyog ua ib cuab ib yig nyob hauv, Tswv Ntuj kev nyiam kev hlub. Thov kom Tswv Ntuj zam txim daws txhaum rau peb. Thov peb Leeg Huab Tais khuv leej peb.
    3. Thaum peb hais zaj nyob pem ntuj... Peb txaus siab hlo nrog Ntuj cov Tshiab, nyob saum ntuj koom suab hu nkauj cav txog peb tus Huab Tais.
    Yog tus siab ntshiab siab huv, muaj koob meej nyob nto moo lug mus ib txhiab ib txhis. Tas ces Leej Choj hais ib zaj thov Ntuj qhib peb lub siab los txais Ntuj cov lus uas hnub no peb yuav nyeem.
    kom poob los ua ib cov txiam xws yug peb tus Ntuj Plig, zoo li peb lub cev tau txais ib hom txhiam xws noj yug peb lub cev. Tawm hauv lub thaj cav txiaj ntsim no los.
    4. Peb tsab ntawv uas nyeem, nrog thaj cav txiaj ntsim hnub no. Leej Choj los Xib Hwb nthuav raws li Ntuj cov lus nqa txoj sia tuaj rau neeg ntiaj teb tias:
    Zaj lus hnub no muaj dab tsi zoo rau peb neeg ntiaj teb khaws coj mus yug siav yug pa kom muaj zog ua lawv lub neej nyob ntiaj teb no.
    Tswv Ntuj nyiam lub sim ceeb neeg npaum li cas! Neeg yuav coj li cas kom Ntuj thiab neeg kev sib raug zoo thiaj nyob taus ua ke.
    Ntuj tau xaiv tej tus neeg siab ntshiab, dawb huv los tshaj Ntuj tej lus. Sib txuas zws ua ntu zus ua ntej li 1850 thaum Yes Xus tsis tau tuaj nyob ntiaj teb no.
    Cov lus nthuav Tswv Ntuj kev nyiam kev hlub yog hais puag thaum ntawd los txog lub zim txwv no. Thiab tseem yuav hais ntxiv mus txog thaum tsis muaj lub Sim ceeb no.
    Txij no yog Leej Ntuj Plig txib Cov Tuaj yeem ua Yes Xus cov Tiam Lis xa lub Moo Zoo mus thoob qab ntuj khwv pab Yes Xus tshaj mus ntxiv:
    Yog cov neeg nyob hauv Lub Koom Txoos Ka Tau Liv, uas yog Vaj Qhia ua tus Tahwj, cov Tswv Qhia, cov Leej Choj, cov Leej Tsob Hwb, thiab tas tsoom poj niam, txiv neej ua tub tshaj Ntuj lus nyob nrog tsoom ntseeg.
    Tswv Ntuj yuav txib txhua tus neeg li hais saum no, nrog Leej Ntuj Plig ua txoj hauj lwm xa Ntuj lub Moo Zoo mus txog thaum lub Sim Ceeb no kawg.
    5. Thaum Tswv Ntuj tseb Nws lo lus ntxhee lawm,lub Txoos sawv daws hais zaj Kuv ntseeg txog Tswv Ntuj.
    Yog Zaj qhia tias, yus ntseeg txij lub hauv paus los txog lub ntsis,Tas puas tsav yam muaj tuaj. Yog Tswv Ntuj Tib leeg xeeb kom muaj mas thiaj muaj nyob txawm los.
    Ntseeg tias, yog ib tug yawm sij qhib rooj ntug rau neeg tau los ntseeg txog Tswv Ntuj. Neeg thiaj muaj txoj sia nyob mus li.
    Peb hais tseeb rau Tswv Ntuj tias, peb ntseeg tas txhua yam Ntuj tau tsim los nyob. Thiab ntseeg txhua yam pom tau los pom tsis tau.
    Ntseeg txij lub hauv paus mus kawg lub ntsis thiab ntseeg mus rau yav tom ntej txhua yam muaj tseeb.
    Ntseeg tias Leej Pleev yog Tswv Ntuj Leej Tub, Nws sawv rov los, ntseeg txhua yam li Leej tub tau hais, ntseeg txog kev daws txhaum, ntseeg Neeg lub cev yuav sawv rov los muaj txoj sia nyob mus li.
    Zaj Kuv ntseeg, yog tus tseem yawm sij qhib neeg lub siab coj neeg tus Ntsuj plig mus ua Ntuj me nyuam. Thiab muaj tseeb li Tswv Ntuj tau hais, Ntuj pub cai rau neeg ua Ntuj li tub ki.
    6. Lub Txoos koom sib pab thov Ntuj. Peb tau hnov Tswv Ntuj cov lus los ntawm cov tsab ntawv uas peb tau nyeem los ntawd.
    Ntuj cov lus muaj nqes li ib hom txhiam xws yug neeg tus ntsuj plig, li neeg lub cev yuav tau mov yug kom nyob taus. Leej tib neeg thiaj tiv taus kev iab kev khwv, kev txom nyem.
    Leej Tib Neeg kev thoob tsis tsis zoo li Tswv Ntuj kev thoob tsib. Lub ntiaj teb thiaj muaj kev txom nyem ntau. Peb thiaj thov Ntuj pab daws Ntiaj teb kev muaj teeb meem pob caus tawm mus.
    A. Thov Ntuj rau lub Koom Txoos Ka Tau Liv, kom cov neeg ntseeg npuab Yes Xus Pleev zoo. Nws yog Tswv Ntuj Leej Tub Twm Zeej, Nws muab Nws txoj sia, tuaj ua tus nqi txhiv neeg cov Ntsuj plig. Komneeg muaj txoj sia nyob mus li.
    Thiaj xub thov Ntuj tau Vaj Qhia, cov Tswv Qhia, cov Leej Choj, cov leej Tsob hwb, cov txiv neej los poj niam ua tub tshaj Ntuj lus nrog txhua tus neeg ntseeg.
    B. Thov Ntuj rau Cov thawj neeg, xws li cov Vaj thiab cov txoov tswv Tim kav ntiaj teb. Kom muaj kev sib raug zoo, Lub Sim Ceeb. thiaj tsis muaj kev txom nyem nrog kev mob nkeeg...
    C. Thov Ntuj rau cov Neeg txom nyem, vim thaum muaj neeg txom nyem tuaj lawm, mas lawv kho siab tu siab, ces lawv tsis xav mloog Ntuj lus los mloog neeg lus.
    Lawv tsuas paub ua kev txhaum kom zoo lawv siab, ces yuav muaj kev sib ntxub ntau heev. Teeb meej yuav muaj ntau yam ua rau neeg daws tsis tas. Yuav muaj ntau txhiab vam leej neeg tuag nrog kev ua txhaum.
    Lub Koom Txoos Ka Tau Liv ua hauj lwm nrog Leej Ntuj Plig, lub Koom Txoos thiaj ua kom niaj hnub Chiv cov thaj cav txiaj ntsim muaj zaj thov Ntuj rau cov neg txom nyem no tsis tu ncua.
    Leej Ntuj Plig tu siab thiab txawj xeeb heev rtxog cov neeg txom nyem no kawg. Ntshai tsam sawv daws cia li tso tes khiav mus tuag ua tsheej pab tsheej pawg nrog kev ua txhaum.
    Yam tsis muaj kev tso siab thiab ntseeg tias Ntuj yeej pab tau. Leej Ntuj Plig thiaj nco ntsoov tshoj cov neeg nyob kaj lug tsis muaj teeb meem nco ntsoov txog lawv.
    D. Thov Ntuj rau tej xwm tshwm sim tuaj tshiab, li dej nyab los hluav taws kub. Av qeeg ua rau neeg raug xwv txheej, thov Ntuj kom cov muaj pab cov rau kev txom nyem, kom lawv muaj lub siab nyob tuaj tus...
    E. Thov Ntuj rau cov tuaj ua ke hnub no, Tswv Ntuj tau pub txiaj ntsim ntau kawg. kom sawv daws nco txog Ntuj txiaj ntsim rau tej kev Ntuj hlub sawv daws dhau los lawd.
    Txawj sib nyiam li Ntuj tau nyiam peb nyob ua kev, thiab kho peb lub siab kom zoo tuaj tsim nyog ua phooj ywg nyob ua Ntuj tej tub ki ntshiab huv.
    7. Leej Choj mam los cev mov cev cawv, yog npaj siab ua lub txoos txi Ntuj. Nyob hauv ntu no yog qhia tas txhua yam hauj lwm tawm ntawm neeg kev iab kev khwv los.
    Leej Choj thiaj hais lo lus tias,peb cav lus zoo txog koj, Tswv kav lub Sim Ceeb Peb tau txais mov los ntawm koj lub siab dav los.
    Cov mov no yog ntiaj teb av txi txiv, yog neeg hauj lwm tsim, peb muab los cev rau koj, kom txia ua cov mov pub txoj sia. Cov cawv kuj hais ib yam:
    Cov cawv no yog ntoo txi txiv, yog neeg hauj lwm tsim, peb muab los cev rau koj. Kom txia ua lub Ceeb tsheej cov cawv.
    Tswv Ntuj, peb yog ib co neeg me, thov koj txais thaj txi Ntuj peb npaj rau ntawm koj xub ntiag. Koj ntxuav peb lub siab, koj yaug peb cov txhaum pov tseg. Thov koj pom zoo txais peb thaj txi Ntuj. Yog thaj tshaj Tswv Ntuj lub koob meej thiab cawm lub qab ntuj neeg.
    8. Zaj Faj Tim Huab Tais, zaj no peb zoo siab hlo cav txog Huab Tais siab zoo, siab Ntshiab nyob ntiaj teb no mus nto plaws txheej ntuj siab saud.
    Peb koom nrog Ntuj cov Tshiab thiab tsoom Leej ntshiab, xws li peb tsoom poj koob yawm koob siab ntshiab siab huv. Nyob txheej ntuj saud.
    Hu nkauj cav txog tusTswv Ntuj muaj koob meej nyob nto moo lug mus txheej dhau txheej, thiab muaj txoj sia nyob mus li.
    9. Leej Choj rov cev mov zaum ob, Yog Thaj cav txij ntsim lub ntsiab qhov loj tshaj plaws. Yog lub caij Leej Choj rub Yes Xus nqes los nyob hauv lub Cim Yug.
    Kom cov mov no txia ua Yes Xus lub Cev, thiab cov cawv no txia ua Yes Xus cov Ntshav. Lo lus uas Leej Choj hais ntawd, yog Yes Xus lo lus.
    Yes Xus hais rau Nws cov Thwj Tim tias: NEJ SAWV DAS TXAIS ,NEJ NOJ, YOG KUV LUB CEV RAUG PUAS, KOM TAU PAB NEJ.
    Yes xus hais ntxiv tias: NEJ SAWV DAWS TXAIS, NEJ HAUS. YOG LUB NTIM RAU KUV ROJ NTSHA, COG LUS TSHIAB NYOB MUS LI. YOG ROJ NTSHA YUAV NTWS LOS DAWS NEJ, THIAB TSOOM SID COV TXHAUM. NEJ YUAV UA LI NTAWD, KOM TAU NCO TXOG KUV.
    Txoj kev ntseeg txog Tswv Ntuj lub paus txog lub ntsis nyob tas nrho rau hauv zaj txi Ntuj no. Yog Tswv Ntuj txoj kev txhiv peb los ua neeg twj li.
    a- Leej Choj thov Ntuj thiab cav lus zoo txog Tswv Ntuj tias, Nws Leej tub Yes Xus Pleev txoj kev tuag thiab Nws kev sawv rov los. Yog peb txoj kev ua tsaug. kom peb tsim nyog tuaj sawv nyob ntawm Tswv Ntuj xub ntiag hawm txog Tswv Ntuj.
    Kom cov neeg txais leej Pleev lub cev thiab cov Ntshav, Leej Tswv Yim Ntshiab txoos peb los ua ib ke,
    b. Thov kom Huab Tais nco txog lub Koom Txoos nyob thoob ntiaj teb. Nrog Vaj Qhia, cov Tswv Qhia,nrog txhua leej coj koj hais neeg, sawv daws hlob mus nyob hauv txoj kev nyiam
    c. *Koj nco txog peb tsoom kwv tij tso lub ntiaj teb no tseg; Lawv tau tso siab tias, muaj lub zim txwv yuav sawv rov los, Nco txog zeej tsoom neeg dua nras.*
    Koj txais lawv sawv daws los cuag koj, nyob pem koj lub teb chaws tshav ntuj nrig.
    { = Zaj muaj tus C pib saum no yog ib zaj tseem ceeb heev rau peb Hiav Hmoob. Vim Hmoob cov kab lis kev cai tua tsiaj txhu ua dab ua qhua muaj raws li Yes Xus lub Koom Txoos zaj cav txiaj ntsim no kiag thiab.}
    Hmoob cov kab ke hu plig, ua nyuj dab npua tais, dab roog xwm kab, thiab tua tsiaj tus txhuv txais niam txiv kwv tij txheeb ze tuaj txog yus vaj yus tsev.
    Cov kab ke noj nqaig haus dej haus cawv ntawd, haum raws nraim li Ka tau Liv lub Cim ua thaj Cav Txiaj Ntsim.
    Tas txhua lo lus uas tau hais ua ntej Yes Xus tsis tau yug los Tswv Ntuj twb txib cov Yaj Saub kom xub hais ua ntej. Los hais li Yes Xus hais lub caij Nws nyob, uas hais txog tus Yaj dawb huv muab los txi Ntuj.
    Muab los piv rau Tswv Ntuj Leej tub, Nws rov muab Nws los txi rau Leej Txiv. Kom yog tus dawb huv ntxim Leej Txiv Tswv Ntuj siab. Leej tib neeg mas lawv hais tias:
    Yog yus ua ib thaj txi Ntuj, zoo mas yuav tua ib tug tsiaj los pauj rau Ntuj kom Ntuj tso kev npau taws tseg, kom Ntuj zoo siab tuaj. Zoo li cov dab neeg uas luag, muaj nyiaj ntau muab nyiaj zais cia lawm.
    Mas muab ib tug neeg tua txi, cia zov cov nyiaj ntawd, kom nyiaj zoo siab nyob. Nyiaj txhob txawj khiav los yaj ploj mus.
    Yam Tswv Ntuj nyiam, txawm yog Koj muaj thiab tsis muaj los koj txhob siv lwm tus neeg los ib tug tsiaj cov ntshav los ua thaj txi Ntuj.
    Koj muab koj tus kheej yam zoo los yam phem los tsis hais li,Tsuav yog koj tug xwb,los ua cov txim txi rau Ntuj mas yog yam zoo tas nrho uas Ntuj nyiam.
    Yam li: Thaum tus Leej choj hais zaj no, Koj muab koj lub cev uas Tswv Ntuj tau tsim los, cev rau Ntuj. Zoo los thov kom Ntuj txais yuav, phem los thov kom Ntuj pab koj hloov kom txawj zoo tuaj rau lwm zaus.
    Los koj muab koj kev zoo siab, uas yus niam yus txiv tau thov kom Ntuj muab rau yus. Los tej yam hauj lwm yus txawj ua tawm ntawm, yus lub Tswv Yim thiab ntawm yus tes taw los, cev ua ib co txim rau Tswv Ntuj.
    Yog koj xav ua kev zoo siab rau koj ib tug neeg txheev ze, mas koj caw nws nrog koj mus ua thaj cav txiaj ntsim kom neb sib haum xeeb nyob hauv Tswv Ntuj kev nyiam kom neb tau ua phooj ywg mus ib sim neej nyob ntawm T. N.
    Mas zoo dua, Koj tua ib tug nyuj los noj ua kev sib hlub. Nyob hauv tus tsiaj ntawd, muaj tej lub ntsiab lus tsis to taub zoo txog! Tsam tus tua tsiaj, nws xav tias kuv ua kom teb chaws qhuas tias, kuv txawj ua neej kawg...
    Tus tau tua nyuj pub luag noj, yog nws xav li no, ces nws tau txais koob meej zoo los ntawm ib co neeg los. Nws twb zoo ua ntej nyob ntawm neeg xub ntiag lawm.
    Nyob rau Ntuj sab mas Ntuj saib tias nws yog neeg zoo rau neeg ces cia neeg muab koob meej thiab neeg qhuas mus.
    Thaum cov neeg qhuas dua mus tas, ces koob meej kuj nrog neeg ploj mus ua ke ces tsis muaj lawm. Ua li mas yog tus paub thaj cav txiaj ntsim no zoo.
    Mas tab yog nws muaj txhaum ntau los nws mus thov txhaum. Nws hais tias, kuv tuaj kuv tsis muaj ib yam zoo tuaj cev rau Ntuj li. Kuv tsuas muaj ib nra txhaum, hnyav li hnyav tuaj qhia thiab cev rau Ntuj saib xwb.
    Tswv Ntuj koj Zam rau kuv, thiab pub txiaj ntsim pab kuv, kom kuv muaj zog tiv saib hnub twg kuv mam dim tau kev ua txhaum mus.
    Yog ib tug neeg paub lub thaj cav txiaj ntsim no zoo, nws mus tsis nruam li. mas nws niaj hnub ua tej lub koob tsheej rau nws tej txheeb ze, ua tsis paub tas li.
    10. Thaum peb hais Zaj Peb Txiv nyob saun Ntuj. Zoo li peb twb muab tej teeb meem zoo thiab phem. hais qhia Tswv Ntuj tas lawm.
    Peb tau xaiv yuav qhov zoo lawm, ces peb los sib zeem ua txiv ua tub nyob hauv Tswv Ntuj lub Cuab xeem.Peb thov zeem Tswv Ntuj hu ua txiv, Kom Tswv Ntuj lees peb ua Nws cov tub ki, yog Yes Xus tau thov thiab qia rau peb.
    Kom Tswv Ntuj zam peb cov txhaum li peb sib zam luag nuj nqes. Thov kom Tswv Ntuj npo peb thaum peb raug kev ntxias.
    11. Thaum peb sib haum xeeb nyob hauv lub thaj cav txiaj ntsim no lawm. Leej choj hais Yes Xus Pleev lo lus xa kev thaj yeeb tias:
    Kuv tso kuv txoj kev thaj yeej rau nej, kuv muab kuv txoj kev thaj yeeb rau nej. Nej yuav sis nyiam sis hlub li kuv tau nyiam thiab hlub nej.
    Ces tus Leej Choj los Xib Hwb xa Yes Xus kev thaj yeej tias: Tswv Ntuj ua Nej siab kaj lug. Nej rov sib xa kev thaj yeeb tias Tswv Ntuj ua koj siab kaj lug. rau ob tug nyob ntawm koj sab xis thiab sab laug, los sab xub ntiag los nraub qaum hais tib los lus li ntawd.
    12.Thaum peb hu zaj nkauj,Yaj txi Tswv Ntuj,Yaj ris qab ntuj neeg txhaum...
    Yes Xus txia ua tus Yaj Ntshiab huv uas nws rov muab Nws txi rau Ntuj... Nws hloov tus tsiaj uas peb muab txi rau Ntuj. kom tas lub qab ntuj neeg rov muaj txoj sia.
    Thaum peb yuav mus txais lub Cim Yug, zoo li Haiv Hmoob cov kev txi tsiaj. peb yuav noj tus tsiaj ntawd cov nqaij los pauj dab qhuas.
    Ces Leej Choj thiaj hais ib co lus cav txog Yes Xus Pleev ua raws li Leej Txiv lub siab, haum nrog Leej Tswv Yim lub Hwj Huam.
    Nws thiaj tuaj yeem tuag kom tau ua cov paj tsab. Txhiv neeg ntiaj ntiaj teb dim ntawm kev ua txhaum. Thov Koj txuag peb kom peb coj koj cov lus qhia, txhob nrug deb ntawm koj mus.
    Ces peb ua kev txais lub Cim yug. Leej Choj tsa lub Cim Yug nws hais tias:
    Nej ntsia tus Yaj Txi Tswv Ntuj, nej ntsia tus ris qab ntuj neeg txaum! Cov uas Tswv Ntuj caw lawv tuaj noj Leej Yaj rooj qav mas lawv txoj hmoo zoo.
    Sawv daws hais tias, Huab Tais kuv tsis tsim nyog txais koj tuaj hauv kuv vaj tsev. Thov koj hais ib los, mas kuv lub siab yuav zoo hlo. `
    Leej Choj cev lub Cim Yug los, nws hais tias, Leej Pleev lub cev. Tus txais teb tias, ua li.
    Thaum kawg, Leej Choj thov Ntuj txiaj ntsim rau pab neeg tuaj ua lub txoos cav txiaj ntsim tas. Nws Foom Hmoov zoo rau Sawv daws.
    Thov kom Huab Tais Leej Txiv. +. ...
    Xib Hwb xa Tswv Ntuj kev kaj siab lug rau zeej tsoom, ces lub txoos xaus.
    Lub txoos cav txiaj ntxim kuv tau nthuav li no, Yog tus xav paub kom tseeb dua no. Nws yuav khaub zig txog Leej Tswv Yim pab qhia thiaj to taub zoo dua txog.


    Yaj Zoov Ntxhev X.H.
    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5526
    Date d'inscription : 2009-08-18

        PHAU NTAWV NTHUAV    LUB THAJ CAV TXIAJ NTSIM Empty Re: PHAU NTAWV NTHUAV LUB THAJ CAV TXIAJ NTSIM

    Post  Maiv Tooj 28th June 2018, 4:01 am



    NTHUAV LUB TXOOS UA THAJ CAV TXIAJ NTSIM.

    Thaj cav txiaj ntsim, yog thaj txi Ntuj, uas hnub chiv cov neeg ntseeg mus koom ua nrog ib tug Txiv Leej Choj. Xws li niaj hnub ua, yog muaj neeg coob mas lawv ua ob peb thaj txi Ntuj li peb paub no.
    Nyob hauv thaj txi Ntuj, mas muaj qab hau kawg! Thaj txi Ntuj no, mas hloov tau txhua yam uas muaj nyob raws li Hmoob tej kab ke cai uas Hmoob ua los tuav tseev pov hwm, txhua yam kev txhawj xeeb.
    Zoo li cawm Hmoob txoj sia nyob hauv kev npau suav phem, kev txom nyem, kev mob nkeeg, kev hu plig kev txhawj xeeb txhua yam tib si.
    Kom lub neej tau nyob kaj siab lug tsis txob tsis txhawj.

    1, Thaum yuav pib ua mus, muaj ib zaj nkauj hu los ua kev cai qhib tos txiaj ntsim. Cav txog txhua lub txiaj ntsim uas muaj nyob hauv lub thaj cav txiaj ntsim no.

    2. UA NTOO CUAM LUB CIM.
    Leej Choj ua ntoo cuam lub cim los caw tsoom neeg ntseeg sawv daws los koom nrog Tswv Ntuj peb leeg ua ke. Kom yog kev sib zeem los ntawm Tswv Ntuj thiab cov neeg ntseeg tias, peb neeg thiab Tswv Ntuj yog Ib cuab ib yig tiag.
    Txij lub hauv paus los mus nto lub ntsis,Tswv Ntuj yuav coj thiab pov hwm kom muaj tseeb li Ntuj tau cog lus los cawm neeg ntiaj teb.

    3. ZAJ KUV LEES TXHAUM.
    Leej Choj foom kev kaj lug tuaj tias:
    Nej muaj lub txiaj ntsim thiab kev kaj siab lug tuaj, ntawm peb Leej Txiv thiab ntawm Huab Tais Leej Tub Yes Xus pleev tuaj.
    Lub txoos teb tias, peb cav lus zoo txog peb tus Huab Tais Pleev Leej Txiv.

    A. Ces Leej Choj qhib hais zaj kuv lees txhaum, Peb neeg txhua tus yuav muab peb lub cev, lub siab thiab peb tus Ntuj Plig, los ua ib co txim ntshiab. Kom zoo los ua cov txim txi Ntuj, ntxim Tswv Ntuj siab.

    B.Thaum tab tom hais zaj lees txhaum.
    Kom tsim nyog muab peb lub siab lub cev thiab tus Ntsuj Plig los cev rau Tswv Ntuj,haum nrog Ntuj kev nyiam kev hlub, yog tsim nyog lawm thov kom Tswv Ntuj khuv leej peb.
    Peb kuj yuav qhia Tswv Ntuj tias, peb xav nrog tsoom txheb ze, xws li peb tej niam tej txiv, los tej txij nkawm thiab tsoom tub ki sib haum xeeb, ua ke nyob hauv Tswv Ntuj txoj kev nyiam kev hlub.
    Thov kom Tswv Ntuj zam peb cov txhaum mus. Kom tas nrho, peb thiaj tsim nyog los ua Tswv Ntuj tsoom tub ki.
    Thov kom peb txawj sib yoog, txawj sib mloog lus, txhob muaj kev sib ntxub nrog kev sib cav sib ceg.
    Thiaj tsis muaj kev ua plaub ua ntug li yog ib cuab neeg nyob hauv Tswv Ntuj.

    4. ZAJ HUAB TAIS KOJ KHUV LEEJ YUAS.
    Peb thov kom peb leeg Huab Tais, koom ua ib tug Tswv Ntuj, hlub peb tsoom neeg muaj txhaum. Coj peb los nyob ua kev Hauv Lub Txiaj ntsim sib haum xeeb Thov Huab Tais khuv leej peb mog.
    Kom peb tsim nyog tuaj ua thaj cav txiaj ntsim no, tib lub caij peb hais zaj no, mas peb nco txog tus uas peb nrog muaj lus uas peb sib yws sib cav thiab sib npau taws rau. Nyias txiav nyias siab sib zam mus.

    5. ZAJ NYOB PEM NTUJ.
    Peb los koom nrog tas nrho 99 phiaj tshiab, nyob pem ntuj cav txog peb tus Tswv Ntuj. Yog tus siab ntshiab siab huv, muaj kev nyiam kev hlub txhua yam, nyob ntiaj teb no mus nto plaws rau saum ntuj.
    Ua tsoom Tshiab cav txog Nws mus li thawm niaj thawm hnub nyob mus li.

    6. LEEJ CHOJ HAIS ZAJ THOV NTUJ.
    Thov Tswv Ntuj txiaj ntsim koob hmoo los ntawm, Nws tej lus muaj koob hmoov tsim nuj tsim nqi rau peb. Kom peb txais tau cov lus pub txoj sia tuaj rau peb, zoo tshaj plaws li cov pov haum thiab cov hmoov nyiaj hmoov kub los nrog peb.

    7. UA NTEJ YUAV NYEEM ZAJ NTAWV MOO ZOO.
    Muab ib zaj nkauj hais txog Yes Xus sawv rov los, yog zaj As les lus yas, Zaj no yog lus ceeb toom tias, Tswv Ntuj zaj lus yuav tawm tuaj, xws li Yes Xus sawv hauv cov tub tuag teb los. Thaum Yes Xus sawv rov los mas tas txhua yam yuav hloov los ua yam tshiab uas tsis tau pom muaj dua li.

    8. Nyob hauv peb tsab ntawv uas yog Tswv Ntuj cov lus foom los ntawd. Zoo li ob tsab ntawv thiab ntawv Moo Zoo.
    Yog Tswv Ntuj cov lus muaj txoj sia thiab nrog kev thoob tsib kev nplua nuj thiab yog tsoom Ntsuj Plig lub zam ci ntsa uas tsoom Ntuj Plig yuav hnav. Kom dawb huv, nyob kom mus kav laus. Rau lub neej yuav nyob mus li ib txhiab ib txhis.

    9. TUS LEEJ CHOJ LOS XIB HWB NTHUAV LUS.
    Thaum yuav nyeem ntawv Moo Zoo, tus nyeem xub ceeb toom ua ntej tias Tswv Tuj tuaj lawm nrog nej nyob. Lub txos txais tos tias, Tswv Ntuj kuj nrog koj nyob no thiab
    Tus nthuav lus no, nws nthuav li Leej Tswv Yim Ntshiab coj nws kev. Hos cov txais Tswv Ntuj lo lus, nyias txais raws li Leej Ntuj Plig qhib nyias lub tswv yim thiab qhia.
    Nyias yuav txais mus raws li Leej Tswv Yim tso los, Txawm tus nthuav nws nthuav tig nus rau lwm sab, los cov txais nyias txais mus rau nyias zaj li Leej Ntuj Plig tseb los.
    Cov mloog thiab txais, mas qee leej tseem mus deb dua li tus nthuav lawm thiab.
    Kuj muaj tej tus uas lawv txais tsis tau los lawv mem tsis tau tias, Tswv Ntuj xav hais dab tsis los muaj.
    Kuj muaj tej tus uas lawv lub siab tsis nyob rau thaum txais Ntuj lus, lawv muaj ib tug dab ntub muab lawv xwv pw tsaug zog ces lawv tsis hnov Tswv Ntuj tej lus kiag li los muaj.

    10. UA ZAJ THOV NTUJ.
    Muaj 5 nqis lus thov:
    A.Thov Ntuj pov hwm Ntuj pab neeg, nyob hauv lub Koom Txoos, uas lawv zeem Tswv Ntuj ua lawv Leej Txiv.
    B. Thov Ntuj pab cov Nom tswv kav tej chaws, kom lawv ua xis Tswv Ntuj txoj kev nyiam kev hlub.
    C. Thov Ntuj rau txhua tus los txhua npoj neeg raug kev txom nye,
    D. Thov Ntuj rau tej yam xwv txheej uas muaj tuaj rau neeg pom thiab paub.
    E.Thov Ntuj rau pab neeg tuaj sib koom mloog Tswv Ntuj zaj lus qhuab qhia ua ke no.

    11. ZAJ KUV NTSEEG TXOG TSWV NTUJ.
    Tsoom ntseeg zeem thiab paub txog tias, Tswv Ntuj zaj lus nyob ua kev tas nrho rau hauv zaj kuv ntseeg no, yeej muaj tseeb li hais no tiag.

    12.PIB UA COV KAB KE TXI NTUJ.
    Yog ib co kab ke xws li ntiaj teb neeg cov kab ke txi rau txhua tus Tim tswv los cov Huab Tais txheej thaud uas tsis pom muaj lub cev. Neeg ntiaj teb siv qoob loo los tsiaj txhu los ua keb ke txi rau.
    Tswv Ntuj xav hloov thiab kho kom zoo dua, thiaj txeem mus txog rau neej nruab sib thiab xis li Tswv Ntuj nyiam.
    Tswv Ntuj thiaj kom Nws Leej tub muab yam tshiab yog kev txom nyem los ua tus nqi txi Ntuj. Nws muab nws tus kheej kev txom nyem, hloov ua zoo li tej qoob loo thiab tus tsiaj dawb huv los txi Ntuj.

    13.ZAJ FAJ TIM HUAB TAIS NTSHIAB.
    Ua ntej yuav rub Yes Xus, los nyob hauv cov ncuav mov thiab lub ntim cawv. Lub Txoos xub nrog Ntuj cov Tshiab nyob saum ntuj cav txog Tswv Ntuj lub koob meej thiab lub hwj huam hwj chim tias:
    Tswv Ntuj yog tus Ntshiab dawb huv zoo tshaj txua yam nyob ntiaj teb no thiab nyob saum txheej ntuj siab saud.

    14. NTU UA COV KAB KE TXI NTUJ.
    Yes Xus muab tus Ntuj qoob thiab Ntuj Hmab txiv cawv, los yees ua Nws lub cev thiab nws cov ntshav los ua cov txim txi rau Leej Txiv Tswv Ntuj.
    Yes Xus yog Leej Txiv tus tub twm zeej, Nws foom lus zoo rau lub ncuav mov tsis muaj poov Xab tas. Ces nws hais rau Nws cov Thwj Tim tias:

    A.Qhov no yog kuv lub cev, raug puas kom tau pab nej. Nej txais nej noj.
    Yes Xus, Nws kuj tuav lub ntim cawv,Nws foom lus zoo rau tas. Nws kuj hais tias:
    Lub ntim no yog rau kuv li roj ntsha. Yog cov ntshav cog lus tshiab,yuav ntws los daws tsom sid cov txhaum. Nej txais nej haus. Nej yuav ua li no, kom tau nco txog kuv.

    B. Thaum tus Leej Choj hais cov lus no, nws ib txhij rub Yes Xus nqes los nyob hau lub ncuav mov thiab rub Yus Xus nqes los nyob hauv cov cawv.
    Yes Xus tau los nyob hauv tiag, kom muaj raws li Yes Xus qhia rau Nws cov Thwj Tim

    15. MLOOG LEEJ CHOJ RUB YES XUS TUAJ.
    Peb Kim caug mloog tus Leej Choj hais cov lus ntawd, Peb txaus siab hlo muab peb tej haum lwm. Peb lub siab lub tswv yim luv cev, kev iab kev khwv kev txom nyem los npuab Yes Xus zaj lus nrog Yes Xus lub cev koom nyob ua ke.
    Los ua peb cov txim kom tsim nyog mus los nrog Yes Xus sib koom ua ib co txim zoo los txi Ntuj.

    16. RUB YES XUS LOS NYOB HAUV LUB CIM YUG LAWM.
    Tus Leej Choj rub Yes Xus los nyob hauv lub ncuav mov thiab cov cawv tas. Leej Choj mus hais paub zaj thov Ntuj li no:

    A. Thov Leej Txiv foom lus zoo rau cov txim no, kom muaj tseeb li Tswv Ntuj Leej Tub zaj txi Ntuj…Tswv Ntuj txuag thiab pov hwm kom yog qhov tseeb. Thiaj yog peb txoj kev ua Tswv Ntuj tsaug.

    B. Los hais zaj thov Ntuj txuag nws tsoom tub ki nyob hauv lub Koom Txoos. Hais txij li tus Vaj qhia uas yog tus kav lub Koom Txoos yog lub Pob Zeb Yes Xus tsa los nres lub Koom Txoos kom nyob khov kho.
    Kom dab phem cov rooj loog yuav tsis muaj hnub yuav yeej lub pob zeb no. thiab thov thoob plaws rau txhua phiaj neeg uas txais lub cim ntxuav, txhua tus uas yog Tswv Ntuj me nyuam tib si.

    C. Mam los rau zaj thov Ntuj, rau Tsoom poj yawm txwv koob. Tsoom niam txiv los tsoom kwv tij txheeb ze tso lub ntiaj teb no tseg.
    Kom Tswv Ntuj qhib rooj ntug rau lawv mus so nyob rau Ntuj Ceeb tsheej. Hauv txoj kev nyob thaj yeeb nyob kaj siab lug mus tas ib txhiab ib txhis.

    D. Hais zaj thov kom Tswv Ntuj khuv leej peb kom peb tsim nyog muaj tsoj sia li Tswv Ntuj Leej Niam Ntshiab Nkauj xwb,Mab Liabb thiab tsoom neeg sib ntshiab. Uas lawv coj lub neej ntxim Tswv Ntuj siab. Kom peb tau nrog lawv cav txog Tswv Ntuj

    E. Mam tsa lub Cim Yug tias, Yog vim tus tswv Ntuj muaj hwj haum Tas txhua yam yog nyob hauv Leej Pleev thiab nrog Leej Tswv Yim Ntshiab muaj koob meej mus txog txhiab niag tim puas xyoo.

    17. COV KAB KEV TXAIS LUB CIM YUG.
    A. Hais zaj peb txiv nyob saum ntuj, los qhuas thiab cav txog Tswv Ntuj yog Leej txi muaj hwj chim hwj huam txawj hlub neeg.
    Yam ua tsis yog lawm los thov koj zam thiab npo peb kom tau nyob hauv txoj kev zoo. Thiab txhob swv rau dab phem tej kev dag kev cuav haub ntxias mus.
    B. Vim Tswv Ntuj yog tus Vaj muaj hwj huam Koob meej nto moo lug mus thoob plaws qaum ntuj rau ntiaj teb.

    18. THOV YES XUS.
    Thov kom Yes Xus Pleev hlub thiab npo peb ntawm txhua yam kev phem yuav tuaj raug peb lub neej txoj sia thiab kev iab kev khwv. Kom Yes Xus muab nws keV kaj siab kev thiaj yeeb pub rau peb.
    Leej Choj los tus Tsob Hwb mam xa Yes Xus Pleev kev thaj yeeb tias: Tswv Ntuj ua nej siav kaj lug.

    19. THAUM TXAIS LUB CIM YUG.
    Hu zaj nkauj tias, Tus zoo Tswv zov yaj…
    Tswv Ntuj tshoj thiab qhia kom yoog raws li neeg ntiaj teb tej kab ke uas lawv siv tsiaj los cog lus ua kab ke txi rau cov dab Tim Tswv uas neej tsis pon lub cev tau.
    Uas neeg xav tias ua ib txoj kab kev siv tsiaj los txi rau tas ces noj pauj dab qhua li laig dab tas noj pauj dab. Tswv Ntuj npaj kom yog ib co txim ntshiab dawb huv tseem ceeb tshaj los yog tsav nyob ze neeg lub cev ib yam nkaus.
    20. FAIB LUB CIM YUG.
    Tus faib lub Vim Yug nws cev los thiab tshaj tias. Leej Pleev lub cev! Yog txhais hais tias Tus Leej Yaj dawb huv lub cev no, muaj txhij muaj txhua nyob hauv.

    21. THOV TXIAJ NTSIM XAUS LUS MUS.
    Tus Leej Choj, thov kom Tswv Ntuj pub koob hmoov txiaj ntsim rau npoj neeg tuaj ua kab ke txi Ntuj. Kom Tswv Ntuj pov hwm thiab txuag sawv daws rov mus vaj mus tsev zoo.
    Nws mas tso lus tias , nej rov mus Tswv Ntuj ua nej siab kaj lug. Lub txoos ua Nytuj tsaug ces xaus li no.
    Ua li mas lub thaj cav txiaj ntsim no, mas muaj qab hau thiab muaj nuj nqes loj kawg. Nws taj los hloov tau tas nrho Hmoob tej kab lis kev cai.
    Uas hu Plig,ua npau suav phem, tej kev cai ua nyuj dab, dab roog, npua tai. khaws ceeb, kev ntshai nrog kev poob siab poob plig txhua yam li Hmoob coj thiab xav li lawm ntag.

    Yaj zoov Ntxheb Xib Hwb.



      Current date/time is 18th March 2024, 10:17 pm