Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» Xib Hwb Thoj Xyooj lub neej
by Maiv Tooj Today at 10:30 pm

» COV ZAJ NYEEM NRUAB LIS PIAM XYOO I 2016-2017
by Mim Yesterday at 8:12 am

» Thov Leej Ntshiab YOS XES
by Maiv Tooj 3rd December 2016, 10:36 am

» COV ZAJ NYEEM NRUAB LIS PIAM XYOO II, 2015-2016
by Mim 2nd December 2016, 1:29 pm

» COV ZAJ NYEEM HNUB CHIV XYOO A 2016-2017
by NrhiavTswvNtuj 1st December 2016, 12:54 pm

» XH.Zoov Ntxheb Yaj Nthuav Ntawv Ntshiab.
by Maiv Tooj 1st December 2016, 12:35 pm

» XH. Yaj Zoov Ntxheb lub Tsev THOOB TSIB
by Maiv Tooj 1st December 2016, 12:33 pm

» Qhia keeb kwm kev ntseeg. TP.Cwj Vuam CChiv.
by Maiv Tooj 28th November 2016, 9:58 pm

» Yes Xus lub ntsej muag tiag tiag.
by NrhiavTswvNtuj 26th November 2016, 1:52 pm

» HMOOB NPAM NAJ XEES
by NrhiavTswvNtuj 21st November 2016, 9:15 am

» MOO QAIJ QAUG
by Maiv Tooj 20th November 2016, 9:45 am

» TP.Txhiaj Foom lub TSEV Ntawv
by Maiv Tooj 19th November 2016, 12:04 pm

Suav neeg tuaj saib, txij hnub 17/09/2010 los mus.


    Txiv Plig Cwj Vuam Chiv Yaj Nthuav Ntawv Ntshiab

    Share

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 30th May 2011, 5:43 am




    Rau hnub tim 03 lub 4 hlis 2011



    Tsoom ntseeg thiab phooj ywg,

    Lub lis piam no, lub Koom Txoos caw peb sawv daws mloog Yes Xus cov lus hais txog tus neeg txhaum. Peb yuav los piav ob peb los raws li Yes Xus qhia hauv Zam ntawv Moo Zoo peb hnov no hais txog tus neeg txhaum. Tiam sis, peb yuav xub piav ob peb los hais txog zaj nyeem ib thiab ob ua ntej, yam txoj kev xub tho rau peb taug, peb thiaj yuav to taub tus neeg txhaum raws li Yes Xus qhia rau peb hnub no.
    Hauv zaj nyeem ib. Tsis tau muaj leej twg faj txog, muaj ib tug neeg Tswv Ntuj nyiam, Tswv Ntuj xaiv ua vaj ntxwv, kawg Huab Tais Tswv Ntuj tib leeg thiaj ua tus paub ua tus pom. Thawj tug vaj ntxwv sawv kav His Xais Lais, yog Xas Ws. Tiam sis peb hnov Tswv Ntuj hais rau saub Xas Muas tias Tswv Ntuj tau tshem Xas Ws, tsis yuav Xas Ws ua vaj ntxwv lawm. Thaum saub Xas Muas paub li ntawd, ua rau saub Xas Muas khuv xim Xas Ws tuj toog rau nruab siab. Tswv Ntuj hais rau saub Xas Muas kom txhob poob kua muag rau Xas Ws ntxiv, txhob khuv xim Xas Ws. Tswv Ntuj kom saub muab nws tus kub nyug ntim ib kub roj mus cuag Yi Xais tsev neeg xeem Npis Yam Meej. Saub tseem tsis tau paub, yog tim li cas tiag Tswv Ntuj muaj lus tib, tsis yuav Xas Ws ua vaj ntxwv, muab Xas Ws tso pov tseg. Tswv Ntuj nyob lub chaw siab pom ntiaj teb neeg, pom puag hauv tib neeg nruab siab, paub tus neeg lim hiam los tus neeg siab ncaj. Tswv Ntuj pom Yi Xais ib tug tub Tswv Ntuj nyiam txawj ua ntxim Tswv Ntuj siab. Thaum saub Xas Muas ntim tau nws kub roj mus txog Yi Xais tsev. Xas Muas pom dheev Es Lias, Yi Xais tus tub hlob, neeg loj, siab ntshuas. Xas Muas xav zoj tias nws ntag, yog tus Tswv Ntuj xaiv los ua Tswv Ntuj tus sawv cev, ua Tswv Ntuj tus pleev. Tiam sis Tswv Ntuj tsis pom li neeg pom : “Txhob saib tus yam ntxwv sab nraud thiab lub cev siab ntshuas, vim kuv tshem nws ; tsis txhob pom li tib neeg vim tib neeg pom li qhov muag hos Huab Tais pom hauv lub siab.” Saub Xas Muas pib to taub Tswv Ntuj cov lus, tim li cas Tswv Ntuj tau tshem Xas Ws, xa saub tuaj tsa Yi Xais ib tug tub sawv ua vaj ntxwv los hloov Xas Ws. Thaum saub ntsib tas Yi Xais xya leej tub tib si, tsis pom muaj tus Huab Tais Tswv Ntuj xaiv. Saub thiaj rov nug leej txiv Yi Xais dua saib puas tshuav lwm tus tub nyob qhov twg los tsis tshuav. Leej txiv los kuj tsis nco qab txog nws tus tub tus me dua cov, tus mloog lus, tsuas txawj zov tsiaj xwb, tseem saib tsiaj nog zaub tom tshav : “Tso neeg mus hu los txog, nws ib tug daj hau, qhov muag zoo nkauj rhib, ib tso zoo nraug ; Huab Tais hais tias : “Sawv tsees, pleev nws, tus no ntag.”13 Xas Muas nthos nkaus kub roj muaj nws pleev nruab nrab nws cov kwv tij” Ntawm peb kuj tib yam, peb yuav tau mloog Tswv Ntuj lus li saub Xas Muas kom peb pom yam ntxim Tswv Ntuj siab hauv peb tib neeg lub neej, kom peb ua tau rau Tswv Ntuj qhov Tswv Ntuj tos peb. Peb tshem kom tu qab qhov phem thiab ua rau Tswv Ntuj dhuav thiab meem txom rau peb pov tseg : Lim hiam, khav theeb, ntshaw ua plees ua yis…Qhov tsis zoo hauv peb yuav raug Tswv Ntuj dhuav thiab tshem tawm li muab Xas Ws them tawm. Qhov zoo ntxim Tswv Ntuj nyiam hauv peb : Siab ncaj, siab dawb, neeg nquag teev Tswv Ntuj hwm Tswv Ntuj, hlub taus leej tib neeg…Piv li tus tub yau rau siab zov tsiaj nog zaub tsis pub tsiaj yoo tshaib. Tswv Ntuj xa saub tuaj tsa tus tub yau ua vaj ntxwv. Tswv Ntuj yuav tsa tus neeg siab dawb siab ncaj, hlub neeg ua Tswv Ntuj tus pleev. Vim li ntawd, Tswv Ntuj thiaj xa nws Leej Tub Yes Xus tuaj rub peb me nyuam neeg dog dig los ciaj noob vaj ntxwv saum qaum ntuj ntawm Tswv Ntuj lub theej kiab.

    Zaj nyeem ob. Cov thwj tim lawv Yes Xus qab, taug Yes Xus lwj lwm mus qhuab qhia Yes Xus cov lus rau txhia haiv neeg paub. Leej Txiv Tswv Ntuj txoj kev hlub peb leej tib neeg loj npaum li ntawd, tsis xav kom kev txhoj kev txhaum ua rau peb tib neeg txom nyem. Tos peb txom nyem ua lub neej tsaus ntuj nti, vim peb niaj hnub sib cav sib ceg, tsis txawj sib zam, tsis sib pab, tsis sib hlub. Peb twb tsis paub Tswv Ntuj, peb yuav ua cas ntseeg tias Tswv Ntuj hlub peb. Tswv Ntuj hlub peb ntiaj teb neeg txhua leej txhua tus npaum li no, peb twb tsis ntseeg Tswv Ntuj, peb yuav ua cas pom tej txiaj ntsim Tswv Ntuj muab rau ntiaj teb dawb do : Tsim lub ntuj kav peb lub neej ua hnub ua hmo, muab daim av rau peb nyob rau peb ua noj, muab noob qoob noob tsa rau peb nrom yug peb txoj sia, ua tshav thiab ua nag ywg tus neeg phem, neeg lim hiam ib yam tus neeg ncaj neeg zoo tej qoob loo…Tus tsis ntseeg Tswv Ntuj yeej tsis lees paub hwm Tswv Ntuj. Kawg tus ntseeg Tswv Ntuj, teev Tswv Ntuj thiaj pom, thiaj paub txais Tswv Ntuj tej koob hmoov. Zim txwv no, peb los ntseeg Tswv Ntuj zwm Tswv Ntuj. Huab Tais Tswv Ntuj yog peb Leej Txiv, niaj hnub peb mus teev, mus hawm nws. Peb tsis txhob ntshaw lub qub neej thaum ub peb tseem teev dab thiab teev mlom. Peb twb ua dab thiab mlom qhev txaus txaus lawm. Dab thiab mlom tsuas txawj ntaim peb noj peb haus. Peb twb khwv ciaj khwv tuag kom tau nyiaj tau txiaj, kom tau tsiaj txhu los tiam los pauj rau dab thiab mlom. Ntau zaus peb raug txob raug txhawj peb twb tsis pom qab mus vam khom thiab khaub zig leej twg. Dab thiab mlom twb tsis muaj hwj huam cawm tau peb kev txhawj xeeb. Tus muaj hwj huam pab peb, tus cawm tau peb, tus daws tau peb lub neej txom nyem, pub kom peb lub siab nyob tiaj tus, ua tau peb lub neej kaj nrig tuaj tsuas kawg nkaus peb tus Huab Tais Yes Xus tib leeg : “Ziag no nej ci ntsa iab hauv Huab Tais, taug txoj kev kaj nrig yam tej me nyuam,9 Txoj kev kaj nrig lub txiv : Siab zoo heev, ncaj ncees thiab ua tseeb.10 Xaiv qhov ntxim Huab Tais” Vim li ntawd, peb yuav nrauj peb lub qub siab kev ntshai dab pov tseg. Tiam sis, peb txhua tus puas ntseeg Yes Xus muaj hwj huam, peb puas nquag thov thiab khaub zig Huab Tais Yes Xus kom nws pab peb ? Yog peb ntseeg Yes Xus muaj hwj huam, peb nquag khaub zig Yes Xus, peb yuav txais Huab Tais Yes Xus cov txiaj ntsim ib yam nws cov thwj tim.

    Zaj ntawv Moo Zoo. Cov txiaj ntsim Yes Xus pub rau nws cov thwj tim txais thiab pub rau tus neeg tuaj pe, tuaj khaub zig Yes Xus txais hloov tau lawv lub siab thiab lub neej npaum li cas lawv ras tsis txog. Yes Xus cov txiaj ntsim pab tus neeg ntseeg tso siab rau Tswv Ntuj muaj hwj huam ua dab ntshai nws, pab nws kho tau neeg mob zoo, daws tus neeg txom nyem lub siab kaj nrig. Piv li ntawm peb Hmoob kab lis kev cai, tus loj yog muam phauj loj. Muam phauj lo lus tau hais li cas nws yog li cas. Vim li ntawd, tsev Hmoob Yaj ncuab, tas txhua tus tub puav leej caiv plawv. Vim muam phauj tau tsawm, tau foom lus phem mus pes tsawg tiam, yeej txwv tuag nthi noj tsis tau plawv. Hmoob Yaj thiaj li cawv plawv, hu ua Yaj caiv plawv. Yog leej twg yuam cai noj plawv, nws yeej yuav tsis zoo, yuav dig, yuav khaum raws li muam phauj lo lus. Hmoob yeej ntseeg khov kho muam phauj lo lus yog ib lo lus loj kawg nkaus. Hais ib zaug kav ib txhiab ib txhis. Vim li ntawd, cov kwv tij neej tsa tseem teev dab qhuas, sawv daws yeej ntshai rwg muam phauj lo lus tsawm no. Tsis muaj leej twg muaj cuab kav twv ntxhias hla muam phauj lo lus. Tus twg noj yeej txhaum xwb xwb. Tsis yog Hmoob Yaj thiaj muaj caiv. Lwm xeem Hmoob puav leej muaj caiv. Tiam sis nyias muaj nyias yam caiv. Hmoob Vaj caiv noj tsis tau qaub ntxuag mov. Lwm xeem Hmoob caiv nthab, nce tsis tau nthab…Hais txog kev caiv, tsis yog Hmoob kev teev dab qhuas thiaj muaj caiv xwb. Lwm yam kev teev hawm puav leej nyias muaj nyias yam caiv.
    Nyob hauv His Xais Lais kev cai teev Tswv Ntuj kuj muaj kab ke caiv ntau ntau yam : Caiv tus kab lia noj tsis tau. Tus noog liaj noog luv, tus uab laum, tus dav, tus puav, tus plas puav leej caiv noj tsis tau. Tus ntses muaj nplai thiaj noj tau ; tus tsis muaj nplai caiv noj tsis tau. Tus tsiaj luav, tus npua, tus luj, tus nees, tus thauj tus ntxhuav puav leej caiv noj tsis tau. Tsuas noj tau tus nquab, tus w, tus yaj tus tshis thiab tus nyuj xwb. Tseem noj tsis tau ntshav thiab roj, yuav tsum caiv. Dua li kev caiv txhiam xws, tseem muaj caiv tib neeg. Tus His Xais Lais yog neeg huv, neeg ntshiab, yog neeg teev Tswv Ntuj. Tej pej kum neeg teev dab qhuas, teev mlom, teev nyuj teev nees, teev hnub teev hli, teev dab npas (Baal)…puav leej yog neeg tsis huv, paug thiab qias, yuav tau maim txhob chwv, txhob kom. His Xais Lais yuav tsum txhob nyob xyaw tej haiv neeg tsis huv no. Tej tub ntxhais yuav nrhiav cuab yig, tsis txhob mus qaws tej pej kum neeg no los hauv yus. His Xais Lais yuav tsum rov yuav His Xais Lais neeg xwb. Vim li ntawd, tej leej choj, tej thoob xwm, tej xib hwb Fas Lis Xais tawm rooj mus ze mus ntsib, mus phoom tej pej kum neeg rov los hauv vaj hauv tsev yuav tsum yaug tes yaug taw thiaj li huv. Tsis yog caiv txhiam xws, los caiv tib neeg xwb, tseem muaj kev caiv hauv txoj kev teev hawm Tswv Ntuj. Hnub xas npas tos, yog hnub ntshiab hnub huv, yog Tswv Ntuj hnub. Tsoom His Xais Lais yuav tsum caiv tsis txhob tawm rooj mus kev deb, tsuas mus kiab khw rov los tsev xwb. Tseem caiv tsis txhob ua num hnub xas npas tos. Yog hnub sawv daws yuav tsum mus teev hawm Tswv Ntuj tom tsev txoos. Cov neeg tsis hwm cov kev caiv no muaj txhaum tas tus. Cov muaj txhaum kuj yog cov tsis caiv hnub xas npas tos, nyiag kev tawm rooj mus ua qav ua num, mus saib kwv saib tij, mus xyuas mob xyuas nkeeg, mus pom tuag…Lawv ua txhaum loj rau Tswv Ntuj, lawv thiaj khaum. Cov neeg muaj txhaum tsis caiv raws txoj cai thiaj raug ntuj nplua lawv. Vim li ntawd, lawv thiaj yug tau me nyuam lag ntseg, dig muag, tuag tes tuag taw : “2 Nws cov thwj tim nug nws hais tias : “Las Npis, leej twg txhaum : Nws los yog nws niam nws txiv txhaum, nws thiaj yug los dig muag ?” Cov thwj tim puav leej xav tib yam li txhua tus His Xais Lais xav. Tus dig muag tos nws dig, vim nws muaj txhaum loj rau Tswv Ntuj, raug Tswv Ntuj nplua thiaj khaum tsis pom kev li luag tej tus tsis muaj txhaum. Tus tu tes, tu taw, mob ruas kuj puav leej muaj txhaum loj raug Tswv Ntuj nplua, neeg khaum, thiaj txom nyem. Tsis tas li ntawd, cov ua thawj, cov coj, cov leej choj tsuas txawj pom neeg muaj txhaum yog cov tsis caiv ncauj, tsis ntxuav tes ntxuav taw tawm rooj los txog tsev, cov tsi caiv tsis hwm hnub xas npas tos, nyiag kev mus ua qav ua num : “16 Ib txhia Fas Lis Xais hais tias : “Tus tib neeg ntawd tsis lam ze ntawm Tswv Ntuj, vim nws tsis caiv hnub xas npas tos.” Lwm cov hais tias : “Ua cas ib tug neeg txhaum ua tau tej lub cim ntawd ?...“Qhuas Tswv Ntuj hwj chim ! Peb paub tias tus neeg no neeg txhaum.” 25 Nws thiaj teb tias : “Nws txawm txhaum, kuv tsis paub. Kuv tsuas paub ib qho tias kuv dig muag, ziag no kuv pom kev.” Raws li Yes Xus qhia rau nws cov thwj tim thiab qhia rau cov leej choj thiab cov Fas Lis Xais sawv daws paub txog tus neeg txhaum tsis yog tus tsis caiv txhiam xws, tsis caiv hnub xas npas tos. Tus neeg txhaum kuj tsis yog tus neeg raug txom nyem ceg tawv, dig muag los mob ruas li sawv daws hais kam. Tus neeg muaj txhaum, yog tus muab txoj cai los ua qhov khav rau luag thiab qhuas tias nws tus kheej hwm txoj cai. Nws hwm txoj cai, ces nws yog neeg ncaj neeg zoo. Luag tsis hwm txoj cai, luag yog neeg txhaum. Yes Xus qhia tias : Tus neeg ncaj thiab tus neeg zoo, tsis yog txoj cai ua, yog hauv lub siab lub ntsws ncaj thiab zoo. Piv txwv hauv txoj cai tsis pub noj ntshav thiab noj roj. Tus neeg ua cai, nws caiv ntshav thiab roj tsis noj tiag. Tiam sis nws twb noj daim nqaij li tej tib neeg thiab ne. Nyob hauv daim nqaij kib tau, hau tau siav tsis pub muaj ib tee ntshav ib tee roj puas tau tiag ? Tus neeg noj ib daim nqaij yuav ua cas cais tau ntshav thiab roj kom tsis pub muaj ? Tus neeg hais tias caiv ntshav thiab caiv roj ho noj nqaij, nws yog ib tug neeg dag. Tus neeg dag, yog tus muaj txhaum loj. Nws hwm txoj cai tsis tshaj luag tej. Yog nws caiv roj caiv ntshav tsis noj, nws yuav tsum noj zaub tas sim neej, tsis txhob noj ib daig nqaij thiaj tseem tiag. Cov leej choj thiab cov Fas Lis Xais yog cov tuaj cov phuv nqaij zoo coj tuaj txi hauv tsev teev ntuj. Vim li ntawd, cov Fais Lis Xais liam Yes Xus muaj txhaum, vim Yes Xus tsis caiv hnub xas npas tos kho tus neeg dig muag hnub caiv. Tus dig muag thiaj teb rau lawv : “31 Peb paub tias Tswv Ntuj tsis mloog cov neeg txhaum, tab sis yog leej twg nquag teev ntuj thiab ua xis nws siab, Tswv Ntuj mloog nws.” Yes Xus muab tus dig muag thiab cov Fas Lis Xais los sib piv. Tus dig muag tsis muaj txhaum, nws dawb huv, tsis tau ua dab tsi txhaum li tus neeg pom kev. Vim li ntawd, Tswv Ntuj pab tus neeg dawb huv, tus dig muag thiaj pom kev rau sawv daws ntsia ntsoov. Cov Fas Lis Xais muaj qhov muag rua pliav, tiam sis tsis pom kev. Lawv lam khav theeb hwm txoj cai, tiam sis lawv qhov muag rua pliav hwm txoj cai zoo tsis tshaj tus dig muag : “40 Cov Fas Lis Xais thiab cov nrog nws ua ke…hais rau nws : “Ua li peb yog cov dig thiab lod ?”41 Yes Xus hais rau lawv tias : “Yog nej neeg dig muag, nej tsis muaj txhaum ; ziag no nej hais tias : Peb pom kev, nej txhaum tuag nthi.”

    Ib tsoom phooj ywg, peb tsis txhob muab txoj cai los ua lub chaw rau peb sib ntsuas zog. Tiam sis, vim muaj txoj cai, peb yuav sib kho kom peb sib haum, txawj sib hlub li Yes Xus qhia, txhob ua li cov xib hwb Fas Lis Xais txoj cai qhia. Yog peb coj li cov Fas Lis Xais khav theeb qhuas tias lawv thiaj hwm txoj cai. Tus dig muag thiab zoo li Yes Xus tsis hwm txoj cai yog neeg txhaum. Peb zoo li cov Fas Lis Xais lam muaj qhov muag rua pliav, hwm txoj cai twb tsis pov khawv npaum tus dig muag li Yes Xus hais. Peb twb ntseeg muam phauj tej lus hais ib los kav ib txhis. Huab Tais Yes Xus cov lus tseem muaj kuab dua muam phauj lus hauv peb qub kev cai. Peb yuav tso siab tuag nthi rau Huab Tais Yes Xus, nws hais ib los cawm tau tib neeg ciaj sia txhiab niag tim puas xyoo. Peb yim huab yuav maj khaws kom zoo peb tus Huab Tais Yes Xus cov lus nws hais rau peb hnub no. Thov cov zaj nyeem hnub no pab peb txhua tus tig los ua neeg dawb huv ntxim tus neeg teev Tswv Ntuj li Yes Xus nyiam.



    31.03.2011 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 30th May 2011, 5:48 am



    Rau hnub tim 10 lub 4 hlis 2011



    Tsoom niam txiv kwv tij neej tsa thiab phooj ywg,


    Hnub no zoo hnub, peb rov tuaj sij fim ua ke, teev hawm peb tus Huab Tais Tswv Ntuj. Peb tau hnov Huab Tais Yes Xus lub Moo Zoo hauv Zam tsab ntawv no. Yes Xus mus tsa nws tus phooj ywg Las Ntxas Los tuag zwm av tau plaub hnub sawv rov los. Peb yuav khaws peb lub ntsiab lus hauv zaj nyeem no tseg, hais txog : Peb tib neeg kev ciaj sia, npaum li cas Yes Xus tseem ceeb rau leej tib neeg thiab txiaj ntsim kev ntseeg Huab Tais Tswv Ntuj tib leeg.

    Kev ciaj sia. Txawm tus neeg ntseeg Tswv Ntuj, tus tsis ntseeg Tswv Ntuj, sawv daws puav leej pom tias txoj sia loj tshaj thiab tseem ceeb dua tej, tsis muaj leej twg ua tau txoj sia. Txawm Hmoob tsis paub Tswv Ntuj, los Hmoob poj Hmoob yawm yeej qhia Hmoob tias muaj lub ntuj ib txheej qhia dhau ib txheej. Vim muaj ntuj tsim, lub teb thiaj txawm los nyob. Hmoob ntseeg tias muaj ntuj. Tas txhua yam nyob saum ntuj, huab cua, lub hnub, lub hli, tej hnub qub puav leej ntuj tsim. Nyob ntiaj teb, daim av, dej, nroj tsuag, tsiaj txhu, tib neeg puav leej ntuj tsim thiaj txawm tau los nyob. Tas txhua yam muaj txoj sia, yog ntuj muab thiaj muaj txoj sia nyob. Tus kab lws, kab npauj siav txawm los nyob hnub puav, tus nroj tus tsuag nyob hli puav, lub hnub lub hli tej hnub qub muaj siav nyob txhiab pua tiam. Tas txhua yam ntuj tsim los, tsis muaj ib yam yuav plhis tau txoj sia tshiab. Peb leej tib neeg txoj sia nyob ib tiam xwb. Muaj ib hnub, peb txoj sia yuav yaj, yuav ploj saum daim av li tus dej tu saum ciav, ib yam tus nroj tsuag yuav qhuav yuav nkig mus, li tus nyuj tuag tsuas tshuav nyuj kub, txog hnub kawg, hmo xaus, lub hnub yuav qauj yuav tsaus ci tsis taus ntxiv. Peb tij neeg cev ntaj ntsug tuag tas nrho, nqaij yuav ciab zib, txha yuav ua plaub mag. Vim txoj sia yaj lis nrho ceev tsis cuag, txuag tsis tau cia. Hmoob hais tias yus daim ntawv ua neej txog txij twg, yus nyob txij ntawd. Yog li, peb leej tib neeg twg twb ntshaw, twb khuv xim txoj sia. Vim txoj sia muaj nuj nqe dua tib si, txoj sia thiaj ua leej tib neeg muaj kev tu siab, chim, ua kua muag poob kua muag ntws. Txoj sia ua leej tib neeg quaj kev mob siab vim txoj sia tu plam ntawm yus tes ; tshuav lub suab quab suab nyiav tus ploj cas yuav ploj yuav tuag nthi lawm tiag tiag tsis pom ntxiv, ntsej yuav tsis hnov nws lub ncauj suab lus lawm tiag. Xav zaj twg los chim siab, tam tseeb txoj sia yuas txoj sia, peb txawm yuav cheem tsis tau koj nyob ntxiv li ntag. Ua rau peb tib neeg tu siab kua muag poob kev ntsoj kev ntsuag.

    Npaum li cas Yes Xus tseem ceeb rau peb tib neeg. Thaum peb tseem tsis tau paub Tswv Ntuj, peb txoj kev vam tsis ntxiv dab tsi rau peb. Kev ploj tuag, kev tu siab kev chim tsuas ua rau peb khaws quaj pos muag nti. Rau peb tib neeg ntiaj teb, kev txom nyem, ntuj qhuav teb nkig, kev tshaib plab, kev txhawj xeeb muaj mob muaj nkeeg, ua rau peb txhawj thiab ntshai. Tus neeg ntseeg Tswv Ntuj, nws pom tias Huab Tais Tswv Ntuj hlub peb leej tib neeg, Tswv Ntuj thiaj xa nws Leej Tub tuaj nrog peb nyob pab peb, cawm kom tau peb. Yes Xus kev cawm neeg yog mus tshaj nws lub Moo Zoo qhia qaum ntuj rau ntiaj teb neeg paub, yog mus pab cov neeg raug dab, ntiab dab khiav, kho neeg tuag ceg, qhib cov dig qhov muag, kho cov neeg mob ruas, pab cov poj ntsuam, cov ntsuag no, zam txhaum rau cov neeg muaj txhaum…Piv txwv li zaj nyeem hauv tsab ntawv no. Thaum Yes Xus paub tias nws tus phooj ywg Las Ntxas Los mob heev. Las Ntxas Los ob tug muam txhawj xeeb kawg, tso xo tuaj rau Yes Xus paub. Tiam sis zoo li Yes Xus tsis nco qab txhawj : “hnov tias nws mob, lawv tseem nyob ntawm chaw ob hnub ntxiv…” Tsis yog Yes Xus tsis txhawj nws tus phooj ywg raug mob. Qhov peb pom zoo li Yes Xus tsis txhawj, yog Yes Xus xav qhia rau nws cov thwj tim thiab rau ob tug muam thiab rau cov neeg caum Yes Xus, tuaj mloog Yes Xus kom lawv paub Yes Xus zoo dua qub. Txoj kev paub Yes Xus, nrog Yes Xus ua phooj ywg, tsis yog zoo li ntiaj teb kev ua phooj ua ywg. Kev nrog Yes Xus ua phooj ywg, yog nrog qaum ntuj ntaus kev phooj ywg mus noj tshoob noj kos, mus fim tej pej kum neeg teev dab qhuas thiab mus nrog cov thawj coj noj mov, haus dej. Kev nrog qaum ntuj ua phooj ywg, yog nrog Yes Xus coj ntiaj teb neeg mus ua qaum ntuj neeg, yog qhia qaum ntuj kev hlub rau ntiaj teb kom tib neeg txawj sib haum, sib hlub, sib pab, li qaum ntuj pab ntiaj teb : “Peb tus phooj ywg Las Ntxas Los tsaug zog lawm, tab sis kuv mus ua kom nws tsim.” Tsis yog peb nrog Yes Xus ua phooj ywg, ces Yes Xus yuav khiav khuav tuaj pab peb li peb tib neeg kev phooj ywg. Kuj tsis yog peb nrog Yes Xus ua phooj ywg kom peb txhob muaj mob dias hau, tsis raug ntiaj teb kev txhawj xeeb, tsis yug tub yug ki, tsis tshaib tsis nqhis, tsis noj tsis haus, tsis ploj tsis tuag. Peb sim xav saib, puas yog Yes Xus qhia rau cov thwj tim, qhia rau Mas Tas thiab Mab Liab, qhia rau cov neeg tuaj mloog nws…Peb nrog Yes Xus ntaus phooj ywg kom peb to taub ntiaj teb kev txhawj xeeb, to taub kev ploj tuag li Yes Xus tus nqes saum ntuj los ua ntiaj teb neeg. Peb neeg ntiaj teb thiaj ntaus tau kev phooj ywg nrog qaum ntuj, mus ua qaum ntuj neeg nrog tau Yes Xus li Yes Xus tuaj nrog tau peb neeg ntiaj teb. Zoo li peb yuav xyaum tsis ntshai kev ploj tuag li Yes Xus. Rau peb neeg ntiaj teb, Las Ntxas Los tau mob tuag, muab zwm av tau plaub hnub, lub cev nqaij lwj lawm. Tiam sis rau Yes Xus, peb tib neeg kev ploj tuag, txawm peb tib neeg lub cev ntaj ntsug lwj yaj ua av tag los tsis txhawj, txoj kev tsis tws rau Yes Xus. Tsuav Yes Xus hu peb ib suab, peb yuav sawv lis tsees rov muaj sia. Vim li ntawd, Yes Xus muaj nuj nqes npaum li cas rau peb, peb nco ntsoov khaws Yes Xus lus, tuav Yes Xus npe ua koob ua hmoov pov peb. Yog peb nrog Yes Xus ua phooj ua ywg ib yam Las Ntxas Los, txawm peb raug mob raug ntsaj, tau ploj tau tuag, txawm peb lub cev ntaj ntsug lwj tas ua av los tsuav Yes Xus tuav peb npe, hu peb ib suab ces txaus tsa tau peb tsim dheev ntawm kev ploj kev tuag rov los. Peb yuav nco ntsoov Huab Tais Yes Xus lub Moo Zoo yog koob yog hmoov pab peb.

    Txiaj ntsim ntseeg Huab Tais Tswv Ntuj. Peb yuav tsum nco ntsoov, Huab Tais Tswv Ntuj pom tag peb leej tib neeg txhua txhia tus nyob saum daim av lub siab lub ntsws : Tus neeg nkaus, tus neeg phem, tus lim hiam thiab tus neeg ncaj, tus neeg zoo, tus neeg hwm ntuj, Huab Tais Tswv Ntuj paub tag. Muab piv li Hmoob yeej ib txwv hwm ntuj, txawm Hmoob tsis paub teev ntuj. Tus Hmoob hwm Tswv Ntuj kuj tau txais Tswv Ntuj tej koob hmoov ib yam tus neeg ntseeg Tswv Ntuj thiab teev Tswv Ntuj. Tiam sis, yog peb pom thiab raug hnyav txoj kev teev hawm Tswv Ntuj tag peb lub siab lub ntsws. Peb tso tag peb tej kab ke teev dab qhuas, tso tag peb txoj kev teev nyiaj txiag ua peb tus huab tais, tso tag peb lub siab nqaim siab ti pov tseg los mus teev thiab hwm Huab Tais Tswv Ntuj tib leeg raws li Yes Xus qhia rau peb. Peb yuav pom lub koob hmoov loj Yes Xus cog lus muab pub rau tus neeg ntseeg Yes Xus : “21 Mas Tas hais rau Yes Xus : “Huab Tais, yog koj lam nyob ntawm no ntshai kuv tus nus yuav tsis tuag ;22 Thiab ziag no, kuv paub tias koj nug Tswv Ntuj dab tsi, Tswv Ntuj yuav pub rau koj.” 23 Yes Xus hais rau nws : “Koj tus nus yuav sawv rov los.”24 Mas Tas hais rau nws : “Kuv paub tias thaum txog hnub kawg, lub caij sawv los, nws yuav sawv rov los.”25 Yes Xus hais rau nws : “Yog kuv ntag kev sawv rov los thiab txoj sia ; tus ntseeg kuv, tab nws txawm tuag lawm, ciaj taus sia ; 26 Tas tus ciaj thiab ntseeg kuv tsis tuag ib txhis. Koj puas ntseeg li ntawd ?” Mas Tas, Mab Liab thiab Las Ntxas Los lawv yog neeg His Xais Lais. Cov His Xais Lais yog neeg ntseeg Tswv Ntuj, teev Tswv Ntuj raws li Mai Xes txoj cai. Tiam sis Yes Xus hais rau Mas Tas thiab Mab Liab nkawd hais tias yog nkawd ntseeg Yes Xus, tab nkawd txawm tuag los nkawd yuav ciaj taus sia. Kuj tib yam rau peb tig los ntseeg Yes Xus. Vim tus ntseeg Yes Xus muaj lub txiaj ntsim ciaj sia ua koob ua hmoov pub tus ntawd. Tus ntseeg Yes Xus lub Moo Zoo, yog tus khaws Yes Xus tej lus. Tus khaws Yes Xus tej lus, nws ua lub neej ntxim Yes Xus nyiam, nws muaj Yes Xus nyob hauv nws. Vim Yes Xus yog kev sawv rov los thiab txoj sia. Tus muaj Yes Xus nyob hauv nws muaj kev sawv rov los thiab txoj sia li qaum ntuj txoj sia nyob ib txhis.

    Ib tsoom phooj ywg, peb txoj kev ntseeg Tswv Ntuj raws li Yes Xus qhia yog koob yog hmoov loj tshaj tej, loj tshaj lwm txoj kab ke teev dab qhuas, teev mlom, los mus ntseeg tus saub ub tus saub no. Peb yuav txuag kom zoo txoj kev teev hawm Huab Tais Tswv Ntuj, nws yog lub koob lub hmoo loj tshaj plaws rau peb. Vim li ntawd, peb yuav kub siab daws txhawm. Thov cov leej choj ua Thaj Txi Ntuj thov Huab Tais Yes Xus zam peb tej txhaum rau peb.


    07.04.2011 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 30th May 2011, 5:52 am





    Rau hnub tim 17 lub 4 hlis 2011



    Ib tsoom niam txiv kwv tij neej tsa phooj ywg,

    Niaj lub xyoo, lub Koom Txoos Kav Tos Liv ua lub Hmoov Hla. Cov ntseeg Kav Tos Liv nej cov coob paub lub Hmoov Hla yog lub hmoov dab tsi. Tiam sis tseem tshuav ib txhia tsis nco qab lub Hmoov Hla yog dab tsi, los nco tsis meej lub Hmmov Hla lub ntsiab lawm. Ua li no, lub Hmoov Hla muaj nuj nqes dab tsi hauv txoj kev teev hawm Tswv Ntuj thiab rau yus tus neeg ntseeg Tswv Ntuj ? Vim li cas lub Koom Txoos thiaj niaj xyoo caw tsoom ntseeg ua lub Hmoov Hla ? Vim li, peb yuav xub piav ob peb los txog lub keeb Hmoov Hla ua ntej, peb mam los nthuav cov zaj nyeem Ntawv Moo Zoo hauv lub hmoov nqaum nplooj peb hnov hnub no.
    Lub Hmoov Hla (La fête de Pâques, the Passover) yog ib lo lus los ntawm lus Hes Nplaws “פֶּסַח” thiab lus Hes Las “πάσχα”. Lo lus Hes Nplaws “פֶּסַח” txhais tias : “Hla plaws.” Vim li ntawd, thaum chiv lub keeb Hmoov Hla, yog pluas hmo tsoom tub ki His Xais Lais noj ua ntej xuas kev khiav tawm ntawm Hais Nkws Tos teb, yam li khiav rog los khiav xwv txheej. His Xais Lais “Hla plaws” xwv txheej thiab “Hla plaws” kev ua Hais Nkws Tos qhev. Tswv Ntuj hais rau Mai Xes kom hais rau His Xais Lais tua ib yig ib tug thav yaj txhiab noj ntxuag cov ncuav mov tsis muaj xab thiab kom muab nyias tus yaj cov ntshav los maim nyias lub qhov rooj ua chaw cim tseg. Hmo ntawd, Tswv Ntuj yuav tso nws tus tshiab tuaj ntaus ib nthwv rog thoob teb chaws Hais Nkws Tos. Yog lub tsev twg tsis muaj ntshav maim, lub tsev ntawd yuav raug xwv txheej. Lub tsev twg pom muaj ntshav cim ntawm qhov rooj, tshiab yuav tuaj “Hla plaws” lub tsev ntawd tsis raug xwv txheej. Tas cov yim neeg tsis noj tus yaj hla thiab tsis muab ntshav ntaus cim ntawm qhov rooj yuav maim tsis dhau xwv txheej, txij tus tsiaj txhu mus rau tus tib neeg thoob tas teb chaws Hais Nkws Tos. Vaj ntxwv Fas Las Oos tus tub hlob thiab txhua yim neeg hais Nkws Tos tus tub hlob puav leej raug xwv txheej tuag hmo ntawd. Tshuav kiag Tswv Ntuj haiv neeg His Xais Lais teev Tswv Ntuj, mloog Mai Xes lus tau muab ntshav yaj ntaus cim ntawm qhov rooj thiaj tsis raug xwv txheej. Lub Hmoov Hla chiv keeb sawv los yog muaj li no.
    Txij li Yes Xus los txog lub zim txwv no, lub Hmoov Hla hloov lawm ntau piv rau txheej laus thaum ub. Muaj dab tsi hloov hauv lub Hmoov Hla raws Yes Xus qhia thiab lub qub raws li Mai Xes qhia ? Qhov hloov, yog lub ntsiab hloov. Yes Xus qhia tau lub ntsiab hauv Hmoov Hla meej dua qub thiab tob tshaj qub. Ziag no, peb los ntseeg Huab Tais Yes Xus, peb mloog Yes Xus lus. Yog peb nquag nyeem Yes Xus lub Moo Zoo. Peb yuav nco tau, muaj ntau zaus saub Zam Ntxuav Plig hais txog Yes Xus : “Saib, nws yog Tswv Ntuj Leej Yaj, tus daws tas lub ntiaj teb tej txhaum Z 1, 29” His Xais Lais yeej ib txwm tua tsiaj txhu los txi rau Tswv Ntuj, ua Tswv Ntuj tsaug, thov koob hmoov ntawm Tswv Ntuj. Cov tsiaj lawv nquag tua yog yaj, tshis thiab nyuj ua txim txi Tswv Ntuj. Kuj zoo li peb Hmoob tua qaib, tua npua, nyuj, twm los ua txim txi dab qhuas. Yes Xus cov thwj tim khaws lub ntsiab lus Yes Xus qhia txog lub Hmoov Hla rau lawv cov kwv tij His Xais Lais tig los ntseeg Yes Xus teev Yes Xus kom hloov lawv txoj qub kev cai Mai Xes qhia rau lawv cov poj yawm, tig los mloog Yes Xus qhia, rua muag ntsia Yes Xus yog tus Yaj Ntshiab, muab nws cov ntshav los txhiv los cawm ntiaj teb neeg kev txhaum ua kom neeg ntshiab huv : “13 Yog ntshav tshis, ntshav nyuj thiab tshauv tsiaj txhu nphoo rau neeg txhaum ntshiab tuaj thiab ua tau cev nqaij huv tuaj 14 Leej Pleev cov ntshav yim huab ua tau loj, tus ciaj sia ib txhis dawb huv rov muab nws tus kheej txi rau Tswv Ntuj, yuav ua tau nej tej num tuag zawv huv tshaj kom nej tiam tus Tswv Ntuj ciaj sia HN 9,13-14” Tsis yog His Xais Lais nkaus xwb yuav tsum hloov tej qub siab, lub qub neej thaum ua ntej los teev Yes Xus. Tas cov neeg teev pej kum dab qhuas tig los teev Yes Xus kuj yuav tsum hloov dua siab ntsws tshiab thiab coj dua lub neej tshiab phim kev teev Yes Xus : “18 Kom nej paub, tsis yog nyiaj thiab kub yam txawj ploj txhiv tau nej ntawm kev qias neeg yoog nej tej poj yawm tus yam ntxwv,19 Hos yog Leej Pleev ntshav muaj nqes txhiv nej li tus yaj dawb tsis muaj qhov xyeej thiab tsuas 1P 1,18-19” Tas nrho lub Koom Txoos Kav Tos Liv cov neeg ntseeg Yes Xus thiab teev Yes Xus thoob ntiaj teb, tas txhua xeem neeg, txhua xeem lus peb yuav siv zog kom kawg siab kawg ntshws, kawg peev xwm los hawm peb tus Huab Tais Yes Xus. Vim Yes Xus yog tus peb yuav caum kom tau qab taug kom tau lw. Yes Xus yog peb ntiaj teb ib tug tib neeg thiab yog peb tus Tswv Ntuj hlub peb tuag kus rau peb tib neeg muaj txhaum tes pab peb : “9 Lawv thiaj seev zaj nkauj tshiab li no : Koj, tus tsim nyog nthos phau ntawv qhib plho nws cov ntsiab lus tawm ; vim koj raug txi muab koj roj ntsha txhiv txhua haiv neeg, txhua xeem lus thiab ib zeej tsoom pej xeem thiab txhua teb chaws cwb rau Tswv Ntuj QYTN 5,9” Tsoom ntseeg Kav Tos Liv niaj xyoo ua lub Hmoov Hla, yog teev hawm peb tus Huab Tais Yes Xus lub Hmoov Hla. Huab Tais Yes Xus “Hla plaws” txoj kev tuag sawv lis tsees ciaj sia lub cev thiab ntsuj plig nyob ib txhis li Tswv Ntuj. Lub Hmoov Hla hauv peb txoj kev ntseeg Yes Xus thiab teev Yes Xus yog ib lub txiaj ntsim muaj nuj nqes cawm tas lub ntiaj teb tsoom ciaj thiab tsoom tuag. Peb ntseeg khov kho Huab Tais Yes Xus ciaj sia lub cev thiab ntsuj plig niaj hnub no nyob nruab nrab hauv txhua tus neeg ntseeg Yes Xus. Ib hnub twg, peb leej tib neeg yuav “Hla plaws” nyias txoj kev tuag sawv lis tsees ciaj sia lub cev thiab ntsuj plig nyob ib txhis li Huab Tais Yes Xus tus xub sawv, xub tsim hauv kev tuag ua peb ntej, peb taug nws kab, peb yuav sawv tsees ciaj sia lawv nws qab.

    Hauv cov zaj nyeem hnub no ua lub hmoov nqaum nplooj hais txog Yes Xus tam li tus Yaj Ntshiab, raug cab mus tua ua txim txi rau Tswv Ntuj. Peb yuav khaws cov zaj nyeem no coj los xav kom thoob hauv nyias nruab siab. Tim li cas Yes Xus, neeg muaj koob meej tsis tshaj Yes Xus, muaj hwj huam tsis tshaj Yes Xus, yuav tuag txom nyem qis npaum tus neeg txhaum, neeg raug txim, neeg tub sab. Txawm tias txoj kev tuag, yeej phem tag txhia txoj tsis muaj txoj zoo nkauj. Tiam sis tuag li Yes Xus tuag, yog tuag liam txwv, tuag txom nyem, poob tsim loj dhau. Tus tuag dai saum ntoo cuam yog neeg phem, neeg tub sab, neeg khaum. Txoj kev tuag li Yes Xus tuag no, yog Tswv Ntuj qhib peb tib neeg qhov muag, qhib peb lub siab los xav npaum li cas peb tib neeg kev lim hiam, kev sib ntxub, kev sib pauj, kev khib, kev khav theeb, kev ntshaw nyiaj, kev ntshaw koob meej…Yog ib txoj kev plhom npaum ua npog. Thaum Hmoob hais tias ua npog : Yog ib yam plhom dhau kev dhau cai. Tas txhua yam ntuj tsim los nyob ntiaj teb, txhua tsav yam nyias muaj nyias kab mus, nyias muaj nyias kev taug. Nyuj nees tsis yog tsov thiab hma. Yog nyuj nees mus tom nqaij noj li tsov thiab hma hnub ntawd yog ua npog lawm. Raws kev cai, tej txwj nkawm yog ib leeg tub nrog ib leeg ntxhais thiaj ua taus niam txiv. Tiam sis muaj tej khub txwj nkawm txiv neej deev txiv neej, poj niam deev poj niam. Kuj ho muaj tej txhia leej niam deev leej tub, leej ntxhais deev leej txi yuam dhau txoj cai. Kev yuam cai, yog plhom npaum ua npog. Tos tus Yaj Ntshiab Yes Xus raug tua tuag tam tus tub sab, tam tus raug txim yog vim cov txwj laus kev yuam cai tua Yes Xus. Txoj kev yuam cai ua rau peb txhaum loj. Tus neeg yuam cai yog ib tug yuam kev. Thaum Yes Xus xaiv ib pab thwj tim, kaum ob leeg, qhuab qhia lawv, coj lawv nrog nws ua ke, mus ua npoj xa lub Moo Zoo rau tej zej zog, mus thoob teb chaws. Yes Xus paub zoo cov thwj tim nws xaiv los nrog nws tshaj lub Moo Zoo. Cov thwj tim yog ib co neeg ua noj ua haus, neeg puav ntses xws teb xws chaw. Lawv tuaj raws Yes Xus, vim lawv ntseeg Yes Xus yog Leej Pleev, tus muaj hwj huam, tus Tswv Ntuj xa tuaj cawm ntiaj teb neeg. Lawv paub ntsoov Yes Xus yog Leej Pleev. Ua cas thaum Yes Xus raug cov txwj laus yuam cai ntes. Cov thwj tim puav leej tso tes plau khiav tag, tso Yes Xus pov tseg. Yus Das, ib tug hauv cov thwj tim tseem ntxeev siab coj kev rau neeg tuaj ntes Xib Hwb Yes Xus mus rau cov txwj laus txiav txim. Pob Zeb, hais khov kawg ntawm ncauj rau sawv daws mloog, ciaj nrog tau Yes Xus ciaj, tuag nrog tau Yes Xus tuag. Tiam sis hmo ua Hmoov Hla lawv ntes tau Yes Xus cab lawm, qaib tsis tau qua, peb zaug sib law, Pob Zeb twb tsis kam lees paub Yes Xus.
    Cov txwj laus thiab thawj leej choj qhuab qhia kev teev hawm Tswv Ntuj pom ntsoov Yes Xus ua hwj huam kho neeg mob ruas zoo huv si, kho neeg tuag ceg sawv tau mus ua noj ua haus, kho tau neeg dig muag rov pom kev, tsa tau neeg tuag ciaj tawm hauv ntxa los ua neej…Pom li ntawd los lawv tsis kam lees paub Yes Xus thiab tseem ntxub Yes Xus qees : “Tus thawj leej choj hais rau nws : “Kuv tuav Tswv Ntuj tus ciaj sia hais koj, qhia rau peb saib koj puas yog Leej Pleev Tswv Ntuj Leej Tub.”64 Yes Xus teb rau nws : “Koj ntag, tus hais. Kuv tseem hais rau nej : Dua li, nej yuav pom neeg Leej Tub zaum ntawm tus muaj Hwj Huam sab xis tuaj saum twv huab saum ntuj.” Rau cov txwj laus, hais li Yes Xus hais, Yes Xus thuam Tswv Ntuj lawm, muaj txhaum loj dhau lawm, pom zoo tsis pub Yes Xus ciaj ua neeg nyob. Puas yog lawv ntxub Yes Xus, yuam cai muab Yes Xus tua.
    Tsis yog cov thwj tim tsis muaj cuab kav lees Yes Xus, tsis yog cov txwj laus yuam cai muab Yes Xus tua nkaus xwb. Tsoom pej xeem caum Yes Xus qab tau peb lub xyoo, mloog Yes Xus tej lus qhuab qhia, pom Yes Xus ua hwj huam, tau noj cov mov Yes Xus ua hwj huam sawv daws noj tsis tag, muab lawv tej tsoos tsho los pua kev tos Yes Xus thiab lov nplooj hmab nplooj ntoos seev suab nkauj suab nruas ua qog qees lom vab vab tos Yes Xus nkag los hauv nroog Yes Los Xos Lws Mos : “9 Npoj neeg ua nws ntej thiab lawv qab qw qog qees : “Das Vis Leej Tub, tus muaj hwj chim ; tus sawv Huab Tais npe tuaj, nto moo lug ! Txheej ntuj saum ub muaj hwj chim ! ” Thaum npoj neeg pom Yes Xus raug txim, kuj tsis muaj tug neeg muaj cuab kav pab Yes Xus. Thaum lawv tuaj txog ntawm roob khauj khaum taub hau, roob tua neeg, lawv tseem hnyos Yes Xus : “39 Cov neeg dua kev co hau hnyos nws, 40 Hais tias : “Tus rhuav lub tsev txoos, peb hnub rov txhim rau, koj cawm koj tus kheej ! Saib koj yog Tswv Ntuj Leej Tub, nqes nroos saum ntoo cuam ! ”

    Tab txawm tsis muaj leej twg pab tau Yes Xus, zoo li cov thwj tim ntshai pab Yes Xus, los zoo li cov txwj laus ntxub Yes Xus, yuam cai muab Yes Xus tua dawb dawb thiab zoo li npoj neeg ntxeev siab hnyos Yes Xus raug txom nyem. Peb tib neeg txhob vam tias yuav tas dawb qhov phem peb tau ua dub lus tseg tsis muaj neeg paub. Qaum ntuj muaj qhov muag thiab muaj pob ntseg. Yes Xus tuag lawm ntsiag moo to li tej neeg ncaj raug neeg phem los raug tub sab tua npog nroj ntsuab thiab zoo li tej me nyuam mos hauv leej niam plab tsis qw ib suab raug lom, raug tsuav ua yoj ua yav, raug rho pov tseg…Yes Xus kev raug tua tuag tsis tas dawb tas do. Cov neeg ncaj raug neeg phem tua tuag, cov me nyuam mos raug tsuav ua yoj ua yav…kuj tsis tas dawb tas do. Yes Xus kev tuag muaj txiaj muaj ntsig ntawm Leej Txiv Tswv Ntuj thiab muaj nuj nqes rau ntiaj teb neeg. Yes Xus tuag los cawm cov neeg ncaj raug peb ntiaj teb neeg muaj txhaum txo lawv txoj sia. Tib neeg tau txo Yes Xus txoj sia tuag saum ntoo cuam, ua Yes Xus nqaij ntuag ntshav nrog, tam zoj tus Yaj Ntshiab roj ntsha tsuag laws ntxuav peb tib neeg tej txhaum pov tseg, ua kom peb ntshiab huv si tuaj, kom tus neeg lim hiam zoo rov los, kom tus nkhaus rov ncaj ncees tau. Lub Hmoov Hla yog Yes Xus “Hla plaws” kev tuag sawv tsees ciaj sia yog txiaj ntsim Leej Txiv Tswv Ntuj pauj rau nws Leej Tub thiab rau cov neeg ncaj ncees mloog Yes Xus lus.

    Ib tsoom phooj ywg sawv daws, cov zaj nyeem hnub no qhia rau peb paub kom peb tsis txhob muaj plhus khav vim peb los ntseeg Yes Xus ces peb paub txaus txawj txaus tsis vam, tsis yuav leej twg qhia peb pab peb ntxiv. Txawm peb los teev Yes Xus, ua Yes Xus thwj tim, peb tsis muaj cuab kav hais tias peb zoo tshaj cov teev dab qhuas thiab teev mlom. Vim peb zoo los muaj tus zoo dua peb, peb txawj los muaj tus txawj dua peb. Tus thuam neeg yog tus tseem pom tsis tau deb, txawj tsis tau txaus thiaj thuam neeg. Tus neeg ntseeg Yes Xus lub luag hauj lwm yog raws kom tau Yes Xus qab, taug kom tau Yes Xus lw ib yam cov poj niam, ib txwm caum Yes Xus puag Nkas Lis Lais txog Yes Los Xos Lws Mos, nrog rawv Yes Xus tsis nrug, sawv ib cag ntawm Yes Xus ntoo cuam. Peb yuav rua muag pom li cov tub rog zov keeb, xeev laus Pis Las Tos tso ua tub ceev xwm saib pej xeem saum roob : “54 Tus xab txheeb thiab cov nrog nws zov Yes Xus pom av qeeg thiab pom tej xwm tshwm ntawd, lawv ntshai kawg hais tias : Tus no yog tseem Tswv Ntuj Leej Tub tiag !” Thov kom lub txiaj ntsim Hmoov Hla rua peb qhov muag.


    13.04.2011 Cwj Vuam Chiv






    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 30th May 2011, 6:06 am



    Rau hnub tim 24 lub 4 hlis 2011



    Ib tsoom niam txiv kwv tij neej tsa thiab phooj ywg sawv daws,

    Hnub no, yog ib hnub dawb hnub huv, ib hnub ntshiab tas nrho lub Koom Txoos Kav Tos Liv ua lub Hmoov Hla, nco txog peb tus Huab Tais Yes Xus muab nws txoj sia cawm peb leej tib neeg (Cev ntaj ntsug, nkauj qas xi, nraug qas plig) tau tuag li nthi mus zwm av. Tiam sis Leej Txiv Tswv Ntuj txuas tau txoj sia nyob ib txhiab ib txhis rau Yes Xus. Vim li ntawd, hnub no yog ib hnub ntshiab huv, nco txog Yes Xus sawv li tsees ciaj sia li Tswv Ntuj. Leej twg ntseeg Yes Xus tus ntawd muaj txiaj ntsha sawv li tsees lawv Yes Xus qab nyob ib niaj txhiab puas xyoo tsis txawj tag.

    Lub lis piam tas los no, peb twb hais ob peb los txog keeb kwm chiv lub Hmoov Hla. Peb yuav tsis rov qab piav txog lub Hmoov Hla lub keeb lawm. Tiam sis, hnub no, peb yuav los piav lub Hmoov Hla, muaj nuj nqes npaum li cas rau peb ntiaj teb neeg thiab rau peb tus neeg ntseeg Tswv Ntuj. Vim li cas ? Vim lub Hmoov Hla yog peb txoj kev teev hawm thiab ntseeg Yes Xus lub plawv, lub ntsiab los tus txha nqaj qaum. Tsim nyog peb khaws lub txiaj ntsim Hmoov Hla los txhim peb txoj kev ntseeg Tswv Ntuj kom ruaj thiab khov npaum zeb npaum tsua. Peb ntseeg tias kawg Tswv Ntuj tib leeg thiaj yog tus tseem Huab Tais hlub ntiaj teb neeg. Hnub no, peb los ua neeg ntseeg Tswv Ntuj lawm, lub txiaj ntsim Hmoov Hla puas hloov tau peb, ua kom peb hlub peb ntiaj teb neeg npaum li Tswv Ntuj hlub. Peb yog tib neeg ntiaj teb, zoo tib yam txhua leej txhua tus tib neeg txawj yug, txawj laus, txawj mob thiab txawj tuag. Peb tib neeg tsis muaj leej twg yuav plhis hla plaws txoj kev tuag. Tus ntseeg Yes Xus kuj tib yam txhua leej tsis txawj plhis. Tiam sis, muaj lub txiaj ntsha txiaj ntsim ua tus ntseeg Yes Xus txawv lwm tus tib neeg ntiaj teb. Qhov ua rau tus neeg ntseeg Yes Xus txawv luag, tsis tuaj ntawm peb tus kheej tuaj : ntawm peb lub siab zoo, ntawm peb lub cev tes txawj tes nquag, ntawm peb lub tswv yim thoob tsib thiab txawj ntse…Tsis yog tej no ua rau tus neeg ntseeg Yes Xus txawv lwm leej lwm tus neeg ntiaj teb. Vim ib ntiaj teb leej tib neeg cov ntseeg Tswv Ntuj thiab cov teev dab qhuas, teev mlom los teev lwm cov kab ke teev hawm puav leej muaj tej neeg zoo thiab thoob tsib. Qhov ua rau peb txawv no yog tuaj ntawm Yes Xus tuaj, yog lub txiaj ntsha txiaj ntsim Yes Xus muab rau tus ntseeg Yes Xus, teev Yes Xus, tus mloog Yes Xus lus. Yog lub txiaj ntsim Hmoov Hla ua tau tej yam neeg ua tsis tau. Muaj ob lo lus piav lub txiaj ntsim hauv lub Hmoov Hla :

    1-Lub Hmoov Hla cawm tsoom His Xais Lais. Tsoom His Xais Lais raug quab yuam ua qhev nyob Hais Nkws Tos teb. Fas Las Oos yog tus quab yuam, tsim txom His Xais Lais. Tswv Ntuj muab lub Hmoov Hla ua nuj pes saub cim cawm tsoom His Xais Lais ntawm kev raug quab yuam ua qhev thiab dim kev raug xwv txheej thiab cawm vaj ntxwv Fas Las Oos thim nws kev lim hiam tsim txom His Xais Lais. Hmo Hla, yog pluas hmo kawg His Xais Lais noj nyob teb chaws Hais Nkws Tos, teb chaws raug txom nyem dim lub neej ua qhev los tiam Tswv Ntuj ua neeg twj lij. Tsoom His Xais Lais yeej tsis paub lub Hmoov Hla muaj nuj nqes dab tsi rau lawv. Tiam sis hmo Hla, yog hmo lawv yug tshiab ua neeg twj lij. His Xais Lais noj tus yaj hla thiab muab nws cov ntshav los ntaus cim pleev lawv cov qhov rooj tsev. Lawv yeej tsis paub yog tim li cas Mai Xes ho hais kom lawv ua li ntawd. Tos lawv tsis raug xwv txheej, yog tus yaj hla cov ntshav muaj nuj nqes cawm tau lawv cov me nyuam, thaiv tau lawv tsis raug xwv txheej. Hos Fas Las Oos thiab tsoom pej xeem Hais Nkws Tos raug xwv txheej loj thoob teb chaws, lawv mam li paub muaj Tswv Ntuj thiab Tswv Ntuj muaj hwj huam, yog His Xais Lais tus Tswv Ntuj. Fas Las Oos thiab tsoom Hais Nkws Tos mam khuv xim thiab pib txhawj ua cas tsis ntxov paub hwm Huab Tais Tswv Ntuj. Fas Las Oos thiaj muab nyiaj ntiav His Xais Lais tso lawv tawm ntawm nws teb chaws tam sim ntawd kiag.
    Vim li no, rau peb ib txhia neeg, lub Hmoov Hla cawm tsoom His Xais Lais thaiv tau lawv tsis raug xwv txheej thiab qhib kev rau lawv dim plaws kev ua Fas Las Oos qhev. Tiam sis, muaj ib txhia yuav xav tias ua li Tswv Ntuj ua puas ncaj nruab nrab, puas haum, vim Tswv Ntuj pab His Xais Lais thiab muab Hais Nkws Tos nplua raug xwv txheej. Yog Tswv Ntuj ncaj tiag, Tswv Ntuj yuav tsis tsa ib tog cai thiab muab xwv txheej nplua lwm tog. Ua li, xav paub lub ntsiab yog li cas tiag. Peb thiaj yuav tau nqes mus kom txog lub ntsiab Hmoov Hla raws li Tswv Ntuj lub siab. Puas yog Tswv Ntuj muab lub Hmoov Hla ua cim qhia ib yam num rau His Xais Lais thiab rau Fas Las Oos ? Vim li ntawd, peb yuav thov Tswv Ntuj qhib peb lub tswv yim tws, tswv yim ntiav no los pom thiab to taub lub txiaj ntsim Hmoov Hla. Tsis yog vim Fas Las Oos quab yuam tsoom His Xais Lais ua nws qhev, muab lawv tsim txom, tsis hlub lawv, thiaj raug Tswv Ntuj nplua, pauj His Xais Lais kev raug txom nyem. Yog peb xav li ntawd, tsis yog lawm, xu kab xu kev lawm. Tsis yog Huab Tais Tswv Ntuj hlub His Xais Lais cov me nyuam thiab ntxub Hais Nkws Tos, Tswv Ntuj thiaj tso xwv txheej, tso aws rau tsoom Hais Nkws Tos cov tub hlob tuag. Yog peb xav li ntawd, peb xav tswv yim li neeg xav. Tsis yog li Tswv Ntuj xav. Nej sim muab xav kom zoo, yog muaj li ntawd tiag, Huab Tais Tswv Ntuj kuj tsis ncaj thiab tsis hlub ntiaj teb neeg txhua leej txhua tus. Yog Huab Tais Tswv Ntuj tsis hlub ntiaj teb neeg txhua tus, tsis hlub tus phem tus zoo, tus txhaum thiab tus ncaj ncees…Leej Txiv Tswv Ntuj yuav tsis xa nws Leej Tub Yes Xus tuaj cawm tag lub ntiaj teb neeg, cawm cov teev Tswv Ntuj thiab cov teev dab, cov teev mlom thiab teev lwm yam kev cai tib si. Yes Xus yuav tsis tuaj qhia Tswv Ntuj txoj kev hlub neeg rau peb. Yes Xus kuj yuav tsis xa nws cov thwj tim kom mus tshaj Yes Xus lub Moo Zoo thoob plaub ceg kaum ntuj coj txhua haiv neeg los ua phooj ua ywg, los cog paj tsis txhob cog pos. Tsis tas li ntawd, niaj hnub no, twb muaj ib cov neeg Hais Nkws Tos ntseeg Tswv Ntuj, teev Tswv Ntuj, ua Tswv Ntuj haiv neeg. Twb yog ib lub cim zeem tseeb tias ib txwm Tswv Ntuj tsis ntxub Hais Nkws Tos ; Tswv Ntuj hlub lawv tib yam ib ntiaj teb leej tib neeg. Niaj hnub no, haiv neeg His Xais Lais cov coob twb tsis teev Yes Xus, tsis ntseeg Yes Xus thiab ne. Ua li, peb puas hais tias thaud, Tswv Ntuj hlub lawv, ziag no Tswv Ntuj hloov siab tsis hlub lawv lawm ? Peb twb paub ntsoov, ib txwm Tswv Ntuj tsis thim lus, kawg tib neeg thiaj thim lus. Vim li ntawd, peb to taub tias Tswv Ntuj muaj lub Hmoov Hla cawm His Xais Lais no ua ib lub cim qhib txoj kev cawm neeg ua ntej rau tus Huab Tais cawm seej yuav lawv qab tuaj. Yes Xus yog tus tseem Yaj Ntshiab Leej Txiv xa tuaj cawm tag ib ntiaj teb leej tib neeg cev ntaj ntsug, nkauj qas xi nraug qas plig mus lawm peb ntuj. Lub Hmoov Hla cawm His Xais Lais no yog nuj pes saub txoj kev qhub txoj kev hlub.

    2-Yes Xus lub Hmoov Hla. Peb nyuam qhuav ua Yes Xus lub Hmoov Hla, yog lub txiaj ntsim npo peb ntawm tas puas tsav yam kev ua qhev thiab raug quab yuam. Peb tsis ua vaj ntxwv Fas Las Oos qhev li thaum ub His Xais Lais. Tiam sis cov vaj ntxwv zim txwv no quab yuam peb ua qhev hnyav kawg nkaus, ua rau peb tsis muaj kev twj lij ib yam His Xais Lais thaum ub. Cov vaj ntxwv zim txwv no muaj coob leej thiab ntau tus, peb yuav teev tsis tas lawv tej npe : Muaj vaj ntxwv khav theeb, vaj ntxwv thuam neeg, vaj ntxwv xam khib, vaj ntxwv sib cav sib ceg, vaj ntxwv ua plees ua yis, vaj ntxwv tub sab tub nyiag, vaj ntxwv ntxub neeg tua neeg, vaj ntxwv mob nkeeg thiab vaj ntxwv ploj tuag…Ntiaj teb neeg raug cov vaj ntxwv Fas Las Oos tshiab no quab yuam peb ua qhev. Yog peb tus kheej xwb, peb yuav tsis muaj zog nti tau dim ntawm cov vaj ntxwv no tes quab yuam peb ua qhev. Peb yuav vam Yes Xus tus nqes saum ntuj los coj peb kev tso peb dim mus taug txoj kev twj lij. Yog peb tsis dim kev ua cov vaj ntxwv no qhev, peb tsis muaj kev twj lij, peb sib hlub tsis tau, peb tsis muaj kev sib pab sib haum tau. Tab Yes Xus kiag, raug vaj ntxwv ntxub neeg tua daim ncuv saum ntoo cuam. Qhov kawg, Yes Xus raug vaj ntxwv ploj tuag nyam zaws hauv qhov ntxa ua qhev li ntiaj teb neeg tej tub tuag. Tiam sis, Tswv Ntuj tuaj cawm nws Leej Tub, tso xwv txheej rhuav vaj ntxwv ploj tuag tes plam plhuav Yes Xus sawv lis tsees ciaj sia nyob ib txhis li Tswv Ntuj tam zoj Fas Las Oos raug xwv txheej tso plhuav His Xais Lais dim kev ua qhev tam sid mus ua neeg twj lij. Yes Xus lub Hmoov Hla yog “Hla Plaws” kev ploj tuag sawv tsees ciaj sia. Tag kis ntawd, cov thwj tim tsis pom tus qauv hauv qhov ntxa lawm. Tiam sis, lawv pom tej yam txawv txawv : cov hlab ntaub hle tais rau ntawm chaw, lub ntxa qhuav qhawv khoob vus, txawv ib tsoom tub tuag ntxa. Piv li txoj kab nas du lug, yus txawm tsis pom nas khiav los yus paub ntsoov muaj nas niaj hmo taug nws txoj kab. Txawm cov thwj tim tsis ntsib Yes Xus, ntxa qhuav qhawv khoob vus, tej hlab ntaub ua cim zeem tseeb tias Yes Xus tsis nyob hauv ntxa lawm : “6 Xis Moos Pob Zeb lawv nws qab tuaj txog, nws chaws mus hauv lub ntxa. Nws xam pom cov hlab ntaub nyob ntawd 7 Daim ntaub, daim qhwv nws taub hau, tsis xyaw cov hlab ntaub nyob ntawd, tiam sis nyob nws ib cag kauv cia nyob ib lub chaw. 8 Lwm tus thwj tim chaws los thiab, tus xub tuaj txog tom ntxa, nws pom nws ntseeg” Peb ua Yes Xus lub Hmoov Hla vim peb ntseeg tias Yes Xus “Hla Plaws” yeej kiag txoj kev tuag, cev ntaj ntsug, nkauj qas xi nraug qas plig sawv li tsees rov ciaj sia mus ib txhis. Ib ntiaj teb leej tib neeg cev ntaj ntsug nkauj qas xi nraug qas plig yuav sawv li tsees muaj Yes Xus lub txiaj ntsha txais Yes Xus lub txiaj ntsig lawv nws qab los mus nyob ib txhis. Tsis tas li ntawd xwb, niaj hnub no, Yes Xus txiaj ntsha muaj hwj huam roos pab peb tau puas tsav yam, Yes Xus txiaj ntsig npo tau peb dim kev raug txim tas ib sim, yog peb ua li nws qhia, mloog nws hais.

    Ib tsoom phooj ywg sawv daws, tos peb pom niaj hnub no, peb hais lus tsis sib to taub, tos peb tsis sib haum, tos peb niaj hnub sib thuam, sib ntxub, sib rhuav vim peb tsuas pom peb tus Huab Tais Tswv Ntuj hlub peb xwb tsis pom nws hlub peb tus yeeb ncuab. Peb tsuas pom peb tus Tswv Ntuj tsa peb cai xwb, tseem xav kom Tswv Ntuj nplua peb tus yeeb ncuab. Yog peb tsis hloov dua lub siab tshiab li Yes Xus qhia, peb puas tseem muaj ntsej muag hais tias peb ntseeg Yes Xus, peb teev Yes Xus, vim Yes Xus twb tsis ua siab nqaim siab tis npaum peb lub siab nqaim siab ti. Yog yus lam txawj pom npaum li cas yus lub cev, yus lub siab thiab lub tswv yim txawj ua phem, txawj thab plaub, ua txhaum, txawj mob, txawj tuag, vim yus raug ua cov vaj ntxwv no qhev, tsis xav txhaum los cas twb yuam kev, tsis xav tuag los siav yaj siav ploj yuav tuag tiag. Peb yuav vam Yes Xus txiaj ntsha coj peb “Hla Plaws” ib ntiaj teb leej tub tuag lub qhov ntxa mus nyob ib txhiab niaj tsis txawj tag li Yes Xus.


    20.04.2011 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 30th May 2011, 6:14 am



    Rau hnub tim 01 lub 5 hlis 2011



    Ib tsoom niam txiv kwv tij neej tsa thiab phooj ywg hmov tshua,

    Hnub no yog lis piam tim 2 hauv lub caij nyoog Hmoov Hla. Lub Koom Txoos caw tas tsoom ntseeg sawv daws mloog Yes Xus cov thwj tim, yog cov ua tim khawv pom Yes Xus tuaj ntsib lawv, thaum Yes Xus sawv hauv cov tuag los. Ua ntej, peb yuav xub hais ob peb los txog tib neeg txoj sia, peb mam los hais txog Huab Tais Yes Xus kev sawv tsees muaj txoj sia tshiab.

    Tib neeg txoj sia. Peb leej tib neeg tsuas paub peb kev ciaj sia, tsis paub Huab Tais Tswv Ntuj kev ciaj sia. Yog hnub twg peb tib neeg txoj sia yaj, hnub ntawd yog hnub kawg hauv peb lub neej nyob ntiaj teb no. Muaj ntau txoj kev rhuav tshem, txo tau peb txoj sia kom ploj thiab puas ntsoog : kev mob nkeeg, xwv txheej los kev xwb tim ua, xwb tim txov neeg siav ; tej no yog tej yam nqus tau peb txoj sia kom tu nrho ntawm peb mus. Vim li ntawd, lub mob nkeeg ua tib neeg tuag ; xwv txheej raug phom, poob deg, poob zeb poob tsua, poob qab ke…yog xwv txheej ua neeg tuag ; kev chim siab noj yeeb noj tshuaj txo yus siav, kev ua tub sab muab ntaj muab phom tua neeg, muab tshuaj lom, kev rho me nyuam hauv leej niam plab, ntxub neeg, lim hiam…yog kev xwb tim txov neeg txoj sia, ua neeg ploj tuag. Tib neeg siav tsis tu ib qho, yuav tu ib qho ; tsis tuag mob tuag nkeeg los yuav tuag xwv txheej ; tsis tuag xwv txheej los yuav tuag riam tuag phom, tsov rog, sib ntaus sib tua, huab noj huab haus ; tsis raug neeg hiam tuag los yuav tuag mob nkeeg. Vim li ntawd, Yes Xus yug los ua neeg, Yes Xus raug luag ntxub, raug neeg hiam dai saum ntoo cuam tuag. Kev ploj tuag tsis yog tim dab ntxwj nyoog ua neej thiaj muaj ploj muaj tuag li Hmoob hais kam. Peb Hmoob poj yawm txawm hais tau li ntawd, niaj hnub no peb Hmoob txawm ntseeg li ntawd los tsis txhaum. Tos poj yawm Hmoob hais tau li ntawd, vim yog ib zag lus qhuab qhia piav ntiaj teb tib neeg kev puas ntsoog, kev ploj tuag. Lo lus hais thiab lo lus txhais tsis mus tib yam. Lo lus hais li ntawd, tiam sis txhais lwm yam. Yog peb tsis yuav tsis khaws poj yawm zaj lus qhuab qhia, peb kuj tsis pom qab piav, tsis muaj lus yuav qhia rau tej xeeb leej xeeb ntxwv tim li cas muaj ploj muaj tuag. Lo lus txawm liam dab ntxwg nyoog siab tsis zoo muab lub mob lub tuag khuam tim toj, neej mus khwv noj thiaj mus khaws tau los coj, ua mob qas ntxhia rau neej tej ntshua siab, neej li tau qaij qaug ploj tuag los mus. Yog lus qhuab qhia, lus paj lus xau, piav neej kev ploj kev tuag hauv lub sim ceeb xwb. Tsis tim tus dab ntxwj nyoog twg ua thiaj muaj ploj muaj tuag. Vim li cas ? Vim tas nrho lub sim ceeb ntuj tsim, tsis muaj ib yam yuav hla dhau kev ploj tuag. Lub sim ceeb tsis puas ntsoog ib qho, yeej raug ib qho ua kom lub sim ceeb puas ntsoog. Lub hnub lub hli, ib hnub twg yuav qauj yuav tsaus nti, vim roj hnub roj hli tag tsis muaj sam tau. Tej toj roob hauv pes yuav pob yuav nphau, vim av qeeg, dej kuav ua roob zeb roob tsuas ntxeev thiab nphau. Txawm Hmoob hais tias yog dab nphau toj, tsis yog li Hmoob hais ntawd. Tej kwj ha yuav nqhuab, tej hiav txwv yuav qhuav vim ntuj tshav teb nkig. Vim li ntawd, lub sim ceeb yog Tswv Ntuj tsim, lub sim ceeb txais txoj sia ntawm Tswv Ntuj. Peb tib neeg yog Tswv Ntuj tsim tib yam, peb txais txoj sia ntawm Tswv Ntuj. Yog Tswv Ntuj tib leeg pub txoj sia rau peb tib neeg thiab pub rau lub sim ceeb nyob txog thaum twg, peb muaj txoj sia nyob txog txij ntawd. Peb ntseeg hais tias Leej Txiv Tswv Ntuj yog tus muaj peev xwm pub txoj sia nyob ib txhiab niaj puas xyoo rau nws Leej Tub Yes Xus. Peb ntseeg Yes Xus cov lus cog cia rau peb hais tias hnub kawg, nws yuav tsa peb sawv ciaj sia lawv nws qab mus nrog nws nyob txhiab niaj tim puas xyoo.

    Yes Xus kev sawv tsees ciaj sia. Niaj hnub no, peb ntseeg tias peb tus Huab Tais Yes Xus ciaj sia nyob nruab nrab hauv tsoom neeg ntseeg thoob ntiaj teb. Peb ntseeg Yes Xus kev ciaj sia hauv nruab siab. Tiam sis peb piav tsis tau, peb tsis muaj lo lus los qhia tau Yes Xus kev ciaj sia. Peb tsuas piav tau raws li cov tim khawv, Yes Xus cov thwj tim qhia rau peb xwb. Lawv tsis paub piav, tsis muaj lo lus piav Yes Xus kev ciaj sia. Lawv tsuas qhia tau tias Yes Xus tuag tseeb, tuag lawm tiag, tiam sis lawv pom Yes Xus ciaj sia nyob nruab nrab hauv lawv : “25 Lwm cov thwj tim hais rau Tos Mas : “Peb twb pom Huab Tais lawm !” Tus no hais rau lawv : “Yog kuv tsis pom lub qhov ntsia hlau hauv nws tes thiab cev kuv ntiv tes rau lub qhov ntsia hlau thiab muab kuv txhais tes plhws nws phab tav, kuv yuav ntseeg tsis tau.” Peb tib neeg tsuas ntseeg tej yam txaus ntseeg. Ib tug neeg tuag lawm, yeej sawv tsis taus rov los. Tsis muaj leej twg ua tau kom ib tug tuag ciaj sia rov sawv tsees tau. Vim li ntawd, Tos Mas mloog nws cov phooj ywg hais tsis txaus nws ntseeg. Tsis kawg Tos Mas tib leeg thiaj zoo li ntawd. Niaj hnub no, peb tib neeg yeej tsis txawv ntau Tos Mas. Peb muaj pes tsawg leej ntseeg tias cov tuag yuav sawv tsees rov muaj sia ? Peb twb paub ntsoov tib neeg tsis muaj tis, peb ya tsis taus. Peb mus txoj kab twg peb xuas ko taw mus kev. Peb lub cev nyob thaj chaw twg, peb nyob qhov chaw ntawd. Ib tug tib neeg nyob tsis tau ob qho, peb qho chaw thooj txhij : peb nyob tsis tau Suav teb tam sim no thiab nyob Fab Kis teb thooj txhij tam sim no. Peb lub siab nyob tau thoob ntiaj teb los peb lub cev tsuas nyob tau tib qho chaw xwb. Peb yuav qhib qhov rooj, peb thiaj mus tau hauv tsev. Peb tsis yog huab tsis yog cua yuav nkag ntawm qhov tsev mus tau rau sab hauv. Peb nyob qaum zos, peb tsis hnov cov nyob qab zog hais lus. Cov thwj tim lawv pom Yes Xus sawv ciaj sia tsis zoo li tus qub thaum tseem nrog lawv nyob lawm. Txawm lawv qhov muag tsis pom Yes Xus, txawm lawv tes kov tsis tau, txawm lawv tsis hnov Yes Xus ua suab sab, los Yes Xus nyob nruab nrab hauv lawv. Lawv tsis paub yog tim li cas. Muaj ib hnub, lawv tseem nkaum hauv tsev, vim lawv ntshai neeg tuaj ntes lawv mus tua, lawv liaj qhov rooj qhov rai ntom nti, tej phab ntsa tsev tsis to lub qhov, xyov ua cas Yes Xus tshwm plaws nruab nrab ntawm lawv xub ntiag : “26 Yim hnub tom qab, nws cov thwj tim tseem rov nyob sab hauv thiab Tos Mas nrog lawv ua ke. Cov qhov rooj puav leej kaw tas, Yes Xus tuaj tshwm sawv hauv nruab nrab, nws hais : “Nyob thaj yeeb nej sawv daws !” 27 Thiab hais rau Tos Mas : “Cev koj ntiv tes ntawm no ntsia kuv cov tes thiab cev koj txhais tes ntawm kuv phab tav thiab txhob ua tus tsis ntseeg, tiam sis ua tus ntseeg.” Thaum Yes Xus tshwm tuaj yim hnub tom qab, Yes Xus teb Tos Mas cov lus Tos Mas hais rau nws pab phooj ywg. Yog ib lub cim qhia peb paub tias Yes Xus nyob nruab nrab hauv nws cov thwj tim, hnov lawv tej lus tham, mloog lawv tej lus hais. Tsis tas li ntawd, Yes Xus sawv rov los tsis zoo li thaum Yes Xus tseem ua neej nyob. Yes Xus sawv rov los nrog peb nyob los peb tsis pom, tsis noj mov tsis haus dej los tsis tshaib tsis nqhis li tej tib neeg lawm. Yes Xus tsis yog nyob ib thaj chaw xwb, nyob thoob qab ntuj plaws, tsis muaj tis los ya taus, tsis yuav taw mus kev lawm, yuav los hauv tsev tsis nkag ntawm qhov rooj yeej los tau tsev, phab ntsa txawm tuab npaum twg tsis txhawj hla los tau sab hauv tawm tau sab nraud. Yes Xus yuav tshwm thaum twg cia li tshwm, nrog lawv noj, nrog lawv nyob, nrog lawv tham, tuav lawv tes. Ib sij huam, Yes Xus yuav yaj ntshis cia li yaj yam txoj sia, lawv yeej vuag tsis tau ib qho phuas tuav ntawm tes. Vim li ntawd, peb ntseeg hais tias ziag no, Leej Txiv Tswv Ntuj pub txoj sia nyob txhiab niag tim puas xyoo rau Yes Xus. Txij hnub Yes Xus sawv tsees muaj Tswv Ntuj txoj sia, nws tsis tshaib, tsis nqhis, tsis muaj mob dia hau, tsis txawj tuag ib zaug ntxiv lawm. Leej twg mloog Yes Xus lus, ua li Yes Xus qhia kom ua, muaj Yes Xus koob hmoov. Tus muaj Yes Xus koob hmoov, ntseeg Yes Xus, kuj yuav ua tau Yes Xus cov dej num. Hnub kawg, nws kuj yuav sawv lis tsees ciaj sia lawv Yes Xus qab, tsis txawj tshaib, tsis txawj mob, tsis txawj tuag ntxiv.

    Ib tsoom phooj ywg sawv daws, peb nco ntsoov peb cov yawg koob, Yes Xus cov thwj tim tej lus qhuab qhia rau peb. Peb tsis txhob thuam cov tub txib sawv los taj cov thwj tim chaw qhia Yes Xus lub Moo Zoo rau ntiaj teb neeg, kom sawv daws tig los ua ib tse neeg, ua haiv neeg ntseeg Tswv Ntuj teev Tswv Ntuj : “31 Cov no muab sau tseg kom xwv nej ntseeg tias Yes Xus yog Leej Pleev Tswv Ntuj Leej Tub kom xwv tus ntseeg muaj txoj sia vim nws lub npe” Yog peb tsis mloog cov sawv los taj cov thwj tim tej lus qhuab qhia, peb ua caj hlav ces ncau ncaim ntawm cov thwj tim. Yog peb ncaim ntawm cov thwj tim, peb kuj cam thawj ncaim ntawm Yes Xus. Peb ncaim ntawm Yes Xus lub Koom Txoos Niam mus ua peb ib pab lawm. Peb tsis koom vaj qhia, tus sawv Pob Zeb lub chaw, peb kuj ncaim ntawm Pob Zeb tus tuav cov yawm sij Yes Xus tso rau qhib rooj ntug. Vim li ntawd, peb yuav vam cov neeg ncaj qhia kev rau peb taug. Peb yuav thov cov leej ntshiab tej koob hmoov roos peb ua neej, khaws kom tag cov thwj tim tej lus qhuab qhia tsis pov tseg ib los.


    28.04.2011 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 30th May 2011, 6:26 am



    Rau hnub tim 08 lub 5 hlis 2011



    Ib tsoom neeg ntseeg thiab phooj ywg sawv daws,



    Hnub no, yog hnub chiv 3 hauv lub caij Hmoov Hla. Peb tsis muaj sij hawm ntau los mus nthuav cov ntsiab lus hauv cov zaj nyeem hnub no. Peb tsuas piav me me ua piv txwv nyias mam li tshawb nrhiav, txhim rau ntxiv yam lub tsev tsa kom tau rau nyias. Peb tsuas khaws ob lub ntsiab lus los nthuav rau ntawm no : Yes Xus Pleev ciaj sia rov los tsis zoo li yav thaum tseem ua neej nyob thiab tus pom lub ncuav mov nws pom Leej Pleev tus ciaj sia rov los.

    Yes Xus Pleev ciaj sia rov los. Yog hais txog peb tib neeg lub neej, peb twb paub tsis txhij paub tsis tag peb leej tib neeg lub neej. Piv li peb tib neeg nyias muaj nyias kab lis kev cai, vim peb nyias yog nyias ib haiv neeg, nyias muaj nyias xeem lus. Yus twb paub tsis tag yus tej kab lis kev cai. Lwm haiv tib neeg kab lis kev cai, yus haj yam yuav paub tsis tag. Vim peb twb paub tsis txhij paub tsis tag peb leej tib neeg lub neej. Yog li ntawd, peb puas yuav vam paub lub neej qaum ntuj tshaj peb tib neeg lub neej. Yog tsis muaj tus qhia, peb yuav paub tsis tau lub neej qaum ntuj zoo li cas. Tiam sis vim muaj Yes Xus tuaj qhia qaum ntuj lub neej rau peb paub. Yes Xus Pleev ciaj sia rov los tsis zoo li yav thaum Yes Xus tseem ua neej nyob. Yes Xus Pleev tseem yog tus qub neeg tiam sis hloov txoj sia tshiab qaum ntuj txoj sia, tsis yog qab ntuj neeg txoj sia lawm. Qaum ntuj txoj sia yog siav ciaj nyob ib txhis tsis nphob tsis thim, ntiab teb ciaj sia muaj ib hnub los txog txawj yau txawj yaj nyob tsis tshaj ib tiam. Ntiaj teb neeg yuav taug kev thiaj mus txog teb, yuav siv taw taug kev thiaj los txog tsev, yuav caij nees, caij tsheb thiaj txog chaw. Qaum ntuj neeg nrog huab nrog cua ya, tsis muaj hneev tsis pom lw, nrog nag xob nthe, nrog nag cua nroo lub ntsej hnov, tiam sis lub muag tsis pom tus : “15 Nkawd tseem sib hais sib tham ua ke, ib sij huam, Yes Xus tus kheej txav los, nws nrog nkawd taug kev. 16 Tab sis nkawd qhov muag zeem tsis tau nws.” Niaj hnub no, Yes Xus Pleev nrog peb nyob ntawm peb lub neej, ntsib peb tej yas kab yas ncua, peb niaj hnub pom nws, nrog nws noj, tuav nws tes, tsuas yog peb qhov muag zeem tsis tau tias yog Yes Xus : “Niaj hnub, kuv nrog nej nyob mus txog hnub ntiaj teb kawg LK 28,20” Teeb meem, tsis yog Yes Xus dag peb, yog peb tsis txawj pom Yes Xus. Qhov peb tsis txawj pom, puas yog vim peb siab qeeb, cia siab tsis tas rau ntawm Tswv Ntuj. Peb puas ntseeg Yes Xus kom ti txha tiag ?

    Tus pom lub ncuav mov pom Leej Pleev. Cov neeg ntseeg Yes Xus hauv lub Koom Txoos Kav Tos Liv yuav tsum paub kom meej, paub kom tshab lub Thaj Txi Ntuj (L’Eucharistie, la Messe) muaj nqes thiab tseem ceeb npaum li cas rau lawv. Lub Thaj Txi Ntuj yog lub Cim loj tshaj plaws rau ib tug neeg teev Yes Xus. Lub Koom Txoos Kav Tos Liv hwm Thaj Txi Ntuj (La Messe) loj dua tej cim thiab lwm yam tej kab ke teev hawm tag tib si. Leej twg tsis ntseeg qhov ntawd, nws kev ntseeg Yes Xus tseem hlob tsis tau txaus. Vim Thaj Txi Ntuj, yog Yes Xus tus kheej lub cev thiab roj ntsha ua txhiam xws yug haiv neeg teev Yes Xus ciaj ua Yes Xus lub cev nyob ntiaj teb no. Yes Xus yog Tswv Ntuj Leej Tub. Tus noj Yes Xus lub cev thiab haus Yes Xus cov ntshav ciaj Tswv Ntuj tub ki thiab ciaj Tswv Ntuj haiv neeg nyob nruab nrab ntiaj teb tib neeg. Vim Tswv Ntuj Ntshiab, li ntawd, haiv neeg teev Tswv Ntuj noj Yes Xus lub cev thiab haus Yes Xus roj ntsha ua haiv neeg ntshiab nyob nruab nrab ntiaj teb neeg txhaum. Tswv Ntuj Ntshiab ua tau neeg txhaum kom ntshiab. Leej Txiv Tswv Ntuj xa nws Leej Tub Yes Xus tuaj npo ntiaj teb neeg txhaum, ua kom neeg ntshiab si mus lawm qaum ntuj ciaj Tswv Ntuj neeg, yog qhov Tswv Ntuj nyiam thiab ntshaw tshaj. Haiv neeg teev Yes Xus ua Thaj Txi Ntuj (La Messe) vim Yes Xus hais kom ua. Yes Xus tus kheej muab nws lub cev thiab roj ntsha ua txhiam xws yug cov tuaj noj Yes Xus lub cev thiab haus nws roj ntsha kom ciaj Yes Xus thwj tim muaj zog tiv dab phem, tiv kev txhaum ua haiv neeg ntshiab tshaj Yes Xus lub Moo Zoo, tuav Yes Xus tes dej num mus txog hnub kawg : “29 Nkawd cheem nws tias : “Nrog wb nyob, tsaus ntuj lawm thiab hnub twb poob qho.” Nws chaws mus nrog nkawd nyob. 30 Thaum nws nrog nkawd zaum ntawm rooj mov, ib sij huam, nws tuav lub ncuav mov, nws foom hmoov zoo rau, nws muab ntais pub nkawd.31 Nkawd qhov muag qhib plho thiab nkawd zeem tau nws, tiam sis nws cia li ploj ntais ntawm nkawd xub ntiag lawm.” Hauv lub Thaj Txi Ntuj, thaum txiv plig nrhab tes khwb cov ncuav mov, hais zaj thov Leej Ntuj Plig Ntshiab foom koob hmoov rau cov ncuav mov thiab ntim cawv tas, ncuav mov thiab ntim cawv ntiaj teb ua qaum ntuj tug lawm, yog Yes Xus lub cev thiab roj ntsha yug Tswv Ntuj haiv neeg thiab tag nrho ntiaj teb neeg. Vim li ntawd, lub Koom Txoos Kav Tos Liv hwm lub Cim Yug loj heev txawb rau lub sam xeeb siab dua tej tib si. Lub Koom Txoos Kav Tos Liv tsis muaj cuab kav thuam Yes Xus lub cev. Lub Koom Txoos Kav Tos Liv tsis muaj ntsej muag muab nyuag mov ci dog dig hauv kiab khw los ntais faib rau tus hlob tus yau, muab tus ub tus no noj phis phais lais ua piv txwv txom ncauj ; thiab lub Koom Txoos Kav Tos Liv tsis muaj ntsej muag lam muab nyuav dej qab zib, nyuag kua txiv ntoo los ua piv txwv kom tas kev tas cai. Kawg cov neeg cam thawj ncaim npoj tawg ntawm lub Koom Txoos Niam Kav Tos Liv mus ua nyuag koom txoos me nyuam luam taw raws tus xib hwb ub tus xib hwb no thiaj muaj ntsej muag thuam Yes Xus, tsis hwm Yes Xus lub cev thiab roj ntsha, tsuav lawv muaj cuab kav twv Huab Tais Yes Xus kuj tsis dua ntawm lawv siab xav. Tiam sis tus ntseeg Yes Xus, teev Yes Xus raws Yes Xus cov thwj tim qhia txij thaum hauv paus los, raws Koom Txoos Kav Tos Liv txoj cai, yuav tsum hwm kom tag siab nrho lub Cim Yug, yog Yes Xus lub cev thiab roj ntsha. Ob tug twg tim hauv Lus Kas tsab ntawv no pom Yes Xus ploj ntawm lub ncuav mov ntawm nkawd xub ntiag. Tsuas tshuav lub ncuav mov rau nkawd pom nyob ntawm nkawd tes ua pov thawj txog Yes Xus Pleev tus tau nrog nkawd taug kev los tau ib tav su. Yog peb tsis hwm Yes Xus lub cev thiab roj ntsha hauv cov ncuav mov thiab ntim cawv, raws li Koom Txoos Kav Tos Liv kev ntseeg ( La foi catholique ) peb thuam Yes Xus tib yam cov neeg cam thawj ncaim ntawm Koom Txoos Kav Tos Liv.

    Ib tsoom ntseeg Yes Xus thiab teev Yes Xus, nej xav paub Leej Txiv Tswv Ntuj, nej xav paub Yes Xus Pleev yog leej twg, nej tig ntsej los mloog lub Koom Txoos Kav Tos Liv tej lus qhuab qhia. Cov tiv khawv, cov thwj tim, cov neeg ntshiab hauv Koom Txoos Kav Tos Liv yuav coj nej, qhia qhov tseeb rau nej, pab nej mus kom txog rau Yes Xus thiab Yes Xus yuav coj nej kom mus txog Leej Txiv Tswv Ntuj. Nej yuav muaj Tswv Ntuj txoj sia ib txhiab ib txhis tsis txawj ploj, tsis txawj tuag ib zaug ntxiv li Tswv Ntuj.


    07.05.2011 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 30th May 2011, 6:30 am




    Rau hnb tim 15 lub 5 hlis 2011,



    Ib tsoom ntseeg thiab phooj ywg hwm Tswv Ntuj mloog Tswv Ntuj lus,


    Hauv cov zaj nyeem hnub no muaj ntau lub ntsiab lus tseem ceeb peb tus Huab Tais Yes Xus xav qhuab qhia rau peb tus ntseeg Yes Xus, teev Yes Xus kom peb yoog tau nws lawv nws qab taug nws hneev. Peb yuav tsis khoom los piav kom txhij hais kom txhua tas cov ntsiab lus peb hnov hnub no. Peb tsuas khaws Huab Tais Yes Xus ib lub ntsiab lus los nthuav rau sawv daws raws li nram no. Nej ho cuab ntsej mloog thiab saib puas mus li ntawd tiag.

    Hais txog tus tub sab txhav khem raws li Huab Tais Yes Xus qhia. Peb yuav tau xyuam xim peb tus kheej tas zog tsis txhob cia peb poob rau kev ua tub sab tub nyiag. Vim muaj ntau txoj kev yus tsis nco qab txog, twb hawv tau yus, pus yus mus poob rau kev ua neeg tub sab : Kev cuab yej cuab ntxiab, kev twv txiaj yuam pov, kev quav dej quav cawv, kev loj leeb, kev tub nkeeg, kev ua lag ua luam, kev ua dej ua num, kev ua txij nkawm, kev ua nom ua tswv, kev ua xib hwb qhia kev tshaj ntuj lus…Tas txhua txoj kev hais los no tos nco txawj ntxeev peb txhua leej neeg xws teb xws chaw los ua neeg tub sab.
    -Muab piv li kev tub nkeeg. Tsis txhob xav tias kev tub nkeeg tsuas ua puas niag neeg tub nkeeg tus kheej xwb, tsis puas lwm tus. Tus neeg tub nkeeg raug txom nyem tsuas sawm nws nkees, puam chawj nws. Vim nws lub plab cav tsis qhuab qhia nws kom ua neeg nquag ces raug txom nyem los xij peem nws. Tsis yooj yim li hais ntawd. Peb pom tias nyob hauv ib tse neeg, tsuav muaj ib niag tub nkeeg yeej ua teeb meem rau lub tsev ntawd ; los hauv zos muaj ib ob yig tub nkeeg thiab hauv ib lub teb chaws muaj ib npoj neeg tub nkeeg…Yeej ua teeb meem rau lub teb chaws, ua ntxhov lub zej zog muaj lus xaiv lus ncua. Vim li cas ? Vim ua neej nyob tsis hais haiv neeg twg, tsis hais leej tib neeg twg peb yeej nyiam thiab qhuas tus neeg nquag : “Yog leej twg tsis xav ua hauj lwm kom nws tsis txhob noj mov 2 TXLN 3,9” Yog ib tug neeg nkees tsis muaj noj, tsis muaj hnav, nws lam nyob ncaj ncaj nws vaj nws tsev, tsis ua txhaum leej twg, luag txawm saib tsis taus nws los luag tsis muaj cai kiam nws. Tiam sis tib neeg ces thaum tshaib tuaj lawm, yeej tsis leem cai, ua neeg thov khawv, thov noj thov haus ncig zej ncig zos, ncig kiab khw puv nroog. Ua neej nyob, tsis muaj leej twg yuav haus cua xwb plab tsau. Tib neeg yuav tsum khwv, yuav tsum siv zog thiaj muaj noj, muaj hnav : “Cov ntawd, peb caw lawv thiab taij lawv ntawm Huab Tais Yes Xus Pleev tug kom cia li rau siab ntso ua num twj ywm, noj tej mov ntawm lawv tes mus khwv tau los 2 TXLN 3,12” Tus neeg nquag, yeej tsis nco txhawj txog kev tshaib nqhis. Tus neeg nkees plab tshaib tuaj lawm, yeej tsis lam nkaum twj ywm hauv lub vaj lub tsev yoo tshaib raws nws kev tub nkeeg. Nws kawg yuav tawm rooj mus nrhiav noj nrhiav haus. Thaum luag pom nws tawm rooj, luag lub ncauj tsis hais los siab ntsws yeej xeeb txob pes hnyo xav twj ywm tsam mus xawb luag qoob loo, mus nyiag luag tsiaj txhu los tua noj. Tos luag pheej piv txoj lug tias : “Ua neeg nyob leej twg ua tub sab, luag pom ces luag ntshais nws cuag ntshai dab.” Yeej muaj tseeb tiag, tus neeg tub sab txhav khem yeej ua tej hom zais ntshis tsis pub leej twg paub nws lub siab dub lim hiam. Neeg tub sab yeej tsom rawv lub caij lub nyoog luag tsis nco faj kiag mam nyiag luag tsiaj, thauj luag qoob, huab luag nyiaj txiag nqa khiav. Tos tib neeg ntshai tub sab, vim tub sab lim hiam npaum li cas tsis muaj tug paub tau. Yog tub sab pom muaj neeg ua pov thawj, tub sab yeej muab luag tua kom tuag kom txhob muaj tug paub, txhob muaj neeg hais nws lub qe tawm. Peb pom tias tus tub sab peb tham no, thaum ntej, nws yog neeg tub nkeeg xwb. Tiam sis, kov thiab kov, nws ua tsheej tub sab thiab haj tseem tua neeg thiab. Vim li ntawd, yog hais tas hauv cov neeg tub sab, muaj ntau tsav ntau yam neeg tub sab, muaj txhij muaj txhua. Yog nej xyuas neeg tub sab lub neej los mus, nej pom thaum ntej lawv kuj yog neeg xws teb xws chaw, yog nej kwv nej tig, nej tej neej tsa : yog neeg cuab yej cuab ntxiab rau tej hauv toj hauv hav, neeg twv txiaj yuam pov laug caij laug nyoog, neeg quav dej quav cawv nej pom dua ntsib dua los lawm, neeg loj leeb ncig ntuj ncig teb, neeg ua lag ua luam hauv tej kiab khw, neeg ntiav zog ntawm nej zos los hauv tej nroog, neeg muaj cuab muaj yig niam tsev txiv tsev li nej, qee leej kuj yog neeg muaj hwj chim nto koob meej thoob teb thoob chaw ua nom ua tswv…ua rau nej ceeb loj, poob siab tag, uag ! Tub sab tseem yog yus tej swm neeg !!!
    -Muab piv li tus neeg qhuab qhia kev ntseeg ntuj ua tub sab txhav khem raws li Yes Xus qhia. Tus xib hwb los tus txiv plig, kuj tib yam, yuav tau ceev faj tas zog txhob yuam kev mus ua tub sab. Tej zaum nws yuav tsis lam taug kev mus tub sab ris luag qoob tom txhab, zais luag nyiaj txiag noj, txeeb luag av, nam luag ciam...Tiam sis tus xib hwb los tus txiv plig yuav tsis txhob npaj siab muag Yes Xus lub Moo Zoo los pauv nyiaj pauv txiaj, tsis txhob muab Yes Xus lub Moo Zoo pauv koob meej, txhob muab Yes Xus lub Moo Zoo ua lub chaw nta hwj chim rau nws tus kheej kav tsoom ntseeg, yuam thiab khoo sawv daws. Tus xib hwb los tus txiv plig coj li ntawd yog tub sab txhav khem li Yes Xus qhia. Nej twb pom ntsoov niaj hnub no, nyob hauv tej lub teb chaws neeg cav ntsuag qees tias vam meej, nplua nuj, muaj kev ywj pheej “Freedom, liberté” loj. Nej puas xav txog, vim li cas muaj ntau lub me nyuam koom txoos cam thawj “Une profusion des Eglises Protestantes” nyias ua nyias lub “Church” luam taw laws npaum li ntawd ? Tawm rooj plaws ntawm nej taw rooj mus ti tom nej tus phooj ywg tsev, nej xam qab ke qaum kev saib muaj pes tsawg hom “Church” npaum nkaus nej nkag hav zoov pes tsawg hom nceb luam nej ko taw nej pom tag. Yog tim li cas tiag yuav muaj ntau hom “Church” npaum li ntawd ? Teeb meem qhov ua ntau pab ntau pawg ntseeg lub ntsiab yog li no : Vim tej xib hwb nyias kav nyias lub “Church”, tsis yog mus kawm Yes Xus lub Moo Zoo los ua Yes Xus tub txib qhuab qhia Yes Xus lub Moo Zoo rau ntiaj teb neeg. Tej xib hwb no, yog tej neeg mus kawm yuav npe xib hwb kom tau cai los muab kev ntseeg Yes Xus cais pab cais pawg. Lawv tsis quav ntsej, tsis mob siab qhov tseeb ntawm kev teev hawm Yes Xus. Hmoob thiaj pheej hais tias : “Ntau tus ua cuav poov xab, ntau txiv muam ua puas dab” yog tej xib hwb ntawd. Hom xib hwb no, luag tsis nrog nrhiav kev ntseeg Yes Xus kom pab tau tib neeg los ntseeg Yes Xus. Luag muab Yes Xus lub npe lo ntawm “Church” ua lag ua luam. Luag muab luag zaj tswv yim los coj neeg, kav neeg thiab khoo neeg. Luag tsis muab Yes Xus lub Moo Zoo los qhuab qhia neeg, luag tsis yog mus kawm los coj tib neeg ntiaj teb kom haum pheej, tsis qhia neeg ua phooj ua ywg, ua kwv ua tij txhob sib thuam, txhob sib cais. Luag tseem yuav tsum nyias cais nyias pab muaj nyias pawg, koj tsis txhob tuaj ntawm kuv “Church”, kuv tsis xav mus koj “Church”. Txawm qhia tsis raug Yes Xus lub Moo Zoo kav liam, tsuav muaj ib pab niag neeg caum luag qab, sawv ua luag xib hwb ces xam tau. Lub ntsiab, cov xib hwb no tsis yog kawm los qhia kom neeg paub Yes Xus, qhia neeg teev hawm Yes Xus, coj neeg raws li Yes Xus cov thwj tim kev qhuab qhia raws keeb kwm, yoog caj yoog ces muaj hauv paus nto hauv ntsis qhia ncaj qhia tseeb li lub Koom Txoos Kav Tos Liv. Tej xib hwb no mas ncauj qab zib, nplaig qab ntse kawg, ntxias zeej tsoom noj thiab tsuav nws tau qhe : “7 Yes Xus rov hais dua tshiab : “Kuv hais tseeb tseeb rau nej tias kuv yog cov yaj lub qhov rooj. 8 Cov tuaj dua lawm yog tub sab txhav khem, cov yaj tsis mloog lawv. 9 Kuv li kuv yog lub qhov rooj : Leej twg nkag ntawm kuv, nws yuav tau kev dim thiab nkag mus thiab tawm los nrhiav tau tshav zaub. 10 Tus tub sab tsuas tuaj kom tau nyiag, kem caj pas thiab ua kom piam sij; kuv li kuv tuaj kom lawv muaj sia kom muaj loj li loj.” Peb yuav tig nsej mloog kom zoo Yes Xus cov lus no thiab mloog cov xib hwb no tej lus, rua muag ntsia lawv tes dej num, peb thiaj li yuav pom qhov lawv yuam kev. Lawv muag Yes Xus lub npe los nrhiav nyiaj thiab koob meej, lawv ua li cas thiaj muaj cai yuam tau neeg :
    -Ntawm kev tso nyiaj hauv “Church”. Yeej muaj tseeb, tsoom ntseeg yuav tsum tso nyiaj rau lub tsev teev ntuj. Vim kev tso nyiaj yog txiaj ntsim ua Huab Tais Tswv Ntuj tsaug. Yus mus teev Tswv Ntuj, mus ua Tswv Ntuj tsaug rau tej txiaj ntsim Tswv Ntuj pub rau yus. Yus tsis mus tes dawb tes npliag, yus npaj paj tshab mus ua txim cev rau Tswv Ntuj : mus faib yus tej qoob loo, los tsiaj txhu, los nyiaj txiag…muab yus qhov paj tshab cob rau cov tub txib tuav lub tsev teev ntuj, xib hwb los txiv plig. Nyias muab raws li nyias kev khwv tau noj tau haus. Tus neeg paub cai yuav tsis txhob hla tus ntugtus cai no. Qhov no, yog kev yog cai. Tiam sis, qhov ua teeb meem, yog cov xib hwb nyias saib nyias lub “Church” yuam qhi neeg tso nyiaj npaum li ub, npaum li no, vim muaj sau tseg nyob hauv phau Ntawv Ntshiab. Tiam sis, hauv phau Ntawv Ntshiab tsis yog hais txog kev tso nyiaj xwb. Tseem muaj ntau yam : yog tim tes ua tub sab, muab tes txiav ; yog tim taw, muab taw txiav ; yog tim qhov muag muab qhov muag kaus pov tseg…Muaj ntau yam lus qhuab qhia li no neeg ua tsis txog npaum li ntawd. Cov xib hwb li hais no yuam qhi tseev kom tau ntawm kev tso nyiaj. Cov yim neeg nplua nuj, kuj tsis luaj twg. Yog yim neeg twg pluag, tsis muaj nyiaj tso xwm yeem hauv “Church” ces xib hwb txawm qhuab qhia hnyav zuj zus rau tsev neeg ntawd. Thaum kawg, yog lawv tso tsis taus nyiaj li ces raug xib hwb caum tawm “Church”. Ua li, puas yog hom xib hwb no muab Yes Xus lub Moo Zoo ua lag ua luam, nrhiav nyiaj txiag ? Vim li cas lawv muaj cuab kav txiav txim rau neeg : “Koj neeg nplua nuj, peb yuav koj tas zog tsis txhob khiav ov ; koj thiaj yuav mus ntuj ceeb tsheej ; hos koj li neeg pluag tas li, peb ntiab koj tawm “Church”, koj yuav mus dab ntxwg nyoog teb ov.”
    -Rhuav Yes Xus lub Moo Zoo thiab ua puas Yes Xus lub npe. Yes Xus Tswv Ntuj Leej Tub nqes saum ntuj los cawm tag lub ntiaj teb neeg, tus muaj tus pluag, tus phem tus zoo, tus muaj txhaum tus neeg ntshiab huv…Yes Xus tsis txiav txim rau tus neeg txhaum kom mus lawm dab teb : “Kuv tsis tuaj hu cov neeg ncaj, tiam sis cov neeg txhaum Mt 9,13” Hom xib hwb no tsis yog lawv muaj cai txiav txim rau tib neeg xwb, lawv tseem rhuav Yes Xus lub Moo Zoo thiab ua puas Yes Xus lub npe, vim lawv kev thuam neeg thiab cais tib neeg. Yes Xus twb tsis thuam tej neeg teev dab qhuas kom khiav deb ntawm Yes Xus. Tseem yog Yes Xus mus thawj cov neeg teev dab qhuas caum dab phem khiav ntawm tej neeg raug dab, mus cawm kom lawv dim kev txom nyem : “1 Lawv hla dej hiav txwv mus sab ntug tim ub, rau cov Nkes Las Xes Nos teb 2 Tawm plaws hauv nkoj, tam sim ntawd, ib tug neeg paug ib tug ntsuj plig tuaj tom toj ntxas tuaj ntsib nws Mk 5,1-2” Tej xib hwb hauv tej “Church” no tsis qhuab qhia Yes Xus lub Moo Zoo kom nkag kab nkag kis. Lawv ces zoo tam ntua tej tub sab Yes Xus hais los saud. Lawv lam ua xib hwb txeeb kom tau ib pab neeg ntseeg, lawv tsis yog tus tswv zov yaj. Lawv tsis nkag ntawm Yes Xus los ua xib hwb qhia Yes Xus lub Moo Zoo. Vim lawv kiag, lawv twb tsis mloog Yes Xus lus. Lawv yuav ua li cas muab tau Yes Xus cov lus los qhuab qhia luag tej. Lawv thiaj zoo li tus tub sab tuaj kom tau nyiag, kem caj pas ua kom piam sij. Hmoob thiaj li piv lus tias : “Yuav cem kom cem dab, yuav thuam kom thuam neeg tub sab.” Lawv lam muab Yes Xus lub npe ua ib pawg ntseeg, tiam sis yog qhib ib lub koom haum “Une assurence mutelle” koj pab kuv, kuv pab koj. Leej twg them tsis taus assurance, lawv tsis yuav tus ntawd, nws tsis haum kev teev Yes Xus.
    Ib tsoom ntseeg thiab phooj ywg, peb los teev Yes Xus thiab los ntseeg Yes Xus, peb tsis yog ua li peb siab nyiam, yog xyaum ua li Yes Xus. Peb lawv Yes Xus qab taug Yes Xus hneev, peb yuav mloog Yes Xus lus qhub ua raws Yes Xus lus qhia. Yog peb thuam Yes Xus cov thwj tim, kuj yog peb thuam Yes Xus. Yog peb thuam Yes Xus, peb kuj thuam Tswv Ntuj. Nco ntsoov, peb yuav tsis txhob cais ib tug tib neeg twg hauv ntiaj teb no, peb thiaj tsis ua neeg tub sab txeeb txoj kev ntseeg Yes Xus los ua peb tug. Peb teev Yes Xus raws caj ces raws keeb kwm, raws cov thwj tim, lawv yog cov qhia Yes Xus rau peb teev hawm, yog peb mloog lawv lus, ces peb tsis yuam kev.

    12.05.2011 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 30th May 2011, 6:39 am




    Rau hnub tim 22 lub 5 hlis 2011



    Tsoom ntseeg thiab phooj ywg,

    Hnub no, peb nyob hauv lis piam 5 lub caij Hmoov Hla. Hauv cov zaj nyeem peb mloog hnub no muaj ntau lub ntsiab lus tseem ceeb peb yuav hais tsis txhua, peb tsuas khaws ob lub ntsiab coj los nthuav tseg xws li nram no : Sib pab kho teeb meem hauv Koom Txoos thiab Yes Xus yog peb txoj kab ke mus lawm qaum ntuj.
    Sib pab kho teeb meem hauv Koom Txoos. Peb lub Koom Txoos Niam kuj zoo tam zoj lub cuab lub yig, ib nkawm niam txiv sawv ua neej. Hmoob twb niaj txhis piv lug tias : “Yug tub yug kiv los npaj laug, npaj qoob npaj loo tseg thiaj tau noj tau haus.” Ua ib zaug neej yug tsis muaj tub ki los tu siab. Thaum yug muaj tub ki tsis cob, tsis qhia tiag kuj tsis tsheej tsis ntseg ho yuav tu siab ib zaug thiab : “Paub tias phem li ntawd, tsis txhob yug los zoo dua !” Ib tug me nyuam yeej tsis lam yuav to taub niam txiv tej lus qhuab qhia tuaj thaum yau. Thaum raug niam txiv cem, me nyuam pheej xav tias ntshai yog niam txiv tsis hlub. Tiam sis ntev xyoo puag tom qab, tub hlob tiav txiv, ntxhais hlob tiav niam, mam to taub nws niam nws txiv tej lus qhub lus qhia thaum tseem yau. Peb los ntseeg Tswv Ntuj, teev Tswv Ntuj hauv lub Koom Txoos Kav Tos Liv kuj zoo tam ntua peb yug los ua me nyuam yuav tau mloog peb lub Koom Txoos Niam tej lus qhub lus qhia tam yus niam yus txiv. Vim li ntawd, peb yuav nco ntsoov peb lub Koom Txoos tej lus koob lus hmoov, tej kab ke nws ua thiab qhia rau peb coj. Tag nrho ib tsoom neeg ntseeg Tswv Ntuj, teev Tswv Ntuj nyob thoob ntiaj teb, tag cov xib hwb, cov txiv plig, cov tswv qhia thiab txiv vaj qhia, tag peb sawv daws yog ib tse neeg, yog ib cuab ib yig, yog kwv tij. Peb sawv daws yog Yes Xus lub cev, tes taw, qhov muag, pob ntseg, qhov ntswg, qhov ncauj…Yes Xus yog peb lub taub hau. Tag tsoom neeg ntseeg peb yog Yes Xus lub cev. Tiam sis, txij Yes Xus rov mus dua qaum ntuj lawm, tus sawv Yes Xus npe hauv ntiaj teb no, yog vaj qhia, vim vaj qhia yog tus sawv los taj Pob Zeb chaw. Pob Zeb yog Yes Xus tsa tuav lub Koom Txoos Niam mloog Yes Xus lus : “Kuv hais rau koj tias koj yog Pob Zeb, saum lub zeb no kuv yuav txhim kuv lub Koom Txoos Mt 16,18.” Thaum Yes Xus sawv ciaj sia hauv tsoom tub tuag los, Yes Xus xa Pob Zeb thiab tas cov thwj tim mus thoob qab ntuj mus tshaj nws lub Moo Zoo rau ntiaj teb neeg paub ; leej twg muaj siab tig los ntseeg Yes Xus, teev Yes Xus, muab tus ntawd ntxuav plig hauv Leej Txiv thiab Leej Tub thiab Leej Ntuj Plig Ntshiab npe kom yug ua Tswv Ntuj haiv neeg, ntseeg Tswv Ntuj thiab teev Tswv Ntuj. Muaj cov pej kum neeg coob zuj zus tig los ntseeg Yes Xus, ua rau Yes Xus lub Koom Txoos huam vam sai kawg. Cov pej kum neeg tig los teev Yes Xus nyias muaj nyias kab ke, nyias muaj nyias xeem lus. Cov neeg ntseeg Yes Xus muaj coob zuj zus nyob ntau lub teb chaws. Thaum ntawd, nws tsis yooj yim li thaum sawv daws tseem tsawg tsawg nyob koom zej koom zos hais tib xeem lus Hes Nplaws. Pib muaj cov kwv tij ntseeg hais xeem lus Hes Las, xeem lus Lis Dias, xeem lus Lis Kaus Nias, xeem lus Fus Nkias, xeem lus Pas Fus Lias, Xis Lias… Cov thwj tim zoo siab kawg. Tswv Ntuj haiv neeg huam vam, tiam sis teeb meem, kev txhawj xeeb kuj loj zuj zus tuaj thiab : “1 Thaum lub caij ntawd, cov thwj tim huam vam nroo ntws, ib sij huam cov neeg Hes Las ywm rau cov neeg Hes Nplaws, vim niaj hnub thaum leg dej num tsis muaj neeg quav ntsej pab poj ntsuam hauv lawv pawg.” Cov hais xeem lus Hes Nplaws yog cov coob, cov hais lus Hes Las tseem tsawg. Cov coob saib xyuas lawv cov poj ntsuam zoo dua cov tsawg. Sawv daws pom tias cov poj ntsuam Hes Las txom nyem dua cov poj ntsuam Hes Nplaws. Lawv tsis muaj noj muaj haus txaus. Lawv tsis muaj vaj muaj tsev zoo, tsis muaj hauj lwm ua. Tej teeb meem sawv tuaj no ua ntxhov rau cov thwj tim. Lawv yog cov coj Yes Xus lub Koom Txoos, lawv yuav tau kho tej teeb meem no kom ncaj, kom haum rau. Cov thwj tim thiaj tau sib sau sab laj, tsa cov tsob hwb (Tub Txib) los pab lawv leg qav leg num : “3 Kwv tij, nej nrhiav cov txiv neej xya leej hauv nej ua tim khawv zoo neeg qhuas, muaj ntsuj plig thoob tsib, peb tsa lawv rau txoj num ntawd ;4 Ntawm peb, peb yuav siv zog ntsos teev ntuj thiab tiam Leej Lo Lus.” Lawv tau tsa 7 leej tsob hwb los pab lawv tiam cov neeg ntseeg sawv daws. Hos lawv tsis tso lawv txoj num qhuab qhia Tswv Ntuj lus pov tseg.
    Niaj hnub no, Yes Xus lub Koom Txoos huam vam thoob plaws ntiaj teb. Tas tsoom ntseeg sawv daws tseem yim huab muaj ntau haiv neeg sib xyaws. Peb kuj nyias muaj nyias kab ke, nyias hais nyias xeem lus, ib txhia coob dua ib txhia. Tsoom ntseeg kuj muaj tej teeb meem ntau yam nyob hauv lub Koom Txoos niaj hnub no. Muaj tej txhia neeg ntseeg Yes Xus yeej raug txom nyem thiab raug tshaib raug nqhis dua lwm cov neeg ntseeg. Peb yuav cev tes sib pab. Tas tsoom ntseeg txhua leej thoob ntiaj teb, peb pom tshuav deb npaum li cas peb tseem ua tsis tau txog qhib yuav coj tau sawv dawv los sib hlub ua kwv ua tij sib pab sib nres, vim peb yog tib tse neeg xwb. Tsis yog ib leeg xwb yuav ua tau, tag txhua leej txhua tus yuav siv zog mloog Yes Xus lus. Tsis yog tus niam nkauj xwb los tus txiv plig xwb yuav tsum mloog Yes Xus lus.

    Yes Xus yog peb txoj kab ke mus lawm qaum ntuj. Peb yog neeg muaj qhov muag pom kev. Txawm peb caij tsheb taug kev, txawm peb mus yos hav zoov, peb tsis poob zoo vim peb nrhiav tau kev mus txog chaw, rov qab los txog vaj txog tsev. Muaj ib hnub twg peb rov mus ntsib txoj qub kev peb taug dua los lawm. Peb pom tias peb nco tau tej yam, kuj muaj tej yam tshiab peb tsis nco pom yav tag los. Cov thwj tim nrog Yes Xus nyob ntev li ntawd. Lawv kuj tseem pom tsis tag, tsis tau paub Yes Xus kom txaus. Cov thwj tim pom tus neeg Yes Xus, mas lawv pom. Tiam sis, yam nyob puag nruab nrog ntawm Yes Xus, cov thwj tim tsis pom : “6 Yes Xus hais rau nws : “Kuv li kuv yog txoj kev, qhov tseeb thiab txoj sia ; tsis muaj neeg mus tau ntawm Leej txiv yog tsis los ntawm kuv. 7 Nej twb paub kuv, nej kuj paub kuv Txiv thiab. Zim txwv no, nej twb paub nws thiab twb pom nws lawm.” Yog tsis muaj neeg pab peb, qhia peb, txawm peb qhov muag pom tag ib tug tib neeg los peb paub tsis tag tus neeg peb pom ntawd. Yes Xus qhia li ntawd rau nws cov thwj tim, yog hais dab tsi ? Yog vim lawv tsis paub Leej Txiv, lawv pom Leej Txiv lawm los lawv tsis paub nws. Cov thwj tim pom Yes Xus mas muaj hwj huam loj kawg : ua tau tej hub dej txia ua cawv neeg haus tsis tag ; ua tau mov txaus txhiab leej neeg noj seem noj so…Cov thwj tim thiab tej tib neeg pom li ntawd, lawv qhuas Yes Xus kawg. Tiam sis, Yes Xus hais rau lawv tias tej hwj huam ntawd yog Leej Txiv ua. Vim li cas Yes Xus hais li ntawd ? Vim peb twb hnov Yes Xus hais ntau zaus : “34 Yes Xus hais rau lawv : “Kuv cov txhiam xws yog kom kuv ua raws tus xa kuv tuaj lub siab, kom ua tiav nws dej num. Z4,34” Cov lus Yes Xus hais, cov dej num Yes Xus ua, tsis yog Yes Xus tuaj ua Yes Xus ntiag tug dej num, yog ua Leej Txiv dej num ua Leej Txiv ntiag tug. Tab txawm yog Yes Xus qhib ncauj hais lus, txawm yog Yes Xus tsa tes foom koob hmoov rau dej thiab rau mov, hwj huam yog Leej Txiv pub kom muaj. Tus thwj tim mloog Yes Xus lus, mus tshaj Yes Xus lub Moo Zoo tsis yog mus ua thwj tim ntiag tug dej num, yog ua Yes Xus tub txib, leg Yes Xus ntiag tug dej num. Yog peb to taub li ntawd, peb ntseeg tias peb qhib ncauj nrog Yes Xus tshaj Yes Xus lub Moo Zoo rau ntiaj teb neeg. Peb tsis muaj cuab kav ua tau hwj huam. Tiam sis, peb ua kom tag peb lub peev xwm lis Yes Xus qhia. Ces peb kuj yuav pom tej lub cim ua rau peb ceeb, vim peb tus kheej ua tsis tau. Tiam sis, vim Yes Xus yog tus ua. Muaj ntau tus poj niam thiab txiv neej mloog Yes Xus lus ua tau tej yam hwj huam, tsis yog lawv tus kheej ua, Yes Xus yog tus ua : “12 Kuv hais tseeb tseeb rau nej : leej twg ntseeg kuv, nws yuav ua tau tes qav num kuv ua tib yam thiab tseem yuav ua tej yam loj dua, vim kuv mus cuag Leej Txiv.”
    Ib tsoom phooj ywg, peb tus Huab Tais Tswv Ntuj loj thiab zoo heev. Tsis muaj leej twg luaj tau Tswv Ntuj. Tiam sis, tus mloog Yes Xus lus, kuj yog mloog Leej Txiv lus. Vim li ntawd, Leej Txiv Tswv Ntuj tsis khuv xim tej hwj huam. Leej twg mloog Yes Xus lus, tus ntawd tseem yuav ua tau tej yam loj dua Yes Xus ua. Peb ntseeg tias, Yes Xus tib leeg yog txoj kev coj peb mus tshwm plaws qaum ntuj. Xav kom peb txhua leej tso siab tag nrho coj lub neej lawv peb tus Huab Tais Yes Xus qab.

    20.05.2011 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 30th May 2011, 6:44 am


    Rau hnub tim 29 lub 5 hlis 2011



    Ib tsoom ntseeg thiab phooj ywg txhua leej,

    Muaj lus zoo siab ntau, peb rov tuaj teev hawm peb tus Huab Tais Yes Xus Pleev ua ke hnub no. Peb tsuas khaws tib lub ntsiab lus coj los nthuav xws li nram qab no : Txuag zias Yes Xus Pleev lub npe kom tag sim neej. Muaj nuj nqes dab tsi rau peb, vim li cas peb thiaj yuav txuag zias Yes Xus Pleev lub npe kom tag sim neej ? Peb yuav xub piav ob peb los txog cov neeg ntseeg Yes Xus teev Yes Xus thaum cov thwj tim tseem ua neej nyob, thaum ntawd, lub neej ua neeg ntseeg Yes Xus thiab teev Yes Xus puas yooj yim ? Peb mam li piav tus txiaj ntsim qab hau txuag Yes Xus Pleev lub npe kom tag yus sim neej.
    Yog muab hais tiag, thaum ub, lub neej ua neeg ntseeg khwv dua, txom nyem dua zim txwv no peb ib txhia neeg ntseeg. Cov thwj tim thiab ntau txhiab leej neeg teev Yes Xus thaum ub raug luag ntxub raug tua tuag coob leej kawg. Muab piv li Tes Fas Nos, thawj tug tub txib tsob hwb raug cov neeg Yus Das tua, vim nws yog lawv ib tug neeg Yus Das tso Mais Xes txoj cai tig los txais kev ntseeg Yes Xus, teev Yes Xus. Qhov no, ua rau lawv meem txom thiab ntxub nws heev, mus txog qhov xuas zeb txawb tua nws tuag. Ntawv Ntshaib hais txog Tes Fas Nos kev txom nyem. Tiam sis, tsis yog nws tib leeg raug txom nyem, raug luag ntxub. Yuav hais tag sawv daws kuj tsis tau. Txawm hais txog Tes Fas Nos tib leeg, kuj taj tag cov neeg ntseeg Yes Xus sawv daws raug luag ntxub. Luag nrhiav ntes cov neeg tig los teev Yes Xus tua pov tseg kom tag. Vim li ntawd, ua rau lub Koom Txoos ntseeg Yes Xus nyob Yes Lus Xas Les tawg ua pab ua pawg, nyob khuam ntab khuam ntuv. Cov thwj tim ib txhia tau khiav tsiv nraim nyob ntau thaj chaw deb nroog Yes Lus Xas Les, ib txhia khiav mus txog ntau lub teb chaws : “5 Fis Lis Pos nqes mus nram Xas Mas Lias ib lub nroog, tshaj Leej Pleev rau lawv.6 Npoj neeg sawv tib nqag mloog Fis Lis Pos qhuab qhia, lawv xyiv fab zoo thiab pom cov cim nws tau ua.” Luag cov ntxub cov neeg teev Yes Xus, luag npaj txhom ntes tua kom tu noob cov neeg teev Yes Xus. Tiam sis, luag kuj tsis muaj lub peev xwm ntes tag cov neeg teev Yes Xus raws li lawv kev lim hiam. Cov coob kuj khiav dhau tas. Txoj kev khiav dim no, yog tej lub cim peb ntseeg tias Tswv Ntuj cev tes thaiv cov neeg teev Yes Xus kom txhob raug ntes. Muaj Tswv Ntuj pab, lawv thiaj khiav dim mus txog ntau qhov chaw ua rau lawv yim tuaj zog tseb noob, tseb Yes Xus lub Moo Zoo qhia tib neeg paub Yes Xus lub npe. Lub ntsiab, luag npaj ua kom cov neeg ntseeg tu noob. Tiam sis, Tswv Ntuj tsis pab kom dim txoj sia xwb, ua rau lub Koom Txoos raug txom nyem yim huam vam, neeg yim los coob teev Tswv Ntuj, ntseeg Tswv Ntuj. Vim li ntawd, Fis Lis Pos mus qhuab qhia Yes Xus lub Moo Zoo rau cov Xas Mas Lias coj lawv los ua neeg ntseeg Yes Xus coob heev tuaj. Tej lub cim no, yog Tswv Ntuj ua rau cov neeg ntseeg Tswv Ntuj pom. Luag cov ntxub yus cov neeg ntseeg, luag tsis paub luag yim ntxub, Tswv Ntuj yim txhawb thiab nres cov neeg ntseeg, ua lub Koom Txoos ntseeg Yes Xus loj hlob thiab muaj zog. Tsis yog txheej thaud xwb, niaj hnub no, tseem muaj tej lub cim zoo li ntawd rau peb qhov muag pom.
    Peb cov kwv tij neej tsa ntseeg Yes Xus, teev Yes Xus hauv cov teb chaws “Koom Tshaj” nyob sab As Xias teb raug tsim txom, raug hiam, raug tua tuag coob kawg txhiab vam leej. Vim kev cai Koom Tshaj ntxub cov neeg ntseeg Yes Xus, teev Yes Xus tib yam nkaus cov thwj tim thaum ub. Kev cai Koom Tshaj txwv tuag nthi tsis pub neeg sib sau teev ntuj txog peb plaub caug xyoo no. Lawv muab cov coj, xib hwb, txiv plig tua tuag coob npaum li cas. Tsis kav cov neeg ntseeg kuj nyiag teev ntuj hauv nyias tsev, hauv nyias tej txaj chaw pw thiab hauv nyias nruab siab puv peb plaub caug xyoo. Peb pom niaj hnub no, cov neeg ntseeg Yes Xus hauv cov teb chaws Koom Tshaj txom nyem tiag, tiam sis ua cas lawv yuav huam vam coob tag npaud. Puas muaj neeg piav tau yog tim li cas ? Lawv kev ntseeg Tswv Ntuj txaus qhuas, lawv mloog Tswv Ntuj lus, muaj phauj, muaj txiv plig nphoo qas ntxuas tshaj hauv cov teb chaws ywj pheej. Tsis tas li ntawd xwb, kev cai Koom Tshaj tseem niaj hnub kav nruj nreem tej pej xeem huab hwm. Luag tseem nrhiav tswv yim ntes kom tas, tswj kom tau cov ntseeg Yes Xus. Lawv muab nyiaj tuaj ntxias cov coj, cov xib hwb hauv zos Hmoob. Yog tus lawv cob nyiaj rau tsis txais lawv cov nyiaj, raug cov tub ceev xwm nrhiav teeb meem rau tus ntawd. Yog tus txais lawv tej nyiaj, raug cov tub ceev xwv khi tuag nthi tsis muaj kev teev hawm ywj siab, mus pab tsis tau zeej tsoom, raug lawv yuam txib ua dab tsi tsis muaj cav, raug lawv muas tau. Tiam sis cov phooj ywg, nej tsis txhob txhawj, tsis txhob ntshai tej tub ceev xwm, neeg li nej xwb, muab nyiaj ua lawv lub zog. Hos nej li, cov phooj ywg, nej muaj Tswv Ntuj tus tsim lub ntuj lub teb nrog nej nraim. Nej lub zog nyob ntawm Tswv Ntuj. Nej yuav khaub zig Leej Ntuj Plig Ntshiab, nej siab yuav loj txaus. Nej yuav txais Leej Ntuj Plig nrog lawv tim ncauj tim lus, tsis txhob ntshai. Nej tseem yuav pab tau cov neeg ntxub nej daws lawv lub mob.

    Vim li ntawd, peb tsis hais dab neeg txog txheej laus thaum ub, tiam sis, peb hais qhov tseeb tiag. Tus neeg ntseeg Yes Xus, teev Yes Xus yuav tuav rawv Yes Xus lub npe loj tshaj nyiaj tshaj kub kom tag nws sim neej. Nyiaj thiab kub muaj nqes muas dej haus, muas mov noj hnub no, ntxeev tau tib neeg zoo ua phem, khi tau ntsuj plig dawb mus ciaj dab puag ntuj txiag teb tsaus. Tag kis, nyiaj thiab kub yuav yaj, yuav ploj ua plua av, plua tshauv. Peb tsis txhob yuam kev tso peb lub siab rau nyiaj thiab kub. Peb yuav muab peb lub siab lub ntsws tso rau tus muaj hwj huam, muab cog rau tus hlub peb txhais xib teg : Huab Tais Yes Xus. Peb yuav nco ntsoov, Yes Xus Pleev lub npe kho tau neeg lub siab lwj dhi zoo hlo rov huv lis si, kho tau neeg tuag rov ciaj los, mus tso tau ntsuj thiab xyw puag ntuj txiag teb tsaus los lawm qaum ntuj tshiab ntuj ka. Yes Xus Pleev lub npe nyob ntawm peb, nrog peb ua ke tiv thaiv peb. Vim li ntawd, peb yuav nquag teev Yes Xus kom peb tsis txhob plam tes tso Yes Xus lub npe pov tseg : “15 Yog nej hlub kuv, nej yuav mloog kuv cov lus qhia, 16 Kuv yuav thov Leej Txiv, nws yuav muab tus tiv thaiv rau nej kom nws nyob mus li nrog nej, 17 Lub sim ceeb tsis muaj cuab kav txais tus Ntsuj Plig tus tseeb, vim lub sim ceeb pom tsis tau nws thiab paub tsis tau ; nej li, nej paub nws, vim nws txawm ze ntawm nej thiab yog nws nyob hauv nej.” Peb tus Huab Tais Yes Xus Pleev lub npe muaj txiaj ntsim loj. Peb twb paub li ntawd, peb yuav tau nrhiav kev tuav rawv Yes Xus Pleev lub npe txhua txhia lub sij hawm hauv peb lub neej. Tsis txhob tos thaum peb tau kev tws, peb thiaj yuam vam txog Yes Xus Pleev lub npe.

    Tsoom phooj ywg, txij hnub peb los ntxuav plig ua haiv neeg teev Yes Xus, peb muaj tag Yes Xus lub hwj huam. Vim li ntawd, sawv daws nco ntsoov tuav Yes Xus Pleev lub npe ua koob ua hmoov pov hwm nyias.


    26.05.2011 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 3rd June 2011, 11:38 am





    Rau hnub tim 05 lub 6 hli 2011

    Ib tsoom ntseeg thiab phooj ywg sawv daws,
    [/center]

    Cov Ntawv Ntshiab (Les Saintes Ecritures) hnub no lub Koom Txoos muab rau peb mloog, hais txog koob hmoov. Peb sim muab xav kom txaus saib cov koob hmoov Yes Xus muab pub rau tus neeg teev Yes Xus ho txawv li cas tej koob hmoov peb xav tau, peb taij kom Yes Xus pub rau peb. Vim li ntawd, peb yuav los piav ob peb los txog yam koob hmoov Yes Xus muab pub rau peb, thov sawv daws sim nrog xav saib puas mus li ntawd tiag.

    Ua ntej, peb yuav xub hais txog tej koob hmoov peb taij ntawm Yes Xus. Tsis hais leej tib neeg twg, peb puav leej ntshaw, puav leej nyiam koob hmoov, tsis muaj leej twg yuav thuam tsis ntshaw koob hmoo. Tab tus neeg phem, neeg tub sab, neeg nkhaus twb ntshaw koob hmoo. Txawm yog tus neeg tsis muaj kev teev hawm, los tus teev dab, teev mlom thiab coj lwm yam kev teev hawm twb puav leej ntshaw muaj koob hmoo tib yam. Vim li ntawd, hais txog ntawm yus Hmoob, peb Hmoob ib txwm hais txog koob hmoov. Kev muaj koob hmoov, los ntawm lo lus hwm niam hwm txiv, mloog niam mloog txiv lus. Me nyuam hlob tiav neeg mus ua neej khaws nkaus niam txiv tej lus koob lus hmoov qhuab qhia nws tej tub ki nws yug tau, txheej ua dhau txheej. Hmoob coj kam li ntawd. Tsis tas li xwb, Hmoob poj yawm dua nra tas, txoj kev hwm hauv Hmoob rais ua Hmoob kev teev hawm, teev dab caj dab ces, rais ua dab qhuas Hmoob. Tos Hmoob teev dab qhuas, puas yog vim Hmoob ntseeg thiab vam txog tej poj yawm ntsuj duab ntsuj plig tso koob tso hmoov pov hwm pov yawm tej tub ki, xeeb leej xeeb ntxwv tseem ua neej. Hmoob yeej vam ntsoov poj yawm tej koob hmoov roos Hmoob. Vim li, Hmoob nco ntsoov fiv, nco ntsoov tiam tsiaj txhu, xyab ntaw tsis pub poj yawm tshaib nqhis, tub ki thiaj tau koob hmoov. Kev muaj koob hmoo yog kev noj qab nyob zoo, tsis txob tsis txhawj, khwv tau noj tau haus, muaj nyiaj muaj txiaj siv. Peb ntseeg khov ntseeg ruaj li ntawd. Txawm peb los teev Yes Xus, peb kuj vam ntsoov, tos ntsoov ib qho koob hmoov ntawm Yes Xus. Peb kuj tos ntsoov tej koob hmoov ntawm Yes Xus tib yam li tos ntawm peb tej poj yawm : kom peb muaj neej nrog luag ua, tsis muaj kev txhawj xeeb, muaj ntsej muag luag ntxhi, tau nyob nyab xeeb, tau zoo nyob kaj siab lug. Yog muab hais los mus, txawm peb los teev Yes Xus, peb kuj tseem vam ntsoov tej koob hmoov pub peb tau noj qab nyob zoo, muaj lub neej nrog luag ua, tsis raug tshaib raug nqhis. Tiam sis raws li Yes Xus qhia, tus neeg ntseeg Yes Xus thiab teev Yes Xus sawm cov koob hmoov loj dua kev noj qab nyob zoo. Yog peb tsis paub xwb, Yes Xus muaj kev nplua nuj koob hmoov loj tshaj qhov peb pom thiab xav tau hauv nruab siab. Yog peb leej twg ntseeg thiab thov txog, tus ntawd sawm zoo dua kev noj qab nyob zoo.

    Koob hmoov Yes Xus pub rau tus neeg teev Yes Xus. Yuav tsis tshua yooj yim hais txog cov koob hmoov Yes Xus muab pub rau tus neeg teev Yes Xus. Txawm hais tias Yes Xus pub koob hmoov dawb paub rau peb tas txhua leej, yog peb tsis ntseeg, peb yuav tsis pom cov koob hmoov ntawd ; yog peb muaj ib pluaj siab ua xyem xyav tso siab tsis tag, peb kuj yuav tsis tau txais cov koob hmoov tuaj ntawm Yes Xus tuaj. Peb puas paub, peb puas ntseeg, tos peb los teev Yes Xus, vim twb yog Yes Xus xub xaiv tau peb. Yes Xus xub nyiam raug peb ntawm peb tsoom kwv tij. Peb thiaj li txiav tau siab los caum Yes Xus ua peb tus Huab Tais, ua peb tus Vaj Ntxwv, mloog Yes Xus lus, ua neej lawv Yes Xus qab. Peb cov kwv tij tsis los teev Yes Xus. Peb txawm los ib leeg, txawm los pes tsawg leej, peb tsis txhob txhawj. Leej twg lawv Yes Xus qab, tus ntawd yuav tsis yuam kev ib zaug. Nws yuav txais cov koob hmoov Yes Xus pub rau tus neeg teev Yes Xus. Yog tus tsis los teev Yes Xus thiab tus twg thim lus, thaub qab, hloov kev, tus ntawd yog tus yuam kev. Tus txais cov koob hmoov Yes Xus pub, yog tus khaws Yes Xus lus, ua li Yes Xus qhia. Peb sim xav saib, dab phem yog tus ntxias peb, coj peb mus yuam kev, yog tus peb ntxub. Vim li cas peb thiaj tseem ntshai dab phem, muas tsiaj txhu tiam rau, txi rau dab phem. Yes Xus yog tus hlub peb, tiv thaiv peb, muab nws roj ntsha cawm peb. Txawm tias peb tsis sawm zoo, tsis sawm kom Yes Xus tuaj npo kom peb ntshiab li Tswv Ntuj Ntshiab, tsis sawm huv li Tswv Ntuj huv. Yes Xus tsis tso peb tseg, tsis puam chawj peb. Yes Xus yog Tswv Ntuj Leej Tub, nto koob meej saum qaum ntuj. Yes Xus tuaj yeem poob ib theem koob meej yug ua neeg li peb, yuav tib neeg koob meej. Hauv ntiaj teb neeg, muaj noob nom, noob vaj ntxwv thiab noob qhev. Peb tib neeg noob qhe thiaj li ntshaw ua npau suav toog ciaj noob nom, noob vaj ntxwv. Tsis muaj noob vaj ntxwv yuav ntshaw ciaj noob qhev. Tswv Ntuj Leej Tub Yes Xus yug ua neeg tsis xaiv los ciaj noob vaj ntxwv, pw vaj ntxwv txaj chaw pua ntaub tsuj ntaub npuag taug pes leev, thaiv kaus kub kaus ntxhw daj rhob txaj chaw nyob, zaum rooj nom rooj tsw, ntoo mom nyiaj mom kub. Yes Xus yug ntawm Mab Liab thiab Yos Xes neeg pej xeem xws teb xws chaw, neeg ua vaj ua tsev, txua rooj txua tog. Thaum kawg, Yes Xus tseem raug neeg xyeeb poob qis dua tej tib si theem kawg, theem tw hauv tib neeg ntiaj teb nrog neeg khaum, neeg raug txim ua tib nqag dai tib phiaj saum ntoo cuam, raug neeg thuam, raug neeg nto, neeg hnyos : “13 Tiam sis yog nej muaj feem nrog Leej Pleev kev raug txom nyem, nej yuav zoo siab, vim thaum txog hnub tshwm sim nws lub hwj chim, nej yuav zoo siab luag ntxhi.14 Yog nej raug tsawm vim Leej Pleev Npe, nej hmoov zoo, vim Tswv Ntuj Leej Ntsuj Plig hwj chim tsaws saum nej.” Tas txhua tus neeg ntseeg Yes Xus teev Yes Xus tsis raug txom nyem tas tus npaum Yes Xus, tsuas yog leej puav. Tus neeg ntseeg Yes Xus teev Yes Xus yuav nco ntsoov, tos ntsoov lub koob hmoov Yes Xus muab rau nyias. Tus neeg teev Yes Xus yuav tsis txhob txwm mus ua tub sab kom raug luag muab nws tsim txom. Peb tsis txhob mus thab plaub muab peb caj dab rau luag hlais thiaj tau koob tau hmoov : “15 Tsis txhob muaj hauv nej leej twg raug txom nyem vim tua neeg los tub sab los neeg phem los txob plaub.” Tiam sis, leej puav neeg teev Yes Xus ntseeg Yes Xus, mloog Yes Xus lus thiab nyiam Yes Xus tas siab nrho. Ciaj thiab tuag, nws tsis thim lus, zoo siab muab tag nws lub siab thiab lub neej cog rau Huab Tais Yes Xus txhais xib teg lawv Yes Xus qab. Tus neeg teev Yes Xus no txawm raug neeg ntxub nws, muab nws ntaus, muab nws tua ntsoog tas, raug neeg thuam raug neeg hnyos npaum li cas. Tus neeg teev Yes Xus no yog koob hmoov Yes Xus pub rau ntiaj teb neeg txhaum. Nws sawm nrog Yes Xus ua Leej Txiv Tswv Ntuj tes qav num saum daim av : “9 Kuv thov ntuj rau lawv, tsis thov rau lub ntiaj teb, tiam sis rau cov koj muab pub rau kuv, vim lawv yog koj tug; 10 Vim kuv tug puav leej koj tug thiab koj tug puav leej kuv tug, kuv nto koob meej hauv lawv.” Tej koob hmoov Yes Xus pub rau tus neeg teev Yes Xus no, yog peb tsis thov, peb yuav tsis tau. Tej tus neeg ntseeg Yes Xus teev Yes Xus no tam tau Yes Xus nyob ntiaj teb no : hlub ntiaj teb neeg, nrog Yes Xus txhim lub ntiaj teb kom sib haum ua kwv tij sib hlub, sib pab, coj cov neeg raug txom nyem mus cuag Leej Txiv Tswv Ntuj. Tej koob hmoov Yes Xus pub no loj tshaj kev tau noj qab nyob zoo.

    Ib tsoom phooj ywg, cov koob hmoov Yes Xus pub rau tas txhua tus neeg teev Yes Xus, yog peb leej twg tsis zoo siab txais, peb kuj yuav tsis pom. Vim li ntawd, nyob hauv peb lub siab, tsuav yog muaj ib lo lus peb lub siab tsis xis, Yes Xus paub tag. Peb yuav siv zog thov Yes Xus cov koob hmoov peb thiaj li yuav pom hauv peb lub neej.


    01.06.2011 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 11th June 2011, 9:52 am






    Rau hnub tim 12 lub 6 hli 2011

    Ib tsoom ntseeg thiab phooj ywg,

    Hnub no, yog zoo hnub zoo nyoog rau lub Koom Txoos Kav Tos Liv thiab rau peb cov neeg ntseeg txhua leej. Yog lub hmoov Leej Ntuj Plig nqes los txhawb txhim thiab tiv thaiv tus neeg ntseeg Yes Xus teev Yes Xus. Vim li ntawd, peb yuav tau piav ob peb los txog Leej Ntuj Plig Ntshiab txuas ntxiv no mus.

    Ua ntej peb yuav txais lub cim ntxuav hauv Koom Txoos Kav Tos Liv, peb tau kawm kev ntseeg. Peb txoj kev kawm coj peb kev, tuav peb tes ib nqes zuj zus rau ib nqes, ib theem nce rau ib theem. Vim xib hwb thiab txiv plig tau qhia Huab Tais Tswv Ntuj rau peb, nyeem Tswv Ntuj lus hauv phau Ntawv Ntshiab rau peb mloog, qhia peb teev Tswv Ntuj raws keeb kwm cov thwj tim qhia rau lub Koom Txoos Kav Tos Liv, thaum chiv keeb los. Kev paub Tswv Ntuj yog peb txoj kev teev hawm lub ntsiab. Yuav kom peb coj txoj kev teev hawm Tswv Ntuj raws kab raws kev cai txhob yuam kev, peb yuav tsum kawm kom paub tseeb txoj kev teev hawm Tswv Ntuj. Thaum peb hais lus rau Leej Txiv, hais rau Leej Tub, los hais rau Leej Ntuj Plig, peb yuav tsum paub rau leej twg peb tsa ncauj thov. Thaum peb paub meej Huab Tais Tswv Ntuj hauv peb nruab siab, peb pom qab hu Huab Tais Tswv Ntuj muaj kab muaj kev tsis sib chab sib chaws. Kuj tib yam li peb paub leej txiv tsis yog leej niam, leej tub leej ntxhais tsis yog leej niam leej txi. Huab Tais Leej Txiv Tswv Ntuj yog tus tsim lub ntuj thiab lub ntiaj teb. Tas txhua yam nyob saum ntuj hnub thiab hli thiab txhua yam nyob ntiaj teb, suab puam, av, dej, nroj tsuag, tsiaj txhu thiab tib neeg puav leej yog Huab Tais Leej Txiv Tswv Ntuj tsim tas nrho. Tej ntsuj muaj hwj huam saum qaum ntuj, tej dab tej xyw txhua yam tsav puav leej yog Leej Txiv Tswv Ntuj tsim. Dab thiab xyw ntxeev ncaim tawg ntawm Tswv Ntuj mus rau ntuj txias teb tsaus. Cov ntsuj muaj hwj huam saum qaum ntuj npuab Tswv Ntuj ruaj nreb tiam Tswv Ntuj. Peb ntseeg thiab peb paub Huab Tais Tswv Ntuj tib tug thiaj yog tseem Huab Tais Tswv Ntuj muaj hwj huam, tsis muaj dua lwm tus ntxiv. Huab Tais Tswv Ntuj yog tib tug Huab Tais 3 leeg : Leej Txiv, Leej Tub thiab Leej Ntsuj Plig. Tswv Ntuj tsis ua 3 tug Tswv Ntuj zoo li tej dab phem muaj 3 tug, 4 tug los ntau tus dab phem. Tsuas muaj tib tug Huab Tais Tswv Ntuj xwb : Leej Txiv, Leej Tub, Leej Ntsuj Plig yog tib tug Tswv Ntuj xwb. Kev sib hlub, sib pab, sib haum ntawm Leej Txiv, Leej Tub, Leej Ntsuj Plig ua tau Haub Tais 3 leeg lawv ciaj tib tug Huab Tais Tswv Ntuj xwb. Leej Txiv tsim muaj lub sim ceeb vim Leej Tub lub sim ceeb thiaj txawm tau los nyob. Lub sim ceeb raug ntxias poob rau dab phem tes. Leej Tub tuaj txhiv tuaj cawm lub sim ceeb, vim Leej Tub paub ntsoov Leej Txiv hlub thiab khuv xim peb npaum li cas. Yug ua tib neeg, Leej Tub hlub peb npaum Leej Txiv. Leej Ntsuj Plig nqes los nrog peb ua ke, yog Leej Txiv thiab Leej Tub kev hlub peb xa tuaj pub kom peb yug ua Huab Tais Tswv Ntuj tub ki vim Leej Tub.
    Leej Ntsuj Plig nqes los txhawb txhim tus neeg ntseeg. Peb tsa ncauj thov los txais kev ntseeg Tswv Ntuj hauv lub Koom Txoos Kav Tos Liv, peb txoj hmoov zoo. Peb muaj hmoo vim Tswv Ntuj hlub peb xaiv raug peb los ua Tswv Ntuj cov tub ki ntseeg Tswv Ntuj, teev Tswv Ntuj raws keeb kwm, raws kev raws cai li Tswv Ntuj nyiam. Lub Koom Txoos Kav Tos Liv txoj dej num yog qhuab qhia ntiaj teb neeg tsis paub Tswv Ntuj kom paub meej, paub tseeb Huab Tais Tswv Ntuj. Koom Txoos Kav Tos Liv txoj dej num yog lis Yes Xus dej num nyob ntiaj teb no kom tiav hnub Yes Xus rov tuaj hnub kawg. Koom Txoos Kav Tos Liv yog lub Koom Txoos Niam saib ntsoov Yes Xus dej num raws li cov thwj tim qhia puag thaum chiv keeb, tam ib leej niam qhuab qhia nws cov me nyuam kom tsheej neeg, ua neeg paub kev paub cai, nquag thiab txawj xwb fab. Vim li ntawd, lub Koom Txoos Kav Tos Liv qhuab qhia tsoom ntseeg, nws cov tub cov ki kom ua neeg paub kev paub cai, hwm neeg thiab hwm ntuj, tsis txhob ua neeg luab tsuab thiab mom txheej : txawj nco tib neeg txiaj ntsim thiab txawj nco Tswv Ntuj txiaj ntsim. Tus tsis hwm neeg, kuj yog tsis hwm Tswv Ntuj. Tus thuam neeg, kuj yog thuam Tswv Ntuj tib yam. Piv li peb Hmoob kev mloog lus, kev hwm niam hwm txiv, hwm kwv hwm tij, hwm neej hwm tsav raws yus Hmoob kev cai yog kev nco txiaj ntsim ntawm tib neeg. Vim Tswv Ntuj xaiv raug peb, peb los ua Tswv Ntuj tub ki, teev Tswv Ntuj. Peb muab yus xeem lus Hmoob ua zaj seev, ua kwv txhiaj lus taum hais qhuas Tswv Ntuj tej txiaj ntsim nrog suab raj, suab qeej teev Tswv Ntuj, nco Tswv Ntuj tej koob hmoov kuj tau tib yam li luag siv luag xeem lus los ua nkauj seev nrog thaj cheej thiab paj nruag. Koom Txoos Kav Tos Liv tseem qhia txhij qhia txhua, qhia dav qhia tob tshaj npaum li cas rau peb txhua haiv neeg ntseeg kom tsis txhob ua neeg siab nqaim siab ti li tej txhia me nyuam Koom Txoos cam thawj, hlav thiab ncau mus ua ntau caj ces sis tsub sis nias. Koom Txoos Kav Tos Liv cob qhia muaj qab muaj hau rau peb yog nws tub ki kom paub kev cai hauv paus nto hauv ntsis raws keeb kwm. Peb yuav ceev faj ua neeg mloog lus, tsis txhob hla ntug hla cai, cav ncauj thiab cam thawj li luag. Peb yuav paub teev ntuj raws caij nyoog, raws niaj raws xyoo, yuav coj thiab ua li Koom Txoos Kav Tos Liv coj qhia. Peb tsis txhob lam xav lam ua tsis muaj paus muaj ntsis li tej “Church” ua nroj paug teb sawv daws pom puv qab ke qaum kev ib ncig ntawm peb. Vim txoj kev thuam niam thuam txiv, thuam vaj qhia, thuam cov leej ntshiab, tsis mloog tsis nco cov thwj tim tej txiaj ntsim, kuj yog thuam Yes Xus. Vim li ntawd, lub ncauj lam teev ntuj tom “Church” los tsis muaj Thaj Txi Ntuj. Yes Xus yog tus hais kom ua Thaj Txi Ntuj nco txog Yes Xus kev raug hiam. Txog lub caij nyoog teev hawm, qhov loj thiab tseem ceeb lub Thaj Txi Ntuj tsis kam ua, yeem mus lob yam ub yam no laug sij hawm. Nej sim xav cov neeg cav ncauj, cam thawj lub neej teev hawm yam tej me nyuam yaus tsis mloog niam mloog txiv txib txoj tseem ceeb tsis ua, khiav tawm nraum zoov mus kov ub kov no, tej suab nkauj suab nruas ua ncha qog qees kom tas caij nyoog teev hawm, cav muaj ntsej muag hais tias teev hawm vaj tswv, Thaj Txi Ntuj tseem ceeb ho tsis ua. Tsis tas li ntawd, hauv ib lub xyoo, muaj hnub ntshiab hnub huv ntau hnub, muaj kab ke ua hmoov ntau txoj, vim ua neeg cav ncauj tsis pom qab pib tog twg ces ib lub hmoov nco Huab Tais Tswv Ntuj txiaj ntsim tsis muaj ua li. Vim li ntawd, peb yuav tau ceev faj nyias tus kheej tsis txhob yoog cov neeg cam thawj, tsis txhob poob hauv tej me nyuam Koom Txoos li tej nroj paug teb no. Yog peb lam ua neeg ntseeg yuav lub npe, tsis mob siab teev ntuj, tsis mus tshwm tsev teev ntuj ib taws li, peb kuj zoo li ntawd, pauv tsis tshaj cov neeg hais los saum no. Txawm muaj tej txhia neeg lawv xwb tim xaiv lawv kev taug, tsis dua ntawm lawv, Hmoob thiaj piv txoj lug tias : “Dev yeem kaws txha, npua yeem lib a ; dev yeem noj quav, npua yeem noj xua” Tiam sis, yog nej tsim dheev, hnub twg nej paub keeb kwm hauv paus kev ntseeg, paub cais txoj tseeb thiab txoj cuav, nej pom nej qhov yuam kev, nej yuav ceeb laj ua neeg ntseeg kom kawg nej sim neej.
    Ntawm nej, nej muaj hmoo, yog nej nyob hauv Koom Txoos Kav Tos Liv. Tas tsoom ntseeg Kav Tos Liv, txij hnub tuaj txog hnub poob, sawv daws sib yoog ua tib tse neeg sib koom siab teev ntuj sib pab sib txhawb, nrog txiv vaj qhia ua sawv daws leej txiv taj Pob Zeb, sawv Yes Xus lub chaw nyob ntiaj teb no : “Nej yuav ceev faj nej tus kheej thiab saib xyuas cov Leej Ntuj Plig Ntshiab tso rau nej, ua Tswv Ntuj lub Koom Txoos cov tswv, nws Leej Tub cov ntshav txhiv los ua nws tug…HL20,28” Lub Koom Txoos qhia peb coj, qhia peb teev hawm, muaj ntau lub hnub nyoog ntau lub hmoov hauv ib lub xyoos : Hmoov Tsuj Xeeb Yes Xus, Hmoov Hla, Hmoov Huab Tais nce pem ntuj, Hmoov hwm lub Cim Yug, Hmoov Huab Tais Peb Leeg, Hmoov Nkauj Xwb Mab Liab nce pem ntuj…Hnub no peb ua lub Hmoov Leej Ntuj Plig nqes los. Yog ib lub zoo sij hawm rau txhua tus neeg ntseeg Tswv Ntuj teev Tswv Ntuj hauv Koom Txoos Kav Tos Liv. Muaj coob leej txais lub Cim Txhab Zog rau hnub no. Vim tus neeg ntseeg Yes Xus ua Yes Xus thwj tim nyob ntiaj teb no. Kev ua Yes Xus thwj tim yuav tau tiv ntiaj teb kev cuav kev dag, tiv dab phem xas tas kev haub kev ntxias, tsis yooj yim. Peb tsis muaj zog ntaus rog ib leeg tiv dab phem. Tiam sis peb ntseeg peb tus Huab Tais Yes Xus cov lus. Nws mus dua qaum ntuj lawm los nws yuav xa Leej Ntuj Plig Ntshiab tuaj pab peb, ua tus tiv thaiv peb. Hnub peb txais lub Cim Txhab Zog ntawm tswv qhia, yog txais Leej Ntuj Plig Ntshiab Yes Xus pub tuaj rau peb. Vim tas cov tswv qhia hauv lub Koom Txoos Kav Tos Liv yog cov sawv Yes Xus pab thwj tim chaw nyob ntiaj teb no. Cov thwj tim tau txais Leej Ntuj Plig Ntshiab Yes Xus xa tuaj rau lawv : “2 Lawv tseem zaum caws vos, ib sij huam, nroo ntws saum ntuj tuaj tam li ib nthwv cua ntsawj muaj ceem yim pliag thoob plaws lub tsev; 3 Tshwm plaws tej ntshua lus tam li nplaim taws faib zoj rau lawv ib leeg ib ntshuas tsaws ntua saum lawv,4 Leej Ntuj Plig Ntshiab puv npo tag sawv daws, lawv cia li hais tau lwm xeem lus raws li Leej Ntuj Plig pub kom lawv hais ” Tsis tas li ntawd, hnub nyoog Leej Ntuj Plig nqes los yog ib lub caij nyoog zoo rau tsoom tub ntxhais hluas zoo siab muab lawv lub neej cog rau Huab Tais Yes Xus txhais xib teg ua Huab Tais Yes Xus thwj tim : Cov niam nkauj xwb thiab cov leej choj…Peb ntseeg hais tias lub txiaj ntsim Leej Ntuj Plig nqes los loj kawg thiab pab tau tsoom neeg ntseeg tiv txoj kev iab kev daw nyob ntiaj teb no. Zoo li thaum ub, cov thwj tim ntshai kawg thaum lawv ntes Yes Xus mus tua lawm. Lawv nkaum hauv tsev, liaj qhov rooj qhov rai tsis tawm nraum zoov. Txij li hnub lawv txais Leej Ntuj Plig Ntshiab, lawv cia li hloov tshiab tas, siab ntsws muaj zog, tsis ntshai tuag. Ua rau lawv muaj lub peev xwm tawm mus hauv tej nroog, tshaj Yes Xus lub npe qhia ntiaj nrag qaum pes, txawj hais txhua xeem lus, tsis kawm los paub hais : “21 Nws rov hais ntxiv rau lawv : “Thaj yeeb nej sawv daws ; xws li Leej Txiv xa kuv tuaj, kuv thiab kuv xa nej mus.”22 Hais li tas, nws tshuab zoj ib pas, nws hais rau lawv : “Txais Leej Ntuj Plig Ntshiab ;23 Yog nej zam txhaum rau tej txhia, lawv txhaum yuav muaj zam mus, yog nej tseg rau tej txhia, lawv txhaum yuav nyob nraim.” Leej Ntuj Plig Ntshiab tseem ua tau tej yam loj rau peb qhov muag ntsia ntsoov, tib neeg ntiaj teb ua tsis tau. Txoj kev zam txhaum, neeg ntiaj teb zam tsis tau. Leej twg ua tub qaug, ua txhaum peb, peb yeej kawg coj nce txwj laus, yuam tseev kom kho peb thiaj tag, muab nplua yuav nyiaj pauj rau peb. Tiam sis, tus neeg teev Yes Xus mloog Yes Xus Lus, ua tau raws li Yes Xus cov lus qhia. Peb tseem nco, tim 13 lub 5 hlis 1981, Txiv Vaj Qhia Zam Paj Lug 2 rau Mehmet Ali Agca tua 2 phom nyob place Saint Pierre. Zoo rov los, TVQ JP 2 tau mus xyuas tus neeg tua nws hauv nkuaj thiab zam txhaum rau nws. Peb pom, JP 2 ua tau raws li Leej Ntuj Plig Ntshiab lub txiaj ntsim pub rau peb tib neeg muaj txhaum.

    Ib tsoom phooj ywg sawv daws, peb yuav thov Leej Ntuj Plig Ntshiab lub zog nrog nraim peb tas txhua lub sij hawm. Peb thiaj li yuav muaj lub peev xwm ua tau lub siab loj siab tawv li cov thwj tim ; thov Leej Ntuj Plig Ntshiab qhia peb ua neej xws li TVQ JP 2 haum xeeb nrog lub ntiaj teb neeg thiab nrog peb tus yeeb ncuab ua phem rau peb. Leej Ntuj Plig Ntshiab, koj los mas, los nyob hauv pev cov ntseeg txog koj.


    07.06.20011
    Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 18th June 2011, 5:31 am






    Rau hnub tim 19 lub 6 hli 2011

    Tsoom ntseeg mloog Tswv Ntuj lus thiab phooj ywg sawv daws,
    Lis piam tas los no, peb ua lub hmoov hwm Leej Ntuj Plig Ntshiab nqes los ntxaum peb tsoom ntseeg tej siab ntsws thiab txhawb koob hmoov rau peb lub siab ntseeg kom ruaj khov. Hnub no, yog lis piam 12 hauv nruab xyoo, lub Koom Txoos Kav Tos Liv caw tag peb sawv daws cov ua nws tub ki hwm Huab Tais Tswv Ntuj 3 leeg (Fête de la Trinité, Trinity Sunday). Peb yuav tau piav ob peb los txog lub hmoov hwm Huab Tais 3 leeg nrog cov ntsiab lus hauv cov zaj nyeem peb hnov hnub no.

    Lub hmoov hwm Huab Tais 3 leeg, muaj txiaj ntsim zoo li cas ? Tsis muaj lwm txoj kev qhia peb paub Huab Tais Tswv Ntuj dua ntawm lub Koom Txoos Kav Tos Liv. Tsuas kawg lub Koom Txoos Kav Tos Liv thiaj qhia nej paub tau Huab Tais Tswv Ntuj yog leej twg, qhia tau rau nej hauv paus mus txog hauv ntsis rau txhua leej paub, nej tus xav ntseeg Huab Tais Tswv Ntuj, xav ntsib Huab Tais Tswv Ntuj. Peb tsis yog thuam lwm cov me nyuam Koom Txoos ncaim thiab txia ntawm lub Koom Txoos Niam Kav Tos Liv mus qhib nyias lub “Church” pawg lug, sis tsub sis nias raws li nyias tus xib hwb ncauj qab zib nplaig qab ntse sawv daws pom luam taw laws ib ncig. Peb tsuas yog qhia ncaj qhia tseeb raws kab raws ke, raws keeb kwm, raws li Yes Xus tso lus rau nws pab thwj tim thaum chiv keeb Pob Zeb thiab Paj Lug tsa muaj lub Koom Txoos Niam tshwm sawv los txog lub zim txwv no rau sawv daws paub. Peb xav pab nej sawv daws, qhia lub keeb kwm rau cov tsis paub kom nrog paub ; pab cov raug haub raug ntxias khuv xim xav txog lig, kom pom qab khaws tej lus no coj mus xav kom tom thawj cuab nej zog ; cov xav los nrhiav, xav los npuab tus tseem Huab Tais Tswv Ntuj kom pom kev mus ntsib, mus poo tau lub tseem Koom Txoos Niam hlub taus sawv daws li sawv daws Leej Niam Leej Txi Tswv Ntuj hlub sawv daws tiag. Peb tsis muaj nplooj siab dag leej tib neeg twg, tsis xav ntxias nej leej twg kom nkag los poo lub Koom Txoos Niam Kav Tos Liv yog nej tsis pom zoo. Vim li ntawd, peb kuj tsis cheem cov xav fav xeeb, xav tawg ntawm lub Koom Txoos Niam. Tsis tas li ntawd xwb, tus neeg cav ncauj cam thawj thiab yuam cai tsis mloog lub Koom Txoos cov lus qhia, tseem raug lub Koom Txoos Kav Tos Liv caum khiav (Frapper de l’excommunication) twb muaj coob leej ntau tus hauv liv xwm Koom Txoos, Lus Thes 03.01.1521, tus tsim thawj lub Koom Txoos Protestant, yog ib tug raug ntiab tawm hauv Koom Txoos Kav Tos Liv. Peb tsuas qhia qhov tseeb thiab qhov yog rau nyias mloog, kom nej tau kev khaws coj mus xav kom txaus : “4 Yog ib leej twg tuaj qhia lwm tus Yes Xus txawv tus peb qhia rau nej, los nej txais lwm tus Leej Ntsuj Plig txawv tus nej tau txais, los lwm lub Moo Zoo txawv lub nej txais, nej kuj uv dhau. 5 Kuv xav, kuv kuj tsis me tshaj cov yawg tshaj xo no, 6 Txawm tias kuv tsis txawj hais lus, ntawm kev paub cai, nej twb pom ntsoov peb coj li cas rau nej. 7 Puas txhaum yam kuv tus kheej tau ua neeg me kom tsa nej rau lub chaw siab, vim kuv qhia Tswv Ntuj lub Moo Zoo dawb paug rau nej ? 8 Kuv tau lwg lwm cov Koom Txoos txais lawv thoob nyiaj kom tuaj tiam tau nej 2KLN 11,4-8” Cov tseem Yes Xus thwj tim, tseem tub txib hauv Koom Txoos Niam Kav Tos Liv coj raws li Paj Lug hais no. Vim li ntawd, lub Koom Txoos Kav Tos Liv kev txhawj xeeb yog qhuab qhia ib tsoom neeg ntseeg Tswv Ntuj, qhia ntiaj teb neeg txhua leej, kom tas sawv daws tau kev, pom qab khaub zig tus tseem Huab Tais Tswv Ntuj tiag tiag.
    Lis piam tas los no peb twb tau hais ob peb los ua ntej, hais txog Tswv Ntuj yog tib tug Huab Tais Tswv Ntuj 3 leeg : Leej Txiv, Leej Tub thiab Leej Ntsuj Plig. Tswv Ntuj tsis ua 3 tug Tswv Ntuj zoo li tej dab phem muaj 3 tug, 4 tug los coob tus dab phem : dab vaj dab tsev, dab qhov rooj, dab qhov cub, dab qhov txos…Tswv Ntuj tsuas yog tib tug Huab Tais Tswv Ntuj xwb : Leej Txiv, Leej Tub, Leej Ntsuj Plig yog tib tug Tswv Ntuj xwb. Yuav kom peb nkag siab, to taub Tswv Ntuj, peb yuav siv tej zaj piv txwv los pab nthuav kom yooj yim rau peb nkag siab txog Tswv Ntuj. Piv txwv li ib yig neeg, muaj leej txiv, leej niam thiab tus me nyuam. Lawv 3 leeg no yog tib yig neeg xwb. Vim leej txiv nrog leej niam ua tib lub siab ; leej niam paub leej txiv siab ; nkawd ib leeg tseg tsis taus ib leeg, ib leeg hlub ib leeg, nkawd thiaj ciaj ib yig neeg. Yog hnub twg nkawd tsis ua tib lub siab, nkawd tsis sib ntseeg siab, nkawd yuav fav xeeb, nyias khiav nyias, tsis ciaj ib cuab ib yig. Zaj piv txwv no, txawm yog neeg tsis yog Tswv Ntuj, los kev sib hlub hauv ib yig neeg muaj Tswv Ntuj txiaj ntsim. Vim li ntawd, kev sib hlub hauv ib nkawm niam txiv thiab kev sib hlub hauv ib cuab kwv tij, ntawm kev neej kev tsav, kev cog phooj ywg, ntawm tib neeg kev sib hwm tsis sib thuam, tsis hais lus xaiv, tsis ua plaub, tsis sib ntaus sib tua…qhia rau peb to taub hauv Huab Tais Tswv Ntuj 3 leeg : “12 Nej ib leeg yuav tshua ib leeg ntawm kev phooj ywg ntshiab, tas cov ntshiab tshua txog nej.13 Thov kom Huab Tais Yes Xus Pleev lub txiaj ntsim, Tswv Ntuj kev hlub neeg thiab Leej Ntsuj Plig Ntshiab kev raug zoo nrog nraim nej sawv daws.” Huab Tais Tswv Ntuj muaj 3 leeg tiam sis lawv ib leeg vam thiab ntshaw ib leeg. Leej Txiv hlub Leej Tub npaum li ntawd, hauv Leej Txiv hlub nws Leej Tub txawm tshwm sim muaj lub sim ceeb rau Leej Tub. Hmoob thiaj pheej hais tias ntuj tsim teb raug. Leej Tub hlub Leej Txiv npaum li ntawd, hauv Leej Tub kev hlub Leej Txiv, xeeb Leej Tub ua leej tib neeg nrog lub sim ceeb qhuas Leej Txiv nrog Leej Tub. Leej Txiv thiab Leej Tub kev sib hlub tshwm Leej Ntuj Plig ua tus thiv thaiv muaj hwj huam. Tswv Ntuj 3 leeg yog tib tug Huab Tais Tswv Ntuj xwb : “16 Tswv Ntuj hlub lub ntiaj teb npaum li ntawd, nws thiaj pub nws Leej Tub ib leeg kheej tuaj kom xwv tus ntseeg nws tsis txhob ploj, hos muaj txoj sia nyob ib txhis.17 Vim Tswv Ntuj tsis xa Leej Tub tuaj hauv ntiaj teb kom muab txim rau ntiaj teb, hos vim nws ntiaj teb txais tau kev cawm.18 Leej twg ntseeg nws tsis raug txiav txim…” Peb txoj kev mloog lub Koom Txoos lus qhuab qhia coj peb los ntsib tus tseem Huab Tais Tswv Ntuj tiag tiag. Thaum no, peb lub siab kuj hloov tsis zoo li qub. Yav thaum, peb siab me, peb txhawj, peb ntshai dab tom. Nyiam no, Huab Tais Tswv Ntuj nrog peb nraim, tiv thaiv peb, ua peb siab loj. Peb tsis txhawj, tsis muaj ntshai. Tej dab Hmoob, ib puas kaum tsav ntsuj thiab xyw ho tig rov ntshai peb lawm, vim tus mloog Tswv Ntuj lus teev Tswv Ntuj, muaj Tswv Ntuj hwj huam. Vim dab yeej paub ntsoov dab tsis yeej Tswv Ntuj. Tas txhua tus dab puav leej me tag tus, tsis muaj hwj huam ib qho. Huab Tais Tswv Ntuj yog tus loj, yog peb Leej Niam Leej Txi hlub peb, peb hwm, peb teev, tus roos peb, plhws peb txhua tsav yam kev txhawj xeeb pov tseg hauv peb lub siab thiab hauv peb lub neej : “3 Tus muaj koob hmoo Tswv Ntuj peb tus Huab Tais Yes Xus Pleev Leej Txiv, tus foom tas Ntsuj Plig qaum ntuj koob hmoo rau peb hauv Leej Pleev, 4 Tus xaiv peb hauv nws ua ntej lub sim ceeb tsis tau txawm kom ntshiab huv tsis muaj xyeej hlub npaud ntawm nws xub ntiag, 5 Hom peb tseg ua nws tej tub sau vim Yes Xus Pleev raws nraim li nws ntshaw thaib siab xav 6 Rau nws lub hwj chim muaj txiaj ntsim pub peb muaj li hauv tus nws hlub. 7 Ntawm nws peb txais txoj kev cawm vim nws roj ntsha, txhiv peb kev txhoj tam nws koob hmoov nplua mias EFX 1,3-7” Vim li ntawd, peb yuav kub siab txog peb txoj kev teev hawm Huab Tais Tswv Ntuj raws caij raws nyoog, mus thawm niaj thawm xyoo tag peb sim neej. Peb yuav tsum paub lub ntsiab thiab qhov loj thiab tseem ceeb hauv txoj kev teev hawm Huab Tais Tswv Ntuj. Tus yuav qhia tau rau peb paub tseeb kev teev hawm Huab Tais Tswv Ntuj hauv paus nto ntsis yog lub Koom Txoos Niam thiaj qhia tau qhov tseeb rau nws tej tub ki. Vim li ntawd, cov nyob hauv tej me nyuam Koom Txoos ncaim ntawm lub Koom Txoos Niam puav leej yuam kev tas tus, tsis paub kev teev hawm qhov tseeb. Yog nej teev hawm Huab Tais Tswv Ntuj li tej xib hwb hauv tej “Church” qhia rau nej xwb, nej sav ntau yam koob hmoov loj thiab tseem ceeb nej tsis tau txais hauv nej kev teev hawm Huab Tais Tswv Ntuj. Tus neeg tub nkeeg yeej pluag dua tus nquag. Tus neeg ua teb nqaim yeej sau tau qoob tsawg dua tus ua teb dav. Lub Koom Txoos Niam teev hawm Tswv Ntuj txhij dua, nws tau koob hmoov ntau zog lwm cov me nyuam Koom Txoos raws kev cai xwb : Tswv Ntuj pub koob hmoov rau cov leej ntshiab ua lawv npe pub rau lub Koom Txoos Kav Tos Liv. Cov leej ntshiab thiaj ua tau hwj huam yees ntxwv. Nyob hauv lwm cov me nyuam Koom Txoos nej pluag thiab tsis pom tej koob hmoov no, tsis yog Tswv Ntuj nplua nej, hos yog tim nej txoj kev teev hawm qhov tseem ceeb nej tsis ua. Nej twb tsis hwm cov leej ntshiab, nej yuav ua cas muaj cov leej ntshiab tej koob hmoo ? Zoo li tus neeg ua teb nqaim kuj sau tau qoob tsawg xwb. Lub Koom Txoos Kav Tos Liv tsis thuam cov neeg ntshiab, niaj xyoo ua lub hmoov nco txog cov leej ntshiab, hwm cov leej ntshiab. Lub Koom Txoos Kav Tos Liv kuj txais cov leej ntshiab tej koob hmoov, tsuas yog kev cai xwb. Kev teev hawm Huab Tais Tswv Ntuj hauv Koom Txoos Kav Tos Liv yog ib lub caij nyoog muaj nuj nqes tshaj, yuav tsis txhob sav tej caij nyoog. Yog peb leej twg lam sau npe ua neeg ntseeg tiam sis peb tsis quav ntsej kev teev hawm Tswv Ntuj li. Peb tsis hloov lub qub siab, tsis hloov peb lub neej phim tus neeg ntseeg Tswv Ntuj li. Hais tiag, peb twb tseem pauv tsis tau tej neeg teev dab qhuas, rau qhov lawv tsis yog neeg dag li yus. Yus dag lub Koom Txoos Niam ua neeg teev Tswv Ntuj, tiam sis yus tsis quav ntsej kev teev hawm Huab Tais Tswv Ntuj. Tsis txhob xav tias yus dag lub Koom Txoos xwb, yog dag Yes Xus tus kheej. Nej nyias yuav tsum xav nyias, tus neeg dag Huab Tais Tswv Ntuj, puas txhaum : “Ntawm txhua txoj kev teev hawm, hauv Thaj Txi Ntuj thiab hauv tas cov Cim yog Leej Pleev thiab lub Koom Txoos kev sib ntsib. Zeej tsoom neeg tuaj sib txoos nrog Leej Ntuj Plig Ntshiab, tus hu tas Tswv Ntuj cov tub ki ciaj ua Leej Pleev lub cev. Caté.Eglise.Catho n° 1097” Peb txoj kev teev hawm coj peb ua Yes Xus lub cev. Yog peb twb tsis mus teev hawm Tswv Ntuj li, nej sim xav saib kev teev hawm dab tsi yuav coj tau peb ua Yes Xus lub cev ? Tas txhua tus neeg tseeg peb yuav qhib pob ntseg kom zoo los mloog peb lub Koom Txoos tej lus qhia no. Peb nyias yuav mob siab rau nyias txoj kev teev hawm Tswv Ntuj kom tag siab nrho.

    Ib tsoom ntseeg thiab phooj ywg, peb los ua tus neeg teev Huab Tais Tswv Ntuj 3 leeg, qhov loj Tswv Ntuj tos peb, yog nrog Huab Tais Yes Xus ciaj ua Huab Tais Yes Xus lub cev ua Tswv Ntuj cov tub ki nyob ntiaj teb no. Peb yeej paub ntsoov tias peb tsis muaj zog, tiam sis vim peb ntseeg Tswv Ntuj, peb mloog Huab Tais Yes Xus lus, vam Leej Ntuj Plig Ntshiab lub zog pab thiab cov leej ntshiab tej txiaj ntsim txhawb ces peb kuj yuav rov ceeb xyov tim dab tsi peb ho ua tau tej yam peb tus kheej thiab peb lub zo ua tsis tau ib leeg.


    15.06.2011
    Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 24th June 2011, 1:46 am



    Rau hnub tim 26 lub 6 hli 2011


    Ib tsoom ntseeg thiab phooj ywg txhua leej,

    Tsis muaj pes tsawg hnub, rov txog caij nyoog peb tuaj teev hawm peb tus Huab Tais Tswv Ntuj. Hnub no yog ib hnub ntshiab hnub huv, lub Koom Txoos Kav Tos Liv caw tag peb txhua leej hwm lub “Cim Yug” Huab Tais Yes Xus lub cev thiab cov ntshav. Lub “Cim Yug” (Corps et Sang de Jésus) muaj ntau yam tseem ceeb peb yuav hais tsis txhij tsis txhua kom tag hnub no. Lub “Cim Yug” muaj txiaj ntsim loj kawg nkaus yug txhua tus neeg ntseeg thiab yug lub Koom Txoos. Peb yuav los tham lub “Cim Yug” raws li lub Koom Txoos Kav Tos Liv, lub Koom Txoos Niam txoj kab txoj kev ntseeg.

    Peb yuav xub hais txog cov txiaj ntsim Huab Tais Yes Xus pub rau lub Koom Txoos Kav Tos Liv txais los ntawm lub “Cim Yug”. Peb twb paub qas ntsoov, lub Koom Txoos Kav Tos Liv muab lub xyoo teev hawm Tswv Ntuj faib muaj caij muaj nyoog raws kev cai : Lub Hmoov Tsuj Xeeb, nco txog Yes Xus yug ua tib neeg ; lub Hmoov Hla, nco txog Yes Xus raug hiam tuag thiab sawv rov ciaj sia ; lub Hmoov hwm Huab Tais 3 Leeg, nco txog Tswv Ntuj Leej Txiv, Leej Tub thiab Leej Ntuj Plig Ntshiab, yog tib tug Huab Tais Tswv Ntuj…Hnub no, peb ua lub Hmoov hwm lub “Cim Yug”. Peb nyob hauv lub Koom Txoos Kav Tos Liv, peb yuav tsum paub lub “Cim Yug” tej txiaj ntsim : “Tsoom kwv tij nkauj muam hmov tshua, kuv xav hais rau nej tag kis no, hais txog ib tug poj niam, tsis tshua muaj neeg paub, tiam sis lub Koom Txoos tshuav nws txiaj ntsim loj kawg, nws tsis coj lub neej ntshiab huv xwb, tiam sis vim nws kev kub siab, nws pab txhim tau ib lub caij nyoog teev hawm loj hauv nruab xyoo, hwm Huab Tais lub cev « Corpus Domini ». Leej ntshiab Julienne de Cornillon…17.11.2010 Benoît XVI Audience générale” Koom Txoos Kav Tos Liv kev hwm lub “Cim Yug” no muaj keeb ua rau cov coj lub Koom Txoos, txiv vaj qhia, tau rhawv kab tho kev rau tej tub ki, xeeb leej xeeb ntxwv teev hawm : “Yog xyoo 1263, ib lub cim tshwm tuaj zoo li no hauv lub nroog Bolsena, nyob Italie teb. Muaj ib tug txiv plig, Pierre de Prague, tuaj sau siab txog Italie, nws ua xyem xyav hauv nruab siab txog lub “Cim Yug” xyov puas yog Leej Pleev lub cev tseeb tiag. Nws tseem tab tom ua Thaj Txij Ntuj, lub ncuav mov cia li liab zuj zus ua nqaij, muaj ob peb tee ntshav nrog lo daim ntaub dawb txheem mus lo lub Thaj. Txiv Plig cia li nqa khiav dua tom chaw hloov khaub ncaws. Txiv Vaj Qhia Urbain 4 tuaj mus saib, nws pom muaj tseeb tiag. Hnub xiab 11 lub 8 hli 1264, txiv vaj qhia ua ib tsab ntawv “Transiturus de hoc mundo” Tej yam no, yog tej lub cim tuaj ntawm Tswv Ntuj tuaj tshoj lub Koom Txoos, qhia lub Koom Txoos paub tsa muaj kev hwm Huab Tais lub cev “Corpus Domini”. Tus neeg ntseeg Kav Tos Liv tsis nquag mus Thaj Txi Ntuj, yuav tsis to taub lub “Cim Yug” muaj txiaj ntsim dab tsi. Tus neeg tsis nyob hauv Koom Txcoos Kav Tos Liv yim huab tsis paub qab hau dab tsi txog lub “Cim Yug”. Lub Koom Txoos yeej ntseeg puag thaum ntej thaum ntxov, txij thaum cov thwj tim los mus lawm. Sawv daws yeej hwm thiab ntseeg lub “Cim Yug” hauv Koom Txoos, yog tsis tau tsa kom muaj caij muaj nyoog los teev hawm xwb. Leej ntshiab Julienne de Cornillon, yog ib tug qhia rau Koom Txoos nqa txiaj ntsim hwm lub “Cim Yug”. Txij thaum ntawd los, txiv vaj qhia thiaj txhib kom muaj kev hwm lub “Cim Yug” hnub 5 (jeudi après dimanche de Sainte Trinité) hauv Koom Txoos. Tom qab no, mam hloov rau hnub chiv.
    Leej twg nkag los ua ib tug tub ki hauv Koom Txoos Kav Tos Liv, nws tsis paub qab tog hauv nchav Koom Txoos kev coj, kev teev hawm. Nws yuav tsum los kawm Koom Txoos kev ntseeg kom thoob hauv paus txog hauv ntsis. Lwm cov Koom Txoos me nyuam txia thiab ncaim ntawm lub Koom Txoos Niam mus tsim ib co neeg ntseeg qus tsis muaj paus muaj ntsis, tsis xyaw npoj tam tej tub ki ncaim kwv ncaim tij, mus raws neej tsa poob dab poob qhua, thaum kawg ua dab tu caj tu ces. Vim li ntawd, nej pom tej Koom Txoos me nyuam luam taw no tsis paub qab tog hauv nchav txog kev teev hawm qhov loj thiab tseem ceeb hlo, tsis muaj hwm lub “Cim Yug” li. Peb nyias yuav tau xav kom ti txha nyias tus kheej, txhob ua neeg yuam kev li hom neeg ntseeg qus no. Tus tsis ntseeg, tsis hwm lub “Cim Yug”, puas yuav txais lub “Cim Yug” tej txiaj ntsim ? Los nej yuav ib siab ua hom neeg ntseeg tsis leem cai no zaj, tsis tau txais koob hmoov ntawm Tswv Ntuj los puam chawj ? Tus txiav txim ua taus li ntawd hauv nws siab, nws puas tseem muaj ntsej muag hais tias yog ib tug neeg ntseeg vaj tswv thiab no ? Ib tug me nyuam, thaum niam txiv ciaj sia twb tsis hlub, tsis hwm niam txiv, txog hnub niam txiv qaij qaug ho quaj hmluj hmlav tua tsiaj txhu rau niam txiv yuav ntsej muag, thaum ntawd muaj txiaj ntsim dab tsi ? Kuj zoo li ntawd rau cov tsis muaj hwm lub “Cim Yug”. Tus tsis saib lub “Cim Yug” muaj nuj nqes, puas phim, puas tseem muaj ntsej muag hais tias teev Yes Xus, hwm Yes Xus raws kev raws cai ? Vim li ntawd, nej nyob hauv Koom Txoos Kav Tos Liv, lub Koom Txoos Niam, nej yuav xyiv fab mloog nej lub Koom Txoos lus qhuab qhia, nej thiaj yuav tsis sav Tswv Ntuj tej koob hmoov hauv lub Koom Txoos. Vim nej mloog, nej ua li Koom Txoos qhia rau nej ua. Lub “Cim Yug” tsis yog ua piv txwv nco txog thaum ub Yes Xus raug hiam raws li tej txhia xib hwb cuav sawv los qhia rau nej hauv nej tej “Church”. Lub “Cim Yug” yog tseem Yes Xus lub cev thiab cov ntshav tiag. Lub Koom Txoos Kav Tos Liv yeej ib txwm ntseeg lub “Cim Yug” yog tseem Yes Xus cev thiab roj ntsha, vim muaj keeb, muaj pov thawj rau lub Koom Txoos. Peb kev mus teev hawm Tswv Ntuj tsis nkim dag, tau koob tau hmoov, muaj txiaj muaj ntsig vim peb ua raws kab raws kev teev Tswv Ntuj : “Tos nws ua tau yam num loj, vim Leej Pleev nrog nraim nws lub Koom Txoos thiab nyob hauv tej kev teev hawm. Leej Pleev nyob nruab nrab Thaj Txi Ntuj thiab hauv tus leej choj “Ntawm cov txim zim txwv no, leej choj cev los mus txi rau ntuj, yog nws tus kheej raug hiam saum ntoo cuam” hauv cov mov thiab cawv. Nws nyob nruab nrab hauv cov Cim, vim li ntawd, thaum ib leej twg ntxuav plig, yog Leej Pleev tus kheej ntxuav plig. Sacro.Concilium n° 7 ” Lub Koom Txoos qhia kom peb nco ntsoov lub Thaj Txi Ntuj rau nruab siab, tsis txhob sav, peb tuaj mus txais lub “Cim Yug” yog noj Yes Xus lub cev thiab haus nws ntshav, peb nrog lub Koom Txoos ciaj Yes Xus lub cev nyob ntiaj teb no : “Hauv lub Thaj Txi Ntuj, Leej Pleev nrog peb nyob tseeb tiag tiag. Nws tsis nyob dub lus yam lub pob ntoos, hos tuaj tshoj kom zaws tau peb nrog nws ciaj ua ib ke. Leej Pleev tuaj nqus kom tau peb nrog nws, thiab nws ua kom peb tawm ntawm peb tus kheej mus koom tas sawv daws ua tau tib nqag nrog nws. Li ntawd, nws coj sawv daws lo ua tib tsob phooj ywg, yog peb koom nrog Huab Tais peb thiaj koom tau nrog peb tej kwv tij tej nkauj muam. Peb pom lub Thaj Txi Ntuj txiaj ntsim ua tau qhov ntawd…Leej Pleev tus peb ntsib hauv cov Cim kuj yog tus peb ntsib nyob Bari, nyob Rome, nyob Europe, nyob As Mes Kas, nyob As Fis Kas, nyob As Xias, nyob Os Xes As Nias. Yog tib tug Pleev hauv lub ncuav mov thaj txi ntuj thoob tas ntiaj teb. Txhais tias, peb ntsib tau nws yog peb nrog tag sawv daws tib nqag ( Nous ne pouvons le recevoir que dans l'unité ) : “17 Tsuas tib lub mov, tib lub cev txawm peb yog ob peb leeg, vim sawv daws koom lub ncuav mov tib lub xwb 1 KLN 10,17” Benoît XVI homélie à Bari, 29.05.2005” Txiv Vaj Qhia hais meej peb hnov, tus tsis nrog lub Koom Txoos, yuav ntsib tsis tau Leej Pleev. Yog peb lam sau npe hauv Koom Txoos, peb tsis mus teev hawm Tswv Ntuj, tsis mus Thaj Txi Ntuj sim neej li, peb kuj tsis ntsib tau Leej Pleev tib yam nkaus cov neeg thuam lub “Cim Yug”.
    Cov neeg ntseeg kub siab rau kev teev hawm Tswv Ntuj hauv Koom Txoos Kav Tos Liv kuj muaj coob leej. Rau lawv, lub “Cim Yug” yog ib lub Cim loj tas nrho hauv peb kev teev hawm, vim yog Yes Xus lub cev thiab roj ntsha. Tus txiv plig Emilien Tardif, neeg Canadien, yog ib tug txiv plig ua tau hwj huam kho neeg raug mob zoo ntau leej. TP Emilien piav txog lub “Cim Yug” nws hais li no : “Hmo no, peb yuav ua Thaj Txi Ntuj, kom nej nco tias Thaj Txi Ntuj tseem ceeb npaum li cas. Vim Thaj Txi Ntuj yog tus ua lub Koom Txoos loj hlob taus. Vim Thaj Txi Ntuj yog Yes Xus Nas Xas Les sawv ciaj sia, tseeb tseeb tsis yog lwm yam dab tsi. Tsis yog ua piv txwv txog Yes Xus hauv lub “Cim Yug” ntshiab peb cav txog thaum ub, hos yog Yes Xus tseeb tseeb. Leej ntshiab Augustin hais tias : Tswv Ntuj hwj huam loj tas nrho, nws xav tsim ib txhiab lub ntiaj teb loj tshaj thiab zoo nkauj tshaj peb lub ntiaj teb yeej tau. Txawm nws muaj hwj huam loj npaum li ntawd, los nws ua tsis tau loj tshaj Thaj Txi Ntuj, vim Thaj Txi Ntuj yog Yes Xus sawv ciaj sia” Peb nyob hauv Koom Txoos Kav Tos Liv, peb yuav tsum paub kom thoob peb lub Koom Txoos kev ntseeg hauv paus nto ntsis. Yog peb tsis paub, peb yuav tsum nug kom paub thiab nrhiav kawm kom txawj, yus lub siab ntseeg Huab Tais Tswv Ntuj thiaj ruaj khov, tsis yuam kem.
    Hauv cov zaj nyeem hnub no, mas nas, yog mov txhiam xws ntiaj teb poob los yug tsoom His Xais Lais tsiv teb tsaws chaw hla hav suab puam 40 xyoo. Mas nas yog ib hom mov daws His Xais Lais kev tshaib nqhis lub caij txom nyem hla suab puam. Ua ntej 40 xyoo, tsis tau pom dua mas nas thiab tom qab 40 xyoo, mas nas kuj tu lawm. Yog li ntawd, mas nas yog mov ntiaj teb poob saum qaum ntuj los cawm His Xais Lais siav kom hla dhau hav suab puam. Dej txhawv ntawm phab zeb phab tsua los cawm His Xais Lais kev nqhis. Mas nas His Xais Lais tau noj thiab dej lawv tau haus lub caij lawv hla hav suab puam yog txhiam xws ntiaj teb xws li lwm tej txhiam laj txhiam xws Tswv Ntuj pub tuaj cawm Tswv Ntuj haiv neeg : “2 Koj yuav cim ntsoov Huab Tais koj tus Tswv Ntuj txoj kev nws coj koj plaub caug xyoo hauv suab puam kom koj pluag, nws sim koj kom paub koj lub siab saib koj puas khaws los tsis khaws nws tej lus txib.3 Nws ua koj pluag, ua koj tshaib, pub koj noj mas nas yam koj tsis tau pom dua thiab koj cov yawg tsis tau paub, kom koj paub tias tsis tim mov nkaus ua tib neeg yuav ciaj neej, hos tas txhua yam tawm ntawm Huab Tais lub ncauj ua tib neeg ciaj neej. ” Cov mas nas thiab cov dej no tsuas poob muaj caij thiab txhawv muaj thaum txawj tu ncua thiab nqhuab tas lawm. Cov His Xais Lais noj cov mas nas no kuj tuag tas lawm. Tiam sis cov mov mas nas no, ntaus cim tseg qhia rau peb pom ua ntej txog cov mov ciaj sia nyob ib txhis nqes saum qaum ntuj los yug haiv neeg teev Tswv Ntuj kom ciaj sia nyob ib txhis thiab : “53 Yes Xus hais rau lawv : “Kuv hais tseeb rau nej, yog nej tsis noj neeg Leej Tub nqaij thiab tsis haus nws ntshav, nej tsis muaj sia hauv nej kheej. 54 Leej twg noj kuv nqaij thiab haus kuv ntshav muaj sia nyob ib txhis, hnub kawg, kuv yuav tsa nws sawv ciaj sia. 55 Vim kuv nqaij yog tseem txhiam xws, kuv ntshav yog tseem kua. 56 Tus noj kuv nqaij thiab haus kuv ntshav nyob txawm tau hauv kuv thiab kuv hauv nws.” Yes Xus cov lus no muaj nuj qes thiab tseem ceeb kawg rau lub Koom Txoos Kav Tos Liv. Lub Koom Txoos Niam tsis xav kom nws cov tub ki ploj qab thiab yuam kev mus tsis tshwm qaum ntuj. Vim li ntawd, lub Koom Txoos Kav Tos Liv mob siab ua zaj ua ntxeev qhia tsoom ntseeg sawv daws kom xyiv fab lauj zias lub caij nyoog mus koom kom tau Thaj Txi Ntuj tsawg kawg 7 hnub ib zaug, mus noj Yes Xus lub cev thiab haus nws ntshav. Cov txaus txhawj, tsis yog cov mloog lus, hos yog cov neeg cav ncauj thiab cam thawj tsis mloog Koom Txoos Kav Tos Liv lus qhia, pluag txiaj pluag ntsim txais tsis tau Tswv Ntuj koob hmoo vim txoj kev thuam tsis hwm lub “Cim yug”, yam num loj thiab tseem ceeb tsis ua. Yus ho yeem ua yus zaj xu das hu nkauj taug pob ntseg nkim caij nyoog tsheej qas tag hnub. Peb qhov muag pom ntsoov muaj cov neeg mloog lus, ua raws Koom Txoos kev ntseeg, poj niam thiab txiv neej muaj coob leej txais Tswv Ntuj tej koob hmoo ib txhiab ib txhis ntawm Tswv Ntuj xub ntiag li Yes Xus cov lus hais tseg. Hmoob twb niaj txhis piv txoj lug tias : “ Nplij niam nplij txiv thiaj tau ntuj ntoo, nplij tub nplij roog thiaj tau zoo.” Cov leej ntshiab yog cov pov thawj nto koob meej Tswv Ntuj pub rau lub Koom Txoos Kav Tos Liv qhov muag pom xyeem muaj coob leej ntau tus thoob ntiaj teb.

    Ib tsoom ntseeg sawv daws, ziag no, peb paub tseeb tias mus koom Thaj Txi Ntuj yog ib lub zoo caij nyoog loj tshaj plaws nrog Yes Xus ciaj nws lub cev nyob ntiaj teb no. Vim li ntawd, peb tseem yuav nquag mus daws txhaum ntawm txiv plig tsis tseg, vim txiv plig sawv Yes Xus npe zam txhaum rau peb. Thaum peb leej twg ua txhaum loj thiab hnyav, tseem yog tswv qhia los vaj qhia xwb thiaj yuav zam txhaum tau rau peb. Yog peb tsis mus thov daws txhaum ntawm txiv plig li, vim peb txaj muag lees peb tej txhaum rau txiv plig hnov, kuj yog peb tsis kam lees peb tej txhaum rau Yes Xus, tsis xav tsa ncauj thov thiab pe Yes Xus zam peb tej txhaum rau peb. Vim li, tsis tsim nyog peb mus txais lub “Cim Yug”, txais Yes Xus tuaj hauv peb. Lub “Cim Daws Txhaum” yog zoo tshuaj kho tau peb qhov mob kom zoo, kom peb rov los nrog Yes Xus ciaj nws lub cev nrog ib tsoom ntseeg hauv Koom Txoos ciaj Yes Xus lub cev txais tau lub “Cim Yug”.



    21.06.2011
    Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 5th July 2011, 10:59 am






    NTHUAV NTAWV NTSHIAB



    Rau hnub tim 3 lub 7 hli 2011

    Ib tsoom ntseeg thiab phooj ywg nrhiav Huab Tais Tswv Ntuj,


    Tsis muaj npaum li cas sij hawm, peb twb mus dhau lub caij nyog Hla. Hnub no, peb nyob hauv hnub chiv 14 lub caij nruab xyoo. Peb khaws 3 lub ntsiab lus hauv 3 zaj nyeem no los nthuav saib puas pab rub tau peb lub siab los npuab Huab Tais Tswv Ntuj zoo dua tuaj.

    Hauv zaj nyeem 1, saub Ntxas Kas Lis hais txog lub zog tab thiab lub zog txooj. Tsis hais leej tib neeg twg, peb puav leej ntshaw lub zog loj, zog txooj. Nyob li ntawd tib neeg, thaum ib tug neeg hlob tuaj nto plaws hluas, nkauj hlob tiav niam, tub hlob tiav txiv : Hmoob hais tias ncej puab puv ceg ris caj npab puv tes tsho. Thaum ntawd, neeg lub cev thiab tej roj ntsha tseem tshiab tshiab zoo zoo, tsis muaj mob, qab los noj mov, ua rau neeg lub cev tab tom muaj zog mloog tsis txawj tag. Yog lub caij ntawd, nyob hauv cov teb chaws vam meej, muaj kev sib ntsuas zog (Compétition sportive) sib lwv ntaus pob, ncaws pob, sib qhau, sib mos, kom tes taw ntaus nrig, sib tw dhia, sib tw khiav nrawm…yog lub caij neeg tab tom muaj muaj zog sib lwv, sib ntsuas zog. Tus yuav nrog luag sib tw, nws yuav tau npaj txhij txhua kom zoo tshaj plaws yam txuj nws txawj, nws thiaj mus phim tau nrog luag sib tw yuav ntsej muag, muaj feem yeej luag. Thaum ntawd, yeej mloog zog tsis txhawj ntaug, yog sab tsuav tau so tib pliag yeej los siav lawm, zog rov muaj puv cev npo npaum li qub. Dhau plaws lub caij ntawd, neeg zog ntaug kiag lawm. Tus neeg txawm yuav qab los noj mov npaum twg, mov tsis mus ntxiv zog ua lub cev sib kha li thaum hluas hos noj mov mus ua roj ua rau cev peem las tuaj lawm xwb. Neeg lub zog tab zuj zus, tsis yog zog txooj li thaum hluas. Vim li ntawd, ntiaj teb tib neeg nyiam kev txawj ntse, tso siab rau lub zog loj, zog txooj. Neeg nyiam sib ntsuas zog, sib tw ua kev lom zem thaum tseem yog caij yog nyoog.
    Ntawm tej tsiaj txhu kuj tib yam li ntawd. Nej yug tau tus heev nyuj los heev nees hlob tiav pwj, caj dab ntug ntoob, ncej puab kheej lam. Thaum no, tus tsiaj ha kawg, tawm plaws nkuaj xwb yeej nyob tsis tswm, hee tsheej suab nchos hau rag rhi tuam phov ncig pes lees puv tiaj nrag tsis sab luag kiag. Txheej laus thaum ub ua tsov ua rog caij nees tua hneev thiab thav ntaj. Luj muaj luj zog, nees muaj nees zog, luj zog tab, nees zog txooj. Luag tsis lam caij tus luj mus tsuj teb tsuj chaw. Tsis muaj neeg yuav tso siab rau tus luj, vim luj tsis yog tsav nrawm thiab tau hauj lwm. Leej twg los puav leej ntshaw tus nees loj muaj zog rag rhi thiaj li muaj cuab kav mus tiv tog yeeb ncuab. Leej twg puas tso taus siab rau tus luj khiav cuj caws, zog me zog tab, tsis txaus nees ob tuam phov tsuag taw luj caj dab lov : “Saib, koj tus vaj ntxwv tuaj cuag koj, tus ncaj ncees muaj peev xwm, yog nws, tus pluag caij luj, tus thav luj maum, me nyuam luj.10 Kuv yuav rhuav lub tsheb tawm ntawm Es Faws Lis thiab tus nees tawm ntawm Yes Lus Xas Les thiab tsov rog tus ntaj hnee ; nws yuav qhia kev thaj yeeb rau cov teb chaws thiab tswj kav hiav txwv txog ntug hiav txwv” Tiam sis, vim peb yog neeg ntseeg, peb los ntseeg Huab Tais Tswv Ntuj, peb yuav mloog Huab Tais Tswv Ntuj lus. Kev mloog Huab Tais Tswv Ntuj lus, yog qee peb lub siab ntsws thiab qee peb lub tswv yim los txais tej yam peb tsis pom peb tus kheej Tswv Ntuj taw rau peb pom, kom peb ras txog tej yam peb xav tsis txog. Tswv Ntuj qhia dab tsi, Tswv Ntuj nyiam li cas thiab xav li cas ? Puas yog Tswv Ntuj muab tib neeg lub neej nyob ntiaj teb hais rau peb mloog, qhia kom peb ras tsis txhob ntshaw, tsis txhob xaiv lub zog loj, zog nchav li neeg siab nyiam siab xav ; lub neej tsis kawg rau peb tib neeg kev txawj kev ntse, zog loj zog nchav. Lub neej muaj nuj nqes tsis yog vim kev txawj ntse los kev muaj zog, muaj nyiaj txiag nkaus xwb. Lub neej muaj nuj nqes yog tag yam peb pom thiab xav tau ntxiv yam peb tsis pom, peb xav tsis txog khee los ua ke. Peb tsuas pom li neeg pom xwb, yog vim li ntawd, ntau zaus peb ua dab tsi, peb ua raws li peb lub siab xav thiab raws li peb nyiam xwb, peb twb tsis tshua mloog peb tus txij nkawm hais, peb twb tsis yuav peb cov kwv tij neej tsa lus, lub zej zog thiaj ntxhov, lub teb lub chaw thiaj tsis thaj yeeb. Lwm yam peb tsis pom, xav tsis txog ntawd, peb twb paub ntsoov, peb tsis muaj hwj huam, tsis muaj lub peev xwm cuag Tswv Ntuj. Tiam sis peb nyiam ua neeg muaj, ua neeg khav theeb. Peb tso siab rau peb lub zog, muab peb kev txawj ntse los khav, muab nyiaj txiag los sib twv nyuag nyob li ntawd. Nyob li Tswv Ntuj tus muaj hwj huam, ua tus pluag, caij tus maum luj tuaj ntsib peb, tso siab rau peb, ywj peb, vam peb nrog Tswv Ntuj tus ncaj ncees kho ntiaj teb neeg nkhaus kom ncaj ncees li Tswv Ntuj. Ntawm peb, peb yog me nyuam neeg muaj plhus caij nees khav ntawm luag xub ntiag txib tub mab tub qhe nthe nqho. Tswv Ntuj hais tias tus tuaj ntawm Tswv Ntuj tuaj yuav rhuav tus nees ua rog thiab muab cov nta hneev tsov rog lov pov tseg. Peb pom Huab Tais Yes Xus tus muaj hwj huam, ib los cheem tau dej hiav txwv nphau nyob tus yees, txwv cua moj zeeg ntsiag tu lis nrho…Huab Tais Yes Xus tsis kav caij nees, tsis kav sia ntaj thiab hneev nrog ncig. Yes Xus tuaj yeem caij maum luj chaws los hauv nroog Yes Lus Xas Les tes dawb tes npliag tim ncauj tim lus tiv cov thawj leej choj kev ntxub kev hiam nws, muab dab phem tus cwj mob cwj tuag lov ntho pov tseg, sawv tsees ciaj sia rooj ntxas qhib lug ciaj ua vaj ntxwv kav qaum ntuj thiab ntiaj teb mus ib sid. Peb tsis pom Leej Pleev lub peev xwm no, muab pub peb txhua tus mloog nws lus. Peb kev ntseeg Leej Pleev Yes Xus, yog npaj txais kev ncaj ncees ntawm Yes Xus hauv peb lub neej, muaj Leej Pleev hwj chim tiv dab phem kev ntxub peb thiab maim dhau tib neeg kev haub kev ntxias.

    Tsis txhob poob cev qhev. Peb lub cev tshaib thiab nqhis ntshaw lub ntiaj teb ua peb tug. Peb thiaj li nrog ntiaj teb sib tw, sib ntsuas zog kom muaj npe, nto koob meej, muaj noj muaj hnav tsis tag, muaj nyiaj txiag puv nas…Peb leej tib neeg siab hlob hlob, muaj npaum ub npaum no los yeej tsis txaus peb lub cev ntshaw, tsis kum yees rau peb lub cev. Peb muaj ntau, yim xav kom peb muaj ntxiv, Hmoob thiaj pheej hais tias qhov muag loj dua plab. Yus twb paub ntsoov lub plab ntim tsis tag, los yus nqa phaj mus daus zaub daus mov, daus niag phaj nco laws txaus ob leeg peb leeg noj. Thaum noj tsis tag, muab laim fias pov tseg, luaj thuam dag. Luag tus zam kev rau yus tus siab hlob muab zaub daus nqig tas, tsis noj nkim pov tseg, mam yaim tais yaim diav puam chawj. Peb tib neeg lam laus cev tsis laus siab, tseem tsis tau paub kev cai txaus. Peb yuav tsum kawm tiag tiag kom paub ua neeg thoob tsib ; yus neeg siab nqaim los yuav xyaum ua siab dav ; yus neeg nkhaus yuav xyaum ua neeg ncaj. Kev xyaum ua neeg zoo, tsis kawm yeej tsis lam txawj, tsis yog kawm ib zaug yuav xyaum tau, ua tau. Kev ua neeg zoo, yuav tau kawm tag yus sim neej, kom hnub no zoo tsis txaus los tag kis tuaj kom zoo dua, khees dua hnub no. Peb yuav tsum kawm kom paub tib neeg lub cev li paub tib neeg lub siab. Tib neeg lub cev tsis yog ntshaw qhov noj xwb. Lub cev tseem ntshaw muaj teej muaj tug. Neeg ntshaw ib tug los hlub yus ua yus teej yus tug. Tus poj niam, tus txiv neej kuj tib yam puav leej ntshaw muaj ib tug los hlub yus. Neeg thiaj li nrhiav txij nkawm los sib hlub thiaj tag siab. Yog noob neej kev sib qawg ua txij nkawm. Tiam sis muaj ib txhia neeg, twb zoo siab sib hlub thaum hluas. Tsis hais tias laus zuj zus, txhim yus txij nkawm kev sib hlub kom ruaj li zeb khov li tsua, zoo li daim nplooj laus daj xyov hnub twg yuav zeeg mus, zoo li lub hnub twb qaij tim npoo roob xyov tsis ntev twb yuav poob qho, paub hnub nyob tsis paub hnub ncaim. Ib txhia haj tseem tseg ib nploog siab zais dub nyos tsis qhia nws tus txij nkawm paub. Daim nplooj siab dub no yeej tam zoj lub mob ntxhia pheeb tas zog phab kev ua nkauj ua nraug, ua plees ua yis. Yus tus txij nkawm hlub yus hauv tsev npaum li ntawd los yeej tsis tag siab li, tseem pheej ntshaw tos tus nkauj mog nraug xwb tseem mog tshaj yus tus ntxhais ntxawm thiab tub ntxawg yus yug. Cav tseem muaj ntsej muag tham rhuav plhu tsawv tau nkauj mog puag kav liam pog laus ua ntsuag ciaj zov txaj chaw pw txias qas to. Lam puag nkauj mog xwb yawg laus lub siab yeej tsis kaj ; lam luag ntxi hniav, vim tub sab dee nkauj mog siab. Nkauj mog cev lam npuab yawg laus xwb yeej tsis sov siab, ncauj tsis hais siab yeej tos tav twg yawg laus li qaij qaug ; ncauj lam dib lus qab zib tsuav vos tau yawg laus tes nyiaj dai yawg laus plaw : “9 Ntawm nej, tsis txhob poob cev qhev, hos mloog nraim ntsuj plig, vim Tswv Ntuj Ntsuj Plig nyob hauv nej…12 Vim li, kwv tij, tsis yog peb tshuav nuj nqes ntawm lub cev ciaj qaug raws lub cev. 13 Yog nej ciaj qaug raws lub cev, nej kawg tuag ; tiam sis yog nej tiv tuag nthi nej lub cev vim ntsuj plig, nej thiaj yuav ciaj sia” Poj niam, txiv neej los xij, hnub peb tsis mloog peb tus txij nkawm lus, muaj nuj nqes dab tsi ua neej nyob ? Hnub peb tsis yuav tus hlub peb lo lus, peb kawg tuag. Tsis yog peb nrog peb nplooj siab dub qaug peb lub cev ntshaw ces yuav zoo rau peb. Yeej tsis ntxiv dab tsi zoo rau peb. Ua cas ho tsis zoo ? Vim kev txob kev txhawj tsuas ntxhov loj zuj zus rhuav yus tus txij nkawm thiab tej me nyuam lub neej kom puas tsuaj. Yus yog niam yog txiv lawm, yus tej me nyuam tsis zoo cem tsis zoo ntaus yus xwb. Vim luag tsis phem kom phim yus, luag tseem txuag hwm yus lub ntsej muag xwb. Tu luag siab loj npaum cas los luag tsis pom qab hais zaj twg. Kheev lam yus siv zog hlub yus lub cuab yig npaum yus nplooj siab plees, muab tag yus thooj nyiaj txhawb yus zag niam tub ntshai yus lub cuab lub yig twb ntxov zoo npaum li cas lawm. Vim li ntawd, peb txhob lam yuav lub npe ua neeg ntseeg Yes Xus tsis hloov siab tshiab, tsis teev Yes Xus, peb tsis yog ua puas peb lub neej xwb, peb tseem rhuav Yes Xus lub npe. Peb twb los ntseeg Yes Xus, peb yuav siv zog teev Yes Xus, los npuab Yes Xus ua hnub ua hmo tag siab nrho mus tag sim neej, peb nplooj siab nkhaus kuj yuav rov ncaj, rov zoo tsis txawj tag : “11 Yog tus tsa Yes Xus hauv tsoom tub tuag tus Ntsuj Plig nyob hauv nej, tus tsa Yes Xus hauv tsoom tub tuag yuav txhawb sia rau nej lub cev txawj tuag kom muaj nws tus Ntsuj Plig nyob hauv nej.” Peb tej txhaum txawm loj, Huab Tais Yes Xus yuav zam tau peb tej txhaum rau peb.

    Yeem kwv Huab Tais Yes Xus tus quab. Peb twb pom ntiaj teb tib neeg sawv daws nyiam tus neeg muaj zog, ntshaw tus neeg txawj ntse, ntshaw kev ua nom ua tswv, kev muaj koob nto npe, muaj nyiaj muaj txiaj. Neeg ntiaj teb tsuas ntshaw tib txoj kev no rau lub neej thiaj yog lub neej muaj nuj nqes. Ntiaj teb tsis hwm cov neeg me, neeg ntshai txoj kev pluag, tsis xav nrog cov neeg dog dig txuas lus. Vim tsis muaj qab hau fim tej noob qhev. Tus neeg fim noob qhev yuav pluag yuav poob tsim nrog lawv. Tej noob nom thiaj tsis xav nrog tej noob qhev koom tsum tham ua ke. Cov nom tsuas vam noj cov qhev xwb. Tib neeg thiaj sib txeeb kev muaj koob meej, sib txeeb ua nom ua tswv, sib txeeb lag luam, khwv ciaj khwv tuag kom muaj nyiaj neeg thiaj saib taus, kom tsis tshaib tsis nqhis, neeg thiaj hwm, neeg thiaj qhuas : “28 Tas nej cov muaj khwv txog siav qhi, tuaj cuag kuv mas, kuv yuav pub rau nej so. 29 Nej tuaj kuv tus quab tsuam nej thiab kawm ntawm kuv, vim kuv siab zoo tsis muab hlob, nej tus plig yuav tau chaw so. 30 Kuv tus quab nws yooj yim thiab kuv lub nra sib kha.” Peb txoj kev teev hawm Yes Xus, mloog Yes Xus lus, zam txhaum rau tus ua tub qaug yus, hlub yus tus yeeb ncuab, thov Tswv Ntuj rau cov neeg ntxub yus, hiam yus yog Yes Xus tus quab peb kwv lawv Yes Xus qab. Yes Xus lub nra hlub neeg piv rau peb tib neeg kev sib ntxub, sib tua, sib tshom ua lub neej puas tsuaj, lam ua neej nyob nplooj siab nplooj ntsws mob ncus nco, yog ib lub nra sib dua peb tib neeg lub. Vim lub nra Yes Xus muab rau peb ris, Yes Xus nrog peb ris. Hos peb lub nra khwv ciaj khwv tuag tsis khoom teev hawm Tswv Ntuj, kev sib ntxub, sib tshom ua peb nplooj siab nplooj ntsws mob nkig nkuav, noj tsis qab, pw tsis tsaug yog peb tus kheej lub nra hnyav dua Yes Xus lub.

    Ib tsoom phooj ywg, yog peb lam ntxov paub, peb yuav siv zog teev hawm Yes Xus, mloog Yes Xus lus, peb yuav ntxov tsis raug txom nyem. Txawm li cas, ziag no peb paub, tus yuav pab tau peb kho peb lub siab mob kom zoo, pub peb muaj kev kaj siab, txawm peb yog neeg muaj txhaum, yof Yes Xus tib leeg. Peb yuav nco ntsoov mus pe, mus thov Huab Tais Yes Xus nws tau cog lus yuav pub rau peb cov muaj khwv txog siav kom peb tau so kom los siav. Peb leej twg ntseeg Yes Xus, tus ntawd yuav txais Yes Xus cov txiaj ntsim pab nws.

    29.06.2011 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 8th July 2011, 8:30 pm



    Rau hnub tim 10 lub 7 hli 2011

    Tsoom ntseeg thiab phooj ywg hmov tshua,

    Txoj kev fim Tswv Ntuj qhia rau peb nyiam Tswv Ntuj ib hnub zoo zuj zus. Kev mloog Tswv Ntuj lus yog thawj txoj kev pab peb nyiam thiab paub Tswv Ntuj. Vim li ntawd, Tswv Ntuj lo lus yog dej haus, yog tshuaj noj, yog txhiam xws pab txhawb yug peb txoj kev ntseeg.

    Hauv zaj nyeem ib, Tswv Ntuj lo lus zoo li nag thiab daus poob saum ntuj los yug daim av. Tswv Ntuj tus tub tshaj xo, His Xais, qhia rau peb kom peb tig mus ntsia nag thiab daus poob los ywg daim av. Yog peb pom nag thiab daus muaj nuj nqes, peb kuj yuav to taub npaum li cas Huab Tais Tswv Ntuj lo lus muaj nuj nqes. Tos nag thiab daus poob los, vim muaj daim av. Vim muaj av, kab ntsaum, tsiaj txhu, nroj tsuag thiab tib neeg thiaj muaj chaw nkaum, tau chaw nyob ciaj sia. Saub qhia tias ib yam Tswv Ntuj ua zoo, cawm tau puas tsav yam muaj txoj sia. Yog Tswv Ntuj kev nto koob meej muaj hwj huam. Lub dej lub lwg, nag xob nag cua, lub caij lub nyoog, lub niaj lub xyoo muaj nuj nqes txhua nrho. Nyob li xyoo twg xyoo zoo, tib neeg tsis txhawj tsis tshaib. Xyoo twg ntuj qhuav tsis muaj nag, xyoo ntawd, neeg yeej tshaib plab. Tsis kawg neeg thiaj tshaib, toj roob hauv pes qhuav lis qhawv, kwj deg kwj ha qhuav lis qho, liaj teb av nkig nkuav tawg pleb nrib nrees, nroj tsuag tuag ciaj khaub, tsiaj txhu kab ntsaum, mos nkawj mos muv, nas noog tshaib qaug luj luas suab kab tsis saub, suab noog tsis seev ntiaj teb ntsiag moo to. Thaum ntuj dub xob nthe nqes nag xob nag cua nroo qas ntws, ntxaum av, tshwm nroj tsuag mos nyoos ntsais tsias, ua paj hmab paj ntoos ntag yees tiaj nrag, hauv toj hauv pes paj nra pwb paug tsw qab zib liaj dib kab ntsoom, dee mos nkawj mos muv siab yuj ua hnub ua hmo ntsauv tsis khoom so. Peb puas pom nag thiab daus muaj nuj nqes npaum li cas rau daim av, peb puas ntseeg nag ua qoob hlob, pub txhiam xws yug peb txoj sia, peb thiaj ciaj ? Tus ho tseem tsis pom tsis ntseeg dej nag muaj nuj nqes thiab, nws ua neej nyob saum daim av zoo dab tsi rau nws ? Peb yeej ntseeg nag thiab daus muaj nuj nqes yug daim av kom ciaj sia tiag. Peb kuj yuav to taub Tswv Ntuj lo lus muaj nuj nqes yug peb tib neeg kom ciaj sia, muaj Tswv Ntuj hwj huam. Vim nag thiab daus twb tseem ceeb rau daim av, Tswv Ntuj lo lus tseem yim huab muaj nuj nqes rau peb tshaj nag thiab daus rau daim av : “10 Vim nag thiab daus nqes puag saum ntuj los, nws tsis lam thim rov qab yog tsis ntxaum daim av, ua taus num, nthaw taus kaus, pub taus noob rau tus nrom qoob thiab mov rau tus yuav noj. 11 Kuv lo lus tawm ntawm kuv lub ncauj kuj tib yam, nws tsis rov qhuav nquas los cuag kuv, yog nws tsis ua li kuv xav, tsis ua tsheej li kuv xa mus.” Ua cas peb twb paub ntsoov li ntawd, peb tib neeg ntiaj teb haj tseem saib Tswv Ntuj lo lus nyuag dog dig, tsis rau nuj nqi, tsis quav ntsej Huab Tais Tswv Ntuj thiab no tiag. Peb tib neeg cav muaj plhus tsis teev Tswv Ntuj, yeem mus zwm, mus teev nyuag dab qus, nyuag mlom, mloog nyuag saub cuav dog qas dig txaus txaj muag. Muaj coob leej neeg ntseeg twb tsis mus pe hawm Tswv Ntuj txog 10 zaus hauv 1 lub xyoo, puas phim Tswv Ntuj hlub peb ? Peb sim nrog xav saib yog li cas tiag. Huab Tais Tswv Ntuj tus hlub neeg, tso nag tso lwg rau peb tej qoob loo ua txhiam xws yug peb tib neeg lub cev ntaj ntsug. Huab Tais hlub peb tib neeg npaum li ntawd, tib neeg ho tsis nrhiav paub Tswv Ntuj, tsis nco Tswv Ntuj txiaj ntsim. Tib neeg yeem muab nyiaj txiag muas tsiaj txhu txi rau nyuag dab qus ntaim neeg noj haus. Puas yog tib neeg yeej tsis sawm zoo, sawm ua dab qhev kom tuag kus ? Twb tsis kawg ua tej dab ntsuj dab xyw qhev xwb, tseem ua tag puas tsav yam dab qhev. Vim tib neeg tsis ris siab, tsis thim xav los npuab Tswv Ntuj ua peb tus Huab Tais. Dab nkauj nraug ntxias peb poob nyiaj ntau rau kev plees kev yis, rhuav peb lub cuab lub yig kom puas tsuaj, rhuav peb lub koob meej ua nkauj feb nraug fav. Dab twv txiaj yuam pov, dab tub sab ntxias peb ua luam yeeb raug txim, raug loj faj, raug ntaus raug nplua. Dab nyiaj dab kub thawb peb muag peb lub cev ua luam, ua dev ua npua poob cev qhev. Peb pom npaum li cas tub ntxhais lub neej liam txwv tsis muaj neej ua vim poob cev qhev. Tas txhua yam, txhua tus dab phem no tsis yog txeem sab nraum zoov los ntxias yus hauv nruab siab xwb. Tej dab phem no ib txwm xeeb txawm zaum caws vos ua hnub ua hmo khub khawv neeg lub cev, nplaum neeg tej siab ntsws xuas dej ntxuav tsis tau kom huv, tes de tsis tau, plhws tsis tawm hauv neeg siab ntsws pov tseg. Tas tej dab phem no yog tib neeg keeb txhoj keeb txhaum. Tsuas kawg Tswv Ntuj lus, yog dej yog tshuaj muaj kuab lom yeej tej dab phem no kom ploj xwb. Kev teev hawm Tswv Ntuj yog yam tshuaj zoo tshaj plaws cawm tau peb. Kev mloog Yes Xus lus npo tau peb dim kev muab hlob, khav theeb, kev poob ua cev qhev. Leej Ntuj Plig Ntshiab lub zog xwb thiaj yuav pub peb tiv yeej tas nrho txhua tus dab phem. Peb yuav tau siv zog nrhiav kev fim Huab Tais Yes Xus raws li cov neeg ncaj, cov leej ntshiab thiab cov thwj tim qhia rau peb hauv Koom Txoos Kav Tos Liv.

    Paj Lug yog tus txawj piav Huab Tais Yes Xus cov lus qhia rau peb ua neeg mloog lus. Peb yuav xyiv fab rau Paj Lug cov lus ua peb lub chaw vam khom, chaw cuab zog txhawb peb txoj kev ntseeg thiab tso siab rau Huab Tais Yes Xus. Vim Paj Lug yog peb tus thawj, yog peb tus yawg koob, yawg suab ntseeg Yes Xus, teev Yes Xus ua peb ntej. Peb yuav hwm nws, mloog nws tej lus yog lus koob lus hmoov qhia peb ua neeg ntseeg Yes Xus li nws, peb thiaj muaj Yes Xus hwj huam li nws. Paj Lug hais tias lub sim ceeb raug txom nyem. Vim neeg tsis sib hlub, tsis sib zam. Cov hlob, tsis hlub cov yau thiab cov yau tsis hwm cov hlob. Tib neeg thiaj ua chawj ua chim, sib txeeb noj, sib txeeb hnav ; tej teb chaws thiaj ua tsov ua rog, ntiaj teb neeg thiaj txom nyem tiam dhau tiam. Yog tib neeg ntseeg Yes Xus cov lus qhia, ib leeg txawj zam, txawj hwm, txawj yoog rau ib leeg, peb yuav tsis muaj plaub muaj ntug hais, yuav tsis sib ntxub, tsis sib pauj. Ntawm txoj kev sib zam, txawm tsis yooj yim zam rau ib tus neeg ua tub qaug yus, ua txhaum yus. Txoj kev zam yus tus yeeb ncuab qhib txoj kev tshiab rau yus taug. Hos txoj kev sib ntxub, kev sib pauj, txoj kev khib yog txoj qub kab qub kev tib neeg txhua tus taug. Peb twb pom tej neeg tub sab, cov neeg siab nyoos, cov neeg lim hiam yeej tsis muaj zam, tsis muaj hlub leej twg, tsis muaj khuv xim, tua neeg tuag puam chawj, hos yog nws tus kheej raug tua tuag los tseg, ciaj los nyob. Txoj kev sib ntxub, sib tua, txoj kev sib pauj yog txoj qub kev neeg ntiaj teb sawv daws taug. Tus neeg ntseeg Yes Xus, teev Yes Xus, yuav taug Yes Xus tus roj tus hneev lawv Yes Xus qab, mloog Yes Xus lus, mus txoj kev tshiab Yes Xus qhia rau peb taug, peb thiaj mus ntsib Yes Xus saum qaum ntuj. Txoj kev zam yus tus yeeb ncuab yog txoj kev tshiab ntiaj teb neeg tsis tau pom dua thiab lwm txoj kev cai teev hawm tsis paub txog, tsis paub qhia, tsuas kawg Yes Xus tib leeg thiaj qhia txog kev sib zam. Peb cov neeg ntseeg Yes Xus yuav txawj sib zam hauv peb lub cuab lub yig, zam rau peb tus yeeb ncuab vim Yes Xus kom peb zam. Muaj tseeb tseeb, peb pom ntsoov ntawm qhov muag cov neeg mloog Yes Xus lus zam tau rau lawv cov yeeb ncuab. Peb ntseeg thiab peb qhuas Yes Xus cov lus muaj hwj huam pab tus neeg ncaj ncees zam tau rau cov neeg lim hiam. Tus neeg ncaj taug txoj kev tshiab Yes Xus tuaj qhia rau ntiaj teb neeg : “22 Peb paub tas nrho lub sim ceeb txawm tau los ntsaj haws him npaum plab mob yug me nyuam txog niaj hnub no ;23 Tsis tas li ntawd, peb cov neeg tshiab txais Leej Ntsuj Plig, ntsaj peb tus kheej tos ntshi ciaj Tswv Ntuj cov tub sau, peb lub cev li tau kev dim. 24 Kev vam twb cawm tau peb lawm.” Txawm tias txoj kev zam rau tus neeg phem, tsis yooj yim taug, kuj tsis yooj yim zam rau yus tus yeeb ncuab ua rau peb mob siab tsheej zag, ua rau peb npau taws ntsaj tsheej suab npaum poj niam mob plab me nyuam. Vim peb mloog Yes Xus lus, peb ntseeg tias kev zam ua tau peb ciaj Tswv Ntuj cov tub sau.

    Hauv Mas Tais Ntawv Moo Zoo, zaj txhais Yes Xus hais rau cov neeg tuaj mloog nws ntawm ntug hiav txwv hais txog cov noob tseb ncaj thaj av phem los av zoo. Peb yog zoo li npoj neeg tuaj ntsauv Yes Xus ntawm ntug dej. Peb los ua neeg ntseeg Yes Xus hauv lub Koom Txoos Kav Tos Liv. Lub Koom Txoos sawv Yes Xus chaw qhia Yes Xus lub Moo Zoo rau peb mloog. Peb txoj kev ntseeg Yes Xus zoo li cov noob peb tau txais ntawm Yes Xus, lub Koom Txoos nrom rau hauv peb nruab siab. Lub ntsiab, tej zaum peb yuav rov nug peb tus kheej saib txoj kev ntseeg Tswv Ntuj puas muaj qab hau los tsis muaj rau peb. Peb zoo li thaj suab puam, los zoo li thaj av muaj khaub pos laum qoob, los yog thaj av zoo qoob ? Peb zoo li cov neeg lam ua npe ntseeg Tswv Ntuj, teev Tswv Ntuj, tiam sis, peb coj tus yam ntxwv li cov neeg teev dab qhuas thiab teev mloom, sim neej tsis paub teev ntuj li. Peb coj lub qub neej, tsis hloov siab tshiab phim tus neeg hwm Tswv Ntuj. Peb lam mloog Yes Xus cov lus, peb khaws tsis tau ib los ua tshuaj lom peb lub siab nkhaus kom ploj mus. Peb lub siab tseem dub thiab lim hiam npaum qub los heev zog qub. Peb mloog Yes Xus cov lus tas los tsis nkag siab li. Peb lam muaj pob ntseg, peb twb pauv tsis ntxiv tus neeg lag ntseg, lam muaj qhov muag, pauv tsis ntxiv tug neeg dig muag. Peb twb tsis pe hawm, tsis teev Tswv Ntuj, ua tus neeg dag Tswv Ntuj tsis hwm cov lus peb tau lees ua neeg teev Tswv Ntuj hnub peb txais lub Cim Ntxuav. Peb ua neeg dag, nyob hauv tsev xwb los peb hais tias tsis muaj caij teev ntuj ; vim peb tub nkeeg, txog caij nyoog teev hawm los peb hais tias hnub no tsis tau mus cia tag kis tso mam mus teev ntuj. Tag kis tuaj los tsis mus, ib hlis tuaj los tsis tau mus, ib xyoos los twb tsis tau mus. Thaum peb zoo li no, tej txiaj ntsim Tswv Ntuj muab pub rau peb ua neej yuav plam, yuav qhuav tag ntawm peb tes. Cov neeg nquag saib txoj kev pe hawm thiab teev Tswv Ntuj muaj nqes, ua cas thiaj yuas tsis tau koob hmoov ? Tus twg mloog Yes Xus lus, nco txiaj nco ntsim ua Tswv Ntuj tsaug, siv zog npuab Tswv Ntuj ua hnub ua hmo. Tus neeg ntawd yuav tsum pom Tswv Ntuj lub txiaj ntsim hauv nws lub neej xwb. Vim tus nquag teev ntuj txais Leej Ntuj Plig lub zog kav nws. Tas txhua yam kev txhawj xeeb hauv nws lub neej, yuav muaj tus daws tas rau nws : “12 Vim tus muaj, yuav pub tshaj rau nws yim huab ntau tuaj ; hos tus tsis muaj, tshuav pes tsawg yuav raug qee huv si ntawm nws.” Tus muaj kev cia siab rau Yes Xus, Yes Xus yuav daws tau nws dim nws kev txhawj xeeb. Nws yuav pom Yes Xus nrog nws nyob mloog nws lub suab hu. Nws kev cia siab rau Yes Xus yim ruaj khov dua tuaj. Tus tsis muaj kev cia siab rau Yes Xus, tseem yim huab yuav pluag kev cia siab rau Yes Xus, vim nws siab ntsws tsaus ntuj nti, nyuaj siab tsis txawj tag.

    Ib tsoom phooj ywg sawv daws, peb twb los ntseeg Yes Xus teev Yes Xus, peb yuav xyiv fab hloov kom tau peb lub neej phim tus neeg hwm Tswv Ntuj. Tsis tas li ntawd xwb, kev hloov siab tshiab, hloov neej tshiab tsis yog hloov ib zaug yuav ua tau tus neeg zoo. Peb yuav niaj hnub hloov peb lub siab thiab lub neej los npuab Yes Xus kom tag peb sim neej raws kom tau Yes Xus qab : “23 Tus tseb rau qhov av zoo, yog tus hnov lo lus thiab to nrog, tus txi taus txiv ib tau pua, los ib tau rau caum, los ib tau peb caug.” Yog peb txawj ua ib yam zoo ib ncig ntawm peb, twb yog txiaj yog ntsim, peb yuav ua tau ntau yam zoo vim Yes Xus lo lus coj peb kev.



    06.07.2011
    Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 15th July 2011, 10:23 am



    Rau hnub tim 17 lub 7 hli 2011

    Ib tsoom ntseeg thiab phooj ywg,
    Muaj ntau yam yuav piav tsis txhua hauv cov zaj nyeem hnub no. Peb tsuas khaws ob lub ntsiab lus coj los nthuav tseg txhawb peb kev kub siab ua neeg mloog Tswv Ntuj lus hauv lub lis piam no.
    Thaum peb tsis tau hnov tsis tau paub dua kev teev Tswv Ntuj, peb tseem teev hawm peb tej dab qhuas Hmoob raws li poj ua tseg yawm ua cia. Peb yeej tsis tau luag lam mus teev tej dab qhuas txawv caj ces peb tej poj yawm ib txwm coj thiab qhia rau peb teev. Vim sawv daws yeej ntshai tsam mus lob nrhab yuav tau nrhab daws. Tus tsis mloog tej laus qhia, nws yuav ua puas dab caj dab ces. Leej twg ua puas dab, tus ntawd yuav tsum tau kho dab nws thiaj li tau zoo nyob tsis raug xwv txheej. Hmoob thiaj pheej hwm kev ua dab ua qhua nruj nreem raws poj koob yawm txwv qhuab qhia rau nyias tej tub ki thiab xeeb leej xeeb ntxwv. Tab txawm yog ib tsob Hmoob xwb los nyias muaj nyias dab qhuas sib txawv. Nyias yuav tsum teev nyias dab raws nyias keeb kwm. Ib xeem Hmoob thiaj teev dab qhuas txawv lawm ib xeem. Nyias kev teev dab qhuas yuam nyias ua raws nyias caj ces, nyias poj yawm txwv koob coj thiab qhia. Tus txiv dab txiv muam yuav tsum paub dab. Hmoob kev teev dab qhuas, muaj caiv loj thiab ua nruj kawg nkaus tsis pub yuam kev ib qho. Vim li ntawd, tej txiab nkeeg thiab xwv txheej ua rau cov Hmoob tseem coj dab qhuas ntshai kawg. Hmoob hais tias tej txiab nkeeg thiab xwv txheej yog dab ua rau neej. Muaj ntsuj muaj xyw hla zej zog rau dev tom tsij qees ntuj tag hmo ntaus cim tseg tias yuav muaj txiab nkeeg thiab xwv txheej, tim dab kev looj koov rau neej tos neej kev tom neej. Muaj ntau yam piv txwv Hmoob teev dab qhuas caiv nruj kawg. Piv li thaum tej ntxhais mus ua neej lawm, mus teev luag dab ciaj luag qhua. Tej ntxhais tuaj yug tsis tau me nyuam hauv niam tais yawm txiv tsev, caiv ua tsis tau, yog tsis caiv yeej kawg puas dab caj dab ces, puas dab vaj dab tsev. Kuj tib yam rau ntawm kev ploj tuag muaj caiv loj kawg nkaus. Tsuas kawg tib cuab kwv tij koom dab koom qhua : Hmoob hais tias txheeb thiaj tsis caiv, ib leeg tuag tau ib leeg tsev. Dua li, ib xeem Hmoob yeej tuag tsis tau hauv lwm xeem tsev, yeej caiv hla tsis dhau tus cai dab qhuas. Kev caiv hauv dab qhuas Hmoob, muaj ntau yam caiv.
    Txij li thaum peb tso kev teev dab qhuas Hmoob tseg, los teev Huab Tais Tswv Ntuj, tus tsim lub ntuj lub teb, tsim neej thiab dab, tsim tas txhua tsav puas yam. Huab Tais Tswv Ntuj loj tshaj thiab muaj hwj huam tshaj neej thiab dab. Peb nrauj dab los teev Tswv Ntuj tus loj muaj hwj huam, peb dim plaws txoj kev txhawj kev ntshai dab tom, kev nqaim kev ti los taug txoj kev loj kev dav Tswv Ntuj txoj kev. Txawm muaj dab los dab cia li ua tus swb, tus ntshai peb, khiav deb ntawm peb txoj xub ke. Vim li cas dab tsis los tom peb li thaum ub lawm ? Qhov peb pom no tsis yog tim peb dab ntshai, tim dab ntshai Tswv Ntuj dab thiaj hwm peb. Huab Tais Tswv Ntuj muaj hwj huam, peb ntseeg, leej twg los khaub zig txog Huab Tais Tswv Ntuj, vam khom, teev, mloog Tswv Ntuj lus, tus ntawd txais Tswv Ntuj lub hwj huam. Muaj tseeb tiag, tsis yog lam hais. Hnub peb txais lub Cim Ntxuav, peb tau ntiab dab phem tawm khiav ntawm peb lub cev thiab ntsuj plig. Peb tau lees Huab Tais Tswv Ntuj los ua peb Niam peb Txiv hlub peb tiv thaiv peb. Cov lus peb hais los ntiab dab muaj hwj huam, caum tau dab li peb hais vim yog Tswv Ntuj lus. Peb tau txais ib lub npe tshiab, vim peb yug dua tshiab ua tus neeg tshiab nrog tas lub Koom Txoos ntseeg sawv daws ua Tswv Ntuj tub ki. Ua neej sawv daws yog ib tse, ib cuab kwv tij tsis txheeb lub cev thiab roj ntsha los txheeb hwj huam thiab txheeb Leej Ntsuj Plig, vim sawv daws koom Tswv Ntuj Ntsuj Plig Ntshiab. Tuag los ib tug tuag tau ib tug tsev txawm yog qhua thiab mab sua, yeej tsis caiv li thaud. Vim sawv daws nrauj txoj kev nqaim los taug txoj kev dav, ciaj ua sawv daws kwv tij sib hlub, tuag sawv daws cev tes ntso sib pab. Peb kuj tseem vam tseem ntshaw sawv daws tej poj yawm txwv koob saum qaum ntuj tej koob hmoov roos peb. Vim li ntawd, Tswv Ntuj lub hwj huam ua rau dab phem ntshai peb, zam peb kev tsis los thab peb li yav thaum ub lawm : “13 Dua ntawm koj, tsis muaj lwm tus Tswv Ntuj yuav txhawj xeeb sawv daws, kom koj qhia tau rau nws tias koj txiav txim tsis ncaj ncees.16 Qhov tseem ceeb ntawm koj lub zog yog kev ncaj ncees, tswj tas txhua yam, koj thiaj txuag puas tsav yam.” Peb tib neeg tsis muaj hwj huam dab tsi, yog peb tsis los npuab Tswv Ntuj, dab phem yuav tsis ntshai peb. Tsis tas li ntawd, peb twb paub ntsoov peb tsis muaj zog, tsis muaj hwj huam tiv tau dab phem. Peb tseem ua neeg cam thawj tsis mloog tej xib hwb, tej txiv plig, tej tswv qhia thiab vaj qhia lus, mus ua li peb siab nyiam siab xav. Peb ua neeg cam thawj, peb kawg yuam kev ib yam tus me nyuam cam dhau nws niam nws txiv, nws kawg yuam kev. Ua cas peb thiaj tsis yuam kev, vim peb thuam cov neeg ncaj ncees, thuam cov leej ntshiab, thuam peb leej niam Mab Liab. Yus yog tus yau, yus tsa ncauj thuam yus niam yus txiv, thuam yus tej poj koob yawm txwv luag yog hlob, yus puas tseem muaj ntsej muag rov qhuas yus, nej xav li cas ? Yog peb yuam kev, peb kuj yog tus pluag txiaj pluag ntsim. Yog peb twb pluag txiaj ntsim, peb kuj tsis tau koob hmoov ntawm tej poj yawm thiab ntawm tsoom leej ntshiab, peb yim huab pluag tsis tau Tswv Ntuj txiaj ntsim : “Leej twg mloog nej, nws mloog kuv thiab leej twg thuam nej nws thuam kuv ; tus thuam kuv thuam tus xa kuv tuaj Lk10,16” Peb los ntseeg Tswv Ntuj, peb koom Tswv Ntuj lub cev ua Tswv Ntuj tub ki thiab koom Tswv Ntuj Ntsuj Plig peb thiaj muaj Tswv Ntuj hwj huam. Vim li ntawd, txij peb los teev Tswv Ntuj, dab thiaj ntshai peb tsis los thab peb li yav thaud lawm.
    Muaj ib txhia neeg teev Tswv Ntuj txawm xav tias los teev Tswv Ntuj ces muaj ntsej muag nrog Tswv Ntuj hais cai cav kom muaj yeej muaj swb. Lawv pheej tseem xav li thaum tseem teev dab qhuas, twb muab qaib npua thiab nyuj twm ntsuj duab ntsuj plig ntxias tau dab kev looj koov zoo tau los. Twb them ntsuj qaib ntsuj npua ua txim hnyav npaum li ntawd tus rau dab, neej ntsuj plig thiaj rov qab los npuab cev. Yus los teev Tswv Ntuj, yus kuj hais rau xib hwb thiab txiv plig teev ob peb zag ntuj ntxias Tswv Ntuj kom ua li yus siab nyiam, tshem yus tej txiab nkeeg mus pov tseg. Yus thiaj los coj kev cai ntseeg Tswv Ntuj kom dim kev txhawj xeeb. Yus los teev ntuj, los tsis dim, tseem pheej raug qees kev txhawj xeeb, tsam Tswv Ntuj tsis loj txaus. Tseem muaj tej txhia neeg ntseeg Tswv Ntuj txawm xav tias yus twb muaj Tswv Ntuj hwj huam lawm, ho tom thawj ua zaj puav npau suav cuab yus zog sawv saub ces maj zeeg, tsam tos thiab tos ho lig rau yus kev sawv saub, los puas sawv ua xib hwb qus raws li yus nyiam thiab yus txawj. Vim li, thiaj muaj coob leej saub cuav ncig teb ncig chaw kho mob kho nkeeg txhua nrho, teev ntuj tsis tsheej ntuj, teev dab tsis tsheej dab ; cov sawv kws xib hwb qus qhuab qhia thoob teb chaws teev dab teev mlom sib xyaws pes ntxaws. Tsis hais tus saub cuav los tus xib hwb qus los tus neeg cam thawj twg puav leej yuam kev tag nrho. Yog kheev lam lawv tus kheej yuam kev xwb tsis luaj twg. Tiam sis, qhov txhaum Tswv Ntuj loj yog qhov lawv txw thiab pus tau cov neeg ntseeg duj de yuam kev nrog lawv. Peb yuav nco ntsoov Yes Xus cov lus Yes Xus hais rau tus neeg cav ncauj cam thawj coj sawv daws poob zoo : “Tus ua tub qaug ib tug hauv cov me nyuam ntseeg kuv no, muab lub zeb luj zom dai ntawm nws caj dab tog lawm hauv qab thu hiav txwv yuav zoo tshaj rau nws Mt 18,6” Peb yuav tau ceev faj kawg nkaus rau hom saub cuav thiab hom kws xib hwb qus sawv los qhuab qhia neeg tsis muaj paus muaj ntsis, ntxias neeg yuam kev. Tsis yog txheej tshiab no thiaj muaj cov neeg coj kev teev hawm vwm leg ntsuav li ntawd. Yog nej mus thuav ntawv liv xwm chiv keeb Koom Txoos Kav Tos Liv sawv los txog niaj hnub no muaj 20 tiam neeg, tshaj 2000 xyoo, yeej ib txwm muaj cov saub cuav thiab cov neeg cam thawj, kws xib hwb qus. Tiam sis, lawv tsuas sawv ib vuag dua ntais li tej noob nroj tuaj paug teb hauv zaj txhais Yes Xus qhia rau peb mloog hnub no : “Huab Tais, tsis yog koj twb tseb cov noob zoo rau koj thaj teb ? Ua cas ho muaj nroj ?” 28 Nws tsa ncauj hais rau lawv : “Neeg tus yeeb ncuab ua li ntawd.” Cov tub txib hais rau nws : “Koj puas xav kom peb mus xawb rho cuam pov tseg deb?”29 Nws teb : “Txhob ua li. Ntshai tsam nej xawb nroj, nej rho tau nplej nrog 30 Cia ob co hlob ua ke txog caij hlais, thaum ntawd, kuv yuav hais rau cov sau qoob : xub xawb nroj ua ntej, muab khi ua tes coj mus pov hlawv, hos sau cov nplej tso hauv kuv txhab.” Peb los teev Tswv Ntuj, yam zoo peb ua, yog peb mloog Tswv Ntuj lus ua li Tswv Ntuj nyiam. Yam phem, qhov yuam kev yog noob nroj tuaj paug teb, yog dab phem coj kev, peb qaug rau dab phem ua li dab phem zaj. Peb twb pom cov saub cuav, cov kws xib hwb qus, cov neeg cam thawj coj kev teev hawm tsis muaj qab muaj hau, tsis muaj paus muaj ntsis. Peb tsis txhob cia lawv ntxias peb mus yoog li lawv, taug lawv qab. Peb yuav coj kom tau peb lub siab los npuab Tswv Ntuj, teev Tswv Ntuj, tso siab rau Tswv Ntuj raws peb tej xib hwb, tej txiv plig, tej tswv qhia lus qhub. Yog nej mloog cov tseem xib hwb thiab tseem txiv plig qhia rau nej, yog nej mloog Huab Tais Yes Xus qhia rau nej. Yog nej mus raws tus saub cuav thiab tus xib hwb qus qhia nej, yog nej mus raws dab phem. Txawm li cas, yog peb teev Yes Xus raws lub Koom Txoos qhia, tso siab tsis txhob txhawj, Yes Xus yog tus yuav txiav txim rau peb txog hnub kawg.
    Ib tsoom ntseeg thiab phooj ywg, lub neej teev Tswv Ntuj ua ntseeg Tswv Ntuj tsis yog ntxuav plig tas ces teem hauv ncoo siab siab pw tsaug zog tom tsev yuav muaj zog thiab ciaj tau neeg ntseeg Tswv Ntuj. Nyias yuav mob siab siv zog ntsos teev Tswv Ntuj, thov koob thov hmoov tsis tseg ntawm Tswv Ntuj tas sim neej twb tseem tsis txaus. Kev mus teev ntuj hnub chiv, yog mus nrog yus cov kwv tij ntseeg pe hawm Tswv Ntuj ciaj Tswv Ntuj tub ki, txais Yes Xus lub cev ua txhiam xws yug yus lub cev thiab ntsuj plig kom muaj zog txhob qaug, txhob poob rau dab phem ntxias. Peb sim tig ntsia cov neeg mloog Tswv Ntuj lus, lawv yeej tsis sav txoj kev teev hawm Tswv Ntuj ib lub caij nyoog li. Tim li cas, tej txhia neeg ntseeg twb tsis mus teev ntuj txog 3 zaug hauv ib lub xyoo, peb yuav ua cas kom Tswv Ntuj pub txiaj ntsim tau rau peb ? Vim li ntawd, cov neeg peb yuav yoog thiab peb yuav tsum mloog yog cov neeg ncaj ncees nyiam Tswv Ntuj raws li Yes Xus qhia rau peb.

    13.07.2011
    Cwj Vuam Chiv




    Last edited by NrhiavTswvNtuj on 23rd July 2011, 7:39 pm; edited 2 times in total





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 22nd July 2011, 11:01 am



    Rau hnub tim 24 lub 7 hli 2011

    Tsoom ntseeg thiab phooj ywg Hmoob sawv daws,



    Hnub no zoo hnub, peb rov tuaj pe hawm peb tus Huab Tais Tswv Ntuj, vim peb yog nws tub ki nws hlub nyob ntiaj teb no. Peb zoo siab tsis txawj tag rau Tswv Ntuj kev hlub peb, tsis muaj yam dab tsi pauj tau peb tus Huab Tais Tswv Ntuj txiaj ntsim. Txawm peb tsis muaj tus tsi pauj tau Tswv Ntuj txiaj ntsim, peb tuaj hais ib lo lus nco koob hmoov, thov Huab Tais Tswv Ntuj mloog peb lo lus qhuas thiab teev Huab Tais.

    Peb leej twg twb xav muab peb lub neej cog rau Huab Tais Tswv Ntuj ua tus pab nres tiv thaiv peb ntawm tas txhua txoj xub ke. Yog yam loj tshaj thiab yam peb ntshaw tshaj plaws hauv peb txoj kev teev Huab Tais Tswv Ntuj. Vim li ntawd, peb thiaj zoo siab hlo nrauj dab phem, tsis ua neeg luab tsuab, neeg plhom moj, neeg muab hlob, zoo siab tig los coj ib lub neej tshiab raws li tus neeg hwm Tswv Ntuj. Peb tau taug kev ntsoov thov txais lub Cim Ntxuav hauv lub Koom Txoos Kav Tos Liv yug ua neeg tshiab, ua haiv neeg ntseeg Tswv Ntuj, teev Tswv Ntuj raws lub Koom Txoos kev qhuab qhia. Peb ntseeg tias, peb kev teev hawm thiab kev mloog Tswv Ntuj lus yog qhov loj thiab tseem ceeb Tswv Ntuj nyiam thiab tos ntawm peb haiv neeg teev Tswv Ntuj nyob ntiaj teb no. Yog peb txawj txhawj thiab txawj ntshaw kom peb lub neej thiab peb lub siab ua tau li Tswv Ntuj nyiam, ces peb yuav txawj ua yam dej num loj thiab tseem ceeb Tswv Ntuj ntshaw kom peb ua nyob ntiaj teb no. Tos Tswv Ntuj xaiv ib haiv neeg nyob ntiaj teb no ua Tswv Ntuj tug, vim Tswv Ntuj hlub tag txhua txhia haiv neeg nyob ntiaj teb kom txawj ua neej sib hlub, txhob yuam kev, txhob poob zoo, puav leej mus tshwm qaum ntuj tag nrho sawv daws. Haiv neeg Tswv Ntuj xaiv yuav ua tus coj sawv daws kev mus cuag Tswv Ntuj, ua sawv daws piv txwv sib hlub thiab ua sawv daws piv txwv pe hawm teev Tswv Ntuj, tshaj Tswv Ntuj lo lus raws kev raws cai, raws tej saub Tswv Ntuj tsa tuav Tswv Ntuj lub npe : “Huab Tais kuv tus Tswv Ntuj, yog koj tsa koj tus tub txib sawv kuv txiv Das Vis chaw ; kuv, me nyuam tub hluas, kuv tsis paub mus los. 8 Koj tus tub txib nyob nruab nrab koj haiv neeg koj xaiv tau, ib haiv neeg coob suav tsis txheeb vim coob dhau suav tsis tau. 9 Thov koj pub rau koj tus tub txib ib lub siab txawj xav, txawj txiav txim rau koj haiv neeg, pom tau qhov zoo ntawm qhov phem, vim leej twg yuav txiav txim tau rau koj haiv neeg loj tag npaum no” Saws Los Mos sawv ua vaj ntxwv taj nws txiv Das Vis. Nws pom txoj kev sawv ua vaj ntxwv yog ib txoj dej num hnyav kawg. Nws tus kheej yuav tsis muaj lub peev xwm kav tau thiab tswj hwm tsoom pej xeem. Tiam sis, Tswv Ntuj zoo siab xaiv nws ua Tswv Ntuj tus tub txib, ua Tswv Ntuj txoj dej num pab Tswv Ntuj haiv neeg. Nws thov Tswv Ntuj pub kev txawj ntse thiab kev thoob tsib pab nws ua ib tug tub txib ncaj ncees xaiv txoj kev zoo rau sawv daws taug. Tas nrho peb sawv daws txhua tus neeg ntseeg Tswv Ntuj, tus hlob tus yau, tus poj niam tus txiv neej, peb kuj sawv ua vaj ntxwv li Saws Los Mos. Txawm tias peb tsis kav ib lub teb chaws li Saws Los Mos sawv kav His Xais Lais. Tiam sis peb sawv tswj hwm peb lub cuab lub yig kom ua tsheej ib yig neeg sib hlub, sib pab, ua ib yig neeg ntseeg Tswv Ntuj, teev Tswv Ntuj raws li Koom Txoos Kav Tos Liv lus qhuab qhia cov yim neeg ; los peb sawv tswj lub zej lub zos, tswj ib lub koom haum, tswj ib lub tsev qhia txuj, tswj ib lub tsev ua qav num, tswj ib pab neeg, ib pawg ntseeg…peb kuj ua Huab Tais Tswv Ntuj ib tug tub ntxhais txib ib yam Saws Los Mos ua Tswv Ntuj tus tub txib. Peb yuav tsis txawj tsis ntse tshaj Saws Los Mos. Peb kev ntseeg Tswv Ntuj yuav tsis loj tshaj nws. Vim li ntawd, peb yuav yoog Saws Los Mos nquag teev ntuj, nquag mloog Tswv Ntuj lus hauv peb lub neej pab txhawb tau peb lub siab ntseeg tsis muaj zog kom loj hlob. Tsis tas li ntawd, tej zaj lus peb hnov no yuav txhawb peb lub tswv yim kom nthuav, qhia peb hais tau tej lo lus ntxim Tswv Ntuj siab thiab txhawb peb cov kwv tij phooj ywg raug kev txhawj xeeb ua tau siab loj. Vim peb khaub zig Huab Tais Tswv Ntuj hauv peb sim neej, lub tswv yim peb muaj thiab lo lus peb hais yog Tswv Ntuj qhia rau peb. Vim li ntawd, peb txoj kev nquag teev Tswv Ntuj muaj koob muaj hmoov pab peb ntau yam xav kom tas txhua tus neeg ntseeg Tswv Ntuj peb xub txhawj rau nyias txoj kev ntseeg dua nyias lub neej.

    Hauv Mas Tais zaj ntawv Moo Zoo hnub no, Huab Tais Yes Xus qhia rau peb kom peb txawj txhawj qaum ntuj, nrhiav qaum ntuj ua peb tug, ua peb lub chaw tso siab. Peb cov neeg ntseeg Tswv Ntuj muaj coob leej hnov Yes Xus cov lus tag los tsis nco qab khaws tseg cuag tsis muaj nuj nqes pab rau peb. Vim li ntawd, peb muaj lub Koom Txoos ntaus peb lub thawj tam yus niam yus txiv hlub yus. Peb yuav tau cuab ntsej mloog Yes Xus cov lus, kuj yog mloog cov coj lub Koom Txoos tej lus qhuab qhia txhob ua neeg cav ncauj, thiaj tsis yuam kev. Peb yuav vam cov xib hwb thiab txiv plig, cov tswv qhia thiab vaj qhia ua peb cov thawj coj. Peb yuav vam cov ciaj thiab cov tuag, vam sawv daws tej koob hmoov txhawb peb. Vim li cas peb thiaj yuav tsum nquag teev ntuj tas peb sim neej, zoo dab tsi ? Peb kev nquag tuaj mus sib txoos ua Thaj Txi Ntuj, txais lub Cim Yug txhawb koob hmoov rau peb, xav kom txhua leej to taub lub txiaj ntsim hauv Thaj Txi Ntuj tseem ceeb npaum li cas rau peb. Tus neeg ntseeg Tswv Ntuj tuaj koom Thaj Txi Ntuj ib lis piam ib zaug noj qaum ntuj txhiam xws yug nws ntsuj plig kom hlob txhob ploj, txhob tuag ib yam lub cev tsis noj mov puas yuav ciaj nyob ; peb kev nguag mloog Tswv Ntuj lus txhawb tau peb ua neeg tsim txiaj zoo nyiam ; tus mloog Tswv Ntuj lus txais koob txais hmoov loj npaum li cas ntawm Tswv Ntuj nws puas paub li ntawd, puas phim nws yuav ua tus neeg luaj thuam, ua tus neeg xyob txhiaj pluag koob hmoov. Peb tus kheej tsis yog tsis muaj tswv yim txaus, tsis muaj kev ntseeg ruaj khov xwb, peb tus kheej kuj tsis muaj hwj huam qhov twg li. Tiam sis peb twb paub ntsoov, pom dheev ntawm qhov muag, tus muaj Tswv Ntuj lus ciaj sia hauv nws nruab siab, Tswv Ntuj pub tus ntawd sawv Tswv Ntuj lub chaw nyob ntiaj teb no. Tsis lam hais dab neeg txog txheej laus thaum ub, niaj hnub no mus rau lub neej tom ntej, Tswv Ntuj pub Tswv Ntuj lub hwj huam txhawb txhua tus neeg mloog Tswv Ntuj lus ua Tswv Ntuj tub ntxhais txib, sawv Tswv Ntuj lub npe. Kev sawv Tswv Ntuj chaw tsis yog ib txoj num dog dig, hos yog ib txoj kab xwm loj, txaus ntshai txaus qhuas. Peb sim xav, vim li cas muaj tej lub hwj huam loj txaus qhuas tshwm tuaj rau neeg pom xyeem neej thiab dab tsis muaj peev xwm ua tau. Peb leej tib neeg tus tau txais tej lub txiaj ntsim ntawm Tswv Ntuj, yuav nco ntsoov Tswv Ntuj mus tag ib txhis.

    Muaj ib tug txiv neej Fab Kis 40 tawm xyoo, nws tau ib lub mob ua rau nws lub duav mob ncus nco ua tsis tau dej num. Tej kws tshuaj tau muab nws duav phais kho tas tsis zoo. Nws tau mus teev ntuj ntau zaus nyob Lourdes, thaj chaw Niam Mab Liab tau tshwm tuaj ntsib Bernadette. Hnub xiab 12 lub 4 hlis 2002 ze 22 h 30 nws tau mus teev ntuj nram qhov tsua, haus dej thiab ntxuav muag tas los muab chaw pw. Los txog ib tog kev, nws hnov mob ib zag nws lub duav thiab nws sab ceg laug, hnov kub lug thoob plaws ib ce. Dhau plaws qhov kub ntawd, nws cia hnov nws qhov mob duav zoo hlo tam sid. Nws kuj ua xyem xyav puas zoo tiag los dag. Tiam sis txij ntawd los nws cia li zoo neej tsis mob duav li lawm. Nws rov qab los txog tsev, nws poj niam kuj nrog nws zoo siab kawg li, pom nws tus txiv dim plaws txoj kev nroo mob duav. Cov kws tshuaj niaj hnub kho nws tau tshuaj xwm xyuas los tau ze 10 xyoo no, lawv pom tias nws zoo neej lawm tiag. Lawv kuj tsis pom qab piav tim li cas nws qhov mob cia li zoo hlo lawm du lug. Nws tus kheej tsis muaj ib yam dab tsi pauj tau Tswv Ntuj lub txiaj ntsim. Nws tuaj yeem mus ko taw 2 lub hlis mus teev ntuj nyob Saint Jacques de Compostelle ua Tswv Ntuj tsuag. Txiv Tswv Qhia Emmanuel Delmas tau tshaj tawm li no : “Cette guérison peut être considérée comme un don personnel de Dieu pour cet homme, comme un événement de grâce, comme un signe du Christ Sauveur. Qhov nws zoo nws tus mob no yog ib lub txiaj ntsim ntawm Tswv Ntuj ntiag tug pub rau nws txais, yog lub cim ntawm Leej Pleev tus cawm seej. ” Kuj zoo li zaj lus Huab Tais Yes Xus hais hauv tsab ntawv peb mloog hnub no txog nqaum ntuj. Cov neeg lawv tau pom Tswv Ntuj lub txiaj ntsim muaj nuj nqes tshaj nyiaj tshaj kub, muaj nuj nqes tshaj tej pov haum. Tus neeg dim nws tus mob no yuav ua cas nws thiaj yuav tsis zoo siab. Tab txawm yog peb los kuj yuav zoo peb siab tsis txawj tag npaum li nws : “44 Qaum ntuj saum ub kuj zoo li ib thoob nyiaj zais hauv ib daim teb, ib tug neeg mus ntsib, nws rov muab zais dua, zoo nws siab dhau, nws mus muab nws teej tug muag tas nws tuaj yuav thaj teb ntawd. 45 Tsis tas li, qaum ntuj saum ub tseem zoo li ib tug los pav nrhiav tej pov haum zoo nkauj ; 46 Thaum nrhiav tau ib lub pov haum muaj nqes, nws maj zeeg muag nws teej nws tug los yuav lub pov haum. 47 Tsis tas li, qaum ntuj saum ub tseem zoo li lub vas cuam rau hauv hiav txwv mus sua tau txhua yam ; 48 Thaum puv tas rub los rau tim ntug, xaiv cov zoo rauv hauv tawb, muab cov qias pov tseg.” Peb twb pom li ntawd, muaj li ntawd, ntseeg li ntawd, peb yuav siv zog mloog Tswv Ntuj lus kom zoo dua qub.
    Ib tsoom phooj ywg sawv daws, peb tsis txhob tos kom Tswv Ntuj pub koob hmoov rau peb pom xyeem peb mam siv zog ua neeg teev Tswv Ntuj. Peb tsis txhob tos kom Tswv Ntuj pab tuaj raws peb lo luv thov Tswv Ntuj, peb mam lees hais tias muaj Tswv Ntuj. Tiam sis Yes Xus qhia hais tias peb xub nrhiav qaum ntuj ces peb yuav txais, peb yuav pom qaum ntuj txiaj ntsim. Tus txiv neej saum no, nws niaj xyoo mus teev ntuj nyob Lourdes thov Tswv Ntuj daws nws tus mob pov tseg. Xyoo ntawd, ces txawm muaj tuaj rau nws pom li nws txoj kev teev Tswv Ntuj. Peb yuav tsum ua siab ntev ntev nrhiav Tswv Ntuj kom tag peb sim neej ces ib hnub twg, peb thiab, peb yuav txais qaum ntuj los ua peb tug, qaum ntuj yuav yog lub pov haum peb ntshaw.


    20.07.2011
    Cwj Vuam Chiv







    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 29th July 2011, 8:06 pm




    Rau hnub tim 31 lub 7 hli 2011

    Ib tsoom ntseeg thiab phooj ywg hmov tshua,


    Yog zoo hnub zoo nyoog rau peb sawv daws cov nrhiav sij hawm tuaj pe tuaj teev peb tus Huab Tais Tswv Ntuj. Peb yeej paub, peb yog tib neeg tsis muaj tus tsi pauj tau peb Leej Txiv Tswv Ntuj lub txiaj ntsim hlub peb. Vim li, peb zoo siab hlo lauj zias 1 teev hauv 7 hnub 168 teev sij hawm, los pauj peb Leej Txiv Tswv Ntuj txiaj ntsim txhawb peb luag dej luag num kom tau noj tau haus ua hnub thiab pw so kom los siav ua hmo. Hnub no, peb tsuas hais txog Huab Tais Tswv Ntuj kev hlub peb. Tiam sis, ua ntej peb yuav xub xub piav ob peb los txog peb tib neeg kev sib hlub hauv lub cuab lub yig. Tas ntawd, peb mam los mloog Tswv Ntuj cov lus Tswv Ntuj hlub peb npaum li ntawd hauv cov zaj nyeem, saib peb puas ris siab txij li no los npuab peb Leej Txiv Tswv Ntuj.

    Peb tib neeg yug los yeej tsis muaj tug paub tau Tswv Ntuj, yuav cia li txawj teev Tswv Ntuj. Tsuas muaj leej puav tib neeg xwb thiaj paub Tswv Ntuj, dua li cov coob yeej tsis paub qab hau txog. Qhov neeg tsis paub kuj los ntawm neeg nyias muaj nyias txuj ci thiab kab lis kev cai coj nyias ua raws nyias keeb kwm, raws nyias poj yawm kev qhuab qhia. Ntawm Hmoob, Hmoob yeej paub tias muaj ntuj tiag, yuav tau hwm txhob ua txhaum ntuj. Hmoob tsuas paub hwm ntuj txij li Hmoob poj Hmoob yawm qhia los xwb, Hmoob tsis paub teev. Yam Hmoob teev tiag yog dab niam dab txiv, dab vaj dab tsev. Muaj tej txhia haiv neeg paub Tswv Ntuj zoo dua Hmoob, paub hwm, paub teev, paub tiam Tswv Ntuj raug kab raug kev, muaj hauv paus hauv ntsis zoo li His Xais Lais. Vim lawv tej poj yawm ib txwm ntseeg Tswv Ntuj teev Tswv Ntuj, ces lawv txawj teev muaj kab muaj ke. Kuj tseem muaj tej txhia neeg twb tsis paub Tswv Ntuj hlo, tsis txawj hwm ntuj kiag, piv li cov neeg ntuj los tsis teev, dab los tsis tiam, neej los tsis quav ntsej txog. Peb tib neeg muaj cev nqaij daim tawv, muaj ntsuj plig, muaj siab ntsws xav txhij xav txhua thiab paub hais lus. Tsiaj txhu tsis paub lus ces nrog tsis tau tib neeg tham kom qhia tau tias nco tib neeg npaum li ntawd los dhuav tib neeg lub siab phem npaum li cas. Hua ua tib neeg ces sawv daws zoo tib yam txawj mob txawj nqhis, txawj nyiam txawj qias, txawj khuv leej txawj dhuav...Peb paub lus qhia tau rau luag qhov twg mob, piav tawm peb kev tu siab, teev tus raug txom nyem kua muag, hais tej lus qab zib deev siab deev ntsws cog kev nkauj kev nraug. Peb txawj seev suab raj suab ncas, suab kwv txhiaj lus taum hais kev kho siab. Neej paub lus ces neej niam ua txuj ua ci kav ntiaj teb daim av thoob. Txawm tus tsiaj txhu pluag lus npaum li los peb twb pom tus tsiaj kuj ua tau tej yam txaus qhuas thiab txaus ntshai, peb yuav tsum lees. Neej yuav tsum hwm tsiaj, tsis txhob lam taus lam kov, lam taus lam txov tsiaj siav, tshuav kiag tsis paub hais lo lus mob siab tawm xwb.
    Kuv nco ntsoov thaum kuv tseem yau, kuv txawj zov vaj zov tsev pab kuv niam kuv txiv pub qaib pub npua. Kuv pom tej poj qaib thaum tseem nteg qe yeej qus kawg tsis muaj neeg lam txav tau ze. Cia thaum ho puag qe daug tas coj ib zag me nyuam no, tej txhia kuj tsiv kawg. Poj qaib mas nthuav tis kheej lam cem yog yus tsis paub qaib lus xwb, yeej ncig pes lees thaiv qaib tub, hos nam zawg zog dhia tuaj tom thiab ncaws tej niag nplawg yus thim tsis yeej rov qab. Yus tseem yau thiab mas ntsia niam qaib ua muaj ceem kawg, ntxaus ntshai nyog : “Hmoob thiaj piv txoj lus tias kov dev tub dev tom, kom npua tub npua ntsw.” Thaum tej lub caij zoo li no, poj qaib los niam npua txawm tsis paub lus, tsis kav luag txawj hlub, txawj mob siab kawg pab luag tub cuag nkaus li neeg thiab. Puas muaj tus poj niam twg yuav tsis txhawj, tsis mob siab rau nws tej me nyuam ? Tas txhua tus tib neeg, nyias yeej hlub hlub nyias tej tub ki, nyias yug mob nyias siab. Ib tug me nyuam yog tsis muaj niam muaj txi hlub, tsis muaj niam pub mis noj, yeej tsis hlob ciaj neeg. Tus me nyuam twg muaj mob dias hau, yeej ua rau leej niam leej txi txhawj xeeb pw tsis tsaug zog. Tus me nyuam twg tsis yog luag yug txhoj puab raug cem tsis khib luag, tseem zoo luag siab. Hos yus ua niam ua txiv lub siab mas mob tsheej zag.
    Peb pom tau tias tej tsiaj txhu thiab leej tib neeg twb txawj mob siab hlub nyias tub nyias ki, nej puas ntseeg tias peb Leej Txiv Tswv Ntuj tseem yim huab mob siab hlub peb yog peb leej twg raug txom nyem. Yog tus twg tsis ntseeg, kom nws mloog cov zaj nyeem peb hnov Tswv Ntuj hais hnub no. Peb sim muab xav, tus tsiaj tsis paub lus, tiam sis tsiaj ua tau tej yam rau peb paub tias tsiaj mob siab. Ntawm peb tib neeg paub lus tiag, tiam sis peb tej lus kuj muaj tsis txhij tsis txhua, kuj hais tsis tau pov khawv Tswv Ntuj tej kev hlub neeg. Tsuas kawg Tswv Ntuj lus thiaj qhia tau txhij txhua thiab qhia tau ntau yam rau peb pom tias Tswv Ntuj hlub peb tib neeg npaum li cas. Tswv Ntuj lus muaj nqes tshaj nyiaj thiab kub, tus twg txawj khaws, tus ntawd thiaj yog neeg nplua nuj. Tswv Ntuj lus ntws nto li tej niam dej tsis paub nqhuab nyab peb tej siab ntsws thiab poob si laim yug peb tes dej num li nag ywg daim av tej nroj tsuag thiab qoob loo : “1 Saib yuam, tus nqhis kom mus cuag dej, txawm tsis muaj nyiaj tuaj nqa tuaj noj, mus nqa cawv thiab mis dawb tsis them nyiaj. 2 Ua cas tshwm nyiaj rau yam mov qhuav, txog siav rau yam tsis pov khawv ? Mloog kuv hais, mloog kuv ! Nej yuav muaj qab noj qhuas ntxhias nrog nej ntsuj plig pluas hno.” Tswv Ntuj hlub ntiaj teb neeg mas hlub tiag tiag, hlub dawb paug kom peb nco ntsoov. Tswv Ntuj hlub neeg, tsis yog hlub cov neeg hwm ntuj los teev ntuj xwb, puav leej hlub cov teev dab los cov neeg thuam ntuj rov taw tuam ntuj tib si. Tswv Ntuj hlub neeg mas hlub tag nrho tus phem tus zoo, tus muaj txhaum tus neeg ntshiab dawb huv, tus muaj tus pluag tag nrho. Kom tus pluag, tus txom nyem los nrhiav tau noj daws nws kev nqhis li tus nplua nuj : ntses muaj nyob hauv dej mus nuv, nqaij nyob hav zoov mus plob, zaub tuaj zaub nruab tsuag mus xawb, mus de los noj. Nyob txhua lub kwj ha, muaj dej ntws nto, mus ce los haus dawb tsis poob ib kis nyiaj. Tej poj niam sem mis txhob txhawj, mus nqa nyuj mis los yug nws tub ki ua cas tseem txhawj. Tswv Ntuj pub dawb paug mis, zib ntab zib mu, nqaij thiab zaub yug txhua leej tib neeg. Tsuas yog neeg thiaj muab mis, muab nqaij, muab ntses muab dej los muag noj nqe, vim neeg siv dag zog mus thauj, mus ris los noj. Yog neeg lub luag dej luag num, neeg kuj xav kom tau lub nqe zog rov qab. Yeej yog kev yog cai yuav tsum them neeg lub nqe zog mus khwv tiv tshav tiv nag thiaj muaj mov noj cawm siav. Tiam sis qhov tsis yog kev yog cai, tus muaj mov noj tsis nco faib rau tus tshaib plab, tus pluag, tus txom nyem. Tus muaj mov noj tsis nco tias nws daim liaj teb yog Tswv Ntuj liaj teb muab qiv ua nws npe cog qoob cog loo ib ntus thaum nws tseem ciaj sia xwb. Hnub nws tso ntiaj teb tseg, nws thaj liaj teb yuav poob rau lwm tus neeg khaws mus cog. Vim nws thaj liaj teb yog Tswv Ntuj thaj, muab qiv rau nws cog ua ntej tas, ho yuav muab qiv rau lwm leej. Lub ntiaj teb yog Tswv Ntuj lub Tswv Ntuj muab qiv rau neeg nyob ib ntus xwb. Vim li ntawd, thaum ua neej nyob tseem muaj sia, peb yuav nco ntsoov nrhiav tus hlub peb tshaj plaws : “35 Tus tsi yuav txiav peb tau ntawm Leej Pleev kev hlub ? Kev txob txhawj, kev txhawj xeeb, kev hiam, kev tshaib, kev pluag, xwv txheej los tus hniav ntaj ? 37 Tiam sis peb yeej tag tej ntawd vim tus hlub peb.” Yog peb ntseeg peb Leej Txiv Tswv Ntuj tiag, peb yuav tso siab rau Leej Pleev Yes Xus tus tuaj ntawm Tswv Ntuj tuaj pab peb. Ua li peb to taub Yes Xus kev pab thiab kev cawm peb zoo li cas ? Peb twb paub ntsoov, txawm peb muaj ib lub vaj lub tsev, peb yuav tsis nyob mus li peb lub vaj lub tsev ; txawm peb muaj ib thaj liaj teb, peb yuav tsis ua peb thaj liaj teb mus li ; peb los nyob ntiaj teb no, peb kuj tsuas nyob ib ntus xwb. Leej Txiv Tswv Ntuj xa nws Leej Tub Yes Xus yug los ciaj neeg kom pab tau peb, cawm tau peb, tsis yog pab cawm kom peb nyob twj ntiaj teb no, ua peb thaj liaj teb mus li los nyob peb lub tsev mus li. Yog peb vam tias peb los teev Yes Xus kom peb dim kev txhawj xeeb, kev raug hiam, raug xwv txheej, dim kev txom nyem, kev pluag xwb mas peb yuam kev. Peb tsis ntseeg Leej Pleev Yes Xus raws lis thwj tim Paj Lug qhia. Peb nyias tsuas ntseeg nyias ib tug Yes Xus raws li peb siab xav xwb, peb tsis ntseeg tus tseem Huab Tais Yes Xus tiag. Peb thiaj pom muaj tej txhia neeg teev Yes Xus tsis tsheej, sawv ua tej tus saub cuav, ua tej tus xib hwb cuav qhia tej txoj kev teev hawm txawv txawv tsis tau pom dua, tsis muaj hauv paus hauv ntsis ; los tej txhia thim kev ntseeg Yes Xus mus ua neeb ua yaig, mus tsawv qe ntaus kuam, ua tej yam dab qhuas tsis thooj dab qhuas Hmoob li tej laus ib txwm teev, ib txwm coj. Yes Xus kev pab cawm ntiaj teb neeg yog tuav peb tes kom peb hla kev txhawj xeeb, kev raug hiam, raug xwv txheej kom dhau ntiaj teb no nrog Yes Xus ua ke mus tshwm qaum ntuj. Peb ntseeg tias kawg yog Leej Pleev Yes Xus tib tug thiaj muaj Leej Txiv Tswv Ntuj hwj huam pab tau peb xwb. Leej twg khaub zig thiab ntseeg Leej Pleev Yes Xus, tus ntawd yuav txais tau txoj kev cawm hla ntiaj teb no yug ua Leej Txiv Tswv Ntuj tub ki tseeb tiag : “Peb twb muaj tsis tshaj tsib lub ncuav mov thiab ob tug ntses.” 18 Nws hais tias : “Nqa tib si los rau kuv ntawm no.19 Hais rau npoj neeg kom nrhiav chaw zaum pem teb.” Nthos tsib lub ncuav mov thiab ob tug ntses, tsa zoj muag ntsia pem ntuj, foom koob hmoov rau thiab muab ntais muab cov mov pub cov thwj tim thiab lawv muab rau npoj neeg.20 lawv noj tsau npo tas sawv daws. Lawv tseem khaws cov seem puv kaum ob pob tawb.” Yog tej lub cim qhia rau peb kom peb nco ntsoov khaub zig Huab Tais Yes Xus tib leeg. Tus yuav pab tau peb cawm tau peb kom peb muaj qaum ntuj txoj sia kawg Yes Xus tib leeg. Yog peb ntseeg Yes Xus raws lub Koom Txoos qhia, peb txoj kev ntseeg yuav cawm tau peb. Kawg Yes Xus xwb thiaj muaj peev xwm muab tsib lub mov thiab ob tug ntses pub rau tsib txhiab leej noj tsis tag. Dua ntawm Yes Xus, tsis muaj leej twg ua tau.

    Ib tsoom phooj ywg sawv daws, peb pom tias Leej Txiv Tswv Ntuj hlub peb tib neeg txhua leej dawb paug. Leej Txiv thiaj xa nws Leej Tub Yes Xus tuaj pab tuaj cawm peb. Cov neeg teev Yes Xus, tsis phim peb yuav thim peb kev ntseeg Yes Xus mus teev nyuag dab, nyuag mlom ua dab ua mlom qhev. Cov tseem tsis tau paub Yes Xus, peb yuav siv zog nrhiav kom peb ntsib dheev peb tus Huab Tais Yes Xus thiaj tsim nyog lub txiaj ntsim Leej Txiv Tswv Ntuj hlub peb, xa nws Leej Tub Yes Xus tuaj coj peb kev mus nyob ib txhis saum qaum ntuj.

    29.07.2011
    Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 11th August 2011, 8:03 am




    Rau hnub tim 7 lub 8 hli 2011

    Ib tsoom ntseeg thiab phooj ywg nquag mloog Tswv Ntuj lus,


    Hnub no peb zoo siab rov tuaj teev hawm peb tus Huab Tais Tswv Ntuj ua ke. Tus nquag thiab kub siab mloog Tswv Ntuj lus, nws lub neej cog ruaj nreb hauv Tswv Ntuj xub ntiag, nws txoj hmoo zoo. Vim li ntawd, peb yuav hais txog tus neeg khaub zig Tswv Ntuj xwm yeem nkaus, txawm yuav ciaj los yuav tuag, nws tso siab lug rau Tswv Ntuj ib leeg.

    Peb ntseeg tias dua li ntawm Huab Tais Yes Xus, tsis muaj leej twg, tsis muaj lwm txoj kev cawm nyob qhov twg yuav coj tau peb mus cuag Leej Txiv Tswv Ntuj : tsiaj txhu, dab thiab saub, los tus xib hwb cuav cawm tsis tau peb. Tsuas kawg nkaus Huab Tais Yes Xus tib leeg peb yuav tuaj vij ua nqaj txoos ua ntxaig, Yes Xus thiaj muaj hwj huam cawm tau txhua tus tib neeg phem thiab zoo, muaj txhaum thiab ntshiab huv, teev dab thiab teev ntuj…Nyias txoj kev tso siab rau Tswv Ntuj thiaj qhib tau rooj ntug rau nyias txais Huab Tais Tswv Ntuj kev cawm nyias. Vim li ntawd, peb tib neeg yuav cia li sawv saub xev nyias tus kheej zaj tswv yim tias muaj hwj huam li ub, raug dab thawj ua tau hwj huam li no, muaj peev xwm kho neeg raug mob thoob teb chaws ncig pes lees. Tus ua li ntawd, yog lam sawv saub, lam ua xib hwb cuav, tsis yog tseem Huab Tais Tswv Ntuj tus saub thiab tus xib hwb. Cov neeg raug kev txhawj xeeb los ua siab me muag nthas, pheej tuaj vam khom tej saub cuav thiab xib hwb cuav pab, pheej xav tias lawv muaj hwj huam tiag, sim tag tsis leej mam ua ib siab tseg. Qhov ua teeb meem, vim cov saub los xib hwb cuav no tsis thoob tsib txaus. Yog lawv muaj kev thoob tsib, lawv yuav tsis lam lees ua tus muaj hwj huam. Lawv twb paub ntsoov lawv tus kheej no yog nyuag tib neeg dog dig, tsis muaj hwj huam tshaj luag tej, yog Tswv Ntuj tsis muab hwj huam tuaj rau yus. Tab txawm hais tias muaj los tseem yuav ua tus pluag hwj huam ib yam li Yes Xus tus piv txwv, thiaj yog neeg thoob tsib to nrog. Huab Tais Yes Xus, tus muaj hwj huam loj tas nrho, ua dab tsi tau tag tsis txhawj, Yes Xus twb tsis muaj cuab kav khav ib los txog nws lub hwj huam Leej Txiv Tswv Ntuj muab rau nws. Peb tseem nco, thaum Yes Xus tsa Yais Los tus me ntxhais tuag sawv rov muaj sia : “Nws hais rau lawv tsis tseev lawv qhia rau leej twg paub txog qhov ntawv thiab kom lawv muab mov rau tus me ntxhais noj Mk5,43” Hos cov nyuag poj saub thiab saub los xib hwv cuav no, hwj huam ib qho tsis muaj li, tseem muaj ntsej muag piv rau Huab Tais Yes Xus tus muaj hwj huam loj, puas txawj txaj muag rau Yes Xus ? Cas yuav txaj muag ua luaj li. Tsis tas li ntawd, lawv puas txawj txaj muag rau tej kws tshuaj, kws kho mob ? Yog kws tshuaj tsis lav kho tus neeg mob lawm, lawv tseem muaj plhus lav kho thiab no lod ! Peb yuav tsum paub, yeej ib txwm muaj tej neeg tsis leem cai no, txij thaum chiv Koom Txoos Kav Tos Liv los txog niaj hnub no. Tej txhia thaum ntej kuj yog neeg teev Yes Xus, tiam sis puav leej yog cov neeg cav ncauj, cam thawj, cam dhau plaws cov thawj coj lub Koom Txoos. Lawv raug ntiab tawm thiaj tawg mus txia ua ntau pab ntau pawg, ntau hom kev teev hawm qus tsis muaj paus muaj ntsis (Sectes et hérésies). Yeej ib txwm muaj hom neeg thim lus no, zoo li noob nroj paug teb thaum chiv keeb los. His Xais Lais, yog haiv neeg Tswv Ntuj xaiv nyob ntiaj teb los teev Tswv Ntuj, tshaj Tswv Ntuj txoj cai rau lwm haiv neeg, rub kom tau ntiaj teb los pe hawm tus tseem Huab Tais Tswv Ntuj, tus tsim lub ntuj lub teb. Tsoom His Xais Lais, kuj muaj coob leej cav ncauj tsis mloog Tswv Ntuj lus li tej poj saub yawm saub thiab tej xib hwb cuav sawv daws pom. Lawv tsis yog tso kev teev hawm Tswv Ntuj pov tseg, tseem mus teev dab teev mlom, tua tsiaj txhu txi rau tej pej kum dab : “Cov dab Npas.” Cov neeg tso Tswv Ntuj pov tseg tau yuam kev tuaj mas yuam loj tshaj tej, ua dog dig : “2 Tswv Ntuj hais rau Mai Xes : koj mus hais rau His Xais Lais : kuv yog nej tus Huab Tais Tswv Ntuj. 3 nej tsis txhob ua li luag ua hauv Hais Nkws Tos teb thaum ub nej mus nyob ; nej tsis txhob ua li luag ua hauv Kas Nas Has teb kuv yuav coj nej mus nyob. Nej yuav tsis txhob ua raws lawv tej cai Lv18,2-3” Tom qab vaj ntxwv Das Vis, muaj coob tus vaj ntxwv tau mus yuav cov poj niam teev dab qhuas, mus nrog poj niam teev dab qhuas tso Huab Tais Tswv Ntuj pov tseg. Peb pom ib txhia txiv neej niaj hnub no yeej zoo tib yam li ntawd. Taim sis, Tswv Ntuj tshoj cov neeg ntseeg Tswv Ntuj khov thiab ruaj muaj hwj huam sawv ua saub tiv cov poj vaj His Xais Lais. Saub Es Lais Hu yog ib tug tiv poj vaj Zes Xas Npes kev teev dab qhuas. Vim li ntawd, poj vaj Zes Xas Npes tso neeg nrhiav ntes saub Es Lais Hu tua pov tseg. Ua rau saub ntshai kawg, saub thiaj khiav tsim nrhaim txog saum lub roob Hos Les, mus nkaum hauv qhov tsua. Niaj hnub no, peb tseem muaj tej kwv tij neej tsa teev hawm Tswv Ntuj nyuaj siab ntxhov plawv, vim lawv raug kev cai koom tshaj quab yuam thiab hiam lawv. Kuv paub tej tus xib hwb, niaj hnub no tseem nkaum hav fab hav tsuag tsis tau nrog poj niam tub se nyob hauv vaj hauv tsev xws luag. Tswv Ntuj cov lus peb hnov no, tsis yog hais dab neeg txog txheej laus thaud. Phooj ywg, peb thov Tswv Ntuj pab nej cov raug kev txom nyem ua siab loj. Nej yuav tig mus ntsia saub Es Lais Hu thaum ub raug txom nyem ib yam li nej zim txwv no. Tswv Ntuj tuaj ntsib nws tus tub txib Es Lais Hu, Tswv Ntuj yuav tsis tso nej pov tseg tib yam nkaus : “Tawm mus nyob saum roob ntawm Huab Tais xub ntiag” Ua ciav Huab Tais tuaj mus, ib nthwv pa hlob thiab muaj ceem nphau toj roob phua rhe tej zeb tsua ntawm Huab Tais xub ntiag, Huab Tais tsis nrog nthwv pa, dhau nthwv pa, av qeeg, Huab Tais kuj tsis nrog av qeeg. 12 Dhau av qeeg, hluav taws, Huab Tais tsis nrog hluav taws, dhau hluav taws ib lub suab tuaj ntxuj ntxiag. 13 Thaum Es Lais Hu hnov dheev, nws npog nkaus nws ntsej muag hauv nws lub tsho loj” Tsis tas li ntawd, peb cov neeg ntseeg niaj hnub no ib txhia txawm tsis raug koom tshaj quab yuam los muaj lwm yam kev haub ntxias laum peb cov neeg ntseeg Tswv Ntuj kom yuam kev, peb yuav tsum tiv tas zog thiab khiav nkaum li Es Lais Hu : nkaum kev daj dee txhob cia rhuav yus lub cuab lub yig kom puas tsuaj li cov yim neeg hauv tej teb chaws vam meej, tsiv nraim kev ua luam yeeb txhaum kev txhaum cai, zam tiag, cheem tiag kev ua tub sab tub nyiag kom txhob raug yus…Txhua yam kev haub kev ntxias no yog peb cov yeeb ncuab hiam peb tus neeg ntseeg Tswv Ntuj, tam li tej xwv txheej peb yuav nrhiav qhov zeb qhov tsua nkaum li saub Es Lais Hu. Peb cov lus thov Tswv Ntuj, hu Tswv Ntuj pab peb zoo li Es Lais Hu lub tsho npog nws ntsej muag nws tsis pom Tswv Ntuj lub ntsej muag hla tuaj ntawm nws. Txawm peb tsis pom Tswv Ntuj los Tswv Ntuj twb hla los ntawm peb ib sab pab peb.

    Hauv Mas Tais zaj ntawv Moo Zoo peb hnov hnub no, Yes Xus tau kom nws cov thwj tim caij nkoj ua Yes Xus ntej rau sab ntug dej tim ub. Muaj ntau zaus, ua ntej Yes Xus yuav ua ib yam dab tsi, Yes Xus xub xub teev nws Leej Txiv. Ua ntej Yes Xus yuav tawm rooj mus tshaj nws lub Moo Zoo, Yes Xus mus teev ntuj 40 hnub nyob hav suab puam. Ua ntej Yes Xus yuav xaiv nws cov thwj tim nrog nws tshaj lub Moo Zoo, Yes Xus nce mus saum roob teev ntuj ib hmos. Ua ntej Yes Xus raug hiam, Yes Xus coj nws cov thwj tim mus tim vaj txiv ntoo roj nrog nws teev ntuj zov hmo. Hnub no, peb hnov Yes Xus nce mus saum roob teev ntuj. Yuav kaj ntug, Yes Xus taug nplaim dej mus cuag cov thwj tim caij nkoj ua nws ntej sab ntug tim ub. Cov thwj tim tab tom raug xwv txheej tom plawv dej. Cua ntsawj nplaim dej nphau tej twv ua rau cov thwj tim nkoj tshuav tog. Cov thwj tim yeej txhawj xeeb kawg, tuav siav rawv npaum nkaus tej tib neeg ntsia ntsoov xwv txheej yuav tuaj nphav lawv. Thaum ntawd, yuav tau hu niam hu txiv pab, hu lub ntuj tuaj pov kom maim dhau xwv txheej. Cov thwj tim pom ib niag tuaj saum nplaim dej tuaj cuag lawv. Twb yog Yes Xus tuaj npo lawv, tuaj pab lawv los lawv tseem ntshai xav tias yog ib niag poj ntxoog. Muaj ntau zaus, peb hu ntuj tuaj pab peb daws peb tej kev txhawj xeeb, tshem tej xwv txheej ntawm peb txoj xub ke. Thaum peb dim plaws xwv txheej, peb tseem hais tias yog dab pab peb, yuav tau pauj dab. Peb yuav tau cuab ntsej mloog zaj ntawv Moo Zoo hnub no. Peb hnov Yes Xus hais rau nws cov thwj tim : “Tso siab, yog kuv, txhob ntshai” Peb txoj kev teev ntuj yog koob yog hmoov, peb yuav nco ntsoov. Yes Xus kev teev ntuj yog koob hmoov rau Leej Txiv pub rau nws cov thwj tim, pub rau tus neeg nquag teev ntuj. Peb kev teev ntuj tsis yog pab kom peb ua tau siab loj tiv peb tej kev nyuaj siab xwb. Peb kev teev ntuj coj tau peb lawv Yes Xus hneev taug Yes Xus qab, ua Yes Xus thwj tim rau cov neeg ib ncig ntawm peb nyob. Yes Xus kev teev nws Leej Txiv tsa Leej Txiv Tswv Ntuj loj thiab siab. Tej hwj huam Yes Xus ua, yog Leej Txiv Tswv Ntuj ua. Tos cov thwj tim paub Yes Xus tshab, vim Leej Txiv Tswv Ntuj. Yog Leej Txiv ua kom cov thwj tim paub Yes Xus kom tshab : “Cov thwj tim txhos caug ntua pe Yes Xus hais tias : “Koj yog tseem Tswv Ntuj Leej Tub !” Peb kev teev ntuj tsa Huab Tais Yes Xus loj, tsa Leej Txiv Tswv Ntuj siab. Tus neeg teev ntuj ua tau hwj huam vim Yes Xus pub nws ua tau hwj huam. Vim li ntawd, txhua tus leej ntshiab ua tau hwj huam, tsis muaj ib tug muaj plhus hais tias yog nws tus kheej ua, tsis zoo li cov saub los xib hwb cuav hais los saud. Cov leej ntshiab yog tseem Yes Xus thwj tim lawv Yes Xus qab taug Yes Xus hneev. Yes Xus cov thwj tim pib to taub, pom tias Yes Xus muaj hwj huam loj tshaj txhua yam lawv xav tau hauv lawv tej siab ntsws : Yes Xus muaj hwj huam tshaj dab, kav tau dab. Yes Xus muaj hwj huam saum yaj ceeb no kav tau neej. Yes Xus muaj hwj huam nyob saum qaum ntuj kav txheej ntuj saud. Cov thwj tim leej twg raws Yes Xus qab, muaj Yes Xus hwj huam ua tau li Yes Xus. Pob Zeb lawv Yes Xus qab mus tau saum nplaim dej. Tiam sis thaum Pob Zeb xav zoj tias, ziag no muaj hwj huam cuag Huab Tais lawm tiag, ib pliag ntshis ua rau Pob Zeb pib tog hauv dej : “Huab Tais, cawm kuv os !” Lub hwj huam Yes Xus pub Pob Zeb mus kev saum nplaim dej qhia Pob Zeb thiab cov thwj tim paub meej meej tias kawg Yes Xus thiaj muaj hwj huam cawm lawv kom txhob poob deg. Tej saub thiab xib hwb cuav xav hauv lawv nruab siab tias lawv no paub kawg, txawj kawg, muaj hwj huam tshaj luag tej, yog qhov yuav ua rau lawv tog hauv qav thu dej. Peb yuav nco ntsoov Hmoob twb niaj txhis piv lus tias : “xav luaj nyug xu luaj ntug” ces yog li ntawd. Ib tug tib neeg no piv tsis nyog rau Huab Tais Tswv Ntuj.

    Ib tsoom ntseeg thiab phooj ywg, peb yuav piav tsis txawj tag lub txiaj ntsim kev teev ntuj, mloog Tswv Ntuj lus. Hnub no, kom peb nco ntsoov lub txiaj ntsim kev teev ntuj loj tas nrho. Yes Xus tus kheej twb tsis sav ib zaug hauv kev fim nws Leej Txiv, teev Leej Txiv. Peb nyuag me nyuam neeg plua av plua tshauv xwb, tseem tsis kub siab teev ntuj thiab puas muaj nuj nqes ua neeg teev Tswv Ntuj ? Peb puas paub tias yog lam muab tau txoj kev teev ntuj piv tau rau ib rooj qav, kev teev ntuj yog pluas qav loj thiab qab tshaj pluas qav qab dua tej huv tib si.



    07.08.2011
    Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 14th August 2011, 2:50 am





    Rau hnub tim 14 lub 8 hli 2011

    Tsoom ntseeg sawv daws thiab phooj ywg txhua leej,

    Tib pliag ntshis, twb txog hnub peb rov tuaj sib txoos ua ke teev Tswv Ntuj mloog Tswv Ntuj lus vim peb yog nws tub ki nws hlub tshaj tsis muaj yam dab tsi pauv tau. Tswv Ntuj txuag peb tib neeg tshaj plaws tsis xav pub peb leej twg yuam kev, poob zoo thiab ploj tuag. Hnub no, peb yuav hais txog Tswv Ntuj kev hlub peb tib neeg tsis muaj thim tau.

    Peb yuav xub piav ob peb los txog peb noob neej kev sib hlub ua ntej yuav hais Huab Tais Tswv Ntuj kev hlub peb. Peb noob neej kev sib hlub yog yam loj tshaj thiab peb ntshaw dua tej tib si. Vim li ntawd, thaum ib tug ntxhais hlob tiav nkauj, tsis muaj txwm yuav tsis tsheej ib yig ; ib tug tub hlob tiav nraug tsis muaj nkawm yuav tsis ciaj ib cuab. Thaum ib tug ntxhais thiab ib tug tub sib qaws ua neej, nkawd tej lus sib cog mas khov tam zeb tam tsua. Xav kom nyias nco nyias cov lus, ib leeg tau cog rau ib leeg : txawm ntuj ntxeev los tseev kom txheem tau, txawm teb nphau tseev nres kom kawg, tsis pub kev sib hlub tu. Ntawm lub ncauj hais mas tam tseeb, sim neej no, tsis muaj yam zoo tshaj plaws. Tiam sis, koj tau kuv kuv tau koj lawm, ntuj tiag teb tus, ntuj tsis tau ntxee, teb tsis tau nphau twb muab tej lus cog thaum ub hais lub ntuj hnov, seev lub teb mloog ntawd rhuav tas pov tseg. Twb tseem ciaj los xyov siab ntsws twb lwj tag, ua rau tej me tub me nyuam ceeb laj ua ntsuag ciaj, mus raws niam los nco txiv, mus nrog txiv los tshuav niam tsis pom qab ua neej. Tsis yog hauv kev txij nkawm tib neeg thiaj thim lus, rhuav tej lus cog cia pov tseg xwb. Huav kev ua qav ua num, nrhiav noj nrhiav haus kuj zoo li ntawd. Hauv cov teb chaws vam meej, kev nrhiav noj nrhiav haus, ntiav dag ntiav zog tseem haj yam muaj teeb meem ntxhov. Muaj ntau yam teeb meem ua rau tus tswv cuab thiab tus tub zog dhuav siab. Qhov kawg, poob mus rau kab rhuav tshem tej lus tau cog cia hauv ntaub ntawv pov tseg nyias mus nyias. Tej teeb meem pob caus loj hauv lub neej tshuav ntau yam teeb meem : Kev sib ntaus sib tua, tsov rog, sib cav sib ceg, txeeb lag luam, koj dag kuv, kuv ntxias koj. Tib neeg peb koom ib lub ntiaj tev, tiam sis, nyias muaj nyias ciam dej ciam av. Kuv teb chaws neeg pluag, txom nyem los hmoov muaj, kuv teb chaws txawm qhov nyiaj qhov kub, muaj qhov tooj qhov hlau, muaj qhov roj a txhawv yaws nruab nrog av. Koj teb chaws nplua nuj, vam meej, txawj tsim toob xib cuab yeej tuam txeem, txawj txua riam phom mos txwv, tiam sis koj pluag roj a taws, yuav tsum rho nyiaj muas. Cia koj thiab kuv no cog lus qhib kev lag luam, cog kev phooj ywg. Kuv muab kuv tej riam phom tiv thaiv koj teb chaws pauv koj roj a los rau kuv taws ; los puas koj muab koj tej qhov nyiaj qhov kub rau kuv tuaj khawb nqa mus nyoj pauv kuv zog nrau kev tsheb rau koj khiav, txhim vaj tse, kho zej zog, qhia kawm txuj kawm ci…Hauv daim ntawv, wb cog lus qhib kev lag luam, nthuav kev phooj ywg. Tiam sis, hauv wb nruab siab nyias npaj nyias ib zag nkhaus vos tseg : “Tsov txaij nraum daim tawv, neeg txaij hauv lub plawv” Peb leej tib neeg lub ncauj hais kev sib pab, cog kev phooj ywg, cog lus sib qaws ua txij nkawm sib hlub mus ib txhis, thaum hais ntawm ncauj mas zoo nkauj, khov thiab ruaj tas nrho. Tiam sis, tib neeg lub siab tsis dawb, txaij thiab kuas tsis muaj tug paub.

    Peb tib neeg kev hlub piv tsis nyog Huab Taus Tswv Ntuj kev hlub peb. Huab Tais Tswv Ntuj lub siab hlub neeg dawb paug tsis khuv xim, tsis muaj thim kev hlub neeg rov qab. Tswv Ntuj hlub tas txhua haiv neeg ib yam nej hlub tag nej me nyuam txhua tus. Npaum li no haiv neeg nyob ntiaj teb, Tswv Ntuj xaiv raug His Xais Lais ua Tswv Ntuj haiv neeg hwm Tswv Ntuj, teev Tswv Ntuj. Lwm haiv neeg teev tej pej kum dab : teev dab qhuas, teev mlom, teev hnub, teev hli…sawv daws nyias teev nyias dab qhuas. Kawg His Xais Lais thiaj hwm thiab teev tus tseem Huab Tais Tswv Ntuj raws li qub kev cai Mai Xes qhia. Txoj qub kev cai Mai Xes qhia His Xais Lais npaj tos Leej Pleev, yuav tuaj ib hnub twg. Thaum Leej Pleev tuaj, Leej Pleev yuav cawm tag lub qab ntuj neeg, coj tag txhia haiv neeg mus lawm qaum ntuj nrog nws nyob ib txhiab ib txhis ntawm Leej Txiv xub ntiag. Caij nyoog txog, Yes Xus yug los hauv haiv His Xais Lais. Yes Xus yog Leej Pleev tus yuav tuaj cawm lub qab ntuj neeg, Mai Xes thiab cov yaj saub hais tseg. Thaum no, His Xais Lais kwv hlo tsis mloog Yes Xus lus qhia, muab Yes Xus tua, tsis teev Yes Xus. His Xais Lais kev tawv ncauj tsis teev Yes Xus cais His Xais Lais ntawm cov neeg teev pej kum dab qhuas, tig los teev Yes Xus. Thaum ub, cov neeg teev pej kum dab yog cov tawv ncauj. Ziag no, His Xais Lais ua cov tawv ncauj. Cov haiv neeg teev pej kum dab tig los ntseeg Yes Xus, teev Yes Xus, yog ib lub txiaj ntsim zoo rau lawv : “30 Yam li thaum ub nej tawv ncauj rau Tswv Ntuj, ziag no kev hlub tsam nej vim lawv no tawv ncauj 31 Ziag no lawv yog cov tawv ncauj vim kev hlub tsam nej kom xwv lawv txais kev hlub thiab.” Paj Lug qhia rau peb kom peb nco ntsoov : vim ib txwm los Tswv Ntuj yeej hlub peb leej tib neeg. Tswv Ntuj thiaj xa nws Leej Tub Yes Xus tuaj cawm peb. Leej twg thim dab qhuas los ntseeg Yes Xus, teev Yes Xus, tus ntawd yuav dim plaws txoj kev tuag. Tus dim txoj kev tuag, hnub ntiaj teb kawg, nws lub cev thiab ntsuj plig yuav sawv lis tsees lub lav tuag lawv Yes Xus qab mus saum qaum ntuj. Yog thaum ub peb tawv ncauj, ziag no peb los teev Yes Xus peb txais Tswv Ntuj kev hlub peb. Txawm ziag no His Xais Lais ua tus tawv ncauj tsis teev Yes Xus, Tswv Ntuj kuj yuav tsis thim Tswv Ntuj kev hlub His Xais Lais rov qab.

    Peb hnov Yes Xus coj nws cov thwj tim nrog nws mus fim cov neeg teev pej kum dab nyob cheeb tsam Tws Lus thiab Xis Dos Nos. Yog Yes Xus tsis nyiam cov neeg teev pej kum dab qhuas, Yes Xus puas coj nws cov thwj tim nrog nws ua ke mus cheeb tsam neeg teev pej kum dab qhuas zej zog ? Yog Yes Xus coj cov thwj tim nrog nws ua ke txog twg, vim Yes Xus xav qhuab qhia tas txhua yam rau cov thwj tim : qhia teev ntuj, qhia ntiab dab, qhia hwj huam, qhia fim luag tej…kom cov thwj tim pom Yes Xus kev hlub neeg. Peb los ua neeg teev Yes Xus, ntseeg Yes Xus, peb yuav mloog Yes Xus lus ib yam li cov thwj tim. Yes Xus yog peb tus Xib Hwb, peb tus Huab Tais. Peb yog Yes Xus cov tub txib tub txuas. Peb twb pom Yes Xus mus fim cov neeg teev dab qhuas, hlub cov neeg teev dab qhuas ib yam cov His Xais Lais neeg teev Tswv Ntuj. Nej sim xav saib, vim li cas peb pom muaj ib co neeg teev Yes Xus caiv tsis kam mus fim cov neeg teev dab qhuas. Lawv muab lawv niam lawv txiv, lawv kwv tij neej tsa teev dab qhuas txiav tu rho, cais meej tsis mus saib, tsis mus xyuas, tsis mus noj, vim lawv hais tias : “Peb los teev vaj tswv lawm, nej pheej ua ua dab peb tsis xav tuaj fim nej ntxiv.” Nej xav li cas ? Hom neeg teev Yes Xus no, pob ntseg puas to qhov, puas tau hnov dua Yes Xus cov lus Yes Xus hais ? Lawv puas teev tus tseem Huab Tais Yes Xus tiag ? Yog peb mus raws tus tseem Huab Tais Yes Xus qab thiab ua nws tub txib tiag, peb yuav mloog Huab Tais Yes Xus lus thiab ua raws li Huab Tais Yes Xus qhia kom ua, zoo dua mloog nyuag xib hwb cuav zaj. Twb yog Yes Xus coj nws cov thwj tim tuaj fim cov neeg teev dab qhuas Kas Nas Nais. Vim li cas, Yes Xus ua tus tsis hnov tsis mloog tus poj niam lub suab qw tsis tseg raws lawv ? Cov thwj tim siab tsis kheev, lawv kuj hlub tus poj niam Kas Nas Nais no. Tseem yog cov thwj tim los taij kom Yes Xus pab hlub tus poj niam teev dab qhuas, qw tas zog lawv lawv qab. Peb kuj yuav tau hlub peb cov niam txiv kwv tij neej tsa tseem teev dab qhuas li cov thwj tim thiab. Peb yuav khiav khuav saib lawv li qub, tsis txhob txiav, tsis txhob cais lawv. Qhov yuam kev tsis txhob ua yog li no : Yuav tsum txiav hauv yus nruab siab kom meej tsis txhob rov ntshaw ua neeb kho yus, tsis txhob vam tej khawv koob pov yus, tsis txhob ntseeg tej kuam tej yaig, txhob teev txhob txi thaj xwm kab, txhob mus thawj saub los mus saib tes…vim peb cov zaj teev ntuj, peb lo lus hu Tswv Ntuj muaj nqes tshaj tag tej kev cai ntawd ua ke. Huab Tais Yes Xus muaj hwj huam tshaj tej saub cuav thiab tej txiv neeb sau tag ua ke. Peb twb vam Huab Tais Yes Xus Tswv Ntuj Leej Tub tus muaj hwj huam tshaj cawm peb, tsis phim peb rov mus vam khom thiab tso siab ntxiv rau nyuag txiv neeb txiv muam thiab saub cuav tsis muaj hwj huam cawm peb. Yog tus nyiag kev rov mus ua li ntawd, nws thim lus thiab yuam kev. Tus neeg yuam kev, nws txhaum. Yog txhaum, yuav tsis txhob ua. Hos kev sib fim, sib khiav sib xyuas, sib pab, tsis yog phem, tsis yuam kev, tsis txhaum. Tus txhaum yog tus thuam nws niam nws txiv, thuam nws tej kwv tij neej tsa teev dab, muab lawv txiav cais thiab nrauj pov tseg. Tus ua li ntawd, nws ua tub qaug neeg, siab neeg, txhaum neeg. Tus ua txhaum neeg kuj ua txhaum Huab Tais Tswv Ntuj. Vim li ntawd, twb yog Yes Xus kiag tseem mus fim tau cov teev dab. Cov nyuag neeg teev Yes Xus ua txoj caiv ntshai mus fim yus cov neeg tseem teev dab, puas loj dua Yes Xus lawm ? Lawv puas pom lawv yog nyuag neeg dog dig li sawv daws thiab xwb sad ! Peb thiaj li yuav tsum ceev faj peb tus kheej, tsis txhob lam mloog tej xib hwb qus sawv ua xib hwb, ua saub, tsis paub qhia txoj kev teev Yes Xus tseeb raws kab raws kev rau sawv daws coj. Yog sawv daws lam ntxov paub, nej yuav muaj coob leej ntau tus xav txog lig, khuv xim mus raws yuam kev tej nyuag xib hwb cuav pus nej rau txoj kev teev hawm cuav, tsis tau koob hmoov. Yuav kom peb kev teev hawm tau koob hmoov, peb yuav tsum paub Huab Tais Yes Xus kom zoo tiag tiag. Puas muaj neeg qhia tau rau peb paub qhov tseeb ? Muaj, tiam sis saib peb puas mloog thiab ov ! Peb yuav tsum nrhiav kom tau lub Koom Txoos Cag thiaj txawj qhia tau Yes Xus kom tseeb. Yog peb nyob hauv tej nyuag koom txoos ceg, kav thiab nplooj xwb ces peb yuav daj yuav qhuav thiab kawg yuav zeeg xwb. Yog peb siv zog nrhiav Yes Xus qw tas zog lawv Yes Xus thiab cov thwj tim qab li tus poj niam Kas Nas Nais no ces peb yeej yuav ntsib yuav pom Yes Xus xwb. Nej yug tau cooj tus me nyuam, nej yeej hlub txhua. Tiam sis tsis yog nej hlub nej cov me nyuam yuav cia lawv ua ywj lawv siab do dig. Nej yeej cob, yeej qhia, txaus nplawm yeej nplawm thiab, puas yog ? Qhov Yes Xus ua tus tsis mloog tsis hnov tus poj niam Kas Nas Nais tsa suab thov, kuj zoo li ntawd, yog Yes Xus cob qhia tus poj niam xwb. Yes Xus tos saib tus poj niam teev dab qhua no puas muaj siab hwm ntuj tiag los tsis muaj thiab qhia rau nws cov thwj tim kom saib taus cov neeg teev dab qhuas, txawj hlub lawv npaum li Yes Xus thiab : “Tsis nyog muab cov me nyuam tej mov pov rau tej nyuam dev !” 27 Tus poj niam no thiaj teb : “Tiag Huab Tais, vim cov nyuam dev noj cov tsig poob ntawm lawv cov huab tais rooj” 28 Yes Xus thiaj teb rau nws : “Aib poj niam, koj ntseeg loj tas npaud ! Kom tshwm tau rau koj li koj ntshaw” Nws txawm kho tus ntxhais zoo hlo tam sid.” Yes Xus paub zoo leej tib neeg sawv daws. Vim li ntawd, Yes Xus xav cawm kom tau tag ntiaj teb neeg, hnub kawg kom tag sawv daws dim plaws txoj kev tuag, txais Tswv Ntuj txoj sia ciaj nyob ib txhiab ib txhis saum qaum ntuj. Yes Xus xav qhia rau peb paub tias muaj cov neeg teev dab qhuas kuj ntseeg ntuj thiab hwm ntuj loj tas npaum li ntawd. Tus poj niam no kev ntseeg ntuj pab tau nws kho nws tus ntxhais raug dab zoo hlo. Yes Xus cov thwj tim yuav tsum nco ntsoov lub cim lawv pom Yes Xus kho tus poj niam no tus ntxhais. Cov thwj tim, yog cov tuav lub Koom Txoos Cag, lawv yuav tsum txawj qhia ntiaj teb neeg kom paub tseeb Yes Xus kev hlub ntiaj teb neeg txhua tus dawb paug tsis muaj thim.


    Ib tsoom ntseeg thiab phooj ywg, peb paub tias Huab Tais Tswv Ntuj hlub peb ntiaj teb neeg txhua leej txhua tus txawm teev dab qhuas thiab teev ntuj los tsis muaj teev hawm tus tsi. Peb paub Tswv Ntuj siab zoo npaum li ntawd, ua rau peb zoo siab tsis txawj tag ua Tswv Ntuj tsaug. Tiam sis ceev faj, tsis yog Tswv Ntuj hlub peb tas npaud, peb yuav ua neeg luab tsuab dog dig ywj peb siab. Peb yuav tsis txhob tos Tswv Ntuj rho nplawm rau peb, peb mam npaj ua neeg nquag teev ntuj. Thov Leej Ntuj Plig coj peb kev maj zeeg ua neeg ntseeg ntuj thiab hwm ntuj li tus poj niam Kas Nas Nais. Thov peb leej Niam Mab Liab lub txiaj ntsim pab peb txhua tus.


    09.08.2011
    Cwj Vuam Chiv







    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 21st August 2011, 6:28 am






    Rau hnub tim 21 lub 8 hli 2011

    Tsoom ntseeg thiab phooj ywg txhua leej,

    Nej muaj coob tus xav paub tim li cas muaj ntau pab ntau pawg neeg teev Yes Xus nyob ntiaj teb no. Pab ntseeg twg yog tus cag, yog lub hauv paus, mloog Yes Xus lus zoo dua tej ? Peb xav nrog nej tham kom tag lus, qhia txoj kev ncaj rau nej xaiv, qhia qhov tseeb rau nej pom thiab qhia kev nej taug. Nej mam xaiv nej txoj kev teev hawm Tswv Ntuj, xaiv lub Koom Txoos cag ua nej tug, nws yuav muaj nqes rau nej dua qhov peb hais rau nej. Vim tsis yog tej kev coj hauv tej pawg ntseeg xwb yuav ua kom Huab Tais Tswv Ntuj tseem ceeb los tsis tseem ceeb. Kuj tsis vim yus kev txiav txim rau luag tias pawg no phem los pawg no zoo, ces yus tej lus txawm yuav ua npaum li yus lo lus hais. Kuj tsis yog tej kev coj hauv yus pawg ntseeg yuav txaus ntaus tus nqe ntawm Tswv Ntuj tias yus zoo tshaj luag. Tus neeg twg xav li ntawd, nws tseem pom kev tsis tau deb, tsis tau paub kev thoob tsib, tseem zoo li tus Fas Lis Xais muab hlob, khav tias nws txawj dua Yes Xus tsis tas yuav mloog Yes Xus lus qhia. Tiam sis, qhov peb xav nrog nej tham kom tas lus, yog qhia lub Koom Txoos zoo ua tau xis Tswv Ntuj siab, muaj txiaj ntsim, tau koob tau hmoov. Tus neeg nyob hauv lub tseem Koom Txoos ua txoj num twg muaj txiaj ntsim tau koob hmoov vim muaj Tswv Ntuj pab. Tus twg Tswv Ntuj pab, vim nws mloog Tswv Ntuj lus. Peb xav caw sawv daws mloog Huab Tais Yes Xus cov lus nws qhia rau nws tus thwj tim Pob Zeb hauv Mas Tais zaj Ntawv Moo Zoo hnub no. Pob Zeb yog tus muaj txiaj ntsim tau koob hmoov zov Yes Xus lub Koom Txoos, coj cov neeg mloog Yes Xus lus.
    Ua ntej, kuv yuav xub piav ob peb los txog tej yam kuv pom hauv tej lub teb chaws kuv mus ncig txog. Nej muaj coob leej paub Mes Kas teb, yog ib lub teb chaws dav, nplua nuj thiab vam meej heev. Kuv yuav tsis piav kev vam meej nyob Mes Kas rau sawv mloog vim sawv daws paub lawm. Qhov kuv xav nrog sawv daws tham, yog hais txog kev txom nyem kuv pom nyob Mes Kas ib txhia tsis nco qab pom. Tiam sis kuv kuj yuav piav tsis tag txhua yam kev txom nyem. Kuv tsuas piav fab kev txom nyem teev hawm Huab Tais Tswv Ntuj. Vim zaj ntawv Moo Zoo hnub no caw peb txhua tus tig mus pom peb txoj kev txom nyem teev hawm Tswv Ntuj. Thaum kuv mus txog Mes Kas teb, muaj ib co kwv tij Hmoob Kav Tos Liv tos kuv mus xyuas lawv, vim lawv txom nyem kev teev Tswv Ntuj tiag. Kuv ib tug txiv ntxawm thiaj coj peb caij tsheb tawm rooj mus deb li 10 ncua kev (km) thiaj txog lawv zos. Qhov kuv pom ntawm tej qab ke qaum kev yog cov tsev teev ntuj ntau lub kawg, zoo li tshaj ntawm 10 lub tsev teev ntuj. Tiam sis, tsis pom muaj 2 lub tsev teev ntuj hais tias yog tib tse neeg koom tib lub koom txoos teev Yes Xus li. Xyov tim li cas 10 tawm lub tsev teev ntuj no, txia ua 10 tawm hom neeg teev Yes Xus, lub txawv lub tsis sib saib sib xyuas, tsis sib fim. Sawv daws lam yuav lub npe teev Yes Xus xwb, nyias ua ywj nyias siab, tug tsis ntshaw tug, koj saib tsis taus kuv thiab kuv tsis hwm koj. Tseem muab qhov cais npoj cais pawg kem koj nyob koj “church” kuv nyob kuv “church” txhob sib poo ua ke. Yog ib qho yuam kev loj hauv txoj kev teev ntuj thiab hwm ntuj : “20 Kuv tsis thov ntuj rau cov no xwb, tiam sis rau cov los ntseeg kuv vim lawv lo lus 21 Kom xwm sawv daws koom ua tib tug hauv wb tam li koj, Leej Txiv, hauv kuv thiab kuv hauv koj, kom lub sim ceeb ntseeg tias koj xa kuv tuaj. 22 Lub koob meej koj muab rau kuv, kuv tau muab rau lawv, kom xwv lawv ua tib tug tam li wb yog tib tug Zm 17,20-22” Txoj kev twm xeeb txom nyem kev teev hawm no ua rau kuv tu siab. Tsis hais tias lub teb chaws loj, koom kom tau npoj ua rau neeg ntshaw kev phooj ywg. Tseem yog yim ncaim npoj loj yuam kev deb Huab Tais Yes Xus cov lus qhia : “sawv daws koom ua tib tug hauv wb tam li koj, Leej Txiv, hauv kuv thiab kuv hauv koj ” Nej sawv daws ho nrog xav thiab saib, tim li cas, nej twb pom muaj ntau pab ntau pawg ntau hom kev teev Yes Xus luam taw npaum li ntawd nyob Mes Kas. Phim ib pab txawm tsis tau koob hmoov los ib pab yuav tsum tau koob hmoov. Xyov muaj ntau txhiab pawg neeg teev Yes Xus npaum li ntawd, ntau txhiab lub me nyuam koom txoos sis tsub sis nias, pab twg pawg twg los twb hais tais yog pab txawj sib hlub, txawj teev Yes Xus zoo tshaj tej. Ua cas tsis pom muaj ib lub “church” twg hauv cov me nyuam koom txoos ncau ntau ceg npaum no txais tau Tswv Ntuj txiaj ntsim thiab koob hmoov, yog li cas ne ? Nej twb pom ntsoov muaj tseeb li ntawd, nej tseem ua tus ntsej lag muag dig mus poo, mus raws tej nyuag xib hwb cuav niaj hnub sawv tsim dua tej hom kev teev Yes Xus tshiab niaj hnub no. Nej tseem tsis txawj ras nej tus kheej thiab, yeej yog nej tsis sawm zoo nkaus xwb, nej tsuas phim nkaus li ntawd thiab. Hos yog nej tseem muaj tswv yim txawj nyiam zoo, xav paub Huab Tais Yes Xus kom tseeb, ua li puas muaj kev dim tau peb txoj kev yuam kev ? Yuav ua li cas peb txoj kev teev hawm Huab Tais Yes Xus thiaj muaj txiaj muaj ntsig, tau koob tau hmoov ? Yog peb nyob hauv cov “church” caj ces yuam kev thiab cam thawj, peb yuav tsum tawm khiav los poo rau Huab Tais Yes Xus lub Koom Txoos muaj Pob Zeb ua thawj, Yes Xus tsa ua tus rhawv kab rhawv kev thiab vaj qhia tus sawv taj Pob Zeb chaw thiaj yog tseem cag thiab tseem hauv paus kev ntseeg. Thaum peb nyob hauv lub hauv paus, peb kev teev hawm Tswv Ntuj thiab muaj txiaj muaj ntsig tau koob tau hmoov : “Kuv hais rau koj, koj yog Pob Zeb, saum lub pob zeb no, kuv yuav txhim kuv lub koom txoos ; dab teb cov rooj vag yuav tiv tsis taus nws.19 Kuv cia qaum ntuj cov yawm sij rau koj, yam koj khi saum av yuav raug khi saum qaum ntuj thiab yam twg koj daws saum av kuj yuav raug daws saum qaum ntuj.” Yes Xus yog tus tsa muaj lub tseem Koom Txoos tuav Yes Xus lub npe thiab tshaj Yes Xus lub Moo Zoo mus rau plaub ceg kaum ntuj. Lub Koom Txoos Kav Tos Liv hwm Yes Xus cov lus qhia tsis nrauj tsis txhem ib los pov tseg. Ib txwm thaum chiv keeb Yes Xus tsa Pob Zeb tuav lub Koom Txoos thiab txiv vaj qhia sawv Pob Zeb lub chaw saib lub Koom Txoos Kav Tos Liv mloog nraim Leej Ntuj Plig Ntshiab tshoj thiab coj kev los txog lub zim txwv no. Koom Txoos Kav Tos Liv txuag zias Yes Xus lub Moo Zoo thiab cob qhia Yes Xus cov lus rau txhua tus neeg ntseeg. Yog nej tig ntsej mloog Koom Txoos cov lus qhia ces nej txoj hmoo zoo, nej tsis yuam kev. Cov neeg ntseeg muaj hmoo hauv Koom Txoos Kav Tos Liv yog cov mloog lus, cov neeg ncaj thiab siab dawb. Cov leej ntshiab yog cov teeb pom kev muaj txiaj ntsim Tswv Ntuj tshoj sawv los txhawb lub Koom Txoos Kav Tos Liv. Vim Koom Txoos Kav Tos Liv muaj Tswv Ntuj txiaj ntsim, cov neeg ntseeg hauv Koom Txoos Kav Tos Liv thiaj muaj Tswv Ntuj txiaj ntsim. Peb sim xav saib, tej kev teev hawm hauv Koom Txoos Kav Tos Liv thiab hauv lwm cov me nyuam koom txoos teev Yes Xus sib txawv li cas, ib lub tau txiaj ntsim thiab koob hmoov, lwm cov nyob qhuav nquas tsis tau dab tsi, yog vim li cas ? Kuj zoo li Hmoob hais kam : tus me nyuam mloog niam mloog txiv lus thiab nquag yeej tau koob tau hmoov tshaj tus me nyuam cam thawj, tawv ncauj thiab tub nkeeg. Koom Txoos Kav Tos Liv hwm cov leej ntshiab, tau cov leej ntshiab tej koob hmoov pab. Leej Ntshiab Mab Liab yog lub Koom Txoos leej niam nres lub Koom Txoos. Tas txhua yam kev teev hawm lub Koom Txoos Kav Tos Liv qhuab qhia rau nws cov me nyuam puav leej muaj txiaj ntsim thiab tau koob hmoov tag nrho. Koom Txoos Kav Tos Liv kev teev Saw Mab Liab pab nws cov me tub me nyuam daws lawv tej kev nyuaj siab thiab quaj ntsuag nyob ntiaj teb no. Tus me nyuam ntsuag khaub zig Nkauj Xwb Mab Liab lub txiaj ntsim, nws txais peb leej niam Nkauj Xwb Mab Liab kev hlub. Peb leej tib neeg twg thov txog cov leej ntshiab tej txiaj ntsim pab, tus ntawd tau txais Tswv Ntuj txiaj ntsim tuaj ntawd tus leej ntshiab tuaj. Huab Tais Yes Xus tsis muaj khib, hwj huam Yes Xus pub rau tus leej ntshiab ua koob hmoov rau peb, yim qhia peb hwm Huab Tais Yes Xus loj dua ntxiv. Hos tej me nyuam koom txoos teev Yes Xus twm xeeb nyias tsuas nco txog nyias pawg, cais pab cais pawg, cais neej, tsis hwm niam hwm txiv, tsis hwm poj yawm, thuam cov neeg ntshiab tej txiaj ntsim, thuam Nkauj Xwb Mab Liab tej txiaj ntsim ces thaum kawg yim pluag txiaj ntsim vim yus twb yog tus txom nyem tus pluag los tseem thuam luag tus muaj txiaj ntsim. Tej nyuag me nyuam koom txoos lam yuav npe teev Yes Xus tiam sias siab ntsws twb tsis hwm Yes Xus cov tub txib, twb yog Yes Xus tus kheej lawv tsis hwm thiab. Thaum zoo li no, yus tus pluag txiaj ntsim, tseem kaw qhov ncauj tsis thov luag tus muaj txiaj ntsim ces yus tej kev teev hawm thiaj tsis tau koob hmoov. Tus neeg mloog lub Koom Txoos Kav Tos Liv qhia, yog mloog Yes Xus lus qhia, nws txais Huab Tais Yes Xus txiaj ntsim. Vim li ntawd, txiv vaj qhia Zam Paj Lug 2, tus sawv Pob Zeb lub chaw yog ib tug neeg ncaj thiab siab dawb thaum tseem ua neej nyob. Niam nkauj xwb Marie-Pierre tau kev nyuaj siab, vim nws muaj mob tshee li vaj qhia Zam Paj Lug 2. Nws tau tsa ncauj thov vaj qhia Zam Paj Lug 2 nyob ntawm Tswv Ntuj xub ntiag pab hlub nws. Thaum kawg, vaj qhia Zam Paj Lug 2 pub txiaj ntsim rau nws ua nws tus mob zoo hlo. Tej lub cim no, yog Tswv Ntuj ua tsa vaj qhia Zam Paj Lug 2 lub npe muaj hwj huam rau neeg pom. Tswv Ntuj kuj nco txog Koom Txoos Kav Tos Liv kev teev hawm muaj txiaj muaj ntsig, tau koob tau hmoov nyob ntiaj teb no.

    Ua li, ib tsoom phooj ywg sawv daws, nej twb pom cov ntseeg muaj ntau pab ntau pawg kev teev hawm thiab kev coj. Peb xav nrog nej tham kom tas lus tsis muaj zais ib los dab tsi, pab neeg teev Yes Xus hauv lub Koom Txoos twg yog pab ua raws li Yes Xus qhia hnub no ? Sawv daws puav leej yog cov xav ua raws Yes Xus lus qhia. Tiam sis vim sawv daws tsis txawj ua kom xis Yes Xus siab nyiam. Muaj tej txhia txawj ua ntxim Yes Xus siab dua tej txhia. Vim li ntawd, cov ntseeg hauv tej lub Koom Txoos kuj tau txais txiaj ntsim thiab koob hmoov ntau dua tej txhia hauv lwm cov koom txoos. Peb tsis xav khav tias peb zoo tshaj luag tej ; peb kuj tsis xav thuam neeg li tej txhia neeg teev Yes Xus thuam peb. Tiam sis, vim peb xav qhia qhov tseeb, qhia lub ntsiab rau ib tsoom neeg teev Yes Xus thiab phooj ywg nej txhua leej kom paub meej txog tus cag thiab lub keeb chiv txoj kev teev Yes Xus sawv los mus txog lub zim txwv no. Peb xav tias tsim nyog tas txhua leej yuav tsum paub qhov tseeb. Peb xav pab tus neeg ntseeg Yes Xus tiag tiag thiab teev Yes Xus kom nws txoj kev teev hawm tau koob hmoov. Peb xav hais kom tas lus qhia qhov tseeb rau sawv daws mloog, nyias mam coj mus xav nyias. Thov kom peb leej niam Nkauj Xwb Mab Liab lub txiaj ntsim pab peb txhua tus.

    17.08.2011
    Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 22nd September 2011, 11:16 am


    Rau hnub tim 18 lub 9 hli 2011

    Ib tsoom niam txiv kwv tij neej tsa thiab phooj ywg,


    Twb rov txog hnub peb tuaj sib fim ua ke teev hawm Huab Tais Tswv Ntuj. Cov zaj nyeem peb hnov hnub no qhia rau peb cov neeg ntseeg Tswv Ntuj pom npaum li cas peb tib neeg lub siab thiab Tswv Ntuj lub siab sib txawv. Peb yuav los nthuav ob peb los lus hais txog cov zaj nyeem hnub no txhawb peb lub siab ntseeg, kom muaj zog npuab Tswv Ntuj khov thiab ruaj, kom tsis muaj tus tsi rhuav tau peb lub siab ntshaw ua Tswv Ntuj tub ki hauv peb lub neej plam plaws qhuav. Yam li kev ploj kev tuag txawm yuav ua kom peb plam tag peb sim neej nyob ntiaj teb los tshuav Tswv Ntuj peb yuav tsis plam ; Huab Tais Yes Xus peb tus cawm seej yuav npo peb dim txoj kev tuag, muab Tswv Ntuj txoj sia tuaj cog rau peb ciaj nrog Tswv Ntuj nyob txhiab niaj tim puas xyoo.

    Kev ntseeg Tswv Ntuj yuav tsum qhia peb ua neej kom tseem neej. Tib neeg kev ua neej tsis yog npau suav. Tus tib neeg tsis nrhiav num ua, nws kawg tshaib plab. Tus neeg tshaib plab kawg mus ua tub sab. Tus neeg mob nkeeg, yuav tsum muaj dej muaj tshuaj los pleev, los qhwv thiab noj haus mus lom, mus tua tus kab mob, nws thiaj nquag. Yog peb lub cev mob nkeeg, peb tua qaib, tua npua tsuas zoo peb lub siab, tsis kho peb lub cev. Peb yuav tsum paub, tsim los, feeb kom meej, kev ua neej tsis yog npau suav. Yam twg tsis meej, nrhiav kom paub ; qhov twg tsis yog, nrhiav kom pom, tso tseg tsis txhob kov, txhob ua ntxiv. Zoo li kev xam phaj, kev suav caij suav nyoog, ib tiam xam txawv ib tiam peb yuav tsum paub li ntawd. Txheej laus thaum ub thiab peb txheej no xam caij xam nyoog sib txawv ntau. Txheej no, peb hais tias ib hnub muaj 24 sij hawm los 24 teev ; ib lis piam muaj 7 hnub ; ib hlis muaj 30 hnub ; ib xyoos muaj 12 lub hlis los puas 365 hnub thiab ib tiam yog 100 xyoo. Peb hais tias txij ib tag hmo rov yav chiv dua ib hnub tshiab. Peb suav sij hawm 1 teev, 2 teev, 3 teev…rov mus txog ib tag hmo yog 24 teev, sij hawm xaus hnub.
    Txheej laus thaum ub haiv neeg Npas Npis Los Nias, cov As Xis Lias thiab cov His Xais Lais lawv xam caij nyoog txawv peb txheej no xam. Lawv xam txij thaum hnub sawv mus txog thaum hnub poob qho muaj 12 teev. Yog thaum hnub tuaj muaj 2 teev lawm ces lawv hais tias yog 2 teev, los hnub tuaj ntev li 3 teev ces yog 3 teev…Yog hnub tsis tau tshwm, ces lawv tseem tsis tau paub suav. Lawv tseem ua li peb hmoob hais qaib qua los kaj ntug txoog. Hos txheej no, thaum kaj ntug txoog twb yog 6 teev tej lawm. Vim li ntawd, thaum peb hnov nyob hauv ntawv Moo Zoo hais txog cov sij hawm caij nyoog, peb yuav tsum paub tig kom haum rau peb cov caij nyoog txheej no : piv li 6 teev txheej thaud yog 12 teev tav su txheej no : “33 Thaum txog rau teev, tas nrho ntiaj teb tsaus nti mus txog cuaj teev MK 15,33.” Thaum lawv ntes tau Yes Xus, coj Yes Xus mus tua, lawv dai Yes Xus saum ntoo cuam, lub ntiaj teb tsaus nti txij 12 teev tav su mus txog yav hnub qaij 3 teev. Nyob hauv Mas Tais zaj Ntawv Moo Zoo peb hnov hnub no kuj hais txog cov sij hawm 3 teev los 6 teev, tus tswv tawm mus nrhiav tub zog ua nws teb, yog raug 9 teev los 12 teev rau peb txheej no.

    Dua li ntawm cov caij nyoog, peb txheej no thiab txheej laus thaud twb sib txawv heev. Cov zaj nyeem hnub no, hais txog Huab Tais Tswv Ntuj siab ntsws thiab peb leej tib neeg siab ntsws sib txawv loj npaum lub ntuj loj thiab siab npaum li cas ntawm daim av : “9 Vim lub ntuj siab dua daim av, li ntawd, kuv xub ke siab tshaj nej xub ke thiab kuv tswv yim tshaj nej tswv yim.” Yog peb pom li ntawd, peb paub Tswv Ntuj muaj hwj huam, peb yuav tsum maj nroos los yoog peb tus Huab Tais Tswv Ntuj lub siab. Kev yoog Tswv Ntuj lub siab yog tso plhuav lwm txoj kev teev hawm pov tseg, tig los ntseeg, los teev hawm Tswv Ntuj, ua Tswv Ntuj haiv neeg, tiam Tswv Ntuj tib leeg nyob ntiaj teb no. Kev yoog Tswv Ntuj, ntseeg Tswv Ntuj thiab tiam Tswv Ntuj yog kev hloov siab tshiab, coj lub neej tshiab. Lub neej tshiab yog zoo li cas ? Peb twb paub Huab Tais Tswv Ntuj siab zoo, siab loj. Tswv Ntuj zam npaum li cas peb tej txhaum peb ua tub qaug Tswv Ntuj, twm Tswv Ntuj tus tsim lub ntuj roos peb hau, daim av tiag peb taw. Kev twm, kev ua tub qaug Tswv Ntuj yog tej yam zoo li no : Tej toj roob hauv pes Tswv Ntuj tsim txawm tau lub zoo xws lub, phim peb yuav qhuas Tswv Ntuj. Tiam sis, peb muaj cuab kav hais tias toj roob hauv pes yog niam dab niam tso lub chaw nyob chaw nkaum. Peb tsis pom roob zeb roob tsuas nuj nqes, roob zoov, txhawv dej, yuav lauj zias sij hawm nqa tes txaum yim ua Tswv Ntuj ib los tsaug. Peb sim xav, ua cas peb tsis ris luag txiaj, tus muaj hwj huam tsim lub ntuj thiab daim av, muaj ntsuj kav saum huab, tsiaj loj tsiaj me mus los nkag pem teb, ntse nuj ntses niag khiav hauv dej…Npaum li ntawd, los Tswv Ntuj tsis cib nyeej leej tib neeg. Tswv Ntuj tsis yog zam peb tej txhaum rau peb xwb. Tswv Ntuj tseem hlub peb tsis muaj caij tag : “6 Nrhiav tiag Huab Tais, cheem yuav ntsib tau, cheem nws tseem nyob ze.” Peb txawm yuam kev tas npaum li txoj xub ke mus pe, mus teev tej dab qhuas tsis muaj hwj huam. Tswv Ntuj cia peb tib neeg mus kom kawg peb siab. Thaum peb txom nyem txaus, peb mam li pom tias tsis muaj lwm txoj kev, kawg nkaus Tswv Ntuj tus pab tau peb daws peb kev txom nyem. Yog peb los npuab Tswv Ntuj tag siab nrho, Tswv Ntuj yuav pab peb hloov tau peb lub siab phem, muab peb lub qub siab lim hiam, siab muaj khib, siab nqaim siab ti nrauj pov tseg. Peb kev ntseeg Tswv Ntuj, yog los coj lub siab tshiab xis Tswv Ntuj siab nyiam. Lub siab Tswv Ntuj nyiam, yog lub siab hlub neeg, ua neeg mloog Tswv Ntuj lus, tsis ntshai muab yus txoj sia pauv Tswv Ntuj tej koob hmoov : “7 Kom tus siab phem nrauj nws txoj xub kev, tus lim hiam nws zaj tswv yim ; kom nws tuaj cuag Huab Tais tus khuv leej nws thiab tuaj cuag peb tus Tswv Ntuj tus kheev zam tsis tag.” Yog peb leej twg thov thiab pe Tswv Ntuj pab qee peb lub siab nkhaus, txhob ua neeg yuam cai, nrauj peb lub siab tub sab, xyaum ua neeg ncaj ncees ; yog peb txiav siab nrauj peb txoj kev plees kev yis pov tseg, los hlub yus tus txij nkawm raws li cov lus yus hais lub ntuj hnov ib tug yuav hlub ib tug mus txog hnub av luaj quas…koob hmoov Tswv Ntuj yuav pub peb txais nplua mias, Tswv Ntuj kev zam peb yuav pom yuav ntsib dheev ntawm qhov muag. Muaj coob tus neeg muab lawv lub siab los npuab Tswv Ntuj tas siab nrho, Tswv Ntuj pub koob haum loj rau lawv . Peb sim xav, tim li cas muaj tej txhia tib neeg pub tau lawv txoj sia los cawm luag lwm tus : “20 Raws li qhov kuv vam ntsoov thiab ntshaw, dab tsi kuv tsis txhawj, tsuas muaj tseeb zim txwv no thiab ib txhis, txawm yuav ciaj los tuag, Leej Pleev yuav zoo siab hlo tshwm sim ntawm kuv lub cev. 21 Rau kuv ciaj nrog Leej Pleev, tuag los tsam peev.” Peb muaj hmoo, peb nrog lub Koom Txoos niam koom kev ntseeg thiab kev teev hawm Tswv Ntuj raws li Yes Xus qhia. Cov neeg qhia Yes Xus rau peb paub yog cov thwj tim thiab cov sawv los taj cov thwj tim chaw, yog cov neeg ntseeg txhua tus txais lub cim ntxuav hauv Koom Txoos Kav Tos Liv, yog yus niam yus txiv, yog cov xib hwb, cov txiv plig, cov tswv qhia thiab vaj qhia. Vim li ntawd, tus neeg nyiam Yes Xus tas siab nrho, tau Yes Xus cov koob haum. Thaum Yes Xus tseem nyob, Yes Xus kho cov tuag tes taw rov mus taus kev, kho cov dig pom kev tuaj thiab kho cov mob ruas huv tuaj…Leej ntshiab François d’Assise yog ib tug neeg nyiam Yes Xus tas siab nrho. Vim li ntawd, muaj ntau lub cim tshwm tuaj hauv François lub neej rau neeg pom. Tej lus nws hais, tej dej num nws ua thiab nws lub cev muaj Yes Xus tej koob haum. Muaj ib hnub, François cov kwv luag nqa mov mus pub cov mob ruas noj thiab mus muab tshuaj rau lawv. Tiam sis, muaj ib tug mob ruas tsiv kawg, muab lawv cem, tsawm lawv phem kawg, tsis muaj leej twg xav mus ze. Lawv los tham qhia François paub, nws thiaj taug kev mus ntsib tus mob ruas ntawd : “Thov Tswv Ntuj pub koj nyob thaj yeeb…kuv lub cev mob npaum li no, lwj dhi, kuv yuav ua cas muaj Tswv Ntuj kev thaj yeej…Tswv Ntuj cia peb lub cev txom nyem kom cawm tau peb tus ntsuj plig yog peb uv dhau txoj kev txom nyem…kuv no mob tas hnub tas hmo npaum li no, koj cov kwv luag twb tsis ua zoo pab kuv kiag…” François thov Tswv Ntuj rau nws tas : “cia kuv mam pab koj…” François rhaub tau dej muab nws ntxuav cev txog twg, nws lub cev nqawm thiab zoo txij twg. François muab nws ntxuav tag, ruas kuj ploj tag.

    Cov zaj nyeem hnub no qhia peb paub tias tsis hais tiam neej twg, cov neeg nyiam Yes Xus puav leej txais koob haum ua Yes Xus tes qav num. Kev ua Yes Xus tes qav num yog zoo li cov tub zog tus tswv ntiav mus ua tus tswv teb ib co mus thaum 6 teev, ib co thaum 9 teev thiab ib co thaum 11 teev (17 h) tsaus ntuj raws li nyob hauv Mas Tais zaj Ntawv Moo Zoo hnub no. Rau peb leej tib neeg, kev ua dag ua zog, kev khwv nyiaj hnub nyiaj hli yuav tsum them nqe raws sij hawm caij nyoog thiaj ncaj, haum neeg siab. Vim li ntawd, rau peb tib neeg tus nquag, tus ua hauj lwm ntau, tus neeg khwv yuav tsum muaj noj thiab tau nyiaj ntau dua tus ua tsawg thiab tus neeg tub nkeeg. Yes Xus cov lus ua teeb meem rau peb vim tus ua ib hnub teb thiab tus ua ib teev teb tau nqe sib npaug zos. Vim peb muab Yes Xus cov lus los piv rau peb tib neeg lub caij nyoog, kev ua ua qav ua num, kev ntiav zog, kev them nyiaj hnub nyiaj hli, ces muaj teeb meem rau peb. Vim lub neej nyob ntiaj teb muaj sij hawm, muaj caij nyoog, muaj hli, muaj xyoo. Hmoob hais tias kom ua neej nyob puv 120 xyoo. Tiam sis, Tswv Ntuj ciaj sia nyob txhiab niaj tim puas xyoo. Tswv Ntuj lub caij lub nyoog txawv peb tib neeg lub caij lub nyoog. Los puas peb yuav tsum hais tias saum qaum ntuj tsis muaj caij nyoog li nyob ntiaj teb lawm. Vim li ntawd, rau Yes Xus, ib teev los ib hnub tsuas yog tib yam xwb ces tsis muaj teeb meem rau Yes Xus. Yog li, saum qaum ntuj yuav ua li cas suav caij nyoog ? Vim tsis muaj caij nyoog ces tsawg hauj lwm sij hawm tsis muaj suav. Vim li ntawd, peb yuav nyiam Yes Xus thiab nyiam leej tib neeg, yuav ua neeg mloog Yes Xus lus yog nyob ntiaj teb no. Hnub peb hla lub ntiaj teb, tas caij nyoog peb ua tsis tau lawm. Nej puas nco, tus nplua nuj xav txog lig, mam xav ua neeg zoo tias sis tag caij lawm ua tsis tau. Tiam sis, yuav kom peb to taub qaum ntuj caij nyoog, peb yuav tsum mloog Yes Xus tham txog ntiaj teb sij hawm thiab caij nyoog. Rau peb, tus ua ib teev hauj lwm thiab tus ua ib hnub hauj lwm mas sib txawv ntau. Tiam sis, nyob saum qaum ntuj vim tsis muaj sij hawm thiab caij nyoog lawm. Txawm yuav yog ib teev, ib hnub, ib tiam neej los 120 xyoo tsis muaj txawv. Piv txwv lub caij thaum Yes Xus cov thwj tim tseem ua neej nyob, lawv kub siab lug qhuab qhia Yes Xus lub Moo Zoo rau cov pej kum neeg teev dab qhuas, thaum ntawd yog 3 teev (9 h) ; lub caij thaum leej ntshiab François d’Assise tseem ua neej nyob, nws siv zog hlub cov mob ruas cov pluag raws li Yes Xus qhia, thaum ntawd yog 6 teev (12 h) ; peb twb tseem nco txog niam nkauj xwb Tes Les Xas (Mère Teresa) nws muab nws lub neej los cawm cov neeg pluag India nyob Calcutta, nws tau qaij qaug xyoo 1997, thaum ntawd yog 9 teev (15 h) ; yav tom ntej tuaj no, tseem yuav muaj ib tug neeg nyiam Yes Xus tas siab nrho ; cov dej haus nyob ntiaj teb yav tom ntej tuaj yuav nqhuab thiab muaj tshuaj lom tas dej tsis txaus neeg haus. Thaum ntawd, neeg yuav tuag dej coob kawg. Tus neeg nyiam Yes Xus yuav muab nws lub neej los cawm cov neeg tshaib dej, thaum ntawd yog 11 teev (17 h)…Yog peb muab zaj piv txwv no xav li peb tib neeg xav, nyias muaj nyias tiam neeg. Tiam sis rau Huab Tais Yes Xus, sawv daws puav leej yog cov tub zog, peb tus tswv txib peb kom siv zog ua tus tswv thaj teb txiv cawv nyob ntiaj teb no. Sawv daws puav leej yuav tau txais tus nqe zog ntawm tus tswv rau sawv daws : “Cov tuaj lawv qab ua ib nyuag teev, koj ua rau lawv cov no npaum li ua rau peb tiv ib hnub zog tshav kub.” 13 Nws thiaj teb rau lawv ib tug tias : “Phooj ywg, kuv tsis tau liam koj, puas yog koj twb khom ib npib nrog kuv ? 14 Los txais nkaus koj tug mus. Kuv xav pub rau tus lawv qab ib yam koj. 15 Tseem tsis pub kuv tug rau kuv ua li ntawm kuv xav lod ?” Cheem peb tseem muaj txoj sia nyob, Huab Tais Yes Xus tos ntsoov peb txoj kev nyiam nws kom tag peb lub siab thiab nyiam peb leej tib neeg cov txom nyem thiab cov pluag ib yam li nws. Peb tsis txhob qeeb siab, txhob laug caij nyoog. Hnub peb hla lub ntiaj teb, peb yuav khuv xim ciaj khuv xim tuag tsis ntxov ua neeg mloog lus, ua neeg zoo nyob ntiaj teb no.

    Ib tsoom phooj ywg sawv daws, peb yuav rov nyeem ob peb zaug cov tsab ntawv peb hnov hnub no, kom peb txawj nyiam Huab Tais Yes Xus kom tag peb lub siab ntsws. Thov kom cov lus peb hnov hnub no txhawb peb ua ib tug neeg ntseeg Yes Xus thiab teev Yes Xus ruaj thiab khov tsis muaj dab tsi txiav tau peb txoj xub ke khaub zig Yes Xus.


    15.09.2011 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 24th September 2011, 3:11 am





    Rau hnub tim 25 lub 9 hli 2011

    Ib tsoom ntseeg thiab phooj ywg,

    Peb zoo siab ua Huab Tais Tswv Ntuj tsaug, hnub no peb tseem muaj txoj sia tuaj txais peb tus Huab Tais tej lus ua koob ua hmoov pab peb, txhim kho peb lub neej ua neeg nyiam zoo hla kev iab kev daw hauv ntiaj teb no mus lawm qaum ntuj. Peb yuav vam txog ib tug coj kab qhia kev rau peb taug, peb thiaj pom qab ua tau neeg zoo. Tus yuav coj tau peb mus cuag Tswv Ntuj, yog peb tus Huab Tais Yes Xus Pleev. Dua li ntawm Huab Tais Yes Xus Pleev, tsis muaj lwm leej lwm tus huab tais, tsis yog lwm leej lwm tus dab los tus tib neeg twg muaj hwj huam cawm ntiaj teb neeg kom ciaj ua Tswv Ntuj haiv neeg, ua Tswv Ntuj tub ki. Kawg nkaus Huab Tais Yes Xus tib tug, Tswv Ntuj Leej Tub, tuaj ntawm Tswv Ntuj tuaj, muaj Tswv Ntuj hwj huam cawm tau peb ntawm kem phem los ua neeg zoo, ntawm kev txhaum los ua neeg ntshiab huv thiab ntawm kev tuag los ciaj sia nyob txhiab niaj tim puas xyoo nrog Tswv Ntuj koom siav. Yog Huab Tais Yes Xus peb yuav los teev los hawm.

    Sawv daws paub, tas ntiaj teb tib neeg txhua tus puav leej nyiam zoo, nyiam qhov yog kev yog cai, qhov ncaj ncees. Tsis kawg rau cov neeg teev Tswv Ntuj thiaj nyiam zoo ; tas txhua tus tib neeg nyob ntiaj teb, tus teev ntuj, tus teev dab qhuas, tus teev mlom, tus tsis coj tsis ntseeg kev teev hawm dab tsi, tas tus puav leej nyiam zoo. Tiam sis, txhua tus tib neeg ua tsis tau zoo raws kev raws cai, tsis ncaj ncees. Peb thiaj pom muaj teeb meem, neeg hais tsis sib haum, sib cav sib ceg ua ntxhov hnyo, sib ntxub tsis xav sib pom. Neeg yeej muaj keeb sib ntxub tiam ua dhau tiam txog niaj hnub no thiab yuav ua li ntawd mus txog hnub kawg. Peb ntsia ntsoov txawm yog ib tse neeg, hauv ib cuab kwv tij, hauv ib lub zos, hauv ib lub teb chaws, hauv ib haiv neeg…sawv daws yeej muaj kev sib tshom, sib khib, sib chim, sib tawg thiab tseem sib ntaus sib tua, ua tsov rog tsis txawj tag. Vim li ntawd, yog nyias tseem muaj nyias xeem neeg hais nyias xeem lus, kev sib ntxub sib thuam tseem yim loj. Tsis yog yus haiv neeg phem, thiaj muaj sib ceg, muaj lus xaiv ; tsis yog yus ob niam txiv phem, thiaj niaj hnub hais kev khib kev mob siab. Neeg ntiaj teb nyiam zoo tas tus, tiam sis tsis txawj ua zoo ; neeg ntshaw kev thaj yeeb los niaj hnub muab kev khib kev chim los hais txiav npluav : kuv tsis vam koj los koj yeej tsis ntshaw kuv tib yam. Thaum neeg npau thiab chim tuaj, neeg lam taus lam hais tej lo lus loj loj tawm : kuv tsis vam koj, koj tsis vam kuv. Tiam sis, neeg ncauj loj ncauj ntaw lam hais tau kom siab nqig, neeg ua tsis tau li lo lus hais ntawm ncauj. Txawm wb lub ncauj hais tias wb tsis sib vam los wb nyob tsis tau wb tus kheej. Wb twb vam twb ntshaw lwm leej lwm tus tib neeg nrog wb ua neej thiaj sov siab, ciaj taus neeg. Vim li ntawd, neeg lub ncauj lam hais lus, neeg ua tsis tau li neeg lub ncauj hais. Hmoob hais tias : hais tau ua tsis tau. Thiaj li hais tias : peb tib neeg tsis txawj ua zoo, tsis txawj hais lus. Tib neeg yuav tsum vam txog Tswv Ntuj tus tsim tib neeg thiab lub sim ceeb pab tib neeg. Yog tib neeg vam Tswv Ntuj pab xwb, tib neeg tsis teev hawm thiab tsis tiam tsis ntseeg Tswv Ntuj, ces tib neeg lub mob tsis yaj tsis ploj. Kev teev hawm Tswv Ntuj raws kab raws kev, raws li Huab Tais Yes Xus coj qhia tau txiaj ntsim, ua dej tshuaj kho tau neeg lub mob zoo, daws tau neeg kev txhoj txhaum kom huv.

    Yes Xus, Tswv Ntuj Leej Tub yug los ua neeg yog lub cim Tswv Ntuj hlub ntiaj teb tib neeg txhua leej txhua tus. Yes Xus tuaj pab peb tib neeg sib ntxub, ua yeeb ncuab kom rov sib haum xeeb, ib tug txawj zam rau tug. Yes Xus hais ntsees kom peb sib hlub, yus hlub yus tus yeeb ncuab li Tswv Ntuj hlub peb yog Tswv Ntuj yeeb ncuab. Vim peb tawv ncauj, thuam ntuj, rov taw tuam ntuj, tsis teev, tsis hwm Tswv Ntuj yog peb Txiv, tus tsim peb, tsis kav Tswv Ntuj ua kawm to qab tsis cib nyeej, tsis chim, ua ntsej muag luag ntxhi rau peb, tso nag ywg tus ncaj tus nkhaus txooj qoob kom nws tau noj, ua hnub sawv kaj tus tub sab thiab tus neeg zoo txoj xub ke kom txhob mus kev dawm taw. Peb pom Yes Xus muab tag Yes Xus hwj huam rau cov neeg thim xav los teev los hwm Tswv Ntuj lawv Yes Xus qab, mloog Yes Xus lus : “27 Thaum tus neeg phem thim nws txoj phem nws ua tig los ua txoj yog thiab ncaj ncees, nws yuav ua nws tus ntsuj ciaj.” Cov neeg teev thiab hwm Tswv Ntuj sawv tau los ua Yes Xus thwj tim. Kev muaj Yes Xus hwj huam yog txais Yes Xus tes qav num ua : tsis cia dab Xas Tas ntxais yus. Peb tseem nco txog Yes Xus yoo tau 40 hnub Yes Xus tshaib plab. Xas Tas tuaj ntxias Yes Xus kom ua hwj huam rau pob zeb txia ua mov noj. Tiam sis Yes Xus txawm muaj hwj huam, Yes Xus tiv kev tshaib nqhis yoo kom dhau kev tshaib li tus tib neeg. Yes Xus tsis qaug dab Xas Tas ntxias. Tsis tas li ntawd, Yes Xus tsis kam sim Tswv Ntuj dhia saum ruv tuam tsev teev ntuj los rau hauv av yuam Tswv Ntuj pab li dab Xas Tas ntxias. Yes Xus tseem tiv qawv nws cov yeeb ncuab Fas Lis Xais thiab cov txwj laus, cov thawj leej choj, tsis ntshai muab lawv lub qe hais tawm : “8 Haiv neeg no lub ncauj lam hwm kuv tiam sis lawv siab ntsws nyob deb ntawm kuv.9 Lawv lam teev hawm kuv qhuav, tshaj tib neeg kev qhuab qhia xwb.” Kev muaj Yes Xus hwj huam yog ua tus pluag tam li Yes Xus ua tus pluag vam Leej Txiv Tswv Ntuj pab, cia koob meej Leej Txiv muaj, cia hwj huam Leej Txiv ua. Tus neeg teev hawm Yes Xus, nws yuav txhob ua tus neeg plhom moj ua tus muaj hwj huam li tej saub cuav. Tiam sis, nws siab yuav dai dhuam ntseeg khov kho txoj kev teev Yes Xus hwm Yes Xus, ua neeg ncaj neeg tseeb, tsis muaj cuav, tsis muaj dag, lees paub yus yog me nyuam neeg pluag, vam Huab Tais Yes Xus tus muaj hwj huam loj pab yus. Peb yuav nrhiav kom tau kev khaub zig Yes Xus hauv cov caij nyoog teev ntuj. Tsis txhob pub peb kev khaub zig Yes Xus sav thiab ncua npaum li peb tsis ncua tsis sav ib pluag noj ib pluag haus hauv peb lub neej. Peb yuav tsum xav kom thoob, yog peb txoj kev teev Yes Xus tsis coj peb los sib haum, tsis rub peb los sib hlub hauv peb lub cuab lub yig, cog kev thaj yeeb hauv peb tsoom kwv tij neeg tsa, nrog ntiaj teb tib neeg tus phem tus zoo ua kwv ua tij li Yes Xus hlub ntiaj teb neeg txhua tus, peb txoj kev teev Yes Xus yog qauj thiab tov lawm, yuav tsis tau koob hmoov dab tsi. Thaum zoo li no, peb pauv tsis ntxiv cov Fas Lis Xais ntsej muag cuav ntsej muag dag Yes Xus cem li hais saum no. Vim li ntawd, tus neeg teev Yes Xus hloov siab tshiab ib zaug tsis txaus, nws yuav niaj hnub vam txog lub Koom Txoos kev teev hawm thiab cov leej ntshiab tej txiaj ntsim, tej lus koob lus hmoov pab nws. Tsis txhob cia peb lub siab coj peb ua neej li peb pom thiab peb xav. Tus neeg teev Yes Xus yuav nco ntsoov Paj Lug thiab cov thwj tim tej lus qhia : “5 Nej yuav coj kom zoo hauv nej ib yam hauv Leej Pleev, 6 Tus ib txwm nyob txawm ntawm Tswv Ntuj, tsis liam tseev kom nrog tau Tswv Ntuj sib txig.7 Yug los thooj li tib neeg, nws cia nws tus kheej tam zoj tus qhev : nws tus yam ntxwv tam tus tib neeg, 8 Nws txo nws tus kheej qis yug ua neeg mloog lus txog qhov tuag, tuag nthi saum ntoo cuam.9 Yog vim li ntawd, Tswv Ntuj thiaj tsa nws siab dua tej thiab pub koob haum rau nws lub npe loj dua tas tej npe tib si” Cia Yes Xus lub Moo Zoo coj peb kev ua neej tsis txhob ntaus siab me. Zim txwv no, nyob ib ncig ntawm yus, txawm muaj coob leej ntau tus neeg sawv tiv Yes Xus, tsis lees paub, tsis thim xav los teev Yes Xus. Tiam sis kuj muaj cov neeg me thim xav tig los ua neeg zoo. Yog peb xav ua neeg teev Yes Xus thiab ntseeg Yes Xus, tsis muaj lwm txoj kev rau peb taug dua ntawm txoj kev lawv Yes Xus qab ua neeg me, lees paub tej txhaum peb ua rau Tswv Ntuj thiab rau luag tej. Lub cim daws txhaum, mus thov lees yus tej txhaum ntawm Yes Xus thim yus cov txhaum li tus poj niam deev hluas, muaj txiaj ntsim tau rau tus neeg ntseeg hauv Koom Txoos Kav Tos Liv. Tos peb los teev Yes Xus thiab ntseeg Yes Xus, vim peb ntshaw kom Yes Xus hlub peb thiab peb xav ua neeg mloog Yes Xus lus lawv Yes Xus qab hlub ntiaj teb neeg li Yes Xus hais rau peb. Vim li ntawd, txawm peb tsis muaj peev xwm, tsis muaj zog hlub tau ntiaj teb neeg txhua tus, peb txawm tsis muaj peev xwm zam tau rau yus tus yeeb ncuab. Yus paub li ntawd, yus thiaj li yuav tsum khaub zig Yes Xus txhua txhia lub sij hawm txhawb yus lub siab.

    Muaj ib yam peb twb paub ntsoov, tsis muaj tus dhia dhau peb tib neeg kev ploj tuag nyob ntiaj teb no. Hnub qaij hmo qaug los txog, nroj tsuag, tsiaj txhu, peb leej tib neeg cev ntaj xib ntsug yuav tuag li nthi. Tos Yes Xus nqes saum ntuj los coj peb kev, vim tsis muaj lwm txoj kev mus, tib neeg lug tsis dhau ntiaj teb kev ploj tuag. Yes Xus nqes los ciaj neeg, yog nrog peb leej tib neeg qaij thiab qaug, ploj thiab tuag. Yes Xus tsis ua hwj huam tiv thiav kev raug ntxub raug hiam, tsis ua hwj huam tiv thaiv kev ploj kev tuag. Tiam sis, Yes Xus nrog cov neeg tuag dawb tuag do ris ntiaj teb kev lim hiam. Cov neeg raug ntiaj teb kev lim hiam tuag dawb tuag do muaj nyob thoob ntiaj teb, hauv tas txhua haiv neeg, hauv txhua lub teb chaws. Peb tsis txhob xav tias cov tua neeg yog tub sab tas tus, los neeg phem tas tus. Hauv cov tua neeg no ib nrab tseem yog yus cov txheeb cov ze, yog cov neeg zoo muaj koob nto npe, yog cov neeg kawm txuj paub ntaub paub ntawv : “Yes Xus hais rau lawv : “kuv hais tseeb rau nej, cov sau se thiab cov poj dee hluas ua nej ntej mus saum qaum ntuj. 32 Zam tuaj cuag nej hauv kev ncaj ncees, nej tsis ntseeg nws, cov sau se thiab cov poj dee hluas ntseeg nws ; nej twb pom ntsoov li ntawd nej twb tsis thim los ntseeg nws.” Vim li ntawd, cov tua neeg tuag dawb do no ib txhia twb tseem yog neeg teev Yes Xus thiab. Kuj zoo tib yam, cov neeg teev ntuj hwm ntuj tsis yog cov neeg ntseeg Tswv Ntuj nkaus xwb thiaj paub hwm ntuj ; nyob hauv lwm cov kev cai teev hawm, hauv txhua haiv neeg nyob ntiaj teb kuj muaj cov neeg paub hwm ntuj ua xis Tswv Ntuj siab, txawm lawv tsis paub teev ntuj. Tsis tas li, Yes Xus txoj kev raug hiam tuag, Yes Xus tsis teb, tsis hais ib los rau cov muab Yes Xus tua zoo tam zoj cov me nyuam mos hauv leej niam plab tsis nroo, tsis hais ib los rau lawv niam lawv txiv thiab cov kws tshuaj lom lawv tua lawv. Tiam sis, Tswv Ntuj pom Yes Xus tsis muaj txhaum raug hiam tuag dawb tuag do li cov me nyuam mos. Yog Tswv Ntuj rub nws Leej Tub Yes Xus tes sawv hauv tsoom tuag rov muaj sia. Tswv Ntuj kuj yuav rub tag cov neeg tuag dawb do tes sawv rov muaj sia tib yam Yes Xus mus lawm saum ntuj. Vim li ntawd, cov raug tua tuag dawb tuag do, yuav ua cov tua neeg ntej mus lawm saum ntuj.

    Ib tsoom phooj ywg, peb yuav mloog Yes Xus cov lus nws hais rau peb hnov hnub no. Peb ua neeg teev Yes Xus, peb ua tsis tau tas txhua yam ywj peb siab, peb tsis muaj cai hais tau tas txhua lo lus raws li peb xav. Tsuas muaj tib txoj kev rau peb tus neeg teev Yes Xus thiab ntseeg Yes Xus taug, peb yuav kub siab lug coj peb lub neej kom haum Yes Xus lub Moo Zoo raws li lub Koom Txoos Kav Tos Liv lus qhuab qhia. Peb yuav nquag daws txhaum, thov cov leej ntshiab tej koob hmoov txhawb peb lub neej.

    21.09.2011
    Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 12th October 2011, 4:29 am



    Rau hnub tim 09 lub 10 hli 2011
    Tsoom ntseeg thiab phooj ywg txhua leej,

    Yog ib hnub zoo caij nyoog, peb rov tuaj teev hawm peb tus Huab Tais Tswv Ntuj. Peb yuav nthuav ob peb los txog tsab ntawv Moo Zoo Huab Tais Yes Xus hais rau peb hnub no. Peb yuav hais txog ob lub ntsiab lus no :
    1-Muaj tej yam hauv vaj ntxwv lub neej qhia tau kom to taub qaum ntuj.
    2-Peb tsis muaj leej twg muaj cai loj cuag Tswv Ntuj.

    Peb cov neeg ntseeg Tswv Ntuj, nej puas tseem nco muaj ntau zaus peb hnov Yes Xus piav qaum ntuj qhia rau peb. Yes Xus muab ntau zaj txhais los qhuab qhia peb. Vim qaum ntuj peb pom tsis tau txawv ntau lub ntiaj teb daim av peb qhov muag pom. Peb nyob ntiaj teb, txawm peb muaj qhov muag rua pliav los peb twb tseem yuam kev poob zoo qees thiab xaiv tsis tau yam khoom zoo rau peb siv. Tej laus thiaj pheej hais tias : “Cas yuav tsis muaj qhov muag ntsia kiag li !” Peb txawm muaj pob ntseg hnov lus, peb tseem yuam kev ua tsis yog qhov luag hais rau peb : “Neeg qig lus, cas koj lub qhov ntsej yuav tsis to qhov ua luaj !” Nyob ntiaj teb twb nyuaj npaum li ntawd, qaum ntuj tej ntsuj peb pom tsis tau thiab muaj ntau yam pob ntseg tsis tau hnov dua, peb yim huab tsis paub txog qaum ntuj. Yes Xus thiaj li muab lub caij lub nyoog los piav los phim qaum ntuj loj thiab dav qhia peb, txawm qhov muag pom tsis tau los peb ho to taub qaum ntuj ; Yes Xus thiaj li muab me paj hmab paj ntoos tawg nra paug los piv qaum ntuj zoo nkauj thiab xyov yuav ua peb zoo siab npaum li cas tshaj tej paj hmab paj ntoos tawg tshiab dee peb tib neeg kev zoo siab. Hnub no, peb mloog Yes Xus muab ib yam hauv vaj ntxwv lub neej qhia peb li no :

    1-Muaj tej yam hauv vaj ntxwv lub neej qhia tau kom to taub qaum ntuj.
    Thaum peb hais txog ib tug txwj laus, ib tug nom los ib tug vaj ntxwv, tib neeg nrog peb to taub qhov peb hais. Ib tug vaj ntxwv kav ib lub teb chaws, nws muaj hwj chim, hais dab tsi pej xeem huab hwm nyo hau mloog thiab ua kom tau raws vaj ntxwv lo lus hais ; vaj ntxwv muaj txhooj muaj cai sau nuj sau se, muaj tub rog thaiv ciam dej ciam av, muaj cai cawm tau neeg los tua neeg…Tsis hais tus vaj ntxwv twg puav leej coj cai thiab siv lub hwj chim zoo li ntawd. Tus ua nom, ua vaj ntxwv tej tib neeg txawm hwm, txawm pe. Ib tug me nyuam neeg txawm raug luag txib, raug yuam ua qhev. Vim li ntawd, tib neeg thiaj pheej npau suav toog ntshaw ua nom, ua vaj ntxwv. Hmoob thiaj pheej hais : “Tuag mus mam los thawj thiab ua nom.” Vim vaj ntxwv yeej tau lub neej zoo ua, muaj vaj tse loj thiab dav nyob, noj tsis tshaib haus tsis nqhis, hnav ntaub ntsuj ntaub npuag, muaj tub mab tub qhe tiam, mus txoj ke twg pej xeem huab hwm ua ntaj teg hwm khoov pe ntsej muag ti av. Hos tus pej xeem, nyuag me nyuam neeg pluag, tsis muaj leej twg quav ntsej, tseem raug thuam, luag twb saib tsis taus thiab tsis muaj ib pluag noj daws nqhis, tsis pom qab ua neeg. Tus vaj ntxwv thiab tus pej xeem lub neej yeej sib txawv npaum li no. Yes Xus thiaj ua zaj txhais qhia rau peb txog qaum ntuj thiab ntiaj teb sib txawv tib yam nkaus. Tus neeg teev Yes Xus yuav taug txoj kev Yes Xus taug. Peb yuav tau hloov zuj zus nyias nruab siab los yuav lub siab tshiab li Yes Xus qhuab qhia, muab peb lub qub siab thiab lub tswv yim xav li neeg xav nrauj pov tseg kom tu taw. Peb thiaj li yuav raws tau Yes Xus qab soj tau nws lw : “8 Nws hais rau nws cov tub txib : qhov ib, rooj tshoob tiav tag, qhov ob, cov raug caw tsis tsim nyog 9 Mus tos ntawm txhua txoj ncauj xub ke txhua tus nej pom caw tuaj xaus tshoob.10 Cov tub txib no tawm mus txhua txoj xub ke coj tag cov lawv ntsib phem thiab zoo, ua neeg nchuav ntws hauv rooj tshoob.” Yog peb xwb, peb puas yuav paub muaj kev lom zem xov npo, nyob kaj siab lug saum qaum ntuj tam rooj tshoob rooj kos, noj tsis tshaib haus tsis nqhis, neeg los coob nphoo ntxuas li lub tsiab peb caug niaj ib txhiab mus ib txhis.
    Peb tsuas paub peb ntiaj teb kev ua neej, kev coj noj coj ua. Neeg ntiaj teb muaj pab muaj pawg, muaj loj muaj yau, muaj nom muaj qhev, muaj nte muaj ruam, muaj neeg zoo neeg phem, neeg nquag neeg tub nkeeg, neeg zoo nkauj neeg dab tuag, neeg lim hiam tub sab tua neeg, neeg ncaj neeg huv, neeg muaj mob dia hau, neeg laus txom nyem nti luj luam…Tsis tas li, tseem muaj cov neeg teev Tswv Ntuj los kuj muaj cov neeg teev dab qhuas, teev mlom, teev hnub teev hli, muaj cov neeg tsis teev tsis hwm ntuj thiab muaj cov rov taw tuam ntuj…tas ntiaj teb txawm li ntawd los sawv daws yog Tswv Ntuj tsim. Huab Tais Tswv Ntuj nyiam thiab hlub tag nrho tsis seem ib tug twg. Peb tus neeg teev Tswv Ntuj, peb ntseeg tias Tswv Ntuj hlub sawv daws tseeb tiag tsis yog lam hais. Peb yuav ceev faj, muaj tej kws tshuaj thiab tej txoj cai “Euthanasier” tso lus txhaj tshuaj lom tej tus tib neeg mob hnyav kom tuag mus tsis txhob txom nyem. Tej zaum peb ua tau rau tsiaj, tiam sis ua tsis tau rau neeg. Vim tib neeg txawm poob tsim loj npaum twg, tshuav neeg hwj chim. Tus neeg tawv ncauj thiab tus mloog lus, Tswv Ntuj puav leej hlub li nej hlub nej tej me nyuam nej yug tus mloog nej thiab tus cav nej. Txawm nej hlub tus mloog lus dua tus cav ncauj los Tswv Ntuj tsis zoo li nej, Tswv Ntuj hlub tag ob leeg. Tus txawj mloog Leej Txiv Tswv Ntuj lus zoo dua tej yog Yes Xus. Txawm li ntawd, Tswv Ntuj kuj hlub peb ib yam hlub Yes Xus, Leej Txiv thiaj xa nws Leej Tub tuaj theej peb lub txhoj, tuag taus rau peb npaum nej tuag taus rau nej lub cuab lub yig. Peb leej twg ntseeg Yes Xus teev Yes Xus, peb mloog Yes Xus lus. Tus mloog Yes Xus, nws nrog Yes Xus ua Leej Txiv Tswv Ntuj tub ki thiab ua Yes Xus thwj tim. Vim li ntawd, txawm tus poj niam los txiv neej, laus los hluas mloog Yes Xus lus, nws ua Yes Xus tub ntxhais txib. Yes Xus tus tub txib tuav Yes Xus tes qav num, sawv Yes Xus chaw ntawm lub cuab lub yig, hauv lub zej zog, ntawm lub luag dej num nrhiav noj nrhiav haus nyob ntiaj teb no. Niaj hnub no, Yes Xus txib peb tus neeg teev Yes Xus mus txhua txoj xub ke hauv tib neeg kev ua neej : mus ntsib cov neeg hauv tsev loj faj, tsev kho mob, tsev laus ; mus tom tshav puam ntawm neeg chaw ua si dhia daj dhia luag, tom tej ntug dej neeg tuaj so pw ziab tshav ; mus nrog tej neeg poob hauj lwm nrhiav qav num txhawb lawv kev nyuaj siab ; mus fim cov neeg quav dej quav cawv, fim tej tub ntxhais ua dev ua npua, ua plees ua yis ; mus pab txhawb tej neeg loj leeb pw luag qab vag tsib taug kom muaj chaw nyob ciaj neeg…zoo li thaum ub cov thwj tim nrog Yes Xus taug kev mus ntsib cov Xas Mas Lias, cov mob ruas, cov dig, cov raug dab, cov poj ntsuam…Niaj hnub no, tus neeg ntseeg yuav nrog Yes Xus mus taug tib neeg kev ua neej, qhia tag coj tag sawv daws tus phem tus zoo mus noj Huab Tais Tswv Ntuj tus tseem Vaj Ntxwv rooj tshoob rau nws Leej Tub. Leej Txiv Tswv Ntuj xa nws Leej Tub Yes Xus tuaj qhaib lub ntiaj teb neeg qaim Leej Tub Yes Xus npab mus ua Leej Txiv Tswv Ntuj nkauj nyab puag qaum ntuj. Tshuav ntau txoj xub ke, tus neeg teev Yes Xus tsis tau taug kom txhua. Vim li ntawd, muaj coob leej neeg teev Yes Xus mus teev ntuj tag rov los zaum tib pob tsis pom qab ua dab tsi. Tseem muaj ib txhia neeg teev Yes Xus, ncauj puam suab khawv, qav num tseem ceeb tsis paub nrog ua, tsuas pom niaj hnub sib cav sib ceg ntxhov qas niab, ua tus paub txhooj paub cai kawg hais txhooj hais cai xwb : “Ua li koj ua yog coj sawv daws teev dab, yuav tsum ua li kuv thiaj yog ; tsis txhob teev ntuj li Hmoob yog ua dab, yuav tsum teev li Fab Kis thiab Mes Kas thiaj yog teev ntuj ; lub tsev teev ntuj no yog kuv lub, nej kav tsij teev twj ywm tom nej lub…” Tej nyuag lus sib cav sib ceg no yuam kev deb zoo li tseem muaj nqes dua Yes Xus tej lus qhia. Peb yuam kev vim peb tsis mus txhua txoj xub ke. Peb ua cov tub txib cam thawj, qig lus, hawv plaub ntug txhij neeg sawv ua nqag tiv lwm pab tub ntxhais txib. Peb tsis ua txoj num Huab Tais xa peb mus ua. Peb xaiv txoj peb xav ua. Yes Xus xa peb mus taug txhua txoj xub ke, peb xaiv kev taug, tsis taug txoj nce toj thiab txoj fab, peb xaiv txoj yooj yim ua qhov peb nyiam. Tseem tsis yog xaiv kev taug xwb, peb tseem xaiv neeg caw, peb tsis caw tag txhua tus neeg li peb Niam peb Txiv Huab Tais lo lus. Peb caw peb cov neeg, pawg nyuag peb fim, peb lub “church”, peb puam chawj cov teev ntuj li Hmoob yog ua dab, puam chawj cov neeg pluag noj yus zog, pab tsis tau yus...Ntawm cov neeg tseem ua dab ua qhua thiab neeg tub sab, tej neeg quav dej quav cawv, ua plees ua yis, twv txiaj yuam pov tsuas nros lawv, yim huab txhob quav ntsej txog : “5 Lawv tsis quav ntsej, nyias pla nyias, ib txhia mus nyias teb, ib txhia ua nyias luam.6 Lwm cov tseem thuam cov tub txib thiab ntes tua tuag.” Cov tub ntxhais txib coj li no yog cov rhuav lwm pab tub ntxhais txib mloog Huab Tais lus. Kev ua Yes Xus tub ntxhais txib, yuav xyaum mus txhua txoj xub ke lawv Yes Xus qab.

    2-Peb tsis muaj leej twg muaj cai loj cuag Tswv Ntuj.
    Peb yuav nco ntsoov Yes Xus cov lus kom txhij nco kom txhua lo. Yog lo twg peb tsis nco, peb yuav mus thuav ntawv nyeem khaws tseg rau nruab siab. Lo twg peb tsis paub, peb yuav nug tus tseem xib hwb qhia thiab txhais Yes Xus lo lus kom peb paub lub ntsiab meej tob taub kom ti txha. Peb tseem nco, Yes Xus hais tias : “24 Tus thwj tim tsis siab dua tus xib hwb los tus qhev siab dua nws tus Huab Tais. MT 10,24” Yog Huab Tais xa peb mus txhua txoj xub ke caw tus phem tus zoo tuaj mus xaus tshoob. Yog peb tsis ua neeg qig lus, peb yuav ua kom tau rau Huab Tais ib yam li cov tub txib mloog lus no ua. Peb txoj dej num ua tub txib tsuas yog ua rau Huab Tais raws li Huab Tais txib xwb. Peb tsis muaj cai mus lob lwm txoj dej num los ua, tso txoj Huab Tais txib pov tseg. Puas yog vim li ntawd, peb thiaj pom muaj plaub ntug, kev dub muag, sib cav sib ceg hauv tsoom neeg ntseeg ntxhov qas niab thawm niaj thawm xyoo. Yog Huab tais kom peb mus txhua txoj xub ke, peb yuav tsum taug txhua txoj xub ke. Yog Huab Tais kom peb caw tus phem tus zoo, peb ua li Huab Tais hais. Tej teeb meem sawv, vim peb xaiv neeg caw, peb tsuas caw tus zoo xwb los caw tus phem xwb, caw tus muaj xwb los caw tus pluag xwb…peb yuam kev tsis ua Huab Tais tub txib, peb ua peb tswv txeeb Huab Tais lub chaw. Peb sim xav, ua cas peb muaj ntsej muag hais rau luag : “Koj neeg teev ntuj koj zoo, koj mus saum qaum ntuj ; hos koj neeg ua dab koj phem, koj mus ntxwg nyoog teb ; peb teev ntuj li Mes Kas thiaj yog teev ntuj, hos nej teev ntuj li Hmoob nej ua dab.” Peb qhov muag rua pliv pom ntsoov saum daim av muaj tus neeg teev ntuj thiab tus neeg teev dab qhuas nyob ua ke, ua neej ua tsav, ua zej ua zos. Tswv Ntuj puav leej hlub tus neeg teev ntuj ib yam tus neeg teev dab qhuas, tso tib lub hnub ziab ob leeg pom ke rau ob leeg tib yam. Vim tus teev ntuj hwm Tswv Ntuj los tus teev dab qhuas kuj hwm ntuj tib yam nkaus. Vim li ntawd, nkawd ob leeg puav leej yog neeg zoo, Tswv Ntuj hlub ob leeg tib si. Tiam sis, txawm Tswv Ntuj hlub ob leeg, Tswv Ntuj kuj txawj npau taws rau ob leeg tib yam nkaus. Ntawm nej, txawm nej hlub nej tej me nyuam, nej twb txawj npau taws rau lawv thiab. Tswv Ntuj kuj txawj npau taws rau tus neeg teev ntuj thiab tus neeg teev dab qhuas tib yam. Vim tus teev ntuj, paub teev ntuj kawg los tub nkeeg thiab tsis paub hais ib los qhuas ntuj li. Txog lub caij teev hawm Tswv Ntuj mas niam tib ub tib no tuaj cia txog lwm hnub tso mam mus. Tej txhia twb tsis mus tshwm tsev teev ntuj ib taws hauv ib lub xyoo. Yog tus neeg ntseeg tseem tsis pom, tsis paub xyov Tswv Ntuj dhuav nws npaum li cas npaug qhov nws dhuav kev teev ntuj kuj tsis dua ntawm nws tus kheej. Ntawm cov neeg teev dab qhuas twb tsis paub teev ntuj li, lawv yuav ua cas mus teev ntuj. Tsis yog qhov no ua rau Tswv Ntuj npau taws. Tej zaum qhov ua Tswv Ntuj npau taws, yog qhov tsis muaj qhov muag pom Tswv Ntuj hlub lawv npaum li ntawd, ua tshav ua nag ywg lawv tej qoob lawv thiaj muaj noj muaj haus tsis tshaib tsis nqhis. Lawv tsis hais ib los tsis seev ib suab ua lub ntuj tsaug, ho mus tua tsiaj txhu cwb dab qhuas laig rau dab, tseem yog tus ntaim lawv noj lawv haus. Tus tub txib txoj dej num yog taug kev mus ntsib tus neeg teev ntuj thiab tus neeg teev dab qhuas tib si, mus coj mus caw qhib sawv daws tej siab ntsws kom tsim meej nthuav los. Daim av yog peb lub chaw so, qaum ntuj thiaj yog peb lub chaw nyob, lub vaj lub tsev.
    Tiam sis peb xav paub, Tswv Ntuj twb hlub tib neeg tag npaum li, hlub tus phem tus zoo. Tim li cas Tswv Ntuj thiaj muab tus tsis npaj tsoos noj tshoob ntiab tawm nraum zoov ? Tswv Ntuj puas hlub txhua tus neeg li hais tiag ? Peb ntseeg tias Tswv Ntuj hlub txhua tus tib neeg tsis seem ib tug li. Tiam sis, txawm Tswv Ntuj hlub tib neeg txhua tus, Tswv Ntuj tsis dig muag tsis txawj pom peb kev lim hiam : “12 Nws hais tias : phooj ywg, tim li cas koj nkag los ntawm no, tsis muaj tsoos noj tshoob ? Nws nyob dub lus.13 Tus vaj ntxwv hais rau cov tub txib : muab nws pav tes pav taw cuam sab nraud hauv qhov tsaus ntuj sab nraud, kom quaj caws vos tom hniav nkawv.” Nej twb hlub nej tej me tub me nyuam txhua tus kawg vim nej yog lawv niam lawv txiv. Tiam sis nej kuj pom nej tus me nyuam lub siab phem ua rau nej tu siab, npau taws, xav xuas nplawm qhia kom quaj caws vos. Qaum ntuj, yog peb txoj kev mus ua nyab, peb yuav tsum npaj peb lub siab raws li Yes Xus tuaj qhia. Daim tsoos ua tshoob, lub zam peb yuav hnav saum qaum ntuj yog sab nruab siab. Peb lub ncauj lam lees ua neeg teev Yes Xus, tiam sis peb lub siab dub qas txig, tsis hloov peb lub siab phem pov tseg, peb zoo li tus neeg nyob dub lus tsis muaj lus teb Huab Tais. Peb yeej tsis nyiam, tsis quav ntsej Tswv Ntuj thiab tsis hlub neeg nyob ntiaj teb no. Peb lub ncauj lam teev ntuj, peb lub siab dub siab phem tsis hloov ib qho, tej zaum tseem lim hiam tshaj qub ntxiv. Leej Txiv nug peb, tim li cas ? Peb yeej tsis muaj lus teb, kawg nyob tug dub lus saum qaum ntuj li nyob ntiaj teb. Tus yuav ntiab peb tawm nraum zoov yog Leej Txiv. Vim li ntawd, nyob ntiaj teb, peb yuav siv zog ua peb txoj dej num tub txib. Peb yuav xub hloov peb lub siab phem ua ntej.

    Ib tsoom phooj ywg, peb tus neeg teev Yes Xus txoj dej num yog nrog Yes Xus taug txhua txoj xub ke lawv Yes Xus qab, fim txhua txhia tus tib neeg nyob ntiaj teb no. Qaum ntuj qhib rooj lug caw tag ntiaj teb neeg tuaj mus xaus tshoob nrog Leej Pleev Yes Xus, tus tseem Vaj Ntxwv kav lub ntuj thiab daim av ciaj sia nyob tsis muaj caij kawg. Qaum ntuj loj li loj, dav li dav, tag ntiaj teb tib neeg mus nyob tsis puv ib ceg kaum ntuj. Peb npaj hloov peb lub siab, thov kom peb leej niam Mab Liab tus ua peb ntej saum qaum ntuj qhia peb mloog peb tus Huab Tais Yes Xus.


    Le 07.10.2011 Cwj Vuam Chiv.





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 15th October 2011, 6:58 am




    Rau hnub tim 16 lub 10 hli 2011

    Tsoom ntseeg thiab phooj ywg hmov tshua,


    Vim peb yog neeg teev Tswv Ntuj, thov caw peb txhua tus xyiv fab cov txoos Txi Ntuj txhua txhia lub sij hawm, cheem peb tseem muaj sia nyob ntiaj teb no. Kev xyiv fab yog pub yam peb muaj zoo tshaj plaws thiab ntxim Tswv Ntuj siab rau Tswv Ntuj npaum li nws pub rau peb, txuag peb txoj sia hauv ntiaj teb no thiab lwm tiam ciaj nrog Tswv Ntuj ciaj. Zaj Ntawv Moo Zoo peb yuav los nthuav ob peb los nram qab no, yog cov lus Yes Xus teb rau cov neeg uas cov Fas Lis Xais tso tuaj sim nws. Vim peb kuj yog neeg ntseeg Tswv Ntuj tib yam li thaum ub cov tuaj sim Yes Xus thiab cov Fas Lis Xais. Peb yuav nthuav ob nqe lus raws li no :
    1-Cov Fas Lis Xais kev teev hawm Tswv Ntuj raws li Mais Xes qhia.
    2-Peb kev teev hawm Tswv Ntuj raws Huab Tais Yes Xus qhia.

    1-Cov Fais Lis Xais kev teev hawm Tswv Ntuj. Lawv yog cov txwj laus, cov thawj leej choj, cov thoob xwm qhuab qhia tsoom pej xeem His Xais Lais teev hawm Tswv Ntuj raws li Mai Xes tus txhooj tus cai teev hawm Tswv Ntuj. Kawg Yes Xus, lawv pom tsis yog Fas Lis Xais, tsis yog thawj leej choj, tsis yog thoob xwm tsis qhuab qhia, tsis ua li lawv nyiam. Lawv pom Yes Xus ua tej yam tsis haum thiab tsis dhos lawv tej lus qhuab qhia tsoom pej xeem. Lawv hais tias Yes Xus txw neeg kom yuam kev thiab tsis hwm Mai Xes txoj cai teev hawm Tswv Ntuj. Lawv iab liam Yes Xus coj xoob, tsis hwm txoj cai : thaum muaj pluas noj, tsis yaug tes raws kev raws cai, tseem cia li los noj mov ; txog hnub caiv, xas npas tos, tsis caiv li, tseem pheej ua qav ua num muaj cuab kav kho neeg mob hnub caiv ; pom tej neeg sau se, neeg txhaum, neeg mob ruas, tsis txav kev kom deb, haj tseem mus koom tsum, mus tham pem, mus poo lawv, mus nrog lawv nyob nrog lawv zaum, tsis tau pom dua, tsis muaj tus ua li ntawd txhaum thiab rhuav txoj cai…Lawv meem txom thiab ua rau lawv ntxub heev. Lawv tsis zoo cia li lam liam Yes Xus, vim muaj neeg coob qhuas Yes Xus, pom Yes Xus kev ncaj ncees, pom tej hwj huam Yes Xus ua tau, lawv ua tsis tau, neeg los poog Yes Xus coob zuj zus. Hauv zaj nyeem hnub no, lawv tso neeg tuaj sim kom Yes Xus hais lus yuam kev ces lawv tau cai txwv, muaj cai ntes thiab tau muab Yes Xus dov, tsoom pej xeem yuav tsis tib hais tsis tau lawv : “Xib Hwb, peb paub koj yog ib tug neeg ncaj, koj qhia tseeb Tswv Ntuj txoj kev thiab koj tsis tuaj leej tib neeg twg tog thiab tsis tsom tib neeg twg ntsej muag ;17 Hais rau peb saib koj xav li cas : puas yuav tsum them se rau Kais Xas los tsis them ?” Qhov Yes Xus teb rau lawv yog qhov lawv tsis nco qab tos. Qhov Yes Xus teb lawv yog qhov lawv tsis ua li lawv txoj cai thiab lawv lo lus qhia. Qhov ncaj, qhov yog lawv tsis ua, lawv mus ua tej yam xu kev das thiab yuam kev rhuav. Tsis tas li ntawd, cov yuam kev hauv kev qhuab qhia, ntawm kev coj neeg yog lawv. Cov qhuab qhia tsoom pej xeem neeg tsis ncaj kab tsis ncaj ke, coj tseev kom sawv daws taug lawv kab raws lawv lw, yog lawv cov ua thawj. Yes Xus paub thiab pom lawv qhov yuam kev no. Yes Xus hais ntau zaus, qhia lawv npaum twg los lawv tsis yuav, tsis mloog Yes Xus qhia.

    2-Peb kev teev hawm Tswv Ntuj. Peb txhua tus yuav xyiv fab tas peb sim neej kom peb tsis txhob yuam kev li cov Fas Lis Xais. Vim li ntawd, kuv tus kheej kuv paub thiab pom kuv tsis muaj tus tsi zoo thiab ntxim Huab Tais Tswv Ntuj siab. Tiam sis, tej zaum nej muaj tej yam zoo ntxim Tswv Ntuj siab kuv tsis pom thiab tsis paub. Yog nej leej twg muaj mas kuv nrog tus ntawd yim zoo siab xwb. Vim nws yuav tau txais koob hmoov ntau ntawm Tswv Ntuj li cov neeg siab dawb siab ncaj. Vim tus neeg ncaj ua tau thiab pub tau rau Tswv Ntuj tej yam ntxim Tswv Ntuj siab. Txawm yog peb tsis muaj tus tsi ntxim Tswv Ntuj siab pub tau rau Tswv Ntuj, peb yim yuav xyiv fab txoj kev teev hawm Tswv Ntuj. Vim peb tsis muaj tus tsi muab rau Tswv Ntuj, peb thiaj li huas caij huas nyoog peb muaj, qee kom tau sij hawm tuaj ntsib Tswv Ntuj teev Tswv Ntuj. Peb yog me nyuam neeg xwb, nyiaj thiab kub peb tsis muaj. Peb tej txheeb tej ze, tej phooj tej ywg muaj mob dias hau, peb tsis yog kws tshuaj, peb pab tsis tau lawv dab tsi. Tiam sis txawm peb yog me nyuam neeg, yam loj neeg qhuas peb tsis muaj muab los tej yam me ntawm peb ntiag tug peb muaj. Peb muaj caij muaj nyoog, peb muab tau qee tau peb lub caij nyoog. Niaj hnub, peb muaj sij hawm mus nrhiav noj nrhiav haus, muaj caij nyoog nyob tham pem ua si. Yog peb tsis qee lub sij hawm tuaj fim Tswv Ntuj, teev hawm Tswv Ntuj, mloog Tswv Ntuj lus, ces peb yog tus tub nkeeg thiab pluag khee kawv tsis tsim nyog ua neej nyob. Huab Tais Tswv Ntuj paub peb zoo, nws tsis tos tej yam loj loj ntawm peb kom peb peev xwm tsis cuag muab rau nws yuav txaus peb txhawj. Tiam sis, Tswv Ntuj tos lub caij nyoog peb qee tau mus teev hawm, tuaj vij, tuaj seev peb lo lus qhuas Tswv Ntuj : “Nej kav tsij rov Kais Xas tug rau Kais Xas thiab Tswv Ntuj tug rau Tswv Ntuj.” Yam li cov me nyuam neeg ncaj ncees dawb huv tos lawv tau koob tau hmoov yeeb vim lawv nquag thiab mloog lus. Ib hnub, lawv teev yim zaug Tswv Ntuj los twb tseem tsis txaus lawv yees. Yeej muaj tseeb tiag li Yes Xus qhia rau cov neeg tuaj sim Yes Xus : ntawm nqe nuj nqe se, nom tswv tsis lam yib tus twg tsis them nws qhov se rau nom tswv yeej tsis tag plaub. Tus tawv tshaj, yeej tawv tsis dhau tus txhooj tus cai, leej twg tshuav se, kawg them thiaj dim tsi raug nplua, tsis raug cuab. Yog peb them se rau nom tswv, vim peb hwm nom tswv, mloog nom tswv lus. Yog peb mloog nom tswv lus ces peb tsis muaj plaub ntug nrog nom tswv. Peb twb ua tau rau nom tswv, peb kuj ua tau rau Huab Tais Tswv Ntuj. Nom tswv twb loj tsis cuag Tswv Ntuj, peb twb mloog nom tswv cai tswj hwm. Tswv Ntuj nws loj tshaj nom tswv npaum li cas, peb kuj yuav yim huab maj khaws kom tag Tswv Ntuj lus coj peb lub neej. Yes Xus tsuas piav me me rau cov tuaj sim nws, qhia kom lawv xyiv fab rau Huab Tais Tswv Ntuj tug npaum li lawv xyiv fab ua rau nom tswv Kais Xas tug. Puas yog li ntawd, cov neeg ncaj ncees dawb huv nquag thiab mloog lus yeej tau koob tau hmoov ntawm Tswv Ntuj tiag. Yog peb tig mus ntsia cov neeg siab ncaj, lawv muab tau lawv lub caij nyoog pab ib zeej tsoom neeg. Ua cas lwm leej lwm tus ho muab tsis tau nws lub caij nyoog los pab luag tej ? Peb tseem pom lawv tsis muab lawv lub caij nyoog nkaus xwb, lawv tseem muab lub neej thiab lawv txoj sia cev rau Huab Tais Tswv Ntuj cawm cov neeg pluag, raug luag ntxub, raug luag hiam. Vim li ntawd, nyob Mes Kas teb, tus xib hwb Martin Luther King tau muab nws lub neej los coj cov Dub thiab cov Dawb kom sib haum xeeb txhob sib cais, kom los sib hlub ua kwv ua tij, tsis txhob sib ntxub ua yeeb ncuab sawv daws nyob ua zej ua zos. Vim li ntawd, cov neeg ntxub nws tau muab nws tua tuag hnub xiab 4 lub plaub hlis 1968 nyob Memphis. Muaj coob leej cov neeg ncaj nyob ntiaj teb muab tau lawv txoj sia cog rau Tswv Ntuj txhais xib teg raws Huab Tais Yes Xus qhia mus lawv Huab Tais Yes Xus qab. Thaum peb ua neej nyob, peb muab tau peb lub neej thiab txoj sia rau Tswv Ntuj. Hnub peb qaij qaug, peb kuj muab tau peb txoj kev tuag rau Tswv Ntuj tib yam : “46 Qw ib suab nrov muaj ceem, Yes Xus hais : Txiv, kuv muab kuv tus plig tso hauv koj txhais tes, hais li ntawd ces nws siav tu nrho LK 23,46.” Vim li ntawd, txawm peb lub cev cwj yag ua plhaub mag los thaum peb tseem ciaj nyob, peb teev peb hwm Tswv Ntuj, peb txawm yaj ua plua av plua tshauv los Tswv Ntuj muaj hwj huam tsis txhawj yuav rub peb tes nqus peb npab sawv tsim txoj sia tshiab lawv Huab Tais Yes Xus qab.

    Ib tsoom ntseeg thiab phooj ywg, peb yuav ua peb tus Huab Tais Yes Xus tsaug tsis txawj tag rau nws kev hlub peb ntiaj teb neeg. Nws xav pab peb txhua tus kom peb lub neej nyob kaj siab lug hauv ntiaj teb no thiab hnub kawg, kom peb tau nrog nws ua ke mus ib txhiab ib txhis saum qaum ntuj. Peb twb paub ntsoov, tsis yog dab yuav pab tau, cawm tau peb ; tsis muaj lwm tus huab tais twg yuav hlub peb cuag peb tus Huab Tais Tswv Ntuj. Peb nco ntsoov saub His Xais lo lus hnub no : “6 Kom sawv daws paub, dua kuv tus tseem Huab Tais txij hnub tuaj txog hnub poob tsis muaj ntxiv.” Vim Tswv Ntuj hlub peb, nws xaiv tau peb los ua neeg teev hawm nws. Vim li ntawd, lub caij nyoog teev hawm peb tus Huab Tais Tswv Ntuj ua tshais ua hmo muaj txiaj ntsim npaum li cas. Xav kom peb tshaib thiab nqhis txog peb tus Huab Tais li peb tshaib thiab nqhis kev noj kev haus.



    13.10.2011 Cwj Vuam Chiv








    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    Sponsored content

    Re: Txiv Plig Cwj Vuam Chiv Yaj Nthuav Ntawv Ntshiab

    Post  Sponsored content Today at 11:30 pm


      Current date/time is 6th December 2016, 11:30 pm