Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» Thov Leej Ntshiab YOS XES
by Maiv Tooj Today at 10:36 am

» COV ZAJ NYEEM NRUAB LIS PIAM XYOO I 2016-2017
by Mim Yesterday at 2:09 pm

» COV ZAJ NYEEM NRUAB LIS PIAM XYOO II, 2015-2016
by Mim Yesterday at 1:29 pm

» COV ZAJ NYEEM HNUB CHIV XYOO A 2016-2017
by NrhiavTswvNtuj 1st December 2016, 12:54 pm

» XH.Zoov Ntxheb Yaj Nthuav Ntawv Ntshiab.
by Maiv Tooj 1st December 2016, 12:35 pm

» XH. Yaj Zoov Ntxheb lub Tsev THOOB TSIB
by Maiv Tooj 1st December 2016, 12:33 pm

» Qhia keeb kwm kev ntseeg. TP.Cwj Vuam CChiv.
by Maiv Tooj 28th November 2016, 9:58 pm

» Yes Xus lub ntsej muag tiag tiag.
by NrhiavTswvNtuj 26th November 2016, 1:52 pm

» HMOOB NPAM NAJ XEES
by NrhiavTswvNtuj 21st November 2016, 9:15 am

» MOO QAIJ QAUG
by Maiv Tooj 20th November 2016, 9:45 am

» TP.Txhiaj Foom lub TSEV Ntawv
by Maiv Tooj 19th November 2016, 12:04 pm

» COV ZAJ NYEEM HNUB CHIV XYOO C 2015-2016
by NrhiavTswvNtuj 19th November 2016, 4:57 am

Suav neeg tuaj saib, txij hnub 17/09/2010 los mus.


    Txiv Plig Cwj Vuam Chiv Yaj Nthuav Ntawv Ntshiab

    Share

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 1st April 2012, 9:58 am




    NTHUAV NTAWV NTSHIAB.




    Rau hnub NQUAM NPLOOJ, tim 01 lub 04 hli 2012

    Ib tsoom niam txiv, kwv tij neej tsa phooj ywg nquag mloog Tswv Ntuj lus,

    Hnub no, tas nrho zeej tsoom neeg teev Yes Xus hauv Koom Txoos Kav Tos Liv thoob ntiaj teb ua lub hmoov nqaum nplooj qhib lub lis piam ntshiab. Peb zoo siab caw tas sawv daws mloog Mas Kos zaj ntawv Moo Zoo piav txog Yes Xus lub neej kawg. Yog ib zaj lus ntev hauj sim, peb yuav piav tsis tag zaj lus no. Tiam sis, peb thov Leej Ntuj Plig Ntshiab coj sawv daws kev, qhib sawv daws lub siab los npuab Huab Tais Yes Xus. Peb tsuas nthuav tib lub ntsiab lus tseg ua piv txwv txhawb peb lub neej nyob ntiaj teb no. Vim ib hnub twg los txog, peb lub neej yuav xaus yuav kawg nyob ntiaj teb no. Txoj kev Huab Tais Yes Xus rhawv ua Vaj Ntxwv rau peb taug ua peb ntej lawm, peb yuav taug Yes Xus hneev, peb thiaj tsis mus ciaj dab phem tub ki, mus tshwm qaum ntuj txais Tswv Ntuj txiaj tsim ciaj noob vaj ntxwv lawv Yes Xus qab.

    Thaum Huab Tais Yes Xus tseem ua neej nyob, nws coj nws cov thwj tim tuaj mus koom lub hmoov hla nyob saum lub tuam ceeb Yes Xus Xas Les. Lawv tuaj txog ze ze ntug nroog lawm, lawv tseem so hauv lub zos Npes Tas Nis, hauv ib yig neeg mob ruas Xis Moos tsev. Yog thawj zaug thiab yog zaum kawg, muaj ib tug poj niam hlub Yes Xus tag npaum li ntawd : “muaj ib tug poj niam chaws los, nqa tau ib hwj tshuaj tsw qab hom zoo tshaj tej thiab tus nqe hnyav kawg, muab lub hwj tsoo, nws muab hliv rau saum Yes Xus taub hau. 4 Ces qees leej yws zom zaws : “Nkim tej tshuaj tsw qab no ua tus tsi ? 5 Yog muab muag ces twb tau peb puas lub txiaj nyiag thiab pab tau tej pluag lawm.” Lawv tau yws tus poj niam. 6 Yes Xus thiaj hais lawv tias : “Cia nws ua nws ! Pheej yuav ua ntxhov nws siab ? Yog nws kev khuv leej nws ua rau kuv…8 Nws ua tag nrho li nws muaj peev xwm ua. Nws tsuag kuv lub cev tsw qab log kuv ua ntej.” Tsuas kawg Yes Xus tib leeg thiaj paub lub caij kawg los txog rau nws lawm. Yes Xus hla lub zos Npes Tas Nis no zaum kawg. Tshuav tsis ntev, Yes Xus yuav hla lub ntiaj teb thiab, tsis muaj lwm zaus rau tus poj niam no hlub Yes Xus, nws hwj tshuaj tsw qab (300 txiaj thaum ub yog ze 900 €) coj los tshuag Yes Xus no, yog lub cim khee tag nws kev hlub Yes Xus. Vim thaum Yes Xus sawv ciaj rov los, Yes Xus tsis noj tej txhiam xws ntiaj teb no lawm, nyiaj txiag los tsis siv thiab tej tshuaj tsw qab no los tsis muaj txiaj ntsim lawm. Tib yam nkaus rau Yes Xus kev hlub nws cov thwj tim thiab hlub lub ntiaj teb neeg, peb puas rua muag pom Yes Xus khee tag Yes Xus kev hlub lub ntiaj teb neeg hauv nws cov hnub kawg. Yog peb tsis pom Yes Xus kev hlub peb, lub lis piam ntshiab no yuav tsis ntxiv nuj nqes dab tsi rau peb txoj kev ua neeg teev ntuj, hwm ntuj. Tsis txhob ua li Yus Das, tseem yog tus ntxeev siab muab Yes Xus muag 30 lub txiaj rau cov txwj laus, vim Yes Xus kev hlub Yus Das tsis muaj txiaj ntsim rau Yus Das : “Kuv hais tseeb rau nej : ib leeg hauv nej, nrog kuv noj mov, nws yuav muab kuv rau luag.” 19 Sawv daws ntshaus tag, lawv ib leeg zuj zus nug nws : “Puas yog kuv ?” 20 Nws teb lawv tias : “Yog ib leeg hauv pab kaum ob, nws nrog kuv koom tib taig.” Yes Xus cawm cov thwj tim dim kev tuag hauv paj dej Tis Npes Lias nplaim dej nphau khwb lawv nkoj yuav tog, Yes Xus cheem tau cua thiab dej tus yees ua lawv siav dim. Zoo li pab 12 no yeej tsis xeev pom Yes Xus tej txiaj ntsim no li. Ziag no, Yes Xus raug teeb meem, tus twg los tus hle, nyias tso nyias tes khiav ntshiab tag. Pob Zeb, tus thawj ntawm pab 12 twb tsis kam lees paub Yes Xus.
    Luag tej ob cag, lwm cov sab nraud, cov thawj leej choj, cov thoob xwm thiab cov txwj laus tuaj mloog Yes Xus lus qhuab qhia, tsis yog tuaj qhib siab los ntseeg Yes Xus hwm Yes Xus. Lawv tuaj npaj thuam Yes Xus tej hwj huam kho neeg dig muag, kho neeg zuav ces, kho neeg mob ruas vim Yes Xus tsis caiv xas npas. Lawv ntsia Yes Xus kev hlub cov pluag loj tsis npaum li lawv kev caiv xas npas. Tiam sis, tsoom pej xeem ntseeg Yes Xus coob zuj zus, qhuas Yes Xus yog tus Mes Xias, tus Pleev muaj hwj huam tsa tau neeg tuag rov ciaj sia, ua rau cov thawj coj mob siab thiab khib. Lawv hais tais Yes Xus txw neeg yuam kev, lawv yim ntxub Yes Xus heev, vim Yes Xus tsis ua li lawv zaj. Ziag no, zoo caij zoo nyoog, lawv ntes tau Yes Xus hauv lawv tes lawm, lawv yuav tsis tso Yes Xus tseg : “60 Tus thawj leej choj thiaj sawv tsees hauv nruab nrab nug Yes Xus hais tias : “Koj tsis teb dab tsi rau lawv cov no tej lus hais koj ?”61 Nws nyob ntsiag to tsis teb ib los. Tus thawj leej choj rov nug nws dua hais tias : “Leej Pleev, tus nto koob meej Leej Tub yog koj lod ?” 62 Yes Xus hais tias : “ Yog kuv, thiab nej yuav pom neeg Leej Tub zaum ntawm tus muaj hwj huam sab xis tuaj nrog twv huab saum ntuj tuaj.”63 Tus thawj leej choj dua rhe nws lub tsho tshaj sab hais tias : “Peb tseem nrhiav pov thawj ntxiv li cas ? 64 Nej twb hnov ntsoov nws rov taw tuam ntuj, nej xav li cas ?” Tas nrho cov ntawd txiav txim rau nws tsim nyog tuag.” Ib txwm keeb, neeg kev sib ntxub kawg ua nqaij ntuag ntshav nrog. Txawm ob kwv tij xwb los yeej kawg sib rhuav, nkawm niam txiv los yeej yuav tsum sib nrauj, tej yeeb ncuab los kawg sib tua, tej teb chaws los kawg ua tsov ua rog. Kev sib ntxub yog kev tuag, kev txhaum, kev ciaj dab phem tub ki.


    Tsuas muaj tib txoj kev pab tau peb dim kev sib ntxub, yog kev npuab Yes Xus kev ua Vaj Ntxwv. Yes Xus kev ua Vaj Ntxwv yog kev hlub neeg (La charité). Yes Xus kev ua Vaj Ntxwv tsis zoo li ntiaj teb kev ua huab tais vaj ntxwv cia tub mab tub qhe thiaj yus tiam yus, noj pej xeem huab hwm dag zog. Yes Xus kev ua Vaj Ntxwv yog tiam ntiaj teb neeg, tuaj hu ntiaj teb neeg mus lawm qaum ntuj. Yes Xus tuaj hu ntiaj teb neeg ua Yes Xus thwj tim. Hauv cov thwj tim, kuj muaj tus sawv tiv Yes Xus los Yes Xus nrog nws tus yeeb ncuab thwj tim ua phooj ywg, tos ntsoov hnub yeeb ncuab thim xav hloov nws lub siab dub siab lim hiam. Yes Xus paub ntsoov Yus Das yog tus thwj tim lim hiam ; Yes Xus paub ntsoov Pob Zeb yog neeg tais caus ; Yes Xus paub peb sawv daws txhua leej, ib txhia siab dub, ib txhia siab hlob, ib txhia siab ntse rov qwb tsi ntse rov hniav…txawm peb zoo li ntawd los Yes Xus xaiv peb los ua nws thwj tim, koom tsum thiab koom tais, koom ib cuab ib yig ua nws haiv neeg ntseeg. Yes Xus niaj hnub tos saib peb puas thim xav li Pob Zeb, hloov siab tshiab ; los peb yuav ua neeg twm xeeb li Yus Das yeem mus dai tuag, tsis yeem hloov siab tshiab. Yes Xus tsis siv tej hwj huam Yes Xus muaj los hlawv tej yeeb ncuab kom yaj ua plua tshauv, tsis nqa riam phom tua tej yeeb ncuab kom tu noob nhro. Yes Xus kev ua Vaj Ntxwv tsis muaj ntxub tej yeeb ncuab, tsuas muaj hlub xwb, tsuas muaj hlub tus neeg txhaum, hlub tus pluag, hlub tag ntiaj teb neeg txhua leej txhua tus. Yes Xus kev ua Vaj Ntxwv tsi hla tib neeg kev ploj tuag, tiam sis tuag theej tus neeg phem lub txim txhaum thiab tuag nrog cov neeg raug txim ua ib nqag : “31 Cov thawj leej choj ib leeg dhau ib leeg hnyos nrog cov thoob xwm : “Nws pom xeeb cawm tau luag, nws ho cawm tsis tau nws tus kheej; 32 Kom Leej Pleev His Xas lais tus vaj ntxwv nqes nroos saum ntoo cuam ziag no rau peb pom kom peb ntseeg.” Yog nej tus me nyuam nej hlub hlub ntxeev siab nqa phom los muab nej tua, nej yuav nrog nej tus me nyuam sib hais tim li cas nws thiaj xav tua nej. Tiam sis, yog nws yuam qhi muab nej tua, nej kuj tsis pom qab cheem tau nws thiab nej txoj kev hlub nws yeej tsis tu. Yes Xus kuj tau thov Tswv Ntuj tshem lub nra raug txom nyem hauv Yes Xus lub neej. Peb yuav tsis txhob to taub yuam kev tias Yes Xus nrhiav kev raug txom nyem. Tim li cas Tswv Ntuj nyob ntsiag to thaum Yes Xus hu txog Tswv Ntuj tuaj pab : “Es Los His, Es Los His, Les Mas Xas Npas Thas Nis, txhais tias : Kuv tus Tswv Ntuj, kuv tus Tswv Ntuj, ua cas koj tso kuv tseg ?” Peb ua neej nyob, muaj tej lub caij nyoog, thaum peb raug kev txhawj xeeb, peb hu niam hu txiv pab, hu ntuj pab : “Niam aw! Pab aw ! Ntuj aw ! Pab aw !” Niam txiv los pab tsis tau, ntuj teb los nyob ntsiag to tsis pom kev pab tuaj txog. Yog tim li cas ? Peb yuav tig mus mloog cov neeg siab dawb lus qhuab qhia : “Hmo tsaus tshaj tej, txhawj xeeb thiab tshaib kev hlub, Awb ! Hmoov zoo kawg ! Kuv tawm rooj tsis muaj tug pom, Tiam sis kuv chaw nyob thaj yeeb lug, Hauv hmo zoo ntawd, Kuv nraim twj ywm tseg, tsis muaj tug pom, Kuv kuj tsis pom tus tsi, Tshuav qhov pom kev cig hauv kuv nruab siab coj kuv kev. Nws coj kuv kev tau zoo tshaj nruab hnub nrig, mus rau thaj chaw tus hlub kuv nyob tos kuv, Tsis muaj lwm tus yuav pom tau. Awb kev tsaus tus coj kuv ! Awb kev tsaus zoo hlub dua kev kaj ! Awb kev tsaus qaws tus hlub nrog tus tshua ua rau tus tshua plhis hauv tus hlub ! Par une nuit profonde, Étant pleine d'angoisse et enflammée d'amour, Oh! l'heureux sort! Je sortis sans être vue, Tandis que ma demeure était déjà en paix. Dans cette heureuse nuit, Je me tenais dans le secret, personne ne me voyait, Et je n'apercevais rien, Pour me guider que la lumière Qui brûlait dans mon cœur. Elle me guidait, Plus sûrement que la lumière du midi, Au but où m'attendait, Celui qui m'aimait, Là où nul autre ne se voyait. O nuit qui m'avez guidée! O nuit plus aimable que l'aurore! O nuit qui avez uni, L'aimé avec sa bien-aimée, Qui a été transformée en lui! La nuit obscure Saint Jean de la Croix 1578” Txawm peb kev hu ntuj hu teb ntsiag qas to, ua tsaus peb ntuj npaum twg, yuav ua rau peb txhawj npaum li cas, kom peb txhob poob siab. Cov leej ntshiab thiab Huab Tais Yes Xus puav leej mus tib txoj kab chaws tib lub dawm ua peb ntej, peb tsuas taug lawv qab, kom peb cim ntsoov Huab Tais Yes Xus kev hlub peb rau nruab siab. Peb yog tus nws tshua yuav plhis tau hauv Huab Tais tus hlub peb xub ntiag.

    Ib tsoom niam txiv kwv tij neej tsa, lub lis piam ntshiab no qhia rau peb kom peb pom tias Yes Xus lub neej kawg, kuj yog peb txoj kev kawg ib hnub twg nyob ntiaj teb no. Peb kev tig los mloog cov zaj nyeem hauv lub lis piam ntshiab yuav cawm tau peb, pab tau peb zoo siab ris peb lub nra thiab ua peb tuaj zog kwv peb tus ntoo cuam lawv Yes Xus qab : “21 Lawv yuam Xis Moos Kws Les Nais, As Les Xas Nrais thiab Lus Fus nkawd txiv, mus teb los hla ntawd, kom kwv nws tus ntoo cuam.”

    29.03.2012 Cwj Vuam Chiv






    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 6th April 2012, 11:41 am



    NTHUAV NTAWV NTSHIAB.


    Rau hnub Hmoov Hla tim 08 lub 04 hli 2012


    Tas zeej tsoom ntseeg thiab phooj ywg,


    Hnub no yog ib hnub txawv txhia hnub, yog ib hnub muaj txiaj ntsim loj dua tej rau peb tus neeg ntseeg Tswv Ntuj teev Tswv Ntuj. Vim li ntawd, peb yuav los nthuav ob peb los txog Huab Tais Yes Xus lub txiaj ntsim Hmoov Hla no.

    Ib tsoom phooj ywg, peb yuav pauj tsis tau lub txiaj ntsim peb tus Huab Tais Yes Xus muab pub rau peb noob neej hauv lub hnub nyoog Hmoov Hla no. Peb yuav ua neeg ntsej lag muag dig tsis paub tsis pom lub txiaj ntsim Hmoov Hla li tej nyuag me nyuam koom txoos teev Yes Xus tsis tau. Yog peb tsis lauj zias lub caij lub nyoog teev hawm Huab Tais Yes Xus sawv ciaj sia hauv lub caij nyoog Hmoov Hla, peb ua tsis nyog ib tug neeg teev Tswv Ntuj hwm Tswv Ntuj. Lub Koom Txoos Kav Tos Liv saib kev teev hawm Huab Tais Yes Xus sawv ciaj Tswv Ntuj sia nyob ib txhiab ib txhis loj kawg. Peb yuav xyiv fab mloog peb lub Koom Txoos Niam qhia txhij qhia txhua Huab Tais Yes Xus cov lus rau peb kom peb txawj ua neeg hwm ntuj thiab hwm neeg nyob ntiaj teb no. Peb txhob lam mloog tej nyuag koom txoos teev Yes Xus loj cov kem tsuab tsis paub teev hawm Yes Xus raws caij raws nyoog. Peb yuav mloog thiab raws kom cuag lub Koom Txoos Niam tej lus qhuab qhia, tsis txhob yuam kev tawm hauv lub Koom Txoos Niam mus : “49 Zam txawm teb hais tias : “Xib Hwb, peb pom muaj ib tug ua koj npe ntiab dab phem, peb xav txwv nws, vim nws twb tsis caum peb.”50 Yes Xus hais rau nws : “Nej txhob txwv, tus twg tsis tiv nej yog tuaj nej tog Lk 9,49-50.” Tus neeg ncaim thiab tiv lub Koom Txoos Niam, nws kuj ncaim thiab tiv kev teev hawm thiab plam txoj kev ntseeg lub ntsiab (le dogme). Tus plam txoj kev ntseeg lub ntsiab zoo li lub thoob tshau qab cug dej tsis tau dej, pluag tsis muaj tej txiaj ntsim Yes Xus muab tuaj rau tsoom ntseeg hauv Koom Txoos Kav Tos Liv. Tsis tas li ntawd, tsis yog nws tus kheej yuam kev xwb, nws tseem pus luag tej ob cag yuam kev nrog nws thiab. Tus neeg teev Tswv Ntuj, hwm Tswv Ntuj raws kev raws cai li Koom Txoos Kav Tos Liv qhia, nws mloog Huab Tais Yes Xus lus qhia. Tus neeg cam thawj tsis mloog thiab tsis hwm lub Koom Txoos Kav Tos Liv, kuj yog tsis mloog Huab Tais Yes Xus cov lus qhia : “18 Kuv hais rau koj, koj yog Pob Zeb, saum lub pob zeb no, kuv yuav txhim kuv lub koom txoos Mt 16,18” Nej sim xav, peb ntseeg thiab peb vam tias cov neeg teev Yes Xus muaj Yes Xus txiaj ntsim. Yog muaj tseeb li ntawd tiag, tus mloog thiab hwm Yes Xus tej lus tag nws lub siab lub ntsws, tag tswv yim, tus ntawd yeej txais Yes Xus txiaj ntsim ntau tshaj tej. Vim li ntawd, cov leej ntshiab, yog cov neeg muaj Huab Tais Yes Xus txiaj ntsim tshaj sawv daws, Huab Tais Yes Xus pub lawv ua tau tej lub cim muaj hwj chim loj tib neeg ua tsis tau. Cov leej ntshiab yog cov neeg teev hawm Yes Xus raws kab raws ke, raws li cov thwj tim qhia.
    Hnub no, tag ib tsoom neeg ntseeg Kav Tos Liv thoob ntiaj teb ua lub Hmoov Hla, hawm Huab Tais Yes Xus sawv tsees ciaj Tswv Ntuj sia raws li cov thwj tim qhia tseg : “6 Xis Moos Pob Zeb lawv nws qab tuaj txog, nws chaws mus hauv lub ntxa. Nws xam pom cov hlab ntaub nyob ntawd, 7 Daim ntaub, daim qhwv nws taub hau, tsis xyaw cov hlab ntaub nyob ntawd, tiam sis kauv cia rau ib qho nyob nws ib cag. 8 Lwm tus thwj tim, tus xub tuaj txog tom ntxa, chaws los thiab nws pom nws ntseeg…” Peb txoj kev ntseeg Tswv Ntuj, peb txais ntawm cov thwj tim los, peb tsis lam xev coj qhia sawv daws teev ntuj. Peb nco ntsoov cov thwj tim tej txiaj ntsim, vim lawv yog cov qhia kev ntseeg Tswv Ntuj, teev Tswv Ntuj rau peb. Vim li ntawd, peb tsis muaj cuab kav thuam vaj qhia thiab cov tswv qhia, cov sawv los taj cov thwj tim chaw. Peb kev qhia neeg ntseeg Tswv Ntuj yuav tsum mus raws li zaj ntseeg (le credo) lub Koom Txoos tau sau tseg. Peb tsis paub yuav ua cas piav Yes Xus raug hiam dai saum nkhib ntoo cuam tuag lawm, nws ua li cas sawv tsees ciaj sia. Cov thwj tim yog cov mus pom daim ntaub qhwv tuag tais zoo zoo tseg, tsis pom Huab Tais lub cev lawm. Yog lub cim zeem tias Yes Xus ua Huab Tais ciaj Tswv Ntuj sia lawm. Lub neej sawv ciaj Tswv Ntuj sia, tsis yog yuav rov los thawj thiab khee lub qub neej ua, hnav tej tsoos tsho, noj tej txhiam xws, tej zaub mov li qub lawm. Lub neej sawv ciaj Tswv Ntuj sia yog lub neej tshiab tag nrho : txoj sia, tsoos tsho, txhiam xws, lub cev…tag txhua yam tshiab tag nrho peb qhov muag pom tsis tau thiab tsis muaj lo lus yuav piav tau. Cov thwj tim pom Huab Tais Yes Xus sawv cia sia tuaj ntsib lawv, muaj lub cev thiab ntsuj plig nyob nruab nrab hauv lawv, nrog lawv noj, nrog lawv haus, tiam sis lawv txhais tes vuag tsis tau Huab Tais Yes Xus li yav tag los. Neeg ntiaj teb, muaj nqaij, muaj txha, koj pom koj kov tau. Huab Tais Yes Xus sawv ciaj sia muaj nqaij muaj txha, tiam sis koj pom koj kov tsis tau vuag tsis tau. Lawv pom Huab Tais Yes Xus nyob thoob txhua txhia lub nroog, thoob teb chaws. Ib sij huam, Huab Tais tshwm plaws rau lawv pom dheev nws nyob nruab nrab hauv lawv, nrog lawv ua ke thiab ploj ntais ntawm lawv xub ntiag lawm.
    Lub txiaj ntsim Hmoov Hla yog lub txiaj ntsim Leej Txiv Tswv Ntuj muab pub rau peb tib neeg ntiaj teb, kom peb muaj Huab Tais Yes Xus txiaj ntsim nrog Huab Tais Yes Xus ciaj Tswv Ntuj sia. Nej sim xav, nws yog ib lub txiaj ntsim zoo tag npaum li ntawd, tim li cas peb tseem ua tej tug neeg tsis paub cai, twb tsis txawj vam tsis txawj ntshaw lub txiaj ntsim ntawd. Vim lub txiaj ntsim Hmoov Hla, peb tib neeg ntiaj teb ploj tuag tsis mus ua dab los ua tsov li Hmoob tej laus hais ; peb kuj tsis mus thawj thiab ua kab npauj kab xi, ua mab ua suav yuav rov yug dua los khee lub qub neej ua ; peb kuj tsis zoo li tej txhia neeg lam yuav npe teev Yes Xus, ib sim neej tsis paub cai teev hawm Yes Xus muaj caij muaj nyoog. Txog caij nyoog ua Hmoov Tsuj Xeeb Yes Xus los tsis paub ua Hmoov Tsuj Xeeb li ; txog lub caij nyoog hawm Huab Tais Tswv Ntuj Peb Leeg los tsis paub cai mus hawm luag ; txog lub lis piam ntshiab Yes Xus raug txom nyem theej yus tej kev txhoj kev txhaum los tsis paub cai mus pe mus thov txim ntawm luag ; txog Hmo Hla nco Huab Tais Yes Xus sawv tsees hauv kev ploj tuag los nqus peb tib neeg ciaj Tswv Ntuj sia nyob niaj txhiab ib txhis los ua tib co neeg nyob dawb dawb ncaj ncaj xwb ; txog hnub nyoog hawm Leej Ntuj Plig Ntshiab nqes los coj yus kev ua neeg thoob tsib, ua neeg siab loj siab dav phim tus neeg teev ntuj hwm ntuj los tsis paub kev cai hawm Leej Ntuj Plig Ntshiab li…Ntshai yog li ntawd, cov neeg lam ua “Church” teev Yes Xus xwb, pluag txiaj ntsim thiab tej siab ntsws thiaj twm xeeb npaum li ntawd. Cov neeg pluag txiaj ntsim no tseem muaj ntsej muag thuam Nkauj Xwb Mab Liab tus siab dawb thiab thuam ib tsoom leej ntshiab. Peb yuav zam kev deb tsis txhob npuab cov neeg pluag txiaj ntsim no. Tsis tas li ntawd, peb yuav tsis txhob muab peb txoj dej num saib hlob, cia peb tej dej num khuam peb tseg, mus tsis tau teev hawm Huab Tais Yes Xus sawv ciaj sia : “42 Nws tau ceeb toom rau peb kom mus tshaj rau zeej tsoom thiab ua pov thawj zeem tias nws yog tus Tswv Ntuj tsa los txiav txim rau cov ciaj thiab cov tuag. 43 Tas cov yaj saub twb ua tim khawv txog tus ntawd : tus ntseeg nws, txais tau kev daws txhaum vim nws lub npe.”

    Ib tsoom phooj ywg thiab ib zeej tsoom neeg mloog Tswv Ntuj lus, peb thov kom Huab Tais Yes Xus kev sawv tsees ciaj Tswv Ntuj sia txhawb peb cov neeg raug kev nyuaj siab ntxhov plawv, pub kev kaj siab lug rau peb txhua leej. Ib hnub twg los txog, kom peb txhob muaj ib tug twg mus ciaj dab xas tas tub ki, tiam sis, kom Huab Tais Yes Xus kev yeej txoj kev ploj tuag nqus peb nrog Huab Tais Yes Xus ciaj Tswv Ntuj sia mus niaj txhiab ib txhis, ua Tswv Ntuj tub ki.

    05.04.2012 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 14th April 2012, 1:21 am



    NTHUAV NTAWV NTSHIAB.


    Rau hnub tim 15 lub 04 hli 2012


    Ib zeej tsoom neeg ntseeg teev Huab Tais Yes Xus thiab phooj ywg,

    Peb nyuam qhuav ua lub Hmoov Hla, nco txog peb tus Huab Tais Yes Xus qaij qaug mus zwm av sawv tsees ciaj Tswv Ntuj sia. Ntawm no mus, peb yuav piav ob peb los txog Huab Tais Yes Xus kev ciaj sia.

    Ib tsoom phooj ywg, xav kom nej txhua leej txhua tus paub tseeb qhov no : Huab Tais Yes Xus yug los ciaj neeg nyob ntiaj teb no kom pab tau peb tib neeg lim hiam, neeg txhaum. Huab Tais thiaj raug txom nyem, raug ntxub, raug tua tuag, nrog peb noob neej ploj thiab tuag mus zwm av. Yog Huab Tais Yes Xus tsis sawv ciaj Tswv Ntuj sia, peb txoj kev ntseeg teev Yes Xus tsis txawv thiab tsis tsim nuj nqes dab tsi tshaj ntiaj teb neeg tej kev teev dab qhuas, kev teev mlom, kev teev Mas Hos Mes los lwm yam kev teev hawm. Vim Huab Tais Yes Xus hla dhau plaws kev ploj tuag, sawv tsees ciaj Tswv Ntuj sia nyob niaj txhiab ib txhis. Vim li ntawd, peb txoj kev ntseeg Yes Xus thiab teev Yes Xus muaj txiaj ntsim dua tej kev teev hawm tib si. Tag txhua txoj kev teev hawm hauv ntiaj teb puav leej zoo, tiam sis zoo tsis txaus. Tag cov thawj neeg rhawv tej kev cai teev hawm no puav leej yog neeg zoo neeg thoob tsib, txawj coj, txawj qhuab qhia, tiam sis, lawv dua toj tag tsis muaj ib tug yuav hla dhau kev ploj tuag. Tsuas yog Yes Xus tib tug xwb thiaj sawv tsees hauv kev ploj tuag ciaj sia.
    Phus Thas, tus tsim kev cai hauj sam, nws yog ib tug neeg thoob tsib, siab dawb siab ncaj txawj hlub neeg. Tiam sis, nws tsuas muab tau nws cov lus thoob tsib qhia neeg, coj neeg kom siab dawb siab ncaj li nws. Phus Thas txhiv tsis tau lwm leej lwm tus neeg mob nkeeg thiab tsis nws muaj hwj huam cawm tau tib neeg tuag kom lub cev thiab ntsuj plig sawv ciaj sia. Phus Thas tus kheej tseem khuam ntiaj teb no li tej tib neeg.
    Mas Hos Mes, tus tsim kev teev hawm Mawv Xim Lim, tsuas qhia kev thoob tsib kom tib neeg txawj sib hlub, sib haum xeeb. Nws kuj tsis muaj rab peev xwm muab tau hwj huam rau leej tib neeg twg kom ua tau hwj huam.
    Peb tej poj yawm txwv txoob muaj koob hmoov pub rau peb tej ua xeeb leej xeeb ntxwv. Tiam sis, lawv kuj tsis muaj zog yuav tiv thaiv roos tau peb cov ua xeeb leej xeeb ntxwv. Vim li ntawd, peb tej poj yawm kuj tseem qhia kom peb fiv lub ntuj tuaj pov tuaj roos peb ntxiv poj yawm lub hwj xyeej thiab.
    Peb thiaj hais tau tias, tag txhua txoj kev teev hawm nyob ntiaj teb no zoo los zoo tsis kawg thiab zoo tsis txaus. Tsuas kawg nkaus txoj kev teev Yes Xus thiaj txawv tag nrho lwm txoj kev teev hawm tib si. Txoj kev teev Yes Xus yog txoj zoo dua tej, zoo txij ntiaj teb no tshab plaws puag qaum ntuj. Yog txhais li cas ? Txhais tias kev teev Yes Xus zoo npaum no : tus tib neeg lim hiam, muaj txhaum, tiam sis, yos nws hloov tau siab ua neeg ncaj, ua neeg me, tsis txhob khav theeb, tsis txhob muab hlob, Tswv Ntuj pub tau kom tus neeg ntawd ntshiab huv tuaj, ciaj tau Tswv Ntuj tub ki thiab ua tau tej yam hwj huam neej thiab dab tsis muaj peev xwm ua tau. Tsuas kawg Tswv Ntuj thiaj pub tau tib neeg muaj Tswv Ntuj txiaj ntsim ua tej lub cim loj txaus ntshai txaus qhuas, txaus neeg hwm. Vim li ntawd, cov neeg ncaj neeg zoo muaj Tswv Ntuj hwj huam tiag tiag, yam li leej ntshiab Martin de Tours : “Muaj ib hnub, ze ntawm xyoo 389-391, Martin tseem rhuav ib lub thaj txi dab pov tseg, npoj neeg teev dab qhuas pom, ua rau lawv meem txom heev, sawv daws khiav nplawg ntia los muab nws mos. Muaj ib niag txawm rho loo tau nws rab ntaj hauv hnab los. Martin txawm muab nws lub tsho loj ua ntia pem teb, cev caj dab qoos qoos tos tus hniav ntaj. Tus yawm ntawd txawm tsa loo nws sab tes tuav ntaj, tiam sis nws cuab tau tes siab dhau ua rau nws ntxeev tiaj hlo rov qab ; nws cia li ntshai Tswv Ntuj tshee na, sawv tau los, nws thiaj los thov txhaum ntawm tswv qhia Martin.” Tej hwj huam Huab Tais Tswv Ntuj muab tuaj rau Martin no yog Tswv Ntuj kev hlub peb ntiaj teb neeg lim hiam, siab phem kom ntiaj teb muaj hwj huam npaum li saum qaum ntuj. Tus yawm ntawd ntxeev tiaj hlo rov qab ua nws siab nqig kiag ; Martin tau txais Tswv Ntuj txiaj ntsim tiv thaiv nws tsis raug hniav ntaj. Peb tib neeg ntiaj teb leej twg ntshaw, leej twg thov Tswv Ntuj txiaj ntsim ces tus ntawd yuav tau txais Huab Tais Yes Xus kev cawm. Cov neeg siab dawb siab ntshiab yog cov neeg me, neeg pluag tos rawv Huab Tais Yes Xus kev cawm. Huab Tais Yes Xus cawm tau Martin hnub ntawd. Huab Tais Yes Xus kuj yuav cawm tau peb tib yam. Txoj kev teev Yes Xus yog txoj zoo coj tau neeg ntiaj teb ciaj ua Tswv Ntuj neeg : “4 Vim tag cov yug ntawm Tswv Ntuj los yeej tuag nthi lub ntiaj teb : peb lub siab ntseeg ntawd yog kev yeej tuag nthi lub ntiaj teb.5 Leej twg yog tus yeej lub ntiaj teb, kawg tus ntseeg tias Yes Xus yog Tswv Ntuj Leej Tub.” Nej sim xav, puas muaj lwm txoj kev teev hawm dua ntawm txoj kev teev Yes Xus, yuav nqus peb neeg ntiaj teb lub cev thiab ntsuj plig mus tshwm qaum ntuj, nrog Tswv Ntuj nyob, ciaj Tswv Ntuj sia ? Dua ntawm txoj kev teev Yes Xus, tsis muaj lwm txoj kev yuav pab tau thiab cawm tau peb neeg ntiaj teb mus ciaj Tswv Ntuj sia nyob niaj txhiab ib txhis li Tswv Ntuj. Peb puas tso tau siab, puas ntseeg tau tias peb tib neeg yuav ciaj tau Tswv Ntuj sia ? Yog peb muab xav rau peb tib neeg ntiaj teb xwb, peb yuav ntseeg tsis tau. Peb leej tib neeg tsis muaj leej twg hla dhau txoj kev tuag. Tab txawm yog cov neeg ntseeg teev Yes Xus los kawg ploj tuag thiaj tag, tsis pom leej twg yuav sawv tsees ciaj sia. Tiam sis, tos peb hais tias peb tib neeg yuav sawv ciaj tau Tswv Ntuj sia, vim peb txoj kev teev Huab Tais Yes Xus qhia rau peb : “26 Yim hnub tom qab, nws cov thwj tim tseem nyob rawv sab hauv thiab Tos Mas nrog lawv ua ke. Cov qhov rooj puav leej kaw tas, Yes Xus tshwm plaws tuaj sawv hauv nruab nrab, nws hais : “Nyob thaj yeeb nej sawv daws !” 27 Thiab hais rau Tos Mas : “Cev koj ntiv tes ntawm no ntsia kuv cov tes thiab cev koj txhais tes ntawm kuv phab tav thiab txhob ua tus tsis ntseeg, tiam sis ua tus ntseeg.” 28 Tos Mas teb rau nws : “Kuv tus Huab Tais thiab kuv tus Tswv Ntuj.” Peb txoj kev teev Yes Xus qhia peb ntseeg tias, txawm peb lub cev qaij qaug ib hnub twg yuav ciab zib yaj ua plua av, plua tshauv, txhob poob siab. Huab Tais Yes Xus yuav pub peb lub cev thiab ntsuj plig sawv ciaj sia muaj hwj chim nrog Huab Tais Yes Xus hla dhau rooj ntxa. Cov neeg mloog Yes Xus lus muaj Yes Xus txiaj ntsim tiag tiag.
    Peb sim xav rau ntawm peb Hmoob, peb twb ntseeg peb tej poj yawm tej lus qhuab qhia. Thaum ib tug laus qaij qaug txwm caij txwm nyoog, Hmoob twb ua kab ke tso plig kom ntsuj plig tau kev mus thawj thiab. Yog peb Hmoob ntseeg tias ntsuj plig yuav rov los thawj thiab ua kab ua ntsaum, ua nyuj ua nees rau luag thauj, ua mab ua sua, ua noob nom noob tsw…peb tej poj yawm yog nyuag tib neeg tsis muaj hwj huam, peb twb ntseeg lawv tej lus qhia. Huab Tais Yes Xus yog Tswv Ntuj Leej Tub, tus muaj hwj huam yeej tuag nthi kev ploj tuag cog lus pub peb yeej tuag nthi kev ploj tuag thiab pub peb nrog nws ciaj Tswv Ntuj sia nyob ib txhis, peb yim huab yuav ntseeg Huab Tais Yes Xus. Tsis tag li ntawd, tos peb ntseeg tias peb tib neeg yuav sawv tsees lawv Yes Xus qab ciaj Tswv Ntuj sia ua Tswv Ntuj neeg, vim peb leej niam Nkauj Xwb Mab Liab, yog peb ntiaj teb neeg thawj thawj tug lub cev thiab ntsuj plig mus dua qaum ntuj ua peb ntej tseeb tiag. Nkauj Xwb Mab Liab twb tshwm sim rau coob leej ntau tus neeg siab dawb siab ncaj pom : tshwm rau ib tug txiv neej Mev, Juan Diego, Mexico xyoo 1531, tshwm rau Catherine Labouré, Rue du Bac, Paris 1830, tshwm rau Bernardette Soubirous, Lourdes 1858…thiab tseem tshwm nyob ntau thaj chaw ntxiv. Peb txoj kev ntseeg Huab Tais Yes Xus sawv ciaj sia muaj txiag muaj ntsig rau peb tus neeg ntseeg. Niaj hnub no, Huab Tais Yes Xus sawv ciaj sia nyob nruab nrab hauv peb nrog peb ua ke, peb txhob txhawj.

    Ib tsoom phooj ywg sawv daws, peb twb muaj lub txiaj ntsim nrog Huab Tais Yes Xus sawv ciaj sia ua Tswv Ntuj tub ki, peb yuav tsis txhob ua neeg nkees, peb yuav nrauj peb txoj kev lim hiam pov tseg, tig los nrhiav Huab Tais Yes Xus tag peb lub siab, muab peb lub neej cog rau hauv Huab Tais Yes Xus xib teg.


    11.4.2012 Cwj Vuam Chiv






    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 21st April 2012, 11:35 am

    [color=blue]


    NTHUAV NTAWV NTSHIAB


    Rau hnub tim 22 lub 4 hlis 2012


    Ib zeej tsoom ntseeg thiab phooj ywg,

    Muaj lus zoo siab peb rov tuaj sib fim dua hauv lub caij nyoog Hmoov Hla Huab Tais Yes Xus sawv ciaj sia, yog ib lub txiaj ntsim txhawb peb ua neeg ntseeg thiab teev hawm Tswv Ntuj. Tim li cas Huab Tais Yes Xus kev sawv ciaj sia muaj txiaj ntsim rau peb txoj kev ntseeg Tswv Ntuj ?

    Huab Tais Yes Xus kev sawv hauv tsoom tub tuag los ciaj sia nyob ib txhis qhib peb tsoom ntseeg teev Tswv Ntuj lub qhov muag los xam pom tib neeg ntiaj teb txhua txoj kev teev hawm, qhib peb neeg ntiaj teb lub siab txhawj xeeb, txom nyem, maub kev tsaus ntuj los mus rau txoj kev kaj lug nyob nyab xeeb thiab qhib peb lub tswv yim tsawg no kom loj tuaj, muaj ib lub tswv yim zoo thiab tshiab rau peb.
    Peb sim rua qhov muag ntsia, tas txhua haiv neeg nyob thoob ntiaj teb puav leej muaj txhua yam kab ke teev hawm. Hauv peb Hmoob kev teev dab qhuas, peb teev dab niam dab txiv, dab caj dab ces. Tsis tas li ntawd, Hmoob kuj ntseeg tias muaj ntuj. Hmoob hais tias : ntuj tsim teb raug. Hmoob ntseeg tias lub ntuj tsim lub teb thiaj raug tau, txawm tau los nyob. Tiam sis, Hmoob tsuas paub teev dab niam dab txiv, teev dab caj dab ces raws poj yawm txwv txoob qhia. Hmoob tsis teev lub ntuj, vim poj yawm tsis qhia Hmoob teev lub ntuj.
    Hauv txhua txoj kev cai teev hawm saum ntiaj teb no, tib neeg puav leej hwm ib tug huab tais ua tus loj, muaj hwj chim. Tib neeg muab tus ntawd saib hlob, hu nws ua saub thiab ua huab tais. Tib neeg mloog nws lus, teev nws, txi nws, hawm nws, tuaj khauv zig vam khom nws. Vim muaj ntau ntau tus huab tais thiaj muaj ntau txoj kab ke teev hawm saum daim npoo av. Nyias txoj kab ke qhia nyias teev hawm nyias tus huab tais. Vim li ntawd, peb pom muaj ntau ntau tus huab tais. Tiam sis, hauv txhua txoj kab ke tib neeg teev thiab hawm no, tsuas muaj tib txog thiaj yog txoj tseem kev cai teev hawm tseeb. Lwm txoj kev cai teev hawm, tsuas lam teev lwm tej huab tais tsis muaj hwj huam. Tsuas muaj tib txoj kev teev hawm thiaj yog txoj tseem thiab teev Huab Tais Tswv Ntuj tus muaj hwj huam. Vim Tswv Ntuj tib leeg xwb thiaj yog Huab Tais muaj hwj huam, txoj kab ke teev hawm Tswv Ntuj thiaj yog txoj tseem tiag.
    Yog peb tig ntsia haiv neeg ib txwm teev hawm Tswv Ntuj, haiv His Xais Lais, peb kuj pom lawv ua ntau pab ntau pawg thiab : muaj cov Fas Lis Xais, cov Xas Dus Kais, cov Hes Los Dais…lawv kuj nyias ua nyias pab nyias pawg neeg teev Tswv Ntuj. Cov thwj tim, kuj yog neeg His Xais Lais, txij li lawv tig los mloog Yes Xus lus qhia, los ua Yes Xus thwj tim, lawv yog cov teev hawm Tswv Ntuj tiag. Peb mloog Pob Zeb qhuab qhia nws cov kwv tij neej tsa His Xais Lais, Pob Zeb hais li no rau lawv : “15 Nej muab tus chiv txoj sia tua, Tswv Ntuj tsa nws sawv tsees hauv qhov tuag los, peb yog nws cov tim khawv. 17 Kwv tij, kuv paub tias nej thiab nej cov thawj tau ua li ntawd vim nej tsis paub dab tsi.” Zim txwv no, peb twb pom muaj ntau pab ntau pawg neeg teev Yes Xus nyob thoob ntiaj teb. Hauv tas txhua pawg neeg teev hawm Yes Xus peb pom no, tsuas yog tsoom ntseeg Kav Tos Liv thiaj yog cov neeg teev hawm Yes Xus raws keeb kwm thiab hwm tus cag lub hauv paus kev ntseeg nto plaws ntsis. Lwm pab lwm pawg neeg teev Yes Xus tsis muaj qhia kev ntseeg raws kev raws cai chiv hauv paus kev teev hawm Yes Xus los mus nto ntsis. Tej txhia neeg lam sawv xib hwb qhuab qhia kev teev hawm Yes Xus raws li lawv zaj tswv yim lawv xav xwb, tsis txawj qhia raws lub hauv paus kev ntseeg. Lawv tej lus qhia kev ntseeg tsis raug thiab tsis dhos lub ntsiab kev teev hawm Tswv Ntuj (Le dogme). Lub Koom Txoos Kav Tos Liv thiaj li muab lawv ntiab tawm hauv Koom Txoos (Excommunication). Cov neeg raug ntiab tawm hauv Koom Txoos Kav Tos Liv yog cov neeg cav ncauj thiab cam thawj. Cov neeg no nyias mus rhawv nyias ib pab neeg teev Yes Xus, xaiv dua npe ua hom neeg teev Yes Xus tshiab. Niaj hnub no, muaj txog txhiab hom neeg teev Yes Xus. Tiam sis, lam teev Yes Xus tsis muaj paus tsis muaj ntsis, tsis muaj qab hau li. Lawv tsis muaj zwm rau vaj qhia thiab cov tswv qhia, cov tseem lub hauv paus tuav kev teev hawm Tswv Ntuj raws nraim Yes Xus cov thwj tim kev qhuab qhia. Hmoob twb hais tias : tsiaj tsis hwm tswv, tsiaj yuav tuag, tub ki tsis hwm niam hwm txiv tub ki yuav pluag. Hom neeg tsis mloog thiab tsis hwm vaj qhia no tsis yog pluag nyiaj txiag, tseem pluag yam loj tshaj nyiaj txiag, yam li pluag txiaj ntsim, vim kev cam thawj tsis tau koob hmoov. Hmoob twb niaj txhis piv txoj lus tias : Muaj qoob loo noj thawm niaj, luag thiaj qhuas tias neeg tsim txiaj ; muaj qoob loo noj thawm xyoo, luag thiaj qhuas tias yog neeg muaj hmoo. Koom Txoos Kav Tos Liv hwm vaj qhia ua leej txiv roos, muaj tswv qhia ua tswv saib, teev hawm Yes Xus raws caij raws nyoog. Tej caij nyoog teev hawm Yes Xus no pub txiaj ntsha, txhua yam kev coj qhia pub txiaj ntsim. Vim li ntawd, lub hnub nyoog Hmoov Hla no pub txiaj ntsim npaum li rau peb cov tuaj khaub zig Huab Tais Yes Xus : “4 Tus hais tau tias : kuv paub nws, tiam sis tsis khaws nws cov lus qhia, yog ib tug dag, qhov tseeb tsis nyob hauv tus ntawd. 5 Leej twg khaws nws cov lus, Tswv Ntuj kev hlub tsheej xeeb tiag hauv tus ntawd” Lub Koom Txoos Kav Tos Liv xav pab kom peb muab siab rau thiab raug hnyav rau txoj kev teev hawm Yes Xus raws caij raws nyoog, raws kev raws cai, tsis txhob lam teev Yes Xus nyuag dog dig. Peb tsis muaj cuab kav lam muab nyuag kua txiv hmab txiv ntoo los txi, saib tsis taus Huab Tais Yes Xus, ua tsis nyog Yes Xus lub cev thiab cov ntshav. Hauv lub Thaj Txi Ntuj, peb yuav saib Yes Xus lub cev thiab cov ntshav muaj txiaj ntsim, tso rau lub zoo sam xeeb. Tsis txhob lam ua Thaj Txi Ntuj dog dig li tej txhia neeg teev Yes Xus tsis muaj paus muaj ntsis, thiaj tau koob tau hmoov. Tsoom leej ntshiab yog Koom Txoos Kav Tos Liv cov me nyuam tau txais Huab Tais Yes Xus cov koob hmoov : “46 Yes Xus hais lawv tias : “Muaj tseeb raws li Ntawv sau tseg, Leej Pleev kev raug hiam, nws kev sawv tsees hnub peb hauv tsoom tub tuag ciaj sia los, 47 Thiab kev ua nws npe mloog lus, zam tau txim txhaum, mus tshaj qhia kom ntiaj teb neeg paub thoob pib ntawm Yes Lus Xas Les ua ntej tuaj mus. 48 Nej yog cov ua tim khawv txog tej ntawd.” Tsoom leej ntshiab yog Yes Xus kev tsa Koom Txoos Kav Tos Liv tub ki ciaj Tswv Ntuj tub ki muaj koob meej, tsa Koom Txoos kev teev hawm muaj nuj nqes thiab saib Koom Txoos kev qhuab qhia ua Yes Xus tus kheej kev qhuab qhia. Vaj qhia tej lus tshaj tawm rau ib tsoom ntseeg tam ntua Yes Xus lus tshaj tawm rau ib tsoom ntseeg. Vim li ntawd, tsoom leej ntshiab hauv Koom Txoos Kav Tos Liv yog cov cim Huab Tais Yes Xus ua tshwm tuaj tias Huab Tais Yes Xus tus kheej yog tus tsav thiab coj Koom Txoos Kav Tos Liv kev nyob ntiaj teb no. Peb kev sib zam txhaum raws li Koom Txoos Kav Tos Liv qhia, yog mloog Yes Xus lus qhia sib zam txhaum.

    Ib tsoom phooj ywg, yog peb tsis mloog peb lub Koom Txoos tej lus qhia, yog peb tsa ncauj thuam txiv vaj qhia tej lus, tsis mloog cov tswv qhia thiab cov txiv plig tej lus qhub, tsis yog peb tsis hwm txiv vaj qhia, tsis hwm cov tswv qhia thiab cov txiv plig xwb, yog Huab Tais Yes Xus tus kheej peb thuam thiab tsis hwm. Peb twb tsis muab siab rau teev hawm Yes Xus, tsis kub siab ua Thaj Txi Ntuj, tsis kub siab daws txhaum, tsis paub kev cai teev hawm, lam teev Yes Xus dog dig phis phais lais, xav mus thaum twg li mus, tsis xav mus ces ib xyoos twb tsis tshwm ib taws hauv tsev teev ntuj. Yus tus kheej twb tsis paub txhawj kub siab tu yus txoj kev ntseeg kom txhob muaj mob, tsam lam ploj, lam yaj thiab tuag mus. Peb yuav tau thov lub txiaj ntsim Hmoov Hla ua tshuaj kho peb txoj kev ntseeg kom txhob muaj mob thiab daws peb tej txhaum, peb thiaj yuav nrog Huab Tais Yes Xus ciaj Tswv Ntuj sia nyob ib txhis.

    18.4.2012 Cwj Vuam Chiv









    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 5th May 2012, 6:36 am

    NTHUAV NTAWV NTSHIAB.




    Rau hnub tim 06 lub 5 hlis 2012

    Ib tsoom niam txiv kwv tij neej tsa phooj ywg,
    Hnub no zoo hnub, peb tseem muaj txoj hmoo tuaj sib fim ua ke koom siab koom ntsws teev hawm Huab Tais Tswv Ntuj peb Leej Niam Leej Txi hlub peb tsis muaj caij kawg. Peb tsis muaj tus tsi yuav pauj tau Huab Tais Tswv Ntuj txiaj ntsim. Peb nqa tes tuaj txaum yim hais ib lo lus ua peb Leej Niam Leej Txiv Tswv Ntuj tsaug. Peb tseem yuav vam Tswv Ntuj tej koob hmoov roos peb, tiv thaiv vij mob vij ntsag, txiab nkeeg hauv peb lub neej. Vim li ntawd, tej koob hmoov nyias yuav tau txais los ntawm nyias txoj kev teev hawm thiab npuab Leej Txiv Tswv Ntuj thiab mloog nws lus.

    Peb yeej paub ntsoov tias tsis yog tus neeg teev Tswv Ntuj thiaj nyiam ua neeg zoo xwb, tas ntiaj teb neeg puav leej nyiam zoo. Tiam sis, peb leej tib neeg tsis muaj zog ua zoo xis Tswv Ntuj siab. Tib neeg tsuas txawj hlub neeg raws li peb lub siab hlub taus xwb. Peb tsis muaj zog hlub taus neeg li peb Leej Niam Leej Txi Tswv Ntuj hlub peb. Muab piv li tus neeg mloog lus, tus neeg zoo nyiam, tus nquag thiab tsim txiaj peb thiaj xav hlub. Peb tsis muaj zog hlub tau tus neeg lim hiam, neeg siab dub siab phem. Peb tib neeg twb tsis muaj txoj kev sib zam, peb tsis muaj zog zam tau peb tus yeeb ncuab, zam tus neeg ua txhaum peb. Tiam sis, Tswv Ntuj tsis zoo li peb, Tswv Ntuj hlub tau thiab zam tau rau tus neeg phem. Peb pom Tswv Ntuj ua tshav ua nag ywg tus neeg phem tej qoob loo ib yam li tus neeg ncaj neeg zoo tej qoob loo. Tswv Ntuj ua hnub kaj tus neeg phem txoj xub ke mus los tib yam tus neeg siab dawb siab zoo txoj xub ke. Tus neeg phem thiab tus neeg zoo puav leej tau dej haus yug siav, puav leej muaj taws rauv ua zaub ua mov noj. Tswv Ntuj hlub tus phem tus zoo sib npaug zos. Peb thiaj li hais tau tias Tswv Ntuj yog tag nrho peb tib neeg Leej Niam Leej Txi. Tiam sis, kom sawv daws to taub, peb tsis txhob xav tswv yim yuam kev. Peb txhob xav yuam kev tias yog Tswv Ntuj twb hlub tus neeg lim hiam ib yam tus neeg zoo, txawm peb yog neeg siab phem siab nkhaus, Tswv Ntuj yeej hlub peb, tsis tas yuav siv zog ua neeg zoo, tsis tas yuav sib hlub, sib zam, tsis tas yuav hwm yus niam yus txiv, tsis tas yuav mus teev teev ntuj. Peb tsis txhob xav tej zaj tswv yim yuam kev li ntawd thiab txhob khib tias ua cas Tswv Ntuj tseem hlub tus neeg phem npaum li tus neeg ncaj neeg zoo. Peb yuav tsum ua neeg thoob tsib, muaj tswv yim. Tos Tswv Ntuj hlub tus neeg phem ib yam tus neeg zoo, vim Tswv Ntuj yog tus tsim sawv daws, yog tag sawv daws tus neeg phem neeg zoo Leej Niam Leej Txi. Tus neeg lim hiam, neeg nkhaus, yog Tswv Ntuj ib tug me nyuam cam thawj ib yam li nej tus me nyuam qig lus, tsis txawj hlub nej, tsis txawj hlub nws tej nkauj muas los tej kwv tij, nws tsuas xam pom nws tib leeg xwb. Nej tus me nyuam qig lus thiab cam thawj no, txawm ua rau nej npau taws, ua rau nej muaj kev tu siab los nej yeej hlub nws vim nws yog nej yug, yog nej me nyuam. Ntawm cov me nyuam mloog nej lus thiab tsim txiaj, lawv yeej tsis nyiam ua neeg phem, ua neeg qig lus li lawv tus nkauj tus muam, los tus kwv tus tij ntawd, puas yog. Peb kuj tib yam thiab, peb tsis txhob khib tias ua cas Tswv Ntuj tseem hlub cov neeg lim hiam tsis tsim nyog hlub. Tsis tas li ntawd xwb, peb tseem yuav mloog thiab ua li Huab Tais Yes Xus qhia rau peb cov neeg teev Tswv Ntuj, kom peb hlub cov neeg tsis zoo hlub li Tswv Ntuj hlub. Peb yuav hlub thiab yuav zam rau peb cov yeeb ncuab ua txhaum rau peb, thuam peb, saib tsis taus peb. Yog lub neej ua neeg ntseeg Tswv Ntuj, yog txoj kev khwv ua neeg teev Yes Xus, tshaj Yes Xus lub Moo Zoo ib ncig ntawm peb nyob, yog peb lub nra, yog peb tus ntoo cuam peb kwv taug kev lawv Yes Xus qab. Txoj kev sib hlub, sib pab, sib zam raws li Huab Tais Yes Xus qhia, ua tau peb ciaj tus neeg teev Yes Xus thiab ntseeg Yes Xus. Yog peb ciaj neeg teev Yes Xus, peb yuav yog lub teeb pom kev rau ntiaj teb neeg maub tsaus ntuj nti, peb yuav ua Yes Xus ib tug tub ntxhais txib cev Huab Tais Yes Xus lus rau cov neeg nyob hauv tsev loj faj, cev tes hlub thiab plhws cov neeg tshaib thiab nqhis tsis muaj leej twg hlub : “18 Cov me nyuam, peb tsis txhob sib hlub hauv lo lus thiab ntawm ncauj xwb, tiam sis hauv tes num thiab qhov tseeb tiag; 19 Li no, peb paub tias peb ua qhov tseeb tiag thiab peb lub siab yuav nyob tus yees ntawm nws” Nyob hauv peb lub Koom Txoos Kav Tos Liv, Huab Tais Yes Xus tso nws cov koob hmoov rau tej tus poj niam los tej tus txiv neej mloog Huab Tais Yes Xus lus qhia. Lawv ua tau tej yam dej num muaj hwj huam ib yam li Yes Xus. Qhov tseeb, tsis yog lawv ua, yog Huab Tais Yes Xus tus kheej qiv lawv lub siab hlub neeg, qiv lawv lub ncauj hais lus thiab qiv lawv tes los leg tej yam dej num plhws ntiaj teb neeg kev mob nkeeg, kev txom nyem pov tseg. Peb twb pom cov leej ntshiab, cov neeg siab dawb siab ncaj tsis khuv xim dag zog, tsis cuaj khaum lawv kev hlub neeg. Lawv hlub tus neeg phem, tus neeg zoo, tus muaj tus pluag, tus qhev los tus nom…lawv yim hlub neeg, yim ua lawv muaj zog teev Yes Xus mloog Yes Xus lus zoo dua ntxiv. Yam li tus neeg nquag, yim ua hauj lwm yim nquag thiab yim xav ua hauj lwm : “5 Kuv yog tsob txiv nej yog cov ceg. Tus txawm hauv kuv thiab kuv hauv nws, tus no yuav txi txiv ncw hna, tus tsis nrog kuv nej ua tsis tau dab tsi 6 Yog tus tsis txawm hauv kuv, yuav cuam pov tseg li tus ceg qhuav, luag yuav sau pov hauv hluav taws thiab yuav kub hnyiab.” Tus neeg ntshiab tes dej num yim ua Huab Tais Yes Xus nto koob meej ib ncig ntawm nws txawv deb tus neeg txhaum los tus saub cuav. Tus neeg txhaum los tus saub cuav tes num, nws yim ua tus txawj kho neeg, nws yim muaj plhus tias nws ciaj huab tais thiab nws tseem loj tshaj Tswv Ntuj Leej Tub Yes Xus. Yeej ib txwm muaj tej saub cuav (Des faux prophètes) tsis hais tiam neej twg : “11 Coob tus saub cuav yuav sawv los ua yuam kev coob leej. Mt24,11” Cov saub cuav no tsuas zoo li tus kws txuj fab kis Jean de La Fontaine zaj txhais : tus qav xav kom nws luaj tus nyuj (La Grenouille qui veut se faire aussi grosse que le Bœuf. Livre I,3) Tus qav tsuas luaj lub nyuag qe, tiam sis ntshaw kom nws luaj tus nyuj. Nws txawm siv siv zog ntsub kom piv tau nyuj : “Leej viv ncaus, puas tau txaus yuad ? Tshuav ntau. Nenni, li no ne ? Koj yuav txog siav xwb lauj. Tos pliag ov. Ua ciav su loj zus, ces plab tawg nphoob lawm lauj.” Tag nrho tsoom saub cuav saum daim npoo av tej lus sau zog ua ke twb piv tsis nyog Huab Tais Yes Xus tus tseem Tswv Ntuj Leej Tub ib lo lus. Vim li ntawd, tsoom neeg teev Yes Xus, peb yuav tau ceev faj txhob ntshaw ua saub thiab tseg kiag tsis txhob mus cuag tej niag saub cuav coj nej yuam kev. Peb thiaj tsis zoo li tus qav Jean de La Fontaine zaj txhais li hais no. Peb nco ntsoov Hmoob niaj txhis piv txoj lus tias : xav luaj nyug, xu luaj ntug.

    Ib tsoom phooj ywg txhua leej txhua tus, peb yuav rua qhov muag ntsia ib tsoom leej ntshiab, cov neeg mloog Huab Tais Yes Xus lus lawv muaj Tswv Ntuj txiaj ntsim thiab yoog cov neeg siab dawb siab ncaj tus lwj lwm peb thiaj nrog lawv txais Huab Tais Yes Xus koob hmoov. Peb tsa ncauj thov tsoom leej ntshiab pab peb cev peb tej lus rau Tswv Ntuj daws peb tej kev txhawj xeeb hauv peb lub neej, lawv tej lus thov Tswv Ntuj muaj txiaj ntsim pab peb tiag tiag thiab peb yuav tau txais cov koob hmoov ntawm peb Leej Niam Leej Txiv Tswv Ntuj tus hlub peb.

    01.05.2012 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 12th May 2012, 2:00 am


    NTHUAV NTAWV NTSHIAB.



    Rau hnub tim 13 lub 5 hlis 2012


    Ib tsoom ntseeg thiab phooj ywg txhua leej,

    Peb nyob hauv lis piam 6, caij nyoog Hla, nco txog lub txiaj ntsim peb tus Huab Tais Yes Xus sawv hauv tsoom tub tuag los ciaj sia nyob ib txhis. Hnub no, peb yuav hais txog peb tus Huab Tais Tswv Ntuj lub siab zoo thiab kev hlub neeg. Peb tsuas hais me me txog Tswv Ntuj txoj kev hlub neeg raws li nram qab no, peb yuav piav tsis tag hais tsis kawg.

    Peb sim xav txog peb tib neeg kev hlub neeg thiab Huab Tais Tswv Ntuj kev hlub neeg, peb yuav pom sib txawv deb npaum li cas.
    Peb txoj kev hlub neeg. Yeej muaj kev sib hlub nyob hauv ib cuab ib yig neeg, peb lub cuab lub yig thiaj ciaj ua neej nyob. Tos peb tib neeg ho ciaj ib cuab koom ib yig, vim txoj kev sib hlub tuav peb, rub peb los ua ke. Thaum ib tug tub thiab ib tug ntxhais sib hlub sib ntshaw, ib tug yeej tseg tsis taus ib tug. Nkawd ob leeg thiaj zoo siab hlo sib qaws ua txij nkawm mus tag ib sim neej. Nkawd txoj kev sib ntshaw ua rau nkawd ob leeg tuaj zog ua neej mus khwv noj khwv haus tsheej hnub tsheej hli tsis nco sab, tsis nco nkees; hnub thiab hmo twb tsis ntev, twb yug tub yug ki huam vam puv vaj puv tsev. Lub neej twb tsis muaj pes tsawg niaj pes tsawg xyoo, nkawd twb ua pog ua yawg, ua poj koob yawm koob. Peb yeej xav tib yam, yus tseem hlub yus tej tub ki tsis taus txaus, lub neej laus twb los txog. Peb tib neeg txoj koob tsis sib luag txhua leej, txoj hmoo tsis sib xws txhua tus. Nyias muaj nyias koob nyias hmoov. Txhua leej muaj niam muaj txi yug, tiam sis, tsis muaj niam muaj txi hlub tas txhua tus. Hmoob hais tias : yog nplooj tsis zeeg zoov yuav tsis nqha, ntiaj teb tib neeg tsis ploj tsis tuag, daim av yuav tsis txaus nyob. Vim li ntawd, lub neej ntsuag yog lub neej poob kua muag. Txoj kev ntsuag, tub ntsoj ntxhais ntsuag, poj ntsuam yawg ntsuag, yeej tsis zoo ua neeg, lam ua neej dai siav rau ntiaj teb, vim tshuav siav tsis tu thiaj ntxeem nyob hnub dhau hnub ua npau suav toog leej niam txhais tes puag, leej txi txhais tes hlub.
    Peb neeg ntiaj teb kev sib hlub tsis dawb do. Peb kev sib hlub mus raws txhooj raws cai. Vim peb muaj kev sib txib sib vam ua neej nyob, koj khiav kuv, kuv khiav koj. Thaum peb hais lus, peb nyiam hais lo tseeb, lo yog. Thaum peb ua dab tsi, peb xav kom ua raws kev raws cai, tsis lam taus lam hais, txhob lam taus lam ua. Peb txoj kev sib hlub, sib vam thiaj muaj txiaj muaj ntsig. Cov tub ki thoob tsib thiab tsim txiaj, yog cov tub ki txawj hlub, txawj nco niam txiv kev iab kev khwv tsa tub ki ua neej tsheej cuab tsheej yig. Peb txoj kev hlub tub ki, peb xav hlub kom tau txiaj ntsim. Vim li ntawd, luag tus ntxub yus tsis pom yus txiaj ntsim hlub luag, nkim yus txoj kev hlub dawb do. Hais tau tias peb tib neeg ntiaj teb pluag kev sib hlub, sib pab, sib zam. Peb kev hlub kev zam tsuas tam li pauv zog xwb. Peb tsuas hlub tau tus yuav hlub tau peb. Vim li ntawd, tus neeg ntxub peb, qig peb kev hlub dawb. Peb tsis muaj kev hlub txaus rau tus neeg ntxub peb, vim peb pluag kev hlub dhau. Tus khaub dab ntsoj ntsuag thiaj txom nyem tsis muaj neeg hlub.
    Tswv Ntuj kev hlub neeg. Tswv Ntuj tsis pauv zog hlub tib neeg tos ntsoov kom tib neeg hlub Tswv Ntuj. Peb yuav pauj tsis tau Tswv Ntuj kev hlub peb tag npaum li. Tswv Ntuj hlub tag nrho lub ntuj thiab daim av, yaj ceeb no ntxee hlo yeeb ceeb sab. Hauv yaj ceeb no, tus nroj tsuag, tus kab ntsaum, tus tsiaj txhu, tus tib neeg Tswv Ntuj hlub txhij ; tus ntsuj duab ntsuj plig hauv yeeb ceeb Tswv Ntuj hlub tag nrho. Tswv Ntuj kev hlub tus nroj tsuag, yog ua nag ua lwg kom nroj tsuag ciaj sia rau kab ntsaum tau ua zes thiab tau noj. Yog Tswv Ntuj tsis hlub, tas txhua tsav puas yam yuav tsis ciaj sia nyob saum yaj ceeb no thiab ntsuj yuav tsis tsheej ntsuj hauv yeeb ceeb. Tswv Ntuj hlub tas txhua yam dawb do tsis tau them se, tsis them tus nqe dab tsi rov rau Tswv Ntuj : “9 Tswv Ntuj muab nws kev hlub rau peb zoo li no : Tswv Ntuj xa nws Leej Tub ib leeg kheej tuaj nyob ntiaj teb no, kom peb ciaj sia vim muaj nws.10 Kev hlub yog li no : tsis yog peb hlub Tswv Ntuj, yog nws hlub peb, nws thiaj xa nws Leej Tub tuaj ua txim dawb paug theej peb cov txhaum.” Yog Tswv Ntuj tsis hlub peb tib neeg, peb twb tsis yug los saum daim av. Zim txwv no, peb nyob saum daim av, peb txais daim av dawb paug rau peb ua neej, muaj nqaij qus nqaij nyeg, muaj zaub mov rau peb ua txhiam xws yug peb lub cev. Yog Tswv Ntuj tsis hlub peb, tsis pub nag los, tsis pub dej ntws, nroj tsuag yuav qhuav nkig nkuav, dej yuav tu, hiav txwv yuav nqhuab, av yuav kub hnyiab, kab ntsaum, tsiaj txhu, tib neeg yuav ploj tuag tu noob nrho, ntiaj teb yuav ciaj plua tshauv. Thaum zoo li ntawd, peb tib neeg yuav ua tau tus tsi los thov Tswv Ntuj hlub peb. Yog Tswv Ntuj zoo li peb, peb tsuas hlub peb pawg nyuag niaj hnub tuaj tso nyiaj hauv peb lub “church” xwb, yog Tswv Ntuj tsuas hlub cov neeg hlub Tswv Ntuj xwb, ntshai Tswv Ntuj twb nplua ntiaj teb no ciaj plua tshauv tav twg los lawm. Peb twb hlub tsis txaus peb lub cuab lub yig, peb twb pauj tsis tau yus niam yus txiv kev iab kev khwv, peb twb hlub tsis taus tej khaub dab ntsoj ntsuag. Peb pom ntsoov, peb cov neeg los teev hawm Tswv Ntuj, txoj nyuag kev mus pe, mus txaum yim ua Tswv Ntuj tsaug 7 hnub 1 nyuag zaus twb tseem tsis cuag ncua, twb dhuav twb nkees. Peb sim xav tshuav dab tsi peb muaj muab pauj Tswv Ntuj yog peb tsis teev Tswv Ntuj. Tseem muaj peb tib neeg thuam Huab Tais Tswv Ntuj, rov taw tuam ntuj. Yog Tswv Ntuj hlub peb dhau peb thiaj tseem muaj txoj sia nyob. Peb los ua neeg teev Tswv Ntuj, peb yuav thim xav, hloov siab ntsws, ua neeg mloog lus : “12 Kuv lo lus qhia yog lo lus no : nej sis nyiam sis hlub zoo npaum li kuv hlub nej. 13 Tsis muaj lwm txoj kev hlub loj dua yus muab yus txoj sia pub yus tej phooj ywg. 14 Nej yog kuv phooj ywg, yog nej ua raws li kuv lo lus qhia.” Peb ua neeg ntseeg Tswv Ntuj thiab teev Tswv Ntuj, xav kom peb txhua leej pom Tswv Ntuj hlub peb dawb paug npaum li hais saum no. Kev mloog Tswv Ntuj lus tsis yog kev ua ywj peb lub siab nyiam, ua li peb siab xav tam li tus neeg phem, neeg tub sab. Tus neeg tub sab lim hiam yeej tsis cheem nws lub siab phem, nws xav li cas yeej ua li ntawd. Tus neeg lim hiam tseem ua tau tej yam luag twb xav tsis tau. Peb los ua neeg ntseeg Tswv Ntuj, teev Tswv Ntuj, peb yuav hloov peb lub qub siab, hloov peb tus qub neeg ua tus neeg tshiab, taug txoj kev Yes Xus taug ua peb ntej. Peb tsis txhob lam yuav lub npe teev Tswv Ntuj, twb tsis nyiam, tsis paub teev Tswv Ntuj tam zoj tej neeg teev dab qhuas. Tsis txhob ua li tej neeg teev dab qhuas, tos sim neej luag tsis paub teev ntuj, vim luag twb tsis los teev Tswv Ntuj. Ntawm yus, yus twb kawm kev ntseeg, twb paub teev ntuj, tiam sis, yus xwb tim nkees, tsis mus fim, tsis mus teev hawm, tsis mus ua Tswv Ntuj tsaug. Puas tsim nyog Tswv Ntuj meem txom rau yus tshaj rau luag. Peb yuav kub siab thiab ua neeg khwv, ua neeg nquag mloog Huab Tais Yes Xus lus.

    Ib tsoom ntseeg sawv daws, peb paub hais tias ua neej nyob, tus muaj thiab tus pluag, tus phem thiab tus zoo Tswv Ntuj yeej hlub ib yam. Peb txoj kev teev hawm Tswv Ntuj qhib txoj kev loj muaj txiaj ntsim tshaj plaws rau peb leej tib neeg txais. Zim txwv no, peb twb muaj txoj hmoo ciaj Tswv Ntuj phooj ywg, ciaj Tswv Ntuj neeg, peb yuav mloog Huab Tais Yes Xus lus qhia, peb yuav sib hlub thiab sib zam ib yam li Huab Tais Yes Xus hlub thiab zam rau peb.


    10.05.2012 Cwj Vuam Chiv






    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 15th May 2012, 6:30 pm




    NTHUAV NTAWV NTSHIAB.




    Rau hnub hla tim 17 lub 5 hlis 2012


    Ib zeej tsoom neeg ntseeg thiab phooj ywg txhua leej,

    Hnub no, yog ib hnub ntshiab ib hnub huv, tag lub Koom Txoos Kav Tos Liv thoob ntiaj teb ua lub hmoov nco txog peb tus Huab Tais Yes Xus nce mus saum qaum ntuj, zaum ntawm Leej Txiv Tswv Ntuj sab xis ua Vaj Ntxwv kav qaum ntuj thiab ntiaj teb no. Peb yuav hais txog cov txiaj ntsim hauv lub hnub nyoog no.

    Lub hmoov Huab Tais Yes Xus nce mus saum qaum ntuj muaj txiaj ntsim loj tas nrho rau peb ntiaj teb neeg thiab rau tus neeg teev Yes Xus. Txawm ntiaj teb neeg tsis teev Yes Xus tas txhua leej, los Yes Xus yog tag sawv daws tus Huab Tais. Thaum peb tseem teev dab qhuas, tsis tau paub teev Tswv Ntuj, peb ua lub neej tsaus ntuj nti hauv ntiaj teb no. Ib qho ob qho los peb hais tias muaj dab, yuav tau txi dab, ntxias dab tas lub neej kom dab txhob looj koov rau peb. Txoj me kev ntshai dab tom tsuam rawv peb caj qwb ruaj thiab khov npaum nkaus yej thiab cav tais nas tuag nthi nti tsis taus. Peb yuav tau tig ntsia peb Hmoob kev ua neej, peb thiaj yuav to taub peb Hmoob kev ntshai dab. Hmoob yog neeg ua liaj ua teb, nyob roob nyob hav, txawm zej zog rau tej hauv toj hauv pes, qab vag tsib taug yeej fab qas hnyo, tsis khoom tu tej zog kom du lug zoo nkauj rhib. Tej poj niam me nyuam yeej tsis tshua tau luag, tsaus ntuj zus yuav yoj hluav taws, yuav tsum cev tes fawb thiaj xuas tau kev taug. Tej nyuag kooj, nyuag kab xiv los peb hais tias ntshai yog ntsuj mam ntsuj plig txia los yuj los seev rau peb. Nruab hnub, nyuag nab raj nab rawm taug kev, khiav los ncaj qab vag tsib taug, peb twb poob siab nthav tsam lam pus vij mob thiab nplooj ntsws nphau lawm tsheej daig tsam tuaj xa vij ntsag. Pw tseem ua zaj dab ntub npau suav phem ntxiv ces peb yim huab poob plig loj. Yus txoj kev txhawj rov ua rau yus noj mov tsis poob plab haus dej tsis poob cev. Txawm xyeej huab cua hloov lub ntuj ntxoo, ntuj nag nqes ua rau tej txhia neeg lub cev thiab roj ntsha nyeej raws huab cua. Ua rau tej txhia neeg raug khaub thuas thiab kub cev li tej qaib tej npua raug ib phaum aws tig los txog. Sawv daws yuav tsum paub kom tseeb, yeej tsis tim dab los tshoj, tsis yog ntsuj tsis puab cev, tsis tim poob plig li. Tiam sis, vim peb txoj kev ntshai dab rov hem peb poob siab xwb ; yus tus plig nws puab nws cev los yus rov hem kom yus ntshai, ces plig cia li ntshaus thiab nyo ib hnub zuj zus raws lub cev tau khaub thuas qaug zog luj luas. Thaum zoo li ntawd, txhob vam tias txiv neeb txiv yaig yuav pab tau yus. Txiv neeb txiv yaig ncauj lus nug rov nug rais yim ua rau peb txhawj loj ntxiv xwb : teem caij teem nyoog kho li ub, yuav nrhiav lub taub hau tsiaj li no los txi, thiaj mus raws cuag, mus puav tau yus tus ntsuj duab ntsuj plig rov los puab cev, nws twb nim kho siab zim ntab sis yeev nrog zaj dab ntub npau suav phem, los twb nrog niag nab rab nab rawm sib pus ntoj rau tej yas toj, los nrog tej kab npauj kab xi seev lis yees rau tej yas ke lawm. Sawv daws yuav tsum paub kom tseeb, qaib npua zoo tsaws tshuaj noj thiab ua kom neeg lub cev muaj zog nkaus xwb ; qaib npua tsis yog tshuaj kho neeg lub mob lub ntsaj. Kev tua tsiaj kho mob kho ntsaj tsuas zoo them txiv neeb txiv yaig nqe nkaus xwb, tsis zoo dab tsi ntxiv, peb yuav tsum nkag siab, ris siab txij li no. Yuav kom yus tus neeg mob zoo, kawg nrhiav kom tau kuab tshuaj los noj thiab los txhaj lom tus kab mob, yus tus neeg mob thiaj yuav nquag nkaus xwb, zoo tam zoj yuav tsum txhaj tshuaj tiv aws rau qaib npua thiaj tsis tuag aws nkaus xwb. Yog leej twg tsis ntseeg, pes tsawg los nws tseem pheej khuv xim xav tiam dab qhuas, kawg dab qhuas yuav ntaim nws noj nws haus mus kom kawg.
    Cov neeg ntseeg Tswv Ntuj thiab teev Tswv Ntuj los tsis txhob ua ywj fab ywj fwj. Peb yuav nco ntsoov, txij li peb nrauj dab qhuas, tsis ua neeb ua yaig, tsis tua tsiaj txhu txi dab, peb lub neej tshav ntuj nrig lawm pes tsaug npaug. Tsis yog peb tsis muaj mob muaj nkeeg, peb kev mob kev nkeeg yog huab yog cua ua, yog kab yog yoov tom, yog kev noj haus, tsis txawj caiv ncauj ua kab mob, kab peem ntxooj yus lub cev ua rau yus ntshav qab zib, muaj roj txhaws yus tej hlab ntsha, tej hlab siab hlab ntsws. Yog kws tshuaj peb yuav tsum thawj nkaus xwb, tsis yog peb raug dab li tej laus hais. Tsis tas li ntawd, peb txoj kev ntseeg Tswv Ntuj, teev Tswv Ntuj ua rau peb siab loj, tsis ntshai tus dab twg li, dab tom tsis tau peb. Tawm rooj plaws, dab tseem yog tus ntshai peb, khiav tsiv nraim peb txoj xub ke. Tsis yog lam hais, Huab Tais Tswv Ntuj yog peb Niam peb Txiv hlub peb, pab peb. Vim peb teev Tswv Ntuj, peb muaj Tswv Ntuj hwj huam. Peb txais Tswv Ntuj hwj huam yeej tag nrho ib tsoom dab ib tsoom ntsuj thiab yeej tag kev mob kev ntsaj, kev ploj kev tuag. Tsis yog peb tsis txawj ploj tsis txawj tuag, peb txais kev ploj tuag nrog Huab Tais Yes Xus kev tuag. Vim Huab Tais Yes Xus yeej hlo kev tuag, tsuj nthi kev tuag hauv nws qab xib taws. Ib hnub twg, peb nrog nws yeej hlo kev tuag, sawv tsees ciaj sia ib yam li nws. Peb cov neeg teev Tswv Ntuj, tsis ntshai tus dab tus ntsuj twg, nws yeej meem tuaj nrog peb sib ntsuas zog : “16 Tus ntseeg thiab ntxuav plig yuav tau kev cawm ; tus tsis ntseeg yuav raug txim.17 Cov ntseeg, tej cim no yuav nrog nraim lawv : hauv kuv npe lawv yuav ntiab dab phem rau sab nraud, lawv yuav hais tej cov lus tshiab, 18 Lawv yuav tuav tau nab hauv tes thiab txawm haus tau tshuaj lom neeg yuav tsis ua tau li cas rau lawv thiab lawv tsa tes saum cov neeg mob nkeeg yuav zoo tuaj.” Tswv Ntuj hlub peb npaum li ntawd, pub peb tib neeg txhaum no muaj Tswv Ntuj hwj huam ciaj tau ua Tswv Ntuj tub ki, yog lub txiaj ntsim loj tas nrho. Yog peb ntseeg thiab teev Tswv Ntuj raws li Huab Tais Yes Xus cov thwj tim qhia, mloog lub Koom Txoos Kav Tos Liv lus ces peb txoj hmoo zoo. Lub hnub nyoog Huab Tais Yes Xus nce pem ntuj no pub lub txiaj ntsim loj npaum li ntawd rau peb sawv nws lub luag dej luag num hauv ntiaj teb no. Yog vim li ntawd, peb thiaj muaj cuab kav hais tias tus neeg teev Yes Xus muaj koob hmoov. Nws txhais tes hlub, txhais tes plhws neeg txom nyem yog Yes Xus tus kheej cev tes hlub thiab plhws neeg txom nyem. Cov neeg teev Yes Xus raug luag ntxub, raug luag hiam tsis yog lawv tus kheej xwb, yog Yes Xus tus kheej raug ntxub raug hiam : “22 Tas puas tsav yam zwm rau nws qab xib taws, ntawm nws, pub nws ua tas lub koom txoos taub hau, 23 Koom Txoos yog nws lub cev, muaj tag nws txiaj ntsim puv npo.” Yog peb tsis nyob hauv Koom Txoos, txawm ua dab tsi peb tsis sawv Koom Txoos npe ua, tsis yog Huab Tais Yes Xus dej num peb ua. Yog peb ua peb tus kheej dej num, peb ua kom neeg cav thiab qhuas peb xwb. Tiam sis, tus mloog Koom Txoos thiab ua raws li cov thwj tim qhia, peb ua kom Huab Tais Yes Xus nto koob meej : “19 Thaum Huab Tais Yes Xus hais lus rau lawv tas, nws cia li mus dua saum ntuj zaum ntawm Tswv Ntuj sab xis. 20 Lawv cov ntawd cia li tawm mus tshaj lus qhov txhia chaw, Huab Tais nrog nraim lawv tes num thiab lus ciaj sia ua tau cim tshwm tuaj.” Niaj hnub no, txawm peb tsis pom Huab Tais Yes Xus pliaj plhu los tus neeg teev Yes Xus txoj dej num muaj Huab Tais Yes Xus hwj huam, piv li tej cim cov leej ntshiab ua tau pub rau tej txhia neeg.

    Ib tsoom phooj ywg, lub txiaj ntsim peb tus Huab Tais Yes Xus nce pem ntuj loj heev rau peb ntiaj teb neeg sawv dawv. Peb yuav pauj tsis tau Huab Tais Yes Xus lub txiaj ntsim no. Peb yuav nco ntsoov Huab Tais Yes Xus yog lub Koom Txoos taub hau coj lub Koom Txoos kev, nws nrog peb nyob nraim ntawm peb lub luag dej luag num.

    12.05.2012 Cwj Vuam Chiv






    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 18th May 2012, 12:08 pm

    NTHUAV NTAWV NTSHIAB.




    Rau hnub hla tim 20 lub 5 hlis 2012


    Tsoom ntseeg thiab kwv tij neej tsa phooj ywg hmov tshua,

    Peb nyob hauv lis piam hnub chiv 7 lub caij nyoog Hla. Yog ib lub sij hawm peb yuav nco txog peb Leej Txiv Tswv Ntuj lub txiaj ntsim hlub peb ntiaj teb neeg tsis muaj caij tag. Rau peb cov neeg ntseeg Tswv Ntuj, peb nyias yuav tsum nug nyias tus kheej saib, txoj kev ntseeg kev teev hawm Tswv Ntuj puas muaj nuj nqes dab tsi rau peb.

    Nej pom, peb muaj tej txhia kwv tij neej tsa twb los ua neeg teev Tswv Ntuj ntev xyoo lawm. Tos thaum nej paub : “Yawg twb khiav rov mus ua dab lawm os !” Tej kwv tij neej tsa thim lus rov mus teev dab teev qhua no, yog tej lub cim qhia rau peb txhua tus neeg ntseeg paub, peb yuav ceev faj thiab xyuam xim txog txoj kev ua neeg ntseeg Tswv Ntuj, teev Tswv Ntuj. Kev ntseeg Tswv Ntuj, teev Tswv Ntuj yog ib lub neej peb txhua leej yuav niaj hnub niaj hmo raus tes txhim npaum nkaus peb txhim peb lub cuab lub yig, kom peb ua neej tsheej cuab tsheej yig. Yog peb lam ua neeg ntseeg Tswv Ntuj xwb, tsis pom txoj kev teev Tswv Ntuj muaj qab hau, tsis pom Tswv Ntuj lub txiaj ntsim hlub peb, ces peb txoj kev ntseeg, kev teev hawm Tswv Ntuj yeej muag nthas tuag zawv xwb. Peb yim nkees teev ntuj, yim ua peb txoj kev ntseeg Tswv Ntuj yim tsuag yim me qauj luj les li tus nplaim teeb ; lam muaj pob ntseg, tiam sis tsis hnov lus, khaws tsis tau Huab Tais Yes Xus tej lus ua koob hmoov pov hwm, txhawb yus kev cia siab rau Tswv Ntuj kom loj thiab ntug txaus. Yog yus txoj kev teev hawm Tswv Ntuj twb tsis qab tsis tsuag, thaum yus ntsib dkeev kev txhawj xeeb, muaj kev txom nyem tuaj nphav tuaj laum yus ces yus cia li plam tes plam taw ntog ntxeev tiaj raws kev haub kev ntxias. Tus neeg ntseeg twg tsis ruaj cag rau Huab Tais Yes Xus, qaug quav rau nws cov txheeb cov ze, rau tej saub cuav, tus ntawd kawg yuam kev. Nws yuam kev thim Huab Tais Tswv Ntuj rov mus thawj dab. Tswv Ntuj yog tus muaj hwj huam tshaj plaws zeej tsoom dab tib si. Yog yus khiav Tswv Ntuj tus muaj hwj huam mus thawj nyuag dab, tus ntaim yus noj yus haus, ces yog yus tsis sawm zoo. Tus neeg ntseeg Tswv Ntuj thim lus, rov taw tuam ntuj, zoo tam nej tus phooj ywg niaj hnub nrog nej ua ke, tos nco, muab nej tso pov tseg mus xyav nej lub moo, nej kuj yuav muaj kev tu siab tib yam : “Pob Zeb sawv ntsug hauv nruab nrab lawv, nws hais tias : 16 “Kwv tij, tau muaj tshwm raws li Leej Ntuj Plig Ntshiab hais tseg hauv ntawv ceeb Das Vis lub ncauj hais txog Yus Das ua tus coj luag kev tuaj ntes Yes Xus, 17 Nws yog ib tug nyob hauv peb, nws kuj nrog txais txoj dej num no.20 Ntawv Nkauj Seev sau muaj tias : Cia kom nws lub loog nqha nrig txhob muaj neeg nyob. Cia muab nws txoj dej num rau lwm tus.” Peb cov neeg thim kev ntseeg Tswv Ntuj rov mus teev dab teev qhua yog Yes Xus cov phooj ywg ntxeev siab rau Yes Xus. Tsis tas li ntawd, peb leej twg tsis mloog peb lub Koom Txoos lus, tawm khiav hauv Koom Txoos mus ua li nws siab nyiam, tam zoj tus thwj tim Yus Das ntxeev siab, mus coj neeg tuaj ntes Yes Xus tua pov tseg. Vim peb tawm hauv Koom Txoos mus xyav Koom Txoos npe rhuav Koom Txoos kuj yog rhuav Yes Xus npe, Yes Xus yog Koom Txoos taub hau coj Koom Txoos kev.
    Peb cov neeg ntseeg Tswv Ntuj yuav tsum paub, peb lam ua neeg ntseeg teev Tswv Ntuj li peb siab nyiam tsis raug kev raug cai. Yog peb ua neeg ntseeg Tswv Ntuj tsis raug kev cai, peb ua neeg yuam cai (Sectes) coj nyias pab nyias pawg neeg tsis muaj hauv paus hauv ntsis. Sawv daws yuav tau xyuam xim, zwm rau ib lub hauv paus tswj kav sawv daws. Peb yuav ntseeg thiab teev Tswv Ntuj raws kab raws ke, raws li poj ua tseg yawm ua cia, mloog cov thwj tim Pob Zeb thiab Paj Lug nkawd lus. Koom Txoos Kav Tos Liv yog tus sawv Pob Zeb thiab Paj Lug chaw taj Huab Tais Yes Xus : “Leej Txiv Ntshiab, txuag lawv hauv koj lub npe uas koj pub rau kuv, kom lawv ua tib leeg tam li wb.12 Thaum kuv tseem nrog lawv nyob, kuv saib lawv teev hawm koj lub npe koj tau muab pub ua kuv ntiag tug. Kuv saib xyuas lawv, tsis muaj ib tug ploj, tshuav tus mus taug nws kev ploj raws li Ntawv Ntshiab tau sau tseg.” Lub Koom Txoos Kav Tos Liv mloog Huab Tais Yes Xus lus thiab qhuab qhia Huab Tais Yes Xus npe rau ntiaj teb neeg. Vim li ntawd, sawv daws koom tib tug txhooj yuav tib txoj cai teev hawm Yes Xus lub cev thiab cov ntshav, mloog tib tsab ntawv Moo Zoo qab ntug txog hauv ntuj, hwm vaj qhia tus sawv Pob Zeb lub chaw ua sawv daws leej txiv saib sawv daws, coj tas txhia haiv neeg nyob ntiaj teb los ua tib cuab tib yig, tsis cais pab cais pawg li Leej Txiv tsis cais Leej Tub thiab Leej Tub tsis cais Leej Txiv. Tas cov haiv neeg Kav Tos Liv thoob ntiaj teb koom tib lub siab (l’unité dans la diversité) li Leej Txiv thiab Leej Tub koom tib lub siab. Huab Tais Yes Xus rov dua pem ntuj, nws yog tus xa cov thwj tim mus thoob ntiaj teb tshaj nws txoj kev hlub neeg. Peb leej twg mloog Yes Xus lus, tus ntawd yog Yes Xus thwj tim nyob thoob ntiaj teb tshaj peb tus Huab Tais Yes Xus kev hlub neeg ib ncig ntawm peb nyob : “18 Ib yam li koj xa kuv tuaj hauv ntiaj teb no, kuv thiab, kuv xa lawv mus rau lub ntiaj teb.19 Kuv rov qee kuv pub rau lawv, kom xwv lawv thiab, lawv rov qee lawv mus rau qhov yog tseem.” Peb muaj ib cuab ib yig neeg, peb thiaj li ciaj neeg. Peb muaj nkauj muaj muam, muaj kwv muaj tig pab, muaj niam muaj txi hlub, peb thiaj li ciaj ua neeg. Tos peb ciaj ua neeg ntseeg Tswv Ntuj, vim muaj lub Koom Txoos ua peb lub cuab lub yig, muaj zeej tsoom neeg ntseeg ua peb nkauj muam, ua peb kwv tij txhawb peb kom ciaj ua neeg ntseeg, muaj vaj qhia ua peb niam peb txiv hlub peb cob qhia peb kom peb pom kev taug txoj tseem kev ntseeg lawv Yes Xus qab. Yog tus me nyuam twg cav ncauj tsis mloog niam mloog txiv lus, tus me nyuam ntawd yeej tsis tsim txiaj, kawg mus ua tub sab. Peb leej twg cav ncauj tsis mloog vaj qhia thiab cov tswv qhia lus, tus ntawd kawg yuam kev hauv kev ntseeg Yes Xus, ncaim npoj, cais pab cais pawg, tsis paub txoj tseem kev teev Yes Xus ces tsis tau txiaj ntsim.

    Ib tsoom ntseeg sawv daws, peb yuav ua neeg ntseeg Tswv Ntuj xyuam xim thiab mloog lus kom peb txhob yuam kev. Yog peb tawm khiav ntawm Huab Tais Tswv Ntuj tus hlub peb, kawg peb haj yam pluag thiab txom nyem. Kom peb nco ntsoov, cov neeg tuaj khaub zig Huab Tais Yes Xus puav leej tau txais kev cawm tas txhua tus : txiv vaj qhia Zam Paj Lug II yog ib lub cim peb qhov muag ntsia ntsoov muaj Huab Tais Yes Xus txiaj ntsim.


    15.05.2012 Cwj Vuam Chiv[/center]





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 26th May 2012, 12:31 pm








    NTHUAV NTAWV NTSHIAB.


    Rau hnub hla tim 27 lub 5 hlis 2012


    Tsoom ntseeg thiab phooj ywg hmov tshua,

    Peb twb ua Hmoov Hla nco txog Yes Xus raug hiam dai saum nkhib ntoo cuam, tuag thiab sawv rov ciaj sia. Plaub caug hnub tom qab, Yes Xus nce mus saum qaum ntuj, kaum hnub tom qab ntxiv, hnub Tsib Caug, Yes Xus xa nws Leej Ntsuj Plig Ntshiab tuaj rau nws cov thwj tim. Hnub no, lub Koom Txoos Kav Tos Liv ua Leej Ntuj Plig Ntshiab lub hmoov, lub hmoov Tsib Caug (πεντηκοστῆ) Pes Tes Kos Tes. Vim li ntawd, hnub no, peb yuav cev ob peb los txog Leej Ntuj Plig Ntshiab thiab lub txiaj tsim Leej Ntuj Plig Ntshiab pub rau tsoom neeg ntseeg Tswv Ntuj.

    Peb yuav tsum mloog peb lub Koom Txoos Kav Tos Liv tej lus qhia coj peb taug lub hauv paus kev ntseeg Tswv Ntuj peb thiaj teev hawm Tswv Ntuj raws kev raws cai, txawj coj Tswv Ntuj siab. Nej yeej paub, peb los ntseeg Tswv Ntuj, teev Tswv Ntuj, peb tsis lam xeem pheev xeev tsim txoj kev teev hawm Tswv Ntuj raws li peb lub siab nyiam, raws li peb zaj tswv yim xav. Peb ntseeg Tswv Ntuj, teev Tswv Ntuj, peb txais txoj kev teev hawm Tswv Ntuj muaj kab muaj ke, raws poj ua tseg yawm ua cia. Peb tsis lam taus lam xev tsim ib txoj kev teev hawm los khoo neeg li tej txhia xib hwb. Sawv daws yuav ceev faj nyias tus kheej kom tsis txhob poob hauv npoj neeg teev hawm Tswv Ntuj txuam tsoov thiab cuav (Sectes). Vim muaj ntau pab ntau pawg neeg teev Yes Xus ntxias tau peb tej txhia yuam kev thiab ua peb plam ntxhiab ntawm Tswv Ntuj lub tseem Koom Txoos Niam Kav Tos Liv. Ntawm lwm pab lwm pawg neeg teev Yes Xus txuam tsoov thiab cuav no zoo tam zoj tej noob qoob noob loo txuam tag, txia tag tsis tseem noob lawm. Peb mloog Lus Kas hais txog tus thwj tim Paj Lug cov lus ceeb toom rau tsoom thawj coj cov neeg teev Yes Xus kom ceev faj cov neeg cuav no yog zoo li hma tuaj tom tsiaj hauv tej tshav zaub ua rau tsiaj tawg puv roob puv hav : “28 Nej yuav ceev faj rau nej tus kheej thiab rau npoj neeg Leej Ntuj Plig Ntshiab tsa nej ua tswv saib coj Tswv Ntuj lub Koom Txoos nog zaub, nws tau nchuav nws roj ntsha los txhiv 29 Kuv paub ntsoov tias kuv tuaj dhau dua ntais, ib co hma tsiv tsaim yuav txeem tuaj ntawm nej, yuav tsis txuag npoj tsiaj 30 Ib co tib neeg yuav tawm ntawm nej, lawv yuav hawv qhia tej yam kom rub tau cov thwj tim mus caum lawv HL 20,29-30” Cov thawj coj Koom Txoos Kav Tos Liv vaj qhia thiab cov tswv qhia yog cov sawv los taj Pob Zeb thiab Paj Lug chaw thaum hauv paus los txog hnub no. Peb yuav cuab pob ntseg mloog Koom Txoos Kav Tos Liv tej lus qhia, peb thiaj taug txoj tseem kev teev hawm Yes Xus raws kab raws ke, raws poj ua tseg yawm ua cia li Yes Xus qhia. Peb cov poj koob yawm koob yog tsoom neeg siab dawb siab ncaj mloog Yes Xus lus tiam dhau tiam, tsoom leej ntshiab muaj Yes Xus txiaj ntsim. Lawv yog cov paub qhia Leej Ntuj Plig Ntshiab rau peb. Yog peb vam txog lawv, peb kuj yuav muaj Leej Ntuj Plig Ntshiab lub txiaj ntsim coj peb lub neej. Ze ntawd xyoo 410, leej ntshiab Agustin qhia li no rau zeej tsoom neeg ntseeg : “Peb paub Tswv Ntuj Leej Ntsuj Plig ua ntau lub cim tshwm sim rau neeg pom. Thaum Yes Xus txais lub cim ntxuav, nws tshwm li tus nquab, hnub Tsib Caug, lub suab nroo ntws li thwv cua nplawm, cov thwj tim pom tuaj li tej tug nplaim taws tuaj tsaws saum lawv…Peb yuav tsum to taub tias Leej Ntuj Plig Ntshiab tsis yog tus nquab los tus nplaim taws…Tus nquab los tus nplaim taws tsuas ua cim rau neeg pom tias Leej Ntuj Plig Ntshiab tuaj lawm…De la Trinité livre 2 ” Leej Ntuj Plig Ntshiab yog Tswv Ntuj txoj pa ib yam li Leej Tub yog Tswv Ntuj lo lus. Leej Txiv hais li cas txawm muaj li ntawd, vim Leej Tub yog Leej Lo Lus ua li Leej Txiv siab nyiam. Leej Ntuj Plig Ntshiab yog peb ib tug phooj ywg ncaj ncees ib sim neej tsis ntxeev siab rau peb, ib tug phooj ywg hlub peb tag siab nrho pab tau peb tas txhua tsav puas yam, muaj hwj huam loj txhawb kom peb muaj hwj huam cuag Tswv Ntuj, ua tau peb neeg txhaum ntshiab huv nrog Tswv Ntuj nto koob meej saum ntiaj teb no thiab ciaj Tswv Ntuj sia nyob ib txhiab ib txhis saum qaum ntuj : “18 Yog nej yoog Leej Ntuj Plig, nej yuav tsis raug txoj cai khoo nej 19 Lub cev nqaij tes num muaj tseeb li no : ua plees ua yis, neeg qias, neeg lwj liam 20 Hwm dab, txi dab, ntxub neeg, sib tshum, muaj khib, siab luv, sib cuab, sib nyom, sib cais 21 Txhav khem, quav cawv, neeg plhom thiab ntau yam zoo li ntawd ; kuv hais rau nej, kuv twb ceeb toom tias cov ua li ntawd yuav tsis tau Tswv Ntuj qaum ntuj ua lawv tug 22 Lub txiv raws li Leej Ntuj Plig yog kev sib hlub, kev zoo siab, thaj yeeb, neeg siab ntev, neeg siab zoo, txawj xav, ua neeg ntseeg 23 Hwm neeg, kav tau yus tus kheej NLT 5,18-23” Peb neeg ntiaj teb tsis mloog Leej Ntuj Plig ntshiab coj peb ua neej, nyias thiaj ua li nyias nyiam, nyias yuav nyias siab, peb thiaj tsis sib haum, tsis muaj kev sib zam, peb nyob tsis taus ua ke. Ob niam txiv xwb los ib tug tsis mloog ib tug hais, thaum kawg thiaj sib nrauj ; ib cuab kwv tij xwb los thiaj tawg tas tsis ua ib pab ; tib co neeg teev Yes Xus tiag, nyias khav nyias txiv yeej koom tsis tau npoj, kawg cais pab cais pawg, lam muag npe ua neeg teev Yes Xus, tiam sis, twb tsis mloog Yes Xus lus qhia. Cov neeg teev Yes Xus tau koob hmoov yog cov mloog Yes Xus lus, mloog cov thwj tim qhia, hwm Pob Zeb ua tus thawj, hwm vaj qhia ua tus sawv Pob Zeb lub chaw tshaj Huab Tais Yes Xus lub Moo Zoo hauv ntiaj teb no.

    Ib tsoom phooj ywg sawv daws, peb yuav tig ntsej los mloog, rua muag los ntsia lub Koom Txoos Kav Tos Liv hla dhau 2000 xyoo, tsis yog ib tiam neej xwb. Tag nrho tsoom neeg ntseeg thoob ntiaj teb puav leej koom tib tug txhooj, hwm tib txoj cai zwm vaj qhia ua sawv daws txiv. Nyob hauv liv xwm, Koom Txoos Kav Tos Liv kuj ntsib dua kev txhawj xeeb los lawm ntau zaus, tawg ua pab ua pawg, muaj peb lub taub hau, peb tug vaj qhia. Peb ntseeg tias Leej Ntuj Plig Ntshiab tshoj cov leej ntshiab, sainte Catherine de Sienne, ntaus thawj rub cov vaj qhia kom los sib poog coj lub Koom Txoos Kav Tos Liv los txog niaj hnub no. Peb yuav thov Leej Ntuj Plig Ntshiab coj peb tsoom neeg teev Tswv Ntuj los sib hlub, koom ib lub siab npaum li Leej Txiv thiab Leej Tub thiab Leej Ntuj Plig.


    24.05.2012 Cwj Vuam Chiv






    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 8th June 2012, 4:37 am


    Nthuav Ntawv Ntshiab

    HNUB 03/06/2012
    ( Hwm Huab Tais 3 Leeg - Xyoo B )





    Ib tsoom ntseeg thiab phooj ywg txhua leej,

    Hnub no, lub Koom Txoos Kav Tos Liv nco txog Tswv Ntuj yog Huab Tais peb leeg. Peb yuav piav ob peb los vim li cas peb hais txog Tswv Ntuj yog Huab Tais peb leeg (La Trinité). Tas ntawd, peb mam los nthuav ib lub ntsiab lus hauv cov zaj nyeem hnub no txhawb peb lub neej ua neeg ntseeg.

    Niaj xyoo, thaum ua Leej Ntuj Plig lub hmoov tas, peb cov Kav Tos Liv muaj hwm Tswv Ntuj yog Huab Tais peb leeg, vim li cas ? Peb twb tau piav ntau zaus txog lub hmoov no, peb yuav tsis rov qab piav npaum li qub. Peb tsuas hais ob peb los kom sawv daws nco tau peb Koom Txoos Kav Tos Liv tus txhooj tus cai hwm Tswv Ntuj yog Huab Tais peb leeg (La Trinité). Yuav kom peb nkag siab txog lub hmoov hwm Tswv Ntuj yog Huab Tais peb leeg, peb yuav xub muab piv rau ib yim tib neeg peb thiaj yuav to taub zoo. Nyob hauv ib yig neeg muaj leej txiv, leej niam thiab tus me nyuam. Lawv peb leeg no yog tib yig tib neeg xwb. Nyob hauv Tswv Ntuj kuj piv tau li ntawd : muaj Huab Tais Leej Txiv thiab Huab Tais Leej Tub thiab Huab Tais Leej Ntuj Plig yog tib tug Tswv Ntuj xwb, tiam sis, yog Huab Tais peb leeg, yam li yim tib neeg, muaj leej txiv, leej niam thiab tus me nyuam : “La Trinité est Une. Nous ne confessons pas trois dieux, mais un seul Dieu en trois personnes: "la Trinité consubstantielle" (Cc. Constantinople II en 553: DS 421). n°253. A cause de cette unité, le Père est tout entier dans le Fils, tout entier dans le Saint-Esprit; le Fils est tout entier dans le Père, tout entier dans le Saint-Esprit; le Saint-Esprit tout entier dans le Père, tout entier dans le Fils" (Cc. Florence en 1442: DS 1331). N° 255 Caté Eg Catho.” Peb tus Tswv Ntuj yog Huab Tais peb leeg, yog Tswv Ntuj Ntshiab. Peb noob neej lo As Das thiab Es Vas keeb txhaum kev cam thawj, hla Tswv Ntuj lus mus mloog dab xas tas lus. Peb tsis lees paub Tswv Ntuj kev hlub peb, yam li tus me nyuam tsis lees niam thiab txiv kev hlub nws, peb rov taw tuam Tswv Ntuj tus tsim peb los. Txawm peb tsis zoo hlub, Leej Txiv khuv leej peb npaum li ntawd, nws xa Leej Tub xeeb los ua neeg kom cawm tau peb neeg txhaum kom ntshiab huv li Tswv Ntuj. Leej Tub ua tus choj tshiab dauv qaum ntuj rau ntiaj teb, tuaj coj peb mus kom txog qaum ntuj raws Leej Txiv lub siab. Leej Tub yug ua neeg ris noob neej kev txom nyem, raug hiam, tuag thiab sawv cia sia rov dua qaum ntuj mus ua peb ntej. Leej Ntuj Plig tshoj peb kom mloog Leej Tub lus, ua neej sib hlub, sib zam, ua kwv ua tij, ua phooj ua ywg, ua ib cuab ib yig hauv ntiaj teb no yam li Leej Txiv thiab Leej Tub thiab Leej Ntuj Plig sib hlub ciaj Tswv Ntuj nyob ib txhiab ib txhis saum qaum ntuj. Tas cov neeg mloog Leej Ntuj Plig Ntshiab coj lawv ua neej sib hlub saum npoo av, puav leej tau txais Leej Ntuj Plig Ntshiab lub hwj huam : piv li tsoom leej ntshiab.

    Cov zaj nyeem hnub no muaj txiaj ntsim loj kawg rau peb txhua leej cov muaj pob ntseg thiab muaj siab tsob hwb peb tus Huab Tais Tswv Ntuj, yog tus Huab Tais siab loj siab zoo, khuv leej peb tib neeg txhua leej txhua tus. Huab Tais Tswv Ntuj tsis saib ntsej ua plhu saib dej ua ntu, leej twg tsob hwb Tswv Ntuj tag siab nrho, tus ntawd yog Tswv Ntuj me nyuam : “14 Cov neeg Tswv Ntuj Leej Ntsuj Plig coj, lawv yog Tswv Ntuj me nyuam.15 Vim nej tsis txais tus ntsuj plig qhev tais caus ntxiv, hos nej txais tus Ntsuj Plig cag, muaj nws peb thiaj hais tias : As Npas, Txiv.16 Tus Ntsuj Plig no lees peb ntsuj plig tias peb yog Tswv Ntuj me nyuam.17 Twb yog me nyuam kuj yog tseem cag, ciaj cag ntawm Tswv Ntuj vim nrog Leej Pleev ciaj cag, nrog nws txom nyem, peb yuav muaj hwj chim nrog nws thiab LM 8,14-17.” Muaj ib tug me ntxhais, Kateri Tekawitha, yog ib tug ntxhais neeg Iroquois, cov neeg qub neeg laug nyob txawm Canada teb thiab Mes Kas teb. Cov neeg laug li Kateri Tekawitha cov poj koob yawm koob no, raug txom nyem loj dua ntais tuag yuav luag tu noob, tshuav poov lawm xwb. Thaum Kateri muaj 4 xyoos, nws tsev neeg raug ib phaum mob tuag tas tshuav nws tib leeg, los haj tseem ua rau nws dig muag thiab ntsej muag mob hluav ncuav tas. Thaum nws niam tseem nyob, nws nco nws niam tau piav txog Huab Tais Yes Xus thiab leej niam Mab Liab rau nws mloog. Ziag no, niam txiv tuag tas tshuav nws ua ntsuag dai niam ntxawm thiab txiv ntxawm xwb. Hlob tiav nkauj los, lawv yuam nws yuav txiv kom thiaj muaj neeg hlub nws. Tiam sis, nws pheej hais nws zaj xav los ntxuav plig ua neeg ntseeg Tswv Ntuj, ces lawv yuam tsis tau nws yuav txiv, lawv ua ntau yam saib tsis taus nws. Xyoo 1676, nws txais lub cim ntxuav, nws muaj 20 xyoo. Nws niaj tag kis sawv thaum 4 h los teev ntuj thiab koom Thaj Txi Ntuj thaum 7 h ; teev ntuj tag, nws mam mus ua qav ua num tsis tau nyob li ; nws muaj siab teev ntuj tsis sav thiab nyiam hawm lub Cim Yug thiab muaj ib pluaj siab xav xav cog lus ua niam nkauj xwb, tiam sis, tsis tau kawm dua ntawv ces nws tsis paub ntawv li. Xyoo 1679, ib tug txiv plig kam txais nws kev cog lus ua niam nkauj xwb. Nws kuj tsis yog neeg noj qab nyob zoo, kheev muaj mob. Xyoo 1680, lub lis piam ntshiab hnub 4, thaum 3 h, nws tau tas sim neej. Thaum nws txoj sia tu, neeg pom nws lub ntsej muag dawb mos nyoos tuaj thiab nws tej pob hluav ncuav ploj tag nrho ua rau cov txiv plig thiab cov ntseeg sawv daws qhuas heev : “Yes Xus hais rau lawv tias : muab tag hwj huam saum ntuj thiab saum daim av rau kuv.19 Nej mus ua kom tas zeej tsoom neeg ua kuv thwj tim, ntxuav lawv plig hauv Leej Txiv thiab Leej Tub thiab Leej Ntuj Plig Ntshiab npe…kuv niaj hnub nrog nraim nej mus txog thaum lub caij kawg.”

    Ib tsoom phooj ywg, peb kev tsob hwb Tswv Ntuj peb tus Huab Tais peb leeg tas siab nrho muaj koob hmoov tshaj kev txawj ntse, tshaj nyiaj thiab kub, tshaj kev nto koob meej hauv ntiaj teb no : “Hnub xiab 21.10.2012, vaj qhia Npe Nes Des Tos 16 yuav tsa Kateri Tekawhita ua leej ntshiab nyob Rome.” Ua li mas tsis hais leej tib neeg twg, tsis hais tiam neej twg, tus neeg siab zoo, siab ncaj mloog Huab Tais Yes Xus lus, tus ntawd nrog Huab Tais Yes Xus muaj hwj chim tseeb tiag. Peb thov leej ntshiab Kateri Tekawitha qhia nws kev nrog Huab Tais Yes Xus txom nyem rau peb taug.


    28.05.2012 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 8th June 2012, 4:42 am


    NTHUAV NTAWV NTSHIAB HNUB 10/06/2012

    ( Hwm Yes Xus Lub Cev thiab cov Ntshav - Xyoo B )



    Rau hnub chiv tim 10 lub 6 hlis 2012


    Tsoom niam txiv kwv tij neej tsa phooj ywg,

    Hnub no yog hnub chiv 10 lub caij nruab xyoo, peb nco txog Huab Tais Yes Xus muab nws lub cev thiab roj ntsha los txhiv lub qab ntuj neeg. Vim li ntawd, hnub no, peb yuav hais txog kev hwm lub Thaj Txi Ntuj hauv peb lub Koom Txoos Kav Tos Liv.

    Peb los ua neeg ntseeg Tswv Ntuj, peb yuav tsum paub peb txoj kev teev hawm Tswv Ntuj hauv peb lub Koom Txoos kom txhij kom txhua. Yog peb twb tsis paub peb txoj kev teev hawm Tswv Ntuj, peb tus kheej yuav ua cas ntseeg Tswv Ntuj ruaj khov, peb puas yuav pom qab pab lwm leej nrog peb teev Tswv Ntuj. Tiam sis, yog peb txawj teev hawm Tswv Ntuj raws peb Koom Txoos Kav Tos Liv qhia, peb thiaj yuav pab tau luag tej, coj tau neeg los nrog peb teev Tswv Ntuj thiab hwm tib neeg raws li Huab Tais Yes Xus qhia. Yuav kom peb ciaj ua neeg ntseeg Tswv Ntuj, peb nyias yuav paub txhawj txog nyias kev npuab Tswv Ntuj, nyiam Tswv Ntuj. Tus twg nyiam mloog Tswv Ntuj lus, tus ntawd ciaj Tswv Ntuj me nyuam. Yog peb twb tsis nquag nyeem Ntawv Ntshiab, peb yuav ua cas paub Tswv Ntuj lub siab, peb puas yuav txawj ua xis Tswv Ntuj nyiam ? Vim li ntawd, peb yuav tsum nquag nyeem phau Ntawv Ntshiab thiab yoog raws li Tswv Ntuj qhia. Peb yuav qhib peb lub siab thov Leej Ntuj Plig Ntshiab tuaj pab peb, coj peb kev, qhia peb ua neeg mloog Tswv Ntuj lus tib yam li nej tus me nyuam mloog nej lus. Tiam sis, kev ciaj Tswv Ntuj me nyuam tsis tag rau txoj kev nyeem Ntawv Ntshiab xwb. Tseem tshuav ntau txoj kev, tshuav ntau lub txiaj ntsim yuav pab tau peb ciaj ua Tswv Ntuj me nyuam zoo tiag tiag. Txoj kev nquag teev ntuj, txoj kev hlub neeg yog lub ntsiab lus hauv txoj kev ntseeg Tswv Ntuj raws Huab Tais Yes Xus kev qhuab qhia : “28 Ib tug thoob xwm nug Yes Xus : “Lo lus qhia loj tshaj cov yog lo twg ?” 29 Yes Xus teb tias lo loj tshaj : “Tig ntsej mloog, His Xais Lais, peb tus Huab Tais Tswv Ntuj yog tseem Huab Tais tib leeg kheej, 30 Koj hlub Huab Tais koj tus Tswv Ntuj tag nrho koj lub siab, tag koj ntsuj plig tag koj tswv yim thiab tag koj lub zog 31 Lo ob lo no : Koj hlub luag tus ze koj tam li koj tus kheej. Tsis muaj lwm lo lus qhia loj tshaj cov no MK 12,27-31” Txawm ib tug neeg ntseeg Tswv Ntuj paub Ntawv Ntshiab zoo kawg, tiam sis tsis txawj hlub neeg li thiab ib tug neeg ntseeg ntuj tsis teev Tswv Ntuj li, puas tsim nyog hu ua neeg ntseeg Tswv Ntuj, nej xav li cas ? Tej neeg ntseeg Tswv Ntuj zoo li ntawd puas txawv los tsis txawv tej neeg teev pej kum dab qhuas ? Yeej tsis txawv thiab pauv tsis ntxiv tus neeg teev pej kum dab qhuas. Vim tus neeg teev pej kum dab qhuas yeej tsis teev ntuj tib yam nkaus.
    Vim li ntawd, tus neeg teev hawm Tswv Ntuj yuav tsum hloov siab hloov ntsws dua tshiab, tsis txhob coj lub qub neej thiab tej qub siab li thaum tseem teev dab qhuas. Peb txawm nkees npaum li cas los peb yuav xyaum ua neeg nquag vim peb xav mloog Yes Xus lus ; peb lub siab txawm lim hiam npaum twg los peb yuav nrauj kom tu taw mus, tig los ua neeg siab ncaj, xyaum hlub neeg vim Yes Xus hais kom peb sib hlub, kom peb nquag teev ntuj hwm Tswv Ntuj npaum li nws lauj lub caij nyoog fim nws Leej Txiv. Peb tsis txhob lam taus lam pheev tsim tej txoj kev teev hawm tshiab li tej txhia xib hwb sawv coj tej pab neeg ntseeg tshiab. Yog yus teev ntuj hauv yus vaj yus tsev, yus ua ywj yus siab kuj tsis luaj twg. Tiam sis, thaum yus coj ib pab neeg teev ntuj, yuav tau ceev faj txhob khoo luag teev ntuj tsis raws kev raws cai, tsis muaj hauv paus hauv ntsis. Tus neeg ntseeg Kav Tos Liv yuav tsum mloog lub Koom Txoos tus txhooj tus cai teev ntuj. Muaj ntau ntau txoj kab ke teev ntuj : teev hauv vaj hauv tsev, teev thaum muaj ib pluag mov khi tes, teev rau ib tug neeg mob hnyav, teev rau ib lub ntees qaij ntees qaug, los ua ib Thaj Txi Ntuj…hauv tej kab ke teev hawm Tswv Ntuj no, lub Thaj Txi Ntuj (l’Eucharistie, la Messe) yog txoj kab ke teev hawm Tswv Ntuj loj dua tej. Tus neeg ntseeg Kav Tos Liv yuav tau saib lub Thaj Txi Ntuj kom muaj nqes tshaj : “22 Hauv pluas hmo, Yes Xus nthos lub mov, hais zaj foom hmoov zoo, muab ntais faib rau lawv thiab hais tias : “Txais mus, yog kuv lub cev.” 23 Thiab nthos lub ntim ua ntuj tsaug, nws muab rau lawv sawv daws haus. 24 Nws hais lawv tias : “Yog kuv roj ntsha, ntshav cog lus nchuav pub rau zeej tsoom MK 14,22-24.” Yog peb ua ib tug neeg ntseeg paub cai, peb yuav kub siab tshaj plaws rau lub Thaj Txij Ntuj tsis pub sav hauv peb lub neej. Vim lub Thaj Txi Ntuj tsis yog muab yaj, muab tshis, muab nyuj los tua txi ntuj li thaum ub lawm. Peb mus koom Thaj Txi Ntuj hnub chiv, yog mus koom Huab Tais Yes Xus muab nws lub cev thiab roj ntsha ua nqe txhiv peb, cawm peb hauv kev tuag tam zoj nej nqa ib thooj nyiaj ua nqe txhiv nej tus txheeb ze raug kaw hauv tsev loj faj tawm los tsev. Yes Xus muab nws lub cev thiab roj ntsha ua txhiam xws yug peb hauv Thaj Txi Ntuj, yog lub cim Yes Xus hlub peb leej tib neeg tuag nthi rau peb tes tam li peb hlub peb tus txheeb ze. Tiam sis, txawm peb hlub peb tus txheeb ze npaug twg, yog luag tseev muab nws tua, peb yeej pab tsis tau peb tus txheeb ze kom ciaj. Vim peb yuav tsis kam muab peb txoj sia mus theej nws kev tuag, taj nws lub chaw. Yam peb ua tsis tau rau peb tus txheeb ze no, Yes Xus ua tau rau peb cuag Yes Xus yog peb tus ntsuab tus ze : “13 Yog ntshav nyuj thiab ntshav yaj thiab paj tshau nphoo rau saum cov neeg txhaum twb ua tau lawv nqaij ntshiab si thiab huv lis si 14 Leej Pleev cov ntshav yim huab zoo tshaj hauv Leej Ntuj Plig tus nyob ib txhis, muab nws tus kheej dawb paug txi rau Tswv Ntuj, nws yim ua tau peb kev tuag huv si los tiam Tswv Ntuj tus ciaj sia 15 Vim li, nws yog tus sawv peb kev cog lus tshiab, nws kev tuag ua nqe txhiv lub txhoj tau rhuav thawj lo lus cog tseg, pub lub cuab tam ib txhis cog cia rau cov muaj feem txais HN9,13-15.” Vim li ntawd, Yes Xus yog peb tus Huab Tais, peb yuav teev Huab Tais Yes Xus kom tag nrho peb lub siab. Lub Thaj Txi Ntuj (l’Eucharistie, la Messe) yog txoj kev zoo tshaj plaws rau peb ua Huab Tais Leej Txiv Tswv Ntuj tsaug hauv nws Leej Tub kev hlub peb. Los puas dua ntawm Thaj Txi Ntuj, tsis muaj lwm yam ntxim Tswv Ntuj siab cuag Thaj Txi Ntuj. Xav kom peb pom tias txawm peb hu 9 hnub 8 hmo nkauj rau Tswv Ntuj, muab tag ntiaj teb cov txhab nyiaj txhab kub txi Tswv Ntuj twb tsis zoo Tswv Ntuj siab npaum Huab Tais Yes Xus Thaj Txi Ntuj.

    Ib tsoom phooj ywg, Huab Tais Yes Xus yog peb tus ntsuab tus ze, nws tau hliv nws roj ntsha cawm peb. Ua neej nyob, kaum hnub tshav los yuav muaj ib hnub tsaus, hnub kev txom nyem tig los txog, peb yuav nco ntsoov Huab Tais Yes Xus lub cuab tam ib txhis cog cia rau cov muaj feem txais. Peb mus koom lub Thaj Txi Ntuj yog mus txais Huab Tais Yes Xus lub cev thiab cov ntshav ua txhiam xws yug peb kom hla dhau hnub kev txom nyem tig los txog peb.

    06.06.2012 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5044
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  Maiv Tooj on 16th June 2012, 11:05 am




    NTHUA NTAWV NTSHIAB HNUB 17/06/2012

    ( Hnub Chiv 11 Nruab Xyoo - Xyoo B )




    Rau hnub chiv tim 17 lub 6 hlis 2012

    Ib tsoom niam txiv kwv tij neej tsa thiab phooj ywg hmov tshua,



    Hnub no zoo hnub, peb rov tuaj sib fim ua ke hauv Thaj Txi Ntuj no. Peb zoo siab qhib ntsej ua ke mloog Huab Tais Yes Xus zaj txhais hais txog qaum ntuj. Vim li ntawd, peb yuav nthuav ob peb los txog Yes Xus kev qhuab qhia qaum ntuj rau peb tib neeg ntiaj teb.

    Muaj tej lo lus peb yuav tau ceev faj thiab txuag peb lub ncauj txhob lam taus lam hais los sib xyaws ua ke. Piv txwv zoo li no : thaum peb hais txog Hmoob tej zos, mas yog zos. Lub zos tsis yog lub nroog, lub nroog tsis yog lub teb chaws. Thaum peb tshaj Huab Tais Yes Xus lub Moo Zoo, peb kuj yuav tsum ceev faj tib yam nkaus. Peb tsis txhob hais lo lus ub lo lus no qhuab qhia Yes Xus lub Moo Zoo. Peb hais lo twg kom yog lo ntawd. Peb hnov Yes Xus ua zaj txhais qhia txog Tswv Ntuj qaum ntuj (le Royaume de Dieu) rau nws cov thwj tim thiab zeej tsoom neeg tuaj mloog nws. Yes Xus hais txog Tswv Ntuj qaum ntuj (le Royaume de Dieu) tsis yog hais txog ceeb tsheej (le Paradis) rau zeej tsoom neeg tuaj mloog nws. Peb yuav tsum pom qhov sib txawv ntawm Tswv Ntuj qaum ntuj thiab ceeb tsheej (Il y a une différence entre le Royaume de Dieu et le Paradis). Tsuas muaj tib zaug Yes Xus thiaj hais txog ceeb tsheej, yog thaum Yes Xus hais rau tus tub sab dai ntoo cuam ntawm nws ib sab : “43 Nws thiaj teb tus no : Kuv hais tseeb rau koj, hnub no, koj yuav nrog kuv nyob hauv ceeb tsheej LK 23,43” Dua li, Yes Xus tsis tau hais txog ceeb tsheej ib zaug qhov twg li. Muaj plaub leeg : Mas Tais, Mas Kos, Lus Kas thiab Zam lawv cov sau Yes Xus lub Moo Zoo, tsuas kawg Lus Kas tib leeg thiaj hais txog ceeb tsheej tib zaug lub sij hawm li hais ntawd xwb. Vim li ntawd, peb thiab, peb yuav txuag peb lub ncauj tsis txhob muab lo ceeb tsheej los hais ua hnub ua hmo li coob leej ntau tus hais peb hnov. Vim li cas ? Vim peb tsis yog Huab Tais, peb tsis yog Tswv Ntuj, tsis yog peb lub luag hauj lwm yuav hais txog ceeb tsheej. Nej sim xav, Mas Tais, Mas Kos thiab Zam lawv cov sau Yes Xus lub Moo Zoo, lawv twb tsis hais ceeb tsheej ib los kiag li, peb puas muaj cai hais tshaj lawv ? Tsis tag li ntawd, yog peb hais txog cov teb chaws muaj vaj ntxwv kav li Thaib teb, Nyee Poo teb, As Kiv teb…peb puas hu Thaib teb ua Thaib ceeb tsheej, Nyee Poo ceeb tsheej los As Kiv ceeb tsheej ? Tos peb tsis hu li ntawd vim tsis raug kev cai. Yes Xus nqes los qhuab qhia Tswv Ntuj qaum ntuj (le Royaume de Dieu) rau tib neeg, tsis yog qhia ceeb tsheej. Peb yuav tau ceev faj vim Yes Xus kiag Yes Xus twb tsis qhia ceeb tsheej, peb thiaj tsis yuam kev (erreur théologique) li ntawd.

    Peb tseem nco Yes Xus thawj lo lus qhib kev tshaj lub Moo Zoo Yes Xus hais li no : “15 Sij hawm los txog, Tswv Ntuj qaum ntuj nyob ze ze kom thim xav thiab ntseeg lub Moo Zoo MK 1,15” Yes Xus lub Moo Zoo yog dab tsi ? Yes Xus lub Moo Zoo thiab Tswv Ntuj qaum ntuj mas yuav luag sib ntxaib raws li peb mloog Yes Xus qhia. Yes Xus qhib kev tshaj Tswv Ntuj qaum ntuj yog tshaj lub Moo Zoo rau tag ntiaj teb neeg : tus phem tus zoo, tus muaj tus pluag, tus neeg mob nkeeg los tus zoo neej. Yes Xus xav qhia dab tsi thaum Yes Xus ua zaj txhais qhia Tswv Ntuj qaum ntuj (le Royaume de Dieu) rau peb tib neeg ? Tus T.P Léonard Audet, c.s.v, hais li no hauv nws phau ntawv : “Yes Xus vam txog Tswv Ntuj, hnub kawg, yuav ua vaj kav qaum ntuj thiab ntiaj teb. Tswv Ntuj yuav nqus tes hlo cawm lub ntiaj teb neeg thiab kho txoj kev ntoj kev thuv dua tshiab kom tib neeg nrog tau Tswv Ntuj ua ib ke. Tiam sis, kom peb txhob to taub yuam kev, tsis yog hnub ntiaj teb kawg qaum ntuj hnub mam tshwm tuaj hauv ntiaj teb no. Hnub twg Tswv Ntuj nqus tes hlo cawm peb, hnub ntawd peb twb nyob hauv qaum ntuj hnub. Qaum ntuj hnub twb tshwm npliv tim npoo ntuj li lub hnub. Vim li ntawd, peb yuav npaj kom tau siab tos, tsam lig dhau rau peb.

    Ua li, Tswv Ntuj qaum ntuj nws yuav zoo li cas ? Raws li Yes Xus lub Moo Zoo, nws yuav yog tej yam tshiab tsis tau pom dua, tsis tau muaj dua, sim neej tib neeg tswv yim xav tsis txog. Yog lub neej tshiab Tswv Ntuj muab pub rau tib neeg. Qaum ntuj hnub tib neeg yuav dim plaws tsis txog siav lawm. Tos qaum ntuj hnub tuaj vim Tswv Ntuj kev hlub neeg. Nws yuav txawv lawm ntau peb ntiaj teb no lub neej, txawv tib neeg tej vaj ntxwv cov teb chaws… Nws yog ib lub ntiaj teb tshiab tag nrho siab tshaj loj tshaj peb tib neeg lub chaw vam thiab zoo tshaj npaum li cas qhov peb mem tau. Yes Xus kev tshaj Tswv Ntuj qaum ntuj qhia peb tib neeg txoj kev vam to ntshua xuas tau kab, muab tau kev rau peb taug. Vim lub hom phiaj no, peb to taub npaum li cas Yes Xus caw neeg kom thim xav, hloov siab hloov ntsws tshiab, nyias npaj nyias kom txhij tos Tswv Ntuj yuav nqus daj nqus tes rau peb pom xyeem. Lub caij lub nyoog tuaj txog ze ze lawm, yuav tau maj zeeg tig los tsis txhob nkim caij nkim nyoog dag.

    Yes Xus tsis yog qhia peb tos Tswv Ntuj qaum ntuj yuav tuaj hnub ntiaj teb kawg xwb. Yes Xus tus kheej qhib plho Tswv Ntuj qaum ntuj lub qhov rooj rau peb qhov muag pom xyeem nyob ntiaj teb no. Yes Xus txhais tes thiab lo lus hais tau Tswv Ntuj qaum ntuj tshwm plaws los : cev tes ntais 5 lub mov thiab 2 tug ntses rau 5000 noj tsis tag ; hais lo lus cawm siav tsa hlo Las Ntxas Los sawv tsees tawm plaws hauv qhov ntxa. Tswv Ntuj nyob nrog Yes Xus ua ke. Txoj num Yes Xus nqes tes qhib yuav tiav log hnub ntiaj teb kawg… Qaum Ntuj yog lub ntsiab Yes Xus kev qhuab qhia, Le Royaume, cœur de la prédication de Jésus Léonard Audet, c.s.v ”

    Ib tsoom phooj ywg sawv daws, peb to taub tias Tswv Ntuj qaum ntuj loj heev ntim tag ntiaj teb neeg yam li tsob ntoo ntim tag cov noog tuaj nyob ua zes. Cov neeg mloog Yes Xus lus nrhiav Tswv Ntuj qaum ntuj, lawv txhais tes thiab lo lus ua tej yam hwj huam cawm tau peb tib neeg txom nyem hauv ntiaj teb no, tsis hais tiam neej twg. Vim Huab Tais Yes Xus nrog nraim lawv ua ke, yam lawv ua tsis yog lawv, yog Huab Tais Yes Xus nqus tes hlo pab rau lawv.


    13.06.2012 Cwj Vuam Chiv




    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 22nd June 2012, 10:11 am





    NTHUAV NTAWV NTSHIAB.

    Rau hnub chiv tim 24 lub 6 hlis 2012

    Ib tsoom ntseeg thiab phooj ywg txhua leej,


    Hnub no, tag lub Koom Txoos Kav Tos Liv nco txog Zam Ntxuav Plig hnub tsuj xeeb. Peb yuav los piav ob peb los txog saub Zam Ntxuav Plig kev ua tim khawv txhawb peb kev tshaj Yes Xus lub Moo Zoo ib ncig ntawm peb nyob. Vim peb lub neej muaj ntau tsos txawv los kuj muaj tej tsos zoo li Zam Ntxuav Plig lub neej.

    Nej paub, Es Lis Xas Npes thiab Mab Liab nkawd yog viv ncaus thiab nej tseem nco txog nkawd lub neej. Es Lis Xas Npes twb mus ua neej nrog Zas Kas Lias laus qas nkoos lawm. Es Lis Xas Npes lub cev poj niam laus tav li ntawd yug tsis tau tub ki, dhau caij dhau nyoog tag, yam li tsob dib tsob taub nplooj daj lawm yuav txi tsis taus txiv. Mab Liab tseem nyuam qhuav hlob ua nkauj xwb qas yeev nyob tsis tau teej cuab teej yig, tseem ntxov dhau rau txoj kev xeeb tub yam tsob nplej tsis tau txog caij txhawv. Lub cev poj niam laus li Es Lis Xas Npes thiab hluas li Mab Liab, yeej xeeb tsis tau tub. Ua cas Es Lis Xas Npes thiab Mab Liab nkawd cev ho xeeb tub, peb yuav to taub mus rau fab twg ? Yog muaj piv rau tej poj niam nruab cev, yeej txawv dhau tsis raws kev cai, xyov ua cas nkawd ho xeeb tau tub yooj yim npaum li ntawd. Tiam sis, vim peb ntseeg Huab Tais Tswv Ntuj kev hlub neeg loj thiab dav npaum li ntawd, cov neeg npuab Tswv Ntuj thiaj paub Tswv Ntuj txiaj ntsim. Es Lis Xas Npes thiab Mab Liab nkawd yog ob tug poj niam nquag, ob tug poj niam mloog Tswv Ntuj lus tshaj dua tej. Nkawd yog neeg khaub zig Tswv Ntuj tag siab nrho thiab hlub Tswv Ntuj npaum Tswv Ntuj pluag tub ki tshaj nkawd. Nkawd nruab siab txhawj Tswv Ntuj tshaj nkawd txhawj nkawd nruab cev pluag tub ki. Nkawd txawm pom Tswv Ntuj ua tau nkawd nruab cev pluag yug tau tub txhaws nkawd kev txhawj xeeb thiab hlub Tswv Ntuj. Es Lis Xas Npes xeeb tau Zam ua Tswv Ntuj tus saub ; Mab Liab xeeb tau Yes Xus tus Siab Tshaj Leej Tub : “59 Thaum txog hnub yim, nkawd coj tus me nyuam mus ua cim hlais, luag kom hu nws txiv Zas Kas Lias npe rau nws 60 Nws leej niam hais tias : “Tsis yog, kom hu nws npe ua Zam.” 61 Lawv hais rau nws : “Hauv koj tsev neeg tsis muaj leej twg hu lub npe ntawd.” 62 Lawv thiaj piav tes rau leej txiv saib nws xav hu lub npe twg. 63 Leej txiv thiaj nug ib daim phiaj thiab sau li no : Zam yog nws lub npe. LK 1,59-63” Lub npe Zam txhais tias : “Tswv Ntuj Txiaj Ntsim” yog lub txiaj ntsim Tswv Ntuj muab. Tiam sis, “Zam, Tswv Ntuj Txiaj Ntsim” no kuj yog Tswv Ntuj kev nplij Zas Kas Lias thiab Es Lis Xas Npes nkawd siab. Vim nkawd tos ntsoov Tswv Ntuj kev hlub nkawd ib sim neej laus tas tav li ntawd tsis thim lus, tsis nros, tsis chim rau Huab Tais Tswv Ntuj ib yam tus neeg ncaj ncees. Nkawd tus tub “Zam” yog Tswv Ntuj pub rau nkawd yug ua Tswv Ntuj tub txib tshaj Tswv Ntuj txoj kev hlub neeg rau Tswv Ntuj tsoom tub ki : “16 Nws yuav coj His Xais Lais cov tub ki coob leej rov los cuag lawv tus Huab Tais Tswv Ntuj.17 Nws yuav mus ua lawv ntej nrog Es Lias ntsuj plig thiab hwj huam, tig cov txiv lub siab npuab cov me nyuam thiab cov neeg ntxeev siab kom muaj cov tswv yim ncaj ncees, npaj ib haiv neeg txhij tseg rau Huab Tais LK 1,16-17.”

    Lwm cov saub twb xub hais txog Zam ntau pua xyoo ua ntej los lawm. Ua li mas Zam yog Tswv Ntuj ib tug saub npaj Tswv Ntuj txoj kev rau tsoom tub ki His Xais Lais taug : “Huab Tais twb hu kuv hauv nruab plab, twb tuav kuv npe hauv kuv niam nruab cev 2 Nws twb hom kuv lub ncauj zuag plias li rab ntaj, nws twb tso kuv nkaum hauv nws txhais tes ntxoov, twb rhais kuv li ntiv xub hauv nws lub raj HX 49,1-2” Zam txoj kev ua saub yog qhuab qhia Tswv Ntuj txoj kev hlub neeg rau tsoom pej xeem tuaj mus xyuas nws tom hav suab puam, ntawm ntug dej Yos Las Das : “11 Zam teb rau npoj neeg hais tias : “Tus muaj ob daim tsoos ua nws tug kom nco ntsoov pub rau tus tsis muaj, kom tus muaj txhiam xws ua tib yam nkaus.” 12 Cov tub se kuj tuaj txais kab ke ntxuav, lawv hais rau nws : “Xib Hwb, peb yuav tsum ua li cas ?”13 Nws teb rau lawv : “Tsis txhob cuab tshaj txoj cai kom nej sau.”14 Cov tub rog kuj nug nws hais tias : “Peb yuav tsum ua li cas ?” Nws hais rau lawv : “Tsis txhob quab yuam txeeb kom tau, zoo siab txais nej tus nqi Lk 3,11-13” Npoj neeg coob tuaj ntsauv Zam, muaj cov neeg sau se, muaj cov tub rog ; sawv daws tuaj thov Zam muab dej los ntxuav lawv cov txhaum pov tseg ; sawv daws hu Zam ua “Zam Ntxuav Plig”. Cov tuaj xyuas Zam coob leej hnov Zam tej lus qhuab qhia, lawv hais tias Zam yog Leej Pleev tus Tswv Ntuj tso tuaj cawm neeg : “26 Zam teb rau lawv tias : “Kuv ntxuav neeg hauv dej. Hos muaj ib tug nyob nruab nrab hauv nej, tiam sis nej tsis paub tus ntawd 27 Nws lawv kuv qab tuaj, kuv twb tsis tsim nyog daws nws txoj hlua khau.” 28 Tej yam no tau tshwm tuaj nyob Npes Tas Nias, ntawm Zos Das Nias, ntawm thaj chaw Zam ntxuav sawv daws 29 Tag kis, nws pom Yes Xus tuaj ntawm nws, nws hais tias : “Saib Tswv Ntuj Leej Yaj, tus daws qab ntuj neeg cov txhaum Z 3,26-29” Tus tseem saub ua txoj num tub txib, qhia thiab cev Huab Tais tej lus tsis txeeb Huab Tais lub chaw rau nws kheej. Tus neeg teev Yes Xus yuav yoog Zam Ntxuav Plig tus cwj pwm tib yam nkaus.

    Ib tsoom phooj ywg sawv daws, peb txhua leej txhua tus laus, hluas, poj niam, txiv neej peb zoo li “Zam” ua Tswv Ntuj ib tug saub ntawm peb lub vaj lub tsev, hauv peb lub zej zog, ntawm peb lub luag dej luag num. Xav kom peb lub ncauj zoo li rab ntaj zuag txiav tau qhov ncaj ncees txhem qhov nkhaus cees tawm, txiav kev lim hiam kom tu nrho, lov ntho txoj cai quab yuam pej xeem pov tseg…peb ua Tswv Ntuj tus xub tshuaj lom neeg lub siab phem siab dub kom ploj. Peb ua txoj num tub ntxhais txib, npaj Tswv Ntuj txoj kev rau Tswv Ntuj tsoom pej xeem taug, tshaj Tswv Ntuj kev hlub neeg, txhob ua neeg dag, txhob cib nyeej, txhob tub sab, txhob lim hiam. Peb tsis txhob khav ua tus neeg ntseeg Tswv Ntuj zoo tshaj tej, muaj plhus txiav txim rau tus ub tus no : koj mus lawm saum qaum ntuj los koj no mus lawm dab teb. Peb tsis txhob muaj plhus tshaj “Zam Ntxuav Plig” twb tsis tsim nyog khoov hle Huab Tais khau, vim tus cawm lub qab ntuj neeg yog Leej Yaj tsis yog peb.


    20.06.2012 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5044
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  Maiv Tooj on 29th June 2012, 10:28 am



    NTHUAV NTAWV NTSHIAB


    Rau hnub chiv tim 01 lub 7 hlis 2012

    Tsoom niam txiv, kwv tij neej tsa phooj ywg,

    Peb nyob hauv lis piam nruab xyoo 13, yog zoo caij zoo nyoog, peb yuav los piav ob peb los txog peb noob neej kev tu siab. Tsis muaj ib yam dab tsi ua peb txhawj thiab muaj kev tu siab loj tshaj txoj kev qaij qaug tso lub ntiaj teb no tseg. Tiam sis, peb tsis txhob txhawj, vim muaj tus pab tau peb daws peb txoj kev tu siab no pov tseg lawm du lug. Vim li ntawd, peb yuav tau ua siab loj khaub zig Huab Tais Tswv Ntuj tag nrho peb lub siab lub ntsws.

    Huab Tais Tswv Ntuj txhais tes tsim lub ntuj thiab daim av, lub hnub lub hli, tej hnub qub, huab cua, nroj tsuag, tsiaj txhu, tib neeg thiab ntsuj mam tsuj plig puas tsav yam zoo tag nrho, tsis muaj ib yam twg hais tias nkim Tswv Ntuj lub zog tsim. Vim tag txhua yam puav leej muaj nuj nqes raws li Tswv Ntuj ntshaw. Yam muaj nuj nqes ntawd yog kev ciaj sia raws li Tswv Ntuj siab. Tswv Ntuj tsim txhua yam koj muaj sia. Tiam sis, tim dab phem sawv tiv Tswv Ntuj rhuav Tswv Ntuj tes num, ua kev ploj tuag rhuav peb txoj sia Tswv Ntuj muab rau peb, yam li tus me nyuam nej yug tau nej hlub, tiam sis nws tsis ris nej txiaj kev hlub nws, tsis mloog nej hais, ua tej yam lim hiam nej xav tsis txog rhuav nej plhu, ua rau nej tu siab. Vim li ntawd, dab phem kev ploj tuag tsis ua rau peb tib neeg tu siab xwb, ua rau Tswv Ntuj tu siab tshaj peb : “14 Tswv Ntuj tsim puas tsav yam kom nyob txawm thiab txhua tsav hauv lub sim ceeb zoo khuv leej thiab tsis muaj ib yam yuav nkim hauv lawv, kev puas ntsoog kav tsis tau daim av 15 Txoj kev ncaj ncees tsis txawj tuag…23 Tswv Ntuj tsim tib neeg kom txhob txawj pluam thiab ua neeg yam nkaus li nws tus kheej ThTs 1,13-14;2,22” Txawm tias kev ploj tuag tshwm tuaj hauv lub sim ceeb rhuav peb txoj sia los kev ploj tuag tsis yeej Tswv Ntuj kev ncaj ncees cawm tau peb. Txawm tias peb tib neeg tsis muaj tus dhia dhau kev ploj tuag, peb tib neeg nyiam qhov zoo, nyiam lub siab loj siab dav, nyiam kev ncaj ncees, nyiam ua neeg tsim txiaj thiab siab zoo. Peb leej twg ncaj ncees thiab siab zoo, peb txawm qaij qaug lawm los Huab Tais Tswv Ntuj tsuas pom peb zoo li tus neeg tsaug zog xwb, Tswv Ntuj yuav tsa kom peb sawv, txuas Tswv Ntuj txoj sia rau peb : “Yes Xus pom sawv daws ua ntxhov hnyo : muaj cov quaj thiab qw qog qees 39 Nws chaws los hais lawv tias : “Ua cas yuav ua ntxhov hnyo thiab quaj npaum li ? Tus me ntxhais tsis tuag, nws tsaug zog xwb MK 5,38-39” Vim Tswv Ntuj muaj peev xwm sam txoj sia rau peb tib neeg tus ncaj ncees kom ciaj sia nyob txawm li Tswv Ntuj thiaj txaus Tswv Ntuj siab. Tsis muaj leej twg muaj peev xwm tiv dab phem kev ploj tuag. Leej Txiv Tswv Ntuj thiaj xa nws Leej Tub Yes Xus tuaj ua peb kwv tij pab peb, qhia peb thim xav ntawm peb txoj kev tu siab los tsob hwb Yes Xus mloog nws lus. Thaum Yes Xus tseem ua neej nyob, zeej tsoom neeg ua npoj ntws caum Yes Xus. Cov neeg raug kev txhawj xeeb yam li Yes Los, tus tswj tsev txoos tuaj pe thov Yes Xus pab nws : “41 Yes Xus tuav nkaus tus me nyuam txhais tes thiab hais tias : “Tas liv tas kus” txhais tias : “Kuv me ntxhais, sawv tsees yuad !” 42 Tam sid, tus me ntxhais sawv tsees los rhais ruam mus kev- nws muaj kaum ob xyoos - Sawv daws yoob tag MK 5,41-42” Cov neeg tuaj khaub zig Yes Xus, lawv puav leej tau txais txiaj ntsim txhua tus. Qhov teeb meem loj ua rau Tswv Ntuj tu siab ntxiv dab phem kev ploj tuag, yog peb lub siab twm xeeb tsis mloog Yes Xus lus, tsis ntseeg Yes Xus qhia, tsis ua li Yes Xus hais ib yam As Das thiab Es Vas tsis mloog Tswv Ntuj lus, hla Tswv Ntuj lo lus cog tseg rau nkawd. Thaum nkawd pom tias nkawd yuam kev, ces lig lawm, nkawd txawj tshaib, paub nqhis, txawj mob txawj ntsaj, txawj ploj txawj tuag. Tim yus yuam cai ua rau yus yuam kev, tus neeg yuam cai thiab yuam kev yog tus neeg cam thawj thiab cav ncauj. Ib tug me nyuam cav ncauj yog ib tug me nyuam tsis mloog lus. Peb yog Tswv Ntuj tsim, peb tsis teev tsis hwm Tswv Ntuj, peb sawv tiv Tswv Ntuj tus tsim peb ib yam li dab phem : “24 Vim dab phem kev khib kev ploj tuag nkag los hauv ntiaj teb ; cov mloog nws cob khaws nkaus tau coj ThTs 2,24” Yog peb tsis mloog Yes Xus lus, peb kuj tsis ntseeg tias Yes Xus pab tau peb. Yog peb tsis ntseeg Yes Xus, peb puas txawj teev thiab puas txawj hwm Yes Xus ? Ib tug neeg tsis teev tsis hwm Yes Xus, yog nws thuam Yes Xus, tus thuam Yes Xus thuam Tswv Ntuj tus kheej. Peb tus neeg thuam Tswv Ntuj, nej pom txhaum loj npaum li cas. Txoj kev thuam Tswv Ntuj tsis yog dab phem xwb, yog tag nrho peb leej tib neeg. Tus neeg peb saib tsis taus, tus neeg peb ntxub, tus pluag peb tsis xav pom, tus mos ab hauv leej niam plab peb rho pov tseg…muaj ntau txoj kev peb ua tub qaug Tswv Ntuj hauv peb lub neej. Tus neeg ntseeg thiab teev Tswv Ntuj yuav mob siab nrhiav kom tau kev ntsib Huab Tais Yes Xus ib yam li tus poj niam tsob ntshav, peb thiaj yuav txais Huab Tais Yes Xus lub txiaj ntsim cawm tau peb li tus poj niam ntsib Yes Xus ua nws tus mob zoo hlo.

    Ib tsoom phooj ywg sawv daws, peb txawm raug txom nyem loj npaum li tus poj niam tsob ntshav thiab raug kev txhawj xeeb li Yes Los, tus tswj tsev txoos, peb yuav niaj hnub nrhiav kev ntsib Huab Tais Yes Xus vim Leej Txiv xa nws tuaj cawm peb. Tus poj niam lub siab xav tau li cas, nws txawm pom Yes Xus pab tau nws dim nws tus mob li nws siab xav. Dua ntawm Huab Tais Yes Xus, tsis muaj dab tsi, tsis muaj lwm leej lwm tus yuav pab yuav cawm tau peb. Vim peb ua leej tib neeg peb muaj kev txhawj xeeb loj rau peb, raug luag ntxub, raug luag hiam, raug kev tshaib kev nqhis, raug mob raug ntsaj, raug kev ploj tuag, muaj kev chim kev tu siab ntau yam, vim li, peb yim huab yuav vam Huab Tais Yes Xus pab peb.


    Le 27.06.2012 Cwj Vuam Chiv




    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 24th August 2012, 9:52 pm


    NTHUAV NTAWV NTSHIAB HNUB 26/08/2012
    ( Nruab Xyoo Hnub Chiv 21 - Xyoo B )




    Rau hnub tim 26 lub 8 hlis 2012


    Ib zeej tsoom neeg ntseeg thiab phooj ywg sawv daws,

    Twb rov txog caij nyoog peb tuaj teev hawm Huab Tais Tswv Ntuj thiab mloog Tswv Ntuj lus hauv cov zaj nyeem no. Sawv daws paub, muaj coob muaj ntau pab neeg ntseeg Yes Xus nyob ntiaj teb no, tiam sis, tsawg leeg xwb thiaj txawj ua haum Yes Xus lub Moo Zoo. Cov neeg ntseeg Tswv Ntuj hauv Koom Txoos Kav Tos Liv, peb yuav tsum paub peb lub Koom Txoos keeb kwm. Vim Yes Xus yog tus teeb thiab tsa peb lub Koom Txoos sawv Yes Xus npe tshaj nws lub Moo Zoo mus thoob qab ntuj neeg. Vim li ntawd, hnub no, peb yuav nthuav ob peb los txog tus neeg ntseeg kev mloog lub Koom Txoos lus qhuab qhia.

    Muaj coob leej yuav xav hais tias : peb mloog phau Ntawv Nshiab txaus dhau lawm, tsis tas peb yuav mloog lub Koom Txoos Kav Tos Liv tej lus qhuab qhia ntxiv. Vim phau Ntawv Ntshiab yog Huab Tais Tswv Ntuj lus, hos Koom Txoos Kav Tos Liv lus qhuab qhia yog nyuag tib neeg lus, peb hwm Tswv Ntuj lus muaj nqes txaus lawm tsis tas peb yuav hwm Koom Txoos Kav Tos Liv lus vim yog neeg lus. Tus neeg xav tau li ntawd, nws zaj tswv yim yuam kev lawm. Vim li cas ? Vim yog ib zag tswv yim qhwv thiab nqaim tsis yog tswv yim thoob tsib. Tus neeg tswv yim nqaim tsis xam qhov siab qhov qis, tsis cais qhov ntxhib qhov mos thiab tsis luj qhov ncaj qhov nkhaus hauv lub neej. Tus neeg ntawd lub ncauj qw ua ntej rau teb chaws hnov hais tias nws no yog neeg ntseeg Yes Xus zoo, tiam sis, nws tes dej num rhuav thiab ua puas Yes Xus lub Moo Zoo lawv nws qab. Nws tsuas xav tias hwm Phau Ntawv Ntshiab xwb ces ua neeg zoo txaus Tswv Ntuj qhuas lawm, tsis tas yuav mloog neeg lus, tsis zoo dab tsi ntxiv. Tiam sis tsis yog li nws zaj tswv yim yuam kev rhuav thiab tsis thoob tsib to nrog. Vim li cas ? Vim hom neeg xav li ntawd lam muab Tswv Ntuj lo lus ua nws lub chaw khav ua neeg mloog Tswv Ntuj lus. Tiam sis, nws tus kheej zaj tswv yid twb xav tsis raug lub keeb puam Tswv Ntuj lus chiv zoo li cas. Yam li, nws twb tsis paub tias Tswv Ntuj lus tsis poob nthav saum ntuj los rau hauv phau Ntawv Ntshiab. Tswv Ntuj lus xub deeg puag hauv tib neeg nruab siab nruab ntsws pes tsawg txheej, pes tsawg tiam neeg dhau los ua ntej sau phau Ntawv Ntshiab. Nws puas paub Tswv Ntuj vam txog neeg lub ncauj hais Tswv Ntuj lus thiab vam txog neeg txhais tes kos Tswv Ntuj lus cia hauv ntaub ntawv. Thaum nej nyeem phau Ntawv Ntshiab yog nej ceev faj, ntau zaus Mos Ses mloog Tswv Ntuj hais, tiam sis, Tswv Ntuj kuj mloog Mos Ses hais thiab. Yog Tswv Ntuj twb mloog neeg hais, peb tus neeg ntseeg Tswv Ntuj txhob muaj plhus thuam neeg yuav tsum hwm neeg li Tswv Ntuj hwm.

    Ua ntej Mos Ses txaug Tswv Ntuj kaum lo lus ua txhooj qhuab qhia haiv His Xais Lais, tus vaj ntxwv Hammourabi, neeg teev dab qhuas twb xub txaug cov ntsiab lus hauv Tswv Ntuj kaum lo lus ua txhooj kav tsoom pej xeem Npas Npis Los 400-500 xyoo ua ntej Mos Ses (1750 av.J-C) : “Yog ib leeg tub ntaus nws txiv, yuav xuas taus txiav nws tes pov tseg C 195…” Vaj ntxwv Hammourabi tus txhooj no puas yog qhia tej tub ki kom hwm niam hwm txiv thiaj tsis raug txim. Tswv Ntuj kuj xav kom tsoom tub ki His Xais Lais txawj hwm lawv niam lawv txiv, tsis txhob tsa tes ntaus lawv niam lawv txiv yug lawv, Tswv Ntuj thiaj tshoj Mos Ses sau li no tseg : “Koj yuav hwm koj niam koj txiv TC Ob 5,16” Ua ntej neeg muab Tswv Ntuj lus sau los ua ib phau ntawv, Tswv Ntuj lus nrog neeg lus nyob ua ke hauv tib neeg ntiaj teb nruab siab nruab ntsws. Ziag no, Tswv Ntuj tshoj neeg muab Tswv Ntuj lus sau ua zag cia hauv ntawv, peb tus neeg ntseeg Tswv Ntuj yuav tsum paub, Tswv Ntuj lus tseem tshuav ntau sau tsis tag los cia ua ke thiab Tswv Ntuj lus tsis tas rau cov tau sau cia hauv phau Ntawv Ntshiab xwb : “25 Tseem muaj ntau yam ntxiv Yes Xus tau ua, yog peb muab sau tseg ib qho zuj zus, kuv xav tias lub ntiaj teb yuav ntim tsis tas cov ntawv sau no Z 21,25.” Tas tej lus koob lus hmoov hauv cov neeg siab dawb siab ntshiab nyob ntiaj teb no, txawm yog neeg teev dab qhuas los neeg teev lwm yam kev cai, puav leej yog Tswv Ntuj lus huv tib si. Vim ntiaj teb neeg puav leej yog Tswv Ntuj tsim. Vim li ntawd, peb tej poj yawm Hmoob txawm lawv tsis teev Tswv Ntuj los poj yawm Hmoob twb ntxov hwm niam hwm txiv li Tswv Ntuj tus cai lus, twb ntxov mloog Tswv Ntuj lus yog tsis paub xwb. Poj yawm Hmoob puav leej txais Tswv Ntuj koob hmoov tib yam cov His Xais Lais teev hawm Tswv Ntuj thiab cov Npas Npis Los neeg teev dab qhuas thaud.

    Peb tus neeg ntseeg Tswv Ntuj yuav tsum paub peb lub Koom Txoos Kav Tos Liv, ua Koom Txoos neeg, nrog Koom Txoos tshaj Yes Xus lub Moo Zoo. Kev tshaj Yes Xus lub Moo Zoo yog tshaj txoj kev hwm Tswv Ntuj, qhia kev teev Tswv Ntuj rau ntiaj teb neeg raws li Yes Xus qhia. Txoj kev ntseeg Tswv Ntuj tsis poob saum ntuj los rau peb li nag poob los ywg tej nroj tsuag thiab tej qoob loo. Peb txais txoj kev ntseeg Tswv Ntuj raws lub Koom Txoos Kav Tos Liv txoj kev ntseeg Tswv Ntuj, raws li Huab Tais Yes Xus qhia. Yes Xus yog tus tsa lub Koom Txoos tshaj Yes Xus lub Moo Zoo nyob ntiaj teb no : “19 Li ntawd, nej tsis yog pej kum thiab neeg thoj nam, hos nej yog cov leej ntshiab thiab Tswv Ntuj cuab yig neeg 20 Txhim tsa saum npoj tshaj xo thiab cov saub lub nrog tsev thiab Leej Pleev Yes Xus tus kheej yog tus ncej zeb EFX 2,19-20” Yus niam yus txiv, xib hwb, txiv plig, tej phooj ywg, tas zeej tsoom neeg ntseeg sawv daws yog haiv neeg ntseeg Tswv Ntuj, yog Koom Txoos Kav Tos Liv, sawv daws yog Huab Tais Yes Xus lub cev thiab tes taw. Yus thiab yus lub Koom Txoos zoo tam zoj txoj kev sib qaws ua txij nkawm. Yus yuav tsum hlub, yuav tsum txhawb, yuav tsum pab yus lub Koom Txoos ib yam yus tus poj niam los yus tus txiv, yus thiaj ciaj ib cuab ib yig, ciaj Koom Txoos lub cev : “22 Cov poj niam nyias hwm nyias tus txiv yam li rau Huab Tais 23 Vim tus txiv yog tus poj niam lub taub haus yam li Leej Pleev Koom Txoos taub hau 24 Raws li Koom Txoos zwm rau Leej Pleev, cov poj niam rau cov txiv tag nrho ib yam 25 Cov txiv, nej hlub nej cov poj niam yam li Leej Pleev hlub lub Koom Txoos thiab muab nws tus kheej rau EFX 5,22-25” Txoj kev ntseeg Tswv Ntuj lub Koom Txoos qhia rau yus ciaj sia hauv yus lub neej tsis yog ua nyuag laj kab thaiv dab kev, ua rau yus dim plhuav tsis ua dab qhev xwb. Nws muaj hwj huam loj tuaj ntawm Tswv Ntuj tuaj coj tas ntiaj teb neeg los ua kwv ua tij, los ua tib tse neeg, tib cuab tib yig, muaj tib tug Ntsuj Plig Ntshiab coj sawv daws nrog Huab Tais Yes Xus ua peb tij txais Leej Txiv lub hwj chim tsa peb ua Tswv Ntuj cov tub ki muaj Tswv Ntuj hwj huam : “29 Vim tsis muaj leej twg yuav ntxub nws tus kheej lub cev thiaj li yug mov thiab txuag zias nws ib yam Leej Pleev thiab lub Koom Txoos 30 Txawm tias tes taw, peb yog nws lub cev EFX 5,29-30” Huab Tais Yes Xus yog tus tsa kom muaj lub Koom Txoos. Yes Xus xaiv cov thwj tim los tuav lub Koom Txoos tiam dhau tiam los txog zim txwv no. Kom peb nco ntsoov rau nruab siab, peb lub Koom Txoos Kav Tos Liv tsis zoo li lwm cov koom txoos los lwm pab lwm pawg neeg teev Yes Xus cov koom txoos. Lwm cov koom txoos yog neeg tsa teev hawm Tswv Ntuj yuav neeg siab, tsis hwm Yes Xus lus qhia. Peb yuav tsum mloog peb lub Koom Txoos lus qhuab qhia, vim yog Yes Xus tsa Koom Txoos, Koom Txoos lus qhuab qhia yog Yes Xus lus qhuab qhia. Cov leej ntshiab hauv Koom Txoos yog cov cim qhia rau peb pom Tswv Ntuj lub txiaj ntsim Tswv Ntuj pub tuaj txhawb Koom Txoos tes dej num : “67 Yes Xus hais rau pab kaum ob : “Puas yog nej xav thim thiab lod ?” 68 Xis Moos Pob Zeb teb rau nws : “Huab Tais, leej twg peb yuav mus thawj ? Koj thiaj yog tus muaj lus ciaj sia nyob ib txhis 69 Peb li peb ntseeg, peb paub tseeb koj yog Tswv Ntuj Leej Ntshiab Z 6,67-69.” Pob Zeb yog tus thawj Yes Xus tsa tuav lub Koom Txoos. Peb hwm Pob Zeb thiab cov sawv los taj Pob Zeb lub chaw, vaj qhia Npes Nes Des Tos 16 txog zim txwv no. Lwm cov koom txoos lam teev Yes Xus, twb tsis mloog Yes Xus lus hais, tsis hnov Yes Xus cov lus saum toj no. Yog peb nyob ruaj nreb thiab siab ntsws npuab peb lub Koom Txoos Kav Tos Liv, peb thiaj li yuav tau Pob Zeb thiab Paj Lug, tas cov leej ntshiab tej koob hmoov.

    Ib tsoom phooj ywg sawv daws, yog nej nyob nruaj nreb hauv lub Koom Txoos Kav Tos Liv ces nej txoj hmoo zoo. Vim nej cog nej txoj kev ntseeg Tswv Ntuj hauv tsev neeg mloog Huab Tais Yes Xus lus, ces nej yuav tau tag zeej tsoom neeg ntiaj teb cov siab ncaj tej koob hmoov thiab tag ib tsoom leej ntshiab cov txiaj ntsim. Yog nej mus dai cov cuab yim neeg cam thawj kev teev hawm Tswv Ntuj, thuam poj yawm txwv txoob thiab thuam zeej tsoom neeg siab ntshiab ces nej yuav pluag txiaj ntsim phim cov cuab yim neeg twm xeeb no. Peb yuav vam peb leej niam Mab Liab ua peb tus piv txwv mloog Yes Xus lus thov txiaj ntsim pab peb.


    23.08.2012 Cwj Vuam Chiv







    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 2nd September 2012, 5:52 pm




    NTHUAV NTAWV NTSHIAB.


    Rau hnub tim 02 lub 9 hlis 2012



    Ib zeej tsoom neeg ntseeg thiab phooj ywg sawv daws,


    Hnub no yog ib hnub zoo sij hawm peb rov tuaj sib fim ua npoj, txoos ua nqag. Peb zoo siab caw sawv daws tig ntsej mloog Huab Tais Yes Xus cov lus qhia txog Leej Txiv Tswv Ntuj kev hlub ntiaj teb neeg. Peb leej twg ntseeg Yes Xus, tus ntawd yuav muaj Yes Xus lub txiaj ntsim hlub neeg tam li Leej Txiv Tswv Ntuj hlub. Yog peb txoj kev ntseeg Tswv Ntuj lub ntsiab.

    Ib tsoom phooj ywg, nej puas pom peb tus Huab Tais Tswv Ntuj hlub peb ntiaj teb neeg npaum li cas. Nej sim xav saib, txij thaum ntuj tsim teb raug los, txij li Tswv Ntuj tsim lub ntuj thiab daim av, muaj pes tsawg tiam neej dhau los, lub ntuj tsis txawj fav, daim av ntiaj teb tsis txawj lam. Vim lub hnub, lub hli tseem yog lub qub ; hnub tseem sawv quj qees tsis txawj fav, hli tseem qaim xwm yeem tav li no tsis txawj feb. Daim av ntiaj teb tsis txawj lam vim txhua leej tib neeg yug los puav leej noj daim av txheej dhau txheej tiam dhau tiam. Daim av tsis txawj lam li caj hmab dawm tes, cag ntoos dawm taw. Daim av hlub peb, puag peb tib neeg txhua nrho, txheem peb txoj sia tam zoj ib leej niam puag nws me nyuam noj nws mis. Peb leej tib neeg puas xam pom Leej Txiv Tswv Ntuj hlub peb npaum li ntawd, kib hlo lub hnub, lub hli thiab daim av ua peb teej cuab tam li peb ua niam ua txiv hlub peb tej tub ki, kib hlo lub vaj lub tsev rau tej me nyuad ua chaw noj chaw nyob kom ciaj neeg. Pes tsawg haiv neeg txawj xam pom Tswv Ntuj kev hlub neeg no ? Tsis muaj pes tsawg haiv, Tswv Ntuj thiaj tshoj, His Xais Lais, ib haiv neeg saum daim av los qhia Tswv Ntuj kev hlub ntiaj teb neeg : “Nej yuav khaws Huab Tais nej tus Tswv Ntuj cov cai raws nraim li kuv teev rau nej 6 Nej nco ntsoov tseg muab khaws siv, nej thiaj yuav ua neeg thoob tsib, ua neeg ntse ntawm tag pej kum neeg xub ntiag. Thaum lawv hnov hais txog txoj cai no, lawv yuav tsa suab hlo qhuas : Tsis muaj ib haiv neeg thoob tsib thiab ntse cuag haiv neeg loj ntawd ! 7 Haiv neeg loj twg tej huab tais nyob ze lawv npaum peb tus Huab Tais Tswv Ntuj nyob ze peb tav twg peb hu txog nws ? TCO 4,2.6.7” Huab Tais Tswv Ntuj tshoj kom Mos Ses qhia cov lus no rau haiv His Xais Lais, teev hawm Huab Tais Tswv Ntuj. Ua neeg ntseeg Tswv Ntuj, yuav tsum tso tej huab tais cuav thiab tej dab qhuas li lwm haiv neeg pov tseg. Cov lus Mos Ses qhia rau haiv His Xais Lais thaud, yog hais qhia rau peb cov tig los teev hawm Tswv Ntuj zim txwv no.

    Peb los ua neeg ntseeg Tswv Ntuj, peb yuav txais txoj kev ntseeg Tswv Ntuj lub ntsiab, mloog Yes Xus Lus. Tus neeg mloog Yes Xus lus yeej tsis yuam kev li. Yes Xus txoj kev hlub lub ntiaj teb neeg, ua tau peb tib neeg txom nyem muaj kev lom zem thiab pub peb ntsuj plig qaug zog luj luas rov ciaj muaj zog dhia rhees hom khaj qhuas Tswv Ntuj. Thaum peb tsis tau paub Tswv Ntuj, dab yog tus peb ntshai ruj rwg tsam tuaj coj peb ntsuj mam ntsuj plig. Peb thiaj ua nuj ua nqe khwv tiag txhaws peb lub niag neej to qab tim dab kev ntaim noj ntaim haus. Txij li peb paub Tswv Ntuj, peb dim plaws kev raug dab quj ua dab qhev. Peb khwv tau loj tau me yog rau peb tag nrho. Ua rau peb zoo siab dhau, peb rov qhuas peb tus kheej. Peb mam xav txog lig, cas yuav ruam tag npaum li, tsis ntxov tso kev teev dab pov tseg, ntshai nyiaj twb puv nas thaum ntej thaum ntxov lawm. Tswv Ntuj pab yus dim kev txom nyem lawm ces tsis nco Tswv Ntuj txiaj ntsim, twb tsis hwm Tswv Ntuj lawm thiab. Thaum yus muaj nyiaj tuaj, yus tsuas pom yus lawm xwb : yuav vaj yuav tsev, yuav cuab yeej tuam txeem raws li yus txoj kev ntshaw. Leej tib neeg ces siab hlob hlob, muaj yam no tag los yeej tseem ntshaw yam tod. Muaj vaj muaj tse tag tseem ntshaw muaj suab muaj npe, ntshaw lub koob meej. Ua nyuag pej xeem dog dig xwb, tsis zoo yus siab. Thaum ntawd, yuav tsum nrog luag sib txeeb nom. Txoj kev ua nom, tsuas muaj tib lub rooj nom rau sawv daws txeeb xwb. Ntshai hmoov yuav tsis txog, cia mus txhij neeg sawv ua nqag, sau ua pab tiv lwm pab, ua kub ua ntxhov tej zej zog, txeeb vaj tse, txeeb liaj txeeb teb. Tej txhia, tsis ntshaw kev ua nom ua tswv, tias sis ntshaw kev plees kev yis. Twb muaj cuab muaj yig, me nyuam twb cuag zog tas, ua pog ua yawg lawm los tseem ntshaw txoj kev ua hluas. Lub me siab mas liab khuj khiv rau txoj kev mus lwj mus liam tos tsis hnyoo tav twg li txog tsiab peb caug, sib yaum mus lawm tsheej ke. Peb sim xav kom zoo, tej dab phem dab qus ua rau poj yawm Hmoob ntshai tuav plig cos thaud twb looj koov tsis cuag tej dab phem txheej no laum ntiaj teb neeg thiab laum tej txhia neeg ntseeg Tswv Ntuj tej siab ntsws. Tej dab phem txheej no, yog cov tswv yim ua tau qias thiab dhuav Tswv Ntuj tshaj tej dab phem dab qus thaud. Vim li cas ? Vim poj yawm Hmoob tej dab phem dab qus looj koov, ua mob ua ntsaj, ua rau poj yawm qaij qaug, coj ntsuj mam ntsuj plig mus ciaj dab ciaj tso kuj yog tswv yim ib txheej hem dhau ib txheej, ua rau yus ntshai poob plig dag. Yeej tsis muaj dab phem dab qus, hos yog tej laus tsis txawj siv dej siv tshuaj thaiv lub cev kom txhob raug mob xwb. Tej dab phem dab qus ntawd yog yoov tom, tsis txawj caiv ncauj, tej roj ntsha…ua rau Hmoob mob thiab qaij qaug xwb : “21 Vim tej yam nyob sab hauv neeg nruab siab, txhawv tej zaj khaus vos : yees loj, tub sab, tua neeg 22 sib daj dee, cuaj khaum, lim hiam, ntxeev cuav, lwj liam, khib, thuam, muab hlob, khav theeb 23 Txhua yam kev phem no tawm sab hauv los thiaj ua qias tib neeg MK 7, 21-23.” Peb los ua neeg ntseeg Tswv Ntuj, peb los tag nrho siab ntsws, ntsuj plig nrog lub cev. Yog peb xeeb txawm nrog lub siab nkhaus, peb yeej los ua neeg ntseeg Tswv Ntuj tug niag siab nkhaus vos. Yog peb siab ncaj, peb los ua neeg ntseeg Tswv Ntuj siab ncaj ncees. Txhob xav tias peb ntxuav plig tas, peb yog neeg ntseeg Tswv Ntuj zoo tsis txog yuav khwv, yuav siv zog, peb yeej tsis txawj khib, tsis txawj mus lwj liam, tsis txawj muab hlob, tsis txawj lim hiam li lawm. Ua cas peb yuav xav yooj yim npaum li ntawd. Txoj kev ntseeg Tswv Ntuj tsis yog ua si. Peb los ntseeg Tswv Ntuj, tsis yog los yuam kom Tswv Ntuj ua li peb lub siab xav rau peb ; cia peb mus daj mus dee, mus lwj liam, mus tub sab tua neeg, lim hiam, muab hlob li qub : “6 Yes Xus teb lawv tias : “Neeg dag, Es Xais tau saub txog nej hauv ntawv tseg tias : Haiv neeg no hawm kuv ntawm di ncauj, lawv siab nyob deb ntawm kuv 7 Lawv kev hawm kuv tsis tsim nqe, tsuas qhia tib neeg tus txhooj cai 8 Nej xyeeb Tswv Ntuj lus qhia rau ib cag tuav ruaj nreb tib neeg tej kab ke MK 7,6-8” Peb los teev hawm Tswv Ntuj vim peb zoo siab mloog peb Leej txiv Tswv Ntuj lus. Yog peb tus neeg nkhaus thiab lim hiam thim xav los mloog Yes Xus lus tiag, nrauj peb lub siab phem pov tseg, lees thiab kho tej txhaum peb tau ua dhau los, zoo siab hlo zam rau cov neeg ntxub yus. Peb thiaj li yog ib tug neeg teev hawm Tswv Ntuj thiab mloog Yes Xus lus.

    Ib tsoom phooj ywg sawv daws, peb txoj kev ntseeg Tswv Ntuj yog ib lub neej lom zem xov npo tshaj ntiaj teb no tej kev lom zem tib si. Thaum peb tsis to taub, peb yuav hais tias : cas cov leej ntshiab raug luag ntxub, raug luag hiam tuag txom nyem ntsuav, ib txhia raug hlawv, lwm cov raug hlais ua doj ua daim. Peb txhob poob siab, Huab Tais Yes Xus yuav tsis pub peb txom nyem. Tiam sis, nco ntsoov tias tus neeg teev Yes Xus hla dhau txoj kev raug luag tsim txom, yog tus muaj hmoo. Peb yuav tsum paub, tus tau zoo tuag, luj ntuj nyob ntsiag to, hos tus neeg siab ntshiab raug hiam tuag txom nyem ntsuav, lub ntuj nyob ze ze ua zog koog tuaj pab tus ntawd. Peb yuav mloog lub Koom Txoos Kav Tos Liv kev qhuab qhia teev hawm Tswv Ntuj, peb thiaj yuav muaj Huab Tais Yes Xus cov koob hmoo.

    29.08.2012 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 7th September 2012, 8:36 am



    NTSHUAB NTAWV NTSHIAB





    Rau hnub tim 09 lub 9 hlis 2012

    Tsoom niam txiv kwv tij neej tsa phooj ywg mloog Tswv Ntuj lus,


    Hnub no, peb txoj hmoo zoo, peb rov tuaj teev hawm peb tus Huab Tais Tswv Ntuj ua npoj ntws. Peb yuav nco ntsoov txuag peb tus Huab Tais cov lus nws hais qhia peb hnub no, yog ib co lus koob lus hmoov, lus txiaj lus ntsim txhawb peb txhua leej tib neeg nyob ntiaj teb no.

    Txoj kev teev hawm Huab Tais Tswv Ntuj tseem ceeb npaum li cas, muaj nuj nqes dab tsi rau peb tiag ? Feem coob, peb cov kwv tij neej tsa Hmoob tsis tau paub, Huab Tais Tswv Ntuj yog neeg ntiaj teb Leej Niam Leej Txi hlub peb leej tib neeg txhua txhia leej txhia tus. Huab Tais Tswv Ntuj kev hlub neeg ntiaj teb zoo li peb ua niam ua txiv, peb hlub peb tej tub ki. Tsis tas li ntawd, Tswv Ntuj kev hlub neeg tseem loj tshaj npaum li cas ntxiv peb hlub peb tej tub ki. Txawm muaj tej txhia niam txiv yug tau me tub me nyuam tsis xav hlub tsis xav tu, muab tso pov tseg ua ntsuag ciaj, tsis muaj niam muaj txi hlub. Cov niam txiv zoo li ntawd txawm muaj los tsawg leej xwb. Cov coob, yog cov niam txiv hlub lawv tej me nyuam cuag li lawv tus kheej. Nej ua niam ua txiv, yeej tsis muaj neeg qhia kom nej hlub nej cov me nyuam, tsis yog nej niam nej txiv, tsis yog pog yawg hais, hos nej xwb tim txawj hlub nej cov me nyuam. Nej cov me nyuam cav tsis tau tsa ncauj thov kom nej hlub lawv ib los, tiam sis, nej twb ntxov hlub nej cov me nyuam ua ntej muaj tus hais ib los rau nej. Thaum nej cov me nyuam yug tau poob nthav, nej yeej hlub lawv, txhawj lawv ; yog lawv txom nyem yeej mob nej siab, yog lawv muaj neej zoo, ua rau nej muaj ntsej muag thiab nej yeej nrog lawv zoo siab twj ywm mus txog hnub kawg. Nej sim xav, vim li cas twb tsis muaj leej twg hais kom nej hlub nej cov me nyuam, nej niam nej txiv, nej pog thiab yawg twb tsis tau hais, nej cov me nyuam twb tsis tau txawj taij nej, ua cas nej yuav hlub thiab tshua nej cov me nyuam tag npaum li ntawd ? Yog peb to taub Tswv Ntuj txawj hlub peb tshaj peb hlub peb tej me nyuam, peb yuav to taub vim li cas peb yuav tso tej huab tais cuav pov tseg los teev peb Leej Txiv Tswv Ntuj. Vim Huab Tais Tswv Ntuj hlub lub ntiaj teb neeg txhua nrho. Nej tus kheej twb txhib kom nej hlub nej cov me nyuam dawb dawb do do. Yog nej tsis tau hlub nej cov me nyuam tag nej lub siab, nej siab yuav tsis nqig. Nej yeej tsis tau cheem nej lub siab kom txhob hlub nej cov me nyuam tsam tom qab lawv tsis hlub nej. Nej yeej hlub lawv tag nej lub siab, niaj hnub niaj hmo sawv pub mis, mus khwv kom lawv noj tsis tshaib haus tsis nqhis. Hmoob hais tias : “Yog leej niam yug, mob leej niam plab, ces leej niam thiaj li hlub nws me nyuam npaum li ntawd.” Neeg ntiaj teb kev sib hlub no, tsuas muaj zoo tsis phem ib qho. Qhov phem, tseem yog tej cuab tej yig neeg tsis txawj sib hlub. Niam txiv tsis hlub me nyuam thiab tub ki tsis hwm niam hwm txiv. Ua neej nyob, tsuas ntshaw txoj kev sib hlub. Lwm yam yeej pauv tsis tau tib neeg kev sib hlub.

    Huab Tais Tswv Ntuj kev hlub ntiaj teb tib neeg zoo tib yam neeg kev sib hlub. Tiam sis, Tswv Ntuj kev hlub tib neeg tseem loj tshaj npaum li cas tib neeg kev sib hlub. Vim li cas ? Vim peb tib neeg tsuas hlub peb lub cuab lub yig xwb. Peb tsuas nyiam tus sab nraud li peb nyiam tau. Neeg lub siab nyiam loj thiab dav tsis cuag neeg lub siab hlub. Thaum koj hlub ib tug neeg, koj yeej tuag taus rau tus neeg ntawd. Tswv Ntuj kev hlub ntiaj teb neeg, tsis yog hlub ib leeg li peb, Tswv Ntuj hlub txhua leej tib neeg tiag tiag, hlub tus phem tus zoo, hlub tus muaj tus pluag, hlub tus teev dab qhuas, teev mlom los teev lwm yam kev cai tib yam li tus teev Tswv Ntuj : “2 Yog ib tug neeg hnav tsoos ci hob coj nplhaib kub thiab ib tug pluag tsoos ntsu kauv hna nkag los hauv nej lub chaw txoos 3 Nej ntsia zoj tus hnav tsoos ci hob thiab hais tias : “Koj zaum lub zoo chaw no thiab nej hais rau tus pluag : Koj sawv ntawm ko los koj zaum hauv kuv theem tiag taw 4 Nej puas saib ntsej ua plhu thiab ua cov txiav txim raws zaj niag phem ? YKN 2,2-4” Tswv Ntuj hlub peb txog ntua Tswv Ntuj zoo siab tuag rau peb tib neeg muaj txhaum tes. Peb tib neeg tsawg leej thiaj ua tau li Tswv Ntuj. Vim li ntawd, txoj kev teev hawm Tswv Ntuj tsis yog qhia hais tias Tswv Ntuj tsuas hlub peb cov neeg ntseeg Tswv Ntuj nkaus xwb, tseg cov neeg txhaum, cov neeg teev dab qhuas los teev pej kum dab tsis hlub. Tej zaj tswv yim ntawd tsis yog lub Koom Txoos Kav Tos Liv kev qhuab qhia. Yog peb leej twg to taub txoj kev tevv hawm Tswv Ntuj mus li ntawd, peb to taub yuam kev Huab Tais Yes Xus lub Moo Zoo lub ntsiab thiab peb coj tsis haum lub Koom Txoos Kav Tos Liv kev qhuab qhia : “31 Yes Xus hais rau lawv : “kuv hais tseeb rau nej, cov sau se thiab cov pog lwj ua nej ntej mus saum qaum ntuj 32 Zam tuaj cuag nej hauv kev ncaj ncees, nej tsis ntseeg nws, cov sau se thiab cov pog lwj ntseeg nws MT 21,31-32” Txoj kev teev hawm Tswv Ntuj raws li Yes Xus lub Moo Zoo thiab raws lub Koom Txoos Kav Tos Liv qhuab qhia yog qhia kom peb tib neeg ntiaj teb sib hlub, txhob sib cais ua pab ua pawg, peb sawv daws nyob hauv Yes Xus ib yam li Yes Xus nyob hauv Leej Txiv. Vim li ntawd, Yes Xus thiaj coj nws cov thwj tim nrog nws tshaj Leej Txiv kev hlub neeg, kom sawv daws sib hlub cuag Leej Txiv Tswv Ntuj hlub tag nrho tib neeg ntiaj teb. Txoj kev teev hawm Tswv Ntuj txoj tseeb tiag, yog ua raws li cov thwj tim thiab cov sawv los taj cov thwj tim lub chaw : mloog vaj qhia thiab cov tswv qhia hauv Koom Txoos Kav Tos Liv. Muaj tej txhia neeg tsis paub li ntawd, vim lawv ncaim ntawm lub hauv paus txia ua ib pab neeg teev Yes Xus tshiab, tsuas txawj qhia Yes Xus lub Moo Zoo raws li lawv siab xwb, xij peem tsis ua raws li Yes Xus qhia rau nws cov thwj tim kav liam. Peb thiaj hnov tej zaj lus txawv txawv no : “Peb yog cov mus saum qaum ntuj hos nej mus lawm dab teb.” Cov neeg hais li yog lam hais dag ntawm ncauj. Peb yuav tsum paub, kawg Huab Tais Yes Xus tib leeg thiaj yog tus txiav txim rau tib neeg thaum ntiaj teb kawg, peb txhob rawm ua tus txiav txim rau tib neeg. Niaj hnub no, yam num peb tus neeg ntseeg Tswv Ntuj yuav tsum ua, yog hlub thiab hwm ntiaj teb neeg txhua tus, hwm cov teev dab qhuas ib yam cov neeg teev Tswv Ntuj, hwm cov neeg txhaum ib yam cov neeg tsis muaj kev teev hawm dab tsi. Vim Huab Tais Yes Xus hlub ntiaj teb neeg li Leej Txiv hlub, Yes Xus tuaj cawm tag nrho ntiaj teb neeg. Yes Xus mus xyuas cov neeg teev dab qhuas nyob Tws Lus teb thiab Xis Doos, kho cov neeg teev dab qhuas dig muag kom pom kev thiab qhib cov neeg ntsej lag kom hnov lus ib yam li Yes Xus ua rau cov dig muag thiab lag ntseg His Xais Lais, haiv neeg teev Tswv Ntuj : “32 Lawv coj ib tug ntsej lag hais lo puav lus tuaj rau nws, lawv thov kom nws tsa tes rau 33 Nws thiaj coj tawm mus rau ib cag, deb npoj neeg, nws cev ntiv tes rau tus ntawd qhov ntsej thiab nti aub ncaug tub tus nplaig 34 Tsa muag ntsia saum ntuj, xyu ib suab thiab hais rau tus ntawd : “Es fas tas,” txhais tias : “Qhib plho.” 35 Tus ntawd pob ntseg qhib plho, tus nplaig zooj lias nws hais taus lus MK 7,32-35” Yes Xus ua siab dav fo hlub txhua haiv neeg, peb tus neeg ntseeg Yes Xus yuav tsis txhob cais pab cais pawg ua ntau hom neeg teev Yes Xus. Tsis tas li ntawd, Yes Xus kho tus neeg lag piav tes no zoo hlo hnov lus, hais lus meej tuaj qhia rau peb tias : yog peb lam ua neeg teev Yes Xus tsis mloog Yes Xus lus qhia, peb zoo li tus neeg lag ntseg thiab hais lus tsis meej no, peb mus qhia Yes Xus lub Moo Zoo tsis meej thiab xu das tsis raug lub ntsiab rau neeg mloog.

    Ib tsoom phooj ywg sawv daws, peb txoj kev ntseeg Tswv Ntuj pab kom peb txhob ua tus neeg lag ntseg thiab hais lus tsis muaj lub. Peb los teev los hawm peb Leej Txiv Tswv Ntuj tus hlub peb thiab muaj hwj huam cawm tau peb. Muab txoj kev ntshai dab ua dab qhev nrauj mus, muab kev ua neeb ua yaig, ua khawv koob hais lus tsis muaj lub muaj log no tshem cia. Peb los seev suab hu nkauj qhuas Leej Txiv Tswv Ntuj tus pab tau yus nrog paj qeeg paj nruag ua npoj nrog ib tsoom poj yawm siab dawb siab huv nyob mus ib txhis saum qaum ntuj.


    06.09.2012 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    Maiv Paj Lug
    Tswv Cuab Hmong Catholique
    Tswv Cuab Hmong Catholique

    Messages : 1634
    Date d'inscription : 2009-08-17

    Re: Txiv Plig Cwj Vuam Chiv Yaj Nthuav Ntawv Ntshiab

    Post  Maiv Paj Lug on 16th September 2012, 5:01 am


    NTHUAV NTAWV NTSHIAB







    Rau hnub tim 16 lub 9 hlis 2012

    Tsoom niam txiv kwv tij neej tsa phooj ywg,

    Tos peb ho muaj teev hawm Tswv Ntuj, vim muaj tej lub cim qhia rau peb pom Tswv Ntuj hauv peb txoj kev teev hawm. Tej cim tshwm tuaj ntawd qhia rau yus pom tias Huab Tais Tswv Ntuj nrog yus nyob. Vim li ntawd, hnub no, peb hais txog tus thwj tim Pob Zeb cov lus ua cim zeem tau Huab Tais Yes Xus rau Pob Zeb kom peb zeem tau Huab Tais Yes Xus rau peb thiab.

    Peb los ntseeg Tswv Ntuj hauv Koom Txoos Kav Tos Liv, peb taug ib txoj kev ntseeg muaj hauv paus hauv ntsis thiab muaj tej lub cim txhawb peb txoj kev ntseeg Tswv Ntuj. Peb yuav tsum ceev faj kom peb txoj kev teev hawm Tswv Ntuj txhob yuam kev. Vim muaj ntau leej ntau tus tib neeg sawv ua xib hwb tsim ntau hom kev teev Yes Xus tsis muaj paus muaj ntsis, tsis raug kev teev hawm Tswv Ntuj. Yog peb taug ib txoj kev teev hawm Tswv Ntuj tsis muaj paus muaj ntsis, peb txoj kev teev hawm tsis muaj txiaj ntsim, tsis tau koob hmoov. Vim li ntawd, peb xav pab ib tsoom phooj ywg teev Yes Xus txhua leej, nej npaj nej lub siab lub ntsws thiab coj nej lub neej los teev hawm Yes Xus raws Koom Txoos Kav Tos Liv kev qhuab qhia thiaj tsis nkim nej lub zog. Vim li cas ? Vim Koom Txoos Kav Tos Liv qhia kev ntseeg Tswv raws li cov thwj tim kev ntseeg Tswv Ntuj. Tsoom ntseeg Kav Tos Liv coj thiab txais kev ntseeg Tswv Ntuj txheej dhau txheej raws li cov thwj tim qhia txog niaj hnub no, ua raws li lub hauv paus Yes Xus qhia tseg rau nws cov thwj tim : “Rau luag tej ob cag, kuv yog leej twg ?” 28 Lawv teb tias : “Yog Zam Ntxuav Plig, rau ib txhia yog Es Lias, lwm cov yog ib tug hauv cov yaj saub.” 29 Nws rov nug lawv ntxiv : “Nej ned, nej hais li cas ? Rau nej, kuv yog leej twg ?” Pob Zeb txais nkaus teb tias : “Koj yog Leej Pleev.” 30 Yes Xus thiaj txwv nkaus lawv nruj kom txhob qhia nws rau leej twg li MK 8,27-30” Cov thwj tim yog cov niaj hnub raws Yes Xus txog twg, lawv yog cov qhia tshab plaws kev teev Yes Xus rau cov tswv qhia sawv los taj lawv lub chaw, txheej qhia dhau txheej txog niaj hnub no. Cov thwj tim pom tej cim Yes Xus ua tshwm rau lawv pom lawv thiaj zeem tau thiab paub tseeb Yes Xus yog leej twg.

    Zim txwv no, cov neeg teev Yes Xus ua ntau pab ntau pawg. Muaj cov Kav Tos Liv, muaj cov Os Tos Dos thiab muaj ntau hom Plos Tes Taas nyob thoob ntiaj teb : Cov Lus Thes, Cov Kas Vees, As Nkis Kas, Es Pis Kos Pas Mes Tos Dis, Mov Meem, Zes Haum Vag…sawv daws zoo li npoj neeg thiab cov thwj tim tuaj ntsauv Yes Xus hauv zaj nyeem hnub no. Tiam sis, cov neeg teev Yes Xus no, xyov sawv daws puas paub Yes Xus yog leej twg tiag. Vim muaj coob tus neeg ntseeg mus sim ntau txoj kev teev Yes Xus, tawm ntawm txoj no mus nkag txoj tod, ho tawm txoj tod mus poo lwm txoj. Vim li cas ua ib co neeg zoo li ntawd ? Vim cov neeg zoo li ntawd lam hais tias teev Yes Xus, twb tsis nrhiav paub Yes Xus yog leej twg. Nyias tsuas xav hauv nyias siab tias ntshai cov Zes Haum Vag tsis cuag cov Mov Meem, khiav mus poo Mov Meem tag, ho pom cov Mes Tos Dis zoo dua, khiav mus thawj cov Mes Tos Dis…ntshai yuav khiav khiav tuag kus los tsis paub Yes Xus yog leej twg li. Vim cov qhia los qhia tsis tshab Yes Xus rau neeg paub, hos cov ntseeg los ntseeg tsis ti txha, sawv daws tsis nrhiav kom paub Yes Xus tiag. Yog peb tsis nrhiav cov cim Yes Xus ua rau peb pom, peb puas yuav paub tau Yes Xus ? Tos Pob Zeb paub Yes Xus, vim Pob Zeb pom cov cim Yes Xus ua : “Koj yog Leej Pleev”. Muaj ntau lub cim Yes Xus ua rau peb pom, xyov peb puas rua muag ntsia, peb puas ntseeg tias Yes Xus ua qhia peb. Cov neeg siab dawb siab ncaj muaj nyob hauv Koom Txoos Kav Tos Liv, muaj hauv lwm cov Koom Txoos teev Yes Xus thiab muaj hauv cov neeg teev pej kum dab qhuas. Lawv yog tej cim Yes Xus pub tuaj rau ntiaj teb neeg, xyov peb puas ntseeg li ntawd. Tsis tas li ntawd xwb, peb tseem yuav mloog Yes Xus lus qhia kom zoo, lees paub Yes Xus kev txom nyem, kev tuag thiab kev sawv ciaj sia : “31 Thiab nws pib qhia rau lawv tias neeg Leej Tub yuav tsum txom nyem loj, cov txwj laus, cov thawj leej choj thiab cov thoob xwm yuav ntxo nws, ua kom nws tuag, peb hnub tom qab, nws yuav sawv rov los 32 Nws tab meeg hais li ntawd, Pob Zeb rub nws rau ib cag yuav qhia nws 33 Tab sis nws tig loo los ntsia nws cov thwj tim ntuas zoj Pob Zeb hais tias : “Lawv kuv qab, dab xas tas, koj tsis xav li Tswv Ntuj tsuas xav li neeg xwb MK 8,31-33” Pob Zeb tsuas pom Yes Xus kev muaj hwj huam. Pob Zeb tsis kam lees tias Yes Xus no txawj tshaib txawj nqhis, raug luag ntxub raug luag hiam, txawj ploj txawj tuag li tib neeg. Pob Zeb thiaj raug Yes Xus cem hnyav ncawv ua dab xas. Vim li cas ? Vim xas tas tsuas khav hwj huam nkaus xwb. Tus muaj hwj huam tsis khwv tsis txom nyem los tau noj. Peb tseem nco xas tas ntxias Yes Xus kom siv hwj huam muab pob zeb txia ua mov noj. Pob Zeb pom Yes Xus yog Leej Pleev. Pob Zeb yuav tsum lees paub Leej Pleev kev hlub tib neeg, pab tib neeg, txom nyem kom cawm tau tib neeg.

    Vim li ntawd, peb cov neeg teev Yes Xus yuav tau ceev faj, txhob rawm xav hais tias peb paub Yes Xus zoo. Peb yeej ntseeg tias Yes Xus muaj hwj huam loj kawg. Yes Xus yog tus cawm tag lub qab ntuj neeg. Yog peb los teev Yes Xus ces Yes Xus yuav pab peb dim plaws txhua txoj kev txhawj xeeb, kev mob kev nkeeg, kev puas ntsoog. Peb pom tias tsis zoo li peb xav, peb los teev Yes Xus, peb tseem muaj mob muaj nkeeg li qub. Vim li ntawd, ua rau tej txhia neeg ntseeg txhawj thiab poob siab rov thim kev ntseeg Yes Xus lawm. Peb txoj kev poob siab rau Yes Xus coj peb yuam kev loj, rov mus zwm dab qhuas, mus ua neeb ua yaig, mus nchuav qe, mus ua khawv koob, mus ntaus kuam, mus thawj tej niag saub cuav yim huab me, haj yam tsis muaj hwj huam ib qho li Yes Xus thiab tseem ua yus poob tej niag teg nyiaj ntxiv xwb los yus cas hais tias zoo siab. Txhob xav tias neeg pab tau yus, tej txiv neeb txiv muam hais zaj ub tuaj, tej saub cuav hais li no ntxiv, ua rau yus siab ntsws yim huab nphau thiab puas loj. Yus cov txheeb cov ze pob sab xyu yuav, vim lawv hais yus tsis mloog lawv lawm. Hos luag tej ob cag ntsia yus li neeg vwm lawm xwb. Peb yuav tsum paub, yog hnub twg yus tsis mloog Yes Xus lus, yog peb tsis teev Yes Xus thaum twg, thaum ntawd peb yog dab xas tas tiv Yes Xus ntag. Pob Zeb raug Yes Xus cem ua dab xas tas, tiam sis Pob Zeb mloog lus lawv Yes Xus qab ruaj khov. Vim li ntawd, Yes Xus tsa Pob Zeb ua tus thawj coj thiab saib Yes Xus lub Koom Txoos los txog niaj hnub no.

    Ib tsoom phooj ywg sawv daws, txoj kev teev hawm Tswv Ntuj raws li Yes Xus qhia tsis yog teev Tswv Ntuj raws nyias kev txawj ntse li tej txhia xib hwb hais rau nej hnov. Peb txoj kev teev hawm Tswv Ntuj raws li Yes Xus qhia yog pab kom peb tib neeg lees peb noob neej kev txom nyem kev puas ntsoog nrog Yes Xus Leej Pleev kev txom nyem kev puas ntsoog thiab pub peb nrog Yes Xus Leej Pleev sawv ciaj sia. Kawg yog Huab Tais Yes Xus tib leeg, tus muaj hwj huam pub tau txoj sia nyob ib txhis rau peb nrog Huab Tais Yes Xus tus xub sawv ciaj sia hauv kev puas ntsoog ua peb ntej pub peb ciaj sia lawv nws qab.

    13.09.2012 Cwj Vuam Chiv




    <3 <3 Pab kuv rov los cuag koj Huab Tais Yesxus <3 <3

    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5044
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  Maiv Tooj on 25th September 2012, 3:53 am



    NTHUAV NTAWV NTSHIAB.

    Rau hnub tim 23 lub 9 hlis 2012



    Tsoom niam txiv kwv tij neej tsa phooj ywg mloog lus thiab teev Tswv Ntuj,

    Hnub no zoo hnub, peb tuaj sib sau txoos ua npoj teev hawm thiab mloog peb Leej Txiv Tswv Ntuj lus. Peb yuav khaws cov zaj nyeem hnub no nco txog peb cov poj yawm txwv txoob tej koob hmoov txhawb peb ua neeg ntseeg thiab teev Tswv Ntuj.

    Cov kwv tij neej tsa phooj ywg nyob Cob Tsib, Los Tsuas thiab Tuam Tshoj teb, peb paub tias nej muaj kev txhawj xeeb ntau tsav ntau yam hauv nej lub neej. Vim Suav thiab Cob Tsib teb neeg coob zuj zus tuaj, av tsawg zuj zus tsis muaj daim teb tshiab rau nej cog qoob thiab tsis muaj thaj liaj ia dav txaus nej khwv noj khwv haus li nej siab xav. Sawv daws tsis tau kev khwv kom nce ncauj, lub neej raug txom nyem, ntsia pem ntuj los yog huab, pem teb los yog av, tsis tau kev txhawb nej tej tub ki lub neej. Vim li ntawd, sawv daws ua neej khuam ntab khuam ntuv, tsis pom qab pib tog twg xyov lub neej yuav mus xaus zoo li cas. Peb nrog nej nyuaj siab tas nrho. Tsis tas li ntawd, nom tswv tus txhooj tus cai kav teb chaws tsub teeb meem ib npaug ntxiv rau nej kev nyuaj siab. Luag soj nraim nej, nrhiav lus rau nej, ntes nej kaw thiab tsim txom nej tuag dawb hais tsis tau ib los. Tej txhooj cai khoo pej xeem no, tsis pub leej twg tawv kom dhau. Luag txwv nthi tsis pub sib sau tham pem ua npoj, tsis tseev neeg txoos ua pab teev hawm ua ke. Luag tsis tso kev rau cov kwv tij neej tsa phooj ywg xav thim dab qhuas los teev hawm Tswv Ntuj. Luag soj nej qab taug nej hneev, ntes nej cov ua thawj coj zeej tsoom sib txoos teev hawm Tswv Ntuj, coj nej mus nug, muab nej rau txim. Luag yuam nej thov ntaub ntawv tawm rooj mus los, vim luag xav paub tag nrho nej tej num tib si. Yog luag kam, nej thiaj tawm rooj mus los tau tsis raug teeb meem. Hais tseeb, nej cov nyob pem yaj sab raug kev quab yuam hnyav tshaj cov nyob nram nroog. Luag txwv nej nruj tshaj tsis muaj cai sib txoos teev hawm Tswv Ntuj pem nej zos. Yog leej twg tawv, nws txawm muaj npe nyob tom nom, los txawm raug ntes, raug ntaus, los raug luag hu mus ploj qab ntais twj ywm li lawm. Ua cas peb yuav nrog nej sawv daws tu siab, ncav tsis cuag nej tes, rub tsis tau nej npab nplawm tej cai quab yuam neeg ntawd pov tseg li, cov phooj ywg ! Nram tej nroog, luag ho tso kev xoob thuav rau sawv daws sib txoos sib sau tej niag tsev ntsawm nkaus. Tej txhooj cai quab yuam neeg ntawd tsis yog tseem txhooj tseem cai tseeb tiag, yog dev npua cai xwb. Xav quab yuam lub pliaj plhu twg ces cia li khoo kom tau xwb, tsis yog tej txhooj cai haum pheej thiab pheej xeeb rau teb chaws siv. Tus cai pheeb xeeb yuav tsum kav pem toj siab thiab nram chaw qis sib txig zos, txawm nom tswv los pej xeem, sawv daws yuav tsum siv tib tug cai thiaj yog cai haum pheej ncaj ncees tiag : “12 Cov neeg nkhaus xav hauv lawv siab : Caws ntxiab rau tus ncaj, vim nws tiv peb, nws coj txawv peb coj…18 Tus ncaj ntawd pom xeeb yog Tswv Ntuj tub no Tswv Ntuj yuav pab nws, npo nws ntawm nws cov yeeb ncuab tes 19 Muab nws tsim txom thiab ua rau nws nyuaj siab, peb ntsia saib nws yuav zoo npaum li cas, sim saib nws yuav ntev npaum twg 20 Peb muab nws rhuav kiag tua kom tuag nthi, vim nws hais tias muaj tus yuav nrog tiv thaiv nws TT 2,12.18-20” Yeeb vim nej nyob hauv tej teb chaws quab yuam neeg tsis muaj kev ywj siab. Vim li ntawd, tsis yog nej lub cev raug txom nyem, tshaib thiab nqhis, ntshaw noj ntshaw hnav xwb, nej lub siab lub ntsws yim txom nyem, yim tshaib thiab nqhis kev ywj siab, kev thaj yeeb. Nej yim ntshaw ua npau suav toog Tswv Ntuj kev khuv leej kev hlub neeg. Cov kwv tij neej tsa raug txom nyem, nej tsis txhob poob siab, tiam sis kom nej nco ntsoov tias Huab Tais Tswv Ntuj twb nrog nraim nej raug iab liam, raug ntxub, raug hiam : “37 Tus sawv kuv npe txais li tej me nyuam yaus no nws txais kuv thiab tus txais kuv tsis yog kuv nws txais yog txais tus xa kuv tuaj MK9,37.” Nej zoo li ib tus me nyuam mloog lus niam txiv zoo zoo txib. Nej yog neeg ntseeg Tswv Ntuj, nej yog Tswv Ntuj me nyuam. Luag quab yuam, luag ntaus nej, tsim txom nej, Tswv Ntuj kuj raug luag quab yuam, raug luag ntaus thiab tsim txom. Nej nco ntsoov tias peb cov poj yawm txwv txoob raug iab liam, raug ntxub, raug hiam ua nej ntej. Lawv zoo siab muab lawv lub neej thiab txoj sia tiv kem txom nyem taug Yes Xus Pleev qab.

    Peb txoj kev ntseeg Tswv Ntuj hauv Koom Txoos Kav Tos Lis muaj txiaj ntsim loj kawg pab peb tiv peb tej yeeb ncuab lo iab liam, kev ntxub thiab hiam peb. Tsis txhob tso siab rau tus ntsis ntaj ntsis hmuv, riam phom txuag tsis tau peb. Tiam sis tso siab rau peb niam peb txiv, rau peb cov pog koob yawg koob, pog suab yawg suab. Peb cov pog koob yawg koob, pog suab yawg suab yog cov thwj tim thiab tsoom leej ntshiab muab lawv lub neej thiab txoj sia rhawv kab rhawv kev taug Huab Tais Yes Xus tus roj tus hneev. Lawv yog cov qhia Koom Txoos Kav Tos Liv kev ntseeg Tswv Ntuj rau peb taug. Peb caw sawv daws tig ntsia peb tus yawg koob Ignace d’Antioche tus lwj lwm taug Huab Tais Yes Xus qab. Kws yees xyoo 33, Yes Xus Leej Pleev raug tua tuag thiab sawv ciaj sia rov dua qaum ntuj lawm. Tsis ntev tom qab, cov Yus Das nyob Yes Lus Xas Les pib ntes cov thwj tim mus hiam thiab tsim txom. Pob Zeb thiaj khiav mus nkaum lub nroog As Nthias Kias (Antioche). Xyoo 35, yug Ignace nyob lub nroog As Nthias Kias, nws tseem muaj npe hu ua Theophoros Thiaj Tswv Ntuj (Porteur de Dieu). Ignace tau ntsib Pob Zeb thiab Paj Lug hauv lub nroog As Nthias Kias thaum nws tseem yau : “Lawv thiaj hu lub npe Khis Tias Nos thawj zaug nyob As Nthias Kais HL 11,26.” Lub caij ntawd, cov neeg teev Yes Xus raug cov neeg Los Mas iab liam, ntxub thiab hiam zoo li tej txhia kwv tij hmoob hauv cov tej chaws koom tshaj niaj hnub no. Thaum lawv ntes tau Pob Zeb, tus thawj coj tsoom Khis Tias Nos cov neeg teev Yes Xus hauv lub nroog As Nthias Kias, Pob Zeb tau tsa Hévodius sawv taj nws lub chaw ua tswv qhia saib cov ntseeg. Txij xyoo 70, Ignace ua tswv qhia nyob As Nthias Kias. Ignace muaj 25 xyoos, nws kub siab txhim Yes Xus lub Koom Txoos raws nraim Pob Zeb thiab Paj Lug thiab cov thwj tim kev qhuab qhia : “Tsis txhob lam yuav lub npe teev Yes Xus dag, yuav tsum tsim nyog ; tej txhia ncauj pawv puab tswv qhia, tiam sis ua ywj lawv siab. Kuv saib cov coj li ntawd tsis ncaj ncees, lawv kev txoos tsis raug cai thiab tsis raug Huab Tais lo lus qhia…kuj tib yam, Huab Tais twb tsis ua ib yam dab tsi tus kheej, los cov thwj tim kheej, yog tsis koom ua tib tug nrog Leej Txiv ; nej thiab tsis txhob ua dab tsi kiag yog tsis koom tswv qhia thiab cov txiv yawg (txiv plig) Ignace d’Antioche Lettre aux Magnésiens 4.7” Peb yuav tsum paub txheej neeg Los Mas thaud tej dab neeg. Cov neeg Los Mas thaud vam meej heev. Lawv mus tsuj teb tsuj chaw ntaus yeej tej nthwv rog, lawv kav sab Aws Los Pas yuav luag thoob. Vim li ntawd, lawv thiaj li tuaj kav txog puag Hais Nkws Tos, Yus Das, Xis Lias, Kas Pas Dos, Nkas Las Tais los rau sab hiav txwv dub Das Xias. Xyoo 106, vaj txwv Trajan ntaus rog yeej teb chaws Dacia (Roumanie), lawv mus huab tau 165 000 kg kub thiab 300 000 kg nyiaj nqa tau los tsev. Lawv los ua ib lub hmoov loj pw ntog noj pw ntog haus tau 23 hnub 23 hmos. Tas lub nroog sawv daws sau nthwv tuaj mus tom tshav ua si, haus dej haus cawv nyob ntsheej hnub tsheej hmo ntsia neeg raug txim thav ntaj sib tua tuag 10 000 leej, tua tsov thiab dais tuag 11 000 tus rau neeg saib. Tiam sis ua ntej yuav tua yuav nkaug tsov, cov tub rog xub thawb tej neeg raug txim pub tsov dhuas rau neeg saib. Cov neeg teev Yes Xus coob leej raug muab pub tsov noj li leej ntshiab Ignace d’Antioche, hnub tim 20 lub 12 hlis xyoo 107. Lub Koom Txoos Kav Tos Liv niaj xyoo ua hmoov nco txog leej ntshiab Ignace kev raug tsim txom. Tiam sis qhov tseem ceeb, yog nws cov lus koob lus hmoov peb cov raug iab liam, raug ntxub raug hiam li cov kwv tij nyob hauv cov teb chaws koom tshaj los peb cov muaj mob muaj nkeeg hnyav yuav nco ntsoov. Peb yuav hais tsis tag Ignace 7 tsab ntawv nws tau sau tseg, tiam sis nws ob peb lo lus hauv nws tsab ntawv rau cov ntseeg nyob Los Mas. Nws tsis yeem kom muaj neeg pab nws, vim nws zoo siab muab nws ua tsov qub zaub qub hno : “Kuv sau ntawv rau cov Koom Txoos, kuv thov hais rau nej paub, kuv zoo siab hlo tuag rau Tswv Ntuj tes, yog nej tsis txhob thaiv kuv kev…cia kuv ua tsiaj qub zaub qub hno, kuv thiaj li yuav ntsib tau Tswv Ntuj. Kuv yog Tswv Ntuj mov cia rau tsiaj xo ua Leej Pleev lub ncuav mov dawb huv. Nej tseem yuav plhws tsiaj plaub cia tsiaj ua kuv lub qhov ntxa faus kuv lub cev du lug, hnub ntawd, thiaj tsis ua leg rau leej twg…Nej thov Leej Pleev rau kuv, kom xwv tej tsiaj ntawd, kuv ua lub zoo txim txi Tswv Ntuj…Moi, j'écris à toutes les Églises, et je mande à tous que moi c'est de bon coeur que je vais mourir pour Dieu, si du moins vous vous ne m'en empêchez pas. Je vous en supplie, n'ayez pas pour moi une bienveillance inopportune. Laissez-moi être la pâture des bêtes, par lesquelles il me sera possible de trouver Dieu. Je suis le froment de Dieu, et je suis moulu par la dent des bêtes, pour être trouvé un pur pain du Christ. 2. Flattez plutôt les bêtes, pour qu'elles soient mon tombeau, et qu'elles ne laissent rien de mon corps, pour que, dans mon dernier sommeil, je ne sois à charge à personne. C'est alors que je serai vraiment disciple de Jésus-Christ, quand le monde ne verra même plus mon corps. Implorez le Christ pour moi, pour que, par l'instrument des bêtes, je sois une victime offerte à Dieu Lettre aux Romains IV, 1 ” Ntawm lub rooj txiav txim rau Ignace d’Antioche, vaj ntxwv Trajan hais li no :
    “Hais tias koj yog dab phem tsawm peb tej huab tais no ne ?
    Dua ntawm koj, tsis muaj leej twg tuav lub npe Theophoros ua dab phem as
    Koj sim txhais lo lus Theophoros sob ?
    Tus thiaj Yes Xus Pleev hauv nruab siab
    Ntshai koj xav tias peb tsis thiaj peb tej huab tais hauv peb tej siab no lod ?
    Nej tej huab tais yog tseem dab phem ; tsuas muaj tib tug Tswv Ntuj tsim ntuj tsim teb, Tswv Ntuj Leej Tub tib leeg ua vaj kav txhiab niaj puas xyoo.
    Koj txi peb cov huab tais, ces kuv tsa koj ua Jupiter tus leej choj thiab cov nom tswv leej txiv los mas.
    Koj tej koob meej ko pauv tsis tau Leej Pleev tus leej choj.”
    Vaj ntxwv Trajan meem txom heev, kom neeg cia li cab mus kaw qhov taub. “Huab Tais, koj pub kuv muaj koob meej nyob qhov taub vim kev tshua koj !” Nws xyab nws ob txhais tes rau lawv khi thiab txhos caug nwj txoj sawv hlau.” Ua li mas tsoom leej ntshiab txawm raug kev tsim txom loj npaum twg, lawv tsis qaug zog, tsis ntshai txom nyem ib yam Huab Tais Yes Xus tuaj yeem raug txom nyem.

    Tsoom phooj ywg sawv daws, peb cov raug kev iab liam, kev ntxub kev hiam yuav nco ntsoov peb tsoom poj yawg txwv txoob ntshiab kev npuab Huab Tais Yes Xus, kom peb muaj lawv tej koob hmoov txhawb peb ua Huab Tais Yes Xus tim khawv mus txog qhov kawg. Peb twb tsis raug kev tsim txom hnyav npaum tsoom leej ntshiab, tsuas yog peb raug tej tus mob loj, ua rau peb txhawj, tej txhia neeg ntseeg txawm siv thim tso tes khiav tsis teev Huab Tais Yes Xus lawm. Peb tej kev ua neeb saib, ua neeb kho lam ua kom tas kev cai, peb tus neeg mob loj nws mob nws li qub. Tej niag saub cuav peb mus thawj haub thiab hawv kom yus yim poob siab xwb, lawv tsis muaj ib qho hwj huam li. Tus neeg Khis Tias Nos teev Yes Xus yuav nco ntsoov Koom Txoos Kav Tos Liv tsoom leej ntshiab tej lus koob lus hmoov, thiaj muaj txiaj ntsim txhawb peb txhua txoj kev raug txom nyem, vim lawv mus dhau kev txom nyem ua peb ntej.


    21.09.2012 Cwj Vuam Chiv




    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 29th September 2012, 2:38 am



    NTHUAV NTAWV NTSHIAB.


    Rau hnub tim 30 lub 9 hlis 2012

    Tsoom neeg ntseeg thiab phooj ywg sawv daws,

    Peb zoo siab tuaj sib sau teev hawm Huab Tais Tswv Ntuj yog peb Leej Niam Leej Txi hlub peb txhua leej. Hnub no, peb caw tas tsoom neeg ntseeg qhib ntsej los mloog Tswv Ntuj tej lus foom kom, lus koob lus hmoov vim peb yog Tswv Ntuj tej tub ki yam li tej laus Hmoob tej lus foom kom rau lawv tej tub ki xeeb leej xeeb ntxwv.

    Nej ua niam ua txiv, nej yeej hlub kawg nej cov me nyuam nej yug tau. Kev hlub me nyuam tsis yog cia me nyuam ua ywj me nyuam siab. Nej yuav qhuab yuav qhia kom tej me nyuam mloog lus, paub qab hau, tsis txhob ua tub sab, tsis txhob quav dej quav cawv, kom tsim txiaj. Tus me nyuam nquag, mloog lus nej yeej qhuas ; tus tawv ncauj nej yeej qhuab, yeej cem, qhia txhij qhia txhua, hais lo mos lo zoo, qhia lo ntxhib lo hnyav. Tswv Ntuj yog peb tib neeg Niam thiab Txiv. Tswv Ntuj kuj qhia txhij qhia txhua rau peb tsoom neeg ntseeg teev hawm Tswv Ntuj tiam dhau tiam tib yam li nej ua niam ua txiv qhia nej tej me nyuam. Hnub no, peb yuav hais ob peb los txog Yes Xus tus thwj tim Yas Kos Npos cov lus qhuab qhia peb cov neeg ntseeg Tswv Ntuj. Tab txawm yog Yas Kos Npos ua tus hais, kuj yog sawv Tswv Ntuj npe hais. Yog peb mloog, Yas Kos Npos cov lus kuj hais tau hnyav thiab hais mob peb cov ua Tswv Ntuj tub ki, xeeb leej xeeb ntxwv no tej siab ntsws, txaus peb xav thiab txaus peb ris kawg nkaus. Tiam sis, txhob to taub yuam kev, tsis yog lus tsawm, lus cem peb. Hos yog ib co lus foom kom, lus koob lus hmoov qhuab qhia peb coj peb lub neej kom peb ciaj Tswv Ntuj tub ki, txhob ua neeg plhom neeg plees, ua tub plhom moj, ua nkauj plees tshauv, ua neeg tsis leem cai li ntiaj teb tib neeg tsis paub cai. Tus tsis paub cai, yeej tsis txawj txaj muag ua dev ua npua tej yas kev yas ncua ; tus tsis leem cai tsis txawj hwm neeg, mus tub sab xam tau rau nws, tsis ntshai tub qaug thiab tsis hwm ntuj, tua neeg yeej tsis ntshai txhaum Tswv Ntuj. Vim li ntawd, Yas Kos Npos muab tus neeg nplua nuj lub neej los phua qhia peb kom peb cov ua Tswv Ntuj tub ki txhob poob rau tib neeg ntiaj teb tus nplua nuj kev ua neej. Peb cov ua Tswv Ntuj tub ki yuav xaiv txoj kev ntxim Tswv Ntuj siab taug thiab coj peb lub neej. Txoj kev nplua nuj, tsis yog muaj nyiaj txiag puv nas, muaj qoob loo puv txhab, tsiaj txhu puv nkuaj li Hmoob hais xwb. Raws li Koom Txoos Kav Tos Liv kev qhuab qhia, raws li cov thwj tim Yas Kos Npos, Pob Zeb, Paj Lug thiab raws li Yes Xus kev qhuab qhia, ntxiv ntawm nyiaj txiag, kev nplua nuj tseem yog kev txawj ntse, kev muaj npe muaj koob meej, kev nkhaus lim hiam, siab dub siab hlob, yees loj dab tsi los txeeb rau yus tus kheej tag nrho, tsis hlub leej twg…Yas Kos Npos thiaj hais ib co lus hnyav txaus peb xav, tsis txhob mus yoog cov neeg nplua nuj khav theeb, siv pluaj siab lim hiam, ua neeg siab hlob yees loj li ntiaj teb neeg cov nplua nuj tsis teev tsis hwm Tswv Ntuj : “1 Cov nplua nuj, nej yuav quaj ntsaj laws vim nej tej xwv txheej yuav tuaj 2 Nej ua neej lwj kas dhi thiab kab twb xwv nej tej tsoos lawm 3 Nej tum nyiaj txiag vam tos hnub kawg, tej nyiaj tej kub twb xeb ntsuav, tej kua xeb sawv ua tim khawv lom nej thiab yuav noj nej nqaij li hluav taws YKN5,1-3” Yas Kos Npos tsis txwv txoj kev nquag kev khwv yug yus lub cuab lub yig kom tau noj tau haus, tsis txwv kev nrhiav nyiaj nrhiav txiaj txhawb yus lub neej kom txhob raug txom nyem. Tiam sis, Yas Kos Npos qhia peb qhib qhov muag, pob ntseg thiab tej siab ntsws hlub tib neeg ntiaj teb cov txom nyem ib yam li Yes Xus qhib rooj ntug nqes los cawm peb tib neeg ntiaj teb tsis txawj sib hlub thiaj txom nyem. Peb pom, peb hnov thiab peb paub cov pluag quaj ntsaj laws ntsia lub ntuj vim lawv raug xwv txheej tshaib thiab nqhis tsis muaj khaub tsoos hnav. Cov nplua nuj kuj yuav quaj ntsaj laws vim tej xwv txheej kev sib txeeb lag luam, sib txeeb nom, sib khib, ib tug tsis zam tug, ntiav tub sab tos kev ntaus sib tua nqaij ntuag, ntshav nrog tuag this kev nplua nuj. Tus tsis tseg kev plees kev yis kuj yuav raug xwv txheej liam txwv cuab yig puas tsuaj, kis mob kis uav ntsaj laws tuag kus. Peb yuav xav kom zoo zoo, muaj coob leej cov neeg ntseeg Tswv Ntuj coj lub neej rhuav Tswv Ntuj plhu, ua puas Tswv Ntuj npe npaum li ntawd. Kom peb nco ntsoov, tej nyiaj sawv daws tum cia tsheej pawg puv nas dag tsis pab, tsis hlub tus tshaib tus txom nyem nrom siav nrag, yuav ntxeev ua kua xeb thiab hluav taws lom peb lub cev thiab kub peb nqaij ua hluav : “4 Saib, tus nqe nej khuav cov tub zog sau nej tej liaj teb nroo laws, cov tub qoob lub suab ntsaj ncha ntws txog tus Huab Tais kav lub sim ceeb 5 Nej tsuas tseev kum nej yees saum daim av thiab txhaws nej kev plhom kev plees, yog nqaij ntuag ntshav nrog nej siab thiaj nqig YKN5,4.5” Tus neeg siab hlob, yees loj, siab nkhaus thiab lim hiam yog ib tug nplua nuj. Vim nws lub siab, lub tswv yim no ua rau nws pub tsis tau zam tsis tau thiab tsis hlub leej twg li. Tus neeg siab hlob, lim hiam nkhaus tsuas xav txog nws tus kheej, yuav ua cas hlub taus neeg ? Ntau zaus, tus neeg nplua nuj tej nyiaj txiag tsis los ntawm nws lub zog thiab ob txhais tes khwv tawm los, hos yog qee tub liaj tub teb lub nqe zog noj tsis them rau luag, los yog nyiaj tub sab tau thiab txeeb kev lag luam tau, los yog nyiaj kaus tau dawb ntawm nom tswv...neeg pom neeg hais tsis tau los muaj ntuj pom, yog nuj nqes kawg yuav tsum kho thiab them rov qab ib hnub twg.

    Peb tus neeg ntseeg Tswv Ntuj yuav los npuab Huab Tais Yes Xus kom tag siab nrho thiab hloov peb tus qub neeg no hauv lub cim ntxuav yug ua ib tug neeg tshiab, coj lub siab hlub neeg thiab hwm Tswv Ntuj mloog Yes Xus lus qhia : “43 Thiab yog koj txhais tes ua koj tub qaug, muab txiav pov tseg pawv tes mus ciaj sia nyob ib txhis khees dua muaj ob sab tes poob dab teb, hauv cub tawg cig tsis txawj tuag 45 Yog koj txhais taw ua koj tub qaug, muab txiav pov tseg pawv taw mus ciaj sia nyob ib txhis khees dua muaj ob sab taw pov rau dab teb MK9,43.45” Yog peb cheem tsis tau peb txhais tes mus ua tub sab, yog peb cheem tsis tau peb txhais taw kwv ceg mus lwj mus liam, yeem muab tes thiab taw txiav pov tseg thiaj tsis pus peb mus ua txhaum. Tiam sis peb to taub, qhov zoo Yes Xus lub siab, tsis yog muab peb tes taw txiav pov tseg. Yog peb kev mloog Yes Xus lus, teev Yes Xus, thov Yes Xus pab peb txiav peb lub siab lim hiam thiab nkhaus no pov tseg thiaj zoo Yes Xus siab. Tus mloog Yes Xus Lus, nrog Yes Xus leg txoj num cawm ntiaj teb neeg. Vim li ntawd, tus neeg teev Yes Xus yog tus neeg taug Yes Xus txoj kev lawv Yes Xus qab, nrog Yes Xus hlub ntiaj teb neeg li Leej Txiv siab nyiam.

    Ib tsoom phooj ywg sawv daws, ib hnub twg los txog, peb tej nas nyiaj nas kub peb khwv tau los tub sab tau yuav poob rau lwm leej lwm tus tes ; cia saib peb lub siab dub, siab nkhaus thiab lim hiam yuav coj peb mus qhov twg xwb, puas mus ua dab tu caj tu ces. Ua neej nyob, peb twb tsis hwm Tswv Ntuj thiab tsis hlub tib neeg. Hnub tuag, saib Tswv Ntuj puas hlub tau peb tus neeg siab dub siab nkhaus nrog tsoom neeg siab ntshiab siab ncaj xwb.

    27.09.2012 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 6th October 2012, 7:26 am



    NTHUAV NTAWV NTSHIAB.



    [/color]
    Rau hnub tim 07 lub 10 hlis 2012



    Ib tsoom ntseeg thiab phooj ywg hmov tshua,

    Peb muaj lus zoo siab rov tuaj txoos ua npoj teev hawm Huab Tais Tswv Ntuj ua ke, nco Huab Tais Tswv Ntuj txiaj ntsim kev hlub peb. Leej Txiv Tswv Ntuj xa nws Leej Tub Yes Xus yug los ciaj neeg kom cawm tau peb.

    Tsoom kwv tij neej tsa phooj ywg, nej xav li cas ? Peb twb paub ntsoov tias Huab Tais Tswv Ntuj thiaj yog tus loj, tus muaj hwj huam, tus hlub peb leej tib neeg. Tswv Ntuj yog tus tsim lub ntuj thiaj ntiaj teb, ua lub ntuj loj thiab muaj hwj huam npaum li ntawd thiab ntiaj teb dav li tom cas zoo nkauj tas nrho pub rau peb tib neeg kav ua peb tug. Tim li cas, ntiaj teb neeg feem coob twb tsis paub, tsis kam lees teev Tswv Ntuj ? Tsis tas li ntawd, hauv cov neeg ntseeg Tswv Ntuj, feem coob twb tsis nyiam thiab tsis npuab Huab Tais Tswv Ntuj kom tag siab. Muaj ntau tus neeg ntseeg thaub qab, tuaj yeem tso Tswv Ntuj pov tseg, mus thawj tej niag huab tais cuav ntsej lag muag dig, tsis muaj ib qho hwj huam. Yeej tsis txawv ntau txheej laus thaum ub kev teev huab tais cuav thiab teev dab qhuas :
    -Haiv neeg Hais Nkws Tos txheej thaud, teev hawm lawv tej huab tais lub cev yog neeg, tiam sis tej taub hau thiab lub pliaj plhu yog tsiaj txhu : Rê huab tais hnub (taub hau noog dav thiab ntoo ib lub kauj vab), Thot yog huab tais thoob tsib (taub hau liab), Bastet huab tais tiv mob tiv ntsaj (taub hau miv)…
    -Cov haiv neeg Hes Las thiab Los Mas tej huab tais : Aphrodite, Vénus yog niam huab tais kev hlub, Dionysos, Bacchus huab tais lom zem, Hermès, Mercure huab tais saub…
    -Kawg haiv neeg His Xais Lais tib tug thiaj teev tus tseem Huab Tais Tswv Ntuj muaj siab muaj ntsws, txawj hlub neeg, tus tsim ntuj tsim teb.
    -Tiam neej no cov huab tais yog kev lom zem, kev plees kev yis, kev noj haus, nyiaj txiag, kev ua nom ua tswv, kev txawj ntse : “18 Kuv tau hais ntau zaus rau nej thiab zaum no kuv hais quaj qaws rau nej, muaj coob leej taug kev ua Leej Pleev tus ntoo cuam yeej ncuab 19 Lawv kawg poob qho thiaj tag ; lawv lub plab ua lawv Tswv Ntuj thiab kev txaj muag ua lawv hwj chim, lawv taug ntiaj teb txoj xub ke 20 Peb li, peb yog qaum ntuj neeg thiab peb tos Huab Tais Yes Xus Pleev tus cawm neeg EFX 3,18-20” Peb cov neeg ntseeg muaj coob leej lub ncauj teev Tswv Ntuj, tiam sis, siab ntsws taug ntiaj teb txoj xub ke : ua neeg siab hlob, khav theeb, twb tsis nrhiav kom tau caij nyoog teev Huab Tais Tswv Ntuj. Vim li ntawd, peb yuav cuab pob tseg los mloog Huab Tais Yes Xus cov lus qhia hnub no. Tos muaj lub sim ceeb vim muaj Yes Xus nyob txawm, thiaj muaj lub sim ceeb ua Yes Xus tug. Yes Xus yog lub sim ceeb sab cev nqaij thiab sab ntsuj plig tus Huab Tais Vaj Ntxwv kav tag nrho lub sim ceeb. Tiam sis, Yes Xus tsis nyob twj ywm saum qaum ntuj xaiv kev tau zoo, tsis xa ib tug tub txib taj nws chaw (tshab xo tshiab) los ua neeg. Yes Xus tus kheej qhib rooj ntug nqes los ua neeg li peb kom cawm peb. Vim tib neeg tau yuam cai hla plaws Tswv Ntuj lus, qaug dab xas tas ntxias ua txhaum. Kev qaug dab xas tas ntxias ua rau tib neeg tsis sib hwm, muaj khib, sib ntxub, raug txom nyem, raug mob raug ntsaj, ploj thiab tuag. Tib neeg ploj tuag vim kev cam thawj yuam cai. Yes Xus yug ua neeg kho tib neeg kev cam thawj, coj neeg kev mloog Leej Txiv lus yam li Yes Xus mloog Leej Txiv lus tuag kus. Vim Yes Xus mloog Leej Txiv lus tuag nthi sawm Leej Txiv kev khuv leej tsa nws Leej Tub sawv hauv tsoom tub tuag rov ciaj sia : “9 Peb pom, Yes Xus, tus txo nws qis zog tsoom tshab xo, txog txij txom nyem tuag kus, sawm lub hwj chim thiab nto koob meej xwv nws kev tuag tsam rau txhua leej muaj Tswv Ntuj txiaj ntsim 10 Tos muaj txhua yam vim nws thiab txhua yam yog rau nws, yog nws tus coj coob leej tub ki muaj hwj chim tus cawm tau lawv tim txom nyem txaus 11 Yog nws tus ntshiab si thiab cov yuav ntshiab si tuaj txhawv tib lub caj ces los ; vim li, nws tsis txaj muag hu lawv ua kwv tij HN 2,9-11” Vim Leej Tub hlub peb npaum Leej Txiv hlub, tsis ntshai tiv kev iab kev daws, raug ntxub raug hiam, nrog tib neeg tuag ua pawg. Leej Txiv kev khuv leej tsa nws Leej Tub tuag sawv ciaj sia tsam rau tas ntiaj teb tsoom tub tuag sawv mus ua ntxaig nrog Leej Tub ciaj qaum ntuj sia nyob ib txhis.

    Ib zeej tsoom neeg ntseeg, tav twg los peb pheej mus txoj qub kab taug txoj qub lw. Peb tsuas taij kom Huab Tais Yes Xus npo peb ntawm kev txhawj xeeb thiab kev puas ntsoog. Peb ntshaw kom peb ciaj sia ntev li ntev txhob txawj qaij qaug : “14 Pom dheev, ua Yes Xus xeeb txob, nws hais lawv : Nej cia cov me nyuam tuaj cuag kuv, txhob cheem lawv, vim qaum ntuj cia rau cov zoo li lawv 15 Kuv hais ncaj rau nej : tus tsis txais qaum ntuj yam me nyuam yaus, yuav chaws tsis tau mus hauv Mk10,14.15” Vim peb tsuas pom kev puas ntsoog yog kev tu siab, kem txom nyem thiab kev tsaus ntuj li neeg ntiaj teb zaj tswv yim xwb. Peb twb cog lus nrauj dab phem, nrauj tej huab tais cuav los npuab Yes Xus teev hawm Yes Xus. Peb yuav hloov peb tej qub siab, tej tswv yim qub no pov tseg, txais kev ntshaw thiab kev vam tshiab li tsoom leej ntshiab thiab Yes Xus kev qhuab qhia. Txoj kev ntshaw kev vam tshiab yog ntshaw thiab hlub Huab Tais Yes Xus. Yog peb ntshaw thiab hlub Huab Tais Yes Xus, peb yuav zoo siab nrog Yes Xus xaiv txoj kev khwv, tiv kev iab kev daw. Ib tug neeg khwv yog ib tug neeg tiv tshav tiv nag, nyiaj tshaib yoo nqhis. Peb nrog Yes Xus xaiv txoj kev khwv, peb yuav nrog Yes Xus hlub ntiaj teb neeg, qiv peb txhais tes rau Yes Xus plhws cov neeg raug tshaib raug nqhis, yam li cev peb tes hlub thiab plhws cov neeg tshaib thiab nqhis npaum li Yes Xus. Peb nrog cov neeg tshaib thaib nqhis txo lawv kem txom nyem kom sib kha. Yog peb nrog Yes Xus xaiv txoj kev khwv, peb yuav raug neeg ntxub raug neeg hiam peb, vim peb qiv peb lub ncauj thiab peb lub siab rau Yes Xus hlub neeg thiab pab neeg. Yog peb zoo siab nrog Yes Xus raug txom nyem, peb kev ploj kev tuag sawm Huab Tais Yes Xus nto koob meej thiab tsam rau peb txais Leej Txiv Tswv Ntuj txiaj ntsim.

    Ib tsoom phooj ywg sawv daws, txoj kev ua neeg ntseeg thiab teev hawm Tswv Ntuj raws li peb cov poj yawm txwv txoob ntshiab, raws li cov thwj tim kev qhuab qhia thiab raws li Huab Tais Yes Xus lus qhia tsis yog ua li txoj cai hais kom ua xwb. Peb yuav ua cov neeg ntseeg thiab teev Tswv Ntuj siab loj siab dav tshaj txoj cai sau tseg rau ntawd : piv li txoj cai tso lus rau neeg rho me nyuam hauv leej niam plab, tiam sis peb yuav tsum hwm tus me nyuam txhob muab rho. Kev teev hawm Tswv Ntuj yog ntshaw thiab vam Tswv Ntuj cuag li tus me nyuam yaus ntshaw thiab vam nws niam nws txiv.

    04.10.2012 Cwj Vuam Chiv





    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 12th October 2012, 7:17 pm


    NTHUAV NTAWV NTSHIAB.



    Rau hnub tim 14 lub 10 hlis 2012

    Ib tsoom niam txiv kwv tij neej tsa phooj ywg,


    Peb zoo siab rov tuaj sib fim mloog Tswv Ntuj lus ua ke hnub no. Vim peb yog neeg ntseeg Tswv Ntuj teev Tswv Ntuj, xav kom peb tuav lub txiaj ntsim ua neeg teev hawm Tswv Ntuj no muaj nuj nqes, txhob ua cov neeg ntseeg zuav zaws muag ncee. Hnub no, peb zoo siab caw sawv daws qhib ntsej los mloog Yes Xus thiab tus neeg nplua nuj nkawd cov lus sib tham txhawb peb kom txhob ua tej tug neeg ntseeg hle ntsuav.

    Peb yuav tsum paub kom tseeb, txoj kev ntseeg Tswv Ntuj yog txoj kev coj neeg ntiaj teb mus lawm qaum ntuj, pub neeg ntiaj teb ciaj Tswv Ntuj neeg. Txoj kev ntseeg Tswv Ntuj yog koob yog hmoov, cawm tau peb tib neeg txhua leej tiam neej no tej siab me siab muag kom loj muaj zog hla dhau txhua txoj kev txhawj xeeb thiab tso peb dim txhua yam kev tsaus ntuj ; fab lwm tiam tseem coj tau peb tib neeg cev ntaj ntsug sawv tsees hauv ntiaj teb plua av plua tshauv nrog ntsuj mam ntsuj plig nce nto plaws ntuj ciaj Tswv Ntuj sia nyob niaj txhiab ib txhis. Vim li ntawd, peb txoj kev ntseeg Tswv Ntuj loj tshaj lwm txoj kev teev hawm : Phus Tha, Hees Dus, Mawv Xim Lim thiab peb Hmoob kev teev dab qhuas huv si. Sawv daws twb paub ntsoov : tus tsiaj txhu tsis yog tib neeg, tus tib neeg tsis yog ntsuj duab ntsuj plig thiab tus ntsuj duab ntsuj plig tsis yog Tswv Ntuj. Vim Huab Tais Tswv Ntuj muaj hwj huam tshaj tej ntsuj mam ntsuj plig, tshaj tib neeg thiaj tej tsiaj txhu. Yog Tswv Ntuj muaj hwj huam tshaj tib neeg, ces kev teev hawm Tswv Ntuj loj dua Phu Tha, Hees Dus, Mos Has Mes kev teev hawm thiab loj dua peb Hmoob kev teev dab qhua. Vim tej kev cai Phu Thas, Mos Has Mes thiab peb tej poj yawm kev teev dab qhuas yog tib neeg rhawv tawm tuaj mus. Phu Thas, Mos Has Mes thiab peb tej poj yawm yog tib neeg xwb. Lawv tsuas pab tau neeg, qhia tau kev thoob tsib rau neeg coj. Lawv tsis muaj hwj huam li Huab Tais Tswv Ntuj ; lawv cawm tsis tau neeg kom ciaj sia thiab lawv twb cawm tsis tau lawv tus kheej. Nej sim xav, lawv twb dua toj thaum ntej thaum ntxov pes tsawg tiam neeg los, niaj hnub no lawv tseem lo ntiaj teb plua av plua tshauv tos ntsoov Tswv Ntuj hnub txiav txim hnub kawg ib yam li tej poj yawm txwv txoob Hmoob sawv daws. Huab Tais Yes Xus twb sawv hauv tsoom tub tuag ciaj sia ua peb ntej dua qaum ntuj lawm. Vim li ntawd, peb txoj kev teev Yes Xus yog kev teev thiab ntseeg Tswv Ntuj raws li Yes Xus qhia. Peb thiaj muaj cuab kav hais tau tias txoj kev ntseeg Tswv Ntuj yog koob yog hmoov, muaj txiaj tsim cawm tau peb zim txwv no thiab hnub kawg cawm tau peb lub cev thiab ntsuj plig lawv Yes Xus qab.

    Hauv tsab ntawv Moo Zoo hnub no, peb hnov Yes Xus qhia rau tus nplua nuj tias yus los teev hawm thiab ntseeg Tswv Ntuj, yus yuav tsum sawm lub cuab tam txoj sia nyob ib txhis saum qaum ntuj : “Zoo Xib Hwb, kuv yuav ua li cas kuv thiaj tau txoj sia nyob ib txhis MK 10,17 ?” Peb kuj zoo li tus neeg nplua nuj no, peb los ntseeg Tswv Ntuj teev Tswv Ntuj, peb nyias muaj nyias kev nplua nuj. Tiam sis tus nplua nuj tiag yog Tswv Ntuj. Peb yuav ntsia Tswv Ntuj siv Tswv Ntuj kev nplua nuj pab peb zoo li cas, peb kuj yuav faib peb kev nplua nuj pab Yes Xus tib yam nkaus. Peb yuav zoo siab nrog Yes tshaj Leej Txiv Tswv Ntuj kev hlub neeg. Peb yuav txaus siab hlo cev tes pab Yes Xus, nrog Yes Xus koom siab koom ntsws, tso siab rau Yes Xus. Leej Txiv xa nws Leej Tub Yes Xus tuaj nyob ntiaj teb no leg Leej Txiv tes num rau Leej Txiv. Yes Xus hu nws cov thwj tim pab nws, Yes Xus hu tsoom leej ntshiab tiam dhau tiam los txog rau peb niaj hnub no. Peb tsis txhob txhawj, txhob khuv xim siv peb lub zog pab Yes Xus thiab nrog Yes Xus tshaj nws lub Moo Zoo : “21 Yes Xus ntsia ntsoov nws, hlub nws thiab hais nws : “Tshuav tib qho, rov mus muag tag yam koj muaj thiab pub rau tej pluag, koj yuav muaj cuab tam saum ntuj thiab tuaj caum kuv” 22 Hnov dheev lo lus ntawd, nws ntshaus ntsho chim siab hlo zam kev deb vim nws muaj teej tug ntau MK 10,21-22” Tej txhia yuav xav tias peb twb tsis muaj zog, tsis muaj ib qho hwj huam, yog peb tus yuav vam Yes Xus pab thiab hlub, tim li cas peb tseem yuav mus pab thiab hlub Yes Xus ua dab tsi, nej xav li cas ? Ntawm tus neeg nplua nuj, xyov nws muaj cuab tam dab tsi zoo ua rau nws thim rov qab ; nws ntsia nws lub cuab tam muaj nqes tshaj kev mloog Yes Xus lus ; nws tso tsis tau, faib tsis tau nws cuab tam rau leej twg, tab Tswv Ntuj twb tsis luaj nws thooj cuab tam. Vim li ntawd, nws yeem tso Yes Xus pov tseg, puam chawj Tswv Ntuj txoj sia nyob ib txhis, tsuav tau nws thooj cuab tam tuav. Peb ne, peb los teev hawm Tswv Ntuj, peb puas coj tag peb lub siab lub ntsws los dai Tswv Ntuj, txhob ua li tus neeg nplua nuj ntawd ? Lub cuab tam muaj nqes hauv yus tus neeg teev Yes Xus yog yus lub siab, kev sib yoog hauv yus lub cuab lub yig, kev sib zam lus chawj lus chim hauv yus tsoom kwv tij neej tsa, hauv yus lub zej zog…Yus puas nrauj yus lub siab phem siab nkhaus pov tseg ? Txhob ua neeg huab noj huab haus, lim hiam tua neeg li tej yeeb ncuab hiam yus, tsim txom yus. Peb kev pab Yes Xus yog txuag Yes Xus lub npe kom nto koob meej, ua rau tus neeg phem thim xav nrauj nws txoj kev phem thiab tsa tus neeg zoo lub siab yim txawj nco Tswv Ntuj txiaj ntsim qhuas Tswv Ntuj.


    Dua ntawm kev pab, peb kev hlub Yes Xus yog nrog Yes Xus cog Tswv Ntuj qaum ntuj kom hlob hauv ntiaj teb no. Peb puas pom Yes Xus hlub peb npaum li cas nrog peb tib neeg ris peb kev iab kev daw tuag nthi. Yes Xus hlub peb ua ntej peb hlub Yes Xus. Peb tsis txhob tos hnub peb nquag, peb mam mus nkag tsev teev ntuj, tsis txhob tos hnub peb noj seem noj so, peb mam faib peb mov seem rau tus tshaib thiab nqhis, los hnub peb pom Yes Xus hwj huam peb mam txiav siab pe Yes Xus. Vim kev hlub tsis muaj caij muaj nyoog thiab tsis txawj nqig. Yus hlub yus lub cuab lub yig, hlub yus niam yus txiv, hlub yus kwv tij neej tsa phooj ywg tag yus lub siab tsis txawj kawg. Peb kev hlub Yes Xus kuj tib yam nkaus, niaj hnub nrog Yes Xus leg leej Txiv Tswv Ntuj tes num ntawm peb nyob, hauv peb lub cuab lub yig, hauv peb lub zos, ntawm peb lub luag dej luag num. Peb kev txhawj kev pab tsoom neeg txom nyem, raug tshaib thiab nqhis yog koob hmoov Yes Xus muab rau peb tau nrog Yes Xus mus ib ncua kev lawv nws qab. Peb txoj kev hlub neeg yog txoj kev hlub Yes Xus thiab yog peb ntxub neeg, kuj yog Yes Xus peb ntxub. Leej twg mus xyuas ib tug neeg raug txim hauv nkuaj, tus ntawd nrog Yes Xus ris cov neeg raug txim ib qho kev iab kev daw, yam li Yes Xus nrog tsoom tub sab ris lawv lub txim tuag daim saum ntoo cuam ua ib pab : “28 Pob Zeb hais rau nws : “Peb tso ub no tseg thiab peb tuaj caum koj”29 Yes Xus hais tias : “Kuv hais tseeb rau nej, tus tso vaj tse, kwv tij, muam, niam thiab txiv, me nyuam, liaj teb tim kuv thiab tim lub Moo Zoo 30 Yuav txais zim txwv no ib puas npaug : vaj tse, kwv tij, muam, niam, me nyuam, liaj teb nrog kev txom nyem thiab lwm tiam txoj sia nyob ib txhis MK 10,28-30” Peb sawv Yes Xus npe hlub ib tug neeg pluag, peb ua rau Yes Xus nto koob meej thiab nrog Yes Xus muab qaum ntuj qhib tuaj hauv ntiaj teb no. Yog peb sawv Yes Xus npe raug txom nyem, peb kev txom nyem hmoov zoo vim peb txais Huab Tais Yes Xus txiaj ntsim ib puas npaug. Cov leej ntshiab txais Huab Tais Yes Xus txiaj ntsim txhua tus. Leej ntshiab Bernadette ua tau tej yam nws tsis muaj peev xwm ua : nws txhais tes hus av ua dej ntws nto txog nia hnub no nram Lourdes.

    Ib tsoom phooj ywg sawv daws, peb txoj kev teev hawm Tswv Ntuj muaj txiaj muaj ntsig cawm tau peb zim txwv no thiab cawm tau peb fab lwm tiam ciaj Tswv Ntuj sia. Tsis muaj lwm txoj kev teev hawm yuav loj thiab muaj hwj huam cuag li peb txoj kev teev Yes Xus. Peb nco ntsoov, yog leej twg tsis nrog Yes Xus raug txom nyem, nws kev raug mob raug ntsaj tuag los puas raug xwv txheej ua nws tuag mus lawm ncaj qha tsi muaj txiaj ntsim. Tiam sis, tus neeg mloog Yes Xus lus raug hiam raug tua tuag, nws kev raug txom nyem muaj hmoo nrog Yes Xus txom nyem tuag, nws yuav txais lub cuab tam nrog Yes Xus ciaj Tswv Ntuj sia ib txhis saum qaum ntuj.


    10.10.2012 Cwj Vuam Chiv






    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 21st October 2012, 6:05 am


    NTHUAV NTAWV NTSHIAB.




    Rau hnub tim 21 lub 10 hli 2012

    Ib tsoom neeg ntseeg thiab phooj ywg sawv daws,

    Twb rov txog lub caij nyoog peb tuaj sib fim moog Tswv Ntuj lus ua ke. Peb yuav tsis muaj sij hawm hais kom txhij piav kom txhua cov zaj nyeem lub Koom Txoos Kav Tos Liv muab los qhia rau peb hnub no. Tiam sis, ua neej nyob, peb nyias muaj nyias kev txob kev txhawj. Vim peb yog neeg teev Yes Xus, peb yeej vam ntsoov Huab Tais Yes Xus lub hwj huam roos peb. Vim li ntawd, peb yuav los nthuav ob peb los txog peb kev tsa ncauj thov Yes Xus lub txiaj ntsim pab peb yam li Yas Kos Npos thiab Zam nkawd thov Yes Xus lub hwj chim rau nkawd.

    Yes Xus yog Huab Tais Tswv Ntuj nqes saum ntuj los ua neeg kom coj tau peb tib neeg nrog nws mus saum qaum ntuj ciaj Huab Tais Tswv Ntuj tub ki. Yog li, peb los teev hawm Yes Xus, xav kom peb paub Yes Xus kom zoo zoo, yog peb twb tsis paub xyov Yes Xus yog leej twg, peb puas yuav muaj kev cia siab rau Yes Xus ? Peb mloog Yes Xus cov lus hais rau tsoom txwj laus His Xais Lais, vim lawv tsis ntseeg tias Yes Xus yog Tswv Ntuj Leej Tub : “34 Yes Xus teb rau lawv : Puas yog sau tseg hauv nej txoj cai : kuv hais tias nej yog tswv ntuj 35 Yog txoj cai pom xeeb hu ua tswv ntuj cov Tswv Nuj lo lus hais lawv, tsis muaj leej twg muaj peev xwm rhuav tau tej ntawv sau tseg no 36 Tus uas Leej Txiv txi ntshiab si thiab xa tuaj hauv ntiaj teb, nej li nej hais tias : koj thuam ntuj, vim kuv hais tias Tswv Ntuj Leej Tub yog kuv ? Z 10,34-36” Yes Xus qhia peb tias tus mloog Tswv Ntuj lus ciaj tau Tswv Ntuj. Vim li ntawd, peb los teev hawm Yes Xus, peb hmoov zoo, peb teev hawm tus tseem Huab Tais Tswv Ntuj. Peb yeej paub qas ntsoov, ib tug qhev tsis yog ib tug thawj neeg los ib tug nom. Li ntawd, tej nyuag huab tais cuav thiab saub cuav tsis yog Huab Tais Tswv Ntuj. Thaum peb muaj chaw thov kev pab, kev cawm siav, peb twb tsis mus pe tus qhev pab tsis tau peb, peb mus thawj mus pe tus neeg tseem ceeb muaj peev xwm pab tau peb. Ntawm tej kev teev hawm kuj tib yam li, kawg txoj kev teev Yes Xus thiaj yog txoj teev hawm Huab Tais Tswv Ntuj thiab muaj hwj chim xwb.

    Peb yuav tsum paub Yes Xus yog tus muaj hwj chim, peb tsis txhob yuam kev cia siab rau tej huab tais cuav ntsej lag muag dig tsis muaj hwj huam los lwm yam kev teev hawm los tej kev teev dab qhuas. Yes Xus hu tau pab kaum ob los ua (ἀπόστολοι, Les Envoyés) npoj Xa Moo, ua nws thwj tim nrog nws leg Leej Txiv tes dej num nyob ntiaj teb no : “1 Nws hu nws kaum ob tug thwj tim los, nws pub hwj huam rau lawv kav cov dab qias ntiab tau lawv tawm khiav thiab kho cov neeg mob nkeeg thiab qaug zog kom zoo hlo 2 Kaum ob tug xa moo ntawd npe yog : tus thawj hu ua Pob Zeb…MT 10,1-2” Yes Xus coj npoj Xa Moo nrog nws mus tshaj lub Moo Zoo taug kev tuaj mus pem lub tuam ceeb Yes Lus Xas Les, pem lub tuam tsev teev ntuj. Lawv hla ntau lub xeev teb, mus txog ntau lub nroog thiab ntsib zeej tsoom His Xais Lais thiab tej pej kum neeg pluag txom nyem, zuav ces, dig muag, mob ruas, raug dab thiab mus fim coob leej cov zoo neej, nplua nuj, tej tub rog, tej nom tswv…Yes Xus pab sawv daws, kho tej neeg mob zoo hlo, tsa tej neeg tuag sawv, ua ntau yam hwj huam. Cov thwj tim niaj hnub nrog Yes Xus ua ke, lawv zeem tau Yes Xus tseeb zuj zus, Yes Xus yog (מָשִׁ֖יחַ ; χριστὸς) Leej Pleev, tus uas cov yaj saub hais quj qees tiam dhau tiam thiab sau tseg rau hauv ntawv tias nws yuav tshwm sim tuaj : “7 Ziag no, kuv paub tias Huab Tais cawm nws Leej Pleev, nws teb ntua nws kev ntshiab si saum qaum ntuj cev nws txhais xis vuag lias cawm NPN 20,7”Npoj Xa Moo ntseeg tias Yes Xus yog Tswv Ntuj Leej Pleev, muaj hwj huam loj npaum li Yes Xus, ntiab tau dab phem khiav ntsaj qaws, cheem cua daj cua dos tu lis nrho, tsa neeg tuag sawv tsees tawm plaws ntawm rooj ntxas. Yes Xus yuav tsis txawj tshaib tsis txawj nqhis, yuav tsis raug mob raug ntsaj, yuav tsis txawj ploj tsis txawj tuag. Tiam sis tsis yog li lawv xav, lawv kev to taub Yes Xus lub Moo Zoo tsis ti ntsiab. Tseem tshuav deb heev Yes Xus yuav tsum qhia lawv kom lawv to taub : “33 Peb nce mus pem Yes Lus Xas Les, neeg Leej Tub yuav raug muag rau cov thawj leej choj thiab cov thoob xwm, lawv yuav txiav txim cia nws tuag, muab nws muag rau cov pej kum neeg 34 lawv yuav thuam yuav nto nws, muab nws nplawm thiab tua nws, peb hnub tom qab nws yuav xeev sawv tsees rov los MK 10,33-34” Cov lus Yes Xus hais lawv no yog zaum peb los tsis nkag npoj Xa Moo pob ntseg. Vim thaum lub caij ntawd, lawv tseem tsis tau nkag siab txog lub Moo Zoo. Lawv tseem nyob thaj chaw qub, nce tsis tau txog theem paub Yes Xus kom meej meej, lawv siab tseem tsis tau qhib tsis tau ras : “Xib hwb, wb xav kom koj mloog wb thov koj” 36 Nws hais nkawd tias : “Neb xav kom kuv ua dab tsi rau neb ?”37 Nkawd hais rau nws : “Kom wb tau zaum ib tug ntawm koj sab xis, ib tug ntawm koj sab laug hauv koj lub hwj chim MT 10,35-37” Yas Kos Npos thiab Zam nkawd ob kwv tij los ntxhi thov Yes Xus lub hwj chim rau nkawd. Tiam sis, lwm cov thwj tim kuj xav muaj Yes Xus hwj chim tib yam li nkawd. Txoj kev ntshaw muaj Yes Xus hwj chim ua rau cov thwj tim sib khib, lawv pib muaj lus sib cav sib ceg liab muag tsuas. Hu ua neeg, leej twg los kuj ntshaw muaj hwj chim, ntshaw muaj koob meej, ntshaw kev nplua nuj, ntshaw ua nom ua tswv, ua huab tais kav pej xeem, kav teb kav chaw. Tab peb cov neeg ntseeg teev Tswv Ntuj, twb yog tib pab neeg ntseeg xwb, hais tib xeem lus, nyob koom zej koom zos, koom tib lub tsev teev ntuj twb muaj khib, muaj lus sib cav sib ceg ntxhov quav niab, faib ua pab ua pawg, tsis xav sib pom, tsis xav teev ntuj ua ke. Teeb meem, tsis yog txoj kev ntshaw muaj hwj chim los muaj kooj meej phem tsis zoo li ub li no. Yes Xus tsis txwv cov thwj tim kom txhob ntshaw Yes Xus hwj chim. Qhov ua teeb meem Yes Xus qhia yog qhov lawv tsis to taub Yes Xus hwj chim. Yog Yas Kos Npos thiab Zam nkawd ntxov to taub Yes Xus lub hwj chim, nkawd yuav tsis muaj ntsej muag thov li nkawd thov ntawd : “Neb tsis paub yam neb thov ; neb puas haus taus lub ntim kuv yuav haus…Nkawd hais rau nws : “Wb muaj cuab kav.” Lwm cov thwj tim kuj tib yam, yog lawv ntxov to taub Yes Xus lub hwj chim, lawv yuav tsis sib khib liab muag tsuas li ntawd. Peb cov neeg ntseeg muaj khib, siab nkhaus nrhiav teeb meem, ua teeb meem niaj hnub no kuj yog vim peb tsis to taub Yes Xus lub Moo Zoo. Tej txhia thawj coj txawm xav tias tau kawm me ntsis txuj ces paub Yes Xus lub Moo Zoo thoob tag, twb tsis tshua xav mloog vaj qhia, tswv qhia thiab tej txiv plig lus lawm. Vim li ntawd, twb yog tib tse neeg ntseeg Kav Tos Liv xwb los cam thawj cuag li lwm pab neeg ntseeg hauv tej me nyuam koom txoos cam thawj thiab : “42 Yes Xus hu lawv los hais rau lawv tias : “Nej twb paub, cov ua thawj kav tej haiv neeg yuam lawv qhi thiab cov ua hlob siv lawv hwj chim rau luag 43 Hauv nej, txhob ua li, leej twg xav ua tus loj yuav ua nej tus tub txib 44 Leej twg hauv nej xav ua tus thawj ua sawv daws tus qhev 45 Thiab neeg Leej Tub tsis tuaj kom luag tiam, hos kom tau tiam thiab pub nws ntsuj plig txhiv kom tau coob leej MK 10,42-45” Yes Xus cov lus no qhia kom peb txawj txaj muag, ua ib tse neeg ntseeg teev Tswv Ntuj zoo nyiam tsim nyog sawv Yes Xus lub npe, tseg lub siab nkhaus, nrauj dab xas tas zaj tswv yim lim hiam tawm hauv peb mus. Peb cov neeg teev Yes Xus yuav tsum ua ib co neeg paub cai. Vim li cas ? Tus neeg ntseeg paub cai, yog tus paub Yes Xus lub hwj chim. Tus muaj Yes Xus lub hwj chim tsis yog tus loj ua nom ua tswv los ua huab tais li peb tib neeg xav. Tus muaj hwj chim raws li Yes Xus qhia yog tus tub txib, tus qhev, tus nquag siab loj siab dav pub tau nws txoj sia ua nyiaj ua kub cev txi rau Huab Tais Yes Xus thiab pub nws ntsuj plig ua pov haum roos coob tus neeg tsis zoo nyiam kom zoo hlub zoo nyiam : “40 Qhov zaum ntawm kuv sab xis los sab laug, tsis yog kuv tus yuav pub, tiam sis yeej npaj cia rau tej txhia MK 10,40” Yes Xus kev muaj hwj chim tsis yog tsa tau neeg tuag tawm plaws hauv qhov ntxa xwb. Yes Xus lub hwj chim kuj yog ua tau phooj ywg nrog ob tug tub sab dai ua nqag saum ntoo cuam tug sab xis, tug sab laug. Yog peb ua neeg ntseeg paub cai, peb yuav pom tias muaj tej zaum tos Yes Xus tsis ua rau peb li peb siab xav los ntshai peb zoo li Zam nkawd ob kwv tij thiab. Yog Yes Xus muab Yes Xus lub hwj chim rau peb no xyov peb puas kam txais thiab.

    Peb tsoom neeg ntseeg teev hawm Tswv Ntuj, peb yog Yes Xus cov tub ntxhais txib tshaj Yes Xus lub Moo Zoo niaj hnub no ib ncig ntawm peb nyob. Tej zaum peb kuj yuav pom thiab mem tau Yes Xus yog leej twg rau peb tus kheej. Tiam sis, tshuav ntau yam peb tseem yuav vam Yes Xus cov thwj tim qhia thiab mloog Yes Xus lus. Tswv Ntuj kev muaj hwj chim tsis zoo li tib neeg tej hwj chim, tus hlob quab yuam tus yau, tus muaj thuam tus pluag los nom tswv khoo pej xeem. Tswv Ntuj lub hwj chim yog kev hlub neeg.

    19.10.2012 Cwj Vuam Chiv






    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 26th October 2012, 7:40 pm



    NTHUAV NTAWV NTSHIAB.




    Rau hnub tim 28 lub 10 hli 2012


    Ib tsoom ntseeg nyiam mloog Tswv Ntuj lus,

    Hnub no zoo hnub, peb yuav los piav txog Huab Tais Tswv Ntuj lub siab khuv leej raws li cov tsab ntawv peb nyuam qhuav mloog tas saum no.

    Peb txoj kev ntseeg Tswv Ntuj thiab teev hawm Tswv Ntuj yog dab tsi ? Nyias yuav tau nug nyias tus kheej, tim li cas kuv ho los ntseeg thiab teev Tswv Ntuj ? Yog peb nug peb tus kheej tiag, peb yuav pom tias kev ntseeg thiab kev teev hawm Tswv Ntuj muaj nuj nqes thiab tau txiaj ntsim, ua rau peb zoo siab tshaj plaws. Tej nuj nqes thiab tej txiaj ntsim Huab Tais Tswv Ntuj pub tuaj rau peb pom dheev ntawm qhov muag, tsis yog dag, tsis yog npau suav. Peb yuav muab tsis tau ib thooj txiaj ntsim txaij nraug zees li cas rau neeg pom. Vim tej txiaj ntsim los ntawm yus kev ntseeg thiab teev hawm Huab Tais Tswv Ntuj los. Kawg tus muaj koob hmoov, tau txais Huab Tais Tswv Ntuj kev hlub nws, nws thiaj li paub, nws thiaj li pom. Lub txiaj ntsim Tswv Ntuj pub rau yus pom ntawd, yus qhia tsis tau rau leej twg. Yus tus neeg npuab Tswv Ntuj thiaj paub, npaum li cas Tswv Ntuj hlub yus thiab pab yus. Tus tsis ntseeg thiab tsis teev Tswv Ntuj, tseem yuav hais tias ntshai yus vwm lawm no. Tej nuj nqes thiab tej txiaj ntsim Tswv Ntuj pub rau cov neeg ntseeg Tswv Ntuj no, tsis tus tsis txawj tag ib sim neej : “9 Lawv coj tau tej niag uas lus thov tuaj kua muag si laim, kuv yuav coj yuav pus lawv rau tus dej ntws nto taug txoj kev ncaj tsis dawm lawv kev, vim kuv yog His Xais Lais leej txiv thiab Es Fais yog kuv thawj tug tub YLM 31,9” Haiv neeg ntseeg Tswv Ntuj pom Tswv Ntuj kev hlub kev pab thiab kev cawm lawv. Tas txhua tiam neej, Tswv Ntuj cov tub ntxhais txib, txhua tus saub puav leej muaj Tswv Ntuj lub zog nres lawv, muaj Tswv Ntuj hwj huam ua lawv luag. Saub Yes Les Mias nco ntsoov Tswv Ntuj tej txiaj ntsim tau cawm His Xais Lais hla dhau lawv tej xwv txheej txhua yam. Kom His Xais Lais nco ntsoov teev hawm thiab los npuab Tswv Ntuj kho kho, yog txoj kev ncaj tsis dawm lawv taw. Yog lawv mus yoog tej pej kum neeg, teev lawv dab qhuas, lawv taug txoj kev nkhaus hmab thiab cag ntoos yuav dawm lawv taw. Mus pe, mus txi tej pej kum neeg tej dab qhuas tsis muaj hwj huam, nkim lawv lub zog dag. Huab Tais Tswv Ntuj yog peb Leej Txiv tsim tau peb, hlub peb npaum li ntawd. Peb txawm raug kev iab kev daw, muaj kev tu siab, chim siab kua muag si, tsis txhob ntshai thov Tswv Ntuj, nws yuav tuav peb tes coj peb kev li tus neeg tshaib dej tau dej cawm nws siav.

    Tos peb hais txheej thaud kwv huam lawv tau txais Tswv Ntuj kev hlub lawv los yog xav kom peb nco ntsoov Tswv Ntuj txiaj ntsim rau peb tiam neej no. Peb twb hnov thiab ntseeg tias Tswv Ntuj tau hlub His Xais Lais npaum li cas, Tswv Ntuj yuav hlub txhua tus neeg mloog Tswv Ntuj lus tiam no ib yam li yav thaud. Thaum Yes Xus tseem ua neej nyob, txhua tus neeg vam khom Yes Xus pab, lawv puav leej tau txais Yes Xus txiaj ntsim. Hu ua tib neeg, tsis muaj leej twg tsis raug kev nyuaj siab. Peb nyias muaj nyias kev txom yem nyob hauv nyias. Txawm peb tshaib, tseem muaj tus tshaib tshaj peb, txawm peb txom nyem los tseem muaj tus txom nyem loj tshaj peb, piv li tus dig muag Npas Tis Mais, niaj hnub zaum ntawm ntug kev thov khawv, thov saib leej twg puas hlub tau nws. Neeg kuj hlub nws thiab los hlub tsis tag, hlub tsis pov khawv. Muaj ib hnub zoo hnub, Yes Xus taug kev tuaj ncaj ntawm nws lub chaw zaum. Nws tsa suab hlo thov Yes Xus pab nws : “Yes Xus, Das Vis Leej Tub, khuv leej kuv yuas…Koj xav kom kuv ua dab tsi rau koj ?” Tus dig muag hais rau nws : “Las Npus Nis, kom kuv pom kev” 52 Yes Xus hais nws tias : “Rov mus, koj lub siab ntseeg cawm koj lawm os MK 10,47.51-52” Cov poj niam los cov txiv neej, laus los hluas, cov txiav txim siab zoo siab hlo, tsa ncauj thov Tswv Ntuj hlub lawv, pab lawv, daws lawv kev txom nyem, lawv kawg tau txais Tswv Ntuj lub txiaj ntsim. Peb hnov Yes Xus hais rau Npas Tis Mais kom rov qab mus siab kaj nrig, vim nws kev ntseeg Tswv Ntuj cawm nws. Yog peb ntseeg Tswv Ntuj npaum Npas Tis Mais, peb lub siab kuj yuav thaj yeeb thiab kaj lug kaj nrig ib yam nws.

    Kom peb nco ntsoov cov neeg txom nyem nyob Is Dias teb, hauv lub nroog Calcutta, lawv yog cov txom nyem tshaj plaws, yoo tshaib yoo nqhis txog txhiab thiab vam leej. Neeg pom lawv coob muaj mob qias dhau, tsis muaj tug xav cev tes kov, cev tes hlub lawv. Tiam sis, muaj ib hnub zoo caij, ib hnub zoo nyoog, tsis muaj neeg paub, tos nco Tswv Ntuj tuaj hlub, tuaj ua tsev rau lawv nkaum tshav nkaum nag, muab txaj chaw rau lawv pw, ua mov rau lawv noj, muab dej rau lawv da, cev tes plhws lawv, muab tshuaj kho lawv tej kev txhab. Tus tuaj tu cov neeg txom nyem no, kuj yog ib tug me nyuam neeg xwb, nws tsis muaj ib txhab nyiaj, tsis muaj ib txhab qoob txaus yug txhiab vam leej neeg txom nyem. Tiam sis, nws tsis poob siab, nws tsa suab hlos niaj tag kis, niaj hnub, niaj hmo thov Yes Xus pab nws ib yam li Npas Tis Mais tus dig muag. Nws ua neej raws Yes Xus lo lus qhia : “3 Yes Xus hais rau lawv : “Txhob nqa pas nrig, lub nas, txiaj nyiag, mov thiab tsoos hloov dab tsis taug kev LK 9,3” Tus me nyuam neeg siab dawb siab loj no cawm tau cov neeg txom nyem hauv lub nroog Calcutta ua txhiab vam leej tej siab ntsws nyob kaj lug: “Kuv lub neej zoo li tej tsiaj txhu nyob nraum kev, tiam sis, kuv tuag li Tswv Ntuj tus tub xa moo, muaj tus hlub thiab saib taus kuv” Tib neeg hais li rau nkauj xwb Teresa hnov.

    Vim li ntawd, ib tsoom phooj ywg mloog Tswv Ntuj lus, peb tsis txhob ua siab me, Huab Tais Tswv Ntuj yog peb Leej Txiv hlub peb tsis txawj kawg. Txawm peb muaj kev txom nyom loj npaum twg, peb yim huab yuab tso siab rau Tswv Ntuj, yeej meem tsa peb lub suab thov Huab Tais Yes Xus. Peb yuav pom nws kev hlub peb ntawm qhov muag.

    25.10.2012 Cwj Vuam Chiv






    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    NrhiavTswvNtuj
    Hmong Catholique
    Hmong Catholique

    Messages : 599
    Date d'inscription : 2009-08-18

    Re: Txiv Plig Cwj Vuam Chiv Yaj Nthuav Ntawv Ntshiab

    Post  NrhiavTswvNtuj on 3rd November 2012, 11:57 am


    NTHUAV NTAWV NTSHIAB.


    Rau hnub tim 04 lub 11 hli 2012



    Hnub no, yog ib hnub zoo caij zoo nyoog rau peb tus neeg ntseeg Tswv Ntuj thiab rau ib zeej tsoom txhua leej tuaj sib fim. Peb xav los nthuav ob peb los txog lub ntsiab lus Huab Tais Yes Xus qhia rau peb hauv txoj kev ntseeg Tswv Ntuj.

    Huab Tais Tswv Ntuj yog tag lub ntuj thiab ntiaj teb, saum yaj ceeb no thiab hauv yeeb ceeb tus Huab Tais Tswv Ntuj. Phim leej tib neeg yuav xaiv Tswv Ntuj ua sawv daws tus Huab Tais thiab teev Tswv Ntuj tib leeg xwb. Tiam sis, nej pom tias txhua tus tib neeg tsis teev thiab tsis hwm Tswv Ntuj. Nyias mus thawj nyias tej niag huab tais cuav li nyias siab nyiam thiab siab xav. Zoo tib yam li nej yug tau nej pab me nyuam huam vam xeeb leej xeeb ntxwv nphoo ntxuas, nej pom tej txhia lawv txawj hlub nej thiab txawj hwm nej dua tej txhia. Tej kev cai teev hawm saum daim npoo av kuj zoo li ntawd, tej txhia kev teev hawm ua tau xis Tswv Ntuj siab nyiam dua tej txhia. Tiam sis, txawm muaj tej txhia neeg tsis teev tsis hwm Tswv Ntuj los Tswv Ntuj tsis khib rau cov neeg ntawd. Nej thiab, nej kuj tsis pom qab khib rau nej tej xeeb ntxwv tsis txawj hlub nej. Txawm tias tej kev cai teev hawm tsis hwm Tswv Ntuj los lawv kev qhuab qhia kom neeg thoob tsib thiab nyiam zoo, muaj nuj nqes pab Tswv Ntuj ib qho hauj lwm. Muab piv li txoj kev cai teev dab qhuas Hmoob, los teev Mos Has Mes kev cai thiab Phus Thas kev cai qhia kom neeg txhob ua tub sab tub nyiag, txhob quav yeeb quav tshuaj, twb muaj nuj nqes qhia kom neeg tsim txiaj. Tiam sis, tej kev cai teev hawm no pab tsis tau tib neeg rau tej qhov tseem ceeb tshaj kev qhuab qhia : yam li kev cawm neeg. Tsuas kawg txoj kev teev hawm Tswv Ntuj thiaj cawm tau tib neeg. Vim Huab Tais Tswv Ntuj tib leeg thiaj muaj hwj huam, peb tib neeg tsis muaj hwj huam ib qho li. Vim li ntawd, tej kev cai teev hawm tib neeg ua tus tsim txawm zoo npaum twg, yeej tsis cuag peb txoj kev teev hawm tus tseem Huab Tais Tswv Ntuj : “2 Kom koj hwm Huab Tais koj tus Tswv Ntuj nco ntsoov khaws tag nws tej kab xwm thiab tej lus uas kuv kom rau koj thiab koj tej tub ki thiab xeeb ntxwv mus tag sim neej koj thiaj yuav nyob laus nkoos 3 Thiab His Xais Lais, koj yuav tsum mloog thiab yuav tsum ua kom tau vim nws zoo rau koj xwv nej thiaj yuav huam vam hauv lub teb chaws mis thiab zib meem mias li Huab Tais nej cov yawg koob tus Tswv Ntuj hais rau koj TC2 6,2-3” Hauv txoj kev teev hawm Tswv Ntuj muaj tej yam loj tas nrho uas tsis muaj hauv tib neeg tej kev cai teev hawm : yam li lub txiaj ntsim thiab tej hwj huam. Vim hwj huam yog Huab Tais Tswv Ntuj lub hwj chim. Peb cov neeg mloog Tswv Ntuj lus teev hawm Tswv Ntuj, txais tau Huab Tais Tswv Ntuj lub hwj chim. Hos cov neeg teev hawm hauv lwm tej kev cai teev hawm pluag hwj chim txhua leej, vim lwm yam kev teev hawm tsis muaj hwj huam dab tsi.

    Peb tus Huab Tais Yes Xus yog Tswv Ntuj Leej Tub nqes saum ntuj los ciaj neeg. Huab Tais Yes Xus muab tau Tswv Ntuj lub hwj chim rau cov neeg mloog Tswv Ntuj lus thiab teev Tswv Ntuj raws li Yes Xus qhia. Peb yuav tsum nkag siab tias kev muaj Tswv Ntuj hwj chim tsis yog ua li peb tib neeg kev cai teev hawm. Peb yuav tsum paub, txoj kev teev hawm Tswv Ntuj tsis cia peb tshaj leej twg. Lub nra sib nra hnyav, peb yuav ris tag nrho. Txoj kev teev hawm Tswv Ntuj tsis yog yuav qee peb txhob cia peb txog siav los txhob cia peb txom nyem, tsis yog li ntawd. Hnub no, peb yuav mloog kom zoo Huab Tais Yes Xus qhia lub ntsiab lus loj hauv peb txoj kev teev hawm Tswv Ntuj rau peb : “29 Yes Xus teb tias lo loj tshaj : “Tig ntsej mloog, His Xais Lais, peb tus Huab Tais Tswv Ntuj tib leeg kheej yog tseem Huab Tais 30 Koj hlub Huab Tais koj tus Tswv Ntuj tag nrho koj lub siab, tag koj ntsuj plig tag koj tswv yim thiab tag koj lub zog 31 Lo ob lo no : Koj hlub luag tus ze ntawm koj li koj tus kheej, tsis muaj lwm lo lus qhia loj tshaj cov no MK 12,29-31” Yes Xus lo lus qhia no tsis txwv txiav cov neeg teev lwm txoj kev cai teev hawm thiab tsis thuam txoj kev cai teev hawm twg phem. Yog lo lus qhuas thiab caw tag ntiaj teb neeg txhua leej txawm teev lwm txoj kev teev hawm thiab txawm teev Tswv Ntuj cuab tag sawv daws zog kom loj. Cov neeg teev lwm txoj kev teev hawm tus twg siab zoo thiab txawj hlub neeg, Huab Tais Tswv Ntuj pom thiab paub, Tswv Ntuj yuav pauj koob haum tuaj rau nws. Cov neeg ntseeg thiab teev hawm Tswv Ntuj tus siab zoo thiab hlub neeg, nws yog neeg hwm Tswv Ntuj tseeb tiag, Tswv Ntuj yuav pauj koob haum tuaj rau nws tib yam nkaus. Cov neeg muaj Tswv Ntuj koob haum hmoov zoo, lawv yuav txais Huab Tais Yes Xus lub hwj chim. Yes Xus lo lus qhia no yog qhia rau peb txog Yes Xus tus kheej thiab cov neeg muaj koob haum mloog Yes Xus lus. Peb to taub tias tus hlub Leej Txiv Tswv Ntuj tag siab nrho, yog Yes Xus : “38 Vim kuv nqes saum ntuj los tsis los ua li kuv nyiam, hos ua li tus xa kuv tuaj siab nyiam Z 6,38.”, Yes Xus hlub Leej Txiv tag Yes Xus Ntsuj Plig : “46 Yes Xus hais : Txiv, kuv tso kuv ntsuj plig hauv koj txhais tes LK 23,46” thiab hlub Leej Txiv tag Yes Xus lub zog : “13 Tsis muaj lwm txoj kev hlub loj dua yus muab yus txoj sia pub yus tej phooj ywg Z 15,13” Txoj kev hlub neeg yog qaum ntuj txoj kev Yes Xus taug tuaj cuag peb. Cov neeg muaj koob haum yog cov hlub neeg thiab mloog Yes Xus lus taug tau Yes Xus lw mus tshwm qaum ntuj.

    Ib zeej tsoom neeg ntseeg thiab phooj ywg, peb tus Huab Tais Tswv Ntuj siab loj siab dav hlub neeg tiag tiag. Peb leej twg hlub neeg, txawm yuav yog tus teev dab qhuas los tus teev Tswv Ntuj, nws yuav txais Tswv Ntuj koob haum mus ciaj Tswv Ntuj sia nrog Huab Tais Yes Xus muaj Tswv Ntuj hwj chim, yog peb txoj kev teev Tswv Ntuj lub ntsiab.

    02.11.2012 Cwj Vuam Chiv






    Tus plig yim mus siab lub cev yim nyiaj mob
    Tus plig yim ntshiab huv lub cev yim uv luag
    Tus plig yim nyob ze Tswv Ntuj lub cev yim txom nyem
    Tswv Ntuj tsom kwm koj vim koj yog tus neeg siab ntshiab
    Tswv Ntuj txhais tes tsa rawv saum koj tau hau,
    Vim koj ntshiab saum taub hau ti nkaus ko taw.

    Sponsored content

    Re: Txiv Plig Cwj Vuam Chiv Yaj Nthuav Ntawv Ntshiab

    Post  Sponsored content Today at 12:48 pm


      Current date/time is 3rd December 2016, 12:48 pm