Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» Thov Leej Ntshiab YOS XES
by Maiv Tooj Today at 10:36 am

» COV ZAJ NYEEM NRUAB LIS PIAM XYOO I 2016-2017
by Mim Yesterday at 2:09 pm

» COV ZAJ NYEEM NRUAB LIS PIAM XYOO II, 2015-2016
by Mim Yesterday at 1:29 pm

» COV ZAJ NYEEM HNUB CHIV XYOO A 2016-2017
by NrhiavTswvNtuj 1st December 2016, 12:54 pm

» XH.Zoov Ntxheb Yaj Nthuav Ntawv Ntshiab.
by Maiv Tooj 1st December 2016, 12:35 pm

» XH. Yaj Zoov Ntxheb lub Tsev THOOB TSIB
by Maiv Tooj 1st December 2016, 12:33 pm

» Qhia keeb kwm kev ntseeg. TP.Cwj Vuam CChiv.
by Maiv Tooj 28th November 2016, 9:58 pm

» Yes Xus lub ntsej muag tiag tiag.
by NrhiavTswvNtuj 26th November 2016, 1:52 pm

» HMOOB NPAM NAJ XEES
by NrhiavTswvNtuj 21st November 2016, 9:15 am

» MOO QAIJ QAUG
by Maiv Tooj 20th November 2016, 9:45 am

» TP.Txhiaj Foom lub TSEV Ntawv
by Maiv Tooj 19th November 2016, 12:04 pm

» COV ZAJ NYEEM HNUB CHIV XYOO C 2015-2016
by NrhiavTswvNtuj 19th November 2016, 4:57 am

Suav neeg tuaj saib, txij hnub 17/09/2010 los mus.


    Lub neej ua neeg ntseeg

    Share

    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Lub neej ua neeg ntseeg

    Post  Mim on 4th October 2010, 3:18 pm

    Tau li ob xyoos tej los lawm uas kuv tau ua zaj piav txog "Lub neej ua neeg ntseeg," yog muab hauv me nyuam yaus cov zaj los ntau xwb. Kuv tau muab rov kho me ntsis thiab coj tuaj tso hauv no.


    PEB LUB NEEJ UA NEEG NTSEEG

    Thaum peb los ntseeg Yes Xus lawm, thiab peb lees tias peb yuav tsis ntseeg tsis mloog ntxwj nyoog Xas Taas kev haub kev ntxias ntxiv, thiab peb txais lub Cim Ntxuav kom peb tau yug los ua Tswv Ntuj cov me nyuam lawm, mas peb lub neej yuav tsum pauv. Peb yuav xyaum coj ib lub neej kom haum Tswv Ntuj txoj cai thiab tej lus qhia uas nyob hauv Ntawv Ntshiab thiab kom haum lub Koom Txoos txoj cai.

    Lub Koom Txoos Txoj Cai/Precepts of the Church

    Thaum peb txais lub Cim Ntxuav nyob hauv lub Koom Txoos Kas Tos Liv, mas peb muaj feem yog ib tug neeg ntseeg nyob hauv, thiab peb yuav tsum tau coj raws li cov kev cai uas lub Koom Txoos tau npaj rau cov ntseeg coj. Muaj li rau nqe tseem ceeb nyob hauv lub Koom Txoos txoj cai, uas yog qhov tsawg tshaj peb yuav tsum tau ua.

    1. Koj yuav mus teev ntuj hnub Chiv thiab tej hnub tshwj xeeb, thiab koj yuav so tsis ua tej hauj lwm hnyav/You shall attend Mass on Sundays and holy days of obligation and rest from servile labor.
    Hnub Chiv thiab tej hnub tshwj xeeb, txawm tsis yog hnub chiv los vim nws yog ib hnub tseem ceeb uas lub Koom Txoos ua kev nco txog Yes Xus los yog Niam Mab Liab, mas peb yuav tsum tau mus teev ntuj. Tej hnub ntawd, qhov tseem ceeb tshaj yog Hnub Chiv, peb yuav tau so hauj lwm thiab yuav tsum muab txoj kev teev Ntuj saib muaj nqes dua txoj kev nrhiav nyiaj nrhiav txiaj, los txoj kev ua si lom zem, los txoj kev neej kev tsav.

    2. Koj yuav tsum mus daws txhaum tsawg kawg nkaus ib xyoos ib zaug/You shall confess your sins at least once a year.
    Thaum peb nyuam qhuav txais lub cim ntxuav tas, mas peb yog ib tug neeg dawb huv, Tswv Ntuj muab peb tej txaug tej txhaum ntxuav tib si pov tseg lawm. Tiam sis vim peb niaj hnub txawj ua txhaum, vim li ntawd lub Koom Txoos thiaj ua ib txog cai kom peb yuav tsum mus daws txhaum qhov tsawg tshaj yog ib xyoos ib zaug, kev cai yog thaum lub caij ua Hmoov Hla.

    3. Koj yuav tau txais lub Cim Yug tsawg kawg ib xyoos ib zaug thaum lub caij Hla/You shall humbly receive the sacrament of the Eucharist at least during the Easter season.
    Nqe 2 saud thiab nqe 3 no muaj ntsis mus ua ke. Yog peb yog ib tug neeg ntseeg, tiam sis peb tsis nquag mus teev ntuj, los mus daws txhaum los mus txais Yes Xus lub cev li, mas txoj cai yuav kom ib xyoos twg txog lub caij Hla(Easter), peb yuav tsum tau mus daws txhaum ib zaug, lees yus txoj kev txaug kev txhaum, thiab mus txais Yes Xus lub Cev ib zaug thaum ntawd.

    4. Koj yuav tsum tau caiv nqaij thiab yoo mov rawv cov caij nyoog uas lub Koom Txoos tau teem tseg lawm/You shall observe the days of fasting and abstinence established by the Church.
    Lub caij caiv nqaij thiab yoo mov yog lub caij 40 uas peb npaj ua kev nco txog Yes Xus raug txom nyem thiab tuag thiab sawv rov los. Yog ib lub caij yus xyaum tswj yus lub siab phem thiab xaiv ua qhov zoo. Lub caij ntawd peb xyaum tswj peb lub cev thiab, yog peb tswj tau peb lub cev mas peb kuj yuav tswj tau peb lub siab phem thiab. Lub Caij 40 pib txij hnub Plaub Txais Tshauv (Ash Wednesday) mus txog hnub Xya Ntshiab (Holy Saturday) uas Yes Xus lub cev mus zwm ntxa lawm. Hnub Plaub Txais Tshauv thiab hnub Rau Ntshiab (Good Friday) yog ob hnub uas peb yuav tsum yoo mov thiab caiv nqaij. Ob hnub ntawd peb tsis noj nqaij kiag li, thiab peb noj me ntsis mov dej tuav plab tshaib xwb. Tas lub Caij 40, niaj Hnub Rau (every Friday), peb yuav tsum caiv tsis noj nqaij li.

    5. Koj yuav tsum pab txhawb lub Koom Txoos/You shall help to provide for the needs of the Church.
    Txhua tus neeg ntseeg yuav tsum tau pab nyiaj txiag pab dag zog txhawb lub Koom Txoos raws li nws pab tau. Niaj hnub Chiv peb mus teev Ntuj, peb yuav tau tso nyiaj. Peb kuj yuav tau pab dag zog pab hauj lwm pab tswv yim, xws li mus sab laj txog txoj kev khiav dej num hauv pawg ntseeg, pab ua tus sau nyiaj, pab ua tus nyeem ntawv, pab ua tus hu nkauj, pab qhia cov me nyuam yaus txog kev ntseeg, thc…

    6. Koj yuav tsum coj raws lub Koom Txoos txoj kev sib yuav ua txij ua nkawm/To observe the laws of the Church concerning marriage.
    Lub Koom Txoos Kas Tos Liv txoj cai tsis pub ob tug poj niam los ob tug txiv neej sib yuav ua txij nkawm, nws tsis yog raws kev cai. Ob tug sib yuav kuj yuav tsum tsis txhob sib txheeb sib ze dhau. Tsis muaj cai yuav quab yuam ib tug neeg los yuav yus, yuav tsum yog ob leeg sib sib yeem mam sib yuav. Thaum sib yuav tau lawm, tsis pub sib nrauj, yuav tsis tau niam yau.


    Rau nqe lus saum no yog rau nqe lus uas lub Koom Txoos tsa rau cov ntseeg coj. Yog qhov tsawg tshaj plaws uas ib tug neeg ntseeg yuav tsum tau ua. Tiam sis yog peb xav yog ib tug neeg ntseeg zoo, mas peb yuav tsum tau ua tshaj qhov tsawg tshaj ntawd.

    (tseem tshuav ntxiv lwm zaus...)


    Last edited by Mim on 5th October 2010, 2:39 pm; edited 1 time in total

    Maiv Paj Lug
    Tswv Cuab Hmong Catholique
    Tswv Cuab Hmong Catholique

    Messages : 1634
    Date d'inscription : 2009-08-17

    Re: Lub neej ua neeg ntseeg

    Post  Maiv Paj Lug on 5th October 2010, 8:43 am

    Wow.....zoo kawg li nawb Niamlaus Mim.... o)

    Kav tsij tuaj sau kom tas, Tswv ntuj yuav pub txiaj ntsim rau koj thiab koj yuav tau txais koob Hmoov ntawm Huab Tais Yesxus txhua hnub. Amen!




    <3 <3 Pab kuv rov los cuag koj Huab Tais Yesxus <3 <3

    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5044
    Date d'inscription : 2009-08-18

    Re: Lub neej ua neeg ntseeg

    Post  Maiv Tooj on 5th October 2010, 9:31 am



    Nyob zoo Mim,

    Ua tsaug rau koj lub siab zoo thiaj kev tshaj lij thoob tsib mog.
    Tus Ntoo Cuam ua koj ntej, lub Ntuj ua koj qab, koj thiaj ua tau txhua yam zoo tshaj.
    Lub ntuj ua koj qab, tus Ntoo Cuam ua koj ntej, koj thiaj ua tau txhua yam zoo rau peb.
    Kuv zoo siab tag nrho uas Tswv Ntuj hnov kuv cov lus thov,
    Kuv zoo siab tshaj plaws uas Tswv Ntuj mloog kuv lo lus txhawj.
    Kuv lub siab quaj dhi, cas hnub no yog koj los nplij
    Kuv lub siab quaj dhev, cas yog koj los txhawb kuv lub siab me...




    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: Lub neej ua neeg ntseeg

    Post  Mim on 5th October 2010, 2:42 pm

    Maiv Paj Lug thiab tais Tooj,

    Ua neb tsaug rau neb lo lus tuaj txhawb kuv os... Neb cov lus yeej ua rau kuv zoo siab thiab xav tias nyaj tej yam kuv sau yuav muaj me me qab hau thiab no...

    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: Lub neej ua neeg ntseeg

    Post  Mim on 5th October 2010, 3:57 pm

    Kuv tau xaus thawj zaj saud hais tias yog peb xav "ua ib tug neeg ntseeg zoo, mas peb yuav tsum tau ua tshaj qhov tsawg tshaj ntawd." Ua ntej kuv yuav hais ntxiv mus, kuv xav los piav me ntsis tias, yuav ua tshaj qhov tsawg tshaj no yog yuav ua tshaj li cas.

    Xws li nqe 1 saud hais tias kom peb yuav tsum mus teev ntuj niaj Hnub Chiv. Yog peb xav ua kom tshaj, thiab yog peb muaj sij hawm, ces peb tsis txhob xam kev nkees, peb yuav tau mus koom thaj Txi Ntuj nruab lis piam li ib ob zaug tej thiab.
    Nqe 2 nqe 3 hais tias kom ib xyoos peb yuav tsum mus daws txhaum thiab txais Yes Xus lub Cev ib zaug. Tiam sis peb xav ua kom tshaj, mas peb xyaum mus daws txhaum ib hlib ib zaug saib puas tau, yog tsis tau los ib xyoo, plaub tsib zaug. Qhov mus txais Yes Xus lub Cev mas txhua zaus peb mus koom thaj txi Ntuj, peb yeej muaj cai mus noj tau Yes Xus lub Cev thiab haus nws cov ntshav, tsuav yog peb tsis muaj ib qho txhaum hnyav nyob hauv peb nruab siab. Yog peb tau ua txhaum hnyav mas peb mus teev ntuj txhob mus txais Yes Xus lub Cev, yuav tsum tau mus daws txhaum tas tso mam mus txais.
    Nqe 4 qhia tias kom peb yuav tsum caiv nqaij yoo mov tej lub sij hawm xws li lub Caij 40. Yog peb xav ua kom tshaj mas ib lis piam peb xyaum caiv nqaij los yoo mov ib hnub los ob hnub kuj tau, nyob ntawm yus txiav rau yus tus kheej xwb. Txheej thaum ub mas niaj lis piam peb yuav tsum caiv nqaij Hnub Rau (Friday). Nyem n o lub Koom Txoos tsis muab ua kev cai rau sawv daws coj lawm, tiam sis yog yus xav coj yus li qhov qub ntawd los haj yam zoo xwb. Nyob Medjugorje, Niam Mab Liab tau hais tias kom niaj lis piam hnub Plaub (Wednesday) thiab Hnub Rau(Friday)kom ua kev caiv kev yoo ob hnub ntawd, kom noj bread(mov ci) ntxuag dej xwb no. Tej kev no, yog yus xav xyaum ua qhov zoo ces yus ua yus xwb, lub Koom Txoos tsis yuam.
    Hais txog kev pab nyiaj txiag mas peb nyob tim Mes Kas no, qee zaum tej yim kuj tsis muaj txawm peem tsis pab li, muaj ib txhia tso ib lis piam ib ob dos las tej xwb los muaj. Ntawm kuv xav mas peb yuav tau xav tias yog peb tso kom tshaj ib ob dos las thiaj yuav pab tau peb lub church thiab peb pawg ntseeg dua, vim tej dej num tej nuj nqes hauv yus pawg ntseeg thiab yus lub church tsuas tos ntsoov cov nyiaj sawv daws tso los them rau xwb.
    Ntawm kev sib yuav, kuv xav tias sawv daws yeej paub qhov yuav ua kom zoo tshaj yog dab tsi lawm, thiab nyob ntawm cov khub niam txiv, vim sawv daws lub neej tsis zoo ib yam. Tiam sis qhov loj mas yog ib leeg yuav tsum ua lub siab ncaj ncees rau ib leeg.


    (tseem tshuav ntxiv...)

    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: Lub neej ua neeg ntseeg

    Post  Mim on 6th October 2010, 4:55 pm

    Thaum peb los ua ib tug neeg ntseeg lawm, peb kuj yuav tsum tau coj raws li Yes Xus txoj cai loj tshaj uas yog hais tias, “Koj yuav nyiam koj tus Tswv Ntuj tas koj lub siab lub tswv yim lub zog, thiab koj yuav nyiam tus nyob ze koj(neighbor) ib yam li koj nyiam koj.”

    Tswv Ntuj 10 lo lus qhia(Ten Commandments) uas thaum ub nws muab qhia rau Mais Xes yuav pab tau peb kom peb coj tau raws li Yes Xus txoj cai loj tshaj ntawd. Thawj peb nqe pab kom peb nyiam Tswv Ntuj tas peb lub siab lub tswv yim lub zog; xya nqe tom qab pab kom peb nyiam tus nyob ze peb ib yam li peb nyiam peb.

    Tswv Ntuj Kaum Lo Lus Qhia


    1. Koj yuav teev Huab Tais Ntuj ib leeg xwb, thiab koj yuav nyiam Huab Tais Ntuj tshaj tas ib puas tsav yam.
    Nws txhais tau tias, thaum peb los ntseeg Ntuj lawm, peb yuav tsum tau txiav txim siab rau Ntuj tiag tiag, tsis txhob ke mus teev ntuj ke ua neeb hu plig tom vaj tom tsev nrog, los kom lwm tus ua neeb hu plig rau yus tom lawv vaj lawv tsev.
    Peb tsis txhob mus teev hauj sam teev lwm yam kev cai ntxiv. Yog peb ua li ntawd mas peb tsis ntseeg thiab teev Tswv Ntuj ib leeg xwb, thiab peb tsis tso siab rau Tswv Ntuj, raws li nws lo lus qhia lawm.

    2. Koj yuav hwm Huab Tais Ntuj lub npe.
    Peb yuav tsis txhob lam taus lam siv Tswv Ntuj lub npe, tsis txhob hais lus saib tsis taus nws lub npe. Tsis txhob lam tuav Tswv Ntuj lub npe los tsa tes cog lus rau tej yam tsis zoo tej yam dag, los yog los twv Ntuj. Peb kuj yuav tsis txhob lam taus lam siv Yes Xus lub npe, los Niam Mab Liab lub npe, los cov leej ntshiab lub npe mus rau tej yam tsis zoo. Peb yuav tau hwm thiab txuag phau ntawv Moo Zoo, thiab tej mlom Yes Xus mlom Mab Liab mus rau qhov zoo.

    3. Koj yuav caiv Huab Tais Ntuj hnub.
    Hnub Chiv yog Huab Tais Ntuj hnub, yog hnub qee rau nws, peb yuav tau ua tas puas tsav yam kom tau kev mus teev Ntuj tom tsev teev ntuj, tsis txhob qaug rau txoj kev nkees, tsis txhob muab peb txoj kev khwv, txoj kev lom zem, los txoj kev neej kev tsav los saib loj dua kev mus teev Ntuj. Ntau zaus, txog hnub Chiv, peb xub mus lwm yam tso, yog muaj sij hawm los yog peb nquag ces mam li mus teev ntuj. Peb coj li no tsis haum lawm. Peb yuav tsum xyaum teem peb lub caij nyoog kom haum rau peb txoj kev mus teev ntuj.

    4. Koj yuav hwm koj niam koj txiv.
    Peb yuav tau hlub niam hlub txiv hlub tej poj yawm, yuav hwm lawv mloog lawv lus, hais lus saib taus lawv, yuav nco lawv tej txiaj ntsim yug yus los tu yus hlob. Tsis tas li ntawd xwb yus yuav tsum tau mloog tau hwm tej ua hlob, tej nom tej tswv, tej ua thawj coj thiab, vim lawv yog zoo li yus niam yus txiv thiab.

    5. Koj tsis txhob tua neeg.
    Tswv ntuj yog tus tswv muab txoj sia rau peb txhua tus, peb tsis muaj cai yuav txo ib tug twg txoj sia, peb tsis muaj cai yuav txo yus tus kheej txoj sia, peb tsis muaj cai yuav rho ib tug me nyuam hauv plab txoj sia. Peb kuj yuav tsum tau tu thiab txuag peb lub cev kom zoo, thiab txuag lwm leej lwm tus lub cev. Xyaum cheem yus txoj kev npau taws, tsis txhob mus ua phem rau luag.
    Tsis tas li ntawd xwb, peb tseem yuav tsum tau ceev faj tsis txhob tua ib tug neeg nyob hauv nws phab ntsuj plig. Piv txwv, yog peb ua tej yam kom ib tug neeg cia li thim nws txoj kev ntseeg Ntuj, mas zoo cuag li peb tua nws tus ntsuj plig txoj sia lawm.

    6. Koj yuav tsis txhob zes luag txij luag nkawm.
    Peb neeg ntiaj teb tam sis no hais tias txoj kev sib tham sib dee nws yog “normal” thiab “natural” xwb, yog li ntawd, txawm tsis sib yuav los lawv yeej niaj hnub nyob li niam txiv. Tiam sis, peb cov ntseeg yuav tsum nco tias, Tswv ntuj yog tus tsim txoj kev sib hlub sib nyiam thiab txoj kev ua txij ua nkawm los rau neeg tu tub tu kiv thiab sib txhawb sib pab. Nws paub neeg lub siab zoo li cas, nws thiaj muaj ib txog cai rau neeg, kav neeg txoj kev ua neej ua txij ua nkawm, kom lub neej tiaj tus thiab tsim txiaj.
    Lub Koom Txoos qhia hais tias, qhov zoo tshaj rau cov tsis tau muaj txij muaj nkawm yog kom lawv yuav tsum cheem lawv tus kheej tsis txhob muaj kev sib dee ua ntej sib yuav. Yog ib tug muaj txij muaj nkawm lawm, nws tsis txhob ua kev plees kev yi, mus deev hluas sab nraud. Nws yuav tsum coj ncaj coj tus, ua siab dawb siab zoo rau nws tus txij nkawm. Tsis muaj cai yuav mus yuav niam ob niam peb ntxiv. Txoj kev sib yuav yog sib yuav mus tas ib sim neej tsis muaj kev sib nrauj.

    7. Koj tsis txhob ua tub sab tub nyiag.
    Txoj kev xav tau dawb, xav noj dawb, los tej zaum txoj kev ntshaw dhau, ua kom neeg mus muab luag tug los ua yus tug. Peb cov ntseeg yuav tsum tau ceev faj thiaj tsis poob rau qhov yooj yim los qhov ntshaw dhau ntawd.

    8. Koj tsis txhob liam rau luag tej.
    Lub ntsiab nyob hauv lo lus no yog txhais tias kom yus tsis txhob ua tim khawv cuav, txhob lam liam rau lwm tus. Xws li, yog ib tug poj niam mus hais rau tub ceev xwm tias, “Tus txiv neej ntawd tau txhom kuv,” kom lawv ntes nws mus. Tiam sis qhov tseeb, nws tsis tau ua li ntawd. Yog yus hais li ntawd mas yus ua txhaum, vim yus tau lam liam kom lwm tus raug txim xwb.

    9. Koj tsis txhob tso koj lub siab ntshaw zes luag poj luag sev.
    Nqe lus no tsis yog hais tias kom tsis txhob tham luag tus poj niam xwb, nws tseem hais tias kom txhob tso yus lub siab ntshaw ua qhov ntawd thiab no. Yes Xus tau hais nyob hauv ntawv Moo Zoo tias, “yog leej twg ua qhov muag zes ib tug poj niam, mas nws twb zes tus poj niam ntawd nyob hauv nws nruab siab lawm.” Nqe lus no qhia tias kom peb yuav tsum yuam yuav tsum hloov peb lub siab tiag tiag, peb thiaj yuav tswj tau peb lub cev kom los taug txoj kev tsim txiaj, txoj kev dawb huv.

    10. Koj tsis txhob tso koj lub siab ntshaw luag teej tug. Hauv zaj qub hais tias: Koj tsis txhob tso kuj lob siab ntshaw ua tub sab tub nyiag. (You shall not covet your neighbor’s goods)
    Nqe lus no thiab nqe cuaj saud yog hais txog peb lub siab ntshaw uas tsis raws kev raws cai, ntshaw tshaj qhov kev ntshaw lawm. Piv txwv, xws li tej tus neeg yog nws pom luag muaj yam puav uas nws tsis muaj, mas zoo li khib khib nws heev, nws cia li lam ntxub luag vim luag muaj nws tsis muaj. Tej tus ces pom luag muaj yus tsis muaj, cia li mus nyiag los ua yus tug. Qhov no tsis yog kev yog cai lawm. Peb yog ib tug neeg ntseeg, peb yeej txawj muaj kev ntshaw thiab, tiam sis peb yuav tsis txhob muab ua kev ntxub luag, tsis txhob nrhiav kev yuav mus rhuav luag txeeb luag. Yus pom luag muaj, yus yuav xyaum nrog lawv zoo siab, nrog lawv ua Ntuj tsaug xwb. Ntawm yus mas yus yuav ua Ntuj tsaug rau tej yam uas yus muaj lawm thiab yuav rau siab khwv ncaj khwv ncees kom saib yus puas muaj taus li luag thiab xwb.

    (mam tuaj tso ntxiv thiab...)



    Last edited by Mim on 7th October 2010, 11:30 am; edited 3 times in total

    Maiv Paj Lug
    Tswv Cuab Hmong Catholique
    Tswv Cuab Hmong Catholique

    Messages : 1634
    Date d'inscription : 2009-08-17

    Re: Lub neej ua neeg ntseeg

    Post  Maiv Paj Lug on 7th October 2010, 8:49 am

    Wow.....zoo tiag tiag cheers .....Niamlaus Mim , koj txawj txhais yog nkaus li kuv ntshaw thiab thov ntawm TSWV NTUJ kom coj ib tug neeg tshaj lij tuaj pab txhais tej kev kawm kev cai ntawm no rau hauv no. Mim koj tej dej num koj txhais TSWV NTUJ tej kab lis kev cai nov rau hauv no , kuv yuav tsis muaj dab tsi pauj tau koj txiaj ntsim. Tiam sis kuv yuav thov HUAB TAIS YESXUS kom nws nco ntsoov muab koj li paj tshab rau koj puag saum ntuj nawb . Thov Huab Tais Ntuj pab kom koj tej hneev tes hneev taw hauv no pab tau lwm tus txoj kev ntseeg loj tuaj.




    <3 <3 Pab kuv rov los cuag koj Huab Tais Yesxus <3 <3

    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: Lub neej ua neeg ntseeg

    Post  Mim on 7th October 2010, 11:36 am

    Maiv Paj Lug,

    Ua tsaug rau koj cov lus qhuas lus zoo thiab koj txoj kev thov ntuj rau kuv os... Kuv mas yeej xav kom nej sawv daws thov ntuj tiag pab kuv xwb os nawb...Qhov ntawd yog qhov kuv xav tau tshaj li...

    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: Lub neej ua neeg ntseeg

    Post  Mim on 7th October 2010, 6:45 pm

    Peb kuj tseem yuav coj lub neej kom haum raws li Yes xus cov lus qhia uas nyob hauv Ntawv Moo Zoo. Muaj ntau yam uas Yes Xus tau qhia kom peb coj. Tiam sis muaj ib co lus tseem ceeb uas hu ua zaj “Cov Tau Txoj Hmoov Zoo,” peb yuav muab coj los piav kom peb thiaj xyaum coj tus yeeb yam raws li cov lus ntawd niaj hnub hauv peb lub neej.

    Cov Tau Txoj Hmoov Zoo: Mas Tais 5: 3-12; Lus Kas 6: 20-23.

    1. Cov tau txoj hmoov zoo, yog cov pluag hauv tswv yim(the poor in spirit)(nyob hauv peb Hmoob phau Ntawv Moo Zoo mas TP Nyiaj Pov txhais hais tias: cov pluag hauv nruab siab), vim Ntuj lub Ceeb Tsheej yog lawv li.
    Lo lus “pluag hauv tswv yim,” yuav txhais tau ntau yam, tiam sis yuav hais ob yam rau ntawm no xwb:
    • Ib yam yog txoj kev pluag nyiaj txiag, pluag noj, pluag hnav, pluag vaj pluag tsev, nyob txom nyem ntsuav. Tiam sis nws muaj ob fab thiab. Ib fab yog tus txom nyem ncaj ncees, nws yeej siv zog kawg nws tswv yim nws dag zog, tiam sis nws tsuas txawj khwv tau li ntawd xwb. Kuv xav hais tias TsNt yuav foom hmoov zoo rau tus txom nyem ncaj ncees. Tus txom nyem vim nws tub nkeeg, tsis mob siab khwv noj khwv haus, mas TsNt yuav tsis foom hmoov zoo rau nws txoj kev tub nkeeg pluag txom nyem.
    • Muaj ib yam kev pluag hauv tswv yim, yog tus neeg uas muaj lub siab lub tswv yim ntse ncaj ncees, tsis muaj lub tswv yim ntse siab phem lim hiam txawj mus ntxias mus dag luag kom tau luag tej nyiaj txiag los ua rau nws nplua nuj.

    Yog peb siv lo lus "cov pluag hauv nruab siab" mas kuv kuj nyiam lub ntsiab zoo dua. Lo lus “pluag hauv nruab siab,” peb xav muab txhais ua ntau yam ntsiab lus los tau ib yam. Tiam sis ntawm no, kuv yuav tham txog li ib ob los peb lub ntsiab xwb.
    • Xws li ib tug neeg nws muaj nyiaj txiag ntau, tiam sis nws lub siab tsis puv nkaus nws tej nyiaj txiag, nws tsis muab khaws rau nws ib tug kheej siv, nws muaj lub siab dawb paug pab rau cov txom nyem, pab rau txoj kev tshaj lub Moo Zoo los pab rau church, thiab pab rau tej yam hauj lwm uas yuav zoo rau coob leej, yog li ntawd nws yog neeg pluag hauv nruab siab.
    • Los xws li ib tug neeg, nws yeej pluag tsis muaj nyiaj muaj txiaj ntau, tiam sis yog leej twg raug kev txom nyem, nws tseem qee tau me ntsis los pab raws li nws pab tau thiab. Ib tug coj li no, mas nws pluag hauv nruab siab tiag, vim nws tsis xav txog nws tus kheej tias, nws twb pluag pluag nws tsis tas pab lwm tus. Nws muaj lub siab xav txog luag ntau tshaj nws tus kheej.
    • Los tseem xws li ib tug neeg uas nws tsis yog muab nws lub siab lub tswv yim los nrhiav nyiaj txiag , nrhiav kev lom zem, kev zoo rau nws tus kheej nyob ntiaj teb no nkaus xwb, tiam sis nws muab nws lub siab lub tswv yim los nrhiav Tswv Ntuj ua ntej txhua yam.


    2. Cov tau txoj hmoov zoo, yog cov quaj ntsuag, vim Ntuj yuav nplij lawv.
    Txoj kev quaj ntsuag, mas muaj ob yam. Ib yam yog cov ua ntsuag tiag tiag, vim lawv tej niam tej txiv, tej txheeb tej ze, tej txij tej nkawm dua toj tas, tseg lawv ua ntsuag txom nyem. Yam ob yog cov ua ntsuag ciaj. Lawv tej neeg tseem nyob, tiam sis luag tsis hlub lawv, ces tso lawv ua ntsuag txom nyem. Muaj ib txhia, lawv kwv lawv tij txiav lawv vim lawv los ntseeg Ntuj lawm ces lawv nyob zoo li tsis muaj kwv muaj tij. Nyob hauv ntawv Moo Zoo, Yes Xus yeej tau hais txog cov neeg ntsuag nos ntau zaus. Thaum peb raug kev txom nyem, kev iab siab tu siab, mas tej zaum peb kuj xav npau taws tias ua cas Ntuj tsis pab peb li. Tiam sis vim Yes Xus tau hais lo lus no, mas peb yuav tau ua siab ntev nyiaj peb tej kev nyuaj, thiab tso siab tias muaj ib hnub twg Tswv Ntuj yuav hlub peb daws peb txoj kev txom nyem. Yog peb ho pom lwm tus raug kev txom nyem los peb yuav nrhiav kev pab lawv raws li peb pab tau, tsis txhob ho nxtub thiab ciav lwm tus pauj.

    3. Cov tau txoj hmoov zoo, yog cov ua neeg me, vim lawv yuav txais lub ntiaj teb los ua lawv tug.
    [*]Raws kuv pom mas lub ntsiab tseem ceeb yog qhov tias peb yuav saib peb yog ib tug neeg me me neeg txhaum nyob ntawm Tswv Ntuj(TsNt) xub ntiag. Peb lub siab lub tswv yim yuav tsis txhob muab peb tus kheej saib rau qhov siab dhau los muaj nqes dhau, es ua kev muab hlob rov rau yus tus kheej. Ces ua rau yus xav tias yus muaj peev xwm txaus lawm, tsis tas pheej yuav mloog TsNt tej lus qhia uas tseem khaum yus kev thiab; yus ua yus tus tswv xwb tsis tas yuav hwm TsNt ua yus tus tswv li.
    Peb yuav tsum teev TsNt, hwm nws, mloog nws lus, ntshaw nws los ua yus tus tswv kav yus. Yuav nco nws txiaj ntsim, lees paub tias tas puas tsav yam yus muaj, yus paub los yus txawj yog nws li, yog nws pub rau yus xwb. Ntawm yus tus kheej, yus yog ib tug pluag pluag, tsis muaj ib yam zoo yuav los them taus los pauj taus rau TsNt. [*]Txhob muab kev nyiaj txiag, kev nto koob meej, kev muaj tswv yim txawj ntse los ua qhov loj hauv yus lub neej, ua rau yus tsis nco qab TsNt lawm. Yog yus muaj tej ntawd, yuav ua TsNt tsaug, nco nws txiaj ntsim thiab haj yam nrhiav kev hwm nws zoo tshaj qub xwb. [*]Cov ua neeg me, yog cov tsis muab hlob, tsis muab lawv tus kheej saib loj dua lwm tus, tsis khav theeb. Lawv saib taus luag, tsis thuam, tsis hais lus phem txog lwm tus. Lawv nrhiav qhov zoo nyob hauv lwm leej lwm tus, thiab lawv nrhiav kev pab cov txom nyem cov pluag, cov tsis nto koob meej, tsis muaj peev xwm kom lawv muaj ntsej muag tuaj.[/list]

    4. Cov tau txoj hmoov zoo, yog cov tshaib thiab nqhis txog txoj kev ncaj, vim Ntuj yuav daws lawv qhov nqhis.
    Muaj ib co neeg, lawv tsis tau txais kev ncaj nyob hauv lawv lub neej, vim luag quab yuam lawv, luag saib tsis taus lawv, luag ua tshaj dhau rau lawv, tiam sis lawv tsis muaj lub peev xwm thiab tsis muaj neeg pab ua tau kom luag saib taus lawv, thiab muab kev ncaj ncees rau lawv. Nyob qee lub teb chaws, luag saib tsis taus cov neeg ntseeg, luag ua phem rau lawv, tsim txom lawv kom lawv nyob tsis taus. Cov uas ua siab ntev nyiaj thiab tsis thim kev ntseeg lawv txoj hmoov zoo. Peb yog ib tug neeg ntseeg, peb yuav tau xyaum saib taus thiab muab kev ncaj ncees rau lwm tus.

    5. Cov tau txoj hmoov zoo, yog cov hlub luag tej, vim Ntuj yuav hlub lawv.
    Yog muaj ib tug neeg ua phem rau yus, tiam sis yus tsis ntxub nws, tsis ua phem rov rau nws, yus zam rau nws, yus thov Ntuj hlub nws, mas yus yog ib tug neeg hlub luag.

    6. Cov tau txoj hmoov zoo, yog cov siab dawb siab huv, vim lawv yuav pom Tswv Ntuj.
    Cov neeg siab dawb siab huv, yog cov uas lawv tsis xav txog tej lub tswv yim phem los qias, tsis muaj kev siab phem kev lim hiam nyob hauv lawv, lawv tsis muaj ib lub tswv yim nkhaus, lawv ua yam twg lawv muaj lub siab dawb paug tiag tiag, thiab Tswv Ntuj yog tus loj tshaj nyob hauv lawv lub neej; lawv yuav ua dab tsis, lawv xub xav txog tias puas haum Tswv Ntuj siab tso. Yog peb xyaum coj lub neej zoo li ntawd, mas peb yeej yuav tau nrog Tswv Ntuj nyob ib hnub twg. Saum neej no los yeej muaj tej tus neeg siab dawb siab huv uas lawv tau pom Tswv Ntuj tiag thiab.

    7. Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam.
    Cov uas lawv tsis muaj lus xaiv lus ncua, cov uas nrhiav kev zam kom dhau tsis txhob muaj lus sib cav sib ceg nrog yus tsev neeg, nrog yus tej phooj ywg, los nrog txhua leej txhua tus, lawv tsuas nrhiav kom muaj kev sib haum xeeb xwb, lawv yog cov neeg tsim kev thaj yeeb.

    8. Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv li.
    Peb yog ib co neeg ntseeg Ntuj, muaj qee zaum peb yuav tau txiav txim siab ua tej yam kom haum Tswv Ntuj txoj cai los kom haum txoj kev ncaj ncees. Yog peb ua li ntawd, peb tej txheeb ze tej phooj ywg yuav thuam yuav cem peb. Lawv yuav hais tias, “Ua cas ruam ua luaj,” los “Ua cas yuav tais caus ua luaj.” Tiam sis peb yuav tsis txhob ntaus siab yau, vim peb paub tias qhov peb ua yog qhov ncaj yog qhov zoo.

    9. Nej tau txoj hmoov zoo, thaum luag thuam nej, hiam nej thiab liam ntau yam phem rau nej vim kuv. Nej yuav zoo siab, vim nej yuav tau txais koob haum loj nyob saum ntuj.

    Daim duab no yog pom ob tug ntxhais hluas uas yog cov neeg ntseeg nyob Indonesia. Nkawd raug cov Mawv Xis Lim (Muslims) muab tua txiav caj dab
    Nyob tej lub teb chaws, xws li Suav teb, Nyab Laj teb niaj hnub no, cov neeg ntseeg Yes Xus raug luag ntes, raug luag kaw los tua pov tseg. Luag liam tias lawv yog ib co neeg mus coj pej kum kev cai, lawv yog ib co neeg ntxeev siab, neeg tsim kev kub ntxhov, tsis mloog nom mloog tswv lus. Thaum ub Yes Xus twb raug luag tua, cov Thwj Tim kuj raug luag tua. Muaj coob leej neeg ntseeg Yes Xus tau tuag ua tim khawv txog lawv txoj kev ntseeg Yes Xus.
    Yog muaj ib tug neeg nqa phom tuaj taw rau yus tias, “Koj yuav tsum thim koj txoj kev mus teev Yes Xus, koj thiaj tsis tuag,” peb tus kheej puas yuav muaj peev xwm teb tau tias, “Kuv tsis thim”? Los peb yuav ntshai ntshai thiab khuv khuv xim yus txoj sia, ces peb cia li hais tias, “Kuv thim os, kuv tsis ntseeg Yes Xus ntxiv,” kom lawv txhob tua yus? Lub Koom Txoos qhia hais tias, yog peb tsis khuv xim peb txoj sia, peb tsis thim peb txoj kev ntseeg Yes Xus, yeem cia luag tua yus lub cev dua thim yus kev ntseeg, mas thaum lawv tua yus ntawd, yus ncaj qha mus saum ntuj nrog Yes Xus nyob no. Peb txoj kev ntseeg yuav tsum loj npaum li ntawd.


    (tshuav ntxiv...)


    Last edited by Mim on 9th October 2010, 1:06 am; edited 3 times in total

    Yaj Suav Nus
    Phooj Ywg
    Phooj Ywg

    Messages : 279
    Date d'inscription : 2009-10-23

    Re: Lub neej ua neeg ntseeg

    Post  Yaj Suav Nus on 8th October 2010, 5:46 am

    Nyob zoo os Mim,

    Thov txim kuv ntxiv ob peb lo lus rau koj zaj no.

    Peb mem tau Yes Xus lub tswv yim, cov muaj txoj Hmoov zoo:
    1- Cov pluag hauv nruab siab.
    2- cov muaj lub siab zoo.
    3- Cov ua lub neej quaj ntsuag.
    4- Cov tshaib thiab nqhis txog txoj kev ncaj.
    5- Cov hlub luag tej, zoo siab pab luag, ua luag tub txib.
    6- Cov siab dawb siab huv, saib lub siab muaj nqes dua lub cev.
    7- Cov tsim kev thaj yeeb, xav kom sawv daws sib haum xeeb.
    8- Cov raug luag hiam vim lawv ua ncaj, hais ncaj, nyiam txoj kev ncaj.

    Neeg ntiaj teb lub tswv yim, cov muaj txoj hmoov zoo:
    1- Cov muaj nyiaj txiag ntau.
    2- Cov muaj siab tawv, muaj hwj xyeej,kom luag ntshai thiab hwm.
    3- Cov tau kev ua si lom zem, tsis xav pom cov quaj ntsuag.
    4- Cov txawj hem luag kom luag pab lawv dawb thiab ua lawv qhev.
    5- Cov ua kom luag hlub lawv thiab siv zog pab lawv, ua lawv cov tub txib.
    6- Cov muaj lub meej mom zoo, cov zoo nkauj zoo nraug, cov txawj tsab zag.
    7- Cov yeej luag tej, ua dab tsi los xav kom yeej luag mus li.
    8- Cov ntse, txawj zais siab los txawj ua nkhaus kom txoj rau txim.

    Peb yuav xav tswv yim txog cov lus saum no, peb pom tias Yes Xus lub tswv yim nyob hauv cov lus ntawd. Nyob hauv Ntawv Moo Zoo mas tsuas yog lub ntsiab xwb, peb txhob xav tias peb nyeem cov lus no ib lwm xwb ces peb twb to taub lawm. Cov lus no mas tas ib sim neej peb to taub tsis tas thiab Yes Xus cov lus peb kuj to taub tsis tas thiab.


    Y. Suav Nus


    Last edited by Yaj Suav Nus on 8th October 2010, 2:11 pm; edited 1 time in total

    Maiv Paj Lug
    Tswv Cuab Hmong Catholique
    Tswv Cuab Hmong Catholique

    Messages : 1634
    Date d'inscription : 2009-08-17

    Re: Lub neej ua neeg ntseeg

    Post  Maiv Paj Lug on 8th October 2010, 8:30 am

    Yaj Suav Nus wrote:

    Peb yuav xav tswv yim txog cov lus saum no, peb pom tias Yes Xus lub tswv yim nyob hauv cov lus ntawd. Nyob hauv Ntawv Moo Zoo mas tsuas yog lub ntsiab xwb, peb txhob xav tias peb nyeem cov lus no ib lwm xwb ces peb twb to taub lawm. Cov lus no mas tas ib sim neej peb to taub tsis tas thiab Yes Xus cov lus peb kuj to taub tsis tas thiab.


    Y. Suav Nus

    Ua tsaug koj qhia peb os Suav Nus...wow! koj hais yog ua luaj, kuv muab ntawv Ntshiab Nyeem pes tsawg lwm los yeej paub tsis txhij li, nyob nyob rov qab mus nyeem mas rov paub dua ib qho tshiab tuaj. Zoo li Tswv Ntuj tej lus txawj muaj ntau yam nyob rau hauv ib kab lus. Nyeem tsawg lwm yeej muaj yam tshiab tawm tuaj.

    Suav Nus, yog peb ua neeg nyob , peb txhua tus txawj xav peb nyiam TSWV NTUJ ,nthsaw TSWV NTUJ tiag tiag no peb pom tau tias TSWV NTUJ tej Oeuvres muaj tsis tu ncua, muaj tsis txawj xaus. Hos neeg ntiaj teb tej oeuvres kev lom zem kev ntshaw nyiaj, kev ntshaw tau zoo noj tau zoo hnav, kev ntshaw tau zoo ua plees nkauj nraum, mus yuav ib tug tas tsis txaus siab tseem mus yuav dua lwm tus kom zoo tshaj : neeg ntiaj teb tej niag kev oeuvres no mas muaj chaw tws tas.... Sad ... yog kev tuag.

    Kheev lam sawv daws muaj kev hwm TSWV NTUJ nrhiav TSWV NTUJ tas siab nrho no tus ntawv yuav txawj hloov los ua neeg me kom tau txoj sia nyob mus li, zoo tshaj tau ib pob nyiaj ib pob kub.




    <3 <3 Pab kuv rov los cuag koj Huab Tais Yesxus <3 <3

    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: Lub neej ua neeg ntseeg

    Post  Mim on 8th October 2010, 1:08 pm

    Txiv Suav Nus thiab Maiv Paj Lug,

    Yog kawg, Yes Xus cov lus nyob hauv ntawv mas zoo nkaus li ib tug dej txhawv uas ntws tas mus li tsis txawj tu li, koj mus ce thaum twg los nws yeej ntws loj li qub...

    Txiv Suav Nus, cov lus kuv tuaj tso hauv no mas nws tsuas yog ib ob lub nyuag ntsiab xwb os... Kuv yeej tsos tsis tas li, thiab kuv los yeej paub tsis tag cov ntsiab li, txawm tej yam me me kuv paub txog los kuv yeej tsis tso kom tas li thiab, vim nws muaj ntau dhau, ces yuav tau xaiv yam puav tuaj hais ua ntej xwb. Thiab tej yam kuv hais no mas qhov ntau yog peb qhia rau cov me nyuam xwb.
    Ib qho ntxiv: Nqe 1 saud mas kuv tseem yuav tuaj kho ntxiv rau, vim nws tsis meej.

    Nej leej twg xav ntxiv rau los kav tsij tuaj tso ntxiv os nawb... Yog muaj coob leej tuaj tso ntxiv rau mas peb thiaj yuav muaj txhij thiab yuav paub txhua dua... Es kuv zoo siab hais tias koj tseem tuaj ntxiv tau tej lub ntsiab zoo thiab tseem ceeb kawg rau hauv no... Kav tsij tuaj tso ntxiv raws li koj paub thiab os...

    Kuv twb tuaj kho nqe 1 ntxiv rau tas lawm...


    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: Lub neej ua neeg ntseeg

    Post  Mim on 10th October 2010, 3:08 pm

    Cov uas yuav tau mus Ntuj lub Ceeb Tsheej thaum kawg: Mas Tais 25: 31-46.

    Kuj tseem muaj ib co lus uas Yes Xus tau hais txog tias thaum ntiaj teb kawg, Ntuj yuav txiav txim li cas, cov twg yuav tau txais kev tau zoo kev kaj siab mus ib txhis, cov twg yuav tau txais kev txom nyem mus tas ib txhiab.

    Peb yuav nquag muab coj los nyeem coj los xav kom peb nco ntsoov xyaum ua lub neej raws li tej lus ntawd.

    Ntawm no kuv pib nqe 34 mus xwb, nej mus pib nyeem nqe 31 tuaj nej thiaj to taub meej:

    34 Ces tus Vaj yuav hais rau cov nyob sab xis tias :
    "Nej los mog! Nej yog cov uas kuv Txiv pub txoj hmoov zoo rau. Nej txais lub Ceeb Tsheej uas Ntuj npaj tseg rau nej txij puag thaum pib tsim lub sim ceeb los ua nej tug. 35 Vim tias kuv tshaib plab, nej pub rau kuv noj ; kuv nqhis dej, nej pub rau kuv haus, kuv yog ib tug pej kum neeg, nej txais kuv ; 36 kuv liab qab, nej muab rau kuv hnav ; kuv mob, nej tuaj xyuas kuv ; kuv nyob hauv tsev loj faj, nej tuaj tsham kuv."
    37 Ces cov neeg ncaj yuav teb tias : "Huab Tais, thaum twg peb tau pom koj tshaib plab ces peb tau pub rau koj noj, pom koj nqhis dej, ces peb tau muab rau koj haus, 38 pom koj yog ib tug pej kum neeg, ces peb tau txais koj, pom koj liab qab ces tau muab rau koj hnav ? 39 Pom koj mob los nyob hauv tsev loj faj, ces peb tau tuaj xyuas koj ?"
    40 Tus Vaj yuav teb rau lawv li no : "Kuv hais tseeb rau nej. Nej tau ua npaum li cas rau cov me tshaj hauv kuv tsoom kwv, mas yog nej ua rau kuv."
    41 Ces tus vaj yuav hais rau cov nyob sab laug tias :
    "Nej txoj hmoov phem. Nej khiav mus deb kuv, mus nyob hauv coy hluav taws kub tsis txawj tuag, uas Ntuj npaj rau tus dab phem thiab nws cov dab. 42 Vim thaum kuv tshaib plab nej tsis pub rau kuv noj, kuv nqhis dej nej tsis pub rau kuv haus, 43 kuv yog ib tug pej kum neeg nej tsis txais kuv, kuv liab qab nej tsis muab rau kuv hnav, kuv mob thiab kuv nyob hauv tsev loj faj nej tsis tuaj xyuas kuv." 44 Ces cov ntawd yuav teb rau tus Vaj tias :
    "Huab Tais, thaum twg peb tau pom koj tshaib plab los nqhis dej, pom koj yog ib tug pej kum neeg, pom koj liab qab, pom koj mob los nyob hauv tsev loj faj, ces peb tsis tau pab koj ?"
    45 Ces tus Vaj yuav teb rau lawv tias : "Kuv hais tseeb rau nej, nej tsis tau ua rau cov me tshaj hauv kuv tsoom kwv npaum li cas, mas yog nej tsis tau ua rau kuv."
    46 Ces cov no yuav mus raug txim ib txhiab ib txhis. Hos cov siab ncaj yuav mus txais txoj sia nyob mus li.
    Cov lus no qhia tias tej yam me me uas peb ua rau lwm tus, yog peb ua rau Yes Xus lawm. Tej yam ntawd yuav muaj nuj nqes rau peb thaum kawg. Thaum ntawd nyiaj txiag yuav pab tsis tau peb, tiam sis peb txoj kev ua zoo rau luag thiab hlub luag yuav pab tau peb.

    Peb lub hom phiaj ntawm kev ua neej nyob ntiaj teb no ces yog npaj tiag saib thaum kawg puas tau txoj hmoov zoo nrog Tswv Ntuj pab yaj nyob nws sab xis xwb tiag lawv...

    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Yuav hnav Tswv Ntuj lub tsho hlau

    Post  Mim on 16th October 2010, 9:18 am

    Hnav Tswv Ntuj lub tsho hlau

    Peb ua neej niaj hnub peb raug ntxwj nyoog tej kev haub ntxias ntau yam. Tus Hauv Paus Xa Lus Paj Lug qhia hais tias kom peb yuav hnav rawv Tswv Ntuj lub tsho hlau no. Nws hais nyob hauv Es Fes Xos 5: 10-19:
    10 Qhov kawg no, nej yuav ua kom nej muaj zog nyob hauv Huab Tais. Nej yuav txais Huab Tais lub hwj hum nyob hauv nej. 11 Nej thiaj tiv yeej dab phem tej cuab yeej nws muab los ntxias nej, nej yuav hnav Tswv Ntuj lub tsho hlau.
    12 Peb tsis tsa rog ntaus ib co yeeb ncuab muaj nqaij muaj ntshav zoo li peb. Peb tsa rog ntaus cov vaj dab phem, cov dab phem muaj hwj huam, cov dab phem kav lub sim ceeb tsaus ntuj. Peb tsa rog ntaus cov tim tswv phem, ya saum cov txheej ntuj. 13 Vim li ntawd, peb thiaj yuav tsum hnav Tswv Ntuj lub tsho hlau ; ces thaum txog hnub phem, nej thiaj tiv tau dab phem, nej siv zog, nej thiaj nyob ruaj.
    14 Nej sawv ntsug tos! Nej muab qhoy tseeb los sia nej duay. Nej muab txoj key ncaj ua tsho hlau hnav. 15 Nej muab lub siab kub los ua khau rau mus xa lub Moo Zoo txoj key thaj yeeb. 16 Nej tuav rawv txoj key ntseeg ntawm tes xws li ib daig leem phiaj, ces nej yuav tua tau tus Phem cov xub tswm faj. 17 Qhov kawg, nej yuav txais key cawm los ua kaus mom hlau tiv, thiab txais Leej Ntuj Plig rab ntaj uas yog Tswv Ntuj lo Ius.
    18 Nej yuav coj ib lub neej teev Ntuj, thiab thov Ntuj tsis tseg. Nej yuav teev Ntuj tsis muaj caij muaj thaum, nyob hauv Leej Ntuj Plig. Nej yuav teev Ntuj tsis paub sab tsis paub nkees : nej thov Ntuj rau tsoom ntshiab. 19 Kuv kuj varn nej thov Ntuj rau kuv thiab, kom kuv tau kev qhib ncauj hais lus, tsis ntshai tshaj cov txuj zais tob tob hauv lub Moo Zoo.


    Kev ncaj ncees ua tsho hlau thaiv hauv siab


    Kev tseeb ua siv sia


    Leej Tswv Yim uas yog Tswv Ntuj Lo Lus ua rab ntaj

    " alt="" />
    Ntawv Moo Zoo txoj kev thaj yeeb ua khau rau

    Kev cawm neeg ua kaus mom ntoo




    Kev ntseeg ua daim leem phiaj ntawm tes


    Sponsored content

    Re: Lub neej ua neeg ntseeg

    Post  Sponsored content Today at 12:53 pm


      Current date/time is 3rd December 2016, 12:53 pm