Cov nqe lus cog rau cov neeg hais txoj saw Mab Liab

COV NQE LUS COG
RAU COV NEEG HAIS TXOJ SAW MAB LIAB

Leej Ntshiab Dominic thiab Alan de la Roche
(tus txhais : Mim Yaj Xyooj)



Niam Mab Liab cog lus tias :
1_Leej twg mob siab hais txoj saw Mab Liab los tsob hwb kuv,
mas nws yuav tau txais tej yam txiaj ntsim pab nws to taub ntau
yam.
2_Kuv cog lus rau cov neeg hais saw Mab Liab tias kuv yuav ua
tus pov hwm lawv, lawv yuav txais koob hmoov loj.
3_Txoj saw Mab Liab yog ib rab ntaj riam muaj hwj huam tiv
thaiv Dab Phem, nws yuav rhuav tau txoj kev tsis zoo, yuav ua
kom kev txhaum tsuag zuj zus, thiab yuav ntaus yeej txoj kev yuam
kev.
4_Kev hais saw Mab Liab yuav ua kom neeg dawb huv tuaj, kom
txoj kev zoo tawg paj txi txiv, thiab neeg yuav tau txais Ntuj txoj
kev hlub thiab kev zam txhaum ntau tas nrho, yuav rub neeg lub
siab kom txhob ntshaw ntiaj teb tej kev dag kev cuav, nws yuav
ntshaw tej yam tsis txawj ploj. Ab! Kheev lam leej tib neeg muab
txoj saw Mab Liab los ua kev taug, mas lawv yuav dawb huv tuaj.
5_Tus neeg uas nws muab nws cob rau kuv nyob hauv txoj kev hais
saw Mab Liab, mas nws yuav tsis poob rau hauv txoj kev tuag mus
li.
6_Leej twg nquag hais txoj saw Mab Liab thiab nco txog tej yam
tob zais ntshis hauv kuv lub neej, mas nws yuav tsis swb txoj kev
phem uas txeem los rau hauv nws lub neej. Thaum nws tso ntiaj teb
tseg, nws yuav tau txais kev pab. Nws yuav nyob hauv Tswv Ntuj
txoj kev sib raug zoo, thiab yuav tsim nyog txais txoj sia nyob mus
li.
7 – Tus neeg hais txoj saw Mab Liab, nws yuav tau txais lub Koom
Txoos cov Cim nqa txiaj ntsim pab nws thaum nws tso lub ntiaj teb
no tseg.
8 – Cov neeg niaj hnub hais txoj saw Mab Liab, yuav tau txais
Tswv Ntuj Qhov Pom Kev, thiab yuav txais txiaj ntsim pab lawv ua
neej nyob ntiaj teb, thiab pab lawv thaum lawv yuav tso ntiaj teb
tseg.Thaum lawv dua nra lawd, lawv tseem yuav tau nrog tsoom neeg
siab Ntshiab nyob saum ntuj sib faib cov leej Ntshiab tej koob
hmoov uas lawv tau tsim tseg.
9 – Kuv yuav cawm cov uas niaj hnub hais txoj saw Mab Liab
kom lawv dim ntawm teb chaws them txim.
10 – Nej leej twg hais txoj saw Mab Liab los thov dab tsi ntawm
kuv, mas nej yuav tau txais raws li nej thov.
11 Tus twg qhia kom muaj neeg coob paub txog kev hais saw
Mab Liab, mas kuv yuav pab nws thaum nws raug kev nyuaj
ntxhov.
12 – Kuv Leej Tub tso cai rau kuv txib tsoom tub ncig saum ntuj
kom pab cov neeg nyiam hais txoj saw Mab Liab, thaum lawv
tseem ua neej nyob ntiaj teb thiab lub caij lawv yuav tso ntiaj teb
tseg.
13 – Txhua leej txhua tus uas hais txoj saw Mab Liab, yog kuv cov
tub cov ntxhais. Lawv yog kuv leej Tub Twm Zeej Yes Xus Pleev
cov kwv cov muam.
14 – Kev nyiam hais txoj saw Mab Liab, yog lub cim qhia tias
Ntuj xaiv nws.



Tus Nkauj Tsim Txiaj Mab Liab paub Yes Xus lub siab zoo tshaj
plaws. Tsis muaj lwm tus yuav muaj peev xwm qhia peb zoo
dua Mab Liab. Li ntawd, txhua zaus peb ntsia Yes Xus lub
neej, mas Niam Mab Liab pab peb coj tus yeeb yam raws li nws
tus piv txwv.
Tus tib neeg ntseeg tus nru lus mas yog: txiav siab nrog nws
tus Huab Tais koom siab koom ntsws, thiab npuab Huab Tais Yes
Xus tas siab tas ntsws ntag .
Tus Hauv Paus Xa Lus Paj Lug hais meej meej tias :
« Kuv xav paub Leej Pleev, xav paub nws txoj kev sawv rov los
muaj zog npaum li cas, xav npuab Huab Tais Yes Xus nyob hauv
nws txoj kev raug txom nyem, thiab kuv xav yoog raws li nws
tus piv txwv nyob hauv txoj kev tuag, saib kuv puas yuav sawv
hauv cov tub tuag rov los. » (FLP 3,10).
«Nej yuav hnav peb tus Huab Tais Yes Xus Pleev »
( LM 13,14 + NKLT 3,27).
Tus Nkauj Tsim Txiaj Mab Liab yog peb niam thiab
yog lub
Koom Txoos leej niam. Niam Mab Liab thov Ntuj tsis tu ncua
rau nws cov me nyuam. Nws thov Ntuj hliv Leej Ntuj Plig
Ntshiab rau hauv peb lub siab, kom peb ua neeg ntshiab tau.
Thaum peb hais txoj saw Mab Liab, mas Niam Mab Liab nrog
peb cav txog nws Leej Tub Yes Xus thiab nrog peb thov Yes Xus.
Tsev neeg twg teev Ntuj ua ke, mas lawv yuav txawj sib hlub,
sib pab ris lub neej tej kev nyuaj ntxhov, txawj sib koom siab,
txawj sib zam txhaum. Tsev neeg twg hais txoj saw Mab Liab
ua ke, mas thaum lawv raug kev nyuaj, kev txom nyem, Yes Xus
nrog lawv ris.
tsev neeg uas lawv sawv daws sib sau los hais Txoj Saw.

Txiv Plig Txhiaj Foom, omi (Fr. Daniel Taillez, omi)



Txoj saw Mab Liab, yog ib txog kev teev Ntuj uas coj peb mus
txog Huab Tais Yes Xus.
Thaum peb hais txoj saw Mab Liab, mas yog zoo li peb nce mus
zaum nyob hauv peb niam lub xub ntiag. Peb niam Mab Liab qhia
txoj kev uas Yes Xus nyob rau peb, thiab pab peb yoog raws li Yes
Xus nyiam.
Thaum koj hais txoj saw Mab Liab mas niam Mab Liab nrog koj
teev Ntuj, nws nrog koj thov Yes Xus rau tas ib tsoom neeg kom
sawv daws tig los ntseeg txog Tswv Ntuj.


Hais txoj saw Mab Liab nias hauv qab no:

https://hmongcatholique.forumdediscussions.com/qhia-thov-ntuj-f22/qhia-hais-txoj-saw-mab-liab-t19.htm