Yes Xus hais tias: "Tswv Ntuj yuav los li tus tub sab, tsis paub thaum twg, yuav tau npaj kom txhij".
Lo lus no, tsis yog hais tias Tswv Ntuj yuav los, tab sis yog hais tias tsis paub thaum twg yus yuav mus, yus yuav tso tsoj sia ntiaj teb tseg; yuav tau npaj kom yus ntshiab huv mus li tos.
Kev npaj kom tiav tos, xws li yuav rau siab niaj hnub teev Ntuj thiab Daws txhaum tsis tu ncua.
Kev teev Ntuj, tsis yog yuav hais tias muaj caij mam teev; yog yus lauj zias yus lub caij mas yuav muaj mus li. Yam li muaj caij ntau kuj teev ntau, muaj caij tsawg kuj teev tsawg; tab sis teev tas mus li txhua hnub.
Kev Daws Txhaum, yuav Daws tsis tu ncua, yam li yog muaj Txiv Plig raws siab xav mas yuav Daws ib hlis ib zaug, yog tsis muaj Txiv Plig ywj siab, yuav tau Daws ua lub caij Tos Huab Tais xws li ua ntej Hmoov Yes Xus Yug thiab lub Caij Plaub Caug, ua ntej Hmoov Hla. Thiab txhua zaus uas yus mus ib qho chaw Ntshiab los yog yus yuav txais ib lub Cim.
Vim li cas thiaj li yuav Daws Txhaum tsis tu ncua thiab teev Ntuj mus li?
Vim ntshai tsam ntuj ho kawg xub ntsa teb ho kawg xub ntoos ces yus ib txwm ua txiaj ntsim, thaum ntawd yus tau ua ib qho txhaum rau Leej Ntuj Plig (yog ib qho txhaum tuag), tsis tau Daws Txhaum ces cia li ua rau yus poob mus rau dab phem teb tim qhov uas yus tsis tau Daws Txhaum xwb.
Kev ua txhaum rau Leej Ntuj Plig yog ib qho txhaum loj uas hnub mus txog ntawm Huab Tais Yes Xus xub ntiag, yog nyob nruab yeeb, yus tsis tu siab rau yus qhov txhaum tiag tiag mas yuav yog ib qho txhaum uas ua rau yus poob tau rau dab phem teb yam thim tsis tau rov qab.
Kev ua txhaum rau Leej Ntuj Plig tsis yog yuav ua txhaum rau Ntuj los yog txoj kev ntseeg nkaus xwb, tej zaud sawv daws tsis nco qab xav txog tias yog yus tua txoj kev hlub ntawm ib tug neeg es yuav ua tau ib qho txhaum loj rau Leej Ntuj Plig tau. Tau laiv! Kev rhuav txoj kev hlub, kev cia siab ntawm ib tug neeg yog ib lub txhim loj rau Leej Ntuj Plig, vim yus tua nws txoj kev hlub lawm. Yam li ob niam txiv, ib tug mus ua plees ua yi ywj siab, tso ib tug rau kev chim siab tu siab, kev tag kev cia siab, kev mob siab; qhov nov yog txhaum rau Leej Ntuj Plig, vim muaj txoj kev hlub rhuav lawm.
Ntau zaus, xav tias yus tsis tau tsa tes tua neeg ces yus dawb huv lawm, tab sis yus twb tsis paub qhov yus ua ntawd tias txhaum loj npaum li cas. Li ntawd peb yuav ib nyuag mob siab tshawb nrhiav txoj kev ntseeg kom ntau thiab thoob me ntsis ntxiv.
Vim li cas thaum teev Saw Mab Liab pheej hais lo lus kawg ntawm qhov koj nyob kaj lug Mab Liab tias: "thaum txog peb lub caij tuag, koj thov pab peb cov neeg txhaum".
Qhov nov, yog thov kom thaum peb nyuam qhuav tuag mus, peb yuav mus ntawm Huab Tais Yes Xus xub ntiag, kom Niam Mab Liab pab thov Ntuj rau peb kom peb txawj xaiv tau qhov zoo qhov yog, kom peb txo peb lub hwj chim lees ua neeg me, neeg txhaum, tso peb cov txhaum tseg, kom xws peb tau mus them peb cov txim ua ntej yuav tau mus nrog Huab Tais Ntuj nyob ntawm lub teb chaws thaj yeeb nyab xeeb tshav ntuj nrig (los lus tshav ntuj nrig, txhais tias kaj siab lug). Yog peb tsis thoav Niam Mab Liab ua txiaj ntsim ua ntej, txog hnub uas peb mus sawv ntawm Huab tais Yes Xus xub ntiag mas kuj tseem muaj dab phem nyob rawv haub ntxias peb kom peb tsa hwj chim thiab txhob lees peb tej txhaum kom peb tau ua neeg muaj hwj chim hauv nws lub teb chaws kub ntaiv, tshaib nqhis thiab txom nyem suab quaj suab qw tsis tu.(Lub caij no lawv hu dab phem ua tus dag ntxias, vim thaum yus tsis paub, yus ua xyem xyav ces nws ntxias yus heev heev, yus yuam kev tau ntseeg nws).