KEV CAI DAWS TXHAUM

Kev cai daws txhaum

Lub caij 40 no yog ib lub caij uas peb sawv daws yuav tsum rov xav txog nyias lub neej, nyias tej kev txhaum. Peb yog neeg mas peb yeej ua txhaum tas mus li. Peb muab xav piv rau peb lub cev, peb yuav tsum tau tu kom zoo, ib hnub txhuam hniav ob zaug, ib ob hnub da dej zawv plaub hau ib zaug mas peb thiaj xav mus fim luag, luag los thiajn xav txav los ti peb. Ntawm peb tus ntsuj plig los ib yam. Peb yuav tau tu peb tus ntsuj plig kom dawb huv. Yog kev daws txhaum thiaj yuav pab tau peb tu peb tus ntsuj plig kom zoo. Peb yuav tu siab rau peb cov txhaum , yuav txiav siab hloov yus tus kheej, tso txoj kev ua txhaum tseg, thiab npaj siab mus daws txhaum. Tsis mus kiag los twb yuav tsum mus ib zaug ua ntej Hnub Chiv Hla(Easter).

Kuv xav tias peb sawv daws yeej paub tias mus daws txhaum no yuav ua li cas tas lawm. Tiam sis kuv rov tuaj tham thiab piav me ntsis kom sawv daws rov nco txog thiab npaj mus daws txhaum rau lub Caij 40 no.

Nyob hauv kev daws txhaum, nws muaj ob toom tseem ceeb:


Toom I: Peb xub xav txog peb tej txhaum(Examination of conscience). Lub caij ua ntej peb nkag mus daws txhaum ntawm txiv plig, peb yuav xav txog peb cov txhaum raws li no:

1) Kuv mus daws txhaum zaum kawg tas lawm yog thaum twg, tau pes tsaug lis piam, pes tsawg hli, los pes tsawg xyoo los lawm?

2) Zaum tas lawd, kuv puas tau txhob txwm zais tsis qhia tej yam txhaum thaum kuv mus daws txhaum, thiab ho dag lam hais tej yam kom muaj lus hais xwb?

3) Txij zaum tas los, kuv tau ua txhaum dab tsi thiab dab tsi, thiab tau ua pes tsawg zaus? Yus ua txhaum yog thaum yus tsis mloog Tswv ntuj cov lus qhia thiab HT Yes Xus cov lus qhia. Yus kuj ua txhaum thaum yus hais lus (sin in words), thaum yus xav (sin in thoughts), thaum yus ua tej yam(sin in actions), los yog thaum yus tsis tau ua tej yam(sin in omissions).

a) Yus yuav xav txog Tswv Ntuj kaum lo lus qhia, saib yus puas tau ua hla cov lus qhia ntawd. Thiab peb tseem yuav tsum nco txog HT Yes Xus cov lus nyob hauv Ntawv Moo Zoo, uas nws tau qhia kom peb yuav tsum txawj sib nyiam sib hlub, ua neeg ncaj ncees, neeg dawb huv, tsim kev thaj yeeb, ua neeg pluag hauv nruab siab, Yus puas tau hlub cov txom nyem, thc…

b) Peb puas tau ua txhaum dab tsi hauv tej yam peb ua, los yog peb tsis tau ua, hauv peb lub siab xav, los yog hauv peb tej lus peb hais tawm.

4) Thaum yus xav tau yus cov txhaum tas lawm, yus tu siab rau yus cov txhaum(Contrition), yus lees rau Tswv Ntuj tias yus xav hloov xav pauv tsis xav ua tej txhaum ntawd ntxiv, thov Ntuj zam rau yus thiab pub txiaj ntsim pab yus kom yus hloov tau.

Toom II: Kev mus daws txhaum tim ntsej tim muag ntawm txiv plig (Confession): Thaum yus npaj tau tas lawm, ces yus nkag mus hauv chav daws txhaum. Kuv tsis paub nej cov church coj li cas, tiam sis hauv peb church mas muaj ob yam rau yus xaiv. Yog yus xav mus txhos caug nyob nraum daim ntxaij kom TP txhob pom yus los tau; hos yog yus tsis txaj muag ces cia li mus zaum ntawm TP ib sab xwb los tau, nws ntsia ntsoov yus, yus ntsia ntsoov nws. Mus txog hauv lawm yuav ua li cas?



1. Yus txhos caug los zaum raws li yus nyiam, TP hais ib co lus nyob zoo rau yus thiab tsa tes ua Cim Ntoo Cuam rau yus, yus kuj tib txhij nrog TP ua Cim Ntoo Cuam rau yus: “Hu txog leej Txiv, thiab leej Tub, thiab Leej ntuj Plig lub npe. Ua li. Kuv tsis tau tuaj daws txhaum tau… (pes tsawg lis piam, pes tsawg hli, los pes tsawg xyoo) lawm.

2. Tej zaum TP nyeem me ntsis los piav me ntsis txog tej zaj hauv ntawv Moo Zoo rau yus, ces yus mloog nws piav, tej zaum kuj tsis piav li. Yog tsis piav ces yus cia li pib nqe 3 hauv no mus xwb.

3. Yus pib hais yus cov txhaum ib qho zuj zus rau TP(confession), thiab yus yuav tsum tau hais txog tias yus tau ua ib qho txhaum ntawd pes tsawg zaus yog yus nco tau. “Txij zaum tas los, kuv tau ua… thiab tau ua… npau no zaus…” Tej yam uas yus tsis tshua xav kam hais, mas xub muab hais ua ntej kom tas yuav yooj yim dua rau yus. Thiab yuav tsum nco ntsoov hais yus cov txhaum hnyav(mortal sins) kom tas. Thaum yus tsis muaj dab tsi hais lawm ces yus xav xaus li no los tau, “Kuv tu siab rau cov txhaum kuv nyuam qhuav hais tas no thiab rau tas nrho cov txhaum kuv tau ua hauv kuv lub neej tib si. Thov kom Tswv Ntuj zam rau kuv. Tas li no lawm.”

4. TP yuav hais ib co lus ntuas yus thiab qhia kom yus yuav hloov li cas. Yus mloog TP hais.

5. TP Yuav muab ib yam rau yus ua los them txim txhaum (penance), xws li nws kom yus hais tej zaj teev ntuj, los yog nws kom yus ua ib yam hauj lwm zoo los pub rau lwm tus: “For your penance, you will say….” Los puas “For your penance, you will do…” Yus zoo siab yuav hais cov zaj teev ntuj li TP hais, los yuav ua tej yam li TP kom ua.

6. TP kom yus hais zaj “Tu Siab,” “Act of Contrition,” ces yus hais zaj ntawd.


Zaj Tu Siab

Kuv tus HT, koj lub siab zoo tas nrho, koj zoo nyiam tas nrho.
Neeg lub txhaum tsis ntxim koj lub siab.
kuv tseem ua txhaum rau koj, kuv tu siab nrho.
Kuv tsis xav trxhaum lwm zaum, thiab kuv xav them txim.
Koj pub txiaj ntsim pab kuv. Ua li.


An Act of Contrition

O my God, I am heartily sorry for having offended you and I detest all my sins, because I dread the loss of heaven and the pains of hell.
But most of all because I have offended you, my God, who are all good and deserving of all my love. I firmly resolve with the help of your grace, to confess my sins, to do penance and to amend my life. Amen.

Acte de contrition

Mon Dieu, j'ai un très grand regret de vous avoir offensé
parce que vous êtes infiniment bon, infiniment aimable,
et que le péché vous déplaît.
Je prends la ferme résolution,
avec le secours de votre sainte grâce
de ne plus vous offenser et de faire pénitence.

7. TP yuav hais cov lus zam txhaum rau yus: "I absolve you from your sins, in the name of the Father and of the Son and of the Holy Spirit." “Kuv zam koj cov txhaum rau koj, nyob hauv HT leej Txiv, thiab HT leej Tub, thiab HT leej ntuj Plig lub npe.” Thaum ntawd yus ua Ntoo Cuam lub Cim nrog thiab yus teb ,“Amen”, “Ua li.”

8. Thaum xaus, TP yuav hais tias, “The Lord has freed you from your sins. Go in peace. Tswv Ntuj tau daws koj cov txhaum tas lawm. Koj mus kaj siab lug.” Yus teb tias. “Thank you, Father. (Or, "Thanks be to God".) “Ua tsaug, Txiv Plig,” los puas “Ua Tswv Ntuj tsaug.” Ces yus tawm los mus.

9. Thaum daws txhaum tas lawm, yuav nco ntsoov ua yus qhov hauj lwm

them
txim txhaum. Yog yus tsis ua ces yus qhov nuj nqes ntawd tseem yuav nyob tas li. Yog TP kom yus hais tej zaj teev ntuj them txim txhaum, ces yus tawm los txhos caug hauv tsev teev ntuj thiab hais cov zaj teev ntuj tam sis ntawd kom tas. Yog TP kom yus ua tej yam los pab luag, ces yuav tsum nco ntsoov npaj ua kom tas sai li sai tau.

Yog yus twb tawm los lawm yus nco dheev txog tias tshuav ib yam txhaum loj yus tsis tau hais, yus yuav thov ntuj zam rau yus thiab yuav tso siab tias Tswv Ntuj zam rau yus lawm. Tiam sis lwm zaus yus mus daws txhuam dua , yuav tsum tau hais yam ntawd rau TP thiab.

Peb cov ntseeg kas Tos Liv muaj hmoov zoo, vim peb muaj lub Cim Daws Txhaum rau peb tau kev mus ntxuav peb tus ntsuj plig kom dawb huv. Peb yuav tsum tau siv lub Cim Daws Txhaum kom tsim nyog, yuav nquag mus daws txhaum. Tej tus leej Ntshiab lawv mus daws txhaum ib lis piam ib zaug; lub Koom Txoos qhia kom peb yuav tsum mus daws txhaum ib hlis ib zaug yog qhov zoo tshaj; thiab lub Koom Txoos kuj tseem qhia tias qhov tsawg tshaj yog ib xyoos yuav tsum mus daws txhaum ib zaug thiab txais Yes Xus lub Cev thaum lub Caij Hla (Easter).




Ib co nqe lus pab yus xav txog yus cov txhaum
(Nram no kuv lam sau ob peb nqe lus yooj yooj yim los pab peb xav tswv yim txog yus tej txhaum. Qee zaus yus xav tsis tawm tias xyov yus tau ua txhaum dab tsi, ces myeem tej cov lus zoo li no ho pab yus ras dheev txog los muaj).

1. Kuv puas tau teev Tswv Ntuj, nyiam Tswv Ntuj ib leeg xwb? Los kuv puas tau tseem mus ua neeb ua yaig, saib hauj sam, saib kab teg, nug saub… thiab lwm yam ntxiv thiab?
2. Kuv puas tau hwm Tswv Ntuj lub npe zoo, los yog siv Tswv Ntuj lub npe dog dig, los thuam Tswv Ntuj lub npe? Los kuv puas tau tsa tes tuav txog Tswv Ntuj lub npe twv ntuj, tiam sis yog twv rau tej yam dag?
3. Kuv puas tau caiv Tswv Ntuj hnub, mus koom thaj txi ntuj niaj hnub Chiv, los puas tu ncua tau pes tsawg zaus tsis mus teev ntuj, vim li cas? Kuv puas nquag teev ntuj hauv vaj hauv tsev, coj kuv tsev neeg teev ntuj ua ke?
4. Kuv puas muaj kev hwm tej niam tej txiv, hwm tej laus, tej thawj, saib taus lawv?
5. Kuv puas tau ua phem rau lwm tus, xav phem rau lawv, los ntxub lawv?
6. Kuv puas tau ua kev plees kev yi, kev phem kev qias uas tsis raws kev raws cai, puas tau yuam txhom luag?
7. Kuv puas tau ua tes tsis huv muab tej yam uas tsi yog kuv li?Kuv puas tau ua tej yam kom kuv tau noj luag loj tshaj kev cai?
8. Kuv puas tau ua tim khawv cuav, lam liam tej yam kuv tsis paub tseeb rau lwm tus?
9. Kuv puas muaj lub siab khib txog los ntshaw txog luag lub neej, thiab xav tswv yim yuav ua kom luag neej plam?
10. Kuv puas muaj lub siab khib khib thiab ntshaw luag teej luag tug, xav kom luag pluag yus muaj xwb?
11. Kuv puas muaj lub siab xav hnyos cov tau kev txom nyem, kev nyuaj siab?
12. Kuv puas muaj lub siab nqaim siab ti, muaj lub siab ntxub luag tas mus li?
13. Kuv puas yog ib tug neeg uas tsim kev kub ntxhov, kev tsis sib haum tas mus li?
14. Kuv puas yog neeg nkees?
15. Kuv puas yog neeg tsis nyiam txo hwj chim, tsis nyiam mloog luag qhia yus?

Tais Tooj,

Ua tsaug uas koj tau tuaj pab kuv kho rau kom zoo os. Thiab kuv tseem tsis tau mus nrhiav zaj "Acte de Contrition" ua lus Fab Kis, koj twb ho coj tuaj tso rau lawm ua koj tsaug kawg li nawb.
Tais Tooj ai, tej lus kuv hais tsis yog, tej yam kuv tso tsis tau zoo los nej yeej meem tuaj pab kho rau kom zoo os nawb...

Hais txog ntawm kev daws txhaum, kuv kuj tsis nco hais tias kuv tau ntsib ib tug TP yuav coj li koj hais li thiab. Kuv mus daws txhaum thaum twg mas TP yeej yuav tsum npua txoj hlab ntxhoo, nws yeej yuav tsum kom yus ua ib qho them txim txhaum, thiab qhov tseem ceeb tshaj mas nws yuav tsum hais lo lus tias, "Kuv daws koj cov txhaum nyob hauv HT leej Txiv thiab HT leej Tub thiab HT leej Ntuj plig lub Npe" no rau yus thiab tsa tes rau saum yus.

Txawm li cas los, nws yog ib tug TP lawm, nyaj Tswv Ntuj yuav zam rau yus thiab. Yog hais tias yus yeej tsis tuag siab li, ces yog hais tau los hais kiag rau nws tias yus nyiam kom nws ua kev daws txhaum raws kev cai qub rau yus, hos yog hais tsis tau los yus thov Tswv Ntuj zam rau yus thiab rau nws, thiab yus mam ho mus ntsib dua lwm tus txiv plig kom yus siab tus xwb. Qhov no mas kuv kuj tsis paub tas. Raws kuv xav mas Tswv Ntuj yeej yuav zam rau yus xwb, vim tus TP ntawd nws yog HT Yes Xus ib tug tub txib tau txais nws lub hwj chim lawm.

Li cas los peb sawv daws yuav tsum tau nquag thov ntuj pab peb cov TPkom lawv thiaj ua tau laswv txoj hauj lwm kom zoo thiag kom yog, vim tsis yog hauj lwm yooj yim li.

Nyob zoo os tais Tooj thiab Mim,
Neb cov tswv yim no yig ib co zoo kawg lawm, kuv qhuas neb lub peev xwm.
Hais txog ntawm qhov tais Tooj hais mas kuv tau tsib dua lawm, mauj tej tus TP hais tias zoo kawg cia thaum kuv ua mis xas kuv mam li cev koj cov txhaum rau Yes Xus nws yuav zam rau koj xwb, muaj tej tus yeej ua li tais Tooj hais. Thawj zaug kuv ntsib li no mas zoo li txawv kawg ! Tab sis tsis ntev ntawd ces zoo li muaj ib qho hais qhia rau kuv tias: tsuav yog kuv ntseeg tias kuv cov txhaum Yes Xus twb daws tas lawm vim tias thaum kuv tab tom hais kuv cov txhaum mas Yes Xus twb nyob hauv tus TP ntawd thiab nws twb hnov tag lawm.
Sib ntsib dua lwm zaus.

Y.Suav Nus

Mim, Maiv Tooj thiab Suav Nus....nej txawj tham kawg li, ua rau kuv xav mus daws txhaum lamw thiab.

Mim, ua tsaug rau nws cov zaj qhia peb kom thim xav txog yus cov txhaum ua nej yuav mus daws.
Maiv Tooj, thaum yus mus daws txhaum yus yeej xav kom muaj tej tus Txiv Plig xav mloog yus piav yus cov txhaum thiab yus yeej xav kom nws hais lus zoo zam rau yus kom tas, yog yus mus ncaj tej tus Txiv Plig maj maj kom yus hais tsuag tsuag kom tas xwb mas yus kuj tsis tshuam kaj siab pes tsawg. Kuv kuj zoo li Suav Nus hais thiab, yog kuv mus ncaj tej tus Txiv Plig daws txhaum maj maj mas kuv muab xav rau Huab Tais Yesxus tias txawm tus Txiv Plig ntawv ua ceev ceev rau kuv xwb los kuv xav tias Yesxus yog tus zam rau kuv thiab mloog kuv lawm ces tsis ua cas, yus ho zam rau tus Txiv Plig daws yus cov txhaum thiab xwb