HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


Ntsuj plig teb chaws them txim Maria Simma. Empty

Latest topics

» Ua tsaug ntees.
by Maiv Tooj 21st February 2024, 11:33 pm

» DUAB MAB LIAB TSHIAB.
by Maiv Tooj 16th February 2024, 8:39 am

» COV ZAJ NYEEM NRUAB LIS PIAM XYOO I 2022-2023
by Mim 10th August 2023, 7:04 am

» Cov zaj nyeem Hnub Chiv Xyoo A. 2022-2023
by Maiv Tooj 20th July 2023, 11:21 pm

» SAJ YES XUS KEV TXOM NYEM
by Maiv Tooj 7th March 2023, 6:34 am

» Tswv Ntuj ua tau tag puas tsav yam, F. Ts. Cob Tsib teb
by Mim 3rd February 2023, 11:33 am

» DAIM NTAUB QHWV TUAG NYOB TURIN
by Mim 29th January 2023, 9:24 am

» Txiv plig Tshaj Sawm (Harry Thiel ) Lub neej
by Maiv Tooj 28th December 2022, 8:25 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 28th December 2022, 7:55 am

» COV ZAJ NYEEM NRUAB LIS PIAM XYOO II 2021-2022
by Mim 24th November 2022, 9:06 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 18th November 2022, 8:28 am

» Cov Txiv Plig ua tau muaj txiaj ntsim rau Peb Hmoob nyob Los Tsuas, Thaib teb ua ntej & tom qab 1975
by Maiv Tooj 14th November 2022, 10:03 am

Suav neeg tuaj saib, txij hnub 17/09/2010 los mus.


    Ntsuj plig teb chaws them txim Maria Simma.

    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5526
    Date d'inscription : 2009-08-18

    Ntsuj plig teb chaws them txim Maria Simma. Empty Ntsuj plig teb chaws them txim Maria Simma.

    Post  Maiv Tooj 4th March 2014, 11:50 am



    Maria Simma, tus ntsuj plig raug txom nyem
    Rau cov ntsuj plig nyob teb chaws them txim.


    Thoob ntiaj teb paub nws, tuag tim 16-03-2004.

    Maria Simma (1915-2004)



     Hnugb tim 16-03-2004 ua Maria Simma tuag, tag ntiaj teb paub qhov uas nws ntsib tau cov ntsuj plig hauv teb chaws them txim. Lawv ua nws lub ntees rau hnub tim 19- lub 3 hlis, yog hnub hmoov LN.Yos Xes, lub zos Sonntag, Autriche teb uas nws nyob.
    Maria Simma yug hnub tim 5 lub 2 hlis 1915. Nws muaj 89 xyoos thaum nws tuag.

    Ntsuj plig nyob teb chaw them txim tshwm sim rau
    Maria Simma pom thawj zaug.


    Maria hais rau hauv nws phau ntawv tias :
    Yog xyoo 1940 uas thawj tug ntsuj plig nyob teb chaws them txim tshwm rau kuv pom. Kuv pw ces kuv hnov zoo li muaj neeg pheej mus mus los los hauv kuv txaj, kuv tsim los. Kuv xav tias leej twg es yuav los hauv kuv txaj ni…
    Kuv txawm pom ib tug neeg uas kuv tsis paub mus mus los los qeeb tsawv hauv kuv txaj. Kuv txawm hais lus nrov nrov tias: “Ua cas koj ho los tau hauv nov? Yog koj ua dab tsi poob lawm lov?” Kuv nqe kiag ntawm kuv lub txaj, kuv cev tes mus nthos nkaus naj cas tuav tau cua xwb, tsis pom dab tsi li lawm…Kuv rov nce mus saum txaj, cas rov hnov mus kev dua…Ces kuv rov sawv, kuv maj mam mus rau ntawm nws, kuv xav rov nthos nws dua; tab sis kuv rov tuav tsis tau dab tsi li thiab…
    Thaum mus Mis Xas tag, kuv mus tham qhia rau kuv tus Txiv Plig. Nws hais tias: “Yog lwm zaus rov pom zoo li no ntxiv no koj tsis txhob nug tias “koj yog leej twg?” no tab sis koj nug tias “Koj xav tau dab tsi?”
    Hmo tom qab nws rov los dua, rov yog tus yawg qub thawj hmo. Kuv thiaj nug nws tias: “Koj xav tau dab tsi ntawm kuv…?” Nws teb kuv tias: “Kom Txiv Plig ua peb thaj Txiv Ntuj rau kuv ces kuv yuav dim.”
    Ces kuv thiaj paub tias ntshe yog ib tug ntsuj plig nyob teb chaws them txim los hais rau kuv. Kuv thiaj hais rau kuv tus Txiv Plig, nws thiaj li qhia qhov tseeb rau kuv.
    Xyoo 1940 rau 1953, ib xyoos no tsuas los li ob los peb tug xwb, qhov ntau yog thaum lub 11 hlis. Kuv tsis pom tias yuav yog ib txoj hauj lwm tshwj xeeb rau kuv ua. Kuv hais rau kuv tus Txiv Plig Alphonse Matt, nws hais tias kom tsis txhob ntiab ib tug ntsuj plig nyob teb chaws them txim kiag li thiab yuav tsum txais lawv luag ntxhi.

    Nyiaj kev txom nyem los them txim.

    Cov ntsuj plig nyob teb chaws them txim thov kom kuv nyiaj kev txom nyem rau lawv. Thaum tus ntsuj plig los, lawv khob qhov rooj tsa kuv los yog hu kuv…Ces kuv nug kiag nws tias : « Koj xav tau dab tsi ? » Li no ces nws thiaj hais rau kuv seb tshuav dab tsi uas nws xav tau.
    Li ntawd, muaj ib tug ntsuj plig thiaj hais tias : « Koj puas kam nyiaj kev txom nyem rau kuv ? »…Kuv teb nws tias : « Tau kawg, tab sis kuv yuav ua li cas ? » Nws hais rau kuv tias : « Koj yuav hnov koj lub cev mob ntsoog tas ntev li 3 teev ; dhau ntawd ces koj sawv taus thiab mus ua koj tej hauj lwm li uas tsis tau muaj dab tsi los. Li no koj yuav tso tau kuv dim hauv teb chaws them txim 20 xyoo. »
    Kuv lees pab. Cas kuv cia li mob ciaj mob tuag ua rau kuv tsuas paub tias kuv nyob rau qhov twg xwb, kuv tseem nco ntsoov tias kuv tau lees pab cawm ib tug ntsuj plig es txom nyem 3 teev. Cas kuv mloog li 3 teev ntawd twb yog ntev ntev los lawm, zoo li twb tau 3 hnub los tseem yog 3 lis piam. Thaum tag lawd, kuv nug kuj yog 3 teev thiab xwb tiag. Qhov ntau, yog kuv yuav txom nyem 5 fiab xwb ; tab sis lub caij ntawd zoo li yeej ntev kawg li.

    Tshwm rau tsoom sid pom.

    Xyoo 1954, yog xyoo teev Mab Liab, xyoo no mas niaj hmo muaj ntsuj plig los xyuas kuv. Tej zaud mas nws qhia kuv tias nws yog leej twg. Lawv kom kuv hais ub hais no rau lawv cov txheeb ze. Yog li ntawd, thiaj ua rau tsoom sid paub zuj zus. Kuv thiaj tau xa tej lus mus rau tej lub zos uas kuv twb tsis paub txog. Tej thaum mas kuv tseem tau hais rau tus txheeb ze kom xa tej teeg tug uas nws yuam cai txeeb los rov rau luag, kuv yeej hais kiag lub ntsiab rau.
    Lawv nug kuv tias : koj puas paub cov ntsuj plig uas los xyuas koj ?
    Yog cov uas kuv paub thaum ub mas kuv yeej paub kiag ; dua li cov mas kuv tsis paub, ntshe tsuas yog lawv hais rau kuv tias lawv yog leej twg no xwb.

    Cov ntsuj plig nyob teb chaws them txim puas paub dab tsi txog peb ?
    Cov ntsuj plig paub ntau yam tshaj qhov peb xav txog, paub txog peb, paub txog tej xwm txheej uas yuav raug peb. Yam li paub tias leej twg yog tus ua lawv lub ntees, seb yus mus teev Ntuj rau lawv los yog yus lam mus xyuas xwb es tsis hais ib nyuag zaj teev Ntuj rau li, qhov ntau yog li no…Cov ntsuj plig paub tag puas tsav yam uas hais lawv, ua rau lawv ; lawv yeej nyob ze ze peb.

    Pab cov ntsuj plig them txim.

    Qhov zoo tshaj uas yuav pab tau cov ntsuj plig yog Thaj txi Ntuj ; tab sis yuav tsum yog thaum tus neeg tseem ua neej nyob nws ntseeg thiab hwm thaj txiv Ntuj tiag.
    Tsis yog cov yuav xam cov thaj txiv Ntuj hnub uas yuav tsum mus xws li Hnub Chiv los yog Hnub hmoov xwb, tab txawm yog txhua hnub hauv nruab lis piam los yeej muaj txiaj ntsim tib yam. Muaj tej cov neeg mas lawv yeej mus teev Ntuj hauv nruab lis piam thiab ua hauj lwm tib si.  
    Cov neeg laus xyeej, cov uas lawv noj qab nyob zoo, cov uas nyob ze tsev teev Ntuj, tab sis lawv hais tias : « Hnub Chiv mas kom kuv yuav tsum mus teev Ntuj ; tab sis nruab lis piam mas mas tsis yuam ces kuv tsis mus.» Cov neeg zoo li nov mas lub thaj txiv Ntuj yuav pab tsis tau lawv pes tsawg, lawv tuag tas mas yuav tos ntev heev mas ib thaj txiv Ntuj thiaj li yuav pab tau lawv; vim thaum ua neej nyob lawv tsis mus teev Ntuj.

    Yog sawv daws paub tias thaj txi Ntuj no muaj nqes npaum li cas rau lub neej nyob mus li mas txawm yog nruab lis piam los ntshe sawv daws yuav mus teev Ntuj ua tsev ntsawm nkaus xwb. Thaum txog hnub yus tuag lawd, cov thaj txiv Ntuj uas yus muaj lub siab ntseeg thiab yus mus koom ntawd yuav ua txiaj ntsim nplua mias rau yus. Nws yuav muaj nqes tshaj cov thaj txiv Ntuj uas thaum yus tuag lawm es mam ua rau yus tom qab.
    Ib txhia niam txiv los cov xib hwb qhia ntawv nroo tias niaj hnub no tej me nyuam txhoj puab tsis mloog lus. Tsis lam yog ib qho lam tau lam tsis mloog lus : Thaum ub tej me nyuam niaj hnub teev Ntuj haus tsev kawm ntawv ; kev teev Ntuj thiab lub Cim Yug muab lub zog kom lawv mloog lus thiab ua kom lawv lub siab npuab lawv txoj hauj lwm.

    COV TXHAUM UAS RAUG TXIM LOJ TSHAJ.

    Yog tawm tsam txoj kev siab dawb siab zoo xws li:
    hais lus xaiv, hiam luag, ntxeev lus, ciaj caub, thuam luag kom yus zoo, ntxub luag vim ntshaw nyiaj thiab luag muaj yus tsis muaj ntshaw luag tug ces ntxub luag,
    tej yam no mas raug txim nyhav nyob rau lub ntuj sab nraum ub. Piv txwv ib tug neeg tsis tsim txiaj, yog muaj lub siab zoo tib zoo hlub nws…Txoj kev siab zoo rau luag yuav tau txais txiaj ntsim loj heev rau lub neej muaj txoj sia nyob mus li…
    Npaum li cas lawm uas peb tau hais lus txhaum thiab tsis txawj xav es txiav txim rau luag !…Ua zoo rau cov uas lawv tsis tuaj yus phab, ua li nov mas thiaj yog ib tug yam ntxwv neeg ntseeg tiag ; Yog li no uas Tus Cawm Seej kom peb ua ; peb yuav muab peb cov yeeb ncuab los ua peb cov phooj ywg, ces peb yuav dim ntawm teb chaws them txim lawm ntau.

    Cov ntsuj plig nyob teb chaws them txim txoj kev txom nyem.
    Cov ntsuj plig nyob teb chaws them txim mas lawv muaj txhiab pua hom kev txom nyem sib txawv; muaj tsawg tus ntsuj plig ces muaj npaum li ntawd yam teb chaws them txim. Txhua tus ntsuj plig nco nco Tswv Ntuj ces lawv thiaj li nyiaj tag puas tsav yam mob kom lawv ntshiab huv. Thiab txhua tus ntsuj plig raug txim rau tej uas nws tau ua txhaum los. Twb zoo nkaus li nyob ntiaj teb es txoj kev raug txim twb yog ib yam tsis zoo: Tus uas noj ntau lwm hnub nws yuav mob plab thiab nws lub plab yuav nyhav nyhav nyhav; tus uas haus luam yeeb haus yaj yeeb ntau, lwm hnub nws yuav mob cancer rau ntsws.
    Tus ntsuj plig nyob qhov chaw tshau, qhov chaw lim pom Tswv Ntuj ci ntsa iab : Lawv pom Tswv Ntuj tshwm tuaj rau lawv zoo nkauj ci ntsa iab, ntshiab huv ci lam lug, fam lawv qhov muag, tag nrho lub zog nyob saum Ntuj thawb tsis tau lawv los rau ntawm Tswv Ntuj xub ntiag yog tias lawv tseem tshuav ib nyuag qhov tsis huv. Tsuas yog tus ntsuj plig dawb huv, ci ntsa iab, zoo tas nrho thiaj li muaj cuab kav mus cuag qhov pom kev nyob mus li thiab mus tim ntsej tim muag ntsia Tswv Ntuj lub ntsej muag.

    Maria Simma mus tham.
    Cov ntsuj plig hais rau Maria Simma tias : “Koj yuav mus tag nrho txhua qhov uas lawv hu koj, yog koj txoj hauj lwm thwj tim” Rooj Ncauj Lus thiab kom cov neeg ntseeg yuav tsum ua thwj tim txoj hauj lwm. Tag nrho cov kas tos liv uas tau txais lub cim txhab zog muaj cai tiv thaiv txoj kev ntseeg thiab qhov tseeb raws li nws tau kawm.
    Lawv nug kuv tias kuv kawm ntawv siab li cas, es thiaj li yuav tuaj tham tej lus no. Kuv ces kuv tsuas tau kawm ntawv hauv paus tau 8 xyoo xwb. Tab sis yog kuv muaj kev fim nrog cov ntsuj plig hauv teb chaws them txim es lawv qhia ub qhia no rau kuv ces kuv thiaj li yog dua ib tug neeg lawm xwb. Kuv kuj muaj kev tso siab heev rau Leej Tswv Yim Ntshiab. Tsuas yog thaum peb tso siab lug hu txog Leej Tswv Yim Ntshiab, Nws thiaj li yuav muab nws lub zog loj los pab peb. Nws kev pab muaj nqes li cas. Yog qhia me nyuam mas zoo heev!  Yam li kuv xav hais rau cov niam cov txiv thiab cov xib hwb kom lawv yuav tsum nquag hu Leej tswv Yim Ntshiab los pab kaj lawv.

    Cov ntsuj plig lus teb.
    Tsuas yog thawj Hnub Xya (Saturday) hauv lub hli los yog hnub cov hmoov Niam Mab Liab xwb uas kuv thiaj li nug tau seb tus ntsuj plig uas kuv xav paub puas tseem nyob teb chaws them txim los tsis nyob lawm. Thaum ib tug ntsuj plig tshwm los, tom qab uas nws hais qhov nws xav kom kuv pab nws rau kuv tag ces yog nws tsis ploj kiag tam sid, nws nyob ntxiv ces kuv paub tias kuv yuav nug tau. Tab sis tsis yog tus ntsuj plig uas kuv nug los teb rau kuv, vim nws los thov tau kev pab ces nws twb dim lawm.
    Yog dua ib tug tshiab coj cov lus teb los,  uas yog ib tug ntsuj plig uas los thov kev pab nws dua thiab. Thaum nws hais qhov nws xav kom yus pab nws tag ces nws mam hais tias seb tus ntsuj plig uas yus tau nug xov ntawd tseem nyob teb chaws them txim los twb ho tso lawm.
    Ces kuv mam nthuav hauv kuv phau ntawv thiab nrhiav tus uas tuaj nug nws moo ntawd chaw nyob, kuv mam xa ntawv mus rau lawv.
    Tej thaum mas kuj yog ob los peb xyoos tej mam li tau lus teb, qhov ntau mas yog kuj luv dua. Nyob ntawm Tswv Ntuj pom zoo xwb.

    DAWS TXHAUM

    Muaj ntau qhov uas lawv tso txoj kev Daws Txhaum tseg lawm. Lub cim daws txhaum yog Leej Pleev ua tus tsim los es tsis yog lub Koom Txoos ua tus txhooj li ib txhia xav. Vim Leej Pleev hais tias : « Txais Leej Tswv Yim Ntshaib. 23 Nej daws txhaum rau leej twg, mas nws cov txhaum yuav daws. Nej tsis daws leej twg cov txhaum, mas nws cov txhaum yuav nyob." (Zam 20, 23). Yuav tsum lees yus cov txhaum kom tag, tsis li ntawd, tus Txiv Plig yuav saib seb nws puas yuav daws ?

    Muaj ib hnub lawv hais rau kuv tias : « Es Leej Pleev twb tsis tau kom peb mus Daws Txhaum ne ? » Kuv teb lawv tias : « Leej Pleev tsis tau hais tiag, tab sis yog nej kam no nej lees nej cov txhaum rau ntawm sawv daws xub ntiag tag nej mam mus, li no ces tus Txiv Plig mam hais qhov zam txhaum rau nej tab meeg ntawm sawv daws thiab nej cov txhaum yuav tsum muab ua plaub ua ntug hais. »


    UA LUB TSEV TEEV NTUJ

    Ntsuj plig teb chaws them txim Maria Simma. Simmac10

    Ib tug ntsuj plig nyob teb chaws them txim hais tias Nkauj Ntshiab xav kom tsa ib lub tsev teev Ntuj rau Sonntag; nws qhia qhov chaw uas yuav tsa lub tsev tib si, rau qhov chaw qub uas thaum ub muaj ib qho chaw teev Niam Mab Liab. Qhov chaw teev Niam Mab Liab qub ploj yog vim lawv ua ib txoj kev tsheb los hla ces lawv muab rhuav, lawv cog lus tias lawv mam ua dua ib lub no tab sis cia li tsis nco qab ua li lawm. Hais tias kom ua ib lub tsev loj me ntsis kom ua tau thaj txi Ntuj hauv. Kuv thiaj nug kuv tus Txiv Plig; nws ntseeg kuv vim nws paub tias qhov chaw ntawd yog ib qho chaw teev Niam Mab Liab thaum ub uas zaum no tsis muaj neeg paub li lawm. Ces kuv tus txiv Plig Alphonse Matt thiaj li ua lub tsev teev Ntuj rau qhov chaw ntawd.


    Txiv Plig Alphonse Matt

    ... Niam Mab Liab hais tias nws xav kom muaj ib tug mlom Mab Liab tso hauv lub tsev rau cov pluag hauv lub zos Banneux ua chaw nco txog Leej Niam Ntshiab.  Thiab thaum ua tau lub tsev teev Ntuj lawd, Tswv Ntuj leej Niam hais rau ib tug ntsuj plig tias kom lawv mua bib daim duab Niam Mab Liab Khuv Leej neeg los tso rau cov ntsuj plig nyob teb chaws them txim. Kom yogi b daim duab nraj zoo nkauj li neeg tiag es txhob yogi b daim duab kos txheej tshiab dog dig. Yog Dr. Adolf Hyla nyob Cracovie ua tus nraj daim duab uas yog muab rau ib tug TP.Jésuite Pos Los Nes nqa tuaj rau Maria Simma ; yog Txiv Plig Stanislas Skudrzy ua tus saib xyuas tag nrho thiab them nqe zog tib si.
    Thaum lub 5 hlis 1959, Txiv Plig tuaj foom hmoov zoo rau lub tsev teev Ntuj. Txij thaum ntawd los ces yogi b qho chaw rau neeg tuaj teev Ntuj thiab yogi b qho chaw ua chaw nco txog cov ntsuj plig nyob teb chaws them txim.
    Raws li TP. Alphonse Matt hais mas : « Muaj tseeb tiag qhov uas Maria Simma hais txog cov ntsuj plig los xyuas nws ; vim tej lus uas nws hais rau cov ntsuj plig cov neeg mas lawv hais tias yeej muaj tseeb li nws hais rau lawv. Vim feem coob, Maria twb tsis paub lawv. »

    Yuav ua li cas pab cov ntsuj plig hauv teb chaws them txim.

    1. Thaj Txi Ntuj,
    2. Nyiaj kev txom nyem los them txim.
    3. Teev Saw Mab Liab thaum ua thaj txiv Ntuj tag, yog ib qho leej tshaj plaws.
    4. Teev Ntoo Cuam txoj kev.
    5. Lees yus tej txhaum txhob zais yog ib qho txiaj ntsimloj tshaj uas hais tsis tau.
    6. Pab nyiaj rau cov thov nyiaj mus pab luag.
    7. Hlawv tswm ciab.
    8. Pov dej foom hmoov zoo, muaj ib hnub Maria pov dej foom hmoov zoo rau ib tug ntsuj plig, ib lub suab hais tias: “pov ntxiv thiab.”

    YAM KUV TUS KHEEJ TAU POM LOS.
    Kuv muaj ib tug phooj ywg, hu ua  Mme Madeleine Bentz, nyob Alsace, Fab Kis teb. Nws nquag mus teev Ntuj nyob tom Sonngtag (Autriche), hauv lub me nyuam tsev teev Ntuj rau cov ntsuj plig teb chaws them txim. Xyoo 1975, hnov tias peb nug tau Maria Simma seb peb niam peb txiv uas tuag lawd puas xav kom peb pab lawv; ces kuv txawm ua siab muab kuv lub hnab ntawv rau tus pog uas saib cov tsheb rau sawv daws mus teev Ntuj nqa mus rau Maria Simma, vim nws thiaj li yuav txav ti Maria. Kuv sau kuv niam thiab kuv tus nus Gérald npe. Kuv lub hnab ntawv rov qab los vim kuv tsis nco qab sau kuv niam thiab kuv tus nus nkawd hnub yug thiab hnub tuag. Ua ntej uas kuv sau tau nkawd ob lub hnub yug thiab hnub tuag es kuv tseem tsis tau xa mus rau Maria Simma, ces kuv txiv cia li tuag kiag rau hnub tim 10-02-1976, ces kuv ho cia li ntxiv kuv txiv lub npe rau ntxiv rau kuv niam thiab kuv tus nus ob lub npe.
    Kuv tos tau ob xyoos, txog rau Hmoov Yes Xus tuag 1978, kuv zoo siab thiab ceeb uas tau txais cov lus teb kuv cov lus nug.
    Kuv niam, tuag tim 28-12-1966, hnub nyug 66 xyoo, kuv tus nus hnub nyug 41 xyoo, nws hlob kuv 1 xyoos, tuag hnub tim 05-07-1969 nkawd ob leeg mus saum Ntuj lawm. Kuv txiv hnub nyug 76 xyoo thaum nws tuag, tseem nyob hauv teb chaws them txim thiab yuav yog 7 thaj Mis Xas (thaj txiv Ntuj) mas thiaj li yuav tso tau nws dim. Kuv maj zeeg saib xyuas tam sim ntawd hais kom Txiv Plig ua 7 thaj mis Xas rau nws. Kuv vam tag nrho kuv lub siab tias cov Thaj Txi Ntuj Ntshiab yuav tso tau nws dim mus cuag kuv niam thiab kuv tus nus Gérard saum Ntuj sai sai no.

    Yog ib lub txiaj ntsim loj tshaj rau kuv uas paub tias kuv niam thiab kuv txiv tus ntxim hlub tau mus saum Ntuj Ceeb Tsheej lawm. Yog ib lub txiaj ntsim uas kuv twb tsis muaj peev xwm nug Maria Simma, yog kuv tsis tau nyeem TP.Herman zaj kwv huam. Nws yog ib tug Yus Das los ua Txiv Plig, nws ntshai tsam nws niam tsis ua Kas Tos Liv es tsis tau mus saum Ntuj. Nws teev Ntuj ntau ntau ces txawm muaj ib tug ntsuj plig los hais rau nws tias nws niam hloov siab los ntseeg thaum nws txoj sia yuav luag tu ces Tswv Ntuj tau cawm nws lawm.
    Kuv xav tias nws twb tau txais lub txiaj ntsim no ua cas kuv ho yuav tsis tau thiab, ntshe kuv yuav kav xyeem thaum tseem muaj Maria Simma tus muaj hwj huam thiab siab zoo nov pab tau kuv. Yog nyeem TP.Herman lub neej es kuv thiaj li muaj cuab kav nug rau kuv thiab. Kuv ua Tswv Ntuj tsaug rau nws lub siab hlub neeg. Yuav rau siab teev Saw Mab Liab thiab kom Txiv Plig ua Mis Xas rau peb cov neeg uas dua nra lawd. Tseem ceeb, peb yuav nquag mus koom Thaj txi Ntuj ntau npaum li yuav ntau tau. Vim nws yuav muaj txiaj ntsim txhua hnub.


    Thérèse Tardif
    Ib zaj hauv phau xov xwm  Vers Demain , tsab lub 8 hli thiab 9 hlis 2004..

    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5526
    Date d'inscription : 2009-08-18

    Ntsuj plig teb chaws them txim Maria Simma. Empty Re: Ntsuj plig teb chaws them txim Maria Simma.

    Post  Maiv Tooj 12th March 2014, 9:49 am



    MUAJ TSEEB TIAG.



    Tus sau: Zoo Tswv Zov Yaj, Lomsak, Thaib teb.
    Xov xwm Tseb Nplej,
    Tsab 11 xyoo 2012.


    Kuv muab zaj nov los tso phim Maria Simma zaj saud; hais txog cov ntsuj plig uas tuag lawd paub txog cov neeg tuaj xyuas nws lub ntees, paub tias tus twg tuaj xyuas yus es teev Ntuj rau nws thiab tus twg lam tuaj saib nws ua ntsej ua muag xwb. Ib qho zoo hais rau peb cov Hmoob, qhov ntau sawv daws mus ntees mas twb tsis ib nyuag mluas, xyom me ntsis li; feem ntau mus luag ntxhwb ntxhi, tseem tso dag tso luag ua lom lom vab vab tsheej tsaug thiab.

    Muaj ib tug txiv neej uas nws tau tag sim neej lawm, lawv ua nws lub ntees tau rau hnub. Tus txiv neej no yog neeg ntseeg nyob hauv lub Koom Txoos Kas Tos Liv; thaum tus txiv neej no tuag tag mas Txiv Plig kuj mus ua cov kab ke xa plig rau.

    Hnub tim 3 hauv lub tsev pam tuag, muaj ib tug poj niam uas yog cov qhua niam (cov poj niam uas mus koom lub ntees tuag mas hmoob hu ua qhua niam, cov txiv neej mas hu ua qhua txiv) nkag mus hauv lub tsev pam tuag. Thaum tus poj niam ntawd nkag mus hauv lub tsev pam tuag, mas nws txawm hnov li muaj ib yam dab tsi los mooj nws; ces nws tsis paub tias nws yog leej twg lawm. Nws saib lub cev tseem yog nws lub; tab sis lub tswv yim xav hauv nws taub hau mas yog tus txiv neej uas tag sim neej ntawd lub. Tam sim ntawd tus txiv neej uas tuag ntawd lub suab cia li hais tawm ntawm tus poj niam ntawd los.

    Tus txiv neej ntawd hais tias:
    "Cov me nyuam! Ua cas nej tsis los zaum ntawm cov rooj tog uas zaum zov kuv. Nej pheej mus tauv pem thiab tham qw zom zaws. Nej puas paub tias kuv tau mus txog Tswv Ntuj lub Ceeb Tsheej, kuv tau pom ntau yam zoo thiab paub tseeb tias Tswv Ntuj lub Ceeb Tsheej muaj tseeb tiag. Kuv xav tham qhia nej paub txog kev ntseeg Ntuj."

    Tsis tas li ntawd, tus txiv neej uas tuag ntawd tseem hais ntxiv rau nws poj niam tias: "Koj niad! Nej txhob mus tam tham pem ma! Nej kav tsij los zaum zov kuv thiab mloog kuv hais." Ces nws tus poj niam teb tias: "Awj! Peb mam ua li koj hais os!"

    Lub caij ntawd, cov neeg hauv lub tsev pam tuag
    Tas lawv ib tse neeg qhuas thiab zoo siab uas lawv tau rov qab hnov lawv txiv lub suab hais lus. Lawv ntseeg tias muaj Tswv Ntuj tiag. Lawv ntseeg lawv txiv cov lus. Vim yog ib qho muaj tseeb thiab pom xyeem ntawm qhov muag. Cov xwm no tsuas yog tshwm sim ib pliag sai sai hauv lub tsev pam tuag xwb.

    Hnub tom qab, tus txiv neej uas tuag lawd ntawd tseem xav rov qab qev tus poj niam tuaj ua qhua ntawd lub cev hais lus dua; tab sis tus poj niam tuaj ua qhua pam tuag ntawd ntshai ces nws tswj nws tus kheej khov khov, nws tsis xav kom rov qab zoo li qub, ces thiaj ua rau tus txiv neej uas tuag lawd ntawd rov qab los hais lus tsis tau lawm.  Tus poj niam uas tuaj ua qhua thiaj hais tias hnub tom qab tus txiv neej ntawd rov los ntag, lub sij hawm ntawd mas tus qhua niam hnov zoo li nws qaug zog heev thiab ua rau nws rua lo heev. Ces nws paub tias yuav rov qab muaj xwm li qub dua, tus poj niam thiaj li tswj nws tus kheej ruaj ruaj, tsis pub kom muaj dab tsi tshwm sim. Yog tus poj niam ntawd txhob tswj nws tus kheej thiab tsis khiav tawm ntawm lub tsev tuag, mas yeej yuav rov muaj xwm tshwm sim dua xwb.

    Kwv tij hmoob, tej yam no yog tej yam uas yus tau hnov dua, tab sis tsis tau pom dua. Tus tau hnov tab sis tsis tau pom dua mas xav tias dag; tab sis tus tau hnov thiab pom kiag mas nws ntseeg tias muaj tseeb tiag. Zaj no tshwm sim hnub tim 3 lub 7 hli xyoo 2012. Nyob hauv lub zos Khej Me. Tus txiv neej uas tau tag sim neej no lub npe hu ua Lus Kas Tswv Cob Lis, nws tus ntxhais hu ua Pham Lis, tus qhua niam yog Tswv Cob Lis ib tug niam ntxawm uas nyob sib ze ntawd.


    Ntsuj plig teb chaws them txim Maria Simma. 31113010
    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5526
    Date d'inscription : 2009-08-18

    Ntsuj plig teb chaws them txim Maria Simma. Empty Re: Ntsuj plig teb chaws them txim Maria Simma.

    Post  Maiv Tooj 7th September 2017, 9:40 am



    Maria Sima tham txog cov ntsuj plig nyob teb chaws them txim ua lu fab kis.


    Sponsored content


    Ntsuj plig teb chaws them txim Maria Simma. Empty Re: Ntsuj plig teb chaws them txim Maria Simma.

    Post  Sponsored content


      Current date/time is 18th March 2024, 9:53 pm