Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» COV ZAJ NYEEM HNUB CHIV XYOO A 2016-2017
by NrhiavTswvNtuj 8th December 2016, 12:32 pm

» XH.Zoov Ntxheb Yaj Nthuav Ntawv Ntshiab.
by Maiv Tooj 8th December 2016, 12:26 pm

» XH. Yaj Zoov Ntxheb lub Tsev THOOB TSIB
by Maiv Tooj 8th December 2016, 12:18 pm

» COV ZAJ NYEEM NRUAB LIS PIAM XYOO I 2016-2017
by Mim 8th December 2016, 5:41 am

» Xib Hwb Thoj Xyooj lub neej
by Maiv Tooj 6th December 2016, 10:30 pm

» Thov Leej Ntshiab YOS XES
by Maiv Tooj 3rd December 2016, 10:36 am

» COV ZAJ NYEEM NRUAB LIS PIAM XYOO II, 2015-2016
by Mim 2nd December 2016, 1:29 pm

» Qhia keeb kwm kev ntseeg. TP.Cwj Vuam CChiv.
by Maiv Tooj 28th November 2016, 9:58 pm

» Yes Xus lub ntsej muag tiag tiag.
by NrhiavTswvNtuj 26th November 2016, 1:52 pm

» HMOOB NPAM NAJ XEES
by NrhiavTswvNtuj 21st November 2016, 9:15 am

» MOO QAIJ QAUG
by Maiv Tooj 20th November 2016, 9:45 am

» TP.Txhiaj Foom lub TSEV Ntawv
by Maiv Tooj 19th November 2016, 12:04 pm

Suav neeg tuaj saib, txij hnub 17/09/2010 los mus.


    COV NTSIAB LUS NYOB HAUV ZAJ KUV NTSEEG

    Share

    Mim
    Tswv Cuab Hmong Catholique
    Tswv Cuab Hmong Catholique

    Messages : 1649
    Date d'inscription : 2009-10-16

    COV NTSIAB LUS NYOB HAUV ZAJ KUV NTSEEG

    Post  Mim on 7th November 2013, 9:03 am

    Nyob zoo sawv daws,

    Kuv pheej tsis tau tuaj sau zaj rau hauv no tau ntev heev lawm.  Hnub no kuv lam tuaj tso ib co lus piav txog zaj "Kuv Ntseeg." Nej coob leej yeej paub zaj no zoo lawm, tiam sis kuv tuaj tso rau kom tej tus uas tsis tau paub zoo ho tob taub ntau zog xwb os.



    COV NTSIAB LUS NYOB HAUV ZAJ ‘KUV NTSEEG’

    Peb muaj ib co nqe lus los yog ntsiab lus tseem ceeb uas peb ntseeg txog.
    Cov nqe lus ntawd yog zaj peb hu tias ‘Zaj Kuv Ntseeg…’ Lus Aas Kiv hu ua ‘The Creed.’
    Peb hais zaj ntawd ua ib zaj teev ntuj. Niaj zaus peb tuaj teev ntuj Hnub Chiv, peb hais zaj ntawd thaum txiv plig nthuav Ntawv Ntshiab (homily) tas lawm. Muaj ob zaj ntseeg. Thaum peb teev ntuj nrog cov Mes Lis Kas, mas peb hais zaj ntev uas hu ua ‘Nicene Creed,’ txhais hais tias Zaj Ntseeg Nicea, yog Zaj Ntseeg uas lub Koom Txoos tau kho thaum lawv ua lub Rooj Ncauj Lus nyob Nicea, xyoo 325 A.D.  Nws yeej zoo ib yam li zaj luv uas peb hais ua lus Hmoob thiab, tiam sis nws piav ntau zog xwb. Zaj luv muaj lub npe hu tias “The Apostles’ Creed,” txhais tias ‘Zaj Ntseeg raws cov Hauv Paus Xa Lus.’ Tos ho hu ua “Apostles’ Creed” yog vim cov ntsiab lus ntawd yog cov thaum ub cov Hauv Paus Xa Lus tau qhia ces thiaj tau muab khaws coj los ua ib zag qhia rau sawv daws los txog niaj hnub no.

    Hais zaj “Kuv Ntseeg…”,  “Apostles’ Creed”

    Kuv ntseeg txog Tswv Ntuj,
    yog keej Txiv muaj hwj huam tas nrho, yog tus tsim ntuj tsim teb.
    Kuv  ntseeg txog Yes Xus Pleev,
    Yog Tswv Ntuj leej Tub twm zeej, yog peb tus Huab Tais.
    Leej Ntuj Plig ua kom nws xeeb los ua neeg.
    Nws yug ntawm nkauj Ntshiab Mab Liab los.
    Lub caij Pis Las Tos ua nom,
    Yes Xus raug luag hiam thiab ntsia saum Ntoo Cuam.
    Nws tuag mus zwm av, mus txog ntuj txias teb tsaus.
    Hnub peb, Yes Xus sawv hauv cov tub taug rov los.
    Nws nce mus lawm saum ntuj, zaum ntawm leej Txiv phab xis.
    Nws yuav rov los txiav txim rau cov neeg ciaj neeg tuag.
    Kuv ntseeg txog leej Ntuj Plig Ntshiab,
    Ntseeg txog lub Koom Txoos Ntshiab cia rau lub qab ntuj neeg,
    Ntseeg txog tsoom leej Ntshiab sib koom Ntuj lub txiaj ntsim,
    Ntseeg txog kev daws txhaum,
    Ntseeg leej neeg lub cev kev sawv rov los,
    Ntseeg txog muaj txoj sia nyob mus li.
    Ua li.

    Piav ib nqe zuj zus tuaj:

    Kuv ntseeg txog Tswv Ntuj …
    Lo lus ‘ntseeg’ mas muaj ntau yam ntseeg. Xws li peb ntseeg tau tias ib tsam yuav tsaus ntuj, tag kis yuav kaj ntug. Peb ntseeg tau vim peb twb pom dua los, nws yeej muaj tas mus li zoo li ntawd tsis sav ib zaug li, ces yeej tseem yuav muaj li ntawd ntxiv xwb. Peb tseem ntseeg tias nyob ntiaj teb no, cov roob siab tshaj yog cov roob Himalayas. Peb tsis tau mus pom kiag ntawm qhov muag, tiam sis peb tau nyeem ntawv txog, tau pom duab txog, ces peb ntseeg, vim peb ntseeg raws li lwm tus neeg uas tau mus pom hais. Peb kuj ntseeg tau tias, ‘kuv niam kuv txiv hlub kuv.’ Peb ntseeg tau, vim peb pom peb niam peb txiv tu peb, nplij peb, cob qhia peb, ua tas puas tsav yam kom peb tau yam zoo. Peb ntsuas tau los mloog tau nyob hauv peb nruab siab tias lawv hlub peb, thiab peb kuj hlub lawv.  Peb ntseeg txog kev hlub vim peb pom tau tej yam tus neeg hlub ua rau peb, thiab peb kuj ntsuas tau mloog tau nws txoj kev hlub nyob hauv peb nruab siab.
    Ntawm Tswv Ntuj mas, thaum peb tsis tau hnov txog los paub txog Tswv Ntuj, ces peb ntseeg txog dab. Tswv Ntuj kuj zoo li dab uas peb pom tsis tau, chwv tsis tau, hnov tsis tau nws lub suab li, vim Tswv Ntuj yog ntsuj plig xwb.  Tiam sis thaum muaj cov tub tshaj Ntuj Lus tuaj qhia txog Tswv Ntuj rau peb,  muaj ib qho nyob hauv peb nruab siab ua kom peb ntseeg tias muaj Tswv Ntuj, ces peb los ntseeg Tswv Ntuj.  Peb lub siab uas ntseeg Ntuj ntawd yog Tswv Ntuj muab cog rau hauv peb nruab siab. Nws zoo li ib lub noob nplej uas cog rau hauv av, nws yuav tsum pib nthaw kaus hlav cag. Peb yog tus tswv teb, peb yuav tsum tu nraim kom nws tsis txhob qhuav mus, tuag mus. Txhais tias peb yuav tsum kawm tas zog ntxiv kom peb paub Tswv Ntuj zoo zuj zus, ces peb txoj kev ntseeg thiaj yuav loj zuj zus, thiab peb yuav ntseeg ruaj nreb tsis ua xyem xyav.

    yog Leej Txiv muaj hwj huam tas nrho, yog tus tsim ntuj tsim teb.
    Niaj hnub no tej kws txuj mas lawv tsis hais tias yog Tswv Ntuj tsim lub ntuj lub ntiaj teb, los tsim tej tsiaj txhu, los tsim tib neeg. Raws li lawv hais thiab lawv xav mas tas puas tsav yam uas muaj tuaj yog txawj txia ntawm lwm yam los. Xws li niaj hnub no lawv qhia tias tib neeg yog txia ntawm liab los, luag hu txoj kev txia ntawd hu ua “evolution.” Lo lus evolution yog txhais tias ‘txawj txia txawj hloov mus ua lwm yam.’ Raws li kuv xav mas tsis yog nws cia li nyob nyob nws txawj txia nws, tiam sis yog Tswv Ntuj lub hwj huam ua kom txia, nws thiaj txawj txia. Thiab qhov loj tshaj yog qhov tias leej twg yog tus pib kom muaj tas puas tsav yam? Lub hauv paus uas pib tas puas tsav yam yog leej twg? Tej kws txuj mas lawv tsis ntseeg tias yog Tswv ntuj lub hwj huam chiv kom muaj tas puas tsav yam.
    Thaum peb nyeem nyob hauv ntawv Ntshiab, mas tas puas tsav yam yog Tswv Ntuj tsim. Nws muaj peev xwm los yog muaj hwj huam loj tas nrho, nws tsis tau siv dab tsi los tsim li. Nws tsuas hais nws lo lus xwb ces cia li muaj tuaj. Ntawm neeg mas nws twb xub tsim tau av lawm, nws mam li muab av los puab thiab tshuab pa rau kom neeg ciaj sia tau. Txhais tau tias, tib neeg muaj ib lub cev nqaij uas yog tawm hauv av los, tej zaum yuav txia ntawm lwm yam lod, tiam sis nws tus ntsuj plig, nws lub tswv yim, nws lub siab ntsws yog Tswv Ntuj muab. Vim li ntawd Ntawv Ntshiab thiaj qhia hais tias “Tswv Ntuj tsim tib neeg kom zoo li nws.” Yog li qhov twg thiaj ua kom peb zoo li Tswv Ntuj? Vim Tswv Ntuj paub tas ib puas tsav yam, nws yog tus tsim tas ib puas tsav yam, thiab nws yog tus muaj txoj tseem kev hlub, mas tib neeg zoo li Tswv Ntuj me ntsis, tib neeg thiaj yog ib tug muaj kev txawj kev ntse txawj xav tswv yim, txawj nrhiav tsim tej yam tshiab, thiab muaj txoj kev hlub tob nyob hauv neeg nruab siab thiab neeg muaj ib tug ntsuj plig uas tsis txawj tuag.
    Tswv ntuj yog tus tsim tas ib puas tsam yam thiab tsim tib neeg, nws thiaj li yog Leej Txiv rau txhua yam. Huab Tais Yes Xus yog tus tau qhia kom peb hu Tswv Ntuj ua Peb Txiv. Zaj “Peb Txiv nyob saum ntuj…” yog zaj teev ntuj uas Yes Xus tau qhia rau peb hais.





    Kuv ntseeg txog Yes Xus Pleev, yog Tswv Ntuj leej Tub twm zeej, yog peb tus Huab Tais.
    Lo lus ‘Yes Xus Pleev’ txhais hais tias HT Yes Xus yog tus uas Tswv Ntuj tau xaiv thiab muab roj pleev nws ua vaj kav tib neeg. Vim li ntawd nws thiaj yog peb tus Huab Tais.
    Peb ntseeg hais tias Yes Xus yog Tswv Ntuj leej Tub. Tiam sis nws tsis yog yug ntawm Leej Txiv los li peb tib neeg txawj yug los. Lub Koom Txoos qhia tias, Yes Xus yeej ib txwm nrog leej Txiv nyob los, nws tsis muaj hnub pib hnub yug los li. Thaum Tswv Ntuj tsim lub ntuj lub teb, Yes Xus yeej nyob lawm, nws yeej yog tus tsim lub ntuj lub teb nrog Leej Txiv, nws yog Lo Lus uas Leej Txiv siv los tsim kom tas puas tsav yam muaj tuaj tau(Zam 1: 1-5). Tswv Ntuj tsis muaj ob peb leeg tub, tsuas muaj tib leeg tub xwb, yog Yes Xus Pleev, tus yug los ua tib neeg.




    Leej Ntuj Plig ua kom nws xeeb los ua neeg; nws yug ntawm nkauj ntshiab Mab Liab los.
    Leej Ntuj Plig Nsthiab yog leej twg? Peb kawm hais tias Leej Txiv thiab Leej Tub muaj txoj kev sib hlub loj tshaj plaws ib leeg rau ib leeg, ces cia li yog Leej Ntuj Plig ntshiab lawm. Leej Txiv thiab Leej tub thiab Leej Ntuj Plig yog ib tug Tswv Ntuj xwb, tiam sis kuj ho yog peb leeg sib txawv thiab. Peb hu lawv peb leeg ntawd ua ke hu ua “Tswv Ntuj Peb Leeg”. Lawv peb leeg ua ke ua cov hauj lwm tsim ntuj tsim teb tsim tas puas tsav yam, vim txawm lawv nyias muaj nyias, los lawv nyob ua ke rawv, tsis muaj caij sib ncaim li. Leej Ntuj Plig Ntshiab yog Leej Txiv thiab Leej Tub txoj kev Hlub. Nws yog tus ua kom Yes Xus xeeb los ua neeg.
    Peb nyeem zaj piav txog tus tshiab saum ntuj hu ua Nkas Nplias, tuaj hais rau Mab Liab tias, nws yuav xeeb ib tug tub. (Lus Kas 1: 30-38) Peb ntseeg tias, Niam Mab Liab xeeb tub, tsis yog tib neeg ua kom nws xeeb tub, yog Tswv Ntuj Leej Tswv Yim Ntshiab ua kom nws xeeb tub tau. Vim Yes Xus yug ntawm Mab Liab los, mas nws yog tseem neeg tiag, nws muaj ib lub cev nqaij thiab ib tug ntsuj plig ib yam li peb. Nws yug los ua ib tug mos liab, nws muaj ib tsev neeg, nws txawj hlob zuj zus los tiav txiv ib yam li peb. Tiam sis nws kuj yog tseem Tswv Ntuj thiab, vim tsis yog tib neeg ua kom nws xeeb los ua neeg, hos yog Tswv Ntuj lub hwj huam uas yog Leej Ntuj Plig Ntshiab ua kom nws xeeb los ua neeg. Vim li ntawd Yes Xus yog Tswv Ntuj Leej Tub, thiab peb hu tau tias Mab Liab yog Tswv Ntuj leej Niam, vim Yes Xus yog Tswv Ntuj.


    Lub caij Pis Las Tos ua nom, Yes Xus raug luag hiam thiab ntsia saum Ntoo Cuam.
    Vim li cas Yes Xus thiaj tau raug txom nyem?  Lub ntsiab ces yog vim nws hlub peb xwb. Nws tau yug los ua neeg twb yog yug los kom tau tuag txhiv tib neeg xwb. Vim nws qhia thiab nrhiav txoj kev ua zoo, ces cov neeg phem ntxub nws, lawv thiaj nrhiav kev txhaum rau nws ris. Yes Xus tau nyiaj tej kev txom nyem ntawd kom tau rhuav peb txoj kev phem kev txhaum pov tseg. Neeg tej txuj tej ci, tej nyiaj txiag cawm tsis tau peb ntawm peb txoj kev ua txhaum ua phem, tsuas yog Yes Xus txoj kev hlub peb raug tsim txom rau peb xwb thiaj cawm peb tau. Peb hais tau tias yog neeg txoj kev ua txhaum ua phem muab Yes Xus ntsia rau saum Ntoo Cuam.
    Yes Xus txoj kev tuag dai saum ntoo cuam puas yog ib txog kev uas neeg dag xev kom sawv daws ntseeg xwb? Yog peb xav paub qhov tseeb ces peb muaj cai mus tshawb tej qub ntaub qub ntawv txheej puag thaum ub saib puas muaj ib tug nom hu ua Pis Las Tos, saib nws puas tau ua tus txiav txim muab Yes Xus Naj Xas Les ntsia dai saum ntoo cuam xwb. Yog peb mus nrhiav nyeem cov neeg Los Mas thaum qub tej ntaub ntawv mas peb yuav pom tias muaj Pis Las Tos npe, muaj piav txog nws ua nom saib sab His Xas Lais teb chaws, muaj hais txog Yes Xus tib si. Peb thiaj paub tias Yes Xus yog ib tug tib neeg tau yug los lub caij Pis Las Tos ua nom tiag.




    Nws tuag mus zwm av, mus txog ntuj txias teb tsaus.

    Peb ntseeg raws li lub Koom Txoos thiab Ntawv Ntshiab qhia hais tias thaum lawv muab Yes Xus dai saum ntoo cuam, nws tau tu siav tau tuag lawm tiag tiag. Nws cov thwj tim tau daws nws lub cev mus zais rau hauv qhov ntxa. Lub caij nws lub cev nyob hauv qhov ntxa, mas nws tus ntsuj plig tau mus txog ntuj txias teb tsaus, uas yog qhov chaw cov neeg xub tau tas sim neej lawd mus nyob tos. Yes Xus tau mus cawm cov neeg uas tau ua ib lub neej zoo neej ncaj ncees kom lawv tau mus saum ntuj. Vim thaum Yes Xus tseem tsis tau tuag, mas cov neeg tas sim neej lawd tsis muaj kev mus saum ntuj tau. Yes xus mus qhib lawv qhov rooj mas lawv thiaj mam tau kev los mus lawm saum ntuj.




    Hnub peb, Yes Xus  sawv hauv cov tub tuag rov los.
    Nyob hauv ntawv Moo Zoo, peb nyeem tias, thaum lawv muab Yes Xus lub cev mus zwm av, mas lawv yeej ntshai tsam Yes Xus cov thwj tim tuaj muab nws lub cev thiab dag tias nws sawv rov los lawm, ces lawv thiaj tso tub rog zov rooj ntxas tib si. Tiam sis thaum Yes Xus cov thwj tim poj niam nqa tshuaj tuaj qhwv nws lub cev thaum sawv ntxov ntxov, lawv tsis pom nws lawm (Saib Mas Tais 28, 1-15). Lawv  hnov av qeeg, lawv pom Tswv Ntuj tus tshiab tuaj dov daim txiag zeb kaw rooj ntxas. Lawv kuj pom tias cov tub rog zov rooj ntxas ntshai kawg li lawv txhav tas zoo nkaus tuag lawm. Tus tshiab hais rau cov poj niam tias lawv nrhiav Yes Xus, tiam sis nws tsis nyob ntawd lawm, nws twb sawv rov los lawm, kom lawv mus hais rau nws cov thwj tim paub, thiab qhia lawv tias Yes Xus ua lawv ntej mus Nkas Lis Lais teb lawm, kom lawv mus lawm ped lawv thiaj yuav pom nws.
    Mas Tais kuj tau piav tias cov tub rog mus ntsib cov thawj leej choj nyob Yes Lus Xas Les, cov thawj leej choj muab nyiaj ntiav lawv kom lawv hais tawm tias yog Yes Xus cov thwj tim tuaj nyiag Yes Xus lub cev nqa mus thaum lawv tsaug zog lawm.
    Yes Xus nyob tau plaub caug hnub hauv ntiaj teb ntxiv, nws tshwm sim rau nws cov thwj tim pom thiab tau ua rau lawv paub meej tias nws yeej sawv rov los lawm tiag. Nws tau cog lus rau lawv tias nws yuav xa Leej Ntuj Plig tuaj pab lawv.
    Lub Koom Txoos qhia hais tias, thaum Yes Xus tuag lawm thiab nws sawv rov los, mas nws lub cev tsis yog cia li ciaj rov los zoo li lub cev qub, xws li thaum Yes Xus tsa Las Ntxas Los sawv rov los, mas nws lub cev qub rov muaj sia tuaj, nws tseem yog tus qub, thiab nws tseem txawj tuag lawm. Hos Yes Xus lub cev sawv rov los muaj hwj chim ci ntsa iab tsis zoo li lub qub lawm, vim nws txawj ploj, txawj mus tau qhov txhia chaw, txawj mus tau yav tom ntej yav tom qab. Vim nws lub cev muaj hwj chim tsis zoo li qub ces Mab Liab Mas Ntas Las thiab cov thwj tim tsis paub nws thaum lawv pom dheev nws.  Yog Yes Xus hais lus rau lawv hu lawv npe mas lawv mam rov paub nws xwb. Lub cev muaj hwj chim ntawd tsis txawj tuag ntxiv lawm.

    Nws nce mus lawm saum  ntuj, zaum ntawm leej Txiv phab xis.
    Cov thwj tim tau ntsia ntsoov Yes Xus nce mus saum ntuj lawm(Lus Kas 24: 50-53; Mas Kos 16: 19-20; Hauj Lwm 1: 6-12). Lawv tau tshaj Yes Xus lub Moo Zoo tias Yes Xus tau yug los ua neeg, tau kho tej neeg mob zoo hlo, tau tsa tej tug tuag sawv rov los, tau qhuab qhia nws pab thwj tim thiab txhua leej uas xav mloog, tau raug txom nyem dai saum ntoo cuam, tau tuag thiab tau sawv rov los muaj txoj sia thiab tau nce mus saum ntuj, mus zaum ntawm Leej Txiv phab xis lawm. Peb paub txog tej yam no yog vim Yes Xus cov thwj tim tau hais lus pov thawj tseg rau peb.
    Tiam sis puas yog hais tias Yes Xus tsis pom peb tsis nyob ze peb li lawd? Thaum peb hais tias ‘nws mus zaum ntawm Leej Txiv phab xis,’ yog txhais tias nws nyob tas qhov txhia chaw ib yam li Leej Txiv Tswv Ntuj lawm. Yog li nws yeej pom peb thiab nrog peb nyob nraim txhua lub sij hawm txhua qhov txhia chaw. Peb nyob txog qhov twg, Yes Xus nrog peb rawv. Peb ua dab tsi, nws pom thiab paub. Txawm peb nyiag ua tej yam zais ntshis, nws yeej paub tag. Peb teev Ntuj, nws nyob ntawd. Peb nyeem Ntawv Ntshiab, yog nws hais lus rau peb. Peb tsis pom nws tiam sis peb ntseeg hais tias nws pom peb saib peb txhua lub sij hawm.


    Nws yuav rov los txiav txim rau cov neeg ciaj neeg tuag.
    Nyob hauv Hauj Lwm 1: 10-11 muaj piav txog thaum Yes Xus nce mus saum ntuj li no:
    10 Thaum Yes Xus nce mus saud lawm, lawv nyob ntsia ntsoov lub ntuj, ces muaj ob tug neeg hnav tsoos dawb los sawv ntawm lawv.
    11 Nkawd hais tias : "Cov neeg Nkas Lis Lais, vim li cas nej nyob ntsia ntsoov lub ntuj zoo li no ? Tus Yes Xus uas luag nqa nws hauv nej mus rau saum ntuj lawd, nws yuav rov los zoo nkaus li nej pom nws nce mus saum ntuj thiab."
    Lub Koom Txoos qhia rau peb ntseeg hais tias thaum lub caij ntiaj teb kawg,Yes Xus yuav rov los, nws yuav los txiav txim rau txhua leej txhua tus, cov tseem ua neeg nyob thiab cov uas twb ncaim mus lawd tib si. Lub caij ntawd, cov tuag yuav sawv rov los muaj lub cev tshiab, cov tseem ua neej nyob lub cev yuav plhis mus ua lub tshiab, sawv daws yuav los mus nyob ntawm HT Yes Xus xub ntiag, thiab nws yuav txiav txim rau txhua leej. Nws paub yam phem yam zoo uas peb tau ua thaum peb ua neej nyob, nws yuav txiav txim rau txhua leej raws li peb tau ua. Yog yus ua lub neej hwm Tswv Ntuj thiab hwm neeg ces yus yuav muaj txoj hmoo tau mus nrog Tswv Ntuj nyob mus li.  Tiam sis yog yus tsis tau ua qhov zoo, yus tau nyiam ua qhov phem, ces yus yuav raug txiav txim mus nrog tug niag phem nyob ib txhis.
    Lub Koom Txoos tsis xav kom peb niaj hnub nyuaj siab txog tias thaum twg lub ntiaj teb mam li kawg, qhov ntawd Yes Xus yeej hais tias tsis muaj neeg paub, tsuas yog Leej Txiv ib leeg thiaj paub xwb. Qhov tseem ceeb rau peb mas yog qhov tias kom peb nyias yuav tsum npaj nyias tus kheej, thaum txog yus hnub kawg(hnub tuag), yus tus ntsuj plig thiaj tau mus nrog Yes Xus thiab nrog Tswv Ntuj nyob xwb. Tsuav yog peb tus ntsuj plig tau mus nrog Tswv Ntuj nyob lawm, ces hnub kawg thaum peb tus ntsuj plig rov mus koom peb lub cev uas sawv rov los tshiab yeej yuav mus nrog Tswv Ntuj nyob tas mus li.

    Kuv ntseeg txog Leej Ntuj  Plig Ntshiab…
    Lub Koom Txoos qhia tias, Leej Ntuj Plig Ntshiab yog ib leeg nyob hauv Tswv Ntuj Peb Leeg. Lawv peb leeg ntawd koom ua ib tug Tswv Ntuj xwb. Peb hais tsis tau tias muaj peb tug Tswv Ntuj. Peb hais tsis tau tias, leej Txiv yog ib tug Tswv Ntuj, leej Tub yog ib tug Tswv Ntuj, leej Ntuj Plig yog ib tug Tswv Ntuj, ces muaj peb tug Tswv Ntuj. Peb hais tsis tau li ntawd, tiam sis peb hais tau tias, leej Txiv yog Tswv Ntuj, leej Tub yog Tswv Ntuj, leej Ntuj Plig yog Tswv Ntuj, lawv peb leeg ntawd yog ib tug Tswv Ntuj xwb. Lawv yog Tswv Ntuj Peb Leeg. Kuv yuav piav ib qho piv txwv kom peb to taub zoo me ntsis. Xws li ib tse neeg muaj leej txiv, leej niam thiab cov me nyuam; peb hom neeg no yog ib tse neeg xwb, peb tsis hais tias lawv yog peb tse neeg. Tswv Ntuj Peb Leeg yog ib yam uas peb lub tswv yim neeg tsis duav, peb to taub tsis txog, xav tsis tawm li, tiam sis yog ib qho uas peb yuav tsum ntseeg.
    Peb yuav pom Leej Ntuj Plig nyob hauv tas puas tsav yam uas zoo, tej yam tsis dag tsis cuav, tej yam uas zoo nkauj zoo saib. Nws nyob hauv lub Koom Txoos, nws nyob hauv tsoom neeg ntseeg. Nws yog tus tshoj ib co neeg kom lawv xyaum ua lub neej ntshiab dawb huv. Yog vim li ntawd peb hais tau tias nws nyob hauv peb nruab siab. Nws yog lub zog uas ua kom yus xav ua neeg zoo coj ncaj thiab txawj hlub luag. Nws yog lub Tswv Yim uas qhia kom peb ntseeg txog Tswv Ntuj thiab ntseeg txog Yes Xus. Thaum peb txais lub Cim Ntxuav, peb txais leej Tswv Yim Ntshiab lub hwj huam los nyob hauv peb, los coj peb ua neeg ntseeg tseem ceeb.

    ntseeg txog lub Koom Txoos Ntshiab cia rau lub qab ntuj neeg…
    Lub Koom Txoos yog tas ib tsoom neeg ntseeg Yes Xus nyob hauv ntiaj teb. Lo lus ‘cia rau lub qab ntuj neeg’ yog txhais lo lus ‘kas tos liv’ uas lub ntsiab yog ‘nyob thoob qab ntuj.’ Lub Koom Txoos Kas Tos Liv yog Yes Xus 12 tug Hauv Paus Xa Lus tau tsa muaj thaum lub hauv paus los. Vim Yes Xus tau hais rau Pob Zeb tias, “Koj yog Pob Zeb, kuv yuav tsa kuv lub Koom Txoos rau saum lub pob zeb no,” mas Pob Zeb yog thawj tus hau thaum lawv nyuam qhuav pib. Cov los hloov Pob Zeb yog cov Vaj Qhia los txog niaj hnub no. Vaj Qhia nrog cov Tswv Qhia yog cov hloov cov Hauv Paus Xa Lus. Lawv yog lub hauv paus cob qhia kev ntseeg Yes Xus, lawv kuj yog cov txiav txim rau peb txoj kev ntseeg, tias peb yuav ntseeg li cas thiab yuav coj li cas thiaj raws li Yes Xus tau qhia. Lub Koom Txoos, txhais tias Vaj Qhia nrog cov Tswv Qhia nrog rau peb sawv daws cov ntseeg, txoj hauj lwm yog tshaj Yes Xus lub Moo Zoo rau tas ib tsoom neeg nyob ntiaj teb kom tau hnov tau paub txog.



    ntseeg txog tsoom Leej Ntshiab sib koom Ntuj lub txiaj ntsim…

    Cov Leej Ntshiab uas hais txog ntawm no yog tsoom neeg ntseeg Yes Xus uas tseem ciaj nyob thiab cov tau tas sim neej lawm tib si. Cov tau tas sim neej lawm, muaj ob pab. Pab ib, yog cov neeg ua neej dawb huv uas lawv tau ncaj qha mus nrog Tswv Ntuj nyob thiab cov uas tau mus nyob teb chaws them txim ib ntus tiam sis twb tau mus nyob saum ntuj lawm. Pab ob, yog cov uas tseem mus nyob them txim txhaum hauv teb chaws them txim tas tso lawv mam tau mus nyob saum ntuj. Peb pab neeg no, cov tseem ciaj nyob, cov nyob saum ntuj, thiab cov nyob teb chaws them txim, lawv sawv daws muaj kev sib faib sib koom Tswv Ntuj lub txiaj ntsim ntawm nws txoj kev cawm seej.
    Lub txiaj ntsim ntawd yog dab tsi? Yog HT Yes Xus cov txiaj ntsim koob hmoov uas nws tau tsim muaj vim nws txoj kev yug los ua neeg, tau raug txom nyem tsim txom, tau tuag thiab tau sawv rov los. Tsis tas li ntawd xwb tas ib tsoom neeg ntseeg thiab cov leej ntshiab uas lawv tau nyiaj lawv tej kev txom nyem thiab muab fij rau ntuj kom tau pab them txim txhaum, kuj muaj txiaj ntsim koob hmoov thiab, uas lawv muab ntxiv rau Yes Xus cov txiaj ntsim koob hmoov kom pab tau lwm tus. Tas nrho cov neeg ntshiab tej txiaj ntsim koob hmoov nrog rau Yes Xus cov txiaj ntsim koob hmoov yog Tswv Ntuj lub txiaj ntsim. Txhua leej txhua tus neeg ntseeg muaj cai siv Tswv Ntuj lub txiaj ntsim ntawd pab nws kom nws tau txais kev cawm. Muab piv tau rau ib lub txhab nyiaj txhab kub uas tag nrho tsoom neeg ntshiab muaj cai mus rho tau los siv rau nyias.


    ntseeg txog kev daws txhaum…
    Nyob hauv Koom Txoos Kas Tos Liv, peb muaj txoj kev daws txhaum nyob hauv lub Cim Daws Txhaum. Yog txiv plig thiaj ua tau lub Cim Daws Txhaum xwb. Cov tsis tau txais lub cim tiag tes ua txiv plig tsis muaj lub hwj huam yuav daws txhaum tau. Txoj kev daws txhaum yog los ntawm qhov Yes Xus tau hais rau nws cov thwj tim tias, “Nej daws yam twg nyob ntiaj teb no, yam ntawd kuj yuav daws nyob saum ntuj; nej khi yam twg nyob ntiaj teb no, yam ntawd kuj yuav khi nyob saum ntuj.” (Zam 20, 21-23) Yes Xus tau tso nws lub hwj huam daws txhaum tau ntawd rau nws cov thwj tim. Cov thwj tim kuj tau ua lub Cim Tiag Tes tso lub hwj huam ntawd rau cov uas los pauv lawv. Lawv tau ua li ntawd tiam dhau tiam los txog niaj hnub no. Cov tswv qhia thiab cov txiv plig yog cov hloov cov thwj tim chaw. Lawv thiaj muaj cai daws txhaum tau.
    Nyob hauv Koom Txoos kas Tos Liv, ib tug deacon tau txais lub cim tiag tes ua deacon xwb, tsis yog lub cim tiag tes ua txiv plig, vim li ntawd tus deacon tsis muaj cai daws txhaum, thiab tsis muaj cai ua lub Cim Pleev Roj rau ib tug neeg mob, vim lub Cim Pleev Roj muaj lub Cim Daws Txhaum nrog.
    Yog vim li cas Koom Txoos Kas Tos Liv thiaj muaj lub Cim Daws Txhaum? Thaum peb los lees ntseeg Tswv Ntuj thiab txais lub Cim Ntxuav kom tau yug los tshiab ua Tswv Ntuj me nyuam, mas cov dej ntxuav plig muab lub keeb txhaum nyob hauv peb thiab muab peb cov txhaum uas peb tus kheej tau ua, muab ntxuav pov tseg tas nrho, ces peb tus ntsuj plig dawb dawb huv huv lawm. Tiam sis peb tseem txawj ua txhaum ntxiv thiab. Vim peb tsuas muaj cai txais lub Cim Ntxuav ib zaug xwb, yog li no peb muaj ib txoj kev uas yuav ntxuav peb cov txhaum uas peb niaj hnub ua pov tseg, yog lub Cim Daws Txhaum. Lub Koom Txoos qhia hais tias peb yuav tau nquag mus daws txhaum, qhov zoo tshaj yog ib hlis ib zaug.





    ntseeg txog  neeg lub cev yuav sawv rov los…

    Vim Yes Xus lub cev tau sawv rov los lawm, peb cia siab hais tias muaj ib hnub twg, thaum lub caij ntiaj teb kawg,  peb lub cev kuj yuav sawv rov los muaj txoj sia dua, yuav muaj hwj chim, thiab yuav tau mus nrog Tswv Ntuj nyob nyob saum ntuj tas mus ib txhis. Niaj hnub no, thaum peb lub cev tas txoj sia, peb lub cev yuav tsum mus nyob zwm av tos. Yuav yog thaum ntiaj teb kawg, peb lub cev thiaj mam sawv rov los tau thiab rov los koom nrog peb tus ntsuj plig muaj txoj sia nyob mus li tsis txawj tag tsis txawj kawg.




    thiab ntseeg txog muaj txoj sia nyob mus li.
    Vim Yes Xus tau sawv rov los thiab muaj txoj sia nyob mus li nyob saum ntuj lawm, peb ntseeg tias muaj ib hnub twg peb kuj yuav tau mus saum ntuj, thiab yuav nyob tas mus li tsis txawj tuag txiv. Peb tsis paub hais tias saum ntuj yuav zoo li cas tiag, tiam sis peb paub tau tias tas puas tsav yam yuav zoo tshaj nyob ntiaj teb no, vim nyob saum ntuj, peb yuav pom Yes Xus, yuav pom Tswv Ntuj thiab paub nws txoj kev hlub, yuav tsis muaj kev txom nyem kev quaj ntsuag li nyob ntiaj teb lawm.
    Koom Txoos Kas Tos Liv qhia tias, thaum peb txoj sia tu, peb lub cev nqaij uas yog Tswv ntuj muab av puab yuav rov mus ua av, tiam sis peb tus ntsuj plig tsis txawj tuag, tus ntsuj plig yuav mus cuag Tswv Ntuj, los mus cuag dab phem nyob ntawm saib peb xaiv txoj twg thaum ua neej nyob.  Peb lub cev mus ua av txog thaum hnub ntiaj teb kawg, peb lub cev mam li yuav sawv rov los dua, ua dua ib lub cev tshiab muaj hwj chim los koom peb tus ntsuj plig mus nrog Tswv ntuj nyob mus tas ib txhiab ib txhis.  Cov lawv tsis xaiv Tswv ntuj los lawv lub cev kuj yuav sawv rov los dua, tiam sis lawv lub cev yuav nrog lawv tus ntsuj plig mus zwm rau dab phem thiab raug txom nyem mus li.

    Ua li.
    Lo lus “Ua li,” yog txhais tias, “Xav kom muaj raws li ntawd,” los “Tseev kom muaj raws li ntawd.”




    Yaj Suav Nus
    Phooj Ywg
    Phooj Ywg

    Messages : 279
    Date d'inscription : 2009-10-23

    Re: COV NTSIAB LUS NYOB HAUV ZAJ KUV NTSEEG

    Post  Yaj Suav Nus on 8th November 2013, 10:20 am

    Nyob zoo Mim,
    Kuv siv lub sij hawm no hais: nyob zoo rau cov phooj ywg txhua tus.
    Cov ntsiab lus hauv zaj KUV NTSEEG... koj tau sau meej kawg thiab ntxaws kawg lawm, kuv thov qhua koj. Yog koj muaj sih hawm no maj mam tuaj sau lwm zaj cov ntsiab lus ntxiv. Xyov puas yuav muaj lwm tus sau tau meej thiab ntxaws li koj lawm.
    Ua tsaug.

    Y. Suav Nus

    Mim
    Tswv Cuab Hmong Catholique
    Tswv Cuab Hmong Catholique

    Messages : 1649
    Date d'inscription : 2009-10-16

    Re: COV NTSIAB LUS NYOB HAUV ZAJ KUV NTSEEG

    Post  Mim on 10th November 2013, 3:14 pm

    Nyob zoo txiv Suav Nus,

    Ua koj tsaug ntau uas koj tseem tau tuaj hais ib co lus qhuas txhawb kuv dag zog thiab os. Cia saib kuv nrhiav puas tau sij hawm tuaj sau lwm yam ntxiv. Yeej muaj ntau yam uas xav tuaj sau kawg, yog tsis tau muab sij hawm ua xwb.

    Sponsored content

    Re: COV NTSIAB LUS NYOB HAUV ZAJ KUV NTSEEG

    Post  Sponsored content Today at 3:40 am


      Current date/time is 10th December 2016, 3:40 am