LUB CIM PLEEV.

Ib zaj kwv huam nyuam qhuav tshwm sim tsis ntev no.

Muaj ib tug yawg mob nyhav, ib hnub kuv leej nkawm wb txawm mus xyuas tim tsev kho mob; mus txog nws kuj nyob cus plaws, tab sis zoo li nws tsis tshua paub tom ntej tom qab lawm. Wb mus txog, nws poj niam zoo siab heev, txawm hais rau nws, uas pheej hais lus tsis tso tseg li, tias: "Koj puas paub ob tug ntawd yog leej twg?" Nws teb tias paub kawg, paub zoo kawg. Tab sis zoo li nws pheej tsis ntsia wb, li tsis pom wb, ntsia li nws ntsia nws lwm yam. Wb nyob ib pliag, wb nrog tus tub hlob tham me ntsis txog Kws tshuaj cov lus plov meej rau lawv ces wb kom tus tub thiab nyab nyob zov nws wb txawm nrog tus niam los mus tom lawv tsev ib pliag. Los ces kuv xav los zoo li yuav yog ib qho nyuaj, ib qho nyhav heev ntshe yuav tsis dim tus mob, kuv txawm hais kom leej niam mus nrhiav ib tug Txiv Plig tuaj ua lub Cim Pleev rau nws; leej niam teb tias tsis txawj hais es yuav ua li cas, kuv thiaj kom nws mus hais nws tus ntxhais kwv (tus niam hluas tus ntxhais) pab ntau xov tooj nrhiav. Nws rov hais tias tsis paub yuav piav li cas rau lawv, ces kuv txawm sau ua lus hmoob thiab lus fab kis tib si rau ib daim ntawv kom nws muab li ntawd rau tus ntxhais kwv.

Wb ob niam txiv txawm rov los tsev lawm.
Lawv mus nrhiav tau Txiv Plig tuaj ua lub Cim Pleev rau tus neeg mob Hnub Peb, tim 14-05-12013 thaum 14h15.

Ib txwm tus yawg no nws coj lub neej ntxhov siab, nws tsa hwj chim rau cov niam tub, nws ua ywj nws lub siab ntau ua rau cov niam tub muaj kev tu siab ntau yam, nws tseem hla txoj cai lij choj zaum puav thaum tsis ntev dhau los no nws kuj nrhiav tham nkauj hmoob nplog nyob cab sab ntau xov tooj ua hnub ua hmo, ib hlis tej nqe txog li 2.400€, twb tsis xam cov uas niaj hli xa mus pub lawv thiab.

Zoo li nws twb feeb tsis meej, tsis pem lawm, thaum Txiv Plig nrog ib tug phauj tuaj teev Ntuj ua lub Cim Pleev rau nws, Txiv Plig hais lus Las Tees xwb, nws twb tsis paub thiab nws kuj tseem twb sis paub lus fab kis zoo li; txawm yog hais ua lus fab kis kiag los nws yeej tsis to taub tag. Tab sis thaum Txiv Plig ua lub Cim Pleev rau nws tag, ces nws rov tsim meej meej los hais lus rau nws cov niam tub, hais ib tug dhau ib tug, hais tag puas tsav yam rau lawv; nws thov txhaum ntawm lawv ib tug dhau ib tug tag nrho nws sim neej uas nws tau ua siab lawv thiab cem lawv. Tej yam nws tus poj niam paub txog los nws hais tej yam uas nws ua nws es poj niam tsis paub txog los nws hais tib si, nws thov txim ntawm nws poj niam thiab cov me nyuam txhua tus ua ntu zus.

Nws hais tias: "Dab phem los nyob ntawm nws ob lub qhov muag, es dab phem kom nws ua phem rau nws cov niam tub, nws thiaj li tau ua phem tag nrho ib sim neej rau lawv."
Nws hais tias thaum Txiv Plig tuaj teev Ntuj rau nws tag ces zoo li leej twg muab nws ob lub qhov muag ntxuav, ua rau nws pom txawv, nws pom txoj kev hlub. Muaj ib tug poj niam hais rau nws tias: "Txij no koj txhob ua phem ntxiv lawm."

Ces nws hais tag puas tsav yam rau nws poj niam, nws poj niam tus niam hluas mus xyuas los nws yeej tham tib yam, nws hais quaj, hais quaj, nws hais tias nws tsis kam ris lub nra nyhav ntawd, nyhav nws heev nws yuav muab hle pov tseg. Txij no mus nws yuav los ua neeg zoo, nws yuav los ua ib tug txiv zoo rau nws cov niam tub. Nws hais thiab quaj tau ob hnub ces nws cia li tsis hais lus li lawm. Hnub Chiv 19-05-2013, kuv hais kom tus niam mus teev Ntuj no ces nws nqa lub Cim Yug los rau nws noj. Hnub ntawd, tus niam mus nqa tau Yes Xus lub Cev los rau nws noj, tus niam kom nws los tom txaj (cov me nyuam tuaj qhov txhia chaw tuaj xyuas nws ces thov lawv tso nws los tsev nruab hnub me ntsis), kom nws ua Ntoo Cuam Lub Cim tag teev zaj Peb Txiv thiab zaj Koj Nyob Zoo Mab Liab, nws sab sab hais tsis tshua taus tab sis tus poj niam nrog nws hais ua ke, nws kuj ua tiag hais tag ces tus poj niam muab lub Cim Yug rau nws noj. Dhau hnub ntawd los ces nws tsis tham lus ntxiv lawm, yog nws xav sawv xav zaum, xav mus tsev dej los nws hais kom lawv coj nws mus xwb. Zoo li nws tsis xav hais dab tsi ntxiv tsam nws ho ua txhaum ntxiv xwb. Nws xav nyob dawb huv li uas lub Cim Pleev ntxuav nws thiab nws tau lees nws cov txhaum hauv nruab siab tag nrho yam tsis txaj muag thiab tsis khuv xim, tsis ntshai poob tsim li. Nws tseem hais ntxiv tias: "Cov niag hluas nkauj tim nplog teb ces nej tsis paub xwb, twb tsis yog hluas nkauj, yog tib cov dab phem ntxias neeg xwb." Dhau li ntawd tsis ntev hnub ces nws tso lub ntiaj teb tseg.

Yam ib tug neeg uas yus paub, yus txheeb nws, yus kuj khuv xim kawg uas nws yuav ploj mus ib sid tsis rov. Tab sis pom qhov uas nws yog ib tug neeg yug los tsis zoo nqaij zoo tawv, tsis muaj laj lim tswv yim, nws nim ntshaw ntshaw kom luag hwm es nws thiaj ua neej yuam kev rhuav, txog thaum kawg nws hle tag nrho nws lub nra rau ntiaj teb yam tsis txaj muag, mas kuv kuj zoo siab heev tias thaum nyob ntiaj teb nws yog tus txom nyem tshaj uas tsis muaj suab muaj npe, tus tsis khuab qhov muag tab sis hnub no nws tso lub ntiaj teb tseg yam dawb huv, ntshe nws yuav yog tus tau txiaj ntsim tshaj; vim nws tau txais lub Cim Pleev, nws tau txais Yes Xus lub cev rau lub caij kawg ntawm nws lub lav mob, nws tau xeev rov qab los leev txhaum tag puas tsav yam rau lub ntiaj teb no mam li mus fim Tswv Ntuj. Yog ib qho uas zoo tshaj plaws.

H.Y
Tag sim neej rau hnub tim 27/05/2013 thaum ib tag hmo.
Fab Kis teb.

Tus sau: Maiv Tooj.

Nyob zoo tais tooj,

Koj zaj lus pov thawj txog lub Cim Pleev saum no zoo pab peb cov nsteeg Hmoob kawg li. Thaum peb muaj neeg mob hnyav, peb yuav tsum tau nco ntsoov nrhiav Txiv plig tuaj ua lub Cim Pleev rau. Lub Cim Pleev yog ib lub cim ntxiv zog thiab daws txhaum rau tus neeg mob. Nws yuav pab kom tus neeg mob muaj siab ntev nyiaj nws tus mob mus txog qhov kawg, thiab kuj pab daws txhaum rau tus neeg mob, tseem ceeb yog daws nws cov txhaum hnyav, kom nws thiaj tau txais kev cawm seej.

Vim tus txiv neej no nws tau los lees nws cov txhaum tas rau nws poj niam thiab nws tsev neeg, nws mam ncaim mus lawm, yog li peb ntseeg thiab tso siab tau tias nws yeej tau txais kev cawm thiab tau mus saum ntuj xwb. Peb nrog nws tsev neeg zoo siab.

Nyob zoo Mim,

Zaj no, kuv hwm tus neeg mob, kuv tsis xav hais nws qhov phem thaum nws tseem ua neej nyob; tab sis kuv thov txim ntawm nws tsev neeg uas kuv tau muab los tham kom ua ib tug qauv, ua ib qho piv txwv rau Peb Haiv Hmoob thaum ntuj kawg xub ntsa teb kawg xub ntoos yuav tsum nco txog kom Txiv Plig ua lub Cim Pleev rau cov neeg mob es tsis yog tseem yuav mus fiv yeem, mus fiv nyuj dab npua tai rau nws. Thaum kuv hnov coob leej ua li no mas ua rau kuv tu siab tshaj li; tsim nyog lawv yuav txhab tus neeg lub zog thiab daws tus neeg cov txhaum ua ntej yuav kawg, tseem tsub txhaum loj tshaj rau lub caij kawg kiag thiab. Peb ua ib cov neeg "UA NTUJ KEV CAI, TSIM NYOG PEB YUAV TSUM PAUB KEV CAI." (Nyob rau Fab Kis teb, cov tsev kho mob loj, yeej muaj ib tug Txiv Plig saib xyuas hauv, yog tsis paub ces nug tus qhia ntawm qhov rooj (Accueil) mas lawv yuav qhia rau nej. Yog tsev kho mob me ho tsis muaj Txiv Plig los nej mam nug tus Txiv Plig uas nyob ntawm nej lub tsev teev Ntuj los yog nyob lub tsev teev Ntuj ntawm lub tse kho mob lub zos kuj tau, lawv tuaj ua dawb rau nej xwb, ua Cim Pleev yog ib lub txiaj ntsim tuaj ntawm Ntuj tuaj, lawv tsis yuav nyiaj).

Ua ntej kuv yuav hais tus poj niam, kuv kuj chim thiab tu siab rau tus yawg no uas nws tsim nws poj niam me nyuam tag ib sim neej; kuv xav tias cia nws mus pom dab teb ntshe nyuam qhuav ntxim qhov uas nws txov luag ib sim neej txog qhov uas ua li cas los tsis txaus siab es tseem npaj siab muab riam tua nws poj niam ob peb zaug; tab sis zoo li Ntuj tsis pub luag tuag ces zaum twg los sav lawm xwb luag thiaj tsis tuag. Tab sis kuv ho xav tias: "Yog kuv cawm tau ib tug ntsuj plig no ntshe Tswv Ntuj yuav zoo siab heev." ces kuv thiaj li ua siab hais nws poj niam kom ua tej kab ke li tau hais los saud. Thaum kawg, nws poj niam kuj zoo siab thiab tu siab kawg li; vim ua ib sim neej, ua cas tsis muaj hnub tshav li; tsuas yog yam lub cub tawg ntaiv zuj zus txog ntua lub caij kawg; ua cas thaum yuav kawg kiag hos hloov hlo ua tus neeg tshiab, hais tej lus uas cuag li twb tsis yog nws tus kheej hais rau yus cov niam tub, hais cov lus uas tej me nyuam tos tos nploj tag, tos tos tu siab tag es ho twb yuav ploj mus mam tau ces twb ho yuav sib ncaim...

Kuv hais rau nws tias: " Txhob tu siab, yuav zoo siab, nws yug los ua neeg zaum no nws tsis muaj hmoo, nws yug los tau cev nqaij daim tawv tsis npliag, yug tau los lub laj lim tswv yim tsis txaus, nws nim ntshaw ntshaw kom luag hwm, luag saib taus, luag qhuas es nws thiaj muab nws lub hwj chim tsa rau nej vim nws tswv yim tsawg, nws xav tias yog nws ua tau heev ua tau nyaum rau nej ces yog nws muaj hwj chim; nws thiaj tau ua yuam kev rhuav li ntawd. TAB SIS HNUB NO, NWS YUAV YOG TUS MUAJ HWJ CHIM  loj TSHAJ COOB LEEJ UAS UA NEEJ NTO MOO LUG NYOB NTIAJ TEB; VIM NWS TXO NWS LUB HWJ CHIM TAG NRHO NTAWM NEEG XUB NTIAG THIAB NTAWM TSWV NTUJ XUB NTIAG. PEB YUAV ZOO SIAB TIAS NWS TAU LUB HWJ CHIM LOJ TSHAJ QHOV NWS NTSHAW NYOB NTIAJ TEB NO LAWM. Thaum kuv hais li no rau nws poj niam, nws poj niam kua muag tu nrho, zoo li lub siab kaj lug yam twb xav tsis txog.

Tus ntxhais uas nrhiav Txiv Plig tuaj ua lub Cim Pleev ntawd tham tias nws niam mus xyuas los, nws niam los tham quaj tham quaj txog tus yawg no cov lus uas thov txim ntawm sawv daws. Nws niam hais tias yawg hais hais lus tsis tso tseg li, zoo li yawg sab sab tham tham ib chim ces yawg qe muag lawm tab sis lub ncauj mas tham tas zog li. Tham ntev ntev noj hmo tag, lawv muab ob lub tshuaj tsaug zog rau yawg noj ces yawg nkees nkees, yawg txawm hais rau nkawd ob viv ncaus tias: "Kuv tham ntev ntev lawm, kuv xav tsaug zog ces kuv tham li no xwb es cia kuv pw tso taig kis kuv mam nrog nej tham dua."
Tus ntxhais hais ntxiv hais tias: "Tsis xav tias lub Cim Pleev yuav muaj zog npaum li no."

PS. Tsis nco qab hais txog ib qho, yam li thaum kuv leej nkawm wb mus xyuas thawj zaug uas nws hais plaws plom tab sis tsis meej pem ntawd, nws lub ntsej muag zoo li o ntxob thiab doog doog, zoo li thaum yus zawm caj pas es ua rau lub ntsej muag dub doog nkawv, ntxob li ntshav txim es doog. Tab sis tom qab nws txais lub Cim Pleev tag, nws los hais lus zoo thiab thov txim nws cov niam tub tag, kuv leej nkawm wb rov mus xyuas nws, nws lub ntsej muag tsis o, tsis doog lawm. Nws lub ntsej muag dawb paug, yuag thiab ntshiab si. lub qhov muag tsis ntxob, nws nyob ntshiab si thiab dauv muag lawv lawm xwb.

Thaum thov Ntuj rau ib tug, yog yus tsa tes rau saum nws mas, yuav txhob qhaws cov ntiv tes, yuav tsa cov ntiv tes nrhab kom Leej Ntuj Plig nqes tau ntawm cov qhov tes los mus rau tus neeg yus thov Ntuj rau. Ua lub Cim Pleev (Cim mob nkeeg) kuj tib yam, yuav tsa txhais tes nrhab rau saum tus neeg mob.