COV ZAJ NYEEM-Xyoo C 2012-13

**NrhiavTswvNtuj** 23rd November 2012, 10:43 am

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°1

COV ZAJ NYEEM-Xyoo C 2012-13

Post NrhiavTswvNtuj 23rd November 2012, 10:43 am

COV ZAJ NYEEM HNUB 25/11/2012

Leej Pleev lub sim ceeb tus Vaj Ntxwv

Zaj nyeem Ib: Das Nias 7, 13-14

13 Hmo ntuj kuv ua npau suav pom tej
ntawd, thiab kuv pom tej yam tuaj nyob
saum cov huab zoo li ib tug neeg Leej
Tub, nws txav los ze ntawm tus Laus,
nws mus txog ntua ntawm tus Laus xub ntiag.

14 Neeg Leej Tub txais lub hwj huam,
lub koob meej thiab kev ua vaj. Tas txhia
haiv neeg, txhia kuj cuab, txhia xeem lus
tsob hwb nws. Nws lub tuam teb yog ib
lub tuam teb nyob mus li tsis txawj kawg.
Nws lub teb chaws yuav tsis raug kev piam tseem.

Zaj nyeem Ob: Qhib yav tom ntej 1, 5-8

5 txais txiaj ntsim thiab kev thaj yeeb
tuaj ntawm Yes Xus Pleev, uas yog tus Tim Khawv
pheej xeeb, tus xub yug hauv cov tub tuag
los, tus tswj kav tsoom vaj nyob ntiaj teb.
Nws nyiam peb, nws tau muab nws cov
ntshav los ntxuav peb cov txhaum.
6 Nws tsa peb ua ib haiv neeg, ua ib co
Leej Choj teev nws Leej Txiv Tswv Ntuj.
Vim li ntawd, mas lub koob meej thiab
lub hwj chim tswj fwm yog nws tug
tas ib txhiab ib txhis. Ua li.
7 Ntsia saib ! Nws nrog cov huab los.
Txhua leej txhua tus yuav pom nws, cov
tau nkaug nws kuj yuav pom. Tas txhua
haiv neeg nyob ntiaj teb yuav quaj yuav
nyiav vim nws. Yuav muaj tseeb li ntawd
8 Huab Tais Tswv Ntuj hais tias :
“Kuv yog As Fas thiab Os Mes Nkas ;
kuv yog Tus Nyob, Tus Ib Txwm Nyob, Tus Tab Tom Los.
Kuv yog tus Muaj Hwj Huam tas nrho.”

Zam Ntawv Moo Zoo: 18, 33b-37

"Koj puas yog cov Yus Das tus vaj ?"
34 Yes Xus teb tias :
"Puas yog koj hais koj, los yog luag tej
hais txog kuv li ntawd rau koj ?"
35 Pis Las Tos teb tias :
"Kuv puas yog ib tug Yus Das ? Koj haiv
neeg thiab cov thawj leej choj coj koj tuaj
rau kuv. Koj tau ua dab tsi ?" 36 Yes Xus teb tias :
"Kuv lub Ceeb Tsheej tsis nyob hauv lub
qab ntuj no. Yog kuv lub Ceeb Tsheej
nyob hauv lub qab ntuj no, mas kuv cov
neeg yuav sawv ntaus rog thaiv kom kuv
txhob poob rau hauv cov Yus Das txhais
tes. Tab sis, kuv lub Ceeb Tsheej tsis
nyob hauv lub qab ntuj no."
37 Pis Las Tos hais rau Yes Xus tias :
"Ua li koj yog vaj lod ?"
Yes Xus teb hais tias :
"Yog koj hais tias kuv yog vaj. Yog vim
qhov ntawd kuv thiaj yug los, thiab yog
vim qhov ntawd kuv thiaj tuaj nyob hauv
lub qab ntuj no : kuv tuaj ua tim khawv
txog qhov tseeb. Leej twg yog txoj kev
tseeb tug, mas nws mloog kuv lub suab."

NTHUAV NTAWV NTSHIAB.

COV ZAJ NYEEM-Xyoo C 2012-13 Enfant10 Rau hnub tim 25 lub 11 hli 2012

Zeej tsoom neeg ntseeg thiab phooj ywg sawv daws,

Hnub no yog ib hnub loj, tas lub Koom Txoos Kav Tos Liv thoob ntiaj teb ua “Peb Caug” quas lub xyoo laus. Lwm lub lis piam tuaj yog lis piam qhib lub xyoo tshiab. Tiam sis, Koom Txoos lub “Peb Caug” txawv ntiaj teb cov haiv neeg tej paj tsiab peb caug. Koom Txoos tsis tua tsiaj txhu ua ib pluag noj, tsis nqaum pab nqaum nruag. Tiam sis, Koom Txoos lub “Peb Caug” yog ib “Thaj Txi Ntuj” qhuas Huab Tais Yes Xus ua tag lub sim ceeb tus Vaj Ntxwv. Vim li ntawd, peb zoo siab caw tag ib tsoom kwv tij neej tsa Hmoob qab ntug txog hauv ntuj nrog peb koom lub Thaj Txi Ntuj qhuas peb tus Huab Tais Yes Xus Pleev ua Vaj Ntxwv kav tag qaum ntuj thiab yaj ceeb no ti plaws yeeb ceeb.

Nej twb paub, ib txwm keeb Huab Tais Tswv Ntuj yeej ua Huab Tais nyob txawm. Hauv Tswv Ntuj tsuas yog kev hlub nkaus xwb : “8 ὁ θεὸς ἀγάπη ἐστίν Tswv Ntuj yog kev hlub 1 Z 4,8”. Peb twb tsis muaj ib lo zoo lus phim qhia Tswv Ntuj txoj kev hlub kom tshab rau peb : Leej Txiv hlub nws Leej Tub thiab Leej Tub hlub nws Leej Txiv thiaj li hu ua Leej Ntuj Plig. Huab Tais Leej Ntuj Plig yog Tswv Ntuj txoj kev hlub. Leej Ntuj Plig yog tus qhia kom peb sib hlub tib yam kev sib hlub hauv Tswv Ntuj. Tas cov neeg teev Tswv Ntuj sawv daws yog kwv yog tij, yog nkauj yog muam, yog tib tse neeg li Tswv Ntuj. Leej Tub nco Leej Txiv lub txiaj ntsim hlub Leej Tub. Vim li ntawd, Leej Tub kev hlub Leej Txiv yog nrog Leej Txiv cawm lub sim ceeb kom lub sim ceeb dim plaws nws kev ploj tuag thiab kev txhaum : “10 Kev hlub yog li no : tsis yog peb hlub Tswv Ntuj, yog nws hlub peb, nws thiaj xa nws Leej Tub tuaj ua txim dawb paug theej peb cov txhaum 1Z 4,10”. Vim muaj Leej Tub, Leej Txiv thiaj tsim lub sim ceeb, tsim muaj tib neeg. Tiam sis, dab xas tas ntxias tau tib neeg yuam kev, cam tawv tsis mloog Tswv Ntuj lus. Kev qaug xas tas ntxias ua rau peb muaj khib li xas tas khib rau Tswv Ntuj, ua rau peb lim hiam sib ntxub li xas tas lim hiam, rhuav lub sim ceeb puas tsuaj Tswv Ntuj tsim tau zoo nkauj rhib : “3 Tas puas tsav yam muaj tshwm vim nws, yog tsis muaj nws, ib yam dab tsi twb tsis muaj Z 1,3”. Tim kev txhaum ua lub sim ceeb lwj liam los Tswv Ntuj tsis nto, tsis hnyos peb neeg txhaum raug mob raug ntsaj, ploj thiab tuag. Peb yog nkawm niam txiv As Das thiab Es Vas xeeb ntxwv cam thawj li nkawd. Tsis kav, Tswv Ntuj xaiv tau His Xais Lais ua pov thawj teev Tswv Ntuj thiab tshoj saub qhuab qhia zeej tsoom His Xais Lais kom mloog Tswv Ntuj lus. Thaum txog caij nyoog, Tswv Ntuj yuav tuaj pauj peb kev raug txom nyem, kev ploj kev tuag : “Ua siab tawv, txhob txhawj, saib ov, nej tus Tswv Ntuj kev pauj, nws kev pab, Tswv Ntuj yuav tuaj cawm nej 5 Cov dig qhov muag yuav rua hlo, cov lag pob ntseg yuav qhib plho 6 Tus ceg pauv yuav dhia rhees li tus kauv, tus piav tes yuav qw tsheej suab EX 35,4-6” Tus yuav tuaj pauj peb kev iab kev daw, kev ploj tuag yog tus cawm lub qab ntuj neeg, yog lub sim ceeb tus Huab Tais Vaj Ntxwv, yog tus Vaj Ntxwv kav qaum ntuj, hauv qab ntuj no thiab puag yeeb ceeb. Nws yuav ua vaj kav mus ib txhiab ib txhis tsis txawj dua : “13 Kuv ua yog toog hmo ntuj pom dheev zoo li neeg leej tub nrog tej twv huab saum ntuj tuaj, lawv zam kev cia nws los ze ntawm ib tug laus neeg 14 Luag muab hwj huam, hwj chim thiab vaj ntxwv cob rau nws thiab tas txhia haiv neeg, txhia teb chaws, txhia xeem lus hawm nws, nws ua vaj kav ib txhis thiab nws kev kav yuav tsis txawj kawg DN 7,13-14” His Xais Lais hwm Mos Xes cai loj tag npaum li, muaj coob leej saub sawv los qhia His Xais Lais txheej dhau txheej tos tus cawm neeg yuav tuaj. Tiam sis, Yes Xus tuaj txog, His Xais Lais npaj tsis tiav. Yes Xus zam txhaum rau cov neeg muaj txhaum, His Xais Lais hais tias Yes Xus hla dhau Tswv Ntuj cai. Yes Xus txhais tes kho tau cov ruas zoo, ua tau cov dig pom kev, cov lag hnov lus thiab cov tuag tsim dheev sawv ciaj sia, tsis kav tsoom txwj laus liam Yes Xus rhuav Mos Xes cai. Lawv xav paub vim li cas Yes Xus lo lus muaj hwj huam thiab nws txhais tes muaj txiaj ntsim. Yes Xus qhia lawv tias Leej Txiv Tswv Ntuj yog Yes Xus Leej Txiv ces txhaum lawv lawm thiab. Yes Xus hais lo twg los tsis tau, ua dab tsi los txhaum tag.

Cov txwj laus His Xais Lais ntes tau Yes Xus, lawv xav tua Yes Xus los lawv nrhiav tsis tau ib lub txim tsim nyog tua Yes Xus. Lawv thiaj coj Yes Xus tuaj rau tus nom, Pis Las Tos txiav txim. Qhov tseeb qhov tiag tshwm plaws hauv Pis Las Tos lub rooj txiav txim :
-1 : Lub txim txhaum cov txwj laus liam Yes Xus, yog Yes Xus txhaum kev tsis hwm Mos Xes txoj cai thiab thuam Tswv Ntuj. Cov lim hiam ntxeev lus, tua neeg thiab ua neeg dag yog lawv, tsis yog Yes Xus. Yes Xus yog tus hwm Mos Xes txoj cai, cov txwj laus yog cov tsis hwm. Lawv lub ncauj hais tias ntseeg Tswv Ntuj, tiam sis, siab ntsws tsis npuab Tswv Ntuj. Lawv yog cov thuam Tswv Ntuj, tsis yog Yes Xus.
-2 : Pis Las Tos ua nom kav His Xais Lais teb. Yog nom txiav li cas, yog li ntawd hauv kev cai txiav txim : “37 Pis Las Tos teb nws tias : “Ua no, vaj ntxwv yog koj ?” Yes Xus teb tias : “Koj tus hais tias kuv yog vaj ntxwv, yog li ntawd kuv thiaj yug los thiab rau qhov ntawd kuv thiaj tuaj hauv qab ntuj no, xwv kuv ua tim khawv txog qhov tseeb tiag, leej twg tseeb tiag nws mloog kuv lub suab Z 18, 37” Tsab ntawv Moo Zoo ua tim khawv txog Pis Las Tos lo lus txiav tias Yes Xus yog cov Yus Das tus Vaj Ntxwv. Niaj hnub no kuj tib yam nkaus, tus yuav yeej los yuav swv plaub ntug yog lub rooj txiav txim.

Hnub no, tas lub Koom Txoos Kav Tos Liv ua Thaj Txi Ntuj quas niaj quas xyoo hawm Huab Tais Yes Xus Pleev ua Vaj Ntxwv. Peb caw cov neeg ntseeg sawv daws, nyias rov nug nyias tus kheej :
-Thaum nej tseem tsis tau paub Tswv Ntuj, nej txawm xav teev ntuj los nej tsis pom qab xyov yuav teev li cas.
-Txij nej txiav siab los ntseeg Tswv Ntuj, nej paub teev thiab paub hwm Tswv Ntuj. Ua li no, nej yeej tsis kub siab teev ntuj li thiab nej yeej tseem coj nej lub qub neej thiab lub qub siab li thaud, ntshai dab, ntseeg neeb, ntseeg tej nyuag poj saub yawm saub tsis muaj hwj huam tej lus dua Huab Tais Yes Xus tus muaj hwj huam lus nej ho tsis ntseeg. Tus neeg ntseeg coj li ntawd puas yog ib tug liam Yes Xus thuam ntuj li tus txwj laus His Xais Lais ?
-Yog tias cov los ntseeg Tswv Ntuj, los tag nrho siab ntsws thiab ntsuj plig, nej cog nej lub siab tus yees nruaj nreb, khov kho npuab Huab Tais Yes Xus yog lub sim ceeb tus Huab Tais Vaj Ntxwv muaj hwj huam. Nej yuav tsis pluag Huab Tais Yes Xus lub zog pov hwm nej. Txawm yuav muaj neeg hem, muaj tus ntxias nej npaum li cas, nej tus ntsuj duab ntsuj plig tsis txawj yuj tsis txawj poob. Tej vij sub vij sw txawm yuav hlob npaum li cas, yeej tsis cuag Huab Tais Yes Xus kev ua vaj kav tag nrho : “5 Yes Xus Pleev tus pov thawj tus tseem, tus xub yug hauv tsoom tub tuag los thiab ua ntiaj teb tsoom vaj ntxwv tus tub cag ; khwv saum tus hlub peb thiab vim nws cov ntshav tso peb dim plaws peb cov txhaum 6 Thiab yog nws tus ua peb ciaj vaj ntxwv QYTN 1,5.6” Yog peb tsis nrog Huab Tais Yes Xus ces peb yuav txhawj yuav txog siav. Tiam sis, yog peb lub siab npuab Huab Tais Yes Xus khov kho, peb yuav ciaj vaj ntxwv nrog Yes Xus kav tau tag xas tas thiab nws cov dab.

Ib tsoom phooj ywg, nej cov muaj kev iab kev daw, raug kev txhawj xeeb, nej los npaub peb tus Huab Tais Yes Xus thiab tso nej lub siab rau nws txhais xib teg. Kawg Huab Tais Yes Xus tib leeg thiaj yog tseem Vaj Nxwv, tsim nyog peb yuav teev hawm nws tag siab nrho.

22.11.2012 Cwj Vuam Chiv

[/color]

**NrhiavTswvNtuj** 30th November 2012, 9:55 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°2

COV ZAJ NYEEM HNUB 02/12/2012 (Tos Huab Tais Chiv 1 - Xyoo C )

Post NrhiavTswvNtuj 30th November 2012, 9:55 pm

COV ZAJ NYEEM HNUB 02/12/2012
(Tos Huab Tais Chiv 1 - Xyoo C )

Zaj nyeem 1 : Yes Les Mias 33, 14-16
14 HUAB TAIS ceeb toom lo lus no :
"Tshuav tsis ntev yuav txog lub hnub
nyoog kuv yuav ua kom muaj xwm
tshwm sim tuaj raws li lo lus zoo uas kuv
tau hais rau saum His Xas Lais thiab rau
saum Yus Das tsev neeg tias :
15 Thaum txog lub zim txwv ntawd kuv
yuav ua kom ib tug kaus coj kev ncaj hlav
tuaj. Nws yuav coj kev ntshiab nyob hauv lub teb chaws.
16 Lub zim txwv ntawd Yus Das yuav
txais kev cawm. Yes Lus Xas Les yuav
tau nyob nyab xeeb. Kuv yuav tis npe rau
lub tsheej ntawd hu ua :
"HUAB TAIS yog peb txoj kev ncaj."

Zaj nyeem 2 : 1 Tes Xas Los Nis 3, 12–4, 2

12 Thov kom Huab Tais ua nej hlob mus,
thiab vam meej nyob hauv txoj kev sib
nyiam, thiab kev nyiam zeej tsoom, ib
yam li peb nyiam nej. 13 Thov kom
Huab Tais ua nej lub siab nyob ruaj nreb
hauv txoj kev ntshiab, tsis muaj chaw
xyeej, nyob ntawm peb Txiv Tswv Ntuj
xub ntiag, tos txog hnub peb tus Huab
Tais Yes Xus yuav nrog tas tsoom Leej Ntshiab rov los.
2 Nej twb paub cov lus peb qhia
rau nej lawm, yog Yes Xus kom peb qhia nej zoo li ntawd.

Ntawv Moo Zoo: Lus Kas 21, 25-28.34-36

Neeg Leej Tub yuav rov los nyob.
25 "Yuav muaj ib co cim nyob saum lub
hnub, lub hli thiab cov hnub qub. Nyob
ntiaj teb no, ib tsoom haiv neeg yuav raug
kev txhawj xeeb loj. Dej ntuj yuav nphau
ua suab nrov nroo ntws, ces cov haiv neeg
yuav txhawj. 26 Neeg yuav tuag ntshai,
vim sawv daws txhawj kawg txog tej yam
yuav tuaj raug lub qab ntuj neeg ; vim tej
yam muaj hwj huam nyob txheej ntuj
saud yuav co ua zog koog. 27 Thaum
ntawd, sawv daws yuav pom Neeg Leej
Tub muaj hwj huam thiab muaj koob
meej loj kawg, los hauv ib tw huab los.
28 Thaum tej ntawd pib tshwm sim tuaj,
mas nej yuav sawv, nej yuav tsa taub hau,
vim txoj kev txhiv nej los txog ze lawm."

34 Nej ceev faj mog, kom nej lub siab
txhob qaug rau txoj kev phem kev tsis
zoo, rau kev luab cawv kom qaug, thiab
rau lub neej tej kev txob xeeb, kom xwv
lub zim txwv ntawd tsis txhob poob nthav
los saum nej 35 xws li ib lub vas. Vim
tias lub zim txwv ntawd yuav los raug
txhua leej txhua tus uas nyob saum ntiaj
teb daim npoo av. 36 Nej ua ib co neeg
feeb meej, nej teev Ntuj tsis tseg, nej
thiaj yuav muaj zog hla dim ib puas tsav
yam uas yuav tshwm sim tuaj, nej thiaj
yuav sawv taus ntsug ntawm Neeg Leej Tub xub ntiag."

NTHUAV NTAWV NTSHIAB.

COV ZAJ NYEEM-Xyoo C 2012-13 F02afa10 Rau hnub tim 02 lub 12 hli 2012

Ib zeej tsoom neeg ntseeg thiab phooj ywg sawv daws,

Hnub no, Koom Txoos Kav Tos Liv thoob ntiaj teb qhib lub xyoo teev ntuj tshiab xyoo 3, yog hnub chiv 1 lub caij tos Huab Tais. Tas zeej tsoom neeg ntseeg Yes Xus, peb yuav npaj lub hmoov tsuj xeeb nco txog peb tus Huab Tais Yes Xus nqes los ciaj neeg. Vim li ntawd, peb thov caw nej txhua leej nrog peb mloog cov zaj nyeem no thiab khaws Huab Tais ob peb lo lus txhawb peb txoj kev ntseeg.

Txij lis piam no mus txog hnub tsuj xeeb, yog lub caij tos Huab Tais. Vim li cas thiaj hu ua lub caij tos Huab Tais ? Vim yog lub caij nyoog rau peb txhua tus neeg ntseeg npaj nyias lub siab thiab lub neej kom haum Huab Tais Tswv Ntuj siab nyiam. Leej Txiv siab nyiam yog xa nws Leej Tub Yes Xus tuaj cawm tag nrho ntiaj teb neeg. Peb tus neeg ntseeg Tswv Ntuj yuav zoo siab ua Leej Txiv Tswv Ntuj tsaug thiab tos txais nws Leej Tub tuaj cawm peb. Tiam sis, ntiaj teb neeg tsis teev Tswv Ntuj, tsis ntseeg Tswv Ntuj tas txhua leej, vim kev cam thawj, kev txhaum ua peb yuam kev. Peb xub ntseeg dab qhuas, teev dab niam dab txiv ua ntej teev hawm Tswv Ntuj. Tej txhia mus ntseeg lwm yam kev teev hawm, tej txhia tsuas ntseeg tib neeg, ntseeg lawv kus kheej xwb, tej txhia kuj twb tsis ntseeg tus tsav dab tsi li thiab, nyias sib txawv nyias. Hauv cov neeg ntseeg Tswv Ntuj, muaj tej txhia twb ntseeg tau ntev los, muaj tej txhia yog cov los ntseeg tshiab, hos tej txhia tseem pib hauv paus kev ntseeg. Peb pom tias zeej tsoom neeg ntseeg Tswv Ntuj sib txawv ntau, ib tug tsis zoo xws tug : muaj cov nquag thiab kub siab, kuj muaj cov tub nkeeg ; muaj cov ntseeg ruaj ntseeg khov, kuj muaj cov ntseeg duj de zuav zaws hle ntsuav ; muaj cov thoob tsib ntse cuag hau koob, kuj muaj cov npub cuag dauj cog.
Peb yuav xyuam xim txog tej teeb meem tshwm tuaj hauv peb lub Koom Txoos. Muaj tej txhia neeg twb ntseeg Tswv Ntuj ntev los lawm tsis kav, yeej tsis muaj kev ntseeg Tswv Ntuj li. Cov neeg no tej siab ntsws yeej tsis pom Tswv Ntuj lub hwj huam ib qho. Lawv lub ncauj hais tias ntseeg, sim neej ko taw yeej tsis tshwm tsev teev ntuj ib taws. Tseem muaj tej txhia muaj plhus twv lub ntuj hais tias tsis tas yuav teev Yes Xus, lawv no txawj txhab ntawv rau tib neeg. Xyov ua cas yuav tsis txawj ntshai tub qaug lub ntuj npaum li ntawd.
Cov los ntseeg tshiab, muaj tej txhia kuj ho ua neeg thoob tsib xyuam xim tshaj cov xub ntseeg. Tiam sis, tas zeej tsoom neeg ntseeg qub thiab tshiab thoob ntiaj teb, sawv daws yuav tsum nquag teev Tswv Ntuj, nrhiav caij nyoog fim Tswv Ntuj. Yog vim qhov ntawd, lub Koom Txoos Kav Tos Liv caw sawv daws sib puag npoo hauv lub caij tos Huab Tais ua lub ntsa tsev ruaj, ua tus ncej tse khov nrog Koom Txoos tiv nag xob nag cua ntsawj : “1 Dua li ntawd, peb hais rau nej thiab thov caw nej hauv peb tus Huab Tais Yes Xus, nej twb tau kawm ntawm peb yuav taug txoj kev twg thiaj ntxim Tswv Ntuj, xwv nej taug txoj kev ntawd nej thiaj yuav txawj dua ntawd 2 Vim nej twb paub Huab Tais Yes Xus tej lus peb tau hais kom nej ua 1TXLN 4,1-2” Yog peb tsis mloog Paj Lug cov lus qhia thiab tsis ua raws peb lub Koom Txoos kev coj, peb tsis muaj lwm txoj kev ua tau xis Yes Xus siab nyiam. Cov zaj nyeem hnub no tseem ceeb tas nrho rau peb txhua tus neeg ntseeg Tswv Ntuj.

Sawv daws to taub tias peb lub neej ua neeg ntseeg Tswv Ntuj thiab teev Tswv Ntuj yog ib lub neej tshiab. Peb yuav tsum nrauj txoj qub kev cai, lub qub siab, zaj tswv yim qub, peb thiaj nkag tau rau lub neej tshiab. Kev tig los ua neeg mloog Tswv Ntuj lus, teev Tswv Ntuj, yog txoj kev taug mus txais lub neej tshiab. Lub neej ua neeg ntseeg Tswv Ntuj no tsis yooj yim. Yog peb nyob nyias vaj nyias tsev puag tes taw twj ywm, peb yuav ua cas txawj ua neeg ntseeg Tswv Ntuj ? Yuav kom peb txawj ua neeg ntseeg Tswv Ntuj raws kev raws cai, peb yuav tsum loj npab nqes tes kawm, peb thiaj yuav txawj ua li Tswv Ntuj nyiam. Kev nrauj peb lub qub siab, nrauj zaj tswv yim qub thiab lub neej qub, tsis nrauj tau yooj yim kiag. Vim peb lub siab, lub tswv yim thiab lub neej tsis yog pluaj ntaub pluaj xo, txiav ib txiab yuav cais tau pluaj zoo thiab pluaj khaub hlab pov tseg. Kev hloov siab tshiab yog hloov peb lub siab ntseeg dab pov tseg los yuav lub siab ntseeg Tswv Ntuj, nrauj zaj tswv yim lim hiam nkhaus los ua neeg ncaj. Ib tug neeg xeeb txawm siab nkhaus, yuav kom tag kis nws cia li ncaj tsis tau. Yuav tsum siv caij siv nyoog thiaj yuav tau : “36 Nej yuav xyuam xim, teev ntuj txhua sij hawm, nej thiaj muaj zog maim dhau thaum tej ntawd tshwm sim tuaj thiab sawv ntsug tsheej ntawm neeg Leej Tub xub ntiag LK 21,36” Tsis tas li ntawd, yog peb tsis vam Huab Tais Yes Xus pab peb, tsis vam cov leej ntshiab tej koob hmoov, tsis vam cov neeg ncaj ncees tej lus qhuab qhia, peb yuav ua tsis tau tus neeg zoo nyiam raws li Paj Lug thiab raws li Yes Xus kev qhuab qhia. Peb cov neeg lam los ntseeg Tswv Ntuj, siab ntsws thiab tswv yid tseem nyob li qub npuab rawv qub kev cai, ntseeg dab, ntseeg neeb peb yuav tsis tau Huab Tais Yes Xus tej koob hmoov cawm peb.

Ib tsoom phooj ywg sawv daws, lub caij tos Huab Tais lub ntsiab lus yog kom peb muaj kev cia siab rau peb tus Huab Tais Yes Xus yuav tuaj cawm peb. Txawm yuav muaj xwv txheej, muaj mob muaj nkeeg, kev iab kev daw tuaj raug peb los tsis txhob txhawj, ua siab loj. Peb txoj kev teev Yes Xus, peb lub siab ntseeg Yes Xus yuav pub tau ib lub neej tshiab nyab xeeb thiab thaj yeeb lug li saum qaum ntuj rau peb.

29.11.2012 Cwj Vuam Chiv

**NrhiavTswvNtuj** 7th December 2012, 11:47 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°3

COV ZAJ NYEEM HNUB 09/12/2012 (Tos Huab Tais Chiv 2 - Xyoo C )

Post NrhiavTswvNtuj 7th December 2012, 11:47 am

COV ZAJ NYEEM HNUB 09/12/2012
(Tos Huab Tais Chiv 2 - Xyoo C )

Zaj nyeem 1 : Npas Lws 5, 1-9

1 Yes Lus Xas Les, hle koj daim tsoos chim siab thiab txom nyem cia, hnav Tswv Ntuj daim tsoos hwj chim mus ib txhis
2 Muab Tswv Ntuj lub tsho loj ncaj ncees rau koj hnav, ntoo Huab Tais hauv phuam hwj chim saum koj taub hau
3 Tswv Ntuj yuav muab koj lub meej mom ua nto moo lug hauv qab ntuj
4 Tswv Ntuj yuav tis cov npe no rau koj mus tas ib sid : thaj yeeb kev ncaj ncees thiab lub hwj chim hwm Tswv Ntuj
5 Sawv tsees, Yes Lus Xas Les ! Koj mus sawv pem lub chaw siab tig ntsia sab toob fab : pom Tswv Ntuj Ntshiab lo lus txoos koj cov me nyuam puag qab ntug ntsa txog qab ntug tsaus. Lawv zoo siab heev, vim Tswv Ntuj nco ntsoov lawv
6 Koj pom lawv mus taw yeeb ncuab nrog ncig lawm, Tswv Ntuj coj lawv los cuag koj thauj lawv tau ntsej muag cuag vaj ntxwv zaum saum theej kiab
7 Vim Tswv Ntuj txiav siab muab cov ncov tsua thiab toj roob nyob txawm ua kom qis tuaj thiab txhub cov vos hav rau, daim av yuav tus yees tuaj, His Xais Lais yuav tau luag mus los hauv Tswv Ntuj lub hwj chim
8 Tswv Ntuj lus ua tau hav zoov thiab ntoo tsw qab roos His Xais Lais
9 Tswv Ntuj yuav coj His Xais Lais hauv xub ke zoo siab, hauv nws lub hwj chim kaj lug, hauv lub siab hlub thiab lub siab ncaj ncees txhawv ntawm nws los.

Zaj nyeem 2 : Fis Lis Pos 1, 4-6.8-11

4 Kuv zoo siab thov Ntuj rau nej tsis
tseg, 5 vim kuv nco tias, txij thawj hnub
los txog tav no, nej tau nrog kuv tshaj lub
Moo Zoo. 6 Kuv paub tseeb tias, tus tau
pib ua hauj lwm nyob hauv nej, nws tau
ua ib txoj hauj lwm zoo kawg, thiab nws
yuav ua kom tiav, mus txog Yes Xus
Pleev lub Hnub Nyoog.
8 Tswv Ntuj ua tim khawv tau tias, kuv
hlub nej mos nyoos nyob hauv Yes Xus
Pleev lub siab. 9 Kuv thov Ntuj li no :
thov kom nej txoj kev nyiam Ntuj hlob
zuj zus, thiab nej paub zaj txuj ci tseeb,
kom nej txawj xav, 10 mas nej thiaj li
yuav pom tau qhov zoo tshaj, thiab yuav
ua neeg siab dawb siab huv, kom tsis
txhob muaj ib qho xyeej nyob hauv nej,
mus txog Leej Pleev lub Hnub Nyoog.
11 Nej yog ib co txiv ntoo siav hauv txoj
kev ncaj, uas Leej Pleev muab rau peb ris
kom Tswv Ntuj nto koob meej, thiab kom
sawv daws cav lus zoo txog Tswv Ntuj.

Lus Kas 3, 1-6

1 Lub zwj ceeb ntawd, Tis Npes
Xes Ntxas ua vaj ntxwv tau kaum
tsib xyoos, Poos Xyus Pis Las Tos ua
tswj kav Yus Das, Hes Los ua vaj txheeb
kav Nkas Lis Lais, Hes Los tus tij laug
Fis Lis Pos ua vaj txheeb kav Is Tus Lias
thiab Thas Kos Nis Tis. Lis Xas Nias ua
vaj txheeb kav As Npis Les Nas. 2 As
Nas thiab Kais Fas nkawd ua Tuam Leej
Choj. Thaum ntawd, Tswv Ntuj Lo Lus
nrov tuaj txog Zam nyob hauv teb chaws
suab puam. Zam yog Ntxas Kas Lias tus
tub. 3 Ces Zam tuaj mus ncig thoob thaj
tsam ntawm dej Yos Las Das, nws tshaj
ib co kab ke ntxuav pab lees txhaum kom
Ntuj zam txhaum, 4 raws li cov lus sau
tseg rau hauv Yaj Saub His Xais phau ntawv tias :
Tus qw hauv teb chaws quav poj lub suab
hais tias : Nej npaj kev rau Huab Tais,
nej ua kom nws txoj lw ncaj tuaj.
5 Yuav txhub av rau txhua lub kwj ha,
yuav ncaws txhua lub roob txhua lub pov
toj kom qis, yuav tho tej kev cuam kawb
kom ncaj, tej kev qawj, yuav hloov ua kev
tiaj. 6 Ces tas ib tsoom uas muaj lub cev
nqaij yuav pom Tswv Ntuj txoj kev cawm.

NTHUAV NTAWV NTSHIAB.

Rau hnub tim 09 lub 12 hli 2012

Ib zeej tsoom neeg ntseeg thiab phooj ywg sawv daws,

Hnub no yog lis piam hnub chiv ob, lub caij tos peb tus Huab Tais Yes Xus tuaj hlub peb neeg txom nyem hauv qab ntuj no. Thov kom peb tus Huab Tais pub nws txoj kev thaj yeeb rau txhua leej txhua tus lub cev thiab ntsuj plig raug kev txhawj xeeb. Cov zaj nyeem peb hnov hnub no caw peb los khaub zig peb tus Huab Tais Yes Xus nws thiaj yog tus cawm tau peb.

Lub caij tos Huab Tais yog ib lub zoo sij hawm rau peb tus neeg ntseeg pib dua lub neej tshiab, ua tus neeg ntseeg tshiab, mloog lus thiab txawj hlub neeg dua yav tag los. Peb yuav thov Tswv Ntuj pab peb txoj kev pluag, pluag kev hlub neeg thiab pluag kev npuab Tswv Ntuj. Yuav kom peb txais Huab Tais tej koob hmoov, peb yuav tsum txhob ua tus neeg ntseeg qig lus luaj thuam. Ib tug neeg luaj thuam yog ib tug neeg zoo li cas ? Tus neeg luaj thuam yog ib tug neeg pluag tsis txuag nyiaj txiag, tsis nco txiaj ntsim, tsis txawj xav. Hmoob thiaj pheej hais tias : “Neeg luaj thuam yog neeg xyob txhiaj.” Lub caij tos Huab Tais qhia rau peb tus neeg ntseeg tsis txhob ua tus neeg ntseeg luaj thuam Huab Tais Tswv Ntuj kev hlub peb. Vim li cas ? Vim peb yuav tsum txawj xam pom Tswv Ntuj kev hlub peb ua leej tib neeg nyob. Peb tej vaj tse, tej liaj teb, tej dej num, kev noj kev haus, yus lub cuab lub yig, yus tej tub ki, kev noj qab nyob zoo…tas txhua yam yog Tswv Ntuj pub rau peb. Tus tshaib plab thiab tus noj seem noj so, tus neeg mob nkeeg thiab tus zoo neej Tswv Ntuj yeej hlub tib yam nkaus. Vim li ntawd, yus yuav txawj ua Tswv Ntuj tsaug thiab hlub neeg li Tswv Ntuj hlub yus : “1 Yes Lus Xas Les, hle koj daim tsoos chim siab thiab txom nyem cia, hnav Tswv Ntuj daim tsoos hwj chim mus ib txhis 2 Muab Tswv Ntuj lub tsho loj ncaj ncees rau koj hnav, ntoo Huab Tais hauv phuam hwj chim saum koj taub hau 3 Tswv Ntuj yuav muab koj lub meej mom ua nto moo lug hauv qab ntuj NL 5,2-3” Tab peb txawm txom nyem loj npaum twg, tsis cuag Tswv Ntuj kev txom nyem hlub peb ntiaj teb neeg. Tus neeg txom nyem yuav nco ntsoov, Tswv Ntuj raug txom nyem tshaj nws. Tus nplua nuj yuav nco ntsoov, Tswv Ntuj nplua nuj tshaj nws. Tsis phim peb tus neeg ntseeg twb tsis txawj hais ib los ua Tswv Ntuj tsaug, tsis nco tej txiaj ntsim Tswv Ntuj tau pab peb. Tsis tsim nyog rau peb tus neeg ntseeg hais tej lus no : “Mus teev ntuj nkim caij nkim nyoog, sem yus dab ntub pw tsis los siav, ua rau yus koom tsis tau kwv tij neej tsa pluas noj pluas haus…” Puas phim Tswv Ntuj meem txom rau peb tus neeg ntseeg luaj thuam ? Tiam sis, Tswv Ntuj ua hnub tshav li qub thiab ua nag xwm yeem mus li ywg yus tej liaj teb twj ywm.

Yog peb tsa muag ntsia lub ntuj, peb yuav pom tias peb tsis muaj dab tsi pauj tau Tswv Ntuj lub txiaj ntsim. Vim li ntawd, yog peb tseem tsis ua peb txoj num teev Tswv Ntuj, peb puas zoo yuav lawm ? Peb yuav khawv khuav tsis sav ib lub sij hawm mus pe mus thov Tswv Ntuj saib peb puas muaj txoj hmoo txais Tswv Ntuj tej txiaj ntsim, tsis yog ua kom peb ntsej muag loj, hos yog ua kom Tswv Ntuj nto koob meej. Peb tus neeg ntseeg Tswv Ntuj tiam neej no los yav thaud, los tus leej ntshiab twg, sawv daws ntseeg tib tug Huab Tais Yes Xus raws li cov thwj tim Pob Zeb thiab Paj Lug kev qhuab qhia. Cov neeg muaj Huab Tais Yes Xus txiaj ntsim yog cov mloog Yes Xus lus li cov leej ntshiab thiab cov thwj tim. Yog peb tus neeg ntseeg mloog cov leej ntshiab thiab cov thwj tim lus, peb txoj kev teev hawm thiaj muaj Huab Tais Yes Xus txiaj tsim li lawv. Tus leej ntshiab tau txiaj ntsim tsis ua rau tus leej ntshiab muaj plhus, tiam sis tus leej ntshiab zoo siab vim Tswv Ntuj nto koob meej : “Kuv thov ntuj kom xwv nej kev hlub muaj zog tuaj hauv kev thoob tsib thiab txawj xav 10 Nej thiaj pom tau qhov muaj nqes ua cov neeg huv si tsis muaj qhov xyeej txog Leej Pleev hnub 11 Muaj kev ncaj ncees puv npo ua rau Leej Pleev qhuas thiab ua rau Tswv Ntuj nto koob meej FLP 1,9-11” Yog peb tus neeg ntseeg Tswv Ntuj txawj xav, peb yuav pom tias peb tsis muaj peev xwm dab tsi. Peb lub siab me me, nqaim nqaim, tsis muaj zog hlub neeg, tsis muaj peev xwm zam tus neeg ua tub qaug peb, tsis muaj cuab kav hlub peb tus yeeb ncuab. Peb lub tswv yim lam khav dag, lim hiam thiab nkhaus heev. Yog tias peb tseem ib nyuag txawj ntse, ib nyuag tau nom ua los ib nyuag nplua nuj dua, ces peb yeej saib tsis tshua taus cov pluag thiab cov ruam li lawm. Peb tib neeg txoj kev khav theeb, kev muab hlob, kev lim hiam, kev plees kev yis…yeej xeeb tau puag nruab thiab los. Vim li ntawd, Hmoob thiaj piv txoj lug tias : “Yug tau cev yug tsis tau siab.” Cov ua niam ua txiv, nej cov me nyuam nej yug tau qee leej qig lus tsis yoog nej siab hlo, nej twb paub li ntawd. Peb tib neeg kev khav theeb, muab hlob, lim hiam, neeg plhom neeg plees zoo tam zoj lub toj roob hauv pes xeeb tau txawm com kawb, ua tsag kwj ha tob kwj ha tais : “Nej npaj Huab Tais txoj kev, nej ua kom nws txoj kev tiaj tus 5 Yuav meem txhua lub kwj ha, yuav tshav kom txhua lub tsua txhua lub roob kom qis ; qhov com kawb yuav kho kom ncaj, tej kev qawj yuav meem kom tiaj tus 6 Tas txhua lub cev ntaj ntsug yuav pom Tswv Ntuj kev cawm neeg LK 3,4-6” Tus neeg teev Yes Xus muaj Yes Xus txiaj ntsim yog tus nws ncaws nws lub siab khav theeb ploj thiab tu taw mus ; yog tus txo nws txoj kev muab hlob los ua tus me ntxawg me aiv ; yog tus zam txoj kev lim hiam tam zoj txiav tej roob com kawb kom qis, kho txoj kev nkhaus kom ncaj ncees ; yog tus cheem nws lub siab plhom siab plees li meem kev qawj, kev to qhov, tej kwj ha kom tiaj tus zoo mus los tsis ntshaus hlaub ntshaus ceg. Peb yuav vam cov leej ntshiab tej lus koob lus hmoov qhia peb li Zam cov lus qhia tsoom His Xais Lais.

Ib tsoom phooj ywg txhua leej, yog peb tus neeg ntseeg tsis tshaib tsis nqhis Tswv Ntuj lub txiaj ntsim hlub neeg ces peb zoo li tus neeg luaj thuam tsis nco Huab Tais Yes Xus kev yug los ciaj neeg muaj nuj nqes. Vim li ntawd, txij no mus, peb yuav tsum siv zog npaj Huab Tais txoj kev kom tiaj tus, nqes tes hlub neeg thiab hwm Tswv Ntuj tag siab nrho.

04.12.2012 Cwj Vuam Chiv

**NrhiavTswvNtuj** 14th December 2012, 8:27 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°4

COV ZAJ NYEEM HNUB 15/12/2012 (Tos Huab Tais Chiv 3 - Xyoo C )

Post NrhiavTswvNtuj 14th December 2012, 8:27 am

COV ZAJ NYEEM HNUB 15/12/2012

(Tos Huab Tais Chiv 3 - Xyoo C )

Zaj nyeem Ib: Xos Fos Nias 3, 14-18a

Zaj nyeem 1 : Xos Fos Nias 3, 14-18a

14 Xis Yoos me ntxhais qw suab hom khaj, His Xais Lais tsa ncauj seev, Yes Lus Xas Les me ntxhais koj yuav zoo siab luag ntxhi
15 Huab Tais plhws koj tej txim, nws yauv txhem koj tus yeeb ncuab, Huab Tais yog His Xais Lais tus Vaj Ntxwv, nws nyob nruab nrab hauv koj, koj yuav tsis ntshai qhov phem ntxiv
16 Hnub ntawd, luag yuav hais rau Yes Lus Xes Les koj tsis txhob ntshai, Xis Yoos koj tes tsis txhob tsaug
17 Huab Tais Tswv Ntuj nyob nruab nrab hauv koj, nws yog tus muaj peev xwm cawm, nws txaus siab hlo rau koj, nws hlub koj twj ywm, nws siab ntsws luag ntxhi txog koj
18 Cov muaj kev tu siab tsis tau koom kev lom zem deb ntawm koj, kuv yuav txais lawv

Zaj nyeem Ob: Fis Lis Pos 4, 4-7

14 Kuv khoov cev ncaj
qha khiav mus rau tom hauv ntej, kuv tso
sas ntws kom mus txog chaw, vim kuv
pom cov paj tshab, uas Tswv Ntuj hu peb
mus txais nyob txheej saud, nyob hauv Yes Xus Pleev.

15 Peb sawv daws yog neeg hlob tiav
lawm, mas peb yuav xav tswv yim zoo li
ntawd. Yog nej xav tswv yim txawv, mas
Tswv Ntuj yuav qhia nej, kom nej pom
txog qhov ntawd. 16 Tab txawm peb
khiav mus txog qhov twg, mas peb tsuas
rhais ruam mus taug tib txog kev li qub.
17 Kwv tij sawv daws, nej yoog raws li
kuv tus lwj lwm mog. Nej ntsia ntsoov
cov neeg ua raws li peb tus piv txwv.
18 Kuv hais li ntawd rau nej, yog vim
muaj ntau leej ua xws li lawv yog cov
yeeb ncuab ntxub Yes Xus tus ntoo cuam.

Ntawv Moo Zoo: Lus Kas 3, 10-18

10 Ces tsoom neeg nug Zam tias :
"Peb yuav ua dab tsi ?"
11 Zam teb rau lawv tias :
"Tus muaj ob lub tsho, yuav faib rau tus
tsis muaj. Tus muaj mov noj, nws kuj
yuav ua li ntawd thiab."
12 Ib co sau se kuj tuaj txais kab ke
ntxuav, lawv hais rau Zam tias :
"Xib Hwb, peb yuav ua dab tsi ?"
13 Zam hais rau lawv tias :
"Nej tsis txhob kom luag them tshaj txoj cai txiav."
14 Ib co tub rog kuj nug Zam tias :
"Peb ne, peb yuav ua dab tsi ?"
Zam hais rau lawv tias :
"Nej txhob quab yuam leej twg, txhob
ntxias yuav dab tsi. Nej nyiaj hli raug
npaum li cas, mas nej yuav txaus siab txais li ntawd."
15 Tsoom pej xeem vam vam tos ntsoov,
sawv daws ua xyem xyav txog Zam rau
nruab siab tias tej zaum Zam yog Leej
Pleev. 16 Ces Zam hais rau sawv daws tias :
"Ntawm kuv, mas kuv muab dej los
ntxuav nej, tab sis tus muaj zog dua kuv
yuav tuaj. Kuv tsis tsim nyog daws txoj
hlua khi nws nkawm khau. Tus ntawd
yuav ntxuav nej nyob hauv Leej Ntuj Plig
Ntshiab thiab hauv hluav taws. 17 Nws
txhais tes tuav lub vab, nws yuav ntxuaj
nws lub tshav ntaus nplej. Nws yuav
yawm nplej rau hauv nws lub txhab. Hos
cov npluag, nws yuav muab hlawv hauv
lub cub tawg tsis txawj kug."
18 Zam tseem hais ntau zaj qhuab qhia
ntxiv los tshaj lub Moo Zoo rau tsoom pej xeem.

NTHUAV NTAWV NTSHIAB.

**NrhiavTswvNtuj** 21st December 2012, 11:54 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°5

COV ZAJ NYEEM HNUB 23/12/2012 (Tos Huab Tais Chiv 4 - Xyoo C )

Post NrhiavTswvNtuj 21st December 2012, 11:54 am

COV ZAJ NYEEM HNUB 23/12/2012
(Tos Huab Tais Chiv 4 - Xyoo C )

Zaj nyeem 1 : Saub Mis Kas Es Tsab Ntawv 5, 1-4a
His Xas Lais yuav txom nyem mus
txog lub caij ib tug poj niam yuav

1 Npes Les Hes, Es Fas Tas, koj
yog lub zos me nyob hauv Yus Das
cov xeem. Tus yuav kav His Xas Lais
yuav tawm ntawm koj los ua kuv li. Nws
lub keeb tuaj ntawm puag txheej thaud tuaj.
2 Yog vim li ntawd mas HUAB TAIS
yuav tso cov His Xas Lais pov tseg ib
ntus, mus txog lub caij uas tus yuav yug
me nyuam nws yug tau nws tus me nyuam lawm.
Txog lub caij ntawd, tus yug los cov kwv
tij seem yuav rov los nrog His Xas Lais tsoom me nyuam.
3 Tus yug los yuav sawv, nws yuav zov
nws pab yaj nog zaub. HUAB TAIS lub
hwj huam nres nws. Tswv Ntuj lub npe
muaj hwj chim nrog nws. Lawv yuav tsa
vaj tsa tsev vim tus saib lawv yuav nto
moo loj mus txog npoo ntiaj teb. 4 Lub
teb chaws yuav tau nyob thaj yeeb.

Zaj nyeem 2 : Tsab Ntawv Hes Nplaws 10, 5-10

5 Vim qhov ntawd,
thaum Leej Pleev los nyob ntiaj teb no,
nws thiaj hais tias :
“Tswv Ntuj, cov thaj txi Ntuj thiab cov
paj tshab, mas koj tsis xav yuav, koj thiaj
puab ib lub cev rau kuv.
6 Cov thaj hlawv tsiaj thiab cov thaj txi
Ntuj them txim txhaum, koj tsis zoo siab txais.
7 Kuv thiaj hais tias :
“Tswv Ntuj, kuv tuaj ua raws li koj
nyiam, raws li riam Ntawv sau hais txog kuv”.
8 Leej Pleev xub hais tias :
“Cov thaj txi Ntuj, cov paj tshab, cov thaj
hlawv tsiaj, cov thaj txi Ntuj them txim
txhaum, koj tsis zoo siab txais : tej ntawd
yog tej yam uas Txoj Cai qhia kom cev.
9 Leej Pleev hais ntxiv tias :
“Kuv tuaj ua raws li koj nyiam.”
Li ntawd, Leej Pleev rhuav thawj txoj cai,
nws tsa ib txog tshiab los hloov. 10 Vim
nws tau ua qhov zoo no, mas peb thiaj
ntshiab tuaj. Yes Xus Pleev cev nws lub
cev ib zaug xwb, ces peb ntshiab mus li.

Ntawv Moo Zoo : Lus Kas 1, 39-45
Mab Liab mus xyuas Es Lis Xas Npes.

39 Tau ob peb hnub, ces Mab Liab sawv
kev mus, nws rau siab ntso mus pem toj
siab, rau ib lub nroog nyob xeev Yus Das.
40 Nws chaws mus hauv Ntxas Kas Lias
tsev, nws foom lus nyob kaj lug rau Es
Lis Xas Npes. 41 Thaum Es Lis Xas
Npes hnov Mab Liab foom kev kaj lug,
mas nws tus me nyuam dhia hauv nws
plab, thiab Leej Ntuj Plig Ntshiab los
nyob puv hauv Es Lis Xas Npes. 42 Ces
Es Lis Xas Npes tsa suab hlo hais nrov nrov tias :
"Koj tau koob tau hmoov tshaj ib tsoom
poj niam huv tib si, thiab lub txiv txi hauv
koj lub cev tau koob tau hmoov. 43 Ua
cas Ntuj thiaj pub kom kuv tus Huab Tais
leej niam tuaj xyuas kuv ? 44 Koj saib,
thaum kuv hnov dheev koj lub suab foom
kev kaj lug nrov txog kuv pob ntseg, tus
me nyuam hauv kuv plab dhia zoo siab.
45 Tus tau ntseeg tias cov lus Huab
Tais hais rau nws yuav tsheej xeeb, mas
nws txoj hmoov zoo !"

NTHUAV NTAWV NTSHIAB.

Rau hnub chiv tim 23 lub 12 hlis 2012

Ib zeej tsoom neeg ntseeg thiab tsoom phooj ywg,

Hnub no yog lis piam 4 hauv lub caij tos Huab Tais, yog ib lub zoo sij hawm rau peb txhua leej tig los txais peb tus Huab Tais Tswv Ntuj yug los ciaj neeg kom hlub tau cawm tag lub qab ntuj neeg.

Tos peb ciaj ua neeg, vim peb muaj niam muaj txi yug, muaj niam muaj txi hlub, tsa cuab tsa yim rau peb, peb thiaj li ciaj neeg. Yus yuav tsis nrauj yus niam yus txiv lub txiaj lub ntsig, yuav nco ntsoov yus tej poj yawm txwv txoob tej koob hmoov, vim muaj lawv thiaj muaj yus niam yus txiv. Tej laus thiaj qhia tej me nyuam kom hlub niam hlub txiv, kom hwm poj yawm txwv txoob. Hmoob thiaj li muaj pe tsiab. Hauv kev cai pe tsiab, tej xeeb leej xeeb ntxwv thiab tub ki ua npoj ntws tuaj pe lawv tus pog koob yawg koob thov koob hmoov. Vim lawv pog koob yawg koob muaj hmoo tau daim ntawv nyob ua neej laus qas nkoos, muaj tub ki vam ntws xws xub ntab, xeeb ntxwv nroo ntws xws xub mu. Vim li ntawd, kev hlub niam hlub txiv, kev hwm poj yawm txwv txoob tsis khib tsis txhaum Tswv Ntuj, tseem yim ua ntxim Tswv Ntuj siab xwb. Hmoob tej laus txawm tsis teev ntuj los lawv kev hlub niam hlub txiv twb dhos daws Tswv Ntuj lo lus qhia : “Koj yuav hwm koj niam koj txiv.” Hmoob tseem paub hwm lub ntuj ua tus loj, lo lus kawg mus cob thiab mus xaus rau lub ntuj xwb. Hmoob kev pauj lub “yeem ntuj” twb yog tua tsiaj txhu ua lub ntuj tsaug raws kev cai hmoob. Txawm Hmoob tsis paub Tswv Ntuj npe, twb yog Tswv Ntuj cev tes npo pab cawm tau Hmoob.

Ziag no, Tswv Ntuj tshoj peb los teev hawm Tswv Ntuj, peb yuav nco ntsoov hlub peb niam peb txiv, hlub peb tej pog koob yawg koob thiab hlub Tswv Ntuj vim Tswv Ntuj yog ntiaj teb neeg Leej Niam Leej Txi : “Koj yuav hlub Huab Tais, koj tus Tswv Ntuj, tas koj siab ntsws, tas koj ntsuj plig, tas koj lub zog, tas koj lub tswv yim thiab hlub tus nyob ze koj ib yam li koj tus kheej LK 10,27” Yog peb mloog peb niam peb txiv lus ces peb ua neeg tsim txiaj. Tos peb tsim txiaj vim peb hlub peb niam peb txiv, nco peb niam peb txiv tej txiaj ntsim. Kev nco niam txiv txiaj ntsig yog koob hmoov. Peb sim xav saib, tej laus Hmoob kev hlub niam hlub txiv thiab hlub tej poj yawm, pub lawv tau koob hmoov. Txawm lawv hu txog niam txiv poj yawm lub koob lub npe tsis duav pab tsis tau lawv los Tswv Ntuj zoo siab hlo cawm lawv. Peb twb los teev hawm Tswv Ntuj, peb yuav tsum paub, txoj kev teev hawm Tswv Ntuj tau koob hmoov loj npaum li cas npaug rau peb. Tiam sis, tsis yog ua li qub thiab hais zaj qub.
Hmoob hais kam tias peb los ua neeg, peb nyias nqa nyias daim ntaub ntawv los ua neej. Tos tib neeg tso ntiaj teb tseg yog vim nws daim ntaub ntawv ua neej tag lawm. Hmoob tej lus tsuas yam kob dej kob tshuaj kho peb kev tu siab. Tiam sis, peb to taub tej laus cov lus qhia thiab Tswv Ntuj cov lus qhia sib txawv ntau. Tej laus cov lus muaj kuab ua tau peb siab kaj, daws peb kev chawj kev chim kom ploj mus, hos Tswv Ntuj cov lus muaj peev xwm pab thiab cawm tau neeg. Vim Tswv Ntuj lus muaj hwj huam hos peb niam peb txiv zaj lus mos lus muag nqee peb kev tu siab thiab teev peb lub kua muag. Huab Tais Yes Xus yug los ua neeg, tsis nqa ntaub ntawv los ua neej li Hmoob hais kam. Huab Tais Yes Xus yug los ua neeg li tej lus muaj tseg sau rau hauv ntaub hauv ntawv thaum ntej thaum ntxov. Peb mloog saub Mis Kas Es cov lus sau tseg li no txog tus yuav yug los cawm tag lub qab ntuj neeg : “1 Npes Les Hes Es Fas Tas, tus me tshaj hauv Yus Das cov xeem, kuv yuav ua kom tus tswj His Xais Lais tawm hauv koj los MKE 3,1” Npes Les Hes, lus Hes Nplaws (לחם בית) txhais tias : “Tsev Mov.” Npes Les Hes yog ib lub me nyuam zos nyob ze lub tuam ceeb Yes Lus Xas Les, hauv xeem Yus Das nrim teb. Yus Das yog Yas Kos ib tug hauv nws 12 leeg tub. Tom qab no thiaj muaj 12 lub xeem His Xais Lais. Yawg koob Yas Kos tau foom koob hmoov rau nws tus tub Yus Das tias nws cov kwv tij yuav tsa ncauj qhuas nws, lawv yuav tuaj pe tuaj hawm nws thiab nws txhais tes yuav nyob saum nws cov yeeb ncuab caj qwb, kav lawv hauv nws xib teg (HP 49,8 ). Vim li ntawd, peb yuav to taub tias Yas Kos cov lus foom koob hmoov rau Yus Das yog Tswv Ntuj lus foom koob hmoov rau Tswv Ntuj Leej Tub. Yes Xus Tswv Ntuj Leej Tub yug nyob lub zos Npes Les Hes, zos “Tsev Mov.” Yes Xus yog mov ciaj sia cawm tag lub qab ntuj neeg ; Yes Xus ua Vaj Ntxwv kav qaum ntuj, ntiaj teb thiab Tswv Ntuj tus yeeb ncuab Xas Tas mus ib txhiab ib txhis. Peb kev mloog Yes Xus lus yog lub txim peb muaj muab tau ntxim Leej Txiv Tswv Ntuj siab dua tej : “Kuv tuaj ua kom tau li koj siab nyiam” Nws yog tus rhuav thawj tus txhooj kom tsa dua tus ob sawv 10 Hauv tus ob no ua tau peb ntshiab huv li nws nyiam vim Yes Xus Pleev lub cev ua txim ib zaug kav ib txhis HN 10,9-10” Peb los teev hawm Tswv Ntuj nrog lub Koom Txoos nyob thoob ntiaj teb, peb yuav xyiv fab rau lub Thaj Txi Ntuj. Niaj hnub peb mus koom Thaj Txi Ntuj, yog peb koom nrog Yes Xus muab nws lub cev thiab roj ntsha los txi rau Leej Txiv. Vim li ntawd, Thaj Txi Ntuj (la messe) yog lub txim loj tshaj plaws ntxim Leej Txiv Tswv Ntuj siab tshaj dua tej. Mab Liab thiab Es Lis Xas Npes nkawd yog ob tug ntseeg Tswv Ntuj thiab mloog Tswv Ntuj lus zoo tshaj tej. Tswv Ntuj ua rau nkawd pom xyeem Tswv Ntuj txoj kev cawm neeg : “45 Hmoov zoo tus ntseeg yam Huab Tais hais rau nws yeej kawg tsheej xeeb LK 1,45” Peb txoj kev teev hawm Tswv Ntuj tsis yog ib txoj kab lis kev cai li lwm tej kev cai teev hawm, tus paub thiaj tau koob hmoov, tus tsis paub tsis tau. Vim kev teev hawm Tswv Ntuj loj tshaj txoj kev cai : nws yog koob hmoov thiab txiaj ntsim. Vim li ntawd, tus neeg ncaj ncees hwm Tswv Ntuj, txawm paub thiab txawm tsis paub Tswv Ntuj los puav leej muaj Tswv Ntuj koob hmoov.

Ib tsoom phooj ywg, hauv lub caij tos Huab Tais no, peb yuav tig mus ntsia Mab Liab thiab Es Lis Xas Npes nkawd ob viv ncaus ua piv txwv qhia peb tos Tswv Ntuj kev cawm lub qab ntuj neeg. Peb pom nkawd kev mloog Tswv Ntuj lus thiab npuab Tswv Ntuj tau koob tau hmoov. Tswv Ntuj pub nkawd ib leeg ib lub txiaj ntsim loj tshaj yam nkawd tos rau nkawd pom. Peb txoj kev teev hawm Tswv Ntuj kuj yuav pub tau ib lub txiaj ntsim rau peb txhua leej, kom peb txhob poob siab.

19.12.2012 Cwj Vuam Chiv

**NrhiavTswvNtuj** 26th December 2012, 3:51 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°6

Cov zaj nyeem Hmo Tsuj Xeeb, Yes Xus yug los tim 24-12-2012, Xyoo C

Post NrhiavTswvNtuj 26th December 2012, 3:51 am

Cov zaj nyeem Hmo Tsuj Xeeb, Yes Xus yug los
tim 24-12-2012, Xyoo C

Zaj nyeem 1 : Es Xais 9, 1-6
Ib tug yug los ua vaj kav Tswv Ntuj haiv neeg.

1 Thaum ntawd tsoom pej xeem
uas lawv maub hauv qhov tsaus ntuj,
lawv pom ib qho pom kev loj. Ib qho
pom kev ci tuaj rau saum cov nyob hauv
lub teb chaws tsaus ntuj nti.
2 HUAB TAIS, koj tau ua kom kev hom
khaj hlob mus, kom muaj chaw zoo siab
ntau. Sawv daws zoo siab nyob ntawm
koj xub ntiag, ib yam li cov sau qoob loo
zoo siab, ib yam li co tub rog sib faib cov
toob xib lawv txeeb tau lawv dhia lom
zem. 3 Tus quab uas tsuam lawv, tus
ntas nyob saum lawv xub pwg, tus zov
cov neeg nyob txim rab qws, koj muab
tsuj, xws li thaum Mas Dias lub hnub
nyoog. 4 Cov suab khau tub rog nrov
ncha tas huv si, cov tsho tshaj sab lo
ntshav tas huv si, nplaim taws yuav noj,
hluav taws yuav hlawv.
5 Vim ib tug me nyuam yug los rau peb,
Ntuj pub ib tug tub rau peb. Lub tuam teb
nyob saum nws xub pwg. Luag tis nws
npe hu ua : tus qhia tswv yim zoo tas
nrho, tus Tswv Ntuj siab loj, tus vaj
txheeb pub kev thaj yeeb.
6 Das Vis lub theej kiab thiab lub teb
chaws nws yuav kav yog ib lub tuam teb
dav thiab nyob thaj yeeb tsis muaj caij
kawg. Nws yuav muab Txoj Cai thiab
kev ncaj los tsa thiab nres nws lub tuam
teb, txij no mus txog ib txhiab ib txhis.
Tus HUAB TAIS kav tsoom tub rog nws
lub siab hlub muaj khib yuav ua tej ntawd.

Zaj nyeem 2 : Tis Tos 2, 11-14
Ntuas Tis Tos kom nws txawj qhia cov ntseeg.

1 Ntawm koj, mas koj qhia txoj kev
haum txoj kev cai tseem ceeb.
2 Kom cov laus txawj yoog noj yoog
haus, ua neeg tsim nyog hwm, xav tom
ntej tom qab, nyob ruaj nreb hauv txoj
kev ntseeg, kev nyiam, thiab kev rub lub siab ntev.
3 Koj qhia cov pog laus kom coj tus yam
ntxwv phim cov neeg siab ntshiab : kom
lawv txhob hais lus xaiv, txhob quav
cawv, thiab txawj ntuas luag zoo.
4 Cov pog laus ua li ntawd, mas lawv
pab qhia cov poj niam tseem hluas kom
txawj hlub lawv tus txiv thiab lawv cov
me nyuam, 5 kom cov poj niam hluas tsis
txhob ua neeg liam, kom lawv ua neeg
tsim txiaj, ua niam tsev tu lub vaj lub
tsev, ua neeg siab zoo, mloog tus txiv lus,
ces luag thiaj tsis thuam Tswv Ntuj lo lus.
6 Koj qhuab ntuas cov hluas kom lawv
xav tom ntej tom qab nyob hauv txhua yam lawv ua.
7 Koj yuav coj tus yam ntxwv zoo, kom
luag tau ib tug piv txwv qhia cov dej num
zoo raws li txoj cai huv thiab muaj tsim,
8 koj qhia yam ncaj uas tsis muaj chaw
xyeej, kom tus neeg tiv peb hais tsis tau
dab tsi phem txog peb, nws kawg yuav
poob ntsej muag xwb.
9 Cov qhev yuav tsum mloog lawv cov
tswv lus txhua lub sij hawm, lawv yuav
nrhiav ua xis cov tswv siab, lawv yuav
tsis txhob ua twm cov tswv. 10 Lawv
tsis txhob ua ib yam tsis ntxim cov tswv
siab, lawv yuav cia lawv lub siab npuab
lawv cov tswv. Yog lawv ua li ntawd,
mas lawv ua kom tus Tswv Ntuj cawm
peb txoj cai nto koob meej.
Vim li cas sawv daws thiaj yuav coj
tus yam ntxwv zoo. 2 : 11 - 15.
11 Sawv daws yuav coj tus yam ntxwv
zoo, vim Tswv Ntuj lub txiaj ntsim yog
lub qhov dej uas txhawv txoj kev cawm
txhua leej txhua tus. Tswv Ntuj lub txiaj
ntsim tawm los rau sawv daws pom
xyeem. 12 Tswv Ntuj lub txiaj ntsim
qhia peb kom tso kev tsis hwm Ntuj pov
tseg, tso txoj kev ntshaw txog lub sim
ceeb no tseg, kom tiam neej no, peb ua
neej nyob hauv txoj kev cheem peb lub
siab, hauv txoj kev ncaj, thiab kev hwm
Ntuj. 13 Vim peb tos thiab peb vam
ntsoov txoj kev kaj siab lug. Peb tos kom
peb tus Tswv Ntuj loj, Yes Xus Pleev uas
yog tus cawm peb lub hwj chim tawm los
rau qhov muag pom xyeem.
14 Yes Xus Pleev, nws muab nws rau
luag ntes, kom nws txhiv tau peb ntawm
txhua txoj kev phem. Nws ntxuav ib haiv
neeg kom huv los ua nws tug, thiab kub
siab ua cov dej num zoo.

Lus Kas Ntawv Moo Zoo:2,1-14: Yes Xus yug los.
1 Lub zwj ceeb ntawd, vaj ntxwv
Xes Ntxas Aus Nkus Tus tshaj lus
ceeb toom kom tas ntiaj teb txheeb tsoom
mej hwm. 2 Thaum txheeb tsoom mej
hwm thawj zaug no, yog lub caij Kis Lis
Nyus ua nom tswj Xis Lias teb.
3 Txhua leej txhua tus sawv kev mus,
nyias mus sau nyias npe hauv nyias lub
nroog. 4 Yos Xes kuj sawv kev hauv lub
nroog Nas Xas Les, xeev Nkas Lis Lais
mus pem Das Vis lub nroog hu ua Npes
Les Hes, nyob hauv xeev Yus Das, vim
Yos Xes yog Das Vis tsev neeg thiab Das
Vis caj ces. 5 Yos Xes xav muab Mab
Liab lub npe sau nrog nws lub npe, vim
Mab Liab yog tus nws qhaib thiab Mab
Liab cev hnyav lawm. 6 Thaum nkawd
nyob Npes Les Hes, txog lub caij Mab
Liab yuav daws cev. 7 Nws yug nws tus
tub, nws muab ntaub qhwv, thiab muab
tso pw hauv ib lub dab nyuj, vim lub tsev
txais qhua tsis muaj chaw rau nkawd so.
8 Nyob thaj tsam ntawd, muaj ib co neeg
zov yaj. Lawv nyob nruab teb. Hmo ntuj,
lawv nyob zov lawv pab yaj. 9 Huab
Tais tus Tshiab tawm los rau lawv pom,
Huab Tais lub hwj chim ci dawb paug
ncig lawv, lawv ntshai kawg. 10 Tus
Tshiab hais rau lawv tias :
"Nej txhob ntshai, vim kuv tuaj xa ib tsab
xov zoo uas yuav ua kom nej zoo siab
thiab ib tsoom neeg zoo siab. 11 Hnub
no, nyob hauv Das Vis lub nroog, tus
Cawm nej yug los lawm, nws yog Leej
Pleev, thiab yog Huab Tais. 12 Lub cim
yuav ua kom nej paub yog lub cim no :
nej yuav pom ib tug me nyuam mos qhwv
ntaub pw hauv ib lub dab nyuj."
13 Ib sij huam, txawm muaj ib pab
Tshiab coob coob tuaj nrog tus Tshiab xa
xov cav lus zoo txog Tswv Ntuj tias :
14 "Nyob saum cov txheej ntuj siab,
Tswv Ntuj nto meej nto moo, nyob ntiaj
teb, tsoom neeg Tswv Ntuj nyiam, nyob thaj yeeb.

COV ZAJ NYEEM-Xyoo C 2012-13 68322010 Rau hnub chiv tim 23 lub 12 hlis 2012

Ib zeej tsoom neeg ntseeg thiab tsoom phooj ywg,

Hnub no yog lis piam 4 hauv lub caij tos Huab Tais, yog ib lub zoo sij hawm rau peb txhua leej tig los txais peb tus Huab Tais Tswv Ntuj yug los ciaj neeg kom hlub tau cawm tag lub qab ntuj neeg.

Tos peb ciaj ua neeg, vim peb muaj niam muaj txi yug, muaj niam muaj txi hlub, tsa cuab tsa yim rau peb, peb thiaj li ciaj neeg. Yus yuav tsis nrauj yus niam yus txiv lub txiaj lub ntsig, yuav nco ntsoov yus tej poj yawm txwv txoob tej koob hmoov, vim muaj lawv thiaj muaj yus niam yus txiv. Tej laus thiaj qhia tej me nyuam kom hlub niam hlub txiv, kom hwm poj yawm txwv txoob. Hmoob thiaj li muaj pe tsiab. Hauv kev cai pe tsiab, tej xeeb leej xeeb ntxwv thiab tub ki ua npoj ntws tuaj pe lawv tus pog koob yawg koob thov koob hmoov. Vim lawv pog koob yawg koob muaj hmoo tau daim ntawv nyob ua neej laus qas nkoos, muaj tub ki vam ntws xws xub ntab, xeeb ntxwv nroo ntws xws xub mu. Vim li ntawd, kev hlub niam hlub txiv, kev hwm poj yawm txwv txoob tsis khib tsis txhaum Tswv Ntuj, tseem yim ua ntxim Tswv Ntuj siab xwb. Hmoob tej laus txawm tsis teev ntuj los lawv kev hlub niam hlub txiv twb dhos daws Tswv Ntuj lo lus qhia : “Koj yuav hwm koj niam koj txiv.” Hmoob tseem paub hwm lub ntuj ua tus loj, lo lus kawg mus cob thiab mus xaus rau lub ntuj xwb. Hmoob kev pauj lub “yeem ntuj” twb yog tua tsiaj txhu ua lub ntuj tsaug raws kev cai hmoob. Txawm Hmoob tsis paub Tswv Ntuj npe, twb yog Tswv Ntuj cev tes npo pab cawm tau Hmoob.

Ziag no, Tswv Ntuj tshoj peb los teev hawm Tswv Ntuj, peb yuav nco ntsoov hlub peb niam peb txiv, hlub peb tej pog koob yawg koob thiab hlub Tswv Ntuj vim Tswv Ntuj yog ntiaj teb neeg Leej Niam Leej Txi : “Koj yuav hlub Huab Tais, koj tus Tswv Ntuj, tas koj siab ntsws, tas koj ntsuj plig, tas koj lub zog, tas koj lub tswv yim thiab hlub tus nyob ze koj ib yam li koj tus kheej LK 10,27” Yog peb mloog peb niam peb txiv lus ces peb ua neeg tsim txiaj. Tos peb tsim txiaj vim peb hlub peb niam peb txiv, nco peb niam peb txiv tej txiaj ntsim. Kev nco niam txiv txiaj ntsig yog koob hmoov. Peb sim xav saib, tej laus Hmoob kev hlub niam hlub txiv thiab hlub tej poj yawm, pub lawv tau koob hmoov. Txawm lawv hu txog niam txiv poj yawm lub koob lub npe tsis duav pab tsis tau lawv los Tswv Ntuj zoo siab hlo cawm lawv. Peb twb los teev hawm Tswv Ntuj, peb yuav tsum paub, txoj kev teev hawm Tswv Ntuj tau koob hmoov loj npaum li cas npaug rau peb. Tiam sis, tsis yog ua li qub thiab hais zaj qub.
Hmoob hais kam tias peb los ua neeg, peb nyias nqa nyias daim ntaub ntawv los ua neej. Tos tib neeg tso ntiaj teb tseg yog vim nws daim ntaub ntawv ua neej tag lawm. Hmoob tej lus tsuas yam kob dej kob tshuaj kho peb kev tu siab. Tiam sis, peb to taub tej laus cov lus qhia thiab Tswv Ntuj cov lus qhia sib txawv ntau. Tej laus cov lus muaj kuab ua tau peb siab kaj, daws peb kev chawj kev chim kom ploj mus, hos Tswv Ntuj cov lus muaj peev xwm pab thiab cawm tau neeg. Vim Tswv Ntuj lus muaj hwj huam hos peb niam peb txiv zaj lus mos lus muag nqee peb kev tu siab thiab teev peb lub kua muag. Huab Tais Yes Xus yug los ua neeg, tsis nqa ntaub ntawv los ua neej li Hmoob hais kam. Huab Tais Yes Xus yug los ua neeg li tej lus muaj tseg sau rau hauv ntaub hauv ntawv thaum ntej thaum ntxov. Peb mloog saub Mis Kas Es cov lus sau tseg li no txog tus yuav yug los cawm tag lub qab ntuj neeg : “1 Npes Les Hes Es Fas Tas, tus me tshaj hauv Yus Das cov xeem, kuv yuav ua kom tus tswj His Xais Lais tawm hauv koj los MKE 3,1” Npes Les Hes, lus Hes Nplaws (לחם בית) txhais tias : “Tsev Mov.” Npes Les Hes yog ib lub me nyuam zos nyob ze lub tuam ceeb Yes Lus Xas Les, hauv xeem Yus Das nrim teb. Yus Das yog Yas Kos ib tug hauv nws 12 leeg tub. Tom qab no thiaj muaj 12 lub xeem His Xais Lais. Yawg koob Yas Kos tau foom koob hmoov rau nws tus tub Yus Das tias nws cov kwv tij yuav tsa ncauj qhuas nws, lawv yuav tuaj pe tuaj hawm nws thiab nws txhais tes yuav nyob saum nws cov yeeb ncuab caj qwb, kav lawv hauv nws xib teg (HP 49,8 ). Vim li ntawd, peb yuav to taub tias Yas Kos cov lus foom koob hmoov rau Yus Das yog Tswv Ntuj lus foom koob hmoov rau Tswv Ntuj Leej Tub. Yes Xus Tswv Ntuj Leej Tub yug nyob lub zos Npes Les Hes, zos “Tsev Mov.” Yes Xus yog mov ciaj sia cawm tag lub qab ntuj neeg ; Yes Xus ua Vaj Ntxwv kav qaum ntuj, ntiaj teb thiab Tswv Ntuj tus yeeb ncuab Xas Tas mus ib txhiab ib txhis. Peb kev mloog Yes Xus lus yog lub txim peb muaj muab tau ntxim Leej Txiv Tswv Ntuj siab dua tej : “Kuv tuaj ua kom tau li koj siab nyiam” Nws yog tus rhuav thawj tus txhooj kom tsa dua tus ob sawv 10 Hauv tus ob no ua tau peb ntshiab huv li nws nyiam vim Yes Xus Pleev lub cev ua txim ib zaug kav ib txhis HN 10,9-10” Peb los teev hawm Tswv Ntuj nrog lub Koom Txoos nyob thoob ntiaj teb, peb yuav xyiv fab rau lub Thaj Txi Ntuj. Niaj hnub peb mus koom Thaj Txi Ntuj, yog peb koom nrog Yes Xus muab nws lub cev thiab roj ntsha los txi rau Leej Txiv. Vim li ntawd, Thaj Txi Ntuj (la messe) yog lub txim loj tshaj plaws ntxim Leej Txiv Tswv Ntuj siab tshaj dua tej. Mab Liab thiab Es Lis Xas Npes nkawd yog ob tug ntseeg Tswv Ntuj thiab mloog Tswv Ntuj lus zoo tshaj tej. Tswv Ntuj ua rau nkawd pom xyeem Tswv Ntuj txoj kev cawm neeg : “45 Hmoov zoo tus ntseeg yam Huab Tais hais rau nws yeej kawg tsheej xeeb LK 1,45” Peb txoj kev teev hawm Tswv Ntuj tsis yog ib txoj kab lis kev cai li lwm tej kev cai teev hawm, tus paub thiaj tau koob hmoov, tus tsis paub tsis tau. Vim kev teev hawm Tswv Ntuj loj tshaj txoj kev cai : nws yog koob hmoov thiab txiaj ntsim. Vim li ntawd, tus neeg ncaj ncees hwm Tswv Ntuj, txawm paub thiab txawm tsis paub Tswv Ntuj los puav leej muaj Tswv Ntuj koob hmoov.

Ib tsoom phooj ywg, hauv lub caij tos Huab Tais no, peb yuav tig mus ntsia Mab Liab thiab Es Lis Xas Npes nkawd ob viv ncaus ua piv txwv qhia peb tos Tswv Ntuj kev cawm lub qab ntuj neeg. Peb pom nkawd kev mloog Tswv Ntuj lus thiab npuab Tswv Ntuj tau koob tau hmoov. Tswv Ntuj pub nkawd ib leeg ib lub txiaj ntsim loj tshaj yam nkawd tos rau nkawd pom. Peb txoj kev teev hawm Tswv Ntuj kuj yuav pub tau ib lub txiaj ntsim rau peb txhua leej, kom peb txhob poob siab.

19.12.2012 Cwj Vuam Chiv

**NrhiavTswvNtuj** 29th December 2012, 6:15 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°7

COV ZAJ NYEEM HNUB 30/12/2012 Hwm Yim Neeg Ntshiab - Xyoo C

Post NrhiavTswvNtuj 29th December 2012, 6:15 am

COV ZAJ NYEEM HNUB 30/12/2012
Hwm Yim Neeg Ntshiab - Xyoo C

Zaj nyeem 1 : 1 Xas Muas 1,20-22.24-28
20 Ces As Nas xeeb tub, nws yug tau ib tug tub, nws
muab tis npe hu ua Xas Muas. As Nas hais tias :
"Kuv hu li ntawd, vim kuv thov ntawm HUAB TAIS los."
21 Thaum tau ib xyoos lawm, Es Kas
Nas thiab nws tsev neeg nce mus txi
HUAB TAIS thiab mus pauj yeem.
22 Tab sis As Nas tsis mus, nws hais rau nws tus txiv tias :
"Kuv tos txog lub caij kuv tus me nyuam
tseg taus mis tso. Kuv yuav coj nws mus
cev rau HUAB TAIS ces nws yuav nyob ntawd mus li."
24 Thaum tus me nyuam txawj noj mov
lawm, As Nas coj nws mus hauv HUAB
TAIS lub tsev txi Ntuj uas nyob Xis Laus.
As Nas cab ib tug heev nyuj muaj peb
xyoos, ib tawb hmoov nplej thiab ib hwj cawv nrog.

25 Lawv muab tus heev nyuj tua txi Ntuj
tas ces As Nas mus hauv Es Lis tsev.
26 Nws hais tias :
"Txiv tswv, kuv yog tus poj niam uas tau
txhos caug nyob ze koj ntawm no thov
HUAB TAIS. 27 Thaum ntawd kuv thov
kom Ntuj pub tus me nyuam no rau kuv.
HUAB TAUS tau mloog kuv lo lus thov.
28 Mas nyem no kuv tso tus me nyuam
no rau HUAB TAIS kom nws nrog
HUAB TAIS mus txog hnub tuag. Kuv
muab nws rau HUAB TAIS."
Ces tus poj niam cia tus me nyuam nyob
ntawd, nws muab pub rau Tswv Ntuj.

Zaj nyeem 2 : 1 Zam 3, 1-12.21-24

1 Nej ntsia saib, Leej Txiv txoj kev
nyiam peb loj tas npaum no : yam li
peb hu ua Tswv Ntuj cov me nyuam, peb
yog Tswv Ntuj cov me nyuam tiag ! Lub
ntiaj teb neeg tsis paub peb, vim ntiaj teb
neeg tsis paub Leej Txiv.
2 Cov zoo nyiam, nyem no, peb yog
Tswv Ntuj cov me nyuam. Qhov uas yav
tom ntej peb yuav plhis mus zoo li cas,
tseem tsis tau tawm los rau qhov muag
pom xyeem. Peb paub tias, thaum Leej
Pleev yuav tawm los rau qhov muag pom
xyeem, mas peb yuav zoo li Nws, vim
nws zoo li cas, mas peb yuav pom Nws zoo li ntawd.

3 Tus twg tso siab rau Leej Pleev, mas
Leej Pleev yuav ua kom nws huv tuaj,
vim Leej Pleev yog tus huv. 4 Tus twg
ua txhaum, mas nws ua tsis haum txoj cai,
vim kev txhaum yog kev hla txoj cai.
5 Nej paub tias Leej Pleev tawm los, vim
nws tshem cov txhaum pov tseg. Tsis
muaj ib qho txhaum nyob hauv nws.
6 Tus twg nyob hauv Leej Pleev, mas
nws tsis txhaum. Tus twg ua txhaum,
mas nws tsis pom thiab tsis paub Leej Pleev.
7 Cov me nyuad, nej txhob cia luag tej ua
kom nej yuam kev. Tus ua raws txoj kev
ncaj, mas nws lub siab ncaj ib yam li Leej
Pleev uas yog tus ncaj.
8 Tus ua txhaum, nws tuaj ntawm dab
phem tuaj, vim txij thaum lub hauv paus
los, dab phem yog tus ua txhaum. Tswv
Ntuj Leej Tub tawm tuaj rhuav dab phem cov hauj lwm.

9 Leej twg yug ntawm Tswv Ntuj los,
nws tsis ua txhaum, vim Tswv Ntuj lub
noob cog rau hauv nws. Nws ua txhaum
tsis tau, vim nws yug ntawm Tswv Ntuj
los. 10 Peb paub tias, cov twg yog Tswv
Ntuj cov me nyuam, thiab cov twg yog
dab phem cov me nyuam : Tus tsis ua
raws txoj kev ncaj, mas nws tsis yog
Tswv Ntuj tug; tus tsis nyiam nws tus
kwv, nws kuj tsis yog Tswv Ntuj tug.

11 Lub moo uas txij thaum lub hauv paus
los nej tau hnov, yog lub moo no : peb
yuav sib nyiam sib hlub. 12 Peb tsis
yoog raws li Kas Ees, uas nws mloog tus
Phem, nws zawm nws tus kwv caj dab.
Vim li cas nws thiaj zawm nws tus kwv caj dab ?
Yog vim nws cov hauj lwm phem,
hos nws tus kwv cov hauj lwm ncaj.

21 Cov zoo nyiam, yog peb lub siab tsis
muab txim rau peb, mas peb tso siab lug
mus nyob ze Tswv Ntuj. 22 Yog peb
thov yam twg ntawm Tswv Ntuj, mas peb
yuav tau txais yam ntawd ntawm nws,
vim peb coj nws cov lus qhia, thiab peb ua xis nws siab.

23 Tswv Ntuj Lo Lus qhia yog lo lus no :
kom peb ntseeg txog nws Leej Tub Yes
Xus Pleev lub npe, thiab peb yuav sib
nyiam, raws li nws qhia kom peb ua.
24 Tus coj Tswv Ntuj cov lus qhia, nws
nyob hauv Tswv Ntuj, thiab Tswv Ntuj nyob hauv nws.

Peb paub tias Tswv Ntuj nyob hauv peb,
vim muaj Leej Ntuj Plig uas Tswv Ntuj pub rau peb.

Lus Kas Ntawv Moo Zoo 2, 41-52: Yes Xus nrog cov kws Txoj Cai tham.

41 Yes Xus niam thiab txiv nkawd niaj
xyoo mus ua lub Ntees Hla pem Yes Lus
Xas Les. 42 Thaum Yes Xus muaj kaum
ob xyoos lawm, lawv mus ua lub Ntees
Hla pem Yes Lus Xas Les raws li kev cai
ua Ntees Hla. 43 Dhau cov hnub ntawd
tas, ces Yos Xes thiab Mab Liab nkawd
sawv kev rov mus, hos tus me tub Yes
Xus tseem nyob Yes Lus Xas Les, nws
niam thiab nws txiv tsis paub.
44 Nkawd xav tias nkawd tus tub nrog
pab neeg tuaj ua ke rov qab lawm. Ces
nkawd mus ib hnub ke, nkawd mam li pib
nrhiav nkawd tus tub hauv cov txheeb ze
thiab cov swm neeg. 45 Nkawd nrhiav
tsis tau, nkawd rov mus nrhiav nws pem Yes Lus Xas Les.
46 Nkawd nrhiav peb hnub, thiaj nrhiav
tau Yes Xus nyob hauv lub Tuam Tsev
Teev Ntuj. Nws zaum hauv nruab nrab
cov kws Txoj Cai, nws mloog lawv thiab
nug lawv. 47 Cov neeg uas tau hnov Yes
Xus hais lus, puav leej yoob tas rau nws
lub tswv yim ntse thiab nws cov lus teb.
48 Thaum nkawd pom Yes Xus, nkawd
xav tsis thoob, ces Yes Xus niam hais rau Yes Xus tias :
"Me tub, vim li cas koj ua li ntawd rau wb ?
Saib ! Koj txiv wb nrhiav koj, wb ntxhov siab tas nrho."
49 Yes Xus hais rau nkawd tias :
"Vim li cas neb nrhiav kuv ?
Neb tsis paub tias kuv yuav leg kuv Txiv cov hauj lwm lod ?”
50 Mab Liab thiab Yos Xes nkawd tsis to
taub lo lus uas Yes Xus hais rau nkawd.
51 Yes Xus nrog nkawd rov mus Nas
Xas Les. Nws mloog nkawd lus. Yes Xus
niam khaws tej ntawd huv tib si cia rau
nruab siab. 52 Hos Yes Xus hlob hauv
kev thoob tsib, nws hlob cev thiab hlob
hauv Ntuj lub txiaj ntsim, nyob ntawm
Tswv Ntuj thiab ntawm zeej tsoom xub ntiag.

NTHUAV NTAWV NTSHIAB.

COV ZAJ NYEEM-Xyoo C 2012-13 Herber10 Rau hnub chiv tim 30 lub 12 hlis 2012

Ib zeej tsoom neeg ntseeg, tsoom niam txiv thiab phooj ywg txhua leej,

Hnub no, tag lub Koom Txoos Kav Tos Liv thoob ntiaj teb sawv daws hwm Mab Liab thiab Yos Xes nkawd lub cuab lub yig nrog Tswv Ntuj Leej Tub Yes Xus yug los hauv nkawd. Peb hais tias lub cuab lub yig “Neeg Ntshiab” lub hmoov.

Lub cuab “Yim Neeg Ntshiab” lub hmoov no muaj txiaj ntsim rau tag ntiaj teb tej txij nkawm thiab rau tag nrho lub sim ceeb. Vim li ntawd, yog nej cov ua niam ua txiv, ua txij ua nkawm lub hmoov. Tos lub sim ceeb huam vam ciaj taus sia, tos tej noob qoob noob loo, tej tsiaj txhu thiab tib neeg ciaj taus noob los yeeb vim muaj poj niam thiab muaj txiv neej, muaj maum thiab muaj txiv. Peb twb paub qas ntsoov, thaum Tswv Ntuj tsim tau nraug Oo As Das tsis tau muaj nkauj Iab Es Vas txawm tau los nyob, As Das twb ceeb laj ua neej ib hnub txog tsaus ntuj. Hnub Es Vas tshwm sim ua neej Es Vas xwb thiaj daws tau As Das kev kho siab, pom qab ua neej nyob. Vim li ntawd, txawm tus txiv neej los tus poj niam nyob ib leeg yuav tsis ciaj taus ua neeg.

Hnub no, peb ntsoom neeg ntseeg Kav Tos Liv ua lub hmoov hwm “Cuab yim neeg ntshiab”. Peb noob neej ntiaj teb yuav tau tig los thov Mab Liab thiab Yos Xes nkawd tej koob hmoov txhawb peb lub cuab lub yig kom peb txawj sib hlub, sib nres, sib haum xeeb li yim neeg ntshiab. Peb yuav tau qhib ntsej mloog Mab Liab thiab Yos Xes nkawd lub neej. Nkawd nyias yeej npaj nyias lub siab sib qaws los ua txij ua nkawm tam ntua ib tsoom tub ntxhais sawv daws. Tiam sis, muaj tej yam hauv nkawd lub neej ntxim Tswv Ntuj siab. Nkawd yog neeg hwm niam hwm txiv, hwm poj yawm txwv txoob. Nkawd ntseeg lawv cov saub tej lus qhia txog Tswv Ntuj Leej Cawm Seej yuav yug los cawm tag lub qab ntuj neeg kev txhoj kev txhaum, kev ploj kev tuag, coj kom tag lub qab ntuj neeg mus lawm qaum ntuj. Mab Liab thiab Yos Xes yeej tos ntsoov Tswv Ntuj lo lus hauv nkawd nruab siab nruab ntsws thiab hauv nkawd kev npaj sib qaws ua neej. Ua ciav, ib sij huam, Tswv Ntuj tus tshab xo cuam tshuam nkawd lub hom phiaj. Tswv Ntuj tus tub xo caw Mab Liab txais Tswv Ntuj txoj dej num thiab caw Yos Xes kom txhawb txhim Mab Liab leg Tswv Ntuj tes num.

Peb sim muab xav kom zoo, yeej tsis yooj yim rau nkawd. Tiam sis, peb pom nkawd siab loj, nkawd txawj hlub Tswv Ntuj tshaj peb lub siab xav tau ; txawm tsis yooj yim los Mab Liab zoo siab hlo ua Tswv Ntuj ib tug ntxhais txib, tsuav yug tau tus Siab Tshaj Leej Tub. Hos rau Yos Xes los tib yam nkaus, tim li cas nws tus hluas nkauj Mab Liab cev ho xeeb tub ? Puas yooj yim ntseeg Mab Liab lus thiab rov los hlub Mab Liab ? Puas yooj yim rau Yos Xes nrog Mab Liab tu ib tug me nyuam tsis yog nkawd roj nkawv ntshav ?

Mab Liab thiab Yos Xes nkawd kev mloog Tswv Ntuj lus hloov nkawd lub hom phiaj sib qaws ua neej nkawd tau sib tham ua ntej. Nkawd pom Tswv Ntuj lus xeeb nyob hauv nkawd lub neej. Tswv Ntuj pom nkawd yog ob niam txiv ncaj ncees siab loj siab dav, siab ntev, nquag, mloog lus yuav hlub thiab tu taus Tswv Ntuj Leej Tub kom loj hlob. Tsis tas li ntawd, nkawd tseem yuav sib hlub mus kom kawg, kom nto ntsis. Yog tias Mab Liab tsis hlub Yos Xes, Mab Liab yuav muab Yos Xes tso pov tseg, tsis yuav Yos Xes ua taub hau txiv. Hos yog Yos Xes tsis hlub Mab Liab, Yos Xes yuav cem Mab Liab phem thiab nrauj pov tseg. Tiam sis, Mab Liab thiab Yos Xes nkawd yog neeg ncaj ncees, siab loj siab dav, nkawd tsis yug tub ki rau nkawd yuav. Nkawd zoo siab faib tau nkawd lub neej tos txais Tswv Ntuj. Nkawd paub tias Tswv Ntuj pluag tshaj thiab txom nyem tshaj nkawd. Tswv Ntuj tsis pom qab yug los ua neeg. Tswv Ntuj ntshaw peb txoj kev hlub Tswv Ntuj, cev tes plhws Tswv Ntuj kev tshaib kev nqhis. Nkawd hlub thiab txhawj xeeb Yes Xus npaum li ntawd. Mab Liab thiab Yos Xes thiab Yes Xus lawv niaj xyoo tuaj teev ntuj nyob Yes Xus Xas Les hauv lub tuam Tsev Teev Ntuj. Thaum lawv twb rov qab mus txog ib tog kev nrhiav tsis pom Yes Xus. Nkawd thiaj los nrhiav tau Yes Xus nrog cov kws txuj thiab cov thawj leej choj sib tham hauv tuam Tsev Teev Ntuj : “Me tub, tim li cas koj ua li ntawd rau wb ? Saib ! Koj txiv thiab kuv, wb txhawj koj npaum li.” 49 Tiam sis nws hais nkawd tias : “Vim li cas neb ho nrhiav kuv ? Neb tsis paub tias qhov twg kuv txiv teej tug, kuv yuav tsum nyob ntawd lod ? LK 2,48-49” Mab Liab thiab Yos Xes nkawd yeej tsis xub paub Yes Xus lub neej tom ntej li. Mab Liab nco ntsoov tej lus Yes Xus hais rau nkawd hauv nws siab.

Peb yuav tau coj lub neej ua neeg ntseeg Tswv Ntuj thiab peb lub neej ua txij nkawm yam li Mab Liab thiab Yos Xes thiab Yes Xus “Yim Neeg Ntshiab” no lub neej. Mab Liab yog peb leej niam siab zoo txawj ua haum Tswv Ntuj siab nyiam. Yos Yes yog ib leej txiv nrog Mab Liab hlub thiab tu Yes Xus. Vim li ntawd, peb pom “Yim Neeg Ntshiab” lub neej kuj tsis yog ib zaj npau suav. Mab Liab thiab Yos Xes thiab Yes Xus lawv ua tau lub neej ntxim Tswv Ntuj siab, lawv nquag teev ntuj, txawj sib hlub, sib zam thiab sib yoog. Peb twb tsis yog neeg ntshiab huv, peb yim huab yuav vam txog “Yim Neeg Ntshiab” tej txiaj ntsim pab peb, tsis txhob ua li tej txhia neeg tsis paub cai cav muaj ntsej muag thuam “Yim Neeg Ntshiab” no.

Tseem muaj ntau txoj kev hauv peb lub neej, peb yuav ceev faj tsis txhob yuam kev coj li tej tib neeg tsis txawj sib hlub, tsis xav sib zam. Nyias khav khav nyias, ib tug tsis vam txog ib tug, koj ua koj lub neej fee das nyob ib cag, kuv ua kuv neej fee de rau ib sab teb. Peb sim rua muag ntsia tiam neeg no cov cuab yig tawg tas ntau lub cuab yig niam mus niam lwj liam, txiv mus txiv lwj dhi, me tub me nyuam tsis pom qab ua neej nyob txom nyem ntsuav tam ntua tub ntsoj ntxhais ntsuag tos leej niam txhais tes hlub leej txi txhais tes puag. Tseem muaj tej yam xwm txaus txhawj ua npog dub thiab ua npog daj txiv neej rov qaws txiv neej ua ib cuab, poj niam qaws poj niam ua ib yig ; xyov lub neej yuav mus xaus qhov twg.

Ib zeej tsoom phooj ywg sawv daws, tab tib neeg txawm yuav paub txuj paub ci loj npaum twg, nplua nuj loj npaum li cas, tib neeg kawg yuav npuab Huab Tais Tswv Ntuj thiaj tsis liam txwv. Peb kev npuab Tswv Ntuj yog nrauj peb lub siab ua neeg cam thawj thiab cav ncauj, sib hlub sib zam, mloog peb lub Koom Txoos Kav Tos Liv lus qhuab qhia. Mab Liab thiab Yos Xes thiab Yes Xus lawv “Yim Neeg Ntshiab” lub neej muaj txiaj ntsim. Peb yuav vam txog lawv lub txiaj ntsim txhawb peb lub neej thiab kev ntseeg Tswv Ntuj.

26.12.2012 Cwj Vuam Chiv

**NrhiavTswvNtuj** 5th January 2013, 8:56 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°8

COV ZAJ NYEEM HNUB 06/01/2013 (Chiv Hwm Huab Tais - Xyoo C )

Post NrhiavTswvNtuj 5th January 2013, 8:56 pm

COV ZAJ NYEEM HNUB 06/01/2013
(Chiv Hwm Huab Tais - Xyoo C )

Zaj nyeem 1 : Es Xais 60,1-6

Kom koj qhov pom kev ci ntsa iab
mas ! Vim koj qhov pom kev tuaj txog,
thiab HUAB TAIS lub hwj chim sawv los ziab koj.
2 Ntsia saib ! Qhov tsaus ntuj vov tas
lub ntiaj teb. Ib twv huab dub vov cov
haiv neeg. Tab sis HUAB TAIS lub hwj chim nyob hauv koj.
3 Cov kuj cuab taug kev mus, nyob hauv
koj qhov pom kev. Koj yog lub hnub
tawm tuaj kaj cov vaj kom lawv pom kev mus.
4 Koj tsa muag ntsia nyob ncig koj mog !
Koj yuav pom sawv daws sib sau tuaj
cuag koj. Koj cov tub tuaj tej teb chaws
deb tuaj, lawv ris koj cov ntxhais ntawm duav.
5 Koj pom li ntawd, koj yuav ua ntsej
muag luag ntxhi. Koj lub plawv yuav
dhia paj paws, koj lub siab yuav nthuav.
Tej txhab kub nram dej ntuj tuaj thawj
koj. Cov kuj cuab tej nyiaj tej kub tuaj nyob hauv koj.
6 Cov ntxhuav tuaj ua npoj ntws. Cov
thauj tuaj ntawm Mas Dias thiab Es Fais.
Lwm cov tuaj Ses Npas tuaj, lawv thauj
kub thiab txab txiv yoov tuaj, lawv tshaj
HUAB TAIS cov hauj lwm loj.

Zaj nyeem 2 : Es Fes Xos 3,2-3a.5-6
2 Kuv xav tias nej yeej tau hnov piav
txog qhov Tswv Ntuj pub txiaj ntsim zoo
li cas rau kuv, kom kuv tau kev pab nej.
3 Tswv Ntuj qhib nws cov txuj ci zais
tob tob los rau kuv pom xyeem.
5 Ntuj tsis tau qhib cov txuj zais tob no
rau txheej laus thaud, xws li nws nyuam
qhuav qhib rau nws cov Hauv Paus Xa
Lus ntshiab, thiab rau nws cov Yaj Saub,
nyob hauv Leej Ntuj Plig : 6 yog qhov
tias cov neeg teev pej kum dab txais ib
lub cuab tam xws luag, lawv ua tes taw
nyob hauv tib lub Cev, lawv txais Ntuj
cov lus cog ib yam li luag, nyob hauv Yes
Xus Pleev, vim lawv mloog lub Moo Zoo.

Mas Tais Ntawv Moo Zoo 2, 1-12 Cov kws hnub qub tuaj hawm Yes Xus.
Yes Xus yug los nyob Npes Les Hes,
Yus Das teb, yog lub caij Hes Los ua vaj.
Muaj ib co kws hnub qub tuaj Toob Fab
tuaj txog Yes Lus Xas Les. 2 Lawv nug tias :
"Tus vaj Yus Das uas nyuam qhuav yug
los nyob qhov twg ? Peb pom nws lub
hnub qub tawm nyob Toob Fab, peb tuaj hawm nws."
3 Tus vaj Hes Los hnov li ntawd, nws lub
siab nphau npog. Tas Yes Lus Xas Les
kuj nrog nws ua siab nphau npog thiab. 4
Hes Los hu cov thawj leej choj thiab pej
xeem cov kws ntawv tuaj tas huv tib si.
Nws nug lawv txog qhov chaw uas Leej
Pleev yuav yug los. 5 Lawv teb tias :
"Nyob Npes Les Hes, Yus Das teb, vim
tus yaj saub sau tseg tias :
6 Koj, Npes Les Hes, Yus Das thaj av,
koj tsis yog lub zos Yus Das me tshaj cov,
vim ib tug thawj coj yuav tawm hauv koj
los, nws yuav zov kuv haiv His Xas Lais."
7 Hes Los hu cov kws hnub qub twj ywm
tuaj. Nws kom lawv qhia meej lub sij
hawm uas lub hnub qub tau tawm tuaj.
8 Ces nws cia lawv mus Npes Les Hes.
Hes Los hais rau lawv tias :
"Nej mus tshuaj tus me nyuam kom meej,
thaum nej nrhiav tau nws, nej xa xov qhia
kuv paub, vim kuv xav mus hawm nws thiab."
9 Tus vaj tso lus li ntawd, ces lawv sawv
kev mus. Thaum ntawd, lub hnub qub uas
lawv tau pom nyob Toob Fab rov mus ua
lawv ntej. Nws mus nres saum qhov chaw
uas tus me nyuam nyob. 10 Lawv rov
pom lub hnub qub, mas lawv zoo siab
kawg. 11 Lawv chaws mus hauv tsev,
lawv pom tus me nyuam thiab nws niam
Mab Liab, lawv pe, lawv hawm nws.
Lawv qhib lawv cov phij xab, lawv cev
kub, cev txab ntoo xyab, thiab cev txab
txiv yoov ua paj tshab rau nws.
12 Ntuj qhia lawv hauv npau suav kom
txhob rov qab mus pem Hes Los tsev.
Ces lawv taug dua ib txog kev rov mus lawv teb chaws.

NTHUAV NTAWV NTSHIAB.

Rau hnub chiv tim 06 lub 1 hlis 2013

Ib soom niam txiv kwv tij neej tsa phooj ywg sawv daws,

Hnub no, tas tsoom neeg ntseeg Kav Tos Liv thoob ntiaj teb ua lub hmoov hwm peb tus Huab Tais Tshwm Plaws tuaj rau peb neeg ntiaj teb, lus Hes Las hais tias (Ἐπιφάνεια). Vim li ntawd, peb yuav los nthuav ob peb los txog lub ntsiab Huab Tais Tshwm Plaws tuaj no, muaj nuj nqes dab tsi rau peb tus neeg ntseeg teev Tswv Ntuj.

Lub txiaj ntsim (Ἐπιφάνεια, Huab Tais Tshwm Plaws Tuaj) no, ib txwm cov yaj saub yeej ceeb toom rau tsoom tub ki His Xais Lais paub. Vim lub ntuj lub teb, tag lub sim ceeb yog Tswv Ntuj tsim. Tag ntiaj teb tib neeg yog Tswv Ntuj me nyuam. Tswv Ntuj hlub tag nrho peb leej tib neeg txhua tus. Tswv Ntuj ntshaw kom peb txhua tus tib neeg muaj kev nyob kaj siab, dim kev txom nyem, kev tsaus ntuj. Txoj kev txom nyem loj yog txoj kev tuag. Peb leej tib neeg txoj kev tuag, yog kev yuam kev ploj mus ib txhiab ib txhis, vim peb leej tib neeg lub keeb txhaum cam thawj, yuam cai, hla Tswv Ntuj lus, ua txhaum Tswv Ntuj thiab ua txhaum peb tej kwv tij neej tsa : Kas Ees tua nws tus kwv As Npes tuag nthi. Txoj kev Huab Tais Tshwm Plaws tuaj no, tsis yog tuaj qhia rau ib haiv neeg paub xwb, tsis yog tuaj qhia rau haiv neeg teev Tswv Ntuj His Xais Lais paub xwb, hos yog tuaj rau tag nrho lub qab ntuj neeg. Vim hauv lub qab ntuj neeg muaj cov teev Tswv Ntuj, muaj cov teev pej kum dab qhuas, muaj cov neeg zoo thiab cov neeg phem, muaj cov neeg siab dawb siab ntshiab thiab cov neeg lim hiam thiab nkhaus. Lub txiaj ntsim Huab Tais Tshwm Plaws tuaj yog pub rau tag tsoom neeg nyob tiaj teb. Tus yaj saub Es Xais twb xub hais Tswv Ntuj cov lus no tshwm rau haiv neeg His Xais Lais hnov. Tus tseem Huab Tais Tswv Ntuj uas haiv neeg His Xais Lais teev no tsis yog lawv tus Huab Tais Tswv Ntuj nkaus xwb ; hos yog ntiaj teb neeg sawv daws tus Huab Tais Tswv Ntuj : “5 Koj yuav pom, koj yuav luag ntxhi, yuav sov koj siab thiab ua koj siab nthuav loj. Thooj nyiaj kub sab dej hiav txwv nraum ub yuav sis laub sis lug tuaj cuag koj nrog cov teb chaws nplua nuj 6 Tej npoj ntxhuav yuav tuaj koos koj nrog Mas Dias thiab Es Fas cov thauj, tas cov neeg Ses Npas nqa kub thiab xyab ntaw tuaj cav lus zoo txog Huab Tais EX 60,5-6” Mas Dias, Es Fas thiab Ses Npas yog cov teb chaws teev pej kum dab qhuas, lawv yuav nqa nyiaj nqa kub, nqa xyab ntaw tuaj teev tuaj qhuas His Xais Lais tus Huab Tais yug los hauv qab ntuj los cawm tag lub qab ntuj neeg.

Yog peb cuab pob ntseg mloog kom zoo peb cov poj yawm txwv txoob tej lus qhia, lawv kuj hais tib yam li saub Es Xais tau hais tseg. Tag lub ntiaj teb neeg yog Tswv Ntuj tsim yog Tswv Ntuj tug. Peb leej tib neeg txawm ua neeg paub cai lees teev hawm Tswv Ntuj, los ua cov tsis paub tsis leem cai tsis tiam Tswv Ntuj los sawv daws puav leej yog Tswv Ntuj tsim yog Tswv Ntuj me nyuam : “5 Nws tsis tau yees qhia rau lwm tiam neeg tej tub li tam sis no nws yees qhia nws npoj xa lus ntshiab thiab rau cov saub hauv Ntsuj Plig 6 Tsoom coj dab qhuas puav leej muaj feem cuab tam, muaj feem xyaw thiab muaj feem nrog kev cog lus hauv Leej Pleev Yes Xus ntawm lub Moo Zoo EFX 3,5-6” Paj Lug yog Yes Xus ib tug thwj tim, Paj Lug kuj qhia tias Leej Pleev Yes Xus yug los cawm tag nrho peb ntiaj teb neeg. Tsoom neeg teev pej kum dab qhuas, cov siab ncaj siab zoo puav leej muaj feem txais tau Leej Pleev Yes Xus kev khuv leej cawm tau lawv. Cov neeg ntseeg Tswv Ntuj lub ncauj lam los teev hawm Tswv Ntuj, tiam sis lub siab lim hiam thiab nkhaus cees txhob vam Huab Tais kev khuv leej, lawv tseem yuav raug txiav txim hnyav ncawv : “6 Yes Xus teb lawv tias : “Neeg dag, Es Xais tau saub txog nej hauv ntawv tseg tias : Haiv neeg no hawm kuv ntawm di ncauj, lawv siab nyob deb ntawm kuv 7 Lawv kev hawm kuv tsis tsim nqe, tsuas qhia tib neeg tus txhooj cai 8 Nej xyeeb Tswv Ntuj lus qhia rau ib cag tuav ruaj nreb tib neeg tej kab ke MK 7,6-8.” Vim li ntawd, peb to taub lub txiaj ntsim Huab Tais Tshwm Plaws tuaj no yog pub rau tag ntiaj teb tib neeg txhua leej txhua tus. Yog tus tib neeg twg ua tus tib neeg siab ncaj ncees hlub nws lub cuab lub yig thiab hlub neeg, tus ntawd yog tus yuav pom Leej Pleev Yes Xus txoj kev cawm.

Mas Tais tsab ntawv Moo Zoo peb hnov hnub no kuj puav leej qhia mus tib seem lus raws li Paj Lug thiab saub Es Xais cov lus qhia. Nej xav li cas, tus vaj ntxwv Hes Los twb ua vaj kav Yus Das teb (37 à 4 av JC), Hes Los twb ua vaj kav haiv His Lais teev hawm Tswv Ntuj raws Mos Ses txoj cai, tim li cas lub caij Yes Xus yug los ciaj neeg, vaj ntxwv Hes Los twb tsis paub, cov neeg teev Tswv Ntuj nyob Yes Lus Xas Les twb tsis paub ? Tseem yog ib co txiv dab txiv muam nyob sab hnub tuaj mus qhia Hes Los thiaj paub : “Nej mus lawm, mus tshuaj kom meej txog tus me nyuam; thaum nej nrhiav tau nws lawm, nej xa xov rau kuv, kom kuv tau mus pe hawm nws thiab MT 2,8 ” Yog peb tsis muab peb txoj kev ntseeg Tswv Ntuj los kav peb lub neej ces peb yuav zoo li vaj ntxwv Hes Los, peb yuav zoo li cov neeg nyob Yes Lus Xas Les tsis paub qab hau dab tsi li, lam niaj hnub teev hawm Tswv Ntuj, Yes Xus yug los tsis ntxiv dab tsi rau lawv lub neej. Vim li ntawd, peb los ua neeg teev Tswv Ntuj, peb yuav muab Tswv Ntuj lus kav peb lub neej thiab tej siab ntsws kom zoo tshaj nom tswv tus txhooj tus cai, peb thiaj li yuav pom Yes Xus yug los ciaj neeg muaj nuj nqes rau peb lub neej. Yam li cov txiv muam taug kev ntsoov tuaj pe hawm Huab Tais Yes Xus thiab muaj nyiaj muab kub, muab xyab ntaw ua paj tshab rau Huab Tais Tswv Ntuj. Tsis li ces, peb yeej pauv tsis ntxiv cov Fas Lis Xais muab hlob thiab lam khav theeb, tsis to taub kev teev hawm Tswv Ntuj ib qho, lam muab tej txhooj cai los phua rau tus ub tus no, ua cov neeg paub cai dag.

Ib tsoom phooj ywg sawv daws, yog peb tsis mloog peb lub hauv paus kev ntseeg lus qhuab qhia, yog peb tsis coj li peb cov thawj txiv plig thiab tswv qhia lus, ces peb lam ua lub npe neeg teev Tswv Ntuj li tej neeg ntseeg tsis nyob hauv Koom Txoos Kav Tos Liv kev ntseeg (hors de la foi catholique). Cov neeg tsis mloog Koom Txoos Kav Tos Liv kev ntseeg, puav leej tsis mloog cov thwj tim Pob Zeb thiab Paj Lug lus qhuab qhia thiab tsis yuav Yes Xus lus qhia. Tus tsis yuav Yes Xus lus qhia ces zoo tam zoj qe qauj qe tov lawm xwb ov.

04.01.2013 Cwj Vuam Chiv

**NrhiavTswvNtuj** 11th January 2013, 11:01 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°9

COV ZAJ NYEEM HNUB 13/01/2013 (Huab Tais txais lub Cim Ntxuav - Xyoo C )

Post NrhiavTswvNtuj 11th January 2013, 11:01 pm

COV ZAJ NYEEM HNUB 13/01/2013
(Huab Tais txais lub Cim Ntxuav - Xyoo C )

Zaj nyeem 1 : His Xais 40,1-5.9-11 His Xais ceeb toom cov lus nplij

1 Nej tus Tswv Ntuj hais tias :
"Nej nplij kuv haiv neeg, nej nplij
lawv mas ! 2 Nej hais lus rau hauv Yes
Lus Xas Les nruab siab. Nej hais nrov
nrov rau nws tias nws lub caij ua qhev
dhau lawm. Nws them txim txhaum tas
lawm. Cov xwm uas nws txais ntawm
HUAB TAIS txhais tes los them nws cov
txhaum twb tshaj nws cov txhaum ob npaug lawm."
3 Muaj ib lub suab qw tias :
"Nej npaj ib txog kev hauv teb chaws
suab puam rau Tswv Ntuj taug. Nej
ncaws ib txog kev ncaj hauv cov teb
chaws quav poj rau peb tus Tswv Ntuj.
4 Nej txhub cov hav tob kom siab, kom
cov roob thiab cov hauv toj cia li qis, kom
cov tiaj muaj pov toj, hloov ua hav tiaj tus
yees, kom cov toj ntxhab hloov ua tshav
puam. 5 HUAB TAIS lub hwj chim
yuav tawm los. Txhua tus muaj lub cev
nqaij puav leej yuav pom lub hwj chim,
vim HUAB TAIS lub ncauj tau hais lus.

Xis Yoos. Koj nce mus saum ib lub roob
siab, koj tsa suab qw nrov nrov mas ! Koj
yog tus fi tsab xov zoo mus rau Yes Lus
Xas Les, koj txhob ntshai cuab suab. Koj
hais rau cov nroog Yus Das tias :
"Ntsia ntawm no saib, yog nej tus Tswv
Ntuj."
10 Saib HUAB TAIS Tswv Ntuj nyob
ntawm no. Nws tuaj txog, nws muaj hwj
huam ! Nws txhais npab ua tswv kav
sawv daws. Nej ntsia tus nqi zog nrog
nws. Cov nyiaj nws them nyob ntawm nws xub ntiag.
11 Tam zoj tus yug tsiaj coj nws pab tsiaj:
Nws tes sua zog nws pab yaj, nqa zoj cov me nyuam ntawm xub ntiag,
mob siab ntsoov tu cov maum yaj coj me nyuam.”

Zaj nyeem 2 : Tis Tos 2, 11-14 ; 3, 4-7 Vim li cas sawv daws thiaj yuav coj

11 Sawv daws yuav coj tus yam ntxwv
zoo, vim Tswv Ntuj lub txiaj ntsim yog
lub qhov dej uas txhawv txoj kev cawm
txhua leej txhua tus. Tswv Ntuj lub txiaj
ntsim tawm los rau sawv daws pom
xyeem. 12 Tswv Ntuj lub txiaj ntsim
qhia peb kom tso kev tsis hwm Ntuj pov
tseg, tso txoj kev ntshaw txog lub sim
ceeb no tseg, kom tiam neej no, peb ua
neej nyob hauv txoj kev cheem peb lub
siab, hauv txoj kev ncaj, thiab kev hwm
Ntuj. 13 Vim peb tos thiab peb vam
ntsoov txoj kev kaj siab lug. Peb tos kom
peb tus Tswv Ntuj loj, Yes Xus Pleev uas
yog tus cawm peb lub hwj chim tawm los
rau qhov muag pom xyeem.
14 Yes Xus Pleev, nws muab nws rau
luag ntes, kom nws txhiv tau peb ntawm
txhua txoj kev phem. Nws ntxuav ib haiv
neeg kom huv los ua nws tug, thiab kub
siab ua cov dej num zoo.

4 Tab sis, hnub uas tus Tswv Ntuj cawm
peb qhib nws lub siab zoo tawm los thiab
nws txoj kev nyiam tsoom sid tawm los
rau qhov muag pom xyeem, 5 mas nws
tsis tshuaj tias peb puas tau ua cov dej
num ncaj los tsis tau. Nws tsuas mloog
nws lub siab khuv leej neeg. Nws cawm
peb nyob hauv cov dej ntxuav neeg, kom
peb rov yug los tshiab, thiab rov tshiab
tuaj nyob hauv Leej Ntuj Plig Ntshiab.
6 Tswv Ntuj tso Leej Ntuj Plig los nyob
puv hauv peb ntau kawg, nyob hauv Yes
Xus Pleev, tus cawm peb. 7 Leej Pleev
lub txiaj ntsim ua kom peb ntshiab tuaj,
ces peb tso siab tau tias peb yuav txais
txoj sia nyob mus li los ua peb lub cuab tam.

Lus Kas Ntawv Moo Zoo 3,15-16.21-22 Yes Xus txais lub Cim Ntxuav.

15 Tsoom pej xeem vam vam tos ntsoov,
sawv daws ua xyem xyav txog Zam rau
nruab siab tias tej zaum Zam yog Leej
Pleev. 16 Ces Zam hais rau sawv daws tias :
"Ntawm kuv, mas kuv muab dej los
ntxuav nej, tab sis tus muaj zog dua kuv
yuav tuaj. Kuv tsis tsim nyog daws txoj
hlua khi nws nkawm khau. Tus ntawd
yuav ntxuav nej nyob hauv Leej Ntuj Plig
Ntshiab thiab hauv hluav taws.

21 Thaum uas tsoom pej xeem txais kab
ke ntxuav tas, thiab Yes Xus kuj txais kab
ke ntxuav tas lawm, ces Yes Xus teev
Ntuj. Lub ntuj qhib plho los, 22 ces
Leej Ntuj Plig Ntshiab yees ua ib lub cev,
xws li ib tug nquab, nqes los saum Yes
Xus. Ib lub suab nrov saum ntuj tuaj
tias :
"Koj yog kuv Leej Tub. Hnub no kuv xeeb koj."

NTHUAV NTAWV NTSHIAB.

Rau hnub chiv tim 13 lub 1 hlis 2013

Ib tsoom niam txiv kwv tij neej tsa sawv daws,

Peb zoo siab rov tuaj sib fim thiab teev Tswv Ntuj ua ke nrog tas zeej tsoom neeg ntseeg thoob ntiaj teb. Peb tsis yog ua neeg ntseeg twm zeej twm kawv xwb, peb txais lub Koom Txoos Kav Tos Liv kev ntseeg. Hnub no, lub Koom Txoos Kav Tos Liv caw tas zeej tsoom neeg ntseeg hwm peb tib neeg thoj nam thoob ntiaj teb thiab hwm Huab Tais Yes Xus txais lub Cim Ntxuav.

Peb yuav tsum ceev faj tsis txhob to taub yuam kev txog Koom Txoos hnub hwm neeg thoj nam thiab nom tswv tus cai tswj neeg thoj nam. Thaum Koom Txoos hais txog neeg thoj nam, Koom Txoos caw zeej tsoom neeg ntseeg thoob ntiaj teb kom hlub cov tib neeg thoj nam. Txiv Vaj Qhia Npaw Nuas 16 hais li no : “Hnub no yog ib hnub nco txog cov neeg thoj nam tsiv teb tsaws chaw “Migrations : pèlerinage de foi et d’espérance ; Tsiv teb tsaws chaw : yog kev ntseeg thib kev cia siab” Txoj kev ntseeg thiab kev cia siab no ua ob lo lus loj nyob rawv hauv tus neeg tsiv teb tsaws chaw nruab siab. Vim lawv ntshaw ib lub neej zoo, lawv thiab li tso lub neej nyuaj siab tsis pom qab cob cuab rov tom qab. Muaj coob leej lawv ntseeg tias Tswv Ntuj yuav tsis tso nws cov me nyuam pov tseg, qhov ntawd cuab tau lub zog loj rau lawv thev dhau txhua tsav puas yam kev tshaib kev nqhis kev txom nyem thiab vam ntsoov ib hnub twg lawv yuav rov los lawv qub teb qub chaw.” Vaj Qhia tseem hais rau cov neeg tsiv teb tsaws chaw li no : “Cov kwv cov muam tsiv teb tsaws chaw, kom hnub nyoog nco txog neeg thoj nam no txhawb nej txoj kev vam thiab kev cia siab rau Huab Tais nws sawv ntawm nej ib sab nres nej ! Kom nej nco ntsoov nws lub ntsej muag ntawm txhua yam luag tos txais thiab hlub nej hauv nej lub neej tsiv teb tsaws chaw…” Vaj Qhia hais tias tus neeg tsiv teb tsaws chaw lub pliaj plhu zoo tam zoj tus neeg ntseeg vam thiab ntshaw Tswv Ntuj pliaj plhu. Cov Tswv Qhia nyob Fab Kis teb hauv cov xeev teb li Nantes, Luçon, Angers, Laval thiab Le Mans kuj hais txog hnub nco cov neeg thoj nam no : “Peb caw tas tsoom neeg ntseeg kom thim xav. Peb tsis yog yuam tsum pub thia pab cov neeg tsiv teb tsaws chaw xwb, peb tseem yuav txais lawv txiaj ntsim. Lawv yog ib co kwv tij nkauj muam ntsib kev iab kev daw hauv lawv lub neej tsiv teb tsaws chaw thiab kuj yog neeg thoob tsib. Ib txhia lawv kuj yog neeg ntseeg muaj kev ntseeg loj muaj txuj yuav qhuab qhia tau rau peb. Ib txhia ua neeg paub cai tshaj peb yuav qhia tau ntau yam rau peb kawm. Peb yuav nco ntsoov Leej Pleev cov lus : “Kuv ua neeg pej kum nej tau txais kuv MT 25,35” Ua li mas txawm yog vaj qhia los cov tswv qhia lawv kuj hais tias hauv tus neeg pej kum lub pliaj plhu peb yuav tsib dheev Leej Pleev pliaj plhu. Vim li ntawd, hnub nyoog hwm peb tib neeg tsiv teb tsaws chaw no tam ntua hwm saub lus thiab.

Ua li no rau peb tus kheej ne, lub hnub nyoog hwm tib neeg tsiv teb tsaws chaw muaj nuj nqes dab tsi rau peb ? Muaj nuj nqes vim qhia rau peb nco txog peb tej poj yawm hauv txoj kev ntseeg. Peb yug los hauv lub ntiaj teb no, peb kuj tsuas yog neeg tsiv teb tsaws chaw ib yam li yawg koob Has Nplas Has, Mos Ses thiab Es Lias lawv ; vim peb lub teb chaws tsis yog nyob ntiaj teb no, peb tseem tos ntsoov hnub kawg peb yuav mus lawm qaum ntuj thiaj yog peb lub chaw nyob ib txhiab ib txhis. Lub cim ntxuav cog lus pub peb ciaj tau Tswv Ntuj me nyuam saum qaum ntuj.

Ua li mas hnub no, lub Koom Txoos kuj nco txog Huab Tais Yes Xus txais lub cim ntxuav. Thaum Yes Xus txais lub cim ntxuav tas, lub ntuj qhib plho, Leej Ntuj Plig Ntshiab nqes los saum nws, ib lub suab nrov saum ntuj tuaj tias : “Koj yog kuv leej tub ntxim hlub, hauv koj ua xis kuv siab tag”. Hnub no, peb nco txog Huab Tais lub cim ntxuav, yog saib lub cim ntxuav peb tau txais rau lub chaw siab. Cov txiaj ntsim Yes Xus tau txais hauv nws lub cim ntxuav, muaj Leej Ntuj Plig Ntshiab thiab muaj Leej Txiv kev pab peb puav leej tau txais huv tib si. Vim li ntawd, xav kom peb pom lub cim ntxuav muaj txiaj ntxim loj npaum li cas pub peb ciaj tsheej Tswv Ntuj me nyuam. Peb yuav tsum txhob ua li tej txhia neeg ntseeg rov taw tuam ntuj nrauj kev teev hawm Tswv Ntuj pov tseg. Peb yuav tau yoog ua cov tim khawv qhia Tswv Ntuj txoj kev hlub neeg loj npaum li cas, tseev kom coj tau peb mus lawm qaum ntuj. Mab Liab yog peb tib neeg thawj tug tsis muaj qua ntxa nyob yaj ceeb no, nws lub cev thiab ntsuj plig mus dua qaum ntuj lawm mus nyob niaj txhiab ib txhis nto koob meej ntawm Tswv Ntuj xub ntiag.

Thov kom lub hnub nyoog hwm peb tib neeg tsiv teb tsaws chaw thiab hwm Huab Tais txais lub cim ntxuav no ua kom peb ciaj Tswv Ntuj me nyuam li Tswv Ntuj siab nyiam.

11.01.2013 Cwj Vuam Chiv

**NrhiavTswvNtuj** 18th January 2013, 12:45 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°10

COV ZAJ NYEEM HNUB 20/01/2013 (Chiv nruab xyoo 3 Xyoo C)

Post NrhiavTswvNtuj 18th January 2013, 12:45 am

COV ZAJ NYEEM HNUB 20/01/2013 (Chiv nruab xyoo 3 Xyoo C)

Zaj nyeem Ib: HX 62, 1-5

1 Vim muaj Xis Yoos, kuv yuav
tsis nyob twj ywm. Vim muaj
Yes Lus Xas Les, kuv yuav tsis so, mus
txog lub caij nws txoj kev yeej tawm
plaws xws li ib qho kaj, nws txoj kev yeej
tawm plaws xws li ib teg tsau cig cig.
2 Cov kuj cuab yuav pom koj txoj kev
yeej, tas cov vaj huv si yuav pom koj lub
hwj chim. Luag yuav tis npe tshiab hu
koj, yog HUAB TAIS lub ncauj yuav
qhia. 3 Koj yuav zoo li ib lub mom teev
kub muaj hwj chim nyob hauv HUAB
TAIS tes. Zoo li ib lub kaus mom ua vaj
nyob hauv koj tus Tswv Ntuj xib teg.
4 Luag yuav tsis hais ntxiv txog koj tias :
"Tus luag tso pov tseg."
Luag yuav hu koj tias :
"Kuv lub chaw zoo siab."
Luag hu koj thaj av tias :
"Nkauj nyab tshiab." Vim koj yuav yog
HUAB TAIS chaw zoo siab thiab koj thaj
av yuav ua nkauj nyab tshiab.
5 Tus tsim koj, nws yuav qaws koj ua
nws txij nkawm zoo li ib tug tub hluas
yuav ib tug ntxhais nkauj xwb. Koj yuav
ua koj tus Tswv Ntuj zoo siab lom zem,
xws li tus nkauj nyab ua nraug vauv lub
chaw sov siab dhia daj dhia luag.

Zaj nyeem Ob: 1 KLN 12,4-11
Muaj ntau lub txiaj ntsim. Tab sis yog tuaj ntawm tib tug Tswv Ntuj tuaj.

4 Ntuj pub ntau yam txiaj ntsim, tiam sis
yog tuaj ntawm Leej Ntuj Plig tib leeg
tuaj xwb. 5 Muaj ntau txoj kab xwm, tab
sis yog tuaj ntawm tib tug Huab Tais tuaj.
6 Muaj ntau txoj hauj lwm, tab sis yog
tib tug Tswv Ntuj ua cov hauj lwm ntawd
nyob hauv txhua leej tib neeg.
7 Ntuj pub Leej Ntuj Plig rau peb kom
peb pab tau tsoom sid. 8 Ib txhia, Leej
Ntuj Plig pub ib zaj lus thoob tsib rau
lawv. Ib txhia, Leej Ntuj Plig pub ib zag
txuj ci rau lawv. 9 Ib txhia, Leej Ntuj
Plig pub kom lawv muaj ib lub siab
ntseeg. Ib txhia, Leej Ntuj Plig pub kom
lawv txawj kho mob. 10 Ib txhia, Leej
Ntuj Plig pub kom lawv txawj ua hwj
huam yees ntxwv. Ib txhia, Leej Ntuj Plig
pub kom lawv txawj ua Yaj Saub. Ib
txhia, Leej Ntuj Plig pub kom lawv txawj
pom tias puas yog dab. Ib txhia, Leej Ntuj
Plig pub kom lawv txawj hais ntau xeem
lus. Ib txhia, Leej Ntuj Plig pub kom lawv
txawj txhais ntau xeem lus.
11 Tas ib puas tsav yam ntawd, yog Leej
Ntuj Plig tib leeg ua, yog Leej Ntuj Plig
tib leeg muab faib rau zeej tsoom sawv
daws, raws li nws nyiam.

Zam Ntawv Moo Zoo: 2, 1-11
Rooj tshoob hauv zos Kas Nas.

1 Peb hnub tom qab, muaj ib rooj
tshoob hauv lub zos Kas Nas xeev
Nkas Lis Lais. Yes Xus niam mus nrog
lawv noj tshoob nyob ntawd. 2 Lawv
caw Yes Xus thiab nws cov thwj tim mus
noj tshoob thiab. 3 Lawv tsis tshuav
cawv ntxiv lawm, Yes Xus niam hais rau
Yes Xus tias :
"Lawv tsis muaj cawv ntxiv lawm."
4 Ces Yes Xus hais rau nws niam tias :
"Niad, tsis yog wb hauj lwm. Kuv lub sij
hawm tseem los tsis tau txog."
5 Yes Xus niam hais rau cov tub ce cawv
tias :
"Yes Xus kom nej ua yam twg, mas nej
ua huv tib si mog."
6 Nyob ntawd, muaj rau lub hub zeb
teem dej rau cov Yus Das siv raws li lawv
tej kev cai ntxuav tes. Ib lub hub ntim tau
peb los plaub thoob dej. 7 Yes Xus hais
rau cov tub ce cawv tias : "Nej hliv dej
kom puv cov hub no." Ces lawv hliv dej
puv nkaus cov hub. 8 Yes Xus hais rau
lawv tias :
"Zaum no, nej ce cov dej no nqa mus rau
txiv thiaj com."
Ces lawv ce cov dej ntawd nqa mus.
9 Thaum txiv thiaj com saj cov dej txia
ua cawv, mas nws tsis paub cov cawv los
qhov twg los. Tab sis cov tub ce cawv
paub lawm, vim lawv yog cov ce. Txiv
thiaj com hu nraug vauv los. 10 Nws
hais rau nraug vauv tias :
"Sawv daws ce cov cawv qab los haus
tso. Thaum cov neeg qaug cawv lawd,
mam li ce cov qab tsis heev los haus. Hos
koj, koj muab cov cawv qab cia txog tav no."
11 Yes Xus thawj lub cim yog zoo li
ntawd. Nws ua thawj lub cim nyob Kas
Nas xeev Nkas Lis Lais. Nws ua nws lub
hwj chim tawm los rau pom, ces nws cov
thwj tim ntseeg txog nws.

NTHUAV NTAWV NTSHIAB

Rau hnub chiv tim 20 lub 1 hlis 2013

Ib zeej tsoom neeg ntseeg thiab phooj ywg mloog Tswv Ntuj lus,

Hnub no yog hnub chiv lis piam tim ob lub caij nyob nruab xyoo teev hawm Tswv Ntuj xyoo peb. Yog ib hnub zoo caij zoo nyoog rau peb ntiaj teb neeg thiab rau peb tus neeg ntseeg teev hawm Huab Tais Tswv Ntuj. Yog peb nquag nyeem Zam tsab ntawv Moo Zoo, peb pom tias Zam tsis hais txog Zam lub npe ib zaug li hauv nws tsab ntawv Moo Zoo. Tiam sis, nws hais ntau zaus cov npe no : “Lwm tus thwj tim, tus Thwj Tim Yes Xus hlub, ib tug hauv cov thwj tim.” Peb thov caw sawv daws mloog Zam qhia li no txog Huab Tais Yes Xus rau peb.

Thaum pib tshaj lub Moo Zoo, Yes Xus hu 12 leeg thwj tim sawv 12 xeem His Xais Lais ua Yes Xus thwj tim. Zam hais tias thawj lub cim Yes Xus ua rau npoj thwj tim pom thiab lawv ntseeg Yes Xus yog rooj tshoob nyob lub zos Kas Nas. Hnub peb, muaj ib rooj tshoob nyob lub zos Kas Nas, lawv caw Yes Xus mus noj tshoob. Yog nej mloog kom zoo, nej yuav pom tias lub zej zog twb tuaj noj nkauj nyab thiab nraug vauv rooj tshoob, tiam sis xyov yog nkauj nyab thiab nraug vauv twg li tshoob, twb tsis hnov nkawd hais ib lo lus tos txais kwv tij neej tsa, nkawd tsuas zoo li tej qhua tuaj sawv dub lus hauv rooj tshoob xwb. Hos Yes Xus tuaj sab nraud tuaj, yog ib tug raug caw tuaj noj tshoob. Tiam sis, Yes Xus cia li yog tus tuaj leg qav leg num, loj npab ntshuas raus tes ntso txheem rooj tshoob, txhawj xeeb rau tej dej caw meej tag tsis txaus neeg haus, yuav tau ua tswv tsev txib tub qa tub num tav tog laub dej laub cawv rau qhua zej qhua zos haus. Peb pom Yes Xus yog tus qhua tuaj noj tshoob yees ua tswv cuab. Hos tus tswv cuab hu neeg tuaj noj tshoob noj kos cia li nyob qhuav nquas li tus qhua. Vim li ntawd, rooj tshoob nyob Kas Nas txawv luag tej tshoob kos sawv daws pom. Qhov txawv no, puas yog qhov Zam muab rooj tshoob nyob Kas Nas los qhia rau peb txog lwm yam ; lub ntsiab rooj tshoob nyob Kas Nas yog Yes Xus rooj tshoob rooj kos nrog peb leej tib neeg cov los npuab Yes Xus ua Yes Xus thwj tim ? Vim ntawv Moo Zoo hais ntau zaus txog Yes Xus tam li nraug vauv tuaj qhaib lub ntiaj teb neeg. Leej tib neeg peb zoo li tus nkauj nyab, nraug vauv nqes saum ntuj los rub nkauj nyab npab, pus peb kom mus ciaj qaum ntuj neeg. Tos peb tsis paub nkauj nyab thiab nraug vauv npe, vim yog Yes Xus rooj ; tsis pom nkawd nqes tes ua dab tsi, vim tsis yog nkawd rooj ; Yes Xus loj npab ntshuas txib tub qa tub num nres nroos rooj tshoob tiam log vim yog Yes Xus rooj.

Lub ntsiab ntawm rooj tshoob nyob Kas Nas qhov loj thiab tseem ceeb, tsis yog yuav nrhiav kom paub saib Yes Xus puas tau ua cov hwj huam rau cov thwj tim pom hauv rooj tshoob nyob Kas Nas no los tsis tau. Lub ntsiab tseem ceeb, yog hais txog cov hwj huam hauv rooj tshoob no qhia peb pom thiab to taub txog lwm yam. Lwm yam ntawd yog dab tsi ? Yog lub ntsiab lus cov thwj tim pom Yes Xus hauv rooj tshoob thiab ua rau lawv paub meej Yes Xus yog leej twg. Hnub ntawd, cov thwj pom Yes Xus lub hwj huam loj tas nrho, yog tsis muaj rooj tshoob ntawd, lawv yuav tsis paub Yes Xus. Tsis tag li ntawd, cov cim Yes Xus ua rau lawv pom no, muaj nuj nqes qhib lawv nruab siab nruab ntsws txog lawv cov poj yawm Mos Ses txoj cai qhia lawv teev hawm Tswv Ntuj. Mos Ses txoj cai teev hawm Tswv Ntuj zoo li cov qub cawv tsis qab tsis tsuag neeg haus ua ntej hauv rooj tshoob no. Tsis yog Mos Ses txoj cai xwb, lwm txoj kev cai teev hawm puav leej zoo tam ntua cov cawv tsuag neeg haus ua ntej meej tag no. Cov thwj tim to taub Yes Xus lub Moo Zoo thiab txoj kev teev hawm Tswv Ntuj raws li Yes Xus qhia zoo tam zoj cov dej yees ua cov cawv qab cawv daw, puv nkaus hauv cov hub teem tseg rau ntawm chaw ntxuav tes ntxuav taw ; cov cawv qab Yes Xus ua no tseev haus yuav tsis txawj meej tsis txawj tag mus ib sim neej : “Tib neeg sawv daws xub rau cov cawv qab thaum lawv qaug tas mam rau cov qab tsis heev ; hos koj li, koj tseg cov cawv qab cia tav no Z 2,10.” Tsis tas li ntawd, Zam tseem qhia tias txoj kev teev hawm Yes Xus zoo tam zoj tib neeg ntiaj teb tej tub ntxhais sib qaws ua neej. Peb txoj kev npuab Yes Xus lom zem npaum li rooj tshoob rooj kos, tub ntxhais sib qaws ua neej. Peb txoj kev npuab Yes Xus sov zej sov zos, sov teb chaws, tam ntua niam txiv ob tog rhawv tau txoj kev neej kev tsav dav lis fo ntxhee li yees. Txoj kev mloog Yes Xus lus thiab ntseeg Yes Xus nqus peb tib neeg txhua leej txhua tus txhua xeem neeg los sib puag npoo ua kwv ua tij loj thiab dav tshaj kev koom roj koom ntshav. Tsis hais tus neeg nplua nuj los tus pluag, tus neeg mob nkeeg los tus zoo neej, tus muaj kwv tij kwv npawg los tus twm zeej twm kawv ua yeeb ncuab, txoj kev mloog Yes Xus lus rub tag ntiaj teb neeg tes los ciaj ib cuab koom nrog Yes Xus ciaj tib yig ua Tswv Ntuj neeg.
Zam tseem qhia rau peb ntxiv kom peb tig ntsej mloog Mab Liab, Yes Xus niam. Yog peb tsis vam khom peb leej niam Mab Liab lo lus qhia, peb yuav tsis txawj ua neeg mloog lus li cov tub txib hauv rooj tshoob no : “Nws hais nej dab tsi, ua kiag Z 2,5.” Vim Mab Liab twb xub pom, twb mem tau nws Leej Tub Yes Xus rooj tshoob. Mab Liab hais rau cov tub txib tias yog Yes Xus txib lawv kom ua dab tsi, lawv cia li ua kiag tsis txhob cam, tsis txhob tawv. Txog lub caij Yes Xus txib lawv mus kwv dej los ntim hauv cov hub, lawv cia li ua kiag. Yes Xus rov txib lawv daus cov dej lawv ntim hauv hub, ua ciav dej yees ua cawv lawm. Vim cov tub txib xub mloog Mab Liab lus ceeb toom ces lawv tau txiaj ntsim. Lawv txoj kev khwv nqa dej los ntim hauv hub loj tsis cuag lub txiaj ntsim dej yees ua cawv puv cov hub. Peb txoj kev hwm Mab Liab tau koob hmoov, kom peb nco ntsoov. Tas txhua tus leej ntshiab hwm Mab Liab puav leej tau koob hmoov li cov tub txib hauv rooj tshoob no.

Ib tsoom phooj ywg txhua leej, peb yuav pauj tsis tag peb cov poj yawm tsoom leej ntshiab thiab pauj tsis tau peb leej niam Mab Liab tej koob hmoov. Thov kom peb tus yawg koob leej ntshiab Zam cov lus qhia hnub no qhib peb txoj kev npuab Yes Xus lub Moo Zoo kom ruaj thiab khov mus tag peb sim neej.

16.01.2013 Cwj Vuam Chiv

**NrhiavTswvNtuj** 26th January 2013, 2:54 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°11

COV ZAJ NYEEM HNUB 27/01/2013 (Chiv nruab xyoo 3 Xyoo C)

Post NrhiavTswvNtuj 26th January 2013, 2:54 am

COV ZAJ NYEEM HNUB 27/01/2013

(Chiv nruab xyoo 3 Xyoo C)

Zaj nyeem Ib: NES HES MIS 8, 2-4a.5-6.8-10

2 Ces tus Leej Choj Es Nras nqa phau
ntawv txoj cai tuaj tso ntawm lub Txoos
hauv ntej. Nyob hauv lub Txoos muaj
cov txiv neej, cov poj niam thiab cov me
nyuam paub tab. Hnub ntawd yog hnub xiab ib lub xya hli.
3 Nyob ntawm lub tshav ncaj lub qhov
rooj dej, Es Nras nyeem ntawv txij thaum
nyuam qhuav kaj ntug mus txog hnub
ntseg. Nws nyeem rau cov poj niam cov
txiv neej thiab cov me nyuam paub tab
sawv daws mloog. Sawv daws cug pob
ntseg zoo mloog txoj cai.
4 Tus thoob xwm ntawv Es Nras sawv
nyob saum ib lub sam thiaj uas lawv
txhob txwm npaj rau nws sawv.

5 Es Nras qhib phau ntawv, sawv daws pom
nws zoo. Vim nws nyob qhov chaw siab
dua sawv daws. Thaum nws pib qhib
phau ntawv mas tsoom sid sawv tsees.
6 Es Nras pib cav txog tus HUAB TAIS
Tswv Ntuj nyob siab. Tas sawv daws tsa
tes rau saum ntuj thiab teb tias : "Ua li ! Ua li !"
Ces tas tsoom pej xeem pe HUAB TAIS,
lawv ntsej muag khoov ti av.

8 Ces Es Nras nyeem Tswv Ntuj txoj cai
nyob hauv ntawv. Nws txhais lub ntsiab
kom sawv daws to taub zoo.
9 Tus Leej Choj Thoob Xwm Es Nras
hais rau tsoom pej xeem tias :
"Hnub no, yog ib hnub ntshiab rau nej tus
HUAB TAIS Tswv Ntuj ! Nej tsis txhob
nyob tej tug mluas mlob, nej tsis txhob quaj !"
Nws hais li no vim thaum sawv daws
hnov cov lus nthuav txoj cai mas sawv daws quaj.
10 Nws tseem hais ntxiv tias :
"Nyem no, nej mus noj nqaij noj mov,
haus dej haus cawv, nej nqa ib feem mus
faib rau cov tsis tau npaj dab tsi. Hnub no
yog ib hnub ntshiab rau peb tus HUAB
TAIS ! Nej tsis txhob tu siab ! HUAB
TAIS chaw zoo siab yog nej lub loog zeb !"

Zaj Nyeem Ob: 1Kos Lis Nthos: 12, 12-30 Muab piv rau neeg lub cev.

12 Ib yam li neeg lub cev : neeg muaj tib
lub cev xwb : tab sis muaj tes, muaj taw,
muaj ntau yam : txhua yam yog lub cev,
txawm tias muaj ntau ces, los yeej yog tib
lub cev xwb. Nyob hauv Leej Pleev kuj
zoo li ntawd. 13 Vim tias peb sawv daws
tau txais lub Cim Ntxuav nyob hauv Leej
Ntuj Plig tib leeg, thiab nyob hauv tib lub
cev xwb. Tsis hais cov Yus Das los cov
Hes Las, cov qhev los cov twj lij, peb
sawv daws puav leej tau haus txaus siab
ntawm Leej Ntuj Plig tib leeg.
14 Lub cev tsis muaj ib txhais ceg xwb :
lub cev muaj ntau txhais. 15 Yog txhais
taw hais tias : ‘Kuv tsis yog lub cev, vim
kuv tsis yog txhais tes.’ Txawm tias
txhais taw hais zoo li ntawd, los nws
tseem yog ib ceg ntawm lub cev thiab.
16 Yog pob ntseg hais tias : ‘Kuv tsis
yog lub cev, vim kuv tsis yog qhov
muag.’ Tab yog pob ntseg hais li ntawd,
los pob ntseg tseem yog lub cev tug thiab.
17 Yog tas lub cev ua qhov muag, mas
yuav ua cas hnov suab nrov tau ? Yog tas
lub cev ua pob ntseg, mas yuav ua cas hnia ntxhiab tau ?

18 Tab sis Tswv Ntuj tso txhua yam rau
hauv lub cev, kom nyias nyob nyias
chaw, raws li nws pom zoo. 19 Yog tas
lub cev muaj ib ceg xwb, mas lub cev yog
qhov twg ? 20 Muaj ntau ceg, tab sis
yog tib lub cev xwb. 21 Li ntawd qhov
muag hais tsis tau rau txhais tes tias :
‘Kuv tsis tas yuav siv koj !’ Lub taub hau
hais tsis tau rau ob txhais taw tias : ‘Kuv
tsis tas yuav siv neb !’
22 Tej yam hauv lub cev, uas peb saib
zoo li tsis muaj zog, tab sis lawv yog
qhov muaj nqi dua tej. 23 Muaj tej yam
uas peb saib tsis muaj tsim dab tsi nyob
hauv lub cev, mas yog tej yam uas peb
muab siab rau vov zoo dua. Tej yam tsis
muaj tsim, mas peb tseem txuag zoo dua
tej. 24 Tej yam uas peb saib muaj tsim,
mas peb tsis vov. Tswv Ntuj dhos tib
neeg lub cev kom peb hwm tej yam tsis
muaj tsim. 25 Li ntawd tsis muaj ib yam
uas tsis sib npuab nyob hauv lub cev. Tas
txhua yam sib dhos zoo. 26 Yog ib sab
ceg mob, mas tas nrho tej tes taw nrog
nws mob. Yog ib txhais tes tau koob
meej, mas txhua ces hauv lub cev nrog nws zoo siab.

27 Ntawm nej, mas nej yog Leej Pleev
lub cev, nyias muaj nyias tug nyob hauv Leej Pleev.
28 Nyob hauv lub Koom Txoos, Tswv
Ntuj tsa tej tus ua Hauv Paus Xa Lus, tej
tus ua Yaj Saub, tej tus ua Xib Hwb.
Tseem muaj cov ua hwj huam yees
ntxwv, cov tau lub txiaj ntsim kho mob,
cov tsob hwb luag, cov tuav kev tswj
fwm, thiab cov paub ntau xeem lus.
29 Sawv daws puas yog Hauv Paus Xa
Lus ? Sawv daws puas yog Yaj Saub, los
Xib Hwb ? Sawv daws puas ua hwj huam
yees ntxwv ? 30 Sawv daws puas txawj
kho mob kom zoo ? Sawv daws puas
paub ntau xeem lus ? Sawv daws puas
txhais tau ntau xeem lus ?

Ntawv Moo Zoo: Lus Kas 1, 1-4 ; 4, 14-21: Cov lus qhib phau ntawv.

1 Tes Os Fis Los, tus zoo koob
meej, muaj coob leej tau nqes tes sau
ib zag piav txog cov xwm uas tshwm sim
nyob hauv nruab nrab peb lawm.
2 Lawv tau sau raws li cov tau pom
xyeem ntawm qhov muag qhia rau peb.
Cov ntawd ua Lo Lus cov tub txib txij lub
hauv paus los. 3 Kuv tau tshuaj xwm
txog txhua yam meej txij thaum pib chiv
lub keeb. Kuv thiaj txiav siab sau ib zag
muaj hauv paus hauv ntsis rau koj,
4 kom koj paub meej tias cov lus qhia
uas koj tau txais yog lus khov lus ruaj.

14 Yes Xus rov mus Nkas Lis Lais, nws
muaj Leej Ntuj Plig lub zog puv hauv
nws. Nws lub moo nto lug mus puv ib
cheeb tsam cov zej zog. 15 Nws qhia
tsoom sid hauv cov tsev txoos, tas sawv daws qhuas nws.

16 Yes Xus los txog Nas Xas Les, yog
lub zos uas nws hlob. Hnub Xas Npas
Tos, nws mus hauv lub tsev txoos xws li
nws ua kam, ces nws sawv mus nyeem
ntawv. 17 Lawv cev tus Yaj Saub His
Xais phau ntawv rau nws. Nws nthuav
kauj ntawv, nws nrhiav tau nqe lus uas sau tias :
18 Huab Tais lub Tswv Yim nyob saum
kuv, vim nws pleev roj los qee kuv..
Nws xa kuv mus tshaj lub Moo Zoo rau
cov pluag. Nws xa kuv mus ceeb toom
rau cov nyob txim tias lawv yuav dim, rau
cov dig muag tias lawv yuav rov pom kev,
rau cov raug luag yuam tias lawv yuav
rov tau ua neeg twj lij,
19 kom kuv tshaj tias yog xyoo Huab
Tais yuav pub txiaj ntsim.
20 Yes Xus rov kauv phau ntawv, nws
rov muab rau tus tub txib, ces nws zaum.
Tas tsoom neeg uas nyob hauv lub tsev
txoos ntsia ntsoov Yes Xus. 21 Ces Yes
Xus hais rau lawv tias :
“Hnub no, cov lus nyob hauv zaj Ntawv
no tsheej xeeb raws li nej tau hnov."

NTHUAV NTAWV NTSHIAB.

Rau hnub chiv tim 27 lub 1 hlis 2013

Ib zeej tsoom phooj ywg,

Hnub no yog ib hnub muaj koob hmoov loj tas nrho hauv cov zaj nyeem no. Peb yuav tsis muaj lub caij nyoog los nthuav kom tag tej ntsiab lus muaj nuj nqes qhia peb kom sib hlub, kom txawj sib koom siab, kom tsis txhob sib khib sib cov nyom... Peb tsuas nthuav tib lub ntsiab lus hais txog Tswv Ntuj kev hlub peb leej tib neeg, txawm ua neeg ntseeg Tswv Ntuj, txawm teev dab qhuas li peb tej poj yawm los tsis teev tsis hwm ib txoj kev ntseeg dab tsi li, los mus nthuav tham raws li nram qab no.

Peb txoj kev tig los ua neeg ntseeg thiab teev hawm Tswv Ntuj, puas yog kom peb los sib cais ua pab ua pawg, sib khib, sib txeeb noj, sib txeeb haus, sib ntxub, sib dub muag nyias fee nyias, tsis xav hais lus ua ke, tsis xav sib pom nraum tog kab tog kev, tsis xav teev hawm Tswv Ntuj ua ke…ua li tej neeg tsis ntseeg, tsis hwm Tswv Ntuj ? Yog peb los ua neeg ntseeg thiab teev Tswv Ntuj coj li hais no, xyov peb puas ua neeg mloog Yes Xus lus thiab teev Tswv Ntuj li Yes Xus qhia ? Vim li ntawd, peb txhua leej yuav tau cuab ntsej mloog Huab Tais Yes Xus cov lus nws hais rau peb hnov hnub no. Kev ua neeg ntseeg thiab teev hawm Tswv Ntuj raws li Yes Xus qhia, tsis yog ua li peb siab nyiam, tsis yog ua li nyias siab xav, hos yog ua li Yes Xus qhia. Ua li no, Yes Xus qhia dab tsi hauv Lus Kas zaj ntawv Moo Zoo hnub no ? Thaum txog lub caij Yes Xus sawv los tshaj lub Moo Zoo, Yes Xus muab saub Es Xais tsab ntawv los nyeem qhia rau tsoom neeg ntseeg tuaj hauv tsev txoos, hauv tsev teev ntuj li no : 18 “Huab Tais tus Ntsuj Plig nyob saum kuv, vim nws tau pleev kuv mus tshaj lub Moo Zoo rau cov pluag, nws xa kuv mus ceeb toom kev twj lij rau cov raug loj faj thiab kev pom tseeb rau cov dig muag, tso cov raug luag tsim txom los mus twj lij 19 Ceeb toom Huab Tais xyoo pauj zog LK 4,18-19” Yes Xus lub Moo Zoo yog dab tsi ? Lub Moo Zoo yog ib lub moo muaj txiaj ntsim rau tag ntiaj teb tib neeg txhua leej txhua tus, tsis cais leej twg li. Cov pluag, cov nyob hauv tsev loj faj, cov dig, cov raug luag hiam…ntiaj teb neeg tsis hwm, tsis nyiam, cais lawv ua pab ua pawg : koj yog neeg pluag, koj yog neeg raug txim nyob nkuaj, koj yog neeg dig muag tsis muaj neej ua, koj yog ib tug peb tsis xav nrog ua ke, tsis xav kom muaj lub neej xws teb xws chaw, peb tsis xav kom koj ciaj sia nyob…Yes Xus lub Moo Zoo tsis yog tuaj tsa peb tw ntxiab kom peb sib cais nyias ua li nyias siab nyiam, muaj kuv pab, muaj nws pawg, muaj lawv npoj. Yes Xus lub Moo Zoo yog ib lub moo rub tag ntiaj teb tej npoj neeg, xeem lus, tej teb chaws kom los ua ib cuab ib yig, ua kwv ua tij, noj sib hlub haus sib ce, kom tus yeeb ncuab los ciaj tau phooj ywg, kom tus pluag muaj koob meej, tus neeg nyob nkuaj muaj kev twj lij, tus dig muag pom kev nrig lam lug, laum tib neeg txoj kev sib ntxub tuag nthi ploj ntais mus ib txhis.

Peb sim xav kom zoo, peb los ua neeg ntseeg teev hawm Tswv Ntuj, peb puas ntseeg Yes Xus lub Moo Zoo muaj txiaj ntsim hloov peb lub siab ti siab nqaim thiab siab nkhaus no kom loj thiab dav thiab kom ncaj ncees tuaj ? Yog peb mloog Yes Xus lus thiab hlub Yes Xus, peb tus neeg ntseeg thiab teev hawm Tswv Ntuj yuav koom nrog Yes Xus ua tib nqag koom tib lub siab. Txoj dej num tshaj lub Moo Zoo tsis yog peb txoj, yog Yes Xus txoj. Tsis tsim nyog peb yuav sib cav sib ceg, sib txeeb dej num ua hauv Koom Txoos cuag nkaus li yog peb tus kheej dej num, muaj kuv pab neeg ua li kuv nyiam, muaj kuv lub koom txoos ua li kuv zaj tswv yim…Yog peb to taub tias peb ua Yes Xus ib tug tub ntxhais txib, peb yuav zoo siab hlo nrog Yes Xus tshaj Yes Xus lub Moo Zoo, tsis yog peb tus kheej lub moo zoo. Peb yuav pom tias dej num npau xi, tsis muaj neeg coob kub siab npuab Yes Xus raus tes nrog Yes Xus leg qav leg num. Yes Xus kev tshaj lub Moo Zoo, yog pauj Tswv Ntuj lub zog tuaj rau ntiaj teb kev txom nyem kev pluag, tsis txawj sib hlub, tsis txawj sib pab kom sib hlub sib pab li saum qaum ntuj. Peb leej twg kub siab mloog Yes Xus lus thiab nrog Yes Xus tshaj lub Moo Zoo, peb yuav nrog tau Yes Xus pauj Tswv Ntuj lub zog rau ntiaj teb neeg txhua leej.

Ib tsoom phooj ywg sawv daws, Yes Xus kev pauj Tswv Ntuj lub zog tuaj rau peb ntiaj teb neeg, yog ua kom saub Es Xais cov lus tsheej xeeb. Yes Xus thiaj li ua tau cov dig pom kev lug, kho cov mob ruas neeg ntxub neeg hiam zoo hlo nqaij mos qas nyoos tuaj. Peb tus neeg ntseeg txoj xub ke nrog Yes Xus pauj Tswv Ntuj lub zog yog tsis txhob cais pab cais pawg hauv peb lub cuab lub yig, hauv tej zej zog thiab hauv peb lub Koom Txoos. Peb yuav nrog Yes Xus coj cov neeg khaus kom ncaj ncees, coj cov yeeb ncuab los ua phooj ua ywg. Qhov no, yog peb kev nrog Yes Xus pauj Tswv Ntuj lub zog.

26.01.2013 Cwj Vuam Chiv

**NrhiavTswvNtuj** 1st February 2013, 8:40 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°12

COV ZAJ NYEEM HNUB 03/02/2013 (Nyob nruab xyoo, Chiv 4 - Xyoo C )

Post NrhiavTswvNtuj 1st February 2013, 8:40 pm

COV ZAJ NYEEM HNUB 03/02/2013
(Nyob nruab xyoo, Chiv 4 - Xyoo C )

Zaj nyeem 1 : Yes Les Mias 1,4-5.17-19 Tswv Ntuj hu Yes Les Mias ua Yaj Saub.

4 HUAB TAIS hais rau kuv li no:
5 "Thaum koj tseem tsis tau xeeb hauv
koj niam plab, kuv twb paub koj lawm.
Koj tseem tsis tau tawm hauv koj niam
lub plab los, kuv twb xaiv koj, kuv twb
tsa koj ua tus Yaj Saub qhia cov kuj cuab."

17 Koj sia koj duav khov. Koj
sawv tsees mas ! Koj yuav hais txhua
yam kuv qhia koj hais no rau lawv. Koj
tsis txhob tshee nyob ntawm sawv daws
xub ntiag. Yog koj tshee mas kuv yuav
ua kom koj tshee nyob ntawm lawv xub ntiag.

18 Koj saib : hnub no kuv muab koj los
ua ib lub tsheej xov ntsa zeb, ua ib tug
ncej hlau, ua ib lub phab ntsa tooj tiv tas
lub teb chaws, tiv cov vaj Yus Das, tiv
cov nom tswv nyob Yus Das teb, tiv cov
Leej Choj thiab tiv tsoom pej xeem huv
tib si nyob hauv lub teb chaws.
19 Lawv yuav nrog koj sib ntaus rog, tab
sis lawv yuav tsis yeej koj, vim kuv nrog
koj nyob, kuv npo koj.
Yog HUAB TAIS lo lus ceeb toom.

Zaj nyeem 2 : 1 Kos Lis Nthos 12, 31–13, 13
Muaj tej yam txiaj ntsim zoo dua
cov. Kev nyiam tseem zoo tshaj.

31 Nej yuav nrhiav cov txiaj ntsim muaj
nqis dua cov. Thiab kuv yuav qhia ib
txog kev zoo tshaj cov txiaj ntsim ntawd tib si.

1 Yog kuv txawj hais ntau haiv
neeg cov xeem lus, thiab txawj
hais Ntuj cov Tshiab cov xeem lus huv tib
si, tab sis kuv tsis muaj ib lub siab nyiam,
mas kuv tsuas yog ib lub nruas tooj nrov
dag, thiab ib lub nruas npuaj ncha ncha xwb.

2 Yog kuv txawj ua Yaj Saub, los kuv
paub tas ib puas tsav yam lus tob, ib puas
tsav yam txuj ci, thiab kuv lub siab ntseeg
loj heev, txawm kuv lub siab ntseeg
tshem tau tej lub roob rau lwm qhov, tab
sis yog kuv tsis muaj ib lub siab nyiam,
mas kuv tsis muaj nqis dab tsi. 3 Yog
kuv muab kuv lub cuab tam tas huv tib si
los faib rau cov neeg pluag, thiab kuv
muab kuv lub cev hlawv, yog kuv tsis
muaj ib lub siab nyiam, mas txhua yam
ntawd tsis nqa ib qho dab tsi zoo los rau kuv.

4 Lub siab nyiam txawj ua siab ntev, ua
siab sib, tsis txawj khib, tsis khav theeb,
tsis muab hlob. 5 Lub siab nyiam tsis ua
tub qaug luag, tsis nrhiav qhov zoo rau
nws, tsis npau taws, tsis cib nyeej. 6 Lub
siab nyiam tsis zoo siab pom luag tej ua
tsis ncaj, nws xav pom luag tej nrhiav
qhov tseeb. 7 Lub siab nyiam zam rau
sawv daws, nws ntseeg sawv daws, nws
tso siab rau sawv daws, nws ua siab ntev
ris tas puas tsav yam nyuaj.
8 Txoj kev nyiam tsis txawj dua ib zaug.
Txoj kev ua Yaj Saub yuav ploj. Muaj ib
hnub twg, cov neeg txawj txhais tej xeem
lus txawv yuav nyob ntsiag to. Txoj kev
txawj kev ntse kuj yuav dua. 9 Vim tias,
txuj ci, peb tsuas paub ib feem xwb.
10 Thaum txoj kev zoo txhij zoo txhua
los txog, mas tej yam uas neeg ua tau ib
feem me me yuav ploj tas huv tib si.
11 Thaum kuv tseem yau, kuv hais lus
me nyuam yaus, kuv xav tswv yim li me
nyuam yaus, kuv txawj xaiv xws li ib tug
me nyuam yaus. Thaum kuv hlob tiav
lawm, kuv tso tej kev ua me nyuam yaus pov tseg.

12 Zaum no, peb pom tsis tseeb, peb
tsuas pom zoo li nyob hauv ib daim tsom
iav. Lwm tiam, peb yuav pom xyeem
ntawm qhov muag. Nyem no, kuv paub ib
feem me me xwb. Fab lwm tiam, kuv
yuav paub, ib yam li Ntuj paub kuv.
13 Nyem no, txoj kev ntseeg, txoj kev tso
siab, thiab txoj kev nyiam tseem muaj
nyob ua peb txog kev. Tiam sis, qhov loj
tshaj mas yog txoj kev nyiam.

Lus Kas Ntawv Moo Zoo 4, 21-30

21 Ces Yes Xus hais rau lawv tias :
“Hnub no, cov lus nyob hauv zaj Ntawv
no tsheej xeeb raws li nej tau hnov."
22 Tas cov neeg ntawd zeem tseeb tias
nws hais lus zoo, lawv qhuas cov lus
muaj txiaj ntsim tawm hauv nws lub ncauj los.
Lawv hais tias :
"Tus ntawd, tsis yog Yos Xes tus tub lod ?"

23 Ces Yes Xus hais rau lawv tias :
"Paub ntsoov, nej yuav piv lus hais txog
kuv tias : Kws kho mob, koj rov kho koj
mas ! Tas txhua yam uas luag piav tias
tshwm sim nyob Kas Fas Naus, mas koj
kuj ua ib yam li ntawd nyob hauv lub zos
koj hlob no thiab mas !"
24 Yes Xus tseem hais ntxiv tias :
"Kuv hais tseeb rau nej, tsis muaj ib tug
yaj saub uas luag yuav txais nws zoo
hauv lub zos nws hlob. 25 Kuv hais
tseeb rau nej : lub caij Es Lias nyob, muaj
coob tus poj ntsuam nyob His Xas Lais
teb. Thaum ntuj kaw nag tau peb xyoos
thiab rau hli, tas teb chaws tshaib plab loj
kawg. 26 Tab sis Ntuj tsis xa Es Lias
mus pab cov poj ntsuam His Xas Lais ib
tug li. Ntuj xa Es Lias mus pab ib tug poj
ntsuam nyob lub zos Xas Les Tas, nyob
Xis Doos teb. 27 Lub caij tus yaj saub
Es Lis Xais nyob, muaj coob tus mob ruas
nyob His Xas Lais teb, tab sis tsis muaj ib
tug mob ruas His Xas Lais rov huv, tsuas
yog tus mob ruas Xis Lias hu ua Nas
Maas thiaj rov huv."
28 Tas cov neeg hauv lub tsev txoos
hnov cov lus ntawd, mas lawv npau taws
kawg. 29 Lawv sawv tsees, lawv ntiab
Yes Xus tawm sab nroog nraud. Lawv
coj Yes Xus mus txog ntawm ib phab toj
saum lub roob uas lawv txhim lub nroog,
lawv yuav thawb Yes Xus kom poob
lawm hauv lub qab toj ntxhab. 30 Tab sis
Yes Xus hla plaws hauv nruab nrab lawv,
nws taug nws kev mus lawm.

NTHUAV NTAWV NTSHIAB.

Rau hnub chiv tim 03 lub 2 hlis 2013

Ib zeej tsoom neeg ntseeg thiab phooj ywg,
Hauv peb zaj nyeem sawv daws tau mloog ua ke no, muaj ntau lub ntsiab lus, peb tsis muaj caij nyoog piav kom tas txhua lub ntsiab. Yog li ntawd, peb tsuas muab lub ntsiab lus tseem ceeb ua ke hauv peb zaj nyeem no los nthuav raws nram no. Lub ntsiab yog kom peb ntiaj teb neeg sib hlub li Tswv Ntuj txoj kev hlub peb.
Nyob rau hauv thawj zaj nyeem, thaum Yes Les Mias twb tsis tau xeeb ua leej tib neeg nyob, Tswv Ntuj twb ntxov hlub Yes Les Mias. Peb sim xav saib, Tswv Ntuj yuav ua li cas hlub tau ib tug neeg twb tsis tau xeeb, tsis tau yug ua neeg, nej xav li cas ? Peb to taub tias kawg Huab Tais Tswv Ntuj xwb thiaj ua tau tej yam zoo li hais ntawd. Vim Tswv Ntuj twb xub pom Yes Les Mias ntxim Tswv Ntuj siab thiaj li xeeb muaj Yes Les Mias los ciaj neeg : “5 Ua ntej xeeb koj hauv koj niam plab, kuv twb paub koj lawm ; ua ntej koj yug los kuv twb xaiv koj, kuv tsa koj ua ib tug saub rau cov haiv neeg YLM 1,5” Txawm tias Huab Tais Tswv Ntuj hais tau li ntawd, tshoj Yes Les Mias puag nruab thiab los Yes Les Mias tsis ua neeg ruam, neeg muaj plhus thiab khav theeb. Yes Les Mias paub ntsoov tias Huab Tais Tswv Ntuj tsis hlub Yes Les Mias tib leeg kheej xwb, Tswv Ntuj lub ncauj tsis hais los lub siab yeej hlub tag nrho haiv neeg Yus Das txhua leej : hlub vaj ntxwv, cov nom tswv, cov leej choj, tej pej xeem huab hwm thiab hlub tag tej pej kum neeg tsis teev, tsis hwm Huab Tais Tswv Ntuj huv si. Tos Tswv Ntuj hlub Yes Les Mias vim Tswv Ntuj hlub tag sawv daws, kom Yes Les Mias tus mloog lus cev Tswv Ntuj lus qhuab qhia sawv daws cov cav ncauj cam thawj rau Tswv Ntuj. Tswv Ntuj xaiv Yes Les Mias ua saub tiv sawv dawv yam li nej niam nej txiv nthe nqho tiv nej vim nej cam thawj tsis mloog nej niam nej txiv lus.
Ziag no peb los ua neeg ntseeg teev hawm Huab Tais Tswv Ntuj, peb kuj zoo li Yes Les Mias Tswv Ntuj xaiv tau peb ua saub cev Tswv Ntuj lus rau ntiaj teb neeg teev pej kum dab qhuas. Peb yuav tsis txhob ua neeg ruam, tsis txhob rawm khav tias ntshai Tswv Ntuj tsuas hlub peb tus kheej xwb. Txawm Tswv Ntuj hais tau tias peb los ua neeg ntseeg teev hawm Tswv Ntuj, peb yog Tswv Ntuj haiv neeg, los Tswv Ntuj yeej hlub tej pej kum neeg teev pej kum dab qhuas ib yam li peb. Yog peb los ua tau Tswv Ntuj haiv neeg tsis yog ua kom peb khav theeb, hos yog qhib peb lub siab kom dav thiab rua peb qhov muag kom pom tas lub ntiaj teb neeg yog Tswv Ntuj tsim, sawv daws yog Tswv Ntuj haiv neeg. Tswv Ntuj hlub tag nrho sawv daws, Tswv Ntuj thiaj ua hnub tshav pom sawv daws kev, ua nag ywg tus phem thiab tus zoo tej qoob loo huv si. Tswv Ntuj hlub dawb paug tus neeg teev Tswv Ntuj thiab tus neeg rov taw tuam ntuj. Peb tsis muaj leej twg txiav tau Huab Tais Tswv Ntuj txoj kev hlub peb dawb paug no kom tu kom ploj mus. Ua ntej peb los ntseeg thiab teev hawm Tswv Ntuj, peb twb nrog peb tej poj yawm teev dab qhuas, Tswv Ntuj twb tsis muaj khib, Tswv Ntuj twb pab twb cawm peb tej poj yawm. Txij peb los ntseeg thiab teev hawm Tswv Ntuj, tej txhia neeg ntseeg kuj tseem lim hiam thiab rov taw tuam ntuj los Tswv Ntuj kuj hlub lawv tas zog. Vim li ntawd, leej ntshiab Paj Lug thiaj qhia kom peb tsis txhob muab kev ntseeg Tswv Ntuj los kev cia siab rau Tswv Ntuj ua kom peb muaj plhus khav hais tias peb yog neeg zoo nyiam thiab txaus qhuas. Yog txoj kev hlub ciaj sia hauv peb thiaj ua rau Huab Tais Tswv Ntuj txaus siab thiab qhuas peb : “4 Kev hlub yog siab ntev, kev hlub tiam neeg, tsis xam khib, tsis muab hlob, tsis khav theeb 5 Tsis yuam cai, tsis nrhiav kom tsam peev, tsis npau, tsis cib nyeej 6 Tsis hnyos tus txom nyem, zoo siab hlo ua qhov ncaj ncees…13 Hauv peb yam no : kev ntseeg, kev cia siab thiab kev hlub, yam loj tshaj yog txoj kev hlub 1KLN 13,5.6.13” Peb to taub leej ntshiab Paj Lug tsis thuam txoj kev ntseeg Tswv Ntuj los kev tso siab rau Tswv Ntuj. Tiam sis, Puj Lug qhia rau peb cov neeg teev hawm Tswv Ntuj tias tas txhua yam : nyiaj kub, kev txawj ntse, kev teev hawm…yeej pauv tsis tau : “kev hlub : ἀγάπη ” Leej twg txuag lo lus hauv nws, Tswv Ntuj “kev hlub : ἀγάπη ”tsheej xeeb hauv tus ntawd 1Z2,5 ” Kev hlub yog yam loj dua tej tag nrho ua tau peb leej tib neeg pom dheev Tswv Ntuj lub pliaj plhu.
Rau peb cov neeg ntseeg Tswv Ntuj, ob zaj piv txwv tus poj ntsuam nyob Xis Doos thiab tus ruas Nais Maas neeg Xis Lias no tsuas yog Yes Xus lus qhia Tswv Ntuj txoj kev hlub neeg. Peb yuav tsum nkag siab kom zoo zoo, txoj kev nrauj dab qhuas tig los txais kev teev Yes Xus zoo tam zoj tus nkauj qaib los niam npau yuav nquag plhws thiaj seej nquag hu thiaj ncawg, peb yuav ua hnub hais thiaj ciaj Huab Tais tub khais, ua hmo seev thiaj ciaj Yes Xus tub ntxhais txib. Peb cov neeg ntseeg Tswv Ntuj yuav ceev faj tsis txhob coj li cov neeg nyob Nas Xas Las muaj khib thiab lim hiam, puav Yes Xus rau nram taw roob kom poob qab tsuas. Cov neeg nyob Nas Xas Las pluag kev hlub tshaj tus poj ntsuam thiab tus ruas. Vim li ntawd, nkawd muaj Tswv Ntuj txiaj ntsim tau ntsib Es Lias thiab Es Lis Xais, yog ob tug sawv Tswv Ntuj npe coj Tswv Ntuj kev hlub tuaj rau nkawd. Es Lias tuaj cawm tau tus poj ntsuam tus tub rau tus poj ntsuam ; Es Lis Xais kho Nais Maas tus ruas zoo hlo muaj lub neej xws teb xws chaw.
Ib tsoom phooj ywg, kev hlub yog yam loj dua tej tag nrho hauv ntiaj teb no thiab saum qaum ntuj, yog kev hlub ciaj sia hauv peb ces peb yuav ntsib dheev Tswv Ntuj pliaj plhu hauv peb lub neej vim Tswv Ntuj yog kev hlub.

31.01.2013 Cwj Vuam Chiv

**NrhiavTswvNtuj** 8th February 2013, 9:32 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°13

Re: COV ZAJ NYEEM-Xyoo C 2012-13

Post NrhiavTswvNtuj 8th February 2013, 9:32 am

COV ZAJ NYEEM HNUB 10/02/2013
(Nyob nruab xyoo, Chiv 5 - Xyoo C )

Zaj nyeem Ib: His Xais 6, 1-2a.3-8 Tswv Ntuj hu His Xais ua Yaj Saub.

1 Xyoo tus vaj Os Xias tuag, kuv
pom Huab Tais zaum saum ib lub
theej kiab siab siab. Nws tw tsho dauv
mus puv nkaus lub Tuam Tsev tas huv tib si.
2 Nyob ntawm nws txheej saud, muaj ib
co Tshiab Xes Las Fis sawv ntsug. Lawv
nyias muaj nyias rau txhais tis.

3 Lawv ib leeg hu nkauj nrov nrov rau ib leeg tias :

"Tsoom tub rog tus HUAB TAIS ntshiab,
ntshiab, ntshiab. Nws lub koob meej
nyob puv lub ntiaj teb."
4 Lub suab ntawd nrov ua cov taw ncej
qhov rooj ua zog koog, pa taws ncho puv
lub tsev. 5 Kuv hais tias :
"Kuv hmoov phem ! Kuv yuav tuag !
Kuv yog ib tug neeg di ncauj tsis huv.
Kuv nyob nruab nrab ib haiv neeg di
ncauj tsis huv. Kuv qhov muag tau pom
tus Vaj, tus HUAB TAIS kav tsoom tub rog !"

6 Ib tug Tshiab Xes Las Fis ya ntxiag los
txog ntawm kuv, nws txhais tes tuav ib
lub pob zeb kub lug uas nws xuas ib rab
ciaj tais ntawm lub thaj txi Ntuj los.
7 Nws coj lub pob zeb los so kuv di
ncauj, nws hais tias :
"Saib ! Qhov no twb chwv koj di ncauj
lawm, nws tshem koj qhov yuam kev tas
huv si. Nws them koj cov txhaum tas lawm."

8 Ces kuv hnov Huab Tais lub suab hais tias :
"Kuv yuav xa leej twg mus ? Leej twg yuav sawv peb cev mus ?"

Kuv teb tias : "Kuv nyob ntawm no. Koj xa kuv mus."

Zaj nyeem Ob: 1 Kos Lis Nthos 15, 1-11 Muaj kev sawv rov los.

1 Kwv tij sawv daws, kuv rov qab
hais kom nej nco ntsoov txog lub
Moo Zoo uas kuv tau tshaj rau nej. Nej
tau txais, thiab nej nyob ruaj nreb hauv
lub Moo Zoo ntawd. 2 Yog nej ntseeg
raws nraim li kuv tau tshaj rau nej, mas
nej yuav txais kev cawm nyob hauv lub
Moo Zoo. Yog lub Moo Zoo cawm tsis
tau nej, mas nej ntseeg dag xwb.
3 Qhov kuv tau qhia rau nej, mas yog
qhov kuv xub tau txais : yam li Yes Xus
yeem tuag kom tau ntxuav peb cov
txhaum pov tseg, raws li Ntawv Ntshiab
xub hais. 4 Lawv muab nws zwm rau
hauv ntxa, ces hnub peb, nws sawv rov
qab los, raws li Ntawv xub hais. 5 Nws
yees tawm los rau Pob Zeb pom tas, ces
nws rov tawm tuaj rau pab kaum ob leeg
pom. 6 Tom qab no, Yes Xus tseem yees
tawm los rau ib pab kwv tij muaj tsib
puas leej ib txhij pom. Cov ntawd, muaj
qee leej twb tuag lawm, tiam sis cov coob
tseem ua neej nyob txog tav no. 7 Tom
qab no, Yes Xus tseem tawm los rau Yas
Kos pom, thiab muaj ib zaug rau tas nws
cov Hauv Paus Xa Lus huv tib si pom.
8 Kuv yog tus puag tom tw, xws li ib tug
me nyuam yug los tsis tau puv hli, tsis
kav Yes Xus kuj tawm tuaj rau kuv pom
thiab. 9 Kuv yog ib tug Hauv Paus Xa
Lus me tshaj cov. Kuv tsis tsim nyog hu
ua Hauv Paus Xa Lus, vim kuv tau hiam
Tswv Ntuj lub Koom Txoos. 10 Yog
Tswv Ntuj lub txiaj ntsim ua kom kuv lub
siab hloov los zoo li no. Tswv Ntuj lub
txiaj ntsim nyob hauv kuv, nws tsis nyob
dag. Kuv tau ua hauj lwm ntau tshaj sawv
daws. Tab sis tsis yog kuv ua : yog Tswv
Ntuj lub txiaj ntsim uas nrog kuv nyob,
tau ua cov hauj lwm ntawd.
11 Txawm yog kuv los yog lawv, qhov
peb tshaj tawm yog cov lus ntawd. Ces nej ntseeg.

Ntawv Moo Zoo: Lus Kas 5, 1-11 Hu thawj plaub leeg thwj tim.

1 Muaj ib zaug, thaum Yes Xus
nyob ntawm ntug pas dej Nkes Nes
Xas Les, ib pab neeg coob sib txiv mloog
Tswv Ntuj Lo Lus ntawm nws. 2 Yes
Xus pom ob lub nkoj nres ntawm ntug
dej. Cov tub puav ntses nqes nkoj tas
lawm, lawv ntxuav lawv cov vas. 3 Yes
Xus nce mus hauv ib lub nkoj, yog Xis
Moos lub, nws kom Xis Moos nquam
nkoj mus deb ntawm ntug dej me ntsis.
Yes Xus zaum hauv nkoj qhia tsoom sid.
4 Thaum Yes Xus hais lus tas, nws hais
rau Xis Moos tias :
"Koj nquam nkoj mus lawm tom qhov dej
tob, nej tso nej cov vas nqes mus puav ntses."
5 Xis Moos teb tias :
"Xib Hwb, peb twb khwv ib hmos tsis tau
dab tsi. Tab sis yog vim koj hais, mas
kuv yuav pov cov vas nqes mus."
6 Ces lawv pov vas. Lawv puav tau
ntses ntau kawg ua lawv cov vas ntuag
kiag. 7 Lawv co tes rau cov npawg nyob
lwm lub nkoj kom tuaj pab. Cov npawg
tuaj txog, sawv daws muab ntses ntim rau
ob lub nkoj puv nkaus, ua nkoj yuav luag tog.

8 Xis Moos Pob Zeb pom li ntawd, nws
txhos caug ntua pe Yes Xus, nws hais tias
"Huab Tais, koj txav mus deb kuv, vim
kuv yog ib tug neeg txhaum."
9 Xis Moos ntshai kawg, cov nrog Xis
Moos ua ke puav leej ntshai, vim lawv
puav tau ntses ntau. 10 Yas Kos thiab
Zam, uas yog Ntxes Npes Dais ob tug
tub, thiab yog Xis Moos ob tug npawg,
nkawd kuj ntshai kawg. Yes Xus hais rau Xis Moos tias :
"Koj txhob ntshai, txij no mus, koj yuav puav neeg."
11 Ces lawv nquam nkoj los rau tim
ntug. Lawv tso tas ib puas tsav yam tseg,
lawv raws Yes Xus mus.

NTHUAV NTAWV NTSHIAB.

Rau hnub chiv tim 10 lub 2 hlis 2013

Ib tsoom phooj ywg hmov thiab tshua,

Peb nyob hauv lis piam nruab xyoo 5 lub caij nyoog teev hawm xyoo 3. Hauv cov zaj nyeem hnub no, peb yuav hais txog cov cim Tswv Ntuj pub rau cov neeg mloog Tswv Ntuj lus pom. Cov cim no qhia peb ua ntej txhawb peb tus neeg ntseeg thiab teev Tswv Ntuj kom peb xuas tau txoj kab ke Tswv Ntuj nyiam taug.

Hauv tsab ntawv zaj nyeem ib, Tswv Ntuj tshoj Es Xais sawv ua tub tshaj xo yam li thaum hmoob mus yuav nyab, hmoob npaj tau neeg ua hmoob cov tshaj xo cev hmoob lus rau niam tais yawm txiv. Hauv zaj nyeem ib no, Es Xais piav txog lub cim thaum Tswv Ntuj tshoj Es Xais sawv los ua Tswv Ntuj tus tub tshaj xo : “5 Kuv hais tias : “Khaum kuv lauj ! Tas rau kuv lauj ! Vim kuv di ncauj qias neeg, kuv nyob nruab nrab ib haiv neeg di ncauj qias neeg, kuv qhov muag pom xyeem Vaj Ntxwv, lub sim ceeb tus Huab Tais !” 6 Cov tub xo ib tug ya ntxiag los cuag kuv, muab ciaj tais nkaus ib lub ncaig kub lug saum Thaj Txi Ntuj tuav rawv 7 Nws coj los ntawm kuv qhov ncauj thiab hais tias : “Yam no twb chwv koj di ncauj thiab tshem tag koj lub txim ziag no, zam tag koj tej txhaum lawm EX 6,5-7” Lub hluav ncaig liab ploog no yog ib lub cim txaus ntshai kawg. Tiam sis, ua rau Es Xais nkag siab npaum li cas Tswv Ntuj muaj hwj huam tas nrho, Loj li Loj, Ntshiab li Ntshiab, hos ntiaj teb neeg txhaum loj li loj, neeg qias li qias dhuav Tswv Ntuj xeev siab fo. Lub hluav ncaig liab ploog xuas ciaj tais saum Thaj Txi Ntuj los kub tag Es Xais tej lus phem lus qias ntawm nws di ncauj ua hluav thiab ntaim dua Es Xais lub ncauj zuag plias li hniav ntaj hniav riam ntshiab huv si tuaj txuas tau Tswv Ntuj lus koob lus hmoov. Peb tus neeg ntseeg puas yuav raug hnyav Yes Xus lub cev thiab cov ntshav saum Thaj Txi Ntuj muaj txiaj ntsim zam peb tej txhaum qias Tswv Ntuj ntaim peb dua tshiab, ua peb ntshiab huv rau Tswv Ntuj.

Yog peb tib neeg qias no ntshiab huv tau vim muaj Thaj Txi Ntuj ua tau peb ntshiab huv, ces Thaj Txi Ntuj yog peb txoj kev ntseeg thiab teev hawm Tswv Ntuj lub plawv. Tus qhia Thaj Txi Ntuj rau peb tus neeg ntseeg yog Yes Xus. Peb mus Thaj Txi Ntuj, peb zoo li teev dej xyaw ntim cawv, peb nrog Yes Xus ua txim txi rau Leej Txiv Tswv Ntuj. Txoj kev ntseeg thiab teev Tswv Ntuj no yog Yes Xus qhia rau nws cov thwj tim, cov thwj tim qhia rau peb coj txog niaj hnub no. Peb yuav cuab ntsej mloog Paj Lug ceeb toom rau cov neeg ntseeg nyob lub nroog Kos Lis Nthos kom txuag zias Yes Xus lub Moo Zoo : “1 Kwv tij, kuv qhia lub Moo Zoo rau nej paub, lub uas kuv tshaj rau nej thiab nej tau khaws tseg thiab nej yoog kom raws nraim khov kho 2 Vim li ntawd, kuv qhia nej li cas yog nej txuag zias tej lus li ntawd, nej yuav txais txoj kev cawm, tsis nkim nej lub zog ntseeg 1KLN 15, 1-2” Ua li peb tus neeg ntseeg Tswv Ntuj yuav txuag Yes Xus lub Moo Zoo li cas ? Peb yuav tsum txawj feeb kom meej txoj kev ntseeg Tswv Ntuj raws li Yes Xus qhia tsis yog nom tswv tus cai kav teb kav chaw. Peb txhob coj kev ntseeg Tswv Ntuj li nom tswv ua (politique) muab cai los khoo tseev kom neeg hwm cai li chaws txiv nyuj txiv nees ntswg tuav ntawm tes los khi qab hluas cia ntawm tswg. Kev ntseeg Tswv Ntuj thiab nom tswv tus cai kav pej xeem nyias muaj nyias kab. Muaj ntau pawg neeg ntseeg tsis mloog Paj Lug qhia, ua Thaj Txi Ntuj tsis tsheej Thaj Txi Ntuj, coj kev ntseeg Tswv Ntuj li coj nom tswv txhooj cai. Peb yuav tsum paub, cov neeg ntseeg Tswv Ntuj tsis yog ib cov neeg los koom siab ua koom haum teev ntuj, tso nyiaj li ua (assurance, association…) ib yig kaum feem pua (10%) thiaj nkag los ua tau koom haum. Cov neeg ntseeg Tswv Ntuj yog cov neeg los txoos npoj, ua Koom Txoos nrog Yes Xus ua ib cuab ib yig, tsis yog ua koom haum. Ua ntej thaum Paj Lug tseem muab Mos Ses txoj cai los khoo neeg li nom tswv tus cai khoo pej xeem, Paj Lug lim hiam kawg rau cov neeg teev Yes Xus : “9 Kuv tus tsis phim ua npoj xa moo vim kuv tau hiam Tswv Ntuj lub Koom Txoos 1KLN 15,9” Tom qab Paj Lug to taub Yes Xus lub Koom Txoos, npaum li cas lub Koom Txoos muaj Yes Xus txiaj ntsim kho tau Paj Lug tus neeg phem sawv daws ntshai ua dua tus neeg tshiab sawv daws qhuas : “10 Tsuas sawm Tswv Ntuj txiaj ntsim kuv thiaj li zoo li kuv no, nws lub txiaj ntsim tsis nkim dag rau kuv, ua kuv tus khwv tshaj tag nrho lawv, tsis yog kuv xwb hos Tswv Ntuj txiaj ntsim nrog kuv 11 Txawm tias kuv los puas lawv, peb tshaj qhia li cas kom nej ntseeg li ntawd 1KLN 15,10-11” Yog peb teev hawm Tswv Ntuj li Paj Lug qhia, peb kuj yuav txais Yes Xus lub txiaj ntsim ib yam li Paj Lug.

Hauv zaj ntawv Moo Zoo, Xis Moos thiab nws cov kwv npawg khwv ib hmos qhuav cuab tsis tau ntses. Tag kis ntawd, lawv pom Xib Hwb Yes Xus nrog ib npoj neeg coob tuaj ntsauv nws ntawm ntug dej, mloog nws piav txog Tswv Ntuj kev hlub neeg. Yes Xus txawm nce rau hauv Xis Moos lub nkoj thiab hais kom Xis Moos rov nthuav nws cov vas pov mus lawm hauv dej : “5 Xis Moos teb tias : “Xib Hwb, peb khwv ib hmos tsis tau dab tsi. Tab sis vim koj lo lus hais, kuv mam pov cov vas lawm hauv.” 6 Ua zoj li, ciav mag tau ntses ntau li ntau ua lawv cov vas ntuag rhe LK 5,5-6” Xyov hmoov dab tsi, tag kis ntawd, Yes Xus ho yuav hloov tau Xis Moos thiab nws cov kwv npawg kev qaug zog ploj qab ntais. Los txog tav no, Xis Moos tsis tau kev mus tham nws lub neej txhawj xeeb rau leej twg paub. Sawv daws nyias muaj nyias kev txom nyem, nyias peem nyias tus kheej. Ua cas yuav tsis ntxov ntsib Yes Xus ib lo lus xwb daws tau tag lawv txoj kev qaug zog pov tseg : “Yes Xus hais rau Xis Moos tias : “Tsis txhob ntshai, txij no mus, koj yuav puav tib neeg sia” 11 Rub nkoj los tas saum av, tso plhuav puas tsav yam tseg, lawv cia li caum nws lawm LK 5,10-11” Kom peb nco ntsoov, thaum peb tsis tau paub Yes Xus, peb yeej tsis pom qab cuab zog ntawm leej twg, kawg dab qhuas khi rawv peb. Txij peb ntsib dheev Yes Xus, peb kuj zoo li Xis Moos, ua rau peb txoj kev qaug zog ntshai dab ploj ntais. Vim peb pom Yes Xus kev hlub peb muaj hwj huam loj tas nrho.

Peb tus neeg ntseeg Tswv Ntuj yuav nco ntsoov, Huab Tais Yes Xus lub cev thiab cov ntshav saum Thaj Txi Ntuj muaj txiaj ntsim loj tas nrho, yog peb noj nws lub cev thiab haus nws cov ntshav, peb yuav nrog Huab Tais Yes Xus ciaj Tswv Ntuj sia ib txhiab ib txhis.

07.02.2013 Cwj Vuam Chiv

**NrhiavTswvNtuj** 16th February 2013, 3:10 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°14

Re: COV ZAJ NYEEM-Xyoo C 2012-13

Post NrhiavTswvNtuj 16th February 2013, 3:10 am

COV ZAJ NYEEM HNUB 17/02/2013
(Chiv 1 Caij 40 - Xyoo C )

Zaj nyeem 1 : Txoj Cai Ob 26, 4-10 Yuav cev thawj cov qoob loo rau Tswv Ntuj.

4 Niaj xyoo koj yuav ris ib kawg
nplej tshiab tuaj rau tus Leej Choj.
Tus Leej Choj yuav txais lub kawm
ntawm koj tes mus txo rau hauv HUAB
TAIS koj tus Tswv Ntuj lub taw thaj txi
Ntuj. 5 Ces koj yuav hais cov lus no rau
HUAB TAIS koj tus Tswv Ntuj :
"Thaum ub, kuv txiv yog ib tug neeg As
Las Mais nyob tsis ruaj chaw. Nws nqes
mus Hais Nkws Tos teb, nws coj ib pab
neeg tsawg mus. Ntev mus lawv coob
tuaj ua ib haiv neeg loj thiab muaj zog.
6 Cov Hais Nkws Tos hiam peb thiab tsis
saib peb li. Lawv kom peb ua lawv qhev
ces peb txom nyem tas nrho. 7 Peb thiaj
hu txog HUAB TAIS, peb cov yawg koob
tus Tswv Ntuj. HUAB TAIS hnov peb
lub suab, thiab ntsia peb txoj kev txom
nyem, nws pom peb lub neej raug luag
yuam. 8 HUAB TAIS tsa tes coj peb
tawm Hais Nkws Tos teb los. Nws pab
peb, nws hem cov Hais Nkws Tos kom
lawv ntshai thiab nws ua hwj huam yees
ntxwv. 9 Nws coj peb los txog qhov no,
nws muab lub teb chaws no rau peb. Teb
chaws no muaj mis nyuj thiab zib ntab ntws lug.
10 HUAB TAIS, ntawm no yog thawj
phaum qoob uas koj pub rau kuv, mas
kuv nqa tuaj cev rau koj."
Koj yuav tso cov qoob ntawd rau ntawm
HUAB TAIS koj tus Tswv Ntuj xub
ntiag, thiab koj yuav pe HUAB TAIS koj tus Tswv Ntuj.

Zaj nyeem 2 : Los Mas 10, 8-13 Txawm yog Yus Das los Hes Las, yeej tsis sib txawv.

8 Nws hais li cas ? Lo lus ze ntawm koj nyob
hauv koj lub ncauj thiab nyob hauv koj siab,
yog kev ntseeg lo lus uas peb tshaj.
9 Yog koj di ncauj lees tias Yes Xus yog
Huab Tais, thiab koj lub siab ntseeg tias
Tswv Ntuj tsa Yes Xus tuag sawv rov los,
mas koj yuav txais kev cawm neeg.
10 Lub siab ntseeg tau txais kev ncaj los
ua nws tug. Lub ncauj uas lees ntseeg
txog Yes Xus tau txais kev cawm. Vim
Ntawv sau cia tias : ‘Tus ntseeg txog
Huab Tais, nws yuav tsis poob ntsej muag.’
12 Li ntawd, txhob hais tias muaj cov
Yus Das thiab muaj cov Hes Las ; lawv
tsis sib txawv. Sawv daws muaj ib tug
Huab Tais xwb, yog tus Huab Tais pub
paj tshab ntau rau cov neeg hu txog nws.
13 Vim Ntawv yeej sau cia tias :
‘Leej twg hu txog Huab Tais lub npe, nws
yuav ntsib kev cawm neeg.’

Lus Kas Ntawv Moo Zoo 4, 1-13 Yes Xus yeej dab phem ntxias.

1 Yes Xus rov ntawm dej Yos Las
Das los, nws muaj Leej Ntuj Plig
Ntshiab nyob puv hauv nws. Leej Ntuj
Plig coj Yes Xus mus nyob teb chaws
suab puam 2 plaub caug hnub, dab
phem ntxias Yes Xus. Tas lub caij ntawd
Yes Xus tsis noj dab tsi li. Thaum dhau
plaub caug hnub lawd, nws tshaib plab.
3 Dab phem hais rau Yes Xus tias :
"Saib ! Koj yog Tswv Ntuj Leej Tub no,
koj hais kom lub pob zeb no txia ua mov."
4 Yes Xus teb rau dab phem tias :
"Muaj lus sau cia tias : Neeg tsis kawg
muab mov los yug txoj sia xwb."
5 Dab phem coj Yes Xus nce mus saum
ib qho chaw siab. Ib sij huam, nws muab
tas nrho cov ceeb tsheej nyob ntiaj teb
rau Yes Xus ntsia. 6 Ces dab phem hais rau Yes Xus tias :
"Kuv yuav muab cov ceeb tsheej ntawd
lub peev xwm thiab lub koob meej huv
tib si rau koj. Vim kuv tau txais ua kuv
tug, kuv xav muab rau leej twg kuj tau
ywj kuv siab. 7 Li ntawd, yog koj pe
kuv, mas tej ntawd yog koj tug tas huv si."
8 Yes Xus hais rau dab phem tias :
"Muaj lus sau cia tias :
Koj yuav pe Huab Tais, koj tus Tswv Ntuj,
koj yuav teev nws tib leeg xwb."
9 Dab phem tseem coj Yes Xus mus pem
Yes Lus Xas Les, ces dab phem muab
Yes Xus tso saum lub ruv Tuam Tsev
Teev Ntuj. Dab phem hais rau Yes Xus tias :
"Saib ! Koj yog Tswv Ntuj Leej Tub no,
koj dhia saum no lawm puag hauv,
10 vim muaj lus sau cia tias :
Ntuj yuav txib nws cov tshiab, kom lawv zov koj.
11 Thiab tseem sau ntxiv tias :
Lawv yuav nqa koj hauv lawv txhais tes,
kom koj txhais taw txhob dawm ib lub pob zeb li."
12 Tab sis Yes Xus teb rau dab phem
tias : "Muaj lus sau hais tias :
Koj yuav tsis txhob ntxias Huab Tais, koj tus Tswv Ntuj.
13 Dab phem ntxias Yes Xus kawg tswv
yim, ces nws txav ntawm Yes Xus mus,
tos dua lwm lub zoo sij hawm.

NTHUAV NTAWV NTSHIAB.

Rau hnub chiv tim 17 lub 2 hlis 2013

Ib zeej tsoom neeg ntseeg teev hawm Tswv Ntuj thiab phooj ywg,

Hnub no yog lis piam hnub Chiv 1 lub caij 40 xyoo 3. Peb yuav los nthuav ob peb los txog lub ntsiab tus neeg ntseeg hla hav suab puam nrog peb tus Huab Tais Yes Xus raws li nram no.

Tus neeg ntseeg thiab teev Tswv Ntuj yuav tsum paub, txoj kev thim dab qhuas los ua neeg teev hawm Tswv Ntuj, tsis yog los plhis dua nqaij hloov dua tawv tshiab li tus tsiaj plhis plaub los niam nab plhis tawv. Peb los thim dab qhuas teev hawm Tswv Ntuj, peb lub cev ntaj xib ntsug, siab ntsws, ntsuj mam ntsuj plig yog noob neej ces peb yuav raug ntiaj teb neeg lub txhoj lub txhaum sib txeeb noj sib txeeb hnav, ntshaw muaj teej muaj tug thiab ntshaw muaj koob meej nto npe. Lub caij 40 no muaj txiaj ntsim qhia Huab Tais Yes Xus tus roj tus hneev tiv dab phem Xas Tas kev haub kev ntxias. Vim li ntawd, peb tus neeg ntseeg teev hawm Tswv Ntuj yuav muab lub caij 40 no ua peb lub chaw nta taw thiab chaw cuab zog nrog Huab Tais Yes Xus tiv dab phem Xas Tas kev ntxias peb caij Xas Tas qhev.

1-Thawj yam dab phem ntxias yog peb lub cev ntaj ntsug. Peb leej tib neeg txhua leej puav leej ntshaw noj, ntshaw hnav, tshaw hlub, ntshaw yuav. Tiam sis, yuav kom peb muaj noj muaj hnav, leej tib neeg yuav tsum loj npab ntshuas ua, cev tes xaws, peb thiaj muaj noj muaj hnav. Tib neeg yuav tau khwv, yuav tsum sawv ua hnub ntej nyiaj dab ntub zias, yuav tsum txog siav txhob khuv xim zog, tiv txhua txoj kev txom nyem. Thaum peb lub cev muaj mob muaj nkeeg hnyav, noj mov tsis poob plab, haus dej tsis poob cev, peb txoj sia ib hnub yau zuj zus mus txog hnub peb txoj pa tu lis nrho. Vim li ntawd, tej txiab nkeeg ua rau peb txhawj xeeb. Peb tej kev txhawj xeeb cuab dab phem zog ntxias peb li dab phem ntxias Yes Xus. Vim Yes Xus yoo tau 40 hnub nyob hav suab puam, ua rau Yes Xus tshaib thiab nqhis qaug zog luj luas yuav tu siav. Dab phem paub Yes Xus muaj hwj huam, tsis txog Yes Xus yuav qaug zog luj luas npaum li peb tib neeg tsis muaj hwj huam. Dab phem tuaj thab kom Yes Xus cia li siv hwj huam zawg zog xwb pob zeb pob tsuas yees zom zaws ua mov noj tsis txawj tag : “3 Dab phem hais nws tias : “Ov ! Koj yog Tswv Ntuj Leej Tub, hais kom lub pob zeb no txia ua mov LK 4,3.” Tiam sis, Yes Xus thev kev tshaib nqhis tsis qaug rau dab phem kev haub ntxias. Yes Xus tuaj yeem ua tus pluag hwj huam li peb leej tib neeg tsis muaj hwj huam : “4 Tiam sis Yes Xus teb rau nws : “Muaj lus sau tseg : Tsis yog mov nkaus xwb ua neeg ciaj sia LK 4,4.” Peb tus neeg ntseeg yuav tsum yoog Yes Xus ua tus pluag, ua tus neeg me hauv peb lub neej. Yog peb leej twg mloog Huab Tais Yes Xus lus, tus ntawd nrog Yes Xus tiv dab phem kev khav theeb. Peb thiaj li yuav nrog Yes Xus ntiab tau dab phem khiav ntawm peb txoj xub ke.

2-Yam ob, dab phem muab kev ntshaw muaj koob meej haub ntxias peb. Leej tib neeg tsis hais poj niam los txiv neej, puav leej ntshaw kom luag qhuas yus, cav txog yus nto koob meej lug : tib neeg thiaj ntshaw ua tus muaj nyiag nplua nuj tshaj tej, ua tus neeg ntse kawm txuj siab dua tej, ua neeg tus nom tswv loj tshaj tej, ua tus kws tshuaj txawj kho mob dua tej, ua tus poj niam siab zoo nquag dua tej…Vim dab phem paub tias koob meej yog yam tib neeg siab ntsws nshaw tas nrho. Vim li ntawd, dab phem muab koob meej los ntxias peb kom qaug rau dab phem zaj li dab phem ntxias Yes Xus : “6 Thiab dab phem hais rau nws : “Kuv yuav muab tej no rau koj kav tag nrho thiab lawv tej hwj chim, vim tej ntawd muab pub kuv tag nrho, kuv xav muab rau leej twg ywj kuv 7 Koj ov, yog koj pe nkaus kuv, tej ntawd tag nrho yog koj tug LK 4,6-7” Tos peb tsis raug hnyav txoj kev teev Tswv Ntuj, tos peb mus teev hawm Tswv Ntuj tsis cuag ncua, peb nquag mam mus. Tiam sis, hnub twg los hnub nkees ces tos hnub dhau hnub tsheej qas hli, qas xyoo peb twb tsis mus teev ntuj. Tsis kav, peb tseem hais tias mus teev ntuj nkim caij nyoog thiab tsis muaj nuj nqes rau peb. Vim peb twb tsis hwm Huab Tais Tswv Ntuj. Dab phem kuj tsis hwm Tswv Ntuj, dab phem thiaj li tsis teev Tswv Ntuj tib yam nkaus. Peb saib txoj kev mus twv txiaj yuam pov, mus haus dej haus cawv, mus noj tshoob noj kos, mus koom kwv tij neej tsa pluas noj pluas haus, mus ua lag ua luam…loj tshaj kev teev hawm Tswv Ntuj. Peb lub siab xib rau kev lag kev luam, kev twv txiaj yuam pov thiab kev noj kev haus tshaj kev teev Tswv Ntuj. Tab tom dhos daws dab phem Xas Tas siab nyiam. Peb tsis niam quav ntsej kev fim Tswv Ntuj : “8 Yes Xus teb rau nws : “Tau sau muaj tseg : Koj yuav pe Huab Tais koj tus Tswv Ntuj thiab koj yuav teev nws ib leeg xwb” Yog peb tsis teev Tswv Ntuj ces peb kawg mus taug dab phem txhua txoj xub ke ntxias peb xwb.

3-Yam peb dab phem muab kev twv Tswv Ntuj los ntxias ntiaj teb neeg thiab ntxias tus neeg ntseeg teev Tswv Ntuj. Yus twb paub ntsoov peb leej tib neeg yug los saum daim av, peb zoo li daim nplooj txawj hlav txawj daj thiab txawj zeeg. Peb muaj hnub yug thiab muaj ib hnub qaij qaug mus. Vim li ntawd, yog peb lub cev muaj mob muaj nkeeg, peb yuav tsum nrhiav dej nrhiav tshuaj kho peb lub mob ; kawg dej tshuaj thiaj lom tau tus kab mob hauv nrog cev kom ploj kom yaj. Hnub twg dej thiab tshuaj pab tsis tau peb lawm ces peb lub cev laus los txog lawm. Dua ntawm dej thiab tshuaj, yeej tsis muaj tus tsi yuav kho tau peb lub mob lub ntsaj. Yog peb ntseeg tias tsiaj txhu kho tau peb tus mob tus ntsaj, los puas pov haum khoos, pov haum muaj peev xwm thaiv tau peb ntawm tus hniav ntaj hniav riam thiab mos txwv, ces tam ntua peb poob rau dab phem kev ntxias Yes Xus kom mus tsaw tsua Yes Xus ko taw yuav tsis ntsawm zeb ntsawm av : “Ov ! Koj yog Tswv Ntuj Leej Tub, dhia rhees koj tus kheej ntawm no lawm hauv 10 Tau sau muaj tseg tias : Nws yuav txheev nws cov tshaj xo rau koj kom txuag tau koj 11 Thiab lawv yuav nqa koj hauv tes, kom koj taw txhob ntsawm ib lub zeb LK 4,9-11.” Yog peb ntseeg tsiaj txhu kho tau peb lub mob lub ntsaj thiab ntseeg pov haum ces peb twv Huab Tais Tswv Ntuj li dab phem twv Tswv Ntuj. Tos peb nrog luag sib tw nthuav txuj nthuav ci, vim peb ntseeg tau peb tus kheej muaj peev xwm yuav yeej tau luag. Yog peb twv Huab Tais Tswv Ntuj ces peb ua neeg khav theeb li dab phem twv Huab Tais Tswv Ntuj : “12 Yes Xus teb rau nws : “Muaj lus sau tseg : Koj tsis txhob ntxias Huab Tais, koj tus Tswv Ntuj LK 4,12”

Lub caij 40 no yog ib lub caij nyoog kho peb txoj kev cia siab rau Huab Tais Tswv Ntuj qhov yuav kev muab cais pov tseg, los taug Huab Tais Yes Xus tus roj tus hneev tiv dab phem. Muab peb txoj kev tub nkeeg, kev pe dab phem nrauj pov tseg. Tig los npuab Huab Tais Yes Xus tag siab nrho, tso siab lug rau Huab Tais Yes Xus. Txij no mus peb yuav raug hnyav rau txoj kev teev hawm Tswv Ntuj tshaj yav tag los.

15.02.2013 Cwj Vuam Chiv

**NrhiavTswvNtuj** 22nd February 2013, 8:59 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°15

Re: COV ZAJ NYEEM-Xyoo C 2012-13

Post NrhiavTswvNtuj 22nd February 2013, 8:59 am

COV ZAJ NYEEM HNUB 24/02/2013
(Chiv 2 Caij 40 - Xyoo C )

Zaj nyeem Ib: Hauv Paus 15, 5-12.17-18

5 HUAB TAIS coj Has Nplas mus nraum
zoov thiab hais rau nws tias :
"Koj tsa muag ntsia saum ntuj thiab suav
cov hnub qub saib koj suav puas txheeb."
Ces nws hais tias : "Koj cov xeeb ntxwv yuav coob npaum li ntawd."
6 Has Nplas ntseeg HUAB TAIS, ces
HUAB TAIS muab Has Nplas lub siab
ntseeg suav ua kev ncaj rau Has Nplas.
7 HUAB TAIS hais rau nws tias :
"Kuv yog tus HUAB TAIS uas tau kom
koj tawm hauv lub teb chaws Uj uas nyob
Kas Ntes los mus nyob lub teb chaws uas
kuv yuav muab rau koj, ua koj tug." 8 Has Nplas teb tias :
"HUAB TAIS Tswv Ntuj, dab tsi thiaj
yuav qhia rau kuv paub tias kuv tau lub teb chaws ua kuv tug ?"
9 HUAB TAIS hais rau nws tias :
"Koj mus coj ib tug xyuas nyuj muaj peb
xyoos, ib tug nkauj tshis muaj peb xyoos,
ib tug txiv yaj muaj peb xyoos, ib tug poj
nquab thiab ib tug me nyuam nquab los rau kuv tso."
10 Has Nplas coj cov tsiaj raws li hais los
rau HUAB TAIS. Nws muab cov tsiaj
phua nruab nrab, nws muab ib sab teeb
rau sab xis ib sab teeb rau sab laug, tiam
sis nws tsis phua cov noog. 11 Dav nyuj
ya ntxiag los noj cov tsiaj, tab sis Has Nplas nplawm kom dav ya.
12 Thaum lub hnub tab tom poob qho,
Has Nplas ib ce tsaug tas, thiab muaj ib
qho ntshai loj kawg los laum Has Nplas.
17 Thaum lub hnub poob qho lawm thiab
tsaus ntuj lawm, ces muaj ib lub qhov
txos ncho pa lug thiab ib teg tsau cig cig
los hla ntawm cov sab nqaij kis nruab
nrab. 18 Hnub ntawd, HUAB TAIS nrog
Has Nplas cog lus li no :
"Kuv muab lub teb chaws no rau koj
tsoom xeeb ntxwv nyob, txij tus dej nyob
Hais Nkws Tos teb mus txog ntua tus Dej
Loj, tus dej Aws Fas Tes.

Zaj nyeem Ob: Fis Lis Pos 3, 17–4, 1

17 Kwv tij sawv daws, nej yoog raws li
kuv tus lwj lwm mog. Nej ntsia ntsoov
cov neeg ua raws li peb tus piv txwv.
18 Kuv hais li ntawd rau nej, yog vim
muaj ntau leej ua xws li lawv yog cov
yeeb ncuab ntxub Yes Xus tus ntoo cuam.
Thaum kuv hais qhov ntawd rau nej, mas
kuv kua muag poob. 19 Cov neeg ntawd,
lawv kawg yuav poob rau hauv txoj kev
tuag xwb. Lawv tus huab tais, yog lawv
lub plab. Lawv muab tej yam phim yuav
txaj muag los khav. Lawv tsuas nyiam tej
yam nyob ntiaj teb no xwb. 20 Ntawm
peb, mas peb lub tsheej nyob saum ntuj,
vim peb tos Huab Tais Yes Xus Pleev
yuav los cawm peb ; 21 nws yuav muab
peb lub cev txom nyem no hloov ua ib lub
cev muaj hwj chim, xws li nws lub. Nws
ua li ntawd tau, vim nws muaj hwj huam
tswj txhua tsav txhua yam.
4,1 Kuv cov kwv tij zoo nyiam, nej
yog kuv qhov chaw zoo siab, yog
kuv lub koob meej. Nej nyob ruaj nreb hauv Huab Tais mog .

Lus Kas Ntawv Moo Zoo: 9, 28b-36

Yes Xus coj Pob Zeb, Zam, thiab Yas Kos nrog nws, ces nws
nce mus teev Ntuj saum roob.
29 Thaum Yes Xus teev Ntuj, nws lub
ntsej muag hloov, nws cev ris tsho ci
dawb paug ntsa iab. 30 Ib sij huam,
muaj ob tug neeg nrog Yes Xus tham :
yog Mais Xes thiab Es Lias. 31 Nkawd
tawm los muaj hwj chim, nkawd nrog
Yes Xus tham txog txoj hauj lwm uas
nws yuav sawv kev mus lis kom tiav
nyob Yes Lus Xas Les. 32 Pob Zeb thiab
nws cov npawg qaug dab ntub. Tab sis
lawv meej pem kawg. Ces lawv pom Yes
Xus lub hwj chim thiab pom ob tug neeg
uas nrog Yes Xus ua ke. 33 Thaum ob
tug ntawd yuav ncaim ntawm Yes Xus,
mas Pob Zeb hais rau Yes Xus tias :
"Xib Hwb, peb nyob ntawm no mas zoo
kawg ! Cia peb tsa peb lub tsev tsam
phooj, ib lub rau koj, ib lub rau Mais Xes, ib lub rau Es Lias."
Pob Zeb tsis paub nws hais dab tsi.
34 Thaum Pob Zeb tab tom hais li ntawd,
mas muaj ib twv huab tuaj vov nkaus
lawv. Thaum lawv nyob hauv twv huab,
lawv ntshai kawg. 35 Muaj ib lub suab
nrov hauv twv huab tuaj tias :
"Tus no yog kuv Leej Tub, yog tus kuv
Xaiv, nej mloog nws mog."
36 Thaum lub suab hais li ntawd tas,
tshuav Yes Xus tib leeg xwb. Hnub
ntawd, cov thwj tim ua twj ywm tsis qhia
dab tsi rau leej twg txog qhov lawv tau pom.

NTHUAV NTAWV NTSHIAB.

Rau hnub chiv tim 24 lub 2 hlis 2013

Tsoom ntseeg sawv daws thiab phooj ywg nyiam mloog Tswv Ntuj lus,

Peb nyob hauv lis piam 2 lub caij 40, yog lub caij hla hav suab puam rau peb tus neeg ntseeg. Peb paub zoo hav suab puam yog ib thaj chaw ntuj qhuav teb nkig, tsis zoo ua neej nyob. Peb leej tib neeg yeej ceeb laj hla dhau lub ntuj qhuav thiab lub teb nkig. Peb yuav los nthuav lub ntsiab lus tus neeg ntseeg hla hav suab puam hauv lub caij 40 raws li nram no.

Lub Koom Txoos Kav Tos Liv niaj xyoo caw tas zeej tsoom neeg ntseeg Tswv Ntuj npaj lub caij 40, hla hav suab puam vim li cas ? Vim lub ntsiab kev hla hav suab puam yog muab peb lub cev ntaj ntsug thiab ntsuj mam ntsuj plig sau nthwv los ua ke lawv Huab Tais Yes Xus qab tiv dab phem. Peb yuav nco ntsoov peb cov yawg koob kev tsiv teb tsaws chaw : Has Nplas Has tawm lub nroog Us, Npas Npis Los teb tuaj txog Kas Nas Has teb ; Mos Xes coj haiv His Xas Lais tawm Hais Nkws Tos lub teb chaw ciaj qhev hla hav suab puam 40 xyoo thiaj tshwm Kas Nas Has teb. Txawm yog Has Nplas Has, txawm yog Mos Xes thiab His Xas Lais kev hla hav suab puam yog kev nyiaj tshaib yoo nqhis, raug txom nyem. Muaj coob leej tau yws tau cem Mos Xes thiab ntxeev siab thuam Tswv Ntuj, muab nyiaj muab kub los nchuav ua mlom teev. Tiam sis, Tswv Ntuj lo lus xwb thiaj cawm tau lawv kev tshaib kev nqhis, yug mov muab nqaij rau lawv noj, muab dej cawm lawv siav lawv thiaj hla dhau teb chaws suab puam.
Rau peb tus neeg ntseeg thiab teev Tswv Ntuj, peb lub neej nyob saum daim npoo av tam ntua kev hla hav suab puam. Ib txhia neeg ntseeg niaj hnub no tso kev teev Tswv Ntuj pov tseg, yeem mus raws tej poj saub yawm saub cuav cov huab tais ; tej txhia, rov qab mus thawj tej txiv neeb txiv muam raws li poj yawm hmoob ua kam ; tej txhia mus raws nyiaj thiab kub ua lawv tus huab tais ; tej txhia nrhiav kev plhom kev plees tos ntshi lub caij lub nyoog mus lwj mus liam tshom lub cuab lub yig puas tsuaj kav liam…Peb yuav tsis txhob yuam kev mus npuab, mus dai tib neeg ntiaj teb kev ua neej dhuav Tswv Ntuj siab. Vim li ntawd, lub caij 40 no yog lub zoo caij zoo nyoog rau peb thim xav, tso peb lub siab lim hiam thiab lub neej lwj liam qias neeg pov tseg, hloov dua siab tshiab los npuab Huab Tais Yes Xus tus roj tus hneev tiv yeej dab phem txhua txoj kev haub ntxias. Txawm tias peb ib txhia nquag mus teev ntuj, peb tsis yog cov neeg tshom lub cuab lub yig los peb yuav tsum paub, peb tib neeg txawm zoo npaum twg los yeej tseem tshuav chaw zoo tsis tau txaus qhov Tswv Ntuj qhuas peb.

Zaj ntawv Moo Zoo peb nyeem hnub no muaj txiaj ntsim loj kawg nkaus rau peb tus neeg teev hawm Huab Tais Tswv Ntuj. Thaum peb tsis tau cog lus ua neeg ntseeg Tswv Ntuj, pev lub neej thiab peb tus cwj pwm tseem yog neeg ntiaj teb tus. Txij li peb los caum Yes Xus, los khaub zig Yes Xus ua peb tus Huab Tais, peb los ua Yes Xus thwj tim, ua Yes Xus kwv tij thiab nkauj muam. Peb los ua Yes Xus thwj tim lawm, peb yuav tsis txhob thim ua neeg fav xeeb ua nkauj feb nraug fav li ntiaj teb tib neeg. Thaum cov thwj tim tuaj caum tau Yes Xus lawm, lawv nrog Yes Xus noj ua ke nyob ua pab. Lawv nrog Yes Xus mus tshaj Tswv Ntuj qaum ntuj txog puag tej zej zog, mus txog ntau cheeb tsam qhia qaum ntuj rau tej tib neeg. Lawv pom Yes Xus tes hwj huam loj tas nrho cawm neeg, txaus ntshai thiab txaus qhuas. Tiam sis lawv pom Yes Xus nquag muab lub caij lub nyoog los teev Leej Txiv Tswv Ntuj : “28 Yes Xus coj Pob Zeb, Zam thiab Yas Kos Npos nrog Yes Xus mus teev ntuj saum ib lub roob. 29 Thaum nws tseem teev ntuj, nws ntsej muag txawv tuaj, nws cev ris tsho ci nplas cuag xob laim. 30 Ua ciav, ob tug neeg nrog nws txuas lus tuj taws, nkawd yog Mos Xes thiab Es Lias. LK 9,28-30” Peb los ua neeg ntseeg Yes Xus, peb yuav nrhiav kom tau lub caij lub nyoog thiab nquag teev Leej Txiv Tswv Ntuj cuag li Yes Xus. Yog peb lam yuav lub npe ntseeg Tswv Ntuj xwb, peb twb tsis paub ib zag teev ntuj, twb tsis mus koom tsoom neeg ntseeg teev Tswv Ntuj kiag li. Nej sim xav saib, tus neeg lam dag yuav lub npe ua neeg ntseeg no puas ntshaw lub txiaj ntsim thiab tej koob hmoov teev ntuj ? Zaj ntawv Moo Zoo hnub no qhia peb pom npaum li cas txoj kev teev Tswv Ntuj muaj txiaj ntsim loj kawg nkaus. Vim lawv peb tug nquag nrog Yes Xus ua ke, lawv thiaj muaj hmoo pom lub txiaj ntsim teev Tswv Ntuj no, lwm cov tsis tuaj, lawv tsis nrog pom : “Pob Zeb hais rau Yes Xus tias : “Xib Hwb, cas zoo rau peb npaud ntawm no, tsa peb lub tsev tsam phooj, koj ib lub, Mos Xes ib lub, Es Lias ib lub LK 9,33.” Txoj kev teev ntuj qhib lawv peb tug thwj tim no txuas tau qaum ntuj neeg, ntsib dheev Mos Xes thiab Es Lias, ob tug yawg koob muaj hwj huam thiab nto moo lug tej laus cav ntsuag qees tiam dhau tiam, ziag no pom xyeem ciaj sia saum qaum ntuj tseeb tiag. Vim li ntawd, Pob Zeb cia li tsis xav rov los tsev, kom ua tsev pheeb suab nyob twj saum roob.

Ntau zaus peb saib txoj kev teev ntuj tsis tshua muaj nuj nqes rau peb, cia peb tej dej num khuav peb tej siab ntsws loj dhau kev cai. Hauv xya hnub ntawd, peb twb tseem qee tsis tau ib teev mus koom tsoom neeg ntseeg teev thiab qhuas Tswv Ntuj lub txiaj ntsim hlub yus. Vim li ntawd, lub caij 40 yog ib lub zoo caij zoo nyoog rau peb tus neeg ntseeg kom rov kho tau peb tus kheej tau yuam kev ncaim mus deb txoj kev teev hawm Tswv Ntuj rov los taug txoj kab txoj ke teev Tswv Ntuj raws li lub Koom Txoos kev qhuab qhia. Yog peb tsis teev hawm Tswv Ntuj raws li lub Koom Txoos qhia, ces nkim peb txoj kev ua neeg teev Tswv Ntuj tsis muaj Yes Xus tej koob hmoov pab yus.

22.02.2013 Cwj Vuam Chiv

**NrhiavTswvNtuj** 1st March 2013, 12:10 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°16

Re: COV ZAJ NYEEM-Xyoo C 2012-13

Post NrhiavTswvNtuj 1st March 2013, 12:10 pm

COV ZAJ NYEEM HNUB 03/03/2013
(Chiv 3 Caij 40 - Xyoo C )

Zaj nyeem Ib: Kev Tsiv 3, 1-8a.13-15 Tswv Ntuj hu Mais Xes hauv tsob pos cig cig.

1 Mais Xes niaj hnub mus zov
nws yawm txiv Zes Raus pab yaj.
Zes Raus yog ib tug leej choj Mas Dias.
Mais Xes coj nws yawm txiv cov yaj mus
noj zaub dhau teb chaws suab puam, ces
nws mus txog Tswv Ntuj lub roob Hos
Les. 2 HUAB TAIS tus Tshiab yees
tawm los rau Mais Xes pom nyob hauv ib
co nplaim taws cig cig nyob hauv ib tsob
pos. Mais Xes ntsia ntsoov, tsob pos cig
cig ntsa iab tab sis tsis txawj kug li.
3 Ces Mais Xes hais tias :
"Kuv yuav lug kev mus xyuas yam txawv
txawv ntawd saib yog dab tsi, ua cas tsob
pos ntawd cig cig tsis txawj kug."
4 HUAB TAIS pom nws lug kev tuaj
xyuas, ces Tswv Ntuj hu nws hauv tsob ntoo tuaj tias :
"Mais Xes, Mais Xes."
Mais Xes teb tias :
"Kuv nyob ntawm no."
5 Tswv Ntuj hais tias :
"Koj txhob txav los ze ntawm no, hle koj
nkawm khau ntawm koj ko taw, vim thaj
chaw uas koj tsuj no yog ib thaj chaw ntshiab."
6 Tswv Ntuj hais ntxiv tias :
"Kuv yog koj cov yawg koob tus Tswv
Ntuj, yog Has Nplas Has tus Tswv Ntuj,
yog His Xas Has tus Tswv Ntuj, thiab yog
Yas Kos tus Tswv Ntuj."
Ces Mais Xes thaiv nws lub ntsej muag,
vim nws ntshai tsam nws qhov muag tau pom Tswv Ntuj.

7 HUAB TAIS hais tias :
"Kuv pom, kuv pom kuv haiv neeg txoj
kev txom nyem nyob Hais Nkws Tos teb.
Kuv hnov lawv lub suab quaj vim luag
quab yuam lawv. Kuv paub lawv tej kev
txhawj xeeb tas huv si. 8 Kuv nqes los
cawm lawv kom dim ntawm cov Hais
Nkws Tos txhais tes. Kuv yuav coj lawv
tawm hauv lub teb chaws ntawd rov los
rau ib lub teb chaws dav thiab zoo qoob,
lub teb chaws muaj mis nyuj thiab zib mu
ntws sis laub sis lug, yog lub teb chaws
uas cov Kas Nas Has.

13 Mais Xes hais rau Tswv Ntuj tias:
"Thaum kuv mus cuag cov His Xas Lais,
thiab kuv hais rau lawv tias : 'Nej cov
yawg koob tus Tswv Ntuj xa kuv tuaj pab
nej.' Yog lawv hais rau kuv tias :
'Nws lub npe hu li cas ?'
Kuv yuav hais li cas rau lawv ? 14 Tswv
Ntuj hais rau Mais Xes tias :
"Kuv yog tus kuv yuav yog."
Tswv Ntuj hais ntxiv tias :
"Koj yuav hais rau cov His Xas Lais li
no : ‘Kuv yog tus kuv yuav yog’ xa kuv tuaj pab nej."
15 Tswv Ntuj tseem hais ntxiv rau Mais Xes tias :
"Koj yuav hais li no rau cov His Xas Lais :
‘ HUAB TAIS, uas yog nej cov yawg
koob tus Tswv Ntuj, yog Has Nplas Has
tus Tswv Ntuj, yog His Xas Has tus Tswv
Ntuj thiab yog Yas Kos tus Tswv Ntuj xa
kuv tuaj pab nej. Lub npe no yog kuv lub
npe mus ib txhis, neeg yuav tuav lub npe
no hu txog kuv mus txheej dhau txheej.’

Zaj nyeem Ob: 1 Kos Lis Nthos 10, 1-6.10-12
1 Kwv tij, kuv xav kom nej paub
tias, thaum ub twv huab tau roos
peb cov yawg koob, sawv daws tau hla
lub hiav txwv, 2 sawv daws tau nrog
Mais Xes txais lub cim ntxuav nyob hauv
twv huab, thiab nyob hauv dej ntuj liab,
3 sawv daws tau noj cov mov poob saum
ntuj los, 4 sawv daws tau haus cov dej
txhawv saum ntuj los : yog cov dej tawm
hauv phab tsua los. Phab tsua ntawd yog
Leej Pleev. 5 Tab sis, cov tau ua ntxim
Tswv Ntuj lub siab, muaj tsawg leej, vim
li ntawd lawv thiaj tuag pawg lug nyob
hauv teb chaws suab puam.
6 Tej xwm ntawd tshwm sim los ua piv
txwv qhia peb, kom peb tsis txhob ywj
peb lub siab ntshaw qhov phem, xws li
txheej thaud cov His Xas Lais tau ua.

10 Nej tsis txhob yws taus xws li tej laus thaud : Ntuj
tus Tshiab thiaj muab lawv tua.
11 Tej xwm ntawd tshwm sim los ua piv
txwv qhia peb. Lawv muab sau cia ua tej
zaj qhuab qhia peb vim yuav txog lub caij
uas ntiaj teb kawg. 12 Nyem no, tus twg
khav tias nws sawv ntsug lawm, mas nws
yuav ceev faj, nyob tsam nws ntog !

Lus Kas Ntawv Moo Zoo: 13, 1-9

1 Tib lub zim txwv ntawd, muaj
ib co neeg tuaj qhia Yes Xus txog
cov Nkas Lis Lais uas Pis Las Tos muab
lawv cov ntshav hliv xyaw rau cov
ntshav uas lawv txi Ntuj. 2 Ces Yes Xus
thiaj hais rau lawv tias :
"Nej puas xav tias cov Nkas Lis Lais
ntawd tau ua txhaum loj dua lwm cov
neeg nyob Nkas Lis Lais, lawv thiaj raug
tsim txom zoo li ntawd ? 3 Kuv hais rau
nej tias lawv tsis tau ua txhaum loj dua
luag tej. Tab sis, yog nej tsis tig los hloov
siab, mas nej yuav tuag ib yam li ntawd thiab.
4 Hos kaum yim leej neeg uas tus pej
thuam Xis Los Es vau los tsuam lawv
tuag tas, mas nej puas xav tias lawv
tshuav nuj nqi ntau dua ib tsoom neeg
nyob Yes Lus Xas Les huv si ? 5 Kuv
hais rau nej tias lawv tsis tshuav nuj nqis
ntau dua luag. Tab sis yog nej tsis xav tig
los hloov dua siab tshiab, mas nej yuav
tuag ib yam li ntawd thiab."
6 Yes Xus hais zaj paj lug no :
"Muaj ib tug neeg cog tau ib tsob txiv
ncuav pias rau hauv nws lub vaj txiv
cawv. Nws tuaj de txiv ncuav pias, tab
sis tsis pom muaj txiv li. 7 Ces nws hais
rau tus tub txib zov vaj tias : "Koj saib !
Tau peb xyoos no kuv tuaj de txiv ncuav
pias, kuv yeej tsis pom ib lub txiv li. Koj
muab tsob ntoo ncuav pias ntov. Yuav
cia nws nyob ntxoov av ua dab tsi ?"
8 Tus tub txib zov vaj teb rau tus tswv
vaj tias : "Huab Tais, thov koj cia tsob
ntoo nyob xyoo no ntxiv. Kuv yuav
khawb av ncig lub hauv paus ntoo thiab
npoog chiv rau. 9 Tej zaum yav tom
ntej, tsob ntoo yuav txi txiv. Yog tsis txi, koj mam muab ntov."

NTHUAV NTAWV NTSHIAB.

Rau hnub chiv tim 03 lub 3 hlis 2013

Tsoom phooj ywg Hmoob mloog Tswv Ntuj lus,

Peb txoj kev ua neej hauv lub ntiaj teb tsis niaj hnub yooj yim li peb lub siab ntshaw los lub siab xav. Leej twg los twb yuav tsum mob siab siv zog ntsos mus khwv thiaj muaj noj muaj haus yug yus tej poj niam tub se, txhawb tsa yus lub cuab lub yig kom xws lub teb lub chaw, ua neej xws luag. Thiaj hais tias ua neej nyob saum daim npoo av tsis yog tau zoo. Tsis muaj tus yuav dim txoj kev khwv siv zog, txog siav, nyiaj tshaib yoo nqhis, tiv tshav tis nag, ua luag qhev, raug luag ntxub, raug luag tsawm…

Peb hnov zaj nyeem hauv phau Ntawv Kev Tsiv hnub no, hais txog Mos Xes txoj kev khwv noj khwv haus. Peb tsis muaj sij hawm los piav txog Mos Xes lub neej rau ntawm no. Nej mam mus ntshawb nyeem hauv phau Ntawv Kev Tsiv yuav muaj txhij thiab ntxaws dua. Mos Xes ua lub neej laus nkoos txwm 120 xyoo li Hmoob niaj txhis piv lus, nws mam tso lub ntiaj teb tseg. Hauv nws lub neej muaj peb toom yuav piav. Hnub no, peb tsuas hais me me txog nws lub neej xwb : yav thaum tseem yau mus txog 40 xyoo, yav hluas txij 40 mus txog rau 80 xyoo thiab txij 80 mus txog nws sawv ua luag txwj luag laus coj tsoom His Xais Lais hla hav suab puam 40 xyoo, xam tag nrho 120 xyoo. Thaum yau, Mos Xes tau kawm txuj nrog vaj ntxwv Fas Las Oos cov tub ua ib nqag hauv vaj ntxwv loog. Vim Mos Xes los ua vaj ntxwv ib tug tub sau, nws tau kawm txuj sawv tsheej vaj ntxwv ib tug tub cag, ua vaj ntxwv ib tug lwj txheeb. Vaj ntxwv Fas Las Oos tau xa nws mus tuav xam saib tas zeej tsoom tub mab tub qhe, txhim zej kho zos tsa lub teb chaws Hais Nkws Tos kom vam meej. Zeej tsoom tub mab tub qhe tsis lawm leej twg, hos yog Mos Xes tej kwv tij neej tsa His Xas Lais. Muaj ib hnub, nws pom cov kwv tij His Xais Lais raug ib tug thawj peeb Hais Nkws Tos tsim txom ntawm lub luag hauj lwm. Txawm mob nws siab qeeg qas daws, nws txawm muab tus peeb tua tuag faus tom hav suab puam. Mos Xes paub nws plaub mob, fij no vaj ntxwv Fas Las Oos yuav tsis lam zam rau nws ib zaug, ces xij lau, cia qiv kauv txhais tsuav yus ciaj xwb. Nws thiaj xuas kev khiav mus nkaum rau Mas Dias teb lawm. Nws txawm mus poob rau hauv ib tug yawg hu ua Zes Raus tsev. Yawg Zes Rau ua txiv leej choj nyob Mas Dias, nws muaj 7 leej ntxhais. Nws txawm cia li yuav Zes Raus ib tug ntxhais ua poj niam, tus hu ua Xis Pos Las. Mos Xes niaj hnub mus zov nws yawm txiv cov tsiaj nog zaub ib hnub dhau ib lub tiaj, ib lub tshav zaub mus rau lwm lub tshav ua li ntawd ntev niaj ntau xyoo mus txwm li 40 xyoo. Muaj ib hnub, nws coj tsiaj nog zaub mus txog lub roob Hos Les. Ua ciav, nws pom ib tauv khaub cig nplaim ua tsaj phov tsis txawj kug lauj, nws tsis paub xyov yog tus tsi. Nws thiaj nyas mus xauj kom ze pom saib, tus tsav tsi yuav txawv tag npaud. Ua ciav, hnov ib lub suab hu nws npe. Nws thiaj mam paub lub suab hu nws npe ntawd yog nws cov yawg koob tus Tswv Ntuj lub suab.

Hmoob twb hais kam : tsis txhob twv ntuj twv teb, twv dej twv taws. Hmoob yeej ib txwm ntseeg muaj Ntuj nyob saud, Ntuj pom. Leej twg nkhaus lam liam tib neeg, tus neeg dag txawm dag yeej luag lwm tus tib neeg, los yuav dag tsis tau Tswv Ntuj. Tej niam tej txi thiaj cob qhia tej tub ki kom ua neeg nquag thiaj muaj noj muaj haus. Tsis txhob ua neeg tub nkeeg thiaj tsis tshaib thiab tsis nqhis, tsis mus thov khawv noj, tsis mus ua tub sab tub nyiag luag teej luag tug. Yus ob txhais tes, yus lub dag lub zog khwv tau li cas, zoo siab hlo noj li ntawd. Tsis txhob ua neeg dag, txhob ua neeg siab dub siab nkhaus mus huab noj huab haus, txhav luag teej tua neeg. Yuav ua neeg siab ncaj ncees, ua tag nrho tus mab tus sua, tus hlob tus yau sawv daws kwv tij kwv npawg. Yuav tig mus yoog Mos Xes hlub leej tib neeg, tus poj niam, tus txiv neej nws cev tes pab tag nrho. Peb pom Mos Xes muaj lub siab hlub nws cov neeg His Xas Lais, pab lawv kom lawv dim ntawm cov thawj rab nplawm thiab tus quab muab lawv tsim txom ua qhev nyiaj tshaib yoo nqhis. Nws kuj tau yuam kev, ua neeg siab ceev tua neeg. Tiam sis Tswv Ntuj pom tag, Tswv Ntuj pom nws siab ceev thiab pom Fas Las Oos lub siab lim hiam, tsim neeg txaus ti txha nkaus. Tswv Ntuj pom cov thawj Hais Nkws Tos quab yuam tsoom His Xas Lais. Tswv Ntuj thiaj cev tes tuaj tso tsoom tub ki His Xais Lais kom dim ntawd Fas Las Oos kev quab yuam. Tiam sis, Tswv Ntuj tsis coj tsis ua li tib neeg zaj lim hiam ib yam Fas Las Oos, tsis quab yuam neeg li cov thawj Hais Nkws Tos thiab tsis cib nyeej tua neeg li Mos Xes. Peb thiaj yuav tsum mloog Tswv Ntuj cov lus, Tswv Ntuj hais rau Mos Xes : “8 Kuv nqes los tso lawv dim ntawm cov Hais Nkws Tos xib teg kom coj lawv tawm thaj av ntawd los mus rau thaj av dav thiab av zoo qoob, mus rau thaj av muaj mis thiab zib ntws nto, mus Kas Nas Has teb. 10 Koj mus tam sis no ! Kuv xa koj mus cuag Fas Las Oos : koj coj kuv haiv neeg, His Xais Lais cov tub ki, tawm Hais Nkws Tos teb KT 3,8.10.” Tswv Ntuj yog tus nqes los tso tsoom tub ki His Xas Lais dim kev ua qhev. Tim li cas Tswv Ntuj tsis mus ua txoj hauj lwm Tswv Ntuj tus kheej kom tiav kiag ? Tswv Ntuj ho yuav vam Mos Xes tus ciaj caub nrog Fas Las Oos kom rov mus cuag Fas Las Oos, mus ua tus coj His Xas Lais kev khiav los ? Peb twb paub tias Tswv Ntuj muaj hwj huam loj, ua cas Tswv Ntuj ho yuav vam txog Mos Xes, ib tug tib neeg tsis muaj peev xwm dab tsi. Mos Xes los twb ntshai tuag nws thiaj khiav nkaum kom Fas Las Oos nrhiav tsis tau nws tua. Puas yog Tswv Ntuj coj Mos Xes mus txhob rau Fas Las Oos tua ? Tsis yog li ntawd. Yog peb xav li ntawd, peb tsuas xav li neeg xav, peb tsuas xav raws li peb lub siab nqaim siab me, qhov peb ntshai, xav raws li zaj tswv yim tws thiab twm xeeb xwb. Vim li ntawd, peb yuav cuab pob ntseg mloog Tswv Ntuj lus. Tswv Ntuj zaj yog zaj ncaj, rau leej tib neeg twg tus His Xas Lais los tus Hais Nkws Tos twb haum twb yuav tau, siv tau. Tswv Ntuj zaj yog zaj loj thiab dav, leej twg twb qhuas twb hwm thiab twb ntshai. Mos Xes yog thawj tug hwm Tswv Ntuj, qhuas Tswv Ntuj thiab ntshai Tswv Ntuj. Mos Xes thiaj tau thaiv nws ntsej muag kom txhob pom Tswv Ntuj, vim Mos Xes hwm Tswv Ntuj loj, nws tsis tsim nyog pom Tswv Ntuj nws thiaj thaiv nws ntsej muag. Fas Las Oos kuj tsuas ntshai Tswv Ntuj ib leeg kheej thiab hwm Tswv Ntuj ib leeg. Tswv Ntuj zaj ua rau neeg ntshai thiab tawv tsis dhau, ua rau Fas Las Oos qhib ncauj yuam kom Mos Xes cia li coj tsoom His Xas Lais khiav tam sim, tsam Fas Las Oos lam raug Tswv Ntuj npau taws, yuav raug Tswv Ntuj nplua. Tswv Ntuj zaj tos nkawd nco twb kho tau Mos Xes thiab Fas Las Oos nkawd kev sib ntxub rov sib haum xeeb. Tswv Ntuj zaj ua rau Mos Xes muaj kev cia siab tuag nthi rau Tswv Ntuj. Thaum ua ntej, Mos Xes yeej tsis lam paub thiab tsis lam to taub xyov Tswv Ntuj yog leej twg. Ziag no, Mos Xes paub Tswv Ntuj muaj npe : “Yog kuv tus yuav yog”. Mos Xes pom qab mus hais qhia rau tsoom tub ki His Xas Lais. Tswv Ntuj zaj qhib Fas Las Oos siab los thim xav pom tias nws tsis muaj hwj huam, Tswv Ntuj xwb yog tus muaj hwj huam loj tas nrho ; ua rau Fas Las Oos thov ceev nrooj, tso kev cia tsoom tub ki His Xas Lais mus nyob twj lij rau lawv teb chaws thiab tseem muab nyiaj txiag ntiav lawv tawm, pua lawv taw mus. Hauv lub Caij 40 no, peb yuav mloog Tswv Ntuj lus kom zoo ib yam Mos Xes thiab Fas Las Oos, los sib haum xeeb ntawm peb tej kev sib cav sib ceg hauv peb lub cuab lub yig, sib haum xeeb ntawm peb tej lus xaiv lus ncua ua plaub ua ntug hauv peb tsoom kwv tij neej tsa. Peb yuav hwm Tswv Ntuj thiab ua li Tswv Ntuj siab nyiam ib yam Fas Las Oos twb tawv tsis dhau Tswv Ntuj.
Kev mloog Tswv Ntuj lus, tsis yog mloog ib zaug yuav txaus. Tus mloog Tswv Ntuj lus, nws yuav tau mloog Mos Xes lus, mloog cov yaj saub lus thiab qhov kawg mloog Yes Xus lus thiab ua li Yes Xus hais kom ua. Yus hnov Tswv Ntuj lus tag, yus paub Tswv Ntuj zaj lus qhia, xav kom yus ua tau raws li Tswv Ntuj siab nyiam, coj tau lub neej muaj txiag muaj ntsig. Tus mloog Tswv Ntuj lus, nws yuav vam txog Tswv Ntuj lub zog pab nws. Tus vam txog Tswv Ntuj pab, nws yuav khiav khuav khaub zig Tswv Ntuj tas zaj tas zog ; tsis yog ib zaug los kaum zaus, tiam sis txhiab pua zaus tag nws sim neej. Vim li no, peb mloog Huab Tais Yes Xus tej lus qhuab qhia ib zaug, ob zaug los kaum zaus kuj tsis txaus peb. Peb yuav vam, yuav thov Huab Tais Yes Xus tej txiaj ntsim txhiab pua zaus pab peb kom tag peb sim neej.

Hnub no peb hnov Huab Tais Yes Xus qhuab qhia li no rau cov neeg tuaj ntsauv nws. Muaj ib pab neeg Nkas Lis Lais tseem tab tom sib sau ua lub txoos txi ntuj. Lawv npaj tau ib co txim yuav coj los txi rau Huab Tais. Tiam sis pab neeg Nkas Lis Lais no, yog ib pab sawv tiv thiab tua cov tub rog neeg Los Mas. Vim lawv tsis nyiam cov Los Mas tuaj kav lawv teb chaws. Thaum lawv tuaj sib sau teev ntuj, lawv raug Pis Las Tos txhij tub rog Los Mas muab lawv puav tua tuag tas. Muaj neeg tuaj hais qhia Yes Xus hnov. Yes Xus teb rau lawv : “Nej xav tias cov Nkas Lis Lais no muaj txhaum dua lwm cov Nkas Lis Lais, vim li ntawd lawv thiaj raug tsim txom ? 3 Kuv hais rau nej, tsis yog li ntawd, tiam sis yog nej sawv daws tsis hloov siab, nej yuav raug puas ntsoog tib yam nkaus. LK 13,2-3.” Peb hnov Yes Xus cov lus no, yog ib co lus qhuab qhia peb lub tswv yim kom xav tau qhov ncaj ncees qhov yog. Tsis txhob xav yuam kev, txhob xav ib zag tswv yim nkhaus cees xu das puag tom tej. Muaj ntau zaus, peb leej tib neeg lub tswv yim thiab tej siab ntsws xav tau tej zaj niag nkhaus cees thiab xu das tsis yog kev yog cai, tsis zoo yuav. Tej zaj tswv yim thiab tej siab ntsws nkhaus no ua rau peb tib neeg yuam kem loj. Yus rov ua rau yus txhawj, yus rov ua rau yus txom nyem thiab yus tseem rov txo yus txoj sia kuj muaj. Yog peb mloog Huab Tais Yes Xus lus qhuab qhia, peb yuav muaj Huab Tais Yes Xus lub txiaj ntsim pab daws peb tej kev txhawj xeeb, pab peb tiv kev txom nyem thiab ua tau peb txoj sia loj tuaj tiag tiag. Huab Tais Yes Xus lub txiaj ntsim pab peb yog pab kom peb lub tswv yim tsis yuam kev, kom peb xav tau qhov ncaj qhov yog ; pab kom peb lub siab loj tiv taus kev txob kev txhawj, tsis ntshai zaj dab ntub npau suav phem ; pab kom peb ua lub neej tsim txiaj, sib haum xeeb, sib hlub, muaj zog hla dhau kev sib cav sib ceg, ua kawm to qab, tsis cib nyeej, ib leeg txawj zam rau ib leeg. Huab Tais Yes Xus qhia tias kom peb tsis txhob yuam kev muab txim txhaum nog ntxiv rau pab Nkas Lis Lais raug Pis Las Tos tua tuag. Lawv tsis muaj txhaum loj dua cov Nkas Lis Lais. Vim tseem muaj lwm cov Nkas Lis Lais tsis nyiam cov neeg Los Mas. Tiam sis lawv tuaj tsis ncaj hnub ntawd, lawv thiaj tseem ciaj sia nyob rau lwm thaj chaw. Lawv tseem yuav npaj, yuav nyas quav txias tua Pis Las Tos kom pauj tau lawv cov neeg. Ntawm Pis Las Tos los kuj tib yam nkaus, nws yeej paub ntsoov tias tseem tshuav yeeb ncuab coob leej yuav nrhiav tua kom tag. Yes Xus thiaj qhia hais tias : “Yog nej sawv daws tsis hloov siab, nej yuav raug puas ntsoog tib yam nkaus LK 13,5.” Tas nrho 2 pab neeg, cov Nkas Lis Lais thiab Pis Las Tos yuav tsum hloov siab tshiab.
Ntawm peb tus kheej kuj tib yam nkaus. Yog peb tsis nrauj peb lub tswv yim lim hiam, tsis hloov peb lub siab neeg nkhaus no, peb yuav tsis muaj kev nyob tiaj tus thaj yeeb. Yog peb tsis khaws Huab Tais Yes Xus lo lus coj peb kev ua neej, txawm peb yug ua neej rau tiam neej twg kuj xij : tus neeg nkees, yuav tuag nws txoj kev tub nkeeg, tus tub sab, yuav this nws kev tub sab tuag, tus siv ntaj siv riam yuav tuag hniav ntaj hniav riam…Tus neeg tsis mloog lus, tsis thim los yuav lub siab tshiab, tsis nrauj nws lub siab phem, nws zoo li tsob txiv ncuav pias tsis txi txiv nkim av dag. Huab Tais twb xav muab txiav pov tseg los Huab Tais ua siab ntev tos rov lwm xyoo saib puas txi tau txiv. Vim tus tub zog tseem khuv xim xav tu tsob txiv kom kawg siab, ncaws av npoog hauv paus thiab nphoo chiv rau tos rov lwm xyoo fim nws yuav txi tau txiv.

Ib tsoom phooj ywg, peb pom Tswv Ntuj muaj hwj huam tas nrho, tiam sis Tswv Ntuj vam txog Mos Xes, tus tib neeg tsis muaj hwj huam cev nws tes mus tso His Xas Lais tawm ntawm chaw raug txim, raug quab yuam ua qhev. Huab Tais twb txiav siab muab tsob txiv ncuav pias nkim av tsis txi txiv txiav pov tseg los Huab Tais ua siab ntev yuav tus tub txib lus, tos tus tub txib ua txhij ua txhua tu kom kawg siab kawg ntsws saib tsob txiv ncuav pias puas txi…Cov lus peb mloog no, yog Tswv Ntuj cov lus qhib peb lub tswv yim thiab peb lub siab. Peb yuav tsis txhob muab peb lub neej los mus xyaw zaj dab ntub npau suav phem, tsis txhob muab kev txhoj kev txhaum, kev khaum los kev raug dab li ub li no nog rau peb lub cev ntaj ntsug ris. Peb lub cev ntaj ntsug thiab zaj dab ntub npau suav yog ob yam sib txawv, nyias muaj nyias kab nyias kev taug. Neeg lub cev ntaj ntsug tau zoo nyob los puas muaj txiab nkeeg tsis yog tim koob hmoov los puas muaj txim txhaum thiaj khaum li Hmoob hais. Yog peb tseem ntseeg li ntawd, peb tseem tsis tau dim txoj qub kev cai, tsis tau ciaj ib tug neeg ntseeg Yes Xus. Peb tseem ua neeg lag ntseg, tsis hnov Huab Tais Yes Xus lo lus qhia hnub no. Peb pom Tswv Ntuj muaj hwj huam loj, Tswv Ntuj tseem vam txog tus tsis muaj hwj huam dab tsi los ua Tswv Ntuj txoj hauj lwm. Peb twb yog tus tsis muaj hwj huam dab tsi, Tswv Ntuj tshoj peb los teev Tswv Ntuj. Yog peb vam Tswv Ntuj lub zog pab peb, ces lub tswv yim peb xav, lo lus peb hais, txoj dej num peb cev tes ua yuav muaj Tswv Ntuj lub hwj huam loj. Mos Xes to taub Tswv Ntuj lub npe mus li ntawd : “Kuv yog tus yuav yog”. Mos Xes lo lus hais thiab Mos Xes txhais tes ua yog Tswv Ntuj tus “Kuv yog tus yuav yog” lo lus hais thiab txhais tes ua. Yog peb mloog lus, peb yuav tso siab rau Yes Xus lo lus qhia. Yog peb tso siab rau Yes Xus, peb yuav mloog Huab Tais cov tub txib lus. Vim cov tub txib lus yog Huab Tais lus. Lawv yuav pab kom peb tawg paj thiab txi txiv tau rov lwm xyoo Huab Tais yuav rov tuaj de txiv.

Le 28.02.2013 Cwj Vuam Chiv

**NrhiavTswvNtuj** 9th March 2013, 9:02 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°17

Re: COV ZAJ NYEEM-Xyoo C 2012-13

Post NrhiavTswvNtuj 9th March 2013, 9:02 am

COV ZAJ NYEEM HNUB 10/03/2013
(Chiv 4 Caij 40 - Xyoo C )

Zaj nyeem 1 : Yos Xuas 5,9a.10-12

Cov His Xas Lais ua lub Ntees Hla.
Lawv noj lawv cov qoob loo.

9 HUAB TAIS hais rau Yos Xuas tias :
"Hnub no, kuv hle nej lub koob
phem nyob Hais Nkws Tos teb pov tseg."
Ces qhov chaw ntawd thiaj hu ua Ntsis Nkas los txog tav no.
10 Cov His Xas Lais tsa tsev tsam phooj
nyob ntawm Ntsis Nkas. Thaum txog
hnub tim kaum plaub tsaus ntuj lawv thiaj
ua lub Ntees Hla. Yog nyob hauv lub tiaj
Yes Lis Kos. 11 Ua lub Ntees Hla tas,
tag kis lawv noj cov txhiam xws uas lawv
cog nyob hauv lub teb chaws. Lawv noj
cov mov tsis xyaw poov xab thiab cov noob nplej kib.
12 Tsis muaj cov mov mas nas lawm,
vim lawv twb tau cov mov hauv lub teb
chaws noj lawm. Cov His Xas Lais tsis
muaj cov mov mas nas lawm ces txij
xyoo ntawd los lawv noj cov txhiam xws
nyob hauv lub teb chaws Kas Nas Has.

Zaj nyeem 2 : 2 Kos Lis Nthos 5, 17-21

17 Nyem no, yog leej twg los nyob hauv Leej
Pleev, mas nws yog tus uas Ntuj xeem
tsim dua tshiab : tus qub neeg dua lawm,
ib tug neeg tshiab sawv los nyob. 18 Tus
qub neeg thiab tus neeg tshiab, puav leej
los ntawm Tswv Ntuj los, vim nws ua
kom peb rov nrog nws sib haum xeeb
nyob hauv Leej Pleev, thiab nws muab
txoj kab xwm sau sawv daws los sib haum xeeb rau peb leg.
19 Tus ua kom lub ntiaj teb neeg nrog
Tswv Ntuj rov sib haum xeeb nyob hauv
Leej Pleev, yog Tswv Ntuj ; nws tsis saib
neeg cov txhaum ntxiv ; nws pub kom
peb hais tau cov lus pab neeg kom nrog nws rov sib haum xeeb.
20 Ces peb yog cov uas Tswv Ntuj xa
mus ua Leej Pleev cov tiam lis ; yog zoo
li Tswv Ntuj siv peb lub ncauj mus qhuab
qhia. Peb tuav txog Leej Pleev lub npe
thov nej tas zog, kom nej cia li nrog Tswv
Ntuj rov sib haum xeeb. 21 Tswv Ntuj
ua kom tus uas tsis paub txoj kev txhaum,
txia ua kev txhaum, kom nws pab peb,
ces peb nyob hauv nws, mas peb plhis
mus ua Tswv Ntuj txoj kev ncaj.

Lus Kav Ntawv Moo Zoo 15,1-3.11-32

Tub tub loj leeb rov los tsev.

1 Tas cov neeg sau se thiab cov
neeg txhaum txav los ze Yes Xus,
lawv xav mloog Yes Xus hais. 2 Ces cov
Fas Lis Xais thiab cov Kws Ntawv
Ntshiab nroo zom zaws tias :
"Tus neeg ntawd txais cov neeg txhaum,
nws tseem nrog lawv noj mov thiab !"
3 Yes Xus thiaj hais zaj paj lug no rau lawv :

11“Ib tug neeg muaj ob tug tub. 12 Tus tub
ntxawg hais rau nws txiv tias : 'Txiv, koj
muab koj lub cuab tam feem uas yog kuv
tug faib rau kuv.' Ces leej txiv thiaj muab
nws lub cuab tam faib rau nws ob tug tub.
13 Ob peb hnub tom qab, tus tub ntxawg
sau feem uas yog nws tug tas huv si, nws
khiav mus ib lub teb chaws deb. Nyob
ntawd nws muab nws lub cuab tam phob
vim nws coj ib lub neej tsis tsim txiaj.
14 Thaum nws muab nws lub cuab tam
phob tas huv si lawm, ces lub teb chaws
tshaib plab loj. Nws pib paub txoj kev
yoo tshaib yoo nqhis. 15 Nws thiaj mus
ua zog hauv ib tug neeg nyob txawm lub
teb chaws ntawd. Luag kom nws mus zov
npua tom teb. 16 Tus tub ntxawg
ntshaw noj cov qos uas npua noj kom tsau
nws plab, tab sis tsis muaj neeg pub rau
nws noj. 17 Nws lub siab mam li ras
dheev tias : 'Pes tsawg leej tub zog nyob
hauv kuv txiv tsev tau mov noj seem noj
so, hos kuv nyob tuag tshaib ntuas ntawm
no. 18 Kuv xav mus cuag kuv txiv, kuv
yuav hais rau nws tias : 'Txiv, kuv ua
txhaum rau Ntuj thiab rau koj. 19 Kuv
tsis tsim nyog koj hu kuv ua koj tus tub
ntxiv. Thov koj saib kuv ib yam li koj ib
tug tub zog.' 20 Tus tub ntxawg thiaj
sawv kev rov los cuag nws txiv. Thaum
tus tub tseem los txog deb, nws txiv twb
pom nws. Leej txiv hlub kawg, nws
khiav mus puag tus tub caj dab, thiab nwj
nws tub tub ntev loo. 21 Tus tub hais rau
leej txiv tias : 'Txiv, kuv ua txhaum rau
Ntuj thiab rau koj. Kuv tsis tsim nyog koj
hu kuv ua koj tus tub ntxiv.' 22 Tab sis
leej txiv hais rau cov tub txib tias : 'Nej
tsuag tsuag mus nqa lub tsho zoo nkauj
tshaj los ntawm no, nej muab rau nws
hnav, nej muab ib nti nplhaib los ntxig
nws ntiv tes, thiab ib nkawg khau los
ntxig nws ko taw. 23 Nej cab tus xyuas
nyuj rog los tua. Peb noj, peb ua lom zem.
24 Vim tias kuv tus tub no tuag lawm,
nyem no nws ciaj rov los. Nws ploj
lawm, nyem no rov nrhiav tau nws.'
Ces lawv sawv daws noj haus lom zem.
25 Thaum ntawd, tus tub hlob tseem
nyob tom teb. Thaum nws rov los yuav
txog tsev, nws hnov suab paj nruag thiab
suab dhia seev cev nrov ntsuag qees.
26 Nws hu ib tug tub txib kom tawm mus
cuag nws, nws nug saib lub suab ntawd
yog dab tsi. 27 Tus tub txib hais rau nws
tias : 'Yog koj tus kwv rov qab los tsev,
koj txiv tua tus xyuas nyuj rog, vim nws
tau koj tus kwv rov los, noj qab nyob
zoo.' 28 Ces tus tub hlob npau taws, nws
tsis kam los hauv tsev. Leej txiv tawm
tuaj thov kom nws los hauv tsev. 29 Tab
sis tus tub hlob teb rau nws txiv tias :
'Saib, kuv lis koj tej hauj lwm cuag li ib
tug qhev tau npaum no xyoo, kuv tsis tau
hla koj ib lo lus li, koj twb tsis muab ib
tug me nyuam tshis pub kuv ib zaug, kom
tau nrog kuv cov phooj ywg noj ib pluag
lom zem. 30 Hos koj niag tub ntawd,
mus nrog cov niam ntiav muab koj lub
cuab tam nqos tas, thaum nws rov los
tsev, koj tua tus xyuas nyuj rog rau nws !'
31 Ces leej txiv hais rau tus tub hlob tias :
'Me tub, koj ib txwm nrog kuv nyob. Ib
puas tsav yam uas yog kuv tug, mas kuj
yog koj tug. 32 Tab sis, peb yuav tsum
noj ib roog qav thiab ua lom zem, vim koj
tus kwv no tuag lawm, zaum no nws ciaj
rov los, nws ploj lawm, nyem no nrhiav tau nws rov los."

NTHUAV NTAWV NTSHIAB.

COV ZAJ NYEEM-Xyoo C 2012-13 Guerch10 Rau hnub chiv tim 10 lub 3 hlis 2013

Ib tsoom ntseeg mloog nraim Tswv Ntuj lus,

Ua neeg mloog Tswv Ntuj lus tsis muaj lwm txoj kev dua txoj yus rau siab ntso niaj hnub npuab nraim khaub zig Huab Tais Tswv Ntuj tas zaj tas zog. Hnub no yog ib hnub zoo caij zoo nyoog, lub Koom Txoos muab 2 zaj nyeem no rau peb xav. Nej hnov cov lus no tas, tsis paub xyov nyias xav nyias li cas? Ntawm kuv tus kheej, yog ib co lus koob lus hmoov loj tsis muaj tus tsi pauj tau. Kuv muab ob peb los sau cia nram qab no. Yog muaj sij hawm nej ho lam mloog thiab.

Nyob hauv zaj nyeem 1, Yos Xuas phau ntawv, piav txog peb leej tib neeg lub neej peb yuav ua nyob saum ntuj. Peb hais tau li ntawd, tsis yog kwv yees hais, yog hais raws li Tswv Ntuj lus qhia muaj tseeb peb ntsej hnov txhua leej hauv Yos Xuas zaj lus no. Tswv Ntuj tshoj kom Mai Xes ua tus coj tsoom tub ki His Xais Lais hla hav suab puam 40 xyoo los mus nyob thaj av Tswv Ntuj yuav pub rau lawv. Tsis yooj yim rau Tswv Ntuj haiv neeg thiab rau Mai Xes. Vim nyob Hais Nkws Tos teb, lawv ua qhev hnyav, raug hiam, tiam sis lawv ua taus lawv niam lawv txiv, nyias ua nyias noj nyias, muaj txhiam xws txhij txhua. Xyov tim li cas Mai Xes yuav coj lawv los yoo tuag tshaib hauv hav suab puam li suab puam. Lawv npau heev rau Mai Xes. Lub ntsiab, lawv hla hav suab puam kom tsis muaj tus tsi laum siab laum ntsws, tsis muaj chaw tab kaum, tsis ntxhov lawv siab. Lawv thiaj npaj tau siab ntsws dai dhuam rau tus yuav hlub lawv, yuav pab lawv thiab cawm lawv. Lawv thiaj mloog tau Tswv Ntuj lus, tig los teev Tswv Ntuj, hwm Tswv Ntuj. Tus lawv yuav xub mloog ua ntej yog Mai Xes. Lawv yuav qhib ntsej los mloog Mai Xes lus, tso siab rau Mai Xes. Tswv Ntuj nyob ntawm Mai Xes ib sab qhuab qhia nws haiv neeg. Lawv yuav xyaum muab tag lawv siab ntsws dai dhuam rau Tswv Ntuj, nyiam Tswv Ntuj. Tsis yooj yim kiag. Muaj pes tsawg zaus lawv tiv tsis mloog Mai Xes. Muaj pes tsawg zaus Mai Xes xav dai tuag, hais tsis tau lawv. Tswv Ntuj tshoj Mai Xes kom teev ib txoj cai qhia tsoom tub ki His Xais Lais. Mai Xes txoj cai yuav kav kom tau tsoom tub ki His Xais Lais nruab siab thiab lub cev sab nraum daim tawv, ua lub neej kom ncaj ncees, dawb huv. Nyob suab puam, Tswv Ntuj lus thiaj yuav deev tau lawv siab ntsws. Mai Xes txoj cai hais Tswv Ntuj lus los deev lawv siab. Tswv Ntuj lo lus yuav tsum nrhau cag hauv neeg nruab siab, yug tib neeg dua tshiab, ua sab cev nqaij daim tawv kom tawg paj thiab txi txiv. Lawv yuav tsum paub caij paub nyoog, muaj hnub leg qav num, muaj hnub caiv. His Xais Lais mus ua 6 hnub hauj lwm, hnub 7, Tswv Ntuj hnub, yog hnub caiv, hnub hwm Tswv Ntuj, pauj Tswv Ntuj txiaj ntsim. His Xais Lais txoj dej num nyob suab puam yog mloog Tswv Ntuj lus. Tswv Ntuj ua (mas nas = xyov dab tsi) poob saum ntuj los yug lawv siav. Ua tej npoj w ya tuaj nphoo ntxuas puv tiaj nrag ua qaij rau lawv noj. Mai Xes qhuab qhia tias yog Tswv Ntuj pub mas nas thiab nqaij tuaj rau lawv noj. Kom nyias cev tes yawm txaus nyias noj. Tsis txhob mus yawm coj los khaws cia. Txhob txhawj tsam tuag tshaib, tso siab lug Tswv Ntuj. Cov hnov lus, mloog Mai Xes qhia. Cov lag ntseg, mus yawm tej niag pheev siab los teem tseg cia tsam tshaib thiaj tau noj. Lawv pom mas nas lwj kas tag, thaum kawg tsis zoo noj. Cov tawv ncauj tau noj tsis tshaj cov mloog lus. Mai Xes coj lawv tau 40 xyoo, nws laus lawm. Tswv Ntuj tshoj kom Mai Xes qhuab qhia Yos Xuas sawv los coj tsoom tub ki His Xais Lais sawv nws chaw. Yos Xuas sawv los coj lawv hla dhau dej Yos Las Das. Lawv los txog Kas Nas Has teb chaws, los txog chaw, txog thaj av Tswv Ntuj muaj rau lawv. Yog hnub xiab 14 lub hli ntawd, lawv ua Hmoov Hla hauv lub tiaj Yes Lis Kos. Yav dhau los, lawv noj (mas nas = xyov dab tsi) tuav siav rawv 40 xyoo, thiaj los txog thaj av Tswv Ntuj muab rau lawv. Txij hmo ua Hmoov Hla rov tag kis, lawv pib noj cov txhiam xws thiab mov nplej kib ntawm lawv thaj av. “Cov (mas nas = xyov dab tsi) tu ncua tsis poob lo lawm vim lawv tau cov txhiam xws saum daim av noj.” His Xais Lais muab 40 xyoo los kawm kev cia siab rau Tswv Ntuj, mloog Tswv Ntuj lus, coj thiab ua li Tswv Ntuj nyiam.
Ntawm peb, nyias muaj nyias ib lub neej suab puam ntev loo 40, 60, los 80 tawm xyoo. Peb lub neej suab puam tsis raug tshaib raug nqhis, tiam sis, raug txhawj xeeb, mob nkeeg thiab tsaus ntuj. Tsis yog Mai Xes thiab Yos Xuas coj peb kev, yog xib hwb, leej choj thiab tswv qhia. Tsis yog nab tom ua peb raug mob raug ntsaj, yog peb lub siab me, siab muag auv ua mob qas ntsuav rau peb qaug txaj qaug lav. Peb tsis noj mas nas, tsis noj kuam cej kuam xua tuav siav rawv, peb noj txhiam laj txhiam xws nqes saum ntuj los, noj Yes Xus lub cev haus Yes Xus cov ntshav muaj Tswv Ntuj txoj sia. Peb nyias yuav tau kawm kev cia siab rau Tswv Ntuj, mloog Tswv Ntuj lus, coj thiab ua li Tswv Ntuj nyiam. Peb hnov His Xais Lais los txog chaw, mas nas tu ncua, muaj txhiam laj txhiam xws thiab mov nplej kib noj los qab rog hnia los tsw ha. Peb txoj kev mloog Tswv Ntuj lus, ua li Tswv Ntuj nyiam yuav coj peb mus lawm qaum ntuj nrog Tswv Ntuj nyob ua ke. Txhiam laj txhiam xws ntiaj teb no yuav tu ncua, peb tsis ntshaw noj ntxiv. Tus yuav coj tau peb tsis poob zoo, tsis yuam kev mus txog chaw, yog peb tus Huab Tais Yes Xus. Vim li ntawd, Yes Xus tib leeg peb yuav teev, yuav hwm thiab txaus peb ntshai.

Hnub no, peb hnov Lus Kas piav txog Yes Xus hais ib zaj paj lug. Peb yuav xyiv fab khaws kom tau nws zaj paj lug no qhib peb sawv daws lub siab lub ntsws mus kom deb kom loj cuag Huab Tais Tswv Ntuj. Yog ib zaj lus hais rau peb sawv daws txhua leej txua tus tib neeg. Yes Xus zaj lus no puav leej hais tas sawv daws lub neej hauv nyias vaj nyias tsev, hauv yus tsoom kwv tij neej tsa, hauv yus lub zej zog, ntawm yus lub luag dej luag num, ntawm kev ua nom ua tswv, kev sib fim, ntawm yus Hmoob thiab ntawm luag tej mab sua…Yuav kom peb tsis txhob txhais Yes Xus zaj paj lug no mus phis mus lais. Peb yuav tsum tig ntsej mloog kom zoo, ua cas Yes Xus thiaj hais zaj paj lug no ? Vim cov neeg tuaj ntsauv tuaj mloog Yes Xus hnub ntawd muaj ob pab neeg. Ib pab yog cov phem, ib pab yog cov zoo. Cov phem yog cov neeg nkhaus, cov tawv ncauj, cam thawj, tub nkeeg teev ntuj, cov ua tub sab, deev luag poj niam deev luag tej txiv. Cov phem yog cov sau se, cov muaj txhaum. Cov zoo yog cov mloog lus, cov nquag teev ntuj, cov paub kev cai, hwm Mai Xes txoj cai, caiv Tswv Ntuj hnub, tso nyiaj txhawb kev teev hawm Tswv Ntuj. Cov zoo yog cov thoob xwm ntawv, cov Fas Lis Xais. Rau cov Fas Lis Xais, lawv yog cov neeg zoo, coj Mai Xes txoj cai, hwm Tswv Ntuj hnub, txav kev deb tsis nrog cov neeg tub sab, neeg muaj txhaum noj haus ua ke, caiv tsis mus chwv tsis mus kov tej neeg mob ruas tsis huv. Muaj cov phem thiab cov zoo tuaj mloog Yes Xus. Cov zoo thuam thiab khib rau cov phem. Lawv yws, vim lawv pom Yes Xus tsis cais leej twg, tsis kws leej twg cai. Yes Xus tseem mus fim, mus nrog cov phem koom tsum noj haus ua ke. Yog vim li ntawd, Yes Xus thiaj hais zaj paj lug no qhuab qhia cov phem thiab cov zoo ob tog coj los xav. Vim tus phem yeej phem tsis tag. Tus zoo kuj zoo tsis tag. Ob leeg puav leej muaj chaw tib chaw xyeej. Yes Xus thiaj muab leej txi thiab ob tug tub coj los ua ib zaj txhais. Leej txi pom xeeb yug tau ob leeg tub. Nws yeej hlub ob leeg tsis paub kawg. Tus tub yau cia li tsa ncauj thov leej txi kom muab nws tug rau nws. Peb pom tias leej txi tsis hais tsis cam tsis txwv ib los. Leej txi ua siab dav fo muab nws tug tag rau nws raws li nws siab nyiam siab xav. Thaum nws tau nws tug lawm. Nws khiav mus ua loj leeb, ncig ntuj ncig teb, deev hluas nkauj, luaj thuam nws tej nyiaj txiag. Thaum phob nyiaj tag, txom nyem tuaj, tshaib plab yuav tuag, xav txog lig, mam nco txog leej txi txoj ke hlub, saib pom leej txi muaj nuj nqes, khiav rov los nyoo, los thov ua tub mab tub qhe, tsuav dim kev txom nyem, tau noj haus tsau tsis tuag tshaib.
Tus leej txi no tsis zoo xws luag tej leej txi. Tus leej txi no siab ntev heev, hlub nws leej tub tiag tiag. Ib tug tub yuam kev loj npaum li tus tub yau, tsis tsim txiaj, luaj thuam, phob tag leej txi lub cuab tam ib nrab, rov qab los txog. Leej txi tsis cem tsis yws ib los nws leej tub. Yog tus leej txi no siab tsis ntev, nws ua tsis tau li no. Vim tus tub tsis tsim txiaj, txawm ua nws lub cuab tam poob tag ib nrab, tsis mob nws siab, tsuav tsis poob nws leej tub. Yog tus leej txi no siab tsis loj tsis dav, nws twb yuav khuv xim nws lub zog. Tiam sis cuab tam khwv tau, neeg khwv tsis tau. Nws tseem muaj lub siab mus qawm lias nws leej tub, hais lo lus mos qas nyoos, plhws leej tub taub hau, muab cev zam tsab tshaj kho rau hnav, ua ib rooj qav hu zej zog tuaj noj nchuav ntws ua kev zoo siab. Yog tus leej txi no tsis hlub nws leej tub npaum li, nws yuav tsis muaj kev zoo siab loj cuag li. Los txog txij no, tsis muaj lus dab tsi yuav hais. Tus yuav mob siab, tus yuav hais, yog leej txi. Tiam sis peb pom leej txi zoo siab ua twj ywm tsis hais nws leej tub luaj thuam, zej zog khaus ncauj npaum li cas tsis muaj feem kiam los hais. Tiam sis tshuav tus tub hlob ib lo lus.
Teeb meem sawv tuaj vim tus tub hlob nrog leej txi khwv npaum li xyoo, tiam leej txi, tsis tawv tsis hla leej txi ib los. Nws hais kev tu siab kev chim tuaj, tsis tau leej txi ib tug tsiaj noj ib rooj ncha ntws nrog nws tej phooj ywg ua kev zoo siab. Tus tub hlob hais kev tu siab rau nws txiv mloog. Tus tub hlob xam khib rau nws tus kwv. Nws pom nws tus kwv tsis tsim txiaj, luaj thuam lub cuab tam pov tseg dag rov qab los dawm kev, muaj plhus ntxiag hnav daim tsoos tsab tshaj, muaj ntsej muag noj ib roog nchuav ntws hu zej hu zos tuaj noj qhuas ntxhias cuag ib tug huab tais. Tus tub hlob xav zaj twg, siab ntsws mob tej niag zaj ncus nco. Tsis xav cia leej txi hlub tej neeg phem, cam thawj, yuam kev loj, poob tsim npaum li ntawd, tsis xav yuav ua kwv tij. Vim leej txi hlub npaud, tus kwv thiaj muaj plhus luaj li.

Ib tsoom ntseeg mloog Huab Tais Yes Xus lus qhuab qhia. Peb leej tib neeg txhua tus puav leej muaj cai sib nrawg nroos ntawm Tswv Ntuj xub ntiag. Nyias yeej muaj nyias ib zag yuav hais tsis muaj chaw tas. Piv txwv li peb tsuas hais qhov kom zoo peb siab xwb, hais txog kev khib : ntawm peb tsoom txheeb ze, ntawm peb lub cuab lub yig, ntawm yus tej kwv tij neej tsa, ntawm yus Hmoob thiab ntawm luag tej mab sua…Peb ib leeg yeej tsis txawj ua kom haum ib leeg siab nyiam, siab ntshaw, ua tsis tau raws li peb vam thiab peb tos. Txawm yog yus tus poj niam los yus tus txiv kiag, ob leeg twb txawj yws, txawj npau. Yog peb nyias tsuas xav nyias zaj, peb yuav tsis sib haum nyob tsis tau ua ke. Peb yuav hlub tsis taus tus neeg tsis zoo nyiam tsis zoo hlub. Vim nws ua tub qaug kuv, vim nws txhob txwm ua saib tsis taus kuv, vim nws ib txwm xeeb tau phem, yuav hloov tsis tau ua tus zoo, vim nws tub nkeeg, vim nws siab luv, vim nws tub sab, niag neeg kov kam deev luag poj niam, deev luag txiv…Yog peb tsis tig ntsej mloog Yes Xus lus qhuab qhia, peb yuav zoo li tus tub yau xav ua ywj nws siab. Tsis quav ntsej tij laug khwv ciaj khwv tuag puam chawj, kib hlo txoj loj txoj yau tib ntxiag rau nws leg kom kawg, tsuav dim tes mus ncig ntuj ncig teb kom siab nqig. Tsis quav ntsej leej txi lub cuab tam, tsis khuv xim leej txi lub dag lub zog kev iab kev daw tu nws hlob. Muaj ntsej muag tsib leej txi tej nyiaj txiag mus quav dej quav cawv, nuam yaj tsis npaj lub neej ua nrog lub teb lub chaw. Tus neeg tig los ntseeg Tswv Ntuj, tsis muab siab rau mloog Yes Xus lus. Xav ua ywj nws siab, nkees teev ntuj, puam chawj luag, nkaum hauv tsev, yeem luab nuj luab nqe pua ko taw mus ncig ntuj ncig teb, tsis cev tes txhawb, tsis pab lub Koom Txoos, puam chawj nws. Cuag nws tsis txawj vam lub Koom Txoos pab, tsis saib lub Koom Txoos muaj qab hau. Hnub nws vam lub Koom Txoos, vam cov neeg ntseeg pab txhawb txhim…Nws kuj muaj ntsej muag tuaj thov kom luag pab nws.
Tsis tas li ntawd xwb, peb kuj yuav ceev faj mloog kom zoo Yes Xus cov lus qhia. Yuav tsis txhob khuv xim yus lub dag lub zog, muab kev tu siab kev chim, muab txhooj muaj cai los hais li tus tub hlob. Peb yuav tau tig mus ntsia leej txi. Peb yuav tau yoog ua li leej txi ua rau tus tub yau thiab ua rau tus tub hlob. Leej txi hlub nws ob tug tub tsis nkim leej txi lub dag lub zog ib qho rau tus tub yau luaj thuam, tsis qig leej txi ib lo lus nchav thiab cem neeg ; kuj tsis khib leej txi dab tsi txawm raug tus tub hlob yws ob peb los, cem thiab npau. Tos leej txi hlub tsis paub tag nws ob leeg tub, vim leej txi kev hlub nkawd ua kev twj lij ywj siab loj rau leej txi. Kev twj lij ywj siab ua leej txi hlub nws ob tug tub dawb dawb do do : tsis yog nyiaj txiag, cuab tam, kev luaj thuam, kev khib, kev npau, kev yws kev tsawm…txiav leej txi kev hlub nkawd. Txawm nkawd hlub tsis taus leej txi, luaj thuam thiab npau los leej txi tsis muaj kev tu siab ib qho luaj plaub hau, yuav hlub nkawd tsawg zuj zus thiab tu ncua kev hlub nkawd. Leej txi hlub taus nkawd dawb thiab do. Peb txoj kev xyaum hlub neeg tseem tshuav deb piv tsis tau rau leej txi. Peb tseem zoo li tus tub yau thiab tus tub hlob xwb. Hnub no Yes Xus qhia rau peb pom leej txi kev hlub nws ob tug tub, yog Huab Tais Leej Txiv Tswv Ntuj kev hlub peb leej tib neeg txhua tus tsis paub kawg.

Cwj Vuam Chiv 08.03.2010

**NrhiavTswvNtuj** 15th March 2013, 10:16 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°18

Re: COV ZAJ NYEEM-Xyoo C 2012-13

Post NrhiavTswvNtuj 15th March 2013, 10:16 am

COV ZAJ NYEEM HNUB 17/03/2013
(Chiv 4 Caij 40 - Xyoo C )

Zaj nyeem Ib: His Xais 43, 16-21

swv Ntuj yuav ua kom nws haiv
neeg tawm ntawm pej kum teb los zaum ob.

16 HUAB TAIS yog tus tho ib
txog kev hla nruab hiav txwv, tho
ib txog kev nyob hauv cov dej muaj zog.
HUAB TAIS ua kom Fas Las Oos cov
tsheb rog, cov nees thiab tsoom tub rog
siab loj sawv daws ua ke sawv mus ntaus rog.
17 Nyem no, lawv pw, lawv yuav tsis
sawv, lawv tuag xws li tus teeb xeeb uas
kug tas. HUAB TAIS hais li ntawd.
18 Nej txhob nco txog thawj cov xwm,
txhob xav tswv yim txog tej yam thaum ub tshwm sid.
19 Ntsia saib ! Kuv rov ua dua ib yam
tshiab. Yam ntawd twb hlav kaus. Nej
tsis pom lod ? Muaj tseeb ! Kuv yuav
tho ib txog kev hauv teb chaws suab
puam, kuv yuav ua kom tej tus dej
txhawv hauv cov teb chaws maj sab.
20 Tej tsiaj nruab nrag, tej hma thiab tej
qaib nyuj yuav cav lus zoo txog kuv lub
koob meej, vim kuv yuav ua kom dej
txhawv hauv teb chaws suab puam los,
haiv neeg kuv xaiv thiaj tau dej haus.
21 Haiv neeg kuv tsim los yuav cav txog
kuv lub koob meej mus li."

Zaj nyeem Ob: Fis Lis Pos 3, 8-14

8 Nyem no, kuv saib txhua yam tsis muaj
nqis, vim kuv muab piv rau ib yam muaj
nqe tas nrho, yog txoj kev paub Yes Xus
Pleev, kuv tus Huab Tais. Vim nws, mas
kuv tau tso tas ib puas tsav yam pov tseg ;
kuv saib tas puas tsav yam tsis muaj qab
hau, vim kuv xav tau Leej Pleev. 9 Kuv
xav kom Tswv Ntuj ntsib kuv nyob hauv
Leej Pleev. Kuv tsis muaj ib txog kev
ncaj ua kuv tug ; kuv tsis muaj txoj kev
ncaj tuaj ntawm Txoj Cai tuaj. Kuv tsuas
muaj txoj kev ncaj tuaj ntawm txoj kev
ntseeg txog Leej Pleev thiab ntawm Tswv
Ntuj tuaj xwb, yog txoj kev ncaj uas
nrhau cag rau hauv txoj kev ntseeg.
10 Kuv xav paub Leej Pleev, xav paub
nws txoj kev sawv rov los muaj zog
npaum li cas, xav npuab nws nyob hauv
nws txoj kev raug txom nyem, thiab kuv
xav yoog nws tus piv txwv nyob hauv
txoj kev tuag, 11 saib kuv puas yuav
sawv tau hauv cov tub tuag rov los.
12 Kuv tsis hais tias, kuv twb mus txog
chaw lawm, los kuv twb zoo txhij zoo
txhua tas lawm. Kuv khiav ntxiv kom
kuv tuav tau Leej Pleev, vim Yes Xus
Pleev twb tuav tau kuv lawm.
13 Kwv tij, kuv tsis khav tias, kuv tuav
tau Leej Pleev lawm. Kuv tsuas hais li no
: kuv hnov qab tias, kuv tau khiav kev
deb li cas lawm. 14 Kuv khoov cev ncaj
qha khiav mus rau tom hauv ntej, kuv tso
sas ntws kom mus txog chaw, vim kuv
pom cov paj tshab, uas Tswv Ntuj hu peb
mus txais nyob txheej saud, nyob hauv Yes Xus Pleev.

Zam Ntawv Moo Zoo: 8 : 1 - 11.Tus poj niam deev hluas.

1 Ntawm Yes Xus, mas nws mus
pem Roob Txiv Ntoo Roj.
2 Thaum kaj ntug txoog, Yes Xus rov
mus hauv lub Tuam Tsev Teev Ntuj. Tas
tsoom pej xeem tuaj cuag nws. Yes Xus
zaum, nws thiaj pib qhia lawv. 3 Cov
kws ntawv thiab cov Fas Lis Xais coj ib
tug poj niam tuaj rau Yes Xus : luag ntes
nws thaum tab tom deev hluas nraug.
Lawv coj tus poj niam tuaj sawv ntsug
hauv nruab nrab. 4 Lawv hais rau Yes Xus tias :
"Xib Hwb, tus poj niam no, luag pom nws
tab tom deev hluas. 5 Nyob hauv Txoj
Cai, mas Mais Xes kom peb xuas pob zeb
txawb cov poj niam zoo li ntawd. Koj ne, koj hais li cas ?"
6 Lawv hais li ntawd vim lawv xav sim
Yes Xus, lawv thiaj li tau kev mus kom
nws. Tab sis Yes Xus khoov, nws xuas
ntiv tes sau npe ntawv rau hauv pem teb.
7 Lawv pheej rov nug tsis tseg, ces Yes
Xus sawv ntsug, nws hais rau lawv tias :
"Nyob hauv nej, yog leej twg tsis muaj
txhaum, mas kom nws xub txawb ib lub
pob zeb rau tus poj niam ntawd."
8 Ces Yes Xus rov khoov, nws rov sau
npe ntawv hauv pem teb. 9 Thaum lawv
hnov hais li ntawd, lawv nyias rov mus
nyias zuj zus. Cov xub mus yog cov laus
dua. Tshuav Yes Xus tib leeg thiab tus
poj niam uas sawv hauv nruab nrab xwb.
10 Yes Xus rov sawv ntsug, nws hais rau
tus poj niam tias :
"Me ntxhais, lawv dua twg tas lawm ?
Tsis muaj leej twg muab txim rau koj lod ?"
11 Tus poj niam teb tias :
"Huab Tais, tsis muaj leej twg."
Ces Yes Xus hais tias :
"Kuv kuj tsis muab txim rau koj thiab.
Koj rov mus, txij no mus koj txhob ua
txhaum ntxiv lawm mog."

[size=24]NTHUAV NTAWV NTSHIAB.[/size]

Rau hnub chiv tim 17 lub 3 hlis 2013

Ib tsoom ntseeg thiab phooj ywg Hmoob,

Peb nyob hauv lub lis piam 5 lub caij 40. Hnub no peb tsuas hais ob peb los txog tsab ntawv Moo Zoo, Zam tau sau tseg. Yes Xus nrog nws cov thwj tim nce mus pem Yes Lus Xas Les, mus ua lub hmoov “Tsev tsam phooj, fête des Tentes, the Tabernacles feast ” nco txog thaum ub lawv cov yawg koob tsa cov tsev tsam phooj hla hav suab puam 40 xyoo. Lub hmoov “Tsev tsam phooj” ua thaum lub caij sau qoob tas, lub 9 hlis ntuj. Yuav tsum paub tias, tau ntev los, cov txwj laus Fas Lis Xais, cov thoob xwm thiab cov xib hwb qhia Ntawv Ntshiab nrhiav ib lub zoo sij hawm kom tau kev ntes Yes Xus. Vim lawv pom Yes Xus tsis caiv hnub Xas Npas Tos raws li Mai Xes txoj cai. Yes Xus pheej kho neeg mob, kho neeg dig muag hnub caiv pheej tsis caiv. Yes Xus tseem muaj cuab kav hu Tswv Ntuj ua nws Leej Txiv. Tsis tau pom dua ib tug neeg muaj ntsej muag npaum Yes Xus. Ntawm tsoom pej xeem, lawv ho xav txawv cov txwj laus. Tsoom pej xeem pom Yes Xus ua hwj huam, ua tau tej yam tib neeg tsis muaj peev xwm ua, lawv qhuas Yes Xus. Lawv pom Yes Xus ua tau hwj huam muaj mov muaj nqaij noj tsis tag. Lawv xav tsa Yes Xus ua vaj ntxwv kav His Xais Lais. Lawv yuav tsis tau cev tes niaj hnub mus khwv tiv tshav tiv nag, lawv yuav tau zoo nyob pw xwb los tau noj lawm. Muaj neeg coob caum Yes Xus nrhiav Yes Xus, ua rau cov txwj laus txhawj thiab khib rau Yes Xus. Lawv kuj tsis txaus siab vim Yes Xus yuam kev ob peb zaug lawm. Yes Xus twb tsis hwm Mai Xes txoj cai raws li cov thoob xwm thiab cov xib hwb qhuab qhia. Ua rau lawv sib cav tau tawg ua ob peb pab. Yes Xus nrog nws cov thwj tim nyob hauv lub tuam tsev teev ntuj ua lub hmoov tsev tsam phooj tsis tau tag.

Tom thawj, lawv nrhiav tau ib zaj plaub tsa lawv tw ntxiab, cuab lawv zog. Cov txwj laus ntes tau ib tug poj niam deev hluas nraug cab tuaj sawv nruab nrab ntawm Yes Xus thiab ib tsoom neeg : “Xib Hwb, tus poj niam no, ntes tau thaum tseem deev hluas. 5 Nyob hauv peb txoj cai, Mai Xes hais tseg yog muaj li tiag, kom xuas zeb tua. Ntawm koj ne yuav hais li cas ?” Lawv tos ntshis saib Yes Xus yuav teb lawv cov lus nug mus zaj twg. Yog Yes Xus tseem rov hais ib los txawv rau lawv hnov, piv li rhuav Mai Xes txoj cai, ces lawv tau cai muab Yes Xus zoj kiag. Saib Yes Xus yuav npuab lawv zaj, ib tug poj niam deev hluas nraug, txhaum txoj cai. Kawg muab cab tom tshav puam rau sawv daws xuas zeb lawg kom tuag. Yog Yes Xus yuav li lawv zaj, nyaj Yes Xus tseem yuav dim zaum no. Yog Yes Xus rhuav Mai Xes txoj cai li cas, lawv yuav liam cuag Yes Xus saib tsis taus lawv muab lawv rhuav tib yam. Lawv sib hais haum tas muab Yes Xus puav kom ti ntsa hnub ntawd tsis pub dim. Tiam sis Yes Xus tsis nrog lawv sib cav. Yes Xus twb tsis tsa muag ntsia lawv, nyo taub hau twj ywm mloog lawv tsawm kom siab nqig, lawv ua cuag lawv muaj ntsej muag loj kawg, cav thiab nthe li ub li no, ua heev diam. Yes Xus thiaj tsa hau los caw lawv xav tswv yim kom thoob kom txaus ua ntej lawv yuav tua ib tug neeg muaj txhuam : “Tus tsis muaj txhaum hlo hauv nej kom nws xub cuam zeb rau tus ntawd.” Xam los txog, lawv kuj yog neeg ntse, ua neeg xav tswv yim ; lawv tsis ua qhov lim hiam, ua ruam tua tsov, ciaj los nyob tuag los tseg. Lawv pom tus poj niam no lub txim txhaum deev hluas. Tiam sis Yes Xus lo lus qhib lawv lub siab thiab lub tswv yim kom pom kev deb thiab xav tau tob dua qhov lawv xav tau los txog txij no. Txawm lawv tsis mus deev luag poj luag sev tiag, lawv puas muaj ntsej muag lees rau Tswv Ntuj tias lawv dawb thiab huv tsis muaj txhaum hlo. Lawv pom tus poj niam deev hluas txhaum Mai Xes txoj cai. Ua li Mai Xes kuj tau qhia ntau yam, hais ntau lo lus tseg hauv nws txoj cai. Lawv yog cov qhuab qhia Mai Xes txoj cai rau ib zeej tsoom neeg, lawv paub Mai Xes txoj cai zoo kawg : “Niaj xyoo, koj sau koj cov teb qoob tas, koj nco ntsoov muab ib qho los ntaus tus se…Yog koj nyob txoj ke deb…koj muab pauv ua nyiaj, nqa nyiaj hauv koj tes mus txog thaj chaw koj tus Huab Tais Tswv Ntuj xaiv tau…koj coj mus pauv tsiaj loj los tsiaj me, yuav dej caw, yam koj ntshaw. Koj muab noj ua kev zoo siab nrog koj tsev neeg nyob ntawd nrog koj tus Huab Tais Tswv Ntuj…Peb xyoos twg sib law, koj sau koj cov qoob xyoo ntawd, koj qee tus nqe se txawb ntawm qhov rooj. Tus les vis, nws tsis nrog koj muaj tug tsis muaj cuab tam, tus pej kum neeg, tus nyuam ntsuag, tus poj ntsuam hauv koj lub nroog, lawv yuav tuaj noj kom tsau npo…TC2 14,22-29” Tas cov txwj laus neeg ua kub ua npau cuag li tuaj ntawd, lawv puas ua tag li Mai Xes tau hais nyob hauv txoj cai ? Lawv pom tias lawv kuj yog neeg dawb huv tsis tag. Lawv tsis muaj txhaum qhov no los lwm qhov lawv kuj lav tsis tau rau Tswv Ntuj. Tus poj niam no muaj txhaum qhov no los tej zaum lwm qhov nws kuj tsis muaj txhaum. Lawv ntsia lawv tsis muaj lus los teb Yes Xus lawm. Lawv cia li tsis muaj plhus nyob ntawd ntxiv. Cov laus tshaj xub xuas kev khiav ua ntej, nyob nyob ploj ib leeg tag. Thaum kawg, tshuav Yes Xus thiab tus poj niam lawm xwb.

Ib tsoom ntseeg thiab phooj ywg Hmoob sawv daws. Ua leej tib neeg nyob ua ke koom zej koom zos, nyob muaj vag muaj tse, muaj cuab muaj yig, tsis hais luag mab sua thiab peb Hmoob. Nyob qhov twg thiab tus leej tib neeg twg twb puav leej muaj lus, ntsib dua kev sib cov nyom tsis sib haum, ib tug ua tub qaug ib tug. Hnub no, peb yuav khaws Yes Xus cov lus hauv Zam tsab ntawv Moo Zoo no coj los xav hauv nyias lub cuab lub yig, ntawm nyias lub neej. Muaj ntau lub ntsiab yuav hais tsis txhua rau ntawm no. Peb tsuas khaws peb lub ntsiab xwb :
1-Hais txog ntawm peb tib neeg txoj kev yuam kev, ua txhaum ua tub qaug neeg. Teeb meem tsis yog lub txhaum me. Qhov ua teeb meem, yog lub txhaum loj, tsis muaj leej twg muaj peev xwm kho tau. Cov neeg tub sab, cov tua neeg yog lub txhaum loj. Vim li ntawd, nyob hauv ntau lub teb chaws, hais tias vam meej. Lawv tseem muaj txoj cai tua tus neeg txhaum nyob rau ntawd. Tiam sis nyob tas ntiaj teb, sawv daws tsis coj thiab tsis pom mus ib yam. Peb pom, muaj ntau lub teb chaws nyob sab Aws Los Pas, txawm tus tib neeg muaj lub txim txhaum loj npaum twg, tsis muaj cai tua tus neeg txhaum lawm. Ntau lub teb chaws nyob sab Aws Los Pas tau rhuav tus txhooj tua neeg pov tseg. Tus neeg ua txhaum loj npaum twg, luag tsuas muab kaw mus tas sim neej, muab tus neeg txhaum loj faj mus txog hnub tuag xwb. Hais txog tus poj niam deev hluas no yeej txhaum tuag nthi. Yog lawv tsis coj tuaj rau Yes Xus ces nws twb tuag rau lawv tes lawm. Rau peb tus neeg ntseeg Tswv Ntuj, peb yuav mloog Yes Xus cov lus hais txog txoj kev tua neeg. Peb los ua tus neeg teev Tswv Ntuj hwm Tswv Ntuj. Peb puas yuav coj thiab yuav ua li tej neeg thiab tej teb chaws ua, los peb yuav vam Yes Xus lo lus coj peb ua neej. Yog ib lo lus muab rau peb xav.
2-Peb pom Yes Xus tsis muab tus poj niam no rau txim, nws twb ua txhaum, tsim nyog yuav muab nplawm ob peb nplawg. Peb ua neeg ntseeg Yes Xus peb yuav xav li cas ? Tsis yog Yes Xus pab tus poj niam, tsa nws cai. Hu ua txiv neej, leej twg tus poj niam deev hluas twb yuav tsum khib tas tus. Yog vim li ntawd, peb yuav tig ntsej mloog Yes Xus. Tsis yog vim Yes Xus tsis rau txim rau tus poj niam, Yes Xus yuav tso kev plhuav rau nws mus ua plees ua yis zoo nws siab ywj nws. Yes Xus tau hais ib los rau tus poj niam coj mus xav tsis tag : “Kuv kuj tsis muab koj rau txim. Kav tsij mus, txij zaum no txhob ua txhaum ntxiv” Yes Xus vam ntsoov tias tus poj niam yuav ris siab. Txij no mus nws yuav ua neeg tsim txiaj, hloov siab tshiab, tig los ua ib tug neeg tshiab. Neeg lub siab peb paub tsis tau. Qhov peb hais kam : qub neeg ces yuav coj lub qub siab. Peb kuj tsis paub, nws yuav ris siab hlo los ua lub neej puab cuab, peb hais tsis tau. Peb hnov Yes Xus cov lus no tsis txaus peb ntseeg, vim peb tos Yes Xus muab nws rau txim ib yam cov txwj laus tos. Tej zaum lub ntsiab, Yes Xus muab tus poj niam deev hluas no coj los ua ib zaj qhuab qhia peb leej tib neeg kom nrhiav lwm txoj kev sib zam txhaum, muaj ntau txoj kev taug. Tsis txhob ua qhov lim hiam, ua qhov yooj yim raws li tib neeg ua kam. Tiam sis rhawv ib txoj kev tshiab, rhawv txoj ncaj, txoj zoo taug kom sib haum. Vim li ntawd, Yes Xus tsis hais nws cov lus rau tus poj niam xwb. Yog Yes Xus hais rau tas peb cov neeg muaj pob ntseg hnov lub Moo Zoo. Tsis yog tus poj niam txawj ua txhaum, cov txwj laus txawj ua txhaum, peb txawj ua txhaum tas tus. Yes Xus tsis muab tus poj niam rau txim, Yes Xus tsis muab cov txwj laus rau txim, Yes Xus tsis muab peb rau txim thiab. Tiam sis Yes Xus kom tus poj niam hloov siab txhob ua txhaum ntxiv. Ntawm peb ne, peb puas hloov siab tshiab tsis txhob ua tub qaug luag, txhob ua txhaum rau Tswv Ntuj ? Tsis yog vim peb paub Yes Xus tsis muab peb rau txim, tab peb txawm tsis mus teev ntuj, tab peb txawm ua neeg cuaj khaum tsis hlub leej twg, Yes Xus hais rau peb nruab siab tias : txij no mus, peb yuav ua neeg nquag hwm Tswv Ntuj, teev Tswv Ntuj, ua neeg siab dawb txhawb lub Koom Txoos, hlub tej neeg txom nyem…Txhob ua txhaum ntxiv.
3-Yes Xus cov lus yog ib co lus ncaj qhia peb lub siab nkhaus kom ncaj ncees tuaj. Kom peb tsis txhob ua li cov txwj laus rhiav lus kom tau liam Yes Xus, lam mus lob ub lob no kom liam yeej luag. Qhov Yes Xus ua puav leej yog, lo Yes Xus hais yog lo ncaj yuav taus. Tiam sis cov txwj laus xwb tim lem, nrhiav lus rau Yes Xus. Lawv rov rhuav lawv ntsej muag. Peb yuav tsis txhob muaj plhus ua tus ntse, tsam peb rov muab peb rhuav poob ntsej muag rau tus neeg ncaj.

Thov kom lub caij 40 no coj peb los npuab peb tus Huab Tais Yes Xus kom tag peb tej siab ntsws thiab ua peb lub neej muaj Huab Tais Yes Xus lub hwj chim.

Cwj Vuam Chiv 18.03.2010

**NrhiavTswvNtuj** 22nd March 2013, 8:09 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°19

Re: COV ZAJ NYEEM-Xyoo C 2012-13

Post NrhiavTswvNtuj 22nd March 2013, 8:09 am

COV ZAJ NYEEM HNUB 24/03/2013
(Chiv NQUAM NPLOOJ Caij 40 - Xyoo C )

Chiv Nqaum Nplooj Lus Kas: 19, 28-40 )
Lawv txais Yes Xus nyob Yes Lus
Xas Les xws li Leej Pleev.

28 Thaum Yes Xus hais cov lus ntawd
tas, nws mus pem Yes Lus Xas Les. Nws
mus kev ua ntej. 29 Thaum nws tuaj
yuav txog Npes Fas Zes thiab Npes Tas
Nias, ze lub roob uas hu ua Roob Txiv
Ntoo Roj, nws xa ob tug thwj tim mus, nws hais tias :
30 "Neb mus hauv lub zos uas nyob tom
hauv ntej tod. Thaum neb chaws mus
hauv zos, neb yuav pom ib tug me nyuam
luj uas luag muab khi cia, tsis tau muaj
neeg caij ib zaug li. Neb daws hlua, neb
cab los. 31 Yog muaj neeg nug neb tias :
'Vim li cas neb daws tus me nyuam luj
hlua ?' Neb yuav hais li no : 'Yog vim Huab Tais yuav siv."
32 Ob tub thwj tim mus, nkawd pom
raws nraim li Yes Xus tau hais rau
nkawd. 33 Thaum nkawd tab tom daws
tus me nyuam luj txoj hlua, cov tswv luj
hais rau nkawd tias : "Neb daws tus me nyuam luj ua dab tsi ?"
34 Nkawd hais tias :
"Yog vim Huab Tais yuav siv."
35 Ces nkawd cab los rau Yes Xus.
Nkawd muab nkawd cov tsho ntev pov
mus pua me nyuam luj nraub qaum,
nkawd kom Yes Xus caij. 36 Thaum
Yes Xus caij tus me nyuam luj mus, mas
tsoom neeg muab lawv cov tsho ntev pua
txoj kev. 37 Thaum Yes Xus yuav nqes
phab toj saum Roob Txiv Ntoo Roj, ces ib
tsoom thwj tim coob coob, zoo siab,
lawv pib cav txog Tswv Ntuj nrov nrov
rau tej hwj huam yees ntxwv uas lawv tau
pom tas huv tib si. 38 Lawv hais tias :
Tus Vaj uas Huab Tais xa tuaj nto koob meej.
Nyob saum ntuj muaj kev thaj yeeb.
Nyob saum cov txheej ntuj siab, yog lub koob meej."
39 Nyob hauv cov neeg ntawd, muaj ib
co Fas Lis Xais hais rau Yes Xus tias :
"Xib Hwb, koj qhuab ntuas koj cov thwj tim mas !"
40 Yes Xus teb rau lawv tias :
"Kuv hais rau nej : Yog lawv cov no
tswm seeb, mas cov pob zeb yuav qw."

Zaj nyeem Ib: His Xais 50, 4-7

Lus paj huam cav txog Tswv Ntuj
tus tub txib. Zaj peb.

4 HUAB TAIS Tswv Ntuj tau
muab cov thwj tim tus nplaig rau
kuv. Nws qhia kuv kom kuv txawj hais
ib lo lus nplij tus qaug zog. Niaj tag kis
nws tsa kuv pob ntseg kom kuv tsim
dheev, kom kuv mloog xws li cov thwj tim mloog.
5 HUAB TAIS Tswv Ntuj qhib kuv pob
ntseg, mas kuv tsis npau taws, kuv tsis
yig, kuv tsis thaub qab.
6 Lawv ntaus kuv, mas kuv tig kuv nraub
qaum rau lawv ntaus. Lawv xav rho kuv
cov hwj txwv, mas kuv tig kuv sab plhu
rau lawv. Lawv xav ib tawg ncuav rau
kuv thiab xav nto qaub ncaug rau kuv
ntsej muag, los kuv tsis fee plhu rau lawv.
7 Tab sis HUAB TAIS Tswv Ntuj tsom
kwm kuv, vim qhov ntawd mas kuv tsis
poob ntsej muag. Ces kuv ua kuv ntsej
muag tawv li pob zeb. Kuv paub tias kuv
yuav tsis raug kev txaj muag.

Zaj nyeem Ob: Fis Lis Pos 2, 6-11
6Yes Xus Pleev yog Tswv Ntuj,
tiam sis nws tsis cia nws lub hwj
chim Tswv Ntuj rau luag hawm :
nws muab nws lub hwj chim hle.
7 Nws yeem ua ib tug qhev,
nws yug los ua neeg xws li ib tsoom
neeg. Luag pom nws tus yam ntxwv
yog yam ntxwv tib neeg.
8 Nws txo nws qis :
nws tuaj yeem mloog Ntuj lus mus
txog qhov tuag, thiab tseem xaiv txoj
kev tuag saum ntoo cuam.
9 Vim li ntawd, mas Tswv Ntuj thiaj tsa
Yes Xus ua ib tug loj nyob siab siab.
Tswv Ntuj muab lub npe uas nyob
siab dua lwm cov npe rau nws.
10 Li ntawd, tus twg hnov tuav txog
Yes Xus lub npe, tsis hais nyob
saum cov txheej ntuj, los nyob ntiaj
teb no, los nyob nruab yeeb, mas tus
ntawd cia li txhos caug hawm.
11 Txhua xeem lus yuav tsum cav tias
Yes Xus Pleev yog Huab Tais :
Leej Txiv Tswv Ntuj thiaj muaj koob
meej nto moo lug.

Lus Kas Ntawv Moo Zoo: 22, 14 – 23, 56
Noj rooj qav Hla. 22 : 14 - 18.
14 Thaum txog caij lawm, Yes Xus mus
zaum ntawm rooj mov, cov Hauv Paus
Xa Lus kuj nrog nws zaum thiab. 15 Yes
Xus hais rau lawv tias :
"Kuv xav nrog nej noj pluas Hla no kawg,
kuv mam li mus txais kev tsim txom.
16 Kuv hais rau nej : txij no mus kuv
yuav tsis tau noj rooj qav Hla mus txog
thaum lub Ntees Hla tiav tas nyob hauv
Tswv Ntuj lub Ceeb Tsheej."
17 Yes Xus tuav ib lub ntim, nws ua Ntuj
tsaug tas, nws hais tias :
"Nej txais qhov no, nej sib faib haus.
18 Kuv hais rau nej, txij no mus kuv
yuav tsis haus kua txiv cawv mus txog
thaum Tswv Ntuj lub Ceeb Tsheej los txog."

Lub cim cav txiaj ntsim.
19 Yes Xus tuav lub ncuav mov, nws ua
Ntuj tsaug, nws muab ntais, nws cev rau
lawv, nws hais tias :
"Qhov no yog kuv lub cev, uas kuv muab
pub rau nej. Nej ua qho no kom nej nco
txog kuv." 20 Noj hmo tas, Yes Xus kuj
tuav lub ntim ib yam li ntawd thiab, nws hais tias :
"Lub ntim no yog kev Cog Lus Tshiab
hauv kuv cov ntshav, yog cov ntshav
nchuav los cawm nej."
21 Saib, tus uas muab kuv muag nrog
kuv nyob ua ke, nws txhais tes nyob saum
lub rooj mov no. 22 Txawm tias Neeg
Leej Tub taug nws txoj kev raws li Ntawv
sau tseg, tsis kav, tus neeg uas muab nws
muag tau txoj hmoov phem !"
23 Ces lawv pib sib nug saib yog leej
twg yuav ua li ntawd
56 Ib tug ntxhais txib
pom Pob Zeb zaum ze lub cub tawg, nws
ntsia ntsoov Pob Zeb, ces nws hais tias :
"Tus neeg ntawd nrog Yes Xus thiab."

**NrhiavTswvNtuj** 28th March 2013, 10:55 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°20

Re: COV ZAJ NYEEM-Xyoo C 2012-13

Post NrhiavTswvNtuj 28th March 2013, 10:55 am

COV ZAJ NYEEM HNUB TIM 28/03/13

Hnub 5 Ntshiab, Huab Tais tsim lub Cim Yug

Zaj nyeem 1 : Kev Tsiv 12,1-8.11-14 Hmo Hla.

1 HUAB TAIS hais rau Mais
Xes thiab As Loos nyob Hais
Nkws Tos teb tias :
2 "Lub hlis no nej yuav muab suav ua
thawj lub hlis, nej yuav muab ua thawj
lub hlis qhib lub xyoo. 3 Neb hais rau ib
tsoom pej xeem His Xas Lais tias: Lub
hlis no xiab kaum, mas txhua yim neeg,
nyias yuav tsum npaj nyias ib tug tsiaj
me. 4 Yog yim neeg twg tsawg dhau
noj tsis tas ib tug tsiaj me, mas nej yuav
mus nrog lwm yim neeg uas nyob ze nej
dua cov koom noj ib tug tsiaj. Nej yuav
xaiv ib tug tsiaj kom txaus sawv daws noj
tsis seem. 5 Nej yuav xaiv ib tug tsiaj
zoo, tsis muaj chaw xyeej, yuav yog ib
tug thav txiv yaj los thav txiv tshis, hnub
nyoog ib xyoos. 6 Nej yuav ceev rau ib
qho tos txog hnub xiab kaum plaub, lub hlis no.
Hmo tim kaum plaub, tas tsoom His Xas
Lais, nyias yuav tua nyias tus tsiaj thaum
tsaus ntuj zuag. 7 Nej yuav cug cov
ntshav coj mus pleev ob tug ncej puab
rooj thiab pleev daim txiag tav saum lub
qhov rooj nkag hauv lub tsev uas nej noj
tus tsiaj ntawd. 8 Hmo ntawd, nej yuav
noj nqaij txhiab hauv hluav taws, nej yuav
noj ntxuag ib co ncuav mov tsis xyaw
poov xab, thiab ib cov zaub iab.

11 Thaum noj mov nej yuav ua zoo li no : Nej sia
siv khov kho, nej rau khau, thiab tuav nej
rab pas nrig ntawm tes. Nej yuav sawv
ntsug noj, noj nrawm nroos, vim yog
HUAB TAIS hmo hla. 12 Hmo ntawd,
kuv yuav hla mus thoob Hais Nkws Tos
teb. Kuv yuav ntaus neeg cov tub hlob,
thiab tsiaj cov me nyuam hlob, kom ntog
tas huv tib si. Thiab kuv yuav muab txim
rau cov dab Hais Nkws Tos, vim kuv yog
HUAB TAIS. 13 Cov ntshav yuav yog
ib lub cim txuag nej hauv cov tsev uas nej
nyob. Kuv pom lub cim ntawd, kuv yuav
hla plaws mus, nej yuav tsis raug qhov
xwv txheej loj ntawd, vim kuv yog tus ua
rau Hais Nkws Tos teb.
14 Yav tom ntej, nej yuav cim ntsoov
hnub ntawd cia, nej yuav nqaum paj
nqaum nruas cav txog HUAB TAIS. Nej
yuav muab hnub ntawd los ua ib txog cai
nqaum paj nqaum nruas mus txheej dhau
txheej rau nej coj.

Zaj nyeem 2 : 1 Kos Lis Nthos 11, 23-26

23 Cov lus kuv qhia rau nej, yog cov lus
kuv txais ntawm Huab Tais los. Yam li,
hmo lawv muab Huab Tais Yes Xus rau
cov nom ntes, Huab Tais tuav ib lub
ncuav mov, 24 nws ua Ntuj tsaug, nws
muab lub ncuav mov ntais, nws hais tias :

Qhov no yog kuv lub cev uas cia cawm
nej. Nej ua qhov no kom nej nco txog kuv.
25 Thaum noj hmo tas Huab Tais
Yes Xus tuav lub ntim cawv, nws hais tias :
Lub ntim cawv no yog zaj cog lus
tshiab nyob hauv kuv cov ntshav ; nej
haus lub ntim no thaum twg, mas nej haus
kom nej nco txog kuv.
26 Kwv tij, txij no mus, nej noj cov
ncuav mov no thaum twg, thiab nej haus
cov cawv no thaum twg, mas nej tshaj
Huab Tais txoj kev tuag, nej ua li no mus
txog hnub Huab Tais rov los.

Zam Ntawv Moo Zoo 13,1-15 Yes Xus ntxuav cov thwj tim ko taw.

1 Thaum yuav txog lub Ntees
Hla, Yes Xus paub tias txog nws
lub caij hla lub ntiaj teb no rov mus cuag
Leej Txiv. Nws nyiam nws cov thwj tim
uas nyob hauv lub qab ntuj no, mas nws
nyiam lawv mus txog thaum kawg.
2 Thaum lawv tab tom noj ib pluag hmo,
ces dab phem twb nkag mus tshoj Yus
Das Kas Lis Yaus, Xis Moos tus tub lub
siab kom muab Yes Xus muag. 3 Yes
Xus paub tias Leej Txiv tso tas ib puas
tsav yam rau hauv nws txhais tes, nws
paub tias nws tuaj ntawm Tswv Ntuj tuaj,
nws yuav rov mus cuag Tswv Ntuj.
4 Ces nws sawv ntawm lub rooj mov
mus, nws hle tsho, nws muab ib daig
ntaub khi rau ntawm nws duav. 5 Nws
hliv dej rau hauv ib lub phiab, ces nws
ntxuav cov thwj tim ko taw. Nws muab
daim ntaub khi ntawm duav los so lawv ko taw.
6 Yes Xus los txog ntawm Xis Moos Pob
Zeb. Pob Zeb hais rau Yes Xus tias :
" Huab Tais, koj yuav ntxuav kuv ko taw lod ?"
7 Yes Xus teb rau Pob Zeb tias :
"Qhov uas kuv ua, mas tam sis no koj tsis
to taub, tiam sis yav tom ntej koj yuav to taub."
8 Pob Zeb hais rau Yes Xus tias :
"Koj txhob ntxuav kuv ko taw, kuv tsis kam ib zaug li."
Yes Xus teb rau Pob Zeb tias :
"Yog kuv tsis ntxuav koj, mas koj yuav
tsis tau nrog kuv ua ke."
9 Xis Moos Pob Zeb hais rau Yes Xus tias :
"Huab Tais, yog li mas tsis yog ntxuav
taw xwb, koj ntxuav kuv tes thiab kuv
taub hau huv si."
10 Yes Xus hais rau Pob Zeb tias : "Tus
uas nws da dej lawm mas tsis tas yuav
ntxuav ntxiv, vim nws ib ce huv tas tib si
lawm. Nej kuj huv lawm thiab, tab sis
huv tsis tas txhua leej." 11 Yes Xus yeej
paub tus twg yog tus yuav muab nws
muag. Vim li ntawd nws thiaj hais tias :
"Nej huv tsis tas txhua leej."
12 Thaum Yes Xus ntxuav lawv ko taw
tas, nws rov hnav nws lub tsho txheej
nraud, nws rov los zaum ntawm rooj
mov, nws mam li hais rau lawv tias :
"Nej puas to taub qhov uas kuv ua rau
nej ? 13 Nej hu kuv ua : Xib Hwb thiab
Huab Tais. Nej hu raug lawm, vim kuv
yeej yog tiag. 14 Txawm tias kuv yog
nej tus Xib Hwb thiab nej tus Huab Tais,
tsis kav, kuv ntxuav nej ko taw, mas nej
ib tug yuav tsum rov ntxuav ib tug ko taw
thiab. 15 Kuv muab ib tug piv txwv rau
nej : kom nej ua raws li kuv tau ua rau nej.

**NrhiavTswvNtuj** 28th March 2013, 11:59 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°21

Re: COV ZAJ NYEEM-Xyoo C 2012-13

Post NrhiavTswvNtuj 28th March 2013, 11:59 am

COV ZAJ NYEEM HNUB TIM 29/03/13

Hnub 6 Ntshiab, Hawm Ntoo Cuam.

Zaj nyeem Ib: His Xais 52,13 – 53,12

Lus paj huam cav txog Tswv Ntuj
tus tub txib. Zaj plaub.

13 Nej ntsia kuv tus tub txib Saib ! Nws
yuav vam meej. Nws yuav nce mus, nws
yuav sawv siab. Sawv daws yuav cav lus zoo txog nws.
14 Coob leej pom nws, lawv yuav nyob
hab nuv, vim nws lub cev puas tas, nws
tsis zoo li neeg lawm. Nws lub cev ntaj
ntsug tsis zoo xws leej tib neeg cov tub
lub cev. 15 Li ntawd, nws yuav ua kom
ntau lub kuj cuab ceeb nkaus. Cov vaj
yuav nyob qhov ncauj kaw ntom nti rau
ntawm nws xub ntiag, vim lawv pom ib
yam uas tsis muaj leej twg tau piav rau
lawv, lawv hnov ib yam uas lawv tsis tau
hnov hais txog.
1 Leej twg yuav ntseeg tau qhov
peb hnov hais no ? HUAB TAIS
lub hwj huam tawm los nyob saum leej twg ?
2 Tus tub txib tau loj hlob nyob ntawm
HUAB TAIS lub xub ntiag, xws li ib tug
cag nrhau mus rau hauv thaj av qhuav,
nws tsis muaj lub meej mom zoo saib,
nws tsis muaj tus yam ntxwv zoo nyiam.
3 Tib neeg thuam nws, tso nws pov tseg.
Nws yog ib tug neeg txom nyem thiab
nquag raug mob. Nws zoo li ib tug neeg
uas yus qhov muag pom dheev, yus pos
qhov muag. Nws raug sawv daws thuam,
peb tsis quav ntsej nws. 4 Tab sis, yam
nws ris yog peb tej kev mob, yam nws
nqa yog peb tej kev ntsaj. Peb xav tias
Tswv Ntuj ntaus nws, thiab ua km nws
raug mob, ua kom nws poob hwj chim.
5 Tab sis tus tub txib raug luag nkaug,
yog vim peb tej hauj lwm phem. Nws
raug luag tsuj, yog vim peb cov txhaum.
Lub txim uas nyob saum nws, yog tus nqi
nws them kom peb tau nyob thaj yeeb.
Nws tej thaj doog ua kom peb tej mob nkeeg zoo hlo.
6 Peb sawv daws zoo li ib co yaj poob
zoo, peb nyias taug nyias txoj kev.
HUAB TAIS ua kom txoj kev txhaum uas
peb sawv daws taug rov los poob rau saum tus tub txib.
7 Tus tub txib raug luag hiam heev kawg,
tab sis nws yeem ua tus me, nws tsis qhib
ncauj. Nws ua zoo li tus yaj uas luag cab
mus rau lub tsev tua tsiaj. Nws nyob twj
ywm xws li tus yaj uas luag txiav nws cov
plaub. Nws ua siab ntev nyiaj, nws tsis qhib ncauj li.
8 Luag yuam, luag txiav txim kom tau
rhuav tus tub txib pov tseg, leej twg tau
xav tswv yim txog nws txoj hmoo ? Luag
muab nws tshem tawm hauv tsoom neeg
ciaj lub ntiaj teb. Luag muab tus tub txib
tua, vim peb tej kev txhaum.
9 Luag muab nws zwm ntxa xyaw cov
neeg phem, muab nws faus ze cov neeg
nkhaus. Tab sis nws tsis tau ua nruj ua
tsiv rau leej twg. Nws lub ncauj tsis tau
hais ib lo lus dag. 10 HUAB TAIS pom
zoo tsuj nws tus tub txib, nws ua kom
nws tus tub txib raug mob raug nkees.
Yog tus tub txib muab nws lub neej los ua
ib thaj txi Ntuj kho kev txhaum, nws yuav
muaj xeeb zeej xeeb ntxwv, nws ua kom
nws lub hnub nyoog kav ntev, nws txhais
tes yuav ua tau raws li HUAB TAIS xav.
11 Vim nws tus plig tau raug txom nyem,
nws yuav pom txoj kev pom kev, nws
yuav lub siab puv npo vim nws paub txuj.
Kuv tus tub txib siab ncaj yuav ua kom
ntau leej ncaj tuaj. Tus yuav ris lawv cov txhaum yog nws.
12 Yog vim li ntawd, kuv thiaj yuav pub
kom muaj ib feem ua nws tug nyob hauv
cov loj, nws yuav nrog cov muaj hwj
xyeej txais cov yeeb ncuab lub cuab tam
ib feem. Vim nws tau ris coob leej cov
txhaum, thiab nws pab thov kev zam rau
cov neeg txhaum.

Zaj nyeem Ob: Hes Nplaws: 4, 14-16; 5, 7-9: Peb yuav npuab Leej Pleev uas yog tus tuam Leej Choj.

14 Vim peb muaj Tswv Ntuj Leej Tub
Yes Xus ua Tuam Leej Choj thiab ua Vaj,
nws hla dhau yim txheej cuaj txheej ntuj,
mas peb yuav nyob ruaj nreb hauv txoj
kev lees ntseeg.
15 Peb tus Tuam Leej Choj tsis yog ib
tug Leej Choj tsis txawj hlub peb cov
neeg zog me, rau qhov nws tau raug txoj
kev sim siab txhij txhua ib yam li peb.
Tsuas tshuav txoj kev txhaum xwb, nws
thiaj tsis raug.
16 Peb kav tsij rhais ruam mus lawm tom
ntej. Peb tso siab lug mus kom txog lub
theej kiab muaj txiaj ntsim, kom peb tau
txais kev khuv leej, kev zam, thiab kev
pab ntawm lub theej kiab.

5, 7-9.
7 Leej Pleev, thaum nws ua neej nyob
hauv nws lub cev nqaij, nws tau tsa suab
quaj thov tus muaj peev xwm cawm tau
nws ntawm txoj kev tuag. Leej Txiv
mloog Leej Pleev lus thov, vim Leej
Pleev yog tus hwm Leej Txiv zoo.
8 Txawm tias Leej Pleev twb yog tus
Tub cag, tsis kav nws tuaj yeem raug
txom nyem. Nws tau kawm tias kev
mloog lus yog dab tsi.
9 Nyem no, Leej Pleev yog tus zoo txhij
zoo txhua. Leej Pleev los ua lub hauv
paus uas cawm cov neeg mloog nws lus
mus li. 10 Vim Tswv Ntuj tsa Leej Pleev
ua Tuam Leej Choj raws li Mes Kis Xes
Des txoj kev.

Zam Ntawv Moo Zoo: 18, 1 txog 19, 42 YES XUS RAUG TXOM NYEM.

1 Yes Xus hais li ntawd tas, ces
nws nrog nws cov thwj tim mus
rau tus kwj deg Kes Nroos sab tim ub.
Muaj ib lub vaj nyob ntawd. Yes Xus
thiab cov thwj tim mus hauv lub vaj.
2 Yus Das, tus uas muab Yes Xus rau
luag, kuj paub qhov chaw ntawd thiab,
vim Yes Xus thiab cov thwj tim sib sau
ntau zaus nyob ntawd. 3 Yus Das coj
pab peeb zeej thiab ib co zov keeb tuaj.
Yog cov thawj leej choj thiab cov Fas Lis
Xais sau cov zov keeb ntawd. Lawv taws
teeb, taws tsau thiab nqa ntaj nqa riam tuaj.
4 Yes Xus paub ib puas tsav yam uas
yuav tshwm sim tuaj raug nws, ces nws
tawm los hais rau lawv tias :
"Nej nrhiav leej twg ?"
5 Lawv teb rau nws tias :
"tus Yes Xus Nas Xas Les."
Yes Xus hais rau lawv tias :"Yog kuv."
Yus Das, tus muab Yes Xus rau luag nrog
lawv sawv ua ke. 6 Thaum Yes Xus hais
rau lawv tias : "Yog kuv", mas lawv
thaub qab thiab lawv ntog pem teb.
7 Yes Xus rov nug lawv dua tias :
"Nej nrhiav leej twg ?"
Lawv hais tias :
"Yes Xus Nas Xas Les."
8 Yes Xus teb tias :
"Kuv twb hais rau nej tias yog kuv. Yog
nej nrhiav kuv, mas nej cia cov no mus."
9 Qhov no tshwm sim raws li lo lus uas
nws xub hais tseg tias :
"Cov uas koj muab rau kuv, mas kuv tsis
ua ib tug ploj li."
10 Xis Moos Pob Zeb muaj ib rab ntaj.
Nws rho hlo nws rab ntaj tib ntag rau tus
thawj leej choj tus qhev, txiav raug nws
sab pob ntseg xis lub qia ntsej tu nrho.
Tus qhev no hu ua Mas Kws.
11 Yes Xus hais rau Pob Zeb tias :
"Koj ntxig ntaj rau hauv hnab. Lub ntim
uas Leej Txiv muab rau kuv, kuv yuav
tsis haus lod ?"

12 Pab peeb zeej nrog tus lwm txheeb,
thiab cov zov keeb Yus Das ntes Yes
Xus. Lawv muab Yes Xus khi. 13 Lawv
xub coj nws mus tim As Nas tsev. As
Nas yog Kais Fas yawm txiv. Xyoo
ntawd yog Kais Fas ua tuam leej choj.
14 Kais Fas yog tus tau tawm tswv yim
rau cov Yus Das hais tias : "Cia ib tug
neeg this tsoom pej xeem tuag mas zoo dua."
15 Xis Moos Pob Zeb thiab lwm tus thwj
tim raws Yes Xus qab. Tus thwj tim
ntawd yog tus tuam leej choj ib tug swm
neeg, ces nws tau nrog Yes Xus chaws
mus hauv tus tuam leej choj lub tshav
loog. 16 Hos Pob Zeb nyob sab nraud,
nws sawv ze ntawm qhov rooj. Lwm tus
thwj tim uas swm tus tuam leej choj tawm
los, nws hais lus rau tus ntxhais txib zov
qhov rooj, ces nws kom Pob Zeb chaws
mus hauv. 17 Tus ntxhais txib zov qhov
rooj hais rau Pob Zeb tias :
"Koj tsis yog tus neeg ntawd ib tug thwj tim lod ?"
Pob Zeb hais tias :
"Kuv tsis yog."
18 Cov tub qhev thiab cov zov keeb rauv
ib cub taws thee, vim lub caij ntawd no
no. Lawv nyob ntawd nte taws. Pob Zeb
kuj nrog lawv nyob ntawd nte taws thiab.
19 Tus tuam leej choj nug Yes Xus txog
nws cov thwj tim thiab nws cov lus qhia.
20 Yes Xus teb rau tus tuam leej choj tias :
"Kuv tab meeg hais lus rau lub qab ntuj
neeg. Kuv niaj hnub qhia nyob hauv cov
tsev txoos thiab hauv lub Tuam Tsev
Teev Ntuj uas tas tsoom Yus Das tuaj sib
txoos. Kuv tsis tau nyiag hais ib yam dab
tsi. 21 Tim li cas koj nug kuv ? Koj nug
cov uas tau hnov tej lus kuv hais rau
lawv. Cov ntawd paub tias kuv tau hais dab tsi."
22 Thaum Yes Xus hais li ntawd, mas
cov zov keeb uas sawv ntsug nyob ntawd,
muaj ib tug ib tawg ncuav rau Yes Xus,
nws hais rau Yes Xus tias :
"Koj teb li ntawd rau tus tuam leej choj lod !"
23 Yes Xus teb rau tus zov keeb tias :
"Yog kuv hais lus phem, koj ua pov thawj
qhia saib qhov twg phem. Hos yog kuv
hais raug lawm, vim li cas koj thiaj ntaus kuv ?”
24 As Nas xa Yes Xus mus rau tuam leej
choj Kais Fas. Yes Xus tseem khi rawv li qub.
25 Xis Moos Pob Zeb nyob ntawd nte
taws. Lawv hais rau nws tias :
"Koj tsis yog nws ib tug thwj tim lod ?"
Pob Zeb tsis lees, nws hais tias :

“Kuv tsis yog.”
26 Tus tuam leej choj muaj ib tug qhev,
nws yog ib tug txheeb ze tus qhev uas
raug Pob Zeb txiav ib sab qia ntsej, nws hais tias :
"Kuv twb pom koj nrog nws nyob hauv
lub vaj los tsis sub ?"
27 Pob Zeb rov qab tsis lees, ces tam sis
ntawd ib tug qaib qua.
28 Lawv coj Yes Xus tim Kais Fas tsev
mus rau hauv lub tsev txiav txim. Thaum
ntawd kaj ntug lawm. Tab sis cov Yus
Das tsis mus hauv lub tsev txiav txim,
kom lawv txhob tsuas yam tsis huv, lawv
thiaj yuav noj tau pluas Hla. 29 Pis Las
Tos thiaj li tawm tuaj cuag lawv, nws hais
tias :
"Nej muaj lus dab tsi, nej thiaj tuaj kom
tus neeg ntawd ?"
30 Lawv teb rau Pis Las Tos hais tias :
"Yog tus neeg no txhob yog neeg phem,
mas peb yuav tsis coj nws tuaj rau koj."
31 Pis Las Tos hais rau lawv tias :
"Nej coj nws mus, nej txiav txim rau nws
raws li nej txoj cai."
Cov Yus Das hais rau Pis Las Tos tias :
"Txoj cai tsis pub peb muab ib tug neeg
tua."
32 Qhov no tshwm sim raws li lo lus Yes
Xus tau xub hais qhia tias nws yuav tsum
tuag zoo li cas. 33 Pis Las Tos thiaj rov
chaws mus hauv lub tsev txiav txim, nws
hu Yes Xus los, nws hais tias :
"Koj puas yog cov Yus Das tus vaj ?"
34 Yes Xus teb tias :
"Puas yog koj hais koj, los yog luag tej
hais txog kuv li ntawd rau koj ?"
35 Pis Las Tos teb tias :
"Kuv puas yog ib tug Yus Das ? Koj haiv
neeg thiab cov thawj leej choj coj koj tuaj
rau kuv. Koj tau ua dab tsi ?" 36 Yes
Xus teb tias :
"Kuv lub Ceeb Tsheej tsis nyob hauv lub
qab ntuj no. Yog kuv lub Ceeb Tsheej
nyob hauv lub qab ntuj no, mas kuv cov
neeg yuav sawv ntaus rog thaiv kom kuv
txhob poob rau hauv cov Yus Das txhais
tes. Tab sis, kuv lub Ceeb Tsheej tsis
nyob hauv lub qab ntuj no."
37 Pis Las Tos hais rau Yes Xus tias :
"Ua li koj yog vaj lod ?"
Yes Xus teb hais tias :
"Yog koj hais tias kuv yog vaj. Yog vim
qhov ntawd kuv thiaj yug los, thiab yog
vim qhov ntawd kuv thiaj tuaj nyob hauv
lub qab ntuj no : kuv tuaj ua tim khawv
txog qhov tseeb. Leej twg yog txoj kev
tseeb tug, mas nws mloog kuv lub suab."
38 Pis Las Tos hais rau Yes Xus tias :
"Qhov tseeb yog dab tsi ?"
Thaum Pis Las Tos hais li no tas, nws
tawm rov mus cuag cov Yus Das, nws
hais rau lawv tias :
"Kuv tsis pom ib yam tsim nyog raug
txim nyob hauv tus neeg ntawd. 39 Tab
sis raws li nej kev cai, mas txog lub Ntees
Hla kuv tso ib tug neeg mus. Nej puas
xav kom kuv tso cov Yus Das tus vaj ?"
40 Lawv rov qab nthe nrov tias :
"Txhob tso nws, tso Npas Las Npas !"
Npas Las Npas yog ib tug tub sab.

19

1 Ces Pis Las Tos coj Yes Xus
mus, nws kom lawv nplawm Yes
Xus. 2 Cov tub rog xuas ib co pos ntxias
ua ib lub kauj, lawv muab tso saum Yes
Xus taub hau. Lawv muab ib lub tsho
ntev liab tshiab rau Yes Xus hnav.

3 Lawv txav los ze nws, lawv hais tias :
"Nyob kaj lug, cov Yus Das tus vaj," ces
lawv ntaus nws tej niag teg.
4 Pis Las Tos rov tawm mus nraum zoov,
nws hais rau lawv tias :
"Nej saib, kuv coj tus neeg no tawm los
rau nej, kom nej paub tias kuv tsis pom ib
yam tsim nyog raug txim nyob hauv nws."
5 Yes Xus tawm los sab nraud, nws ntoo
lub kauj pos thiab hnav lub tsho ntev liab
tshiab, ces Pis Las Tos hais rau lawv tias :
"Nej ntsia tus neeg no."
6 Thaum cov thawj leej choj thiab cov
zov keeb pom Yes Xus, lawv nthe nthe hais tias :
"Muab dai saum ntoo cuam ! Muab dai saum ntoo cuam !"
Pis Las Tos hais rau lawv tias :
"Nej coj nws mus, nej muab nws dai
saum ntoo cuam. Vim tias kuv tsis pom
ib yam tsim nyog raug txim nyob hauv nws."
7 Cov Yus Das teb rau Pis Las Tos tias :
"Peb muaj ib Txoj Cai, raws li Txoj Cai
ntawd, mas nws yuav tsum tuag, vim nws
tsa nws ua Tswv Ntuj Leej Tub."
8 Thaum Pis Las Tos hnov lo lus ntawd,
mas nws haj yam ntshai. 9 Ces nws rov
chaws mus hauv lub tsev txiav txim. Nws
hais rau Yes Xus tias :
"Koj nyob qhov twg tuaj ?"
Tab sis Yes Xus tsis teb ib lo lus rau nws
li. 10 Pis Las Tos thiaj hais rau Yes Xus tias :
"Koj tsis hais lus rau kuv. Koj puas paub
hais tias kuv muaj hwj huam tso tau koj
mus, thiab muaj hwj huam muab koj dai saum ntoo cuam ?"
11 Yes Xus teb hais tias :
"Yog koj tsis tau txais hwj huam saum
ntuj los, mas koj yuav ua tsis tau dab tsi
rau kuv. Vim li ntawd, tus muab kuv rau
koj, nws muaj ib qho txhaum loj dua."
12 Txij ntawd los, Pis Las Tos nrhiav
kev tso Yes Xus. Tab sis cov Yus Das
nthe nthe hais tias :
"Yog koj tso tus neeg ntawd mus, mas koj
tsis yog Xes Ntxas phooj ywg. Leej twg
tsa nws ua vaj, mas nws sawv tiv Xes Ntxas."
13 Thaum Pis Las Tos hnov cov lus no,
nws kom lawv coj Yes Xus tawm mus
sab nraud. Ces Pis Las Tos mus zaum
saum lub theej kiab txiav txim, ntawm
qhov chaw hu ua Tshav Txiag Zeb, lus
Hes Nplaws hais tias Nkas Npas Thas.
14 Hnub ntawd, yog Hnub Npaj ua lub
Ntees Hla. Thaum ntawd kwv yees ze
kaum ob teev tav su. Pis Las Tos hais rau
cov Yus Das tias :
"Nej ntsia nej tus vaj."
15 Cov Yus Das nthe nrov nrov tias :
"Muab tua ! Muab tua ! Muab dai saum ntoo cuam !"
Pis Las Tos hais rau lawv tias :
"Kuv yuav muab nej tus vaj dai saum ntoo cuam lod ?"
Cov thawj leej choj teb hais tias :
"Peb tsuas muaj Xes Ntxas ua peb tus vaj xwb."
16 Ces Pis Las Tos muab Yes Xus rau
lawv, kom lawv coj nws mus dai saum ntoo cuam.
Lawv thiaj li coj Yes Xus mus.
17 Yes Xus kwv nws tus ntoo cuam.
Nws tawm mus txog qhov chaw hu ua
"Khauj Khaum Taub Hau", uas lus Hes
Nplaws hu ua "Nkos Nkos Thas."
18 Lawv muab nws dai rau saum ntoo
cuam nyob ntawd. Lawv muab ob tug
neeg dai saum ntoo cuam xws li nws
thiab, ib tug nyob ib sab, Yes Xus nyob
nruab nrab. 19 Pis Las Tos sau ntawv
rau saum ib daim txiag ; nws kom muab
tso saum tus ntoo cuam. Cov npe ntawv
saum daim txiag sau hais tias : Yes Xus
Nas Xas Les, cov Yus Das tus vaj.
20 Coob leej Yus Das nyeem cov lus
saum daim txiag, vim qhov chaw uas
lawv muab Yes Xus dai saum ntoo cuam
nyob ze lub nroog, thiab lawv sau ua lus
Hes Nplaws, lus Las Tis Nas, thiab lus
Hes Las. 21 Cov thawj leej choj Yus
Das hais rau Pis Las Tos tias :
"Koj tsis txhob sau tias :
Cov Yus Das tus vaj, yuav tsum sau tias
"Tus ntawd hais tias : Kuv yog cov Yus Das tus vaj."
22 Pis Las Tos teb hais tias :
"Qhov kuv sau, mas twb sau tas lawm."

23 Thaum cov tub rog muab Yes Xus dai
saum ntoo cuam tas, lawv muab Yes Xus
cov ris tsho faib ua plaub tsw, ib tsw rau
ib tug tub rog. Lawv muab lub tsho ntev
faib, tab sis lub tsho ntev tsis muaj leej
leeg, yog tsho ntos ua ib daig xwb mus
rau nram taw. 24 Cov tub rog sib tham tias :
"Peb txhob muab lub tsho ntev dua, peb
twv saib leej twg yuav tau lub tsho ntawd."
Ua li mas tshwm sim raws li Ntawv sau cia tias :
Lawv sib faib kuv cov khaub
ncaws, lawv twv saib leej twg yuav tau kuv cov ris tsho.
Cov tub rog tau ua li ntawd.
25 Yes Xus niam thiab nws niam tus
niam hluas, nrog Mab Liab uas yog Khos
Pas poj niam, thiab Mab Liab Mas Ntas
Las, lawv sawv ze tus ntoo cuam.
26 Yes Xus pom nws niam, thiab pom
tus thwj tim uas nws nyiam sawv ze nws
niam, ces nws hais rau nws niam tias :
"Niad, tus ntawd yog koj tus tub."
27 Thiab Yes Xus hais rau tus thwj tim tias :
"Tus ntawd yog koj niam."
Txij lub sij hawm ntawd los, tus thwj tim
coj Mab Liab mus nyob hauv nws tsev.

28 Ua li ntawd tas, nws paub tias zaum
no ib puas tsav yam tiav tas lawm, nws
hais tias : "Kuv nqhis dej", kom xwv
muaj raws li Ntawv sau tseg. 29 Muaj ib
hub kua qaub puv nkaus nyob ntawd.
Lawv muab ib thooj rwb tub kua qaub
chob rau ib tug ntsis pas nroj his xaus cev
mus rau Yes Xus qhov ncauj. 30 Thaum
Yes Xus haus qhov kua qaub tas, nws hais tias :
"Ib puas tsav yam tiav tas lawm."
Ces Yes Xus nyo taub hau, nws tso nws
tus ntsuj plig tawm mus.
31 Hnub ntawd yog Hnub Npaj, mas cov
Yus Das tsis xav cia cov tuag lub cev dai
saum ntoo cuam hnub Xas Npas Tos, vim
tias hnub Xas Npas Tos ntawd yog ib lub
hnub nyoog loj. Cov Yus Das thov Pis

704
Las Tos kom muab cov neeg dai saum
ntoo cuam ob sab ceg lov thiab muab
lawv lub cev txo nqes los.
32 Cov tub rog thiaj tuaj muab thawj tug
ob sab ceg lov, thiab muab lwm tus uas
nrog nws dai saum ntoo cuam ob sab ceg
lov. 33 Thaum lawv los txog ntawm Yes
Xus, lawv pom nws twb tuag lawm, lawv
tsis muab nws ob sab ceg lov, 34 tab sis
ib tug tub rog xuas nws rab hmuv hno
Yes Xus phab tav, tam sis ntawd ib co
ntshav thiab ib co dej tawm los.
35 Tus uas tau pom qhov ntawd ua pov
thawj hais. Nws ua tim khawv hais qhov
tseeb, nws paub tias qhov nws hais muaj
tiag. Nws hais tej ntawd kom nej ntseeg.
36 Tej xwm no tshwm sim kom muaj
raws li Ntawv sau cia tias :
Nws cov pob txha tsis lov ib tug li.
37 Tseem muaj lwm lo lus hauv Ntawv
hais tias :
Lawv yuav ntsia tus uas lawv nkaug.

38 Thaum tej xwm ntawd tshwm tuaj tas,
Yos Xes nyob As Lis Mas Tias tuaj thov
Pis Las Tos kom kheev nws txo Yes Xus
lub cev. Pis Las Tos tso lus rau Yos Xes.
Ces Yos Xes mus txo Yes Xus lub cev.
Yos Xes yog Yes Xus ib tug thwj tim, tab
sis nws tsis pub luag tej paub vim nws
ntshai cov Yus Das. 39 Nis Kos Des
Mos kuj tuaj thiab. Nis Kos Des Mos yog
tus uas thaum chiv thawj, nws tuaj cuag
Yes Xus hmo ntuj. Nws nqa ib cov tshuaj
qhwv tuag tuaj : yog txab txiv yoov xyaw
txab xyab phij, kwv yees hnyav li ib puas
choj. 40 Lawv txo Yes Xus lub cev los,
lawv xuas tej pluaj hlab ntaub pleev
tshuaj tsw qab los qhwv nws lub cev,
raws li cov Yus Das kev cai tu zam. 41
Nyob ntawm thaj chaw uas luag muab
Yes Xus dai saum ntoo cuam, muaj ib lub
vaj. Nyob hauv lub vaj ntawd muaj ib lub
ntxa tshiab uas tseem tsis tau tso ib tug
tuag rau hauv li. 42 Vim tias hnub
ntawd yog cov Yus Das Hnub Npaj, thiab
lub ntxa ntawd nyob ze, ces lawv muab
Yes Xus zwm rau hauv lub ntxa ntawd.

**NrhiavTswvNtuj** 29th March 2013, 7:16 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°22

Re: COV ZAJ NYEEM-Xyoo C 2012-13

Post NrhiavTswvNtuj 29th March 2013, 7:16 pm

COV ZAJ NYEEM HNUB TIM 30/03/13
Hnub 7 Ntshiab, Hmo ua Hmoov Hla

Zaj Nyeem Ib:Hauv Paus: 1, 1 – 2, 2

Thawj zag piav txog Tswv Ntuj tsim
ntuj tsim teb

1 Thaum chiv lub keeb, Tswv Ntuj
tsim lub ntuj thiab lub ntiaj teb,
2 mas lub ntiaj teb tseem tsis tau tsheej
ntiaj teb thiab tsis muaj dab tsi nyob hauv
li. Qhov tsaus ntuj nti npog lub qhov ntuj
dub nciab. Tswv Ntuj nthwv cua kiv
nplawm ntws saum nplaim dej.

2 1 Lub ntuj thiab lub ntiaj teb yog
tsim los zoo li no, thiab tas txhua
yam nyob rau hauv. 2 Tswv Ntuj ua nws
txoj num tiav tas rau hnub xya. Ces hnub
xya nws thiaj so, vim nws ua nws txoj
num tiav tas. 3 Tswv Ntuj foom lus zoo
rau hnub xya thiab muab hnub xya ua
hnub ntshiab, vim nws ua nws txoj num
tsim ntuj tsim teb tiav tas ces hnub ntawd nws so.

4a Zaj kwv huam piav txog lub ntuj thiab
lub ntiaj teb, thaum ntuj tsim teb raug,
mas yog zoo li saum no.

4b Thaum lub caij HUAB TAIS Tswv
Ntuj tsim lub ntiaj teb thiab lub ntuj,
5 tseem tsis tau muaj ib tug me yub ntoo,
ib tug nroj tsuag tuaj li, vim HUAB TAIS
Tswv Ntuj tseem tsis tau ua kom los nag
rau ntiaj teb, thiab tseem tsis tau muaj tib
neeg los cog tej av. 6 Tab sis muaj dej
txhawv hauv av los ywg tas nrho daim npoo av.

7 HUAB TAIS Tswv Ntuj muab ib thooj
av nplaum los puab ua tib neeg. HUAB
TAIS Tswv Ntuj tshuab pa rau hauv tib
neeg qhov ntswg, ces tib neeg ciaj ua ib tug muaj sia.

8 HUAB TAIS Tswv Ntuj cog tau ib lub
vaj nyob Es Dees, nyob sab hnub tuaj.
Nws muab tus txiv neej uas nws tau puab
tso rau hauv lub vaj. 9 HUAB TAIS
Tswv Ntuj ua kom txhua yam ntoo uas
zoo saib thiab zoo noj tuaj hauv lub vaj
thaj av. Tus ntoo muaj txoj sia tuaj nyob
hauv nruab nrab lub vaj, thiab tus ntoo
uas paub qhov zoo qhov phem. 10 Ib tug
dej txhawv hauv Es Dees ntws mus ywg
lub vaj. Tus dej ntawd ncau ua plaub ceg.
11 Thawj tus dej, hu ua Dej Pis Soos.
Nws chev hla thoob lub teb chaws Has
Vis Las uas muaj kub. 12 Hom kub teb
chaws ntawd yog tseem kub. Kuj muaj
ib hom txab ntoo zoo thiab muaj hom pob
zeb dub muaj nqis nyob ntawd.
13 Tus dej ob hu ua Dej Ntsis Hoos.
Nws chev ncig lub teb chaws Kus Saws.
14 Tus dej peb hu ua Dej Tis Nkis : nws
ntws nyob As Xws teb sab hnub tuaj. Tus
dej plaub yog tus Dej Aws Fas Tes.
15 HUAB TAIS Tswv Ntuj coj tus txiv
neej mus nyob hauv lub vaj Es Dees kom
nws cog lub vaj thiab saib lub vaj.
16 HUAB TAIS Tswv Ntuj qhia tus txiv neej li no :

"Koj noj tau cov txiv txi ntawm tas txhua
tsob ntoo hauv lub vaj no tib si. 17 Tiam
sis cov txiv txi ntawm tus ntoo paub qhov
zoo thiab qhov phem, mas koj txhob noj.
Yog koj noj hnub twg, mas hnub ntawd koj yuav tuag."

18 HUAB TAIS Tswv Ntuj hais tias :
"Cia txiv neej nyob ib leeg mas tsis zoo.
Kuv yuav ua ib tug pab nws kom phim nws."

19 HUAB TAIS Tswv Ntuj thiaj muab
av los puab tas puas tsav yam tsiaj qus
thiab tas puas tsav yam noog ya saum
ntuj. Nws coj los rau tus txiv neej xyuas
saib nws yuav tis npe li cas rau. Txhua
yam tsiaj yuav muaj lub npe raws li tus
txiv neej tis rau. 20 Tus txiv neej tis npe
rau tas txhua hom tsiaj nyeg, rau cov
noog ya saum ntuj, thiab rau tas txhua
hom tsiaj qus, tiam sis nws nrhiav tsis tau
ib tug pab nws thiab phim nws.
21 HUAB TAIS Tswv Ntuj tso ib tug
dab ntub hlob laum tus txiv neej, ces nws
tsaug zog lawm. Tswv Ntuj rho nws ib
tug tav tawm los, nws rov kaw lub qhov
zoo li qub. 22 HUAB TAIS Tswv Ntuj
muab tus tav uas nws rho ntawm tus txiv
neej los puab ua ib tug poj niam. Tswv
Ntuj coj los rau tus txiv neej saib. 23 Tus
txiv neej nqua suab hlo tias :
"Zaum no, tus no yog tseem txha ntawm
kuv txha thiab tseem nqaij ntawm kuv
nqaij tiag ! Tus no yuav hu ua 'poj niam,'
vim tus no tawm ntawm txiv neej los !"
24 Vim li no txiv neej thiaj tso niam tso
txiv tseg, mus npuab nws tus poj niam,
ces nkawd ua ib lub cev nqaij xwb.
25 Thaum ntawd, tus txiv neej thiab tus
poj niam nkawd ob leeg nyob liab qab,
tiam sis nkawd ib leeg tsis txaj muag rau ib leeg.

Zaj Nyeem 2:Hauv Paus 22, 1-13.15-18
Has Nplas Has txi Ntuj.

1 Thaum tej xwm no dhau tas
lawm, Tswv Ntuj sim Has Nplas
Has siab. Nws hu tias :
"Has Nplas Has ! Has Nplas Has !"
Has Nplas Has teb tias :
"Kuv nyob ntawm no !"
2 Tswv Ntuj hais tias :
"Coj koj leej tub twm zeej His Xas Has
uas koj hlub kawg, koj coj nws mus kom
txog lub teb chaws Mos Lis Yas. Nyob
ntawd koj yuav muab nws txi rau kuv
saum ib lub roob uas kuv yuav qhia rau koj."
3 Tag kis, Has Nplas Has sawv ntxov,
nws nog nra rau nws tus luj, nws coj ob
tug tub txib thiab nws tus tub His Xas
Has nrog nws mus. Nws phua ib co taws
npaj mus ua thaj txi ntuj, ces nws sawv
kev mus rau thaj chaw uas Tswv Ntuj qhia rau nws.
4 Hnub peb, Has Nplas Has tsa muag
ntsia pom thaj chaw ntawd tseem nyob deb.
5 Has Nplas Has hais rau nws ob tug tub txib tias :
"Neb nrog tus luj nyob ntawm no. Kuv
tus me nyuam wb mus kom txog tid, wb
yuav hawm Ntuj, wb mam rov los ntawm neb."
6 Has Nplas Has muab cov taws txi Ntuj
nog rau nws tus tub His Xas Has ris, hos
nws nqa cov hluav taws thiab rab riam,
ces nkawd ob leeg ua ke mus.
7 His Xas Has nug nws txiv Has Nplas Has tias :
"Kuv txiv !"
Has Nplas Has teb tias :
"Me tub, koj hais dab tsi !"
His Xas Has hais ntxiv tias :
"Ua cas pom hluav taws thiab cov taws
xwb, ua li tus yaj yuav coj los hlawv txi
Ntuj nyob qhov twg ?"
8 Has Nplas Has teb tias :
"Me tub, Tswv Ntuj mam li muab tus yaj
uas yuav txi Ntuj rau wb."
Ces nkawd ob leeg taug kev mus ntxiv.
9 Thaum nkawd tuaj txog thaj chaw uas
Tswv Ntuj tau qhia nws, Has Nplas Has
tsa ib lub thaj rau ntawd thiab nws muab
cov taws mus teeb rau saud. Nws muab
nws tus tub His Xas Has pav, ces nws
muab tso rau saum cov taws saum lub thaj
txi Ntuj. 10 Has Nplas Has tsa tes mus
nthos rab riam yuav coj los tua nws tus
tub. 11 Tiam sis HUAB TAIS tus Tshiab
hu saum ntuj tuaj rau nws tias :
"Has Nplas Has ! Has Nplas Has !"
Has Nplas Has teb tias :
"Kuv nyob ntawm no !"
12 Tus Tshiab hais tias :
"Txhob tsa koj txhais tes rau saum tus me
nyuad ! Txhob ua dab tsi phem rau nws !
Zaum no kuv paub hais tias koj hwm
Tswv Ntuj tiag, vim koj tsis yig, koj
tseem muab koj leej tub twm zeej los txi rau kuv."
13 Has Nplas Has tsa muag ntsia pom ib
tug laug tshis uas ob tug kub daig hauv ib
koog pos. Ces nws mus muab tus laug
tshis los hlawv txi Ntuj hloov nws tus tub chaw.

Zaj Nyeem 3: Kev Tsiv 14, 15 – 15, 1a
Cov His Xas Lais hla Dej Ntuj Liab.

15 HUAB TAIS hais rau Mais Xes tias :
"Vim li cas koj thiaj hu kuv cuag li
ntawd ? Koj hais rau cov His Xas Lais
kom lawv rov sawv kev mus ntxiv.
16 Koj yuav tsa koj rab pas thiab xyab koj
txhais tes rau saum dej ntuj, koj yuav faib
dej ua ob sab, kom cov His Xas Lais tau
taug kev qhuav qhawv hauv qab thu dej
mus. 17 Kuv yuav ua kom cov Hais
Nkws Tos lub siab tawv qhawv tuaj, lawv
yuav caum cov His Xas Lais qab hla hauv
qab thu dej mus thiab, ces kuv yuav siv
Fas Las Oos thiab nws cov tub rog, nws
cov tsheb rog thiab cov tsav tsheb los ua
kom kuv nto koob meej. 18 Thaum kuv
siv Fas Las Oos thiab nws cov tsheb rog
thiab cov tsav tsheb ua kom kuv nto koob
meej lawd, cov Hais Nkws Tos mam
yuav paub tias kuv yog HUAB TAIS tiag."

19 Tswv Ntuj tus Tshiab uas mus ua
tsoom His Xas Lais ntej, hloov chaw mus
thaiv tom lawv qab : ces tus ncej huab
nyob ntawm lawv hauv ntej txav chaw
mus nyob tom lawv qub qab. 20 Nws
mus nyob nruab nrab kem tog Hais Nkws
Tos ntawm tog His Xas Lais. Twv huab
dub nciab tsaus nti ib hmos thaiv lawv,
ces hmo ntawd ib hmos, ib tog txav tsis ti
ib tog li. 21 Mais Xes tsa tes rau saum
dej ntuj, ces HUAB TAIS ua cua hlob
hlob ntsawj toob fab tuaj thawb cov dej ib
hmos, qab thu dej tawm qhuav qhawv los,
hos dej faib ua nyob ob sab. 22 Cov His
Xas Lais nkag hauv hiav txwv, lawv tsuj
av qhuav qhawv mus, nyob ntawm lawv
sab xis thiab sab laug muaj ob lub phab
ntsa dej. 23 Cov Hais Nkws Tos caum
lawv qab : Fas Las Oos cov nees, cov
tsheb rog thiab cov tsav tsheb nkag mus
hauv dej ntuj caum cov cov His Xas Lais.
24 Thaum yuav kaj ntug, HUAB TAIS
nyob saum tus ncej huab hluav taws, ntsia
pom cov Hais Nkws Tos. Nws ua kom
cov Hais Nkws Tos tau ntshai kawg.
25 Nws ua kom lawv cov log tsheb daig
thiab ntog qeeb qeeb. Cov Hais Nkws Tos hais tias :
"Peb khiav mus deb ntawm cov His Xas
Lais vim HUAB TAIS pab lawv tawm
tsam ntaus cov Hais Nkws Tos !"
26 HUAB TAIS hais rau Mais Xes tias :
"Koj tsa tes rau saum dej ntuj, kom dej
ntws rov los nyab cov Hais Nkws Tos
thiab lawv cov tsheb rog thiab cov tsav tsheb tib si."
27 Mais Xes tsa tes rau saum dej ntuj,
ces thaum pib kaj ntug, dej ntws rov los
nyob qhov qub chaw. Cov Hais Nkws
Tos tig khiav rov qab, tiam sis dej nphau
nphwv los npog lawv, HUAB TAIS ua
kom lawv ntxeev zom zaws rau hauv dej
ntuj. 28 Cov dej nphau rov los nyob
qhov qub, los npog cov tsheb thiab cov
tsav tsheb Hais Nkws Tos uas tau nkag
mus hauv qab thu dej caum cov His Xas
Lais, tsis dim ib tug li. 29 Hos cov His
Xas Lais tau taug kev qhuav nyob hauv
plawv dej ntuj, cov dej ua ob sab phab
ntsa nyob ntawm lawv sab xis thiab sab
laug. 30 Hnub ntawd, HUAB TAIS
cawm cov His Xas Lais dim ntawm cov
Hais Nkws Tos txhais tes. Cov His Xas
Lais pom cov Hais Nkws Tos tuag pawg
lug ntawm ntug dej ntuj. 31 Cov His Xas
Lais pom HUAB TAIS lub peev xwm uas
nws siv los tiv yeej cov Hais Nkws Tos.
Tsoom pej xeem sawv daws hwm HUAB
TAIS. Lawv tso siab rau HUAB TAIS
thiab rau nws tus tub txib Mais Xes.
1 Ces Mais Xes thiab tsoom tub
ki His Xas Lais hu nkauj cav txog HUAB TAIS li no :
"Kuv hu nkauj cav txog HUAB TAIS,
vim nws yeej thiab nws muaj koob meej,
nws tau muab tus nees thiab tus caij nees
pov rau hauv hiav txwv."

Zaj Nyeem 4: His Xais: 54, 5-14

5 Vim koj tus txiv yog tus tsim koj. Nws
lub npe yog tus HUAB TAIS Nyob Siab.
Tus txhiv koj yog His Xas Lais tus
Ntshiab, nws hu ua Tswv Ntuj kav lub ntiaj teb.
6 Muaj tseeb ! Koj tus plig nyob hauv
txoj kev lwj siab, xws li tus poj niam uas
luag tso pov tseg. HUAB TAIS rov hu
koj. Tus Tswv Ntuj hais tias :
"Tus poj niam uas yus yuav thaum hluas,
yus puas yuav ntiab tau nws ? 7 Kuv tso
koj tseg ib nyuag me ntsis, tab sis kuv lub
siab hlub koj heev, kuv rov sau koj.
8 Kuv tau npau taws heev rau koj, kuv
thiaj nraim kuv lub ntsej muag ib nyuag
chim, tab sis kuv lub siab npuab koj mus
tas ib txhis, kuv khuv leej koj. Tus
HUAB TAIS txhiv koj, hais li ntawd.
9 Thaum Nos Hes tseem nyob, kuv cog
lus tias dej yuav tsis nyab ntiaj teb ntxiv.
Nyem no, kuv rov cog lus zoo li ntawd,
kuv yuav tsis npau taws rau koj, Yes Lus
Xas Les kuv yuav tsis tso hem thawj rau koj.
10 Cov roob txawj txav mus, cov hauv
toj txawj vau, tab sis kuv lub siab npuab
koj yuav tsis nrug deb koj, kuv kev cog
lus nyob thaj yeeb yuav tsis ntshaus. Tus
HUAB TAIS khuv leej koj hais li ntawd."
11 Yes Lus Xas Les, koj tau raug kev
txom nyem loj kawg ! Cov cua daj cua
dub tuaj nplawm koj. Tsis muaj leej twg
nplij koj. Koj ntsia saib ! Kuv yuav
muab pob zeb ci ua ntsa zeb xov koj,
yuav muab pob zeb xia los ua taw ntsa,
yuav muab pob zeb dawb ua cov qhov rooj.
12 Kuv yuav muab nyiaj muab kub los
ua ib lub yeej xov koj. Kuv yuav muab
tsom iav los ua koj cov rooj loog. 13 Koj
cov tub sawv daws ua HUAB TAIS thwj
tim. Koj cov tub yuav nyob hauv txoj
kev thaj yeeb loj. 14 Kev ncaj yuav ua
kom koj nyob khov kho. Koj yuav nyob
deb ntawm txoj kev raug luag quab yuam.
Koj yuav tsis muaj kev txhawj xeeb ntxiv.
Kev txhawj ntshai yuav tsis txav los ze ntawm koj.

Zaj Nyeem 5: His Xais 55, 1-11
1 Nej sawv daws uas nej nqhis
dej, nej tuaj cuag lub qhov dej.
Nej cov uas tsis muaj nyiaj txiag, nej tuaj
mas ! Nej muas nplej los ua ncuav mov !
Nej noj, tsis tas yuav them nyiaj. Nej
muas cawv txiv ntoo muas mis nyuj, tsis
tas yuav them dab tsi.
2 Ua cas nej yuav siv nyiaj los muas tej
yam tsis yog mov noj ? Ua cas nej siv
cov nyiaj nqe zog los muas tej yam tsis ua
kom nej tsau plab ? Nej mloog kuv mas !
Ces nej yuav tau noj tej yam qab, nej
yuav tau tej yam txhiam xws qab xis nej
lub ncauj. 3a Nej tig ntsej los mloog kuv
mog ! Nej mloog kuv, ces nej tus plig
yuav muaj txoj sia nyob.
3b Kuv yuav nrog nej cog ib lo lus nyob
mus ib txhiab ib txhis, raws li cov txiaj
ntsim kuv hais ruaj tias kuv yuav muab rau Das Vis.
4 Yam li kuv tau tsa Das Vis los ua ib
tug tim khawv rau cov haiv neeg, ua ib
tug ntaus thawj qhia cov haiv neeg.
5 Yog zoo li no, Yes Lus Xas Les, koj
yuav hu ib lub kuj cuab uas koj tseem tsis
tau paub, ces lub kuj cuab ntawd yuav
khiav tuaj cuag koj, yog vim HUAB
TAIS koj tus Tswv Ntuj, yog vim His
Xas Lais tus Ntshiab, nws ua kom koj nto koob meej.

6 Nej nrhiav HUAB TAIS mog ! Nyem
no yog lub caij zoo ntsib nws. Nws nyob
ze lawm, nej hu txog nws mog !
7 Tus siab phem, nws yuav tso nws txoj
kev phem tseg. Tus siab nkhaus tso nws
lub tswv yim lim hiam tseg. Nws yuav
tig los cuag HUAB TAIS. HUAB TAIS
yuav khuv leej nws. Nws cia li los cuag
Tswv Ntuj, vim Tswv Ntuj lub siab zam dav.
8 Nej zaj tswv yim tsis zoo li kuv zaj.
Nej txoj kev tsis zoo li kuv txoj kev. Yog
HUAB TAIS lus ceeb toom.
9 Lub ntuj nyob siab dua lub ntiaj teb,
kuv txoj kev nyob siab dua nej txoj kev
npaum li ntawd. Thiab kuv zaj tswv yim
nyob siab dua nej zaj tswv yim.
10 Cov nag, cov daus uas poob saum ntuj
los, yog lawv tsis tau pub dej rau ntiaj teb
haus, mas lawv tsis rov mus saum ntuj.
Cov nag thiab cov daus ua kom cov noob
lwj thiab nthaw kaus, ua kom lub ntiaj teb
txi txiv rau tus tseb, pub mov rau neeg
noj, ces cov nag mam rov mus lawm saum ntuj.
11 Cov lus tawm ntawm kuv lub ncauj
los kuj zoo li ntawd thiab. Nws tsis tau
ua hauj lwm, mas nws tsis rov los cuag
kuv. Kuv lo lus tsis tau leg qhov kuv xav,
mas nws tsis rov los cuag kuv. Kuv lo lus
tsis tau ua tiav qhov kuv xa nws mus ua,
mas nws tsis rov los cuag kuv."

Zaj Nyeem 6: Npas Lwv: 3, 9-15.32 – 4, 4

9 Tig mloog, His Xais Lais, cov lus ciaj sia, cuab ntsej los kawm kev thoob tsib.
10 Tim li cas His Xais Lais, koj thiaj poob rau yeeb ncuab av ? Nyob laus rau pej kum teb ?
11 Ua cas cia tej tub tuag kis yus ? Yuav mus ciaj neej nrog cov nyob dab teb ?
12 Vim koj tau tso lub hauv paus thoob tsib pov tseg.
13 Koj lam taug Tswv Ntuj xub ke, koj yuav nyob thaj yeeb mus ib txhis.
14 Los nrhiav lub chaw kev thoob tshib nyob, kev txawj kev ntse thiaj paub lub chaw siav ntev, koj lub chaw pom kev thiab kev nyob thaj yeeb.
15 Leej twg pom qab kev thoob tsib chaw nyob, nkag tau hauv nws txhab kub ?
32 Tus paub puas tsav yam thiaj paub kev, tus muaj tswv yim thiaj nrhiav tau. Nws twb npaj av tos lawm puag ntxov ub, muab tsiaj txhu los nyob.
33 Nws xa qhov pom kev tuaj, thiaj txawm qhov pom kev ; thaum nws hu, qhov pom kev mloog nws laim mos nyoos.
34 Tej hnub qub ntsais tsias hom khaj zov hmo.
35 Nws tsa suab hu, cov hnub qub teb : “Peb nyob ntawm no !” Lawv hom khaj ntsais tsias qhua tus tsim tau lawv.
36 Yog nws peb tus Tswv Ntuj, dua nws tsis muaj lwm tus pauv tau.
37 Nws nrhiav tau txoj xub ke txawj ntse, nws qhia nws tus tub txib Yas Kos, His Xais Lais, tus nws hlub.
38 Vim li, nws tshwm sim los saum daim av, los ciaj leej tib neeg.
1 Kev thoob tsib yog phau ntawv teev Tswv Ntuj lus qhuab qhia, txoj cai nyob mus ib txhis ; tus twg mloog nws txais txoj sia, tus twg tso nws pov tseg ploj tuag tas ;
2 Thim xav los cuag nws, Yas Kos, tsawv nkaus nws, nrog nws mus taug txoj kev kaj, mus ntsib nws kev pom kev.
3 Txhob xyeeb koj lub koob meej rau lwm tus neeg, koj teej tug rau lub teb chaw pej kum neeg.
4 Peb hmoov zoo His Xais Lais, peb twb paub ntsoov yam xis Tswv Ntuj siab.

Zaj Nyeem 7: Es Xes Kias 36, 16-17a.18-28
16 Kuv txais HUAB TAIS ib lo
lus li no : 17 Neeg leej tub,
thaud, tsoom His Xas Lais nyob txawm
hauv lawv teb chaws. Lawv tus yam
ntxwv thiab lawv tej hauj lwm ua kom
lawv lub teb chaws sw tas.
18 Kuv thiaj tau tso kuv lub siab npau
rau lawv, vim lawv ua luag roj ntsha ntws
nyob hauv lawv teb chaws, lawv muab tej
tus mlom dab los ua kom lawv teb chaws sw.
19 Kuv ua kom cov His Xas Lais sib
ncaim mus nyob hauv nruab nrab cov kuj
cuab. Kuv muab lawv w mus rau pej
kum teb. Kuv tau txiav txim rau lawv
raws lawv tus yam ntxwv thiab lawv tes dej num.
20 Lawv tuaj nyob pej kum teb, lawv
tseem ua puas kuv lub npe ntshiab. Lawv
ua kom pej kum haiv neeg hais tias : Yog
HUAB TAIS haiv neeg, lawv tawm hauv
nws lub teb chaws tuaj nyob qhov no."
21 Tab sis kuv txuag kuv lub npe
ntshiab, uas His Xas Lais ua kom puas
rau hauv cov kuj cuab ua lawv tuaj nyob.
22 Koj mus hais rau tsoom His Xas Lais tias :
"Huab Tais Tswv Ntuj hais li no : His
Xas Lais tsev neeg, tsis yog vim nej ces
kuv thiaj ua zoo li no, yog vim kuv lub
npe ntshiab uas nej tau ua puas nyob hauv
cov kuj cuab uas nej tuaj nyob. 23 Kuv
yuav ua kom kuv lub npe loj ntshiab tuaj,
vim nej tau ua kom kuv lub npe puas
nyob hauv cov kuj cuab nej tuaj nyob.
Cov kuj cuab thiaj yuav paub tias kuv yog
HUAB TAIS. HUAB TAIS Tswv Ntuj
hais zoo li ntawd. Kuv yuav ua kom kuv
lub siab ntshiab ci tuaj rau lawv qhov
muag pom. 24 Thaum ntawd kuv yuav
thau nej hauv cov kuj cuab los, kuv yuav
sau nej ntawm pej kum teb los nyob ua
ke, kuv yuav coj nej rov los nyob hauv
nej thaj av. 25 Kuv yuav hliv dej ntshiab
ntws tuaj saum nej, ces nej yuav huv tuaj.
Kuv yuav so nej tej yam sw thiab nej tej
mlom dab pov tseg kom nej huv tuaj.
26 Kuv yuav pub ib lub siab tshiab rau
nej, kuv yuav dawj nej lub siab tawv li
zeb, kuv yuav cog ib lub siab muag li
nqaij nyob hauv nej lub cev.
27 Kuv yuav muab kuv lub tswv yim rau
hauv nej. Kuv yuav ua kom nej mus raws
kuv tej lij choj, thiab kom nej coj kuv tej
kev cai. 28 Nej yuav tau nyob hauv lub
teb chaws uas kuv muab rau nej phaj txiv
thiab phaj yawg. Nej yuav yog kuv haiv
neeg. Kuv yuav yog nej tus Tswv Ntuj."

Zaj Nyeem 8: Los Mas 6, 3-11
3 Peb cov uas tau txais lub Cim
Ntxuav nyob hauv Yes Xus Pleev, mas
yog peb txais lub Cim Ntxuav nyob hauv
Yes Xus txoj kev tuag. 4 Thaum peb
txais lub Cim Ntxuav peb nrog Yes Xus
tuag, peb nrog nws mus hauv nws lub ntxa.
5 Ua li mas peb yuav coj ib lub neej
tshiab xws li Leej Pleev sawv hauv yeeb
ceeb rov los, vim Leej Txiv lub hwj huam
tau tsa nws. 6 Peb nrog Leej Pleev
koom. Peb nrog Leej Pleev tuag, peb
thiaj yuav nrog nws sawv rov los. Peb
paub tseeb tias peb muab peb tus qub
neeg nrog Yes Xus ntsia saum ntoo cuam,
vim peb xav muab peb lub cev xib rau
kev txhaum tua. Mas peb thiaj tsis ua
kev txhaum cov qhev ntxiv. 7 Vim tias
tus neeg tuag, tsis zwm rau txoj kev txhaum ntxiv.
8 Tab sis, yog peb nrog Leej Pleev tuag
mas peb ntseeg tias peb yuav nrog nws
muaj txoj sia. 9 Peb paub tias Leej Pleev
sawv hauv qhov tuag los lawm, nws yuav
tsis rov tuag dua, txoj kev tuag tsis muaj
cuab kav tuaj raug nws ib zaug ntxiv.
10 Nws tuag ib zaug kom txoj kev
txhaum tuag. Nyem no, nws ciaj rov los
nws npuab Tswv Ntuj mus li.
11 Nej, mas nej kuj zoo li ntawd thiab :
nej yuav saib tias nej tus neeg txhaum
tuag lawm, tshuav nej tus neeg tshiab
npuab Tswv Ntuj uas muaj txoj sia nyob
hauv Huab Tais Yes Xus Pleev mus li.

Lus Kas Ntawv Moo Zoo: 24, 1-12

1 Thawj hnub pib lub lis piam,
thaum kaj ntug txoog, cov poj
niam mus tom ntxa. Lawv nqa cov tshuaj
tsw qab uas lawv tau npaj.
2 Lawv pom daim txiag zeb dov tawm
ntawm lub rooj ntxas lawm. 3 Lawv
chaws mus hauv, lawv nrhiav tsis tau
Huab Tais Yes Xus lub cev. 4 Lawv xav
tsis thoob vim li cas. Ces thaum ntawd,
ob tug neeg tshwm plaws los ntawm
lawv, nkawd hnav tsoos ci dawb vog.
5 Cov poj niam ntshai, lawv dauv ntsej
muag rau hauv av. Ob tug neeg ntawd
hais rau lawv tias :
"Ua cas nej nrhiav Tus Neeg Ciaj hauv
cov neeg tuag ? 6 Nws tsis nyob ntawm
no. Nws sawv rov los lawm. Nej nco
ntsoov txog qhov nws tau hais rau nej,
thaum nws tseem nyob Nkas Lis Lais.
7 Nws hais tias : Neeg Leej Tub yuav
tsum raug luag muab rau hauv cov neeg
txhaum txhais tes, raug dai saum ntoo
cuam. Hnub peb, nws yuav sawv rov los."
8 Ces lawv rov nco txog Yes Xus cov lus.
9 Cov poj niam rov ntawm ntxa mus
tsev. Lawv qhia tej yam ntawd tib si rau
Pab Kaum Ib thiab rau lwm cov. 10 Yog
Mab Liab Mas Ntas Las, Zag, thiab Mab
Liab uas yog Yas Kos niam. Lwm cov
poj niam uas nrog lawv ua ke, kuj hais ib
yam li ntawd rau cov Hauv Paus Xa Lus.
11 Tab sis cov Hauv Paus Xa Lus saib tej
lus no zoo li neeg tsis meej pem hais, ces
lawv tsis ntseeg cov poj niam.
12 Pob Zeb sawv tsees, nws khiav mus
tom ntxa. Nws khoov xauj hauv, nws
tsuas pom cov hlua pav xwb. Nws rov
mus tsev, nws xav tsis thoob txog tej
xwm uas tshwm tuaj zoo li ntawd.

**NrhiavTswvNtuj** 5th April 2013, 9:35 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°23

Re: COV ZAJ NYEEM-Xyoo C 2012-13

Post NrhiavTswvNtuj 5th April 2013, 9:35 am

COV ZAJ NYEEM HNUB TIM 31/03/13
Hnub chiv Huab Tais sawv rov los, Xyoo C

Zaj nyeem 1 : Hauj Lwm 10, 34a.37-43

34 Pob Zeb qhib ncauj hais tias :
“Qhov tseeb, kuv zeem tau tias Tswv Ntuj
tsis saib dej ua ntu saib ntsej ua plhu,

37 Nej twb tau hnov txog tej xwm uas
tshwm sim tuaj nyob hauv xeev Yus Das :
yam li thaum Zam tshaj tias sawv daws
yuav txais lub cim ntxuav, mas nej kuj
hnov hais txog Yes Xus nyob Nas Xas
Les. Nws pib qhia hauv xeev Nkas Lis
Lais. 38 Tswv Ntuj tau pleev nws. Tswv
Ntuj muab Leej Ntuj Plig Ntshiab thiab
muab hwj huam rau nws. Nws mus ncig
teb ncig chaw, nws ua zoo rau sawv daws.
Nws kho cov neeg poob hauv dab phem
tes kom lawv zoo. Vim Tswv Ntuj nrog nws nyob.
39 Peb ua tim khawv pom tas puas tsav
yam Yes Xus tau ua nyob hauv cov Yus
Das lub teb chaws thiab nyob Yes Lus
Xas Les. Cov Yus Das tau ua phem rau
nws : lawv muab nws dai saum ib tug
ncej kom nws tuag. 40 Tab sis, hnub tim
peb, Tswv Ntuj tsa nws sawv rov qab los
lawm thiab pub kom nws tawm los xyuas
cov tim khawv uas nws xub tau xaiv ua
ntej. 41 Tsis yog tas tsoom pej xeem tau
pom nws. Cov tau pom nws yog peb.
Thaum nws sawv hauv cov tub tuag rov
los, mas peb tau nrog nws noj thiab haus
ua ke. 42 Nws qhia peb kom peb tshaj
rau tsoom pej xeem thiab ua pov thawj
zeem tias nws yog tus uas Tswv Ntuj tsa
los txiav txim rau cov neeg ciaj thiab cov neeg tuag.
43 Tas cov yaj saub ua tim khawv txog
Yes Xus tias leej twg ntseeg txog nws,
mas leej twg cov txhaum yuav daws tas
nyob hauv nws lub npe."

Zaj nyeem 2 : Kos Los Xais 3, 1-4
Peb npuab Yes Xus peb thiaj tau txoj sia tshiab.

1 Nej pom xeeb nrog Leej Pleev
sawv rov los lawm, mas nej nrhiav
tej yam nyob txheej saud, vim txheej saud
yog Leej Pleev qhov chaw nyob, nws
zaum ntawm Tswv Ntuj phab xis. 2 Nej
lub siab yuav dai dhuam rau tej yam nyob
txheej saud, txhob dai rau tej yam nyob
ntiaj teb no. 3 Vim tias, nej tuag lawm,
hos nej txoj sia nrog Leej Pleev tsiv nraim
hauv Tswv Ntuj. 4 Leej Pleev yog nej
txoj sia : thaum nws yuav tawm los rau
pom xyeem, mas nej kuj yuav nrog nws
tawm los muaj hwj chim.

Zam Ntawv Moo Zoo 20,1-9 lub ntxa qhuav.

1 Thawj hnub pib lub lis piam,
thaum sawv ntxov, ntuj tsis tau
kaj, Mab Lias Mas Ntas Las mus tom
ntxa. Nws pom daim txiag zeb tshem
ntawm lub ntxa lawm. 2 Mab Liab Mas
Ntas Las khiav mus cuag Xis Moos Pob
Zeb thiab lwm tus thwj tim, uas yog tus
Yes Xus nyiam. Nws hais rau nkawd
tias : "Lawv nqa Huab Tais tawm hauv
ntxa lawm, peb tsis paub xyov lawv coj
nws mus tso qhov twg lawm."

3 Pob Zeb tawm plaws mus, lwm tus
thwj tim kuj tawm plaws thiab, nkawd
mus tom ntxa. 4 Nkawd ob leeg ua ke
khiav mus, tab sis lwm tus thwj tim
khiav nrawm dua Pob Zeb, nws khiav ua
ntej, nws xub mus txog tom ntxa. 5 Nws
khoov mus xauj, nws pom tej hlab ntaub
nyob ntawd ; tab sis nws tsis chaws mus
hauv. 6 Ces Xis Moos Pob Zeb lawv tus
thwj tim qab mus txog, nws chaws mus
hauv lub ntxa. Nws pom cov hlab ntaub
nyob ntawd, 7 hos daim ntaub qhwv
taub hau kauv cia nyob lwm qhov, tsis
xyaw cov hlab ntaub. 8 Ces lwm tus
thwj tim uas xub mus txog ntawm lub
ntxa mam li chaws mus hauv. Nws pom
ces nws ntseeg. 9 Vim lawv tseem tsis
tau to taub tias Yes Xus yuav sawv hauv
cov tuag rov los raws li Ntawv qhia.

**NrhiavTswvNtuj** 5th April 2013, 10:01 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°24

Re: COV ZAJ NYEEM-Xyoo C 2012-13

Post NrhiavTswvNtuj 5th April 2013, 10:01 am

COV ZAJ NYEEM HNUB TIM 07/04/13
Hnub chiv 2 Caij Hla, Xyoo C

Zaj Nyeem Ib: Hauj Lwm: 5, 12-16

Cov Hauv Paus Xa Lus ua hwj huam yees ntxwv.

12 Ntuj siv cov Hauv Paus Xa Lus ob
txhais tes los ua ntau lub cim thiab ntau
yam hwj huam yees ntxwv nyob hauv
tsoom pej xeem. Cov ntseeg koom siab
koom ntsws tuaj nyob hauv lub qab ruv
tsev Xas Los Moos. 13 Tsis muaj leej
twg muaj cuab kav tuaj nrog lawv ua ke.
Tab sis tsoom pej xeem cav lus zoo txog
lawv. 14 Cov ntseeg los ntxiv coob zuj
zus rau Huab Tais, tej pab txiv neej thiab
poj niam coob kawg... 15 Ces lawv coj
cov neeg mob tuaj tso ntawm kev, lawv
tso cov mob pw saum tej lub txaj thiab tej
daim lev, kom thaum Pob Zeb hla los
mus, nws tus duab ntxoov tus puav neeg
mob. 16 Tsoom neeg coob coob ntawd
tuaj ntawm cov zos tsis deb ntawm Yes
Lus Xas Les tuaj. Lawv coj cov neeg
mob thiab cov neeg raug dab tsis huv tuaj.
Sawv daws puav leej zoo tas huv si.

Zaj nyeem Ob: Qheb yav tom ntej 1, 9-11a.12-13.17-19

9 Kuv yog Zam, nej tus kwv, uas nrog
nej raug kev iab kev khwv, nrog nej ua
siab ntev siab tawv, nyob hauv Yes Xus
thiab nyob hauv lub ceeb tsheej.
Thaum ntawd kuv nyob hauv lub pov
txwv Pas Mos, vim Tswv Ntuj Lo Lus,
thiab vim txoj kev ua tim khawv txog Yes
Xus. 10 Hnub ntawd yog Huab Tais
hnub, kuv lub tswv yim feeb rau nruab
yeeb. Ces kuv hnov ib lub suab nrov,
xws li lub hom tom kuv nraub qaum tuaj tias :
11 “Koj sau tej yam koj pom rau hauv ib
phau ntawv txog tej yam tshwm sim niaj hnub
no thiab tej yam yuav tshwm rau lwm hnub.

12 Kuv tig mus ntsia lub suab hais lus
tuaj rau kuv ntawd. Kuv tig mus, ua ciav
kuv pom xya tus ncej kub txawb teeb.
13 Cov ncej ntawd nyob ncig ib tug zoo
li Tib Neeg ib Leeg Tub. Nws hnav ib
lub tsho ntev, sia ib txog siv kub ntawm duav.

17 Kuv pom nws, kuv vau hlo rau ntawm
nws ko taw, xws li kuv tuag lawm. Tab
sis nws muab nws txhais tes xis los chwv
kuv, thiab nws hais tias:
“Txhob ntshai ! Yog kuv ! Kuv yog tus
Thawj, tus Kawg, tus Muaj Txoj Sia.
18 Kuv tau tuag lawm ; tab sis nyem no,
kuv muaj txoj sia mus li txheej dhau
txheej. Kuv tuav tus yawm sij hauv txoj
kev tuag thiab hauv tub tuag teb. 19 Koj
yuav sau tej yam koj pom, yam li tej uas
tab tom tshwm sim nyem no, thiab tej uas
yuav tshwm sim tuaj yav pem suab.

Zam Ntawv Moo Zoo: 20, 19-31

19 Tib hnub ntawd thaum tsaus ntuj, uas
yog thawj hnub pib lub lis piam, cov
qhov rooj hauv qhov chaw cov thwj tim
nyob kaw tas, vim lawv ntshai cov Yus
Das. Yes Xus los sawv hauv nruab nrab,
nws hais rau lawv tias :
"Nej nyob kaj lug."
20 Thaum Yes Xus hais lo lus ntawd tas,
nws muab nws ob txhais tes thiab nws
phab tav rau lawv saib. Cov thwj tim
pom Huab Tais, lawv zoo siab kawg.
21 Yes Xus rov hais rau lawv tias :
"Nej nyob kaj lug ! Kuv xa nej mus xws li
Leej Txiv xa kuv tuaj."
22 Yes Xus hais li tas, nws tshuab pa rau
lawv, nws hais rau lawv tias :
"Nej txais Leej Ntuj Plig Ntshiab.
23 Nej daws txhaum rau leej twg, mas
nws cov txhaum yuav daws. Nej tsis
daws leej twg cov txhaum, mas nws cov
txhaum yuav nyob."

24 Tos Mas yog ib tug hauv pab Kaum
Ob, nws tseem hu ua Dis Dws Mos thiab.
Thaum Yes Xus tawm los, mas nws tsis
nrog cov thwj tim nyob. 25 Lwm cov
thwj tim hais rau nws tias :
"Peb pom Huab Tais lawm !"
Ces Tos Mas hais rau lawv tias :
"Yog kuv tsis pom lub qhov txhab ntsia
hlau nyob hauv nws ob txhais tes, yog
kuv tsis muab kuv tus ntiv tes ntxig lub
qhov ntsia hlau, thiab yog kuv tsis muab
kuv txhais tes rau ntawm nws phab tav,
mas kuv tsis ntseeg."
26 Yim hnub tom qab, cov thwj tim rov
nyob hauv tsev dua. Tos Mas kuj nrog
lawv nyob thiab. Cov qhov rooj puav leej
kaw tas. Yes Xus tawm los sawv hauv
nruab nrab, nws hais rau lawv tias :
"Nej nyob kaj lug !"
27 Ces Yes Xus hais rau Tos Mas tias :
"Cev koj ntiv tes rau ntawm no, koj ntsia
kuv ob txhais tes. Cev koj txhais tes los,
muab rau hauv kuv phab tav. Koj txhob
ua neeg tsis ntseeg ntxiv, koj ntseeg mog."
28 Tos Mas teb rau Yes Xus tias :
"Kuv tus Huab Tais, Kuv tus Tswv Ntuj."
29 Yes Xus hais rau Tos Mas tias :
"Vim koj pom kuv, mas koj thiaj ntseeg.
Cov uas tsis tau pom tab sis lawv ntseeg,
mas lawv txoj hmoov zoo."
30 Yes Xus tseem tau ua lwm cov cim
ntau nyob ntawm cov thwj tim xub ntiag,
uas tsis tau muab sau rau hauv phau
ntawv no. 31 Tau muab cov cim no sau
tseg kom nej ntseeg tias Yes Xus yog
Leej Pleev, Tswv Ntuj Leej Tub. Nej
ntseeg ces nej yuav muaj txoj sia nyob
hauv nws lub npe.

**NrhiavTswvNtuj** 12th April 2013, 11:30 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°25

Re: COV ZAJ NYEEM-Xyoo C 2012-13

Post NrhiavTswvNtuj 12th April 2013, 11:30 am

COV ZAJ NYEEM HNUB TIM 14/04/2013
( Hnub chiv 3 lub Caij Hla, Xyoo C )

Zaj 1 : Hauj Lwm 5, 27b-32.40b-41

Tus Thawj leej choj nug cov Hauv Paus Xa Lus tias :
28 "Peb twb txwv nej, tsis kheev nej siv
lub npe ntawd los qhia. Tab sis nej tseem
qhia nej zaj ntawd mus thoob Yes Lus
Xas Les. Nej puas xav kom tus neeg
ntawd cov ntshav rov qab poob los rau saum peb ?"
29 Ces Pob Zeb nrog cov Hauv Paus Xa Lus teb tias :
"Yuav tsum mloog Tswv Ntuj lus zoo dua
mloog neeg lus. 30 Tus Yes Xus uas nej
muab nws dai saum ib tug ncej kom tuag,
mas peb cov yawg koob tus Huab Tais tsa
nws sawv rov los lawm. 31 Nws yog tus
uas Tswv Ntuj txhais tes xis tsa nws siab
kom nws ua tus Thawj thiab tus Cawm
Seej. Yog vim nws, mas Tswv Ntuj thiaj
pub txoj kev thov txhaum thiab kev zam
txhaum rau His Xas Lais. 32 Peb yog
cov tim khawv pom tej yam ntawd. Leej
Ntuj Plig Ntshiab uas Tswv Ntuj pub rau
cov neeg mloog nws lus kuj ua tim khawv
txog tej yam ntawd thiab."

Lawv kom luag muab cov Hauv Paus Xa Lus
nplawm tas, lawv txwv tsis pub tuav txog
Yes Xus lub npe los qhia. Ces lawv tso
cov Hauv Paus Xa Lus mus. 41 Cov
Hauv Paus Xa Lus tawm ntawm lub rooj
txwj laus Xas Nes Nrees, lawv zoo siab
vim Ntuj saib lawv tsim nyog raug luag
hiam vim Lub Npe.

Zaj 2 : Tshwm Plaws 5,11-14

11 Thiab kuv ntsia, kuv hnov coob leej xa moo thiab cov tsiaj
thiab cov laus neeg vij vog lub theej kiab ua suab sab thiab
lawv coob li tom cas txhiab txhiab vam vam leej,
12 Hais suab nthe nqho : “Tsim nyog tus Yaj raug txi txais hwj huam,
txiaj ntsim thiab thoob tsib thiab lub zog thiab
muaj tsim thiab kev nto moo thiab kev qhuas,
13 Tas nrho txhua yam saum ntuj thiab saum
daim av thiab nyob nruab yeeb thiab hauv hiav txwv
thiab txhua nrho kuv hnov hais tias : Rau tus zaum
saum lub theej kiab thiab rau Leej Yaj kev qhuas,
kev muaj tsim thiab nto koob meej thiab zog loj mus txhiab niaj puas xyoo”
14 Plaub tug tsiaj hais tias : “Ua li” Cov laus neeg nyo nris thiab pe nkaus hawm.

Zam Ntawv Moo Zoo 21,1-25
1 Dua li ntawd, Yes Xus rov
tawm los rau cov thwj tim pom
nyob ntawm ntug dej ntuj Tis Npes Lias.
Thaum Yes Xus tawm los mas muaj zoo
li no. 2 Cov nyob ua ke ntawd yog Xis
Moos Pob Zeb, Tos Mas uas hu ua Dis
Dws Mos, Nas Tas Nais uas nyob Kas
Nas hauv xeev Nkas Lis Lais, Ntxes Npes
Dais ob tug tub, thiab ob tug thwj tim
ntxiv. 3 Xis Moos Pob Zeb hais rau lawv tias :
"Kuv yuav mus puav ntses."
Lawv hais rau nws tias :
"Peb nrog koj mus thiab."
Lawv tawm mus nce rau hauv lub nkoj.
Hmo ntawd lawv puav tsis tau dab tsi li.
4 Thaum kaj ntug lawm, Yes Xus nyob
tim ntug dej. Tab sis cov thwj tim tsis
paub tias yog Yes Xus. 5 Yes Xus thiaj
hais rau lawv tias :
"Cov me nyuam, nej puas muaj dab tsi noj ?"
Lawv teb rau Yes Xus tias : "Tsis muaj."
6 Nws hais rau lawv tias :
"Nej pov vas rau ntawm lub nkoj sab xis,
nej yuav tau ntses."
Lawv thiaj pov vas mus, ces lawv rub tsis
tau lub vas rov los, vim mag tau ntses
ntau kawg. 7 Tus thwj tim uas Yes Xus
nyiam thiaj hais rau Pob Zeb tias :
"Yog Huab Tais !"
Xis Moos Pob Zeb hnov dheev tias yog
Huab Tais, nws muab ib daim khaub
ncaws khi ntawm duav, vim nws liab qab,
ces nws dhia mus hauv dej. 8 Lwm cov
thwj tim mam li caij nkoj thiab cab lub
vas puav ntses los. Lawv nyob tsis deb
ntawm ntug nqhuab lawm, kwv yees deb
li ob puas tshim. 9 Thaum lawv nqes los
txog saum av, lawv pom ib cub tawg thee
nyob ntawd, hos muaj ib co ntses tso rau

707
saud, thiab ib co ncuav mov. 10 Yes Xus
hais rau lawv tias :
"Nej nqa cov ntses me uas nej nyuam
qhuav puav tau los."
11 Xis Moos Pob Zeb nce mus hauv
nkoj, nws rub lub vas mag ntses loj puv
nkaus los rau saum av : tau ib puas tsib
caug peb tus ntses ! Txawm tias puav tau
ntses ntau npaum ntawd, tsis kav lub vas
tsis ntuag.
12 Yes Xus hais rau lawv tias :
"Nej los noj tshais."
Tsis muaj ib tug thwj tim muaj cuab kav
nug Yes Xus tias :
"Koj yog leej twg ?"
Vim lawv yeej paub tseeb tias yog Huab
Tais. 13 Yes Xus txav los muab cov
ncuav mov cev rau lawv, nws kuj muab
cov ntses cev rau lawv thiab.
14 Txij thaum Yes Xus sawv hauv cov
tuag rov los, mas nws tawm los rau cov
thwj tim pom, zaum no yog zaum peb.

15 Thaum lawv noj tshais tas, Yes Xus
hais rau Xis Moos Pob Zeb tias :
"Xis Moos, Zam tus tub, koj puas nyiam
kuv dua lawv cov ntawd ?"
Pob Zeb hais rau Yes Xus tias :
"Huab Tais, koj paub tias kuv nyiam koj tiag."
Yes Xus hais rau Pob Zeb tias :
"Koj coj kuv cov me nyuam yaj mus noj
zaub mog." 16 Yes Xus rov hais zaum ob tias :
"Xis Moos, Zam tus tub, koj puas nyiam kuv ?"
Pob Zeb hais rau Yes Xus tias :
"Huab Tais, koj paub tias kuv nyiam koj tiag."
Yes Xus hais rau nws tias :
"Koj zov kuv cov yaj mog."
17 Yes Xus tseem rov hais dua zaum peb
rau Pob Zeb tias :
"Xis Moos, Zam tus tub, koj puas nyiam kuv tiag ?”
Pob Zeb tu siab rau qhov Yes Xus hais
rau nws zaum peb tias : "Koj puas nyiam
kuv tiag ?" Pob Zeb hais rau Yes Xus tias :
"Huab Tais, koj paub tas ib puas tsav
yam, koj paub tias kuv nyiam koj tiag."
Yes Xus hais rau Pob Zeb tias :
"Koj coj kuv cov yaj mus noj zaub mog.
18 Kuv hais qhov muaj tseeb tiag rau
koj : Thaum koj tseem hluas zog, koj
muab koj txoj siv, koj sia koj, koj xav
mus qhov twg los koj mus koj. Tiam sis
thaum koj laus, koj yuav tsa tes cia ib tug
muab siv rau koj sia, cia luag coj koj mus
hauv qhov chaw uas koj tsis xav mus."
19 Yes Xus hais qhov ntawd qhia tias
Pob Zeb yuav tuag zoo li cas kom Tswv
Ntuj nto koob meej. Yes Xus hais li tas,
nws hais rau Pob Zeb tias : "Koj raws kuv mus."
20 Pob Zeb tig ntsia tom qab, nws pom
tus thwj tim uas Yes Xus nyiam lawv
nkawd qab. Yog tus uas thaum lawv noj
hmo, nws tig mus pheeb rau ntawm Yes
Xus hauv siab, thiab nug tias : 'Huab
Tais, tus muab koj rau luag yog leej twg'.
21 Pob Zeb pom tus thwj tim ntawd, Pob
Zeb hais rau Yes Xus tias :
"Huab Tais, tus ntawd ned ?"
22 Yes Xus hais rau Pob Zeb tias :
"Yog kuv xav kom nws nyob mus txog
hnub kuv rov los kuj xij, tsis yog koj hauj
lwm. Hos koj, mas koj raws kuv mus."
23 Lo lus no ncha mus hauv cov kwv tij
tias : 'Tus thwj tim ntawd yuav tsis tuag.'
Tab sis Yes Xus tsis tau hais rau Pob Zeb
tias : 'Nws yuav tsis tuag', Yes Xus tsuas
tau hais tias : 'Yog kuv xav kom nws
nyob txog hnub kuv rov los, kuj xij, tsis
yog koj hauj lwm.
24 Yog tus thwj tim ntawd ua tim khawv
txog tej xwm no thiab yog nws muab sau cia.
Peb paub tias nws cov lus ua pov thawj
muaj tseeb. 25 Tseem tshuav ntau yam
kawg uas Yes Xus tau ua, yog yuav sau ib
yam zuj zus tas huv tib si, mas kuv xav
tias lub ntiaj teb yuav ntim tsis tas cov
ntawv uas sau txog nws tej hauj lwm.

NTHUAV NTAWV NTSHIAB.

Rau hnub chiv tim 14 lub 4 hlis 2013

Tsoom neeg ntseeg Yes Xus thiab phooj ywg txhua leej,

Peb nyob hauv lis piam hnub chiv 3 lub caij Hla, vim peb tus Huab Tais Yes Xus tau tuag nthi mus zwm av. Tiam sis, Huab Tais Yes Xus sawv lis tsees hla plaws txoj kev tuag los ciaj sia nyob ib txhiab ib txhis li Tswv Ntuj. Peb yuav piav ob peb los txog cov thwj tim tau ntsib dheev Huab Tais Yes Xus ciaj sia raws li tsab ntawv Moo Zoo peb hnov hnub no.

Cov thwj tim yog cov xub ntseeg Yes Xus dua tej tag nrho. Cov neeg ntseeg thiab teev Yes Xus nyob ntiaj teb no, sawv daws puav leej txhawv los ntawm cov thwj tim Pob Zeb thiab Paj Lug lawv yog cov thawj thiab hauv paus kev ntseeg Yes Xus. Tiam sis, hauv tag nrho tsoom neeg ntseeg thiab teev Yes Xus nyob ntiaj teb no, tsuas muaj tib pab thiaj li yog cov mloog lus, coj raws li cov thwj tim qhuab qhia thaum chiv keeb los txog niaj hnub no. Lwm pab lwm pawg neeg teev Yes Xus tau ncaim thiab tsis hwm Pob Zeb thiab Paj Lug ua hauv paus lawm. Nyias txia nyias ua nyias pab nyias pawg ntseeg teev Yes Xus tsis npuab, tsis hwm Pob Zeb thiab Vaj Qhia tus sawv Pob Zeb lub chaw. Peb yuav tsum zwm Vaj Qhia, npuab Yes Xus lub Koom Txoos, peb txoj kev ntseeg thiaj tsis yuam kev. Vim Vaj Qhia yog tus sawv taj Pob Zeb thaum chiv keeb los txog niaj hnub no. Npoj neeg ntseeg tau txais Yes Xus txiaj ntsim yog npoj neeg ntseeg zwm rau Vaj Qhia. Muaj ntau pab neeg ntseeg thiab teev hawm Yes Xus hnov Yes Xus cov lus hauv zaj Moo Zoo no tag los tsis mloog Yes Xus cov lus hais no. Lawv ua ywj lawv siab nyiam, tsis mloog Vaj Qhia lus. Tsuas yog cov neeg ntseeg Kav Tos Liv thiaj mloog thiab hwm Yes Xus cov lus thiab ua raws li Yes Xus hais tseg. Yes Xus qhuab qhia dab tsi ? Yes Xus tau hais li no rau Pob Zeb : “18 Kuv hais rau koj, koj yog Pob Zeb, saum lub pob zeb no, kuv yuav txhim kuv lub koom txoos ; dab teb cov rooj vag yuav tsis muaj zog tiv nws. MT 16,18.” Yes Xus tus kheej ua tus xaiv Pob Zeb los ua thawj saib Yes Xus lub Koom Txoos, coj haiv neeg ntseeg Yes Xus mus txog hnub ntiaj teb kawg, tam li tus tswv zov nws pab yaj nog zaub. Thaum Yes Xus raug hiam tuag nthi sawv tsees ciaj sia los, Yes Xus tuaj ntsib cov thwj tim, Yes Xus rov qab hais ntsees rau Pob Zeb peb zaug sib law raws li zaj ntawv Moo Zoo hnub no : “Yes Xus hais rau Xis Moos Pob Zeb : “Xis Moos, Zam leej tub, koj puas hlub kuv tshaj cov no ?” Nws teb tias : “Huab Tais, koj paub tias kuv nyiam koj.” Yes Xus hais rau nws : “Coj kuv cov nyuam yaj nog zaub.” 16 Nws hais zaum ob ntxiv : “Xis Moos, Zam leej tub, koj puas hlub kuv?” Nws teb tias : “Huab Tais, koj paub tias kuv nyiam koj.” Yes Xus hais rau nws : “Ua tswv saib kuv cov yaj.”17 Nws hais ntxiv zaum peb : “Xis Moos, Zam leej tub, koj puas nyiam kuv?” Pob Zeb poob siab nthav vim yog zaum peb nws hais : “Koj puas nyiam kuv?” Nws thiaj li teb : “Huab Tais, koj paub tag, koj paub tias kuv nyiam koj.” Yes Xus hais nws : “Coj kuv cov yaj nog zaub. Z 21,15-17” Vaj Qhia yog tus sawv taj Pob Zeb lub chaw saib Yes Xus lub Koom Txoos niaj hnub no. Tim li cas cov neeg ntseeg Yes Xus tsis zwm Vaj Qhia, pob ntseg tsis to qhov los ua cas tsis hnov Yes Xus cov lus no, lawv tseem muaj cai tiv Vaj Qhia ? Saib nej ne, nej ho xav li cas ?
Peb yuav tsum paub lub ntsiab hauv txoj kev ntseeg Yes Xus. Tos peb los ntseeg Yes Xus vim muaj Yes Xus cov thwj tim tuaj tshaj Yes Xus lub Moo Zoo rau peb paub, peb thiaj los ntseeg tau Yes Xus. Cov thwj tim Pob Zeb thiab Paj Lug lawv yog cov mus tshaj Yes Xus lub Moo Zoo rau ib zeej tsoom neeg pej kum teev dab qhuas thoob ntiaj teb thiab coj lawv los ntseeg Yes Xus, thiaj pib muaj cov neeg ntseeg thiab teev Yes Xus huam vam coob zuj zus. Tiam sis, muaj cov neeg ntseeg tsis mloog Yes Xus cov lus qhuab qhia no, lawv thiaj tsis hwm Vaj Qhia. Yog lawv mloog Yes Xus lus, lawv yuav tsis lam sawv tiv Vaj Qhia. Tus neeg tsis hwm Vaj Qhia tus sawv Pob Zeb lub chaw saib Yes Xus lub Koom Txoos, nws kuj tsis hwm Pob Zeb. Tus tsis hwm Pob Zeb kuj yog tsis hwm Yes Xus, ua cas tseem muaj ntsej muag hais tias yog neeg ntseeg Yes Xus.
Vim li ntawd, peb yuav ceev faj tsis txhob ua cov neeg ntseeg Yes Xus lawv tej xib hwb ub tej xib hwb no qab. Tej xib hwb sawv los tsim tej pawg neeg ntseeg Yes Xus tsis yog cov zoo tswv zov yaj : “12 Tus tub zog tsis yog tus zov tsiaj, cov yaj tsis yog nws li, pom hma tuaj, nws tso tes khiav puam chawj cov yaj, hma tuaj txhom tau ua yaj tawg tas. Z10,12” Peb yuav tsum npuab Yes Xus lub Koom Txoos. Kev npuab Yes Xus lub Koom Txoos yog mloog Vaj Qhia thiab mloog cov Tswv Qhia lus. Vim Vaj Qhia yog tus sawv Pob Zeb chaw, Pob Zeb yog tus Yes Xus tsa coj Yes Xus pab neeg ntseeg. Pob Zeb thiab Vaj Qhia muaj Yes Xus txiaj ntsim coj tsoom neeg ntseeg Yes Xus. Cov neeg ntseeg zwm rau Vaj Qhia : yam li cov tswv qhia, cov txiv plig, cov neeg ntseeg sawv daws puav leej tau Yes Xus cov txiaj ntsim. Yog li ntawd, txiv Vaj Qhia muaj txiaj ntsim txuas tau qaum ntuj lus los qhuab qhia peb tib neeg ntiaj teb. Piv txwv lub txiaj ntsim zoo li no : Hnub 08.12.1854, txiv vaj qhia Pie 9 txiav tus txhooj hwm Mab Liab ib txwm xeeb ntshiab huv rau ib tsoom ntseeg Kav Tos Liv “Ineffabilis Deus, Dogme de l’Immaculée Conception.” Tus txhooj no, tsis muaj nyob hauv Ntawv Ntshiab tiag. Tiam sis, vim Vaj Qhia muaj Yes Xus txiaj ntsim. Tus txhooj Vaj Qhia tau txiav rau tsoom neeg ntseeg Kav Tos Liv coj no tsis yuam kev thiab raug lub ntsiab kev ntseeg mus ib txhiab ib txhis. Muaj ib lub cim tuaj qaum ntuj tuaj txhawb Koom Txoos Kav Tos Liv kev hwm Mab Liab ib txwm xeeb ntshiab huv. Tau plaub xyoos tom qab, hnub xiab 25.03.1858 nyob Lourdes, muaj ib tug ntxhais Bernadette hnub nyoog 14 xyoos tau pom ib tug poj niam tshwm tuaj thiab qhia nws lub npe rau Bernadette hais tias : “Que soy era immaculada councepciou, Kuv yog tus ib txwv xeeb ntshiab huv” Yog tej lub cim qhia rau peb ntseeg tias Vaj Qhia muaj Yes Xus txiaj ntsim nrog tau qaum ntuj sib txuas lus : “19 Kuv cia qaum ntuj cov yawm sij rau koj, yam koj khi saum av yuav khi nkaus saum qaum ntuj thiab yam twg koj daws hlo saum av kuj yuav daws hlo saum qaum ntuj MT 16,19.” Vaj Qhia cov lus Vaj Qhia hais nyob ntiaj teb muaj nqes nyob saum qaum ntuj. Cov lus Vaj Qhia hais yog hais qaum ntuj lus. Vaj Qhia saib lub Koom Txoos twg, lub Koom Txoos ntawd yog Yes Xus lub Koom Txoos. Yog peb tsis zwm rau Vaj Qhia, peb tsis nyob hauv Yes Xus lub Koom Txoos. Yog peb zwm Vaj Qhia ua tswv, peb thiaj li yog Yes Xus cov yaj.

Ib tsoom neeg ntseeg thiab phooj ywg, yuav kom peb txoj kev ntseeg thiab teev hawm Yes Xus muaj txiaj ntsim, peb yuav tsum txuas Huab Tais Yes Xus lub Koom Txoos. Huab Tais Yes Xus tsa Pob Zeb ua txiv saib nws lub Koom Txoos thiab Vaj Qhia tus sawv los taj Pob Zeb coj Yes Xus pab yaj. Vaj Qhia nyob qhov twg, Yes Xus lub Koom Txoos nyob ntawd. Lub Koom Txoos Kav Tos Liv tsis yog Vaj Qhia lub Koom Txoos, hos yog Yes Xus lub Koom Txoos. Vaj Qhia tsuas yog Yes Xus tus tub txib xwb. Nej leej twg tsis npuab Yes Xus lub Koom Txoos, tus ntawd yuav tsis muaj Yes Xus txiaj ntsim pab nws.

11.04.2013 Cwj Vuam Chiv