Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Suav neeg tuaj saib, txij hnub 17/09/2010 los mus.


    HUAB TAIS NTUJ LUB TXIAJ NTSIM MUAJ NQES TAS NRHO

    Share

    Bao X Mary
    Phooj Ywg
    Phooj Ywg

    Messages : 180
    Date d'inscription : 2011-07-09

    HUAB TAIS NTUJ LUB TXIAJ NTSIM MUAJ NQES TAS NRHO

    Post  Bao X Mary on 28th October 2011, 4:58 pm

    HUAB TAIS NTUJ LUB TXIAJ NTSIM MUAJ NQES TAS NRHO.
    NWS TXOJ KEV DAWB HUV, MUAJ HWM HUAM, KEV HLUB, KEV KHUV LEEJ NEEG, LOJ TAS NRHO.

    Kuv yog ib tug neeg ntseeg Catholic thaum yau los kuv niam kuv txiv ntseeg ntuj thaum kuv tsis tau yug. Txij thaum kuv yug los kuv niam kuv txiv yeej coj kuv mus teev Ntuj. Kuv nco ntsoov thaum me los tias txoj kev ntseeg Ntuj yog ib txoj kev kaj siab tas nrho. Kuv zoo siab uas kuv niam kuv txiv twb xaiv Tswv Ntuj thaum kuv tsis tau yug, yog ib yam zoo tshaj plaws. Thaum kuv yug los kuv cia li pom txoj kev kaj xwb, yog ib lub txiaj ntsim muaj nuj nqe tas nrho.

    Hnub no, kuv yuav los pias txog Ntuj lub Txiaj Ntsim uas muaj nuj nqes tas nrho, uas Ntuj tau pub rau kuv thiab cawm kuv, pub rau sawv daws tau hnov thiab tau paub.

    TSWV NTUJ TAU CAWM KUV DIM NTAWM TXOJ KEV TSAUS NTUJ

    Yav thaum kuv tseem hluas, kuv tsis tau los muab tag kuv lub siab los npuab Tswv Ntuj, nrhiav Tswv Ntuj kom paub Nws zoo thiab tso siab rau Nws tag. Mas kuv lub siab me heev, kuv ntshai mus xyuas cov neeg tas sim neej tom tej tsev txias. Thaum twg kuv hnov lub npe tsev txias, thiab hais tias muaj ib tug neeg tag sim neej mas kuv lub siab poob nthav, ntshai tshaj plaws li. Thiab yog txoj kev muaj toj ntxa mas kuv tsis kav mus li. Yog taug tau ib txoj kev es pom dheev toj ntxas mas kuv lub siab poob nthav, kuv txhais tes nyem kiag, tawm hws, thiab kuv lub siab txias zias. Kuv ntsia li tsaus ntuj nti, tsis muaj ib tug neeg yuav paub thiab pab tau kuv txoj kev tsaus ntuj hauv kuv lub siab. Kuv ntsia mas lub ntiaj teb no cas yuav tsaus ntuj ua luaj, tsis muaj ib yam yuav ua kuv kaj siab li. Vim yog sab ntsuj plig lawm kuv muab tsis tau qhia rau neeg. Tsuas yog Tswvg Ntuj tib leeg thiaj paub xwb.

    Muaj ib hnub, muaj ib lub suab hais hauv kuv lub siab tuaj tias:
    “ tsuas yog Tswv Ntuj tib leej xwb thiaj yuav pab tau koj. Nws thiaj yuav cawm tau koj ntawm koj txoj kev ntshai, kev tsaus ntuj hauv koj lub siab. Nws yuav muab txoj kev pom kev, lub siab loj siab tawv rau koj.”

    Thaum ntawd, kuv thiaj ras dheev, kuv thiaj mus koom nrog pawg ntseeg teev Ntuj hu nkauj, kawm kev ntseeg txhua lub lis piam. Txij thaum kuv rau siab mus kawm txoj kev ntseeg nrog pawg ntseeg ntau zuj zus, ces tos kuv nco xwb kuv lub siab cia li kaj, kuv lub siab cia li loj. Kuv mus tsev txias los kuv tsis ntshai lawm. Kuv ib leeg mus tim tej toj ntxa los kuv lub siab cia li loj tsis ntshai dab tsi.Kuv ntsia pom lub ntiaj teb zoo nkauj xwb. Txhua lub sij hawm kuv ntseeg tias Tswv Ntuj yog tus tsim thiab ua tau puas tsav yam, Nws yog tus Tswv loj tshaj tsim lub ntuj lub teb, Nws nrog nraim kuv, kuv tsis ntshai dab tsi. Txij thaum ntawd los, kuv txoj kev xav hloov tsis zoo li qub. Nws hloov qhov tsaus ntuj los ua qhov pom kev. Yog vim Huab Tais Ntuj cawm kuv.
    Thaum ntawd los, ua rau kuv yim nyiam Tswv Ntuj ntau, thiab yim xav hu nkauj cav txog Nws, yim xav mus nrog pawg ntseeg kawm kev ntseeg, thiab hu nkauj ua ke. Ntuj lub Txiaj ntsim muaj nuj nqes tas nrho.

    Xyoo 2002 thaum lub 6 hli ib nrab ntawd uas yog lub National Hanca conference nyob rau St. Pau Minnesota ntawd. Kuv tau mus koom lub rooj Sab Laj ntawd. Kuv tau txais Ntuj lub Txiaj Ntsim uas muaj nqes tas nrhov pub rau kuv. Ua ntej thaum kuv tsis tau mus mas kuv lub siab ntxhov nyho, hos zoo li ib tau huab dub laum thiab nyob rawv hauv kuv lub taub hau, kuv ntsia qhov twg los tsaus ntuj nti, tsis muaj kev kaj siab li. Hos hauv kuv lub siab qhua qhawv zoo li tsis muaj ib teev dej nyob hauv li. Lub sij hawm ntawd, kuv txiv yawg mob heev Kws Tshuaj tsis lees khov yeej hais tias nyob tos tuag xwb, ces ncauj tsis hais los yeej paub tias yuav tau kev txom nyem xwb. Tsis hais los kua muag los, ntsia qhov twg los tsis muaj ib yam yuav ua rau kuv kaj siab tau li. Kuv ntsia kuv tsev neeg los zoo li tsis muaj leeg twg pab tau kuv kom thooj niag huab dub hauv kuv lub tau hau ploj mus li. Ua li cas los zoo li kuv pheej ntshaib nqhis ib ib yam uas tsis muaj leeg twg muab tau rau kuv li.
    Muaj ib hnub kuv hnov tias lawv muaj lub rooj Saj Laj loj sau siab nyob St. Mn lub 6 hli 2002 ntawd ces kuv thiaj thov Tswv Ntuj tias: “Tswv Ntuj, kuv nyuaj siab ua luaj no es thov koj ua kuv tus txiv lub siab kom nws kam kuv mus lub rooj Sau Siab ntawd mas, txawm kuv txiv yawg mob los thov koj qheb txoj hauv kev rau kuv mus mas.” Kuv txiv yawg mob pw xwb noj tsis taus tsis paub yuav ncaim lub sij hawm twg. Tab sis kuv tus txiv zoo siab hlo hais tias koj niam koj mus tsis ua cas, kuv twb nyob kuv mam saib mog. Ces kuv zoo siab hlo, ua rau kuv lub siab kaj lug tau ob peb hnub. Kuv ho rov xav tias tsam kuv mus es txiv yawg tag lub neej kuv tsis pom thiab ces ho xav tias kav liam txhob mus lawm no. Ces thaum rov txiav siab li ntawd mas tauv huab dub rov los nyob saum kuv taub hau, hos kuv rov qab ntxhov siab tshaj plaws li. Kuv mloog li tsau ntuj nti xwb ua li cas los tsis kaj siab li. Kuv rov qab hais tias ab, txiav siab rov qab mus, ces siab kaj lug lawm thiab. Kuv thiaj tias xij peem nyob ntawm Tswv Ntuj xwb kuv txiav siab mus kiag txhob ua ob siab tsis zoo. Mas kuv siab kaj tshaj qhov kaj li lawm.

    Thaum Ntawd kuv cov me nyuam tseem me thiab mus li ib Lis Piam tseg kuv cov txiv tub nyob nrog kuv txiv yawg mob mob. Kuv sau ib tsab ntawd lo ntawm phab ntsa rau lawv tias: “ kuv mu ib Lis Piam diam nawb, nej nyob nej nco kuv ces nej nrog Huab Tais Ntuj tham, nej teev Ntuj ces peb nyob ua ke. Thiab nej saib yawg zoo zoo.”

    Kuv zoo siab hlo coj kuv ob tug me nyuam thiab nrog kuv tus niam hlob ob niam txiv thiab ib tug phooj ywg uas wb ib txwm sib pab hauv lub Koos Txoos mus lub rooj Sau Siab. Hmo peb mus txog ntua xwb, Xib Hwb Npuag Neeb Yaj hais kuv thiab kuv tus phooj Ywj hu ua Mos Suav Lwm Thoj kom wb mus ntsib Txiv Tswv Qhia Choo Thoj tuaj Nplog teb tuaj no. Thaum wb mus txog ntua, kuv tuav nkaus nws tes, “ kuv hnov ib lub zog tuag kiag li taws xob nkag rau kuv lub siab ua kuv quaj kiag tam sim ntawd, kuv tsis paub tias ua cas kuv quaj, ces Txiv Tswv Qhia cia li tuav kuv tes ib chim mam tso. Kuv hais rau nws tias ua cas kuv tuav koj tes es kuv hnov ib lub zog tuaj rau kuv es kuv cia li quaj, vim kuv zoo siab heev.

    Peb txawm mus Sau Siab tau 2-3 hnub ces Hnub Xya (Saturday) uas yog hnub Tim 23 ntawd peb los pw hauv ib tug Xib Hwb tsev. Lawv pua chaw ntawm chav nyob rau peb tag nrho pw ces kuv txawm tsis xav pw nrog lawv li. Kuv thov tias cia kuv mus pw hauv qab lawj es thiaj tsis sov no. Ces kuv tus txhais thiab kuv niam hlob tus ntxhais mus nrog kuv pw hauv qab lawj. Peb pw txog ib tag hmo. Thaum 3 teev kaj ntuj ntawd, kuv ua ib zaj npau suav phem ua rau kuv nyuaj siab heev li. Kuv tsim los kuv xav tias ntshai tsam tom tsev muaj teeb meem lawm. Ces kuv nyuaj siab heev li. Kuv thiaj thov Ntuj tam sim ntawm, Kuv hais zaj “ Peb Txiv, Koj nyob zoo Mab Liab, Kuv ntseeg Txog Tswv Ntuj tam sim ntawd. Kuv hais tias: “Huab Tais Tswv Ntuj, kuv nyuaj siab dhau lawm kuv thov muab tag kuv lub neej, lub siab, kuv tsev neeg, kuv txoj kev nyuaj siab no ces rau koj. Thov koj pab kuv.” Tam sim ntawd kuv tso plhuav ib puas tsav yam rau Tswv Ntuj ces kuv txawm rov qab pw. Kuv txawm hno li ib lub zog tuaj laum kiag kuv lub siab, laum laum txog thaum kuv hnov li kuv lub siab puv npo, ho kaj li kaj xwb tsis paub hais tias kaj tshaj qhov kaj li lawm. Thaum ntawd kuv qe muaj ces pom li ib tug txiv neeg hnav ib cev dawb pawg ho loj siab tab sis tsis pom lub ntsej muag, tsuas pom txij lub hauv siab rov hauv xwb. Hos yog kuv qheb muag ces kuv hnov cua tuaj ntxiag hos zoo li muab kuv nqa li kuv lub cev ya muaj muaj muaj zog. Ces kuv txawm hais tias: “ Kuv tus Huab Tais, ua koj tsaug cas koj yuav zoo ua luaj.” Kuv hais tsis tau dab tsis li vim kaj siab dhau lawm ces qhua tas zog xwb. Kuv hais tas zog tias, “As les lus yas, Kuv tus Huab Tais,” Hais tas zog li ntawd xwb kuv lub siab twb tsis tau tias yuav hawm Nws tab sis kuv txhais tes twb xub los hawm Nws lawm, kuv zoo siab tshaj qhov qhia tau, thaum ntawd kuv pom kuv tus ntsuj plig da kiag hauv pem teb hawm Tus Txiv Neeg ntawd, vim nws ntshiab huv dhau hwv lawm thiab muaj hwj huam tas nrho, ntshiab huv tshaj qhov qhia tau thiab hais tau.Ntiaj teb no tsis muaj ib yam yuav piv tau. Ces Kuv tsuas qhua tas zog thiab hais As les lus yas tas zog xwb.

    Li ib pliag kuv txawm hnov ib cov suab txiv neeg luag zom zaws tab sis tsis hnov tseeb. Cov luag zom saws sab tod tuaj, tus ntawd qhia rau kuv tias: yog coj Leej Ntshiab, vim lawm pom ib tug me nyuam zoo siab heev tau txais lub Txiaj Ntsim lawm lawv nrog zoo siab heev li. Ces peb sawv daws luag luag ntev loo ces kuv rov ntsia tus txiv neej ntawd mas ntshiab huv thiab muaj hwj huam tshaj qhov ntiaj teb qhia tau, thiab Nws txoj kev hlub loj tas nrho, ho nws txoj kev zoo mas tsis paub yuav qhia tau. Ces Nws txawm hais kuv tias: “ me ntxhais, koj coj Kuv txoj kev zoo, thiab yam uas tau tshwm sim rau koj hnub no mus qhia rau neeg mog.” Ces thaum ntawd kuv teb Nws tias: “kuv yog neeg txhaum, yuav ua cas kuv thiaj yuav coj mus qhia tau.” Ces thaum ntawd kuv xav txog kuv cov txhaum puag thaum xeev xwm ua neeg los txog lub sij hawm ntawd, kuv quaj pos muag nti, thaum ntawd mas kuv ntsia mas kuv twb tsis tsim nyog ib qhov li cov hmoov av uas nws tsuj. Kuv tus siab rau kuv cov txhaum tag nrhov, txhua yam txhaum mas tawm tas nrho tsis tshuav ib qhov li. Kuv quaj quaj… kuv ntshai tsam kuv ob tug ntxhais hnov, kuv mus xauj ob tug tsaug ob tug zog, ces kuv rov qab quaj dua, kuv quaj thiab tus siab tshaj plaws rau kuv cov txhaum, quaj txog thaum Nws hais tias: “me ntxhais, txaus lawm, tau lawm, txhob quaj lawm mog.” Kuv lub suab quaj thiaj tu nrho thaum ntawd, yog Nws tsis hais li ntawd mas quaj tsis paub ntsiag,vim kuv pom Nws lub Txiaj Ntsim txoj kev hlub, kev khuv leej neeg, kev ntshiab huv los tas nrho, tus siab rau kuv cov txhaum heev. Kuv haj tseem noog Nws hais tias: kuv xav pom Koj lub ntsej muag, Nws hais tias: “li no xwb tau lawm.” Kuv txawm pom ib tug poj niam zoo nkauj tshaj plaws hnav ib cev tiab ntev ntev npua ib txoj khiab taub hau xiav, hluas zoo nkauj tshaj qhov qhia tau los loo luag ntxhi, sawv kiag ntawm tus txiv neeg sab xiv. Tus Poj Niam ntawd lub siab Ntshiab thiab huv tshaj qhov qhia tau, nws ntsia ntsia kuv xwb.
    Nyob li ib pliag ces tus txiv neej hais rau kuv tias, me ntxhais, txaus lawm os, li nov xwb es koj mus so mog. Ces kuv teb tias ua li os. Ces ob tug txawm ploj lawm kuv pw qe muag kiag, ua cas kuv ho pom ib lub teeb ci ci loj zus tuaj rau kuv, cas kuv txawm pom li nyob saum cov huab ho zoo nkauj tshaj plaws, pom ib cov tib neeg coob coob hos lawv muaj tis dawb paug loj siab tshaj lawv lub taub hauv nyob ua kev, qhov chaw ntawd kaj tshaj, nthiab huv tshaj qhov qhia tau, ci ntsa iab hos zoo nkauj tshaj. Ces kuv txawm xav kiag tiag yog Ntuj lub Ceeb Tsheej lawm, yog Ntuj cov Tshiab lawm. Cev kuv saib saib lawv ib pliag ces plog lawm. Kuv tsis tsaug zog li lawm, kuv txawm xav tias puas yog kuv vwm. Kuv xav tsis yog, yog Tswv Ntuj tiag tiag li. Thaum ntawd yog 5 teev kaj ntuj lawm. Kuv cia li tos tsis taus kaj ntuj li lawm. Kaj ntuj xwb kuv sawv los piav qhia lawv sawv daws, lawv hais tias yog kuv nyuaj siab es kuv lam ua xwb no.Tab sis kuv tswm tsis tau kuv lub qhov ncauj lis kuv lub siab puv npo kuv hais qhia txhua tus neeg kuv ntsib.

    Ces hnub Sunday uas yog Hnub Chiv, peb mus teev Ntuj, peb mus rau tus Txiv Tswv Qhiav Choo foom hmoov rau peb. Ces thaum kuv mus txog ntawm nws, kuv txhos caug kiag, nws tuav kiag kuv lub taub hauv, kuv ho hnov li taws xob nkag kiag tuaj rau kuv thiab kuv sawv tsees ob ruam tom ntej zoo li ib daim ntaub dawb ya tuaj npog nkaus kuv ua rau kuv mus tsis tau kev li ib pliag. Kuv los txog tom chaw zaum, kuv zoo siab dhau kuv hais rau ob tug zaum tom kuv ob sab tias: “ neb puas hnov dab tsis?”
    Ob tug teb tias:“tsis hnov as”
    kuv tias: “kuv hnov ib qhov txawv kawg li os.”
    Ces txij ntawd los kuv lub siab kaj lug, hos kuv lub siab puv npo. Kuv lub qhov ncauj tswm tsis tau, qhia txhua leej kuv ntsib, kuv tus txiv los nws hnov li ntawd mas nws lub siab kaj nrog kuv. Kuj muaj ib cov hais tias yog kuv vwm, yeej tsis muaj ib tug neeg yuav pom li ntawd li, yeej yog vwm xwb. Tab sis kuv txaus siab hlo yam uas kuv tau txais ntawd, kuv paub tias yog Tswv Ntuj. Kuv kuj xav tias kuv yog ib tug neeg txhaum tiag tiag li, kuv tsis tsim nyog tau qhov txiaj ntsim ntawd, tab sis kuv ua tsaug uas Nws tau pub lub txiaj ntsim muaj nqes tas nrhov rau kuv.

    Kuv muab sau ua ntawv meskas, kuv kuj mus piav qhia ib tug Txiv Plig tim peb lub Diocese ces nws nyeem tas, nws hais tias: “Kuv txoj hmoov zoo kuv taus txais qhov txiaj ntsim ntawd, mas nws nyeem kuv cov lus tag nws zoo siab heev li, ua rau nws lub siab kaj lug thiab.” Txij ntawd los kuv txoj kev ntseeg txawv qhov qub lawm.
    Kuv ua Huab Tais Yes Xus tsaug, Nws lub Txiaj Ntsim uas Nws tau cawm kuv, Nws txoj kev dawb huv, txoj kev hlub, txoj kev khuv leej neeg, txoj kev ntshiab huv pub rau kuv pom.


    HUAB TAIS NTUJ:
    • Txoj kev hlub
    • Kev nyiam
    • Kev zam txim
    • Kev khuv leej lub qab ntuj neeg
    • Kev zoo
    • Kev ntshiab huv
    • Kev muaj hwj huam
    • Kev thoob tsib
    Mas loj tas nrho, Tswv Ntuj lub tswv yim xav txawv neeg lub. Tswv Ntuj tsim tau peb tib neeg mas Nws hlub thiab nyiam peb tshaj qhov uas peb paub txog. Nws hlub thiab khuv leej peb tshaj qhov uas peb hlub thiab khuv leej peb tus kheej lawm. Peb txawm muaj txhaum npaum li cas los, Nws yeej hlub peb, Nws yeej tsis thim Nws txoj kev hlub thiab kev nyiam peb li. Nws txoj kev nyiam, kev hlub, kev zam txim rau peb mas nyob mus li tsis hloo, tsis txawv, tsis txawj qub tsis txawj ploj. Nws tos nrhw lub sij hawm peb thov txog Nws thiab tuav txog Nws lub npe, Nws maj zeej cev tes los hlub thiab puag peb rau hauv Nws lub xub ntiag.


    Qhov loj tshaj plaws uas Tswv Ntuj xav kom peb ua yog: Ntseeg thiab tso siab rau Nws, muab tag nrho peb lub siab, lub neej, tag tswv yim, tag dag zog, tag peb tus ntsuj plig, cev rau Ntuj tas mus li… Qhov nov yog qhov peb yuav tau txais lub txiaj ntsim uas Nws npaj rau peb.


    Kuv tus Huab Tais zoo nyiam, kuv thov muab tag kuv lub neej, lub siab, lub tswv yim, tag dag zog, thiab kuv tus ntsuj plig cev rau koj.
    • Koj yog kuv tus Huab Tais
    • Koj yog kuv tus Tswv Ntuj
    • Koj yog kuv lub zog
    • Koj yog kuv txoj sia txoj pa
    • Koj yog kuv qhov pom kev
    • Koj yog kuv txoj kev kaj siab
    • Koj yog kuv lub tswv yim
    • Koj yog kuv txoj kev nyiam kev hlub
    • Koj yog kuv tus cawm seej
    • Koj yog kuv txoj kev zoo siab
    • Koj yog kuv lub Ceeb Tsheej
    • Koj yog kuv lub tseem Tsev

    Kuv zoo siab los muab peb tus Tswv Ntuj lub txiaj ntsim, txoj kev ntshiab huv, txoj kev hlub, kev zoo, kev muaj hwj huam tas nrhov uas Nws tau pub rau kuv , nthuav pub rau daws tau hnov, thiab tau paub.Yog leej twg ntseeg, thiab tso siab, thov nws yuav taus txais.

    “ Nej thov, ces nej yuav taus txais, nej nrhiav, ces nej yuav ntsib, nej khob qhov rooj, ces luag yuav qheb rau nej. Vim tias leej twg thov, nws yuav tau txais; leej twg nrhiav, nws yuav ntsib; leeg twg khob qhov rooj, mas yuav muaj tus qhib qhov rooj rau nws. ” Muaj tseeb tiag.
    ( Mas Tais 7: 7 - 8 )

    “ Nej mus, nej ua kom tas ib tsoom haiv neeg los ua kuv thwj tim. Nej hu txog leej Txiv, Leej Tub, thiab Leej Ntuj Plig Ntshiab lub npe, nej ntxuav lawv. Hos ntawm kuv mas kuv yuav nrog nraim nej nyob mus txog lub zim txwb kawg.”
    ( Mas Tais, 28:19 – 20 )

    Huab Tais Ntuj nrog peb nyob mus li.

    Bao X Mary Kong

    Maiv Paj Lug
    Tswv Cuab Hmong Catholique
    Tswv Cuab Hmong Catholique

    Messages : 1631
    Date d'inscription : 2009-08-17

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Maiv Paj Lug on 28th October 2011, 8:41 pm

    Niam laus Bao X Mary,

    kuv nyeem nws zaj lus txais Tswv Ntuj lub txiaj ntsim no twb ua rau kuv kaj siab kawg, kuv zoo siab tshaj uas muaj ntau zaus kuv tham txog kuv tej txiaj ntsim Tswv Ntuj los xyuas kuv , Tswv Ntuj yeej los yav yuav kaj ntug ntau. Tej thaum kuv zoo siab dhau lawm kuv tham rau txhua tus neeg kuv ntsib, tus twg luag paub Tswv Ntuj zoo ces luag nrog kuv zoo siab, tej tus lam ntseeg ntuj xwb tsis paub Tswv Ntuj zoo ces yeej cem li koj hais, yeej tias kuv ntseeg ntuj dhau lawm es rov qab ua kuv vwm, tus hais zoo ces kuv xav hais ntxiv kom nws nrog kuv zoo siab kom nws tau paub Tswv Ntuj li kuv, tus hais tsis zoo ces kuv hais me me xwb kuv ua twj ywm ,kuv thov ntuj rau nws kom muaj ib hnub nws txais Tswv Ntuj lub txiaj ntsim kom nws tau rov tuaj nrog kuv tham .

    Txhua hnub kuv yeej xav tham kuv tej txiaj ntsim tau txais ntawm Tswv Ntuj rau txhua tus, tiam sis nim no kuv tsis tshuam tham lawm, vim kuv muab sau tseg hauv lub Vas Sab Hmong Catholique ntawm no, tus twg tau nyeem, nws ntseeg los ho rau siab teev ntuj kom nws tau txais tib yam kuv.

    Nim no kuv zoo siab heev uas muaj ntau zaus kuv tau txais lub txiaj ntsim, kuj yog tuaj ntawm lub vas sab Hmong Catholique hauv no thiab, vim Tswv Ntuj coj nej txhua tus tuaj tham nej txiaj ntsim nej tau txais ntawm Tswv Ntuj ces nws ua rau kuv zoo siab tshaj qub.

    Peb leej twg tau txais Tswv Ntuj lub txiaj ntsim ,peb yeej xav kom tag ntiaj teb txhua tus tib neeg tau txais es thaum peb sib ntsib, peb thiaj tau muab coj los piav luag ntxhi, sib faib kev zoo siab, sib qhia thiab sib to taub tias Tswv Ntuj zoo tag nrho ua peb siab kaj lug.

    Thaum Tswv Ntuj los xyuas yus mas yus yeej paub:

    Vim ua rau yus lub cev muaj zog, yus lub cev sib sib, yus tsis nkees, yus txaus siab, yus tsis xav kom tsum, yus zoo siab dhau yus quaj, muaj qee zaus yus hnov tsw qab, yus hnov yus lub cev muaj zog zoo li muaj hluav taws xob laim pes vog hauv yus lub cev lub siab los yus tej tes taw, muaj qee zaus yus hnov suab hais lus kaj nrig, muaj qee zaus yus hnov suab nkauj suab ntas yees zoo mloog tshaj plaws.

    Peb nrhiav peb ntsib, peb thov peb yuav tau txais:

    Sob lus no muaj tseeb, yog peb lam ua ib tug neeg ntseeg xwb, peb lub siab tsis nrhiav Tswv ntuj ces peb tsuas paub li peb kawm thiab peb tsuas paub tias peb yog Hmong Catholique no kom tas kev cai , tiam sis yog peb rau siab nrhiav, peb txawm paub los xav paub ntxiv, kawm tag lawm los xav kawm ntxiv, yog peb nyiam Tswv Ntuj tshaj qhov peb kawm thiab peb paub, peb qhib peb lub siab rau Tswv Ntuj, peb caw Tswv Ntuj tuaj nyob hauv peb vaj peb tsev, peb caw Yesxus tuaj nyob hauv peb lub siab ces peb yuav tau txais Tswv ntuj tus ntsuj plig ( LEEJ TSWV YIM NTSHIAB / SAINT-ESPRIT / HOLY SPIRIT ) Thaum peb txais LEEJ TSWV YIM NTSHIAB peb thiaj hloov tau siab, peb nyiam Tswv Ntuj tshaj txhua yam, peb hlub lwm tus neeg li peb hlub peb, peb tsis qia dub,peb hlub cov txom nyeem,peb ntxub kev txhaum, peb tsis muaj hlob, peb thoob tsib, peb zam tau kev npau taws, peb tsis hais lus ntau thaum yog thaum peb hais lus ces hais tseem ceeb qhov tsawg tiam sis txhais ntau yam, peb zoo siab txais peb lub neej txawm muaj thiab pluag los peb tsis ntshaw.

    Yav thaum ub kuv tseem tsis tau muab kuv lub siab tag rau Tswv Ntuj, kuv yeej ntshai mus saib cov neeg tuag hauv tsev txias , kuv hnov tias muaj neeg tuag xwb kuv lub siab ntxho nyho twb tsis tau luag ua dej num hauv kuv vaj kuv tsev, yog kuv tseem mus ntsib ib lub roob ntoj ntxas, kuv yeej thim rov qab los sis kuv yuav tau hla txoj kev ntawv mas kuv yeej ntsia lwm qhov kom txhob pom.

    Txij li kuv tus Huab Tais Ntuj tau hlub kuv, nws tsis pub kuv yuam kev, nws tau cia kuv txom nyeem ib ntus, thaum kuv kev txom nyeem txaus lawm Tswv Ntuj mam rov cog lus rau kuv, Tswv Ntuj yuav txhawb kuv lub zog kom kuv hloov siab hloov ntsws. Kuv tau ntsib txhua yam, tsis hais dab phem los neeg phem kuv tau ntsib tib si, Tswv Ntuj thiaj li txhawb kuv kom txhob nsthai cov neeg tag sim neej, nws tau qhib kuv qhov muag mus pom hauv ntuj txias teb tsaus, kuv pom cov neeg tag sim neej mus nyob txom nyeem kawg siab kawg ntsws, mus nyob tuag tshaib tuag nqhis, thiaj ua rau kuv lub siab loj tuaj, kuv hlub cov neeg tag sim neej heev, txij li ntawv los, kuv tsis ntshai cov neeg tuaj saum yaj ceeb no lawm, kuv mus saib tau lawv lub cev tuag qaij qaug, kuv mus ntsib roob toj ntxas, kuv pom tshav ntuj nrig hauv kuv lub siab, txij li ntawv los kuv tau mus ncig xyuas ntau lwm hauv cov toj ntxas uas muaj kuv cov txheeb ze, kuv tau nqa dej foom hmoov zoo mus pov rau cov neeg hauv roob toj ntxas thiab pov rau kuv cov txheeb ze. Kuv xav kom lwm hnub kuv lub neej tag ntiaj teb no lawm, muaj tus thov ntuj rau kuv tib yam li kuv thov rau cov qaij qaug. o)




    <3 <3 Pab kuv rov los cuag koj Huab Tais Yesxus <3 <3

    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5170
    Date d'inscription : 2009-08-18

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Maiv Tooj on 29th October 2011, 11:44 am

    Nyob zoo Bao XMary thiab Maiv Paj Lug,

    Neb muaj txoj hmoov zoo, neb thiaj tau txais txiaj ntsim.

    Bao XMary, kuv mloog koj tham, kuv xav tias yog cov neeg ntseeg muaj lub siab ntseeg thiab hais zoo npaum li koj hais no ntshe sawv daws yuav pom Tswv Ntuj lub txiaj ntsim tas mus li xwb. Vim koj txoj kev ntseeg cog tob, txoj kev zoo cog ruaj, koj thiaj tau pom Tswv Ntuj lub hwj huam. Yog kawg, yog yus muaj txoj Hmoov pom Ntuj Ceeb Tsheej, pom Tswv Ntuj lub hwj chim, pom Tswv Ntuj lub hwj huam mas yuav tsis muaj yam hauv ntiaj teb no piv tau kiag li. Kuv mloog koj tham xwb kuv twb los kuag muag, kuv yeej ntshaw kawg nkaus kom kuv tau muaj txiaj ntsim li koj thiab, tab sis ntshe kuv yuav tsis muaj lub fwv tsam pom ib zaug. Txawm kuv yog neeg keeb txhaum, kuv yog neeg txhaum, kuv tsis txawj ua yam zoo los kuv tseem yoog kuv lub siab tas zog kom ua zoo seb ua puas tau kom ntxim Tswv Ntuj siab me me. Niaj hnub, kuv thov Huab Tais Ntuj pab qheb kuv lub siab tas li, xav kom ib hnub twg tau pom li Maiv paj Lug neb pom thiab...Tab sis ntshe Tswv Ntuj yuav tsis xaiv tus neeg txhaum li kuv. Kuv nrog neb zoo siab rau lub txiaj ntsim uas neb tau mog ob tug me viv ncaus siab zoo.

    Bao XMary, hais rau nws paub tias kuv tau muab nws cov ntawv kho los puav lus uas ntau yuam kev thiab tej lo uas tsis tshua yog lus Hmoob lawm.

    Bao X, raws li kuv nrhiav tau, ntshe yog nws yuam kev lawm los yog muaj Sab Laj HANCA nyob Saint Paul MN, USA, ob xyoos sib law?
    Puas yog 2005 ib zaug, 2006 ib zaug, uas Txiv Tswv Qhia Txwj Choo puas leej tuaj koom tag nrho?
    Raws li kuv nrhiav pom mas Txiv Tswv Qhia Txwj Choo Thoj tsuas tuaj koom HANCA, St.Paul MN Rooj Sab Laj 17/7/2005 xwb.




    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5170
    Date d'inscription : 2009-08-18

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Maiv Tooj on 29th October 2011, 6:41 pm

    Tswv Qhia Tito Ban Chong Thopanhong (Txwj Choo Thoj) tsev teev Ntuj Saint Vincent de Paul, Rooj Sab Laj HANCA, tim 17 LUB 7HLI 2005.



    Last edited by Maiv Tooj on 2nd November 2016, 8:59 am; edited 2 times in total




    Bao X Mary
    Phooj Ywg
    Phooj Ywg

    Messages : 180
    Date d'inscription : 2011-07-09

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Bao X Mary on 30th October 2011, 8:45 am

    Maiv Tooj,

    kuv kuj tso lub xyoo Txiv Tswv Qhia Choo Thoj tuaj thawj zaug tsis yog lawm thiab. Nws tuaj thawj zaug lawv tsis tso duab rau hauv Hanca lub site, thaum ntawd lawv tsis tau tsim lub National Hanca ntawd. Txiv Tswv Qhia Choo Thoj tuaj thawj zaug es kuv tau ntsib nws uas qhov txiaj ntsim tau tshwm sim rau kuv yog: Lub 6 hli 2001 ntawd nyob rau St. Paul Minnesota ntawd. Thaum 2005 ntawb ua cov duab koj tso ntawd yog tom qab nov lawm, thaum Txiv Tswv Qhia Choo tuaj thaum 2005 ntawd peb kuj tau coj nws los saib peb pawg ntseeg nyob Green Bay los pw hauv peb tsev thiab.

    Mai Tooj, kuv zoo siab ua koj tsaug uas koj tau muaj lub siab dawb los pab txhim kho lub Hmongcatholique no rau peb siv thiab muab txhuam yam tseem ceeb kawg los tso rau hauv nov rau peb sawv daws tau pom thiab kawm. Koj txoj hmoov zoo heev os mog, koj twb tau txais lub txiaj ntsim loj kawg uas Huab Tais Ntuj tau pub rau koj, " yog koj txoj kev ntseeg, koj pom nws nyob hauv koj lub siab, lub tswv yim, koj ua nws cov dej nus li koj niaj hnub ua tas sim no rau lub Hmongcatholique no, thiab pab koj pawg ntseeg, nrog rau txhua yam koj ua niaj hnub no. Tswv Ntuj nrog nraim koj mus li koj thiaj muaj lub siab los ua tau tej yam muaj nqe kawg li no rau peb txhua tus tau kawm txhawb peb txoj kev ntseeg." Thaum kuv tuaj thawj zaug tuaj pom Maiv Paj Lug, Xwb Hwb Npuag Tub nej sawv daws, kuv nyeem nej lus xwb mas zoo kuv siab lawm ntau npaum licas. Kuv ntseeg tias nej yog cov uas txhawb tau koj txoj kev ntseeg, nej to taub ku txoj kev xav. Kuv thiaj txaus siab los muab kuv Tswv Ntuj tej txiaj ntsim uas kuv tau txais los sau rau hauv nej lub forum no. Kuv nyeem nej tej lus tag ua rau siab kaj lawm ntau kawg. Nej txhua tus tau txoj hmoov zoo os mog.

    Bao X Mary
    Phooj Ywg
    Phooj Ywg

    Messages : 180
    Date d'inscription : 2011-07-09

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Bao X Mary on 30th October 2011, 8:51 am

    Niam hluas Maiv Paj Lug, kuv zoo siab uas koj yog ib tug hluas kawg thiab tseem tau txais lub txiaj ntsim muaj nuj nqes kawg li. Tswv Ntuj tau hu koj yog ib tug hluas los pab txhawb peb txoj kev ntseeg, kav tsis rau siab tshaj Nws lub Moo Zoo mus mog. Kuv nyeem koj tej lus tau txais txiaj ntsim tas xwb ua rau kuv kaj siab thiab zoo siab kawg li. Thaum kuv tuaj pom Maiv Tooj, Xwb Hwb Npuag Tub nej lub site thiab nyeem nej tej lus tas, thiab txhua tus cov zaj tau txais txiaj ntsim tas mas kuv zoo siab kawg li. Kuv pom Maiv Tooj neb tej kev tshaj Ntuj lus txhua yam nyob hauv nov mas kuv zoo siab kawg. Thov kom Huab Tais Ntuj nrog nraim peb txhua tus mus li os mog.

    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5170
    Date d'inscription : 2009-08-18

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Maiv Tooj on 30th October 2011, 10:14 am



    Nyob zoo Bao X Mary,

    Yog nws hais tsis yuam kev los haj yam zoo xwb. Yog kom paub qhov tseeb es peb thiaj li khaws tau tej puav pheej cia xwb.

    Bao X Mary, kuv mas tab xav txog qhov nws hais tias: "kuv pom kuv tus ntsuj plig da kiag hauv pem teb hawm Tus Txiv Neeg ntawd, vim nws ntshiab huv dhau hwv lawm thiab muaj hwj huam tas nrho, ntshiab huv tshaj qhov qhia tau thiab hais tau.Ntiaj teb no tsis muaj ib yam yuav piv tau. Ces Kuv tsuas qhua tas zog thiab hais As les lus yas tas zog xwb."

    Qhov nov mas cas yuav zoo ua luaj li...Kheev lam saum yaj ceeb no yus tus plig txawj ua kom yus hwm Ntuj li nruab yeeb mas ntshe yuav yuav ua txhaum tsawg zog.




    Bao X Mary
    Phooj Ywg
    Phooj Ywg

    Messages : 180
    Date d'inscription : 2011-07-09

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Bao X Mary on 30th October 2011, 4:04 pm

    http://www.servimg.com/index.php?lang=en

    Mim
    Tswv Cuab Hmong Catholique
    Tswv Cuab Hmong Catholique

    Messages : 1707
    Date d'inscription : 2009-10-16

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Mim on 30th October 2011, 4:14 pm

    Nyob zoo Bao X Mary thiab Maiv Paj Lug,

    Neb ob leeg yog ob tug tau txais Tswv ntuj cov txiaj ntsim los txhawb neb txoj kev ntseeg. Luag hais tias tus tau pom thiaj paub hais, tus tau raug lawm thiaj paub piav. Tos nws pub rau neb pom los yog vim nws yeej xav kom neb muaj lub siab kub lug nyiam nws tiag tiag thiab nws xav kom neb coj los piav qhia rau peb sawv daws kom ho txhawb peb txoj kev ntseeg ib yam li neb thiab. Peb lub neej nyob ntiaj teb no, muab xav mas ib sij tas ib xyoos. zoo li mus sai kawg nkaus li. Tiam sis yog xav ntawm yus tej kev nyuaj siab, kev txom nyem, kev yuav tsum niaj hnub tawm tsam kom yeej tus dab ntxwj nyoog tej kev haub kev ntxias mas zoo li ntev ntev kawg li. Kuv xav thiab ua Tswv Ntuj tsaug tias yog nws xav pab kom neb tsis txhob qaug zog hauv neb txoj kev ntseeg, nws thiaj tau pub tej lub txiaj ntsim zoo rau neb. Thiab neb cov lus pov thawj los tseem yuav pab tau peb sawv daws thiab.

    Bao X Mary
    Phooj Ywg
    Phooj Ywg

    Messages : 180
    Date d'inscription : 2011-07-09

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Bao X Mary on 19th November 2011, 5:18 am

    Maiv Tooj,

    Thov txim ntev lawm kuv tsis tau los teb koj cov lus nov os. Peb yuav noj peb caug ces hauj lwm ntau es kuv thiaj tsis tau tuaj.

    ua tsaug koj cov lus tau teb kuv thiab pab kho txhua yam uas kuv tau sau thiab muab duab tso kom zoo nkauj os mog. Koj txoj hmoov zoo, kuv pom tias koj muaj txoj kev ntseeg ruaj khov. Koj lub siab kub thiab xav pab lwm tus kom los paub txoj kev ntseeg. Koj ua ib tug qauv zoo thiab khaws txhua yam zoo cia. Tswv Ntuj foom koob hmoo zoo rau koj os mog.


    Maiv Tooj wrote:

    Nyob zoo Bao X Mary,

    Yog nws hais tsis yuam kev los haj yam zoo xwb. Yog kom paub qhov tseeb es peb thiaj li khaws tau tej puav pheej cia xwb.

    Bao X Mary, kuv mas tab xav txog qhov nws hais tias: "kuv pom kuv tus ntsuj plig da kiag hauv pem teb hawm Tus Txiv Neeg ntawd, vim nws ntshiab huv dhau hwv lawm thiab muaj hwj huam tas nrho, ntshiab huv tshaj qhov qhia tau thiab hais tau.Ntiaj teb no tsis muaj ib yam yuav piv tau. Ces Kuv tsuas qhua tas zog thiab hais As les lus yas tas zog xwb."

    Qhov nov mas cas yuav zoo ua luaj li...Kheev lam saum yaj ceeb no yus tus plig txawj ua kom yus hwm Ntuj li nruab yeeb mas ntshe yuav yuav ua txhaum tsawg zog.

    Maiv Tooj... kuv los yeej tsis paub tias vim li cas lub txiaj ntsim zoo ntawd cia li tshwm sim rau kuv. Thaum ua li ntawd rau kuv tas mas kuv xav tsis thoob, kuv xav tias puas yog kuv vwm los yog ua cas. Kuv sawv los xav ib tag kis, tsis pw li. Tom qab ntawd mas kuv lub siab kaj lug tswm tsis tau lub qhov ncauj hais qhia rau txhua leej neeg uas kuv ntsib. Cov tsis to taub ces lawv thuam kuv tias kuv xiam hlwb. Cov to taub ces lawv nrog zoo siab thiab ua rau lawv lub siab kaj. Kuv muab sau ua lus mekas rau ib tug Txiv Plig thiab ib tug Phauj nyob tim peb lub Diocese thaum ob tug nyeem tas ob tug hais tias ob tug siab kaj lug, ob tug zoo siab heev li. Cov neeg to tau txog sab ntsuj plig mas lawv tsis thuam lawv zoo siab thiab ua rau lawv siab kaj lug.


    Thaum qhov ntawd tshwm sim tas rau kuv, kuv thiaj to taub txog qhov thaum ub Huab Tais Yes Xus mus Yes Lus Xas les thiab qhov Nws hais thaum Nws yuav rov los zaum ob.

    " Thaum Yes Xus caij tus me nyuam lug los mus Yes Lus Xas Les, tsoom neeg muab lawv cov tsho ntev puas txoj kev.Thaum Yes Xus yuav nqes phab toj saum Roob Txiv Ntoo Roj, ces ib tsoom thwj tim coob coob, zoo siab lawv pib cav txoj Tswv Ntuj tej hwj huam yees ntxwv uas lawv tau pom tas huv tib si. Lawv hais tias: Tus Vaj Huab Tais xa tuaj nto koob meej. Nyob saum Ntuj muaj kev thaj yeeb. Nyob saum cov txheej ntuj siab, yog lub koob meej. Muaj ib cov Fas Lis Xais hais rau lawv tias: " Xwb Hwb, koj qhuab ntuas koj cov thwj tim mas!Yes Xus teb rau lawv tias: " Kuv hais rau nej: Yog lawv cov no tswm xeeb, mas cov pob zeb yuav qw."(Lus Kas 19: 36-38)

    Thiaj ua kuv pom tias: Huab Tais Ntuj muaj hwj huam tas nrho thiab Nws ntshiab huv npaum li cas tiag. Vim neeg tsis qw thiab cav txog los tej pob zeb tej xyoob ntoo yuav qw cav txog Nws.Lub sij hawm uas qhov ntawd tshwm sim rau kuv, kuv twb tsis tau xav tias yuav hawm tab sis kuv txhais tes twb xub mus hawm Nws lawm. Koj tsis quaj los kua muag ntws cuag tsi, tus siab rau yus tej txhaum tshaj plaws li. Thaum ntawd kuv mam pom tias txhua yam kev txhaum kuv ua mas kuv muab rau Nws ris tag huv si, Nws ntshiab huv thiab siab zoo ua luaj Nws ris kuv tej txhaum tag. Mas kuv tus siab tshaj li. Quaj tsis paub tso tsej. Yog Nws tsis hais kom ntsiag ces quaj tas li.

    Nws muaj Hwj Huam, Nws hlub neeg thiab Ntshiab huv tiag tiag li. Niam Mab Liab lub siab ntshiab tiag tiag li.



    " Nws nrog cov Huab los.
    Txhua leej txhua tus yuav pom Nws,
    cov tau nkaug Nws los pom nws,
    tas txhua haiv neeg hauv ntiaj teb yuav quaj vim Nws.
    Huab Tais Tswv Ntuj yuav hais tias:
    Kuv yog tus ib txwm nyob, yog Tus muaj hwj huam tas nrho.
    (Qhib yam tom ntej 1: 7 - 8 )Huab Tais Muaj hwj huam tiag,
    tas txhua tus yuav hawm Nws.
    Txawm tus niaj hnub nyiam no thuam Nws los txog hnub kawg yeej yuav hawm Nws."



    Bao X Mary
    Phooj Ywg
    Phooj Ywg

    Messages : 180
    Date d'inscription : 2011-07-09

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Bao X Mary on 19th November 2011, 5:32 am

    Mim wrote:Nyob zoo Bao X Mary thiab Maiv Paj Lug,

    Neb ob leeg yog ob tug tau txais Tswv ntuj cov txiaj ntsim los txhawb neb txoj kev ntseeg. Luag hais tias tus tau pom thiaj paub hais, tus tau raug lawm thiaj paub piav. Tos nws pub rau neb pom los yog vim nws yeej xav kom neb muaj lub siab kub lug nyiam nws tiag tiag thiab nws xav kom neb coj los piav qhia rau peb sawv daws kom ho txhawb peb txoj kev ntseeg ib yam li neb thiab. Peb lub neej nyob ntiaj teb no, muab xav mas ib sij tas ib xyoos. zoo li mus sai kawg nkaus li. Tiam sis yog xav ntawm yus tej kev nyuaj siab, kev txom nyem, kev yuav tsum niaj hnub tawm tsam kom yeej tus dab ntxwj nyoog tej kev haub kev ntxias mas zoo li ntev ntev kawg li. Kuv xav thiab ua Tswv Ntuj tsaug tias yog nws xav pab kom neb tsis txhob qaug zog hauv neb txoj kev ntseeg, nws thiaj tau pub tej lub txiaj ntsim zoo rau neb. Thiab neb cov lus pov thawj los tseem yuav pab tau peb sawv daws thiab.

    Mim,

    Ua tsaug rau nws tej lus zoo uas tau txhawb Maiv Paj Lug wb os mog. Kuv pom tias Nws muaj txoj kev ntseeg zoo thiab ruaj khov kawg li. Nws yog ib tug ntxhais ntseeg Ntuj ntev los thiab tuav txoj kev ntseeg ruaj nreb mus li. Kuv tau nyeem koj tej lus nyob rau hauv "HANCA" txog cov lus teb txog lwm tus cov lus noog mas, kuv paub tias nws yog ib tug neeg muaj kev ntseeg tob thiab paub kev ntseeg zoo. Thaum kuv nyeem nws cov lus teb tag mas kuv zoo siab thiab paub tias peb tseem muaj tej tus neeg paub kev ntseeg zoo thiab muaj kev ntseeg ruaj, ua rua kuv zoo siab kawg. Tsis tas li los nws tej lus tau sau rau hauv no thiab txhais ntaum yam txog Niam Mab Liab tshwm sim mas zoo kawg li. Kuv tuaj nyeem mas kuv kaj siab kawg. Thaum kuv tuaj nrhiav tau Maiv Tooj, Maiv Paj Lug, Xwb Hwb Npuag Tub nej mas kuv zoo siab kawg. Kuv tuaj nrhiav tau ib lub zog los txhawm kuv zoo. Kuv ua nej tsaug.

    Hais txog lub txiaj ntsim tau tshwm sim rau kuv mas kuv ua rau kuv ceeb thiab mauj ntau tus hais tias yog vwm xwb. Tab sis kuv txaus siab thiab ua Tswv Ntuj tsaug uas Nws tau pub lub txiaj ntsim ntawd rau kuv pom. Kuv txaus siab los muab qhia txhua tus ua nws xa tau.

    Mim thov kom Huab Tais Ntuj nrog nraim koj mus li thiab txhawb koj kom koj tshaj Nws lub moo zoo rau peb txhua tus tau paub thiab nyeem los txhawb peb txoj kev ntseeg os mog.


    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5170
    Date d'inscription : 2009-08-18

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Maiv Tooj on 19th November 2011, 10:49 am



    Nyob zoo Bao XMary,

    Zoo siab rov ntsib nws hnub no.
    Ua tsaug rau nws cov lus teb kuv, txawm teb lig los kuv yeej zoo siab tos txog hnub nws teb kuv. Kuv pom nws muaj txoj kev ntseeg tob thiab zoo, kuv zoo siab heev. Ntau zaus kuv nyeem nws tej lus thov Ntuj thiab Hwm Ntuj, uas nws tau hais dhau los, ua rau kuv kua muag poob. Vim kuv twb tsis txawj ua ib tug neeg ntseeg zoo, txawj hais tej lo lus ntxim Tswv Ntuj siab. Bao X, yog peb txawj hais tej los lus nplij Tswv Ntuj siab, txawj hais peb cov txhaum rau Tswv Ntuj mas kuv xav tias ntshe yuav muab coob tus tau txais txiaj ntsim ib yam li nws. Tab sis qhov ntau peb twb tsis paub hais, peb twb tsis xav txog ib qhov li, peb tsuas paub thov txiaj ntsim xwb.

    Bao X,
    tej yam nws tau ntsib no mas qhov yuav hais tau tias yog tseeb los cua, qhov nov yooj yim kawg yog xav paub. Qhov tias yog ib qho tseeb ces yog nws cia li ua ib tug neeg nyiam mus teev Ntuj, xav mus txais Yes Xus lub Cev tsis tu ncua. Qhov nov qhia tau tias yog TSEEB.

    Qhov CUAV los kuj paub tau yooj yim heev. Yog tias cuav xwb ces tus neeg uas hais tias tau txiaj ntsim ntawd yeej niaj hnub hnov suab hais rau nws, pom tej yam txawv txawv hais txog Ntuj tab sis tus neeg ntawd tsis mus teev Ntuj, ua Mis Xas ib zaug li. Nws tsis nyiam txais lub Cim Yug tsuas hais qhov tias Tswv Ntuj, cov Tshiab, Yes Xus, Niam Mab Liab mas niaj hnub los tshaj xo rau nws kom nws hais rau tsoom sid. Cov nov mas yog cuav xwb, tej zaud mas tsis yog tus neeg ntawd dag, tab sis yog dab phem los txia ua cov neeg Ntshiab dag tus neeg ntawd.




    Mim
    Tswv Cuab Hmong Catholique
    Tswv Cuab Hmong Catholique

    Messages : 1707
    Date d'inscription : 2009-10-16

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Mim on 19th November 2011, 11:37 am

    Bao X Mary wrote:
    Mim wrote:Nyob zoo Bao X Mary thiab Maiv Paj Lug,

    Neb ob leeg yog ob tug tau txais Tswv ntuj cov txiaj ntsim los txhawb neb txoj kev ntseeg. Luag hais tias tus tau pom thiaj paub hais, tus tau raug lawm thiaj paub piav. Tos nws pub rau neb pom los yog vim nws yeej xav kom neb muaj lub siab kub lug nyiam nws tiag tiag thiab nws xav kom neb coj los piav qhia rau peb sawv daws kom ho txhawb peb txoj kev ntseeg ib yam li neb thiab. Peb lub neej nyob ntiaj teb no, muab xav mas ib sij tas ib xyoos. zoo li mus sai kawg nkaus li. Tiam sis yog xav ntawm yus tej kev nyuaj siab, kev txom nyem, kev yuav tsum niaj hnub tawm tsam kom yeej tus dab ntxwj nyoog tej kev haub kev ntxias mas zoo li ntev ntev kawg li. Kuv xav thiab ua Tswv Ntuj tsaug tias yog nws xav pab kom neb tsis txhob qaug zog hauv neb txoj kev ntseeg, nws thiaj tau pub tej lub txiaj ntsim zoo rau neb. Thiab neb cov lus pov thawj los tseem yuav pab tau peb sawv daws thiab.

    Mim,

    Ua tsaug rau nws tej lus zoo uas tau txhawb Maiv Paj Lug wb os mog. Kuv pom tias Nws muaj txoj kev ntseeg zoo thiab ruaj khov kawg li. Nws yog ib tug ntxhais ntseeg Ntuj ntev los thiab tuav txoj kev ntseeg ruaj nreb mus li. Kuv tau nyeem koj tej lus nyob rau hauv "HANCA" txog cov lus teb txog lwm tus cov lus noog mas, kuv paub tias nws yog ib tug neeg muaj kev ntseeg tob thiab paub kev ntseeg zoo. Thaum kuv nyeem nws cov lus teb tag mas kuv zoo siab thiab paub tias peb tseem muaj tej tus neeg paub kev ntseeg zoo thiab muaj kev ntseeg ruaj, ua rua kuv zoo siab kawg. Tsis tas li los nws tej lus tau sau rau hauv no thiab txhais ntaum yam txog Niam Mab Liab tshwm sim mas zoo kawg li. Kuv tuaj nyeem mas kuv kaj siab kawg. Thaum kuv tuaj nrhiav tau Maiv Tooj, Maiv Paj Lug, Xwb Hwb Npuag Tub nej mas kuv zoo siab kawg. Kuv tuaj nrhiav tau ib lub zog los txhawm kuv zoo. Kuv ua nej tsaug.

    Hais txog lub txiaj ntsim tau tshwm sim rau kuv mas kuv ua rau kuv ceeb thiab mauj ntau tus hais tias yog vwm xwb. Tab sis kuv txaus siab thiab ua Tswv Ntuj tsaug uas Nws tau pub lub txiaj ntsim ntawd rau kuv pom. Kuv txaus siab los muab qhia txhua tus ua nws xa tau.

    Mim thov kom Huab Tais Ntuj nrog nraim koj mus li thiab txhawb koj kom koj tshaj Nws lub moo zoo rau peb txhua tus tau paub thiab nyeem los txhawb peb txoj kev ntseeg os mog.


    Bao X Mary,

    Ua koj tsaug, koj tseem hais tau ib cov lus qhuas thiab txhawb kuv kawg. Thov kom muaj tseeb li koj hais nkaus xwb. Thiab koj yog ib tug tau txiaj ntsim zoo koj yuav tsum pab thov ntuj tiag rau peb sawv daws thiab kom sawv daws thiaj muaj txoj kev ntseeg tob thiab ruaj ntxiv nkaus xwb os nawb.

    Qhov uas kuv ntseeg tau tias nws yeej tau ib lub txiaj ntsim zoo yog vim nws muaj qhov pom hais tias ua cas yus yog ib tug neeg txhaum ua luaj, thiab nws kuj muaj kev to taub txog Tswv ntuj zoo dua qub mas yog ib qhia tias Tswv ntuj xav rub kom nws nyiam Tswv Ntuj tshaj qub, ces yuav tsum zoo xwb.


    Bao X Mary
    Phooj Ywg
    Phooj Ywg

    Messages : 180
    Date d'inscription : 2011-07-09

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Bao X Mary on 19th November 2011, 4:20 pm

    Maiv Tooj

    Nws hais yeej yog lawm. Muaj ntau tus yeej hais tias pom li ub li no. Dab phem yeej txia ua li ub li no los ntxias neeg kom neeg ua xyem xyav. Thiab tam sim los yeej muaj cov saub cuav mas coob kawg li. Yog tus neeg niaj hnub hais tias nws pom Niam Mab Liab, Huab Tais Yes Xus tab sis tsis mus teev Ntuj. Yeej yog li koj hais. Cov zoo li nov yeej coob kawg. Tab sis txawm leej twg yuav hais li cas los yus txoj kev ntseeg nyob hauv yus, yus paub Tswv Ntuj nyob hauv yus. Yog yus ntseeg Tswv Ntuj thiab tso siab rau Nws tiag mas yus paub qhov tseeb thiab qhov cuav.Hauv yus lub siab yeej qhia yus meej tias yog Tswv Ntuj.

    Ntawm kuv tus kheej, yam uas tau tshwm sim rau kuv ntawd nws yog ib yam uas ua rau kuv ceeb tas. Txij thaum qhov ntawd tau tshwm sim rau kuv tas, kuv txoj kev ntseeg txawv tsis zoo li qub lawm.Qhov ua rau kuv txawv "vim tias ua ntej thaum qhov lub txiaj ntsim ntawd tsis tau tshwm sim rau kuv mas kuv lub siab nyuaj, tsau ntuj nti,kuv siab me, kuv tsis tau luag mus taug txoj kev muaj toj ntxas, hais txog lub tsev txias, no mas kuv tsis xav hnov ua rau kuv poob siab. Kuv tsis kav mus tsev txias li. Tsis tas li lub sij hawm ntawd, kuv txiv yawg mob heev thaj mom yeej tsis kam kho,thiab tsuas muab sij hawm rau nws nyob xwb. Kuv lub siab nyuaj tsaus ntuj nti, paub tias yuav tau kev txom nyem. Hauv kuv lub siab zoo li qhuav qhawv tsis muaj ib teev dej, mloog zoo li ib tauv huab dub nyob hauv kuv lub tau hau laum nyob hauv, tsis kaj li. Kuv ntsia lub ntiaj teb no tsis muaj leej twg yuav ua tau kom kuv lub siab kaj. Tab sis thaum lub Txiaj Ntsim ntawd tshwm sim rau kuv tas. Kuv rov los tsev tau 2 as thiv tom qab kuv txiv yawg tau tas sim neej lawm. Thaum ntawd, kuv lub kuaj muag tu, kuv lub siab puv npo,thiab kaj lug, kuv tsis nco qab nyuaj siab li lawm. Txij ntawd los ces kuv mloog kuv txoj kev ntseeg tsis zoo li qub lawm. Kuv lub siab kaj lug, kuv siab loj tuaj, kuv tsis ntshai mus tsev txias, thiab mus tim tej toj ntxas. Kuv txoj kev xav tsis zoo li qub lawm. Zoo li lub ntuj tsaus pauv mus ua lub ntuj kaj lawm. Kuv tsuas hais tau li nov xwb.

    Qhob tseem ceeb tshaj plaws ntxiv:

    Huab Tais Ntuj txhawb kuv lub zog,
    Huab Tais Ntuj yog lub teeb rau kuv pom kev,
    Huab Tais Ntuj pub txoj kev kaj rau kuv,
    Huab Tais Ntuj cawm kuv ntawm txoj kev tsaus ntuj,
    Huab Tais Ntuj cawm kuv ntawm txoj kev ntshai,
    Huab Tais Ntuj cawm kuv ntawm txoj kev txaj muag,
    Huab Tais Ntuj cawm kuv ntawm kuv txoj kev nyuaj siab,
    Huab Tais Ntuj so kuv lub kua muag,
    Nws txhawb kuv lub zog,
    Nws qheb kuv lub siab
    Nws hloov kuv txoj kev xav
    Nws yog Tus zoo tshaj tas puas tsav yam,
    Nws yog Tus siab zoo tas nrho
    Nws yog Tus txawj xav tshaj tas txhua tus,
    Nws yog Tus muaj hwj huam tas nrho,
    Nws yog yog tseem txoj sia nyob mus li.
    Nws txoj kev xav txawv neeg txoj.
    Nws yog Tus zoo nyiam tshaj tas puas tsav yam
    Nws yog Tus muaj txoj kev zam txim loj tas nrho
    Nws yog Tus muaj txoj kev hlub loj tas nrho
    Nws txoj kev zoo mas tsis ntiaj teb yuav tsis muaj qhov qhia tau.

    Kuv tsuas hais tau li no xwb.

    Txawm leej twg yuav hais li cas los txoj kev ntseeg yog nyob hauv yus, yus thiab Tswv Ntuj thiaj sib paub zoo. Thaum yus nrog Nws sib ua phooj ywj zoo lawm mas zoo li tus hluas nkauj thiab hluas nraug uas tsis xav sib ncaim, xav nyob ua ke mus li. Vim Nws yog yus nplooj siab nplooj ntsws. Tsis muaj leeg twg yuav txwv tau txoj kev sib nyiam sib hlub ntawm Nws thiab yus.








    Sponsored content

    Re: HUAB TAIS NTUJ LUB TXIAJ NTSIM MUAJ NQES TAS NRHO

    Post  Sponsored content Today at 2:07 am


      Current date/time is 19th January 2017, 2:07 am