Halloween, All Saints, All Souls

Hmo 10 hli timn 31, lub 11 hlis tim 1, lub 11 hlis tim 2

Hmoo 10 hli tim 31, nyob Mes Kas teb peb hu tias ‘Halloween” no. Nej puas paub lo lus ‘Halloween’ yog txhais li cas? Nyob hauv lo lus ntawd muaj ob lo lus uas lawv muab los tso ua ib los lawm xwb. Muaj lo lu ‘Hallows” txhais tias ‘Saints’ (cov leej ntshiab), thiab muaj lo lus ‘Evening’ yog txhais tias ‘thaum pib tsaus ntuj.’ Lawv muab ob lo lus los sib txuas ua ib los tias’Halloween’ no xwb. Lo lus ntawd yog txhais tias ‘Hmo ua ntej Tas Tsoom Leej Ntshiab.’


Puag thaum ub nyob Ireland teb, cov neeg teev dab lawv ntseeg tias hmo tim 31 ntawd, cov neeg tuag tej ntsuj plig rov los ncig zej ncig zos, los thov zaub thov mov noj no. Thaum cov neeg nyob Ireland los ntseeg ntuj lawm, lawv txawm muab hmo ntawd los ua ib hmos neeg mus thov zaub thov mov coj los pub rau cov neeg pluag neeg txom nyem. Tiam sis thaum cov Protestants khiav ncaim tawm ntawm cov Kas Tos Liv mus lawm, feem ntau yog cov tuaj nyob As Mes Lis Kas teb, lawv txawm pib muab hmo ntawd los ua ib txog kev lom zem, tso cov me nyuam yaus mus khob qhov rooj ncig zej ncig zos thov ‘khoob noom.’ Tsis tas li ntawd xwb, lawv tseem khaws lub tswv yim tias, yog hmo cov neeg tuag los ncig nrhiav noj. Lawv txawm nrhiav tswv yim xaws ris tsho ua dab poj ntxoog rau cov me nyuam hnav mus thov khawv. Thaum chiv thawj, cov neeg ntseeg Kas Tos Liv muab tej cev ris tsho ua cov leej ntshiab los yog ua cov tshiab rau lawv cov me nyuam hnav. Zaum no ces cov neeg ntseeg thiab cov tsis ntseeg los cia li coj zoo ib yam tas nrho lawm xwb.


Ces txawm sawv daws ntseeg ntuj lawm los, sawv daws tseem pheej ua qhov niag qub kev cai ntawd los ua kev lag kev luam. Lub caij ntawd mas tej tub lag tub luam tau nyiaj heev. Peb nyob tim Mes Kas no mas, lub caij li hnub no, yus mus tom tej kiab tej khw mas tej txee ntim khaub noom yeej du lug tas lawm ntau. Lawv tej kem tsev muag ris tsho ‘Halloween’ los du lug ntau. Cov neeg ua liaj ua teb kuj tau me ntsis lag luam los ntawm lawv cov taub daj ‘pumpkins’ thiab.
Ntawm kuv tus kheej mas kuv xav tias luag tej khoom lag luam no muaj ntau yam ntau hom, tej yam phem phem txaus ntshai los muaj, qhov ntau yog ua rau cov loj thiab cov laus. Cov ua rau me nyuam yaus mas kuj tsis tshua muaj tej yam txaus txaus ntshai heev. Yog li peb cov ua niam ua txiv yuav tsum ceev faj, txhob yuav tej cev ris tsho ua dab phem los ua neeg tuag phem phem rau peb cov me nyuam hnav. Cov loj lawm, yus yuam tsis tau lawv kom txhob ua li ntawd, tiam sis yus qhia rau lawv, cov mloog lus ces lawv kuj yuav li yus hais. Cov tseem yau mas yus yuav li cas lawv hnav li ntawd xwb. Qhov zoo tshaj mas kuv xav tias peb tsis tas ua tej ntawd los yeej tau, yus tsis tau poob ib teg nyiaj rau tej yam tsis muaj nqes rau yus.


Lub 11 hlis tim 1: All Saints Day – La Toussaint – Nco txog Tas Ib Tsoom leej Ntshiab.


Niaj xyoo lub 11 hlis tim 1, nyob hauv Koom Txoos Kas Tos Liv, peb ua kev nco txog tas ib tsoom leej ntshiab, yog tas ib tsoom neeg ntseeg uas lawv tau tas sim neej lawm, tiam sis lawv tau mus nrog Tswv Ntuj nyob, pom Tswv Ntuj tim ntsej tim muag, thiab tau txais kev zoo siab lawm. Niaj hnub nyob hauv nruab xyoo, lub Koom Txoos ua kev nco txog cov leej ntshiab uas lub Koom Txoos paub txog, raws caij raws nyoog raws li lub Koom Txoos tau teev cia. Tiam sis tseem muaj txhiab leej vam leej cov leej ntshiab uas lub Koom Txoos tsis paub txog, ces lub Koom Txoos thiaj ua ib teg nco txog hwm txog lawv txhua leej txhua tus rau hnub tim 1 lub 11 hlis ntuj. Hnub ntawd yogi b hnub dawb hnub huv, muaj nqes ib yam li hnub Chiv thiab. Peb cov neeg ntseeg yuav tsum tau mus koom Thaj Txi Ntuj hnub ntawd (Holy Day of Obligation). Tiam sis vim txoj kev ua dej ua num, mas yog tias poob rau hnub Saturday los Monday, mas cov Tswv Qhia nyob teb chaws Mes Kas no tau thov lus kheev ntawm Vaj Qhia kom peb cov ntseeg nyob teb chaws no tsis tas mus teev ntuj los tau. Vim li ntawd xyoo no yog poob rau hnub Monday/Lundi, ces peb tsis mus teev ntuj hnub ntawd los tau. Tiam sis yog peb tsis ua hauj lwm mas peb yuav tsum mus zoo tshaj, mus ua Tswv Ntuj tsaug thiab ua cov leej ntshiab tsaug, vim lawv niaj hnub thov ntuj pab peb.


Lub 11 hlia tim 2: All Souls Day – Commémoration des fidèles défunts
Niaj xyoo lub 11 hlis tim 2, peb cov ntseeg Kas Tos Liv ua kev thov ntuj pab rau ib tsoom ntseeg uas tau ncaim mus lawm. Hnub ntawd yog hnub peb mus koom thaj Txi Ntuj thov ntuj hlub yus tej txheeb tej ze uas tau ua ntej mus lawm., tiam sis tseem mus khuam nyob rau teb chaws them txim. Peb yuav tau nqa paj must so rau tom toj ntxas thiab mus thov ntuj tod rau lawv thiab. Peb txoj kev thov ntuj no pab tau lawv kom daws tau lawv txoj kev txom nyem nyob hauv teb chaws them txim (Purgatory) kom sib zog tuaj, los qee zaum kuj pab tau kom lawv cia li tau nce mus saum ntuj los muaj.
Yog li nej leej twg muaj tus txheeb tus ze uas tau tas sim neej lawm, yuav tsum nco ntsoov mus thov ntuj tom tsev teev ntuj thiab tom toj ntxas nawb…

Nyob zoo Mim,

Ua tsaug ntau rau nws lub caij muaj nqes tuaj sau tej yam tseem ceeb heev rau peb paub txog.
Yog kawg, chiv keeb puam kwm yog ib qhov zoo, tab sis zaum no neeg lub siab hloov, neeg tsis nco qab txog lub txiaj ntsim tseem ceeb lawm.

Nyob Fab Kis teb, peb tsis muab Halloween ua ib qho tseem ceeb, muaj tsawg heev mus thov qaum liab qaum ntsuab, muaj tsawg heev mus muas lawv tej tsoos tsho los hnav...Tsis yog ib qho économie rau peb.

Niamlaus Mim, ua tsaug ntau koj tuaj qhia txog keeb kwm Halloween rau peb paub . Nyob Fab Kis Teb no, nyuam qhuav dhau tau tsis ntau lub xyoo los no FabKis nyuam qhuav pib xyaum cov AsMesLisKas ua hmoov Halloween xwb, yav tas los peb yeej tsis paub txog tej ntawv li, peb tsuas paub tias txog caij peb yuav thov ntuj rau cov txheeb ze tau tas zim neej thiab yuav tau thov cov Leej Ntshiab vim yog hmoov Ntshiab.

Kuv yeej tsis nyiam ua hmoov Halloween, kuv tsis kk txog tej ntawv. Nim no yog FabKisTeb twb pib ua hmoov Halloween lawm thiab ces tsis ntev ntshe lawv yuav mus qhuas lub hmoov Halloween dua lub Hmoov Leej Ntshiab lawm. Kuv xav mas dab phem yeej muaj ntau txoj hauv los txias tib neeg kom txhob nco qab tej Hmoov Ntshiab, dab phem muaj ntau txoj hauv kev ntxias tib neeg kom lom zem kom txhob nco qab mus thov ntuj.

Tu siab kawg, muaj ib zaug kuv mus pom ib tug poj Hmoob nyob USA thaij duab tuaj share hauv Hmoob thaib teb forum ,uas yog thaij thaum nws ua hmoov halloween, hnav khaub ncaws Halloween, tus niam muab plaub hau zas dawb paug, tseem muab ntsej muag pleev zoo li tus neeg tuag uas luag tau pom nws cov hniav daj heev , tus txiv looj lub taub hau dab ntxwj nyoog, tuaj 2 tug kub , zas ntsej muag dub , tuaj 2 tug kaus liab ,hos tseem hnav khawb ncaws liab liab thiab nplua daim phab zoo li tus vampire. Kuv pom tus niam muab daim duab tuaj share qhuas rau nws cov phoojywg hmoob saib, lawv mas khav khawg thiab qhuas tias lawv ua lom zem tshaj plaws . Kuv ncauj tsis hais , siab quaj dhi xav twj ywm tias cov neeg ruam ntawv xav tias lawv ntse txawj ua hmoov thiaj txawj zas lawv zoo tag tag, tiam sis lawv twb tsis paub tias lawv tab tom ua kiag dab ntxwj nyoog tus qauv .

It is the feast day of evil

Messages given to John Leary - Friday, October 12, 2006

Jesus said: "It's okay to share candy with small, but it is better to avoid all the bad decorations witches and demons. Instead of focusing on a feast day of evil, it is best to remember that it is the vigil of All Saints. The evil is trying to enter your holidays, but do not help by scaring children. Give love and comfort to my children and get rid your home of Harry Potter products, the occult and other evil influence. "


Halloween , c’est le jour de fête du malin

Messages donnés à John Leary - Vendredi le 12 octobre 2006

Jésus dit :« C’est correct de partager des bonbons avec les petits, mais ce serait mieux d’éviter toutes les mauvaises décorations de sorcières et de démons. Au lieu de vous centrer sur un jour de fête du mal, il vaut mieux se rappeler que c’est la vigile de la Toussaint. Le malin essaie d’entrer dans vos jours de fête, mais ne l’aidez pas en faisant peur aux enfants. Donnez de l’amour et du réconfort à mes petits et débarrassez votre maison des produits de Harry Potter, de l’occulte et de toute autre influence mauvaise. »

Nyob zoo Maiv Paj Lug,

Yog kawg, coob leej ntau tus tsis paub txog qhov lawv ua hais tias yuav muaj kev plhom sij npaum li cas, yuav yuam kev npaum li cas. Ua tsaug nws tseem muab ib nqe lus muaj nqes tuaj qhia kom peb ras xeev txog txhua yam peb siv thiab peb xav khaws tseg. Yog kawg, txhua yam toob xib thiab kev saib tsawv ntawd yuav tsum muab tshem kom tag, LUAG thiaj ntxias thiab nkag tsis tau rau yus. Ib yam li saib tsawv, saib phaib, saib saub, saib hmoov,...thc...

Maiv Paj Lug,

Koj tau tuaj hais ib co lus tseem ceeb kawg li hais txog Halloween... Ua koj tsaug os nawb... Xyov ua cas zoo li muaj neeg coob nyiam dab phem ntxwj nyoog tshaj cov nyiam Tswv Ntuj sub... Rau qhov dab phem cia neeg ua kom ywj neeg lub siab thiab zoo neeg lub siab raws li neeg xav thiab ntshaw, txawm neeg yuav ua phem ua qias npaum li cas los dab phem tsis hais tias yog kev txhaum li, ces neeg nyiam qhov ntawd...

Nyob zoo sawv daws,

Hnub no yog tim 1 lub 11 hlis ntuj 2011, yog hnub uas peb cov ntseeg Kas Tos liv mus teev ntuj hwm tas ib tsoom Leej Ntshiab. Kuv tsis paub hais tias nyob rau nej cov teb chaws puas yog ib hnub uas nej cov tswv qhia txiav cai kom nwj yuav tsum mus teev ntuj, tiam sis peb nyob rau tim Mes Kas no, mas hnub yog ib hnub Holy Day of Obligation, txhais tias peb yuav tsum tau mus teev ntuj, ib yam li Hnub Chiv thiab. Kuv paub hais tias, vim peb txoj kev khwv noj khwv haus, mas coob leej kuj tsis tau kev yuav mus teev ntuj, tiam sis yog peb qee tau sij hawm mas phim peb yuav tsum qee kom tau mus teev ntuj hnub no, mus hwm tas ib tsoom leej ntshiab uas xub ua peb ntej mus nyob saum ntuj lawm, cov uas peb paub lawv npe thiab cov uas peb tsis paub huv si.

Cov zaj Nyeem rau hnub no:

Zaj Nyeem Ib: Qhib Yav Tom Ntej 7: 2-4; 9-14
2 Kuv pom dua ib tug Tshiab tawm sab Toob Fab tuaj ; nws nqa tus Tswv Ntuj muaj txoj sia lub thwj. Nws hu ib suab nrov nrov rau plaub tug Tshiab uas tau txais txoj hauj lwm tso xwv txheej rau lub ntiaj teb tias :
3 “Nej txhob rawm tso xwv txheej mus rau lub ntiaj teb, lub hiav txwv, thiab tej me ntoo. Tos peb ntaus cim rau saum Tswv Ntuj cov tub txib hauv pliaj tso.”
4 Ces kuv hnov lawv ntaus cim rau npaum no leej : ib puas plaub caug plaub txhiab leej nyob hauv tas nrho cov xeem His Xas Lais.
9 Dhau tej ntawd tas lawm, ces kuv pom ib pab neeg coob coob suav tsis txheeb ; muaj tas txhua teb chaws, txhua haiv neeg, txhua xeem lus. Lawv sawv ntsug ze ntawm lub theej kiab, nyob ntawm Leej Yaj xub ntiag. Lawv hnav tsho dawb ntev, thiab tuav tej rev nplooj ntawm tes.
10 Lawv qw nrov muaj ceem tias : “Kev yeej yog peb tus Tswv Ntuj uas nws
zaum saum lub theej kiab tug, thiab yog Leej Yaj tug !”
11 Ces tas tsoom Tshiab uas sawv ncig lub theej kiab, ncig cov Laus thiab plaub Leeg Muaj Txoj Sia, lawv txhos caug, ntsej muag khoov ti av pe Tswv Ntuj.
12 Lawv hais tias : “Lo Lus cav, lub hwj chim, kev thoob tsib, kev ua tsaug, kev nto koob meej, kev muaj hwj huam thiab muaj zog yog peb tus Tswv Ntuj tug, mus tas ib txhiab ib txhis ! Ua li.”
13 Ib tug Laus txawm hais rau kuv tias : “Cov neeg uas hnav tsho dawb ntev ntawd yog leej twg ? Lawv tuaj qhov twg tuaj ?”
14 Kuv teb tias : “Huab Tais, yog koj thiaj paub.” Nws rov hais tias :
“Lawv yog cov uas hla dhau txoj kev raug luag hiam hnyav los. Lawv tau ntxhua lawv cov tsho ntev, thiab muab raus Leej Yaj cov ntshav kom dawb."

Zaj Nyeem Ob: 1 Zam 3: 1-3
1 Nej ntsia saib, Leej Txiv txoj kev nyiam peb loj tas npaum no : yam li
peb hu ua Tswv Ntuj cov me nyuam, peb yog Tswv Ntuj cov me nyuam tiag ! Lub ntiaj teb neeg tsis paub peb, vim ntiaj teb neeg tsis paub Leej Txiv.
2 Cov zoo nyiam, nyem no, peb yog Tswv Ntuj cov me nyuam. Qhov uas yav
tom ntej peb yuav plhis mus zoo li cas, tseem tsis tau tawm los rau qhov muag pom xyeem. Peb paub tias, thaum Leej Pleev yuav tawm los rau qhov muag pom xyeem, mas peb yuav zoo li Nws, vim nws zoo li cas, mas peb yuav pom Nws zoo li ntawd. Tswv Ntuj cov me nyuam yuav ua neeg siab ntshiab.
3 Tus twg tso siab rau Leej Pleev, mas Leej Pleev yuav ua kom nws huv tuaj, vim Leej Pleev yog tus huv.

Ntawv Moo Zoo: MT 5: 1-12a
1 Yes Xus pom neeg coob coob tuaj, nws nce mus saum lub roob. Nws zaum. Cov thwj tim txav los ze Yes Xus.
2 Ces Yes Xus tsa ncauj qhia lawv hais tias :
3 "Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li.
4 Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug.
5 Cov tau txoj hmoov zoo, yog cov quaj ntsuag, vim Ntuj yuav nplij lawv. 6 Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis.
7 Cov tau txoj hmoov zoo, yog cov hlub luag tej, vim Ntuj yuav hlub lawv.
8 Cov tau txoj hmoov zoo, yog cov siab huv, vim lawv yuav pom Tswv Ntuj.
9 Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam.
10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug.
11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo.
12 Nej zoo siab thiab nej hom khaj mog, vim nej yuav tau txais koob haum loj nyob saum ntuj.

Tag kis tim 2 luh 11 hlis, kuj yog ib hnub tshwj xeeb thiab, tiam sis tsis yog Holiday of Obligation, txhais tias lub Koom Txoos tsis kom peb yuav tsum mus teev ntuj xwb xwb.
Hnub tim 2 ntawd mas yog hnub uas peb tsoom ntseeg Kas Tos Liv mus koom thaj txi ntuj los thov ntuj pab rau peb cov neeg uas tau dua nras lawm, cov tau dua nras ntev lawm thiab cov nyuam qhuav dua tib si. Qhov tseem ceeb yog peb thov ntuj pab rau cov uas tseem nyob teb chaws them txim tsis tau mus pom Tswv Ntuj tim ntsej tim muag, vim lawv dawb huv tsis tau txaus. Peb tsis paub tias Tswv Ntuj txiav txim li cas rau ib tug neeg, yog li peb cov neeg tus twg nyob saum ntuj lawm thiab tus twg tseem them txim txhaum los peb yeej tsis paub li, ces peb ib teg thov ntuj rau lawv txhua tus tib si. Peb cov zaj thov ntuj yeej tsis cia li pov tseg dawb. Yog ib tug neeg peb thov ntuj rau, nws ho tsis need lawm los Tswv Ntuj yeej siv peb zaj thov los pab rau lwm tus ua tseem need.

Peb sawv daws khwv khwv, tiam sis yog peb hlub peb cov neeg mas peb yuav nrhiav sij hawm mus koom thaj txi ntuj pab rau lawv. Zaj thov ntuj muaj nqes tshaj plaws pab tau cov neeg them txim kom dim sai mas yog thaj txi ntuj xwb. Lwm zaj kuj zoo kawg, xws li txoj Saw Mab Liab. Tiam sis yog peb tseem ntxiv thaj Txi Ntuj thiab mas haj yam muaj txiaj ntsim ntau rau peb cov neeg dua nras lawm.

Tsis tas li ntawd xwb, tas nrho lub 11 hlis ntuj no yog ib lub hlis uas Koom Txoos Kas Tos Liv tshwj tseg los thov ntuj rau tas cov neeg dua nras lawm thiab. Xws li hauv peb church, peb twb pib muab phau ntawv los sau peb cov neeg npe rau hauv lawm, ces thaum txiv plig ua thaj txi ntuj thaum twg mas nws thov ntuj pab rau sawv daws tib si.

Cov zaj nyeem hnub no:

Zaj Nyeem Ib: Thoob Tsib 3: 1-9
1 Cov neeg ncaj tus plig nyob hauv Tswv Ntuj txhais tes. Tsis muaj ib
yam xwv txheej dab tsi yuav raug tau lawv.
2 Cov neeg tsis muaj tswv yim xav tias cov neeg ncaj tuag lawm, hos lawv txoj kev ncaim mus yog ib yam xwv txheej loj,
3 thiab lawv txoj kev tawm rooj mus deb ntawm peb, yog ib txog kev puas
tsuaj loj. Tab sis cov neeg ncaj ntawd nyob hauv kev thaj yeeb lawm.
4 Tib neeg xav tias cov siab ncaj tuag, mas yog lawv raug txim, tab sis lawv tso siab lug tias lawv muaj txoj sia nyob mus li.
5 Lawv raug ib txog kev txom nyem sib, tab sis lawv yuav txais txiaj ntsim koob hmoov loj. Tswv Ntuj sim lawv, nws pom tias lawv tsim nyog ua nws tug.
6 Tswv Ntuj sim lawv, zoo li sim kub nyob hauv lub yeej vub. Tswv Ntuj txais lawv zoo li thaj txi Ntuj zoo txhij zoo txhua.
7 Thaum Tswv Ntuj tuaj xyuas lawv, mas lawv ci ntsa iab. Lawv yuav khiav
nrawm cuag li hluav taws ri mus kis tej roob nqeeb qhuav.
8 Lawv yuav txiav txim rau cov kuj cuab, lawv yuav tswj cov haiv neeg.
Huab Tais yuav ua vaj kav cov siab ncaj mus ib txhis.
9 Cov neeg tso siab rau Huab Tais yuav paub txoj kev tseeb. Cov neeg npuab Huab Tais yuav nyob ze nws hauv txoj kev nyiam. Vim Huab Tais tshwj zias nws lub txiaj ntsim thiab nws txoj kev zam rau nws cov ntshiab, nws tuaj xyuas cov nws xaiv.

Zaj Nyeem Ob: Los Mas 6: 3-9
3 Peb cov uas tau txais lub Cim Ntxuav nyob hauv Yes Xus Pleev, mas yog peb txais lub Cim Ntxuav nyob hauv Yes Xus txoj kev tuag.
4 Thaum peb txais lub Cim Ntxuav peb nrog Yes Xustuag, peb nrog nws mus hauv nws lub ntxa.
5 Ua li mas peb yuav coj ib lub neej tshiab xws li Leej Pleev sawv hauv yeeb ceeb rov los, vim Leej Txiv lub hwj huam tau tsa nws.
6 Peb nrog Leej Pleev koom. Peb nrog Leej Pleev tuag, peb thiaj yuav nrog nws sawv rov los. Peb paub tseeb tias peb muab peb tus qub neeg nrog Yes Xus ntsia saum ntoo cuam, vim peb xav muab peb lub cev xib rau
kev txhaum tua. Mas peb thiaj tsis ua kev txhaum cov qhev ntxiv. 7 Vim tias tus neeg tuag, tsis zwm rau txoj kev txhaum ntxiv.
8 Tab sis, yog peb nrog Leej Pleev tuag mas peb ntseeg tias peb yuav nrog nws muaj txoj sia.
9 Peb paub tias Leej Pleev sawv hauv qhov tuag los lawm, nws yuav
tsis rov tuag dua, txoj kev tuag tsis muaj cuab kav tuaj raug nws ib zaug ntxiv.

Zaj Ntawv Moo Zoo: Zam 6: 37-40
37 Txhua yam uas kuv Txiv muab rau kuv yuav los cuag kuv. Hos tus tuaj cuag kuv, kuv yuav tsis ntiab nws rau nraum zoov.
38 Vim kuv nqes saum ntuj los, tsis yog los ua ywj kuv siab, yog los ua
raws li Tus Xa kuv tuaj lub siab.
39 Tus Xa kuv tuaj lub siab xav, yog zoo li no : Kom kuv tsis txhob ua ib yam uas nws muab rau kuv ploj li, thiab hnub kawg, kom kuv tsa yam ntawd sawv rov los.
40 Qhov uas kuv Txiv nyiam yog zoo li no : leej twg pom Leej Tub thiab ntseeg txog Leej Tub, mas nws muaj txoj sia nyob mus li, thiab Hnub Kawg, kuv yuav tsa nws sawv rov los."

Nyob zoo Mim,

Ua tsaug ntau uas nws tseem muab lub caij muaj nqes los sau txog Hnub Hawm Tsoom Leej Ntshiab thiab. Taig kis no kuv mus teev Ntuj, kuv twb xav txog tab sis kuv hauj lwm ntau ces kuv thiaj li tsis sau xwb. Nyob tim peb, Fab Kis teb, hnub no (Tim 1 lub 11 hlis) yog ib hnub caiv, ces peb tsis mus ua hauj lwm, tab sis Los Pav them nyiaj rau peb. Txawm nyob qhov twg los tsuav yog Catholique ces Tswv Qhia yeej kom mus teev Ntuj tib si, tsuas ntshe tus neeg ntawd ho tsis xav mus xwb.

Teev Ntuj Hnub Hawm tsoom Leej Ntshiab, yog kom peb yuav tsum xyaum hloov peb lub siab, peb tus yam ntxwv kom peb txawj ua ib tug neeg ntshiab, kom peb xyaum coj lub neej ntshiab raws kli cov Leej Ntshiab cov qauv.

Tais Tooj,

Yog kawg, peb mus teev ntuj hwm ib tsoom Leej Ntshiab, tsis yog peb mus teev lawv. Lawv yog neeg ib yam li peb thiab xwb, tiam sis peb muab lawv saib rau qhov chaw siab vim lawv tau ua tiag niaj hnub ua lub neej dawb huv mus txog qhov kawg. Thiab peb ua Ntuj tsaug vim Tswv Ntuj muab lawv los ua piv txwv rau peb kawm kom peb xyaum taug lawv tus hneev taw, muaj ib hnub twg peb thiaj li yuav tau kev zoo siab ib yam li lawv. Lawv yog cov rub peb tes coj peb kev. Lawv yog peb cov "heroes", txhais tias lawv yog peb cov "Nkauj See Nraug Seev"

Nyob zoo os ,Mim thiab Maivtooj ,thiab cov phooj ywg sawv daws
Tau ntev lawm tsis tau tuaj tsham nej li os ,
nej sawv daws kuj noj qab nyob zoo los ,zoo siab uas rov tuaj nsib nej os , nej sawv daws kuj tuaj cheb vaj cheb tsev du luag thiab zoo siab kawg li os , txawm kuv tsis khoom tuaj sau los kuv yeej tuaj saib nej tas li thiab os .
Mim , thiab MT kuv tsis paub hais tias yog li neb hais no os Ua tsaug os uas neb ho tuaj qhia rau hauv no kom peb ho paub thiab os ,Hnub tim 1 ntawd kuv kuj muaj yam tseem ceeb es kuv kuj yuav ib tsob paj coj mus siv rau thiab tab sis kuv ho tsis paub li neb hais es kuv ho tsis mus teev ntuj rau os , tab sis kuv kuj tau teev ntuj ua ntej kuv yuav pw nws kuj ua raukuv kaj siab thiab os ,zoo kawg uas neb tuaj qhia os nawb  Yus neeg ua neej lig ces tsis paub qab hau ab tsi li os ,

Maivxis .

Nyob zoo og Niam hlob,Mim,Mp, thiab Maiv xis, zoo siab uas nej tau tham txog ua lub hmoov hwm tsoom Leej Ntshiab rau peb tau xyaum yoog lawv tus piv txwv og. N hlob ua tsaug uas nws tsaug uas nws tau qhia qhov uas, ntawm peb cov ntseeg tsis txhob ua tshoob kos rau cov hnub ntaws og, kuv yeej tsi tau paub li, kus tsuas paub tias nyob rau lub "Caij Plaub Caug" es thiaj tsi pub ua tshoob kos thiab yuav txwj yuav nkawm xwb no, kuv tsi tau paub txog 2 lub hmoov hwm HT Yes Xus los, thiab hwm Tsoom Leej Ntshiab ntawd, ua tsau ntau og nawb. Ntawm no yog kuv piav me ntsis peb hmoob cob tsib qaum teb rau peb mloog. Txawm tias peb nyob rau cob tsib qaum teb no peb tsi tau muaj tsev teev ntuj los peb kuj mus sib sau rau hauv ib yim neeg twg, los teev ntuj thiab ua lub txoos rau hnub ntawd thiab, yog ib qho uas muaj nuj nqe kawg rau ntawm peb kev teev Ntuj hwm tsoom Leej Ntshiab, vim Tswv Ntuj tau txais Lawv mus nyob sau ntuj Ceeb Tsheej. Peb tau hu tej zaj nkauj los qhuas cov Leej Ntshiab xws li hauv qab no, tiam si kuv sau raws li peb hmoob cob tsib cov lus, xws li lub npe "Leej Ntuj Plig" mas peeb hais tias: "Ntuj see, los Ntuj Txiv Seem See" yog qhov tws tsi nkas siab peb mam sib ntsib dua. Ntawm no yog yog zaj nkauj peb hu.

"TEJ NPOJ TXOOS TAU CI NPLAAG HAWM NTUJ TXIV, UA XYIV FAAB NROO NTWG TSHAAV NTUJ LUG NRUG NTUJ TXIV NYOB PEG NTUJ TSI TXAWJ TAAG. Lub SUAB SEEV NROV NTAA LAWG NYOB PEG NTUJ. TEJ NTUJ SEE HAB ZOO NEEG UA IB KE HAWM NTUJ TXIV, LUB SUAB QEEJ NTXUA SUAB SEEV, SUAB NTUJ SEE, HAB ZOO NEEG LOM ZEM NTWG. NPLAJ TEB XAA SUAB XAA LUG UA NPOJ, SAU UA KE THOOB KOOM NRUG NTUJ TXIV. HAWM NTUJ TXIV".

Zaj nkauj tas li no xwb, tiam si kuv sau raws li peb hmoob cob tsib co lus xwb, yeej tsi yog lus hmoob teb, yog qhov twg nej tsi nkag siab thiab tsi to taub, peb mam sib ntsib nyob rau hauv XH Npuag tub lub tsev kawm hais lus hmoob.