Lub Hnub Ua Txuj Ci rau cov Ntseeg nyob India

Xyoo 2016, cov ntseeg nyob Kerala India kwv tus mlom Niam Mab Liab teev ntuj taug kev mus txog ib qho chaw uas lawv nres teev ntuj, ces lub hnub tawm tuaj ua ib co txuj ci rau lawv pom raws li nyob hauv daim video no, xws li yog Niam Mab Liab hais rau lawv tias nws zoo siab heev tias lawv muaj coob leej tseem tso siab rau nws thiab vam khom nws:

Mim,

Ua tsaug koj coj tsab xov zoo nov tuaj qhia rau peb paub.

Yuav txog lub caij kawg lawm ( Caij kawg tsis yog ntiaj teb kawg, tsis yog ntiaj teb yuav puas ntsoog lwj tag, yog yuav hloov ua ib lub sawm fem tshiab nyob hauv txoj kev nyiam kev hlub). Li ntawd Tswv Ntuj thiaj li ua tag txhua yam tsoj peb kom peb npaj siab tos, peb tus peb lub siab kom dawb huv tos Tswv Ntuj Nqes Los (Tswv Ntuj txoj Kev Hlub Nqes Los). Li ntawd peb yuav xyaum ua cov neeg thoob tsib, zov hmo, ua cov hluas nkauj thoob tsib npaj roj faj seeb kom tsis txhob tau maub kev tsaus ntuj thiab tsis txawm peem thaum txog caij nyoog uas tus Tswv los.

Tais Tooj,

Kuv kuj xav li koj hais thiab. Lub caij ze ze lub caij lub ntiaj teb raws li pe paub no yuav dua mus, lub ntiaj teb yuav hloov dua tshiab, HT Yes Xus txoj kev nyiam kev hlub yuav los kav ntiaj teb. Tiam sis raws li hauv Ntawv Qhib Yav Tom Ntej, ua ntej HT Yes Xus los mas lub ntiaj teb thiab lub Koom Txoos Kas Tos Liv yuav tsum hla ib lub caij muaj kev txom nyem thiab kev sim siab loj kawg nkaus li no. Qhov uas peb yuav npaj yog qhov kom peb nyob ruaj nreb hauv peb txoj kev ntseeg, tsis txhob ua xyem xyav, tsis txho ntaus siab me. Yog ib qho nyuaj vim xyov yus puas yuav paub tias qhov twg yog qhov tseeb thiab qhov uas Tswv Ntuj nyiam li. Vim li ntawd peb yuav tsum tau mob siab kub siab thov Niam Mab Liab thiab Leej Tswv Yim Ntshiab tas zog pab peb.

Kuv nyeem nyob hauv peb cov saub Kas Tos Liv, mas yuav muaj ib lub sij hawm, ntshai twb ze ze lawm, uas Tswv Ntuj yuav ua ib yam hwj huam rau ntiaj teb neeg pom kom lawv paub tias Muaj Tswv Ntuj tiag, thiab nyias yuav rov pom nyias lub neej raws li Tswv Ntuj pom, thiab sawv daws yuav paub tseeb tias lub Koom Txoos Kas Tos Liv thiaj yog lub Koom Txoos HT Yes Xus tau tsa tiag. Ces thaum ntawd txhua tus tib neeg yuav muaj nws txoj kev twj lij los xaiv Tswv Ntuj thiab los ntseeg raws li lub Koom Txoos no. Tiam sis coob leej kuj yuav tawm tsam Tswv Ntuj tsis kam hloov siab los ntseeg li thiab no.
Ces dhau qhov ntawd lawm, thiab dhau txoj kev txom nyem loj lawm, mas Tswv Ntuj yuav muab lub ntiaj teb kho dua tshiab tas nrho, ces yuav muaj ib lub sij hawm neeg yuav nyob muaj kev thaj yeeb lug mus ib ntus no.

Xyov peb cov laus no puas yuav pom qhov ntawd tshwm sim, thiab puas yuav yog tshwm sim rau tiam neeg peb nyob no, tiam sis yeej muaj nyob hauv ntaub ntawv tseg lawm ces yeej yuav tsum muaj tuaj ib hnub twg xwb.
Tej zaum peb kuj muaj feem cuam ua kom tej ntawd tshwm tuaj thiab os.