TEJ YAM YAV DHAU LOS YUS ROV UA RAU YUS TXAJ MUAG THIAB POOB NTSEJ MUAG

**Bao X Mary** 21st September 2015, 5:37 pm

Bao X Mary: Phooj Ywg; Messages : 168
Date d'inscription : 2011-07-09

Post n°1

TEJ YAM YAV DHAU LOS YUS ROV UA RAU YUS TXAJ MUAG THIAB POOB NTSEJ MUAG

Post Bao X Mary 21st September 2015, 5:37 pm

YAM UAS YAV DHAU LOS YUS TAU UA RAU YUS
POOB NTSEJ MUAG THIAB TSIS NYIAM!

Yav dhau los kuv tau ua tej yam uas ua rau kuv tau txaj muag tshaj thiab kuv xam kom kuv tsis hnov qab li. Tab sis muaj tej lub sij hawm pheej ua rau kuv rov nco txog tej yam ntawd tsis plog, thaum kuv xav txog mas kuv rov qab txaj muag rau kuv tus kheej tshaj plaws li.

Thaum kuv xav txog tej yam ntawd txaj muag, kuv pheej thov Ntuj tias thov kom tej yam ua kuv ua kuv poob ntsej muag thiab txaj muag dhau ntawd ploj mus. Thov kom txhov nyob hauv kuv lub hlwb ntxiv li lawm. Vim tias thaum lub sij hawm ua yus ua tej yam ntawd mas yus twb txaj muag thiab poob ntsej muag txaus lawm. Tab sis tseem pheej nyob hauv yus lub hlwb tseem pheej xav txog tas zog thiab. Ua rau yus ntxub yus tus kheej thiab rov txag muag yus tus kheej kawg li.

Thaum kuv xav txog thaum twg ces kuv thov Ntuj kom nws ploj mus, kom Tswv NTuj muab tshem mus kom yus txhob nco txog ntxiv lawm. Muaj ib hnub kuv tsav tsheb ua hauj lwm los txog ib tog kev, txawm muaj ib lub suab hais hauv kuv lub siab tias : “ Txhua yam uas koj ua rau koj txaj muag thiab poob ntsej muag ntawd, yog ib yam me me xwb. Tab sis yam koj ua rau luag poob ntseg muag thiab ua rau luag tu siab, thiab ua rau luag txaj muag rau koj mas yog ib yam loj. Yam koj ua rau koj poob ntsej muag thiab txaj muag mas yuav ua rau koj loj hlob xwb.” Txij thaum lub suab hais li ntawd rau hauv kuv lub siab tuaj ces kuv qhov uas yam dhau los ua rau kuv txaj muag, poob ntsej muag ntawd cia li ploj, ua rau kuv txaus siab rau kuv tus kheej. Zoo li lub nra ntawd cia li hle lawm. Zoo li kuv lub cev sib kiag, kuv to taub kiag, ua rau kuv zoo siab rau kuv tus khej lawm. Kuv paub tias thaum kuv poob ntsej muag, kuv txaj muag luag thuam kuv mas haj yam ua rau kuv loj hlob nyob hauv txoj kev thoob tsib xwb.

Lub suab hais cov lus ntawd ua rau kuv lub siab kaj, kuv lub nra sib, kuv to taub zoo lawm. Hnub no mus kuv tsis ntshai poob ntsej muag, tsis ntshai txaj muag lawm. Leej twg luag kuv thuam kuv, nyos kuv los kuv haj yam loj hlob xwb.

Kuv lam muab piav rau nej tau hnov, nws yog ib yam ua rua kuv lub siab kaj, kuv thiaj muab piav qhia nej.

Luag saib yus qis Tswv Ntuj tsa yus siab, luag tej luag yus mas Tswv Ntuj yuav txhawb yus kom yus haj yam loj hlob.

Txhob tus siab rau yam yus ua tsis zoo, los yam yus ua yuam kev, los ua tsis yog li siab xav. Txhua yam yog kev loj hlob thiab kev thoob tsib rau yus xwb.

Npaub

**Maiv Tooj** 22nd September 2015, 10:11 am

Maiv Tooj

Maiv Tooj: Tswv Cuab Hmong Catholique; Messages : 5527
Date d'inscription : 2009-08-18

Post n°2

Re: TEJ YAM YAV DHAU LOS YUS ROV UA RAU YUS TXAJ MUAG THIAB POOB NTSEJ MUAG

Post Maiv Tooj 22nd September 2015, 10:11 am

Nyob zoo Npaub,

Ua tsaug koj tuaj piav koj zaj lus txog txoj kev ua txhaum, txoj kev xyaum ua neeg me ntawm Tswv Ntuj xub ntiag. Yog ib qho qauv zoo rau txhua leej yuav xyaum ua yog xav xyaum ua Tswv Ntuj me nyuam tiag.

Ntawm kuv tus kheej mas tej yam kuv tau ua, ua rau kuv rov txaj muag mas ho tsis khuam kuv siab heev pes tsawg; tab sis kuv yeej tau npaj mus daws txhaum ntau zaus, tab sis thaum mus txog ntawm Txiv Plig ces txaj muag dhau hais tsis tau rau Txiv Plig li. Lwm zaus rov mus dua, los hais tsis tau li thiab. Mus ob peb zaug, ua ib siab hais tawm kiag no cas zoo li twb tsis nim loj npaum li cas thiab. Thaum muab hais tawm kiag tag mas kuv mloog li kuv ib ce huv cuag li kuv mus da pa dej kub los.

Thaum kuv paub kev ntseeg tsis zoo, kuv yog neeg ua Ntuj Kev Cai tab sis kuv tsis paub Kev Cai heev, kuv tau ua txhaum ntau yam rau Tswv Ntuj, tej qhov mas yog tim yus txoj kev txom nyem, txoj kev lwj siab ces yus cia li ua yam tsis paub thiab xav tsis txog; tej zaud ces yog tim kuv ua neeg tawv tsis txaus, ua tsis taus siab tawv qhawv thiaj li tau ua txhaum. Thaum kuv paub Ntuj Kev Cai zoo dua thiab kuv ua ib tug neeg ntseeg tiag tiag lawm, kuv tu siab heev rau kuv tej txhaum uas kuv tau ua los yam txhob txwm thiab yam uas tsis paub es ua lawd. Txawm kuv twb muaj hais hauv kev daws txhaum ntau zaud los kuv yeej tseem tu siab qees rau kuv tus kheej thiab tej txhaum uas kuv tau ua rau Tswv Ntuj. Muaj ib hnub, kuv cia li xav tias: "HT.Yes Xus tsis yug los rau cov neeg zoo, NWS los rau cov neeg txhaum". Txij hnub ntawd los kuv tsis xav txog tej kuv tau ua dhau los lawm; kuv tsuas ceev faj kom kuv txhob ua txhaum ntxiv lawm xwb.