Tim khawv tau txais txiaj ntsim los ua Yes Xus tim khawv (TÉMOIGNAGES / Conversions au Christianisme)

Tswv Ntuj lub hwj huam loj tag nrho, cov neeg tsis muaj kev ntseeg los yog poob rau kev quav yeeb quav tshuaj, kev liam, Tswv Ntuj los ntsib lawv, ua rau lawv los ua neeg zoo.
Yog hais ua lus fab kis xwb, thov txim rau tsoom ntseeg uas tsis nyob rau Fab Kis teb.

Lawv hais tias: "Tswv Ntuj lub hwj huam loj tag nrho, koj xav thov dab tsi ntawm Tswv ntuj los yeej tau tag nrho, tsuav yog koj thov hauv koj lub siab tiag tiag xwb.

Raws li kuv mloog cov tim khawv los ua neeg ntseeg Yes Xus nov mas puav leej yog cov uas lawv xub tau txais txiaj ntsim, tau pom HT.Yes Xus los rau lawv pom xyeem kiag los yog los ua npau suav rau lawv pom ntau zaus. Txawm ua ntej ntawd lawv tsis yog neeg ntseg Ntuj los HT.Yes Xus los ntawm lawv ces ua kom lawv paub tias "Nws yog Txoj Kev, Qhov Tseeb thiab Txoj Sia nyob mus li" no ces lawv paub tias yog Yes Xus cov lus. Lawv thiaj li los ua neeg ntseeg. Niaj hnub no, feem coob yog cov Muv xis lim lawv los ua Ntuj Kev Cai coob, vim HT.Yes Xus tshwm rau lawv, thaum lawv tag kev cia siab, lawv thov Ntuj tsis yog lawv tus huab tais tshwm los pab lawv; tab sis yog HT.Yes Xus tshwm los pab lawv. Yog thaum ntsib Tswv Ntuj lawm mas tsis muaj neeg yuav txwv tau kom tsis txhob los ntseeg Ntuj.

Thaum Hmoov neeg Thoj Nam tim 11-01-2014 no, peb tus Tswv Qhia Lyon, Mrg.Philippe Barbarin tau hais ib los tias yog hnub twg lub teb chaws Iran muaj kev ywj pheej mas ntshe yuav ntxua plig tsis yeej rau lawv li. Kuv tsis paub tias nyob Iran lawv tsis muaj kev ywj pheej ces lawv thov txais lub cim ntxuav raws cab sab, zaum no neeg paub coob tias muaj ua lub Cim Ntxuav hauv Paltalk no mas lawv tuaj thov lub cim ntxuav coob heev yam twb tsis muaj Txiv Plig xyeej ua rau lawv.

Cia lwm hnub xyeej me ntsis no mam li muab zaj puav los txhais ua lus hmoob.

As Lis yog ib tug neeg Khej Dawb Turk teev kev cai muv xis lis, nws yog ib tug kws txhim tsev, nws ua hauj lwm zoo heev tab sis nws quav cawv; thaum twg nws qaug cawv ces nws muab nws poj niam ntaus tas mus li; nws cheem tsis tau nws tus kheej. Muaj ib zaug nws mus haus cawv los, nws poj niam tseem tab tom ua zaub, cov zaub tseem tsis tau siav nyob hauv qhov cub, nws yuav saj no ces nws poj niam cev diav rau nws saj zaub hauv qhov cub; nws tsis tshuab kom txia me ntsis tso nws mam saj, nws cia li daus los noj kiag, kub nws qhov ncauj, nws muab nws poj niam ntau tam sim ntawd, nws cem poj niam tias cas tsis ua kom txia tso mam cia nws saj, poj niam teb tias twb tsis tau siav es thiaj li tseem nyob hauv qhov cub. Ces As Lis muab nws ntau thiab cem tias ua cas tsis ua zaub ua ntej kom thaum nws los txog txhob kub kub heev.

Nws xav thum cawv tab sis nws thum tsis tau ces tej thaum nws mus ua hauj lwm deb lawm tsheej xyoo kom nws txhob tau los ze nws poj niam kom nws txhob tau tsim txom nws poj niam; vim nws hlub nws poj niam heev.

Muaj ib hnub ib tug phooj ywg ua hauj lwm ua ke thiaj hais rau kuv tias yog kuv tsis xav haus cawv lawm no kom kuv mus nyob teb chaws Arabie Saoudite mas lawv txwv tsis pub muag cawv mas kuv yuav nrhiav tsis tau cawv haus. Ces kuv hu xov tooj rau kuv poj niam tias kuv yuav mus nyob tid ib xyoos tej seb kuv puas thum tau cawv. Kuv poj niam kuj kam kuv mus thiab. Kuv txawm mus, thawj xyoo mas yog tiag tab sis nyob tau ib xyoos ces swm lub teb chaws lawm ces xav haus cawv thaum twg los yus paub mus nrhiav chaw yuav lawm ces kuv nco nco kuv cov niam tub, kuv cia li rov haus cawv dua. Peb cov ua hauj lwm ua ke sib yaum mus xyua Masjid al-Haram, cov muv xis lis lub hauv paus chaw ntshiab, ces peb mus 3 lub tsheb, ib lub caij 4 leeg tab sis kuv tsis muaj ntawv tsav tsheb, kuv cia li lam tsav xwb ces tsav phem phem tsis muaj neeg kam nrog kuv caij ces kuv caij kuv tib leeg xwb.

Peb mus txog ib tug phooj ywg txawm nug tias ua cas kuv twb tsis yog ib tug neeg ntseeg zoo, kuv ho tuaj teev Ntuj ntawm qhov chaw ntshiab no.  Kuv teb nws tias, kuv paub tias kuv tsis yog ib tug neeg zoo, kuv muaj ntau yam teeb meem hauv kuv lub neej, kuv xav kom kuv lub neej hloov, yog thaum kuv lub neej hloov lawm mas kuv yuav txia siab los ua ib tug neeg ntseeg muv xis lis zoo. Ces lawv txawm mus pwv hauv tsev tsam phooj tag lawm, tshuav kuv, sov sov thiab zoo li kuv ntxhov ntxhov siab ces kuv cia li pw nraum zoov.

Thaum kuv qhau cev pw, kuv xav txog thaum kuv nyuam qhuav nto me nyuam hluas es kuv niam thiab kuv cov kwv tij lawv tsis hlub tsis nyiam kuv, kuv niam cem kuv tas li xwb, kuv tsis pom qab rau siav qhov twg kuv thiaj muab kuv lub siab cog rau Tswv Ntuj. kuv thov Tswv Ntuj tias: "Tswv Ntuj, yuav mus li cas thiaj li yuav tuaj txog koj?  Kuv vam tias koj yuav hnov kuv lo lus thov koj. Kuv xav kom koj pab kom kuv dim ntawm txoj kev quav cawv. Kuv ntshaw ntshaw kom koj cawm kuv. Ces kuv cia li tsaug zog lawm. Ib ntsis kuv cia li ua npau suav pom ib tug txiv neej hnav lub tsho tshaj sab dawb dawb ci ci, lam lam, los ntawm kuv thiab hais tias:
- "Koj yog kuv tug".
- Koj yog Ais Txas! (Muv xis lis hu Yes Xus ua Ais Txas, lawv kuj ntseeg tias Yes Xus yog ib tug yaj saub)
- Kuv yuav coj koj nrog kuv mus.
- Yog kuv mus, es kuv poj niam me nyuam ne ho yuav ua li cas?

Ces nws cev tes los tuav kuv lub hauv pliaj thiab hais rau kuv tias:
- "Khiav kom deb ntawm nov, koj yug kuv tug."

Kuv tsim los cas zoo li yog tiag tiag li, kuv lub siab deeg daws ua rau kuv zoo siab tas nrho, ua rau kuv kua muag yuav poob, kuv hnov kuv ib ce sib sib cuag li kuv tuaj tis, kuv tsis paub tias kuv nyob saum ntuj los yog nyob hauv av ces kuv thiaj li ces tes kov daim lev naj cas kuv tseem nyob hauv av. Kuv thiaj li xav kom kuv rov ua qhov npau suav nov dua, kuv rov pw tab sis kuv tsis tsaug  zog lawm ces kuv tsis pom dab tsi li lawm. Kuv khiav mus tsa kuv ib tug phooj ywg hauv tsev tsam phooj thiab tham qhia nws tab sis nws kom kuv kav tsij mus pw nws tsaug tsaug zog li, yog kuv npau suav xwb no. Ces kuv thiaj li mus nrog lawv sib txiv pw hauv tsev. Kuv nyuam qhuav tsaug zog xwb ces rov hnov lub suab hais rau kuv dua tias: "As Lis, tawm ntawm qhov chaw nov mus, koj yog kuv tug, tsis txhob nyob qhov nov teev ntuj ntxiv lawm." Lub suab hais no ua rau kuv hauv siab ceev ceev, kuv ua tsis tau pa lawm. Kuv tsis paub tias lub suab no tuaj qhov twg tuaj. Kuv pw tsis tsaug zog ces kuv thiaj li khia mus pw hauv kuv lub tsheb tom tshav nres tsheb. Kaj ntug ces cov phooj ywg yuav rov mus teev Ntuj dua, kuv tseem tab tom yuav mus no cas tseem rov hnov dua lub suab tias: "Koj tsis txhob mus teev ntxiv lawm, koj cia li tawm ntawm qhov chaw nov mus." Ces kuv thiaj li tsis nrog kuv cov phooj ywg mus ntxiv lawm, kuv los rau lub nroog Av Npas uas kuv nyob ua hauj lwm. Kuv los txog tsev, kuv mus da dej naj cas kuv pom tias kuv cov plaub ntawm hauv siab ib nrab cia li txheeb tag lawm. Kuv xav tias yog kuv tawm hws es lo plua tshauv lo no; kuv muab phuam los so naj cas tsis yog, yog nws dawb lawm tiag.  Muaj ib lub suab hauv kuv nruab nrog hais tias: "Kuv tseem yuav qhia tej yam uas hwj huam yees ntxwv loj tshaj qhov ko rau koj pom thiab." Thaum ntawd ces kuv ntshai, kuv cia li txhos caug teev Ntuj, kuv thiaj li tsis ntshai lawm, kuv qhov ntshai cia li txia ua ib qhov kev pheej xeeb. Kuv xav teev Ntuj tab sis kuv tsis paub teev, ces kuv hais rau Tswv Ntuj tias: "Huab Tais, koj kom kuv ua dab tsi los kuv yuav ua tag nrho tib si rau koj." Thaum tsaus ntuj, kuv pw rov hnov dua lub suab hais rau kuv kom kuv rov mus tsev. Kuv thiaj li tu khoom ces kuv cia li rov los tsev.

Kuv los txog tsev, zej zog tuaj xyuas kuv coob, lawv yeej paub tias thaum ub kuv ntau kuv poj niam heev; tab sis lawv kuj nyiam kuv thiab ces lawv thiaj tuaj xyuas kuv. Ib chim ces lub suab nyob hauv kuv hais rau kuv tias: "Sawv! Sawv mus hais rau lawv." Kuv thiaj sawv, ces kuv hais rau lawv li qhov kuv tau pom Yes Xus nyob tim Arabie Saoudite. Yes Xus hloov kuv siab lawm, kuv hais rau nej tias zaum no Yes Xus hloov kuv lub neej lawm, kuv los ua Ntuj Kev Cai lawm. Ces sawv daws luag thuam kuv. Thaum lawv mus tsev tag lawd, kuv hais rau kuv poj niam tias:

- Xas Las, kuv ua Ntuj Kev Cai lawm.
- Es ua cas tim Arabie Saoudite ho ua Ntuj Kev Cai tau maj?
- Kuv npau suav pom Yes Xus, NWS hloov kuv siab lawm. Kuv hlub koj heev, es kuv yuav ua li cas? Kuv hais rau koj tias kuv yuav tsis ntau koj ib zaug ntxiv lawm. Tswv Ntuj zam txhaum rau kuv. Es koj ne, koj puas zam tau txhaum rau kuv thiab?
- As Lis, kuv zam txhaum rau koj.
As Lis quaj.
- Ua cas koj ho quaj maj? Ua cas?
- Xas Las, Kuv ua Ntuj Kev Cai lawm es koj ne? Kuv ua xwb koj tsis ua es kuv yuav ua li cas?
- Yog tias koj ua Ntuj Kev Cai ces kuv yeej ua tau tib yam.
- Tiag ntag!
- Tiag mas.

Hmo ntawd, muaj kev thaj yeeb puv ntoob hauv peb tsev. Thaum ntawd Xas Las wb tsis paub ib tug neeg ntseeg Yes Xus li, wb tsis paub yuav ua li cas li. Kuv yuav tsum rov mus ua hauj lwm ces kuv thiaj li rov mus ua kuv qhov hauj lwm qub thaum ub. Kuv pheej xav xav tham qhov kuv ntsib rau cov phooj ywg ces tus thawj tsis txaus siab, nws muab kuv ntiab tawm hauj lwm lawm. Ces lub suab rov hais rau kuv tias kom kuv rov los tsev. Kuv los txog tsev, kuv thiaj los nrhiav taus ib txoj hauj lwm hauv kuv lub zos ua.
Thaum ntawd kuv tsis tau pom dua ib tug neeg ua Ntuj Kev Cai li ces kuv twb tsis tau nyeem dua phau Ntawv Cog Lus Tshiab li. Ib hnub kuv los hauj lwm los, kuv poj niam tseem ua hmo tsis tau siav, kuv yuav mus hu me nyuam los noj mov no tab sis kuv poj niam kom kuv mus so mloog xov tooj cua es nws mam mus hu no. Kuv txawm los qheb lub vib thab nyub naj cas hnov lawv hais txog Yes Xus hauv, kuv hu kuv poj niam ceev ceev los, kuv qhia nws. Lub xov tooj cua no npe hu ua: "Nquag hu rau kev thaj yeeb." Kuv thiaj li sau ntawv mus nug lawv, lawv thiaj li xa tau ib phau Ntawv Moo Zoo tuaj rau kuv nyeem. Txij thaum ntawd los ces kuv hais rau sawv daws tias: "Nej puas xav pom ntuj ceeb tsheej? Yog nej xav pom no tuaj hauv kuv tsev."

Kuv hlub hlub kuv poj niam lawm ces ua rau cov poj niam nruab zog ntshaw kom lawv cov txiv los ua Ntuj Kev Cai thiab vim lawv tsis txawj ua neeg zoo. Tuaj nug kuv poj niam, kuv poj niam hais rau lawv tias yog Tswv Ntuj hu xwb thiaj tau.

Mariée par miracle de Dieu ,un puissant témoignage à suivre

Vidéo.

Linda Gordon, hnub nyug twb nchav tsawv lawm; tab sis nrhiav tsis tau txiv yuav. Ib hnub nws txawm teev Ntuj kom Tswv Ntuj coj ib tug txiv tuaj rau ntawm nws qhov rooj rau nws yuav. Nws tham qhia nws tus viv ncaus thiab cov phooj ywg, lawv thuam thiab luag nws. Cas tsis ntev tom qab, muaj ib tug nom peeb zeej, yog ib tug hnub qub 4, dhia taug kev los ncaj ntawm nws qhov rooj, cia li ncaj qha los rau ntawm Linda nrog nws tham. Tam sim ntawd ib lub suab hauv Linda siab rau rau Linda tias: "kuv muab tus txiv neej nov rau koj." Nkawd sib tham haum siab heev, tau 4 hlis tom qab nkawd txawm sib yuav. Sib yuav tag tau 6 hnub xwb ces Col.David yuav tsum mus ua hauj lwm, nws txawm mus rau lub xeev Louisiane 6 lis piam (1 hlis ntau) mam li rov los.
Nws mus nyob lub yeej Louisiane ces nws khiav taug kev li niaj hnub khiav, nws mus ib ncua kev uas lub hnub ntab yees tom hauv ntej, muaj ib lub tsheb los tom nws qab los, hnub ci tus tsav tsheb qhov muag tsis pom nws ces coj tsheb los tsoo nws ua nws ntog nrig nphaug ntsos ua rau taub hauv ua ntej. Tsoo nws lub taub haus sab sab, lawv thauj nws mus tsev kho mob tam sim ntawd, mus txog tsev kho mob sab heev lawm lawv rov muab hélicoptère thauj nws dua rau ib lub tsev kho mob loj. Tsoo li nov ua rau lub paj hlwb os heev yam lawv tsis pom qab ua li cas. Nws siv tshuab ua pa lawm xwb; tus khws tshuaj hais rau Linda tias ntshe yuav tsis muaj txoj hauv kev kho tau David; lawv muab 3 lo lus rau nws xav seb nws yuav xaiv qhov twg yam li:
1- Cia nws nyob nws li ntawd hauv tsev kho mob
2- Seb Linda puas coj mus tsev es cia lub tshuab nws nyob nws.
3- Seb puas kam muab nws cov siab ntsws, raum thiab plawv tej pub lwm tus neeg mob uas tos ntsis?

Linda yeej paub tias tub rog mas lawv xav tias yog tuag rau hniav ntaj hniav phom xwb ces yog tus twg los yeej ua ntawv tseg kom muab nws tej khoom pub rau lwm tus yuav ua neeg mus. Tab sis nws xav tias David yeej tsis tuag li vim thaum David los nrog nws tham ntawm nws qhov rooj, muaj ib lub suab siab rau nws tias: "Tus nov yog kuv muab rau koj." Ces ib hnub Linda thiaj li nthuav phau ntawv Moo Zoo, pom zaj hais txog Las Ntxas tuag tau 4 hnub es Yes Xus tsa tau Las Ntxas rov ciaj sia sawv rov los. Linda thiaj li nqa phau ntawv Moo Zoo mus nyeem zaj no rau David mloog thiab thov Ntuj rau David, ua ntoo cuam lub cim saum nws hauv pliaj tag ces Linda los tsev lawm. Ib ntsis kws tshuaj tuaj tshuaj saib David naj cas David cia li rua muag xam xam. Ces mam tshuaj zoo zoo naj cas David tej mos zoo hlo tib si lawm. Tau 3 hlis tom qab ces David tawm khev kho mob. Nws zoo hlo lawm tiag ces nws rov qab mus ua nws txoj hauj lwm tub rog li qub.

Linda thiab David nkawd ob leeg ntseeg tias yog Ntuj tso nkawd los sib tau.