HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


COV ZAJ NYEEM NRUAB LIS PIAM XYOO II 2021-2022 - Page 4 Empty

Latest topics

» Tswv Ntuj txoj kev Khuv Leej Neeg.( Neuvaine à la Divine Miséricorde)
by Maiv Tooj Yesterday at 11:22 pm

» Ua tsaug ntees.
by Maiv Tooj 21st February 2024, 11:33 pm

» DUAB MAB LIAB TSHIAB.
by Maiv Tooj 16th February 2024, 8:39 am

» COV ZAJ NYEEM NRUAB LIS PIAM XYOO I 2022-2023
by Mim 10th August 2023, 7:04 am

» Cov zaj nyeem Hnub Chiv Xyoo A. 2022-2023
by Maiv Tooj 20th July 2023, 11:21 pm

» SAJ YES XUS KEV TXOM NYEM
by Maiv Tooj 7th March 2023, 6:34 am

» Tswv Ntuj ua tau tag puas tsav yam, F. Ts. Cob Tsib teb
by Mim 3rd February 2023, 11:33 am

» DAIM NTAUB QHWV TUAG NYOB TURIN
by Mim 29th January 2023, 9:24 am

» Txiv plig Tshaj Sawm (Harry Thiel ) Lub neej
by Maiv Tooj 28th December 2022, 8:25 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 28th December 2022, 7:55 am

» COV ZAJ NYEEM NRUAB LIS PIAM XYOO II 2021-2022
by Mim 24th November 2022, 9:06 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 18th November 2022, 8:28 am

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO II 2021-2022

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 22nd February 2022, 10:47 am

    Tim    23    lub    2    Hlis    2022

    Hnub Plaub Lis Piam Xya Nruab Xyoo C Nruab Lis Piam Xyoo II
    Lectionary: 343
     
    Yuav Hwm LN Polycarp, ua Tswv Qhia thiab tuag ua Tim Khawv

    Zaj  Nyeem Ib:   YK 4: 13-17
     
    Cov zoo nyiad:
    13 Nej cov uas zaum no hais tias: “Hnub no los tag kis, peb yuav mus lawm tom lub tsheej tod, peb yuav mus  ib xyoos to dib xyoos ua lag ua luam, ces peb yuav tau paj ntau.”
    14 Nej twb tsis paub tias tag kis nej lub neej yuav zoo li cas. Nej zoo li ib co pa dej nyob ib pliag xwb, twb yuav yaj tas mus.
    15 Phim nej yuav hais tias: “Yog Huab Tais pom zoo, mas peb tseem yuav muaj txoj sia nyob, ces peb yuav ua qhov no thiab qhov tod.”
    16 Tiam sis nej tseem muaj ntsej muag kawg txog nej tej kev khav theeb xwb. Txoj kev khav theeb zoo li ntawd yog ib yam phem.
    17 Li ntawd, mas tus uas paub ua qhov zoo, tab sis nws tsis ua, mas nws ua txhaum.
     
    NPN   49: 2-3, 6-7, 8-10, 11
     
    Txais: (MT 5: 3) Cov pluag hauv nruab siab yog cov tau txoj hmoov zoo,
                            lub ceeb tsheej saum ntuj yog lawv tug.

    Tas cov haiv neeg sawv daws, nej mloog qhov no,
    tas tsoom neeg nyob qab ntuj khwb, nej tig pob ntseg mloog,
    tsis hais laj mej pej xeem los neeg muaj koob nto npe,
    tsis hais cov muaj los cov pluag.

    Txais: (MT 5: 3) Cov pluag hauv nruab siab yog cov tau txoj hmoov zoo,
                            lub ceeb tsheej saum ntuj yog lawv tug.

    Vim li cas kuv thiaj ntshai thaum muaj tsiv hnub tsiv nyoog tuaj,
    thaum cov neeg nkhaus txoj kev phem nyob puag ncig kuv?
    Lawv tso siab rau lawv peev nyiaj txiag,
    lawv muaj plhus ntxiag vim lawv nplua nuj loj kawg nkaus.

    Txais: (MT 5: 3) Cov pluag hauv nruab siab yog cov tau txoj hmoov zoo,
                            lub ceeb tsheej saum ntuj yog lawv tug.

    Tsiv kav ib tug neeg yuav rov txhiv nws tus kheej tsis tau,
    nws yuav rov them tsis tau nws tus nqi txhiv rau Tswv Ntuj li.
    Tus nqi txhiv ib tug neeg txoj sia hnyav dhau,
    nws yuav muaj tsis txaus them ib zaug li
    Kom nws thiaj muaj sia mus li tsis txhob pom txoj kev tuag.

    Txais: (MT 5: 3) Cov pluag hauv nruab siab yog cov tau txoj hmoov zoo,
                            lub ceeb tsheej saum ntuj yog lawv tug.

    Nws yuav pom tias cov neeg thoob tsib txawj tuag,
    ib yam li cov neeg vwm thiab cov neeg ruam los txawj tuag,
    lawv tso lawv tej nyiaj txiag rau lwm cov neeg yuav.

    Txais: (MT 5: 3) Cov pluag hauv nruab siab yog cov tau txoj hmoov zoo,
                            lub ceeb tsheej saum ntuj yog lawv tug.

     
    As Les Lus Yas:   Zam 14: 6
     
    Txais: As les lus yas, as les lus yas.

    Huab Tais hais tias: "Kuv yog Txoj Kev, yog Qhov Tseeb, thiab yog Txoj Sia.
    Tsis muaj leej twg mus cuag Leej Txiv tau, yog nws tsis hla ntawm kuv mus.”

    Txais: As les lus yas, as les lus yas.

     
    Ntawv Moo Zoo:   MK 9: 38-40
     
    38 Zam hais rau Yes Xus tias: "Xib Hwb, peb pom ib tug neeg tuav txog koj lub npe los ntiab dab, ces peb tau txwv nws, vim nws tsis raws peb.
    39 Tab sis Yes Xus hais tias: “Nej tsis txhob txwv nws, vim tsis muaj ib tug neeg tuav txog kuv lub npe los ua hwj huam yees ntxwv tas, ho yuav hais lus phem txog kuv tib txhij ntawd.
    40 Vim tias leej twg tsis tiv peb, mas nws tuaj peb tog.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 23rd February 2022, 9:12 am

    Tim    24    lub    2    Hlis    2022

    Hnub Tsib Lis Piam Xya Nruab Xyoo ABC Nruab Lis Piam Xyoo II
    Lectionary: 344
     
    Zaj  Nyeem Ib:   YK 5: 1-6
     
    1 Nyem no, nej cov nplua nuj, nej kav tsij quaj kav tsij nyiav txog tej kev txom nyem uas yuav tuaj raug nej mog.
    2 Nej tej kev nplua nuj ces lwj tas mus, nej tej tsoos tsho raug kab muab txiav tu tas.
    3 Nej tej kub thiab tej nyiaj ces xeb tas, cov xeb ntawd yuav ua tim khawv txiav txim rau nej, thiab yuav noj nej tej nqaij zoo li yog hluav taws hlawv. Nej tau khaws nyiaj txiag cia rau hnub kawg.
    4 Nej mloog saib, cov nqe zog uas nej tsis them rau cov tub zog sau nej tej qoob loo hauv nej tej teb, lawv quaj qw nrov nrov, hos cov tub zog lub suab quaj nce mus txog tus Huab Tais kav tsoom tshiab lub pob ntseg lawm.
    5 Nyob ntiaj teb no, nej ua neej noj tsis txhawj haus tsis txuag thiab muaj kev lom zem xauv npo, nej tau txav nej lub siab kom rog rau lub caij luag yuav cab nej mus tua.
    6 Nej tau muab txim rau nws, nej tau muab tus neeg tsis txhaum tua, nws tsis cav nej ib los li.
     
    NPN   49: 14-15ab,15cd-16, 17-18, 19-20
     
    Txais: (MT 5: 3) Cov pluag hauv nruab siab tau txoj hmoov zoo,
                            lub Ceeb Tsheej saum ntuj yog lawv tug!

    Cov uas tso siab rau yam tsis tseem ceeb yuav tau txoj hmoov zoo li ntawd,
    thiab cov uas lawv zoo siab rau lawv lub neej yuav xaus zoo li ntawd:
    Lawv zoo li ib pab yaj raug coj mus tso rau hauv ntuj txias teb tsaus;
    Kev tuag yuav ua tswv zov yaj saib lawv, hos cov neeg ncaj yuav tswj lawv.

    Txais: (MT 5: 3) Cov pluag hauv nruab siab tau hmoov zoo,
                            lub Ceeb Tsheej saum ntuj yog lawv tug!

    Lawv lub cev ntaj ntsug yuav yaj mus ploj mus;
    Ntuj txias teb tsaus yuav yog lawv chaw nyob.
    Tab sis, Tswv Ntuj yuav txhiv kuv txoj sia ntawm
    ntuj txias teb tsaus lub hwj huam, nws yuav txais kuv.

    Txais: (MT 5: 3) Cov pluag hauv nruab siab tau hmoov zoo,
                            lub ceeb tsheej saum ntuj yog lawv tug!

    Koj txhob txhawj thaum ib tug neeg nplua nuj tuaj
    thiab nws tsev neeg nto koob meej tuaj;
    Vim hnub nws tuag, nws nqa tsis tau dab tsi li,
    nws txoj kev nplua nuj yuav nrog tsis tau nws mus.

    Txais: (MT 5: 3) Cov pluag hauv nruab siab tau hmoov zoo,
                            lub ceeb tsheej saum ntuj yog lawv tug!

    Thaum ua neej nyob, txawm nws zoo siab tias nws tau hmoov zoo,
    thiab txawm luag qhuas tias nws txawj ua tau txhua yam zoo rau nws,
    los nws kawg yuav mus cuag nws tej poj yawm txwv koob,
    uas yuav tsis pom lub hnub ci pom kev ib zaug ntxiv xwb.

    Txais: (MT 5: 3) Cov pluag hauv nruab siab tau hmoov zoo,
                            lub ceeb tsheej saum ntuj yog lawv tug!

     
    As Les Lus Yas:   1 TXLN 2: 13
     
    Txais: As les lus yas, as les lus yas.

    Nej txais Tswv Ntuj Lo Lus, tsis txhob txais zoo li yog neeg lo lus,
    nej yuav txais raws li qhov tseeb uas yog Tswv Ntuj Lo Lus tiag.

    Txais: As les lus yas, as les lus yas.

     
    Ntawv Moo Zoo:   MK 9: 41-50
     
    Yes Xus hais rau nws cov thwj tim tias:
    41 "Yog leej twg muab ib khob dej rau nej haus, vim nej yog Leej Pleev tug, mas kuv hais tseeb rau nej tias, tus ntawd yeej yuav tau txais koob haum.”

    42 Yog leej twg coj ib tug neeg me li no uas ntseeg txog kuv mus ua txhaum, mas txhiaj khoov cia luag muab ib lub zeb luj zom mus dai ntawm nws caj dab, thiab muab nws pov rau hauv dej ntuj.
    43 Yog koj txhais tes coj koj mus ua txhaum, muab txiav pov tseg,  txhiaj khoov koj tu ib sab tes mus hauv Txoj Sia, zoo dua koj muaj ob sab tes mus rau hauv dab phem teb, hauv cov hluav taws uas yuav kub mus li,
    45 Yog koj txhais taw coj koj mus ua txhaum, muab txiav pov tseg: txhiaj khoov koj tu taw mus hauv Txoj Sia, zoo dua muaj ob txhais taw, tab sis koj poob rau hauv dab phem teb.
    47 Yog koj lub qhov muag coj koj mus ua txhaum, muab kaus pov tseg: txhiaj khoov koj dig ib sab qhov muag mus hauv Tswv Ntuj lub Ceeb Tsheej, zoo dua koj muaj ob sab qhov muag, tab sis koj poob rau hauv dab phem teb,
    48 hauv qhov chaw uas lawv cov kas tsis txawj tuag, thiab hluav taws tsis txawj kug.
    49 Vim hluav taws yuav las kom txhua leej txhua tus qab ntsev.
    50 Ntsev yog ib yam qab, tab sis, yog ntsev tsuag lawm, yuav muab dab tsi las kom ntsev daw li qub? Nej yuav ua kom muaj ntsev nyob hauv nej, ces nej ib leeg yuav nrog ib leeg nyob thaj yeeb.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 24th February 2022, 7:02 pm

    Tim    25    lub    2    Hlis    2022

    Hnub Rau Lis Piam Xya Nruab Xyoo C Nruab Lis Piam Xyoo II
    Lectionary: 345
     
    Zaj  Nyeem Ib:   YK 5: 9-12
     
    9 Cov kwv tij nkauj muad, nej tsis txhob ib tug yws txog ib tug, nej thiaj yuav tsis raug txiav txim. Ntsia saib, tus txiav txim twb sawv nyob ntawm lub rooj vag lawm.
    10 Cov kwv tij nkauj muad, nej yuav muab cov Yaj Saub uas tau hais lus nyob hauv Huab Tais lub npe los ua ib tug piv txwv txog kev nyiaj kev txom nyem thiab kev ua siab ntev rau nej xyaum.
    11 Muaj tseeb tias peb hu cov neeg uas muaj lub siab nyob ruaj nreb khov kho ua cov tau txoj hmoov zoo. Nej twb tau hnov hais txog Yob txoj kev muaj lub siab nyob ruaj nreb khov kho, thiab nej kuj tau pom Huab Tais lub hom phiaj lawm, vim nws yog tus muaj lub siab hlub thiab khuv leej neeg.
    12 Kuv cov zoo nyiad, qhov uas nej yuav xub mob siab rau ua ntej tshaj cov mas yog nej yuav tsis txhob cog lus twv ntuj los twv teb, los yog muab lwm yam los cog lus kiag li. Thaum ‘yog’ mas nej yuav tsum hais tias ‘yog,’ thaum ‘tsis yog,’ mas nej yuav tsum hais tias ‘tsis yog,’ nej thiaj yuav tsis nrhiav txim rau nej ris.
     
    NPN   103: 1-2, 3-4, 8-9, 11-12

    Txais: (8a) Huab Tais muaj lub siab zoo thiab khuv leej neeg.

    Kuv tus plig, koj cia li cav txog HUAB TAIS;
    tas nrho kuv tus kheej, koj cia li cav txog nws lub npe ntshiab.
    Kuv tus plig, koj cia li cav txog HUAB TAISs,
    thiab tsis txhob hnov qab nws tej txiaj ntsim koob hmoov.

    Txais: (8a) Huab Tais muaj lub siab zoo thiab khuv leej neeg.

    Nws zam tas nrho koj cov txhaum rau koj,
    nws kho tas koj tej mob nkeeg kom zoo.
    Nws txhiv koj txoj sia ntawm kev puas tsuaj puas ntsoog,
    nws muab nws lub siab zoo thiab nws kev hlub rau koj ntoo.

    Txais: (8a) Huab Tais muaj lub siab zoo thiab khuv leej neeg.

    HUAB TAIS yog tus khuv leej thiab hlub neeg,
    nws npau taws qeeb, nws muaj kev hlub puv npo
    Nws tsis cem tsis yws tas mus li,
    nws kuj tsis npau taws tas mus ib txhis.

    Txais: (8a) Huab Tais muaj lub siab zoo thiab khuv leej neeg.

    Siab npaum li lub ntuj nyob siab tshaj saum ntiaj teb,
    nws kuj hlub cov neeg uas hwm nws tshaj npaum li ntawd.
    Deb npaum li sab hnub tuaj nyob deb sab hnub poob,
    nws kuj muab peb tej txhaum pov tseg deb ntawm peb npaum li ntawd

    Txais: (8a) Huab Tais muaj lub siab zoo thiab khuv leej neeg.

     
    As Les Lus Yas:   Zam 17: 17b, 17a
     
    Txais: As les lus yas, as les lus yas.

    Koj lo lus yog qhov tseeb , Huab Tais,
    thov koj qee peb mus nyob hauv txoj kev tseeb .

    Txais: As les lus yas, as les lus yas.

     
    Ntawv Moo Zoo:   MK 10: 1-12
     
    1 Yes Xus tso qhov chaw ntawd tseg, nws mus rau lub xeev Yus Das, thiab mus rau sab dej Yos Las Das tim ub. Rov muaj dua tej pab neeg tuaj cuag nws. Nws rov qhia lawv xws li nws ua kam.
    2 Cov Fas Lis Xais txav los ze, lawv nug nws tias: "Ib tug txiv neej puas muaj cai yuav nrauj nws poj niam?" Lawv hais li ntawd los sim nws.
    3 Yes Xus teb rau lawv tias: "Mais Xes qhia kom nej ua dab tsi?"
    4 Lawv teb tias: "Mais Xes tso cai kom tus txiv ua ntawv nrauj tso ces mam li tso nws mus."
    5 Yes Xus teb rau lawv tias: "Yog vim nej lub siab tawv dhau, Mais Xes thiaj sau txoj cai ntawd.
    6 Tab sis, txij thaum chiv lub keeb tsim neeg los, Tswv Ntuj tsim nkawd yog txiv neej thiab poj niam.
    7 Vim li ntawd, tus txiv neej yuav tso nws niam nws txiv tseg, nws yuav mus nrog nws poj niam,
    8 nkawd ob leeg yuav ua ib lub cev nqaij xwb. Ua li mas nkawd tsis yog ob leeg lawm, nkawd yog ib lub cev nqaij lawm xwb.
    9 Yog vim li no, mas yam uas Tswv Ntuj muab sau los ua ke, neeg yuav tsis txhob muab txhem.”
    10 Thaum lawv rov los txog tsev, cov thwj tim rov nug Yes Xus txog qhov ntawd.
    11 Ces Yes Xus hais rau lawv tias: "Tus txiv neej twg nrauj nws poj niam ho rov yuav dua lwm tus, mas nws yog ib tug muaj poj niam mus deev hluas, nws ua txhaum rau nws poj niam.
    12 Hos tus poj niam twg nrauj nws tus txiv, rov yuav dua lwm tus, mas nws yog ib tug neeg muaj txiv mus deev hluas.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 25th February 2022, 5:29 am

    Tim    26    lub    2    Hlis    2022

    Hnub Xya Lis Piam Xya Nruab Xyoo C Nruab Lis Piam Xyoo II
    Lectionary: 346
     
    Zaj  Nyeem Ib:   YK 5: 13-20
     
    Cov zoo nyiad:
    13 Nyob hauv nej, puas muaj leej twg raug kev txom nyem?  Kom nws yuav tsum thov Ntuj.  Puas muaj leej twg nyob kaj siab lug? Kom nws yuav tsum hu nkauj cav txog Tswv Ntuj.

    14 Puas muaj leej twg muaj mob muaj nkeeg nyob hauv nej?  Kom nws yuav tsum hu lub Koom Txoos cov txwj laus ua leej choj tuaj thov Ntuj rau nws, thiab kom lawv muab roj los pleev nws nyob hauv Huab Tais lub npe.
    15 Zaj thov ntuj muaj kev ntseeg tiag yuav cawm tau tus neeg mob, thiab Huab Tais yuav tsa nws sawv rov los. Yog nws tau ua txhaum, mas nws cov txhaum yuav daws tas.
    16 Li ntawd, nej yuav rov lees txhaum ib leeg rau ib leeg, thiab nej yuav thov Ntuj ib leeg rau ib leeg, kom nej tus mob zoo hlo. Thaum tus neeg siab ncaj mob siab thov Ntuj, mas nws lo lus thov muaj hwj huam kawg nkaus.
    17 Es Lias yog ib tug neeg zoo li peb  xwb, tiam sis nws thov Ntuj tas zog kom txhob los nag, ces nag tsis poob los yug lub ntiaj teb tau peb xyoos thiab rau hli.
    18 Es Lias rov qab thov Ntuj dua, ces ntuj thiaj qhib lug tso nag los, lub ntiaj teb thiaj rov txi txiv.
    19 Kuv cov kwv tij nkauj muad, thaum nej ib tug twg yuam kev mus deb ntawm qhov tseeb lawm, yog muaj ib tug coj tau nws rov los,

    20 mas nej yuav tsum paub tias, tus uas coj tau ib tug neeg txhaum ntawm nws txoj kev yuam kev rov los, mas tus ntawd cawm tau nws tus plig ntawm txoj kev tuag, thiab nws so tau ntau yam txhaum pov tseg.

    NPN       141:  1-2, 3+8

    Txais:  (2a) Thov kom kuv zaj thov Ntuj nce tuaj rau ntawm koj xws li ib co pa xyab.

    HUAB TAIS, kuv hu txog koj : tsuag tsuag tuaj pab kuv mas!
    Thaum kuv hu txog koj, thov koj tig los mloog kuv.
    Thov cia kuv zaj teev Ntuj nce tuaj rau ntawn koj xws li pa xyab,
    Kom kuv ob txhais tes tsa tuaj rau koj zoo li cev txim thaum tsaus ntuj.

    Txais:  (2a) Thov kom kuv zaj thov Ntuj nce tuaj rau ntawm koj xws li ib co pa xyab.

    HUAB TAIS, thov koj zov kuv lub qhov ncauj,
    Thov koj zov lub qhov rooj ntawm kuv di ncauj,

    vim kuv tig qhov muag ntsia ntsoov koj, Tswv Ntuj, kuv tus Huab Tais
    kuv khiav tuaj nkaum hauv koj, thov koj txhob tshem kuv txoj sia mus.

    Txais:  (2a) Thov kom kuv zaj thov Ntuj nce tuaj rau ntawm koj xws li ib co pa xyab.

    As Les Lus Yas:      MT 11:  25

    Txais:   As les lus yas, as les lus yas.

    Kuv cav txog koj, Leej Txiv, tus Huab Tais kav lub ntuj lub teb,
    vim koj qhib cov txuj tob txog lub Ceeb Tsheej rau cov neeg me paub.

    Txais:   As les lus yas, as les lus yas.

    Ntawv Moo Zoo:       MK  10:   13-16

    13 Muaj neeg coj ib co me nyuam tuaj rau Yes Xus kom Yes Xus plhws lawv, tab sis cov thwj tim cem lawv.

    14 Yes Xus pom li ntawd, nws npau taws, nws hais rau lawv tias: "Nej cia cov me nyuam tuaj cuag kuv, nej txhob txwv lawv. Vim yog cov uas zoo li cov me nyuam no thiaj yuav tau Tswv Ntuj lub Ceeb Tsheej los ua lawv tug.
    15 Kuv hais tseeb rau nej: Leej twg tsis txais Tswv Ntuj lub Ceeb Tsheej zoo li ib tug me nyuam, mas nws yuav mus tsis tau rau hauv.”
    16 Ces Yes Xus puag cov me nyuam hauv nws xub ntiag, nws foom hmoov zoo, tsa nws txhais tes rau saum lawv.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 27th February 2022, 1:40 pm

    Tim    28    lub    2    Hlis    2022

    Hnub Ob Lis Piam Yim Nruab Xyoo C Nruab Lis Piam Xyoo II
    Lectionary: 347
     
    Zaj Nyeem Ib:   1 PZ 1: 3-9
     
    3 Peb cav lus zoo txog peb tus Huab Tais Yes Xus Pleev tus Tswv Ntuj thiab Leej Txiv, uas muaj lub siab khuv leej neeg tas nrho, nws thiaj ua kom peb rov yug los dua tshiab, muaj txoj kev tso siab ruaj khov nyob hauv Yes Xus Pleev txoj kev sawv hauv cov tub tuag rov los;
    4 muaj ib lub cuab tam uas tsis txawj lwj, tsis txawj qias, thiab tsis txawj nphob, uas muab tshwj zias cia rau nej nyob saum Ntuj lawm.
    5 Yog vim txoj kev ntseeg, mas Tswv Ntuj lub hwj huam yuav txuag nej, kom nej tau txais txoj kev cawm, uas yuav tawm tuaj hnub kawg.
    6 Vim qhov no, mas nej yuav zoo siab, tab txawm tias nyem no, nej yuav tsum raug kev txom nyem kev sim siab ntau yam ib ntus tsis ntev ntxiv,
    7 kom xwv nej txoj kev ntseeg tseeb, uas muaj nqes tshaj tej kub txawj puas uas luag sim nyob hauv hluav taws, thiaj yuav tshwm tuaj kom nej tau txais lo lus qhuas, lub koob meej, thiab lub hwj chim, hnub Yes Xus Pleev tawm los.
    8 Nej tsis tau pom nws dua, tsis kav nej twb nyiam nws, nej tsis pom nws nyem no, tab sis nej twb ntseeg nws, thiab nej zoo siab hlo nyob hauv ib txog kev zoo siab uas piav tsis tau thiab muaj hwj chim,
    9 vim nej tau txais qhov paj tshab ntawm txoj kev ntseeg lawm, uas yog txoj kev cawm nej tus ntsuj plig.
     
    NPN     111: 1-2, 5-6, 9+10c

    Txais: (5) Huab Tais yuav nco ntsoov tias nws tau cog lus mus tas ib txhis.
    los:       As les lus yas.

    Kuv yuav ua HUAB TAIS tsaug tas kuv lub siab lub ntsws,
    thaum kuv nrog tsoom neeg siab ncaj koom ua lub txoos.
    HUAB TAIS cov hauj lwm loj tas nrho, zoo ntxim siab kawg nkaus.

    Txais: (5) Huab Tais yuav nco ntsoov tias nws tau cog lus mus tas ib txhis.
    los:       As les lus yas.

    Nws muab txhiam xws rau cov hwm nws tau noj,
    nws yuav nco ntsoov mus li txog tias nws tau cog lus.
    Nws tau qhia nws haiv neeg paub txog nws tej hauj lwm muaj hwj huam,
    Nws muab cov kuj cuab lub cuab tam pub rau lawv.

    Txais: (5) Huab Tais yuav nco ntsoov tias nws tau cog lus mus tas ib txhis.
    los:       As les lus yas.

    Nws tau xa kev cawm tuaj rau nws haiv neeg lawm,
    nws tau txiav meej tias yuav tsis hloov nws lo lus cog tas mus ib txhis;
    nws lub npe ntshiab thiab tsim nyog qhuas kawg nkaus.
    Nws lub koob meej yuav nyob mus li ib txhiab ib txhis. .

    Txais: (5) Huab Tais yuav nco ntsoov tias nws tau cog lus mus tas ib txhis.
    los:       As les lus yas.

    As Les Lus Yas:     2 KLN  8:  9

    Txais: As les lus yas, as les lus yas.

    Yes Xus Pleev yeem ua tus pluag txawm tias nws yog tus nplua nuj,
    kom xwv nws txoj kev pluag ua tau nej nplua nuj tuaj.

    Txais: As les lus yas, as les lus yas.

     
    Ntawv Moo Zoo:   MK 10: 17-27
     
    17 Thaum Yes Xus tab tom sawv kev mus rau lwm qhov, muaj ib tug neeg khiav los txhos caug ntua ntawm Yes Xus xub ntiag, nws nug tias: "Xib Hwb siab zoo, kuv yuav tsum ua dab tsi thiaj yuav tau txais txoj sia nyob mus li los ua cuab tam?"
    18 Yes Xus hais rau nws tias: "Vim li cas koj hais tias kuv siab zoo? Tsis muaj leej twg siab zoo, tsuas kawg Tswv Ntuj tib leeg xwb.
    19 Koj twb paub cov lus qhia no lawm: ‘Koj txhob tua neeg, txhob zes luag txij luag nkawm, txhob ua tub sab, txhob ua tim khawv cuav, txhob dag luag yuav nyiaj, hwm koj niam koj txiv.’"
    20 Tus neeg ntawd teb rau Yes Xus tias: "Xib Hwb, txij thaum yau los, kuv yeej coj raws nraim li ntawd."
    21 Yes Xus ntsia nws, ces Yes Xus nyiam nws. Yes Xus hais rau nws tias: “Tsuas tshuav ib yam xwb koj tsis tau ua: koj mus, koj muab koj lub cuab tam muag, muab tus nqi pub rau cov pluag, koj yuav tau ib lub cuab tam muaj nqis nyob saum ntuj. Ces koj los raws kuv."
    22 Tus neeg ntawd hnov lo lus no, nws ua ntsej muag ntshaus ntsho, ces nws rov mus tu siab nrho, vim nws muaj cuab yeej cuab tam ntau.
    23 Ces Yes Xus ntsia ib ncig nws, nws hais rau nws cov thwj tim tias: "Cov neeg nplua nuj mus hauv Tswv Ntuj lub Ceeb Tsheej mas nyuaj npaum no!"
    24 Cov thwj tim poob siab tas rau nws cov lus no. Ces Yes Xus rov hais rau lawv tias: "Cov me nyuad, yuav mus hauv Tswv Ntuj lub Ceeb Tsheej mas yeej nyuaj npaum no tiag!
    25 Ib tug ntxhuav yuav nkag hauv lub qhov koob mas yooj yim dua ib tug nplua nuj yuav nkag mus hauv Tswv Ntuj lub Ceeb Tsheej."
    26 Cov thwj tim yim huab poob siab, lawv sib tham lawv tias: "Yog li ntawd, leej twg thiaj yuav tau txais kev cawm?"
    27 Yes Xus ntsia ntsoov lawv, nws hais tias: "Yog neeg ua neeg xwb, mas yeej tsis tau li, tab sis Tswv Ntuj ua tau, vim Tswv Ntuj ua tau tas ib puas tsav yam."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 28th February 2022, 12:34 pm

    Tim    1    lub    3    Hlis    2022

    Hnub Peb Lis Piam Yim Nruab Xyoo C Nruab Lis Piam Xyoo II
    Lectionary: 348
     
    Zaj Nyeem Ib:   1 POB ZEB 1: 10-16

    Cov zoo nyiad:

    10 Hais txog ntawm txoj kev cawm nej tus ntsuj plig, mas cov Yaj Saub uas tau ua saub hais txog lub txiaj ntsim nej yuav tau txais los ua nej tug, lawv twb tau tshawb nrhiav thiab tau tshuaj txog kom zoo tas lawm.
    11 Lawv tau ua zoo tshuaj txog lub caij nyoog thiab tej xwm uas Leej Pleev lub Tswv Yim nyob hauv lawv xub ua tim khawv qhia ua ntej rau lawv lawm tias, yuav muaj tej kev txom nyem zoo li cas tuaj raug Leej Pleev, thiab nws yuav muaj koob meej li cas tom qab.
    12 Lawv tau txais kev to taub tias qhov lawv ua tsis yog ua los tsob hwb lawv tus kheej, tiam sis yog ua los tsob hwb nej, hais txog tej yam uas zaum no nej tau hnov tshaj txog lawm, uas yog cov tub tshaj lub Moo Zoo tuaj qhia rau nej paub, nyob hauv Leej Tswv Yim Ntshiab tus tuaj saum ntuj tuaj, yog tej yam uas cov Tshiab kiag lawv yeej ntshaw kom lawv tau pom.
    13 Vim li no, nej lub tswv yim yuav sia siv khov kho, nej tsis txhob haus dej haus cawv kom qaug, thiab nej yuav tso siab lug rau lub txiaj ntsim uas nej yuav tau txais thaum Yes Xus Pleev tawm plaws los.

    14 Zoo li ib co me nyuam mloog mloog lus, nej tsis txhob ua ywj nej lub siab ntshaw xws li yav thaud uas nej tseem tsis tau paub dab tsi,
    15 tiam sis raws li tus hu nej nws yog tus ntshiab, nej kuj yuav coj ib tug cwj pwm ntshiab nyob hauv txhua yam nej ua,
    16 vim muaj lus sau tseg tias: “Nej yuav ua neeg ntshiab vim kuv yog tus ntshiab.”

    NPN   98: 1, 2-3ab, 3cd-4

    Txais: (2a) HUAB TAIS tau ua kom sawv daws paub txog nws txoj kev cawm.


    Nej hu ib zaj nkauj tshiab rau HUAB TAIS
    vim nws tau ua tej yam txaus qhuas kawg nkaus;
    nws txhais tes xis tau ua kom nws yeej,
    nws sab npab ntshiab tau ua.

    Txais…

    HUAB TAIS ua kom sawv daws paub txog nws txoj kev cawm,
    nws muab nws txoj kev ncaj tawm rau cov haiv neeg pom.
    Nws rov nco txog nws txoj kev ua zoo rau
    thiab kev hlub tsev neeg His Xas Lais.

    Txais…

    Tas cov npoo ntiaj teb kawg tau pom

    peb tus Tswv Ntuj txoj kev cawm neeg lawm.
    Tas txhua teb chaws, nej yuav zoo siab hu nkauj rau HUAB TAIS,
    nej nqua suab hu nkauj, nej cav txog nws mog.

    Txais…


    As Les Lus Yas:   MT 11: 25

    Txais: As les lus yas, as les lus yas.

    Kuv cav txog koj, Leej Txiv, tus Huab Tais kav lub ntuj lub teb,
    vim koj tau qhia cov txuj tob txog lub Ceeb Tsheej rau cov neeg me paub.

    Txais: As les lus yas, as les lus yas.

    Ntawv Moo Zoo:   MK 10: 28-31

    28 Pob  pib tsa ncauj hais rau Yes Xus tias: “Peb, mas peb tau tso ib puas tsav yam tseg, peb los raws koj.”

    29 Yes Xus hais tias: “Kuv hais tseeb rau nej tias, tsis muaj ib tug neeg twg uas tau tso vaj tse, kwv tij nkauj muam, niam thiab txiv, me tub me nyuam, thiab liaj teb tseg vim kuv thiab vim lub Moo Zoo,
    30 uas tiam no yuav tsis tau txais ib puas npaug ntawm vaj tse, kwv tij nkauj muam, niam thiab txiv, me tub me nyuam thiab liaj teb, ntxiv nrog rau kev raug luag hiam, thiab lwm tiam, tau txoj sia nyob mus li.
    31 Tiam sis coob leej uas tuaj ua ntej, yuav nyob puag tom qab, hos coob leej tuaj tom qab, yuav tau ua ntej.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 1st March 2022, 4:31 am

    Nyob zoo peb cov ntseeg sawv daws,

    COV ZAJ NYEEM NRUAB LIS PIAM XYOO II 2021-2022 - Page 4 Lent-1200x530
    Nyob hauv lub Caij 40, peb yuav xyaum txoj kev yoo los yog cheem peb tus kheej,
    peb yuav xyaum ua lub siab dav pub pab rau cov txom nyem,
    peb yuav xyaum mob siab teev ntuj tshaj qub.


    Tag kis twb txog lub Caij 40 lawm. Yog lub caij peb yoo mov yoo nqaij los xyaum tswj peb lub cev. 
    Tiam sis peb kuj tseem yuav tsum tau xyaum yoo kev npau taws, kev siab phem, kev ntxub luag, kev ua phem ua qias coj tsis tus, kev ua siab nqaim qia dub, thiab lwm yam kev phem, los tswj peb lub siab, kom saib peb puas xyaum tau ua neeg ntshiab dawb huv me ntsis tuaj, thiaj yuav raws li Tswv ntuj nyiam dua.

    Lub sij hawm no, thov kom peb sawv daws sib pab sib txhawb nyob hauv peb txoj kev xyaum ua neeg ntshiab dawb huv, es peb yuav thov ntuj ib leeg rau ib leeg thiab os.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 1st March 2022, 6:03 am

    Tim    2    lub    3    Hlis    2022


    Hnub Plaub Txais Tshauv - Pib Caij Plaub Caug Xyoo ABC
    Lectionary:219


    COV ZAJ NYEEM NRUAB LIS PIAM XYOO II 2021-2022 - Page 4 Ash-Wednesday-Eventlas

    Zaj Nyeem Ib:   YOS ES 2: 12-18

    12 HUAB TAIS hais li no:

    "Lub sij hawm no, nej kav tsij muab tas nrho nej lub siab rov qab los cuag kuv;
    nej yoo mov, nej quaj, nej nyiav.
    13 Nej dua nej lub siab kom ntuag, tsis txhob dua nej tej ris tsho;
    nej rov qab los cuag HUAB TAIS nej tus Tswv Ntuj,
    vim nws siab zoo thiab khuv leej neeg tas nrho, nws npau taws qeeb,
    nws lub siab puv nkaus kev ua zoo, nws tos tsis hnyoo yuav thim nws txoj kev rau txim.
    14 Tej zaum nws yuav rov thim xav dua los kuj muaj,
    ces nws yuav foom ib lo lus zoo tseg rov tom qab,
    yog tej tsiaj txi ntuj thiab tej cawv los cev rau HUAB TAIS nej tus Tswv Ntuj.
    15 Nej tshuab puab tshuab hom nyob saum Xis Yoos!

    Nej ua ib txog kev yoo ntshiab, nej teem ib lub caij tuaj sib txoos loj.
    16 Nej hu tas tsoom pej xeem tuaj sib sau ua ke,
    nej ua kom lub txoos ntshiab dawb huv tuaj;
    nej hu cov neeg laus tuaj, nej sau coj cov me nyuam yaus
    thiab cov tseem noj mis tib si tuaj.
    Kom nraug vauv yuav tsum tso nws lub chaw pw tseg,
    nkauj nyab yuav tsum tso nws lub paim tseg.
    17 Kom cov Leej Choj, uas yog HUAB TAIS cov tub txib,
    tuaj quaj nyob hauv lub tshav ntawm kis nruab nrab lub qhov rooj thiab lub thaj txi Ntuj,
    lawv yuav quaj hais tias: ‘HUAB TAIS, thov koj txuag koj haiv neeg!
    Koj txhob tso koj lub cuab tam rau hauv txoj kev raug luag saib tsis taus,
    txhob cia cov kuj cuab hnyos lawv.
    Vim li cas koj thiaj yuav cia kom cov haiv neeg tau kev thuam tias:
    ‘Lawv tus Tswv Ntuj dua qhov twg lawd?’”
    18 Ces HUAB TAIS lub siab hlub txog nws lub teb chaws,

    nws thiaj zam rau nws haiv neeg.

    NPN   51: 3-4, 5-6ab, 12-13, 14+17

    Txais: (3a) HUAB TAIS, thov koj khuv leej peb vim peb tau ua txhaum lawm.

    Tswv Ntuj, thov koj khuv leej kuv vim koj lub siab zoo;
    thov koj so kuv qhov txhaum pov tseg, vim koj muaj kev hlub loj tas nrho.
    Thov koj ntxuav kuv lub txim pov tseg kom tas huv si
    thiab muab kuv qhov txhaum tshem mus kom kuv dawb huv tuaj.

    Txais: (3a) HUAB TAIS, thov koj khuv leej peb vim peb tau ua txhaum lawm.

    Kuv lees paub qhov phem kuv tau ua,
    kuv qhov txhaum nyob rawv ntawm kuv xub ntiag mus li:
    “Kuv tau ua txhaum rau koj ib leeg xwb,
    kuv tau ua qhov uas koj saib yog tsis zoo.”

    Txais: (3a) HUAB TAIS, thov koj khuv leej peb vim peb tau ua txhaum lawm.

    Tswv Ntuj, thov koj tsim ib lub siab huv lis si rau kuv,
    thiab rov muab ib lub tswv yim nyob ruaj nreb rau kuv.
    Koj tsis txhob ntiab kuv mus deb ntawm koj xub ntiag,
    thiab txhob rho koj leej Tswv Yim Ntshiab tawm ntawm kuv mus.

    Txais: (3a) HUAB TAIS, thov koj khuv leej peb vim peb tau ua txhaum lawm.

    Thov koj pub kom kuv rov zoo siab nyob hauv koj txoj kev cawm
    thiab ua kom kuv muaj ib lub tswv yim xav mloog koj.
    HUAB TAIS, thov koj qhib kuv di ncauj,
    ces kuv lub ncauj yuav tshaj koj lub koob meej.

    Txais: (3a) HUAB TAIS, thov koj khuv leej peb vim peb tau ua txhaum lawm.

    Zaj Nyeem Ob:   2 KOS LIS NTHOS 5: 20—6: 2

    Cov kwv tij nkauj muad:
    20 Peb yog Leej Pleev cov tiam lis, ces zoo li yog Tswv Ntuj siv peb los nqua hu sawv daws.

    Peb thiaj li sawv Leej Pleev cev thov nej tias, kom nej cia li tig los nrog Tswv Ntuj rov sib raug zoo.
    21 Vim Tswv Ntuj hlub peb, nws ua kom tus uas tsis paub kev txhaum txia ua kev txhaum,
    kom nyob hauv nws, peb plhis tau ua Tswv Ntuj txoj kev ncaj.
    6: 1 Peb koom nrog nws ua hauj lwm ua ke, ces peb thiaj thov qhuab ntuas nej

    kom nej txhob txais Tswv Ntuj lub txiaj ntsim dag xwb.
    2 Vim nws hais tias: “Thaum lub sij hawm zoo, kuv tau teb rau koj raws li koj thov.
    Thaum txog hnub cawm neeg, kuv tau pab koj lawm.”
    Lub sij hawm zoo yog nyem no ntag; hnub cawm neeg yog nyem no kiag.

    Zaj Cav lub Moo Zoo:   NPN 95: 8

    (Lub Caij 40 peb tsis hais As les lus yas lawm ces thiaj muab hloov hu li no lawm)

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Hnub no yog nej hnov nws lub suab,
    nej tsis txhob ua nej lub siab tawv ncauj.

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Ntawv Moo Zoo:   MT 6: 1-6, 16-18

    Yes Xus hais rau nws cov thwj tim tias:
    1 “Nej ceev faj kom nej tsis txhob ua ncaj nyob ntawm neeg xub ntiag xwb, kom luag pom nej. Yog nej ua li ntawd, mas nej yuav tsis txais koob haum dab tsi ntawm nej Txiv nyob saum ntuj.

    2 Thaum koj pub rau luag, koj txhob tshuab hom ua koj ntej, xws li cov neeg zoo sab nraud ua nyob hauv cov tsev txoos thiab nyob ntawm tej kev, kom sawv daws cav lus zoo txog lawv. Kuv hais tseeb rau nej, lawv twb txais lawv cov koob haum tas lawm.
    3 Hos koj, mas thaum koj pub rau luag, koj txhob cia koj sab tes laug paub qhov koj sab tes xis ua.
    4 Li ntawd, tsis muaj neeg paub tias koj tau pub rau luag. Ces koj Txiv uas nws pom hauv qhov chaw nraim yuav pauj rau koj.
    5 Thaum koj teev Ntuj, koj txhob ua li cov neeg zoo sab nraud: lawv nyiam sawv ntsug hauv cov tsev txoos, thiab ntawm tej kev tshuam, kom sawv daws pom lawv. Kuv hais tseeb rau nej, lawv twb txais lawv cov koob haum lawm.

    6 Hos koj, mas thaum koj teev Ntuj, koj mus nyob twj ywm hauv koj kem txaj, kaw koj qhov rooj rau ces koj teev koj Txiv uas nws nyob hauv qhov chaw nraim. Koj Txiv uas nws pom hauv qhov chaw nraim, yuav pauj rau koj.
    16 Thaum koj yoo mov, koj txhob ua ntsej muag mluas mlob xws li cov neeg zoo sab nraud: lawv ua ntsej muag ntshaus, kom luag paub tias lawv yoo mov. Kuv hais tseeb rau nej tias cov neeg ntawd twb txais lawv cov koob haum tas lawm.

    17 Hos koj, mas thaum koj yoo mov, koj yuav pleev tshuaj tsw qab rau saum taub hau, koj yuav ntxuav muag,
    18 kom txhob muaj neeg paub tias koj yoo mov, tsuas kawg koj Txiv uas nws nyob hauv qhov chaw nraim tib leeg paub xwb. Koj Txiv uas pom hauv qhov chaw nraim yuav pauj rau koj.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 2nd March 2022, 8:24 am

    Tim    3    lub    3    Hlis    2022

    Hnub Tsib tom qab Hnub Plaub Txais Tshauv Xyoo ABC Nruab Lis Piam Xyoo I & II
    Lectionary: 220

    XHLT:   LN Katharine Drexel, nkauj tsim txiaj

     
    Zaj Nyeem Ib:   TCO 30: 15-20

    Mais Xes hais rau tsoom pej xeem tias:
    15 “Hnub no kuv muab kev muaj txoj sia thiab kev vam meej, kev tuag thiab kev puas ntsoog tso rau ntawm nej xub ntiag.

    16 Yog nej mloog HUAB TAIS nej tus Tswv Ntuj cov lus qhia uas hnub no kuv muab rau nej no, yog nej nyiam nws, taug nws txoj kev, ua raws nws tej lus qhia, nws txoj cai thiab tej kev nws tau txiav, mas nej yuav muaj txoj sia thiab nej yuav huam vam ntws coob tuaj; HUAB TAIS nej tus Tswv Ntuj yuav foom hmoov zoo rau nej nyob hauv lub teb chaws uas nej tab tom yuav nkag mus nyob ua nej lub teb chaws.
    17 Tab sis yog nej ntxeev siab, nej tsis mloog lus thiab nej cia luag ntxias tau nej mus nrog luag pe hawm thiab tsob hwb lwm cov dab,
    18 mas hnub no kuv hais rau nej paubtias, nej yuav ploj mus tas, nej yuav tsis tau nyob ntev xyoo hauv lub teb chaws uas nej yuav hla tus dej Yos Las Das mus txeeb los ua nej tug.
    19 Hnub no, kuv hu lub ntuj lub teb nrog kuv ua tim khawv txog nej tias: kuv tau muab txoj sia thiab txoj kev tuag, lo lus zoo thiab lo lus phem tso rau nej xaiv. Nej xaiv txoj sia mog! Nej thiab nej cov xeeb leej xeeb ntxwv thiaj yuav muaj txoj sia,
    20 vim nej nyiam HUAB TAIS, nej tus Tswv Ntuj, nej mloog nws lub suab, thiab npuab nws ruaj nreb; qhov ntawd yog qhov yuav ua kom nej muaj txoj sia thiab yuav ua kom nej tau ua neej ntev dhawv hauv lub teb chaws uas HUAB TAIS tau cog lus tias yuav muab pub rau nej cov yawg koob Has Nplas Has, His Xas Has thiab Yas Kos.”

    NPN   1: 1-2, 3, 4+6

    Txais: (40:5a) Muaj hmoov zoo yog cov uas tso siab rau Huab Tais.

    Muaj hmoov zoo yog tus uas tsis coj raws tus neeg phem zaj tswv yim,
    los taug cov neeg txhaum txoj kev,
    los zaum nrog cov neeg saib tsis taus luag tej,
    tiam sis nws zoo siab hlo coj HUAB TAIS txoj cai,
    thiab nws xav ntsoov HUAB TAIS txoj cai nruab hnub hmo ntuj.

    Txais: (40:5a) Muaj hmoov zoo yog cov uas tso siab rau Huab Tais.

    Nws zoo li ib tsob ntoo cog nyob ze cov dej ntws,
    nws txi txiv raws caij raws nyoog,
    thiab nws tej nplooj tsis txawj zeeg li.
    Nws ua yam twg tau yam ntawd .

    Txais: (40:5a) Muaj hmoov zoo yog cov uas tso siab rau Huab Tais.

    Cov neeg phem tsis zoo li ntawd,
    lawv zoo li cov npluag nplej uas cua muab nplawm tawm mus.
    Vim HUAB TAIS saib ntsoov tus neeg ncaj txoj kev,
    hos tus neeg phem txoj kev yaj ntshis mus.

    Txais: (40:5a) Muaj hmoov zoo yog cov uas tso siab rau Huab Tais.

    Zaj Cav lub Moo Zoo:   MT 4: 17

    Huab Tais hais tias, nej yuav lees txhaum,
    vim lub Ceeb Tsheej saum ntuj tuaj txog ze lawm.

    Ntawv Moo Zoo:   LK 9: 22-25

    22 Yes Xus hais rau nws cov thwj tim tias: “Neeg Leej Tub yuav tsum raug txom nyem loj thiab raug cov txwj laus, cov Thawj Leej Choj, thiab cov Kws Ntawv Ntshiab muab nws tshem tawm. Nws yuav raug luag tua, tab sis hnub peb nws yuav sawv rov los.”

    23 Ces nws hais rau sawv daws tias: “Yog leej twg xav los raws kuv, mas nws yuav tsis txhob nco txog nws, nws yuav niaj hnub kwv nws tus ntoo cuam, thiab lawv kuv qab.
    24 Vim tias tus xav cawm nws txoj sia, mas nws yuav ua nws txoj sia ploj. Hos tus twg ua nws txoj sia ploj vim kuv, mas tus ntawd yuav cawm tau nws txoj sia.
    25 Yog ib tug neeg txeeb tau lub ntiaj teb tas huv si los ua nws tug, tab sis nws ua nws ploj los ua nws tus kheej puam tsuaj tas, mas nws tau dab tsi zoo?”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 3rd March 2022, 11:56 am

    Tim    4    lub    3    Hlis    2022

    Hnub Rau tom qab Hnub Plaub Txais Tshauv Xyoo ABC Nruab Lis Piam Xyoo I & II
    Lectionary: 221

    XHLT:   LN Casimir


    Zaj Nyeem Ib:   HIS XAIS 58: 1-9a

    HUAB TAIS Tswv Ntuj hais li no:
    1 “Koj kav tsij qw tiag txhob tso tseg, tsa koj lub suab kom nrov li lub hom, koj tshaj rau kuv haiv neeg txog lawv kev ua phem, thiab rau Yas Kos tsev neeg txog lawv cov txhaum.

    2 Lawv yeej nrhiav kuv hnub dhau hnub, lawv xav paub txog kuv tej kev, lawv ua zoo li lawv yog ib lub kuj cuab uas coj kev ncaj thiab tsis tso nws tus Tswv Ntuj txoj cai pov tseg; lawv thov kom kuv txiav txim ncaj rau lawv; lawv zoo siab kawg tias lawv tau los nyob ze Tswv Ntuj.”
    3 ‘Vim li cas peb thiaj yuav yoo mov, yog koj twb tsis pom? Los ua kev them txim txhaum yog koj twb tsis quav ntsej txog?’ Ntsia saib, hnub nej yoo mov, nej tseem ua hauj lwm rau nej tus kheej xwb, thiab nej tseem yuam nej cov tub zog thiab.

    4 “Ntsia saib, thaum nej yoo mov nej tsuas nrhiav kev sib cav sib ceg, ua siab phem siv zog xuas nrig sib tsuab sib ntaus xwb. Nej yuav tseg tsis txhob yoo mov xws li niaj hnub no, ces thiaj yuav muaj tus mloog nej lub suab nyob saum txheej siab.
    5 Txoj kev yoo zoo li no puas yog txoj uas kuv xaiv, puas yog ib hnub uas tib neeg ua kev them txim txhaum? Ua taub hau qaij de xws li ib tug tauj deg, tso cev pw saum ntaub tsaj thiab plua tshauv, puas yog qhov nej hu ua kev yoo, puas yog ib hnub uas HUAB TAIS zoo siab txais?
    6 Txoj kev yoo raws li kuv nyiam yog zoo li no: Tshem txoj kev phem tej saw khi neeg, daws cov hlua quab yuam neeg, tso cov neeg raug hiam kom tau kev twj lij, muab txhua yam quab lov pov tseg,

    7 muab koj mov los faib rau tus neeg tshaib noj, caw cov raug luag ntiab tawm thiab cov txom nyem tsis muaj chaw nyob los so hauv koj tsev, muab ris tsho rau cov neeg koj pom liab qab tau hnav, thiab tsis txhob tig nrob qaum rau tus uas yog koj roj koj ntshav.
    8 Li no mas koj qhov pom kev thiaj yuav ci tawm tuaj xws li thaum lub hnub tawm, koj lub mob yuav zoo sai, koj txoj kev ncaj ncees yuav mus ua koj ntej, HUAB TAIS lub hwj chim yuav lawv koj qab thaiv koj.
    9 Yog koj hu mas HUAB TAIS yuav teb, yog koj qw, nws yuav hais tias : ‘Kuv nyob ntawm no.’”

    NPN   51: 3-4, 5-6ab, 18-19

    Txais: (19b) Tswv Ntuj, koj yuav tsis thuam tus tu siab rau nws cov txhaum thiab ua neeg me.

    Tswv Ntuj, thov koj khuv leej kuv, vim koj lub siab zoo;
    thov koj so kuv qhov txhaum pov tseg, vim koj muaj kev hlub loj tas nrho.
    Thov koj ntxuav kuv lub txim pov tseg kom tas
    thiab koj tshem kuv qhov txhaum mus kom kuv dawb huv tuaj.

    Txais: (19b) Tswv Ntuj, koj yuav tsis thuam tus tu siab rau nws cov txhaum thiab ua neeg me.

    Kuv lees paub kuv qhov txhaum,
    kuv qhov txhaum nyob rawv ntawm kuv xub ntiag.mus li:
    “Kuv tau ua txhaum rau koj ib leeg xwb,
    kuv tau ua qhov uas koj saib yog phem.”

    Txais: (19b) Tswv Ntuj, koj yuav tsis thuam tus tu siab rau nws cov txhaum thiab ua neeg me.

    Vim koj tsis zoo siab txais cov kev hlawv tsiaj txi ntuj;
    yog kuv hlawv tsiaj txi rau koj, koj yuav tsis txais.
    Kuv txoj kev txi ntuj, Tswv Ntuj, yog muaj ib lub tswv yim xav lees txhaum;
    tus muaj ib lub siab xav lees txhaum thiab ua neeg me,
    Tswv ntuj, koj yuav tsis thuam.

    Txais: (19b) Tswv Ntuj, koj yuav tsis thuam tus tu siab rau nws cov txhaum thiab ua neeg me.

    Zaj Cav lub Moo Zoo:   AS MOS 5: 14

    Nej nrhiav qhov zoo txhob nrhiav qhov phem,

    ces nej yuav muaj txoj sia nyob, thiab Huab Tais yuav nrog nraim nej.

    Ntawv Moo Zoo:   MT 9: 14-15

    14 Zam cov thwj tim tuaj cuag Yes Xus, lawv hais tias:

    "Peb yoo mov, thiab cov Fas Lis Xais kuj yoo. Vim li cas koj cov thwj tim tsis yoo?"
    15 Yes Xus teb lawv tias: “Cov qhua tuaj noj tshoob puas yuav tsum ntoo xyom thaum nraug vauv tseem nrog lawv nyob? Muaj ib hnub thaum luag coj nraug vauv mus lawm, mas lawv mam li yuav yoo mov.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 4th March 2022, 2:59 pm

    Tim    5    lub    3    Hlis    2022

    Hnub Xya tom qab Hnub Plaub Txais Tshauv Xyoo ABC Nruab Lis Piam Xyoo I & II
    Lectionary: 222

    Zaj Nyeem Ib:   HIS XAIS 58: 9b-14

    HUAB TAIS hais li no:
    9b “Yog koj tshem txoj kev quab yuam neeg ntawm koj mus, yog koj tsis taw tes nki rau luag, koj tsis hais lus phem,

    10 yog koj muaj lub siab dav fo pub rau tus neeg tshaib noj, thiab pab tus neeg txom nyem kom nws zoo siab, mas koj qhov pom kev yuav sawv tuaj nyob hauv qhov tsaus ntuj, thiab koj qhov tsaus yuav pom kev nrig li thaum tav su.
    11 HUAB TAIS yuav coj koj kev tas mus li; nws yuav pub rau koj tau noj tau haus kom txaus siab thaum lub caij av qhuav qhawv, thiab nws yuav ua kom koj cov pob txha rov muaj zog tuaj; koj yuav zoo li ib lub vaj muaj dej ywg nraim, thiab yuav zoo li ib lub qhov uas dej txhawv tsis txawj tu.
    12 Lawv yuav rov tsa dua koj tej qub vaj tse uas vau ntev los lawd; koj yuav rov txhim cov qub taw ntsa ntau txheej ntau tiam los lawd dua tshiab; ces luag yuav hu koj ua “tus kho cov phab ntsa tawg,” “tus rov txhim tej tej vaj tej tse puas.”

    13 Yog koj caiv hnub xas npas tos, koj thim koj txhais ko taw, tsis mus ua raws koj siab nyiam nyob hauv kuv hnub ntshiab, yog koj hu hnub xas npas tos ua "Hnub zoo tshaj plaws", thiab “HUAB TAIS hnub ntshiab tsim nyog hwm,” yog koj hwm hnub ntawd, koj tsis mus raws koj tej kev ntshaw, koj tsis ua raws koj siab nyiam, koj tsis hais lus phem,
    14 ces koj yuav muaj kev zoo siab puv npo nyob hauv HUAB TAIS; kuv yuav tsa koj nyob siab saum tej chaw siab nyob hauv lub ntiaj teb, kuv yuav muab koj txiv Yas Kos lub cuab tam los yug koj. Vim HUAB TAIS lub ncauj tau hais li ntawd.

    NPN   86: 1-2, 3-4, 5-6

    Txais:   (11ab) Thov koj qhia koj txoj kev rau kuv, Huab Tais,
                kuv thiaj paub taug kev raws koj txoj kev tseeb.

    Thov koj khoov cuab pob ntseg los mloog kuv, HUAB TAIS,

    thov koj teb kuv, vim kuv txom nyem thiab kuv pluag.
    Thov koj txuag kuv txoj sia, vim kuv lub siab npuab koj;
    thov koj cawm koj tus tub txib uas tso siab rau koj.
    Koj yog kuv tus Tswv Ntuj.

    Txais:   (11ab) Thov koj qhia koj txoj kev rau kuv, Huab Tais,
                 thiaj paub taug kev raws koj txoj kev tseeb.

    Thov koj khuv leej kuv, Huab Tais,
    vim kuv hu koj tas hnub.
    Thov koj pub kev zoo siab rau koj tus tub txib tus ntsuj plig,
    vim kuv tsa kuv tus ntsuj plig yuj plaws tuaj rau koj, Huab Tais.

    Txais:   (11ab) Thov koj qhia koj txoj kev rau kuv, Huab Tais,
                kuv thiaj paub taug taug kev raws koj txoj kev tseeb.

    HUAB TAIS, koj lub siab zoo thiab txawj zam txhaum,
    koj ua zoo tas nrho rau cov uas hu txog koj.
    HUAB TAIS, thov koj mloog kuv zaj thov ntuj
    thiab cuab pob ntseg rau kuv lo lus thov.

    Txais:   (11ab) Thov koj qhia koj txoj kev rau kuv, Huab Tais,
                kuv thiaj paub taug kev raws koj txoj kev tseeb.

    Zaj Cav Lub Moo Zoo:   ES XES KIAS 33: 11

    Huab Tais hais tias: Kuv tsis zoo siab pom tus neeg phem raug txoj kev tuag,
    kuv tsuas xav kom nws tig los ua neeg zoo, ces nws thiaj yuav ciaj sia.

    Ntawv Moo Zoo:   LK 5: 27-32

    27 Yes Xus mus pom ib tug sau se hu ua Les Vis zaum ntawm lub rooj sau se. Yes Xus hais rau nws tias: "Koj raws kuv mus."

    28 Ces Les Vis sawv tsees, nws tso tas ib puas tsav yam tseg, nws raws Yes Xus mus.
    29 Les Vis ua ib rooj qav loj tos txais Yes Xus hauv nws tsev. Muaj ib pab neeg sau se coob thiab tseem muaj lwm cov neeg nrog lawv zaum ntawm rooj mov.
    30 Cov Fas Lis Xais thiab lawv cov Kws Ntawv Ntshiab yws yws rau Yes Xus cov thwj tim hais tias: "Vim li cas nej nrog cov neeg sau se thiab cov neeg txhaum noj haus ua ke?"
    31 Yes Xus teb rau lawv tias: "Tsis yog cov neeg noj qab nyob zoo thiaj yuav vam txog kws kho mob, yog cov muaj txiab muaj nkeeg.
    32 Tsis yog kuv tuaj hu cov neeg ncaj, yog kuv tuaj hu cov neeg txhaum kom tig los lees txhaum hloov dua siab."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 7th March 2022, 4:07 pm

    Tim    7    lub    3    Hlis    2022

    Hnub Ob Lis Piam Ib Caij 40 Xyoo ABC Nruab Lis Piam Xyoo I & II
    Lectionary: 224

    Zaj Nyeem Ib:   LES VIS 19: 1-2, 11-18


    1 HUAB TAIS hais rau Mais Xes tias :
    2 "Koj yuav hais rau tas tsoom tub ki His Xas Lais tuaj sib sau ua ke tias :
    ‘Nej yuav ua neeg ntshiab, vim kuv, HUAB TAIS nej tus Tswv Ntuj, kuv Ntshiab.
    11 Nej yuav tsis txhob ua tub sab; tsis txhob hais tej lus cuav tsis muaj tseeb; tsis txhob dag ib leeg rau ib leeg.
    12 Nej yuav tsis txhob lam tuav txog kuv lub npe los cog lus cuav,
    vim nej ua li ntawd yog ua saib tsis taus nej tus Tswv Ntuj lub npe. Kuv yog HUAB TAIS.
    13 Koj yuav tsis txhob nrhiav kev noj tus nyob ze koj, tsis txhob nyiag nws tug;
    koj yuav tsis txhob khaws koj tus tub ntiav zog hnub no nws tus nqe zog cia rau ntawm koj kom txog tag kis.
    14 Koj yuav tsis txhob tsawm foom lus phem rau tus neeg lag ntseg, thiab tsis txhob muab ib yam coj mus tav tus dig muag kev, tiam sis koj yuav ntshai koj tus Tswv Ntuj. Kuv yog HUAB TAIS.
    15 Koj yuav tsis txhob ua tsis ncaj thaum koj txiav txim rau luag, txhob tuaj tus neeg pluag tog los txhob tsa tus ua nom ntsej muag, tiam sis koj yuav txiav txim rau cov neeg raws txoj kev ncaj xwb.
    16 Koj yuav tsis txhob xyav koj cov neeg txheeb ze lub npe rau ub rau no; los tsis txhob ua ntsej lag muag dig thaum tus nyob ze koj raug luag txov nws txoj sia. Kuv yog HUAB TAIS.
    17 Koj yuav tsis txhob ntxub koj tus kwv tij nyob hauv koj nruab siab; koj yuav cem yuav qhuab qhia tus nyob ze koj, koj thiaj yuav tsis tau ris nws qhov txhaum.
    18 Koj yuav tsis txhob nrhiav kev ua pauj thiab yuav tsis txhob khaws kev chim rau koj cov  neeg ib tug twg li. Tiam sis koj yuav nyiam tus nyob ze koj ib yam li koj nyiam koj. Kuv yog HUAB TAIS.

    NPN   19: 8, 9, 10, 15

    Txais: (Zam 6:63b) Huab Tais, koj cov lus yog tswv yim thiab yog txoj sia.

    HUAB TAIS txoj cai zoo tas nrho,
    nws ntxiv siav ntxiv zog rau tus ntsuj plig;
    HUAB TAIS tus txhooj tsim nyog ntseeg,
    nws ua kom tus neeg ruam thoob tsib tuaj.

    Txais: Huab Tais, koj cov lus yog tswv yim thiab yog txoj sia.

    HUAB TAIS cov lus qhuab qhia yog lus ncaj
    ua kom neeg lub siab kaj.
    HUAB TAIS lo lus qhia meej kawg,
    ua kom neeg qhov muag pom kev.

    Txais: Huab Tais, koj cov lus yog tswv yim thiab yog txoj sia.

    Txoj kev hwm HUAB TAIS dawb huv,
    txoj kev ntawd yuav nyob mus li;
    HUAB TAIS cov lus txiav txim yog lus tseeb,
    tas nrho yog lus ncaj ncees.

    Txais: Huab Tais, koj cov lus yog tswv yim thiab yog txoj sia.

    Thov kom cov lus ntawm kuv lub ncauj
    thiab txoj kev xav hauv kuv nruab siab zoo ntxim koj siab ,
    HUAB TAIS, kuv lub tsua thiab kuv tus cawm seej.

    Txais: Huab Tais, koj cov lus yog tswv yim thiab yog txoj sia.

    Zaj Cav lub Moo Zoo:   2 KOS LIS NTHOS 6: 2b

    Ntsia saib, lub sij hawm zoo, yog nyem no.
    Hnub muaj kev cawm neeg, yog nyem no.

    Ntawv Moo Zoo:   MT 25: 31-46

    Yes Xus hais rau nws cov thwj tim tias:
    31 “Thaum Neeg Leej Tub yuav los muaj hwj chim, thiab tas tsoom Tshiab yuav nrog nws los, mas nws yuav zaum saum nws lub theej kiab muaj hwj chim.

    32 Tas ib tsoom haiv neeg yuav sib sau nyob ntawm nws xub ntiag. Ces nws yuav muab lawv cais nyias nyob rau nyias ib qho, xws li tus tswv zov yaj cais cov yaj ntawm cov tshis.
    33 Nws yuav muab cov yaj tso rau ntawm nws sab xis, muab cov tshis tso rau ntawm nws sab laug.
    34 Ces tus Vaj yuav hais rau cov nyob nws sab xis tias: “Nej cov uas kuv Txiv pub txoj hmoov zoo rau nej, nej los. Nej txais lub Ceeb Tsheej uas yeej npaj tseg rau nej txij puag thaum pib tsim lub sim ceeb los lawm ua nej tug.
    35 Vim tias kuv tshaib plab, nej pub rau kuv noj; kuv nqhis dej, nej pub rau kuv haus, kuv yog ib tug pej kum neeg, nej txais kuv;
    36 kuv liab qab, nej muab rau kuv hnav; kuv mob, nej tuaj xyuas kuv; kuv nyob hauv tsev loj faj, nej tuaj saib kuv.”
    37 Ces cov neeg ncaj yuav teb tias: “Huab Tais, thaum twg peb tau pom koj tshaib plab ces peb tau pub rau koj noj, los pom koj nqhis dej, ces peb tau muab rau koj haus?
    38 Thaum twg peb tau pom koj yog ib tug pej kum neeg, ces peb tau txais koj, los pom koj liab qab ces peb tau muab rau koj hnav ?
    39 Thaum twg peb tau pom koj mob los nyob hauv tsev loj faj, ces peb tau tuaj xyuas koj ?”
    40 Tus Vaj yuav teb rau lawv tias: “Kuv hais tseeb rau nej, yog nej tau ua npaum li cas rau ib tug twg nyob hauv cov me tshaj hauv kuv tsoom kwv, mas yog nej tau ua rau kuv lawm.”
    41 Ces tus vaj yuav hais rau cov nyob sab laug tias: “Nej khiav mus deb ntawm kuv, nej cov tau txoj hmoov phem, mus nyob hauv cov hluav taws kub tsis txawj tuag, uas yog npaj rau tus dab phem thiab nws cov dab nyob.

    42 Vim thaum kuv tshaib plab nej tsis pub rau kuv noj, kuv nqhis dej nej tsis pub rau kuv haus,
    43 kuv yog ib tug pej kum neeg nej tsis txais kuv, kuv liab qab nej tsis muab rau kuv hnav, kuv mob thiab kuv nyob hauv tsev loj faj nej tsis tuaj xyuas kuv.”
    44 Ces cov ntawd kuj yuav teb rau tus Vaj tias: “Huab Tais, thaum twg peb tau pom koj tshaib plab los nqhis dej, pom koj yog ib tug pej kum neeg, pom koj liab qab, pom koj mob los nyob hauv tsev loj faj, ces peb tsis tau pab koj?”
    45 Ces tus Vaj yuav teb rau lawv tias: “Kuv hais tseeb rau nej, yog nej tsis tau ua rau ib tug twg nyob hauv cov neeg me tshaj npaum li cas, mas yog nej tsis tau ua rau kuv.”
    46 Ces cov no yuav mus raug txim ib txhiab ib txhis, hos cov siab ncaj yuav mus txais txoj sia nyob mus li.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 7th March 2022, 4:28 pm

    Tim    8    lub    3    Hlis    2022

    Hnub Peb Lis Piam Ib Caij 40 Xyoo ABC Nruab Lis Piam Xyoo I & II
    Lectionary: 225

    XHLT:  
    John of God

    Zaj Nyeem Ib:   HIS XAIS 55: 10-11


    Huab Tais hais li no:
    10 “Xws li cov nag thiab cov daus uas poob saum ntuj los,
    lawv tsis rov mus saum ntuj ua ntej lawv yuav tsum xub ywg lub ntiaj teb tas tso,
    kom av zoo thiab tuaj taus kaus, thiaj yuav txi taus noob qoob noob loo
    rau tus tswv tseb noob thiab pub tau mov rau tus yuav noj tso,
    11 ib yam li ntawd, lo lus tawm ntawm kuv lub ncauj los
    kuj yuav tsis rov qab los cuag kuv qhuav nquas,
    nws yuav tsum xub tau ua qhov kuv xav kom ua,
    thiab ua tiav log txoj hauj lwm kuv xa nws mus ua tso."

    NPN   34: 4-5, 6-7, 16-17, 18-19

    Txais: (18b) Tswv Ntuj cawm cov neeg ncaj ntawm tas lawv tej kev nyuaj.

    Nej nrog kuv cav txog HUAB TAIS lub koob meej,
    peb sawv daws ua ke qhuas nws lub npe.
    Kuv nrhiav HUAB TAIS, nws tau teb kuv,
    thiab tau cawm kuv ntawm tas kuv tej kev ntshai.

    Txais: (18b) Tswv Ntuj cawm tus neeg ncaj ntawm tas lawv tej kev nyuaj.

    Nej vam txog nws ces nej yuav zoo siab luag ntxhi,
    nej ntsej muag yuav tsis liab vim nej tau kev txaj muag.
    Thaum tus neeg pluag hu, HUAB TAIS yuav hnov,
    thiab yuav cawm nws ntawm tas nws tej kev nyuaj.

    Txais: (18b) Tswv Ntuj cawm tus neeg ncaj ntawm tas lawv tej kev nyuaj.

    HUAB TAIS muaj qhov muag pom cov neeg ncaj,
    muaj pob ntseg hnov lawv lub suab quaj.
    HUAB TAIS tawm tsam cov neeg ua phem,
    rhuav lawv kom lub ntiaj teb txhob nco txog lawv ntxiv.

    Txais: (18b) Tswv Ntuj cawm tus neeg ncaj ntawm tas lawv tej kev nyuaj.

    Thaum cov neeg ncaj hu, HUAB TAIS hnov lawv,
    Nws cawm lawv ntawm tas lawv tej kev nyuaj.
    HUAB TAIS nyob ze ze cov neeg siab lwj siab ntuag,
    thiab nws cawm cov uas tas kev cia siab.

    Txais: (18b) Tswv Ntuj cawm tus neeg ncaj ntawm tas lawv tej kev nyuaj.

    Zaj Cav lub Moo Zoo:   MT 4: 4b

    Neeg tsis kawg muab mov los yug siav xwb,
    neeg tseem yuav muab txhua lo lus tawm ntawm Tswv ntuj lub ncauj los yug siav thiab.

    Ntawv Moo Zoo:   MT 6: 7-15

    Yes Xus hais rau nws cov thwj tim tias:
    7 “Thaum nej teev Ntuj, nej txhob ntuas mus ntuas los zoo li cov neeg teev dab ua: lawv xav tias yog lawv hais lus ntau ntau, mas dab yuav mloog lawv zoo dua.
    8 Nej txhob ua zoo li lawv. Vim nej Txiv paub tias qhov twg yog qhov nej yuav tsum muaj, tab yog nej tsis tau thov, nws twb xub paub lawm.
    9 Nej yuav teev Ntuj zoo li no:
    ‘Peb Txiv nyob saum ntuj, kom koj lub Npe ntshiab nto moo lug.
    10 Koj lub Ceeb Tsheej kom los txog.
    Kom muaj raws koj nyiam nyob ntiaj teb no zoo li nyob saum ntuj.
    11 Thov koj pub mov txaus peb noj hnub no.
    12 Koj zam txhaum rau peb zoo li peb zam rau luag.
    13 Koj txhob tso peb raug kev ntxias. Thov koj npo peb dim ntawm kev phem.’
    14 Yog nej zam rau cov neeg ua txhaum rau nej, mas nej Txiv nyob saum ntuj kuj yuav zam rau nej thiab.
    15 Hos yog nej tsis zam txhaum rau luag, mas nej Txiv kuj yuav tsis zam rau nej thiab.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 8th March 2022, 9:01 am

    Tim    9    lub    3    Hlis    2022

    Hnub Plaub Lis Piam Ib Caij 40 Xyoo ABC Nruab Lis Piam Xyoo I & II
    Lectionary: 226

    XHLT:  LN Frances nyob Los Mas


    Zaj Nyeem Ib:   YOS NAS 3: 1-10

    1 HUAB TAIS lo lus nrov tuaj rau Yos Nas zaum ob tias:

    2 "Koj sawv kev, koj yuav mus kom txog lub tuam tsheej loj Nis Nis Vas, koj yuav tshaj rau lawv raws li kuv qhia rau koj hais."
    3 Yos Nas thiaj sawv kev, ces nws mus rau Nis Nis Vas raws li HUAB TAIS lo lus. Lub tsheej Nis Nis Vas yog ib lub tsheej loj kawg nkaus, yuav mus peb hnub ke thiaj hla dhau lub tsheej.
    4 Yos Nas pib mus hla hauv lub nroog, nws mus kev deb li ib hnub ke, nws ke mus ke tshaj tawm rau sawv daws tias: "Tshuav plaub caug hnub ntxiv, ces lub tsheej Nis Nis Vas yuav raug rhuav tas."
    5 Cov neeg nyob Nis Nis Vas cia li ntseeg Tswv Ntuj; lawv ceeb toom kom sawv daws yoo mov thiab npua ntaub tsaj, tsis hais tus laus los tus hluas li.
    6 Thaum lub moo no nrov tuaj txog tus vaj nyob Nis Nis Vas, nws sawv tsees ntawm nws lub theej kiab los, nws hle hlo nws lub tsho tshaj sab tseg, nws muab zoj ib lub hnab tsaj los npua, nws mus zaum hauv cov qhov tshauv.

    7 Ces nws kom lawv mus qw thoob plaws hauv lub nroog Nis Nis Vas raws li tus vaj thiab nws cov tub nom tub tswv lo lus ceeb toom tias: "Tej neeg thiab tsiaj txhu, cov tsiaj loj thiab tsiaj me, sawv daws yuav tsis txhob noj dab tsi li, tsis noj mov noj zaub tsis haus dej li.
    8 Txawm tus neeg txawm tus tsiaj los yuav tsum npua hnab tsaj huv tib si thiab yuav hu txog Tswv Ntuj tas zog; txhua tus neeg nyias yuav tso nyias txoj kev ua phem tseg, yuav cheem nyias ob txhais tes kom txhob ntaus luag txhob tsim txom luag ntxiv.
    9 Tsis muaj neeg paub, tiam sis tej zaud Tswv Ntuj siab yuav nqig, nws yuav thim xav, yuav thim nws txoj kev npau taws kub lug, ces peb sawv daws yuav tsis tuag ."
    10 Tswv Ntuj pom lawv cov hauj lwm, thiab pom tias lawv tso lawv txoj kev ua phem tseg tiag, ces Tswv Ntuj hloov siab, nws thim qhov phem uas nws npaj yuav ua rau lawv, ces nws tsis ua raws li nws tau hais.

    NPN   51: 3-4, 12-13, 18-19

    Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

    Tswv Ntuj, thov koj khuv leej kuv vim koj lub siab zoo;
    thov koj so kuv qhov txhaum pov tseg, vim koj txoj kev hlub loj tas nrho.
    Thov koj ntxuav kuv lub txim pov tseg kom tas
    thiab tshem kuv qhov txhaum mus kom kuv dawb huv tuaj.

    Txais: Tswv Ntuj, koj tsis thuam tus tu siab rau nws cov txhaum thiab ua neeg me.

    Tswv Ntuj, thov koj tsim ib lub siab huv lis si rau kuv,
    thiab rov muab ib lub tswv yim nyob ruaj nreb rau kuv.
    Koj tsis txhob muab kuv ntiab mus deb ntawm koj,
    thiab txhob rho koj leej Tswv Yim Ntshiab tawm ntawm kuv mus.

    Txais: Tswv Ntuj, koj tsis thuam tus tu siab rau nws cov txhaum thiab ua neeg me.

    Vim koj tsis zoo siab txais cov kev txi ntuj,
    yog kuv hlawv tsiaj txi ntuj, koj yuav tsis txais.
    Kuv txoj kev txi ntuj, Tswv Ntuj, yog muaj ib lub tswv yim xav lees txhaum;
    tus muaj ib lub siab xav lees txhaum thiab ua neeg me,

    Tswv ntuj, koj yuav tsis thuam nws.

    Txais: Tswv Ntuj, koj tsis thuam tus tu siab rau nws cov txhaum thiab ua neeg me.

    Zaj Cav lub Moo Zoo:   YOS ES 2: 12-13

    HUAB TAIS hais tias, lub sij hawm no,
    nej kav tsij muab tas nrho nej lub siab tig rov los cuag kuv,
    vim kuv muaj lub siab hlub thiab khuv leej neeg.

    Ntawv Moo Zoo:   LK 11: 29-32

    29 Thaum tej pab neeg coob coob tuaj sib sau nyob ua ke, Yes Xus pib hais lus rau lawv tias: "Tiam neeg no yog ib tiam neeg phem. Lawv taij ib lub cim, tab sis yuav tsis muaj ib lub cim rau lawv pom, tsuas kawg muaj tus yaj saub Yos Nas lub cim xwb.

    30 Xws li Yos Nas yog ib lub cim rau cov neeg nyob Nis Nis Vas, Neeg Leej Tub kuj yog ib lub cim rau tiam neeg no thiab.
    31 Thaum txog hnub txiav txim, tus poj vaj nyob Naj Fab yuav nrog tiam neeg no sawv rov los, nws yuav muab txim rau lawv, vim nws tuaj puag tim npoo ntiaj teb kawg tuaj mloog Xas Los Moos cov lus thoob tsib. Hos nyob ntawm no, twb muaj tus loj dua Xas Los Moos!
    32 Thaum txog hnub txiav txim, cov neeg nyob Nis Nis Vas yuav nrog tiam neeg no sawv rov los, lawv yuav muab txim rau tiam neeg no, vim tias thaum Yos Nas tuaj qhia lawv, mas lawv thim xav, hos nyob ntawm no twb muaj tus loj dua Yos Nas!”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 9th March 2022, 3:01 pm

    Tim    10    lub    3    Hlis    2022

    Hnub Tsib Lis Piam Ib Caij 40 Xyoo ABC Nruab Lis Piam Xyoo I & II
    Lectionary: 227

    Zaj Nyeem Ib:   Es Thes C: 12, 14-16, 23-25 (raws li ‘USCCB Lectionary Weewkdays Year II.’)

                                                                                  
    12 Tus poj vaj Es Thes txhawj xeeb loj kawg nkaus, ces nws tig mus vam khom HUAB TAIS pab. Nws khoov ti av nrog nws cov ntxhais txib, txij sawv nrxov mus txog tsaus ntuj.

    14 Nws thiaj thov Huab Tais His Xas Lais tus Tswv Ntuj li no tias: “Has Nplas Has tus Tswv Ntuj, His Xas Has tus Tswv Ntuj, Yas Kos tus Tswv Ntuj, thov kom koj nto koob meej. Thov koj tuaj pab kuv, vim kuv ib leeg xwb, tsis muaj leej twg pab, tsuas muaj koj xwb.
    15 Thiab kuv tab tom yuav pheej hmoo rau kuv txoj sia.
    16 Txij thaum kuv tseem yau los, kuv tau hnov kuv cov pojn yawm tej ntaub ntawv hais txog tias, Huab Tais, txhua zaus koj yeej tuaj cawm cov neeg uas ua ntxim koj siab. Zaum no, thov koj pab kuv, vim kuv ib leeg xwb, tsis muaj leej twg pab, tsuas muaj koj xwb, Huab Tais kuv tus Tswv Ntuj.
    23 Zaum no, thov koj tuaj pab kuv, uas yog ib tug me nyuam ntsuag.

    24 Thov koj muab ib co lus muaj kuab rau kuv qhov ncauj kom txawj ua rau tsov mloog lus thiab txawj tig tsov lub siab mus ntxub peb tus yeeb ncuab, thiaj yuav ua kom tus yeeb ncuab thiab nws cov neeg koom siab ploj mus kom tas.
    25. Thov koj cawm peb dim ntawm peb cov yeeb ncuab txhais tes; koj muab peb txoj kev quaj ntsuag hloov mus ua kev zoo siab, thiab muab peb txoj kev tu siab hloov mus ua kev kaj siab.”

    NPN   138: 1-2ab, 2cde-3, 7c-8

    Txais: (3a) Huab Tais, thaum kuv hu kom koj tuaj pab, koj tau teb kuv.

    HUAB TAIS, kuv ua koj tsaug tas siab tas ntsws,
    vim koj tau hnov kuv lub ncauj cov lus thov;
    kuv yuav hu nkauj cav txog koj nyob ntawm cov tshiab xub ntiag;
    kuv yuav khoov pe hawm koj nyob hauv koj lub tuam tsev ntshiab
    thiab yuav hais ua tsaug rau koj lub npe.

    Txais: (3a) Huab Tais, thaum kuv hu kom koj tuaj pab, koj tau teb kuv.

    Vim Koj txoj kev ua siab zoo thiab koj txoj kev tseeb,
    koj ua kom koj lub npe thiab koj txoj kev cog lus
    nyob siab tshaj tas txhua yam.
    Thaum kuv hu txog koj, koj tau teb kuv lawm,
    koj tau ntxiv zog rau kuv kom kuv lub zog loj tuaj.

    Txais: (3a) Huab Tais, thaum kuv hu kom koj tuaj pab, koj tau teb kuv.

    Koj txhais tes xis tau cawm kuv.
    HUAB TAIS yuav ua kom tiav tej yam nws tau npaj ua rau kuv.
    HUAB TAIS, koj lub siab zoo yuav nyob mus li;
    thov koj txhob tso cov hauj lwm koj txhais tes tau tsim pov tseg.

    Txais: (3a) Huab Tais, thaum kuv hu kom koj tuaj pab, koj tau teb kuv.

    Zaj Cav lub Moo Zoo:   NPN 51: 12a, 14a

    Tswv Ntuj, thov koj tsim ib lub siab huv lis si rau kuv,
    thov koj pub kom kuv rov zoo siab nyob hauv koj txoj kev cawm

    Ntawv Moo Zoo:   MT 7: 7-12

    Yes Xus hais rau nws cov thwj tim tias:
    7 "Nej thov, ces nej yuav tau txais; nej nrhiav, ces nej yuav ntsib; nej khob qhov rooj, ces luag yuav qhib rau nej.

    8 Vim tias leej twg thov, nws yuav tau txais; leej twg nrhiav, nws yuav ntsib; leej twg khob qhov rooj, mas yuav muaj tus qhib rau nws.
    9 Nyog hauv nej, puas muaj leej twg yuav muab ib lub pob zeb rau nws tus tub yog tus tub taij mov noj?
    10 Los puas yuav muab ib tug nab rau nws, yog nws taij ib tug ntses?
    11 Yog tias nej, uas yog neeg phem, twb txawj pub tej yam zoo rau nej cov me nyuam, mas nej Txiv tus nyob saum ntuj haj yam yuav txawj pub tej yam zoo rau cov neeg uas thov nws.
    12 Tas ib puas tsav yam uas nej xav kom luag ua rau nej, mas nej kuj yuav tsum ua tej ntawd rau luag thiab. Txoj Cai thiab cov Yaj Saub yog li ntawd.”
               


    Last edited by Mim on 10th March 2022, 9:56 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 10th March 2022, 6:14 am

    Tim    11    lub    3    Hlis    2022

    Hnub Rau Lis Piam Ib Caij 40 Xyoo ABC Nruab Lis Piam Xyoo I & II
    Lectionary: 228

    Zaj Nyeem Ib:       ES XES KIAS  18:   21-28

    Huab Tais Tswv Ntuj hais li no:
    21 “Yog tus neeg siab phem tseg ncua tsis ua tas nws tej kev txhaum ntxiv uas nws tau ua, nws los coj kuv cov lus qhia thiab ua raws txoj cai thiab raws qhov ncaj, mas nws yeej yuav muaj txoj sia, nws yuav tsis tuag.

    22 Kuv yuav tsis nco txog nws cov txhaum nws tau ua ib qho li, nws yuav ciaj vim nws ua qhov ncaj.
    23 Kuv puas yuav zoo siab pom ib tug neeg txhaum tuag?” Huab Tais TSWV NTUJ hais li. “Ntshai kuv yuav zoo siab dua yog nws tso nws txoj kev ua phem tseg kom nws tau txoj sia.
    24 Tab sis yog tus neeg siab ncaj ncaim ntawm nws txoj kev ua ncaj thiab mus ua phem xws li tus neeg tsis hwm Ntuj ua, mas tus neeg ntawd puas yuav tsum muaj txoj sia nyob? Nws cov hauj lwm zoo uas thaum ub nws tau ua, kuv yuav tsis nco txog li. Vim nws tau ntxeev siab tso kev ntseeg tseg thiab mus ua txhaum, mas vim li no nws yuav tsum tuag.

    25 Nej hais tias: ‘HUAB TAIS ua tsis ncaj?’ Tsev neeg His Xas Lais, nej mloog zoo zoo mog, puas yog kuv ua tsis ncaj? Zoo li yog nej ua tsis ncaj los tsis yog?
    26 Tus neeg siab ncaj nws ncaim ntawm txoj kev ncaj mus ua txhaum, ces nws yuav tsum tuag; yog vim nws tau ua txhaum nws thiaj yuav tsum tuag.
    27 Hos tus neeg siab phem nws tso nws txoj kev ua phem pov tseg, nws los ua raws qhov yog thiab raws qhov ncaj, ces nws yuav txuag tau nws txoj sia nyob.
    28 Vim nws tso tas nws tej kev ua txhaum pov tseg, mas nws yeej yuav muaj txoj sia, nws yuav tsis tuag.”

    NPN       130:   1-2, 3-4, 5-7a, 7bc-8

    Txais: (3) Huab Tais, yog koj cim ntsoov peb cov txhaum, leej twg thiaj yuav nyob taus?

    Kuv nyob hauv qab tiv txwv hu txog koj, HUAB TAIS,
    HUAB TAIS, thov koj mloog kuv lub suab hu mas!
    Thov koj cuab pob ntseg mloog kuv lub suab thov koj.

    Txais: (3) Huab Tais, yog koj cim ntsoov peb cov txhaum, leej twg thiaj yuav nyob taus?

    HUAB TAIS, yog koj cim ntsoov peb cov txhaum,
    leej twg thiaj yuav nyob taus?
    Tab sis nyob ntawm koj muaj kev zam txhaum,
    thov kom sawv daws hwm koj zoo.

    Txais: (3) Huab Tais, yog koj cim ntsoov peb cov txhaum, leej twg thiaj yuav nyob taus?

    Kuv tso siab rau HUAB TAIS,
    kuv tus ntsuj plig tso siab rau nws lo lus.
    Kuv tus ntsuj plig tos ntsoov HUAB TAIS
    tos heev tshaj cov zov keeb tos lub caij kaj ntug.
    His Xas Lais, koj yuav tsum tos ntsoov HUAB TAIS.

    Txais: (3) Huab Tais, yog koj cim ntsoov peb cov txhaum, leej twg thiaj yuav nyob taus?

    Vim HUAB TAIS muaj lub siab zoo,
    thiab nws muaj txoj kev cawm nplua mias,
    nws yuav cawm His Xas Lais
    ntawm tas lawv tej kev txhaum.

    Txais: (3) Huab Tais, yog koj cim ntsoov peb cov txhaum, leej twg thiaj yuav nyob taus?

    Zaj Cav lub Moo Zoo:       ES XES KIAS  18:   31

    HUAB TAIS hais tias: “Nej cia li tso tas nej tej kev ua txhaum pov tseg,
    thiab hloov dua ib lub siab tshiab thiab ib lub tswv yim tshiab.”

    Ntawv Moo Zoo:       MT  5:   20-26

    Yes Xus hais rau nws cov thwj tim tias:
    20 "Kuv hais rau nej: Yog nej tsis ua siab ncaj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv lub Ceeb Tsheej saum ntuj.

    21 Nej tau hnov cov lus qhia rau tej laus thaud tias: ‘Koj tsis txhob tua neeg. Tus twg tua neeg, nws yuav raug luag txiav txim rau nws.’
    22 Hos kuv, mas kuv hais rau nej tias: Leej twg npau taws rau nws tus kwv tij, mas nws yuav raug luag txiav txim rau nws. Yog nws hais rau nws tus kwv tij tias ‘Niag ruam,’ mas nws yuav raug txiav txim ntawm lub rooj txwj laus Xas Nes Nrees. Yog nws hais rau nws tus kwv tij tias: ‘Niag vwm,’ mas nws yuav mus raug txim nyob hauv dab phem cov hluav taws.
    23 Li ntawd thaum koj cev ib co txim rau saum lub thaj txi Ntuj, yog koj nco dheev tias koj tus kwv tij tau muaj lus rau koj lawm,
    24 mas koj cia li tso koj cov txim rau ntawm lub thaj txi Ntuj, koj mus nrog koj tus kwv tij hais kom haum tso, koj mam rov los cev koj cov txim.
    25 Thaum koj nrog tus neeg ntxub koj tseem ua ke taug kev, koj kav tsij nrog nws hais kom haum, tsam nws coj koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj.
    26 Kuv hais tseeb rau koj, koj yuav tawm tsis tau hauv tsev loj faj los, mus txog thaum koj rho tej nyiaj qab nas los them kom tas txog npib kawg tso.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 11th March 2022, 10:29 am

    Tim    12    lub    3    Hlis    2022

    Hnub Xya Lis Piam Ib Caij 40 Xyoo ABC Nruab Lis Piam Xyoo I & II
    Lectionary: 229

    Zaj Nyeem Ib:   TXOJ CAI OB 26: 16-19

    Mais Xes Hais rau tsoom pej xeem tias:
    16 “Hnub no, HUAB TAIS nej tus Tswv Ntuj ceeb toom rau nej tias kom nej yuav tsum coj tej kev cai tej lij cho no. Yog  li, nej yuav ua zoo muab tas nej lub siab nej tus nstuj plig los coj tej kev cai tej lij choj ntawd.

    17 Hnub no, nej nrog HUAB TAis cog ib lo lus li no tias: Nws yuav yog nej tus Tswv Ntuj, thiab nej yuav taug raws nws txoj kev, coj raws nws tej lij choj, tej lus qhia, tej kev cai, thiab nej yuav mloog nws lub suab.
    18 Hnub no HUAB TAIS kuj nrog nej cog lus tias: nej yuav yog nws haiv neeg nws ntiag tug, xws li nws tau cog lus rau nej lawm, yog tias nej coj nws tej lus qhia tas huv tib si.
    19 Ces HUAB TAIS yuav tsa nej kom nyob siab tshaj, kom nto koob meej tshaj, kom muaj meej mom tshaj, thiab muaj hwj chim tshaj lwm cov haiv neeg uas nws tau tsim los huv tib si; nej yuav yog ib haiv neeg ntshiab rau HUAB TAIS nej tus Tswv Ntuj, raws li nws tau cog lus lawm.”

    NPN   119: 1-2, 4-5, 7-8

    Txais: (1b) Muaj hmoov zoo yog cov uas coj raws Huab Tais txoj cai!

    Muaj hmoov zoo yog cov uas taug ib txoj kev tsis muaj chaw xyeej,
    yog cov uas taug raws HUAB TAIS txoj cai.
    Muaj hmoov zoo yog cov uas coj raws nws tej lus qhia,
    yog cov uas nrhiav nws tas lawv siab lawv ntsws.

    Txais: (1b) Muaj hmoov zoo yog cov uas coj raws Huab Tais txoj cai!

    Koj tau ceeb toom kom sawv daws
    mob siab mloog koj tej lus qhia.
    Thov koj pab kuv kom kuv nyob ruaj nreb
    hauv koj tej kev cai lij choj!

    Txais: (1b) Muaj hmoov zoo yog cov uas coj raws Huab Tais txoj cai!

    Kuv yuav muab ib lub siab ncaj los ua koj tsaug,
    thaum kuv paub txog koj txoj cai ncaj ncees lawm.
    Kuv yuav coj nraim koj tej cai lij choj,
    thov koj tsis txhob tso kuv pov tseg kiag li.

    Txais: (1b) Muaj hmoov zoo yog cov uas coj raws Huab Tais txoj cai!

    Zaj Cav lub Moo Zoo:   2 KLN 6: 2b

    Nej ntsia saib, lub sij hawm zoo yog nyem no;
    hnub muaj kev cawm seej yog nyem no.

    Ntawv Moo Zoo:   MT 5: 43-48

    Yes Xus hais rau nws cov thwj tim tias:
    43 "Nej tau hnov tej lus qhia tias:

    ’Koj yuav nyiam tus nyob ze koj, koj yuav ntxub koj tus yeeb ncuab.’
    44 Tab sis, kuv hais rau nej tias:

    Nej yuav nyiam nej cov yeeb ncuab, nej yuav thov Ntuj rau cov tsim txom nej;
    45 nej thiaj yuav yog nej Txiv tus nyob saum ntuj cov tub;

    vim tias nws ua kom lub hnub tuaj ziab cov neeg phem thiab cov neeg zoo huv tib si,
    thiab nws ua kom nag los rau cov siab ncaj thiab rau cov siab nkhaus huv tib si.
    46 Yog nej nyiam cov neeg nyiam nej xwb, mas nej yuav tau koob haum dab tsi?

    Cov sau se lawv tsis txawj ua ib yam li ntawd thiab lod?
    47 Yog nej tsuas hu nej cov kwv tij txheeb ze xwb, mas nej tau ua dab tsi tshaj?

    Tab yog cov neeg teev pej kum dab, lawv tsis txawj ua li ntawd thiab lod?
    48 Hos nej, mas nej yuav tsum ua neeg zoo tshaj plaws,

    ib yam li nej Txiv nyob saum ntuj yog tus zoo tshaj plaws.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 13th March 2022, 11:47 am

    Tim    14    lub    3    Hlis    2022

    Hnub Ob Lis Piam Ob Caij 40 Xyoo ABC Nruab Lis Piam Xyoo I & II
    Lectionary: 230

    Zaj Nyeem Ib:   DN 9: 4b-10

    4b “Huab Tais, tus Tswv Ntuj loj thiab txaus qhuas tas nrho, koj ua raws li lo lus koj tau cog thiab koj khuv leej cov neeg uas nyiam koj thiab cov uas coj rawv koj cov lus qhia.

    5 Peb tau ua txhaum lawm, peb tau ua qhov phem qhov tsis zoo, thiab peb tau ntxeev siab, tau tso koj cov lus qhia thiab koj cov cai lij choj pov tseg lawm.
    6 Peb tsis tau mloog cov yaj saub uas yog koj cov tub txib lus, thaum lawv tuav txog koj lub npe hais lus rau peb cov vaj, rau peb cov thawj coj, rau peb phaj txiv, thiab rau tas tsoom pej xeem nyob hauv lub teb chaws.
    7 Huab Tais, koj yog tus muaj txoj kev ncaj, hos peb yog cov tau kev txaj muag; hnub no, kev txaj muag poob los raug peb, txawm yuav yog cov nyob Yus Das teb, cov nyob Yes Lus Xas Les, thiab tas nrho tsoom His Xas lais, cov nyob deb los nyob ze, nyob tas txhua lub teb chaws uas koj tau xa lawv mus nyob, vim lawv tau ntxeev siab rau koj.
    8 Huab Tais, peb tau kev txaj muag, nrog rau peb cov vaj, peb cov nom cov tswv, thiab peb phaj txiv, vim peb tau ua txhaum rau koj.
    9 Huab Tais, peb tus Tswv Ntuj yog tus muaj txoj kev khuv leej thiab txoj kev zam txhaum, txawm tias peb ntxeev siab rau nws,

    10 thiab peb tsis mloog nws lub suab, tsis coj raws nws txoj cai uas nws kom nws cov yaj saub uas yog nws cov tub txib muab rau peb.”

    NPN   79: 8, 9, 11+13

    Txais: (103:10a) Huab Tais, thov koj tsis txhob ua rau peb raws li peb cov txhaum.

    Thov koj txhob nco txog peb tej txhaum yav dhau los ntxiv;
    muab koj txoj kev khuv leej tuaj rau peb sai sai,
    vim peb poob rau qhov qis kawg nkaus lawm.

    Txais: (103:10a) Huab Tais, thov koj tsis txhob ua rau peb raws li peb cov txhaum.

    Thov koj pab peb, Tswv Ntuj, peb tus cawm seej,
    vim koj lub npe muaj koob meej;
    Thov cawm peb thiab zam peb cov txhaum rau peb
    kom koj lub npe nto moo loj.

    Txais: (103:10a) Huab Tais, thov koj tsis txhob ua rau peb raws li peb cov txhaum.

    Thov koj cia cov neeg nyob txim lub suab ntsaj nrov tuaj txog koj;
    koj siv koj lub hwj huam loj los cawm cov neeg poob rau hauv kev tuag.
    Ces peb, uas yog koj haiv neeg thiab pab yaj nyob hauv koj lub nras zaub
    yuav ua koj tsaug mus li tsis muaj caij kawg,

    Thiab yuav cav txog koj lub koob meej tiam dhau tiam.

    Txais: (103:10a) Huab Tais, thov koj tsis txhob ua rau peb raws li peb cov txhaum.

    Zaj Cav lub Moo Zoo:   ZAM 6: 63C, 68C

    Huab Tais, koj cov lus yog ntsuj plig thiab yog txoj sia;
    koj muaj cov lus pub txoj sia nyob mus li.

    Ntawv Moo Zoo:   LK 6: 36-38

    Yes Xus hais rau nws cov thwj tim tias:
    36 “Nej yuav tsum khuv leej neeg ib yam li nej Txiv khuv leej neeg.
    37 Nej yuav tsis txhob txiav txim rau luag, thiaj yuav tsis muaj tus txiav txim rau nej. Nej yuav tsis txhob rau txim rau luag, thiaj yuav tsis muaj tus rau txim rau nej. Nej zam rau luag, thiaj yuav muaj tus zam rau nej.
    38 Nej pub rau luag, ces yuav muaj tus pub rau nej; luag yuav luj kom puv puv, yuav muab tswm muab nchos kom cee ceev, yuav ua kom nco lug los hliv rau ntawm nej xub ntiag; vim tias nej luj li cas rau luag, mas kuj yuav muaj tus luj ib yam li ntawd rau nej thiab.”

                   
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 14th March 2022, 6:24 am

    Tim    15    lub    3    Hlis    2022


    Hnub Peb Lis Piam Ob Caij 40 Xyoo ABC Nruab Lis Piam Xyoo I & II
    Lectionary: 231

    Zaj Nyeem Ib:   HIS XAIS 1: 10, 16-20

    10 Cov nom tswv kav Xos Dos Mas, nej cia li mloog Huab Tais lo lus!

    Tsoom pej xeem nyob Nkos Mos Las, nej cia li cuab pob ntseg rau peb tus Tswv Ntuj lo lus qhia!
    16 Nej yuav ntxuav nej kom nej dawb huv tuaj!

    Nej tshem nej tej kev ua phem mus kom kuv qhov muag txhob pom ntxiv;
    nej tso txoj kev ua phem tseg!
    17 Nej xyaum ua qhov zoo, nej nrhiav kev ncaj ncees, nej pab tsa tus neeg raug luag tsim txom cai,
    nej ua ncaj rau tus tub ntsuag, nej tuaj tus poj ntsuam tog.
    18 Nej tuaj, peb sib kho kom mus rau qhov ncaj! HUAB TAIS hais li.
    Txawm tias nej tej txhaum yuav liab ploog, los lawv yuav rov dawb li daus tau;
    tab yog nej tej txhaum yuav liab dub nciab, los lawv yuav rov dawb xws plaub yaj tau.
    19 Yog nej mob siab tiag thiab nej mloog lus,
    mas nej yuav tau noj tej yam zoo nyob hauv lub teb chaws.
    20 Tiam sis yog nej tsis kam mloog lus thiab nej tawv kom dhau,
    mas hniav ntaj yuav txo nej. Vim HUAB TAIS lub ncauj tau hais li ntawd lawm.

    NPN   50: 8-9, 16bc-17, 21+23

    Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

    “Kuv tsis yog cem nej vim nej cov thaj txi ntuj,
    nej tej tsiaj hlawv txi ntuj yeej nyob ntawm kuv xub ntiag mus li.
    Kuv tsis coj ib tug heev nyuj hauv koj tsev mus,
    los ib tug laug tshis hauv koj pab tsiaj mus.”

    Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom..

    “Tim li cas nej lub ncauj thiaj lam qog kuv cov kev cai lij choj,
    thiab lam lees kuv cov lus kuv tau nrog nej cog,
    tiam sis nej ntxub ua kom raws txoj cai
    thiab nej muab kuv tej lus ua ntia pov tom qab xwb?”

    Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

    “Thaum nej ua tej yam zoo li no, kuv puas yuav tsum ua ntsej lag muag dig?
    Nej puas xav tias kuv zoo nkaus li nej thiab?
    Kuv yuav qhuab qhia nej, yuav kos kiag rau nej qhov muag ntsia.
    Tus neeg twg tuaj cev lus zoo rau kuv yog nws cav txog kuv lub koob meej;
    tus twg xaiv txoj kev ncaj taug kuv yuav muab Tswv Ntuj txoj kev cawm neeg rau nws pom.

    Txais: (23b) Kuv yuav muab Tswv Ntuj lub hwj huam cawm neeg rau tus neeg ncaj pom.

    Zaj Cav lub Moo Zoo:   ES XES KIAS 18: 31

    HUAB TAIS hais tias:
    Nej cia li muab tas nej tej txhaum nej tau ua pov tseg deb ntawm nej,
    thiab nej cia li yuav dua ib lub siab tshiab thiab ib lub tswv yim tshiab.

    Ntawv Moo Zoo:   MT 23: 1-12

    1 Yes Xus hais lus rau cov pab neeg coob coob thiab rau nws cov thwj tim,

    2 nws hais tias: “Cov Kws Ntawv Ntshiab thiab cov Fas Lis Xais zaum Mais Xes lub rooj zaum.
    3 Vim li no mas nej yuav ua thiab coj tas txhua yam lawv qhia rau nej, tab sis nej tsis txhob ua raws li lawv ua. Vim lawv qhia, tab sis lawv twb tsis ua raws qhov lawv qhia.
    4 Lawv zoj tej lub nra hnyav hnyav ris tsis taus tso rau saum tsoom sid xwb pwg, tab sis lawv tsis kam tsa ib tug nyuag ntiv tes mus thawb kom ua zog li.
    5 Lawv ua txhua tsav txhua yam kom neeg pom lawv xwb. Yog li ntawd, lawv thiaj coj tej lub txws ntim Txoj Cai dav dav, thiab dai tej tw ntxhoo ntev ntev.
    6 Lawv nyiam zaum cov rooj tseem ceeb thaum lawv mus noj mus haus, thiab thawj cov rooj nyob hauv cov tsev txoos.
    7 Lawv nyiam kom luag hawm lawv tom tej tshav puam, nyiam hnov sawv daws hu lawv ua “Xib Hwb”.
    8 Hos nej, mas nej txhob cia luag hu nej ua “Xib Hwb”, vim nej tsuas muaj tib tug Xib Hwb xwb, thiab nej sawv daws yog ib co kwv tij.
    9 Nej txhob hu leej twg nyob ntiaj teb no ua “Txiv”, vim nej tsuas muaj tib leeg Txiv uas nyob saum ntuj xwb.
    10 Nej txhob cia luag hu nej ua “Thawj Tswj”, vim nej tsuas muaj tib tug Tswj xwb, yog Leej Pleev.
    11 Tus loj dua cov nyob hauv nej, yuav ua nej tus tub txib.
    12 Tus twg tsa nws siab, yuav raug txo kom qis; tus twg txo nws qis, yuav raug tsa kom siab.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 15th March 2022, 5:32 am

    Tim     16     lub     3     Hlis     2022
     
    Hnub Plaub Lis Piam Ob Caij 40 Xyoo ABC Nruab Lis Piam Xyoo I & II
    Lectionary: 232

    Zaj Nyeem Ib:   YES LES MIAS 18: 18-20

    18 Haiv neeg Yus Das thiab cov pej xeem nyob Yes Lus Xas Les hais tias: "Nej tuaj! Peb yuav nrhiav ib lub tswv yim los rhuav Yes Les Mias; vim txoj kev qhuab qhia txoj cai yuav tsis ploj, tseem yuav los ntawm cov Leej Choj los, tseem yuav muaj txoj kev tuav xam pab tswv yim los ntawm cov neeg thoob tsib los, thiab cov lus saub los ntawm cov ua yaj saub los. Nej tuaj, peb kav tsij siv peb lub ncauj los rhuav nws, thiab peb tsis txhob quav ntsej nws tej lus ib qhov me me li."
    19 HUAB TAIS, thov koj cuab pob ntseg mloog kuv,

    thiab thov koj mloog cov lus uas kuv cov yeeb ncuab hais.
    20 Puas tsim nyog kom muaj kev ua phem pauj kev ua zoo,
    vim lawv khawb ib lub qhov taub cia txo kuv txoj sia?
    Thov koj nco txog tias kuv tau sawv nyob ntawm koj xub ntiag
    los hloov lawv chaw hais lus thov koj,
    kom koj tshem koj txoj kev npau taws mus deb ntawm lawv.

    NPN   31: 5-6, 14, 15-16

    Txais: (17b) Huab Tais, thov koj cawm kuv mas, vim koj muaj lub siab zoo.

    Koj yeej yuav cawm kuv dim ntawm rooj ntxiab uas lawv caws tos kuv,
    vim koj yog kuv qhov chaw vam khom.
    Kuv muab kuv tus ntsuj plig tso rau hauv koj txhais tes;
    koj yeej yuav txhiv kuv dim, Huab Tais, tus Tswv Ntuj tsis txawj fav xeeb.

    Txais: (17b) Huab Tais, thov koj cawm kuv mas, vim koj muaj lub siab zoo.

    Kuv hnov tsoom neeg hais lus ntxhi nyob ib ncig kuv ua rau kuv ntshai,
    lawv sib tuav tswv yim txog kuv, tias lawv yuav txo kuv txoj sia li cas.

    Txais: (17b) Huab Tais, thov koj cawm kuv mas, vim koj muaj lub siab zoo.

    Tiam sis, kuv tso siab plhuav rau koj, Huab Tais.
    kuv hais tias: “Koj yog kuv tus Tswv Ntuj.”
    Kuv txoj hmoo nyob hauv koj xib tes; thov koj cawm kuv dim ntawm

    kuv cov yeeb ncuab thiab cov neeg hiam kuv txhais tes.

    Txais: (17b) Huab Tais, thov koj cawm kuv mas, vim koj muaj lub siab zoo.

    Zaj Cav lub Moo Zoo:   ZAM 8: 12

    Huab Tais hais tias: Kuv yog lub ntiaj teb qhov pom kev;
    leej twg lawv kuv qab yuav muaj txoj kev kaj uas pub txoj sia.

    Ntawv Moo Zoo:   MT 20: 17-28

    17 Thaum Yes Xus taug kev mus pem Yes Lus Xas Les, nws coj Pab Kaum Ob mus rau ib qho uas tsuas muaj lawv xwb; nws hais rau lawv thaum lawv tseem taug kev tias:

    18 “Nej pom tias peb yuav mus pem Yes Lus Xas Les. Neeg Leej Tub yuav raug muag rau cov thawj leej choj thiab cov Kws Ntawv Ntshiab. Lawv yuav txiav lub txim tuag rau nws.
    19 Lawv yuav muab nws rau cov neeg teev pej kum dab kom lawv thuam nws, nplawm nws thiab muab nws ntsia dai saum ntoo cuam. Ces hnub peb, nws yuav sawv rov los.”
    20 Thaum ntawd, Ntxes Npes Dais ob tug tub leej niam nrog nws ob tug tub txav los ze Yes Xus, nws txhos caug hauv av vim nws xav thov ib yam ntawm Yes Xus.

    21 Yes Xus hais rau nws tias: “Koj xav tau dab tsi?” Leej niam hais rau Yes Xus tias: “Thov koj cia kuv ob tug tub no, ib tug zaum ntawm koj sab xis, ib tug zaum ntawm koj sab laug nyob hauv koj lub Ceeb Tsheej.”
    22 Yes Xus teb tias: “Neb tsis paub qhov neb thov. Neb puas haus taus lub ntim uas kuv yuav haus?” Nkawd teb tias : “Wb haus taus.”
    23 Yes Xus hais rau nkawd tias: “Kuv lub ntim, mas neb yuav tau haus tiag, tab sis qhov yuav tau zaum ntawm kuv sab xis thiab sab laug, mas kuv tsis yog tus yuav muab rau neb, tiam sis yog yuav cia rau cov uas kuv Txiv yeej npaj rau lawv lawm."
    24 Thaum lawv kaum leej hnov cov lus ntawd, lawv npau taws rau nkawd ob kwv tij.
    25 Ces Yes Xus hu lawv kom txav los ze nws, nws hais tias: “Nej paub lawm tias cov ua nom ua tswv kav tsoom kuj cuab, mas lawv ua nruj ua tsiv rau lawv cov neeg, thiab cov ua hlob ua kom luag paub tias lawv muaj peev xwm tswj lawv cov neeg.
    26 Tab sis nyob hauv nej, mas yuav tsis txhob muaj ua li ntawd. Leej twg xav ua tus loj nyob hauv nej, mas nws yuav ua nej tus tub txib.
    27 Leej twg xav ua nej tus thawj, mas nws yuav ua nej tus tub qhe.
    28 Ib yam li ntawd, Neeg Leej Tub tsis tuaj nyob ntiaj teb no kom luag tsob hwb nws, tiam sis nws tuaj tsob hwb sawv daws, thiab muab nws txoj sia los ua nqi txhiv coob leej.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 16th March 2022, 4:38 am

    Tim     17     lub     3     Hlis     2022
     
    Hnub Tsib Lis Piam Ob Caij Plaub Caug Xyoo ABC Nruab Lis Piam Xyoo I & II
    Lectionary: 233

    XHLT:   LN Patrick, ua Tswv Qhia


    Zaj Nyeem Ib:   YES LES MIAS 17: 5-10

    5 HUAB TAIS hais li no: "Tau hmoov phem yog tus neeg uas tso siab rau tib neeg, nws muab lub cev nqaij los ua nws lub zog, hos nws lub siab txav mus deb ntawm HUAB TAIS.

    6 Nws zoo puav tam li ib tsob ntoo txi tsis taus txiv nyob hauv hav suab puam, nws tsis pom ntuj tshav ntuj nag li, nws nyob hauv ib thaj chaw kub hnyiab dub nciab, uas yog av ntsev tsis muaj dab tsi yuav ciaj taus xwb.
    7 Tus tau hmoov zoo yog tus neeg uas tso siab lug rau HUAB TAIS, tus uas HUAB TAIS yog nws txoj kev vam.
    8 Nws zoo puav tam li ib tsob ntoo cog nyob ze dej; nws nrhau cag mus txog cov dej ntws lug. Thaum txog lub caij ntuj sov nws tsis ntshai dab tsi, nws cov nplooj ntsuab mus li; thaum txog lub xyoo ntuj qhuav qhawv nws tsis txhawj li, nws tseem txi taus txiv.
    9 Neeg lub siab nkhaus tshaj lwm yam tas nrho, hloov tsis tau li; leej twg yuav to taub tau nws?

    10 Kuv, HUAB TAIS, kuv ib leeg thiaj tsom tau hauv neeg lub tswv yim thiab sim tau neeg lub siab; ces kuv pub rau neeg kom phim tus yam ntxwv nws coj, kom haum raws li cov txiaj ntsim los  ntawm nws tes hauj lwm los."

    NPN   1: 1-2, 3, 4+6

    Txais: (40:5a) Cov muaj hmoov zoo yog cov uas tso siab rau Huab Tais.

    Tus muaj hmoov zoo yog tus uas tsis coj
    raws tus neeg phem zaj tswv yim,
    los taug cov neeg txhaum txoj kev,
    los zaum nrog cov neeg saib tsis taus luag tej,
    tiam sis nws zoo siab hlo coj HUAB TAIS txoj cai,
    thiab nws xav ntsoov HUAB TAIS txoj cai nruab hnub hmo ntuj.

    Txais: (40:5a) Cov mua hmoov zoo yog cov uas tso siab rau Huab Tais.

    Nws zoo puav tam li ib tsob ntoo cog nyob ze cov dej ntws,
    nws txi txiv raws caij raws nyoog,
    thiab nws tej nplooj tsis txawj zeeg li.
    Nws ua yam twg tau yam ntawd. .

    Txais: (40:5a) Cov mua hmoov zoo yog cov uas tso siab rau Huab Tais.

    Cov neeg phem tsis zoo li ntawd,
    lawv zoo li cov npluag nplej uas cua muab nplawm tawm mus.
    Vim HUAB TAIS saib ntsoov tus neeg ncaj txoj kev,
    hos tus neeg phem txoj kev yaj ntshis mus.

    Txais: (40:5a) Cov mua hmoov zoo yog cov uas tso siab rau Huab Tais.

    Zaj Cav lub Moo Zoo:   LK 8: 15

    Cov muaj hmoov zoo yog cov muaj ib lub siab dav coj raws Lo Lus,
    thiab mob siab rau coj mus txog qhov kawg ces lawv txi tau txiv zoo.

    Ntawv Moo Zoo:   LK 16: 19-31

    Yes Xus hais rau cov Fas Lis Xais tias:
    19 "Muaj ib tug neeg nplua nuj, nws hnav ntaub tsuj liab tsam xem thiab ntaub pag mos. Nws niaj hnub noj nqaij noj hno qab qab xwb.

    20 Muaj ib tug pluag hu ua Las Ntxas Los pw nraum nws qhov rooj, ib ce mob kiav txhab thoob plaws.
    21 Las Ntxas Los ntshaw noj tej tsig mov poob ntawm tus nplua nuj lub rooj mov los kom tsau nws plab... Dev tseem tuaj yaim nws tej qhov txhab thiab.
    22 Muaj ib hnub, tus pluag tuag, ces cov Tshiab tuaj nqa nws mus rau hauv Has Nplas Has xub ntiag. Tus nplua nuj kuj tuag thiab, luag muab nws coj mus zwm ntxa.
    23 Tus nplua nuj nyob hauv ntuj txias teb tsaus, nws raug txom nyem loj kawg. Nws tsa muag ntsia pom Has Nplas Has nyob deb thiab pom Las Ntxas Los nyob hauv Has Nplas Has xub ntiag.
    24 Nws hu nrov nrov tias: ‘Txiv Has Nplas Has, thov koj khuv leej kuv, thov koj xa Las Ntxas Los tuaj muab nws tus ntsis ntiv tes tub dej rau kuv tus nplaig kom txias, vim kuv txom nyem heev nyob hauv cov hluav taws no.’
    25 Tab sis Has Nplas Has hais tias: ‘Kuv tub aw, koj nco ntsoov tias thaum ua neej nyob koj tau txais tej yam zoo, hos Las Ntxas Los tau txais qhov phem. Zaum no Las Ntxas Los txais kev nplig siab nyob ntawm no, hos koj raug txom nyem.
    26 Thiab tsis tag li ntawd, tseem muaj ib lub qhov ntuj tob kawg kem ntawm peb rau ntawm nej, kom cov uas xav hla ntawm peb rau tim nej hla tsis tau, thiab kom cov nyob tim nej txhob hla tau los rau tim no.’
    27 Ces tus nplua nuj hais tias: ‘Txiv, kuv thov koj xa Las Ntxas Los mus hauv kuv txiv tsev neeg,
    28 vim kuv muaj tsib tug kwv tij, kom Las Ntxas Los mus qhia rau lawv paub, kom lawv tsis txhob tuaj nyob hauv qhov chaw raug txom nyem no.’
    29 Ces Has Nplas Has hais tias: ‘Lawv muaj Mais Xes thiab cov Yaj Saub. Cia lawv mloog Mais Xes thiab cov Yaj Saub qhia.’
    30 Tus nplua nuj hais tias: ‘Txiv Has Nplas Has, yog tias ib tug hauv cov tuag mus cuag lawv, mas lawv thiaj yuav hloov siab.’
    31 Tab sis Has Nplas Has hais rau nws tias: ‘Yog lawv twb tsis mloog Mais Xes thiab cov Yaj Saub, mas tab yog ib tug sawv hauv cov tuag mus qhia lawv kiag los lawv yeej yuav tsis ntseeg nws li.’”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 17th March 2022, 3:07 am

    Tim     18     lub     3     Hlis     2022
     
    Hnub Rau Lis Piam Ob Caij PLaub Caug Nruab Xyoo ABC Nruab Lis Piam Xyoo I & II
    Lectionary: 234

    XHLT:  LN Cyril nyob Yes Lus Xas Les



    Zaj Nyeem Ib:   HP 37: 3-4, 12-13a, 17b-28a

    3 His Xas Lais hlub Yos Xes tshaj nws cov tub huv si, vim Yos Xes yug thaum nws twb laus laus lawm. Ces nws kom lawv xaws ib lub tsho ntev txaij ntau yam tsos rau Yos Xes hnav.

    4 Nws cov tij laug pom tias lawv txiv hlub nws tshaj nws cov tij laug txhua tus, mas lawv sawv daws ntxub nws kawg, lawv twb tsis xav hais lus zoo rau nws li.
    12 Muaj ib zaug, Yos Xes cov tij laug mus zov lawv txiv pab yaj noj zaub nyob Xis Kes lawm.

    13a His Xas Lais hais rau Yos Xes tias: "Koj cov tij laug mus zov tsiaj dua tom lub tshav zaub Xis Kes lawm puas yog? Koj npaj, ces kuv yuav xa koj mus xyuas lawv."
    17b Ces Yos Xes mus nrhiav nws cov tij laug, nws nrhiav tau lawv nyob Dos Tas.

    18 Lawv pom nws thaum nws tseem tuaj txog deb. Thaum nws tuaj tsis tau txog ntawd, lawv sib tuav tswv yim tias yuav ua kom nws tuag.
    19 Lawv sib tham tias: "Nej saib! Niag neeg txawj ua npau suav tuaj lawm!
    20 Zaum no, peb muab nws tua kiag thiab muab nws pov rau hauv ib lub qhov tim thaj, ces peb mus hais tias yog ib tug tsiaj qus tom nws lawm. Ces peb yuav pom tias nws cov npau suav mas leej tas nrho!"
    21 Tiam sis thaum Lus Npees hnov lawv tham, nws xav pab kom Yos Xes dim ntawm lawv tes, nws hais tias: "Peb tsis txhob txo nws txoj sia."
    22 Lus Npees hais ntxiv rau lawv tias: "Nej tsis txhob ua ntshav ntws, nej cia li muab nws pov rau hauv lub qhov tim thaj ntawm suab puam no xwb, nej tsis txhob tsa nej txhais tes cia li tua nws." Lus Npees hais li no, vim nws xav cawm Yos Xes ntawm lawv tes, nws thiaj li yuav coj tau Yos Xes rov mus rau nws txiv.
    23 Ces thaum Yos Xes tuaj txog ntawm nws cov tij laug lawm, lawv muab nws lub tsho ntev txaij uas nws hnav hle.
    24 Lawv txhom nws thiab muab nws pov rau hauv lub qhov tim thaj uas yog ib lub qhuav tsis muaj dej.
    25 Ua li tas ces lawv mus zaum noj mov. Lawv tsa muag ntsia pom ib pab neeg Is Mas Es tuaj Nkas Las As tuaj. Lawv cov ntxhuav thauj ib co txab ntoo, ib co tshuaj pleev tawv nqaij thiab ib co tshuaj tsw qab uas lawv yuav coj mus rau Hais Nkws Tos teb.

    26 Ces Yus Das hais rau nws cov kwv tij tias: "Yog peb muab peb tus kwv tua thiab muab nws cov ntshav zais, peb yuav tau dab tsi?
    27 Nej los, peb muab nws muag rau cov neeg Is Mas Es ntawd xwb, peb txhob tsa peb txhais tes rau saum nws; vim nws twb yog peb tus kwv, koom tib co nqaij tawv ib yam li peb thiab." Ces nws cov kwv tij mloog nws hais. 28 Ces lawv rub Yos Xes tawm hauv lub qhov tim thaj los, lawv muab nws muag nees nkaum lub txiaj nyiag, rau cov neeg Is Mas Es ntawd.

    NPN 105: 16-17, 18-19, 20-21

    Txais: (5a) Nej yuav cim ntsoov Huab Tais cov hwj huam nws tau ua cia.

    Thaum HUAB TAIS hu kom kev tshaib plab poob los rau saum lub teb chaws,
    thiab ua kom tej qoob loo uas yuav yug lawv lwj tas,
    nws tso ib tug neeg mus ua lawv ntej,
    yog Yos Xes, tus raug muag mus ua qhev.

    Txais: (5a) Nej yuav cim ntsoov Huab Tais cov hwj huam nws tau ua cia.

    Lawv muab khawb hlau pav nws ko taw
    thiab muab saw hlau khi nws.
    Thaum kawg, kuj muaj tuaj raws li nws tau hais tseg;
    HUAB TAIS lo lus ua pov thawj tias nws hais tseeb.

    Txais: (5a) Nej yuav cim ntsoov Huab Tais cov hwj huam nws tau ua cia.

    Tus vaj xa neeg mus tso nws tawm hauv nkuaj los,
    tus tswj cov haiv neeg muab kev twj lij rau nws.
    Tus vaj tsa nws ua tus kav tus vaj lub vaj lub tsev
    thiab tus tswj tas txhua yam uas yog tus vaj tug.

    Txais: (5a) Nej yuav cim ntsoov Huab Tais cov hwj huam nws tau ua cia.

    Zaj Cav lub Moo Zoo:   ZAM 3: 16

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Tswv Ntuj hlub lub ntiaj teb npaum li ntawd,
    nws thiaj tso nws tib leeg tub los rau lawv,
    kom xwv txhua leej uas ntseeg nws yuav muaj txoj sia nyob mus li.

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Ntawv Moo Zoo:   MT 21: 33-43, 45-46

    Yes Xus hais rau cov thawj leej choj thiab pej xeem cov txwj laus tias:
    33 “Nej mloog dua ib zag paj lug. Muaj ib tug tswv teb, nws cog tau ib thaj teb txiv cawv. Nws xov laj kab ncig nws thaj teb, nws khawb qhov rau ib lub zeb zom txiv cawv, thiab tseem txhim tau ib lub sam thiaj siab siab rau hauv. Nws ntiav ib co neeg zov, ces nws tawm rooj mus kev deb lawm.

    34 Thaum yuav txog caij de txiv, nws xa nws cov tub txib mus nqa txiv cawv ntawm cov zov teb.
    35 Tiam sis cov neeg zov teb ntes cov tub txib, muab ib tug ntaus, muab ib tug tua, muab pob zeb los txawb lwm tus kom tuag.
    36 Tus tswv rov xa ib co tub txib coob dua thawj cov mus, cov zov teb kuj ua ib yam li lawv tau ua rau thawj cov thiab.
    37 Qhov kawg, nws xa nws tus tub mus cuag lawv, nws xav tias: ‘Lawv yuav hwm kuv tus tub.’
    38 Tab sis cov zov teb pom dheev tus tub xwb, lawv twb sib tham tias: ‘Tus ntawd yog tus yuav txais lub cuab tam. Tsuag tsuag! Peb muab nws tua, lub cuab tam thiaj yuav yog peb tug.’
    39 Ces lawv ntes ntho tus tub, coj nws mus rau nraum ntug teb thiab muab nws tua.
    40 Thaum tus tswv teb txiv cawv los txog, nws yuav ua dab tsi rau cov zov teb ntawd?”
    41 Lawv teb rau Yes Xus tias: “Nws yuav ua kom cov zov teb siab phem ntawd tuag txom nyem ntsuav, ces nws yuav ntiav lwm cov neeg zov nws daim teb. Thaum txog caij txiv cawv siav, cov ntawd yuav xa cov txiv rau tus tswv.”
    42 Yes Xus hais rau lawv tias: “Nej puas tau nyeem ib zaug li txog cov lus nyob hauv Ntawv tias :
    ‘Lub pob zeb uas cov tub txhim tsev muab pov tseg,

    txia ua lub pob zeb txheem tsev;
    yog Huab Tais ua kom muaj tau li ntawd;
    yog ib yam zoo kawg nkaus rau ntawm peb qhov muag’?
    43 Vim li ntawd, kuv hais rau nej tias: Tswv Ntuj lub Ceeb Tsheej yuav raug muab thau ntawm nej los pub rau ib haiv neeg uas yuav txi lub ceeb tsheej cov txiv.”
    45 Cov thawj leej choj thiab cov Fas Lis Xais hnov Yes Xus cov zaj paj lug, lawv to taub tias Yes Xus hais txog lawv.
    46 Lawv nrhiav kev ntes Yes Xus, tab sis lawv ho ntshai tsoom sid, vim sawv daws saib Yes Xus yog ib tug yaj saub.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 18th March 2022, 6:10 am

    Tim     19     lub     3     Hlis     2022
     
    Hnub Xya Lis Piam Ob Caij Plaub Caug Xyoo ABC Nruab Lis Piam Xyoo I & II

    Koob Tsheej Hwm leej Ntshiab Yos Xes, Niam Mab Liab tus txij nkawm

    Lectionary: 543

    Zaj Nyeem Ib:   2 XAS MUAS 7: 4-5a, 12-14a, 16

    4 HUAB TAIS hais lus rau Nas Taas, nws hais tias :
    5 "Koj mus hais rau kuv tus tub txib Das Vis li no:
    12 ‘Thaum txog koj lub caij mus nrog koj cov poj yawm txwv koob so lawm, kuv yuav tsa koj ib tug tub kom sawv los tom qab koj, yog ib tug tawm ntawm koj roj ntsha los, kuv yuav tsa nws txoj kev ua vaj kom nyob ruaj nreb.
    13 Nws yog tus yuav txhim ib lub tsev rau kuv lub npe, ces kuv yuav tsa nws txoj kev ua vaj kom nyob ruaj nreb mus li.
    14a Kuv yuav ua nws txiv, nws yuav ua kuv tus tub.
    16 Koj tsev neeg thiab koj txoj kev ua vaj yuav nyob mus li nyob ntawm kuv xub ntiag; koj lub theej kiab yuav nyob ruaj nreb mus ib txhis.’”

    NPN   89: 2-3, 4-5, 27+29

    Txais: (37) Das Vis leej tub yuav nyob tas mus li ib txhis.

    Kuv yuav hu nkauj mus li cav txog koj txoj kev hlub, HUAB TAIS;
    tiam dhau tiam kuv lub ncauj yuav tshaj txog koj txoj kev pheej xeeb.
    Vim koj tau hais tias: “Kuv txoj kev hlub yuav nyob mus li,”
    koj tau tsa koj txoj kev pheej xeeb kom nyob ruaj nreb nyob saum ntuj.

    Txais: (37) Das Vis leej tub yuav nyob tas mus li ib txhis.

    “Kuv tau hais haum nrog tus kuv xaiv,
    kuv tau cog lus ruaj rau Das Vis kuv tus tub txib tias:
    Kuv yuav tsa koj caj ces kom nyob mus li,
    kuv yuav txhim koj lub theej kiab kom nyob tiam dhau tiam.”

    Txais: (37) Das Vis leej tub yuav nyob tas mus li ib txhis.

    “Nws yuav hais txog kuv tias: ‘Koj yog kuv txiv,
    koj yog kuv tus Tswv Ntuj, kuv lub tsua, tus cawm kuv.’
    Kuv yuav muab kuv txoj kev hlub rau nws tas mus li,
    thiab kuv txoj kev nrog nws cog lus yuav nyob ruaj nreb.”

    Txais: (37) Das Vis leej tub yuav nyob tas mus li ib txhis.

    Zaj Nyeem Ob:   LOS MAS 4: 13, 16-18, 22

    Cov kwv tij nkauj muad:
    13 Has Nplas Has thiab nws tsoom xeeb ntxwv tau txais txoj kev cog lus tias lawv yuav tau txais lub ntiaj teb los ua lawv tug, tsis yog vim Has Nplas Has mloog txoj cai, tiam sis yog vim nws muaj txoj kev ncaj ncees uas los ntawm txoj kev ntseeg los.
    16 Vim li no txoj kev cog lus ntawd yog txawb rau saum txoj kev ntseeg, ces nws thiaj yog ib qho txiaj ntsim koob hmoov thiab thiaj li nyob ruaj nreb rau tas Has Nplas Has tsoom xeeb leej xeeb ntxwv, tsis yog rau cov uas coj raws txoj cai xwb, tiam sis rau txhua tus uas coj txoj kev ntseeg raws li Has Nplas Has uas yog peb sawv daws txiv,

    17 raws li muaj ntawv sau tseg tias: “Kuv tsa koj ua txiv rau ntau haiv neeg.” Tswv Ntuj yeej saib Has Nplas Has yog peb txiv, vim Has Nplas Has ntseeg Tswv Ntuj tus uas muab tau txoj sia rau cov neeg tuag thiab cia li hu xwb ces txhua yam tsis muaj txawj xeeb muaj tuaj.
    18 Thaum tsis muaj kev cia siab li lawm, Has Nplas Has tseem cia siab tuag nthi thiab ntseeg tuag nthi tias nws yuav ua txiv rau ntau haiv neeg raws li cov lus hais rau nws tias: “Koj tsoom xeeb ntxwv yuav coob npaum li no.”
    22 Vim li no thiaj muab qhov kev ntseeg ntawd ntaus nqe ua nws txoj kev ncaj ncees.

    Zaj Cav lub Moo Zoo:   NPN 84: 5

    Cov muaj hmoov zoo yog cov nyob hauv koj lub tsev, HUAB TAIS,
    lawv yuav cav txog koj mus li tsis muaj caij kawg.

    Ntawv Moo Zoo:   MT 1: 16, 18-21, 24a

    16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev.
    18 Yes Xus Pleev lub keeb yog chiv zoo li no: Mab Liab uas yog Yes Xus niam raug muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub.

    19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm xwb.
    20 Thaum nws txiav siab li ntawd lawm, Huab Tais tus Tshiab txawm tawm los ua npau suav rau nws, thiab hais rau nws tias: "Yos Xes, Das Vis leej tub, koj txhob ntshai coj Mab Liab koj tus poj niam los nyob hauv koj tsev. Yog Leej Ntuj Plig Ntshiab ua kom nws xeeb tub.
    21 Nws yuav yug ib tug tub, koj yuav tis nws npe hu ua Yes Xus, vim nws yuav cawm nws haiv neeg ntawm lawv cov txhaum."
    24 Thaum Yos Xes tsim los, nws ua raws li Huab Tais tus Tshiab qhia rau nws : nws mus coj nws poj niam los nyob hauv nws tsev.

    Los:   LK 2: 41-51a

    41 Yes Xus niam thiab txiv nkawd niaj xyoo mus ua lub Ntees Hla pem Yes Lus Xas Les.

    42 Thaum Yes Xus muaj kaum ob xyoos, lawv kuj mus ua lub Ntees Hla pem Yes Lus Xas Les raws li kev cai thiab.
    43 Thaum cov hnub ua ntees tiav tas lawm, Yos Xes thiab Mab Liab nkawd sawv kev rov mus tsev, hos tus me tub Yes Xus tseem nyob Yes Lus Xas Les, nws niam thiab nws txiv tsis paub.
    44 Nkawd xav tias nkawd tus tub nrog pab neeg tuaj ua ke rov qab lawm. Ces nkawd mus ib hnub ke, nkawd mam li pib nrhiav nkawd tus tub hauv cov txheeb ze thiab cov swm neeg.
    45 Nkawd nrhiav tsis tau, ces nkawd rov mus nrhiav nws pem Yes Lus Xas Les.
    46 Nkawd nrhiav tau peb hnub, thiaj nrhiav tau Yes Xus nyob hauv lub Tuam Tsev Teev Ntuj. Nws zaum hauv nruab nrab cov kws qhia Txoj Cai, nws mloog lawv thiab ho nug lawv.
    47 Cov neeg uas tau hnov Yes Xus hais lus, puav leej yoob tas rau nws txoj kev to taub thiab rau nws cov lus teb.
    48 Thaum nkawd pom Yes Xus, nkawd xav tsis thoob, ces Yes Xus niam hais rau Yes Xus tias: "Me tub, vim li cas koj ua li ntawd rau wb? Saib! Koj txiv wb nrhiav koj, wb ntxhov siab tas nrho."
    49 Yes Xus hais rau nkawd tias: "Vim li cas neb nrhiav kuv? Neb tsis paub tias kuv yuav tsum ua kuv Txiv cov hauj lwm no lod?”
    50 Mab Liab thiab Yos Xes nkawd tsis to taub lo lus uas Yes Xus hais rau nkawd li.
    51 Yes Xus nrog nkawd rov mus Nas Xas Les. Nws mloog nkawd lus.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 20th March 2022, 6:14 am

    Tim     21     lub     3     Hlis     2022
     
    Hnub Ob Lis Piam Peb Caij Plaub Caug Xyoo ABC Nruab Lis Piam Xyoo I & II
    Lectionary: 237

    Zaj Nyeem Ib:   2 VAJ 5: 1-15ab

    1 Nas Maas, tus thawj tub rog rau tus vaj As Las Mais, yog ib tug neeg uas tus vaj hwm thiab nyiam, vim yog muaj nws mas HUAB TAIS thiaj pab cov As Las Mais yeej rog. Tab sis tus neeg muaj peev xwm ntawd yog ib tug mob ruas.

    2 Muaj ib zaug cov As Las Mais tuaj lwg His Xas Lais teb, lawv ntes tau ib tug me nyuam ntxhais coj mus lawm. Tus ntxhais ntawd mus ua ntxhais txib rau Nas Maas tus poj niam.
    3 Nws hais rau nws tus poj tswv tsev tias: "Yog kuv tus tswv mus cuag tus Yaj Saub nyob Xas Mas Lias teb mas tus Yaj Saub yuav cawm tau nws dim ntawm nws tus mob ruas xwb!"
    4 Nas Maas mus qhia rau nws tus huab tais txog cov lus uas tus ntxhais tuaj teb chaws His Xas Lais tuaj tau hais.
    5 Tus vaj As Las Mais teb tias: "Yog li ces koj mus, kuv yuav xa ib tsab ntawv nrog koj mus rau tus vaj His Xas Lais." Ces Nas Maas mus, nws nqa kaum choj nyiag, rau txhiab lub txiaj kub thiab kaum cev tsoos tsho ua zam.

    6 Nws mus txog, nws cev tus vaj tsab ntawv rau tus vaj His Xas Lais nyeem. Nyob hauv tsab ntawv muaj cov lus hais li no : "Kuv xa kuv tus tub txib Nas Maas nrog tsab ntawv no tuaj. Thov koj kho nws tus mob kom zoo."
    7 Thaum tus vaj His Xas Lais nyeem tsab ntawv tas, nws dua rhe nws lub tsho, nws hais tias: "Kuv puas yog ib tug tswv ntuj txawj ua kom neeg ciaj los neeg tuag, ua cas tus ntawd thiaj yuav kom kuv kho ib tug neeg mob ruas kom zoo? Qhov tseeb yog nws xav nrhiav lus rau kuv xwb ntag!"
    8 Tab sis thaum Es Lis Xais, uas yog Tswv Ntuj tus neeg, hnov tias tus vaj dua nws cov ris tsho, mas nws tso neeg mus hais rau tus vaj tias: "Vim li cas koj dua koj cov ris tsho? Kom nws tuaj cuag kuv saib! Nws thiaj yuav paub tias muaj ib tug Yaj Saub nyob His Xas Lais teb."

    9 Nas Maas thiaj caij nws lub tsheb nees nrog nws cov nees tuaj txog, nws nres ntawm Es Lis Xais qhov rooj.
    10 Es Lis Xais tso neeg mus hais rau nws tias: "Koj mus da dej xya zaus nyob hauv tus dej Yos Las Das ces koj cev nqaij yuav rov zoo thiab koj yuav rov huv tuaj."
    11 Nas Maas npau taws, nws hais tias: "Kuv vam tias ntshai nws yuav tawm tuaj, nws yuav hu txog HUAB TAIS nws tus Tswv Ntuj lub npe thiab nws yuav tsa tes plhws kuv qhov nqaij muaj mob, ces tus mob ruas yuav zoo hlo no!
    12 Tus dej As Npas Nas thiab tus dej Fas Pas nyob Das Mas teb tsis zoo dua cov dej nyob His Xas Lais teb lod ? Yog kuv mus da cov dej nyob Das Mas teb kuv yuav tsis zoo tuaj lod?" Ces Nas Maas lem loo nees rov qab, nws npau taws heev.
    13 Tab sis nws cov tub txib txav los hais rau nws tias: "Txiv, yog tus Yaj Saub kom koj ua ib yam nyuaj dua ntawd mas koj twb yuav ua xwb puas yog? Txawm yog nws hais tias kom koj mus da dej xwb ces koj yuav zoo mas koj haj yam yuav tsum zoo siab ua xwb."
    14 Nas Maas thiaj nqes mus hauv tus dej Yos Las Das, nws mus ntxuav cev xya zaus xws li Tswv Ntuj tus neeg hais, ces nws cov nqaij rov zoo hlo, cia li zoo xws li tus me nyuam mos tej nqaij dua; nws huv si tuaj lawm.
    15 Nas Maas nrog nws pab neeg rov los rau ntawm Tswv Ntuj tus neeg, nws hais tias: "Nyem no, kuv paub lawm tias tsis muaj dua lwm tus Tswv Ntuj nyob tas ntiaj teb no, tsuas kawg muaj nyob His Xas Lais teb xwb!”

    NPN   42: 2, 3; 43: 3, 4

    Txais: (42:3) Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
                Thaum twg kuv li tau mus pom Tswv Ntuj lub ntsej muag?

    Xws li tus kauv nqhis cov dej ntws lug,
    kuv tus ntsuj plig kuj nqhis txog koj, Tswv Ntuj.

    Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
                Thaum twg kuv li tau mus pom Tswv Ntuj lub ntsej muag?

    Kuv tus ntsuj plig nqhis txog Tswv Ntuj, tus Tswv Ntuj muaj txoj sia.
    Thaum twg kuv li tau mus pom Tswv Ntuj lub ntsej muag?

     
    Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
                Thaum twg kuv li tau mus pom Tswv Ntuj lub ntsej muag?

    Thov xa koj qhov pom kev thiab koj txoj kev ua siab ncaj tuaj rau kuv,
    thiaj yuav coj kuv taug kev mus ntxiv, thiab coj kom kuv tuaj txog

    lub roob koj txoj kev ntshiab, thiaj txog koj lub chaw nyob.

    Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
                Thaum twg kuv li tau mus pom Tswv Ntuj lub ntsej muag?

    Ces kuv yuav chaws mus hauv lub thaj txi Tswv Ntuj,
    tus Tswv Ntuj uas ua kom kuv muaj kev zoo siab thiab kaj siab.
    Ces kuv yuav ntaus nkauj nog ncas ua koj tsaug,
    Tswv Ntuj, kuv tus Tswv Ntuj!

    Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
                Thaum twg kuv li tau mus pom Tswv Ntuj lub ntsej muag?

    Zaj Cav lub Moo Zoo:   NPN 130: 5, 7

    Kuv tso siab rau Huab Tais, kuv ntseeg nws lo lus,
    nws yog tus muaj lub siab zoo tas nrho thiab muaj kev cawm seej ntws lug.

    Ntawv Moo Zoo:   LK 4: 24-30

    24 Yes Xus hais rau cov neeg nyob hauv lub tsev txoos nyob Naj Xas Les tias: "Kuv hais tseeb rau nej tias, tsis muaj ib tug yaj saub uas luag yuav txais nws zoo hauv lub zos nws nyob hlob.

    25 Kuv hais tseeb rau nej: lub caij Es Lias nyob, muaj coob tus poj ntsuam nyob His Xas Lais teb. Thaum ntuj kaw nag tau peb xyoos thiab rau hli, tas teb chaws tshaib plab loj kawg.
    26 Tab sis Ntuj tsis xa Es Lias mus pab cov poj ntsuam His Xas Lais ib tug li. Ntuj xa Es Lias mus pab ib tug poj ntsuam nyob lub zos Xas Les Tas, nyob Xis Doos teb xwb.
    27 Lub caij tus yaj saub Es Lis Xais nyob, kuj muaj coob tus mob ruas nyob His Xas Lais teb thiab, tab sis tsis muaj ib tug mob ruas His Xas Lais rov huv li, tsuas yog tus mob ruas Xis Lias hu ua Nas Maas thiaj rov huv xwb."
    28 Tas cov neeg hauv lub tsev txoos hnov cov lus ntawd, mas lawv npau taws kawg.

    29 Lawv sawv tsees, lawv ntiab caum Yes Xus kom tawm sab nroog nraud. Lawv coj Yes Xus mus txog ntawm ib qho ua qab tsuas saum lub roob uas lawv txhim lawv lub nroog, lawv yuav thawb Yes Xus kom poob lawm hauv lub qab tsuas.
    30 Tab sis Yes Xus hla plaws hauv nruab nrab lawv, nws taug nws kev mus lawm.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 21st March 2022, 8:32 am

    Tim     22     lub     3     Hlis     2022
     
    Hnub Peb Lis Piam Peb Caij Plaub Caug Xyoo ABC Nruab Lis Piam Xyoo I & II
    Lectionary: 238
     
    Zaj Nyeem Ib:   DAS NIAS 3: 25, 34-43

    25 As Xas Lias sawv hauv cov nplaim taws, nws thov ntuj nrov nrov tias :
    34 "Huab Tais, thov koj saib koj lub npe, es koj tsis txhob tso peb rau luag tes mus li,
    thiab tsis txhob rhuav lo lus koj tau cog.
    35 Koj tsis txhob thau koj txoj kev khuv leej ntawm peb mus,
    vim koj txuag Has Nplas Has koj tus phooj ywg, His Xas Has koj tus tub txib,
    thiab His Xas Lais koj tus Ntshiab.
    36 Koj tau cog lus rau lawv tias lawv yuav muaj tub ki coob cuag li cov hnub qub nyob saum ntuj,
    los cuag li cov suab zeb nyob ntawm ntug hiav txwv.
    37 Tiam sis peb yog ib haiv neeg tsawg tuaj lawm ntau, Huab Tais,
    tsawg tshaj lwm haiv neeg tas tib si;
    hnub no nyob tas ntiaj teb peb poob qis vim peb cov txhaum.
    38 Lub caij no, peb tsis muaj nom tswv, tsis muaj yaj saub, tsis muaj tus thawj li,
    tsis muaj tsiaj hlawv txi ntuj, tsis muaj cov txim, tsis muaj ib yam yuav fij rau ntuj,
    tsis muaj xyab, tsis muaj qhov chaw yuav cev thawj cov txiv rau koj
    kom tau txais koj cov txiaj ntsim koob hmoov li.
    39 Tab sis vim peb muaj ib lub siab lees txhaum
    thiab ib lub tswv yim txo hwj chim mas thov koj txais peb.
    40 Zoo puav tam li yog ib co laug tshis thiab ib co heev nyuj
    los yog ib txhiab tus yaj rog hlawv txi rau koj,
    thov kom hnub no koj saib peb thaj txi ntuj yog zoo li ntawd
    thiab kom koj zoo siab txais,
    vim cov tso siab rau koj yuav tsis raug kev poob ntsej muag.
    41 Nyem no peb muab tas peb lub siab los raws koj,
    peb hwm koj thiab peb nrhiav koj lub ntsej muag.
    42 Thov koj tsis txhob cia peb poob rau kev txaj muag,
    tiam sis koj mloog koj lub siab zoo thiab khuv leej neeg, koj ua zoo rau peb.
    43 Thov koj ua hwj huam loj los cawm peb,
    thiab koj ua kom sawv daws cav txog koj lub npe, Huab Tais."

    NPN   25: 4-5ab, 6+7bc, 8-9

    Txais: (6a) Huab Tais, thov koj nco ntsoov koj txoj kev khuv leej.

    Huab Tais, thov koj ua kom kuv paub koj tej kev,
    thov qhia koj tej lw rau kuv taug,
    thov coj kuv mus raws koj txoj kev tseeb thiab qhia rau kuv paub,
    vim koj yog Tswv Ntuj tus cawm kuv.

    Txais: (6a) Huab Tais, thov koj nco ntsoov koj txoj kev khuv leej.

    Huab Tais, thov koj nco ntsoov tias koj lub siab hlub neeg,
    thiab koj lub siab zoo yeej ib txwm nyob txij puag thaud los lawm.
    Koj lub siab zoo, Huab Tais, thov koj nco txog kuv,
    vim koj muaj lub siab hlub neeg.


    Txais: (6a) Huab Tais, thov koj nco ntsoov koj txoj kev khuv leej.

    Huab Tais yog tus siab zoo siab ncaj,
    nws thiaj qhia txoj kev zoo rau tus neeg txhaum taug.
    Nws coj tus neeg me mus raws txoj kev ncaj,
    nws qhia nws txoj kev rau tus neeg me taug.

    Txais: (6a) Huab Tais, thov koj nco ntsoov koj txoj kev khuv leej.

    Zaj Cav lub Moo Zoo:   Yos Es 2: 12-13

    HUAB TAIS hais tias: Nyem no nej cia li
    muab tas nej lub siab tig rov los cuag kuv,
    vim kuv muaj lub siab zoo thiab khuv leej neeg.

    Ntawv Moo Zoo:   MT 18: 21-35

    21 Thaum ntawd, Pob Zeb txav los nug Yes Xus tias: “Huab Tais, yog kuv tus kwv tij ua txhaum rau kuv, kuv yuav zam pes tsawg zaus rau nws? Puas yuav zam txog xya zaus?”
    22 Yes Xus teb rau Pob Zeb tias: “Kuv tsis hais tias kom koj zam txog xya zaus, tiam sis kom koj zam txog xya caum xya zaus.
    23 Li ntawd, lub Ceeb Tsheej saum ntuj yog zoo li ib tug vaj uas xav nrog nws cov tub txib txheeb nws tej nyiaj txiag.
    24 Thaum nws pib txheeb, luag coj ib tug tub txib uas tshuav nuj nqis txog ib vam nras nyiaj tuaj rau tus vaj.
    25 Tus tub txib tsis muaj dab tsi them, ces tus vaj kom luag muab nws thiab nws poj niam me nyuam thiab tas nws lub cuab tam huv si muag, los them cov nuj nqis ntawd.
    26 Tus tub txib txhos caug ntua ntawm tus vaj ko taw, nws pe tus vaj, nws hais tias: ‘Huab Tais, thov koj ua siab ntev rau kuv, kuv yuav them kom tas rau koj.’
    27 Tus Huab Tais ntawd hlub nws tus tub txib, ces nws tso tus tub txib mus thiab tseem zam cov nuj nqis huv tib si rau nws.
    28 Thaum tus tub txib tawm rov qab mus, nws ntsib nws ib tug phooj ywg ua tub txib li nws thiab, uas tshuav nqi ntawm nws ib puas lub txiaj nyiag. Tus tub txib ntawd nthos nkaus nws tus phooj ywg caj dab, zawm tus phooj ywg caj pas, thiab hais tias: ‘Koj tshuav kuv nqi koj cia li them kom tas rau kuv.’
    29 Tus phooj ywg txhos caug ntua ntawm nws ko taw thov tias: ‘Thov koj ua siab ntev rau kuv, kuv yuav them rau koj.’
    30 Tab sis tus tub txib ntawd tsis kam li, nws kom luag muab nws tus phooj ywg mus kaw hauv tsev loj faj mus txog hnub tus phooj ywg them nuj nqis tas huv tib si rau nws.
    31 Tus tub txib cov phooj ywg pom nws ua li ntawd, lawv chim kawg, lawv mus qhia tej ntawd rau lawv tus Huab Tais.
    32 Ces tus Huab Tais hu tus tub txib tuaj, nws hais rau tus tub txib ntawd tias: ‘Tub txib siab phem dab tsi! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv.
    33 Ua cas koj tsis hlub koj tus phooj ywg zoo li kuv tau hlub koj?’
    34 Ces tus Huab Tais npau taws heev, nws muab tus tub txib ntawd tso rau cov tub hiam neeg tsim txom mus txog hnub nws them nws cov nuj nqis tas huv tib si.
    35 Kuv Txiv nyob saum ntuj los kuj yuav ua ib yam li ntawd rau nej thiab, yog tias nej txhua tus tsis zam hauv nruab siab rau nej ib tug kwv tij twg.”

    Sponsored content


    COV ZAJ NYEEM NRUAB LIS PIAM XYOO II 2021-2022 - Page 4 Empty Re: COV ZAJ NYEEM NRUAB LIS PIAM XYOO II 2021-2022

    Post  Sponsored content


      Current date/time is 28th March 2024, 3:38 pm