Tim 1 lub 8 Hli 2022
Hnub Ob Lis Piam Kaum Yim Nruab Xyoo ABC Nruab Lis Piam Xyoo II
Lectionary: 407
Yuav Hwm LN Alphonsus Liguori, ua Tswv Qhia thiab Kws cov Txuj Ntshiab
Zaj Nyeem Ib: YES LES MIAS 28: 1-17
1 Thaum tus vaj Xes Des Kias pib ua vaj kav Yus Das teb tau plaub xyoos, xyoo ntawd thaum lub tsib hlis,
tus yaj saub As Nas Nias, uas yog As Xws tub, tuaj Nkas Npas Oos tuaj, nws hais rau Yes Les Mias
nyob hauv HUAB TAIS lub tsev, nyob ntawm cov leej choj thiab tas tsoom pej xeem xub ntiag tias:
2 "Tus Huab Tais kav tsoom tshiab, His Xas Lais tus Tswv Ntuj hais li no:
‘Kuv yuav muab tus vaj nyob Npas Npis Los tus quab dam pov tseg.
3 Ob xyoos ntxiv ces kuv yuav nqa cov twj taig uas cia siv rau hauv HUAB TAIS
lub tuam tsev no rov qab los rau ntawm no, yog cov uas Nas Npws Kos Dos Nos Xos,
tus vaj Npas Npis Los tau lwg nqa mus rau Npas Npis Los lawm.
4 Kuv kuj yuav coj Yes Kos Nias uas yog Yuas Kis tub thiab yog tus vaj Yus Das, thiab tas cov Yus Das
mus nyob txim nyob Npas Npis Los lawd, kuv yuav coj lawv rov qab los nyob ntawm no.
Vim kuv yuav muab tus vaj Npas Npis Los tus quab dam pov tseg,’ HUAB TAIS hais li ntawd.”
5 Ces tus yaj saub Yes Les Mias hais rau tus yaj saub As Nas Nias nyob ntawm cov Leej Choj
thiab tas tsoom sid xub ntiag nyob hauv HUAB TAIS lub tsev tias:
6 "Ua li los mas! Thov kom HUAB TAIS ua raws li koj cov lus koj tau ua saub hais, kom tej twj taig nyob hauv HUAB lub tsev thiab kom cov neeg mus nyob txim nyob Npas Npis Los rov qab los nyob rau ntawm no.
7 Tab sis koj mloog zoo zoo cov lus kuv yuav hais rau koj pob ntseg, thiab rau tas tsoom sid pob tseg hnov.
8 Cov yaj saub txheej thaud, cov ua koj thiab kuv wb ntej, mas sawv daws tsuas ua yaj saub hais
txog kev ua tsov ua rog, kev txom nyem thiab kev yuav muaj tej yam mob loj los raug ntau thaj av,
thiab ntau lub teb chaws loj uas muaj vaj kav xwb.
9 Tus yaj saub twg ua saub tshaj tias yuav muaj kev thaj yeeb, mas yog thaum twg tshwm sim raws li
nws cov lus lawm mas thiaj paub tseeb tias nws yog ib tug tseem yaj saub uas HUAB TAIS xa tuaj tiag."
10 Ces yaj saub As Nas Nias chua ntia tus quab ntawm yaj saub Yes Les Mias
caj dab los dam kiag pov tseg thiab nws hais rau tsoom sid hnov tias:
11 "HUAB TAIS hais li no: ‘Ob xyoos ntxiv mas kuv yuav dam Nas Npws Kos Dos Nos Xos tus vaj Npas Npis Los nws tus quab uas nyob ntawm cov kuj cuab lub caj dab ib yam li no.’" Ces Yes Les Mias sawv tsees mus lawm.
12 Tom qab yaj saub As Nas Nias dam tus quab ntawm yaj saub Yes Les Mias caj dab tas
tau tsis ntev, HUAB TAIS hais rau Yes Les Mias tias:
13 "Koj mus hais rau As Nas Nias tias: ‘HUAB TAIS hais li no:
Koj dam tus quab ntoo pov tseg, tiam sis koj ntaus tus quab hlau los hloov!
14 Tus HUAB TAIS kav tsoom tshiab, His Xas Lais tus Tswv Ntuj hais li no: Kuv yuav muab ib tug quab hlau rau tas cov haiv neeg uas zwm rau Nas Npws Kos Dos Nos Xos tus vaj Npas Npis Los coj, lawv yuav tsob hwb nws; tab yog cov tsiaj nyob nruab liaj nruab teb los kuv kuj yuav muab rau nws huv tib si."
15 Yaj saub Yes Les Mias mus hais rau yaj saub As Nas Nias tias: "As Nas Nias, koj mloog zoo zoo.
HUAB TAIS tsis tau xa koj tuaj, koj tuaj hais kom tsoom pej xeem muaj kev tso siab rau tej yam cuav.
16 Vim li ntawd HUAB TAIS hais li no: Kuv yuav ntiab koj kom txhob nyob hauv lub ntiaj teb no ntxiv.
Xyoo no kiag koj yuav tuag, vim koj qhia kom sawv daws ntxeev siab rau HUAB TAIS."
17 Ces xyoo ntawd kiag, thaum lub xya hli, tus yaj saub As Nas Nias cia li tag sim neej lawm.
NPN 119: 29, 43, 79, 80, 95, 102
Txais: (68b) Huab Tais, thov koj qhia koj cov kev cai lij choj rau kuv.
Thov koj tshem txoj kev cuav mus deb ntawm kuv,
koj muab koj Txoj Cai ua txiaj ntsim pub pub rau kuv.
Txais: (68b) Huab Tais, thov koj qhia koj cov kev cai lij choj rau kuv.
Koj txhob rho koj lo lus tseeb ntawm kuv lub ncauj mus,
vim kuv tso siab lug rau koj cov cai koj tau txiav.
Txais: (68b) Huab Tais, thov koj qhia koj cov kev cai lij choj rau kuv.
Thov kom cov neeg hwm koj tig los cuag kuv,
thiab los lees paub koj cov cai koj tau txiav.
Txais: (68b) Huab Tais, thov koj qhia koj cov kev cai lij choj rau kuv.
Thov kom kuv lub siab coj raws nraim koj cov cai lij choj,
Ces kuv thiaj yuav tsis poob ntsej muag.
Txais: (68b) Huab Tais, thov koj qhia koj cov kev cai lij choj rau kuv.
Cov tsis hwm ntuj nyas ntshis yuav tua kuv,
tiam sis kuv rau siab ntso mloog koj cov lus qhia.
Txais: (68b) Huab Tais, thov koj qhia koj cov kev cai lij choj rau kuv.
Kuv tsis ncaim ntawm cov lus koj tau txiav,
vim koj yog tus qhia rau kuv coj.
Txais: (68b) Huab Tais, thov koj qhia koj cov kev cai lij choj rau kuv.
As Les Lus Yas: MT 4: 4
Txais: As les lus yas, as les lus yas.
Neeg tsis kawg muab mov xwb los yug siav xwb,
neeg tseem muab txhua lo lus tawm ntawm Tswv Ntuj lub ncauj los yug siav thiab.
Txais: As les lus yas, as les lus yas.
Ntawv Moo Zoo: MT 14: 13-21
13 Yes Xus hnov tias Zam Ntxuav Plig tuag lawm, ces nws caij nkoj mus rau ib qhov chaw xu kev,
tsis muaj neeg nyob. Zeej tsoom hnov li ntawd, lawv tawm hauv lawv tej nroog mus ko taw raws nws qab.
14 Thaum Yes Xus nqes nkoj, nws pom ib pab neeg coob coob, ces nws hlub lawv,
nws kho lawv cov neeg uas muaj mob muaj nkeeg kom zoo hlo.
15 Thaum yuav tsaus ntuj, cov thwj tim txav los hais rau nws tias: "Thaj tsam no, tsis muaj neeg nyob,
thiab lig lawm; koj tso tsoom neeg rov mus hauv tej zos kom lawv tau kev mus muas mov noj."
16 Yes Xus teb rau lawv tias: "Tsis tas lawv yuav mus qhov twg li;
nej yog cov yuav muab mov rau lawv noj."
17 Cov thwj tim hais rau Yes Xus tias: “Ntawm no, peb tsuas muaj
tsib lub ncuav mov thiab ob tug ntses xwb.”
18 Ces Yes Xus hais tias: "Nej nqa los rau kuv."
19 Yes Xus kom cov neeg sawv daws zaum saum tej nroj tsuag. Ces nws tuav tsib lub ncuav mov
thiab ob tug ntses, nws tsa muag ntsia saum ntuj, nws hais zaj foom hmoov zoo rau,
nws muab cov ncuav mov ntais, nws muab cev rau cov thwj tim kom lawv muab rau sawv daws.
20 Tas sawv daws tau noj tsau txaus siab npo; lawv kuj khaws tej sab mov seem puv kaum ob tawb thiab.
21 Cov neeg noj mov ntawd muaj ze ntawm tsib txhiab leej txiv neej, tsis xam poj niam me nyuam li. *
Los: MT 14:22-36 (Xyoo A)
22 Tam sis ntawd, Yes Xus txhib cov thwj tim kom nce nkoj ua nws ntej mus
lawm sab ntug dej tim ub, hos nws nyob xa tsoom sid rov qab.
23 Thaum nws xa zeej tsoom rov qab mus tas lawm, nws nce mus saum roob,
rau ib qho chaw xu kev, ces nws teev Ntuj. Thaum tsaus ntuj, tshuav nws tib leeg lawm xwb.
24 Lub nkoj twb mus deb ntawm ntug nqhuab lawm ntau ntsua muag lawm,
ces dej nphau nphwv tuaj nplawm lub nkoj, vim cua tshuab tom hauv ntej tuaj.
25 Thaum yav yuav kaj ntug, Yes Xus mus ko taw saum dej ntuj, nws tuaj caum cov thwj tim.
26 Lawv pom Yes Xus mus ko taw saum dej ntuj, lawv ib ce xob tas, lawv hais tias:
"Yog poj ntxoog". Lawv ntshai kawg ces lawv qw qw.
27 Tam sis ntawd Yes Xus hais rau lawv tias: "Nej tso siab mas, yog kuv; tsis txhob ntshai."
28 Pob Zeb teb rau Yes Xus tias: "Huab Tais, yog koj tiag no, koj hais kom kuv tsuj tau nplaim dej los cuag koj."
29 Ces Xus teb tias: "Los mas!" Ces Pob Zeb nqes nkoj, nws mus ko taw saum nplaim dej mus cuag Yes Xus.
30 Tab sis Pob Zeb pom cua hlob hlob, nws ntshai, ces nws pib tog hauv dej,
nws qw tias: "Huab Tais, cawm kuv mas!"
31 Yes Xus cev tes tam sis ntawd mus tuav Pob Zeb, nws hais rau Pob Zeb tias:
"Neeg muaj kev ntseeg tsawg, ua cas koj ua xyem xyav?"
32 Thaum Yes Xus nkawd nce hlo rau hauv nkoj, cua tu nrho lawm.
33 Cov nyob hauv nkoj pe Yes Xus, lawv hais tias: "Koj yog Tswv Ntuj Leej Tub tiag!"
34 Thaum lawv hla dhau dej lawm, lawv mus nqes rau ntawm Nkes Nes Xas Les.
35 Cov neeg nyob txawm qhov chaw ntawd cim tau Yes Xus, ces lawv tso neeg mus qhia
rau ib thaj tsam ntawd paub thiab lawv coj tas nrho cov neeg muaj mob tuaj rau Yes Xus.
36 Lawv thov nws tias tsuav lawv tau kov nws lub tw tsho xwb,
ces txhua tus uas tau kov, puav leej zoo mob tas tib si.